An alt erëm eng Kéier ass Lëtzebuerg implizéiert. Et hätt eis jo alleguerten gewonnert, wann dem net esou gewiescht wier. A witzegerwéis ass een Deel vun der Lëtzebuerg-Paradise-Connectioun d‘Shakira, déi kolumbianesch Sängerin. Si huet sech iwwert een lëtzebuergeschen Expert eng Firma zu Malta organiséiert. Wat si mat där mécht, ass bestëmmt zu honnert Prozent legal. Mä et däerf een sech trotzdeem froen, wisou mir dat bei deenen Enthüllungen ëmmer dobäi soe mussen. Do huet iergendeen eng komesch Konstruktioun vun 4 Firmen iwwert deen hien oder hat säin Privatjet u sech selwer least a muss dowéinst da keng TVA op deen Privatjet bezuelen. Sou een Jet kascht kritt een sou vun graff 4 Milliounen un, do kënnt scho bëssi TVA zesummen. Den Lewis Hamilton – een Formel 1-Fuerer – huet iwwer 18 Millioune Euro op sengem Privatjet gespuert. Wahrscheinlech ass dat komplett legal gewiescht.

Mä sou Saache sinn ethesch eben net esou okay. Wann een_t sech souwisou een Jet leeschte kann, sollt d‘TVA am Fong och dran sinn. Bei de Superräichen wéi dem Shakira, dem Bono an dem Hamilton jo souwisou, a bei multinationale Firmen jo nach vill méi. An och fir déi kleng „Paradäiser“, déi gären déi puer Prozent Taxen huelen, déi Firmen an Räicher hinnen nach loossen, fir an hiren Heemechtslänner näischt ze bezuelen, ass dat zwar eng gutt Affär, mä eben ethesch a moralesch immens zweiwelhaft. Ech hat op jo schonn eng Kéier erkläert, wisou ech déi üblech lëtzebuergesch Excuse vun „et ass net illegal“ net iwwerzeegend fannen. Mä ech well haut op een anere Punkt eraus.

Vill Leit froen sech nämlech, wisou sech keen opreegt. Also, natierlech reegen ech mech op – mä scho manner wéi bei de Luxleaks oder de Panama Papers, well och ech ofstompen – an nach eng gutt Rëtsch Leit méi. Mä wann op Facebook gezielt gëtt, Refugees géifen vun der Caritas een Handy geschenkt kréien, huet een d‘Gefill, et kéint all Moment de Mob mat Mëschtgafelen an Fackelen op der Strooss stoen. Wisou also reege sech sou wéineg Leit doriwwer op, datt déi, déi souwisou scho méi wéi genuch hunn, sech nach méi huelen, wéi hinnen zousteet?

D‘Äntwert ass einfach: Si wieren och gären sou räich. A mir kréien jo all stänneg gezielt, wa mir just haart a laang genuch géife schaffe a fläisseg genuch wieren, kéinte mir et och packen. An fir déi, wou et net packen, gëtt et ëmmer nach d‘Méiglechkeet, am Lotto ze gewannen. An iert dir elo mengt, ech géif all déi Leit fir domm halen: Mir geet et ganz ähnlech. Reegelméisseg erwëschen ech mech bei Gedanken, déi ufänke mat „Wann ech bis räich a berühmt sinn“. Jo, bal jidderee_nt dreemt dovunner, och eng Yacht, e Privatjet oder Museksrechter am Wäert vun 30 Milliounen ze hunn. An denkt sech, ganz heemlech: „Ech géif och keng TVA op mengem Jet bezuele wëllen“. Dat selwecht ass iwwregens de Grond, wisou Verméigenssteieren esou onpopulär sinn. Oder Ierfschaftssteieren. Net, well et esou vill Leit ginn, déi fuerchtbar vill Verméigen hätten, wat besteiert kéint ginn. Mä well de Gros vun eis hofft, dach nach iergendeng Grousstata ze hunn, déi geschwënn ofkraazt an eis e Verméigen hannerléisst.

Wann dir net scho räich sidd, stinn d‘Chancen, datt dir et gitt, enorm kleng. Déi meescht Leit ginn eben net räich, well se vill schaffen oder eng genial Iddi hunn, mä well se vum Papp eng Millioun geléint kréien, fir den éischte Business opzemaachen.

D‘Paradise Papers sollten eis Ulass ginn, fir doriwwer nozedenken. Net nëmmen iwwert den Privatjet, deen een_t ni wäert hunn, mä och doriwwer, wat d‘Implikatiounen dovunner sinn, wann sech Leit mat Suen alles erlabe kënne. Dat geet nämlech nëmmen esou laang, bis de Recht aus dem Dram vum eegenen Jet erwächt.

The post Angscht a Schrecken am Paradäis appeared first on Angscht a Schrecken zu Lëtzebuerg.

An am Fong misst de leschte Mëttwoch een Datum wéi den 11. September 2001 sinn. Do kann sech all Mënsch erënneren, wat en gemaach huet, wéi d‘Noriicht vum Terroruschlag zu New York koum. Den 12. Juli 2017 wäert wahrscheinlech net esou an dat kollektiv Gediechtnes agoen. Dir wësst natierlech, wouropper ech eraus wëll: de Klimawandel. Vläicht ass dat Stéck vum Larsen C-Äisschelf, dat elo een Äisbierg ass, guer keen esou een gutt Symbol fir den Klimawandel, well mir net emol genee wëssen, ob et wierklech um Klimawandel läit, datt dat Stéck ofgebrach ass, oder ob et einfach een Deel vum natierleche Prozess vum Gletscher an Äisschelf ass. Ee besseren Unhaltspunkt wier den Undeel vum Kuelendioxid an der Atmosphär, méi genee den Zäitpunkt wou deen d‘Mark vu 400 ppm iwwerschratt huet. ppm heescht „parts per Million“, also den Milliounstel Deel. D‘symbolesch Mark vu 400 ppm Kuelendioxid am globale Mëttel ass iergendwann am Mäerz 2015 erreecht ginn. Wësst dir nach, wat dir am Mäerz 2015 gemaach hutt?

