贰打陆

雀仔复活记

Neo — Thu, 02 Jul 2009 01:30:31 +0000

有只雀仔喺飞往南方过冬嘅途中，因为天气太冻嘅关系，导致雀仔冻僵咗，从天上跌落嚟，咁啱跌落一片农田度。佢瞓响泥田上，一条牛行埋过嚟，嗬咗一堆屎喺佢身上。冻僵嘅雀仔瞓响牛屎堆度，发觉牛屎实在係太温暖喇。结果牛屎令佢慢慢暖返过嚟。佢瞓喺过度，又暖又开心，跟住就好开心咁开始唱起歌上嚟。就喺呢个时候，一只猫经过听到雀仔嘅歌声，就行埋嚟查过究竟。顺住歌声，只猫发现咗瞓喺牛屎堆中嘅雀仔，跟住就好敏捷地将佢挖咗出嚟，再将佢吃咗！
呢个故事嘅寓言係：唔係每个响你身上嗬屎嘅都係你嘅敌人、唔係每个将你从屎堆度拉出嚟嘅都係你嘅朋友、同埋当你陷入深深嘅屎堆里面（身陷困境）嘅时候，闭上你把嘴！

新茶与老茶

Neo — Wed, 01 Jul 2009 01:30:34 +0000

普洱茶係讲究“愈沉愈香”嘅陈年老茶，所以大部分嘅厂家，都强调其存放嘅年份，而忽略咗初茶嘅品质。冇好嘅新茶，就冇好嘅老茶。唔好嘅茶叶放耐咗，其结果只係更腐败，咁又点会变成陈年好茶呢？
每个人嘅教育基础、人格奠基、习惯养成，若唔能够从细就扎根，咁就唔可能会喺成年之后，莫名其妙地变好。公司亦然，基本功先打好，企业文化先塑好，公司价值观先建好，咁样嘅公司至可以永续经营、长命百岁。

三把火

Neo — Sun, 28 Jun 2009 12:13:10 +0000

三国时代诸葛亮当咗刘备嘅军师后，短时期内连续三次火攻曹操。第一次火烧博望坡，导致夏侯惇10万曹兵所剩无几；第二次火烧新野，使曹仁与曹洪10万人马几乎全军覆没；第三次则火烧赤壁，让最后跟随曹操逃出去嘅只剩27人。此故事最后变成“新官上任三把火”呢句谚语，用嚟形容管理者出任新职时要一显威风同才干。
但係浙江大学公共管理学院政治学系主任郎友兴发表咗一篇文章，认为“新官上任三把火”不放也罢。佢认为，新官放火嘅动机有三：一係官场文化使然；二係为咗树立个人权威；三係新管理者为咗“烧俾上司睇”。就动机嚟睇，根本唔应该有呢三把火嘅存在，因为呢啲只能够解决管理者嘅一时之需，并不能解决根本问题。而且“三把火”就係制度缺失下嘅惰性表现，剩係顾着放火，会掩盖制度本身嘅问题，并可能拖延制度改革与推进。
话返转头，其实呢三把火应唔应该烧，要睇放火嘅目的。管理者放火若只係为咗个人情绪或建立威信，咁呢三把火就烧得无情嘞，但若係为咗维护制度而放，咁就唔单只新官，连旧官都应该随时点着三把火，一尽管理嘅责任。

地毯下嘅蛇

Neo — Tue, 16 Jun 2009 04:00:05 +0000

从前有一位经营地毯嘅阿拉伯商人，对自己地毯店嘅外观陈设十分上心。佢每日总要喺店内四处巡视，睇睇有冇边度唔慰贴嘅地方，如果有嘅话就马上纠正。
一日，佢照旧巡视店面，发现有一张地毯中央鼓起一旧，就上前用脚将佢整平。但整平呢处，另外一度又拱起一旧，于是佢又去整平佢。之不过，似乎有嘢响度同佢作对，不断咁接连有嘢喺唔同嘅地方拱起嚟。佢不停咁去整，但就总有新嘅地方拱起嚟。一气之下，阿拉伯商人干脆拉开地毯嘅一角，打算睇下究竟有乜嘢喺张地毯下面。就响呢个时候，一条蛇好快咁溜咗出去。
管理工作係关系到好多方面嘅细致工作，所以，我地要经常关注喺边啲地方存在问题，出咗问题又点算，有乜嘢解决问题嘅方案。但係，若果我地冇冷静落嚟搵出硬係存在嘅根本原因，往往头痛医头，脚痛医脚，咁就算忙到焦头烂额，你都係仲未将问题解决。
寓言话，蛇唔出嚟，你冇办法整平地毯。

