Cambodia News

ពិធីបុណ្យទ្បើងអ្នកតាមេ.សជាទំនៀមទំលាប់តាំងពីសម័យនគរភ្នំ

2007-06-08T22:39:00.000+07:00

ខេត្ដព្រៃវែង ៖ ប្រជាពលរដ្ឋដែលរស់នៅតាមតំបន់នីមួយៗតែងមានជំនឿខុសៗគ្នា តំណពីដូនតារបស់ខ្លួន ដោយនៅតំបន់ខ្លះគោរពចំពោះធម្មជាតិព្រៃភ្នំក្រំថ្ម និងខ្លះទៀតគោរពចំពោះអ្នកតាចាស់ស្រុក ដែល ធ្លាប់តែផ្ដល់សេចក្ដីសុខដល់ពួកគេ។ ចំណែកអ្នកស្រុកបាភ្នំ ខេត្ដព្រៃវែង បន្ទាប់ពីធ្វើបុណ្យចូលឆ្នាំខ្មែរ ប្រពៃណីជាតិរួច ពួកគាត់បានសហការជាមួយអាជ្ញាធរ និងសប្បុរសជនជិតឆ្ងាយរៀបចំប្រារឰពិធីឡើង អ្នកតាមេ.ស ដើម្បីធ្វើការបន់ស្រន់បួងសួងសុំឱ្យជួបតែសេចក្ដីសុខសប្បាយ រកស៊ីមានបានឱ្យជាសះស្បើយ ពីជំងឺបៀតបៀន ដោយមានរៀបចំគ្រឿងតង្វាយផ្សេងៗ ហើយមានសភាពអធិកអធមខ្លាំងណាស់ ដែល ពិធីនេះបានប្រារឰធ្វើតាំងពីសម័យនគរភ្នំមកម្ល៉េះ ។

លោកម៉ៅ អៀង អភិបាលស្រុកបាភ្នំឱ្យដឹងថា ពិធីបុណ្យឡើងអ្នកតាមេ.សនេះជាទំនៀមទំលាប់ប្រពៃណី ដ៏យូរលង់របស់អ្នកស្រុកយើង ដែលបានស្រុះស្រួលគ្នាធ្វើមិនដែលខកខាននោះទេ ក្នុងបំណងរំលឹកគុណ ចំពោះអ្នកតាមេ.ស ដែលធ្លាប់តែផ្ដល់សេចក្ដីសប្បាយ និងភាពត្រជាក់ត្រជុំចំពោះអ្នកស្រុកជាច្រើន ជំនាន់មកហើយ ។ កាលពីមុនឆ្នាំ ១៩៩៣ អ្នកស្រុកយើងធ្លាប់ប្រារឰពិធីនេះដែរ ប៉ុន្ដែក្នុងទ្រង់ទ្រាយតូច មិនមានលក្ខណៈអធិកអធមដូចសព្វថ្ងៃនេះទេ ដែលកាលនោះសូម្បីតែអាស្រមអ្នកតាមេ.សក៏កសាងពីឈើ ហើយគ្មានរូបសំណាក និងព្រះពុទ្ធរូបល្អដូចសព្វថ្ងៃនេះឡើយ។ លោកអភិបាលស្រុកបាភ្នំ បានបន្ដថា ដោយសារតែអំណាចនៃកំលាំងសទ្ធាជ្រះថ្លារបស់ពុទ្ធបរិស័ទ និងសប្បុរសជនទាំងក្នុង និងក្រៅប្រទេស ដែលមានជំនឿចំពោះបារមីអ្នកតាមេ.សនោះ បានចូលបច្ច័យកសាងអាស្រម ខ្លោងទ្វារ ស្រះទឹក រូបសំណាក និងព្រះពុទ្ធរូបតម្កល់ទុកនៅទីនោះ ដើម្បីគោរពបូជា និងសំរាប់ប្រើប្រាស់ ព្រមទាំងរៀបចំទីនោះឱ្យ មានសោភ័ណភាពល្អទៀតផង ហើយបានទាក់ទាញពុទ្ធបរិស័ទជិតឆ្ងាយឱ្យទៅគោរពបូជា និងអ្នកទេសចរ ទៅទស្សនាកំសាន្ដថែមទៀតផង ។ ក្នុងពិធីបុណ្យឆ្នាំនេះកាន់តែមានសភាពអធិកអធម ព្រោះមាន ការជួយឧបត្ថម្ភគាំទ្រពីលោកហួរ ស្រេង មន្ដ្រីសំរបសំរួលនៃអង្គការសេដាកប្រចាំស្រុកបានជួយឧបត្ថម្ភ ថវិកាមួយចំនួនដល់ក្រុមសិស្សសំដែងរបាំប្រពៃណី និងរឿងកំប្លែងអប់រំដល់យុវជនយុវនារីកុំឱ្យសេព គ្រឿងញៀន និងដើរខុសផ្លូវប្រព្រឹត្ដអំពើអបាយមុខផ្សេងៗ ។

លោកម៉ៅ អៀង បន្ដទៀតថា នៅថ្ងៃប្រារឰពិធីបុណ្យម្ដងៗមានប្រជាជនមកពីគ្រប់ទិសទីទាំងក្នុងខេត្ដ និងក្រៅខេត្ដ ក្នុងនោះក៏មានអ្នករស់នៅក្រៅប្រទេសមួយចំនួន ក៏បានមកចូលរួមផងដែរយ៉ាងច្រើនកុះករ។ នៅពេលនោះក៏មានការរៀបចំដង្ហែអ្នកតាទាំង៨ទិស និងដង្ហែអ្នកតាមេ.សឡើងអាស្រម រួចបញ្ជាន់រូប អ្នកតាតូច-ធំ ដើម្បីសួរនាំពីហេតុការណ៍ផ្សេងៗ និងធ្វើការបួងសួងសុំពរជ័យសេចក្ដីសុខសប្បាយ រកស៊ី មានបានចៀសផុតពីឧបទ្រពចង្រៃ និងជំងឺបៀតបៀន ។ នៅពេលយប់ឡើងមានការរៀបចំប្រលង ចំរៀងសម័យទំនើបនិងសំដែងសិល្បៈដែលមានការចូលរួមពីសិស្សានុសិស្ស ចែកជូនអ្នកចូលរួមបុណ្យ កំសាន្ដសប្បាយ រហូតទល់ភ្លឺញ៉ាំងឱ្យបរិយាកាសនោះកាន់តែសប្បាយរីករាយមួយកំរិតថែមទៀត ។

ទាក់ទងនឹងប្រវត្ដិអ្នកតាមេ.ស តាមការរៀបរាប់របស់លោកតាប៊ុត ប៊ុន អាយុ៦០ឆ្នាំ ជាគណៈកម្មការពិធី បុណ្យឱ្យដឹងថា កាលក្នុងសម័យនគរភ្នំរាជធានីនៃប្រទេសកម្ពុជាស្ថិតនៅត្រង់ចំណុចស្រុកបាភ្នំ ខេត្ដ ព្រៃវែងនេះឯង ។ កាលនោះព្រះរាជាមានលោកមេទ័ពធំក្លាហានម្នាក់ ក្នុងត្រកូលគ្រួសារមេទ័ពដ៏ក្លាហាន និងស្មោះត្រង់នេះ មានកូនប្រុសម្នាក់ ឈ្មោះថា គីរីផល ជាបុត្រាទោល ហើយស្ដេចផែនដីក៏ស្រឡាញ់ ទៀតផង ដូច្នេះដើម្បីបន្ដវេនជាមេទ័ព និងបំរើជាតិមាតុភូមិ ស្ដេច និងឪពុកជាមេទ័ព ក៏បានផ្ញើសារ ទៅថ្វាយសុំឱ្យប្រទេសក្រិច និងមេទ័ព ដើម្បីសុំឱ្យកូនបានទៅបំពេញសិល្ប៍វិជ្ជាមន្ដអាគមពីលោកគ្រូដែល មានវិជ្ជាល្បីល្បាញរបស់ប្រទេសក្រិចនោះផង ហើយសំណើតាមរយៈការទូតនោះ ក៏ត្រូវស្ដេចក្រិច និង លោកមេទ័ពទទួលយក។ គីរីផល និងមិត្ដសំឡាញ់គេម្នាក់ទៀត ជាកូនមន្ដ្រីជាន់ខ្ពស់នៅបាភ្នំនេះត្រូវ បានបញ្ជូនឱ្យទៅរៀននៅប្រទេសក្រិចជាមួយគ្នាដែរ ។

លោកបន្ដថា ក្នុងចំណោមសិស្សជាច្រើន ដែលទៅសិក្សាទីនោះមានតែយុវជនគីរីផលទេ ដែលមាន ប្រាជ្ញាវៃឆ្លាតលើសគេសព្វបែបយ៉ាង។ ម្យ៉ាងទៀត គីរីផល មានរូបសង្ហាថែមទៀត ក្នុងចំណោមសិស្ស ទាំងអស់មកពីគ្រប់ប្រទេសដែលបានទៅរៀនសូត្រនោះ។ ចំណែកនៅក្នុងប្រទេសក្រិចនោះវិញ កូនក្រមុំ របស់លោកមេទ័ពក្រិចដែលជាអាចារ្យទេសាភិបាលមោគ្គដ៏កំពូល ល្បីខាងសិល្ប៍វេទមន្ដនោះឈ្មោះថា នាង មេ.សក៏បានរៀនសូត្រនៅទីនោះដែរហើយនាងមានរូបសម្បត្ដិស្រស់ជាងគេទៀតផង ។ កំលោះគីរីផល និង នាងមេ.ស ត្រូវបានស្ដេច និងលោកមេទ័ពក្រិចផ្សំផ្គុំអ្នកទាំងពីរឱ្យក្លាយទៅជាគូស្វាមីភរិយា តាំងពីពេល នោះមក ។

លោកបានបន្ដទៀតថា ស្ដេចក្រិចនិងឪពុកក្មេក បានហាមឃាត់គិរីផលថា បើអ្នករៀបការហើយ គឺដាច់ ខាតឱ្យនៅថែរក្សាទឹកដីក្រិចជារៀងរហូត មិនឱ្យវិលត្រឡប់ទៅស្រុកវិញឡើយ ។ ក្រោយពីបានរៀបការ ជាមួយនាងមេ.សរួច គិរីផល រស់នៅទីនោះតែម្នាក់ឯង ចំណែកឯមិត្ដសំឡាញ់របស់គេម្នាក់ទៀត ក៏បានវិលត្រឡប់មកស្រុកទេសវិញជួបជុំឪពុកម្ដាយនិងទៅថ្វាយបង្គំគាល់ស្ដេចនគរភ្នំ ហើយបានឋានៈជា មេទ័ពទៀតផង។ រីឯគិរីផលមិនបានវិលត្រឡប់មកស្រុកកំណើតវិញទេ អស់រយៈពេលយូរខែឆ្នាំទៅ គិរីផល ចេះតែចង់វិលទៅស្រុកកំណើតវិញ តែខ្លាចស្ដេចនិងឪពុកក្មេក ។ ម្យ៉ាងទៀតការរួមរស់ជាមួយ នាងមេ.សបានកូនប្រុសម្នាក់ឈ្មោះថា គិរីជោត ប៉ុន្ដែទោះជាយ៉ាងនេះក្ដី គិរីផលនៅតែរិះរកមធ្យោបាយ វិលមកនគរភ្នំវិញ ។

លុះចំណេរក្រោយមក ស្រុកនគរភ្នំក៏បានកើតចលាចល ដោយខ្មាំងចូលវាយលុកស្ដេច និងមេទ័ពមានការ ព្រួយបារម្ភខ្លាំងណាស់ ក៏លួចផ្ញើសំបុត្រតាមរយៈឈ្មួញឱ្យទៅកូនប្រុសថា ឪពុកឈឺធ្ងន់សូមកូនវិលមក វិញ។ សារលិខិតនេះ គិរីផល ទទួលបានយ៉ាងសំងាត់មិនឱ្យស្ដេច និងភរិយាដឹងឡើយ។ ថ្ងៃមួយពេល ដែលស្ដេចក្រិចប្រើឱ្យគិរីផលដើរត្រួតពលទ័ពមើលសន្ដិសុខតាមជាយដែន គិរីផលបានលបលួចក្លែងខ្លួន ជាឈ្មួញជិះសំពៅវិលមកនគរភ្នំទាល់តែបានសំរេច ដោយមិនឱ្យស្ដេច និងក្រុមគ្រួសារដឹងទេ រហូតបានមក ជួបជុំឪពុកម្ដាយ និងស្ដេចនគរវិញ ។ ស្ដេចនគរភ្នំក៏ត្រេកអរ ហើយតែងតាំងគិរីផលជាមេទ័ពការពារ ទឹកដីនគរភ្នំ ។ លោកបន្ដទៀតថា ដោយបាត់គិរីផលយូរថ្ងៃខែមិនឃើញវិលមករកប្រពន្ធកូនវិញនោះ ស្ដេចក្រិចក៏ជ្រាបដំណឹងនេះហើយ ខ្ញាល់យ៉ាងខ្លាំងក៏ប្រើវេទមន្ដ “ហិបគន្លឹះយន្ដ” មួយឱ្យហោះមកដល់ ស្ដេចនគរភ្នំ នៅពេលស្ដេចនគរភ្នំកំពុងគង់នៅរោងជំនុំជាមួយនាហ្មឺនសព្វមុខមន្ដ្រី ហិបគន្លឹះយន្ដនោះ ក៏ធ្លាក់ចំកណ្ដាលចំណោម។ នៅលើហិបមានរាជសារមួយសរសេរថា “បើស្ដេចនគរភ្នំបើកហិបនេះ មិនរួចទេនោះ ស្ដេចក្រិចនឹងលើកទ័ពមកវាយកំទេចនគរភ្នំ” ។ ដោយចង់យល់រាជសាររបស់ស្ដេចក្រិច ស្ដេចនគរភ្នំក៏ប្រើឱ្យសេនាបើកគំរបគន្លឹះយន្ដនោះ តែគ្មាននរណាម្នាក់បើករួចឡើយ ។

លោកបន្ដទៀតថា ពេលនោះស្ដេចប្រើឱ្យសេនាទៅតាមគិរីផល ដែលកំពុងបំពេញបេសកកម្មនៅជាយដែន វាយកំទេចខ្មាំងសត្រូវនោះ ឱ្យវិលត្រឡប់ចូលព្រះរាជវាំងដើម្បីបើកហិបគន្លឹះយន្ដ ។ ពេលបានឃើញ និង យល់ហិបគន្លឹះយន្ដរបស់ស្ដេចក្រិច គិរីផលក៏ទូលស្ដេចថា “បើខ្ញុំព្រះករុណាបើកហិបគន្លឹះយន្ដនេះហើយ នឹងស្លាប់សូមឱ្យរក្សាទុកសពនេះផង កុំយកទៅបូជា” ។

ពេលបើកគន្លឹះយន្ដភ្លាម គិរីផល ក៏ត្រូវកាត់កទំលាក់ចូលក្នុងហិប រួចហិបបិទគំរប ហើយក៏នាំក្បាល ហោះឆ្ពោះទៅប្រទេសក្រិចវិញ ។ ខណៈនោះនាងមេ.ស និងឪពុកដឹងរឿងនេះដែរ ប៉ុន្ដែមិនហ៊ានប្រឆាំង នឹងស្ដេចឡើយ ហើយនាងបានសុំឪពុកម្ដាយទៅតាមរកប្ដីយ៉ាងណាក៏ឪពុកម្ដាយមិនព្រមដែរ នៅទីបំផុត នាងក៏លបលួចក្លែងខ្លួនសុំឈ្មួញជិះសំពៅកាត់សមុទ្រមកតាមរកប្ដីដល់នគរភ្នំ ។ ពេលនាងដើររកឃើញ សពប្ដីនិងឪពុកម្ដាយក្មេក ហើយស្ដេចក៏អនុញ្ញតឱ្យនាងមេ.ស និង កូនប្រុសចូលក្នុងព្រះរាជវាំងមើល សាកសព។ នាងឃើញហើយក៏ទូលសុំស្ដេចឱ្យគេស្វែងរកក្បាល ទោះសត្វឬមនុស្សក៏ដោយឱ្យតែបានយក មកតភ្ជាប់ក្បាលឱ្យប្ដីវិញ នឹងបានរស់ឡើងវិញហើយ វិជ្ជាសិល្ប៍នេះមានតែនាងទេដែលចេះបន្ដពីឪពុក។ ខណៈនោះនាងបានរៀបចំអាសនៈ៧ទិស ហើយក៏ប្រើឱ្យសេនាទាំងនោះចេញដំណើរទៅគ្រប់ទិសទាំង ព្រលឹមអុរ ទោះជួបមនុស្ស ឬសត្វបែបណាក៏ដោយ សុំឱ្យកាត់យកតែក្បាលមកចុះ ដើម្បីឱ្យនាង តភ្ជាប់នឹងដងខ្លួនប្ដីវិញ ។ ពេលនោះសេនារកមនុស្សមិនជួបក៏បានកាត់ក្បាលដំរី១មកឱ្យនាង ដើម្បី រៀបចំពិធីតភ្ជាប់ក្បាលដំរីឱ្យប្ដីបានដូចបំណងហើយរស់ឡើងវិញ។ ប៉ុន្ដែក្បាលដំរីខ្លួនជាមនុស្សមិនអាច និយាយស្ដីចេញឡើយ គឺគ្រាន់តែបានធ្វើកាយវិការប៉ុណ្ណោះ ។ ទោះបែបនេះក្ដីគិរីផលនិងនាងមេ.ស ព្រមទាំងកូនប្រុសគិរីជោត រស់នៅថែ រក្សាគ្នារហូតដល់អស់សង្ខារៀងៗខ្លួនទៅ ។

លោកអភិបាលស្រុកបាភ្នំបានបញ្ជាក់ថា កាលពីសម័យបុរាណនៅពេលរៀបចំពិធីឡើងអ្នកតាមេ.សម្ដងៗ គឺមានការកាប់សំលាប់មនុស្ស និងសត្វធំៗយកមកបូជាព្រះអង្គ ប៉ុន្ដែក្រោយមកនៅពេលប្រទេស យើងគោរពព្រះពុទ្ធសាសនាក៏សំលាប់សត្វជ្រូក មាន់ ទា និងគ្រឿងតង្វាយផ្សេងៗដើម្បីថ្វាយវិញ ។ ពិធី នេះត្រូវបានអ្នកស្រុកបាភ្នំ យើងប្រារឰធ្វើតាំងពីសម័យនគរភ្នំមកម្ល៉េះ ហើយកេរដំណែលនេះត្រូវបានអ្នក ស្រុកយើងនិយមរៀបចំធ្វើតៗគ្នាមិនដែលខកខាននោះទេ ព្រោះពួកគាត់ជឿថា បារមីអ្នកតាមេ.ស អាច ជួយឱ្យពួកគាត់បានសេចក្ដីសុខសប្បាយ រកស៊ីមានបានចៀសផុតពីឧបទ្រពចង្រៃផ្សេងៗទៀតផង ។

កិច្ចប្រជុំក្រុមប្រឹក្សាកំណែទម្រង់ច្បាប់ និងប្រព័ន្ធយុត្ដិធម៌ច្បាប់ប្រឆាំងអំពើពុករលួយរាជរដ្ឋាភិបាលរៀបចំរួចរាល់ហើយ

2007-06-08T22:38:00.000+07:00

រាជធានីភ្នំពេញ ៖ យោងតាមសេចក្ដីប្រកាសរបស់ទីស្ដីការគណៈរដ្ឋមន្ដ្រីបានឱ្យដឹងថា នៅថ្ងៃទី៦ មិថុនា ឆ្នាំ២០០៧ វេលាម៉ោង៩ព្រឹក នៅទីស្ដីការគណៈរដ្ឋមន្ដ្រី មានរៀបចំកិច្ចប្រជុំក្រុមប្រឹក្សាកំណែទម្រង់ច្បាប់ និងប្រព័ន្ធយុត្ដិធម៌ ក្រោមអធិបតីភាពលោកឌិត មន្ទីរ ប្រធានតុលាការកំពូល និងលោកសុខ អាន ឧបនាយករដ្ឋមន្ដ្រី រដ្ឋមន្ដ្រីទទួលបន្ទុក ទីស្ដីការគណៈរដ្ឋមន្ដ្រី ជាសហប្រធានក្រុមប្រឹក្សាកំណែទម្រង់ច្បាប់ និងប្រព័ន្ធយុត្ដិធម៌ ដើម្បីពិនិត្យ និងផ្ដល់ការឯកភាពលើរបាយការណ៍ស្ដីពីលទ្ធផលសំខាន់ៗនៃការអនុវត្ដន៍ កម្មវិធីសកម្មភាពសម្រាប់អនុវត្ដយុទ្ធសាស្ដ្រ កំណែទម្រង់ច្បាប់ និងតុលាការក្នុងឆ្នាំ២០០៦ និងទិសដៅ អនុវត្ដការងារបន្ដ ។

របាយការណ៍នេះបានបង្ហាញពីលទ្ធផលចម្បង ដែលក្រសួង-ស្ថាប័នក្នុងវិស័យកំណែទម្រង់ច្បាប់ និងប្រព័ន្ធ យុត្ដិធម៌សម្រេចបានមានជាអាទិ៍ ៖ លទ្ធផលនៃការអនុវត្ដសូចនាករតាមដានរួម (Joint Monitoring Indicators) ឆ្នាំ២០០៦ ពាក់ព័ន្ធដល់ការតាក់តែង និងការអនុម័តច្បាប់ជាមូលដ្ឋាននៃយុត្ថាធិការតុលាការ មានដូចតទៅ ៖ ក្រមនីតិវិធីរដ្ឋប្បវេណី ត្រូវបានប្រកាសឱ្យប្រើកាលពីថ្ងៃទី៦ ខែកក្កដា ឆ្នាំ២០០៦ ។ សេចក្ដីព្រាងក្រមរដ្ឋប្បវេណីត្រូវបានពិនិត្យជិតចប់ហើយ ដោយគណៈកម្មការនីតិកម្ម និងយុត្ដិធម៌ នៃ រដ្ឋសភា។ ក្រុមនីតិវិធីព្រហ្មទណ្ឌត្រូវបានពិនិត្យចប់ហើយដោយគណៈកម្មការនីតិកម្ម និងយុត្ដិធម៌ នៃ រដ្ឋសភា ហើយនៅពេលនេះកំពុងស្ថិតនៅក្នុងការប្រជុំពិភាក្សា នៃរដ្ឋសភា ។ សេចក្ដីព្រាងក្រមព្រហ្មទណ្ឌ កំពុងតែសម្រួលដោយក្រសួងយុត្ដិធម៌ ជាមួយភាគីបារាំងដើម្បីឱ្យរលូនជាមួយនឹងច្បាប់ពាក់ព័ន្ធដទៃ ទៀត។ សេចក្ដីព្រាងច្បាប់អង្គការស្ដីពីការចាត់តាំងអង្គការតុលាការ និងអយ្យការក្រសួងយុត្ដិធម៌ បានបញ្ជូនទៅសុំយោបល់ពីឧត្ដមក្រុមប្រឹក្សានៃអង្គចៅក្រមរួចហើយ កាលពីថ្ងៃទី៧ មីនា ឆ្នាំ ២០០៧ ។ សេចក្ដីព្រាងច្បាប់ស្ដីពីលក្ខន្ដិកៈចៅក្រម និងព្រះរាជអាជ្ញាកំពុងពិនិត្យឡើងវិញ ដោយក្រុមប្រឹក្សា អ្នកច្បាប់នៃទីស្ដីការគណៈរដ្ឋមន្ដ្រីជាមួយក្រសួងយុត្ដិធម៌។ វិសោធនកម្មច្បាប់ស្ដីពីការរៀបចំ និងការ ប្រព្រឹត្ដទៅនៃឧត្ដមក្រុមប្រឹក្សានៃអង្គចៅក្រមក្រសួងយុត្ដិធម៌កំពុងពិនិត្យឡើងវិញ។ សេចក្ដីព្រាងច្បាប់ ប្រឆាំងនឹងអំពើពុករលួយត្រូវបានរៀបចំរួចហើយ តែនៅរង់ចាំការអនុម័តក្រមព្រហ្មទណ្ឌ និងក្រមនីតិវិធី ព្រហ្មទណ្ឌជាមុនសិន ។

លទ្ធផលនៃការអនុវត្ដន៍គំរោងតាមរយៈដៃគូអភិវឌ្ឍន៍រួមមាន ៖ ការរៀបចំ និង បញ្ចប់ការស្ទង់មតិលើ ជំនួយផ្នែកច្បាប់ និងការរៀបចំក្រមសីលធម៌ ចៅក្រម និងព្រះរាជអាជ្ញា ដែលឧបត្ថម្ភដោយភ្នាក់ងារ សហរដ្ឋអាមេរិកសំរាប់ការអភិវឌ្ឍន៍ជាតិ (USAid) តាមរយៈដៃគូផ្ទាល់របស់ខ្លួន គឺវិទ្យាស្ថានគ្រប់គ្រង បូព៌ា-បស្ចិម(EWMI) ។ ក្រមសីលធម៌ចៅក្រម និងព្រះរាជអាជ្ញា ត្រូវបានឧត្ដមក្រុមប្រឹក្សានៃអង្គចៅ ក្រមអនុម័ត ដាក់ឱ្យប្រើប្រាស់កាលពីថ្ងៃទី៥ កុម្ភៈ ឆ្នាំ ២០០៧ ហើយគោលការណ៍ក្រមសីលធម៌ ចៅក្រម និងព្រះរាជអាជ្ញានេះក៏ត្រូវបានបញ្ចូលទៅក្នុងកម្មវិធីបង្រៀននៅសាលាចៅក្រម និងសាលាមេធាវីផង ដែរ។ ការសិក្សារៀបចំទិន្នន័យអំពីកម្មវិធីយល់ដឹងពីសិទ្ធិមូលដ្ឋាននៅកំរិតសហគមន៍ និងទិន្នន័យវិវាទ ដីធ្លី ការចងក្រងសេចក្ដីសំរេចស្ថាពររបស់តុលាការ ការពង្រីកការបោះពុម្ពរាជកិច្ច និងការពង្រឹងយុត្ដិធម៌ មូលដ្ឋាន ដែលឧបត្ថម្ភដោយកម្មវិធីអភិវឌ្ឍន៍អង្គការសហប្រជាជាតិ (UNDP) តាមរយៈគំរោងសិទ្ធិ ទទួលបានយុត្ដិធម៌នៅកម្ពុជា ។ ការពង្រីកការអនុវត្ដន៍តុលាការគំរូនៅតាមតុលាការខេត្ដក្រុងមួយ ចំនួនទៀត ក្រៅពីតុលាការខេត្ដកណ្ដាល ដែលបានធ្វើរួចហើយ រួមមានតុលាការក្រុងភ្នំពេញ តុលាការ ខេត្ដកំពង់ចាម និងខេត្ដបន្ទាយមានជ័យ ដើម្បីជាការអនុវត្ដន៍សាកល្បងនូវអ្វីដែលយើងយល់ថាល្អលើបទ ពិសោធន៍បច្ចុប្បន្នសំរាប់ឯករាជ្យ និងមានទំនុកចិត្ដ ។ គំរោងនេះស្ថិតក្នុងគំរោង CCJAP III ឧបត្ថម្ភដោយ AusAid និង DANIDA/DIHR ។ ដោយឡែកអង្គការនីតិប្បញ្ញតិបានអនុម័តផ្ដល់ថវិកាជូនក្រសួងយុត្ដិធម៌ ដើម្បីសាងសង់តុលាការខេត្ដចំនួន៣គឺ ខេត្ដក្រចេះ ខេត្ដបន្ទាយមានជ័យ ខេត្ដកំពង់ធំ និងសាលសវនាការ មួយនៅខេត្ដបាត់ដំបង ។ ចំពោះការបង្កើតតុលាការពាណិជ្ជកម្មអង្គភាពសម្របសម្រួល អចិន្ដ្រៃយ៍ និង អង្គភាពគ្រប់គ្រងគម្រោងនៃក្រុមប្រឹក្សាកំណែទម្រង់ច្បាប់ និងប្រព័ន្ធយុត្ដិធម៌ បានធ្វើការសម្របសម្រួល ជាមួយក្រសួងពាណិជ្ជកម្ម និងក្រសួងយុត្ដិធម៌ ដើម្បីអនុវត្ដស្មារតីនៃកិច្ចប្រជុំក្រុមប្រឹក្សាកំណែទម្រង់ ច្បាប់ និងប្រព័ន្ធយុត្ដិធម៌កាលពីថ្ងៃទី១៦ ទី៣០ ខែសីហា និងទី១៤ ខែកញ្ញា ឆ្នាំ២០០៦ ដែល បានសម្រេចឱ្យសិក្សារៀបចំបង្កើតតុលាការពាណិជ្ជកម្មស្មើនឹងតុលាការថ្នាក់ដំបូង (ខេត្ដ-ក្រុង) និងឱ្យ មានសភាដោះស្រាយវិវាទពាណិជ្ជកម្មនៅសាលាឧទ្ធរណ៍ និងនៅតុលាការកំពូល ។ ក្រសួងពាណិជ្ជកម្ម កំពុងធ្វើការសិក្សាលំអិតអំពីការបង្កើតតុលាការពាណិជ្ជកម្ម និងកំពុងរៀបចំសេចក្ដីច្បាប់ស្ដីពីតុលាការ ពាណិជ្ជកម្ម ក្រោមការឧបត្ថម្ភរបស់ UNDP និង ADB ។ ដោយឡែកច្បាប់ស្ដីពីមជ្ឈត្ដការផ្នែក ពាណិជ្ជកម្ម ត្រូវបានអនុម័ត និងប្រកាសឱ្យប្រើរួចនៅថ្ងៃទី៥ ខែឧសភា ឆ្នាំ២០០៦ ហើយបច្ចុប្បន្ន កំពុងតែរៀបចំការអនុវត្ដន៍ ។

