Drizzling Of Love

احساسِ ندامت

2026-10-21T02:26:49.469+05:00

جب میں نے اس پر افسانہ لکھنے کا ارادہ کیا تو اسے مرے ہوۓ تین ہفتے گزر چکے تھے۔ وہ مجھ سے اکثر کہا کرتی تھی 'تم اتنی کہانیاں لکھتے ہو مگر تم نے آج تک مجھ پر کبھی کوئی کہانی نہیں لکھی۔' جبکہ میں اس سے کہتا 'تم پر میں کیا لکھوں مجھے نہیں لگتا تم میری کہانی کے لیے کوئی موزوں کردار ہو سکتی ہو۔' یہ بات کسی حد تک سچ بھی تھی اگر واقعی اس کے ساتھ موت کا اندوہناک واقعہ پیش نہ آیا ہوتا تو مجھے اس پر کبھی بھی کہانی لکھنے کا خیال نہ آتا۔ اس کی موت کے حادثے نے مجھے اس پر کہانی لکھنے کے لیے مجبور کر دیا یا شاید یہ میرا احساسِ ندامت تھا جس کے تحت میں نے ایسا ارادہ کیا۔ برسوں پہلے میری اس سے پہلی بار ملاقات ہوئی تھی اور اب جب میں اس پر غور کرتا ہوں تو کبھی تو مجھے لگتا ہے یہ بالکل کل کی بات ہے اور کبھی یوں لگتا ہے اس کو گزرے ہوۓ زمانہ بیت گیا۔ ان دنوں میں فارغ تھا اور سواۓ لکھنے پڑھنے کے اور کچھ بھی نہیں کرتا تھا۔ تقریباً تمام دن میں اپنے کمرے میں کھڑکی کے پاس بیٹھا پڑھتا لکھتا رہتا تھا اور جب کبھی اکتا جاتا تو باہر اس ندی کو دیکھتا رہتا جو میری کھڑکی سے دور کچھ فاصلے پر بڑی سست روی سے بہا کرتی تھی۔ یہ ندی اور میرا گھر راستے میں تھا اور ان دونوں کے درمیان چھوٹی سی سڑک تھی جس پر سارا دن لوگوں کی آمدورفت جاری رہتی تھی۔ وقتاً فوقتاً لوگ یہاں سے گزرتے رہتے تھے لیکن اس طرح کہ بھیڑ کبھی نہیں لگتی تھی۔ اس میں دو ایسی متضاد خصوصیات تھیں جو اس جگہ کو قابلِ رشک بناتی تھیں ایک یہ کہ یہ جگہ شور شرابے سے ہٹ کر بڑی خاموش اور پُرسکون تھی اور دوسری یہ کہ لوگوں کی چہل پہل کی بدولت ویران اور سنسان بھی نہیں لگتی تھی۔ بارونق ہونے کی وجہ سے بوریت کا احساس بھی نہیں ہوتا تھا اور نہ اس قدر بھیڑ اور شورشرابہ تھا کہ بیزاریت اور اکتاہٹ محسوس ہو۔ اس پر مستزاد یہ کہ سامنے ندی کا حسین نظارہ اور فطرت سے قربت کا احساس طبعیت اور مزاج کو ہشاش بشاش کر دیتا تھا۔ اکثر اشیاۓ خورونوش بیچنے والے یہاں سے کچھ نہ کچھ بیچتے ہوۓ گزرتے تھے جن میں کچھ تو پیدل ہوتے تھے اور کچھ موٹرسائیکل اور سائیکل پر سوار چلے آتے تھے۔ موٹرسائیکل سوار بہت کم ٹھہرتے اور بڑی تیز رفتاری سے میری کھڑکی کے پاس سے گزر جاتے تھے مگر پیدل اور سائیکل سواروں کو کئ بار جب کبھی میرا کچھ کھانے کو موڈ ہوتا میں آواز دے کر ٹھہرا لیتا تھا۔ انہی دنوں میں نے اسے اپنی کھڑکی کے سامنے سے گزرتے ہوۓ دیکھا۔ اس نے اس وقت کون سے رنگ کا لباس پہن رکھا تھا وہ تو مجھے اب یاد نہیں رہا شاید سیاہ تھا یا شاید سرخ تھا لیکن اس کے ہاتھ میں چند کتابیں تھیں اور غالباً اس نے آنکھوں پر چشمہ چڑھا رکھا تھا۔ ان دنوں میں اور میرے گھر والے نۓ نۓ اس علاقے میں وارد ہوۓ تھے اور ہم ابھی تک اردگرد کے مکینوں سے پوری طرح آشنا نہیں ہوۓ تھے۔ اس وقت تو میں نے سرسری طور پر اسے اک نظر دیکھا تھا اور پھر بھول گیا تھا مگر چند دن بعد جب میرے گھر والوں نے اردگرد کے ہمسایوں سے روابط قائم کرنے شروع کیے تو مجھے معلوم ہوا وہ ہمارے گھر کے ساتھ ہی ایک دو گھر چھوڑ کر رہتی ہے۔ اس کے بعد جب میرے گھر والوں اور اس کے گھر والوں کے آپس کے تعلقات مزید مستحکم ہوۓ تو دونوں کا ایک دوسرے کے گھر آزادانہ آنا جانا شروع ہو گیا۔ میں تو کسی کے گھر بہت کم جایا کرتا تھا لیکن وہ اکثر یہاں آجاتی تھی۔ اس میں اور مجھ میں بہت سی باتیں مختلف تھیں اور بہت سی باتیں مشترک بھی تھیں لیکن ان سب میں جو سب سے زیادہ مشترک اور نمایاں بات تھی وہ مطالعہ تھا۔ اس سے پہلے مجھے یہ زعم تھا کہ میں بہت زیادہ مطالعہ کرتا ہوں مگر یہ میری خودفریبی تھی حقیقت میں ایسا نہیں تھا۔ وہ مجھ سے بہت زیادہ بہتر مطالعہ کرتی تھی اور شاید کتابیں بھی مجھ سے بہتر پڑھا کرتی تھی۔ اکثر ایسا ہوتا کہ وہ مجھ سے کسی کتاب یا کسی ناول کا ذکر کرتی جو میں نے نہ پڑھا ہوتا کبھی تو میں اسے سچ بتا دیتا کہ نہیں پڑھا لیکن چونکہ بیشتر دفعہ ایسا ہوتا تھا کہ میں نے وہ کتاب نہ پڑھی ہوتی اس لیے اپنی شرمندگی چھپانے کے لیے میں اس سے جھوٹ بولنے لگا۔ وہ جس کتاب کا ذکر کرتی میں اکثر کہتا ہاں میں نے پڑھی ہے۔ اس کے بعد جب وہ مزید اس کتاب کے بارے میں کوئی بات کرتی تو میں سوچ میں پڑ جاتا کہ اسے کیا جواب دوں۔ اگر اس نے کسی ناول کا ذکر کیا اور میں نے جھوٹ موٹ کہہ دیا کہ ہاں پڑھا ہے تو جب وہ اس کی کہانی یا پلاٹ وغیرہ کے بارے میں بات کرتی تو مجھ سے کوئی جواب بن نہ پڑتا۔ لیکن میں ڈھٹائی اور بے شرمی سے کوئی نہ کوئی بات گڑھ کر اسے بتا دیتا۔ میری بات سن کر وہ مسکرا اٹھتی اور اس کے چہرے اور آنکھوں کے تاثرات سے یونہی لگتا کہ وہ جانتی ہے کہ میں نے یہ کتاب نہیں پڑھی مگر وہ مجھ سے کبھی کچھ نہ کہتی۔ اس کی گفتگو کا انداز بے حد الگ تھا جب وہ دوسروں سے باتیں کر رہی ہوتی تو نسبتاً تیز تیز باتیں کرتی تھی مگر مجھ سے بات کرتے وقت اس کے انداز میں ایک ٹھہراؤ، گہرائی اور نامعلوم اداسی کا رنگ غالب آجاتا۔ پہلے پہل ایسا نہیں تھا یا اس وقت میں نے زیادہ دھیان نہیں دیا تھا مگر اس شام جب میں ابھی تازہ تازہ اپنے کمرے میں وارد ہوا تھا اور کھڑکی کھول کر سامنے ندی کے پاس ایک نوجوان جوڑے کو ہنستے باتیں کرتے دیکھ کر مسکرا رہا تھا وہ اچانک میری کھڑکی کے سامنے آگئ۔ میں نے خیرت سے اسے دیکھا تو اس نے ہنستے ہوۓ کہا۔ 'چونک گۓ؟'

نہیں بس خیران ہوں تم اس وقت یہاں کیا کر رہی ہو؟'

ہم سیر کرنے کے لیے نکلے ہیں۔ میں تھک گئ تھی تو کھڑکی میں تمہیں دیکھ کر یہاں رک گئ۔'

لیکن باقی لوگ کہاں ہیں نظر تو نہیں آرہے؟' میں نے خیرت سے پوچھا۔

وہ آگے چلے گۓ ہیں۔'

تم اتنی جلدی تھگ گئ تمہارے گھر سے یہاں تک کا فاصلہ کوئی زیادہ تو نہیں۔'

ہاں میں چلتے وقت بہت جلد تھک جاتی ہوں۔ اس لیے مجھے رک رک کر جانا پڑتا ہے۔ شاید زندگی بھی تو ایسی ہی ہے رک رک کر چلنے والی۔'

اس وقت میں نے پہلی بار اس کی آنکھوں میں اک نامعلوم سی اداسی کی جھلک دیکھی اور یہ کہ جب وہ مجھ سے بات کرتی ہے تو اس کے لہجے اور گفتگو میں اک ٹھہراؤ اور گہرے پن کا احساس ہوتا ہے۔

خیرت ہے اتنے سے فاصلے پر کون تھکتا ہے؟' میں نے پوچھا۔

اوروں کا تو پتہ نہیں میں تھک جاتی ہوں۔۔۔ چھوڑو اس بات کو تمہیں اک بات بتاؤں میں تمہارے لیے دو بڑے مزے کی کتابیں لائی ہوں۔' اس نے فوراً موضوع بدلتے ہوۓ کہا۔ 'بڑی اچھی ہیں تم ضرور پڑھنا۔

اچھا! کہاں ہیں؟'

گھر پر ہیں کل تمہیں دوں گی۔ اچھا اب میں چلتی ہوں وہ دیکھو مجھے سب بلا رہے ہیں۔'

اس سے پہلے میں کچھ کہتا وہ آگے بڑھ گئ۔ میں نے ندی کی طرف دیکھا شام کے ساۓ پھیل رہے تھے اور وہ نوجوان جوڑا واپس لوٹ رہا تھا۔

اگلے دن دوپہر کے وقت وہ میرے گھر آئی اس کے ہاتھ میں وہی دو کتابیں تھیں۔ اس نے کتابیں مجھے پکڑائیں تو میں نے الٹ پلٹ کر دیکھا ایک کتاب افسانوں کا مجموعہ تھی اور دوسری کتاب کسی ڈرامے کی تھی۔

