Demonocrazy

Insomnioa gainditzeko 25 disko

Demonocrazy — Fri, 16 Oct 2009 22:00:25 +0200

Uda hasi aurretik egin nuen erosketa konpultsibo horietako baten ondorioz, nire logelan programatuz denborarekin emendatu egiten den soinu aparatu bat daukat. Batzuek nahiago dute prozac edo dormidina bezalakoak, baina jakin pizti bat mantsotzeko musika baino hobeagorik ez dela ezer existitzen.

Horregatik azken hilabeteetan momentu horretarako aproposa den musikaren bila ibili naiz, gabetan ohean etzanda entzuteko musikaren bila.

Azkenean lehendik ezagutzen nituen diskoak izaten badira ere gehien entzuten ditudanak, talde interesgarri berri batzuk ezagutu ditudala ere esan dezaket, guztiak batu eta 25 onenak aukeratzen saiatu naiz gaurkoan, hor doa lista, inongo ordenarik gabe.

WEEZER - Green album

Weezer taldeak kolore askotako diskoak atera ditu, gaurkorako berdearekin gelditzen naiz.

A PERFECT CIRCLE – eMOTIVe

Maynard James-en proiektu paralelo honek disko interesgarri asko ditu, gaurkorako eMOTIVe aukeratu dut, bakea nahi edo gai bezala jorratzea amankomun duten 12 kanten bertsioak, amesteko prest uzten dizun diskoa.

ANARI – zebra

Disko berriaren zain gauden honetan, beraren lan borobilena goraipatzea besterik ez daukat, niretako euskal bakarlari interesgarriena, ez da gutxi.

DONNIE DARKO – Filmaren soinu banda

INXS “Never Tear Us Apart”, Joy Division “Love Will Tear Us Apart” edo Michael Andrews & Gary Jules “Mad World” bezalako abesti ezin hobeak.

BRANT BJORK –Jalamanta

Stoner doinuak, Kyuss-en 5. diskoa bezala ezaguna den disko hau desertuarekin amesteko ezin aproposagoa da.

GU TA GUTARRAK - Bertso Berriak eta Lagun Zaharrak

Bertsoak musikatuz emaitza interesgarri bat ateratzen da.

JEFF BUCKLEY – Grace

Denboraz baino lehen joan zitzaigun artista honen maisu lana, historia guztiko disko onenen listan sartzeko merituak dituen diskoa, ez baduzu ezagutzen ez dakit zeren zain zauden.

JETHRO TULL – Aqualung

Disko konpaktua da, bere beste disko batzuekin saiatu naizen arren, hau da gustoko dudan bakarra, agian pertsonalki esanahi bat duelako, ez dakit, dena den kalitate handiko lana da.

JOE SATRIANI - Surfing With The Alien

Logurari aurre egiteko, doinu mantsoak bakarrik balio dutela uzte baduzu, oker zaude. Satriani maisu bat da, eta hau bere maisulana, oso gomendagarria.

LEONARD COHEN - I'm your man

Barakaldora joateko aukerarik gabe gelditu banintz ere, Leonard Cohen oso gustuko dut, bereziki disko hau.

LISABÖ – Ezlekuak

Lisabö taldearen azken lana ezin trinkoagoa da, zortzi kanta baino gehiago, disko bat da, guztiak dira Ezleku. Mugitu gabe bidaiatzeko egina.

MAHASTER RIVER- Irtenbiderik gabeko autobideak

Bergarako hirukotearen lehen diskoa ezin aproposagoa da gaurko gaia lantzeko, akorde intimoak, melodia lasaiak.

MUSE - Absolution [Instrumental]

Joan den urtean atera zuten bitxikeria hau, absolution disko famatua baina formatu instrumentalean, insomnioa gainditzeko edo karaokerako balio du, bakoitzak aukera dezala.

RADIOHEAD - Amnesiac

Ez da Radiohead en disko hoberena, baina nire ustez gaurko gaiarekin hobetuen datorrena bai. Gitarra rockeroak albo batera utzi eta elektronikarekin esperimentatu, berdin da zer erabili, radiohead kalitatearen sinonimoa da eta.

