ශ්‍රී ලංකාව නියෝජනය කරමින්, 2027 ඇකඩමි සම්මාන උළෙලේ අන්තර්ජාතික වෘත්තාන්න චිත්‍රපට කාණ්ඩයට (International Feature Film) ඉදිරිපත් කරන සිනමා නිර්මාණය ලෙසට ‘රිවර්ස්ටන්‘ චිත්‍රපටය තෝරාගෙන තිබෙනවා.

ලලිත් රත්නායක විසින් අධ්‍යක්ෂණය කළ මෙම චිත්‍රපටයට මහේන්ද්‍ර පෙරේරා, ශ්‍යාම් ප්‍රනාන්දු, ප්‍රියන්ත සිරිකුමාර, රන්දික ගුණතිලක, ආනන්ද කුමාර උන්නැහේ ඇතුළු පිරිසක් රංගනයෙන් එක් වුනා.

99 වැනි ඇකඩමි සිනමා සම්මාන උළෙල නියෝජනය කරන ලාංකේය සිනමාපටය තෝරාගනු ලැබුවේ ශ්‍රී ලංකා ජාතික චිත්‍රපට සංස්ථාවේ මැදිහත්වීමෙන් පිහිටුවා ඇති සහ ඇමෙරිකා එක්සත් ජනපදයේ චිත්‍රපට කලා හා විද්‍යා ඇකඩමියේ අනුමැතිය හිමිවූ ශ්‍රී ලංකා ජාතික ඔස්කාර් තේරීම් කමිටුව (NOSCSL) විසිනුයි.

රිවස්ටන් නිෂ්පාදනය නිමන්ති පෝරගේ සහ ප්‍රභාත් රෝෂණ විසිනි.

සිංහල සිනමාවේ කලකින් නොදැකපු, නැවුම් සහ වෙනස්ම කතා තේමාවක් රැගත් ඩිංගා (Dinga) අලුත්ම සිනමාපටය එළඹෙන ඔක්තෝබර් මාසයේ සිට දිවයින පුරා තිරගත වනවා.

මෙරට ජනප්‍රිය නලු නිලියන් රැසකගේ රංගනයෙන් හැඩවන ඩිංගා අධ්‍යක්ෂණය කළේ ඩිලංක රංගනාත් විසිනුයි. එමෙන්ම මෙය ඔහුගේ පළමු වෘතාන්ත සිනමා අධ්‍යක්ෂණය ද වනවා.

පසුගිය සරසවිය සම්මාන උළෙලේදී හොඳම සහාය නලුවා ලෙසින් සම්මානයට පාත්‍ර වූ තුසිත ලක්නාත් විසින් මේ චිත්‍රපටයේ ඩිංගාගේ ප්‍රධාන චරිතය නිරූපණය කරනවා. ඒ සමඟින් තිලක්ෂණී රත්නායක, තුමිඳු ​දොඩන්තැන්න, සංජානා ඔනාලි, අංජන ප්‍රේමරත්න, දිලුම් බුද්ධික, උදාර අබේසුන්දර ඇතුලු නලු නිලියන් රැසක් ඔබට මෙයින් දැකගන්නට පුලුවන්.

ඩිංගා චිත්‍රපටය නිෂ්පාදනය කරන්නේ ලක්මාල් ධර්මරත්න – උදාර අබේසුන්දර – ප්‍රිමාල් රණසිංහ එකතුවෙනුයි. ස්ට්‍රයිනර් ඇඩම්ස් චිත්‍රපටයේ කැමරාකරණය හසුරවා තිබෙන අතර දමිත චන්ද්‍රසිරි විසින් සංස්කරණය සිදු කර තිබෙනවා.

“ඩිංගා” කියන්නේ නමක් උණාට විසාල අර්ථයක්. ඩිංගක් කියන්නේ සරල අරත්යෙන් ගත්තොත් චුට්ටක් කියන එක. ඉතිං ඩිංගගේ ජීවිතේ හැමදේම තියෙන්නේ චුට්ට චුට්ට.

ආර්ථිකය, උගත්කම, සමාජ තත්වය, පෙනුම, දැනුම මේ ​ඔක්කොම “ඩිංග” ට තියෙන්නේ චුට්ට චුට්ට. මේ චුට්ට කියන්නේ “කොළඹ ආදර ලෝකයේ” දී ආදරය හොයාගන්න ගියාම “ලොකු” ප්‍රශ්නයක්.

