അമിനി (10/12/2015): മൂന്നാമത് ലക്ഷദ്വീപ് സ്കൂള്‍ ശാസ്ത്രോല്‍സവവവും പ്രവര്‍ത്തി പരിചയ മേളയും അവസാനിച്ചപ്പോള്‍ 216 പോയിന്‍റോടെ ആതിഥേയരായ അമിനി ഓവറോള്‍ ട്രോഫി നേടി. ശാസ്ത്ര മേളയില്‍ അമിനി 128 പോയിന്‍റോടെ ആതിപത്യം സ്ഥാപിച്ചപ്പോള്‍ 95 പോയിന്‍റോടെ കവരത്തി പ്രവര്‍ത്തി പരിചയ മേളയില്‍ ചാമ്പ്യന്‍മാരായി. ശാസ്ത്ര മേളയില്‍ കല്‍പേനി ദ്വീപ് റണ്ണേസ് അപ്പായി. പ്രവര്‍ത്തി പരിചയ മേളയില്‍ അമിനി റണ്ണേസ് അപ്പായി.

അടുത്ത മേള 2016'ല്‍ ആന്ത്രോത്ത് വേദിയാവും. അടുത്ത ശാസ്ത്രോല്‍സവം മുതല്‍ ഐ‌ടിയും മേളയുടെ ഭാഗമാകും.

ഉപയോഗ ശൂന്യമായ പാഴ്വസ്തുക്കള്‍ വലിച്ചെറിഞ്ഞ് ദ്വീപിന്‍റെ പരിസ്ഥിതിയെ തകിടം മറിക്കുന്ന നമുക്ക് മാതൃകയാവുകയാണ് കവരത്തി ഗവര്‍മെന്‍റ് സീനിയര്‍ സെക്കന്‍ഡറി സ്കൂളിലെ +1 വിദ്യാര്‍ത്ഥി ശറഫുന്നീസ ബി‌കെ. പ്രവര്‍ത്തി പരിചയ മേളയില്‍ ഒന്നാം സ്ഥാനം നേടിയ കവരത്തി സ്റ്റാളിലെ പ്രധാന ആകര്‍ഷണത ശറഫുന്നീസയുടെ "ശുമ്മുന്ന വിളക്കാണ്" (അലങ്കാര വിളക്ക്). ഒന്നേകാല്‍ മണിക്കൂര്‍ കഷ്ടപ്പെട്ടാണ് ഈ കൊച്ചു മിടുക്കി ഈ ശുമ്മുന്ന വിളക്കുണ്ടാക്കിയത്. വര്‍ക്ക് എക്സ്പീരിയന്‍സ് അധ്യാപിക ബീഫാത്തുമ്മാ ടീച്ചറാണ് ഇതിനായി തനിക്ക് മാര്‍ഗ നിര്‍ദ്ദേശം തന്നതെന്ന് ശറഫുന്നീസ പറഞ്ഞു.


ആലച്ചപ്പാട അബ്ദുല്‍ റഹ്മാന്‍റെയും പുളീനകീള്‍ നസീമയുടേയും മകളാണ് കവരത്തി സ്വദേശി ശറഫുന്നീസ. 

അമിനി (04/12/2015): മൂന്നാമത് ലക്ഷദ്വീപ് തല ശാസ്ത്രോല്‍സവത്തിന് തിരിതെളിഞ്ഞു. വിവിധ ദ്വീപുകള്‍ അമേനിയില്‍ എത്തി.

04/12/2015:
അതിവേഗ യാത്രാ കപ്പലായ പരളിയില്‍ തലസ്ഥാന ദ്വീപായ കവരത്തിയാണ് ആദ്യം എത്തിയത്. ഉച്ചയ്ക്ക് 03.35നു കല്‍പേനിക്കാരെയും കൊണ്ട് എം‌വി മിനിക്കോയ് കപ്പലും കില്‍ത്താന്‍ ദ്വീപുകാരേയും കൊണ്ട് അതിവേഗ യാത്രാക്കപ്പല്‍ ചെറിയപാണിയും എത്തിയിരുന്നു.

