Nepali Gajal

‘गीत र गजल मिडियाले छुट्याउनु र्पछ’

noreply@blogger.com (Yatri Shekhar) — Fri, 11 Oct 2013 12:58:00 +0000

सुनसरी २५ असोज । नेपाली सञ्चारमाध्यमले गीत र गजललाई नछुट्याइ प्रकाशन र प्रसारण गर्दा सर्वाधिक लोकप्रियतामा रहेपनि गजल विधा उपेक्षामा परेको गजलकारहरुले बताएका छन् ।
नेपाल गजल प्रतिष्ठान र सङ्गीत साधना प्रतिष्ठानले आज इटहरीमा आयोजना गरेको गजल विमर्शमा गजलको विकास र परिस्कारको अभियानमा लागेका अभियन्ताहरुले मिडियाले गजल भनेर जस्ता पायो त्यस्तै रचना प्रकाशन प्रसारण गर्ने गरेको बताए । अनाम मण्डलीका सल्लाहाकार तथा संस्थापक अध्यक्ष सुरेश सुवेदीले एफएम रेडियोहरुले गजललाई गीत भनेर र गीतलाई गजल भनेर बजाउँदा स्रोतामा भ्रम सिर्जना भएको बताउनुभयो ।
एफएम रेडियो र पत्रपत्रिकाले स्तरहीन गजल पनि प्रकाशन प्रशारण गरेकाले गजलमा विकृति देखा परेको नेपाल गजल प्रतिष्ठानका अध्यक्ष यात्री शेखरको भनाइ थियो । संगीत साधना प्रतिष्ठानका महासचिव राजु केसीले सञ्चार माध्यमले जस्तै संगीतकार र गायकहरुले पनि गजल नबुझी संगीत गर्दा र गाउँदा समस्या भएको बताउँनुभयो ।
पूर्वका पाँच दर्जन बढि गजलकार सहभागी विर्मश कार्यक्रममा भुपेन्द्र तिम्सिना, सुविद गुरागाइ, जीवि गजललगायतले गजलका बारेमा चर्चा गरे । भने ३० जनाबढीले गजल वाचन गरेका थिए ।

तस्विर : राज आशातित

गजल

noreply@blogger.com (Yatri Shekhar) — Sat, 02 Mar 2013 01:36:00 +0000

अमला अधिकारी, सिन्धुली

मेरा बाले गोरू नारेको हेर्न आऊ
आमाले बीउ उमारेको हेर्न आऊ

कति मुस्किलले बनाउँछ चराले घर
चुच्चोले झिँजा ओसारेको हेर्न आऊ

के हेर्छौ पर्यटक सहरमा कृतिमता
प्रकृतिले गाउँ सिँगारेको हेर्न आऊ

दर्शिनढुङ्गामा झुलो राखेर हजुरबाले
चकमकले आगो पारेको हेर्न आऊ

कसले भन्यो माया गर्दिनँ तिमीलाई
शब्दमा तस्वीर उतारेको हेर्न आऊ

गजल

noreply@blogger.com (Yatri Shekhar) — Wed, 02 Jan 2013 06:07:00 +0000

- जीबी गजल
सिखरमा चड्दै जाउ खस्ने छदैछु म ।
तिमी उड पिन्जडामा बस्ने छदैछु म ।

बिस्तारै पारी तर हिडेर पुलबाट,
वारिबाटै बाढिभित्र पस्ने छदैछु म ।

हास बोल कुनै रोक छैन तिमीलाई,
आफ्नो घाटी आफैलेनै कस्ने छदैछु म ।

अर्कैको सिन्धुर पोते लगाएर हिड,
जोगी बनी खरानी चै घस्ने छदैछु म ।

शान्ति मिलोश हृद यमा सधैसधै नै,
यो छातीमा तिखो छुरा धस्ने छदैछु म ।

गजलमा गर्जदै पूर्वेली नारी

noreply@blogger.com (Yatri Shekhar) — Wed, 26 Dec 2012 03:00:00 +0000

महामाया मासिकमा

नियति नै यस्तै भनी नारीहरु झुक्नुहुन्न ।
लजालु त्यो घुम्टो ओढी भयो अब लुक्नुहुन्न ।

तेज बनी बगिरहे ढुङ्गो छेड्छ पानीले’नि,
विश्वासको हिमनदी खहरे भै सुक्नुहुन्न ।
इच्छा, चाहना र अधिकार पूरा गर्न लागि पर्नुपर्छ भन्ने दृढता बोकेको गजलका यी दुई शेर मायामितु न्यौपानेले निर्वासित चराहरु गजलसङ्ग्रहमा राखेकी छन् । भुपेन्द्र तिम्सिनासँगको संयुक्त सङ्ग्रहमा रहेका उनका अधिकतर गजल नारी चेतनाले भरिएका छन् । मानवीय संवेग र नेपाली परिवेशलाई आधार बनाएर शेरहरु बुन्छिन् उनी । नारी मनलाई गजलमा दुरुस्त उतार्नु उनको अर्को विषेशता हो । महिलालाई कमजोर ठान्ने हाम्रो समाजको मासिकताविरुद्ध उनी गजलमार्फत् सोझो प्रतिवाद गर्छिन् ।

