Carita Sunda Kang Avid

Panineungan Kang Uyan

2011-12-08T07:37:00.000-08:00

Geus lila hayang nulis ieu teh. Ti basa nguping kang Uyan (Yan Asmi) pupus, Maret 2010 kapungkur. Tapi da kumaha atuh, karek ayeuna kaburuna. Keun bae lah nya. Hampura bae telat saeutik mah :).

Pangna kuring hayang nulis, aya dua sabab utama. Kahiji, kuring bisa disebut salah saurang fans na Kang Uyan. Ti leuleutik, jaman sok manggung d’Bodor keneh, kuring mindeng nongton mun pareng aya di TVRI. Mun geus aya trio Uyan, Kusye, UsUs teh sok manco panghareupna teu ngiceup-ngiceup.

Salian ti lucu, kataji ku nembangna deuih. Da eta pisan salah sahiji kaahlian Kang Uyan. Nembang bari nurutan penyanyi sejen, model Ebit (G Ade),(R) Oma Irama atawa Jamal Mirdad. Malah kungsi sababaraha kali d'Bodor ngaluarkeun album. Nu pangingetna nu judulna (asana mah) “Jambu Monyet.” Nu tungtungna teh Kang Kusye nanya, “Kalo jambu monyet, mana monyetnya?” “Ya kamu monyetnya,” tembah Kang Uyan jeung Bah Us Us bareng. Apal baheula mah. Ayeuna? Inget etana wungkul. Haha.

Ti leuleutik geus resep, atuh puguh we basa kaparengkeun papanggih teh atoh kacida. Ngan sanajan ngefans oge, teu jiga ABG ayeuna nu heboh. Kuring mah rada jaim. Jadi biasa bae, atohna na jero hate wungkul :). Harita bisa nempo langsung Kang Uyan teh basa aya penyuluhan di Ciwidey. Kang Uyan nu kapeto jadi artisna.

Satuluyna kuring kungsi sababaraha kali aya gawean jeung anjeunna. Tah ieu mah nyambung ka sabab anu kadua: kuring boga sababaraha carita mandiri jeung Kang Uyan teh. Kieu geura.

Harita, basa kuring dines di Bandung, sababaraha kali kantor tempat kuring gawe manggil Kang Uyan manggung. Boh jadi MC atawa ngabodor. Nya nu sok kapapancenan bagean nguruskeun teh kuring pisan. Ti ngajemput, nganteur ka lokasi, konsumsi nepi ka mayar honor. Ke saeutik cuang ngobrolkeun perkara konsumsi heula. Sabab dina perkara ieu aya oge nu kuring inget ti Kang Uyan teh.

Hiji mangsa kuring nganteur Kang Uyan jeung rombongan ka Pangalengan. Ku sabab geus waktuna dahar, nya di jalan ku kuring rombongan teh disimpangkeun ka hiji rumah makan di daerah Banjaran. Pas harita usum peuteuy. Horeng ieu salah sahiji kalandep Kang Uyan. Ningal peuteuy nu barolotot ngagarantung, anjeunna kop sapapan bari langsung: ditambul, atah-atah.

Aya deui carita nu moal kuring poho. Nyeta soal honor. Ieu oge basa tos mentas di Pangalengan, ngan lain waktu asana mah. Harita kuring kapapancenan ngabagikeun honor ka kabeh pengisi acara. Kaasup Kang Uyan, nu harita kapeto jadi MC. Ti samemehna duit geus disiapkeun, diasupkeun kana amplop, diteundeun di saku belah kenca. Sedengkeun, di beh katuhu dipesakkan oge amplop kosong pikeun cadangan. Da sok ngadadak butuh.

Beres acara, saperti biasa kuring nepungan Kang Uyan bari nganuhunkeun. Sor, amplop nu geus disiapkeun teh dibikeun. “Ieu aya kagegelan saalit,” ceuk kuring basa-basi bari salam tempel. Ku kang Uyan ditampa bari nyarita heureuy, “His, tong sok kitu ah, isin,” cenah bari mesakkan amplop. Aman, ceuk kuring dina hate. Pancen geus dilakonan, kuring amitan da aya keneh bayareun.

Geus sabaraha lila, karek kuring nyadar yen di saku kenca nyesa amplop. Barang dirampa karasa kandel. “Astagfirulloh!” kuring reuwas. Horeng tadi salah mikeun. Nu dibikeun ka Kang Uyan teh tetela… amplop kosong. Da nu eusian mah aya keneh.

Satengah lumpat kuring balik ka tempat tadi. Hadena, Kang Uyan aya keneh, keur ngobrol jeung sababaraha tamu. Bari ngaleng kanu rada suni kuring sanduk-sanduk. “Duh, hapunten Kang Uyan. Tadi lepat masihkeun. Nu eta mah kosong,” ceuk kuring bari rada era. Demi Kang Uyan kalah mesem. “Naha atuh, da karasa ti tadi ge ipis,” cenah.

Tos sataun leuwih Kang Uyan ngantunken. Mugia anjeunna dipasihan tempat anu bagja di dituna tur digampilkeun sagala urusanna. Aamiin.

Raden Dewi Sartika

2011-12-06T07:17:00.000-08:00

Dewi Sartika dibabarkeun ti kulawarga ningrat Sunda, Nyi Raden Rajapermas jeung Raden Somanagara. Sanajan ngalanggar tetekon mangsa harita, sepuhna keukeuh nyakolakeun Dewi Sartika ka sakola Walanda. Sabada ramana pupus, Dewi Sartika dirawatan ku pamanna (lanceuk ibuna) nu janten patih di Cicalengka. Nya ti ingkang paman, anjeunna meunang atikan ngeunaan kasundaan, sedengkeun wawasan kabudayaan Barat kenging ti saurang nyonya Asisten Residen urang Walanda.

Bakat ngajar

Ti leuleutik, Dewi Sartika geus nunjukkeun bakat ngajarna jeung kapengkuhan hate dina ngahontal sagala nu dipikahayang. Bari arulin di tukangeun gedong kapatihan, anjeunna sok ulin sasakolaan, ngajar maca-nulis, jeung basa Walanda, ka budak rencang-rencang di kapatihan. Papan bilik kandang kareta, areng, jeung potongan kenteng nu dijadikeun alat bantu anjeunna ngajar.

Dewi Sartika karek nincak umur sapuluh taun, basa Cicalengka ibur ku kamampuh maca-nulis jeung sababaraha hiji kecap basa Walanda nu ditunjukkeun ku barudak rencang-rencang kapatihan. Ibur, kusabab di waktu harita can loba barudak (komo budak somah) nu boga kamampuh jiga kitu, katambah nu ngajarna teh budak awewe pisan.

Nincak Rumaja

Nincak rumaja, Dewi Sartika mulang ka ibuna di Bandung. Jiwana nu beuki dewasa ngadorong anjeunna ngawujudkeun sagala nu dicita-citaeun. Katambah meunang pangrojong ti ingkang paman, Bupati Martanagara, nu oge ngagaduhan cita-cita nu sarua. Tapi, sanajan ngabogaan pamadegan nu sarua jeung ingkang paman, teu ngajadikeun ibu Dewi bisa laluasa ngawujudkeun cita-citana. Tetekon nu meungkeut kaum wanoja dina waktu harita, ngajadikeun ingkang paman ngarasa rempan. Tapi ku kapengkuhan tekad jeung sumangetna nu teu weleh ngagedur, nya ahirna Dewi Sartika bisa ngayakinkeun ingkang paman mere idin pikeun ngadegkeun sakola wanoja.

Jatuk rami

Dina taun 1906, Dewi Sartika jatuk rami jeung Raden Kanduruan Agah Suriawinata nu tetela ngabogaan pamadegan jeung cita-cita nu sarua. Anjeunna saurang guru di Sakola Karang Pamulang nu harita ngarupakeun Sakola Latihan Guru.

Ngadegkeun Sakola

Ti taun 1902, Ibu Dewi Sartika geus ngarintis pangajaran jang kaum wanoja. Di hiji rohangan leutik, tukangeun rorompok ingkang ibu di Bandung, Dewi Sartika ngajar di hareuprun anggota kulawargana nu wanoja. Nu diajarkeun harita nyaeta palajaran ngarenda, masak, ngajait, maca, nulis, jeung sajabana.

Sabada menta idin ka Bupati R.A. Martenagara, dina 16 Januari 1904, ibu Dewi Sartika ngadegkeun Sakola Istri nu munggaran sa-Hindia-Walanda. Nu ngajarna tiluan; Dewi Sartika, dibantuan ku dua dulur misanna, Nyi Poerwa jeung Nyi Oewid. Murid-murid angkatan kahiji jumlahna 20 urang, ngagunakeun rohangan pendopo kabupaten Bandung.

Sataun saterusna, di 1905, kelasna nambahan, nepi ka tuluy pindah ke Jalan Ciguriang, Kebon Cau. Tempat anyar ieu dibeuli ibu Dewi Sartika ngangge tabungan pribadina, sarta bantuan dana pribadi ti Bupati Bandung. Lulusan kahiji diistrenan di taun 1909, ngabuktikeun ka bangsa urang yen wanoja oge ngabogaan kamampuh nu taya bedana jeung lalaki. Taun 1910, ngagunakeun harta pribadina, sakolana direhab nepi ka bisa leuwih nyumponan pasaratan kalengkepan sakola formal.

Dina taun-taun saterusna di sabaraha tempat di wewengkon Pasundan ngadeg sababara hiji Sakola Istri, utamana nu dijeujeuhkeun ku para wanoja Sunda nu boga cita-cita sarua jeung ibu Dewi Sartika. Dina taun 1912 kacatet ngadeg salapan Sakola Istri di kota-kota kabupaten (satengahma tina jumlah kota kabupaten satatar Pasundan).

Nincak umur ka-sapuluh taun, di taun 1914, sakolana ganti ngaran jadi Sakola Kautamaan Istri. Kota-kota kabupaten wewengkon Pasundan nu can ngabogaan Sakola Kautamaan Istri ngan kari tilu/opat. Sumanget ieu oge meuntas ka Bukittinggi. Di ditu, Sakola Kautamaan Istri diadegkeun ku Encik Rama Saleh. Sakuliah Pasundan jangkep ngabogaan Sakola Kautamaan Istri di unggal kota kabupatenna dina taun 1920, ditambah sababaraha hiji nu ngadeg oge di kota kawadanaan.

Dina bulan September 1929, Dewi Sartika ngayakeun pangeling-eling ngadegna sakola nu nincak ka 25 taun, nu saterusna ganti ngaran jadi "Sakola Raden Déwi". Ku jasana di widang ieu, Dewi Sartika dipaparinan bentang jasa oleh pamerintah Hindia-Walanda.

Pupus

Dewi Sartika pupus 11 September 1947 di Tasikmalaya, sarta dimakamkeun ngangge hiji upacara nu basajan di pamakaman Cigagadon-Desa Rahayu Kacamatan Cineam. Tilu taun ti harita dimakamkan deui di kompleks Pamakaman Bupati Bandung di Jalan Karang Anyar, Bandung.

Surat Ti Reungit

2010-11-04T21:19:00.000-07:00

KULIAH jam 2 teh, kuliah pang teu purun-purunna. Mun kongang mah hayang ngaguher we di asrama. Heu pan waktu tutunduhna tateh. Waktu pangeunah-ngeunahna sare. Ngan ku sabab katalian ku tanggungjawab ti nu jadi kolot, nu geus tihothat beurangpeuting ngarah budakna bisa jadi sarjana, nya kapaksa kuring nguat-nguat maneh. Bari jeung angger we di kelas mah ngadon… nundutan.

Ari diuk, biasa di pangtukangna bae. Meh laluasa nundutan tea. Ngarah teu katohyan teuing ku juragan dosen. Lain sieun, ngan karunya we. Maenya manehna cape2 nerangkeun ari mahasiwahna kalah sare. Pan matak nyeri hate.

Di gigireun, geus saged jang Egar urang Karawang, sobat saperjuangan nu lumayan rada leuwih rajin nyatet batan kuring. Tara digurah-geureuh. Malah dirojong pisan, meh ke mun usum ujian bisa nginjeum. Teu kudu motokopi loba teuing ka neng Wineu. Pan lumayan ngirit.

Keur anteng ngararasakeun katunduh, hiunghiung aya nu ngaguruh na deukeut ceuli. Rikat ditewak. Horeng reungit badag pisan. Geus paeh. Awakna gepeng pedah dirames satarikna ku kuring.

Nempo layon sakadang reungit, ujug2 boga ideu jang miceun tunduh. Ret ka hareup, katembong neng Lita, mojang lenjang urang Sukabumi, keur manco ngadengekeun dongeng juragan dosen. Hahay… mangsa tah, cekeng teh. Ret ka gigireun, kai Egar keur cutatcatet. Tuluy di toel bari ngaharewos.

“Tulis, Gar!” ceuk kuring.

“Naon?” ceuk manehna, teu ngarti mimitina mah.

“Pokona tulis we nu kuurang diomongkkeun!” ceuk kuring maksa.

Teu loba tatanya deui Si Egar tret weh nyatet sakabeh nu ku kuring diomongkeun. Geus beres kertasna disoeh, ditileptilep dijieun aamplopan. Luhurna di tulisan: TO LITA, cenah ngajeblag . Terahir sup, layon sakadang reungit diasupkeun kana amplop. Tuluy dipapaykeun ka hareup.

Teu hese, eta surat teh nepi ka nu dituju. Langsung dibuka ku jinisna nu katempo tuluy rungah-ringeuh narima surat aneh teh. Jigana bingung, reuwas, keuheul campur… geuleuh.

Kuring jeung si Egar tingcikikik, nyerangkeun di tukang. Tunduh teh leungit teu sakarakara.

Nepi ka bubar kuliah teu ngaku. Pas rek balik kakara bebeja yen eta surat teh meunang nyieun duaan. “Pantesan,” cenah. “Geus nyangka, ngan tulisanna beda.” Kuring nyerengeh.

Ari surat teh eusina kieu:

KU KIRIMKAN SEGENAP HATIKU BERSAMA BANGKAI NYAMUK INI
KUINGIN KAU TAHU BETAPA BESAR CINTAKU PADAMU
JANGAN KAU TENDANG KARENA HATIKU AKAN TERBUANG
USAH KAU HEMPAS KARENA JIWAKU AKAN KANDAS
MAKANLAH KESELURUHANNYA
AGAR JIWA KITA MENYATU SELAMANYA

Komentar si Egar pas beres nulis eta surat: “Bisaan maneh euy,” cenah.

Haha… uing!

Ngeblog Deui

2010-08-25T07:09:00.000-07:00

GEUS lila teu ngeblog. Mangbulan- bulan henteu. Terakhir di blog ieu teh bulan desember taun 2009. jadi geus ampir dalapan bulanan.

Ari nu ngalantarankeunana mah biasa, kasibukan. Ongkoh deui pan ayeuna mah ngetrend keneh pesbukan batan ngeblog. Pesbukan mah gampang. Teu jiga ngeblog nu kudu mikir sabab kudu nulis nu rada panjang, pesbukan (jeung twiteran) mah teu kudu. Ukur hiji dua kecap jadi.

Tapi dua minggu kamari mah mimiti kabita deui. Malah nyoba-nyoba nyieun blog anyar basa inggris sagala. Nyeta forestryandgis.blogspot.com Ieu blog eusina ngeunaan widang kahutanan (nyeta widang kuring gawe) hususna dina hubunganna jeung sistim informasi geografis atawa penginderaan jauh.

Ti saprak pindah ka perencanaan, kuring memang ngarasa kudu leuwih neuleuman ieu widang. Salian ti penting jang nunjang pagawean kuring, oge aya sari-sari resep deuih. Rada aneh, sabab baheula mah pas kuliah henteu pati katarik. Jadi teu pati neuleuman.

Ku sabab euweuh guruna, nya diajar teh otodidak wae. Neangan sumber-sumber tina internet. Tah ku sok neangan bahan-bahan tea, jorojoy hayang "ngadokumentasikeun" dina hiji blog. Pikiran teh salian ti meh teu gancang poho, oge bisi aya batur nu jiga kuring hayang diajar bisa milu ngamanfaatkeun. Naha make bahasa inggris. Eta ge diajar. Sugan ari remen maca mah gancang bisana :).