05/12/2015:
ആറാം തിയതി രാവിലെ 07.30നു എം‌വി അറേബ്യന്‍ സീ കപ്പല്‍ ലക്ഷദ്വീപിന്‍റെ ഏറ്റവും തെക്കേ അറ്റത്തുള്ളതും മഹല്‍ ഭാഷാ സംസാരിക്കുന്നവരുമായ മിനിക്കോയ് ദ്വീപുകാരെ അമിനിയില്‍ എത്തിച്ചു. അമിനി ദ്വീപിന് തൊട്ടടുത്ത് കിടക്കുന്ന മങ്ങിയ കാഴ്ചയില്‍ കാണാവുന്ന ദൂരത്തുള്ള അയല്‍ ദ്വീപായ കടമത്ത് സ്കൂള്‍ സമുച്ഛയത്തിന് തുറമുഖ വകുപ്പ് അനുവദിച്ച വലിയ ബോട്ടില്‍ രാവിലെ 08 മണിയോടെ അമിനിയില്‍ എത്തി. ഉച്ചയ്ക്ക് 03.30നു ചെത്ലാത് ദ്വീപ് അതിവേഗ യാത്രാകപ്പലില്‍ എത്തി. 04 മണിയോടെ എം‌വി അറേബ്യന്‍ സീ അഗത്തി ദ്വീപ് നിവാസികളേയും വഹിച്ചെത്തി. കടല്‍ അല്‍പം ക്ഷോപിച്ചതിനാല്‍ വിവിധ ദ്വീപിലെ വിദ്യാര്‍ത്ഥികളില്‍ പലരും കടല്‍ ചൊരുക്കിന്‍റെ പിടിയിലായിരുന്നു. ഇവരെ ഫസ്റ്റ് എയിഡ് കമ്മിറ്റി നേരത്തെ സജ്ജമാക്കിയ ആംബുലന്‍സില്‍ പ്രഥമ ശുശ്രുഷ നല്‍കി വിട്ടയച്ചു.

06/12/2015:
ആന്ത്രോത്ത് ദ്വീപുകാരേയും കൊണ്ടെത്തിയ എം‌വി മിനിക്കോയ് കപ്പലില്‍ നിന്നും രാവിലെ തന്നെ വിദ്യാര്‍ത്ഥികളേയും അദ്ധ്യാപകരേയും അമിനി സ്വീകരിച്ചു. മോശം കാലാവസ്ഥ കാരണം കൊച്ചു ദ്വീപായ ബിത്ര ദ്വീപുകാര്‍ക്കായി ഏര്‍പ്പെടുത്തിയ അതിവേഗ യാത്രാക്കപ്പലായ ബ്ലാക് മര്‍ലിന്‍ കവരത്തിയില്‍ നിന്നും ബിത്രയിലേക്ക് പുറപ്പെട്ട് മണിക്കൂറുകള്‍ കഴിഞ്ഞ് കാലാവസ്ഥ മോശമാവുകയും തുടര്‍ന്ന് തുറമുഖ വകുപ്പ് തിരിച്ച് വിളിക്കുകയും ചെയ്തതോടെ ബിത്ര ദ്വീപിന്‍റെ യാത്ര രണ്ടു ദിവസമായി അനിശ്ചിതത്വത്തിലായിരുന്നു. ഇന്ന്‍ ഉച്ചയോടെ ബിത്ര അമിനിയിലെത്തി. എങ്കിലും ഉല്‍ഘാടന ചടങ്ങുകള്‍ കാണാന്‍ പറ്റാത്ത വിഷമത്തിലാണ് കൊച്ചു ബിത്രയിലെ 14 വിദ്യാര്‍ത്ഥികള്‍. മേളയിലെ ഏറ്റവും ചെറിയ ദ്വീപും ഏറ്റവും കുറഞ്ഞ മല്‍സരാര്‍ത്ഥികളുള്ള ദ്വീപും ബിത്രയാണ്. അപ്പര്‍ പ്രൈമറി തലത്തില്‍ മാത്രമെ ബിത്ര പങ്കെടുക്കാറുള്ളു. അതിനാല്‍ ഓവറാള്‍ ചാംപ്യന്‍ഷിപ്പിന് ബിത്രക്ക് അവസരമുണ്ടാവാറില്ല. എട്ടാം ക്ലാസ് പാസായാല്‍ തുടര്‍ പഠനത്തിന് അടുത്തുള്ള ചെത്ലാത് ദ്വീപിനെയോ കേരളത്തേയോ ആണ് ബിത്ര വാസികള്‍ ആശ്രയിക്കുന്നത്.


