As Crónicas de Landereina

Un blog para unilos a todos

noreply@blogger.com (Sabela) — Wed, 01 Oct 2014 10:39:00 +0000

Levo ben meses sen pasar por este blog, seino. E tampouco é que estivese coidando moito da Gramática de Corpos, a verdade, pero ás veces o tempo non dá para todo.

Unha das cousas nas que invertín ese tempo (ademais de escribir, traballar e, faltaría máis, estar de vacacións) foi en preparar a nova imaxe do meu blog principal, Gramática de Corpos.

A renovación do blog non é só visual: no canto de ter perfís e blogs esparexados pola rede, toda a información, entradas, etc. está agora xunta nun só sitio:

unha páxina persoal ubicada en sabelagonzalez.com.

As entradas deste mesmo blog están transferidas a esta nova Gramática de Corpos, ademais das entradas do que xa leva sendo o meu blog dende 2009.

Iso si, toda a información das Crónicas seguirá aquí dispoñible e actualizada coas novidades que xa vos irei contando (moi pronto!).

No Twitter, manterase o meu perfil @BelukaGramatica. E tamén poderedes pasarvos polo Facebook, por Pinterest (que ten cousas ben bonitas :D) ou por Google+.

Vémonos en sabelagonzalez.com!

Visitas de maio

noreply@blogger.com (Sabela) — Thu, 22 May 2014 08:03:00 +0000

Esta semana pasada, a semana das letras, fixen unha pausiña escritora (velaí o motivo polo que me prodigo pouco polas redes...) e tiven o pracer de visitar o IES Sanxenxo e o Colexio Los Sauces, de Vigo.

Paseino moi ben nas dúas visitas. Foron deses actos que se fan sinxelos xa só pola boa actitude dos rapaces e rapazas (e do persoal do centro, claro!) e grazas á cantidade de preguntas e comentarios.

Asinei tropocentos exemplares, pero tamén en marcapáxinas e anacos de papel e foi un día xenial, que vos vou dicir!

Aquí tedes un par de fotiños, para o recordo. En canto teña o video da entrevista que me fixeron en Sanxenxo tamén o deixarei por aquí.

Grazas a todos e todas!!

Lémonos!

Feira do Libro de Santiago

noreply@blogger.com (Sabela) — Wed, 30 Apr 2014 10:13:00 +0000

Parece que estou desaparecida (aínda que algo si que me pronunciei pola Gramática e por Twitter) pero o certo é que vos ando abondo ocupada. E ocupada, neste caso, quere dicir "landereineando". O segundo tomo das Crónicas de Landereina está engordando cada día, facéndose e dourándose pouco a pouco.

Por iso, e como se achega o momento, no meu próximo encontro, acompañada de Francisco Castro, lerei as primeiras páxinas desta nova entrega. O acto será esta fin de semana, o domingo 4 de maio, ás 20:00, na Feira do Libro de Santiago. Vídesvos?

E se queredes estar máis ao día das feiras e estas cousiñas de libros, botádelle un ollo ao calendario do libro deste ano, aquí.

Visitas na Mariña

noreply@blogger.com (Sabela) — Wed, 09 Apr 2014 09:00:00 +0000

Remato a crónica da última semana de marzo coa visita a dous centros moi especiais.

O día 28 estiven falando de Bágoa de Lúa no que foi o meu instituto, o Monte Castelo de Burela (mellor non pensemos canto fai diso). Foi unha moi boa visita, coa ilusión engadida de volver pasear polo centro e ver que tampouco cambiaron tanto as cousas.

Só un anaco despois, puxen rumbo ao IES Marqués de Sargadelos, outro instituto especial, xa que o seu orientador é o meu pai (ola Papáaa!). Eu teño poucas fotos da visita, pero botade un ollo á presentación de agradecemento que fixeron (véndoa acábome de decatar de que xesticulo un mon-tón!). Moitas grazas!!

Foi unha charla xenial, con moitas preguntas e da que xurdiron grandes ideas! Espero que poidamos falar do libro cando o leades, se queredes! :)

Grazas a todas e todos por un día tan especial!

