BLOGGER JOWO

CANDI PRAMBANAN

noreply@blogger.com (BLOGGER JOWO) — Sat, 27 Nov 2010 23:40:00 +0700

Candi Rara Jonggrong utawa kang luwih kondang kasebut Candi Prambanan sejatine yaiku candi Hindu kang ukurane paling gedhe ora mung ing wilayah Indonesia nanging uga paling gedhe ing wilayah Asia Tenggara.

Candi kang duwur bangunan utamane kurang luwih 47m iki manggon nang perbatasan Propinsi Jawa Tengah lan Daerah Istimewa Yogyakarta. Tepate ing wilayah Kabupaten Sl;eman, Yogyakarta lan Kabupaten Klaten, Jawa Tengah, kabangun tahun 850 M ing jaman pemerentahane Nalendra Rakai Pikatan lan Rakai Balitung

Candi Roro Jonggrang duweni 8 candi utama lan ana luwih saka 250 candi kang ukurane luwih cilik.

Ana 3 candi utama kang kasebut kanti istilah Trisakti, kang kapersembahake dumateng Sang Hyang Trimurti. Yaiku Batara Siwa, Batara Wisnu lan Batara Brahma. Telu candi utama iki uga duweni candi pendamping kang madep ana sisih kulon, yaiku Nandini pendamping kanggo Siwa, Angsa kanggo Brahma lan Garuda kanggo Wisnu. Kajaba iku isih ana 2 candi apit, 4 candi kelir lan 4 candi sudut.

Candi Siwa kang ukurane paling gedhe duweni 4 ruangan. Salah siji ruang utamane kaisi arca Siwa, dene 3 rungan liyane kaisi arca Durga ( garwa Siwa ), Agastya ( Guru Siwa ) lan Ganesha ( Putra Siwa ). Yo arca Durga iki mono kang saiki tumrap warga sekitar candi luwih kondang kasebut kanti jeneng Arca Roro Jonggrang

Candi Prambanan iku uga duweni relief candi kang gambarke carita kisah Ramayana. Ana uga relief Kalpataru kang menurut para ahli menawa relief Kalpataru iki gambarake sejatine warga masyarakat ing abad 9 iki wis duweni semangat lan keprigelan tumrap babagan ngelola lan nglestarike lingkungan hidup.

Isih akeh babagan apik liyane tumrape Candi Prambanan iki. Supaya luwih jelas lan gamblang, kanggo panjenengan ingkang durung nate mirsani Candi Prambanan saka cedak, monggo enggal-enggala tindak dateng Prambanan ,……. e ben ora diarani ketinggalan jaman toh.

BLOGGER JOWO

ONDE ONDE

noreply@blogger.com (BLOGGER JOWO) — Sun, 17 Oct 2010 21:19:00 +0700

Bunder isine kacang digoreng lan dilumuri wijen, yo iku sing aran onde-onde. Kanggo para sutrisna panganan tradisional , jajanan onde-onde iki mungkin wis ora pangling maneh, yen ono uwong sing ngaku penggemar jajanan tradisional, nanging kok durung nate njajal panganan onde-onde iki yo berarti durung iso diarani penggemar panganan tradisional sejati… ngono toh…

Onde-onde iku salah sawijining jenis panganan tradisional utawa jajanan pasar kang uwis kondang ing Indonesia. Mulai saka pelosok desa nganti tumake kutha jajanan iki wis sumebar nang kabeh panggonan, ora mung ana pasar tradisional utawa pedagang kaki lima, malah onde-onde iki sejatine wis mulai njamah ana mall-mall kang sumebar nang kutha gedhe kae, kayata : Jakarta, Surabaya, Yogyakarta lan sapanunggale.

Onde-onde kang bentuke khas bunder kaya ball iku kagawe saka tepung terigu utawa tepung ketan njerone diisi karo kacang ijo, ana uga kang diisi kacang tholo lan malah ono uga kang jerone diisi karo parutan klapa kang ditawuri gula jawa, terus pinggirane dilumuri karo wijen, lan njur terus digoreng.

Perkembangan jaman panganan kang popoler banget tumrap masyarakat ing Mojokerto, Jawa Timur iki emang mulai ana variasi-variasi ing babagan olahane. Mula yo aja da pada kaget yen para sutrisna kabeh bakal nemui onde-onde kang wujud lan rasane bedha karo layake onde-onde kae.

