Comprondiendo Bida

Muhe Frida – cine artistico y mistico di nos propio suelo.

Ingrid Werleman — Sat, 19 May 2012 18:49:08 +0000

Den e cine cortico ‘Muhe Frida’ Alydia Wever ta duna su version di 7 arcetipo di e artista Mejicano Frida Kahlo. Alydia ta bisa cu Frida a inspir’e, mescos e lo keda inspira tur generacionnan cu lo topa cu Frida di un forma of otro. Mes colorido, bohemico, mistico y controversial cu Frida Kahlo su bida tabata, asina Alydia, hunto cu Felix de Rooy y Ryan Oduber a blend e naturalesa fotogenico y colorido di Aruba den nan produccion.

Un produccion cu ta refleha e buskeda na identidad di cada un di nos. Den e complexidad di bida ta bunita pa mira con Frida Kahlo a hasi su buskeda, ‘su’ bida. Esaki ta exigi balentia casi sobrenatural den un bida cu tabata marca pa hopi dolor fisico y emocional. Y podise esey ta loke ta keda intriga y ta hasi cu ora hendenan bishita e museo di Frida Kahlo, ta bisa cu ta parse cu ‘Frida Kahlo no a muri, e la djis disparse temporario pa asina duna hende chens pa drenta den su santuario priva’. Nada stranjo si sa cu e museo tabata e cas unda Frida a biba y traha.

Cu e produccion aki Alydia, Felix de Rooy y Ryan Oduber a mustra e forsa di combina talento y ta sinja nos cu maske un isla chiquito, nos por crea produccionnan di nivel artistico internacional.

Diasabra, Mei 19 ta pasa e peliculanan ‘The Last Supper’ & ‘The Devil’s Double’. Y diadomingo, Mei 20 ta sigi cu e pelicula cortico di Juan Fransisco Pardo di Aruba ’10 Ave Maria’ y e pelicula ‘Melancholia’. ’10 Ave Maria’ a ricibi diferente premio internacional. E anochi di cine ta cuminsa pa 8:00 PM den e Black Room aire acondiciona di Ateliers ’89, Dominicanessenstraat 34, full HD y riba pantaya grandi. Segun mi experencia di e prome anochi, un garantia pa un anochi ameno y cu produccionnan cu bale la pena pa tur amante di bon cinema. Y di otro banda bo ta juda artistanan local pa por sigi cu producionnan artistico di nos propio suelo. Esey ya ta duna un motibo extra y balioso pa bay. Pa ticket por contact Francisco Pardo 566 2529 of via FB of por cumpra na porta.

Creando e ‘Alto Vista’ nobo… e Bista mas Halto

Ingrid Werleman — Wed, 16 May 2012 18:55:21 +0000

Tin asina tanto expertisio y sabiduria di nos mesun hendenan a sali afo den e ultimo dianan. Di con nos no por forma un think tank nacional y busca e miho alternativa for di e punto di bista di loke ta miho pa Aruba, pa medio ambiente y pa cada un di nos famianan… No a bira tempo pa nos cuminsa respeta otro un poco mas den cada un su posicion y opinion, teniendo Aruba como meta principal?

Saca di ‘Aruba’…. un storia di Al Figaroa

Ingrid Werleman — Wed, 16 May 2012 00:28:25 +0000

…..Sigiendo mi ruta riba mi Pais Natal y mi bario stima, ta Alto Vista mi tin cu pasa y laga un oracion chikito atras. E Kapel chikito eynan ta trece hopi recuerdo, specialmente riba diamars, e dia cu mi Mama tabata hibami eynan pa nos por resa na Dios. E olanan cu ta lora y kibra riba e barancanan cercano, ta produci un ritmo asina Sereno cu bo ta pensa ta den cielo mes bo ta. Tur esaki tabata posibel riba un simpel pida sero chikito rondona den naturalesa. Y na caminda pa Alto Vista mi ta pasa banda di Juju su cas, e homber stranjo cu nos mayornan semper a spanta nos cune y pa confronta nos miedo, tabata bay tira piedra riba dak di su cas pa un dia wak su cara mahos. Mucha ta keda mucha berdad, semper inocente y fragil, pero cu un bon educacion un dia cielo nan lo alcansa. Pero mi ta sigi …

