BIN ZUBEIRY SPORTS — ONLINE

YANGA SC YASAJILI CHIPUKIZI MWINGINE, NI HUSSEIN MIHAMBO WA MASHUJAA FC

2026-07-20T19:34:36.428+03:00

KLABU ya Yanga imemtambulisha mshambuliaji chipukizi, Hussein Juma Mihambo (19) kutoka Mashujaa FC kuwa mchezaji wake mpya kuelekea msimu ujao.
Anakuwa mchezaji wa pili tu mpya baada ya chipukizi mwingine, winga Juma Issa Abushiri ‘Chuga Boy’ (18) kutoka Fountain Gate FC.

AZAM FC YASAJILI WINGA MGANDA, HASSAN MUBIRU KUTOKA SC VILLA

2026-07-20T17:40:36.352+03:00

KLABU ya Azam FC imemtambulisha winga wa kulia wa Kimataifa wa Uganda, Hassan Mubiru (21) kutoka SC Villa ya kwao, Kampala akiwa mchezaji mpya wa tano kuelekea msimu ujao.
Wengine ni mabeki wa kati, Lupini Mawuku Dieumerci (20) kutoka AS Maniema Union ya kwao, DRC na Henri Braham Stanic Mbelgiji mwenye asili ya DRC pia kutoka Stellenbosch FC ya Afrika Kusini.
Azam FC pia imesajili mawinga wengine wawili,, Henoc Molia (22) kutoka St. Eloi Lupopo ya kwao, Jamhuri ya Kidemokrasia ya Kongo (DRC) na Muivory Coast, Kipré Tiagori Emmanuel Junior Zunon ‘Kipre Junior’ aliyejiunga tena na Azam FC akitokea MC Algiers ya Algeria.
Kipre Junior amerejea Azam FC ambako awali alicheza kuanzia msimu wa 2022-2023 akitokea SOL FC d’Abobo ya kwao, Ivory Coast hadi 2024-2025 alipohamia MC Algiers.

SIMBA SC YAMSAJILI BEKI WA AZAM FC NATHANIEL CHILAMBO

2026-07-20T14:42:35.213+03:00

KLABU ya Simba imemtambulisha beki wa kulia, Nathaniel Raphael Chilambo (22) kuwa mchezaji wake mpya kuelekea msimu ujao akijiunga na Wekundu hao wa Msimbazi kutoka Azam FC.
Anakuwa mchezaji mpya wa pili baada ya kiungo wa ulinzi, Kelvin Nashon Naftali (25) aliyetambulishwa jana kutoka Pamba Jiji FC ya Mwanza.

NI HISPANIA MABINGWA WA DUNIA 2026, WAICHAPA ARGENTINA PUNGUFU 1-0

2026-07-20T01:48:30.442+03:00

TIMU ya Hispania imefanikiwa kutwaa Kombe la Dunia baada ya kuwafunga waliokuwa mabingwa watetezi, Argentina bao 1-0 usiku huu katika mchezo uliodumu kwa dakika 120 na ushei Uwanja wa MetLife mjini East Rutherford, Bergen County, New Jersey nchini Marekani.
Pongezi kwa mfungaji wa bao hilo pekee, mshambuliaji wa Barcelona, Ferran Torres García dakika ya 106 akimalizia pasi ya winga wa Athletic Bilbao, Nicholas Williams Arthuer mwenye asili ya Ghana.
Hispania ilicheza pungufu dakika zote 30 za nyongeza baada ya kiungo wake, Enzo Jeremías Fernández anayechezea klabu ya Chelsea ya England kutolewa kwa kadi nyekundu kufuatia kuonyeshwa kadi ya pili ya njano kwa kumchezea rafu beki wa Barcelona na Hispania, Pau Cubarsí Paredes dakika ya 90’+3.

Gwiji wa Argentina alikuwa mnyonge wa kutia huruma baada ya kipyenga cha mwisho akimshuhudia mchezaji aliyempakata akiwa mtoto, Lamine Yamal Nasraoui Ebana wa Barcelona mwenye asili ya Morocco kupitia kwa baba yake na Equatorial Guinea kupitia kwa mama yake akiiongoza La Roja kutwaa Kombe.

SIMBA SC YAMTAMBULISHA RASMI 'MKATA UMEME' KELVIN NASHON

2026-07-19T13:47:13.999+03:00

KLABU ya Simba SC imemtambulisha kiungo Kelvin Nashon Naftali (25)kuwa mchezaji wake mpya kwanza kuelekea msimu ujao akijiunga na Wekundu hao wa Msimbazi kutoka Pamba Jiji FC ya Mwanza.

