O Balonmano Uesca certificó ahiere a suya permanencia en a Liga Asobal dimpués d’empazar con l’Anaitasuna de Pamplona, conseguindo asinas o punto que li feba falta t’asegurar a suya presencia en a maxima categoria d’o balonmano estatal a l’anyo venient.

O partiu, que s’heba aplazau dimpués d’un problema en as estructuras d’o pabellón navarro, se reprencipió con 12-15 en o marcador ta os aragoneses. Os niervols d’aconseguir os puntos fación que l’Anaitasuna empazase o partiu a los 10 menutos d’a segunda parti. Dende ixe inte a igualdat continó en o marcador, dica la fin. Con 30 segundos por chugar-se o partiu yera empazau a 27, pero o BM Uesca consiguió fer o 27-28, y encara que l’Anaitasuna empazaba en 28, ya yera un feito que en o suyo primer anyo en a categoría, o club de Uesca sinyaba a suya permanencia.

Asambleya d'a PDE (Foto: Nació Digital)

Una vegada conoixiu o plan de cuenca de l’Ebro, que atendendo as reclamacions de l’uso, achique o cabal minimo ta fer frent a ixas demandas, prencipia o plazo d’alegacions que se ferá en os venients seis meses.

Os gubiernos aragonés y espanyol y os regants son contentos con o nuevo plan, mientres que as organizacions d’esfensa d’a tierra y ecolochistas aragonesas y catalanas no son guaire d’alcuerdo porque creyen que afectará a lo cabal minimo ecolochico d’o rio, va contra a directiva marco europeya y ubre a puerta batalara a nuevos trescoles.

Dende Catalunya, a Plataforma de Defensa de l’Ebre alcordaron en a suya asambleya d’o zaguer cabo semana levar a suya protesta ta Europa, asinas como reclamar a la Comisión Europeya que veile por o proceso d’alegacions a o nuevo plan de cuenca. Seguntes o movimiento antitrescoles, a propuesta d’a CHE de 106,9 metros cubicos por segundo como cabal minimo tendría conseqüencias grieus ta o delta de l’Ebro y o territorio. Por l’inte no se planteyan levar a movilizacion ta la carrera, pero si que recullirán sinyaturas ta fer as suyas reclamacions en Bruselas.

Tamién en Aragón os colectivos d’esfensa d’a tierra y contra o trescole u los gran entibos, como Coagret, han refusau o nuevo plan de cuenca. Seguntes iste colectivo, o cabal planteyau por a CHE ye por baixo d’o 10% d’o cabal meyo de l’Ebro. Tamién quieren trucar o ficacio en que as “demandas d’augua s’han almitiu totas, o que ferá complicau satisfer-las en tiempos de ixuquera como l’actual”.

Coagret, una vegada más, tamién ha reclamau l’ature d’as obras d’os entibos de Yesa, Mularroya, As Torcas u Biscarrués por os impactos meyoambientals y porque as alternativas planteyadas suposarían un coste menor ta la ficienda publica, asinas como un millor aproveitamiento de l’augua.

Auto de gama alta (Foto: G. Gimeno)

Hue son estadas publicadas por ACEA (L’asociacion europeya de fabricants d’Autos) as estatisticas de nuevas matriculacions d’autos a ran europeyo. Ye estau unatro mes negro a tot o sector, ya que as ventas son baixadas d’un 6.9% en cheneral en tot o continent.

As zifras acumuladas de tot l’anyo son encara piors y fan un retacule de -7.5% contimparau con o 2011. Por marcas de vehíclos, os segmentos utilitarios mas populars son os que acumulan as cayitas más cerenyas como Renault que baixa un 23% acumulau en tot l’anyo, Seat con -17% u a nivel más interesant ta los intereses de l’industria en Aragón, Opel caye en toda Europa (o destino principal d’as exportacions dende Figueruelas) un 17%.

Sin dembargo os autos de segmentos consideraus de luxo continan puyando as ventas, asinas os resultaus acumulaus de 2012 son : +4% ta Audi, +0.6% ta BMW, Mercedes crexe un 5.5%, Lexus +11.7%, Jaguar-Land Rover +33.4% y Bentley-Bugatti-Lamborghini lo fan totz chuntos un 37%

As organizacions Jalón Vivo y COAGRET organizan iste sabado una chornada en esfensa d’o Rio Xalón y contra o prochecto de l’entibo de Mularroya.