Was ass de Klimawandel?

Et ass am Fong och ganz egal. Datt et kee kollektiven Trauma-Dag fir de Klimawandel gëtt, läit an der Natur vun der Saach. Fir dat jidderee*nt matschwätze kann, resuméieren ech nach eng Kéier, wourëms et geet. Mir stousse sougenannten Zäregase wéi CO₂ oder Methan aus. Déi bleiwen an der Atmosphär. D‘Sonnestrale kommen op d‘Äerd an ginn do zum Deel reflektéiert. Iert se zeréck an de Weltraum kënnen, muss se awer laanscht d‘Zäregasen. Déi suergen dofir, datt dee laangwellegen Deel vun de Sonnestralen, d‘Wäermestralung, an der Atmosphär gefaange bleiwen. Doduerch gëtt et lues a lues méi waarm.

An et dauert eben, bis d‘Äerd sech erwiermt, mä si mécht dat bestänneg. An och wann et no mënschleche Perspektiven ausgesäit, wéi wann sech bal näischt géif änneren, sou ass d‘Erwiermung, déi mir grad erliewen, op klimatologescher a geologescher Skala enorm séier. Et gëtt haut keng Zweiwel méi, datt de Klimawandel duerch de Mënsch gemaach ass. An d‘Konsequenze sinn duerchaus krass, och wann dir dat vläicht net mengt. Egal, wat mir nach maachen, et sinn elo schonn sou vill Zäregasen an der Loft, datt bis un d‘Enn vum Joerhonnert verschidde Stied un de Küsten net méi bewunnbar wäerte sinn. An net nëmmen dat: Wa mir esou weider maache wéi bis elo wäerte verschidde Regioune vun der Äerd esou waarm sinn, datt et fir Mënsche physesch onméiglech wäert sinn, do ze liewen. D‘Versuergung mat Liewensmëttel wäert – och a Regioune mat haut „gemässegtem“ Klima – een risegroussen Defi duerstellen. Wa mir sou weider maache wéi bis elo, wäert bis un d‘Enn vum Joerhonnert esou vill CO₂ an der Loft sinn, datt déi kognitiv Fäegkeete vum mënschleche Gehir ëm 20 Prozent zeréckgoe wäert. D‘Zil vun zwee Grad Erwiermung am globale Mëttel ass kee gutt Zil, dat d‘Äerd an dem Zoustand léisst wéi mir se kennen. Et ass dat läscht Stoppschëld virum Ofgrond, een wuertwiertlechen „Point of no Return“, no deem d‘Auswierkungen esou katastrophal sinn, datt wahrscheinlech e groussen Deel vun der Populatioun einfach géif stierwen. Fir et méi graff auszedrécken: Am Fong ass et scho geschass, mä déi zwee Grad sinn den absolute Maximum, deen dierft erreecht ginn, fir datt net alles d‘Schäissbaach erof geet. Mä dat gesi mir eben net esou gutt. An dofir ass et vläicht gutt, sech den 12. Juli 2017, den Dag wou een Äisbierg duebel sou grouss wéi Lëtzebuerg vum Südpol ofgebrach ass, ze mierken. Als Symbol.

Wat huet dat alles mat eis ze dinn? Lëtzebuerg huet proportional gesinn een immens groussen Undeel dorunner. Mir hunn déi héchsten Zäregas-Emissioune pro Kapp an Europa. Wann een all d‘Zäregasemissiounen an der Geschicht zesummerechent, hunn mir weltwäit déi héchsten Emissioune pro Kapp. Laut der europäeschen Ëmweltagence EPA kommen iwwert Halschent vun eisen Emissiounen aus dem Transport an een Véierel aus dem Energiesecteur. Natierlech kann een elo soen: d‘USA, China an ganz vill aner Länner produzéieren – an absoluten Zuelen – méi Zäregase wéi mir. Als Industrienatioun, déi zanter Joerzéngten emittéiert, als dat Land mat deene meeschten Autoe pro Kapp an Europa, als d‘Land vum Tanktourismus hu mir awer eng historesch Verantwortung.

Wat ass d’Äntwert op de Klimawandel?

An elo? Mir hunn eng Regierung mat grénger Bedeelegung, déi trotzdeem méi Autobunne baut, déi hirem eegene Courage fir déi sougenannt „douce“ Mobilitéit net traut an déi Ëmweltbedenken direkt iwwer Bord werft, wann een grousse Konzern wéi Google uklappt. Mir sollten awer och net sou maachen, wéi wann de Klimawandel just u perséinleche Verhaalensweisen géifen hänken. Et geet net onbedéngt dorëms, datt mir all ze dacks an d‘Vakanz fléien oder ze vill Fleesch iessen. Mä wann dir mech lo frot, wat dir perséinlech kéint maachen, géif ech iech trotzdeem äntweren: Iesst manner Fleesch, besonnesch manner Rëndsfleesch an flitt manner an d‘Vakanz. Huelt net fir alles den Auto. Mä maacht dat alles mam Wëssen, datt dee klengen, individuelle Schratt net duer geet, datt mir als Gesellschaft radikal mussen ëmdenken an eis Gewunnechten ännere mussen. Net iwwermuer, net muer, mä am beschte scho virgëschter.

Vläicht ass d‘Äntwert: Doriwwer schwätzen. Informéiert iech iwwert Hannergrënn. An da schwätzt mat ärer Famill, mat äre Frënnd*innen, mat ären Aarbechtskolleg*innen iwwert de Klimawandel. Frot si, wou si den 12. Juli 2017, den Dag wou een Äisbierg duebel sou grouss wéi Lëtzebuerg vum Südpol ofgebrach ass, waren. Wa Politiker*innen op iech duer kommen, fir iech präventiv zu de Gemengewahlen d‘Hand ze rëselen, schwätzt se op dat Thema un. Frot se, wou si den 12. Juli 2017 waren. An frot se, wat si an ärer Gemeng konkret wëllen ënnerhuelen, fir de Klimawandel ze bekämpfen. Vläicht ännert dat eppes. Soss musse mir eis einfach mam Gedanken ufrënnen, datt geschwënn alles zimlech séier zimlech vill d‘Schäissbaach erof geet.