Sing penting tumrap kitha marang panganan onde-onde kang sejatine yo warisan nenek moyang bagian saka kekayaan tradisional bangsa Indonesia iki, yo ayo to padha di uri-uri melu nglestarikne ben ora ilang keberadaane. Ojo nganti kitha di cap ketinggalan zaman yen durung ngrasakne onde-onde.

BLOGGER JOWO

BARONGAN

noreply@blogger.com (BLOGGER JOWO) — Sun, 12 Sep 2010 01:31:00 +0700

Opo toh BARONGAN kuwi. Ditilik saka jenenge wae kok sajak nyolowadi lan uga tansah medheni banget. Barongan iku sejatine salah sawijining kesenian tradisional nang Jawa Tengah. Nanging kesenian Barongan iki dhewe, luwih ngakar lan kondang tumraping warga masyarakat ing Kabupaten BLORA, tinimbang kuta-kuta liyane nang Jawa Tengah. Mula ora mokal yen Barongan iku akhire identik lan dadi kesenian unggulane Kabupaten Blora iku dhewe.

Barongan ing lelakon kesenian barongan iku, digambarke minangka panguasa alas kang angker kanthi sifat lan watake kang sarwa ala. Mula wujude barongan iku yo di gambarke kaya wujude Singo Kang Galak utawa Singo Barong.

Ewodene wujud saka kesenian barongan iku dhewe , disuguhke kanthi sarana beksa/tari, lan diiringi nganggo gending gamelan kang gendinge iku khas kanggo kesenian barongan iki dhewe. Dene tokoh penting ing carita barongan iki yaiku: 1. Singo Barong ( Gembong Amijoyo ), 2. Bujangganom ( Pujangga Anom ), 3. Joko Lodro ( Gendruwo ) 4. Reog ( Pasukan Turongga ), 5. Noyontoko, 6. Untub.

Kocap kacarita, mula pambukane carita barongan kang kapetik saka babat panji iki, yaiku nalika Prabu Klana Sawandana saka negari Bantarangin kanthi utusane Bujangganom lan Raden Panji Asmarabangun saka negari Jenggala kanti utusane Noyontoko lan Untub, nduweni kekarepan kang padha yaiku saperlu nglamar putri Raja Kediri sesilih Dewi Sekartaji. Nanging kekareban iku kaadang dening Singo Barong kang minangka jelmaane Adipati Gembong Amijaya. Dadia perang tanding Singo Barong lumawan para prajurit Bantarangin lan uga prajurit Jenggala.

Jangkeping carita, Singo Barong kaasorake dening Prabu Klana Sawandana kang gegaman Cemeti Samandiman, lan didadekne andahane. Sakbacute Prabu Klana Sawandana uga kena dikalahne dening Raden Panji Asmarabangun nganti tumeka pati. Dene Singo Barong kasedakne ora iso malih wujud asal manungsa ( Gembong Amijoyo ) maneh, lan didadekne abdine, Bujangganon uga didadekne abdine. Kanti kairing para prajurit Jenggala, Bujangganon lan sisa prajurit Bantarangin kang wis kasil dikalahke lan uga Singa Barong, Raden Panji Asmarabangun kanti arak arakan kasebut neruske lampah saperlu nglamar Dewi Sekartaji.

Pungkasan , yo suasana arak-arakan iki ing tembe mburine kang minangka dadi cikal bakaling kasenian Barongan iku nganti tekan seprene iki.

BLOGGER JOWO

BA'DHA - RIAYA

noreply@blogger.com (BLOGGER JOWO) — Tue, 7 Sep 2010 19:07:00 +0700

Dina sing nembe dienteni karo umat muslim sak donya iki sedelo maneh bakal teko. Apa toh kuwi? Hari Raya Idul Fitri, utowo yen wong jowo wis latah biasa ngucapake karo istilah Riaya alias Badha, ukoro kang pirang-pirang dino iki mesti paling kerep keprungu lan paling kerep kaucapke marang para khalayak rame ing saantero negeri iki.

Prasasat wis dadi adat, khususe nang Indonesia iki, badha tansah ajeg dirayakake karo kabeh umat muslim. Ono unen-unen Kurang lego roso ati iki yen durung ngrayakake badha.

