මෙරට සිටි ජනප්‍රිය නිරූපණ ශිල්පිනියක, උපදේශිකාවක සහ රංගන ශිල්පිනියක වූ චූලා පත්මේන්ද්‍ර මහත්මිය මීට සුලු මොහොතකට පෙර අභාවප්‍රාප්ත වී තිබෙනවා.

හදිසි හෘදයාබාධයක් හේතුවෙන් මිය යන විට, ඇය 46 හැවිරිදි වියේ පසු වුනා. නිවසේදී ඇති වූ හදිසි රෝගී තත්වයකින් පසුව රෝහලට ඇතුළත් කරන විටත් ඇය ජීවිතයෙන් සමුගෙන තිබූ බවටයි මාධ්‍ය වාර්තා කරන්නේ…

මෙරට මෙන්ම ජාත්‍යන්තර මෝස්තර නිරූපණ තරගාවලි රැසකට සහභාගි වී ඇති චූලාපත්මේන්ද්‍ර කුමාරපතිරණ මහත්මිය, මෙරට ප්‍රධාන පෙලේ මෝස්තර නිරූපණ උපදේශිකාවක් ලෙස ද කටයුතු කර තිබෙනවා.

රංගන ශිල්පිනියක වශයෙන් ද කටයුතු කළ ඇය ‘වහින්න මුතු වැස්සක්’ ටෙලිනාට්‍යය තුළින් මෙරට විශාල රසික ආකර්ෂනය දිනාගන්නට සමත් වුනා. ඊට අමතරව 2000 මුල් දශයකයේදී මෙරට ජනප්‍රිය වූ ගීත වීඩියෝ නිර්මාණ රැසක්ම ඇගේ රංගනයෙන් හැඩවුනා.

හේමාල් රණසිංහ ප්‍රධාන රංගනයෙන් එක්වන, “රිටිගල ජයසේන සහ සැඟවුනු නගරය” චිත්‍රපටයේ අලුත්ම පූර්ව ප්‍රචාරක පටය දැන් නිකුත් වී තිබෙනවා.

රිටිගල ජයසේන සිනමාපටය අධ්‍යක්ෂණය කරන්නේ අකාල සන්ධ්‍යා, දඬුබස්නාමානය, අග්නිදාහය, සමනල සංධ්වනිය ඇතුලු සම්මානනීය නිර්මාණ රැසක් ඔබ වෙත ගෙනා ජයන්ත චන්ද්‍රසිරි විසිනි.

හේමාල් රණසිංහ සමඟින් තුමිඳු දොඩන්තැන්න, පබෝදා සංදීපනී, උමා අසේනි, කාන්චනා මෙන්ඩිස් ඇතුලු ජනප්‍රිය නලු නිලියන් රැසක් මෙහි රංගනයෙන් එක්වනවා.

මධුනි අලහකෝන් චිත්‍රපටයේ කැමරා අධ්‍යක්ෂකවරියයි. චිත්‍රපටය නිෂ්පාදනය නිමල් දියුනුගල – රසිත ජිනසේන සහ සුජීව නිවුන්ඇල්ල විසිනි.

රිටිගල ජයසේන සිනමාපටය ළඟදීම දිවයින පුරා සිනමා හල්වලදී තිරගත වීමට නියමිතයි.

බිමල් ජයකොඩි ප්‍රධාන රංගනයෙන් එක්වන, මෙරට අතිශය ජනප්‍රිය ධර්ම යුද්ධය චිත්‍රපට මාලාවේ නවතම දිගහැරුමේ වැඩ කටයුතු පසුගියදා ආරම්භ වූවා. ධර්ම යුද්ධය පළමු චිත්‍රපටයේ ‘හරිස්චන්ද්‍ර’ගේ චරිතයට පණ පෙවූයේ ප්‍රවීණ රංගන ශිල්පී ජැක්සන් ඇන්තනි මහතා වුවත්, ඔහුගේ අවාසනාවන්ත අභාවය හමුවේ මෙම චරිතය නිරූපණය කිරීම බිමල් ජයකොඩිට භාරවුනා.