RAFA RUEDA - Saredun eskua (2006)

PI L.T. taldeko abeslari ohiak, bakarlari bezala nahikoa disko atera dituen arren, nire gustukoena hau dudarik gabe, askotan entzuten dudan diskoa, letra onak eta musika lasaigarria.

SIGUR RÓS - Með suð í eyrum við spilum endalaust

Diskoaren izenburua ahoskagaitza izan arren, musika lehen entzunalditik asimilatzen da, islandiarraren azken diskoa, aproposa musika lasai positiboarekin lokartzea behar dugun egunetarako.

U2- The Joshua Tree

Topiko bezala hartu daiteke dagoeneko, baina Irlandesen diskoa hoberena da dudarik gabe. Kanta guztietan mantentzen da kalitatea.

DEPECHE MODE-The Sound Of The Universe

Erabilera aunitzeko musika egin izan ohi duen taldea, larunbatean dantza egiteko edo ardiak zenbatzeko erabilgarria, beraien diska onena izan ez arren, azken aldian entzunaldi asko eskeintzen diodan diskoa dela esan dezaket.

PATRICK WOLF - Wind In The Wires

Harpa, klabezina, kitarra, pianoa, organoa, biolina… bezalako instrumentuak batu eta emaitza katalogaezina aterako da, ez dakit rock, folk edo teknoa den, dakidan bakarra da gustuko dudala.

NIKOLA SARCEVIC - Roll Roll And Flee

Millencolin hxc melodiko talde ezagunaren abeslariaren proiektu akustikoa da, estilo honetako disko gehienak bezala, aproposak gaurko gairako.

BIHOTZ BAKARTIEN KLUBA - Katamalo

Proiektu batetan Gorka Urbizu izena irakurtzeko aukera badago, gutxienez saiakera bat merezi duela uste dut, kasu honetan arrazoi horregatik entzuten hasi banintz ere, estimu handiko diskoa bihurtu da dagoeneko. Literatura musikatua, katamaloa kendu eta amesteko aproposa.

SOULSAVERS – Broken

Ez dakit arimak salbatzeko gai izango diren, baina REM fasera heltzeko izan ohi dugun helburua lortzeko aproposak dira.

ZEA-MAYS –Harrobian

Zea-mays-en disko guztiak dute zerbait espeziala, baina gaurko gaiarekin hobetoen datorrena hurrengo hau dela uste dut. Zuzeneko indartsuengatik ezagunak badira ere, Aioraren ahotsak ez du mugarik ezagutzen.

BON IVER - For Emma, Forever Ago

Aste honetan bertan ezagutu dudan diskoa, The indezents blogean irakurri nuen diskaren historia eta ikusminak jota edo, deskargatzea erabaki nuen, erabaki ona izan nuela esan beharra daukat.

PINK FLOYD – The Wall

Ez dauka aurkezpen beharrik, guztiok ezagutzen dugu maisulan hau.

Insomnioa gainditzeko helburuarekin itsutzen banintz, diska gehienak bakarlari, jazz estilo edo filmen soinu bandak izango ziren, horregaitik lista guztiz subjektiboa egitea iruditu zait egokiena.

Baten batek listako diskoren bat aurkitzeko zailtasunak baditu, jarri nirekin harremanetan eta oso gustura igoko diot diskoa.

Bukatzeko, esan beharra daukat, hasieran aurreikusita neukana baino zailagoa egin zaidala 25 disko aukeratzea, lista bukatuta neukanean, bertako batzuk kentzea eta beste batzuk gehitzea pentsatu dut, baina azkenean lista natural bat gelditzeko eta burutik jota ez amaitzeko, burura etorri diren lehen 25 diskoak ustea pentsatu dut. Hurrengo baten kanpoan gelditu direnekin beste 25eko lista bat egingo dut.

Bestalde, zuek zer disko gehituko zenuten?

Autorik gabeko eguna kontrolatzen

Demonocrazy — Tue, 22 Sep 2009 20:59:37 +0200

Izenburuak ez du zerikusi handirik nik komentatzea nahi dudan gaiarekin, baina mugikortasunaren astea eta autorik gabeko eguna izanda, anekdota txiki hau plazaratzeko momentu ezin hobea iruditu zait.