मायामितु न्यौपाने

नारीलाई कुहिरोको काग नसम्झ ।
सप्तरङ्गी इन्द्रेणीलाई दाग नसम्झ ।
०००
एक शताब्दी पार गरिसक्दा नेपाली गजलले थुप्रै स्रष्टा र सिर्जना जन्माएको, हुर्काएको, फुलाएको, फलाएको छ । गजल सिर्जनाका फाँटमा पुरुष स्रष्टासरह नारीहरु पनि उत्तिकै सशक्त भएर देखापरेका छन् । नेपालको पूर्वी भागमा बसेर सिर्जना कर्ममा जुटेका अधिकतर नारी सर्जकहरुले देशकै प्रतिनिधित्व गरेका छन् । उनीहरु गजलको बागमा फुलेका छन्, थरीथरी फूल भएर । गजलको छालमा शृङ्गारिक मात्र नभएर पीडा, उत्कण्ठा, आवेग, आक्रोस ओकल्दै हेलिएका छन् । सामाजिक संरचनाले थोपरेको भारीविरुद्ध गर्जिएका छन् । भेद्भाव चिर्न चर्कोस्वर उरालेका छन् । परिवेश बुझ्न नसक्दा उत्पन्न हुने अप्ठेरो र खतराले जीवनलाई दुखी बनाउने हुँदा नारी सचेत हुनुपर्ने ध्यानाकर्षण गराउँदै ज्योति जङ्गलले अक्षरमा तिमी भित्र नारी मनको कोमल भाव पोखिन् ।

ज्योति जङ्ग

पूजा गर्छु भन्छन् र दास बनाउँछन् ।
माया गर्छु भन्छन् र लास बनाउँछन् ।
०००
सम्बत् १९४० को दशकमा मोतीराम भट्टका पालादेखि सुरु भएको नेपाली गजल लेख्ने, भन्ने, सुन्ने आधुनिक धाराप्रवाहले अहिले विशाल कोसीको आकार लिइसकेको छ । त्यही परम्परामा हिजोआज अनेक विशिष्टीकरणसहित थुप्रै खहरेहरु मिसिएका छन् । सिर्जनाबाटै सागर छुने चाह बोकेर पूर्वका नारी गजलगोहरुले जनताको पक्षमा हुने आन्दोलनमा काम लाग्ने गरी आफ्ना रचनालाई हतियार बनाएका छन् । देश परिवर्तनका लागि हुने–गरिने सङ्र्घषलाई सजिलो पार्न सिर्जनाशक्ति पनि मिसाइदिएका छन् । त्यहाँ महिला र पुरुषको भेद्भाव छैन् । कोही कमजोर छैनन् । टीका ‘आत्रेय’ पौडेलले पनि मनको क्षितिजमा यस्ता शेरलाई निकै महत्व दिएकी छन् ः

टीका ‘आत्रेय’ पौडेल

नारी आफैँ महान शक्ति ऊविना यो जगत छैन ।
सृष्टि शून्य हुन्छ जब नारीको त्यो रगत छैन् ।
०००
अक्करबाट झर्ने खहरे झैं पूर्वेली नारी सर्जकका शक्ति वेगले गजलका शेरमा हानिएका छन् । खहरेको सङ्गमविना सागर पनि अपुरो हुने भावना छल्काएका छन् । नारी एकजुट भएर समाज निमार्णमा जुटनुपर्ने आह्वान प्रायः सबै नारी स्रष्टाका गजल लेखनको सार हो ।

नारी हामी एकजुट नभई यो समाज चल्दैन है ।
दृष्टि हाम्रो सही नभई नयाँ नेपाल बन्दैन है ।
आरती पोखरेल ‘अनु’ले धरातलमा उभिएर भित्र यस्ता थुप्रै शेर बुनेकी छन् । अनु मात्र हैन पूर्वका सबैजसो नारी सर्जकले यस्तो विचार भावनामा मुछेका छन् । अन्तरमनका भावहरु अभिव्यक्त गरेका मात्र छैनन्, अस्तिवको रक्षाका लागि लडाइँ मैदानमा उत्रिएको घोषणा गर्न शव्दको पाञ्चजन्य पनि बजाएका छन् ।

रोमा निरौला

पूर्वका नारी गजलगोहरुका एकदिन आफ्नो अस्तित्व गाढा बनाउने अभिलाषा ताजै छ । र, त्यो पूरा हुने विश्वास पनि दृढ छ सिर्जनाहरुमा । एक जुगमा आउने एक दिन र त्यस दिन हुने विशेष अनुभूतिको पर्खाइमा छन् उनीहरु । गजलकार रोमा निरौलाले गजल सञ्चयन पर्खाइमा यस्तै उद्घोष गरेकी छिन् ः
इतिहासको पानामा अट्ने मेरो नाम छैन ।
राष्ट्रियता झल्काउने कुनै काम छैन ।