Quellen:
The Uninhabitable Earth
Iceberg twice size of Luxembourg breaks off Antarctic ice shelf
Global carbon dioxide levels break 400ppm milestone
EPA-Statistik fir Lëtzebuerg
Luxemburg – CO₂ emissions per capita
Global warming in Luxembourg

Dir huet dës Episod gefall? Dann hëllef mat, se ze verbreeden! Du kanns dës Buttons dofir benotzen:

The post Doubel sou grouss wéi Lëtzebuerg appeared first on Angscht a Schrecken zu Lëtzebuerg.

Et schéngt wéi wann dat ganzt Land elo am Tour-Féiwer wier. All Duerf, wou den Tour duerch fiert, ass extra „gerëscht“ ginn. An dat natierlech op eng enorm kitscheg Manéier – et konnt een sech awer net ganz entscheeden, ob een misst d‘Nationalfaarwe rout wäiss blo benotzen oder ob dat traditionellt Tour-Giel dominéiere sollt – elo ass et een zimlech ellene Potpourri aus deenen zwee ginn.

De Combel ass awer d‘Staumauer vun eisem wonnerschéine Stauséi. Natierlech ass et zimlech spektakulär, datt d‘Vëloen do driwwer fueren. Ech gesinn d‘Helikopteropnahmen op der Tëlee schonn, déi da ronderëm déi ganz Welt ginn. A wat huet sech Lëtzebuerg afaale gelooss, fir dat Bild nach méi spektakulär ze maachen? Richteg, et hänkt e risege Banner drop, op deem déi véier Lëtzebuerger Tour de France-Gewënnner ze gesi sinn. An da steet do „They made it happen“, eng Ofwandlung vum hellegen Nationbranding-Slogan „let‘s make it happen“ also. Ech weess net, wat mech méi verwonnert: Datt een hei vum eigentleche Slogan ofwäicht oder datt een tatsächlech mengt, mat esou engem plompe Versuch iergendeppes ze erreechen. Sollen elo wierklech Banker_innen, Investor_innen oder soss Leit mat vill Frick den Tour kucken an sech da soen „Ahjo, de Charly Gaul an den Andy Schleck hunn den Tour gewonnen. Deen een ass duerno a de Bësch wunne gaangen, deen aneren huet gewonne well deen Typ virun him gedoppt war. An dat Land wëll ech elo meng Suen investéiere goen!“

Mat vill guddem Wëllen ass den Tour zu Lëtzebuerg eng Reklamm fir den Tourismus. Wann d‘Leit just d‘Episod vun haut kucken an net de Recht vun der Staffel, wou gewise gëtt, wéi flott Frankräich ass. Mä et hätt een och einfach manner fest op den Tüb drécke kënnen. Da géif een vläicht och net bei all Geleeënheet esou provinziell wierken.

Quellen:
Wort zu Käschten
Foto vum Banner op der Staumauer

The post Angscht a Schrecke mam Tour de France appeared first on Angscht a Schrecken zu Lëtzebuerg.

Eng gut laanscht d’Backen an en decke Fouss an den Ar…..da kommen se zou sech.Dei mengen wat sie wieren wann se esouer fleihen loossen. [Quell]

raus aus dem Lande mat Deenen…. [Quell]

Den obligatorischen Militärdengscht soll fir 1. Joer agefouert gin dat geng denen jonken Lenken, DP , an Sozialisten inclus CSV gudd din…dono kucken mer wien nach iwreg bleiwt sech verantwortungsvoll an den politischen Dengscht vun eisem Land ze stellen! Fuck Dommheet …an den Nullrespekt an Onwseenheet! [Quell]

also wann daat do keen fake ass da sollen sech da mol e puer schummen die do hun et net verdengt Letzebuerger ze sinn [Quell]

Ech denken net dass eng Natioun d’Léit spléckt. Vill Auslänner splécken sech selwer of, well se weder Sproch kennen, nach Interessi um Land hun. Vill sin hei wéint der Arbescht an net wéint eisen schéinen Veloswëer. Dei Auslänner wou sech awer hei mat anbannen wellen, fannen och en dohem an “eiser” Natioun. Zu denen Lénken soen ech lo naischt, mat engem Lénken kann éen net schwätzen. [Quell]

Jo déi Asozial Lénk den Ofschaum vun derMënschheet. [Quell]

Sou eppes kann nemme vun enger Hord Paviane kommen.Aus wei engem Käfech sin dei fortgelaf [Quell]

Naja, ech verstinn de Sproch funn dene jonke lenken. Hier .d’Fest am A….., dann kennt en eben ob esou Sprech ?? An mei wei Sch…. haten dei nach nie an der Bier ! Dei haten einfach en Krankeschein wei d’Gehier verdelt ginn ass oder ?? [Quell]

Wann ech esou ungeckelt wär op eist ländchen geif ech auswanderen….also dier delpesen ciaoooo [Quell]

All an eng Rei gestallt a a gefeckt ginn mat engem gudde Knëppel aus Lëtzebuerger Holz [Quell, Screenshot]

Germain deemols haetten mir sou Wixteren an den Keller 7 anespaert. An duerno haetten se den Falschirmtest awer ouni Falschirm gemaacht. [Quell, Screenshot]

Dat, wat dir elo héieren hutt, ware Commentairen op sozialen Netzwierker, déi sech iwwert jonk politesch aktiv Mënschen opgereegt hunn. Dat sinn natierlech alles Eenzelfäll, net an iergendenger Form representativ.

The post Angscht a Schrecke mat de léiwe Lëtzebuerger*innen, Deel 3 appeared first on Angscht a Schrecken zu Lëtzebuerg.

