Newmannar.lk

சமூக வலைத்தள காதல் வலை ; புலம்பெயர் முதியவரிடம் ரூ.40 இலட்சம் பண மோசடி

2026-06-14T20:42:14.013+05:30

லண்டனில் வசித்து வரும் 69 வயதுடைய ஒருவரிடம் சமூக வலைத்தளத்தின் ஊடாக நெருங்கிப் பழகி, 40 இலட்சம் ரூபாவிற்கும் அதிகமான பணத்தைப் பெற்றுக்கொண்டதாகக் கூறப்படும் சம்பவம் தொடர்பில் பொலிஸாரிடம் முறைப்பாடு செய்யப்பட்டுள்ளது.

குறித்த முறைப்பாடு, பாதிக்கப்பட்டதாகக் கூறப்படும் சின்னத்தம்பி சிவப்பிரகாசம் என்பவரின் மகளால் பொலிஸின் இணையக் குற்றப்பிரிவில் பதிவு செய்யப்பட்டுள்ளதாக தெரிவிக்கப்படுகிறது.

முறைப்பாட்டின் படி, சமூக வலைத்தளத்தில் போலியான கணக்கு ஒன்றைப் பயன்படுத்தி, வேறொரு பெண்ணின் புகைப்படங்களை பதிவேற்றி, சிவப்பிரகாசத்துடன் தொடர்பை ஏற்படுத்திய நபர் அல்லது நபர்கள், பல்வேறு காரணங்களைக் கூறி அவரிடமிருந்து பெருமளவு பணத்தைப் பெற்றுக்கொண்டதாக குற்றஞ்சாட்டப்பட்டுள்ளது.

மேலும், தனது தந்தை எந்தவித ஒழுங்கற்ற தொடர்பிலும் ஈடுபடாத நிலையிலும், குறித்த கணக்கிலிருந்து தொடர்ச்சியாக புகைப்படங்கள் மற்றும் காணொளிகள் அனுப்பப்பட்டதாகவும் முறைப்பாட்டில் குறிப்பிடப்பட்டுள்ளது.

இதேவேளை, முறைப்பாட்டில் குறிப்பிடப்பட்டுள்ள சமூக வலைத்தள கணக்கும், அதனுடன் தொடர்புடைய அடையாள விவரங்களும் போலியானவையாக இருக்கலாம் என்ற சந்தேகமும் எழுந்துள்ளது.

வவுனியாவில் வழங்கப்பட்டிருந்த முகவரியில் தற்போது அந்த நபர் வசிக்கவில்லை என அப்பகுதி மக்கள் தெரிவித்துள்ளதாகவும் கூறப்படுகிறது.

சம்பவம் தொடர்பில் மேலதிக விசாரணைகளை பொலிஸார் மேற்கொண்டு வருகின்றனர்.

இதனையடுத்து, சமூக வலைத்தளங்கள் ஊடாக ஏற்படும் தொடர்புகள் மற்றும் நிதி பரிவர்த்தனைகள் குறித்து பொதுமக்கள், குறிப்பாக புலம்பெயர் நாடுகளில் வாழ்பவர்கள், மிகுந்த அவதானத்துடன் செயற்பட வேண்டும் என அறிவுறுத்தப்பட்டுள்ளது.

இலங்கைக்கு கடும் எல்-நினோ தாக்கம் ஏற்படும் வாய்ப்பு மிகக் குறைவு

2026-06-14T20:18:10.419+05:30

உலகளவில் உருவாகும் எல்-நினோ காலநிலை நிலைமை இலங்கைக்கு கடுமையான தாக்கத்தை ஏற்படுத்தும் வாய்ப்பு மிகவும் குறைவு என காலநிலை மாற்ற செயலாளர் அலுவலகத்தின் இயக்குநர் லீல் ரந்தெனியார் தெரிவித்துள்ளார்.

பசிபிக் பெருங்கடலின் வெப்பமண்டலப் பகுதியில் கடல் வெப்பநிலை உயர்வதன் காரணமாக உருவாகும் இந்த எல்-நினோ நிலைமை உலகளாவிய காலநிலையை பாதிக்கக்கூடும் என வானிலை விஞ்ஞானிகள் கணித்து வருகின்றனர்.

குறிப்பாக, வரும் பெப்ரவரி மாதத்திற்குப் பிறகு உலக வெப்பநிலை உயர்வதற்கான வாய்ப்பு இருப்பதாகவும் அவர் கூறினார்.

இலங்கையில் தற்போது தென்மேற்கு பருவமழை நிலவிவருகிறது என்றும் அது செப்டம்பர் வரை தொடரும் என்றும் அவர் குறிப்பிட்டுள்ளார்.

ஜூலை மற்றும் ஆகஸ்ட் மாதங்களில் இடைக்கிடையே மழை பெய்யக்கூடிய நிலை இருந்தாலும், பொதுவாக மழை அளவு குறைவாக இருக்கும் எனவும் தெரிவித்துள்ளார்.

அதேபோல், இரண்டாவது இடைமோசம் மழைக்காலம் அக்டோபர்–நவம்பர் மாதங்களில் ஏற்பட்டு அதிக மழைப்பொழிவு கிடைக்கும் எனவும் அவர் கூறினார்.

அதன்பின்னர் வடகிழக்கு பருவமழை தொடங்கி பெப்ரவரி வரை நீடிக்கும் என்றும், நாட்டின் அதிகமான மழை இந்த காலத்தில் கிடைக்கும் என்றும் தெரிவித்தார்.

மார்ச்–ஏப்ரல் காலப்பகுதியில் முதல் இடைமோசம் மழைக்காலம் தொடங்கும் நிலையில், ஜூலை–ஆகஸ்ட் காலம் பொதுவாக வறண்ட காலநிலையாக இருக்கும் எனவும் அவர் கூறினார்.

எல்-நினோ தாக்கம் ஏற்பட்டால் தென்மேற்கு பருவமழை அல்லது இடைமோச மழையைவிட, வடகிழக்கு பருவமழை அமைப்பில் அதிக தாக்கம் ஏற்படக்கூடும் எனவும் அவர் எச்சரித்தார்.

மேலும், அடுத்த ஆண்டு பெப்ரவரி மற்றும் மார்ச் மாதங்களில் வெப்பநிலை அதிகரிக்கும் வாய்ப்பு இருப்பதாகவும் அவர் குறிப்பிட்டுள்ளார்.

இருப்பினும், இந்தியப் பெருங்கடலில் உள்ள “இந்தியப் பெருங்கடல் இரட்டை அலை (Indian Ocean Dipole)” காரணமாக இலங்கையில் பெரிய அளவில் நீராவி குறைபாடு ஏற்பட வாய்ப்பு இல்லை எனவும், நாட்டின் புவியியல் அமைப்பு (மலைப்பாங்கான மத்திய மலைநாடு மற்றும் தீவாக இருப்பது) காரணமாக கடுமையான எல்-நினோ தாக்கம் ஏற்படும் வாய்ப்பு குறைவாக உள்ளது எனவும் அவர் தெரிவித்துள்ளார்.

யாழ்ப்பாணத்தில் காணாமல் போன சிறுவன் உடலமாக மீட்பு

2026-06-14T20:04:20.671+05:30

யாழ்ப்பாணம் பருத்தித்துறை - புலோலி தெற்கு பகுதியில் கிணறு ஒன்றிலிருந்து சிறுவனின் உடலம் மீட்கப்பட்டுள்ளது.

உயிரிழந்தவர் 6 வயதுடைய சிறுவன் என அடையாளம் காணப்பட்டுள்ளதாக காவல்துறையினர் தெரிவித்துள்ளனர்.

குறித்த சிறுவனின் காணாமல்போனமை தொடர்பில் காவல்துறையினருக்குக் கிடைத்த முறைப்பாட்டையடுத்து மேற்கொள்ளப்பட்ட தேடுதல் நடவடிக்கையின் போதே சிறுவன் உடலமாக மீட்கப்பட்டுள்ளார்.

இந்த நிலையில் சம்பவம் குறித்த மேலதிக விசாரணைகளை காவல்துறையினர் முன்னெடுத்துள்ளனர்.

சாதாரண தரப் பரீட்சை பெறுபேறுகளில் தாமதம்

2026-06-14T18:12:59.375+05:30

கல்விப் பொதுத் தராதர சாதாரண தரப் பரீட்சை முடிவுகளை வெளியிடுவது தாமதமடையக்கூடும் என பரீட்சைத் திணைக்களம் தெரிவித்துள்ளது.

திணைக்களத்தின் பேச்சாளர் ஒருவர் குறிப்பிடுகையில், இதற்கு முன்னர் நாளை (15) ஆம் திகதி முடிவுகளை வெளியிடுவதற்குத் திட்டமிடப்பட்டிருந்ததாகத் தெரிவித்தார்.

முடிவுகளைத் தயாரிக்கும் பணிகள் இறுதிக் கட்டத்தை எட்டியுள்ளதாகவும், அடுத்த இரண்டு வாரங்களுக்குள் முடிவுகளை வெளியிட எதிர்பார்ப்பதாகவும் அவர் குறிப்பிட்டார்.

2025ஆம் ஆண்டுக்கான கல்விப் பொதுத் தராதர சாதாரண தரப் பரீட்சை கடந்த பெப்ரவரி 17ஆம் திகதி முதல் 26ஆம் திகதி வரை நடைபெற்றதுடன், இதற்காக 451,463 பரீட்சார்த்திகள் தோற்றியிருந்தனர்

காலி முகத்திடலில் அரங்கேறிய கின்னஸ் சாதனை

2026-06-14T18:03:03.840+05:30

காலி முகத்திடலில் இன்று (14) நடைபெற்ற வரலாற்றுச் சிறப்புமிக்க கலாசார நிகழ்வில், 5,000க்கும் மேற்பட்ட பரதநாட்டியக் கலைஞர்கள் ஒரே நேரத்தில் இணைந்து நடனமாடி புதிய கின்னஸ் சாதனையை படைத்துள்ளனர்.