Kotxeko gidabaimena daukat ,eta nirea ez den arren kotxea eskuragarri ere, askok ulertzen ez duten arren, autobusean noa klasera ordea, Bergaratik-Eskoriatzara. Arrazoi nagusia ingurugiroa dela gustura esango nuke, baina benetako arrazoia dirua da (beti bezala...), Debagoiena osoan tarifa berdina egonda, oso ekonomiko irteten zaizkit bidaiak. Bergaratik Eskoriatzara = 0,69 zentimo hain justu ere.

Autobusa egunero erabiltzen dudan arren, ez nago bape pozik pesak eskaintzen digun zerbitzuarekin. Pesa konpainia sufritzen dugunok badakigulako ez dutela beharrezko betebeharrak asetzen. Esaterako, egunero hartzen dudan autobusa 12:45 etan etorri behar den arren, ikasturtea hasi denetik 7 egunetatik batean ere ez du asmatu,egunero berandu heldu da eta parrandaz noanean berdin bazait ere, unibertsitatean puntualitatea eskatzen lehenengoa izanda, ezin naiz berandu heldu.

Zerbitzua hobetzeko ordea, pesak ikaragarrizko ideia izan du, autobus gehiago? Ez. Autopistatik joaten diren autobusak (Lehengo arinak, bertakoak eta express sistema berrezarriz)? Ez. Beraien konponbidea, Abuztutik aurrera autobusa hartu duzuenok jakingo duzuen bezala, autobus guztietan kamerak jartzea izan da. Berandu heltzeaz gain, jende guztia konturatu dadila!

Ez dakit zerek bultzatu dituen, beraien indarrak eta gestio plana horrelako gauzetara bideratzen, baina zerbitzua hobetzetik, oso urrun geratu dira erabaki honekin.

Segurtasun kameren gaia, gai eztabaidatua izan ohi da, baina nik argi daukat, gero eta kamara gutxiago, hobeto. Bakoitzaren intimitatea bermatzea derrigorrezkoa ikusten dut, agian film distopikoen zalea naizelako uste dut hau, baina nire ustez pesako autobusak ez dute horrelakorik behar.

Horrela jarraitzen badute, 4 lagun elkartu eta kotxez joateko aukera serio pentsatzen hasiko naiz.

Bihar bertan, kamerei, bi daude autobus bakoitzean, argazkia ateratzea da nire asmoa, post honetan jartzeko.

EDITATUTA 2009/10/08:

Argazkiekin baino, argiago ikusiko duzue goienaren hurrengo bideoan non dauden kamarak. Bideoa ikusita gaberako autobusek bakarrik dutela kamarak pentsatu dezakegun arren, ez ahaztu autobus horiek egunez gehiago dabiltzala gabez asteburutan baino, esaterako nik egunero aste barruan erabiltzen dudan autobusa kameraz hornituta dago.

BlogDay 2009

Demonocrazy — Mon, 31 Aug 2009 14:03:11 +0200

Aurreko Abuztuak 31ean egin nuen bezala, Blog-en eguna ospatzeko, nire google reader en ezinbestekoak diren bost blog aipatzera nator gaur.

El condensador de fluzo

Izenak argi uzten duen bezala, blog hau denbora bidaietan oinarritzen da, oso gustoko dudan gai honi buruz dagoen blogik onena dudarik gabe.

Eneko

20minutos webgunetik salbatzen den gauza bakarra, egunerokotasun handiko binetak, askotan kritika azidoekin, beti kalitatearekin.

Nimias Cosas Minimas

- Mentira más común en internet*

*Seguida muy de lejos por "déjame que te vea por la web-cam, te prometo que no te grabo"

Irudi bat, azpititulu batekin. Hori izan ohi da bere modu soperandia, kontuz, irrigarritasun handiko eremua.

TCM

Telebistako katea inoiz ikusi ez dudan arren, bere webgunean dauden blogak arretaz jarraitzen ditut, bereziki hau (de cine). Zinemari buruz jarraitzen ditudan blog guztietatik nire gustukoena.

¡Escucha esto!

Manuel Bartual, umorea eta melomania nahastean irteten den koktela, askotan identifikatuta sentitzen naiz.