تم یہ ڈرامہ پہلے پڑھنا۔' اس نے کہا۔ 'مجھے یہ ڈرامہ بے حد پسند ہے۔ جب میں نے اسے پہلی بار پڑھا تھا تو میرا بڑا دل چاہا کہ اسے کسی تھیٹر میں جا کر دیکھوں۔ میں نے اردگرد بہت سے تھیٹروں میں پتہ کیا مگر یہ ڈرامہ کسی تھیٹر میں نہیں لگتا۔ ممکن ہے کبھی کسی نے اسے اسٹیج کیا ہو مگر اب یہ صرف کتابی صورت میں دستیاب ہے۔'

ٹھیک ہے میں جلد پڑھوں گا پھر تمہیں بتاؤں گا کیسا لگا۔'

ہاں ضرور بتانا۔ مجھے یقین ہے تمہیں پسند آۓ گا۔'

میں نے وہ ڈرامہ ایک ہی نشست میں پڑھ لیا۔ یقیناً بہت عمدہ ڈرامہ تھا۔ ایک ایکٹ اور دو مناظر پر مشتمل مختصر سی کہانی تھی جس میں صرف دو ہی کردار تھے۔ ایک مرد اور ایک عورت۔ زندگی کے دو بنیادی کردار مرد اور عورت۔۔۔ جو زندگی کی اسٹیج پر نمودار ہوتے ہیں اور مختلف شکلوں، مختلف صورتوں میں پھیل جاتے ہیں۔ جن کے چال چلن، رنگ ڈھنگ ایک دوسرے سے جدا ہونے کے باوجود کتنے مشابہ، کتنے ملتے جلتے ہیں۔ یہی دو کردار ہی تو ہیں جن سے پوری زندگی عبارت ہے۔ انہی دو کرداروں کے مخلتف رنگ ہر سو دکھائی دیتے ہیں۔ تمام کہانیاں، تمام ادب انہی دو کرداروں سے پھوٹتا ہے۔

اگلی بار جب اس سے میری ملاقات ہوئی تو میں نے اسے بتایا کہ میں کتاب پڑھ چکا ہوں واقعی بہت شاندار ڈرامہ تھا۔ اس نے کہا 'مجھے معلوم تھا تمہیں پسند آۓ گا۔'

مجھے اک اور خیال سوجھا ہے۔' میں نے کہا۔

کیا؟

کیوں نا ہم اس ڈرامے کو اسٹیج کریں۔'

ہم۔۔۔' اس نے خیرت سے کہا۔ 'ہم کیسے کریں اور کہاں کریں؟'

یہیں کرتے ہیں۔'

یہاں کہاں؟'

اپنی گلی میں۔۔۔ یہ جو اپنی سڑک ہے یہاں آمدورفت نسبتاً کم ہے زیادہ تر تو خالی رہتی ہے۔ اردگرد مکان بھی زیادہ نہیں میرے اور تمہارے گھر کے علاوہ تین چار گھر اور ہیں۔ بس انہی لوگوں کو بلا لیں گے اور سڑک پر ہی اسٹیج لگا لیں گے۔'

میں نے بات ختم کی تو وہ سوچ میں پڑ گئی۔ اتنا ہم دونوں جانتے تھے کہ نہ تو ہمارے گھر والوں میں سے اور نہ ہی جس جگہ ہم رہتے تھے وہاں کسی کو بھی اس بات پر کوئی اعتراض ہو سکتا تھا۔

لیکن ہم پرفارم کیسے کریں گے ہمیں ایکٹنگ کہاں آتی ہے؟' چند لمحے خاموش رہنے کے بعد اس نے کہا۔

نہیں آتی تو کیا ہوا ہم کون سا کسی تھیٹر میں پرفارم کر رہے ہیں یا ہم نے اس میں کوئی ایوارڈ حاصل کرنا ہے۔ اپنے گھر والے اور اردگرد کے چند افراد ہی تو ہوں گے۔ بس تھوڑا سا شغل ہو جاۓ گا، تھوڑی سی تفریح ہو جاۓ گی اور چونکہ کہانی بھی اچھی ہے تو جن لوگوں نے اسے نہیں پڑھا ان تک کہانی بھی پہنچ جاۓ گی۔'

کچھ دیر کی سوچ بچار کے بعد وہ راضی ہو گئ اور ہم دونوں نے اس کے لیے ایک اچھا سا منصوبہ بنانا شروع کر دیا۔ اس کے لیے ہم نے اپنے گھر والوں کو بھی ساتھ ملا لیا اور پھر اس کی تیاری میں لگ گۓ۔ جو بھی گھر میں فارغ ملتا اس کو پکڑ لیتے اور اسے کسی نہ کسی کام پر لگا دیتے۔ چھوٹے بھائی بہنوں کو تو مختلف قسم کے انعام کے لالچ دے کر ہم نے بہت سے کام کرواۓ۔ پہلے ایک دو دن تو وہ خوب مستعدی سے کام کرتے رہے، تجسس اور انعام کی چاہ میں بھاگ کر کبھی یہاں جاتے اور کبھی وہاں، فلاں چیز لانے کو کہا جاتا تو لے آتے اور فلاں جگہ بھیجا جاتا تو فوراً چلے جاتے مگر ایک دو دن کے بعد جب انہیں انعام ملنے کے امکانات کچھ کم نظر آنے لگے تو انہوں نے بغاوت کر دی اور ہر کام سے بھاگنے لگے۔ ایسے میں ہم نے طے کیا کہ انہیں کچھ نہ کچھ کھلانا پڑے گا ورنہ یہ کوئی کام نہیں کریں گے۔ لہذا فوراً ان کے لیۓ پیزا اور کچھ دوسری چیزیں آرڈر کی گئیں۔

تمام کام بخوبی ہوتے رہے مگر جس کام میں سب سے زیادہ ہمیں مشکل پیش آئی وہ مکالمے یاد کرنا اور ریہرسل کرنا تھا۔ بالآخر قریباً ایک ڈیڑھ ہفتے کی محنت شاقہ کے بعد ہماری تمام تیاری مکمل ہو گئ۔ ڈرامے کا دن مقرر کرکے ہم نے اردگرد جو تین چار گھر تھے ان کو دعوت دی۔ یوں تو انہیں پہلے ہی کسی نہ کسی صورت پتہ چل چکا تھا کیونکہ یہاں زیادہ آبادی تو تھی نہیں بس چند گھر اس سڑک پر واقع تھے جہاں ہم لوگ رہتے تھے اور باقی گھر کچھ فاصلے پر دوسری سڑک پر آباد تھے مگر ہم نے اپنی گلی تک محدود رہنا مناسب سمجھا اور صرف نزدیک کے تین چار گھروں کو دعوت دی گئی۔ اس کی ایک بڑی وجہ یہ بھی تھی کہ اس پورے علاقے میں زیادہ تر لوگ مختلف ملکوں اور علاقوں سے آکر آباد ہوۓ تھے اور ایک دوسرے کی زبان وغیرہ سے بہت کم واقف تھے۔ جن چار پانچ قریب کے گھروں کو ہم نے دعوت دی سبھی نے ہماری دعوت کو خوش دلی سے قبول کیا۔ ان میں سے ایک گھر مسٹر سمتھ کا بھی تھا جو اپنی بیوی کے ساتھ رہتے تھے۔ ان کا گھر اس سڑک کے اختتام پر جہاں یہ ایک موڑ کاٹ کر دوسری سڑک سے جا ملتی تھی واقع تھا۔ مسٹر سمتھ اور مسز سمتھ کا تعلق بھی دوسرے شہر سے تھا، وہ اپنی زندگی کے آخری ایام کسی پرسکون جگہ پر فطرت کے قریب گزارنا چاہتے تھے اس لیے انہوں نے بھیڑ بھاڑ والے مصروف شہر کو خیرباد کہا اور یہاں آکر بس گۓ۔ دونوں میاں بیوی ہماری دعوت پر بہت خوش ہوۓ۔ مسٹر سمتھ نے ہمیں بتایا کہ اپنے ایام جوانی میں انہیں اداکار بننے کا بہت شوق تھا اس لیے وہ بہت زیادہ اسٹریٹ تھیٹر کیا کرتے تھے اور سڑکوں پر بے شمار اداکاری کے جوہر دکھا چکے تھے لیکن پھر کچھ گھریلو مجبوریوں کی وجہ سے وہ اس میں آگے نہ بڑھ پاۓ۔ انہوں نے یہ بھی بتایا کہ نہ صرف اداکاری بلکہ کئ کھیل انہوں نے خود بھی لکھے تھے اور ان کھیلوں پر پرفارم کرنے کے علاوہ ان ڈراموں کو چھپوایا بھی تھا جو اس زمانے میں بہت پڑھے جاتے تھے۔ مالی مشکلات کی وجہ سے انہیں اداکاری ترک کرکے ملازمت اختیار کرنی پڑی تھی مگر انہوں نے لکھنا نہیں چھوڑا تھا۔ ملازمت کے دوران وہ مسلسل لکھتے رہے تھے اور نہ صرف ڈرامے بلکہ ان کے دو شعری مجموعے بھی شائع ہو چکے تھے۔ جبکہ دوسری طرف ان کی بیوی بلکل ان کے الٹ تھیں۔ مسز سمتھ نے کہا کہ انہوں نے سواۓ اپنے سکول اور کالج کے نصاب کے علاوہ آج تک اور کوئی ڈرامہ نہیں پڑھا اور صرف چند ڈرامے مسٹر سمتھ کے ساتھ جا کر انہوں نے دیکھے ہیں لیکن انہوں نے وعدہ کیا کہ وہ دونوں میاں بیوی ہمارے کھیل میں ضرور شرکت کریں گے۔

جب مقررہ دن آیا تو مسٹر سمتھ اور مسز سمتھ دونوں سب سے پہلے تشریف لاۓ۔ ہم سے بہت پرتپاک انداز میں ملے۔ کھیل شروع ہوا تو پورے کھیل کے دوران کئ بار ہم نے ان کی طرف دیکھا کیونکہ ہم جانتے تھے کہ وہ اپنی ماہرانہ نظر سے ہمارا کھیل دیکھیں گے اس لیے ہم ان کے چہرے کی طرف بار بار دیکھ رہے تھے تا کہ ہم دونوں اندازہ لگا سکیں کہ ہم اچھا کر رہے یا نہیں۔ پورے کھیل کے دوران ایک مخصوص مسکراہٹ ان کے چہرے پر کھیلتی رہی جس سے ہم کچھ بھی جان نہ پاۓ کہ انہیں ڈرامہ پسند آرہا یا نہیں۔ جب کھیل ختم ہوا تو وہ خود ہی چل کر ہمارے پاس آگۓ۔ پہلے تو انہوں نے ہماری تعریف کی اور کہا کہ آپ نے بہت عمدہ طریقے سے کھیل پیش کیا ہے پھر انہوں نے ہم سے پوچھا۔ 'تم لوگ جانتے ہو اس کھیل کا مصنف کون ہے؟'

میں نے کہا جی کتاب کے اوپر نام تو لکھا ہوا ہے مگر ہم جانتے نہیں کہ وہ کون ہے۔'

وہ مسکراۓ اور کہا۔ 'یہ کھیل میں نے ہی لکھا ہے۔'

