An Outspoken Soul

ലൂസിഫര്‍ - ഫിലിം റിവ്യു

2018-12-15T00:56:00.002-08:00

ഇന്നലെ ഇറങ്ങിയ ഒടിയന്റെ റിവ്യു ആണ് ആദ്യം എഴുതാന്‍ ഉദ്ധേശിച്ചത്. അപ്പോളാണ് ചത്ത കുഞ്ഞിന്റെ ജാതകം നോക്കിയിട്ടു കാര്യം ഇല്ലല്ലോ എന്ന്ഓര്‍ത്തത്..

സൊ പ്ലാന്‍-ബി.... ഒരു മുഴം മുന്നേ... !!

ലുസിഫറിന്റെ റിവ്യു എഴുതുന്ന ആദ്യ ചലച്ചിത്ര നിരൂപകന്‍ എന്ന ക്രെഡിറ്റ് ഇനി എനിക്കിരിക്കട്ടെ എന്ന് വിചാരിച്ചു!!!

_____ലൂസിഫര്‍ ഫിലിം റിവ്യു_________

സൌത്ത് ഇന്ത്യന്‍ യൂത്ത്സ്റ്റാര്‍ പ്രിത്വിരാജ് സുകുമാരന്‍ സംവിധായകന്റെ മേലങ്കി അണിയുന്ന ആദ്യ ചിത്രമായ ലുസിഫര്‍ മോഹന്‍ലാലിന്റെ അഭിനയപര്‍വത്തിലെ മറ്റൊരു സുവര്‍ണ അധ്യായമായി മാറുകയാണ്. ഒരു നവാഗത സംവിധായകന്റെ യാതൊരു ബാലരിഷ്ടതകളും കൂടാതെ വളരെ കയ്യടക്കതോടെയാണ് പ്രിഥ്വിരാജ് തന്റെ കന്നി സംവിധാന സംരംഭം അതിന്റെ പരിപൂര്‍ണതയില്‍ എത്തിച്ചിരിക്കുന്നത്. മലയാള സിനിമയുടെ നഭോമണ്ഡലത്തില്‍ പ്രിത്വിരാജിനെ കാലം അടയാളപ്പെടുത്തുക ഒരു മികച്ച അഭിനേതാവ് എന്നതിലുപരി ആല്ഫ്രെഡ്‌ ഹിച്കോക്കിനെയോ പോള്‍ ഗ്രീന്‍ ഗ്രാസ്സിനേയോ ഒക്കെ പോലെയുള്ള സംവിധായക കുലപതികളുടെ ഗണത്തില്‍ പ്രതിഷ്ടിക്കാവുന്ന ഒരു മിനിയേച്ചര്‍ മല്ലുവുഡ് ലെജെന്‍ണ്ട് ആയിട്ടായിരിക്കും.

അഭിനേതാക്കളെ സംവിധായകന്റെ കൈകളിലെ കളിമണ്ണായാണ് ചലച്ചിത്ര നിരൂപകര്‍ ഉപമിക്കുക. മോഹന്‍ലാല്‍ എന്ന മഹാനടന്‍ ഇനിയും വേണ്ട രീതിയില്‍ സംവിധായകര്‍ ഉപയോഗപ്പെടുത്തിയിട്ടിലാത്ത അഭിനയ സമ്രാട്ടാണ് . തന്റെ ആദ്യ സിനിമ ആയിട്ടുകൂടി, പരിചയസമ്പന്നനായ ഒരു സംവിധായകന്റെ മാസ്മരികതയോടെ സ്റ്റീഫന്‍ നെടുംപള്ളി എന്ന നായക കഥാപാത്രമാ യി മോഹന്‍ലാലിനെ പരിപൂര്‍ണതയോടെ ട്രാന്‍സ്മ്യൂട്ടെഷന്‍ ചെയ്തെടുക്കാന്‍ തനിക്ക് സാധിച്ചു എന്നതില്‍ പ്രിത്വിക്ക് അഭിമാനിക്കാം .

ലുസിഫര്‍ ഒരു ബൈബിള്‍ കഥാപാത്രമാണ്- ദൈവത്തോടു ചോദ്യമുയര്‍ത്തിയതിനാല്‍ സ്വര്‍ഗ്ഗത്തില്‍ നിന്നും പുറംതള്ളപ്പെടുന്ന മാലാഖ. സെമിറ്റിക് മതാത്മക കാഴ്ചപ്പാടില്‍ ഭൂമിയിലെ തിന്മയുടെ രാജാവാണ്‌ അവന്‍. മനുഷ്യകുലത്തിന്റെ എല്ലാ കഷ്ടതകളുടെയും മൂലഹേതു. ദൈവത്തിന്റെ ആജ്ഞാനുവര്‍ത്തിയായി കഴിയുക എന്നതിനേക്കാള്‍ സ്വന്തം സാമ്രാജ്യത്തിന്റെ ചക്രവര്‍ത്തിയായി കഴിയാന്‍ അവന്‍ ഇഷ്ടപ്പെട്ടു. എന്നാല്‍ ലുസിഫര്‍ എന്ന സിനിമ പറഞ്ഞു വെയ്ക്കുന്നത് ഒരു ബൈബിള്‍ കഥയുടെ പുനരാവിഷ്കാരം അല്ല. അത് ഒരു യാത്രയാണ് - മനുഷ്യ മനസുകളുടെ പ്രതികാരവും പകയും ഉറങ്ങുന്ന നിഗൂഡതകളുടെ താഴ്വരയിലൂടെയുള്ള ഒരു യാത്ര. ഏവരുടെയും ഉപബോധമണ്ടലങ്ങളില്‍ പതുങ്ങി കിടക്കുന്ന ലുസിഫര്‍ എന്ന മുറിവേല്‍ക്കപ്പെട്ട റിബലിന്റെ ഉയര്തെഴുന്നെല്‍ക്കലാണ് ഈ ചിത്രത്തിന്റെ ത്രെടിലൂറെ സംവിധായകന്‍ പറഞ്ഞു വെയ്ക്കുക.

ഐതിഹ്യവും ജീവിതവും ഇടപിരിഞ്ഞു നില്‍ക്കുന്ന ഒരു കഥയെ അഭ്രപാളികളില്‍ ആവിഷ്കരിക്കുമ്പോള്‍ പിഴവുകള്‍ ഇല്ലാത്ത ഒരു തിരക്കഥ അനിവാര്യമാണ് . മുരളി ഗോപി എന്ന ഇന്റെലെക്ചല്‍ ജയന്റിന്റെ കൈകളില്‍ ഈ തിരക്കഥാവിഷ്കാരം ഭദ്രമായിരുന്നു. സുജിത് വാസുദേവിന്റെ സിനിമാടോഗ്രാഫി ഈ ചിത്രത്തെ ഹോളിവൂഡ്‌ നിലവാരത്തിലേയ്ക് ഉയര്‍ത്തിയിട്ടുണ്ട്.

ഉശിരന്‍ കഥയും തീപൊരി ചിതറുന്ന ഡയലോഗുകളും കാവ്യാത്മകമായ ഛായാഗ്രഹണവും അതിനൊപ്പം മോഹന്‍ലാല്‍ എന്ന നടന വിസ്മയവും ഇഴചെരുമ്പോള്‍ ആരാധകരുടെ കാത്തിരിപ്പും ആകാംഷയും വെറുതെയായില്ല എന്ന് കാണാം . തിയറ്ററുകള്‍ പ്രകമ്പനം കൊള്ളിക്കുന്ന ആരാധകരുടെ ആവേശവും ഹര്‍ഷാരവവും ഇത്ശരി വയ്ക്കുന്നു .

പുലി മുരുകന്റെ മാസ്സും ഒടിയന്റെ ക്ലാസും ഒത്ത് ചേര്‍ന്നതാണ് ലുസിഫര്‍ എന്ന ദ്രിശ്യവിസ്മയം. സ്റ്റീഫന്‍ നെടുംപള്ളി എന്ന രാഷ്ട്രീയക്കാരനായി മോഹന്‍ലാല്‍ പകര്ന്നാടുകയാണ് ഈ ചിത്രത്തില്‍. കഥാപാത്രത്തിന്റെ പൂര്‍ണ്ണതയ്ക്കായി എന്ത് ത്യാഗവും സഹികാനായുള്ള മോഹന്‍ലാലിന്റെ ഡെഡിക്കെഷന്‍ ഹോളിവുഡ് താരങ്ങള്‍ക്ക് വരെ മാതൃകയാണ്. സാള്‍ട്ട് ആന്‍ഡ്‌ പെപ്പര്‍ അപ്പെയരന്‍സില്‍ എത്തുന്ന മോഹന്‍ലാലിന്റെ വിരലുകളും രോമങ്ങളും പോലും സ്റ്റീഫന്‍ നെടുംപള്ളി എന്ന കുശാഗ്രബുദ്ധിയായ നായകന്‍റെ മാനറിസങ്ങളിലെയ്ക്ക് രൂപാന്തരം നടത്തുന്നത് ആത്മഹര്ഷത്തോടുകൂടി മാത്രമേ പ്രേക്ഷകന് കണ്ടിരിക്കാനാവു.

മോഹന്‍ലാല്‍ -മന്‍ജുവാര്യര്‍ കെമിസ്ട്രി പ്രേക്ഷകന്റെ മനസ്സില്‍ ഭൂതകാല കുളിരിന്റെ മഞ്ഞുതുള്ളികള്‍ പെയ്യിക്കുന്നു. ഒടിയന്റെ വമ്പന്‍ വിജയത്തിന് ശേഷം വീണ്ടും മോഹന്‍ലാലിനൊപ്പം മത്സരിച്ചഭിനയിക്കുന്ന മന്‍ജു ഈ ചിത്രത്തിന്റെ വൈകാരിക പരിസരങ്ങളില്‍ ചില തീ പാറുന്ന ഡയലോഗുകള്‍ കാഴ്ച്ചവെയ്ക്കുന്നുണ്ട്.

സാമ്ജിത് മൊഹമ്മദിന്റെ നോണ്‍ലീനിയര്‍ എഡിറ്റിംഗ് കഥയുടെ നരേഷ ന്റെ ചടുലത വര്‍ധിപ്പിക്കുന്നു. ദീപക് ദേവിന്റെ അതിമനോഹരമായ ഗാനങ്ങള്‍ മലയാള സിനിമയുടെ കാവ്യവസന്തം ഇനിയും അവസാനിച്ചിട്ടില്ല എന്ന ഒരു ഓര്‍മ്മപ്പെടുത്തല്‍ ആണ്.

ബോളിവുഡ് ആക്ടര്‍ വിവേക് ഒബ്റോയി, ടോവിനോ, ഇന്ദ്രജിത്ത് എന്നിവര്‍ എല്ലാം തന്നെ തങ്ങളുടെ റോളുകള്‍ വളരെ ഭംഗിയായി നിര്‍വഹിച്ചു.

ഒരു സിനിമ എന്നതിനപ്പുറം ലുസിഫര്‍ ഒരു അനുഭവമാണ്. ആ അനുഭവത്തെ അതിന്റെ ഭാവാത്മകതയും ചടുലതയും ഒട്ടും നഷ്ടമാകാതെ പ്രേക്ഷക ഹൃദയങ്ങളിലേക്ക് പകരാന്‍ കഴിഞ്ഞു എന്നതാണ് ഈ സിനിമയുടെ വിജയവും. ഒട്ടേറെ കളക്ഷന്‍ റെക്കോര്‍ടുകള്‍ തകര്‍ക്കാന്‍ കഴിഞ്ഞു എന്നതിലുപരി മലയാള സിനിമയുടെ ചക്രവാളത്തില്‍ പുതിയ ഒരു കള്‍ട്ട് രൂപപ്പെടുത്തിഎടുക്കാന്‍ കഴിഞ്ഞു എന്നതില്‍ പ്രിത്വിക്കും ചിത്രത്തിന്റെ മറ്റ് അണിയറ പ്രവര്‍ത്തകര്‍ക്ക് എക്കാലവും അഭിമാനിക്കാം.

My Verdict: 3.815/5.0

#Lucifer #Mohanlal #Film #Review

ചുംബന സത്യാഗ്രഹം നാലാം ഖണ്ഡം !!

2014-12-17T10:55:00.001-08:00

പ്രതികരണാര്‍ഹമായ വിഷയങ്ങള്‍ എങ്ങനെ പാര്‍ശ്വവല്‍ക്കരിക്കപ്പെടുന്നു അഥവാ അനാവശ്യ സമരങ്ങള്‍ എങ്ങനെ സമൂഹം ഒരു ആഘോഷം ആക്കി മാറ്റുന്നു എന്നൊക്കെയുള്ള ചോദ്യങ്ങള്‍ക്ക് വിശദമായ ഉത്തരം കേരളത്തിലെ സമീപകാല വിവാദങ്ങളില്‍ വ്യക്തമായി പ്രതിഫലിക്കുന്നുണ്ട് . കേരളത്തിലെ വിവാദങ്ങളുടെ നാള്‍വഴി പരിശോധിക്കുമ്പോള്‍ മനസിലാക്കാന്‍ സാധിക്കുന്നത് , എരിവും പുളിയും ഉള്ള , പ്രേക്ഷകരെ തൃപ്തരാക്കാന്‍ വേണ്ട ചേരുവകള്‍ അവശ്യം ഉള്ള വിഷയങ്ങള്‍ മാധ്യമങ്ങള്‍ ആഘോഷമാക്കിയിട്ടുണ്ട് എന്നതാണ്. . ഒരു അഴിമതി ആരോപണം പോലും ബോക്സ്‌ ഓഫീസില്‍ വിജയിക്കണം എങ്കില്‍ ഇത്തരം മസാലകള്‍ അവശ്യം ആണ്. മറിയം റഷീദ മുതല്‍ സരിത നായരും രുക്സാനയും വരെയുള്ള കോഴക്കെസുകള്‍ വിശകലനം ചെയ്യുമ്പോള്‍ ഈ സത്യം നമുക്ക് ബോധ്യമാകും.

അങ്ങനെ എന്തിലും ഏതിലും ബിറ്റ് അന്വേഷിക്കുന്ന ഉത്കൃഷ്ട മാദ്യമങ്ങള്‍ സമീപകാലത്ത് ആഘോഷമാക്കിയ ഐറ്റം ആണ് വിശ്വവിഖ്യാതമായ ചുംബന സമരം. സദാചാരപോലിസിങ്ങിനു എതിരെയുള്ള യുദ്ധ കാഹളം എന്നൊക്കെയാണ് പല സാംസ്കാരിക നായകരും ടി സമരത്തെപ്പറ്റി എഴുതിപ്പിടിപ്പിചിട്ടുള്ളത്. വാസ്തവത്തില്‍ എന്താണ് ഈ സമരം കൊണ്ട് അര്‍ഥമാക്കുന്നത് എന്നതിനെപ്പറ്റി ഇതിന്റെ സംഘാടകര്‍ക്ക് പോലും വേണ്ട വ്യക്തത പോരാ.

ചുംബന സ്വാതന്ത്യത്തിനു വേണ്ടിയുള്ള സമരം എന്നാണു സമരത്തിന്റെ പ്രാരംഭ ഘട്ടങ്ങളില്‍ പറഞ്ഞുകേട്ടത്. കോഴിക്കോട് ഡൌണ്‍ ടൌണ്‍ റെസ്റരണ്ടില്‍ അനാശാസ്യപ്രവര്‍ത്തനങ്ങള്‍ നടക്കുന്നു എന്ന് ജയ്ഹിന്ദ് ചാനല്‍ റിപ്പോര്‍ട്ട് ചെയ്യുകയും അതിനെതുടര്‍ന്ന് യുവമോര്ച്ചക്കാര്‍ റെസ്റ്റരന്റ് അടപ്പിക്കുകയും ചെയ്തതാണ് സമരത്തിന്റെ തുടക്കത്തിനു ഹേതുവായത്.

രണ്ടു വ്യക്തികള്‍ ചുംബിക്കുന്നത് ഇന്ത്യന്‍ ഭരണഘടന എവിടെയും വിലക്കിയിട്ടുള്ള തായി എനിക്കറിവില്ല. പലവിധത്തിലുള്ള സ്നേഹച്ചുംബനങ്ങള്‍ നാം നിത്യേന കാണുന്നതും അനുഭവിക്കാറുള്ളതുമാണ്. അതേസമയം തന്നെ അനാശാസ്യം അഥവാ ഇമ്മോറല്‍ട്രാഫിക്കിംഗ് ഇന്ത്യയില്‍ കുറ്റകരമാണ്. അനാശാസ്യം നടത്തുന്നവരെ നിയമപാലകര്‍ പലയിടത്തു നിന്നും റെയ്ഡ് ചെയ്ത് പിടിക്കാരുമുണ്ട്. മാത്രമല്ല, ഡൌണ്‍ടൌണ്‍ റസ്റ്ററെന്റ് നു എതിരായി ഉയര്‍ന്ന ആരോപണം ചുംബിക്കാന്‍ അനുവദിച്ചു എന്നതല്ല, മറിച്ചു അനാശാസ്യ കൃത്യങ്ങള്‍ക്ക് കുട പിടിച്ചു എന്നതാണ് താനും. ഈ വസ്തുതകള്‍ കൂട്ടിവായിക്കുമ്പോള്‍തന്നെ ചുംബന സ്വാതന്ത്യത്തിനു വേണ്ടിയുള്ള സമരം എന്ന പ്രയോഗം അതില്‍ത്തന്നെ അര്‍ദ്ധശൂന്യമാവുകയും പ്രസ്തുത സമരത്തെ പൊതു സമൂഹം അനാശാസ്യ സ്വാതന്ത്യ സമരം എന്ന് വായിച്ചെടുക്കുകയും ചെയ്യുന്നു. ഇനി അത് തന്നെയാണ് ടി സമരത്തിനു നേതൃത്വം നല്‍കുന്നവര്‍ ഉദ്ദേശിക്കുന്നതെങ്കില്‍ അത് വെട്ടിത്തുറന്നു പറയാനുള്ള ആര്‍ജ്ജവം ആണ് കാട്ടേണ്ടത്.

ആനുകാലിക പ്രശ്നങ്ങളില്‍ ഫെസ്ബുക്കിലൂടെ ആഞ്ഞടിക്കുകയും എന്നാല്‍ കാര്യത്തോടടുക്കുമ്പോള്‍ നനഞ്ഞ പടക്കം ആവുകയും ചെയ്യുന്ന പരമ്പരാഗത ന്യൂ ജെന്‍ സമരം തന്നെയായി ചുംബന സമരവും . ഫേസ്ബുക്കിലെ ലൈക്കുകള്‍ അല്ല ഒരു സമരത്തിന്റെ ജനപങ്കാളിത്തം തീരുമാനിക്കുക എന്ന സത്യത്തിനു ഒരിക്കല്‍ കൂടി അടിവരയിടുന്നതായി ഈ സമരം. (ഫെസ്ബുക്ക് ലൈക്ക് ആണ് കാര്യങ്ങള്‍ക്ക് തീര്‍പ്പ്‌ കല്‍പ്പിക്കുന്നത് എങ്കില്‍ കേരളത്തിലെ ഏറ്റവും ജനപ്രിയ താരം നസ്രിയ ആണ് എന്ന് പറയേണ്ടി വരും !. ഈ ലൈക്കിലോക്കെ ഇത്രേ ഉള്ളൂ കാര്യം !! )

10 പേര്‍ ചുംബിക്കുന്നത് കാണാന്‍ പതിനായിരം പേര്‍ ഒത്തുകൂടുന്ന വിസ്മയ കാഴ്ചകള്‍ക്ക് പിന്നീടു കേരളം സാക്ഷ്യം വഹിച്ചു. സരിതയുടെ സെല്ഫികള്‍ക്കും നാടോടി നൃത്തത്തിനും ശേഷം ബിറ്റ് ഉള്ള വാര്‍ത്തകള്‍ കിട്ടാതെ വാര്‍ത്താ ദാരിദ്രത്തില്‍ കഴിഞ്ഞിരുന്ന മാധ്യമങ്ങള്‍ ഇത് ആഘോഷം ആക്കുകയും ചെയ്തു. . പോരെ പൂരം !!.. പിന്നീട് ചുംബന സമരത്തിന്‌ പുത്തന്‍ വ്യാഖ്യാനങ്ങള്‍ ചമയ്ക്കപ്പെട്ടു . ബുദ്ധിജീവി ഭാഷയില്‍ ഇത് സദാചാരത്തിന്റെ കറുത്ത കാലത്തിനു മേലുള്ള പുത്തന്‍ തലമുറയുടെ അടയാളപ്പെടുത്തല്‍ ആയി!!..

സദാചാരം എന്ന വാക്ക് ഒരു മുഴുത്ത തെറിയായി നവ മാധ്യമങ്ങളില്‍ പ്രതിഷ്ടിക്കപ്പെട്ടു. സദാചാരത്തെ പിന്താങ്ങുന്നവരേ സദാചാര പോലീസുകാര്‍ എന്ന പട്ടം ചാര്‍ത്തികൊടുത്ത് ബുദ്ധിജീവികളും പ്രതിക്രിയാ വാദികളും തലങ്ങും വിലങ്ങും വലിച്ചു കീറി. ഇന്ത്യയില്‍ പലയിടത്തും ലിപ് ലോക്ക്, ഫ്രഞ്ച് കിസ്സ്‌, സ്മൂച്ച് കിസ്സ്‌ എന്നിങ്ങനെ ചുംബനത്തിന്റെ പല വെരയ്റ്റികള്‍ പരീക്ഷിക്കപ്പെട്ടു. ഒടുവില്‍ ട്രിവാന്‍ഡ്രത്ത് IFFK ചലച്ചിത്ര മേള വരെ എത്തിനില്‍ക്കുന്നു ചുംബന കാഴ്ചകള്‍.. ബുദ്ധിജീവി പരിവേഷത്തില്‍ അണ്‍ സെന്‍സര്ഡു ചൂടന്‍ ചിത്രങ്ങള്‍ അവയുടെ അമൂര്‍ത്തമായ വൈകാരിക ബൌധിക തലങ്ങളിലൂടെ സഞ്ചരിച്ചു വിലയിരുത്തുകയും ഇടവേളകളില്‍ പരസ്പരം ലിപ് ലോക്ക് അടിച്ചു സദാചാര പോലീസിനെതിരെ കൊഞ്ഞനം കാട്ടുന്നതായി നടിക്കുക എന്നതും ആണ് IFFK ചുംബനസമരത്തിന്റെ നവീന മുഖം.

ഇവിടെ സാധാരണക്കാരന് ചോദിക്കാനുള്ളത് സംവിധായകന്‍ രഞ്ജിത് ചോതിച്ച ചോദ്യം തന്നെയാണ് . ആര്‍ക്കും ആരെയും എവിടെവെച്ചും ചുംബിക്കാനുള്ള ചുംബന സ്വാതന്ത്യമാണോ ഇന്നത്തെ യുവത്വം നേരിടുന്ന ഏറ്റവും വലിയ പ്രശ്നം?

ഒരു തുണ്ട് ഭൂമിക്കായ്‌ കാത്തു കാത്തു നിന്ന് കാലുകള്‍ തളര്‍ന്ന ഒരു സമൂഹം നമ്മുടെ കേരളത്തില്‍ ഉണ്ട്.. മൂന്നു വയസ്സുകാരി മുതല്‍ 90 വയ്യസുകാരി വരെ പീടിപ്പിക്കപ്പെടുന്ന വിധം പേടിപ്പെടുത്തുന്ന ഒരു അവസ്ഥയിലാണ് നാം ജീവിക്കുക.. അവസാന തുള്ളി വെള്ളം വരെ ഊറ്റിയെടുക്കപ്പെട്ടു മരണം കാത്തു കഴിയുന്ന നദികള്‍ , എന്തിനെയും കോര്പറെട്ടു ശക്തികള്‍ക്ക് അടിയറ വെയ്ക്കാന്‍ വെമ്പുന്ന സര്‍ക്കാരുകള്‍, കയ്യും കണക്കും കൂടാതെ പൊതുമുതല്‍ കയ്യിട്ടു വാരുന്ന ഭരണ വര്‍ഗ്ഗം .. ഇപ്പറഞ്ഞ വിഷയങ്ങളെക്കാളൊക്കെ എന്ത് സാമൂഹിക പ്രസക്തിയാണ് ചുംബന സമരം എന്ന പേരില്‍ ആഘോഷിച്ചുകൊണ്ടിരിക്കുന്ന സമര വൈകൃതങ്ങള്‍ക്കുള്ളത്?. സമൂഹം നേരിടുന്ന കാതലായ പ്രശ്നങ്ങളെ തൃണവല്‍ക്കരിച്ചു ചീപ് പബ്ലിസിറ്റി മാത്രം ലാക്കാക്കി ആഭാസ സമരങ്ങള്‍ക്ക് നേതൃത്വം നല്‍കുന്നവരും അവ ലൈവ് ടെലികാസ്റ്റ് ചെയ്ത് റേറ്റിംഗ് കൂട്ടുന്ന മാധ്യമങ്ങളും ആശങ്കാജനകവും അതിലേറെ പ്രതീക്ഷാരഹിതവുമായ നാളെയിലെയ്ക്കാണു വിരല്‍ ചൂണ്ടുക .

സ്വന്തം അപ്പനോ അമ്മയ്ക്കോ പെങ്ങള്‍ക്കോ പോലും നാളിതു വരെ സ്നേഹത്തോടെ ഒരു ഉമ്മ പോലും കൊടുകാത്തവ്ര്‍ തെരുവുകളില്‍ പേക്കൂത്തുകള്‍ തീര്‍ക്കുമ്പോള്‍ കേരളത്തിലെ പൊതു സമൂഹം അവര്‍ക്ക് നേരെ കാര്‍ക്കിച്ചു തുപ്പിയില്ലെന്കിലെ അത്ഭുതം ഉള്ളൂ.. തങ്ങള്‍ എന്തോ മഹത്തായ കൃത്യമാണ് നിര്‍വഹിക്കുന്നത് എന്ന നാട്യത്തില്‍ അപ്പോഴും നനയ്ക്കാത്ത മുടിയും അലക്കാത്ത ജീന്‍സും തടവി ബുദ്ധിജീവി മണ്ഡലങ്ങള്‍ താത്വിക അവലോകനങ്ങള്‍ നടത്തിക്കൊണ്ടേയിരിക്കും. ഇനിയുമൊരു കൂട്ടര്‍ സ്ത്രീ സ്വാതന്ത്ര്യത്തിന്റെ നാല്‍ക്കവലകളില്‍ ഇരുട്ട് നുണഞ്ഞു കൊണ്ടിരിക്കുകയും യാഥാര്‍ഥ്യങ്ങളുടെ നേര്‍ക്ക് കണ്ണടച്ച് ഇരുട്ടാക്കുകയും ചെയ്യുന്നു.
ബ്ലഡി മല്ലൂസിന്റെ കേരളത്തില്‍ ജനിച്ചു പോയതില്‍ ദു:ഖിക്കുകയും താന്‍ പിറക്കെണ്ടിയിരുന്ന യൂറോപ്യന്‍ പുല്‍ത്തകിടികള്‍ സ്വപ്നം കാണുകയും ചെയ്യുന്നവര്‍ക്ക് തറവാട്ടില്‍ പിറക്കുക അഥവാ നല്ല തന്തയ്ക്കും തള്ളയ്ക്കും ജനിക്കുക എന്നൊക്കെ പറയുന്നത് എന്താണെന്ന് എത്ര പറഞ്ഞാലും പിടി കിട്ടണം എന്നില്ല , പിടി കിട്ടാത്തത് അവരുടെ തെറ്റും അല്ല.

വാല്‍ക്കഷണം : മേല്‍പ്പറഞ്ഞ തെരുവുകളിലെ ഐറ്റം ഷോകളെ ഇന്ത്യന്‍ സ്വാതന്ത്യ സമരത്തോടും ഗാന്ധിജി നയിച്ച ഉപ്പു സത്യഗ്രഹത്തോടും ഒക്കെ ഉപമിച്ചുകൊണ്ട് ഒരു സൊ കോള്‍ഡ് സാംസ്കാരിക നായകന്‍ ട്വിട്ടരില്‍ എഴുതിയിരിക്കുന്നത് കണ്ടു. ഗാന്ധിജി ഇന്ന് ജീവിച്ചിരിപ്പില്ലാത്തത് ടിയന്റെയൊക്കെ ഭാഗ്യം എന്നെ പറയുന്നുള്ളു .. ഉണ്ടായിരുന്നെങ്കില്‍ ലവന്റെയൊക്കെ തലമണ്ട തല്ലിപ്പൊളിച്ചു കുറച്ചു സന്തോഷു ബ്രഹ്മി തളിച്ചേനേ!!

പെഷവാറില്‍ നിന്നുയരുന്ന രോദനങ്ങള്‍

2014-12-17T05:28:00.000-08:00

മുള്‍ച്ചെടിയില്‍ നിന്ന് അത്തിപ്പഴമോ ഞെരിഞ്ഞിലില്‍ നിന്ന് മുന്തിരിപ്പഴമോ ഒരുകാലത്തും പ്രതീക്ഷിക്കേണ്ടതില്ല എന്ന സത്യം പാക്കിസ്ഥാന്‍ വേദനയോടെ തിരിച്ചറിയുകയാണ്. കഴിഞ്ഞ ദിവസം പെഷവാറിലെ സ്കൂളില്‍ നടന്ന കൂട്ടക്കൊലയെ വിശേഷിപ്പിക്കാന്‍ 'പൈശാചികത' എന്ന വാക്കില്‍ കുറഞ്ഞതൊന്നും തന്നെ യോജിക്കുകയില്ല. നിരപരാധികളും നിസ്സഹായരുമായ ആ പിഞ്ചു കുരുന്നുകളുടെ നിലവിളികള്‍ ലോകമാനവികതയുടെ ഹൃദയത്തില്‍ ഉണങ്ങാത്ത മുറിവുകള്‍ തീര്‍ത്തിരിക്കുന്നു ..

മനുഷ്യനെ നന്മയിലെയ്ക്കും സത്യത്തിന്റെയും കരുണയുടെയും പാതയിലെയ്ക്കും നയിക്കാന്‍ ഉദ്ധേശിക്കപ്പെട്ടിരിക്കുന്ന മതങ്ങളുടെ പേരിലാണ് എല്ലാക്കാലത്തും ഭീകരത അതിന്റെ സംഹാരതാണ്ടവം അഴിച്ചുവിട്ടിട്ടുള്ളത്. 'ദൈവം വലിയവനാണ്‌' (അല്ലാഹു അക്ബര്‍) എന്ന് ഉറക്കെ അട്ടഹസിച്ചുകൊണ്ടാണ് ചെകുത്താന്റെ ഹോള്‍സെയില്‍കൊട്ടെഷനുമായി വന്നവര്‍ ആ മാലാഖക്കുരുന്നുകളെ കുരുതി കഴിച്ചത് എന്നത് അങ്ങേയറ്റം വിരോധാഭാസം തന്നെയാണ്.

നിഷ്കളങ്കതയുടെ നേരെ വെടിയുതിര്ത്തവര്‍ ആ കുഞ്ഞുങ്ങളുടെ കണ്ണുകളില്‍ നോക്കിയിട്ടുണ്ടാവില്ല എന്നെനിയ്ക്ക് തോന്നുന്നു.. ആ കണ്ണുകളില്‍ തിളങ്ങുന്ന നക്ഷത്ര ദീപങ്ങളെ യാതൊരു കരുണയും കൂടാതെ തല്ലിക്കെടുത്തുവാന്‍ മനുഷ്യനായി പിറന്ന ഒരാള്‍ക്ക് സാധിക്കുമോ??..

തൊണ്ടയില്‍ കുരുങ്ങിയ നിലവിളികളുമായി പ്രാണരക്ഷാര്‍ദ്ധം ബെഞ്ചുകള്‍ക്കടിയില്‍ ഒളിച്ച കുരുന്നുകളെ പുറത്തേയ്ക്ക് വലിച്ചിഴച്ചു തുരുതുരെ വെടി വെച്ചവര്‍ തങ്ങള്‍ ചെയ്യുന്നത് ദൈവത്തിനു വേണ്ടിയുള്ള എന്തോ മഹത്കൃത്യം ആണെന്ന് വിശ്വസിക്കുകയും ഈ 'വിശുദ്ധകൃത്യ'ത്തിനു പ്രതിഫലമായി സ്വര്‍ഗത്തില്‍ എണ്ണിയാലൊടുങ്ങാത്ത ഹൂറികള്‍ തങ്ങളെയും കാത്തു പായ വിരിച്ചിരിപ്പുണ്ട് എന്ന് കരുതുകയും ചെയ്യുന്നുണ്ടെങ്കില്‍, ഇത്തരം വിവരമില്ലായ്മകള്‍ തന്നെയാണ് എക്കാലത്തും ഭീകരതയുടെ സമസ്ത ക്രൂരതകള്‍ക്ക് വിശുദ്ധ പരിവേഷം നല്‍കാന്‍ ഉപയോഗിക്കപ്പെടുന്നതെങ്കില്‍, അത്തരം തെറ്റായ ബോധ്യങ്ങള്‍ മനുഷ്യ മനസുകളിലെയ്ക്ക് കുത്തിവെയ്ക്കുന്ന കാളകൂട വിഷങ്ങളുടെ സ്രോതസുകളെ ഉന്മൂലനം ചെയ്യേണ്ട സമയം ഏറെ അതിക്രമിച്ചിരിക്കുന്നു.

ഭീകരതയെ കാലഘട്ടത്തിന്റെ അനിവാര്യതയോ ന്യൂട്ടന്റെ തേര്‍ഡ് ലോയോ ഒക്കെയായി വിശേഷിപ്പിക്കുന്ന സോഷ്യല്‍മീഡിയ ബുദ്ധി(?)ജീവികള്‍ക്കും, ISISനെ ഇറാഖിലെ തങ്ങളുടെ നേരാങ്ങളമാര്‍ ആയി അവരോധിച്ചിരിക്കുന്ന ഇവിടുത്തെ കുഞ്ഞാങ്ങളമാര്‍ക്കും ഇതൊരു ഓര്‍മപ്പെടുത്തല്‍ ആണ് - നന്മനിറഞ്ഞ ഭീകരത എന്നൊന്ന് ഇല്ലെന്ന ഓര്‍മ്മപ്പെടുത്തല്‍..

മലാലയെന്ന ധീരയായ പെണ്‍കുട്ടിയുടെ സ്വപ്നങ്ങളുടെ നേരെ താലിബാന്‍ ഭീകരര്‍ നിറയൊഴിച്ചു രസിച്ചപ്പോള്‍ അതിനെ അമേരിക്കയുടെയും യൂറോപ്യന്‍ ശക്തികളുടെയും നാടകമായി വ്യാഖ്യാനിച്ച് അഫ്ഗാന്‍ താലിബാന് സ്വഭാവ സര്‍ട്ടിഫിക്കറ്റ് നല്‍കിയവര്‍ നമ്മുടെ ഇടയില്‍ത്തന്നെ ഉണ്ട് എന്നത് അല്പം വേദനിപ്പികുന്ന സത്യം ആണ്. അല്പം നാളുകള്‍ പിന്നിടുമ്പോള്‍ പെഷവാര്‍ ഭീകരാക്രമണത്തിന് പുതിയ പരിപ്രേക്ഷ്യങ്ങള്‍ ചമയ്ക്കപ്പെടില്ല എന്ന് ആര് കണ്ടു !

ഭീകരതയ്ക്ക് എല്ലാ കാലത്തും ഒരേയൊരു മുഖമേ ഉള്ളൂ.. അത് ക്രൂരതയുടെയും മനുഷ്യത്വരാഹിത്യതിന്റെതും ആണ്. കൊടുത്ത പണി കൊല്ലത്ത് തന്നെ കിട്ടിയപ്പോഴാണ് ലോക പോലിസ്കാര്‍ എന്ന് സ്വയം വിശേഷിപ്പിക്കുന്ന അമേരിക്കയ്ക്ക് ഈ സത്യം വെളിപ്പെട്ടു കിട്ടിയത്. അപ്പോഴേയ്ക്കും അനേകം നിരപരാധരുടെ ജീവനുകള്‍ അവര്‍ക്ക് വിലയായി നല്‍കേണ്ടി വന്നിരുന്നു. ശത്രുക്കള്‍ക്കെതിരെ ഉപയോഗപ്രദമായതും തങ്ങള്‍ക്ക് നിരുപദ്രവകരവുമായ ഒരു ഭീകരത എന്നത് സാങ്കല്പികം മാത്രമാണെന്ന് അല്പം വൈകിയാണെങ്കിലും പാക്കിസ്ഥാന് ബോധ്യമായിരിക്കുന്നു.

ഈ തിരിച്ചറിവുകള്‍ നല്‍ക്കുന്ന ബോധ്യങ്ങളില്‍ ഇനിയെക്കാലവും അടി പതറാതെ ഉറച്ചുനില്കാന്‍ ഈ 132 മാലാഖക്കുരുന്നുകളുടെ നിലവിളികള്‍ ഹേതുവായി തീരട്ടെ.

ഭീകരതയുടെ കരാളഹസ്തങ്ങളില്‍ ഞെരിഞ്ഞുടഞ്ഞ പെഷവാറിലെ കുഞ്ഞനുജന്മാരുടെയും അനുജതിമാരുടെയും സ്മരണകള്‍ക്ക് മുന്നില്‍ ഞാനും ഒരു നിമിഷം ശിരസു നമിക്കുന്നു..

ഭ്രാതൃഹന്താക്കളും പൈശാചികതകളും ഇല്ലാത്ത തന്റെ രാജ്യത്തില്‍ ദൈവം നിങ്ങള്‍ക്ക് നിത്യശാന്തി നല്‍കുമാറാകട്ടെ..

സ്വര്‍ണപ്പൊതി സൂപ്പര്‍ !!.. ( എന്നാലും എന്റെ മൊയ്‌ലി ജീ.. )

2014-01-01T10:33:00.001-08:00

അല്ലേലും അറിയാരുന്നു പുതുവര്‍ഷമായിട്ട് യു പി എ സര്‍ക്കാര്‍ എന്തേലും സമ്മാനം തരാതിരിക്കില്ല എന്ന്. നല്ല സ്വര്‍ണ പൊതിയില്‍ പൊതിഞ്ഞു കെട്ടിതന്നെ ന്യൂ ഇയര്‍ സമ്മാനം ഇന്ത്യ മഹാരാജ്യത്തെ എല്ലാ മഹാജനങ്ങള്‍ക്കുമായി തരപ്പെടുതിയിട്ടുണ്ട് ശ്രീ വീരപ്പ മൊയ്‌ലി ജി. പൊതി തുറന്നു കണ്ടതിന്റെ ഞെട്ടലില്‍ നിന്ന് പലരും ഇത് വരെ മുക്തി നേടിയിട്ടില്ല. അന്നും ഇന്നും എന്നും സാധാരണക്കാരന് കഞ്ഞി കുമ്പിളില്‍ തന്നെയാണ്. പുത്തന്‍ വര്‍ഷം നീയൊക്കെ പാതി വെന്ത കഞ്ഞി കുടിച്ചാല്‍ മതി എന്നും, മുഴുവനായി വെന്ത കഞ്ഞി കുടിക്കണം എന്നുള്ളവര്‍ സ്വന്തമായി മരം നട്ടു വളര്‍ത്തി വെട്ടി വിറകാക്കി കത്തിച്ചു ആശ തീര്‍ത്താല്‍ മതി എന്നുമാണ് കേന്ദ്ര സര്‍ക്കാര്‍ പാചക വാതക വില വര്‍ധനയിലൂടെ പറയാതെ പറഞ്ഞു വെച്ചതും.

എല്ലാ കാര്യത്തിലും റെകോര്‍ഡ് നേടണം എന്നത് യു പി എ സര്‍ക്കാരിന്റെ ഒരു വാശിയാണ്. അതിന്റെ ഭാഗം തന്നെയാണ് ഈ റെകോര്‍ഡ് വില വര്‍ധനയും. അല്ലേലും ഈ റിക്കോര്‍ഡുകള്‍ എന്നത് സച്ചിന്‍ തെണ്ടുല്‍ക്കറിന് മാത്രം അവകാശപ്പെട്ടത്‌ അല്ലല്ലോ. മറ്റൊരു സാമ്പത്തിക വിദഗ്ധനും സഞ്ചരിക്കാത്ത പാതയിലൂടെ ഒരു ഭ്രാന്തനെപ്പോലെ സഞ്ചരിച് അതി സാഹസികവും ധീരോദാത്തവുമായ രീതിയില്‍ മന്‍മോഹന്‍സിങ്‌ ഇന്ത്യയെ വികസനത്തിന്റെ കൊടുമുടിയിലെയ്ക് എത്തിക്കുന്ന കാഴ്ചയാണ് ഏതാനും വര്‍ഷങ്ങളായി നാം കണ്ടുകൊണ്ടിരിക്കുന്നത്. കോര്‍പറേറ്റ്‌ വമ്പന്മാരെ സഹായിക്കുകയാണ് സര്‍ക്കാര്‍ അജണ്ട എന്നൊക്കെ ശത്രുക്കള്‍ ഒരിയിടുന്നുണ്ട് . അതൊക്കെ ആര് ഗൌനിക്കാന്‍ !.

ഗാന്ധിജി കണ്ട ദരിദ്രര്‍ ഇല്ലാത്ത ഇന്ത്യ - അതാണ്‌ എല്ലാ ഐഡിയല്‍ കോണ്ഗ്രസ്സ് കാരനെപോലെ നമ്മുടെ മന്മോഹന്‍ ജിയുടെയും സ്വപ്നം. ഏതു വിധേനെയും ദാരിദ്രം ഇന്ത്യയില്‍ നിന്നു തൂത്തെറിയുക. അതിനുള്ള ഏറ്റവും ഈസി ആയ മാര്‍ഗം ഇവിടുത്തെ ദരിദ്ര നാരായണന്മാരെ തൂത്തെറിയുക എന്നതല്ലാതെ മറ്റെന്താണ് !.

ജനസംഖ്യയുടെ 50 % ആളുകള്‍ക്ക് പോലും സ്വന്തമായി ബാങ്ക് അക്കൌന്റ്റ്‌ ഇല്ലാത്ത ഒരു രാജ്യത്ത്‌, ബാങ്ക് അക്കൌന്റ്റ്‌കളിലൂടെ മാത്രമേ സബ്സിഡികള്‍ ലഭ്യമാക്കാനാവൂ എന്ന് സര്‍ക്കാര്‍ വാശി പിടിക്കുന്നതില്‍ നിന്നും എന്താണ് നാം മനസിലാക്കേണ്ടത്?. അതും ഭരണ ഘടനാപരമായി യാതൊരു വ്യവസ്ഥാപിതമായ നിയമങ്ങളുടെയും പിന്‍ബലം ഇല്ലാത്ത, ആധാര്‍ കാര്‍ഡ്‌ പോലുള്ള ഒരു ബയോ മെട്രിക്‌ ഐഡന്റിഫിക്കേഷന്‍ സംവിധാനം മാത്രം ബാക്ക്ബോണ്‍ ആയി ഉപയോഗിച്ചു കൊണ്ട് !..

(ആവശ്യത്തിലേറെ തിരിച്ചറിയല്‍ രേഖകള്‍ ഇപ്പോള്‍ തന്നെ ഉള്ളപ്പോള്‍ ഇനിയും എന്തിന് ഒരു തിരിച്ചറിയല്‍കാര്‍ഡ് കൂടി?, 111 കോടി ജനങ്ങളുടെ ബയോ മെട്രിക്‌ ഡാറ്റയ്ക്ക് എന്ത് സെക്യൂരിറ്റി ആണ് നിലവില്‍ ഉള്ളത്?, Unique Identification Authority of India (UIDAI)ഉം സി.ഐ.എ ഫണ്ട് ചെയ്യുന്ന MongoDB ഗ്രൂപ്പും തമ്മിലുള്ള ബന്ധം ഏതു രീതിയില്‍ ഉള്ളതാണ് ? എന്നിങ്ങനെ ഉള്ള സംശയങ്ങള്‍ ക്യൂ ആയി നില്‍ക്കുന്നുണ്ട് എന്നത് മറ്റൊരു വസ്തുതയാണ്.)

ആധാര്‍ കാര്‍ഡ്‌ ഇല്ലാതെ ബിരിയാണി കൊടുക്കില്ല എന്ന ഉറച്ച പിടിവാശിയില്‍ എണ്ണ കമ്പനികള്‍ മുന്നോട്ടു പോകുമ്പോള്‍ ഇവിടുത്തെ പ്രമുഖ പ്രതിപക്ഷപാര്‍ടികള്‍ അവലംബിക്കുന്ന മൌനം വളരെ അരോചകമായി തന്നെയാണ് അനുഭവപ്പെടുന്നതും. പാലക്കാട്ടുള്ള മുഖ്യമന്ത്രിയെ തിരുവനന്തപുരത്ത് ഉപരോധിച്ചവര്‍ സര്‍ക്കാരിന്റെ ഈ ജനദ്രോഹ നയത്തിന് എതിരെ എങ്ങനെയാണ് പ്രതികരിക്കുക എന്നറിയാന്‍ അല്പം ആകാംഷയും ഇല്ലാതില്ല.

എന്റെ പരിമിതമായ നിയമ പരിജ്ഞാനത്തില്‍ നിന്നും മനസിലാക്കാന്‍ സാധിചത് പച്ചയായ കോടതി അലക്ഷ്യമാണ് ടി എണ്ണ കമ്പനികള്‍ നടപ്പാക്കുന്നത് എന്നാണ്. ഗവണ്മെന്‍റ് നിയന്ത്രണത്തില്‍ പ്രവര്‍ത്തിക്കുന്ന ഒരു പൊതുമേഘലാസ്ഥാപനത്തിന് ഇന്ത്യന്‍ നിയമവ്യവസ്തയോടും കോടതിയോടും ഇത്രമാത്രം ബഹുമാനവും അനുസരണയുമേ ഉള്ളൂ എങ്കില്‍ അതില്‍ കൂടുതല്‍ അനുസരണ ഈ രാജ്യത്തെ സാധാരണ പൌരനില്‍ നിന്നും പ്രതീക്ഷിക്കുന്നത് വിഡ്ഢിത്തരം അല്ലാതെ മറ്റൊന്നുമല്ല. നിയമം ലംഘിക്കപ്പെടാനുള്ളതാണ് എന്ന സന്ദേശം തന്നെയാണ് എനിക്ക് ഇതില്‍ നിന്നും വായിച്ചെടുക്കാന്‍ സാധിക്കുന്നതും.

മുന്‍കാലങ്ങളില്‍ 446 രൂപ മാത്രം അടച്ച് സബ്സിഡി നിരക്കില്‍ ഗ്യാസ്‌ വാങ്ങിയിരുന്ന ജനങ്ങള്‍ ഇനി മുതല്‍ 1216 രൂപ മുന്‍കൂര്‍ അടച്ച് ഗ്യാസ്‌ സിലിണ്ടര്‍ വാങ്ങുകയും പിന്നീറ്റ്‌ ബാങ്ക് അക്കൌണ്ടില്‍ സബ്സിഡി വന്നു കേറുന്ന ശുഭ മുഹൂര്‍ത്തത്തിനായി കണ്ണില്‍ എണ്ണ ഒഴിച് കാത്തിരിക്കുകയും ചെയ്യേണ്ട ഒരു സ്ഥിതി വിശേഷമാണ് നിലവില്‍ സംജാതമാകുന്നത് .നാളുകള്‍ പിന്നിടുമ്പോള്‍ എല്ലാ പൌരന്മാര്‍ക്കും പണം മുന്‍കൂര്‍ ആയി കൊടുത്ത്‌ ഗ്യാസ്‌ വാങ്ങാന്‍ സാധിക്കുന്നത് തന്നെ കുതിച്ചു ചാടിയ അവരുടെ സാമ്പത്തിക നിലവാരത്തിന്റെ അടയാളമാണെന്നും അതുകൊണ്ട് തന്നെ 'വന്‍നഷ്ടം ' സഹിച്ചു ഇത്രയും വലിയ തുക സബ്സിഡി ഇനത്തില്‍ നല്‍കേണ്ട ആവശ്യം ഇല്ല എന്ന് ടി സാമ്പത്തിക വിദഗ്ദന്മാര്‍ പറഞ്ഞു കൂടായ്കയില്ല. സബ്സിഡികള്‍ ഘട്ടം ഘട്ടം ആയി നിര്‍ത്തലാക്കുക എന്നതാണ് സര്‍ക്കാര്‍ നയമെന്നിരിക്കെ, കാണാനുള്ള കാഴ്ചകള്‍ കാണാന്‍ വെറ്റിലയില്‍ മഷി പുരട്ടി നോക്കേണ്ട കാര്യം ഉണ്ടെന്നു തോന്നുന്നില്ല. എന്തായാലും രൊക്കം കാഷ്‌ കൊടുത്ത്‌ ഗ്യാസ്‌ വാങ്ങിച്ചു , കത്തിച്ചു പണ്ടാരടക്കി .. 'എന്നിട്ടും നീ വൈകുന്നത് എന്തെ' എന്ന പാട്ടും പാടി ഇരിക്കുമ്പോള്‍ ആയിരിക്കും ആ തീട്ടൂരം ഇടിത്തീ പോലെ തലയില്‍ വന്നു വീഴുക .. എന്ത് സബ്സിഡി? . എവിടത്തെ സബ്സിഡി??.. അതൊക്കെ പണ്ട്.. ഇപ്പൊ നീയൊക്കെ അങ്ങ് റിച് ആയി പോയില്ലേ!!.. ഏത് ?!!