ការទំនាក់ទំនង
អង្គភាពសម្របសម្រួលអចិន្ដ្រៃយ៍ និងអង្គភាពគ្រប់គ្រងគម្រោងបានធ្វើទំនាក់ទំនង ព្រមទាំងស្វះស្វែង ធ្វើការពន្យល់ផ្សព្វផ្សាយ ដើម្បីបញ្ចូលគម្រោងកំណែទម្រង់ច្បាប់ និង តុលាការទៅក្នុងក្របខណ្ឌសំរាប់ ការផ្ដល់ជំនួយរបស់ប្រទេស និងសហគមន៍អ្នកផ្ដល់ជំនួយសម្រាប់បន្ដពីឆ្នាំ២០០៦នេះទៅ ដូចជាជំនួយ អភិវឌ្ឍន៍របស់អូស្ដ្រាលី (AusAid) តាមរយៈគម្រោង CCJAP III សហគមន៍ អឺរ៉ុប (EU) និងភ្នាក់ងារ ផ្ដល់ជំនួយអភិវឌ្ឍន៍អន្ដរជាតិដាណឺម៉ាក (DANIDA/DIHR) ជាដើម ។ របាយការណ៍បានលើកទិសដៅ សម្រាប់អនុវត្ដជាបន្ដក្នុងនោះការងារសំខាន់ៗមានជាអាទិ៍ៈ ជំរុញនីតិវិធីតាក់តែងច្បាប់ឱ្យបានចេញឆាប់។ ទំនាក់ទំនងរកដៃគូអនុវត្ដគម្រោងបង្កើតការិយាល័យដើម្បីការពារសិទ្ធិពលរដ្ឋ (Ombudsman) ។ ជំរុញ ការអនុម័តច្បាប់ដែលបានបញ្ជូនទៅរដ្ឋសភា ។ រៀបចំផែនការអនុវត្ដគម្រោងជំនួយផ្នែកច្បាប់ ។ ជំរុញ ការបង្កើតតុលាការ/សភា ពិសេសទៅតាមតម្រូវការដូចជាតុលាការ ពាណិជ្ជកម្ម រដ្ឋបាល អនីតិជន ។ល។ ពង្រីកការអនុវត្ដន៍គម្រោងតុលាការគំរូនៅតាមខេត្ដ-ក្រុងផ្សេងពីតុលាការខេត្ដកណ្ដាល ។ រៀបចំការតាក់ តែងក្រមសីលធម៌សម្រាប់មន្ដ្រីតុលាការផ្សេងៗទៀត ។ បង្កើត និង ពង្រឹងយន្ដការដោះស្រាយវិវាទ ក្រៅប្រព័ន្ធតុលាការ ។ ពង្រឹងសមត្ថភាពមន្ដ្រីរាជការតាមក្រសួង ស្ថាប័នពាក់ព័ន្ធនឹងវិស័យច្បាប់ និង យុត្ដិធម៌ ។ បញ្ចប់ការរៀបចំសៀវភៅមគ្គុទ្ទេសក៍សម្រាប់វិស័យច្បាប់ និងយុត្ដិធម៌។ ធ្វើបច្ចុប្បន្នភាព បញ្ជីគម្រោងកំណែទម្រង់ ច្បាប់ និងតុលាការ ។ រៀបចំប្រព័ន្ធសូចនាករតាមដានសំរាប់វិស័យច្បាប់ និងយុត្ដិធម៌ទាំងមូល ដើម្បីវាស់វែងភាពជឿនលឿន នៃការអនុវត្ដន៍កម្មវិធីសកម្មភាព ។ ពង្រឹង សមត្ថភាពដឹកនាំគ្រប់គ្រង និងអនុវត្ដកម្មវិធី សកម្មភាពកំណែទម្រង់ច្បាប់ និងតុលាការ ដោយបន្ដកិច្ច សហប្រតិបត្ដិការជាមួយ DIHR ។ ជំរុញការអនុវត្ដន៍គម្រោង CCJAP III ដោយសហការជាមួយ ដៃគូអភិវឌ្ឍន៍ ជាពិសេសជាមួយ AusAid និង DANIDA ។ បន្ដធ្វើការផ្សព្វផ្សាយទំនាក់ទំនង និងសម្រប សម្រួលស្វែងរកជំនួយឧបត្ថម្ភពីដៃគូអភិវឌ្ឍន៍ ដើម្បីជំរុញការអនុវត្ដន៍សកម្មភាព សម្រាប់កំណែទម្រង់ ច្បាប់ និងតុលាការ ដែលនៅសេសសល់ឱ្យបានលឿន និងឱ្យបានច្រើនថែមទៀត ។ របាយការណ៍នេះរៀបចំ ដោយអង្គកភាពគ្រប់គ្រងគម្រោងនៃក្រុមប្រឹក្សាកំណែទម្រង់ច្បាប់ និងប្រព័ន្ធយុត្ដិធម៌ ហើយបានដាក់ជូន អង្គភាពសម្របសម្រួលអចិន្ដ្រៃយ៍នៃក្រុមប្រឹក្សាកំណែទម្រង់ច្បាប់ និងប្រព័ន្ធយុត្ដិធម៌ពិនិត្យនៅថ្ងៃទី២៤ ខែ មេសា ឆ្នាំ២០០៧ ។

បន្ទាប់ពីក្រុមប្រឹក្សាកំណែទម្រង់ច្បាប់ និងប្រព័ន្ធយុត្ដិធម៌បានពិនិត្យ និងផ្ដល់ការឯកភាពរួច របាយការណ៍នេះនឹងរៀបចំដាក់ជូន ឧត្ដមក្រុមប្រឹក្សាកំណែទម្រង់រដ្ឋ និងរាជរដ្ឋាភិបាល ដើម្បីបានជ្រាប អំពីការងារដែលវិស័យកំណែទម្រង់ច្បាប់ និងតុលាការបានអនុវត្ដ និងសម្រេចបាននៅក្នុងដំណាក់កាល ទី២នៃការកែទម្រង់ក្រោយពីដំណាក់កាលទី១ នៃការរៀបចំចក្ខុវិស័យ យុទ្ធសាស្ដ្រ និង កម្មវិធីសកម្មភាព សម្រាប់អនុវត្ដយុទ្ធសាស្ដ្រ កំណែទម្រង់ច្បាប់ និងតុលាការត្រូវបានបញ្ចប់ នៅពេលដែលគណៈរដ្ឋ មន្ដ្រីបានអនុម័តកម្មវិធីសកម្មភាពសម្រាប់អនុវត្ដយុទ្ធសាស្ដ្រ កំណែទម្រង់ច្បាប់ និងតុលាការ កាលពីថ្ងៃ ទី២៩ ខែមេសា ឆ្នាំ២០០៥ ។

របាយការណ៍នេះ ក៏នឹងត្រូវចែកជូនសហគមន៍អ្នកផ្ដល់ជំនួយ និងអ្នកពាក់ព័ន្ធឯទៀត រួមទាំងសង្គមស៊ីវិល ផងដែរ ដើម្បីឱ្យបានដឹងអំពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងវិស័យកំណែទម្រង់ច្បាប់ និង តុលាការ ។

អនាគតរបស់រាជវង្សដែលកំពុងធ្វើនយោបាយទ្រង់ធម្មិកោរំពឹងថានឹងមានការចាកចេញបន្ដបន្ទាប់

2007-06-08T22:37:00.000+07:00

រាជធានីភ្នំពេញ ៖ ព្រះអង្គម្ចាស់ ស៊ីសុវត្ថិ ធម្មិកោ អតីតអគ្គប្រតិភូរបស់គណបក្សរណសិរ្សសង្គមជាតិ និយម ដែលទើបតែប្រកាសរំលាយរចនាសម្ព័ន្ធគណបក្សរបស់ព្រះអង្គមកចូលរួមជាមួយគណបក្សនរោត្ដម រណឫទ្ធិ កាលពីពេលថ្មីៗនេះបានមានបន្ទូល កាលពីថ្ងៃទី៧ ខែមិថុនា ថា “ការដឹកនាំរាជានិយមមានតែ សម្ដេចក្រុមព្រះទេដែលជាស្ដេចធំជាងគេ ហើយរាជវង្សដទៃទៀតអាចដឹកនាំជំនួសព្រះអង្គបាន ប្រសិន បើព្រះអង្គលាឈប់ តែនៅពេលសម្ដេចក្រុមព្រះនៅក្នុងឆាកនយោបាយនោះ គ្មានរាជវង្សណាធំជាង ព្រះអង្គក្រុមព្រះបានទេ”។ ព្រះអង្គម្ចាស់បានបញ្ជាក់ថា ការបោះឆ្នោតឃុំ-សង្កាត់ ទោះបីគណបក្ស ហ្វ៊ុនស៊ិនប៉ិច និងគណបក្ស នរោត្ដម រណឫទ្ធិ បានទទួលពីរ-បីកៅអីដែរក៏ដោយ វាជាការអាម៉ាស់មុខ សម្បើមណាស់ ហើយបើរាជានិយមមិនរួបរួមគ្នាទេ កម្លាំងរាជានិយមអស់អនាគតហើយ ។

នៅព្រឹកថ្ងៃទី៧ ខែមិថុនានោះ ព្រះអង្គម្ចាស់ស៊ីសុវត្ថិ ធម្មិកោ បានផ្ដល់បទសម្ភាសន៍មួយជាមួយ ក្រុមអ្នកកាសែតនៅក្រោមដើមអំពិលក្បែរមន្ទីររដ្ឋសភា ដែលជាការភ្ញាក់ផ្អើលមួយ ព្រោះកម្រមាន ។ ព្រះអង្គម្ចាស់ បានមានបន្ទូលទៀតថា គណបក្សនរោត្ដម រណបទ្ធិ និងហ្វ៊ុនស៊ិនប៉ិចគួរតែរួមគ្នាហើយ មិនអាចនិយាយថា គណបក្សនរោត្ដម រណឫទ្ធិ រំលាយខ្លួននោះទេវាមិនសមទេ ព្រោះគ្មានឥស្សរជនណា ចង់ឱ្យរំលាយបក្ស ដូចគណបក្សរណសិរ្សសង្គមជាតិនិយមនោះទេ។ ព្រះអង្គម្ចាស់បន្ដថា មានប្រទេស ជាច្រើនសែរាជវង្សមិនធ្វើនយោបាយដូចជាថៃ អង់គ្លេស ជប៉ុន... អត់មានគណបក្សរាជានិយមទេ ។

ព្រះអង្គម្ចាស់បានគូសបញ្ជាក់បន្ដថា យោងតាមប្រទេសមួយចំនួនខាងលើនោះ គេមិនមានការជំរុញណា មួយឱ្យក្រុមស្ដេចធ្វើនយោបាយនោះទេ និងតម្រូវឱ្យមានគណបក្សរាជានិយមនោះទេ ។ ព្រះអង្គម្ចាស់បន្ដ ថា “ការមិនតម្រូវឱ្យរាជវង្សធ្វើនយោបាយ ដោយសារតែគំនិតរបស់រាជានិយមនោះបានជ្រាបចូលទៅក្នុង សង្គមនៃប្រទេសគេទៅហើយ ។ ដូច្នេះតាមយោបល់ខ្ញុំថា ស្ដេចខ្មែរ មិនគួរធ្វើនយោបាយទេ ហើយខ្ញុំ បានសរសេរអត្ថបទមួយក្នុងឆ្នាំ២០០៤ មានចំណងជើងថា ស្ដេចខ្មែរមិនគួរធ្វើនយោបាយទេ” ។

ព្រះអង្គម្ចាស់មានបន្ទូលទៀតថា ព្រះអង្គនៅស្រុកខ្មែរយូរមកហើយ តែហេតុអ្វីបានជាសំរេចចិត្ដចូល ប្រឡូកក្នុងឆាកនយោបាយទៀត ហើយព្រះអង្គមិនចង់ធ្វើនយោបាយទេ ។ ព្រះអង្គម្ចាស់មានបន្ទូលថា “ស្រុកខ្មែរមិនចាំបាច់ធ្វើច្បាប់ទេ ដល់ដំណាក់កាលមួយ ស្ដេចត្រូវតែចេញពីឆាកនយោបាយ ក៏ប៉ុន្ដែ យើងត្រូវតែរៀបចំនូវលក្ខខណ្ឌមួយចំនួន...បើយើងធ្វើបានវាមានតំលៃចំពោះជាតិផង និងប្រជារាស្ដ្រ ផង។ ជាគំនិតរបស់ខ្ញុំ ស្ដេចពុំគួរធ្វើនយោបាយនោះទេ” ។ ព្រះអង្គម្ចាស់បន្ដថា ៉វាផ្ទុយនឹងស្ដេចដឹកនាំ គណបក្ស នៅពេលស្ដេចដឹកនាំគណបក្សហើយវាត្រូវតែប្រឆាំងជាមួយគណបក្សដទៃទៀត ” ។

គេនៅចាំបានថា កាលពីពេលថ្មីៗនេះ មានចរន្ដមួយបានលើកឡើងថា សែរាជវង្សគួរនៅក្រៅឆាក នយោបាយ។ ក្រោយមកសែព្រះរាជវង្សមួយចំនួនបានប្រតិកម្មថា រដ្ឋធម្មនុញ្ញមិនបានហាមឃាត់មិនឱ្យ ស្ដេចធ្វើនយោបាយនោះទេ ព្រោះស្ដេចក៏ដូចរាស្ដ្រដែរ មានសិទ្ធិធ្វើនយោបាយបានដូចគ្នា។ ប៉ុន្ដែពេលនេះ មានព័ត៌មានលេចឮថា សម្ដេចនរោត្ដម សិរីវុឌ្ឍ គ្រោងលាឈប់ពីឆាកនយោបាយ ខណៈដែលម្ចាស់ក្សត្រី នរោត្ដម វជរា កំពុងតែពិចារណា ។

ទោះបីជាយ៉ាងណាក្ដីសម្ដេចក្រុមព្រះ រហូតមកដល់ពេលនេះមិនទាន់បង្ហាញពីជំហររបស់ព្រះអង្គ ឆ្លើយ តបទៅនឹងបន្ទូលរបស់ព្រះអង្គម្ចាស់ ធម្មិកោ នៅឡើយទេ ប៉ុន្ដែកាលពីថ្ងៃទី២៧ ឧសភា សម្ដេចក្រុមព្រះ បានមានបន្ទូលនៅក្នុងខ្សែអាត់សម្លេងចាក់ផ្សាយតាមវីដេអូ ក្នុងពេលសមាជរបស់គណបក្សរណសិរ្ស សង្គមជាតិនិយមថា “បើចង់ឱ្យស្ដេចឈប់ធ្វើនយោបាយនោះ លុះត្រាតែស្ថាប័ន ព្រឹទ្ធសភា រដ្ឋសភា រដ្ឋាភិបាលធានានូវព្រះរាជសិទ្ធិរបស់ព្រះមហាក្សត្រ ” ។

គេមានការកត់សំគាល់ទៀតថា កាលពីពេលកន្លងទៅថ្មីៗនេះដែរ លោកសម រង្ស៊ី ប្រធានគណបក្ស សម រង្ស៊ី ធ្លាប់បានថ្លែងថា “ រាជវង្សគួរឈប់ធ្វើនយោបាយ ហើយការធ្វើនយោបាយ គឺម៉ាំងទៅម៉ាំងមក គេរិះគន់យើង យើងរិះគន់គេ ចង់មិនចង់វាពិតជាប៉ះពាល់ដល់ស្ថាប័នព្រះរាជបល័ង្កមិនខាន ដែលមាន ព្រះមហាក្សត្រកំពុងសោយរាជសម្បត្ដិបច្ចុប្បន្ន ” ។ លោកអះអាងថា មានប្រទេសជាច្រើនសែរាជវង្ស មិនប្រឡូកក្នុងឆាកនយោបាយនោះទេ ហើយប្រជាពលរដ្ឋគេគោរពស្ថាប័នរាជបល័ង្ករបស់គេ ។

លោកមុត ចន្ថា អ្នកនាំពាក្យគណបក្ស នរោត្ដម រណឫទ្ធិ មានប្រសាសន៍ថា បន្ទូលរបស់ព្រះអង្គម្ចាស់ ធម្មិកោ ជាព្រះរាជសិទ្ធិរបស់លោកទេ ព្រោះពលរដ្ឋគ្រប់រូបមានសិទ្ធិ បញ្ចេញមតិ ហើយក៏មិនមាន ការប៉ះពាល់អ្វីទៅដល់សិទ្ធិរបស់សម្ដេចក្រុមព្រះក្នុងការធ្វើនយោបាយនោះដែរ ។ លោកបន្ដថា “គ្មាន ពលរដ្ឋណាមានសិទ្ធិទៅរំលោភលើព្រះរាជសិទ្ធិរបស់ព្រះមហាក្សត្រទេ ប៉ុន្ដែពលរដ្ឋមានសិទ្ធិក្នុងការទូល ថ្វាយព្រះមហាក្សត្របាន” ។

ព្រះអង្គម្ចាស់ធម្មិកោ បានបន្ដថា ដើមហេតុមកពីគណបក្សហ្វ៊ុនស៊ិនប៉ិចដែលធ្វើសមាជនិងប្ដឹងសម្ដេច ក្រុមព្រះឱ្យជាប់គុក ដូច្នេះត្រូវតែគណបក្សហ្វ៊ុនស៊ិនប៉ិចគិតពិចារណាក្នុងការបង្រួបបង្រួម។ ព្រះអង្គម្ចាស់ បន្ដថា “គណបក្សហ្វ៊ុនស៊ិនប៉ិចត្រូវទទួលស្គាល់ថា ជាអ្នកបំបែកបំបាក់ជួររាជានិយម ដូច្នេះត្រូវ ហ្វ៊ុនស៊ិនប៉ិចរៀបចំកម្មវិធីអ្វីមួយ ដើម្បីបង្រួបបង្រួមសាជាថ្មី ។ ប៉ុន្ដែលោកនូវ សុវត្ថិរ៉ូ អ្នកនាំពាក្យ របស់គណបក្សហ្វ៊ុនស៊ិនប៉ិចថ្លែងថា “ព្រះអង្គម្ចាស់សម្លឹងតែផល តែមិនគិតអំពីហេតុនោះទេ” ។ លោកបន្ដ ទៀតថា ចំពោះបញ្ហាដែលលើកឡើងរបស់ព្រះអង្គម្ចាស់ធម្មិកោដូចនេះមិនគួរលើកឡើងទេ ប្រសិនបើ ព្រះអង្គម្ចាស់ចង់បង្រួបបង្រួមមែននោះ ព្រោះគណបក្សហ្វ៊ុនស៊ិនប៉ិច មិនដែលមានចេតនាបំបែកបំបាក់ រាជានិយមនោះឡើយ គឺមានតែការពាររាជវង្ស។ ចំពោះសំណួរដែលសួរទាក់ទងនឹងបន្ទូលរបស់ព្រះអង្គ ម្ចាស់ស្ដីពីការឈប់ធ្វើនយោបាយនោះ ? លោកថ្លែងថា គណបក្សហ្វ៊ុនស៊ិនប៉ិច គាំទ្រព្រះរាជតម្រិះ របស់អតីតព្រះមហាក្សត្រ ហើយមិនមានអត្ថាធិប្បាយអ្វីទេ ។

លោកខៀវ កាញារីទ្ធ អ្នកនាំពាក្យរបស់រាជរដ្ឋាភិបាល និងជាអ្នកនាំពាក្យរបស់គណបក្សប្រជាជនកម្ពុជា បានមានប្រសាសន៍ប្រាប់កោះសន្ដិភាពថា “កន្លងមកគណបក្សប្រជាជនកម្ពុជាមិនធ្លាប់បានលើកពីបញ្ហា រាជវង្ស នៅក្រៅឆាកនយោបាយនោះឡើយ ប៉ុន្ដែលោកសម រង្ស៊ី ធ្លាប់លើកបញ្ហានេះ ហើយវាអាស្រ័យ ទៅលើការសំរេចចិត្ដរបស់រាជវង្សខ្លួនឯងនោះទេ”។ លោកបន្ដថា យើងមិនយល់ចំពោះការលើកឡើង របស់ព្រះអង្គម្ចាស់ ធម្មិកោនោះទេ ព្រោះយើងមិនយល់អំពីការលើកឡើងថា “មិនយូរមិនឆាប់រាជវង្ស នឹងឈប់ធ្វើនយោបាយនោះទេ”។

ព្រះអង្គម្ចាស់ធម្មិកោបានមានបន្ទូលបន្ថែមថា នៅពេលប្រទេសជាតិយើងបាន ពង្រឹងនូវលទ្ធិប្រជាធិបតេយ្យ ពិតប្រាកដ មានការឯកភាពជាតិគោរពសិទ្ធិមនុស្សពេញលេញ នោះវាជាស្វ័យប្រវត្ដិស្ដេចពិតជាឈប់ ធ្វើនយោបាយ។ ព្រះអង្គម្ចាស់បន្ដថា “ខ្ញុំយល់ឃើញថា ព្រះអង្គម្ចាស់ ឬស្ដេចដទៃទៀតក៏មានគំនិត មិនខុសពីខ្ញុំប៉ុន្មានដែរ ។ ខ្ញុំយល់ថា នៅពេលដ៏ខ្លីខាងមុខនេះ យើងចង់ឱ្យប្រទេសយើង ដូចជា ប្រទេសស៊ុយអែត ថៃ ចក្រភពអង់គ្លេសជាដើម... ប៉ុន្ដែនៅប្រទេសយើងមិនទាន់មានការគោរពសិទ្ធិ ឬប្រជាធិបតេយ្យរឹងមាំ ។

ក្រុមគ្រួសារដែលតុលាការកាត់ឱ្យចាញ់ក្ដីគ្រួសារអ្នកចាញ់ក្ដីរើតោករើហ៊ឹងមកនៅសាលាឃុំ

2007-06-08T22:36:00.000+07:00

ខេត្ដកំពត ៖ ប្រជាពលរដ្ឋក្រីក្រចំនួន៣គ្រួសារ ដែលមានកូនប្រុសស្រីតូចធំចំនួន៧នាក់នៅ ភូមិត្រញំងព្រីង ឃុំត្រញំងព្រីង ស្រុកកំពត បាននាំគ្នាយំសោកបោកខ្លួនដូចអកព្រាត់គូ ខណៈពេលដែលព្រះរាជអាជ្ញារងអម តុលាការខេត្ដកំពតដឹកនាំកម្លាំងចំរុះចុះទៅអនុវត្ដសាលក្រមបណ្ដេញឱ្យចេញពីដីទំនាស់ ដែលបានប្ដឹងប្ដល់ គ្នាជាមួយឈ្មោះចាន់ ត្រេន ភេទស្រី អាយុ៦១ឆ្នាំ តាំងពីឆ្នាំ១៩៨៨ ហើយតុលាការបានកាត់ក្ដីឱ្យ គ្រួសារទាំង៣នេះចាញ់ក្ដីនៅឆ្នាំ២០០១ ប៉ុន្ដែមិនទាន់បានអនុវត្ដសាលក្រមនៅឡើយទេ ដោយទុកបើក ផ្លូវឱ្យភាគីចាញ់ក្ដីប្ដឹងសាទុក្ខទៅសាលាឧទ្ធរណ៍បន្ដទៀត តែគ្រួសារអ្នកចាញ់ក្ដីពុំបានប្ដឹងបន្ដទៀតទេ ដូច្នេះហើយទើបនៅព្រឹកថ្ងៃទី៦ ខែមិថុនា តុលាការខេត្ដកំពតដឹកនាំដោយលោកព្រះរាជអាជ្ញារង តុប ឈុនហេង បាននាំកម្លាំងចំរុះមានប៉េអឹម និងប៉ូលិសចុះមកអនុវត្ដសាលស្រមតែម្ដងទៅ ។

ក្រុមគ្រួសារដែលចាញ់ក្ដីគេនោះរួមមាន ១-ឈ្មោះមាស ប៉ែត អាយុ៥៧ឆ្នាំ ជាស្ដ្រីមេម៉ាយមានកូន ប្រុសម្នាក់ ២-ឈ្មោះសេង បន់ ភេទស្រី អាយុ៣៦ឆ្នាំ មានកូនប្រុសស្រីចំនួន៤នាក់ និង៣-ឈ្មោះសេង ឡៃ អាយុ៣០ឆ្នាំ ជាស្ដ្រីមេម៉ាយមានកូន២នាក់ ។ គ្រួសារទាំង៣នេះ ត្រូវបានកម្លាំងចំរុះដឹកនាំដោយ ព្រះរាជអាជ្ញារងចុះទៅរុះរើផ្ទះសម្បែង បណ្ដេញឱ្យចេញពីដីទំនាស់ដោយបានទាំងចាប់វ៉ៃខ្នោះដៃមិនឱ្យ ប្រឆាំងតបតជាមួយសមត្ថកិច្ចផងដែរ ឯទ្រព្យសម្បត្ដិដែលគ្រួសារទាំងនេះ មានបន្ដិចបន្ដួចរួមទាំងកំណាត់ ឈើបាក់បែកដែលសល់ពីការរុះរើផ្ទះនោះ សមត្ថកិច្ចបានដឹកយកមកគរទុកនៅក្នុងបរិវេណ សាលាឃុំ ត្រញំងព្រីង ក្រោមការទួញសោក របស់ក្រុមគ្រួសាររងគ្រោះ ។