Primicia no Salón do Libro Infantil e Xuvenil de Pontevedra

noreply@blogger.com (Sabela) — Fri, 04 Apr 2014 08:30:00 +0000

Vouvos contando, con atraso e pouco a pouco, das visitas da semana pasada. Non era sen tempo, verdade?

O día 27 de marzo, como vos dixera, tivemos ocasión de presentar Bágoa de Lúa no Salón do Libro Infantil e Xuvenil de Pontevedra, cos alumnos do IES Torrente Ballester da mesma vila. Ademais, esta presentación foi abondo especial, pois lin as dúas primeiras páxinas de Feitizo de Sangue, a segunda parte das Crónicas de Landereina (que tan atarefada me teñen!). Tedes aquí a nova no blog de Galaxia.

Non vos vou enganar: púxenme abondo nerviosiña... O meu editor estaba alí e nin sequera as lera antes! Con todo, parecía contento... :D

Con @landereina no Salón do Libro para presentar 'Feitizo de sangue', segundo libro de 'As crónicas de Landereina' pic.twitter.com/IEgBihYAVi
— Francisco Castro (@chamademesimbad) March 27, 2014

Novos encontros con Bágoa de Lúa

noreply@blogger.com (Sabela) — Tue, 25 Mar 2014 13:22:00 +0000

Xa sei que hai moito que non aparezo por aquí, pero está a cousa liada, que vos vou contar!

Ademais, esta semana téñoa completiña, a verdade:

Comezamos co Salón do Libro Infantil e Xuvenil de Pontevedra. Se aínda non fustes non sei a que esperades! Está do 14 de marzo ao 5 de abril. Eu estarei o xoves día 27, ás 10:30, falando de Bágoa de Lúa e das primeiras páxinas do 2º libro das Crónicas cos rapaces e rapazas do IES Torrente Ballester.

O venres 28... visita á casa! Primeiro pasarei polo meu antigo instituto, o IES Monte Castelo de Burela, e logo achegareime a San Cibrao, ao IES Marqués de Sargadelos. Desta volta levo presentación... a práctica de facela terá que ir vindo! :D

Lémonos!

Bágoa de Lúa finalista do II Premio Muíño do Vento

noreply@blogger.com (Sabela) — Thu, 13 Mar 2014 11:56:00 +0000

Hai premios curiosos.
E un deles, para min, é o Premio Muíño do Vento de textos de contraportad a. Este premio, organizado pola Asociación Sociocultural de Canido (Ferrol), Muíño do Vento, ten en conta unhas liñas que a cotío pasan desapercibidas e, sen embargo, son moi importantes: moitas lecturas decídense só con elas, sen importar todo o contido impreso no interior da obra.

Este ano, na súa segunda edición, un dos finalistas é o meu Bágoa de Lúa, e é unha grande alegría. Canda min, están os textos de A illa de todas as illas, de Xabier P. Docampo, A Terra Queima, de Lalo Carnota e Xurxo Souto, e O Castañeiro de Abril, de Antonio Manuel Fraga. Sorte e noraboa a todos!

Bágoa de Lúa no club de lectura do CPI Progreso (Catoira)

noreply@blogger.com (Sabela) — Tue, 25 Feb 2014 10:00:00 +0000

Foto tirada do blog do club de lectura

O outro día recibín, tras un contacto por Twitter, un correo do club de lectura do CPI Progreso, de Catoira. Os rapaces e rapazas do club estiveron lendo Bágoa de Lúa e tiñan algunhas preguntas que facer.

Aquí vos deixo as respostas que lles din.

Grazas ao club de lectura do CPI Progreso (pasádevos polo seu blog!) polas súas preguntas!

1.- Como se che ocorreu esta historia?