മോഡിയെ പ്രധാന മന്ത്രിയാക്കാന്‍ ബി ജെ പി വേണ്ടപോലെ ഉല്‍സാഹിചില്ലേലും 'അണ്ണാന്‍ കുഞ്ഞിനും തന്നാലായത്‌' എന്നപോലെ ആകാവുന്ന പണി ഓരോ കേന്ദ്രമന്ത്രിയും തന്നാലാവുംവിധം ചെയ്യുന്നുണ്ട് എന്നത് പരസ്നേഹത്തിന്റെയും ശത്രു സ്നേഹത്തിന്റെയും ഒക്കെ ദൃഷ്ടാന്തം മാത്രമായി കണ്ടാല്‍ മതി. ഇനി , ആര് കണ്ടു വിലവര്‍ധന വലിച്ചു കീറി കാറ്റില്‍ പറത്തി, വീരപ്പ മൊയ്‌ലി ജിയെ ചീത്തയും പറഞ്ഞു ഒരു സൂപര്‍ നായകനെ പോലെ രാഹുല്‍ഗാന്ധി അവതരിച്ചു കൂടായ്കയില്ല എന്ന് !!..

പിന്നാമ്പുറം: കണ്ണീരും കയ്യുമായി തിരുവഞ്ചൂര്‍ ഹോമില്‍ നിന്നും പടിയിറങ്ങി വന വാസത്തിലെയ്ക് പ്രവേശിച്ചു കഴിഞ്ഞു.. നല്ലൊരു കൈനീട്ടം പ്രതീക്ഷിച്ച പിള്ളയോട് കൈനീട്ടം വൈകിട്ടായാല്‍ കുഴപ്പമുണ്ടോ എന്നാണ് ഉമ്മന്‍ ചാണ്ടി ചോതിക്കുന്നത്.. ഇതിനെ ചതി എന്നല്ലാതെ മറ്റെന്താണ് പറയുക!! കൊണ്ഗ്രസിലെ വിന്റര്‍ കഴിഞ്ഞു എന്നും 2014 മുഴുവന്‍ വസന്തം പൂത്തുലയുന്ന കാഴ്ചയാണ് ഇനി നാം കാണുക എന്നും രമേശ്‌ . വസന്തമല്ല, വസന്തയാണ് പൂക്കുക എന്ന് ബാലകൃഷ്ണപിള്ളയും .. എനിക്ക് തോന്നുന്നത് ബാലറ്റ് പെട്ടിയില്‍ മിക്കവാറും കുറ്റിച്ചൂല്‍ ആയിരിക്കും പൂത്തുലയാന്‍ പോകുന്നത് എന്നാണ് ..

എന്ത് കോപ്പായാലും വേണ്ടില്ല, കോഴികളെ വസന്തയില്‍ നിന്നും കാലികളെ കുളംബ് രോഗത്തില്‍ നിന്നും കാത്തോണേ ദൈവമേ.. (അല്ലേലും ഞാന്‍ ഒരു മൃഗ സ്നേഹി ആന്നേ..!!)

വിജയനെ സഭയിലെടുത്തപ്പോള്‍..

2013-12-07T10:11:00.000-08:00

പണ്ട് എല്‍ദോയെ സിനിമയിലെടുത്തത് പോലെ പിണറായി വിജയനെ സഭയില്‍ എടുത്തതിന്റെ വാര്‍ത്തകള്‍ ആണ് ഇപ്പോള്‍ ചാനലുകളില്‍ നിറഞ്ഞു നില്‍ക്കുന്നത്‌ . ഒരു കാലത്ത് നികൃഷ്ട ജീവികള്‍ ആയി അവരോധിക്കപ്പെട്ടവരുടെ കൂടാരത്തില്‍ ഏറെ ഹാര്‍ദ്ദവമായ സ്വീകരണം തന്നെയാണ് പിണറായിക്ക്‌ ലഭിച്ചതും. സഭയുടെ കസ്തൂരി രംഗന്‍ നിര്‍മാര്‍ജന സമരത്തിന്‌ എല്ലാവിധ പിന്തുണയും പ്രഖ്യാപിച്ചു പരിസ്ഥിതി സംരക്ഷകരെ ആവശ്യത്തിന് ചീത്തയും പറഞ്ഞു അവസരത്തിനൊത്ത് ഉയര്‍ന്ന പിണറായിയ്ക്ക് ഇപ്പോള്‍ താമരശ്ശേരി ചുരത്തിനിപ്പുറത്ത് ഒരു ന്യൂ ജനറേഷന്‍ സ്റ്റാറിന്റെ ഇമേജ് ആണ് രൂപപ്പെട്ടുവരുന്നത്.

കാല് തല്ലിയോടിച്ചവനോടു ക്ഷമിച്ച വിശാലഹൃദയനായ ആശാനെപ്പോലെ എല്ലാം പൊറുക്കുന്ന താമരശ്ശേരി ബിഷപ്പ്‌ വിജയന് പൂര്‍ണ പാപ വിമോചനം പ്രഖ്യാപിക്കുകയും ചെയ്തു. പോരെ പൂരം ! ഇതു വരെ കാര്യങ്ങള്‍ ഏറെ ജോര്‍ ആയിട്ടുണ്ട് . പ്രായോഗിക രാഷ്ട്രീയത്തിന്റെ പുത്തന്‍ വഴിത്താരകള്‍ തേടി പിണറായി മുന്നോട്ടു നീങ്ങുമ്പോള്‍ ഏറെ പരുങ്ങലില്‍ ആവുക യു ഡി എഫ് നേതൃത്വം തന്നെയാവും എന്നതില്‍ തര്‍ക്കം ഇല്ല.

വിജയന്‍ പത്തടി മുന്നോട്ടു വെയ്ക്കുമ്പോള്‍ മുന്നോട്ട് ഒട്ടും പോയില്ലെങ്കിലും പിന്നോട്ട് പോകാതിരിക്കാനാവും യു.ഡി.എഫ് ശ്രദ്ധിക്കുക. അപ്പൊ എന്ത് വേണ്ടു.. പരിസ്ഥിതി ലോല മേഘലകളെ സംരക്ഷിക്കാന്‍ ഇന്നലെ പുറത്തിറങ്ങിയ സര്‍ക്കാര്‍ ഉത്തരവു ഒന്ന് ഇരുട്ടി വെളുത്തപ്പോ ദാ കിടക്കുന്നു ചവറ്റു കുട്ടയില്‍!. ഇനി വേണ്ടത് കസ്തൂരി രംഗനെ തൂക്കിലേറ്റുകയും ഗാട്ഗില്‍ സമിതിയെ നാട് കടത്തുകയുമാണ്. സര്‍ക്കാരിനു ഇക്കാര്യത്തില്‍ നട്ടെല്ല് ഇല്ലെങ്കില്‍ ചെയ്യേണ്ടത് പാര്‍ട്ടി ചെയ്യും .

ഈ പരിസ്ഥിതിക്കാര്‍ ഒക്കെ റിപ്പോര്‍ട്ട് എഴുതുന്നത് വിദേശത്ത് നിന്നും കണക്കില്ലാതെ ഒഴുകി എത്തുന്ന ഫണ്ട് മോഹിച്ച് മാത്രമാണ് എന്നതില്‍ പിസി ജോര്‍ജിനെ പോലെ തന്നെ പിണറായിയ്ക്കും സംശയ ലേശം ഇല്ല. മലയോരത്ത് ചോര നീരാക്കി പണിയെടുക്കുന്ന പാറ-മണല്‍ കൃഷിക്കാര്‍ക്കും ടൌണ്‍ഷിപ്പ് കൃഷിക്കാര്‍ക്കും ഒരു ഇടക്കാല ആശ്വാസം ലഭിക്കാനാണ് ഇന്നലെ ഇറക്കിയ ഉത്തരവ്‌ സര്‍ക്കാര്‍ ഇന്ന് പിന്‍വലിച്ചത് എന്ന് വേണം പിന്‍വലിച്ച നിര്‍ദേശങ്ങളിലൂടെ കടന്നുപോകുമ്പോള്‍ മനസിലാക്കാന്‍ സാധിക്കുക.

ഇനിയും എന്തിന്നാണ് കേരളത്തില്‍ കാട് ? ഇപ്പോള്‍ തന്നെ ഈ ഫോറസ്റ്റ്‌ മുഴുവന്‍ കാടാണല്ലോ എന്നൊക്കെയാണ് ഇവിടുത്തെ രാഷ്ട്രീയ പാര്‍ട്ടികളുടെ ഒക്കെ സംശയം. ഈ കോപ്പൊക്കെ വെട്ടി വിറ്റാല്‍ എന്തോരേം കാശു സര്‍ക്കാരിനു കിട്ടും !. പിന്നെ കുറെ മാനും മയിലും കൊരങ്ങനും ഒക്കെ. എല്ലാത്തിനേം കൊന്നു ഇറച്ചിയാക്കി ഈ ക്രിസ്തുമസിന് വെളമ്പണം. എന്നിട്ട് വല്ലോം ബാക്കിയൊന്ടെല്‍ ഒണക്കി വിദേശത്തേയ്ക്ക് എക്സ്പോര്‍ട്ട്‌ ചെയ്യണം. (ഞങ്ങളു നസ്രാണികള്‍ ഒന്ന് ആഞ്ഞു പിടിച്ചാല്‍ എല്ല് പോലും ബാക്കി കിട്ടില്ലെന്നത് വേറെ കാര്യം!) കരിങ്കുരങ്ങ് ഇറചിയ്ക്കൊക്കെ വിദേശത്ത് നല്ല ഡിമാണ്ട് ആന്നാ കേട്ടത്. (ആകാശത്തിനു കീഴെ ഉള്ളതെല്ലാം മനുഷ്യന് വേണ്ടിയാണല്ലോ ദൈവം സൃഷ്ടിച്ചത്. അപ്പൊ എല്ലാത്തിനേം അങ്ങ് തിന്നാലും കര്‍ത്താവ്‌ ഒന്നും പറയത്തില്ല).
പിന്നെ ഇവിടത്തെ കുന്നും മലയും ഒക്കെ. എല്ലാം നിരത്തി ഓരോ വില്ലെജിനും ഒരു എയര്‍ പോര്‍ട്ട്‌ വീതം പണിയണം. പിന്നെ ഐ ടി പാര്‍ക്ക്‌ , ഫ്ലാറ്റുകള്‍ , റിസോര്‍ട്ടുകള്‍ , ടൌണ്‍ഷിപ്പുകള്‍ ... അങ്ങ് കുട്ടനാട്ടില്‍ ആര്‍ക്കും വേണ്ടാതെ കുറെ കണ്ടവും കായലും ഒക്കെ ഉണ്ട്. ഒക്കെ നികത്തണം. അവര്‍ക്കും വേണ്ടേ വിമാനത്താവളം.. അവര്‍ക്കും വേണ്ടേ ഐ.ടി പാര്‍ക്ക്‌ .. അങ്ങനെ അങ്ങനെ.. ഒടുവില്‍ കാണുന്ന ഏവനും പറയണം "ഭൂമിയില്‍ ഒരു സ്വര്‍ഗം ഉണ്ടേല്‍ അത് ഇതാണ് .. അത് ഇതാണ് " ഇമ്മാതിരിയുള്ള വികസന സ്വപ്നങ്ങള്‍ക്കാണ് ഇവിടത്തെ പരട്ട പരിസ്ഥിതി വാദികള്‍ ആപ്പ് വെയ്ക്കുന്നത് . ഈ വികസന സ്വപ്‌നങ്ങള്‍ മുടക്കുന്നതിനാണ് ഇവന്മാര്‍ക്ക്‌ വിദേശത്ത് നിന്നും ഫണ്ട് കിട്ടുന്നത് . പുല്ലന്മാര്‍!!.. ഒന്നിനേം വെച്ചേക്കല്ല്.. മരമില്ലേല്‍ മഴ പെയ്യില്ല പോലും.. പിന്നേ .. കോപ്പ് ... മരം ഉണ്ടായിട്ടല്ലേ അറബിക്കടലില്‍ മഴപെയ്യുന്നത്. കാട് വെട്ടിയാല്‍ ചൂടു കൂടും പോലും.. അന്റാര്‍ട്ടിക്ക മുഴുവന്‍ കാട് ആയത് കൊണ്ടാവും അവിടെ ഒടുക്കത്തെ തണുപ്പ്.. ഒക്കെ തട്ടിപ്പാന്നെ!!.. എല്ലാ അവനേം തല്ലിക്കൊന്നു തെമ്മാടിക്കുഴീല്‍ തട്ടണം.
പിന്നെ, പരിസ്ഥിതിയെ ഒലത്തുക ഭൂമിയെ രക്ഷിക്കുകഎന്നൊക്കെ ഡയലോഗ് വിട്ടു കുറെ ന്യൂ ജനറേഷന്‍ ഗ്രീന്‍ ആക്ടിവിസ്റ്റ്കള്‍ ഇറങ്ങീട്ടുണ്ട്.. ലവന്മാര്‍ ശ്രദ്ധിക്കാനായി- നമ്മടെ പിള്ളേരുടെ ഒരു സൈബര്‍ വിംഗ് എല്ലാ ജയിലുകളിലും സജീവമായിട്ടുണ്ട്. പ്രത്യേകിച്ചും കോഴിക്കോട്ട്. നിന്റെയൊക്കെ സോഷ്യല്‍ മീഡിയയിലെ ഓരോ ചലനവും ഈ ഗടികള്‍ സ്കെച് ചെയ്യുന്നുണ്ട്. ഇനി എഫ്ബിലും വാട്സ് ആപ്പിലും ഒക്കെ പരിസ്ഥിതിയെ സ്നേഹിക്കുമ്പോ സൂക്ഷിച്ചാ നെനക്കൊക്കെ കൊള്ളാം. ആവശ്യത്തിന് പരിസ്ഥിതിയെ ഒക്കെ പാര്‍ട്ടി വേണ്ടപോലെ സംരക്ഷിചോളും. പിന്നേം എന്തേലും കുറവ്‌ ഉണ്ടെന്നു തോന്നിയാല്‍ ബാക്കി സഭയും സംരക്ഷിക്കും.. ചുമ്മാ പിള്ളേര്‍ക്ക്‌ പണി ഒണ്ടാക്കി വെയ്ക്കല്ല്.. അടുത്ത തവണ 51 തുന്നിക്കെട്ടില്‍ നിന്നുവെന്നു വരില്ല.. അല്ല പിന്നെ!!

ആ വള്ളംകളി മാഞ്ഞുപോയി !

2013-11-04T01:37:00.001-08:00

മൂന്ന് നാല് ദിവസങ്ങള്‍ പിന്നിടുന്ന ' ശ്വേതാംബര നിര്‍വേദ'ത്തിന്‌ ഒടുവില്‍ തിരശീല വീഴുകയാണ്. സോഷ്യല്‍ മീഡിയ പ്രതികരണ തൊഴിലാളികള്‍ക്കും മെയിന്‍ സ്ട്രീം മീഡിയ സദാചാര പാലകര്‍ക്കും ഇനി അല്‍പ്പം വിശ്രമം ആവാം - കുറഞ്ഞത് അടുത്ത വിവാദത്തിന്റെ കല്ല്‌ വീഴും വരെയെങ്കിലും. പ്രായം കൂടും തോറും വീര്യം കൂടുന്ന ജെനുസ്‌ എന്നാണു രാഷ്ട്രീയക്കാരെപ്പറ്റി കേട്ടുപഴകിയ ഒരു വിശേഷണം. പ്രത്യേകിച്ചും കൊണ്ഗ്രസ്സുകാരുടെ കാര്യമാവുമ്പോള്‍ പറയേണ്ടതുമില്ല. ന്യൂ ജനറേഷന്‍ വസന്തം ഒരു ബീപ് ശബ്ദത്തോടെ പൂത്തുലയുന്ന ഈ ഫ്രീക്ക് കാലത്തിലും പെണ്‍വിഷയത്തില്‍ ഏതു ജനറെഷനെക്കാളും 'വര്‍ദ്ധിതവീര്യ'ത്തോടെ ഒരു വള്ളപ്പാടു മുന്നില്‍ താന്‍ ഉണ്ടാകും എന്ന് കൊല്ലം വള്ളം കളിയോടെ പീതാംബരക്കുറുപ്പ്‌ തെളിയിച്ചു കഴിഞ്ഞു.

തന്റെ പ്രസവം മൂവി കാമറകള്‍ക്കു മുന്നില്‍ തുറന്നു വെയ്ക്കുകയും അഭിനയ രംഗത്ത്‌ പുത്തന്‍ പ്രവണതകള്‍ക്ക് പാത വെട്ടിത്തെളിക്കുകയും ചെയ്ത, അങ്ങനെ മലയാള സിനിമാ രംഗത്ത്‌ ഏറ്റവും ബോള്‍ഡ്‌ ആയ നടി എന്ന് പേരെടുത്ത (ഇതിനു ബോള്‍ഡ്‌നെസ് എന്ന് തന്നെയാണോ പറയേണ്ടത്‌ എന്നതിനെപ്പറ്റി ഇപ്പോഴും ചര്‍ച്ചകള്‍ സജീവമാണ്) ശ്രീമതി ശ്വേതാ മേനോനെ അപമാനിക്കാന്‍ ശ്രമിച്ച പീതാംബരക്കുറുപ്പിന് ഇതിനോടകം തന്നെ കാപ്പിറ്റല്‍ പണിഷ്മെന്റ് കിട്ടിയ ഒരു പ്രതീതി ആണ്. സോഷ്യല്‍ മീഡിയയിലെ ന്യായാധിപന്മാര്‍ ഇതിനോടകം തന്നെ ടിയാനെ ഒരു നൂറ്റൊന്നു തവണ എങ്കിലും കഴുവേറ്റുകയും ചാണക വെള്ളത്തില്‍ കുളിപ്പിച്ച് കിടത്തുകയും ചെയ്തിട്ടുണ്ട്‌. സമീപ കാലത്ത്‌ ഇതുപോലെ ഭാഗ്യം ലഭിച്ച മറ്റൊരാള്‍ ജോസ്‌ തെറ്റയില്‍ മാത്രമായിരിക്കും.

എല്ലായ്പ്പോഴും ഇരയുടെ ഒപ്പം മാത്രം ഓടുകയും വേട്ടക്കാരനെ പുലഭ്യം പറയുകയും ചെയ്യുന്ന പരമ്പരാഗത രീതിയില്‍ നിന്നും ഒരു ട്വിസ്റ്റ്‌ മേല്പറഞ്ഞ രണ്ടു സംഭവങ്ങളിലും ഉണ്ടായിട്ടുണ്ട്. ഒരു ഗര്‍ഭ നിരോധന ഉറയുടെ പരസ്യ മോഡല്‍ ആയി അഭിനയ രംഗത്തേയ്ക്ക് കടന്നു വരികയും പിന്നീട് ഐറ്റം ഡാന്‍സ് കളും ലൈംഗിക അതിപ്രസരം നിറഞ്ഞ ഇക്കിളി റോളുകളും കൈകാര്യം ചെയ്ത്‌ മലയാള സിനിമ രംഗത്ത്‌ ചുവടുറപ്പിക്കുകയും ചെയ്ത ശ്വേതയ്ക്ക് അങ്ങനെ തന്നെ വരണം എന്നു വാദിക്കുന്ന ഒരു കൂട്ടം ആളുകളെയും ഇതിനിടെ കാണാന്‍ സാധിച്ചു. സ്വന്തം പ്രസവം പോലും കാമറയ്ക്ക് മുന്നില്‍ തുറന്നു വച്ച ശ്വേതയ്ക്ക്, ഇപ്പോള്‍ പീതാംബരക്കുറുപ്പ്‌ അറിഞ്ഞോ അറിയാതെയോ ഒന്ന് തൊട്ടപ്പോള്‍ ഈക്കണ്ട കോലാഹലം ഒക്കെ ഉണ്ടാക്കേണ്ട കാര്യം ഇല്ലെന്നാണ് അവരുടെ വാദം. ഒരു സ്ത്രീ - അവള്‍ എത്ര മോശക്കാരിയോ ഒരു പ്രോസ്ടിടുറ്റ്‌ തന്നെയോ ആയിക്കൊള്ളട്ടെ , അനുവാദം കൂടാതെ അവരുടെ ശരീരത്തില്‍ ദുരുദ്ദേശത്തോടെ സ്പര്‍ശിക്കുന്നതിനെ ഇന്ത്യന്‍ പീനല്‍ കോട് പ്രകാരം നിര്‍വചിക്കുക പീഡനം എന്ന് തന്നെയാണ്. ഈയൊരു സിമ്പിള്‍ ലോജിക്‌ ആണ് പലപ്പോഴും നാം മിസ്സ്‌ ചെയ്യുക.

    വെള്ളിത്തിരയിലെ രതിച്ചേച്ചി എന്ന കഥാപാത്രത്തെയും ശ്വേതാമേനോന്‍ എന്ന അഭിനേത്രിയെയും വേര്‍തിരിച്ചറിയാന്‍ കഴിഞ്ഞില്ല എന്നയിടത്താണ് പീതാംബരക്കുറുപ്പിന്റ ചുവടു പിഴച്ചത് . കുറുപ്പിന് മാത്രമല്ല ഇവിടുത്തെ പല പ്രതികരണ തൊഴിലാളികള്‍ക്കും തെറ്റ് പറ്റുന്നത് ഈ തിരിച്ചറിവ് നഷ്ടമാവുമ്പോളാണ്. സ്ത്രീയെ ഒരു ലൈംഗീക ഉപകരണം അഥവാ സൊ കോള്‍ഡ്‌ 'ചരക്ക്‌' മാത്രമായി കാണുകയും അവളെ ഒരു ബഹുമാനം അര്‍ഹിക്കുന്ന വ്യക്തി ആയി കാണുന്നതില്‍ പരാജയപ്പെടുകയും ചെയ്യുന്നിടത്ത് നിന്നാണ് എല്ലാ പീഡന കഥകളുടെയും ബീജോവാപം. പലരും മലര്‍ന്നുകിടന്നു തുപ്പുന്നതു പോലെ ഇത് ഇവിടത്തെ മലയാളി സമൂഹം മാത്രം നേരിടുന്ന പ്രശ്നം അല്ല. ആഗോള -കച്ചവടവല്‍ക്കരണ സംസ്കാരങ്ങള്‍   അതിന്റെ പുത്തന്‍ കോര്‍പ്പറേറ്റ് മാനങ്ങള്‍ തേടുമ്പോഴും സ്ത്രീ ശരീരം അന്നും ഇന്നും വിപണനത്തിന്റെ ലാഭ നഷ്ടക്കണക്കുകള്‍ നിര്‍ണയിക്കുന്ന ഒരു ഐറ്റം പീസ്‌ മാത്രമായി ലേലത്തിനു വെയ്ക്കപ്പെട്ടിരിക്കുന്ന കാഴ്ചകള്‍ നാം നിത്യേന കാണുന്നതാണ് .   എലൈറ്റ്‌ ക്ലാസ്‌ പ്രൈസ്‌ ടാഗുകള്‍ കഴുത്തില്‍ ചാര്‍ത്തി ബികിനിയിലും ടു പീസിലും സ്ത്രീത്വത്തിന്റെ പുരോഗമന മാനങ്ങള്‍ അഭിമാനത്തോടെ കാഴ്ച്ചവെയ്ക്കുമ്പോള്‍ തങ്ങള്‍ 'ആറ്റന്‍ ചരക്കുകള്‍' ആയി സ്വയം അവരോധിക്കുകയാണ് എന്ന സത്യം ഇവിടത്തെ പല സ്ത്രീ വിമോചന വാദികളും മറന്നു പോകുകയോ അറിയാത്തതായി ഭാവിക്കുകയോ ആണ് പതിവ്‌ .
           ഒരു വ്യാഴവട്ടക്കാലം കൊണ്ട് സ്ത്രീ സമൂഹത്തിന്റെ അഭിമാനവും യശസ്സും ഉയര്‍ത്താനും മാതൃത്വത്തിന്റെ മഹിമയെ വാനോളമെത്തിക്കാനും തനിയ്ക്ക് കഴിഞ്ഞിട്ടുണ്ട് എന്ന് സ്വയം അവകാശപ്പെടുന്ന ശ്വേതമേനോന്‍, പ്രേഷക മനസുകളില്‍പ്രതിഷ്ടിക്കപ്പെട്ടിരിക്കുന്നത് വെറും ഒരു മൂന്നാം കിട 'ചരക്ക്‌' മാത്രമായിട്ടാണ് എങ്കില്‍ അതിന്റെ ഉത്തരവാദിത്വത്തില്‍ നിന്നും അവര്‍ക്ക്‌ പൂര്‍ണമായി ഒഴിഞ്ഞു മാറാന്‍ സാധിക്കില്ല. വേണ്ടത്ര വൈകാരിക-ലൈംഗിക പക്വത നേടിയിട്ടില്ലാത്ത ഒരു സമൂഹത്തെ, അതിന്റെ ബലഹീനതകള്‍ മുതലെടുത്ത്‌ ബോക്സ് ഓഫീസുകള്‍ നിറയ്ക്കുകയും നിത്യ ഹരിത ഹിറ്റുകള്‍ തീര്തതിന്റെ നിര്‍വൃതിയില്‍ സ്വയം മതിമറക്കുകയും ചെയ്യന്ന നവ യുഗ വ്യാപാരികള്‍ക്ക്‌ ഒരു നല്ല നമസ്കാരം പറയാതെ തരമില്ല.

              എന്തൊക്കെയോ തിരിച്ചറിവുകളുടെയോ വെളിപാടുകളുടെയോ വെളിച്ചത്തില്‍ കുറുപ്പിനെതിരായ പരാതിയും പിന്‍വലിച്ച് ശ്വേത അണിയറയിലേയ്ക്ക്‌ മറയുമ്പോള്‍ ശവമായത് പവനായിയാണോ കുറുപ്പാണോ അതോ ന്യൂസ് ഡസ്കുകളില്‍ ചെരിന്ക് കിടന്നു ലൈവ് വിചാരണകള്‍ നടത്തിയ സോമന്മാരാണോ എന്ന സംശയം ബാക്കി. 'തെറ്റ് പറ്റുന്നത് മാനുഷികമാണ് , ക്ഷമിക്കുന്നത് ദൈവികവും' എന്ന മഹത് വചനം വേണമെങ്കില്‍ ഒരു ശിക്ഷയായി പീതാംബരക്കുറുപ്പിന് ഇമ്പോസിഷന്‍ കൊടുക്കാം. ഇതൊക്കെ കാണാനും കേള്‍ക്കാനും വിഡ്ഢികളാകാനും മാത്രം വിധിക്കപ്പെട്ടവര്‍ക്ക് വേണമെങ്കില്‍ ഒരു വഞ്ചിപ്പാട്ടിന്റെയോ താരാട്ട് പാട്ടിന്റെയോ ഈരടികള്‍ ഏറ്റു പാടാം .
        തൊട്ടറിഞ്ഞ അനുഭവത്തിന്റെ പുത്തന്‍ പാഠങ്ങളുമായി കുറുപ്പദ്ദേഹത്തിനു ഇനിയും പാരല്മെന്റിലെയ്ക്ക് ധൈര്യമായി യാത്രയാകാം. രാജ്യത്ത്‌ സ്ത്രീകള്‍ നേരിടുന്ന അരക്ഷിതാവസ്തക്കെതിരെ ലോക്സഭയില്‍ ശബ്ദമുയര്ത്താം. വേണമെങ്കില്‍ ഒഴിവു സമയം കിട്ടുമ്പോള്‍ തന്റെ പിതൃതുല്യമായ വാല്‍സല്യം തെറ്റിധരിക്കപ്പെട്ടതിന്റെ വേദനയില്‍ രണ്ടു തുള്ളി കണ്ണീര്‍ ചേര്‍ത്ത് 'ഞാന്‍ കണ്ട ശ്വേത' എന്ന പേരില്‍ ഒരു ആത്മകഥാ കുറിപ്പുകള്‍ പുറത്തിറക്കുകയുമാവാം .

ഇത് പാര്‍ട്ടി വക കല്ല്‌ അല്ല, പാര്‍ട്ടിയുടെ കല്ല്‌ ഇങ്ങനെയല്ല

2013-10-28T07:48:00.000-07:00

കേരള മുഖ്യമന്ത്രിക്കെതിരായി സി പി എം നയിച്ചു കൊണ്ടിരുന്ന ഐതിഹാസിക സമരം അതിന്റെ നാള്‍വഴി പുസ്തകത്തില്‍ ചോര പൊടിയുന്ന മറ്റൊരു എട് കൂടി എഴുതിച്ചേര്‍ക്കുന്ന കാഴ്ചയാണ് ഇന്നലെ കേരളം കണ്ടത് . പ്രതിപക്ഷ സമരത്തില്‍ നട്ടം തിരിഞ്ഞിരുന്ന ഉമ്മന്‍ ചാണ്ടിയ്ക്ക് അക്ഷരാര്‍ഥത്തില്‍ മറ്റൊരു കാരുണ്യ ലോട്ടറി തന്നെയാണ് ഇന്നലെ അടിച്ചത് എന്ന് വേണം പറയാന്‍. വടക്കന്‍ കേരളത്തില്‍ മാത്രം കണ്ടുവന്നിരുന്ന ആ കാറ്റിന് ഇപ്പോള്‍ സഹതാപത്തിന്റെ മണം ആണെന്നു പിണറായിയും കൂട്ടരും അല്പം ഞെട്ടലോടെ തിരിച്ചറിയുന്നുണ്ട്. ആ കാറ്റ് താമസിയാതെ തെക്കന്‍ കേരളത്തിലേയ്ക്ക് വ്യാപിക്കുമോ, അങ്ങനെ വ്യാപിച്ചാല്‍ പണി പാലും വെള്ളത്തിലാണോ അതോ റേഷന്‍ മണ്ണെണ്ണയിലാണോ കിട്ടുക എന്നിങ്ങനെയുള്ള കടുത്ത ആശങ്കയിലാണ് ഇപ്പോള്‍ ഇടത് നേതൃത്വം.

സമാധാനത്തിന്റെയും ശാന്തിയുടെയും കാവല്‍ദൂതരായ സിപിഎം -നെ ഇക്കാര്യത്തില്‍ കുറ്റപ്പെടുത്തുന്നത് കടുത്ത അനീതിയാണ് , ക്രൂരതയാണ് , സര്‍വോപരി അപലപിക്കപ്പെടെണ്ടതാണ്. ഈ കാര്യത്തില്‍ അരിയാഹാരം കഴിയ്ക്കുന്ന ആര്‍ക്കും സംശയത്തിനു ഇട ഉണ്ടാവേണ്ടതില്ല. അന്‍പത്തൊന്നു വെട്ടിന്റെ രാഷ്ട്രീയം , മാര്‍ക്സിസ്റ്റ്‌ ഭീകരത എന്നിങ്ങനെ പാടിപ്പതിഞ്ഞ ക്ലിഷേകള്‍ ഒക്കെ പെറ്റി ബൂര്‍ഷ്വാ മാധ്യമങ്ങളുടെ സൃഷ്ടി ആണ്‌ എന്ന സത്യം കേരളത്തിലെ ജനങ്ങള്‍ക്ക് ബോധ്യപ്പെട്ടു വരുന്നുണ്ട്. അത് ഇനിയും ബോധ്യപ്പെടാത്തവര്‍ ദേശാഭിമാനി വായിച്ചു തുടങ്ങേണ്ടിയിരിക്കുന്നു.

ചാണ്ടി - രമേശ്‌ ഗ്രൂപ്പ് വഴക്ക് ആണ് മുഖ്യമന്ത്രിയ്ക്ക് എതിരെയുള്ള അക്രമത്തിനു പിന്നില്‍ എന്നു സംഭവം നടക്കുന്നതിനു അഞ്ച് മിനിറ്റ്‌ മുന്നേ തന്നെ ജയരാജന്‍ സഘാവും പിന്നാലെ പിണറായി സഘാവും ആണയിട്ടു വ്യക്തമാക്കിയിട്ടുള്ളതാണ്. അതുകൊണ്ട് തന്നെ ഇക്കാര്യത്തില്‍ സിപിഎം - നെ സംശയിക്കേണ്ടതില്ല. ഇനി ഇതൊന്നും പോരെങ്കില്‍, ചാലക്കുടിയില്‍ നിന്നെത്തിയതും താലിബാനുമായി ബന്ധം ഉണ്ടെന്ന് സംശയിക്കപ്പെടുന്നതുമായ ഒരു കൊട്ടേഷന്‍ സംഘമാണ് ചാണ്ടിക്കെതിരായ ഓപറേഷന്‍ നടത്തിയതെന്ന് പാര്‍ട്ടിയുടെ ഉന്നത തല അന്വേഷണ വൃത്തങ്ങള്‍ ഇന്ന് രാവിലെ വെളിപ്പെടുത്തിയിട്ടുണ്ട്. പാര്‍ട്ടിയുടെ അന്വേഷണം എന്നാല്‍ സിബിഐയെ കടത്തിവെട്ടുന്നതാണെന്നു കേരളത്തിലെ കൊച്ചു കുട്ടികള്‍ക്ക് പോലും അറിയാം. മുഖ്യന്റെ നെറ്റിയിലെ മുറിവിന്റെ ആഴം, പാഞ്ഞു പോയ കല്ലിന്റെ ആക്സിലറേഷന്‍, വെലോസിടി ഇവയൊക്കെ വിശകലനം ചെയ്തു കൃത്യമായി പ്രതികളെ പിടിച്ചു മുന്നില്‍ ഇട്ടുതരും പാര്‍ട്ടിയുടെ മിടുക്കരായ അന്വേഷകര്‍. (എന്ന് കരുതി ചാണ്ടിയുടെ പോലിസ്‌ ഇതിനു ഫീസ്‌ ഒന്നും തരേണ്ട, കേട്ടോ. തികച്ചും ഫ്രീ ആണ്. കേരള പോലീസിനു ഒരു കൈസഹായം ഇരിക്കട്ടെ എന്ന് മാത്രമേ കരുതിയിട്ടുള്ളൂ) ഈ രീതിയിലൊരു ശാസ്ത്രീയ വിശകലനം നടത്തിയപ്പോഴാണ് ആ സത്യം വെളിവായത്‌! - ' ഇത് പാര്‍ട്ടി വക കല്ല്‌ അല്ല, പാര്‍ട്ടിയുടെ കല്ല്‌ ഇങ്ങനെയല്ല ' . വെറ്റിലയില്‍ തെളിയുന്ന ദൃശ്യങ്ങളും പാര്‍ട്ടി വക ചാത്തന്മാരുടെ മുഖലക്ഷണങ്ങളും ശരിയാണെങ്ങില്‍, മദ്ധ്യകേരളത്തില്‍ ചാലക്കുടി എന്നൊരു ഗ്രാമത്തില്‍ നിന്നാണ് കല്ലിന്റെ പ്രഭവ കേന്ദ്രം. ഇത്ര ഭയങ്കര കണ്ടുപിടുത്തങ്ങള്‍ നടത്തിയ പാര്‍ടിയെ അനുമോദിചില്ലെങ്കില്‍ വേണ്ട, (പാര്‍ട്ടിയ്ക്ക് അത്തരം പാര്‍ലമെന്ററി വ്യാമോഹങ്ങള്‍ ഒന്നും ഇല്ല) പകരം നിരപരാധികള്‍ ആയ പാര്‍ട്ടി അണികളെ പിടിച്ച് അകത്തിടുന്നത് നന്ദികേടല്ലാതെ മറ്റെന്താണ് ?.

അല്ലെങ്കിലും സിപിഎം എന്നെങ്കിലും അക്രമത്തെ പിന്തുണചിട്ടുണ്ടോ?. അഹിംസയുടെയും സത്യഗ്രഹതിന്റെയും പൈതൃകം അവകാശപ്പെടുന്നത് ഇവിടത്തെ കൊണ്ഗ്രസ് കൊഞ്ഞാണന്മാര്‍ ആണെങ്കിലും വാസ്തവത്തില്‍ ഇന്ന് കേരളത്തില്‍ ഗാന്ധിജിയുടെ ചുവടുകള്‍ പിന്തുടരുന്നത് സിപിഎം മാത്രമാണ്.

ശാന്തി സന്ദേശത്തിന്റെ പൂങ്കാവനങ്ങളാണ് കണ്ണൂരില്‍ പാര്ട്ടിഗ്രാമങ്ങളിലൂടെ വിഭാവനംചെയ്യുന്നത്. അവിടങ്ങളില്‍ കള്ളമില്ല, ചതിയില്ല, അക്രമമില്ല, പകയില്ല. അക്ഷരാര്‍ഥത്തില്‍ മാവേലി നാട്. ഇത്തരം മാവേലി നാടുകള്‍ കുട്ടിച്ചോറാക്കാന്‍ അസൂയ പൂണ്ട കോണ്‍ഗ്രസ് - ബിജെപി കിങ്കരന്മാര്‍ പലപ്പോഴും ശ്രമിച്ചിട്ടുണ്ട്. ചിലപ്പോഴൊക്കെ പാര്‍ട്ടിയിലെ ചില കുലംകുത്തികള്‍ ടിയാന്മാര്‍ക്ക് ചൂട്ട് പിടിചിട്ടുമുണ്ട് . പക്ഷെ , ഇവരോടൊന്നും പാര്‍ട്ടിയ്ക്ക് പകയോ ദ്വേഷ്യമോ ഉണ്ടാവാറില്ല. അങ്ങനെ ദ്വേഷ്യപ്പെടാന്‍ പാര്ട്ടിക്കാവുമോ. അവരെ പാര്‍ടി സമാധാനത്തിന്റെ ഭാഷയില്‍ പുഞ്ചിരിച്ചുകൊണ്ട് ഉപദേശിക്കും, അത്രമാത്രം. പാര്‍ട്ടിയുടെ ഉപദേശങ്ങള്‍ ധിക്കരിക്കുന്നവരുടെ ശിരസ്സില്‍ ദൈവകോപം ഇടിത്തീ പോലെ ഭവിക്കും. ടിപിയുടെ കാര്യത്തില്‍ സംഭവിച്ചത്‌ ഇതാണ് . ഇത്തരം ദുരന്തങ്ങള്‍ ഒഴിവാകണേ എന്ന് പേരുകേട്ട അമ്പലങ്ങളില്‍ പൂജ കഴിച്ചും പള്ളികളില്‍ നൊവേന ചൊല്ലിച്ചും തലമുതിര്‍ന്ന നേതാക്കന്മാര്‍ ദൈവത്തോട് റിക്വസ്റ്റ് ചെയ്യാറുണ്ട്. പക്ഷെ , പലപ്പോഴും പണ്ടാരക്കലിപ്പില്‍ ആയ ദൈവം ഇതൊന്നും മുഖവിലയ്ക്കെടുക്കാറില്ല. ഒടുക്കം പഴി കേള്‍ക്കേണ്ടി വരുന്നതോ , പാവം പാര്‍ട്ടിയും അണികളും!. ദൈവത്തിന്റെ ഇമ്മാതിരിയുള്ള കളികള്‍ ആണോ ചാലക്കുടിയില്‍ നിന്നും അക്രമി സംഘത്തെ കണ്ണൂരിലെയ്ക് ഇളക്കിവിട്ടത് എന്നുള്ള ഒരു സംശയം പാര്‍ട്ടിയ്ക്ക് ഇല്ലാതില്ല. ഇക്കാര്യത്തില്‍ പാര്‍ട്ടി ദൈവത്തോടു എക്സ്പ്ളനേഷന്‍ ആവശ്യപ്പെട്ടിട്ടുണ്ട് .

തൃശ്ശൂര്‍ വെടിക്കെട്ടിന് ഏഴു നിലയില്‍ പൊട്ടുന്ന അമിട്ട് പോലെ പൊട്ടിയ പാര്‍ട്ടിയുടെ സമരങ്ങളെ ഓര്‍ത്ത് ദുഖാര്തരായ ഏതോ വിവരം കേട്ട പാര്‍ട്ടി പ്രവര്‍ത്തകര്‍ ആണ് അക്രമത്തിനു പിന്നില്‍ എന്ന് പെറ്റി ബൂര്‍ഷ്വാ മാധ്യമങ്ങള്‍ മുക്രയിടുന്നുണ്ട് . ഇതൊന്നും പ്രബുദ്ധ കേരളം വകവെയ്ക്കില്ല. കണ്ണില്‍ കൊള്ളേണ്ടത് പുരികത്തില്‍ തട്ടി പോയല്ലോ എന്നാശ്വസിക്കുകയും, ചെയ്തു പോയ തെറ്റുകള്‍ക്ക് പാര്‍ട്ടിയോടും ദൈവത്തോടും മാപ്പിരക്കുകയുമാണ് മുഖ്യമന്ത്രി ചെയ്യേണ്ടത്‌. അതിനു പകരം 'ജന സമ്പര്‍ക്ക പരിപാടി' എന്നൊരു ഉഡായിപ്പ് പരിപാടിയുമായി ഇനിയും കണ്ണൂരിലേയ്ക്ക്‌ ഒരു വരവ് കൂടി വരേണ്ടി വരും എന്നൊരു ഭീഷണിയാണ് മുഖ്യമന്ത്രി നടത്തിയത്‌. ഇത് തികഞ്ഞ അഹങ്കാരമല്ലാതെ മറ്റൊന്നല്ല. ആവശ്യത്തിനുള്ള സമ്പര്‍ക്ക പരിപാടി ഒക്കെ പാര്‍ട്ടി നേരിട്ട് നടത്തുന്നുണ്ട്. അല്ലെങ്കിലും പാര്‍ട്ടി ഗ്രാമങ്ങളിലെ ജനങ്ങള്‍ക്ക് എന്ത് പരാതി! എന്ത് സങ്കടങ്ങള്‍ !.

പാര്‍ട്ടിഗ്രാമങ്ങള്‍ കുട്ടിച്ചോര്‍ ആക്കാനുള്ള മുഖ്യന്റെ അടവ്‌ നയം മാത്രമാണ് ഈ സമ്പര്‍ക്ക പരിപാടിയ്ക്ക് പിന്നില്‍ . കാവ് തീണ്ടിയാലും പാര്‍ടി ഗ്രാമങ്ങള്‍ തീണ്ടിയാലും ഉണ്ടാകാവുന്ന ദുരന്തങ്ങള്‍ ഒരേപോലെ ഭീകരമാണ് . സൂക്ഷിച്ചാല്‍ ദുഖിക്കേണ്ട!. അത്ര തന്നെ !

അനുഭവങ്ങളില്‍ നിന്നും ഒരു കോപ്പും പഠിക്കാതെ വീണ്ടും വീണ്ടും മണ്ടത്തരങ്ങള്‍ കാട്ടാനുള്ള അവകാശം പാര്‍ട്ടിയ്ക്ക് മാത്രമേ ഉള്ളൂ. മുഖ്യമന്ത്രിയായാലും ശരി ഹൈകോടതി ജഡ്ജി ആയാലും ശരി , പാര്‍ട്ടിക്കോ പാര്‍ട്ടി നേതാക്കള്‍ക്കോ എതിരായ കളികള്‍ തല്‍ക്കാലം കോള്‍ഡ്‌ സ്റ്റോരെജില്‍ വെയ്ക്കുന്നതായിരിക്കും നല്ലത് . മന്ത്രിയ്ക്കും ജട്ജിയ്ക്കും നല്ലബുദ്ധി തോന്നണെ എന്ന് മാത്രമാണ് പാര്‍ട്ടിയുടെ പ്രാര്‍ത്ഥന. മറിച്ചാണെങ്കില്‍, ദൈവ കോപത്തിന്റെ അന്‍പത്തൊന്നു തലങ്ങള്‍ കമ്പനി കാണാനിരിക്കുന്നതെ ഉള്ളൂ.

വേദനയുടെ പാരമ്യത്തില്‍ നിന്നും മഹത്വത്തിലെയ്ക്ക് ..

2013-03-28T11:56:00.000-07:00

" സ്നേഹിതന് വേണ്ടി ജീവന്‍ അര്‍പ്പിക്കുന്നതിനേക്കാള്‍ വലിയ സ്നേഹമില്ല "

(യോഹ : 15 .13)

ഒരേ തരംഗ ദൈര്‍ഘ്യങ്ങള്‍ കാത്തുസൂക്ഷിക്കുന്നവര്‍ക്കിടയിലാണ് ഗാഡമായ സുഹൃത്ത് ബന്ധങ്ങള്‍ രൂപപ്പെടാറുള്ളത് എന്നൊരു തിയറി കേട്ടിട്ടുണ്ട്. പലപ്പോഴും തോന്നിയിട്ടുണ്ട്, എത്രത്തോളം വാസ്തവമാണിതെന്ന്. അല്ലെങ്കില്‍പ്പിന്നെ എന്തുകൊണ്ടാണ് നൂറുകണക്കിന് സൌഹൃദങ്ങള്‍ ഓഫ്‌ലൈന്‍ ആയും, അതിന്റെ പതിന്മടങ്ങ് ഓണ്‍ലൈന്‍ ആയും കാത്തുസൂക്ഷിക്കുന്ന ഈ സൈബര്‍ കാലത്തും നമ്മുടെ ഹൃദയത്തെ സ്പര്‍ശിക്കുന്ന ബന്ധങ്ങള്‍ വിരലില്‍ എണ്ണാവുന്നത് മാത്രമായിത്തീരുന്നത്?. അതെ, ബന്ധങ്ങള്‍ ഹൃദയത്തോട് ഒട്ടിനില്‍ക്കണം എങ്കില്‍ അങ്ങനെ ഒട്ടിച്ചേരുന്ന ഹൃദയങ്ങള്‍ തമ്മില്‍ പരസ്പരപൂരകങ്ങള്‍ ആയ, അതുമല്ലെങ്കില്‍ അനന്യം എന്ന് തോന്നാവുന്ന എന്തോ ഒന്ന് തീര്‍ച്ചയായും ഉണ്ടാകണം. അവിടെ മാത്രമേ പരസ്പരം മനസിലാക്കല്‍ സംഭവിക്കുന്നുള്ളൂ.

ഇത്തരത്തിലുള്ള സൌഹൃദങ്ങളും ബന്ധങ്ങളുമൊക്കെയാണ് നിര്‍ണായകമായ ഘട്ടങ്ങളില്‍ ജീവിതത്തില്‍ വെളിച്ചമായിത്തീരുക. സ്നേഹിതര്‍ക്കു വേണ്ടി സ്വയം ബലിയായിത്തീര്‍ന്ന ജഗത്‌ ഗുരുവിന്റെ കുരിശിന്റെ വഴിയിലൂടെ സഞ്ചരിക്കുമ്പോള്‍ ഞാന്‍ തിരിച്ചറിയുന്നതിതാണ് - എന്നെ മറ്റാരെക്കാളും മനസിലാക്കാന്‍ അവനേ കഴിയൂ.. ജീവിതത്തിന്റെ എല്ലാ മേഖലകളിലും ഒന്നുമില്ലായ്മയുറെയും ദു:ഖങ്ങളുടെയും പാരമ്യമറിഞ്ഞവന് എന്റെ കുഞ്ഞു കുഞ്ഞു വേദനകളും ഇത്തിരിയില്ലാത്ത ദു:ഖങ്ങളും മനസിലാക്കാന്‍ എന്താണ് തടസ്സമാകുക!.

