Newmannar.lk

டிஜிட்டல் யுகத்திற்கு ஏற்ப மாறும் சிறுவர் துஷ்பிரயோகம்!

2026-10-01T20:04:52.660+05:30

நாட்டில் இடம்பெறும் சிறுவர் துஷ்பிரயோகங்கள் டிஜிட்டல் யுகத்திற்கு ஏற்ப மாற்றமடைந்துள்ளதாக தேசிய சிறுவர் பாதுகாப்பு அதிகாரசபை தெரிவித்துள்ளது.

உலக சிறுவர் தினத்தை முன்னிட்டு வெளியிட்டுள்ள செய்தியிலேயே, அதன் தலைவர் பிரீதி இனோகா ரணசிங்க இதனைத் தெரிவித்துள்ளார்.

கடந்த சில ஆண்டுகளில் தேசிய சிறுவர் பாதுகாப்பு அதிகாரசபைக்கு கிடைத்த முறைப்பாடுகளை ஆய்வு செய்ததில் இது தெரியவந்துள்ளதாகவும் அவர் குறிப்பிட்டுள்ளார்.

குறிப்பாக, சிறுவர்கள் சமூக ஊடகங்களைப் பயன்படுத்துவதன் மூலம் வன்முறைக்குள்ளாகல், தொடர்ச்சியாக பாடசாலைக்குச் செல்லாமை அதிகரித்தல், தாய்மார்கள் வெளிநாடு செல்லுதல், குடும்பத் தகராறுகள் மற்றும் பெற்றோரின் விவாகரத்து, சிறுவர்கள் ஏனைய சிறுவர்களின் கண்ணியத்திற்குப் பாதிப்பு ஏற்படுத்தும் வகையில் செயற்படுதல் மற்றும் துஷ்பிரயோகங்களில் ஈடுபடத் தூண்டுதல் போன்ற பிரச்சினைகள் அதிகரிக்கும் போக்கினால் சிறுவர் துஷ்பிரயோகங்கள் அதிகரித்துள்ளமை அவதானிக்கப்பட்டுள்ளது.

மேலும், சிறுவர்கள் அதிகளவில் டிஜிட்டல் திரைகளைப் பயன்படுத்துவதால் அவர்களின் சிறுவர் பருவம் இழக்கப்படுவதோடு, கல்வியின் மீதான கவனமும் குறைகிறது. இவ்வாறான விடயங்களால் மனவலிமை மிக்க ஒரு பிள்ளையை உருவாக்குவது இன்று எம்மமுன்னுள்ள சவாலாக மாறியுள்ளது.

சிறுவர்களுக்கு எதிராக இடம்பெறும் அனைத்து வகையான துஷ்பிரயோகங்களிலிருந்தும் (உடலியல், பாலியல், உளவியல் மற்றும் புறக்கணிப்பு) அவர்களைப் பாதுகாப்பதும், இவ்வாறான துஷ்பிரயோகங்களுக்கு உள்ளான சிறுவர்களைப் பாதுகாப்பதும் தேசிய சிறுவர் பாதுகாப்பு அதிகாரசபையின் முதன்மைப் பொறுப்பாகும் என்பதுடன், அதற்காகத் தாம் எப்போதும் அர்ப்பணிப்புடன் செயற்படுவதாகவும் பிரீதி இனோகா ரணசிங்க அறிவித்துள்ளார்.

அத்துடன், சிறுவர் துஷ்பிரயோகச் சம்பவங்களை ஒருபோதும் எவராலும் சமரசத்திற்கு உட்படுத்த முடியாது எனவும், இவ்வாறான சம்பவங்கள் குறித்து தாமதிக்காமல் தேசிய சிறுவர் பாதுகாப்பு அதிகாரசபையின் '1929' என்ற சிறுவர் உதவி தொலைபேசி இலக்கத்திற்குத் தெரிவிக்குமாறும் தலைவர் கேட்டுக்கொண்டுள்ளார்.

சிறுவர்களைப் பாதுகாக்கும் முதன்மைப் பொறுப்பைத் தங்களது குடும்பத்திலிருந்தே தொடங்குமாறு கேட்டுக்கொள்வதுடன், அனைத்துச் சிறுவர்களையும் பாதுகாக்க நாம் அனைவரும் செயற்பட வேண்டும் எனவும் அவர் வலியுறுத்தியுள்ளார்

மன்னாரில் விவசாய நடவடிக்கைகளின் கணக்கெடுப்பு ஆரம்பம்.

2026-10-01T19:56:38.314+05:30

இலங்கை தொகை மதிப்பு புள்ளி விபரத் திணைக்களத்தினால் 10 வருடங்களுக்கு ஒரு முறை முன்னெடுக்கப்படுகின்ற குடிசன தொகை மதிப்பீட்டின் பின்னர் மேற்கொள்ளப்படுகின்ற பொருளாதார கணக்கெடுப்பின் முதலாவது நடவடிக்கையாக விவசாய நடவடிக்கைகளின் கணக்கெடுப்பு ஆரம்ப நிகழ்வு இன்று (1)வியாழக்கிழமை காலை மன்னாரில் ஆரம்பித்து வைக்கப்பட்டது.

மன்னார் பெரிய கடை கிராம அலுவலர் பிரிவில் இன்று வியாழக்கிழமை காலை 9.30 மணியளவில் ஆரம்பமான குறித்த நிகழ்வில் மன்னார் மாவட்ட அரசாங்க அதிபர் க.கனகேஸ்வரன் கலந்து கொண்டு ஆரம்பித்து வைத்தார்.

குறித்த ஆரம்ப நிகழ்வில் பிரதி திட்டமிடல் பணிப்பாளர்,மன்னார் மாவட்ட புள்ளி விபர திணைக்கள அதிகாரிகள்,விவசாய திணைக்கள உதவி பணிப்பாளர், உள்ளடங்களாக திணைக்கள தலைவர்களும் கலந்து கொண்டனர்.

ஆரம்ப நிகழ்வை தொடர்ந்து பெரிய கடை கிராம அலுவலர் பிரிவில் உள்ள வீடு ஒன்றுக்கு சென்ற அதிகாரிகள் பதிவுகளை வைபவ ரீதியாக ஆரம்பித்தமையும் குறிப்பிடத்தக்கது.

மன்னார் பஜார் பகுதியில் உள்ள 4 வர்த்தக நிலையங்களில் ஒரே நேரத்தில் கைவரிசையை காட்டிய திருடர்கள்.

2026-10-01T14:01:56.442+05:30

மன்னார் பஜார் பகுதியில் உள்ள 4 வர்த்தக நிலையங்களில் ஒரே நேரத்தில் இன்று(1) வியாழக்கிழமை அதிகாலை திருடர்கள் கைவரிசையை காட்டியுள்ளனர்.

இரண்டு நகைக்கடை மற்றும் இரண்டு ஆடை விற்பனை நிலையங்களில் கைவரிசையை காட்டியுள்ளனர்.

குறித்த வர்த்தக நிலையங்களுக்கு மேல் பகுதியால் குறையை உடைத்துக் கொண்டு உள்ளே சென்ற திருடர்கள் திருட்டு நடவடிக்கையில் ஈடுபட்டனர்.

இன்று (1) வியாழக்கிழமை காலை வர்த்தக நிலையங்களை திறந்து பார்த்த நிலையில் வர்த்தக நிலைய உரிமையாளர்களுக்கு தமது வர்த்தக நிலையங்களுக்கு உள்ளே திருடர்கள் நுழைந்தமை தெரிய வந்துள்ளது.

குறித்த நகைக்கடைகள் மற்றும் ஆடை விற்பனை நிலைய உரிமையாளர்கள் இன்று கால மன்னார் பொலிஸ் நிலையத்தில் முறைப்பாடு செய்த நிலையில் பொலிஸார் விசாரணைகளை முன்னெடுத்து வருகின்றனர்.

மன்னார் மாவட்ட மோட்டார் வாகன திணைக்களத்திற்கு ஒரு தொகுதி புதிய வாகன இலக்கத்தகடுகள் கிடைக்கப்பெற்றுள்ளன வாகன இலக்கத்தகடுகளைப் பெற்றுக்கொள்வது தொடர்பான அறிவித்தல்.

2026-09-30T20:09:55.939+05:30

வாகன இலக்கத்தகடுகளைப் பெற்றுக்கொள்வது தொடர்பான அறிவித்தல்

மன்னார் மாவட்ட மோட்டார் வாகன திணைக்களத்திற்கு 2026.09.29 ஆம் திகதி ஒரு தொகுதி புதிய வாகன இலக்கத்தகடுகள் கிடைக்கப்பெற்றுள்ளன.

அதற்குரிய வாகன இலக்கத்தகடுகளின் விபரங்கள் இணைக்கப்பட்டுள்ளன. எனவே, குறித்த வாகனங்களின் உரிமையாளர்கள் கீழே குறிப்பிடப்பட்டுள்ள தேவையான ஆவணங்களுடன் நேரில் வருகை தந்து, தங்களுக்குரிய வாகன இலக்கத்தகடுகளைப் பெற்றுக்கொள்ளுமாறு கேட்டுக்கொள்ளப்படுகின்றனர்.