Recuerdo… mi Alma y Aruba…

Ingrid Werleman — Mon, 14 May 2012 20:27:51 +0000

…Divino Ser di Shelo…

Sembra un simia puro…

Den mi Aruba tan stima…

…Divino Ser di Shelo…

Un fabor mi kier pidi bo…

Pa no laga mi wak…

Mi Aruba tur cambia…

Tuma mi den bo brasa…

Of sconde mi algun caminda…

Felis lo mi sintimi…

Si mi por conta cu bo promesa…

Simianan cu bo planta, lo sigui spreit

Ingrid Werleman — Sun, 13 May 2012 18:48:57 +0000

Un video di e artista, naci na Corsow Caresse Isings. Caresse ta dedica e presentacion aki na su defunto mama, e artista y escritora Nydia Ecury.
Caresse a hereda e simia di su mama y ta comparti su curason den cada palabra cu e scirbi.
Danki na Caresse pa comparti su obra cu Comprondiendo Bida y danki na Nydia pa su inspiracion y bunitesa di curason.

E ta bunita.

Alma Mater…

Ingrid Werleman — Thu, 10 May 2012 23:26:27 +0000

Mi kier presta bo mi halanan pa bo bula…
Ora bo ta cansa y ta sinti bo abandona…

Mi ta orguyoso di cada logro di bo…
Y ta sinti mi dol’i pa cada draachi di cabey
cu ta molestia bo riba bo cabes…

Den mi pensamento mi ta brasa bo y zoja bo…
Cada dia… mescos cu dia bo tabata chiquito…
Protega bo di dolor…
Y hasi bo felis cada dia di bo bida…
Paso bo ta na mi curason mara…
Y yiu di mi alma…

Bo ta mi mes…
Refleha den un otro ser humano…
Bo ta mi yiu…
Pa eternidad…
Bo ta ami…
Y ami ta abo…
Esencianan sali di e Alma di e Mama Mayor…

Dedica na Bida mes… mei 2012

E regalo di mas grandi pa un mama no ta ‘cos’….

Ingrid Werleman — Tue, 08 May 2012 16:20:41 +0000

Mi a mira un comentario riba Facebook tocante e falta di educacion sexual na scolnan. Y mi ta asombra cu maske nos ta desaroya lihe, tin ora te hasta demasiado lihe, den hopi sentido, ora ta toca e tema di educacion sexual poco ta cambia. Educacion sexual semper lo keda un tema super necesario, pero delicado na scolnan. Ni maske un grupo grandi di majornan ta apoja e tema, ta keda e miedo di e majornan cu ta contra. Hoooopi anja pasa mi tabata den un oudercommissie cu kier a introduci un projecto nacional riba e tema. Basa riba normanan universal y profesional. Toch no a logra… nos cultura di miedo ta stroba hopi y tanten abuso di mucha ta sigi y sigi… y comunidad ta bira cara otro banda pa no mester mira e sombra di nos mes…

Pa educa nos majornan tin prensa y NGO’s y sector priva y scol y gobierno y su profesionalnan cu lo por traha mas hunto na bienestar di nos muchanan. Nos comunidad no ta un comunidad cu ta papia ‘zomaar’ riba sexualidad. Tampoco un comunidad cu ta sali asina lihe bay un charla pa sinja papia riba e tema. E indosincrasia ta diferente. Bo ta touch e Arubiano, ora bo por touch su curason. Ban hasi esaki nos vision…
Pesey mi ta kere cu medionan di comunicacion tin un rol grandi pa hunga, apoja pa profesionalnan den comunidad.

Diadomingo awor ta dia di mama… ban dedic’e tambe na e yiunan di mama… e regalo mas grandi pa un mama ta pa honra su yiunan… y duna nan respet como yiu y creacion di Dios…
Y ban habri nos mente y curason mas pa traha na projectonan cu di berdad lo trese e cambio asina necesario… projectonan cu ta touch nos rais y nos curason. Ban crea un ‘comunidad di curason’… Bo ta cla?

E Arubiano Balente, un rasa cu no ta muri…

Ingrid Werleman — Wed, 02 May 2012 00:09:04 +0000

‘Dia di Obrero’ na Aruba, un dia pa celebra e orguyo y satisfaccion cu nos tin den nos trabou. Mi kier refleha un tiki riba e forma con nos ta experencia trabou awendia. Tin ora sa tende reclamo di nos hendenan, specificamente e Arubiano original. Cu esaki mi ta compronde e Arubiano cu ta bin di majornan cu a nace na Aruba pa diferente generacion tras di otro.