A historia de Berenguela e Güenaela saíu dun conto pequeno que se me ocorreu hai máis de dez anos. Imaxinei (ás veces as ideas aparecen nos miolos porque si, supoño) un rei dos típicos de conto, gordecho, barbudo e moi bo ao que quixen chamar Bogardo. Dinlle voltas á historia, pero na miña mente Bogardo era tan bo, que non lle pasaba nada interesante. O interesante, pensei, podería estar arredor del. Tantas voltas lle din que o meu contiño quixo ser libro: inventeille a familia enteira e púxeno nunha terra imaxinaria (parecida á nosa en moitas cousas, pero imaxinaria nunha morea de aspectos), sufrindo por mor dun legado familiar. Con moitos dos personaxes finais en mente, pareceume máis interesante que a aventura a vivisen unhas rapazas que así poden demostrar a súa valía. Gústame que as una o destino e gústame velas medrar como persoas. Os adultos son máis aburridos para algunhas cousas...

En fin, pasei moitos anos engadindo cousas, cambiándoas e quitándoas ata dar co que agora son As Crónicas de Landereina. Sempre me custara escribir cousas máis longas ca un relato de poucas páxinas, así que pasei moito tempo a perfilar que quería contar. Iso si, tardei anos porque fixen moitas máis cousas, non porque se tarde tanto tempo en escribir un libro!

2.- Por que usaches seres fantásticos para esta historia?

Moitas das eleccións que se fan escribindo e inventando unha historia non teñen un motivo concreto que se recorde. Se me paro a pensalo, moito tivo que ver con que me gustan as historias de fantasía (todas as ficcións, case, a dicir verdade) e coas miñas lecturas do momento, ou coas películas e series que poñían daquela.

De sempre, gustoume moito a mitoloxía, especialmente a nórdica e a celta, e certos seres fantásticos proceden delas. Por outra banda, penso que son moi interesantes e que engadir monstros e criaturas fantásticas dá moito xogo. É unha crueza moi distinta á da realidade pero coido que un bo reflexo.

3.- Como se che ocorreron eses nomes tan complexos?

Poido resumilo dicindo que son un pouco "friki"... Gústanme moito os idiomas e procurar palabras raras, a etimoloxía das palabras e dos nomes de persoas, e inventar cousas. Se xuntas todo iso, saen unhas cantas tardes moi divertidas poñendo nomes raros.

Algúns nomes son reais: Berenguela, Güenaela (adaptado do bretón, Gwennaëlle), Alfhildr (é un nome nórdico antigo), Bjarne (diminutivo antigo de Björn, que significa "oso"), etc.

O resto son inventados, algúns baseándome en nomes reais, xuntando varias ideas de nomes e cambiándoos para que soen ben (ou mal, según apeteza), outros collendo unha característica do personaxe e buscando esa palabra noutros idiomas, para logo darlle algunha volta e adaptala... Por exemplo, os nomes dos centauros veñen da cor da súa pelaxe. Busquei a cor en varios idiomas nun tradutor e logo adaptei a palabra. "Ciemny" é escuro en polaco. A día de hoxe, non lembro de onde saíron moitos deles: unha vez que collen forma e imaxinas á personaxe con el, é difícil deixar de velo como un nome de verdade.

Ah! E Sirvian vén do nome dunha aldea de Pontevedra. Nunca estiven, pero o autobús Vigo-Lugo pasa por un cruce no que pon Sirvian nun sinal.

Botade un ollo en behindthename.com e veredes que hai nomes reais xa abondo complexos de seu!

4.- En quen te inspiraches para crear a Berenguela e a Guenaela? E... cómo é fisicamente Berenguela?

Inevitablemente, inspireime en xente que coñezo, supoño.

Berenguela, na miña cabeza, é unha rapaza tirando a normaliña, nunha primeira ollada. Gústame que non chame a atención. Non é moi alta, nin moi baixa, nin delgada, nin gordiña. Ten o pelo castaño claro, máis ben liso, os ollos verdes (pero dun verde pouco brillante, que ás veces un non sabe se son grises, verdes, ou escuros... e aquí baseime nos meus, que son verdes pero ninguén se dá conta), e a pel tirando a clara. O que máis me gusta dela é que xesticula moito e é moi expresiva, ademais, le ben á xente e ten moita empatía.

