Cambodia Forest News Sharing

អ្នកនេសាទផ្កាប់ឆ្នាំងបាយដោយសារបាត់បង់ប្រភពចំណូល ពីព្រោះ អស់ត្រី

noreply@blogger.com (Sotheavy royals) — Wed, 7 Sep 2016 19:07:00 -0700

អ្នកនេសាទផ្កាប់ឆ្នាំង ២០១៦

ភ្នំពេញ —

គ្រួសារអ្នកនេសាទដែលរស់នៅតាមដៃបឹងទន្លេសាបនៅតែបន្តជួបវិបត្តិអត់ត្រីដដែលដោយសារបរិមាណត្រីមានការធ្លាក់ចុះខ្លាំងពេក បើប្រៀបធៀបការនេសាទរបស់ពួកគេនៅពេលមុនៗ។

ប្រជាពលរដ្ឋ ដែលរស់នៅតាមដៃបឹងទន្លេសាប និងប្រកបរបរចិញ្ចឹមជីវិតដោយការនេសាទត្រី មិនអាចរកត្រីមកផ្គត់ផ្គង់ជីវភាពដូចពីមុនឡើយ ដោយសារបរិមាណត្រី ដែលពួកគេអាចរកនៅក្នុងបឹងទន្លេសាប ដែលធ្លាប់ជាជង្រុកត្រីដ៏ធំរបស់ប្រទេសកម្ពុជានោះ បានធ្លាក់ចុះយ៉ាងខ្លាំង។

ថ្លែងប្រាប់ VOA តាមទូរស័ព្ទ លោក អេង គឹមឈួ ប្រធានសមាគមន៍បឹងទន្លេសាបប្រចាំស្រុកកំពង់ស្វាយ ខេត្តកំពង់ធំ បានឲ្យដឹងថា លោកគឺជាអ្នកនេសាទដែលធ្លាប់នេសាទនៅលើបឹងនេះអស់រយៈពេលជាងសាមសិបឆ្នាំ តាំងពីក្រោយពេលរបបខ្មែរក្រហមបានដួលរលំ។

លោកបានបញ្ជាក់ថា៖

«ពីមុនមក មួយថ្ងៃរកបានហាហុកសិបគីឡូ មានថ្ងៃខ្លះទៅដល់មួយរយ។ រករាល់ថ្ងៃនេះបានបួនប្រាំគីឡូ។ ទំនិញឡើងថ្លៃគ្រប់មុខទៅហើយ យើងរកអត់សូវបានទៅហើយ។ កូនធំៗត្រូវរៀនផង»។

បរិមាណត្រីដែលលោកអាចរកបានមានការធ្លាក់ចុះយ៉ាងគំហុក ធ្វើឲ្យចំណូលប្រចាំថ្ងៃរបស់លោកមានការធ្លាក់ចុះ ខណៈដែលចំណាយនៅតែកើនឡើង ហើយលោកត្រូវចិញ្ចឹមសមាជិកគ្រួសារបួននាក់ រួមទាំងរូបលោក។ ហើយកូនបួននាក់ទៀតត្រូវទៅធ្វើកម្មករនៅរាជធានីភ្នំពេញ។

បើតាមរបាយការណ៍របស់ Global Nature Fund បឹងទន្លេសាបត្រូវបានគេចាត់ទុកថា ជាទន្លេដែលរងការគំរាមកំហែងខ្លាំងជាងគេ នៅឆ្នាំ២០១៦។

បឹងទន្លេសាបជាជង្រុកត្រីដ៏ធំមួយរបស់ប្រទេសកម្ពុជា ប៉ុន្តែដោយសារសកម្មភាពមនុស្ស ដូចជាការប្រើថ្នាំពុល គ្រឿងផ្ទុះ ឧបករណ៍ឆក់ និងការប្រើសំណាញ់ក្រឡាញឹកជាដើម ការសាងសង់ទំនប់វារីអគ្គិសនី និងការប្រែប្រួលអាកាសធាតុបានធ្វើឲ្យបឹងនេះបាត់បង់នូវប្រភពជីវៈចម្រុះ ហើយធ្វើឲ្យត្រីនៅក្នុងទឹកនោះក៏ត្រូវបាត់បង់ដែរ។

លោកគឹម ឈួជាគ្រួសារមួយក្នុងចំណោមអ្នកនេសាទ៨០០រយគ្រួសារទៀតដែលរងគ្រោះដោយសារការបាត់បង់ត្រីនៅក្នុងឃុំរបស់លោកដែលបង្ខំឲ្យគ្រួសារខ្លះមានកូនធ្វើចំណាកស្រុកទៅធ្វើការនៅបរទេស ឬនៅភ្នំពេញដើម្បីរកចំណូលផ្គត់ផ្គង់បន្ថែមពីលើមុខរបរនេសាទរបស់ពួកគេ។

អ្នកនេសាទម្នាក់ទៀតលោកអៀង ណាំ ប្រធានសមាគមន៍អ្នកនេសាទ និងជាអ្នកនេសាទនៅតាមតំបន់បេ៦នៃដៃព្រែកទន្លេមេគង្គ ខេត្តកំពង់ចាម ក៏ជួបប្រទះនឹងបញ្ហាប្រហាក់ប្រហែលគ្នាដែរ ហើយលោកត្រូវបង្ខំចិត្តផ្លាស់ប្តូរអាជីពទៅជាអ្នករត់រឺម៉កវិញ។

«បើយើងប្រៀបធៀបពីដប់ឆ្នាំមុន ផលត្រីខុសគ្នាច្រើនណាស់មកដល់បច្ចុប្បន្ននេះ។ វាអត់មានត្រីទៀតទេ។ អ្នកនេសាទ ដែលអត់មានមុខរបរ ត្រូវធ្វើចំណាកស្រុកទៅរកមុខរបរផ្សេងទៅភ្នំពេញ ទៅថៃ ដោយសារតែត្រីនៅតំបន់នេះវាអស់តែម្តង»។

លោកបន្ថែមថា៖

«ខ្ញុំសម្រេចចិត្តឈប់នេសាទ ដោយសារអត់ត្រី។ កន្លងមកយើងធ្លាប់រកបានដប់ម្ភៃគីឡូក្នុងមួយថ្ងៃ ឥឡូវនេះយើងមួយថ្ងៃយើងទៅរកអត់បានមួយគីឡូទេ»។

លោកគឹម ឈួគិតថា មូលហេតុដែលនាំឲ្យបាត់បង់ត្រីគឺដោយសារកត្តាមនុស្សផង កត្តាធម្មជាតិផង។

«កត្តាមនុស្សគឺមនុស្សយើងឥឡូវប្រើឧបករណ៍ញឹកពេក ហើយយកត្រីឡើងអស់ហើយ ហើយមួយទៀតទឹកហ្នឹងចេះតែតូចទៅៗ អត់ធំ។ ជិតដល់ខែភ្ជុំ ធម្មតាខែនេះទឹកវាបីបួនម៉ែត្រ ហើយឥឡូវអត់ទាន់បានពីរម៉ែត្រផង»។

លោកបណ្ឌិតណៅ ធួក រដ្ឋលេខាធិការក្រសួងកសិកម្ម រក្ខាប្រមាញ់ និងនេសាទ និយាយថា ក្រសួងមានគម្រោងផ្សេងៗដើម្បីស្តារដៃទន្លេឡើងវិញ។

លោកនិយាយថា៖

«យើងកំពុងពិភាក្សាគ្នាអំពីថា តើយើងគួរធ្វើយ៉ាងណាឲ្យទន្លេសាបអាចរក្សានិរន្តរភាពបាន ហើយនឹងបង្កើនបរិស្ថានជលផលឲ្យល្អឡើងវិញ»។

លោកតឹក វណ្ណារ៉ា នាយកប្រតិបត្តិនៃវេទិកាមិនមែនរដ្ឋាភិបាលគិតថា មានកត្តាច្រើនដែលអាចនាំឲ្យឈានទៅដល់ការបាត់បង់ត្រីកម្រិតច្រើនបែបនេះ។

«ទីមួយការថយចុះនៃព្រៃលិចទឹក។ ទីពីរគឺការថយចុះនៃកម្រិតទឹកគ្របដណ្តប់ព្រៃលិចទឹក។ ចំណុចទីបីគឺការគោករីងរាក់នៃតំបន់បឹងទន្លេសាប។ តំបន់មួយចំនួនដែលជាប្រភពត្រីហ្នឹងបានគោករីង»។

អង្គការ Conservation International កំណត់ថា ជលផលដែលបានមកពីទន្លេសាបគឺជាវិស័យដែលផ្តល់ចំណូលដល់កម្ពុជាប្រហែលពីរពាន់លានដុល្លារសហរដ្ឋអាមេរិកក្នុងមួយឆ្នាំៗ ហើយពីរភាគបីនៃប្រជាជនកម្ពុជាបរិភោគត្រីទាំងនេះដែលជាប្រភពនៃប្រូតេអ៊ីនប្រចាំថ្ងៃរបស់ពួកគេ៕

VOA

08-9-2016

បទល្មើសកាប់ឈើក្នុងតំបន់ព្រៃឡង់នៅតែបន្តកើតមានយ៉ាងរាលដាល

noreply@blogger.com (Sotheavy royals) — Thu, 1 Sep 2016 21:23:00 -0700

ថ្ងៃ September 2, 2016 ដោយ មនសិការខ្មែរ

សកម្មជនព្រៃឈើ និងមន្ត្រីអង្គការក្រៅរដ្ឋាភិបាលបានឲ្យដឹងថា ក្រោយពេលព្រៃឡង់ត្រូវបានដាក់ជាតំបន់ការពារនិងអភិរក្សរួចមក គឺបទល្មើសកាប់ឈើនិងដឹកជញ្ជូនឈើខុសច្បាប់នៅតែកើតមានយ៉ាងរាលដាលខុសពីអ្វីដែលលោក សាយ សំអាល់ រដ្ឋមន្ត្រីក្រសួងបរិស្ថាន អះអាងថាគ្មានការកាប់ឈើទ្រង់ទ្រាយធំតទៅទៀត។ ប្រជាសហគមន៍ការពារព្រៃឈើបានឲ្យដឹងថា ព្រៃឡង់ក្នុងខេត្តស្ទឹងត្រែង កំពុងតែប្រឈមនឹងការបំផ្លាញយ៉ាងមហន្តរាយ ហើយសូម្បីតែព្រៃសហគមន៍របស់ជនជាតិដើមភាគតិចកួយក្នុងខេត្តស្ទឹងត្រែង ក៏កំពុងប្រឈមនឹងការបំផ្លាញយ៉ាងពេញបន្ទុកដែរ។ ដូច្នេះលោក សាយ សំអាល់ រដ្ឋមន្ត្រីក្រសួងបរិស្ថាន គួរចាត់វិធានការទប់ស្កាត់ជាបន្ទាន់ព្រោះមន្ត្រីបរិស្ថានទទួលបន្ទុកការពារព្រៃឡង់ ពុំមានលទ្ធភាពក្នុងការទប់ស្កាត់បទល្មើសកាប់ឈើដែលកំពុងកើតឡើងយ៉ាងអនាធិបតេយ្យនោះទេ។

មន្ត្រីអង្គការក្រៅរដ្ឋាភិបាលបានឲ្យដឹងថា ព្រៃឡង់ក្នុងទឹកដីខេត្តស្ទឹងត្រែង កំពុងប្រឈមនឹងការបំផ្លាញយ៉ាងពេញបន្ទុកពីក្រុមជនល្មើសដែលមានការឃុបឃិតជាមួយមន្ត្រីជំនាញ និងសមត្ថកិច្ចពាក់ព័ន្ធដទៃទៀត។ អ្នកមានលុយ អ្នកមានអំណាច មួយចំនួនបានកាប់ព្រៃឡង់ទន្ទ្រានយកធ្វើជាកម្មសិទ្ធិដោយគ្មានញញើតអ្វីទាំងអស់ ជាពិសេសនៅចំណុចអន្លង់ក្រមួន ស្រុកថាឡាបរិវ៉ាត់ ខេត្តស្ទឹងត្រែង។ តំណាងសហគមន៍ជនជាតិដើមភាគតិចបានឲ្យដឹងថា បទបញ្ជារបស់លោកនាយករដ្ឋមន្ត្រី ហ៊ុន សែន ក្នុងការទប់ស្កាត់បទល្មើសបំផ្លាញព្រៃឈើ គឺពុំមានប្រសិទ្ធភាពនោះទេព្រោះមន្ត្រីថ្នាក់ក្រោមមិនអនុវត្តន៍តាមបទបញ្ជារបស់ប្រមុខរាជរដ្ឋាភិបាលឡើយ។ ផ្ទុយទៅវិញមន្ត្រីជំនាញពាក់ព័ន្ធដូចជា មន្ត្រីបរិស្ថាន មន្ត្រីរដ្ឋបាលព្រៃឈើ និងមន្ត្រីអាជ្ញាធរ កំពុងឃុបឃិតគ្នាជាប្រព័ន្ធដើម្បីទទួលផលប្រយោជន៍ពីក្រុមជនល្មើសកាប់ឈើ ក៏ដូចជាពីក្រុមជនល្មើសទន្ទ្រានកាន់កាប់ដីព្រៃរបស់រដ្ឋយកធ្វើជាកម្មសិទ្ធិ។

តាមការអះអាងរបស់ជនជាតិដើមភាគតិចកួយរស់នៅឃុំស្រែប្ញស្សី ស្រុកថាឡាបរិវ៉ាត់ ខេត្តស្ទឹងត្រែង បានឲ្យដឹងថាដីព្រៃឈើក្នុងមូលដ្ឋានរបស់ពួកគាត់រាប់ពាន់ហិកតាត្រូវក្រុមជនល្មើសទន្ទ្រានកាន់កាប់យកធ្វើជាកម្មសិទ្ធិ ហើយប្រើគ្រឿងចក្រឈូសឆាយបំផ្លាញព្រៃឈើដោយគ្មានញញើតអ្វីទាំងអស់។ តំណាងជនជាតិដើមភាគតិចកួយក្នុងឃុំស្រែប្ញស្សី បានឲ្យដឹងទៀតថា កន្លងមកព្រៃឈើមានប្រយោជន៍ខ្លាំងណាស់សម្រាប់ទ្រទ្រង់ជីវភាពរស់នៅរបស់ពួកគាត់ដូចជា រកឃ្មុំ ដងជ័រទឹក ដាក់អន្ទាក់សត្វ បេះបន្លែផ្លែឈើ រកវ័ល្លិ៍ និងរកថ្នាំបុរាណជាច្រើនប្រភេទ។ ប៉ុន្តែឥឡូវនេះព្រៃឈើក្នុងមូលដ្ឋានរបស់ពួកគាត់ត្រូវរងការបំផ្លាញជាបន្តបន្ទាប់ ហើយនាយខណ្ឌរដ្ឋបាលព្រៃឈើខេត្តស្ទឹងត្រែង លោក ឈាង តុលា និងប្រធានមន្ទីរបរិស្ថានខេត្ត មិនចាត់វិធានការទប់ស្កាត់បទល្មើសឲ្យបានទាន់ពេលវេលានោះទេ។ ហេតុនេះហើយទើបមានការអំពាវនាវឲ្យលោក សាយ សំអាល់ រដ្ឋមន្ត្រីក្រសួងបរិស្ថាន ចុះពិនិត្យដល់កន្លែងកើតមានបទល្មើសព្រៃឈើតែម្តងចៀសវាងជឿតាមរបាយការណ៍ភូតភររបស់មន្ត្រីថា្នក់ក្រោម៕

បទល្មើសកាប់ឈើក្នុងតំបន់ព្រៃការពារ និងព្រៃអភិរក្សនៅតែកើតឡើងយ៉ាងពេញបន្ទុក

noreply@blogger.com (Sotheavy royals) — Mon, 29 Aug 2016 06:09:00 -0700

ថ្ងៃទី២៩ ខែសីហា ឆ្នាំ២០១៦

ប្រភពៈ មនសិការខ្មែរ

កាលពីថ្ងៃទី២២ ខែសីហា ឆ្នាំ២០១៦ ក្នុងវេទិកាស្ដីពីការការពារនិងអភិរក្សធនធានធម្មជាតិ លោកនាយករដ្ឋមន្ត្រី ហ៊ុន សែន បានដាក់ចេញនូវវិធានការយ៉ាងច្បាស់លាស់ដើម្បីការពារព្រៃឈើដែលនៅសេសសល់ឲ្យគង់វង្យយូរអង្វែងតទៅទៀត។ ក៏ប៉ុន្តែសកម្មជនព្រៃឈើ និងមន្ត្រីអង្គការក្រៅរដ្ឋាភិបាលបានកត់សម្គាល់ថា ក្រោយពេលលោកនាយករដ្ឋមន្ត្រី ហ៊ុន សែន ដាក់ចេញវិធានការកាលពីថ្ងៃទី២២ ខែសីហា ឆ្នាំ២០១៦នោះ គឺបទល្មើសកាប់ឈើនិងដឹកជញ្ជូនឈើខុសច្បាប់ក្នុងតំបន់ការពារ តំបន់អភិរក្ស នៅតែកើតឡើងយ៉ាងរាលដាល ហើយមិនឃើញមានមន្ត្រីជំនាញ និងសមត្ថកិច្ចពាក់ព័ន្ធចាត់វិធានការបង្ក្រាបបទល្មើសប្រកបដោយប្រសិទ្ធភាពនៅឡើយទេ។

សេចក្ដីរាយការណ៍ពីប្រជាសហគមន៍ការពារព្រៃឈើក្នុងស្រុកជ័យសែន និងស្រុកឆែប ខេត្តព្រះវិហារ បានឲ្យដឹងថាព្រៃឡង់ក្នុងមូលដ្ឋានរបស់ពួកគាត់នៅតែប្រឈមនឹងការបំផ្លាញយ៉ាងពេញបន្ទុក ព្រោះមន្ត្រីបរិស្ថាន និងមន្ត្រីរដ្ឋបាលព្រៃឈើក្នុងខេត្តព្រះវិហារ មិនចាត់វិធានការទប់ស្កាត់បទល្មើសឡើយ។ មន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសបំផ្លាញធនធានធម្មជាតិក្នុងខេត្តព្រះវិហារ បានឲ្យដឹងថា បទបញ្ជាលោកនាយករដ្ឋមន្ត្រី ហ៊ុន សែន មិនបានធ្វើឲ្យមន្ត្រីរដ្ឋបាលព្រៃឈើ និងមន្ត្រីបរិស្ថាន យកចិត្តទុកដាក់អនុវត្តន៍តាមនោះទេ។ ជាងនេះទៅទៀតឈ្មួញកាប់ឈើនិងដឹកជញ្ជូនឈើខុសច្បាប់មិនខ្វល់ពីបទបញ្ជាឬវិធានការបង្ក្រាបរបស់រដ្ឋាភិបាលលោក ហ៊ុន សែន ឡើយព្រោះកន្លងមករាល់បទបញ្ជានិងវិធានការទាំងនោះក្លាយទៅជារឿងឥតន័យខ្លឹមសារ។

ប្រជាសហគមន៍ការពារព្រៃឈើក្នុងខេត្តស្ទឹងត្រែង ក៏បានលើកឡើងដែរថា ព្រៃឡង់ក្នុងស្រុកថាឡាបរិវ៉ាត់ នៅតែប្រឈមនឹងការកាប់បំផ្លាញយ៉ាងមហន្តរាយ ហើយសិប្បកម្មកែច្នៃឈើនិងរោងម៉ាស៊ីនអារឈើខុសច្បាប់នៅតែបន្តកើតមានឥតឈប់ឈរ។ មិនតែប៉ុណ្ណោះឈ្មួញរកស៊ីជួញដូរឈើខុសច្បាប់ ក៏ដូចជាមន្ត្រីពាក់ព័ន្ធហាក់ដូចជាបង្ហាញនូវភាពក្រអឺតក្រទមជាងមុនក្នុងការកាប់ឈើនិងដឹកជញ្ជូនឈើខុសច្បាប់ ពួកគេគ្មានញញើតអ្វីទាំងអស់។ លើសនេះទៅទៀតឈ្មួញមួយចំនួនក្នុងខេត្តរតនគិរី មណ្ឌលគិរី ស្ទឹងត្រែង ព្រះវិហារ កំពង់ធំ ឧត្ដរមានជ័យ ពោធិ៍សាត់ និងកំពង់ស្ពឺជាដើម នៅតែដឹកជញ្ជូនឈើយ៉ាងគគ្រឹកគគ្រេងដោយមានការបើកដៃពីសមត្ថកិច្ចពុករលួយ។

នៅក្នុងខេត្តពោធិ៍សាត់ថ្មីៗនេះ ប្រជាពលរដ្ឋក្នុងស្រុកភ្នំក្រវាញ និងស្រុកវាលវែង បានរាយការណ៍ថា បទល្មើសកាប់ឈើប្រណីតនិងឈើលេខ១នៅក្នុងតំបន់អភិរក្សជួរភ្នំក្រវាញ កំពុងកើតឡើងយ៉ាងអនាធិបតេយ្យ ហើយមន្ត្រីបរិស្ថាន ជាអ្នកទទួលខុសត្រូវធំជាងគេ។ នៅតំបន់ដែនជម្រកសត្វព្រៃភ្នំឱរ៉ាល់ ខេត្តកំពង់ស្ពឺ ក៏មានបទល្មើសកាប់ឈើនិងដឹកជញ្ជូនឈើយកទៅលក់នៅស្រុកយួនយ៉ាងពេញបន្ទុកដែរ ដោយគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការតាមបទបញ្ជារបស់លោកនាយករដ្ឋមន្ត្រី ហ៊ុន សែន ឡើយ។ ហេតុនេះលោកនាយករដ្ឋមន្ត្រី ហ៊ុន សែន គួរពិនិត្យមើលឡើងវិញចំពោះបទល្មើសកាប់ឈើនិងដឹកជញ្ជូនឈើខុសច្បាប់ដែលកំពុងកើតឡើងឥតឈប់ឈរដោយមានការឃុបឃិតជាប្រព័ន្ធរវាងឈ្មួញខិលខូច និងមន្ត្រីពុករលួយជាច្រើនស្ថាប័ន៕

សហគមន៍ព្នងរំពឹងថានឹងមានជីវភាពធូរធារបន្ទាប់ពីក្រុមហ៊ុនអាមេរិកទិញឥណទានកាបូន

noreply@blogger.com (Sotheavy royals) — Mon, 29 Aug 2016 05:46:00 -0700

ថ្ងៃច័ន្ទ, ២៩ សីហា ២០១៦

ដោយ: ប្រាជ្ញ ចេវ (RFA)

ប្រជាសហគមន៍ដែលភាគច្រើនគឺជាជនជាតិដើមភាគតិចព្នង ជាអ្នកការពារអភិរក្ស និងអាស្រ័យផលពីជម្រកសត្វព្រៃកែវសីមា រំពឹងថា ពួកគេនឹងមានជីវភាពធូរធារជាងមុន បន្ទាប់ពីត្រូវបានក្រុមហ៊ុនរបស់សហរដ្ឋអាមេរិកមួយឈ្មោះ ឌីសនី (Disney) សម្រេចទិញឥណទានកាបូនដែលមាននៅក្នុងតំបន់ព្រៃឈើមួយនេះ។

ដែនជម្រកសត្វព្រៃកែវសីមា មានផ្ទៃជិត ៣០ម៉ឺនហិកតារ គ្របដណ្ដប់ក្នុងឃុំចំនួន៤ ក្នុងស្រុកកែវសីមា ខេត្តមណ្ឌលគិរី។ តើកិច្ចព្រមព្រៀងឥណទានកាបូនពិតជាបានផ្តល់ប្រយោជន៍ដល់ពលរដ្ឋនៅក្នុងតំបន់នោះមែនទេ?