A chornada prencipiará con una cursa dende Embit dica Morés que se i puet ir andando u en bici. De meyodiyas se ferá una chenta popular en Morata. O debat plega de tardis con una charrada a on que serán representants d’a Plataforma en Defensa de L´Ebre, Huerva Vivo, Jalón Vivo y COAGRET. A parti más festiva la meterá o ‘Jalón Rock’, un festival a on que tanyerán as collas Mentira Piadosa, Alkol 96, Cachirulos XL, Vinoman y Switch Over.

Ta qui quiera dormir-ie se meterá una zona d’acampada libre en Chodes. A chornada cuenta, antimás, con o refirme d’o Bloque Independentista de Cuchas y d’o sindicato SOA.

Alumnos d'o CRA Cinca-Cinqueta (Foto: A clica d'a Cinca-Cinqueta)

O gubierno ha ubierto o plazo de presentación de demandas ta las plazas publicas de profesors d’aragonés, que remata o venient diya 26 de mayo. Ta dentrar en a convocatoria s’ha de estar en posesión d’o titulo de Machisterio y habrán de pasar una preba de tipo practico. A provisión de plazas no ye automatica, sino que as presonas que pasen a preba dentrarán en a bolsa de triballo en situgación d’interinidat. Curiosament, en a convocatoria oficial, se demanda a os aspirants que han d’acreditar en caso de no tener a nacionalidat espanyola prou conoiximiento de castellán, pero no d’aragonés.

Os detalles d’a convocatoria pueden trobar-se en iste vinclo.

Rajoy en o Senau espanyol o diya 8 de mayo

Por primer vegada dende que existe l’euro a prima de risque d’a deuda espanyola ha puyau dillá d’os 500 puntos. L’intrés ha puyau dica os 6,44%, marcando un maximo historico en a esferencia con o bono alemán. As razons d’ista puyada van dende a situgación d’incerteza en Grecia, dica a restructuración d’o sector bancario espanyol, menazau por os suyos “activos” inmobiliarios.

As nuevas midas d’o gubierno espanyol, como a puyada d’as provisions obligatorias ta os bancos en 30.000 millons d’euros, u no han convenciu a los inversors, u, a lo contrario, los han convenciu de que pueden continar presionando a o gubierno espanyol ta continar por o camin d’a privatización de servicios, retalles y achustes fiscals y politicos.

Hue, o diario espanyol “La Razón”, publica amás, que o gubierno de Mariano Rajoy podria estar parando a intervención estatal de bellas autonomias por no cumplir os obchectivos de deficit. As reunions entre o gubierno espanyol y os gubiernos, por eixemplo, de Catalunya u Andalucia, ha feito a istos dos zaguers gubiernos presentar un nuevo plan de retalles. Encara asinas, y seguntes o diario espanyol, fuents d’o gubierno han dito que bellas comunidatz autonomas no cumpliran l’obchectivo y que l’Estau habrá d’intervenir as cuentas. En l’articlo se cita a Murcia, País Valencian, Catalunya u Andalucía, asinasmesmo a lo País Vasco, encara que ditz que ye “por unatro motiu”.

Karolos Papoulias, president de Grecia (Foto: Wikipedia)

Grecia ferá nuevas eleccions muito probablement o venient mes de chunio, dimpués de que haigan fracasau todas as prebatinas de formar gubierno dende os comicios d’o 6 de mayo. Lo ha anunciau o dirichent d’o PASOK, Evangelos, Venizelos, dimpués d’a zaguer reunión entre o president de Grecia, Karolos Papulias, y os dirichents d’os partius surtius d’as urnas, fueras d’os neonazis.

Tamién i han asistiu representants d’os dos partius que s’oposan a lo plan de rescate pactau entre Atenas, a UE y o Fundo Monetario Internacional: a coalición Syriza y a Cucha Democratica.

A reunión de hue yera a zaguer prebatina de fer un gubierno de tecnocratas, independients d’os partius, dimpués d’o fracaso d’un gubierno entre as principals formacions griegas. Manimenos ista proposa de Papoulias tampoco no ye estaca aceptada.

En istas nuevas eleccions a coalición d’a cucha radical, Syriza, podría trencar definitivament o bipartidismo griego d’o PASOK y Nueva Democracia; seguntes as zaguers enqüestas publicadas por a depeixa Ekithamerini seria la formación más votada.

O Real Zaragoza continará en a primer división d’a Liga BBVA gracias a la suya victoria d’ahiere por 2 gols a zero contra o Getafe. O Zaragoza fa asinas historia pues ye a primer vegada que un equipo consigue superar una desavantalla de 12 puntos y remanir en primer división.