ہم دونوں خیرت سے ان کی طرف دیکھنے لگے۔ پھر انہوں نے کہا۔ 'وہ جو نام تم لوگوں نے کتاب پر دیکھا ہے وہ اصل میں میرا ہی قلمی نام ہے۔ پہلے پہل میں اپنے قلمی نام سے لکھا کرتا تھا اس لیے اس کتاب پر وہی نام چھپا ہوا ہے۔'

اس کے بعد ہم نے بہت سے ڈرامے اسی سڑک پر اسٹیج کیے جن میں ہم نے بہت سے معاملات میں مسٹر سمتھ کی راۓ بھی لی۔ انہوں نے ہماری اداکاری کے اناڑی پن کو دیکھ کر بہت سی باتوں میں ہماری اصلاح کی اور ہمیں بہت سے مفید مشورے دیے جو ہمارے بہت کام آۓ۔

ایک ڈرامہ ہم نے خود بھی لکھا اور اسے اسٹیج کرنے کے لیے بہت بے تاب تھے۔ اس کی تیاری ہم نے بڑی محنت سے کی۔ مقررہ دن سے ایک دن پہلے جب ہم اس کی ریہرسل کر رہے تھے تو وہ مجھے کچھ تھکی تھکی سی دکھائی دی۔ میں نے پوچھا خیریت ہے آج تمہاری طبعیت کچھ ٹھیک نہیں لگ رہی تو اس نے کہا 'لگتا ہے آج ہمارا آخری ڈرامہ ہے۔'

میں نے خیرت سے پوچھا۔ 'کیوں کیا ہوا؟'

اس نے جواب دیا۔ 'بس ایسے ہی۔'

اگر تمہاری طبعیت ٹھیک نہیں تو ہم کل رہنے دیتے ہیں پھر کسی دن کر لیں گے۔'

نہیں کل ہی کریں گے۔'

اگلے دن جب ہم اسٹیج پر پہنچے تو وہ پہلے سے بھی زیادہ بجھی بجھی سی نظر آرہی تھی۔ میں نے ایک دو بار اس سے پھر کہا کہ اگر تم ٹھیک نہیں تو رہنے دیتے ہیں مگر اس نے کہا کچھ نہیں ہے ہم آج ہی یہ ڈرامہ کریں گے۔ جب کھیل شروع ہوا تو آغاز میں تو اس نے اچھی طرح مکالمے ادا کیے مگر بعد میں بھولنے لگی۔ ابھی آدھا ڈرامہ بھی نہیں ہوا تھا کہ وہ لڑکھڑا کر گر پڑی۔ فوراً اسے ہسپتال لے جایا گیا۔ اس دن مجھے پتہ چلا کہ وہ بیمار تھی۔ پچھلے کئ برسوں سے اس کی حالت ایسی تھی کہ بس دواؤں پر زندہ تھی۔ یہ بات اس کے گھر والوں کو معلوم تھی کہ کسی وقت بھی اس کی زندگی کا خاتمہ ہو سکتا ہے۔ میرے گھر میں سے بھی یقیناً کچھ افراد کو یہ بات پتہ ہو گی مگر میری چونکہ کسی سے بھی اس کے بارے میں کوئی بات نہیں ہوئی تھی اور نہ ہی اس نے خود مجھے کبھی بتایا۔ تھوڑی دیر بعد ڈاکٹر نے آکر کہا کہ اسے بچایا نہیں جا سکا۔ ایسا سننا تھا کہ میں ہسپتال سے فوراً نکل آیا۔ باہر آکر میں بلا مقصد ایک طرف چلنے لگا۔ سڑک ویران اور سنسان تھی اردگرد تاحد نگاہ بس سبزہ و ہریالی پھیلی تھی اور میرے بائیں جانب وہی ندی تھی جو میرے گھر کے سامنے سے بھی گزرتی تھی۔ ندی کے پار دوسری جانب چند گھر ایک دوسرے سے فاصلے پر کھڑے تھے۔ مجھے اب اس کی وہ تمام باتیں رفتہ رفتہ یاد آنے لگیں جو میں اس وقت سمجھ نہیں پایا تھا۔ اب مجھے سمجھ آرہی تھی کہ اس دن وہ بس چند قدم چل کر کیوں تھک گئ تھی اور اس نے ایسا کیوں کہا تھا کہ میں زیادہ دیر نہیں چل سکتی۔ اب مجھے اس کی اداسی کا مطلب بھی سمجھ آرہا تھا۔ اور وہ بات بھی جب اس نے مجھ سے کہا تھا تم مجھ پر کہانی کیوں نہیں لکھتے تو میں نے کہا تھا تم پر میں کیا لکھوں اور اس کے جواب میں اس نے کہا تھا 'تم ایک دن مجھ پر کہانی ضرور لکھو کے مگر اسے میں پڑھ نہیں پاؤں گی۔'

اولادِ قبیحہ

2026-10-10T05:29:06.599+05:00

کردار

پہلا آدمی۔ دوسرا آدمی

عمر رسیدہ شیطان اور اس کے دو چیلے۔

نوجوان شیطان: جو ہو بہو شیطان کی صورت جیسا دکھتا ہے مگر عمر میں اس سے بہت کم ہے۔

منظر

ایک بڑا سا خوبصورت سا لونگ روم یا حال

پہلا آدمی: تمہیں یاد ہے تم نے پچھلے دنوں اس ملک کے باسیوں کو کتے کہا تھا؟

دوسرا آدمی: ہاں تو؟

پہلا آدمی: تمہاری اس بات پر کتوں نے بہت زیادہ اعتراض کیا ہے اور کہا ہے کہ یہ ہماری سراسر توہین ہے۔ ان کا کہنا ہے کہ ہماری یعنی کتوں کی قوم کو اس ملک کے باشندوں سے تشبیہہ دے کر ہماری تحقیر کی گئ ہے۔ آخر سماج میں ہماری بھی کوئی عزت ہے۔

دوسرا آدمی: ہاں یہ تو ہے۔

پہلا آدمی: پھر تم نے انہیں گندی نالی کے غلیظ کیڑے کہا تھا۔

دوسرا آدمی: ہاں کہا تھا۔

پہلا آدمی: اس پر غلیظ کیڑوں نے شکایت کی ہے اور کہا ہے کہ ان کو ہم جیسا قرار دینا بہت زیادتی کی بات ہے۔ کیونکہ ہم ان سے افضل ہیں اور ایسا کہنا ہماری عزت نفس پر حملہ کرنے کے مترادف ہے۔

دوسرا آدمی: ہوتا ہو گا۔

پہلا آدمی: پھر تم نے انہیں شیطان کی اولاد کہا تھا۔۔۔

دوسرا آدمی: نہیں میں نے یہ نہیں کہا تھا کہ یہ شیطان کی اولاد ہیں بلکہ میں نے یہ کہا تھا یہ شیطان کی ناجائز اولاد ہیں۔

پہلا آدمی: تو یہ تو اس سے بھی زیادہ گھناؤنی بات ہے۔

دوسرا آدمی: ہاں مگر یہ سچ ہے۔

پہلا آدمی: لیکن تم نے صرف اتنا نہیں کہا بلکہ تم نے اس سے ایک قدم آگے بڑھ کے یہ تک کہا کہ یہ دھندہ کرنے والی عورت کی اولاد ہیں۔

دوسرا آدمی: نہیں میں نے یہ بھی نہیں کہا۔ دھندہ کرنے والی تو ان کے مقابلے میں بڑی شریف عورت ہے کیونکہ ممکن ہے وہ کسی مجبوری سے دھندہ کرتی ہو۔ میں نے تو اصل میں یہ کہا تھا کہ اس ملک کے باشندے شیطان کی راکھیل کی اولاد ہیں۔ شیطان ان کا بائیولوجیکل باپ ہے۔

پہلا آدمی: تو تمہیں معلوم ہونا چاہیے کہ شیطان نے اس پر ملک گیر احتجاج کا اعلان کیا ہے اور کہا ہے کہ یہ اس پر گھناؤنا الزام ہے۔ وہ کہتا ہے کہ اگر یہ میری اولاد ہوتے تو ان میں کچھ تو شرم و حیا ہوتی مگر جیسی حرکتیں یہ لوگ کرتے ہیں میں تو ایسا سوچ بھی نہیں سکتا۔

دوسرا آدمی: وہ مصروف رہتا ہے اسے کئ طرح کے کام ہوتے ہیں، کر کے بھول گیا ہو گا۔ ایسے افئیر وہ کہاں یاد رکھتا ہو گا۔

پہلا آدمی: لیکن تم اتنے یقین سے کیسے کہہ سکتے ہو؟

دوسرا آدمی: اس میں کوئی شک والی گنجائش ہی نہیں اس کے ثبوت تو گلی گلی، نگر نگر، قریہ قریہ، شہر شہر، گاؤں گاؤں ہر جگہ مل جائیں گے۔ چاروں طرف ایسے لوگ سر عام منڈلاتے اور دندناتے پھرتے ہیں جن کی حرکتوں سے صاف ظاہر ہوتا ہے کہ ان میں شیطان کے جراثیم ہیں۔ ایسے لوگوں کی یہاں کوئی کمی تو نہیں جو ڈھونڈنے پڑیں۔ یہ تو واحد ایسی کھیتی ہے جو ہر وقت سر سبز و شاداب رہتی ہے اور جس پر ہر موسم میں ڈھیر سارا اناج اگتا ہے۔ یہ ایک ایسا پیڑ ہے جو پورا سال پھلوں سے خوب لدا پھندا رہتا ہے۔ اس پر کبھی بھی کمی نہیں آتی۔ یہ ایک ایسا درخت ہے جس نے کبھی خزاں نہیں دیکھی، ہمیشہ اس پر فصل بہار طاری رہتی ہے۔ اس کے ثبوت کے لیے کسی تفتیش، کسی تحقیق کی ضرورت نہیں۔ اس کے لیے تو روزمرہ کے رہن سہن کا مشاہدہ کافی ہے۔ یہ تو بالکل ایسے ہی عیاں اور واضح ہے جیسے مشرق سے ابھرتا سورج۔۔۔ اس کو جاننے کے لیے کسی خبر، کسی ذاتی تجربے یا کوئی گہری بصیرت درکار نہیں یہ تو یوں پیش پا افتادہ حقیقت ہے جس سے انکار محال ہے۔ ادنیٰ سے ادنیٰ زیرک آدمی بھی اس کو با آسانی جان سکتا ہے۔

پہلا آدمی: لیکن تمہیں ایسا نہیں کہنا چاہیے تھا۔

دوسرا آدمی: تم تو ایسے کہہ رہے ہو جیسے میرے کہنے سے کسی کو کوئی فرق پڑتا ہے۔ تم نے ان کی نجاست، غلاظت اور خباثت کا اندازہ نہیں لگایا۔۔۔ کیا میرے ایسا کہنے سے کسی کو رتی برابر بھی کوئی فرق پڑا؟ کسی کے کان میں جوں تک بھی رینگی؟ ان میں سے کوئی ایک بھی شخص اپنی حرکتوں سے ذرا سا بھی بعض آیا؟ وہ تو اپنی تمام سرگرمیاں بدستور اسی طرح جاری رکھے ہوۓ ہیں۔ کسی ایک فرد کو بھی کسی قسم کی ندامت اور شرمندگی کا احساس ہوا؟ ان سے بہتر تو شیطان ہے جسے کچھ شرمندگی کا احساس تو ہوا۔