Ta ser bisa cu ya e Arubiano, no ta mes balente cu antes. Esey tin hopi di hasi segun mi cu e forma cu bo kier wak bida. Mi ta kere e Arubiano no a bira menos balente. Mi ta kere cu e comunidad a cambia, mescos cu a sosode den hopi otro nacion y mirando e cualidadnan di e Arubiano, e la dicidi cu e kier move pa un otro tipo di trabou. Esaki a hasi cu a bin trabounan liber den ramonan pa cua mester a busca trahado di exterior.

Ora ta papia di e Arubiano Balente, ta importante pa determina den ki aspecto ta papia. Mi ta pensa bek cu ora mi a bay entiero di sra. Toya y mi a mira hopi Arubiano Balente. Sorry, Arubiano ‘Super’ Balente. Pa cuminsa mi ta corda e speech di e pastor hopi bon cu a papia di sra. Toya, pa hopi hende tambe mama Toya cu a dedica su bida na su fe, su Dios y su iglesia catolico. Mama Toya, naci na Corsow, pero pa mi un Arubiano ‘Super’ Balente. Mi ta corda tambe un senjora grandi sinta mi dilanti den misa, di baina e por cana, su lomba ta tur dobla, pero e tabata hasi su esfuerso pa lanta para, hinca rudia y a hasi su esfuerso pa bin duna su saludo final na sra. Toya. Otro Arubiano Balente.

Asina mi por sigi menciona hopi ehempel di ‘E muhe Arubiano Balente’ cu ta lora man na cas pa por cria nan yiunan. E yiu Arubiano Balente cu despues di su trabou, ta bay cas y cuida pa su mama malo. Tin hopi Arubiano Balente ta traha mas cu un trabou pa por juda nan famia. Yiunan cu ta jena saco den supermercado pa juda nan mama of tata sin trabou. Aruba ta jen di Arubiano Balente, un rasa cu no ta muri…

Cu cada dia di trabou ta jena cu satifaccion y honorabilidad pa tur hende cu stima Aruba…

Purificando mi curason…

Ingrid Werleman — Sun, 08 Apr 2012 17:06:08 +0000

Un instrumento pa cosnan bon,
esey ta loke mi kier ta,
pero mi sa cu mi curason tin simianan,
di condicionamento humano…

den silencio pues mi ta pidi…
na mi ser di ser…
pa para den porta eynan…
papia cu mi…
pa mi haja mi puresa atrobe…
brasa mi cu bo halanan di amor…
purificando asina mi curason…
pa asina mi por ta atrobe…
e esencia di ken un dia den paraiso mi tabata…
resusitando asina un suspiro a la ves…

april 8, 2012

Ban resusita den amor

Ingrid Werleman — Sun, 08 Apr 2012 01:12:59 +0000

Pasco di Resureccion… periodo di refleccion… pakico e jiu di Dios a scoge pa muri na crus?
Kico e kier a bisa nos di berdad? Tin ora mi ta pensa cu e mester kier a duna e hendenan di su tempo un mensahe di amor. Hesus tabata biba den un periodo cu nan tabata mata muchanan chikito riba orden di e mandatarionan. Mescos cu nan tabata mata criminalnan riba crus…

Y awendia, con nos ta para? Ainda ta mata jen di hende den guera rond di mundo riba orden di mandatarionan. Hendenan ta tira otro mata sin motibo algun den diferente paisnan. Kico ta e ehempelnan cu ta pone hende actua asina contra su prohimo?

Nos ta bibando den un mundo cu 10% ta donjo di 90% di e rikesanan. Hendenan ta muri di hamber den un parti di mundo, tanten otronan ta gasta nan placa na luho exorbitante of placernan cu ta corumpi otro ser humano.

Tin ora mi ta puntra mi mes, kico a bay robes cu humanidad. Unda nos a bira e victima di nos propio crecemento sin limite?
Con nos por draai cos bek? Dios lo duna nos un chens pa draai cos bek? Nos ‘kier’ draai cos bek of nos ta keda baila riba e barco di bida te dia e sink mescos cu Titanic?

Podise nos cada un por pensa con nos por resusita, cada un di nos den nos propio grandesa?
Si nos ta traha na imagen di Dios, ya caba nos ta bibando den amor y bendicion, toch? Y awor si nos desvia pa cualkier motibo, podise Pasco di Resureccion por inspira nos pa cada un di nos resusita, no for di morto fisico manera Hesus, pero den e mensahe cu e la laga atras pa mundo.

E mensahe di tur tempo ta un mensahe di amor… Ke hubo, ban ta balente… Ban resusita den amor!!! Abo ta cu cla???…