NI ENGLAND WASHINDI WA TATU KOMBE LA DUNIA 2026

2026-07-19T05:25:44.731+03:00

TIMU ya England imefanikiwa kumaliza nafasi ya Tatu Kombe la Dunia baada ya ushindi wa mabao 6-4 dhidi ya Ufaransa usiku wa kuamkia leo Uwanja wa Hard Rock Jijini Miami Gardens, Florida nchini Marekani.
Mabao ya Three Lions yamefungwa na kiungo wa Arsenal, Declan Rice dakika ya tatu, beki wa Aston Villa, Ezri Ngoyo Konsa mwenye asili ya Jamhuri ya Kidemokrasia ya Kongo (DRC) dakika ya 18, winga wa Arsenal, Bukayo Ayoyinka Temidayo Moses Saka mwenye asili ya Nigeria, matatu dakika ya 37, 45+1 na la penalti dakika ya 87 huku lingine likifungwa na kiungo wa Real Madrid, Jude Victor William Bellingham mwenye asili ya Kenya dakika ya 90’+8.
Kwa upande wa Ufaransa mabao yao yamefungwa na washambuliaji, Kylian Mbappé Lottin wa Real Madrid mwenye asili ya Cameroon, mawili dakika ya 48 na 66, Bradley Jean-Manuel Essolisam Addo Barcola wa mwenye asili ya Togo dakika ya 54 na Masour Ousmane Dembélé mwenye asili ya Senegal - Mauritania na na Mali dakika ya 90’+6 wote wa Paris Saint-Germain.
Kwa kufunga mara mbili kwenye mchezo huo, Mbappé amefikisha mabao 10, mawili zaidi ya Lionel Messi wa Argentina ambaye baadaye Saa 4:00 usiku wa leo ataiongoza timu yake katika mchezo wa Fainali dhidi ya Hispania Uwanja wa MetLife, East Rutherford, Bergen County, New Jersey hapo hapo Marekani.

YANGA SC YAMSAJILI WINGA CHIPUKIZI WA FOUNTAIN GATE MWENYE KIPAJI

2026-07-19T01:00:46.649+03:00

MABINGWA wa Tanzania, Yanga SC wamemtambulisha winga chipukiz, Juma Issa Abushiri ‘Chuga Boy’ (18) kutoka Fountain Gate FC kuwa mchezaji wao wa kwanza mpya kuelekea msimu ujao.

AZAM FC YASAJILI BEKI MWINGINE WA KATI MKONGO KUTOKA LUPOPO

2026-07-18T18:50:01.108+03:00

KLABU ya Azam FC imemtambulisha winga, Henoc Molia (22) kutoka St. Eloi Lupopo ya kwao, Jamhuri ya Kidemokrasia ya Kongo (DRC) kuwa mchezaji wake mpya wa nne kuelekea msimu ujao.
Wengine ni mabeki wa kati, Lupini Mawuku Dieumerci (20) kutoka AS Maniema Union ya kwao, DRC na Henri Braham Stanic Mbelgiji mwenye asili ya DRC pia kutoka Stellenbosch FC ya Afrika Kusini, wakati mchezaji mwingine ni winga Muivory Coast, Kipré Tiagori Emmanuel Junior Zunon ‘Kipre Junior’ aliyejiunga tena na Azam FC akitokea MC Algiers ya Algeria.
Kipre Junior amerejea Azam FC ambako awali alicheza kuanzia msimu wa 2022-2023 akitokea SOL FC d’Abobo ya kwao, Ivory Coast hadi 2024-2025 alipohamia MC Algiers.

POLISI TANZANIA YAREJEA LIGI KUU BAADA YA KUISHUSHA TANZANIA PRISONS

2026-07-16T20:34:11.071+03:00

TIMU ya Polisi Tanzania imefanikiwa kurejea Ligi Kuu ya NBC Tanzania Bara licha ya kufungwa 1-0 na wenyeji, Tanzania Prisons bao la Neva Kapoma dakika ya 86 jioni ya leo Uwanja wa Sokoine Jijini Mbeya.
Polisi Tanzania inanufaika na ushindi wa 4-0 kwenye mchezo wa kwanza wa Mchujo wa mwisho wa kuwania kucheza Ligi Kuu Julai 12 Uwanjan wa Chuo cha Ushirika mjini Moshi mkoani Kilimanjaro, mabao yake yakifungwa na Juhudi Philemon kwa penalti dakika ya sita, Tariq Seif dakika ya 46, Tatizo Shem dakika ya 54 na Emanuel Mpuka kwa penalti pia dakika ya 73.
Tanzania Prisons ilifikia kwenye mchujo huo baada ya kufungwa na Mbeya City kwa jumla ya mabao 2-0 katika mchujo wa awali wa timu za igi Kuu tupu – wakati Polisi Tanzania iliitoa Mbeya Kwanza kwa jumla ya mabao 7-1 katika mchujo wa timu za Champonship tupu.
Kwa mujibu wa kanuni za Ligi Kuu inayoshirikisha timu 16, baada ya timu mbili za mwisho kuteremka, zinazofuatia katika nafasi ya 13 na 14 humenyana katika michezo miwili ya nyumbani na ugenini na mshindi wa jumla anabaki kwenye ligi hiyo, wakati anayefungwa anakwenda kumenyana na timu kutoka Championship kujaribu tena kubaki Ligi Kuu.
Na kwenye Championship baada ya timu mbili za juu kupanda Ligi Kuu, zinazofuatia nafasi ya tatu na ya nne humenyana baina yao kwa michezo miwili ya nyumbani na ugenini na mshindi wa jumla anakwenda kuwania kupanda Ligi Kuu dhidi ya timu iliyopoteza Mchujo wa Ligi Kuu – wakati inayofungwa inasalia Championship.
Kwa maana hiyo, timu zitakazoshiriki Ligi Kuu msimu ujao ni; mabingwa watetezi, Yanga SC, Simba SC, Azam FC, Singida Black Stars, TRA United, JKT Tanzania, Coastal Union, Pamba Jiji, Dodoma Jiji, Namungo FC, Mashujaa FC, Fountain Gate FC, Mbeya City, Geita Gold, Kagera Sugar, Polisi Tanzania baada ya kushuka kwa Mtibwa Sugar, KMC na Tanzania Prisons.

