BAARGAAL.NET

xaalada ka taagan magaalada Baargaal oo saamayn wayn ku yeelatay ganacsiga iyo noloshii shacabka

noreply@blogger.com (Blogger) — Mon, 19 Mar 2012 12:51:32 PDT

waxaa wali muuqanaaya raadadkii ay ka tageen xaaladihii mudooyinkaan danbe ka aloosnaa Degmada Baargaal iyo degaanada ku hareeraysan ,waxaa badanaa la xiray goobihii Ganacsiga , Maqaaxiyihii cuntada iyo Shaaha iyo gooba kale oo ganasi oo ay ku noolaayeen dad badan oo kamid ah dadka ku nool magaalada baargaal ee gobolka Bari,

Xaaladan oo Mudo sanad ku dhawaad ah ka taagan degaanka ayaa cuuryaamisay noloshii iyo ganacsigii dadka rayidka ah mana jiraan ilo ay dadku ka helaan nolol maalmeedka.

“Waxaa kala go,ay Baabuurtii Khudaarta ,ma jiraan dad wax naga iibsada ,ganacsigeenu waxaa uu noqday mid gaabis ah waxaana taasi ugu wacan ,waxaanan jiran waxsoosaar saxiimadihii bada ka shaqayn jiray iyo abaaro ba'an ”sidaana waxaa Shabakada Baargaal u sheegtay mid kamid ah haweenka ka ganacsada khudaarta degmada Baargaal.

Badi Dadka Shaqada u yimaaday Degmada baargaal ayaa isaga tagay oo meelo kale shaqo u doontay magaalooyin kale

Waxa kale oo arinta sii murgiyay Hawlihii Ha'adaha samafalka oo yaraaday cabsi qayb badan oo katirsan ha'adaas ay ka qabaan degaanka kadib dilkii loogu gaystay alaha u naxariistee xildhibaan bile maxamuud Yuusuf , Lamana qiyaasi karo dhibaatada ay shacabku qabaan

Shabakada BAARGAAL.NET
Isha wararka horumarka degaanada Calbari
baargaal@gmail.com

Daawo Dhulkii : Shabakada Baargaal oo Booqatay Xoogaad

noreply@blogger.com (Blogger) — Fri, 16 Mar 2012 13:27:08 PDT

xoogaad waxay ku taal meel qar ah oo cimilo fiican oo dugaal ah ,Shabakada baargaal.net oo booqatay xoogaad ayaa idiin soo gubbinaysa sawiradan laga soo qaaday xoogaad , sii daawo sawirada:

Ma rabtaa inaad noqoto qof la jecelyahay

noreply@blogger.com (Blogger) — Fri, 16 Mar 2012 12:27:48 PDT

waxan jecleestay inaan halkan idiinku soo gudbiyo maqaal aad u tayo wanagsan fa'iidooyin badana leh
maqaalkaas oo sida cinwaanku ku xusan yahay ah qofka siduu ku noqon karaa qof la jecel yahay oo la ixtiraamo.
Hamoodin qofku inuu soo dhasho isagoo la tixgaliyo ama la jeclyahay. Laakiin waa wax la kasbado lana gaaro marka la maro dadaal iyo daal badan.

Ma rabtaa inaad noqoto qof la tixgaliyo oo la jecelyahay, hadaba isku tarbiyee sifooyinkan 20ka’ah:

Badi dhoola cadaynta, waji furnaanta “ muusoodka “
Si run iyo daacadnimo ku jirto u amaan qofkii u qalma adigoo ka madhan laba wajiilanimada, soo jiidasho iyo nifaaqba.

Ka fogow muranka iyo dood badanba waayo waa bilowga canaadka, colaada iyo kala gu’ida e.
Ula dhaqan dadka oo dhan sida aad jeceshahay in laguula dhaqmo adiga.

Iska yaree canaanta una cudurdaar qofkii kugu gafa ( kugu khaldama )
Iska ilaali cadhada siday doonto ha ahaato’e waayo waxay fal shaydaan. La soco caafimaadka iyo caqligana aad bay ugu daran tahay.
Badi salaanta, waayo walaaltinimada ayay xoojisaa.

Hadii aad awoodo sii Hadiyad haba yaraato qiimaheedu’e, ehelkaaga iyo asxaabtaadaba.
Isbar inaad dhagaysato qofka kula hadlaya, barona habka wax loo dhagaysto inta aadan baran habka loo hadlo.

Ka fogow balaayeysiga iyo baasaysigaba, rajadana iyo yididiiladana badi, waayo rajada oo la badiyo waxay kuu noqonaysaa taageero iyo xoog aad ku dhaafto waqtiyada adag e.

Iska jir qalbi adayga iyo calool adaaygaba waayo waa sifooyinka doqoniimada e.
Markaad fikrad soo ban dhigayso qof dareensii inay tahay wax aad wada leedihiin oo aanad ka fariidsanaynayn kana caqli badayn.

Iska jir isla waynida tusna dadka inaad tahay iyagoo kale, heerka aad doontaba aad gaadhid e, waayo Rabiigeen sw ma eego qofka isal wayn qiyaamaha, lan soco in Aadam iyo xaawo ay in wada dhaleen dhmmaanteen.

Badi saamaxaada iyo cafiga waayo nadaafada qalbiga iyo naftaba e.
Marka aad qof waaninayso ilaali dareenkiisa oo ha ku odhan ereyo dhaawacaya qalbigaysiisa iyo naftiisa toona.

Caawi oo garab sii qayrkaa marka ay kuu baahan yihiin waayo Rabi baa kuu kaalmayn doona maalainta aad baahatoe.
Iska ilaali dhaliisha aflagaadada iyo naqdiga badan waayo kalmada xumi qalbiga ayey wax yeeshaa, waxaa laga yaabaa inay colaad iyo nacayb isu bedeshoe.
Ha badin qosolka aan haboonayn - waayo qosolka aan macnaha lahayni haybada iyo daganaanta ayuu kaa qaadayaa e.

Isbar dulqaadka iyo adkaysiga waayo waa laba sifo oo Rabigeen iyo Rasuulku csw ay jecel yihiin
Ka faaíidayso waxyaalaha wanwanaagsan ee hareerahaaga ah noqona sida shinida oo kale waayo inta ay kolba ubax fuusho ayey kala baxdaa Manka iyo Muudkabaa

WQ: Faduma Sh Ibrahim

WAR DEG DEG : Qarax ka dhacay magaalada Gaalkacyo

noreply@blogger.com (Blogger) — Thu, 15 Mar 2012 11:44:09 PDT

Waxaa goordhawayd qarax ka dhacay irida hore ee Qaybta Booliska gobolka Mudug kaas oo sida la sheegay la doonayay in lala eegto Taliyihii hore ee Qaybta Booliska gobolka Mudug iminkana ah Taliyaha hawgalinta dhanka ammaanka Col. Muuse Xasaasi, waxaana la sheegay in Taliyaha iyo ilaalo la socotay aan wax khasaaro ah soo gaarin, hase ahaatee, gaarigii ay saarnaayeen uu gabi ahaanba basbeelay.

Goobta qaraxu ka dhacay ayaa waxay tahay xarun Dawladeed oo ay kusugan yihiin Ciidan ka tirsan Booliska Mudug, waxaa kaloo aad ugu dhow dahay Saldhiga Booliska, mana jirto cid loo qabtay qaraxan habayaraatee.

Magaalada Gaalkaco ayaa dhowr bilood ka hor waxaa ka dhici-jiray dilal qorayshaysan iyo qaraxyo kuwaas oo intooda badan cid loo qaban, hase ahaatee, muddooyinkan ayaan dilalkii qorshaysnaa ay yaraadeen marka laga reebo Wariye dhawaan halkaas lagu dilay.

Wax Ka qor Nabada Horumarka iyo Taariikhda Magaalada Baargaal Kuna Guulayso Abaalmarin

noreply@blogger.com (Blogger) — Thu, 15 Mar 2012 01:15:23 PDT

Taariikhda Magaalada Baargaal iyo guud ahaan degaanada Calbari malahan qoraal dhawrsoon oo dhamystiran oo laga heli karo internetka oo loo noqdo haddii arin la saari waayo ama diraasad laga diyaarinaayo degaanka .