«សំឡេងទឹកហូរ និងសត្វព្រៃ»

លោក ធឿន ស្រូវ ជាជនជាតិដើមភាគតិចព្នង រស់នៅភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី លោកជាប្រជាសហគមន៍ម្នាក់ក្នុងចំណោមប្រជាសហគមន៍ផ្សេងទៀតដែលបានចូលរួមការពារដែនជម្រកសត្វព្រៃកែវសីមា។

មានអាយុ ៤៦ឆ្នាំ បុរសមានមាឌមាំសម្បុរខ្មៅស្រអែម ពាក់អាវពណ៌ខៀវក្រមៅ មានអាវក្រៅពណ៌ត្រួយចេក លោក ធឿន ស្រូវ តែងពាក់អាវនេះជូនភ្ញៀវចូលព្រៃ។ ស្ពាយបង្វេចអីវ៉ាន់នៅពីក្រោយ និងមានទាំងទឹកទុកផងនោះ លោកត្រូវទៅដល់ព្រៃកន្លែងមើលសត្វព្រៃប្រមាណម៉ោង ៥ព្រឹក ចំណែកភ្ញៀវទេសចរក៏ត្រូវទៅដល់កន្លែងដើម្បីតាមមើលសត្វទោច ស្វា និងស្វាកន្ទុយស ហើយស្វាកន្ទុយស ជាសត្វកម្រដែលមាននៅក្នុងដែនជម្រកមួយនេះ៖ «»។

លោក ធឿន ស្រូវ បានស្ម័គ្រចិត្តចូលបម្រើការងារជាអ្នកស្រាវជ្រាវសត្វទោចនៅសមាគមអភិរក្សសត្វព្រៃនៅកម្ពុជា (WCS) កាលពីឆ្នាំ២០១៣ ក្រៅពីជូនភ្ញៀវចូលព្រៃ។ លោកមានតួនាទីផ្សាំងសត្វទោច សត្វស្វា កុំឲ្យសត្វផ្អើលពេលឃើញមនុស្ស។ លោកពន្យល់ថា ការផ្សាំងសត្វ គឺលោកត្រូវទៅឈរក្បែរសត្វ មិនធ្វើឲ្យសត្វភ័យខ្លាច ហើយពាក់អាវពណ៌ដដែលពេលទៅម្តងៗ ដើម្បីឲ្យសត្វចំណាំ។

ការងារនេះ ផ្តល់កម្រៃឲ្យលោកក្នុងមួយខែប្រមាណ ២០ម៉ឺនរៀល។ ក្រៅពីនេះ លោកទទួលបានប្រាក់ ៥ម៉ឺនរៀល នៅពេលជូនភ្ញៀវទេសចរចូលព្រៃឡើងភ្នំម្តងៗ។ លោក ធឿន ស្រូវ ថាភ្ញៀវទេសចរទៅតំបន់នេះភាគច្រើនគឺជនបរទេស លោកមិនចេះភាសាអង់គ្លេសទេ ដូច្នេះត្រូវមានអ្នកប្រែភាសាម្នាក់ទៀតទៅអមជាមួយលោក៖ «»។

ទំនេរពីការនាំភ្ញៀវចូលព្រៃ លោក ធឿន ស្រូវ ធ្វើស្រែធ្វើចម្ការដូចពលរដ្ឋផ្សេងទៀតដែរ ចំណែកភរិយារបស់លោក លក់ដូរគ្រឿងទេស ឬចាប់ហួយនៅផ្ទះ។ បុរសជនជាតិដើមភាគតិចរូបនេះ យល់ថា ព្រៃឈើមានសារសំខាន់សម្រាប់ការរស់នៅយូរអង្វែង និងប្ដេជ្ញាធ្វើសកម្មភាពការពារព្រៃឈើដដែល។

បន្ទាប់ពីមានការប្រកាសទិញកាបូនពីដែនជម្រកកែវសីមា ពីក្រុមហ៊ុន ឌីសនី កាលពីពេលថ្មីៗនេះ ធ្វើឲ្យពលរដ្ឋមួយចំនួនងឿងឆ្ងល់ពីការលក់កាបូននេះមានន័យយ៉ាងម៉េច និងចោទសួរថា ពាណិជ្ជកម្មកាបូននេះប៉ះពាល់ដល់ព្រៃ ឬក៏ជួយការពារព្រៃឈើយ៉ាងណានោះ?

ស្រដៀងគ្នានេះដែរ លោក ធឿន ស្រូវ ក៏មិនសូវដឹងច្បាស់ពីឥណទាននេះដែរ គ្រាន់តែលោកដឹងថា លក់កាបូន គឺលក់ខ្យល់បានពីព្រៃឈើដោយមិនចាំបាច់កាប់បំផ្លាញព្រៃឈើ៖ «»។

ទាក់ទងរឿងនេះ អ្នកជំនាញបរិស្ថានពន្យល់ថា ជាការព្រមព្រៀងផ្តល់ថវិការវាងប្រទេសបណ្ដាប្រទេសអភិវឌ្ឍន៍ខ្លាំង ហើយការអភិវឌ្ឍនោះធ្វើឲ្យប៉ះពាល់ដល់បរិស្ថានតាមរយៈផ្សែងពុល ផ្តល់ថវិកានោះមកប្រទេសដែលការពារព្រៃឈើ។ សមាគមអភិរក្សសត្វព្រៃនៅកម្ពុជា ហៅកាត់ថា ដាប៊លយូ.ស៊ី.អេស (WCS) បានធ្វើការងារទាក់ទងគម្រោងរេដបូក (Redd+) នៅដែនជម្រកសត្វព្រៃកែវសីមាបានជិត ៧ឆ្នាំមកហើយ។

បុគ្គលិកផ្នែកទេសចរណ៍ធម្មជាតិនៃអង្គការ WCS លោក ខាង សឿង ប្រាប់ថា សព្វថ្ងៃនៅក្នុងគម្រោងរបស់លោក បង្រៀនប្រជាសហគមន៍នៅក្នុងភូមិឲ្យចេះនាំភ្ញៀវ អ្នកស្រាវជ្រាវសត្វទោច ចុងភៅ អ្នកយាម និងអ្នកសម្អាត ដែលក្រុមទាំងនេះផ្តល់សេវាដល់ភ្ញៀវទេសចរ។ លោកថា នេះជាគម្រោងទីមួយនៃផែនការអភិរក្សដែនជម្រកកែវសីមា។ នៅពេលនេះមានពលរដ្ឋជាង ២០០នាក់ចូលរួម ថវិកាទ្រទ្រង់សកម្មភាពការងារដំបូង អង្គការជាអ្នកផ្តល់ឲ្យ បន្ទាប់ពីមានប្រាក់តម្កល់ ប្រជាសហគមន៍ជាអ្នកទទួលខុសត្រូវខ្លួនឯង៖ «»។

ការអនុវត្តគម្រោងភូមិអណ្ដូងក្រឡឹង ជាភូមិមួយនៅក្នុងដែនជម្រកសត្វព្រៃកែវសីមា មានសង់រានហាលអង្គុយលំហែ រោងសម្រាប់ភ្ញៀវស្នាក់។ ថវិកាដែលទទួលបានពីភ្ញៀវនៃការផ្តល់សេវានេះ ទុកសម្រាប់ការប្រើប្រាស់នៅក្នុងសហគមន៍។

អ្នកការពារព្រៃឈើម្នាក់ទៀត លោក ជិ រញើប មិនទាមទារថវិកាបានពីការលក់កាបូនយកចែកពលរដ្ឋនោះទេ ប៉ុន្តែទាមទារឲ្យមានការអភិវឌ្ឍនៅមូលដ្ឋានរបស់លោក។ លោកស្នើឲ្យយកថវិកាដែលទទួលបាននេះ កែច្នៃព្រៃឈើនៅក្នុងសហគមន៍របស់លោកក្លាយទៅជាតំបន់អេកូទេសចរណ៍៖ «»។

កាលពីថ្ងៃទី១១ ខែសីហា ពិធីចុះហត្ថលេខាជាប្រវត្តិសាស្ត្រមួយបានកើតឡើង។ ក្រុមហ៊ុន ឌីសនី (Disney) របស់សហរដ្ឋអាមេរិក សម្រេចចុះហត្ថលេខាទិញកាបូន រេដបូក (Carbon Redd+) នៅដែនជម្រកសត្វព្រៃកែវសីមាចំនួន ២,៦លានដុល្លារពីរដ្ឋាភិបាលកម្ពុជា តាមរយៈក្រសួងបរិស្ថាន ក្នុងកិច្ចសន្យារយៈពេលពីរឆ្នាំ។ រដ្ឋមន្ត្រីក្រសួងបរិស្ថាន លោក សាយ សំអាល់ ប្រកាសដាក់ជីវិតនយោបាយដើម្បីអនុវត្តលើគម្រោងនេះឲ្យជោគជ័យ។

ក្រោយមានកិច្ចព្រមព្រៀងនេះ អ្នកធ្វើការងារទាក់ទងដែនជម្រករួមមាន មន្ត្រីក្រសួងបរិស្ថាន មន្ត្រីនៃអង្គការអភិរក្សសត្វព្រៃកម្ពុជា បានជួបប្រជុំជាមួយប្រជាសហគមន៍ជនជាតិដើមភាគតិចព្នង ចំនួន ២០សហគមន៍ ស្ថិតក្នុងដែនជម្រកសត្វព្រៃកែវសីមា នាខេត្តមណ្ឌលគិរី ដើម្បីបន្តសកម្មភាពកិច្ចការជីវចម្រុះតំបន់ និងការយកថវិកាពីការលក់ឥណទានកាបូន មកអភិវឌ្ឍភូមិ-ឃុំនៅក្នុងតំបន់ដែនជម្រកសត្វព្រៃមួយនេះ។

មន្ត្រីគម្រោងដែនជម្រកសត្វព្រៃកែវសីមា នៃក្រសួងបរិស្ថាន លោក គង់ ពុទ្ធីរ៉ា ឲ្យដឹងថា ថវិកាដែលបានពីការលក់ឥណទានកាបូនចំនួន ៥០ភាគរយនៃថវិកាសរុប ត្រូវផ្តល់ទៅប្រជាសហគមន៍នៅមូលដ្ឋានក្រោមរូបភាពពីរ គឺការអភិរក្សដែនជម្រក និងអភិវឌ្ឍភូមិ-ឃុំនៅដែនជម្រក។ លោកថា អ្នកជំនាញរេដបូករបស់ WCS លោក យាង ដូណាល់ ប្រាប់ថា តំបន់ការពារព្រៃឈើនេះ ដើម្បីគណនាកាបូន ត្រូវវាស់វែងឈើងាប់ឈើរស់ឈើឈរ និងកម្ពស់ឈើ។ លោកថា ការផ្ទុកកាបូនអាស្រ័យទៅលើប្រភេទព្រៃ តាមការប៉ាន់ស្មាន ព្រៃស្រោងមានផ្ទុកកាបូន ៧០០តោនក្នុងមួយហិកតារ ព្រៃរបោះផ្ទុកកាបូនពី ២០០ ទៅ ៣០០តោនក្នុងមួយហិកតារ៖ «»។

គិតពីឆ្នាំ២០១០ ដល់ឆ្នាំ២០១៥ មានកាបូនទាំងអស់ជាង ៥លានតោន។ ការវាយតម្លៃចំនួនកាបូន ត្រូវធ្វើឡើងប្រាំឆ្នាំម្តង ដោយក្រុមហ៊ុនអន្តរជាតិដែលមានជំនាញលើរឿងនេះ។ កាបូនអាចកើន ឬថយចុះ អាស្រ័យលើការការពារព្រៃឈើ ឬការបំផ្លាញព្រៃឈើ។

អ្នកជំនាញរេដបូករបស់ WCS លោក យាង ដូណាល់ ឲ្យដឹងទៀតថា មុននឹងមានការសម្រេចទិញឥណទានកាបូនពីក្រុមហ៊ុន ឌីសនី មានបុគ្គលិកក្រុមហ៊ុននេះចុះមកពិនិត្យវាយតម្លៃផ្ទាល់នៅដែនជម្រកកែវសីមា។ លោកថា ក្រុមហ៊ុន ឌីសនី ទិញឥណទានកាបូនរយៈពេលពីរឆ្នាំ គឺពីឆ្នាំ២០១៧ ដល់ឆ្នាំ២០១៨ ត្រឹមកាបូន ៣៦៥.០០០តោន ដែលចំនួននេះមិនទាន់ស្មើពាក់កណ្ដាលនៃចំនួនកាបូនដែលមានសព្វថ្ងៃនៅដែនជម្រកកែវសីមា។

ដែនជម្រកសត្វព្រៃកែវសីមា មានផ្ទៃជិត ៣០ម៉ឺនហិកតារ គ្របដណ្ដប់ក្នុងឃុំចំនួន៤ ក្នុងស្រុកកែវសីមា ខេត្តមណ្ឌលគិរី សម្បូរដោយប្រភេទព្រៃផ្សេងៗរួមមាន ព្រៃស្រោង ពាក់កណ្ដាលស្រោង ព្រៃរបោះ តំបន់វាលស្មៅ។

កត្តាទាំងនោះហើយធ្វើឲ្យតំបន់នេះសម្បូរសត្វព្រៃ និងសត្វព្រៃកម្រ ដូចជា ដំរីអាស៊ី ខ្លារខិន ទន្សោង ខ្ទីង ត្រយងយក្ស កង្កែបអូររាំង ស្វាកន្ទុយស និងទទាទ្រូងលឿង ជាដើម។ កត្តាពិសេសមួយទៀត ពលរដ្ឋរស់នៅតំបន់នេះជាជនជាតិដើមភាគតិចព្នង ដែលជាសហគមន៍រស់នៅអាស្រ័យលើព្រៃឈើ។

«សំឡេងសត្វយំ និងទឹកហូរ»

ទាក់ទងការអភិវឌ្ឍសហគមន៍នេះដែរ ក្រុមពលរដ្ឋជាអ្នកល្បាតនៅមូលដ្ឋាន រំពឹងថា ថវិកាបានពីការលក់ឥណទានកាបូន នឹងជួយធ្វើឲ្យជីវភាពពួកគាត់កាន់តែប្រសើរ តាមរយៈការបង្រៀនបច្ចេកទេសចិញ្ចឹមសត្វ ដាំបន្លែ និងតភ្ជាប់ផ្លូវ ភ្លើង សាលារៀន មកដល់មូលដ្ឋានរបស់ពួកគេ៕

មេឈ្មួញ ធី ប្ញទ្ធិសី នៅតែមានអំណាចក្នុងការកាប់ឈើនិងដឹកជញ្ជូនឈើខុសច្បាប់តាមអំពើចិត្ត

noreply@blogger.com (Sotheavy royals) — Fri, 26 Aug 2016 20:09:00 -0700

ថ្ងៃសុក្រ, ២៦ សីហា ២០១៦

ដោយ មនសិការខ្មែរ

មន្ត្រីអាជ្ញាធរ និងសមត្ថកិច្ចពាក់ព័ន្ធមួយចំនួនបានឲ្យដឹងថា មកដល់ពេលនេះមេឈ្មួញ ធី ប្ញទ្ធិសី ដែលជាអតីតកូនជឹងរបស់ឧកញ៉ា លឹម ប៊ុណ្ណា ហៅខ្នា នៅតែមានអំណាចយ៉ាងធំធេងក្នុងការកាប់ឈើនិងដឹកជញ្ជូនឈើទៅស្រុកយួនដោយគ្មានសមត្ថកិច្ចណាបង្ក្រាបឡើយ។ មន្ត្រីរដ្ឋបាលព្រៃឈើក្នុងខេត្តរតនគិរី និងខេត្តមណ្ឌលគិរី បានចាត់ទុកមេឈ្មួញ ធី ប្ញទ្ធិសី ជាប្រភពចំណូលរបស់ខ្លួនទើបគេបណ្ដោយឲ្យឈ្មួញរូបនេះធ្វើអ្វីៗតាមអំពើចិត្ត ដើម្បីជាថ្នូរនឹងផលប្រយោជន៍។ ហេតុនេះហើយទើបបទល្មើសកាប់ឈើប្រណីតនិងឈើប្រភេទលេខ១ក្នុងតំបន់ដែនជម្រកសត្វព្រៃលំផាត់ តំបន់ព្រៃអភិរក្ស ព្រៃការពារ និងឧទ្យានជាតិក្នុងខេត្តរតនគិរី នៅតែបន្តកើតឡើងយ៉ាងគគ្រឹកគគ្រេង។

មន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសបំផ្លាញព្រៃឈើក្នុងខេត្តរតនគិរី បានឲ្យដឹងថាមេឈ្មួញ ធី ប្ញទ្ធិសី ចាប់ផ្ដើមធ្វើសកម្មភាពខ្លាំងក្លាឡើងវិញកាលពីដើមខែសីហា ហើយមកដល់ពេលនេះមិនទាន់មានមន្ត្រីជំនាញ ឬសមត្ថកិច្ចពាក់ព័ន្ធណាចាត់វិធានការបង្ក្រាបឡើយ។ ហេតុនេះហើយទើបប្រជាពលរដ្ឋនៅក្នុងស្រុកលំផាត់ ខេត្តរតនគិរី ព្រួយបារម្ភយ៉ាងខ្លាំងពីសេចក្ដីវិនាសព្រៃឈើក្នុងមូលដ្ឋានរបស់ពួកគាត់ ព្រោះមេឈ្មួញ ធី ប្ញទ្ធិសី មិនត្រឹមតែកាប់ឈើក្នុងដែនជម្រកសត្វព្រៃលំផាត់ប៉ុណ្ណោះទេ គឺព្រៃសហគមន៍ និងព្រៃការពារ ក៏កំពុងប្រឈមនឹងការបំផ្លាញដែរ។ ទន្ទឹមនឹងនេះមេឈ្មួញ ធី ប្ញទ្ធិសី បានប្រើរថយន្តយីឌុបមិនតិចជាង១០គ្រឿងដើម្បីដឹកឈើចែកចាយតាមដេប៉ូក្នុងខេត្តរតនគិរី និងដេប៉ូឈើតាមបណ្ដាខេត្តនានាដោយមានការសម្របសម្រួលពីក្រុមមន្ត្រីពុករលួយយ៉ាងរលូន។

សមត្ថកិច្ចតូចតាចនៅក្នុងខេត្តរនតគិរី បានឲ្យដឹងថា នាយកដែនជម្រកសត្វព្រៃលំផាត់ ក៏ដូចជាលោក ហុង សុវណ្ណរាន នាយផ្នែករដ្ឋបាលព្រៃឈើគ្រប់គ្រង៣ស្រុក-ក្រុង គឺស្រុកលំផាត់ ស្រុកកូនមុំ និងក្រុងបានលុង គឺជាអ្នកបើកដៃឲ្យមេឈ្មួញ ធី ប្ញទ្ធិសី កាប់ឈើនិងដឹកជញ្ជូនឈើចេញពីស្រុកលំផាត់យ៉ាងរលូនដើម្បីជាថ្នូរនឹងផលប្រយោជន៍។ បញ្ហានេះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ក៏ដូចជាលោក សាយ សំអាល់ រដ្ឋមន្ត្រីក្រសួងបរិស្ថាន គួរចាត់វិធានការទប់ស្កាត់ជាបន្ទាន់ ព្រោះព្រៃឈើក្នុងដែនជម្រកសត្វព្រៃស្រុកលំផាត់ ក៏ដូចជាព្រៃសហគមន៍ និងព្រៃការពារក្នុងស្រុកនេះ កំពុងត្រូវបានមេឈ្មួញ ធី ប្ញទ្ធិសី កាប់បំផ្លាញនិងដឹកជញ្ជូនធ្វើអាជីវកម្មយ៉ាងក្រអឺតក្រទមបំផុត។ ដូច្នេះប្រសិនបើមន្ត្រីជាន់ខ្ពស់នៅក្រសួងកសិកម្ម និងក្រសួងបរិស្ថាន គ្មានពាក់ព័ន្ធបញ្ហាផលប្រយោជន៍ជាមួយឧកញ៉ាវ័យក្មេងគឺមេឈ្មួញ ធី ប្ញទ្ធិសី គួរចាត់វិធានការទប់ស្កាត់ជាបន្ទាន់កុំឲ្យបទល្មើសព្រៃឈើក្នុងខេត្តរតនគិរី បន្តកើតមានយ៉ាងរាលដាលតទៅទៀត៕

ទាល់តែ ជិតដាច់ពូជទើបខំប្រឹង............អនិច្ចា ឈើ គ្រញូង

noreply@blogger.com (Sotheavy royals) — Sat, 20 Aug 2016 07:22:00 -0700

ថ្ងៃសៅរ៏, ២០ សីហា ២០១៦ _RFA

ដោយ ហង្ស សាវយុត

បច្ចុប្បន្ននេះ នៅប្រទេសកម្ពុជា ក៏ដូចជាប្រទេសថៃ និងវៀតណាម គឺគ្រាប់ពូជឈើគ្រញូងមានតម្លៃថ្លៃបំផុត ដោយ ១គីឡូក្រាមយ៉ាងហោចណាស់ក៏ថ្លៃពី ៣០០ ទៅជិត ៤០០ដុល្លារអាមេរិកដែរ។ ការលក់គ្រាប់ពូជយ៉ាងថ្លៃដូចនេះ ដោយសារតែប្រភេទឈើគ្រញូង បានវិនាសផុតពូជស្ទើរតែទាំងស្រុង បន្ទាប់ពីជាង ៥-៦ឆ្នាំជាប់ៗគ្នាមកហើយ ប្រទេសចិន បានប្រមូលទិញប្រភេទឈើទាំងនោះ ដោយយកទាំងឫស ទាំងគល់គ្មានសល់ រហូតធ្វើឱ្យពលរដ្ឋខ្មែរជាច្រើនបានគ្រោះថ្នាក់ដល់ជីវិតក្នុងពេលឆ្លងដែនទៅកាប់ឈើគ្រញូងខុសច្បាប់ក្នុងទឹកដីថៃ ទៀតផង។

តើពេលនេះប្រទេសកម្ពុជា រកគ្រាប់ឈើគ្រញូងមកពីណាដើម្បីដាំដុះឱ្យកូនខ្មែរជំនាន់ក្រោយបានស្គាល់វាបន្តទៀត?