Wat ass de Noutstand?

Bis elo gouf et schonn een Noustandsparagraph an eiser Verfassung. Deen huet awer just fir international Noutfäll an net fir national Noutsituatioune gegollt. D‘läscht Woch huet d‘Chamber – mat Ausnam vun déi Lénk an ADR – fir d‘Ännerung vum Artikel 32 (4) vun der Verfassung gestëmmt. Elo kann d‘Regierung an de Grand-Duc och am Fall vun enger nationaler Krisen de Noutstand ausruffen. Deen dauert als éischt zéng Deeg, kann dann awer vum Parlament op dräi Méint verlängert ginn. Wann de Noutstand aktiv ass, kann d‘Regierung mat Reglementer sou zimlech alles maachen, wouropper se Loscht huet. Natierlech steet elo an der Verfassung, déi Mesurë missten „noutwendeg, adequat an ugepasst“ sinn. An natierlech steet och am Text, déi Mesurë missten der Verfassung an internationalen Traitéën entspriechen. Mä wien soll dat am Eeschtfall kontrolléieren?

Am Fong soll de Noutstand och just dann a Kraaft trieden, wann d‘Parlament net séier genuch reagéiere kann. Mä wéi séier kann d‘Parlament iwwerhaapt reagéieren, an wien decidéiert, wat séier genuch ass?

De Noutstand ass Krisen-PR

Et ass nämlech esou: D‘Ännerung vum Noutstandsparagraph ass Krisen-Kommunikatioun vun der Regierung. An d‘Kris, dat waren d‘Terroruschléi zu Paräis am November 2015. Dat war esou no u Lëtzebuerg, datt d‘Regierung iergendwéi huet misse reagéieren. An dat huet se gemaach, an deem s de lauter komesch an zweiwelhaft Reegelungen erausginn huet. Zum Beispill d‘Geschicht mat de Prepaid-Kaarten, déi net méi anonym dierfe sinn. Wéi wann Terrorist*innen sou domm wieren, hir Prepaid-Kaarten ze registréieren!

Och de Noutstand wäert net vill géint den Terror maachen, mä d‘Regierung – an d‘CSV – kënnen sech elo dohinner stellen an sech op d‘Schëller klappen a soen: „Mir hunn eppes géint den Terror gemaach“. Wat en plus nach net stëmmt, well eleng de Paragraph keen Terrorakt wäert ophalen. Et ass renge politeschen Aktionismus, deen en plus nach ganz geféierlech fir eis Demokratie ass.

Hëlleft de Noutstand géint Terror?

A Frankräich gesi mir, datt et mol keen Verfassungsartikel brauch, fir een état d‘urgence méintelaang oprecht ze erhalen. Zanter November 2015 gëllt a Frankräich den Ausnahmezoustand – domadder goufen zwar keng Terrorattaken verhënnert, mä et ass awer vill méi einfach ginn, fir Demonstratiounen ze verbidden. Zum Beispill déi, déi bei de Verhandlungen zum Klimaofkommens zu Paräis sollte stattfannen. Insgesamt sinn Amnesty International no 155 Manifen verbuede ginn. Fir ofzeschleissen nach e puer erschreckend Zuelen: Vun 24 Attentäter, déi an deene läschten Méint a Joren an Europa islamistesch Terror- oder Morduschléi gemaach hunn, waren der 24 – also alleguerten – der Police bekannt, d‘Halschent gouf schonn vun der Police iwwerwaacht. Mir brauchen also guer net méi Iwwerwaachung oder Noutstandsgesetzer, mä vläicht einfach e Police, déi hir Aarbecht besser mécht. Dobäi dierf een och net vergiessen, datt et an Europa ëmmer méi rietsen Terror gëtt, deen vun der Verwaltung an der Politik gäre kleng gespillt gëtt.

Mir kréien also elo een Noutstand, deen am schlëmmste Fall eis Demokratie futti mécht, an am beschte Fall näischt aneres bréngt wéi een gutt Gefill fir e puer Politiker_innen. Domadder si mir erëm beim Ufank: An der Klimapolitik ass et jo dacks genee esou.

Links:

Woxx: L’état d’urgence, un danger pour la démocratie

Wort: Verschärfter Notstand

Spiegel: Unsere Sicherheit ist eine Inszenierung

The post Angscht a Schrecke mam Noutstand appeared first on Angscht a Schrecken zu Lëtzebuerg.

D‘Welt steet am Moment jo e bëssi op der Kopp. De Brexit, den Donald Trump, d‘Spannunge mat Russland, nationalistesch Tendenzen a ganz Europa an elo och nach de Virschlag vun der Kommissioun, een Europa vun de „puer Vitessen“ ze maachen. Et gesäit also dono aus, wéi wa Lëtzebuerg deemnächst op sech eleng gestallt wier. Oder op mannst esou, wéi wa mir deemnächst méi Sue fir eis Verteidegung missten ausginn. Dem Trump säi Vizepräsident, den homofeindleche Mike Pence, ass do nämlech mam Donald op enger Linn. An well déi ganz Welt ausernee fält, ass et vläicht guer keng esou eng schlecht Iddi, opzerëschten.

Mä do gëtt et ee klenge Problem. Eis Arméi ass nämlech bëssi eng kleng Trupp. An mir kënne jo net einfach Leit akafen. An iert dir lo denkt „Okee, soll den Etienne eis nach e puer Dingoe kafen“ – mir hunn scho vill ze vill Dingoen. An en plus eng Arméi, déi net onbedéngt Loscht huet, mat dem neie Fliger a Krichsgebidder ze fueren, wéi et bei enger Versammlung vun der respektiver Gewerkschaft ze héiere war. Zwangsrekrutéierung ass natierlech keng Léisung, also musse mir kreativ ginn. Et bréngt jo näischt, just Material ze kafen, fir dat den Donald an de Mike glécklech sinn. Mir géifen eis jo gäre verteidegen. Denkt elo net: „Ween géif Lëtzebuerg dann ugräifen?“ Erënnert dir iech un all déi feig Attacken op Lëtzebuerg an deene leschte Joren? Den ehemolegen däitschen Ausseminister Peer Steinbrück wollt mol d‘Kavallerie op Lëtzebuerg schécken. A net réicht zanter Luxleaks gëtt op eisen aarme Grand-Duché geklappt, wéi wa mir um Elend vun der ganzer Welt Schold wieren! Mir mussen eis also schützen!