Taariikhda ay magaalo ama dad leeyihiin waa hanti ma guuraan ah oo la wadaago , waxayna astaan u tahay jiritaanka ummaddaas , waana weel uu ku jiro dhaqankoodu horaana loo yiri " waarimayside war ha kaa haro "
sidaas awgeed waxaan go'aansanay inaan diyaarino tartan , qofkasta oo qoraa ah , ama waayo aragnimo u leh inuu diyaariyo faalooyin noocaas ah , tartankaas oo aan u qoondeenay abaal marin maqaalkii qaata oo gaaraysa :

10 $ sahal services (ninkii gudaha dalka ku sugan ) 10 $ paypal bank ninkii dibada ku sugan ,
iyo maqaalka oo boga hore ee shabakada baargaal.net lagu faafin doono iyo shabakadaha kala ee aan iskaashiga la leenahay .

waxaan u xilsaaranay doorashada maqaalada Gudi isugu jira abwaano , aqoonyahano iyo macalimiin maxaa yeelay si tartanka u guulaysto waxaa loo baahanyahay in loo taago dhidibbo iyo tiirar aan la dumin karin, iyo qawaacid la raaco

shuruuda looga baahnyahay maqaalka :

1) in uu qoraagu ku bilaabo hordhac uu kaga hadlaayo magaalada
2) in qoraagu xogta uu bixinaayo ay leedahay raad ama meel loo raaco
3) in uu qoraagu soo raacsiiyo maqaalkiisa sawiro iyo tusaalayaal
4) Tartanku kuma koobna magaalada baargaal , waa laga qori karaa magaalooyinka kale sida xaabo , caluula bareeda iwm
5) Qoraagu sugaan iyo sheekooyin waa isticmaali karaa si uu u cadeeyo ujeedadiisa
6) Qoraagu waa inuu daboolo marxaladihii ay soo martay magaaladu , markay ahayd caasimada majeerteeniya
7) qoraagu waa inuu maqaalkiisa uu yahay mid xooga saaraaya dhinacyada nabada , horumarka iyo wada noolaanshaha beelaha calbari

Maalinta ugu danbeesa ee laxiraayo qabashada maqaalada waa 15/4/2012 , fadlan inta ka horaysa taariikhdaas soo dir maqaalkaaga

maqaalada waxaa lagu soo diri Doonaa : Email : baargaal@gmail.com Fax: 00252 5 811204

Shabakadaa Baargaal.net

Col.Gaagaab: Faroole kuma darsan karo haddii kale wuxuu garaacaya geedo badan oo halaq ku jiro

noreply@blogger.com (Blogger) — Tue, 13 Mar 2012 12:16:58 PDT

Madaxweyne kuxigeenkii hore ee Dowladda Puntland ayaa ka hadlay hadal dhowaan uu shaaciyey Madaxweynaha Puntland C/raxmaan Maxamed Faroole oo ah in muddada xilka uu haynaayo ay tahay 5-sano.

Dr.Maxamed Cali Yuusuf (Gaagaab) oo maanta Xafiiskiisa magaalada Gaalkacyo ku qabtay Shir Jiraa’id ayaa si kulul uga soo horjeestay arrintaas ,wuxuuna sheegay in ay tahay arrin aan la aqbali Karin oo aan la samaynin.

Wuxuu sharci darro ku tilmaamay in 480-qof ay matalaan shacabka reer Puntland oo ay ansixiyaan dastuur isagoo sheegay haddi ay meel mariyaan dastuurka aysan sax noqonaynin.

‘’Waxaan qaba in ay sharci darro tahay 480-qof ay matali Karin wakiil ka noqon kari codka qof kasta reer Puntland leeyahay,dastuur ay ansixiyaan uusan sharci noqonaynin iyo sax,dastuurki hore lagu dhaqmi jirey ee 2001-di si kumeel gaar ah loo ansixiyey qodobkiisa 54-aad ayaa cadeynaysa in xilkiisa 4-sano yahay waxaana loo dooran kara labo jeer keliya ‘’,ayuu yiri isagoo raaciyey in la hayo cadeymo cod ah hadana ku dhaartay in xilka uu haynaayo afar sano.

Mr.Gaagaab ayaa ka digay in Madaxweynaha uu ku darsado hal sano oo dheeraad ah isagoo sheegay haddii uu talaabadaas ku dhaqaaqo in Madaxweynaha uu garaacayo geedo badan oo halaq ku jiro ayna keeni karto dhib,siduu sheegay.

‘’Waxaan qabnaa oo dadweynuhu qabaan in maalin lagu darin,laguma dari karo lamana samayn karo haddii kale Madaxweynuhu wuxuu garaacaya geedo badan oo halaq ku jiro,dhib baa ka dhici karta xaaladda Puntland oo iska liidata haddii fiidmo lagu abuuro hadee masuuliyada isaga iyo golihiisa iska leh’’,ayuu sheegay.

Maxamed Cali Yuusuf Gaagaab oo mar soo noqday Wasiirka Maaliyadda Puntland ayaa beeniyay mid kamid ah hadalada Madaxweynaha oo ahayd in Xukuumaddii hore ee Cadde Muuse soo diyaarisay in xilka uu hayn karo 5-sano isagoo sheegay in haddi ay xaqiiq tahay ay iyagu joogi lahaayeen.

‘’Madaxweynuhu wuxuu sheegay in xilka loo doortay 5-sano waana waxba kama jiraan arrintaas ,wuxuu ku dooday in Xukuumaddi hore diyaarisay.waxyaalaha qaar in laga xishoodo ayaa wanaagsan Madaxweynuhu in arrintaas la’eg oo aan waxba ka jirin dadweynaha hortooda ka qirto waa wax aan jirin haday shan sano tahay anaga waan joogi lahayn’’,ayuu yiri mar kale.

Siyaasiyin badan ayaa kasoo horjeestay mudo kororsiga uu shaaciyey Madaxweynaha Puntland.

Shabakada Baargaal.net
baargaal@gmail.com

Aadan Barakaat oo ahaa Madaxa Shirkadda Isgaarsiinta Hormuud ee Magaladda Baydhabo, oo la dilay

noreply@blogger.com (Blogger) — Mon, 12 Mar 2012 01:20:17 PDT

Sheekh Aadan Barakaat oo ahaa Madaxa Shirkadda Isgaarsiinta Hormuud ee Magaladda Baydhabo, isla-markaana ahaa shakhsi ka madax banaanaa dhinacyada isu haaya gacan ku heynta dalka ayaa maanta lagu diley magaalada Baydhabo.

Rag hubeysan oo aan heybtooda la’aqoonsan ayaa waxay dil bareer ah ay u geysteen Allaha u naxariistee Sheekh Aadan Barakaat, iyadoo dilkiisa si weyn looga hadal-haayo qeybo ka mid ah dalka.

Raggaan oo bistoolado ku hubeysnaa ayaa waxay garaaceen taleefanka gacanta ee Sheekh Aadan Barakaat, waxayna ugu baaqeyn in uu dibadda u soo baxo xilli uu goobtiisa shaqada uu ku sugnaa, hase yeeshee markii uu dibadda u soo baxay ayaa la-sheegay inay sidaasi ku toogteen.

Durbaba waxay isaga baxsadeen goobta ay dilka ka geysteen raggaasi oo an heybtooda la’aqoonsan, inkastoo lagu tuhmaayo dhinacyada kale ee ka soo horjeeda Dowladda Kmg ah ee Soomaaliya, inay falkaasi geysteen.

Sheekh Aadan Barakaat ayaa wuxuu ahaan jiray Madaxa Shirkadda Isgaarsiinta Hormuud ee Magaladda Baydhabo, isla-markaana wuxuu ahaa shakhsi ka madax banaanaa dhinacyada isu haaya gacan ku heynta dalka.

Laakiin ma-cadda baahid keentay in rag hubeysan ay hoygiisa ku dhex toogtaan Sheekh Aadan Barakaat, waxayna tani dhalisay inay si weyn u hadal-hayaan shacabaka ku dhaqan Magaaladda Baydhabo iyo magaalooyinka kale ee ku yaalla Gobolada Koonfureed ee Soomaaliya.

Iyadoo xalayna magaalada Baydhabo lagu diley Gudoomiyihii hore ee Baarlamaanka Soomaaliya Sheikh Aadan Madoobe, nin ay isku hooyo ahaayeen oo 33 jir ah kana ahaa Motoristaha Shirkada Isgaarsiinta ee Hormuud ee Baydhabo Oo lagu magacaabi jirey ALLAHA u naxariister ENG. Macalin Nuur Maxamed.

wariyaal ku sugan Magaaladda Baydhabo ayaa ku soo waramayaa in Ciidamadda Dowladda ay taggeen meeshii Sheikh Aadan Barakaat lagu diley, ka gadaal markii rag hubeysan ay halkaasi ku dilleen, balse wuxuu soo sheegayaa inaysan cidina u soo qaban.