សង្កាត់រដ្ឋបាលព្រៃឈើកន្ទួតខ្នាក្រៅ គឺជាអង្គភាពការពារព្រៃឈើមួយដែលស្ថិតនៅក្នុងឃុំខ្នារង្វះ ស្រុកបន្ទាយស្រី ចម្ងាយជាង ៤០គីឡូម៉ែត្រ ភាគខាងជើងឆៀងខាងលិចពីទីរួមខេត្តសៀមរាប។

មន្ត្រីរដ្ឋបាលព្រៃឈើទីនោះ កំពុងទទួលខុសត្រូវយ៉ាងធ្ងន់ធ្ងរលើកិច្ចការពារ និងអភិរក្សដើមគ្រញូងពូជ ដែលនៅសេសសល់ចុងក្រោយបំផុតចំនួនជាង ៥៧០ដើម ដែលដុះនៅលើផ្ទៃដីអភិរក្សទំហំជាង ៥០ហិកតារ។

នាយរងសង្កាត់រដ្ឋបាលព្រៃឈើកន្ទួតខ្នាក្រៅ គឺលោក ហង្ស ជំនិតរិទ្ធី។ លោកមានប្រសាសន៍ថា បច្ចុប្បន្ននៅប្រទេសកម្ពុជា ស្ទើរតែបាត់បង់ឈើគ្រញូងទាំងស្រុង ក៏ប៉ុន្តែនៅក្នុងសង្កាត់រដ្ឋបាលព្រៃឈើរបស់លោក គឺនៅមានសេសសល់ពូជគ្រញូងចុងក្រោយដែលរូបលោក ក៏ដូចជាក្រុមដើរល្បាតកំពុងប្រឹងប្រែងការពារទាំងយប់ទាំងថ្ងៃ។ វាជាការពិបាកបំផុតទៅលើកិច្ចការពារដើមឈើគ្រញូងដែលមានទំហំមុខធំៗ ពីព្រោះតែបច្ចុប្បន្ន ក្រុមឈ្មួញដែលជួញដូរឈើគ្រញូងនៅមិនទាន់បោះបង់ចោលមុខរបររបស់ពួកគេនៅឡើយ ហើយពួកគេតែងតែប្រាថ្នាចង់បានដើមឈើប្រភេទនោះ ពីព្រោះវាមានតម្លៃខ្ពស់រហូតដល់ទៅរាប់ម៉ឺនដុល្លារអាមេរិកក្នុង ១ដើម។

លោក ហង្ស ជំនិតរិទ្ធី បញ្ជាក់ថា ដើមគ្រញូងធំៗ ដែលនៅសេសសល់ចុងក្រោយក្នុងសង្កាត់របស់លោកនេះ គឺជាក្ដីសង្ឃឹមឡើងវិញសម្រាប់ជួយប្រទេសកម្ពុជា ឱ្យអាចយកគ្រាប់ពូជទៅបណ្ដុះចែកចាយតាមបណ្ដាខេត្តជាច្រើនទៀតឱ្យយកវាទៅដាំឡើងវិញ៖ «ស្រាវជ្រាវដើម្បីយកគ្រាប់ទៅបណ្ដុះចែកចាយដល់រដ្ឋបាលព្រៃឈើផ្នែកណាដែលអត់មាន ដូចជានៅខេត្តព្រះសីហនុ ខេត្តស្វាយរៀង ក៏ដូចជាបណ្ដាខេត្តខ្លះទៀតដែលគេស្នើសុំ»។

បច្ចុប្បន្ននេះឈើគ្រញូងនៅតែទទួលរងការកាប់បំផ្លាញធ្វើអាជីវកម្មខុសច្បាប់ស្ទើរតែគ្រប់តំបន់ ហើយមួយផ្នែកទៀត ក្រុមឈ្មួញក៏នៅតែជួលពលរដ្ឋខ្មែរឱ្យឆ្លងដែនចូលទៅកាប់ដោយខុសច្បាប់ក្នុងទឹកដីថៃ ហើយដឹកជញ្ជូនយកទៅលក់ឱ្យចិន ដោយឆ្លងកាត់ប្រទេសវៀតណាម ដដែល។

មន្ត្រីរដ្ឋបាលព្រៃឈើក្នុងខេត្តឧត្ដរមានជ័យ ឃុបឃិតឲ្យមានបទល្មើសកាប់ឈើដើម្បីផលប្រយោជន៍ផ្ទាល់ខ្លួន

noreply@blogger.com (Sotheavy royals) — Sat, 20 Aug 2016 07:07:00 -0700

ថ្ងៃសៅរ៏, ២០ សីហា ២០១៦

ដោយ មនសិការខ្មែរ

ប្រជាពលរដ្ឋរស់នៅស្រុកត្រពាំងប្រាសាទ និងស្រុកអន្លង់វែង ខេត្តឧត្ដរមានជ័យ បានឲ្យដឹងថា បច្ចុប្បន្នបទល្មើសកាប់ឈើនិងដឹកជញ្ជូនឈើឆ្លងកាត់មូលដ្ឋានរបស់ពួកគាត់នៅតែកើតឡើងយ៉ាងអនាធិបតេយ្យ ព្រោះមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធមិនអនុវត្តន៍តាមតួនាទីរបស់ខ្លួនឲ្យបានត្រឹមត្រូវនោះទេ។ សេចក្ដីរាយការណ៍ពីប្រជាពលរដ្ឋបានឲ្យដឹងទៀតថា បច្ចុប្បន្នឈើប្រណីតនិងឈើប្រភេទលេខ១ក្នុងតំបន់អភិរក្សគូលែនព្រហ្មទេព នៃស្រុកត្រពាំងប្រាសាទ កំពុងប្រឈមនឹងការបំផ្លាញយ៉ាងពេញបន្ទុក ហើយចៀសមិនផុតពីសេចក្ដីវិនាសនោះឡើយ។

មន្ត្រីអង្គការក្រៅរដ្ឋាភិបាលនិងប្រជាសហគមន៍ការពារព្រៃឈើក្នុងស្រុកត្រពាំងប្រាសាទ បានកត់សម្កាល់ថាយូរៗម្តងទើបមន្ត្រីខណ្ឌរដ្ឋបាលព្រៃឈើខេត្តឧត្ដរមានជ័យ ចាត់វិធានការបង្ក្រាបរថយន្តដឹកឈើខុសច្បាប់ដោយសារម្ចាស់រថយន្តទាំងនោះ មិនបង់លុយតាមការកំណត់។ ប្រសិនបើឈ្មួញដឹកជញ្ជូនឈើ ចេះបែងចែកផលប្រយោជន៍ដល់មន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធដទៃទៀតនោះ អ្វីៗអាចប្រព្រឹត្តទៅដោយរលូនមិនប្រឈមនឹងការបង្ក្រាបឡើយ។ មានន័យថាការដែលមន្ត្រីរដ្ឋបាលព្រៃឈើខេត្តឧត្ដរមានជ័យ បង្ក្រាបរថយន្តយីឌុបដឹកឈើកាលពីទៀបភ្លឺថ្ងៃទី១៩ ខែសីហា ឆ្នាំ២០១៦នោះ គឺដោយសារម្ចាស់រថយន្តដែលជាឈ្មួញឈើឈ្មោះ ឌួង វិចិត្រ ចង់គេចវេះពីការបង់លុយក៏ត្រូវប្រឈមនឹងការបង្ក្រាបយកស្នាដៃតែម្តង។

មន្ត្រីអាជ្ញាធរក្នុងស្រុកត្រពាំងប្រាសាទ បានឲ្យដឹងថា ការដែលបទល្មើសកាប់ឈើនិងដឹកជញ្ជូនឈើចេញពីតំបន់អភិរក្សបរិស្ថានគូលែនព្រហ្មទេព នៅតែបន្តកើតឡើងយ៉ាងអនាធិបតេយ្យ គឺដោយសារមានការបើកដៃពីលោក ខេង សុជាតិ ដែលជាប្រធានតំបន់អភិរក្សគូលែនព្រហ្មទេព ប្រចាំស្រុកត្រពាំងប្រាសាទតែម្តង។ លោក ខេង សុជាតិ មិនត្រឹមតែបើកដៃឲ្យឈ្មួញចូលកាប់ឈើនិងដឹកឈើក្នុងតំបន់អភិរក្សស្រេចតែអំពើចិត្តប៉ុណ្ណោះទេ គឺថែមទាំងបើកដៃឲ្យក្រុមជនល្មើសចូលបរបាញ់សត្វព្រៃក្នុងតំបន់អភិរក្សយ៉ាងមហន្តរាយថែមទៀត។ បញ្ហានេះលោក ស ថាវី អភិបាលខេត្តឧត្តរមានជ័យ ក៏ដូចជានាយខណ្ឌរដ្ឋបាលព្រៃឈើខេត្តឧត្ដរមានជ័យ និងប្រធានមន្ទីរបរិស្ថានខេត្តឧត្ដរមានជ័យ គួរពិនិត្យឡើងវិញជាបន្ទាន់ព្រោះលោក ខេង សុជាតិ ប្រធានតំបន់អភិរក្សគូលែនព្រហ្មទេព ប្រចាំស្រុកត្រពាំងប្រាសាទ គឺជាអ្នកឃុបឃិតឲ្យមានបទល្មើសកាប់ឈើនិងដឹកជញ្ជូនឈើកើតឡើងយ៉ាងពេញបន្ទុកដោយគ្មានញញើតអ្វីទាំងអស់៕

សហគមន៍ព្នងនៅមណ្ឌលគិរីអំពាវនាវឲ្យមន្ត្រីតុលាការស៊ើបអង្កេតរឿងឈ្មួញឈូសឆាយព្រៃឈើ

noreply@blogger.com (Sotheavy royals) — Fri, 19 Aug 2016 06:15:00 -0700

ថ្ងៃសុក្រ, ១៩ សីហា ២០១៦_ RFA

ដោយ រដ្ឋា វិសាល

មន្ត្រីអយ្យការសាលាដំបូងខេត្តមណ្ឌលគិរី ស៊ើបអង្កេតជំហានដំបូងទៅលើពាក្យប្ដឹងរបស់តំណាងជនជាតិដើមភាគតិចព្នង ភូមិពូរ៉ាដែត ឃុំស្រែអំពូម ស្រុកពេជ្រាដា រឿងឈ្មួញមានប័ណ្ណកម្មសិទ្ធិដីក្នុងតំបន់ព្រៃដែលរដ្ឋប្រគល់ជូនសហគមន៍ការពារហើយឈូសឆាយព្រៃគ្រោងយកដីនោះជាកម្មសិទ្ធិឯកជន។

តំណាងសហគមន៍ព្នងភូមិពូរ៉ាដែត ស្វាគមន៍ការស៊ើបអង្កេតរបស់មន្ត្រីអយ្យការអមសាលាដំបូងខេត្តមណ្ឌលគិរី និងអំពាវនាវសុំឲ្យការស៊ើបអង្កេតនេះផ្ដល់យុត្តិធម៌ជូនពលរដ្ឋ។

ព្រះរាជអាជ្ញាសាលាដំបូងខេត្តមណ្ឌលគិរី កាលពីថ្ងៃទី១៧ ខែសីហា បានអញ្ជើញតំណាងសហគមន៍ ៦នាក់ចូលមកបំភ្លឺពាក្យប្ដឹងរបស់អ្នកភូមិដែលចោទឈ្មួញទិញដីម្នាក់ និងមន្ត្រីនគរបាលប៉ុស្តិ៍ពាក់ព័ន្ធឈូសឆាយរានព្រៃសហគមន៍ដែលក្រសួងកសិកម្មបានចុះបញ្ជីទទួលស្គាល់ជាព្រៃការពារ។

តំណាងសហគមន៍អ្នកស្រី ហេង ណុក បញ្ជាក់នៅថ្ងៃទី១៩ ខែសីហា ថា អ្នកភូមិហាក់មានសង្ឃឹមតិចតួចថា ចំណាត់ការតាមប្រព័ន្ធតុលាការអាចផ្ដល់យុត្តិធម៌ត្រឹមត្រូវឲ្យសហគមន៍។ យ៉ាងនេះក្តីអ្នកស្រីបញ្ជាក់នេះជាជម្រើសចុងក្រោយរបស់សហគមន៍ដែលពឹងផ្អែកទៅលើចំណាត់ការផ្លូវច្បាប់ ពីព្រោះការស្វែងរកដំណោះស្រាយតាមរយៈអាជ្ញាធរមូលដ្ឋានមិនអាចធ្វើឲ្យសហគមន៍ទទួលយកបានឡើយ៖ «ខ្ញុំអត់សូវមានជំនឿទេ ព្រោះពួកខ្ញុំមកតែខ្លួនទទេ សម័យនេះមិនសូវទុកចិត្តប៉ុន្មានទេនិយាយរួម។ គេមានលុយយើងអត់លុយគេមិនសូវចាប់អារម្មណ៍ទេ»។

ព្រៃការពារសហគមន៍ភូមិពូរ៉ាដែត មានទំហំ ១.៣២៣ហិកតារ ចុះបញ្ជីទទួលស្គាល់ដោយមន្ត្រីអាជ្ញាធរមូលដ្ឋាន និងជំនាញរដ្ឋបាលព្រៃឈើ ជាពិសេសមានការទទួលស្គាល់ពីក្រសួងកសិកម្ម ក្រសួងអភិវឌ្ឍន៍ជនបទទុកជាព្រៃការពាររបស់សហគមន៍តាំងពីឆ្នាំ២០០៩។ ក៏ប៉ុន្តែនៅឆ្នាំ២០១២ ក្រុមនិស្សិតនិងមន្ត្រីជំនាញដីធ្លីបានចុះវាស់វែងឆ្វៀលដីដែលប្រជាពលរដ្ឋដាំដុះជាក់ស្ដែងនៅតំបន់អភិរក្សនោះជូនប្រជាពលរដ្ឋតាមគោលនយោបាយស្បែកខ្លារបស់រាជរដ្ឋាភិបាល។ រហូតមកទល់នឹងខែកក្កដានេះ សហគមន៍បានរកឃើញឈ្មួញទិញដីឈ្មោះ ឡេង គឹមឈាង យកគ្រឿងចក្រមកឈូសព្រៃសហគមន៍អស់រហូតដល់ទៅជាង ២០ហិកតារដោយសំអាងថា ដីនោះខ្លួនបានទិញពីប្រជាពលរដ្ឋមានប័ណ្ណកម្មសិទ្ធិស្របច្បាប់។

អភិបាលរងស្រុកពេជ្រាដា លោក ខាំ ដារ៉ា បញ្ជាក់ថា រហូតបច្ចុប្បន្ននេះអាជ្ញាធរបានបញ្ជូនឯកសារពាក់ព័ន្ធរឿងនេះទៅអាជ្ញាធរខេត្តដោះស្រាយបន្តបន្ទាប់ពីសហគមន៍បដិសេធមិនព្រមសម្របសម្រួល។ លើសពីនេះ សហគមន៍បានដាក់ពាក្យប្ដឹងរឿងនេះទៅតុលាការរួចហើយ ហេតុនេះដែនសមត្ថកិច្ចដោះស្រាយរបស់អាជ្ញាធរស្រុកត្រូវបញ្ចប់៖ «ផុតស្រុកអស់ហើយយើងបានធ្វើលិខិតស្នាម សហគមន៍គាត់មិនព្រមព្រៀង នឹងជូនទៅខេត្តដោះ (ស្រាយ) ហើយសហគមន៍គាត់បានប្ដឹងទៅតុលាការដើម្បីដោះស្រាយនៅតុលាការហើយ»។

សហគមន៍ភូមិពូរ៉ាដែត បានច្រានចោលដំណោះស្រាយរបស់អាជ្ញាធរស្រុកពេជ្រាដា ចំនួនពីរលើក ខណៈដែលមន្ត្រីមូលដ្ឋានទាំងនោះព្យាយាមសម្របសម្រួលឲ្យសហគមន៍កាត់ដីជាង ១១ហិកតារ ដែលកំណត់ក្នុងប័ណ្ណកម្មសិទ្ធិប្រគល់ឲ្យឈ្មួញ។ ចំណែកដីដែលឈ្មួញឈូសលើសត្រូវប្រគល់ជូនសហគមន៍ និងចាត់នីតិវិធីផ្លូវច្បាប់ចំពោះការឈូសឆាយព្រៃលើសដីកំណត់ក្នុងប័ណ្ណកម្មសិទ្ធិ។

ព្រះរាជអាជ្ញាអមសាលាដំបូងខេត្តមណ្ឌលគិរី លោក ឡុង ហុងម៉េង ទទួលស្គាល់ថា ស្ថាប័នអយ្យការបើកការស៊ើបអង្កេតបឋមទៅលើបណ្ដឹងរបស់សហគមន៍ទាក់ទិនការចោទប្រកាន់ឈូសឆាយព្រៃសហគមន៍យកដី។លោកថា សហគមន៍ត្រូវមានជំនឿចិត្តទៅលើការស៊ើបអង្កេតរឿងក្តីនេះដែលនឹងផ្ដល់យុត្តិធម៌ជូនពលរដ្ឋគ្រប់ភាគី៖ «តុលាការគេបង្កើតមកឲ្យរកយុត្តិធម៌ក្រែងបុគ្គលថាម៉េចខ្ញុំមិនដឹងទេ។ តែកាលណាចេញដីកាយើងហៅទាំងអស់ គ្រាន់តែមិនទាន់ដល់ថ្ងៃគេចូល។ យើងធ្វើការឲ្យរកយុត្តិធម៌ឲ្យ»។

របាយការណ៍អង្កេតរបស់មន្ត្រីសមាគមអាដហុក ខេត្តមណ្ឌលគិរី រកឃើញថា ប័ណ្ណកម្មសិទ្ធិទាំងបីប្លង់ដែលឈ្មួញយកជាសំអាងដើម្បីឈូសឆាយដីចេញនៅឆ្នាំ២០១២ មានម្ចាស់កម្មសិទ្ធិឈ្មោះ យន់ លី មាស សារិន និងឈ្មោះ ហ៊ោ ហូត ជាប្រជាពលរដ្ឋរស់នៅភូមិពូរ៉ាដែត។

មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក សុក រដ្ឋា ចាត់ទុកការចេញប័ណ្ណកម្មសិទ្ធិនៅតំបន់ព្រៃការពារសហគមន៍គឺជារឿងមិនប្រក្រតី។ លើសពីនេះទៀត ឈ្មួញទិញដីបានឈូសឆាយព្រៃលើសទំហំមានកំណត់ក្នុងប័ណ្ណដែលជាបទល្មើសឈូសឆាយកាន់កាប់ដីព្រៃរបស់រដ្ឋ។ លោកថា អាជ្ញាធរពាក់ព័ន្ធរួមទាំងស្ថាប័នតុលាការត្រូវតែចាត់វិធានការផ្លូវច្បាប់ទាក់ទិនបទល្មើសព្រៃឈើ និងស៊ើបអង្កេតបន្ថែមទៅលើភាពមិនប្រក្រតីនៃការចេញប័ណ្ណកម្មសិទ្ធិនេះ៖ «ស្ថាប័នរាជរដ្ឋាភិបាលគួរមានវិធានការផ្លូវច្បាប់ចំពោះមន្ត្រីស្ថាប័នសាធារណៈ និងមន្ត្រីមូលដ្ឋានណាដែលរារាំងសហគមន៍មិនឲ្យដាក់ពាក្យប្ដឹងបទល្មើសឧក្រិដ្ឋដែលផ្ទុយទៅនឹងក្រមព្រហ្មទណ្ឌ។ អ្វីដែលគាត់ចេញមុខការពារទ្រព្យសម្បត្តិរដ្ឋគាត់ប្រឈមទៅនឹងការគំរាមកំហែងមួយចំនួន»។