तारा टिपें, जून टिपें सिर्जनामा अटाइसके,
मेरै आत्मा अटाउने कुनै पनि ठाम छैन ।
ठाउँको खोजीमा साहित्यमा लागेका पूर्वेली नारीले आफ्ना मागलाई गजलमा मजैले अटाएका छन् । पूर्वका विभिन्न गाउँ (ठाउँ)मा बसेर सिर्जनाकर्ममा लागेका नारी सर्जकहरुले देश र समाजको वास्तविकतालाई भावनामा उनेका मात्र छैनन्, परिवर्तनका लागि आवाज बुलन्द पनि बनाएका छन् ।
गजल लेखनमा खरो उत्रिने पूर्वका दुई दर्जनभन्दा बढी नारी स्रष्टाले गजलको सागरमा आफ्ना सङ्ग्रह सुम्पिसकेका छन् । सुमित्रा बाङ्देल ‘चेली’ सङ्ग्रह सार्वजनिक गर्नेमा अग्रपङ्क्तिमै पर्छिन् । सङ्ग्रह लोकार्पण गर्नेहरु सीता आस्था, अञ्जु अञ्जली, लीला अनमोल पनि चेलीकै लहरमा उभिएका छन् । बन्दना खालिङ, पार्वता पोमु, ममता राई, दीपा दाहाल, दीपिका मिश्र, एलिना सङ्ग्रौला, अम्बिकाकडरियाले पनि गजल कृति दिइसकेका छन् । पूर्वमा गायत्री विष्ट गाउँले, सीमा आभाष, करुणा राईलगायतका नारी स्रष्टा गजल लेखन यात्राका अविराम यात्री मानिन्छन् । मन्दिरा मधुश्रि, चन्दा खड्का, सलोजा स्काई, सविता खतिवडा, पुनम अधिकारी, मञ्जु आचार्य, सविता याक्खा, निसम माबोलगायतका स्रष्टा पूर्वेली गजल हाँक्ने युवादस्ताका सारथी हुन् । थुप्रै सम्भावना बोकेर नेपाली साहित्यमा अगाडि बढिरहेका यिनीहरुमध्ये कतिपयले कृति ननिकाले पनि गजल सिर्जनाको फाँटमा दरिलो उपस्थिति देखाएका छन् ।

सीमा आभाष

पश्चिमी संस्कृतिले धावा बोलिरहेको परिवेशमा गुज्रिरहेछ हाम्रो समाज । यो अवस्थाबाट नेपाली नारी पनि अलग छैनन् । त्यसैले सारा नेपाली नारी मात्र नभएर स्रष्टा र सर्जकलाई गजलकार सीमा आभाषले गजलमै सचेत गराएकी छन् । उनका यी शेरले भनेजस्तौ भावना पोख्दै सहनु मात्र हैन अधिकार लिन सजग र सचेत भएर लाग्नुपर्ने बेला आएको छ ः
तिम्रो लोग्ने कृष्ण बन्दा सीता किन बन्छ्यौ कान्छी ?
नारीले नै अन्यायलाई सहु किन भन्छ्यौ कान्छी ?

सानैदेखि चुला–चौका नोकर बन्ने पाठ सिकी,
आफैँलाई गाड्ने खाल्टो आफैँ किन खन्छ्यौ कान्छी ?

गजल

noreply@blogger.com (Yatri Shekhar) — Tue, 16 Oct 2012 08:55:00 +0000

नबिन नेपाल

दुइ वटा कुरा हुन्छ दसै पछाडी !
फुल यात छुरा हुन्छ दसै पछाडी !!

सफा मनले दुर्गासँग माग्नु दसैमा
मन्को इच्छा पुरा हुन्छ दसै पछाडी !

यस्तै चोट यस्तै पिडा दोहोरिरहे
बाटा अझै साँघुरा हुन्छ दसै पछाडी !

मत्तीने र आत्तीने को बिस्वास नगर्नु

दुख पिडा मधुरा हुन्छ दसै पछाडी !

मिठो बोली मिठै माया गर्छौ भने
सिन्दुर र चुरा हुन्छ दसै पछाडी !

आटेको र चाहेको मिलोस सबैलाई
नत्र 'नेपाल' बेसुरा हुन्छ दसै पछडि !

१९ वटा भाषाको संयुक्त गजलसङ्ग्रह

noreply@blogger.com (Yatri Shekhar) — Sun, 14 Oct 2012 15:10:00 +0000

काठमाण्डु । नेपाली गजलको विकास, विस्तार र परिस्कारका लागि कृयाशील संस्था अनाममण्डलीले प्रकाशन गरेको १९ ओटा विभिन्न भाषामा लेखिएको ऐतिहासिक संयुक्त गजलसङ्ग्रह 'राष्ट्रिय भाषाका गजलहरू' को हिजो काठमाडौँको राड्ट्रिय सभागृहमा विमोचन गरियो ।

गजलकारहरू ज्ञानुवाकर पौडेल, देवी नेपाल, धीरेन्द्र प्रेमर्षि, रोशनकुमार राजभण्डारीलगायतले पुस्तकको विमोचन गर्नुभएको थियो ।