   സത്യത്തില്‍ എന്താണ് അവന്റെ ജീവിതം മുഴുവന്‍?.. വേദനകള്‍ അല്ലാതെ?.. ഈച്ചയും കൊതുകും ആര്‍ക്കുന്ന ഒരു കന്നുകാലിക്കൂട്ടില്‍ ആണ് അവന്‍ പിറന്നു വീണത്‌. ജനനം തന്നെ മരണത്തിന്റെ വാള്‍മുനയില്‍, ജീവനെ പ്രതി അന്യനാട്ടിലേയ്ക്ക് പലായനം, അന്യ നാട്ടില്‍ പ്രവാസിയായുള്ള ജീവിതം, 30 വര്‍ഷത്തെ അജ്ഞാത വാസം, കുരുവികള്‍ക്ക് കൂടുകളും കുരുനരികള്‍ക്ക് മാളങ്ങളും ഉള്ള ഈ ഭൂമിയില്‍ സ്വന്തം എന്ന് പറയാന്‍ ഒരു കൂര പോലും ഇല്ലായിരുന്നു അവന്. അന്തിയുറങ്ങാന്‍ വഞ്ചിയുടെ അമരങ്ങള്‍. ചങ്ങാതികളായി മുഖ്യധാരയില്‍ നിന്നും അകറ്റി നിര്‍ത്തപ്പെട്ട കുറെ ചുങ്കക്കാരും മുക്കുവരും, കല്ലെറിയുകയും ഒറ്റപ്പെടുത്തുകയും ചെയ്യുന്ന സ്വദേശവാസികള്‍.
അത്ഭുതങ്ങളുടെ നിറപ്പകിട്ടുകളും കുട്ടകള്‍ നിറയുന്ന അപ്പങ്ങളും പ്രതീക്ഷിച്ച് അവന്റെ പിന്നാലെ വഞ്ചിയേറി പുറപ്പെടുന്ന ബഹുഭൂരിപക്ഷത്തില്‍ നിന്നും ഒരു കല്ലേറ് ദൂരം പിന്നിടുമ്പോള്‍, രക്തം ഇറ്റുവീഴുന്ന, ഹൃദയ നൊമ്പരങ്ങളുടെ ഗെത്സമെനില്‍ അവനും ഒറ്റപ്പെടുകയാണ്. ഏറ്റം പ്രിയപ്പെട്ടവര്‍ക്ക് പോലും അവനെ മനസിലാക്കാനാവുന്നില്ല. ഏകാന്തതയുടെ തുരുത്തുകളില്‍ ഒറ്റപ്പെടുമ്പോള്‍ ഞാന്‍ ഓര്‍മ്മിക്കാറുണ്ട്, അവനോളം ഏകാന്തതയും ഒറ്റപ്പെടലും അനുഭവിച്ചവര്‍ വേറെ ആരുണ്ട്‌?. 30 വെള്ളിക്കാശിനു ഒറ്റുകൊടുക്കുകയും തള്ളിപ്പറയുകയും ചെയ്യുന്ന പ്രിയസ്നേഹിതര്‍, നിഷേധിക്കപ്പെടുന്ന നീതി,   മരണം ഏറ്റവും ദയനീയമാം വിധം ആകാശത്തിനും ഭൂമിയ്ക്കും മദ്ധ്യേ ഒരു മരക്കുരിശില്‍ തൂങ്ങി - അതെ, അവന്‍ വേദനകളുടെ തികവാര്‍ന്ന മനുഷ്യന്‍.
   ഒരു കൂട്ടം പാവപ്പെട്ട മനുഷ്യരോടു അലിവിന്റെ, കരുണയുടെ സുവിശേഷം പ്രസംഗിച്ച നസ്രായന്‍ തച്ചനെ എങ്ങനെയാണ് ഇഷ്ടപ്പെടാതിരിക്കാനാവുക?. 'നിങ്ങളില്‍ പാപമില്ലാത്തവന്‍ ആദ്യം കല്ലെറിയട്ടെ' എന്ന വചനങ്ങള്‍ക്ക്‌ മുന്നില്‍ കാല്‍ചുവട്ടിലെ മണ്ണ് നഷ്ടപ്പെട്ടു തലതാഴ്ത്തി മടങ്ങിയ ഒരു സമൂഹത്തിനു മുന്നില്‍ 'എന്നില്‍ കുറ്റം ആരോപിക്കാന്‍ നിങ്ങളില്‍ ആര്‍ക്കു കഴിയും?' എന്ന് ചങ്കൂറ്റത്തോടെ വെല്ലുവിളിക്കുന്ന ആ യുവാവിനെ എങ്ങനെയാണ് ആരാധനയോടെയും അസൂയയോടെയുമല്ലാതെ നോക്കിക്കാണാനാവുക?..
        പടവെട്ടിയും അങ്കം ജയിച്ചും ലോകം കീഴടക്കിക്കഴിഞ്ഞ ചക്രവര്‍ത്തിമാരെയും യുധവീരന്മാരെയുമൊക്കെ നിഷ്പ്രഭരാക്കി ഈ തച്ചന്‍ ചരിത്രത്തെ തന്നെ രണ്ടായി കീറിമുറിക്കുമ്പോള്‍ തോറ്റു കൊടുക്കുന്നതിലും ഒരു വിജയം ഉണ്ടെന്ന് ലോകം അല്ഭുതത്തോടെ മനസിലാക്കുകയാണ്. വില്ലന്മാരെ പപ്പടം പോലെ പൊടിച്ച്‌ , കോട്ടകൊത്തളങ്ങള്‍ അഗ്നിക്കിരയാക്കി സ്ലോ മോഷനില്‍ നടന്നു വരുന്ന പരമ്പരാഗത ഹീറോകളില്‍ നിന്നും അവനെ വ്യത്യസ്തനാക്കുന്നത് സ്വയം തോറ്റുകൊടുക്കുന്ന, ഭൂമിയെക്കാളും താഴ്ന്നു കൊടുക്കുന്ന, ഇടത്തെ കരണത്ത് അടിച്ചവര്‍ക്ക് വലതു കാരണം കൂടി കാണിച്ചുകൊടുക്കുന്ന ഒരു പുത്തന്‍ ജെനുസ്‌ ഹീറോയിസമാണ്.
   പറഞ്ഞതൊന്നും പാഴ്വാക്കാകാതെ സ്വജീവിതത്തിലൂടെ നിറവേറ്റിയവനാണ് അവന്‍. പുതുതലമുറ ക്രിസ്ത്യാനികള്‍ക്ക് അന്യമാകുന്നതും ഈ ഗുണം തന്നെയാണ്. ഒരു ക്രിസ്ത്യാനിയാകുക എന്നത് അത്ര എളുപ്പമല്ല എന്ന സത്യം ഒരു നാമമാത്ര ക്രിസ്ത്യാനിയായ ഞാന്‍ ഹൃദയ വേദനയോടെ തിരിച്ചറിയുകയാണ്. ഈ പീഡാനുഭവ വാരത്തില്‍ അവന്‍ എന്നെ ഓര്‍മ്മിപ്പിക്കുന്നതും ഇത് തന്നെയാണ്. പറയുന്നതൊന്നും ചേങ്ങില പോലെ ചിലമ്പുന്ന പാഴ്വാക്കുകള്‍ ആകാതിരിക്കട്ടെ, ദൈവമെ.
              വിശുദ്ധവാരം ഓര്‍മ്മിപ്പിക്കുന്നതിതാണ്, ഈസ്റ്ററിന്റെ മഹിമയിലെയ്ക്ക് പ്രവേശിക്കും മുന്നേ, സ്വയം നുറുങ്ങി ഇല്ലാതായി മറ്റുള്ളവര്‍ക്ക് ജീവനായി തീരുന്ന ഞെരുക്കത്തിന്റെയും വേദനയുടെയും ഒരു ദു:ഖവെള്ളി കൂടിയേ തീരൂ. ഉദാഹരണവും അവന്‍ തന്നെ പറഞ്ഞുതന്നിട്ടുണ്ടല്ലോ - ' ഗോതമ്പ് മണി നിലത്ത് വീണ് അഴിയുന്നുവെങ്കില്‍ അത് നൂറും അറുപതും മേനി ഫലം തരും. ഇല്ലങ്കിലോ അത് അതുപടി തന്നെയിരിക്കും '. സ്വയം നുറുങ്ങി ലോകത്തിനു ജീവനായി തീര്ന്നവന്റെ പീഡാനുഭവ - ഉത്ഥാന സ്മരണകളെ ധ്യാനിക്കുന്ന എല്ലാവര്‍ക്കും അനുഗ്രഹപൂര്‍ണമായ ഒരു വിശുദ്ധ വാരവും സന്തോഷകരമായ ഒരു ഉയിര്‍പ്പ് തിരുന്നാളും ആശംസിക്കുന്നു...

മുനയൊടിയുന്ന മുള്ളുകള്‍ (സീസണ്‍ - 3)

2013-02-23T03:57:00.001-08:00

ഇല വന്നു മുള്ളില്‍ വീണാലും മുള്ള് വന്നു ഇലയില്‍ വീണാലും മുനയൊടിഞ്ഞു പോകുന്നത് മുള്ളിന്റെയാണ് എന്ന ആ തിരിച്ചറിവ് ഇപ്പോള്‍ കുര്യന്‍ സാറിന് ഉണ്ടായിക്കാണും. തിരിച്ചറിവുകളുടെ പാരമ്യത്തില്‍ താന്‍ ഒറ്റയ്ക്കല്ല, തുല്ല്യ ദു:ഖിതരായുള്ള മറ്റനേകം മുനയൊടിഞ്ഞ മുള്ളുകള്‍ സ്വന്തം പാളയത്തില്‍ തന്നെ ചിയേഴ്സ് പറയാന്‍ കൂടെ ഉണ്ടാകും എന്നതാവാം അദെഹത്തിനു അല്പം എങ്കിലും ആശ്വാസം പകരുന്ന വസ്തുത. മുന്‍പൊരിക്കല്‍ ഐസ്ക്രീം കഴിച്ചു വയറിളക്കം പിടിപെട്ടവരും വീമാന യാത്രയില്‍ ക്രാഷ് ലാന്‍ഡിംഗ് നടത്തി പക്ഷാഘാതം പിടിപെട്ടവരും ഒക്കെ ടി പറഞ്ഞ 'ഇല-മുള്ള്'പരിപ്രേക്ഷ്യത്തിന്റെ ജീവിക്കുന്ന രക്തസാക്ഷികള്‍ തന്നെയാണ് എന്നാണ് എനിക്ക് തോന്നുന്നത്.

മാനവികതയുടെ പുരോഗതി അതിന്റെ മൂര്‍ധന്യത്തില്‍ എത്തിയിട്ടുണ്ട് എന്നും സ്തീ - പുരുഷ സമത്വം സിന്ധി പശുവിനെ പോലെ പുല്ലുതിന്നു ആര്‍മാദിച്ചു നടക്കുന്നു എന്നുമൊക്കെ ഓണ്‍ലൈന്‍ ബുദ്ധിജീവികള്‍ പറയാറുണ്ട് എങ്കിലും വസ്തുതകള്‍ യാഥാര്‍ത്ഥ്യത്തില്‍ നിന്നും രണ്ടു കല്ലേറ് ദൂരം അകലെയാണ് എന്ന് വേണം കരുതാന്‍. അല്ലെങ്കില്‍ തന്നെ എന്താണ് ഇവിടെ ഇപ്പോള്‍ സംഭവിക്കുക?.. ജനറേഷന്‍ വ്യത്യാസങ്ങള്‍ പരണത്ത് വെച്ച് ഒരു സമൂഹം മുഴുവന്‍ സ്ത്രീ സ്വാതന്ത്ര്യത്തിനു വേണ്ടി അലറി വിളിക്കുന്നു. സ്ത്രീ സ്വാതന്ത്ര്യത്തിനു മേല്‍ തരി മണല്‍ എങ്കിലും വീഴുന്നുണ്ടോ എന്നറിയാന്‍ ഹിഡന്‍ കാമറകളും മറ്റു ആധുനിക സെറ്റ്‌ അപ്പുകളുമായി പാര്‍ട്ടി ഓഫീസുകള്‍ പോലും കണ്ണില്‍ എണ്ണയൊഴിച്ച് കാത്തിരിക്കുന്നു. അത്തരത്തില്‍ സ്ത്രീ സ്വാതന്ത്രത്തിനു മേല്‍ മണല്‍ ഇറക്കാന്‍ ശ്രമിച്ച് കാമറയ്ക്ക് മുന്നില്‍ പെട്ടുപോയ മണല്‍ മാഫിയകളെ കഴുവിലെറ്റാനും കല്ലെറിഞ്ഞു കൊല്ലുവാനുമായി സോഷ്യല്‍ - മുഖ്യധാര - മുഖ്യമല്ലാത്ത ധാര - മാധ്യമങ്ങള്‍ മത്സരിക്കുന്നു. സ്ത്രീ സ്വാതന്ത്ര ധ്വംസനങ്ങളോ അവകാശ ലംഘനങ്ങളോ മറ്റോ ഈ വികസിത സമൂഹത്തില്‍ അരങ്ങേറാറുണ്ടോ, ഉണ്ടെങ്കില്‍ അതിന്റെ വിശദാംശങ്ങള്‍ എങ്ങനോക്കെയാണ് എന്നൊക്കെ ഓണ്‍ ലൈന്‍ വീഡിയോ സ്ട്രീമിംഗ് സൈറ്റുകളില്‍ റയിഡ് നടത്തി കണ്ടെത്തുന്ന പ്രായഭേദം ഇല്ലാത്ത ഒരു സദാചാര സേന നമുക്കുണ്ടല്ലോ.

'എന്നെ ഈ $##%^&$ മോന്‍ പീഡിപ്പിക്കാന്‍ ശ്രമിച്ചേ ' എന്ന് ഏതെന്കിലും ഒരു പെണ്‍കിടാവ് ഉറക്കത്തില്‍ എങ്കിലും മൊഴിഞ്ഞു പോയാല്‍ മതി. പോരെ പൂരം ! ഓണ്‍ ലൈന്‍, ഓഫ്‌ ലൈന്‍ മീഡിയകളില്‍ ടി മോന്‍മാരെ മുക്കാലിയില്‍ കെട്ടി അടിക്കാനും ചൂടുവെള്ളത്തില്‍ മുക്കിപ്പിടിക്കാനും കോളം കത്തിക്കാനും മേല്പറഞ്ഞ സദാചാര സേന മത്സരിക്കാറുമുണ്ട്‌. പീഡന കൃത്യങ്ങളുടെ വിശദാംശങ്ങള്‍ ഒട്ടും നഷ്ടമാവാതിരിക്കാന്‍ അന്തിപ്പത്രങ്ങള്‍ (ഓണ്‍ലൈന്‍ & ഓഫ്‌ ലൈന്‍ ) ഒന്നുവിടാതെ വായിക്കാറുമുണ്ട് . 'ഞങ്ങളെപ്പോലെ വിശുദ്ധ ജന്മങ്ങളും ഹരിച്ചന്ദ്രന്മാരും മാത്രം വാഴുന്ന ഈ പുരുഷലോകത്തിനു പേര് ദോഷം ഉണ്ടാക്കാന്‍ നീയൊക്കെ ഏതു ചൊവ്വ ഗ്രഹത്തില്‍ നിന്നും അവതരിച്ചു ' എന്ന് ധാര്‍മിക രോഷത്തിന്റെ ഉപ്പും മുളകും ചാലിച്ച് സോഷ്യല്‍ മീഡിയയില്‍ നാമൊക്കെ സദാചാര പ്രസംഗങ്ങളും പൂരപ്പാട്ടുകളും നടത്തുമ്പോള്‍ ഇന്നലെ വൈകിട്ട് കൂടി ഇതുപോലൊരു പ്രഭാഷണവും കാഴ്ച വെച്ച് ഉറങ്ങാന്‍ പോയവനാണ് ഇപ്പൊ കുരിശില്‍ മരണം കാത്തു കിടക്കുന്നത് എന്ന സത്യം മനസ്സില്‍ സൂക്ഷിക്കുന്നത് എല്ലാ സേനാംഗങ്ങള്‍ക്കും ദഹനത്തിന് നല്ലതായിരിക്കും.

നമ്മുടെയൊക്കെ മുന്നില്‍ മാധ്യമങ്ങള്‍ പുരുഷാധിപത്യത്തിന്റെ ബലിയാടുകളായി കാഴ്ച വെയ്ക്കുന്ന പല ബിംബങ്ങളും പ്രതിഫലിപ്പിക്കുന്നത് മിക്കവാറും ബിംബങ്ങള്‍ ചുമക്കുന്നവരുടെ മറ്റുപല താല്പര്യങ്ങളുമാകാം എന്നൊരു സാധ്യത നാമാരും കാര്യമാകാറില്ല. നീലക്കുറിഞ്ഞി പൂക്കുന്ന പോലെ സീസണല്‍ ആഘോഷങ്ങള്‍ മാത്രമായി ഇത്തരം പെരുന്നാളുകളും ഉത്സവങ്ങളും അരങ്ങുതകര്‍ക്കുമ്പോള്‍ നേര്‍ച്ച പെട്ടികളില്‍ കുന്നുകൂടുന്ന കാഴ്ച ദ്രവ്യങ്ങളുടെ കണക്ക്‌ നാമാരും അറിയാറില്ല. ഇത്തരം മാധ്യമങ്ങള്‍ സൃഷ്ടിക്കുന്ന ബിംബങ്ങളുടെ പൊയ്മുഖങ്ങള്‍ക്ക് മുന്നില്‍ ചരട് വലിക്കുന്നവരെയും പലപ്പോഴും നാം തിരിച്ചറിയാതെ പോകുന്നു. വസ്തുതകളുടെ ആഴങ്ങളില്‍ ഇറങ്ങിചെല്ലാതെ, കാള അവിഹിത ഗര്‍ഭം ധരിച്ചു എന്ന് കേള്‍ക്കുമ്പോഴേ, ഉത്തരവാദികളെ കഴുവിലേറ്റാന്‍ കയറു പിരിച്ച് കാത്തിരിക്കുന്ന വിഡ്ഢികള്‍ ആയിതീരാറുണ്ട് നമ്മള്‍ പലപ്പോഴും.

നാണം, മാനം, ചാരിത്രം, അഭിമാനം ഇവയൊക്കെ പെണ്ണിനും ആണിനും ഒരുപോലെ ബാധകം ആണ്. അത് അങ്ങനെ അല്ല എന്നു വിളിച്ചു കൂവുന്നവര്‍ വര്‍ത്തമാന ലോകത്തിന്റെ ഭിത്തിയില്‍ എഴുതി വെച്ച ഏറ്റവും മോശം അശ്ലീലങ്ങളില്‍ ഒന്നാണ് എന്ന് എനിക്ക് തോന്നുന്നു. ഇത്തരത്തില്‍ ബോധപൂര്‍വം ക്രിയേറ്റ്‌ ചെയ്യപ്പെട്ട അനേകം ക്ലീഷേകള്‍ ഉണ്ട് ഇന്ന് നമുക്കിടയില്‍. അതുകൊണ്ടാണ് പൊതുനിരത്തില്‍ ഗുണ്ടായിസം കാട്ടുന്നത് പുരുഷന്മാര്‍ ആണ് എങ്കില്‍ അവര്‍ പോലിസിന്റെ കൂമ്പിനിടിയും പുലയാട്ടും ഏറ്റുവാങ്ങുന്നതും ഇതേ കൃത്യം ചെയ്യുന്ന സ്ത്രീകളെ പട്ടും വളയും പൂമാലയും കാത്തിരിക്കുന്നതും. ഇതുകൊണ്ടാണ് മദ്യപാനവും പുകവലിയുമൊക്കെ പുരുഷന്മാര്‍ക്ക് വെറും ദു:ശ്ശീലവും സ്ത്രീകള്‍ക്ക്‌ ഇവ സമത്വത്തിന്റെ പറുദീസയിലെയ്ക്കുള്ള ചവിട്ടുപടികളും ഒക്കെയായി മീഡിയകളില്‍ ചിത്രീകരിക്കപ്പെടുന്നത്. ഇതുകൊണ്ടാണ് ലോകത്തിന്റെ ഇങ്ങേ കോണില്‍ മാറ് മറയ്ക്കാനുള്ള അവകാശത്തിനു വേണ്ടി ഒരുകൂട്ടം സ്ത്രീകള്‍ സമരം നയിച്ചപ്പോള്‍ ഇതേ ലോകത്തില്‍ മറ്റൊരിടത്ത് 'നോ ബ്രാ' മൂവ്മെന്‍റ് അരങ്ങു തകര്‍ത്തത്.

ഇത്തരം വക്രീകരിക്കപ്പെട്ട കാഴ്ച്ചപ്പാടുകള്‍ക്കിടയില്‍ സ്ത്രീ ലോകത്തെ പല സഹന പര്‍വ്വങ്ങളെയും നാം കാണാതെ പോകുന്നുണ്ട്. അഥവാ കണ്ടാലും നാളുകള്‍ക്കുള്ളില്‍ അവരെ മറവിയുടെ മാറാലയ്ക്ക് നാം വിട്ടു കൊടുക്കുകയാണ് പതിവ്‌. തുടര്‍ച്ചയായുള്ള ബ്രെയിന്‍ വാഷുകള്‍ക്കൊടുവില്‍ ഡല്‍ഹി പെണ്‍കുട്ടിയെയും സൌമ്യയെയും ഒക്കെ നാം മറന്നു പോകുന്നു. ചുവന്ന തെരുവുകളില്‍ വെന്തുരുകുന്ന സ്ത്രീജന്മങ്ങള്‍ നമ്മുടെ സ്ത്രീ വിമോച്ചകരുടെ ദു:സ്വപ്നങ്ങളില്‍ പോലും കടന്നു വരാത്തത് അതുകൊണ്ടാണ്.

മാങ്ങയുള്ള മാവുകള്‍ക്ക് നേരെ എറിയാനുള്ള ഒരു കല്ലുമാത്രമായി നമ്മുടെ നാട്ടില്‍ സ്ത്രീ പീഡനക്കേസുകള്‍ രൂപമെടുത്തത് എന്ന് മുതല്‍ക്കാണ്?

"സ്ത്രീയെ വെറും ഉപഭോഗ വസ്തുവോ ലൈംഗിക ഉപകരണമോ ഒക്കെ മാത്രമായി കണക്കിലെടുക്കുന്ന ഒരു സമൂഹത്തിലാണല്ലോ ദൈവമേ ഞങ്ങള്‍ ജീവിക്കുന്നത്" എന്ന് നെഞ്ചത്തലച്ച് നിലവിളിക്കുമ്പോള്‍ എന്തുകൊണ്ടാണ് ഇത്തരം ഒരു ചരക്ക്‌ സംസ്കാരം ഇവിടെ രൂപം കൊള്ളാന്‍ കാരണമായത്‌ എന്ന ചിന്ത ഇടയ്ക്കൊക്കെ നന്നായിരിക്കും. ഈ രോഗാതുരമായ സംസ്കാരം ബാക്കിനില്‍ക്കുന്നത് കൊണ്ടാണ് ഒരു ഷേവിംഗ് റെസരിന്റെ പരസ്യത്തില്‍ പോലും മേല്പറഞ്ഞ ബിംബങ്ങള്‍ അനിവാര്യം ആയിത്തീരുക. താല്‍ക്കാലിക ലാഭങ്ങള്‍ക്ക് വേണ്ടി തന്നിലെ വ്യക്തിത്വത്തെ വിസ്മരിച് സൊ കോള്‍ഡ്‌ 'ചരക്ക്‌ ' മാത്രമായി ന്യൂ ജനറേഷന്‍ പെണ്‍കൊടികള്‍ ട്രാന്‍സ്മ്യൂട്ടെഷന്‍ നടത്തുമ്പോള്‍ രോഗാതുരമാകുന്ന സമൂഹത്തെ പറ്റി ആരും ചിന്തിക്കാറില്ല. വീണ്ടും ഒരു തിരിച്ചു പോക്കിന് ഏറെ വൈകി എന്നറിയുബോഴെയ്ക്കും കാലത്തിന്റെ ഒഴുക്ക് ചാലിലൂടെ വെള്ളം ഏറെ ഒഴുകിക്കാനും.
മനുഷ്യന്‍ ജീവിക്കുന്നതിന്റെ ആത്യന്തിക ലക്‌ഷ്യം തന്നെ ലൈഗീകതയാണ് എന്ന ന്യൂജനറേഷന്‍ ചിന്തകള്‍ അതിന്റെ പുത്തന്‍ ആഴങ്ങളും നാഴികക്കല്ലുകളും നാട്ടാന്‍ പറ്റിയ ചതുപ്പ് നിലങ്ങളും ഒക്കെ തേടി മുന്നോട്ടു പോകുമ്പോള്‍, കച്ചവടവല്ക്കരിക്കപ്പെട്ട സ്ത്രീത്വത്തെ പറ്റി വിലപിക്കാന്‍ ഇവിടുത്തെ സ്ത്രീ വിമോചന പ്രസ്ഥാനക്കാര്‍ക്ക് കരളുരപ്പ്‌ നഷ്ടപ്പെട്ടിരിക്കും. അന്ന് 'സ്ത്രീ വിമോചനം' എന്ന വാക്ക്‌ ഒരു മുട്ടന്‍ അശ്ലീലപദമായി രൂപം കൊണ്ടു എങ്കില്‍ പോലും ഒട്ടും അത്ഭുതപ്പെടെണ്ടതില്ല. കാവ്യ നീതി എന്നൊക്കെ പറയുന്ന സെറ്റ്‌ അപ്പിന്റെ ഭാഗം ആയി അതിനെ കരുതുന്നതായിരിക്കും നന്ന് .

ആഘോഷമാകുന്ന വേദനകള്‍..

2012-12-30T10:30:00.001-08:00

ജീവിക്കാനുള്ള മോഹം അവസാന ശ്വാസം വരെ പങ്കുവെച്ച ആ പെണ്‍കുട്ടി നിത്യതയുടെ തീരങ്ങളിലെയ്ക്ക് യാത്രയായിരിക്കുന്നു. നഷ്ടങ്ങളുടെ കണക്കുകള്‍ കൂട്ടിയും കിഴിച്ചും നാട്ടിലെ മാനഭംഗങ്ങളുടെയും സ്ത്രീ പീടനങ്ങളുടെയും സ്ഥിതിവിവരക്കണക്കുകള്‍ താരതമ്യപ്പെടുത്തിയും ഇനിയും ഏറെ നാള്‍ മീടിയകളില്‍ ആഘോഷങ്ങള്‍ നീണ്ടു നിന്നേക്കാം. കാമവെറിയന്മാരെ കഴുവിലേറ്റാനുള്ള മുറവിളികള്‍ക്ക് നാളെ ഒരു പക്ഷെ ശക്തി കുറഞ്ഞേക്കാം. ചിതറുന്ന നോട്ടുകെട്ടുകളുടെ മുകളിലൂടെ കറുത്ത കോട്ടിട്ട വവ്വാലുകള്‍ പറന്നു വീഴുമ്പോള്‍ നിയമവ്യവസ്ഥയുടെ ലൂപ്‌ ഹോളുകളിലൂടെ ആ നികൃഷ്ട ജീവികളും രക്ഷപെട്ടെക്കാം. നിരത്തുകള്‍ നിറയുന്ന പ്രക്ഷോഭങ്ങള്‍ക്ക് അരങ്ങ് ഒഴിയുമ്പോള്‍ ഇന്നത്തെ ക്ഷോഭിക്കുന്ന യുവത്വം വീണ്ടും യൂട്യൂബില്‍ വസന്തമായി വിരിയുന്ന മായക്കാഴ്ച്ചകളിലെയ്ക്കും സണ്ണി ലിയോണിന്റെ സുവിശേഷങ്ങളിലെയ്ക്കും മടങ്ങും. ഇനിയും, സ്ത്രീവിമോചനത്തിന്റെ ന്യൂ ജനറേഷന്‍ വീഡിയോകള്‍ 3GP, MP4 ഫോര്‍മാറ്റുകളില്‍ മൊബൈല്‍ ഫോണ്‍, ടാബ്ലെറ്റ്‌ ഇത്യാതികളിലൂടെ ചിറകടിച്ചു പറക്കും.. അപ്പോള്‍, ആരും അനുസ്മരിക്കാതെ പോയ ആ പോലീസുകാരന്റെ ആത്മാവ് ഒരു പുച്ഛച്ചിരിയോടെ പറയും .. "എന്തിനോ വേണ്ടി തിളച്ച സാമ്പാറുകള്‍.... കഷ്ടം.. തണുത്തു പോയല്ലോ.."

ഇപ്പോഴും ചര്‍ച്ചാ വേദികള്‍ സജീവമാണ്.. ബുദ്ധിജീവികളും.. അവര്‍ ചര്‍ച്ച ചെയ്യുന്നു - ഫ്യൂഡല്‍ പുരുഷാധിപത്യ വാഴ്ചയുടെ അടിവേരു പിഴുതെടുക്കെണ്ടതിന്റെ ആവശ്യകതയെ കുറിച്ച്.. ഇനിയും പൂവണിയാത്ത ഫെമിനിസ്റ്റ്‌വസന്തം പൊട്ടിവിടരേണ്ട സമയം അതിക്രമിച്ചത്തിന്റെ നഷ്ട ഭാഗ്യങ്ങളെക്കുറിച്ച്.. പീഡനവീരന്മാരെ തൂക്കിക്കൊല്ലണോ കരണ്ടടിപ്പിച്ചു കൊല്ലണോ അതോ 'നിര്‍വീര്യ'രാക്കി തുറന്നു വിട്ടാല്‍ മതിയോ എന്നതിനെപ്പറ്റി.. നിയമത്തിന്റെ നൂലാമാലകള്‍ കൂടുതല്‍ സങ്കീര്‍ണ്ണം ആക്കുന്നതിനെപ്പറ്റി.. പീഡിപ്പിക്കാന്‍ മുട്ടുന്നവര്‍ക്കായി എല്ലാ സംസ്ഥാനങ്ങളിലും വേശ്യാലയങ്ങള്‍ സര്‍ക്കാര്‍ ചെലവില്‍ തുറന്നു പ്രവര്തിപ്പിക്കെണ്ടതിന്റെ അനിവാര്യതയെപ്പറ്റി.. തന്മൂലം സര്‍ക്കാരിന് ലഭ്യമായേക്കാവുന്ന കോടികളുടെ ലാഭക്കണക്കിനെപ്പറ്റി.. അങ്ങനെ ചര്‍ച്ചകള്‍ നടക്കുന്നു.. നടന്നുകൊണ്ടേയിരിക്കുന്നു.

മറ്റൊരു വശത്ത്, പുര കത്തുമ്പോള്‍ വാഴ വെട്ടുന്നവര്‍ തങ്ങളുടെ സ്ഥിരം കലാ പരിപാടികള്‍ ആരംഭിച്ചുകഴിഞ്ഞു. അവര്‍ക്കാവശ്യം താല്‍കാലികമായ രാഷ്ട്രീയനേട്ടങ്ങളും തെറിക്കുന്ന കുറെ കസേരകളുമാണ്. ഒരു പറ്റം കാമാസക്തരായ മനോരോഗികള്‍ ആ പെണ്‍കുട്ടിയെ പിച്ചിചീന്തിയത് രാജ്യം ഭരിക്കുന്ന മന്മോഹന്സിങ്ങിന്റെയും സോണിയ ഗാന്ധിയുടെയും പിടിപ്പുകേടാണ് എന്ന് പറയുന്നവരുടെ തലയില്‍ വര്‍ക്ക്‌ ചെയ്യുന്നത് ഇന്റലിന്റെ ഐ സെവെന്‍ പ്രോസസ്സര്‍ തന്നെയാണ് എന്നതിന് യാതൊരു സംശയവും വേണ്ട.

പൊതു സമൂഹത്തിന്റെ എല്ലാ വികാരങ്ങളെയും പുച്ഛത്തോടെ കാണുന്ന എലൈറ്റ്‌ ക്ലാസ്സ്‌ ജീവികളും വാചക മേളയില്‍ ഒട്ടും പിന്നില്‍ അല്ല. ഭൂരിപക്ഷാഭിപ്രായത്തെ എതിര്‍ത്ത് മാധ്യമ ശ്രദ്ധ പിടിച്ചുപറ്റുന്ന ചെപ്പടി വിദ്യ ഇന്ന് പോപുലര്‍ ആയി വരുന്നു. മീനച്ചിലാറില്‍ മുങ്ങാംകുഴിയിട്ടു പഠിച്ച താറാവുകളെ ആരും ഒഴുക്കിനെതിരെ നീന്താന്‍ ക്രാഷ് കോഴ്സ്‌ കൊടുക്കേണ്ടതില്ല. അവര്‍ക്കറിയെണ്ടത് ഇതാണോ ഉത്തരാധുനിക ഇന്ത്യന്‍ ചരിത്രത്തിലെ ആദ്യ ബലാത്സംഗം എന്നാണ്. മാത്രമല്ല, ഡല്‍ഹിയിലെ പെണ്‍കുട്ടി സമ്പന്നയും ഉന്നതകുലജാതയും ആയതുകൊണ്ടാണ് ഇപ്പോള്‍ ഈ പ്രതിഷേധങ്ങള്‍ ഒക്കെ ഉയരുന്നത് പോലും!!. കീഴ്ജാതിക്കാരിയോ ദരിദ്രയോ ആയിരുന്നു എങ്കില്‍ ഈ പ്രതിഷേധങ്ങള്‍ ഒന്നും സംഭവിക്കില്ല പോലും (ഇനി മുതല്‍ പ്രതിഷേധങ്ങള്‍ക്കും റിസര്‍വേഷന്‍ ഏര്‍പ്പെടുത്തേണ്ടി വരും എന്ന് സാരം. ക്രീമി ലെയറിനെ വേണമെങ്കില്‍ ഒഴിവാക്കാം). ഇനിയും മറ്റു ചില മാധ്യമങ്ങളുടെ വിഷലിപ്തമായ സൃഷ്ടികള്‍ വായിച്ചാല്‍ തോന്നുക ഇന്ത്യന്‍ ആര്‍മി എന്നത് മാനഭംഗ വീരന്മാരുടെ കൂട്ടമാണ് എന്നും, ഇവര്‍ മൂലം ഇന്ത്യയിലെ സ്ത്രീകള്‍ക്ക് വഴി നടന്നുകൂടാ എന്നൊക്കെയാണ്. ആദ്യം കഴുവില്‍ ഏറ്റെണ്ടത് ഈ ജവാന്മാരെ ആണെന്നും ഇവരുടെ ഭീകര കൃത്യങ്ങള്‍ക്ക് മുന്നില്‍ ടെല്ലിയിലെ കുറ്റവാളികള്‍ ചെയ്തത് ഒന്നുമല്ല എന്നും ഇവര്‍ പറയുന്നു. ഏറ്റവും കൌതുകകരം ആയ വസ്തുത ഇതേ മാധ്യമ സിങ്കങ്ങള്‍ തന്നെയാണ് മാസങ്ങള്‍ക്ക്‌ മുന്‍പ്‌ പാക്കിസ്ഥാനില്‍ മലാലയെ താലിബാന്‍ ഭീകരര്‍ ആക്രമിച്ച സംഭവം ആഗോള വിഷയം ആയതില്‍ അസഹിഷ്ണുത പ്രകടിപ്പിച്ചതും.

'ഡല്‍ഹിയിലെ പുരുഷന്മാര്‍ എല്ലാവരും പെണ്ണുപിടിയന്മാര്‍' ആണ് എന്ന് പറയുന്നത് പോലെ പരിഹാസ്യമാണ് ഇന്ത്യന്‍ ആര്‍മിയെ അടച്ച് ആക്ഷേപിച്ചുകൊണ്ടുള്ള ടിയാന്മാരുടെ വാദവും. ഇവരുടെ അടുപ്പുകളില്‍ വെന്തുകൊണ്ടിരിക്കുന്നത് ആരുടെ പരിപ്പ് ആണ് എന്നത് സാമാന്യ ബോധം ഉള്ളവര്‍ക്ക്‌ മനസിലാക്കാവുന്നതെ ഉള്ളൂ. എന്തായാലും, ഏതൊക്കെ പാത്രങ്ങള്‍ തിളച്ചു തൂവും, ഏതൊക്കെ പാത്രങ്ങള്‍ പൂച്ച തട്ടിമറിക്കും എന്നത് കാലം തെളിയിക്കേണ്ടിയിരിക്കുന്നു...

'ആര്‍ക്കുനേരെ' എന്ന് തീര്ച്ചയില്ലാത്ത പ്രതിഷേധങ്ങള്‍ അതിന്റെ പരിസമാപ്തിയിലെയ്ക്ക് നീങ്ങിത്തുടങ്ങുമ്പോള്‍ ഹൃദയത്തിലെവിടെയോ ഒരു നൊമ്പരം ബാക്കിയാവുകയാണ്..

"അവരെ തൂക്കിലേറ്റുവിന്‍.. " എന്ന് ഉയരുന്ന ആരവങ്ങളോടോപ്പം എന്റെ സ്വരം ഉയരാതതെന്തേ.. തൊണ്ടയില്‍ തടയുന്ന ശബ്ദ ശകലങ്ങള്‍.. രണ്ടായിരം വര്‍ഷങ്ങള്‍ക്കപ്പുറം നിന്ന് ഒരു സ്വരം മുഴങ്ങിക്കേള്‍ക്കുന്നു.. "നിങ്ങളില്‍ പാപം ഇല്ലാത്തവന്‍ ആദ്യം കല്ലെറിയട്ടെ.."

അപരനിലെയ്ക്ക് ഒരു വിരല്‍ നീട്ടുമ്പോള്‍ എന്നിലേയ്ക്ക് തിരിയുന്ന നാല് വിരലുകള്‍ ഞാന്‍ തിരിച്ചറിയുന്നു. സമൂഹത്തിനു മുന്നില്‍ സത്ഗുണസമ്പന്നനും ഹരിശ്ചന്ദ്രനും ആയി ചമയുന്ന എന്നിലെ സോഷ്യല്‍മീഡിയ ജീവി കയ്യിലെ കല്ലുകള്‍ താഴെയിട്ട് തല താഴ്ത്തി പിന്തിരിഞ്ഞു നടക്കുകയാണ്..

സച്ചിതാനന്ദന്റെ വരികള്‍ അറിയാതെ മനസ്സില്‍ ഓടിയെത്തുന്നു..

'ആറാം ദിവസമാണ് ദൈവത്തിന്

                                        കയ്യബദ്ധം പിണഞ്ഞത്
                                        പ്രണയമില്ലാതെ പ്രാപിക്കുകയും
                                      വിനയമില്ലാതെ പ്രാർത്ഥിക്കുകയും
                                      തിന്നാനല്ലാതെ കൊല്ലുകയും ചെയ്യുന്ന
                                       മൃഗത്തെ സൃഷ്ടിച്ച ആ ദിവസം'

സദ്‌ വാര്‍ത്തയുടെ ദേവദൂതര്‍..

2012-12-22T09:52:00.001-08:00

"...ഭയപ്പെടേണ്ട, ഇതാ സകല ജനത്തിനും വേണ്ടിയുള്ള സന്തോഷത്തിന്റെ വലിയ സദ്വാര്‍ത്ത നിങ്ങളെ ഞാന്‍ അറിയിക്കുന്നു... " (ലൂക്കാ 2:10)

വീണ്ടുമൊരു ക്രിസ്തുമസ് കൂടി വന്നണയുകയാണ്.. മഞ്ഞില്‍ കുളിച്ച ഡിസംബറും കരോള്‍ ഗാനങ്ങളുടെ ഈരടികളും കണ്ണുകള്‍ക്ക്‌ ഇമ്പമേകുന്ന നക്ഷത്ര വിളക്കുകളും എല്ലാം ദൈവപുത്രന്റെ പിറവിയുടെ മധുര സ്മരണകള്‍ വിളിച്ചോതുന്നു.. "ഞങ്ങളുടെ കാലത്തെ ക്രിസ്തുമസ് ആയിരുന്നു ക്രിസ്തുമസ്.. ഇപ്പൊളൊക്കെ എന്തോന്ന് ക്രിസ്തുമസ്!!' എന്ന ഡയലോഗ് അടിക്കാന്‍ മാത്രം പ്രായം ആയിട്ടില്ല എനിക്ക്. കഷ്ടിച്ച് 24 വര്‍ഷങ്ങള്‍ മാത്രമേ ഇതുവരെ ജീവിത വല്ലരിയില്‍ നിന്നും ഉണങ്ങിക്കൊഴിഞ്ഞു പോയിട്ടുള്ളൂ. എങ്കിലും ഞാന്‍ ആദ്യമായി സാക്ഷ്യം വഹിച്ച 1988ലെ ക്രിസ്തുമസില്‍ നിന്നും (ഓര്‍മ്മ ഇല്ലേലും.. ചുമ്മാ പറയാല്ലോ!!) ഈ 2012ലെ ക്രിസ്തുമസ് വരെ എത്തിനില്‍ക്കുമ്പോള്‍ ഒന്ന് മാത്രം അറിയാന്‍ സാധിക്കുന്നു.. എന്തൊക്കെയോ എനിക്ക് മിസ്സ്‌ ചെയ്യുന്നു.. അന്നത്തെ ക്രിസ്തുമസ് കാലങ്ങളില്‍ മനസ്സില്‍ നിറഞ്ഞിരുന്ന ഉല്ലാസവും സന്തോഷവുമൊക്കെ ഇന്ന് എവിടെയോ കൈമോശം വന്നപോലെ..

എന്തോ.. അന്നത്തെ നിഷ്കളങ്കതയും സന്മനസുമൊക്കെ കളഞ്ഞുപോയതാകാം ഈ വശപ്പിശകിനൊക്കെ കാരണം.. കാരണം സന്മനസ്‌ ഉള്ളവര്‍ക്ക്‌ മാത്രമാണല്ലോ സമാധാനം ഉറപ്പ്‌ തന്നിട്ടുള്ളത്..

എന്തിനെയും കണ്ണുകളില്‍ നിറയെ അത്ഭുതത്തോടെയും ആകാംക്ഷയോടെയും മാത്രം നോക്കിക്കണ്ടിരുന്ന ഒരു പിഞ്ചു പൈതലില്‍ നിന്നും ഞാന്‍ ഇന്ന് കുറെ ദൂരം പിന്നിട്ടിരിക്കുന്നു. കാപട്യവും വഞ്ചനയും മാത്സര്യവും നിറഞ്ഞ ലോകത്തില്‍, അതിന്റെ ഏറ്റവും ആക്ടീവായ ഒരു സിസ്റം പ്രോസ്സസ് മാത്രമായിരിക്കുന്നു ഇന്ന് ഞാന്‍. കൂടെ ഓടുന്നവനെ ടാക്കിള്‍ ചെയ്ത് വീഴ്ത്തി കൂടുതല്‍ വേഗത്തിലെയ്ക്കും കൂടുതല്‍ ഉയരത്തിലെയ്ക്കും കുതിയ്ക്കുമ്പോള്‍ കോര്‍പറേറ്റ്‌ ലോകത്തിന്റെ ആര്‍പ്പുവിളികള്‍ എനിയ്ക്ക്‌ കേള്‍ക്കാം.. "..ഇതാണ് ശരിയായ വഴി.. ധൈര്യമായി ഓടുക.. കൂടുതല്‍ നാഴികക്കല്ലുകള്‍ പിന്നിടുക.."

അപ്പോഴും പച്ച കെടാതെ മനസ്സിന്റെ അടിത്തട്ടുകളില്‍ എങ്ങോ പൂണ്ടു കിടക്കുന്ന കുറെ നല്ല ഓര്‍മ്മകള്‍ മന:സാക്ഷിയെ കുത്തിനോവിക്കുന്നുണ്ടാവും.. അസ്വസ്ഥമാകുന്ന സായഹ്ന്നങ്ങളില്‍ സാന്ത്വനം തേടി വേദപുസ്തകം തുറക്കുമ്പോള്‍ ബെതലഹെമിലെ ആ മാലാഖമാരുടെ ദേവ സംഗീതം കേള്‍ക്കാം...

"..അത്യുന്നതങ്ങളില്‍ ദൈവത്തിനു മഹത്വം.. ഭൂമിയില്‍ സന്മനസ്സ് ഉള്ളവര്‍ക്ക്‌ സമാധാനം.."

സമാധാനം അഷുര്‍ ചെയ്യപ്പെട്ടിരിക്കുന്ന ആ സന്മനസ്സുള്ളവരുടെ കൂട്ടത്തില്‍ നിന്നും ഞാന്‍ പുറം തിരിഞ്ഞോടിയത് എന്നാണ്?..

സമാധാനം തരുന്ന വാര്‍ത്തകള്‍ ഒന്നുമല്ല നാം ഇന്ന് കേട്ടുകൊണ്ടിരിക്കുന്നത്. റാമയിലെ വിലാപങ്ങള്‍ ഇന്നും ആവര്‍ത്തിക്കപ്പെടുന്നു. ഇന്നും ഒട്ടേറെ റെയ്ച്ചലുമാര്‍ തങ്ങളുടെ മക്കളെ ഓര്‍ത്ത്‌ കരയുന്നു.. ചുട്ടുകൊല്ലപ്പെട്ട പിഞ്ചു കുരുന്നുകളെ ഓര്‍ത്ത്‌.. നഗരമധ്യത്തില്‍ ചെന്നായ്ക്കളാല്‍ കടിച്ചു കീറപ്പെടുന്ന തന്റെ പെണ്മക്കളെ ഓര്‍ത്ത്‌.. ലഹരിക്കടിമപ്പെട്ടു ജീവിതം തുലയ്ക്കുന്ന യുവത്വത്തെ ഓര്‍ത്ത്‌.. ഇവിടെയൊക്കെ നാം വല്ലാതെ അസ്വസ്തരാകുന്നു.. അല്ലെങ്കില്‍ അസ്വസ്തരാകുന്നതുപോലെ അഭിനയിക്കുന്നു. ഹേറോദേസ്-മാരുടെ രക്തത്തിനായി നാം അലറിവിളിക്കുന്നു. ഫേസ്ബുക്കില്‍ പോസ്റ്റ്‌ ഇടുന്നു, ട്വീട്ടുന്നു, നിരത്തുകളില്‍ പന്തം കൊളുത്തി പ്രകടനങ്ങള്‍ നടത്തുന്നു. പ്രഹസ്വനങ്ങളായി തീരുന്ന ഇത്തരം പൊറാട്ട് നാടകങ്ങള്‍ക്കപ്പുറം നമ്മില്‍ എത്ര പേര്‍ ഈ അമ്മമാരുടെ കണ്ണീര്‍ തുടയ്ക്കാന്‍ മുന്നോട്ടിറങ്ങുന്നുണ്ട് ?

മാനം മുട്ടുന്ന ദൈവാലയ ഗോപുരങ്ങള്‍ക്കും രണ്ടു ലക്ഷം രൂപയുടെ പുല്‍ക്കൂടുകള്‍ക്കും ഇരുനൂറടി നീളമുള്ള നക്ഷത്ര ഭീമന്മാര്‍ക്കുമപ്പുറത്ത്‌, പാര്‍ശ്വവല്ക്കരിക്കപ്പെടുന്ന ഒരു സമൂഹം ആളുകള്‍ ഒട്ടേറെ വേദനകളും ആകുലതകളുമായി കഴിയുന്നുണ്ട്. ഒരു പക്ഷെ തീപുകയാത്ത അടുപ്പുകളെ ഓര്ത്താകാം അവരുടെ വേദന.. അല്ലെങ്കില്‍ തളര്‍ന്നു കിടക്കുന്ന പങ്കാളിയെ ഓര്‍ത്ത്‌.. അല്ലെങ്കില്‍ പ്രൊഫഷണല്‍ കോഴ്സ്‌-നു പഠിക്കുന്ന തങ്ങളുടെ മക്കളുടെ അടുത്ത ഗഡു ഫീസ്‌ കെട്ടുന്നതിനെയോര്ത്ത്.. അതുമല്ലെങ്കില്‍ കയറിക്കിടക്കാന്‍ ഒരു കൂര ഇല്ലാത്തതിനെ ഓര്‍ത്ത്‌.. 'ഭയപ്പെടേണ്ട' എന്നോതി ഇന്നും അവരുടെ ജീവിതത്തില്‍ സന്തോഷത്തിന്റെ സത്-വാര്‍ത്തയുമായി ദേവദൂതന്മാര്‍ പറന്നിറങ്ങാറുമുണ്ട്.. സ്വര്‍ഗത്തില്‍ നിന്നല്ല- ഈ ഭൂമിയിലെ മാലാഖമാര്‍!!..

