Contecurte

in paradîs

2012-02-24T08:17:00.000+01:00

Herbert James Draper (1863-1920) Flying Fish - 1910 (Exocoetus volitans) [colezion privade]

lade...

cualchi an indaûr o soi lât tês Seicell [1] par lavôr. stant el clime e tacavin biel prest a buinore,
fin dîs, e tal dopomisdì tor des cuatri fin ore di cene: e spes ancje dopo. ma ogni fin setemane
a pes tal ocean. par me o vevi une gip, di chês dutes viertes, cul veri denant tirât sù cuant che al plûf.
e ancje il sofêr:
un mulat voe di ridi.

tal interval, jo om di mont, mi fasevi puartâ su le piche plui alte [2] a saceâmi di flât su chê siele a mil metris. o cjalavi jù in bas dut chel mostri di mâr, cui sgrisui pe schene: siet mil mies di une bande
e trê mil di chê altre. e jo li, sentât
su chel sbit di isulute.

dopo cualchi biel dì, cognossintmi di plui, lui mi dîs «o soi stuf di lâ fin là sù.
no podìno cambiâ? ti meni intun puest plen di incjant!» e al cjape dibot le strade de cueste
che cuasi e fâs dut el zîr di Mahè [3] : fra goles salvadies, volts inspietâts, anses di tiere
e teles di cîl. di restâ cence flât! po le strade e finìs. si fermìn ancje nô, denant di un gloriet
scrufuiât tor des palmes. mi sint dut content, di un lizêr mai provât.
se ‘l paradîs al è un puest, nol pues sei che cussì.
mancjaressin i agnui…

cuntun struc inte tace mi invii intal scûr de foreste, atrat da un lusôr là jù insomp
a cent metris, scjafoiât sot dai brancs. dopo cualchi biel pas o scuen intardâmi
fin che i voi no si justin pe stralûs che mi incee. o induvini une splaze. o viôt ondes lungjes
che e rivin fin li: e figotin le tiere, le bussin sui lavris de sô piçule rade.
e po mularie. mularie intun grop, che zuie intal mâr come simpri i fruts
di ogni bande di mont

si sclipin cu l’aghe, si corin daûr, e colin, si alcin, si tocjin e ridin, e vuichin di gjonde
cun muse in sorprese. o voi plui indevant cjapât ancje jo dal businâ che mi sburte le brise,
a bugades: saran ‘ne dozene, fruts e frutes intune. e varan tredis agns. cutuardis, no sai.
salacor, cuindis. o voi cul lôr zuc. o cjali chês mans fûr e dentri da l’aghe.
cjamesutes svoladies, bregonuts mai intivâts. si lumin, si tocjin, si tufin,
si cjapin e scjampin e ridin e zornin e cricin, s’imbracin, si molin, si sburtin.
e jo li come un stupit.

belece salvadie, inmò cree. primitive. pagane. sublime. un incjant mai viodût
intun sôl colp di voli...

(continue...)

di el fari

[1] Seychells, in talian Seicelle

[2] Morne Seychellois

[3] le isule plui grande, cun capitâl Victoria

Cemût si disial, par furlan?

2012-02-22T09:43:00.000+01:00

O comencìn vuê une gnove rubriche, cussì, par gust dal Ostîr, par viodi se magari a pues plasê ancje ai clients de Ostarie e sburtâlu a lâ indevant.

La rubriche si clame "Cemût si disial?" e si cjacare di peraulis. In fin dai conts, lis contis si fasin sù cu lis peraulis, e di spes a capite di no savê cemût che si clame par furlan cualchi robe che par talian lu savin benissim. Qualchi volte al capite parfin il contrari.

Comencìn!

LIBELLULA

Sì, propite chê bielissime bestie che e svolete parsore lis nestris aghe, d'Istât, e che riflet il soreli. Cemût si disie, libellula, par furlan. Forsit lu savês o forsit no, ma al reste che la traduzion e je une vore particolâr. La libellula, par furlan, e je il SVUARBECJAVAI, o il SVUARBEVOI come che nus dîs il DOF.

COCCINELLA

E forsit nancje la "coccinella" ducj a san cemût che si dîs par furlan. O sigûr, chei plui vecjuts pues jessi che si metin a ridi, par une robe cussì, ma us siguri che i fruts no lu san e a tirin fûr strambolots come "cocinele" o robis di cheste fate. La "coccinella" invezit, par furlan e je la MARIUTINE, o MARIUTE o ancje AVEMARIE.

Il parcè nol è nancje di discuti, se o pensais che par solit a saltin fûr il mes di Mai, ven a stâi il mês de Madone.

MANTIDE RELIGIOSA

E par sierâ la terne dai insets di vuê, fate di nons une vore evocatîfs, par furlan, ve chi chel che al à, par sigûr, origjine compagne di chê taliane (li çatis in preghiere de bestie) ma che par furlan e somee plui biele e incisive. La "mantide religiosa" difat, par furlan e je nuiemancul che la MUINIE, ancje se pes sôs abitudinis alimentârs post-cubie no je propite cetant religjose...

COME IL Dì PRIME

2012-02-20T09:26:00.000+01:00

Al zuc di lâ a platâsi jê a varès zuiât ogni dì. Îr a si jere verementri ben platade. Al trê e jere bielzà insom de scjaibule dal fenîl.

Al cuatri e jere platade sot dal fen. Al sîs par platâsi miôr e jere lade tant in sot che al siet e jere colade te buse dal fen. Al vot, nuie di mâl, e jere colade suntune piore e come che il stali al jere sierât a clâf, a si jere fate cjatâ dome le sere…

9, fortune che no jere colade sui cuars di une cjavre.

10, o su le schene di une scrove... Joiii, cui vevie dite che lis scrovis a mangjin ancje i fruts?

L’indoman a vevin tirât vie le scjaibule par che nissun al ledi plui a platâsi là sù. Ma no veve nancje tante voie di riscjâ di copâsi inmó une volte e al

1… Indulà vevie di lâ a platâsi?

2… Daûr dal arbul di là de cise?

3… No, li lis ocjis no lassavin jentrâ nissun, no jerial li che chê ocje i veve becât il cûl a sanc cuant che e jere piçule?

4… No podeve stâ tant a rifleti. E scugnive sei platade prime che chê che contave e rivas al dîs. Le rêt e le cise! Li nol jere mai lât a platâsi nissun. Par rimpinâsi sule rêt e rondolâsi su le cise e colâ jú di chê altre bande i jere bastât pôc.

5… Poiant il pît par tiere e veve sintût un grugnâ.

6…Une scrove lontan doi metros si alçave sú e e vignive viers di jê corint.

7… Tirant sù le cotule cu lis mans e veve cjapât le corse cence savê indulà che leve.

8... Ae çampe! Ae çampe un muret di claps!

9… Alore op sul muret. Al nûf e mieç le scrove e rivave sú di jê tant che jê e saltave jù di chê altre bande.

Al colâ dal dîs a coreve vie viers il puarton che e veve viodût da pe dal prât sierantlu svelte daûr di se. Uf! Juste a timp.

Ma tant che le scrove e tornave indaûr a calmâ i soi piçui, jê si meteve a saltâ come une indjaulade cirint di businâ sot vôs par no fâsi sintî da chê che a veve a pene finît di contâ. Lis gjambis, i braçs e ancje le muse a tacavin a becâi dapardut parcè che lis jerbis altis di chel prât a jerin dutis urtiis. Le contentece di vêle fate francje a veve durât pôc. Come il dì prime.

di Jaio Furlanâr

flôrs de France

2012-02-17T18:01:00.000+01:00

Inconnu: Jeanne Ière de Naples, comtesse de Provence (1326-1382) De mulieribus claris. Cognac. XVe - XVIe siècle. (Bibliothèque Nationale de France) cote François 599. 93v.

une curiositât, par jentrâ in discors

Zuane d’Angiò contesse di Provence e regjine di Napoli, e jere contemporanie di pape Urban VI e dal cuintripape avignonês Clement VII. Ma culì no interesse tant le sô storie: e ancjemò di mancul chê di chei altris doi, cun ducj i muarts che fasevin, cui complots che si fasevin par dâ a diviodi cui chel al ves vût le veretât plui juste.

Nus interesse nome un fatut.

Tal 1347, le regjine Zuane - e veve vincjeun agns - e ven declarade eresiàtiche e scismatiche dal pape, che cun chê scuse le pare vie di Napoli. Biel tornant te sô contee e passe par Grasse, une vile de France. Cjapade jenfri di un brut tristimp di soresere, e cjate sotet tal cjistiel di un zentilom che al faseve el vedreâr. Tal indoman le contesse i domande di viodi cemût che al fâs i flacons. E chel, dut stranît pe domande e di plui pe bielece di chê fantate regjine, si met a soflâ, ma cussì tant e cussì tant ben, che i ven fûr une butilie di une cuindisine di litris. El mestri alore le pree di podê dâ el sô non a chel biel sproposit. E je i sugjerìs di clamâle “dame Zuane" che in francês al sune “dame-jeanne” .

Cjo mo!

Po chel vedran le à metude sul stranc sut, le à strente in sigûr e ornade cun vencs colorats: e al à fate fortune.

e vignìn a nô

Piligrìn … in chê volte, zirant vie pal mont in triciclo, si è sburtât jù pe France: a Lurd fintremai! a cjatâ le Madone cun cinc damigjanes, tornant di che aghe jemplades in colm. Sul cartel scrit a man, par denant si leieve “de Vergjine l’aghe jo o puarti in Friûl”.

Di paîs in paîs lu fermin smicjant « une gote ancje a nô, pai nestris malâts ... ». «… là jù tant lontan no podin migo lâ ... ». « le Madone ti vuardi e nô ti sin grâts ... »

Al jere bon Piligrìn e cussì ur in dave: a gotes, lassant che il lôr cûr al rindès fûr dal vade. Le sere, sul scûr, si fermave a durmî dongje un riul, par lavâsi le muse partint l’indoman, vent in prime le cure di rionzi par ben chês sôs cinc benedetes.

Alfin in trê mês, lui con lôr ducj intîrs, son rivâts in sorprese.

Ve’ le vôs che si spant: intun lamp tal curtîl une code in preiere. In chel dì dutes cinc les disvuede che cuasi i ven voe di partî jù pe France di gnûf: chê stagjon cussì curte e jere stade plui buine di tantes ben lungjes, in orari e a paron.

(Al veve scuviert, daûr di Èline Flavie (1) el negozi zovevul di robes di cult: di credo in marcjât, di relicuie in crodince).

di El fari

(1) Concubine di Costanzo Cloro e mari di Costantìn, che al deventarà imperadôr. bisugnarès cjatâ fûr il timp di lei le sô storie. e ancje chê di sô fi: par capî dabon cemût che si è inlidrisade le culture corinte.

I ORDENÂI

2012-02-15T08:00:00.000+01:00

A son vignudis sù dôs cjasis subit di là de nestre, di doi fradis, cun cinc fruts che sot sere àn cjapade la mende di fâ une partide di balon tal lôr curtîl.

“Tire, passe, goal!” si sintiju businâ, intun legri sunsûr che no si è plui usâts a considerâ.

Cuant che pe strade nol passe un automobil, al è sigûr un camio, un tratôr o almancul une motorete, epûr un nol fâs câs, al considere, al seguite a fâ il so fat. Ma la musiche e gambie cul vosarili di cinc fruts che a zuin di balon. Alore al pâr di strani. Un si disconcentre tes sôs robis, fintremai a sustâsi di dute la babilonie di chei frutaçats.

La facende e je clare. La orele e il sintiment si adatin aes robis ordenariis e si viôt che un trop di fruts ch’a zuin nol è, in zornade di vuê, un fat comun. Dulà che, une volte, i fruts a jerin talmentri tancj che si veve un bon fastidi a pensâ ce metiur non. E alore si ricoreve ai nons dai muarts, dai nonos e dai nonobis o ancje, des voltis, ai numars ordenâi.

Primo, al prin frut, che ai vût ancje jo gno barbe Primo, muart in Argientine. Secondo, al secont. Terzo, al tierç, come Terzo da la Tine, par dî un, che al vignive a compagnâ i fruts di Sante Marie a Verzegnis ogni an d’istât, cjase dal plevan. Quarto, al cuart. Quinto, al cuint, a ûs Quinto Saberdencje capitât a stâ chenti di Sclaunic, dulà che la sô int e jere capitade par antîc di Saberdencje.