Horeng dunya perblogan teh geus maju jauh ayeuna mah. Teu jiga basa kuring ngamimitian di taun 2005-an. Nu paling karasa nyeta ku gampangna. Baheula mah nu hayang ngeblog teh kudu ngarti bahasa html, meh bisa nyeiun template nu rada alus, ayeuna mah teu kudu. Asal bisa muka internet, tangtu bisa. Template na ge pabalatak, aralus. Sok komo bahasa pangantar blogger.com nage ku bahasa indonesia ayeuna mah.

Tren jalma-jalma nu ngareblog ge geus beda. Baheula, blog teh umumna media ekspresi si blogger, nu eusina murni tina kereteg hate. Ayeuna mah geus loba jadi alat komersil, jang neangan duit. Komo basa google ngaluarkeun adsense mah. Beuki loba jalma nu ngadadak ngeblog pedah hayang meunang duit tina internet. Jadi geus teu murni nu resep nulis deui.

Tapi teu kunanaon ketang. Da geus jamanna. Malah kuring ge asa rada-rada kabita. Nya saha nu nyaho, bari nyalurkeun karesep, meunang duit. Pan lumayan tah :). Nu matak, template ieu blog ge dirobah ku nu rada-rada SEO friendly. Meh blog urang gampang kaindeks ku situs pencari samodel google, bing jeung yahoo.

Nu penting di blog ieu mah nyeta sumangetna. Sumangetna tetep pikeun ngalestarikeun bahasa sunda, sunda jeung kasundaan, hususna di dunya maya. Mudah-mudahan we katanagaan.

Cag heula ah.

Singa Gunung Babakan

2009-12-18T18:10:00.000-08:00

MAKAM teh aya di tempat nu rada luhur. Barang srog ka “lawangna”, di sisi Jalan Siliwangi nu ngabalungbang, urang langsung disanghareupkeun ka tetecean nu lumayan netek. Tapi da teu panjang. Ukur memenitan, tur teu ngesang-ngesang acan ge jigana nepi. Katempo plangna warna bodas jieunan Disbudpar nu geus nyengsol. "Makam Dalem Prabu Singaperbangsa," pokna. Bari dituluykeun ku nyebutkeun salah sahiji pasal tina Undang-undang Pelestarian Cagar Budaya.

Aya dua makam ngarendeng, dilingkung ku pager beusi jieunan beh dieu jeung tatangkalan galede nu rajeg mawa sima. Ku sabrehan ge katempo yen makam teh lain makam samanea. Salian ti babatuanna nu lukutan kandel, cirining umurna geus heubeul pisan, oge ku ukuran jeung bentuk eta makam nu beda jeung makam-makam biasa.

Makam nu hiji leuwih gede batan hijina deui. Nu gede tangtuna ge makam Kangjeng Dalem. Sedeng nu hiji deui duka nu saha. Bisa jadi garwana, matak direndengkeun oge. Hanjakal teu kungsi panggih jeung kuncen, jadi teu bisa tetelepek. Ukur bisa maca tutulisanna nu ditapelkeun dina saung nu aya gigireun makam handapeun batu nu ngajegir sagede mobil beus, nu wanti-wanti majar tong ngaganggu kana barang-barang nu aya sabudeureun eta. Nguriling ka belah katuhu, handapeun batu aya hiji deui saung teh. Nu ieu mah nyanghareupan hiji celah batu (guha), nu jigana sering dipake nyepi. Di dinya ge aya tutulisan nu sarua.

***

Ti saprak nyaho yen di wewengkon Gunung Babakan aya situs makam Dalem Prabu Singaperbangsa kuring memang jadi rada panasaran. Panasaran, kusabab tokoh Singaperbangsa teh hiji tokoh nu historis, dina harti kacatet resmi dina sajarah formal, lain ukur tina dongeng atawa legenda. Hanjakalna teu pareng bae. Karek minggu kamari bisa teh. Padahal da teu jauh. Keur mah lokasina memang asup ka wewengkon leuweung nu ayeuna jadi tanggungjawab kuring.

Nurutkeun situs resmi pemkab Karawang mah, Singaperbangsa teh jenengan bupati Karawang anu kahiji, nu jumeneng di abad XVII, jaman tatar Sunda kaereh ku Mataram. Anjeunna diistrenan bupati ku Sultan Agung dina taun 1633, tur pupus dina taun 1677. Makamna aya di Desa Manggung Jaya Kacamatan Cilamaya, kurang leuwih 40 km ti pusat kota Karawang, nu matak katelah oge Eyang Manggung. Kiwari, jenenganana diangge jadi ngaran universitas jeung stadion olahraga di Karawang

Naha geuningan di Banjar ge aya makam Dalem Singaperbangsa? Naha aya hubunganna?

Aya cenah mah. Nurutkeun sababaraha sumber nu ku kuring dikotektak, Kangjeng Adipati Singaperbangsa nu jadi bupati munggaran Karawang teh, bibit buitna mah memang ti Galuh. Persisna ti hiji tempat nu ngaranna Kertabumi. Nu matak basa dibenum jadi Bupati Karawang ku Sultan Agung ge gelarna teh Adipati Kertabumi IV.

Ari Kertabumi, asalna hiji karajaan leutik di tatar Galuh nu ngadeg di tungtung Abad 16. Nurutkeun Buku Sejarah Ciamis nu diterbitkeun ku Pemkab Ciamis bareng LPPM Universitas Galuh taun 2005 mah, sabada runtagna karajaan Sunda Pajajaran di taun 1579 ku serangan tentara Banten, karajaan Galuh, nu masih mertahankeun corak Hindu, ngadeg merdeka nepi ka taun 1595, tur rajana jenengan Prabu Maharaja Sanghiyang Cipta di Galuh. Puseur karajaanna aya di Cimaragas.

Dina taun 1595, pangaruh pulitik Mataram nepi ka Tatar Galuh. Tapi Panembahan Senapati, nu harita masih sibuk nalukkeun wilayah-wilayah Jawa basisir, can pati negeskeun kakawasaannana. Dina harti, karajaan-karajaan di tatar priangan, kaasup Galuh, masih diaku salaku hiji karajaan, can jadi bagean langsung pamarentahan Mataram. Hal ieu dicirikeun ku para pangawasana nu masih keneh make gelar prabu atawa maharaja.

Taun 1610 Maharaja Sanghiyang Cipta mangkat, tur diganti ku putrana, Prabu Galuh Cipta Permana, nu satuluyna mindahkeun puseur kakawasaan ka Gara Tengah (Cineam ayeuna). Beda jeung ramana nu masih ngagem agama karuhun, Prabu Galuh Cipta Permana mah tos ngagem Islam sabab nikah ka putri maharaja Kawali nu tos Islam samemehna.

Salian ti Gara Tengah, di wilayah tatar Galuh, aya oge sababaraha hiji puseur kakawasaan daerah (karajaan leutik), diantarana Kawasen (Banjarsari ayeuna) nu dirajaan ku, Sanghyang Permana, putra Prabu Maharaja Sanghiyang Cipta nu bungsu, jeung, Kertabumi tea, nu dirajaan ku Rangga Permana (putra Prabu Gesan Ulun ti Sumedang, minantu Prabu Maharaja Sanghiyang Permana) nu gelarna Prabu di Muntur. Situs patilasan karajaan Kertabumi aya di Dusun Bundar Desa Kertabumi kacamatan Cijeungjing Ciamis.

Basa Sultan Agung (1613 – 1645) naek tahta, karajaan Mataram mulai ngareorganisir wilayah kakawasaanna di Priangan. Karajaan-karajaan nu jadi vassalna turun darajat jadi ngan ukur satingkat kabupatian. Gelar para pangawasana ge lain prabu atawa maharaja deui, tapi cukup adipati. Harita nu jadi pangawasa di Galuh teh Adipati Panaekan (1618 – 1625), putra Prabu Galuh Cipta Permana, nu masih nyakrawati di Gara Tengah. Anjeunna diangkat salaku wadana Bupati Mataram di tatar Galuh. Sedengkeun nu jadi bupati di Kertabumi, nyeta Singaperbangsa (sebut we Singaperbangsa I), putra Prabu di Muntur, nu katelah Dipati Kertabumi III. Puseur kakawasaan Kertabumi di jaman Singaperbangsa I, cenah, geus pindah ka Bojonglopang, Banjar kolot ayeuna, nu matak disebut oge Kabupaten Bojonglopang.

Dina sababaraha sumber disebutkeun yen Singaperbangsa teh adi iparna Panaekan. Tapi mun ditengetan tina silsilahna mah, nu bener jigana Panaekan ka Singaperbangsa teh kapilanceuk. Sabab Singaperbangsa teh putra Tanduran di Ageung, lanceuk Prabu Cipta Permana, ramana Panaekan. Duka mun Singaperbangsa oge nikah ka adi Panaekan mah. Kuring can manggih sumberna.

Dina taun 1625, Sultan Agung mulai ngaluarkeun wacana rek ngagempur puseur kakuatan Kumpeni (VOC) di Batavia, nu tangtuna oge ngalibatkeun pasukan ti tatar Sunda. Hal ieu jadi sumber pacogregan antara Panaekan jeung Singaperbangsa. Panaekan, ceuk sababaraha sumber, sapamadegan jeung Dipati Ukur, nu hayang geuwat-geuwat nyerang samemeh VOC beuki kuat. Sedengkeun nurutkeun Singaperbangsa can waktuna. Anjeunna sapamadegan jeung Rangga Gempol I (Bupati Sumedang, nu oge pamanna), nu leuwih satuju ngawangun heula kakuatan pasukan samemeh mutuskeun perang.

Duka kumaha 'kostelasi' pulitik jaman harita. Nu jelas, eta pacogregan teh tetela ngagedean, tug nepi ka ngalantarankeun tiwasna Panaekan ku Singaperbangsa. Ceuk ujaring carita, sabada ditelasan, layon Panaekan dipalidkeun ka walungan Cimuntur, tur kapanggih di wewengkon Karang Kamuliyan, nu satuluyna dikurebkeun di dinya. Panaekan diganti ku putrana nu katelah Dipati Imbanagara (1625 – 1636).

Serangan wadyabalad Mataram ka Batavia jadi dilaksanakeun dina taun 1628 jeung 1629, nu dua-duana gagal.

Ngaran Singaperbangsa disebut-sebut deui dina taun 1632. Harita Sultan Agung nugaskeun anjeunna jeung 1000 urang rahayat ti Kertabumi pikeun ngamankeun daerah Karawang tina gangguan tentara Banten, sakaligus nyiapkeun logistik dina waktuna serangan ka Batavia nu satuluyna (nu teu pernah kalaksanakeun nepi ka pupusna Sultan Agung). Eta tugas tetela bisa dicumponan kalawan nyugemakeun. Dina taun 1633 Singaperbangsa diangkir ka Mataram pikeun meunang panghargaan ti Sultan Agung mangrupa keris nu ngaranna "karosinjang."

Tah, basa mulang ti Mataram sanggeus narima penghargaan tea, Singaperbangsa boga maksud nyimpang heula ka Galuh. Jigana anjeunna ngaraos sono ka lembur jeung dulur-dulurna di Kertabumi. Kersaning Pangeran, Dalem Singaperbangsa teu kantos mulih deui ka Karawang. Di perjalanan, anjeunna pupus tur dikurebkeun di Galuh. Kalungguhan di Karawang dituluykeun ku putrana nu katelah Singaperbangsa oge (Singaperbangsa II) nu gaduh gelar Adipati Kertabumi IV. Nya ieu nu dianggap Bupati Karawang kahiji dina sajarah resmi, nu makamna di desa Manggungjaya tea.

Jadi nu di Gunung Babakan? Lamun milu kana rundayan carita di luhur, kuat sangkaan yen eta teh makamna Kangjeng Dalem Singaperbangsa nu pupus di Galuh tea (Singaperbangsa I), ramana Singaperbangsa II nu dikurebkeun di Manggung Jaya. Dina sumber nu kakotektak memang teu disebutkeun dimana persisna anjeunna dikurebkeun, ngan ukur aya katerangan pupus tur dimakamkeun di Galuh. Bener henteuna, wallohu alam. Nu jelas, di daerah Banyumas oge (nu notabene baheulana masih kaasup tatar Galuh keneh) cenah aya hiji kompleks pamakaman kuno Panembahan Singaperbangsa. Duka Singaperbangsa nu mana deui, ngan cenah nu eta mah pupusna di jaman Amangkurat I (Sunan Tegal Arum), nu hartina di taun 1650-an.

***

Kiwari jalan Siliwangi dilegaan. Tapi lebah situs makam mah, pamarentah kota teu wani ngaganggu, sanajan ayana dina pengkolan pisan. Duka pedah ngahormat ka situs makam sang Dalem, duka pedah lokasina memang batu nu hese ditugarna. Tapi cenah, aya nu ngadongeng, basa rek nyoba ngagaru batu cadas handapeun makam, beko nu boga kontraktorna ngadak-ngadak macet jiga aya nu metot. Ki mandor nu nganteur kuring oge ngaku kungsi nempo belegedegan singa (singa bener ieu mah) di eta wewengkon peuting-peuting. Bener henteuna duka tah.

Cag!

Basa Sunda Urang Malingping

2009-02-21T20:45:00.000-08:00

Baheula mah, keur anyar datang, sok loba kerang-kerung mun pareng ngobrol jeung urang Malingping teh. Komo nu di pasisian mah, sabab salian ti loba kecap-kecap nu teu kaharti, lentongna oge aneh. Orokaya, jadi hese nangkep maksud omonganana.

Tapi lila-lila mah biasa deui. Ku mindeng tatanya jeung remen ngadenge mah bisa oge geuningan. Malah mun balik ka Bandung atawa Ciamis sok loba nu ngageuhgeuykeun, geus jiga urang Banten cenah. Kutan?

Na kumaha kitu basana? Nya beda we. Munasabah sabenerna mah,da di unggal daerah ge sok pasti boga basa wewengkon masing-masing nu teu kapanggih di daerah sejen. Jadi lain di Malingping atawa Banten bae.

Nu puguh mah, rata-rata urang Malingping mun ngobrol basana kasar, ceuk ukuran urang priangan mah. Basa pamajikan anyar pindah kungsi reuwas pedah aya pamajikan anak buah nu nyebutkeun hulu, lain mastaka, ka manehna. Basa ku kuring dijelaskeun yen memang basana kitu, lain maksud nyinggung, karek ngartieun. Malah sok kagugu mun ngadenge deui teh.

Padahal cenah, aslina basa Sunda mahmemang kitu. Nu hartina egaliter, teu ngabedakeun saha nu diajak ngomong. Ngobrol ka cacah jeung ka menak nya sarua bae. Ayana undak-usuk basa -nu nyababkeun basa aslina karasa jadi kasar /teu nyakola- mah hasil pangaruh basa tatar priangan kaereh ku Mataram.

Tapi teu saeutik oge urang Malingping geus ngarti kana undak usuk basa. Utamana urang puseurna nu kungsi sakola jeung remen hubungan jeung urang priangan pendatang. Sakola memang salah sahiji 'sarana berkembangna' basa nu 'mriangan.' Sabab guru-guruna, utamana guru-guru senior, lolobana memang datang ti tatar priangan, saperti Ciamis, Tasik jeung Garut. Baheula mah can loba urang Malingping asli nu bisa sakola luhur nepi ka jadi guru.

Tah, nu ngartieun mah, mun nyahouen ngomong jeung urang nu datang ti priangan teh sok milu lemes, sanajan ari ngobrol jeung papadana mah biasa bae beledag beledug. Aya oge nu jadi ngadadak mindel. Basa diseleksek, sieun salah omong pokna.

Ku sabab lentong mah hese ngagambarkeunanan, nu bisa dicaritakeun di dieu mah kecap-kecap nu kuring di anggap aneh bae. Urang tataan geura:

Urang Banten, umumna nyebutkeun ka dirina (jalma ka hiji) teh kami. Sedeng ka nu diajak ngobrol dia. Kecap kami, di priangan aya oge, tapi teu ilahar atawa arang langka dipake jang nyebutkeun sorangan. Biasa kadenge teh sok dipake jang nyalin sesebutan diri Pangeran dina khutbah. Sedeng kecap dia mah jigana ngan aya di tatar banten wungkul.

Urang Malingping/Banten oge nyebut akang (milanceuk) teh ku kaka. Akarna mah jigana sarua, neneh tina kecap raka

Tong heran mun urang Malingping remen nyebut burung. Lain hartina nyebutkeun urang gelo, atau nyaritakeu nu teu jadi, tapi burung teh kecap panganteb nu fungsina kira-kira sarua jeung atuh.