Güenaela leva moitas cousas inspiradas na miña irmá, aínda que no carácter non se parecen en nada. Pero si leva os cabelos lacios e claros, os ollos dun azul moi claro e intenso e a figura moi finiña. É máis alta ca a miña irmá, porque me gusta que sexa unha figura desgarbada á vez que é áxil, de apariencia fráxil pero moi forte.

5.-Tiveches que facer algún borrador?

He, he, algún? Uns cantos! Tomei notas á man, escribín no ordenador, corrixín en papel, corrixín na pantalla... Hai que revisar moitas veces: ler por partes para ver se están ben, lelo todo xunto varias veces para ver o conxunto, buscar grallas, buscar faltas, erros de sentido... Hai moitas versións previas antes da final. Para min, ademais, é moi importante dividir a historia e ir repasando cada certo tempo e tamén tomar notas lonxe do ordenador, darlle voltas ás cousas antes de sentar e tomalas como referencia para seguir escribindo.

Nesta entrada do blog podedes ver parte da papelada coa que acabei (e unha ilustración que fixo un amigo meu de como imaxino a Güenaela).

6.- Por que hai dúas liñas de tempo e non unha? Non sería máis sinxelo se só fora unha?

Sería, si, pero resultaría moi aburrido contar a historia de xeito lineal.

De feito, a historia cóntase en diferentes tempos porque existe un paralelismo en certas cousas entre o que aconteceu no pasado e o que está a acontecer: un descubrimento, unha viaxe, unha batalla... Se se contase de maneira lineal, non habería ningunha sorpresa!

7.- Como se che ocorreu a xeografía da historia?

Como ben se lle ve, a cabra tira ao monte: mirando os nosos montes e rías en Galicia. Aínda que vivo en Vigo, eu son de Cervo (Lugo), e cando vou visitar a meus pais atraveso case toda Galicia. É difícil non inspirarse vendo vilas, montes e costas de aquí. Ademais, en Cervo, imos pola beira do río pasear á cadela e aí é inevitable imaxinar ás rapazas camiñando...

E vós, tedes algunha pregunta?
Lémonos!

O rap de Bágoa de Lúa

noreply@blogger.com (Sabela) — Thu, 20 Feb 2014 10:30:00 +0000

O outro día contábavos das charlas que fun dar ao IES Pintor Colmeiro de Silleda e ao IES Daviña Rei de Monforte. Desta última, facía unha "nota mental" para lembrar pedir unha copia do rap que escribiu unha alumna (Mimí) e que me cantaron en directo.
Pois, por incrible que pareza, lembrei preguntar e enviáronme estes enlaces de pouco despois. Como vedes, no blog de normalización deste IES colgaron varias entradas sobre a miña visita... Rap incluído!

Aquí tedes a nova da miña visita, as fotos e o rap de Bágoa de Lúa :)

Moitas grazas!!

Bágoa de Lúa finalista nos Premios da Edición 2014

noreply@blogger.com (Sabela) — Tue, 18 Feb 2014 10:42:00 +0000

Onte, luns 17 de febreiro, déronse a coñecer os títulos nominados aos Premios da Edición da Asociación Galega de Editores.

Entre eles, está o meu Bágoa de Lúa (entre moitos grandes títulos, cómpre sinalar!) e non podo estar máis contenta.

Por iso, velaquí vai o meu máis sincero agradecemento á Editorial Galaxia, aos editores galegos e a AGE e, por suposto, a todos os lectores e lectoras que tantas alegrías me dan.

Nestes premios, son os editores os que presentan as candidaturas e realizan unha primeira votación, cuxo resultados se publican e fan chegar ao xurado que emitirá a decisión final. A entrega de premios será o día 21 de marzo no Liceo de Betanzos.

Non deixedes de botar un ollo ao resto de títulos nominados.

Os meus parabéns a todos os seleccionados e moita sorte!

Cuestionario Proust en Caderno da Crítica

noreply@blogger.com (Sabela) — Mon, 17 Feb 2014 10:00:00 +0000

O sábado día 15, o amigo Ramón Nicolás publicou no seu (imprescindible) blog, Caderno da Crítica, as miñas respostas ao cuestionario Proust que dende hai uns meses se convertiu nunha interesante sección do seu blog.

