Augneblink

Å hjelpes

2012-02-06T19:26:00.000+01:00

På torsdag flyttar eg til København med ullsokkar og teskjeier og gitar, for å bli popstjerne. Neidå! Eg skal berre bli god til å synge. I nesten eit år har eg berre gleda meg og gleda meg til akkurat denne veka, men no når ho er her byrjar eg å lura på om det eigentleg kjem til å gå bra. Lille Frøydis i den store byen, i landet der eg kjennar ingen og på skulen der alle har mykje meir erfaring enn meg. Eg trøstar meg med at alt ordnar seg for kjekke jenter. Og at av og til så må ein berre hiva seg uti det, sjølv om ein kanskje må knipa att augene litt for å klara det.

Å himmel

2012-01-22T22:37:00.000+01:00

På fredag skulle me på familiemiddag i Mathiashuset, men først måtte me stoppa ein to tre fire gonger for å sjå på himmelen. Så herleg rosa. (og så fin kjærast!)

A room with a view

2012-01-10T23:50:00.001+01:00

I haust fekk eg min eigen utsikt for første gong. Då reknar eg ikkje med den gongen eg hadde utsikt til carl berner-krysset, eller den gongen eg hadde utsikt til t-banen på makrellbekken. Eg meiner utsikt på ordentleg. Med tre og by og sjø på ein gong. Om ein månad dreg eg vekk frå denne utsikten, og då kan det jo vera fint å ha nokre visuelle minner når eg sit i eit Københavnsvindu å kikkar ned på trafikkryss og søppelbøtter. (no høyres eg litt klagete ut, men eigentleg så er eg nøgd berre eg har eit vindu, heilt sant).

Totusenogelleve

2012-01-01T14:16:00.000+01:00

Året då eg budde i to forskjellige blokker. Kollektivblokka og kjærastblokka, begge med masse hjarterom og pusterom.

Året då eg ordna meg ein bachelorgrad, og lurte frykteleg på kva eg skulle bruka han til.

Året då eg fekk vera i mitt barndomsparadis saman med Mathias, og det endte med firehjuling i solnedgangen. Det blei til ein fin liten hellasfilm.

Året då eg gjekk seks månadar utan å kjøpe klede, og klarte meg ganske fint fordeom.

Året då me kjøpte scrabble. Scrabble <3

Året då eg gjekk på kafé, med mor, med Mathias, med scrabble, med notatbok og med meg sjølv.

Året då eg og Erlend laga litt musikk, og fekk lyst til å laga litt meir.

Året då mor kom på besøk fleire gonger, og var like søt og god som alltid.

Året då eg tok balletimar med Solveig. Me gjekk på litt øva, men eigentleg var me litt elendige. Og litt veldig fornøyde med å snurra rundt i ballettskoa våre.

Året då det vart jul i blokka vår, og me laga vårt eige pepperkakehus for første gong i historia.

Året med all kjærleiken. Klisskliss!

Tusen takk til de som kikkar innom av og til, de er så fine! No er det totusenogtolv og eg gler meg.

Ting som er fine nett no

2011-12-21T14:11:00.000+01:00

1. Fiskar som kyssar fiskekyss i fiskebolla

2. Å kjenna at det blir ein bra dag med ein gong ein åpnar augene

3. Å høyra på Sufjan Stevens si juleplate medan ein les aftenpoften som ligg og ventar utanfor døra

4. Å byrja på første sesong av Gilmore Girls. Igjen. Og igjen.

5. Julegavar som ventar på å få bli pakka opp

6. At det berre er to dagar igjen før eg får flyplassklem

7. Å lesa fine sitat som får ein til å tenka at alt er mogleg og at det kjem til å gå bra til slutt.

"If you can dream it, you can do it"

- Walt Disney

Julestemning?

2011-12-14T12:04:00.000+01:00

Om du treng litt ekstra julestemning, ein liten pause frå eksamenslesing eller berre har lyst til å gå på konsert, syns eg du skal koma på julekonserten vår i kveld! Eg syng i Trill vokalensemble, og me er eit jentekor som lagar masse fine lydar. Det blir litt jul, litt pop, litt madonna og kanskje litt pepperkaker. Eg gler meg! Meir info finn du her.

23

2011-12-12T11:14:00.000+01:00

I dag har eg bursdag! Den skal feirast med korøving, sjokolade, ein fin kjærast og kanskje bittelitt sushi.