Al sest si disevi Sisto. Settimo al setim. Ottavo, Ottavio e ancje Otto, passant alore cumò a un numar cardinâl, al otâf, sicu Oto Maçon, a stâ in face a nô, che si presentave infalibil, magari a dute gnot, a judâ gno pari cuant che al scrocave pe vacje il timp dal fâ.

Plui intrigâts si cjatavisi a jessi cul frut seguint, che al pareve di strani meti non Nono a un frut subit nassût. Decimo, invezit, al decim, cun braure, tratantsi di une bocje in plui ma ancje di doi braçuts pronts a judâ cjase, subit dispatussâts.

Fruts a nassevin ancje dopo, in cualchi cjase, ma si meteviur altris nons, corint alore a consultâ il lunari, stant che, passât il dîs, i numars a parevin adats dome pai papes.

Fin che, di un frut al altri, al capitave il moment che al ultin i metevin non Firmino o Fermino.

“Fermìno?” i diseve la femine al om, che e jere rivade alore cumò la volte di fermâ.

Storiutis de buinegnot

di Ivano Urli

LA MASANETE

2012-02-13T08:00:00.000+01:00

Tobie al jere un vecjo pescjadôr. Al clopave di un voli e di chel altri nol rivave a viodi un gran. Ma al jere braurin e mal sopuartave di scugnî doprâ i ocjai. Al jere stât il plui babio pescjadôr dal paîs. E lu sarès stât ancjemò. Fat al è che no viodint benon, tal dividi ce che lis rêts a tiravin su la barcje, al falave aromai ce tant.

«Cheste e je une cape», al diseve strizant i voi. E al butave in aghe un cieul.
«Chest al è un brancin». E si tignive te cassele, come al so solit, une butiliute di aghe.
«Ve ca, ce biel pes». Ma e jere une çavate di plastiche.

E indenant cussì, se no piês. E nissun che olsàs dai cuintri a la sô malereson. Ae fin te aghe a nadavin di gnûf i pes bogns e te barcje e jerin nome çavatis di plastiche e capis. Cussì i sorestants i domandarin di lâ in pension par lassâ il puest di vore a un zovin. I faserin une biele fieste. I regalarin un biel orloi e une radio pâr scoltâ, che lui no veve nancje impar a piâ. Cundiplui si jere prest stufât di no podê lâ a pescjâ. Al steve in sinton di fûr de sô cjasute di pescjadôr propite su la rive dal puart canâl dulà che a rivavin e partivin i soi plui zovins compagns pescjadôrs. Une dì, tant che dut seriôs, al steve cui pîts in muel te aghe, al sintî une vôs: «Tu sês fortunât a stâ alì cence fastidiis!»
«Cemût fortunât?» al dîs malegraceôs Tobie. «E po, cui aial fevelât, mo? Achì no viôt propite nissun! O ai di vê lis tarlupulis!»
«No soi un spieli, o soi ca te aghe!»

Tobie al tache a preocupâsi, si cjale ator, e nol cjate nuie che si podedi viodi. Al tache a sintîsi mâl.

«O scomenzi a pierdi colps, mi pâr di sintî une vôs che mi cjacare». Tobie al strice i voi. E hop, saltuçant e salte fûr de aghe une masanete. A viodi ben e sarès stade une granseole, ma no impuarte. Ce che al impuarte al è che i mancjave une çate, la ultime çampine daûr.
«Mandi, jo o soi Gusto!»

Tobie si cjale ator, nol volarès mai che i soi coparis lu lampassin cjacarâ cuntune masanete.

«Mandi a ti Gusto, jo o soi Tobie, vecjo e malandât!»
«Pparcè lamentâti, amì Tobie?»
«Ce ûstu savê tu? Mi sint tant che une çavate vecje, e nome parcè che no viôt plui tant ben e no sai cemût passâ il me timp».
«Cjale me, pitost. Dai frutaçats, par zuiâ, mi àn fat il dispiet di sbregâmi vie une çate. I mei compagns mi àn bandonât parcè che no puès plui cori svelt come lôr par scjampâ dai nestris nemîs, i predadôrs!»

Sintint la storie de masanete, a Tobie i ven drete une grande ideone!!! Al cjape il so curtissut di pescjadôr, une ronculute a sieremani, al creve une ramaçute di un len li dongje e al scomenze la sô vore di intai. In pôcs minûts, Tobie al gjave fûr dal toc di len une çatute gnove di screi. Le cjale ben, al cjape un astic e le tache cun chel al cuarp di Gusto. La granseole cu la grucje tignude dongje dal astic, e torne a cjatâ il gust di cori come no faseve di un toc. E no sta plui te sô scusse de gjonde. Saludant Tobie si invie di gran buride. Tobie al reste che la sô gnove amie e stedi scjampant cussì di corse, alì fer su la rive dal puart canal, tant che un bacalà, fissant Gusto che al discomparive. Cence une consolazion si sintà ancjemò cu lis gjambis in muel te aghe dal canâl. Passâts pene un doi minûts si sintî a spizigâ il poleâr dal pît. Al tirâ di colp il pît fûr de aghe. Al jere Gusto tornât cuntune sorpresute. Jenfri lis chelis al veveun pâr di ocjai. Pierdûts di cuissà cui e cuissà cuant.

Tobie no cence pôre, si met sù chei ocjâi che savevin di mâr, e cuntun berli di contentece corint bande il paîs e pardutis lis stradis al cridà:

«Ce ben che o viôt!»

La zornade daûr a buinore la barcje di Tobie e jere za fûr tal mâr viert. Al tornà in puart sore sere cu lis casselis plenis di bon pes fresc. Al veve tornât a fâ benon il so mistîr dividint des rêts il bon dal trist. No i interessave di parê bon parcè che, al pensave, i ocjiâi a son un regâl dal mâr!

di Stefano Gasti

CAFÈ MAGLÂT (le poesie non à mani)

2012-02-10T08:00:00.000+01:00

Soy un libro abierto (Sandro de Ponte - Messico 1975)

vuê a buinore, biel prest

juste a pene sentât in cusine denant dal cafè …

cui ise Vera ...

... Vera?!

sì! Vera …

[un tai di cidin]

ma! no sai… parcè tu?

[mi sbilfe cui voi]

spiete: chi di bot mi ven iniment … el non di une poete …

russe…

une poete? e tu tu ti insumiis di une poete?

... russe?!!!

mi insumii?

tu âs clamât Vera, usgnot passade

ma va! tu varâs capît mâl …

dôs voltes? … no pensi propit!

ce vuelistu che ti dîsi …

disimi di Vera!

ma cetantes Vera cognossìno nô?

jo nissune… e tu?

t’al ai dit benzà… une poete russe … Vera Pavlova … vele ca!

o ai let cualchi poesie des sôs

e tu te sês insumiade …

ancjemò ... ma ce disistu!

tu t’inrabiis parcè che m’insumii?

no! no pal sium …

ancje tu ogni tant tu t’insumiis …

ma migo di poetis … afghans o azèros

parce che no tu ju leis… si viôt

[rideç sfrent, uçât]

finìs el cafè che al è tart

in ogni câs o ai miôr Ane Achmatova

… o fevelin usgnot!

[e jes di buride]

o jes ancje jo daurman, lassant le cjicare a mieç.

po o torni indaûr e le svuedi tal lavel.

[… i siums no varessin di vê spetatôrs …]

di El Fari

LIS CONTIS DI GNO NONO TONIN Gno nono Tonin a Milan

2012-02-08T08:00:00.000+01:00

«Fabio ti aio contât di chê volte che o jeri lât a Milan in biciclete?»

«No! Nono, no tu mi lu âs mai dit».

«Alore cumò ti conti; Tu âs di savê, che cuant che o jeri zovin, mi varès plasût une vore lâ indenant cui studis. La mestre Siacca, che mi à fat scuele tes elementârs, e veve cirût in dutis lis manieris di convinci gno pari, a paiâmi la iscrizion al Esam di stât, come privatist. A si tratave di 500 francs di chê volte. Ma nol è stât nuie di fâ, di rivâ a convincilu, lui al contindeve dome le sô idee, e cussì i a dit a la mestre “Siore mestre, a je ore che al impari un mistîr, no stâ dome a pierdi timp daûr aes monadis”. E cussì mi a mandât a imparâ il mistîr di marangon, là di Migjio Strissule.

«Jo o levi a lavorâ ogni dì malvulintîr, o vevi simpri la sperance di cjatâ un lavôr un tic di miôr. Cuant che o ai sintût che Jacum di Poç al sarès lât a Milan a cirî lavôr, no ai spietât nancje un moment, o soi partît di corse a domandâi se o podevi lâ vie ancje jo cun lui».

“Sa tu âs une biciclete e voie di pedalâ, par me a va benon, cussì o varès compagnie”.

In chê sere, dopo cheste rispueste di Jacum, jo o jeri, il plui content dal mont, e cul pinsîr o jeri bielzà a Milan.

«Daspò il probleme vêr, al jere chel di rivâ a convinci gno Barbe Meno a prestâmi le sô biciclete, soredut parcè che lui la tignive di cont come une relicuie.

Fabio, jo ti dîs la veretât, e je volude la man dal Signôr par rivâ a convincilu a dâmi le biciclete.

Mê mari, ogni dì che e passave, a man, a man, che si vicinave la ore de mê partence, a cresseve lis Ave Mariis ae Madone par avodâmi ae Sô protezion.

Lâ a Milan in biciclete inta chei agns, nol jere facil, lis bicicletis par ben tignudis che e fossin, no jerin di sigûr lis bicicletis lizeris che e son vuê, cence fevelâ des stradis, plenis di claps e di di busis. Nus a volût plui di une setemane par rivâ. Mangjâ pôc e pedalâ tant, e durmî indulà che si podeve. Par nestre fortune il cusin di Jacum, che al viveve a Milan nus à dât ospitalitât.

Al jere une brave persone, e nol steve mâl nancje cul tacuin. Jo no pues dismenteâ il so boncûr, a pene che o sin rivâts, nus à subit fats jentrâ inte sô cjase,e nus a dât di mangjâ, e nus à metûts a durmî intune cjamarute sotet, mi pareve di jessi za un siôr.

I prins doi dîs ju vin spindûts a cjalâ la citât.

«Denant dal Domo o jeri restât incantesemât, tal viodi chel spetacul di costruzion, ducj chei ricams su lis balaustris e chei sgherlifs tai penacui e ator ator dai balçons, e parevin fats cul trafôr,

e la sù adalt parsore di dut, chel sflandôr de Madonute di aur.

Jo no rivavi a movimi di li, o jeri come se o fos stât inclaudât inte strade, denant a chê maravee.

Dopo un pôc di timp che jerin a Milan, midiant des cognossincis che al veve il cusin di Jacum, jo ai cjatât di lâ a lavorâ come aprendist intune fabriche di automobii di gale, lis miôr di chê ete.

“La Isotta Fraschini”. Dilunc de zornade o levi a vore e la sere o fasevi un cors par deventâ un mecanic eletricist.

Dopo un an di sacrificis, o jeri sistemât a vonde ben. Jo 'nd ai di disi grazie fin che o campi al Signôr e al cusin di Jacum. Fabio cheste storie che ti ai contât, a son ducj fats di veretât, chest tal siguri jo».

di Plume di Ingjustri

IL GNO DOPO VUERE

2012-02-06T08:00:00.000+01:00

“Moviti frut, no vin timp di pierdi. Ancje se lis zornadis si son slungjadis, l’istès al ven scûr adore…. e tu sâs che ancje chest an o vin di lâ a scuedi chei cuatri carantans che a coventin par fâ dî messe a Cjargnà”.
E cussì ogni an, a pît, dopo le solite solecitazion di mê none, jo e jê o partivin pes cjasis di chês fameis che ancjemò a spietavin, cui il fi, cui il marît, a voltis il pari, partîts in vuere e mai plui tornâts.
“Almancul une messe par chei puarets che no savìn se son muarts, fats presonîrs, o pierdûts”. Chest si ripeteve mê none, strade fasint, fevelant di bessole. Puarete, in chê vuere, e veve pierdût doi fîs. Nelo e Gjovanin, doi biei zovins, cussì a contavin tal paîs, e che jê, a jere sigure che prime di murì ju varès viodûts su lis lôr gjambis zirâ la volte de androne. Cjaminâ cun jê in chês bielis zornadis di vierte, pai trois dai cjamps, biadelore verts, mi jemplave il cûr. Ma un an, chê gjonde par chê biele zornade che o vevi tant spietât si jere mudade intun brut pinsîr che come un carûl mi businave tal cjâf. O pensavi a gno pari che al jere un comunist, come chei che a vevin copât o fat presonîrs i miei barbis.“Cemût puedial jessi amì di chei che a àn copât, o fats presonîrs siei fradis? mi domandavi avilît.
No podevi savê, o jeri masse canai, che al jere stât chel cancar di Mussolini, i fassiscj che a vevin mandât in vuere i miei barbis. Come che no podevi savê che chei bruts pinsîrs a jerin nuie altri che lis bufulis di chei cuatri politics, che a contavin cul ingjan ae puare int par podê lâ a sentâsi a Rome. Ma par fortune chel brut pinsîr subit al jere sparît a pene che mê none viodintmi cussì lancurôs, mi à prometût che mi varès puartât a Cjargnà.