“Kadieukeun burung bukuna bade disimpen mah!”

Kecap-kecap sejen:

Lila : kebel
Hese : gati
Da : ja
Ngambek : marah
Jiga : doang
Tara : telok
Tukang : buri
Ribut : haliwuh
Ngobrol : cacahan
Loba gaya : lalagaan
Embung : endung
Sukur : kamayangan
Anjir : bagor
Engke : engkin (ieu mah ilahar di daerah Cianjur, Sukabumi, bogor ge)

Aya oge kecap-kecap nu arang langka dipake ku urang priangan tapi ilahar di Malingping mah:

Geuwat : geura
Lalaonan : Anca
Pisan : Amat
Terus : laju
Hade/Alus : Endah

Aya nu tibalik. Isin, di priangan mah lemes, tapi di Malingping mah kasar. Sabalikna jeung era.

Mun urang malingping nganahakeun (naha bet) cukup ku kecap pan?

“Pan, motorna diparkir di dieu?”

Aya deui nu aneh. Rarangken –na di Malingping mah jadi –an. Mun nyebut pangkasepna teh jadi pangkasepan.

Kahade atawa mangka hade jadi nu hade

Nu aneh deui mun nyebut pamajikan atawa awewe cukup ku ewe bae. Jorang ceuk urang priangan mah. Tapi biasa bae ceuk urang ditu mah.

Jadi tong heran mun hiji mangsa urang Malingping ngomong "pamajikan keur di ewe Lurah" bari kalem-kalem bae. Tong mikir nu lain-lain, da manehna mah keur ngobrolkeun yen pamajikanna keur aya di pamajikan pa lurah. Kitu.

Jengkol

2007-08-24T19:06:00.000-07:00

Duka aya naon dina jengkol. Nu puguh mah kuring sok hese eureun ngahuap mun aya eta kadaharan teh. Rek nu ngora, nu kolot, malah ka sepi-sepi dikaramus. Rek nu atah atawa nu asak (digoreng atawa disemur) teu halangan. Pokona sarupaning jejengkolan kuring mah hobi. Malah aya ojoyna mun dibandingkeun batur jigana: kuring mah dahar jengkol teh teu kudu make sambel bae. Ditambul jeung sangu ge jalan.

Ti leuleutik eta teh. Nepi ayeuna umur meh nincak kapala tilu teu kurang-kurang. Najan ayeuna mah memang teu pati dipupujukeun. Ma’lum euweuh nu ngurusna bujangan mah. Dahar teh sasampakan di nu dagang wae. Padahal apanan arang langka rumah makan atawa restoran nu nyadiakeun eta kadaharan. Peuteuy onaman, nu sarua matak bau, masih loba nu nyadiakeun. Paling-paling semurna nu sok remen kapanggih teh. Baheula mah, basa keur hirup di Bandung kota, sok kalan-kalan ngahaja meuli di Giant BSM. Di beh rak sayuran sok aya dibungkusan paketan. Tangtuna ge rada leuwih mahal batan di pasar. Ngan, kangaranan lalaki jiga kuring, tibatan kukurusukan di Kosambi atawa Cicadas mah puguh we mending meuli di dinya. Praktis. Kungsi eta ge aya nu rada moyok. Basa antri di kasir rek mayar hiji ibu-ibu, jigana teu sadar, ngagorowok kaget basa nempo kuring mindah-mindahkeun balanjaan tina karanjang ka meja kasir sina diitung. “Ih jengki,” cenah. Kuring cuek bae.

Tangtuna ge teu kabeh jiga kuring. Najan teu kurang-kurang nu jengkol mania oge tapi jigana leuwih loba alergi kana eta lalab teh. Khususna awewe. Si Eneng, bebene kuring manten, sok molotot mun kuring geus ngarampa jengkol teh. Kaharti sih. Sanajan enya ngeunah jeung matak ponyo tapi jengkol boga epek khas anu matak teu nyaman: bauna. Saha nu teu apal atuh kana bau jengkol nu matak nyengak kana irung. Salian ti kaambeu langsung tina napas oge epekna teh kana bubuangan, utamana cikiih. Aromana sok napel mangpoe-poe di WC teh. Kungsi ngalaman kajadian lucu perkara eta. Baheula basa PKL keur kuliah di Sumedang dipangmasakkeun ku tuan rumah teh jengkol. Poe kahiji mah euweuh nu wani noel, sabab digebes ku babaturan awewe. “Awas jangan kencing di WC!” ancam salah saurang. Poe kadua, masih keneh jengkol. Kuring mimiti ngawani-wani maneh, dibaturan ku salah saurang. Ancaman barudak awewe teu diwaro. Poe katilu nambahan sababaraha urang nu milu. Poe kaopat jeung satuluyna mah kabeh, nepi ka barudak awewena, dalahar jengkol. Rugi, cenah, bauna kabagean tapi barangna teu ngasaan.

Ari ku resep mah, masing bau-bau ge dihantem bae. Eta ge loba palakiah supaya ngurangan bauna. Anu biasa ngaroko mah sok langsung bae melenyun. Leungit memang bau jengkolna, katutup ku bau bako. Mun aya mah ku bonteng oge lumayan nulung, sanajan sok masih keneh kaambeu. Aya nu nyebutkeun ngaramus beas sajumput. Cenah mah ku ieu mah bubuangan na ge teu pati bau. Kuring mah, kusabab tara ngaroko, sok ngandelkeun peremen bae. Sanajan teu jarang sok kapohoan. Sadar-sadar mun geus nempo batur babalieuran mun keur ngobrol.

Untungna kuring mah can ngasaan jengkoleun. Enya panyakit disababkeun ku ngahadar jengkol. Ulah kahayang mah. Bejana kasiksa pisan kusabab teu bisa kiih. Bisa ge nyeri. Biasana eta teh ngalanggar pantangan. Cenah mah mun ngadahar jengkol teu meunang bareng jeung peuteuy. Atawa mun geus ngadahar nu atah tong ngadahar nu asakna. Bener henteuna duka tah. Nu jelas mah babaturan kungsi keuna ku jengkoleun kusabab ngadahar jengkolna ...sakeresek.

Geus ampir dua bulan ieu, kuring teu mirasa bae dahar. Ngarumas meureun. Pedah jauh ti lembur bari hirup nyorangan, sanajan aya bibi nu mangmasakkeun ge. Karuhan atuh awak ge rada ngorotan. Mangkukna basa papanggih jeung babaturan ge heraneun. “Na karek tilu bulan pindah geus ngabegangan kieu?” cenah. Eta ge enggeus nginum jamu. Kabeneran pernah aya tukang jajamu ngalanto ka kantor. Nya dibere jamu napsu makan. Tapi teu pati ngaruh. Hulang-huleng, ahirna kapikir jurus heubeul: jengkol.

Nu matak, kamari mah pesen ka si bibi: mangnenangan keun jengkol. Balik-balik mawa sepi sakeresek.

Lumayan rada ponyo tah.

Nguseup

2007-05-15T11:07:00.000-07:00

SABENERNA teu pati resep kana ngusep teh. Teu resep malah. Duka da. Padahal pun aki mah jenatna (aki ti pun bapa), manukna tah kana usap-useup teh. Diulik malah ku anjeunna mah. Ti urusan jeujeur, eupan nepi ka kukumbul-kukumbul tara sambarangan make. Kudu maranti, cenah. Mana jang di balong, mana jang di walungan, mana jang di laut. Beda-beda. Di balong ge macem-macem. Kuma gede leutikna, jero henteuna. Kuma jenis laukna deuih. Lah pokona mah kumplit we spesepikasina teh. Malah samemeh anjeunna brek udur mah –dugi ka pupusna, di bumina teh sok bari icalan alat-alat nguseup kenging damelanna.

Pun bapa ge, sanajan teu pati kokomoan teuing, resepeun kana nguseup teh. Babakuna mah ketang kana uras-urus laukna eta mah. Kana miarana. Ti baheula, karesepna ngan kana nyewa atawa ngagade balong. Sanajan asa can kaparengan kaala hasilna ge. Enya, maksud teh bisa ngajual bari kalayan boga bati. Rugi jeung rugi we. Mun teu alatan gemprah paraeh, aya nu maling atawa garing kasaatan. Padahal ari ngabibitan mah tuluy-tuluyan. Malah sok ngorbankeun sagala rupa tateh. Ayeuna ge gawena teh ngan ulukutek we di balong. Kabeneran gaduh balong titinggal pun aki (nu ti pun biang ieu mah), di sisi walungan Cileueur. Mun ditaros obsesina teh ngan hiji: hayang ngabeton balong, cenah.

Tapi da teu nurun ka kuring mah. Teu resep we. Enya kana nguseup. Eta ge ketang teu ari cadu mah. Sakali-kali mah osok oge ula-ilu. Utamana mun dititah ku dunungan. Tuda geus sababaraha kali pareng boga dunungan resep nguseup. Dunungan tea... atuh pikiraneun. Babaturan deuih, sok remen ngarajak. Ongkoh geus jadi kabiasaan di kantor kuring mah mun aya nu meunang promosi atawa mutasi teh sok terus we ditaragih nguseupna. Kabeh daratang. Nya sakali-duakali mah kapaksa we milu. Tamba teu disebut kuper teuing. Da ari eupan jeung jeujeurna na mah tara kudu mawa ti imah ieuh.

Ngan nyaeta meureun ku teu bakat tea, tara we dibere meunang. Sanajan batur-batur haben ngangkat ge ari kuring mah paling copel ngan meunang tilu atawa opat siki. Eta ge nu laleutik. Heran puguh. Enya, sok padahal eupanna sarua, tempat na ge teu beda, da balongna eta-eta keneh. Naha batur meunang ari kuring henteu? Naha ari lauk sok pulah-pilih jelema mun rek ngahakan eupan kitu?

Jigana mah ku tara meunang tea nya tungtungna teu resep weh kana usap-useup teh. Nepi ka ayeuna. Nu matak basa dua minggu kamari aya beja dunungan hayang nguseup di daerah kuring, geuwat neangan alesan supaya teu jadi. Pangpangna bisi manehna kuciwa. Ongkoh barudak sarua deuih euweuh nu tabah kana perkara nguseup teh. Nya kapaksa boboleh. Teu apal tempat nu alus, ceuk kuring ka si KTU. Untung manehna ngarti. Karunyaeun deuih, meureun. Bolay weh.

Tapi basa kamari barudak bebeja rek ngaruseup di Cirata mah, kuring rada obah pamadegan. Lain nanaon: teu kuat ku rudet. Rudet ku masalah nu geus sababaraha minggu ieu asa loba pisan daratang. Pikiraneun. Bari jeung can boga waktu jang ngalelerkeunana. Dipikir-pikir tibatan gering mikiran rurubed mending milu jeung barudak. Sugan we rada kabangbrangkeun.

Nya, gancangna carita, jadi weh kuring milu jeung barudak nguseup. Tempatna teu jauh. Ukur dua puluh menitan ti imah mah. Cenah mah ngaranna teh wewengkon Babakan Garut, masih bagean keneh waduk Cirata. Asupna ka kabupaten Cianjur. Jigana nu mimiti muka eta tempat teh urang Garut pangna dingaranan kitu ge.

Sabenerna taun katukang kungsi oge kuring jeung barudak nguseup di Cirata teh. Ngan harita mah niatna lain ngahajakeun nguseup wungkul, tapi piknik bari arisan ibu-ibu. Pedah bosen cenah unggal bulan di kantor bae. Sakali-sakali mah hayang diayakeun di luar. Nya nu dipilih teh Cirata. Salian teu pati jauh, oge bisa sakalian neangan lauk. Tapi lain Cirata nu ieu. Harita mah Cirata Purwakartana. Nu jalanna ka Cikalong. Tah, keur ibu-ibuna arisan bari balakecrakan, bapa-bapana ngaruseup.

Ari ayeuna mah beda. Niatna memang bener-bener rek nguseup. Nu matak nu arindit teh lalaki wungkul. Aya dalapan urang, katambah si Andri bungsuna Mantri. Alusna mah cenah indit teh nyubuh, ngarah jam genep geus bisa tagen di ditu. Ngan kusabab marake jam karet tea, rada kabeurangan. Tabuh satengah salapan karek nepi ka sisi situ. Sanggeus lima menit naek parahu, narepi we ka panguseupan.

Horeng di panguseupan teh geus sadia lima nepi ka genep rakit nu di luhurna dijieun saung-saung. Nya di eta saung nu ngaruseup teh nagenna. Basa kuring jeung barudak daratang, didinya geus nyampak sababaraha urang. Cenah mah aya diantarana nu geus dua poe di dinya. Hanjakal keur sepi, ceuk nu saurang.

Sanggeus milih rakit, nya langsung we nagen di posisi masing-masing. Nyaan tiis geuning. Meunang lauk leutik keur mimiti, tuluy kadituna nyamos. Nepi ka jam sabelas ngan nambahan dua siki deui. Sarua lauk leutik. Pas di gebluskeun kana korang langsung moncor deui. Tuda jaringna garede teuing. Ngalieuk ka batur, teu beda. Kesel, lapar, katambah mimiti karasa panas, direrema ku murak heula timbel. Geus kitu mah, nagen deui. Ari barudak tuluy ngacaprak silih poyokan bari tingirihil saleuseurian.

Nepi ka jam dua ngan nambah deui hiji nila sagede ramo, pleus tilu lauk leutik. Geus weh, kadituna mah euweuh nu noel-noel deui. Kesel nungguan, tuluyna mah ngagoler we luhureun rakit. Sakali-kali ngengklokan barudak nu tingcakakak. Ongkoh kalah tunduh. Jam satengah opat nu parahu nu neang datang. Tapi ceuk barudak engke wae jam lima, panasaran keneh cenah. Heug, ceuk kuring.

Tapi nepi ka jam lima angger wae. Tungtungna mah sapuk naraek. Basa beberes, kakarek engeuh sendal kuring euweuh sabeulah. Jigana ragrag tina rakit. Duka tuluy teuleum duka palid. Walhasil, balik nyeker. Untung Mantri haat mere sedal swalowna. Keun bae abdi mah nyandak sapatu, cenah.

Balik nguseup teu mawa lauk mah asa teu pantes. Ongkoh ki Oter mah diancam ku pamajikanna, mun teu mawa lauk tong balik cenah, tungguan we laut. Tungtungna mareuli dua kilo sewang ka bandar.

Di jalan, barudak nanya: “minggu enjing bade ngiring deui pa?”

Teu ah. Mending ngeblog! He...

Kulan, Bobos?

2007-05-12T20:51:00.000-07:00

Teuing tas ngadahar naon, si E teh ti isuk-isuk geus ngacaprak. Ti barang datang ka kelas, teu eureun-eureun manehna ngan ngacacang wae. Bari nu diomongkeuna teh teu puguh alang-ujurna.

Mabok sugan? Tapi sidik henteu. Panonna biasa wae, teu beureum teu sing. Malah cenghar pisan. Teu jiga jalma keur teler. Ongkoh deuih, da sanajan kaceluk jalma tukang jail ge, tara manehna mah kana unam – inum teh, ari lain nginum cikopi kabeukina mah. Atawa kasambet? Henteu deuih. Sorana angger sora manehna. Teu ngadadak ngagerem atawa cicirihilan, jiga sora-sora jurig di tipi. Leumpangna oge sabihara-bihari, teu jaregjreg.

Estu euweuh nu beda tina sareat mah.

Tapi naha kunaon bet kalakukanna jadi jiga nu kurang saeundan kitu. Boa-boa.... Ih bit ketang. Teu hade ngadoakeun goreng babaturan teh. Dosa ceuk aki Udin ge, inget keneh kuring mah. Kunaon atuh maneh teh E?

Ari nu diomongkeunana titatadi teh ngan dua kecap. Enya ngan dua kecap-dua kecapna. Bari jeung rada saru deuih. Punten we da kitu kanyataannana, rek di genti da bisi teu nyambung. Arek teu disebutkeun da eta nu masalahnya. Euh maksud teh, nu diomongkeunana teh kecap: “Kulan, Bobos?”, cenah. Ti isuk-isuk nepi ka arek bubar ngan eta-jeung eta we. Bari terus cakakak-cakakak seuri nempo batur ngahuleng teu ngarti teh.