उक्त पुस्तकबारे बोल्दै समालोचक प्रभाती किरणले पुस्तक ऐतिहासिक महत्त्वको रहेको बताउनुभयो भने देवी नेपालले अनाममण्डलीका हरेक कार्यहरू नयाँ र ऐतिहासिक हुने गरेका उल्लेख गर्नुभयो । साहित्यकार धीरेन्द्र प्रेमर्षिले उक्त पुस्तकमा समग्र नेपालको प्रतिनिधित्व रहेको बताउनुभयो । प्रमूख अतिथि पौडेलले अनाम नाम राखेर सुनाम कमाइरहेको अनाममण्डलीलाई शुभकामना दिनुभयो ।

पुस्तकको संयोजन सम्पादन घनेन्द्र ओझा, सुरेश सुवेदी र बलराम दाहालले गर्नुभएको हो । सोही कार्यक्रममा कन्दरा पब्लिकेशनद्वारा प्रकाशित युवागजलकार गुलाब कान्छोको गजलकृति 'कुल्चिएको गुलाब' को पनि विमोचन गरिएको थियो । उक्त पुस्तकबारे समालोचक सरोज घिमिोरेले बोल्नुभएको थियो । अनाममण्डलीका संयोजक बलराम दाहालको सभापतित्वमा भएको उक्त कार्यक्रममा गजलकारहरू सुरेश सुबेदी, घनेन्द्र ओझा, जय गौडेल लगायतले बोल्नुभएको थियो ।

शब्द तस्विर ः अनाम मण्डली

गजल

noreply@blogger.com (नेपाली गजल) — Sun, 14 Oct 2012 14:37:00 +0000

कपिल ज्ञवाली

कपिल ज्ञवाली ‘जिज्ञासु’

जहाँ माया त्यहि हुने, घातहरु धेरै ।
टुंगो छैन जीवनको, बातहरु धेरै ।

हं मा हं थप्नेहरु हुदाँ रैछन् बैशहुंदा,
चिठ्ठी अब चांहिदैन, खातहरु धेरै ।

सूचना र प्रबिधिले माया सांघुरियो,
गफि बने मोवाईलका, रातहरु धेरै ।

बिश्वासनै नभए त किन साथ माग्नु ?
धोका दिने धोकेबाजका, जातहरु धेरै ।

अलग्गिनै उचित लाग्छ तनावैले हो की ?
खानु किन ‘जिज्ञासु’ले, लातहरु धेरै ।
kplgyawali3@gmail.com

गजल मञ्चमा सावित्रा

noreply@blogger.com (Yatri Shekhar) — Sat, 11 Aug 2012 10:58:00 +0000

उर्लाबारी गजल मञ्चको शनिवार सम्पन्न चौथो साधरण सभाले सावित्रा याक्खाको अध्यक्षतामा नयाँ कार्य समिति चयन गरेको छ ।

गजल मञ्चको उपाध्यक्षमा युवराज काफ्ले इवन , सचिव मञ्जु आचार्य, सहसचिव सहिदनेपालीनयन र कोषाध्यक्षमा रिना प्रधान रहनुभएको छ । यस्तै सदस्यहरुमा बविता घिमिरे , ममता घिमिरे, यज्ञ परिश्रमी , नवराज निरौला, नविना बस्नेत र तेजन खड्का रहनुभएको छ । सल्लाकार सदस्यहरुमा केशब राई , मिश्र बैजयन्ती जयधर्म अचार्य र महेन्द्रजंग तामाङलगायत रहनुभएको छ ।

कार्यक्रममा नवनिर्वाचित अध्यक्ष साबित्रा याक्खाले बार्षिक कार्ययोजना प्रस्तुत गर्नुभएको थियो । नवनिर्वाचित अध्यक्षद्धारा प्रस्तुत कार्यक्रम योजनामा मासिक साहित्यक कार्यक्रमलाई निरन्तरता दिने, संस्थाको आर्थिक स्रोतको पहिचान गर्ने , साधरण सदस्यहरुको संख्या बिस्तार गर्ने, गजल मञ्चले प्रकाशन गर्दै आएको प्रकाशन बन्द भएको ‘सम्बन्ध’ द्वैमासिक पत्रिका पुन प्रकाशन गर्ने , पुस्तक प्रकाशन गर्ने लगायतका कार्यक्रम छन् । कार्यक्रममा कृष्णउदाशी को सभापतित्व र मिश्र बैजयन्तीको प्रमुख आतिथ्य रहेको थियो ।

रोमको ‘आगो लिएर आउ’ विमोचित

noreply@blogger.com (Yatri Shekhar) — Fri, 27 Jul 2012 13:03:00 +0000

सुनसरी १२ साउन । नेपाल गजल प्रतिष्ठानका सुनसरी सचिव रोम ढुंगेलको गजल संग्रह आगो लिएर आउ आज धरानमा एक कार्यक्रमका विच सार्वजनिक गरिएको छ ।
कार्यक्रममा प्रमुख अतिथि शिव रेग्मी प्रणत विषेश अतिथि प्राडा टंक न्यौपाने र डा भिम खतिवडाले संयुक्त रुपमा विमोचन गर्नुभयो ।
समसामयीकता, जीवन जगत, प्रेम, आक्रोस समेटिएको संग्रहको टिप्पणी डा भिम खतिवडाले गर्नुभयो । मिश्र बैजयन्तीले रोमका गजल समसामयीकताको एउटा दस्तावेज भएको बताउनुभयो ।
कार्यक्रममा नेपाल गजल प्रतिष्ठानका अध्यक्ष यात्री शेखर, साहित्यकारहरु विवश बलिभद्र कोइराला, अभागी थेगुवा, टिका आत्रेयलगायतले गजलकार ढुंगेल र गजल संग्रहको सफलताको शुभकामना दिनुभयो ।