தேவையான ஆவணங்கள்

1. வாகனப் பதிவுப் புத்தகத்தின் மூலப்பிரதி.

2. வாகனம் லீசிங் நிறுவனத்தில் இருப்பின், இரண்டு மாதங்களுக்குள் லீசிங் நிறுவனத்தினால் உறுதிப்படுத்தப்பட்ட வாகனப் பதிவுப் புத்தகத்தின் பிரதியொன்று.

3. வாகன உரிமையாளரின் தேசிய அடையாள அட்டை.

4. வாகனத்தின் பழைய இலக்கத்தகடு – உரிமை மாற்றம் செய்யப்பட்ட வாகனங்களுக்கு மட்டும்.

5. பழைய இலக்கத்தகடு தொலைந்திருந்தால், அது தொடர்பாக பொலிஸ் நிலையத்தில் செய்யப்பட்ட முறைப்பாட்டின் மூலப்பிரதி.

6. வாகன உரிமையாளர் நேரடியாக வருகை தருதல் கட்டாயமாகும்.

முக்கிய குறிப்பு

மேற்குறிப்பிட்ட ஆவணங்கள் அனைத்தும் உரிய முறையில் சமர்ப்பிக்கப்பட்ட பின்னரே வாகன இலக்கத்தகடு வழங்கப்படும்.

எனவே, சம்பந்தப்பட்ட அனைத்து வாகன உரிமையாளர்களும் உரிய ஆவணங்களுடன் வருகை தந்து தங்களுக்குரிய இலக்கத்தகடுகளைப் பெற்றுக்கொள்ளுமாறு கேட்டுக்கொள்ளப்படுகின்றனர்.

மோட்டார் வாகன திணைக்களம்

மன்னார் மாவட்டம்

திகதி: 2026.09.30

யாழில் திலீபன் சிலை அகற்றப்பட்ட விவகாரம்; வாய் திறந்தார் டக்ளஸ் தேவானந்தா

2026-09-30T19:58:35.532+05:30

யாழில் அகற்றப்பட்ட தியாகதீபம் திலீபனின் சிலை விவகாரம் தொடர்பில் அரசாங்கம் தனது நிலைப்பாட்டை தெளிவாக வெளிப்படுத்தியுள்ளதாக முன்னாள் அமைச்சர் டக்ளஸ் தேவானந்தா தெரிவித்துள்ளார்.

அந்த நிலைப்பாட்டின் அடிப்படையிலேயே அரசாங்கம் செயற்பட்டு வருவதாகவும், மறுபுறம் தமிழ் அரசியல் கட்சிகள் தமக்கிடையே குடுமிச் சண்டையில் ஈடுபட்டு வருவதாகவும் அவர் குறிப்பிட்டுள்ளார்.

தமிழ் அரசியல் கட்சிகள் குடுமிச் சண்டை

எனினும், இந்த விவகாரத்தை தான் தற்போது பெரிதாக அலட்டிக்கொள்ளவில்லை எனத் தெரிவித்த டக்ளஸ் தேவானந்தா, தனக்கான காலம் வரும்போது அதற்கான உரிய செயற்றிட்டத்தை முன்வைப்பேன் எனவும் கூறியுள்ளார்.

கடந்த காலங்களிலும் யாழ்ப்பாணம் மணிக்கூட்டு கோபுரப் பகுதியில் மும்மன்னர்களின் சிலை, உரும்பிராயில் பொன் சிவகுமாரனின் சிலை, முத்திரைச் சந்தியில் சங்கிலியனின் கம்பீரமான சிலை மற்றும் மடத்தகடியில் தனிகாசலம் அடிகளாரின் சிலை உள்ளிட்டவற்றை நிறுவுவதில் தான் நடவடிக்கை எடுத்துள்ளதாகவும் அவர் சுட்டிக்காட்டியுள்ளார்.

தமிழ் மக்களின் வரலாற்று அடையாளங்களைப் பாதுகாக்கும் விடயத்தில் கடந்த காலங்களில் தான் மேற்கொண்ட நடவடிக்கைகளையும் நினைவூட்டிய டக்ளஸ் தேவானந்தா, எதிர்காலத்திலும் உரிய நேரத்தில் அதற்கான நடவடிக்கைகளை முன்னெடுப்பேன் எனத் தெரிவித்துள்ளார்.

போதைப்பொருள் பற்றி அறிவிப்பதற்கான '1818' அவசர சேவை இனி 24 மணிநேரமும்!

2026-09-30T19:30:45.923+05:30

போதைப்பொருள் அச்சுறுத்தலை நாட்டில் இருந்து முற்றாக ஒழிப்பதற்காக முன்னெடுக்கப்படும் 'முழு நாடும் ஒன்றாக' தேசிய செயற்திட்டத்திற்கு அமைவாக அறிமுகப்படுத்தப்பட்ட 1818 என்ற அவசர அழைப்பு இலக்கம், தற்போது 24 மணிநேரமும் தடையின்றி இயங்குவதாக அரசாங்க தகவல் திணைக்களத்தின் பிரசாரப் பிரிவு அறிவித்துள்ளது.

'முழு நாடும் ஒன்றாக' பிரதான அலுவலகம் மற்றும் ஊடக மையத்தில் நிறுவப்பட்டுள்ள இந்த சேவை மூலம் நாடு முழுவதிலும் இடம்பெறும் போதைப்பொருள் கடத்தல், விநியோகம் அல்லது அது தொடர்பான சந்தேகத்திற்கிடமான எந்தவொரு நடவடிக்கை குறித்தும் பொதுமக்கள் துல்லியமான தகவல்களைப் பாதுகாப்புத் தரப்பினருக்கு வழங்க முடியும்.

நாட்டின் எந்தவொரு குடிமகனும் இந்தச் சேவையைப் பயன்படுத்த முடியும் என்பதுடன், தகவல் வழங்குபவர்களின் ரகசியத்தன்மை முழுமையாகப் பாதுகாக்கப்பட்டு, அளிக்கப்படும் தகவல்கள் மீது உடனடியாக நடவடிக்கைகள் எடுக்கப்படும் என உறுதி அளிக்கப்பட்டுள்ளது.

ஜனாதிபதி செயலகம் மற்றும் 'முழு நாடும் ஒன்றாக' தேசிய செயல்பாட்டுக் குழுவின் நேரடி மேற்பார்வையின் கீழ் இயங்கும் இந்தச் சேவை மூலம், பொதுமக்கள் எந்த நேரத்திலும் பாதுகாப்பான முறையில் பாதுகாப்புப் படையினருக்குத் தகவல்களை வழங்க முடியும் என அரசாங்கம் மேலும் தெரிவித்துள்ளது.

ஈராக்கில் இருந்து முழுமையாக வௌியேறும் அமெரிக்க படைகள்

2026-09-30T19:17:10.864+05:30

20 ஆண்டுகளுக்கு பின் ஈராக்கில் இருந்து அமெரிக்கப் படைகள் முழுதும் வெளியேறுவது அண்டை நாடான ஈரானுக்கு மகிழ்ச்சியை ஏற்படுத்தினாலும், ஈராக்கின் உள்நாட்டு பாதுகாப்பு கேள்விக்குறியாகும் சூழல் உருவாகியுள்ளது.

அணு ஆயுதங்கள் மற்றும் இரசாயன ஆயுதங்கள் போன்ற பேரழிவு ஆயுதங்களை ரகசியமாக தயாரிப்பதாகக் கூறி, மேற்காசிய நாடான ஈராக் மீது, 2003ல் அமெரிக்கா போர் தொடுத்தது.

கைது செய்யப்பட்ட ஈராக் அதிபராக இருந்த சதாம் உசைன், 2006ல் துாக்கிலிடப்பட்டார்.

ஈராக் உடனான போருக்கு பின் அந்நாட்டின் பாதுகாப்பு மற்றும் பிற காரணங்களுக்காக அமெரிக்க படைகள் அங்கேயே தங்கி இருந்தன.

இந்நிலையில், அமெரிக்காவில் கடந்த முறை ஜனாதிபதியாக இருந்த ஜோ பைடன் தலைமையிலான அரசின் காலத்தில், ஈராக்கில் இருந்து அமெரிக்க படைகள் படிப்படியாக வெளியேறும் என அறிவிக்கப்பட்டது.

அப்போது நடைமுறைப்படுத்தப்பட்ட இந்த வெளியேற்றம் தற்போது இறுதிக் கட்டத்தை எட்டியுள்ளது. அமெரிக்கப் படைகள் முழுதும் இன்று வெளியேற முடிவு செய்யப்பட்டுள்ளது.

இது மேற்காசிய நாடுகளின் அரசியலில் மிகப்பெரிய மாற்றங்களை ஏற்படுத்தும் என கூறப்படுகிறது.

அமெரிக்கப் படைகளின் வெளியேற்றத்தை ஈரானும் அதன் ஆதரவு பெற்ற ஆயுதக் குழுக்களும் மிகப் பெரிய வெற்றியாக கொண்டாடுகின்றன.