កាលពីថ្ងៃទី១៥ ខែកក្កដា ប្រជាពលរដ្ឋភូមិពូរ៉ាដែត ៦នាក់ តំណាងឲ្យសហគមន៍ ១៥០គ្រួសារបានផ្តិតមេដៃលើពាក្យប្ដឹង ឈ្មួញទិញដីឈ្មោះ ឡេង គឹមឈាង ពីបទកាប់រានឈូសឆាយ និងហ៊ុមព័ទ្ធយកដីព្រៃ រួមទាំងប្ដឹងនាយនគរបាលប៉ុស្តិ៍ស្រែអំពូម លោក រ៉ា បូរិទ្ធ ពីបទផ្ដល់មធ្យោបាយនាំឲ្យមានការកាប់រានឈូសឆាយ និងហ៊ុមព័ទ្ធយកដីព្រៃសហគមន៍។

តំណាងសហគមន៍បញ្ជាក់ថា សហគមន៍មានភស្តុតាងជាក់លាក់បង្ហាញថា ប័ណ្ណកម្មសិទ្ធិដីដែលឈ្មួញយកមកសំអាង គឺមិនមានដីអាស្រ័យផលនោះទេ គឺ ៩០ភាគរយជាដីព្រៃស្រោង។ សហគមន៍ទាមទារសុំឲ្យផ្ដន្ទាទោសអ្នកប្រព្រឹត្តខុស និងអ្នកឃុបឃិត ព្រមទាំងទាមទារឲ្យដាំឈើនៅកន្លែងឈូសឆាយនោះឡើយវិញ៕

បទល្មើសដឹកជញ្ជូនឈើចេញពីស្រុកជាំក្សាន្ត ខេត្តព្រះវិហារ កំពុងកើតឡើងយ៉ាងអនាធិបតេយ្យ

noreply@blogger.com (Sotheavy royals) — Wed, 17 Aug 2016 07:25:00 -0700

ថ្ងៃពុធ, ១៧ សីហា ២០១៦

ដោយ មនសិការខ្មែរ

កាលពីថ្ងៃទី១៣ ខែសីហា ឆ្នាំ២០១៦ រថយន្តយីឌុបធុនធំ២គ្រឿងបានដឹកឈើលេខ១និងឈើលេខ២ចេញពីទឹកដីស្រុកជាំក្សាន្ត ចូលមកខេត្តកំពង់ធំយ៉ាងរលូន ហើយគ្មានមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធ ចាត់វិធានការទប់ស្កាត់ឡើយ។ មន្ត្រីអាជ្ញាធរក្នុងខេត្តព្រះវិហារ បានឲ្យដឹងថា នៅតាមដងផ្លូវជាតិលេខ៦២ពីខេត្តព្រះវិហារ ចូលមកខេត្តកំពង់ធំ មានប៉ុស្ដិ៍ត្រួតពិនិត្យរបស់មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធជាច្រើនកន្លែង ប៉ុន្តែសមត្ថកិច្ចទាំងនោះមិនចាត់វិធានការបង្ក្រាបរថយន្តដឹកឈើរបស់ក្រុមហ៊ុនហុងសុភាពឡើយ។ គេសង្ស័យថាសមត្ថកិច្ចទទួលផលប្រយោជន៍ពីក្រុមហ៊ុនហុងសុភាព ទើបបណ្ដោយឲ្យក្រុមហ៊ុននេះដឹកជញ្ជូនឈើតាមអំពើចិត្ត។

មន្ត្រីអាជ្ញាធរខេត្តព្រះវិហារ បានឲ្យដឹងថាក្រុមហ៊ុនហុងសុភាព បានទទួលសិទ្ធិក្នុងការដេញថ្លៃនិងម៉ៅការឈូសឆាយដីព្រៃសម្បទានសេដ្ឋកិច្ចធ្វើផ្លូវនិងផ្ទះឲ្យគ្រួសារកងទ័ពនៃកងពលតូចអន្តរាគមន៍លេខ៧ ក្នុងភូមិឈើទាលគង ឃុំស្រអែម ស្រុកជាំក្សាន្ត។ ប៉ុន្តែក្រុមហ៊ុននេះបានឈានដល់ការអារច្រៀកឈើដឹកជញ្ជូនធ្វើអាជីវកម្មឆ្លងខេត្តស្រេចតែអំពើចិត្តដោយមានការឃុបឃិតជាមួយមន្ត្រីរដ្ឋបាលព្រៃឈើ និងសមត្ថកិច្ចពុករលួយជាច្រើនស្ថាប័នទៀត។ ដូច្នេះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ គួរពិនិត្យមើលសកម្មភាពមិនប្រក្រតីក្រុមហ៊ុនហុងសុភាពជាបន្ទាន់ ព្រោះក្រុមហ៊ុននេះកំពុងប្រើប្រាស់រថយន្តយីឌុបធំៗដឹកឈើពីស្រុកជាំក្សាន្ត ខេត្តព្រះវិហារ ចូលមកខេត្តកំពង់ធំ តាមអំពើចិត្ត។

ប្រភពពីប្រជាពលរដ្ឋនិងមន្ត្រីអង្គការក្រៅរដ្ឋាភិបាលមួយចំនួនបានឲ្យដឹងថាឈើដែលក្រុមហ៊ុនហុងសុភាព ដឹកជញ្ជូនពេញរថយន្តធំៗកាលពីថ្ងៃទី១៣ ខែសីហា ឆ្នាំ២០១៦ មិនមែនជាឈើដែលបានមកពីការឈូសឆាយធ្វើផ្ទះឲ្យគ្រួសារកងទ័ពនៅក្នុងឃុំស្រអែមនោះទេ។ ផ្ទុយទៅវិញឈើទាំងនោះអាចកាប់ដឹកចេញពីតំបន់ព្រៃអភិរក្សជុំវិញប្រាសាទព្រះវិហារ ដូច្នេះក្រសួង និងស្ថាប័នពាក់ព័ន្ធ គួរចាត់វិធានការត្រួតពិនិត្យឲ្យបានដិតដល់ព្រោះបច្ចុប្បន្នព្រៃឈើនៅតំបន់ប្រាសាទព្រះវិហារ កំពុងប្រឈមនឹងការបំផ្លាញឥតឈប់ឈរ។ ជាងនេះទៅទៀតព្រៃឈើក្នុងស្រុកឆែប ស្រុកត្បែងមានជ័យ ស្រុកគូលែន និងស្រុករវៀង ខេត្តព្រះវិហារ ក៏កំពុងប្រឈមនឹងការបំផ្លាញយ៉ាងមហន្តរាយដែរ ព្រោះមន្ត្រីអាជ្ញាធរ មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធ មិនចាត់វិធានការបង្ក្រាបបទល្មើសព្រៃឈើឲ្យស្របទៅតាមបទបញ្ជាលោកនាយករដ្ឋមន្ត្រី ហ៊ុន សែន នោះឡើយ៕

បទល្មើសបំផ្លាញព្រៃឈើក្នុងស្រុកលំផាត់ ខេត្តរតនគិរី នៅតែកើតឡើងយ៉ាងរាលដាល

noreply@blogger.com (Sotheavy royals) — Wed, 17 Aug 2016 02:53:00 -0700

ថ្ងៃពុធ, ១៧ សីហា ២០១៦

ដោយ មនសិការខ្មែរ

លោក កែប កត់ នាយខណ្ឌរដ្ឋបាលព្រៃឈើខេត្តរតនគិរី និងលោក ថង សាវុន ជាអភិបាលខេត្តរតនគិរី ត្រូវបានមជ្ឈដ្ឋាននានារិះគន់ថា មិនយកចិត្តទុកដាក់ទប់ស្កាត់បទល្មើសកាប់ឈើនិងដឹកជញ្ជូនឈើខុសច្បាប់ដែលកំពុងកើតឡើងយ៉ាងពេញបន្ទុកនោះទេ។ ហេតុនេះហើយទើបប្រជាសហគមន៍ការពារព្រៃឈើនៅស្រុកលំផាត់ ក៏ដូចជាមន្ត្រីអង្គការក្រៅរដ្ឋាភិបាល អំពាវនាវឲ្យរដ្ឋមន្ត្រីក្រសួងកសិកម្ម លោក វេង សាខុន ពិនិត្យមើលភាពអសកម្មរបស់លោក កែប កត់ នាយខណ្ឌរដ្ឋបាលព្រៃឈើខេត្តរតនគិរីជាបន្ទាន់។ ទន្ទឹមនឹងនេះក៏មានការអំពាវនាវទៅថ្នាក់ដឹកនាំក្រសួងមហាផ្ទៃ ឲ្យពិនិត្យមើលភាពអសកម្មរបស់លោក ថង សាវុន អភិបាលខេត្តរតនគិរីផងដែរ ព្រោះបទល្មើសផ្សេងៗជាពិសេសបទល្មើសកាប់ឈើនិងដឹកជញ្ជូនឈើខុសច្បាប់នៅតែកើតឡើងយ៉ាងរាលដាល។

សកម្មជនព្រៃឈើ និងមន្ត្រីអង្គការក្រៅរដ្ឋាភិបាលថ្មីៗនេះបានឃើញរថយន្តធន់ធំ២គ្រឿងដឹកជញ្ជូនឈើប្រភេទលេខ១និងលេខ២ចេញពីដីសម្បទានក្រុមហ៊ុនហ្សូមហ្វាង នៃភូមិសមុទ្រលើ ឃុំសេដា ស្រុកលំផាត់ ហើយគេសង្ស័យថាជាឈើខុសច្បាប់។ ទោះជាយ៉ាងណាមន្ត្រីរដ្ឋបាលព្រៃឈើ និងមន្ត្រីបរិស្ថាន មិនទប់ស្កាត់សកម្មភាពដឹកជញ្ជូនឈើខុសច្បាប់នោះឡើយ ព្រោះខ្លាចបាត់បង់ផលប្រយោជន៍ផ្ទាល់ខ្លួន។ ហេតុនេះហើយទើបក្រុមហ៊ុនហ្សូមហ្វាង អាចកាប់ឈើក្រៅបរិវេណដីសម្បទានសេដ្ឋកិច្ចរបស់ខ្លួន រួចដឹកជញ្ជូនធ្វើអាជីវកម្មខុសច្បាប់ស្រេចតែអំពើចិត្ត ព្រោះមានការឃុបឃិតជាមួយសមត្ថកិច្ចពុករលួយ និងមន្ត្រីជំនាញច្រើនស្ថាប័ន។

ប្រជាសហគមន៍ការពារព្រៃឈើក្នុងស្រុកលំផាត់ បានឲ្យដឹងថា បទល្មើសដឹកជញ្ជូនឈើចេញពីមូលដ្ឋានរបស់ពួកគាត់ទៅលក់នៅស្រុកយួនតាមច្រកទ្វារអន្តរជាតិអូរយ៉ាដាវ នៅតែបន្តកើតឡើងយ៉ាងគគ្រឹកគគ្រេង ហើយឈ្មួញមួយចំនួនបានប្រើប្រាស់អាជ្ញាប័ណ្ណក្រុមហ៊ុនដីសម្បទានសេដ្ឋកិច្ចដើម្បីបិទបាំងសកម្មភាពរបស់ខ្លួន។ ចំណែកលោក ហុង សុវណ្ណរាន នាយផ្នែករដ្ឋបាលព្រៃឈើស្រុកលំផាត់ ក្រុងបានលុង និងស្រុកកូនមុំ គិតតែពីរឿងប្រមូលលុយដាក់ហោប៉ៅប៉ុណ្ណោះ ហើយមិនចាត់វិធានការបង្ក្រាបបទល្មើសឲ្យស្របទៅតាមតួនាទីរបស់ខ្លួនឡើយ។ ដូច្នេះលោក វេង សាខុន រដ្ឋមន្ត្រីក្រសួងបរិស្ថាន មិនត្រូវមើលរំលងតទៅទៀតទេ ព្រោះមន្ត្រីរដ្ឋបាលព្រៃឈើស្រុកលំផាត់ និងលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី កំពុងឃុបឃិតគ្នាបើកដៃឲ្យឈ្មួញដឹកជញ្ជូនឈើទៅលក់នៅស្រុកយួន ដើម្បីជាថ្នូរនឹងលុយយ៉ាងក្រអឺតក្រទម៕

សកម្មភាពដឹកជញ្ជូនឈើប្រណីតឆ្លងកាត់ខេត្តកំពង់ឆ្នាំង ពុំមានការថយចុះនោះទេ

noreply@blogger.com (Sotheavy royals) — Tue, 16 Aug 2016 19:43:00 -0700

ថ្ងៃច័ន្ទ, ១៥ សីហា ២០១៦

ដោយ មនសិការខ្មែរ

ឈ្មួញធំៗដែលជាមន្ត្រីប្រដាប់អាវុធនៅតែបន្តសកម្មភាពដឹកជញ្ជូនឈើប្រណីតឆ្លងកាត់ខេត្តពោធិ៍សាត់ និងខេត្តកំពង់ឆ្នាំង នៅតែកើតឡើងយ៉ាងពេញបន្ទុក បើទោះបីពេលខ្លះត្រូវសមត្ថកិច្ចអាវុធហត្ថ និងមន្ត្រីរដ្ឋបាលព្រៃឈើបង្ក្រាបក៏ដោយ។ ជាក់ស្ដែងកាលពីយប់ថ្ងៃទី១៣ ខែសីហា ឆ្នាំ២០១៦ ឈើគ្រញូងទម្ងន់១២០០គីឡូក្រាមត្រូវកម្លាំងអាវុធហត្ថខេត្តកំពង់ឆ្នាំង បង្ក្រាបនៅចំណុចភូមិរមាស ឃុំតាំងក្រសាំង ស្រុកទឹកផុស ខេត្តកំពង់ឆ្នាំង។ ទាក់ទងនឹងការបង្ក្រាបនេះប្រភពខ្លះបានឲ្យដឹងថា មកពីឈ្មួញឈើមិនទាក់ទងសម្របសម្រួលជាមួយលោក មាស សុវណ្ណ មេបញ្ជាការកងរាជអាវុធហត្ថខេត្តកំពង់ឆ្នាំងជាមុន ប្រសិនបើមានការសម្របសម្រួលនោះ ឈ្មួញអាចដឹកជញ្ជូនឈើទៅដល់គោលដៅយ៉ាងរលូនជាមិនខាន។

ប្រភពពីសមត្ថកិច្ចដែលចូលរួមក្នុងការបង្ក្រាបរថយន្តដឹកឈើគ្រញូងកាលពីយប់ថ្ងៃទី១៣ ខែសីហា បានឲ្យដឹងថារថយន្តនោះម៉ាកកាមរីឆ្លាម ពណ៌ស្ករ ពាក់ស្លាកលេខភ្នំពេញ2E-1536 បើកចេញពីខេត្តពោធិ៍សាត់ ឆ្លងកាត់ផ្លូវក្រួសក្រហមនៅក្នុងភូមិក្ដុល ឃុំក្រាំងស្គារ ស្រុកទឹកផុស។ សមត្ថកិច្ចបានឲ្យដឹងទៀតថា រថយន្តដឹកឈើខាងលើមើលទៅផ្ទុករបស់ធ្ងន់ខុសពីប្រក្រតីទើបឈានដល់ការដេញបង្ក្រាបតាំងពីចំណុចភូមិក្ដុល ឃុំក្រាំងស្គារ រហូតដល់ភូមិរមាស ឃុំតាំងក្រសាំង ទើបឃាត់បាន។ នៅពេលកងរាជអាវុធហត្ថតាមបង្ក្រាបនោះ ក៏មានរថយន្តផ្សេងមួយទៀតធ្វើការរារាំងពីមុខរថយន្តសមត្ថកិច្ចផងដែរ ក៏ប៉ុន្តែសមត្ថកិច្ចតាមបង្ក្រាបរហូតបានសម្រេចហើយអ្នកបើកបររថយន្តដឹកឈើបានរត់គេចខ្លួន។

សេចក្ដីរាយការណ៍ពីសមត្ថកិច្ចពាក់ព័ន្ធបានឲ្យដឹងថា រថយន្តដឹកឈើគ្រញូង១២០០គីឡូក្រាមដែលត្រូវកងរាជអាវុធហត្ថបង្ក្រាបនោះ គឺជារបស់ឈ្មោះ អ៊ឹម សេន ជាមន្ត្រីយោធានៅខេត្តពោធិ៍សាត់ ហើយកន្លងមកមន្ត្រីរដ្ឋបាលព្រៃឈើក្នុងខេត្តពោធិ៍សាត់ និងក្នុងស្រុកទឹកផុស ខេត្តកពង់ឆ្នាំង មិនដែលធ្វើការបង្ក្រាបម្តងណាឡើយ។ ឈ្មួញដឹកជញ្ជូនឈើគ្រញូងចេញពីខេត្តពោធិ៍សាត់ ឆ្លងកាត់ខេត្តកំពង់ឆ្នាំង ភាគច្រើនជាមន្ត្រីយោធាក្នុងខេត្តពោធិ៍សាត់ ហើយពួកគេបានយកមន្ត្រីធំៗក្នុងខេត្តពោធិ៍សាត់ ធ្វើជាបង្អែកក្នុងការប្រព្រឹត្តបទល្មើសទៀតផង។ ជាក់ស្ដែងកាលពីពេលថ្មីៗកន្លងទៅនេះកងរាជអាវុធហត្ថស្នាក់ការសន្តិសុខលេខ៥០០នៅឃុំលង្វែក បង្ក្រាបរថយន្តបាឡែន១គ្រឿងដឹកឈើគ្រញូងដែលជារបស់ឈ្មោះ អ៊ឹម សេន មន្ត្រីយោធាខេត្តពោធិ៍សាត់ ដែលឈរជើងនៅច្រកព្រំដែនថ្មដា ស្រុកវាលវែង ផងដែរ។ ហេតុនេះហើយទើបប្រជាពលរដ្ឋរិះគន់ថា ឈ្មួញជាមន្ត្រីយោធានៅតែបន្តសកម្មភាពដឹកជញ្ជូនឈើប្រណីតយ៉ាងគឃ្លើន ហើយសមត្ថកិច្ចបង្ក្រាបតែឈ្មួញដែលមិនបង់លុយតាមការកំណត់ប៉ុណ្ណោះ រីឯឈ្មួញដែលមានទំនាក់ទំនងល្អអាចដឹកជញ្ជូនឈើទៅដល់គោលដៅដោយគ្មានសមត្ថកិច្ចណារំខានឡើយ៕

សមត្ថកិច្ចជំនាញនាំខ្លួនម្ចាស់ផ្ទះម្នាក់ព្រមទាំងរថយន្តដឹកឈើគ្រញូងនិងឈើនាងនួន៣គ្រឿងទៅតុលាការ

noreply@blogger.com (Sotheavy royals) — Mon, 15 Aug 2016 23:35:00 -0700

ប្រភពៈ ខេមរា
សៀមរាប៖នៅព្រឹកថ្ងៃទី១៤ខែសីហានេះកម្លាំងអាវុធហត្ថនិងកម្លាំងរដ្ឋបាលព្រៃឈើខេត្តសៀមរាប បានធ្វើការចាប់រថយន្តដឹកឈើគ្រញូងចំនួន៣គ្រឿងនិង នាំខ្លួនម្ចាស់ផ្ទះមកសួរនាំ ឯអ្នកដឹកឈើរត់គេចខ្លួនបាត់អស់។លោកម៉ុង ប៊ុនលីម នាយផ្នែករដ្ឋបាលព្រៃឈើបន្ទាយ
ស្រីបានឲ្យដឹងថា៖ដោយមានការសម្របសម្រួលពីតំណាងអយ្យការអមសាលាដំបូងខេត្តទើបមានការឃាត់រថយន្តកាមរីបាឡែនចំនួន២គ្រឿងក្នុងនោះ១គ្រឿងផ្ទុកដឹកឈើគ្រញូងនិង១គ្រឿងទៀតមុខសញ្ញាដឹកឈើនៅក្នុងផ្ទះនោះដែរ។
លោកបន្តថាការបង្ក្រាបនេះធ្វើឡើងនៅម៉ោង៧ព្រឹក ថ្ងៃទី ១៤ខែសីហា ឆ្នាំ២០១៦ ស្ថិតនៅក្បែរវត្តត្រាំនាគ ភូមិចុងកៅស៊ូ សង្កាត់ស្លក្រាម ក្រុងសៀមរាប។ រថយន្តដែល ដឹកឈើគ្រញូងនេះ ពណ៌ស្ក ពាក់ស្លាកលេខភ្នំពេញ២C៣២៥៤ផ្ទុកឈើគ្រញូង១៤២ដុំស្មើ៩៤៤គីឡូក្រាមស្មើ០.៧៨៦មឡែត្រគូប។និង១គ្រឿងទៀតមានស្លាកលេខភ្នំពេញ2C 3254 ពណ៌ទឹក
ប្រាក់។លោកបន្ថែមថា៖ម្ចាស់ផ្ទះដែលមិនប្រាប់សមត្ថកិច្ចពីឈ្មោះម្ចាស់ឈើនោះមានឈ្មោះ សុិន សុីណា ភេទស្រីអាយុ២៦ឆ្នាំរស់នៅភូមិឃំុខាងលើ ហើយបច្ចុប្បន្នកំពុងរៀបចំសំណំុរឿងបញ្ជូនខ្លួនទៅទៅតុលាការដើម្បីចាត់ការបន្ត។លោកបញ្ជាក់ថា៖ដោយឡែកសមត្ថកិច្ច បញ្ជាក់ថា បន្ទាប់ពីបាំរថយន្តនោះមករក្សាទុកនៅផ្នែករដ្ឋបាលៈហរៃឈើបន្ទាយស្រីនៅឃំុព្រះដាក់ស្រាប់តែរថយន្តកាមរីដឹកឈើនាងនួន១គ្រឿងទៀតត្រូវបាន រដ្ឋបាល ព្រៃឈើស្ទាក់ចាប់បាន ឯម្ចាស់រថយន្តរត់គេចបាត់។បច្ចុប្បន្ននេះរថយន្តដឹកឈើទាំង៣គ្រឿងព្រមទាំង
ម្ចាស់ផ្ទះត្រូវបានកម្លាំងរដ្ឋបាលព្រៃឈើកសាងសំណំុរឿងបញ្ជូនទៅតុលាការដើម្បីចាត់ការបន្ត។សូមរំលឹកថា ជំនួញឈើគ្រញូងកំពុងដំណើរការឡើងវិញហើយខណះក្រុមឈ្មួញមានលុយ បានជួលសមត្ថកិច្ច ឡេមឡឺមមួយចំនួនឲ្យជួយរត់ការពីខេត្តឧត្តរមានជ័យឆ្លងកាត់ខេត្តសៀមរាបឆ្ពោះទៅកាន់ទីផ្សារងងឹតយ៉ាងសុខស្រួល។តែទោះជាយ៉ាងណាគេក៏ឃើញសមត្ថកិច្ចខេត្តសៀមរាបចាប់បានខ្លះៗដែរ។

