Dr. Hamisi Kigwangalla's Round Table

MSIMAMO WA MBUNGE WA NZEGA KUHUSU POSHO

2011-12-12T11:15:00.000-08:00

Kufuatia kuwepo kwa mjadala mzito wa kitaifa kuhusu ongezeko la posho ya kikao (Sitting allowance) ya wabunge kama ilivyoongezwa siku za karibuni, ofisi ya Mbunge wa Nzega imelitafakari suala hili na kuona umuhimu wa kutoa taarifa kwa wananchi wa jimbo la Nzega na watanzania kwa ujumla kuhusiana na msimamo wa Mhe. Mbunge. Tamko hili linazingatia maswali mengi kutoka kwa wapiga kura wa jimbo la Nzega na baadhi ya watanzania waliotaka kujua nini msimamo wa Dr. Hamisi Kigwangalla, MB (Nzega, CCM) kuhusu posho, hususan ongezeko hili la kutoka 70,000 hadi 200,000.

Mbunge wa Nzega ana msimamo ufuatao:

Kwamba, posho ama ujira wa mwia, ni malipo halali ya kazi ya Mbunge na kwamba ongezeko lolote litakalofuata kanuni na taratibu za haki na usawa kwa watu wote litakuwa halali.

Kwamba, Ongezeko hili kama lilivyotamkwa na Mhe. Spika Anna Makinda (MB), limekuja kutokana na ongezeko la ukali wa maisha katika mji wa Dodoma linaleta mashaka na utata mkubwa kuhusiana na uhalali wake, linaonesha usaliti wa wabunge kwa wananchi waliowachagua na linaiaibisha taasisi ya Bunge kama mtetezi wa wanyonge na mdhibiti na msimamizi mkuu wa serikali. Mbunge wa Nzega anaamini kwamba sababu hii inawakimbiza wabunge mbali zaidi na wananchi na kwamba ni kweli kuna mfumuko mkubwa wa bei lakini hauwagusi wabunge tu pekee yao, unamgusa kila mtanzania, na kama ofisi ya Rais inaona umuhimu wa kuboresha hali ya maisha ya wabunge, basi ingewapandishia mishahara yao, ingewaongezea mafuta ya gari kwa ajili ya kufanyia kazi zao, ingeboresha mfuko wa jimbo, ingeboresha ofisi zao n.k. Kwa hakika kabisa, kwa sababu zilizotolewa na Mhe. Spika, posho iliyopaswa kuongezwa siyo posho ya kikao bali ni posho ya kujikimu. Na hata kama Mhe. Spika alikuwa na nia ya kuongeza posho ya kikao, basi kwa vyovyote vile sababu isingekuwa hii ya ukali wa maisha mjini Dodoma, maana hauongezeki kwa wabunge peke yao tu!

Kwamba, kwa kuwa sababu za kuongezwa kwa posho ya kikao haziendani na malengo ya uwepo wa posho hiyo, basi wabunge wote waungane mkono na Mbunge wa Kigoma Kaskazini Mhe. Zitto Kabwe, Mbunge wa Bumbuli Mhe. January Makamba na Mbunge wa Nzega Mhe. Dkt. Hamisi Kigwangalla (Nzega) waikatae posho hii ili kuwatendea haki watanzania wanaohangaika kutafuta mkate wao wa kila siku. Kuna madaktari wanakesha usiku kucha na wanalipwa posho ya on call allowance ya TZS 10,000 tu, kumlipa Mbunge posho ya 200,000 haijengi mazingira ya usawa ya kuugawana umaskini wa nchi yetu.

Kwamba, ili kupunguza visingizio vya wabunge kudai maslahi makubwa zaidi kwa kuwa wanaombwa sana amisaada na wapiga kura wao, ofisi ya Bunge ianzishe kitengo cha kutoa elimu kwa umma kuhusu kazi na majukumu ya Mbunge ili kuwaelimisha wananchi kwamba kusaidia matatizo binafsi siyo kazi yao na hivyo wasihukumiwe kwa kutokutoa misaada bali kwa kuisimamia serikali ipasavyo.

Tamko hili limetolewa leo Tar 12/12/2011 na Ofisi ya Mbunge wa Jimbo la Nzega, Mhe. Dkt. Hamisi Kigwangalla (MB).

Mapinduzi ya Kijani (Pamba) Yamefanikiwa Nzega!

2011-11-08T08:45:00.000-08:00

Katika hali ya kutia moyo, wilaya ya Nzega imefanikiwa kufufua kilimo cha Pamba. Zao hili la biashara lililokuwa limepotea kabisa wilayani hapa sasa limerudi upya tena, japokuwa si kwa kufikia kiwango cha zamani lakini mwanga wa matumaini unaangaza kila kona. Wilaya ya Nzega iliacha kulima pamba takriban miaka 12 iliyopita kufuatia kuanguka kwa utaratibu mbovu wa ushirika uliokuwepo. Tatizo hili halikuikumba Nzega peke yake bali ukanda wote wa Western Cotton Growing Area (WCGA) (yaani mikoa ya Tabora, Shinyanga, Mwanza, Mara, Kigoma, Singida, Kagera n.k). Ushirika ulikuwa ukinunua pamba kwa mkopo na kulipa wakulima pesa yao kwa awamu. Mwaka 1990 wakulima wote hawakulipwa pesa ya malipo yao ya awamu ya pili. Hii iliwakatisha sana tamaa na wengi wao waliacha kulima pamba msimu wa kilimo uliofuatia. Mwaka 1991, bei za pamba zilizidi kuanguka kwenye soko la dunia na hivyo kusababisha ushirika tena kushindwa kununua pamba ya wakulima vizuri ipasavyo, na mzunguuko huu ulipelekea wakulima wengi zaidi kususa kulima pamba misimu iliyofuatia. Mfumo wa masoko ulipoboreshwa kwa kuingia kwa soko huria hapo baadaye, sehemu nyingine zilirudia kilimo cha pamba lakini Nzega ilikoma kabisa na pamba ikabaki historia! Na huu ulikuwa mwanzo wa kushamiri wa kwa umaskini wilayani Nzega. Maana wakulima walilazimika kuuza chakula ili wapate hela badala ya kuuza mazao ya biashara.