முக்கிய தளமான அல் அசாத் விமானப்படை தளம் உள்ளிட்டவற்றில் இருந்து அமெரிக்க படைகள் வெளியேறுவதால், ஈராக் மீதான தன் அரசியல், பொருளாதார மற்றும் பாதுகாப்பு செல்வாக்கை ஈரான் மேலும் விரிவுபடுத்தக்கூடும் என கூறப்படுகிறது.

மேலும், ஈராக்கின் பாதுகாப்பில் ஒரு வெற்றிடம் உருவாகலாம் என சர்வதேச ஆய்வாளர்கள் கவலை தெரிவிக்கின்றனர்.

இதைப் பயன்படுத்தி ஐ.எஸ்., போன்ற தீவிரவாத அமைப்புகள் மீண்டும் தலையெடுக்க வாய்ப்புள்ளதாகவும், வடக்கில் உள்ள குர்ஷித் தன்னாட்சி பகுதிக்கு வெளிப்படையான அச்சுறுத்தல்கள் அதிகரிக்கலாம் எனவும் அஞ்சப்படுகிறது.

மெரிக்கப்படைகள் வெளியேறுவதால், ஈராக் அரசு சொந்த நாட்டை காப்பாற்றிக் கொள்ள பல்வேறு தலையீடுகளை சமாளிக்க வேண்டிய கடினமான சூழ்நிலை உருவாகியுள்ளது.

யாழ்ப்பாணம், கிளிநொச்சி, உட்பட பல மாவட்டங்க்களுக்கு வெப்ப காலநிலை எச்சரிக்கை

2026-09-29T20:30:00.129+05:30

வெப்பமான காலநிலை குறித்து வானிலை ஆய்வு மையம் எச்சரிக்கை அறிவிப்பு ஒன்றை வெளியிட்டுள்ளது.

இதன்படி, வட மத்திய மற்றும் கிழக்கு மாகாணங்கள் மற்றும் யாழ்ப்பாணம், கிளிநொச்சி, முல்லைத்தீவு, வவுனியா, மொனராகலை மற்றும் ஹம்பாந்தோட்டை ஆகிய மாவட்டங்களுக்கு இந்த எச்சரிக்கை பொருந்தும் என தெரிவிக்கப்பட்டுள்ளது.

இன்று (29) மாலை 4:00 மணிக்கு வெளியிடப்பட்ட இந்த எச்சரிக்கை, நாளை மாலை 4:00 மணி வரை நடைமுறையில் இருக்கும் எனவும் தெரிவிக்கப்பட்டுள்ளது.

வட-மத்திய மற்றும் கிழக்கு மாகாணங்களின் சில பகுதிகளிலும், யாழ்ப்பாணம், கிளிநொச்சி, முல்லைத்தீவு, வவுனியா, மொனராகலை மற்றும் அம்பாந்தோட்டை மாவட்டங்களிலும் பகல் வேளையில், மனித உடல் உணரும் வெப்பத்தின் அளவு (heat index) எச்சரிக்கையுடன் இருக்க வேண்டிய நிலையை எட்டக்கூடும் என்று அந்த அறிவிப்பில் குறிப்பிடப்பட்டுள்ளது.

சமூக ஊடகங்களில் பகிரப்படும் சிறுவர்களின் படங்கள் குறித்து எச்சரிக்கை

2026-09-29T19:06:52.287+05:30

பேஸ்புக் மற்றும் பிற சமூக ஊடக தளங்கள் மூலம் பணம் சம்பாதிக்கக்கூடிய நடைமுறைகள் அறிமுகப்படுத்தப்பட்டதைத் தொடர்ந்து, பெற்றோர்களின் அனுமதியுடனோ அல்லது அனுமதியின்றியோ சிறுவர்களின் புகைப்படங்களையும் காணொளிகளையும் இணையத்தில் பதிவேற்றும் செயற்பாடுகள் வேகமாக அதிகரித்து வருகின்றன.

சிறுவர்களின் திறமைகளை வெளிப்படுத்துவதாகவும் அவர்களின் சுவாரஸ்யமான செயல்களைப் பாராட்டுவதாகவும் கூறிக்கொண்டு, பல்வேறு நபர்களும் அமைப்புகளும் இத்தகைய காணொளிகளை வணிக நோக்கங்களுக்காகப் பயன்படுத்துவது அவதானிக்கப்பட்டுள்ளது.

இத்தகைய காணொளிகள் மற்றும் விலொக்ஸ் மூலம் சிறுவர்களின் அன்றாட வாழ்க்கை அந்நியர்களுக்கு வெளிப்படுத்தப்படுவது அவர்களின் தனிப்பட்ட பாதுகாப்பிற்கு கடுமையான ஆபத்தை ஏற்படுத்தக்கூடும்.

மேலும், செயற்கை நுண்ணறிவு தொழில்நுட்பத்தைப் பயன்படுத்தி, பொருத்தமற்ற அல்லது பாலியல் ரீதியான உள்ளடக்கங்களை உருவாக்க இணையத்தில் பதிவேற்றப்பட்ட புகைப்படங்களும் காணொளிகளும் மூலங்களாகப் பயன்படுத்தப்படக்கூடிய அபாயமும் உள்ளது.

எனவே, இதுபோன்ற ஆபத்தான சூழ்நிலைகளிலிருந்து சிறுவர்களைப் பாதுகாப்பதற்காக, சமூக ஊடகங்களைப் பயன்படுத்தும்போது பெற்றோர்களும் சிறுவர்களின் பராமரிப்பு மற்றும் பாதுகாப்பிற்குப் பொறுப்பான அனைவரும் அதிக விழிப்புணர்வுடனும் பொறுப்புடனும் செயல்படுமாறு இதன் மூலம் அறிவுறுத்தப்படுகிறார்கள்

அனோஜன் விவகாரத்தில் அரசாங்கம் எடுத்துள்ள முக்கிய நடவடிக்கைகள்!

2026-09-29T18:43:45.287+05:30

சவூதி அரேபியாவில் மரண தண்டனை விதிக்கப்பட்டுள்ள சிவராசா அனோஜனைக் காப்பாற்றுவதற்காக அரசாங்கம் அனைத்து சாத்தியமான நடவடிக்கைகளையும் எடுத்து வருவதாக அமைச்சரவைப் பேச்சாளர் அமைச்சர் நளிந்த ஜயதிஸ்ஸ தெரிவித்துள்ளார்.

இன்று (29) நடைபெற்ற அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில் கலந்துகொண்டு கருத்துத் தெரிவிக்கையிலேயே அவர் இதனைத் தெரிவித்தார்.

அவர் மேலும் கூறுகையில், சவூதி மன்னருக்குக் கோரிக்கை கடிதம் ஒன்றை அனுப்புவதற்காக மாலைத்தீவின் முன்னாள் ஜனாதிபதியின் உதவியும் எதிர்பார்க்கப்பட்டுள்ளது.

இதற்காக சட்டத்தரணிகளான உபுல் குமாரப்பெரும மற்றும் பைஸர் முஸ்தபா ஆகியோர் இதில் பங்கெடுத்துள்ளனர். இதன் மூலமும் சவூதி மன்னரிடம் இந்தக் கோரிக்கை முன்வைக்கப்படவுள்ளது.

அத்துடன், ஜனாதிபதியின் கோரிக்கையையும், பாராளுமன்றத்தின் ஆளுங்கட்சி மற்றும் எதிர்க்கட்சி உறுப்பினர்கள் அனைவரினதும் கையொப்பங்களையும் உள்ளடக்கிய கடிதம் ஒன்றையும் சவூதி மன்னருக்குச் சமர்ப்பிக்கவும் எதிர்பார்க்கப்பட்டுள்ளது.

மேலும், ஐக்கிய நாடுகள் பொதுச்சபைக் கூட்டத்தொடரின் போது, வெளிவிவகார அமைச்சர் விஜித ஹேரத் சவூதி அரேபிய வெளிவிவகார அமைச்சரைச் சந்தித்து இது தொடர்பாகக் கலந்துரையாடவுள்ளார்.

இவ்வாறாக ராஜதந்திர மட்டத்தில் முன்னெடுக்கப்பட வேண்டிய அனைத்துக் நடவடிக்கைகளும் தற்போது தீவிரமாக நடைபெற்று வருகின்றன.

"இந்தச் சம்பவம் நடந்த நாளிலிருந்தே தூதரகம் தேவையான இராஜதந்திர மற்றும் சட்ட நடவடிக்கைகளில் தலையிட்டு வருகிறது. இங்கு நாம் வேறொரு நாட்டில் உள்ள சட்டத்திற்கு உட்பட்டே செயல்பட வேண்டியுள்ளது. அங்கு இரண்டு மேன்முறையீடுகள் தாக்கல் செய்யப்பட்டன; ஒன்று இலங்கை இளைஞர் சார்பாகவும், மற்றொன்று சவூதி அரசாங்கத்தின் சார்பாகவும் தாக்கல் செய்யப்பட்டன.

அந்த இரண்டு மேன்முறையீடுகளையும் பரிசீலித்தே இந்தத் தீர்ப்பு வழங்கப்பட்டுள்ளது. அவரது உயிரைக் காப்பாற்றி அவரை மீண்டும் இலங்கைக்கு அழைத்து வர நாங்கள் எங்களால் இயன்ற அனைத்து வழிகளிலும் முயற்சி செய்து வருகிறோம்" என அமைச்சர் மேலும் சுட்டிக்காட்டினார்.