Opor osteko diskoen zain

Demonocrazy — Thu, 09 Jul 2009 21:56:08 +0200

Iraila hitza entzutean bakarrik sentsazio arraro bat etortzen zaigu burura, konnotazio negatibo bat dauka hilabete horrek, oporren amaiera, egunerokotasunaren buelta...

Aurten ordea oporraldi osteko sindromea gainditzeko material dezente izango dugu eskuragarri, azken aldian itxaroten nabilen disko guztiak hil horretan aterako dira eta. Hurrengo kasuak ezagutzen ditut nik.

Berri txarrak, Irailean argitaratu behar dute beraien 6. diskoa Lekunberrikoek, Rubio joan eta David etorri zenetik atera behar duten lehen diskoa da hau, 2005ko Jaio.Musika.Hil-etik ez dute diskorik atera, tartean Zertarako amestu dokumental ederra dagoen arren. Hatortxurock-en izan nuen hirukotea ikusteko aukera eta une indartsuan daudela argi gelditu zitzaidan, kontzertu horretan jo zuten bi kanta berriak eta beraien myspace eta roadrunner-en webgunean aurkeztu duten Dortoken mendean kantu berriak, disko berriarekiko gosea handitu besterik ez didate egin.

Muse, gaur egun nire talderik gustukoenetarikoaren diskografi perfektua aztertuz, hutsik ez dutela egingo argi ikusten dut, gainera diskoari Madrileko kontzertua gehitu behar zaio, dagoeneko sarrera altxor bat bezala gordeta dut eta, urteko kontzerturik interesgarriena dela uste dut, HAARP Dvd-a ikusi ondoren, argi dago ingelesek zuzeneko indartsua dutela.

Diskoaren izenburua The Resistance izango da eta twitter bidez kanten izenburuak ere badakizkigu:

1. Uprising
2. Resistance
3. Undisclosed Desires
4. United States of Eurisia (+Collateral Damage)
5. Guiding Light
6. Unnatural Selection
7. MK Ultra
8. I Belong to You (+Mon Coeur S’oUVRE A Ta Voix)
9. Exogenesis : Symphony Part I (Overture)
10. Exogenesis : Symphony Part II (Cross Pollination)
11. Exogenesis : Symphony Part III

Bellamy eta konpainiak egin dezaketenaren aurrean beldurra daukat, gehien bat azkenengo hiru kantak berez sinfonia bat osatzen dute eta.

Skunk Df Madrildarrak ere iraila hautatu dute nola ez, berain disko berria, El Crisol, aurkezteko. Esencia azken diska rockeroagoaren bidetik jarraituko dutelaren susmoa daukat, taldearen eboluzioa aztertuta, dena dela kitarra berriak sartu dira taldean eta beraien nortasunak ere ezustekoren bat eman dezakete, momentuz aurrerapen bezala bideoklip bat jarri dute sarean.

A Fire Inside, hasieratik asko aldatu den taldea izanda ere, beraien azken hiru diskoak oso gustuko ditut

(The Art of Drowning ,Sing the Sorrow, Decemberunderground), irailean aterako duten diska Crash Love deituko da.

Pearl jam-ekoak oraindik diskoaren izenburua Backspacer izango dela bakarrik esan duten arren, gogo handia dut Seattle-eko talde mitiko honen disko berria entzuteko.

Alice In Chains, Seattle-eko beste talde handi honek ere iraila aukeratu du nola ez, bere disko berria Black Gives Way to Blue aurkezteko

Horren beste diskoren artean ez galtzeko, laburpen txiki bat egingo dut:

Irailak XX – Berri txarrak “Izenburu gabe oraindik”

Irailak 14 – Muse “The Resistance”

Irailak 21 – Skunk Df “El Crisol”

Irailak 22 – Pearl Jam “Backspacer”

Irailak 29 – AFI "Crash Love"

Irailak 29 – Alice In Chains “Black Gives Way to Blue”

Inoiz ez nuen aurreikusiko hurrengoa esatera helduko nintzenik ,baina, ea oporrak pasa eta irailera heltzen garen!

Ikastolan ikusitako filmak

Demonocrazy — Mon, 06 Jul 2009 15:32:48 +0200

Gure udako gabak normalean tertulietan amaitzen dira, horrela beste egunean pelikula batzuk komentatzen geundela lagun bati film bat gomendatzean, beste batek mespretxuz, film hori ikastolan ikusi zuela esan zuen eta orain oporretan gaudela gogorazi zidan.