Kampuni ya MSK Solutions Ltd ikishirikiana na Serikali wilaya ya Nzega na Kampuni ya Rural Livelihood Development Company (RLDC) wamejifunga mikanda na kwa pamoja wamefanikiwa kuleta mapinduzi ya ukweli ya kijani. Pamba imerudi tena Nzega, imerudi kwa kasi ya ajabu ambayo haikutegemewa. Kwa pamoja wadau hawa wamekuwa wakiendesha mradi wa Nzega Cotton Development Project (NZECODEP) ambao unafadhiliwa kwa pamoja na wadau wawili, MSK Solutions Ltd na RLDC.

Mradi huu umeweza kufanikiwa kwa sababu zifuatazo, kwanza umewahakikishia wakulima soko la uhakika na bei nzuri zaidi ya pamba yao. Pili, mradi unahakikisha upatikanaji wa pembejeo na zana za kilimo cha pamba karibu na wakulima na kwa bei nzuri zaidi. Tatu, wakulima wanahakikishiwa ushauri wa kitaalamu karibu zaidi kwa kuwa mradi unawawezesha posho kidogo mabwana shamba ili kuwatia morali zaidi wa kutoa huduma za ugani.

Katika uhamasishaji huu, ujumbe mahsusi unaowafikia wakulima ni pamoja na uhakika wa vitu vyote hivi na pia maelezo yanayotoa cost-benefit analysis ya kilimo cha pamba ukilinganisha na mazao mengine na kwamba pamba haikuja kufuta kilimo cha mazao mengine bali kuhakikisha mkulima anakuwa na zao la mbadala endapo ikitokea amekosa mavuno ya kutosha ya mazao ya chakula ama mengine ya biashara atakayokuwa amelima. Pia wakulima wanaeleimishwa kuwa pamba inastahimili ukame ukilinganisha na mahindi na mpunga na hivyo kama mkulima akikosa hayo mazao mengine yote na akapata pamba, atauza atapata hela na kwenda kununua chakula. Na kama akipata mazao mengine, basi atafanya mambo mengine kwa kutumia hela itokanayo na pamba.

Kutoka kilo 20,000 Mwaka wa Kwanza, hadi 350,000 na sasa Kilo 982,000! Mbali na kukuza kipato cha mkulima mmoja mmoja, pamba itakuwa ni chanzo kipya kikubwa cha mapato ya halmashauri ya wilaya ya Nzega kupitia ushuru wa mazao (district cess) na hivyo kufanikisha miradi mbali ya maendeleo kama mabarabara, shule, zahanati n.k. Pia faida nyingine ni pamoja na kuongeza mzunguko wa fedha na hivyo kutia chachu sekta nyingine za maendeleo na huduma wilayani hapa. Pia kushamiri kutaleta viwanda wilayani hapa. Maendeleo haya ni endelevu na yanagusa watu wengi ukilinganisha na uwepo wa mgodi mkubwa wa uchimbali dhahabu ambapo ikiisha ndiyo basi tena.

Kikwazo kikubwa kinachoukumba mradi, pamoja na mambo mengine, ni propaganda za kisiasa zinazofanywa na wanasiasa kwa vile tu harakati za kufufua zao la pamba Nzega zinafanywa na kampuni ya MSK Solutions Ltd ambamo Mbunge wa Jimbo la Nzega ana hisa.

Makala hii imeandaliwa na Ndg. Kumotola L. Kumotola, Afisa Mahusiano, Uratibu na Itifaki - Ofisi ya Mbunge wa Jimbo la Nzega akishirikiana na Ndg. Hassan Jaha, Mratibu wa Mradi wa NZECODEP, MSK Solutions Ltd, Nzega.

Volunteers at Work!

2011-11-08T07:45:00.000-08:00

Volunteers at Work!

2011-11-07T10:05:00.000-08:00

Are we Realistically Trying to Solve the Electricity Problem in Our Country?

2011-06-07T04:52:00.000-07:00

Mpaka leo hii, tuna mitambo ya jumla ya MW 336 inayowashwa kwa kutumia gesi asilia, yaani kuna ile inayomilikiwa na kuendeshwa na Songas (MW 191), ile ya serikali ya Ubungo (MW 100) na ile ya Tegeta (MW 45). Hii mitambo tu ukiongeza na ile ya makampuni kama matatu hivi yanayotumia gesi asilia kuendeshea mitambo yao, yameisha-exhaust supply ya gesi. Hata ile ya Dowans ikiwashwa leo, bado haitoweza kuwaka to full capacity (ya 112 MW), badala yake itazalisha MW 75 tu, kwa sababu ya poor supply ya gesi.

Leo hii kuna miradi ya Ubungo - MW 100, Kinyerezi MW 260 na Somanga Fungo MW 240, jumla yake ni MW 600. Je, serikali iko tayari kuwekeza kwenye bomba jipya litakalosaidia kutatua tatizo hili la upatikanaji wa gesi, ambalo ni very expensive?

