Cerita Mob

Matematika

noreply@blogger.com (Cerita Mob) — Sun, 30 Aug 2009 06:00:00 +0000

Ada anak kecil satu, de dapat PR matematika dari de pu Bu guru. Karna de tra tau matematika jadi de pi tanya sama de pu tete...
Anak : Tete... dulu waktu tete sekolah tete pintar ka..?
Tete : Wetss... tete nih paling pintar di kelas dari SD sampe SMA, pringkat 1 trus...
Anak : Kalo matematika tete biasa dapat nilai brapa...??
Tete : Dari SD sampe SMa dapat 100... itu juga guru bilang kalo seandainya ada nilai 200 akan de kase tete juga...
Anak : Klo begitu... tiga tambah dua sama dengan brapa tete???
Tete : Oh... itu kalo zaman tete dulu masih delapan... kurang tau mungkin skarang su naik dua belas ka...

Email

noreply@blogger.com (Cerita Mob) — Sat, 29 Aug 2009 06:00:00 +0000

Bapa satu ini ada duduk baca koran. Begini de dengar de pu anak ada telpon de pu pacar yang ada di Jawa sana...
Anak : Iyo, nanti sa kirim sa pu foto lewat Imel (*maksudnya Email to) sudah...
Bapa ko dengar begitu trus mulai angkat bicara...
Bapa : Anak eee... Ko stop bawa-bawa Markus pu anak perempuan sudah (Markus pu anak perem nama Imel). Ko mo suruh de bawa ko foto ke Jawa toh. Ko kira jawa tuh dekat ka???
Anak : Bapa... yang sa maksud tuh bukan Imel tapi Email...
Bapa : Ah... Bapa cuma tes ko saja to. Bapa juga su tau mo... Email itu kapal udang yang ada transit di pelabuhan tooo???

Pokok Anggur

noreply@blogger.com (Cerita Mob) — Thu, 27 Aug 2009 23:36:00 +0000

Ada pace satu de beli anggur baru de panggil de pu teman 2 orang. Yang satu kerja di PLN, trus yang satu lagi bagian pembangunan jalan. Dong tiga duduk siram sampe meter miring... Tra lama pace yang kerja di PLN de angkat suara...
Pace PLN : Akulah terang dunia
Pace Pemb. Jalan : Akulah jalan kebenaran dan hidup
Pace yang pu anggur : Akulah pokok anggur yang benar dan kamulah ranting rantingnya...

Kapal Besar

noreply@blogger.com (Cerita Mob) — Thu, 27 Aug 2009 06:00:00 +0000

Satu kali ada pace dua duduk baku melawan daerah masing-masing, sapa pu dearah yang paling pangaruh. Mulai dari bangunan-bangunan sampe turun ka pelabuhan deng kapal. Jadi pace yang satu mulai angkat...
Pace1 : Ko tau ka tidak? di tong pu kota tuh kapal besar-besar sampe... Kapal Perintis saja besar kaya Kapal Putih, apalagi Kapal Putih...
Pace2 : Adoh pace kam pu kapal perintis kecil begitu? pace supaya ko tau di tong pu daerah itu kapal perintis besar besar skali, jadi kalo satu orang di muka kapal meninggal begitu, tong yang di belakang baru tau tuh 6 bulan kemudian...

Kelihatan

noreply@blogger.com (Cerita Mob) — Wed, 26 Aug 2009 06:00:00 +0000

Pace satu nih de baru kuliah di Jawa. Satu malam begini, orang-orang di kompleks tempat pace ko tinggal aa kejar pancuri... Trus pace nih kebetulan baru pulang dari kampus... Baru jalan yang de lewat nih baru saja pancuri lewat situ. Tapi pace de tra sempat baku dapar deng pancuri... Jadi, pas de jalan sante-sante begini de kaget skali ada orang banyak lari trus tanya dia...
Mas : Mas lihat orang yang tadi lewat sini gak??? dia itu maling, lihat gak??
Pace : Ah masa...??? Aduhhh.. aku gak kelihatan...
*padahal de pu maksud itu "Aku gak lihat"

Fajar Utama

noreply@blogger.com (Cerita Mob) — Tue, 25 Aug 2009 06:00:00 +0000

Jadi ada mace satu de dari Jakarta mo ke Jogja ikut de pu anak pu wisuda. Dari rumah dong pesan klo su sampe di stasiun Gambir tuh naik kereta Fajar Utama karna berangkat pagi ka ini. Setelah mace ko sampe di Gambir langsung de ke loket baru tanya petugas yang jaga...
Mace : Mbak... ada jual tiket Arwo Utama ka?
Mbak : Arwo utama? waduh klo Arwo utama nggak ada bu... yang ada cuma Fajar Utama...
Mace : Yooo... Arwo Utama ka Fajar Utama ka... itu sudah...