Kuriosoa iruditzen zait batzuk derrigorrezko eskolan ikusten diren filmei hartzen dioten amorrua. Seguruenik liburuekin fenomeno hau arruntagoa izango da, baina nire zaletasunetako bat zinema denez, ikastolan ikusi nituen filmak aztertzea bururatu zait.

Derrigorrezko bigarren hezkuntza baino lehenago ikusi nituenak alde batera utzi ditut gehienak marrazki bizidunak izan bai ziren.

DBH

Suaren bila: Gehienak errekako eszena bakarrik gogoratzen duten arren, nire ustez kriston film bat da, historikoki oso zehatza, interneten irakurri nuen zuzendaria urte bete ibili zela garaiko hizkuntzak aztertzen...

La lista de Schindler: Ez da nire film gustukoenetarikoa baina eskolan ikusteko oso aproposa bai, historia ona, musika ona, film ona.

Tierra y libertad: gerra zibilari buruz ikusi dudan filmik interesgarriena, historia ikasgaian ikusteko oso aproposa.

Batxilergoa:

Rebelion en las ondas: Laurogeigarren hamarkadako estetika da nire ahulezietako bat, gainera irrati piraten indarra, sistemaren aurkako jarrera, eskolen faltsukeriak eskolako film batetan... oso film ona iruditzen zait eta seguruenik institutuan ikusteko aukerarik gabe gelditzen banintz filma ezagutu barik geldituko nintzen. Everybody Knows...

El odio: Eukal herrian gorrotoak nora eramaten gaituen argi badago ere, film honek frantziako behe-auzoetako egoerak maisutasunez erakusten dizkigu. Eskolarako aproposa.

Blade runner: Nire film gustukoenetariko bat, uste dut gelan ikusi genuenean jendeak ez ziola merezi duen arreta jarri eta aurkako kritika ugari entzun behar izan nituen, hau da agian post honetan hobeto gelditzen den adibidea, film ilun bat da, distopikoa, ziberpunka, filosofikoa eta horrelako filmekin, zinemazalea ez den gazte bat, ondo eramatea zaila izaten da. Lokalean lagun artean berriro ikusi dugun batzuetan jendeak eskolan ikusitakoan baino onagoa zela esan izan dit. Desberdina da film bat iniziatiba propioz ikustea edo eskolako irakasle batek esanda lan bat egiteko.

La chaqueta metálica: Stanley kubrick en film onena ez izan arren, film belikoen artean oso ona iruditzen zait eta eskolarako aproposa.

Haz lo que debas: Eskolan ikusi ditudan film guztietatik seguruenik hau izan da niretako onuragarriena, dagoeneko film hau mitifikatuta daukat, berari esker ezagutu nuen Spike Lee eta beraren filmak (Get on the bus nire filmik gustukoenetariko bat), film honi esker nire ukabilak love eta hate hitzekin tatuatzeko gogoa sortu zait, film honi esker gogoan dut Radio Raheem eta Powell reberendua, film honek markatu egin zidan, horregatik oso aproposa ikusten dut eskolan ikusteko.

Ikastolan ikusitako ze film gogoratzen duzue zuek?

Ba al dakizu zer ordu den?

Demonocrazy — Sat, 27 Jun 2009 15:31:13 +0200

Egunero entzun eta erantzuten dugu galdera hau, baina ba al dakigu benetan zer ordu den? galdera samurra iruditu arren, ez da horren sinplea...

What Time Is It? dokumentala ikusi berri dut, bertan historian zehar gizakiak denbora kontzeptuaren inguruan eduki dituen ideia desberdinak aztertzen dira, denbora zer den azaltzeko.

Brian Cox zientzilariak Maya mundutik, zientzia kuantikora eramaten gaitu denbora bidaietatik pasaz, zulo beltzak, erloxu atomikoak, mundu paraleloak, Einsteinen erlatibotasun teoria, shapiro efektua, unibertsoaren adinaren kalkulua... denetarik azaltzen da motz gelditzen den ordu bete batetan.

Oso gomendagarria, youtuben gaztelerazko azpitituluekin ikusi dut.