តាមប្រជាពលរដ្ឋនៅភូមិត្រញំងព្រីងបានឱ្យដឹងថា មុនពេលអនុវត្ដសាលក្រុមរបស់តុលាការខេត្ដកំពតនេះ លោកតុប ឈុនហេង ជាព្រះរាជអាជ្ញារងបានសួរទៅភាគីចុងចោទ ដែលជាអ្នកចាញ់ក្ដីថា តើអ្នក ទាំងអស់គ្នា ព្រមប្រគល់ដីទៅឱ្យឈ្មោះចាន់ ត្រេន ដើមបណ្ដឹងដែរឬទេ? ពេលនោះភាគីអ្នកចាញ់ក្ដី ទាំង ៣គ្រួសារបានឆ្លើយយ៉ាងស្រុះគ្នាថា ពួកខ្ញុំរស់នៅលើដី២៥ម៉ែត្រ × ២២ម៉ែត្រនេះ តាំងពីឆ្នាំ១៩៧៩មក ម្ល៉េះ ដូច្នេះតើឱ្យពួកខ្ញុំប្រគល់ដីរបស់ខ្លួនទៅឱ្យគេដូចម្ដេចកើតទៅ? ។ ក្រោយពីឮក្រុមគ្រួសារទាំង៣ ឆ្លើយប្រាប់ដូច្នេះ លោកព្រះរាជអាជ្ញារងបានងាកទៅសួរខាងដើមបណ្ដឹងវិញថា បើខាងភាគីចាញ់ក្ដីមិន ព្រមប្រគល់ដីមកឱ្យលោកយាយបែបនេះ តើលោកយាយព្រមដែរឬទេ? ភ្លាមៗនោះយាយចាន់ ត្រេន បានឆ្លើយយ៉ាងរហ័សថា ខ្ញុំត្រូវតែយកដីរបស់ខ្ញុំមកវិញ ពីព្រោះតុលាការបានកាត់ក្ដីឱ្យខ្ញុំឈ្នះហើយ ។ ដោយមិនអាចធ្វើការសំរុះសំរួលគ្នាបានជាលើកចុងក្រោយ លោកព្រះរាជអាជ្ញារងក៏ បានសំរេចឱ្យកម្លាំង ចំរុះធ្វើការរុះរើលំនៅឋានរបស់ភាគីអ្នកចាញ់ក្ដីនៅក្នុងខណៈពេលនោះតែម្ដង ក្រោមការតវ៉ារារាំងពីកូនៗ ទាំង៧នាក់របស់ក្រុមគ្រួសារអ្នករងគ្រោះ ប៉ុន្ដែដើម្បីសំរេចកិច្ចការនេះ កម្លាំងសមត្ថកិច្ចបានចាប់ឃាត់ខ្លួន អ្នកទាំងនោះ ដោយមានការដាក់ខ្នោះដៃទៀតផង ហើយអ្វីដែលធ្វើឱ្យប្រជាពលរដ្ឋក្នុងភូមិហួសចិត្ដ ខ្លាំងនោះ គឺភាគីអ្នកឈ្នះក្ដីបានបង្គាប់ឱ្យកូនចៅរបស់គេធ្វើរបងព័ទ្ធដី២៥ម៉ែត្រ × ២២ម៉ែត្រនោះភ្លាមៗ។ ចំណែកខាងមន្ដ្រីតុលាការក៏បានជំរិតទារលុយពីភាគីអ្នកចាញ់ក្ដីចំនួន៥០ម៉ឺនរៀលផងដែរ ដោយបញ្ជាក់ ប្រាប់ថា ជាប្រាក់សំណងជម្ងឺចិត្ដអ្នកឈ្នះក្ដី ប៉ុន្ដែភាគីស្ដ្រីមេម៉ាយដែលចាញ់ក្ដីគេនោះបាននិយាយអង្វរ តុលាការទាំងយំសោកបោកខ្លួនថា តើពួកគាត់មានលុយឯណាមកបង់ជម្ងឺចិត្ដឱ្យគេនោះ បើគាត់រកតែ អង្ករមួយកំប៉ុងដាំបបរឱ្យកូនហូបមិនបានផងនោះ ។

ស្ដ្រីចំណាស់ឈ្មោះមាស ប៉ែត បាននិយាយប្រាប់អ្នកយកព័ត៌មានកោះសន្ដិភាពទាំងទឹកភ្នែកហូរជោក ថ្ពាល់ថា ដីទំនាស់នេះគាត់បានមករស់នៅតាំងពីឆ្នាំ១៩៧៩មកម្ល៉េះ ហើយអ្នករងគ្រោះ២គ្រួសារទៀតនោះ គឺជាកូនរបស់គាត់ដែលមករស់នៅក្នុងនេះជាមួយគ្នា ចំណែកឯអ្នកដើមបណ្ដឹងនោះមិនមានផ្ទះសម្បែងនៅ លើដីនោះទេ។ គាត់បាននិយាយត្អូញត្អែរទៀតថា កូនស្រីរបស់គាត់ទាំង២នាក់ ដែលជាស្ដ្រីមេម៉ាយ ហើយមានកូនចៅជាប់ខ្លួនច្រើននោះ ពួកគេប្រកបរបរវាយថ្មរកកំរៃបានបន្ដិចបន្ដួចចិញ្ចឹមកូនស្ទើរតែពុំរស់ ឯរូបគាត់ទៅរាវក្រែងក្នុងសមុទ្រដែលជួនកាលរកមិនបានទៀតផង ហើយពេលនេះត្រូវតុលាការរុះរើផ្ទះ បណ្ដេញឱ្យចេញពីដីរបស់ខ្លួនទៀត តើឱ្យពួកគាត់ទៅរស់នៅទីណាវិញ?

ទាក់ទិននឹងការចុះអនុវត្ដសាលក្រមនេះ លោកតុប ឈុនហេង ព្រះរាជអាជ្ញារងបានឱ្យដឹងថា តុលាការខេត្ដ កំពតបានកាត់ក្ដីរឿងដីធ្លីនេះឱ្យឈ្មោះចាន់ ត្រេន ជាអ្នកឈ្នះតាំងពីថ្ងៃទី២២ ខែមិថុនា ឆ្នាំ២០០១ តែអ្នកចាញ់ក្ដីមិនប្ដឹងទៅឧទ្ធរណ៍ទេ រហូតមកដល់ថ្ងៃនេះ ដូច្នេះហើយទើបតុលាការខេត្ដសំរេចអនុវត្ដ សាលក្រមជាស្ថាពរ។ ប៉ុន្ដែរឿងដីទំនាស់នេះគូភាគីទាំង២ សុទ្ធតែបានអះអាងថាជាដីរបស់ខ្លួនបានកាន់ កាប់តាំងពីឆ្នាំ១៩៧៩ ដូចគ្នា ឯរូបលោកផ្ទាល់ (តុប ឈុនហេង) ក៏ទើបតែផ្លាស់មកកាន់តុលាការ ខេត្ដកំពតនេះ បានជាង១ឆ្នាំតែប៉ុណ្ណោះ ។

ចំណែកលោកអធិការរងនគរបាលស្រុកកំពតវិញនិយាយថា ភាគីទាំង២និយាយដូចជាមិនប្រាកដប្រជាសោះ ប៉ុន្ដែបើតាមការពិនិត្យមើលភូមិសាស្ដ្រដីទំនាស់នោះ គឺភាគីអ្នកឈ្នះក្ដីនៅដាច់ដោយឡែកពីភូមិឋាន អ្នកចាញ់ក្ដីទេ ហើយភាគីអ្នកចាញ់ក្ដីក៏គ្មានព្រំដីនៅជាប់គ្នាដែរ តែនេះជារឿងរបស់តុលាការ រូបលោកមិន ហ៊ានជ្រៀតជ្រែកនោះទេ ។

ភី សុភ័ស្ស បាត់មុខយូរជួបអ្នកឡើងកូដ លួន សុខខេង

2007-06-08T22:35:00.000+07:00

រាជធានីភ្នំពេញ ៖ ជ័យ កំសត់ អ្នកប្រដាល់នៃសមាគមកីឡាកងយោធពលខេមភូមិន្ទ ត្រូវបានផ្គូផ្គង ឱ្យជួបប្រកួតក្នុងប្រភេទទម្ងន់៦៧គីឡូក្រាម ជាមួយសំណាង ដេនី អ្នកប្រដាល់ក្លឹបខេមបុក្ស នៅសង្វៀន ស្ថានីយទូរទស្សន៍ប៉ុស្ដិ៍ CTN នារសៀលថ្ងៃសៅរ៍ ទី៩ មិថុនា ខាងមុខនេះ ។

កំសត់ និងដេនី ធ្លាប់មានឈ្មោះនៅក្នុងការប្រកួតដណ្ដើមខ្សែក្រវាត់ស្រាសាច់ដុំពិសេស ប្រភេទទម្ងន់ ៦៧គីឡូក្រាម កាលពីលើកមុន ប៉ុន្ដែពុំធ្លាប់បានជួបប្រកួតគ្នានៅឡើយ ដោយសារពួកគេស្ថិតនៅក្នុងពូល ផ្សេងគ្នា។ ម្យ៉ាងទៀតអ្នកទាំង២ ត្រូវធ្លាក់នៅក្នុងវគ្គប្រកួតជំរុះវិលជុំដូចគ្នា គឺមិនបានឡើងមកប្រកួត នៅវគ្គពាក់កណ្ដាលផ្ដាច់ព្រ័ត្រទេ ។ ដោយឡែកការធ្លាក់របស់ដេនី នាពេលនោះ ដោយសារគេមាន បញ្ហារបួសដៃស្ដាំ មិនអាចប្រកួតកើត ហើយត្រូវការព្យាបាលរយៈពេលយូរ ប៉ុន្ដែបច្ចុប្បន្នរបួសនោះ បានជាសះស្បើយហើយ ទើបហ៊ានឡើងមកប្រកួតសាជាថ្មីម្ដងទៀត ។ ទោះបីយ៉ាងណា រវាងកំសត់ និង ដេនី នៅតែមិនអាចសន្និដ្ឋានពីលទ្ធផលទុកជាមុនបានឡើយ ព្រោះពួកគេទាំង២នាក់ខានឡើងសង្វៀន យូរគួរសមដែរ មិនដឹងថា អ្វីៗអាចប្រែប្រួលកំរិតណានោះទេ ។

លួន សុខខេង ក្លឹបសិង្ហកីឡា ត្រូវធ្វើការប្រកួតក្នុងប្រភេទទម្ងន់៦០គីឡូក្រាម ជាមួយភី សុភ័ស្ស អ្នកប្រដាល់នៃក្លឹបពន្លឺថ្មីខេត្ដបាត់ដំបង ។ មួយរយៈចុងក្រោយនេះ សុខ ខេង មានយីអ៊ុនឡើងខ្លាំងណាស់ ព្រោះគេទទួលបានជោគជ័យជាបន្ដបន្ទាប់ ហើយការប្រកួតចុងក្រោយកាលពីថ្ងៃទី២៦ ឧសភា កន្លងទៅ ថ្មីៗនេះ សុខខេង បានយកឈ្នះពិន្ទុ សារឹម វុទ្ធី អ្នកប្រដាល់មកពីសមាគមកីឡាកងយោធពលខេមរភូមិន្ទ ដោយនៅក្នុងទឹកទី២ សុខ ខេង បានប្រើស្នៀតជើងទាត់ទៅលើវុទ្ធី រហូតអាជ្ញាកណ្ដាលរាប់៨ដល់ទៅ ២លើកទៀតផង។ ចំណែកសុភ័ស្សវិញ អាចចាត់ទុកថា ជារៀមច្បង ព្រោះគេមានប្រវត្ដិប្រកួតយូរ មកហើយ ក្បាច់គុនរបស់អ្នកប្រដាល់រូបនេះ ក៏មិនធម្មតាដែរ ទាំងស្នៀតទាត់ ជង្គង់ ឬកែងធ្វើឱ្យអ្នក ស្នេហាវិស័យកីឡាប្រដាល់ទទួលស្គាល់រូបគេគ្រប់ៗគ្នា ។ ប៉ុន្ដែសុភ័ស្ស ត្រូវបាត់មុខមួយរយៈយ៉ាងយូរ មិនដឹងថា តើគេអាចរក្សាវិជ្ជាគុនបានល្អដូចពីពេលមុន ឬយ៉ាងណានោះទេ? គូនេះក៏មិនអាចទស្សន៍ទាយ លទ្ធផលទុកជាមុនបានដែរ គ្រាន់តែដឹងថា ពិតជាធ្វើឱ្យមានការជក់ចិត្ដមិនខាន ។

អេ សុវត្ថិឌី សមាគមកីឡាកងយោធពលខេមរភូមិន្ទ ត្រូវប្រកួតក្នុងប្រភេទទម្ងន់៥៤គីឡូក្រាម ជាមួយ ឯម វុត្ថា ក្លឹបគ្រុឌមានជ័យ ។ សុវត្ថិឌី និងវុត្ថា ជាអ្នកប្រដាល់ស៊េរីថ្មីដូចគ្នា ប៉ុន្ដែក្បាច់គុន របស់ពួកគេមិនចាញ់អ្នកប្រដាល់ជើងចាស់ឡើយ ។ សុវត្ថិឌី ប្រកួតចុងក្រោយបានយកឈ្នះពិន្ទុ ចេង រិទ្ធី មកពីក្លឹបសាលវ័ន្ដកីឡា រីឯវុត្ថាវិញ ក៏មិនធម្មតាដែរ ប៉ុន្ដែអ្នកប្រដាល់រូបនេះមិនសូវបានឡើងសង្វៀន ញឹកញាប់ដូចសុវត្ថិឌីទេ ហេតុនេះហើយទើបមជ្ឈដ្ឋានអ្នកលេងភ្នាល់លុយក្រៅសង្វៀន មានជំនឿចិត្ដ លើសុវត្ថិឌី ច្រើនជាង ។

ជាម អាដាំ ក្លឹបឃ្លាំងមឿង ត្រូវប្រកួតក្នុងប្រភេទទម្ងន់៦២គីឡូក្រាមជាមួយយិន យឿន ក្លឹបតាព្រហ្ម មានជ័យ។ តាមការស្រាវជ្រាវពីប្រវត្ដិប្រកួត អាដាំជាសិស្សប្អូន ព្រោះយិន យឿន ជាអ្នកប្រដាល់ ជើងចាស់ ធ្លាប់មានឈ្មោះជាយូរមកហើយ ប៉ុន្ដែអ្នកប្រដាល់រូបនេះមិនសូវមានការវិវឌ្ឍន៍វិជ្ជាគុនប៉ុន្មាន ទេ ដូច្នេះការមកប៉ះជាមួយអាដាំជាសិស្សប្អូននោះ ក៏មិនទាន់ប្រាកដថា អាចយកឈ្នះនោះដែរ ។

ផល សីហា ក្លឹបយុវជនអង្គរ ត្រូវប្រកួតក្នុងប្រភេទទម្ងន់៥៤គីឡូក្រាមជាមួយម៉ន សំណាង ក្លឹបព្រែក ឯងកីឡា ។ ចំពោះការប្រកួតជាលក្ខណៈសាកល ជា ហេង ក្លឹបពន្លឺខេមរា ត្រូវប្រកួតក្នុងប្រភេទ ទម្ងន់៥១គីឡូក្រាមជាមួយខុន រដ្ឋា ក្លឹបកងរថក្រោះ។ រីឯ ម៉ាក់ សាមឿន មកពីក្លឹបតាឡីដំរីព្រេច ត្រូវប្រកួតក្នុងប្រភេទទម្ងន់៥៤គីឡូក្រាមជាមួយ ពេជ្រ សីហា ក្លឹបតាខ្មៅមានរឹទ្ធិ ខេត្ដកណ្ដាល ។

បក្សសិទ្ធិមនុស្សរបស់លោកកឹម សុខាពន្យារពេលធ្វើសមាជខណៈមិនទាន់មានច្បាប់ផ្លូវការ

2007-06-08T22:34:00.000+07:00

រាជធានីភ្នំពេញ ៖ លោកញ៉ឹក វណ្ណារ៉ា អ្នកនាំពាក្យ និងជាប្រធានគណៈកម្មការរៀបចំសមាជគណបក្ស សិទ្ធិមនុស្សរបស់លោកកឹម សុខា បានមានប្រសាសន៍កាលពីថ្ងៃទី៦ ខែមិថុនាថា គំរោងការរៀបចំសមាជ របស់គណបក្សនេះ ត្រូវពន្យារពេលវិញ ដែលពីមុនគ្រោងរៀបចំធ្វើនៅថ្ងៃទី៧ ខែកក្កដា ឆ្នាំ២០០៧។ ការ ពន្យារពេលនេះ ត្រូវបានធ្វើឡើងបន្ទាប់ពីក្រសួងមហាផ្ទៃមិនទាន់អនុញ្ញាតច្បាប់ជាផ្លូវការ ដល់គណបក្ស ចំពោះស្នាមមេដៃគាំទ្រច្បាស់លាស់ ដែលគណបក្សបានដាក់ជូនទៅក្រសួងកន្លងមក ។

លោកញ៉ឹក វណ្ណារ៉ា បន្ដថា គណបក្សសិទ្ធិមនុស្សរបស់លោកបានដាក់ពាក្យស្នើសុំទៅក្រសួងមហាផ្ទៃ នូវលក្ខន្ដិកៈ ព្រមទាំងឈ្មោះអ្នកបង្កើតគណបក្ស និងស្នាមមេដៃអ្នកគាំទ្រ ប្រមាណជា៦.០០០នាក់ ដែលលើសពីតម្រូវការរបស់ក្រសួងមហាផ្ទៃទៅទៀត ។ លោកបន្ដទៀតថា នៅក្នុងចំនួនមេដៃ ទាំងនោះត្រូវបានក្រសួងមហាផ្ទៃទទួលស្គាល់តែជាង២.០០០ប៉ុណ្ណោះ ហើយក្រៅពីនេះទៀតថា មានភាព មិនទាន់ច្បាស់លាស់នោះទេ ។

យោងតាមសេចក្ដីប្រកាសព័ត៌មានរបស់គណបក្សសិទ្ធិមនុស្ស ដែលកោះសន្ដិភាពបានទទួល ឱ្យដឹងថា គណបក្សសិទ្ធិមនុស្សបានផ្ញើលិខិតទៅកាន់ក្រសួងមហាផ្ទៃ និងសាលាក្រុងភ្នំពេញ ដើម្បីសុំកិច្ចសហការ ក្នុងការការពារសន្ដិសុខ សណ្ដាប់ធ្នាប់ និងផ្ញើទៅក្រសួងអប់រំ ដើម្បីសុំខ្ចីអគារក្នុងពហុកីឡដ្ឋានជាតិ អូឡាំពិក ប្រារឰពិធីសមាជរបស់គណបក្ស ។ លោកញ៉ឹក វណ្ណារ៉ា បន្ដថា រហូតមកដល់ពេលនេះ ក្រសួងមហាផ្ទៃមិនទាន់បានផ្ដល់សុពលភាព ដល់គណបក្សសិទ្ធិមនុស្សនៅឡើយ ដោយឯកសារនៃការ ចុះបញ្ជីដែលគណបក្សសិទ្ធិមនុស្សបានផ្ញើទៅក្រសួងមហាផ្ទៃ កាលពីថ្ងៃទី២២ ឧសភានោះ ក្រសួង មហាផ្ទៃតម្រូវឱ្យគណបក្សកែសំរួល និងបំពេញបន្ថែមឯកសារមួយចំនួនទៀត។ លោកបន្ដថា សាលាក្រុង ភ្នំពេញអះអាងថា ការសុំបរិវេណពហុកីឡដ្ឋានជាតិធ្វើសមាជនោះ រង់ចាំការអនុញ្ញាតពីក្រសួងមហាផ្ទៃ សិន ។

អ្នកនាំពាក្យគណបក្សសិទ្ធិមនុស្សបានឱ្យដឹងទៀតថា អាស្រ័យដោយមិនទាន់បានទទួលលិខិតផ្ដល់សុពល ភាពឱ្យគណបក្សសិទ្ធិមនុស្សពីក្រសួងមហាផ្ទៃ ហើយក្រសួងអប់រំក៏មិនទាន់ឱ្យខ្ចីអគារពហុកីឡដ្ឋានជាតិ អូឡាំពិក ធ្វើជាកន្លែងប្រារឰពិធីសមាជ ទើបគណបក្សសិទ្ធិមនុស្សយល់ឃើញថា ដំណើរការរៀបចំ សមាជដំបូងរបស់គណបក្សសិទ្ធិមនុស្ស មិនអាចប្រព្រឹត្ដទៅបានតាមការគ្រោងទុកទាន់ពេលវេលាទេ ហើយ គណបក្សបានសំរេចលើកពេលវេលាប្រារឰពិធីសមាជ ទៅពេលក្រោយវិញ ។

លោកសក់ សេដ្ឋា អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ បានមានប្រសាសន៍ប្រាប់ កោះសន្ដិភាព តាមទូរស័ព្ទថា ក្រសួងមហាផ្ទៃមិនមែនមិនផ្ដល់សុពលភាពឱ្យទៅគណបក្សសិទ្ធិមនុស្ស របស់លោកកឹម សុខា នោះទេ ។ ក្រសួងបានទទួលការស្នើសុំនេះហើយ ប៉ុន្ដែដោយតម្រូវការបន្ថែមទៅ លើឯកសារមួយចំនួនរួមមានការផ្ដិតមេដៃពីអ្នកគាំទ្រមិនមានភាពច្បាស់លាស់ ក្រសួងតម្រូវឱ្យគណបក្ស នេះបញ្ជាក់ឱ្យបានច្បាស់ ព្រោះមានស្នាមមេដៃខ្លះរលុបមិនច្បាស់ ។

លោកបន្ដទៀតថា យោងតាមច្បាប់ គឺក្រសួងតម្រូវឱ្យការដាក់ពាក្យនោះមានឈ្មោះប្រធានបក្ស លក្ខន្ដិកៈ របស់គណបក្ស និងស្នាមមេដៃអ្នកគាំទ្រចំនួនបួនពាន់នាក់ ដាក់ទៅក្រសួងមហាផ្ទៃ។ លោកអះអាងថា ក្រសួងមិនមែនមិនផ្ដល់សុពលភាពឱ្យគណបក្សសិទ្ធិមនុស្សនោះទេ តែត្រូវបំពេញឯកសារតាមផ្លូវច្បាប់ កំណត់ ។ ប៉ុន្ដែលោកញ៉ឹក វណ្ណារ៉ា បានឱ្យដឹងថា ការមិនទាន់បានផ្ដល់សុពលភាពដល់គណបក្សសិទ្ធិមនុស្ស និងការពន្យារពេលសមាជវិញនោះ វាអាចធ្វើឱ្យមានការប៉ះពាល់ចំពោះអ្នកគាំទ្រមកពីក្រៅប្រទេស ដែល គ្រោងចូលរួម ព្រមទាំងក្រុមប្រឹក្សាជាតិមកពីតាមខេត្ដ-ក្រុងចំនួន៨ផងដែរ នៅទូទាំងប្រទេស ។

លោកកឹម សុខា ប្រធានគណបក្សសិទ្ធិមនុស្សបានប្រាប់កោះសន្ដិភាពកាលពីសប្ដាហ៍មុនថា ក្រសួង មហាផ្ទៃតម្រូវឱ្យគណបក្សរបស់លោកបញ្ជាក់ឱ្យបានច្បាស់ ចំពោះស្នាមមេដៃអ្នកគាំទ្រ និងទីលំនៅ បច្ចុប្បន្នផង ។ លោកបន្ដថា លោកបានដាក់ពាក្យទៅក្រសួងមហាផ្ទៃ ព្រមទាំងឯកសារមួយចំនួនតាម តម្រូវការរបស់ក្រសួងក្នុងការបង្កើតគណបក្សរួចហើយនាពេលកន្លងមក ។

លោកញ៉ឹក វណ្ណារ៉ា បានឱ្យដឹងទៀតថា រហូតមកដល់ពេលនេះ គណបក្សសិទ្ធិមនុស្សរបស់លោក នៅមិនទាន់បានរៀបចំរចនាសម្ព័ន្ធនៅឡើយទេ ដោយរង់ចាំសំរេចតាមរយៈសមាជជ្រើសរើស ព្រោះ គណបក្សនេះកើតឡើងពីប្រជាពលរដ្ឋ។ លោកបន្ដទៀតថា “បន្ទាប់ពីការជួបពិភាក្សារបស់ក្រុមប្រឹក្សាជាតិ មកពីខេត្ដ-ក្រុង និងស្រុក ព្រមទាំងអ្នកខ្លះមកពីបរទេសផងនោះ ទើបមានការសំរេចពីការបង្កើតរចនា សម្ព័ន្ធរបស់គណបក្សនៅពេលនោះ” ។

យុវនារីសិស្សវិទ្យាល័យវត្ដកោះរងការវាយប្រហារដោយទឹកអាស៊ីត

2007-06-08T22:31:00.001+07:00

រាជធានីភ្នំពេញ ៖ យុវនារីសិស្សវិទ្យាល័យវត្ដកោះម្នាក់ បានរងការវាយប្រហារពីសំណាក់ជនដៃដល់២នាក់ ដែលជិះម៉ូតូមកក្បែរ ហើយចាក់ស្រោចទឹកអាស៊ីតពីលើបណ្ដាលឱ្យរោលរលាកពេញខ្លួនប្រាណ ។

ហេតុការណ៍នេះបានកើតឡើងកាលពីវេលាម៉ោង១១ព្រឹកថ្ងៃទី៧ ខែមិថុនា នៅចំណុចកែងមហាវិថី ព្រះមុនីវង្ស និងផ្លូវលេខ១០៩ មុខមជ្ឈមណ្ឌលការិយាល័យពាណិជ្ជកម្ម ស្ថិតក្នុងសង្កាត់បឹងរាំង ខណ្ឌដូនពេញ ក្រុងភ្នំពេញ។ ការវាយប្រហារដោយទឹកអាស៊ីតនេះ បានកើតឡើងស្របពេលដែល សិស្សរូបនោះធ្វើដំណើរដោយថ្មើរជើងចេញពីវិទ្យាល័យឆ្ពោះទៅផ្ទះនៅក្នុងសង្កាត់អូរឫស្សីទី៤ ខណ្ឌ៧ មករា ដែលមានចំងាយប្រហែលជា១៥០ម៉ែត្រពីកន្លែងកើតហេតុ ។

នេះជាការវាយប្រហារថ្មីមួយទៀតពីសំណាក់ជនល្មើស ដោយប្រើប្រាស់ទឹកអាស៊ីតធ្វើជាអាវុធ បន្ទាប់ពី ការវាយប្រហារបែបនេះបានស្ងប់ស្ងាត់យូរមកហើយ ។ ទោះបីជាបែបណា ការវាយប្រហារបែបនេះគេ ច្រើនកត់សំគាល់ថា កើតឡើងតែទៅលើស្ដ្រី ដែលត្រូវបានអះអាងថាជាប្រពន្ធចុង ឬជាស្ដ្រីកំណាន់ ហើយ នារីដែលរងគ្រោះមិនធ្លាប់មានជាសិស្សសាលានោះទេ ដូច្នេះការវាយប្រហារលើសិស្សនារីវិទ្យាល័យនេះ គឺជាលើកទីមួយហើយ ។