വിവിധ ദ്വീപുകാര്‍ക്ക് വേണ്ടി നിശ്ചയിച്ച വെല്‍ഫയര്‍ ഓഫീസര്‍മാരും വൊളണ്ടിയര്‍മാരും ഇവരെ സ്വീകരിച്ചു. പരമ്പരാഗത ശൈലിയില്‍ തയ്യാറാക്കിയ "തത്ക്കാര പന്തലില്‍" (സല്‍കാര പന്തല്‍) ഊഷ്മള സ്വീകരണമാണ് സ്വാഗത സംഘം ഏര്‍പ്പെടുത്തിയത്.

ചിത്രങ്ങള്‍:
1. കവരത്തി ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

2. കല്‍പേനി ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

3. കില്‍ത്താന്‍ ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

4. മിനിക്കോയ് ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

5. കടമത്ത് ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

6. ചെത്ലാത് ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

7. അഗത്തി ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

8. ആന്ത്രോത്ത് ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

9. ബിത്ര ദ്വീപിനെ സ്വീകരിക്കുന്ന ചിത്രങ്ങള്‍ (ക്ലിക്ക് ചെയ്യുക)

മൂന്നാമത് ശാസ്ത്രോല്‍സവത്തിന് തിരിതെളിയവെ തല്‍സമയ സ്കോറും മേളയുടെ തുടിപ്പും മാധ്യമങ്ങളില്ലാത്ത ദ്വീപുകാരെ അറിയിക്കാന്‍ വെബ്സൈറ്റ് കമ്മിറ്റി അഹോരാത്രം ഓടി നടക്കുകയാണ്. അപ്പോയാണ് നാല് ഫെണ്‍മക്കള (പെണ്‍കുട്ടികള്‍) വരവ്. വെബ്സൈറ്റിലൂടെ ഓണ്‍ലൈന്‍ റേഡിയോ സംപ്രേഷണത്തിലൂടെ മേളയുടെ തുടിപ്പ് പത്തു ദ്വീപുകളിലും വന്‍കരയിലും എത്തിക്കുകയാണ് ഇവരുടെ ലക്ഷ്യം. +1 വിദ്യാര്‍ത്ഥിനികളായ ഫാത്തിമ സനിയയും ഫാത്തിമ സൈദൂനയും എട്ടാം ക്ലാസ് വിദ്യാര്‍ത്ഥിനികളായ അസ്ഫിയ സിദ്ദീഖും ഫാത്തിമ സബീനയുമാണ് തല്‍സമയത്തിലെ നാല് 'ഫെണ്‍മക്ക'.