Nickdutnik

Demonocrazy — Thu, 23 Apr 2009 23:14:24 +0200

Atzo estreinatu zen Nickdutnik programa ETB3 katean, eskerrak arratsaldean Sustatun albistea irakurri nuela, oso saio interesgarria izan zen atzokoa eta.

Euskaraz informatikaren mundua jorratzen zuen saio bat faltan botatzen genuen askok, eta atzokoa ikusiz Nickdutnik hutsune hori osotasunez betetzeko asmoarekin etorri da.

Atzoko saioan Teknopatako Joxeri elkarrizketa bat egin zioten (Nire poken kuttuna telebistan!), Goearko sortzaileari elkarrizketa bat egin zioten (Zerbitzu hau askotan erabili arren ez nekien atzean euskaldun bat zegoela), twitter eta beste zerbitzu askori errepaso bat egin zioten... Ondo aprobetxatutako ordu erdia.

ETBn ikusten dudan programa bakarrenetarikoa kalaka izanda, amorru pixka bat ematen dit hau ere egun berdinean izatea, baina ordu erdi bakarrik izanda ez da ezer pasatzen.

Espero det bizitza luzeko programa izatea, baina oraindik ez dakigu zer gertatuko den ETB telebistarekin lehendakari berria edukitzean.

Puntu txar bat aurkitzekotan, jorratzen duten gaia ikusita nire ustez http://www.nickdutnik.com/ webgunea prest egon beharko zen saioko bideoekin eta programan agertu diren zerbitzuen loturekin edo blog txukun batekin. Seguruenik hortan ibiliko dira, pilotoaren balorazioaren zain, bitartean twitter bidez jarraitu dezakegu.

Besterik gabe, zorte on eta asteazkenero 22:00 elkar ikusiko gara.

Diogenes digitala

Demonocrazy — Thu, 02 Apr 2009 21:31:25 +0200

Diogenes digitala

Azken urtetako iraultza digitalak, kultura kontsumitzeko eredu zahar guztiak apurtzeaz gain, kultura biltegiratzeko eta bereganatzeko kontzeptu guztiak aldatu ditu.

Edozeinek dauka gaur egun, P2P sareei esker, Alexandriako artxiboa barregarri utziko lukeen erregistroa etxean.

Soulseek, Emule, Pando, Rapidshare, Mediafire, Megaupload, Torrent, MoorHunt... Programa, zerbitzu eta webgune mordoa erabiltzen ditugu egunero errubera digitalaren barruan harrapatuta gelditu garen gazte askok. Baina beti bezala, muturreko jarrerak ez dira batere egokiak eta gero eta jende gehiagok sufritzen du Diogenes digitala, hau da, disko gogorra zaborrez beteta edukitzea, inoiz kontsumituko ez duten informazioa pilatzea, filmari baino garrantzia handiago ematea zenbat denboran deskargatzen den, edukiari garrantzia eman beharrean deskargatzen lehenak izaten saiatzea...

Friki/geek perfileko “gaixotasuna” dirudien arren, gure sistema materialista barruan jaio eta internet duen edozein jauzi daiteke.

Arazo bat dugunean lehena arazoa onartzea dela esan ohi dute adituek, beraz nire ordenagailuan ditudan artxiboak aztertuko ditut kultura kontsumitzeko dudan gaitasuna aztertuz, nire ordenagailuan inoiz kontsumitzeko gai izango ez naizen zaborra dudan edo gutxika aseko nauen multimedia artxiboak ditudan zehazten saiatzeko.

Momentu honetan dudan erregistroa:

Pelikulak: Pelikulak DVDtan gordetzen joaten naiz, urteak daramazkit sistema berbera erabiltzen, oraintxe bertan 329 pelikula ditut.

Musika: Disko gogorraren laurdena baino gehiago musikarentzat daukat, urte asko noa musika deskargatzen, guztira 60 GB ditut, 1200 diska baino gehiago.

Argazkiak: 4 GB, 5000 argazki baino gehiago.

Telesailak: 8 telesail desberdinen kapitulu guztiak.

Liburu/Komikiak: 2 liburu eta 5 komiki.