பாடசாலை நேரம் மாற்றப்படுகிறதா?

2026-09-29T18:38:36.021+05:30

அரசாங்கம் எந்தவொரு அரச பாடசாலையையும் தன்னிச்சையாக மூடுவதற்கு நடவடிக்கை எடுக்கவில்லை என்றும், மாணவர் எண்ணிக்கை குறைவாக உள்ள பாடசாலைகள் குறித்து அறிவியல் பூர்வமான ஆய்வுகள் மட்டுமே மேற்கொள்ளப்பட்டு வருவதாகவும் அமைச்சரவைப் பேச்சாளர் அமைச்சர் நளிந்த ஜயதிஸ்ஸ தெரிவித்துள்ளார்.

அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில், பாடசாலைகளை மூடுவது, கல்வி மறுசீரமைப்புகள் மற்றும் பாடசாலை நேர மாற்றம் குறித்து எழுப்பப்பட்ட கேள்விகளுக்குப் பதிலளிக்கையிலேயே அவர் இதனைத் தெளிவுபடுத்தினார்.

எந்தவொரு பாடசாலையையும் உடனடியாக மூடும் எண்ணம் அரசாங்கத்திற்கு இல்லை என்றும், கடந்த பல வருடங்களாக மாணவர்களின் எண்ணிக்கை தொடர்ச்சியாகக் குறைந்து வரும் பாடசாலைகள் தொடர்பிலேயே கவனம் செலுத்தப்பட்டு வருவதாகவும் அமைச்சர் சுட்டிக்காட்டினார்.

60 அல்லது 70 வருடங்களுக்கு முன்னர் அமைக்கப்பட்ட சில பாடசாலைகளின் அமைவிடமும், தற்போதைய மக்கள் தொகை பரம்பலும் வேறுபட்டுள்ளன.

மாணவர்கள் மிகக் குறைவாக உள்ள பாடசாலைகள் குறித்துக் கோட்ட மற்றும் வலய மட்டத்தில் அறிக்கைகள் கோரப்பட்டு ஆய்வுகள் முன்னெடுக்கப்பட்டு வருகின்றன.

பாடசாலையை வெறுமனே திறந்து வைப்பதை விட, நாட்டிலுள்ள ஒவ்வொரு பிள்ளைகளுக்கும் தரமான மற்றும் வசதிகள் நிறைந்த கல்வியை உறுதி செய்வதே அரசாங்கத்தின் பிரதான நோக்கமாகும் எனவும் அவர் குறிப்பிட்டார்.

அத்துடன் கல்வி அமைப்பில் நிலவும் ஆசிரியர் பற்றாக்குறைக்குத் தீர்வாக மிக விரைவில் 3,000 புதிய ஆசிரியர்களைக் கல்வி அமைப்பில் இணைத்துக் கொள்ள நடவடிக்கை எடுக்கப்பட்டு வருவதாகவும், இதன் மூலம் ஆசிரியர் பற்றாக்குறைக்குக் கணிசமான தீர்வு கிடைக்கும் என்றும் அமைச்சர் தெரிவித்தார்.

கல்வி மறுசீரமைப்பு என்பது பாடத்திட்டங்களை மாற்றுவதுடன் மட்டும் நின்றுவிடாமல், பாடசாலைகளுக்குத் தேவையான பௌதிக மற்றும் மனித வளங்களை வழங்குதல், கல்வி நிர்வாகக் கட்டமைப்பில் சீர்திருத்தங்களை மேற்கொள்தல் மற்றும் மதிப்பீட்டு முறைகளை நவீனமயமாக்கல் உள்ளிட்ட அனைத்துக் காரணிகளையும் உள்ளடக்கியதாகவே அமையும்.

இதற்கமைய, 2027 ஆம் ஆண்டளவில் 1, 2 மற்றும் 6 ஆம் தரங்களுக்கான புதிய பாடத்திட்ட மறுசீரமைப்புகள் அமுல்படுத்தப்படும் எனவும் அவர் விளக்கமளித்தார்.

மேலும் பாடசாலை ஆரம்பிக்கும் மற்றும் முடிவடையும் நேரத்தை மாற்றுவது தொடர்பாகத் தற்போது கல்வி அமைச்சினால் தயாரிக்கப்பட்டுள்ள அறிக்கைகள் தொடர்பில் எந்தக் கலந்துரையாடலும் இடம்பெறவில்லை என்றும், இது குறித்துக் கல்வி அமைச்சு எதிர்காலத்தில் ஏதேனும் தீர்மானம் எடுத்தால் அது முறைப்படி அறிவிக்கப்படும் என்றும் அமைச்சர் நளிந்த ஜயதிஸ்ஸ மேலும் தெரிவித்தார்.

மன்னார் Soft Ball Premier League 2027 – புதிய அணி உரிமையாளர்களுக்கான விண்ணப்பங்கள்!

2026-09-29T15:03:46.606+05:30

மன்னார் Soft Ball Premier League (MSPL) இன் முதல் சீசன் பிரமாண்டமாக இடம்பெற்று பலரது பாராட்டுகளையும் பெற்றிருந்த நிலையில், தற்போது அதன் இரண்டாவது சீசனான MSPL 2027 தொடருக்கான ஆரம்பக்கட்ட நடவடிக்கைகள் முன்னெடுக்கப்பட்டு வருகின்றன.

இதன் ஒரு பகுதியாக, புதிய அணிகளை கொள்வனவு செய்ய ஆர்வமுள்ள அணி உரிமையாளர்களுக்கான விண்ணப்ப விநியோகம் ஆரம்பிக்கப்பட்டுள்ளது.

MSPL 2027 தொடரில் மேலும் 4 புதிய அணி உரிமையாளர்கள் தெரிவு செய்யப்படவுள்ளனர்.

விண்ணப்பங்களைப் பெற்றுக்கொள்ளும் ஆர்வமுள்ளவர்கள், பூர்த்தி செய்யப்பட்ட விண்ணப்பங்களை ஒக்டோபர் 3 திகதி மாலை 5.00 மணிக்கு முன்னதாக சமர்ப்பிக்குமாறு அறிவிக்கப்பட்டுள்ளது.

மேலதிக விபரங்கள் விண்ணப்பப் படிவத்தில் குறிப்பிடப்பட்டுள்ளதுடன், விண்ணப்பப் படிவங்களை AA Sports அலுவலகத்தில் பெற்றுக்கொள்ள முடியும் எனவும் அறிவிக்கப்பட்டுள்ளது

மன்னார் மூன்றாம்பிட்டியில் பிரபல உணவகத்தில் வாங்கிய வடையில் வெட்டுக்கிளி

2026-09-29T14:47:08.128+05:30

மன்னார் மாந்தை மேற்கு சுகாதார வைத்திய அதிகாரி பணிமனை க்கு உட்பட்ட – மூன்றாம் பிட்டி பகுதியில் உள்ள பிரபல உணவகம் ஒன்றில் வாங்கப்பட்ட வடையில் வெட்டுக்கிளி ஒன்று காணப்பட்ட சம்பவம் அதிர்ச்சியை ஏற்படுத்தியுள்ளது.

குறித்த உணவகத்தில் வாங்கப்பட்ட வடையை சாப்பிட முற்பட்ட வேளையில் வடையுடன் வெட்டுக்கிளி ஒன்று இருந்ததாக தெரிவிக்கப்படுகிறது.

இதேவேளை, நேற்று முன்தினம் மன்னார் நகர் பகுதியில் வாங்கப்பட்ட முட்டை ரொட்டியில் இரும்புக் கம்பி துண்டு காணப்பட்ட சம்பவம் பெரும் அதிர்ச்சியை ஏற்படுத்தியிருந்த நிலையில், இன்று மற்றொரு உணவுப் பொருளில் வெட்டுக்கிளி காணப்பட்டுள்ளமை மக்கள் மத்தியில் கவலையை ஏற்படுத்தியுள்ளது.

இதையடுத்து, மாந்தை மேற்கு பொது சுகாதார வைத்திய அதிகாரி பணிமனையினர் இவ்விடயம் தொடர்பில் விரைவான நடவடிக்கை எடுக்க வேண்டும் என கோரிக்கை முன்வைக்கப்பட்டுள்ளது.

மேலும், மன்னார் மாவட்டத்தில் உள்ள உணவகங்களின் உணவுத் தரம் மற்றும் சுகாதார நிலைமைகள் தொடர்பாக உரிய முறையில் கண்காணிப்பு மேற்கொள்ள வேண்டும் எனவும் பொதுமக்கள் கோரிக்கை விடுத்துள்ளனர்.

பொது மக்களின் சுகாதாரத்தை கருத்திற்கொண்டு, உணவகங்களில் சுகாதார நடைமுறைகள் முறையாக பின்பற்ற படுகின்றனவா என்பதை சம்பந்தப்பட்ட அதிகாரிகள் தீவிரமாக கண்காணிக்க வேண்டும் எனவும் வலியுறுத்தப்பட்டுள்ளது.