Lëtzebuerg brauch eng Atombomm!

A wéi kann een sech schützen, wann ee kleng ass, vill Sue wëll ausginn, keng grouss Arméi huet an net nach 50 Dingoe kafe wëll? Richteg! Et baut een eng Atombomm! Lëtzebuerg brauch eng Atombomm! Da géif sech kee méi trauen, eis ee Steierparadäis ze nennen! Du hues eppes géint eis Rulingen? Dann hues de hoffentlech scho genuch Jod-Tabletten akaaft!

An doduerch, datt mir sou kleng sinn, ass et vill méi schwéier, eis ze treffen! Fir eng lose-lose-Situatioun muss een eis vir d‘éischt emol op der Kaart fannen an et packen, eis net mat Liechtenstein ze verwiesselen!

Atombomme wieren déi ideal Verteidegung fir dat 21. Joerhonnert! Déi ganz Länner ronderëm eis wëllen elo souwisou aus der Atomenergie erausklammen. Mir kënnen deenen einfach ubidden, géint eng kleng Taxe selbstverständlech, de Recycling vun dem ganzen Uran ze erleedegen. A wann d‘Franzouse gewuer ginn, wéi bëlleg mir aus Cattenom Atomsprengkäpp maachen, ass déi gréisste Gefor fir eist Land a fënnef Minutten zou. Sou ökologesch Recycling-Waffen, dat géif esouguer deene Grénge gefalen! Vläicht kann den Tram jo dann och dee weltwäit éischten Tram mat takteschen Atomwaffe sinn. An am Stau kann dann déi nei geschafften Atom-Marine dann dat éischt lëtzebuergescht Atom-Uboot besetzen. Wa mir eng Atombomm hätten, géif och kee méi bezweifelen, datt Lëtzebuergesch eng Sprooch ass an d‘Leit vun Nee2015 mat hire Mannerwäertegkeetskomplexer géifen endlech mol de Baack halen. Och de Verkéiersproblem géif sech einfach a Loft opléisen.

Alles an allem wier e lëtzebuergeschen Atombommeprogramm déi ideal Léisung fir all eis Problemer. Wisou hu mir nach längst net domadder ugefaangen?

The post Keng Angscht a kee Schrecke mat der Atombomm appeared first on Angscht a Schrecken zu Lëtzebuerg.

Wouriwwer ech dës Woch wëll schwätzen ass dem Ëmgäng, deen mir an Europa mam Donald Trump hunn. Den Trump ass sou bëssi de Buh-Mann ginn, mat deem een aner Politiker_inne gäre vergläicht. Dat ka praktesch sinn, well een dorunner gesäit, datt sech verschidde Saache guer net esou staark ënnerscheeden. Sou zum Beispill am Fall „Schooleaks“, wou zwee Minister_inne vun der DP sech ëffentlech op social media iwwert dat Uerteel opgereegt hunn – ganz ähnlech wéi den Trump, dee vu „so-called judges“ geschwat huet.

Zwou Falen mam Donald Trump

Anerersäits dierfe mir elo awer och net an de Modus verfalen, deen ënnert dem George Bush normal war. Deemols war de Motto „déi blöd Amien an hire blöde Präsident“. Do sinn zwou Falen dran:

Déi éischt Fal ass d‘Argument mat der Dommheet, oder esouguer der geeschteger Krankheet. Et kann een sou Diagnosen net vu wäitem stellen, dat heescht ouni een Dokter, deen den Donald Trump vun noen ënnersicht huet, si sämtlech Spekulatiounen iwwert seng geeschteg Gesondheet wäertlos. Do kënnt da nach dobäi, datt et iwwerhaapt net de Punkt ass, op den Trump krank oder domm ass: Hien setzt rassistesch a sexistesch Politiken duerch. Wann iech no engem Mount Trump wierklech keng aner Kritik afält wéi „deen ass domm“, géif ech iech roden, är Prioritéiten ze checken. Well och wann den Trump den intelligentste Mann vun der Welt wier a just a Vermooss géif schwätzen an twitteren, seng Aussoen an seng Aktioune géifen doduerch net manner rassistesch a sexistesch an domadder kritséierenswäert ginn.

Déi zweet Fal ass déi, sech op d‘USA als einfacht Feinbild ze konzentréieren. Natierlech ass et wichteg, datt mir eis solidaresch erkläre mat deenen Amerikaner_innen, déi sech elo „the Resistance“ nennen an zum Beispill Protester géint de „Muslim ban“ organiséiert hunn. Mä mir däerfen dobäi Lëtzebuerg an Europa net vergiessen. Et ass einfach, dem Trump seng Pläng fir eng Mauer un der Grenz zu Mexiko ze kritiséieren an dobäi ze vergiessen, wéi mäerderesch a rassistesch déi europäesch Grenzpolitik ass. Mir kréien iwwregens eis eege Mauer: un der südlecher Grenz vu Libyen gëtt mat EU-Suen d‘Grenz verstäerkt, fir datt manner Migrant_inne Richtung Europa kënne kommen. Dat hunn eis geeschteg gesond Politiker_inne mat normale Frisuren zu Malta entscheet.

Et gëllt also, sech net vum Donald Trump sengem Ausgesinn oder senger Manéier ze schwätzen, oflenken ze loossen. Et gëllt, hie fir déi richteg Saachen ze kritiséieren. An et gëllt bei deene ganze Push-Notifications, déi Moies um Handy liichten an eis Schreckensmeldungen aus den USA bréngen de Rietsruck an Europa net ze vergiessen.
Just well et hei e bëssi manner schlëmm ausgesäit, heescht dat nach laang net, datt et vill besser ass.

