Newmannar.lk

மன்னார் சாந்திபுரத்தில் இடி மின்னல் தாக்கம்

2026-10-26T11:45:59.194+05:30

மன்னார் சாந்திபுரம் கிராமத்தில் நேற்று நள்ளிரவு ஏற்பட்ட இடி மின்னல் தாக்கத்தினால் 5 வீடுகள் கடுமையாகச் சேதமடைந்துள்ளதுடன், 5 குடும்பங்களைச் சேர்ந்த 14 பேர் பாதிக்கப்பட்டுள்ளனர்.

நேற்று நள்ளிரவு சுமார் 12 மணியளவில் இடி மின்னல் தாக்கம் ஏற்பட்டதாகத் தெரிவிக்கப்படுகிறது. இதன்போது வீடுகளின் கூரைகள் தூக்கி வீசப்பட்டதுடன், கூரையின் பகுதிகள் படுக்கையில் உறங்கிக் கொண்டிருந்தவர்கள் மீது விழுந்துள்ளன.

மேலும், வீடுகளிலிருந்த மின்சார உபகரணங்களும் செயலிழந்துள்ளதாகத் தெரிவிக்கப்படுகிறது. இதனால் குறித்த குடும்பங்களின் வீடுகள் மற்றும் உடைமைகளுக்குப் பெருமளவில் சேதம் ஏற்பட்டுள்ளது.

இச்சம்பவத்தைத் தொடர்ந்து அனர்த்த முகாமைத்துவப் பிரிவின் அதிகாரிகள் மற்றும் சாந்திபுரம் கிராம சேவை உத்தியோகத்தர் ஆகியோர் சம்பவ இடத்திற்குச் சென்று பாதிக்கப்பட்ட வீடுகளைப் பார்வையிட்டுள்ளனர்.

நள்ளிரவில் ஏற்பட்ட இந்த அனர்த்தத்தினால் அப்பகுதி மக்கள் அச்சமடைந்துள்ளதுடன், பாதிக்கப்பட்ட குடும்பங்களின் சேத விபரங்கள் தொடர்பான மேலதிக தகவல்கள் எதிர்பார்க்கப்படுகின்றன.

தீவிர சூறாவளியாக வலுவடைகிறது 'அர்னாப்' : மீனவர்களுக்கு சிவப்பு எச்சரிக்கை!

2026-10-26T11:19:19.406+05:30

வங்காள விரிகுடாவில் உருவாகியுள்ள அர்னாப் (ARNAB) சூறாவளி காரணமாக அந்தப் பகுதிகளில் பலத்த காற்று வீசக்கூடும் என்பதோடு, கடல் மிகவும் கொந்தளிப்பாகக் காணப்படும் என்பதால் வளிமண்டலவியல் திணைக்களம் சிவப்பு எச்சரிக்கை விடுத்துள்ளது.

இன்று (26) காலை 9.30 க்கு வெளியிடப்பட்ட இந்த வானிலை அறிவிப்பு அடுத்த 12 மணி நேரத்துக்கு செல்லுபடியாகும் என வளிமண்டலவியல் திணைக்களம் தெரிவித்துள்ளது.

வங்காளவிரிகுடாவின் மத்திய கிழக்கு மற்றும் அதனை ஒட்டிய தென்கிழக்கு பகுதியில் நிலவிய ஆழ்ந்த காற்றழுத்த தாழ்வு மண்டலம் மேலும் வலுவடைந்து 'ARNAB' புயலாக மாறியுள்ளது.

இந்தத் தொகுதி மேற்கு-வடமேற்கு திசையில் நகரக்கூடும் என எதிர்பார்க்கப்படுவதுடன், இன்று இரவு 11.30 அளவில் மத்திய மேற்கு வங்கக்கடல் பகுதியில் மேலும் வலுவடைந்து தீவிர சூறாவளியாக மாற அதிக வாய்ப்புள்ளதாகவும் எச்சரிக்கப்பட்டுள்ளது.

இதன்காரணமாக, குறிப்பிட்ட கடல் பகுதிகளில் காற்றின் வேகம் இடைக்கிடையே மணிக்கு 80 முதல் 100 கிலோமீற்றர் வரை அதிகரிக்கக்கூடும்.

மேலும், அலைகள் 3 முதல் 4 மீற்றர் உயரத்துக்கு எழக்கூடும் என்பதால் கடல் பகுதி மிகவும் கொந்தளிப்பான நிலையை அடையும்.

இந்த அமைப்பு இலங்கையை நேரடியாகப் பாதிக்காது என்றபோதிலும், இதன் காற்று சுழற்சி தீவு முழுவதும் பரவுவதால் நாட்டின் தென்மேற்கு பகுதிகளில் எதிர்வரும் சில நாட்களுக்கு மழை அதிகரிக்கக்கூடும் என எதிர்வு கூறப்பட்டுள்ளது.

இதன் காரணமாக, வட அகலாங்கு 10 முதல் 20 வரையிலும், கிழக்கு நெட்டாங்குக் கோடு 80 முதல் 95 வரையிலும் உள்ள கடல் பகுதிகளில் மறுஅறிவித்தல் வரும் வரை மீன்பிடி மற்றும் கடற்படை நடவடிக்கைகளில் ஈடுபடுவதை முழுமையாகத் தவிர்க்குமாறு அறிவுறுத்தப்பட்டுள்ளது.

மேலும், ஏற்கனவே அந்த கடல் பகுதியில் மீன்பிடி மற்றும் கடற்படை நடவடிக்கைகளில் ஈடுபட்டுள்ளவர்கள் உடனடியாகப் பாதுகாப்பான பகுதிகளுக்குச் செல்லுமாறும், எதிர்வரும் வானிலை அறிவிப்புகளைக் கவனமாகக் கண்காணிக்குமாறும் வளிமண்டலவியல் திணைக்களம் அறிவித்துள்ளது

தொடர்மழையால் பெருக்கெடுக்கும் ஆறுகள்! - பல நீர்த்தேக்கங்களின் வான் கதவுகள் திறப்பு

2026-10-26T11:13:59.550+05:30

நிலவும் தொடர்ச்சியான பலத்த மழை காரணமாக பல பிரதான நீர்த்தேக்கங்களின் நீர்மட்டம் கணிசமாக உயர்ந்துள்ளதால், அவற்றுள் பல நீர்த்தேக்கங்களின் வான் கதவுகள் திறக்கப்பட்டுள்ளதாக நீர்ப்பாசனத் திணைக்களம் தெரிவித்துள்ளது.

இதற்கமைய, தெதுரு ஓயா, ராஜங்கனை, குக்குளே கங்கை மற்றும் கலாவாவி ஆகிய நீர்த்தேக்கங்களிலிருந்து நீர் வெளியேற்றப்பட்டு வருவதால், குறித்த நீர்த்தேக்கங்களுக்குக் கீழே அமைந்துள்ள ஆறுகள் மற்றும் ஓடைகளுக்கு அருகில் வசிக்கும் மக்கள் மிகுந்த அவதானத்துடன் செயற்படுமாறு கேட்டுக்கொள்ளப்பட்டுள்ளனர்.

தெதுரு ஓயா நீர்த்தேக்கத்தின் நீர்மட்டத்தைக் கட்டுப்படுத்தும் நோக்கில், அதன் எட்டு வான் கதவுகள் இரண்டு அடி வீதம் திறக்கப்பட்டுள்ளன. இதன் மூலம் தெதுரு ஓயாவுக்கு வினாடிக்கு 10,400 கன அடி நீர் வெளியிடப்படுகிறது.

நீர்த்தேக்கத்தின் நீர்ப்பிடிப்புப் பகுதிக்குக் கிடைக்கும் மழைவீழ்ச்சி மற்றும் நீர்த்தேக்கத்திற்குள் வரும் நீரின் அளவைப் பொறுத்து எதிர்வரும் காலங்களில் வான் கதவுகள் திறக்கப்படும் அளவு மாறக்கூடும் என நீர்ப்பாசனத் திணைக்களம் சுட்டிக்காட்டியுள்ளது.

இதனிடையே, ராஜங்கனை நீர்த்தேக்கத்தின் ஆறு வான் கதவுகள் திறக்கப்பட்டு கலா ஓயாவுக்கு வினாடிக்கு 3,800 கன அடிக்கும் அதிகமான நீர் வெளியேற்றப்பட்டு வருகிறது. இந்த நீர் வெளியேற்றம் முற்பகல் 9 மணியளவில் வினாடிக்கு 8,000 கன அடியாக அதிகரிக்கப்படும் என எதிர்பார்க்கப்படுவதோடு, வானிலை நிலவரத்திற்கு ஏற்ப இத்தீர்மானம் மாற்றமடையக்கூடும்.

மேலும், குக்குளே கங்கை நீர்த்தேக்கத்தின் நீர்ப்பிடிப்புப் பகுதிகளில் பெய்துவரும் மழையைக் கருத்திற்கொண்டு அதன் ஒரு வான் கதவு திறக்கப்பட்டுள்ளது.

அதன் மூலம் வினாடிக்கு 45 கன மீற்றர் நீரும், மின் உற்பத்தியின் போது வினாடிக்கு 48 கன மீற்றர் நீரும் வெளியேற்றப்படுகின்றன.

அதற்கமைய, நீர்த்தேக்கத்திலிருந்து குடா ஓயாவுக்கு வெளியேற்றப்படும் மொத்த நீரின் அளவு வினாடிக்கு 93 கன மீற்றராக உள்ளதாக நீர்த்தேக்கப் பொறுப்பதிகாரி தெரிவித்துள்ளார்.