E ve ca, finalmentri chê zornade e jere rivade. Jo, me none, gnagne Angjeliche o jerin bielzà montâts, cun dute la clape dal paîs, su la coriere che nus puartave al templi di Cjargnà. Jo o jeri content come une pasche e soredut parcè in chê zornade o vevi la braùre ancje di podê lei i nons dai miei barbis su la lapide di marmul che e jere in chê grande glesie. Ma no dome par chest o jeri content. Gnagne Angjeliche e jere une femine gustose e dome il pinsîr di passâ une zornade ancje cun jê mi meteve ligrie. Ma se chel gust, come che si dîs, al jere vignût a cjaval, al è bastât pôc par che al tornàs vie a pît. Te glesie, a metât cerimonie, gnagne Angjeliche no podeve plui tignîle... Puare femine, no i restave che cisicâ inte orele di mê none che le compagnâsi fûr de glesie par lâ a poiâle di cualchi bande. Dit e fat. Ducj I trê o jerin bielzà fûr, tal biel mieç de place. E al bastave un moment, in chê volte lis feminis indevant cui agns a puartavin lis mudantis cul sclap. Al coventave dome un cjanton dulà che gnagne Angjeliche e aromai, za che jere, ancje mê none, a podessin fâ la pissade. Jo o vevi dome di stâ atent che nol rivâs nissun. E velis là, dutis dôs, in pins, dongje il mûr, crodint che nissun al podès viodilis. Ma sul plui biel de disbevude, cuant chê gnagne Angjeliche e mê none a pensavin di vêle fate francje, no passie propit par li la bande dai alpins. Mari mê, ce vergogne!!! Dut al jere finît intun bati mans, ridadis di gust e cun chel de trombe che ur sunave daûr. In chel moment, par l’imberdei o sarès lât sot tiere. Mancul mâl che incrosant i voi di gnagne Angjeliche, mi soi acuart che jerin biei e celescj come il cîl di chê zornade e che a dispiet de vergogne a ridevin istès, come se se nol fos sucedût nuie.

di Nello Malisano

IL CANO(CJÂL)

2012-02-01T08:00:00.000+01:00

“Sêtu za stade in bancje?” gjo, a mê mari, tal viodile tornâ daurman.
“Nol ere nancje un cano!” disè jê.
“Cjan” gjo, “e par talian, cane.”
“Cano, sâtu parcè?” disè jê.
“Lu sai a memorie” gjo.
“Puar Agnul!” disè jê, tacant a contâ la storie di cuant che, la sere in sierade, ducj insieme cu lis fameis par dongje, si discartossave te arie la blave subit tirade jù, sentâts in file sul grum a man a man plui piçul de blave di discartossâ, denant dal grum a planc a planc plui grant de blave rosse o blancje scartossade, tun legri svoletâ par aiar, di un grum al altri, di panolis e peraulis de int, dute intun contâsi.
“Cemût, Ivano, chê dal cano cano?” mi diseve ogni moment Agnul Medêç, pari di Meni da la glace nomenât di dut Udin par vie che al puartave la glace tes casselis tai reparts dal ospedâl, in agns che no esistevin glacerots di ogni bande.
O vevi començât asilo juste in chel, sot des muiniis tun furmiâr di fruts e la superiore suor Giacinta che nus insegnave filistocjis, vuadolant ben e no mâl cui che al tardave a imparâlis.
“Queste son le mie manine” o començavi alore jo cun tante di ande sul grum de blave, zirulant lis mans denant di Agnul, “presto via non ci son più.”
“Questo è il lungo cano cano” cu lis mans a canocjâl denant i voi, “che si vede da lontano, presto via non ci son più!” platant lis mans daûr il cûl.
E Agnul Medêç, ogni volte, si consolave a ridi.
“Cemût chê dal cano cano?” al tornave a domandâ.
“Questo è il lungo cano cano che si vede da lontano…” jo, pontant il canocjâl cu lis manutis, che tun canocjâl fat cu lis mans un frutut al viôt robonis.

Storiute de buinegnot n. 22
di Ivano Urli

COLÔR VIOLE

2012-01-30T08:30:00.000+01:00

Regjine, restade di bessole in chê vecjie cjasone di claps grîs come lis sôs viestis, si confide cun Benedete, che la scolte cence bati cee crusiant carotulis e pan sec.
«Benedete, nance cheste volte ti sôs plene, tu sês il ritrât de salût, biele frescje parcè mo no tu âs preseât il mascli di Paschine?»
Intant che e fevelave, il ricuart vîf di une lontane viere la strassine in rive al riul, sedis agns, biele come une primulute, insomp de vigne un zovenut dai cjavei di aur al cuince lis vîts, a si cjalin, a si tornin a cjalâ, man man che lui si svicine il gong dai lôr cûrs al spant une musiche maraveose.
Il zovin, ingropât e cjapât par l'emozion, si presente: «O soi Benedet e tu?» «Jo o soi Regjine».
Un grant amôr, a disevin ducj, confidencis, progjets. Une dì, Benedet, plen di zentilece e contenton come une Pasche i dîs a: «Regjinute, o voi in Argjentine cun il gno amì Olmo, al è une vore simpatic, al sarà il nestri copari di anel».
«O Benedete, cussì e je la storie, no ai mai permetût al gong dal gno cûr di sunâ par altris moscardins, i clucîs simpri il segret di viodilu tornâ... ma cuissà cuant...»

Tornade tal so jessi, e met la cunine dentri te vecje sporte di sclofulis di none Ilde, che la doprave par puartâ i cunins a incrosâ. «Benedete, ti puarti di un espert, cheste volte tu viodaras c'è biele schirie di cuninuts». La sporte tal manuvri de biciclete, e cor là di Vigji, passionât intinditôr di nemai da curtîl.

A la imburide comparizion di Regjine in cjâf de stradele di cjase, dongje il ripâr dal Tiliment, Vjigi, om solitari, da la timidece mascarade dai mostacjins a la Salvador Dalì, al reste sfolgorât par la emozion. Simpri biele ancie cui cjaviei blancs,” al pense.
Intant che al esamine la besteute cun competence, il so fîl di sperance grues come un glimuç ingropât intun intrîc di sintiments, dal inamorament mai declarât; la so vôs imprisonade da la balbuzie fin da piçul e sclope come une bombe: «Regjjne... no pos fa... cu cu cunins al è un mascli... tipo Olmo, clamile Benedet. Regjinute jo o soi da simpri inemorât di te».
Scaturît e maraveât de naturalece de so peraule, e la declarazion d'amour finalmentri disblocade, Vjigisi piert incantesemât tai voi celest di Regjine cun il timôr di une brute reazion.
«Ce Vjigi... ce âstu dit? Benedet? Olmo? La cunine un mascli? Jo la mê vite... tu inemorât di me? Cetancj agns jo o ai... Sedis, cinquantetrê?»
Regjine e monte in biciclete e scjampe confusionade, scossade di une conturbie di emozions, il cûr in burascje.
La dì dopo, sore sere, Vjigi cul cjâf tal mont de lune, timorôs di vê ofindût Regjine, al reste striât di un nûl che al cole jù dal cîl, al ven jù ben planc e ben planc si rodolee jù pe stradele di cjase par fermâsi devant di lui.
E je Regjine in biciclete, vistude di viole cui cjaviei blancs colôr lune.

di O. Zete

IL CUADRI DAL MUSEU

2012-01-27T08:00:00.000+01:00

Un gnûf cuadri al jere rivât tal museu. Al jere un cuadri un vore biel e Meni, il guardian di gnot, si jere fermât a cjalâlu: e jere une cjase bandonade cun ator arbui grandonons e un cîl di ploie.
Il cuadri al jere stât regalât al Museu no si sa di cui e no si saveve cui che lu veve piturât. Si viodeve dome, tal cjanton, une “L” come firme.
A Meni i jere plasût cussi tant che a lu veve cjalât cun atenzion prime di lâ indenant cui so zîr.
Al veve alc di misteriôs e al rapresentave une cjase bandonade, su lis culisinis. A dî il vêr, a someave propit la cjase dulà che, tancj agns prime a jerin sparîts trê soi amîs.
No si jere mai savût ce fin che a vevin fate, e la uniche restade – une bielissime fantate che in chê volte i plaseve une vore – a no veve mai viert la bocje e a jere deventade mate.
La gnot dopo al veve tornât a osserva il cuadri: i barcons a jerin spalancâts e si viodeve dentri. I veve someât che a fossin sierâts... Ma ce stupidagjine... di sigûr si visave mâl!
La tierce sere al jere lât dongje dal cuadri cuntun pocje di aprension e cuant che lu veve cjalât al veve crodût di jessi deventât mat: dentri de cjase e jere une femine. Al jere plui che sigûr di no vele viodude, la sere prime. E jere une robe incredibile: la fantate, cun dai luncs cjavei neris, e jere vignude fûr da la puarte de cjase, si jere piade une cjiche e a veve tacât a fumâ. Ancje se al jere scûr, tal cuadri, Meni al rivave a viode benissim la sene, come se e fos par television. La fantate si viodeve di lontan pene fûr de cjase.
Lui, par viodi miôr, al jere subite lât dongje dal cuadri, ma come par incjant dut al veve fermât di movisi e la cjase e jere tornade imobile e la piture i someave di gnûf normâl, come pene che al veve tacât a cjalâle.
Cussì al jere lât indevant cul so zîr, dant la colpe a la strache o a lis lûs dal Museu, che di gnot a lu vevin ingjanât.
La sere dopo, però, la sene e jere tornade a ripetisi.
Meni, chest colp, si jere fermât lontan dal cuadri, al veve pontât la pile su la tele e al jere stât atent a dut ce che al jere sucedût.
Prime di dut la fantacine cui cjavei neris e jere tornade fûr e e veve tornât a piasi la sigarete. Dopo si jere slontanade de cjase, cjaminant framieç il bosc, par lâ a platâsi daûr di une cise. Intant che jê e jere lontan da la cjase bandonade, parsore di chê al veve començât a cambiâ il timp, la gnot e jere ancjemò plui scure e a un ciert pont Meni al veve viodût doi zovenots che a vierzevin il barcon e parfin un fulmin che a lu straviersave, parantju dentri.
Chel cuadri al jere propite une maravee!
Meni nol rivave a cjalâ dapardut e cussì al veve decidût di seguî ce che e faseve la femine. Ancje se forsit e jere lade framieç i morai dome par la a pissâ, a lui i pareve di ricognossi propit chê fantate che al cognosseve di zovin e che i plaseve.
Cussì, cence inacuarzisi, al jere lât une altre volte dongje dal cuadri e ancjemò une volte dut si jere fermât, tornant normâl: la fantate e jere restade platade daûr une cise e i barcons da la cjase misteriose a jerin scûrs e no si rivave plui a viodi nuie.
Meni al veve provât a tornâ a lâ plui lontan, ma la maravee no jere tornade e il cuadri al jere restât fer.
«Nuie di fâ» si jere dit, la sere dopo si sarès impegnât a no movisi e a cjalâ dute la sene, cence lâ dongje e cence distacâ i voi da la tele.
Nol jere stât facil, ma la sere dopo Meni al jere restât imobil e al veve cjalât dut ce che al sucedeve.
Da la fantate, che intant lui si jere visât che si clamave Lussie, no si rivave plui a viodi nuie, ma dentri te cjase al pareve che al stes sucedint di dut!
Dopo i fulmins che al veve straviersât il barcon, Meni al veve viodût doi zovins, che a cjalâiu di lontan i parevin terorizâts. Nol capive ce che al stes capitant ma al jere sigûr di viodi dal sanc che al schizave dapardut e i pareve ancje di sintîju businâ.
Al veve cirût di mantignî la calme e di no spaurisi, ma noi rivave a gjavâ i voi da che maledete tele. Cussì chest colp al veve decidût che la uniche maniere par fermâ dut chel orôr, che i pareve al stes sucedint intal scûr dal cuadri, e jere chê di fâ come simpri e di svicinâsi.
Cussì al jere lât dongje fin a tocjà la tele cul nâs e di bot une man e jere vignude fùr e i veve gjavât un voli!
Meni, a chel pont, al veve tacât a businâ par il mâl e il sanc che al schizave da par dut, ma ancje cuntun voli sôl nol veve podût fâ di mancul di cjalâ il cuadri.
Una femine e veve tacât a vignî fûr da la cornîs e in cuatri e cuatri vot si jere cjatade devant di lui. E veve il cjâf cusît sul cuel al contrari e lis mans tacadis tal puest dai pîts, come se prime la vessin fate a tocs e dopo la vessin tornade a incolâ, cence tante atenzion. La robe plui orende, però, e jere che ta la muse i mancjave un voli e jê si jere ficjade te buse chel che e veve robât al vuardian.
Cun chel restât, lui, al veve viodût la femine che e tacave a cjaminâ, ma no jere buine e subite e jere colade sul paviment, sbatint la muse par tiere.
Meni, in chel, al veve rivât a dâsi une mote e a decidisi a scjampâ vie, pûr cence viodi ben, ma une vôs lu veve fermât: «Meni! Fermiti… no stâ scjampâ…»
II vuardian, aromai voltàt di cassele, al veve tacât a cjaminâ devant daùr, ma cuant che al veve sintût clamâ il so non si jere fermât.
«O soi Marie… No tu mi cognossis?» e veve dite la vôs di chê fantasime mostruose, distirade par tiere.
Meni, plen di mâl par il voli gjavât e terorizât di chel cuarp saltât fûr di un cuadri, no si visave di nissune Marie, ancje se la vôs i pareve di cognossile.
I veve coventât un moment par visâsi che l’amie di chê fantate che i pareve di vê viodût prime, dentri dal cuadri e che al cognosseve tancj agns indaûr e veve propit chel non.
Ma cemût al jerial pussibil?
Cence pensâ parsore al jere tornât viers di jê e si jere sbassât a viodi, parcè che Marie, dopo vê cjacarât, a someave muarte.
Ma nol jere cussì: pene che al jere lât dongje jê e veve slungjât i braçs, lu veve cjapât pal cuel e e veve tacât a strenzi!
E intant che jê lu scjafoiave, dal cuadri a jerin vignûts fûr altri doi fantats, che a someavin come pene alçâts de tombe, intun cricâ di vues.
Meni, blocât da lis mans di cheste Marie, a ju cjalave intant che, ducj ingropâts e incjastrâts come viers, chei doi a si remenavin par tiere.
Dut ta un colp si jere visât che ju cognosseve ducj i doi: si clamavin Vigji e Gjovanin, e a jerin propite che sparîts, une gnot, intune cjase bandonade dulà che a vevin voie di passâ la gnot. Anzit, ancje lui al varès vût di lâ cun lôr, in chê sere, ma dopo – no si visave parcè – no ju veve compagnâts.
Purtrop par Meni, al jere masse tart par podê fâ alc di chê scuvierte.
I trê muarts, doprant lis ongulis e i dincj, lu vevin vierzût come un purcit in becjarie e si jerin spartîts i tocs dal so cadavar. Ognun di lôr al cjoleve ce che chê cjase bandonade, tancj agns indaûr, i veve robât.