സ്നേഹവും കരുണയും കാരുണ്യവും അത്ര കണ്ടു കൈമോശം വന്നിട്ടില്ല നമ്മുടെ സമൂഹത്തില്‍.. ആള്‍ക്കൂട്ടത്തില്‍ ഒറ്റപ്പെട്ടു നില്‍ക്കുന്ന കുറെ ആളുകള്‍.. തനിക്ക് കിട്ടുന്ന അപ്പത്തില്‍ പാതി അപരനാണ് എന്ന് വിശ്വസിക്കുന്നവര്‍.. കാരണം, അവര്‍ക്കറിയാം 'ദൈവരാജ്യം നിങ്ങളുടെ ഇടയില്‍ തന്നെ എന്ന് ദിവ്യനാഥന്‍ മൊഴിഞ്ഞതിന്റെ പൊരുള്‍.. അവര്‍ക്കറിയാം തങ്ങളുടെ ഗുരു പിറന്നുവീണത് ഈച്ചയും കൊതുകുമാര്‍ക്കുന്ന ഒരു കാലിതൊഴുത്തില്‍ ആണെന്ന്.. അവര്‍ക്കറിയാം പറവകള്‍ക്കാകാശവും കുരുനരികള്‍ക്ക് മാളങ്ങളും ഉള്ള ഈ ഭൂമിയില്‍, അമരങ്ങളില്‍ അന്തിയുറങ്ങിയ ഭൂലോക നാഥനെ.. മുക്കുവരുറെയും ആട്ടിടയന്മാരുടെയും ചങ്ങാതിയായ ആ നസ്രായന്‍ തച്ചനെ..

അവര്‍ക്കറിയാം രാജകൊട്ടാരങ്ങളില്‍ മിശിഹാ പിറക്കുന്നില്ല എന്ന ചരിത്ര സത്യം.. അതെ, സ്നേഹവും കരുണയും കാരുണ്യവും അത്ര കണ്ടു കൈമോശം വന്നിട്ടില്ല.. നാം കരുതുന്ന പോലെ..

സ്വന്തം ജീവിതത്തിലേയ്ക്ക് അല്ഭുതതിന്റെയും സന്തോഷത്തിന്റെയും സന്ദേശവുമായി പറന്നിറങ്ങുന്ന ഒരു സ്വര്‍ഗീയ ദൂതനായി കാത്തിരിക്കാതെ, നമുക്കും സദ്‌വാര്‍ത്തയുടെ മാലാഖമാര്‍ ആയിതീരാം.. സോദരുടെ-സഹജീവികളുടെ-ജീവിതങ്ങളില്‍ പ്രത്യാശയുടെ താരകങ്ങള്‍ തെളിക്കാം.. വിലപിക്കുന്ന റേച്ചല്‍-മാരുടെ കണ്ണീരൊപ്പാം..

എന്തെന്നാല്‍, ദൈവരാജ്യം നമ്മുടെ ഇടയില്‍ തന്നെ ആണല്ലോ..

എല്ലാ പ്രിയ സ്നേഹിതര്‍ക്കും വായനക്കാര്‍ക്കും ഹൃദയപൂര്‍വമായ ക്രിസ്തുമസ് മംഗളങ്ങള്‍ നേരുന്നു..

ചോരപ്പുഴകള്‍ വീണ്ടുമൊഴുകുമ്പോള്‍..

2012-11-24T02:31:00.000-08:00

ഇപ്പോള്‍ സോഷ്യല്‍മീഡിയയിലും സൈബര്‍ എഴുത്ത് പുരകളിലും നിറഞ്ഞു നില്‍ക്കുന്നത്‌ ഗാസയില്‍ കവിഞ്ഞൊഴുകുന്ന രക്തമാണ്. പാലസ്തീന്‍ ജനതയെ തിന്നൊടുക്കുന്ന ഇസ്രായേല്‍ കാപലികര്‍ക്കെതിരെ ആകുംവിധം പ്രധിഷേധം കോരിച്ചോരിയാന്‍ ടി എഴുത്തുകാര്‍ എല്ലാവരും തന്നെ അവശ്യം ശ്രദ്ധ കൊടുക്കുന്നുമുണ്ട്‌. സയണിസ്റ്റ്‌ കിരാതവാഴ്ചയുടെ നിത്യഹരിത പ്രതിനായകന്മാരായി ഇസ്രയേലിനെ അവരോധിച്ചുകൊണ്ടും സാമ്രാജ്യത അധിനിവേശത്തിന്റെ പുത്തന്‍മുഖമായുമൊക്കെ ഈ സംഭവങ്ങളെ വിലയിരുത്തുവാനാണ് എല്ലാ സൈബര്‍ സമാധാന സംസ്ഥാപകര്‍ക്കും താല്പര്യം എന്ന് തോന്നുന്നു. ഇസ്രായേല്‍ ഭീകരതകള്‍ക്കെതിരെ കേരളത്തിലെ നിരത്തുകളിലും മുക്കുകളിലും കവലകളിലുമൊക്കെ ഘോരഘോരം പ്രസംഗങ്ങള്‍ പൊടിപൊടിക്കുന്നു. "ഇന്ത്യ എന്തെ ഇടപെടാത്തെ?, ലോകരാഷ്ട്രങ്ങളുടെ അണ്ണാക്കില്‍ പിരിവെട്ടിയോ?" എന്നിങ്ങനെയുള്ള ഗര്‍ജനങ്ങള്‍ കേട്ടു തുടങ്ങിയിട്ടും ഉണ്ട്.

അക്രമങ്ങളും അധിനിവേശങ്ങളും രക്തചൊരിച്ചിലുകളും ആര് നടത്തിയാലും അത് അപലപിക്കപ്പെടെണ്ടതാണ്. പക്ഷെ, ചില രക്തചൊരിച്ചിലുകള്‍ മഹനീയവും മറ്റു ചിലത് വെറുക്കപ്പെടെണ്ടതുമാകുന്നതിലെ കാപട്യമാണ് എനിക്ക് ഇഷ്ടപ്പെടാതെ വരുന്നത്. ലോകം ഇന്നേ വരെ കണ്ടിട്ടില്ലാത്ത വിധമായ ക്രൂരതകള്‍ ആണ് പാലസ്തീനയില്‍ ഇപ്പോള്‍ നടമാടുന്നത് എന്നും മറ്റും പറഞ്ഞു പ്രതിക്ഷേധ പ്രഹസനങ്ങളും കീബോര്‍ഡ്‌ പ്രതികരണങ്ങളുമായി ഇസ്രെയെലിനെതിരെ യുദ്ധം കുറിക്കുന്നവരോടു എനിക്ക് ചോതിക്കാനുള്ള ചോദ്യം ഇതാണ് -

എവിടെയായിരുന്നു നിങ്ങള്‍ ഇക്കാലമത്രയും?.

വിശുദ്ധയുദ്ധത്തിന്റെ പേരുപറഞ്ഞു ലോകത്തിന്റെ നാനാഭാഗങ്ങളില്‍ ഇക്കാലമത്രയും രക്തപ്പുഴകള്‍ ഒഴുകിയപ്പോള്‍ നിങ്ങള്‍ എവിടായിരുന്നു??..

അമേരിക്കയില്‍ ഇരട്ടഗോപുരങ്ങള്‍ തകര്‍ന്നു നിരപരാധര്‍ കൊല്ലപ്പെട്ടപ്പോള്‍ നിങ്ങളുടെ ശബ്ദം കേള്‍ക്കാനില്ലായിരുന്നല്ലോ.. എന്തെ അന്ന് നിങ്ങള്‍ ഉറങ്ങുകയായിരുന്നോ?..

പാലസ്തീന്‍ പോലെ, നമ്മുടെ ഈ ഭൂലോകത്തിന്റെ തന്നെ ഭാഗങ്ങളായ ശ്രീലങ്ക, നിജീരിയ, സിറിയ, തായ്‌ലന്‍ഡ് തുടങ്ങിയ രാജ്യങ്ങളിലെ മനുഷ്യാവകാശ ലംഘനങ്ങളെകുറിച്ച് നിങ്ങള്‍ മൌനം അവലംബിക്കുന്നതെന്തേ?..

ഒന്നും വേണ്ട, നമ്മുടെ മാതൃരാജ്യത്ത്, ബോംബെയില്‍ ഒരു പറ്റം കശാപ്പുകാര്‍ സ്ത്രീകളും കുട്ടികളുമടക്കമുള്ള നമ്മുടെ സഹോദരരെ കാട്ടുപന്നിയെ വെടിവെച്ചിടുന്ന പോലെ ചന്നം ചിന്നം വെടിവെച്ചു വീഴ്ത്തിയപ്പോഴും നിങ്ങളുടെ ആദര്‍ശ ധീരതയും പ്രതികരണ ശൂരതയും എവിടെപ്പോയിരുന്നു??..

ഇന്ത്യയുടെ ഭരണ സിരാകേന്ദ്രത്തിനു നേരെ ശത്രുക്കള്‍ ഏറു പടക്കമെറിഞ്ഞു രസിച്ചപ്പോള്‍ പ്രതിഷേധസൂചകമായി ഒരാളുടെ പോലും ശബ്ദം ഉയര്‍ന്നു കേട്ടില്ലല്ലോ..

ഇക്കഴിഞ്ഞ ദിവസം ഒരു രാജ്യദ്രോഹിയെ തൂക്കിലേറ്റിയപ്പോള്‍, ബോംബെയില്‍ പൊലിഞ്ഞ നിഷ്കളങ്കരുടെ ജീവനുകളെക്കാലേറെ നിങ്ങളുടെ വേവലാതി, ഈ വധശിക്ഷ നടപ്പാക്കാന്‍ ഗവണ്മെന്‍റ് കാണിച്ച തിടുക്കത്തെക്കുറിച്ചായിരുന്നല്ലോ..

എന്തെ, ഇന്ത്യക്കാരന്റെ ചോരയ്ക്ക് ചുവപ്പല്ലേ കളര്‍?..

ഇതില്‍ നിന്നൊക്കെ വ്യക്തമാകുന്ന സത്യം ഇതാണ് - ഭൂമി കുതിര്‍ക്കുന്ന ചോരപ്പുഴകളെ ഓര്‍ത്ത്‌ അല്ല നിങ്ങളുടെ സങ്കടം. മറിച്ച്, ചോരയൊലിപ്പിച്ച് കിടക്കുന്നവന്റെ മതം - അതാണ്‌ ഇവിടത്തെ മനുഷ്യാവകാശങ്ങളുടെയും പ്രതിഷേധ റാലികളുടെയും സൊ കോള്‍ഡ്‌ അധിനിവേശങ്ങളുടെയും ഒക്കെ ആഴവും പരപ്പും തീവ്രതയുമൊക്കെ നിശ്ചയിക്കുക.. ഒരു പ്രത്യേക മതവിഭാഗക്കാര്‍ ലോകമെമ്പാടും തെരഞ്ഞുപിടിച്ച് ആക്രമിക്കപ്പെടുന്നു എന്ന് വരുത്തിത്തീര്‍ക്കാന്‍ ചില കേന്ദ്രങ്ങള്‍ക്ക്‌ എന്തെന്നില്ലാത്ത ആവേശം!!..

സമകാലീന പ്രതികരണ തൊഴിലാളികള്‍ ഇതുപോലെ മതം, ജാതി , വര്‍ഗം തുടങ്ങിയവ മാത്രം ആധാരമാക്കി പ്രതികരിക്കുന്നത് എത്രത്തോളം ഹീനമായ ഒരു കീഴ്വഴക്കമാണ്. ലോകത്തെല്ലായിടത്തും മനുഷ്യന്റെ ചോരയ്ക്ക് ഒരേ കളര്‍ ആണ് എന്ന സത്യം എന്തെ നിങ്ങളുടെ മന:സാക്ഷിയെ എല്ലായ്പ്പോഴും തൊട്ടുണര്‍ത്തുന്നില്ല?

അല്ലങ്കില്‍ തന്നെ എന്താണ് ഇപ്പോള്‍ പാലസ്തീനയില്‍ സംഭവിക്കുക?.. ചെറിയ വട കൊടുത്ത്‌ വലിയ വലിയ വടകള്‍ വാങ്ങിച്ചു കൂട്ടുന്ന നിക്ഷേപാത്മകമായ സമീപനമാണ് സൊ കോള്‍ഡ്‌ നിഷ്കളങ്ക അഹിംസാ സമരസേനാനികള്‍ ആയ ഹമാസ്‌ ചെയ്തുകൊണ്ടിരിക്കുന്നത് എന്നത് നിഷ്പക്ഷമായി ഈ പ്രശ്നം വിലയിരുത്തുന്ന ആര്‍ക്കും മനസിലാകും. ഈ നവംബര്‍ മാസത്തില്‍ മാത്രം ഹമാസ്‌ 2500ഇല്‍ ഏറെ മിസൈലുകള്‍ ഇസ്രയേലിലേയ്ക്ക് വിക്ഷേപിച്ചിട്ടുണ്ട്. ഇവയൊന്നും അക്രമമോ പ്രകോപനമോ ഉളവാക്കാന്‍ വേണ്ടിയായിരുന്നില്ല, മറിച്ച് ഹമാസ്‌ ക്യാമ്പുകളിലെ ദീപാവലി ആഘോഷങ്ങളുടെ ഭാഗമായിരുന്നു എന്ന് പറയുന്നവന്റെ തലമണ്ടയില്‍ അല്പം സന്തോഷ്‌ ഭ്രഹ്മിയോ നെല്ലിക്ക ലേഹ്യമോ മറ്റോ തളിക്കേണ്ടി വരും. ഇതുപോലത്തെ ദീപാവലി വെടിക്കെട്ടുകള്‍ ആയിരുന്നല്ലോ എല്ലാക്കാലത്തും ഹമാസിന്റെ ഹോബ്ബിയും!!.

'എന്നിട്ടും ഇസ്രയേലില്‍ അധികം ജൂതന്മാര്‍ ചത്തില്ലല്ലോ' എന്നാണു ഇവിടത്തെ സമാധാന പ്രേമികളുടെ പരാതി. തങ്ങളുടെ സിവിലിയന്മാരെ ഷെല്‍ട്ടറുകള്‍ തീര്‍ത്തും എമര്‍ജന്‍സി അലാമുകള്‍ കൊടുത്തും ഹമാസ്‌ മിസൈലുകളില്‍ നിന്നും സുരക്ഷിതരായി സംരക്ഷിക്കാന്‍ ഇസ്രെയെല്‍ ഗവണ്മെന്റിനു കഴിയുന്നുണ്ടെങ്കില്‍ "ഇതാണെടാ ഭരണകൂടം, ഇങ്ങനെയാവാണമെടാ ഭരണകൂടം" എന്ന ഡയലോഗ് പറയാതെ തരമില്ല. തങ്ങളുടെ ചാവേര്‍ പോരാളികള്‍ക്ക് ചുറ്റും സ്ത്രീകളും കുഞ്ഞുങ്ങളും അടങ്ങുന്ന മനുഷ്യപരിചകള്‍ തീര്‍ക്കുകയും ഇങ്ങനെ നിഷ്കളങ്കരെ ബലികഴിച്ച് ലോകത്തിന്റെ മുന്നില്‍ സ്ത്രീകളുടെയും കുഞ്ഞുങ്ങളുടെയും മൃതശരീരങ്ങളുടെ കണക്ക് നിരത്തി, ഉദാത്തമായ ജനസേവനം കാഴ്ചവെയ്ക്കുന്ന ഹമാസ്‌ ഭരണകൂടം സംരക്ഷനാത്മകമായ ഒരു സമീപനം തങ്ങളുടെ ജനങ്ങളോട് കാണിക്കും എന്ന് ; സാമാന്യ ബോധം ഉള്ള ആരും ചിന്തിക്കുകയില്ല.

കേരളത്തിന്റെ അത്രമാത്രം പോലും വലുപ്പമില്ലാത്ത കുഞ്ഞു രാജ്യമായ ഇസ്രയേലിനെ സ്ഥാപന ദിനം മുതല്‍ ചുറ്റുമുള്ള അറബ്ഭരണകൂടങ്ങള്‍ എല്ലാം ഒറ്റപ്പെടുത്തി ആക്രമിച്ചിട്ടും ഇന്നും അതിനു പിടിച്ചുനില്‍ക്കാന്‍ സാധിക്കുന്നത് ആ ജനതയുടെ വില്‍പവരിന്റെയോ ചങ്കൂറ്റത്തിന്റെയോ ഒക്കെ ഭാഗമാണ്. വായില്‍ കോല്‍ ഇട്ടിളക്കി അള്‍സേഷ്യന്‍ പട്ടിയെ പ്രകോപിപ്പിച്ചു കടി വാങ്ങിയിട്ട് , ഈ പട്ടിയ്ക്ക് "പേ പിടിച്ചേ.. പേ പിടിച്ചേ.." എന്ന് അലറി വിളിക്കുന്ന അതേ സ്ട്രാറ്റജി ആണ് ഇപ്പോള്‍ ഹമാസ്‌ കാഴ്ച വെയ്ക്കുക.

ചാകുന്നത് യഹൂദന്‍ ആണ് എങ്കില്‍ അത് വിശ്വോദാത്തമായ സമാധാന സ്ഥാപനവും മറിച്ച്, ഒരു പാലസ്തീനി ആയാല്‍ അത് ലോകം ഇതുവരെ കണ്ടിട്ടില്ലാത്ത ക്രൂരതയും ആണ് എന്ന് പറയുന്നവരോട് എന്ത് പറയണം എന്നറിയില്ല.

ഇത്രയും പറഞ്ഞത് കൊണ്ട്, ഇസ്രായേല്‍ ചെയ്യുന്നതെല്ലാം ശരി ആണ് എന്നോ ഹമാസ്‌ നേതൃത്വം ലോകോത്തര ചെറ്റകളും അലവലാതികളും ആണ് എന്നൊന്നും ഞാന്‍ ഉദ്ദേശിച്ചിട്ടില്ല. സുപ്രീം കോടതി ബാബരി മസ്ജിത് കേസില്‍ ഭൂമി പങ്കിട്ടു നല്കിയപോലെ ഇവര്‍ക്കായി ഭൂമി പങ്കിടാനോ അതിര്‍ത്തി രേഖ വരയ്ക്കാണോ ഒന്നിന്നും ഞാന്‍ ആളല്ല. പറയാനുള്ളത്‌ ഇത്രമാത്രം. ഇന്ത്യന്‍ സ്വാതന്ത്യ സമരം പോലുള്ള ആദരണീയമായ സ്വാതന്ത്യ സമരങ്ങളുടെ പട്ടികയില്‍ പാലസ്തെന്‍ സമരത്തെയും ഹമാസിനെയും ഒക്ക പ്രതിഷ്ഠിക്കാന്‍ വല്ലാത്തൊരു ആവേശം ഇന്ന് പലരും പ്രകടിപ്പിച്ചു കാണുന്നുണ്ട്. ഇവര്‍ പറയുന്നതിന്റെ സാരം ഇതാണ് -
"..ഇസ്രായേല്‍ എന്നൊരു രാഷ്ട്രം നിലവില്‍ ഇല്ലായിരുന്നു. ലോകത്തിന്റെ പലഭാഗങ്ങളില്‍ നിന്നും ഇസ്രയെല്കര്‍ പലസ്തീനികളുടെ ഭൂമി കയ്യേറി. ഇത് അനുവദിക്കാന്‍ പറ്റില്ല. ഇസ്രയേല്‍ എന്നൊരു രാഷ്ട്രമെ പാടുള്ളതല്ല. ആ ഭൂമി മുഴുവന്‍ ഹമാസിന് അവകാശപ്പെട്ടതാണ്... നിലനില്‍പ്പിന് വേണ്ടിയുള്ള ഹമാസിന്റെ ഈ പോരാട്ടം എന്തുകൊണ്ടും ഇന്ത്യന്‍ സ്വാതന്ത്യ സമരം പോലെയോ അതിനെക്കാളുപരിയോ ആയ മഹത്വം അര്‍ഹിക്കുന്നു.."
അല്പം വിശദമായി ഹമാസിനെപ്പറ്റി പഠിക്കുമ്പോള്‍ ഇസ്രായേല്‍ എന്ന രാഷ്ട്രത്തോടല്ല യഹൂദമതം എന്ന മതത്തോടും ജൂതര്‍ എന്ന വംശത്തോടുമാണ് ഇവരുടെ വിദ്വേഷവും വെറുപ്പും എന്നത് വ്യക്തമാകും. ഇത്തരത്തിലുള്ള വംശ-മത വിദ്വേഷം മുഖമുദ്രയാക്കിയ ഒരു വര്‍ഗീയ മുന്നേറ്റത്തെ ഇന്ത്യന്‍ സ്വാതന്ത്യ സമരത്തോട് ഉപമിക്കുന്നത് ഇന്ത്യ മഹാരാജ്യത്തോടും അതിന്റെ പരിപാവനമായ ചരിത്രത്തോടും ധീര രക്തസാക്ഷികളോടും ചെയ്യുന്ന ഏറ്റവും വലിയ അവഹേളനം ആണ് എന്നാണ് എന്റെ അഭിപ്രായം.

ഇല്ലാതായിക്കൊണ്ടിരിക്കുന്ന പലസ്തീന്റെ കഥ പറയുന്നവര്‍ ചരിത്രത്തിന്റെ കുറേക്കൂടി പിന്നോട്ട് പോയി എങ്ങനെ ഇസ്രായേല്‍ എന്ന രാഷ്ട്രം നാമാവശേഷമായി, എങ്ങനെ അവര്‍ ലോകത്തില്‍ നനാഭാഗത്തായി ചിതറിക്കപ്പെട്ടു, എങ്ങനെ ഈ പറയുന്ന പാലസ്തീന്‍ രാഷ്ട്രം രൂപപ്പെട്ടു എന്നൊക്കെയുള്ള ചരിത്ര പാഠങ്ങള്‍ പഠിക്കുക. സമാധാനപരമായ പങ്കുവയ്ക്കലുകള്‍ക്ക് വിഘാതം തീര്‍ത്തതും മറുതലിച്ചവരും ആര് എന്ന് പരിശോധിക്കുക. നിങ്ങളുടെ പൊതുവിജ്ഞാനം അല്പമെങ്കിലും വര്‍ധിപ്പിക്കാന്‍ ഇത് ഉപകരിക്കും.

അധിനിവേശങ്ങളും അതിനെതിരെ പോരാട്ടങ്ങളും ലോകചരിത്രത്തില്‍ സര്‍വസാധാരണമാണ്. ഇവിടെയെല്ലാം ചോരിയപ്പെടുന്നത് നിരപരാധരുടെ രക്തവും. പോരാടി ജയിക്കാന്‍ കഴിവില്ലാതാകുമ്പോള്‍ നിഷ്കളങ്കരെ കുരുതികൊടുക്കുന്നതും അതിനു മതത്തിന്റെ പുറംതോല്‍ മറയാക്കുന്നതും തികഞ്ഞ ഭീകരതയും സര്‍വോപരി നാണം കേട്ട കഴിവുകേടുമാണ്.

സ്വന്തം രാജ്യത്തെ പ്രശ്നങ്ങളോടും രക്തപ്പുഴകളോടും ഭീകരതകളോടും നിരുത്തരവാദപരമായ നിസംഗതയും പുശ്ചവും പുലര്‍ത്തുകയും ആഗോള പ്രശ്നങ്ങളില്‍ മതത്തിന്റെ ലേബല്‍ മാത്രം നോക്കി അട്ടഹാസം മുഴക്കുകയും ചെയ്യുന്നവര്‍ ഏതാണ് തങ്ങളുടെ രാജ്യം, ആരാണ് തങ്ങളുടെ യജമാനമാര്‍ എന്നതിനെപ്പറ്റിയൊക്കെ ആത്മ വിമര്‍ശനപരമായ ഒരു അവലോകനം പുലര്‍ത്തുന്നത് നന്നായിരിക്കും.

പുരോഗതിയുടെ വാലില്‍ തീ പിടിച്ചോ?

2012-11-12T11:38:00.001-08:00

ഇനിയും വികസിച്ചു തീര്‍ന്നിട്ടില്ലാത്ത രാഷ്ട്രങ്ങളാണ് വികസ്വര രാഷ്ട്രങ്ങള്‍ എന്നും അത്തരത്തിലുള്ള ഒരു ഒരു വികസ്വര രാഷ്ട്രം ആണ് ഇന്ത്യ എന്നും അപ്പര്‍ പ്രൈമറി തലങ്ങളില്‍ ഇമ്പോസിഷന്‍ എഴുതി പഠിച്ചത് അല്പം വിഷമത്തോടെയാണ്. ഇന്ത്യയുടെ ഈ വികസനത്തിന്റെ പൂര്‍ണത ഈ കൊല്ലം ഉണ്ടാകും, അടുത്തകൊല്ലം ഉണ്ടാകും എന്നിങ്ങനെയുള്ള പ്രതീക്ഷകള്‍ ഓരോ വര്‍ഷവും സോഷ്യല്‍ സയന്‍സ് എക്സാം എഴുതിതീരുമ്പോഴും മനസ്സില്‍ കമ്യുണിസ്റ്റ്‌ പച്ച പോലെ ആര്‍ത്തുകേറുമായിരുന്നു. വിശ്വാസവും പ്രത്യാശയും ഇല്ലാതെ എന്തൂട്ട് ജീവിതം!. 1.. 2... 3... വര്‍ഷങ്ങള്‍ ഓരോന്നായി പൊഴിഞ്ഞുകൊണ്ടിരുന്നു. ഒപ്പം ജീവിതത്തിന്റെ ഓരോ ഘട്ടങ്ങളും.. UP, ഹൈസ്കൂള്‍, പ്ലസ്‌ ടു, ഡിപ്ലോമ, ഡിഗ്രി.. ഇതെല്ലാം പിന്നിട്ടു അങ്ങനെ ഈ റിയാലിറ്റി ഷോ അതിന്റെ സീസണ്‍ 6ലേയ്ക്ക്‌ പ്രവേശിച്ചു കഴിഞ്ഞു. ഇപ്പോഴത്തെ യു.പി പിള്ളേരും 'ഇന്ത്യ വികസ്വര രാഷ്ട്രം' എന്ന് തന്നെയാണ് പഠിച്ചുകൊണ്ടിരിക്കുക. 2012ല്‍ ഇന്ത്യ വികസിച്ച് തീരും എന്നും ഇല്ലെന്നും ഒക്കെ പറഞ്ഞു കേള്‍ക്കുന്നു. ഇനി, ഭാവിയില്‍ എന്റെ മക്കളും ഇതുതന്നെ പഠിക്കേണ്ടി വരുമോ എന്നുള്ള ആശങ്ക ഒരല്പം ഇല്ലാതില്ല.

അതെന്തായാലും അതിവേഗം തന്നെ ഇന്ത്യയെ വികസിപ്പിച്ചെ അടങ്ങൂ എന്ന വാശിയില്‍ ആണ് യു.പി.എ സര്‍ക്കാര്‍ എന്നാണു തോന്നുന്നത്‌. "ഇപ്പൊ ശരിയാക്കിത്തരാം" എന്ന മട്ടില്‍ രണ്ടും കല്പ്പിച്ചാണ് മന്മോഹന്‍ജി മുന്നോട്ടു പോകുക. വിലക്കയറ്റം പുരോഗതിയുടെയും ജീവിതനിലവാരത്തിന്റെ കുതിച്ചുചാട്ടത്തിന്റെയും ലക്ഷണം ആണ് എന്നാണു ഇവിടുത്തെ ന്യൂജനറേഷന്‍ സാമ്പത്തിക വിദഗ്ധര്‍ ആവര്‍ത്തിച്ചു പ്രഖ്യാപിക്കുന്നത്. ഡീസല്‍, പെട്രോള്‍ ,പാചക വാതകം, പാല്‍, പച്ചക്കറി, ബസ്‌ ഫെയര്‍ അങ്ങനെ ജീവിതത്തിന്റെ സമസ്ത മേഖലകളുടെയും വിലനിലവാരം ചൈനീസ്‌ വെടിക്കെട്ടിന്റെ സ്പെഷ്യല്‍ ഐറ്റം പോലെ പതിനെട്ടു നിലകള്‍ ആയി മാനത്ത്‌ വിരിഞ്ഞു ചിതറുമ്പോള്‍ വികസനത്തിന്റെ തേരിലേറി കുതിയ്ക്കുന്ന ഇന്ത്യയെപ്പറ്റിയോര്‍ത്ത്‌ സാമ്പത്തിക ശാസ്ത്രജ്ഞന്മാരും, അടുത്ത അധ്യയന വര്ഷം ഇന്ത്യയുടെ പ്രൊഫൈല്‍ സ്ടാടസ് 'വികസ്വരം' എന്നതില്‍ നിന്നും 'വികസിതം'എന്നാക്കിമാറ്റി പാഠപുസ്തകങ്ങളില്‍ അപ്ഡേറ്റ് ചെയ്യുന്നതോര്‍ത്ത് വിദ്യാഭ്യാസ വിചക്ഷണന്മാരും രോമാഞ്ചം കൊള്ളുന്നുണ്ടാകാം.. എന്തോ എനിക്കറിയില്ല, എന്തായാലും ഒന്ന് മാത്രം കാണുകയും കേള്‍ക്കുകയും അറിയുകയും അനുഭവിക്കുകയും ചെയ്യുന്നു - എട്ടിന്റെ പണി നെഞ്ചത്ത് തന്നെ കിട്ടിയ പൊതുജനത്തിന്റെ വേദന. ഈ വേദന എത്ര നേതാക്കന്മാര്‍ക്ക്‌ മനസിലാക്കാന്‍ പറ്റുന്നുണ്ട് എന്നത് ഇനിയും എനിക്ക് മനസിലായിട്ടും ഇല്ല.

മുന്‍കാലങ്ങളെ അപേക്ഷിച്ച് ഇപ്പോള്‍ പുറത്ത്‌ വന്നുകൊണ്ടിരിക്കുന്ന അഴിമതി ആരോപണങ്ങളും വേദനിക്കുന്ന കോടീശ്വരരുടെ സ്വിസ്സ് അക്കൌണ്ടുകളില്‍ ഉണ്ടെന്നു കരുതപ്പെടുന്ന ലക്ഷം കോടികളുടെ നിക്ഷേപങ്ങളും എല്ലാം കൂടി മഹനീയമായ വികസനത്തിന്റെ പുത്തന്‍ വഴിത്താരകള്‍ വെട്ടിതുറക്കുകയാണ്. അഴിമതി ആരോപണങ്ങള്‍ക്ക് പോലും എന്തൊരു മാസ്മരികത.. എന്തൊരു മനോഹാരിത.. പത്തുകൊല്ലം മുന്‍പ്‌ ആരോപിക്കപ്പെട്ടിരുന്ന പത്തും ഇരുപതും ലച്ചം ഉലുവയുടെ നിലവാരത്തില്‍ നിന്നും ലക്ഷം കോടിയിലെയ്ക്കും മില്ല്യന്‍ കോടിയിലെയ്ക്കും ഉയരാന്‍ കഴിയുന്നതിനെ പുരോഗതി എന്നോ വികസനം എന്നോ വിശേഷിപ്പിച്ചാല്‍ കുറ്റം പറയാന്‍ ഒക്കുമോ?. ഗാന്ധിയുടെയും നെഹ്രുവിന്റെയും സ്വപ്നങ്ങളില്‍ മൊട്ടിട്ട സോഷ്യലിസം ഇവിടെ പൂത്തുലയുകയാണ്. 'അമ്പ്‌ കൊള്ളാത്തവര്‍ ഇല്ല കുരുക്കളില്‍' എന്ന് പറയുന്നതുപോലെ ഭരണ -പ്രതിപക്ഷ ഭേദം ഇല്ല അഴിമതി വീരന്മാരില്‍. ഇവരെ പൊതിഞ്ഞു പിടിയ്ക്കാനും മഹത്ത്വീകരിക്കാനും അവര്‍ ഉള്‍ക്കൊള്ളുന്ന പാര്‍ട്ടികള്‍ മത്സരിക്കുകയാണ്.

ഒരേ തൂവല്‍ പക്ഷികള്‍ ഒരേ തീരത്തിലെയ്ക്കും ലക്ഷ്യങ്ങളിലെയ്ക്കും പറന്നടുക്കുമ്പോള്‍ മുതലെടുപ്പിനു വേണ്ടിയല്ലാതെ പാവപ്പെട്ടവന് വേണ്ടിയും പാര്ശ്വവല്‍ക്കരിക്കപ്പെട്ടവര്‍ക്ക്‌ വേണ്ടിയും ശബ്ദം ഉയര്‍ത്താന്‍ ഇന്ന് ഇവിടെ ആരുമില്ലാതായിരിക്കുന്നു എന്നതാണ് ഏറ്റവും ഖേദകരമായ വസ്തുത. കൊടി പിടിയ്കാനും അടി വാങ്ങിക്കാനും പോസ്റ്റര്‍ ഒട്ടിക്കാനും അഞ്ചഞ്ചു കൊല്ലം കൂടുമ്പോള്‍ വോട്ടു കുത്താനുമുള്ള പണിയാളുകള്‍ എന്നതിനപ്പുറം ഇവരെ കുറച്ചു സീരിയസ് ആയി കണക്കിലെടുക്കാന്‍ ഇവിടെ ഒരു ഹരിശ്ചന്ദ്രനും ഇല്ല എന്നത് ഏറെ ആശങ്കാജനകമാണ് എന്ന് പറയാതെ വയ്യ.

അടുത്തിടെ സൂരജ്‌ കുന്ടില്‍ നടന്ന കൊണ്ഗ്രസ്സിന്റെ 'സംവാദ്‌ ബൈടക് ' യോഗത്തില്‍ പ്രധാന വിഷയമായത് മേല്‍പ്പറഞ്ഞ സാധാരണകാരന്റെ നൊമ്പരങ്ങളോ പ്രയാസങ്ങളോ അല്ല, മറിച്ച് എങ്ങനെ മുഖം മിനുക്കി, അടുത്ത ഇലക്ഷന് കളം പിടിച്ച് ഏതുവിധേന ഇപ്പോഴത്തെ 'ഇന്ത്യയുടെ വികസനം' പൂര്‍ണ്ണമാക്കാം, ഇത്തരം വികസനത്തിനെതിരെ വെട്ടിത്തിളയ്ക്കുന്ന സോഷ്യല്‍ മീടിയയെയും അവിടെക്കിടന്നു വിരകുന്ന മഹാപാപികളെയും പൊളിച്ചടുക്കാം എന്നതൊക്കെയാണ്. എന്തുകൊണ്ടാണ് സോഷ്യല്‍ മീഡിയകള്‍ തിളച്ചു മറിയുന്നത്, അതിനു ഹേതുവാകുംവിധമുള്ള മോശമായ ഭരണമാണോ നിലവില്‍ തങ്ങള്‍ കാഴ്ച വെയ്ക്കുന്നത് എന്നിങ്ങനെ സ്വയംവിമര്‍ശകമായ ചോദ്യങ്ങള്‍ക്ക്‌ ഉത്തരം തേടാന്‍ കോണ്ഗ്രസ്സിന് താല്പര്യമോ സമയമോ ഇല്ല എന്നതു തന്നെയാണ് വീണ്ടും വ്യക്തമാകുന്നത് .

വികസനത്തെക്കുറിച്ച് ചിന്തിക്കുമ്പോള്‍ നമ്മുടെ ചിന്തകളും സ്വപ്നങ്ങളും ഒക്കെ വളരെ ഉയരങ്ങളിലാണ്.. എല്ലാ ജില്ലകളിലും വിമാനത്താവളങ്ങള്‍ ഉണ്ടാകേണ്ടതിന്റെ ആവശ്യത്തെക്കുറിച്ചും അതിവേഗ റയിലിനെക്കുറിച്ചും ചന്ദ്രനില്‍ പട്ടയം വാങ്ങുന്ന ഇന്ത്യയെപ്പറ്റിയും ഒക്കെ നാം വാചാലരാകുന്നു. മറുവശത്ത് ജനസംഖ്യടെ പകുതിയോടടുത്ത്‌ ജനങ്ങള്‍ പോഷകപൂര്‍ണ്ണമായ ഭക്ഷണം ലഭിക്കാതെയും തലചായ്ക്കാന്‍ പാര്‍പ്പിടമില്ലാതെയും വിദ്യയുടെ പൊന്‍വെളിച്ചമില്ലാതെയും സമൂഹത്തിന്റെ പുറമ്പോക്കില്‍ കഴിയുന്നു. അവരും ഇന്ത്യക്കാരായ നമ്മുടെ സഹോദരര്‍ ആണ് എന്ന ചിന്ത എന്തെ നമുക്ക്‌ നഷ്ടമാകുന്നു? ഇവരുടെ ഹൃദയത്തില്‍ക്കൂടി വികസനത്തിന്റെ ബുള്‍ടോസര്‍ ഓടിച്ചുകയറ്റിയും അപ്പത്തിനായി നീളുന്ന കയ്യുകളില്‍ മൊബൈലുകളും ടാബ്ലെറ്റുകളും വെച്ചുകൊടുത്തുമാണോ നാം ഇവിടെ സമത്വ ഭാരതത്തിന്റെ സമ്പൂര്‍ണ്ണ വളര്‍ച്ച പൂര്‍ത്തീകരിക്കുക?

ഒന്നും വേണ്ട, ഇത്തരത്തിലുള്ള മനുഷത്വത്തിന്റെയും നന്മയുടെയും സാഹോദര്യത്തിന്റെയും കല്‍വിളക്കുകള്‍ തെളിക്കേണ്ട മതനേതൃത്വങ്ങള്‍ എന്താണ് ഇപ്പോള്‍ ചെയ്തുകൊണ്ടിരിക്കുന്നത് ?.. ഒരു വിഭാഗം ആളുകള്‍ മതവിദ്വേഷം വളര്‍ത്തി തമ്മില്‍ തല്ലിക്കുന്നു. മറ്റൊരിടത്ത് ഒരു കൊമ്പറ്റീഷന്‍ ഐറ്റം പോലെ കോടികള്‍ മുടക്കി ആരാധനാലയങ്ങള്‍ പണിതുയര്‍ത്തുകയും അവയുടെ അവകാശത്തെച്ചൊല്ലി പൊതുനിരത്തില്‍ കടിപിടികൂടുകയും മറുവശത്ത്‌ ആഡംബര ജീവിതം ഒഴിവാക്കണം എന്ന് അണികളെ ഉപദേശിക്കുകയും ബോധവല്‍ക്കരിക്കുകയും ചെയ്യുന്നു. വേറൊരു കൂട്ടം ആളുകള്‍ ആരൊക്കെയാണ് തങ്ങളുടെ മതാചാര്യനെപ്പറ്റി കാര്‍ട്ടൂണ്‍ വരയ്ക്കുന്നത്, സിനിമ എടുക്കുന്നത് എന്നിങ്ങനെയുള്ള വിവാദങ്ങള്‍ക്കായി മാത്രം കാത്തിരിക്കുന്നു. ഇതില്‍ നിന്നൊക്കെ സ്വസ്ഥത തേടി അലയുന്നവര്‍ക്കായി ആത്മീയത കുപ്പിയിലും പായ്ക്കറ്റിലും ആയി വില്പനയ്ക്കെത്തുന്നു.

ലോകം കണ്ടതില്‍ ഏറ്റവും പരമദരിദ്രനായി പിറന്നുവീഴുകയും വഞ്ചിയുടെ അമരങ്ങളില്‍ അന്തിയുറങ്ങുകയും ചെയ്ത, കുരുനരികള്‍ക്ക് മാളങ്ങളും പറവകള്‍ക്ക് ആകാശവും സ്വന്തമായുള്ള ഈ ഭൂമിയില്‍ അവസാനത്തെ ആറടിമണ്ണ് പോലും സ്വന്തമായി കരുതിവെയ്ക്കാതിരുന്ന, "സമ്പന്നന്‍ ഒരുകാലത്തും ദൈവരാജ്യത്തില്‍ പ്രവേശിക്കില്ല" എന്ന് കട്ടായം പറയുകയും ദരിദ്രരുടെയും മുക്കുവരുടെയും ചുങ്കക്കാരുടെയും ഉറ്റസുഹൃത്തും പ്രത്യാശയും മാര്‍ഗ്ഗദീപവുമായിരുന്ന അതേ ഗുരുനാഥന്റെ ലേബലിലാണ് രണ്ടായിരം വര്‍ഷങ്ങള്‍ക്കിപ്പുറം ഏറ്റവും കൂടുതല്‍ കോര്‍പറേറ്റ്‌ സ്വത്തുകള്‍ കുമിഞ്ഞുകൂടുന്നത് എന്ന വിരോധാഭാസം എന്തായാലും ഒരു പുനര്‍വിചിന്തനത്തിനു തിരി കൊളുത്തേണ്ടതുണ്ട്.

വാലില്‍ തീപിടിച്ച പോലെ പുരോഗമനം അതിന്റെ ന്യൂജനറേഷന്‍ പാതകള്‍ താണ്ടി മുന്നോട്ടു കുതിയ്ക്കുമ്പോള്‍ പണമില്ലാത്തവന്‍ ഇവിടെ പിണം തന്നെയാണ് എന്ന സത്യം ഒരല്പം നൊമ്പരത്തോടെ നാം ഒരിക്കല്‍ കൂടി തിരിച്ചറിയുകയാണ്...

ഒരിക്കല്‍ ഫ്രാന്‍സിലെ ജനങ്ങള്‍ റൊട്ടി കിട്ടാനില്ലാതെ പട്ടിണി മൂലം പ്രക്ഷോഭം നയിച്ചപ്പോള്‍ "എന്തിനാണ് ഇവര്‍ റൊട്ടിയ്ക്ക് വേണ്ടി ബഹളം കൂട്ടുന്നത് ? റൊട്ടി കിട്ടുന്നില്ലെങ്കില്‍ പകരം ഇവര്‍ക്ക്‌ കേയ്ക്ക് കഴിച്ചുകൂടെ ?" എന്ന് അന്നത്തെ രാജ്ഞി ചോതിച്ചതായി കേട്ടിട്ടുണ്ട്. ഇതുപോലെ, ദന്തഗോപുരങ്ങളില്‍ വാഴുന്നത് കൊണ്ട് സാധാരണക്കാരന്റെ പ്രശ്നം പിടി കിട്ടാതതാണോ ഇപ്പോഴത്തെ ഭരണാധികാരികളുടെ പ്രശ്നം? അതോ പിടി കിട്ടുന്നില്ല എന്ന് നടിയ്ക്കുന്നതോ?..

ഭര്‍ത്താക്കന്മാരുടെ ശ്രദ്ധയ്ക്ക്.. (ഭാര്യമാരുടെയും !!)

2012-10-17T08:25:00.001-07:00

ഇന്ത്യയിലെ മെയില്‍ ഷോവനിസ്റ്റ് കെട്ടിയോന്മാര്‍ക്ക് നെഞ്ചത്തലച്ച് കരയുവാനും ഭാര്യമാര്‍ക്ക്‌ ആര്‍ത്തു വിളിക്കാനും അവസരം തീര്‍ത്തുകൊണ്ട് കേന്ദ്ര വനിതാ-ശിശുക്ഷേമ വകുപ്പ്‌ പുത്തന്‍ നിയമം അണിയിച്ചൊരുക്കുന്നു. ഇപ്പോള്‍ അണിയറയില്‍ ഒരുങ്ങിക്കൊണ്ടിരിക്കുന്ന ഈ ബില്‍ നിയമമായാല്‍ ഇന്ത്യ മഹാരാജ്യത്തിലെ സകല ഭര്‍ത്താക്കന്മാരും തങ്ങളുടെ ഭാര്യമാര്‍ക്ക്‌ പ്രതിമാസം നിശ്ചിത തുക ശമ്പളമായി നല്‍കേണ്ടി വരും. എതുവകയില്‍ എന്നുചോതിച്ചാല്‍ വീട്ടില്‍ ചെയ്യുന്ന സേവനങ്ങളുടെ പ്രതിഫലമായി!!.. കൃത്യമായി പറഞ്ഞാല്‍ കണവന്റെ ശമ്പളത്തിന്റെ 20 ശതമാനം തുക അതാത് മാസങ്ങളില്‍ ഭാര്യയുടെ പേരില്‍ ബാങ്ക് അക്കൌണ്ടില്‍ നിക്ഷേപിക്കണം എന്ന് സാരം !!. ടി ശമ്പളത്തില്‍ അണ - പൈ കുറവുണ്ടായാല്‍ കെട്ടിയോനെ കോടതി കയറ്റാനും വേണച്ചാല്‍ ഉണ്ട തീറ്റിക്കാനും ഭാര്യമാര്‍ക്ക്‌ എല്ലാ വിധ അവകാശവും നല്‍കുന്നു ഈ നിയമം. വെറുതെ അല്ല ഭാര്യ !! മനസിലായില്ലേ ??..

പ്രസ്തുത ബില്ലിനെ അനുകൂലിച്ചും പ്രതികൂലിച്ചും നിരവധി വാദപ്രതിവാദങ്ങള്‍ ഉയര്‍ന്നു കഴിഞ്ഞു.. ഇപ്പോള്‍തന്നെ ഭര്‍ത്താക്കന്മാരെ മുളക് പുരട്ടി വേവിക്കാന്‍ സ്ത്രീപീടനം, സ്ത്രീധനപീഡനം, ഗാര്‍ഹികപീഡനം എന്നിങ്ങനെ പലതരം പീഡനങ്ങള്‍ക്ക് എതിരായ നിയമങ്ങള്‍ നിലവില്‍ ഉണ്ടായിരിക്കെ, 'മുളകിന് കൂടെ അല്‍പ്പം മസാല കൂടി' എന്നതുപോലെ തൊഴില്‍ പീഡനം എന്നൊരു പുത്തന്‍ വകുപ്പ്‌ കൂടി ഈ ചട്ടിയിലെയ്ക്ക് ചേര്‍ക്കപ്പെട്ടിരിക്കുന്നു.

ഏതായാലും വിവാഹം കഴിക്കാന്‍ ഒരുങ്ങിയിരിക്കുന്ന പുരുഷ കേസരികള്‍ക്ക് ഒരു പുനര്‍വിചിന്തനത്തിന് ഇനിയും സമയം ബാക്കിയുണ്ട്. ഇതിനോടകം പെട്ടുപോയവര്‍ എല്ലാം ദൈവനിശ്ചയം എന്ന് കരുതി സമാധാനിക്കുക.. വരാനുള്ളത് എന്തായാലും വഴിയില്‍ തങ്ങില്ല. പുത്തന്‍ ബില്ലിന്റെ ചുവട്പിടിച്ചു ഉയര്‍ന്നെക്കാവുന്ന അവകാശ ലംഘനങ്ങള്‍ക്കും തൊഴില്‍ പ്രശ്നങ്ങള്‍ക്കും എത്രയെത്ര സാധ്യതകള്‍..!!

* എല്ലാ ജോലികള്‍ക്കും നിശ്ചിത മണിക്കൂര്‍ ഷെഡ്യൂള്‍ ബാധകം ആണ്. 8 മണിക്കൂര്‍ ഡ്യൂട്ടി ആണ് നിലവില്‍ മിക്കവാറും എല്ലാ ജോലികള്‍ക്കും ഉള്ള ഷെഡ്യൂള്‍. അപ്പോള്‍ ഓവര്‍ ടൈം ചെയ്യുന്ന ജോലികള്‍ക്ക് ഭാര്യ എക്സ്ട്ര അലവന്‍സ് ചോതിച്ചാല്‍ മീശ പിരിച്ചിട്ടു കാര്യം ഇല്ല.

* മറ്റു ജോലികള്‍ക്ക് ഉള്ളത് പോലെ മാസം നിശ്ചിത ദിവസം ഓഫ്‌, നിശ്ചിത എണ്ണം കാഷ്യല്‍ ലീവ് ഇതൊക്കെ ഭാര്യമാര്‍ക്കും ആവശ്യപ്പെടുന്നതില്‍ തെറ്റുണ്ടോ??

*ഓണം, ക്രിസ്തുമസ് തുടങ്ങിയ വിശേഷ അവസരങ്ങളില്‍ ആഘോഷ ബത്ത, ബോണസ്‌ തുടങ്ങിയവയ്ക്ക് ന്യായമായും ഭാര്യമാര്‍ക്ക്‌ അവകാശം ഉന്നയിക്കാം.