Dulang

noreply@blogger.com (Cerita Mob) — Mon, 24 Aug 2009 06:00:00 +0000

Pace deng mas dong dua pi dulang. Sambil dulang begini pace ko tanya sama mas...
Pace : Mas... kalo ko pu uang banyak ko mo beli apa???
Mas : Aku mo beli mobil, motor dan rumah... trus kalo kamu gimana??
Pace : Klo sa pu uang banyak pasti sa tidur di got...
Bah mas nih de heran langsung, masa uang banyak baru tidur di got tuh...
Mas : Loh... kok bisa gitu???
Pace : Jiii kan sa mabuk tooo...

Kuburan

noreply@blogger.com (Cerita Mob) — Sun, 23 Aug 2009 06:00:00 +0000

Pace satu de tinggal di kampung. Jadi de pu rumah kalo jalan masuk tuh harus lewat kuburan dulu... Satu kali begini pace pulang su gelap ka ini, de kaget anak-anak kecil dong ada main di kuburan. de pikiran kaco skali, dalam hati de bilang.. " Adoohh ini suanggi sudah nih". Tapi de penasaran juga jadi de tanya anak-anak kecil dorang...
Pace : Weeii.. kam tinggal disini ka?
Anak : Iyo, tong tinggal disini to... Baru om ko tinggal di???
Pace : Sa tinggal di depan sana... trus kam suka makan apa?
Anak : Makan daging tooo... kalo om ko suka makan apa?
Pace tambah panik dengar anak-anak dong bilang suka makan daging jadi pace ko jawab...
Pace : Ah trada anak... om selama ini makan Firman Thuna dan Nyanyian Rohani... (sudah pace ko langsung lari ka ini)

Nene Naik Taksi

noreply@blogger.com (Cerita Mob) — Sat, 22 Aug 2009 06:00:00 +0000

Ini ada nene satu. Satu kali de naik taksi dari Pasar mo pulang ke de pu rumah. Baru su tau to kalo dulu tuh mahasiswa bayar Seribu, kalo umum bayar dua ribu. Su naik taksi baru nene ko ingat kalo de punya uang tinggal dua ribu saja untuk beli sirih satu tempat. Tapi de terlanjur naik jadi lanjut saja... Sampe mo dekat-dekat de pu rumah kan ada Kampus to... Jadi nene ko turun di kampus, baru cuma bayar seribu saja trus alasan jalan masuk ke dalam kampus...
Kondektur : Bah nene... penumpang umum tuh bayar dua ribu bukan seribu...
Nene : Ah sa nih mahasiswa jadi bayar seribu
Kondektur : Ah su tua baru...
Nene : Bodok sa lagi tugas belajar...

Nene Sakit

noreply@blogger.com (Cerita Mob) — Fri, 21 Aug 2009 06:00:00 +0000

Ini ada nene satu de opname di rumah sakit...
Pas siang begini mantri mo datang suntik obat ke nene, jadi mantri tanya nene begini...
Mantri : Nene su makan ka???
Nene : Sudah lagi... tadi pagi makan pinang...
Mantri : !@$@#$@

Peti

noreply@blogger.com (Cerita Mob) — Thu, 20 Aug 2009 06:00:00 +0000

Pace satu de pu sodara meninggal baru de cari peti, trus pace de tanya harga...
Pace : Mas harga peti yang murah brapa ka???
Mas : Yang murah harga mulai dua juta...
Pace : Bah mahal sampe... trada yang lima ratus ribu ka???
Mas : Ada juga... tapi badan di dalam kaki di luar...
Pace : %^*^&(&*)

Dopis

noreply@blogger.com (Cerita Mob) — Wed, 19 Aug 2009 06:00:00 +0000

Ada nene satu, de meninggal trus menghadap malaikat...
Malaikat : Selama hidup nene ko paling banyak bikin dosa
Nene : Stop tuduh sembarang eee...
Malaikat langsung bawa nene ke neraka
Nene : Bah tunggu sa telpon tete dulu...
Tapi malaikat langsung dorong nene ke api neraka
Nene ko menangis baru bilang...
Nene : Kam tunggu eee... sebentar tete datang deng dopis jang kam lari eee...