அதுமட்டுமின்றி, அதிக மழை காரணமாக கலாவாவியின் நீர்மட்டமும் உயர்ந்துள்ளது. மேல் நீர்ப்பிடிப்புப் பகுதியில் பெய்துவரும் மழையின் காரணமாக தம்புள்ள ஓயா ஊடாக கலாவெவுக்கு வினாடிக்கு 5,500 கன அடிக்கு நெருக்கமான நீர் வந்து சேருவதுடன், தற்போது அதன் நீர் கொள்ளளவு அதிகரித்துள்ளது.

கலாவாவி வான் பாயும் அபாயத்தைக் கருத்திற்கொண்டு அதன் அவசர வான் கதவுகள் இரண்டும் ஆறு அங்குலம் வீதம் திறக்கப்பட்டு, அதன் மூலம் கலா ஓயாவுக்கு வினாடிக்கு 511 கன அடி நீர் வெளியேற்றப்பட்டு வருவதாகக் குறிப்பிடப்பட்டுள்ளது.

இந்தச் சூழ்நிலையைக் கருத்திற்கொண்டு, குறித்த நீர்த்தேக்கங்களின் கீழ் பகுதிகளில் வசிக்கும் பொதுமக்கள் நீர் நிலைகளில் ஏற்படும் நீர்மட்ட மாற்றங்கள் குறித்து விழிப்புடன் இருக்குமாறு அறிவுறுத்தப்பட்டுள்ளனர்.

அத்துடன், வான் கதவுகள் திறப்பு மற்றும் நீர் வெளியேற்றம் தொடர்பில் நீர்ப்பாசனத் திணைக்களம் மற்றும் அனர்த்த முகாமைத்துவப் பிரிவுகளினால் வெளியிடப்படும் உத்தியோகபூர்வ அறிவிப்புகளைப் பின்பற்றிச் செயற்படுமாறு பொதுமக்களுக்கு மேலதிகமாக அறிவுறுத்தப்பட்டுள்ளது.

யாழ் கீரிமலையில் தேங்கிக்கிடக்கும் கழிவுகள்; பெரும் அபாயம்

2026-10-25T21:30:00.670+05:30

யாழ்ப்பாணம் கீரிமலை கற்குவாரியில் கொட்டப்பட்ட கழிவுகளை மீள அள்ளுமாறு வடமாகாண ஆளுநர் மற்றும் வடமாகாண உள்ளூராட்சி ஆணையாளர் உத்தரவிட்டுள்ள போதிலும் அவை மீள அள்ளப்படவில்லை என குற்றம் சாட்டியுள்ள வலி. வடக்கு பிரதேச சபை உறுப்பினர்கள் அது தொடர்பில் விசாரணைகளை முன்னெடுக்க விசேட விசாரணை குழு அமைக்க வேண்டும் என கோரியுள்ளனர்.

கீரிமலை பகுதியில் உள்ள கற்குவாரியில் அனுமதியின்றி பெருந்தொகையான கழிவுகள் வலி. தெற்கு பிரதேச சபையினால் கொட்டப்பட்டது.

வலி.வடக்கு பிரதேச சபை ஆளுகைக்கு உட்பட்ட பகுதியில் வலி. தெற்கு பிரதேச சபையினால் கொட்டப்பட்ட கழிவுகளுக்கு எதிராக வலி. வடக்கு பிரதேச சபை உறுப்பினர்கள் எதிர்ப்பு தெரிவித்தனர்.

அது தொடர்பில் வடமாகாண ஆளுநர் , வடமாகாண உள்ளூராட்சி ஆணையாளர் ஆகியோரிடமும் முறையிட்டதை தொடர்ந்து , அவர்கள் அப்பகுதிக்கு நேரில் சென்று பார்வையிட்டதுடன் அவற்றினை உடனடியாக மீள அள்ளுமாறு உத்தரவிட்டனர்.

உத்தரவுக்கு அமைய சிறியளவிலான கழிவுகளை மாத்திரம் மீள அள்ளிய நிலையில் பெருந்தொகையான கழிவுகள் மீள அள்ளப்படவில்லை.

அவ்வாறான நிலையில் யாழ்ப்பாணத்தில் தற்போது பருவ மழை ஆரம்பித்துள்ள நிலையில் கடந்த சில நாட்களாக பெய்து வரும் கடும் மழை காரணமாக குவாரி கிடங்குகளில் வெள்ள நீர் தேங்கியுள்ளது.

அவ்வாறு தேங்கியுள்ள நீரில் கழிவுகளும் கலந்துள்ளமையால் , அப்பகுதியை சூழவுள்ள பிரதேச நிலத்தடி நீர் மாசுபடும் பெரும் அபாயம் காணப்படுகிறது

இவ்வாறான நிலையில் கீரிமலை கற்குவாரியில் கொட்டப்பட்ட கழிவுகள் தொடர்பில் விரிவான விசாரணைகளை முன்னெடுக்க ஏதுவாக , விசேட விசாரணை குழுவினை அமைத்து விசாரணைகள் முன்னெடுக்கப்பட வேண்டும் என வலி. வடக்கு உறுப்பினர்கள் கோரியுள்ளனர்.

இலங்கைக்கு அருகே கடலில் சிக்கித்தவித்த 40 ஈரான் மாலுமிகள் மீட்பு

2026-10-25T21:09:23.879+05:30

இலங்கைக் கரையில் இருந்து சுமார் 24 கடல் மைல் தொலைவில் தவித்துக் கொண்டிருந்த வணிகக் கப்பல்களில் இருந்து 40 ஈரானிய மாலுமிகளை காலி ஊடாக வெளியேற்றுவதற்கான மனிதநேயப் பணியை இலங்கை ஒருங்கிணைத்துள்ளதாக இலங்கை வௌிவிவகார அமைச்சு தெரிவித்துள்ளது.

மருத்துவ தேவைகள் குறித்த அவசர உதவி கோரிக்கைகளுக்கு இணங்க இந்த நடவடிக்கை மேற்கொள்ளப்பட்டுள்ளதாக வௌிவிவகார அமைச்சு குறிப்பிட்டுள்ளது.

கொழும்பில் உள்ள ஈரானிய தூதரகம் இதற்கான ஏற்பாடுகளையும் வசதிகளையும் செய்திருந்தது.

சர்வதேச கடற்பரப்பில் இருந்து அழைத்து வரப்பட்ட அவர்களுக்கு சிகிச்சையளிக்கப்பட்ட பின்னர், அனைத்து ஊழியர்களும் நேற்று ஈரானுக்குப் புறப்பட்டுச் சென்றதாக இலங்கை வௌிவிவகார அமைச்சு குறிப்பிட்டுள்ளது.

வங்காள விரிகுடாவில் புயல் உருவாகும் சாத்தியம் - மீனவர்களுக்கு எச்சரிக்கை

2026-10-25T20:48:06.236+05:30

எதிர்வரும் 27 ஆம் திகதி காலையளவில் வங்காள விரிகுடாவின் மேற்கு-மத்திய கடற்பகுதியில் பலத்த சூறாவளி நிலைமை ஏற்படுவதற்கான சாத்தியக்கூறுகள் காணப்படுவதாக வளிமண்டலவியல் திணைக்களம் தெரிவித்துள்ளது.

அடுத்த 24 மணித்தியாலங்களுக்காக தீவைச் சூழவுள்ள கடற்பகுதிகளுக்கான வானிலை முன்னறிவிப்பை வெளியிட்டுள்ள வளிமண்டலவியல் திணைக்களம் இதனைத் தெரிவித்துள்ளது.

வளிமண்டலவியல் திணைக்களம் வெளியிட்டுள்ள அறிக்கையில் குறிப்பிடப்பட்டுள்ளதாவது:

வங்காள விரிகுடா கடற்பகுதியில் நிலைகொண்டுள்ள குறைந்த அழுத்தத் தாழ்வு பிரதேசம் இன்று (25) காலை 8.30 மணியளவில் வட அகலரேகை 15.3° மற்றும் கிழக்கு தீர்க்கரேகை 91.2° க்கு அருகில் மையம் கொண்டிருந்தது.

இத்தொகுதி இன்று வங்காள விரிகுடாவின் கிழக்கு - மத்திய மற்றும் அதனை ஒட்டிய தென்கிழக்கு பகுதி ஊடாக நகர்ந்து, தாழமுக்கமாக (Deep Depression) வலுவடைவதற்குக் மிக அதிக சாத்தியக்கூறுகள் உள்ளன.

இத்தொகுதி தொடர்ந்து தெற்கு நோக்கி நகர்ந்து, படிப்படியாக திசைமாறி, மேற்கு நோக்கிச் சாய்வாக வடமேற்கு திசையில் நகர்ந்து, நாளை (26) காலையளவில் சூறாவளியாகவும் (Cyclone), நாளை மறுதினம் (27) காலையளவில் வங்காள விரிகுடாவின் மேற்கு-மத்திய கடற்பகுதியில் பலத்த புயலாகவும் மேலும் தீவிரமடைவதற்கு அதிக சாத்தியக்கூறுகள் உள்ளன.

வட அகலரேகை 10° - 20° மற்றும் கிழக்கு தீர்க்கரேகை 80° - 95° ஆகிய எல்லைகளுக்குட்பட்ட கடற்பகுதிகளில் மறு அறிவித்தல் வரை மீன்பிடி மற்றும் கடற்படை நடவடிக்கைகளில் ஈடுபடுவதைத் தவிர்க்குமாறு அறிவுறுத்தப்பட்டுள்ளது.

குறித்த கடற்பகுதிகளில் மீன்பிடி மற்றும் கடல்சார் நடவடிக்கைகளில் ஈடுபட்டுள்ள சமூகத்தினர் உடனடியாக பாதுகாப்பான பகுதிகளை நோக்கி நகருமாறு கேட்டுக்கொள்ளப்பட்டுள்ளனர்.