តាមអ្នករត់ម៉ូតូឌុបម្នាក់ដែលឃើញហេតុការណ៍បាននិយាយឱ្យដឹងថា គេបានឃើញនារីរងគ្រោះ និងមិត្ដភក្ដិ ៣នាក់ទៀតចេញមកពីវិទ្យាល័យវត្ដកោះ ធ្វើដំណើរដោយថ្មើរជើងតាមបណ្ដោយផ្លូវលេខ១០៩ឆ្ពោះទៅ ទិសខាងលិច ដោយមានទឹកមុខញញឹមញញែម និងនិយាយគ្នាបណ្ដើរដើរបណ្ដើរ ។ លុះមកដល់មុខ មជ្ឈមណ្ឌលការិយាល័យពាណិជ្ជកម្ម ដែលមានទីតាំងនៅកែងមហាវិថីព្រះមុនីវង្ស និងផ្លូវលេខ១០៩ ស្រាប់តែមានយុវជនស្ទាវ២នាក់ជិះម៉ូតូមួយគ្រឿងធុន C125 ពណ៌ខ្មៅ មិនចាំស៊េរី បានបើកមកពីក្រោយ ដោយអែបម៉ូតូក្បែរនារីរូបនោះ រួចលើកធុងពណ៌ផ្កាឈូកមួយ ចាក់ទឹកស្រោចពីលើក្បាលនាងទទឹកជោក បន្ទាប់មកជនដៃដល់ក៏បានបើកម៉ូតូបត់ទៅទិសខាងជើង តាមមហាវិថីព្រះមុនីវង្សគេចខ្លួនបាត់ស្រមោល ទៅ។ ខណៈពេលដែលយុវជនស្ទាវបើកម៉ូតូចេញទៅបាត់ ក៏ឮសំលេងស្រែកទ្រហោយំឱ្យប្រជាពលរដ្ឋ ដូចជាមិត្ដភក្ដិរួមដំណើរជួយ ព្រោះនាងទទួលរងនូវភាពក្ដៅក្រហាយស្បែកក្បាល និងខ្លួនយ៉ាងខ្លាំង ទើប ម្នាក់ៗភ្ញាក់ផ្អើលថាជាទឹកអាស៊ីត ។
នារីរងគ្រោះត្រូវបានគេជួយលើកយកទៅដាក់នៅមុខសណ្ឋាគារញូវយ៉ក ហើយអ្នកខ្លះយកទឹកមកស្រោច ពីលើក្បាល និងខ្លះទៀតយកទឹកកកស្អំ ដើម្បីជួយកាត់បន្ថយការឈឺចាប់ដ៏ក្ដៅរោលរាលនោះ រួចបន្ទាប់ មកក៏ត្រូវបានគេដឹកភ្លាមៗទៅកាន់គ្លីនីកឯកជនមួយ ព្រោះមុខរបួសមានស្ថានភាពខ្មៅកន្ទួលបណ្ដើរៗ ទៅហើយ។ នៅកន្លែងកើតហេតុ មានប៉ូលិសមូលដ្ឋានម្នាក់ស្ពាយកាំភ្លើងអាកា ច្រងេងច្រងាង ព្យាយាមរារាំងអ្នកកាសែតមិនឱ្យថតនារីរងគ្រោះដែលត្រូវគេជះទឹកអាស៊ីតនេះទេ ដែលមិនដឹងថាមកពី មូលហេតុអ្វី ហើយជាមួយគ្នានោះក៏មានក្រុមស្ទាវដែលទំនងជាមិត្ដភក្ដិបាននាំគ្នាមករារាំង និងហាមឃាត់ អ្នកកាសែតដែរ។ នារីរងគ្រោះដែលរងនូវការវាយប្រហារដោយទឹកអាស៊ីតនោះ ត្រូវគេស្គាល់ថាឈ្មោះ គីរី ចរិយា អាយុ១៨ឆ្នាំ ជាសិស្សវិទ្យាល័យវត្ដកោះ រៀនថ្នាក់ទី១១ ស្នាក់នៅក្នុងសង្កាត់អូរឫស្សីទី៤ ខណ្ឌ៧មករា ក្រុងភ្នំពេញ។

មន្ដ្រីប៉ូលិសជំនាញបានធ្វើការសន្និដ្ឋានជំហានដំបូងដោយមិនផ្លូវការថា អំពើហិង្សាជះទឹកអាស៊ីតទៅលើ សិស្សនារីនោះ ទំនងជាកើតចេញពីស្នេហាត្រីកោណ ក៏ប៉ុន្ដែក្រុមគ្រួសារបានអះអាងថា នារីរងគ្រោះ មិនដែលមានទំនាក់ទំនងជាមួយអ្នកណាម្នាក់ទេ ហើយរឿងស្នេហាគូកំណាន់ក៏គ្មានដែរ ។ ចំណែកប្រភព ព័ត៌មានជិតស្និទ្ធជាមួយគ្រួសារនារីរងគ្រោះបានបង្ហើបឱ្យដឹងថា ស្លាកស្នាមជះទឹកអាស៊ីតមានសភាព ធ្ងន់ធ្ងរនៅលើផ្ទៃមុខ និងដៃទាំងសងខាង ហើយទំនងជាគ្រួសារបញ្ជូនទៅព្យាបាលនៅប្រទេស វៀតណាម។ មិនមានព័ត៌មានផ្លូវការណាមួយត្រូវបានឱ្យដឹងភ្លាមៗនោះទេ ជុំវិញការវាយប្រហារដោយ ទឹកអាស៊ីតនេះ។

ការតាមដានអាចនិយាយបាន ទី១-បើសិនជានាងគ្មានទំនាស់អ្វីជាមួយអ្នកណាម្នាក់ ឬទាក់ទងនឹងស្នេហា ត្រីកោណ ឬមានបញ្ហាផ្សេងដែលស្មានមិនដល់ ការវាយប្រហារទាំងកំរោលរបស់ជនស្ទាវទាំង២នាក់នោះ អាចជាការភាន់ច្រឡំមនុស្ស ចំណែកទី២-ក៏អាចនិយាយបានថា បើគ្មានភ្លើងពិតជាគ្មានផ្សែងទេ ។ ទោះបី ជាយ៉ាងណា ការប្រើប្រាស់ទឹកអាស៊ីតវាយប្រហារទៅលើគូបដិបក្សបែបនេះ ត្រូវតែថ្កោលទោស ព្រោះជា ការបង្កនូវក្ដីឈឺចាប់អស់មួយជីវិត ប្រសិនបើមិនស្លាប់ អ្នករងគ្រោះនឹងក្លាយទៅជាខ្មោចមិនខ្មោច មនុស្សមិនមនុស្ស រស់មិនរស់ ស្លាប់មិនស្លាប់ គឺជាការចងកម្មវេរាគួរឱ្យរន្ធត់ដែលអ្នកកាន់ព្រះពុទ្ធ សាសនាមិនត្រូវធ្វើឡើយ ។

ចោរស្ដេចត្រាញ់ក្នុងព្រៃ៩ឆ្នាំដេកពេទ្យជាប់ច្រវាក់

2007-06-08T22:31:00.000+07:00

ខេត្ដបាត់ដំបង ៖ ទណ្ឌិតម្នាក់ដែលគេស្គាល់ថា ជាចោរស្ដេចត្រាញ់ប្លន់ប្រដាប់អាវុធ សំលាប់មិនរើសមុខ យ៉ាងកក្រើកនៅភាគខាងលិចស្រុកបវេល កាលពីប៉ុន្មានឆ្នាំមុន ហើយជននេះកាលណោះរស់នៅតែក្នុងព្រៃ ជាមួយកាំភ្លើងAK47 ចំនួន២ដើមអស់រយៈពេល៩ឆ្នាំ ដោយដើរលួច ឬប្លន់បាយទឹកអ្នកស្រុក តាម ខ្ទមស្រែចំការដើម្បីចំអែតក្រពះមួយពេលៗដូចសត្វព្រៃ។ ប៉ុន្ដែបច្ចុប្បន្នបើតាមសេចក្ដីរាយការណ៍ ពីមន្ដ្រី អភិរក្សពន្ធនាគារខេត្ដបាត់ដំបងបានឱ្យដឹងថា ទណ្ឌិតម្នាក់នេះកំពុងធ្លាក់ខ្លួនឈឺរីងរៃ ព្រោះកើតអេដស៍ ហើយត្រូវបានគេបញ្ជូនទៅព្យាបាលបណ្ដោះអាសន្ន នៅមន្ទីរពេទ្យបង្អែកខេត្ដដោយសារមានសភាពរាក រូសខ្លាំងពេក ដែលគ្រូពេទ្យប្រចាំពន្ធនាគារមិនអាចព្យាបាលបាន ។

លោកកង សារ៉េន ប្រធានពន្ធនាគារខេត្ដបាត់ដំបងបានឱ្យកោះសន្ដិភាពដឹងថា ទណ្ឌិតដែលមានផ្ទុក មេរោគអេដស៍ម្នាក់នេះឈ្មោះ ហឺស វ៉ាន់ដា អាយុ៣៦ឆ្នាំ ជននេះត្រូវបានតុលាការខេត្ដបាត់ដំបង បើកសវនាការជំនុំជំរះកាលពីថ្ងៃទី១៣ ខែធ្នូ ឆ្នាំ២០០៦ ដោយផ្ដន្ទាទោសឱ្យជាប់គុកចំនួន៥ឆ្នាំពីបទ សំលាប់មនុស្ស និងប្លន់ប្រដាប់អាវុធ ។ បើគិតតាំងពីថ្ងៃចាប់ខ្លួនបានជននេះជាប់គុកជាងកន្លះឆ្នាំហើយ។ លោកកង សារ៉េន បានឱ្យដឹងទៀតថា ទណ្ឌិតឈ្មោះហឺស វ៉ាន់ដា នេះ បច្ចុប្បន្នមានជំងឺប្រចាំកាយ យ៉ាងធ្ងន់ធ្ងរបំផុត គឺគេមានផ្ទុកមេរោគអេដស៍ ។ ដោយសារជននេះស្ថិតក្នុងសភាពស្គមរីងរៃ និងមាន អការៈរាករូសមិនឈប់ឈរទើបលោកចាត់កំលាំងឱ្យបញ្ជូនជននេះទៅសំរាកព្យាបាល នៅមន្ទីរពេទ្យបង្អែក ខេត្ដបាត់ដំបង គឺបញ្ជូនទៅតាំងពីថ្ងៃទី១៨ ខែឧសភា ។ លោកប្រធានពន្ធនាគាររូបនេះបញ្ជាក់ថា បច្ចុប្បន្ន អ្នកទោសទាំងអស់កើតអេដស៍ចំនួន១៦នាក់ ហើយកាលពីខែឧសភាកន្លងទៅនេះ លោកបញ្ជូនអ្នកទោស ដែលមានជំងឺធ្ងន់ៗទៅព្យាបាលនៅមន្ទីរពេទ្យបង្អែកខេត្ដអស់ជាង១០នាក់ តែឥឡូវបានបញ្ជូនមកពន្ធនាគារ វិញខ្លះហើយ ដោយនៅតែ៧នាក់ប៉ុណ្ណោះ រាប់ទាំងឈ្មោះហឺស វ៉ាន់ដា នេះផង ។ លោកបញ្ជាក់បន្ថែមថា បច្ចុប្បន្ននៅក្នុងពន្ធនាគារមានគ្រូពេទ្យប្រចាំការរបស់ពន្ធនាគារ និងគ្រូពេទ្យរបស់អង្គការលីកាដូផង សំរាប់ ព្យាបាលជំងឺអ្នកទោស ។

ដោយឡែកទណ្ឌិតឈ្មោះហឺស វ៉ាន់ដា ដែលជាចោរស្ដេចត្រាញ់កំពុងដេកស្ដូកស្ដឹង លើគ្រែពេទ្យឯណោះ វិញ បានប្រឹងងើបអង្គុយទាំងត្រដាបត្រដួស ដោយមានជាប់ច្រវាក់ជើងនៅនឹងគ្រែផង ហើយបានលូកដៃ យកម៉ាស់មកពាក់មុខ រួចនិយាយខ្សាវៗប្រាប់អ្នកយកព័ត៌មានយើងថា ខ្លួនគេមានផ្ទុកមេរោគអេដស៍យូរ ឆ្នាំហើយ តាំងពីខ្លួនធ្វើចោររស់នៅក្នុងព្រៃមកម្ល៉េះ ឥឡូវជំងឺនេះចាប់ផ្ដើមធ្វើទុក្ខកាន់តែខ្លាំងហើយ។ ទណ្ឌិតនេះនិយាយទាំងទឹកមុខស្លេកស្លាំងថា ខ្លួនគេត្រូវតុលាការកាត់ទោសឱ្យជាប់ពន្ធនាគារចំនួន៥ឆ្នាំ ឥឡូវខ្លួនជាប់បានជាងកន្លះឆ្នាំហើយ ហើយពេលគេបញ្ជូនមកដេកពេទ្យនេះគ្រូពេទ្យនិយាយថា ខ្លួនមាន ជំងឺអេដស៍ផង និងជំងឺរបេងផង ។ ជននេះបានត្អូញត្អែរថា ចាប់តាំងពីខ្លួនត្រូវបាននគរបាលចាប់ខ្លួន រហូតមកដល់ពេលនេះ គ្មានសាច់ញាតិណាម្នាក់មកអើតសួរសុខទុក្ខខ្លួនគេទេ ហើយសុខភាពរបស់គេមើល ទៅមិនអាចរស់ឱ្យរួចទោសចំនួន៥ឆ្នាំនោះឡើយ ។

គួររំលឹកថា ទណ្ឌិតឈ្មោះហឺស វ៉ាន់ដា នេះមុនពេលត្រូវនគរបាលចាប់ខ្លួន ជននេះធ្វើជាចោររស់នៅ តែក្នុងព្រៃអស់រយៈពេល៩ឆ្នាំ គឺចាប់ពីឆ្នាំ១៩៩៧រហូតដល់ថ្ងៃទី២៣ ខែតុលា ឆ្នាំ២០០៦ ទើបត្រូវ សមត្ថកិច្ចនគរបាលស្រុកបវេលចាប់ខ្លួនបាន។ ជននេះមានកាំភ្លើង AK47 ចំនួន២ដើមបានធ្វើសកម្មភាព ប្លន់សំលាប់មិនរើសមុខដ៏កក្រើកនៅភាគខាងលិចស្រុកបវេល ខេត្ដបាត់ដំបង ។ ការរស់នៅក្នុងព្រៃ រយៈពេល៩ឆ្នាំ ជននេះ ដើរលួច ឬប្លន់បាយទឹកអ្នកស្រែចំការយកទៅហូប ហើយដេកនៅតាមដំបូក ឬតាម វាលស្រែពេលប្លន់បានលុយទើបគេលបលួចចូលក្នុងភូមិ ឬដើរតាមផ្សារ ឬទៅលេងស្រីម្ដងម្កាល ។ ជននេះត្រូវក្រុមគ្រួសារសាច់ញាតិកាត់កាលចោល ដោយសារតែមានចរិតជាចោរ ។ ជននេះធ្លាប់ប្រាប់ សមត្ថកិច្ចកាលចាប់ខ្លួនដំបូងថា “មូលហេតុដែលនាំឱ្យខ្លួនគេសំរេចចិត្ដរត់ចូលព្រៃធ្វើជាចោរនេះ ដោយ សារខ្លួនគេធ្លាប់លួចស្រលាញ់កូនស្រីរបស់មន្ដ្រីនគរបាលស្រុកបវេលម្នាក់ ហើយត្រូវមន្ដ្រីនគរបាលនោះ ប្រមាថរកបាញ់គេសំលាប់ចោល ទើបខ្លួនគេខឹងក៏សំរេចចិត្ដរត់ចូលព្រៃធ្វើចោរតែម្ដង” ជននេះមានស្រុក កំណើតនៅភូមិក្ដុលក្រោម ឃុំក្ដុលតាហែន ស្រុកបវេល ខេត្ដបាត់ដំបង ។

វាយសម្លាប់គ្រូទាយប្លន់យកចិញ្ចៀនមាស ខ្សែ.ក..ប៉ះចំមាសកាឡៃ

2007-06-08T22:25:00.000+07:00

ខេត្ដតាកែវ ៖ គ្រូទាយម្នាក់ត្រូវជនដៃដល់២នាក់ ប្រើល្បិចហៅទៅគូរយ័ន្ដហើយឆក់ឱកាសវាយនឹង អង្រែបុកគ្រឿងសម្លាប់ រួចយកសពច្រកចូលក្នុងស្បោងជីបន្ទាប់ពីដោះយកគ្រឿងអលង្ការអស់ពីខ្លួន មាន ខ្សែ.ក ចិញ្ចៀន និងនាឡិកាដៃ តែបែកការណ៍ក៏ត្រូវបានចាប់ខ្លួន ។ គ្រូទាយដែលជនដៃដល់សម្លាប់នេះ គឺជាគ្រូទាយតែងតែជិះកង់ដើរទស្សន៍ទាយតាមភូមិអ្នកស្រុក ។ ការរៀបផែនការវាយសម្លាប់នេះ ត្រូវ បានមន្ដ្រីសមត្ថកិច្ចឱ្យដឹងថា ដោយសារតែពួកគេបានឃើញគ្រូទាយនេះមានពាក់ចិញ្ចៀន និងខ្សែ.ក ដែល ការពិតគឺជាមាសកាឡៃ។

ហេតុការណ៍វាយសម្លាប់ប្លន់ចិញ្ចៀន និងខ្សែ.កគ្រូទាយនេះ បានកើតឡើងនៅភូមិខ្នាច ឃុំបឹងត្រាញ់ ខាងជើង ស្រុកសំរោង ខេត្ដតាកែវ នៅវេលាម៉ោង៣រសៀលថ្ងៃទី៦ មិថុនា កន្លងទៅនេះ ។
លោកអនុសេនីយ៍ទោ ឆុក អេងលី អធិការស្ដីទីស្រុកសំរោងបានប្រាប់កោះសន្ដិភាព ឱ្យដឹងថា ជនរង គ្រោះជាគ្រូទាយឈ្មោះញ៉ែម ញិន អាយុ៦៧ឆ្នាំ នៅភូមិចោមពុល ឃុំពពេល ស្រុកត្រាំកក់ ។

លោកអធិការស្ដីទីបានបន្ដទៀតថា ក្នុងខ្លួនសាកសពមានខ្សែ.កបន្ដោងព្រះបដិមា១ខ្សែ ចិញ្ចៀន១វង់ នាឡិកា១ និងលុយជាង១ម៉ឺនរៀល ។ ពេលប្រមូលសំភារៈក្នុងខ្លួនសាកសពអស់ហើយនោះ ឃាតក វ័យស្ទាវទាំង២មិនទាន់បានចាត់ចែងកប់សពទេ តែបាននាំគ្នាយកកង់ជនរងគ្រោះទៅលក់ ។ ទោះបីជាបែប ណា ការសម្លាប់នេះត្រូវបានប្អូនស្រីរបស់ជនល្មើសឈ្មោះជុក គន្ធា អាយុ៩ឆ្នាំ បានរត់ទៅនិយាយប្រាប់ ក្មេងៗកូនអ្នកជិតខាងថា បងរបស់ខ្លួនបានវាយសម្លាប់គ្រូទាយច្រកស្បោងជី ភ្លាមនោះក៏មានការឆោឡោ ឡើង ហើយប៉ូលិសក៏ទៅដល់ និងស្រាវជ្រាវចាប់ជនល្មើសជាឃាតកបានភ្លាមៗផងដែរ ចំនួន២នាក់ គឺម្នាក់ឈ្មោះជុក ភារិន្ទ ភេទប្រុស អាយុ១៨ឆ្នាំ ជាជនដៃដល់ និងជាអ្នករៀបចំផែនការ និង ម្នាក់ទៀតឈ្មោះចាន់ វន់ ភេទប្រុស អាយុ១៨ឆ្នាំ ជាអ្នកមើលផ្លូវ ។ ជន២នាក់នេះរស់នៅភូមិ កើតហេតុខាងលើ។

នៅចំពោះមុខសមត្ថកិច្ច ឈ្មោះជុក ភារិន្ទ បានសារភាពថា ពួកខ្លួនទាំង២នាក់នេះបានឃ្លាំមើលគ្រូទាយ ជាជនរងគ្រោះនេះរយៈពេល២អាទិត្យមកហើយ ឃើញពាក់ខ្សែ.ក និងចិញ្ចៀន ក៏បានរៀបគំរោងផែនការ ដើម្បីប្លន់យកខ្សែ.ក និងចិញ្ចៀននោះ ដោយពួកខ្លួនគិតថា បើប្លន់បានមាសពីគ្រូទាយនោះ នឹងនាំគ្នា យកទៅលក់បានលុយទៅដើរលេងនៅភ្នំពេញឱ្យបានសប្បាយម្ដង លុះដល់ថ្ងៃរសៀលមុនកើតហេតុ ពេលតាគ្រូទាយនោះ មកលេងផ្ទះបងប្អូនគាត់ក្នុងភូមិហើយពេលគាត់ជិះកង់ត្រឡប់ទៅផ្ទះវិញ ពួកខ្លួនក៏ បានហៅគាត់ឱ្យចូលក្នុងផ្ទះដោយប្រាប់ថា ឱ្យជួយគូរយ័ន្ដឱ្យ ហើយតាគ្រូទាយក៏ព្រម។ នៅពេលតាគ្រូ ទាយនោះកំពុងអង្គុយគូរយ័ន្ដនៅលើគ្រែ ខ្លួន (ជុក ភារិន្ទ) ក៏បានយកអង្រែបុកគ្រឿងវាយលើ កញ្ចឹង.កពីក្រោយមួយទំហឹងបណ្ដាលឱ្យតាគ្រូទាយធ្លាក់ពីលើគ្រែស្លាប់ភ្លាមៗ ។

ឈ្មោះជុក ភារិន្ទ បានសារភាពបន្ដទៀតថា នៅពេលដឹងថា តាគ្រូទាយស្លាប់ហើយ ក៏នាំគ្នាដោះយកខ្សែ.ក ចិញ្ចៀន នាឡិកា និងឱ្យឈ្មោះចាន់ វន់ កាត់ស្បោងជី ហើយចងឱ្យអង្កុញជើង រួចលើកច្រកក្នុង ស្បោងជីពណ៌.ស ដើម្បីយកទៅកប់ក្នុងរណ្ដៅដែលពួកគេបានជីកនៅក្រោយផ្ទះរួចជាស្រេចហើយនោះ តែ មិនយកកប់ភ្លាមទេ ដោយប្រញាប់យកកង់ទៅលក់បាន៣៥.០០០រៀល តែការលក់ខ្សែ .ក ចិញ្ចៀន នាឡិកា គេអត់ទិញ ព្រោះជាមាសកាឡៃ ។

ជនជាប់ចោទទាំង២ត្រូវបានប៉ូលិសស្រុកសំរោង បញ្ជូនមកស្នងការដ្ឋាននគរបាលខេត្ដភ្លាមៗដែរ ដើម្បី កសាងសំណុំរឿងបញ្ជូនទៅតុលាការ ។

អ្នកលេងជាយដែនវាយគ្នាជាមួយក្រុមគ្រូបង្រៀននៅផ្ទះបនស្រី

2007-06-08T22:23:00.000+07:00

ខេត្ដបាត់ដំបង ៖ ក្រុមក្មេងអន្ធពាលចំនួន៣នាក់ ដែលគេស្គាល់ថា ជាក្រុមអ្នកលេងជាយដែន ត្រូវ បាននគរបាលស្រុកសំពៅលូន តាមស្រាវជ្រាវឃាត់ខ្លួនបានកាលពីថ្ងៃទី៤ មិថុនា កន្លងមកនេះ បន្ទាប់ពី ក្រុមគេបានធ្វើសកម្មភាពវាយដំទៅលើគ្រូបង្រៀនចំនួន៤នាក់ ឱ្យរងរបួសយ៉ាងដំណំ កាលពីវេលាម៉ោង ១១និង៥៤នាទីយប់ថ្ងៃទី២ មិថុនា នៅចំណុចខាងមុខផ្ទះមន្ដ្រីនគរបាលម្នាក់ ដែលបើកបនស្រីបំរើផ្លូវភេទ ស្ថិតក្នុងក្រុមទី១០ ភូមិត្រញំងព្រលឹត ឃុំសន្ដិភាព ស្រុកសំពៅលូន ខេត្ដបាត់ដំបង ខណៈពេលដែលក្រុម ក្មេងពាល និងក្រុមគ្រូបង្រៀនទៅលេងស្រីញីនៅទីនោះទាំងអស់គ្នា ហើយកើតទំនាស់ពាក្យសំដីគ្នា បន្ដិចបន្ដួចក៏វាយតប់គ្នាតែម្ដង។

លោកឈិត សេង នាយផ្នែកនគរបាលយុត្ដិធម៌ស្រុកសំពៅលូនបានឱ្យដឹងថា ក្រុមក្មេងអន្ធពាលទាំង៣ នាក់ដែលសមត្ថកិច្ចឃាត់ខ្លួនពីបទបង្ករបួសស្នាមនេះមាន១-ឈ្មោះវង្ស វិច អាយុ២៣ឆ្នាំ ជាជនដៃដល់ មុខរបរមិនពិតប្រាកដ ២-ឈ្មោះញ៉ែម សុដែន អាយុ២២ឆ្នាំ មុខរបរមិនពិតប្រាកដ និង៣-ឈ្មោះវុធ ថន អាយុ២៦ឆ្នាំ ជាជាងជួសជុលម៉ូតូទាំង៣នាក់រស់នៅភូមិ-ឃុំកើតហេតុខាងលើ ដោយឡែកក្រុមគ្រូ បង្រៀនដែលអះអាងថា រងគ្រោះដោយក្រុមក្មេងពាលវាយនោះមានគ្នា៧នាក់ តែត្រូវក្រុមអន្ធពាលវាយ តែ៤នាក់ទេ ក្នុងនោះមាន១-ឈ្មោះមាស បារាំង អាយុ២៦ឆ្នាំ ២-ឈ្មោះ សាត់ កំសត់ អាយុ២៦ឆ្នាំ ៣-ឈ្មោះមឿន ចាន់ធី អាយុ២៥ឆ្នាំ និង៤-ឈ្មោះសេង រតនៈ អាយុ២៥ឆ្នាំ ពួកគេជាគ្រូបង្រៀននៅ វិទ្យាល័យសំពៅលូន ហើយក្នុងចំណោម៤នេះ គឺរងរបួសតែ៣នាក់ទេ ។

លោកនាយផ្នែករូបនេះបន្ដទៀតថា នគរបាលបានចុះទៅធ្វើអន្ដរាគមន៍ភ្លាមៗដែរ ក្រោយពេលកើតហេតុ តែក្រុមក្មេងអន្ធពាលទាំងនោះបានរត់គេចបាត់អស់ទៅហើយ លុះនៅថ្ងៃទី៤មិថុនា ទើបកំលាំងរបស់ លោកតាមស្រាវជ្រាវចាប់ខ្លួនជនពាលទាំងនោះបាន។

ក្រោយពេលឃាត់ខ្លួនយកមកសាកសួរក្រុមក្មេងអន្ធពាលទាំង៣នាក់បាននិយាយនៅមុខនគរបាលថា មុន ពេលកើតហេតុ ពួកខ្លួនបានផឹកស្រាស្រវឹងរៀងៗខ្លួន ហើយក៏នាំគ្នាទៅវ៉ៃសិចនៅផ្ទះបនស្រីដែលមាន ម្ចាស់ឈ្មោះវីន ជាមន្ដ្រីនគរបាល ។ ពេលទៅដល់ផ្ទះបនឈ្មោះវិច (ជនអន្ធពាល) បានចូលវាយសិច រួចចេញមកវិញ ស្រាប់តែត្រូវក្រុមគ្រូបង្រៀន៣នាក់បានដើរបុកឈ្មោះវិច នៅក្នុងផ្ទះបននោះ ហើយក៏ មានការប្រកែកគ្នាមួយម៉ាត់ពីរ រួចឈ្មោះវិចក៏ដើរចេញមករកបក្សពួកគេ២នាក់ទៀតនៅចាំខាងក្រៅ។ យុវជនពាលទាំង៣នាក់បន្ដទៀតថា ពេលដើរចេញមកក្រៅ ស្រាប់តែឃើញក្រុមគ្រូបង្រៀនចំនួន៤ទៀត (គ្រូទាំងអស់៧នាក់) អង្គុយខាងមុខផ្ទះបន ដោយកាន់ដំបងគ្រប់ដៃត្រៀមវាយពួកខ្លួន ឃើញដូច្នេះ ពួកខ្លួនក៏ដើររកដំបងវាយទៅលើគ្រូទាំង៤នាក់នោះ ហើយនាំគ្នារត់មកផ្ទះរៀងៗខ្លួន លុះនៅព្រឹកថ្ងៃទី៤ មិថុនា ទើបនគរបាលចាប់ពួកខ្លួនតែម្ដង ។