O Zaragoza heba de ganar o partiu ta conseguir estar-se l’anyada venient en primer división. De haber empatau hese pendiu d’os resultaus en atros campos. L’asperanza plegaba en o minuto 57 quan Apoño conseguiba fer un gol de penalty puyando o 0-1 t’o marcador contra un Getafe con 9 chugadors dimpués de que l’arbitro forachitase a Sarabia en o minuto 25 y a Torres en o 56. Pero a seguridat de continar en primer encara tardaría más de meya hora eterna ta l’afición. Estió Postiga qui, en o minuto 92, fació o gol que guaranciaba que o Zaragoza podría continar-ie una atra temporada.

Cientos de zaragocistas salioron t’a carrera ta celebrar que o suyo equipo no baixaba ta segunda como quasi tot lo mundo s’heba pensau mientres toda l’anyada. Tamién en Getafe, pues yeran miles os aficionaus que plenoron o campo que muitos meyos clamoron ‘a chicota Romareda’ a tardi d’ahiere. Chunto con l’alegría de continar en primera y os chilos de ‘Sí se podió’, tamién se sintioron a-saber-las criticas contra o president Agapito Iglesias y chilos de refirme a l’entrenador Manuel Jiménez.

Manifestación en a Plaza d'o Pilar o 12 de mayo

As accions arredol d’o cabo d’anyo d’o 15M continan mientres ista semana. O sabado yeran 50.000, seguntes os organizadors, as personas que se chuntoron en a manifestación más gran d’o país en Zaragoza. Más de mil en Uesca y cientos de personas en tot lo territorio, dende Teruel dica o Sobrarbe, se sumoron tamién t’as protestas.

Dimpués d’a manifestación y de l’asambleya que se fació en a Plaza d’o Pilar, bellas personas decidioron d’acampar-ie y montoron as suyas tiendas de campanya. Manimenos no plegoron a fer-ie nueit pues a policía les fació desaloixar a ixo d’as 5 d’a maitinada, baixo a presencia d’o delegau d’o gubierno espanyol, Gustavo Alcalde.

O 15M zaragozano tornó t’a plaza ahiere ta fer-ie una atra asambleya a on que se decidió que no se i acamparía. Tamién se i decidió de meter mesas informativas en a Plaza o diya 15 dende as 18:30 y convocar una sentada pacifica a las 20:00. O sabado 19 se ferá una asambleya, tamién en a Plaza d’o Pilar, a on que se evaluarán os actos feitos mientres istas zaguers semanas. Antimás as trobadas de ‘mareas’ y vicos pasarán a fer-se en a Plaza d’o Pilar totz os domingos a las 20:00.

A Catedra UNESCO de Patrimonio Lingüistico Mundial d’a Universidat d’o País Basco (UPV/EHU) organiza, a tarde d’o chueus 17 de mayo en Bilbau, o Seminario “Internet y a promoción d’a diversidat lingüistica”, con l’obchectivo de sensibilizar sobre a importancia de promocionar a diversidat lingüistica en Internet. L’aragonés i será present, con a participación de Juan Pablo Martínez, profesor d’a Universidat de Zaragoza, qui ferá una charrada con o titol “As TIC como ferramienta en a revitalización de luengas en periglo: o caso de l’aragonés”, y tamién en a mesa redonda que se celebrará a la fin.

O seminario, que se celebrará dende as 15:30 dica las 20:00 horas en as Aulas d’a Experiencia da UPV/EHU, ye de libre dentrada, y contará tamién con a presencia d’atros ponents como Elin Haf Gruffydd Jones, d’a Universidat de Aberystwyth (Galas), Carmen Gómez Mont d’a UNAM (Mexico), Reitze Jonkman d’as Universidatz NHL y Stenden (Frisia, Países Baixos), Héctor García Gil, de l’Academia de la Llingua Asturiana y Karaitiana Taiuru, de Nueva Zelanda, qui expondrán as experiencias de promoción d’a diversidat lingüistica en os suyos países. L’acto rematará con una mesa redonda arredol d’internet y as luengas minorizadas.

O programa completo se puede trobar en http://www.unescoetxea.org/dokumentuak/internet2012_egitaraua_programa.pdf

As actividatz d’ista Catedra d’a UNESCO, se pueden seguir en twitter https://twitter.com/UNESCOmho y en facebook https://www.facebook.com/pages/UNESCO-Chair-on-World-Language-Heritage/164200393675702