Leo hii serikali inalalamikia gharama za uendeshaji wa mitambo ya IPTL, inayotumia Heavy Fuel Oil (HFO) kuwa ziko juu sana, sasa kwa nini tena inajenga power plant ya Mwanza (MW 60) kwa mitambo itakayotumia HFO ilhali wanaiona IPTL inavyosumbua kwa gharama?

Saa nyingine unashindwa kuelewa ni jinsi gani wasomi wetu wanafanya maamuzi mazito kama haya! Sijui wanakuwa wanatumia vigezo gani?

Hivi kwa nini serikali isianzishe mradi wa Umeme na wakajikita zaidi kwenye MW chache tu zilizo ndani ya uwezo wetu? Kama walivyofanya kwenye barabara kwa nini wasifanye hivyo pia kwenye umeme???

TATIZO LA UMEME NCHINI!

2011-06-07T04:22:00.000-07:00

Mhe. Dkt. Hamisi Andrea Kigwangalla (MB), atauliza:-

(a) Tangu serikali ya awamu ya pili hadi leo, serikali imetumia jumla ya shilingi ngapi kuzalisha umeme, na bado tatizo lipo?

(b) Je, tatizo la umeme nchini litaisha lini?

(c) Kwa nini serikali inaongea mipango mingi ya kutatua tatizo la umeme bila kutekeleza na kwa nini suala la upatikanaji umeme nchini ni la dharura kila siku?

Waziri wa nishati na madini atajibu:-

Mheshimiwa Spika, napenda kujibu swali la Mheshimiwa Dkt. Hamisi Andrea Kigwangalla, Mbunge wa Nzega lenye sehemu (a), (b) na (c) kama ifuatavyo:-

(a) Mhe. Spika, uwekezaji wa serikali katika miradi ya kuzalisha umeme tangu kipindi cha serikali ya awamu ya pili hadi leo unafikia jumla ya Dola za Marekani milioni 798.

(b) Mhe. Spika, tatizo la uhaba wa umeme litaisha baada ya kutekeleza kwa ukamilifu na kwa wakati mpango wa kipindi kifupi cha 2011 - 2015 kama ilivyofafanuliwa kwenye mpango kabambe wa uendelezaji wa sekta ya umeme wa mwaka 2009. Miradi itakayotekelezwa kipindi hicho itaongeza jumla ya MW 1830 kwenye mfumo wa gridi ya Taifa kwa gharama inayokadiriwa ya Dola za marekani milioni 3,700.

(c) Mhe. Spika, serikali imeazimia kutekeleza kwa wakati miradi ya kuzalisha na kusafirisha umeme kulingana na Mpango Kabambe wa Uendelezaji wa sekta ya Umeme, hususan, katika kipindi cha 2011 - 2018. Miradi iliyopangwa kujengwa itaongeza MW 600 kwa kutumia maporomoko ya nguvu za maji, MW 870 kwa kutumia gesi asili, MW 1200 kwa kutumia makaa ya mawe na MW 100 kwa kutumia nguvu ya upepo. Serikali inategemea miradi hii itakamilika kwa kushirikisha uwekezaji wa sekta binafsi kwa kuwa gharama za miradi hii yote ni kubwa.

Mhe. Spika, serikali kwa kushirikiana na sekta binafsi imeanza mikakati ya kutafuta fedha za kugharamia miradi ya kipaumbele niliyoitaja hapo juu.

Maswali Mawili ya Nyongeza kutoka kwa Mheshimiwa Kigwangalla:

(1) Kama toka awamu ya pili mpaka leo hii serikali ilitumia Dola za Marekani milioni 798 na bado hali ya upatikanaji umeme nchini ni duni kiasi hiki, serikali hii leo itapata wapi Dola za Marekani milioni 3,700?

(2) Mpaka leo miundombinu ya kusafirisha gesi kutoka Mnazi bay na Songosongo kwa ajili kuzalishia umeme kwenye mitambo iliyopo Dar es salaam ni duni na imechakaa, na uwekezaji kwenye bomba la kusafirishia gesi ni gharama kubwa, mnatuhakikishiaje dhamira ya serikali ya kulitatua tatizo la umeme kwa haraka kwamba ni ya ukweli au tutegemee kuendelea kufaidi mgao kila siku?

Kada Kigwangalla Akicheza Ngoma na Wanachama Wenzake wa CCM!

2011-05-10T09:55:00.000-07:00

CCM bwana, raha tupu! I am so proud to be a member of the CCM party!

Mwaliko wa Maandamano Kupinga Uwepo wa Mgodi wa Golden Pride Project Nzega!

2011-03-07T10:24:00.001-08:00

Ofisi ya Mbunge wa Jimbo la Nzega inakualika kwenye Maandamano ya Amani kupinga uwepo wa Mgodi wa Kuchimba dhahabu wa Golden Pride Project, Nzega, kwa kuwa hauna faida kwa Nzega na kwa Taifa, Unaharibu mazingira, Umegubikwa na usiri mkubwa, Wachimbaji wadogo na wakazi wa maeneo mgodi huu ulipo hawajalipwa fidia mpaka leo, wananchi wa Nzega hawapati fursa za ajira wala tenda mbalimbali mgodini humo, unatumia maji mengi zaidi ya wenyeji, unachafua na kuharibu vyanzo vya maji, uongozi na wamiliki wa mgodi hawana ubinadamu na huruma kwa wenyeji wa Nzega na hata nchi yetu kwa ujumla n.k. Maandamano haya yatafanyika mnamo Tarehe 3/4/2011 Mjini Nzega. Muda wa kuanza, mahali pa kukusanyikia/kuanzia na kumalizia mtatangaziwa. Nyote mnakaribishwa kuunga mkono jitihada hizi za kudhibiti wizi wa Raslimali za Taifa na uharibifu mkubwa unaofanyika!