*** *** ***

Le matine dopo i prins ospits dal museu a vevin cjatât la puarte sierade e, cuant che a vevin clamât cualchidun a vierzi, Meni, il vuardian di gnot, al jere sparît.
Il cuadri da la cjase bandonade, picjât tal mûr, al jere come simpri, cence che dentri si viodès.
E jere dome une maglute di sanc, inte cornîs, ma nissun si jere inacuart di jê.

Conte dai Fruts de
Scuele Medie di Faedis

Classis 2A - 2B

A.S. 2010/2011

Grup di Furlan

UNE MUART IN CAMPAGNE

2012-01-25T08:00:00.000+01:00

Toni al jere un famôs colezionist di cuadris. Di spes al comprave oparis di pitôrs impuartants.
Al jere vedran e al jere a stâ intune cjase isolade in campagne.
La cjase e jere fûr Faedis e lui la veve comprade a une aste spindint pôc, par vie da lis cjacaris da la int dal paîs. Si contave che e fos maledete, parcè che cui che al jentrave nol vignive plui fûr. Toni, che al jere un siorut studiât, inteligjent e cui pîts par tiere, nol crodeve a dutis chês monadis. Lui al crodeve dome a ce che al viodeve, ancje se al veve ocjâi pençs come doi fonts di butilie.
Une sere a vevin sunât il campanel, ma cuant che al veve vierzût la puarte al veve cjatât dome un cuadri, cun piturade une cjase bandonade.
La cornîs e jere di len e carulade, il colôr al jere smamît e crepât e tal cjanton si viodeve un schiribiç, che di sigure al jere la firme, ma si rivave a lei dome une "L".
Toni no si jere inacuart che chê cjase e jere propite la sô, dopo jessi stade metude a puest.
Al veve cjapât sù il cuadri e lu veve poiât parsore di altris, come che al faseve ogni volte prin di studiâju.
Dopo cene lu veve cjalât e i veve someât di viodi un barcon cu la lûs impiade. Rispiet a prime i someave che al fos plui scûr e che i morâi si movessin cul aiar. Al veve crodût di jessi un tichinin strac e al jere lât a durmî.
L'indoman di buinore, cjalant il cuadri, al veve scuviert che la gnot e jere deventade il cricâ dal dì: si viodeve il soreli che al nasseve daûr de cjase.
Lui però, netantsi i ocjâi cul ravai da la cjamese, al veve pensât che di sigure al veve viodût mâl la prime volte e cussì lu veve tornât a meti te tasse e, in dute premure, al jere corût a lavorâ, cu la tace dal cafè ancjemò in man.
Al veve contât a soi colegas ce che i jere parût dal cuadri, ma chei no i vevin crodût e, tocjantji il cerneli, i vevin dite: «Ma va la cjase, mone, tu varâs la fiere! Cjapiti cualchi zornade di feriis!»
Tornât di vore al veve picjât il cuadri in cusine e chest colp al jere cuasi sigùr: il soreli al jere alt tal cîl e la ombre da la cjase si jere scurtade!
Nuie di fâ: al veve di jessi propite strac. Cussì al jere lât a durmî e cuant che al jere jevât il soreli al tramontave e il timp al steve cambiant.
Al jere lât dongje, cjapant sù la sô lint di ingrandiment, e propit intant che al lumave la tele al veve sintût che e jere dute bagnade. In chel moment al veve scoltât lis gotis da la ploie bati sul veri.
Di li a pôc al veve sintût tucâ ta la puarte e al jere lât a vierzi, ma li di fûr nol veve cjatât nissun. Intant che al steve su la puarte, anzit, al veve percepît trê sofladis di aiar frêt che a jentravin, cussì al veve sierât di corse e al jere tornât in cusine.
Ta la opare al jere sucedût un altri misteri: in chê stanze che e someave jessi la cusine a jerin saltadis fûr trê personis. A jerin dome trê ombris, ma nol pove jessi che no lis vès viodudis prin! I someavin une femine e doi oms.
Al steve comencant a ve pôre...
Cussì, dopo mangjât, al veve cjapât sù une ombrene e al jere lât a fa une cjaminade, par calmâsi.
Lis culinis fur Faedis a jerin plenis di bosc e dut ator si sintive odôr di muscli, che al pareve cuasi odôr di frait. Al veve començât a lâ daûr da la piste dulà che a fasevin rally e lis segnalazions fatis cu la vernîs rosse sui arbui i someavin maglis di sanc.
Al sintive dapardut a sbisiâ tal vert, ma ogni volte che si spaurive a saltavin fûr un cuc, un çus o une sghirate che a someavin vê plui pôre di lui.
Dopo al veve tacât a sglavinâ e Toni al jere scugnût tornâ subit indaûr.
Jentrât a cjase, la prime robe che al veve fat e jere stade cjalâ il cuadri e al jere restât savoltât: ancje ta la tele, cumò, al sglavinave come là di fûr.
No podeve jessi un câs, e cussì al veve tacât a pensâ cemût fâ par capî se chel cuadri al rapresentave pardabon cjase sô o pûr al jere dome lui che al viodeve mâl.
Dopo un pôc al veve vude une idee: al veve cjapât in man il cuadri e al jere lât dongje dal barcon de cusine.
Come che al veve imagjinât, in ta la piture al veve viodût subite comparî une sagume che i someâve dute la sô. Intun prin moment, plui che cjapâ ancjemò plui pôre, si jere incuriosît, parcè che al veve capît di vê par lis mans une robe une vore strane.
Ma propite intant che al pensave cussì al veve viodût, intal barcon dentri tal cuadri, altris trê sagomis daûr da la sô.
Si jere voltât di colp, convint di cjatâ cualchidun in ta la stanze cun lui, ma nol jere nissun! La cusine e jere vueide, ancje se l’aiar al jere vignût frêt.
A chel pont, la uniche robe che al veve voie di fâ, e jere chê di scjampâ vie di cjase, lassant li il cuadri, ma come se cualchidun al vès sintût il so pensîr, i scûrs a jerin sbatûts cun violence denant di lui e la stanze e jere deventade dute nere.
Al veve cirût di impiâ la lampadine, ma chê e jere scopiade e tal so puest si jere piade la flame dal gâs. Toni la veve distudade, ma dopo di chê si jere piade la television e sul schermo si veve viodût nuie mancul che la cjase bandonade dal cuadri! Alore lui al veve distacât la spine, ma la imagjine e jere restade impiade ancje cence curint! No podeve jessi, al veve pensât.
Cumò, Toni al veve dome chê di scjampâ soredut cuant che la television a si jere distudade di bessole, cence che lui al fasès nuie.
Toni, dopo vê cjolt la pile intun scansel e fasint lûs cun chê, al veve cirût di vierzi la puarte, ma la veve cjatade… cence manilie.
Alore al veve començât a fâ lûs tal scûr e cuant che al veve sintût un rumôr di fier sul paviment, la veve viodude che e vignive jù pês scjalis. Subit daûr da la manilie, però, al jere vignût jù rodolant un cjâf di femine!
Dopo di chel, al veve sintût talpinâ e pontant la lûs dulâ che al veve poiât il cuadri, al veve viodût, platâts dal scûr, trê fantats: une cence cjâf, un che lu veve cusît tal braç e un che i coreve daûr come une bale.
Sconvolt, Toni al veve pontât la pile di ca e di là, ma nol tornave plui a cjatâsi e a capî cemût podê scjampâ di chê cjase che, a chist pont, ancje lui al pensave che e fos maledete.
Anzit, sul paviment di cjase al veve viodût cori une man!
Aromai al stave dant i numars e al sintive il cûr che i bateve tal pet come se al volès saltâ fûr. Par di plui a jere plui di une man a cori di ca e di là e dome ogni tant, pontant la pile, al rivave a viodilis.
Dut ta un colp, une di chês e veve tacât a rimpinâsi sù par i soi bregons, plantant lis ongulis, e subite dopo une altre a veve fat compagn, lant a finîle sot i siei vistîts.
Toni nol jere rivât a stratignisi e terorizât si jere butât par tiere, a remenâsi, fin che il so cûr al jere sclopât come une bombe.

*** *** ***

Dopo cualchi dì, un colega di lavôr i veve telefonât, par viodi cemût mai che nol lave a vore, ma i veve rispuindût dome une vôs che e respirave.
Cussì a jerin lâts a cjase di Toni, ma lu vevin cjatât za muart, copât di un infart.
No vevin rivât a capì cemût che al fos sucedût, jessint che al pareve vê buine salût. Dut al someave dâ reson a lis cjacaris dal paîs su la maledizion de cjase.
Jessint che al jere a stâ di bessôl e che nol veve parincj a cui lassâ la sô robe, la cjase dulà che al jere a stâ e jere tornade a jessi bandonade e i cuadris che a vevin cjatât a cjase sô, a jerin stâts ducj regalâts a un Museu di li dongje.