இது தொடர்பாக வளிமண்டலவியல் திணைக்களத்தால் வெளியிடப்படும் எதிர்வரும் முன்னறிவிப்புகள் மற்றும் அறிக்கைகள் குறித்து அவதானத்துடன் இருக்குமாறு மீனவர்கள் மற்றும் கடல்சார் சமூகத்தினரிடம் கோரப்பட்டுள்ளது.

இதனால் நாட்டைச் சூழவுள்ள கடற்பகுதிகளில் ஆங்காங்கே மழை அல்லது இடியுடன் கூடிய மழை பெய்யக்கூடும்.

காற்று தென்மேற்கு திசையிலிருந்து மணித்தியாலத்துக்கு 30-40 கி.மீ வேகத்தில் வீசக்கூடும். திருகோணமலையிலிருந்து காங்கேசன்துறை, புத்தளம், கொழும்பு, காலி மற்றும் ஹம்பாந்தோட்டை ஊடாக பொத்துவில் வரையான கடற்பகுதிகளில் காற்றின் வேகம் அவ்வப்போது மணித்தியாலத்துக்கு 50-60 கி.மீ வரை அதிகரிக்கக்கூடும்.

திருகோணமலையிலிருந்து காங்கேசன்துறை, புத்தளம், கொழும்பு, காலி மற்றும் ஹம்பாந்தோட்டை ஊடாக பொத்துவில் வரையான கடற்பகுதிகள் அவ்வப்போது கொந்தளிப்பாகக் காணப்படும். நாட்டைச் சூழவுள்ள ஏனைய கடற்பகுதிகள் அவ்வப்போது ஓரளவு கொந்தளிப்பாகக் காணப்படும்.

புத்தளத்திலிருந்து கொழும்பு, காலி மற்றும் மாத்தறை ஊடாக பொத்துவில் வரையான கடற்பகுதிகளில் கடல் அலைகள் சுமார் 2.0 - 2.5 மீட்டர் வரை உயரக்கூடிய சாத்தியம் உள்ளது.

இடிமழையின் போது: இடியுடன் கூடிய மழை பெய்யும் வேளைகளில் குறித்த கடற்பகுதிகளில் தற்காலிகமாக பலத்த காற்று வீசக்கூடுவதுடன், அக்காலப்பகுதியில் கடற்பகுதிகள் தற்காலிகமாக மிகவும் கொந்தளிப்பாகக் காணப்படும் என்றும் தெரிவிக்கப்பட்டுள்ளது.

மன்னார் விடத்தல்தீவு பிரதேச வைத்தியசாலைக்கு சுகாதாரம் மற்றும் வெகுசன ஊடக அமைச்சர் நளிந்த ஜயதிஸ்ஸ விஜயம்.

2026-10-25T19:18:41.542+05:30

மன்னார் விடத்தல்தீவு பிரதேச வைத்தியசாலைக்கு சுகாதாரம் மற்றும் வெகுசன ஊடக அமைச்சர் நளிந்த ஜயதிஸ்ஸ நேற்று சனிக்கிழமை (24) கண்காணிப்பு விஜயம் ஒன்றை மேற்கொண்டிருந்தார்.

பள்ளமடு சந்தியில் அமைந்துள்ள பிரதேச வைத்தியசாலைக்கு அமைச்சர் நளிந்த ஜயதிஸ்ஸ ,பாராளுமன்ற உறுப்பினர் ஜெகதீஸ்வரன், வடமாகாண சுகாதார அமைச்சின் செயலாளர் மற்றும் மன்னார் மாவட்ட சுகாதார சேவைகள் பணிப்பாளர் , மற்றும் வைத்தியர்கள்,தாதியர்கள்,பிரதேச சபை உறுப்பினர் என பலரும் இந்த கண்காணிப்பு விஜயத்தில் கலந்து கொண்டிருந்தனர்.

கண்காணிப்பு விஜயத்தின் போது வைத்திய சாலையின் குறைபாடுகள் தொடர்பாக கேட்டறிந்து கொண்டதோடு வைத்தியர்கள் மற்றும் தாதியர்களின் பிரச்சினைகள் தொடர்பாகவும் கலந்துரையாடப்பட்டது.

அதனைத் தொடர்ந்து வைத்தியசாலை வளாகத்தில் மரக்கன்று ஒன்று அமைச்சரினால் நாட்டி வைக்கப்பட்டது.

சம்மாந்துறையில் தொழுகைக்குச் சென்ற முஅத்தின் மீது காட்டு யானை தாக்குதல்: மயிரிழையில் உயிர் தப்பினார்!

2026-10-25T18:46:58.163+05:30

அம்பாறை மாவட்டம், சம்மாந்துறை பகுதியில் தொழுகைக்காகப் பள்ளிவாசலுக்குச் சென்ற 67 வயதுடைய முஅத்தின் ஒருவரைக் காட்டு யானை தாக்கியதில், அவர் மயிரிழையில் உயிர் தப்பியுள்ளார்.

சம்மாந்துறை ஸபூர் பள்ளிவாசலில் நேற்று (24) சனிக்கிழமை அதிகாலை 4.25 மணியளவில் இச்சம்பவம் இடம்பெற்றுள்ளது.

சம்மாந்துறை பகுதியைச் சேர்ந்த கலந்தர்லெப்பை அலியார் என்ற முஅத்தினே இவ்வாறு காட்டு யானையின் தாக்குதலுக்கு உள்ளாகியுள்ளார். இதன்போது, அவரது துவிச்சக்கர வண்டி பகுதியளவில் சேதமடைந்துள்ளதுடன், அவர் சிகிச்சைக்காக சம்மாந்துறை ஆதார வைத்தியசாலையில் அனுமதிக்கப்பட்டுள்ளார்.

கடந்த மூன்று வருடங்களாக குறித்த பள்ளிவாசலில் முஅத்தினாகக் கடமையாற்றி வரும் அலியார், பள்ளிவாசலுக்குச் சென்றுகொண்டிருந்தபோதே இச்சம்பவம் இடம்பெற்றுள்ளது.

சம்பவத்தை நேரில் கண்ட பள்ளிவாசல் தலைவர் தாஹிர் ஊடகங்களுக்குக் கருத்துத் தெரிவிக்கையில், முஅத்தின் பள்ளிவாசலுக்கு வந்துகொண்டிருந்தபோது காட்டு யானையின் தாக்குதலுக்கு உள்ளானதாகவும், அவர் 'அல்லாஹ், அல்லாஹ்' எனச் சத்தமிட்டதைக் கேட்டு உடனடியாகச் சம்பவ இடத்துக்குச் சென்றதாகவும் தெரிவித்தார்.

சம்மாந்துறை பகுதியில் காட்டு யானைகளின் தொல்லை நாளுக்கு நாள் அதிகரித்து வருவதாகவும், இதனால் அப்பகுதி மக்கள் அச்சத்துடன் வாழ்ந்து வருவதாகவும் தெரிவித்த அவர், காட்டு யானைகள் குடியிருப்புப் பகுதிகளையும் சேதப்படுத்தி வருவதாகக் குறிப்பிட்டார்.

எனவே, இப்பிரச்சினையைக் கட்டுப்படுத்த உரிய அதிகாரிகள் அவசர நடவடிக்கை எடுக்க வேண்டும் எனவும் அவர் கோரிக்கை விடுத்தார்.

மேலும், இச்சம்பவத்தில் பள்ளிவாசல் இமாம் தாக்கப்பட்டதாகச் சிலர் சமூக வலைத்தளங்களில் தவறான தகவல்களைப் பரப்பி வருவதாகக் குறிப்பிட்ட பள்ளிவாசல் தலைவர், உண்மைக்குப் புறம்பான தகவல்களைப் பரப்புவோர் அல்லாஹ்வுக்கு அஞ்சிச் செயற்பட வேண்டும் என்றும் தெரிவித்தார்.

வளிமண்டலவியல் திணைக்களத்தின் சிவப்பு எச்சரிக்கை

2026-10-24T19:56:36.215+05:30

வங்காள விரிகுடாவின் ஆழ்கடல் பகுதியில் பயணிக்கும் நெடுநாள் மீன்பிடி படகுகள் மற்றும் கடற்பயணிகளுக்காக வளிமண்டலவியல் திணைக்களத்தினால் 'சிவப்பு' எச்சரிக்கை விடுக்கப்பட்டுள்ளது.

இன்று (24) பிற்பகல் 04.30 மணிக்கு வெளியிடப்பட்ட இந்த எச்சரிக்கை அறிவித்தல், அடுத்த 24 மணித்தியாலங்களுக்குச் செல்லுபடியாகும் என அத்திணைக்களம் சுட்டிக்காட்டியுள்ளது.

வடக்கு அந்தமான் தீவுகளுக்கு அருகில் வங்காள விரிகுடா கடற்பரப்புகளுக்கு மேலாக விருத்தியடைந்த குறைந்த அழுத்தப் பிரதேசம் இன்று, ஒக்டோபர் 24ஆம் திகதி ஒரு தாழமுக்கமாக வலுவடையக் கூடிய சாத்தியம் உயர்வாகக் காணப்படுவதாக அதில் தெரிவிக்கப்பட்டுள்ளது.

அவ்அமைப்பானது மேற்கு நோக்கி நகர்ந்து வடமேற்கு திசையை நோக்கி மேலும் வலுவடைந்து, நாளை (25) ஆழ்ந்த காற்றழுத்தத் தாழ்வு மண்டலமாக மாறக்கூடும்.