Nu karunya mah Neng A, anu nanya sabener-bener, “E, ari maneh Padaherangna dimana?” kalah dijawab “Kulan, bobos?” cenah. Atuh, jelema anu sakitu seriusna dijawab teu nyambung kitu, nya bek we ambek. Beungeutna baeud nepi ka bubaran. Padahal satadina mah maneh na teh nanya teh nembongkeun aya perhatian. Karunya meureun, pedah geus tilu taun di indit ti Padaherang sakola ka Ciamis, si monyong teh can kungsi kabejakeun aya awewe anu resepeun. Kari-kari aya anu nanya sabageur-bageur kalah dijawab kitu. Nya aruh saha nu teu nyeri hate. Ongkoh deuih da manehna mah teu rumasa tas bobos. Enya ge tadi sakali, pan ngahaja nyumput heula ka tukang, nguliwed. Atawa apaleun kitu?

Aya deui, jang Ab. Jigana manehna keur pararusing pedah motorna tas ditilang pulisi. Mangkaning engke teh geus jangjian rek ulin jeung nyi M ka Tasik, beuh .. pastina ge bakal ngambek tah si kumpay teh. Teu aneh mun ti barang datang teh manehna ngan jamedud we di bangku tukang. Euweuh nu daek ngabaturan ka manehna mah da sok ngahegak mun keur kitu teh. Atuh basa si E jol ngadeukeutan bari ngomong nu dua kecap teh langsung we rumpu-rampa neangan jang babukeun. Untungna we si E kaburu lumpat, jadi teu kungsi terjadi “perang saudara”.

Tah anu lucu mah jam terahir. Basa pas pelajaran pisika. Guruna pa S katelah tukang heureuy. Harita teh keur nincak bahasan teori ‘atom.’

“Jadi,” terang pa S, “atom teh berasal dari kata atomos. Ditemukan pertama kali oleh orang Yunani bernama Demokritos. Tapi da teu sawios-wios. Teu nuju nyeri waos. Mung memang teu gaduh artos. Kumaha kahartos?” cenah. Heureuy ti dituna mah.

Ana celengkeung teh si E ti tukang (bari jeung rada dipengkek, da apal sanajan resep heureuy ge pa guru teh katelah rada galak).

”Kulan, bobos?” cenah. Aya ku nyambung.

Atuh ger sarerea sareuri. Kuring sorangan nu ti tatadi ngabandungan kalakuan eta budak tangka cireumbayan tah.

Ari pa S kalah rungah-ringeuh. Jigana teu pati kadangueun tah caritaan si E teh. Ongkoh teu terangeun ti mimitina deuih.

: Panineungan waktos SMA di Ciamis. Ieu carios teh, sanajan rada diropea deui, leres-leres kantos kaalaman. Hapunten kanu namina kasebat. Sanes bade nanaon, ieu mah estu ukur kanggo ’nostalgia.’ Mudah-mudahan kamanah. Hehe.

Kanggo E, ”dimana maneh ayeuna euy?”

Genti Pingping

2007-05-11T19:01:00.000-07:00

IEU mah ceuk kang Didin, saurang gegedug LSM di Bandung. Harita, duka keur dina riungan naon, kuring, kang Didin jeung sababaraha urang deui guntreng ngarobrol. Tina urusan lingkungan, duka saha nu ngamimitian, der jejer catur teh los-los kana masalah ‘kejantanan.’

“Di BIB (Balai Inseminasi Buatan) Lembang mah, sapi teh sok diparaban jukut kiurat,” ceuk kuring. “Nu matak jaluna teh kuat dikawinkeun unggal poe ge.”

“Lamun ka jelema kumaha tah?” salah saurang nanya.

“Ceuk urang dinya mah cenah alus. Harita ge peserta studi banding teh nu geus karolot mah loba nu panasaran marawa sakeupeul sewang,” ceuk kuring deui.

“Lah, hayang sumanget deui mah gampang atuh,” tempas kang Didin, ujug-ujug.

“Kumaha carana?” nu sejen reang.

“Tinggal genti pingping,” cenah bari tuluy ngabarakatak.

Sambel Jaer

2007-05-06T03:06:00.000-07:00

SAMBEL JAER

NAON ari sambel jaer teh? Tetela cenah, eta teh ngaran kaolahan urang Sunda (utamana nu hirup di pasisian) jaman baheula. Teu baheula-baheula teuing ketang, paling itungan lilikuran taun katukang. Boa di pelemburan mah ayeuna ge masih aya keneh nu sok pirajeunan nyieun. Na jiga kumaha rupana jeung kumaha nyieunna? Tangtuna wae tina lauk, hususna lauk jaer (nu ngaleuya di pakampungan mah). Jaerna alusna mah kudu nu dadak, meunang nguseup atawa nyair.

Tah si lauk Jaer teh langsung we dikurusukeun kana ruhak. Tangtuna ge samemehna dibedelan heula. Ngan teu kudu disisit. Teu kudu diuyahan deuih. Mun geus katingali asak, kakarek sisitna nu harideung dikerik. Tuluy nyiapkeun samarana kayaning cikur, jahe, bawang beureum, uyah, cengek jeung gula. Eta samara teh laju direndos dihijikeun jeung jaer meunang meuleum tea bari jeung dikucuran cai saeutik. Jadi weh. Kumaha rasana? Leuh, cenah, sanajan rupana teu pikauruyeun ge (kataksir rada ledeg), ceuk nu kungsi ngarasaan mah, pelem pisan. Ngadaharna dicocol ku sangu poe atawa bisa langsung digalokeun kana sanguna. Kutan?

Barudak ayeuna tangtu jarang, malah jigana moal aya, nu nyahoeun kana kaolahan model sambel jaer. Dalah kuring ge, nu kungsi gede di pasisian, asa inget-asa henteu. Padahal keur kolot-kolot baheula mah, aeh budak baheula maksudna mah, enya, nu jaradi kolot ayeuna, eta teh sasat deungeun sangu primadona. Mun balik sakola teu nyampak deungeun sangu teh, tara sing pundung jiga barudak ayeuna, deker we nguseup. Ngaracik sambel jaer. Kumaha ari etim peda, tutug oncom, pencok hiris jeung angeun turubuk? Nyeta sarua bae. Eta rupa-rupa kaolahan teh geus arang langka kapanggih ayeuna mah. Tangtuna ge kusabab geus jarang dijarieun. Tutug oncom onaman masih osok keneh loba disayagikeun di restoran-restoran Sunda.

Naon deuih cenah ieu teh ngadon nyaritakeun dahareun? Hih, lain nanaon. Pedah we dua minggu katukang pareng manggih buku Kang Asep Ruhimat –- saurang guru tur pangarang Sunda nu kungsi dileler anugrah R. Soeria Diradja (2003/2004) jeung Setia Permana Award pikeun karya-karya tulisna-- di Gramedia, nu judulna Sambel Jaer: Tali Paranti, Palakiah, Kaolahan & Pantangan Urang Sunda. Ku sabab panasaran ku judulna der we dibeuli. Lumayan murah, ngan 17.500-an. Pareng dibaca, horeng resep oge geuning.

Naon bae cenah eusina buku teh? Lumayan leubeut. Utamana loba nyaritakeun gambaran kahirupan urang Sunda di pasisian, puluhan nepi ka lilikuran taun katukang. Hususna di wewengkon priangan wetan, kayaning Ciamis, Tasik, Garut jeung sabudeureunana, lembur asal nu ngarangna. Sok sanajan bisa wae hal nu dicaritakeun teh kapanggih oge di wewengkon Sunda sejenna.

Salian ti nyaritakeun rupa-rupa kaolahan jaman baheula, samodel nu ditataan tadi, dina eta buku urang bakal manggih rupa-rupa tatali paranti (tradisi) kolot-kolot urang jaman harita, nu bisa jadi ayeuna mah geus loba dipohokeun. Model kumaha carana ngurus orok, ti lahir nepi ka diajar leumpang. Rupa-rupa kapamalian, samodel budak parawan tong nguah cowet bisi meunangkeun aki-aki. Aya oge palakiah-palakiah, nu sanajan teu asup akal tapi loba maunatna. Contona barudak jaman baheula mah mun ulin teh sok mesakan batu laleutik tilu siki. Eta teh cenah malar teu hayang ngising teu pupuguh. Bab Totonden mah nyaritakeun kapercayaan urang lembur ngeunaan rupaning tanda-tanda alam, samodel naon hartina mun aya caringin rungkad, jeung sajabana.

Aya ge bab-bab nu nyaritakeun model-model imah jeung perwatekan kuda. Bisa jadi nu ieu mah geus moal kapanggih dina kaayeunaan. Enya, ayeuna mah apanan geus arang model-model imah julang ngapak atawa badak heuay. Capit gunting atawa tagog anjing. Oge, geus tara aya nu pirajeunan ngingu kuda, ari lain rukang delman mah. Tuluy aya oge bab nu nyaritakeun karamean nyanghareupan bulan puasa di pilemburan, ti mimiti kuramas nepi ka lebaran.

Bab Ngala Lauk jeung Rupaning Kaulinan mah nyaritakeun kabiasaan barudak jaman baheula. Samodel, naheun bubu jeung ngabungbun. Atawa kaulinan baren jeung gobag. Kuring sorangan masih ngalaman kana dua kaulinan eta mah. Sok resep mun pasosore, samemeh ka masjid, maen gobag di jalan aspal hareupeun imah. Balik-balik tangka ngoprot kesang.

Horeng bener dunya teh teu angger. Salawasna barobah. Nu baheula jadi kabiasaan, ayeuna mah geus beda deui. Kitu satuluyna. Ngan sabisa-bisa urang teh tong gampang teuing pareumeun obor, mopohokeun nu geus kaliwat. Sabab eta teh jati diri urang. Nu geus ngabentuk urang jadi hiji bangsa anu mandiri. Nu beda ti nu lian. Sanes kitu?

Nu matak mangga geura parilarian tah buku!

Hayu Cuang Nyabu

2007-04-28T09:43:00.000-07:00

HAYU CUANG NYABU

Aya Dina Kumis Deui

Aya kutu teuing ku mahiwal. Manehna hayang nyayang jeung bumetah dina bubuluan sakur artis jeung tokoh-tokoh kawentar. Sanajan hese beleke, ahirna eta kutu teh bisa nyayang dina ...kelek Mike Tyson.

Tapi sabada sababarahan poe manehna nyayang dina kelek Mike Tyson, eta kutu teh ngarasa teu betah, lantaran kelek Mike Tyson mah pohara bauna. Saterusna eta kutu gura-giru pindah, sarta ku sumanget keung akalna, eta kutu teh ahirna nyayang dina ... kumis Charles Bronson.

Ngan edas we, abong Charles Bronson mah bentang film kasohor jeung loba kabogohna, eta kutu teh ngalaman tibabaranting sababaraha kali, lantaran Charles Bronson mindeng pisan silih cium jeung bentang-bentang film awewe sejenna. Ahirna eta kutu teh ngarasa teu betah, sarta manehna usaha satekah polah hayang pindah tina kumis Charles Bronson kana ... “taeun” Madonna.

Tapi orokaya, sanggeus eta kutu bisa nyayang dina “taeun” Madonna, hiji mangsa manehna nundutan nepi ka sarena. Dina mangsa manehna keur sare, Madonna teh tepung jeung Charles Bronson lantaran maranehna boga jangji rek sare bareng.

Ari kutu tea, manehna pohara kagetna waktu hudang sare horeng manehna jadi aya deui dina ... kumis Charles Bronson?

KAPIASEM? Tangtos. Eta guguyon teh aya dina buku enggal kang Opik (Taufik Faturahman), si raja guguyon tea, nu judulna angger Sabulangbentor, ngan ayeuna mah ditambuhan angka 2 jeung 3 deuih sakaligus, kumargi Sabulangbentor nu munggaran mah apan tos medal sababaraha taun kapengker. Naha meuni langsung dua jilid? His, sanes ngan ukur dua malah, cenah mah aya dugi ka tujuh jilidna. Leuh!

Eta guguyon-guguyon teh kenging ngabeundeulkeun tina rubrik nu judulna sami nu unggal Minggu midang dina koran Galamedia. Ceuk kang Opik dina Panganteurna, basa buku Sabulangbentor kahiji medal teh saleresna mah bade langsung disusul ku jilid ka-2na. Ngan cenah, bundelan naskahna teh ujug-ujug leungit duka kamana. Anyar-anyar, eta bundelan naskah teh kapendak deui basa edisi rubrik Sabulangbentor nincak kana nomer 300. Atuh mokaha basa diranjing-ranjing teh cukup jang 7 jilideun. Nya sakalian we cenah.

Ari diterbitkeunna angger keneh ku Geger Sunten. Tiap jilid dipasihan judul nu mandiri. Jilid kadua dijudulan “Tabib India”. Jilid katilu “Ngeunah Keneh Inem.” Jilid kaopat “Festival Dosol”. Jilid kalima “Humor Persib jeung Homur Mengbal Sejenna”. Jilid kagenep “Humor-Homor Politik”. Nu katujuh mah “Kumpulan Tarucing jeung SMS lucu”. Jilid kadua jeung katilu medal bulan Januari 2007. Pami ti jilid kaopat depi katujuh mah duka tos medal duka teu acan, dan can katingali di Gramedia.

Eusina tangtos pikalucueun. Aya nu ukur matak mesem, aya oge nu nepi ka matak nyeri kulit beuteung. Gayana angger gaya heureuy khas kang Opik, anu basajan, sakarep-karep (ngaranna ge sabulangbentor), sakapeung cerdas, tur rada-rada cawokah, model nu ditulis di luhur. Buku jilid kadua midangkeun 178 guguyon sedengkeun jilid katilu meungkeut 122 guguyon. Jejerna rupa-rupa. Aya heureuy ngeunaan urang-urang Sunda (nu ti kampung tangtuna ge) nu sok pabaliut palebah ngomong mamalayuan (nu kieu mah ku nu nulis ge remen kaalaman). Aya oge heureuy-heureuy ‘santri,’ model naon cenah bedana telepisi jeung pangajian. Jawabna telepisi mah “Dunia dalam Berita” ari pangajian mah “Aherat dalam berita”, jeung sababaraha hiji deui. Ari humor-humor cawokah mah biasa diteundeun di bagian panungtung.

Lah pokona mah cobian we geura pilari ku nyalira. Pami tos kenging, hayu cuang sasarengan nyabu ... langbentor!

Kedah Aya Frank Lampard

2007-04-20T03:47:00.000-07:00

KOCAPKEUN sanggeus puteran liga Inggris taun 2006/2007 rengse, sakumaha nu geus diiburkeun samemehna, Jose Mourinho memang ahirna ninggalkeun kleupna, Chelsea, nu geus salila tilu taun dimenejeran ku manehna. Weuh, tangtuna ge loba pamilik kleup Eropa nu ngahiap-hiap. Rek teu kitu kumaha tuda, Jose Mourinho teh kawentar hiji palatih anu jenius tur boga leungeun anu tiis (bertangan dingin maksudna mah). Eta buktina, Chelsea anu samemehna can kungsi juara Liga Premiere, ti saprak dimenejeran ku manehna mah dadak sakala jadi hiji kleup anu dipikagimir sa-Eropa. Atuh Alex Ferguson palatih Manchester United (MU) jeung Arsene Wenger palatih Arsenal anu salila ieu piligenti ngarajaan Liga Inggris, dijieun teu bisa hojah. Dua taun tuluy-tuluyan Chelsea jadi jawara Liga Premiere kalayan poin anu anggang pisan jarakna. Ngan taun 2007 wungkul nu rada ragot teh, eta ge pedah loba pamaenna anu tatu. Nu matak, kleup-kleup nu baleunghar di Eropa kayaning ti Spanyol atawa Itali mah langsung wae paheula-heula ngajukeun tawaran paluhur-luhur.

Ngan nu matak helok nyaeta kleup nu dipilih Kai Mourinho pikeun jadi pangentreupanana dina musim taun 2008. Lain Real Madrid atawa Inter Milan anu ti samemehna ngudag-ngudag bari ngajangjikeun bayaran anu luhur, tapi estu kleup anu jauh tina panyangka balerea. Enya, Mourinho teh geuning kalah milih pindah ngalatih di Indonesia, tur kleup nu dipilihna teh taya lian ti: Persib, maung Bandung tea. Atuh geunjleung sakabeh ‘insan permengbalan sa-dunya.’ Loba nu manghanjakalkeun kaputusan Mourinho nu kalah pindah ngalatih ka hiji nagri anu prestasi mengbal tim nasionalna ge teu menyat-menyat. Aya nu nyangka yen Mourinho prustasi pedah salila di Chelsea dibaeudan bae ku Abramovich anu medit dina meuli pamaen. Aya oge nu nyebutkeun yen Mourinho geus koslet uteukna pedah salila tilu taun ngalatih di Liga Inggris tuluy-tuluyan meunang ‘tekanan’ anu kacida beuratna.