Sepak

noreply@blogger.com (Cerita Mob) — Tue, 18 Aug 2009 06:00:00 +0000

Satu kali ni ada paitua satu de pulang kerja dalam keadaan mabuk (su kebiasaan ka ini). Baru su tau orang mabuk to... tra pikir-pikir panjang lagi de mulai panggil de punya anak satu-satu baru mulai berdiri pukul dorang. De pu maitua marah jadi de pu maitua berdiri bela anak-anak. Tapi paitua ko tambah marah jadi paitua ini bale hantam de pu maitua lagi. Bo su begitu maitua ko menangis sedih skali eee... Baru maitua ko angkat bicara begini...
Maitua : Booo... biar sudah, ko su tau sa sakit-sakit begini baru setiap kali ko begini sama sa, pertama tong dua nikah tu ko bilang kata ko sayang saya lah... ko cinta saya lah... tapi itu sementara saja... Skarang ini setelah ko pu anak dari sa, ko tinggal main pukul sa... ko sepak sa di muka, ko sepak sa di kepala, ko sepak sa di dada... sampe sa deng sa pu mama pi rongseng baru dokter bilang sa sepak nafasss...

Anjojeng

noreply@blogger.com (Cerita Mob) — Mon, 17 Aug 2009 06:00:00 +0000

Nene mo naik ojek, trus nene ko tanya sama tukang ojek...
Nene : Pace ko bisa angkat ban ka??!
Ojek : Bisa to!!
Nene : Ah coba ko angkat sa mo liat...
Sudah tukang ojek ko angkat ban baru nene ko batariak...
Nene : Anjojeng... anjojeng... suanggi ko bunuh tete ka!!! biar sa kawin deng tukang ojek....

Mata Besar

noreply@blogger.com (Cerita Mob) — Sun, 16 Aug 2009 06:00:00 +0000

Ada pace satu, de pu nama Lukas. Satu kali begini de deng de pu sodara Matius pi ke Gereja ka ini. Minggu pertama dong du pi ibadah, pendeta pu khotbah terambil dari kitab LuKas... Minggu kedua pendeta pu khotbah dari kitab Lukas juga. Minggu ketiga juga sama. Pace Lukas su tersinggung skali... tapi de tunggu sampe minggu depan, kalo pembacaan AlKitab buka dari Lukas lagi brarti pace de marontak. Ternyata betul, pas minggu keempat pembacaan Alkitab dari Lukas lagi... Pace Lukas de berdiri, trus de mulai bicara...
Lukas : Pak Pendeta, su beberapa minggu berturut-turut nih sa ikuti tapi kenapa tong tinggal buka kitab Lukas trusss... sa tersinggung, sa pu nama juga Lukas... macam trada kitab lain saja... Pak pendeta ko tra lihat sa pu sodara Matius mata besar ini kah???!!!

Siapa Yang Konto?

noreply@blogger.com (Cerita Mob) — Sat, 15 Aug 2009 06:00:00 +0000

Ada pace dua pulang bajalan dari kota. Trus dijalan pulang nih dong dua harus lewat pohon beringin bokar. Pas lewat pohon beringin begini pace yang satu de cium bau-bau tra enak ka ini...
Pace1 : Bah... bau busuk apa ini??!! sapa lagi yang konto nih...
Pace2 : Ah jang sampe suanggi yang konto ka pa...
Suanggi muncul dari pohon beringin baru de bilang...
Suanggi : Sumpah demi Tuhan eee... bukan sa yang konto!!!

Laut Mati

noreply@blogger.com (Cerita Mob) — Fri, 14 Aug 2009 06:00:00 +0000

Satu kali ada tiga anak duduk baku melawan tentang sapa pu bapa yang paling jago...
Anak1 : Kam tahu sa bapa tu de pujahat saja... dalam satu jam de bisa bunuh orang satu kampung...
Anak2 : Kam tau sa bapa lebih jahat, satu jam saja bisa bunuh satu kota...