இந்தியாவில் இடம்பெற்ற அயலக தமிழர் மாநாட்டில் கலந்து கொண்டிருந்தபோது பெருந்தோட்ட மற்றும் சமூக உட்கட்டமைப்பு வசதிகள் பிரதி அமைச்சர் சுந்தரலிங்கம் பிரதீப் விடுத்த வேண்டுகோளுக்கு அமையவும், அவரின் வழிகாட்டல் மற்றும் ஆலோசனையின் பேரில், சங்கமம் குளோபல் அகடமி மற்றும் சங்கமம்லியா ஹொலிடேஸ் ஏற்பாட்டிலும் இந்த நிகழ்வு இடம்பெற்றிருந்தது.

இதற்கு முன்னர் பரதநாட்டியத் துறையில் படைக்கப்பட்டிருந்த உலக சாதனையானது வெறும் 416 கலைஞர்களின் பங்கேற்புடன் மட்டுமே அமைந்திருந்தது.

ஆனால், இம்முறை அதனை விடப் பல மடங்கு அதிகமாக, இந்தியா மற்றும் இலங்கையைப் பிரதிநிதித்துவப்படுத்தி சுமார் 5000 கலைஞர்கள் கலந்துகொண்டு முந்தைய சாதனையை முறியடித்துள்ளனர்.

இந்த வரலாற்று நிகழ்வை நேரில் காண பல்லாயிரக்கணக்கான பொதுமக்கள், கலை ஆர்வலர்கள் மற்றும் வெளிநாட்டு பார்வையாளர்கள் காலி முகத்திடலில் குழுமியிருந்தனர்.

சங்கமம் 2026 நிகழ்வானது உலக சாதனை புத்தகமான கின்னஸில் இடம் பிடித்ததை உறுதி செய்து கின்னஸ் சாதனை நிறுவனத்தினால் சான்றிதழ் வழங்கப்பட்டமை குறிப்பிடத்தக்கது.

தற்போது குழந்தைகள் மத்தியில் பரவி வரும் சில நோய்கள்

2026-06-14T17:36:40.572+05:30

தற்போது சிறுவர்களிடையே சில நோய்கள் பரவி வருவதால் பெற்றோர் அது குறித்து அவதானத்துடன் இருக்க வேண்டும் என்று கொழும்பு லேடி ரிட்ஜ்வே சிறுவர் வைத்தியசாலையின் விசேட வைத்திய நிபுணர் தீபால் பெரேரா தெரிவித்துள்ளார்.

டெங்கு, இன்ஃப்ளூயன்சா, கை, கால் மற்றும் வாய் நோய், மற்றும் மெனிஞ்சைடிஸ் ஆகிய நோய்கள் தற்போது சிறுவர்களிடையே பரவி வருவதைக் காணக்கூடியதாக உள்ளதாக விசேட வைத்திய நிபுணர் குறிப்பிட்டுள்ளார்.

இதற்கமைய, இந்நோய் நிலைமைகள் குறித்து விழிப்புடன் இருந்து, இந்நோய்களுக்கு ஆளாவதைத் தவிர்ப்பதற்கான நடவடிக்கைகளை எடுப்பது அனைத்து தரப்பினரதும் பொறுப்பாகும் என்றும் விசேட வைத்திய நிபுணர் இங்கு சுட்டிக்காட்டினார்.

அங்கு டெங்கு நோய் பற்றிக் குறிப்பிடுகையில், அது ஒரு உயிராபத்தான நோய் என்றும் காய்ச்சல், தலைவலி, கண்களுக்குப் பின்புறம் வலி, உடல் வலி, மூட்டு வலி மற்றும் வாந்தி, வயிற்றுப்போக்கு போன்ற அறிகுறிகளைக் காண முடியும் என்றும், 2 நாட்களுக்கு மேல் காய்ச்சல் காணப்பட்டால் அது குறித்து அவதானமாக இருக்குமாறும் விசேட வைத்திய நிபுணர் குறிப்பிட்டார்.

இன்ஃப்ளூயன்சா நோய் பற்றிக் குறிப்பிடுகையிலும் காய்ச்சலுடன் இருமல், தடிமன், உடல் வலி, மூட்டு வலி போன்ற அறிகுறிகளைக் காண முடியும் எனச் சுட்டிக்காட்டிய விசேட வைத்திய நிபுணர் தீபால் பெரேரா, இருமல், தடிமனுடன் காய்ச்சல் காணப்பட்டால் பிள்ளைகளை மருத்துவ சிகிச்சைக்கு உட்படுத்துமாறு கேட்டுக்கொண்டார்.

அத்துடன், இந்நோய் காணப்பட்டால் பிள்ளைகளுக்கு ஓய்வளிப்பது மிகவும் பொருத்தமானது எனச் சுட்டிக்காட்டிய வைத்தியர், பிள்ளைகளைப் பாடசாலைகள் அல்லது முன்பள்ளிகள், பகல்நேர பராமரிப்பு நிலையங்களுக்கு அனுப்பும்போது முகக்கவசம் அணிவிக்குமாறும், அதன் மூலம் மற்றைய தரப்பினருக்கு நோய் பரவுவதைக் கட்டுப்படுத்த முடியும் என்றும் சுட்டிக்காட்டினார்.

மேலும், தற்போது சிறுவர்களிடையே கை, கால் மற்றும் வாய் நோய் பரவி வருவதைக் காணக்கூடியதாக உள்ளதாகச் சுட்டிக்காட்டிய விசேட வைத்திய நிபுணர் தீபால் பெரேரா, அந்த நோயின் அறிகுறிகளாக கால்கள், முழங்கைகள், வாய் சார்ந்த பகுதிகளில் சிவப்புப் புள்ளிகள் மற்றும் சில வேளைகளில் வெள்ளை நிற நீர் கொப்புளங்கள் ஏற்படலாம் என்றும் குறிப்பிட்டார்.

இந்நோய்க்கான காரணி Coxsackievirus எனப்படும் வைரஸ் எனச் சுட்டிக்காட்டிய விசேட வைத்திய நிபுணர், இந்நோய் பாதிக்கப்பட்ட ஒரு பிள்ளையின் உடல் மற்றுமொரு பிள்ளையின் உடலில் படுவதன் மூலம் அந்தப் பிள்ளைக்குப் பரவுகிறது என்றும் சுட்டிக்காட்டினார்.

எனவே, இந்த அறிகுறிகளைக் கொண்ட பிள்ளைகளை 3-4 நாட்கள் வீட்டில் வைத்திருக்குமாறும், தேவையான மருத்துவ சிகிச்சைகளை வழங்குமாறும் விசேட வைத்திய நிபுணர் பெற்றோரிடம் கேட்டுக்கொண்டார்.

இதற்கிடையில், தற்போது சிறுவர்களிடையே மெனிஞ்சைடிஸ் நோய் பரவி வருவதாகவும் பதிவாகியுள்ளதாகக் குறிப்பிட்ட அவர், இதற்குக் காரணம் ஒரு வைரஸின் தாக்கம் என்றும், இதன் அறிகுறிகளாக காய்ச்சலுடன் தலைவலி, வாந்தி, மின் ஒளி அல்லது ஏதேனும் ஒரு வெளிச்சத்தைப் பார்ப்பதில் சிரமம், அதேபோல் சில சமயங்களில் சத்தங்களைக் கேட்பதற்குக் கூட விருப்பமின்மை, உடல் வலி போன்ற அறிகுறிகள் தென்படும் என்றும் வைத்தியர் இங்கு சுட்டிக்காட்டினார்.

இந்நோய் செரிமானப் பாதை மற்றும் சுவாசப் பாதை மூலம் பரவுகிறது என்றும், இந்நோய் பரவுவதைக் குறைப்பதற்காக சுத்தமான உணவு, கொதித்தாறிய நீரைப் பருகுதல், இருமல் மற்றும் தடிமன் காணப்பட்டால் முகக்கவசம் அணிவது பொருத்தமானது என்றும் விசேட வைத்திய நிபுணர் சுட்டிக்காட்டினார்.

உயிர்த்த ஞாயிறு தாக்குதல் விடையத்தில் தமிழ் பேசும் மக்களாகிய நாங்கள் அமைதி காக்கக் கூடாது. -பாராளுமன்ற உறுப்பினர் செல்வம் அடைக்கலநாதன்

2026-06-14T17:24:29.825+05:30

உயிர்த்த ஞாயிறு தாக்குதல் தொடர்பாக முன்னாள் ஜனாதிபதி கோட்டாபய ராஜபக்ஷவை விசாரித்த பின்பு சூடு பிடித்திருக்கிறது.

தொடர்ந்து சுரேஷ் சாலே கைது செய்யப்பட்ட பின்பு தொடரும் கைதுகள் தொடர்ச்சியாக நடைபெற்றுக் கொண்டிருக்கிறது.அதை நாங்கள் வரவேற்கிறோம். என வன்னி மாவட்ட பாராளுமன்ற உறுப்பினர் செல்வம் அடைக்கலநாதன் தெரிவித்துள்ளார்.

மன்னாரில் நேற்று (13) ஊடகம் ஒன்றுக்கு கருத்து தெரிவிக்கையிலேயே அவர் இவ்வாறு தெரிவித்துள்ளார்.

அவர் மேலும் தெரிவிக்கையில்,,,

இந்த உயிர்த்த ஞாயிறு தாக்குதல் மட்டுமல்ல, இவர்கள் எங்களுடைய போராட்டத்திலே மனித உரிமை மீறியவர்கள் என்பதையும் நான் சுட்டிக்காட்ட விரும்புகிறேன். சுரேஷ் சாலே உயிர்த்த ஞாயிறு தாக்குதலில் சம்பந்தம் இருக்கின்ற ஒரு சூழலில் விசாரிப்பதற்காக கைது செய்யப்பட்ட பின்பு, அவருடைய விடுதலையையும் முன்னாள் ஜனாதிபதி கோட்டாபய ராஜபக்ஷவின் வெற்றிக்கு உயிர்த்த ஞாயிறு தாக்குதல் நடந்ததாக கூறப்படுகின்ற விடயத்திலே, அவர் அழைக்கப்பட்டு விசாரணை செய்யப்பட்ட பின்பு இனவாதிகள் கொஞ்சம் பேர் அவர்களைக் காப்பாற்றுவதற்கு துள்ளிக் குதித்துக் கொண்டிருக்கிறார்கள்.

தமிழ் பேசுகின்ற நாங்கள் இவ்விடையத்தில், அமைதி காணக் கூடாத, அமைதி பேணக் கூடாது என்பதை நான் இங்கு குறிப்பிட விரும்புகிறேன்.