* എന്തിനെങ്കിലും ശമ്പളം വാങ്ങുന്നുണ്ട് എങ്കില്‍ അത് ഒരു തൊഴില്‍ ആയി അന്ഗീകരിക്കപ്പെട്ടുകഴിഞ്ഞു. അപ്പോള്‍ എല്ലാ തൊഴില്‍ മേഘലകളിലും എന്തിനു പാട്ട പെറുക്കുന്നവര്‍ക്ക് പോലും ട്രേഡ് യൂണിയനുകള്‍ രൂപീകരിക്കപ്പെട്ടിരിക്കുന്ന കേരളത്തില്‍ എന്ത്കൊണ്ട് വീട്ടമ്മമാര്‍ക്കും യൂണിയന്‍ ഉണ്ടായിക്കൂട??..

* എല്ലാ തൊഴിലാളികളും പണിമുടക്കും ഹര്‍ത്താലും ആഘോഷിക്കുമ്പോള്‍ അടുക്കള അടച്ചിട്ടു കൊണ്ട് അഖില കേരള ഭാര്യാ യൂണിയന്‍ ഒരു പണിമുടക്കിന് ആഹ്വാനംചെയ്തു കൂടാ എന്നില്ല!!

*പണിമുടക്കിന് പരിഹാരം കാണാതെ ഹോട്ടലില്‍ നിന്ന് ഫുഡും അടിച്ചു ചുമ്മാ കണ്ണുമടച്ചു നടക്കാം എന്ന് കരുതുന്ന കെട്ടിയോന്മാര്‍ നോക്കുകൂലി ആവശ്യപ്പെട്ടുകൊണ്ടുള്ള ഘരാവോ , പിക്കറ്റിംഗ് എന്നീ സമരമുറകള്‍ പ്രതീക്ഷിക്കുക.

* എല്ലാരാഷ്ട്രീയ പാര്‍ട്ടികളും യൂണിയന്‍ ഉണ്ടാക്കുപോള്‍ ടി യൂണിയനുകള്‍ തമ്മില്‍ ഇടയ്ക്കിടെ രാഷ്ട്രീയ സംഘട്ടനങ്ങള്‍ പ്രതീക്ഷിക്കുന്നതില്‍ തെറ്റുണ്ടോ?. അടിയും പിടിയും ഒന്നുമില്ലാതെ എന്തോന്ന് ട്രെഡ്‌ യൂണിയന്‍!!

*ഒരു ഓഫീസില്‍.. സോറി... വീട്ടില്‍ തന്നെ സേവനം അനുഷ്ടിച് മടുക്കുമ്പോള്‍ മറ്റേതു മേഖലയിലെന്നപോലെ ഒരു ട്രാന്‍സ്ഫര്‍ ഇവിടെയും ആപ്ലിക്കബിള്‍ ആണോ !! :P

"ഭാര്യ -ഭര്‍തൃ ബന്ധം വിശുദ്ധം അല്ലെ , പവിത്രം അല്ലെ, അതിനെ സാമ്പത്തിക മാനങ്ങളില്‍ നോക്കിക്കാണണമോ എന്നുതുടങ്ങിയ സംശയം ഒക്കെ ഉള്ളവര്‍ ഇനി അതൊക്കെ അങ്ങ് പള്ളീ പറഞ്ഞാല്‍ മതി" എന്ന അട്ടഹാസവുമായി ഇന്നാട്ടിലെ വനിതാ വിമോചകര്‍ രക്ഷാ ദൌത്യവുമായി ഇറങ്ങിക്കഴിഞ്ഞു. ഇനി കൊറേ കാലത്തേയ്ക്ക് ഇക്കൂട്ടര്‍ക്ക്‌ നല്ല സീസണ്‍ ആയിരിക്കും എന്ന് തോന്നുന്നു.

സമൂഹത്തിന്റെ എല്ലാ മണ്ഡലങ്ങളും എന്തിനു ബന്ധങ്ങള്‍ പോലും നോട്ടുകെട്ടുകളുടെ കനത്തില്‍ അളക്കപ്പെടുന്ന ഈ കാലത്ത് ഇത്തരത്തിലൊരു നിയമം കൊണ്ടുവരുന്നതിനെ പറ്റി അത്ഭുതത്തിന്റെ ആവശ്യം ഉണ്ടെന്നു തോന്നുന്നില്ല. ഏതു വിധത്തിലാണ്‌ ഈ നിയമം ഇന്ത്യയിലെ അണുകുടുംബങ്ങളെ പരിപോഷിപ്പിക്കുക?; ഇപ്പോള്‍ തന്നെ കുടുംബക്കോടതികള്‍ ആവശ്യത്തിലധികം കേസുകളുമായി വിയര്‍പ്പുമുട്ടവേ, കുറെയധികം കുടുംബങ്ങളില്‍ കൂടി കലഹത്തിന്റെ വിത്തുകളും വക്കീലന്മാര്‍ക്ക് കൈ നിറയെ കേസുകളും ഉണ്ടാക്കിക്കൊടുക്കാം എന്നതില്‍ കവിഞ്ഞ് ഏതു രീതിയില്‍ ഉള്ള വനിതാശാക്തീകരണം ആണ് വനിതാ -ശിശുക്ഷേമ വകുപ്പ്‌ ഉദേശിക്കുന്നത് എന്നിങ്ങനെയുള്ള എളിയ ആകാംഷകള്‍ എനിക്കും ഇല്ലാതില്ല.

ഏതായാലും തല്‍ക്കാലം ആകാംഷകള്‍ പരണത്ത് വെച്ച് ഞാനും കാത്തിരിക്കുകയാണ് .. പുത്തന്‍ നിയമ- തൊഴില്‍ പ്രശ്നങ്ങളുടെ സങ്കീര്‍ണ്ണതകള്‍ ഇവിടം വരെ എത്തും എന്ന് കാണേണ്ടിയിരിക്കുന്നു.. പൂമുഖവാതിലുകളില്‍ ഇനിമുതല്‍ വിടരുന്നത് പൂന്തിങ്കളാണോ അതോ ഉപരോധങ്ങളാണോ എന്നറിയണം. എന്നിട്ട് വേണം ഒരു എമ്പ്ലോയര്‍ ആകണമോ വേണ്ടയോ എന്ന് തീരുമാനിക്കാന്‍!! :)

വാല്‍ക്കഷണം:

അങ്ങനെ ഇന്ത്യയിലെ ഭാര്യമാരുടെ പ്രശ്നങ്ങള്‍ അവസാനിക്കുകയാണ്. ഇതേ വീക്ഷണകോണില്‍ നോക്കുമ്പോള്‍ പത്തുമാസം ചുമന്നതിനു ചുമട്ടു കൂലി-വാടകയിനത്തിലും, പ്രസവിച്ചു വളര്‍ത്തിയതിനും പരിപാലിച്ചതിനുമായി കുടിശിക-സെക്യൂരിറ്റി ഇനങ്ങളിലും തക്കതായ പ്രതിഫലം ഇന്നാട്ടിലെ അമ്മമാര്‍ ആവശ്യപ്പെട്ടാല്‍ തെറ്റ് പറയാന്‍ പറ്റുമോ ??

(ഞാനീ ഇക്കണോമിക്സും നിയമവും ഒന്നും പഠിച്ചിട്ടില്ലല്ലോ.. അതുകൊണ്ട് ശതമാനക്കണക്ക് പറയാന്‍ ഞാന്‍ ആളല്ല!!)

റിസര്‍വ്ഡ് ഇന്ത്യ !!

2012-10-01T10:21:00.003-07:00

എണ്ണിയാലൊടുങ്ങാത്ത ജാതി - മത സമൂഹങ്ങളും നാനാ ഭാഷകള്‍ സംസാരിക്കുന്ന 28 സ്റ്റേറ്റുകളും ചേര്‍ന്ന ഒരു മഹത്തായ രാജ്യത്താണല്ലോ നാം ജീവിക്കുക. വൈവിധ്യങ്ങളും വൈരുദ്ധ്യങ്ങളും ഏറെ ഉണ്ടെങ്കിലും അവയെയൊക്കെ കാറ്റില്‍ പറത്തി 'ഒരേ ഒരു ഇന്ത്യ , ഒരൊറ്റ ജനത ' എന്ന സുകൃത ജപവും ഉരുവിട്ടുകൊണ്ട് നാം എല്ലാവരും ഒരമ്മ പെറ്റ മക്കളെ പോലെ വേണം ജീവിക്കാന്‍' എന്നാണു പ്രൈമറി സ്കൂള്‍ തലം മുതലേ ഞാനൊക്കെ പഠിച്ചു പോന്നിട്ടുള്ളത്.

എല്ലാവര്‍ക്കും തുല്യത ഓഫര്‍ ചെയ്യുന്നതാണ് നമ്മുടെ ഭരണ ഘടന; നിയമത്തിനും ഭരണ ഘടനയ്ക്കും മുന്നില്‍ ജാതിയില്ല, മതമില്ല, ലിംഗമില്ല മറിച്ച് ഒരു ഇന്ത്യന്‍ പൌരന്‍ മാത്രമേ ഉള്ളൂ എന്നൊക്കെ പരീക്ഷകളുടെ തലേന്ന് സോഷ്യല്‍ സ്റ്റഡീസിന്റെ പുസ്തകങ്ങളില്‍ വായിച്ചു അഫിമാന പുളകിതനായ ഓര്‍മ്മകള്‍ ഒക്കെ ഇന്നും പച്ചകെടാതെ മനസ്സില്‍ നില്‍ക്കുന്നുണ്ട്.

സ്കൂള്‍ തലങ്ങള്‍ വിട്ടു പ്രൊഫഷണല്‍ വിദ്യാഭ്യാസത്തിന്റെ ബിരിയാണി ഹട്ടുകളില്‍ ഇര എടുക്കാനായി അണപ്പല്ലും കൊമ്പല്ലും ഒക്കെ രാകി രാകി മൂര്‍ച്ച വരുത്തി ചെന്നിരുന്നപ്പോള്‍ ആണ് ആ സത്യം മനസിലായത്‌ - ഈ പന്തിയില്‍ രണ്ടുതരം വിളമ്പല്‍ ആണ് !!.. ആദ്യ പന്തിയില്‍ ഇരിക്കുന്നവര്‍ക്ക് കാഷ് അടയ്ക്കണ്ട.. !!.. മാത്രമല്ല തീറ്റ എടുത്തു കഴിഞ്ഞു വയറിളക്കുന്ന ചെലവിലെയ്ക്ക് ഇങ്ങോട്ട് കിട്ടും പെടയ്ക്കുന്ന ഇന്ത്യന്‍ റുപീ..!!.. കൊള്ളാലോ വീഡിയോണ്‍....

"..അതിപ്പോ കോയി ബിരിയാണി ആയാലും ശരി , ബീഫ്‌ ആയാലും ശരി.. ആദ്യത്തെ പന്തിയില്‍ ഒള്ളവര്‍ കഴിച്ചിട്ട് ബാക്കി വല്ല പൊട്ടും പൊടിയും ഒണ്ടായാല്‍ അതും കഴിച്ച് ആശ തീര്‍ക്ക്.. മോനെ.."

"അല്ല സാറേ, അപ്പൊ ഈ ആദ്യത്തെ പന്തീല് കേറിയാല്‍ അടിച്ച കോളാ.. അല്ലെ.. .ആദ്യം കേറാന്‍ എന്താ വഴി??.."

".. അതിനിപ്പോ എന്താ.. കേറാലോ.. അയിനു മുന്നേ ഒന്ന് ചോതിക്കട്ടെ.. മോന്റെ ജാതി ഏതാ??.. "

"ക്രിസ്ത്യന്‍.. റോമന്‍ കത്തോലിക്ക.."

"എന്നാ പിന്നെ ആ കത്തോലിക്കാ പരിപ്പ് വേഗം വാങ്ങിയേരെ,, നീയൊക്കെ വല്യ സമ്പന്ന-മുന്നോക്ക-സവര്‍ണ്ണ ജാതിയല്ലേ.. പതുക്കെ കേറിയാ മതി.."

"അതുപിന്നെ, സാറേ സമ്പന്നന്‍ ആകണം, മുന്നോക്കം ഓടണം എന്നൊക്കെ എനിക്കും ആഗ്രഹം ഉണ്ട്,.. ആഗ്രഹം മാത്രമേ ഉള്ളെ.. കഞ്ഞി കുടിച്ചു പോകുന്നത് എങ്ങനാന്നു കര്‍ത്താവിന് മാത്രം അറിയാം.. ആ ഞാന്‍ എങ്ങനാ സമ്പന്നന്‍ ആകുന്നെ??.. തന്നെമല്ല ജാതി ചോതിക്കരുത്, പറയരുത് .. എല്ലാ ഇന്ത്യക്കാരും തുല്യരാണ് എന്നൊക്കെയാണല്ലോ സ്കൂളില്‍ പഠിപ്പിച്ചേ??.."

"മോനെ.. ചക്കരേ, പാ വേറെ .. പാപ്പച്ചന്‍ വേറെ ... സ്കൂളില്‍ പോകുമ്പോ എല്ലാ പാഠവും പഠിക്കണ്ടെ.. SC, ST, OBC എന്നീ വിഭാഗങ്ങള്‍ക്ക്‌ സംവരണം ഉള്ള കാര്യമൊന്നും പഠിച്ചിട്ടില്ലേ..??"

"അത് .. സാറേ ആ ദിവസം ഞാന്‍ ആബ്‌സന്റ് ആയിരുന്നു.. വയറെളക്കം.. "

"എന്നാ കേട്ടോ.. സാമൂഹികമായും സാമ്പത്തികമായും പിന്നോക്കം നില്‍ക്കുന്നവര്‍ ആണ് ഇവര്‍.. ഇവരെ മുന്നിലെത്തിക്കാനാണ് ഭരണഘടന സംവരണം ഏര്‍പ്പെടുത്തിയിട്ടുള്ളത്‌.. "

"സാറേ.. സാമ്പത്തികമായി ഞാനും വീക്കാ.. അപ്പൊ എനിക്കും കിട്ടോവോ ബിരിയാണി ??.."

"ഇപ്പൊ കിട്ടും.. നോക്കിയിരുന്നോ!!.. എടാ മുന്നോക്ക കെഴങ്ങാ.. ദളിതന്‍ എന്നും അസങ്ങടിതമായ സമൂഹമാണ്.. ഒരു കാലഘട്ടം മുഴുവന്‍ വേട്ടയാടപ്പെടുകയും അവഹേളിക്കപ്പെടുകയും ചെയ്തിട്ടുള്ള ഈ പാവപ്പെട്ട വിഭാഗത്തിനെ മുഖ്യധാരയില്‍ എത്തിക്കാനായി ഭരണ ഘടന നല്‍കുന്ന അവകാശം ആണ് ഇത്.. ദളിതന്റെ അവകാശങ്ങളെ ചോദ്യം ചെയ്യാനോ അവന്റെ പാത്രത്തില്‍ നോക്കി വെള്ളമിറക്കാണോ ഒരു പുല്ലനെയും ഞങ്ങള്‍ അനുവദിക്കില്ല. നിന്നെപ്പോലുള്ള സവര്‍ണ്ണ-ജന്മി തമ്പ്രാക്കന്മാരുടെ ധൈഷനികതയേറിയ സാമ്രാജ്യത്ത നയങ്ങളുടെ ഭാഗമായ വര്‍ണ്ണവിവേചനം, അപ്പാര്‍തീട് തുടങ്ങിയ ഹീനമായ അജണ്ടകള്‍ പഴംപായില്‍ പൊതിഞ്ഞു കുഴിച്ചുമൂടിയെരെ.."

"എന്തോന്നോക്കെയാ സാറെ.. ഈ പറയുന്നേ.. ഒന്നും മനസിലാകുന്നില്ല.."

"..സോറി ഞാന്‍ അല്പം ഇമോഷണല്‍ ആയിപ്പോയി.. അത് പോട്ടെ.. ഇപ്പൊ ഇത്രയൊക്കെ മനസിലാക്കിയാ മതി.. കൂടുതല്‍ അറിയണോങ്കി പോയി ചരിത്രം പഠിച്ചിട്ട് വാ.. ഇത്ര മാത്രം മനസിലാക്കുക.. എന്നും പാവപ്പെട്ടവന് പരവതാനി വിരിക്കുന്ന ഒരു ഭരണഘടന ആണ് നമുക്ക്‌ ഉള്ളത്.. എങ്കിലേ ഉള്ളവനും ഇല്ലാത്തവനും തമ്മിലുള്ള വിടവ് നമുക്ക്‌ നികത്താന്‍ പറ്റൂ.. അതിനു വേണ്ടിയാണ് മഹനീയമായ ഈ സംവരണ സെറ്റ്‌ അപ്പ് .."

"സാറേ.. ദേ.. ആ മുന്നിലത്തെ റോയില്‍ ഇരുന്നു ബിരിയാണി അടിച്ചുകേറ്റി ഞെളിപിരി കൊള്ളുന്നവനെ കണ്ടോ.. ഞങ്ങടെ നാടിലെ വല്യ പുള്ളിയാ.. സ്വന്തമായി സ്വര്‍ണ്ണക്കട ഒക്കെ ഒള്ള ടീംസ് ആണ്.. ഇവനൊക്കെ ആണോ സാമ്പത്തികമായും സാമൂഹികമായും പിന്നില്‍ നില്‍ക്കുന്നെ??.."

"പറഞ്ഞല്ലോ.. അധികം ചോദ്യം ഒന്നും വേണ്ട.. അവനു സ്വന്തമായി ജെവെല്ലറി ഉണ്ടായിരിക്കാം.. പക്ഷെ ഇപ്പോഴും അവന്‍ നിന്നെപ്പോലുള്ള സവര്‍ണ്ണ മേലാളന്‍മാരുടെ ഹുങ്കിനും അഹന്തയ്ക്കും അടിയില്‍ കിടന്നു വിയര്‍പ്പ്മുട്ടുകയാണ്... "

"എന്തുവാ സാറെ ഈ പറയുന്നേ.. അണ്ണാക്ക് വരെ ബിരിയാണി വെട്ടിക്കേറ്റി ശ്വാസം വെലങ്ങീട്ടാ അവന്‍ ഇപ്പൊ വീര്‍പ്പു മുട്ടുന്നെ.."

"ധിക്കാരി.. അധികപ്രസംഗം പറയുന്നോ.. ഭരണഘടനയെ വെല്ലുവിളിച്ച കുറ്റത്തിന് നിന്നെയൊക്കെ ഞാന്‍ അഴി എന്നിക്കും.. പുല്ലേ..#!%$#%$"

    ഇല്ല, ഒരു രക്ഷയുമില്ല. തല്‍ക്കാലം രണ്ടാം പന്തികൊണ്ട് തൃപ്തിപ്പെട്ടു.. കിട്ടിയ എല്ലിന്‍കഷണങ്ങള്‍ അമൃത് പോലെ ആസ്വദിച്ചു കഴിച്ചു. എന്തായാലും ഏതാനും ദിവസങ്ങള്‍ക്കുള്ളില്‍ ആ സത്യം ബോധ്യമായി.. ഈ ഹോട്ടലില്‍ മാത്രമല്ല ഇന്ത്യ രാജ്യത്തെ എല്ലാ ഹോട്ടലിലും ഇതുപോലെ രണ്ടു പന്തികള്‍ ആണ്... ' എന്ന കൊടുമയ് സാര്‍ ഇത് !!'

   സ്വാതന്ത്യ ലബ്ധിക്ക് ശേഷം 65 വര്‍ഷങ്ങള്‍ പിന്നിട്ടിട്ടും ജാതി വ്യവസ്ഥയില്‍ ഊന്നിയ റിസര്‍വേഷന്‍ സിസ്റ്റം 'എന്നെപ്പോലുള്ള സവര്‍ണ്ണ മേലാളന്‍'മാരുടെ ഉറക്കം കെടുത്തുകയാണ്. ഒരു കാലഘട്ടത്തിന്റെ ശരി ആയിരുന്നു റിസര്‍വേഷന്‍ സിസ്റ്റം. ഇന്ത്യ മഹാരാജ്യത്ത്‌ ബ്രിട്ടീഷ് ഭരണ കാലത്തും അതിനു മുന്‍പും അത്യന്തം ഹീനമായ വര്‍ണ്ണ വിവേചനം നിലനിന്നിരുന്നു. അതിനാല്‍ തന്നെ പാര്‍ശ്വവല്‍ക്കരിക്കപ്പെട്ട ഒരുകൂട്ടം സമൂഹത്തിനു ഒരു കൈത്താങ്ങു അക്കാലത്ത് ആവശ്യവുമാരുന്നു. പക്ഷെ, വര്‍ത്തമാന ഇന്ത്യ കാണുന്നത് ഇതേ കൈത്താങ്ങ്‌ തന്നെ സമ്പന്ന-സവര്‍ണ്ണ സമുദായം എന്ന് വിശേഷിപ്പിക്കപ്പെടുന്ന, സ്വരം നഷ്ടമായ ഒരു പറ്റം നിസ്സഹായ ജന്മങ്ങളുടെ കൊരവള്ളിയില്‍ വടയക്ഷിയുടെ കൈകള്‍ പോലെ പിടി മുറുക്കുന്നതാണ്..
        ശരിയായ പോഷണം ലഭിക്കാത്ത സാഹചര്യത്തില്‍ വൈറ്റമിന്‍ ഗുളികകള്‍ ആവശ്യമാണ്. എന്ന് കരുതി പുട്ടും കടലയും കഴിക്കുന്ന ലാഘവത്തില്‍ ജീവിതകാലം മുഴുവന്‍ ഈ ഗുളികകള്‍ കഴിക്കുന്നത് അപകടകരമായ അവസ്ഥയാകും ക്ഷണിച്ചു വരുത്തുക. ഇത് തന്നെയാണ് സംവരണത്തിന്റെ കാര്യത്തിലും ഇന്ന് സംഭവിക്കുന്നത്. ഇന്ന് സംവരണം നീക്കം ചെയ്യാന്‍ പാടില്ലാത്ത ഒരു അവകാശം ആയിത്തീര്‍ന്നിരിക്കുന്നു.. ജാതി-മത-ലിംഗ വ്യത്യാസത്തിന്റെ മാത്രം പേരില്‍ ഉള്ളവന്‍ വീണ്ടും വീണ്ടും തടിച്ചു കൊഴുക്കുകയും ഇല്ലാത്തവന്‍ ടിയാന്മാരുടെ മേശയില്‍ നിന്നും വീഴുന്ന അപ്പക്കഷന്ങ്ങള്‍ക്കായി ഒരു നിശബ്ദമായ നിലവിളിയോടെ കാത്തിരിക്കുന്നതുമാണ് ഇന്ന് കാണാന്‍ സാധിക്കുന്നത്. വോട്ടു ബാങ്ക് രാഷ്ട്രീയം മാത്രം ലക്‌ഷ്യം വെയ്ക്കുന്ന രാഷ്ട്രീയ നേതൃത്വങ്ങള്‍ കുളം കലക്കി മീന്‍ പിടിക്കുകയും സംവരണ വിരുദ്ധ മുന്നേറ്റങ്ങള്‍ പൊളിച്ചടുക്കുകയും ചെയ്യുന്നു..
    ഇന്നത്തെ ഇന്ത്യയില്‍ ജാതിയോ മതമോ ഒരു പിന്നോക്കവസ്തയ്ക്കുള്ള കാരണം അല്ല. സാമ്പത്തികമായ പ്രാരാബ്ധങ്ങള്‍ ആണ് ഒരു വ്യക്തിയെ മുന്നോട്ടുള്ള പ്രയാണത്തില്‍ തട്ടി വീഴ്ത്തുക. ഈ സത്യം എല്ലാവര്ക്കും അറിയാവുന്നതുമാണ്. ഒരു ദളിത സമുദായക്കാരന്‍ ആയിരുന്ന ശ്രീ. കെ.ആര്‍. നാരായണന്‍ ഇന്ത്യന്‍ പ്രസിടന്റ്റ്‌ ആയത് എന്തെങ്കിലും സംവരണത്തിന്റെ വാലില്‍ തൂങ്ങിയല്ല. അതുപോലെ തന്നെ ശ്രീ. APJ അബ്ദുല്‍ കലാമും.. ഇവര്‍ രണ്ടു പേരും വളരെ സാമ്പത്തികമായി ബുദ്ധിമുട്ടിയിരുന്ന കുടുംബങ്ങളില്‍ നിന്നാണ് പുരോഗതിയിലേയ്ക്ക് കുതിച്ചുയര്‍ന്നത്. ഈ കുതിപ്പില്‍ ഒരിടത്തും ഇവര്‍ക്ക്‌ ആര്‍ക്കെങ്കിലും അവരുടെ ജാതി ഒരു പ്രശ്നമായി മാറിയില്ല. പ്രശ്നം തീര്‍ക്കുന്നത് സാമ്പത്തികമായ ഇല്ലായ്മകളും വല്ലായ്മകളും മാത്രം..
   വസ്തുതകള്‍ ഇങ്ങനെയായിരിക്കെ, പിന്നെ എന്ത് കൊണ്ട് സാമ്പത്തിക സംവരണം നിലവില്‍ വരുന്നില്ല എന്ന ചോദ്യം ഒരു അനാഥ പ്രേതത്തെ പോലെ ബംഗാള്‍ ഉള്‍ക്കടലിന്റെയും അറബിക്കടലിന്റെയും തീരങ്ങളില്‍ അലഞ്ഞു തിരിയുന്നു.. പുരോഗമന -വിപ്ലവാത്മക-പ്രസ്ഥാനങ്ങളും മതേതരത്വത്തിന്റെ മൊത്ത വ്യാപാരികളും ഈ വിഷയത്തില്‍ പുലര്‍ത്തുന്ന മൌനം അര്‍ത്ഥഗര്‍ഭമായി തന്നെ തുടരുന്നു..

ഇപ്പോള്‍ സംവരണത്തിന്റെ ഇക്വറ്റോറിയല്‍ മാനങ്ങള്‍ പുതിയ മേച്ചില്‍പ്പുറങ്ങള്‍ തേടുകയാണ്. പ്രൈവറ്റ്‌ സെക്ടറിലെ ജോലികള്‍ക്കും സംവരണം വേണം എന്നുള്ള ആവശ്യങ്ങള്‍ പോലും ഉയര്‍ന്നു കേള്‍കുന്നു.സംവരണ ശതമാനം ഇനിയും കൂട്ടി 60 ശതമാനം ആക്കണം എന്നുള്ള ആവശ്യം വേറെയും!!.. ജോലികള്‍ക്കുള്ള സംവരണം അവിടെ നിന്നും ഒരു പടി കൂടി കടന്ന് പ്രമോഷനുകള്‍ക്ക് കൂടി ബാധകമാക്കാനുള്ള നീക്കത്തിലാണ് സര്‍ക്കാര്‍. ഇതില്‍ ആശ്ചര്യത്തിന് വകയുണ്ട് എന്ന് തോന്നുന്നില്ല. അര്‍ഹരായവരെ ബൈപാസ്‌ ചെയ്തു നേടിയെടുത്ത സ്ഥാനങ്ങളില്‍ കഴിയുന്നവര്‍ക്ക് അടുത്ത മേഘലയിലെയ്ക്ക് ഉയരണം എങ്കില്‍ തീര്‍ച്ചയായും മറ്റൊരു ബൈപാസ്‌ അനിവാര്യം ആണ്. അപ്പോള്‍ സ്വാഭാവികമായും അവിടെയും ജാതി ഒരു മാനദണ്ഡം ആയെ തീരൂ!!

വാല്‍ക്കഷണം :-

         പെട്ടി ഓട്ടോകളില്‍ മുതല്‍ പ്രൊഫഷണല്‍ കോളജുകളില്‍ വരെ 60 ശതമാനം സീറ്റുകള്‍ ജാതിവ്യവസ്ഥ അടിസ്ഥാനമാക്കി റിസര്‍വ്‌ ചെയ്ത് , ബാക്കി വരുന്ന 40 ശതമാനം സീറ്റ് സ്ത്രീകള്‍ക്കായി നീക്കിവെയ്ക്കുകയും, രാജ്യത്തിന് തന്നെ ഭാരമായിത്തീരുന്ന ജനറല്‍/മുന്നോക്ക/സവര്‍ണ്ണ/പുരുഷ മൈ$%$മാരെ വല്ല ഉഗാണ്ടയിലെയ്ക്കോ പാക്കിസ്ഥാനിലെയ്ക്കോ അതുമല്ലെങ്കില്‍ ചൊവ്വയിലെയ്ക്കോ കയറ്റി അയയ്ക്കുകയും ചെയ്യുമ്പോള്‍ സമത്വത്തിന്റെയും വികസനത്തിന്റെയും വെണ്‍കൊറ്റ കുടകള്‍ രാജ്യമെങ്ങും വിടരുകയും സമാധാനത്തിന്റെ വെള്ളരിപ്രാവുകള്‍ ചിറകടിയ്ക്കുകയും ചെയ്യും !!

മഹനീയം.. ഈ മാതൃത്വം..

2012-09-29T13:46:00.000-07:00

മാതൃത്വത്തിന്റെ മഹത്വത്തെ പറ്റിയും പാല്‍ ചുരത്തുന്ന പയോധരങ്ങളെ പറ്റിയുമൊക്കെ വാഴ്ത്താത്ത കവികളില്ല.. വര്‍ണ്ണിക്കാത്ത എഴുത്തുകാരുമില്ല. ഏതു പുരാണം എടുത്ത്‌ പരിശോധിച്ചു നോക്കിയാലും ഏതു ഇതിഹാസങ്ങള്‍ പരതിയാലും അവിടെയെല്ലാം ജ്വലിച് നില്‍ക്കുവാന്‍ തക്കവിധം അമ്മിഞ്ഞപ്പാലിന്റെ മണമുള്ള ഏടുകള്‍ കാണാം.. ഇനി, ഇവരാരും പറഞ്ഞു തരാതെ തന്നെ മാതൃത്വത്തിന്റെ മാധുര്യത്തെ പറ്റി 'തള്ളയ്ക്ക് പിറന്ന' എല്ലാവര്‍ക്കും അറിയാവുന്നതാണ്.
ഉണ്ണിക്കണ്ണന്റെയും യശോദയുടെയും വാല്സല്യവും കുസൃതിയും തുളുമ്പുന്ന ചിത്രങ്ങള്‍ കാണാത്തവര്‍ നമ്മളില്‍ ആരുണ്ട് !!..

"നിന്നെ പ്രസവിച്ച ഉദരവും പാലൂട്ടിയ മുലകളും ഭാഗ്യം ചെയ്തവ!!.." ക്രിസ്തു നാഥന്റെ അമ്മയെ പറ്റി ജനക്കൂട്ടത്തിലെഏതോ ഒരു സ്ത്രീ വിളിച്ചു പറഞ്ഞ വാക്കുകള്‍ ഇങ്ങനെ..
' മുസ്ലിംസിനെ പറ്റി ഒരക്ഷരം മിണ്ടരുത് ' എന്ന് നിലവില്‍ ഓര്‍ഡര്‍ ഉള്ളതിനാലും നാളെയും ഈ ബ്ലോഗില്‍ പോസ്റ്റ്‌ ഇടാന്‍ ഞാന്‍ ആഗ്രഹിക്കുന്നതിനാലും ഇസ്ലാം മതത്തിലെ മാതൃത്വ സങ്കല്‍പ്പത്തെ പറ്റി പറയാന്‍ ഞാന്‍ ധൈര്യപ്പെടുന്നില്ല.. സാമുദായിക സംതുലനം ടാലി ആകാത്തതില്‍ വിഷമിക്കുന്നവര്‍ തല്‍ക്കാലം ക്ഷമിക്കുക.

അങ്ങനെ ചരിത്രത്തിന്റെ കീറിപ്പറിഞ്ഞ ഓള്‍ഡ്‌ ജനറേഷന്‍ ഏടുകള്‍ മുഴുവന്‍ പെറ്റമ്മയുടെ താരാട്ട് പാട്ടുകളുടെ ഈരടികളാല്‍ മുഖരിതമാവുമ്പോള്‍ ഈ ഫേസ്ബുക്ക്‌ ജനരെഷനില്‍ മാതൃത്വത്തിന്റെ മഹാത്മ്യം വിളിച്ചോതാന്‍ ഒരുത്തിയും ഇല്ലല്ലോ എന്നോര്‍ത്ത്‌ നെടുവീര്‍പ്പുകള്‍ വീട്ടിരുന്നവര്ക്ക് ഇനി ആശ്വസിക്കാം.. നിങ്ങളുടെ ദുഖങ്ങളും ആശങ്കകളും എല്ലാം അബോര്‍ട്ട് ചെയ്തു ചവറ്റുകുട്ടയില്‍ എറിഞ്ഞെക്കുക.. ഇതുവരെ പെറ്റവരും ഇപ്പോള്‍ പെറുന്നവരും ഇനി പെറാനിരിക്കുന്നവരുമായ മലയാളി മങ്കകളുടെ ബ്രാന്‍ഡ്‌ അംബാസിഡര്‍ ആയി ഇനി ശ്വേതാ മേനോന്‍ ഉള്ളപ്പോള്‍ നിങ്ങള്‍ എന്തിനു ആശങ്കപ്പെടണം..!! എന്തിനു പരിഭ്രമിക്കണം!!..

ഒരുകാലഘട്ടത്തില്‍ ഗര്‍ഭനിരോധനത്തിന്റെയും അതിനുള്ള മാര്‍ഗങ്ങളുടെയും "ചൂടേറിയ" അപ്പസ്തോലയായിരുന്ന ടി നായിക (അങ്ങനെയാണല്ലോ ടിയാള്‍ സുപ്രസിദ്ധയായതും) ഇന്ന് ഗര്‍ഭധാരണത്തെപ്പറ്റിയും അതിന്റെ മഹത്വത്തെപ്പറ്റിയും ഒക്കെ കേരളത്തിലെ സ്ത്രീകളെ ബോധവല്‍ക്കരിക്കാന്‍ ഇറങ്ങിയതിനെ കാലത്തിന്റെ മറ്റൊരു കാവ്യനീതി എന്ന് മാത്രമേ വിശേഷിപ്പിക്കാനാവൂ. എങ്ങനെയൊക്കെ വിശേഷിപ്പിചാലും ശ്വേതാമെനോനും ബ്ലസ്സിയും മലയാള സിനിമയുടെ അഭ്രപാളികളില്‍ പുത്തന്‍ചരിത്രം രചിക്കുകയാണ്. സ്വന്തം ഗര്ഭകാലഘട്ടവും പ്രസവവും തല്‍സമയം ചിത്രീകരിച്ച് മലയാള സിനിമയില്‍ മറ്റൊരു ന്യൂ ജനറേഷന്‍ ട്വിസ്റ്റ്‌ സൃഷ്ടിച്ചിരിക്കുകയാണ് ശ്രീമതി ശ്വേത. ഇന്നിപ്പോള്‍ കേരള സര്‍ക്കാരിന്റെ ഗര്‍ഭിണികള്ക്കായുള്ള പരസ്യങ്ങളില്‍ പോലും ശ്വേത ആണ് താരം..
(അരി ഇടിച്ചുകൊണ്ടിരിക്കുമ്പോള്‍ 'ദാ വന്നു ,ദേ പോയി എന്ന മട്ടില്‍ കൂള്‍ കൂളായി കുഞ്ഞുങ്ങളെ പ്രസവിച്ചിരുന്ന ചരിത്രം വിളംബിക്കൊണ്ടിരിക്കുന്ന അമ്മച്ചിമാര്‍ ക്ഷമിക്കുക.. അതൊന്നും ഒരു സംഭവമേ അല്ല, ഇതാണ് ലോകാത്ഭുതം..)

പുതിയ ചിത്രത്തിലെ വേഷത്തെക്കുറിച്ച് ശ്വേത പറയുന്നത് ഇങ്ങനെ..

‘ ഗര്‍ഭം ധരിക്കലും പ്രസവവും സ്ത്രീയുടെ മാത്രം ജോലിയല്ല അതിന്റെ ഓരോ നിമിഷവും പുരുഷനും പങ്കുണ്ട്. ഇതു ലോകത്തോടു പറയാന്‍ കിട്ടിയ അപൂര്‍വ്വ അനുഭവമാണിത്. അതു നടിയെന്ന നിലയില്‍ ഞാന്‍ പൂര്‍ണമായും ഉപയോഗിക്കുന്നുവെന്നുമാത്രം’-

"അഭിനയം തന്റെ ജീവനാണെന്നും അതിനാല്‍ ജീവന്‍ കൊണ്ടുതന്നെ ലോകത്തോട് ഇക്കാര്യം പറയാനാഗ്രഹിക്കുന്നു. സ്ത്രീ ഗര്‍ഭം ധരിക്കുന്നതുമുതല്‍ പുരുഷനും കൂടെയുണ്ടാവണം... ഗര്‍ഭിണിയാകുന്നതോടെ സ്ത്രീയെ രോഗിയെപ്പോലെ കാണുന്ന സമൂഹമാണു നമ്മുടേത്.. അപ്പോഴാണു ഗര്‍ഭിണിയായാല്‍ അതു സ്ത്രീയോടു കാണിക്കുന്ന അനീതിക്കെതിരെ പ്രതികരിക്കാനുള്ള മാര്‍ഗം കൂടിയാണെന്നു താനും ഭര്‍ത്താവും തിരിച്ചറിഞ്ഞത്.."

ഭാരതീയ സ്ത്രീത്വത്തിന്റെ നവോദ്ധാനത്ത്തിനും ശാക്തീകരണത്തിനും സര്‍വ്വോപരി മലയാളസിനിമയോടുള്ള പറിച്ചുമാറ്റാനാകാത്ത പൊക്കിള്‍ക്കൊടിബന്ധത്തിന്റെ അന്യൂനമായ പുഷ്ടിപ്പിനുമായി സ്വന്തം ജീവിതം പോലും കാമറയ്ക്ക് മുന്നില്‍ തുറന്നു വെയ്ക്കാന്‍ തയ്യാറായ ഈ മഹാ നടിയ്ക്ക് ഭാരത രത്നമോ കുറഞ്ഞത് പത്മവിഭൂഷന്‍ എന്കിലുമോ കൊടുക്കണം എന്നതാണ് ഈയുള്ളവന്‍റെ അഭിപ്രായം.. (പട്ടാള വേഷത്തില്‍ അഭിനയിച്ച ലാലിന് ലഫ്‌.കേണല്‍ പദവി കൊടുത്തില്ലേ .. അപ്പൊ ഇവിടെ ജീവിച്ചഭിനയിച്ച ശ്വേതയ്ക്ക് ഇതില്‍ കുറഞ്ഞ ഒരു അവാര്‍ഡ്‌ ഉണ്ടോ) പ്രത്യേകിച്ച് ഐശ്വര്യ ബച്ചന്റെ പ്രസവ കാലഘട്ടം ഓര്‍മയുള്ള മീടിയാക്കാരന്‍ എങ്കിലും ഈ വാദത്തെ അനുകൂലിക്കുമെന്ന് തോന്നുന്നു.. മുന്‍ വിശ്വ സുന്ദരിയുടെ കുളി തെറ്റിയ ദിവസം മുതല്‍ തിരു വയര്‍ ഒഴിയലിന്റെ മഹനീയ നിമിഷങ്ങള്‍ വരെ എന്തോരം ഓ ബി വാനുകള്‍ ആണ് ബച്ചന്‍ കുടുംബത്തിനു പിന്നാലെ കൂടിയത്. എന്നിട്ട് അതിനൊക്കെ പുല്ലു വില കൊടുത്തോ ബച്ചനും കൂട്ടരും.. മാധ്യമങ്ങള്‍ സ്വൈരം തരണം എന്നാണു അന്ന് ബിഗ്‌ ബി ട്വീട്ടിയത്. ഇതൊന്നും പോരാഞ്ഞ് ഒടുക്കം ബച്ചിയുടെ ഒരു സ്റ്റില്‍ പോലും മീഡിയയില്‍ കൊടുത്തില്ല.. സ്വകാര്യത വേണം പോലും .. സ്വകാര്യത.. അഹങ്കാരികള്‍ !!.. ബച്ചനും കൊച്ചനുമൊക്കെ ഞങ്ങടെ ശ്വേതയെ കണ്ടു പഠിക്കട്ടെ!!

   സുതാര്യതയില്‍ തന്നെ കവച്ചുവയ്ക്കുന്ന ഒരു കൊപ്പനും ഈ ഭൂലോകത്ത് രണ്ടു കാലില്‍ നടക്കുന്നില്ല എന്നും പറഞ്ഞു വിജ്രുംഭിച്ചിരുന്ന ബഹു.സി.എം ഉമ്മന്‍ചാണ്ടി, ഈ വാര്‍ത്ത കേട്ടതിനു ശേഷം കൃത്യം രണ്ടു മണിക്കൂര്‍ മുപ്പതു മിനുട്ടുകള്‍ എടുത്തുവെത്രെ ഞെട്ടലില്‍ നിന്നും മുക്തി നേടാന്‍!!..

ഇതുപോലൊരു മഹാ നടിയെ കേരളക്കരയ്ക്ക് ലഭിക്കാന്‍ മാത്രം പുണ്യം നമ്മളൊക്കെ ചെയ്തിട്ടുണ്ടോ.. മുഖ്യധാര മാധ്യമങ്ങള്‍ അര്‍ഹിക്കുന്ന പരിഗണന ഈ പുണ്യപ്രസവത്തിനു കൊടുക്കുന്നുണ്ടോ എന്നത് നാം മനസിരുത്തി ചിന്തിക്കേണ്ടതാണ് .
      എക്കാലവും കേരളത്തിലെ സ്ത്രീ സമൂഹത്തിന്റെ നവോധാനത്തിനു വേണ്ടി അശ്രാന്തം പരിശ്രമിച്ച ശ്വേത മേനോന്‍ ഒരിക്കല്‍ കൂടി    സ്വന്തം കഥാ പാത്രങ്ങളെ കവച്ചു വെയ്യ്ക്കുന്ന വിധമാണു തന്റെ ബോള്‍ഡ്‌നെസ് എന്ന് ഉറക്കെ പ്രഖ്യാപിച്ചിരിക്കുകയാണ്. പുരുഷ കേന്ദ്രീകൃതമായ ലോകത്ത്‌ ഇത്തരം ധീരമായ ചുവടു വെയ്പ്പുകളിലൂടെ സ്ത്രീ ഒരു സംഭവം തന്നെയാണ് എന്ന് ഇനിയും ഇനിയും തെളിയിക്കാന്‍ ശ്വേതയ്ക്ക് കഴിയട്ടെ.. പുണ്യ പ്രസവത്തിലൂടെ മലയാള സിനിമ ലോകത്തെയും സര്‍വ്വോപരി വിശ്വ മാതൃത്വത്തെ തന്നെയും ധന്യമാക്കിയ അമ്മയ്ക്കും കുഞ്ഞിനും നൂറു ചുകപ്പന്‍ അഭിവാദ്യങ്ങള്‍!!
കണ്ടു വളരാനും അനുകരിക്കാനുമായി 'പാലോളി മാണിക്യം', 'രതിനിര്‍വേദം ', കയം എന്നീ ക്ലാസ്സിക്‌ ചിത്രങ്ങളിലെ ശക്തമായ കഥാപാത്രങ്ങള്‍ക്ക് പുറമേ പുറമേ, സ്വന്തം പിറവിയുടെ ക്ലോസ് അപ്പ്‌ മുഹൂര്‍ത്തങ്ങള്‍ കൂടി തന്റെ മകള്‍ക്കായി സമ്മാനിക്കുമ്പോള്‍ ആണ് ശ്വേതയിലെ അമ്മ വ്യത്യസ്തയായ ഒരു അമ്മയായി മാറുന്നതും..

    ഇങ്ങനെ, കേരളത്തിലെ ബ്ലഡി സദാചാരക്കാര്‍ സ്വകാര്യമായിരിക്കണം എന്ന് ശഠിക്കുന്ന നിമിഷങ്ങളും ദൃശ്യങ്ങളും തുറന്നു കാട്ടാനുള്ള ചങ്കൂറ്റം ഇനിയും ഇനിയും ധാരാളം വനിതാ സെലിബ്രിട്ടികള്‍ക്ക് ഉണ്ടാകട്ടെ എന്ന് ആശംസിക്കുന്നു.. അപ്പോളാണ് സ്ത്രീ താത്വികമായും യാഥാര്‍ത്ഥ്യമായും സ്വതന്ത്രയാകുക..!!

ഊര് വിലക്കികള്‍ ഓര്‍ക്കാതെ പോകുന്നത് ..

2012-09-24T10:40:00.003-07:00

മലയാള സിനിമയുടെ നടന തിലകം ഇനി ഒരു ഓര്‍മ്മ മാത്രമാവുകയാണ്.. ഓര്‍മ്മയില്‍ സൂക്ഷിക്കാന്‍ ഒട്ടേറെ അനശ്വര കഥാപാത്രങ്ങള്‍ ബാക്കിവെച് തിലകന്‍ എന്ന മഹാനടന്‍ യാത്രയാവുമ്പോള്‍ അഭിനയ തികവിന്റെയും ഭാവാത്മകതയുടെയും ഒരു യുഗം തന്നെ ഇവിടെ അവസാനിക്കുന്നു.. മലയാള സിനിമയുടെ പെരുന്തച്ചന്‍, തല കുനിക്കാത്ത നിഷേധി, മലയാളത്തിന്റെ മഹാനടന്‍.. അങ്ങനെ ഒരു പോസ്റ്റില്‍ ഒതുങ്ങാത്ത വിധമാണ് അദ്ദേഹത്തിന്റെ വിശേഷണങ്ങള്‍ നീളുന്നത്.

മുണ്ടക്കയത്ത് ഒരു നാടകസമിതിയിലൂടെ ആയിരുന്നു തിലകന്‍റെ അഭിനയ ലോകത്തേയ്ക്കുള്ള അരങ്ങേറ്റം. കേരള പീപ്പിള്‍ ആര്‍ട്സ്, കൊല്ലം കാളിദാസ കലാകേന്ദ്രം, ചങ്ങനാശ്ശേരി ഗീത എന്നീ പ്രൊഫഷണല്‍ നാടക ട്രൂപ്പുകളിലും തിലകന്‍ ഒരു കാലത്ത്‌ സജീവമായിരുന്നു. ഉള്‍ക്കടല്‍ എന്ന ചിത്രത്തിലൂടെ അഭ്ര പാളികളിലെ അഭിനയ ജീവിതത്തിനു തുടക്കം കുറിച്ചു. യവനികയിലെ അഭിനയത്തിന് സംസ്ഥാന സര്‍ക്കാരിന്‍റെ അവാര്‍ഡ് ലഭിച്ചു. 1988ല്‍ ഋതുഭേദത്തിലെ അഭിനയത്തിന് തിലകന്‍മികച്ച സഹനടനുള്ള ദേശീയ അവാര്‍ഡ് നേടി. 1990ല്‍ പെരുന്തച്ചനിലൂടെ മികച്ച നടനുള്ള സംസ്ഥാന അവാര്‍ഡും ഫിലിം ഫെയര്‍ അവാര്‍ഡും സ്വന്തമാക്കി. 2005ല്‍ ഫിലിം ഫെയര്‍ തിലകനെ തെന്നിന്ത്യയിലെ അപൂര്‍വ പ്രതിഭയായി ബഹുമാനിച്ചു. 2007ല്‍ ഏകാന്തത്തിലെ അഭിനയത്തിന് ദേശീയ അവാര്‍ഡ് കമ്മിറ്റി സ്പെഷല്‍ ജൂറി അവാര്‍ഡ് നല്‍കി. 2009ല്‍ രാഷ്ട്രം തിലകനെ പത്മശ്രീ നല്‍കി ആദരിച്ചു.