Shabakada Baargaal.net
baargaal@gmail.com

Taarikh nololeedkii allaha u naxariistee xildhibaan bille maxamuud Yuusuf iyo talo ku wajahan beesha xuseen talareer , iyo dawlada Puntland

noreply@blogger.com (Blogger) — Tue, 13 Mar 2012 01:38:51 PDT

wuxuu marxuumku dhashay 1952dii wuxuuna ku dhashay degmada caluula magaalada xaabbo , wuxuu booliska soomaaliya qortay 1975tii

waxaa uu ka soo shaqeeyay gobolada soomaaliya intooda badan , shaqadiisa khaaska ah waxay ahayd taarwale booliska ah (eretii) waxaa tababaro iyo koorsooyin loogu qaaday dhawr wadan oo dibada ah sida jabuuti iyo Uganda

Bile wuxuu dad aduun kaga tagay 9 wiil iyo 4 gabdhood iyo 6 ay sii dhaleen iyo labo xaas ,

Markii ay dhacday dawladii dhexe ee soomaaliya intii ka danbaysay wuxuu kamid ahaa odayaasha iyo waxgaradka beelaha hartiga ee gobolada waqooyi bari wuxuu kasoo shaqeeyay ururkii SSDF ee mudo katalinaayay goboladatan , wuxuu kamid ahaa saraakiishii usoo halgamay goboladatan xiligii dagaalada sokeeye wuxuu kaloo kamid ahaa dadkii fara kutiriska ahaa ee ka soo shaqeeyay in SSDF looga guuro maamulka Puntland

Bille alaaha unaxariistee wuxuu ahaa nin jecel midnimada horumarka iyo nabadgalyada Puntland , qayb libaaxna kasoo qaatay horumarka iyo nabadgalyada reer puntland sanadku markuu ahaa 2009kii , xildhibaanku wuxuu ahaa nin hal abuur leh hadalkiisana aan la gabban oo ku adkaysta waxa uu aaminsanyahay , wuxuu ahaa nin ku caanbaxay in uu ka shaqeeyo danta caamka ah

Marxuumku wuxuu safar ugu baxay markii ladilaayay degmooyinka baargaal iyo caluula , ee uu ka soo jeeday allaha unaxariistee wuxuu u socday dano guud iyo in uu gaaro qoyskiisa oo degan magaalada xaabbo , taariikhdu markay ahayd 27/1/2012 waxaa jidgooyo u dhigtay kontroolka magaalada baargaal koox kasoojeeda degmada caluula iyo baargaal ayaga oo si bareer ah ugu furay rasaas aan loo aaba yeelin baabuurkiisiina shabaq ka dhigay halkaas ayuu ku geeriyooday allaha unaxariistee

Maydka marxuumku wuxuu debeda oolaa 12 caanomaal oo aan la aasin markii laysku afgaran waayay cidii ama dadkii gacan ku dhiiglayaasha ahaa ee falkaasi gaystay in la cadeeyo sababtoo ah gacan ku dhiiglayaasha ayaa isku dayay in ay ku andacoodaan maamul ayaa dilay , waxayna u cuntami wayday arintaasu dhibanayaashii oo mawqifkoodii ku adkaystay in la cadeeyo dadkii Marxuum bille dilay

Waxaa xusid mudan allaha unaxariistee in marxuumku xariga kasoo daayay xareed isaga oo geed dheer iyo geed gaabanba u koray sidii uu mar uun debada ukeeni lahaa isga oo dhawr jeer madaxwaynaha ugu noqnoqday ilaa uu ku guulaystay in uu damiinto ,

Waxaan kale oo idin xasuusinaayaa allaha u naxariistee Bile maxamuud yuusuf garabyare , awoowihiis yuusuf garabyare taariikhdiisi iyo meeshii uu bulshada kaga jiray odaygu allaha unaxariistee wuxuu ahaa nin caan ka ahaa degaamada calbari wuxuuna ahaa nabadoonka nabadoonada beesha ciisa-cawlyahan ,
waxaa odayga lagu xasuustaa sadexatan kalmadood oo murtida ah :

1) Dayn in uu halaag yahay ninkii dumar u sheegtaa og,
2) Dulmi inuu halaag yahay ninkii duugta galay baa og,
3) In dekeno halaag tahay ninkii duurka galay baa og .

Beelaha Xuseen Talareer

Marka hore allah ka cabsada oo diinta islaamka ku dhaqma oo ogaada in aan dhamaanteen geeri ku xakumanay qofba si ha u dhintee , waxaa sidaas u leeyahay waxaa ogahay dad badan oo idinka mid ah oo sharciga islaamka dhinac ordaaya , oo dhiiga bille duudsiinaaya oo leh urur baa dilay , maamul baa dil , iyo wax lamid ah , iyaga oo og sida wax u dhaceen waxaa kuwaas dulmiilayaasha ah oo u tafaxaytay xumaanta , beenta iyo isku dirka uga digaayaa in ay ka dhexbaxaan mugdiga ay ku jiraan waxa kale oo aan idiin sheegaayaa habaar ka wayn majiro dhiig sokeeye alla ku gali xareed iyo shire waxay si bareer ah oo gardaro ah u dileen inna adeerkood bille oo birimagayda ah , qoortuuna u suranyahay aduun iyo aakhirona waa lagu ciqaabaayaa insha allaahu iyaga iyo mooryaanti ay adeegsadeenba ,
Todobaatan iyo toban gu’ baa tibin laraadshaa inta wiil ka tabargalhayo baa taaha lahayaa yaan la sahlan dhiigii marxuum Xildhibaan Bille

Waxa kale oo aan idiin sheegaayaa fikirka aan ka qabo in baargaal iyo caluula ciidamo loo diro si loo soo qaqabto danbiilayaasha oo sharciga loo horkeeno , way fiicnaan lahayd hase yeeshee waxaa dhibaato kasoo gaaraysaa dad aan waxba galabsan gacan ku dhiiglayaashuna buuraha ayeey u cararaayaan sidii caadada u ahaydba mida kale danbiilayaashu waxay rabaan in dhibaato dhacdo oo hada meel ay galaan ayay la’ yihiin ,

Waxayna hada ku ducaystaan ilaahow hada ciidamo noo keen 40 ama 50 siwaaqroon ah halaga dilee , si xaaladu faraha uga baxdo sidaas darted waxaan ku talin lahaa in aan wax ciidamo ah loo dirin degaanada caluula iyo baargaalba dawlada Puntland waxaan ka codsanaayaa inaan loo dirin wax ciidan ah eeryadaas calbari , oo yaan fursad lasiin debiilayaashu ay ugu dhexnoolaadaan bulshada , waxa hubaal ah hadii sidaas layeelo in noloshu ku adkaan doonto

Waxaa kale oo aan kula talinaayaa waxgaradka iyo odayaasha beesha in ay ka qaybqaataan nabadgalyada horumarka iyo midnimada puntland waxna la qaybsadaan dadka walaalahood ah ee ay dalka wadaagaan wixii cabasha ahna dawlada kala hadlaan .sidaan aan lawada socono puntland waxay ku talaabsatay horumar siyaasadeed iyo mid dhaqaaleba , dhawaana waxaa magaalada garoowe lagu soo gaba gabeeyay shirkii aayaha soomaaliya lagaga hadlaayay oo ahaa sidii dawlad rasmi iyo fedraal ah loogu guurilahaa , shirkaas oo labo fays ahaa waa lagu guulaystay indhaha caalamkuna aad ayeey inoo soo fiiriyeen waa wax lagu farxo , waxaa intaas dheer riiga ka taagan dooxada dharoor ee shidaalka qodaaya , aduuna oo dhami wuxuu xiisanyaa in uu puntland xiriir la yeesho , shirkado badan baa u kala ordaaya sidii ay mashaariicda ukala horaysan lahaayeen

Dawlada Puntland

Dawlada puntland ee uu hogaaminaayo madaxwayne Dr. C/raxmaan maxamed maxamuud faroole waxaan ugu baaqaayaa in ay ka shaqayso nabadgalyada ,horumarka , cadaalada iyo midnimada puntland si ay u xaqiijiso arimahaas ,

Waxaa xaqiiqo ah in ay dawladu ku guulaysatay siyaasada dibadda hase ahaatee waa in ay hoos u eegtaa xaalada gudaha reer puntland , sida qaabka ilka cabashadooda saami qaybsiga dawlada iyo khayraadkaba waxa kale oo aan ka codsanaayaa madaxwaynaha iyo dawladiisaba in ay googol u fidiyaan odayaasha iyo waxgaradka beesha xuseen talareer si looga wada hadlo wixii tabasho ah ee ay beeshu sheeganayso in muda ahba