மேலும், நாளை மறுதினம் (26) காலையாகும்போது மத்திய-மேற்கு வங்காள விரிகுடா கடற்பகுதியை அண்டி இது புயலாக மாறுவதற்கான மிக அதிக சாத்தியக்கூறுகள் காணப்படுவதாக வளிமண்டலவியல் திணைக்களம் தெரிவிக்கிறது.

இதன் காரணமாக, வடக்கு அட்சரேகை 10 முதல் 20 வரையிலும் மற்றும் கிழக்கு தீர்க்கரேகை 85 முதல் 95 வரையிலும் இடைப்பட்ட கடற்பரப்புகளில் மறு அறிவித்தல் வரை மீன்பிடி மற்றும் கடற்பயண நடவடிக்கைகளில் ஈடுபடுவதைத் தவிர்க்குமாறு அறிவுறுத்தப்பட்டுள்ளது.

அத்துடன், குறித்த கடற்பரப்புகளில் மீன்பிடி நடவடிக்கைகளில் ஈடுபட்டுள்ளவர்கள் உடனடியாகப் பாதுகாப்பான பகுதிகளை நோக்கி நகருமாறும் வளிமண்டலவியல் திணைக்களம் வலியுறுத்துகிறது.

எனவே, எதிர்வரும் நாட்களில் வெளியிடப்படும் அறிவித்தல்கள் மற்றும் கணிப்புகள் குறித்து தொடர்ச்சியான அவதானத்துடன் இருக்குமாறு வளிமண்டலவியல் திணைக்களம், மீன்பிடி மற்றும் கடற்பயண சமூகத்தினரிடம் மேலும் அறிவுறுத்தியுள்ளது.

சுட்டுக் கொல்லப்பட்ட நிலையில் இளைஞனின் சடலம் மீட்பு!

2026-10-24T19:40:51.827+05:30

தனமல்வில, நிகவெவ பகுதியில் அமைந்துள்ள கதிர்காம ஆலயத்திற்கு சொந்தமான காணி ஒன்றிலிருந்து சுட்டுக் கொல்லப்பட்ட நிலையில் இளைஞன் ஒருவரின் சடலம் மீட்கப்பட்டுள்ளது.

இவ்வாறு உயிரிழந்தவர் தனமல்வில, போதாகம, மீகஸ்வெவ பிரதேசத்தைச் சேர்ந்த 28 வயதுடைய திருமணமாகாத இளைஞன் என தெரியவந்துள்ளது.

கதிர்காம ஆலயத்திற்கு சொந்தமான, குத்தகை அடிப்படையில் வழங்கப்பட்டுள்ள நிகவெவ 280 வத்தை பகுதியில் அமைந்துள்ள குறித்த தென்னந்தோட்டத்தைச் சுத்தம் செய்வதற்காக குறித்த இளைஞர் நேற்று (23) அங்கு சென்றுள்ளதாகப் பொலிஸார் தெரிவித்தனர்.

எனினும், அவர் மீண்டும் வீடு திரும்பாத காரணத்தினால், அவரது தந்தை இன்று (24) அதிகாலை சம்பந்தப்பட்ட காணிக்குச் சென்று தேடிப்பார்த்துள்ளார்.

அங்கு அவர் தனது மகன் சுட்டுக் கொல்லப்பட்டு உயிரிழந்திருப்பதைக் கண்டதுடன், இது குறித்து தனமல்வில பொலிஸாருக்கு அறிவித்துள்ளார்.

இதற்கமைய, பொலிஸ் அதிகாரிகள் குறித்த இடத்திற்குச் சென்று விசாரணைகளை ஆரம்பித்துள்ளனர்.

இச்சம்பவம் தொடர்பான விசாரணைகளுக்காகக் குற்றத்தடுப்புப் பிரிவு ஸ்தல பரிசோதனை அதிகாரிகளும், பொலிஸ் மோப்ப நாய் பிரிவினரும் குறித்த இடத்திற்கு வரவழைக்கப்பட்டுள்ளனர்.

துப்பாக்கிச் சூட்டை நடத்தியவர் யார் என்பது அல்லது அதற்கான காரணம் இதுவரை கண்டறியப்படாத நிலையில், சம்பவம் குறித்து தனமல்கவில்ல பொலிஸார் மேலதிக விசாரணைகளை மேற்கொண்டு வருகின்றனர்.

குவைத்தில் இலங்கை பெண்கள் இருவர் மர்மமாக உயிரிழப்பு - விசாரணை ஆரம்பம்

2026-10-24T18:44:18.971+05:30

குவைத்தின் இரு வெவ்வேறு பகுதிகளில் இலங்கை பெண்கள் இருவர் மர்மமான முறையில் உயிரிழந்துள்ளமை தொடர்பில் விசாரணைகள் ஆரம்பிக்கப்பட்டுள்ளதாக குவைத் ஊடகங்கள் செய்தி வெளியிட்டுள்ளன.

அலி சபா அல்-சேலம் மற்றும் அல்-நஹ்தா ஆகிய பகுதிகளில் உள்ள வீடுகளில் இருந்தே இவர்களின் சடலங்கள் மீட்கப்பட்டுள்ளதுடன், இவற்றை குவைத் பொலிஸார் இயற்கைக் கடந்த மரணம் என வழக்குகளைப் பதிவு செய்து விசாரணைகளைத் தொடங்கியுள்ளனர்.

முதல் சம்பவமாக, அலி சபா அல்-சேலம் பகுதியில் உள்ள வீடொன்றின் கூரையில் அமைக்கப்பட்டிருந்த களஞ்சிய அறையிலிருந்து 1988 ஆம் ஆண்டு பிறந்த இலங்கை பெண் ஒருவர் சடலமாக மீட்கப்பட்டுள்ளார்.

வீட்டு உரிமையாளர் அளித்த தகவலின் பேரில் அஹ்மதி பொது குற்றவியல் பிரிவு இது குறித்த விசாரணைகளை மேற்கொண்டு வருகிறது.

இரண்டாவது சம்பவமாக, அல்-நஹ்தா பகுதியில் உள்ள வீடொன்றில் 1999 ஆம் ஆண்டு பிறந்த மற்றொரு இலங்கை பெண் சடலமாக மீட்கப்பட்டுள்ளார்.

சம்பவ இடத்திற்குச் சென்ற ஜஹ்ரா பொது குற்றவியல் பிரிவு தடயவியல் நிபுணர்களுடன் இணைந்து சான்றுகளைச் சேகரித்துள்ளது.

குவைத்தின் 'அரப் டைம்ஸ்' நாளிதழின் செய்தியின்படி, இரு மரணங்களும் சந்தேகத்திற்கிடமான முறையிலேயே இடம்பெற்றுள்ளதால் சடலங்கள் பிரேத பரிசோதனைக்காகத் தடயவியல் பிரிவுக்கு அனுப்பி வைக்கப்பட்டுள்ளன.

இந்த இரண்டு உயிரிழப்புகளுக்கும் இடையே ஏதேனும் தொடர்புகள் உள்ளதா அல்லது இதில் தொடர்புடைய சந்தேக நபர்கள் எவரேனும் அடையாளம் காணப்பட்டுள்ளனரா என்பது குறித்த தகவல்களைக் குவைத் அதிகாரிகள் இதுவரை வெளிப்படுத்தவில்லை என குவைத் ஊடகங்கள் தெரிவிக்கின்றன.

மன்னாரில் உணவகங்கள் உள்ளிட்ட உணவு கையாளும் நிறுவனங்களில் விசேட சுகாதாரப் பரிசோதனை!

2026-10-24T18:17:45.270+05:30

மன்னார் நகர எல்லைக்குட்பட்ட பகுதிகளில் உணவு தயாரித்தல் மற்றும் கையாளுதல் நடவடிக்கைகளில் ஈடுபடும் பல்வேறு நிறுவனங்களில் இன்று (24) விசேட சுகாதாரப் பரிசோதனைகள் முன்னெடுக்கப்பட்டுள்ளன.

மன்னார் நகர சபையின் பொது சுகாதாரப் பரிசோதகர்கள் மற்றும் சுகாதார வைத்திய அதிகாரி அலுவலகத்தின் பொது சுகாதாரப் பரிசோதகர்கள் இணைந்து இந்தப் பரிசோதனைகளை மேற்கொண்டனர்.

இதன்போது, சில உணவு கையாளும் நிறுவனங்களில் உணவுப் பாதுகாப்பு மற்றும் சுகாதார நடைமுறைகள் தொடர்பில் பல்வேறு குறைபாடுகள் அவதானிக்கப்பட்டதாகத் தெரிவிக்கப்பட்டுள்ளது.

குறிப்பாக, உணவு தயாரிக்கப்படும் இடங்களில் ஈக்களின் நடமாட்டம், எலிகளால் உணவு மாசுபடக்கூடிய அபாயம், உணவுப் பொருட்களைச் சேமிக்கும் இடங்களில் சுகாதாரக் குறைபாடுகள், உரிய அனுமதிகள் மற்றும் பணியாளர்களுக்கான மருத்துவ அறிக்கைகள் இல்லாமை போன்ற விடயங்கள் அடையாளம் காணப்பட்டுள்ளன.

மேலும், உணவு தயாரிக்கும் பணியாளர்கள் உரிய பாதுகாப்பு உபகரணங்களைப் பயன்படுத்தாமை, அசுத்தமான பாத்திரங்களில் உணவைச் சேமித்தல், உணவுப் பொதியிடுவதற்குப் பொருத்தமற்ற பொருட்களைப் பயன்படுத்துதல், சமையல் எண்ணெயை மீண்டும் மீண்டும் பயன்படுத்துதல் உள்ளிட்ட பல்வேறு குறைபாடுகளும் அவதானிக்கப்பட்டுள்ளன.