Dir huet dës Episod gefall? Dann hëllef mat, se ze verbreeden! Du kanns dës Buttons dofir benotzen:

The post Angscht a Schrecke mam Donald appeared first on Angscht a Schrecken zu Lëtzebuerg.

Esou nei ass dat ganzt allerdéngs och net: D’Limite vun 50 µg/m³ an der Dagesmoyenne ass och schonn an der Vergaangenheet iwwerschratt ginn, zum Beispill den 18. März 2016 op der Miessstatioun Bouneweg, oder den 9. Dezember 2016, wou zu Esch souguer 64 µg/m³ am Dagesmëttel gemooss gi sinn. Enn Mäerz 2015 gouf et eng Episod, wou d‘Limite e puer Deeg hannerteneen iwwerschratt ginn sinn.

Leider ass den Site emwelt.lu, wou een sech d‘Donnéeë vun de Moossstatiounen kann ukucken, net immens séier an huet éischter Problemer, fir längerfristeg Donnéeën ze weisen. Dofir ass et schwéier, erauszefannen wéi d’Situatioun soss war. Leider kann een*t sech déi wichteg Donnéeën och net einfach als Excel eroflueden (et kéint jo nach een*t op d’Iddi kommen, eppes Sënnvolles domadder ze maachen!). Den Open Data-Site data.public.lu huet zwar zanter haut e puer Excels-Fichiern mat Loftwäerter vum September 2016. Dat ass vläicht eréischt den Ufank, mä een konsequenten Monitoring vun der Situatioun gesäit anescht aus.

Véier Moossstatiounen ginn et laut Emwelt.lu, dovunner zwou an der Stad, eng zu Esch an eng zu … Beidweiler. Am Norden vum Land gëtt et also keng offiziell Moossstatioun, an och am bevëlkerungsräiche Süden gëtt et just zu Esch eng. Et stellt sech also d‘Fro, ob et net méi där Moossstatiounen misst ginn an ob de System, fir déi Donnéeën ze publizéieren, vläicht net och iwwerschafft misst ginn, fir de Public éischter ze warnen.

Loftqualitéit: Stéckoxider iwwerschreidden d’Limiten

Dir erënnert iech vläicht vun den Dieselofgasskandal, wou d‘Automobilsfabrikant*innen bei den Ofgastester gefuddelt hunn. Do ass et virun allem ëm Stéckoxider gaangen, déi als NOx zesummegefaasst ginn. D‘Stad Lëtzebuerg huet eng eegen semi-mobil Moossstatioun, mat där Stéckstoffdioxid gemooss ka ginn. Op hirem Internetsite huet d‘Stad e puer Bulletinen zur Loftqualitéit verëffentlecht. Net immens detailléiert, mä eng Iwwersiicht iwwert Joren 2013 bis 2015. 2016 sollt dann all Mount e Bilan verëffentlecht ginn, dat ass awer just bis Mäerz geschitt. Eventuell ass och net méi weider gemooss ginn, well d‘Moossstatioun technesch Problemer hat. An der Stad sinn 2013 bis 2015 déi jäerlech Grenzwäerter fir de Stéckstoffdioxid all Joer iwwerschratt ginn an och am leschten Mäerz war d‘Schätzung, datt dat 2016 géif geschéien. D‘Loftqualitéit war also an dësem Punkt ni besonnesch gutt an hei ass den Verkéier een vun den Haaptverantwortlechen. Stéckoxider sinn och Virleefer vum buedemnoen Ozon, deen och extrem gesondheetsschiedlech fir de Mënsch ass.

Mir gesinn also: eng liberal-gréng Regierung, egal op um nationalen oder um kommunale Plang, huet wéineg Interêt dorunner, eppes fir d‘Loftqualitéit ze maachen. Et feelen engersäits kohärent an och längerfristeg Donnéeën, anerersäits awer konkret Mesuren. Un Ëmweltzonen gëtt zu Lëtzebuerg nach guer net geduecht, een Dieselverbued huet d‘Ëmweltministesch strikt ofgelehnt. An mat deene villen Autobunnen an Turbo-Rond-Pointen déi an der läscht opgaange sinn, wäert d’Loftqualitéit allerdéngs net besser ginn. Dat néidegt Ëmdenken, dat eis op méi nohalteg Formen vun Transport wéi ëffentlechen Transport, Zufoussgoen a Vëlo bréngt, kënnt duerch esou Infrastrukturmoossnahmen och net. Freet iech also op Krankheeten wéi Asthma, Mëttelouerentzündungen, Schied um Nervensystem, Impotenz, Longekriibs an Häerzinfarkter!

Iwwregens sollt d’Limite vum Réngstëbs 2010 op siwen Iwwerschreidungen am Joer vun 20 µg/m³ erofgesat ginn. Den Wäert géif Lëtzebuerg haut bal all Dag iwwerschreiden. Zum Gléck huet déi béis béis EU et sech anescht iwwerluecht. Natierlech kéint Lëtzebuerg och selwer méi streng Wäerter virginn, mä wisou sollt et? Et ass jo net esou, wéi wann d’WHO géif virschloen, den Joeresmëttel fir PM10 op 20 µg/m³ ze setzen …

Quellen:

• 4 Moosstatiounen bei Emwelt.lu
• Bulletins VdL: 2013, 2014, 2015, Iwwersiicht.
• data.public.lu

Dir huet dës Episod gefall? Dann hëllef mat, se ze verbreeden! Du kanns dës Buttons dofir benotzen:

The post Angscht a Schrecken mat der Loftqualitéit appeared first on Angscht a Schrecken zu Lëtzebuerg.