एकदर्जन बढी गजलकारहरुले गजल गायन र वाचन गरेको कार्यक्रम नेपाल गजल प्रतिष्ठान सुनसरी शाखाले आयोजना गरेको हो । कार्यक्रममा झापा, मोरङ, सुनसरी, धनकुटाका एकसय बढीको सहभागिता थियो ।

असार १५ मा मायामितुका दुइ गजल

noreply@blogger.com (नेपाली गजल) — Fri, 29 Jun 2012 07:10:00 +0000

१
वर्खाको संकेत दिन्छ असार पन्ध्रले ।
हलो, जुवा फारिस किन्छ असार पन्ध्रले ।

धान दिवस मनाउँदै, दही चिउरा खाँदा,
दुख पीडा सबै भुल्छ , असार पन्ध्रले ।

आली लाउँदै धान रोपी, पानी सम्याउँदै,
किसानलाई हातमा लिन्छ असार पन्ध्रले ।

मानो रोपी मुरी फलाउने बेला भन्दै,
हामीलाई राम्रो चिन्छ, असार पन्ध्रले ।

२
मन भित्र खुशी फुल्छ, असार पन्ध्रमा ।
किसानको रहर झुल्छ असार पन्ध्रमा ।

आकाश हेदै्र डल्ला फोरी झार झिलाउँदै,
पाखो बारी सबै डुल्छ असार पन्ध्रमा ।

मनको कालो सबै सबै पखालेर फाली,
हेर मनको आकाश खुल्छ, असार पन्ध्रमा ।

आकाश हेदै्र गोरु नार्दा एका बिहानै,
वर्ष दिनको पीडा भुल्छ असार पन्ध्रमा ।

मायामितु न्यौपाने

गजल

noreply@blogger.com (Yatri Shekhar) — Fri, 18 May 2012 16:11:00 +0000

- यात्री शेखर
हावा हो मन पानी हो मन ।
फूलैफूल्को जवानी हो मन ।

रम्छ सधैं अरुकै खुसीमा,
भावको ठुलो खानी हो मन ।

सुम्पन्छ सबै बिर्सेर आफैं,
लाग्दछ साँच्चै दानी हो मन ।

यत्ति पवित्र अरु के होला,
पुजा नै गर्ने थानी हो मन ।

जत्ति घोटे नि सहेर बस्छ,
जाँतो विचको मानी हो मन ।

जे सुकै हाल तिमीले भित्र,
मात्र तेल झार्ने घानी हो मन ।

विवाद किन गर्नु बेकारको,
होइन राजा रानी हो मन ।
मिति २०६९ जेठ ४

गजल

noreply@blogger.com (Yatri Shekhar) — Fri, 18 May 2012 16:10:00 +0000

– प्रवीण बानियाँ

मनको बस्ती अन्तै सरेको खबर आयो
फूलका लागि जून मरको खबर आयो ।

लगाएर आगो मनको फूलबारीमा
निष्ठुरीले साँघु तरेको खबर आयो ।

सकिएकै थिएन गाँसेर प्रेमको माला
रङ्गमञ्चको पर्दा झरेको खबर आयो ।

रंगाउछु सिउँदो भन्ने मेरो अठोट थियो
त्यही सिउँदो अर्कैले भरेको खबर आयो ।

शब्दघर–ताप्लेजुङ

गजल

noreply@blogger.com (नेपाली गजल) — Fri, 27 Apr 2012 10:47:00 +0000

तिलक भट्टराई "अन्जान"

कुन्नी केको धन्दा अचेल गर्दै छौ रे शहरतिर,,
पैसा भन्दा मरिमेटी मर्दै छौ रे शहरतिर।।

रातारात करोडपती बन्ने भुत लाग्या छ रे,,
झुप्रो छोडि महलमा सर्दै छौ रे शहरतिर।।

बासी आटो नुन सँग छाक टारेको बिर्सिएर,,
मो मो अनी छोइलामा चर्दै छौ रे शहरतिर।।

आफ्नै चेली नङ्ग्याएर पिपासु मन भुलाउछौ रे,,
डिस्को अनी बारमा पैसा छर्दै छौ रे शहरतिर।

हिजो मात्र तिम्रो नाम सुन्दै थिएँ रेडियोमा,,
धिक्कार छ कालोसुचिमा पर्दै छौ रे शहरतिर।।

कस्लाई के थाहा जिन्दगीको पासा कता पल्टिदिन्छ,,
सुनेँ उही औकातमा झर्दै छौ रे शहरतिर।।

गजल

noreply@blogger.com (नेपाली गजल) — Fri, 27 Apr 2012 10:43:00 +0000

पूर्ण गुभाजु मुस्कान

सधै भरि यो जिन्दगी आहा छ मलाई !
कसैको त साथ् पाउँछु थाहा छ मलाई !!