யாழில் இன்று இடம்பெற்ற கோர விபத்தில் பறிபோன பூசகர் உயிர்

2026-09-28T20:52:03.597+05:30

யாழ்ப்பாணம் வல்லை வெளி வீதியில் இடம்பெற்ற விபத்தில் பூசகர் ஒருவர் பரிதாபகரமாக உயிரிழந்துள்ளார்.

இன்று (28)இடம்பெற்ற விபத்தில் கெருடாவில் பகுதியைச் சேர்ந்த பூசகர் ஒருவர் பரிதாபகரமாக உயிரிழந்துள்ளதாக தெரிவிக்கப்படுகின்றது.

சைக்கிளில் பயணித்த பூசகர்

யாழ்ப்பாணம் - பருத்தித்துறை பிரதான வீதியில் மோட்டார் சைக்கிளில் பயணித்த பூசகர், வல்லை முனியப்பர் ஆலயத்தில் வழிபாடுகளை முடித்துவிட்டு வீதியை நோக்கி வந்த இளைஞருடன் மோதி வீதியில் விழுந்துள்ளார்.

இதன்போது, அவருக்கு பின்னால் வந்த வாகனம் ஒன்று பூசகர் மீது மோதியதில் அவர் சம்பவ இடத்திலேயே உயிரிழந்தார்.

MP அர்ச்சுனா உள்ளிட்ட 6 பேருக்கு சமூக வலைத்தள தடை!

2026-09-28T20:43:55.692+05:30

கல்முனை ஆதார வைத்தியசாலை வைத்திய அத்தியட்சகர் வைத்தியர் கு. சுகுணன் மற்றும் அவரது குடும்பத்தினர் தொடர்பில் சமூக வலைத்தளங்களில் பதிவுகளை வெளியிடுவதற்கு பாராளுமன்ற உறுப்பினர் அர்ச்சுனா இராமநாதன், முன்னாள் இராஜாங்க அமைச்சர் எச்.எம்.எம். ஹரீஸ் உள்ளிட்ட ஆறு பேருக்கு மட்டக்களப்பு நீதிவான் நீதிமன்றம் இன்று (28) இடைக்காலத் தடை உத்தரவு பிறப்பித்துள்ளது.

வைத்தியர் சுகுணன் மற்றும் அவரது குடும்பத்தினர் தொடர்பில் வழக்கு முடிவடையும் வரை பேஸ்புக் உள்ளிட்ட சமூக வலைத்தளங்களில் பதிவுகளை வெளியிடக்கூடாது என நீதிமன்றம் உத்தரவிட்டுள்ளது.

வழக்கு முடிவடையும் வரை பதிவுகளை வெளியிடக்கூடாது

கல்முனை ஆதார வைத்தியசாலையில் சுகாதாரப் பணி உதவியாளர்களுக்கான நியமனங்கள் மற்றும் அவர்களின் ஆடை தொடர்பில் ஏற்பட்ட சர்ச்சையைத் தொடர்ந்து, வைத்தியர் சுகுணன் மற்றும் அவரது குடும்பத்தினர் தொடர்பில் சமூக வலைத்தளங்களில் அவதூறான கருத்துகள் பதிவிடப்பட்டதாக குற்றச்சாட்டு முன்வைக்கப்பட்டது.

இதுதொடர்பில் அர்ச்சுனா இராமநாதன், முன்னாள் இராஜாங்க அமைச்சர் எச்.எம்.எம். ஹரீஸ் உள்ளிட்ட ஆறு பேருக்கு எதிராகவும், யூரியூப் மற்றும் பேஸ்புக் தளங்களுக்கு எதிராகவும் நிகழ்நிலை காப்புச் சட்டத்தின் கீழ் வழக்குத் தாக்கல் செய்யப்பட்டது.

வழக்கு இன்று மீண்டும் விசாரணைக்கு எடுத்துக்கொள்ளப்பட்டபோது, ஆறு பேருக்கும் இடைக்காலத் தடை உத்தரவைப் பிறப்பித்த நீதிவான் அண்ணாதுரை தர்ஷினி, அனைவரையும் எதிர்வரும் ஒக்டோபர் 12ஆம் திகதி நீதிமன்றில் முன்னிலையாகுமாறும் உத்தரவிட்டார்.

நாளை முதல் கொழும்பு முழுவதும் மெட்ரோ பஸ் சேவை!

2026-09-28T20:16:43.136+05:30

கொழும்பு நகரம் முழுவதும் நாளை (29) முதல் மெட்ரோ பஸ் (Metro Bus) சேவையை விரிவுபடுத்த நடவடிக்கை எடுக்கப்பட்டுள்ளதாகப் போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க தெரிவித்துள்ளார்.

ஜனாதிபதியின் தலைமையில் முன்னெடுக்கப்படும் இந்த வேலைத்திட்டத்தின் கீழ் 121 பஸ்கள் சேவையில் இணைக்கப்படவுள்ளதாகவும் அமைச்சர் குறிப்பிட்டார்.

போக்குவரத்துப் பாதுகாப்பு மற்றும் பொதுப் போக்குவரத்துச் சேவையை மேம்படுத்துவதற்காகச் செயல்படுத்தப்படும் தேசிய வேலைத்திட்டம் தொடர்பான விசேட செய்தியாளர் சந்திப்பிலேயே அவர் இதனைத் தெரிவித்தார்.

தனியார் வாகனங்களின் பயன்பாட்டைக் குறைத்து, பொதுப் போக்குவரத்துச் சேவைகளைப் பயன்படுத்துவதற்கு மக்களை அதிகளவில் ஊக்குவிப்பதே இந்த வேலைத்திட்டத்தின் முக்கிய நோக்கமாகும் என அவர் தெரிவித்தார்.

இதனிடையே, பஸ்களுக்கான பஸ் முன்னுரிமை ஒழுங்கை (Bus Priority Lane) முறைமை முன்னதாக இலங்கை பொலிஸாரால் அறிமுகப்படுத்தப்பட்ட போதிலும், பல்வேறு காரணங்களினால் அதனைத் தொடர்ச்சியாக நடைமுறைப்படுத்த முடியாமல் போனதாகவும் அமைச்சர் சுட்டிக்காட்டினார்.

மெட்ரோ பஸ் சேவையின் மூலம் குறிப்பிட்ட நேரத்துக்கு இயங்கும், அனைத்து இடங்களிலும் நிறுத்தப்படாத, சட்டத்தை மதிக்கக்கூடிய சாரதிகள் மற்றும் நடத்துநர்களைக் கொண்ட முறையான பஸ் சேவையை வழங்க நடவடிக்கை எடுக்கப்பட்டுள்ளதாக அவர் கூறினார்.

அதற்கமைய, பஸ்களுக்கான முன்னுரிமை ஒழுங்கை முறைமையை நடைமுறைப்படுத்துவதற்கு இது மிகவும் பொருத்தமானது என அடையாளம் காணப்பட்டுள்ளதாகவும் அமைச்சர் குறிப்பிட்டார்.

காலை 6 மணி முதல் 9 மணி வரை ஒரு திசையிலும், பிற்பகல் 4 மணி முதல் இரவு 7 மணி வரை மறு திசையிலும், வீதியிலுள்ள மூன்று வழிகளில் ஒரு வழி, பொதுப்போக்குவரத்து பஸ்களுக்காக ஒதுக்குவதற்கு நடவடிக்கை எடுக்கப்படும் என்றும் அவர் மேலும் தெரிவித்தார்.

அனோஜனின் விடுதலைக்காக இந்திய உயர்ஸ்தானிகர், அமெரிக்கத் தூதரக அதிகாரியை சந்தித்த தமிழரசுக் கட்சி!

2026-09-28T19:44:03.208+05:30

சவூதி அரேபியாவில் மரண தண்டனையை எதிர்நோக்கியுள்ள அனோஜனின் விடுதலைக்கான முயற்சிகளை முன்னெடுக்கும் வகையில், இன்று (23) இந்திய உயர்ஸ்தானிகர் சந்தோஷ் ஜா (Santosh Jha) மற்றும் இலங்கைக்கான அமெரிக்கத் தூதரகத்தின் அரசியல் மற்றும் பொருளாதார ஆலோசகர் Anthony V. Pirnot ஆகியோரை இலங்கைத் தமிழரசுக் கட்சியின் பாராளுமன்ற உறுப்பினர்கள் சந்தித்துக் கலந்துரையாடினர்.

இலங்கைத் தமிழரசுக் கட்சியின் பாராளுமன்றக் குழுக் கூட்டத்தில் எடுக்கப்பட்ட தீர்மானத்தின் அடிப்படையில், பாராளுமன்றக் குழுத் தலைவர் சாணக்கியன் இராசமாணிக்கம் மற்றும், தமிழரசுக் கட்சியின் பாராளுமன்ற உறுப்பினர்கள் இச்சந்திப்புகளில் கலந்துகொண்டனர்.

இதன்போது, சவூதி அரேபியாவில் மரண தண்டனையை எதிர்நோக்கியுள்ள அனோஜனின் விடுதலை தொடர்பாகவும், அவரை மீட்பதற்காக மேற்கொள்ளப்பட வேண்டிய இராஜதந்திர நடவடிக்கைகள் மற்றும் அடுத்தகட்ட முயற்சிகள் குறித்தும் விரிவாகக் கலந்துரையாடப்பட்டது.