இவ்வாறான குறைபாடுகள் உணவின் தரத்தையும் பாதுகாப்பையும் பாதிப்பதுடன், பொதுமக்களின் ஆரோக்கியத்திற்கும் ஆபத்தை ஏற்படுத்தக்கூடும்.

இதனையடுத்து, சுகாதார மற்றும் உணவுப் பாதுகாப்பு விதிமுறைகளை மீறியதாகக் கண்டறியப்பட்ட நிறுவனங்களுக்கு எதிராக நடைமுறையிலுள்ள சட்டங்கள் மற்றும் விதிமுறைகளுக்கு அமைவாகத் தேவையான சட்ட நடவடிக்கைகளை மேற்கொள்ள நடவடிக்கை எடுக்கப்படவுள்ளதாகத் தெரிவிக்கப்பட்டுள்ளது.

வங்கக் கடலில் புயல் அபாயம்: மீனவர்களுக்குச் சிவப்பு எச்சரிக்கை!

2026-10-23T21:26:25.879+05:30

வங்காள விரிகுடாவின் ஆழ்கடல் பகுதியில் பயணிக்கும் நெடுநாள் மீன்பிடி படகுகளுக்கு வளிமண்டலவியல் திணைக்களம் சிவப்பு எச்சரிக்கை விடுத்துள்ளது.

வடக்கு அந்தமான் தீவுகளை ஒட்டிய வங்காள விரிகுடா பகுதியில் தற்போது ஒரு புதிய குறைந்த அழுத்தப் பிரதேசம் உருவாகியுள்ள நிலையில், அது அடுத்த சில மணிநேரங்களில் தாழமுக்கமாக வலுவடைய அதிக சாத்தியக்கூறுகள் உள்ளன.

அதன்பின்னர், இத்தொகுதி வடமேற்கு திசையை நோக்கி நகர்ந்து மேலும் தீவிரமடைந்து ஒரு ஆழமான தாழமுக்கமாக மாறக்கூடும்.

அத்துடன், ஒக்டோபர் 26 ஆம் திகதி காலையளவில் வங்காள விரிகுடாவின் மத்திய மேற்குப் பகுதியில் இது புயலாகவலுவடையக் கூடிய அதிக சாத்தியக்கூறுகள் இருப்பதாக வளிமண்டலவியல் திணைக்களம் சுட்டிக்காட்டியுள்ளது.

இதன் காரணமாக, வடக்கு அட்சரேகை 10 இற்கும் 20 இற்கும் இடையிலும், கிழக்கு நெட்டாங்குக் கோடு 80 இற்கும் 95 இற்கும் இடையிலும் அமைந்துள்ள கடற்பரப்புகளில் மறு அறிவித்தல் வரை மீன்பிடி மற்றும் கடற்பயண நடவடிக்கைகளில் ஈடுபடுவதைத் தவிர்க்குமாறு வளிமண்டலவியல் திணைக்களம் அறிவித்துள்ளது.

மேலும், தற்போது குறிப்பிடப்பட்ட கடற்பரப்புகளில் மீன்பிடி நடவடிக்கைகளில் ஈடுபட்டுள்ளவர்கள் உடனடியாக பாதுகாப்பான பகுதிகளை நோக்கி நகருமாறும் அறிவுறுத்தப்பட்டுள்ளனர்.

மீனவர்கள் மற்றும் கடற்பயணங்களில் ஈடுபடுவோர் இது குறித்து மிகுந்த அவதானத்துடன் இருக்குமாறும், இனிவரும் காலங்களில் வெளியிடப்படும் அறிவிப்புகளை கவனத்தில் கொள்ளுமாறும் வளிமண்டலவியல் திணைக்களம் மேலும் அறிவுறுத்தியுள்ளது.

ராஜ் சோமதேவவின் அறிக்கையில் பாரிய சந்தேகம் - நீதிமன்றில் மனு!

2026-10-23T21:18:56.824+05:30

செம்மணிப் புதைகுழி தொடர்பான அறிக்கையில் 'பெரும் மனிதப் புதைகுழி' என்ற சொற்றொடரைப் பேராசிரியர் ராஜ் சோமதேவ திட்டமிட்டு நீக்கியுள்ளார் எனச் சந்தேகிப்பதாகப் பாதிக்கப்பட்ட தரப்பினரின் சார்பில் சட்டத்தரணிகள் குழுவொன்று நீதிமன்றத்தில் நகர்த்தல் பத்திரத்தைத் தாக்கல் செய்துள்ளது.

செம்மணிப் புதைகுழி தொடர்பான வழக்கு விசாரணைகளின்போது பாதிக்கப்பட்ட தரப்பினர் சார்பில் சட்டத்தரணிகள் சிலர் தொடர்ச்சியாக முன்னிலையாகி வரும் நிலையில், அவர்களால் சமர்ப்பிக்கப்பட்ட இந்த நகர்த்தல் பத்திரத்தில் பல முக்கியமான விடயங்கள் சுட்டிக்காட்டப்பட்டுள்ளன.

பாதிக்கப்பட்ட தரப்பினர் தாக்கல் செய்துள்ள நகர்த்தல் பத்திரத்தில், பேராசிரியர் ராஜ் சோமதேவ நீதிமன்றத்தில் சமர்ப்பித்த இடைக்கால அறிக்கையில் 'பெரும் புதைகுழி' என்ற சொல் வேண்டுமென்றே நீக்கப்பட்டுள்ளதாகக் குறிப்பிடப்பட்டுள்ளது.

இதற்கு முன்னர் அவரால் தாக்கல் செய்யப்பட்ட அறிக்கைகளில் அந்தச் சொற்றொடர் உள்ளடங்கியிருந்த நிலையில், தற்போதைய அறிக்கையில் அந்தச் சொல் விடுபட்டுள்ளமையானது தீவிரமான சந்தேகங்களை எழுப்புவதாகவும், இது ஒரு திட்டமிட்ட நடவடிக்கையாகக் கருத வேண்டியுள்ளதாகவும் அதில் தெரிவிக்கப்பட்டுள்ளது.

குறித்த அகழ்வுப் பகுதியை வழக்கமான அடக்க இடமாகக் கருதுவதற்கான அடிப்படை ஏதேனும் இருந்தால், அது தொடர்பான மயானப் பதிவுகள், நிலப் பயன்பாட்டின் வரலாறு, சட்ட ஏற்பாடுகள் மற்றும் நம்பகமான சான்றுகள் மூலம் அறிக்கை தெளிவுபடுத்தப்பட வேண்டும் எனவும் அவர்கள் கோரியுள்ளனர்.

மேலும், எச்சங்களின் ஆழம், பரவல், மண் அடுக்குகளில் அவற்றின் அமைவிடம் மற்றும் அவற்றின் நிலை ஆகியவை தடயவியல் மற்றும் தொல்லியல் ஆய்வுகளில் மிக முக்கியமான அம்சங்கள் என்பதால், இந்த அம்சங்கள் வழக்கமான அடக்கம் என்ற முன்வைக்கப்பட்ட விளக்கத்துடன் பொருந்துகின்றனவா என்பதை அறிக்கை விளக்க வேண்டும் என்றும் சுட்டிக்காட்டப்பட்டுள்ளது.

அத்துடன், குறித்த முடிவுகளுக்கு வருவதற்குப் பயன்படுத்தப்பட்ட அறிவியல் அவதானிப்புகளையும் ஒப்பீட்டுச் சான்றுகளையும் அறிக்கையில் முறையாக அடையாளப்படுத்த வேண்டும் என்றும் கோரப்பட்டுள்ளது.

இதற்கிடையில், செம்மணிப் புதைகுழியின் பின்னணியில் தொற்றுநோய் அல்லது இயற்கைப் பேரழிவு காரணமாக இருக்கலாம் எனக் கருதுவதற்குப் போதிய சான்றுகள் இல்லை என்று பாதிக்கப்பட்ட தரப்பினர் நீதிமன்றத்தில் குறிப்பிட்டுள்ளனர்.

செம்மணிப் புதைகுழிக்குத் தொற்றுநோய் அல்லது இயற்கைப் பேரழிவு காரணமாக இருந்திருக்கலாம் என்று பேராசிரியர் ராஜ் சோமதேவ தனது இடைக்கால அறிக்கையில் குறிப்பிட்டுள்ள கருத்தை அவர்கள் கடுமையாக மறுத்துள்ளனர்.

அடையாளம் காணக்கூடியதும் சரிபார்க்கக் கூடியதுமான அறிவியல் சான்றுகள் ஆதரிக்காத வரை இத்தகைய கருதுகோளுக்கு ஆதரவாகப் பயன்படுத்தப்பட்ட உண்மைநிலை மற்றும் அறிவியல் அடிப்படைகளைப் பேராசிரியர் ராஜ் சோமதேவ தெளிவுபடுத்த வேண்டும் எனவும், போதுமான ஆதாரங்கள் இல்லாத நிலையில் செம்மணிப் புதைகுழிக்கான காரணமாகத் தொற்றுநோய் அல்லது இயற்கைப் பேரழிவைக் கருத முடியாது எனவும் சட்டத்தரணிகள் தாக்கல் செய்துள்ள நகர்த்தல் பத்திரத்தில் மேலும் சுட்டிக்காட்டப்பட்டுள்ளது.

மன்னார் புனித சவேரியார் ஆண்கள் கல்லூரி மைதான வடிகால் புனரமைப்புக்கு 5 மில்லியன் ரூபாய் நிதி ஒதுக்கீடு!