Se queredes saber algo máis de min, podedes velo aquí.

*Editado (2014): Non lembraba que xa fixera un cuestionario destes hai tempo... Arrincoume un sorriso ver que respostas se mantiveron e cales cambiaron... Podedes lelo aquí.
e cumpren.

Calendario do Libro e da Lectura

noreply@blogger.com (Sabela) — Thu, 13 Feb 2014 17:52:00 +0000

A finais de xaneiro, a AELG e a AEG comezaron a espallar o calendario que vos traio. Aínda que se trate dun calendario adicado a profesionais do sector do libro, seguro que moitos e moitas de vós o atopades interesante, que por algunha feiriña do libro se haberá que pasar este ano!

Eu xa anotei as datas importantes nun dos meus calendarios, a ver se este ano me animo a completalo tamén coas datas de publicación e fallo dos certames literarios e o podo compartir con vós.

Podedes botarlle un ollo e descargalo aquí, ou na propia imaxe que vos achego.

Obradoiros literarios en La Voz de Galicia

noreply@blogger.com (Sabela) — Mon, 10 Feb 2014 08:39:00 +0000

Esta fin de semana, La Voz de Galicia publicaba un artigo sobre a formación en escritura creativa no que falaba, entre outras iniciativas, dos obradoiros que imparte, dende 2003, Francisco Castro.

Dado que eu asistín a uns cantos deses obradoiros, unha entrevistiña miña acompaña o artigo (aquí), e xa vedes que non podo dicir máis que marabillas da experiencia.

Se vos gusta escribir ou se queredes coñecer mellor o proceso da escrita, recoméndovos estes obradoiros. Agora mesmo está aberta a inscrición para un de iniciación e un de perfeccionamento. E seguro que haberá máis!

Sabela González na AELG

noreply@blogger.com (Sabela) — Tue, 04 Feb 2014 17:22:00 +0000

Dende hoxe, está dispoñible no centro de documentación da Asociación de Escritores/as en Lingua Galega o meu perfil como autora.

Aquí, nesta páxina, por agora só cunha breve autobiografía e os enlaces aos meus perfís e páxinas, está a miña ficha. Espero poder aportar máis documentación e información en breve (coma a que tedes neste mesmo blog, nas diferentes etiquetas e na galería).

Formar parte da asociación dos nosos escritores e das nosas escritoras paréceme toda unha honra. Poderei xa crer de todo que son escritora, aínda que sexa a tempo parcial? Espero poder. Pronto.

Por iso mesmo, vou seguir tecleando (hoxe tócame lidiar cun personaxe novo... non sei se me sorprenderá ou se sairá como leva sendo nos meus miolos todo este tempo, xa vos contarei).

Se a vós vos tira isto das letras, botádelle un ollo aos certames e premios na web da AELG aquí. E se queredes estar ao día, non esquezades seguir a súa axenda aquí.

Lémonos!

Charlas en versión beta

noreply@blogger.com (Sabela) — Wed, 29 Jan 2014 09:00:00 +0000

Esta semana, o luns, fun por primeira vez visitar institutos para falar de Bágoa de Lúa.

As outras veces que tiven que falar en público do meu libriño, fun na compaña de Francisco Castro, que me introduce con engaiolantes e ben fiadas verbas. E iso axuda a meterse en materia e dar enchido o tempo e os ocos da cabeciña.

Desta volta, sen rede nin trampolín, tocoume estar soa, aínda que non ante o perigo, senón ante os rapaces e rapazas de dous centros de ensino: o IES Pintor Colmeiro, de Silleda, e o IES Daviña Rei, de Monforte.

Aínda custa un chisco falar do que unha escribe e ir fiando como naceu a historia, como logrou ser un libro, por que escribo (por que fago calquera outra cousa que fago?), pero disfrútase moito tendo as reaccións e as opinións de lectores e lectoras tan preto. Puiden contar máis cousas de como naceu o reino de Landereina, os nomes cos que tanto vos toleo, o brasón que decora a portada do libro... E puiden tomar moitas notas mentais de como mellorar o meu discurso para o futuro, para pasar desta versión en beta, esta versión de probas, a unha charla algo mellor feitiña. Por iso, pido desculpas pola inexperiencia e agradézovos a oportunidade.