AZAM FC YASAJILI BEKI MBELGIJI ALIKUWA ANACHEZA AFRIKA KUSINI

2026-07-16T20:30:01.710+03:00

KLABU ya Azam FC imemtambulisha beki wa kati Mbelgiji, Henri Braham Stanic kuwa mchezaji wake mpya kuelekea msimu ujao, akijiunga na timu hiyo kutoka Stellenbosch FC ya Afrika Kusini.

Stanic anaondoka Stellenbosch FC baada ya msimu mmoja tu tangu awasili Julai 15 mwaka jana, 2025 akitokea Balzan FC ya Malta baada ya awali kucheza Liepaja ya Latvia, Jerv ya Norway, OH Leuven U23, Anderlecht U18, OH Leuven U21 kufuatia kupikwa katia akadmi ya Anderlecht, zote za Ubelgiji.
Henri Braham Stanic alizaliwa nchini Ubelgiji, mama yake akitokea Kongo na baba yake akitokea Togo na wazazi wake walikutana awali katika kituo cha Wakimbizi Ubelgiji walipokuwa wakitafuta hifadhi.
Kwa sababu hawakuwa na hati za kisheria wakati wa kuzaliwa kwake, wakili wa Ubelgiji anayeitwa Vladimir Stanic alijisajili kama baba yake halali ili kumsajili chini ya sheria za Ubelgiji, ambapo ndipo jina lake la mwisho linapoanzia.
Anakuwa mchezaji mpya wa pili baada ya winga Muivory Coast, Kipré Tiagori Emmanuel Junior Zunon ‘Kipre Junior’ aliyetambulishwa jana kujiunga tena na Azam FC akitokea MC Algiers ya Algeria.
Kipre Junior anarejea Azam FC ambako awali alicheza kuanzia msimu wa 2022-2023 akitokea SOL FC d’Abobo ya kwao, Ivory Coast hadi 2024-2025 alipohamia MC Algiers.

ARGENTINA YATINGA FAINALI IKITOKA NYUMA NA KUICHAPA ENGLAND 2-1

2026-07-16T00:29:24.716+03:00

MABINGWA watetezi, Argentina wamefanikiwa kwenda Fainali ya kombe la Dunia baada ya ushindi wa mabao 2-1 dhidi ya England usiku huu Uwanja wa Mercedes-Benz Jijini Atlanta Georgia, Marekani.
Hukuwa ushindi mwepesi kwa La Selección baada ya Three Lions kutangulia kupata bao lililofungwa na winga wa Barcelona ya Hispania, Anthony Michael Gordon dakika ya 55 akimalizia krosi ya kiungo mshambuliaji wa Aston Villa ya kwao, England, Morgan Elliot Rogers mwenye asili ya Jamaica kutoka upande wa kulia.
Argentina ikazinduka dakika za mwishoni kama kawaida yake kwenye michuano yam waka huu kwa mabao ya kiungo wa Chelsea ya England, Enzo Jeremías Fernández dakika ya 85 na mshambuliaji wa Inter Milan ya Italia, Lautaro Javier Martínez dakika ya 90’+2, wote wakimalizia pasi za kiungo mshambuliaji wa Inter Miami ya Marekani, Lionel Andrés Messi.
Sasa Argentina watakutana na Hispania katika Fainali ya Kombe la Dunia Julai 19, mwaka 2026 Uwanja wa MetLife Jijini East Rutherford, in Bergen County, New Jersey nchini Marekani.
Kwa upande wao England watawania nafasi ya tatu dhidi ya Ufaransa mchezo utakaotangulia Julai 18 Uwanja wa Hard Rock, Miami Gardens, Florida, Marekani.
Ikumbukwe Hispania ilitinga Fainali kwa ushindi wa mabao 2-0 dhidi ya Ufaransa usiku wa jana Uwanja wa AT&T Jijini Arlington, in Tarrant County, Texas nchini Marekani.
Mabao ya La Roja jana yalifungwa na mshambuliaji wa Real Sociedad ya kwao, Hispania, Mikel Oyarzabal Ugarte dakika ya 22 kwa penalti na beki wa kulia wa club Tottenham Hotspur ya England, Pedro Antonio Porro Sauceda dakika ya 58.

KIPRE JUNIOR AREJEA AZAM FC KUTOKA MC ALGIERS YA ALGERIA

2026-07-15T18:33:39.729+03:00

WINGA Muivory Coast, Kipré Tiagori Emmanuel Junior Zunon ‘Kipre Junior’ amejiunga tena na Azam FC akitokea MC Algiers ya Algeria.
“Tunayo furaha kuwataarifu kuwa tumemrejesha nyota wetu wa zamani, Kipre Junior baada ya kumnunua kutoka klabu ya MC Algiers. Karibu tena nyumbani,“ wameandika Azam FC kwenye ukurasa wao.
Kipre Junior anarejea Azam FC ambako awali alicheza kuanzia msimu wa 2022-2023 akitokea SOL FC d’Abobo ya kwao, Ivory Coast hadi 2024-2025 alipohamia MC Algiers.