Kigwangala - Mtu wa Watu!

2010-12-22T01:14:00.000-08:00

Mgombea Ubunge wa Nzega kupitia Chama Cha Mapinduzi ni mtu mcheshi, mwenye bashasha na anakubalika kwa watu wa makundi yote. Hapa anaonekana amekaa akiongea na bibi kizee wa Kijiji cha Ijanija, Kata ya Ijanija, kabla ya hapo alikuwa akielekea kuhutubia mkutano wa kampeni ambapo alisimamisha gari yake mara moja na kushuka kwenda kumsalimia kikongwe huyu ambaye alifurahi sana kumuona Kigwangalla kwa macho yake!

Watoto Wengi Wamepewa Jina la 'Kigwangalla' Jimboni Nzega!

2010-12-22T01:06:00.000-08:00

Wakati wa kampeni za uchaguzi mkuu mwaka 2010, jimboni Nzega ambako mgombea Ubunge wa CCM Dk. Hamisi Kigwangalla, ambaye alipewa Utemi wa Makaranga Ng'wana Ng'washi walizaliwa watoto wengi na kupewa jina la 'Kigwangalla' kwa mapenzi na mvuto wa mgombea huyu wa CCM, ambaye mwisho wa siku aliibuka mshindi wa uchaguzi huo! Mpaka leo hii takriban watoto 32 wamezaliwa kila pande ya Nzega na kupewa jina la Mbunge huyo...Huyu anayeonekana pichani ni mtoto Kigwangalla ambaye alizaliwa katika kijiji cha Ijanija, kilichopo kata ya Ijanija, Wilayani Nzega. Pembeni yake ni Bibi wa mtoto huyo akiwa amemshika kichwani kaka mkubwa wa 'Kigwangalla'.

Dk Kigwangala awakaba Resolute

2010-12-09T09:28:00.000-08:00

Dk Kigwangala awakaba Resolute
Mwananchi, Jumatano Desemba 1, 2010

Na Mustapha Kapalata, Nzega

   MBUNGE wa Nzega (CCM), Dk Hamis Kigwangala, amesema mkataba wa mgodi wa dhahabu wa Nzega Golden Pride Mine Ltd, hauna manufaa na wananchi wa jimbo hilo.
   Kauli ya mbunge huyo imekuja ikiwa ni siku moja baada ya kuanza kutumikia wananchi, akianzia ziara yake kwenye mgodi huo.
   Dk Kigwangala alifanya ziara ya kushtukiza mgodini hapo jana na kukutana na Meneja Mwendeshaji, Les Taylor, akimtaka kueleza jinsi wananchi wanavyonufaika na mgodi huo.
   Hatua ya Mbunge inatokana na kero kubwa ya maji inayowakumba wananchi wa Nzega. Hivi sasa plastiki la lita 20 za ujazo linanunuliwa kwa sh 1,500.
   Mbunge huyo alisema mgodi huo hauna msaada kwa wananchi wa jimbo hilo kwani, uongozi wa mgodi huo hautoi huduma muhimu kama maji kwa wananchi, ilhali wanaendelea kukausha vyanzo vya maji.
   Dk Kigwangala alisema uhusiano wa wawekezaji hao na wananchi wanaozunguka eneo hilo, ni sawa na chui na paka, hawaelewani kutokana na utawala wa mgodi huo unaodharau raia kwenye nchi yao.
   Alisema mikataba iliyofungwa enzi hizo siyo yakinifu ambayo itanufaisha wananchi wa Nzega na watanzania na kwamba, inalenga kunufaisha watu binafsi.
   Kuhusu mrahaba unaolipwa kwa halmashauri wa sh 200 milioni kwa mwaka, Dk Kigwangala alisema kiwango hicho ni kidogo ikilinganishwa na rasilimali wanayovuna.
   "Kwa kweli kama mbunge, mikataba hii ni ya kihuni , siridhishwi nayo hata kidogo, kiwango wanachotoa ni bora wangechimba bure. Hawana msaada kwa watu wa taifa hili, wanachokifanya ni kuongeza umaskini, naheshimu sana mikataba lakini huu siridhiki nao," alisema Dk Kigwangala.
   Alisema muda wa uchimbaji kwa mgodi huo unakaribia kumalizika na wananchi wataachiwa mashimo, yenye madhara makubwa kwa afya zao, huku akimtaka meneja huyo kurekebisha haraka uhusiano wao na wananchi.
   Kwa upande wake, Taylor alimshutumu mbunge huyo kwa kufanya ziara isiyo rasmi na kwamba, alitakiwa kutoa taarifa kama mbunge kuingia mgodini.
   Taylor alisema malalamiko ya wananchi kuhusu uhusiano siyo kazi ya mgodi, bali serikali ambayo inatakiwa kutimiza ahadi zake.
   Alisema kampuni inatoa msaada pindi inapoguswa na tatizo, siyo lazima na halihusiani na mkataba wao.
Awali, Dk Kigwangala alitembelea vyanzo vya maji na Meneja wa maji wilaya ya Nzega, Samuel Buyigi, akimweleza kutokuwepo kwa uhusiano mzuri na mgodi huo ambao unakausha vyanzo vya maji.
   Buyigi alisema mgodi huo unachukua maji kutoka vyanzo vya maji na kwamba, vingine vimeanza kukauka, hali inayosababisha usumbufu kwa wananchi.