Kontsumitzeko gai naizena:

Pelikulak: Bataz beste astero bi film ikusten ditut, dena den, momentuaren arabera film mota desberdin bat aukeratzen dut, beraz, normala da kontsumitzeko gai naizena baino film gehiago edukitzea, dena den deskargatzen ditudan filmen ehuneko 80a ikusten dut 2 hilabete baino lehen.

Musika: Egunero 2 diskotik gora entzuten ditut, baina normalean diska zaharrak (Lehenago deskargaturikoak) entzuten ditut, album asko ditut deskargatuta eta oraindik Zip artxibo bezala, inoiz entzungabe.

Argazkiak: Album handia eduki arren, argazki gehienak pertsonalak dira, eta etorkizunean ikusteko besterik ez dute balio.

Telesailak: Atal honetan bekatzen dut, deskargatzen ditudan telesailak DVDtan grabatzen ditudan arren, behin bakarrik ikusten ditut, ondoren tarrina batetan hautsa jasotzen gelditzen dira.

Liburu/Komikiak: Ditudan liburu eta komikietatik ez dut inoiz osorik ezer irakurri, ez naiz kapaza ordenagailu bidez irakurtzeko. Bi kasutan irakurtzen hasi eta gustoko nuenez komikia erosi beharra izan dut.

Ondorioak:

Diogenes digitalaren sintoma asko ditudan arren, uste dut kontrolaturik dudala gaitza eta ez doala gehiagora, alderantziz, azken aldian disko gogorreko zabor asko borratzen ibili naiz eta musika asko entzuteko Spotify erabiltzen hasi naizenez osasuntsu nago digitalki.

Bukatzeko, sarrera hau idazteko inspirazioaren iturriak azalduko ditut, kuadrila artean sortu zen eztabaida batetik dator kontua, bi muturren arteko eztabaida batetik, lagun batek dena online egiten duela esan zuen, etorkizuna hortik datorrelako. Lagun honek musika entzuteko Spotify, Last Fm, Youtube, Myspace, Playlist, Goear… erabiltzen ditu eta filmak ikusteko cinetube edo horrelako zerbitzuren bat, beste laguna ordea disko gogorren artean bizi da, gero eta film gehiago deskargatzen ditu, gutxienez 15 telesail oso ditu, talde bat gomendatzen diotenean ezer entzun hasi baino lehen diskografia deskargatzen du… Ta beraien artean ni nengoen, beti bezala bi aldetatik kolpeak jasotzen. Azkenean garbi atera genuen bakarra gauza bat izan zen, bakoitza libre da bere menu kulturala kudeatzeko, gauza pertsonal bat da eta SGAEk aurkakoa esaten duen arren legalki eskubide guztiak ditugu bi eratan funtzionatzeko.

Zinemaren eragina Simpson telesailean

Demonocrazy — Mon, 16 Feb 2009 21:12:36 +0100

Hamaika aldiz ikusi ditut Simpson telesaileko kapitulu guztiak, egunak 23 ordu ditu gure belaunaldirako, eguerdiko ordu bietatik hiruretara Simpson, gure erlijioaren biblia.

Zaila da gure koadrilan berriketan gaudenean Simpson telesailaren erreferentzia bat ez entzutea. Horregatik gaur pozik nago aurkitu dudan blogarekin.

Actualidad Simpson-en Zinemak Springfieldeko lagunengan eduki duen eragina ikusi daiteke. Erreferentzia asko ezagutzen nituen baina beste asko berriak dira. Ideia bat egiteko adibide batzuk jarriko ditut:

Asko daude, gainera bakoitza ze kapitulutik atera duten esateaz gain pelikularen izenburua eta historiak izan dezakeen erlazioa ere komentatzen dute.

Poken gorri bat egokitu zait

Demonocrazy — Sat, 14 Feb 2009 13:35:53 +0100

www.teknopata.net blogeko Poken gorri baten zozketan parte hartu nuen eta gaur goizean mezu hau aurkitu det nire postan.

Aupa aupa!

Oraintxe egin dugu pokenaren zozketa, eta, ezetz asmatu, zuri tokatu zaizu!!! ZORIONAK!!!

Hitza ematen dut heltzen zaidanean argazki erreportai bat egiteaz gain azterpen sakon bat egingo diodala gailu geek honi. Besterik gabe, eskerrik asko Joxe.