HISPANIA YAICHAPA UFARANSA 2-0 NA KUTINGA FAINALI KOMBE LA DUNIA

2026-07-15T03:23:13.251+03:00

TIMU ya Hispania imefanikiwa kutinga Fainali ya Kombe la Dunia baada ya ushindi wa mabao 2-0 dhidi ya Ufaransa usiku huu Uwanja wa AT&T Jijini Arlington, in Tarrant County, Texas nchini Marekani.
Mabao ya La Roja yamefungwa na mshambuliaji wa Real Sociedad ya kwao, Hispania, Mikel Oyarzabal Ugarte dakika ya 22 kwa penalti na beki wa kulia wa club Tottenham Hotspur ya England, Pedro Antonio Porro Sauceda dakika ya 58.
Sasa Hispania watamsubiri mshindi wa Nusu Fainali ya pili kati ya mabingwa watetezi, Argentina na England zitakazomenyana baadaye leo Uwanja wa Mercedes-Benz Jijini Atlanta Georgia, Marekani.
Fainali ya Kombe la Dunia 2026 itapigwa Julai 19 Uwanja wa MetLife Jijini East Rutherford, in Bergen County, New Jersey nchini Marekani ikitanguliwa na mechi ya kusaka mshindi wa tatu, Julai 18 Uwanja wa Hard Rock, Miami Gardens, Florida, Marekani.

BETPAWA YADHAMINI LIGI YA KIKAPU DAR ES SALAAM KWA SH588.9M

2026-07-12T15:02:33.157+03:00

WACHEZAJI wanaoshiriki Ligi ya Mpira wa Kikapu Mkoa wa Dar es Salaam (BDL) wanatarajiwa kunufaika na uwekezaji wa mwaka mmoja wenye thamani ya Sh588.9 milioni katika msimu wa 2026.
Kwa mujibu wa mkataba uliosainiwa juzi kati ya kampuni ya michezo ya kubashiri ya betPawa kwa ajili ya kuongeza udhamini kwa msimu mmoja, wachezaji watalipwa fedha hiyo kupitia mpango wa Locker Room Bonus (LRB) unaolenga kuwazawadia timu zinazoshinda.
Kupitia makubaliano hayo mapya, kila mchezaji wa timu itakayoshinda mechi atapokea Sh88,750 papo hapo, huku bonasi hiyo inawanufaisha makocha na maofisa wengine wa benchi la ufundi la timu husika baada ya kila ushindi.

Meneja wa Kanda ya Kusini na Mashariki ya Afrika wa betPawa, Bwalya Noah akizungumza wakati wa kusaini mkataba wa msimu wa wa 2026 wa ligi ya kikapu ya mkoa wa Dar es Salaam (BDL)ambapo kampuni hiyo imedhamini kw Sh58.9m.

Jumla ya wachezaji 12 pamoja na maofisa wanne wa benchi la ufundi, wakiwamo makocha wawili wa kila timu inayoshinda watanufaika na malipo hayo, hatua ambayo imelenga kuongeza thamani ya ushindi na kuhamasisha ushindani mkubwa katika ligi msimu mzima.
Meneja wa Kanda ya Kusini na Mashariki mwa Afrika wa betPawa, Bwalya Noah, alisema kampuni hiyo inaamini maendeleo ya mchezo wa mpira wa kikapu yanaanza kwa kuwekeza kwa wachezaji.
*"betPawa tunaamini mafanikio yanayopatikana uwanjani yanapaswa kuwanufaisha wale wanaoyaleta. Ndiyo msingi uliozaa mpango wa LRB. Timu inaposhinda, wachezaji na benchi la ufundi waliofanikisha ushindi huo wanapaswa kupata zawadi yao mara moja," alisema Noah.

Mratibu wa Masoko wa betPawa Afrika Mashariki, Nassoro Mungaya akiuzngumza katika hafla hiyo ya kusaini makataba wa msimu wa 2026 wa BDL.

Rais wa chama cha mpira wa kikapu wa Dar es Salaam (BD) Shendu Hamis akiungumza wakati wa kusaini mkataba wa msimu wa 2026 wa ligi ya BDL na kampuni ya betPawa.

Alisema mpango huo unatambua juhudi za wachezaji, unazawadia ubora na kuhakikisha mafanikio ya uwanjani yanageuka kuwa manufaa ya moja kwa moja kwa wahusika.
Noah alisema LRB imekua na kuwa moja ya programu kubwa za maendeleo ya michezo barani Afrika, ikinufaisha maelfu ya wanamichezo katika nchi mbalimbali zikiwamo Ghana, Uganda, Nigeria na Cameroon, huku mamia ya wachezaji wa mpira wa kikapu nchini Tanzania tayari wakinufaika na bonasi hizo.
Kwa upande wake, mratibu wa Masoko wa betPawa Afrika Mashariki, Nassoro Mungaya, alisema kampuni hiyo inatarajia ushirikiano huo kuendelea kuleta matokeo chanya katika maendeleo ya mchezo wa mpira wa kikapu nchini.
"Tunatarajia kuona matokeo mazuri ndani na nje ya uwanja. Tunataka kushuhudia mechi zenye ushindani mkubwa zaidi, klabu zenye uendeshaji bora na wachezaji wanaopata motisha ya kufanya vizuri katika kila mchezo,"* alisema Mungaya.
Alisema betPawa itaendelea kushirikiana kwa karibu na Basketball Dar es Salaam League pamoja na Shirikisho la Mpira wa Kikapu Tanzania (TBF) kuimarisha mifumo ya uendeshaji wa ligi.
"Mbali na kulipa bonasi, tunawekeza katika kuboresha usimamizi wa ligi kupitia usajili wa wachezaji, uthibitishaji wa taarifa na uwasilishaji sahihi wa matokeo ya mechi. Mifumo imara ndiyo msingi wa maendeleo endelevu ya mchezo," alisema.
Mungaya alisema dira ya muda mrefu ya betPawa ni kusaidia kuifikisha Tanzania katika viwango vya juu zaidi vya mpira wa kikapu kwa kuendelea kuthamini ubora na kuwapa wachezaji fursa zaidi za kunufaika na vipaji vyao.
"Tunaamini kwamba wachezaji wanapotambuliwa na kuzawadiwa kwa kiwango chao, wanapata hamasa zaidi ya kufanya vizuri, klabu zinaimarika na mchezo mzima unanufaika. Huo ndiyo mwelekeo tunaotaka kuendelea kuuona nchini Tanzania," alisema.