இவர்கள் எங்களுடைய தேசத்தின் அழிவை, இளைஞர்களுடைய விசாரணை என்ற பேரிலே மிக மோசமான விசாரணைகளை செய்தவர்கள் என்ற அடிப்படையில், ஒரு ஜனாதிபதி வெல்வதற்காக ஒரு சமூகத்தை உயிர்த்த ஞாயிறு தாக்குதலில் கிறிஸ்தவ சமூகம் மட்டு மல்ல, அந்தோனியார் தேவாலயத்தில் வழிபாட்டிற்குச் சென்ற அனைத்து மதத்தினரும் படுகொலை செய்யப்பட்டார்கள்.

அதன் பின்பு அவர் பல லட்சங்கள் வாக்குகளால் ஜனாதிபதியாக்கப்பட்டார். இது சந்தேகத்திற்கு இடமான நிலையிலே பேசப்படுகிற விடயம்.

அந்த சந்தர்ப்பங்களில் முஸ்லிம் தீவிரவாதிகள் இதில் பங்கு பெற்றுள்ளதாகச் சொல்லியிருந்தார்கள். ஆனால் விசாரணையின் பின் தான் தெரியும் என்ன இதில் இருக்கும் பின்னணி என்னவென்று தெரியும். ஆனால் என்னைப் பொறுத்தமட்டில், தமிழ் பேசும் மக்களாகிய நாங்கள் அமைதி காக்கக் கூடாது.

இந்த இவர்கள் மட்டுமல்ல, இனியும் மறைந்திருக்கும் அத்தனை பேரும் கைது செய்யப்பட்டு விசாரணை செய்யப்பட வேண்டும் என்ற கூக்குரலை, போராட்டத்தை நாங்கள் செய்தாக வேண்டும். தென்னிலங்கையிலே எங்களை அழித்தவர்களை காப்பாற்றுகின்ற ஒரு செயல்பாட்டைச் செய்கின்ற சிங்கள தேசம், அதற்கு நாங்கள் எதிர் மறையாக எங்களுடைய தமிழினம் இதற்கு, இந்த விசாரணைக்கு ஆதரவாக குரல் கொடுக்க வேண்டும்.

மனித உரிமை மீறல் செய்தவர்களாக கருதப்படுகின்ற இந்த முன்னாள் ஜனாதிபதி கோட்டாபாய ராஜபக்ச, இன்னும் இப்பொழுது கைது செய்யப்பட்டிருக்கும் சுரேஷ் சாலே, இன்னும் எத்தனையோ பேர்கள் கைது செய்யப் பட இருக்கிறார்கள் என்பது எங்களுக்குத் தெரியாது விட்டாலும், இந்த விடயத்திலே நாங்கள் தமிழ் தரப்பு ஒற்றுமையாக, இந்த விசாரணையை துரிதப்படுத்தி இதில் சம்பந்தப் பட்டவர் களைக் கண்டுபிடித்து தண்டனை கொடுக்க வேண்டும்.

ஒரு கவிஞனை விடுதலை செய்வதற்காக நாங்கள் குரல் கொடுத்தோமோ, எப்படி எங்களுடைய காணிகளை அபகரிக்கும் இந்த முப்படைகளுக்கு எதிராக நாங்கள் குரல் கொடுத்தோமோ, அப்படியான ஒரு எழுச்சிமிக்க ஒரு குரலாக தமிழ் தேசம் மாற வேண்டும்.

ஆகவே, இந்த விடயத்திலே நாங்கள் அமைதி காக்கக் கூடாது என்பது என்னுடைய கருத்தாக இருக்கிறது.

உயிர்த்த ஞாயிறு தாக்குதல் சம்பந்தப்பட்டவர்கள் விசாரிக்கப்படுகின்ற போது, வடக்கு கிழக்கில் இனப்பிரச்சினை சார்ந்த விடயங்களில் மனித உரிமை மீறல்கள் சம்பந்தமாகவும் இவர்கள் கருதப்படுகின்ற, இவர்கள் மீது விசாரிக்கப் படுகின்ற சூழலை உருவாக்க முடியும்.

ஆகவே, இந்த விடயத்திலே தமிழ் தேசம் ஒற்றுமையாக, மிக எழுச்சியான ஒரு போராட்டத்தை நாங்கள் தொடர்ச்சியாகச் செய்ய வேண்டும். இந்த உயிர்த்த ஞாயிறு தாக்குதல்லே விசாரிக்கப் படுகின்ற அத்தனை பேரும் உண்மையைக் கண்டறிந்து தண்டிக்கப்பட வேண்டும் என்ற ரீதியிலே நாங்கள் செயலாற்றுகிற போது, வடக்கு கிழக்கில் இனப்பிரச்சினை என்ற போர்வையில் எங்களை, எங்களுடைய இளைஞர் களைச் சித்திரவதை செய்து, இளைஞர்களை எரித்துச் சாம்பலாக்கி இந்த மனித உரிமை மீறலாளர்கள் இதில் கண்டுபிடிக்க படுவார்கள் என்பது என்னுடைய கருத்து.

ஏற்கனவே நான் சொன்னது போல, துரிதமான விசாரணை மேற்கொள்ளப்பட வேண்டும். அந்த விசாரணை ஒரு ஒரு தீர்க்கமான ஒரு தீர்வை நீதிமன்றம் கொடுக்க வேண்டும். அதன் ஊடாக மனித உரிமை மீறல் சம்பந்தமாக இன்றைக்கு ஐ நா சபை சொல்லுகின்ற விடயங்களில் சாட்சிகளாக இந்த விடயங்கள் எங்களுடைய பக்கம் வருகிற வாய்ப்பு இருக்கிறது.

ஆகவே அரசாங்கம் காலம் தாமதம் செய்வது சில விடயங்களை பார்க்கக் கூடியதாக இருந்தாலும் கூட, இந்த விடயத்தை நான் வரவேற்கின்றேன். எதிர்க்க எதிரணியினர் தங்களுடைய பிரச்சினைகளும் தாங்களும் கைது செய்யப்படலாம்? என்ற ஒரு சந்தேகத்தில் இந்தக் கூக்குரலை இடுகிறார்கள். அது ஒரு அபாயக் கூ குரலாகத் தான் நான் பார்க்கிறேன். அவர்கள் கூக்குரல் இடலாம். சம்பந்தப்பட்டவர்கள் கைது செய்யப்பட வேண்டும்.

இந்தக் கூக்குரல் இடுபவர்களுக்குள்ளே இருப்பவர்களும் கைது செய்யப்பட வேண்டும். ஆகவே, நான் சொன்ன விடயம், தென்னிலங்கையிலே இப்படியான ஒரு கூக்குரல் அவர்களைக் காப்பாற்ற வேண்டும் என்று ஒலிக்குமாக இருந்தால், அவர்கள் தண்டிக்கப்பட வேண்டும் என்று தமிழ் பிரதேசத்திலே, வடக்கு கிழக்கில் மிக பாரிய அளவில் தமிழ், முஸ்லிம் மக்கள், தமிழ் பேசும் மக்கள் ஒன்றிணைந்து போராட்டத்தை மேற்கொள்ள வேண்டும் என்பது எனது கோரிக்கை என்பதை நான் இங்கு குறிப்பிட விரும்புகிறேன்.

பிணையில் வந்த சொல்லிசைப் பாடகருக்கு நாமல் ராஜபக்ச வாழ்த்து

2026-06-13T20:59:17.328+05:30

கடந்த சில நாட்களுக்கு முன்னதாக தமிழ் சொல்லிசைப் பாடகர் சங்கீத்சன் பயங்கரவாதத் தடைச் சட்டத்தின் கீழ் காவல்துறையினரால் கைது செய்யப்பட்டு விளக்கமறியலில் வைக்கப்பட்டிருந்தார்.

இந்நிலையில், அவர் நீதிமன்றத்தால் நேற்று பிணையில் விடுதலை செய்யப்பட்டதை அடுத்து, சிறிலங்கா பொதுஜன பெரமுனவின் நாடாளுமன்ற உறுப்பினர் நாமல் ராஜபக்ச அதனை வரவேற்றுள்ளார். இது குறித்து சமூக வலைத்தளக் கணக்கில் பதிவிட்டுள்ள நாமல்,

நான் மகிழ்ச்சியடைகிறேன்...

"இந்த முடிவுக்குப் பின்னால் உள்ள அரசியல் குறித்து நான் கருத்து தெரிவிக்கப் போவதில்லை இளம் கலைஞர் சங்கீத்சன் விடுதலை செய்யப்பட்டு, அவரது குடும்பத்தினருடன் மீண்டும் இணைந்துள்ளார் என்பதுதான் இங்கு முக்கியமானது .அது நடந்ததைக் கண்டு நான் மகிழ்ச்சியடைகிறேன் என்று குறிப்பிட்டுள்ளார்.

மேலும் இந்த இளம் கலைஞர் தனது தனித்துவமான திறமையையும், எதிர்கால அபிலாஷைகளையும் நேர்மறையான மற்றும் அர்த்தமுள்ள வழியில் தொடர்ந்து முன்னெடுப்பார் என நம்புகிறேன்" எனத் தெரிவித்துள்ள நாமல் ராஜபக்ச, பாடகரின் எதிர்காலக் கலைப் பயணத்திற்குத் தனது வாழ்த்துகளையும் பகிர்ந்துள்ளார்.

வரலாற்றில் முதல் ....உலகின் முதல் டிரில்லியனர் ஆனார் எலான் மஸ்க்

2026-06-13T20:44:36.199+05:30

எலான் மஸ்க்கின் ஸ்பேஸ்எக்ஸ் விண்வெளி மற்றும் செயற்கை நுண்ணறிவு (AI) நிறுவனம் நேற்றையதினம்(12) பங்குச் சந்தையில் அறிமுகமானதைத் தொடர்ந்து, அவர் உலகின் முதல் டிரில்லியனர் ஆனார்.

நாஸ்டாக்கில் ஆரம்பப் பொதுப் பங்களிப்பு (IPO) நடந்த சில மணி நேரங்களில், பங்குகள் அவற்றின் தொடக்க விலையான $135 (தோராயமாக €117)-ஐத் தாண்டி கணிசமாக உயர்ந்தன.