Dad puntland diid ah oo dano ugaara iyo dano shisheeye wata ayaa reerka ku dhex jiray waxayna beesha dhex dhigeen colaad , amaano daro , cuqdad iyo burbur si guuldarooyinkaas beesha ku habsaday iyo been abuurkaasba looga soo kabto waa in ay dawladu talaabo degdeg ah qaadaa oo beesha lagu soo dhawaynaayo , mida kale waxaan ka codsanaayaa madaxwaynaha puntland inuusan wax ciidan ah u dirin degaanada calbari , si waxyeelo uga soo gaarin dad aan waxba galabsan hada iyo intuu xafiiskiisa fadhiyo sababtoo ah waxaa jecel cadawga puntland oo ay kamid yihiin gacan ku dhiiglayaasha xildhibaan bile dilay allaha unaxariistee

Wabilaahi tawfiiq

Qore : Maxamed Samatar Yuusuf Garabyare
_____________________________________________________

Fiiro-Gaar ah:Shabakada Baargaal Media mas*uul kama aha aragtida Dadweynaha
Qoraaga ayaa xumaanteeda iyo xilkeedaba qaadaya,anagga waxaan soo dhaweynaa ra*yigga akhristayaasha

BAARGAAL MEDIA 2012
baargaal@gmail.com

Khaatumo State oo aqoonsigii lagala noqday

noreply@blogger.com (Blogger) — Sat, 10 Mar 2012 00:32:16 PST

Dowladda KMG ah ee Soomaaliya ayaa maanta shaaca ka qaaday inay aqoonsigii kaga laabtay maamulkii dhowaan degmada Taleex lagu dhisay ee Khatumo State.

Digreeto kasoo baxday xafiiska sii hayaha xilka Ra’iisul wasaaraha ahna wasiirka beeraha Maxamed Maxamuud Xaaji Ibraahim ayaa lagu xusay in maamulka Khaatumo uusan buuxin shuruudihii maamul goboleednimada sidaas darteedna aan la aqoonsan karin.

Digreetada ayaa sidoo kale lagu sheegay in qaabkii maamulka Khaatumo loo aqoonsaday uusan ahayn mid sharciga waafaqsan maadaama uu dastuurka qabyada ahi dhigayo in maamul goboleedyada cusub ay tahay in Baarlamaanku ansixiyaan.

Warkan kasoo baxay dowladda KMG ah ee Soomaaliya ayaa imaanaya xilli dhowr beri kahor ay mas’uuliyiin Federaalka ka tirsani sheegeen in Khaatumo loo aqoonsaday maamul goboleed madax banaan oo ka tirsan maamul goboleedyada dowlada FKMG ah ee Soomaaliya.

Dowladda Federaalka oo Aqoonsatay maamulka Khaatumo

noreply@blogger.com (Blogger) — Wed, 07 Mar 2012 09:24:06 PST

Dowladda Federaalka ee Soomaaliya ayaa aqoonsatay maamulka Khaatumo State of Somalia oo labo bilood kahor lagaga dhawaaqay degaanka Taleex ee gobolka Sool.Wefdi kasocda maamulka Khaatumo ayaa mudooyinkaan safar ku joogay magaalada Muqdisho uuna hogaaminaayo Madaxweynaha Maamulka,
waxaana ay kulamo kala duwan la qaateen masuuliyinta Dowladda.

Masuuliyinta ay la kulmeen waxaa kamid ah Madaxweynaha Dowladda Federaalka Shariif Sheikh Axmed,Kusimaha Ra’iisul Wasaaraha ahna Wasiirka Gaashandhigga Xussein Carab Ciise iyo xubno kamid ah Golaha Wasiirada kuwaas oo u bandhigay codsi ku saabsan in la aqoonsado.
Wefdiga Maamulka Khaatumo ayaa xaqiijiyey in Dowladda Federaalka ay u aqoonsadeen maamul goboleed jira oo kamid ah kuwa hadda ka jira dalka.

Inkastoo aanay jirin wax hadal ah oo kasoo baxay Dowladda Federaalka oo cadeynaaya aqoonsiga maamulka Khaatumo ayaa haddana masuuliyin kamid ah ayaa si hoose u xaqiijiyey in la aqoonsaday.
Maamulka Khaatumo State of Somalia ayaa ka kooban saddex gobol oo kala ah Sool,Sanaag iyo Ceyn oo ay isku haystaan maamulada Puntland iyo Somaliland.

Dowladda Puntland iyo Somaliland ayaa si cad u sheegay in aysan aqoonsaneen maamulka Khaatumo kuna tilmaamay mid ay wataan rag Siyaasadda hore ugu fashilmay iyo kuwa khal khal wada.

Shabakada Baargaal.net
Isha wararka horumarka degaanada Calbari
Baargaal@gmail.com

Golaha ammaanka oo ka doodey xal u helidda dhibaatooyinka Soomaaliya

noreply@blogger.com (Blogger) — Tue, 06 Mar 2012 01:15:25 PST

Golaha ammaanka ee Qaramada Midoobey ayaa kulan ay shalay yeesheen kusoo qaaday xal u helidda dhibaatooyinka ka jira dalka Soomaaliya.

Kulankan oo ahaa mid ay kasoo qayb galeen dhamaan wadamada golahan xubnaha ka ah ayaa waxaa looga hadlay arimo badan oo ay kamid ahayeen xal u helidda Burcad-badeeda iyo xagjirnimada.

Ciidamada Africa ee howlgalka nabad ilaalinta ee AMISOM u jooga magaalada Muqdisho ayaa iyaguna kamid ahaa waxyaabihii kulankaas lagu gorfeeyey.

Waxaana la isla qaatay in ciidamada nabad ilaalinta ee Africanka ahi aysan noqon karin xal joogto ah oo ku aadan sidii Soomaaliya looga dhigi lahaa dal xasiloon.

Golaha amaanka ee QM wuxuu ku taliyey in la kordhiyo taageerada la siiyo ciidamada DKG ah si looga dhigo kuwo awood u leh inay la wareegaan mas’uuliyadda ciidamada AMISOM iyo wadamada Soomaaliya deriska la ah.

Gabagabadii kulankan ayaa laga soo saaray bayaan lagu taageerayo go’aamadii kasoo baxay shirkii arimaha Soomaaliya looga hadlay ee dhowaan magaalada London ka dhacay.

Waxayna arintani kusoo beegmeysaa xilli xoghayaha guud ee QM uu ka digey in xaaladda bini aadminimo ee dalka Soomaaliya ay sii xumaato hadii aan si deg deg ah wax looga qaban.

C/qaadir Caato : waxaan u arkaa Casayrland mid loo adeegsanaayo Burburinta iyo curyaaminta horumarka baargaal

noreply@blogger.com (Blogger) — Wed, 07 Mar 2012 11:58:50 PST

Mudane c/qaadir Maxamed Jaamac ( C/qaadir Caato ) ayaa aad u dhaliilay maamul ku sheega casayrland kadib markii uu jagada gudoomiye uu horay ugu xilsaarnaa iska casilay jagadaas asagoo sabab uga dhigay inay dhibaatadii dadka degaanka haysatay ay nimankaasi kordhiyeen , ayna wax horumar ah soo wadin

warqad soo gaartay xafiiska Shabakadaa Baargaal.net ayuu ku muujiyay Mudane C/qaadir caato sababaha ka danbeeyey in uu shaqada nimankaas isagatago , ayaa waxaa kamid ahaa sababahaas

1. markaan arkay in loo adeegsanaayo maamulka Burburinta iyo curyaaminta horumarka baargaal
2. markaan arkay waxgaradka qaybihiisa kala duwan in aysan wax taageero ah u hayn maamulkan dib u dhaca u sababaya degaanka oo awalba dhibaataysanaa
3. markaan arkay in ay horboodaayaan maamulka dad aan bulshada dhexdeeda ku lahayn wax miisaan ah iyo waxmagarad aan waxba saadaalin karin
4. markaan arkay deeqihii biniaadanimo ee soo gaaray degmada in la bililiqaystay
5. markaan arkay in taladii kabaxday gacmaha odayaal dhaqameedka oo u wareegtay dad aan ehel u ahayn
6. markaan arkay in maamulku samaynaayo cadaawad beelaha calbari iyo beelaha deriska la ah dhexgasha
7. markaan arkay in maamulku maalgaliyo iska hor'imaad dhexmara bulshada calbari dhexdeeda
8. markaan arkay hogaanka maamulka inuusan diyaar u ahayn talooyinka iyo tusaalaha wax garadka oo uu u dhaqmaayo (nin meel u cadahay meel ka madoow)

Waxaan goostay in aan shaqadooda isaga tago oo aan bulshada si madax banana ula shaqeeyo

War ku saabsan shidaal qodida ka socota Puntland

noreply@blogger.com (Blogger) — Sun, 04 Mar 2012 11:48:24 PST

Wararka ka imanaaya Dooxada Dharoor ee Maamulka Puntland ayaa waxaa lagu soo waramayaa in ay meel fiican ay marayso qodida shidaalka oo hada marayso ilaa iyo 1850 Mitir.

ilaha wararka na soo gaaraaya ayaa tibaaxaaya in meesha ilaa hada la gaaray qodida laga helay natiijadii la raadinaayey , jawiga shaqadana aad u fiicanyahay

Puntland Taladii Lagu Dhisaa ka weyn!

noreply@blogger.com (Blogger) — Sun, 04 Mar 2012 12:05:49 PST

Taladii lagu dhisay Puntland ayaa kawayn. iyo Puntland taladii lagu dhisaa kawayn, kan labaad ayaan doortay anigu waase jiri karaan dadka ku xeel dheer iyagu afka somaliga inay la qumanaan lahayd midkale ama mida horeba.

waxaan qormadaan uga hadli doonaa sheeko ama dhacdo ka dhacday deegaanada hada puntland looyaqaan Dawladuna kadhisan tahay sabankan aynu joogno.