Meneja wa Kanda ya Kusini na Mashariki ya Afrika wa betPawa, Bwalya Noah (katikati) akisaini mkataba wa kudhamini wa msimu wa 2026 wa ligi ya kikapu ya mkoa wa Dar es Salaam (BDL)ambapo kampuni hiyo imedhamini kwa Sh58.9m. Kulia ni Rais wa chama cha mpira wa kikapu wa Dar es Salaam (BD) Shendu Hamis na kushoto ni Mratibu wa Masoko wa betPawa Afrika Mashariki, Nassoro Mungaya.

Meneja wa Kanda ya Kusini na Mashariki ya Afrika wa betPawa, Bwalya Noah (wa pili kushoto) akibadilishana mkataba wa kudhamini ligi ya kikapu ya mkoa wa Dar es Salaam (BDL) wa msimu wa 2026 na rais wa chama cha mpira wa kikapu wa Dar es Salaam Shendu Hamis(wa pili kulia). Wa kwanza kushoto ni Msimamizi wa shughuli za ofisi wa betPawa, Erick Taisamo ambapo wa pili kushoto ni mratibu wa Masoko wa betPawa Afrika Mashariki, Nassoro Mungaya na kulia ni Katibu Mkuu wa BDL, Daniel Kapongo.

Meneja wa Kanda ya Kusini na Mashariki ya Afrika wa betPawa, Bwalya Noah (katikati), rais wa chama cha mpira wa kikapu wa Dar es Salaam Shendu Hamis(wa pili kulia), msimamizi wa shughuli za ofisi wa betPawa, Erick Taisamo (wa kwanza kushoto), mratibu wa Masoko wa betPawa Afrika Mashariki, Nassoro Mungaya (wa pili kushoto) na Katibu Mkuu wa BDL, Daniel Kapongo 9wa kwanza kulia) wakiwa katika picha ya pamoja mara baada ya kusaini mkataba wa msimu wa 2026 wenye thamani ya sh588.9m.

Wakati huo huo, Rais w Chama cha mpira wa kikapu cha mkoa wa Dar es Salaam League (BDL), Shendu Hamis, alisema wanafurahia kuendelea na ushirikiano huo kwa kuwa umekuwa na mchango mkubwa katika maendeleo ya ligi na ustawi wa wachezaji.
"Tunafurahi sana kuhuisha mkataba wetu na betPawa kwa sababu udhamini huu umeendelea kuleta thamani kubwa kwa ligi yetu. Umekuwa ukiwapa motisha wachezaji kupambana kwa nguvu katika kila mechi na umeongeza ushindani kwa timu zote msimu mzima," alisema Hamis.
Alisema mpango wa Locker Room Bonus umebadili mtazamo wa wachezaji na klabu, kwani kila mchezo sasa una umuhimu mkubwa kutokana na timu kujua ushindi unaambatana na zawadi ya kifedha.
"Udhamini huu pia umechangia kuongeza weledi katika uendeshaji wa klabu na kuinua kiwango cha ushindani wa ligi. Tunaamini ushirikiano huu utaendelea kuinua mpira wa kikapu Dar es Salaam na Tanzania kwa ujumla," aliongeza.

ARGENTINA YAIFUATA ENGLAND NUSU FAINALI KOMBE LA DUNIA

2026-07-12T07:11:16.602+03:00

TIMU ya Argentina imefanikiwa kutinga Nusu Fainali ya Kombe la Dunia baada ya ushindi wa mabao 3-1 dhidi ya Uswisi katika mchezo uliodumu kwa dakika 120 Alfajiri ya leo Uwanja wa Arrowhead, Kansas City, Missouri, Marekani.
Mabao ya Argentina yamefungwa na kiungo wa Liverpool ya England, Alexis Mac Allister dakika ya 10 na washambuliaji, Julián Alvarez wa Atlético Madrid ya Hispania dakika ya 112 na Lautaro Javier Martínez wa Inter Milan ya Italia dakika 120.
Kwa upande wao Uswis bao Lao pekee limefungwa na winga wa Nottingham Forests ya England, Dan Assane Ndoye mwenye asili ya Senegal dakika ya 67.
Argentina sasa itakutana na England katika mechi kali ya Nusu Fainali Julai 15 Uwanja wa Mercedes-Benz, Atlanta, Georgia nchini Marekani.
England ilitangulia Nusu baada ya ushindi wa mabao 2-1 dhidi ya Norway usiku wa kuamkia leo Uwanja wa Hard Rock Jijini Miami Gardens, Dade County, Florida, Marekani.
Mabao yote ya Three Lions yalifumgwa na kiungo mshambuliaji Jude Victor William Bellingham mwenye asili ya Kenya anayechezea klabu ya Real Madrid ya Hispania aliyefunga dakika ya 45’+2 na 93 katika mchezo uliodumu kwa dakika 120.
Kwa upande wao Norway bao lao pekee amefunga kiungo mshambuliaji wa Benfica ya Ureno, Andreas Rædergård Schjelderup dakika ya 36.