Conte dai Fruts de
Scuele Medie di Faedis

Classis 2A - 2B

A.S. 2010/2011

Grup di Furlan

LA CJASE BANDONADE

2012-01-23T08:00:00.000+01:00

La cjase e jere su une culine fûr Faedis. E jere piçule, ma e veve trê plans e une grande cantine plene di mufe. I mûrs a jerin colôr dal temporâl, la elare si rimpinave come un ragn e i scjalins di len a ciulavin.
Vigji e Gjovanin, par fâ viodi che no vevin pôre, a vevin decidût di lâ a durmî in cheste cjase in compagnie des lôr murosis.
Marie e Lussiute i tignivin la man parcè che si cagavin intor di pôre.
Vigji, che al veve pene cjapât la patente e par chel si faseve figo, al cjaminave devant; Lussiute, sventolant i soi cjavei neris, luncs e lustris come la sede, e jere subite daûr. Gjovanin, invezit, sec, imbranât, e che nol jere nancje bon di lâ in motorin, al sierave la file, cuasi strissinât di chê grassone di Marie.
Dopo vê preparât il sac a pêl, a vevin començât a cjalâsi ator, par viodi cemût che a vevin di sistemâsi.
Al jere scûr. Al pareve che ìl sofit al vès di vigni jù di un moment a chel altri. I mûrs a jerin cuvierts di scritis: peraulatis, maglis di colôr rusin, sgrifignadis e grafits.
Vigji e Lussiute a vevin decidût di durmî al prin plan, chei altris doi al ultin.
Dopo vê mangjât pan e salam, bevût cualchi latine di bire – a part Gjovanin, che al leve a aghe di poç – a si jerin metûts ducj a zuiâ a briscule.
Pôc prime di miezegnot, avonde cjocs, si jerin butâts dentri dai lôr sacs a pêl e subite a vevin tacât a ronfâ.
A un ciert pont a vevin sintût cjaminâ sù par lis scjalis.
La prime a sveâsi e jere stade Lussiute.
«Vigji, va a viodi ce che a fasin parsore» e veve dit, secjade par jessi stade sveade.
«Finissile di lamentâti! Lassimi durmî!» al veve rispuindût lui.
«Dâi, fâs l'om e va a dîi di dut!» lu veve stiçât jê.
«Va ben! Va ben! No stâ secjâmi, o voi cumò, però dopo lassimi durmî».
Vigji al jere lât sù e al veve cjatât Gjovanin al secont plan, che al vignive jù pes scjalis.
Chel, ancjemò indurmidît parcè che Marie lu veve sveât a pidadis, al jere blanc come un cadavar.
«Vîs di finîle di fâ casin» al veve sberlât Vigji.
«O sês voaltris che no rivais a stâ cuiets!» i veve rispuindût cuntun fîl di vôs Gjovanin.
A vevin tacât a barufâ, ma in chel a vevin sintût sberlâ cualchidun abas e a jerin lâts a viodi ce che al steve sucedint...
… Lussiute e jere sparide!
La borsete, lis scarpis e il gjubot no jerin plui, ma il sac a pêl al jere ancjemò al so puest.
Gjovanin e Vigji a vevin tacât a clamâle e a cirîle.
Vigji al jere lât parfin a viodi te cantine, ma al veve cjatât dome telis di ragn e pantianis.
«Chê li e je lade a cjase!» al veve dite Gjovanin.
«Cjale che no son ducj paurôs come te».
«Però la mê murose e je ancjemò lassù».
«Se no tu tasis ti rive un scufiot che ti volti il cjâf!»
Ma in chel a vevin sintût un altri rumôr.
Par lis scjalis e jere vignude jù une robe slichignote, stomeose e che e saltave e mugulave.
Giovanin al jere saltât fûr dut sbarlufìt e al veve sberlât: «Ce schifo! Ce robe ise?»
«No covente businâ! Al jere miôr se e fos stade le tô murose chi cun me, di sigure e varès mancul pôre di te!» i veve dite Vigji, lant a cjapâ sù la robe slicadice, ingrumade par tiere.
Ma a pene che al veve tocjât chel pastrocj dut schifôs, lu veve tirât in muse dal so amì, che, sporc di sanc, al jere subit svignùt come un sac di patatis.
Subit dopo al jere vignût jù pes scjalis rodolant il cjâf sanganant di Marie.
Vigji, terorizât, si jere pissât intor e al veve tacât a cori come un danât cence nancje savê dulà lâ. Al jere lât a finîle in te cantine, cjapant sù dutis lis telis di ragn e pescjant pantianis. Si jere fermât dome cuant che al jere lât a sbati cu la muse intor dal mûr. Intrunìt, i jere vulût un moment par capî ce che al steve sucedint e calmâsi, prime di tornâ parsore.
Al veve cjatât Gjovanin a pene sveât, che no si jere inacuart di nuie.
Cjacarant si jerin rindûts cont che chê robe di prime al jere il cûr di Marie.
Cussì a vevin cirût subite di scjampâ, ma lis puartis a jerin sieradis e lôr a jerin come intune pereson. A vevin provât a lâ fûr pal barcon, ma un aiar fuartissim ju veve scaraventâts sul paviment e un fulmin par pôc, straviersant la fignestre, no ju veve becâts.
In chel, tal scûr, a vevin tacât a sintî il talpinâ da lis pantianis, il cricâ dai scjalins e, soredut, il cûr di Marie che al bateve, come il pestâ di un tambûr!
Là di fûr, lis cjampanis a vevin tacât a botâ lis trê di matine.
Vigji, batint i dincj, al veve dit: «E cumò ce fasino? Par dulâ scjampìno?»
«No sai ! O sai dome che mi àn copât la murose e che o crôt che o fasarìn la stesse fin!» i veve rispuindût il so amì, cuasi vaint.
«Vino di lâ a viodi ce che al è sucedût parsore?»
«Ma par plasê! Prove pluitost a cirî il to telefono!»
«E je vere! Ce stupit! Lu ai in te sachete!»
Ma cuant che Vigji al veve provât a clamâ, i veve rispuindût une vôs mostruose, che no someave nancje vignî dal telefono.
Dai mûrs de cjase si veve tacât a sintî dai laments e jenfri di chei e jere ancje la vôs di Marie, che i diseve: «Scjampait! Scjampait!»
«Sêstu Marie?» Al veve ciulât Gjovanin, par nuie convint che chê vôs e fos chê de sô murose.
«No ai timp par cjacarâ, o vês di scjampâ!»
«Ma cemût fasìno? No rivìn a lâ fûr!»
«Svelts! Svelts! Lui al sta rivant…» a vevin tornât a sberlâ lis vôs, insieme a Marie.
Dopo di chel, al jere sucedut di dut.

*** *** ***

Lussiute, che e jere lade a fumâ, e jere tornade in cjase e… e veve viodût un spetacul orent!
Dutis lis scjalis sporcjis di sanc.
Il cjâf di Vigji picjât tal mûr. Un voli che al pindulave, lis orelis sbregadis, la bocje spalancade e la spine dorsâl che e vignive jù come un madrac.
Il pet al jere stât butât intun cjanton, cu lis cuesti vierzudis come un barcon, lis mans distacadis dai braçs che a corevin sù e jù cjaminant sui dêts, come risaltis cu la code di sanc, i dincj sparniçâts sul paviment, gjavâts un par un.
Mieç cuarp di Gjovanin, invezit, al jere smaltacât sul mûr: cence cjâf, scuartât, i budiei che a bulivin e a fumavin.
Lis gjambis, ingropadis come doi madracs, si strissinavin lassant une rie di sanc come i lacais. Suntun scjalin, il so cjâf e chel di Marie a jerin fers che si bussavin.
Lussiute, sul imprin, no veve capît che dut chel davoi al jere vêr e e veve tacât a clamâ: «Vigji! Ven fûr, che a nol è divertent!»
Ma dopo si jere rindude cont che al jere dut vêr, se no altri da la puce di sanc e di cadavar. E veve començât a lâ devantdaûr, sbrissant e lant a finîle dute lungje sul paviment cuviert di vanziduris dai cuarps dai soi amîs.
Terorizade, e jere jevade sù in pîts come une saete e e jere scjampade come se la muart i stes corint daûr, intant che alc, tal so cjâf, si rompeve par simpri.
La puarte, come se la spietàs, si jere vierzude e la veve lassade passâ e scjampâ vie viers il paîs a clamâ aiût.

*** *** ***

Cualchi timp dopo, Lussiute e jere di gnûf devant da la cjâse, e e puartave cun sé une tele blancje e i colôrs par piturâ.
Nissun al veve mai savût ce fin che a vevin fat Vigji, Gjovanin e Marie. Cuant che a jerin tornâts inte cjase par ciriju, no ju vevin cjatâts. A jerin restadis dome lis lôr robis e la fantate ancjemò vive no jere in grât di dî plui nancje une peraule.
In paîs ducj la cjalavin stuart: di chê volte, sclerade, no veve fat altri che piturâ cuadris cun dentri chê cjase bandonade, piture che aromai e saveve a memorie.

Conte dai Fruts de
Scuele Medie di Faedis

Classis 2A - 2B

A.S. 2010/2011

Grup di Furlan

ECUMÈNE LA LIMONADE

2012-01-20T21:58:00.000+01:00

Лимонад - Михаил Михайлович Зощенко

Я, конечно, человек непьющий. Ежели другой раз и выпью, то мало - так, приличия ради или славную компанию поддержать.
Больше как две бутылки мне враз нипочем не употребить. Здоровье не дозволяет. Один раз, помню, в день своего бывшего ангела, я четверть выкушал.
Но это было в молодые, крепкие годы, когда сердце отчаянно в груди билось и в голове мелькали разные мысли.
А теперь старею.
Знакомый ветеринарный фельдшер, товарищ Птицын, давеча осматривал меня и даже, знаете, испугался. Задрожал.
- У вас, - говорит, - полная девальвация. Где, - говорит, - печень, где мочевой пузырь, распознать, - говорит, - нет никакой возможности. Очень, - говорит, - вы сносились.
Хотел я этого фельдшера побить, но после остыл к нему.
"Дай, - думаю, - сперва к хорошему врачу схожу, удостоверюсь".
Врач никакой девальвации не нашел.
- Органы, - говорит, - у вас довольно в аккуратном виде. И пузырь, - говорит, - вполне порядочный и не протекает. Что касается сердца - то оно очень еще отличное, даже, - говорит, - шире, чем надо. Но, - говорит, - пить вы перестаньте, иначе очень просто смерть может приключиться.
А помирать, конечно, мне неохота. Я жить люблю. Я человек еще молодой. Мне только-только в начале нэпа сорок три года стукнуло. Можно сказать, в полном расцвете сил и здоровья. И сердце в груди широкое. И пузырь, главное, не протекает. С таким пузырем жить да радоваться. "Надо, - думаю, - в самом деле пить бросить". Взял и бросил.
Не пью и не пью. Час не пью, два не пью. В пять часов вечера пошел, конечно, обедать в столовую.
Покушал суп. Начал вареное мясо кушать - охота выпить. "Заместо, - думаю, - острых напитков попрошу чего-нибудь помягче - нарзану или же лимонаду". Зову:
- Эй, - говорю, - который тут мне порции подавал, неси мне, куриная твоя голова, лимонаду.
Приносят, конечно, мне лимонаду на интеллигентном подносе. В графине. Наливаю в стопку.
Пью я эту стопку, чувствую: кажись, водка. Налил eще. Ей-богу, водка. Что за черт! Налил остатки -- самая настоящая водка.
- Неси, - кричу, - еще!
"Вот, - думаю, - поперло-то!"
Приносит еще.
Попробовал еще. Никакого сомнения не осталось - самая натуральная.
После, когда деньги заплатил, замечание все-таки сделал.
- Я, - говорю, - лимонаду просил, а ты чего носишь, куриная твоя голова?
Тот говорит:
- Так что это у нас завсегда лимонадом зовется. Вполне законное слово. Еще с прежних времен... А натурального лимонаду, извиняюсь, не держим - потребителя нету.
- Неси, - говорю, - еще последнюю.
Так и не бросил. А желание было горячее. Только вот обстоятельства помешали. Как говорится - жизнь диктует свои законы. Надо подчиняться.