ஃபோர்ப்ஸ் பத்திரிகையின்படி, முதல் நாள் வர்த்தகத்தின் முடிவில் பங்குகள் 19%க்கும் சற்று அதிகமாக உயர்ந்து சுமார் $161 இல் நிலைபெற்றன. இது ஸ்பேஸ்எக்ஸ் நிறுவனத்தின் மதிப்பை சுமார் $2.1 டிரில்லியனாகவும், மஸ்க்கின் நிகர சொத்து மதிப்பை சுமார் $1.1 டிரில்லியனாகவும் மதிப்பிடச் செய்துள்ளது.

நியூயார்க் நேரப்படி மதியம் 1 மணிக்குச் சற்றுப் பிறகு (1700 GMT/UTC), டெக்சாஸை தளமாகக் கொண்ட அந்த விண்வெளி மற்றும் செயற்கைக்கோள் நிறுவனத்தின் பங்குகள் சுமார் $173 என்ற அளவில் நிலை கொண்டிருந்தன.

இது கிட்டத்தட்ட 28% உயர்வாகும், இதன் மூலம் அதன் சந்தை மூலதனம் சுமார் $2.26 டிரில்லியனாக இருந்தது. பின்னர், நாள் முடிவில் அவை மீண்டும் சற்று சரிந்தன.

இந்த மதிப்பீட்டின்படி, ஸ்பேஸ்எக்ஸ் மற்றும் மின்சார கார் தயாரிப்பு நிறுவனமான டெஸ்லாவில் உள்ள தனது பங்குகள் மூலம், குறைந்தபட்சம் காகித வடிவிலாவது, ஒரு டிரில்லியன் டாலர் சொத்தை வைத்திருக்கும் வரலாற்றின் முதல் நபர் என்ற பெருமையை மஸ்க் பெறுகிறார் .

அசாம் விமான விபத்தில் 5 பேர் உயிரிழப்பு

2026-06-13T20:35:23.476+05:30

அசாமின் ஜோர்ஹட்டில் விமானப் படை போக்குவரத்து விமானம் ஏஎன்-32 விபத்துக்குள்ளானதில் விமானப் படையின் 5 வீரர்கள் உயிரிழந்தனர். விபத்து குறித்து விசாரணை மேற்கொள்ளப்பட்டு வருகிறது.

விமானப் படைக்குச் சொந்தமான ஏஎன்-32 ரக போக்குவரத்து விமானம், அசாமின் ஜோர்ஹட் விமானப் படை நிலையத்தில் தரையிறங்க முயன்றபோது விபத்துக்குள்ளானது. இரண்டு இன்ஜின்கள் கொண்ட இந்த விமானத்தில் பயணித்த விமானப் படையின் ஐந்து வீரர்கள் உயிரிழந்தனர்.

இது தொடர்பாக இந்திய விமானப் படை தனது எக்ஸ் பக்கத்தில் வெளியிட்ட பதிவில், ‘அசாமின் ஜோர்ஹட்டில் இன்று காலை சுமார் 10 மணி அளவில் வழக்கமான பயணத்தின்போது இந்திய விமானப் படையின் ஏஎன்-32 விமானம் விபத்துக்குள்ளானது. விபத்து நடந்த இடத்தில் மீட்புப் பணிகளும் ஆரம்பகட்ட விசாரணைகளும் நடைபெற்று வருகின்றன.

ஆரம்பகட்ட முடிவுகள் வரும் வரை ஊகங்களை தவிர்க்குமாறு இந்திய விமானப் படை கேட்டுக்கொள்கிறது. உயிரிழப்புகளுக்கு இந்திய விமானப் படை ஆழ்ந்த வருத்தம் தெரிவிப்பதோடு, துயரமான இந்த காலகட்டத்தில் பாதிக்கப்பட்ட குடும்பத்தினருடன் உறுதுணையாக நிற்கிறது’ என தெரிவிக்கப்பட்டிருந்தது.

இதையடுத்து, விமானப் படை வெளியிட்ட மற்றொரு பதிவில், ‘விமான விபத்தில் ஐந்து வீரர்கள் உயிரிழந்ததற்கு இந்திய விமானப் படை ஆழ்ந்த வருத்தம் தெரிவிக்கிறது. ஸ்க்வாட்ரன் லீடர் பிரசாந்த் சிங், பிளைட் லெப்டினன்ட் சுபம் குமார், சார்ஜென்ட் ஜிதேந்திர சர்மா, அக்னிவீர் வாயு வீரர் கேமராம் குமாவத், அக்னிவீர் வாயு வீரர் தானிஷ் ஆலம் ஆகியோர் தங்கள் கடமையின்போது இன்னுயிரை நீத்தனர்.

உயிரிழந்தவர்களின் குடும்பத்தினருக்கு இந்திய விமானப் படை தனது ஆழ்ந்த இரங்கலை தெரிவித்துக் கொள்வதுடன் துயரமான இந்த தருணத்தில் ஆவர்களுடன் உறுதுணையாக நிற்கிறது’ என தெரிவிக்கப்பட்டுள்ளது.

எரிபொருளுக்கான அரச மானியம் ஜூன் மாதத்துடன் நிறைவு!

2026-06-13T20:26:02.883+05:30

எரிபொருளுக்காக அரசாங்கம் வழங்கி வரும் மானியங்கள் ஜூன் மாதத்துடன் நிறைவடைவதாக பெற்றோலிய கூட்டுத்தாபன அதிகாரிகள், அரசாங்க நிதி பற்றிய குழு முன்னிலையில் தெரிவித்துள்ளனர்.

இதன்போது, பொது நிதிக்குழுவின் தலைவர் கலாநிதி ஹர்ஷ டி சில்வா எழுப்பிய கேள்விக்கு பதிலளித்த அதிகாரிகள், எரிபொருள் விலை அதிகரிப்பு குறித்து அரசாங்கம் இதுவரை எந்தவொரு முடிவையும் எடுக்கவில்லை என்று குறிப்பிட்டுள்ளனர்.

எரிபொருள் நுகர்வைக் குறைப்பதே அரசாங்கத்தின் இலக்காகும் என்றும், அதற்கமையவே எரிபொருள் விலையை உயர்த்துவது போன்ற தீர்மானங்கள் எடுக்கப்பட்டதாகவும் ஜனாதிபதி அநுர குமார திசாநாயக்க கடந்த மே 13 ஆம் திகதி தெரிவித்திருந்தார்.

நுவரெலியா மாவட்ட விசேட ஒருங்கிணைப்புக் குழுக் கூட்டத்தில் கலந்துகொண்டு மேலும் கருத்து தெரிவித்திருந்த ஜனாதிபதி, உலகச் சந்தையில் எரிபொருள் விலை அதிகரித்துள்ள நிலையில், நாட்டில் ஒரு லீட்டர் டீசலின் விலை 720 ரூபாய் வரை உயர்ந்துள்ளதாகக் குறிப்பிட்டிருந்தார்.

இருப்பினும், அரசாங்கத்தினால் ஒரு லீட்டர் டீசலுக்காக 100 ரூபாய் மானியம் செலவிடப்பட்டு, 392 ரூபாய் என்ற விலைக்கு மக்களுக்கு வழங்கப்படுவதன் மூலமும் கூட்டுத்தாபனம் நட்டத்தை எதிர்கொண்டு வருவதாகவும், இதனை நீண்ட காலத்திற்கு முன்னெடுத்துச் செல்ல முடியாது என்றும் ஜனாதிபதி இங்கு வலியுறுத்தியிருந்தமை குறிப்பிடத்தக்கது.

விபரங்கள் இல்லாத சீன உணவுகள் - சூப்பர் மார்க்கெட் முற்றுகை

2026-06-13T20:01:04.277+05:30

இலங்கையின் நுகர்வோர் சட்டங்களை மீறி, தயாரிப்பு திகதி, காலாவதியாகும் திகதி அல்லது விநியோகஸ்தரின் விபரங்கள் மற்றும் ஏனைய தரவுகள் எதனையும் உள்ளடக்காமல் பொருட்களை விற்பனை செய்த சீன நிறுவனத்திற்குச் சொந்தமான பல்பொருள் அங்காடி ஒன்றை நுகர்வோர் விவகார அதிகார சபை முற்றுகையிட்டுள்ளது.

கொள்ளுப்பிட்டி பகுதியில் நடத்தப்பட்டு வந்த இந்த விற்பனை நிலையத்தில், உள்ளூர் நுகர்வோருக்கும் பொருட்கள் விற்பனை செய்யப்பட்டுள்ள போதிலும், அவற்றில் என்னென்ன பொருட்கள் அடங்கியுள்ளன என்பதை அவர்கள் அறிந்துகொள்வதற்குப் பொருத்தமான எந்தவொரு மொழியும் பயன்படுத்தப்படவில்லை எனக் குறிப்பிடப்பட்டுள்ளது.

மேலும், இந்த முற்றுகையின் போது, சீன உணவுகள் இலங்கை நபர்களால் தயாரிக்கப்பட்டு விற்பனை செய்யப்பட்டுள்ளமையும் கண்டறியப்பட்டுள்ளது.

கைப்பற்றப்பட்ட பொருட்கள் மாளிகாகந்த நீதிமன்றத்தில் ஆஜர்படுத்தப்படவுள்ளதுடன், இது தொடர்பில் நுகர்வோர் விவகார அதிகார சபை மேலதிக விசாரணைகளை மேற்கொண்டு வருகிறது.

டெங்கு மரணங்களின் எண்ணிக்கை 23 ஆக உயர்வு

2026-06-13T19:54:53.821+05:30

இந்த வருடத்தின் இதுவரையான காலப்பகுதிக்குள் 23 டெங்கு மரணங்கள் பதிவாகியுள்ளதாக தேசிய டெங்கு ஒழிப்பு பிரிவு தெரிவித்துள்ளது.

அவர்களில் நான்கு சிறுவர்களும் உள்ளடங்குவதாக அதன் சமூக வைத்திய நிபுணர் பிரஷிலா சமரவீர குறிப்பிட்டுள்ளார்.

அத்துடன், கடந்த 6 மாத காலப்பகுதியில் 40,443 டெங்கு நோயாளர்கள் பதிவாகியுள்ளதுடன், அவர்களில் 50 சதவீதமானோர் மேல் மாகாணத்திலேயே அடையாளம் காணப்பட்டுள்ளதாக அவர் மேலும் தெரிவித்தார்.