Kvit glede

2011-12-08T12:12:00.000+01:00

Åh, finaste snø! Eg måtte hoppa og hyla då han kom, fordi det kribla sånn i magen. I går gjekk eg tur for å kjenna korleis han knaka under skoa, og for å sjå på kor fint han har pynta trea. Lykke!

Lang sundag

2011-12-04T19:00:00.000+01:00

Sundagar eignar seg godt til å gå tur, til å sjå på tv, til å spela spel. Og til skikkeleg mange andre ting. I dag har eg prøvd å få tak i nokre solstråler bak ein haug, tørka støv, og prøvd å lesa Anna Gavalda på fransk. Det er ikkje så lett, men eg blir skikkeleg glad når eg forstår kva det dreiar seg om. For eksempel om å eta middag med ein framand som ein nettopp har møtt, og så aldri sjå han meir. Hurra for desember og lange sundagar!

Scrabble

2011-11-30T12:53:00.000+01:00

Det skjer ikkje så mykje om dagen. Eg jobbar, Mathias jobbar, me jobbar, og innimellom har me spelekveld og kafébesøk og museumstur og bakekveld. Kanskje den beste dagen var då me kjøpte Scrabble. Scrabble! Eg ler meg i hjel av scrabble.

Earl and the Girl

2011-11-21T12:50:00.001+01:00

No skal eg visa noko som får det til å kribla i magen min, eit lite hjartebarn som eg er ganske stolt over. Fine Erlend og eg har på ein måte laga eit band, og no har me lagt ut ein sang på urørt. Om du vil høyra så blir eg glad!

Gå til Urørt for å finne ut mer om låta og artisten

Erlend har produsert og musisert, Mattias har klimpra litt på gitaren sin, og eg syng.

Scann deg ein blomekrans

2011-11-10T12:58:00.000+01:00

Me har fått ein ny dingseboms i hus, ein fotoscannar. Han er frykteleg snill, for han lar oss scanna gamle negativar som me ikkje veit korleis ser ut, og så husker me ting som me hadde gløymt. Her er nokre fine smakebitar!

Teater

2011-10-31T13:15:00.001+01:00

På tirsdag var eg og Mathias på nationaltheatret og såg rockeulven. Rockeulven! Fullt av sauar, eit fantastisk esel, morsomme høner og ein liten pia tjelta-kylling. Og så ulven då. Det var så fint og latterframkallande at eg vil at alle skal sjå han! Og om ein er mellom 15 og 25 kostar det berre hundre kroner, hvis ein meldar seg inn i unge nasjonal. No reklamerar eg som ein galning, men det er berre fordi eg syns det er så bra.

Herifrå

Heimelaga

2011-10-27T11:33:00.000+02:00

I fjor introduserte Alvilde meg for sushi, og sidan då har eg vore hekta. Sushi ser så stilig ut, i tillegg til å smaka perfekt. Eg er heilt ok på å laga mat, men trudde eigentleg ikkje at det var eit nivå som kvalifiserte til å laga sushi. Feil! Sjå berre, det liknar! Dessutan smakte det godt.

Glede på boks

2011-10-24T12:28:00.000+02:00

I helga var Mathias på Londonbesøk, mens eg var heima og var økonomisk. Det var bittelitt kjipt, men alt vart mykje betre då Mathias dro fram denne boksen frå sekken. Hei på deg, lakrismakron!

Tittei

2011-10-21T15:05:00.000+02:00

Dei siste vekene har eg ikkje vore heilt i skrivehumør. Heldigvis har eg vore i mange andre typar humør, for eksempel jobbehumør, museumshumør og kaféhumør. Eg og mathias har til dømes vore på stockfleths for å prøva ut frappéen deira (å himmel) og for å lesa om stolar.

Haustferie

2011-10-11T12:58:00.000+02:00

Eg tek meg ein liten haustferie. No er eg heime på Klepp, her regnar det annankvar halvtime og trea held på å blåsa vekk. Det gjer ingenting, for det er jo sånn det skal vera.

(Link om ein trykkar på biletet)

Besøk

2011-10-04T00:00:00.001+02:00

I helga har eg hatt mi fine, galne, gode mor på besøk. Det er noko av det beste eg veit! Plutseleg får eg eit fullt kjøleskap og roser på bordet, lange kafébesøk med scrabble og enno lengre frokostar med nysteikte baguettar. Sidan eg har ein snill kjærast som tilbyr seg å sova på sofaen, fekk mor sova på sida av meg, sånn som då eg var lita og hadde mareritt. No var det mor som hadde mareritt, der nokon ville kasta dei fina dukane til mormor. Skumle greier! I går måtte me seia hadet, men i tillegg sa me snakkast snart, og det er fordi me snakkast snart. Det er fint å tenka på.