බිමල් ජයකොඩි සමඟින් දිල්හානි ඒකනායක, තිසුරි යුවනිකා, විනුමි වන්සදී, අශාන් ඩයස්, කුසුම් රේණු ඇතුලු මුල් චිත්‍රපටයට රංගනයෙන් එක් වූ නලු නිලියන් බොහෝ දෙනෙක් මේ නිර්මාණයටත් රංගනයෙන් එක්වනවා.

ධර්ම යුද්ධය 3 අධ්‍යක්ෂණය කරන්නේ මාරියා, හැපී බර්ත්ඩේ, නිකිණි වැස්ස වැනි චිත්‍රපට ඔබ වෙත ගෙනා අරුණ ජයවර්ධන විසිනි. තිර රචනය සිදු කළේ සුනෙත් මාලිංග ලොකුහේවා යි. කෝටි 60කට වැඩි ආදායමක් ඉපැයූ ධර්ම යුද්ධය 2වන චිත්‍රපටයේ අධ්‍යක්ෂණය සහ තිර රචනය සිදු කළේ ද ඔවුන් දෙදෙනා එකතුවෙනි.

මීට සමගාමීව ‘ධර්ම යුද්ධය’ චිත්‍රපටයට පාදක වූ Drishyam මලයාලම් කතාමාලාවේ 4වන චිත්‍රපටයත් නුදුරේදීම රූගත කිරීමට නියමිතයි.

සබීතා පෙරේරා සහ සංගීතා වීරරත්න, දශක ගණනාවක් පුරා ලාංකේය සිනමා තිරය හැඩ කළ, මෙරට ප්‍රවීණ සහ ජනකාන්ත රංගන ශිල්පිනියන් දෙපළක්. ඔවුන් දෙදෙනාම පසුගිය කාලය පුරාවටම සිනමා රංගනයෙන් දැකගන්නට ලැබුනේ නැහැ. නමුත් දැන්, දිගු නිහැඬියාවකට පසුව සබීතා සහ සංගීතා දෙදෙනාම නැවතත් සිනමා රංගනයට එක් වී සිටිනවා.

ඒ විහඟ ප්‍රේමය සහ ආදරණීය තරුවක් චිත්‍රපට හරහායි!

සබීතා පෙරේරා ප්‍රධාන රංගනයෙන් එක්වන ‘විහඟ ප්‍රේමය’ සිනමාපටය සංජීව පුෂ්පකුමාරගේ නවතම අධ්‍යක්ෂණයි. පොලිසියේ සහ දේශපාලන සහාය ඇතිව සිදු කරගෙන යන, කූට ළමා ජාවාරමක් වටා ගෙතෙන එම චිත්‍රපටය ලෝ පුරා ජාත්‍යන්තර සිනමා උළෙල රැසකදී ජගත් සම්මානයට පාත්‍ර වුනා. මහේන්ද්‍ර පෙරේරා – ඩිනාරා පුංචිහේවා – අකලංක ප්‍රභාෂ්වර වැනි තවත් නලු නිලියන් රැසක් එහි රංගනයෙන් එක්වනවා.

සංගීතා වීරරත්න කලකට පසුව රංගනයෙන් එක්වන ‘ආදරණීය තරුවක්’ චිත්‍රපටයත් මේ දිනවල අති සාර්ථකව තිරගත වෙමින් තිබෙනවා. මුල් දින හතරදී පමණක් එය ලක්ෂ 150කට අධික Box Office ආදායමක් රැස් කළා. ආදරණීය තරුවක් දිල්ෂාන් අමරසිංහගේ පළමු අධ්‍යක්ෂණයයි. ශනුද්‍රි ප්‍රියසාද් සහ සාරංග දිසාසේකර ද මේ චිත්‍රපටයෙන් දැකගත හැකියි.

එකිනෙකට වෙනස් – නැවුම් ශානර දෙකක් වටා ගෙතෙන විහඟ ප්‍රේමය සහ ආදරණීය තරුවක් චිත්‍රපට ද්විත්වයටම රසිකයින්ගේ උණුසුම් ප්‍රතිචාර ලැබෙමින් පවතිනවා.

මේ සිනමාපට දෙකම දිවයින පුරා සිනමා හල්වලදී ඔබට දැන් නරඹන්නට පුලුවන්!