கொழும்பு, கம்பஹா, மாத்தறை, காலி, இரத்தினபுரி மற்றும் கண்டி ஆகிய மாவட்டங்கள் டெங்கு நோய் வேகமாக பரவும் மாவட்டங்களாக அடையாளம் காணப்பட்டுள்ளன.

இரண்டு நாட்களுக்கு மேல் நீடிக்கும் கடுமையான காய்ச்சல், தலைவலி, வாந்தி மற்றும் உடல் வலி போன்ற அறிகுறிகள் காணப்பட்டால், தாமதிக்காமல் உடனடியாக வைத்திய சிகிச்சைகளைப் பெற்றுக்கொள்ள வேண்டும் என வைத்திய நிபுணர் பிரஷிலா சமரவீர மேலும் தெரிவித்துள்ளார்.

இதற்கிடையில், கொழும்பு மாவட்டத்தில் ஜூன் மாதம் 15 ஆம் திகதி முதல் 21 ஆம் திகதி வரை விசேட டெங்கு ஒழிப்பு வாரத்தை நடைமுறைப்படுத்த கொழும்பு மாவட்ட டெங்கு ஒழிப்பு குழு தீர்மானித்துள்ளது.

பிரதமர் கலாநிதி ஹரினி அமரசூரிய தலைமையில் நேற்று (12) கொழும்பு மாவட்ட செயலகத்தில் நடைபெற்ற இக்குழுவின் கூட்டத்தின் போதே இந்தத் தீர்மானம் எட்டப்பட்டுள்ளது.

நாடு முழுவதிலும் இருந்து பதிவாகும் டெங்கு நோயாளர்களில் 25.8 சதவீதமானோர் கொழும்பு மாவட்டத்திலேயே பதிவாகியுள்ளனர். இதன் காரணமாக, அந்தப் பகுதியை 'அதி அவதானம்' மிக்க மாவட்டமாக பெயரிட தேசிய டெங்கு ஒழிப்பு பிரிவு நடவடிக்கை எடுத்துள்ளது.

கடந்த காலங்களில் நிலவிய அதிக மழைவீழ்ச்சியுடனான காலநிலை காரணமாக டெங்கு பரவல் மீண்டும் தீவிரமடைந்துள்ளதாக சுகாதாரப் பிரிவினர் இங்கு சுட்டிக்காட்டியுள்ளனர்.

இம்முறை டெங்கு பரவலானது வீடுகளை விட, அரசு மற்றும் தனியார் நிறுவனங்கள், பாடசாலைகள் மற்றும் மத வழிபாட்டுத் தலங்கள் போன்ற பொது இடங்களில் அதிகமாக பதிவாகியுள்ளமை விசேடமாக கண்டறியப்பட்டுள்ளது.

இதன்படி, டெங்கு ஒழிப்பு வாரத்தில் பொது இடங்கள் மற்றும் வீடுகளைச் சுத்தம் செய்வதற்கான சிரமதான வேலைத்திட்டங்களை ஏற்பாடு செய்தல், அதி அவதானம் மிக்க வீடுகளைப் பரிசோதித்தல் மற்றும் விழிப்புணர்வுகளை ஏற்படுத்திய பின்னர் சட்ட நடவடிக்கை எடுத்தல் போன்ற பல நடவடிக்கைகள் முன்னெடுக்கப்படவுள்ளன.

மன்னார் புனித சவேரியார் ஆண்கள் கல்லூரி பழைய மாணவர் சங்கத்தின்அதிகாரப்பூர்வ அறிவிப்பு

2026-06-13T15:58:36.403+05:30

அதிகாரப்பூர்வ அறிவிப்பு – வருடாந்த பொதுக்கூட்டம் 2026*

மன்னார் புனித சவேரியார் ஆண்கள் கல்லூரி பழைய மாணவர் சங்கத்தின் (OBA) வருடாந்த பொதுக்கூட்டம் (AGM) 2026 ஆம் ஆண்டு ஜூன் 14 ஆம் திகதி ஞாயிற்றுக்கிழமை புனித சவேரியார் ஆண்கள் கல்லூரி வளாகத்தில் நடைபெறவுள்ளது.

இக்கூட்டத்தில் சங்கத்தின் கடந்தகால செயற்பாடுகள் மற்றும் எதிர்கால திட்டங்கள் குறித்து கலந்துரையாடப்படுவதுடன், வரவிருக்கும் காலப்பகுதிக்கான புதிய நிர்வாகக் குழுவும் தெரிவு செய்யப்படும்.

மேலும், கூட்டம் ஆரம்பிக்கும்முன் பழைய மாணவர்களின் வருடாந்த சந்தா கட்டணம் (Annual Subscription Fee) வசூலிக்கப்படும் என்பதை தயவுடன் அறியத்தருகின்றோம்.

எனவே, புனித சவேரியார் ஆண்கள் கல்லூரியின் அனைத்து பழைய மாணவர்களையும் இந்நிகழ்வில் கலந்துகொண்டு, பாடசாலையின் வளர்ச்சிக்கும் முன்னேற்றத்திற்கும் தங்களது பங்களிப்பை வழங்குமாறு அன்புடன் அழைக்கிறோம்.

📅 திகதி: 14 ஜூன் 2026 (ஞாயிற்றுக்கிழமை)

📍 இடம்: புனித சவேரியார் ஆண்கள் கல்லூரி, மன்னார்

🕒 நேரம்: [9.30 AM]

"ஒருமுறை சவேரியன் – எப்போதும் சவேரியனே!"

அநுராதபுரம் சிறுமி துஷ்பிரயோகம்; இரத்தம் மாதிரி கொடுக்க தேரருக்கு உத்தரவு

2026-06-12T21:39:36.384+05:30

அநுராதபுரத்தின் முன்னாள் அட்டமஸ்தானாதிபதி பல்லேகம ஹேமரத்தன தேரரை, எதிர்வரும் ஜூன் 16 ஆம் திகதி அரச இரசாயன பகுப்பாய்வாளர் திணைக்களத்திற்குச் சென்று, டி.என்.ஏ. (DNA) பரிசோதனைக்காகத் தனது இரத்த மாதிரியை வழங்குமாறு அநுராதபுர பிரதம நீதவான் சியபத் சசிந்து விக்ரமரத்ன உத்தரவிட்டுள்ளார்.

இரத்த மாதிரியை வழங்கியதன் பின்னர், அது தொடர்பான டி.என்.ஏ. பரிசோதனை அறிக்கையை நீதிமன்றத்தில் சமர்ப்பிக்குமாறும் பிரதம நீதவான் அரச இரசாயன பகுப்பாய்வாளருக்குப் பணித்துள்ளார்.

சிறுமியால் மறைத்து வைக்கப்பட்டிருந்த ஆடைகள்

நிட்டம்புவ பொலிஸார் தாக்கல் செய்த மேலதிக அறிக்கையை கவனத்தில் கொண்டே நீதவான் இந்த உத்தரவைப் பிறப்பித்துள்ளார்

. நீதிமன்ற உத்தரவின்படி, முன்னர் பாதிக்கப்பட்ட சிறுமியால் மறைத்து வைக்கப்பட்டிருந்த நிலையில் மீட்கப்பட்ட, இரத்தக் கறைகள் படிந்திருப்பதாகச் சந்தேகிக்கப்படும் ஆடைகள், அரச இரசாயன பகுப்பாய்வாளருக்கு அனுப்பி வைக்கப்பட்டிருந்தன.

அந்த ஆடைகளில் மேற்கொள்ளப்பட்ட டி.என்.ஏ. பரிசோதனையில், சிறுமியின் ஆடைகளில் டி.என்.ஏ. அணுக்கள் (DNA Alleles) இருப்பது உறுதி செய்யப்பட்டுள்ளதாக அரச இரசாயன பகுப்பாய்வாளர் அறிக்கை சமர்ப்பித்துள்ளதாக நிட்டம்புவ பொலிஸார் நீதிமன்றத்தில் தெரிவித்தனர்.

இதனையடுத்து, சந்தேகத்திற்குரிய தேரரின் இரத்த மாதிரியைப் பெற்று, அந்த ஆடைகளில் கண்டெடுக்கப்பட்ட டி.என்.ஏ. மாதிரிகளுடன் ஒப்பிட்டுப் பார்ப்பதற்காகவே இந்த நீதிமன்ற உத்தரவு பிறப்பிக்கப்பட்டுள்ளது.

PTA நீக்கம்; சட்டமா அதிபர் அதிரடி உத்தரவு ;சங்கீத்சனுக்கு பிணை!

2026-06-12T21:34:11.983+05:30

சொல்லிசை கலைஞர் சங்கீத்சன் தொடர்பான வழக்கில் சற்றுமுன் முக்கிய தீர்ப்பு வெளியாகியுள்ளது. கைது செய்யப்பட்டு விளக்கமறியலில் வைக்கப்பட்டிருந்த அவர் இன்று சாவகச்சேரி நீதிவான் நீதிமன்றத்தில் முன்னிலைப்படுத்தப்பட்டார். வழக்கை பரிசீலித்த நீதிமன்றம் சங்கீத்சனுக்கு பிணை வழங்க உத்தரவிட்டுள்ளது.

சொல்லிசை பாடகர் சங்கீத்சனுக்கு எதிராகப் பாய்ந்திருந்த பயங்கரவாத தடைச் சட்டப் பிரிவுகளை நீக்கி தண்டனைச் சட்டக் கோவை பிரிவுகளில் வழக்கு தாக்கல் செய்யுமாறு பொலிசாருக்கு பணிபுரை விடுத்துள்ளதாக தெரிவிக்கப்படுகின்றது.

சொல்லிசை பாடகர் சங்கீத்சனுக்கு எதிராகப் பாய்ந்திருந்த பயங்கரவாதத் தடைச் சட்டத்தை (PTA) முழுமையாக நீக்கி, சட்டமா அதிபர் பிறப்பித்துள்ள அதிரடி உத்தரவு இன்றைய தினம் நீதிமன்றில் வழங்கப்பட்டு உள்ளது.