En Silleda, estiven cos alumnos e alumnas que fixeran as críticas do libro das que xa vos falei, na compaña de Gracia, de Trafegando Ronseis. Despois de falar, asinei algúns exemplares do libro, así que xa hai algún Bágoa de Lúa máis co seliño da lúa por Galiza adiante, e tamén me fixeron unha entrevistiña para a radio do centro. En Monforte mesmo puiden escoitar un rap sobre Berenguela e Güenaela (nota mental: pedir unha copia, a ver se vola podo enseñar).

Non houbo moitas preguntas, e iso, crédeme, fai máis difícil sacar historias que contar, as anécdotas e curiosidades nas que non reparara ata que alguén pregunta o que acende a chama, pero se cadra iso me fixo lembrar con máis forza os meus anos de instituto (porque non, o máis probable é que eu non preguntase nada tampouco... aínda que máis tarde, ás veces, me arrepentise).

Pero agora, no anonimato, se vos animades, os comentarios son todos vosos!
Que máis vos podo contar desta aventura?

Traballando

noreply@blogger.com (Sabela) — Tue, 14 Jan 2014 17:00:00 +0000

Ese é o meu recuncho, dende o que escribo estas liñas. Dende o que escribo (case) todas as liñas. Supoño que vou algo en contra do estereotipo de desorde que se comenta dalgúns escritores...

A lámpada alumea dende a dereita porque son zurda. Se tedes a lámpada á dereita e non sodes zurdos ides mal, que vos vai facer sombra.

Na estantería, caixas de cadernos, de cousas de fotografía, de selos. Nos arquivadores hai apuntes e papeis: os de Landereina ocupan o da esquerda, o da dereita ten o resultado de obradoiros literarios e clases de alemán, francés e debuxo. Os outros arquivadores son de cómics. Fóra da foto, máis á dereita, todo son libros e caixas de materiais de pintura.

Ensínovos o meu "estudio" porque é onde estou a pasar todas as miñas tardes. Ando ben atarefada, dándolle ao teclado, contando estas historias da miña cabeciña e teño moitas ganas de seguir avanzando e de que pronto cheguen a vós.

En fin, non é que sexa moita novidade, pero a iso ando.

Ah, e pronto tocan visitas a institutos varios por Galicia adiante... así que igual nos vemos!

Mentres tanto, lémonos!

Feliz 2014!

noreply@blogger.com (Sabela) — Wed, 08 Jan 2014 09:00:00 +0000

Aló van as vacacións! Espero que as aproveitasedes e as disfrutasedes.

Pola miña banda, confeso que con tanta troula familiar non din lido apenas nada do que vos dixen, polo que o meu monte de libros segue a me ollar con vileza...

Irémoslle dando, pouco a pouco, porque o máis urxente e importante é volver a Etlual, coller a Berenguela e Güenaela da man e guialas ata un feitizo... Tamén me espera unha viaxe ao pasado, a antes da creación da Pedra de Lúa, para contarvos como raio comezou toda esta historia.

E dá que facer pero, tanto como custa, mola. Así que, por favor, tomádeo como motivo de ausencia se vedes que me prodigo pouco. Ando por aquí, tecleando, e argallando novas cousas que amorsarvos.

Feliz ano!

Lecturas para o Nadal - Boas festas!

noreply@blogger.com (Sabela) — Mon, 23 Dec 2013 12:53:00 +0000

Chegan as vacacións de Nadal e con elas un merecido descanso.

Marcho de visitas familiares e celebracións varias e estou aínda dándolle voltas ás lecturas que levar. O meu montón de lecturas pendentes foi medrando ao mesmo tempo que minguaba o meu tempo libre, pero se cadra estes días de chuvias (segundo a predición meteorolóxica) e festexos dará para se botar no sofá cunha manta, un té con leite e un novo libro por descubrir. Confeso que tamén me conteño á hora de comezar un novo libro porque como me enganche sei que non vou dar feito nada máis ata que o remate... Que se lle vai facer.