පුංචි තිරයේ නිර්මාණ රැසකින් ඔබට සමීප වූ, නව පරපුරේ ජනප්‍රිය රංගන ශිල්පීන් දෙපළක් වන දුමී වන්නිආරච්චි සහ අකලංක ප්‍රභාෂ්වර ප්‍රධාන රංගනයෙන් එක්වන “මම තනියම” සිංහල චිත්‍රපටයේ මුහුරත් උළෙල පසුගියදා පැවැත්වුනා.

රොහාන් වැලිවිට විසින් අධ්‍යක්ෂණය කරන මෙම නවතම නිර්මාණය සඳහා නෙතලි නානායක්කාර, රිචඩ් වීරක්කොඩි, නිමල් පල්ලෙවත්ත, කුමාර කරුණානන්ද, ගාමිණි ජයලත්, සුදර්ශනී ගැලනිගම, දිලුක්ෂි විතාරන, ජගත් ආනන්ද ඇතුලු තවත් ජනප්‍රිය නලු නිලියන් රැසක්ම රංගනයෙන් එකතු වීමට නියමිතයි.

මෙය රොහාන් වැලිවිටගේ දෙවන චිත්‍රපට අධ්‍යක්ෂණය වන අතර මීට පෙර ඔහු විසින් සුසීමා සිංහල සිනමාපටය ද අධ්‍යක්ෂණය කළා.

මම තනියම චිත්‍රපටයේ සංගීත අධ්‍යක්ෂණය නවරත්න ගමගේ විසිනි. කැමරාකරණය තිසුලදීප තඹවිට සහ තිර රචනය චන්දන සමරසේකර විසිනි.

සම්පත් රණසිංහ වේෂ නිරූපණයෙන් එක්වන මම තනියම චිත්‍රපටයේ සංස්කරණය අනූෂ ජයවර්ධනගෙනි. ආනන්ද බණ්ඩාර විසින් වර්ණ සංයෝජනය සිදු කරනු ලබනවා. චන්දන පීරිස් චිත්‍රපටයේ කලා අධ්‍යක්ෂකවරයායි. ඇඳුම් නිර්මාණය අනෝමා වැලිවිට විසිනි.

මම තනියම චිත්‍රපටයේ විධායක නිෂ්පාදනය නුවන් වැලිවිට විසින් සිදු කරයි.

මෙරට පළමු සෙමි – ඇනිමේෂන් චිත්‍රපටය වන, “පිස්zoo” නවතම සිංහල චිත්‍රපටයේ රූගත කිරීම් පසුගියදා අවසාන වුනා.‍ මේ දිනවල එහි පසු නිෂ්පාදන කටයුතු සිදුවෙමින් තිබෙනවා.

ඉෂංකා ජහන්වී ‘නිහන්සා’ගේ චරිතයෙන් සහ දර්ශන් තවරාජා ‘සදේශ්’ගේ චරිතයෙන් මෙම චිත්‍රපටයේ ප්‍රධාන රංගනයට එකතු වනවා.

ඒ සමඟින් සෙනාලි ෆොන්සේකා, කුමාර තිරිමාදුර, ප්‍රියන්ත සිරිකුමාර, සරත් කොතලාවල, නිරෝෂා තලගල, ගිහාන් ප්‍රනාන්දු ඇතුලු නලු නිලියන් රැසක් මෙහි දැකගත හැකියි.

පිස්zoo චිත්‍රපටයේ අධ්‍යක්ෂණය අරුණ ජයවර්ධන සහ තිර රචනය සුනෙත් ලොකුහේවා විසිනි.

“හන්තානට ඇහෙනවද” සිනමා නිර්මාණය, පසුගියදා නිෂ්පාදන කටයුතු ඇරඹූ නැවුම් කතා තේමාවක් සහිත සිනමාපටයක්. ජනප්‍රිය නලු නිලියන් රැසක් රංගනයෙන් එක්වන මෙය අධ්‍යක්ෂණය කරන්නේ ශර්’ලි පී දෙලංකාවල විසිනි. චිත්‍රපටයේ රංගනයෙන් එක්වන නලු නිලියන් සහ කාර්මික ශිල්පීන්ගේ සහභාගීත්වයෙන් මෙහි මුහුරත් උළෙල පසුගියදා පැවැත්වුනා.