Tapi teu saeutik oge ketang, khususna jelema-jelema anu tara suudon, anu nyambut positip kana kaputusan Mourinho teh. Maranehna nganggap yen kaputusan Mourinho teh sanajan kawilang nekad tapi mangrupakeun hiji hal anu positip tur ngabuktikeun yen manehna teh jelema nu ‘haus tantangan’. Enya teu beda jeung basa Valentino Rossi mutuskeun pindah ti Honda ka Yamaha, apanan jiga kitu tah. Hayang neangan tangtangan anyar cenah, ceuk si Doktor. Ngan meureun pedah ieu mah ekstrim pisan. Ti hiji kleup beunghar di nagri nu kompetisina paling alus sadunya ka hiji kleup di hiji nagara berkembang anu prestasi mengbalna teu weleh matak ngaheruk. Tapi justru eta teh cenah bisa jadi ‘ajang pembuktian’ jang Mourinho. Mun pareng bisa mawa Persib muncul jadi hiji kakuatan di Asia atawa dunya tangtuna ge bakal nyababkeun ngaran Mourinho beuki seungit tur nunjukeun yen kamampuh dirina salaku palatih teh memang bener-bener ‘brilian’, lain pedah ngandelkeun pamaen bentang wungkul. Enya, jiga basa Guus Hidink bisa mawa kasebelan ...eh kasabelasan Korsel jadi juara opat di Piala Dunia 2002 apanan matak gehger jalma sadunya. Nu nyababkeun Guus Hidink dipuja-puja pisan di Korea mah. Naha mana nu bener? Duka tah. Can aya nu bisa mastikeun, sabab Mourinhona ge jiga nu teu puruneun ngabahas sual eta.

Hal nu matak panasaran oge nyaeta naha milihna teh ka Persib, lain ka... Persija, misalna, anu biasana wani mayar leuwih gede jaba salaku kleup ibukota. Apanan Chelsea ge, enya kleup manehna manten, markasna teh di London, ibu kota Inggris. Atawa naha teu milih Persik, anu jadi juara dina taun 2006, atawa kleup-kleup sejenna. Naha kudu Persib? Kateuing atuh. Apanan nu ngarang ge geus nyebutkeun yen kunaon pindah ngalatih ka Indonesia ge can bisa kajawab, komo pertanyaan nu ieu. Tapi ketang hayang-hayang teuing mah keun bae rek dibejakeun saeutik rusiahna. Cenah ieu ge, duka bener, duka henteu. Ngan pedah ieu inpo teh bejana meunang ti ‘orang dalam anu terpercaya’ nu nyaho pisan kana proses kumaha ngusahakeun Mourinho pindah ka Persib. Tapi ieu mah rusiah pisan. Omat teu menang diucah-aceh sambarangan, bisi kadengeeun ku jinisna sok komo kadengeeun ku The Jack mah. Kitu tah implik-implikna beja teh. Duka pedah naon.

Sabenerna, cenah, ieu kabeh teh alesanna mah aya hubunganna jeung kabeuki Mourinho anu rada mahiwal. Enya, bejana Mourinho teh mun dahar kudu wae make ... kurupuk. Salila ieu pihak kateringna Chelsea teh unggal bulan ngimpor kurupuk ti Indonesia husus yang Kai Jose teu kurang ti dua ton. Ngan kusabab dibawana jauh tea, bisa jadi loba teuing kaangin-angin di jalan, nepi ka London teh kurupukna sok loba nu geus laleuleus. Atuh teu kapuluk. Mun geus kitu Kai Jose sok tara ngeunah dahar. Tungtungna murang-maring, mindeng ambek-ambekan ka wartawan. Naha ti iraha Mourinho nu urang Portugal beukieun kana kurupuk? Duka tah perkara eta mah, nu ngarang ge can kapikiran. Ngan ameh tereh, percaya we yen bener Jose Mourinho teh kabeukina kurupuk. Bisi teu percaya, tanyakeun we langsung ka jinisna.

Tapi pan kurupuk mah dimana-mana ge aya, lain di Bandung wungkul? His, lain kurupuk sambarangan ieu mah. Cenah mah kurupuk kalandep Kai Jose teh ngan kurupuk ti Cikoneng. Enya Cikoneng Ciamis tea geuning. Cenah Gurihna matak Mourinho deudeuieun. Naha kudu kurupuk Cikoneng? Hih, ceuk nu ngarang ge tong loba teuing tatanya ke nu maca beuki lieur, komo nu ...ngarangna. Geus we anggap kitu. Moal matak nambahan hutang ieuh.

Tah, kusabab nu pangdeukeutna ka Ciamis teh iwal Bandung, nya ahirna Mourinho teh milih jadi palatih Persib. Jadi bisa ngagares kurupuk Cikoneng saseubeuhna jeung dijamin rarangu keneh deuih. Mokaha, hal ieu teh atuh teu wudu matak atoh pikeun para bobotoh jeung umumna urang bandung mah. Saha nu teu atoh atuh kasabelasan kareueusna ayeuna menangkeun palatih kelas dunya. Tangtu wae harepan bakal juara Ligina tur bisa ‘berbicara di tingkat Asia’ teh bakal jadi kanyataan ayeuna mah. Piraku sugan ari dilatih ku palatih kelas dunya mah.

Orokaya, sanajan manehna boga alesan pribadi pikeun pindah ka Bandung, Kai Jose teh geuningan angger menta bayaran anu lumayan gede. Manehna ngajukeun sarat nyeta gajihna kudu leuwih atawa minimal sarua jeung waktu di Chelsea. “Piraku wae atuh turun pa Wali,” cenah. “Apanan UMR ge unggal taun teh naek,” tambahna. Ku sabab kacintana ka Persib nu kacida gedena, tur mikir yen tawaran jiga kieu teh moal datang dua kali, tungtungna Pa Walikota nyanggupan kana kahayang si menir Parasman. Ngan basa diitung-itung ku biro keuangan manehna ngarenjag sorangan, sabab gajih Kai Jose teh geuningan sed saeutik jeung jumlah APDB kota Bandung ... satauneun. Beu!

Bingung ku hal eta tuluy Pa Wali ngayakeun konsultasi jeung anggota Dewan. Teu disangka-sangka para angota dewan anu tetela kabehna ge bobotoh panatik teh malah nyaluyuan tur ngarojong pisan kana usulan Pa Wali. Eta cenah APBD beak teu jadi masalah nu penting Persib nanjung. Para inohong jeung masarakat kota oge ngarojong pisan kana hal eta teh. Keun bae sual pangawangunan mah cenah, masarakat sapuk rek kerja bakti atawa swadaya. Para pagawe nagri, pemda, anggota dewan malah Pa Walina sorangan kabeh ihlas teu digajih. Maranehna kabeh ‘rela berkorban’ pikeun cita-cita Persib unggah ka ‘pentas dunia.’

Singget carita, Kai Jose Mourinho resmi jadi palatih Persib. Ngan kusabab waragadna geus beak jang mayar Kai Jose tea, para pamaen Persib anu dipilih teh pamaen lokal bae. Eta ge husus anu rido teu digajih atawa digajih sawilasana. Da anu butuheun keneh ku bayaran mah ngahaja disina pindah. Atuh pamaen asing nu samemenha maen di Persib kayaning si Barkowi, Cabanas, Bekamenga, Nyeck jeung si Jimenez betah-betah keneh ge milih balik ka nagrina sewang-sewangan. Teu puruneun maranehna ari kudu teu dibayar mah. Heu, da kaharti deuih, maenya cicing di lembur batur bari teu boga panghasilan, kateuteuari. Nya antukna nu nyesa teh ngan para pamaen lokal wae ditambah sababaraha hiji ti junior. Tapi hal eta teu jadi halangan jang Kai Jose. Kangaranan palatih propesional mah kudu bisa gawe dina sagala kondisi. Kai Mourinho jangji rek ngetrukkeun sakabeh kabisana pikeun mawa Persib kana kajayaan.

Ti poe ka poe menir Jose mere program-program pelatihan jang sakabeh pamaen. Pangalamanna nu kungsi ngalatih kleup-kleup gede kayaning Porto jeung Chelsea dipake dasar pikeun nangtukeun strategi nu diterapkeun di Persib. Ngan orokaya, tetela teu sagampang anu diharepkeun. Masing palatihna jenius ge ari bahanna sakitu-kituna mah geuning teu loba mawa perkembangan.

Atuh basa prung Liga Indonesia musim 2008 ge permaenan Persib tetela teu pati nyugemakeun. Nepi ka tujuh kali pertandingan mimiti, Persib ngan ukur bisa dua kali meunang, eta ge di kandang, tilu kali drow, sesana eleh. Atuh posisina ge ngan aya di papan tengah. Tangtuna ge ieu teh loba nimbulkeun protes ti masarakat nu kabeh ge ngarahna ka Pa Walikota. Eta meureun pedah dana APBD nepi ka koredasna apanan jang ngabiayaan Kai Jose teh. Sanajan mimitina sumanget pisan ngarojong, tapi ari geus prakna mah geuning loba oge nu ngarasula.

Mimitina mah Pa Walikota teu pati malire kana hal-hal eta. Anjeunna ngama’lum yen palatih anyar kudu adaptasi heula. “Sabar,” kitu papatahna ka rombongan panglima Viking nu datang unjuk rasa, “kabeh ge butuh waktu.” Tapi lila-lila mah Pa Walikota hareudang oge. Komo deui pada nyundutan ku pagawena nu reang pedah geus tilu bulan teu meunang gajih. Najan kitu, Pa Wali teu wani gagabah. Bubuhan urang Sunda nu handap asor, tur nyaho adat Kai Jose anu gede ambek, Pa Wali ati-ati pisan dina nunjukeun kateusugemaanana.

Dina hiji sore, bari merhatikeun para pamaen nu keur latihan, Pa Wali nanya ka Kai Mourinho.

“Cing Kang Mo, kumaha ieu teh kinten-kintenna Persib tiasa janten juara moal musim ieu?” ceuk Pa Wali ngolongan.

“Tiasa bae Pa Wali,” tembal Kai Jose kalem, “asal ... kedah aya Frank Lampard,” cenah teu riuk-riuk.

Pa Walikota ngan ukur bisa ngaheneng.

Pasir-Pasir nu Ngeplak Lir Gajah Putih

2007-04-13T19:30:00.000-07:00

Ernest Hemingway

PASIR-pasir cadas peuntaseun tegal Ebro manjang tur ngeplak bodas. Di peuntaseun nu beh dieu, taya pisan tempat linduh atawa tatangkalan, tur eta stasion aya di antara dua garis erel nu kapentrang ku panonpoe. Teu jauh ti stasiun katembong kalangkang haneut hiji wangunan gedong, jeung kere nu dijieun tina untunan manik-manik awi ngagantung meuntasan lawang panto nu ngabalungbang nuju ka bar, malar nyieuhkeun laleur. Si urang Amerika jeung wanoja nu ngabarenganana diuk dina hiji meja di tempat nu iuh luareun gedong. Poe mungguh moreret, tur kareta ekspres ti Barcelona baris datang opat menit deui. Kareta teh bakal eureun di eta stasiun salila dua menit samemeh neruskan deui lalampahanna ka Madrid.

”Ngaleueut naon nya enakna?” si wanoja nanya. Manehna muka topina tuluy diteundeun luhureun meja.

”Panas pisan poe teh,” ceuk si lalaki.

”Bir we.”

”Dos cervezas,” si lalaki nyarita ka tukangeun kere.

”Gelas ageung?” saurang awewe nanya ti lawang panto.

”Sumuhun. Dua gelas ageung.”

Si awewe mawa dua gelas bir jeung dua tilam. Manehna neundeun tilam jeung gelas bir di luhur meja bari merhatikeun nu duaan. Si wanoja mindahkeun teuteup ka pasir-pasir cadas. Pasir-pasir teh ngeplak bodas katojo panonpoe tur taneuhna katempo coklat gersang.

”Tingal tuh pasir cadas, ngeplak tur manjang, siga gajah bodas,” manehna ngomong.

”Akang mah can kungsi nempo aya gajah warna bodas,” si lalaki nginum birna.

”Moal akang mah.”

”Mungkin wae,” si lalaki nyarita. ”Yen ceuk Nyai akang can pernah nempo, lain hartina akang moal pernah nempo.”

Si wanoja neuteup kana kere manik-manik.

”Tingal, kere teh ditulisan,” ceuk manehna. ”Naon hartosna nya?”

”Anis de Toro. Eta teh sabangsa minuman.”

“Nyobian tiasa teu?”

Si lalaki ngagero ”hey” ka beh tukangen kere. Si awewe kaluar ti bar.

”Sadayana opat real”

”Nyungkeun Anis del Toro, dua”

“Dicampur ku cai?”

“Bade dicampur ku cai?”

“Duka atuh,” si wanoja nyarita. “Enak kitu pami dicampur cai?”

“Sumuhun.”

“Dupi bapa minumanna bade dicampur ku cai?” tanya si awewe.

”Enya, dicampur cai.”

“Rasana siga licorice,” ceuk si wanoja bari neundeun gelasna.

“Memang siga kitu sadayana ge.”

“Uhun,” ceuk si wanoja. “Sadayana siga licoricie. Komo nu tos lami diantosan ku akang mah, siga absinthe, anggur Perancis.”

”Enggeus atuh.”

”Akang nu ngamimitian,” ceuk si wanoja. “Padahal tadi abdi nuju ngaraos bungah. Abdi teh nuju ngararaoskeun waktu-waktu nu pinuh kabungahan.”

”Enya... enya. Akang can rengse tadi. Maksud akang teh itu pasir nyaan katingalina jiga sakumpulan gajah bodas. Waas nya?”

“Uhun waas.”

“Akang hayang nyobaan inuman nu enggal tea. Pan tadi teh kitu sanes? Urang teh keur ningalikeun itu pasir jeung nyobaan inuman enggal.”

”Uhun asana mah.”

Si wanoja neuteup ceuleuyeu ka lebah pasir.

”Pasir nu waas,” omongna. ”Teu patos siga gajah bodas sih. Maksadna warnana di antara tatangkalan.”

“Bade nambih minumanna?”

“Uhun.”

Angin haneut niup kere ka beh meja.

“Birna enak jeung tiis,” ceuk si lalaki.

“Uhun seger pisan,” ceuk si wanoja.

“Sakadar operasi anu leutik tur aman, Jig.” Si lalaki nyarita. ”Sanes dioperasi enyaan.”

Si wanoja mindahkeun teuteup ka handap, kana tatapakan suku meja.

”Akang nyaho, nyai moal nolak. Ieu mah sanes nanaon. Ukur mukakeun sina asup hawa.”

Si wanoja teu lemek.

”Akang rek nyarengan kaditu jeung bakal nungguan nepi ka rengse. Ukur mukakeun lolongkrang hawa, satuluyna mah biasa deui saperti bihari.”

”Teras pami tos kitu urang bade naon?”

”Saterusna nya urang bakal biasa wae. Saperti samemehna.”

”Naha akang gaduh pikiran kitu?”

”Ngan eta nu ngaganggu urang. Ngan eta nu ngajadikeun urang teu bagja.”
Si wanoja neuteup kana kere manik-manik, leungeunna ngopepang, ngarawel dua tungtung tali manik-manik.

”Janten urang moal kunanaon tur bakal bagja?”

”Tangtu wae. Teu kedah sieun. Akang seueur kenal jeung jalmi-jalmi nu pernah ngalaman hal eta.”

”Abdi ge,” ceuk si wanoja. ”Satuluyna maranehna sadaya ngaraos bagja.”

”Nya entos atuh,” ceuk si lalaki, ”mun nyai alim mah ulah. Akang moal nitah mun nyaho nyai alim. Tapi da ieu mah gampil pisan.”

”Akang leres hoyong abdi ngalakukeun eta?”

”Ceuk akang mah eta nu pang alusna keur urang. Tapi akang teu hayang mun nyaina ngaraos kapaksa.”