លោកសូ ភី អធិការនគរបាលស្រុកសំពៅ លូន បានមានប្រសាសន៍ថា ក្រុមក្មេងអន្ធពាល៣នាក់ខាងលើនេះ តែងតែធ្វើសកម្មភាពវាយតប់ស្ទើរគ្រប់ទីកន្លែង គឺវាយមិនរើសមុខទេ ។ ដូច្នេះដោយយោងតាមពាក្យ បណ្ដឹងរបស់ជនរងគ្រោះ និងយោងតាមចំលើយសារភាពរបស់ពួកគេ ព្រមទាំងយោងទៅលើក្រុមនេះ ជាមុខសញ្ញាចាស់ផង ទើបលោកកសាងសំណុំរឿងបញ្ជូនពួកគេទាំង៣នាក់ទៅស្នងការដ្ឋានខេត្ដបាត់ដំបង ដើម្បីចាត់ការតាមនីតិវិធី។

ប៉ូលិស-ប៉េអឹមច្រឡំគ្នា ពេលបង្ក្រាបអ្នកលក់ថ្នាំញៀន

2007-06-08T22:22:00.000+07:00

ខេត្ដបន្ទាយមានជ័យ ៖ កាលពីថ្ងៃទី៦ មិថុនា សមត្ថកិច្ចប៉ូលិសស្រុកអូរជ្រៅបានឃាត់ខ្លួនជនជាតិយួន ពីរនាក់ប្ដីប្រពន្ធពីបទជួញដូរថ្នាំញៀននៅក្នុងភូមិក្បាលស្ពាន ឃុំប៉ោយប៉ែត ស្រុកអូរជ្រៅ ខេត្ដបន្ទាយ មានជ័យ ។ ហេតុការណ៍ឃាត់ខ្លួននោះបានបង្កឱ្យមានការភ្ញាក់ផ្អើលពេញតំបន់ប៉ោយប៉ែត ដោយសារ តែមានការផ្ទុះអាវុធពីសំណាក់ប៉េអឹមបណ្ដាលឱ្យបែកកង់រថយន្ដប៉ូលិស ។

ប៉ូលិសស្រុកឱ្យកោះសន្ដិភាពដឹងថា ពេលប៉ូលិសចុះបង្ក្រាបជនជាតិយួនពីរនាក់ប្ដីប្រពន្ធដែលជាអ្នកជួញដូរ ថ្នាំញៀននោះ មានការប្រទូស្ដរ៉ាយមួយប្រាវដោយសារកំលាំងប៉េអឹមស្រុកអូរជ្រៅ ផ្ទុះអាវុធ១គ្រាប់ ។ ខណៈរថយន្ដម៉ាកកាមរីពណ៌ខ្មៅ របស់សមត្ថកិច្ចប៉ូលិសដែលបង្ក្រាបអ្នកជួញថ្នាំញៀន២នាក់នោះ បើក លើផ្លូវជាតិលេខ៥ ដល់មុខស្រះសួគ៌ ស្រាប់តែត្រូវរថយន្ដឡង់គ្រីស្ស័រមួយគ្រឿងពណ៌ត្រេអ៊ី ពាក់ស្លាក លេខ ខ.ម បើកទៅញំងទទឹងផ្លូវ។ ពេលនោះប៉េអឹមបានដកកាំភ្លើងខ្លីម៉ាករ៉ូឡូបាញ់១គ្រាប់ចំថាសកង់ រថយន្ដខាងឆ្វេងរបស់ប៉ូលិស។ បន្ទាប់ពីសមត្ថកិច្ចទាំង២ឈ្លោះប្រកែកគ្នារួចហើយ រថយន្ដប៉ូលិស បានបើកចេញទៅ ។

តាមប្រភពព័ត៌មានប្រាប់ថា មួយសន្ទុះក្រោយមកគេឃើញសមត្ថកិច្ចប៉ូលិសស្រុក នាំកំលាំងប្រមាណ ជិត២០នាក់ ទៅព័ទ្ធជុំវិញបន្ទាយរបស់ប៉េអឹម ប៉ុន្ដែនៅពេលនោះគេពុំឃើញមានការប្រទូស្ដរ៉ាយគ្នា ឡើយ។ បន្ដិចក្រោយមកកំលាំងសមត្ថកិច្ចប៉ូលិសស្រុកបានត្រឡប់ទៅវិញ ។

មន្ដ្រីប៉ូលិសបញ្ជាក់ឱ្យដឹងថា មន្ដ្រីប៉េអឹមមានចេតនាចង់បំពានមកលើប៉ូលិស ព្រោះនៅមុនពេលផ្ទុះអាវុធ ខាងប៉ូលិសបានឈប់រថយន្ដរួចរវៃកញ្ចក់ចុះប្រាប់ថា ជាប៉ូលិសទេ ប៉ុន្ដែខាងប៉េអឹមនៅតែដកកាំភ្លើង បាញ់កង់រថយន្ដរបស់ប៉ូលិស ។

លោកម៉ែន ភិរម្យ មេបញ្ជាការរងកងរាជអាវុធហត្ថស្រុកអូរជ្រៅឱ្យដឹងថា នៅពេលនោះកំលាំងរបស់ លោកបានឃាត់រថយន្ដដែលថា ជារបស់ប៉ូលិសតែពួកគេស្លៀកពាក់ស៊ីវិល ដោយសារមិនព្រមឈប់ ហើយ ដោយមិនដឹងថាជារថយន្ដរបស់ប៉ូលិស ទើបកំលាំងរបស់លោកដកកាំភ្លើងបាញ់មួយគ្រាប់ទៅ ។ នៅពេល ដឹងថាជារថយន្ដប៉ូលិស គឺបាញ់រួចទៅហើយ ហើយពុំមានបញ្ហាអ្វីថែមទៀតនោះទេ។
លោកវរសេនីយ៍ត្រីអ៊ឹង សុងយូ អធិការស្រុកអូរជ្រៅបានព្យាយាមមិនធ្វើអត្ថាធិប្បាយពីហេតុការណ៍ ផ្ទុះអាវុធទេ តែបានដឹងថា ជនជាតិយួនពីរនាក់ប្ដីប្រពន្ធដែលសមត្ថកិច្ចប៉ូលិសឃាត់ខ្លួនពីបទជួញដូរថ្នាំ ញៀននោះប្ដីឈ្មោះ យឿង យ៉ាំងធី អាយុ៣៣ឆ្នាំ និងប្រពន្ធឈ្មោះហ្វៀង ទ្រីពឿង អាយុ៤០ឆ្នាំ រស់នៅ ភូមិក្បាលស្ពាន។ សមត្ថកិច្ចប៉ូលិសរឹបអូសពីជនជាប់ចោទបានថ្នាំញៀនចំនួន៩៩០គ្រាប់ ហើយនឹង កសាងសំណុំរឿងបញ្ជូនពួកគេទៅតុលាការខេត្ដ ។

ក្រោយពេលមានព្រឹត្ដិការណ៍ផ្ទុះអាវុធ ដាក់គ្នារវាងសមត្ថកិច្ចនិងសមត្ថកិច្ចនោះ បានបង្កឱ្យប្រជាពលរដ្ឋ នៅតំបន់ប៉ោយប៉ែតរិះគន់ថា គ្រាន់តែបង្ក្រាបគ្រឿងញៀនកំប៉ិកកំប៉ុកសោះ មានផ្ទុះអាវុធទៅហើយ មិនតែ ប៉ុណ្ណោះម្ខាងៗមានកំលាំងច្រើនដូចជាលើកគ្នាទៅធ្វើសង្គ្រាមគួរឱ្យខ្លាច។ តាមប្រភពព័ត៌មានថា ការជួញ ដូរគ្រឿងញៀននៅតំបន់ប៉ោយប៉ែត ទោះជាសមត្ថកិច្ចបង្ក្រាបជាញឹកញាប់ក៏ដោយ ក៏នៅតែមានសកម្មភាព ក្ដៅគគុកដដែល ។ ចំពោះឈ្មួញដែលសមត្ថកិច្ចបង្ក្រាបនោះ ភាគច្រើនជាឈ្មួញរកស៊ីតូចតាចប៉ុណ្ណោះ ឯឈ្មួញធំគឺសមត្ថកិច្ចមិនទាន់អាចចាប់យកមកផ្ដន្ទាទោសបាននៅឡើយទេ ។

ឆេះកសិដ្ឋានចិញ្ចឹមមាន់នៅអង្គស្នួលងាប់មាន់ជាង៤ពាន់ក្បាល

2007-06-08T22:20:00.001+07:00

ខេត្ដកណ្ដាល ៖ រោងចិញ្ចឹមមាន់នៅក្នុងកសិដ្ឋានមួយកន្លែង ត្រូវបានអគ្គីភ័យឆាបឆេះអស់ទាំងស្រុង បណ្ដាលឱ្យងាប់មាន់អស់ជាង៤.០០០ក្បាល ព្រមទាំងសម្ភារៈប្រើប្រាស់ និងចំណីសំរាប់ទុកឱ្យមាន់ស៊ី ជាច្រើនបាវទៀត ។ ហេតុការណ៍នេះបានកើតឡើង កាលពីល្ងាចថ្ងៃទី៦ មិថុនា នៅកសិដ្ឋានមួយ ដែលមានទីតាំងស្ថិតនៅក្នុងភូមិលាក់កូប ឃុំលំហាច ស្រុកអង្គស្នួល ខេត្ដកណ្ដាល ។ ម្ចាស់កសិដ្ឋាន ពុំត្រូវបានគេស្គាល់ឈ្មោះនោះទេ ប៉ុន្ដែអ្នកមើលការខុសត្រូវនៅទីនោះឈ្មោះ អ៊ុច ប៉ុន ភេទប្រុស អាយុ៥៨ឆ្នាំ មានទីលំនៅក្នុងភូមិ-ឃុំកើតហេតុ ។

តាមប្រភពព័ត៌មានពីមន្ដ្រីប៉ូលិសស្រុកអង្គស្នួលបានឱ្យដឹងថា រោងចិញ្ចឹមមាន់ខាងលើនោះធ្វើអំពីឈើ ប្រក់ស្បូវ ទំហំ៨ម៉ែត្រ x ៥០ម៉ែត្រ ដែលសាងសង់នៅដាច់ឆ្ងាយពីភូមិឋានប្រជាពលរដ្ឋ ហើយត្រឹមតែ មួយប៉ប្រិចភ្នែកប៉ុណ្ណោះត្រូវភ្លើងឆាបឆេះអស់គ្មានសល់ ។ នៅក្នុងរោងមាន់នោះ ក៏មានធ្វើកន្លែងសំរាប់ អ្នកមើលការខុសត្រូវស្នាក់នៅផងដែរ ហើយនៅមុនពេលកើតហេតុ បុរសចំណាស់អ្នកមើលការខុសត្រូវ បានដឹកគោយកទៅចងឱ្យស៊ីស្មៅ ដោយទុកចៅប្រុសរបស់គាត់ម្នាក់អាយុ៦ឆ្នាំ ឱ្យនៅក្នុងរោងមាន់នោះ តែម្នាក់ឯង។ កន្លែងដែលគាត់ចងគោ នៅមិនឆ្ងាយពីរោងមាន់ប៉ុន្មានទេ គឺនៅក្នុងបរិវេណកសិដ្ឋាន នោះដែរ។ ពេលកំពុងតែចងគោ ស្រាប់តែឮចៅប្រុសស្រែកហៅ និងប្រាប់ថា ភ្លើងឆេះរោងមាន់ ពេលគាត់ ក្រឡេកមើលក៏ឃើញភ្លើងឆេះពេញបន្ទុកទៅហើយ ។

ប្រភពដដែលបានបន្ដថា ក្នុងខណៈនោះគាត់បានយកចៅចេញពីក្នុងរោង ព្រោះខ្លាចភ្លើងឆេះស្លាប់ ហើយ ពុំមានការជួយអន្ដរាគមន៍ពន្លត់ភ្លាមៗនោះទេ ព្រោះកសិដ្ឋាននៅដាច់ឆ្ងាយពីគេ ទំរាំតែមានការភ្ញាក់ផ្អើល ភ្លើងបានឆេះពេញបន្ទុកទៅហើយ។ ពេលនោះមាន់នៅក្នុងទ្រុងមួយចំនួនធំបានងាប់ក្នុងភ្លើង ឯមួយចំនួន តូចបានហើរ និងរត់ចេញរួច ប៉ុន្ដែចំពោះឧបករណ៍សំរាប់ចិញ្ចឹមមាន់ និងចំណីសំរាប់ឱ្យមាន់ស៊ីត្រូវក្លាយជា ចំណីភ្លើងទាំងអស់ ។ ក្រោយពេលកើតហេតុរោងធ្វើពីឈើប្រក់ស្បូវទំហំ៨ម៉ែត្រ x ៥០ម៉ែត្រ ទូរទស្សន៍ ស-ខ្មៅ១គ្រឿង អាគុយចំនួន៣ ធុងហ្គាស់២ ចំណីស្ដុកទុកសំរាប់ឱ្យមាន់ស៊ីចំនួន៦៥បាវ ឧបករណ៍សំរាប់ ចិញ្ចឹមមាន់ ព្រមទាំងមាន់ចំនួនជាង៤ពាន់ក្បាលត្រូវភ្លើងឆេះអស់គ្មានសល់ ។

មន្ដ្រីប៉ូលិសបានឱ្យដឹងទៀតថា តាមការសន្និដ្ឋាន គ្រោះអគ្គីភ័យនេះបណ្ដាលមកពីចៅប្រុសរបស់បុរស អ្នកមើលការខុសត្រូវ លេងភ្លើងឬលេងចង្ក្រានហ្គាស់ ព្រោះក្នុងខណៈពេលនោះភ្លើងបានឆាបឆេះចេញពី កន្លែងដែលគាត់ស្នាក់នៅតែម្ដង ។ មាន់នោះគេចិញ្ចឹមរយៈពេលត្រឹមតែ៤៥ថ្ងៃប៉ុណ្ណោះ នឹងដល់ពេលត្រូវ លក់ហើយ ប៉ុន្ដែពេលនេះ ទើបតែបាន៣៥ថ្ងៃ គឺនៅសល់១០ថ្ងៃទៀត ទើបដល់ពេលត្រូវចាប់លក់ ក៏ត្រូវក្លាយជាចំណីអគ្គីភ័យអស់ សូម្បីតែសល់សាច់ក៏គ្មានដែរ ក្រៅពីក្លាយជាផេះនោះ ។

ក្រុមហ៊ុន KTC កូរ៉េចុះហត្ថលេខាជួយឧបត្ថម្ភបាល់ទាត់ជំរើសជាតិជួយរយៈពេល៣ឆ្នាំ ក្នុង១ឆ្នាំ ១០៥,៦០០ដុល្លារ និងជួលគ្រូបង្វឹកកូរ៉េ

2007-06-08T22:20:00.000+07:00

រាជធានីភ្នំពេញ ៖ ក្រុមហ៊ុនមួយរបស់ប្រទេសកូរ៉េខាងត្បូងដែលកំពុងរកស៊ីនៅក្នុងប្រទេសកម្ពុជាឈ្មោះ Korean Technology Company ហៅជាអក្សរកាត់ថា KTC បានសន្យាជួយឧបត្ថម្ភជាទឹកប្រាក់ដល់ក្រុម បាល់ទាត់ជំរើសជាតិខ្មែរយៈពេល៣ឆ្នាំក្នុង១ឆ្នាំចំនួន១០៥.៦០០ដុល្លារសហរដ្ឋអាមេរិក ។ កិច្ចសន្យានេះ បានធ្វើឡើងតាមរយៈពិធីចុះហត្ថលេខាលើអនុស្សរណៈយោគយល់គ្នាមួយ នៅឯទីបញ្ជាការកងរាជអាវុធ ហត្ថលើផ្ទៃប្រទេសកាលពីយប់ថ្ងៃពុធ ទី៦ ខែមិថុនា ឆ្នាំ២០០៧ ដែលខាងភាគីកម្ពុជាមាន លោក ឧត្ដមសេនីយ៍ឯក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានសហព័ន្ធ បាល់ទាត់កម្ពុជា និងខាងភាគីកូរ៉េមានលោក KIM MYUNG IL ជាប្រធានក្រុមហ៊ុន KTC តែម្ដង ។

លោក KIM MYUNG IL មានប្រសាសន៍ថា នេះជាលើកទី១ដែលក្រុមហ៊ុនរបស់លោកបានចំណាយ ថវិកាជួយដល់ក្រុមបាល់ទាត់ជំរើសជាតិខ្មែរ ហើយជំនួយនេះមិនត្រឹមតែមានទឹកប្រាក់ជាង១០ម៉ឺនដុល្លារ នេះទេ គឺក្រុមហ៊ុនរបស់លោកបានចំណាយទឹកប្រាក់ក្នុង១ឆ្នាំជាង១០ម៉ឺនដុល្លារពីលើថែមទៀត ដើម្បី ជួលគ្រូកូរ៉េឱ្យមកជួយបង្ហាត់ដល់ក្រុមកីឡាករបាល់ទាត់ជំរើសជាតិខ្មែរ ។ ពិសេសជាងនេះទៅទៀត លោក KIM MYUNG IL បានសន្យាថា លោកនឹងត្រៀមជួយដល់កីឡាករបាល់ទាត់ជំរើសជាតិខ្មែរណា ដែលមានទេពកោសល្យល្អដើម្បីបញ្ជូនទៅធ្វើការហ្វឹកហាត់នៅឯប្រទេសកូរ៉េ ទៀតផង ។

លោកឧត្ដមសេនីយ៍ឯកសៅ សុខា បានសំដែងនូវក្ដីរំភើប និងថ្លែងអំណរគុណចំពោះ ក្រុមហ៊ុន KTC ដែលបានជួយឧបត្ថម្ភគាំទ្រ ដល់ក្រុមកីឡាបាល់ទាត់ជំរើសជាតិកម្ពុជា ហើយលោកបានជូនពរដល់ ក្រុមហ៊ុនរបស់លោក KIM MYUNG IL ផងដែរដោយ សូមឱ្យក្រុមហ៊ុនមានដំណើរការរីកចំរើនជា រៀងរហូត។ លោកឧត្ដមសេនីយ៍បានថ្លែងបញ្ជាក់ប្រាប់ភាគីកូរ៉េទៀតថា សហព័ន្ធបាល់ទាត់កម្ពុជាកន្លងមក មានការខ្វះខាតថវិកាខ្លាំងណាស់ ជាហេតុធ្វើឱ្យក្រុមបាល់ទាត់ជំរើសជាតិខ្មែរហ្វឹកហាត់មិនបានល្អ ។ ពេល នេះលោកសង្ឃឹមថា ក្រុមបាល់ទាត់ជំរើសជាតិខ្មែរនឹងមានការឈានឡើងមួយកំរិតថែមទៀត ។ ចំពោះ ថវិកាដែលក្រុមហ៊ុន KTC ជួយឧបត្ថម្ភមកនេះ ក្រៅពីការចាយវាយទៅលើការងារផ្សេងៗដែលពាក់ព័ន្ធ ជាមួយក្រុមបាល់ទាត់ជំរើសជាតិខ្មែរនោះ ក៏អាចមានផ្ដល់ជាប្រាក់ខែបើកឱ្យកីឡាករបាល់ទាត់ជំរើសជាតិ ខ្មែរ ក្នុងម្នាក់ជាង១០០ដុល្លារសហរដ្ឋអាមេរិកថែមទៀត ។ ជាមួយគ្នានោះដែរ លោកប្រធានសហព័ន្ធ បាល់ទាត់កម្ពុជាបានធ្វើការសំណូមពរឱ្យក្រុមកីឡាករបាល់ទាត់ជំរើសជាតិខ្មែរទាំងអស់ធ្វើយ៉ាងណា ចាប់ ពីថ្ងៃនេះតទៅត្រូវខិតខំធ្វើការហ្វឹកហាត់ឱ្យបានខ្លាំងក្លាថែមទៀត ដើម្បីត្រៀមចូលរួមប្រកួតស៊ីហ្គេមដែល នឹងធ្វើឡើងនៅប្រទេសថៃនាពេលឆាប់ៗខាងមុខនេះ ។

បុរសជនជាតិកាណាដាដេកស្លាប់នៅលើឥដ្ឋក្នុងក្លឹបកំសាន្ដ

2007-06-08T22:19:00.000+07:00

រាជធានីភ្នំពេញ ៖ បុរសជនជាតិកាណាដាម្នាក់ត្រូវបានគេប្រទះឃើញដេកស្លាប់នៅលើឥដ្ឋ ក្នុងបន្ទប់ លេខ១០ ជាន់ទី២នៃក្លឹបកំសាន្ដឌីវី-៨ (DV-8) ដែលមានទីតាំងផ្ទះលេខ៧Eo ផ្លូវលេខ១៤៨ សង្កាត់ផ្សារ កណ្ដាលទី១ ខណ្ឌដូនពេញ ក្រុងភ្នំពេញ កាលពីវេលាម៉ោង៧យប់ថ្ងៃទី៥ មិថុនា។ ការសន្និដ្ឋានជំហាន ដំបូងគេសង្ស័យថា ជារឿងអត្ដឃាត ព្រោះបន្ទប់ជនរងគ្រោះបានដាក់គន្លឹះពីខាងក្នុង ។ ជនបរទេស ដែលដេកស្លាប់ក្នុងក្លឹបកំសាន្ដខាងលើឈ្មោះ TERRY ROBERT អាយុ៥៧ឆ្នាំ កាន់លិខិតឆ្លងដែនលេខ BC 044072 ។

ស្ដ្រីម្នាក់ឈ្មោះ ជា សុវណ្ណា អាយុ៥៣ឆ្នាំ ជាបុគ្គលិកបំរើការនៅក្លឹបកំសាន្ដ DV-8 បានរៀបរាប់ ប្រាប់សមត្ថកិច្ចថា មុនពេលកើតហេតុគាត់ឡើងទៅបន្ទប់របស់ជនជាតិកាណាដាឈ្មោះ TERRY ROBERT ដើម្បីរៀបចំគ្រែដេកនៅជាន់ទី២ ។ ពេលទៅដល់មុខបន្ទប់ក៏ឃើញភ្លើងក្នុងបន្ទប់នៅភ្លឺ ទើបគាត់ សង្ស័យថា ជនរងគ្រោះប្រាកដជានៅក្នុងបន្ទប់ ព្រោះជាទម្លាប់របស់បុរសនោះ ពេលចេញទៅណាគាត់តែង បិទភ្លើងបន្ទប់។ ពេលនោះគាត់ក៏យកកៅអីឡើងឈរមើលតាមប្រហោងខ្យល់ មិនឃើញបុរសនោះដេក នៅលើគ្រែទេ ដូច្នេះគាត់កាន់តែសង្ស័យថែមទៀត ក៏អោនមើលតាមប្រហោងទ្វារបន្ទប់ខាងក្រោម ស្រាប់តែឃើញជនបរទេសរូបនោះ ដេកស្លាប់នៅលើឥដ្ឋ ទើបមានការភ្ញាក់ផ្អើល និងរាយការណ៍ឱ្យ សមត្ថកិច្ចចុះមកពិនិត្យ។

ក្រោយពេលមានសេចក្ដីរាយការណ៍ថា មានជនបរទេសដេកស្លាប់ក្នុងបន្ទប់នោះ គណៈកម្មការចំរុះត្រូវ បានបង្កើតឡើងដោយមានការចូលរួមពីព្រះរាជអាជ្ញាអមតុលាការក្រុងភ្នំពេញ ប៉ុន្ដែអ្នកកាសែតត្រូវ បានប៉ូលិសប៉ុស្ដិ៍រដ្ឋបាលផ្សារកណ្ដាលទី១ រារាំងមិនឱ្យថតយករូបភាពទេ គឺហាក់បីដូចជាមានអាថ៌កំបាំង អ្វីម្យ៉ាង ។ ក្នុងហេតុការណ៍នោះកំលាំងប៉ុស្ដិ៍ចំនួន៥នាក់បានដាក់ពង្រាយនៅមុខទីតាំងក្លឹបកំសាន្ដ DV-8 ។

ស្ដ្រីខ្មែរម្នាក់ដែលអះអាងថា ជាម្ចាស់ក្លឹបកំសាន្ដ DV-8 បានបញ្ជាក់ប្រាប់សមត្ថកិច្ចថា ជនរងគ្រោះឈ្មោះ TERRY ROBERT ដែលដេកស្លាប់នេះ ត្រូវជាមិត្ដភក្ដិប្ដីរបស់គាត់ ដោយបានមកស្នាក់នៅបន្ទប់លេខ១០ ជាន់ទី២ លើក្លឹបកំសាន្ដអស់រយៈពេល៣សបា្ដហ៍មកហើយ ដែលបុរសរងគ្រោះហាក់ដូចជាមានជម្ងឺ អ្វីម្យ៉ាង។

គ្រូពេទ្យប្រចាំតុលាការដែលបានចូលរួមពិនិត្យសាកសពនៅកន្លែងកើតហេតុបានឱ្យដឹងថា បុរសជនជាតិ កាណាដារូបនេះបានស្លាប់ទំនងជាដោយសារតែកើតជំងឺពោះវៀនដុះខ្នែង ព្រោះនៅពោះផ្នែកខាងស្ដាំ មានស្នាមជាំ ហើយការស្លាប់នេះមិនមានទាក់ទិននឹងរឿងឃាតកម្មឬអត្ដឃាតឡើយ ។ សាកសពត្រូវ បានគេបញ្ជូនទៅសាលតម្កល់សពក្នុងមន្ទីរពេទ្យកាល់ម៉ែតរង់ចាំបងប្អូនសាច់ញាតិ ។

សិក្ខាសាលាបង្ហាញសេចក្ដីព្រាងផែនការសកម្មភាពជាតិប្រឆាំងហិង្សាក្នុងគ្រួសារ

2007-06-08T22:17:00.001+07:00

សិក្ខាសាលាបង្ហាញសេចក្ដីព្រាងផែនការសកម្មភាពជាតិប្រឆាំងហិង្សាក្នុងគ្រួសារ

រាជធានីភ្នំពេញ ៖ លោកជំទាវវេជ្ជបណ្ឌិតអ៊ឹង កន្ថាផាវី រដ្ឋមន្ដ្រីក្រសួងកិច្ចការនារីបានថ្លែងឱ្យដឹងនៅក្នុង ឱកាសបើកសិក្ខាសាលាស្ដីពីការបង្ហាញសេចក្ដីព្រាងផែនការសកម្មភាពជាតិ ដើម្បីប្រឆាំងអំពើហិង្សាលើ ស្ដ្រីដែលបានធ្វើឡើងនៅឯសណ្ឋាគារកាំបូឌីយ៉ាណា កាលពីថ្ងៃទី៤ ខែមិថុនា ឆ្នាំ២០០៧ កន្លងមកនេះថា អំពើហិង្សាលើស្ដ្រីមានផលប៉ះពាល់មួយយ៉ាងធ្ងន់ធ្ងរមិនត្រឹមតែអ្នកធ្លាប់ ទទួលរងគ្រោះប៉ុណ្ណោះនោះទេ ប៉ុន្ដែថែមទាំងមានផលប៉ះពាល់ទៅលើស្ថានភាពសង្គម និង សេដ្ឋកិច្ចនៅក្នុងប្រទេសផងដែរ ។ លោក ជំទាវបានបញ្ជាក់ឱ្យដឹងបន្ថែមទៀតថា ក្នុងចំណោម១៦ភាគរយនៃអ្នកដែលបានសម្ភាសន៍ បានបាត់បង់ ប្រាក់ចំណូលប្រហែលជា១ខែ ជារៀងរាល់ឆ្នាំដោយសារតែអំពើហិង្សានៅក្នុងគ្រួសារ ហើយកាន់តែធ្ងន់ធ្ងរ ជាងនេះទៀតនោះ ចំពោះជនក្រីក្រដែលពួកគេបាននិយាយថា មានការបាត់បង់ប្រាក់ចំណូលប្រចាំខែ ស្ទើរតែ២ដងក្នុងឆ្នាំកន្លងទៅ។ នេះគឺជាលទ្ធផលដែលបានមកពីការធ្វើអង្កេតជាមូលដ្ឋាន ដែលបានបោះពុម្ព ផ្សាយកាលពីឆ្នាំ២០០៦ ដោយក្រសួងកិច្ចការនារី។

