AfriForum en die Naboomspruit Inwonersforum het op 1 September 2010, die eerste dag van Nasionale Boomplantweek, bome by Laerskool Eugene Marais op die dorp geplant.

Dit volg na verskeie gesprekke met en skrywes aan die plaaslike munisipaliteit oor inheemse bome wat in die omgewing uitgekap word. Daar is kort voor die afgelope algemene verkiesing `n laekoste behuisingskema op Naboomspruit gebou. Die huise is egter nie met elektrisiteit toegerus nie, wat daartoe lei dat inwoners bome uitkap om mee vuur te maak.

Met hierdie aksie wil AfriForum en die Inwonersforum die boodskap oordra dat gemeenskappe self moet optree om probleme aan te pak en nie altyd van die regering afhanklik moet wees nie.

Hannes Booysen (Hoofseun van die Laerskool Eugene M. Marais op Naboomspruit) help James Kemp, AfriForum se woordvoerder oor omgewingsake om `n Doppruim te plant. Mnr. Manus Booysen, die waarnemende voorsitter van die Naboomspruit (Mookgophong) Inwonersforum staan aan die regterkant.

Hannes Booysen (Hoofseun van die Laerskool Eugene M. Marais op Naboomspruit) help James Kemp, AfriForum se woordvoerder oor omgewingsake om `n Doppruim te plant. Mnr. Manus Booysen, die waarnemende voorsitter van die Naboomspruit (Mookgophong) Inwonersforum staan aan die regterkant.

Die burgerregte-inisiatief AfriForum het die minister van Verdediging, me Lindiwe Sisulu tyd gegun tot 17:00 vandag (1 September 2010) om vrae te beantwoord oor militêre opleiding vir ANCYL- en YCL-lede wat klaarblyklik binnekort ʼn aanvang by die Vloot se opleidingsbasis in Saldanha in die Wes-Kaap gaan neem.

AfriForum is bekommerd dat die beoogde militêre opleiding vir “genomineerdes van politieke partye” in stryd is met die bepalings van Artikel 199(7)(b) van die Grondwet, wat bepaal dat die SA Nasionale Weermag en lede van die veiligheidsmagte nie die belange van enige politieke party mag bevorder nie.

Minister Sisulu en verteenwoordigers van die ANC Jeugliga en die Jong Kommuniste Liga het in Mei 2010 planne bekend gemaak om militêre opleidingskampe vir jeuglede aan te bied, kort na die omstrede besoek van Julius Malema aan Zimbabwe, Venezuela en Kuba, vroeër vanjaar.

“Na ʼn openbare uitbarsting het die minister ʼn verklaring uitgereik wat beweer dat die opleidingskampe oop is vir alle politieke partye, maar verteenwoordigers van die drie vernaamste opposisiepartye het reeds aan ons bevestig dat hulle geen formele uitnodiging tot dié effek van die minister ontvang het nie”, het Willie Spies, prokureur van AfriForum, in ‘n verklaring gesê.

“Dit is van wesentlike belang dat ons nie die foute van ons noordelike bure in Suid-Afrika herhaal nie. Die opstellers van die grondwet het ook verder goeie rede gehad om politieke partydigheid in die Weermag uitdruklik te verbied. In Zimbabwe is jeug-lede van Zanu-PF wat opleiding in militêre milisiekampe ondergaan het, berug en gevrees vir hulle aandeel in geweld en intimidasie tydens verkiesingstye. Ons moet ten alle koste ʼn soortgelyke situasie in Suid-Afrika verhoed”, het Spies gesê.

Indien geen antwoord van die minister se kantoor ontvang word nie, sal ʼn hersieningsaansoek more in die Noord-Gautengse-Hooggeregshof uitgereik word.

Die Wes-Moot-inwonersvereniging, bygestaan deur die burgerregte-inisiatief AfriForum, het vandag ʼn suksesvolle aansoek in die Hooggeregshof gebring om as ʼn party tot ʼn geding rakende die verskuiwing van plakkers toegelaat te word.

Die gemeenskap van die Wes-Moot, wat Booysens en Claremont insluit, is bekommerd oor plakkers wat tans besig is om hulself in die omgewing te vestig. AfriForum se hoof van gemeenskapsveiligheid, Nantes Kelder, sê die gemeenskap se kommer spruit onder meer  uit ʼn toename in misdaad, drank- en dwelmhandel en onhigiëniese omstandighede wat deur ʼn gebrek aan riolering veroorsaak word.

Regter Murphy het ʼn konsepbevel wat deur die partye opgestel is bekragtig. Volgens die konsepbevel sal die plakkers nie toegelaat word om verdere strukture op te rig nie. Verder sal die plakkers nie gedwing word om te skuif totdat die saak weer op 9 September 2010 aangehoor word nie.

Intussen word daar van die Tshwane-metroraad verwag om met die plakkers in gesprek te tree en die hof van voorstelle te voorsien oor hoe die aangeleentheid verder hanteer moet word.

AfriForum het uit protes teen die verandering van die Pretoria Skou se naam na die “Tshwane” Skou, ʼn veldtog begin om Pretorianers te oortuig om die “Tshwane” Skou te boikot. As deel van die veldtog het AfriForum reeds begin om pamflette by 220 000 huishoudings in die Pretoria-omgewing te laat aflewer, om die publiek in te lig dat die skou sy rug op Pretoria se naam gekeer het.

Volgens Kallie Kriel, uitvoerende hoof van AfriForum, het sy organisasie herhaalde pogings aangewend om die skou-bestuur deur konstruktiewe gesprekvoering te oortuig om nie die skou se naam na die “Tshwane” Skou te verander nie. “Die feit dat hierdie versoeke op dowe ore geval het, het AfriForum genoop om daad by woord te voeg en stappe teen die skou te neem,” het Kriel gesê.

Kriel het daarop gewys dat die voormalige Pretoria Skou se sukses grootliks te danke is aan Pretorianers wat dit oor jare lojaal ondersteun het.  Die skou byt volgens Kriel met hierdie naamsverandering die hand wat hom voed.  “Pretorianers se geld sal die praatwerk moet doen vir die behoud van Pretoria se naam,” het Kriel gesê.

Volgens Kriel speel die skou-bestuur met die naamsverandering in die hande van die Tshwane Metroraad se volgehoue pogings om die publiek te mislei om te glo dat die hoofstad se naam nie Pretoria is nie.  “Dít, terwyl die hoofstad se naam wetlik Pretoria is,” het Kriel bygevoeg. 

‘n Afskrif van AfriForum se pamflet, wat by 220 000 huishoudings afgelewer word, is op aanvraag beskikbaar.