”Teras, pami abdi ngalakukeun eta, akang bakal ngarasa bagja, sareng sadayana bakal jiga bihari tur akang bakal tetep nyaah ka abdi?”

”Akang nyaah ka nyai danget ieu. Akang nyaah pisan, nyai terang eta pan?”

”Abdi terang. Namung pami abdi ngalakukeun hal eta, naha Akang baris ngaraos waas pami ku abdi disebatkeun yen itu pasir lir gajah bodas tur bakal resep ningalina?”

”Akang bakal resep ningalina. Akang bakal resep, tapi ayeuna mah akang teu kapikiran hal nu kararitu. Nyai pan apal lamun akang keur tagiwur.”

”Pami abdi ngalakukeun hal eta, naha akang moal tagiwur?”

”Akang moal tagiwur, sabab operasina ge leutik pisan.”

”Nya atuh, abdi bade ngalakukeun hal eta. Kumargi abdi mah tos teu mikiran diri sorangan.”

”Naon maksud nyai?”

”Abdi mah tos teu mikiran diri sorangan.”

”Tapi akang mikiran nyai.”

”Sumuhun. Tapi abdi tos teu mikirkeun kana diri sorangan. Abdi pasti bade ngalakukeun hal eta tur sadayana bakal balik deui siga bihari.”

”Akang teu hayang nyai ngalakukeun eta lamun nyai ngarasa saperti kitu.”

Si wanoja nangtung tuluy leumpang muru tungtung stasion. Di peuntas, di tukangeunana, katembong ngampar kebon gandum jeung tatangkalan sapanjang tegalan Ebro. Di kajauhan beh ditu, di peuntaseun walungan, kaciri pasir-pasir rarentul. Kalangkang awan leumpang meuntasan kebon gandum tur manehna mencrong ka walungan nu bulat-beulit ngaliwatan tatangkalan.

”Urang bakal ngengingkeun sadayana,” cenah. ”Urang bakal ngengingkeun sadayana tapi beuki dieu bet asa beuki pamohalan.”

”Nyai nyarios naon?”

”Uhun, saur abdi teh urang bakal tiasa ngengingkeun sadayana.”

”Ayeuna urang tos gaduh sadayana.”

”Ayeuna mah henteu.”

”Urang tiasa ngengingkeun sakabeh nu aya di dunya.”

”Teu.”

”Urang bisa angkat kamana wae.”

”Teu, teu tiasa. Sadayana sanes nu urang deui.”

”Nu urang.”

”Sanes. Sakali ku maranehna dicandak, urang moal tiasa ngengingkeunana deui.”

“Tapi apanan maranehna can nyarandak.”

”Antosan we, engke ge katingali.”

”Hayu ah, ka palih ditu, nu iuh,” ceuk si lalaki. ”Nyai teu menang ngarasa kitu.”

”Abdi teu ngaraos nanaon,” si wanoja nyarita. ”Abdi mung terang wungkul.”

”Akang teu hayang nyai ngalakukeun nu ku nyai teu hayang dilakukeun.”

”Sareng ngalakukeun nu teu sae jang diri abdi, ” ceuk si wanoja. ”Abdi ngartos. Tiasa nyungkeun birna deui?”

”Mangga. Tapi nyai kudu bisa ngarasakeun ...”

”Abdi ngaraoskeun,” ceuk si wanoja. ”Tiasa tong ngobrolkeun deui hal ieu?”
Maranehna diuk dina meja nu tadi, si wanoja mencrong ka pasir di lebah nu datar tur garing di tegal eta, si lalaki neuteup ka si wanoja jeung meja tea. ”Nyai kudu ngarasakeun,” si lalaki nyarita, ”yen akang teu hayang nyai ngalakukeun hal eta mun nyai teu purun. Akang bener-bener niat rek narimakeun saayana lamun eta kahayang nyai.”

”Sanes eta kahoyong akang teh? Urang tiasa sasarengan salamina.”

”Tangtu bae. Tapi akang teu hayang nu sejen, iwal nyai. Akang teu hayang nu sejen. Jeung akang apal yen ieu teh bener-bener hal nu biasa.”

”Uhun, abdi terang ieu teh leres-leres biasa.”

”Teu kunanaon nyai nyarita kitu, tapi akang bener-bener apal kana hal eta.”

”Akang kersa ngalakukeun hiji hal kanggo abdi ayeuna?”

”Naon wae ku akang bakal dilakukeun jang nyai.”

”Abdi nyungkeun Akang tong nyarioskeun hal eta deui!”
Si lalaki teu ngomong nanaon deui, tapi manehna mencrong ka tas-tas maranehanana nu nyangsaya di tembok stasion. Katempo stiker sababaraha hiji hotel nu pernah disareaan ku maranehanana narapel di dinya.

”Tapi akang teu hayang nyai ngalakukeun hal eta,” si lalaki nyarita, ”akang moal .. nanaon tentang eta.”

”Abdi bade ngajerit.”

Si awewe kaluar tina tukangen kere bari mawa dua gelas bir tur diteundeun dina luhur tilam. ”Kareta bakal dugi lima menit deui,” omongna.

”Nyarios naon cenah?” si wanoja nanya.

“Saurna kareta bade dugi lima menit deui.”

Si wanoja imut ka si awewe, nganuhunkeun.

”Mending cuang candakan ieu tas-tas teh ka sisi stasiun palih ditu,” ceuk si lalaki. Si wanoja imut ka manehna.

”Uhun mangga, enggal kadieu deui, cuang seepkeun bir teh.”
Manehna ngangkat dua tas gede tuluy dibawa nguriling ka sisi jalur erel beh peuntas. Manehna mencrong ka eta jalur, tapi teu bisa nempo karetana. Manehna leumpang deui ngaliwatan ruangan bar, paragi jalma-jalma nungguan kareta bari ngaropi. Manehna nginum sagelas Anis di bar eta bari neuteup ka para panumpang. Kabeh keur narungguan kareta. Manehna kaluar deui ngaliwatan kere manik-manik. Si wanoja keur diuk di mejana tur imut ka manehna.

”Teu kunanaon?” manehna nanya.

”Henteu,” ceuk si wanoja. ”Teu kunanaon. Abdi teu kirang nanaon.”

Ernest Miller Hemingway (21 Juli 1899 – 2 July 1961) saurang panulis novel, carpon jeung wartawan urang Amerika nu kawentar. Di leler hadiah Pulitzer dina taun 1953 keur novel The Old Man and the Sea. Manehna oge dileler Hadiah dina taun 1954. Gaya nu mandiri Hemingway dicirikeun ku kalimat-kalimat nu parondok tur sederhana, nu mangaruhan perkembangan dunya panulisan fiksi di abad 20-an.

Disundakeun ku kang Avid tina "Bukit-bukit Bagai Gajah Putih" nu aya dina Buku Antologi Cerpen Nobel, Bentang Mei 2004

Dina Pangaruh Morfin

2007-04-13T18:54:00.000-07:00

DINA PANGARUH MORFIN

O Henry

KURING weleh teu ngarti, kumaha carana nepi ka Tom Hopkins bisa gagabah samodel kitu, sok padahal manehna teh kungsi meakeun waktuna di fakultas kadokteran (samemeh manehna meunang warisan ti bibina) tur tangtuna ngarti pisan kana sual obat-obatan.

Kuring jeung manehna geus jangjian rek panggih dina eta sore, tuluy Tom datang ka tempat kuring rek ngadon ngopi jeung ngobrol ngaler-ngidul samemeh balik ka apartemenna nu mewah. Kuring keur ka ruangan sejen sakeudeung basa ngadenge Tom ngagorowok:

"Euy, Billy, kuring rek menta pel kina opat siki mah, teu kunanaon lin? rarasaan teh tariris kieu yeuh. Asup angin jigana mah."

"Nya, sok we mawa," ceuk kuring. "Botolna aya dina rak nu kadua. Nginumna campurkeun jeung minyak kayu putih sasendok. Ameh paitna leungit."

Basa balik deui ka ruangan, kuring jeung manehna tuluy ngawangkong hareupeun parapian. Kira-kira nepi dalapan menit, Tom ujug-ujug labuh ngalenggerek.

Kuring ngojengkang kana kotak obat tur nangenan.

"Na ari maneh ku gagabah!" ceuk kuring keuheul. "Deuleu tah balukarna mun duit geus mangaruhan otak jelema!"

Aya botol morfin nu tutupna geus muka, jigana Tom teu kungsi nutupkeunna deui tadi.

Kuring tuluy ngagero saurang dokter ngora nu kamerna di lante luhur, tur tuluy duaan ngagotong Tom ka imah dokter Gales nu aya dua blok jauhna ti dinya. Tom Hopkins beunghar teuing mun kudu di sanghareupan ku saurang dokter bau cikur keneh mah.

Basa dokter Gales ngurunyung, manehna tuluy mere Tom pangrawat nu sabanding jeung ajen ka-profesian-na. Sanggeus ngaliwatan hiji usaha panyalametan nu meh-mehan, kuring jeung manehna nginumkeun Tom kopi nu kadar kafeinna tinggi, tuluy tiluan mayang Tom naek turun tangga. Dokter Gales nyangkeh awak Tom bari nepakan beungeutna, tihothat melaan lambaran cek nu jumlahna gede nu bakal ditarimana engke. Si dokter ngora nu ti lante luhur tea nunjukkeun perhatianna nu leuwih ku hiji tajongan ngarah Tom sadar, bari tuluy menta hampura ka kuring.

"Wah, teu ngaruh," cenah. "Kakarek ayeuna bisa najong saurang jutawan. Jigane hese deui engke mah."

"Tah, ayeuna," ceuk dokter Gales, sanggeus sababaraha kedapan, "Manehna bisa salamet. Ngan omat jagaan sangkan manehna tetep hudang. Bisa ku diajak ngobrol atawa digeubig-geubig sakali-kali. Mun nadi jeung nafasna geus normal, kakara bisa sina sare. Kuring ayeuna rek mulang. Ieu pasen wayahna dipasrahkeun ka didinya."

Kuring tinggal sorangan jeung si Tom, nu geus di sarandekeun dina sofa. Manehna ngabebengkang bangun nu tenang naker bari panonna meletet. Ayeuna kuring ngamimitian boga tugas ngajaga supaya manehna angger hudang.

"Yeuh, aki-aki bedegong," ceuk kuring. "Didinya tadi ampir-ampiran cilaka, untung kuring kaburu keneh bisa nulungan. Baheula basa kuliah, dosenna kungsi ngajarkeun teu, yen m-o-r-f-i-n teh dibacana lain 'kina', komo bari jeung opat siki? Tapi nya keun bae nu geus liwat mah, asal cageur deui we. Ngan kuduna mah didinya teh geus jadi apoteker. Geus pantes nyieun resep obat."

Tom ngareret semu tunduh ka kuring bari nyengir.

"B..ly," cenah teu pati jelas, "Kuring ngarasa jadi nyiruan jeung manuk nu ngapung ngurilingan kekembangan. Rarasaan teh bungah pisan. Geus tong ngaganggu wae. Geura sare kadituh."

Manehna ngalenyap aya kana dua detik mah. Ku kuring digeubig-geubig.

"Dengekeun Tom," ceuk kuring rada tarik, "Maneh teu menang waka sare. Ceuk dokter maneh kudu tetep hudang salila sajam mah. Beunta, maneh can aman pisan deuleu. Yeuh, hudang!"

Tom Hopkins teh beuratna aya kana 198 pon. Manehna ukur nyengir bari tetep meletet, teu lila geus sare deui. Euweuh deui cara, kuring kudu ngusahakeun manehna tetep gerak, alusna mah malah sina joged dangsa irama waltz ngurilingan ruangan. Tom kadenge mimiti kerek, eta hartina, ku sabab keur karacunan morfin tea, manehna aya dina kaayaan nu bahaya pisan.

Tuluy kuring mikir. Rek ngangkat awakna kajudi moal kuat, ana kitu mah kuring kudu bisa narik perhatianna. Sakilat kapikir ideu brilian: "Sina ambek." Beu, tapi kumaha carana? Gusti, rarasaan euweuh cawadeun na diri manehna mah. Tom teh sobat nu kacida bageurna. Manehna estu jalma anu amis budi, saurang lalaki sajati, bageur, jujur jeung bersih hate lir sumiratna panon poe. Manehna teh urang pakidulan, nu masih ngahargaan kana adab kasopanan. Najan hirup di tengah gurilapna kahirupan New York, tapi teu nyababkeun manehna unggah adat. Manehna boga selera nu kuno tur sopan pisan ka awewe, tah..tah... awewe, kapanggih! Kuring seuri kapengkek ngabayangkeun hal eta. Tuluy ku kuring awakna digeubig-geubig nepi ka ceulina disada aplek-aplekan. Bangun teu purun manehna beunta. Kuring api-api nunjukkeun panghina bari ngacungkeun curuk ka hareupeun irungna.

"Dengekeun yeuh, Hopkins!" ceuk kuring rada nyentak.

"Urang teh geus lila sosobatan, tapi ka hareup mah kuring teu hayang deui babarengan jeung jalma teu boga cedo jiga maneh."

Tom katempo rada mureleng.

"Aya naon, Billy?" cenah, malik nyentak. "Ku naon ari maneh, hah?"

"Mun kuring jadi maneh," ceuk kuring tuluy. "Tapi sukur henteu, kuring moal bisa sare, maksud teh ngeunaan awewe nu ku maneh ditinggalkeun sorangan di lembur. Awewe nu ku maneh dipopohokeun sanggeus maneh ayeuna loba duit. Kuring ge ngarti nu aya dina pikiran maneh. Baheula basa keur jadi mahasiwa kedokteran nu miskin, maneh ngarasa manehna teh pantes jang maneh. Tapi ayeuna, sanggeus jadi jutawan, sagalana beda. Kuring heran, naon nu diteangan ku jelema-jelema samodel maneh ti awewe nu sakitu satiana. Maneh nganggap yen maneh saurang lalaki sajati? Hampura Hopkins, kuring kapaksa kudu ngomong ieu, sabab maneh salila ieu geus nyumputkeun hal eta sakitu bunina. Kuring teu resep ku sagala kalakuan maneh nu teu jujur eta."

Deudeuh Tom. Kuring ampir-ampiran ngabarakatak nempo manehna kokosehan hanyang ngalawan pangaruh morfin. Manehna kaciri bener-bener ambek, tur kuring ge teu nyalahkeun. Tom, sakumaha ilaharna urang pakidulan, ngabogaan sifat gede ambek. Panonna buncelik tur semu hurung. Tapi pangaruh obat teu bisa dilawan, nyababkeun letahna lir nu kakonci.

"K..e..he..d ...si..a..h," cenah balelol, "di tampiling ku aing."

Manehna rek hudang tina sofa. Tapi awakna estu teu tanagaan. Ku kuring didedetkeun ku saleungeun. Manehna ngabebengkang deui dina sofa bari ngagidir lir singa nu asup kana pitapak.

"Lumayan bisa nahan sakeudeung tah, aki-aki bedegong," ceuk kuring jero hate. Kuring ngarongkong pipah tur tuluy diseungeut, rarasaan teh hayang ngaroko heula. Kuring leuleumpangan sakeudeung, bari muji sorangan ku sabab ideu brilian tadi.

Kadenge sora kerek. Ku kuring dilieuk. Tom geus sare deui. Ku kuring disampeurkeun bari tuluy pipina dicabok. Manehna ukur neuteup teu suka. Kuring nyedot pipah bari tuluy nyodorkeun kana beungetna.

"Geuwat hudang siah, bari tuluy geura indit ti dieu," ceuk kuring ngahina manehna. "Kuring geus ngedalkeun sakabeh nu aya di pikiran tentang maneh. Mun maneh masih boga harga diri jeung kajujuran, maneh bakal mikir dua kali samemeh nyebut diri lalaki sajati. Manehna awewe nu sangsara, lin?" cek kuring. "Nu kampungan jeung tinggaleun jaman ti saprak urang loba duit. Nu bakal ngerakeun mun dibawa jalan-jalan ka Fifth Avenue? Yeuh Hopkins, maneh teh opat puluh tujuh kali leuwih goreng batan jelema nu teu boga cedo. Saha nu rek nempo kana duit maneh, hah? Kuring mah teu paduli. Wani taruhan eta awewe ge moal. Jigana mun maneh teu boga duit, kakara bakal bisa ngarasakeun. Maneh geus nipu diri sorangan, jeung...." rarasaan teh bet ku dramatis, "ngancurkeun hatena nu satia." (Si aki-aki bedegong Tom Hopkins geus ngancurkeun hatena nu satia)

"Kuring geus teu hayang deui nempo maneh."