*** *** ***

Jo, si capìs, o soi astemi. Salacor cualchi volte o bêf ancje, ma pôc, cussì, par no jessi salvadi o par tignî sù la companie. Plui di dôs butiliis tune volte no mi capite mai di bevilis. La salût no mal permet. Une volte, mi visi, la dì che o finîvi i agns, mi soi bevût un boçon.
Ma dut chest tai agns de zoventût, de gaiardece, cuant che il cûr al bateve imburît tal pet e tal cjâf a smalitavin altris pinsîrs.
Cumò o ven vecjo.
Un aprendist veterinari gno cognossint, il copari Pticyn, mi à visitât pôc timp indaûr, e cjalait, al à cjapât un spac. I àn tacâts i sgrisui.
- Lui - al dîs - al à une complete debilitazion. Dulà isal - al dîs - il fiât, dulà la vissie, nol è pussibil - al dîs - nancje dicerni. Al è - al dîs - propit fruçât.
Mi vignive voie di dâi un frac a di chel aprendist, ma dopo mi soi calmât.
“Dai - o pensi - come prime robe, anìn di un miedi brâf, par sincirâsi”.
Il miedi nol à cjatade nissune debilitazion.
- I orghins - al dîs - ju à in condizion avonde pulide. E la vissie - al dîs - dal dut a plomp, e nol piert aghe. Par ce che al inten il cûr, al è ancjemò perfet, ancje - al dîs - plui larc di ce che al scugne. Ma - al dîs - fermaitsi di bevi, che se di no la muart e pues rivâ une vore in curt.
E di murî, si capìs, no ‘nd ai voie. Mi plâs vivi. O soi un om ancjemò zovin. O ai fat cuarantetrê agns juste juste al inizi de NEP. Si pos dî, tal plen sflurî des fuarcis e de salût. E il cûr tal pet al è larc. La vissie, sore dut, no fâs aghe. Cuntune vissie cussì no si po no gjoldi la vite. “Tocje - o pensi - molâ il bevi”. Det e fat.
No bêf e no bêf. No bêf une ore, no bêf dôs. A lis cinc di sere o soi lât, si capìs, a gustâ in mense.
O mangjât un zuf. O scomenci cu la cjar, mi ven voie di bevi. “Invezit - o pensi - di bevandis alcolichis o domandi alc altri mancul fuart: aghe minerâl, o une limonade”. O clami.
- Ei, - o dîs - tu che tu mi âs puartât il plat, puarte ca, cjâf di gjaline, une limonade.
A mi puartin, si capìs, la limonade suntune guantiere siorone. Tune carafe. Lu met te tace. Mi bêf la tace, o cerci. Sint ca, vodke. O ai tornât a meti. Gjo, vodke. Ce dal diaul. O ai metut ce che al mancjave: vere vodke arude.
- Puarte - i berli - ancjemò.
“Cjo, - o pensi - al è lât jù po!”
Mi puarte une altre.
O ai tornât a cerçâ. No mi reste dubi: la plui sclete.
Dopo, cuant che o ai paiât, o ai fat dut câs une osservazion.
- Jo - o dîs - o ai domandât une limonade, e tu ce mi puartistu, cjâf di gjaline?
Chel al dîs:
- E ma chi di nô cheste le clamìn simpri limonade. Une peraule da dut legâl. Ancjemò in chê volte… e la limonade vere, domandi scuse, ma no le vin. No son i aventôrs.
- Puartimi ancjemò - o dîs - la ultime.
E insome no ai smetût. E o volevi a fuart. Ma lis circostancis no àn judât. Come che si dîs: la vite e dete leç. Al vûl ubidît.

Conte par rus di “Michaìl Michàjlovič Zòščenko” (1925),

voltade par furlan di Xabi Xogrâr da Plêf

LA MANCE

2012-01-18T08:00:00.000+01:00

Rafael Cativel al à cjolte Miane di Piso. Lui al saveve lei e scrivi pulît. Invezit jê e faseve fature, ma par chel cont no voleve jessi di mancul.
Chest fat, zontât cuntun dedut di gjelosie, le puartave a cori jê sul puartel dal curtîl a spietâ la puestine, a vierzi par ordin la pueste ancje a non di Rafael e, za che e jere vierte, a lei biel planc ce che i scrivevin.
Ma par solit e rivave pueste de prime fie Dusuline, a servî a Turin di frutate tune cjase di siôrs che i volevin ben come a une fie.
Dusuline e jere a stâ cui siôrs, no veve spesis di sorte (al plui, cualchi cine la fieste dopomisdì, che e à tant vaiût cu lis storiis di Robert Taylor e di Shirley Temple, e tant ridût cun Cric e Croc), la mesade je mandavin cjase par ordin i siôrs tante che e jere e cun di plui, une volte, Dusuline e à zontât i doi francs di une mance vuadagnade, une dì, di une tant degnevule persone amie dai siôrs.
“Vi mando anche una mancia, che so che avete tanto bisogno” ur à scrit Dusuline, e sô mari Miane e leieve cumò e tornave a lei, cui voi sledrosâts di no podê crodi.
“Cje ca, Rafael, ce robones! Dusuline a dîs che nus mande une manze” e cor tal ort a visâ Rafael che al nase la robe a colp, cence bisugne di lei.
“Orpo di chê madone, Miane, sâtu che a Turin e àn manzes par ogni cjanton!”
“E par dute chê strade, cemût ae di fâ, puare bestie?”
“Ah bon, baste dîi alon e jê e sa dibessole vignî di Turin a Sante Marie.”
“Sêtu sigûr?”
“Po no ûtu! A sarà cumò za rivade a mieze strade.”
E jù strambolots di chê sorte, su la puarte dal ort, fin che Rafael i à dit dai doi francs e i à dit che sai tegni par se, di cjosi alc, in maniere un fregul di indulcîle e no sintî il verbumcaro par dute chê solfe che i veve fat.

Storiute de buinegnot n. 18
di Ivano Urli

STEP

2012-01-16T08:00:00.000+01:00

Tal mieç de gnot.
Lis scjalis dal condomini a son vueidis, desertis e jo in cjalçuts par no fâ rumôr. Le lûs des scjalis e je di un zâl smamît, lis piastrelis a samein la schene di un coccodrillo.

Su… jù, su jù, trê su, trê jù… par cuatri voltis. Step.

…daûr di chel vâs alì e je une robe piçule… schifose, cuissà ce ca je? No vevi mai cjalât. Cumò che o soi a chi a fâ step, mi fermi.
O sgarfi cul dêt, cul comedon che mi ziruche indaûr pal schifo… odiu!
Un gnotulut muart. Al è sierât intun glimuç di polvar, cu lis alutis pleadis e i vogluts… brrr.

O resti par un toc a cjalâlu, fin che lu sburti innà… là!
E o fas dôs corsis une par sù une par jù a dute velocitât. Mi dismentei di lui. Step.

Su… jù, su jù, trê su, trê jù…. par cuatri voltis. Step

O torni jù, te jentrade, a fâ flessions sul tapêt. O cjali fûr pe puarte di veri. Fûr al è clâr come di dì. Si viodin i troncs di trê dai cuatri pins dal curtîl. Gnot di lune plene.
E aiar… e je une gnot ariose. Se o ves lis scarpis o larès a fâ une corse fûr.
Sì, cussì doman cualchidun al disarà… Nosere o ai viodût une matuce che e coreve in plene gnot aoôr dal condomini.

Su… jù, sù jù, trê sù, trê jù… par cuatri voltis. Step.

… Ma tal garage o ai un pâr di scarpis…
Magari o rivi dome fin te vigne sot dal cavalcavie a robâ un rap di ue. Dai!

Passant dongje dal vâs, mi scrufui a cjalâ il gnotul. Simpri li. Tal glimuç. Brrr.
O vierç le puarte e o fâs una corse discjapinele fin tal porton dal garage, o tiri su le sierande e mi met lis scarpis. O sieri e o cjamini fûr dal curtîl viers il cavalcavie.
Ce biele gnot. Al è dut un businâ di fueis tal aiaâr lizêr, le lune plene e samee une mascare d’arint. E corin i nui intor di jê e alore e côr ancje jê, come par scjampâ… cuissà parcè che il mont, a voltis, al àa bisugne di sedi cussì biel.

O stoi cjaminant pal troi infangât che al va jù te vigne di verduz, proprietât de aziende Rossit, che jo i mangji le ue e i bêf il vin.
O torni cuntun rap di mieç chilo in man che al è un spetacul, e mi sinti a mangjiâlu sul muret plui alt dal cavalcavie.
Di lontan al rive un grant businôr… al passe il treno de gnot par Vignesie. Cumò o sai che son lis trê. I finestrins a mostrin cualchi indistinte figure. Come simpri o pensi cuissà se une dì o cognossarai cualchidun tra chês figuris. L’aiar, spostât di colp, si bute sui pôi come par un grant pataf. Dopo, i pôi a sunin lis fueis par un biel toc.
E intant lis lûs da ferovie e deventin plui fuartis, il scûr si fâs plui scûr.
O torni. Le lune, brancade dai nui dut tun colp, e je sparide. Le gnot e je deventade cussì nere che e fas vignî i sgrisui. O côr cjase. O vierç le puarte e o impii le lûs das scjalis. La lûs smuarte su la schene dal coccodrillo. No viodevi la ore.
Ma ce arie, paure, che che o vevi li di fûr? Paure?
- Paure di ce? Stupiduta! - Mi dîs ancjemò il nono di Joannis, tal cjâf.
O met il pît sul prin scjalin e o sint un moviment sùpes scjalis.
- Odio! Ce isal? -
O fâs une corse par sù ma o rivi a viodi dome il svol di capot, di un mantel … o no sai ce, di un cheal è scjampât su le rampe parsore dal gno apartament.
No, no voi plui in sù…
O voi a durmì! Brrr…

Te gnot dopo, mi curi le isonnie cuntune butilie e un film, no step.
Ancje le gnot dopo. Butilie e film, no step.

Ma usgnot o soi tornade.

Su… jù, su jù, trê su, trê jù… par cuatri voltis. Step.

Le gnot e jê calme e la lune mancul furibonde. O stoi cjalant fûr pe puarte di veri. I trê troncs dai cuatri pins dal curtîl.
Di colp si vierç la puarte, bessole, no sai cemût.
Dopo un secont al jentre un, cuntune specie di mantel e la cape sul cjâf. Al ten le puarte cul pît come che a fasin i condominos. Jo mi tiri di bande, incantesemade.
Mi passe denant e al va sù. Cuntun pas fer. Scjalin dopo scjalin. Sito.
No comment. O fâs ancjemò cuatri flessions, par forme, e o voi a durmì. Ancje se no rivi a durmì.
Tal doman no viôt la ore che e vegni gnot, par tornâ a fâ step su lis scjalis.
O torni.
O ai pene sintût sot il paviment il tremôr dal treno de gnot par Vignesie.

Vêlu… che al jentre, cul so mantel.
Al va sù, mi passe denant, ma nol dîs peraule.
Dopo, o sint che si ferme, che si sinte, fasint - Ahhh! Come un che al è strac.
O voi sù, a planc…
Sentât sul scjalìn, in pigiama e vestalie ma cui scarpons, al è il siôr Macoratti, apartament 9, disore dal gno. Cuntun grant rap di ue in man.

Verduz, o scomet.
…E si è sentat propit sul gnotul! Brrr…

di Leonora

CHÊ DAL TIN

2012-01-12T19:18:00.001+01:00

Il Tini al jere a pene rivât sú da Udin che dut il paîs a lu veve savût. No erial lui chel che l'an prime al veve fat cavilâ il plevan cun Agne Lene?

A si lu diseve dal becjâr, si lu ripeteve te ostarie e di bot, cualchidun al spietave che le domenie a messe grande il plevan lu vès nomenât in te predicje. Invezit nuIe, chest an il Tini al someave plui calm, dutcâs a si lu viodeve di mancul pes stradis.

Vevial fat judizi?

Par no urtâ i sintiments dal plevan, agne Lene, aes domandis sul Tini e rispuindeve fevelant sul timp tant che biecemai il plevan al rispuindeve cuntun segn di crôs di sperance che no i torni a rivâ di pierdi le pazience e cavilâsi di gnûf cun siore Lene par daspó dividi il paîs in doi par une cuistion che insome a no veve impuartance.

I prins peteçs a si jerin calmâts dopo lis primis messis e i ai ultins tais dal dopo messe il Tini

al jere stât dismenteât. Ma erial propit vêr ce che al veve fat l'an passât?

Erial vêr che chest an agne Lene a lu tignive sierât in cjase par che nol ledi a meti malepâs pal paîs?

Al jere dut vêr. Dopo lis fiestis le gnece udinês e jere vignude sú a cjoli il Tini e nissun nol veve plui fevelât di nuie fin cuant che il plevan al si jere indacuart che lis sôs trê gjatis a jerin plenis e che chest al voleve dî che il Tini al jere passât par aí cence rispiet ni pe sô fie che al veve fat l’an passât ni pe fie che al veve fat l’an prime, ni pe nône, che purcite, che a varès almancul podût difindi so gnece se no saveve difindi sô fie. Ma cui capivial ce che al diseve il plevan?