Empecei a follear The Graveyard Book (O libro do cemiterio), de Neil Gaiman, pero non sei se aparcalo e comezar con outro, por variar de fantasía, se cadra. Este autor, Neil Gaiman, é un autor de fantasía do que lin moi boas críticas: é o autor de Coraline, o libro no que se basea a peli do mesmo nome, moi recomendable. Con esa información por diante, téñolles moitas ganas aos tres libros que escollín, sobre todo a Neverwhere, que plantea a existencia dun Londres alternativo baixo o Londres real (interesante, non?). Xa vos contarei que me parecen!

Por outra banda, teño outras tres ideas de lectura fóra da fantasía xuvenil. Un é O corazón da branca de neve é o último libro de Francisco Castro, a novela gañadora do premio de novela por entregas de La Voz de Galicia deste ano. É unha novela negra que promete ser entretetida e da que tamén lin críticas moi boas. O que máis me apetece é 1984 de George Orwell, todo un clásico que leva na miña biblioteca tempo de máis sen ser lido. Cos tempos que corren, ademais, penso que igual que apetece fuxir da realidade, apetece tamén ás veces a dureza dunha ficción futurista (no seu momento érao!) que nos faga cuestionarnos como imos acabar... Por último, a nova incorporación ao montón é La verdad sobre el caso Harry Quebert, recomendado e non recomendado a partes iguais por amigas que o leron, de aí a gran curiosidade de ver que penso eu.

E vós? Que lecturas tedes pendentes? Como decidides cal é o voso seguinte libro?

Boas festas e ata o ano que vén! *<[]:^)

Entrevista no Diario Cultural da Radio Galega

noreply@blogger.com (Sabela) — Fri, 06 Dec 2013 09:30:00 +0000

Como xa vos retwittei no seu momento, o día 27 de novembro entrevistáronme na Radio Galega, no espazo Páxina Literaria do Diario Cultural.

Tedes a entrevista neste enlace ou, coma sempre, na Galería do blog.

Culturgal 2013

noreply@blogger.com (Sabela) — Wed, 04 Dec 2013 10:30:00 +0000

Presentación aos lectores no Culturgal 2013

Unha vez máis, chego algo tarde coa crónica dunha xornada, que lle imos facer!

Neste caso quero contarvos do Culturgal 2013. Algo vos fun colgando no twitter, pero sempre queda por contar.

Non teño eu moita experiencia nestas lides (por non dicir nada) e ademais era a miña primeira visita ao Culturgal, polo que se cadra convén sumar o abraio pseudoinfantil que as cousas novas provocan.

Puidemos ensinar a orixe dos mapas e da lingua antiga

A feira toda é acolledora, tanto coma unha libraría de vello (seguro que me entendedes), e alí pódese atopar unha morea de cousas interesantes. Eu quedei con ganas de levar un teatro de papel para montar na casa, e tamén o libro de Berta Dávila, que ten unha pintaza, pero o tren non ía agardar por min.

Francisco Castro, co que sempre é un inmenso pracer compartir escea, estivo comigo, compartindo curiosidades da creación de Landereina, a historia deste libriño meu e demais, coas rapazas e rapaces do IES de Ponteareas e do IES Monte Carrasco, de Cangas do Morrazo. Eu ía nerviosa, pero a verdade é que non tiña por que: paseino xenial falando de Bágoa de Lúa e respondendo ás preguntas dos asistentes, que amosaron coñecer ben este mundo fantástico meu. E si, o segundo sae o ano que vén :)

Dende aquí quero dar as grazas a todos e todas por facerme caso tanto tempo seguido (non é fácil, seino) e por paseardes comigo por Landereina. E polos autógrafos! Espero que puiderades pegar ben as adicatorias no libro, foi un verdadeiro pracer!

Non vos perdades tampouco a crónica do blog de Galaxia, como ben din, foi ilusionante!