ដោយឡែកករណីជំនួញឈើគ្រញូងនេះដែរគេនៅទន្ទឹងរង់ចាំមើលថាតើលោកសេងប៊ុនតេងមានឋានន្តរៈស័ក្តិវរសេនីយ៍ត្រីមានតួនាទីជាជំនួយការលោកឧត្តមសេនីយ៍ត្រីហង្សថុលមេបញ្ជាការកងរាជអាវុធហត្ថខេត្តកំពង់ធំផងនោះដែលត្រូវបានសមត្ថកិច្ចរដ្ឋបាលព្រៃឈើសៀមរាបចាប់វាយខ្នោះទៅតាមការបញ្ជាររបស់លោកព្រះរាជអាជ្ញាអមសាលាដំបូងខេត្តខណះពេលដែលជននេះបើកឡានរបស់ខ្លួនកាងឡានដឹកឈើគ្រញូងរារាំងផ្លូវសមត្ថកិច្ចក្នុងការបង្ក្រាបបទល្មើសព្រៃឈើកាលពីថ្ងៃទី០៩ខែសីហាកន្លងទៅនេះ ត្រូវបាន
គេល្បីថាមានអ្នកចង់មកសូកប៉ាន់ឲ្យនៅក្រៅឃំុ។
ទោះជាយ៉ាងណាគេនៅរង់ចាំមើលចំណាត់ការរបស់
ស្ថាប័នតុលាការដែលជាស្ថាប័នឯករាជ្យជាអ្នកសម្រេចទៅតាមច្បាប់ទៅចុះ៕

មេការក្រុមហ៊ុនអានម៉ារ៉ាឌី កាប់ឈើពីខេត្តព្រះវិហារ ដឹកជញ្ជូនទៅខេត្តកំពង់ធំ និងកំពង់ចាម យ៉ាងពេញបន្ទុក

noreply@blogger.com (Sotheavy royals) — Mon, 15 Aug 2016 23:21:00 -0700

ប្រភពៈ មនសិការខ្មែរ

សេចក្ដីរាយការណ៍ពីប្រជាពលរដ្ឋក្នុងខេត្តព្រះវិហារ បានឲ្យដឹងថាមេការក្រុមហ៊ុនអានម៉ារ៉ាឌី កំពុងធ្វើសកម្មភាពកាប់ឈើនៅក្នុងខេត្តព្រះវិហារ ដឹកជញ្ជូនទៅលក់នៅខេត្តកំពង់ធំ និងខេត្តកំពង់ចាម ស្រេចតែអំពើចិត្តដោយគ្មានមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធចាត់វិធានការបង្ក្រាបឡើយ។ ប្រភពពីមន្ត្រីពាក់ព័ន្ធក្នុងខេត្តព្រះវិហារ បានឲ្យដឹងថាក្រុមហ៊ុនអានម៉ារ៉ាឌី បានបញ្ចប់អាជ្ញាប័ណ្ណដឹកជញ្ជូនឈើជាយូរមកហើយ ប៉ុន្តែមេការក្រុមហ៊ុននេះនៅតែបន្តសកម្មភាពកាប់ដើមឈើធំៗដែលមានប្រវែងពី៥ទៅជាង១០ម៉ែត្រ និងមានមុខកាត់ចាប់ពី០,៥០ម៉ែត្រ ដឹកជញ្ជូនធ្វើអាជីវកម្មខុសច្បាប់ដោយគ្មានញញើតអ្វីទាំងអស់។

បញ្ហានេះលោក ឆេង គឹមស៊ុន អគ្គនាយករដ្ឋបាលព្រៃឈើ គួរចាត់វិធានការទប់ស្កាត់ជាបន្ទាន់ព្រោះបច្ចុប្បន្នឈ្មោះ ស្រ៊ុន ជាមេការក្រុមហ៊ុនអានម៉ារ៉ាឌី កំពុងធ្វើអ្វីៗតាមអំពើចិត្ត។
តាមការអះអាងពីប្រជាពលរដ្ឋរស់នៅក្នុងឃុំរមណីយ ស្រុករវៀង ខេត្តព្រះវិហារ បានឲ្យដឹងថា ក្នុងមួយថ្ងៃៗមានរថយន្តកែច្នៃម៉ាករ៉េវពី១៥ទៅ២០គ្រឿងចូលកាប់ឈើក្នុងព្រៃការពារ ហើយដឹកជញ្ជូនចេញពីព្រៃមកស្ទូចដាក់លើរថយន្តយីឌុបនៅក្នុងបរិវេណក្រុមហ៊ុននៅឃុំរមណីយ ស្រុករវៀង។ ឈើទាំងនោះត្រូវបានឈ្មោះ ស្រ៊ុន មេការក្រុមហ៊ុនអានម៉ារ៉ាឌី ដឹកជញ្ជូនទៅលក់នៅខេត្តកំពង់ធំ ខេត្តកំពង់ចាម យ៉ាងគគ្រឹកគគ្រេងដោយមានការសម្របសម្រួលពីមន្ត្រីរដ្ឋបាលព្រៃឈើ និងសមត្ថកិច្ចនៅតាមដងផ្លូវ។ សមត្ថកិច្ចពាក់ព័ន្ធខ្លះបានបង្ហើបឲ្យដឹងថា ក្នុងមួយថ្ងៃៗក្រុមហ៊ុនអានម៉ារ៉ាឌី ដឹកឈើចេញពីខេត្តព្រះវិហារ តាមរថយន្តយីឌុបជាច្រើនគ្រឿងដោយមានឈ្មោះ រិន ជាអ្នករត់ការបើកផ្លូវបង់លុយឲ្យមន្ត្រីជំនាញ និងសមត្ថកិច្ចពាក់ព័ន្ធ។

ប្រជាសហគមន៍ការពារព្រៃឈើក្នុងស្រុករវៀង បានឲ្យដឹងថា ដើមឈើធំៗក្នុងព្រៃឡង់ដែលជាមុខរបរប្រពៃណីរបស់ជនជាតិដើមភាគតិចកំពុងប្រឈមនឹងសេចក្ដីវិនាស ព្រោះមេការក្រុមហ៊ុនអានម៉ារ៉ាឌី ឈ្មោះ ស្រ៊ុន នៅតែអាចកាប់ឈើនិងដឹកជញ្ជូនឈើខុសច្បាប់យ៉ាងគឃ្លើនបើទោះបីអាជ្ញាប័ណ្ណក្រុមហ៊ុនផុតសុពលភាពក៏ដោយ។ មន្ត្រីអាជ្ញាធរក្នុងស្រុករវៀង ក៏បានឲ្យដឹងដែរថាការដែលឈ្មោះ ស្រ៊ុន មេការក្រុមហ៊ុនអានម៉ារ៉ាឌី អាចកាប់ឈើនិងដឹកជញ្ជូនឈើខុសច្បាប់ដូចសព្វថ្ងៃនេះ គឺមានការឃុបឃិតជាមួយមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធជាច្រើនស្ថាប័នទៀត ទើបអ្វីៗអាចប្រព្រឹត្តទៅដោយគ្មានឧបសគ្គ។ ដូច្នេះហើយទើបមានការអំពាវនាវឲ្យលោក ឆេង គឹមស៊ុន អគ្គនាយករដ្ឋបាលព្រៃឈើ ចាត់វិធានការទប់ស្កាត់បទល្មើសរបស់ក្រុមហ៊ុនអានម៉ារ៉ាឌី ជាបន្ទាន់ព្រោះមេរដ្ឋបាលព្រៃឈើខេត្តព្រះវិហារ ខេត្តកំពង់ធំ និងខេត្តកំពង់ចាម កំពុងសម្ងំទទួលផលប្រយោជន៍យ៉ាងសុខស្រួលបំផុត៕

ឈ្មួញយួនចូលមកប្រមូលទិញឈើនៅស្រុកកោះញែក ហើយដឹកជញ្ជូនចេញតាមច្រកអូរយ៉ាដាវ យ៉ាងអនាធិបតេយ្យ

noreply@blogger.com (Sotheavy royals) — Mon, 15 Aug 2016 19:55:00 -0700

ថ្ងៃច័ន្ទ, ១៦ សីហា ២០១៦

ដោយ មនសិការខ្មែរ

មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធក្នុងស្រុកកោះញែក ខេត្តមណ្ឌលគិរី បានព្យាយាមបិទបាំងរឿងឈ្មួញចូលមកប្រមូលទិញឈើក្នុងមូលដ្ឋានរបស់ខ្លួន ហើយដឹកជញ្ជូនឆ្លងកាត់ស្រុកលំផាត់ ក្រុងបានលុង ទៅច្រកទ្វារអន្តរជាតិអូរយ៉ាដាវ យ៉ាងអនាធិបតេយ្យ។ ប៉ុន្តែទោះជាយ៉ាងណាមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធនៅស្រុកកោះញែក មិនអាចបិទបាំងការពិតបានទេ ព្រោះប្រជាសហគមន៍ការពារព្រៃឈើ និងមន្ត្រីអង្គការក្រៅរដ្ឋាភិបាល បានមើលឃើញបទល្មើសជាក់ស្ដែងតែម្តង។ ដោយសារតែមានឈ្មួញយួនចូលមកប្រមូលទិញឈើដល់ក្នុងមូលដ្ឋានស្រុកកោះញែកបែបនេះហើយ ទើបឈើប្រណីតនិងឈើប្រភេទលេខ១ក្នុងព្រៃការពារ ព្រៃអភិរក្ស កំពុងប្រឈមនឹងការសេចក្ដីវិនាស។

សេចក្ដីរាយការណ៍ពីប្រជាពលរដ្ឋរស់នៅចំណុចអូររវ៉ាក់ ជាប់ប្រប្រទល់រវាងស្រុកកោះញែក ខេត្តមណ្ឌលគិរី និងស្រុកលំផាត់ ខេត្តរតនគិរី បានឲ្យដឹងថាឈើប្រណីតរាប់ពាន់កំណាត់ត្រូវបានឈ្មួញជនជាតិយួនដើរប្រមូលទិញយកមកគរទុកនៅផ្ទះមន្ត្រីបរិស្ថាន ក្នុងចំណុចអូររវ៉ាក់។ ទាក់ទងនឹងបញ្ហានេះសកម្មជនព្រៃឈើនិងមន្ត្រីអង្គការក្រៅរដ្ឋាភិបាលបានរិះគន់ថា មេរដ្ឋបាលព្រៃឈើស្រុកកោះញែក ខេត្តមណ្ឌលគិរី និងមេរដ្ឋបាលព្រៃឈើស្រុកលំផាត់ ខេត្តរតនគិរី ជាអ្នកឃុបឃិតគ្នាបើកដៃឲ្យឈ្មួញយួនចូលមកប្រមូលទិញឈើយ៉ាងរលូន ដើម្បីជាថ្នូរនឹងផលប្រយោជន៍។ ចំណែកលោក ខ្លូត ឃា អធិការនគរបាលស្រុកកោះញែក ទំនងជាជាប់ពាក់ព័ន្ធផលប្រយោជន៍ទើបព្យាយាមបិទបាំងការពិតថា ពុំមានឈ្មួញយួនចូលមកទិញឈើក្នុងស្រុកកោះញែកឡើយ។

ប្រជាសហគមន៍ការពារព្រៃឈើក្នុងស្រុកកោះញែក បានឲ្យដឹងថាឈ្មួញយួនប្រមូលទិញឈើប្រណីតរាប់ពាន់កំណាត់យកទៅស្តុកទុកនៅផ្ទះមន្ត្រីបរិស្ថាន ចំណុចអូររវ៉ាក់ ស្រុលលំផាត់ ជាប់ព្រំប្រទល់ស្រុកកោះញែក ហើយមន្ត្រីជំនាញ និងសមត្ថកិច្ចពាក់ព័ន្ធទាំងអស់រក្សាភាពស្ងៀមស្ងាត់ដើម្បីផលប្រយោជន៍។ សូម្បីតែលោក ខ្លូត ឃាអធិការនគរបាលស្រុកកោះញែក ក៏ព្យាយាមបិទបាំងការពិតរឿងឈ្មួញជនជាតិយួនចូលមកប្រមូលទិញឈើក្នុងមូលដ្ឋានរបស់ខ្លួនដែរ បើទោះបីប្រជាពលរដ្ឋបានឃើញច្បាស់នឹងភ្នែកក៏ដោយ។ លើសនេះទៅទៀតប្រជាពលរដ្ឋរស់នៅស្រុកលំផាត់ ជាប់ព្រំប្រទល់ស្រុកកោះញែក បានឲ្យដឹងថាក្នុងមួយថ្ងៃៗមានរថយន្តដឹកជញ្ជូនឈើជាច្រើនគ្រឿងចេញពីស្រុកកោះញែក ឆ្លងកាត់មូលដា្ឋនរបស់ពួកគាត់ ហើយទាំងមន្ត្រីរដ្ឋបាលព្រៃឈើ មន្ត្រីបរិស្ថាន មន្ត្រីអាវុធហត្ថ និងសមត្ថកិច្ចពាក់ព័ន្ធដទៃទៀត ឃុបឃិតដើម្បីផលប្រយោជន៍យ៉ាងសុខស្រួល៕

បទល្មើសទន្ទ្រានកាន់កាប់ដីព្រៃឡង់ក្នុងស្រុកសណ្ដាន់ ខេត្តកំពង់ធំ នៅតែកើតឡើងយ៉ាងរាលដាល

noreply@blogger.com (Sotheavy royals) — Mon, 15 Aug 2016 19:35:00 -0700

រូបភាព តំណាង

ថ្ងៃច័ន្ទ, ១៥ សីហា ២០១៦

ដោយ មនសិការខ្មែរ

ក្រោយពេលព្រៃឡង់ត្រូវបានដាក់ចូលជាតំបន់ការពារនិងអភិរក្ស ហើយស្ថិតក្រោមការគ្រប់គ្រងរបស់ក្រសួងបរិស្ថានរួចមក គឺបទល្មើសកាប់ឈើនិងដឹកជញ្ជូនឈើខុសច្បាប់ ក៏ដូចជាបទល្មើសកាប់ព្រៃទន្ទ្រានយកដីធ្វើជាកម្មសិទ្ធិនៅតែបន្តកើតឡើងយ៉ាងអនាធិបតេយ្យដូចមុនដដែល។ ហេតុនេះហើយទើបប្រជាពលរដ្ឋក្នុងឃុំសណ្ដាន់ ស្រុកសណ្ដាន់ ខេត្តកំពង់ធំ ព្រួយបារម្ភយ៉ាងខ្លាំងចំពោះដីធ្លីដែលត្រូវធ្លាក់ទៅក្នុងកណ្ដាប់ដៃអ្នកមានលុយ អ្នកមានអំណាច ដោយសារតែមន្ត្រីជំនាញ និងមន្ត្រីអាជ្ញាធរ មិនចាត់វិធានការទប់ស្កាត់។ មន្ត្រីអាជ្ញាធរក្នុងឃុំសណ្ដាន់ ស្រុកសណ្ដាន់ ធ្លាប់ប្រាប់ប្រជាពលរដ្ឋថា ដីដែលពួកគាត់សុំកាន់កាប់នាពេលកន្លងមកនោះ ជាដីសម្បទានរបស់ក្រុមហ៊ុនយួនឈ្មោះស៊ីអស៊ីខេ ក៏ប៉ុន្តែជាក់ស្ដែងក្រុមមនុសមកពីតំបន់ផ្សេងបានទន្ទ្រានកាន់កាប់ដីក្នុងតំបន់នោះយកទៅដាំស្វាយចន្ទី និងដំណាំផ្សេងៗទៀតជាបន្តបន្ទាប់។

តំណាងប្រជាពលរដ្ឋក្នុងភូមិឈូក ឃុំសណ្ដាន់ បានឲ្យដឹងថា ដីដែលពួកគាត់ស្នើសុំកាន់កាប់នាពេលកន្លងមកនោះ មានទំហំប្រមាណ១០ហិកតានៅចំណុចព្រៃតាធឹក ប៉ុន្តែមន្ត្រីអាជ្ញាធរប្រាប់ពួកគាត់ថាជាដីសម្បទានសេដ្ឋកិច្ចសម្រាប់ដាំកៅស៊ូរបស់ក្រុមហ៊ុនយួនឈ្មោះស៊ីអស៊ីខេ(CRCK) ក៏ប៉ុន្តែកាលពីចុងខែកក្កដាកន្លងទៅថ្មីៗនេះ ស្រាប់តែមានមនុស្សមកពីតំបន់ផ្សេងប្រមាណ១៥គ្រួសារ ធ្វើសកម្មភាពទន្ទ្រានកាន់កាប់ដីនោះយ៉ាងគឃ្លើន ហើយមិនឃើញមន្ត្រីអាជ្ញាធរ និងមន្ត្រីជំនាញចាត់វិធានការទប់ស្កាត់ឡើយ។ ហេតុនេះហើយទើបប្រជាពលរដ្ឋក្នុងឃុំសណ្ដាន់ អំពាវនាវឲ្យលោក ឡង គីសឺង អភិបាលស្រុកសណ្ដាន់ បកស្រាយឲ្យបានច្បាស់លាស់ករណីមនុស្សពីតំបន់ផ្សេងទន្ទ្រានកាន់កាប់ដីព្រៃឡង់នៅចំណុចព្រៃតាធឹក ភូមិឈូក ឃុំសណ្ដាន់ ស្រុកសណ្ដាន់ ខេត្តកំពង់ធំ។

មន្ត្រីអង្គការក្រៅរដ្ឋាភិបាលបានឲ្យដឹងថាក្រុមហ៊ុនស៊ីអស៊ីខេរបស់យួន ទទួលបានដីសម្បទាននៅតំបន់ព្រៃឡង់ប្រមាណជាង៦០០០ហិកតាសម្រាប់ដាំកៅស៊ូកាលពីឆ្នាំ២០១០ ហើយក្រុមហ៊ុននេះបានបំពានកាប់ឈើក្រៅបរិវេណដីសម្បទាន ហើយដឹកជញ្ជូនធ្វើអាជីវកម្មខុសច្បាប់យ៉ាងគឃ្លើនដោយមានការឃុបឃិតជាមួយមន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធជាច្រើនស្ថាប័នទៀត។ ចំណែកលោក អ៊ុត សំអន អភិបាលខេត្តកំពង់ធំ បែរជាធ្វើមិនដឹងមិនឮអ្វីទាំងអស់ចំពោះបទល្មើសកាប់ឈើនិងទន្ទ្រានកាន់កាប់ដីរដ្ឋនៅក្នុងព្រៃឡង់នៃឃុំសណ្ដាន់ ស្រុកសណ្ដាន់ ខេត្តកំពង់ធំ។ ហេតុនេះហើយទើបមានពលរដ្ឋពីតំបន់ផ្សេងទៅទន្ទ្រានកាន់កាប់ដីធ្លីក្នុងភូមិឈូក ឃុំសណ្ដាន់ ដោយគ្មានញញើតអ្វីទាំងអស់ ក្នុងខណៈដែលលោក ឡង គីសឺង អភិបាលស្រុកសណ្ដាន់ គិតតែរឿងផលប្រយោជន៍ផ្ទាល់ខ្លួន។ បញ្ហានេះលោក សាយ សំអាល់ រដ្ឋមន្ត្រីក្រសួងបរិស្ថាន មិនត្រូវបណ្ដែតបណ្ដោយតទៅទៀតទេ ព្រោះព្រៃឡង់ក្នុងឃុំសណ្ដាន់ ស្រុកសណ្ដាន់ នៅតែប្រឈមនឹងការឈូសឆាយទន្ទ្រានបំផ្លាញយ៉ាងពេញបន្ទុកឥតឈប់ឈរ៕

អាជ្ញាធរខេត្តកំពង់ធំព្រមានចាត់វិធានការចំពោះមន្ត្រីណាដែលបណ្ដោយឱ្យមានបទល្មើសព្រៃឈើ

noreply@blogger.com (Sotheavy royals) — Sat, 13 Aug 2016 18:46:00 -0700

ដោយ សូត សុខប្រាថ្នា

អាជ្ញាធរខេត្តកំពង់ធំ ព្រមានចាត់វិធានចំពោះមន្ត្រីពាក់ព័ន្ធមួយចំនួនដែលធ្វេសប្រហែសបណ្ដោយឱ្យសកម្មភាពកាប់បំផ្លាញព្រៃឈើ និងការដឹកជញ្ជូនឈើនៅតែបន្តកើតមាន។ វិធានការទាំងនោះ គឺត្រូវពិន័យរដ្ឋបាល ឬត្រូវអនុវត្តតាមច្បាប់តែម្ដង ពិសេសចំពោះមន្ត្រីទាំងឡាយណាដែលរកឃើញថា បានឃុបឃិតគ្នាជាមួយក្រុមឈ្មួញ។ ទោះជាយ៉ាងនេះក្ដី មន្ត្រីសហគមន៍ការពារព្រៃឡង់ មិនមានជំនឿចំពោះវិធានការនេះឡើយ។