2010-12-09T06:16:00.000-08:00

Makada wa CCM Nzega, Dr. Hamisi Kigwangalla (Kushoto) na Ndg. Hussein Bashe (Kulia) wakibadilishana mawazo wakimsubiri Mhe. Dr. Jakaya Mrisho Kikwete atue viwanja vya Shule Bukene kabla ya kuhutubia mikutano miwili ya Kampeni Jimbo la Bukene na Jimbo la Nzega.

Ka Obama Vile! Watu wangu wa Kata ya Lusu...

2010-08-08T07:45:00.000-07:00

Watu wangu wa Kata ya Lusu waliniita Obama...walishangilia kwa bashasha ya hali ya juu lilipotajwa jina langu Dr. Hamisi Kigwangalla a.k.a 'Shimba Ngosha'. Basi nami sikuwaangusha, hakika niliunguruma kama simba dume, nilitoa hotuba ya ukweli iliugusa kila moyo wa mwana Lusu aliyekuwepo pale.

Nata ilikuwa balaa, mpaka nashindwa kusema neno lolote lile...walinipokeaje?

Isanzu, mh....

KURA ZA MAONI NZEGA!

2010-08-08T07:23:00.000-07:00

Jamani, Uchaguzi si mchezo si lelemamaaa...

Hili ni baadhi tu ya mabango yaliyotumika kuuza sura, sera na jina la mbegu mpya, bora na ya kisasa inayoitwa "Kigwangalla"...pale Nzega kwa wanaCCM.

Tabasamu hili liliupamba mji wa Nzega...

Nikiliangalia napata fikra za kuleta mapinduzi ya kiuchumi kwa watu wangu wa Nzega...Mungu nipe uwezo.

Nimejifunza mengi sana ila moja ni la msingi na halitatoka kifuani mwangu mpaka kufa - wapende wapiga kura wako maana wao ndiyo mtaji na msingi mkuu wa kazi ya kisiasa!

Kuoa Uchagani kuna raha zake!

2010-05-21T09:40:00.000-07:00

wikiendi iliyopita mke wangu Mama Sheila na Mimi tulitembelewa na wageni. Wageni hao, wakwe zangu na mashemeji walituletea supu (mbuzi wawili) ya mzazi (mama Sheila) kwa ajili ya kunywa na kuleta maziwa ya kutosha. Hii ni baada ya kufurahishwa na ujio wa Mtoto wetu wa pili tuliyempa jina la Hawwah Kigwangalla. Hawwah ni jina la mama mkwe wangu.

Dk. Hamisi Kigwangalla na Kilimo Kwanza Nzega: Kilimo cha Pamba Kinawezekana!

2010-05-21T09:35:00.000-07:00

Jitihada za kufufua kilimo cha zao la biashara la pamba Nzega, Tabora zinaelekea kuzaa matunda baada ya mwanga wa mavuno mazuri kuonekana. Zifuatazo ni picha zilizopigwa na Mkurugenzi wa Mradi wa Kuendeleza Pamba Nzega - yaani Nzega Cotton Development Project (NZECODEP), Dk. Hamisi Kigwangalla akiwa na wadau wengine wa wilayani Nzega wakati wa tathmini ya mradi inayoendelea kule wilayani Nzega. Mpaka sasa dalili zinaonyesha kuwa kilimo cha pamba kitaleta mapinduzi makubwa ya uchumi wa mkulima Nzega, baada ya mradi kuwawezesha wananzega kutegemea kupata wastani wa kilo 1200 kwa ekari moja; kiwango kikubwa kuliko wastani wa taifa wa kilogramu 400 tu kwa ekari. Hii ni kutokana na uhamasishaji mkubwa uliofanywa na wafanyakazi mahiri na waliojitoa wa kampuni ya MSK Solutions Ltd, ambaye ni mmiliki wa mradi huo. Mradi huu unahamasisha matumizi kidogo ya madawa ya kuua wadudu na matumizi ya samadi au mboji pekee (kwa ajili ya kutunza ardhi) badala ya mbolea za kisasa za chumvichumvi. Hii inaifanya pamba ya Nzega iwe na hadhi ya pamba hai (organic cotton). Matumizi madogo ya dawa yanawezeshwa na kutumika kwa mfumo wa zao mtego (Integrated Pest Management, IPM) na zao linalotumika Nzega ni alizeti, ambayo inawawezesha wakulima pia kuvuna na kujipatia mafuta kwa ajili ya kula na mashudu kwa ajili ya mifugo yao.

Mradi unaelekea katika ujenzi wa kiwanda cha kuchambua pamba (cotton ginnery) mjini Nzega, kilimo cha mkataba kwa mwaka wa kilimo wa 2010/2011 ambao ni mwaka wa pili wa mradi na pia kutanuka zaidi na kuunganisha wilaya jirani ya Uyui.

Hizi ni harakati za mashirika na watu binafsi kujitokeza kuunga mkono azimio la Mh. Rais Jakaya Mrisho Kikwete la Kilimo Kwanza kwa vitendo. Na tayari mafanikio yameshaonekana. Ushirikiano huu utawaletea manufaa makubwa wakulima na taifa kwa ujumla. Wengine wengi zaidi tujitokeze. TUKISHIRIKIANA TUTAJENGA UCHUMI IMARA!