அனோஜனின் உயிரைக் காப்பாற்றுவதற்கான அவசரத் தேவையை முன்னிறுத்தி, சம்பந்தப்பட்ட தரப்புகளுடன் ஒருங்கிணைந்து உரிய நடவடிக்கைகளை முன்னெடுப்பதன் முக்கியத்துவம் குறித்தும் இச்சந்திப்பின்போது கவனம் செலுத்தப்பட்டுள்ளது.

'நாட்டை கட்டியெழுப்பும் இளைஞர் சக்தி' என்ற தொனிப்பொருளில், மாந்தை மேற்கு பிரதேச செயலாளர் பிரிவில் முன்னெடுக்கப்பட்ட மோட்டார் சைக்கிள் பேரணி

2026-09-28T19:35:13.653+05:30

'நாட்டை கட்டியெழுப்பும் இளைஞர் சக்தி' என்ற தொனிப்பொருளில், நாடு தழுவிய ரீதியில் தேசிய மக்கள் சக்தி கட்சியின் சோசலிச இளைஞர் சங்கத்தால் இளைஞர்களை ஒழுங்குபடுத்தி நாட்டிற்கு தேவையான இளம் தலை முறைகளை வெளிக்கொண்டுவரும் ஒரு பாரிய செயற்திட்டத்தை முன்னெடுத்து வரும் நிலையில் இன்று (28) திங்கட்கிழமை மாலை 4 மணியளவில் மாந்தை மேற்கு பிரதேச செயலாளர் பிரிவில் மோட்டார் சைக்கிள் பேரணி முன்னெடுக்கப்பட்டது.

வடமாகாணத்தில் மன்னார் மாவட்டத்தில் முதல் தடவையாக மாந்தை மேற்கு பிரதேச செயலகப் பிரிவில் 'நாட்டை கட்டியெழுப்பும் இளைஞர் சக்தி' என்ற தொனிப்பொருளில் இளைஞர் மாநாடு ஒன்றை எதிர்வருகின்ற அக்டோபர் 4ஆம் தேதி அடம்பன் பலநோக்கு கூட்டுறவு சங்கத்தின் ஏற்பாடு செய்யப்பட்டுள்ளது.

சோசலிச இளைஞர் சங்க மா நாட்டின் பிரச்சார முதற்கட்ட பணியாக இன்றைய தினம் திங்கட்கிழமை மாலை குறித்த மோட்டார் சைக்கிள் பேரணி ஏற்பாடு செய்யப்பட்டுள்ளது.

இதில் மாந்தை மேற்கு பிரதேச செயலகத்திற்குட்பட்ட இளைஞர், யுவதிகள் அனைவரும் கலந்து கொண்டனர்.

குறித்த மோட்டார் சைக்கிள் பேரணி அடம்பன், ஆண்டாங்குளம், வட்டக்கண்டல் போன்ற பிரதேசங்களில் உள்ள இளைஞர், யுவதிகளை அக்டோபர் 4ஆம் தேதி நடைபெற இருக்கும் சோசலிச இளைஞர் சங்க மாநாட்டில் கலந்து கொள்ளுமாறு அவர்களை அழைப்பதற்கு குறித்த மோட்டார் பைக் பேரணி ஏற்பாடு செய்யப்பட்டுள்ளது.

திலீபனின் சிலை அகற்றப்பட்ட மைக்கு எதிராக மன்னாரில் போராட்டம்

2026-09-28T19:06:17.816+05:30

யாழ்ப்பாணம் நல்லூர் பகுதியில் அமைக்கப்பட்டிருந்த தியாக தீபம் திலீபனின் உருவச் சிலை அகற்றப்பட்டமையைக் கண்டித்து மன்னாரில் போராட்டம் ஒன்று இன்று(28) திங்கட்கிழமை மாலை 3 மணியளவில் முன்னெடுக்கப்பட்டுள்ளது.

மன்னார் மாவட்ட வலிந்து காணாமல் ஆக்கப்பட்டவர்களின் உறவுகள் சங்கத்தின் ஏற்பாட்டில் மன்னார் பஜார் பகுதியில் உள்ள தந்தை செல்வா சிலை அடிக்கு முன்பு குறித்த கவனயீர்ப்பு போராட்டம் மேற்கொள்ளப்பட்டது.

திலீபனின் உருவச் சிலை அகற்றப்பட்டமையைக் கண்டித்தும், பொலிஸாரின் செயலைக் கண்டித்தும், தமிழ் மக்களின் நினைவேந்தல் உரிமையை வலியுறுத்தியும் இந்த கவனயீர்ப்பு போராட்டம் மேற்கொள்ளப்பட்டது.

போராட்டத்தில் ஈடுபட்டவர்கள் பல்வேறு வசனங்கள் எழுதிய பதாதை யை ஏந்தியவாறு ஈடுபட்டனர்.

குறித்த போராட்டத்தில் மன்னார் மாவட்ட வலிந்து காணாமல் ஆக்கப்பட்டவர்களின் உறவுகளின் சங்க தலைவி மனுவல் உதய சந்திரா,சங்க பிரதிநிதிகள்,மன்னார் பிரஜைகள் குழுவின் தலைவர் மாக்கஸ் அடிகளார்,உள்ளூராட்சி மன்ற உறுப்பினர்கள்,பொதுமக்கள் என பலர் கலந்து கொண்டனர்.

முட்டை ரொட்டியில் இரும்புக் கம்பித் துண்டு? – மன்னாரில் பிரபல உணவகத்துக்கு எதிராக குற்றச்சாட்டு

2026-09-28T15:09:41.564+05:30

முட்டை ரொட்டியில் இரும்புக் கம்பித் துண்டு? – மன்னாரில் பிரபல உணவகத்துக்கு எதிராக குற்றச்சாட்டு

சிறு குழந்தைக்காக வாங்கப்பட்ட உணவில் இரும்புக் கம்பியின் பகுதி காணப்பட்டதாக முறைப்பாடு – சுகாதாரத் துறைக்கு அறிவித்தும் இதுவரை நடவடிக்கை இல்லை என குற்றச்சாட்டு

மன்னார், பள்ளிமுனைப் பிரதான வீதியில் அமைந்துள்ள பிரபலமான உணவகமொன்றில் நேற்று (27) இரவு சிறு குழந்தையொன்றுக்காக வாங்கப்பட்ட முட்டை ரொட்டியில் இரும்புக் கம்பியின் ஒரு பகுதி காணப்பட்டதாக முட்டை ரொட்டியை கொள்வனவு செய்த பெண் தெரிவித்துள்ளார்.

அப்பகுதியில் வசிக்கும் குறித்த பெண், தனது சிறு குழந்தைக்காக குறித்த உணவகத்தில் முட்டை ரொட்டி ஒன்றை வாங்கியதாகவும், அதனை உட்கொள்ளும் சந்தர்ப்பத்தில் உணவுக்குள் இரும்புக் கம்பியின் ஒரு பகுதி இருப்பது கண்டுபிடிக்கப்பட்டதாகவும் தெரிவித்துள்ளார்.

இச்சம்பவம் தொடர்பில் குறித்த பெண் சம்பந்தப்பட்ட சுகாதாரத் துறையினருக்கு உடனடியாக தெரியப்படுத்தியுள்ளதாகவும் தெரிவிக்கப்படுகிறது.

எனினும், சம்பவம் தொடர்பில் சுகாதார வைத்திய அதிகாரி பணிமனை, நகரசபை அல்லது பொது சுகாதார பரிசோதகர் தரப்பில் இதுவரை எந்தவிதமான நடவடிக்கையும் மேற்கொள்ளப்படவில்லை என குறித்த பெண் குற்றம் சாட்டியுள்ளார்.

சிறு குழந்தைக்காக வாங்கப்பட்ட உணவில் இரும்புத் துண்டு காணப்பட்டதாக முன்வைக்கப்படும் இந்தக் குற்றச்சாட்டு தொடர்பில் உரிய விசாரணை மேற்கொள்ளப்பட வேண்டும் எனவும், உணவகங்களில் பொதுமக்களின் உணவுப் பாதுகாப்பு உறுதி செய்யப்பட வேண்டும் எனவும் பொதுமக்கள் கோரிக்கை விடுத்துள்ளனர்.

மன்னாரில் 3 வது நாளாக விமர்சையாக நடைபெற்ற உலக சுற்றுலா தின இறுதி நாள் நிகழ்வு

2026-09-28T11:35:26.566+05:30

உலக சுற்றுலா தினத்தை முன்னிட்டு வடக்கு மாகாண சுற்றுலா பணியகம் மன்னார் மாவட்டச் செயலகம் மற்றும் வடக்கு மாகாண தொழில்துறை மன்றம் ஆகியன இணைந்து ஏற்பாடு செய்த உலக சுற்றுலா தினம் உணவுத் திருவிழா 3 நாள் நிகழ்வின் இறுதி நாள் நிகழ்வுகள் நேற்று ஞாயிற்றுக்கிழமை (27) மாலை மன்னார் உப்புக்குளம் அல்பத்தா விளையாட்டு மைதானத்தில் நடைபெற்றது.