អាជ្ញាធរខេត្តកំពង់ធំ បានដាក់បទបញ្ជាទៅគ្រប់គណៈបញ្ជាការឯកភាពស្រុក និងមន្ត្រីជំនាញដែលពាក់ព័ន្ធឱ្យត្រួតពិនិត្យលើការងាររបស់ខ្លួនឡើងវិញ ដោយមិនត្រូវធ្វេសប្រហែស ឬឃុបឃិតជាមួយក្រុមជនល្មើសកាប់បំផ្លាញព្រៃឈើ ការទន្ទ្រានដីព្រៃដោយខុសច្បាប់ និងសកម្មភាពដឹកជញ្ជូនឈើចេញពីតំបន់មួយចំនួននៅក្នុងខេត្តកំពង់ធំ ពិសេសចេញពីតំបន់ព្រៃឡង់។ ការបញ្ជាក់ជំហរបែបនេះធ្វើឡើងក្នុងកិច្ចប្រជុំរបស់គណៈបញ្ជាការឯកភាពខេត្ត និងស្ថាប័នពាក់ព័ន្ធចំពោះការត្រួតពិនិត្យ និងទប់ស្កាត់បទល្មើសព្រៃឈើកាលពីថ្ងៃទី៨ ខែសីហា។

អ្នកនាំពាក្យសាលាខេត្តកំពង់ធំ លោក គង់ វិមាន មានប្រសាសន៍នៅថ្ងៃទី១១ ខែសីហាថា នេះជាការព្រមានចុងក្រោយចំពោះមន្ត្រីពាក់ព័ន្ធទាំងអស់ឱ្យយកចិត្តទុកដាក់លើការងាររបស់ខ្លួន ដោយមិនត្រូវធ្វេសប្រហែស ឬឃុបឃិតជាមួយក្រុមជនល្មើសឡើយ។ ជាមួយគ្នានេះ អាជ្ញាធរខេត្តនឹងចាត់វិធានការលើមន្ត្រីពាក់ព័ន្ធទាំងនោះ ហើយដាក់ទោសទណ្ឌតាមច្បាប់តែម្ដង៖ «បើសិនជាជំនាញមិនបានយកចិត្តទុកដាក់ទេ ឯកឧត្ដមអភិបាលខេត្តនឹងបង្ក្រាបមន្ត្រីពាក់ព័ន្ធ។ បាទ! នេះជាប្រសាសន៍របស់ឯកឧត្ដមអភិបាលខេត្ត ហើយលោកនឹងមិនយោគយល់ទៀតទេ»។

លោកឱ្យដឹងទៀតថា អាជ្ញាធរនឹងដាក់បណ្ដាញ ឬក្រុមចល័តដើម្បីតាមដានសកម្មភាពអនុវត្តន៍ច្បាប់របស់មន្ត្រីពាក់ព័ន្ធ ព្រមទាំងសហការជាមួយពលរដ្ឋដើម្បីរាយការណ៍មកថ្នាក់ខេត្តផ្ទាល់តែម្ដងលើករណីបទល្មើសព្រៃឈើដែលបានកើតមានឡើង។

កាលពីខែកក្កដា កម្មករអារឈើនៅតំបន់ព្រៃឡង់ ក្នុងស្រុកសណ្ដាន់ ខេត្តកំពង់ធំ ម្នាក់ឱ្យដឹងថា ប្រពន្ធនិងកូនៗរបស់អធិការស្រុកសណ្ដាន់ គឺលោក អួង ម៉ូលី គឺជាមេខ្លោងដែលជួលពលរដ្ឋទៅកាប់ឈើនៅតំបន់ព្រៃមួយនេះ។ សកម្មភាពនេះធ្វើឡើងជាប្រព័ន្ធ ដោយពួកគាត់អះអាងថា ក្រុមគ្រួសារអធិការស្រុករូបនេះ បានបង់ប្រាក់ប្រចាំខែមួយចំនួនទៅស្ថាប័នពាក់ព័ន្ធជាថ្នូរការចូលទៅកាប់ និងដឹកជញ្ជូនឈើពីតំបន់ព្រៃឡង់ ប៉ុន្តែការចោទប្រកាន់នេះ ត្រូវបានលោក អ៊ួង ម៉ូលី ទាត់ចោលដោយលើកឡើងថា ជាការបង្ខូចកិត្តិយសក្រុមគ្រួសាររបស់លោកទៅវិញ។

សកម្មជនការពារព្រៃឡង់ នៅស្រុកសណ្ដាន់ ម្នាក់ លោក ជុំ យីន ឱ្យដឹងថា ក្រោយពេលរាជរដ្ឋាភិបាលដាក់តំបន់ព្រៃឡង់ ជាព្រៃជម្រកសត្វ ឬជាព្រៃការពារកាលពីដើមខែឧសភា បទល្មើសមួយចំនួនបានថយចុះ ប៉ុន្តែបច្ចុប្បន្នសកម្មភាពបទល្មើសបានកើតឡើងវិញដដែល។ លោកបារម្ភថា ប្រសិនអាជ្ញាធរបណ្ដោយឱ្យបទល្មើសនៅតែកើតឡើងបន្តទៀត តំបន់ព្រៃអភិរក្សមួយនេះនឹងមានតែឈ្មោះប៉ុណ្ណោះ៖ «កាលដំបូងឡើយ យើងសប្បាយចិត្តជាមួយមន្ត្រីអនុរក្សក្នុងការការពារ និងថែរក្សាបានល្អ ប៉ុន្តែចុងក្រោយយើងសោកស្ដាយខ្លាំងបំផុត»។

កាលពីដើមខែឧសភា រាជរដ្ឋាភិបាលសម្រេចដាក់បញ្ចូលតំបន់ព្រៃឡង់ ទាំង ៤ខេត្ត រួមមានខេត្តព្រះវិហារ កំពង់ធំ ក្រចេះ និង ខេត្តស្ទឹងត្រែង លើទំហំដីជាង ៤០ម៉ឺនហិកតារជាតំបន់ព្រៃជម្រកសត្វ។

ទោះបីយ៉ាងណាក៏ដោយ អ្នកសម្របសម្រួលលេខាធិការដ្ឋានបណ្ដាញសហគមន៍ព្រៃឡង់ លោក សេង សុខហេង គឺមិនមានជំនឿទៅលើវិធានការរបស់អាជ្ញាធរខេត្តកំពង់ធំ ឡើយ ពីព្រោះកន្លងមកវិធានការរបស់អាជ្ញាធរ និងរាជរដ្ឋាភិបាលរាប់មិនអស់ ប៉ុន្តែបទល្មើសនៅតែអាចដំណើរការបានយ៉ាងល្អដដែល៖ «សូម្បីតែកន្លងមកយើងឃើញថ្នាក់រដ្ឋមន្ត្រី នាយករដ្ឋមន្ត្រីគាត់ព្រមានតែមិនដែលឃើញធ្វើបានផង ធ្វើតែមួយក្ដាំង ធ្វើបានតែតូចតាចអ៊ីចឹងទៅ»។

លោកយល់ថា ដើម្បីឱ្យសារព្រមានចាត់វិធានការរបស់មន្ត្រីរាជរដ្ឋាភិបាលមានប្រសិទ្ធភាព ពួកគេត្រូវអនុវត្តច្បាប់ឱ្យបានតឹងរ៉ឹង ហើយត្រូវដកតួនាទីមន្ត្រីណាដែលធ្វើការមិនកើត ព្រមទាំងត្រូវដាក់ទោសទណ្ឌដល់មន្ត្រីរបស់ខ្លួនដែលពាក់ព័ន្ធបទល្មើសព្រៃឈើ។ ជាងនេះទៀត រដ្ឋត្រូវផ្ដល់សិទ្ធិអំណាចដល់ប្រជាសហគមន៍ការពារព្រៃឈើ និងត្រូវលុបបំបាត់រាល់ទម្រង់អំពើពុករលួយជាដើម៕

អង្គការសត្វព្រៃ ថា មានដំរីជាង២០០ ក្បាលក្នុងខេត្តមណ្ឌលគិរី និងជាង១០០ ក្បាលនៅជួរភ្នំក្រវាញ

noreply@blogger.com (Sotheavy royals) — Wed, 10 Aug 2016 18:34:00 -0700

ដោយ៖ រ៉ឹម ភារី

ភ្នំពេញ៖ អង្គការសម្ព័ន្ធមិត្តសត្វព្រៃ (Wildlife Alliance) ដែលធ្វើការងារលើការអភិរក្សសត្វព្រៃ បានប៉ានប្រមាណថា មានដំរីជាង២រយក្បាលក្នុងខេត្តមណ្ឌលគិរី និងជាង១០០ក្បាលនៅជួរភ្នំក្រវាញ។ ការលើកឡើងបែបនេះ គឺធ្វើឡើងនៅក្នុងសន្និសីទសារព័ត៌មានមួយស្តីពីការការអបអរ សមិទ្ធផលរបស់ខ្លួន ដែលធ្វើឲ្យគ្មានការបរបាញ់សត្វដំរីអាស៊ី ក្នុងតំបន់ជួរភ្នំក្រវាញចាប់តាំងពីឆ្នាំ២០០៦រហូតមកដល់បច្ចុប្បន្ន។

ខណៈការបារម្ភរបស់ប្រជាជនកម្ពុជាចំពោះការបាត់បង់សត្វព្រៃ អង្គការសម្ព័ន្ធមិត្តសត្វព្រៃ បានប្រារព្ធពិធីអបអរសមិទ្ធផលរបស់ខ្លួន ដែលបានធ្វើឲ្យសត្វដំរីមានកើនឡើង និងរារាំងក្រុមឈ្មួញ និងជនល្មើស រហូតករណីសម្លាប់សត្វដីរីស្មើនឹងចំនួនសូន្យក្នុងរយៈពេល១០ឆ្នាំមកនេះ។ អង្គការអន្តរជាតិមួយនេះ បានប៉ាន់ប្រមាណថា នៅកម្ពុជានៅសល់សត្វដំរីប្រមាណជាង២០០ ក្បាលនៅក្នុងខេត្តរតនគិរី និងជាង១០០ ក្បាលទៀតនៅតំបន់ជួរភ្នំក្រវាញ។ «គ្មាននរណាដឹងទេ ពីចំនួនដំរីពិតប្រាកដនៅជួរភ្នំក្រវាញ និងខ្ពង់រាបខេត្តមណ្ឌលគិរី តែទោះជាយ៉ាងក៏ដោយមានការប៉ានប្រមាណថា នៅខេត្តមណ្ឌលគិរីមានដំរីពី២០០ទៅ៣០០ក្បាល ហើយនៅជួរភ្នំក្រវាញមានចន្លោះពី១០០ទៅ២០០ក្បាល តែខ្ញុំមិនសូវច្បាស់នោះទេ។ ខ្ញុំទុកឲ្យអ្នកចុះល្បាតនៅភ្នំក្រវាញផ្ទាល់ ឆ្លើយទើបច្បាស់ជាង»។ នេះការអះអាងរបស់បណ្ឌិត Thomas Grayនាយកផ្នែកវិទ្យាសាស្ត្រ និងការអភិវឌ្ឍន៍សកលរបស់អង្គការសម្ព័ន្ធមិត្តសត្វព្រៃ ដែលបានថ្លែងនៅក្នុងសន្និសីទសារព័ត៌មាននៅទីស្នាក់ការកណ្តាល អង្គការសម្ព័ន្ធមិត្តសត្វព្រៃ ក្នុងរាជធានីភ្នំពេញ នៅថ្ងៃទី១០ សីហានេះ។

លោក Nop Thet ទីប្រឹក្សាក្រុមចុះល្បាតនៅឧទ្យានជាតិជួរភ្នំក្រវាញរបស់អង្គការសម្ព័ន្ធមិត្តសត្វព្រៃ ដែលតែងតែចុះល្បាតជាប្រចាំនៅជួរភ្នំក្រវាញ បានអះអាងគាំទ្រនឹងការលើកឡើងរបស់បណ្ឌិត Thomas Gray ថា ដំរីនៅតំបន់ជួរភ្នំក្រវាញ គឺមានការកើនឡើង បើប្រៀបធៀបនឹង១០ឆ្នាំមុន។ លោកបញ្ជាក់យ៉ាងដូច្នេះ៖«ពួកខ្ញុំ គឺជាអ្នកចុះល្បាតជាក់ស្តែងជាប្រចាំ។ យើងបានឃើញដានដំរី អាចម៍ដំរីនិងផ្លូវដំរីច្រើន ព្រមទាំងឃើញដំរីជាច្រើនដោយផ្ទាល់មានកើនឡើងច្រើន។ ខ្ញុំគិតថា ដំរីមានកើនឡើងពី៥០ទៅ៦០ភាគរយ»។

ទន្ទឹមនឹងការកើនឡើងសត្វដំរីនៅប្រទេសកម្ពុជានេះដែរ អង្គការសម្ព័ន្ធមិត្តសត្វព្រៃ បានធ្វើការតាំងពីឆ្នាំ២០០៦មក ដើម្បីការពារ និងអភិរក្សសត្វដំរីនៅឧទ្យានជាតិជួរភ្នំក្រវាញ។ កាលពីឆ្នាំ២០០០ដល់ឆ្នាំ២០០៦ មានដំរីអាស៊ីចំនួ៣៧ក្បាល ត្រូវបានគេសម្លាប់នៅតំបន់ជួរភ្នំក្រវាញ។ តែចាប់តាំងឆ្នាំ២០០៦រហូតមកដល់ពេលនេះ អង្គការសម្ព័ន្ធមិត្តសត្វព្រៃ សហការណ៍ជារដ្ឋបាលព្រៃឈើ ក្រសួងបរិស្ថាន ព្រមទាំងភាគីពាក់ព័ន្ធបានចាប់អន្ទាក់ចំនួនជាង១៤ម៉ឺន ព្រមទាំងចាប់បានជនល្មើសជាង៣០០នាក់បញ្ជូនទៅតុលាការផងដែរ។

ដោយឡែក អង្គការរុក្ខជាតិ និងសត្វអន្តរជាតិ (FFI) កាលពីឆ្នាំ២០០៨ បានប៉ាន់ប្រមាណថា យ៉ាងហោចណាស់ក៏មានដំរីចំនួន១៧៥ក្បាល កំពុងរស់នៅក្នុងច្រករបៀងដំរីភាគនីរតីនេះ។

សូមបញ្ជាក់ថា ឧទ្យាជាតិជួរភ្នំក្រវាញខាងត្បូង មានទំហំ ៤១០,០០០ ហិចតា ទើបតែបង្កើតថ្មី គឺស្ថិតនៅចំកណ្តាលជម្រកសត្វដំរី និងជួយរក្សាឲ្យដែនជម្រកនេះ សម្រាប់ជាតំបន់ទេសភាពសត្វដំរី៕

ឧកញ៉ា សី កំពុងបំផ្លាញព្រៃឈើនៅក្នុងដែនជម្រកសត្វព្រៃលំផាត់ យ៉ាងមហន្តរាយ

noreply@blogger.com (Sotheavy royals) — Wed, 10 Aug 2016 18:20:00 -0700

ដោយ មនសិការខ្មែរ

ប្រជាសហគមន៍ការពារព្រៃឈើក្នុងស្រុកលំផាត់ ក៏ដូចជាមន្ត្រីអង្គការក្រៅរដ្ឋាភិបាលបានសម្ដែងនូវសេចក្ដីព្រួយបារម្ភយ៉ាងខ្លាំងចំពោះមហន្តរាយព្រៃឈើក្នុងដែនជម្រកសត្វព្រៃលំផាត់ ព្រោះឧកញ៉ា សី កំពុងធ្វើសកម្មភាពកាប់ឈើនិងដឹកជញ្ជូនឈើចេញពីតំបន់នេះយ៉ាងគគ្រឹកគគ្រេង ហើយគ្មានមន្ត្រីជំនាញនិងសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ។ សេចក្ដីរាយការណ៍ពីប្រជាពលរដ្ឋនៅស្រុកលំផាត់ បានឲ្យដឹងថា រយៈពេលប៉ុន្មានថ្ងៃកន្លងទៅនេះឧកញ៉ា សី ឬ ធី រិទ្ធសី បានបំផុសប្រជាពលរដ្ឋឲ្យចូលទៅកាប់ឈើក្នុងតំបន់ដែនជម្រកសត្វព្រៃលំផាត់ ហើយដឹកជញ្ជូនទៅចែកចាយតាមដេប៉ូក្នុងខេត្តរតនគិរី ដោយគ្មានញញើតអ្វីទាំងអស់។

មន្ត្រីអង្គការក្រៅរដ្ឋាភិបាលនិងប្រជាពលរដ្ឋក្នុងស្រុកលំផាត់ បានឲ្យដឹងថា រយៈពេលប៉ុន្មានថ្ងៃកន្លងទៅនេះឧកញ៉ា សី បានប្រើប្រាស់រថយន្តយីឌុបសណ្ដោងកន្ទុយពី៧ទៅ៨គ្រឿងដឹកឈើក្រហមប្រភេទលេខ២ចេញពីតំបន់ដែនជម្រកសត្វព្រៃលំផាត់ យកទៅចែកចាយតាមដេប៉ូក្នុងក្រុងបានលុង យ៉ាងពេញបន្ទុក។ ចំណែកលោក ហុង សុវណ្ណរាន ដែលជានាយផ្នែករដ្ឋបាលព្រៃឈើប្រចាំ៣ស្រុក-ក្រុង គឺស្រុកលំផាត់ ស្រុកកូនមុំ និងក្រុងបានលុង ធ្វើមិនដឹងមិនឮអ្វីទាំងអស់ចំពោះបទល្មើសបំផ្លាញព្រៃឈើរបស់ឧកញ៉ា សី ដែលជាឈ្មួញដ៏មានឥទ្ធិពល។ លើសនេះទៅទៀតលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី ទំនងទទួលបានផលប្រយោជន៍យ៉ាងច្រើនពីឧកញ៉ា សី ទើបបណ្ដោយឲ្យឈ្មួញរូបនេះធ្វើអ្វីៗតាមអំពើចិត្ត។

ប្រភពពីមន្ត្រីរដ្ឋបាលព្រៃឈើតូចតាចនៅក្នុងខេត្តរតនគិរី បានឲ្យដឹងថានៅក្នុងឯកសារអាជ្ញាប័ណ្ណនាំឈើចេញដែលឧកញ៉ា សី សុំដឹកជញ្ជូនគឺក្នុងមួយរថយន្តត្រូវដឹកឈើតែ១៦ម៉ែត្រគូប ប៉ុន្តែជាក់ស្ដែងក្នុង១រថយន្តគេផ្ទុកឈើពី៣០ទៅ៤០ឬ៥០ម៉ែត្រគូប។ ការដែលឧកញ៉ា សី អាចធ្វើអ្វីៗតាមអំពើចិត្តគឺមានការឃុបឃិតជាមួយលោក ហុង សុវណ្ណរាន នាយផ្នែករដ្ឋបាលព្រៃឈើប្រចាំស្រុកលំផាត់ ស្រុកកូនមុំ និងក្រុងបានលុង ទើបអ្វីៗអាចប្រព្រឹត្តទៅដោយរលូន ហើយព្រៃឈើក្នុងដែនជម្រកសត្វព្រៃលំផាត់ កំពុងប្រឈមនឹងសេចក្ដីវិនាសចៀសមិនផុតឡើយ។ ហេតុនេះលោក ឆេង គឹមស៊ុន អគ្គនាយករដ្ឋបាលព្រៃឈើ និងលោក វេង សាខុន រដ្ឋមន្ត្រីក្រសួងកសិកម្ម គួរចាត់វិធានការទប់ស្កាត់បទល្មើសបំផ្លាញព្រៃឈើរបស់ឧកញ៉ា សី នៅក្នុងខេត្តរតនគិរីជាបន្ទាន់ ហើយក៏ត្រូវចាត់វិធានការលើភាពអសកម្មរបស់មន្ត្រីរដ្ឋបាលព្រៃឈើក្នុងខេត្តរតនគិរី ជាបន្ទាន់ផងដែរ៕

ករណីមន្ត្រីអាវុធហត្ថខេត្តកំពង់ធំ ជាប់ពាក់ព័ន្ធបទល្មើសដឹកជញ្ជូនឈើគ្រញូងធ្វើឲ្យមជ្ឈដ្ឋាននានាហួសចិត្តយ៉ាងខ្លាំង

noreply@blogger.com (Sotheavy royals) — Wed, 10 Aug 2016 17:36:00 -0700

ដោយ មនសិការខ្មែរ
ប្រជាពលរដ្ឋក្នុងខេត្តសៀមរាប និងខេត្តកំពង់ធំ មានការចាប់អារម្មណ៍យ៉ាងខ្លាំងទៅលើរឿងរ៉ាវមន្ត្រីអាវុធហត្ថខេត្តសៀមរាប ចាប់វ៉ៃខ្នោះមន្ត្រីអាវុធហត្ថខេត្តកំពង់ធំមួយរូប ដែលជាប់ពាក់ព័ន្ធទៅនឹងការប្រើអំណាចកាងរថយន្តដឹកឈើគ្រញូងខុសច្បាប់។ ការចាប់ខ្លួនមន្ត្រីអាវុធហត្ថខេត្តកំពង់ធំ គឺកម្លាំងអាវុធហត្ថខេត្តសៀមរាប អនុវត្តន៍តាមបទបញ្ជារបស់ព្រះរាជអាជ្ញាអមសាលាដំបូងខេត្តសៀមរាប ដោយសារតែមន្ត្រីអាវុធហត្ថខេត្តកំពង់ធំ ឈ្មោះ សេង ប៊ុនតេង ធ្វើសកម្មភាពបើករថយន្តរបស់ខ្លួនកាងរថយន្តដឹកឈើគ្រញូង ហើយរាលរាំងផ្លូវសមត្ថកិច្ចក្នុងការបង្ក្រាបមើសព្រៃឈើ។ ការចាប់ខ្លួនមន្ត្រីអាវុធហត្ថឈ្មោះ សេង ប៊ុនតេង បានធ្វើឡើងកាលពីវេលាម៉ោង៤ទៀបភ្លឺ ថ្ងៃទី០៩ ខែសីហា ឆ្នាំ២០១៦ ចាប់ពីចំណុចស្រុកបន្ទាយស្រី រហូតដល់ម៉ោង៥និង៣០នាទីព្រឹក ទើបចាប់បាននៅចំណុចផ្លូវជាតិលេខ៦ ក្នុងស្រុកប្រាសាទបាគង ខេត្តសៀមរាប។
ប្រភពពីមន្ត្រីអាវុធហត្ថខេត្តសៀមរាប ដែលចូលរួមក្នុងប្រតិបត្តិការនោះបានឲ្យដឹងថា មន្ត្រីអាវុធហត្ថខេត្តកំពង់ធំ ដែលត្រូវចាប់ខ្លួនមានឈ្មោះ សេង ប៊ុនតេង ឋានៈវរសេនីយ៍ត្រី(ស័ក្ដិ៍៤) មានតួនាទីជាជំនួយការលោក ហង្យ ថុល មេបញ្ជាការកងរាជអាវុធហត្ថខេត្តកំពង់ធំ។ រឿងរ៉ាវដែលឈានដល់ការចាប់ខ្លួនលោក សេង ប៊ុនតេង គឺមកពីមន្ត្រីអាវុធហត្ថរូបនេះបើករថយន្តឡិចស៊ីស៤៧០ពណ៌ខ្មៅ