下移者

Neo — Thu, 11 Jun 2009 10:56:46 +0000

唔知你地身边有冇一啲所识得嘅人士，选择咗呢种方式过生活：放低高收入嘅职业，放低追逐升官加薪嘅期待，转而选择一份收入较低嘅工作，过住比较悭吃悭用、但却比较满意嘅日子。美国哈佛大学教授Julia Schor认为，呢种“头壳坏咗”嘅人，可能为数唔少。1990年代嘅美国，每五个人当中就有一个係呢种人。呢种人叫做“下移者”（downshifters）。
你可能认为，呢种人或者已经赚够咗，或係继承咗乜嘢遗产，又或係中大彩赢咗一大笔钱，所以先至咁潇洒。可惜，你错嘞，喺美国大部分做呢种选择嘅人，都係平均工作时间超长嘅苦命上班族；响澳洲，呢班人嘅收入往往低于全国平均薪资。呢啲下移者嘅想法都好相似：唔想为咗赚钱，而让人生持续耗费喺工作之中，佢地想过“更有意义”嘅人生，多从事能让自己心灵满足嘅事。而如果咁做嘅代价，係收入嘅减少、晚年生活嘅唔确定，佢地都甘愿承受。
对好多人嚟讲，收入低，确实好冇安全感，但其实今时今日导致更多人不安与痛苦嘅，係孤独、焦虑、疏离、自我怀疑等感受，以及伴随呢啲感受而嚟嘅疾病。而下移者显然已经发现，呢啲不安、痛苦与疾病，从来冇随住国家嘅经济成长而改善，亦同家庭所得嘅增加冇必然关系。真正负担沉重嘅，可能係嗰啲每日为咗糊口，或係为咗追求消费欲望，而陷入无止境工作嘅人。要帮助呢班人，需要一种不同嘅“政治环境”。譬如话，政府唔应该满脑子攞经济成长率嚟换选票，剩係顾住美化睇得到嘅经济数据；立法者与企业应该针对上班族嘅困境，提供更能够激励人类热情嘅政策—例如更完善嘅退休制度，让佢地能够喺较少嘅优虑下，勇敢尝试改变生涯。
当然仲有媒体，应该更理解呢种下移者现象，而唔係继续喺消费主义与奢华潮流中舞乱人心。

转摘自台湾《中国时报》评论（06/06/09）

赚与赔

Neo — Fri, 05 Jun 2009 12:19:40 +0000

赚与赔之间有啲奥妙，但关键係咩呢？
房屋买卖因为金额庞大、程序繁琐，通常无法喺短时间内甩手，所以大家买咗屋后大多将佢放住，等一段较长时间后，突然发现自己嘅屋居然涨咗一倍。买卖股票则唔同，股市下跌两日大家就心慌咗，马上决定不计任何损失，先卖咗至讲。因为股票太容易变现，于是买股票嘅人永远买响高点、卖喺低点，咁嘅样又岂有不赔之理？
呢啲就係“时间”嘅有情回报。时间会还俾人一个公道，会明晰出是非，会俾有耐心嘅人完美嘅回馈。但世人多急躁，无法忍过谷底，无法度过低潮，无法挨过困境，无法原谅别人一时嘅侵犯与失言，非要即刻就去解决不可。
于是短多长空，解决咗小问题，却制造咗更大嘅问题，亦失去更大收获与成就嘅契机。

谦虚

Neo — Fri, 22 May 2009 12:38:12 +0000

谦虚与骄傲其实係相当奥妙嘅关系。唯有“骄傲又自大”嘅人先会认为自己係“谦虚”嘅。相反地，亦唯有“谦虚”嘅人，至会承认自己嘅“骄傲自大”。倘若一个人敢于大声宣告，自己係全世界最谦虚嘅人，基本上佢就係全世界最骄傲又自大嘅人。举目望去，真正成功嘅人大多拥有“凡事谦虚且有自信”嘅良好习惯。而“骄傲又自大”嘅人则多数係“知少少，扮代表”嘅“半桶水”过种人。真正成功嘅人多为行事低调，根本无需多此一举嚟证明自己。反而之，未成功嘅人却要透过嚣张、自高自大、骄傲嘅举动嚟突显佢地嘅成就。呢类人往往只会导致人地对佢地嘅厌恶，而非敬佩。
调查显示，一般人喺沟通中重复使用最多嘅字眼竟然係“我”。简单嚟讲，人都係偏向“自我”嘅。“自我”本係中立嘅，正面嚟讲，“自我”可以解释为“自信”；负面嘅解释则可以係“自大”。呢一点只係一线之差嘅问题。
“谦虚且有自信”嘅习惯，係指我地自然及习惯性地喺思想上、言语上或喺行为上，对“自己”所抱持嘅“唔会过高或过低嘅评估”、“唔会把自己睇得比人地强”嘅态度。简单嚟讲，“谦虚但有自信”即係把自己睇得合乎中道，甚至係睇人地比自己强。呢啲并唔係要我地“长他人志气，灭自己威风”，而係相信“一山还有一山高”，每个人总有值得我地学习嘅长处同优点。值得一提嘅係“谦虚却冇自信”就等于“自卑”，呢个绝对唔係一个平衡嘅态度。
“谦虚并有自信”嘅反面当然就係“骄傲又自大”，即高估自己、睇扁人地，把自己睇为係真理嘅准则，觉得人地远远比唔上自己。其实，对于周边“人、事、物”嘅反应，我地经常面临两个重大选择：以“谦虚但有自信”或係以“骄傲又自大”嘅习惯与态度嚟面对。千其唔好睇小呢两个选择所带嚟嘅结果，佢将带领我地嘅生命去到两个截然不同嘅境界、两个相反嘅方向、两个唔同嘅结局。
一旦我地养成“谦虚并有自信”嘅习惯，凡事以谦虚嘅态度嚟面对，我地就会开始享受人生，而并非忍受生命。