சமூக வலைத்தளங்களிலும், அரசியல் தளங்களிலும் பெரும் பரபரப்பை ஏற்படுத்தியிருந்த இந்த வழக்குத் தொடர்பில், அடுத்தகட்ட நடவடிக்கை குறித்துப் பொலிஸார் சட்டமா அதிபரின் ஆலோசனையைக் கோரியிருந்தனர்.

வழக்கின் நுணுக்கங்களையும், பின்னணிகளையும் மிக ஆழமாக ஆராய்ந்த சட்டமா அதிபர், எவ்வித அரசியல் அழுத்தங்களுக்கும் இடமளிக்காது, மிகவும் துணிச்சலான மற்றும் கௌரவமிக்க தீர்மானம் ஒன்றை எடுத்துள்ளார்.

இளைஞன் சங்கீத்சனுக்கு எதிராகக் சுமத்தப்பட்டிருந்த கொடூரமான பயங்கரவாதத் தடைச் சட்டக் குற்றச்சாட்டுகளை சட்டமா அதிபர் முழுமையாக நீக்கியுள்ளார்.

அதோடு இந்த வழக்கினை தண்டனைச் சட்டக் கோவையின் 120ஆம் பிரிவின்கீழ் (சாதாரண சட்டப் பிரிவு) மாற்றிப் பதிவு செய்யுமாறு பொலிஸாருக்கு பணிப்புரை விடுத்துள்ளார்.

உலகளவில் முடங்கிய பேஸ்புக், இன்ஸ்ட்டா!

2026-06-12T21:29:17.179+05:30

பேஸ்புக், இன்ஸ்டாகிராம், த்ரட் மற்றும் மெட்டா நிறுவனத்திற்குச் சொந்தமான இன்னும் சில சமூக ஊடகத் தளங்கள் உலகளாவிய ரீதியில் செயலிழந்துள்ளன.

இதனால் மில்லியன் கணக்கான பயனர்கள் தங்களது கணக்குகளைப் பயன்படுத்த முடியாமல் தவித்து வருவதாக தகவல்கள் வௌியாகியுள்ளன.

மின்னல் தாக்கியதால் ஸ்ரீலங்கன் விமானம் அவசரமாக தரையிறக்கம்

2026-06-12T19:22:28.308+05:30

கட்டுநாயக்க சர்வதேச விமான நிலையத்திலிருந்து நேற்று இரவில் அவுஸ்திரேலியாவின் மெல்போர்ன் நகரம் நோக்கிப் பயணத்தை ஆரம்பித்த விமானம் ஒன்று அவசரமாகத் தரையிறக்கப்பட்டுள்ளது.

மின்னல் தாக்கியதன் காரணமாகவே இந்த விமானம் இவ்வாறு அவசரத் தரையிறக்கத்தை மேற்கொண்டுள்ளதாக ஸ்ரீலங்கன் விமான சேவை நிறுவனம் தெரிவித்துள்ளது.

யு.எல். 606 (UL 606) ரகத்தைச் சேர்ந்த இந்த விமானத்தின் ஒரு எஞ்சின் மீது மின்னல் தாக்கியுள்ளதாகத் தெரிவிக்கப்படுவதுடன், ஒரு பாதுகாப்புப் படியாக விமானத்தை மீண்டும் கட்டுநாயக்க விமான நிலையத்திலேயே தரையிறக்குவதற்கு நடவடிக்கை எடுக்கப்பட்டுள்ளது.

அதன் பின்னர், மாற்று விமானம் ஒன்றின் மூலம் குறிப்பிட்ட பயணிகள் குழுவினர் அவுஸ்திரேலியாவின் மெல்போர்ன் நகரம் நோக்கி அனுப்பி வைக்கப்பட்டுள்ளதுடன், இந்தச் சம்பவத்தின் காரணமாக விமானப் பயணம் 5 மணித்தியாலங்களுக்கும் அதிக நேரம் தாமதமாகியுள்ளது.

இச்சம்பவத்தினால் பயணிகள் எவருக்கும் அல்லது விமானத்திற்கு எந்தவித பாதிப்பும் ஏற்படவில்லை என ஸ்ரீலங்கன் விமான சேவையின் ஊடகப் பேச்சாளர் ஒருவர் குறிப்பிட்டுள்ளார்.

முழு அரசு மரியாதையுடன் இயக்குநர் பாரதிராஜா உடல் நல்லடக்கம்

2026-06-11T19:28:44.698+05:30

இயக்குநர் இமயம் பாரதிராஜா உடலுக்கு பொலிஸார் அணிவகுத்து 72 குண்டுகள் முழுங்க முழு அரசு மரியாதையுடன் உடல் நல்லடக்கம் செய்யப்பட்டது.

இயக்குநர் இமயம் என்று அழைக்கப்பட்ட பாரதிராஜா வயோதிகம் மற்றும் உடல் நலக்குறைவால் தனது 84 வயதில் நேற்று (10) காலமானார்.

72 குண்டுகள் முழுங்க முழு அரசு மரியாதையுடன் உடல் நல்லடக்கம்

பாரதிராஜா மறைவு செய்தி திரையுலகிலும், ரசிகர்கள் மத்தியிலும் பெரும் அதிர்ச்சியையும், சோகத்தையும் ஏற்படுத்தியது.

சென்னை நீலாங்கரையில் உள்ள அவரது வீட்டில் உடல் வைக்கப்பட்டிருந்த நிலையில், திரைத்துறையினர், அரசியல் கட்சி தலைவர்கள் என பலரும் நேரில் வந்து அஞ்சலி செலுத்தினர்.

பிறகு, நேற்று இரவு சென்னையில் இருந்து சொந்த ஊரான தேனி மாவட்டம் வத்தலக்குண்டு காட்ரோடு அருகேயுள்ள அவரது பண்ணை வீட்டிற்கு கொண்டு செல்லப்பட்ட பாரதிராஜாவின் உடலுக்கு உறவினர்கள், ஊர்க்காரர்கள், ரசிகர்கள் திரண்டு வந்து அஞ்சலி செலுத்தினர்.

இந்நிலையில், இன்று (11) பிற்பகல் 3 மணிக்கு மேல் பாரதிராஜாவின் உடலுக்கு இறுதி சடங்குகள் நடத்தப்பட்டது. தொடர்ந்து, பாரதிராஜாவின் உடலுக்கு முழு அரசு மரியாதை வழங்கப்பட்டது.

பொலிஸார் அணிவகுத்து வந்து பாரதிராஜா உடலுக்கு 72 குண்டுகள் முழுங்க முழு அரசு மரியாதையுடன் உடல் நல்லடக்கம் செய்யப்பட்டது.

அங்கொட தேசிய தொற்று நோயியல் நிறுவனத்திற்கு சர்வதேச அங்கீகாரம்

2026-06-11T19:12:00.733+05:30

டெங்கு நோய் தொடர்பான கூட்டு சர்வதேச ஆராய்ச்சி மற்றும் பயிற்சி மையமாக உலக சுகாதார அமைப்பினால் (WHO) அங்கொட தேசிய தொற்று நோயியல் நிறுவனம் (IDH) பெயரிடப்பட்டுள்ளது.

இலங்கையின் சுகாதாரத் துறையில் ஒரு முக்கிய மைல்கல்லைக் குறிக்கும் வகையில், அங்கொட தேசிய தொற்றுநோய் தடுப்பு நிறுவனத்திற்கு உலக சுகாதார அமைப்பு இந்தச் சிறப்பு அங்கீகாரத்தை வழங்கியுள்ளது.

இதன்படி, டெங்கு நோய் முகாமை குறித்த பயிற்சி மற்றும் ஆராய்ச்சிக்கான உலக சுகாதார அமைப்பின் கூட்டு மையமாக தேசிய தொற்றுநோய் தடுப்பு நிறுவனம் பெயரிடப்பட்டுள்ளது.

இலங்கையில் இந்த கௌரவத்தைப் பெற்ற முதலாவது வைத்தியசாலை அங்கொட தேசிய தொற்று நோயியல் நிறுவனமாகும்.

இது வைத்தியசாலையின் நிர்வாக மற்றும் மருத்துவக் குழுவினரின் பல வருட தொடர்ச்சியான முயற்சி மற்றும் அர்ப்பணிப்பின் விளைவாகக் கிடைத்த ஒரு மதிப்புமிக்க வாய்ப்பாகும்.

இதுவரை காலமும் இலங்கையின் சுகாதாரப் பணியாளர்கள் கல்வி கற்பதற்காக ஏனைய நாடுகளுக்குச் சென்று வந்த நிலையில், இந்த மையம் இலங்கையில் நிறுவப்பட்டதன் பின்னர், ஏனைய நாடுகளின் சுகாதாரப் பணியாளர்கள் டெங்கு நோய் முகாமைத்துவம் தொடர்பான பயிற்சிகளைப் பெற்றுக்கொள்வதற்கும், ஆராய்ச்சிகளை மேற்கொள்வதற்கும் நம் நாட்டிலேயே வாய்ப்புக் கிடைக்கிறது.

இதற்கான ஒரு பூர்வாங்கத் தயாரிப்பாக, தேசிய தொற்றுநோய் தடுப்பு நிறுவனத்தினால் நிறுவப்பட்ட ஆராய்ச்சி மற்றும் பயிற்சி மையத்தின் (CeRT) மூலம் பங்களாதேஷ், நேபாளம், பூட்டான் போன்ற நாடுகளுக்கு டெங்கு நோய் முகாமைத்துவம் குறித்த தத்துவார்த்த மற்றும் மருத்துவ அறிவை வழங்கும் பணிகள் தற்போது ஏற்கனவே முன்னெடுக்கப்பட்டுள்ளன.

டெங்கு நோய் முகாமைக்கான பயிற்சி மற்றும் ஆராய்ச்சி மையமாக அங்கொட தேசிய தொற்று நோயியல் நிறுவனத்திற்கு இந்த அங்கீகாரம் 4 ஆண்டுகள் காலப்பகுதிக்கு வழங்கப்பட்டுள்ளதுடன், அடுத்த நான்கு ஆண்டுகளில் வைத்தியசாலை எட்ட வேண்டிய சில இலக்குகளையும் உலக சுகாதார அமைப்பு சுட்டிக்காட்டியுள்ளது.