پہلا آدمی: ہاں وہ تو ہے لیکن پھر بھی۔

دوسرا آدمی: چلو چھوڑو یار کوئی اور بات کرو۔

پہلا آدمی: مجھے لگتا ہے مجھے اب چلنا چاہیے۔

دوسرا آدمی: کیوں کیا ہوا رکو تھوڑی دیر۔

پہلا آدمی: نہیں یار ایک دو ضروری کام ہیں پھر آؤں گا۔

دوسرا آدمی: چلو ٹھیک ہے۔ ہوتی ہے پھر ملاقات۔

پہلا آدمی: ٹھیک ہے۔

( باہر نکل جاتا ہے)

دوسرا آدمی: (قمیض کو سونگھ کر) مجھے لباس تبدیل کر لینا چاہیے۔ کافی گندا ہو گیا ہے۔

(چلا جاتا ہے۔ اس کے جانے کے بعد شیطان اپنے دو چیلوں کے ساتھ آتا ہے)

شیطان: یہی وہ گھر ہے؟

پہلا چیلا: جی استاد یہی وہ گھر ہے۔ اسی گھر کے ایک آدمی نے آپ پر الزام لگایا ہے کہ آپ نے۔۔۔

شیطان: (ہاتھ کے اشارے سے اسے روک کر) ہاں ہاں ٹھیک ہے پھر سے کہنے کی ضرورت نہیں ہم جانتے ہیں۔ تم یہ بتاؤ وہ آدمی ہے کہاں اس وقت؟

دوسرا چیلا: ابھی تھوڑی دیر پہلے یہیں تھا اندر گیا ہو گا۔

شیطان: ٹھیک ہے تم اس پر نظر رکھو ہم اس سے بعد میں نپٹیں گے ابھی ہمیں ایک ضروری کام ہے ہم جا رہے ہیں۔

(جانے لگتا ہے لیکن اسی وقت دوسرا آدمی آجاتا ہے)

آدمی: (اسے دیکھ کر ذرا سا چونک جاتا ہے) کون ہو تم؟

پہلا چیلا: یہ وہیں ہیں جن پر تم نے اتنا گھٹیا الزام لگایا ہے۔

آدمی: کون۔۔۔ شیطان؟

دوسرا چیلا: تمیز سے نام لو اور صحیح نام لو ان کا۔

آدمی: لیکن ہم سب اسے اسی نام سے پکارتے ہیں۔

شیطان: ٹھیک ہے جانے دو۔ تم یہ بتاؤ تم نے ہم پر ایسا الزام کیوں لگایا؟

آدمی: میں نے تم پر تو کوئی الزام نہیں لگایا۔ میں نے تو جو کہا ہے انسانوں کے بارے میں کہا ہے۔

شیطان: جو بھی ہے اس سے ہماری بدنامی ہوئی ہے تم اپنی یہ بات واپس لو۔ ورنہ ہم عدالت کا دروازہ کھٹکھٹائیں گے، میڈیا کے پاس جائیں گے اور سڑکوں پر تمہارے خلاف احتجاج کریں گے۔

آدمی: مجھے اس بات پر خیرت ہو رہی ہے اس میں تمہاری بدنامی کیسے ہوئی ہے تم تو اسی طرح کے کاموں کے لیے شہرت رکھتے ہو اسی لیے تو شیطان کہلاتے ہو۔

شیطان: ہاں یہ ٹھیک ہے ہم اسی طرح کے کاموں کی شہرت رکھتے ہیں مگر ہمارا معیار اتنا بھی گرا ہوا نہیں کہ ہم یہاں کے افراد کو اپنی اولاد کا درجہ دیں۔

آدمی: مجھے لگتا ہے بھول چوک میں تم سے یہ کام ہو گیا ہے۔

شیطان: ہرگز نہیں ہم نے کہا نا ہمارا ایسا گھٹیا معیار بالکل نہیں۔ بے شک ہم شیطان ہیں لیکن ہمارے بھی کچھ اصول ہیں۔

آدمی: مجھے تمہاری بات پر بالکل بھی یقین نہیں۔ جیسی ان لوگوں کی حرکات ہیں یہ ممکن ہی نہیں کہ اس کے پیچھے تمہارا ہاتھ نہ ہو۔

شیطان: کہا تو ہے ہم نے یہ نہیں کیا۔ ہو سکتا ہے ہمارے کسی چیلے کا کام ہو۔

آدمی: نہیں اگر تمہارے کسی چیلے کا کام ہوتا تو اس کے اثرات اتنے گہرے نہ ہوتے۔ ہو نہ ہو یہ تمہارا ہی کام ہے۔ جس قدر توانا جراثیم ان میں پاۓ جاتے ہیں اس سے صاف ظاہر ہوتا ہے یہ تمہاری حرکت ہے۔

شیطان: تو تم اپنی بات واپس نہیں لو گے؟

آدمی: واپس کیسے لوں جو کہہ دیا ہے وہ واپس کیسے ہو سکتا ہے؟ اور میں تو ابھی تک خیران ہوں تمہیں تکلیف کیوں ہو رہی ہے؟ جن کے بارے میں کہا ہے انہیں تو پرواہ بھی نہیں۔ تمہیں اتنی ندامت محسوس ہو رہی ہے جبکہ انسانوں میں سے تو کوئی ذرہ سا بھی شرمندہ نہیں۔

شیطان: انسانوں کی بات الگ ہے وہ تھوڑے زیادہ بے شرم ہیں لیکن ہم اتنے نہیں ہیں۔ ہماری شیطانوں کی قوم میں یہ بات بہت گھٹیا سمجھی جاتی ہے کہ ہم کسی انسان کے ساتھ ایسا تعلق قائم کریں۔ ہاں انسانوں میں ہمارے چیلے بہت سے ہیں لیکن اولاد کوئی نہیں۔

آدمی: تو تم کیا چاہتے ہو میں کیا کروں؟

شیطان: ہم چاہتے ہیں کہ تم یہ بات کہو کہ ہماری کوئی اولاد انسانوں میں نہیں اور یہ کہ ہمارا اس قسم کا کوئی بھی تعلق انسان سے کبھی نہیں رہا۔ بالکل ایسے جیسے تم نے وہ بات کی تھی۔ تم کہو کہ شیطان پر لگایا گیا یہ الزام غلط ہے۔

آدمی: میں ایسا نہیں کہوں گا کیونکہ مجھے پورا یقین ہے کہ بہت سے لوگ تمہارے صرف چیلے نہیں بلکہ تمہاری اولادیں ہیں۔ ان کے اندر تمہارا خون دوڑ رہا ہے۔

شیطان: تم سمجھتے کیوں نہیں ہم نے تمہیں بتایا ہے کہ ہم نے کبھی بھی انسانوں کے ساتھ ایسی کوئی حرکت نہیں کی۔ تمہیں یقین نہیں تو ہمارے ان دو چیلوں سے پوچھ لو۔

آدمی: چیلے بھی تو تمہارے ہیں وہ کون سا سچ بتائیں گے۔

پہلا چیلا: استاد ٹھیک کہتا ہے اس نے انسان کے ساتھ ایسا تعلق کبھی قائم نہیں کیا۔ تم خود سوچو شیطان تو انسان کا کھلا دشمن ہے وہ اس قسم کا تعلق انسان سے کیوں قائم کرے گا؟

آدمی: وہ اس لیے کہ اس طرح اس کے جراثیم انسانوں میں آجائیں اور انسانوں میں بھی جگہ جگہ اس کی اولادیں ہو جائیں تو اس کا کام آسان ہو جاۓ گا۔ اب دیکھو کتنے لوگ انسانوں میں گھوم رہے ہیں جو بالکل اسی کی طرح کی حرکتیں کرتے ہیں۔

دوسرا چیلا: چلو مان لیا بالفرض ایسا ہی ہے استاد ایسا کام کر سکتا ہے مگر تم خود سوچو کون سا ایسا انسان ہے جو شیطان سے اس قسم کا تعلق قائم کرنا چاہے گا؟

آدمی: (بلند آواز سے قہقہہ لگاتا ہے) ایسے انسانوں کے تو ڈھیر لگے پڑے ہیں۔ تمہیں کیا لگتا ہے یہ جتنے بھی مسائل انسانوں کو اس دنیا میں درپیش ہیں یہ کیوں ہیں؟ معاشی سے لے کر خانگی تک اور انفرادی سے لے کر سماجی تک سب مسائل کیا اسی شیطان سے تعلق کے باعث نہیں؟ بھوک و افلاس، جنگ و جدل، دھنگے و فساد سب اسی تعلق کی دین نہیں؟ ظلم و استحصال پر مبنی معاشی و سیاسی نظام، جبر و بربریت کے بل بوتے پر قائم رسوم و رواج سب اسی شیطان و انس کی دو طرفہ محبت کا نتیجہ نہیں؟ سینکڑوں، ہزاروں، لاکھوں انسان ہیں جو اس کی محبت میں اپنا تن من دھن اس کے آگے نچھاور کر دیتے ہیں۔ اپنا دل، دماغ، سب رہن رکھ کر اس کے چرنوں میں گر جاتے ہیں۔ کروڑوں لوگ دن رات اس کی پوجا و عبادت میں لگے رہتے ہیں۔ معمولی سے مفاد کی خاطر اپنے ہی بھائی بند دوسرے انسانوں سے الجھ پڑتے ہیں، عورتوں کی عصمت دری کرتے ہیں، مردوں کو ذلیل و رسوا کرتے ہیں، بچوں سے زیادتی کرتے ہیں اور بزرگوں پر ستم ڈھاتے ہیں۔ یہاں تک کہ اس سے دوستی اور محبت کا تعلق قائم کرنے کی خاطر دوسرے انسان کی جان لینے سے بھی گریز نہیں کرتے۔ اور تم کہتے ہو کہ کوئی انسان اس سے تعلق قائم کرنا نہیں چاہے گا۔۔۔

(پہلا آدمی داخل ہوتا ہے۔ شیطان اور اس کے چیلوں کی عجیب صورت کو دیکھ کر چونک جاتا ہے اور وہیں رک جاتا ہے)

دوسرا آدمی: گھبراؤ نہیں آجاؤ۔ یہ شیطان اور اس کے چیلے ہیں۔

شیطان: فی الحال ہم چلتے ہیں کیونکہ ہمیں ایک ضروری کام ہے لیکن ہم بہت جلد واپس آئیں گے۔

(شیطان اور اس کے دونوں چیلے چلے جاتے ہیں۔

پہلا آدمی: یہ بو کیسی آ رہی ہے؟

دوسرا آدمی: مجھے لگتا ہے یہ شیطان کی بو تھی۔ کیونکہ تھوڑی دیر پہلے یہ یہیں کہیں آس پاس ہی تھا تو میں سمجھا شاید میرے کپڑوں سے بو آرہی ہے۔ مگر جب میں لباس تبدیل کرکے آیا تو یہ اپنے چیلوں کے ساتھ یہیں موجود تھا اور بو سارے کمرے میں پھیلی تھی۔