ភាពជឿនលឿននៃការលុបបំបាត់អំពើហិង្សាលើស្ដ្រីនិងកុមារ មិនអាចកើតឡើងបានទេ បើគ្មានការយល់ ដឹងអំពីឫសគល់នៃបញ្ហាឱ្យបានស៊ីជំរៅ ។ ប៉ុន្ដែវារឹតតែសំខាន់ជាងនេះទៅទៀតសំរាប់ការយល់ដឹងដែរថា ការផ្លាស់ប្ដូរឥរិយាបថនិងទស្សនៈមិនមែនជាការងាយស្រួលឡើយ គឺមានតែការខិតខំរួមគ្នាពីគ្រប់ មជ្ឈដ្ឋាន និងគ្រប់លំដាប់ថ្នាក់ ប៉ុណ្ណោះដែលអាចជំរុញការផ្លាស់ប្ដូរនេះបាន។ អាស្រ័យហេតុនេះការចូលរួមពី សំណាក់អ្នកអនុវត្ដគ្រប់ស្ថាប័ន គឺជាតម្រូវការដ៏ចាំបាច់ដែលមិនអាចខ្វះបាន ។ ការអប់រំការផ្សព្វផ្សាយ និងការបណ្ដុះបណ្ដាលគឺជាការងារដ៏សំខាន់របស់យើងទាំងអស់គ្នា ដែលនាំឱ្យមានការគាំទ្រចំណងគ្រួសារ និងការលើកស្ទួយការគោរពប្រពៃណីព្រះពុទ្ធសាសនាដែលអាចដោះស្រាយបញ្ហាដោយសន្ដិវិធីបាន ។

លោកជំទាវអ៊ឹង កន្ថាផាវី បានសង្កត់ធ្ងន់ថា ដើម្បីទប់ស្កាត់អំពើហិង្សាយើងត្រូវតែផ្លាស់ប្ដូរឥរិយាបថ និងលើកកំពស់សីលធម៌ សង្គម និងតំលៃគ្រួសារ។ ដើម្បីសំរេចបាននូវគោលដៅនេះ គឺត្រូវធ្វើ សកម្មភាពមួយចំនួនដូចជាការផ្សព្វផ្សាយតាមប្រព័ន្ធឃោសនាព័ត៌មាន ការបណ្ដុះបណ្ដាលដល់ក្រុមមន្ដ្រី នានាអំពីក្របខណ្ឌច្បាប់ ការបញ្ចូលទស្សនៈថ្មីនេះទៅក្នុងវិស័យអប់រំ និងការធ្វើឱ្យប្រសើរឡើងដល់សេវា សុខាភិបាល និងសេវាសង្គមកិច្ច។ ផែនការសកម្មភាពជាតិ ដែលក្រសួងបានធ្វើការបង្ហាញនាថ្ងៃនេះត្រូវ បានព្រាងឡើងដោយមានការចូលរួមពីក្រុមអ្នកជំនាញជាតិ អន្ដរជាតិ ដែលអញ្ជើញមកពីផ្នែកពាក់ព័ន្ធ ផ្សេងៗ ។ លោកជំទាវរដ្ឋមន្ដ្រីក្រសួងកិច្ចការនារីមានប្រសាសន៍ បញ្ជាក់ទៀតថា ថ្ងៃនេះគឺជាឱកាសមួយ ដើម្បីឱ្យអ្នកចូលរួមក្នុងសិក្ខាសាលានេះទាំងអស់ជួយផ្ដល់ព័ត៌មាន និងយោបល់ទៅលើផែនការនេះ ។ ដូច្នេះនៅពេលដែលផែនការ សកម្មភាពជាតិនេះត្រូវបានសភាអនុម័ត ហើយរាជរដ្ឋាភិបាលនិងក្រសួង កិច្ចការនារី នឹងធ្វើការជាមួយក្រុមការងារបញ្ជ្រាបយេនឌ័រនៃក្រសួងពាក់ព័ន្ធដើម្បីអនុវត្ដសកម្មភាព ជាក់លាក់ក្នុងវិស័យរបស់ក្រសួងនីមួយៗ ។

អង្គការជប៉ុនស្ម័គ្រចិត្ដជួយបំផុសចលនាដាំដើមឈើជីវចំរុះ

2007-06-08T22:17:00.000+07:00

ខេត្ដស្វាយរៀង ៖ សិក្ខាសាលាស្ដីពីការថែរក្សាបរិស្ថានធម្មជាតិនិងជីវចំរុះដែល ឧបត្ថម្ភដោយអង្គការ វីស្សូ-កូលី-កៃ (សន្ដិស្ម័គ្រចិត្ដ) ប្រទេសជប៉ុន ត្រូវបានរៀបចំធ្វើឡើងនៅក្នុងបរិវេណវត្ដតាសួស ស្ថិតក្នុងភូមិស្វាយក្អែ ឃុំតាសួស ស្រុកស្វាយជ្រំ ខេត្ដស្វាយរៀង កាលពីថ្ងៃទី៥ ឧសភា ២០០៧ រយៈពេល ពេញមួយថ្ងៃ ក្រោមអធិបតីភាព លោកយស គឹមស៊ាន អភិបាលរងស្រុកស្វាយជ្រំ ។ ចូលរួមក្នុង សិក្ខាសាលានេះ គេសង្កេតឃើញវត្ដមានលោកទេព ធន់ ប្រធានមន្ទីរធម្មការនិងសាសនាខេត្ដ ព្រះ សាសនមុនី ជេត ឌិត ព្រះមេគណខេត្ដ ព្រះវិសុទ្ធិញាណមុំ សយ ព្រះអនុគណស្រុកស្វាយជ្រំ លោក យ៉ាហ្គីសាវ៉ា កាហ្សឹម៉ាសា នាយកអង្គការសន្ដិស្ម័គ្រចិត្ដ ព្រះសង្ឃចំនួន៦៥អង្គ មកពីវត្ដនានាជុំវិញខេត្ដ អាចារ្យតាមវត្ដនានា ព្រមទាំងមេភូមិ មេឃុំ និងក្រុមប្រឹក្សាឃុំសរុប ចំនួន៨៥នាក់ទៀត ។

សិក្ខាសាលានេះ រៀបចំធ្វើឡើងក្នុងគោលបំណងចង់ឱ្យសិក្ខាកាមទាំងអស់ បានយល់ដឹងអំពីគុណសម្បត្ដិ នៃដើមឈើ ចេះអំពីរបៀបបណ្ដុះកូនឈើ របៀបដាំនិងរបៀបថែរក្សាកូនឈើឱ្យរីកលូតលាស់ ស្រស់ បំព្រង ដែលធ្វើឱ្យប្រទេសកម្ពុជា ក៏ដូចជាខេត្ដស្វាយរៀងពោរពេញទៅដោយពណ៌បៃតង ។

លោកយ៉ាហ្គីសាវ៉ា កាហ្សឹម៉ាសា នាយកអង្គការសន្ដិស្ម័គ្រចិត្ដបានមានប្រសាសន៍ថា ខេត្ដស្វាយរៀង គឺជាខេត្ដដែលក្រីក្រជាងគេ និងខ្សត់ដើមឈើជាងគេ តែការដាំដើមឈើគឺមិនទាន់យឺតពេលទេ ដូចនេះ យើងទាំងអស់គ្នាត្រូវតែចូលរួមដាំឱ្យបានច្រើននិងគ្រប់ទីកន្លែង ។ មនុស្សគ្រប់រូបមានភារកិច្ចថែរក្សា បរិស្ថានឱ្យបានស្អាតល្អ ដែលទាមទារឱ្យយើងព្យាយាមនិងចែករំលែកបទពិសោធន៍ពីគ្នាទៅវិញទៅមក ដើម្បីសេចក្ដីសុខចំរើនរបស់កូនចៅយើងជំនាន់ក្រោយ ។ លោកបានបញ្ជាក់ទៀតថា ថ្ងៃនេះម៉ោងនេះ នៅ ប្រទេសអាល្លឺម៉ង់កំពុងធ្វើការជួបប្រជុំគ្នារវាងបណ្ដាប្រទេសឧស្សាហកម្មធំៗចំនួន៨ ដើម្បីពិភាក្សាអំពី បរិស្ថាន នៅលើពិភពលោកនិងរកវិធីកែប្រែធ្វើយ៉ាងណាឱ្យជីវិតនៅលើផែនដី មាននិរន្ដរភាពចៀសផុត ពីជំងឺតម្កាត់នានា ដែលបណ្ដាលមកពីភាពអាប់អួ និងសារធាតុពុលដែលមាននៅក្នុងបរិស្ថាន ។

គួរបញ្ជាក់ថា នៅតាមផ្លូវទីសាធារណៈ ពិសេសនៅក្នុងបរិវេណវត្ដតាសួស ត្រូវបានគេចងបដាដែលមាន សរសេរខ្លឹមសារថា “មានព្រៃឈើទើបមានទឹក មានទឹកទើបមានជីវិត” ដែលនេះជាការបង្ហាញឱ្យឃើញថា ព្រៃឈើមានសារសំខាន់ណាស់ចំពោះជីវិតទាំងអស់នៅលើផែនដី ដូចនេះមនុស្សគ្រប់រូបត្រូវតែចូលរួមដាំ និងការពារព្រៃឈើឱ្យបានគ្រប់ៗគ្នា ។

វត្ដជោតញ្ញាណក្រុងព្រះសីហនុបើកបវេសនកាលឆ្នាំសិក្សាថ្មី

2007-06-08T22:16:00.000+07:00

ក្រុងព្រះសីហនុ ៖ កាលពីរសៀលថ្ងៃទី៥ ខែមិថុនា ឆ្នាំ២០០៧ នៅវត្ដជោតញ្ញាណ ក្រុងព្រះសីហនុ មានប្រារឰពិធីបើកបវេសនកាល ឆ្នាំសិក្សាថ្មី២០០៧-២០០៨ សំរាប់សាលាពុទ្ធិកបឋមសិក្សា២០០៧-២០០៨ និងបើកវគ្គសិក្សាផ្នែកវិបស្សនាធុរៈសំរាប់ដូនជី សីល វតី និងចាស់ព្រឹទ្ធាចារ្យ។ ពិធីនេះត្រូវ បាននិមន្ដចូលរួមពីសំណាក់ព្រះតេជគុណព្រះបញ្ញាសោភ័ណ្ឌ គៀត ច័ន្ទធុច រាជាគណៈថ្នាក់កិត្ដិយស ទីប្រឹក្សាសម្ដេចព្រះអគ្គមហាសង្ឃរាជាធិបតីទេព វង្ស ព្រះអនុគណខណ្ឌមិត្ដភាព និងជាព្រះគ្រូចៅ អធិការវត្ដជោតញ្ញាណ, លោកសុខ ឡាង ប្រធានមន្ទីរធម្មការ និងសាសនាក្រុងព្រះសីហនុ រួមនឹងមន្ដ្រី សង្ឃ សមណសិស្ស ដូនជី តាជី ចាស់ព្រឹទ្ធាចារ្យ ទាំងផ្នែកគន្ថធុរៈ និងផ្នែកវិបស្សនាធុរៈ។

នៅក្នុងថេរដីកាសំណេះសំណាលរបស់ព្រះគ្រូគៀត ច័ន្ទធុច និងមតិសំណេះសំណាលរបស់លោកសុខ ឡាង ប្រធានមន្ទីរធម្មការ និងសាសនាក្រុងព្រះសីហនុ បានបង្ហាញថា នៅឆ្នាំសិក្សាថ្មី២០០៧-២០០៨នេះ វត្ដជោតញ្ញាណបើកថ្នាក់ពុទ្ធិកបឋមសិក្សាចំនួន២ថ្នាក់ គឺថ្នាក់ទី១ និងថ្នាក់ទី៣ មានសមណសិស្ស ចូលសិក្សាចំនួន៤៣អង្គ។ ចំណែកផ្នែកវិបស្សនាធុរៈក៏មានបើកបង្រៀនដែរ ដោយមានទាំងព្រះសង្ឃ ដូនជី តាជី និងចាស់ព្រឹទ្ធាចារ្យដែលកំពុងស្នាក់នៅក្នុងវត្ដ និងចូលរៀនផ្នែកសមាធិកម្មដ្ឋាន ក្រោមការ ផ្គត់ផ្គង់ពីព្រះគ្រូចៅអធិការវត្ដ រួមនឹងពុទ្ធបរិស័ទមកគ្រប់មជ្ឈដ្ឋាន ។

ព្រះបញ្ញាសោភ័ណ្ឌ គៀត ច័ន្ទធុច ឆ្លៀតក្នុងឱកាសនោះក៏បានផ្ដាំផ្ញើដល់សមណសិស្ស និងដូនជី តាជី ទាំងអស់ ត្រូវខិតខំត្រងត្រាប់ និងប្រតិបត្ដិឱ្យបានល្អត្រឹមត្រូវតាមគន្លងព្រះពុទ្ធសាសនា ស្របតាមប្រកាស របស់អនុសំវច្ឆរៈមហាសន្និបាតមន្ដ្រីសង្ឃ ដែលឱ្យគ្រប់វត្ដអារាមខិតខំអភិវឌ្ឍវត្ដអារាមផង និង បណ្ដុះ បណ្ដាលធនធានមនុស្ស បំរើសង្គមជាតិផង ។ ជាមួយគ្នានេះ សមណសិស្សគ្រប់អង្គក៏ត្រូវខិតខំរៀន សូត្រតាមគ្រូធម្មាចារ្យ បង្ហាត់បង្រៀនទាំងផ្លូវលោក និងផ្លូវធម៌ ។

ប្ដីកាប់.កប្រពន្ធនឹងកាំបិតប៉័ងតោត្រូវចាប់ខ្លួនពេលប្រុងចង.ក

2007-06-08T22:15:00.000+07:00

ខេត្ដស្វាយរៀង ៖ ពិតជាគេចខ្លួនមិនរួច ឬមិនអាចគេចអស់មួយជីវិតបានទេ ទីបំផុតឈ្មោះពុត សំរក្សា ហៅសាខន ដែលជាប់ចោទពីបទមនុស្សឃាត “កាប់.កប្រពន្ធសម្លាប់” នៅភូមិស្វាយដូនអី ឃុំស្វាយធំ ស្រុកស្វាយជ្រំ ត្រូវបានសមត្ថកិច្ចខេត្ដស្វាយរៀងសហការជាមួយប៉ូលិសប៉ុសិ៍្ដរដ្ឋបាលឃុំព្រៃពោន ស្រុក កំពង់ត្របែក ខេត្ដព្រៃវែង ធ្វើការចាប់ខ្លួនបានកាលពីវេលាម៉ោង១២ ថ្ងៃទី៦ មិថុនា ២០០៧ នៅចំណុច ក្រោមដើមស្វាយក្នុងវាលស្រែ ស្ថិតក្នុងភូមិជីអក ឃុំព្រៃពោន ស្រុកកំពង់ត្របែក ខេត្ដព្រៃវែង ខណៈពេល ដែលជននេះកំពុងចងក្រមាលើដើមស្វាយបំរុងចង.កសម្លាប់ខ្លួន ។

សមត្ថកិច្ចការិយាល័យព្រហ្មទណ្ឌកំរិតធ្ងន់ខេត្ដស្វាយរៀងបានបញ្ជាក់ថា ក្រោយពីធ្វើសកម្មភាពសម្លាប់ ប្រពន្ធដោយកាប់.កនឹងកាំបិតប៉័ងតោរួចមក ជនល្មើសបានរត់គេចខ្លួនទៅស្រុកកំណើត ហើយសំងំពួននៅ ទីនោះរហូត ។ បើពិនិត្យមើលស្ថានភាពជនល្មើសវិញ ពេលដែលសមត្ថកិច្ចចាប់ខ្លួននេះ ហាក់ដូចជា មនុស្សឆ្កួតទៅហើយ គឺបាត់អស់ភាពម្ចាស់ការលើខ្លួនឯងរវើរវាយគិតច្រើនផ្ដេសផ្ដាស ចេះតែចង់រត់ទៅ ចង.កសម្លាប់ខ្លួន ។

សមត្ថកិច្ចបានបន្ដទៀតថា នេះសំណាងហើយដែលសមត្ថកិច្ចទៅដល់ទាន់ពេលវេលា ខណៈដែលជននេះ កំពុងតែប៉ុនប៉ងចង.កសម្លាប់ខ្លួន បើលោតែយឺតពេលប្រហែល៣០នាទីទៀត ច្បាស់ជាចាប់បានសាកសព ជនល្មើសជាក់ជាមិនខាន ព្រោះពេលសមត្ថកិច្ចទៅដល់ (កន្លែងចាប់ខ្លួនខាងលើ) ជនល្មើសបានចងក្រមា ជាប់នឹងដើមស្វាយរួចរាល់ទៅហើយ តែពុំទាន់ដាក់ក្បាលចូលក្នុងក្រមាមច្ចុរាជនៅឡើយ។ ប៉ូលិសថា បើយឺតពេលបន្ដិចជននេះនឹងស្លាប់ ។

ឃ្វាលគោជ្រកភ្លៀងក្រោមដើមឈើត្រូវរន្ទះបាញ់ស្លាប់ប្អូន របួសបង

2007-06-08T22:14:00.000+07:00

ខេត្ដពោធិ៍សាត់ ៖ កូនចៅអ្នកភូមិពីរនាក់បងប្អូនដែលទៅឃ្វាលគោហើយជ្រកភ្លៀងក្រោមដើមឈើ បានត្រូវរន្ទះបាញ់ស្លាប់ម្នាក់ និងរបួសម្នាក់។ បាតុភូតនេះបានកើតឡើង កាលពីវេលាម៉ោង២កន្លះ ថ្ងៃទី៥មិថុនា ២០០៧ នៅចំណុចចំការខ្នុរ ស្ថិតក្នុងភូមិកំរែង ឃុំស្វាយ.ស ស្រុកក្រគរ ខេត្ដពោធិ៍សាត់ ក្នុងខណៈពេលមេឃងងឹតធ្លាក់ភ្លៀងតិចៗ។

លោកហុង ថាន់ មេឃុំស្វាយ.ស បានប្រាប់ កោះសន្ដិភាពថា កុមារដែលត្រូវរន្ទះបាញ់ស្លាប់ឈ្មោះលាង រដ្ឋា ភេទប្រុស អាយុ១៣ឆ្នាំ រីឯកុមារីរងរបួសជាបងបង្កើតឈ្មោះ លាង សុខគា អាយុ១៥ឆ្នាំ នៅភូមិឃុំកើត ហេតុខាងលើ។ លោកមេឃុំបានប្រាប់ឱ្យដឹងថា ក្មេងរងគ្រោះទាំងពីរនាក់មានស្នាមជាំក្រលៀនឡើងខ្មៅ រហែកខោអាវដូចគេវះងៀត ។ ក្មេងប្រុសឈ្មោះលាង រដ្ឋា ជាប្អូនបានស្លាប់ភ្លាមៗនៅនឹងកន្លែងកើតហេតុ ចំណែកក្មេងស្រីឈ្មោះលាង សុខគា ជាបងសន្លប់និងមានសភាពស្លេកស្លាំងដូចពុលអ្វីមួយ ។ លោក មេឃុំស្វាយ.សឱ្យដឹងទៀតថា នៅរសៀលថ្ងៃទី៥ មិថុនា ២០០៧ នោះមេឃបញ្ចេញកំដៅពេញមួយថ្ងៃ លុះដល់ម៉ោងជិត៣ស្រាប់តែមេឃស្រទុំធ្លាក់ខ្យល់ខ្លាំង និងមានភ្លៀងធ្លាក់បន្ដិចបន្ដួច ប៉ុន្ដែពោរពេញ ទៅដោយផ្លេកន្ទោរច្រវាត់ពេញមេឃគួរឱ្យភ័យខ្លាច។ ចំណែកក្មេងរងគ្រោះទាំងពីរនាក់បងប្អូន ដែលទៅ ឃ្វាលគោនៅចំណុចចំការខ្នុរចំងាយពីផ្ទះប្រហែលមួយគីឡូម៉ែត្រនោះ បានជ្រកក្រោមដើមឈើទាំងពីរនាក់ ខណៈនោះក៏ត្រូវរន្ទះបាញ់ឆក់ យកជីវិតប្អូនប្រុសតែម្ដងទៅដោយបន្សល់ទុកបងស្រីសន្លប់ក្បែរនោះទាល់ តែអ្នកស្រុកដើរទៅជួបទើបនាំគ្នាដឹកយកមកផ្ទះ។

គួររំលឹកថា ឆ្នាំនេះនៅខេត្ដពោធិ៍សាត់ មានកើតឡើងនូវករណីរន្ទះបាញ់៦-៧លើកមកហើយ ហើយ កាលពីខែមុននេះនៅឃុំត្នោតជុំ ស្រុកក្រគរ រន្ទះបាញ់ងាប់គោអស់ ១១ក្បាលទៀតផង។

កតញ្ញូនិងស្នេហា

2007-06-08T22:13:00.000+07:00

ដើម្បីទៅភូមិខាងត្បូង គេត្រូវឆ្លងកាត់ផ្លូវទួលជើងភ្នំដែលមានចម្ងាយច្រើនរយម៉ែត្រ ។ ថ្ងៃមួយនាង ក្រមុំមានការត្រូវទៅភូមិនោះ តែមិនហ៊ានធ្វើដំណើរម្នាក់ឯង ព្រោះផ្លូវស្ងាត់ពេក ណាមួយទួលខ្ពស់ពិបាក ជិះកង់ផង ក៏ពឹងសង្សាររបស់ខ្លួនឱ្យធាក់កង់ជូនទៅ ។ ពេលឡើងបានពាក់កណ្ដាលទួល យុវជនជាសង្សារ បែកញើសប៉ុនៗគ្រាប់ពោត ដកដង្ហើមសឹងមិនដល់គ្នា។ ឃើញដូច្នេះនាងក្រមុំឃាត់ ៖
-បងទៅមុខទៀតមិនរួចទេ, ឈប់ត្រឹមហ្នឹងចុះ ។ យើងនាំគ្នាដើរវិញ ។
យុវជនជាសង្សារតប ៖
-អូនកុំព្រួយ! ដើម្បីអូនទោះត្រូវជិះកង់កាត់កំពូលភ្នំក៏បងជិះបានដែរ កុំថាឡើយផ្លូវទួលជើងភ្នំប៉ុណ្ណឹង។ អូនអោបចង្កេះបងឱ្យតែជាប់ទៅបានហើយ ។
ពិតដូចការអះអាងមែន យុវជនលង់ស្នេហ៍ប្រឹងធាក់កង់ឌុបសង្សារទាល់តែឆ្លងផុតទួល ដោយអត់បាច់ ចុះដើរ។ មកដល់ផ្ទះវិញ នាងក្រមុំយករឿងនេះអួតប្រាប់ម្ដាយអ្នកកំលោះ ដែលនាងគិតថាអនាគត នឹងក្លាយជាម្ដាយក្មេកខ្លួន។ ឮដូច្នេះលោកយាយម្ដាយអ្នកកំលោះចង់សាកចិត្ដកូនប្រុស តើមានចិត្ដកតញ្ញូ ប៉ុន្មានដែរ បើជាមួយស្នេហាហ៊ានតស៊ូម្លឹងៗ? ស្អែកឡើងគាត់ក៏ហៅកូនប្រុសជិះកង់ឌុបគាត់ទៅភូមិ ខាងត្បូងម្ដង ។ ប៉ុន្ដែលើកនេះ ពេលឡើងបានពាក់កណ្ដាលទួលខ្ពស់ ស្រាប់តែអ្នកកំលោះប្រាប់ម្ដាយ ៖
-ម៉ែចុះដើរសិនទៅ, ខ្ញុំឌុបទៀតមិនរួចទេ ។
លោកយាយជាម្ដាយបើកភ្នែកធំៗ ៖
-ចម្លែកមែន, ជាមួយសង្សារឌុបរួចរហូតដល់គោលដៅ តែជាមួយម្ដាយបានត្រឹមពាក់កណ្ដាលផ្លូវទៅមុខ លែងរួច ។ មើល៍, ម៉ែសួរបន្ដិច រវាងកតញ្ញូនិងស្នេហាមួយណាធ្ងន់ជាង?
យុវជនយើងឆ្លើយរបៀបអេះអុញ ៖
-បាទ, គឺកតញ្ញូធ្ងន់ជាង !
-អ៊ីចឹងហេតុម៉េចឌុបសង្សាររួច តែឌុបម៉ែមិនរួច?
-បាទ, ព្រោះតែកតញ្ញូធ្ងន់ជាងស្នេហានោះអី?