Kuring nungguan Tom, bari ngiceupan sorangan hareupeun eunteung. Kadenge manehna hudang, kuring geuwat ngalieuk. Kuring teu hayang mun kudu katindihan ti tukang ku jelema beuratna 198 pon. Tapi Tom ngan bisa malik saeutik, awakna nyangsaya kana sofa bari sirahna ngalehleh. Manehna ngomong sababaraha kecap nu kadengena leuwih jentre batan tadi.

"Aing sabenerna ...teu hayang ...ngomong ieu ka maneh, Billy, ...malahan sanajan mun aya jelema nu ngomong teu bener tentang maneh. Tapi dengekeun ku maneh. Mun aing bisa hudang .... moal asa-asa ku aing dipiteskeun beuheung maneh... mangkahade siah."

Kuring jadi rada kapiasem ngadengena. Tapi eta kabeh ku kuring dilakukeun jang kasalametan manehna sorangan. Isukan ge, mun kuring geus ngajelaskeun hal eta ka manehna, tangtuna kuring jeung manehna bakal saleuseurian deui.

Kira-kira dua puluh lima menit saterusna Tom beuki leuleus kadengena, tuluy sare. Ku kuring dipariksa nadi jeung nafasna, tuluy ngantepkeun manehna tibra. Nadi katut nafasna geus normal deui jeung Tom geus salamet. Kuring indit ka kamer nu sejen bari tuluy ngaguher di kasur.

Basa hudang isuk-isukna, kuring nempo Tom geus diuk jeung salin. Katempona manehna geus sadar sapinuhna, ngan sarapna masih keneh ngadaregdeg tur letahna lir kulit jamuju nu maroletek.

"Aya ku belegug ari kuring," cenah. "Paingan asa aya nu aneh pel kina teh basa ku kuring rek diinum. Hese teu nyadarkeun kuring peuting?"

Ku kuring dibejakeun henteu. Katempona ingetanna teu pati alus kana kajadian peuting. Kuring nyindekkeun yen manehna teu ingeteun kana naon nu geus dilakukan ku kuring pikeun ngajaga supaya manehna tetep sadar, tur mutusken moal nyabit-nyabit deui eta perkara. Engke we, meureun, mun manehna geus cageur pisan, tangtuna kuring jeung manehna bakal resep nggalalakonkeunna deui.

Basa Tom rek indit, manehna eureun heula sakedapan di hareupeun panto nu muka bari ngajak sasalaman.

"Maneh geus loba nulungan, euy," omongna tenang, "Hampura kuring geus loba ngaripuhkeun maneh, jeung bener nu ku maneh diomongkeun peuting. Sagancangna kuring bakal ngirim telegram ka si awewe nu di kampung tea."

O Henry (1862-1910) ngaran aslina William Sydney Porter, hiji pangarang Amerika nu kaitung produktif. Dilahirkeun di Greenboro California Utara tanggal 11 September 1862. Tulisanna loba nyaritakeun kahirupan jelema-jelema basajan di kota New York. Kawentar ku alurna nu bulat beulit jeung nyaritakeun kajadian-kajadian nu ironis atawa kabeneran tur ditungtungan ku ahir nu teu disangka-sangka.

Disundakeun ku Kang Avid tina "Dalam Pengaruh Morfin" nu aya dina buku Cerita-cerita Pilihan O Henry, KATIA Desember 2004.

Sms-an Pabeubeurang

2006-04-28T05:08:00.000-07:00

+ P Kasi naha ayeuna mah tara nitip bhs? He2
- Teu percaya ka asper mah bisi kaselang jang bya koordinasi
+ He2 nyeta puguh enya, apalan bae ruruntuk asper kahot mah he2, kang kuma di b..... rame jigana? Hoyong lah kadinya, pangbejakeun k p h..., bosen di b.. bae yeuh
- ieu kebetulan samobil jeun p h... menuju direksi, lgs dibejakeun, ceunah kudu kawin heula, alhamdulillah ti saprak di pht, nya ayeuna bisa menikmati kerja teh, biar jauh asal teu ripuh, sanes kitu?
+ Enya tah kitu, dua rius yeuh, soal kawin gampang he2, salam k p h...
- Iya ke diperjuangkeun ku kami meh ngumpul deui, salam ka a... c....
+ Sip lah, ke rame2 cuang tagonian mun geus ngumpul mah
- Cuang nyanyi lh janji bragi, ayi nu ngahitarna
+ He2 moal ah, ayeuna mah rek nyanyi yana julio hehe
- Apal ti saha kami kembaran yana hulio, ti kang a... r.. nya?
+ Prediksi abi weh he2. aya naon k drksi?
- Rapat renc Budidaya jarak pagar sama teh u..., ti unit karoren
+ Jadi nyah budidaya jarak teh? Di B.. mah teu pararuguh. Sok ah wilujeng rapat beh, salam ka teh u... jeung kang d......
- Ya, kade jumaahan
+ Siap…siap…

Lekoh Teuing

2006-04-22T21:01:00.000-07:00

Anton Chekhov

BASA nepi ka Stasiun Deadville, Gleb Smirnov, juru ukur tanah, kakara nyaho yen wewengkon perkebunan nu nyaluk manehna gawe teh jauhna masih kira-kira tilu puluh atawa opat puluh mil deui. Lamun kusirna kuat tur kudana jagjag, jarakna bisa kurang ti tilu puluh mil, tapi lamun kusirna ripuh tur kudana geus rempo, bisa jadi nepi ka lima puluhan.

"Punten, pami penyewaan kuda palih mana nya?" si juru ukur nanya ka patugas stasiun.

"Kulan? Panyewaan kuda? Ah, di palih dieu mah moal aya anjing liar-anjing liar acan, Kang, komo panyewaan kuda! Bade kamana kitu?"

"Ka Devkino, kebonna jendral Hohotov."

"Euh," ceuk kepala stasiun, "ka pengker stasiun we; biasana sok aya patani nu bade ka daritu, maranehna sok nyandak panumpang oge."

Si tukang ukur ngarenghap lungse, tuluy leumpang bangun nu teu purun muru tukangeun stasiun. Sanggeus rada lila neneangan bari jeung nguat-nguat maneh, manehna ahirna manggih saurang patani, awakna gede tur dedeg. Beungetna sangar, pinuh ku tapak bared. Make jeket kulawu nu geus rangsak jeung sapatu tina jarami.

"Meuni alus kieu boga roda teh euy!" poyok si juru ukur bari kalacat unggah kana roda. "Nepi ka kuring teu bisa ngabedakeun mana hareup mana tukang."

"Ah ma enya? Nu deukeut ka buntut kuda eta hareup, mun nu didiukan ku Bapa eta tukang."

Kuda teh ngora keneh tapi begang, sukuna ceking tur ceulina sopak. Basa kusirna nangtung bari nyepretkeun pecutna, si kuda ukur gideug; basa si kusir kekecrek tarik bari nyepretkeun pecutna kadua kali, roda teh ngareket tur oyag jiga nu nirisan; dina cepretan katilu, roda ngadangheuak, dina nu kaopat, maju lalalunan.

"Biasana kieu ieu teh?" ceuk si juru ukur, reuwas campur heran nempo kabisa si kusir Rusia ngadumaniskeun karayap laon kuya si kuda jeung sora cepretan pecutna nu matak nyentug kana hate.

"Pokona mah nepi, Pa" si kusir ngareugreugkeun. "Kuda teh ngora keneh jeung rada kebluk. Tapi da mun geus leumpang mah sok hese eureun geura. Hudang jurig!"

Maranehna ninggalkeun stasiun basa meh reup-reupan. Di beh katuhu katembong ngemplang padataran nu poek tur sepi jempling. Legana satungtung deuleu nepi ka jigana mun pareng los-los ka lebah dinya moal salah bakal anjog ka tungtung nagri Ajrak. Panon poe usum murag daun nu tarariis teh lalaunan surup basa sisina saeutik-saeutik leyur ka langit. Di beh kenca, dina sesa-sesa cahaya, katembong pasir-pasir nu rarentul, bisa jadi leuweung geledegan atawa kebon nu geus dihumaan. Si juru ukur teu bisa nempo ka beh hareup lantaran pamandanganna kahalangan ku tonggong kusir nu rubak tur dedeg. Hawa karasa beuki nyecep, meh-mehan beku.

"Ku sepi-sepi teuing," gerentes si juru ukur bari sabisa-bisa nutupan kadua ceulina ku kerah jaketna; "meuni taya pisan imah atawa saung! Beu, mun pareng cilaka atawa aya nu ngarampog, pantesna moal aya hiji-hiji acan jalma nu nangenan, moal, lamun teu nembakkeun kanon mah. Jeung si kusir jiga-jiga nu nyurigakeun deuih. Teuing aya jurig naon nu nyumput satukangeunna! Sungutna teu mantes, lir sato galak. Mang, mang," si juru ukur nanya,"saha ngaran teh?"

"Ngaran kuring? Klim"

"Cing Klim, kumaha kira-kirana di dieu? Tara aya nanaon? Tara aya begal?"

"Oh, pangeran nangtayungan keneh, tara aya! Saha nu rek ngabegal di tempat kieu?"

"Enya sih. Tapi mun eta kajadian, kuring boga tilu pestol di dieu" – si juru ukur ngabohong – "jeung, sing apal, tong sakali-kali nyoba-nyoba heureuy jeung pestol. Hiji pestol cukup jang sapuluh rampogeun mah."

Peuting mimiti turun. Ujug-ujug roda teh ngareket, sada nu humaregung, tuluy ngagoloprak mengkol ka kenca, jiga nu rek balik deui.

"Rek dibawa kamana aing teh cenah?" gerentes si tukang ukur. "Tadi manehna lempeng ka hareup, ayeuna ujug-ujug mengkol ka kenca. Moal boa si kehed teh rek mawa aing ka tegal nu sepi –- tuluy -– tuluy -– geus kabayang nu bakal kajadian. Mang," manehna nyarita ka si kusir, "tadi ceuk emang tara aya nanaon di dieu? Hanjakal. Padahal kuring resep mun kudu gelut jeung begal. Kuring katempona leutik tur palaya-peleye, tapi tanaga mah wani ngadu jeung munding ge. Pernah kuring diserang ku tiluan, kuma cing? Ku kuring dipeupeuh saurang nepi ka –- paeh. Nu duaan deui dikirim ka panjara Siberia. Kuring ge teu apal timana boga kakuatan sakitu bedasna. Kuring bisa ngangkat jelema nu sagede akang ukur ku saleungeun – tuluy – tuluy - dibabetkeun!"

Klim ngalieuk ka si juru ukur, ngadengdekeun beungeutna bari tuluy mecut si kuda begang.

"Nyaan Mang" sambung si juru ukur. "Pangeran geus mere pitulung ku nyanghareupken para rampog teh ka kuring! Lain ngan ukur dipites-piteskeun leungeunna, tapi maranehna ge kudu mertanggungjawabkeun kajahatannana di hareupeun pangadilan, dimana hakim jeung pangacarana teh babaturan kuring kabeh. Kuring teh aparat pamarentah nu kacida pentingna. Lamun keur jalan-jalan jiga kieu, pamarentah pasti nyahoeun jeung nempatkeun mata-mata jang nalingakeun kasalametan kuring. Aya sababaraha hiji pulisi jeung kaptenna nu nyumput di rungkun sapanjang jalan. Heup! Heup!" si juru ukur ujug-ujug ngagorowok. "Rek kamana ieu teh? dibawa kamana kuring?"

"Pan ka ditu? Asup ka jero leuweung."

"Jadi kitu," gerentes si juru ukur. "Aing mimiti seber, tapi aing sabisa-bisa teu meunang nunjukkeun rasa. Jigana manehna geus nyahoeun yen aing sieun ku manehna. Kunaon ti tatadi manehna ngan ngalieukan bae ka aing? Manehna pasti keur ngarencanakeun hiji maksud jahat. Tadi pas mimiti indit roda teh ngarayap, tapi ayeuna meuni asa ngapung. Dengekeun yeuh Klim, kunaon di dinya ngajalankeun kuda teh meuni jiga nu rurusuhan?"

"Kuring teu rurusuhan, kudana nu lumpat sakahayangna. Ceuk kuring ge mun geus lumpat, si ieu mah tara aya nu bisa ngahalangan. Memang geus kitu ti dituna"

"Ekol wungkul siah, kuring nyaho di dinya ngabohong. Tong gancang-gancang teuing ngajalankeunnana. Tahan kudana ku di dinya, ngarti?"

"Naha?"

"Sabab –- sabab –- aya opat babaturan kuring nu keur nuturkeun ti stasiun. Maranehannya ameh bisa nyusul. Maranehna geus jangji rek panggih di ieu leuweung. Bakal reugreug mun araya maranehna mah. Awakna baradag jeung tanagana baredas, bari mawa pestol hiji sewang. Kunaon siah di dinya culang-cileung bae jeung teu daek cicing? Hah? Tempo kadieu, kuring – kuring – euweuh barang berharga di kuring, kuring teu mawa harta nanaon – salian ti pestol nu tilu tea! Yeuh lamun teu percaya ku kuring rek ditembongkeun – dagoan sakeudeung cuang buka."

Si juru ukur api-api ngodok kana kantongna, nya harita pisan timbul kajadian nu jauh pisan tina panyangkana. Si Klim ujug-ujug ngajleng tina roda tuluy lumpat bari notog notog maneh ka jero leuweung.

"Ampun!" cenah. "Ampun! Sok bawa kuda jeung roda, tong disesaken, ngan kuring tong dinanaon! Ampun!"

Sada nu lumpat gogorobasan ngan sakeudeung kadengena. Jep jempling deui. Basa eta hal nu jauh tina panyangka teh kajadian, nu dipetakeun ku si juru ukur pangheulanan nyaeta ngeureunkeun kuda, tuluy merenahkeun tempat diukna dina roda bari mimiti mikir nya pilampaheun.

"Jadi manehna teh sieuneun jeung percayaeun kana caritaan aing, dasar belegug! Aduh, kudu kumaha pilakueun aing ayeuna? Aing teu nyaho jalan, jadi moal bisa indit sosoranganan, jeung deuih lamun kitu teh ke aing disangka nu maling kuda. Aduh, kudu kumaha aing, Klim! Klim!"

"Klim," kadenge aweuhan sorana sorangan.

Boga pikiran kudu meuting di eta leuweung geledegan sosoranganan, ngadenge sora ajag di kajahuan, aweuhan sorana sorangan jeung haroshosna sora napas kuda begangna, bulu punduk si juru ukur mimiti muringkak, manehna tuluy diuk.

"Klim," manehna ngagorowok. "Mang Klim! Mang! Dimana maneh?"

Aya kana dua jam manehna gogorowokan nepi ka peura, manehna geus lah-lahan rek meuting bae di eta leuweung basa dina hiliwir angin kadenge sora haroshos.

"Klim, maneh eta? Kadieu geuwat, hayu cuang indit!"

"Maneh –- maneh rek maehan kuring!"

"Kunaon, kuring mah ukur heureuy, Klim; caritaan kuring ukur bohong. Kuring teu mawa pestol! Kuring ngabohong sabab ku sieun. Hayu ah, kuring katirisan yeuh!"

Si Klim mikir, lamun enya-enya begal tangtu ti tatadi geus kabur mawa kuda jeung rodana, lalaunan manehna kaluar tina rungkun, nyampeurkeun roda bari masih taki-taki.

"Kunaon maneh bet jadi sieun, belegug? Kuring mah bobodoan, jeung didinya deuih matak pikeueungeun! Hayu asup!"

"Euh, juragan," Klim kukulutus, bari tuluy naek kana roda, "mun nyaho rek kieu mah tadi teh ku kuring moal dibawa sanajan mayar saratus Rubel genan. Sugan teh rek paeh."

Klim mecut kuda begangna –- roda gideug; Klim mecut sakali deui roda teh oyag; dina pecutan anu ka opat roda mimiti ngarayap lalaunan, si juru ukur narik kerah jaketna jang nutupan kadua ceulina bari tuluy nyarandekeun sirahna nu beurat.

Si Klim jeung jalan teh teu pikakeueungen deui ayeuna mah.