پہلا آدمی: لیکن یہ یہاں لینے کیا آیا تھا؟

دوسرا آدمی: کہہ رہا تھا میں اپنا الزام واپس لے لوں۔ جبکہ میں نے اسے کہا کہ میں نے اس پر تو کوئی الزام نہیں لگایا میں نے تو یہاں کے لوگوں کے بارے میں ایسا کہا ہے۔ مگر وہ کہتا ہے کہ میرے ایسا کہنے سے اس کی بدنامی ہوئی ہے۔

پہلا آدمی: تو پھر اب تم نے کیا سوچا ہے؟

دوسرا آدمی: سوچنا کیا ہے میں اپنی بات سے پیچھے نہیں ہٹوں گا چاہے کچھ بھی ہو جاۓ۔

پہلا آدمی: اور اگر اس نے منفی ہتھکنڈے استعمال کیے تو۔۔۔آخر شیطان ہے اس سے بہتر رویے کی توقع رکھنا عبث ہے۔

دوسرا آدمی: ہاں میں جانتا ہوں مگر کیا بھی کیا جا سکتا ہے کرنے دو جو کرتا ہے۔۔۔تم بتاؤ تم تو چلے گۓ تھے واپس کیسے آۓ؟

پہلا آدمی: جس کام سے گیا تھا وہاں متعلقہ آدمی موجود نہیں تھا کہہ رہے تھے کچھ دیر بعد چکر لگانا۔ پھر میں کہاں جاتا میں نے سوچا چلو یہیں تمہارے پاس ہی آجاتا ہوں۔

دوسرا آدمی: چلو یہ تو اچھا کیا۔ آؤ پھر تم بیٹھو میں چاۓ لے کر آتا ہوں۔

پہلا آدمی: نہیں تم بہت دیر لگاؤ گے۔

دوسرا آدمی: دیر نہیں لگے گی چاۓ بن چکی ہے میں تمہارے آنے سے پہلے چاۓ ہی پینے والا تھا۔ تم بیٹھو میں بس دو منٹ میں آیا۔

(چلا جاتا ہے۔ پہلا آدمی میز کے پاس جاتا ہے اور میز پر سے ایک رسالہ اٹھا کر صوفے پر بیٹھ کر پڑھنے لگتا ہے۔ ساتھ ہی شیطان کے جیسی صورت والا ایک نوجوان داخل ہوتا ہے)

پہلا آدمی: (کھڑے ہو کر) تم کون ہو تمہاری صورت تو شیطان سے ملتی ہے جو ابھی تھوڑی دیر پہلے یہاں سے گیا ہے۔

نوجوان: وہ میں تمہیں بعد میں بتاؤں گا پہلے تم بتاؤ تم ہی وہ آدمی ہو جس نے شیطان پر الزام لگایا ہے؟

پہلا آدمی: نہیں میں وہ نہیں ہوں۔

نوجوان: تو پھر وہ آدمی کہاں ہے؟

پہلا آدمی: وہ اندر ہے ابھی آجاتا ہے۔ مگر تم یہ بتاؤ تم کون ہو اور یہاں کیا لینے آۓ ہو؟

نوجوان: وہ میں اس آدمی کے سامنے ہی بتاؤں گا۔ تم اس کو جلدی سے بلاؤ۔

(دوسرا آدمی داخل ہوتا ہے)

دوسرا آدمی: کون ہے؟ میں تم لوگوں کی آوازیں سن کر چلا آیا میں نے سوچا اب پتہ نہیں کون آگیا ہے۔

نوجوان: (دوسرے آدمی سے) تم وہ آدمی ہو جس نے شیطان پر الزام لگایا ہے؟

دوسرا آدمی: میں نے پہلے بھی بتایا ہے کہ میں نے شیطان پر الزام نہیں لگایا۔ میں نے تو۔۔۔

نوجوان: جو بھی ہے میں تمہیں بتانے آیا ہوں کہ تمہیں غلط فہمی ہوئی ہے۔

دوسرا آدمی: کیسی غلط فہمی؟

نوجوان: یہی کہ یہ کام شیطان کا ہے۔

دوسرا آدمی: میں کیسے مان لوں؟ صاف نظر آتا ہے کہ اس کام میں شیطان کا ہاتھ ہے۔

نوجوان: تمہاری بات درست ہے اس کے پیچھے شیطان ہی ہے مگر وہ شیطان نہیں۔

دوسرا آدمی: کیا مطلب وہ شیطان نہیں کوئی اور بھی شیطان ہے؟

نوجوان: ہاں یہ کام میرا ہے۔

دوسرا آدمی: تم کون ہو؟

نوجوان: میں اسی شیطان کا بیٹا ہوں۔ وہ میرے والد ہیں۔

پراسرار دنیا

2026-10-02T04:35:03.423+05:00

رات کے تقریباً دو بج رہے تھے ٹرین سنسنان اور ویران علاقے میں تاریکی اور سناٹے کو چیرتی ہوئی آگے بڑھ رہی تھی۔ چند لمحے پہلے تک وہ ٹرین کے کمپارٹمنٹ میں تنہا بیٹھا کسی رسالے کی ورق گردانی کر رہا تھا مگر خاموشی میں ریل کی چھک پھک چھک پھک کرتی آواز کے ردھم نے اس پر غنودگی سی طاری کر دی تھی اور اب اسے اونگھ سی آنے لگی تھی۔ اس نے جلدی سے اپنے سر کو جھٹکا دیا تاکہ نیند اس پر غلبہ نہ پا لے کیونکہ اس کا اسٹیشن بالکل قریب تھا۔ کچھ ہی دیر بعد گاڑی پلیٹ فارم پر آ لگی۔ اس نے اپنا مختصر سا سامان اٹھایا اور باہر آ کر ایک طرف چلنے لگا۔ اس کا رخ اس دفتر کی جانب تھا جہاں سے ٹرین کی آمد اور ٹکٹ وغیرہ کی معلومات حاصل کی جاتی تھیں۔ پورا پلیٹ فارم اندھیرے میں ڈوبا تھا محض برآمدے میں جہاں انتظار گاہ تھی وہاں ایک مریل سا بلب روشن تھا جو تاریکی کے اتنے بڑے دیو کے خلاف مزاحم تھا۔ بلب کے عین نیچے دو تین بنچ رکھے تھے جو اس وقت بالکل خالی تھے۔ پلیٹ فارم پر اس آدمی کے سوا ایک دو مسافر اور تھے جو ٹرین سے اتر کر مرکزی دروازے سے باہر نکل رہے تھے۔ جب وہ دفتر کے قریب پہنچا تو اسے لگا دفتر شاید بند ہے مگر جب وہ کھڑکی کے پاس آیا اور اس نے اندر جھانک کر دیکھا تو اسے ایک آدمی نظر آیا جو اپنے سامنے والے کاؤنٹر پر سر رکھے سو رہا تھا۔ اس نے کھڑکی کو ہلکا سا بجایا مگر وہ آدمی غالباً گہری نیند میں تھا۔ اس بار اس نے کھڑکی کو قدرے زور سے اپنی انگلیوں کی پشت سے بجایا۔ وہ آدمی ایک جھٹکے سے اٹھ بیٹھا۔ 'جی کیا کام ہے؟'

کیا آپ بتا سکتے ہیں ریلوے کوارٹر کس طرف ہیں مجھے ظہیر صاحب سے ملنا ہے.'

اس آدمی نے ایک بڑی سی جمائی لے کر کہا۔ 'یہاں سے آپ باہر نکلیں تو دائیں طرف چلتے جائیں اگر تو آپ کو رکشہ وغیرہ کچھ مل گیا تو آپ کی قسمت نہیں تو پندرہ بیس منٹ پیدل چلنا پڑے گا۔'

اس نے شکریہ ادا کیا اور باہر نکل آیا۔ دائیں جانب چند قدم چلنے کے بعد اسے ایک چھوٹا سا ڈھابہ نظر آیا جس کے دوسری طرف ایک سگریٹ کا کھوکھا تھا۔ اس نے پتلون کی جیب میں ہاتھ ڈالا اور سگریٹ کا پیکٹ باہر نکال کر دیکھا جس میں صرف ایک سگریٹ بچا تھا۔ اس نے دوسری جیب سے لائیٹر نکالا اور سگریٹ سلگا کر پیکٹ پھینک دیا۔ کھوکھے کے پاس جا کر اس نے گولڈ لیف کا ایک پیکٹ مانگا اور دکاندار سے پوچھا۔ 'کیا آپ بتا سکتے ہیں ظہیر صاحب کا کوارٹر کس طرف ہے؟'

کون ظہیر صاحب؟'

وہ جو ریلوے میں ملازم ہیں اور اس ریلوے اسٹیشن کا انتظام وہی سنبھالتے ہیں۔'

معلوم نہیں صاحبو۔ یہ سامنے سے پتہ کر لو۔' دکاندار نے سامنے ڈھابے کی طرف اشارہ کرتے ہوۓ کہا۔

اس نے سگریٹ کا پیکٹ لے کر پیسے ادا کیے اور ڈھابے کی طرف قدم بڑھایا مگر پھر رک گیا اور دکاندار سے دوبارہ مخاطب ہوا۔

اچھا کیا یہاں کوئی ہوٹل وغیرہ ملے گا ادھر نزدیک ہی آس پاس رات گزارنے کے لیے؟'

ہاں جی۔' دکاندار نے آگے جھک کر سر باہر نکالا اور کاؤنٹر سے باہر جھانک کر ایک طرف اشارہ کرتے ہوۓ کہا۔ 'وہ وہاں نیلے رنگ کا بورڈ نظر آرہا ہے۔ اس کے ساتھ ہی ہوٹل ہے آپ کو رات گزارنے کے لیے وہاں اچھا کمرہ مل جاۓ گا۔'

ٹھیک ہے شکریہ۔' شکریہ ادا کرکے وہ آگے بڑھا اور ہوٹل کی جانب چل دیا۔

جب وہ ہوٹل میں داخل ہوا تو اسے گرمی کا احساس ہوا کیونکہ باہر موسم خوشگوار تھا مگر ہوٹل کے اندر حبس تھی۔ سامنے استقبالیہ پر دو آدمی بیٹھے باتیں کر رہے تھے۔ اس نے کمرے کی بابت پوچھا اور کمرے اور کراۓ کے متعلق ضروری معلومات حاصل کرکے اور اپنا نام، فون نمبر وغیرہ لکھوا کر اور چابی لے کر وہ اوپر چلا آیا۔ ایک لڑکا اس کے ساتھ اوپر تک آیا اور کمرے کی نشاندہی کرکے واپس لوٹ گیا۔ کمرے میں پہنچ کر اس نے جلدی سے اپنا موبائل چارجنگ پر لگایا جو بیٹری گرنے کی وجہ سے مکمل طور پر بند ہو چکا تھا۔ اس کے بعد اس نے کھڑکی کھولی جس سے کمرے کے اندر کا حبس ختم ہو گیا۔ کھڑکی سے باہر اک نظر جھانک کر وہ واپس پلٹا اور بستر پر ڈھیر ہو گیا۔ گرمیوں کے آخری دن تھے اور سرما کی آمد آمد تھی اس لیے رات کے وقت پنکھا چلانے کی ضرورت پیش نہیں آتی تھی۔ وہ بہت تھک چکا تھا اور اسے بہت سخت نیند آرہی تھی اس لیے وہ بستر پر گرتے ہی گہری نیند سو گیا۔