កម្មការិនីរោងចក្រកាត់ដេរដួលស្លាប់ពេលកំពុងធ្វើការងារ

2007-06-07T22:12:00.000+07:00

រាជធានីភ្នំពេញ ៖ កម្មការិនីរោងចក្រកាត់ដេរមួយកន្លែងមានយីហោឈុន ស៊ីង ស្ថិតនៅក្នុងភូមិភ្នក សង្កាត់ស្ទឹងមានជ័យ ខណ្ឌមានជ័យ បានស្លាប់ខណៈពេលកំពុងធ្វើការងារក្នុងរោងចក្រ កាលពីរសៀល ថ្ងៃទី៧ ខែមិថុនា ឆ្នាំ២០០៧ ។

កម្មការិនីដែលស្លាប់ខាងលើឈ្មោះព្រីង មួយលី អាយុ២០ឆ្នាំ មានស្រុកកំណើតនៅស្រុកស្រីសន្ធរ ខេត្ដកំពង់ចាម បច្ចុប្បន្នជួលផ្ទះស្នាក់នៅក្នុងសង្កាត់ស្ទឹងមានជ័យ ។

តាមការបំភ្លឺរបស់កម្មករមួយក្រុមបាននិយាយថា ឈ្មោះព្រីង មួយលី ស្លាប់ដោយសារខ្សែភ្លើងឆក់ ខណៈពេលកំពុងធ្វើការក្នុងរោងចក្រ ព្រោះថៅកែរោងចក្រមិនឱ្យពាក់ស្បែកជើងចូលធ្វើការ (ពាក់ស្បែក ជើងជាន់ម៉ាស៊ីនដេរ) ។ ដោយឡែកបើតាមការអះអាងរបស់ប៉ូលិសមូលដ្ឋាន ដែលយោងតាមការ បំភ្លឺរបស់ម្ចាស់រោងចក្រនិយាយថា ឈ្មោះព្រីង មួយលី ស្លាប់ដោយសារខ្យល់គរ ។ ទោះបីជាមានការ អះអាងពីរផ្ទុយគ្នាក៏ដោយ ក៏ពុំទាន់មានប្រភពផ្លូវការណាមួយបញ្ជាក់អំពីហេតុផលស្លាប់របស់ឈ្មោះ ព្រីង មួយលី នៅឡើយទេ លុះត្រាធ្វើកោសល្យវិច័យពិនិត្យត្រឹមត្រូវទើបយកជាការបាន ។

ចោរប្លន់លើផ្លូវជាតិលេខ៣ព្រំប្រទល់៣ខេត្តកំពុងកក្រើក

2007-06-07T22:10:00.001+07:00

ខេត្ដតាកែវ ៖ អំពើប្លន់ម៉ូតូមួយបានបង្កឱ្យមានការផ្ទុះអាវុធបាញ់តដៃគ្នា រវាងសមត្ថកិច្ចនិងចោរ នៅ វេលាយប់ថ្ងៃទី៥ មិថុនា ធ្វើឱ្យក្រុមចោរត្រូវបង្ខំចិត្ដផ្ដួលម៉ូតូដែលប្លន់បានចោលលើដងផ្លូវលំ និង បោះចោលកាំភ្លើងខ្លីមួយដើម ព្រមទាំងស្បែកជើង២គូ ទោះបីជាបែបណា ការតាមប្រមាញ់ក្រុមចោរ ប្លន់រហូតដល់វេលាទៀបភ្លឺថ្ងៃទី៦ មិថុនា គ្មានជនសង្ស័យណាម្នាក់ត្រូវបានចាប់ខ្លួននោះឡើយ គឺបានត្រឹម ដណ្ដើមបានម៉ូតូមកវិញ១គ្រឿង និងរឹបអូសកាំភ្លើង និងស្បែកជើងដែលក្រុមចោរបន្សល់ទុក ហើយរត់ ប្រាសអាយុបាត់ស្រមោលទៅនោះ។

នេះជាករណីប្លន់ចុងក្រោយមួយនៅតាមដងផ្លូវជាតិលេខ៣ បន្ទាប់ពីព័ត៌មានប្លន់តាមផ្លូវនេះ នាវេលាយប់ ត្រូវបានរាយការណ៍ថា កើតមានឡើងជាបន្ដបន្ទាប់នោះ ។ លោកស្នងការប៉ូលិសខេត្ដតាកែវវុធ ផល្លី មាន ប្រសាសន៍ឱ្យដឹងថា នាថ្ងៃទី៥ មិថុនា វេលាម៉ោង៧ និង១៥នាទីយប់ ជនសង្ស័យមានគ្នា២នាក់ ធ្វើដំណើរដោយថ្មើរជើង បានប្លន់ម៉ូតូវីវ៉ាពណ៌ក្រហមមួយគ្រឿងពាក់ស្លាកលេខ កំពត 1A 6183 របស់ ឈ្មោះសេក សាវ៉ន ភេទប្រុស អាយុ៤៦ឆ្នាំ នៅភូមិត្រញំងខ្យង ឃុំទួលអំពិល ស្រុកបសេដ្ឋ ខេត្ដកំពង់ស្ពឺ ដែលដាក់នៅមុខផ្ទះជាប់ខាងលិចផ្លូវជាតិលេខ៣ ខាងជើងផ្សារបាុំងកាសី ចំងាយប្រមាណជា១៥០ម៉ែត្រ ពីផ្សារស្ថិតក្នុងភូមិសាស្ដ្រស្រុកបសេដ្ឋជាប់ព្រំប្រទល់ ស្រុកសំរោង ខេត្ដតាកែវ ។

តាមពីម្ចាស់ម៉ូតូឈ្មោះសេក សាវ៉ន បាននិយាយថា នៅពេលគាត់ជិះម៉ូតូដល់មុខផ្ទះ ក៏បានឈប់ដោយទុក ឱ្យកូនប្រុសរបស់គាត់ម្នាក់អាយុ៧ឆ្នាំ អង្គុយនៅលើម៉ូតូ ហើយគាត់ក៏ដើរចូលផ្ទះដើម្បីយកលុយទៅចាក់ សាំង។ ពេលនោះគាត់ឮសំលេងប្រពន្ធគាត់ស្រែកថា “ចោរប្លន់ម៉ូតូៗ” ដោយចោរបានយកកាំភ្លើង អុកក្បាលកូនគាត់ទំលាក់ពីម៉ូតូ បណ្ដាលឱ្យពកភ្លាមៗ ហើយបាញ់គំរាម១គ្រាប់ រួចជិះម៉ូតូចេញទៅទិស ខាងជើងបាត់ទៅ ។ ចំណែកគាត់ ក៏បានទាក់ទងតាមទូរស័ព្ទទៅប៉េអឹមនៅស្នាក់ការការពារសន្ដិសុខ លេខ ៣០១ ដែលមានទីតាំងនៅប្រមាណជា៣គីឡូម៉ែត្រពីកន្លែងកើតហេតុឱ្យជួយអន្ដរាគមន៍ តែទទួលពេលនោះ លោកអនុសេនីយ៍ឯកហ៊ីម ឌីណា មេបញ្ជាការប៉េអឹមប្រចាំស្នាក់ការ៣០១ កំពុងធ្វើដំណើរចេញ ពីភ្នំពេញជាមួយគ្រួសារនិងកូនគាត់ម្នាក់ ខណៈពេលបានទទួលទូរស័ព្ទ លោកហ៊ីម ឌីណា បាននិយាយថា ពេលនោះលោកបានធ្វើទំនាក់ទំនងទៅលោកវរសេនីយ៍ឯកឡា ឡៃ មេបញ្ជាការកងរាជអាវុធហត្ថ ខេត្ដតាកែវ ដើម្បីសុំបទបញ្ជា ។ ជាមួយនេះលោកក៏បញ្ជាទៅកំលាំងរបស់លោកនៅស្នាក់ការ និងធ្វើ ទំនាក់ទំនងទៅលោកអធិការប៉ូលិសស្រុកបាទី និង ស្រុកសំរោង សហការជាមួយប៉ូលិសស្រុកបសេដ្ឋ ខេត្ដកំពង់ស្ពឺ ដែលនៅជិតៗគ្នានោះជួយអន្ដរាគមន៍ ។

លោកអនុសេនីយ៍ឯកហ៊ីម ឌីណា និយាយថា ពេលលោកបើករថយន្ដមកដល់ខាងត្បូងផ្សារកាយរោង លោកបានឃើញម៉ូតូវីវ៉ាពណ៌ក្រហមបើកមកពីទិសខាងត្បូងឥតបើកភ្លើងទេ ពេលនោះលោកបានស្គាល់ ភិនភាគម៉ូតូ ក៏បត់រថយន្ដតាមពីក្រោយ ។ លោកអនុសេនីយ៍ឯក ក៏បានបញ្ជាក់ផងដែរថា នៅក្នុង រថយន្ដរបស់លោកគ្មានអាវុធដើម្បីតដៃជាមួយពួកចោរទេ ហើយពេលដែលឃើញរថយន្ដរបស់លោកបត់ តាមពីក្រោយកៀកគ្នានោះ ក្រុមចោរក៏ឈប់ម៉ូតូ និងបានអារម៉េកាំភ្លើងខ្លីតំរង់មករករថយន្ដរបស់លោក ពេលនោះលោកក៏ដាក់លេខថយក្រោយយ៉ាងប្រញាប់ ហើយក្រុមចោរក៏ឡើងជិះម៉ូតូបន្ដដំណើរទៅទៀត។ ទោះបីជាបែបណា ពេលក្រុមចោរព្យាយាមបើកម៉ូតូគេចនោះ លោកក៏បើករថយន្ដតាមពីក្រោយរហូត ដល់ក្រុមចោរបត់ចូលវត្ដក្រាំងក្រូច ទទួលពេលនោះកំលាំងប៉េអឹមរបស់លោកក៏បានយកអាវុធអាកា៤៧ មកដល់ល្មម តែពេលទៅដល់មុខខ្លោងទ្វារវត្ដ ចោរក៏បាញ់កាំភ្លើងខ្លីសំដៅមករថយន្ដរបស់លោក ធ្វើឱ្យ កូនប្រពន្ធរបស់លោកភ័យលស់ព្រលឹង ចំណែកលោកក៏បាញ់តបតវិញ ហើយបានធ្វើទំនាក់ទំនងទៅ លោកង៉ាន់ សារី អធិការប៉ូលិសស្រុកបាទីនាំកំលាំងមកជួយទប់ស្កាត់ ។

បន្ទាប់ពីផ្ទុះអាវុធមួយប្រាវក្រុមចោរក៏ពួនសំងំនៅកន្លែងណាមួយ ដោះស្លាកលេខម៉ូតូគ្រវាត់ចោល ហើយ បន្ដដំណើរបំរុងឆ្ពោះទៅក្រុងភ្នំពេញ តាមបណ្ដោយប្រឡាយខាងត្បូងជ្រៃអូរព្នៅ ។ ប្រមាណជា ម៉ោង១២យប់ ស្រាប់តែឃើញម៉ូតូបើកឆ្ពោះទៅកាន់ផ្លូវជាតិលេខ៣ ចំកន្លែងប៉ូលិសសេដ្ឋកិច្ចខេត្ដតាកែវ ចាំពីខាងជើងផ្លូវផង និងពីខាងត្បូងផ្លូវផង ធ្វើឱ្យក្រុមចោរដែលជិះម៉ូតូអត់បើកភ្លើងភ័យស្លន់ស្លោ ខណៈ ប៉ូលិសបានបាញ់រះទៅលើតែមិនត្រូវ។ ក្រុមចោរបានផ្ដួលម៉ូតូចោល នៅចិញ្ចើមថ្នល់ខាងកើតផ្លូវជាតិ លេខ៣ ហើយរត់គេចខ្លួនបាត់ស្រមោលតែម្ដង ដោយបន្សល់ទុកនៅនឹងកន្លែងនូវម៉ូតូវីវ៉ាពណ៌ក្រហមមួយ គ្រឿង កាំភ្លើងK54មួយដើម និងថង់គ្រាប់មួយមានចំនួន៤គ្រាប់ ស្បែកជើងបាតាមួយគូ ស្បែកជើង ស៊កពណ៌ខ្មៅមួយគូ និងមួកពណ៌ខៀវចាស់មួយ។ កំលាំងប៉ូលិសខេត្ដ និងស្រុកបានធ្វើការរុករកតាម ភូមិសាស្ដ្រទាំងយប់ ហើយយាមព័ទ្ធជុំវិញភូមិសាស្ដ្រដែលមានព្រៃល្បាស់ និងផ្ទះប្រជាពលរដ្ឋរហូតដល់ វេលាព្រឹក តែរកពុំឃើញស្រមោលចោរទាំងនោះទេ ។ បច្ចុប្បន្ននេះសំភារៈដែលជនល្មើសបន្សល់ទុក ត្រូវបានកងកំលាំងប៉េអឹមប្រចាំស្នាក់ការ៣០១កសាងសំណុំរឿងបញ្ជូនទៅបញ្ជាការដ្ឋានខេត្ដ ដើម្បីធ្វើការ ពិនិត្យ និងសហការជាមួយស្នងការដ្ឋានខេត្ដធ្វើការស្រាវជ្រាវបន្ដទៀត សំដៅវែកមុខចោរប្លន់ប្រដាប់ អាវុធទាំងអស់នោះ រីឯម៉ូតូបានប្រគល់ឱ្យម្ចាស់វិញ ។

ជាការកត់សំគាល់ ចោរប្លន់ប្រដាប់អាវុធនៅតាមបណ្ដោយផ្លូវជាតិលេខ៣ ចាប់ពីដើមឆ្នាំ២០០៧មក កំពុងតែបង្កឱ្យមានការភ័យខ្លាចរហូតមហាជនចាត់ទុកថា ជាកំណាត់ផ្លូវអសន្ដិសុខទៀតផង ។ ការចាប់ កំរើកឡើងវិញនៃអំពើចោរកម្មនេះ គឺបន្ទាប់ពីស្ងប់ស្ងាត់មួយរយៈក្រោយពេលកងកំលាំង នៃស្នងការដ្ឋាន ខេត្ដ និងប៉េអឹមខេត្ដតាកែវ បានបង្ក្រាបចោរហារយ គឺក្រុមចោរប្លន់លីអូ ដែលបានធ្វើសកម្មភាពប្លន់ប្រដាប់ អាវុធតាមបណ្ដោយផ្លូវជាតិលេខ២ និងលេខ៣ កាលពីឆ្នាំ២០០២កន្លងទៅ ។ ទោះបីជាបែបណា សកម្មភាពប្លន់ប្រដាប់អាវុធបានកំរើកឡើងវិញ តាមបណ្ដោយផ្លូវជាតិលេខ៣ និងសង្កាត់មួយចំនួន ក្នុងខណ្ឌដង្កោ រាជធានីភ្នំពេញ ស្រុកកណ្ដាលស្ទឹង ខេត្ដកណ្ដាល ស្រុកគងពិសី ស្រុកបសេដ្ឋ ខេត្ដកំពង់ស្ពឺ ស្រុកបាទី ស្រុកសំរោង ខេត្ដតាកែវ។ សមត្ថកិច្ចបានឱ្យដឹងថា បានជាក្រុមចោរយកផ្លូវជាតិលេខ៣ ធ្វើសកម្មភាព ដោយសារផ្លូវជាតិនេះជាព្រំប្រទល់៣ ខេត្ដដូចជាផ្សារត្រាំខ្នារ ផ្សារដើមរកា ផ្សារប៉ាំងកាសី ផ្សារថ្នល់បត់។ល។ ត្រូវបានចែក ការគ្រប់គ្រងម្ខាងម្នាក់ ។

លោកវុធ ផល្លី ស្នងការប៉ូលិសខេត្ដតាកែវបានឱ្យដឹងថា សកម្មភាពប្លន់ប្រដាប់អាវុធចាប់ពីដើមឆ្នាំ២០០៧ មកទល់ពេលនេះ ក្នុងភូមិសាស្ដ្រស្រុកដែលស្ថិតនៅតាមបណ្ដោយផ្លូវជាតិលេខ៣ គឺស្រុកត្រាំកក់ ស្រុកសំរោង ស្រុកបាទី មានប្រមាណជា៣លើក ក្នុងនោះនៅស្រុកបាទីចំនួន២លើក និងស្រុកសំរោង មួយលើក។

ក្រសួងបរិស្ថាននិងអាជ្ញាធរខេត្ដសៀមរាបប្រារឰទិវាបរិស្ថានឆ្នាំ២០០៧

2007-06-07T22:10:00.000+07:00

ខេត្ដសៀមរាប ៖ តាមការកំណត់របស់រាជរដ្ឋាភិបាលនៃព្រះរាជាណាចក្រកម្ពុជា ដែលបានចេញនូវអនុក្រឹត្យ លេខ១៥អនក្រ. បក ចុះថ្ងៃទី២៤ ខែមេសា ឆ្នាំ១៩៩៦ តំរូវយកថ្ងៃទី៥ មិថុនា ជាថ្ងៃប្រារឰទិវាបរិស្ថាន ជាតិ និងទិវាបរិស្ថានពិភពលោកជារៀងរាល់ឆ្នាំនៅទូទាំងប្រទេស ដោយមានការចូលរួមពីសំណាក់ សមាគម អង្គការក្រៅរដ្ឋាភិបាល ដែលស្ថិតនៅក្រោមពាក្យស្លោក “បរិស្ថានល្អ សង្គមល្អ វប្បធម៌រុងរឿង និងទីក្រុងស្អាត បរិស្ថានល្អជាប្រភពនៃសុខភាពរបស់ប្រជាជន” និងក្រោមប្រធានបទ “ការរលាយទឹកកក នៅតំបន់ប៉ូលជាប្រធានបទដ៏ក្ដៅគគុក”។ មិទ្ទិញស្ដីពីការចូលរួមអបអរសាទរទិវាបរិស្ថានជាតិ និងបរិស្ថាន ពិភពលោក ថ្ងៃទី៥ មិថុនា ឆ្នាំ២០០៧ ត្រូវបានក្រសួងបរិស្ថាន សហការជាមួយអាជ្ញាធរខេត្ដសៀមរាប ព្រមទាំងអង្គការមិនមែនរដ្ឋាភិបាលរៀបចំធ្វើឡើងនៅក្នុងបរិវេណនៃវិទ្យាល័យអង្គរ កាលពីព្រឹកថ្ងៃទី៤ មិថុនា ក្រោមអធិបតីភាព លោកបណ្ឌិតម៉ុក ម៉ារ៉េត ទេសរដ្ឋមន្ដ្រី រដ្ឋមន្ដ្រីក្រសួងបរិស្ថាន និងលោក ស៊ូ ភិរិន្ទ អភិបាលខេត្ដសៀមរាប ព្រមទាំងមានការអញ្ជើញចូលរួមពីសំណាក់សមាគម-អង្គការក្រៅ រដ្ឋាភិបាល មន្ដ្រីតំណាងឱ្យក្រសួង-ស្ថាប័នមន្ទីរពាក់ព័ន្ធនានា ក្នុងខេត្ដរួមជាមួយប្រជាពលរដ្ឋយ៉ាង ច្រើនកុះករ ។

បន្ទាប់ពីមតិស្វាគមន៍របស់លោកទេព ប៊ុនឆាយ អភិបាលស្រុកសៀមរាប និងការលើកឡើងជាចំណាប់ អារម្មណ៍របស់លោកសេង សាវី អគ្គនាយកក្រុមហ៊ុនស៊ីនទ្រី (កម្ពុជា) ចំកាត់ ព្រមទាំងចំណាប់អារម្មណ៍ របស់លោក ឈឹត សំអាត នាយកប្រតិបត្ដិវេទិកានៃអង្គការមិនមែនរដ្ឋាភិបាលស្ដីពីកម្ពុជាដែលថ្លែង បញ្ជាក់ថា វេទិកានៃអង្គការមិនមែនរដ្ឋាភិបាលស្ដីពីកម្ពុជាតាមរយៈគំរោងបរិស្ថាន បានធ្វើការយ៉ាងជិត ស្និទ្ធទៅលើបញ្ហាបរិស្ថាននៅក្នុងព្រះរាជាណាចក្រកម្ពុជា។ នៅក្នុងកំឡុងពេលប៉ុន្មានឆ្នាំនេះ NGO Forum បានធ្វើការយ៉ាងច្រើនជាមួយនឹងថ្នាក់ជាតិ និងអន្ដរជាតិក្នុងការជួយអប់រំផ្សព្វផ្សាយតស៊ូមតិពិភាក្សា និង គាំទ្រដល់សហគមន៍ទាំងឡាយដែលទទួលរងនូវផលប៉ះពាល់ ពីបញ្ហាបរិស្ថានបណ្ដាលមកពីគំរោង អភិវឌ្ឍន៍ធំៗទាំងក្នុងនិងក្រៅប្រទេស។ មិនតែប៉ុណ្ណោះយើងក៏បានធ្វើការយ៉ាងសកម្មផងដែរ ទៅលើ ការពង្រឹងសមត្ថភាពសហគមន៍ និងការងារបណ្ដាញតស៊ូមតិជាមួយនឹងបញ្ហាបរិស្ថានជាច្រើនដែលបណ្ដាល មកពីគំរោង ព្រៃ រ៉ែ និងដីសម្បទានធំៗនៅទូទាំងព្រះរាជាណាចក្រកម្ពុជា ។ លោកបញ្ជាក់ថា បញ្ហា កើនឡើងកំដៅផែនដី និងការប្រែប្រួលអាកាសធាតុមិនមែនមានបញ្ហាចំពោះតែ ប្រទេសកម្ពុជាមួយនោះ ទេតែនេះជាបញ្ហារួមដែលត្រូវធ្វើការគិតគូរពិចារណាទាំងអស់គ្នា ដើម្បីស្វែងរកដំណោះស្រាយ ពីព្រោះ បញ្ហានេះបណ្ដាលមកពីការបំពុលបរិយាកាស និងការបំផ្លាញស្រទាប់អូហ្សូនរបស់ផែនដីយើង ។

ថ្លែងនៅក្នុងឱកាសនោះ លោកស៊ូ ភិរិន្ទ អភិបាលខេត្ដសៀមរាបបានបញ្ជាក់ថា ខេត្ដសៀមរាប ជាខេត្ដដែលសំបូរដោយប្រាសាទបុរាណច្រើនជាងគេ ហើយក៏ជាខេត្ដដែលមានសក្ដានុពលសេដ្ឋកិច្ចខ្ពស់ លើវិស័យទេសចរណ៍វប្បធម៌ដែរ ដូច្នេះខេត្ដសៀមរាបជា ខេត្ដនិមិត្ដរូបនៃខឿនវប្បធម៌ដ៏រុងរឿង ដែល បុព្វបុរសខ្មែរយើងបានបន្សល់ទុកឱ្យជាកេរដំណែលប្រវត្ដិសាស្ដ្រ និងជានិមិត្ដរូបមួយ នៃខឿនបរិស្ថាន សង្គមវប្បធម៌ខ្មែរនាសម័យនោះ។ លោកអភិបាលខេត្ដបានថ្លែងបញ្ជាក់ទៀតថា ក្នុងនាមប្រមុខដឹកនាំ នៃ អាជ្ញាធរខេត្ដបានចាត់ទុកកិច្ចគាំពារបរិស្ថានជាចំណែកមួយដែលមិនអាចខ្វះបាន ក្នុងការរួមចំណែកគាំពារ ការអភិវឌ្ឍន៍វិស័យទេសចរណ៍នៅក្នុងខេត្ដ ដែលអាជ្ញាធរបានគិតគូរដល់កិច្ចការពារ បរិស្ថានធម្មជាតិ ជាពិសេសធនធានព្រៃឈើ និងរក្សាដើមឈើធំៗ ដែលដុះលូតលាស់នៅក្នុងបរិវេណប្រាសាទនានា ព្រម ទាំងការដាំដើមឈើឡើងវិញជារបាំងការពារផងដែរ ។ ជាមួយគ្នានោះលោកស៊ូ ភិរិន្ទ បានធ្វើការ អំពាវនាវដល់គ្រប់ស្ថាប័នទាំងអស់ដែលពាក់ព័ន្ធត្រូវប្រឹងប្រែងឡើងថែមទៀត ដើម្បីស្រាវជ្រាវរកមុខអ្នក ដែលបំផ្លាញធនធានធម្មជាតិ ជាពិសេសការកាប់រានដី ព្រៃឈើ ព្រៃលិចទឹកដើម្បីទប់ស្កាត់ និងអប់រំ ណែនាំឱ្យបញ្ឈប់សកម្មភាពទាំងនោះ ឬប្ដឹងទៅតុលាការដើម្បីផ្ដន្ទាទោសតាមច្បាប់ ។ លោកបានសង្កត់ ធ្ងន់ថា យើងត្រូវខិតខំអនុវត្ដច្បាប់ដែលមានជាធរមានបន្ថែមទៀត ជាពិសេសបទបញ្ជាលេខ០១បប របស់ នាយករដ្ឋមន្ដ្រី ហ៊ុន សែន ចុះថ្ងៃទី១០ ខែឧសភា ឆ្នាំ២០០៦ ដែលបានព្រមានថា អ្នកប្រព្រឹត្ដ ល្មើសត្រូវបញ្ឈប់សកម្មភាពជាបន្ទាន់ ហើយប្រគល់ដីទាំងនោះមកឱ្យរដ្ឋវិញ ចៀសវាងការប្រឈមមុខ ជាមួយច្បាប់ ។

មានប្រសាសន៍ក្នុងឱកាសនោះដែរ លោកបណ្ឌិតម៉ុក ម៉ារ៉េត បានថ្លែងថា ទិវាបរិស្ថាន ៥ មិថុនា គឺជា ព្រឹត្ដិការណ៍ប្រវត្ដិសាស្ដ្រនៃចលនាអន្ដរជាតិដែលបានចាប់ផ្ដើមឡើងនៅ ឆ្នាំ១៩៩២ ក្រោមកិច្ចប្រជុំកំពូល នៅប្រទេសប្រេស៊ីល ដោយមានគោលបំណងជំរុញប្រទេសទាំងអស់ក្នុងសាកលលោកឱ្យកាន់តែ យកចិត្ដ ទុកដាក់ចំពោះបញ្ហាបរិស្ថានរបស់ខ្លួនដើម្បីធានាដល់ការអភិវឌ្ឍន៍ជាតិ និង ការរីកចំរើនក្នុងពិភពលោក ទាំងមូល ។ លោកទេសរដ្ឋមន្ដ្រីបានថ្លែងបញ្ជាក់ឱ្យដឹងផងដែរថា រាជរដ្ឋាភិបាលកម្ពុជាបានចេញអនុក្រឹត្យ លេខ១៥អនក្រ.បក ចុះថ្ងៃទី២៤ ខែមេសា ឆ្នាំ១៩៩៦ ដោយកំណត់យកថ្ងៃទី៥ មិថុនារៀងរាល់ឆ្នាំ ជាថ្ងៃប្រារឰព្រមគ្នានូវទិវាបរិស្ថានជាតិ និងទិវាបរិស្ថានពិភពលោក ក្នុងគោលបំណងពញ្ញាក់ស្មារតីមនុស្ស គ្រប់ៗរូបឱ្យគិតគូរពីហានិភ័យបរិស្ថាននានា ដែលតែងកើតមានមកលើភពផែនដី និងជួយដាស់តឿនដល់ សហគមន៍យើងទាំងមូលឱ្យយកចិត្ដទុកដាក់ពីបញ្ហាបរិស្ថាន ដើម្បីផលប្រយោជន៍មនុស្សគ្រប់រូប និង សេដ្ឋកិច្ចសង្គមជាតិទាំងមូល ។ លោកបណ្ឌិតបានបញ្ជាក់ថា ទិវាបរិស្ថានឆ្នាំនេះគឺយើងចាប់អារម្មណ៍ ជាចំបងទៅលើការប្រែប្រួលអាកាសធាតុ ពិសេសកម្មវិធីបរិស្ថានអង្គការសហប្រជាជាតិ បានដាក់ចេញ នូវប្រធានបទមួយថា “ការរលាយទឹកកកនៅតំបន់ប៉ូលជាប្រធានបទដ៏ក្ដៅគគុក” ដែលប្រធានបទនេះ គឺសារមួយដ៏មានសារសំខាន់សំរាប់ប្រជាពលរដ្ឋទូទាំងសាកលលោក ក៏ដូចជាប្រជាជនកម្ពុជាយើងផងដែរ ឱ្យយកចិត្ដទុកដាក់ទៅលើភយន្ដរាយនានាដែលបណ្ដាលមកពីការប្រែប្រួលអាកាសធាតុ របស់ភពផែនដី ដោយសារសកម្មភាពរបស់មនុស្ស ។

ធនាគារពិភពលោកប្រកាសផ្ដល់១៨,៥លានដុល្លារសំរាប់តចរន្ដភ្លើងពីប្រទេសឡាវ-វៀតណាម

2007-06-07T22:08:00.000+07:00

រាជធានីភ្នំពេញ ៖ យោងតាមសេចក្ដីប្រកាសព័ត៌មានរបស់ធនាគារពិភពលោក ការិយាល័យប្រចាំ កម្ពុជាបានឱ្យដឹងថា ប្រជាជនដែលរស់នៅក្នុងបណ្ដាខេត្ដក្រីក្រនៃប្រទេសកម្ពុជា ហើយដែលបច្ចុប្បន្ន នេះកំពុងប្រើប្រាស់ថាមពលអគ្គិសនីមានតំលៃខ្ពស់ជាងគេបំផុតក្នុងពិភពលោកនោះ នឹងឃើញតំលៃភ្លើង ប្រើប្រាស់របស់ពួកគាត់ចុះថោកច្រើនសន្ធឹកសន្ធាប់ ដោយសារជំនួយឥតសំណងដែលបានអនុម័ត ដោយ ធនាគារពិភពលោក នាថ្ងៃទី៦ មិថុនាកន្លងមកថ្មីៗនេះ។ ក្រោមកម្មវិធីីពាណិជ្ជកម្មថាមពលអគ្គិសនី ក្នុង មហាអនុតំបន់ទន្លេមេគង្គរបស់ធនាគារពិភពលោក ជំនួយឥតសំណងចំនួន១៨,៥លានដុល្លារអាមេរិក នឹង ផ្ដល់ជូនប្រទេសកម្ពុជាសំរាប់សាងសង់ខ្សែបណ្ដាញបញ្ជូនចរន្ដអគ្គិសនី ពីព្រំប្រទល់ប្រទេសឡាវ និងពីព្រំ ប្រទល់ប្រទេសវៀតណាម។ ជាមួយនឹងខ្សែបញ្ជូនចរន្ដអគ្គិសនី ដែលកំពុងសាងសង់ពីប្រទេសវៀតណាម ក្រោមគំរោងអគ្គិសនីភាវូបនីយកម្មជនបទ ដែលគាំទ្រដោយធនាគារពិភពលោក ជំនួយថ្មីនេះនឹងអាច ធ្វើការពង្រីកពាណិជ្ជកម្មថាមពលអគ្គិសនីបន្ថែមទៀតពីប្រទេសវៀតណាម ហើយអាចជួយកម្ពុជានាំយក ថាមពលអគ្គិសនីក្នុងតំលៃថោកសំរាប់អ្នកប្រើប្រាស់ក្នុងប្រទេសកម្ពុជារបស់ខ្លួន ។