வடமாகாண சுற்றுலா பணியகத்தின் தலைவர் கலாநிதி ஜெகநாதன் விவேகானந்தன் தலைமையில் இடம்பெற்ற குறித்த நிகழ்வில் பிரதம விருந்தினராக கடற்றொழில் அமைச்சர் சந்திர சேசேகரன் கலந்து கொண்டார்.

மேலும் விருந்தினர்களாக பாராளுமன்ற உறுப்பினர் எம்.ஜெகதீஸ்வரன், மன்னார் மாவட்ட அரசாங்க அதிபர் க.கனகேஸ்வரன் உள்ளடங்களாக திணைக்கள தலைவர்கள்,உள்ளூராட்சி மன்றங்களின் தவிசாளர்கள் பொலிஸ் உயர் அதிகாரிகள் ஆகியோர் கலந்து கொண்டனர்.

குறித்த நிகழ்வில் பல ஆயிரக்கணக்கான மக்கள் கலந்து கொண்டனர்.குறித்த நிகழ்வில் பல்வேறு நிகழ்வுகள் அரங்கேற்றப்பட்டது.

மேலும் வடமாகாண சுற்றுலா பணியகத்தின் புதிய இணையதளம் ஒன்றும் வைபவ ரீதியாக அங்குரார்ப்பணம் செய்து வைக்கப்பட்டது.

யாழில் பெருந்தொகை பணம், கூரிய ஆயுதங்களுடன் பெண் உட்பட 9 பேர் கைது

2026-09-27T21:11:05.340+05:30

யாழ்ப்பாணத்தில் பெருந்தொகை பணம் மற்றும் கூரிய ஆயுதங்களுடன் பெண் ஒருவர் உட்பட ஒன்பது பேர் யாழ்ப்பாணப் பொலிஸாரினால் நேற்று (26) கைது செய்யப்பட்டுள்ளனர்.

யாழ்ப்பாணம் புறநகர்ப் பகுதியில் கார் ஒன்றிலும், இரண்டு மோட்டார் சைக்கிள்களிலும் சந்தேகத்திற்கிடமான முறையில் பயணித்த கும்பல் ஒன்றை ரோந்துப் பணியில் ஈடுபட்டிருந்த பொலிஸார் மடக்கிப் பிடித்துள்ளனர்.

இதன்போது, காரினுள் கூரிய ஆயுதங்களும் 9 இலட்சம் ரூபாய் பணமும் காணப்பட்டுள்ளன.

அதனைத் தொடர்ந்து விசாரணைகளை முன்னெடுத்த பொலிஸார், கார் மற்றும் இரண்டு மோட்டார் சைக்கிள்களில் பயணித்த பெண் ஒருவர் உட்பட 9 பேரையும் கைது செய்ததுடன், அவர்களது கார் மற்றும் மோட்டார் சைக்கிள்களையும் பறிமுதல் செய்தனர்.

கைது செய்யப்பட்டவர்களிடம் மேலதிக விசாரணைகளை முன்னெடுத்த பொலிஸார், அவர்களை இன்றைய தினம் (27) யாழ்ப்பாணம் நீதவான் நீதிமன்றத்தில் ஆஜர்ப்படுத்திய நிலையில், அவர்களை எதிர்வரும் 9 ஆம் திகதி வரை விளக்கமறியலில் வைக்குமாறு நீதிமன்றம் உத்தரவிட்டுள்ளது

குழந்தைகளுக்கான பால் போத்தல்கள் தொடர்பில் விசேட சுற்றிவளைப்பு

2026-09-27T21:00:51.195+05:30

குடிக்கக்கூடிய திரவங்களை எடுத்துச் செல்வதற்குப் பயன்படுத்தப்படும் மீளப் பயன்படுத்தக்கூடிய பிளாஸ்டிக் போத்தல்கள் மற்றும் பொலிமர் பொருட்களால் தயாரிக்கப்பட்ட குழந்தைகளுக்கான பால் ஊட்டும் போத்தல்கள் தொடர்பில் நுகர்வோர் அலுவல்கள் அதிகாரசபை கடந்த வாரம் நாடளாவிய விசேட சுற்றிவளைப்பு மற்றும் விசாரணை நடவடிக்கையை மேற்கொண்டுள்ளது.

இந்நடவடிக்கையின் கீழ் மொத்தம் 144 சுற்றிவளைப்புகள்/பரிசோதனைகள் மேற்கொள்ளப்பட்டுள்ளன.

அவற்றில் SLS 1616 தரநிலையுடன் தொடர்புடைய மீளப் பயன்படுத்தக்கூடிய பிளாஸ்டிக் போத்தல்கள் தொடர்பில் 96 பரிசோதனைகளும், SLS 1306 தரநிலையுடன் தொடர்புடைய பொலிமர் பொருட்களால் தயாரிக்கப்பட்ட குழந்தைகளுக்கான பால் ஊட்டும் போத்தல்கள் தொடர்பில் 48 பரிசோதனைகளும் மேற்கொள்ளப்பட்டுள்ளன.

இப்பரிசோதனைகளின்போது 1,400க்கும் மேற்பட்ட பொருட்கள் வழக்குப் பொருட்களாக அதிகாரிகளின் பொறுப்பில் எடுக்கப்பட்டுள்ளன.

2025.10.01 திகதியிடப்பட்ட 2456/42 ஆம் இலக்க அதிவிசேட வர்த்தமானியில் வெளியிடப்பட்ட கட்டளை இலக்கம் 96, இப்பொருட்கள் தொடர்பான தேவைகளை நிர்ணயிக்கிறது.

இக்கட்டளை 2026 ஏப்ரல் 01 முதல் அமுலுக்கு வந்துள்ளது. குடிக்கக்கூடிய திரவங்களை எடுத்துச் செல்வதற்கான மீளப் பயன்படுத்தக்கூடிய பிளாஸ்டிக் போத்தல்களுக்கு SLS 1616 தரநிலையும், பொலிமர் பொருட்களால் தயாரிக்கப்பட்ட குழந்தைகளுக்கான பால் ஊட்டும் போத்தல்களுக்கு SLS 1306 தரநிலையும் பொருந்துகின்றன.

உள்நாட்டில் தயாரிக்கப்படும் பொருட்களுக்கு SLS சான்றிதழ் குறியீடு கட்டாயமாகும். உள்நாட்டில் தயாரிக்கப்படும் மேற்குறிப்பிட்ட பொருட்கள் இலங்கை தரநிலைகள் நிறுவகத்தினால் (SLSI) வழங்கப்படும் SLS Product Certification Mark-ஐ கொண்டிருக்க வேண்டும்.

எனவே, ஒரு உள்நாட்டு தயாரிப்பு “தரநிலைக்கு இணங்குகிறது” என்று குறிப்பிடுவது மட்டும் போதுமானதல்ல, கட்டளை இலக்கம் 96 இன் கீழ் SLS Product Certification Mark இருப்பது கட்டாயமாகும்.

இறக்குமதி செய்யப்பட்ட பொருட்களுக்கு SLS குறியீடு இருப்பது மட்டுமே சட்டத் தேவை அல்ல. இறக்குமதி செய்யப்பட்ட மீளப் பயன்படுத்தக்கூடிய பிளாஸ்டிக் போத்தல்கள் மற்றும் குழந்தைகளுக்கான பால் ஊட்டும் போத்தல்களில் SLS குறியீடு கட்டாயமாக இருக்க வேண்டும் என்று கட்டளை இலக்கம் 96 குறிப்பிடவில்லை.

அதற்குப் பதிலாக, அவ்வாறான இறக்குமதி செய்யப்பட்ட பொருட்கள் இலங்கை தரநிலைகள் நிறுவகத்தினால் நடைமுறைப்படுத்தப்படும் Import Inspection Scheme இன் கீழ் பரிசோதிக்கப்பட்டு விற்பனைக்கு அங்கீகரிக்கப்பட்டிருக்க வேண்டும்.

தேவையான சந்தர்ப்பங்களில் கட்டளை இலக்கம் 83 இன் கீழ் பற்றுச்சீட்டுகள், invoices மற்றும் விநியோகத் தகவல்கள் பரிசோதிக்கப்பட்டு பொருட்களின் மூலத்தை அடையாளம் காண நடவடிக்கை எடுக்கப்பட்டுள்ளது.

மீளப் பயன்படுத்தக்கூடிய பிளாஸ்டிக் போத்தல்கள் மற்றும் குறிப்பாக குழந்தைகளுக்கான பால் ஊட்டும் போத்தல்களை வாங்கும்போது தயாரிப்பில் குறிப்பிடப்பட்டுள்ள தகவல்களை கவனமாகப் பரிசோதிக்கவும். உள்நாட்டில் தயாரிக்கப்பட்ட பொருட்களை வாங்கும்போது SLS Product Certification Mark உள்ளதா என்பதை கவனிக்கவும்.