ពាក់ស្លាកលេខភ្នំពេញ2L-9861 របស់ខ្លួនមករារាំងពីមុខរថយន្តសមត្ថកិច្ចដែលតាមបង្ក្រាបរថយន្តដឹកឈើគ្រញូង។ ប្រភពបានឲ្យដឹងទៀតថាលោក សេង ប៊ុនតេង បានបើករថយន្តរបស់ខ្លួនរេពេញផ្លូវថ្នល់មិនឲ្យរថយន្តសមត្ថកិច្ច៣គ្រឿងតាមបង្ក្រាបរថយន្តដឹកឈើគ្រញូងបាន។
ប្រភពពីមន្ត្រីកងរាជអាវុធហត្ថនៅខេត្តកំពង់ធំ បានឲ្យដឹងថាកន្លងមកលោក សេង ប៊ុនតេង អាងតួនាទីរបស់ខ្លួនជាជំនួយការលោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ ហើយប្រើអំណាចកាងក្រុមឈ្មួញដឹកជញ្ជូនឈើប្រណីតដោយគ្មានញញើតអ្វីទាំងអស់។ ដូច្នេះហើយទើបការដែលកម្លាំងអាវុធហត្ថខេត្តសៀមរាប អនុវត្តន៍តាមបទបញ្ជារបស់ព្រះរាជអាជ្ញាអមសាលាដំបូងខេត្តសៀមរាប ក្នុងការចាប់ខ្លួនលោក សេង ប៊ុនតេង ធ្វើឲ្យប្រជាពលរដ្ឋនិងមជ្ឈដ្ឋាននានាមានការចាប់អារម្មណ៍យ៉ាងខ្លាំង ព្រោះលោក សេង ប៊ុនតេង ជាប់ពាក់ព័ន្ធនឹងបទល្មើសដឹកជញ្ជូនឈើគ្រញូងជាយូរមកហើយ។ នៅក្នុងការចាប់ខ្លួនលោក សេង ប៊ុនតេង គឺកម្លាំងអាវុធហត្ថខេត្តសៀមរាប ដកហូតរថយន្តឡិចស៊ីស៤៧០ពណ៌ខ្មៅ១គ្រឿង អាយកូម១គ្រឿង ស្រោមកាំភ្លើងខ្លីចំនួន២ ខ្នោះដៃ២ កាំភ្លើងម៉ាកឡុកមានគ្រាប់ចំនួន១៤គ្រាប់ និងសម្ភារៈមួយចំនួនទៀត។ មជ្ឈដ្ឋាននានាចាំមើលថា សមត្ថកិច្ចខេត្តសៀមរាប ចាត់វិធានការបែបណាទៅលើលោក សេង ប៊ុនតេង ជំនួយការលោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ ព្រោះលោក សេង ប៊ុនតេង ប្រើអំណាចរបស់ខ្លួនកាងឈ្មួញដឹកជញ្ជូនឈើគ្រញូងខេត្តឧត្ដរមានជ័យ ព្រះវិហារ និងសៀមរាប ទៅស្រុកយួនជាច្រើនឆ្នាំមកហើយ៕

ឈ្មួញ និងមន្ត្រីពុករលួយកំពុងឃុបឃិតគ្នាកាប់ឈើនៅក្នុងឧទ្យានជាតិវីរៈជ័យ ខេត្តរតនគិរី

noreply@blogger.com (Sotheavy royals) — Wed, 10 Aug 2016 07:32:00 -0700

ថ្ងៃពុធ, ១០ សីហា ២០១៦ ១១:០០ ព្រឹក

ដោយ មនសិការខ្មែរ

សកម្មជនបរិស្ថាននៅខេត្តរតនគិរី បានរាយការណ៍ឲ្យដឹងថា ក្នុងរយៈពេលបួនថ្ងៃ គឺចាប់ពីទី០៥ដល់ថ្ងៃទី០៨ ខែសីហា កន្លងទៅនេះ គេឃើញរថយន្ដយីឌុបធំៗបានដឹករទេះក្របីមកពីចម្ងាយ រាប់សិបនឹមមកទម្លាក់នៅចំណុច វាលថ្មរំផ្លង់ ស្ថិតនៅឃុំអូរជុំ ស្រុកអូរជុំ ចូលទៅកាប់ឈើដោយខុសច្បាប់នៅក្នុងឧទ្យានជាតិវីរៈជ័យ ខណៈមន្ត្រីជំនាញគ្មានវិធានការទប់ស្កាត់អ្វីឡើយ ហើយសកម្មភាពនេះកំពុងតែធ្វើឲ្យប្រជាពលរដ្ឋមូលដ្ឋានមានការខឹងសម្បា។

រទេះក្របីទាំងនោះបានបរបំបែកគ្នាជាក្រុមៗ មានក្រុមខ្លះបរឆ្លងកាត់ទីរួមស្រុកតាវែង ហើយរទេះក្របីខ្លះទៀតបរទៅកាន់ ស្រុកវ៉ើនសៃ ដើម្បីចូលព្រៃជ្រៅធ្វើសកម្មភាពកាប់ឈើប្រណីត ហើយដឹកឈើទាំងនោះចេញពីព្រៃមកវិញ។ សកម្មជនបរិស្ថានបានបញ្ជាក់ថា ក្រោយពីកាប់ឈើ និងដឹកចេញពីតំបន់អភិរក្សរួចមក គេសង្កេតឃើញរថយន្តធុនធំបានចាំនៅខាងក្រៅតំបន់អភិរក្សរួចជាស្រេចដើម្បីប្រមូលដឹកឈើទាំងនោះយកចេញទៅបាត់ដោយរលូន ខណៈមន្ត្រីជំនាញនៅក្នុងភូមិសាស្ត្រស្រុកទាំងពីរខាងលើនេះ មិនបានអើពើចំពោះបទល្មើសឡើយ។

ប្រជាពលរដ្ឋមូលដ្ឋានបានបញ្ជាក់ដែរថា ការដឹកជញ្ជូនឈើភាគច្រើនកើតឡើងនៅពេលយប់ ហើយអ្នកអារឈើ និងអ្នកដឹកឈើ ខ្លះមានកាំភ្លើងច្នៃ ដែលជាហេតុធ្វើឲ្យមន្ត្រីជំនាញខ្លាចរអា។ យ៉ាងណាក្តី ប្រជាពលរដ្ឋបានរិះគន់ថា សមត្ថកិច្ចជំនាញ និងសមត្ថកិច្ចពាក់ព័ន្ធផ្សេងៗទៀត ដែលនៅឈរជើងតំបន់នោះ ហាក់បីដូចជាមានសភាពធូររលុងបណ្តែតបណ្តោយឲ្យសកម្មភាពដឹកជញ្ជូនឈើតាមរថយន្តធំៗ ឡានកូរ៉េ ធ្វើសកម្មភាពបានយ៉ាងរលូន ដោយពុំមានទប់ស្កាត់អ្វីសោះ ឬមួយសមត្ថកិច្ចដែលមានអាវុធនៅនឹងដៃខ្លាចកាំភ្លើងកែច្នៃរបស់ជនល្មើស។

ជុំវិញបញ្ហាខាងលើនេះ សកម្មជនបរិស្ថាននៅខេត្តរតនគិរី បានបង្ហើបថា ការពិតទៅមន្ត្រីជំនាញមិនមែនខ្លាចជនល្មើសទេ តែបញ្ហានៅត្រង់ថាមន្ត្រីជំនាញមួយចំនួនមានផលប្រយោជន៍រួមគ្នាជាមួយក្រុមជនល្មើស ហើយក្នុងករណីខ្លះសមត្ថកិច្ចក៏ពិបាកធ្វើសកម្មភាពបង្ក្រាបផងដែរដោយសារស្ថានភាពភូមិសាស្ត្រមានលក្ខណៈស្មុគស្មាញ។ សកម្មជនបរិស្ថានបានបញ្ជាក់ថា បើសមត្ថកិច្ចជំនាញពិតជាមានឆន្ទៈពិតប្រាកដ បទល្មើសព្រៃឈើនឹងអាចបង្ក្រាបបាន ព្រោះជនល្មើសចូលព្រៃជ្រៅកាប់ឈើបាន ដូចនេះសមត្ថកិច្ចត្រូវបង្ហាញសមត្ថភាពបម្រើប្រជាពលរដ្ឋ៕

រដ្ឋាភិបាល និង អង្គការ WCS នឹងចុះហត្ថលេខាលើកិច្ចព្រមព្រៀងផ្ទេរឥណទានកាបូន

noreply@blogger.com (Sotheavy royals) — Wed, 10 Aug 2016 04:25:00 -0700

ដោយ៖ ថ្មីៗ

រដ្ឋាភិបាល និងអង្គការសមាគមអភិរក្សសត្វព្រៃនៅកម្ពុជា(WCS) នឹងចុះហត្ថលេខា លើការអនុវត្តតាមកិច្ចព្រមព្រៀង ផ្ទេរឥណទានកាបូនទៅឲ្យក្រុមហ៊ុន Disney នៅថ្ងៃទី១១ សីហា វេលាម៉ោង ៣រសៀល នៅសាលប្រជុំ ម៉ុក ម៉ារ៉េត នាទីស្ដីការក្រសួងបរិស្ថាន ។ នេះបើផ្អែកតាមសេចក្ដីប្រកាសព័ត៌មានរបស់ស្ថានទូតអាមេរិកប្រចាំកម្ពុជា។

លោក William A. Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជា នឹងលោក សាយ សំអាល់ រដ្ឋមន្ត្រីក្រសួងបរិស្ថាន នឹងចូលរួមពិធីចុះហត្ថលេខាលើគម្រោងនៃកិច្ចព្រមព្រៀងដែលនឹងត្រួតពិនិត្យលើការប្រើប្រាស់មូលនិធិ បានមកពីការផ្ទេរឥណទានកាបូនទៅឲ្យក្រុមហ៊ុន Disney នេះ។

គួរបញ្ជាក់ថា ឥណទានកាបូនដែលត្រូវបានលក់នេះ ត្រូវបានគេដាក់នៅលើទីផ្សារកាបូនស្ម័គ្រចិត្ត ដែលអាចឲ្យក្រុមហ៊ុនឯកជន អង្គការ និងបុគ្គលម្នាក់ៗ ធ្វើការបង់ប្រាក់សម្រាប់សកម្មភាពជាច្រើន ដែលចូលរួមកាត់បន្ថយការបញ្ចេញឧស្ម័ន។

កន្លងមកលោក សាយ សំអាល់ រដ្ឋមន្ត្រីក្រសួងបរិស្ថាន បានមានប្រសាសន៍ថា ការលក់ឥណទានកាបូនទ្រង់ទ្រាយធំដំបូងបង្អស់របស់កម្ពុជានេះ គឺជាផ្នែកមួយនៃចក្ខុវិស័យរបស់យើង ដើម្បីទទួលបាននិរន្តរភាពហិរញ្ញវត្ថុសម្រាប់តំបន់ការពារនៅក្នុងប្រទេសកម្ពុជា។ លោកបន្តថា តាមរយៈកិច្ចព្រមព្រៀងនេះ នឹងផ្តល់ថវិកាសឹងតែទាំងអស់សម្រាប់ការពារព្រៃឈើ និងការអភិវឌ្ឍន៍សហគមន៍ ។

សូមបញ្ជាក់ថា ការផ្ទេរឥណទានកាបូននៃដែនជម្រកសត្វព្រៃកែវសីមាដល់ក្រុមហ៊ុន Disney នេះ មានផ្ទៃដី២៩២,៦៩០ហិចតា ស្ថិតនៅក្នុងខេត្តខេត្តមណ្ឌលគិរី។ ក្រុមហ៊ុន Disney ដែលជាក្រុមហ៊ុនវិនិយោគលើការកាត់បន្ថយឧស្ម័នផ្ទះកញ្ចក់នៅទូទាំងពិភពលោក៕

ស្ថានភាពព្រៃឡង់ Prey Lang នាពេលបច្ចុប្បន្ន

noreply@blogger.com (Sotheavy royals) — Sun, 31 Jul 2016 22:49:00 -0700

ក-អំពីការអភិវឌ្ឍក្នុងតំបន់ព្រៃឡង់ Prey Lang Area (ខេត្តកំពង់ធំ)

Prey Lang នៅពុំទាន់មានការអភិវឌ្ឍជាដុំកំភួន គួរឲ្យកត់សម្គាល់ក្នុងតំបន់ព្រៃការពារដើម្បីអភិរក្សជីវចម្រុះ

(ព្រៃឡង់) Prey Lang ប៉ុន្មានទេ តែក្រសួងឧស្សាហកម្មរ៉ែ និងថាមពលបានផ្តល់អាជ្ញាប័ណ្ណឲ្យក្រុមហ៊ុន ចំនួន០៣ ធ្វើការសិក្សាស្រាវជ្រាវរ៉ែលោហៈក្នុងខេត្តកំពង់ធំ ខេត្តក្រចេះ មានក្រុមហ៊ុនALEXCORPO RATIONវិនិយោគនៅតំបន់ភ្នំជី ស្រុកសណ្ដាន់ ខេត្តកំពង់ធំ លើផ្ទៃដីទំហំ ១៦២គីឡូមែត្រក្រឡា ក្រុមហ៊ុន INDOCHINE RESOURCES LTD វិនិយោគនៅក្នុងភូមិសាស្រ្ដតំបន់ភ្នំប្រុស ស្រុកសណ្ដាន់ ខេត្តកំពង់ធំ និង ស្រុកសំបូរ ខេត្តក្រចេះ លើផ្ទៃដីទំហំ២៧១គីឡូម៉ែត្រក្រឡា និងក្រុមហ៊ុន ASIA PACIFIC GOLD & COPPER COMPANY LIMITED វិនិយោគនៅតំបន់ស្រុកសន្ទុក ខេត្តកំពង់ធំ និងស្រុកព្រែកប្រសប់ ខេត្តក្រចេះ លើផ្ទៃដីទំហំ២៩២(ពីររយកៅសិបពីរ)គីឡូម៉ែត្រក្រឡា។ ជាមួយគ្នានេះដែរ

មានគម្រោងសាងសង់ផ្លូវឆ្លងកាត់តំបន់ព្រៃឡង់ផងដែរ រួមទាំងគម្រោងផ្ដល់សម្បទានដី សង្គមកិច្ចនៅក្នុងភូមិសាស្រ្ដឃុំបឹងល្វា ស្រុកសន្ទុកខេត្តកំពង់ធំ មានផ្ទៃដីទំហំ២២៥០ហិកតា។

ផែនទី Prey Lang ខេត្តកំពង់ធំ និងសកម្មភាពការងារចុះល្បាត របស់ ខរព.កធ

ខ-ការអភិវឌ្ឍនៅខាងក្រៅជាប់តំបន់ Prey Lang ព្រៃការពារអភិរក្សជីវចម្រុះព្រៃឡង់

-មានការអភិវឌ្ឍដូចជាការផ្តល់ដីសម្បទានដីសេដ្ឋកិច្ចឲ្យក្រុមហ៊ុនចំនួន០២នៅជាប់តំបន់ ព្រៃការពារនេះ គឺក្រុមហ៊ុន ស៊ី អរ ស៊ី ខេ អភិវឌ្ឍន៍កៅស៊ូទំហំ ៦០៤៤ ហិកតា ស្ថិតក្នុងស្រុកសណ្តាន់ និងក្រុមហ៊ុន មានរិទ្ធី ខូ អិល ធី ឌី ទំហំ៩៧៨៤ ហិកតា ស្ថិតក្នុងស្រុកសន្ទុក ។

-មានការអភិវឌ្ឍដូចជាការផ្តល់សម្បទានដីសង្គមកិច្ចចំនួន ០២កន្លែង គឺនៅក្នុងឃុំសុចិត្រ ស្រុកសណ្ដាន់ មានផ្ទៃដីទំហំ ១៨១៧ ហិកតា និងក្នុងឃុំបឹងល្វា ស្រុកសន្ទុក ខេត្តកំពង់ធំ មានផ្ទៃដីទំហំ ៣៤៦៩ ហិកតា ។

Prey Lang and Household

-ការអភិវឌ្ឍសហគមន៍ព្រៃឈើ នៅក្នុងស្រុកសន្ទុក និងស្រុកសណ្ដាន់

-ការរៀបចំបង្កើតព្រៃសិក្សាស្រាវជ្រាវ និងស្តារព្រៃឈើឡើងវិញ ។

គ-ស្រុកដែលជាប់ពាក់ព័ន្ធ និងព្រៃការពារ ដើម្បីអភិរក្សជីវចម្រុះ “ព្រៃឡង់” Prey Lang

Prey Lang and Household

ស្រុកពាក់ព័ន្ធចំនួន០២ គឺ(ស្រុកសណ្តាន់ និងស្រុកសន្ទុក) ឃុំពាក់ព័ន្ធចំនួន០៥ឃុំ (ឃុំដងកាំបិត,ឃុំសណ្តាន់, ឃុំមានរិទ្ធិ, ឃុំសុចិត្រនៃស្រុកសណ្តាន់ និងឃុំបឹងល្វានៃស្រុកសន្ទុក) ហើយមានចំនួន ៤៥ ភូមិ ហើយមានប្រជាជនដែលពាក់ព័ន្ធៈ សរុប២៧៩៩៥គ្រួសារ ស្មើនឹង ១៣៣៩២៣ នាក់ (ស្រី ៦៨៥ ០៤ នាក់ ) ។ ប្រជាជនទាំងនេះមានស្ថានភាពជីវភាពក្រីក្រ និងមធ្យម ។

Prey Lang and Household

ឃ-អនុក្រឹត្យ ស្ដីពី ការបង្កើតដែនជម្រកសត្វព្រៃ (ព្រៃឡង់)

ផែនទីព្រៃឡង់ Prey Lang ចេញ ដោយ ក្រសួង បរិស្ថាន ២០១៦

Prey Lang history ប្រវត្តិ ស្ថានភាព និងភាពពាក់ព័ន្ធនឹង Prey Lang តំបន់ព្រៃការពារដើម្បី អភិរក្សជីវចម្រុះ (ព្រៃឡង់) Prey Lang

noreply@blogger.com (Sotheavy royals) — Sun, 31 Jul 2016 21:10:00 -0700

1-ប្រវត្តិផ្សេងៗអំពីព្រៃឡង់ Prey Lang

Prey Lang

ព្រៃឡង់ Prey Lang ជាឈ្មោះហៅតៗគ្នា ប្រភពនៃពាក្យមានផ្សេងៗគ្នា អ្នកខ្លះថាមកពីពាក្យថាព្រៃ Long ជាពាក្យបារាំងមានន័យថាព្រៃវែង ។ អ្នកខ្លះថាមកពីភាសាជនជាតិគួយ “ ពាក្យឡង់ “ មានន័យថាព្រៃយើងទាំងអស់គ្នា ។

ប្រភព៖ Wikipedia.org

បច្ចុប្បន្នរដ្ឋបាលព្រៃឈើកំពុងរៀបចំតំបន់ព្រៃការពារសម្រាប់អភិរក្សជីវចម្រុះ

ដ្បាក្រាម ផ្ទៃដីព្រៃឡង់ Prey Lang តាមបណ្ដាខេត្ត ទាំង ៤ (ពង្រាង)

“ព្រៃឡង់ Prey Lang “ស្ថិតនៅខេត្តព្រះវិហារ ស្ទឹងត្រែង កំពង់ធំ និងក្រចេះ ក្នុងរង្វង់ផ្ទៃដីសរុប ៤៨៤ ១៥៦ ហិកតា (ជាពង្រាង) គឺលាតសន្ធឹងពីឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង ឆ្ពោះមកទិសខាងត្បូងរហូតមកដល់ឃុំបឹងល្វា ស្រុកសន្ទុក ភាគខាងត្បូងខេត្តកំពង់ធំ ។

ផែនទី ព្រៃឡង់ (ពង្រាង) Prey Lang Map (Draft Map)

2-ស្ថានភាពតំបន់ព្រៃការពារសម្រាប់អភិរក្សជីវចម្រុះ “ព្រៃឡង់” Prey Lang ខេត្តកំពង់ធំ

ប្រវត្តិអតីតកាល

មុនឆ្នាំ១៩៦០ ដល់១៩៧០: តំបន់ព្រៃឡង់ Prey Lang គ្រប់គ្រងដោយសង្កាត់គង្គា រុក្ខាប្រមាញ់ចំនួនបួន មាន