JUDE BELLINGHAM AIPELEKA ENGLAND NUSU FAINALI KOMBE LA DUNIA

2026-07-12T04:21:28.156+03:00

TIMU ya England imefanikiwa kwenda Nusu Fainali ya Kombe la Dubai Banda ya ushindi wa mania 2-1 dhidi ya Norway isolines kuamkia leo Uwanja wa Hard Rock Jijini Miami Gardens, Dade County, Florida, Marekani.
Mabao yote ya Three Lions yamefumgwa na kiungo mshambuliaji Jude Victor William Bellingham mwenye asili ya Kenya anayechezea klabu ya Real Madrid ya Hispania aliyefunga dakika ya 45’+2 na 93 katika mchezo uliodumu kwa Danika 120.
Kwa uplande wao Norway bao lao pekee amefunga kiungo mshambuliaji wa Benfica ya Ureno, Andreas Rædergård Schjelderup dakika ya 36.
England sasa itakutana na mshindi kati ya Argentina na Uswisi zitakazomenyana baadaye leo Uwanja wa Arrowhead, Kansas City, Missouri, Marekani.

NYOTA WA BAFANA BAFANA NA MAMELODI SUNDOWNS, JAYDEN ADAMS AFARIKI DUNIA

2026-07-11T18:22:30.626+03:00

KIUNGO wa Kimataifa wa Afrika Kusini na Jayden Adams wa Mamelodi Sundowns amefariki dunia leo na umri wa miaka 25, wiki chache tu baada ya kuitumikia nchi yake kwenye Fainali za Kombe la Dunia.
Adams alicheza mechi zote tatu za Kundi A za Bafana Bafana kwenye michuano hiyo akiiwezesha kutinga Hatua ya 32 Bora kabla ya kutolewa na wenyeji wenza, Canada wakifungwa 1-0.
"Ni kwa mshtuko mkubwa na moyo mzito kwamba nimejifunza kuhusu kifo cha Jayden Adams," amesema Waziri wa Michezo, Sanaa na Utamaduni wa Afrika Kusini, Gayton McKenzie katika taarifa yake.
"Kandanda ya Afrika Kusini imepoteza mojawapo ya vipaji vyake vya vijana vilivyochangamka zaidi, na taifa letu linaomboleza pamoja na familia yake, wachezaji wenzake na mamilioni ya wafuasi waliomtazama akikua kutoka kwenye akademi ya kutumainiwa hadi kuwa mchezaji kamili wa kimataifa wa Bafana Bafana."
Polisi nchini Afrika Kusini walisema kuwa wamefungua uchunguzi baada ya mwili wa mwanamume mwenye umri wa miaka 25 kupatikana katika nyumba moja huko Schotschekloof, kitongoji cha katikati mwa Cape Town, Jumamosi asubuhi.
McKenzie aliongeza: "Sababu ya kifo cha Jayden bado haijathibitishwa, na ningependa kutoa wito kwa wanahabari na umma kujizuia na huruma, na kujiepusha na uvumi, wakati familia yake na Mamelodi Sundowns wanapewa nafasi na faragha wanayohitaji katika wakati huu mgumu sana.
"Taarifa zozote rasmi zitawasilishwa na wahusika kwa wakati ufaao."
Adams alianza katika sare ya 1-1 dhidi ya Jamhuri ya Czech katika Kundi A licha ya kujua kwamba nyanyake alikuwa ameaga dunia saa chache kabla ya kuanza kwa mchezo huo.
Muungano wa Wachezaji wa Kandanda wa Afrika Kusini ulisema "umehuzunishwa na kifo kisichotarajiwa" cha Adams ambaye aliichezea nchi yake kwa mara ya kwanza mwaka wa 2022.
"Jayden alikuwa ameiwakilisha Afrika Kusini hivi majuzi kwenye Kombe la Dunia la 2026, akibeba matumaini ya taifa kwa kiburi, ujasiri na tofauti.
"Kufariki kwake ni hasara kubwa kwa familia yake, wachezaji wenzake, vilabu, udugu wa soka na nchi kwa ujumla.
"Soka la Afrika Kusini limepoteza mchezaji mwenye kipawa, mtumishi mwenye fahari wa mchezo na maisha ya ujana ambayo bado yalikuwa na mengi ya kutoa."
Adams alianza soka lake katika klabu ya Stellenbosch FC, kabla ya kuhamia Mamelodi Sundowns Januari 2025, ambako alishinda mataji ya ligi na Ligi ya Mabingwa Afrika.
Alikuwa sehemu ya kikosi cha Afrika Kusini kilichotinga nusu fainali ya Kombe la Mataifa ya Afrika 2023 kabla ya kuitwa kwenye kikosi cha Hugo Broos kilichoshiriki Kombe la Dunia, ambapo timu hiyo iliweka historia ya kutinga hatua ya mtoano ya michuano hiyo kwa mara ya kwanza.
"Inasikitisha sana kusikia kwamba kiungo wa Afrika Kusini Jayden Adams ameaga dunia wiki chache tu baada ya kushiriki katika kampeni ya kihistoria ya Kombe la Dunia la Fifa," rais wa Fifa Gianni Infantino alisema.
"Mawazo yangu na rambirambi, pamoja na za kila mtu katika Fifa na jumuiya ya soka duniani, ziko pamoja na familia yake, marafiki na wachezaji wenzake. Nyota huyo wa Bafana Bafana na Mamelodi Sundowns atakumbukwa sana. Apumzike kwa amani."