Dk. Hamisi Kigwangalla atangaza rasmi kwa waandishi wa habari nia ya kuwania ubunge Nzega

2010-03-10T08:34:00.000-08:00

Tarehe 10 Machi 2010

Dk. Hamisi A. Kigwangalla (MD, MPH, MBA) ni kijana msomi mwenye umri wa miaka 35, mwenye digrii tatu na aliyebobea katika taaluma ya afya ya jamii na utawala wa biashara. Dk. Kigwangalla ni kijana wa kitanzania anayeamini kwenye fikra mbadala na za kisasa lakini anaamini katika misingi iliyowekwa na wazee waasisi wa TANU na ASP. Alihitimu masomo ya digrii ya udaktari wa tiba ya binadamu (yaani Doctor of Medicine, MD) kutoka chuo kikuu cha Dar es salaam mnamo mwaka 2004. Pia ni muhitimu wa digrii mbili za uzamili; moja ambayo ni Masters in Public Health Sciences (major: Safety promotion) – kwa Kiswahili inatafsirika kama digrii ya uzamili katika sayansi ya afya ya jamii (amebobea kwenye kuhamasisha usalama), alihitimu mwaka 2007 kutoka chuo kikuu cha Karolinska Institutet, Stockholm, Sweden, na ya pili ni Masters in Business Administration (major: organization and leadership) – ambayo kwa Kiswahili inatafsirika kama digrii ya uzamili katika utawala wa biashara (amebobea kwenye mambo ya uongozi na miundo ya mashirika) aliyoipata kutoka Chuo Kikuu cha Blekinge (Blekinge Institute of Technology), pia kilichopo Sweden, mjini Ronneby.

Dk. Kigwangalla anaamini katika kutoa mchango wake juu ya maendeleo ya jamii kuliko kusubiri atafanyiwa nini na Taifa lake. (kama alivyowahi kusema raisi wa zamani wa marekani Bw. Abraham Lincoln).

Dk. Kigwangalla ni mtu anayefanya kazi zake kwa umakini, spidi na maarifa, na kuzingatia misingi ya maendeleo na uwajibikaji. Ni mwanapinduzi anayeamini mapinduzi ya Uchumi wa Tanzania yako karibu, na kwamba tutaendelea tu kama tutabadilisha fikra zetu (change of mindset). Anaiona Tanzania kama ni nchi yenye fursa nyingi na kwamba ni nchi iliyokaa vizuri na tayari tayari kuyapokea mapinduzi ya kiuchumi (Tanzania ni miongoni mwa emerging economies in Africa). Anaamini kuna haja ya kuwapa nafasi watu ambao wanayaona maisha kwa macho tofauti, badala ya kuangalia matatizo tu wanaangalia fursa ziko wapi ndani ya hayo matatizo. Bila kubadilisha mtazamo wetu hatutoweza kusonga mbele, itakuwa ni sawa na kujaribu kukimbiza jahazi nchi kavu!

Yeye anasema “maadui wa Tanzania wanajulikana na njia za kupambana nao zinajulikana – maadui hawa wapo toka nchi hii ianze, sasa kama maadui tunawajua na silaha za kuwamaliza tunazo, tunangoja nini sasa?....” Hapa anaongelea Ujinga, Maradhi na Umaskini.

Yeye anaona kuna ya haja ya viongozi mahiri na wenye nia thabiti ya kuwatumikia watu wajitokeze popote walipo na waje kuongeza nguvu kwa taifa letu ili tuweze kupambana na maadui hawa. Anasema, “tatizo kubwa ni kwamba watu wengi wanaogopa kuingia kwenye ‘mainstream politics’ kwa kuwa hawajiamini katika uwezo wao wa kukabili mikiki mikiki inayoendana na siasa, wengine wanafikiri siasa ina wenyewe, wengine wanasubiri wastaafu ndiyo waingie kwenye siasa (hivi utaweza kutawatumikia watu vizuri wakati ukiwa umechoka?). vijana wengi wasomi na wachapakazi wazuri kabisa wanasahau kwamba siasa na mfumo wa maisha yao ya kila siku na kwamba hadi majumbani mwao wanafanya siasa– wengine ni watu makini sana na wangeweza kuchangia mengi kwenye kuleta maendeleo ya taifa letu, ……tatizo kubwa ni kwamba watanzania ni wazuri sana wa kusema na kupanga lakini ni wavivu wa kutekeleza, hivyo tunahitaji viongozi watendaji kwenye kila sekta, popote walipo wafanye mabadiliko! Tuache kuongea na kupanga tu, sasa tuanze kuwa mabingwa wa utekelezaji!” “….pia viongozi wengi si wabunifu, wachovu wa kufikiri na hivyo hata utendaji na usimamizi wao wa sera nzuri zilizowekwa unakuwa mbovu”

Dk. Kigwangalla anasema kwa kuyaangalia yote haya na ametafakari kwa umakini na kujipima uwezo wake, ameonelea aanze kwa vitendo ili awe chachu ya mabadiliko kwa watu wa Nzega, ambako ndipo alipozaliwa. Anasema, “jamani Charity begins at home na ndo maana nimeamua kuwania ubunge wa Nzega ili nishiriki kikamilifu na kwa ukaribu zaidi pamoja na wana Nzega wenzangu katika kuzikabili changamoto za maendeleo katika jimbo la Nzega kwa spidi na kwa ubunifu wa hali ya juu…..maana mimi kila nikiiangalia Nzega sioni matatizo bali naona fursa tu za kuleta mabadiliko, nashindwa kuelewa kwa nini sasa watu wakose mahali pa kunyweshea mifugo yao wakati mungu ametujaalia mabonde na mito ya kumwaga kabisa? Siku moja nilipita kijiji cha Nata, ambacho kipo karibu kabisa na bonde la mto Manonga, nilishangaa na kusikitika sana kuwaona akinamama wakifuata maji mbali kabisa na miji yao, takriban kilomita tano au saba! Eti kijijini hakuna visima, kweli?” Nikafuatilia sana suala hili nikagundua kuwa tatizo haliishii hapo tu, wakazi wa vijiji vya sehemu moja huwa wanalazimika wakati wa kiangazi kupeleka mifugo yao kuwekeza kwenye vijiji vilivyo karibu na mto, kweli tumeshindwa hata kutega maji kwa ajili ya mifugo yetu?”