नजर सबले तिमि माथि गाड्न थाले पछी ,
तिम्रो आफ्नै हेराइमा डाहा छ मलाई !!

कति सार्है रमाउछौ खुसि बाड्दै तिमि ,
तिम्रो जस्तो जिन्दगी त काँहा छ मलाई !!

गह भरि अश्रु पार्दै बेदनामै बाचें पनी ,
तिम्रै दिलको धड्कन हुन चाहा छ मलाई !!

बिछोड कै पल हेर्छन दुनियाको नजरले ,
त्यसैले त एकै पलमा हाहा छ मलाई !!

गजल

noreply@blogger.com (नेपाली गजल) — Fri, 27 Apr 2012 10:39:00 +0000

साबित्रा लुइँटेल घिमिरे

सबै आफ्नो ठाउबाट उठ्नु पर्छ
अधिकार माग्नलाई जुट्नु पर्छ !!

एकतानै बल हाम्रो सामन्ती लाई
खोजी खोजी यहाँ हामी कुट्नु पर्छ !!

रंग हेरी सिमा तोक्नु किन नी अब
जाती भेद सबै तिर छुट्नु पर्छ !!

नारी बिना सृस्‍टि कहाँ सत्यता बुझ
सद्भाव ले नै उन्को आशु पूछ्नु पर्छ !!

गजल

noreply@blogger.com (नेपाली गजल) — Fri, 27 Apr 2012 10:38:00 +0000

रामकृष्ण अनयास
नजाउ प्यारा देश छाडी एक्लैआज पर्छिन आमा
बिरामी छन् जेठ चौधमा फेरि अब मर्छिन आमा ।

सबै छोरा भ्रष्ट्रजालि यिन्ले छोको खान्ऩ भन्दै
मातृभुमि चोखो पार्न सुनपानि छर्छिन आमा ।

संबिधान देख्ने यिन्को ठुलो धोका हुदा आखिर
न बेच है देश भन्दै रुवाबासी गर्छिन आमा ।

सत्ता भत्ता खादै दरवार, धाउने छ सय एकलाई
मारे देखुन पुण्य पाउदै स्वर्गतिर तर्छिन आमा ।

गजल

noreply@blogger.com (नेपाली गजल) — Fri, 27 Apr 2012 10:37:00 +0000

नबिन परबाशी

चाह यो मनमा उमारीन मैले!
ब्यर्थैमा जीबन उधारीन मैले!!

फूलको धारले म रेटिएको थिए!
गुलाबलाई अब मुसारिन मैले!!

प्रसाद नचढाई कोही बन्छ आफ्नो ?
भागवान पनि पुकारिन मैले!!

दुख पिडा त भोगाइ न हो ठानेँ
निरिह भै आँशु झारिन मैले!!

भिड्दै छु म त जीन्दगीमा एक्लै
स्वार्थी यो सन्सार गुहारिन मैले!!

गजल

noreply@blogger.com (नेपाली गजल) — Fri, 27 Apr 2012 10:35:00 +0000

कृष्ण जलन

उनले सोध्लिन मेरो बारे बाच्या छ रे सुनाइ दिनु !
रूँदै छ कि भन्लिन फेरी हास्या छ रे सुनाइ दिनु !

बाटो हेर्दै उनले छिटो फर्क भन्ने खबर देलिन
उसले पनि दिन गन्दै बस्या छ रे सुनाइ दिनु !

पार्लिन आँशु गहभरी सम्झाइदिए उनको मनलाई
अभिलाषा मन भित्रै ति भास्या छ रे सुनाइ दिनु !

स्पन्दनले खोजि दिंदा यता उता उनकै छाया
खडेरी मै हजार खुशी नास्या छ रे सुनाइ दिनु !

उखरमाउलो गर्मि भित्र कैले रुँदै कैले हाँस्दै
जीवन संग झुटो नाता गास्या छ रे सुनाइ दिनु !

गजल

noreply@blogger.com (Yatri Shekhar) — Sat, 10 Dec 2011 12:49:00 +0000

अभागी कान्छा गाउले

आँखा डुलाई गजलको, बहरमा खोजि रा'छु !
हराएकी मायालुलाई, सहरमा खोजि रा'छु !!

याद आउदा पर्दा तानि, झ्याल बाट तल हेर्दै
दिन रात उनैलाई, हर प्रहरमा खोजि रा'छु !!

आँशु बगाई बिते कत्ती, चिसा मेरा रातहरु
पाउने आसा नमरे रै, रहरमा खोजि रा'छु !!

एकान्तमा टोलाएर, सम्झनामा एक्लै पाउदा
स्नान गर्ने सधै उनको, नहरमा खोजि रा'छु !!

आसा सबै मरी सके , लोलाई सके नजर पनि
उन्लाई भेट्ने बाटो अब, जहरमा खोजि रा'छु !