Waxaan ku bilaabayaa Eebe Wayne Magicii Naxariis iyo Nabadgalyo Nabi Mohamed CSW korkiisa Ha ahaato intaaa kagadaal.

Hordhac:

Taladii lagu dhisay Puntland ayaa kawayn. iyo Puntland taladii lagu dhisaa kawayn, kan labaad ayaan doortay anigu waase jiri karaan dadka ku xeel dheer iyagu afka somaliga inay la qumanaan lahayd midkale ama mida horeba.

waxaan qormadaan uga hadli doonaa sheeko ama dhacdo ka dhacday deegaanada hada puntland looyaqaan Dawladuna kadhisan tahay sabankan aynu joogno.

waxaan ka hadli doonaa waxay wadaagaan labada saban ee kala ah kansheekadu inoo sheegtay iyo kaynu joogno, waxaan kaloo xusi doonaa shacabkii markaa dhulkaan daganaa iyagu iyo shacabka maanta dagan deegaanadii, walaw ay oodu tiitahay, abkuna kii yahay laakiin farqiga yaala aan ka eegi doono.

Arar.

Hashii garawo ninkii lahaa waw halqab saday wax badan mid aan kasoo qaado.

Badda jeexayaa iyo birriga jaanta mariyaaba, walee geel jeclaantaan u qabo, waw jirrabi ruuxa. (Aniguse waxaan oran walee Puntland jeclaantaan u qabo waw jirabi ruuxa).

Taladii lagu dhisay Puntland.

Inta aanan u guda galin kunsano iyo siyaado aysoo jiren dadka deegaanada puntland dagaa kuna abtirsada, aan ku hor maro Taladii taariikhda gashay ee lagu baraaray laguna diirsaday ee lagu yagleelay Dawlada soomaaliyeed ee Puntland, run ahaanti waxay ahay talo soo jireen ah oo dadka deegaanadaasi lahaayeen mudo dheer, sida dadka waxka qoray puntland ay sheegaan waqtigii Faraaciinta inay jireen dadkani iyo dalkani Ab iyo isirka wadaaga, waxaa jirta sheeko dunida caan ka ah oo qoraagii sheekadan lahaa ugu magac daray (Mallaaxul Qariiq) waxaa qoray nin raga ka agdhaw Boqor Dawladihii Faraacin la oran jiray ee facawaynaa mudada badana masar ka talinayay mid kamid ah, waxaa sheekada ku jirtay marka in abeeso uu kula kulmay jaziirad ay had yad usoo siisay wax yaabihii Puntland ku caanka ahayd ee uduga ahaa FOOXA, MAYDIGA IWM, ayna usheegtay abeesadu in wax yaabaha udgooni dhulka puntland hodan ku yahay, hadase shidaal ayaaba kasoo burqanaya oo foox wayba dhaaftay sheekadu, laakiin wali ujeedkii qaraal ma aynaan gaarin ee hasaluugin.

Talo iyo Taalo.

Waxaa deegaanada puntland caan ku ahaayeen (Taalo) taalooyinkaas waxaa lagu maa muusi jiray sadex dhacdo oo midiba, muhiim keeda leedahay. Laba kamid ah taaloyinkaas waxay ahaayeen Xabaalo ama Qubuuro laakiin ay kala du wanaayeen maa muusidoodu, oo midi waxay ahayd mid lagu aaso madaxda oo qalabkooda wata, Halka mida kale xabaal ahayd laakiin waxaa jiray taalo sadexaad oo iyadu Dunida aynu maanta joogno dadka kunooli aanay waxba ka ogayn, inta ogina aanay dadka usheegin ama aanay ku faanin waayo Dimuqraadiyad ayaa laynaku wareeriyay, lana doonayo in layna baro inaan si cod bixina udoo rano madaxdeena, Kawaran adiga Reer Puntland ama Somaliga ah inaadan ogayn amaba aadan ku baraarug sanayn awoowa yaashaa Dimuqraadiyadii ay sameeyeen Dunida kale oo Dhurwaaya ah.

Taalada sadexaad (Dhiido iyo Waraab).

Taaladan sadexaad waxay ku caan baxday Doorasho cod loo qaaday Laba nin oo ilama adeer ahaa oo madax nimada isku qabsaday, Run ahaantii waxaa aad ii cajabiyay sida dhalin yaradayadu ay umoogtahay Taariikhdooda iyo awoowa yaashood Duni waxay dhaxal usiiyeen ee ahaa dhaqan wanaagsan, Waxaa iyana nasiib daro ah Madaxdeenu inaysan ahayn Sida Dhiido iyo Waraab, waxaa kaloo aan iyaguna ahayn Shacabkii dhulkaa dagi jiray ee geesiyada ahaa, Casharka dunida udhigay lakiin wiilashoodu door bideen inay baal maraan oo maalinba ninka meesha jooga isagu ay garabka siiyaan, Dhiido iyo Waraab waa hal tusaale oo kamid awoowayaasheen siday Dimuqraadiyad u sameeyeen taasaana ah mida run ta ah,

Waxa lagusoo xuli jiray ama lagu kala saari jiray ragu markay isku qabtaan xukunkasidan.

1-waxaa lagu tartan siin jiray noocyada hogaaminta Bulshada, siloogu kala saaro.
2-waxaa lagu kala saari jiray Deeqdooda wax bixineed.
3- waxaa loosoo bandhigi jiray markay arin culisi dhacdo midba siduu umaareeyo.

4- midan afraad oo ah iyadu mida aan ujeedka Qoraalba u qoray aan eegno awoowe yaasheen inay lahaayeen Ceebta aynu caadaysanay ee ah nin jeclaysiga, Waxaa loo guda gali jiray in lagu kala saaro iyadoo la eegayo kartida qof ahaaneed, Xoogooda Dooda, Dulqaadka iyo Xeelada, labadii markaa iyagu intaa ku kala hari waayaa waxay ahay Doorasho!! Doorashooy side tahay, Saw tan hada layna barayo maaha, sawtan xisbiyo samaysta laynaku Cadaadinayo maaha, Sawtan magaca loo bixiyay dhaxalkii awoowa yaasheen ee laynaku yiri maaha Dimuqraadiyad! Tartankii Doorasho ayaa bilaam may hada, ugu horay waxaa la sameeyay gudi u dhexeeya labada nin ee kala ah Dhiido iyo Waraab oo iyagu ku tar tamayay boqor nimada uu ka tagay adeer kood aan caruur dhalin.

Gudigii loo yagleelay doorashada Dhiido iyo Waraab waxaay soo saareen go’aan ah A iyo B:

(A) waxay yiraahden waa in nin walbaa uu keeno Biciid badqaba( loola jeedo badqaba aan dhaawac soo gaarin geesana jabin) Dhiido iyo Waraab labadiiba ragoodii ololaha doorashada la waday ayay talo galiyeen waxayna usheegeen arinkii, waxaa dhacday labadii xisbiba inay ku guulaysteen inay keenaan Biciidkii oo badqaba waxaana ilaa iminka la yiraah daa meeshii lasaaray ama buurtii lasaaray Biciid lasaar.