(Ditarjamah-bebaskeun ku Kang Avid tina Overseasoned karangan Anton Chekhov nu aya dina buku Selected Stories, Wordsworth Classic, 1996)

Surgana Budak

2005-12-08T01:35:00.000-08:00

Naguib Mahfouz

"APA!"
"Kulan?"
"Ade sareng rerencangan, Nadia, sok sasarengan bae."
"Uhun atuh, Bageur. Apan Nadia teh sobat Ade."
"Di kelas, nuju istirahat, nuju jajan."
"Sae pisan. Nadia teh budakna bageur jeung pikaresepeun."
"Tapi waktos pelajaran agama mah, Ade di kelas nu hiji, Nadia di kelas nu sanes."

Katempo indungna imut, sanajan keur sibuk nyulam sepre. Manehna nyarita bari jeung oge imut:

"Dina pelajaran agama wungkul."
"Naha kunaon, Pa?"
"Margi Ade gaduh agama nyalira, Nadia oge gaduh agamana deui."
"Kumaha eta teh, Pa?"
"Uhun, Ade Islam, Nadia mah Kristen"
"Naha?"
"Adena alit keneh, ke tos ageung bakal ngartos."
"Ade tos ageung bet."
"Alit keneh, Bageur."
"Naha kunaon Ade teh bet urang Islam?"

Manehna kudu jembar tur ati-ati dina ngajawab. Teu meunang nepi ka ngagorengkeun sistim pangajaran moderen nu anyar diterapkeun. Manehna nyarita deui:

"Apa jeung Mamah urang Islam. Janten Ade oge urang Islam."
"Pami Nadia?"
"Apana jeung mamahna Kristen. Janten Nadia oge Kristen."
"Sanes ku margi apana nganggo kacasoca?"
"Sanes. Teu aya hubungannana sareng kacasoca eta mah. Sareng deuih, akina oge Kristen."

Manehna nyoba-nyoba nuturkeun silsilah nini-akina ka luhur, teuing rek nepi mana, magar anakna boseneun, heg mengkolkeun omongan kana topik nu sejen. Tapi anakna kalah nanya deui:

"Saha nu leuwih sae?"

Manehna ngahuleng sakeudeung, terus ngajawab:

"Urang Islam sae, urang Kristen oge sae."
"Pasti kedah aya hiji nu leuwih sae."
"Nu ieu sae, itu oge sae."
"Wios teu upami Ade ngiringan jiga urang Kristen, ameh tiasa sasarengan teras sareng Nadia?"
"His ulah, Bageur, teu kenging. Unggal jalmi kedah angger sami jiga apa jeung mamahna."
"Naha, kunaon?"

Memang enya, sistim pangajaran moderen teh kejem oge! Manehna nyarita deui:

"Teu tiasa ngantosan Ade ageung, engke?"
"Henteu."
"Kieu atuh, Ade terang mode, pan? Tah, aya jalmi nu tiasa resep kana mode nu ieu, aya oge anu resep kana mode nu sanes. Yen Ade urang Islam, hartosna eta teh mode anu pangenggal-enggalna. Margi kitu, Ade kedah tetep Islam."
"Janten, Nadia mah modena tos lami?"

Duh, boa-boa Pangeran bakal ngajiwir manehna bareng jeung Nadia dina eta poe. Katempona manehna geus nyieun kasalahan, sangkilang geus nyoba ati-ati. Manehna ngarasa lir didedetkeun euweuh ampun kana beuheung toples. Cek manehna:

"Eta mah masalah karesep. Tiap jalmi kedah teras sami jiga apa jeung mamahna."
"Wios teu ku Ade diwartoskeun ka Nadia, pami Nadia modena tos lami, Ade mah modena enggal?"

Gancang manehna motong:

"Tiap agama oge sae. Urang Islam nyembah ka Alloh, urang Kristen oge nyembah ka Alloh."
"Naha Nadia nyembah ka Alloh di kelas nu ieu, ari Ade di kelas nu sanes?"
"Di dieu mah Alloh disembah ngangge cara anu kieu, di nu sanes mah ngangge cara nu sanes deui."
"Naon bentenna, Pa?"
"Ke taun enjing Ade bakal terang, atanapi taun enjingna deui. Ayeuna mah asal terang we, yen urang Islam nyembahna ka Alloh, urang Kristen oge nyembahna ka Alloh."
"Alloh teh saha, Pa?"

Jadina manehna mikir rada lila oge. Tuluy malik nanya, jang saukur ngulur-ngulur waktu:

"Saur Ibu guru kumaha di sakola?"
"Ibu guru sok ngaos seseratan Al Quran sareng ngajarkeun netepan. Tapi Ade teu terang saha Alloh teh."

Manehna mikir deui, maksa imut bari jeung rada muriding. Cenah:

"Alloh teh anu nyiptakeun sadaya alam dunya."
"Sadayana?"
"Uhun, sadayana"
"Naon hartosna nyiptakeun teh?"
"Ngadamel sagala rupa."
"Kumaha carana?"
"Ku kakawasaannana anu kacida agungna."
"Di mana linggihna Alloh teh?"
"Di sadaya alam dunya."
"Pami sateuacan aya alam dunya?"
"Di luhur."
"Di langit?"
"Uhun."
"Ade hoyong ningal Alloh."
"Teu tiasa."
"Dina TV oge teu tiasa?"
"Moal, moal tiasa."
"Moal aya anu tiasa ningal, saurang ge?"
"Moal, saurang oge."
"Naha Apa terang Alloh aya di luhur?"
"Nya da memang kitu."
"Saha nu ngawartosan Alloh aya di luhur?"
"Para nabi."
"Para nabi?"
"Uhun, sapertos nabi urang, Muhammad."
"Kumaha carana?"
"Ku katiasa anu ngan aya di aranjeunna."
"Socana awas pisan?"
"Uhun."
"Naha tiasa?"
"Alloh parantos nyiptakeunna kitu."
"Naha?"

Manehna ngajawab bari nahan kasabaranna:

"Alloh tiasa ngadamel naon bae anu dipikahoyongna."
"Kumaha katingalna ku nabi?"
"Kacida agungna, kacida kuat sareng kawasana kana sagala rupa."
"Jiga Apa?"

Manehna ngajawab bari rada mengkek piseurieun:

"Alloh mah teu aya nu ngabandingan."
"Kunaon Alloh teh linggihna di luhur?"
"Margi dunya handap mah moal tiasa ngawadahan. Tapi Mantenna tiasa ningal kana sagala rupa nu aya di handap."

Eta budak cicing sakeudeung, tuluy ngomong deui:

"Tapi saur Nadia mah, Tuhan teh hidup di dunia."
"Ku margi Alloh tiasa terang jeung ningal kana sagala rupa, jantenna sapertos anu linggih di mana-mana."
"Nadia oge ngobrol, saurna jalmi-jalmi jahat parantos ngamaotan Tuhan."
"Tapi da Alloh mah jumeneng, teu maot."
"Saur Nadia, aya nu parantos ngamaotan Tuhan."
"Henteu, Bageur. Jalmi-jalmi eta nyangka parantos tiasa ngamaotan Mantenna. Padahal Alloh mah tetep jumeneng, teu maot."
"Pami aki, jumeneng keneh oge?"
"Aki mah pan parantos maot."
"Dimaotan ku jalmi jahat oge?"
"Henteu, aki mah maot nyalira."
"Kumaha?"
"Aki udur, teras maot."
"Pami Eneng nu nuju udur bakal maot oge?"

Tarangna kerung sakeudeung, saliwat manehna nempo isyarah kateu panujuan ti lebah pamajikannana.

"Henteu, insya Alloh Eneng mah bakal damang."
"Tapi naha Aki mah maot?"
"Margi udurna tos sepuh."
"Apa kantos udur, sareng tos sepuh. Naha teu maot?"

Ujug-ujug indungna ngagebes. Eta budak jadi heraneun teu ngarti, sakeudeung panonna mencrong ka indungna, sakeudeung ka bapana. Ceuk si bapa:

"Urang sadaya bakal maot, pami Alloh tos nangtoskeun."
"Naha Alloh nangtoskeun urang sadaya bakal maot?"
"Alloh tiasa ngadamel sakahoyongna."
"Pami maot teh enak teu, Pa?"
"Henteu, Bageur."
"Naha Alloh nangtoskeun anu teu enak ka urang sadaya?"
"Emh, Apa lepat tadi."
"Naha Mamah bendu waktos Ade nyarios Apa bakal maot?"
"Margi Alloh teu acan nangtoskeun kitu."
"Naha Alloh teu acan nangtoskeun?"
"Alloh anu nyandak urang ka dunya, Alloh oge anu bakal nyandak urang angkat deui."
"Naha?"
"Supados urang ngadamel kasaean heula di dunya, sateuacanna angkat deui."
"Naha urang henteu teras we cicing di dunya?"
"Engke dunyana heurin atuh pami sadaya jalmi teras cararicing mah."
"Urang bakal ngantunkeun kasaean nu di dunya?"
"Ke urang bakal angkat ka nu leuwih sae deui di ditu."
"Di mana?"
"Di luhur."
"Caket Alloh?"
"Uhun."
"Urang bakal tiasa ningal Alloh?"
"Uhun."
"Sae atuh?"
"Uhun.”
"Pami kitu, hayu atuh urang angkat."
"Tapi pan urang teu acan seueur ngadamel kasaean."
"Pami Aki atos?"
"Uhun."
"Ngadamel naon?"
"Aki parantos ngadamel bumi sareng melak tatangkalan di kebon."
"Pami Tutu, putra bibi, parantos ngadamel naon?"

Beungeutna merengut sakeudeung, tuluy panonna mencrong ka pamajikanna bangun anu menta tulung.

"Tutu oge parantos ngadamel bubumian sateuacanna angkat."
"Tapi Lulu, anu bumina di payun, parantos ngagebug Ade sareng tara ngadamel kasaean."
"Lulu mah budak bangor."
"Tapi Lulu moal maot."
"Kajaba pami Alloh tos nangtoskeun."
"Wios tara ngadamel kasaean oge?"
"Sadayana bakal maot. Sing saha anu ngadamel kasaean, manehna bakal angkat ka sisi Alloh. Saha anu ngadamel kaawonan, bakal angkat ka naraka."

Eta budak leutik teh ngarenghap bari tuluy ngahuleng. Si Bapa ngadadak ngarasa kacida capena. Manehna teu bisa ngitung, teuing aya sabaraha hiji omonganna tadi anu bener jeung sabaraha hiji nu salah. Eta pertanyaan-pertanyaan teh geus ngahudangkeun tanda tanya, nu tuluy namper na jero hatena. Tapi si budak ujug-ujug norowelang:

"Ade mah hoyong sareng Nadia teras."

Sirahna ngalieuk bangun nu hayang eces. Eta budak norowelang deui:

"Sanaos dina pelajaran agama oge!"

Manehna ngadadak seuri nyakakak. Pamajikanna milu nyeuleukeuteuk. Bari heuay alatan tunduh, manehna tuluy nyarita:

"Teu kabayang, eta pertanyaan-pertanyaan bisa didiskusikeun dina taraf umur sakitu!"

Pamajikanna mairan:

"Isukan ge manehna bakal gede, tangtu Kaka bakal bisa nerangkeun hal-hal eta ke ka manehna."

Gancang manehna ngalieuk ka si awewe, hayang ngayakinkeun naha eta omonganna teh memang bener-bener atawa ngan saukur ngabeberah. Tapi katempo pamajikanna geus tungkul, sibuk deui jeung sulamanna.

(Ditarjamah-bebaskeun ku Kang Avid tina Surganya Anak, karangan Nauib Mahfouz, dina Antologi Cerpen Nobel, Bentang 2004)

Sapatu saha?

2005-12-06T01:34:00.000-08:00

IEU kajadian teh geus lumayan lila. Kira-kira sapuluh taun katukang. Basa kuring masih keneh diuk di kelas hiji SMA --SMA hiji Ciamis (A keneh baheula mah, can jadi U). Nu matak tong nanya tanggal jeung bulan pastina, dijamin kuring moal inget. Komo nepi ka memenitanna mah, lebeng. Ngan nu sidik mah, harita teh poe Rebo. Nu matak inget, sabab harita teh jam pelajaran olahraga. Ari lamun bagean olahraga kuring mah sok inget wae da kudu disalin ku baju kaos jeung calana trening. Eh, teu nyambung ketang.

Tapi memang, ieu carita teh berhubungan pisan jeung acara salin-menyalin. Maksudna, jeung kawajiban kudu disalin ku baju kaos jeung calana trening tea. Kieu geura:

Harita, jam pelajaran olahraga teh jam kahiji pisan. Nu matak, basa loceng ngeleneng, kuring sabatur-batur langsung siap-siap, rek salin tea. Ari tempatna biasa di mushola bae, hareupeun kelas. SMA hiji Ciamis can bogaeun masjid harita mah.

Aya lima atawa geneplah kira-kira anu bareng jeung kuring teh. Salah sahijina si Asep. Asep we lah urang sebut, tong si Primus, ngarah kaciri Ciamisna.

Ari si Asep, nelah budak rada leder. Nya, ampir balap jeung kuring mah. Gawena ngan popoyok jeung nyeungseurikeun batur. Mun teu kitu, purah nyumput-nyumputkeun sapatu. Bari jeung tuluy akey-akeyan nempo nu bogana kokotetengan. Pondokna mah: pikasebeleun batur.

Tapi teu, ketang. Teu sarua jeung kuring. Ari kuring mah da tara disarebelkeun ku batur. Malah loba nu sok ngarasa kaleungitan, mun kuring euweuh teh. Nya mun teu pulpenna, pasti jidarna atawa tas. He he.

Harita ge Si Asep geus pangheulana muru mushola. Minangka rada segut mun bagean olahraga teh. Beda jeung mun bagean Kimia atawa Pisika, sok loba humandeuar. Pelajaran teu guna, pokna teh. Moal dipake dina barang beuli ieuh.

Tah, barang nepi ka lawang mushola, breh nempo aya sapatu sarampasan di hareupeun panto. Manehna tuluy ulal elol. Tapi da sidik teu kaciri aya jalma di jero. Aman, pikirna. Biasa, uteuk jailna geus mimiti jalan. Ari kuring mah jeung nu lian, teu loba acara deui, langsung we asup bari gesat-gesut salin.

"Lot, aya sapatu euy," cenah bari mimiti nyabakan sapatu. Di lawang panto mushola.

"Enya, bawa balik ku maneh. Lumayan," kuring ngahaminan, bari muka baju.

"Embung ah, goreng euy, sapatu murah," tembalna. Masih di lawang panto.

"Goreng kumaha, sidik alus," ceuk kuring.

"Goreng bel, tuh tempo, sapatu murah kieu. Geus rada bodol, tuh ieu na ge molongo," cenah, bari nembong-nembongkeun eta sapatu.

"Naha masih dipapake nya? Mun mah piceun," sambungna. Kalah beuki semangat tah si bedul.

"Era rek makena ge, butut," pokna deui teu euleum-euleum.

"Ieu pasti boga lanceukna si Nani," cenah deui. Nani teh ngaran babaturan kuring sakelas keneh. Lain ngaran asli nu pasti mah, inggis dianggap pencemaran nama baik.

"Naha meuni apal?" ceuk kuring.

"Apal da sok remen cicing di dieu. Tapi jelemana mana, nya?" cenah. Masih ngalak-ngilik sakadang sapatu.

Cacap ngomong kitu, ana pucunghul teh aya jelema nangtung ti tukangeun mimbar. Horeng, nu boga sapatu. Jigana geus ti tatadi cicing di dinya, duka keur nanahaon. Bener, maneh na teh lanceuk si Nani, budak kelas tilu.

Mushola teh teu sakumaha gede. Paling luasna kana sapuluh kali lima meteran. Jadi tangtuna ge sakabeh omongan tadi teh, nu moyok sapatu, atra kadengeeun pisan ku nu bogana. Mangkaning moyokna teh bebeakan. Hag!

Nyaho nu bogana aya, si Asep gancang ngepeskeun sapatu. Tuluy manehna nyampeurkeun kuring sabatur-batur bari geumpeur. Rampang-reumpeung, manehna nyarita ka kuring, "Lot, trening maneh alus euy," cenah.

Nu boga sapatu teu lemek teu nyarek. Ceg mawa sapatu. Teu ngalieuk-lieuk acan, manehna indit kaluar.

Kuring sabatur-batur akey-akeyan nepi ka nyareri beuteung.

: kantos dimuat di majalah Mangle