തറവാടിയായ കാരണവര്‍, മക്കളെ നേര്‍വഴിയ്ക്ക് നടത്താന്‍ ശ്രമിക്കുന്ന, ശാട്യം ഏറെയുള്ള അച്ചന്‍, വടയക്ഷികളെ കാഞ്ഞിര പലകയില്‍ തറച്ച് പോസ്റ്റര്‍ ആക്കുന്ന മന്ത്രവാദി, അങ്ങനെ ഇദ്ദേഹം അനശ്വരമാക്കിയ കഥാപാത്രങ്ങള്‍ ഒട്ടേറെ.. തന്റെ മിക്ക കഥാ പാത്രങ്ങളുടെയും സ്ഥായി സ്വഭാവമായിരുന്ന ഒരു തരം നിഷേധാത്മക ഭാവം പലപ്പോഴും അദ്ദേഹത്തിന്റെ വ്യക്തി ജീവിതത്തിലും അന്തര്‍ലീനമായിരുന്നു എന്ന് വേണം കരുതാന്‍.. അപ്രിയ സത്യങ്ങള്‍ പരസ്യമായി പറയാന്‍ പാടുള്ളതല്ല എന്ന കോര്‍പ്പറേറ്റ് തിയറി അദ്ദേഹത്തിന് ഒരു കാലത്തും സ്വീകാര്യമല്ലായിരുന്നു.. 'നേരെ വാ.. നേരെ പോ ' എന്നുള്ള അദ്ദേഹത്തിന്റെ സ്വഭാവം അദ്ദേഹത്തിന്റെ കരിയറില്‍ ഉണ്ടാക്കിയ പ്രശ്നങ്ങള്‍ ചില്ലറയല്ല.
ജീവിച്ചിരിക്കുമ്പോള്‍ സ്വന്തം മാതാപിതാക്കളെ സ്റ്റോര്‍ റൂമിലോ വീടിന്റെ പിന്നാമ്പുറത്തോ അതുമല്ലെങ്കില്‍ വല്ല ഓള്‍ഡ്‌ ഏജ്‌ ഹോമിലോ പുഴുവരിക്കാന്‍ വിടുകയും; മരിച്ചുകഴിയുമ്പോള്‍ ചന്ദനപ്പെട്ടി, പൊന്നിന്‍കുരിശ്, വാദ്യമേളം, ആര്‍ച്ച്‌ ബിഷപ്പിന്റെ അനുസ്മരണ പ്രസംഗം തുടങ്ങിയ കലാപരിപാടികളോടെ അവാര്‍ഡ് ഇവന്ടിനെ വെല്ലുന്ന രീതിയില്‍ ശവ സംസ്കാരം നടത്തുകയും ചെയ്യുന്ന ന്യൂ ജനറേഷന്‍ സംസ്കാരം നമുക്കൊക്കെ ഏറെ പരിചിതമാണ്. സമാനമായ ഒരുതരം കലാപരിപാടി മലയാള സിനിമാലോകവും അണിയറ പ്രവര്‍ത്തകരും ഇപ്പോള്‍കാഴ്ച്ച വെച്ചുകൊണ്ടിരിക്കുകയാണ്.

        സമീപ കാലഘട്ടത്തില്‍ മലയാള സിനിമ ലോകത്ത് അരങ്ങേറിയ 'ഊര് വിലക്കല്‍' നാടകങ്ങള്‍ നിഷ്പക്ഷമായി വിലയിരുത്തിയിട്ടുള്ള ആര്‍ക്കും തിലകനോടു ചലച്ചിത്ര ലോകം അര്‍ഹിക്കുന്ന നീതി പുലര്‍ത്തി എന്ന വാദത്തോട് യോജിക്കാനാവില്ല. മലയാളത്തിന്റെ മഹാ താരത്തെ ദീര്‍ഘകാലം മലയാള സിനിമയുടെ പടിപ്പുരയുടെ പുറത്ത് നിര്‍ത്തുകയും ഒരു വന്ദ്യ വയോധികന് കൊടുക്കേണ്ട പരിഗണന പോലും കൊടുക്കുകയും ചെയ്യാതിരുന്നവര്‍ക്ക് കാലത്തിന്റെ കാവ്യനീതി എന്നത് എന്താണെന്ന് മനസിലാക്കാന്‍ അധികകാലം കാത്തിരിക്കേണ്ടി വരില്ല.

            സോഷ്യല്‍ മീഡിയക്കാര്‍ സന്തോഷ്‌ പണ്ടിട്ടിനെയും പ്രിഥ്വിരാജിനെയുമൊക്കെ എത്രത്തോളം നികൃഷ്ടജന്മങ്ങള്‍ ആയി ആണോ കണക്കാക്കുക അതിനേക്കാലൊക്കെ വെറുക്കപ്പെട്ട ഒരു കാന്‍വാസില്‍ ഈ നടനെ തളച്ചിടാന്‍ ശ്രമിച്ചവര്‍ ഇപ്പോള്‍ തിലകന്‍ ചേട്ടന്‍ ഞങ്ങടെ പൊന്നാണ്, തേനാണ് , പാലാണ് എന്നൊക്കെ പറഞ്ഞു വിങ്ങിപ്പൊട്ടുന്നത്‌ കാണുമ്പോള്‍ മനസ്സില്‍ തികട്ടിവരുന്ന വികാരം അതേപടി ഇവിടെ എഴുതി വെച്ചാല്‍ മോശമാകും എന്ന് തോന്നുന്നു. ഇതേ കൊഞ്ഞാണന്മാര്‍ എല്ലാം കൂടി നാളെ തിലകന്റെ പേരില്‍ ഒരു അവാര്‍ഡ്‌ ഏര്‍പ്പെടുത്തിയാല്‍ പോലും അതില്‍ അത്ഭുതപ്പെടെണ്ടതുണ്ട് എന്ന് തോന്നുന്നില്ല.. കാരണം നാണം, മാനം, ഉളുപ്പ് അഭിമാനം,നട്ടെല്ല് ഇതൊന്നും മാര്‍ക്കറ്റില്‍ കിട്ടുന്നതല്ലല്ലോ. ഏതായാലും ടി സാറന്മാര്‍ക്കെല്ലാം തന്നെ സുഭദ്രമായ ഒരു രാഷ്ട്രീയ ഭാവി ഉണ്ട് എന്നത് കോവര്‍ കഴുതകളായ ജനങ്ങളെ സംബന്ധിച്ച് ഏറെ ആശങ്കാജനകം ആണ്..!!
' ഞങ്ങടെ സംഘടനയുടെ അരഞ്ഞാണ ചരടിന്റെ ബലത്തിലാണ് മലയാള സിനിമ നിന്ന് പിഴച്ചു പോകുന്നത്. ഞങ്ങളോട് മൊടയുമായി വന്നവന്‍ ഇവിടെ ഒരു സിനിമയും ഒലത്തണ്ട, ഒരു കോപ്പും ഒണ്ടാക്കണ്ട' എന്ന നിഷേധ മനോഭാവമാണ് ഇവിടത്തെ പല താര-സാങ്കേതിക- സംഘടനകളും വെച്ചു പുലര്‍ത്തുക. വിലക്കാനായി മാത്രം യോഗം കൂടുന്ന ഇതുപോലെയുള്ള കുണ്ടികുലുക്കി പക്ഷികള്‍ ചലച്ചിത്ര ലോകത്ത്‌ മാത്രമല്ല ജീവിതത്തിന്റെ സര്‍വ മേഘലകളിലും ആധിപത്യം സ്ഥാപിച്ചു വരുന്നുണ്ട്-പ്രത്യേകിച്ചും കേരളത്തില്‍. ആധ്യാത്മിക-ധാര്‍മിക-യുവജന പ്രസ്ഥാനങ്ങള്‍ എന്ന് അവകാശപ്പെടുന്ന സംഘടനകള്‍ പോലും ഇത്തരം ക്ഷുദ്രീകരണ ശക്തികളുടെ തായംകളികള്‍ക്ക്‌ വേദിയാകുന്നത് നാം അനുദിനം കണ്ടുവരുന്നു. അപ്പോള്‍ എല്ലാ വിധ ഹറാം പെറപ്പുകളുടെയും ടൂറിസ്റ്റ്‌ പ്ലേസ് ആയ സിനിമയുടെ കാര്യം പറയാനുണ്ടോ !!. 'കൂടുതല് കളിച്ചാല്‍ നിന്നെ ഞങ്ങളങ്ങു വിലക്കിക്കളയും ' എന്നാണു ഇക്കൂട്ടരുടെ ഭീഷണിയും. പാര്‍ട്ടി ഗ്രാമങ്ങളില്‍ നിലനിന്നുപോരുന്ന പോരുന്ന ഊര് വിലക്കലിനോടോ തുറമുഖങ്ങളിലെ ക്വാറന്റയിനോടോ മാത്രമേ ടിയാന്മാരുടെ വിലക്കലിനെ ഉപമിക്കാനാവൂ. ഇപ്രകാരം വിലക്കപ്പെടുന്നവന് ഇഹലോകത്തിലോ പരലോകത്തിലോ മോക്ഷം ലഭിക്കില്ല പോലും!!.
                  നിന്ദാകരമായ ഇത്തരം ഒറ്റപ്പെടുത്തലുകളെയും ഊരുവിലക്കലുകളെയും കാറ്റില്‍പ്പറത്തി തിലകന്‍ സാറിന് മലയാള സിനിമയിലേയ്ക്ക്‌ ശക്തമായ തിരിച്ചു വരവിനു അവസരം ഒരുക്കിയ സംവിധായകന്‍ രഞ്ജിത്ത് പ്രത്യേകം അഭിനന്ദനം അര്‍ഹിക്കുന്നുണ്ട്. രഞ്ജിത്ത് തന്നിലര്‍പ്പിച്ച വിശ്വാസം അതിന്റെ എല്ലാ വിധ പരിപൂര്‍ണ്ണതയിലും തിലകന്‍ കാത്തുസൂക്ഷിച്ചു. തിലകന്റെ അഭിനയ ശോഭയ്ക്ക് മുന്നില്‍ പിടിച്ചു നില്‍ക്കാന്‍ സൗത്ത്‌ ഇന്ത്യയിലെ ഇന്ഗ്ലിഷ് സംസാരിക്കുന്ന ഏക നടന്‍ ".ക്ക.. മ്മ..ന്ന..ങ്ങ..' എല്ലാം വരയ്ക്കുന്നത് നമ്മള്‍ 'ഇന്ത്യന്‍ റുപ്പീ'യില്‍ കണ്ടറിഞ്ഞതാണ്..
   ന്യു ജനറേഷന്‍ തരംഗത്തില്‍ പെട്ട് ഒലിച്ചു പോകാതിരിക്കാന്‍ മലയാളത്തിന്റെ സൊ കോള്‍ഡ്‌ സൂപ്പര്‍-മെഗാ-യുനിവേഴ്സല്‍ താരങ്ങള്‍ കൈ കാലിട്ടടിക്കുമ്പോള്‍ ജനറേഷന്‍ ഗ്യാപ്‌ ബാധിക്കാത്ത ഒരു മഹാ സംഭവം തന്നെയാണ് താന്‍ എന്ന് 'ഉസ്താത്‌ ഹോട്ടല്‍' എന്ന നവതലമുറ ചിത്രത്തിലൂടെ തിലകന്‍ തെളിയിക്കുകയുണ്ടായി.

     തന്റെതായ മാനറിസങ്ങളും ആരുടെ മുന്നിലും അടിയറവ്‌ വെയ്ക്കാത്ത കാഴ്ച്ചപ്പാടുകളുമായി ഒരു മഹാമേരു പോലെ മലയാള സിനിമയില്‍ തന്റെതായ സിംഹാസനം ഉറപ്പിച്ച അഭിനയ ലോകത്തെ ഈ മഹാനായ ഔട്ട്‌സ്പോക്കണ്‍ താരകത്തിന്, മഹാനല്ലാത്ത വെറും കൂതറയായ ഈ കോട്ടയംകാരന്‍ ഔട്ട്‌സ്പോക്കന്‍ സോളിന്റെ ആദരാഞ്ജലികള്‍..

ഇ-സാമ്പാറും മാവേലിയും പിന്നെ കുലംകുത്തിയും

2012-08-23T08:19:00.004-07:00

ഐശ്വര്യത്തിന്റെ സൈറന്‍ മുഴക്കി വീണ്ടുമൊരു പൊന്നോണം കൂടി വരവായി. മാവേലി തമ്പുരാന്‍ വീടിന്റെ ഉമ്മറപടിയിലെത്തി കേറണോ വേണ്ടയോ എന്ന ശങ്കയില്‍ നില്‍ക്കുകയാണ്. പിന്നെന്താ തിരുമനസ്സിനെ അകത്തേയ്ക്ക് ക്ഷണിച്ചു സപ്രമഞ്ചത്തിലേയ്ക്ക് ആനയിക്കാന്‍ ഇയാള്‍ക്ക്‌ ഇത്ര അമാന്തം എന്നായിരിക്കും നിങ്ങളുടെ സംശയം. ഒന്നുമല്ലേലും 'അതിഥി ദേവോ ഭവ ' എന്നാണല്ലോ ആര്‍ഷഭാരതത്തിലെ മാമുനിമാര്‍ നമുക്ക്‌ പകര്‍ന്നു തന്ന പൈതൃകവും സംസ്കാരവും. മാത്രവുമല്ല, ഒരു സെന്‍സര്‍ എന്യുമരെട്ടറെ പോലെ വീട്ടുവാതില്‍ക്കല്‍ വിനയാന്വിതനായി നില്‍ക്കുന്നത്‌ ഒരു എക്സ്-രാജാവ്‌ ആകുമ്പോള്‍ പ്രോട്ടോക്കോള്‍ പ്രകാരം നല്‍കേണ്ട ബഹുമാനാദരവുകള്‍ നല്കിയില്ലേല്‍ കേസ് വേറെയാകും. ഒരു ഭരണഘടനാപ്രതിസന്ധിയിലെയ്ക്ക് ഊതിപ്പെരുപ്പിച്ച് വലുതാക്കാന്‍ ഒരു പ്രശ്നവും കിട്ടാതെ കാജാബീഡിയും വലിച്ചു സൈബര്‍ സ്പേസില്‍ അലഞ്ഞുതിരിയുന്ന ഫേസ് ബുക്ക്‌ പാണന്മാര്‍ ഇതെങ്ങാനും സ്കെച്ച് ചെയ്‌താല്‍!!.. തമ്പുരാനെ!!.. എന്റെ കാര്യം പോക്കായി !!

വാസ്തവത്തില്‍, മേല്പറഞ്ഞ പോലുള്ള ബഹുമാനക്കുറവ്‌ ഒന്നും ഉണ്ടായിട്ടല്ല കേട്ടോ ഞാനിങ്ങനെ അലക്ഷ്യ ഭാവത്തില്‍ നില്‍ക്കുക. ഓണത്തിനും വിഷുവിനും ക്രിസ്തുമസിനുമൊക്കെ തുളസിയിലയും കൂവളത്തിലയും സമാസമം ചേര്‍ത്ത് തിളപ്പിച്ച കഞ്ഞി വെള്ളം കുംബിളിലാക്കി ചവച്ചരച്ചു കുടിയ്ക്കുന്ന സൊ കോള്‍ഡ്‌ കോരന്മാരുടെ പട്ടികയിലാണ് എന്റെ പേരും. ഇമ്മാതിരിയുള്ള ഒരുതരം ഗതിയില്ലായ്മയില്‍ നട്ടം തിരിയുമ്പോള്‍ എന്ത് , എവിടെന്നെടുത്ത്‌ , എങ്ങനെ മൂപ്പിലാന് സദ്യയൊരുക്കി കൊടുക്കും എന്നുള്ള ഒരു കണ്ഫ്യൂഷനും ഫീല്‍ ചെയ്തു തുടങ്ങിയിട്ടുണ്ട് . കാണം വിറ്റുകിട്ടുന്ന കാശിനു തിരുമേനിയ്ക്ക് KFC ചിക്കന്‍ വാങ്ങിക്കൊടുക്കാം എന്ന് കരുതിയാല്‍ ആധാരക്കെട്ടുകള്‍ എല്ലാം പണയത്തിലാണ്. ഇനി, കെ.എഫ്.സി വേണ്ട പകരം വല്ല അവിയലോ സാമ്പാറോ ഒക്കെ കൂട്ടി ഒരു കണ്‍വെന്‍ഷനല്‍ വെജ് സദ്യ ഒണ്ടാക്കി കൊടുക്കാം എന്ന് വെച്ചാല്‍ പച്ചക്കറി ചന്തയിലെയ്ക്ക് തീ വില മൂലം എത്തിനോക്കാന്‍ വയ്യ..

എന്നെപ്പോലുള്ള ബിലോ ക്ലാസ്‌ കോരന്മാര്‍ക്ക് കേന്ദ്ര സര്‍ക്കാര്‍ മൊബൈല്‍ ഫോണോ ടാബ് ലറ്റോ മറ്റോ ഫ്രീ ആയി കൊടുക്കും എന്ന് കേട്ടായിരുന്നു. എത്രയും വേഗം കയ്യിലോട്ടു കിട്ടിയിരുന്നേല്‍ മുരിങ്ങക്കൊലിനും മത്തങ്ങയ്ക്കും പകരം ഈ കോപ്പൊക്കെ കണ്ടിച്ചിട്ട് ഒരു 'ഇ-സാമ്പാര്‍' വെച്ച് കൊടുക്കാമായിരുന്നു.. ഇനി, ഓണക്കോടിയുടെ കാര്യമാണേല്‍ പറയാനുമില്ല. പിന്നെയും ഒരു ആശ്വാസം ഉണ്ടാരുന്നത് ഇത്തവണ എല്ലാ കേരളീയര്‍ക്കും വിദ്യാഭ്യാസ വകുപ്പ്‌ വക ഓണക്കോടികള്‍ സൌജന്യമായി കൊടുക്കും എന്നൊരു ശ്രുതി കേട്ടിരുന്നു. ഫേസ്ബുക്കന്മാര്‍ പറഞ്ഞുള്ള അറിവാണ്. ഒള്ളതാണോ എന്തോ !!.. ഹരിത കേരളത്തില്‍ ഹരിതാഭ ഓണം ആണത്രേ ഇത്തവണ ആഘോഷിക്കുക. പച്ചക്കരയുള്ള കസവ് സാരിയും പച്ചബ്ലൌസും ധരിച്ച മലയാളി മങ്കമാരും പച്ചമുണ്ടും ഷര്‍ട്ടും ധരിച്ച മങ്കന്മാരും പച്ച നിറമുള്ള SAS പേപ്പര്‍ വാഴയിലയില്‍ പച്ചരി ചോറും പച്ചടിയും കൂട്ടി ഓണമുണ്ണുന്ന കാഴ്ച സമ്പൂര്‍ണ്ണ സോഷ്യലിസത്തിന് മുന്നോടിയായുള്ള ദീപക്കാഴ്ചയാണ് പോലും!!

            ഓണക്കളികള്‍ക്കും ഓണത്തല്ലിനും   ദൈവം സഹായിച് കേരളത്തില്‍ യാതൊരു പഞ്ഞവും ഇല്ല എന്നത് ഒരു സമാധാനമാണ്. കുലം കുത്തികള്‍ക്ക് പ്രത്യേക തരം തല്ലും പായ്ക്ക് ചെയ്തു ചൊവ്വയില്‍ നിന്നും കൊട്ടേഷന്‍ സംഘം യാത്ര തിരിച്ചിട്ടുണ്ട് എന്ന് കേള്‍ക്കുന്നു. കൊട്ടേഷന്‍ സംഘം എന്നൊക്കെ പറഞ്ഞപ്പോഴാണ് ഓര്‍ത്തത്‌ നമ്മടെ മാവേലീം ഒരു കൊട്ടേഷന്റെ ഇരയാണല്ലോ അല്ലെ !!. ഒരു പക്ഷെ ദേവേന്ദ്രന്റെ കൊട്ടെഷനുമായി വന്നു അതി ക്രൂരവും പൈശാചികവും ആയ രീതിയില്‍ പൊന്നു തമ്പുരാനെ ചവിട്ടിത്താഴ്ത്തിയ വാമനന്റെ കോളേജില്‍നിന്ന്‌ തന്നെയാരിക്കും കൊടിസുനിയും മറ്റും എന്‍ജിനീയറിംഗ് പഠിച്ചത് എന്നതില്‍ എനിക്ക് യാതൊരു ഡൌട്ടും ഇല്ല. എന്തൊക്കെയായാലും കരഞ്ഞു കാലുപിടിച്ചു വാങ്ങുന്ന ആ മൂന്നു ചുവടില്‍ നിന്നും വ്യത്യസ്തമായി , 51 വെട്ടിന് പണിയും തീര്‍ത്ത് അടുത്ത വിമാനത്തില്‍ ദുഫായിക്ക് മടങ്ങാന്‍ കഴിയത്തക്ക വിധത്തിലുള്ള ഒരു പ്രൊഫഷനലിസത്തിലേയ്ക്ക് കാര്യങ്ങള്‍ വളര്‍ന്നത് അതിവേഗം ബഹുദൂരം പായുന്ന കേരളത്തിന്റെ വളര്‍ച്ചയുടെ ഭാഗം തന്നെയാണ് .
ആ നിലയ്ക്ക് നോക്കുമ്പോള്‍, ദേവലോകത്തിന്റെ സ്ഥാവരജംഗമ വസ്തുക്കള്‍ മൊത്തമായി സ്വന്തം പേരില്‍ എഴുതിവാങ്ങാന്‍ വളരെ നൈസായി ചരട് വലിച്ച മാവേലി തമ്പുരാന്‍ ഒരു എലൈറ്റ്‌ ക്ലാസ്‌ കുലം കുത്തി തന്നെയാണ് എന്ന് പറയേണ്ടി വരും. ഒടുവില്‍ നല്ലൊരു രാജാവിനെ ചവിട്ടിതാഴ്ത്തി പണ്ടാരടക്കിയ വാമനന്‍ ന്യു ജനറേഷന്‍ ഹീറോയും ജനകോടികളുടെ വിശ്വസ്ത സ്ഥാപനവുമായി മാറുമ്പോള്‍ ഒരു സമൂഹത്തിന്റെ ആത്മാവിഷ്കാരത്തിനായ്‌ രാജ്യം കൈ വിട്ട മഹാബലി, ഒരു കോമിക്ക് കഥാപാത്രമോ കൊമാളിയോ ഒക്കെ ആയി വീണ്ടും വീണ്ടും ഊളയാകുന്ന കാഴ്ചകള്‍ തന്നെയാണ് നാം കണ്ടുകൊണ്ടിരിക്കുന്നതും.
       എക്കാലത്തും പാര്‍ശ്വവല്ക്കരിക്കപ്പെടുകയും ദേവന്മാരാല്‍ ചൂഷണം ചെയ്യപ്പെടുകയും ചെയ്യുന്ന അസുര വംശത്തില്‍ ജനിച്ചതുകൊണ്ടല്ലേ മാവേലിയ്ക്ക് ഈ പാടുപീഡ ഒക്കെ സഹിക്കേണ്ടി വന്നത് എന്ന പലപ്പോഴും ഞാന്‍ ആലോചിച്ചിട്ടുണ്ട്. സുഖവും സന്തോഷവും അധികാരങ്ങളുമൊക്കെ ദേവന്മാര്‍ക്ക് മാത്രം വിധിച്ചിട്ടുള്ളതാണെന്നും ദേവലോകത്തിന്റെ പിന്നാമ്പുറത്ത് നിന്നും പൊഴിഞ്ഞു കിട്ടുന്നവ അമൃത് പോലെ ആസ്വദിച്ച് ജീവിതം കഴിച്ചു കൂട്ടുകയാണ് ഒരു ഐഡിയല്‍ അസുരന്‍ ചെയ്യേണ്ടത്‌ എന്നുമുള്ള സത്യം വിസ്മരിച്ചതല്ലേ മഹാബലിയ്ക്ക് പറ്റിയ അബദ്ധം?..
         കാര്യം, കേരളത്തിന്റെ പൊന്നോമനയാണ്, ചക്രവര്‍ത്തിയാണ്, മാങ്ങാത്തൊലിയാണ് എന്നൊക്കെ പറഞ്ഞു എല്ലാ ഓണത്തിനും നാം വല്യ ഡയലോഗ് അടിക്കുമെങ്കിലും മാവെലിയോടു ഒരു തരം വെറുക്കപ്പെട്ടവനോടുള്ള മനോഭാവം അല്ലെ നാമൊക്കെ ഉള്ളിന്റെ ഉള്ളില്‍ വെച്ച് പുലര്‍ത്തുക?. അല്ലെങ്കില്‍ പിന്നെ എന്തുകൊണ്ടാണ്   ലോക്കല്‍ ചാത്തന്‍ന്മാര്‍ക്കും മാടനും മറുതയ്ക്കും പോലും അമ്പലങ്ങളും പ്രതിഷ്ഠകളും ഉള്ള നമ്മുടെ നാട്ടില്‍ മഹാബലി ചക്രവര്‍ത്തിയ്ക്ക് ഒരു കല്‍വിളക്ക്‌ തെളിക്കാന്‍ പോലും ആളില്ലാത്തത്??.. ചോതിക്കാനും പറയാനും ആളില്ലെന്ന് കരുതി മാവെലിയോടൊക്കെ എന്തും ആകാമല്ലോ അല്ലെ..!!

നല്ലൊരു ഓണമായിട്ട് എന്ത് പന്നത്തരം ഒക്കെയാണ് ഇവന്‍ ഈ എഴുന്നള്ളിക്കുന്നത് എന്ന് ചിന്തിക്കുന്നവര്‍ ഇത്ര മാത്രം മനസിലാക്കുക- മലയാളിയുടെ രക്തത്തില്‍ അലിഞ്ഞു ചേര്‍ന്ന ഒരു സംസ്കാരത്തെ പായ്ക്കറ്റ് വല്ക്കരിക്കുന്ന ഈ നവയുഗ കാലഘട്ടത്തില്‍, മാവേലി എന്നത് മാവ്‌, എലി എന്നീ സമത്വ സുന്ദര സോഷ്യലിസ്റ്റ്‌ സമസ്യകളുടെ സമന്വയീ ഭാവം ആണ് എന്ന് സൈബര്‍ ലോകത്തെ NG കുഞ്ഞുങ്ങള്‍ നാളെ പറഞ്ഞു കൂടായ്കയില്ല. കാരണം സമൂഹത്തില്‍ നടപ്പിലുള്ള സകല നിയമങ്ങളെയും വ്യവസ്ഥിതികളെയും ചോദ്യം ചെയ്യുകയും തന്റെതായ കാഴ്ചപ്പാടുകള്‍ക്ക് അനുസരിച്ച് എല്ലാത്തിനെയും പുനര്നിര്‍വചിക്കുകയും രാജ്യത്തിന്‍റെ നിയമങ്ങള്‍ പോലും ഇതിനനുസരിച് മാറ്റിയെഴുതണം എന്നു ശഠിക്കുകയും ചെയ്യുമ്പോള്‍ ആണല്ലോ ഒരു NG യഥാര്‍ത്ഥ NG ആയി മാറുക.. രാജ്യത്തിന്റെ ദേശീയ പതാകയെ ആദരിക്കുന്നത് വിഡ്ഢിത്തമാണ് എന്നിങ്ങനെയുള്ള വെളിപാടുകള്‍ പോലും അപ്പോള്‍ തലയില്‍ ഉദിച്ചെന്നു വരാം.. പിന്നെയല്ലേ കേരളത്തിന്റെ ദേശീയ ഉത്സവം!! കണ്ടുകൊണ്ടിരിക്കുന്നതും ഇനി കാണാനിരിക്കുന്നതും ആയ പൂരങ്ങളെ വെച്ച് നോക്കുമ്പോള്‍ ഇതൊക്കെ എന്ത് !!..

എന്തായാലും നല്ലൊരു ഓണം ഉണ്ണാന്‍ കച്ചകെട്ടുന്നവരും "ക്യൂ നില്‍ക്കുന്നവരും" കുമ്പിള്‍ കോട്ടുന്നവരുമായ എന്റെ പ്രിയ സുഹൃത്തുക്കള്‍ക്ക് ഹൃദയം നിറഞ്ഞ ഓണാശംസകള്‍ നേരത്തെ തന്നെ നേരുന്നു..

സ്വാതന്ത്യത്തിന്റെ തല്‍സമയ കാഴ്ചകള്‍!!..

2012-08-11T12:12:00.003-07:00

നമ്മുടെ ഇന്‍ക്രെടിബിള്‍ ഇന്ത്യ അതിന്റെ 65-മത് സ്വാതന്ത്യ ദിനാഘോഷങ്ങള്‍ക്ക് എല്ലാവിധ ഒരുക്കങ്ങളും പൂര്‍ത്തിയാക്കിക്കൊണ്ടിരിക്കുകയാണ്. ഒട്ടേറെ തലമുറകളുടെയും എണ്ണിയാലൊടുങ്ങാത്ത വലിയൊരു സമൂഹം രാജ്യസ്നേഹികളുടെയും ചോരയുടെയും വിയര്‍പ്പിന്റെയും വിലയായാണല്ലോ ഇന്ന് നാം സ്വാതന്ത്യം എന്ന പേരില്‍ ആഘോഷിക്കുകയും ആസ്വദിക്കുകയും ആര്‍മ്മാദിക്കുകയും ചെയ്യുക. അടിമയായി കഴിയുക എന്ന ദുരവസ്ഥ നമുക്ക്‌ (നമുക്ക്‌ എന്നുവെച്ചാല്‍ ഞാനും നിങ്ങളും ഒക്കെ ഉള്‍പ്പെടുന്ന FB ജെനറേഷന്..) ഇതുവരെ അനുഭവിക്കേണ്ടി വന്നിട്ടില്ലാത്തത് കൊണ്ടായിരിക്കും ഈ ദിനത്തിന് അത് അര്‍ഹിക്കുന്ന ഒരു പ്രാധാന്യം നമ്മള്‍ കൊടുക്കാറുണ്ടോ എന്ന വസ്തുത നാമൊക്കെ മനസ്സിരുത്തി ചിന്തിക്കേണ്ടതാണ്.

എല്ലാ അവധി ദിവസങ്ങളെയും പോലെ വീട്ടില്‍ ചടഞ്ഞു കൂടി ഇരിക്കാനും വൈകിട്ട് കൂട്ടുകൂടി വെള്ളമടിക്കാനും കൈ വരുന്ന ഒരു സുവര്‍ണ്ണാവസരം മാത്രമായി ഈ ദിവസത്തെ കരുതുന്ന ഒട്ടേറെ യുവതുര്‍ക്കികള്‍ നമ്മുടെ ഇടയില്‍ തന്നെ ഉണ്ടല്ലോ.. വിദ്യാഭ്യാസ സ്ഥാപനങ്ങളിലും സമാനമായ ഇന്സ്ടിട്യുഷനുകളിലും മാത്രമായി രാജ്യ സ്നേഹത്തിന്റെ മൂവര്‍ണ്ണക്കൊടികള്‍ ഒതുങ്ങുകയും നാളെയുടെ നവമുകുളങ്ങള്‍ വൈകിട്ടത്തെ പരിപാടിയുടെ ഹാങ്ങ്‌ ഓവര്‍ മാറാതെ ചുരുണ്ടുകൂടി കിടക്കുന്ന കാഴ്ചകള്‍ കാണുമ്പോള്‍ അങ്ങ് സ്വര്‍ഗ്ഗലോകത്തില്‍ ഊന്നുവടിയില്‍ തലചായ്ച്ച് ഏങ്ങലടിച്ചു കരയുന്ന ഒരു വൃദ്ധാത്മാവിന്റെ ചിത്രം എനിക്ക് ഭാവനയില്‍ കാണാനാവുന്നുണ്ട്..

ഇതൊന്നും പോരാഞ്ഞ്, ഇന്ന് നാം അനുഭവിക്കുന്നത് സ്വാതന്ത്യമല്ല , മറിച്ചു മറ്റെന്തോ സാധനം ആണെന്നും സ്വാതന്ത്ര്യം എന്നപേരില്‍ മെയ്‌ട് ഇന്‍ കുന്നംകുളം സാധനം വാങ്ങിത്തന്നു ഗാന്ധിയും കൂട്ടരും ഇന്ത്യയെ വഞ്ചിക്കുകയാണ് ചെയ്തത് എന്നുവരെ ആരോപണമുയര്‍ന്നിരുന്നു. ഇതൊക്കെ കേട്ടപ്പോള്‍ സമൂഹത്തിന്റെ വിവിധ (ക്രീമി ആന്‍ഡ്‌ നോണ്‍-ക്രീമി) ലെയറുകളില്‍ പട്ടയം വാങ്ങി താമസിക്കുന്ന വലിയ സമൂഹം ആളുകള്‍ എങ്ങനെയാണ് സ്വാതന്ത്യം എന്നതിനെ നോക്കിക്കാണുന്നത് എന്നറിയാന്‍ എനിക്കും ഒരു ആകാംഷ!!.. അങ്ങനെ പുറത്തേയ്ക്ക്‌ ഇറങ്ങിയപ്പോള്‍ കേട്ട അഫിപ്രായങ്ങള്‍ ചുവടെ ചേര്‍ക്കുന്നു..

(വ്യക്തികളുടെ സ്വകാര്യതയെ മാനിച്ച് , ഇവിടെ ചേര്‍ക്കുന്ന പേരും ലൊക്കേഷനും യഥാര്‍ത്ഥം അല്ല..)

"സ്വാതന്ത്യം കിട്ടി 65 കൊല്ലമായി, കോപ്പായി എന്നൊക്കെ പറഞ്ഞാലും യഥാര്‍ത്ഥ സ്വതന്ത്യത്ത്തില്‍ നിന്നും ഈ രാജ്യം ഏറെ അകലെയാണ് എന്നാണ് വര്‍ത്തമാനകാല സംഭവങ്ങള്‍ സൂചിപ്പിക്കുക.. ഒരാളെ സ്വസ്ഥമായി വെട്ടിക്കൊല്ലാന്‍ പോലും ഇന്ന് ഈ രാജ്യത്ത് സ്വാതന്ത്യം ഇല്ലാതായിരിക്കുന്നു.. അപ്പൊ ഇറങ്ങിക്കോളും പോലീസും കോടതിയും എന്നൊക്കെ പറഞ്ഞു കുറെ പോഴന്മാര്‍!!.. പാര്ട്ടികെതിരെ (എന്നുവെച്ചാല്‍ ഈ രാജ്യത്തിനെതിരെ) ആപ്പ് വെയ്ക്കുന്ന ക്നാപ്പന്മാരെ 51 വെട്ടു വെട്ടി മണ്ണെണ്ണ ഒഴിച്ച് കത്തിക്കുക എന്നത് ഉദാത്തമായ രാജ്യസ്നേഹപരമായ പ്രവൃത്തിയാണ്.. കുറെ സത്യങ്ങള്‍ നമ്പരിട്ടു പറയുവാ...
1).ഏറെ മഹത്തരവും ഉത്കൃഷ്ടവുമായ ലാറ്റിനമേരിക്കന്‍ രാജ്യങ്ങളുടെ സ്വാതന്ത്യമാണ് ഇന്ത്യ മാതൃകയാക്കേണ്ടത്...
2).അതിനു വേണ്ടിയാണ് കാറല്‍ മാര്‍ക്സ്‌, ഇ.എം.എസ്, ലെനിന്‍ തുടങ്ങിയ സ്വാതന്ത്യ സമര സേനാനികള്‍ ഉപ്പ് സത്യഗ്രഹവും ദണ്ടി യാത്രയും ഒക്കെ നടത്തിയത്‌.. ജാലിയന്‍വാലാബാഗില്‍ ചെഗുവേര രക്തസാക്ഷിത്വം വരിച്ചത്‌...
3).ചരിത്രപരമായ ഇത്തരം യാഥാര്‍ത്ഥ്യങ്ങളെ കുഴിച്ചുമൂടാനാണ് ഇവിടുത്തെ മാധ്യമ കഴുവേറികള്‍ അന്നും ഇന്നും ശ്രമിച്ചുകൊണ്ടിരിക്കുക.. "

( -സ.മണിയന്‍ പിള്ള, വണ്ടന്‍മെട് ഏരിയാ കമ്മിറ്റി)

"..കാര്യം എല്ലാ സെറ്റപ്പും ഒക്കെ.. പക്കേങ്കില് ഈ ദേശീയ പതാക ഒണ്ടല്ലോ.. അതത്ര പോര.. ആരോടു ചോയ്ചിട്ടാ ഈ കുംകുമോം വെള്ളേം ഒക്കെ കേറ്റിയത്?.. ഫുള്‍ ഞമ്മന്റെ പച്ച മതി!! അതാ അയിന്റെ ഒരു മൊഞ്ച്.. ഞമ്മന്റെ പാര്ട്ടീന്റെ കലരും പച്ചയാനെയ്‌.. പണ്ടൊരിക്കല്‍ ഞമ്മടെ പിള്ളേര് ഫുള്‍ പച്ചയാക്കാന്‍ നോക്കീതാ.. അങ്ങ് എയര്‍ പോര്‍ട്ടില്.. ഹോ എന്തൊക്കെ പുകിലാരുന്നു!!.. ഇനീപ്പോ കേരളത്തിന്റെ ദേശീയ പതാക പച്ച ആയി അങ്ങ് പ്രഖ്യാപിക്കും.. ഈ കള്ള ഹിമാറുകള്‍ എന്നാ ഒലത്തൂന്നു കാണട്ടെ!!"

(-മി.കുഞ്ഞപ്പ കുട്ടി, ഐസ്ക്രീം ലീഗ് ഡിസ്ട്രിക്റ്റ് പ്രസിടന്റ്റ്‌ )

" ...സ്വാതന്ത്യം എന്നത് ഒരു മരീചിക പോലെയോ അല്ലെങ്കില്‍ ഉട്ടോപ്യ എന്നൊക്കെ പറയുന്നത് പോലെ ഉപരിപ്ലവമായ ഒരു സംഭവമായോ ഒക്കെയാണു എനിക്ക് അനുഭവപ്പെടുന്നത്.. എന്റെ "ഗാന്ധിയുടെ വടിയും സ്വാതന്ത്യവും' എന്ന ഗ്രന്ഥത്തില്‍ ഈ വിഷയത്തെ പറ്റി വിശദമായി പ്രതിപാതിക്കുന്നുണ്ട്.. തത്വ ചിന്താപരമായി നാം ഒരു അവലോകനം നടത്തുമ്പോള്‍ പാരതന്ത്യം, സ്വാതന്ത്യം എന്നൊക്കെ വിശേഷിപ്പിക്കുക ഒരേ സംഭവത്തെ തന്നെയാണ് എന്ന് മനസിലാക്കാന്‍ സാധിക്കും... പ്രഥമ ദ്രിഷ്ട്യാ ഇവ തമ്മില്‍ ബന്ധം കണ്ടെത്താന്‍ സാധിച്ചില്ല എങ്കില്‍ കൂടിയും അതുതന്നല്ലേ ഇത് എന്ന മട്ടിലുള്ള ഒരു ഉല്‍പ്രേക്ഷ എല്ലായ്പ്പോഴും സജീവമാണ്. പരബ്രഹ്മതിന്റെ കിളിവാതിലുകള്‍ മലര്‍ക്കെ തുറക്കപെടുകയും ബന്ധുര കാഞ്ചനക്കൂട്ടിലെ കിളി 'രാത്രി ശുഭരാത്രി.. ഇനി എന്നും ശിവരാത്രി.. " എന്ന ഋഗ്വേദത്തിലെ ശ്ലോകവും ഉരുവിട്ടുകൊണ്ട് അങ്ങ് ചക്രവാളത്തിന്റെ അനന്തതയില്‍ വിലയം പ്രാപിക്കുകയും ചെയ്യുന്ന ആ കാഴ്ച്ച.. അത് സത്യത്തിന്റെ നഭോമണ്ഡലത്തിലേയ്ക്ക് കൂടുതല്‍ വെളിച്ചം വീശും.."

(-ലഫ്‌.ഡോ.പത്മശ്രീ. സന്തോഷ്‌ ചക്രവര്‍ത്തി )

   " ..യൂ നോ.. ഫ്രീഡം എന്നൊക്കെ പറയുന്നത്‌ ഇന്ന് ഒരു കണ്‍സെപ്റ്റ് മാത്രമാണ്.. ഇന്നെവിടെയാണ് സ്വാതന്ത്യം??.. ഒരാണിനും പെണ്ണിനും കൂടി ഇന്ന് സ്വസ്ഥമായി പുറത്തിറങ്ങി നടക്കാനോ സൗഹൃദം പങ്കിടാനോ ഡേറ്റിംഗ് നു പോകുവാണോ ഇന്നിവിടെ അവകാശം ഉണ്ടോ?. നേരം ഇരുട്ടിയാല്‍ ഒരാണിനും പെണ്ണിനും ഒരു ഹോട്ടലിലോ ലോഡ്ജിലോ മുറിയെടുക്കാനോ ഗ്ലോബല്‍ റിസഷന്റെ ആഫ്ടര്‍ എഫക്ട്സ്-നെ പറ്റി മുറിയടച്ചിരുന്നു ചര്‍ച്ച നടത്താനോ ഇന്ത്യയുടെ ഭാവി വാര്‍ത്തെടുക്കാനോ സാധിക്കുമോ?.. എറങ്ങിയിരിക്കുവല്ലേ മോറല്‍ പോലിസിംഗ് എന്നൊക്കെ പറഞ്ഞു കുറെ ബ്ലഡി ഫ@^$@ഗ് കള്‍ച്ചര്‍ ലെസ് ഫെല്ലോസ്‌.. ഐ ഹേറ്റ് ദിസ് കണ്ട്രി.. വീ നീട് എ ബ്രാന്‍ഡ്‌ ന്യൂ യൂറോപ്യന്‍ കള്‍ച്ചര്‍.. ശരിക്കും ബ്രിട്ടിഷ് പീപിള്‍ ഇന്ത്യ വിട്ടു പോയപ്പോള്‍ ഇന്ത്യന്‍ കല്ച്ചരില്‍ സംഭവിച്ച ഒരു അണ്‍ഫോര്ച്ചുനെറ്റ്‌ മ്യൂട്ടേഷന്‍ ആയാണ് ഞാന്‍ ഇതിനെ കാണുക.."
   ( -ഫ്രാങ്കസ്ടിന്‍ നമ്പൂതിരി, ഐ.ടി കണ്‍സല്ട്ടന്റ്റ്‌ , ടെക്നോ പാര്‍ക്ക്‌ )

      "..എല്ലാ മലയാലികള്‍ക്കും എ വെരി മോസ്റ്റ്‌ ബ്യൂട്ടിഫുള്‍ ഇന്ടിപെണ്ടന്‍സ് ഡേയ് വിഷേസ് ആഷംശിക്കുന്നു.. നമ്മുടെ ഗാന്ധിജി അങ്കിളും നെഹ്‌റു അങ്കിളും ഒക്കെ കൂടി, അവരുടെ ഒത്തിരി സംഗതികള്‍ മിസ്സ്‌ ചെയ്ത് വലരെ സ്ട്രൈന്‍ ചെയ്ത് നേടിയെടുത്ത ഒരു സംഭവമാണ് ഈ ഫ്രീഡം എന്നൊക്കെ പരയ്കാ.. അത് എല്ലാ സീസണിലും നന്നായ്‌ സൂക്ഷിക്വാ.. കൂടുതല്‍ ഒന്നും പരയുന്നില്ല.. വന്‍സ് എഗയിന്‍ ഹാപ്പി ഇന്ടിപെണ്ടന്‍സ് ഡേ.."
(-മിസ്സ്‌ മഞ്ജരി കരിയാസ്‌ , ടി.വി ആങ്കര്‍ )

"..സ്ത്രീ എന്നും അടിമത്തത്തിന്റെ ചങ്ങലയിലാണ്.. സ്വാതന്ത്യം അതിന്റെ ഷഷ്ടിപൂര്‍ത്തി പിന്നിട്ടു അഞ്ചു വര്ഷം കൂടി കഴിയുമ്പോഴും അഹന്ത മുറ്റിയ പുരുഷന്റെ ചട്ടക്കൂടുകളില്‍ നെടുവീര്‍പ്പിടുകയാണ് ഇന്ന് കേരള സ്ത്രീത്വം.. സ്വന്തം ഇഷ്ടത്തിനൊത്ത വസ്ത്ര ധാരണം പോലും ഇന്ന് കേരള സ്ത്രീകള്‍ക്ക് അന്യമായിരിക്കുന്നു.. അമേരിക്കന്‍-യൂറോപ്യന്‍ പുരോഗമന രാഷ്ട്രങ്ങള്‍ അവരുടെ സ്ത്രീകളുടെ ഔദ്യോഗിക വസ്ത്രമായി ടു പീസ്‌ അന്ഗീകരിച്ചിട്ടും ഇന്ത്യയിലെ പുരുഷാധിപത്യ സമൂഹം ഇത്തരം ആശയങ്ങള്‍ക്കെതിരെ കൊഞ്ഞനം കുത്തുകയാണ്. മതത്തിന്റെ മുഖം മൂടിയണിഞ്ഞ ഇത്തരം സ്ത്രീ വര്‍ഗ ശത്രുക്കള്‍ക്കെതിരെ ഒരു തുറന്ന പോരാട്ടം ആവശ്യമായിരിക്കുന്നു.. വെറും 33ശതമാനം സംവരണം ആണ് ഇന്ന് സ്ത്രീകള്‍ക്ക് ഇന്ത്യയില്‍ ഉള്ളത്.. ഇത് 100 ശതമാനത്തിലെയ്ക്ക് എത്തിക്കേണ്ടത്‌ ഇന്ത്യന്‍ സ്ത്രീ സമൂഹത്തിന്റെ അഭിമാന പ്രശ്നമാണ്.. സ്ത്രീ സമൂഹം കാലാകാലങ്ങളായി അനുഭവിക്കേണ്ടി വരുന്ന ഗര്‍ഭധാരണം എന്ന മാരണം പുരുഷകെസരികള്‍ക്ക് കൈമാറുകയും സ്വാതന്ത്യത്തിന്റെ ചക്രവാളങ്ങളില്‍ പെന്‍ശലഭങ്ങള്‍ പാറിപ്പറക്കുകയും ചെയ്യുന്ന ആ കാഴ്ച്ച ഏറെ വിദൂരമല്ല.. സ്ത്രീ ഒരു കോപ്പന്റെയും പെങ്ങളല്ല, അമ്മയല്ല, ഭാര്യയല്ല.. മറിച്ച് സ്ത്രീ ഒരു ഭയങ്കര സംഭവം തന്നെയാണ് .. "

-(മിസ്സ്‌. സുലോചനാ വര്‍മ്മ, സ്ത്രീസംരക്ഷക (മൊത്തമായും ചില്ലറയായും!)

"..വാസ്തവത്തില്‍ ഇവിടെ ശരിക്കും എന്നതാ സംഭവിക്കുന്നത് എന്ന് പിടി കിട്ടുന്നില്ലെടാ ഉവ്വേ.. സാധാരണക്കാരന് ചൂടുവെള്ളത്തില്‍ കുളിക്കാന്‍ വയ്യ, ഉമ്മിക്കരി വെച്ച് പല്ല് തേയ്ക്കാന്‍ വയ്യ.. ഹെല്‍മെറ്റ്‌ ഇല്ലാതെ വണ്ടിയോട്ടാന്‍ വയ്യ.. പ്ളാസ്റിക് ബാഗില്‍ പച്ചക്കറി വാങ്ങാന്‍ വയ്യ.. അതൊക്കെ വല്യ വല്യ തെറ്റുകള്‍!! പോലിസ്‌ , കോടതി പിഴ.. തേങ്ങാക്കൊല!! കോടികള്‍ അഴിമതി നടത്തുന്നവന്‍ കൊടി വെച്ച കാറില്‍ പാഞ്ഞു പോകുന്നു!!.. അവരെ കാണുമ്പോ പോലിസ്‌ സലുറ്റ്‌ അടിക്കുന്നു.. ബോംബ്‌ പൊട്ടിച്ചു നാട്ടുകാരെ കൊന്ന തീവ്രവാദി ചിക്കെന്‍ ബിരിയാണി തിന്നുന്നു.. ഇതൊക്കെ പോരാഞ്ഞു ഇടക്കിടെ അവന്റെയൊക്കെ അമ്മെക്കെട്ടിക്കാനായ്‌ ഓരോ ബന്ദും ഹര്‍ത്താലുമായി ഇറങ്ങും.. ഇതൊക്കെ എന്തോന്ന്‍ അവസ്ഥയാണ് അണ്ണാ.. അറിയാന്‍ വയ്യാഞ്ഞിട്ട് ചോതിക്കുവാ.."
(-പൊതുജന കഴുതകളില്‍ ഇമ്മിണി മൂത്ത കഴുത )

മേല്പറഞ്ഞതൊന്നും എന്റെ അഭിപ്രായങ്ങളായി ആരും തെറ്റിദ്ധരിക്കരുതേ എന്ന് അപേക്ഷയുണ്ട്. ടിയാന്മാരെ പോലെ സ്വാതന്ത്യത്തെപ്പറ്റി ആശയ ബാഹുല്യത്താല്‍ സമലംകൃതമായ വിലയിരുത്തലുകല്‍ക്കൊന്നും എനിക്ക് ആമ്പിയര്‍ ഇല്ല എന്ന വിവരം വ്യസന സമേതം അറിയിക്കുകയാണ്.. മാത്രമല്ല, ഇപ്പോള്‍ ആസ്വദിച്ചുകൊണ്ടിരിക്കുന്ന സ്വാതന്ത്യത്തില്‍ ഞാന്‍ ഏറെ സന്തുഷ്ടനാണ്.. ഒന്നുമല്ലേലും ഈ സ്വാതന്ത്യത്തിന്റെ മൂല്യം ഒന്നുകൊണ്ടു മാത്രമാണല്ലോ ഇതുപോലൊരു പീറബ്ലോഗ്‌ എനിക്ക് എഴുതാന്‍ സാധിക്കുന്നതും ഇന്ത്യന്‍ പ്രസിടന്ടു മുതല്‍ വാര്‍ഡ്‌ മെമ്പര്‍ വരെയുള്ളവര്‍ തുമ്മുന്നുണ്ടോ ചീറ്റുന്നുണ്ടോ എന്നൊക്കെ നോക്കിയിരുന്ന്, ഇനി മേലില്‍ ഈ പണി പറ്റില്ല എന്നൊക്കെ ഡയലോഗ് അടിക്കാന്‍ സാധിക്കുന്നതും!!.. ഇതൊക്കെ വല്ല ചൈനയിലോ അറബി നാട്ടിലോ ജനിച്ചു പോയിരുന്നേല്‍ നടപ്പതു കാര്യം വല്ലതുമാണോ!!..