හන්තානට ඇහෙනවද චිත්‍රපටයේ ප්‍රධාන රංගනයෙන් එක්වන්නේ ධනුක දිල්ශාන්, සෙනාලි ෆොන්සේකා සමඟින් මලීෂා ජයසිංහයි. ඒ සමඟින් කළණ ගුණසේකර, අකලංක ප්‍රභාෂ්වර, තුමිඳු දොඩන්තැන්න, නිල්මිනී තෙන්නකෝන්, බියංක අමරසිංහ ඇතුලු රංගන ශිල්පීන් රැසක් මෙම චිත්‍රපටයට එක්වනවා.

හන්තානට ඇහෙනවද චිත්‍රපටය නිෂ්පාදනය කරන්නේ රිම්සාන් ෂහීඩ් විසිනි. චන්දන ජයසිංහ කැමරාකරණයෙන් සහ අමිත් ගුරු පසුබිම් සංගීතයෙන් එක්වනවා.

හන්තානට ඇහෙනවද චිත්‍රපටයේ පළමු රූගත කිරීම් මහනුවර ප්‍රෙද්ශයේදී පසුගියදා ආරම්භ වුනා.

මාලිනී ෆොන්සේකා මහත්මියගේ ජීවිත කතාව ඇසුරෙන් නිපදවෙන ‘රැජිනියේ’ චිත්‍රපටයේ රූගත කිරීම් මේ දිනවල සිදුවනවා. තාරුකා වන්නිආරච්චි, දමිත් විජේතුංග සහ ජනිත් වික්‍රමගේ ඇතුලු රංගන ශිල්පීන් පිරිසක් එහි රංගනයට එක්වනවා. එවැනි පසුබිමකදී එම චිත්‍රපටයේ රූගත කිරීම් පිළිබඳව, එම මහත්මියගේ පවුලේ සාමාජිකයින් විසින් පසුගියදා නිල නිවේදනයක් නිකුත් කළා.

මෙම සිනමාපටයේ රූගත කිරීම් පිලිබඳව ඔවුන්ව දැනුවත් කර නොමැති බවත්, එය සදාචාර විරෝධී ක්‍රියාවක් බවත් ඔවුන් පවසා තිබෙනවා.
මේ පිළිබඳව රංගන ශිල්පිනී සමනලී ෆොන්සේකා පළ කල සම්පූර්ණ නිවේදනය පහතින්

>>>>>>>>>

‘රැජිණියේ’ සිනමාපටය සම්බන්ධයෙන් මාලිනී ෆොන්සේකා මහත්මියගේ පවුලේ සාමාජිකයන්ගේ නිල නිවේදනයයි!

සිනමා නිළි රැජිණ, මගේ ආදරණීය ලොකු නැන්දා වන මාලිනී ෆොන්සේකා මහත්මිය අප අතරින් වෙන් වී වසරක් ගෙවීයාමටත් මත්තෙන්, ඇගේ ජීවිත කතාව අලලා සිනමාපටයක් නිර්මාණය වන බවට ජයන්ත ධර්මදාස මහතා සිදු කළ නිල නිවේදනයෙන් පසුව ඒ පිළිබඳව සමාජය තුළ විශාල කතිකාවක් නිර්මාණය විය. ඇගේ අභාවයෙන් පසු පවුලේ සාමාජිකයන් ලෙස අප පවත්වාගත් නිහඬතාවය පිළිබඳව බොහෝ දෙනෙකු ප්‍රශ්න කළද, නිර්මාණයක තිරපිටපත හෝ අන්තර්ගතය කුමක්දැයි නිසි ලෙස නොදැන ප්‍රකාශයන් නිකුත් කිරීම වෘත්තීය මෙන්ම සදාචාරාත්මක නොවන බැවින් අප මෙතෙක් නිහඬව සිටියෙමු.

එහෙත් අපට නොදන්වාම චිත්‍රපටයේ රූගත කිරීම් අද දින ආරම්භ කර ඇත. එහෙයින් ‘රැජිණියේ’ චිත්‍රපටය සම්බන්ධව අපට සිදු කළ සදාචාර විරෝධී ක්‍රියාව පැහැදිලි කරනු වස් පවුලේ සාමාජිකයන් වෙනුවෙන් මම මෙම නිල ප්‍රකාශය සිදු කරමි.