அதன்படி, வருடாந்தம் அதன் முன்னேற்றம் குறித்த அறிக்கைகளை தேசிய தொற்றுநோய் தடுப்பு நிறுவனம் உலக சுகாதார அமைப்பிற்கு வழங்க வேண்டும் என்பதுடன், அந்த இலக்குகளைச் சரியான முறையில் பூர்த்தி செய்வதன் மூலம் மட்டுமே அடுத்த 4 ஆண்டுகளுக்கும் உலக சுகாதார அமைப்பின் கூட்டு மையமாக தேசிய தொற்றுநோய் தடுப்பு நிறுவனம் தொடர்ந்து பெயரிடப்படும்.

அவற்றைச் சாதிப்பதற்கான உலக சுகாதார அமைப்பின் தொடர்ச்சியான ஆதரவும் அங்கொட தேசிய தொற்று நோயியல் நிறுவனத்திற்குக் கிடைக்கும்.

அதன் தொடக்கமாக, அடுத்த இரண்டு மாதங்களுக்குள் மாலைதீவு மற்றும் நேபாளத்தின் சுகாதார அதிகாரிகளைப் பயிற்சிப் பட்டறைகளில் இணைத்துக் கொள்ள தேசிய தொற்றுநோய் தடுப்பு நிறுவனம் எதிர்பார்க்கிறது.

எபோலா உள்ளிட்ட கடுமையான தொற்றுநோய்களைப் பரிசோதிப்பதற்காக நவீன ஆய்வகக் கட்டிடம் ஒன்றும் வைத்தியசாலைக்குள் கட்டப்பட்டு வருவதுடன், இந்த ஆண்டுக்குள் அதனைச் சிகிச்சை சேவைகளுக்காக இணைத்துக் கொள்ளவும் நடவடிக்கை எடுக்கப்படும் என்று அங்கொட தேசிய தொற்று நோயியல் நிறுவனத்தின் பணிப்பாளர், விசேட வைத்திய நிபுணர் ஏ.பி. சந்தநாயக்க தெரிவித்தார்.

தேசிய தொற்றுநோய் தடுப்பு நிறுவனம் டெங்கு நோய் முகாமைத்துவம் குறித்த பயிற்சி மற்றும் ஆராய்ச்சிக்கான உலக சுகாதார அமைப்பின் கூட்டு மையமாகப் பெயரிடப்பட்டமை குறித்துப் பொதுமக்களுக்குத் தெளிவுபடுத்துவதற்கான விசேட செய்தியாளர் சந்திப்பு இன்று (11) அங்கொட தேசிய தொற்று நோயியல் நிறுவனத்தில் நடைபெற்றது.

நாட்டில் 5 வயதுக்குட்பட்ட பிள்ளைகளிடையே மந்த போசணை அதிகமுள்ள மாகாணம் ஊவா!

2026-06-11T18:33:41.177+05:30

இலங்கையில் 5 வயதுக்குட்பட்ட பிள்ளைகளிடையே மந்த போசணை மிக அதிகமாகக் காணப்படும் மாகாணம் ஊவா மாகாணம் என்று பதுளை போதனா வைத்தியசாலையின் ஊட்டச்சத்து விசேட வைத்தியர் வாசனா மாரசிங்க தெரிவித்துள்ளார்.

நேற்று (10) போசணையின் முக்கியத்துவம் குறித்த விழிப்புணர்வுப் பேரணிக்கு இணையாக பதுளை போதனா வைத்தியசாலையில் நடைபெற்ற விழிப்புணர்வுத் திட்டத்தில் கலந்துகொண்டு கருத்துத் தெரிவிக்கும் போதே அவர் இதனைப் பகிர்ந்து கொண்டார்.

இதேவேளை, இந்த மாகாணத்தில் மந்த போசணை மட்டுமன்றி, அதிபோசணை (Overnutrition) அதாவது தேவையற்ற முறையில் உடல் எடை அதிகரித்தல் என்ற நிலையும் அதிகமாகக் காணப்படுவதாக வைத்தியர் குறிப்பிட்டுள்ளார்.

மக்களின் ஊட்டச்சத்து குறித்த அறிவு மட்டம் குறைவாக இருப்பதே இதற்கான காரணம் என்றும் அவர் மேலும் தெரிவித்துள்ளார்.

இலங்கை கடற்பரப்பிற்குள் இழுவை படகு மூலம் ஊடுருவி சட்டவிரோத மீன்பிடியில் ஈடுபடுவதற்கு தயாராகும் இந்திய மீனவர்கள். இலங்கை கடல் வளங்களை பாதுகாத்து தருமாறு இலங்கை அரசாங்கத்திடம் வடமாகாண கடற்றொழிலாளர் களின் இணையம் அவசர வேண்டுகோள் முன் வைப்பு.

2026-06-11T18:17:08.931+05:30

இலங்கை கடற்பரப்பிற்குள் இழுவை படகு மூலம் ஊடுருவி சட்டவிரோத மீன்பிடியில் ஈடுபடுவதற்கு தயாராகும் இந்திய மீனவர்களின் வருகையை தடுப்பதுடன் இலங்கை கடல் வளங்களை பாதுகாத்து தருமாறு இலங்கை அரசாங்கத்திடம் வடமாகாண கடற்றொழிலாளர் களின் இணையம் அவசர வேண்டுகோளினை முன்வைத்துள்ளது.

இவ்விடயம் தொடர்பாக வடமாகாண கடற்றொழிலாளர் இணையம் ஜனாதிபதிக்கு அவசர கடிதம் அனுப்பி வைத்துள்ளது.குறித்த விடயம் தொடர்பாக தெளிவு படுத்தும் ஊடக சந்திப்பு இன்றைய தினம் வியாழக்கிழமை (11) காலை மன்னாரில் இடம் பெற்றது.

இதன் போது வடமாகாண கடற்றொழிலாளர் களின் இணையத்தின் செயலாளர் என்.எம்.ஆலம் ஊடகங்களுக்கு கருத்து தெரிவித்தார்.

அவர் மேலும் தெரிவிக்கையில்,,,

ஜூன் 15ஆம் தேதி எதிர்பார்க்கப்படும் இலங்கை எல்லை கடற்பரப்பில் தமிழ்நாட்டின் இழுவைப் படகுகளால் மீண்டும் தொடங்க படவிருக்கும் எல்லை தாண்டிய மீன்பிடி நடவடிக்கைகள் குறித்து ஆழ்ந்த மற்றும் அவசரமான கவலையை வெளிப்படுத்துகிறோம்.

பல ஆண்டுகளாக, குறிப்பாக சட்டவிரோத அடிமட்ட இழுவை மீன்பிடி முறைகள் சம்பந்தப்பட்ட இத்தகைய அழிவுகரமான ஊடுருவல்கள், இலங்கையின் கடல் சூழல் அமைப்புகளுக்கு கடுமையான மற்றும் சரி செய்ய முடியாத சேதத்தை ஏற்படுத்தியுள்ளது.

அவை முக்கியமான கடல் உணவு இருப்புகளை குறைத்ததோடு குறிப்பாக வடக்கு மற்றும் வடமேற்கு கடலோரப் பகுதிகளில் ஆயிரக்கணக்கான வடக்கு மீனவர்கள் மற்றும் அவர்களது குடும்பங்களின் வாழ்வாதாரங்களுக்கு பெரும் அச்சுறுத்தலாக அமைந்துள்ளது.

மேலும் சரி செய்ய முடியாத சேதம் ஏற்படுவதற்கு முன்னர், இந்த சட்டவிரோத ஊடுருவல் களை தடுத்து நாட்டின் இறையாண்மைக்கு உட்பட்ட கடல் வளங்களை பாதுகாக்க ஜனாதிபதி கடற்றொழில், நீரியல் மற்றும் சமுத்திர வளங்கள் அமைச்சு, இலங்கை கடற்படை மற்றும் சம்பந்தப்பட்ட அனைத்து அரசாங்க அதிகாரிகளும் உடனடி தீர்க்கமான மற்றும் அமல் படுத்தக்கூடிய நடவடிக்கைகளை எடுக்க வேண்டும் என்று இலங்கை வட மாகாண மீனவ சமூகம் மரியாதையுடனும் உரியது உறுதியுடனும் கேட்டுக்கொள்கிறோம்.

இந்த அழிவுகரமான மீன்பிடி முறைகள் எளிதில் பாதிப்படைய கூடிய கடலடி தளங்களையும் கடல் வாழ்விடங்களும் சேதப் படுத்துவதோடு மட்டுமல்லாமல் இலங்கையின் மீன்பிடித் தொழிலின் நிலைத்தன்மையும் அடிப்படையாக சீர்குலைக்கின்றன.

மேலும் உலகச் சந்தைகளுக்கு தரமான கடல் உணவு வழங்கும் நாட்டின் திறனையும் நேரடியாக பாதிக்கின்றன. அதே நேரத்தில் இலங்கை கடல் உணவு ஏற்றுமதியாளர்கள் தற்போதுள்ள அமெரிக்க தீர்வைகள் மற்றும் பிரிவு 301 நடவடிக்கைகளின் கீழ் கூடுதலாக 12.5% தீர்வை விதிக்க ப்படும் அச்சுறுத்தல் உள்ளிட்ட சர்வதேச சந்தைகளில் அதிகரித்து வரும் அழுத்தங்களையும் தொடர்ந்து எதிர்கொண்டு வருகின்றனர்.

சட்டவிரோத மீன்பிடி நடவடிக்கைகள், அதிகரித்து வரும் செயல்பாட்டு செலவுகள் மற்றும் தீவிரமடைந்து வரும் வர்த்தக தடைகள் ஆகியவற்றின் கூட்டு விளைவானது இலட்சக்கணக்கானோர் வாழ்வாதாரங்களுக்கு ஆதரவளித்து இலங்கை பொருளாதாரத்திற்கு இன்றியமையாத அந்நிய செலாவணி வருவாய் ஈட்டித் தரும் ஒரு தொழில் மீது மிகப்பெரிய மற்றும் தாங்க முடியாத அழுத்தத்தை ஏற்படுத்துகிறது.

நமது தேசிய மீன்பிடி வளங்களை பாதுகாப்பது என்பது ஒரு பொருளாதார அவசர தேவை மட்டு மல்ல . இலங்கையின் கடல் உணவு ஏற்றுமதிகள் மீதான சர்வதேச நம்பிக்கையை பேணுவதற்கும், முக்கிய உலகளாவிய சந்தைகளுக்கான அணுகலைப் பாதுகாப்பதற்கும் இது ஒரு முன் நிபந்தனையாகும் என்று இலங்கை வடமாகாண மீனவ சமூகம் வலியுறுத்துகிறது.