Zu Lëtzebuerg hunn sech zwee Regierungspolitiker*innen zu Wuert gemellt. Engersäits den Aarbechtsminister Nicolas Schmit vun der LSAP, deen der Meenung ass, et misst een eis „Awanderungs- an Asylpolitik“ iwwerdenken. Hien huet dann och implizit gefuerdert, déi europäesch Baussegrenze méi staark zou ze maachen, fir datt déi europäesch Reesfräiheet fir d‘Europäer*inne kéint bestoe bleiwen. Dat wier zwar deier, mä et mir kéinte „déi Leit“ jo net all ophuelen.

Et ass fir ze katzen.

De Nicolas Schmit vermëscht mat voller Absicht Migratioun mat Asyl. Dat ass eppes, wat déi Riets – op een se elo „Populist*innen“, „Extrem“ oder „Radikal“ nennt, immens gäre maachen. Leit, déi Asyl froen, Leit déi Schutz viru Krich froen, ginn als „Migratioun“ gelabelt. Dat maachen se, well „Migratioun“ u sech schonn net immens gutt klengt an een dann och ganz liicht vun enger „Invasioun“ fabuléiere kann. De Nicolas Schmit géif och gären Asylprozeduere schonn an den Heemeschtlänner vu potentielle Refugees duerchféieren. D‘Fro, wéi dat praktesch sollt ausgesinn, huet hien sech wahrscheinlech net gestalt, mä ech wënschen him vill Spaass dobäi, mam Assad oder soss engem Dikator iwwert ee lëtzebuergeschen Asyl-Büro an hirem Land ze verhandelen. Och déi komesch Iddi, datt Sue fir dausende Kilometer Mauer fir Leit ofzehale besser ugeluechtend Geld wier, wéi deene Leit wierklech ze hëllefen, muss ech mengen ech net weider kommentéieren. „Mir mussen eis europäesche Baussegrenze schützen“ ass „I‘m going to build a wall“, just méi fein ausgedréckt. An bei eis bezillt ebe net Mexiko, mä déi Leit, déi hiert Liewen dowéinst loossen. D‘läscht Joer sinn iwwregens iwwer 5000 Leit eleng am Mëttelmier gestuerwen. Dat sinn der bal 14 Stéck all Dag. 14 Mënschen, déi all Dag stierwen, well mir léiwer iwwer d‘Sécherung vun eise Baussegrenze schwätze wéi déi Leit, déi viru Krich a Verfolgung flüchten, ze retten.

Déi zweet Regierungspolitikerin, déi sech zum Thema Refugees gemellt huet, war d‘Integratiounsministesch Corinne Cahen vun der DP. Si huet dat lei gesot:

„Déi reesen einfach emol vu Land zu Land. Dat si Leit aus Albanien, Algerien, Tunesien, aus dem Marokko, aus der Tierkei, souguer aus dem Kosovo. Iwwerall Länner, wou et de Leit vläicht net esou gutt geet, mä wou sécher am Moment kee Krich ass. Déi och iwwerhaapt keng Chance hunn, fir kënnen heizebleiwen. An do musse mer als Europa virun allem kucken, datt mer eis elo emol endlech an Europa och d’Moyene ginn, fir dat déi Leit et iwwerhaapt net mi bis heihinner packen. Well et sinn am Fong déi, déi eis Misär maachen, net nëmmen zu Lëtzebuerg.“

Et ass fir ze katzen.

Et ass éischtens emol onheemlech krass, datt eng Persoun mat lëtzebuergeschem Pass, déi zousätzlech als Ministesch iwwerhaapt keng Problemer huet, iergendwou hinzereessen, vu Leit aus Albanien, Algerien, Tunesien, Marokko an dem Kosovo sou schwätzt wéi wann déi aus Spaass géifen duerch Europa reesen op der Sich no enger Zukunft. Et ass och lächerlech, datt d‘Ministesch anscheinend net weess – oder wëssentlech ignoréiert – datt et an deene Länner, déi si opzielt, ëmmer erëm zu Mënscherechtsverletzunge kënnt. Homosexualitéit ass am Marokko zum Beispill einfach verbueden. An der Tierkei ginn et grad massiv Verhaftungswelle géint Oppositioneller, déi kurdesch Minoritéit gëtt net nëmmen ënnerdréckt mä och bekricht – fir d‘Madame Cahen sinn dat anscheinend alles keng Grënn fir Asyl ze kréien. Och si wëll, datt „déi Leit et iwwerhaapt net méi bis heihinner packen“, also am Fong och „I‘m going to build a wall“. Et ass egal, ob et tatsächlech ëm eng Mauer oder ënnert Gimmete „just“ ëm méi Frontex-Zaldote geet – si wëll Leit dovunner ofhalen, an Europa ze kommen an et ass hir anscheinend egal, ob déi ee legitimmen Asylgrond hunn kéinten.
Natierlech ginn et och ënnert Refugees schlecht Mënschen an natierlech wäert net all Persoun, déi hiert Gléck an Westeuropa versiche wëll, een Asylgrond hunn. Mä sollt eis dës Erkenntnis wierklech dovunner ofbréngen, ganz basic Mënscherechter ze verteidegen an eis géint eng Virverurtdeelung vun all deene Leit ze wieren?

Wien eis wierklech Misär mécht

Wësst dir, wien eis nämlech wierklech Misär mécht?
Et si Politiker*inne wéi d‘Corinne Cahen an de Nicolas Schmit. Politiker*innen, déi – obwuel se et besser wësse – d‘Matiere vun der Migratioun an vum Asyl matnee verméchen. Politiker*innen, déi substitäre Schutz viru Krich als „Asyl“ bezeechnen, well se vun deenen aneren Asylgrënn näischt wësse wëllen. Misär maachen eis Leit wéi d‘Corinne Cahen an de Nicolas Schmit, déi d‘Dir no riets wäit op maachen an probéieren, sou op Stëmmefang am rietsen a rassistesche Lager ze goen. Si normaliséieren een nationalisteschen Discours, si de-humaniséiere Refugees an si bidden um Enn iwwerhaapt keng Léisungen ausser „I‘m going to build a wall“.