ទឹកប្រាក់ជំនួយចំនួន១៥លានដុល្លារអាមេរិកទៀត នឹងផ្ដល់ជូនប្រទេសឡាវដើម្បីសាងសង់ខ្សែបណ្ដាញ បញ្ជូនចរន្ដអគ្គិសនីដើម្បីតភ្ជាប់មកប្រទេសកម្ពុជា និងសាងសង់ប្រព័ន្ធបញ្ជូនចរន្ដអគ្គិសនីសំរាប់តភ្ជាប់ ប្រទេសឡាវ កម្ពុជា និងថៃ ។ គំរោងនេះនឹងអាចជួយធ្វើឱ្យប្រសើរដល់ការផ្គត់ផ្គង់ភ្លើងអគ្គិសនីដល់ ខេត្ដសារាវ៉ានភាគខាងត្បូងរបស់ប្រទេសឡាវ ។

លោកអៀន ផតធ័រ នាយកធនាគារពិភពលោកប្រចាំកម្ពុជានិងប្រទេសឡាវមានប្រសាសន៍ថា យុទ្ធសាស្ដ្រ របស់ធនាគារពិភពលោកសំរាប់មហាអនុតំបន់ទន្លេមេគង្គ ដែលកម្មវិធីពាណិជ្ជកម្មថាមពលអគ្គិសនីជាផ្នែក មួយដែរនោះ គឺជាការស្វែងរកការពង្រឹងកិច្ចសហប្រតិបត្ដិការ និងការធ្វើសមាហរណកម្ម នៅក្នុងតំបន់ ដូចនេះមហាអនុតំបន់ទន្លេមេគង្គ អាចទទួលបានអត្ថប្រយោជន៍ពីការអភិវឌ្ឍន៍ធនធានធម្មជាតិ របស់ អាស៊ីអាគ្នេយ៍ និងធ្វើឱ្យមានកំណើនបានឆាប់រហ័ស។ ធាតុផ្សេងៗទៀតនៃយុទ្ធសាស្ដ្រ ដោយរួមទាំងការ គ្រប់គ្រងធនធានទឹក ការសំរួលពាណិជ្ជកម្ម និងដឹកជញ្ជូន និងអន្ដោប្រវេសន៍កំលាំងពលកម្ម ។ លោក ផតធ័រ មានប្រសាសន៍ថា “សំរាប់ប្រជាជនដែលរស់នៅតំបន់ទន្លេមេគង្គទទួលបានផលប្រយោជន៍ ពួកគាត់ នឹងត្រូវការស្ថាប័នដ៏រឹងមាំ គោលនយោបាយល្អ និងហេដ្ឋារចនាសម្ព័ន្ធដែលគួរឱ្យជឿទុកចិត្ដបាន”។ លោក ផតធ័រ បន្ដថា “យុទ្ធសាស្ដ្រ របស់ធនាគារពិភពលោកបានដាក់ចេញនូវ ក្របខណ្ឌសំរាប់ជំនួយបច្ចេកទេស ការវិភាគ ការកសាងសមត្ថភាព និងការវិនិយោគ ដូចនេះប្រទេសនានាក្នុងមហាអនុតំបន់ទន្លេមេគង្គ អាចធ្វើការជាមួយគ្នា ដើម្បីទាក់ទាញ អ្នកវិនិយោគ និងធ្វើឱ្យប្រសើរលើសេវាកម្មសំរាប់ប្រជាជនរបស់ ពួកគេ”។

សេចក្ដីប្រកាសព័ត៌មានបានបន្ដថា ក្នុងប្រទេសកម្ពុជា ប្រជាជនកម្ពុជារកចំណូលបាន៣៨០ដុល្លារអាមេរិក ក្នុងមួយឆ្នាំ និងមានប្រជាជនច្រើនជាង១ភាគ៣រស់នៅក្រោមបន្ទាត់ភាពក្រីក្រ ហើយមានប្រជាជនភាគ តិចណាស់ ដែលទទួលបានសេវាកម្មអគ្គិសនី (តិចជាង១៨ភាគរយ)។

ប្រជាជននៅខេត្ដកំពង់ចាម និងខេត្ដស្ទឹងត្រែងប្រើប្រាស់ថាមពលអគ្គិសនីនៅមានកំរិត ហើយមានតំលៃ ខ្ពស់រហូតដល់០,៣ដុល្លារអាមេរិកក្នុងមួយគីឡូវ៉ាត់ម៉ោង។ បន្ទាប់ពីខ្សែបណ្ដាញបញ្ជូនចរន្ដនេះ ត្រូវ បានសង់រួចតំលៃថាមពលអគ្គិសនីនៅខេត្ដទាំងពីរនេះសង្ឃឹមថា នឹងអាចចុះដល់ត្រឹមចន្លោះ ០,១-០,១៥ ដុល្លារអាមេរិកក្នុងមួយគីឡូវ៉ាត់ម៉ោង ។

លោកយឹម ណុលសុន អគ្គនាយករងអគ្គិសនីកម្ពុជាមានប្រសាសន៍ថា “ជាមួយនឹងគំរោងពាណិជ្ជកម្ម ថាមពលមហាអនុតំបន់ទន្លេមេគង្គ ប្រទេសកម្ពុជានឹងមើលឃើញ នូវឥទ្ធិពលវិជ្ជមានរបស់គំរោងជាច្រើន ក្នុងការអភិវឌ្ឍន៍ខេត្ដស្ទឹងត្រែង និងខេត្ដកំពង់ចាម” ។ លោកបន្ដថា “គំរោងនេះនឹងអាចចូលរួមដើម្បី កាត់បន្ថយភាពក្រីក្រ និងបង្កើនលទ្ធភាពប្រើប្រាស់ថាមពលអគ្គិសនី នៅទីជនបទនៅក្នុងខេត្ដទាំងពីរ នេះ”។ លោកមូហិនដា ហ្គោឡាទី ប្រធានគំរោងពាណិជ្ជកម្មថាមពលអគ្គិសនីក្នុងមហាអនុតំបន់ទន្លេ មេគង្គរបស់ធនាគារពិភពលោក មានប្រសាសន៍ថា “ពាណិជ្ជកម្មថាមពលនៅក្នុងមហាអនុតំបន់ទន្លេមេគង្គ អាចជួយផ្ដល់អត្ថប្រយោជន៍យ៉ាងច្រើនដល់សេដ្ឋកិច្ច និងបរិស្ថាន និងធ្វើឱ្យមានស្ថិរភាពថាមពលនៅក្នុង តំបន់នេះ” ។ លោកបន្ដថា “ការជួយប្រទេសនានានៅក្នុងតំបន់ទន្លេមេគង្គឱ្យទទួលបានអត្ថប្រយោជន៍ ទាំងនោះ នឹងបង្កើតលទ្ធភាពទទួលសេវាអគ្គិសនីនៃប្រជាជនក្រីក្របានច្រើនជាងមុន និងជួយគាំទ្រដល់ ការអភិវឌ្ឍន៍សេដ្ឋកិច្ចនៅក្នុងតំបន់ ។

ប្រទេសឡាវ ក៏ជាប្រទេសក្រីក្រមួយនៅក្នុងតំបន់ដែរ ។ ប្រជាជនឡាវមានចំណូលប្រមាណ៤៦០ដុល្លារ អាមេរិក ក្នុងមួយឆ្នាំ ប៉ុន្ដែប្រទេសនេះសំបូរទៅដោយធនធានទឹកនិងរ៉ែ ។ តាមរយៈយុទ្ធសាស្ដ្រអភិវឌ្ឍន៍ ថាមពលវារីអគ្គិសនីសំរាប់លក់ឱ្យប្រទេសជិតខាងរបស់ខ្លួន បានធ្វើឱ្យប្រជាជនឡាវប្រមាណជិត ៥០ ភាគរយ មានភ្លើងអគ្គិសនីប្រើប្រាស់នាពេលនេះ ហើយប្រទេសនេះកំពុងតែទទួលបានរូបិយប័ណ្ណបរទេស ពីការធ្វើពាណិជ្ជកម្មថាមពលអគ្គិសនី ។ លោកវីរាភុញ វីរ៉ាវង នាយកនៃនាយកដ្ឋានលើកំពស់ និង អភិវឌ្ឍន៍ថាមពលមានប្រសាសន៍ថា “យើងមានភ័ព្វសំណាងដោយសារប្រទេសយើងសំបូរធនធានធម្មជាតិ ហើយយើងកំពុងតែអភិវឌ្ឍន៍ធនធានទាំងនេះប្រកបដោយនិរន្ដរភាព” ។ លោកបន្ដថា “គំរោងនេះ នឹង ជួយយើងក្នុងការផ្គត់ផ្គង់ថាមពលគួរឱ្យទុកចិត្ដបានសំរាប់ប្រជាជនឡាវ ហើយក៏អាចជួយឱ្យយើងមាន លទ្ធភាពសំរាប់ពង្រីកពាណិជ្ជកម្មជាមួយ ប្រទេសផ្សេងៗទៀតនៅក្នុងតំបន់”។

ក្នុងអំឡុងពេលរៀបចំគំរោងទាំងនេះ ប្រទេសកម្ពុជានិងប្រទេសឡាវបានធ្វើការវិភាគផលប៉ះពាល់ បរិស្ថាន និងសង្គមយ៉ាងក្បោះក្បាយមួយ លើសំណើសាងសង់ប្រព័ន្ធ ខ្សែបញ្ជូនអគ្គិសនីនេះ ក្នុងនោះក៏ មានការពិគ្រោះយោបល់យ៉ាងទូលំទូលាយជាមួយប្រជាជននៅក្នុងតំបន់ប្រតិបត្ដិគំរោង និង អង្គការសង្គម ស៊ីវិលផងដែរ ។ ផលប៉ះពាល់ដល់សង្គម និងបរិស្ថានដែលបានរកឃើញមានកំរិតបន្ដិចបន្ដួចប៉ុណ្ណោះ។ គំរោងថាមពលពាណិជ្ជកម្មអគ្គិសនីមហាអនុតំបន់ទន្លេមេគង្គសង្ឃឹមថា នឹងអាចបញ្ចប់រួចរាល់នាខែសីហា ឆ្នាំ២០១១ នៅប្រទេសកម្ពុជា និងប្រទេសឡាវ ឆ្នាំ២០១៣ ។

កូនចាបព្រាត់សំបុកសុំផ្ញើជីវិតលើបាយបាត្រ

2007-06-07T22:07:00.000+07:00

ខេត្ដកំពត ៖ ដោយសារតែភាពក្រីក្របំផុតមិនអាចរ៉ាប់រងចិញ្ចឹមក្មួយប្រុសតូចៗ៤នាក់ ដែលពួកគេ មានអាយុចាប់ពី៣ឆ្នាំ ដល់១២ឆ្នាំ ស្ដ្រីជាម្ដាយមីងបានសំរេចចិត្ដឱ្យចាកចេញពីផ្ទះ ក្រោមការចាត់ចែង របស់លោកមេភូមិ និងអ្នកស្រុក ។ ស្ដ្រីជាម្ដាយមីងដែលត្រូវប្រឈមមុខនឹងភាពទីទាល់ក្របំផុត ណាមួយប្ដីឈឺស្គមរីងរៃដេកលើកន្ទេលរង់ចាំតែថ្ងៃស្លាប់ ហើយក៏មានកូនប្រុសស្រីតូចៗ៤នាក់ដែរនោះ បាននិយាយថា គាត់ត្រូវពុះពារទាំងត្រដររកប្រាក់បានបន្ដិចបន្ដួចដោយការស៊ីឈ្នួលស្ទូង ដក ឬច្រូតកាត់ ឱ្យគេ មិនអាចយកមកផ្គត់ផ្គង់ចិញ្ចឹមកូននិងក្មួយៗ៨នាក់ ក្នុងបន្ទុកបានឡើយ ណាមួយប្ដីឈឺដេកលើ កន្ទេលស្បែកដណ្ដប់ឆ្អឹងអស់ទៅហើយ ពិតជាអាចដាច់ពោះស្លាប់ បើសិនជាមិនបំបែកគ្នាដើម្បីរស់ទេ នោះ។

រឿងរ៉ាវនេះបានកើតមាននៅភូមិកំរែងក្រសាំង ឃុំខ្ជាយខាងជើង ស្រុកដងទង់ ខេត្ដកំពត កាលពីសបា្ដហ៍ កន្លងមកនេះ ។ ដោយសារតែកើតមានបញ្ហាបែបនេះ ទើបលោក ឆាយ ឡឹង មេភូមិបានចាត់ចែង នាំក្មេងតូចៗទាំង៤នាក់បងប្អូនទៅផ្ញើរកការសង្គ្រោះពីព្រះសង្ឃដែលគង់នៅវត្ដដំណាក់ ដើម្បីឱ្យពួកគេ បានស្នាក់នៅក្រោមម្លប់នៃទីអារាមនោះផង ។ ជាមួយគ្នានេះ លោកមេភូមិក៏បានទំនាក់ទំនងដល់ លោកនាយកសាលាវត្ដដំណាក់ឱ្យជួយលៃលករៃអង្គាសជាអង្ករ ដើម្បីជួយចិញ្ចឹមពួកគេផងដែរ ។ តើមាន អ្វីដែលត្រូវនិយាយនៅពេលនេះចំពោះវាសនាកម្មរបស់ក្មេងប្រុសទាំង៤?

តាមអ្នកភូមិកំរែងក្រសាំង ឃុំខ្ជាយខាងជើង ស្រុកដងទង់ ខេត្ដកំពត បានឱ្យកោះសន្ដិភាពដឹងថា ក្មេងប្រុសទាំង៤នាក់នេះ ត្រូវបានម្ដាយបោះបង់ចោល ។ ស្ដ្រីជាម្ដាយដែលបោះបង់កូនចោលនេះ ឈ្មោះ ញ៉ែម ស្រី អាយុ៣៩ឆ្នាំ ។ តាមស្ដ្រីដែលជាម្ដាយមីង និងត្រូវជាប្អូនស្រីម្ដាយក្មេងទាំង៤បានរៀបរាប់ថា កាលពីឆ្នាំ១៩៨៩ ម្ដាយពួកគេបានទៅរស់នៅជាមួយម្ដាយមីងឯខេត្ដកោះកុង ហើយក៏បានរៀបការរហូត ដល់មានកូនប្រុស៤នាក់ ដែលកូនច្បងអាយុ១២ឆ្នាំ និងកូនប្អូនអាយុ៣ឆ្នាំ ។ ក្រោយមកប្ដីរបស់គាត់ (ឪពុកពួកគេទាំង៤) បានធ្លាក់ខ្លួនឈឺរ៉ាំរ៉ៃរហូតលក់ទ្រព្យរបស់ផ្ទះសំបែង ភូមិករ អស់គ្មានសល់ ដើម្បី ព្យាបាលជំងឺ ប៉ុន្ដែទីបំផុតអស់លុយកាក់ទ្រព្យសម្បត្ដិ ផ្ទះសំបែងហើយ ក៏បានស្លាប់ទៅ ដោយបន្សល់ ទុកកូនតូចៗ៤នាក់ឱ្យស្ដ្រីជាប្រពន្ធរ៉ាប់រងចិញ្ចឹមទាំងលំបាកវេទនា ។

ស្ដ្រីជាប្អូន និងជាម្ដាយមីងពួកគេទាំង៤ បានឱ្យដឹងទៀតថា បន្ទាប់ពីប្ដីស្លាប់ចោលទៅ បងស្រីរបស់គាត់ នៅសល់តែបាតដៃទទេ សូម្បីតែផ្ទះក៏គ្មានជ្រក រហូតដើរសុំទានគេ សន្សំប្រាក់ធ្វើសោហ៊ុយពីខេត្ដកោះកុង ត្រឡប់មកស្រុកកំណើតវិញ។ នៅពេលមកដល់ស្រុកកំណើតបានរស់នៅជាមួយនឹងគាត់ ជាប្អូនស្រី ដែល ជាគ្រួសារក្រីក្ររកព្រឹកខ្វះល្ងាចរកល្ងាចខ្វះព្រឹក និងមានកូន៤នាក់រស់នៅក្រោមដំបូលខ្ទមតូចមួយ ហើយ នាំគ្នាដើរស៊ីឈ្នួលដកស្ទូងច្រូតកាត់ឱ្យគេ ដើម្បីរកប្រាក់មកចិញ្ចឹមកូន និងប្ដីដែលឈឺរាុំរ៉ៃដេកតែលើ កន្ទេល។ រហូតដល់ចុងឆ្នាំ២០០៦ គឺនៅក្នុងខែវិច្ឆិកាបងស្រីឈ្មោះញ៉ែម ស្រី បានប្រាប់គាត់ថា សុំផ្ញើ កូនផង គាត់ទៅផ្សារដងទង់ ដើម្បីរកទិញអង្ករមកទុកដាំបាយហូប ប៉ុន្ដែការចេញទៅនោះគឺបាត់រហូត តែម្ដង ដោយគ្មានដំណឹងថាទៅទីណា និងមានសុខទុក្ខយ៉ាងណាទេ ។ តាំងពីពេលនោះមកបន្ទុកដ៏ធ្ងន់ធ្ងរ បានធ្លាក់មកលើគាត់ជាប្អូន ដែលក្រីក្រចិញ្ចឹមកូន៤នាក់មិនគ្រប់គ្រាន់ផងនោះ ត្រូវរ៉ាប់រងចិញ្ចឹមក្មួយតូចៗ ទាំង៤នាក់នោះទៀត ។ ដោយសារតែគ្មានលទ្ធភាពរកស៊ីចិញ្ចឹម ទើបនៅថ្ងៃទី១ មិថុនា កន្លងទៅនេះ គាត់បានដាច់ចិត្ដឱ្យក្មួយទាំង៤នាក់រកជំរកថ្មី ព្រោះគាត់គ្មានលទ្ធភាពចិញ្ចឹមពួកគេទេ ។

អ្នកភូមិក៏មានការភ្ញាក់ផ្អើលដែរ ព្រោះក្មេងកំព្រាទាំង៤នាក់ដែលស្ដ្រីជាម្ដាយបានរត់ចោលបាត់ទៅនោះ ត្រូវម្ដាយមីងមិនអាចតស៊ូចិញ្ចឹមពួកគេបាន ។ ទោះបីជាបែបណា អ្នកភូមិគ្រប់គ្នាដែលក្រីក្រដែរនោះ ក៏មិនអាចជួយចិញ្ចឹមពួកគេបានដែរ ព្រោះថាមិនអាចយកបង ឬប្អូនមកចិញ្ចឹមតែម្នាក់ ឬ២នាក់ បានឡើយ បើចិញ្ចឹមគឺចិញ្ចឹមទាំង៤នាក់។ បន្ទាប់ពីមានការចាត់ចែងពីលោកមេភូមិពិតណាស់ថា ក្មេងកំព្រា ទាំង៤នាក់ បងប្អូននឹងទៅនៅវត្ដ ផ្ញើវាសនាលើបាយបាត្រ ដែលអ្នកភូមិសង្ឃឹមថា ពួកគេនឹងបន្ដរស់ តទៅទៀត ក្នុងនាមជាកូនចាបព្រាត់សំបុក។ អ្វីដែលគួរឱ្យអនិច្ចានោះ ក្មេងប្រុសជាបងដែលមាន អាយុ ១២ឆ្នាំ ត្រូវក្លាយខ្លួនជាឪពុកថែទាំប្អូនៗ ដើម្បីបន្ដហែលឆ្លងវាលវដ្ដសង្សារដ៏ធំធេងនេះ ។ កោះសន្ដិភាព សង្ឃឹមថា សប្បុរសជនជាជនរួមជាតិទាំងក្នុង និងក្រៅប្រទេសពិតជាជួយកូនចាបមួយសំបុកនេះមិនខាន ទៅតាមលទ្ធភាពរៀងៗខ្លួន ។

Cambodia News

ពិធីបុណ្យ​ទ្បើ​ង​អ្នកតា​មេ​.​ស​ជា​ទំនៀមទំលាប់​តាំងពី​សម័យ​នគរ​ភ្នំ

អនាគត​របស់​រាជវង្ស​ដែល​កំពុង​ធ្វើ​នយោបាយ​​ទ្រង់​ធ​ម្មិ​កោ​រំពឹង​ថា​នឹង​មានការ​ចាកចេញ​បន្ដបន្ទាប់

ក្រុម​គ្រួសារ​ដែល​តុលាការ​កាត់​ឱ្យ​ចាញ់ក្ដី​​គ្រួសារ​អ្នក​ចាញ់ក្ដី​រើ​តោក​រើ​ហ៊ឹង​មក​នៅ​សាលាឃុំ

ភី សុ​ភ័ស្ស បាត់​មុខ​យូរ​ជួប​អ្នក​ឡើង​កូដ លួ​ន សុខ​ខេ​ង

បក្ស​សិទ្ធិ​មនុស្ស​របស់​លោក​កឹ​ម សុខា​​ពន្យារពេល​ធ្វើ​សមាជ​ខណៈ​មិន​ទាន់​មានច្បាប់​ផ្លូវការ

យុវនារី​សិស្ស​វិទ្យាល័យ​វត្ដ​កោះ​រង​ការ​វាយប្រហារ​ដោយ​ទឹក​អាស៊ីត

ចោរ​ស្ដេចត្រាញ់​ក្នុង​ព្រៃ​៩​ឆ្នាំ​ដេកពេទ្យ​ជាប់ច្រវាក់

វាយ​សម្លាប់​គ្រូទាយ​ប្លន់​យក​ចិញ្ចៀនមាស ខ្សែ​.​ក​..​ប៉ះ​ចំ​មាស​កាឡៃ

អ្នកលេង​ជាយ​ដែន​វាយ​គ្នា​ជាមួយ​ក្រុម​គ្រូបង្រៀន​នៅផ្ទះ​បន​ស្រី

ប៉ូលិស​-​ប៉េ​អឹ​ម​ច្រឡំ​គ្នា ពេល​បង្ក្រាប​អ្នកលក់​ថ្នាំ​ញៀន

ឆេះ​កសិដ្ឋាន​ចិញ្ចឹម​មាន់នៅ​អង្គស្នួល​ងាប់​មាន់​ជាង​៤​ពាន់​ក្បាល

បុរស​ជនជាតិ​កា​ណា​ដា​ដេក​ស្លាប់​នៅ​លើ​ឥដ្ឋ​ក្នុង​ក្លឹ​ប​កំសាន្ដ

សិក្ខាសាលា​បង្ហាញ​សេចក្ដី​ព្រាង​ផែនការ​សកម្មភាព​ជាតិ​ប្រឆាំង​​ហិង្សា​ក្នុង​គ្រួសារ

អង្គការ​ជប៉ុន​ស្ម័គ្រចិត្ដ​ជួយ​បំផុស​ចលនា​ដាំ​ដើមឈើ​ជីវចំរុះ

វត្ដ​ជោ​ត​ញ្ញាណ​ក្រុងព្រះសីហនុ​បើក​បវេសនកាល​ឆ្នាំ​សិក្សា​ថ្មី

ប្ដី​កាប់​.​ក​ប្រពន្ធ​នឹង​កាំបិតប៉័ងតោ​ត្រូវ​ចាប់ខ្លួន​ពេល​ប្រុង​ចង​.​ក

ឃ្វាលគោ​ជ្រក​ភ្លៀង​ក្រោម​ដើមឈើ​ត្រូវ​រន្ទះបាញ់​ស្លាប់​ប្អូន របួស​បង

កតញ្ញូ​និង​ស្នេហា

កម្មការិនី​រោងចក្រ​កាត់ដេរ​ដួល​ស្លាប់​ពេល​កំពុងធ្វើការ​ងារ

ចោរប្លន់​លើ​ផ្លូវជាតិ​លេខ​៣​ព្រំប្រទល់​៣​ខេត្ត​កំពុង​កក្រើក

ក្រសួងបរិស្ថាន​និង​អាជ្ញាធរ​ខេត្ដសៀមរាប​ប្រារឰ​ទិវា​បរិស្ថាន​ឆ្នាំ​២០០៧

ធនាគារពិភពលោក​ប្រកាស​ផ្ដល់​១៨,៥​លាន​ដុល្លារ​សំរាប់​ត​ចរន្ដ​ភ្លើង​ពី​ប្រទេស​ឡាវ​-​វៀតណាម

កូនចាប​ព្រាត់​សំបុក​សុំ​ផ្ញើ​ជីវិត​លើ​បាយបាត្រ

ពិធីបុណ្យទ្បើងអ្នកតាមេ.សជាទំនៀមទំលាប់តាំងពីសម័យនគរភ្នំ

អនាគតរបស់រាជវង្សដែលកំពុងធ្វើនយោបាយទ្រង់ធម្មិកោរំពឹងថានឹងមានការចាកចេញបន្ដបន្ទាប់

ក្រុមគ្រួសារដែលតុលាការកាត់ឱ្យចាញ់ក្ដីគ្រួសារអ្នកចាញ់ក្ដីរើតោករើហ៊ឹងមកនៅសាលាឃុំ

ភី សុភ័ស្ស បាត់មុខយូរជួបអ្នកឡើងកូដ លួន សុខខេង

បក្សសិទ្ធិមនុស្សរបស់លោកកឹម សុខាពន្យារពេលធ្វើសមាជខណៈមិនទាន់មានច្បាប់ផ្លូវការ

យុវនារីសិស្សវិទ្យាល័យវត្ដកោះរងការវាយប្រហារដោយទឹកអាស៊ីត

ចោរស្ដេចត្រាញ់ក្នុងព្រៃ៩ឆ្នាំដេកពេទ្យជាប់ច្រវាក់

វាយសម្លាប់គ្រូទាយប្លន់យកចិញ្ចៀនមាស ខ្សែ.ក..ប៉ះចំមាសកាឡៃ

អ្នកលេងជាយដែនវាយគ្នាជាមួយក្រុមគ្រូបង្រៀននៅផ្ទះបនស្រី

ប៉ូលិស-ប៉េអឹមច្រឡំគ្នា ពេលបង្ក្រាបអ្នកលក់ថ្នាំញៀន

ឆេះកសិដ្ឋានចិញ្ចឹមមាន់នៅអង្គស្នួលងាប់មាន់ជាង៤ពាន់ក្បាល

បុរសជនជាតិកាណាដាដេកស្លាប់នៅលើឥដ្ឋក្នុងក្លឹបកំសាន្ដ

សិក្ខាសាលាបង្ហាញសេចក្ដីព្រាងផែនការសកម្មភាពជាតិប្រឆាំងហិង្សាក្នុងគ្រួសារ

អង្គការជប៉ុនស្ម័គ្រចិត្ដជួយបំផុសចលនាដាំដើមឈើជីវចំរុះ

វត្ដជោតញ្ញាណក្រុងព្រះសីហនុបើកបវេសនកាលឆ្នាំសិក្សាថ្មី

ប្ដីកាប់.កប្រពន្ធនឹងកាំបិតប៉័ងតោត្រូវចាប់ខ្លួនពេលប្រុងចង.ក

ឃ្វាលគោជ្រកភ្លៀងក្រោមដើមឈើត្រូវរន្ទះបាញ់ស្លាប់ប្អូន របួសបង

កតញ្ញូនិងស្នេហា

កម្មការិនីរោងចក្រកាត់ដេរដួលស្លាប់ពេលកំពុងធ្វើការងារ

ចោរប្លន់លើផ្លូវជាតិលេខ៣ព្រំប្រទល់៣ខេត្តកំពុងកក្រើក

ក្រសួងបរិស្ថាននិងអាជ្ញាធរខេត្ដសៀមរាបប្រារឰទិវាបរិស្ថានឆ្នាំ២០០៧

ធនាគារពិភពលោកប្រកាសផ្ដល់១៨,៥លានដុល្លារសំរាប់តចរន្ដភ្លើងពីប្រទេសឡាវ-វៀតណាម

កូនចាបព្រាត់សំបុកសុំផ្ញើជីវិតលើបាយបាត្រ