Pancen badhane umat muslim iki, yen nang Indonesia iso uga diartekno dadi badhane kabeh warga, tan kliwatan uga tumrape warga sing non muslim. Lanang, wadhon, tuo, enom, sugeh, mlarat kabeh podo mbahur dadi siji ing dino kamenangane umat muslim iki.

Ana kebiasaan liyane yen pas mbarengi tekane dina riaya iki, kebiasaan kang mesti ajeg ora nate diliwatke karo warga, khususe tumrap warga sing manggon nang kuto-kuto gedhe, Jakarta salah siji contone. Yoiku kebiasaan mudik lebaran.

Badha berarti yo mudik, yen ra mudik berarti yo ra badha. Badha berarti yo mulih kampung, yen ra mulih kampung berarti yo berarti ra badha. Iku mau mung unen-unen sing ajeg kaprungu lan mungkin uga wis dadi panganan sak bendina para pelancong, para warga kang ngayahi jejibrahan, macul, golek sandang pangan urip nang kuto gedhe. Yen diibaratke, mudik iku sejatine yo kembange riaya.

He..he..he.. akeh uwong sing podho kemekelen ya'e, yen ngrungokake unen-unen sing koyo mangkono iku. Ning yo piye maneh, iku pancen sejatine sing kerep ditemoni ing wayah sakbendinane iki. Masalahe mungkin ukoro iku kurang pas tumrape para warga kang nembe prihatin, nandang tirakat urip amarga ngadepi kahanan negara sing kaya ngene iki. Abot ngasakne urip. Angele golek duwit, trus yen wis dadi duwit prasasat cepet uga ilang ujudane . Rega - rega kang tansah sarwa larang marakne duwit iki pencen soyo suwe yo soyo ra ono ajine maneh. Mumet... mumet....bakalane..

Mulane tinimbang ngrasakne urip susah kok malah digawe tambah susah, luwih becik dijupuk wae hikmahe dina riaya iku mau. Ojo mung ngurusi urusan donya tok ning trus lali karo sing duwe donya iki yaiku Gusti Kang Maha Kuasa. Piye Gusti Allah arep tresno karo umate, yen umate wae nglalekake karo Gustine. Piye Gusti Allah arep andum rezeki sing gedhe yen umate wae ra tau nyukuri marang apa wae kang wis nate diparing-Ke.

Pungkasan BLOGGER JOWO ngaturaken Sugeng Riyadi, Minal aidin wal faidzin, nyuwun ngapunten tumrap sedaya kalepatan lahir lan batin. Nuwun.

BLOGGER JOWO

BLOGGER JOWO

noreply@blogger.com (BLOGGER JOWO) — Tue, 7 Sep 2010 00:18:00 +0700

Ora jalaran ra iso boso, ora amarga kentekan bahan opomaneh nganti kentekan akal lan nalar sehat, kabeh iku mau ora ono kaitane babar blas marang mula pambukane muncul lan digawene blog jowo iki. Tujuan di gawene blog iki ora ono liyo yo amung dadi obat panglipuring awak iki, panglipur marang kahanan donya iki kang tansah kebak soko carut marute tingkah polah kang kadang kala yen dilebokne nang ati malah iso ndadeake sumpeking ati iki.

Mulo ora salah yen tinimbang melu grudugan sing ora ono faedahe, yo luwih becik ngeblog ngene iki. Numpahake unek-unek nang kene, sesrawungan karo sedulur- sedulur blogger liyane sinambi ngangsu kawruh e... sopo ngerti mergo soko iki iso ndadekake tambahing ngilmu, tambahing paseduluran lan iso uga andadekake tambahing sumringahe penggalih iki sekalian nguri uri kabudayan jawi ngono lho, supoyo ora lekas luntur kepangan semrawuting kahanan iki.

Ojo podo kaget yo yen blog iki bakalane nyuguhke tulisan-tulisan kang campur mawut koyo campur mawute gado gado, toprak utowo lotek kang kerep dijajakake bakul nang pinggir dalan kae. Tulisan ngalor ngidul, guyon maton ,ngetan ngulon kang ora ono kaitane lan juntrunge blas. Kabeh mau ora liyo tak anggep dadi kembange tulisan lan kembange urip nang donya iki. Pungkasane mugo mugo kabeh kang ono nang kene iki iso ndadekake panglipuring penggalih kabeh.

Salam Adhem Ayem

BLOGGER JOWO