ඉතිං “ඩිංගා” ආදරය හොයමින් කොළඹ සැරිසරනවා…

“ඩිංගා” ඔබේ කතාව නොවුණත් ඔබේ ළඟම එකෙක්ගේ, ඔබේ හිතවතකුගේ, මල්ලියෙකුගේ කතාව වෙන්න පුළුවන්! ඔබේ මිතුරු කුලකයෙක් “ඩිංග’” අනිවාර්යෙන් ඉඳලා තියනවා. කවමදාවත් ඒ “ඩිංගා” ගැන ​පොතක්, කවියක්, සිංදුවක් හෝ චිත්‍රපටියක් නම් හැදිලම නෑ…

ඉතිං මේක තමයි ලෝක “ඩිංගලා” ගැන හැදෙන පළමෙනිම චිත්‍රපටිය…. එහෙනං ඔක්තෝබර් මාසේ ඒ “ඩිංගා” බලන්න ලෑස්ති වෙන්න!!

මෙරට තරුණ පරපුරේ ජනකාන්ත රංගන ශිල්පිනියක වන ශනුද්‍රි ප්‍රියසාද් රංගනයෙන් එක්වන අග්නිජය සිංහල චිත්‍රපටය එළඹෙන ඔක්තෝබර් මාසයේදී දිවයින පුරා තිරගත වනවා.

ශනුද්‍රි සමඟින් මෙහි ප්‍රධාන චරිත නිරූපණය කරන්නේ තාරුක මංචන පීරිස් විසිනි. එමෙන්ම අග්නිජය චිත්‍රපටයේ අධ්‍යක්ෂණය ද ඔහු විසින්ම සිදු කොට තිබෙනවා. මෙය ඔහුගේ පළමු සිනමා අධ්‍යක්ෂණයයි.

ඒ සමඟින් සනත් ගුණතිලක, කළණ ගුණසේකර, බිමල් ජයකොඩි, ශ්‍රියානි අමරසේන, ක්ලීටස් මෙන්ඩිස්, ජගත් චමිල, දසුනි සෙනෙත්මා ඇතුලු ප්‍රවීණ සහ තරුණ කලා ශිල්පීන් රැසක් අග්නිජය චිත්‍රපටයේ රංගනයෙන් දැක බලාගන්නට පුලුවන්.

ක්‍රියාදාම රැසක් සමඟින් කුතුහලය පිරුනු, නැවුම් සිනමා අත්දැකීමක් විඳ ගන්නට කැමති ඔබට අග්නිජය සිනමාපටය හොඳ තෝරා ගැනීමක් වේවි… මෙහි නිල පූර්ව ප්‍රචාරක පටයත් දැන් අන්තර්ජාලයට නිකුත් වී තිබෙනවා.

අග්නිජය – මේ ඔක්තෝබර් මාසයේ සිට!!

මෙරට සිටි ජනප්‍රිය නිරූපණ ශිල්පිනියක, උපදේශිකාවක සහ රංගන ශිල්පිනියක වූ චූලා පත්මේන්ද්‍ර මහත්මිය මීට සුලු මොහොතකට පෙර අභාවප්‍රාප්ත වී තිබෙනවා.

හදිසි හෘදයාබාධයක් හේතුවෙන් මිය යන විට, ඇය 46 හැවිරිදි වියේ පසු වුනා. නිවසේදී ඇති වූ හදිසි රෝගී තත්වයකින් පසුව රෝහලට ඇතුළත් කරන විටත් ඇය ජීවිතයෙන් සමුගෙන තිබූ බවටයි මාධ්‍ය වාර්තා කරන්නේ…

මෙරට මෙන්ම ජාත්‍යන්තර මෝස්තර නිරූපණ තරගාවලි රැසකට සහභාගි වී ඇති චූලාපත්මේන්ද්‍ර කුමාරපතිරණ මහත්මිය, මෙරට ප්‍රධාන පෙලේ මෝස්තර නිරූපණ උපදේශිකාවක් ලෙස ද කටයුතු කර තිබෙනවා.

රංගන ශිල්පිනියක වශයෙන් ද කටයුතු කළ ඇය ‘වහින්න මුතු වැස්සක්’ ටෙලිනාට්‍යය තුළින් මෙරට විශාල රසික ආකර්ෂනය දිනාගන්නට සමත් වුනා. ඊට අමතරව 2000 මුල් දශයකයේදී මෙරට ජනප්‍රිය වූ ගීත වීඩියෝ නිර්මාණ රැසක්ම ඇගේ රංගනයෙන් හැඩවුනා.

හේමාල් රණසිංහ ප්‍රධාන රංගනයෙන් එක්වන, “රිටිගල ජයසේන සහ සැඟවුනු නගරය” චිත්‍රපටයේ අලුත්ම පූර්ව ප්‍රචාරක පටය දැන් නිකුත් වී තිබෙනවා.

රිටිගල ජයසේන සිනමාපටය අධ්‍යක්ෂණය කරන්නේ අකාල සන්ධ්‍යා, දඬුබස්නාමානය, අග්නිදාහය, සමනල සංධ්වනිය ඇතුලු සම්මානනීය නිර්මාණ රැසක් ඔබ වෙත ගෙනා ජයන්ත චන්ද්‍රසිරි විසිනි.