இறக்குமதி செய்யப்பட்ட பொருளில் SLS குறியீடு இல்லாதது மட்டும் அந்தப் பொருள் சட்டவிரோதமானது என்று முடிவு செய்வதற்கான காரணமல்ல. பொருட்களை வாங்கும்போது பற்று அல்லது விற்பனைச் சீட்டைப் பெற்றுப் பாதுகாப்பாக வைத்திருக்கவும்.

இப்பொருட்களை சந்தைக்கு விநியோகிப்பதற்கு முன்னர் சம்பந்தப்பட்ட சட்ட மற்றும் தரநிலைத் தேவைகளை உறுதிப்படுத்திக்கொள்ளவும். உள்நாட்டில் தயாரிக்கப்பட்ட பொருட்களுக்கு SLS Product Certification Mark தொடர்பான தேவையை உறுதிப்படுத்த வேண்டும்.

இறக்குமதி செய்யப்பட்ட பொருட்கள் SLSI Import Inspection Scheme இன் கீழ் பரிசோதிக்கப்பட்டு விற்பனைக்கு அங்கீகரிக்கப்பட்டுள்ளன என்பதை உறுதிப்படுத்தும் ஆவணங்களையும் சரிபார்க்க வேண்டும்.

மேலும் கொள்வனவு மற்றும் விநியோகம் தொடர்பான பற்றுச்சீட்டுகள், invoices மற்றும் வழங்குநர் தகவல்களை முறையாகப் பேணவும்.

மேலதிக தகவல்களுக்கு அல்லது சட்டத் தேவைகளுக்கு இணங்காததாக சந்தேகிக்கப்படும் பொருட்கள் தொடர்பான தகவல்களை வழங்க அலுவலக நேரங்களில் 1977 குறுந்தொலைபேசி இலக்கத்தின் ஊடாக தொடர்புகொள்ளுமாறு நுகர்வோர் அலுவல்கள் அதிகாரசபை அறிவித்துள்ளது.

திலீபனின் சிலை அகற்றப்பட்டமைக்கு எதிராக போராட்டம்

2026-09-27T20:54:54.948+05:30

யாழ்ப்பாணம் நல்லூர் பகுதியில் அமைந்துள்ள திலீபனின் நினைவிடத்தில் அஞ்சலிக்காக வைக்கப்பட்டிருந்த சிலையை பொலிஸார் எடுத்துச் சென்றமையைக் கண்டித்தும், அச்சிலையை மீண்டும் அதே இடத்தில் நிறுவ வலியுறுத்தியும் யாழ்ப்பாணத்தில் போராட்டம் ஒன்று முன்னெடுக்கப்பட்டது.

அந்த நிறைவிடத்திற்கு முன்பாக இன்று (27) மாலை இப்போராட்டம் முன்னெடுக்கப்பட்டது.

திலீபனின் நினைவிடத்தில் அவரது நினைவேந்தல் நிகழ்வின் ஆரம்ப நாளான கடந்த 15 ஆம் திகதி இச்சிலை வைக்கப்பட்டு, தொடர்ந்து 12 நாட்கள் அஞ்சலி நிகழ்வுகள் இடம்பெற்ற நிலையில், நேற்று (26) இறுதி நாள் நிகழ்வுகள் நடைபெற்றன.

இந்நிலையில், இன்று நினைவிடத்திற்கு வருகை தந்த யாழ்ப்பாணத் தலைமைப் பொலிஸ் நிலையப் பொறுப்பதிகாரி தலைமையிலான 20-க்கும் மேற்பட்ட பொலிஸார், இரண்டு பொலிஸ் வாகனங்களில் வருகை தந்து, அங்கிருந்த சிலையைப்பை எடுத்துச் சென்றுள்ளனர்.

பொலிஸாரின் இந்நடவடிக்கையைக் கண்டித்தும், அகற்றப்பட்ட சிலையை உடனடியாக மீள நிறுவக் கோரியுமே பொதுமக்கள் மற்றும் அமைப்பாளர்களால் இப்போராட்டம் முன்னெடுக்கப்பட்டது.

இதேவேளை, பயங்கரவாதத் தடுப்புச் சட்டத்தின் கீழ் தமிழீழ விடுதலை புலிகள் அமைப்பின் தலைவர் ஒருவரின் சிலையை அமைப்பது அல்லது நினைவு கூறுவது முடியாது என்பதால், நல்லூர் ஆலயத்திற்கு அருகில் வைக்கப்பட்டிருந்த திலீபனின் சிலை பொலிஸாரால் அகற்றப்பட்டுள்ளது.

திலீபனின் சிலை அவ்விடத்தில் வைக்கப்பட்டமை தொடர்பில் யாழ்ப்பாண நீதிமன்றில் அறிக்கையிடப்படவுள்ளதாக பொலிஸ் ஊடகப் பிரிவு தெரிவித்துள்ளது.

குறித்த சிலையை அங்கு வைப்பதற்கு நேற்று வரை மாத்திரமே அனுமதி வழங்கப்பட்டதாகவும், உரிய காலத்திற்கு பின்னர் அந்த சிலை அங்கிருந்து அகற்றப்பட்டதாகவும் பொலிஸார் குறிப்பிட்டுள்ளனர்.

பிரமாண்டமாக நிறைவடைந்தது DU Legends Premier League!

2026-09-27T19:46:14.521+05:30

மன்னாரில் DU Sports நிறுவனம் மற்றும் Dreams united club ஏற்பாட்டில் நடைபெற்ற DU Legends Premier League கால்பந்து தொடரின் இறுதிப் போட்டி நேற்று (26) மன்னார் நகரசபை பொது விளையாட்டு மைதானத்தில் வெகு விமரிசையாக இடம்பெற்றது.

Dream Sports நிறுவனத்தின் தலைவர் நித்திய சீலன் யெஜமன் அவர்களின் தலைமையில் நடைபெற்ற இந்த நிகழ்வு, விளையாட்டு வீரர்கள், ரசிகர்கள் மற்றும் விளையாட்டு ஆர்வலர்களின் பெருமளவான பங்கேற்புடன் சிறப்பாக நடைபெற்றது.

குறித்த நிகழ்வில் மன்னார் மாவட்ட மேலதிக அரசாங்க அதிபர், சிரேஸ்ர பொலிஸ் அத்தியட்சகர், மன்னார் நகரசபை மற்றும் மாந்தை பிரதேச சபை தலைவர்கள், மன்/புனித சவேரியார் ஆண்கள் கல்லூரியின் முன்னாள் அதிபர் உள்ளிட்ட பல்வேறு முக்கிய பிரமுகர்கள் கலந்துகொண்டனர்.

40 வயதுக்கு மேற்பட்ட வீரர்களுக்காக ஏற்பாடு செய்யப்பட்ட இந்தத் தொடரில் மொத்தம் 7 அணிகள் பங்கேற்றிருந்தன.

இறுதிப் போட்டியில் DU Legend அணியும் PKK Legend அணியும் மோதின. ஆட்ட நேர முடிவில் இரு அணிகளும் தலா ஒரு கோல் பெற்று 1–1 என்ற கோல் கணக்கில் சமநிலையில் இருந்தன.

இதனையடுத்து நடைபெற்ற பெனால்டி உதைகள் மூலம் DU Legend அணி வெற்றியைப் பதிவு செய்து, DU Legends Premier League தொடரின் சம்பியன் கிண்ணத்தை கைப்பற்றியது.

சம்பியனான DU Legend அணிக்கு ரூ.5 இலட்சம் பணப்பரிசும் வெற்றிக் கிண்ணமும் சிறப்பு விருந்தினர்களால் வழங்கப்பட்டன.

மேலும், கடந்த மாதம் தேசிய ரீதியில் மாற்றுத்திறனாளிகளுக்காக நடைபெற்ற விளையாட்டுப் போட்டிகளில் வெற்றி பெற்ற வீரர்களும் இந்நிகழ்வில் பரிசுகள் மற்றும் பதக்கங்கள் வழங்கி கௌரவிக்கப்பட்டனர்.

விளையாட்டுத் துறையில் தொடர்ச்சியாக கவனம் செலுத்தி வரும் DU Sports நிறுவனம், பல்வேறு வயதுப் பிரிவினரையும் விளையாட்டு வீரர்களையும் ஊக்குவிக்கும் வகையில் இவ்வாறான போட்டிகளை ஏற்பாடு செய்து வருகின்றமை குறிப்பிடத்தக்கது.

குறிப்பாக, 40 வயதுக்கு மேற்பட்ட அனுபவம் வாய்ந்த வீரர்களை மீண்டும் போட்டி மைதானத்திற்கு அழைத்து வந்து, அவர்களின் விளையாட்டுத் திறமைகளை வெளிப்படுத்துவதற்கான வாய்ப்பை ஏற்படுத்தியுள்ளமை இந்தத் தொடரின் சிறப்பம்சமாக அமைந்தது.

மன்னாரின் விளையாட்டுத்துறையை மேலும் ஊக்குவிக்கும் வகையில் நடைபெற்ற இந்த பிரமாண்டமான தொடரின் இறுதிப் போட்டி, வீரர்கள் மற்றும் ரசிகர்கள் மத்தியில் உற்சாகத்தையும் மகிழ்ச்சியையும் ஏற்படுத்தியதுடன் சிறப்பாக நிறைவடைந்தது.