(B) waxaa bilaabmay wareegii labaad ee Doorashada waxay soo saareed Gudigii Doorashadu arintii Taariikhiga ahayd oo ah in cod loo qaado Doorashada, Akhristaw awoowahaa kunsano Boqolaalsano ka hor ayuu cod ku kalasaaray ragii xilka isku hayay, Inagana nin jeclaysi aynan dhaxal ulahayn ayaan ku daalnay, Doorasho haloo dareero ayay Go’aamiyeen Gudigii waxayna udhacday sidan, waxay yiraahdeen maalin hebla halaysugu yimaado meesha noo caas ah, markii goobtii laysugu yimidna waxay ushegeen dadkii laka taageen sanaa Dhiido iyo Waraab inay dhagax ruuraan ama tuumiyaan, markay tuureen dhagixii ayaa waxaa waynaatay oo buur wayn noqotay Dhiido midiisii halkaas ayaana lagu caloomo raasay walina loo yaqaan buurihii Dhiido iyo Waraab maalinkaas ayayna Taariikhda iyo magacuba raacay buuraha, waana cod bixintii waa gaac ay dhaxalka inooku reebeen Awoowa yaasheen laakiin Reer Galbeed intuu qaatay maanta doorasho sameeya layna leeyahay waana ayaan daro, waxaa kale oo iyana xusid mudan inaysan dhicin Tii ka dhacday Alxamdullilaah iyo Dhuudo oo aanay jirin Nin jeclaysi ee lagu kala saaray waxaad aragtay.

waxaan kusoo xirayaa qoraalkan Taariikhiga ah inaysan dhicin Tii Alxamdullilaah Iyo Dhuudo oo kale, waxaase muuqata saan santeeda awoowa yaasheena sidaas ayay wax umaareeyeen Dunidana cashar bareen.

wixii aan khalday waxaan ka dalbanayaa cafis, wixii sixid ah Emailkaas kusoo dir.
Waxaan kasoo xigtay sheekada Dhiido iyo Waraab iyo sheekooyin kale Buug uu Qoray.
Qoraaga wayn: Khaalid Cali-Guul Warsame ( Sheekoba sheekay keentaa ) buuga magaciisa.

Wabilaahi tawfiiq
mahadsanidiin

Jaabir Xuseen Gacayte
Email. Yaarabi-janah@hotmail.om
Facebook: Jaber Gaeyte.

Bahal Muran badan dhaliyay oo duleedka baargaal lagu dilay

noreply@blogger.com (Blogger) — Mon, 27 Feb 2012 07:21:24 PST

Waxaa duleedka magaalada baargaal ee gobolka bari lagu dilay bahal , lala yaabay oo dhaliyay muran badan , Bahalkaas oo aan horay degaanka lagu arki jirin

Waxaa hugunka iyo muranka sii badiyay diyaarad joog hoose dul heehaabaysay mudo dheer meesha lagu dilay bahalkaas , saacado ka hor dilkiisa

Dad badan ayaa aaminsan inay diyaaradaasi halkaa ku dajisay bahalkaas ,

Meesha dadka qaybtiisa kale ay magacyo kala gadisan ku sifeeyeen bahalkan ,

Cudur Daar Ku socda : Dhamaan Akhristayaasha Shabakada Baargaal.net

noreply@blogger.com (Blogger) — Wed, 07 Mar 2012 12:05:32 PST

Shabakada Baargaal.net ayaa akhristayaasheeda Sharafta Leh u soo gudbinaysa Cudurdaar , Hakadkii ku yimid Mudadii La soo Dhaafay Qoraaladii Beejka Intrenedka cilad xaga khadka internetka ah awgeed , Mudadaas oo Bulshada Degaanka Calbari ay soo wajaheen arimo badan oo u baahnaa iskaashi ,wada tashi iyo wada hadal ,

arimahaas oo ugu muhiimsanaa Dilkii loo gaystay marxuum Bile Maxamuud Yuusuf , anagoo Halkan tacsi uga direeyna caruurtii , eheladii , qaraabadii iyo Asxaabtii iyo Dhamaan Bulsha waynta Degaanada Calbari oo uu ahaa marxuumku alaha ha u naxariistee , xildhibaan matala degaanadan , waxaana marxuumka eebe uga baryaynaa inuu janadii ka waraabiyo , anagana Samir Naga siiyo

Waxaa kaloo kamid ahaa arimihii mudadaas dhacay , dacwadii ka dhalatay dilkii marxuum bile maxamuud yuusuf iyo isku dhicii garabkii lahaa Dhiigiisa iyo garabkii loo haystay dilka marxuumka .

Mudadii intaas ahayd waxaa meeshoodii ka socday adeegyadii kale ee aan bulshada u qaban jirnay ee aan ku xirnayn khadka internetka ,

ugu danbayn waxaa dhamaan akhristayaasha ugu baaqaynaa in la ilaaliyo midnimo , walaalnimada iyo wada shaqaynta bulshada dhexdeeda , lana iska ilaaliyo wax kastoo wax u dhimaaya midnimadeena iyo horumarkeena

Shabakada Baargaal.net

baargaal@gmail.com

qaybtii labaad : Sawiradii Shaqadii Kaluumaysiga oo dib u soo laabatay

noreply@blogger.com (Blogger) — Mon, 16 Jan 2012 00:28:40 PST

Qaybtii labaad ee sawiro laga soo qaaday , Marsada raas binna oo katirsan Degmada Baargaal , oo shaqadu ka socoto , doonyihii oo libaaxa iyo kaluunka ka miisaamaaya saxiimadaha ,

“Qolooyinka reer Baargaal oo intaa ku haya waxba nalooma qaban waxaan u sheegayaa mashaariic fara badan baa idiin soo socota”

noreply@blogger.com (Blogger) — Wed, 11 Jan 2012 10:16:49 PST

Madaxweynaha Puntland C/raxmaan Maxamed Faroole oo khudbad dheer ka jeediyey xarunta madaxtooyada magaalada Boosaaso Ayaa qirtay in Maamulkiisa aanay ku qanacsaneyn Reer Bari

Xaflad Balaaran oo loo qabtay sanad guuradii sadexaad intuu xilka madaxwaynaha puntland qabtay , ayuu madaxwayne Faroole sheegay in mudadii uu jiray maamulkiisa uu xooga saaray amaanka gaar ahaan wax ka qabashada Al-Shabaab iyo kooxaha burcad badeeda oo iyaguna uu sheegay inay dhibaato badan ku hayaan maamulkiisa.

Waxaan idiin sheegayaa dadka reer Puntland-now saddexdii sano ee halkan joognay wax badan ayaan qabanay ILLAAH haddii laga baqo. Way jiraan in wax badan dhiman yihiin caqabadana waa jiraan naga hor yimid

Tabashada dadka Madaxweynaha Puntland wuxuu si aan ka leexad lahayn u qiray in dhaliilo badan loo soo jeediyey maamulkiisa gaar ahaan waxqabadka gudaha. “Inkastoo ay jiraan dhaliilo fara badan haddana dadka reer Puntland-now waxaan idiin sheegayaa inaan dadaalnay oo aan qabanay intii karaankeena” ayuu yiri Faroole.

Wuxuu sheegay in cqabado badan ay hortaagan yihiin maamulka, hase yeeshee aysan ahayn in maamulka oo kaliya lagu haleeyo inuu wax walba qabto. “Qolooyinka reer Baargaal oo intaa ku haya waxba nalooma qaban waxaan u sheegayaa mashaariic fara badan baa idiin soo socota”

Dhaliisha reer Bari Madaxweyne Faroole wuxuu ku dhaliilay dadka ku nool gobolka Bari gaar ahaan “reer Boosaaso” inaysan ku buraarugsaneyn waxqabadka maamulkiisa isagoo ugu baaqay inay iska daayaan hadalada meelaha lagu wadwado ee ay maamulkiisa taageeraan.

waxuu kale oo faroole ka hadlay khudbadiisii shirkada Saracen International oo Puntland kula heshiisay dhanka amniga iyo tababarka ciidamada badda oo la xayiray kadib markii dacwado laga geeyay dibada , alshabaab , iyo khilaafka madaxda FKMG iyo khilaafka baarlamaanka

Shabakada Baargaal.net
baargaal@gmail.com

Dowladda Kenya oo ku dhawaaqday hadal layaab leh oo aan horey looga maqlin oo ku aadan Al Shabaab?

noreply@blogger.com (Blogger) — Mon, 09 Jan 2012 11:56:00 PST

Dowladda Kenya oo dagaalo xoogan kula jirta Xoogaga Shabaab, ayaa waxay shaaca ka qaaday hadal aanu horey looga maqal, ayna sidoo kale weli soo hadal-qaadin Xarakada A Shabaab.