എന്തൊക്കെ കുറ്റങ്ങളും കുറവുകളും ഉണ്ടെലും ഒരു ഇന്ത്യക്കാരനായി ഈ പുണ്യ ഭൂമിയില്‍ പിറന്നു വീഴാന്‍ ഇടയായതില്‍ ഞാന്‍ അഭിമാനിക്കുന്നു.. ദൈവത്തിനു നന്ദി പറയുന്നു..

പിറന്ന മണ്ണിനുവേണ്ടി പ്രാണന്‍ ത്യജിച്ച വീരന്മാര്‍ക്കും, ഇപ്പോഴും കൊടും തണുപ്പിനെ തൃണവല്‍ക്കരിച്ച് മാതൃ രാജ്യത്തിന് കാവല്‍ നില്‍ക്കുന്ന ധീര ജവാന്മാര്‍ക്കും ഒരു ബിഗ്‌ സല്യൂട്ട്..

എല്ലാ പ്രിയ സുഹൃത്തുക്കള്‍ക്കും സ്വാതന്ത്യ ദിനാശംസകള്‍ അഭിമാനപൂര്‍വ്വം നേരുന്നു..!!

ജയ്‌ ഹിന്ദ്‌ !!!!!

ആഗോള ഗ്രാമങ്ങള്‍ മറന്നുപോകുന്നത്..

2012-08-05T06:49:00.001-07:00

നല്ലൊരു ഞായറാഴ്ചയായതുകൊണ്ടും അതിലുപരി ഇന്ന് ലോക സൌഹൃദ ദിനം ആയതുകൊണ്ടും അല്പം തത്വചിന്തയുടെയും നൈതികത നിറഞ്ഞ മനുഷ്യ ബന്ധങ്ങളുടെയും നടപ്പാതകളിലൂടെ (ഈ ചവറിനെയൊക്കെ ഇങ്ങനെ വിശേഷിപ്പിക്കുന്നതില്‍ ക്ഷമിക്കുക.. ലേഖകന്‍റെ ജന്മസിദ്ധമായ അഹങ്കാരത്തിന്‍റെ ഭാഗം മാത്രമായി ഇതിനെയൊക്കെ കണ്ടാല്‍ മതി) പ്രാഞ്ചി പ്രാഞ്ചിയാണെങ്കിലും അല്പം ചുവടുകള്‍ മുന്നോട്ട് വെയ്ക്കുന്നത് കുറച്ച്‌ ആത്മീയ ഉത്കര്‍ഷത്തിനു (നിങ്ങളുടെയല്ല, എന്‍റെ..) ഉപകരിക്കുമെന്ന് തോന്നുന്നു.

വിജ്ഞാന വിസ്ഫോടനത്തിന്റെ സാങ്കേതിക തലങ്ങളെ പറ്റി എന്നെക്കാളും കൂടുതല്‍ അറിവ് അത്തരം സ്ഫോടനങ്ങള്‍ക്ക്‌ തിരി കൊളുത്തുന്ന, ഇപ്പോളും കൊളുത്തിക്കൊണ്ടിരിക്കുന്ന നിങ്ങള്‍ക്ക്‌ ഉണ്ട് എന്ന വസ്തുതയെപ്പറ്റി നിങ്ങള്‍ക്ക്‌ സംശയം ഉണ്ടായേക്കാം എങ്കിലും എനിക്കില്ല. ഇലക്ട്രോണിക് യുഗത്തിന്റെ പ്രവാചകന്‍ എന്നറിയപ്പെടുന്ന മാര്‍ഷല്‍ മാക്‌ ലുഹാന്‍ ഈ സമകാലീന ലോകത്തെ വിശേഷിപ്പിച്ചത് ഇങ്ങനെയാണ്-

“...The time has ceased..

space has vanished..

we are living in a global village..”

സമയം ഇല്ലാതാകുന്ന, ദൂരങ്ങള്‍ അപ്രത്യക്ഷമാകുന്ന ഈ ഡാറ്റ സുനാമിയുടെ (Data Tsunami) ഓളങ്ങളില്‍ എങ്ങോട്ടെന്നില്ലാതെ തുഴഞ്ഞുനീങ്ങുന്ന നാം ഒന്ന് തിരിഞ്ഞു നോക്കുമ്പോള്‍ കാര്യങ്ങള്‍ കൂടുതല്‍ വ്യക്തമാകുകയാണ്. അതെ, ഈ ആഗോള ഗ്രാമം ചെറുതാകുകയാണ്- എല്ലാ അര്‍ത്ഥത്തിലും. ദൂരവും സമയവും മാത്രമല്ല, ഒരുകാലത്ത് നാം മഹത്തരം എന്ന് കരുതിയിരുന്ന പലതും ചുരുങ്ങിച്ചുരുങ്ങി ഒടുവില്‍ ശൂന്യതയില്‍ പുകച്ചുരുളുകള്‍ പോലെ വിലയം പ്രാപിക്കുകയാണ്. എന്തിനെയും ഏതിനെയും സംശയത്തോടെ മാത്രം വീക്ഷിക്കുന്ന ഒരു ശരാശരി ഔട്ട്‌സ്പോകെന്‍ മലയാളിയുടെ കണ്ണട കൊണ്ട് നോക്കുന്നതു കൊണ്ടാണോ എന്തോ.. മങ്ങിയ കാഴ്ചകള്‍ തന്നെ വീണ്ടും വീണ്ടും ഫ്രെയിമില്‍ നിറയുന്നു...

ശാസ്ത്രത്തിന്റെ ചിറകിലേറി നാം കൂടുതല്‍ ഉയരങ്ങളും കൂടുതല്‍ ദൂരങ്ങളും പിന്നിടാനുള്ള വെമ്പലില്‍ മുകളിലേയ്ക്ക് കുതിക്കുകയാണ്. മുകളിലേയ്ക്ക് കുതിക്കാന്‍ പിണ്ഡം തടസമാകുമ്പോള്‍ അതിനു കാരണഹേതുവായ ദൈവകണത്തെ നാം പുറംകാലുകൊണ്ട് തട്ടിക്കളയുകയാണ് പതിവ്‌. ഭാരം നഷ്ടപ്പെട്ട് ഒരു അപ്പൂപ്പന്‍ താടി പോലെ പാറിപ്പറന്ന്, അതിര്‍വരമ്പുകള്‍ ഇല്ലാത്ത സ്വാതന്ത്യം ആസ്വദിച്ച്, നാം ജീവിതംതന്നെ ഒരു ആഘോഷമാക്കി മാറ്റാറുണ്ട്.

എങ്ങോട്ടെന്നില്ലാതെയുള്ള ഈ പ്രയാണത്തില്‍ മാര്‍ഗതടസമായി മുന്നില്‍ വന്നു ചാടുന്നതിനെയെല്ലാം അന്‍പത്തൊന്നും അറുപത്തൊന്നും വെട്ടു വെട്ടി അരിഞ്ഞു തള്ളാന്‍ പലപ്പോഴും നമുക്ക്‌ രണ്ടാമതൊന്ന് ആലോചിക്കേണ്ടി വരുന്നില്ല. തെളിവുകള്‍ മാന്തിയെടുത്ത് ഒരു നികൃഷ്ടജീവിയും തന്റെ പിന്നാലെ വരില്ല എന്ന് ഉറപ്പുവരുത്തിയശേഷം പുത്തന്‍ മേച്ചില്‍പ്പുറങ്ങളില്‍ ഉല്ലസിക്കുമ്പോള്‍ ഒരു നാള്‍ സര്‍വശക്തന്റെ “നിന്റെ സഹോദരന്‍ എവിടെ?’ ചോദ്യത്തിനു ഉത്തരം നല്‍കേണ്ടിവരും എന്ന വസ്തുത പലരും ഓര്‍ക്കാറുമില്ല.

ഗര്‍ഭപാത്രത്തിനു പുറത്തെ വെളിച്ചത്തിന്റെ ഊഷ്മളതയും അമ്മയുടെ പുഞ്ചിരിയുടെ മനോഹാരിതയും സ്വപ്നം കണ്ട്, സുഖസുഷുപ്തിയില്‍ മയങ്ങുന്ന നവമുകുളങ്ങളെ മുന്‍സിപ്പാലിറ്റിയുടെ ചവറുകൊട്ടയിലെയ്ക്ക് കഷണങ്ങളാക്കി വലിച്ചെറിഞ്ഞു കളയുമ്പോള്‍, കാലില്‍ കൊണ്ട മുള്ള് വലിച്ചൂരി കളയുന്ന ലാഘവം മാത്രമേ നമുക്ക്‌ തോന്നാറുള്ളൂ.

അയല്‍ക്കാരുറെയും ആത്മാര്‍ത്ഥ സുഹൃത്തിന്റെയും നെഞ്ചത്ത്‌ കാലുറപ്പിച്ചു നിന്ന് പുരോഗമനത്തിന്റെ ഏണിപ്പടികള്‍ കയറിപ്പോകുമ്പോള്‍ മനസാക്ഷിയുടെ പിന്‍വിളികള്‍ ഇന്നുനാം കേള്‍ക്കാറില്ല. ലക്ഷ്യവും മാര്‍ഗവും എല്ലാം ചോര പുരളുമ്പോഴും അപ്പോഴൊക്കെ നമ്മുടെ സ്വപ്നങ്ങളില്‍ നിറയുന്ന മോഹനവര്‍ണ്ണങ്ങള്‍ പറഞ്ഞറിയിക്കാവുന്നതാണോ?.. സംതൃപ്തി എന്നത് അപ്പോളും ഒരു മരീചിക പോലെ അകന്നകന്നു പോവുകയല്ലേ.. പിടി തരാതെ..

ഒടുവില്‍, രമ്യഹര്‍മ്യങ്ങളിലെ കനക സിംഹാസനങ്ങളില്‍ പടഞ്ഞിരുന്നു സാമൂഹ്യ നന്മയുടെയും മനുഷ്യത്വത്തിന്റെയും അപ്പസ്തോലന്മാരായി സ്വയം അവരോധിക്കുമ്പോള്‍ പിന്നിട്ട വഴികളെ നാമൊക്കെ സൌകര്യ പൂര്‍വം മറന്നുകളയുകയല്ലേ പതിവ്‌?. ട്വിട്ടരിലും ഫേസ്ബുക്കിലും കാരുണ്യത്തിന്റെയും മനുഷ്യ സ്നേഹത്തിന്റെയും നവയുഗ പാഠങ്ങള്‍ രചിക്കുമ്പോഴും നാട്ടുകാരെ ബോധവല്‍ക്കരിക്കുമ്പോഴും സ്വന്തം വീടിന്റെ പിന്നാമ്പുറങ്ങളിലോ ഇരുണ്ടകോണുകളിലോ കിടന്നു ശിഷ്ട ജീവിതം നരകിച്ചു തീര്‍ക്കുന്ന പുരാതന ജന്മങ്ങളെ കണ്ടില്ലന്നു നടിക്കുന്ന വിശിഷ്ട വ്യക്തിത്വങ്ങള്‍ക്ക് പഞ്ഞം ഉണ്ടെന്നു തോന്നുന്നില്ല. പ്രത്യേകിച്ചും ദൈവത്തിന്റെ സ്വന്തം നാട്ടില്‍..

മേല്പറഞ്ഞ പുരാതന ജന്മങ്ങള്‍ സ്വന്തം ജീവിതത്തിനു വില വെയ്ക്കാതെ ചോര നീരാക്കിയും മുണ്ട് മുറുക്കിയുടുത്തും തള്ളിനീക്കിയ കാലഘട്ടങ്ങളുടെയും സ്വയം വിറകുകൊള്ളിയായി എരിഞ്ഞു തീര്‍ന്ന ത്യാഗപൂര്‍ണമായ സായാഹ്നങ്ങളുടെയും ആകെത്തുകയാണ് ഇന്ന് തടിച്ചു കൊഴുത്ത് കൊളസ്ട്രോള്‍ മുറ്റിയിരിക്കുന്ന പുണ്യദേഹങ്ങളുടെ രൂപത്തില്‍ സുഖസൌകര്യങ്ങളുടെ ബ്ലാങ്കറ്റിനടിയില്‍ പുളച്ചു മറിയുന്നത് എന്ന വസ്തുത, സീനിയര്‍ സിറ്റിസണ്‍ റിസോര്‍ട്ടുകളായി മുഖം മിനുക്കിയ ന്യൂ ജനറേഷന്‍ വൃദ്ധ സദനങ്ങളില്‍ സ്വന്തം മാതാപിതാക്കള്‍ക്ക്‌ അഡ്മിഷന്‍ വാങ്ങുമ്പോള്‍ ഒരു വല്‍സല പുത്രനും ഓര്‍ക്കാറില്ല.

സര്‍വവും വെട്ടിപ്പിടിച്ച് കാല്ച്ചുവട്ടിലാക്കി എന്ന് അഹങ്കരിക്കുമ്പോഴും തൃപ്തി എന്നത് വീണ്ടും ഒരു നിഗൂഡ സമസ്യ അജ്ഞാതമായി തുടരും. അഞ്ചുസെന്റ് സ്ഥലവും ചെറ്റക്കുടിലും ആവശ്യത്തിനും അതിലേറെയും പ്രാരാബ്ധങ്ങളും മാത്രം സംബാദ്യമായുള്ള അയല്‍വാസി എങ്ങനെയാണ് ഇത്ര സംതൃപ്തനും സന്തോഷവാനും ആയി കഴിയുന്നത്, എന്തുകൊണ്ടാണ് അയാള്‍ക്ക്‌ പരാതികള്‍ ഇല്ലാത്തത് എന്നതിനെക്കുറിച്ച് ഒരുപക്ഷെ നാം അത്ഭുതം കൂറും..

മറവിയുടെ മാറാലകളും സ്വയംകൃത മറന്നുപോകലുകളും ഒരു കാലത്ത് തൂത്തെറിയപ്പെടുക തന്നെ ചെയ്യും. തിരിച്ചറിവുകള്‍ വാതിലില്‍ മുട്ടുമ്പോഴെയ്ക്കും ഏറെ വൈകിയിരിക്കും. കാലം അതിന്റെ കാവ്യ നീതി എക്കാലത്തെയും പോലെ ഭംഗിയായി നിറവേറ്റുമ്പോള്‍ സ്വന്തം മക്കളോടു കോപിക്കാനോ ചോദ്യം ചെയ്യാനോ ഉള്ള സ്വരം പോലും നഷ്ടപ്പെട്ടിരിക്കും. ഒടുവില്‍ എവിടെയാണ് പിഴച്ചത് എന്ന് തിരിഞ്ഞുനോക്കുമ്പോള്‍ ഒരായിരം കരങ്ങള്‍ തന്റെ നേരെ നീളുന്നതും അവനെ ക്രൂശിക്കുക എന്ന് അലറിവിളിക്കുന്നതും ഒരു ബ്ലായ്ക്ക് ആന്‍ഡ്‌ വൈറ്റ്‌ ഫിലിമില്‍ എന്നപോലെ അവ്യക്തമായി കാണാന്‍ സാധിക്കും.

ആള്‍ക്കൂട്ടത്തിന്റെ തിരക്കില്‍ ഒഴുകി നീങ്ങിയിരുന്ന താന്‍ ഒറ്റയ്ക്കായത് എങ്ങനെ എന്ന ചോദ്യം മാത്രം അപ്പോളും ഒരു പ്രഹേളിക പോലെ അവശേഷിക്കും. ഒരുപക്ഷെ ജീവിത സായാഹ്നത്തിന്റെ അന്ത്യ യാമങ്ങളില്‍ അത് നാം തിരിച്ചരിഞ്ഞെക്കാം – ലോകം ചുരുങ്ങി ചെറുതായപ്പോള്‍ അതിനോടൊപ്പം തന്റെ മനസും ഹൃദയവും കൂടി ചെറുതായിപ്പോയി എന്ന സത്യം..

വാല്‍ക്കഷണം:-

വിഷയ ദാരിദ്ര്യം കൊണ്ട് നട്ടംതിരിയുകയും "എന്താടാ പുല്ലേ പുതിയ പോസ്റ്റ്‌ ഒന്നും ഇടാത്തത്?".., "..മസ്തിഷ്കത്തില്‍ ബ്ലോക്ക്‌ ബാധിച്ചോഡാ കോപ്പേ??.." എന്നിങ്ങനെയുള്ള ചോദ്യശരങ്ങളാല്‍ പൊറുതിമുട്ടുകയും ചെയ്യുമ്പോള്‍ എന്നെപ്പോലുള്ള NG ബ്ലോഗ്ഗര്‍മാര്‍ കാണിക്കുന്ന സ്ഥിരം ചെപ്പടി വിദ്യകളുടെ ഭാഗം മാത്രമായി ഈ പോസ്റ്റിനെ കാണുക!!.

അഭിമാനിക്കാന്‍ ഓരോരോ കാരണങ്ങള്‍..

2012-08-01T11:39:00.000-07:00

കേരളത്തിന് മാത്രം പൈതൃകാവകാശമായി ഉയര്‍ത്തിക്കാട്ടാനുള്ള ആ പാളത്തൊപ്പിയില്‍ ഒരു പൊന്‍തൂവല്‍ കൂടി ചാര്‍ത്തപ്പെടുകയാണ്. ലോകചരിത്രത്തില്‍ ആദ്യമായാവണം ഒരു കൊലക്കേസ്‌ പ്രതിയെ അറസ്റ്റ്‌ ചെയ്തതില്‍ പ്രതിഷേധിച്ച് ഹര്‍ത്താല്‍ ആചരിക്കപ്പെടുന്നത്. (ലാറ്റിനമേരിക്കന്‍ രാജ്യങ്ങളിലെ കേസുകെട്ടുകളെ പറ്റി വല്യ നോളജ് ഇല്ല.. സഖാക്കള്‍ ക്ഷമീ..).

രാജ്യത്തിന്റെ അഭിമാനത്തിന്റെ നെഞ്ചത്ത് കൂടി ക്യാറ്റ്‌ വോക് ചെയ്ത മാധുര ഹണിയ്ക്ക് ശേഷം ഇപ്പോള്‍ ഇതാ ബ്ലഡി മല്ലൂസിന്റെ നെഞ്ചത്ത്‌ പേട്ട തുള്ളാന്‍ഏല്ലാ വിധ സന്നാഹങ്ങളും തയ്യാറായി കഴിഞ്ഞു.

കുറേക്കാലത്തിനു ശേഷം ഒരു കൊട്ടേഷന്‍ ഒത്തുവന്നതില്‍ ഉള്ള സന്തോഷത്തില്‍ ആയിരിക്കണം ഷെഡ്ഡില്‍ നിന്നും ഇറങ്ങാനൊരുങ്ങുന്ന ഹര്‍ത്താല്‍ തൊഴിലാളികള്‍ ഇപ്പോള്‍.. നാളെ എത്ര ബസ്സുകള്‍ കത്തിക്കണം, എത്ര പേരുടെ മോന്ത അടിച്ചു ചളുക്കണം, എത്ര നികൃഷ്ട ജീവികളുടെ തന്തയ്ക്ക് വിളിക്കണം എന്നിങ്ങനെയുള്ള ശുദ്ധികലശങ്ങളുടെയും പൂജാവിധികളുടെയും കണക്കെടുപ്പില്‍ ആവണം പാര്‍ട്ടി പൂജാരികള്‍ ഇപ്പോള്‍.

അതെന്തായാലും വളരെ നികൃഷ്ടമായ ഒരു കീഴ്വഴക്കത്തിനാണ് സി.പി.എം കഴിഞ്ഞ കോഴിക്കോട് ജില്ലാ തല ഹര്‍ത്താല്‍ മുതല്‍ തുടക്കം കുറിച്ചിരിക്കുന്നത്. ഒരു ക്രിമിനല്‍ കേസിലെ പ്രതി എന്ന് സംശയിക്കുന്ന ഒരു വ്യക്തിയെ - അയാള്‍ ഏതു കോപ്പിലെ പാര്‍ട്ടിയുടെ കൊണാണ്ടന്‍ ആയാലും - അറസ്റ്റ്‌ ചെയ്ത് അകത്തിടാനും തെളിവുകള്‍ ശേഖരിക്കാനും അങ്ങനെ ശേഖരിച്ച തെളിവുകള്‍ കോടതിയില്‍ ഹാജരാക്കി ടിയാന് അര്‍ഹമായ ശിക്ഷ വാങ്ങിക്കൊടുക്കാനുമാണ് ഇന്ത്യന്‍ പീനല്‍ കോഡ്, പോലിസ്‌ എന്നിങ്ങനെയുള്ള സെറ്റപ്പുകള്‍ ഇന്ത്യയില്‍ നിലനില്‍ക്കുന്നത്. കേരളം ഈ ഇന്ത്യയിലെ ഒരു സംസ്ഥാനവും കണ്ണൂര്‍ ഈ സംസ്ഥാനത്തിലെ ഒരു ജില്ല മാത്രവും ആണ് എന്നിരിക്കെ മേല്‍പ്പറഞ്ഞ നിയമങ്ങള്‍ കണ്ണൂര്‍ ജില്ലാ സെക്രട്ടറിയ്ക്ക് ബാധകം അല്ല എന്ന് വരുന്നില്ല.
ഒരു പക്ഷെ കണ്ണൂര്‍ എന്നത് പ്രത്യേകമായ ഒരു രാജ്യമോ സമത്വ സുന്ദര ചൈനയുടെ ഒരു ഭാഗമോ ഒക്കെ ആണ് എന്നൊരു മിഥ്യാ ധാരണ അന്നാട്ടുകാരായ സഖാക്കള്‍ക്ക്‌ ഉണ്ടായാല്‍ കൂടിയും പ്രബുദ്ധര്‍ എന്ന് സ്വയം കരുതുന്ന സി.പി.എം സംസ്ഥാന നേതൃത്വം അത്തരമൊരു ധാരണ വെച്ച് പുലര്ത്തുന്നതിനെ നിരാശാജനകം എന്നെ വിശേഷിപ്പിക്കാനാവൂ. പുരോഗമനാത്മക രാഷ്ട്രീയ പ്രസ്ഥാനം എന്ന് നാഴികയ്ക്ക് നാല്‍പ്പതു വട്ടം മുക്രയിടുകയും കേരളത്തെ മൊത്തം വല്ലാത്തൊരു പുരോഗതിയുടെ തൊണ്ടക്കുഴിയില്‍ വരെ എത്തിക്കുകയും ചെയ്തവര്‍ നിയമവ്യവസ്ഥയ്ക്ക് നേരെ ഈ വിധം മുണ്ട് പൊക്കിക്കാട്ടുന്നതിലൂടെ ഏതു വിധത്തിലുള്ള പുരോഗമനത്തിലെയ്ക്കാണ് നാടിനെ നയിക്കുന്നത് എന്നതിനെപറ്റി പൊതുജനകഴുതകള്‍ക്ക് ഇനിയും പിടികിട്ടുന്നുണ്ടാവില്ല. ഇമ്മാതിരിയുള്ള ബാര്‍ബേറിയന്‍ നവോഥാന കാലഘട്ടത്തിന്റെ അന്തര്‍ധാരാതലങ്ങളെ പറ്റി സഖാകന്മാര്‍ ഒരു നിഷ്പക്ഷമായ അവലോകനം നടത്തുന്നത് നന്നായിരിക്കും എന്ന് തോന്നുന്നു. ചുരുങ്ങിയത് "കേരള ജനത ഹര്‍ത്താലിനെ ഇരുകൈകളും നീട്ടി സ്വീകരിച്ചു " എന്ന് നാളെ വൈകുന്നേരം ചാനലുകളുടെ മുന്‍പാകെ ഓരിയിടുന്നതിനു ഒരു അഞ്ചു മിനുട്ട് മുന്‍പെങ്കിലും..

ധന്യമായ കമ്യൂണിസ്റ്റ് ജീവിതം മാത്രം നയിക്കുന്ന ഒരു സഖാവാണ് ജയരാജന്‍ എന്ന് ബോധ്യമുള്ള ഒരു നേതൃത്വമാണ് സി.പി.എം നു ഉള്ളതെങ്കില്‍ ചെയ്യേണ്ടത് അന്തസ്സോടെ ഈ കേസിനെ നിയമപരമായി കോടതിയില്‍ നേരിടുകയാണ്. അതിനു പകരം സംസ്ഥാനത്തെ കലാപത്തിന്റെ തീച്ചൂളയാക്കുകയും നിയമം കയ്യിലെടുക്കുകയും ചെയ്യാനുള്ള ധാര്‍ഷ്ട്യമാണ് പാര്‍ട്ടി മുന്നോട്ടു വെയ്ക്കുന്നതെങ്കില്‍ പായും തലയണയും ട്രാവല്‍ ബാഗും ഒക്കെ ഒരുക്കി വെച്ചുകൊള്ളുക എന്ന് മാത്രമേ പറയാനുള്ളൂ. കാരണം ക്ഷമയുടെ നെല്ലിപ്പടിയും അതിനപ്പുറവുമൊക്കെ കണ്ടുകഴിഞ്ഞു കേരളത്തിലെ ജനങ്ങള്‍.

അങ്ങാടിയില്‍ തോല്‍ക്കുന്നതിനു വീണ്ടും വീണ്ടും പൊതുജനങ്ങളുടെ നെഞ്ചത്ത് പൊന്കാലയിടുന്ന സഖാക്കന്മാര്‍ നാളത്തെ പൊന്കാലയിടല്‍ തുടങ്ങുന്നതിനു മുന്നേ ഒരു ഹാന്‍ഡ്‌ കര്‍ച്ചീഫ് പോക്കറ്റില്‍ കരുതുകയോ തലയില്‍ കെട്ടുകയോ ചെയ്യുന്നത് നന്നായിരിക്കും. കൊടിയുടെ നിറമോ വടിവാളുകളുടെയും കുറുവടികളുടെയും പിന്ബലമോ ഇല്ലാത്ത ഒരു സമൂഹം ജനങ്ങളുടെ കാര്‍ക്കിച്ചു തുപ്പലുകള്‍ നിറുകയിലൂടെ ഒലിച്ചിറങ്ങുമ്പോള്‍ ഒപ്പിയെടുക്കാന്‍ ഇത് ഏറെ സഹായകമായിരിക്കും.

ചാനല്‍ റിയാലിറ്റിഷോയില്‍ ഫേവറിറ്റ് കൊച്ചിന് വേണ്ടി അയയ്ക്കുന്ന എസ് .എം.എസ് പോലെയാണ് നാളെ നിങ്ങള്‍ എറിയുന്ന ഓരോ പെട്രോള്‍ ബോംബുകളും കാറ്റ് കുത്തിവിടുന്ന ഓരോ ടയറുകളും ഇപ്പോള്‍ എലിമിനേഷന്‍ റൌണ്ടില്‍ നില്‍ക്കുന്ന ജയരാജന്‍ സഖാവിന് പ്രയോജനപ്പെടുക എന്നുതുടങ്ങിയ സ്റ്റഡി ക്ലാസ് വചനങ്ങളും കേട്ട്; നാളെ നിരത്തുകളിലെയ്ക്ക് ഇറങ്ങുന്ന അഭ്യസ്ത വിദ്യരോടു എന്ത് പറയണം എന്നറിയില്ല. പോലിസിന്റെ അടി വാങ്ങിയും നാട്ടുകാരുടെ പ്രാക്കു കേട്ടും തന്നിലെ വിശ്വോദാത്തമായ നേതൃപാടവം വികസിപ്പിക്കുന്നവര്‍ തീര്‍ച്ചയായും ഈ നാടിനു വഹിക്കാന്‍ കഴിയാത്ത ഭാരം തന്നെയാണെന്ന് പറയാതിരിക്കാന്‍ വയ്യ.

വാല്‍ക്കഷണം :-

UPDATE ON 03/07/2012:

അങ്ങനെ ഈ ഹര്‍ത്താലും വിജയകരമായി പരിസമാപിക്കുകയാണ്. പൊതുജനങ്ങളുടെ അണ്ണാക്കിലെയ്ക്ക് തിരുകാന്‍ വെച്ചിരുന്ന പരിപ്പുവടയുടെ ഒരു വീതം കുട്ടി സഘാവിനും കിട്ടി എന്ന്‍ വായിച്ചറിഞ്ഞു..
സന്തോഷായി വിജയേട്ടാ.. പെരുത്ത്‌ സന്തോഷായി!!

തട്ടം വലിച്ചു കീറുന്നവര്‍..

2012-07-17T09:49:00.000-07:00

         മലയാള സിനിമയുടെ പുല്തകിടികളില്‍ സ്വച്ഛമായി മേഞ്ഞ് അര്‍മ്മാദിച്ച് നടക്കുന്ന ng കോലാടുകള്‍ക്കിടയിലെ നിഷ്കളങ്കനായ ചെമ്മരിയാട്ടിന്‍കുട്ടി എന്ന പോലെയാണ് അടുത്ത കാലത്തിറങ്ങിയ "തട്ടത്തിന്‍ മറയത്തു " എന്ന സിനിമ അനുഭവപ്പെട്ടത്. വിശ്വോദാത്ത ചിത്രം എന്നൊന്നും പറയുന്നില്ല. മനോഹരമായ ഒരു പ്രണയ ചിത്രം. ന്യൂജനറേഷന്‍ അപ്പസ്തോലന്മാരുടെ ചട്ടക്കൂടുകളില്‍ നിന്നും വേറിട്ടുനില്‍ക്കുന്ന ഒരു ചിത്രം എന്നും വേണമെങ്കില്‍ പറയാം. ഒരു ന്യൂ ജനറേഷന്‍ സിനിമയുടെ കണ്‍വെന്ഷണല്‍ കൂട്ടുകള്‍   മിസ്സായിരിക്കുന്നത് കണ്ടപ്പോളേ തോന്നി NG ബുദ്ധിജീവികള്‍ തൂലിക പടവാളാക്കി ആഞ്ഞടിക്കുമെന്ന്. ഏതു കോപ്പിലെ പുല്ലന്മാര്‍ ആഞ്ഞടിച്ചാലും ഇല്ലേലും പടം സൂപ്പര്‍ കളക്ഷനുമായി മുന്നേറുകയാണെന്നാണു ഒടുക്കം കിട്ടിയ വിവരം. എന്തായാലും സിനിമയെ വെറും എന്‍റര്‍ടയിന്മന്റ്റ് മാത്രമായി എടുക്കുന്ന ഒരു ബ്ലഡി മലയാളി ആയതുകൊണ്ടാകാം പടം എനിക്ക് ഇഷ്ടമായി.
   എന്റെ സുഹൃത്തുക്കളെല്ലാം എന്റെ തന്നെ ഒരു സ്റ്റാന്‍ഡാര്‍ഡ് (ഐ മീന്‍ ലോ സ്റ്റാന്‍ഡാര്‍ഡ് ) കീപ്പ്‌ ചെയ്യുന്നത് കൊണ്ടാകാം അവരെല്ലാം ഒരേ സ്വരത്തില്‍ പറഞ്ഞത് 'പടം കിടു ആണ്' എന്നു തന്നെയാണ്.   ജനറേഷന്‍ വ്യത്യാസമില്ലാതെ കേരളത്തിലെ   യുവാക്കള്‍ ഈ ചിത്രം ഒരേപോലെ നെഞ്ചിലേറ്റുമ്പോള്‍, നവ തലമുറ ചിത്രങ്ങള്‍ "ചാപ്പാകുരിശ് ട്രാക്ക്‌" പിന്തുടരാത്തതില്‍ ആശങ്കപ്പെടുന്ന എലൈറ്റ്‌ ക്ലാസ്‌ കൊച്ചമ്മമാര്‍ സര്‍ജിക്കല്‍ ബ്ലേഡുമായി (ഏത്.. നമ്മുടെ 22fk ഫെയിം ബ്ലേഡ്‌ തന്നെ!!) തട്ടത്തിനെ സോഷ്യല്‍മീഡിയകളില്‍ ചപ്രംചിപ്രം വലിച്ചുകീറുന്ന കാഴ്ചകള്‍ ആകാംഷയും കൌതുകവും ഒരേപോലെ സമ്മാനിക്കുന്നുണ്ട്. എന്തായാലും പശുവിന്റെ കടിയും തീരും, കാക്കയുടെ വിശപ്പും മാറും എന്ന് പറയുന്ന പോലെയാണ് കാര്യങ്ങള്‍ നീങ്ങുന്നത്. വിമര്‍ശനം കൂടും തോറും ക്യൂവിന് നീളം കൂടുകയാണ്.
   ന്യൂജനറേഷന്‍ തൊഴുത്തില്‍ പോയിട്ട് അതിന്റെ ഏഴയലത്ത് അടുപ്പിക്കാനുള്ള യോഗ്യത പോലും ടി ചിത്രത്തിന് ഇല്ലത്രേ!!. നുരയുന്ന ബിയര്‍ കുപ്പികളും നുണഞ്ഞു മെയില്‍ ഷോവനിസ്സ്റ്റ്‌ പന്നികളുടെ മുഖത്ത് കാറിതുപ്പുന്ന നായികമാരില്ല, ഉള്ള നായികമാര്‍ക്ക് ബോള്‍ഡ്‌നെസ് ഇല്ല, (അല്ലേലും ബോള്‍ഡ്‌ നെസ് എന്നൊക്കെ പറഞ്ഞാല്‍ രമ്യ നമ്പീശന്‍ കഴിഞ്ഞിട്ടേ ഉള്ളൂ എന്നത് ആര്‍ക്കാ അറിയാത്തത്‌!!) പ്രീ/പോസ്റ്റ്‌ മാരിറ്റല്‍ സെക്സ് സീനുകള്‍ ഇല്ല, മെട്രോ ലൈഫ്‌ പഞ്ചുകള്‍ ഒട്ടും ഇല്ല.. അങ്ങനെ ഒരു NGയ്ക്ക് ആവശ്യമായതൊന്നും തന്നെ ഇല്ല. ആകെയുള്ളത് സദാചാര പന്നികള്‍ക്ക് എതിരെ ഇത് പാക്കിസ്ഥാന്‍ അല്ലന്നോ മറ്റോ ഉള്ള ഒരു കൊട്ട് ആണ്. അതും എങ്ങും തൊടാതെ!! പിന്നെ എന്ത് കോപ്പിലെ ന്യു ജെന്‍!!.
   വിനീത് ശ്രീനിവാസന്‍ ഏതു കോപ്പിലെ ഇന്‍സ്ടിട്യുട്ടില്‍ നിന്നാണ് ഡയറക്ഷന്‍ പഠിച്ചത് എന്നും ഇതാണ് പ്രണയം എന്നു പറയാന്‍ ടിയാന്‍ ഇതിനു മുന്‍പ്‌ പ്രേമിച്ചിട്ടുണ്ടോ എന്നുമാണ് നിരൂപക സിംഹങ്ങളുടെയും സിംഹികളുടെയും ഗര്‍ജ്ജനം. ശ്രീനിവാസന്‍ സാര്‍ ആനപ്പുറത്ത് കയറിയപ്പോള്‍ ഉണ്ടായ തഴമ്പുകള്‍ ഒന്നും തന്നെ മകന് കിട്ടിയിട്ടില്ല പോലും. (തഴമ്പുകള്‍ - പ്രത്യേകിച്ചും ചന്തിയിലെ തഴമ്പുകള്‍- അവലോകനം ചെയ്യാന്‍ NG പെണ്‍പിള്ളേര്‍ വളരെ സമര്‍ത്ഥരാണത്രെ!!. ഒട്ടും തഴമ്പ് ഇല്ലാത്തതിനാല്‍ വിനീതിന്റെ ചന്തിയ്ക്ക് അപ്പന്‍ രണ്ടു പെട കൊടുക്കേണ്ടതായിരുന്നു എന്ന് വരെ ഒരുത്തി (?) അഭിപ്രായപ്പെടുന്നു..) ഇതൊന്നും പോരാഞ്ഞ് ഒരു സ്ത്രീ വിരുദ്ധ-മുസ്ലീം വിരുദ്ധ ചിത്രമായി ഇതിനെ മുദ്ര കുത്തുവാന്‍ ടി നിരൂപകര്‍ പ്രത്യേകം ശ്രദ്ധ വയ്ക്കുന്നുണ്ട് താനും. പ്രണയം എന്ന ബന്ധുര കാഞ്ചനക്കൂട്ടില്‍ പെണ്ണിനെ എക്കാലവും ബന്ധിച്ചിടാനുള്ള പുരുഷ കേന്ദ്രീകൃത ലോകത്തിന്റെ ഒടുങ്ങാത്ത ത്വര ആണ് ഈ ചിത്രത്തില്‍ വെളിവാകുന്നതെത്രേ!! ഫയങ്കരം തന്നെ അല്ലെ !!

ഒരു കണക്കിന് ആലോചിച്ചു നോക്കുമ്പോള്‍ ശരിയാണ്. സിനിമയിലെ നായികയുടെ തട്ടത്തിനിടയിലൂടെ പറന്നു കളിക്കുന്ന മുടിയിഴകള്‍ പുരുഷാധിപത്യ - സ്ത്രീ വിരുധ ലോകത്തിനു നേരെയുള്ള സ്ത്രീ സമൂഹത്തിന്റെ പുശ്ചത്തിന്റെ പരിപ്രേക്ഷ്യങ്ങളാണെന്നും   ടി പര്‍ദ്ദയുടെ കറുപ്പുനിറം പുരുഷ കേന്ദ്രീകൃതമായ ലോകത്ത് കഞ്ഞിക്കലത്തിന്റെ കരി പുരണ്ട് പണ്ടാരടങ്ങിയ പെന്ഹൃദയങ്ങളുടെ ഇരുണ്ട ലോകങ്ങളുടെ അടയാളപ്പെടുത്തലുകള്‍ ആണെന്നും    വരികള്‍ക്കിടയിലൂടെയും വരികള്‍ക്ക് അടിയിലൂടെയും വായിച്ചെടുക്കുന്ന ഒരു നിരൂപക സമൂഹം ഇങ്ങനെയല്ലാതെ പിന്നെങ്ങനെയാണ് ഒരു സിനിമയെ വിലയിരുത്തേണ്ടത്?- അതും ന്യൂ ജെന്‍ എന്ന ലേബലില്‍ അവതരിപ്പിക്കുന്ന ഒരു സിനിമ!.. ഒരു NG നായകന്‍ മുഖസൌന്ദര്യം മാത്രം നോക്കി പ്രണയിനിയെ സെലെക്റ്റ് ചെയ്യാന്‍ പാടുണ്ടോ എന്ന് ടിയാന്മാര്‍ ചോതിക്കുന്നു. (ഇവന്മാര്‍ പിന്നെ എവിടത്തെ സൌന്ദര്യം നോക്കി ആണ് പ്രണയിക്കുന്നത് എന്ന കണ്ഫ്യൂഷന്‍ എന്നെ കുറെ നാള്‍ വേട്ടയാടിയിരുന്നു.. ഇത്തരത്തിലുള്ള ഒരു അധ്യാത്മിക പ്രതിസന്ധിയില്‍ പെട്ട് നട്ടം തിരിയുമ്പോള്‍ ആണ് ഇന്ത്യന്‍ എക്സ്പ്രസ്-ന്റെ ഒരു സര്‍വേ ഫലം കണ്ണില്‍ ഉടക്കിയത്.. വായിച്ചുകഴിഞ്ഞപ്പോ പല സംശയോം മാറിക്കിട്ടി!!.. )
    കാര്യം ഇങ്ങനോക്കെയായാലും നായകന്റെയും നായികയുടെയും മതവും ജാതിയും സാമ്പത്തിക നിലവാരങ്ങളും മാത്രം ആധാരമാക്കി ഒരു ചിത്രത്തെ വെറുക്കപ്പെടെണ്ടത്, പൈങ്കിളി എന്നിങ്ങനെ ലേബലുകളും ചാര്‍ത്തുകയും ടി സിനിമയുടെ കഥ അപ്പാടെ ഫെമിനിസ്റ്റ്‌ -മതവിദ്വേഷ കാളകൂടങ്ങള്‍ കലക്കി നിരൂപണം എന്ന പേരില്‍ ചര്‍ദിച്ചു വെയ്ക്കുകയും ചെയ്യുന്നത് എത്രത്തോളം മലയാള സിനിമയെ പരിപോഷിപ്പിക്കും എന്നറിയില്ല. എന്തൊക്കെയായാലും NGകള്‍ക്ക്‌ നിഷിദ്ധമായ ഇത്തരം ചിത്രങ്ങള്‍ ബോക്സ്‌ ഓഫീസ് തകര്‍ത്തു വാരുന്നതുകൊണ്ട് ടിയാന്മാര്‍ക്ക്‌ എന്തെന്നില്ലാത്ത നെഞ്ചെരിച്ചിലും വയറുകടിയും ഉണ്ടാവുക സ്വാഭാവികം. സമീപകാലത്ത് പുതുതലമുറ പരിപ്രേക്ഷ്യങ്ങള്‍ ഒന്നും തന്നെ ഇല്ലാതെ തിയറ്ററുകള്‍ നിശബ്ദമായി കീഴടക്കിയ 'ഓര്‍ഡിനറി' എന്ന ഓര്‍ഡിനറി ചിത്രം റിലീസ്‌ ചെയ്തപ്പോളും ഇതുപോലുള്ള ഹൈക്ലാസ്‌ പോമറെനിയന്‍ അന്നക്കുട്ടികള്‍ നന്നായി കുരച്ചിരുന്നു. കുരയുടെ സ്വരം നന്നാകാഞ്ഞിട്ടാണോ അതോ ടി ഹൈ ക്ലാസുകാര്‍ 'മോശം' എന്നു പറയുന്നതിനെ നല്ലത് എന്ന വിപരീതാര്‍ത്ഥത്തില്‍ നാട്ടുകാര്‍ വായിച്ചെടുക്കുന്നതുകൊണ്ടാണോ (നാട്ടുകാരും പണി പഠിച്ചു പോയി.. ഏത്!!) എന്തോ ആ കുണ്ടും കുഴിയും ചാടി ഓടിയ ഓര്‍ഡിനറി ബസ്സും വമ്പന്‍ ഹിറ്റ്‌ ആയിരുന്നു.
       നല്ല ചിത്രങ്ങള്‍ കേരളത്തില്‍ ഓടുന്നില്ല, ഓടുന്നതൊക്കെ നിലവാരം കുറഞ്ഞ പഴഞ്ചന്‍ പൈങ്കിളി പ്രണയ കാവ്യങ്ങള്‍ ആണെന്നും കഷ്ടിച്ച് ഒരാഴ്ച പോലും തിയറ്ററില്‍ ഓടാതെ വിസ്മൃതിയിലെയ്ക്ക് തള്ളപ്പെടുന്നതാണ് മഹത്തരമായ ചിത്രങ്ങള്‍ എന്നും മറ്റും ഒരു കാലത്ത് വാദിച്ചിരുന്നത് കുളിയും നനയും ഇല്ലാത്ത, വര്‍ഷത്തില്‍ ഒരിക്കല്‍ മാത്രം പല്ലുതെയ്ക്കാറുള്ള , താടിയും മുടിയും നീട്ടി വളര്‍ത്തിയ, വംശനാശ ഭീഷണി നേരിടുന്ന ഒരു പറ്റം ജീവികള്‍ ആയിരുന്നു. മലയാളികളുടെ ബൌദ്ധിക നിലവാരത്തെ ദിവസം ഒരു തവണയെങ്കിലും പുശ്ചിച്ചില്ല എങ്കില്‍ ടിയാന്മാര്‍ക്ക് കോന്‍സ്ടിപ്പെഷന്‍ ഉണ്ടാകുമായിരുന്നു എന്നാണ് ചരിത്രകാരന്മാര്‍ പറയുന്നത്.

   മലയാള സിനിമകളെ- പ്രത്യേകിച്ച് പത്തു പേര്‍ "നല്ലത് " എന്നു പറയുന്നവയെ- താത്വികമായും രാടിക്കല്‍ ആയും പോസ്റ്റ്മോര്‍ട്ടം ചെയ്ത്, "ഇതൊക്കെ എന്ത് !!.. ചീള് കേസുകള്‍.. പഴകിയ പ്രമേയം.. മാനവികതയുടെ അഗാധതലങ്ങളോടു യാതൊരു സ്പര്‍ശവും പുലര്‍ത്താത്തത്.." എന്നിങ്ങനെ ഡയലോഗ് അടിച്ചുകൊണ്ടിരിക്കുന്നത് ടിയാന്മാരുറെ ദിനച്ചര്യകളുടെ ഭാഗവുമായിരുന്നു. ഇന്ന് ഈ NGയുഗത്തില്‍ വ്യക്തമായ ഐഡന്റിറ്റിയോ അഡ്രസ്സോ ഇല്ലാത്ത കുറെ കീബോര്‍ഡ്‌ തൊഴിലാളികള്‍ ഈ അനുപമമായ പൈതൃകം ഏറ്റെടുത്തിരിക്കുകയാണ്. ഒരു പ്രമുഖ സംവിധായകന്റെ വാക്കുകള്‍ കടമെടുത്താല്‍ ഒരു സെക്കണ്ടില്‍ 24 ഫ്രെയിമുകള്‍ കൂടിച്ചേരുമ്പോള്‍ ആണ് സിനിമ സിനിമയാവുക എന്ന പ്രാഥമിക അറിവുപോലും ഇല്ലാത്ത ജീവികള്‍ ആണ് ഇന്ന് ആധുനിക നിരൂപക പുംഗവന്മാര്‍ ആയി പേരെടുക്കുന്നത്.
          വിമര്‍ശിക്കാന്‍ വേണ്ടി മാത്രം തിയറ്ററില്‍ പോയി പടം കാണുകയും ബ്ലഡി മല്ലൂസ് 'നല്ലത്' എന്ന് പറയുന്ന സിനിമകളെ തലനാരിഴ കീറി പരിശോധിച്, അധിനിവേശ - പുരുഷാധിപത്യ - പൈങ്കിളി സംസ്കാരത്തിന്റെ അമൂര്‍ത്ത ശകലങ്ങള്‍ എന്നോ പഴകി പുളിച്ച കാല്പനിക വീഞ്ഞ് എന്നോ മറ്റോ ഉള്ള വിശേഷണങ്ങള്‍ ചാര്‍ത്തി പുശ്ചിച്ചു തള്ളുമ്പോള്‍ ഇവര്‍ക്ക്‌ ലഭിക്കുന്ന അനിര്‍വചനീയമായ ആ സുഖം ഏതു കാറ്റഗറിയില്‍ പെടും എന്നതിനെപറ്റി ശാസ്ത്രം ഇപ്പോഴും ഒരു തീരുമാനത്തില്‍ എത്തിയിട്ടില്ല എന്ന് തോന്നുന്നു.. അഭിപ്രായ സ്വാതന്ത്യം എന്നത് എന്തും വിളിച്ചുപറയാനും ആരുടെ നെഞ്ചത്തും പൊന്കാലയിടാനുമുള്ള ഒരു തരം അവകാശമായതിനാലും ലവന്മാര്‍ (ലവളുമാരും) പറയുന്നത് പോഴത്തരം ആണ് എന്ന് പറയാനുള്ള സ്വാതന്ത്ര്യം എനിക്കും ഉള്ളതിനാലും ഇത്തരം സുഖങ്ങളുടെ സാങ്കേതിക തലത്തിലേയ്ക്ക് ഞാന്‍ കടക്കുന്നില്ല.
               ഒരു പറ്റം ആളുകളുടെ ഉറക്കമില്ലാത്ത രാവുകളുടെയും പ്രതിബന്ധങ്ങളില്‍ തളരാതെയുള്ള പടയോട്ടങ്ങളുടെയും ആകെത്തുകയാണ് ഒരു സിനിമ എന്നത്. അതിനെ ഏതുവിധേനയും പൊളിച്ചടുക്കാന്‍ വേണ്ടി മാത്രം തൂലിക ചലിപ്പിക്കുകയും, എത്ര നന്നായി ചെയ്താലും കുറ്റം മാത്രം കാണുകയും ചെയ്യുന്ന, സിനിമ നിരൂപണം എന്നാല്‍ റിലീസ്‌ ദിവസം തന്നെ സിനിമയുടെ ആദി-മധ്യാന്തം കഥ സോഷ്യല്‍ മീഡിയയില്‍ വികൃതമാക്കി   എഴുതിവെയ്ക്കുന്നതാണ് എന്ന് കരുതുന്ന, എങ്ങനെയാണ് നല്ല സിനിമ എടുക്കേണ്ടത് എന്ന വിഷയത്തില്‍ രഞ്ജിത് സാറിനും സത്യന്‍ അന്തികാടിനും ക്രാഷ് കോഴ്സ്‌ കൊടുക്കുന്ന ഇത്തരം കീബോര്‍ഡ്‌ തൊഴിലാളികള്‍ സമകാലീന ചരിത്രത്തിന്റെ ഫ്രെയിമില്‍ പതിഞ്ഞ ഏറ്റവും വലിയ അശ്ലീലങ്ങളിലോന്നാണ് എന്നു തന്നെയാണ് എന്റെ അഭിപ്രായം.