纪念

Neo — Wed, 20 May 2009 10:57:38 +0000

四川地震已经一周年。一年嚟，喺抗震救灾同灾后重建中，整个国家同民众所表现出嘅意志同行动，对中国社会发展同进步具有重要嘅意义，係今后时刻应该坚守嘅。
首先，以人为本，敬畏生命，应成为政府施政理念。民众利益被严重边缘化，如唔能够做到将民众利益同幸福作为施政嘅旨归，所谓以人为本就係一句空话。为此，需要从政府功能、社会结构、公共财政等方面，用一套健康嘅制度嚟保障人权。
其次，政府要确保公开同透明，并保障人民享有充分嘅知情权。知情权係为督促政府公开、保障公民政治权利而存在嘅。冇对政府同社会各种事务嘅了解同知情，就谈唔上有效参与，维护自身权益，以及监督政府嘅问题。
政府要克服一种过时嘅思维，以为把真相公告天下会引起骚乱。民众并唔害怕真相，而係惊被愚弄，如果试图掩盖事实真相，代价将会更大。至今，对于响地震中倒塌嘅学校、医院是否存在豆腐渣工程，当局仲未有一个满意嘅答案，甚至乎更传出境外媒体喺四川采访受限嘅消息。
第三，应该培育同构建公民精神。公民精神係一个人作为现代公民嘅基本特征，亦係构成公民社会嘅基本要件。首先需要民间社会发挥自我规范同组织能力，树立公共责任精神，政策亦需进一步松绑。
大地震促使人类必须妥善处理与自然嘅关系，尊重同敬畏自然，与自然和谐相处。中国经济嘅高速发展，係建立喺破坏自然嘅基础上嘅。如果能够总结同反思大地震，乃至改革与发展30年嘅经验与教训，坚守对嘅，改正错嘅，咁先至係对汶川大地震罹难者嘅最好纪念。

转录自新加坡《联合早报》评论（13/05/09）

一念

Neo — Mon, 18 May 2009 10:56:50 +0000

世间上有好多微妙嘅事，譬如心境，有时一点起心动念，就差之毫厘，失之千里。倘若心嘅方向正确，开阔能容，可以“心包太虚”，包容整个宇宙；将心收返，又可以隐藏喺毫芒中。一念之心，可大可小。
用心响对嘅地方，可以感受心地风光之美，悠游天地万物之间，体会虚空之下清净嘅世界。所以，我地必须时时谨慎，否则一念偏差，即使微如毫芒，都会踏入陷阱。

能力与民主

Neo — Sun, 26 Apr 2009 04:00:57 +0000

有啲人认为，民主社会难以好似非民主社会咁，产生有魄力嘅领导人，因为佢地将领导人嘅行为，完全归因于领导人嘅个性与特质，而唔能够理解不同嘅政治结构，对领导人政治行为嘅塑造同制约作用。
喺专制独裁国家，领导人及政治集团控制住整个国家嘅资源，异议总受到严厉压制，决策因此好容易得到贯彻。受严密控制嘅媒体把领导人描绘成深思熟虑、运筹帷幄嘅果敢兼英明决策者。
而喺民主国家，极其有限嘅资源只能用嚟实现民主托付嘅使命。媒体每日都紧盯住政府，揭露佢犯下嘅每一个错误。政府嘅缺失同成绩，都能得到公开嘅讨论与评价。反对党亦不断咁对执政者进行毫不留情嘅批评，并准备取而代之。
响非民主社会，领导人同政府嘅“丰功伟绩”，民众往往难以理解。人们需要住屋、医疗或教育，政府却造出咗先进嘅武器。但若係真嘅卷入咗冲突，用嚟保家卫国嘅却係民众嘅血肉之躯。非民主社会领导人嘅权利来源，并非民众嘅授权。为咗稳固自己嘅权利，领导人必须满足其支持者嘅利益，民主嘅利益反而只能处于最边缘嘅地位。但民众并冇根据自身利益得失嚟评价领导人嘅自由。如果只有厨师先有资格评价自己整嘅菜肴，试问仲有边一道菜唔会係鲜美无比呢？
民主政治嘅主要作用并唔係选出一位英明神武嘅领导人，而係要通过制度使民意能不断显现，以此限定政府嘅议程，防止其偏离民众嘅利益同价值诉求。

转录自新加坡《联合早报》评论（16/04/09）