صبح جب اس کی آنکھ کھلی تو دن کافی نکل آیا تھا۔ دھوپ کھڑکی کے راستے اس کے بستر تک پہنچ گئی تھی۔ اس نے جلدی سے موبائل آن کیا۔ آن کرتے ہی اسے یکایک کالز اور میسجز کے نوٹفیکیشن آنا شروع ہو گۓ۔ اس نے جلدی سے ظہیر صاحب کو کال ملائی اور ان سے کہا کہ وہ رات کو کافی دیر سے پہنچا تھا اور اس کا موبائل بھی بند ہو گیا تھا اس لیے وہ رات ہوٹل میں ہی رک گیا۔ ظہیر صاحب سے ملنے کا وقت اور جگہ طے کرکے اس نے چند دیگر پیغامات جو اسے موصول ہوۓ تھے وہ دیکھے اور موبائل میز پر رکھ کر دوبارہ کچھ دیر سستانے کے لیے لیٹ گیا۔ سامنے والی دیوار پر ایل سی ڈی لگی تھی جس کا ریموٹ اس کے بستر کے ساتھ والے میز پر پڑا تھا۔ اس نے ریموٹ اٹھایا اور ٹی وی آن کر کے دیکھنے لگا۔ کچھ دیر ادھر ادھر چینل گھمانے کے بعد اس نے ٹی وی بند کر دیا اور بستر سے اٹھ کھڑا ہوا۔ نہا کر اس نے اپنا لباس تبدیل کیا اور کمرے سے باہر آگیا۔ نیچے آکر اس نے چابی واپس لوٹائی اور بل ادا کرکے ہوٹل سے نکل کر سیدھا ریلوے اسٹیشن کا رخ کیا۔ ہوا چل رہی تھی مگر دھوپ میں چلنے کی وجہ سے اسے پسینہ آگیا۔ اسٹیشن پہنچ کر اس نے ظہیر صاحب کے دفتر کی جانب قدم بڑھاۓ۔ جب وہ دفتر میں داخل ہوا تو ظہیر صاحب اپنی کرسی پر براجمان تھے اور ان کے سامنے میز کے دوسری طرف انہی کی عمر کے برابر ایک اور آدمی بیٹھا تھا۔ ظہیر صاحب سے بغلگیر ہونے اور اس آدمی سے مصافحہ کرنے کے بعد وہ بھی ایک کرسی پر بیٹھ گیا۔ پھر ظہیر صاحب نے اس دوسرے آدمی سے اس کا تعارف کرواتے ہوۓ کہا۔ 'آپ ان کو پہچانتے ہیں؟ یہ ذیشان صاحب ہیں بہت عمدہ ناول نگار ہیں۔ ان کے پچھلے ناول کو بہت پذیرائی حاصل ہوئی تھی اور آج کل یہ ایک نیا ناول لکھ رہے ہیں۔ اسی ناول کے سلسلے میں کسی کام سے یہ یہاں حاضر ہوۓ ہیں۔'

جی میں جانتا ہوں۔' اس آدمی نے کہا پھر وہ ذیشان سے مخاطب ہوا۔ 'معاف کیجیے گا ذیشان صاحب! میں فکشن بہت کم پڑھتا ہوں مگر میں نے آپ کا نام بہت سنا ہے۔ لیکن ایک بات سے میں خیران ہوں آپ کو اپنے ناول کے لیے اس جگہ پر کیا کام پڑ گیا؟'

وہ مسکرایا پھر کچھ توقف کے بعد بولا۔ 'بات دراصل یہ ہے کہ میرے ناول کی کہانی اسی طرح کے ایک چھوٹے سے ریلوے اسٹیشن کے گرد گھومتی ہے اور تمام کردار بھی اسی جگہ سے تعلق رکھتے ہیں۔ اس لیے میں چاہتا ہوں میں یہاں کچھ دن رہ کر یہاں کی زندگی اور ماحول کا اور یہاں پر آنے جانے والے مسافروں اور دوسرے لوگوں کا قریب سے مشاہدہ کر سکوں۔ یہ بات آپ کو شاید عجیب لگے مگر۔۔۔!'

آپ کی یہ بات درست ہو گی۔' ظہیر صاحب نے کہا۔ 'مگر آج کل تو بہت سے لوگ انٹرنیٹ، میڈیا اور سوشل میڈیا سے معلومات و مواد وغیرہ حاصل کر لیتے ہیں یا اخبار کی سرخیوں میں کچھ تلاش کرنے کی کوشش کرتے ہیں۔ بہت سے لکھنے والوں کا ماننا ہے کہ آج کل سب کچھ انہیں اپنے ڈرائینگ روم اور اسٹڈی روم میں بیٹھے بیٹھے ہی مل جاتا ہے۔'

جی ہاں بہت سے لوگ ایسا سمجھتے ہیں مگر میں ان میں سے نہیں ہوں۔ مجھے تو اپنی کہانیاں اور کردار حتیٰ کہ بعض اوقات موضوعات بھی روزمرہ کی چلتی پھرتی، جیتی جاگتی اور سانس لیتی زندگی سے ہی ملتے ہیں۔ میں انہی سے کچھ اخذ کرکے کہانی کہتا ہوں۔'

میں آپ کی بات سے اتفاق کرتا ہوں۔' دوسرے آدمی نے کہا۔ 'یہ طریقہ زیادہ بہتر ہے بہ نسبت دوسرے طریقے کے۔'

تو پھر بتائیے ہم آپ کی کیا خدمت کرسکتے ہیں؟' ظہیر صاحب نے پوچھا۔

بس مجھے یہیں ریلوے اسٹیشن میں ایک کمرہ دے دیجیے جہاں میں چند دن رہ سکوں۔'

کوئی مسئلہ نہیں آپ کو کمرہ مل جاۓ گا آپ جتنے دن چاہے رہ سکتے ہیں۔ اور اگر آپ کو اور کسی چیز کی ضرورت پیش آۓ تو آپ بلاجھجک مجھ سے مانگ سکتے ہیں۔' ظہیر صاحب نے کہا۔

جی بہت شکریہ فی الحال تو اور کسی چیز کی ضرورت نہیں۔'

چلیں کمرہ تو آپ کو مل جاۓ گا پر ابھی ناشتے کا وقت ہے تو کیا خیال ہے ناشتہ کیا جاۓ؟' ظہیر صاحب نے کہا۔

جی بہت شکریہ پہلے کمرہ مل جاۓ تو میں اپنا سامان وغیرہ رکھ دوں تو۔۔۔'

سامان آپ کا کہیں نہیں جا رہا میں ملازم کو کہہ دیتا ہوں وہ آپ کا سامان اٹھا کر کمرے میں رکھ دے گا۔ آج کے دن آپ ہمیں مہمان نوازی کا موقع دیں۔' ظہیر صاحب نے کہا اور اٹھ کھڑے ہوۓ۔ پھر انہوں نے ملازم کو بلایا اور اسے ساری بات سمجھا کر تینوں باہر نکل گۓ۔ گاڑی میں بیٹھ کر تقریباً پانچ سات منٹ کی مسافت پر وہ ایک ناشتہ سنٹر کے سامنے جا کھڑے ہوۓ۔ ذیشان نے اسٹیشن کے پاس جو ریستوران اور ڈھابے دیکھے تھے وہ کچھ زیادہ اچھے دکھائی نہیں دیتے تھے مگر یہ ناشتہ سنٹر جس کے سامنے وہ ابھی کھڑے تھے باہر سے اک نظر دیکھنے سے ہی معیاری نظر آتا تھا۔ ریسٹورنٹ میں داخل ہونے کے بعد انہوں نے ایک اچھی سی جگہ کا انتخاب کیا اور پھر کھانے کا آرڈر دے کر باتوں میں مشغول ہو گۓ۔

ظہیر صاحب آپ نے ان کے بارے میں کچھ بتایا نہیں؟' ذیشان نے اس دوسرے آدمی کے بارے میں پوچھا۔

یہ ادریس صاحب ہیں میرے کولیگ ہیں اور بہت اچھے دوست بھی ہیں۔ اسی محکمے میں بڑے اعلیٰ عہدے پر فائز ہیں۔'

ریستوران اندر سے بھی قدرے بہتر تھا۔ صفائی ستھرائی کا مناسب انتظام تھا اور تمام میز کرسیاں بڑے قرینے سے رکھے تھے۔ دیواروں پر لگتا تھا ابھی ابھی تازہ رنگ کیا گیا ہے۔ ایک جگہ پر بڑا سا پردہ لٹکایا گیا تھا جس کے ساتھ والی دیوار پر ایک پرچی چسپاں تھی جس پر لکھا تھا 'صرف فیملی کے لیے'۔ داخلے کے بالکل ساتھ ہی استقبالیہ تھا جہاں پر ایک نوجوان خوبصورت پتلون قمیض میں ملبوس بیٹھا تھا جو غالباً کیشیئر کے فرائض سر انجام دے رہا تھا۔

اچھا ذیشان صاحب یہ تو بتائیں آپ اس کے علاوہ کوئی اور کام بھی کرتے ہیں یا اسی سے آپ کا اچھا گزارا ہو جاتا ہے؟' ادریس صاحب نے پوچھا۔

نہیں اس سے تو گزارا کرنا بالکل بھی ممکن نہیں۔' ذیشان نے پہلو بدلتے ہوۓ کہا۔ 'یہ تو میں بس اپنے ذوق کے لیے کرتا ہوں۔ بچپن سے کہانیاں، کتابیں وغیرہ لکھنے کا شوق تھا تو اسی شوق کی خاطر۔۔۔ آپ اسے میرا مشغلہ کہہ لیں۔ جبکہ میرا ذریعہ آمدن تو کچھ اور ہے۔ پہلے میں ایک جگہ ملازمت کرتا تھا اور اب میں نے پچھلے کچھ عرصے سے اپنا ایک چھوٹا سا کام شروع کر لیا ہے بس اسی سے گزر بسر ہوتی ہے۔'

ادریس صاحب کو یہ بھی تو بتائیں کہ آپ بیرونِ ملک مقیم ہیں اور وہیں پر کام کرتے ہیں۔' ظہیر صاحب نے کہا۔

جی۔ میں ملک سے باہر پہلے ملازمت کرتا تھا پھر میں اس قابل ہو گیا کہ وہیں پر اپنا ایک چھوٹا سا سیٹ اپ بنا لیا۔ بس اسی سے دال روٹی چلتی ہے۔'