(NB: ഇത് എന്റെ വ്യക്തിപരമായ അഭിപ്രായമായതിനാലും NG ഫെമിനിസ്റ്റ്‌ കൊച്ചമ്മമാരുമായി തായം കളിക്കാന്‍ ഞാന്‍ ഇഷ്ടപ്പെടാത്തതിനാലും വിധികാല വൈപരീപ്യത്താല്‍ ഇത് വായിക്കാന്‍ ഇടയായ നിരൂപക കൊച്ചമ്മമാര്‍ തങ്ങള്‍ ഒന്നും വായിച്ചിട്ടില്ല എന്ന് മാത്രം കരുതുക. കുറച്ചുകൂടി ലളിതമായി പറഞ്ഞാല്‍ കെട്ടിയോന്റെ പൂശ് വാങ്ങുമ്പോള്‍ നിങ്ങള്‍ കരുതാറുള്ളത് പോലെ എല്ലാം മായ എന്ന് കരുതി സമാധാനിക്കുക.. വേണമെങ്കില്‍ "ഔട്ട്‌സ്പോക്കെന്‍ ബ്ലഡി മല്ലു സക്ക്സ് എഗയിന്‍.." എന്നൊരു സ്ടാടസ് അപ്-ഡേറ്റ് കൂടി താങ്ങിക്കോളൂ..)

ന്യൂ ജെന്‍. പ്രൊഫൈല്‍ പാകം ചെയ്യുന്ന വിധം..

2012-07-04T12:26:00.003-07:00

നാടും നാട്ടാരും NGകള്‍ക്ക് പുറകെ പരക്കം പായുകയും ഫേസ്ബുക്കില്‍ ആകമാനം ന്യൂ ജനറേഷന്‍ വസന്തം പൂത്തുലയുകയും കോഴിയിറച്ചിയും കപ്പലണ്ടിയും മുതല്‍ സിനിമാ - രാഷ്ട്രീയ - സാഹിത്യ - സാംസ്കാരിക രംഗങ്ങള്‍ വരെ 'ന്യൂ ജനറേഷന്‍' പരിപ്രേക്ഷ്യങ്ങളില്‍ അവതരിപ്പിക്കപ്പെടുകയും ചെയ്യുമ്പോള്‍ എന്താണ് തനിയ്ക്ക് ചുറ്റും ഈ സംഭവിയ്ക്കുന്നത് എന്ന് മനസിലാകാതെ കുന്തം വിഴുങ്ങി നില്‍ക്കുകയും എങ്ങനെ തനിക്കും ഒരു NG ആകാം എന്നോര്‍ത്ത് തലമണ്ടയില്‍ ഗ്യാസ്‌ ലൈറ്റര്‍ തെളിക്കുകയും ചെയ്യുന്ന വെറും സാധാരണക്കാരനെ ഉദ്ദേശിച്ചാണ് ഈ പോസ്റ്റ്‌.

'ന്യുജനറേഷന്‍' എന്നാല്‍ അട്ടര്‍ വെറൈറ്റി മാത്രമാണ് എന്ന തിയറിയാണ് താങ്കള്‍ ആദ്യമായി മനസിലാക്കേണ്ടത്. ഉദാഹരണത്തിന്, നോര്‍മ്മല്‍ രീതിയില്‍ സിനിമ കാണുകയും ലാലെട്ടന്റെയും മമ്മുക്കയുടെയും കാമുക-യുവത്വ ഭാവങ്ങള്‍ കണ്ടു രോമാഞ്ചിച്ചുകൊണ്ടിരിക്കുകയും അവസാനം ശുഭം എന്നെഴുതുമ്പോള്‍ കയ്യടിക്കുകയും ചെയ്ത ജനത്തിന് മുന്നില്‍, നോണ്‍-ലീനിയര്‍ എഡിറ്റിംഗ് വിസ്മയത്തിലൂടെ വാല്‍ ആദ്യവും തല നടുക്കും കഴുത്ത് അവസാനവുമായി ഒരു അത്ഭുത ജീവിയെ പ്രസവിച്ചിടുകയും, "എന്തുതരം ജീവിയാണ് ഇത് "എന്നുള്ള ഒരുതരം വിഭ്രമാത്മക കണ്ഫ്യൂഷന്‍ പ്രേക്ഷകര്‍ക്ക്‌ സമ്മാനിച്ച്, അവന്റെ കോഴിമുട്ട വലിപ്പമുള്ള ബ്രെയിന് എട്ടിന്റെ വര്‍ക്ക്‌ കൊടുക്കുകയും ചെയ്തു എന്നതാണല്ലോ ന്യൂജനറേഷന്‍ സിനിമകളുടെ ആകെത്തുക തന്നെ.

പ്രധാനമായും ഫേസ്ബുക്ക്, ട്വിറ്റര്‍ തുടങ്ങിയ സോഷ്യല്‍ നെറ്റ്‌വര്‍ക്ക്കളിലാണ് NGവീരന്മാര്‍ ജന്മമെടുക്കാറുള്ളത്. അത്യപൂര്‍വമായി ഇതുപോലുള്ള ബ്ലോഗുകളിലും അവര്‍ അവതാരം ചെയ്യാറുണ്ട്. സൊമാലിയയിലെ പട്ടിണി മുതല്‍ അന്റാര്‍ട്ടിക്കന്‍ കാടുകളിലെ നീഗ്രോകളുടെ വെളുപ്പ്‌ ദീനത്തിനു വരെ ശാശ്വതമായ പരിഹാരം തങ്ങളുടെ വാള്‍ പോസ്ടുകളിലാണ് സംഭവിക്കുക എന്നുള്ള ഒരുതരം ആത്മവിശ്വാസം (അങ്ങനെയും പറയാമെന്നു തോന്നുന്നു) NGകള്‍ക്ക്‌ ഒഴിച്ച് കൂടാനാവാത്ത ഘടകമാണ്. താന്‍ ഒരു മഹാസംഭവം ആണെന്നും തന്നെ മൈന്‍ഡ്‌ ചെയ്യാതെ സോഷ്യല്‍ മീഡിയയുടെ തിണ്ണ നിരങ്ങുന്നവര്‍ ഗ്രാസ്റൂട്ട് ലെവല്‍ കിഴങ്ങന്മാര്‍ ആണെന്നുമുള്ള മഹാസത്യം ഒരു NG എക്കാലത്തും ഹൃദയത്തില്‍ സൂക്ഷിച്ചു ധ്യാനിക്കെണ്ടതാണ്.

ഇത്തരത്തിലുള്ള ഒരു ധാരണയില്‍ നിന്നുമാവണം പിന്നീടുള്ള താങ്കളുടെ ഫേസ്ബുക്ക് ഇതിഹാസങ്ങള്‍ ജന്മമെടുക്കാന്‍...

ഒരു NG ആകാന്‍ തക്കവിധം താങ്കളുടെ ഹൃദയം ഇതിനകം ത്രസിച്ചു തുടങ്ങിയെങ്കില്‍ തുടര്‍ന്നു വായിക്കാം. ഇല്ലെങ്കില്‍ ഈ കോപ്പിലെ ബ്ലോഗ് വായന ഇവിടെ നിര്‍ത്തി വേറെ പണി നോക്കാം..

ഫേസ്ബുക്ക് പ്രൊഫൈല്‍ :-

താങ്കളുടെ ഫേസ്ബുക്ക് പ്രൊഫൈല്‍ ഒരു NGയ്ക്ക് ചേര്‍ന്ന വിധം പരുവപ്പെടുത്തി എടുക്കുക എന്നതാണ് ആദ്യ ഘട്ടം..

കാണാന്‍ കൊള്ളാവുന്ന, ചന്ദ്രനെപ്പോലെ വിളങ്ങുന്ന മുഖമാണ് തന്റേതു എന്ന് ഉറപ്പു പോരാത്തവര്‍ പ്രൊഫൈല്‍ പിക് ആയി അത് ചേര്‍ത്ത് നാടുകാരെ ഞെട്ടിക്കാതിരിക്കുക. ഒരു വെറൈടി ഉണ്ടായിരിക്കാന്‍ എപ്പോളും ശ്രദ്ധിക്കുക. (അല്ലേലും ഈ NG എന്നത് തന്നെ ഒരുതരം വെറയ്ടി ആണല്ലോ). മല്ലു സെലിബ്രിറ്റികള്‍, ഇന്ത്യന്‍ ഫിലിം സ്ടാര്സ് എന്നിവരുടെ പിക്സ് പ്രൊഫൈലിലും കവറിലും ഇട്ടു ബ്ലഡി മല്ലൂസിന് പഠിക്കാതിരിക്കുക. വേണമെങ്കില്‍ ക്യു.ആര്‍ കോഡോ വല്ല മോഡേണ്‍ ആര്‍ട്ടോ ഒക്കെ പ്രൊഫൈല്‍ പിക് ആയി കൊടുത്ത് കാണുന്നവന്റെ തലയില്‍ ട്രെയിന്‍ ഓടിക്കാം. ഇനി സ്വന്തം പടം വേണമെന്ന് നിര്‍ബന്ധം ആണേല്‍ ഫോട്ടോഷോപ്പില്‍ കയറ്റി മോന്തയുടെ ഏതേലും ഒരു പാര്‍ട്ട് മാത്രം സ്ലൈസ് ചെയ്തെടുത്തു ടി പാസ്സഞ്ചര്‍ ട്രെയിന്‍ സൂപ്പര്‍ ഫാസ്റ്റ്‌ ആക്കാം..

( പെണ്കൊച്ചുങ്ങളുടെ പേരില്‍ NG ഫെയ്ക്‌ പ്രൊഫൈല്‍ ഉണ്ടാക്കുന്നവര്‍ ശ്രദ്ധിക്കാന്‍..

നിങ്ങള്‍ പ്രൊഫൈല്‍ പിക്ക്‌ ആയി കൊടുക്കാന്‍ ഉദ്ദേശിക്കുന്ന ചെല്ലക്കിളിയെ ഗൂഗിള്‍ ഇന്‍ഡെക്സ് ചെയ്തിട്ടുണ്ടോ എന്ന് ചെക്ക് ചെയ്തിട്ട് മാത്രം അപ്‌ലോഡ്‌ ചെയ്യുക. ഗൂഗിള്‍ ഇന്‍ഡെക്സ് ചെയ്യാത്ത ചെല്ലക്കിളികള്‍ എല്ലാം ജെനുവിന്‍ ആണെന്നാണ്‌ പല കൊജ്ഞാനന്‍മാരും കരുതുന്നത്.)

ടൈം ലൈന്‍ :-

അമേരിക്കയിലോ ഇംഗ്ലണ്ടിലോ മറ്റേതെങ്കിലും യൂറോപ്യന്‍ രാജ്യങ്ങളിലോ ജനിക്കെണ്ടിയിരുന്ന താന്‍ ഈ നശിച്ച ഇന്ത്യയില്‍ ജനിച്ചുപോയത്‌ ഈ രാജ്യത്തിന്റെ അസുലഭ സൌഭാഗ്യമാണെന്നും, തന്നോടു തായം കളിക്കാന്‍ മാത്രം ഒരു ബ്ലഡി മല്ലുവും വളര്‍ന്നിട്ടില്ലെന്നുമുള്ള ഒരു സന്ദേശം ടൈം ലൈനില്‍ മുഴച്ചു നില്‍ക്കണം.

നിങ്ങള്‍ക്ക്‌ ഇഷ്ടപ്പെട്ട പുസ്തകം മംഗളം വാരികയോ ബാലരമയോ ഒക്കെ ആയാലും അതൊന്നും പ്രൊഫൈലില്‍ എഴുന്നള്ളിക്കാതിരിക്കുക. ജോണ്‍ ഗ്രീന്റെ "ഫാള്‍ട്ട് ഓഫ് ഔര്‍ സ്ടാര്സ്", ഗിള്ളിയന്‍ ഫ്ലയ്ന്റെ 'ഗോണ്‍ ഗേള്‍' എന്നിവ പോലെ ന്യൂ.ജെന്‍ ആംഗലേയ കൃതികള്‍ ലിസ്റ്റ് ചെയ്യുന്നത് മേല്പറഞ്ഞ സന്ദേശത്തെ അരക്കിട്ടുറപ്പിക്കും. ഇഷ്ടഗായകരുടെ ലിസ്റ്റില്‍ ലേഡി ഗാഗയും റിഹാനയും മിസ്സാകരുത്‌. വേണമെങ്കില്‍ ആകൊനും ജസ്റ്റിന്‍ ബീവറും കിടക്കട്ടെ.. അല്ലാണ്ട് ഒരുമാതിരി കണ്ട്രി മല്ലൂസിനെപ്പോലെ രവീന്ദ്രന്‍ മാഷ്‌, ഇളയരാജ എന്നൊന്നും ഒലത്തിയെക്കരുത്!!.

ഇതുപോലെ തന്നെ ഇഷ്ട സിനിമകളും.. ഹോളിവുഡ്-ലാട്ടിനമേരിക്കന്‍ സിനിമകള്‍ മാത്രം ലിസ്റ്റുക. ഇനി മലയാളം അത്രയ്ക്ക് നിര്‍ബന്ധമാണേല്‍ 'ചാപ്പ കുരിശ്', 22fk, ബാച്ചലര്‍ പാര്‍ട്ടി എന്നിവയിലൊന്നു ചേര്‍ത്തോ..

ഇപ്പൊ ടൈം ലൈന്‍ ഒരുമാതിരി ന്യൂ ജെന്‍ ആയിട്ടുണ്ട്.

ഇനി പോസ്ടുകളുടെ കാര്യം..

താഴെപ്പറയുന്ന തത്വങ്ങളുടെ എസ്സെന്‍സ് ചേര്‍ത്ത് വേണം പോസ്റ്റുകള്‍ വഴറ്റിയെടുക്കാന്‍...

1. എല്ലാ മലയാളികളും എഴാംകൂലി ഞരമ്പ്‌ രോഗികളും അമ്മപെങ്ങന്മാരെ തിരിച്ചറിയാത്ത പുല്ലന്മാരുമാണ്. NGകളെ കഴുവേറ്റാന്‍ ടിയാന്മാര്‍ കയറും പിരിച്ചു കാത്തിരിക്കുകയാണ്.

2. നിര്‍ഭാഗ്യവശാല്‍ ഒരു മലയാളി ആയിപ്പോയി എങ്കിലും ബൌധികപരമായി യൂറോപ്യന്‍ പുല്തകിടികളില്‍ സ്ഥിരമായി മേഞ്ഞു നടക്കുന്നത്‌ കൊണ്ട് മേല്പറഞ്ഞ പുല്ലന്മാര്‍ക്കിടയിലെ മാലാഖകുഞ്ഞാണ് താന്‍.

3. ഇന്ത്യ നേരിടുന്ന ഏറ്റം വലിയ ഭീഷണി സാമ്പത്തിക മാന്ദ്യവും ദാരിദ്രവും രൂപയുടെ വിലയിടിച്ചിലും ഒന്നുമല്ല, മറിച്ച് അണ്‍കള്‍ച്ചര്ട് സദാചാര പോലീസുകാരാണ്.

4. ട്രാഫിക്കിനും ചാപ്പകുരിശിനും മുന്‍പ്‌ കേരളത്തില്‍ ഇറങ്ങിയത്‌ ഒന്നും സിനിമ അല്ല. ഫഹദ്‌ ഫാസിലും രമ്യ നമ്പീശനും ആണ് അഭിനയ ലോകത്തിലെ വിശ്വോദാത്ത പ്രതിഭകള്‍.

5. താനൊഴികെ ഓണ്‍ലൈന്‍ ലോകത്ത് നെരങ്ങുന്ന സകല മല്ലൂസും കെഴങ്ങന്മാര്‍ ആണ്. തന്റെ പോസ്റ്റുകള്‍ ലൈക്കുകയും ഷെയര്‍ ചെയ്യുകയും ചെയ്തു മാത്രമേ ടി അവസ്ഥയില്‍ നിന്നും അവര്‍ക്ക് മോക്ഷം നേടാനാവൂ..

6. തന്റെ പോസ്റ്റിന്റെ ലൈക്കുകളെ ആശ്രയിച്ചിരിക്കും സാംസ്കാരിക കേരളത്തിന്റെ ഓരോ സ്പന്ദനവും..

7. മുഖ്യധാരാ പത്രങ്ങള്‍ എല്ലാം തന്നെ വാര്‍ത്തകള്‍ മുക്കുന്നവര്‍ ആണ്. നളമിടം, വെബ്‌ ദുനിയ , മറുനാടന്‍ മലയാളി എന്നീ ഓണ്‍ലൈന്‍ പത്രങ്ങളില്‍ വരുന്നത് മാത്രമാണ് പച്ചയായ സത്യം.

ടി വാര്‍ത്തകള്‍ ഷെയര്‍ ചെയ്തു സത്യം പ്രചരിപ്പിക്കുക എന്നതാണ് ഉല്‍കൃഷ്ട FB ജേണലിസം.

സ്റ്റാറ്റസ് അപ്ഡേറ്റുകള്‍:-

രാവിലെ കണ്ണുതുറക്കുന്നത് മുതല്‍ വൈകിട്ട് കണ്ണടയുന്നത് വരെ സ്റ്റാറ്റസ് അപ്ഡേറ്റുകള്‍ ഇടാന്‍ മറക്കരുത്..

ചുമ്മാ സ്റ്റാറ്റസ് ഇട്ടാ പോരാ, എല്ലാ സ്ടാടസിലും ഒരു എലൈറ്റ്‌ ക്ലാസ്‌ കള്‍ച്ചര്‍ഡ് പേഴ്സണാലിറ്റിയുടെ മണം ഉണ്ടാകണം..

ഉദാഹരണത്തിന്, മൂന്നുനേരവും കഴിക്കാറുള്ള കപ്പയും കഞ്ഞിയും സ്റ്റാടസുകളില്‍ കെന്‍റക്കി ചിക്കനും ഹോട്ട് വിങ്ങ്സുമായി പുനര്‍ജനിക്കണം..

മഴവില്‍ മനോരമയിലെ പൈങ്കിളി കാണുമ്പോള്‍,

"Watching sathyameva jayathe.. amir khan really rocks.. " എന്ന് സ്റ്റാറ്റസ്‌ ഇടണം..

ചെല്ലപ്പന്‍ ചേട്ടന്റെ കടയില്‍ ചായ കുടിച്ചിരിക്കുമ്പോള്‍ "nw @gold souk.. enjoying DOF 6D show.. " എന്നും, വൈകിട്ട് മനസില്ലാമനസ്സോടെ വീട്ടിലെ കുടുംബ പ്രാര്‍ഥനയ്ക്ക് പോയിരിക്കുമ്പോള്‍ "enjoying a mind blowing DJ @Windsor Castle.. wow.. awesome one.." എന്നും സ്റ്റാറ്റസ്‌ ഇടുന്നതില്‍ തെറ്റില്ല..

അല്ലെങ്കില്‍ നമ്മുടെ NG സ്ടാടസ്!!.. ബാക്കി പറയണ്ടല്ലോ..

ലൈക്കുകള്‍ :-

പിന്നൊരു കാര്യം... തറവാട് സ്വത്ത്‌ എഴുതിക്കൊടുക്കേണ്ടി വന്നാലും ഒരു ക്നാപ്പന്റെയും സ്ടാട്ടസില്‍ ലൈക്‌ കൊടുക്കരുത്.. 'ലൈക്‌' എന്നത് നമ്മുക്ക് ഇങ്ങോട്ട് മാത്രം കിട്ടേണ്ട സംഗതി ആണ് എന്ന് മനസ്സില്‍ കുറിച്ചിടുക. (ചെല്ലക്കിളികള്‍ക്ക് ഈ നിയമം ബാധകം അല്ല കേട്ടോ.. .. പാ വേറെ.. പാപ്പച്ചന്‍ വേറെ!!..)

ഇപ്പോള്‍ താങ്കള്‍ ഏറെക്കുറെ ഒരു NG ആയിക്കഴിഞ്ഞു..!! എല്ലാ ഭാവുകങ്ങളും!!...

കിടന്നു പൊറുക്കാത്ത ഇറച്ചിക്കോഴികള്‍.. ബിരിയാണി എപ്പോക്കിട്ടും??

2012-06-29T10:48:00.000-07:00

ഏതു വിരുന്നുകാരന്‍ വന്നാലും ഇറച്ചിക്കോഴിയ്ക്ക് കിടക്കപ്പൊറുതിയില്ല എന്ന് കേട്ടിട്ടുണ്ട്. സമാനമായ ഒരു അവസ്ഥാ വിശേഷത്തിലൂടെയാണ് ഇപ്പോള്‍ കോഴിക്കോടുകാരും കടന്നു പോകുന്നത്. ടി.പി ചന്ദ്രശേഖരന്റെ കൊലക്കേസിനോടു ബന്ധപ്പെട്ട്‌ സി.പി.എം ന്റെ ഒരു പെരിയ സഖാവിനെ അറസ്റ്റ്‌ ചെയ്തതില്‍ പ്രതിഷേധിച്ചു നാളെ ഹര്‍ത്താല്‍ ആചരിക്കുകയാണ് കോഴിക്കോടു ജില്ലയില്‍. അങ്ങാടീല്‍ തോറ്റതിന് കോഴിക്കോടുകാരുടെ നെഞ്ചത്ത്‌ കേറുന്നതിനു പിന്നിലെ കാവ്യനീതി എന്തെന്ന ചോദ്യം അങ്ങ് പോളണ്ടില്‍ പോയി ചോതിച്ചിട്ടും കാര്യമില്ല എന്ന സത്യം അറിയാഞ്ഞിട്ടല്ല. എങ്കിലും അറിയാതെ ചോതിച്ചുപോകുന്നതാണ് . പണ്ട് സദ്ദാമിനെ തൂക്കിലേറ്റിയപ്പോള്‍ കേരളത്തില്‍ നടന്ന ഹര്‍ത്താലിന് ഇതേ മാതിരി ഒരു ചോദ്യം തികട്ടിവന്നു എങ്കിലും അക്കാലത്ത് അവധി പ്രതീക്ഷിച്ചു കാത്തിരിക്കുന്ന ഒരു സ്കൂള്‍കുട്ടി എന്ന നിലയില്‍ ഞാന്‍ അത്തരം തികട്ടലുകളെ കടിച്ചൊതുക്കുകയായിരുന്നു പതിവ്‌.

ഇടത് ----_വലത് ഭേദമില്ലാതെ ബന്ദുകളും അതിന്റെ ലേറ്റസ്റ്റ്‌ വേര്‍ഷന്‍ ആയ ഹര്‍ത്താലുകളും പണിമുടക്കുകളും ആഘോഷിച്ച് , അങ്ങനെ പുരോഗതിയുടെ നവയുഗ പന്ധാവിലെയ്ക്ക് നമ്മുടെ കൊച്ചുകേരളത്തെ നയിക്കുന്ന മഹാമനസ്കരെ ഓര്‍ത്തു കുട്ടിക്കാലത്ത്‌ ഞാന്‍ ഒട്ടേറെ സന്തോഷിച്ചിട്ടുണ്ട് . അടുത്ത ദിവസം ക്ലാസില്‍ ഇടുന്ന ടെസ്റ്റ്‌ പേപ്പറിനു ഏതു സിനിമയുടെ കഥ എഴുതും എന്നോര്‍ത്തു വിഷമിച്ചിരിക്കുമ്പോള്‍ ആയിരിക്കും മനസ്സില്‍ ഒരായിരം ലഡ്ഡു പൊട്ടിച്ചുകൊണ്ട് ഹര്‍ത്താല്‍ മഹാമഹം വന്നെത്തുക. അന്നെരമോക്കെ തോന്നിയിട്ടുള്ളത് ഈ ഹര്‍ത്താല്‍ മാമന്‍മാരെ കെട്ടിപ്പിടിച്ചു ഒരു ചക്കര ഉമ്മ കൊടുക്കാനാണ്. (ഇപ്പോളത്തെ ന്യു ജെന്‍ കിഡ്സ്‌ നു ഇതുപോലെ ഉമ്മ കൊടുക്കാന്‍ തോന്നാറുണ്ടോ അതോ മറ്റു വല്ലതുമാണോ തോന്നാറ് എന്നതിനെ പറ്റി എനിക്ക് വെല്യ ഐഡിയ ഇല്ല ).

ഏതായാലും ഈ ഹര്‍ത്താലിന് പാല്‍ , പത്രം എന്നിവ കൂടാതെ ടൂറിസത്തെയും ഒഴിവാക്കുമോ എന്ന് നമുക്ക്‌ കാത്തിരുന്നു കാണാം.

മോഹനന്‍ സഖാവിനെ കള്ളക്കേസില്‍ കുടുക്കിയിരിക്കുകയാണ് എന്നാണു സി.പി.എം ഉന്നയിക്കുന്ന പ്രധാന ആരോപണം. ഒരു രാഷ്ട്രീയപുണ്യവാളനും തനിക്കെതിരേയുള്ള കേസ്‌ ഒള്ളതാണ് എന്ന് സമ്മതിക്കുന്നത് ഞാന്‍ ഇതുവരെ കേട്ടിട്ടില്ല. ജീവപര്യന്തം ശിക്ഷിക്കപ്പെട്ടു തീഹാര്‍ ജയിലില്‍ കഴിയുന്ന അഴിമതി വീരന്മാര്‍ പോലും ഇപ്പോഴും കരുതുന്നു, രാഷ്ട്രീയ എതിരാളികളുടെ കള്ളക്കേസുകെട്ടുകളില്‍ പെട്ട് ജീവിതം പൊഹയായ ശുദ്ധാത്മാക്കളാണ് തങ്ങളെന്ന്. ഇത്തരം താത്വിക പ്രതിസന്ധികളില്‍, ഒരാള്‍ക്കെതിരെ ഫയല്‍ ചെയ്യപ്പെട്ട കേസ്‌ 'കള്ള'യാണോ 'വെള്ള'യാണോ എന്ന് പറയാന്‍ കഴിയുന്ന ഏക അതോരിടി കോടതിയാണ് എന്നായിരുന്നു എന്റെ ഇതുവരെയുള്ള ധാരണ. യഥാര്‍ത്ഥ കുറ്റവാളികളെ നേരിട്ടറിയാവുന്നവര്‍ക്കും ഇത്തരമൊരു പ്രസ്താവനയ്ക്ക് വോയ്സ് ഉണ്ടെന്നു തോന്നുന്നു. സി.പി.എം ഇതില്‍ ഏതു ഗണത്തിലാണോ പെടുക!!.. ഇതൊന്നുമല്ലെങ്കില്‍ വെറ്റിലയിലും വെള്ളുരുളിയിലും സത്യങ്ങള്‍ തെളിയിക്കുന്ന മാന്ത്രിക താന്ത്രിക വിദ്യകള്‍ പോളിറ്റ്ബ്യൂറോയും വശത്താക്കി എന്ന് വേണം അനുമാനിക്കാന്‍.. ഇത്തരം വിദ്യകളുടെ പ്രൊഫഷണല്‍ മാനങ്ങളിലെയ്ക്ക് സി.പി.എം കാര്യമായി 'മൂലധനം' (മാര്‍ക്സെ... നീ പൊറുക്കുക!!) ഇറക്കിയാല്‍ കാണിപ്പയൂര്‍ തിരുമേനിയും മറ്റും കട്ടയും പടവും മടക്കേണ്ടി വരും എന്നതില്‍ സംശയം ഇല്ല.

      സഖാവിനെ അറസ്റ്റ്‌ ചെയ്തു കൊണ്ടു പോയ രീതി ശരിയായില്ല എന്ന് കൂടി പാര്‍ടി പരാതിപ്പെടുന്നു. മറ്റെല്ലാ ഇന്ത്യന്‍ പൌരരെയും അറസ്റ്റ്‌ ചെയ്യുന്നതിന് ഒരാഴ്ച മുന്‍പ്‌ പോലീസ് ഫോണില്‍ ബന്ധപ്പെടുകയും കുറ്റാരോപിതന്റെ സൌകര്യാനുസൃതം അറസ്റ്റിനു അപ്പോയിന്മെന്റ് എടുക്കുകയും ചെയ്യാറുണ്ട് എന്നും ടി സഖാവിന്റെ കാര്യത്തില്‍ മാത്രം നീതി നിഷേധം നടന്നു എന്നുമാണ് നാം ഇതില്‍ നിന്നും മനസിലാക്കേണ്ടത്. മാത്രമല്ലാ, അറസ്റ്റിന്റെ നാടകീയത അല്പം ഓവര്‍ ആയിരുന്നു പോലും!!. ഇത് വളരെ ക്രൂരവും പൈശാചികവും ആയിപ്പോയി എന്ന് പറയാതെ തരമില്ല. സി.ഐ.എയുടെ പങ്ക് ഇത്തരം നാടകങ്ങള്‍ക്ക് പിന്നില്‍ ഉണ്ടോ എന്ന് സംശയിക്കെണ്ടിയിരിക്കുന്നു..
   എന്തായാലും ധന്യമായ കമ്യുണിസ്റ്റ്‌ ജീവിതം നയിക്കുന്ന ഒരു സഖാവിനെ അറസ്റ്റ്‌ ചെയ്യുമ്പോള്‍ നാടകീയത എത്രടം വരെ ആകാം , എവിടം വരെ ആകാന്‍ പാടില്ല എന്നതിനെ അധികരിച്ച് ഒരു പാര്‍ട്ടി മാര്‍ഗരേഖ താമസിയാതെ തന്നെ നമുക്ക്‌ പ്രതീക്ഷിക്കാം. മാത്രമല്ല ഇത്തരം നാടകങ്ങളുടെ തിരക്കഥ, സംഭാഷണം, പശ്ചാത്തല സംഗീതം എന്നിവ പോലും ഇനിമേല്‍ പാര്‍ട്ടി കലാകാരന്മാര്‍ സൌജന്യമായി നിര്‍വഹിച്ചു കൊടുക്കുന്നതായിരിക്കും. (മറ്റൊന്നിനുമല്ല , പോലിസിന്റെ ജോലി ലഘൂകരിക്കുക എന്നത് മാത്രമേ പാര്‍ട്ടി ആഗ്രഹിക്കുന്നുള്ളൂ!!)
    മറ്റു കുറ്റവാളികളെയെല്ലാം മുഹൂര്‍ത്തം നോക്കി, താലപ്പൊലിയും വെഞ്ചാമരവും വീശി പനിനീരും തളിച്ച് സ്വീകരിച്ചാനയിച്ചു കൊണ്ടുപോകുമ്പോള്‍ 'തീവ്രവാദികളോട്' എന്ന പോലെയാണ് പാവപ്പെട്ട മോഹനന്‍ സഖാവിനോട് പെരുമാറിയത് ' എന്ന പരാതി മാത്രമാണ് ഒരല്പം ആശയക്കുഴപ്പം ഉണ്ടാക്കുക. എന്റെ അറിവില്‍ ഇപ്പോള്‍ ഇന്ത്യയില്‍ തടവില്‍ കഴിയുന്ന ഏറ്റം കുപ്രസിദ്ധ തീവ്രവാദി അജ്മല്‍ കസബ്‌ ആണ്. പിടിയിലാകുമ്പോള്‍ നരുന്തു പോലിരുന്ന ടിയാന്‍ ഇപ്പോള്‍ ചിക്കന്‍ ബിരിയാണി ഒക്കെ തിന്നു ആകെ നല്ല ചുള്ളന്‍ ഫ്രീക് ചെക്കനായി എന്നാണ് ഫേസ്ബുക്കന്മാര്‍ തരുന്ന ഇന്‍ഫോര്‍മേഷനില്‍ നിന്നും മനസിലാകുന്നത്.. തൂക്കം തന്നെ പത്ത് --_ പതിനഞ്ചു കിലോ കൂടി പോലും!!.. പ്രതിഭാ പാട്ടീലിന്റെ ടൂര്‍ പായ്ക്കേജിനു വേണ്ടി വന്നതിന്റെ   അടുത്തുവരുമത്രേ ഇയാള്‍ക്ക് വേണ്ടി കേന്ദ്രം ചെലവാക്കിയ തുക!. ഇമ്മാതിരിയുള്ള ഒരു പരിഗണനയാണോ മോഹനന്‍ സഖാവിന് കേരള പോലീസ് തന്നത് എന്ന് പാര്‍ട്ടി വേഗം വിശദമാക്കെണ്ടിയിരിക്കുന്നു.
അല്ലെന്നുവരികില്‍ ഈ 'തീവ്രവാദി ആരോപണം' എത്രയും വേഗം ഒഴിവാക്കാന്‍ അപേക്ഷ!! (പാര്‍ട്ടി അണികള്‍ തെറ്റിദ്ധരിക്കേണ്ട എന്ന് കരുതിയാ കേട്ടോ.. സൌകര്യമില്ലേല്‍ വേണ്ട..)

വാല്‍ക്കഷണം :- ഓരോ നേതാവും പിടിയിലാകുമ്പോള്‍ പ്രത്യേകം പ്രത്യേകം ഹര്‍ത്താല്‍ നടത്താതെ "പത്ത് പേര്‍ തികയുമ്പോള്‍ ഒന്ന് "എന്ന രീതി സ്വീകരിച്ചിരുന്നെങ്കില്‍ വല്യ ഉപകാരമായിരുന്നു. എന്നാലും തരപ്പെടും മാസത്തില്‍ ഒരു മൂന്നെണ്ണം!! (പറഞ്ഞെന്നെ ഉള്ളൂ.. സൌകര്യമില്ലേല്‍ വേണ്ട.. അല്ല പിന്നെ!!)

ചൂടു പട്ടിയിറച്ചി തിന്നുമ്പോള്‍ സംഭവിക്കുന്നത് ..

2012-06-26T08:39:00.000-07:00

         പ്രതികരിക്കാന്‍ മുട്ടിയിരിക്കുമ്പോള്‍ വിഷയമില്ലാതാകുന്നതിന്റെ വേദന ഒരു FB വിപ്ലവകാരിക്കെ മനസിലാകൂ. എന്നും സോമാലിയയിലെ പട്ടിണിയും ലാടിനമേരിക്കന്‍ രാജ്യങ്ങളിലെ മുതലാളിത്ത അധിനിവേശവും ഓടയിലെ വെള്ളം കുടിയ്ക്കുന്ന നിസ്സഹായ ബാല്യങ്ങളുടെ വേദനയും ഒക്കെ മാത്രം പോസ്ടിക്കൊണ്ടിരുന്നാല്‍ ലൈക്ക്‌ കളുടെ എണ്ണത്തില്‍ കാര്യമായ ഇടിവ്‌ സംഭവിക്കുമെന്നതു എല്ലാ FB പ്രതികരണ തൊഴിലാളികള്‍ക്കും അറിയാവുന്ന വസ്തുതയാണ്. എപ്പോളും എന്തേലും ഒക്കെ വെറൈറ്റി വേണം. "ഈ പോസ്റ്റ്‌ ലൈക്കിയില്ലേല്‍ നിന്റെ സിസ്റ്റം ഹാംഗ് ആകും, വിന്‍ഡോസിന്റെ ചിപ്പ്‌ കരിഞ്ഞു പോകും" എന്നിങ്ങനെയുള്ള ഭീഷണികള്‍ ഇപ്പോള്‍ അച്ചായിമാരുടെ അടുത്തുപോലും എല്ക്കുകയില്ല. പിന്നല്ലേ NG പിള്ളേരുടെ അടുക്കല്‍!!. എന്തു ചവറു പോസ്റ്റിയാലും, ഇനി ഒരു കോപ്പും പോസ്റ്റിയില്ലേലും ലൈക്ക്‌ കിട്ടണം എങ്കില്‍ 'അഞ്ജലി വര്‍മ്മ ' എന്നോ 'സുസന്‍ മേരി ജോര്‍ജ്‌ ' എന്നോ മറ്റോ ഉള്ള തൂലിക നാമങ്ങളില്‍ (സോറി.. കമ്പ്യൂട്ടറില്‍ എവിടാ തൂലിക!.. തല്ക്കാലം കീബോര്‍ഡ്‌ നാമം എന്നോ മറ്റോ വിളിക്കാം അല്ലെ !) അക്കൌണ്ട് തുറക്കണം എന്ന ന്യൂജനറേഷന്‍ തിയറി ഇന്നലെ പിറന്നു വീണ പിഞ്ചു കുഞ്ഞു വരെ പറഞ്ഞു തരും .
   ഇത്തരത്തില്‍ ഉള്ള ഒരു വിഷയാത്മക പ്രതിസന്ധിയില്‍ പെട്ട് കയ്യും കാലും അടിക്കുമ്പോള്‍ ആണ് ഒരു കച്ചിത്തുരുമ്പ് എന്നോണം മണി സഖാവ്‌ ആയും പെട്രോള്‍ വില വര്‍ധന ആയും പ്രതികരിക്കാന്‍ ഓരോരോ കാരണങ്ങള്‍ വീണു കിട്ടുക. എങ്കിലും ആറിയ കഞ്ഞി പഴയംകഞ്ഞി എന്ന പ്രപഞ്ച സത്യം നാം ഒരിക്കല്‍ അന്ഗീകരിച്ചേ മതിയാകൂ. ഇത് ഫേസ് ബുക്ക്‌ തൊഴിലാളികള്‍ക്ക്‌ മാത്രമല്ല ബാധകം. നമ്മുടെ രോമാന്ച്ച കഞ്ചുകങ്ങള്‍ ആയ മുഖ്യ ധാര മലയാള പത്രങ്ങളും ഇത്തരത്തിലുള്ള പഞ്ഞ മാസങ്ങള്‍ അഭിമുഖീകരിക്കാറുണ്ട്. അപ്പോള്‍ അവര്‍ ചെയ്യാറുള്ളത് നിത്യ ഹരിത ഇംഗ്ലീഷ് പത്രങ്ങളുടെ അടുക്കളയും പിന്നാമ്പുറവും നിരങ്ങുക എന്നതാണ്. അവിടെ നിന്നും പൊഴിഞ്ഞു കിട്ടുന്ന കഷണങ്ങള്‍ ഒന്നും നഷ്ടമാകാതെ   നന്നായ്‌ ചൂടാക്കി, അല്പം സാള്‍ട്ടും പെപ്പറും ഒക്കെ ചേര്‍ത്തു പിറ്റേന്നത്തെ വെണ്ടയ്ക്ക ആയി ബോക്സില്‍ നിരത്തുക ആണ് സാധാരണ പതിവ്‌.

(അല്ലേലും ഏതു ബ്ലഡി മല്ലു ആണ് വീട്ടില്‍ വരുത്തുന്ന ഇംഗ്ലീഷ് പേപ്പര്‍ വായിക്കുക, ഇനി ആരേലും വായിക്കുന്നുണ്ടെല്‍ അവന്‍ പിന്നെ മലയാളം പേപ്പര്‍ വായിക്കുമോ?, എന്നിങ്ങനെയുള്ള പരമ്പരാഗത ധാരണകളും ഇത്തരം വെണ്ടയ്ക്കകള്‍ക്ക് പിന്നിലുണ്ടെന്ന് കൂട്ടിക്കോ!!)

         മലയാളികളെ നേര് നേരത്തെ അറിയിക്കുന്ന ഒരു പത്രം   ഒരിക്കല്‍ ഇത്തരത്തില്‍ ഒരു മലയാളീകരണം നടത്തിയപ്പോള്‍ മലയാളികള്‍ക്ക്‌ എക്കാലവും ഓര്‍ത്ത്‌ ചിരിക്കാനുള്ള വക കിട്ടി.
പാശ്ചാത്യരുടെ ഒരു തരം വിശിഷ്ടമായ ഒരു സാന്‍ട് വിച്ച് ആയ "ഹോട്ട് ഡോഗ് " ടി പത്രം മലയാളീകരിച്ചപ്പോള്‍ ചൂടു പട്ടിയിറച്ചി ആയി!!...
       കഴിഞ്ഞ വര്ഷം അറുപത്തി നാല് പട്ടികളെ തിന്നയാള്‍ ഇത്തവണ പത്തുമിനുറ്റ്‌ കൊണ്ട് അറുപത്തിനാലര പട്ടികളെ തിന്നു സ്വന്തം റെക്കോര്‍ഡ്‌ തിരുത്തി എന്ന ഞെട്ടിക്കുന്ന വാര്‍ത്ത വായിച്ചു എത്ര സഖാക്കന്മാര്‍ വിജ്രുംഭിതരായി, പട്ടികള്‍ക്കെതിരെ നടക്കുന്ന പാശ്ചാത്യ അധിനിവേശങ്ങള്‍ക്കെതിരെയും മൃഗീയമായ ക്രൂരതകള്‍ക്കെതിരെയും എത്ര ഫേസ്ബുക്ക്‌ സഖാക്കന്മാര്‍ ആഞ്ഞടിച്ചു എന്നിങ്ങനെയുള്ള വിവരങ്ങളെ പറ്റി കാര്യമായ അറിവില്ല. എന്തായാലും ഹര്‍ത്താലോ കരി ദിനമോ ഒന്നും തന്നെ ആചരിക്കപ്പെട്ടില്ല എന്നാണ് എന്റെ ഓര്‍മ്മ .

        ഇന്ന് ഈ ഹോട്ട് ഡോഗിന്റെ കാര്യം ഓര്‍മ്മ വരാന്‍ കാര്യമുണ്ട്. ഇന്ന് രാവിലെ മുതല്‍ ഫേസ് ബുക്ക്‌ പ്രതികരണ തൊഴിലാളികള്‍ സര്‍ദാര്‍ജിയുടെയും മദാമ്മയുടെയും ഒക്കെ തന്തയ്ക്ക് വിളിച്ചു കൊണ്ട് പോസ്റ്റുന്നത് കണ്ടപ്പോള്‍ ന്യൂ ജനറേഷന്‍ ബ്ലോഗ്ഗര്‍ ആയ എനിക്കും ഒരു ചൊറിച്ചില്‍. എങ്ങനെയാ പ്രതികരണം കുറയ്ക്കുന്നെ... കുറച്ചാ കൊറച്ചില്‍ അല്ലെ ..

    കാര്യം എന്താണെന്നല്ലേ.. പെട്രോള്‍ വിലയുടെ ക്ഷീണം മാറും മുന്നേ കേന്ദ്രം പ്രവാസികള്‍ക്കിട്ടു പണി തന്നിരിക്കുന്നു!!. അതും എട്ടിന്റെ പണി!!... അതായത്, അവര്‍ നാട്ടിലേയ്ക്ക് അയയ്ക്കുന്ന ഓരോ 1000 രൂപയ്ക്കും 123 രൂപ നികുതി നല്‍കണം പോലും !!.. എന്തു കോപ്പിലെ എടപാടാ അല്ലെ..

ടി പോസ്റ്റ്‌ കണ്ടപ്പോളേ സര്‍ദാര്‍ജിയെ തെറി പറയാന്‍ എന്റെയും നാക്ക് ചൊരിഞ്ഞു. എന്നാലും അതിനു മുന്‍പേ വാര്‍ത്തയുടെ ആധികാരികത പരിശോധിക്കണ്ടേ.. (എന്നാ പറയാനാ.. അങ്ങനെയൊരു ദുശീലം ഉണ്ടായിപ്പോയി!!..)

അന്വേഷിച്ചപ്പോള്‍ മനസിലായതു കേരള കൌമുദി റിപ്പോര്‍ട്ട് ആണ് വാര്‍ത്തയ്ക്കു അടിസ്ഥാനം എന്നാണു...

ടി വാര്‍ത്ത ചുവടെ ചേര്‍ക്കുന്നു..


                 പക്ഷെ മനോരമയില്‍ ഈ വാര്‍ത്ത കണ്ടില്ലല്ലോ... ഇനി ലവന്മാര്‍ കേന്ദ്രത്തെ രക്ഷിക്കാന്‍ മുക്കിയതാണോ !!.. ആകെ കണ്ഫ്യൂ ഷന്‍!! ഇനി ഓണ്‍ലൈന്‍ പത്രങ്ങള്‍ ഒന്ന് തപ്പിയാലോ...
      അങ്ങനെ തപ്പിതപ്പി 'ദി ഹിന്ദു ബിസിനെസ്സ്‌ ലൈന്‍' ന്റെ പേജില്‍ എത്തി...
അപ്പോള്‍ ആണ് മനസിലായത് കൌമുദി വിളമ്പിയത് "ചൂടു പട്ടിയിറച്ചി" ആണെന്ന് ...!!
ഈച്ചക്കോപ്പി അടിക്കുമ്പോള്‍ പറ്റുന്ന ഓരോരോ പറ്റുകളെ....!!

    മനസിലായില്ലേ വ്യത്യാസം.. ഒരു പ്രവാസി ഒരു ലക്ഷം രൂപ വെസ്റ്റേണ്‍ മണി ട്രാന്‍സ്ഫര്‍ലൂടെ നാട്ടിലേയ്ക്ക് അയയ്ക്കുന്നു എന്ന് കരുതുക. 12.36 % നികുതി എന്നത് ഈ ഒരു ലക്ഷം രൂപയ്ക്കല്ല. ഈ ഒരു ലക്ഷം രൂപയ്ക്ക് മണി ട്രാന്‍സ്ഫര്‍ ഏജന്‍സി 500 രൂപ കമ്മീഷന്‍ ഈടാക്കുന്നു എങ്കില്‍ ആ 500 രൂപയ്ക്കാണ് ടി പറഞ്ഞ നികുതി!!.. അതായത്    61.80 രൂപ!!.
കൌമുദി പറയുന്നത് അനുസരിച്ച് ആണെങ്കില്‍ ഒരു ലക്ഷം രൂപയ്ക്ക് 12360 രൂപ നികുതി അടയ്ക്കണം!!.
            ഏതായാലും, മദാമ്മയുടെയും സര്‍ദാര്‍ജിയുടെയും തന്തയ്ക്ക് വിളിച്ച എത്ര ഫേസ് ബുക്ക്‌ ഗുണ്ടകള്‍ പറ്റിയ അബദ്ധം ഏറ്റുപറഞ്ഞ്‌ ക്ഷമാപണം രേഖപ്പെടുത്താനുള്ള മര്യാദ കാണിക്കും എന്ന് കണ്ടറിയണം!!..
     തങ്ങള്‍ക്ക് അബദ്ധം പറ്റിയതല്ല (അല്ലേലും തങ്ങള്‍ക്ക് അബദ്ധം പറ്റാറെയില്ലല്ലോ... പറ്റുന്നത് പോസ്റ്റു വായിച്ചവര്‍ക്കല്ലേ!!) മറിച്ച്, അടുത്ത പെട്രോള്‍ വില വര്‍ധനയ്ക്ക്‌ വിളിക്കാന്‍ വെച്ചിരുന്നത് എടുത്തു നേരത്തെ വിളംബിയതാണ് എന്നിങ്ങനെയുള്ള താത്വിക വിശദീകരണങ്ങള്‍ നമുക്ക്‌ പ്രതീക്ഷിക്കാം !!