गजल

noreply@blogger.com (Yatri Shekhar) — Sat, 10 Dec 2011 12:48:00 +0000

सँचारकर्मि श्यामशुन्दर पुडासैनी

रात को शित बाँकी छ, नव बसन्त 'आ' छैन,
चिस्याउने जाडो बाँकी छ, शिशिर अझै 'गा' छैन,

पोहोर साल हालेको, जडौरीको लुगा मेरो,
जस्ता को तस्तै नै छ, अहिलेसम्म 'ला' छैन,

मौका मा चौका हान्न कुरेर नै बसी 'रा' छु,
केही दिन अरु पर्ख, समय ठीक भा छैन

गजल

noreply@blogger.com (Yatri Shekhar) — Sat, 10 Dec 2011 12:45:00 +0000

शिब सिग्देल

अमिट माया पाउने आशमा रित्तो मेरो हात भयो
अभागिको कर्म यस्तै एका देशको बात भयो

माहान तिनको उदेश्य लाइ बुझ्ने प्रयास गर्छु भन्दा
अनयाशै आज किन सपना को रात भयो

पागल प्रेमि पात्र बनी समिप्यमा गइ बस्दा
बेशहारा एक्लो हुनु जिन्दगीको मात भयो

अभिशाप भइ आउनु रैछ उनको बचन तोड्न खोज्दा
बेदनाले मुटु भरी अतितको खात भयो

गजल

noreply@blogger.com (Yatri Shekhar) — Sat, 10 Dec 2011 12:39:00 +0000

यात्री शेखर

एउटै मन कहिले आगो कहिले पानी हुन्छ ।
भइदिन्छ कहिले राजा कहिले रानी हुन्छ ।

खुसी हुदाँ उफ्रिएर मनको हिमाल चढे पनि,
यही मन कहिले बद्मास् कहिले ज्ञानी हुन्छ ।

संसारको रीतसँग मिल्नु पर्ने बाध्यता छ
त्यसैले पो कहिलो चोर कहिले ध्यानी हुन्छ ।

दुई कृति सार्वजनिक

noreply@blogger.com (Yatri Shekhar) — Fri, 02 Dec 2011 13:28:00 +0000

दमक १६ मंसिर । मिडिया नेटवर्क भूटानको आयोजनमा आज शुक्रबार दमक १० स्थित गन्तव्य थिएटरको हलमा दुई साहित्यिक कृतिको विमोचन भएको छ ।
वारँगी मोरँगका स्रष्टा शन्देस तुम्बापोको गजल कृति अतीतका शब्दहरु र नेपालीभाषी भूटानी स्रष्टा धर्मेन्द्र तिम्सिनाको रुबाइ र गजलको सँयुक्त कृति जानु कहाँ हो क्रमस सँगीतकार मणिकमल क्षेत्री, डि.बि. शारु र युवा समालोचक मुनाराज शेर्माले सँयुक्त रुपमा विमोचन गरेका थिए ।
अतीतका शब्द माथि स्रष्टा भुपेन्द्र तिम्सिना र जानु कहाँ हो माथि स्रष्टा धनकुटेकान्छाले समिक्षा गरेका थिए । यसैगरी मिडिया नेटवर्क भूटानले सुरुवात गरेको प्रत्येक महिनाको अनलाई फोटो प्रतियोगिता अन्तर्ग अक्टुवरको बिजयी फोटोग्राफर काशी कँडेललाई पुरस्कार प्रदान गरिएको थियो ।
कार्यक्रमा स्रष्टाहरु प्रकाश आङ्देम्बे, सुन्दर कुरुप, बैदिक अत्री, जितेन मुस्कान, लिला निशा, दिपा प्रहार, एलिना सँग्रौला, रत्न तुम्बापो, देउकुमार तामाँग, यमन सुवेदी, कृष्ण घिमिरे आदिले रचना वाचन गरको सो कार्यक्रम सञ्चालन ज्योति भट्टराइले गरेका थिए भने मेडिया नेटवर्क भूटानका कार्यकारी प्रमुख मनरथ पोख्रेलको अध्यक्षतामा सम्पन्न भएको थियो ।

धरानमा गजल प्रतियोगितासंगै रमाइलो

noreply@blogger.com (Yatri Shekhar) — Sat, 26 Nov 2011 12:43:00 +0000

इटहरी १० मंसिर । सुनसरीको धरानमा जिल्ला स्तरिय खुल्ला प्रतियोगितात्मक गजल गोष्ठि सम्पन्न भएको छ ।
नेपाल गजल प्रतिष्ठान सुनसरी शाखाले आयोजना गरेको कार्यक्रममा सुनसरी जिल्लाका नयाँ तथा पुराना सर्जकहरुले भाग लिएका थिए ।
प्रतियोगितामा अर्जुन भट्टराई, आश्था आले, तेजोत्पल भट्टराई र आनन राईका गजलला

ई उत्कृष्ट घोषणा गरिएको थियो । उत्कृष्ट गजलकारलाई कार्यक्रमका प्रमुख अतिथी प्राध्यापक डा टंक न्यौपानेले पुरस्कार र प्रमाणपत्र वितरण गर्नुभएको थियो ।
कार्यक्रममा प्रतियोगि सगै अप्रतियोगी गजलकारहरुले पनि गजल बाचन सगैं गजलको संरचना इतिहास र वर्तमान अवस्थकाका बारेमा चर्चा गरेको थिए ।