അമിനി(05/12/2015): മൂന്നാമത് ലക്ഷദ്വീപ് ശാസ്ത്രോല്‍സവത്തിന്‍റെ ഔപചാരിക ഉല്‍ഘാടനം ലക്ഷദ്വീപ് എം‌പി ശ്രീ പി‌പി മുഹമ്മദ് ഫൈസല്‍ നിര്‍വ്വഹിച്ചു. വൈകീട്ട് ഏഴരക്ക് ആരംഭിച്ച വര്‍ണ്ണാഭമായ ചടങ്ങില്‍ വിദ്യാഭ്യാസ വകുപ്പിലെ ഉന്നത ഉദ്യോഗസ്ഥര്‍, സ്കൂള്‍ മാനേജ്മെന്‍റ് ഭാരവാഹികള്‍, ജനപ്രതിനിധികള്‍ സംബന്ധിച്ചു. ദേശീയ സയന്‍സ് കോണ്‍ഗ്രസില്‍ പങ്കെടുത്ത ലക്ഷദ്വീപിലെ വിദ്യാര്‍ത്ഥികള്‍ വന്‍കരയിലെ വിദ്യാര്‍ത്ഥികളെപോലും വെല്ലാന്‍ കെല്‍പ്പുള്ളവരാണെന്ന് അദ്ദേഹം തന്‍റെ ഉല്‍ഘാടന പ്രസംഗത്തില്‍ പ്രസ്താവിച്ചു.

സ്വാഗത പ്രസംഗം നടത്തിയ ലക്ഷദ്വീപ് വിദ്യാഭ്യാസ മേധാവി ശ്രീ എ ഹംസ പൂര്‍ണമായും കേരളാ പാഠ്യപദ്ധതി പിന്തുടരുന്ന ലക്ഷദ്വീപ് പക്ഷെ ശാസ്ത്രോല്‍സവത്തിന്റെ കാര്യത്തില്‍ കേരളത്തെ പിന്തുടരാത്തത് ഒരു വിടവാണെന്നും അതിന് തെളിവാണ് വിവര സാങ്കേതിക വിദ്യയെ ശാസ്ത്രോല്‍സവത്തില്‍ ഉള്‍പ്പെടുത്താതെന്നും പ്രസ്താവിച്ചു. ശാസ്ത്രോല്‍സവത്തില്‍ വരും വര്‍ഷങ്ങളില്‍ ഐ‌ടി കൂടി ഉള്‍പ്പെടുത്തി ആ വിടവ് പരിഹരിക്കുമെന്നുമുള്ള അദ്ദേഹത്തിന്‍റെ പ്രഖ്യാപനം വിദ്യാര്‍ത്ഥികള്‍ നീണ്ട ഹര്‍ഷാരവത്തോടെ സ്വാഗതം ചെയ്തു.

ആന്ത്രോത്ത്, ബിത്ര ദ്വീപുകള്‍ ഒഴികെയുള്ളവര്‍ അമിനിയില്‍ എത്തിച്ചേര്‍ന്നു. മോശം കാലാവസ്ഥ കാരണം രണ്ടു ദിവസമായി ബിത്ര ദ്വീപിന്‍റെ യാത്ര മുടങ്ങുകയായിരുന്നു. ഇവര്‍ക്ക് വേണ്ടി ലക്ഷദ്വീപ് തുറമുഖ വകുപ്പ് ഏര്‍പ്പെടുത്തിയ അതിവേഗ യാത്രാ കപ്പല്‍ ബ്ലാക് മര്‍ലിന്‍ കവരത്തി ദ്വീപില്‍ നിന്ന്‍ ബിത്രയിലേക്ക് പുറപ്പെട്ട് ഏതാനും മണിക്കൂറുകള്‍ കഴിഞ്ഞ് തുറമുഖ വകുപ്പ് തിരിച്ച് വിളിക്കുകയായിരുന്നു. മേളയുടെ ഉല്‍ഘാടന ചടങ്ങില്‍ എത്താന്‍ പറ്റാത്തത്തില്‍ ബിത്ര വിദ്യാര്‍ത്ഥികള്‍ ഏറെ നിരാശയിലാണ്. ആന്ത്രോത്ത് ദ്വീപുകാരേയും കൊണ്ടെത്തിയ എം‌വി മിനിക്കോയ് കപ്പല്‍ രാത്രി വളരെ വൈകിയെത്തിയതിനാല്‍ കുട്ടികളുടെ സുരക്ഷയെ മാനിച്ച് അമിനി തുറമുഖ ഓഫീസ് എമ്പാര്‍ക്കേഷന് അനുവാദം നല്‍കിയില്ല. പുറംകടലില്‍ നങ്കൂരമിട്ടിരിക്കുകയാണ്. നാളെ മല്‍സരങ്ങള്‍ ആരംഭിക്കും.