මෙම චිත්‍රපටය නිෂ්පාදනය කරන්නේ ජයන්ත ධර්මදාස මහතා විසිනි. අප ලොකු නැන්දා අසනීප වූ සෑම අවස්ථාවකදීම මෙන්ම ඇගේ අවසාන කාලයේදීත්, ඔහු ඇය වෙනුවෙන් කළ සියලු උපකාර සහ දැක්වූ ආදරය පිළිබඳව අපගේ හෘදයාංගම කෘතඥතාවය මේ මොහොතේ ද පුද කර සිටිමු. එහෙත්, මෙම චිත්‍රපටය නිර්මාණය කිරීම සම්පූර්ණයෙන්ම වෙනමම වෘත්තීයමය කාරණාවකි. එම නිසා ඊට අදාළව පවුලේ සාමාජිකයන් නිසි ලෙස දැනුවත් කරමින්, වෘත්තීය මට්ටමේ විනිවිදභාවයක් පවත්වාගෙන යාමට එතුමා ඇතුළු නිර්මාණ කණ්ඩායම සදාචාරාත්මකව බැඳී සිටිනු ඇතැයි අපි දැඩිව විශ්වාස කළෙමු.

ලොකු නැන්දා පිළිබඳව චිත්‍රපටයක් නිර්මාණය වීමට යන බව මට මුලින්ම දැනගන්නට ලැබුණේ හිතවතෙකුගෙනි. මා වහාම ඒ පිළිබඳව දමයන්ති නැන්දා (දමයන්ති ෆොන්සේකා) වෙත පවසා, ජයන්ත ධර්මදාස මහතාගෙන් ඒ පිළිබඳව විමසීමක් කරන ලෙස ඇයගෙන් ඉල්ලා සිටියෙමි.

ඒ අනුව 2026 පෙබරවාරි 09 වන දින දමයන්ති නැන්දා ජයන්ත ධර්මදාස මහතා හමුවී මේ පිළිබඳව විමසූ විට ඔහු පවසා ඇත්තේ, එම සිනමාපටය තවමත් පවතින්නේ සාකච්ඡා මට්ටමක බවත්, පවුලේ වැඩිහිටියන් සමඟ වැඩිදුර විස්තර කතා කරගැනීම සඳහා ඉදිරියේදී සාකච්ඡාවක් ලබා දෙන බවත්ය. එහිදී ඇය අවධාරණය කර සිට ඇත්තේ ලොකු නැන්දාගේ කීර්තිනාමයට හෝ චරිතයට කිසිදු හානියක් නොවිය යුතු බැවින්, ඊට පෙර එහි තිරපිටපත (Script) අප වෙත ලබා දීමට කටයුතු කළ යුතු බවයි. ඉන්පසුව දිනෙක උත්සව අවස්ථාවකදී ජයන්ත ධර්මදාස මහතා මට හමු වූ මොහොතකද මෙම සිනමාපටය ගැන පැවසූ අතර, එහිදී මම ද කියා සිටියේ එය හොඳ අදහසක් බවත් ‘මාලිනී ෆොන්සේකා’ වැනි ප්‍රබල චරිතයක් පිළිබඳව සිනමාපටයක් කිරීම ඊට අවශ්‍ය කාලය රැගෙන කළයුතු පර්යේෂණාත්මක කාර්‍යයක් බවයි.

නමුත් තත්ත්වය මෙසේ තිබියදී, 2026 අප්‍රේල් 2 වන දින ‘රැජිණියේ’ නමින් මාලිනී ෆොන්සේකා මහත්මියගේ ජීවිතය අලලා චිත්‍රපටයක් කිරීමට යන බව නිල වශයෙන් ජනගත කර තිබෙනු අප දුටුවේ මුහුණුපොත (Facebook) හරහාය. එම ජනගත කිරීමේ මූලික සාකච්ඡාව සඳහා හෝ උත්සවය සඳහා පවුලේ වැඩිමහල් කිසිදු සාමාජිකයෙකුට ආරාධනා කර තිබුණේ නැත.

පසුව මෙහි පිටපත් රචකයා ලෙස කටයුතු කරන සුනෙත් මාලිංග මහතා මා වෙත දුරකථනයෙන් ඇමතුමක් ලබා දී පිටපත පිළිබඳ විස්තර කිරීමට උත්සාහ කළ විට, මා ඔහුට පැවසුවේ මෙය දුරකථනයෙන් කතා කළ හැකි සුළු කාරණයක් නොවන බවත්, පවුලේ සියලු දෙනා සමඟ නිල සාකච්ඡාවක් පවත්වා දීර්ඝව කතාබහ කළ යුතු බවත්ය. එහෙත් ඉන් පසුව කිසිදු දිනෙක ඔහු හෝ එම කණ්ඩායමේ කිසිවෙකු ඒ සම්බන්ධයෙන් මා සම්බන්ධ කරගත්තේ නැත.