Afhayeen u hadlay Wasaaradda Gaanshaandhiga ee Dowladda Kenya oo lagu magacaabo Cyrus Oguna , oo ka hadlaayay khasaaraha xoogan ee ay u geysteen Xarakada Al Shabaab, tan iyo markii Ciidamadda Dowladda Kenya ay gudaha u soo galleen dalka Soomaaliya, ayaa wuxuu shaaca ka qaaday in Al Shabaab ay ku dhex dhuumanayaan dadka qaxootiga ah.

“Ciidaadeena diyaaradaha dagaalada wada waxay ogyihiin in marka ay duqeymaha ka geysanayaan goobaha ay jooggaan Al Shabaab, inay ku soo dhex dhuutaan meelaha ay deggan yihiin dadka barakacayaasha ah, si’aysan wax-yeelo uga soo gaarin duqeymaha lala beegsanaayo” ayuu yiri Cyrus Oguna.

“Diyaaradaha dagaalada ee Kenya ma-duqeynayaan goobaha ay deggan yihiin dadka barakacayaasha ah, laakiin Al Shabaab waxaa idin sheegayaa inay soo wajahday cabsi xoogan, oo hadda waxayba marayaan inay ku dhex dhuuntaan dadka shacabka ah” ayuu markale yiri Cyrus Oguna.

Sidoo kale wuxuu ku faanay in Xarakada Al Shabaab ay ka dilleen ilaa 7,00 oo dagaal-yahano ah, tan iyo markii Ciidadamadda Dowladda kenya ay gudaha u soo galleen Gobolada Gedo, Jubbada Dhexe iyo Jubbada Hoose.

Cyrus Oguna ayaa wuxuu ku hanjabay inay sii wadi doonaan dagaalada iyo duqeymaha xoogan ay ku hayaan Xarakada Al Shabaab, isagoo intaasi ku daray inaysan marnaba joojin dagaalada hawl-gallada ay dalka Soomaaliya uga sifeynayaan Al Shabaab, sida uu yiri.

Shaqadii kaluumaysatada Degaanka oo dib u soo bilaabatay (Sawiro )

noreply@blogger.com (Blogger) — Mon, 09 Jan 2012 00:27:22 PST

waxaa degaanka dib u soo noqday dhaqdhaqaaqii shaqo , kadib xili dabaylaad socday muddo laba bilood ah ,saxiimalaydii iyo baxridii bada ka shaqysan jirtay ayaa ayaguna si firfircooni ku jirto aaladoodii bada u jiiday

daawo sawiro laga soo qaaday doonyaha oo kaluunka miisaamaaya .

Shabakada Baargaal.net

Isha wararka Horumarka Degaanka Calbari

Go'aamadii kasoo Baxay Shirkii Nabadaynta Taageer

noreply@blogger.com (Blogger) — Sun, 08 Jan 2012 01:35:05 PST

Taariikhdu marka ay ahayd 27/12/2011 ayaa beelo walaalo ah waxaa ku Dhexmaray Tuulada Taageer Iska Hor imaad beelahaas oo ah kuwo wada degan Tuulada Taageer oo kala ah :

Beesha Ismaaciil saleebaan
Beesha Aadan C/raxmaan

Iyadoo ay jirin Cid waxyeelo ku soo gaartay iska horimaad kaas

Waxaana Magaalooyin badan uga soo gurmaday guurti fara badan

Kadib markii guurtidaasi u fariisteen xalinta arintaas waxaa laga gaaray heshiis nabadeed labada dhinacba , waxayna ku heshiiyeen arimaha hoos ku qoran :

1. In amaanka guud uu yahay Muqadas Loona wada ilaaliyo si wadajir ah

2. Qofkii dhigta isbaaro aysan guurtida magaaladu ogayn wuxuu mutaysanaayaa Ginaax dhan $ 1000 (kun Dollar )

3. Deegaanka taageer qofkii gaari ka afduuba wuxuu mutaysanaayaa Ginaax dhan $ 3000 (sadex kun oo Dollar )

4. Cidii duulaan ka qaadda magaalada ama Ku soo qaadda waxay mudanaayaan Ginaax dhan $ 10,000 (Toban kun oo Dollar )

5. Qofkii Dhulka dadka kale ka sheegta oo aan wanaag ula jeedin sida xaaluf ka joojinta wuxuu mutaysanaayaa Ginaax Dhaan $ 1000 ( kun Dollar )

6. Qofkii magaalada dhexdeeda karida xabad bilaa macne ah oo bulshada argagax galinaysa wuxuu mudanaayaa Ginaax Dhan $ 100 ( Boqol Dollar )

7. Qofkii Xabad ku rida qof kale si ula kac ah wuxuu mudanaayaa Ginaax dhan $ 500 (Shan boqol oo Dollar )

8. Dhagax tuurka magaalada dhexdeeda cidii lagu helo waxay mudanaysaa Ginaax dhan $ 50 (konton Dollar )

9. Ginaaxaasi qofkuu qabsado waxaa laga rabaa isaga iyo jifidiisa wuxuuna dhaqan galaayaa 4 /1/2012

Waxaa kaloo lagu heshiiyay wixii xeer beeg ah ee degaanku lahaa inay ahaato sideedii

Saxiixayaal :

Sheekh Ciise Muuse Shirwac (Gudoomiye )

Sheekh warsame yuusuf axmed

Yuusuf Cismaan Cali

Kaatun Nuur Axmed

Maxamed Xasan Axmed ( kulusow)

Cali Axmed Cali (Kolon)

Axmed saalax (Faange)

Maxamuud Caynab Muuse

Saalax Cumar Samatar

Nuur M. xuseen

Cabdi Geelle Nuur

Samatar Siciid Jaamac

Siciid Axmed Jaamac

Siciid M. Axmed

Diraac Cali Cumar

Rooble Dhuxul Cismaan

Wabilaahi Tawfiiq

TALEEX : M.kuxigeenka PL oo walaalkiis iyo Wiil uu Adeer u yahay oo la dilay

noreply@blogger.com (Blogger) — Sun, 11 Dec 2011 23:28:59 PST

Taleex:-Waxaa magaalada Taleex lagu dilay 2 qof oo midkood ay walalo yihiin M-waynekuxigeenka Puntland Gen. Cabdisamad Cali Shire oo lagu magacaabi jiray Sumini Cali Shire iyo Wiil uu Adeer u yahay oo lagu magacaabi jiray ina Saalax Cali Shire waxaana wararka qaarkood ay sheegayaan in ay dilkooda kadambeeyeen kooxo isla deegaanka ah.

Sumini Cali Shire oo ay walalo ahaayeen M-waynekuxigeenka Puntland ayaa waxa uu kamid ahaa ganacsatada magaalada Garoowe oo uu daganaa waxaana la sheegay in uu magaalada Taleex uu ka waday mashaariic dhanka horumarinta ah.

Taleex, ayaa waxaa la filayay in uu ka furmo shir-beeleed beesha Dhulbahante oo loogu magacdaray Khaatumo 2, balse dilkan ayaa waxa uu u muuqdaa mid sii kala fogaynaya beesha deegaanka oo muddo dheer khilaaf dhanka maamulada Puntland iy Somaliland uu ka dhex aloosnaa.

Shabkada Baargaal.net
Baargaal@gmail.com

Wasaaradda Haweenka oo Lacag ugu deeqday dadkii ku hanti beelay dabkii Bosaaso

noreply@blogger.com (Blogger) — Sat, 10 Dec 2011 11:56:20 PST

Wasaaradda Haween iyo Arimaha Qoyska Dawlada Puntland ayaa Si rasmiya ugu dhawaaqday inay 100,000,000 (Boqol Maliyan oo Shilin Somali ah) ugu deeqday dadkii reer Puntland iyo Somaaliyeed ee wax ku noqday dabkii Khasaaraha faraha badan Dhaliyey ee kakacay suuqa Magaalada Bosaaso,

Wasiirka wasaaradda Haweenka iyo Arimaha qoyska Marwo Caasho Gelle Diiriye oo saxaafada kula hadlaysay Xarunta wasaaradda Haween ee Magaalada Garowe ayaa sheegtay in wasaaradeedu Boqol Milyan oo shilin Somali ah ugu deeqday dadkaasi la tiraan yeysan Dhibaatadii uu u Gaystay dabkii Naxdinta badnaa ee kakacay Suuqa weyn ee Magaalada Bosaaso waxayna hay’adaha kale ee dawlada ugu Baaqday inay talaabadas oo kale qaatan si loo gacan qabto Umada ay dhibaatadu ka soo gaadhay Masiibadaasi dabeed,

Marwo Caasho Geele diiriye waxay sheegtay inay lacagtan ay ugu deeqeen dadkii ku hanti beelay dabkii khasaaraha badnaa ay ka jareen Mushaarka Shaqaalaha wasaaradda halka qaar badan oo kamid ah shaqaalaha wasaaradu ay gabi ahaanba bixiyeen Mushaaradkoodii Bishan iyagoo ka duulaya dhiibatada qabsatay walaalohooda ay ku habsatay masiibada rabaaniga ahi,

Wasiirka wasaarada Haweenka ayaa sheegtay inay taageero kooban u tahay dadkii ku hanti beelay Masiibadii Dabka hase ahaate waxay baaq u jeedisay dhamaan wasaaradaha dawlada, Hay’adaha Caalamiga ah iyo Bulshada reer Puntland ee iyagu dadkaasi wax u awoodi kara ,

Sidoo kale wasiirka wasaaradda haweenka dawlada Puntland Marwo Caasha Geelle diiriye waxay dadweynaha reer Puntland iyo Guud ahaa kuwa somaaliyeed uga tacsiyeysay allaha u naxariiste Dr Axmed Xaaji C/raxmaan oo kooxo Dhagar qabayaal ah ku dileen Gudaha Magaalada Bosaaso waxayna illaahay Marxuumka uga rajaysay Janadii inuu ka waraabiyo.