Zu Koblenz gouf et dëse Weekend och Protester géint dat rietst Vernetzungstreffen. Ënnert den Demonstrante war och eisen Ausseminister. Et schéngt awer, wéi wann hien deemnächst och am Regierungsrot protestéiere misst. Mä vläicht ass dat fir d‘LSAP och just Taktik. De Minister Schmit mécht d‘Dir no riets op, während de Minister Asselborn Signaler un de lénke Fligel schéckt. Am Endeffekt bléift just eng Regierung, déi sech net eendeiteg fir Mënscherechter ausschwätze kann, well se léiwer um rietse Bord no Stëmme fëscht.

Quellen:
Corinne Cahen op RTL.lu.
Nicolas Schmit op Wort.lu
D’Doudeger am Mëttelmier

Dir huet dës Episod gefall? Dann hëllef mat, se ze verbreeden! Du kanns dës Buttons dofir benotzen:

The post Déi, déi eis Misär maachen appeared first on Angscht a Schrecken zu Lëtzebuerg.

Zu Lëtzebuerg si mir mat der Meldung gestart, datt am Trifolion den Thilo Sarrazin géif optrieden. Den Sarrazin ass net einfach just ee Mënsch mat enger kontroversieller Meenung, mä een ausgemaachten Rassist, deen seng Theorien pseudowëssenschaftlech ze hannerleeë versicht. Wisou een ëffentlecht Kulturzentrum esou engem Mënsch onwiddersprach eng Bühn muss bidden, an dat och nach ouni kritesch Froen zouzeloossen, dat ass fir mech wierklech net ze verstoen. Datt et antifaschistschen Protest gouf, ass nëmmen normal an ze begréissen. Wéi medial mat dem ëmgaangen ass, war och Inhalt vun enger Episod.

Bei Angscht a Schrecken hunn mir eis dunn mam Schoulsystem befaasst, an mir sollten mat eiser Feststellung, datt et eng enorm krass Segregatioun vun lëtzebuergeschen an net-lëtzebuergeschen Schüler*innen géif ginn, Recht behalen, wéi d’Resultater vun der rezentster PISA-Etude gewisen hunn.

Refugees waren am Fong dat ganzt Joer an der Aktualitéit – datt sech Leit iwwert eng Aktioun mat Kartongshäzer opgereegt hunn, huet gewisen, datt vill “Lëtzeboier” mol net een Häerz aus Kartong hunn, wann et ëm Leit a Nout geet. Wéi wichteg et ass, vir Leit a Nout opzehuelen, huet 2016 ëmmer erëm gewisen. Grad zum Schluss vum Joer, wéi d’Schluecht ëm Aleppo ouni Récksiicht op zivil Affer op een Enn bruecht ginn ass. Ëmsou méi fir ze schummen, datt féierend Politiker*innen vun der CSV keen Problem hunn, géint Refugees ze hetzen an nach méi fir ze schummen, datt eis “progressiv” Regierung Leit an d’Kirchsgebidd Afghanistan expulséiere wëll.

Lëtzebuergesch, Mobilitéit an d’Steierparadäis

Och mat der lëtzebuergesch Sprooch hu mir eis an der dëser Rubrik befaasst – an vill Argumenter, déi an der berühmt-berüchtegter Petitioun benotzt gi sinn, hate mir schonn um Enn vum Februar widderluecht. Leider ass dës Diskussioun esou emotional, datt Argumenter dacks näischt bréngen. Wann d’Argument ass “Um Kierchbierg héiert een keen Lëtzebuergesch méi”, freet een*t sech och, ob domadder de grousse Kino um Kierchbierg gemengt ass oder tatsächlech de Geschäfter a Bistroen an dem Quartier.

D’Mobilitéit war och een grousst Thema, dat ech an e puer Episoden behandelt hunn, eng Kéier méi generell, eng Kéier speziell iwwert déi béis Radaren, déi eis all d’Suen aus der Täsch zéien. Witzeg waren och d’Online-Diskussiounen zu dem Thema, wou allerlee Verschwörungstheorien iwwert Tachoen an Radaren ronderëm gegeeschtert sinn, déi wéineg mat der Realitéit ze dinn haten.  D‘Steierparadäis Lëtzebuerg ass och an e puer Episoden virkomm, no de PanamaLeaks an beim Luxleaks-Prozess, deen Antikapitalismus virun Geriicht gestallt hat. Hei ass dat läscht Wuert nach net geschwat, mä et wéisst sech ëmmer méi, datt de Grand-Duché net aus senger Rôle eraus kënnt.

Aner Themen, déi an dësem Podcast dat läscht Joer virkomm sinn, war d’Jugend an de Generatiounekonflikt. Elo wäert ech dëst Joer 30 Joer aal ginn, an dach fillen ech mech nach ëmmer net erwuessen an froe mech, ob ech dat je maach wäert. Dat läit net dorunner, datt ech gären Pokémon Go spillen a mir net blöd dobäi virkommen, mä éischter dorunner, datt ech net eescht geholl ginn vun der Generatioun vun de “Babyboomer” an der “Generation X”, déi eis d’Zukunft verbaut hunn an sech elo froen, wisou mir sou negativ agestallt sinn.

Eng gutt Noriicht

Zu gudder Läscht gouf et dann awer och eng gutt Noriicht: d’Fro, wou d‘Éislek ufänkt, konnt endlech gekläert ginn. Déi Episod ass net nëmmen mat Ofstand déi, déi am meeschten erofgeluede gouf, mä huet et och als Artikel an d’Zäitschrëft “Forum” gepackt.

Et sollt een bei all dem Angscht a Schrecken awer net vergiessen, datt och e puer gutt Saachen geschitt sinn. Wat déi genee waren, iwwerloossen ech iech, fir iech auszedenken …

The post Angscht a Schrecken am Joer 2016 appeared first on Angscht a Schrecken zu Lëtzebuerg.