පසුව, දමයන්ති නැන්දා විසින් 2026 අප්‍රේල් 15 වන දින ලියාපදිංචි තැපෑලෙන් යවන ලද ලිපියට ප්‍රතිචාරයක් ලෙස, 2026 මැයි 2 වන දින සුනෙත් මාලිංග මහතා පමණක් දමයන්ති නැන්දා හමුවීමට පැමිණියේය. එහිදීද ඔහු චිත්‍රපටයේ කතාව ඇයට පැහැදිලි කිරීමට යන අවස්ථාවේදී ඇය කියා සිට ඇත්තේ වාචික ප්‍රකාශ පිළිගත නොහැකි බැවින් ලිඛිත තිරපිටපත පවුලේ අයට ලබා දෙන ලෙසයි. ඒ වන විට පිටපත සම්පූර්ණයෙන් අවසන් කර නොමැති බව පවසා ඇති සුනෙත් මාලිංග මහතා සහ දුරකථනයෙන් එම සාකච්ඡාවට සම්බන්ධ වූ ජයන්ත ධර්මදාස මහතා, පිටපත කඩිනමින් අවසන් කර 2026 මැයි මස 20 වන දිනට පෙර පවුලේ අතට පත් කරන බවට දමයන්ති නැන්දාට පොරොන්දු වී ඇත.
කෙසේ වෙතත්, එලෙස පොරොන්දු වූ දිනට අප වෙත පිටපත ලැබුණේ නැත. ඉන්පසුව දමයන්ති නැන්දා විසින් මැයි 23 සහ ජූනි 6 යන දිනවල යොමු කරන ලද කිසිදු WhatsApp පණිවිඩයකට හෝ 2026 ජූනි 23 වන දින ලියාපදිංචි තැපෑලෙන් යැවූ අවසාන ලිපියට පවා අද වන තෙක් ඔවුන්ගෙන් කිසිදු ප්‍රතිචාරයක් ලැබී නැත.

මගේ ලොකු නැන්දා පිළිබඳව චිත්‍රපටයක් නිර්මාණය වීම ගැන ඇගේ දියණියක ලෙසත්, ක්ෂේත්‍රයේම නියැලෙන රංගන ශිල්පිනියක ලෙසත් මම අවංකවම සතුටු වෙමි. එහෙත් එය කුමන ආකාරයේ සිනමාපටයක්ද, එය සිදු කරන්නේ කෙලෙසද සහ එහි අන්තර්ගත වන කතා වස්තුව කුමක්ද යන්න පිළිබඳව සෙවීමටත්, දැනගැනීමටත් ඇගේ පවුලේ අයට පූර්ණ අයිතියක් ඇත.

තිරපිටපත පවුලේ සාමාජිකයන් වෙත ලබා දෙන බවට දුන් පොරොන්දුව අමු අමුවේ උල්ලංඝනය කරමින් සහ මාලිනී ෆොන්සේකා යන නාමය ප්‍රචාරණ කටයුතු සඳහා බාල ලෙස භාවිත කරමින්, ‘රැජිණියේ’ චිත්‍රපටයේ රූගත කිරීම් අද දින අත්තනෝමතික ලෙස ආරම්භ කර ඇත.

මාලිනී ෆොන්සේකා මහත්මියගේ සහෝදර සහෝදරියන් ඇතුළු පවුලේ සැම නොසලකා හරිමින් සිදු කළ මෙම අතිශය සදාචාර විරෝධී, වංචනික ක්‍රියාව අප දැඩිලෙස හෙළා දකිමු. තම මුළු ජීවිත කාලයම සිනමා කලාව වෙනුවෙන්ම කැප කළ ශ්‍රේෂ්ඨ කලාකාරිනියකගේ ජීවිතය, ඇගේ මරණයෙන් පසුව මෙලෙස සුළු පිරිසකගේ පටු උන්නතිය උදෙසාත්, වාණිජ පරමාර්ථ උදෙසාත් අවභාවිත කිරීම සමස්ත කලා ක්ෂේත්‍රයේම ආචාර ධර්මයන්ට පටහැනි බව මම වගකීමෙන් ප්‍රකාශ කර සිටිමි.