HISPANIA YAICHAPA UBELGIJI 2-1 NA KUTINGA NUSU FAINALI KOMBE LA DUNIA

2026-07-11T00:33:08.700+03:00

TIMU ya Hispania imefanikiwa kwenda Nusu Fainali ya Kombe la Dunia baada ya ushindi wa mabao 2-1 dhidi ya Ubelgiji usiku huu Uwanja wa SoFi Jijini Inglewood, Los Angeles, California, Marekani.
Mabao ya La Roja yamefungwa na kiungo wa Paris Saint-Germain ya Ufaransa, Fabián Ruiz Pena dakika ya 30 na mshambuliaji wa Arsenal ya England, Mikel Merino Zazón dakika ya 88, wakati bao pekee la 'Mashetani Wekundu’ limefungwa na mshambuliaji wa Atalanta ya Italia, Charles Marc S. De Ketelaere dakika ya 41.
Dalili za jahazi la Ubelgiji kuzama leo zilionekana pale kipa wake wa kwanza, Thibaut Courtois wa Real Madrid ya Hispania alipoumia paja na kulazimika kutoka dakika ya 71 nafasi yake ikichukuliwa na kipa wa akiba wa Manchester United ya England, Senne Lammens aliyedaka mechi yake ya kwanza timu yake hiyo ya taifa.
Kwa ushindi huo, Hispania watakutana na Ufaransa katika Nusu Fainali kali kabisa Julai 14 Uwanja wa AT&T Jijini Arlington, Tarrant County, Texas, hapo hapo Marekani.

UFARANSA YAICHAPA MOROCCO 2-0 NA KUTINGA NUSU FAINALI KOMBE LA DUNIA

2026-07-10T04:52:29.962+03:00

TIMU ya Ufaransa imefanikiwa kwenda Nusu Fainali ya Kombe la Dunia baada ya ushindi wa mabao 2-0 dhidi ya Morocco katika mchezo wa Robo Fainali usiku wa kuamkia leo Uwanja wa Gillette Jijini Foxborough, Norfolk County, Massachusetts, Marekani.
Mabao yote ya Ufaransa yamefungwa na washambuliaji wake wenye asili ya Afrika, Kylian Mbappé Lottin wa Real Madrid ya Hispania mwenye asili ya Cameroon dakika ya 60 na Masour Ousmane Dembélé wa Paris Saint-Germain ya Kwai, Paris mwenye asili ya Mauritania, Senegal na Mali dakika ya 66.
Ufaransa wanders kuondoka na ushindi mnene zaidi kama Nahodha wake, Mbappe asingekosa penalti dakika ya 28, ambayo iliokolewa na kipa wa Al Hilal ya Saudi Arabia, Yassine Bounou mzaliwa wa Canada.
Sasa Ufaransa itakutana na mshindi wa Robo Fainali ya pili kati ya Hispania na Ubelgiji zitakazomenyana leo Uwanja wa SoFi, Inglewood, Kusini-Magharibi mwa Los Angeles, California, Marekani.

USWISI YAITOA COLOMBIA KWA MATUTA NA KUTINGA ROBO FAINALI

2026-07-08T03:19:24.591+03:00

TIMU ya Uswisi imefanikiwa kwenda Robo Fainali ya Kombe la Dunia baada ya ushindi wa penalti 4-3 kufuatia sare ya bila mabao na Colombia ndani ya dakika 120 usiku wa huu Uwanja wa BC Place Jijini Vancouver nchini Canada.
Waliofunga penalty za Uswisi ni Granit Xhaka, Mohamed Amdouni, Cedric Itten na Rubén Vargas huku Manuel Akanji pekee akikosa, wakati kwa upande wa Colombia waliofunga ni Juan Quintero, Jaminton Campaz na Luis Díaz huku Davinson Sánchez na Juan Hernández wakikosa.
Sasa Uswisi itakutana na Argentina Julai 11 Uwanja wa Arrowhead, Kansas City, Missouri, Marekani – wakati Robo Fainali nyingine ni Ufaransa na Morocco Julai 9 Uwanja wa Gillette, Foxborough, Massachusetts, Marekani, Hispania na Ubelgiji Julai 10 Uwanja wa SoFi, Inglewood, California, Marekani na Norway dhidi ya England Julai 11 pia Uwanja wa Hard Rock, Florida, Miami Gardens, Marekani.