അമിനി (01/12/2015): മൂന്നാമത് ലക്ഷദ്വീപ് തല ശാസ്ത്രോല്‍സവം ഈ മാസം 6'നു കോടിയുയരാനിരിക്കെ മേളയുടെ പശ്ചാതല ഗാനങ്ങള്‍ പുറത്തു വിട്ടു. ലക്ഷദ്വീപിന്‍റെ ജീവിത സാഹചര്യങ്ങളേയും വിദ്യാഭ്യാസ ക്രമങ്ങളേയും ദ്വീപിന്‍റെ സാംസ്കാരിക ചിഹ്നങ്ങളേയും തൊട്ടുണര്‍ത്തുന്ന ഏഴ് ഗാനങ്ങള്‍ കടമത്ത് ദ്വീപ് സ്വദേശി പി ശൈകോയ മാഷാണ് രചിച്ചത്. കടമത്ത് ദ്വീപിലെ തന്നെ സജ്ന ഡിജിറ്റല്‍ സ്റ്റൂഡിയോയാണ് ഗാനങ്ങള്‍ക്ക് സംഗീത പരിവേഷം നല്‍കിയത്.

അമിനി സീനിയര്‍ ബേസിക് സ്കൂളിലെ അദ്ധ്യാപകനും കലാകാരനുമായ സകരിയ മാഷ്, കടമത്ത് സ്വദേശികളായ അബ്ദുള്‍ സത്താര്‍, സജാദ് ഖാന്‍, +2 വിദ്യാര്‍ത്ഥിനി നജീബ കാത്തൂന്‍ തുടങ്ങിയവര്‍ ഗാനങ്ങള്‍ ആലപിക്കുന്നു.



ഗാനങ്ങള്‍ ഡൌണ്‍ലോഡ് ചെയ്യാന്‍ ഇവിടെ ക്ലിക്ക് ചെയ്യുക

അമിനി (11/11/2015): ഡിസംബര്‍ ആദ്യവാരം ദ്വീപില്‍ നടക്കുന്ന മൂന്നാമത് ലക്ഷദ്വീപ് സ്കൂള്‍ ശാസ്ത്രോല്‍സവത്തിന്‍റെ ലോഗോയും വെബ്സൈറ്റും ഉല്‍ഘാടനം ചെയ്തു. മേളയുടെ ലോഗോ സ്ഥലം സബ്-ഡിവിഷണല്‍ ഓഫീസര്‍ ശ്രീ ടി കാസിം ഉല്‍ഘാടനം ചെയ്തപ്പോള്‍ സ്കൂള്‍ ഹര്‍ഷാരവത്തോടെ സ്വാഗതം ചെയ്തു. മേളയുടെ ഔദ്യോഗിക വെബ്സൈറ്റായ www.swema2015.weebly.com വില്ലേജ് ദ്വീപ് പഞ്ചായത്ത് ചെയര്‍പേയ്സണ്‍ ശ്രീമതി ഹൈറുന്നീസ ഉല്‍ഘാടനം ചെയ്തു. മേളയ്ക്കായി അമിനി തയ്യാറായി കഴിഞ്ഞുവെന്ന് മേളയുടെ ചെയര്‍മാനും പ്രിന്‍സിപ്പാളുമായ ശ്രീ എം‌സി മുഹമ്മദ് സര്‍ പ്രസ്താവിച്ചു.

ഉല്‍ഘാടനം കഴിഞ്ഞ ഉടനെ പൊതു ജനങ്ങള്‍ ലോഗോ മൊബൈലില്‍ പകര്‍ത്താനും സാമൂഹിക മാധ്യമങ്ങളില്‍ പങ്കുവെക്കാനും തിക്കും തിരക്കും കാട്ടി.