හේමාල් රණසිංහ සමඟින් තුමිඳු දොඩන්තැන්න, පබෝදා සංදීපනී, උමා අසේනි, කාන්චනා මෙන්ඩිස් ඇතුලු ජනප්‍රිය නලු නිලියන් රැසක් මෙහි රංගනයෙන් එක්වනවා.

මධුනි අලහකෝන් චිත්‍රපටයේ කැමරා අධ්‍යක්ෂකවරියයි. චිත්‍රපටය නිෂ්පාදනය නිමල් දියුනුගල – රසිත ජිනසේන සහ සුජීව නිවුන්ඇල්ල විසිනි.

රිටිගල ජයසේන සිනමාපටය ළඟදීම දිවයින පුරා සිනමා හල්වලදී තිරගත වීමට නියමිතයි.

බිමල් ජයකොඩි ප්‍රධාන රංගනයෙන් එක්වන, මෙරට අතිශය ජනප්‍රිය ධර්ම යුද්ධය චිත්‍රපට මාලාවේ නවතම දිගහැරුමේ වැඩ කටයුතු පසුගියදා ආරම්භ වූවා. ධර්ම යුද්ධය පළමු චිත්‍රපටයේ ‘හරිස්චන්ද්‍ර’ගේ චරිතයට පණ පෙවූයේ ප්‍රවීණ රංගන ශිල්පී ජැක්සන් ඇන්තනි මහතා වුවත්, ඔහුගේ අවාසනාවන්ත අභාවය හමුවේ මෙම චරිතය නිරූපණය කිරීම බිමල් ජයකොඩිට භාරවුනා.

බිමල් ජයකොඩි සමඟින් දිල්හානි ඒකනායක, තිසුරි යුවනිකා, විනුමි වන්සදී, අශාන් ඩයස්, කුසුම් රේණු ඇතුලු මුල් චිත්‍රපටයට රංගනයෙන් එක් වූ නලු නිලියන් බොහෝ දෙනෙක් මේ නිර්මාණයටත් රංගනයෙන් එක්වනවා.

ධර්ම යුද්ධය 3 අධ්‍යක්ෂණය කරන්නේ මාරියා, හැපී බර්ත්ඩේ, නිකිණි වැස්ස වැනි චිත්‍රපට ඔබ වෙත ගෙනා අරුණ ජයවර්ධන විසිනි. තිර රචනය සිදු කළේ සුනෙත් මාලිංග ලොකුහේවා යි. කෝටි 60කට වැඩි ආදායමක් ඉපැයූ ධර්ම යුද්ධය 2වන චිත්‍රපටයේ අධ්‍යක්ෂණය සහ තිර රචනය සිදු කළේ ද ඔවුන් දෙදෙනා එකතුවෙනි.

මීට සමගාමීව ‘ධර්ම යුද්ධය’ චිත්‍රපටයට පාදක වූ Drishyam මලයාලම් කතාමාලාවේ 4වන චිත්‍රපටයත් නුදුරේදීම රූගත කිරීමට නියමිතයි.

සබීතා පෙරේරා සහ සංගීතා වීරරත්න, දශක ගණනාවක් පුරා ලාංකේය සිනමා තිරය හැඩ කළ, මෙරට ප්‍රවීණ සහ ජනකාන්ත රංගන ශිල්පිනියන් දෙපළක්. ඔවුන් දෙදෙනාම පසුගිය කාලය පුරාවටම සිනමා රංගනයෙන් දැකගන්නට ලැබුනේ නැහැ. නමුත් දැන්, දිගු නිහැඬියාවකට පසුව සබීතා සහ සංගීතා දෙදෙනාම නැවතත් සිනමා රංගනයට එක් වී සිටිනවා.

ඒ විහඟ ප්‍රේමය සහ ආදරණීය තරුවක් චිත්‍රපට හරහායි!

සබීතා පෙරේරා ප්‍රධාන රංගනයෙන් එක්වන ‘විහඟ ප්‍රේමය’ සිනමාපටය සංජීව පුෂ්පකුමාරගේ නවතම අධ්‍යක්ෂණයි. පොලිසියේ සහ දේශපාලන සහාය ඇතිව සිදු කරගෙන යන, කූට ළමා ජාවාරමක් වටා ගෙතෙන එම චිත්‍රපටය ලෝ පුරා ජාත්‍යන්තර සිනමා උළෙල රැසකදී ජගත් සම්මානයට පාත්‍ර වුනා. මහේන්ද්‍ර පෙරේරා – ඩිනාරා පුංචිහේවා – අකලංක ප්‍රභාෂ්වර වැනි තවත් නලු නිලියන් රැසක් එහි රංගනයෙන් එක්වනවා.