Pal Tini, dutis lis gjatis a jerin compagnis. Agne Lene e conte cun fierece che jê e veve fat ce che a veve podût e che no jé colpe sô se tant che lis feminis a lavin a messe e i oms a lavin a bevi il prin tai dutis lis gjatis a lavin dal Tini.

Po a zonte che forsit al è par chel che chest an al jere cussí content di tornâ a Udin... E a cjantuce cuntune bocje da ridi: Tintine tintone cui bale lassù...

di Jaio Furlanâr

IL DRÂC

2011-12-25T08:00:00.000+01:00

Il timp al jere chel just, par sedi sot Nadâl. Un cîl di plomp al tignive scuindût il soreli daûr di un nûl plat e fis, pront a molâ jù la nêf. Dicembar al veve proviodût a scancelâ lis ultimis maglis di zâl, ros e narançon che la braùre di Novembar e veve sparniçadis ator pe campagne e al veve taponât dut cuntune man di moron, abàs vie, e une di grîs, sù in alt. Daspomisdì, sul tart, Min al jere jessût di cjase, a mieze mont, e al veve cjapât il troi che al menave sù tal bosc daûr dal paîs: sô mari, che e viveve cun lui, lu veve mandât a cirî un pin par fâ l’arbul.

Prime di tacâ la vore, si jere fermât te largjure disboscade un mês indaûr cui Foscjis, che a jerin a stâ dongje di lôr e che lu clamavin dispès a judâju. Cun lôr al leve vulintîr a fâ cualchi lavôr, parcè che no i disevin “mut”, come in paîs. E po, lui mighe nol jere mut! La vôs le veve, dome che no i vignive fûr! Sul ôr de largjure Min al lumà il biel çoc di faiâr che al veve za vût doprât par sentâsi a fâ di mirinde cuant che al jere stât a disboscâ. I plaseve chel puest parcè che di li si viodeve ben dute la plane. Cussì, al veve justât il seghet inte sachete daûr dai bregons e si jere sentât par tirâ flât.

Cuant che il grisum spandût dulintor al scomençà planc a mudâsi di clâr in scûr, Min al tacà a viodi lontan a man drete un flum di lusutis zalitis in dôs o trê filis che al scoreve pegri vignint sù de citât. Parele, ma de bande contrarie, une altre flumere di lusutis rossis, largje ancjetant, e leve jù lente bande disot. A mieç di chel flus, dal cors principâl al partive un riul plui stret che al leve vie cuintri soreli a mont. Daspò di un zîr a cercli, la corint e puartave lis lusutis intun lât largjonon, juste devant di un capanon scuadrât tant che une scjate e cuntune stele di Nadâl ben grande, impiade parsore dal tet. Li, lis lûs a ralentavin la corse, a devin une lampade rosse plui fuarte e, une volte fermis, si distudavin. Altris invezit si impiavin e daspò di cualchi manovre a jessevin dal lât e a tornavin a jentrâ inte corentie de bande contrarie. Un furmiâr di int al leve dal lât fin drenti dal edifici; altre int par cuintri e jesseve dal scjatulon, puartantsi daûr côi di pacs e di borsis.

Si varès podût dî che dut chel corîr al jere un presepi ledrôs: impen di puartâ i dons, la int e leve a cjoliju. Ma Min al jere un om pratic, che di zovin al veve fat fintremai il purcitâr e, par lui, chel che si viodeve jù abàs de mont al podeve sei dome un… polmon. Il polmon di une bestie bocognone che e domeave cu la sô panze sglonfe dute la plane. Un drâc distirât, cu lis talpis daûr in muel te aghe dal mâr e lis sgrifis des talpis devant plantadis tai foredôrs jenfri des monts. Al durmive, forsi, ma dut chel scori al mostrave che al jere ben vîf! Vîf in gracie dal sanc furnît des furmiis che a movevin pacs e pacuts drenti di lui, zirant indevant e indaûr pai bovui intorteâts des sôs venis badiâls. Tai dîs prime di Nadâl il sanc al circolave a plen, tant di fâ pensâ che se chel da pît de mont al jere il polmon, alore il roson larc di lusutis che a tarlupavin plui in jù a ret de citât al jere dal sigûr il cûr!

Min nol veve mai viodût il drâc tant grant intai agns passâts. Dome dal an prime i someave dopleât, e nol olsave pensâ ce che al sarès deventât se al continuave a cressi cussì, cence fin! Suturni, al jevà sù de sô sente di faiâr e al tornà a cjapâ il troi drenti dal bosc. I prins flocs di nêf i sbisiavin su lis ceis e i jentravin tal nâs. Il seghet i scloteave inte sachete daûr dai bregons biel che al cjaminave di rive jù, bande cjase, stant atent a no sgliciâ.

Al jere masse scûr aromai. Il pin par fâ l’arbul di Nadâl al sarès lât a cirîlu tal indoman.

Salacor.

di Gianfranco Pellegrini

Conte cjolte de Ostarie viere

AL MANCJE UN RE

2011-12-24T08:00:00.000+01:00

“A si steve miôr cuant che al jere vîf il vecjo” al dîs Gaspar tornant al so puest dopo vê cjaminât ator pe cjase.

“Sigûr” i rispuint il camêl, poiantsi tal setiç che i fruts a àn doprât par fâ il desert, “âstu di meti Bepino cun chei ca? Chel al jere un om in gamba, al veve zirât il mont, a vore fintremai in Egjit e ancje a Parîs mi pâr.”

“Di fat a me mi a cjolte là tune buteghe sot la tour Eiffel” e fâs la femine che e gucje contente.

“Tu tu sês francese tant che jo napoletan” al riduce il becjâr netant la manarie, nol conte là che ti comprin, ma la persone che tu jeris, jo, tant par dîle, sarès armen.

“Chei ca invezit a son dome lofios” al fâs Gaspar cambiant discors; “lasse stâ che no si inacuarzin che noaltris i corìn ator pal apartament vie pe gnot, ma vêso sintût di ce che a tabaiavin îr sere?”

“No, parcè, di ce àno fevelât?” al domande Melchior sveantsi dibot.

“Dal frutin, di Jesus. A crodin pardabon che lui e Marie a fossin bionts e cui voi celescj, si rindêso cont?”

“Bionts come me?” al riduce il marangon che al à la buteghe dongje des palmis “Ma se nô si jere scuasit ducj de Galilee, dai mo, ma ce vano a fâ a messe, a scjaldâ il banc?”

“Ce vûstu, a son fruts no? Si viôt che a dutrine, invezit di stâ atents, a matein cui Gormiti, al è normâl” a ju scuse la sartore.

“Eh no biele la mê parigjine, nol è normâl par nuie e dut câs”, al salte sù Gaspar sustantsi un tic, “che la Madonute e jere bionde pardabon a lu à dite Dree, il fi di Bepino che al à passe cuarante agns, migo i canais.”

“Ce âstu di bruntulâ cumò?” i fâs Melchior al camêl che a nol tâs mai une.

“No bruntuli, rumii. Rumii e resoni.”

“E di ce?”

“Dal fat che e podeve lâ ancje piês. Pense se Dree al vendeve dut. O finivin sparniçâts di ogni bande dopo passe trente agns che o sin insiemit. Al sarâ lofio, ma almancul a nus ten adun e al cjalt tant che une famee.”

“Che fûr al sedi frêt, chel no si discut, ma âstu di meti il vieli” a i rispuint trancuîl Gaspar. “Chel, a noaltris re Magjos, a nus mandave prin tal cjistiel di Erode e daspò nus tirave dongje de capane dì par dì. Puar Bepino al veve une culture, migo come so fi. Cjale ca ce presepi che a àn fat, dut un casin, al è il vincj di Dicembar e noaltris Magjos sin bielzà rivâts ca di Jesus cu la marcjanzie, dai…”

“A proposit di regâi” e domande une piore dute curiose “ma no jeriso simpri in trê. I tre re dell’oriente?

Dulà isal chel altri, chel dal aur ?”

“Baldassâr” i rispuint Melchior cu la vôs rote “chest an a nol ven, i àn cjatade la asme, puarin e no si le sintive di viazâ. Da la Persie fin ca jù a son gnots e gnots cence durmî ‘ne lûs.”

“Dîs lis robis cemût che a stan Melchior” i fâs il camêl, mastiant une fuee. “Baldassâr al respirave mâl ancje ai timps di Bepino, ma al è simpri vignût istès. La veretât e je che Dree chest an lu à tornât a meti te scjate bruntulant. “Cheste storie dal Re neri tal presepi” al à dite a la sô femine “e je dute une invenzion politiche sâstu? I re Magjos a jerin blancs come nô, prove domande ator”.

di Maurizio Mattiuzza

Conte cjolte de Ostarie viere

SPECIÂL

2011-12-22T08:00:00.000+01:00

O ai simpri savût di jessi speciâl.

O varai vût sì e no sîs agns cuant che o ‘nd ai vude la conferme plui clare. I voi di chel om cence etât che mi passavin fûr par fûr. La sô man grispose sul gno cjâf. A disevin che al savès lei il cûr dai oms. No ai podût sintî la sô sentence, ma mi à bastât viodi la ombre su la muse di gno pari e mê mari che e vaìve come une scoreade. Mi sarès plasût ancje a mi lei tal cûr dai oms. Ma, pal om cence etât, nol jere chel il gno destin.

Par agns o ai cirût di scjafoiâ la mê nature, ma o savevi che prime o dopo e sarès saltade fûr. Ce che mi à maraveât e je stade la semplicitât dal at. Al è stât cussì facil. Fintremai banâl. No jere nissune reson speciâl. O vevi dome voie di fâlu. E vonde. La uniche emozion le ai vude tal cjalâ a distudâsi la lûs dai siei voi. Supâle sù, come se e fos nudriment. O ai provât a lei il so cûr, ma nancje cjapâlu in man mi à judât a fâlu. Forsit, o ai pensât, nol è il gno destin.

Copâ. La prime volte no si dismentee mai. Come cuant che si fâs l’amôr. Dificil che e vegni ben. Che e vegni come che si le à sumiade. La esperience e ven dome cul fâ. E jo, di in chê volte, lu ai fat cussì tantis voltis che o riscji di pierdint il cont. O cîr di provâ simpri alc di gnûf. Personis, lûcs, mûts, timps: mai nuie di compagn. Nancje la lûs che ur scjampe dai voi, nancje chê no je mai compagne. E pûr e reste la uniche robe che un tic mi emozione. Ogni tant o provi a cjapâur il cûr, ma no ai inmò imparât a leilu. E à di jessi vere che nol è il gno destin.

O ai di tornâ dal om cence etât. Cui sa se al è ancjemò vîf? Magari al pues spiegâmi cemût che si fâs a lei il cûr dai oms. Jo, invezit, i mostrarai cemût che si distude la lûs dai voi. Cemût che si fâs a supâle sù. Nissun al sa fâlu come me. Mi ven facil. E je la mê nature. Parcè che jo o soi speciâl.

di Carli Pup

Conte cjolte de Ostarie viere

LA COLEZIONISTE

2011-12-21T08:00:00.000+01:00

Lis veve tignudis dutis di bande. No cate che ducj i disessin che lis robis a àn valôr dome se si lis dopre, e no se si tegnin di cont tant che la relicuie di S. Svualt a Sauris. Jê e pensave che cul jessi doprade e fruiade la robe e pierdès il so valôr. E alore, zaromai agnorums indaûr, e jere lade sù sul solâr, si jere sielte un biel baûl grant. Lu veve piturât dal colôr dal cîl e sfodrât cuntune biele cjarte colorade. Ogni volte che lu vierzeve un profum di lavande al jemplave l’aiar… i someave di tornâ indaûr tal timp.

Dentri e veve metût ducj i siei vistîts preferîts, chei che i plasevin cussì tant che, par pôre di ruvinâju no veve cuasi mai doprât. Sô mari le rideve vie “Al è dibant che tu tegnis di cont dute chê robe tant che e fos un cimeli. Doprile pluitost, che une dì tu ti pintirâs di vêle lassade fâ il carûl alì dentri!”. Nuie ce fâ, je le sbeleave e e continuave cu la sô archiviazion maniacâl.

Il fat al è che ogni maiute e veve un significât ben precîs e leât a un moment speciâl de vite. E jere la sô prime maie cu lis maniis curtis, piçule tant che un façolet a riutis blu e blancjis. E po e jere la maie cui cûrs ducj colorâts. Chê che cuant che le meteve e voleve dî che e jere tacade l’Istât. In ordin cronologjic e vignive daspò la maie dai mîts: Elvis, James Dean, Marlon Brando… ducj un dongje di chel altri. Metude une sere sole, cuant che pe prime volte e veve bussât un fantat. Ma bussât pardabon!