Anak3 : Aeeee... sa tra anggap kam pu bapa skali eee, kam tau sa bapa pu jahat? tapi sa tanya dulu kam tahu Laut Mati di Israel sana itu?
Anak1-2 : Iyo tong tau, kenapa jadi?
Anak3 : Yo... itu sa bapa yang bunuh makanya dong bilang laut mati...

Berenanglogi

noreply@blogger.com (Cerita Mob) — Thu, 13 Aug 2009 06:00:00 +0000

Ada tete sama de pu cucu. Cucu nih mahasiswa di Jawa. Satu kali de ada pulang ke kampung, jadi de ikut tete cari ikan...
Cucu : Tete... ko tau Biologi ka???
Tete : ... (cuma goyang kepala saja)
Cucu : Baru Sosiologi???
Tete : ... (cuma goyang kepala saja)
Cucu : Kalo Antropologi???
Tete : ... (cuma goyang kepala saja, tapi tete su mulai ganas ka)
Sampe tengah laut baru tete yang balik tanya de pu cucu...
Tete : Baru cucu ko tau pelajaran Berenanglogi ka???
Cucu : Tra tau tete...
Tete: Kalo tenggelamlogi??
Cucu : ... (goyang kepala) Tra tau juga tete...
Tete : Yo... kalo ko tra tau pelajaran Berenanglogi, nanti ko Tenggelamlogi trus ko Matilogi...

Naruto

noreply@blogger.com (Cerita Mob) — Wed, 12 Aug 2009 06:00:00 +0000

Napi tiga orang dong duduk kumpul di terminal Biak. Mansar Obet ko lewat depan dong tiga baru de tanya...
Obet : Mili... kam tiga liat Naruto ka???
Nap dong tiga kaget... dong bale tanya Obet... "Bah Naruto itu sapa???"
Obet : Naruto itu NApi RUmkorem TO...

Ipar Siram

noreply@blogger.com (Cerita Mob) — Tue, 11 Aug 2009 06:00:00 +0000

Satu kali ada pace duduk siram dengan de pu anak laki-laki, dari sore sampe malam ka ini. Jadi dong dua su mabok berat.
Karena su kena miras jadi anak ko angkat kata : "Ipar ko siram.....!!!"
Pace su dengar tapi pace pikir orang lain yang de pu anak panggil... Anak ko panggil lagi dan pace ko marah
Pace : Eh anak!!! sa tu ko pu bapa bukan ko pu ipar!!!
Anak : Ah kan ko kawin deng sa pu mama to jadi sa panggil ko ipar...

Partai

noreply@blogger.com (Cerita Mob) — Mon, 10 Aug 2009 06:00:00 +0000

Partai
Ada tete deng nene di kampung satu. Sekarang begini kan masuk masa kampanye untuk pemilu jadi dong dua baku melawan soal partai.
Nene Partai A sedangkan tete pro Partai B. Tete mulai bilang untuk nene...
Tete : Nene ko nanti pilih partai mana ka?
Nene : Partai A to...!
Tete : Ah Partai A tralaku Partai B boleh pangaruh.
Nene : Iyo habis Partai B yang kase makan ko dari dulu jadi..
Tete : Ah... sekarang tu lain Partai B yang pengaruh, ko lihat kampanye besok ni Partai B kase turun artis dari Jakarta. Kalo kam Partai A tu pasti kam tarian adat lagi to...
Nene tra terima tete bicara partai Partai A begitu tapi nene tahan saja. Besok hari nih tete pergi ikut kampanye Partai B sampe sore, selesai kampanye langsung tete pulang, sampe di rumah tete kase salam buat nene.
Tete : Selamat sore...!
Nene : Sore... ko su pulang kampanye ka?
Tete : iyo...
Tete kira nene su tra marah karna nene jawab baik-baik
Tete : Nene... ada makanan ka?
Nene : Ada di belakang...
Terus tete ke belakang cari, tapi tete tra lihat jadi tete bale tanya nene
Tete : Nene dimana ka?
Nene : Ada di atas meja makan ada tutup deng tudung...
Tete langsung cepat-cepat ke meja makan, padahal yang nene tutup nih gelagak yang nene cincang halus-halus. Tete buka tudung begini tete kaget...
Tete : Bah...!!! nene apa yang ko taruh untuk saya nih???
Nene : Gelagak
Tete : Boo...! masa begitu ko kira sa binatang ka?
Nene : Ko kan bilang Partai B yang pangaruh to... Partai B kan Banteng to, terus banteng kan de punya makanan kan gelagak, jadi itu sudah makanan yang cocok buat ko...!
Tete : Bo....! nene masa masalah partai ko bawa sampai ke meja makan...
Nene : Itu supaya ko tau kalau yang selama ini kasi makan ko itu Partai A bukan Partai B...!
Tete badan loyo langsung, su lapar bunuh baru dapat makanan tra baik. Makanya jang baku melawan dengan nene...