2026-10-23T20:58:32.113+05:30

மன்னார் புனித சவேரியார் ஆண்கள் கல்லூரியின் விளையாட்டு மைதானத்தில் மழை காலங்களில் நீர் தேங்குவதால் மாணவர்கள் எதிர்கொள்ளும் சவால்களை நிவர்த்தி செய்யும் முகமாக வடிகால் வசதிகளை ஏற்படுத்துவதற்காக 5 மில்லியன் ரூபாய் நிதி ஒதுக்கீடு செய்யப்பட்டுள்ள நிலையில், குறித்த திட்டத்திற்கான அடிக்கல் நாட்டும் நிகழ்வு இன்று (23) பாடசாலை வளாகத்தில் இடம்பெற்றது.

தேசிய மக்கள் சக்தி அரசாங்கத்தின் கீழ் பாடசாலைகளின் விளையாட்டுத்துறை யை மேம்படுத்தும் நோக்கில் முன்னெடுக்கப்படும் திட்டத்தின் ஒரு பகுதியாக இவ்வேலை திட்டம் ஆரம்பிக்கப்பட்டுள்ளது.

இதன் கீழ் மன்னார் கல்வி வலயத்தில் மன்னார் புனித சவேரியார் ஆண்கள் கல்லூரி மற்றும் வங்காலை சென். ஆன்ஸ் மத்திய மகா வித்தியாலயம் ஆகிய இரு பாடசாலைகளும் மடு கல்வி வலயத்தில் அடம்பன் மத்திய மகா வித்தியாலயம், பண்டிவிரிச்சான் மாகவித்தியலயத்தினுடைய மைதான அபிவிருத்தி பணிக்ளும் ஆரம்பிக்கப்படவுள்ளன.

மாணவர்களின் விளையாட்டுத் திறன்களை மேம்படுத்துவதற்கும், பாடசாலைகளில் சிறந்த விளையாட்டு உள்கட்டமைப்பு வசதிகளை ஏற்படுத்துவதற்கும் இத்திட்டம் பங்களிக்கும் என எதிர்பார்க்கப்படுகிறது.

குறித்த நிகழ்வில் வன்னி மாவட்ட நாடாளுமன்ற உறுப்பினர் மயில்வாகனம் ஜெகதீஸ்வரன், தேசிய மக்கள் சக்தியின் நகரசபை மற்றும் பிரதேச சபை உறுப்பினர்கள், பிரஜாசக்தி உறுப்பினர்கள், வலயக் கல்விப் பணிமனை அதிகாரிகள் பாடசலை பழைய மாணவர் சங்க உறுப்பினர்கள் உள்ளிட்ட பலர் கலந்து கொண்டனர்.

மன்னார் மாவட்டம் கட்டுக்கரை குளத்தின் கீழ் 2026/2027 ஆம் ஆண்டிற்கான பெரும்போக பயிர்ச் செய்கைக்கான முதல் கட்ட நீர் விநியோகம் வைபவ ரீதியாக ஆரம்பித்து வைப்பு.

2026-10-23T20:43:38.947+05:30

மன்னார் மாவட்டம் கட்டுக்கரை குளத்தின் கீழ் 2026/2027 ஆம் ஆண்டிற்கான பெரும்போக பயிர்ச்செய்கைக்கான முதல் கட்ட நீர் விநியோகம் விவசாயக் குழு கூட்ட தீர்மானங்கள் படி இன்றைய தினம் வெள்ளிக்கிழமை (23) காலை 10.30 மணியளவில் சர்வமத தலைவர்கள் ஆசியுடன் திறந்து விடப்பட்டுள்ளது.

மன்னார் மாவட்ட அரசாங்க அதிபர் க.கனகேஸ்வரன் தலைமையில்,விவசாய திணைக்கள பணிப்பாளர் , திணைக்கள அதிகாரிகள் இணைந்து வைபவ ரீதியாக நீர் விநியோகத்தை திறந்து வைத்தனர்.

இம்முறை மன்னார் மாவட்டத்தில் ஒட்டுமொத்தமாகச் சுமார் 60, ஆயிரம் ஏக்கர் நிலப்பரப்பில் பெரும்போக நெற்செய்கை மேற்கொள்ளப்பட உள்ளது.

அதற்கமைய முதல் கட்டமாக நீர் வினியோகம் இன்றைய தினம் வெள்ளிக்கிழமை(23) வைபவ ரீதியாக திறந்து வைக்கப்பட்டுள்ளது.

காலநிலை மாற்றங்களை கருத்தில் கொண்டு விவசாயிகள் அனைவரும் குறுகிய காலத்தில் (3 அல்லது 3.5 மாதங்கள்) பலன் தரக்கூடிய நெல் இனங்கள் பயிரிடுமாறு கோரிக்கை விடுக்கப்பட்டுள்ளது.

கொழும்பில் இருந்து மன்னார் சென்ற பேருந்து கோர விபத்து; இருவர் பலி; பலர் காயம்

2026-10-23T15:38:15.260+05:30

கொழும்பில் இருந்து சென்ற பேருந்து புத்தளம் - அநுராதபுரம் பிரதான வீதியின் சாலியவெவ 19ஆவது மைல்கல் பகுதியில் கோர விபத்தில் சிக்கியதில் இருவர் உயிரிழந்துள்ளதுடன், 15க்கும் மேற்பட்டோர் காயமடைந்துள்ளனர்.

நேற்று (22) மாலைஇடம்பெற்ற கொழும்பில் இருந்து புத்தளம் ஊடாக மன்னார் நோக்கிப் பயணித்த அதி சொகுசு பேருந்து ஒன்றே விபத்துக்குள்ளாகியுள்ளதாக சாலியவெவ பொலிஸார் தெரிவித்தனர்.

மோட்டார் சைக்கிளை முந்த முற்பட்ட வேளை விபத்து

பிரதான வீதியில் பயணித்துக் கொண்டிருந்த மோட்டார் சைக்கிளை முந்திச் செல்ல முற்பட்ட வேளையில், கட்டுப்பாட்டை இழந்த பேருந்து வீதியோரத்தில் இருந்த பாலத்தில் மோதி, வீதியை விட்டு விலகிச் சென்று சுமார் 200 மீற்றர் தூரம் வரை இழுத்துச் செல்லப்பட்டு, அதி உயர் அழுத்த மின் கம்பத்துடன் மோதி கவிழ்ந்துள்ளது.

விபத்து நடந்த சமயத்தில் பேருந்தில் சுமார் 50 பயணிகள் பயணித்துள்ளனர். விபத்தையடுத்து சாலியவெவ பொலிஸாரும் அப்பகுதி மக்களும் இணைந்து காயமடைந்தவர்களை மீட்டு வைத்தியசாலைகளில் அனுமதிப்பதற்கான நடவடிக்கைகளை மேற்கொண்டனர்.

இந்த விபத்தில் மோட்டார் சைக்கிளில் பயணித்த நபரும், பேருந்தில் பயணித்த பெண் ஒருவரும் உயிரிழந்துள்ளதாக பொலிஸார் உறுதிப்படுத்தியுள்ளனர். மேலும், படுகாயமடைந்த பேருந்தின் சாரதியின் நிலைமை கவலைக்கிடமாக உள்ளதாகவும் பொலிஸார் தெரிவிக்கின்றனர்.

பேருந்து மோதியதில் அதி உயர் அழுத்த மின் கம்பம் பலத்த சேதமடைந்ததைத் தொடர்ந்து அப்பகுதியில் மின்சார விநியோகம் தடைப்பட்டது. இன்னிலையில் விபத்து சம்பவம் தொடர்பில் சாலியவெவ பொலிஸார் மேலதிக விசாரணைகளை முன்னெடுத்து வருகின்றனர்.

மன்னார் நகரசபை உறுப்பினர் பிரசாத்துக்கு ஒரு மாதத் தடை!

2026-10-22T23:11:59.343+05:30

மன்னார் நகரசபையில் இடம்பெற்ற கூட்டத்தின்போது கருத்துத் தெரிவிக்க முற்பட்ட உறுப்பினர் பிரசாத்துக்கும் நகரசபைத் தவிசாளருக்கும் இடையில் ஏற்பட்ட முரண்பாட்டைத் தொடர்ந்து, உறுப்பினர் பிரசாத்துக்கு ஒரு மாத காலத் தடை விதிக்கப்பட்டதாகக் கூறப்படும் சம்பவம் சர்ச்சையை ஏற்படுத்தியுள்ளது.

குறித்த தடையை எதிர்த்தும், தனக்கு இழைக்கப்பட்டதாகக் கூறப்படும் அநீதி தொடர்பில் உரிய நடவடிக்கை எடுக்குமாறும் கோரி உறுப்பினர் பிரசாத் வடக்கு மாகாண ஆளுநரிடம் நேரடியாக முறைப்பாட்டுக் கடிதத்தைக் கையளித்துள்ளார்.

கடந்த 20.10.2026 அன்று நடைபெற்ற மன்னார் நகரசபையின் 17ஆவது மாதாந்தக் கூட்டத்தின்போது, சபை அனுமதி தொடர்பான விவாதத்தின் போது விவாதங்கள் இடம்பெற்றுள்ளன.

இதன்போது நகரசபையின் கொள்வனவு நடவடிக்கைகள் தொடர்பாக உறுப்பினர் பிரசாத் கருத்துத் தெரிவிக்க முற்பட்டதாகத் தெரிவிக்கப்படுகிறது.

அந்தச் சந்தர்ப்பத்தில் தவிசாளர் குறுக்கிட்டதாகவும், முதலில் தனக்குக் கருத்துத் தெரிவிப்பதற்கு வாய்ப்பளிக்குமாறும், தான் பேசி முடித்த பின்னர் தவிசாளர் பதிலளிக்கலாம் என்றும் உறுப்பினர் பிரசாத் தெரிவித்ததாகக் கூறப்படுகிறது.