Asinando anaquiños de papel para os que non puideron traer o libro / Foto de @chamademesimbad

Aí estou contando algo que non sei eu se sería interesante :) / Foto de @chamademesimbad

As vosas opinións (2)

noreply@blogger.com (Sabela) — Mon, 02 Dec 2013 10:09:00 +0000

Aquí volvo con novas opinións sobre Bágoa de Lúa!

Desta volta, son as rapazas do Clube de Lectura da Biblioteca do IES de Poio as que contan que lles está a parecer o libro no seu blog Os Trasnos dos Libros (no enlace van as entradas marcadas coa etiqueta Crónicas de Landereina, pero hai máis opinións sobre outros libros, non volas perdades!).

No blog podedes escoitar un audio coas súas primeiras impresións e ler unha reflexión moi interesante que compara a Berenguela con Mónica, de Dragal, e Katniss de Los Juegos del Hambre.

Grazas ao IES de Poio polas vosas opinións, esperamos ver que vos parece a continuación do libro!

Vós tamén lestes Bágoa de Lúa? Queredes opinar? Non dubidedes en contalo nos comentarios. Tamén podedes pegar o enlace se escribistes sobre o libro no voso blog, encantaranos compartir as vosas opinións co resto de lectores/as.

Lémonos!

Imos ao Culturgal

noreply@blogger.com (Sabela) — Wed, 27 Nov 2013 11:00:00 +0000

O venres 29 de novembro estaremos no Culturgal presentando Bágoa de Lúa aos centros de ensino, ás 12:15, no Espazo Infantil.

Se queredes saber máis sobre Culturgal, podedes atopar información aquí e a programación aquí.

Un evento novo, xa se notan os nervios...

Vémonos!

As vosas opinións

noreply@blogger.com (Sabela) — Mon, 25 Nov 2013 10:30:00 +0000

Como vos dixen, vou contándovos cousas destas últimas semanas pouco a pouco.

Agora tócalle o turno ás reseñas. Coma sempre, podedes ver a relación de reseñas que fumos recopilando neste apartado do blog, ao final da Galería.

No blog As Estelas dos Ronseis podedes atopar comentarios das lecutras de moitos libros da man de rapaces e rapazas.

Entre eses libros está o meu Bágoa de Lúa (faime ilusión, claro que si!).

Podedes dar con el e as súas reseñas na categoría "Fantasía", aquí. Pero, aviso, ollo!, algunhas das críticas conteñen información sobre o libro que vos pode estragar algunha sorpresa se non o listes aínda.

Tamén dei cunha reseña máis no blog de O Levantador de Minas. Podedes lela aquí.

Moitas grazas a todos e todas polos vosos comentarios, as vosas gabanzas e as vosas críticas.

Lémonos!

Manuscrito (I) en Caderno da Crítica

noreply@blogger.com (Sabela) — Mon, 18 Nov 2013 07:54:00 +0000

Estou de volta! Concedinme unha semaniña ao retorno da miña viaxe para poñer as cousas en orde e, claro, acumulouse todo.

Vóuvolo contando pouco a pouco, e comezo con esta preciosa entrada do (magnifiquísimo) blog Caderno da Crítica, de Ramón Nicolás. Este blog é unha referencia imprescindible para saber das novidades literarias galegas e conta, ademais, con este apartado de manuscritos que acolle fragmentos escritos á man e curiosidades de autores. Unha delicia para unha fanática da escrita á man coma min.

Na entrada conto un pouco do meu vicio cos cadernos e podedes ver algúns debuxiños. Como complemento e curiosidade, cóntovos que en Florencia merquei máis cadernos para a colección e uns plumíns clásicos de tinta china que quitan o sentido. Hai cousas que non cambian. Mellor.

Lémonos!

Entrevista no ZigZag Diaro

noreply@blogger.com (Sabela) — Thu, 24 Oct 2013 17:46:00 +0000

Xa pasou algo de tempo dende a miña última entrevista, pero aquí volvo cunha nova: este luns pasado, 22 de outubro, adicáronme un corte no ZigZag Diario da TVG2 que podedes ver neste enlace.

Coma sempre, está engadida na galería do blog, no apartado de entrevistas.

Lémonos!