Ikan Kuah Kuning

noreply@blogger.com (Cerita Mob) — Sun, 09 Aug 2009 06:00:00 +0000

Mace satu ni, de rumah tiap hari rame dengan acara gaple, biasa de pu laki deng laki pu teman-teman dong. Setiap de pangil de punya laki, de pu laki jawab "sabar"... jang ganggu tong dulu sa ada main rame nih..."
Mace ganas jadi mace de atur rencana, satu kali begini dong main sampe siang jadi pace lapar bunuh, pace ke belakang mau cari makan jadi de tanya mace...
Pace : Mama ada makanan ka?
Mace : Iyo... ada di atas meja tu ko makan sudah...
Pace tra tunggu lagi langsung pace timba nasi, ale pace kasi nasi saja gunung, Pace ko ke meja makan buka tudung makanan langsung pace bilang "Boh ikan kuah kuning e..." Pace siram kuah fol, pas pace mau timba isi yang de kira ikan ni, pas pace angkat begini yang naik gaplek 6 balok dengan 1 balok..!
Ale pace pu menyesal saja, su lapar baru mau makan begini bukan ikan kuah kuning tapi gaplek kuah kuning...

Main Dopis Trus

noreply@blogger.com (Cerita Mob) — Sat, 08 Aug 2009 06:00:00 +0000

Pace satu nih kalo de cari ikan tu de pake dopis. Orang di situ semua su larang tapi de lagi keras kepala macam ikan kepala batu saja.
Satu hari begini pace pi ke laut cari ikan pake dopis lagi, tapi karna de terlambat buang dopis begini de pu tangan sebelah yang pegang dopis tu putus karna dopis meledak di tangan (ah trada maen dopis trus...).
Akhirnya pace bawa de pu tangan yang putus ke darat untuk di kubur. Pace ko gali kuburan baru de berdoa begini ”Ya Bapa... ke dalam tanganMu... ku serahkan tanganku...

Janji Joni

noreply@blogger.com (Cerita Mob) — Fri, 07 Aug 2009 06:00:00 +0000

Pace satu nih de mo berangkat dinas luar kota satu minggu. Pace de pu anak nama Joni. Jadi de kasih Joni uang satu juta untuk de pu uang makan deng kase makan babi.
Pace: Joni, bapa mo dinas luar kota jadi ini uang satu juta untuk ko pu uang makan deng kase makan tong pu babi eee....
Joni : Iyo bapa... aman itu...
Sudah pace ko berangkat. Tapi Joni nih de cuma kase makan babi nasi kosong campur deng krupuk saja.
Pas su satu minggu begini pace ko balik. Neh de heran skali, babi de kase tinggal tuh gemuk skali tapi sekarang babi pu badan jatuh.
Sudah de panggl Joni baru de bicara...
Pace : Joni... ko bicara yang betul... sebenarnya ko kase makan babi ka tidak??!!!
Joni : Ji... bapa... sa kase makan babi... tapi su tau toh, bapa berangkat dinas itu yang bikin babi de pikiran sampe de badan jatuh...

Angin Besar

noreply@blogger.com (Cerita Mob) — Thu, 06 Aug 2009 06:00:00 +0000

Pace satu ni de lagi asyik pancuri kangkung. De ambil su banyak skali. Bikin kaya de yang tanam saja...
Pas de lagi laju petik-petik kangkung begini orang yang punya datang...
Yang Pu Kangkung : Ehh... kurang ajar nih, ko bikin apa??? pancuri sa pu kangkung to???!!!
Karna su dapat tangkap basah, jadi pace pancuri su trada kata-kata, terpaksa de bilang...
Pancuri : Aduh... bapa... ini tadi ada angin besar jadi sa tahan di kangkung...