எனினும், அவருக்குக் கருத்துத் தெரிவிக்க அனுமதி வழங்கப்படவில்லை எனக் குற்றஞ்சாட்டப்பட்டுள்ளது. இதனால், தன்னைப் பேச அனுமதிக்குமாறு உறுப்பினர் மீண்டும் வலியுறுத்தியதாகவும் தெரிவிக்கப்படுகிறது.

இந்த முரண்பாட்டைத் தொடர்ந்து, சபைக் கூட்டத்திலிருந்து வெளியேறுமாறு தவிசாளர் உறுப்பினர் பிரசாத்திடம் தெரிவித்ததாகக் கூறப்படுகிறது.

இதன் பின்னர், உறுப்பினர் பிரசாத்துக்கு ஒரு மாத காலத் தடை விதிக்கப்பட்டதாகத் தெரிவிக்கப்படுகிறது. இந்த நடவடிக்கை தொடர்பில் அதிருப்தி வெளியிட்டுள்ள அவர், தவிசாளரின் செயற்பாடு தொடர்பாகவும் தனது ஆட்சேபனைகளை முன்வைத்துள்ளார்.

தனக்கு வழங்கப்பட்டதாகக் கூறப்படும் ஒரு மாதத் தடையை எதிர்த்தும், சபைக் கூட்டத்தின்போது தனது கருத்துக்களை முன்வைப்பதற்கான வாய்ப்பு மறுக்கப்பட்டமை தொடர்பிலும் உறுப்பினர் பிரசாத் வடக்கு மாகாண ஆளுநரிடம் கடிதம் ஒன்றைக் கையளித்துள்ளார்.

குறித்த கடிதத்தில், 20.10.2026 அன்று நடைபெற்ற கூட்டத்தில் இடம்பெற்ற சம்பவங்கள், JCB கொள்வனவு தொடர்பான விவாதத்தின்போது ஏற்பட்ட முரண்பாடு மற்றும் அதனைத் தொடர்ந்து மேற்கொள்ளப்பட்ட நடவடிக்கைகள் தொடர்பான தனது முறைப்பாட்டை அவர் முன்வைத்துள்ளார்.

மேலும், இந்த விடயம் தொடர்பில் உரிய கவனம் செலுத்தி, தனக்கு இழைக்கப்பட்டதாகக் கூறப்படும் அநீதிக்குத் தீர்வு பெற்றுத்தர வேண்டும் என்பதே அவரது முறைப்பாட்டின் நோக்கமாகும்.

நகரசபை நிர்வாகத்தின் அடுத்தகட்ட நடவடிக்கை என்ன?

மக்களால் தெரிவு செய்யப்பட்ட பிரதிநிதிகள் நகரசபைக் கூட்டங்களில் பொதுமக்களின் நலன் சார்ந்த விடயங்கள், கொள்வனவுகள் மற்றும் வரவு – செலவுத் திட்டம் தொடர்பாகக் கருத்துக்களை முன்வைப்பது உள்ளூராட்சி நிர்வாகத்தின் முக்கிய அம்சமாகும்.

இந்நிலையில், கொள்வனவு தொடர்பான விவாதத்தின்போது ஏற்பட்டதாகக் கூறப்படும் இந்த முரண்பாடும், உறுப்பினருக்கு விதிக்கப்பட்டதாகக் கூறப்படும் ஒரு மாதத் தடையும் பல்வேறு கேள்விகளை எழுப்பியுள்ளன.

குறித்த தடையை விதிப்பதற்கான காரணங்கள், அதற்குப் பின்பற்றப்பட்ட நடைமுறைகள் மற்றும் உறுப்பினர் முன்வைத்துள்ள முறைப்பாடு தொடர்பில் ஆளுநர் எத்தகைய நடவடிக்கை எடுக்கவுள்ளார் என்பவை தற்போது கவனத்தைப் பெற்றுள்ளன.

10 ஆண்டுகளுக்குப் பின்னர் மன்னாரில் மீண்டும் உருவாக்கம் பெறும் NISCO!

2026-10-22T20:09:48.486+05:30

10 ஆண்டுகளுக்குப் பின்னர் மன்னாரில் மீண்டும் உருவாக்கம் பெறும் NISCO!

மன்னார் மாவட்டத்தில் நீண்டகாலமாகச் செயலிழந்த நிலையில் காணப்பட்ட NISCO அமைப்பு, சுமார் 10 ஆண்டுகளுக்குப் பின்னர் மீண்டும் உருவாக்கம் பெறுவதற்கான நடவடிக்கைகள் முன்னெடுக்கப்பட்டுள்ளன.

இதன் ஒரு கட்டமாக, நேற்று (21) மன்னார் மாவட்டத்தில் NISCO அமைப்பின் நிர்வாகத் தெரிவு இடம்பெற்றுள்ளது.

இளைஞர்களுக்கான தொழில் வாய்ப்புகளை உருவாக்குதல், மேலதிகக் கல்வி மற்றும் திறன் மேம்பாட்டுக்கான வாய்ப்புகளை ஏற்படுத்துதல், கடனுதவித் திட்டங்கள் உள்ளிட்ட பல்வேறு செயற்பாடுகளை முன்னெடுப்பதை நோக்கமாகக் கொண்டு NISCO அமைப்பு செயற்பட்டு வருகின்றது.

எனினும், மன்னார் மாவட்டத்தில் கடந்த சுமார் 10 ஆண்டுகளாக இவ்வமைப்பு இயங்காத நிலை காணப்பட்டதாகத் தெரிவிக்கப்படுகிறது. இந்நிலையில், மீண்டும் அமைப்பைச் செயற்படுத்தும் நோக்கில் நிர்வாகத் தெரிவு இடம்பெற்றுள்ளமை குறிப்பிடத்தக்கது.

இந்நிகழ்வில் தேசிய இளைஞர் சேவைகள் மன்றத்தின் மாவட்டப் பணிப்பாளர், பிரதேச இளைஞர் சேவை உத்தியோகத்தர், NISCO பிரிவு உத்தியோகத்தர், விளையாட்டு மற்றும் இளைஞர் விவகார அமைச்சின் மன்னார் மாவட்ட இணைப்பாளர் உள்ளிட்ட அதிகாரிகளும், இளைஞர் யுவதிகளும் கலந்துகொண்டனர்.

நீண்டகால இடைவெளிக்குப் பின்னர் மன்னாரில் மீண்டும் உருவாக்கம் பெறும் NISCO அமைப்பின் ஊடாக, மாவட்ட இளைஞர்களுக்கான வேலைவாய்ப்புகள், கல்வி முன்னேற்றம் மற்றும் பொருளாதார மேம்பாட்டுக்கான புதிய வாய்ப்புகள் உருவாகும் என எதிர்பார்க்கப்படுகிறது.

மன்னார் மாவட்ட இளைஞர்களின் எதிர்காலத்தை மேம்படுத்தும் நோக்கில் NISCO அமைப்பின் மீள்செயற்பாடு முக்கியத்துவம் பெறுகின்றது.

யாழ்ப்பாணத்தில் 22 நாட்களாக யுவதி மாயம் ; மகளை மீட்டுத் தருமாறு தாய் கோரிக்கை

2026-10-22T19:54:30.382+05:30

யாழ்ப்பாண மத்திய பேருந்து நிலையத்திலிருந்து காணாமல் போன தனது மகளைத் தேடிக் கண்டறிய பொலிஸார் துரித நடவடிக்கை எடுக்க வேண்டும் எனத் தாயார் கோரிக்கை விடுத்துள்ளார்.

குறித்த யுவதி காணாமல் போனமை தொடர்பில் அவரது தாயார் கடந்த முதலாம் திகதி யாழ்ப்பாணம் பொலிஸ் நிலையத்தில் முறைப்பாடு செய்துள்ளார்.

எனினும், முறைப்பாடு செய்து 22 நாட்கள் கடந்துள்ள போதிலும், தனது மகள் தொடர்பில் இதுவரை எவ்வித தகவல்களும் கிடைக்கவில்லை எனத் தாயார் தெரிவித்துள்ளார்.

யாழ்ப்பாண மத்திய பேருந்து நிலையத்திலிருந்து தனது மகள் காணாமல் போனதாகக் குறிப்பிட்டுள்ள அவர், மகளைக் கண்டறிவதற்கான விசாரணைகளை பொலிஸார் துரிதப்படுத்த வேண்டும் என வலியுறுத்தியுள்ளார்.

மேலும், காணாமல் போன தனது மகளை விரைவாகக் கண்டறிந்து தன்னிடம் ஒப்படைக்க உரிய நடவடிக்கைகளை எடுக்குமாறும் பொலிஸாரிடம் தாயார் கோரிக்கை விடுத்துள்ளார்.

இச்சம்பவம் தொடர்பில் பொலிஸார் விசாரணைகளை முன்னெடுத்து வருகின்றனரா என்பது குறித்த மேலதிக தகவல்கள் வெளியாகவில்லை.

ரியாத், தம்மாமுக்கான விமான சேவைகள் தொடர்ந்தும் ரத்து

2026-10-22T19:32:34.308+05:30

கொழும்புக்கும் தம்மாமுக்கும் இடையில் மற்றும் கொழும்புக்கும் ரியாத்துக்கும் இடையிலான அனைத்து விமானச் சேவைகளும் எதிர்வரும் 1 ஆம் திகதி வரையில் தொடர்ந்தும் இடைநிறுத்தப்பட்டிருக்கும் என ஸ்ரீலங்கன் எயார்லைன்ஸ் அறிவித்துள்ளது.

பிராந்தியத்தில் நிலவும் பாதுகாப்புச் சூழ்நிலை காரணமாக, இந்த தீர்மானம் எடுக்கப்பட்டுள்ளதாக ஸ்ரீலங்கன் எயார்லைன்ஸ் இன்று (22) அறிக்கையொன்றை விடுத்து தெரிவித்துள்ளது.