Parsore di dutis però e jere la maie dal Canadà: pûr sintetic agns ’70. Blancje, cuel e polsins ros, cun tal mieç la stampe di un distributôr di caramelis. Chel cu la boce di veri taronde e dentri i bon bons di ducj i colôrs. Parcè che, come che al cjantave chel grup

“Quando ero piccolo il massimo

erano le chewingum a palline dentro la boccia.

Perchè una cosa va detta:

anche se i telefilm erano in bianco e nero

c’era sempre una cosa a colori,

la boccia delle chewingum.”

Insome, une vite a meti di bande reperts, sigure che prime o dopo cualchidun al varès preseât e capît il lôr valôr. La dì che e jere nassude sô fie e jere convinte di vê cjatât par spartî cheste passion. Je sì che a varès dal sigûr capît la impuartance di chei vistîts, di chel rît di tignîju di cont… Sô mari le cjalave cun blasim e tenarece, cierte che la sô e jere dome une utopie.

E come che al sucêt in dutis lis storiis, e rivà ancje par jê la dì che e ve di rindisi. I colà il mont devant dai voi la matine che e viodè la frutine doprâ la sô maiute plui vecje, il prin toc de colezion, la Numar 1 di Zio Paperone… par vistî il gjat! E veve reson sô mari (robe dure di acetâ): la vite, cun ducj i siei vistîts, bisugne fruiâle cuant che al è il moment.

di Eowin

Conte cjolte de Ostarie viere

DRINK

2011-12-20T08:00:00.000+01:00

Al jere il prin an che il Drink al jentrave a Friuli doc.

Gjovanin, strissinant lis gjambis sui siei cent e trente agns malmetûts (nol veve vonde bêçs par comprâsi un set di gnervidure gnove tai zenoi, e a malepene al veve finît di paiâ il fiât e il cûr, cjolts ducj i doi di seconde man); Gjovanin, si diseve, al cjaminave jù par vie Marcjât Vieri, domandantsi cemût che a vevin rivât a clamâ chel bevaron dome “Drink”, in barbe ae normative dal antitrust, in muse ai salutiscj e in cûl al vin, a la bire e a ducj chei altri alcolics.

«Drink! Cjocs par vivi a lunc» al vosave un display parsore dal stand che al faseve cjanton, intal plan rialçât di place Sant Jacum.

Lui, pensionât di secont nivel, li parsore nol podeve montâ. Par jentrâ a Virtuale doc bisugnave jessi almancul citadins di tierç o pensionâts di cuart nivel; cun di plui, come ducj chei de sô categorie, nol podeve permetisi l’intervent par zontâ la puarte USB intal dêt piçul.

Si contentave cussì di lâ a spas pes stradis reâls, sacramentant ogni volte che un zovenut, a torzeon cuntun di chei maladets segway, i pocave i sghirets.

Tant nol jere pericul di no lei chê scrite di altris bandis, parcè che no jere ostarie o barachin che no vendessin il Drink. Anzit, a dîle dute, Gjovanin al veve fat une vore di fature par rivâ adore a bevi un tai. Aromai a jerin simpri mancul i contadins che a tignivin un vignâl, parcè che scuasit dapardut lis ostariis a vevin miôr tignî tal camarin chest benedet bevaron, aromatizât al vin.

Drink aromatizât al Merlot, al Sauvignon, al Refosc, al Verduç, al Cabernet…

A jerin tornâts parfin il Clinto, il Frambul e il Tocai, che tant, par une Multinazionâl, e jere dome cuistion di un chimic in plui o in mancul, di paiâ a la fin dal mês.

Intant che al beveve, poiade la mace su la cjadree e il cjapiel su la mace, Gjovanin al olmave lis musis di chei altris bevidôrs, ducj ator di lui. Nol jere un che a nol fos cjoc. A ridevin e a businavin, cence passion ni creance, e plui di cualchidun lu cjalave di stuart, come se al fos un dai ultins puars coions che a bevin vin.

Da rest ce varessial vût di dî?

Il Drink al jere l’unic alcolic che al tignive di cont il cûr, il fiât, il stomi, il sgrasaiâr e al gjavave cuasi dal dut ancje il pericul di tumôr; e cence nissun (dut testât in laboratori) efiet contrari. Sigûr, il presit di paiâ al jere un popul che nol pensave plui e al cjapave dut cence discuti, dai comizis al reclam.

E lui, Gjovanin, ce altri vevial di fâ, se no cjalâju, menâ il cjâf e disgotâ la tace; pensant ai agns di vite che si stave gjavant, par podê vivi chei che i restavin come un puar coion.

di Raffaele Serafini

Conte cjolte de Ostarie viere

SE DIU AL VÛL

2011-12-19T08:00:00.000+01:00

Ce vite misare e impestade: dolôr e muart simpri a lenziti e a cimiâti. Come chest mâr rabin che al svuacare cuintri i flancs de barcje, e al sbrume tant che un cjaval mat. Ma intant ti clame e ti nice.

O ai dibot plui fradis che agns, e ducj a barufin ogni dì cu la vite par rivâ da pît de zornade. O vevi ancje un om. Un che mi è jentrât tal jet che o jeri dome une frutine e che mi à cjapade cun fuarce e dispresit. Un che mi à pacade milante voltis fin a fâmi sanganâ, e che mi à passât malatiis marçosis e infamis. Chel vecjo sporc e soç che mi à fat fâ cuintri voie cinc fîs in cinc agns. Trê a son cressûts, i ultins doi mi son lâts picinins. Mê mari e dîs che aromai o jeri masse strache e lancurose, e che il gno lat nol veve sostance. Cuant che al è muart il vecjat, mi à tocjât ancje puartâ corot par no ufindi la int. O ai fat fente di vaîlu par contentâju, ma dentri o cjantavi.

Po ben, cumò chê vite e je sierade, finide. Inshallah, se Diu al vûl, dut di culì indenant al larà in miei.
La mê libertât, il pan pe mê famee, al coste cinc mil dolars. Jo no ju vevi, par paiâmi chest sium. No savevi nancje contâ fin a cinc mil. Ma o soi stade fortunade: un dal paîs che a son agns che al è fûr, al à metût par me i bêçs dal viaç. Mi à dite che jai tornarai ben planchin, cence premure, lavorant par lui. Al dîs che mi à cjatât un lavôr biel e che al rint un grum. Al dîs che li che o voi, la int e à bisugne di nô: a 'nd è lavôr par dutis chês che come me a scjampin de miserie.

Jo no sarai come chês altris che a son za ladis. Jo no deventarai supierbeose a pene che o varai fate furtune. Nissune di chês rivadis tal forest e à mai gust di scrivi, nissune e conte mai nuie di se, de sô gnove vite... Mê cusine - la uniche volte che e à scrit - e à dite di no vignî, che la Italie no je come che a disin... Àno vadì pôre che ur robìni il lavôr? Ma no disino che a 'ndi è par ducj, fin sore il cjâf?
No vûl sei triste, no vûl vê triscj pinsîrs. No vuê, no cumò che il gno sium mi pâr za di rasintâlu cu la ponte dai dêts. Denant di nô si viodin za lis lûs de cueste: il cûr mi bat a mil.

O pensi ai miei frutins, a mê mari, ai miei fradis. Ur scrivarai subite, che no stedin in pinsîr... Cui prins bêçs ur mandarai ancje cualchi regalut, che si visin di me e che mi spietin, che o tornarai siore e contente, e dopo no ju lassarai plui.

O cjali l'orizont che si sclarìs, e o benedîs il Cîl che - salacor - in fin mi contentarà ancje me.

di L'Antescûr

Conte cjolte de Ostarie viere

IL FURLAN TAI TIMPS CHE CAMBIIN

2011-12-02T08:00:00.000+01:00

«Nono ce âstu che tu sês cussì preocupât, ce isal che ti tormente? A son dôs oris che tu stâs li incacît cence dî une peraule!»
Viodint che il nevôt al veve metude tante gracie tal vierzi il discors e che, puar zovin, al stave cul cûr in man par lui, Meni, ancje se nol veve nissune intenzion di fevelâ, nol podeve strafuî da lis preocupazions dal nevôt. Vere, i siei pinsîrs a jerin bruts, masse stuarts par chel fantat cussì zovin. Ma l’istes, aromai, par cemût che si jerin metudis lis robis, Meni, nol podeve tirâsi indaûr e cussì, cjapade a la largje, al veve tacât a contâ di dulà che al vignive il so lancûr.
«Tancj agns indaûr, cuant che o jeri fantat, in ducj i paîs de provincie di Udin si fevelavin cuatri lenghis.
I siôrs, tra di lôr, a dopravin il venezian, ancje se al jere un venezian par mût dî. Lu vevin rangjât, cemût che che a podevin par fevelâ cu la stesse lenghe dai lôr parons: sfidi, no volevin jessi di mancul.
Il plevan e i predis sot il so comant, invezit, par dî messe, e pes preieris, - come che tu sâs - a dopravin il latin.
Il talian? Chel lu dopravin lis mestris e i mestris cui fruts tes scuelis e il sindic, cun chei de sô clape cuant che si cjatavin tal Palaç dal Comun.
Dute la int dal paîs come me, impen e doprave la lenghe furlane. La lenghe doprade dai nestris vecjos - al veve zontât il nono - chê fevelade, che secont i siôrs, par no dî nestris parons, no jere une lenghe, ma un dialet. Par dîle dute: la lenghe dai sotans… Chei, nevôt, a jerin i agns a pene finide la vuere, i agns di miserie e par tantis fameis, de fam»
Debil cemût che al jere, il nono, tal contâ chestis robis si jere propit stracât. Ma dopo vê cjapât un fregul di flât e suiantsi i vôi des lagrimis clipis che i bagnavin ancje la muse, al jere lât indenant cu lis peraulis:
«… dopo vincj agns, an plui an mancul de fin de vuere, lis robis a àn tacât a cambiâ in miôr. Par prin, chei cuatri siorats dal paîs a son lâts a stâ in citât, e il venezian simiotât che ti disevi no lu doprave plui nissun. E lis robis no jerin finidis li. Un Pape, un di chei che no podarìn mai dismenteâ, propit in chei agns, al à dât l’ordin a ducj i predis di no dî plui messe e preâ par latin, ma di doprâ il talian, e se a jerin bogns, parcè no, il Furlan.
Si jere metût tal cjâf, e al veve reson, che dome cussì, ducj a podevin capî miôr lis lôr preieris, ma soredut les peraulis dopradis in dutis lis funzions.
Insome, in chei agns, tai paîs e ancje ca di nô si fevelavin dome dôs lenghis: il talian tes scuelis, in Glesie e tal Palaç dal Comun; il Furlan, che nol jere plui considerât di nissun un dialet, anzit, e e jere ore, une vere lenghe.
Chei, nevôt, a son stâts, forsit, i agns plui biei che al à cognossût il popul furlan. I nestris paîs a jerin deventâts une seconde Svuizare. Cun di plui, chei che a pene finide la vuere a vevin scugnût fâ lis valîs par no murî di fan, a vevin podût tornâ a cjase: lavôr al jere par ducj. Pense tu! Lavôr dongje la puarte di cjase, fevelant la lenghe che ur vevin insegnât, tai borcs, i nestris vielis.
Biei timps… chei…, ma, tant che a disevin i vielis, magari cussì no, la cuaie no va simpri par chel agâr, e ancje cheste volte lu à saltât. Tai ultins agns lis robis son propit cambiadis in piês.
Lavôr al è pôc par ducj e soredut pai zovins come te e nol passarà tant timp che la pension gjavaran ancje a mi. Si fâs indenant propit un mont indulà che no mi ricognòs plui. Pes stradis no si viôt plui nissun, i canais tal paîs tu ju contis sui dêts di une man. Dut al cambie. Ancje i predis a tornin a dî messe in latin. E il furlan? No lu dopre plui nissun, o chei cuatri vecjos che a son restâts. O tornarin vadì come in chê volte che la miserie si taiave a fetis e tal paÎs si cjacaravin cuatri lenghis. E je propit vere che se un popul al piert il lavôr e la sô lenghe, al piert la sô dignitât e al à segnât il so destin. Ve, nevôt, di dulà che al ven il gno marum, il gno torment, la mê, pocje voie di vivi. E o sint propit che ancje par me i miei dîs a son contâts e chê dal falcet e je su la puarte…»

di Nello Malisano