Japokuwa Nzega ina fursa nyingi, na ni mojawapo ya wilaya kongwe, kasi yake ya maendeleo haiendani na fursa zilizopo. Nzega ilikuwa ni wilaya ya mbele kimaendeleo tangu miaka ya 60, mzunguko wa hela ulikuwa mkubwa, miundo mbinu ilikuwa na hali nzuri zaidi ya sasa ukilinganisha na wilaya zingine, lakini kasi yake ya ukuaji hairidhishi na shughuli za uchumi na maendeleo zinazidi kuzorota siku hadi siku.

Dk. Kigwangalla anasema “kasi ya maendeleo ya Nzega hairidhishi na matatizo mengi ya msingi hayapatiwi ufumbuzi…kero zinazowakabili watu wa Nzega ni nyingi na zinahitaji mtu mwenye uwezo mkubwa wa kufikiri na kubuni miradi mbalimbali itakayoweza kuharakisha maendeleo ya Nzega. Wananchi wa Nzega wanahitaji kuwa na kiongozi mwenye kupenda maendeleo, mwenye fikra mbadala na mwenye uwezo wa kuanzisha msukumo mpya wa kasi ya maendeleo kulingana na kero zao na vipaumbele vya kisera na kimikakati vya kiwilaya na kitaifa.” “Kuna mambo mengi hayajakamilika na utekelezaji wake unalegalega – nyumba za walimu na baadhi ya vyumba vya madarasa kwenye mashule ya kata havijakamilika, waalimu hawatoshi kwenye shule zetu mpya; huduma duni za ugani kwa wakulima, hali ya miundo mbinu vijijini bado hairidhishi.”

Mke wangu siku moja aliniuliza swali, maana yeye huwa muoga sana na hapendi sana mikakati yangu ya kuingia kwenye siasa, “hivi kwa ni haswa unataka kugombea Ubunge? Si ufanye tu mambo yako?” Na mimi sikusita kumjibu kuwa: “Ninataka kugombea Ubunge kwa kuwa ni uwezo mkubwa wa kuwatumikia watu, nina wito na ni haki yangu ya msingi kikatiba”. Alivyo kin’gang’anizi akaendelea “kwa nini lazima wewe tu, si uwaache wengine wafanye?” Nikamwambia: “mimi naona kama mambo hayaendi inavyopaswa na ninajiona kama ninaweza kuyafanya kwa ubora zaidi, sasa kwa nini nisitoe mchango wangu kwa taifa? Nikamuuliza wewe ni daktari, umeshuhudia akinamama wangapi wakipoteza maisha kwa kukosa huduma, wengine wakizalia njiani bila msaada wowote wa huduma? Je haya mambo kama yakipata watu wenye nia ya kweli ya kubadili mambo hayatendeki?” akanyamaza. Kwisha kazi yake. “mimi nikiangalia mjane aliyeachwa na babu yangu mdogo pale Inagana, Magengati naona kama anahitaji msaada kidogo tu aweze kumudu kuendesha maisha yake. Ndugu zangu wanaolima vitunguu kule Milambo-Itobo hawahitaji vitu vikubwa sana, wanahitaji wapate mtu wa kuwatetea na kuwaongoza kidogo tu waweze kupata faida zaidi kwenye shughuli zao na waboreshe zaidi maisha yao. Ni watu kama hawa wanaonifanya nijisikie wito zaidi wa kwenda kushirikiana nao kuleta mabadiliko katika maisha yao na familia zao, naona kama wamewekwa pembezoni na hawana mtetezi!

Mzee wangu Mzee Masanilo ni mkulima stadi na mahiri sana, hahitaji vitu vikubwa wala vya kutisha, yeye anahitaji soko la uhakika tu la mazao yake ya pamba, alizeti na mpunga. Wadogo zangu, akina Fatu na Ibra wao wanahitaji uhakika wa kuendelea na masomo ya kidato cha tano na au vyuo vya kati (vya kutoa Diploma na Vyeti) vya kuwapa ujuzi na maarifa, wanahitaji madaraja ya kupandia chuo kikuu, wanahitaji hizi fursa ziwepo. Zote hizi ni kero, na tunazijua, je ni lini tutazifanyia kazi? Kwa nini tunashindwa? Ninajiona kama nina majibu ya maswali yote haya na ninadhani naweza kuyafanyia kazi ipasavyo.

Leo hii nimeamua kuiweka nia yangu hadharani kabisa kuwa kwa ridhaa yangu na matakwa yangu binafsi, nafsi yangu inanituma na hapa basi natangaza rasmi nia yangu ya kuvuta fomu kuwania ubunge wa jimbo la Nzega kupitia chama changu, Chama Cha Mapinduzi (CCM), pindi wakati utakapowadia. Naomba mungu aniongoze. Amina.

Dk. Hamisi Kigwangalla’s Contacts are:

0715636963
0754636963
0784636963

Email: hkigwangalla@gmail.com

Website: www.peercorpstrust.org

Dk. Hamisi Kigwangalla Kutangaza Rasmi Nia ya Kuwania Ubunge wa Jimbo la Nzega 2010

2010-03-02T08:37:00.000-08:00

Mwanasiasa machachari na chipukizi, Dk. Hamisi A. Kigwangalla, ambaye ni mkazi na mzaliwa wa wilayani Nzega, Tabora anajipanga kutangaza rasmi nia yake ya kuwania ubunge wa jimbo la Nzega kupitia chama cha mapinduzi.