இதனை மிக உயர்ந்த தேசிய முன்னுரிமையாக கருதி இலங்கையின் கடல் எல்லைகளை பாதுகாக்க சட்டத்தின் முழு பலத்துடன் செயல்படுமாறு அரசாங்கத்தை நாங்கள் கேட்டுக்கொள்கிறோம்.

தற்போதைய மற்றும் எதிர்கால சந்ததியினரின் நலனுக்காக, நிலையான மீன்பிடி மேலாண்மை, பொறுப்பான அறுவடை நடைமுறைகள் மற்றும் இலங்கையின் கடல் சூழலின் நீண்ட கால பாதுகாப்பு ஆகியவற்றை ஆதரிப்பதில் வடக்கு மீனவராகிய நாம் முழுமையாக உறுதி பூண்டுள்ளோம். என குறித்த கடிதத்தில் குறிப்பிடப்பட்டுள்ளதாக அவர் மேலும் தெரிவித்தார்.

மன்னாரில் பயங்கரவாத தடைச் சட்டத்திற்கு எதிராகவும் கைது செய்யப்பட்ட பாடகர் சங்கீதனை விடுதலை செய்யக் கோரியும் பாரிய போராட்டம் முன்னெடுப்பு -பொலிஸார் தலையீடு

2026-06-11T18:10:08.658+05:30

பயங்கரவாத தடைச் சட்டத்திற்கு எதிராகவும் கைது செய்யப்பட்டுள்ள சொல்லிசை பாடகர் சங்கீதனை விடுதலை செய்யக் கோரியும், இலங்கை தமிழரசுக் கட்சியின் மன்னார் கிளை ஏற்பாடு செய்த போராட்டம் இன்று வியாழக்கிழமை (11) காலை 10 மணியளவில் மன்னார் அரச பேருந்து தரிப்பிடத்திற்கு முன்பு இடம் பெற்றது.

குறித்த போராட்டத்திற்கு ஆதரவு தெரிவித்து பொது அமைப்புக்கள்,சிவில் அமைப்புக்கள்,மன்னார் பிரஜைகள் குழு,மன்னார் மாவட்ட காணாமல் ஆக்கப்பட்ட உறவுகளை சங்கத்தினர்,அரசியல் பிரதிநிதிகள்,பெண்கள் அமைப்புக்கள் உள்ளடங்களாக நூற்றுக்கணக்கானவர்கள் கலந்து கொண்டனர்.

பயங்கரவாத தடைச்சட்டத்தின் கீழ் இளைஞர்கள் கைது செய்யும் நடவடிக்கை முன்னெடுக்கப்பட்டு வருகிறது.அதன் ஒரு கட்டமாக சொல்லிசை பாடகர் சங்கீதன் கைது செய்யப்பட்டு சிறை வைக்கப்பட்டுள்ளார்.

கைது செய்யப்பட்ட இளைஞனுக்கு நீதி வேண்டியும்,பயங்கரவாத தடைச்சட்டத்தை இந்த நாட்டிலே இல்லாது செய்ய வேண்டும் என்ற கோரிக்கையை முன் வைத்து குறித்த போராட்டம் முன்னெடுக்கப்பட்டது.

குறிப்பாக இந்த நாட்டில் அமுலில் உள்ள பயங்கரவாத தடைச் சட்டம் ரத்து செய்யப்பட வேண்டும்,கைது செய்யப்பட்ட பாடகர் சங்கீத் உற்பட பயங்கரவாத தடைச்சட்டத்தின் கீழ் கைது செய்யப்பட்டு நீண்ட காலமாக சிறையில் உள்ள அனைவரும் விடுதலை செய்யப்பட வேண்டும்.இதற்கு ஜனாதிபதி துரித நடவடிக்கைகளை மேற்கொள்ள வேண்டும் என போராட்டத்தில் ஈடுபட்டவர்கள் கோரிக்கை விடுத்தனர்.

போராட்டத்தில் ஈடுபட்டவர்கள் அமைதியான முறையில் பதாகைகளை ஏந்தியவாறு ஈடுபட்ட நிலையில் திடீர் என குறித்த பகுதிக்கு வருகை தந்த மன்னார் பொலிஸார் பதாகை ஒன்றில் எழுதப்பட்ட வசனம் ஒன்று குறித்து சிறிது நேரம் விசாரணை மேற்கொண்டனர்.

குறிப்பாக குறித்த பதாதையில் அரசே 'பயங்கரவாத தடைச்சட்டத்தை' நீக்கு என எழுதப்பட்ட குறித்த வசனத்தை தவறான முறையில் விளங்கிக் கொண்டமையினால் குறித்த நிலை ஏற்பட்டது.

பின்னர் குறித்த பதாதையில் தமிழில் எழுதப்பட்ட வசனம் சிங்கள மொழியில் வாசித்துக் காட்டப் பட்ட நிலையில் பொலிஸார் அவ்விடத்தில் இருந்து சென்றனர்.

தொடர்ச்சியாக அமைதியான முறையில் குறித்த போராட்டம் முன்னெடுக்கப்பட்டது குறிப்பிடத்தக்கது.

தமிழரசுக் கட்சியால் உயிருக்கு அச்சுறுத்தல் ; அவசர பாதுகாப்பு கோருகிறார் அர்ச்சுனா!

2026-06-11T09:49:35.028+05:30

இலங்கைத் தமிழரசுக் கட்சியினரால் தனது உயிருக்கு அச்சுறுத்தல் ஏற்பட்டுள்ளதாக நாடாளுமன்ற உறுப்பினர் இராமநாதன் அர்ச்சுனா தெரிவித்துள்ளார்.

இதன் காரணமாக, ஒரு மக்கள் பிரதிநிதியாகப் பொதுமக்களைச் சந்திப்பதில் தனக்கு பெரும் இடையூறு ஏற்பட்டுள்ளதாகவும், எனவே தனது பாதுகாப்பை உடனடியாக உறுதிப்படுத்துமாறும் அவர் சபாநாயகரிடம் கோரிக்கை விடுத்துள்ளார்.

நாடாளுமன்றத்தில் நேற்று புதன்கிழமை (10) நடைபெற்ற அமர்வின் போது, சிறப்புரிமை மீறல் பிரச்சினையொன்றை எழுப்பி உரையாற்றிய போதே அவர் இந்த விவகாரத்தை சபையின் கவனத்திற்குக் கொண்டு வந்தார்.

இலங்கைத் தமிழரசுக் கட்சியினாலும், சில உள்ளூராட்சி சபை உறுப்பினர்களாலும் தனக்குத் தொடர்ச்சியாக அச்சுறுத்தல்கள் விடுக்கப்பட்டு வருகின்றன.

இதனால் நாடாளுமன்றத்துக்கு வருவதிலும், தொகுதி மக்களை நேரில் சந்திப்பதிலும் அச்சுறுத்தல் நிலவுகிறது.

நாடாளுமன்ற உறுப்பினர்களின் பாதுகாப்பை உறுதிப்படுத்துவதற்கு அரசாங்கம் முறையான எந்தவொரு நடவடிக்கையையும் எடுக்கவில்லை.

இது குறித்து தான் சபையில் தொடர்ச்சியாகப் பேசிய போதிலும், அதிகாரிகள் தரப்பில் உரிய கவனம் செலுத்தப்படவில்லை.

தனது பாதுகாப்புக்காக வழங்கப்பட்டுள்ள அதிகாரபூர்வ துப்பாக்கி தொடர்பிலும் தேவையற்ற பிரச்சினைகள் ஏற்படுத்தப்பட்டு வருகின்றன.

எனினும், தான் அந்தத் துப்பாக்கியை ஒருபோதும் முறையற்ற வகையில் பயன்படுத்தியதில்லை.

தமக்கான பாதுகாப்பு அச்சுறுத்தல்கள் குறித்து நாடாளுமன்றம் உடனடியாகத் தலையிட்டு, முறையான மற்றும் அவசர நடவடிக்கைகளை முன்னெடுக்க வேண்டும் என நாடாளுமன்ற உறுப்பினர் இராமநாதன் அர்ச்சுனா வலியுறுத்தியுள்ளார்.

குவைத்தில் போதைப்பொருள் கடத்தலில் ஈடுபட்ட 3 இலங்கையர்கள் கைது!

2026-06-11T09:42:22.570+05:30

குவைத்தில் போதைப்பொருள் கடத்தலில் ஈடுபட்ட மூன்று இலங்கையர்கள் உட்பட ஏழு பேரை அந்நாட்டு பாதுகாப்புப் படையினர் கைது செய்துள்ளனர்.

குவைத் பாதுகாப்புப் படையினரால் மேற்கொள்ளப்பட்ட விசேட சோதனையின் போதே இந்த சந்தேக நபர்கள் கைது செய்யப்பட்டுள்ளதாக வெளிநாட்டு ஊடகங்கள் செய்தி வெளியிட்டுள்ளன.

கைது செய்யப்பட்டவர்களில் மூன்று இலங்கையர்களுக்கு மேலதிகமாக, இரண்டு குவைத் நாட்டவர்கள், ஓர் இந்தியர் மற்றும் மேலும் இரு வெளிநாட்டவர்கள் அடங்குவதாகக் குறிப்பிடப்பட்டுள்ளது.

சந்தேக நபர்களிடமிருந்து ஹஷிஷ் (Hashish), ஹெரோயின், போதை மாத்திரைகள் உள்ளிட்ட பல்வேறு வகையான போதைப்பொருட்கள் கைப்பற்றப்பட்டுள்ளதுடன், போதைப்பொருட்களை அளவிடும் கருவிகள் மற்றும் பொதி செய்யும் உபகரணங்களும் கைப்பற்றப்பட்டுள்ளதாக தெரிவிக்கப்படுகிறது.

கைது செய்யப்பட்ட சந்தேக நபர்களும் கைப்பற்றப்பட்ட உபகரணங்களும் மேலதிக விசாரணைகளுக்காக குவைத் நாட்டின் குற்றவியல் பாதுகாப்புப் பிரிவிடம் ஒப்படைக்கப்பட்டுள்ளனர்.