ស្នាក់ការកកោះ ឃុំសន្ទុក ស្រុកសន្ទុក ស្នាក់ការទឹកអណ្តូង ឃុំតាំងក្រសៅ ស្រុកសន្ទុក ស្នាក់ការដងក្តារ (ភូមិដងក្តារ និងក្រយានៅជាប់គ្នា បច្ចុប្បន្ន សង្កាត់រដ្ឋបាលព្រៃឈើក្រយា )ឃុំក្រយា ស្រុកសន្ទុក និង ស្នាក់ការសណ្តាន់ ឃុំសណ្តាន់ ស្រុកសណា្តន់ ខេត្តកំពង់ធំ ហើយស្ថិតក្រោមផ្នែកគង្គា រុក្ខាប្រមាញ់

កំពង់ថ្ម និងផ្នែកគង្គា រុក្ខាប្រមាញ់កំពង់ធំ នៃខណ្ឌគង្គា រុក្ខាប្រមាញ់កំពង់ធំ ។ ក្នុងមួយ សង្កាត់មានមន្រ្តីមេព្រៃចំនួន០១រូប និងមន្ត្រីបណ្តែតមួយចំនួនជំនួយការផងដែរ ។ នៅក្នុងតំបន់ ព្រៃឡង់ Prey Lang មានភូមិបុរាណចំនួន០៥ មានភូមិបឹងល្វា ជាភូមិធំបង្គួរមានផ្ទះប្រជាពលរដ្ឋប្រហែល ៣០ខ្នង ភូមិបង្គីតាំងរ៉េន ភូមិត្បែង ភូមិថ្មសំលៀង និង ភូមិសណ្តាន់ ។

ស្ថានភាពព្រៃឈើជាប្រភេទព្រៃស្រោងក្រាស់ ប្រភេទជីវចម្រុះ និងរុក្ខជាតិសំបូរបែបជាពិសេសប្រកប ទៅដោយឈើអំបូរ Dipterocapaceae ដែលមានមុខកាត់ធំជាង ១ម៉ែត ។ ឯចំណែកសត្វព្រៃក៏សំបូរ ដោយខ្ទីងទន្សោង ខ្លា ដំរី ដែលធ្វើអោយប្រជាពលរដ្ឋមានការភ័យខ្លាច ហើយប្រភេទបក្សីក៏សំបូរបែប ផងដែរ ។

Prey Lang ពីឆ្នាំ១៩៧០ដល់១៩៧៩:ជាសម័យសង្រ្គាមរវាងរបប លន់ នល់ និងអតីតរបបកម្ពុជា ប្រជាធិបតេយ្យ កងទ័ពអតីតខ្មែរក្រហមបានបោះទីតាំង និងកសាងមូលដ្ឋានក្នុងព្រៃឡង់ ហើយជា សម័យកាល គ្រប់គ្រងដោយរបបប្រល័យពូជសាសន៍ ប៉ុល ពត ការគ្រប់គ្រងធនធានព្រៃឈើនៅពេលនោះត្រូវ បានបោះបង់ចោលទាំងស្រុង។ ស្ថានភាពព្រៃសត្វព្រៃជីវចម្រុះពុំសូវមានការប្រែប្រួលខ្លាំងទេ ។

Prey Lang ពីឆ្នាំ១៩៨០ដល់១៩៩០: ជាសម័យសង្រ្គាមរវាង អតីតរបបកម្ពុជាប្រជាធិបតេយ្យ និងអតីតរដ្ឋកម្ពុជាកងទ័ពអតីតខ្មែរក្រហមនៅបន្តយកព្រៃឡង់ជាមូលដ្ឋានតស៊ូ ។ ការគ្រប់គ្រងព្រៃចម្រុះឈើស្ថិតក្រោមសមត្ថកិច្ចការិយាល័យរុក្ខាប្រមាញ់ខេត្តកំពង់ធំ ហើយតំបន់ព្រៃឡង់ Prey Lang គ្រប់គ្រងដោយសង្កាត់ រុក្ខាប្រមាញ់ក្រយា ដែលមានមន្រ្តីចំនួន០៤ រូប។

Prey Lang ពីឆ្នាំ១៩៨០ដល់១៩៩០: ក្នុងឆ្នាំ១៩៨៩ ចាប់ផ្តើមមានបទល្មើសលួចបង្កើតរោងអារឈីនៅតំបន់ដងក្តារ និងក្រយា ហើយអតីតរដ្ឋាភិបាលរដ្ឋកម្ពុជាបានជំលៀសប្រជាពលរដ្ឋពីភូមិបឹងល្វា និងត្បែង មកនៅទំនប់ទឹក ០១មករា ជិតទីប្រជុំជនកំពង់ថ្ម បង្កើតបានជាភូមិបឹងល្វាថ្មី និងភូមិត្បែងថ្មី ។

Prey Lang ពីឆ្នាំ១៩៩០ដល់២០០០: ក្នុងអំឡុងឆ្នាំ១៩៩១និង១៩៩៣របបខ្មែរក្រហមបានដកថយពីក្នុងប្រទេសទៅប្រមូលផ្តុំនៅតាមព្រំដែន ប្រទេសបានទទួលនូវសន្តិភាពជាបណ្តើរៗ ស្ថិតនៅក្នុងដំណាក់កាលការពារ និងកសាងប្រទេសពីចំណុចសូន្យ។

រូបភាព៖ ការឈូសឆាយរបស់ក្រុមហ៊ុន សម្បទានដីសេដ្ឋកិច្ច នៅជាប់ ព្រំព្រៃឡង់ Prey Lang

នៅក្នុងអំឡុងឆ្នាំ ១៩៩៥-១៩៩៦ មានក្រុមហ៊ុន ព្រៃសម្បទានចំនួន០៤ បានដាក់ទុនវិយោគធ្វើអាជីវកម្មប្រមូលឈើហ៊ុប និងកែឆ្នៃឈើ មានក្រុមហ៊ុន មៀន លីហេង

ក្រុមហ៊ុន GAT internatinal ក្រុមហ៊ុនសហគ្រាស កូឡិចស៊ីម និងក្រុមហ៊ុន ភាពីម៉ិច ហើយបានផ្អាកទៅវិញនៅក្នុងឆ្នាំ២០០១។ ទន្ទឹមនោះក៏មានក្រុមហ៊ុនសម្បទានដីសេដ្ឋកិច្ចបានចូលមកវិនិយោគដាំដំណាំកសិ-ឧស្សាហកម្មមានក្រុមហ៊ុន តាន បៀន ក្រុមហ៊ុនបា រៀ ក្រុមហ៊ុនGold Fusion និងក្រុមហ៊ុន CRCK ។

(Prey Lang សូមអាន បន្ដ )

Prey Lang To be continued

ព្រៃឡង់ Prey Lang និងលទ្ធផលការងារចុះល្បាត សម្រេចបាន

noreply@blogger.com (Sotheavy royals) — Sun, 31 Jul 2016 05:20:00 -0700

ជាលទ្ធផល

ខណ្ឌរដ្ឋបាលព្រៃឈើកំពង់ធំ បានទទួលថវិកាពីគម្រោង JICA-CAM-REDD ចំនួន ០២វគ្គ ហើយ ដើម្បីចុះល្បាត ទប់ស្កាត់ និងបង្រ្កាបបទល្មើសព្រៃឈើ និងសត្វព្រៃ ក្នុងដែនព្រៃឡង់ Prey Lang ដោយទទួលបានលទ្ធផលសរុបៈ
-ដកហូតម៉ូតូ ចំនួន ០៧គ្រឿង កាំបិតខ្វែវ ០៨ ពូថៅ ០១
-ដកហូតគោយន្ត ចំនួន ០១ គ្រឿង

ចុះល្បាតបង្រ្កាបបទល្មើស ព្រៃឈើ ក្នុងដែនព្រៃឡង់ Prey Lang ខេត្តកំពង់ធំ

-ដកហូតរណារយន្ត ចំនួន ២១គ្រឿង
-ដកហូតឈើក្រាក់ក្រញូង ចំនួន ៦៧៩គ.ក ស្មើនឹង ០ម៣៥៦៥
-ដកហូតឈើអារប្រណីត ធ្នង់ ចំនួន ០៧ម៣៦៤៥
-ដកហូតឈើអារប្រភេទលេខ២ (ឈើទាល-ផ្តៀក) ចំនួន ២៥ម៣២១២
-វាយផ្លាក ( ដីព្រៃកំពុងប្តឹងទៅតុលាការ ) បានចំនួន ៧៦ផ្លាក ។
- បានចុចនិយាមកា រៀបចំផែនទី ហើយដាក់ពាក្យបណ្តឹងទៅតុលាការខេត្តកំពង់ធំ នៅដីព្រៃ
ទទួលរងនូវការកាប់រានថ្មី ចំនួន ១៨កន្លែង ស្មើនឹងផ្ទៃដី ២៧០,៤៥ហិកតា ។
- ចុចយកចំណុចនិយាមការផ្ទៃដីរងនូវការកាប់រានបានចំនួន ៧០ កន្លែង មានផ្ទៃដីទំហំ ១៧១៣,៧៨ហិកតា។
‑ផ្ទៀងផ្ទាត់ផ្ទៃដីដែលបានដាក់ពាក្យបណ្តឹងកន្លងមក ឃើញមានការរំលោភ ដាំដំឡូងមី ចំនួន ១៤កន្លែង មានផ្ទៃដីទំហំ ៧៥,៤៥ហិកតា
‑ផ្សព្វផ្សាយច្បាប់ស្តីពីព្រៃឈើ និងលិខិតបទដ្ឋានពាក់ព័ន្ធនិងវិស័យព្រៃឈើ បានចំនួន ០២ លើក មានមនុស្សចូលរួមចំនួន ១១៣ នាក់ នៅទីតាំងចំនួន០២កន្លែងផ្សេងគ្នា ក្នុងឃុំបឹងល្វា ។

បញ្ហាប្រឈម និង ការលំបាកពេលចុះទប់ស្កាត់ បទល្មើសព្រៃឈើក្នុងដែនព្រៃឡង់ Prey Lang ស្រុកសណ្ដាន់ ខេត្តកំពង់ធំ

noreply@blogger.com (Sotheavy royals) — Sun, 31 Jul 2016 05:09:00 -0700

បញ្ហាប្រឈម និង ការលំបាក ពេលចុះល្បាត ព្រៃឡង់ Prey Lang

-បទល្មើសដឹកជញ្ជូនបំបែកជារូបភាពតូចៗនិងបំលែងតាមរូបភាពផ្សេងៗបំភ័ន្តភ្នែកសមត្ថកិច្ច។
-ទោះបីសមត្ថកិច្ចខិតខំធ្វើការអប់រំផ្សព្វផ្សាយជាច្រើនដងនិងឃាត់ចាប់ខ្លួនបញ្ជូនទៅតុលាការ
ក៏នៅតែមានជនល្មើសលួចត្រួសត្រាយព្រៃបែងចែកដីព្រៃកាប់ឆ្ការព្រៃស្រទាប់ក្រោម អោយងាប់
ត្រូវកាប់រំលំទុកអោយងាប់រួចលួចដុតចោល បន្ទាប់មក លួចសាងសង់ផ្ទះ។
-រដ្ឋអំណាចភូមិឃុំមួយចំនួនបានអនុញ្ញាតអោយប្រជាពលរដ្ឋមកពីខេត្តផ្សេងៗស្នាក់នៅលើដីព្រៃ
និងអោយប្រជាពល រដ្ឋទំាងនោះអះអាងថាខ្លូនគ្មានដី។

បញ្ហាប្រឈមពេលចុះល្បាត ក្នុង ដែនព្រៃឡង់ Prey Lang ខេត្តកំពង់ធំ

-ទីកន្លែងដែលជនល្មើសលួចធ្វើសកម្មភាពបទល្មើសព្រៃឈើគឺស្ថិតនៅតំបន់ឆ្ងាយៗការធ្វើដំណើរ
រុករកក្នុងព្រៃត្រូវ ចំណាយពេលវេលាយូរហើយបណ្តាញព័ត៌មានរបស់ជនល្មើសមានច្រើនដូច្នេះ
តែងតែបែកការជាមុន។
-មានការលួចកាត់អារច្រៀកឈើដោយប្រើប្រាស់រណារយន្តចល័តនៅពេលយប់។
-ជនល្មើសកាប់រានដីព្រៃច្រើនដឹងខ្លួនមុន នៅពេលសមត្ថកិច្ចចុះធ្វើការងារ ។

Cambodia Forest News Sharing

អ្នក​នេសាទ​ផ្កាប់​ឆ្នាំង​បាយ​ដោយ​សារ​បាត់បង់​ប្រភព​ចំណូល ពីព្រោះ អស់ត្រី

បទល្មើស​កាប់​ឈើ​ក្នុង​តំបន់​ព្រៃ​ឡង់​នៅតែ​បន្ត​កើតមាន​យ៉ាង​រាលដាល​

បទល្មើស​កាប់​ឈើ​ក្នុង​តំបន់​ព្រៃ​ការពារ និង​ព្រៃ​អភិរក្ស​នៅតែ​កើតឡើង​យ៉ាង​ពេញបន្ទុក

សហគមន៍​ព្នង​រំពឹង​ថា​នឹង​មាន​ជីវភាព​ធូរធារ​បន្ទាប់​ពី​ក្រុមហ៊ុន​អាមេរិក​ទិញ​ឥណទាន​កាបូន

មេ​ឈ្មួញ ធី ប្ញ​ទ្ធិ​សី នៅតែមាន​អំណាច​ក្នុងការ​កាប់​ឈើ​និង​ដឹកជញ្ជូន​ឈើ​ខុសច្បាប់​តាម​អំពើ​ចិត្ត

ទាល់តែ​ ជិត​ដាច់​ពូជ​ទើប​ខំប្រឹង​............អនិច្ចា​ ឈើ គ្រញូង​

សហគមន៍​ព្នង​នៅ​មណ្ឌលគិរី​អំពាវនាវ​ឲ្យ​មន្ត្រី​តុលាការ​ស៊ើប​អង្កេត​រឿង​ឈ្មួញ​ឈូស​ឆាយ​ព្រៃ​ឈើ

បទល្មើស​ដឹកជញ្ជូន​ឈើ​ចេញពី​ស្រុក​ជាំ​ក្សាន្ត ខេត្តព្រះវិហារ កំពុង​កើតឡើង​យ៉ាង​អនាធិបតេយ្យ

បទល្មើស​បំផ្លាញ​ព្រៃឈើ​ក្នុងស្រុក​លំផាត់ ខេត្តរតនគិរី នៅតែ​កើតឡើង​យ៉ាង​រាលដាល

សកម្មភាព​ដឹកជញ្ជូន​ឈើ​ប្រណីត​ឆ្លងកាត់​ខេត្តកំពង់ឆ្នាំង ពុំមាន​ការថយចុះ​នោះទេ

បទល្មើស​ទន្ទ្រាន​កាន់កាប់​ដីព្រៃ​ឡង់​ក្នុងស្រុក​សណ្ដាន់ ខេត្តកំពង់ធំ នៅតែ​កើតឡើង​យ៉ាង​រាលដាល

អាជ្ញាធរ​ខេត្ត​កំពង់ធំ​ព្រមាន​ចាត់​វិធានការ​ចំពោះ​មន្ត្រី​ណា​ដែល​បណ្ដោយ​ឱ្យ​មាន​បទល្មើស​ព្រៃឈើ

អង្គការ​សត្វព្រៃ ថា មាន​ដំរី​ជាង​២០០ ក្បាល​ក្នុង​ខេត្តមណ្ឌលគិរី និង​ជាង​១០០ ក្បាល​នៅ​ជួរ​ភ្នំក្រវាញ

ឧកញ៉ា សី កំពុង​បំផ្លាញ​ព្រៃឈើ​នៅក្នុង​ដែនជម្រកសត្វព្រៃ​លំផាត់ យ៉ាង​មហន្តរាយ

ឈ្មួញ និង​មន្ត្រី​ពុករលួយ​កំពុង​ឃុបឃិត​គ្នា​កាប់​ឈើ​នៅក្នុង​ឧទ្យាន​ជាតិ​វីរៈ​ជ័យ ខេត្តរតនគិរី

រដ្ឋាភិបាល និង អង្គការ WCS នឹង​ចុះហត្ថលេខា​លើ​កិច្ចព្រមព្រៀង​ផ្ទេរ​ឥណទាន​កាបូន​

ស្ថានភាព​ព្រៃឡង់ Prey Lang ​នា​ពេល​បច្ចុប្បន្ន

ក-អំពីការអភិវឌ្ឍក្នុងតំបន់ព្រៃឡង់ Prey Lang Area (ខេត្តកំពង់ធំ)

ខ-ការអភិវឌ្ឍនៅខាងក្រៅជាប់តំបន់ Prey Lang ព្រៃការពារអភិរក្សជីវចម្រុះព្រៃឡង់

គ-ស្រុកដែលជាប់ពាក់ព័ន្ធ និងព្រៃការពារ ដើម្បីអភិរក្សជីវចម្រុះ “ព្រៃឡង់” Prey Lang

ឃ-អនុក្រឹត្យ ស្ដីពី ការបង្កើត​ដែនជម្រក​សត្វព្រៃ​ (ព្រៃឡង់)

1-ប្រវត្តិ​ផ្សេងៗ​អំពីព្រៃឡង់ Prey Lang

2-ស្ថានភាពតំបន់ព្រៃការពារសម្រាប់អភិរក្សជីវចម្រុះ “ព្រៃឡង់” Prey Lang ខេត្តកំពង់ធំ

ប្រវត្តិអតីតកាល

ព្រៃឡង់ Prey Lang និង​​លទ្ធផល​ការងារចុះល្បាត​ សម្រេច​បាន​

ជាលទ្ធផល

បញ្ហាប្រឈម​ និង ការលំបាក​ពេលចុះទប់ស្កាត់ បទល្មើសព្រៃឈើ​ក្នុង​ដែន​ព្រៃឡង់ Prey Lang ស្រុកសណ្ដាន់​ ខេត្តកំពង់ធំ

បញ្ហា​ប្រឈម​ និង​ ការលំបាក ពេលចុះល្បាត​​ ព្រៃឡង់ Prey Lang

អ្នកនេសាទផ្កាប់ឆ្នាំងបាយដោយសារបាត់បង់ប្រភពចំណូល ពីព្រោះ អស់ត្រី

បទល្មើសកាប់ឈើក្នុងតំបន់ព្រៃឡង់នៅតែបន្តកើតមានយ៉ាងរាលដាល

បទល្មើសកាប់ឈើក្នុងតំបន់ព្រៃការពារ និងព្រៃអភិរក្សនៅតែកើតឡើងយ៉ាងពេញបន្ទុក

សហគមន៍ព្នងរំពឹងថានឹងមានជីវភាពធូរធារបន្ទាប់ពីក្រុមហ៊ុនអាមេរិកទិញឥណទានកាបូន

មេឈ្មួញ ធី ប្ញទ្ធិសី នៅតែមានអំណាចក្នុងការកាប់ឈើនិងដឹកជញ្ជូនឈើខុសច្បាប់តាមអំពើចិត្ត

ទាល់តែ ជិតដាច់ពូជទើបខំប្រឹង............អនិច្ចា ឈើ គ្រញូង

សហគមន៍ព្នងនៅមណ្ឌលគិរីអំពាវនាវឲ្យមន្ត្រីតុលាការស៊ើបអង្កេតរឿងឈ្មួញឈូសឆាយព្រៃឈើ

បទល្មើសដឹកជញ្ជូនឈើចេញពីស្រុកជាំក្សាន្ត ខេត្តព្រះវិហារ កំពុងកើតឡើងយ៉ាងអនាធិបតេយ្យ

បទល្មើសបំផ្លាញព្រៃឈើក្នុងស្រុកលំផាត់ ខេត្តរតនគិរី នៅតែកើតឡើងយ៉ាងរាលដាល

សកម្មភាពដឹកជញ្ជូនឈើប្រណីតឆ្លងកាត់ខេត្តកំពង់ឆ្នាំង ពុំមានការថយចុះនោះទេ

បទល្មើសទន្ទ្រានកាន់កាប់ដីព្រៃឡង់ក្នុងស្រុកសណ្ដាន់ ខេត្តកំពង់ធំ នៅតែកើតឡើងយ៉ាងរាលដាល

អាជ្ញាធរខេត្តកំពង់ធំព្រមានចាត់វិធានការចំពោះមន្ត្រីណាដែលបណ្ដោយឱ្យមានបទល្មើសព្រៃឈើ

អង្គការសត្វព្រៃ ថា មានដំរីជាង២០០ ក្បាលក្នុងខេត្តមណ្ឌលគិរី និងជាង១០០ ក្បាលនៅជួរភ្នំក្រវាញ

ឧកញ៉ា សី កំពុងបំផ្លាញព្រៃឈើនៅក្នុងដែនជម្រកសត្វព្រៃលំផាត់ យ៉ាងមហន្តរាយ

ឈ្មួញ និងមន្ត្រីពុករលួយកំពុងឃុបឃិតគ្នាកាប់ឈើនៅក្នុងឧទ្យានជាតិវីរៈជ័យ ខេត្តរតនគិរី

រដ្ឋាភិបាល និង អង្គការ WCS នឹងចុះហត្ថលេខាលើកិច្ចព្រមព្រៀងផ្ទេរឥណទានកាបូន

ស្ថានភាពព្រៃឡង់ Prey Lang នាពេលបច្ចុប្បន្ន

ឃ-អនុក្រឹត្យ ស្ដីពី ការបង្កើតដែនជម្រកសត្វព្រៃ (ព្រៃឡង់)

1-ប្រវត្តិផ្សេងៗអំពីព្រៃឡង់ Prey Lang

ព្រៃឡង់ Prey Lang និងលទ្ធផលការងារចុះល្បាត សម្រេចបាន

បញ្ហាប្រឈម និង ការលំបាកពេលចុះទប់ស្កាត់ បទល្មើសព្រៃឈើក្នុងដែនព្រៃឡង់ Prey Lang ស្រុកសណ្ដាន់ ខេត្តកំពង់ធំ

បញ្ហាប្រឈម និង ការលំបាក ពេលចុះល្បាត ព្រៃឡង់ Prey Lang