– සමනලී ෆොන්සේකා.

මෑතකාලයේදී පුංචි තිරයේ ජනප්‍රිය වූ ‘කොටු’ ටෙලි නාට්‍යය, මේ දිනවල චිත්‍රපටයක් ලෙසින් රිදී තිරයට නැඟෙනවා. පසුගියදා එහි මුහුරත් උළෙල පැවැත්වුනා. ඒ මෙම සිනමාපටයට සහභාගී වන නලු නිලියන් සහ කාර්මික ශිල්පීන්ගේ සහභාගීත්වයෙනුයි.

ජගත් චමිල, ජයනි සේනානායක, සුලෝ හැරපත්දෙණිය, හිමාලි සයුරංගි, ඉසුරංග ජයකුමාර ඇතුලු මුල් ටෙලි නාට්‍යයට එක් වුනු නලු නිලියන් රැසක් මේ චිත්‍රපටය සඳහාත් රංගනයෙන් එක් වීමට නියමිතයි.

ඊට අමතරව සනත් විලමසිරි, සම්පත් ජයවීර, සරත් කොතලාවල ඇතුලු මුල් ටෙලි නාට්‍යෙය් නොසිටි නලු නිලි පිරිසකුත් මෙම චිත්‍රපටයෙන් දැකගත හැකියි.

කොටු ටෙලි නාට්‍යයේ අධ්‍යක්ෂකවරයා වන අසංක සායක්කාර විසින්ම මෙම සිනමාපටයත් අධ්‍යක්ෂණය කරනු ලබනවා.

මෙහි තවත් සුවිශේෂීත්වයක් වන්නේ අසංක සායක්කාර කොටු කතා තේමාව පළමුවෙන්ම ඉදිරිපත් කරන්නේ වේදිකා නාට්‍යයක් ලෙසයි. වේදිකා නාට්‍යයට පාදක වූ කතාවම ඔහු විසින් පුංචි තිරයේ ටෙලි නාට්‍යයක් බවට පත් කළ අතර ඉන් ලැබුනු අසීමිත ජනප්‍රියත්වය නිසා දැන් එය සිනමා තිරයටත් නැඟෙමින් තිබෙනවා.

මේ දිනවල මෙම චිත්‍රපටයේ රූගත කිරීම් සිදුවනවා.

ලාංකේය සිනමා ඉතිහාසය තුළ නිෂ්පාදනය වන, මෙරට පළමු සෙමි – ඇනිමේෂන් චිත්‍රපටය වන, “පිස්zoo” නවතම නිර්මාණයේ වැඩ කටයුතු පසුගියදා ආරම්භ වුනා.

ඉෂංකා ජහන්වී ‘නිහන්සා’ගේ චරිතයෙන් සහ දර්ශන් තවරාජා ‘සදේශ්’ගේ චරිතයෙන් මෙම චිත්‍රපටයේ ප්‍රධාන රංගනයට එකතු වනවා.

ඒ සමඟින් සෙනාලි ෆොන්සේකා, කුමාර තිරිමාදුර, ප්‍රියන්ත සිරිකුමාර, සරත් කොතලාවල, නිරෝෂා තලගල, ගිහාන් ප්‍රනාන්දු ඇතුලු නලු නිලියන් රැසක් මෙහි දැකගත හැකියි.

නිල්මිණී කෝට්ටේගොඩ, ලක්මාල් වීරසිරි, චමල් රත්නායක, ශාන් අරෝෂ ඇතුලු තවත් ශිල්පීන් රැසක් මෙහි සතුන්ගේ හඬ කැවීම් සඳහා එකතු වනවා.

පිස්zoo චිත්‍රපටය නිර්මාණය කරන්නේ මෙරට වැඩිම ආදායම් වාර්තාව හිමි ධර්මයුද්ධය-2 අධ්‍යක්ෂණය කළ අරුණ ජයවර්ධන සහ එහි තිර රචනය සිදුකළ සුනෙත් ලොකුහේවා විසිනි.