Dk. Kigwangalla, ambaye anajiweka kama ni mtu mwenye kupenda maendeleo, anayeona mbali na mwenye nia ya dhati ya kuwaendeleza wanaNzega na watanzania wenzake walio maskini zaidi, alikuwa na haya ya kusema: "...mungu akinijaalia ninapanga kutangaza rasmi nia yangu ya kuwania ubunge wa jimbo la Nzega kupitia CCM kwenye uchaguzi ujao (yaani wa Mwaka 2010), hili linakuja sana baada ya kufuatwa na kuombwa na watu mbalimbali wa rika tofauti tofauti....nimejifikiria sana na ninadhani kama kila kitu kitaenda sawa naweza kufuata ushauri wa watu, kwa sasa hivi bado nashauriana na familia yangu, ndugu, jamaa na marafiki, wakiona nisonge mbele basi ninapanga kutangaza hadharani kupitia vyombo vya habari mnamo wiki ya kuanzia Machi 08, 2010."

Dk. Kigwangalla ni mwanaharakati, mkulima na mjasiriamali kijana aliyezaliwa wilayani Nzega miaka takriban 35 iliyopita na ni msomi wa digrii tatu ikiwemo ya kwanza ya udaktari wa tiba za binadamu (Doctor of Medicine), ya afya ya jamii (MPH) na ya utawala wa biashara (MBA). Kwa sasa anajishughulisha na kilimo na mambo ya harakati za kuleta maendeleo kwa kinamama, watoto na makundi mengine yaliyo katika hatari zaidi.

Tarehe 5-2-2010: Maadhimisho ya Kuzaliwa kwa CCM Nzega

2010-03-02T08:33:00.000-08:00

Sherehe za kuadhimisha miaka 33 tangu Chama Cha Mapinduzi (CCM) kizaliwe zilivutia na kufana sana pale wilayani Nzega ambapo mgeni rasmi siku hiyo alikuwa Mwenyekiti wa CCM wa Mkoa wa Tabora Mh. Hassan Wakasuvi.

Sherehe hizo zilianza alfajiri ya siku hiyo ya tarehe 5/2/2010 (ambayo ndiyo siku ya kuzaliwa kwa CCM, chama tawala Tanzania) kwa Viongozi mbalimbali wa kimkoa wakiongozwa na Mwenyekiti Wakasuvi, Katibu wa CCM Mkoa Ndg. Iddi Ali Ame, Katibu wa UVCCM Mkoa wa Tabora Ndg. Julius, na wajumbe wengine wa Kamati ya Siasa Mkoa kushiriki maandamano ya mshikamano yaliyoanzia kwenye viwanja vya ofisi ya CCM wilaya na kuishia Kitangiri na baadaye ofisini ambapo mgeni rasmi alitoa hotuba fupi iliyolenga katika kuhamasisha mshikamano miongoni mwa wanachama wa CCM Nzega.

Pia Viongozi wa Kiwilaya, wanachama, wakereketwa na wapenzi wa CCM Nzega walikuwepo.

Kabla ya kuwasilisha hotuba yake, Ndg. Mwenyekiti Wakasuvi na viongozi wengine wa CCM Mkoa na Wilaya walishiriki kupanda miti ili kuboresha mazingira ya ofisi ya CCM wilaya Nzega na kuweka alama ya ukumbusho.

Sherehe za Kuadhimisha Kuzaliwa kwa CCM (5 Februari 2010) Zilivyofana Nzega

2010-03-02T07:34:00.000-08:00

Mh. Asha Kabeke (kwenye kiti) wa Kundi la 'Hiari Stars' akikata mauno na Mh. Diwani mwenzake.

Mwenyekiti Wakasuvi (Kulia) akiwa na Mh Diwani Basilio (Katikati) na Kada wa Chama

Sherehe za Kuadhimisha Kuzaliwa kwa CCM (5 Februari 2010) Zilivyofana Nzega

2010-03-02T07:22:00.000-08:00

Asubuhi saa kumi na mbili kamili viongozi wa chama na serikali; wanachama, wakereketwa na wapenzi wa Chama Cha Mapinduzi wilayani Nzega walijidamka na kukusanyika kwenye viwanja vya ofisi ya CCM wilayani hapo, kwa malengo ya kushiriki kwenye matembezi ya hiari yaliyolenga kudumisha umoja na mshikamano miongoni mwa wanachama. Matembezi hayo yalifana sana na yalifanywa kuwa rahisi kwa kutumbuizwa na nyimbo za kuhamasisha zilizoletwa na wahamasishaji mahiri.

Picha hapa chini inawaonesha:- Kutoka Kushoto: Mwenyekiti wa CCM Mkoa wa Tabora, Mzee Hassan Wakasuvi akiwa na Makada wa CCM Wilaya ya Nzega, Ndg. Babu Rajabu Ahmed (ambaye pia ni Katibu Tawi wa CCM, Tawi la Nzega Mjini Magharibi), Dk. Hamisi Kigwangalla na Ndg. Salum Juma (ambaye pia ni Katibu Tawi wa CCM, Tawi la Nzega Mjini Mashariki). Picha hii ilipigwa mara baada ya watembeaji hawa kurejea kwenye viwanja vinavyozunguka ofisi ya CCM wilaya ya Nzega, ambapo matembezi haya yalianzia.