Mandagsfint

2011-09-26T11:45:00.001+02:00

Mathias har reist til Molde for å filma litt, men eg har fri! Det betyr kafé med meg sjølv, telys i vindauget, brownies frå igår og litt kvalitetstid saman med denne gjengen. Mine favorittar er Kurt og Brittany. Kven er dine?

herifrå

Kulturnatt

2011-09-21T20:03:00.000+02:00

På fredag sprang eg og Mathias rundt i byen for å få med oss mest mogleg kultur. Hurra for gratis osloarrangement! Me starta på matfestivalen på aker brygge. Der fekk me så mange smaksprøvar at me nesten blei mette. Så glei me vidare til småflaskemuseet, som var fullt av småflasker. Me tenkte at det sikkert var heilt okei, men det var faktisk veldig kjekt! Det toppa seg då eg fann sklia, som ein kunne velga i plassen for å gå trappa. I løpet av kvelden var me innom fransk kultursenter for litt vin og kortfilm, quiz på nasjonalbiblioteket, origamikurs og konsert. Fin kveld!

Ein to tre fir

2011-09-19T10:48:00.000+02:00

I dag er ein fin dag, fordi det er fire år sidan Mathias spurte meg om me ikkje snart skulle kyssa. Fire år! Det feirar me med sushi, roser, skrapelodd, monopol, og sjølvsagt kyssing.

Home is where the heart is

2011-09-17T00:36:00.000+02:00

Her bur hjartet mitt, og mathias sitt. I betongblokka som stikk opp av alle trea. Me har ikkje budd her så lenge, men eg syns me har fått det ganske fint!

Noko av det finaste er fiskebolla. Her driv Joakim og Anne-Lise med yndlingshobbyen sin. Symjing.

Globusen!

På kjøkkenet står søstrene grene bak nesten alt det fine.

Kjolane får henga ute og lufta seg, det trur eg dei likar godt.

I ei hylle står dvdane mine, mathias sine får ikkje plass på eit bilete, sidan han er ein filmnerd. Eg kjøpar berre dei eg likar aller aller best.

Noko eg aldri har hatt før: ei platesamling. Eg gler meg til å utvida ho!

I sommar fekk eg ein kommode av mormora til mathias sånn heilt utan vidare. Ho hadde tenkt å hiva han, men ga han til meg sidan eg ikkje klarte å gå forbi utan å stryka han.

Eg likar rosiner.

Ovanfor senga heng fine augneblinkar og litt historie på ei snor.

Spelehjørnet. Spelehydna, på dialekta mi.

Tenk, me har ein balkong! Den har morgonsol og utsikt til mange hundre tre.

Og oss då. Oss to i Oslo.

Regn er fint når

2011-09-13T23:37:00.000+02:00

¤ det kjem pakke i posten som ein ikkje visste om og så blir ein heilt sånn hæ? Til meg?
¤ ein finn facebook-versjonen av eit spel ein likar kjempegodt, for eksempel monopol
¤ ein kan gjøyma seg under teppet/bak kjærasten og halda seg for øyrene mens ein har det eine auge bittelitt på gløtt, sånn at ein ikkje skal skvetta så fælt av skrekkfilmen
¤ ein kan hoppa i pyttane med raudprikkete gummistøvlar
¤ ein kjem inn og tek av alle dei våte kleda, for så å smyga seg inn i ei mjuk joggebukse
¤ ein kan planlegga reiser til fine byar, besøk frå fine mødre, 4-årsdag med kjærasten eller berre ei litt ekstra fin helg
¤ ein treng éi unnskyldning til for å sleppa å springa på joggetur
¤ ein har noko godt i posen

Ein kjem langt med tre gir og litt kjærleik

2011-09-08T00:02:00.000+02:00

Før regnet kom sykla me tur rundt Maridalsvatnet. Det innebar fleire drikke- og hoppepausar, for det kjekkaste med å vera på tur er jo at ein kan ta pausar.

Sykt lykkelig

2011-09-05T18:06:00.000+02:00

I dag har eg ein sånn dag der eg heile tida tek meg i å smila, på bussen, over kaffikoppen, til avisa, under dyna. Fine ting i dag er ni plommer i ei skål, kaffi med sjokolade og nype, Louis Armstrong som dirrar på platespelaren og korøving med fine korjenter. Sånn ellers er Sykt lykkelig ein ordentlig fin film, som til og med har blitt valgt ut til å vera Noregs oscar-kandidat. Tenkte berre å nevna det.