یہ تو بہت اچھی بات ہے۔' ادریس صاحب نے کہا۔

ناشتہ کرنے اور چاۓ پینے کے بعد وہ اٹھ کھڑے ہوۓ اور بل ادا کر کے واپس اسٹیشن چلے آۓ۔ ذیشان کچھ دیر ان کے پاس ٹھہرنے کے بعد اپنے کمرے میں آگیا۔ بہت چھوٹا سا کمرا تھا مگر صاف ستھرا تھا۔ اندر غسل خانہ بھی تھا جس کے مخالف سمت کھڑکی کے پاس ایک چھوٹا سا بستر لگا تھا۔ کمرے میں داخل ہونے کے لیے لکڑی کے دو دروازے ایک ساتھ لگے تھے۔ ایک دروازہ آگے تھا جس کے پیچھے جالی دار دروازہ تھا۔ آگے کا دروازہ کھول دینے سے جالی دار دروازے سے باہر کا منظر صاف دکھائی دیتا تھا جہاں سے اس وقت ٹھنڈی ہوا اندر آ رہی تھی۔ یہ کمرا شاید پہلے دفتری استعمال میں تھا مگر بعد میں اسے عملے میں سے کسی کو رہنے کے لیے دے دیا گیا تھا جو ان دنوں کسی وجہ سے خالی تھا۔ اسی لیے اسے یہاں ٹھہرایا گیا تھا۔ کمرے میں آنے کے بعد اس نے سب سے پہلے اپنے سامان کو مناسب جگہ پر رکھا جو ملازم بستر پر رکھ گیا تھا۔ اس کے بعد وہ غسل خانے میں گھس گیا اور باہر نکلنے کے بعد اس نے اپنے جوتے اتارے اور کھڑکی کی طرف بڑھا۔ کھڑکی کے نیچے ایک میز اور کرسی پڑی تھی، اس نے کھڑکی کھولی اور کرسی پر بیٹھ کر لکھنے کی تیاری کرنے لگا مگر شب بھر کے جگراتے، سفر کی تھکاوٹ اور نئ جگہ سے غیر مانوسیت اور اجنبیت کے سبب ابھی اس کا ذہن لکھنے کے لیے تیار نہیں ہوا تھا اس لیے کوشش کے باوجود وہ بمشکل دو تین سطریں ہی لکھ پایا اور اٹھ کر بستر پر آکر لیٹ گیا۔ کچھ پل یونہی گزر گۓ پھر اس نے کتاب اٹھائی اور پڑھنے لگا۔ تین چار صفحے پڑھنے کے بعد اسے نیند آگئ۔

ریل گاڑی کی زوردار سیٹی کی آواز سے اس کی آنکھ کھل گئ اس نے اٹھ کر وقت دیکھا تو دن کافی بیت چکا تھا۔ وہ اٹھا اور منہ ہاتھ دھو کر سگریٹ کا پیکٹ اٹھایا اور کمرے سے باہر کھڑے ہو کر سگریٹ پینے لگا۔ اس کا کمرہ پلیٹ فارم کے رش والے حصے سے ذرا ہٹ کر تھا جہاں صرف عملے کے لوگ کبھی کبھار کسی کام سے آیا کرتے تھے ورنہ عموماً یہ حصہ ویران اور خاموش پڑا رہتا تھا۔ لیکن جہاں وہ کھڑا تھا وہاں سے پلیٹ فارم صاف اور واضح طور پر دکھائی دیتا تھا۔ اس نے سگریٹ کا کش لگا کر پلیٹ فارم پر نگاہ ڈالی۔ حسبِ معمول بس چند مسافر ٹرین کے آنے کا انتظار کر رہے تھے۔ چھوٹا سا ریلوے اسٹیشن تھا بھیڑ بھاڑ کسی کسی وقت ہی ہوتی تھی اس لیے یہاں قلی وغیرہ بھی دکھائی نہیں دیتے تھے۔ اس نے کمرے کو باہر سے بند کیا اور سگریٹ پیتا ہوا پلیٹ فارم پر چلا آیا۔ وہ ظہیر صاحب کے دفتر پہنچا مگر دفتر بند تھا غالباً ظہیر صاحب جا چکے تھے۔ وہ واپس پلٹنے والا تھا جب ان کا ملازم وہاں پہنچ گیا اور اس نے اسے بتایا کہ 'ظہیر صاحب آپ کا پوچھ رہے تھے، میں آپ کو کمرے میں دیکھ کر بھی آیا تھا پر آپ سو رہے تھے انہوں نے کہا ہے کہ اگر آپ کو کوئی ضرورت پڑے تو مجھے فون کر لینا۔' ملازم چلا گیا تو پلیٹ فارم پر جہاں ایک مسافر بڑی دیر سے بیٹھا ٹرین کا انتظار کر رہا تھا وہ اس کے پاس کچھ فاصلے پر خالی بینچ پر بیٹھ گیا۔ سورج ریلوے اسٹیشن کی عمارت کے باہر درختوں اور دور پہاڑیوں کے عقب میں روپوش ہو چکا تھا اور اندر پلیٹ فارم آہستہ آہستہ اندھیرے میں ڈوب رہا تھا۔ جہاں وہ بیٹھا تھا وہاں پر بلب ابھی روشن نہیں کیے گۓ تھے مگر کچھ دور چاۓ والے نے اپنی دکان پر بتی جلا دی تھی جس سے اس کا چہرہ صاف طور پر دکھائی دینے لگا تھا۔ اس کے چہرے پر عجیب سی ہنسی پھیلی تھی اسے لگا شاید وہ آدمی کچھ سوچ کر مسکرا رہا ہے مگر تھوڑی دیر غور کرنے پر اسے معلوم ہوا وہ بالکل بھی ہنس نہیں رہا تھا بلکہ اس کے چہرے کے نقش اور خدوخال ہی کچھ اس طرح کے تھے یوں ہی لگتا تھا کہ وہ ہر وقت ہنستا رہتا ہے۔ اگر وہ آدمی مکمل طور پر سنجیدہ ہو تو چہرے سے یونہی لگتا تھا کہ وہ ہنس رہا ہے۔ وہ سوچنے لگا جب یہ آدمی کسی مرگ وغیرہ پر جاتا ہو گا تو دوسروں کو کیسا محسوس ہوتا ہوگا۔ یہ سوچ کر اسے ہنسی آگئ۔ اس کے ساتھ والے بینچ پر جو آدمی بیٹھا گاڑی کا انتظار کر رہا تھا اس نے اپنی گود میں بیگ اٹھا رکھا تھا اور وہ اپنی ایک ٹانگ کو مسلسل ہلاتا چلا جا رہا تھا۔ اس کا موبائل فون اس کی جیب میں بجنے لگا تھا مگر اسے شاید گھنٹی سناۓ نہیں دے رہی تھی۔

بھائی جی آپ کا فون بج رہا ہے'۔

جی۔۔۔' وہ آدمی ہلکا سا چونکا۔ 'جی۔۔۔ہاں۔۔۔وہ فون۔۔۔'

اس نے ہلکی سی بوکھلاہٹ کے ساتھ جیب سے فون نکالا اور کال سننے لگا۔

جی۔۔۔نہیں ابھی تو ٹرین کا انتظار کر رہا ہوں۔۔۔ ہاں پہنچ جاؤں گا۔۔۔ہاں۔'

اس نے کال بند کر دی اور موبائل دوبارہ جیب میں رکھ کر پھر سے واپس اپنی پرانی حالت پر چلا گیا۔ اس کی ٹانگ کی حرکت جو فون سنتے ہوۓ رک گئ تھی دوبارہ اسی طرح حرکت کرنے لگی۔ اس نے اس عجیب و غریب آدمی کو دیکھتے ہوۓ اس سے پوچھا۔ 'آپ ٹرین میں پہلی بار سفر کر رہے ہیں؟'

جی۔۔۔؟' وہ اس بار بھی ہلکا سا چونکا۔ 'جی نہیں میں روز ٹرین سے سفر کرتا ہوں۔'

روز۔۔۔؟' اس نے خیرت سے پوچھا۔ 'روز اسی وقت؟'

جی۔ اسی وقت'۔

اس سے پہلے کہ وہ کچھ اور پوچھتا ٹرین کی سیٹی کی آواز آئی اور وہ آدمی اٹھ کر کھڑا ہو گیا۔ گاڑی ابھی کچھ دور تھی مگر وہ ابھی سے چل کر پٹری کے پاس جا کر کھڑا ہو کر انتظار کرنے لگا۔جب ٹرین آکر پلیٹ فارم پر رکی تو کچھ مسافر گاڑی سے اترے اور چند ایک مسافر سوار ہو گۓ مگر وہ اسی جگہ بلکل ساکت کھڑا رہا۔ وہ اس طرح کھڑا تھا جیسے اسے اردگرد کا بالکل بھی ہوش نہیں۔ جب گاڑی نے روانگی کے لیے سیٹی بجائی اور وہ آہستہ آہستہ آگے بڑھنے لگی تو وہ آدمی اپنی جگہ سے ہلا اور بھاگ کر گاڑی میں سوار ہو گیا۔ وہ اس آدمی کی اس عجیب و غریب حرکت کو دیکھ کر بہت خیران ہوا۔ جب گاڑی چلی گئ تو وہ بھی اٹھ کھڑا ہوا۔ پہلے اس نے سوچا کمرے میں چلا جاۓ مگر پھر اس نے دوبارہ اس چاۓ والے آدمی کی طرف دیکھا تو اس کی کینٹین کی جانب بڑھا۔ کوئی اور دن ہوتا تو وہ شاید اس کی طرف زیادہ دھیان نہ کرتا مگر اب چونکہ وہ یہاں آیا ہی اپنی کہانی کے لیے تھا اس لیے اسے لگا وہ آدمی اس کی کہانی کے لیے ایک دلچسپ کردار ہو سکتا ہے۔

ایک کپ چاۓ۔' کینٹین پر پہنچ کر اس نے انگلی کے اشارے سے کہا اور خود ایک بنچ پر بیٹھ کر سگریٹ پینے لگا۔ چاۓ والا اس وقت دکان پر بالکل اکیلا تھااس نے کوئی بات چھیڑنے کی غرض اس سے یونہی پوچھا۔ 'تم یہیں نزدیک ہی رہتے ہو؟'

نہیں بھائی جی۔ میرا گھر یہاں سے کچھ دور ہے۔ یہاں بس اس دکان کے لیے آتا ہوں۔'

کتنا عرصہ ہو گیا تمہیں یہ کام کرتے ہوۓ؟'

پچیس تیس سال ہو گۓ ہیں مجھے یہی کام کرتے ہوۓ۔' چاۓ والا نے فخر سے کہا۔

تیس برس۔۔۔خوب' اس نے سر ہلاتے ہوۓ کہا۔

آپ محکمے میں نۓ آۓ ہیں؟' اس بار چاۓ والے نے پوچھا۔

نہیں میں یہاں کسی کام سے آیا ہوں بس چند دن رہ کر واپس چلا جاؤں گا۔'

ظہیر صاحب کے مہمان ہیں؟'

ہاں۔'

ظہیر صاحب بہت اچھے آدمی ہیں پتہ نہیں اوپر والا ایسے اچھے لوگوں کو کیوں دکھ دیتا ہے۔'

دکھ۔۔؟ کیسا دکھ؟' اس نے خیریت سے پوچھا۔

آپ کو معلوم نہیں؟' چاۓ والے نے اس کی طرف دیکھ کر خیرت سے کہا۔

نہیں۔ کیا ہوا ان کے ساتھ؟'

بس کیا بتاؤں جناب ان کی جوان بیٹی تھی پچھلے دنوں اچانک چلی بس۔'