Isku soo wada duubo Deeqda ay wasaaradda Haweenka iyo Arimaha qoysku ugu deeqday Dadka ku hanti beelay dabkii xoogana ee kakacay suuqa magaalada Bosaaso ayaa la filaya inay wax un u dabooli Doonto ay Gacan qabasho intaa ka sii badan u baahan yahay hadana waxaa la oran karaa waa Wado ku dayasho mudan oo ay qaaday wasaaradda Haweenka waana Hay’adii ama Xitaa cidii ugu horaysay ee wax ugu deeqda umadda Somaaliyeed ee ku hanti beeshay Masiibadii Dabeed ee Magaalada Bosaaso.

Shabakada Baargaal.net

Dhawr nooc oo bariiska aynu cuno ka mida oo ay ku badan tahay maado kiimiko ah oo taranka wax u dhimaysa

noreply@blogger.com (Blogger) — Tue, 22 Nov 2011 00:07:57 PST

Dadka dunnida ku nool ayaa badanaa bariisku u yahay cuntada muhiimka ah ee ay cunaan maalin walba, dadkaas waxaa ka mid dadka soomaalida oo maalin walba cuna bariiska. Haddaba waxaa jirta marka la beerayo bariiska in lagu shubo maadooyin kiimiko ah oo loo isticmaalo siyaabooyin kala duwan oo ay ka mid yihiin in si degdeg ah u soo saaraan bariiska ama degdeg ugu soo baxo, ama ka ilaalisa cayayaanka. Laba maado oo kiimikada ahi waxay qabtaan in ay midi ka ilaaliso in uu wixii la beerayey ee bariiska ahaa uu qaayiso (xumaado) midna waa mid ka ilaaliska cayayaanka.

Haddaba maadooyinkaas kiimikada haddii xadigii ama qiyaastii loogu talo agalay in ka badan lagu shubo waxa ay keentaa halis caafimaad darro ah. Taas oo keenta in ay taranka qofka wax u dhinto, waxa kale oo ay keentaa in ilmaha uurka ku jira ay dhibaato caafimaad daro u keento. Bal haddaba sayt-ka (Home-page) iswidhisha oo tijaabiya ama test gareeya cuntooyinka oo magaciista la yidhaahdo Testfakta.se ayaa waxa uu daboolka ka qaaday in dhawr nooc oo bariiska ka mid ahi ay aad ugu badan tahay maadooyin kiimiko ah, oo aan caafimaadka u wanaagsanayn. Waxaan lagu soo baadhay dhawr-ka nooc ee bariiska ah shaybaadhka cuntada lagu baadho.

Bal haddaba aynu eegno noocyada ay kala yihiin bariiskaasi.
Sida aad sawirka ka arkaysaan waa toboda nooc oo kala ah:

1- Daavat
2- Eldorado
3- Euroshoshopper
4- Habib
5- Katos
6- Mahmood Sella
7- Shiva Sela

Haddaba bal mid mid aynu u gudo galno.

1- Daavat: maadadada kiimikada ee ku jirta waxa ay 3 goor ka badan tahay inta caadiga ah ee loogo talo galay.

2- Eldorado: Waxa yara saraysa maadada kiimikada ku jirta qaayiska la dagaalanta, kuma jirto maadada kiimika ah ee la dagaalanta cayayaanka

3- Euroshopper: qiyaasta/xadiga maadada kiimikada la dagaalanta cayayaanka ayaa ka saraysa inta loogu talo galay.

4- Habib: Waxaa aad ugu yara badan maadada la dagaalanka qaayiska (xumaado) kuma jirto maadada kiimikada ee la dagaalanka cayayaanka.

5- Katos: Waxaa aad ugu badan oo ku jirta maadada kiimikada ah ee ka hortaga qaayiska.

6- Mahmood Sella: Waxa aad iyo aad ugu badan maadada kiimika ah ee la dagaalanka cayayaanka.

7- Shiva Sela: Waxaa ku jira maadooyinka la dagaalanka/ka hortaga cayayaanka, waxaanay maadoouinkaas kiimikada ahi 4 goor ka sareeyaan inta caadiga ah ee loogu talo galay.

Waxa loo kala qaybiyey laba nooc

1- Kiimikada loo isticmaalo la dagaalanka/ka hortaga cayayaanka oo magacyadooda la yidhaahdo

Carbendazim (MBC) and benomyl
imidacloprid
Isoprotiolan
Pirimiphos-methyl
Propiconazol
Tricyclazol
* Measurement uncertainty is + / – 0.01 mg

2- Kiimmikada sunta ah ee la dagaalanta ama ka hortagta qaayiska oo magacooda la yidhaahdo

aflatoxin B1

Toboda nooc ee bariiska ah saddex ka mida waxaa saaran calaamada x oo midab casaana leh iyo kuwa ay saaran tahay calaamada / oo akhtara.

Halkan ka akhriso natiijada.
Waxaa ugu darnaa bariiska Shiva Sela, waxaa ku jirta maadada kiimikada ah, 4 goor in ka badan inta caadiga ah ee loogu tallo galay.

Halkan ka akhriso natiijada oo dhan!

http://www.testfakta.se/incoming/article52665.ece/BINARY/basmatiris2.pdf

Ergo Nabadeed oo ka Ambabaxday Boosaaso kuna Jeeda degmada Rako ee gobolka Karkaar

noreply@blogger.com (Blogger) — Sun, 20 Nov 2011 09:32:41 PST

Ergo Nabadeed oo isugu jirta Odayaal, Nabadoono, Waxgarad iyo Culuma’udiin ayaa maanta ka ambabaxay gudaha magaalada Boosaaso, kuwaas oo ku wajahan degmada Rako oo ay ka dhaceen dagaal beeleed sababay khasaare ba’an.

Ergadaan oo u hoggaaminayo Beeldaaje Ismaacil Beeldaaje Yaasiin kana kooban 25-xubnood ayaa Saaka ka ambabaxay magaalada Boosaaso ee xarunta gobolka Bari.

Sidoo kale Ergada ayaa waxaa kamid ah Suldaan Cabdillaahi Soote, Nabadoon Ciise Axmed Ciise, Nabadoon Raage Maxamed Maxamuud, Nabadoon Cabdiqaadir Ibraahim Xarago iyo Xuseen Xaaji Samatar.

Guddoomiyaha Nabadoonada gobolka Bari Nabadoon Cabdiqaadir Ibraahim Xarago oo Saxaafadda la hadlay intii aysan Boosaaso ka ambabixin ayaa sheegay in Socdaalkeedu yahay mid ay ku doonayaan in ku ay tagaan goobihii lagu dagaalamay ee degmada Rako si labada beeleed ee dirirtu dhexmartay u kala dhex-dhigaan gogol nabadeed.
Nabadoon Cabdiqaadir Ibraahim Xarago ayaa sidoo kale baaq u diray labada beelood ee Colaadu dhexmaratay,wuxuuna sheegay in si dhakhsi ah u joojiyaan dirirta,xabadjoojin labada dhinacba ay ku dhawaaqaan.

…..”Colaadda laba beelood maahan mid munaasib ku ah Puntland, waana mid ku haboon in sida ugu dhakhsiyaha badan lagu Joojiyo…”ayuu yiri Nabadoon Xargo.
Si kastaba ha ahaatee Colaada labada beelood ayaa waxaa ka dhashay khasaare isgu jirta naf iyo maala,waxaana soo baxaysa baaqyada
nabadeed ee loo dirayo labada dhinac.

Xigasho
Raxanreeb Radio