සංගීතා වීරරත්න කලකට පසුව රංගනයෙන් එක්වන ‘ආදරණීය තරුවක්’ චිත්‍රපටයත් මේ දිනවල අති සාර්ථකව තිරගත වෙමින් තිබෙනවා. මුල් දින හතරදී පමණක් එය ලක්ෂ 150කට අධික Box Office ආදායමක් රැස් කළා. ආදරණීය තරුවක් දිල්ෂාන් අමරසිංහගේ පළමු අධ්‍යක්ෂණයයි. ශනුද්‍රි ප්‍රියසාද් සහ සාරංග දිසාසේකර ද මේ චිත්‍රපටයෙන් දැකගත හැකියි.

එකිනෙකට වෙනස් – නැවුම් ශානර දෙකක් වටා ගෙතෙන විහඟ ප්‍රේමය සහ ආදරණීය තරුවක් චිත්‍රපට ද්විත්වයටම රසිකයින්ගේ උණුසුම් ප්‍රතිචාර ලැබෙමින් පවතිනවා.

මේ සිනමාපට දෙකම දිවයින පුරා සිනමා හල්වලදී ඔබට දැන් නරඹන්නට පුලුවන්!

පුංචි තිරයේ නිර්මාණ රැසකින් ඔබට සමීප වූ, නව පරපුරේ ජනප්‍රිය රංගන ශිල්පීන් දෙපළක් වන දුමී වන්නිආරච්චි සහ අකලංක ප්‍රභාෂ්වර ප්‍රධාන රංගනයෙන් එක්වන “මම තනියම” සිංහල චිත්‍රපටයේ මුහුරත් උළෙල පසුගියදා පැවැත්වුනා.

රොහාන් වැලිවිට විසින් අධ්‍යක්ෂණය කරන මෙම නවතම නිර්මාණය සඳහා නෙතලි නානායක්කාර, රිචඩ් වීරක්කොඩි, නිමල් පල්ලෙවත්ත, කුමාර කරුණානන්ද, ගාමිණි ජයලත්, සුදර්ශනී ගැලනිගම, දිලුක්ෂි විතාරන, ජගත් ආනන්ද ඇතුලු තවත් ජනප්‍රිය නලු නිලියන් රැසක්ම රංගනයෙන් එකතු වීමට නියමිතයි.

මෙය රොහාන් වැලිවිටගේ දෙවන චිත්‍රපට අධ්‍යක්ෂණය වන අතර මීට පෙර ඔහු විසින් සුසීමා සිංහල සිනමාපටය ද අධ්‍යක්ෂණය කළා.

මම තනියම චිත්‍රපටයේ සංගීත අධ්‍යක්ෂණය නවරත්න ගමගේ විසිනි. කැමරාකරණය තිසුලදීප තඹවිට සහ තිර රචනය චන්දන සමරසේකර විසිනි.

සම්පත් රණසිංහ වේෂ නිරූපණයෙන් එක්වන මම තනියම චිත්‍රපටයේ සංස්කරණය අනූෂ ජයවර්ධනගෙනි. ආනන්ද බණ්ඩාර විසින් වර්ණ සංයෝජනය සිදු කරනු ලබනවා. චන්දන පීරිස් චිත්‍රපටයේ කලා අධ්‍යක්ෂකවරයායි. ඇඳුම් නිර්මාණය අනෝමා වැලිවිට විසිනි.

මම තනියම චිත්‍රපටයේ විධායක නිෂ්පාදනය නුවන් වැලිවිට විසින් සිදු කරයි.

මෙරට පළමු සෙමි – ඇනිමේෂන් චිත්‍රපටය වන, “පිස්zoo” නවතම සිංහල චිත්‍රපටයේ රූගත කිරීම් පසුගියදා අවසාන වුනා.‍ මේ දිනවල එහි පසු නිෂ්පාදන කටයුතු සිදුවෙමින් තිබෙනවා.

ඉෂංකා ජහන්වී ‘නිහන්සා’ගේ චරිතයෙන් සහ දර්ශන් තවරාජා ‘සදේශ්’ගේ චරිතයෙන් මෙම චිත්‍රපටයේ ප්‍රධාන රංගනයට එකතු වනවා.

ඒ සමඟින් සෙනාලි ෆොන්සේකා, කුමාර තිරිමාදුර, ප්‍රියන්ත සිරිකුමාර, සරත් කොතලාවල, නිරෝෂා තලගල, ගිහාන් ප්‍රනාන්දු ඇතුලු නලු නිලියන් රැසක් මෙහි දැකගත හැකියි.

පිස්zoo චිත්‍රපටයේ අධ්‍යක්ෂණය අරුණ ජයවර්ධන සහ තිර රචනය සුනෙත් ලොකුහේවා විසිනි.