चर्चा गर्ने गजलकारहरुमा नेपाल गजल प्रतिष्ठानका अध्यक्ष यात्री शेखर, साहित्यकारहरु हेमन यात्री देवान किराती, सुदिप पाख्रीन, करुणा राई चन्दा खडकालगायत थिए ।
कार्यक्रममा धेरै प्रतियोगी तथा अप्रतियोगी गजलकारले गजल गाएर मन्त्रमुग्ध पारेका थिए । गजलबाचनमा प्रफुल्लराज भण्डारीलेले नाचेर कार्यक्रमको रौनक अझ थपेका थिए ।

मोतीराम दिवसको अवसरमा गजल प्रतियोगिता र स्मारिका विमोचन

noreply@blogger.com (Yatri Shekhar) — Mon, 29 Aug 2011 16:23:00 +0000

इटहरी १२ भदौ । १४६ औ मोती जयन्तीको अवसरमा धनकुटामा खुल्ला गजल प्रतियोगिता भएको छ । नेपाल गजल प्रतिष्ठान धनकुटाशाखा र सल्लेरी साहित्य संगमले आयोजना गरेको प्रतियोगितामा कृष्ण सदवहारले प्रथम स्थान हासिल गरेका छन् । त्यस्तै खगेन्द्र भण्डारीले दोस्रो, खगेन्द्र थापाले तेस्रो र मिलन पराजुलीले सान्त्वना स्थान हासिल गरेका छन् । उहाँहरुलाई कार्यक्रमका प्रमुख अतिथि धनकुटाका कोष तथा लेखा नियन्त्रक बाबुराम सुवेदी, साहित्यकार शेषराज शिवाकोटी, समाजसेवी दोर्ण गुरागाईँलगायतले पुरस्कार तथा प्रमाणपत्र वितरण गर्नु भएको थियो । सो कार्यक्रमको सभापतित्व सल्लेरी साहित्य संगम धनकुटाका अध्यक्ष रमेशचनद्र अधिकारीले गर्नु भएको थियो । त्यस अवसरमा साहित्यकार शेषराज शिवकोटीलाई सम्मान गरिएको थियो ।
यस्तै नेपाल गजल प्रतिष्ठान भोजपुर शाखाले प्रकाशित मोत जयन्तीका अवसरमा गजल स्मारिका विमोचन गरेको छ ।
पुस्तकमा केहि महिनाअघि भोजपुरमा आयोजित पूर्वाञ्चलस्तरीय गजल प्रतियोगितामा सहभागी रचनाको साथमा अन्य गजलकारहरुको रचना समावेश गरिएको छ । नेपाली साहित्य विधामा लोकप्रिय बन्दै गएको गजलप्रति युवाको उत्साहलाई प्रतिष्ठानले सम्मानस्वरुप गजलसम्बन्धी खुराकहरु पस्किदै जाने गजल प्रतिष्ठान भोजपुरका अध्यक्ष राजन साम्पाङले बताउनुभएको छ ।
उता रोल्पाको लिबाङमा तीन वटा कृति एकैसाथ विमोचन भएका छन् । राप्ती साहित्य परिषद् जिल्ला शाखा रोल्पाले आज लिबाङमा ‘जिल्ला स्तरीय गजल प्रतियोगिता तथा साहित्यिक कार्यक्रम’को आयोजना गरी जलजला रोकामगरको ‘समर्पण’ गजलसंग्रह, डी.वी.मगर ‘स्वेद’को ‘एक यात्रा अनेक मोड’ गजलसंग्रह र मधु वलीको ‘अधुरो जीवनको अधुरै सपनाहरू’ जीवनीसंग्रहको विमोचन गरेको हो । वरिष्ठ साहित्यकार नारायणप्रसाद सुवेदीले कृतिहरु विमोचन गर्नु भएको राप्ती साहित्य परिषद् जिल्ला शाखा रोल्पाका अध्यक्ष डी.वी. टुहुरोले जानकारी दिनुभयो ।
यस्तै १ सय ४६ औ मोतीजयन्तीको अवसरमा आज जलजला बहुमुखी क्याम्पस लिबाङ रोल्पामा गजल बाचन कार्यक्रम सम्पन्न भएको छ । निमित्त क्याम्पस प्रमुख भिमबहादुर पुनमगरको अध्यक्षतामा सम्पन्न कार्यक्रममा प्राध्यापकहरु दिपेन्द्र शर्मा, नवीन कुमार श्रेष्ठ, गोकर्ण प्रसाद पुनमगर, अमृत बाँठामगर, खेम बहादुर खड्का क्षेत्री, कृष्ण प्रसाद न्यौपाने लगायतले मन्तव्य तथा रचना बाचन गर्नुभएको थियो । त्यस्तै कार्यक्रममा क्याम्पसमा अध्ययनरत खेमराज गाउँले, टेककुमारी वली, सिर्जना शर्मा, यम विरही मगर, निमकुमारी डाँगी, सिर्जना सेन, कर्ण डाँगी, नरेन्द्र बुढामगर, शान्ति घर्तीमगर, श्याम लेकाली, खिमराज कवर, लोकन्द्र थापामगर लगायतले गजल तथा रचनाहरु बाचन गर्नुभएको थियो । कार्यक्रमको सन्चालन क्याम्पसका उपप्राध्यापक होमनाथ न्यौपानेले गर्नुभएको थियो ।