பயணிகள் மற்றும் பணியாளர்களின் பாதுகாப்பே எமது முதன்மை முன்னுரிமையாகும் எனத் தெரிவித்துள்ள ஸ்ரீலங்கன் எயார்லைன்ஸ் நிறுவனம், வர்த்தக நடவடிக்கைகளுக்கு உகந்த சூழ்நிலை இருப்பதாக மதிப்பிடப்பட்ட பின்னர் விமானச் சேவைகள் மீண்டும் ஆரம்பிக்க திட்டமிட்டுள்ளதாக குறிப்பிட்டுள்ளது.

மேலதிக தகவல்களுக்கு, வாடிக்கையாளர்கள் 1979 (இலங்கைக்குள்), +94 11 777 1979 (சர்வதேசம்), WhatsApp +94 74 444 1979 (உரையாடல் மட்டும்) ஆகிய இலக்கங்கள் ஊடாகவும், உங்கள் பயண முகவர் மூலமாகவும் அல்லது www.srilankan.com என்ற இணையதளத்தைப் பார்வையிட்டும் தொடர்பு கொள்ளுமாறு அறிவுறுத்தப்பட்டுள்ளது.

நீதிமன்ற உத்தரவால் விஹாரமஹாதேவி பூங்காவில் அமைதியின்மை!

2026-10-22T19:26:37.584+05:30

கொழும்பு - விஹாரமஹாதேவி பூங்காவில் பௌத்த பிக்குமார் சத்தியாகிரகத்தில் ஈடுபட்டுள்ள பகுதியில் அமையின்மை ஏற்பட்டுள்ளது.

குறித்த பகுதியில் சத்தியாகிரக போராட்டத்தில் ஈடுபட்டுள்ள குழுவினரை அங்கிருந்து அகற்றுவது தொடர்பில் கறுவாத்தோட்டம் பொலிஸார், கொழும்பு பிரதான நீதவான் நீதிமன்றில் உத்தரவொன்றை பெற்றுள்ளனர்.

இந்த உத்தரவு தொடர்பில் பொலிஸார் அறிவிப்பதற்கு ஸ்தலத்துக்கு சென்றிருந்த நிலையில் அங்கு அமையின்மை ஏற்பட்டுள்ளதாக தெரிவிக்கப்பட்டுள்ளது.

A9 வீதி அக்குறணை பகுதியில் தற்காலிகமாக மூடப்படுகிறது!

2026-10-22T19:17:51.483+05:30

கண்டி - யாழ்ப்பாணம் A9 வீதியின் அலவத்துகொட பொலிஸ் பிரிவுக்குட்பட்ட குருகொட 7 ஆம் கட்டை பகுதி இன்று (22) இரவு 10 மணி முதல் நாளை (23) அதிகாலை 2 மணி வரை தற்காலிகமாக மூடப்படவுள்ளதாக பொலிஸார் அறிவித்துள்ளனர்.

கடந்த 19 ஆம் திகதி குறித்த பகுதியில் இடம்பெற்ற கோர வீதி விபத்துடன் தொடர்புடைய 'பிரைம்மூவர்' இழுவை வாகனத்தை விபத்து நடந்த இடத்திலிருந்து மீட்டு அப்புறப்படுத்தும் நடவடிக்கைகள் மேற்கொள்ளப்படவுள்ளமையினாலேயே வீதி இவ்வாறு மூடப்படவுள்ளது.

எனவே, குறித்த காலப்பகுதியில் சாரதிகள் மாற்று வழிகளைப் பயன்படுத்துமாறு பொலிஸார் கேட்டுக்கொண்டுள்ளனர்.

இதற்கமைய, கண்டியிலிருந்து மாத்தளை நோக்கிப் பயணிக்கும் வாகனங்கள் கட்டுகஸ்தோட்ட, மடவள, வத்தேகம, உகுவலை மற்றும் எல்வள ஊடாகப் பயணித்து மீண்டும் A9 வீதியை அடைய முடியும்.

அதேபோன்று, மாத்தளையிலிருந்து கண்டி நோக்கிப் பயணிக்கும் கனரக வாகனங்கள் எல்வள, உகுவலை, வத்தேகம, மடவள மற்றும் கட்டுகஸ்தோட்ட ஊடாகப் பயணிக்க வேண்டும்.

மேலும், இலகுரக வாகனங்கள் அலவத்துகொட, ஓவிஸ்ஸ, பூஜாபிட்டிய மற்றும் அம்பதென்ன ஊடாக கட்டுகஸ்தோட்டவைச் சென்றடைந்து அங்கிருந்து கண்டி திசையை நோக்கிப் பயணிக்க முடியும் எனப் பொலிஸார் தெரிவித்துள்ளனர்.

குறித்த காலப்பகுதியில் ஏற்படக்கூடிய போக்குவரத்து நெரிசலைக் குறைத்துக் கொள்ளும் வகையில், குறிப்பிடப்பட்டுள்ள மாற்று வழிகளைப் பயன்படுத்துமாறு பொலிஸார் சாரதிகளிடமும் பொதுமக்களிடமும் கோரிக்கை விடுத்துள்ளனர்.

இலங்கையை விட்டு விலகுகிறது குறைந்த அழுத்தப் பிரதேசம்! - புதிதாக ஒன்று உருவாகும் சாத்தியம்

2026-10-22T18:59:47.541+05:30

இலங்கைக்கு அண்மையாக உருவான குறைந்த அழுத்தப் பிரதேசம் தற்போது மேற்கு திசையில் நாட்டை விட்டு விலகி நகர்ந்து கொண்டிருப்பதாக வளிமண்டலவியல் திணைக்களம் தெரிவித்துள்ளது.

எவ்வாறாயினும், இந்தத் தொகுதியின் தாக்கம் நாளையும் தொடர்ந்து காணப்படும் என எதிர்பார்க்கப்படுகிறது.

அதன்படி, நாளைய தினம் மேல், சப்ரகமுவ, மத்திய, வட மற்றும் வடமேல் மாகாணங்களிலும் அனுராதபுரம் மாவட்டத்திலும் இடைக்கிடையே மழை அல்லது இடியுடன் கூடிய மழை பெய்யக் கூடிய சாத்தியம் காணப்படுவதுடன், இந்தப் பிரதேசங்களில் சில இடங்களில் 100 மில்லி மீற்றருக்கும் அதிகமான பலத்த மழைவீழ்ச்சி எதிர்பார்க்கப்படுகிறது.

நாட்டின் ஏனைய பிரதேசங்களில் பிற்பகல் ஒரு மணிக்குப் பின்னர் மழை அல்லது இடியுடன் கூடிய மழை பெய்யக் கூடும் என்பதுடன், சில இடங்களில் 75 மில்லிமீற்றருக்கும் அதிக அளவான பலத்த மழைவீழ்ச்சி பதிவாகலாம்.

இதேவேளை, நாளை (23) தென்கிழக்கு மற்றும் அதனை ஒட்டிய மத்திய கிழக்கு வங்காள விரிகுடா பகுதியில் மற்றுமொரு புதிய குறைந்த அழுத்தப் பிரதேசம் உருவாகக் கூடும் எனவும் வளிமண்டலவியல் திணைக்களம் எதிர்வுகூறியுள்ளது.

பின்னர் இது மேற்கு-வடமேற்கு திசையில் நகர்ந்து மேலும் தீவிரமடையக்கூடும் என்றும் எதிர்வு கூறப்பட்டுள்ளது.

முல்லைத்தீவில் மரணத்திலும் வாழ்வு கொடுத்த தாய்..

2026-10-21T23:08:17.915+05:30

முல்லைத்தீவு பகுதியில் இடம்பெற்ற மோட்டார் சைக்கிள் விபத்தில் காயமடைந்து மூளைச்சாவடைந்த தாய் ஒருவரின் இரண்டு சிறுநீரகங்களும் தானமாக வழங்கப்பட்டுள்ளன.

வவுனியா வைத்தியசாலையில் இடம்பெற்ற இந்த உறுப்பு தானத்தின் மூலம், இரண்டு நோயாளிகளுக்கு சிறுநீரகங்கள் பொருத்தப்பட்டு மறுவாழ்வு அளிக்கப்பட்டுள்ளது.

முல்லைத்தீவு - உடுப்புக்குளம் நான்காம் கட்டைப் பகுதியைச் சேர்ந்த 53 வயதுடைய சண்முகம் இந்திரா என்ற தாய், கடந்த பதினைந்தாம் திகதி தனது மகனுடன் மோட்டார் சைக்கிளில் மாஞ்சோலைப் பகுதியில் பயணித்துக் கொண்டிருந்தபோது, எதிர்பாராத விதமாகத் தவறி விழுந்து விபத்துக்குள்ளானார்.

குறித்த விபத்தில் தலையில் பலத்த காயமடைந்து சுயநினைவை இழந்த அவர், உடனடியாக அருகில் இருந்த வைத்தியசாலையில் அனுமதிக்கப்பட்ட நிலையில் மேலதிக தீவிர சிகிச்சைக்காக உடனடியாக யாழ் போதனா வைத்தியசாலையில் அனுமதிக்கப்பட்டார்.

அங்கு வழங்கப்பட்ட தீவிர சிகிச்சைகள் பலனளிக்காத நிலையில், அவர் வவுனியா வைத்தியசாலைக்கு மாற்றப்பட்டார்.

இந்த நிலையில், குடும்பத்தினரின் சம்மதத்துடன், அவரது இரண்டு சிறுநீரகங்களும் வவுனியா வைத்தியசாலையில் வைத்து தானமாக வழங்கப்பட்டன.