MESSI AMEKOSA PENALTI TENA, LAKINI AMEFUNGA NA ARGENTINA IMEITOA MISRI

2026-07-07T21:45:00.067+03:00

MABINGWA watetezi, Argentina wamefanikiwa kwenda Robo Fainali ya Kombe la Dunia baada ya kutoka nyuma na kushinda mabao 3-2 dhidi ya Misri usiku huu Uwanja wa Mercedes-Benz, Atlanta, Georgia, Marekani.
Mafarao wa Misri walitangulia kwa mabao ya wachezaji wake wanaocheza ligi ya nyumbani. beki wa kati, Yasser Ibrahim Ahmed El Hanafi wa Al Ahly dakika ya 15 na winga wa kushoto, Mostafa Mohamed Zaky Abdelraouf ‘Zico’ wa Pyramids dakika ya 67.
Argentina ikazinduka kwa mabao ya beki wa kati wa Tottenham Hotspur ya England, Cristian Gabriel Romero dakika ya 79, mshambuliaji, Lionel Andrés Messi wa Inter Miami ya Marekani dakika ya 83 na kiungo, Enzo Jeremías Fernández wa Chelsea ya England dakika ya 90’+2.
Mapema dakika ya 21 Lionel Messi alikosa penalti baada ya shuti lake kuokolewa na kipa wa Al Ahly ya Misri, Mostafa Shobeir na sasa Argentina watakutana na mshindi kati ya Uswisi na Colombia zitakazomenyana baadaye usiku huu Uwanja wa BC Place, Vancouver nchini Canada.

UBELGIJI YAICHAPA MAREKANI 4-1 NA KUITUPA NJE KOMBE LA DUNIA

2026-07-07T08:06:05.367+03:00

TIMU ya Marekani imekamilisha idadi ya timu zote wenyeji wa Fainali za Kombe la Dunia kutolewa baada ya jana kufungwa mabao 4-1 na Ubelgiji katika mchezo wa Hatua ya 16 Boora Uwanja wa Lumen Field Jijini Seattle, Washington nchini Marekani.

Mshambuliaji wa Atalanta ya Italia, Charles Marc S. De Ketelaere aliifungia mabao mawili Ubelgiji dakika ya tisa na 33, huku mabao mengine yakifungwa na kiungo mshambuliaji wa Club Brugge ya kwao, Hans Vanaken dakika ya 57 na mshambuliaji Romelu Lukaku Bolingoli mwenye asili ya Jamhuri ya Kidemokrasia ya Kongo (DRC) dakika ya 90’+3.
Bao pekee la na kufutia machozi la Marekani ambayo inaungama na wenyeji wenza wake Canada na Mexico kuaga michuano hiyo limefungwa na kiungo wa Bayer Leverkusen ya Ujerumani, Malik Leon Tillman dakika ya 31 na sasa Ubelgiji itakutana na Hispania katika Nusu Fainali ‘Tamu Kabisa’ Julai 10 Uwanja wa Hard Rock, Miami Gardens, Florida, Marekani.

HISPANIA YAICHAPA URENO 1-0 NA KUTINGA ROBO FAINALI KOMBE LA DUNIA

2026-07-07T00:20:18.198+03:00

TIMU ya Hispania imefanikiwa kwenda Robo Fainali ya Kombe la Dunia baada ya ushindi wa bao 1-0 dhidi ya Ureno usiku huu Uwanja wa AT&T Jijini Arlington, Tarrant County, Texas, Marekani.
Pongezi kwa mfungaji wa bao hilo pekee, kiungo Mikel Merino Zazón wa mabingwa wa England, Arsenal aliyefunga dakika ya 90’+1 na sasa Hispania watakutana na mshindi kati ya Marekani na Ubelgiji zitakazomenyana Alfajiri.

RAIS DK SAMIA AMJULIA HALI PACOME HOSPITALI YA AGA KHAN

2026-07-06T14:45:27.107+03:00

RAIS wa Jamhuri ya Muungano wa Tanzania, Mheshimiwa Dkt. Samia Suluhu Hassan leo amemtembelea na kumpa pole kiungo Muivory Coast wa Yanga SC, Peodoh Pacome Zouzoua, ambaye anaendelea kupatiwa matibabu katika Hospitali ya Aga Khan, Dar es Salaam.
Pacome aliumia katika mchezo wa kufungia msimu wa Ligi Kuu ya NBC Tanzania Bara Juni 30, Yanga ikishinda 3-0 dhidi ya wenyeji, JKT Tanzania Uwanja wa Meja Jenerali Isamuhyo, Mbweni, Dar es Salaam na kutwaa ubingwa kwa mara ya tano mfululizo.

BELLINGHAM APIGA MBILI ENGLAND YAICHAPA MEXICO 3-2

2026-07-06T06:47:18.515+03:00

TIMU ya England imefanikiwa kutinga Hatua ya Robo Fainali Kombe la Dunia baada ya ushindi wa mabao 3-2 dhidi ya wenyeji wenza, Mexico Asubuhi ya leo Uwanja wa Azteca Jijini Mexico City nchini Mexico.
Kiungo wa Real Madrid ya Hispania, Jude Victor William Bellingham mwenye asili ya Ireland kupitia kwa baba yake na Kenya kupita kwa mama yake aliifungia Three Lions mabao mawili dakika ya 36 na 38, kabla ya Nahodha Harry Edward Kane kufunga la tatu kwa penalti dakika ya 60.
Mabao ya Mexico ambao wanakuwa wenyeji wa pili kutolewa baada ya Canada waliochapwa 3-0 na Morocco juzi – yamefungwa na washambuliaji, Julián Andrés Quiñones Quiñones wa Al-Qadsiah ya Saudi Arabia mzaliwa wa Colombia dakika ya 42 na Raúl Alonso Jiménez Rodríguez wa Wolverhampton Wanderers ya England dakika ya 69 kwa penalti.
England sasa watamenyana na Norway ambayo usiku wa jana nayo ilitinga Robo Fainali kwa ushindi wa mabao 2-1 dhidi ya Brazi usiku wa kuamkia leo Uwanja wa MetLife Jijini East Rutherford, New Jersey, New York, Marekani.