اوہ۔ وہ کیسے؟'

معلوم نہیں۔ کچھ پتہ نہیں اس کے ساتھ کیا ہوا۔'

چاۓ والے نے چاۓ کپ میں ڈال کر اس کے سامنے میز پر رکھ دی اور پھر واپس اپنی جگہ پر جا کر کسی اور کام میں جت گیا۔ پھر دوبارہ بولا۔ 'بھائی جی یہ سب ربی کام ہیں۔ اس کے کام وہی جانے۔'

اس نے چاۓ والے کو غور سے دیکھا اس کے لہجے میں غم اور سنجیدگی کی جھلک تھی مگر اس کے چہرے پر ابھی بھی وہی ہنسی پھیلی ہوئی تھی۔ یہ ہنسی اس کی اپنی اختیار کردہ نہیں تھی نہ ہی اسے ہنسی کہا جا سکتا ہے بلکہ اس کے چہرے کی بناوٹ ایسی تھی یوں لگتا تھا وہ ہنس رہا ہے۔ اس کی باچھیں ہر وقت یوں کھلی رہتی تھیں جیسے کوئی بھی انسان ہنستے ہوۓ باچھیں پھیلاتا ہے۔

جتنی دیر تک وہ وہاں بیٹھا رہا چاۓ والے سے باتیں کرتا رہا پھر اٹھ کر کمرے میں چلا آیا۔ صبح بھاری بھرکم ناشتہ کرنے کی بدولت اسے ابھی تک بھوک نہیں لگی تھی۔ اس نے لکھنے کا ارادہ کیا اور میز پر بیٹھ کر لکھنا شروع کر دیا۔ مگر ابھی بھی اس کا وہی حال تھا، وہ بالکل بھی لکھ نہیں پا رہا تھا۔ دیر تک لکھنے کی کوشش کرنے کے باوجود وہ چند جملوں سے آگے نہ بڑھ پایا۔ ابھی وہ سوچ ہی رہا تھا کہ کیا کرے اس کے فون کی گھنٹی بجی۔ اس نے دیکھا تو اس کے دوست کا فون تھا۔ اس نے کال اٹھائی تو اس کے دوست نے کہا۔ 'کیا حال ہے کیسا جا رہا ہے تمہارا دور دراز کے ریلوے اسٹیشن کا دورہ؟'

یار کچھ سمجھ نہیں آرہا۔ پتہ نہیں میرا یہاں آنے کا فیصلہ درست تھا کہ نہیں۔'

کیوں کیا ہوا؟'

جب سے آیا ہوں ایک لفظ ٹھیک طرح سے لکھ نہیں پایا۔ میں نے سوچا تھا کہانی کی جس طرح کی سیٹنگ ہے اسی طرح کی جگہ اور ماحول کے قریب رہوں گا تو زیادہ بہتر لکھ پاؤں گا۔ مگر اب۔۔۔'

کوئی بات نہیں یارا ابھی تو ایک دن بھی پورا نہیں ہوا تمہیں وہاں گۓ ہوۓ، ایک دو دن صبر کرو ٹھیک ہو جاۓ گا۔'

مجھے تو یہ رائیٹرز بلاک قسم کی کوئی چیز لگتی ہے'۔

او نہیں یار ایسا نہیں ہے اور بالفرض اگر ایسا ہے بھی تو ایک دو دن انتظار تو کرو۔ تمہارے لیے بالکل نئی اور اجنبی جگہ ہے اس لیے ایسا ہو جاتا ہے۔' اس کے دوست نے اس کو تسلی دیتے ہوۓ کہا۔

کافی دیر تک وہ دوست سے باتیں کرتا رہا۔ پھر اس نے کہا۔ 'مجھے لگتا ہے مجھے ریلوے اسٹیشن سے باہر نکل کر بارونق حصے کی طرف ذرا چہل قدمی کرنی چاہیے جہاں اس وقت ہوٹل اور دکانیں وغیرہ کھلی ہیں اس سے شاید مجھے کوئی لکھنے کی تحریک ہو۔'

ہاں یہ ایک اچھا خیال ہے۔' اس کے دوست نے کہا۔

تو پھر ٹھیک ہے بعد میں بات کرتے ہیں ابھی میں جاتا ہوں۔'

اس نے فون بند کر دیا اور کمرے کو باہر سے تالا لگا کر ایک طرف چل پڑا۔ پلیٹ فارم پر پہنچ کر اس نے چاۓ کی دکان پر نظر ڈالی چاۓ والا دکان بند کرکے جا چکا تھا۔ پلیٹ فارم اس وقت مکمل طور پر خالی تھا۔ برآمدے میں وہی ٹمٹماتا بلب جل رہا تھا جو اس نے پچھلی رات ٹرین سے اتر کر دیکھا تھا۔ باہر نکلنے سے پہلے اس نے صغیر صاحب کے کمرے کی طرف نظر دوڑائی، اندر بتی جل رہی تھی اس نے سوچا شاید صغیر صاحب کسی کام سے آۓ ہوں اس نے دروازے سے جھانک کر اندر دیکھا۔ اندر ایک لڑکی کھڑی فائلوں کو الٹ پلٹ کر دیکھ رہی تھی۔ وہ بہت خیران ہوا۔ اس نے انگلیوں سے دروازے پر ہلکی سی دستک دی اور کمرے کے اندر چلا آیا۔ لڑکی نے اس کی طرف دیکھا اور کہا۔ 'آپ۔۔۔؟'

جی میرا نام ذیشان ہے میں یہاں صغیر صاحب۔۔۔'

میں جانتی ہوں۔' لڑکی اس کی بات مکمل ہونے سے پہلے بول پڑی۔ 'آپ ذیشان صاحب ہیں اپنے ناول کے سلسلے میں یہاں کچھ دن رہنے آۓ ہیں۔'

جی لیکن آپ۔۔۔؟'

میرا نام سارہ ہے میں صغیر صاحب کی بیٹی ہوں۔'

بیٹی! لیکن وہ تو۔۔۔'

جی ہاں وہ میری بڑی بہن تھی۔' لڑکی نے فوراً جواب دیا۔ 'اس کی موت کے بعد ابو کچھ بیمار اور تھکے تھکے سے رہنے لگے ہیں اس لیے میں کبھی کبھار ابو سے چھپ کر یہاں آجاتی ہوں اور ان کا جو کام رہتا ہے وہ کر دیتی ہوں۔'

تو انہیں اس بات کا پتہ نہیں چلتا؟'

اکثر تو نہیں چلتا کیونکہ میں ملازم کو کہہ دیتی ہوں کہ انہیں کچھ بھی مت بتانا اس لیے اگر کبھی انہیں شک ہو اور وہ کچھ پوچھیں تو ملازم کوئی بہانہ بنا دیتا ہے مگر پھر بھی کبھی کبھی انہیں پتہ چل جاتا ہے۔'

پھر آپ کو روکتے تو ضرور ہوں گے؟'

ہاں روکتے ہیں لیکن میں پھر بھی آجاتی ہوں۔ اس لیے کہ بہن کو کھو چکی ہوں اب ابو کو کھونا نہیں چاہتی۔' اس کے چہرے پر دکھ کے تاثرات ابھرے پھر غائب ہو گۓ۔

ذیشان نے کمرے میں نظر دوڑائی اور کہا۔ 'میں آپ کی کوئی مدد کر سکتا ہوں؟'

لڑکی نے اس کی طرف دیکھا۔ اس سے پہلے وہ کچھ کہتی اس نے کہا۔ 'میرا مطلب ہے جو کام آپ کرنے آئی ہیں میں اس میں آپ کی مدد کر سکتا ہوں۔'

نہیں اس کی ضرورت نہیں آپ کا شکریہ آپ بس ابو کو کچھ مت بتانا۔'

وہ تو ٹھیک ہے لیکن میں صغیر صاحب کی کوئی مدد کر سکوں تو مجھے بہت خوشی ہو گی۔ میری صغیر صاحب سے اور آپ کے گھر والوں سے دیرینہ شناسائی ہے اور پھر انہوں نے مجھے یہاں کمرہ دے کر میری مدد بھی کی ہے تو بدلے میں اگر میں ان کے کچھ کام آسکوں تو مجھے بہت اچھا لگے گا۔'

لیکن کیا آپ کو یہ کام آتا ہے؟' لڑکی نے پوچھا۔

آتا تو نہیں مگر کچھ تھوڑا بہت جو میں کر سکوں۔'

ٹھیک ہے پھر یہ پکڑیے اور اس کے حساب کتاب میں جو گڑبڑ ہے اور جو غلطیاں ہیں اس کو ٹھیک کر دیجیے۔' سارہ نے اسے ایک بڑا سا پرچہ تھماتے ہوۓ کہا۔

اس نے شکریہ کے ساتھ پرچہ لیا اور کھڑے کھڑے اس پر نگاہ ڈالی پھر وہ ایک طرف بیٹھ کر اسے ٹھیک کرنے لگا۔ جبکہ سارہ نے ایک طرف پڑے کاغذوں کا پلندہ اٹھایا اور اسے الٹ پلٹ کر دیکھنے لگی۔ چند لمحوں بعد اس نے نظر اٹھا کر سارہ کو دیکھا اسے اس کی آنکھوں میں کچھ عجیب سا نظر آیا۔ جب سے وہ کمرے میں داخل ہوا تھا اس نے کمرے کی فضا اور اس کی آنکھوں میں ایسا ہی عجیب پن محسوس کیا تھا مگر وہ سمجھ نہیں پا رہا تھا کہ یہ کیا ہے۔ آخر کچھ تو ایسا تھا جو اس لڑکی میں الگ تھا۔ کچھ ایسا جو عمومیت سے بالکل ہٹ کر تھا۔ وہ لڑکی یقیناً خوبصورت تھی مگر اس طرح کی بہت سی خوبصورت لڑکیاں اس نے دیکھی تھیں۔ اس کے خدوخال بھی نارمل حسین لڑکیوں جیسے ہی تھے مگر پھر بھی اس میں کچھ انوکھی بات ضرور تھی جس نے اسے تجسس میں مبتلا کر دیا تھا۔

ایک بات پوچھ سکتا ہوں؟'

لڑکی نے اس کی طرف دیکھا پھر کہا۔ 'جی پوچھیے؟'

مجھے شاید اتنی ذاتی نوعیت کی بات پوچھنے کا حق تو نہیں مگر پھر بھی کیا آپ بتائیں گی آپ کی بہن کی موت کیسے ہوئی تھی؟'

لڑکی مسکرائی پھر بولی۔ 'میں جانتی تھی آپ یہ بات ضرور پوچھیں گے۔ مگر میں آپ کو اس کا کوئی جواب نہیں دے سکتی۔ اس دنیا میں شائد کچھ باتیں ایسی ہوتی ہیں ذیشان صاحب جس کا کوئی جواب نہیں ہوتا۔ ہم لاکھ جاننے کی کوشش کریں مگر جواب جاننے سے قاصر رہتے ہیں۔ مجھے لگتا ہے ذیشان صاحب قدرت بہت سی باتیں ہم سے پوشیدہ رکھنا ہی پسند کرتی ہے۔'

یہ بھی تو ہو سکتا ہے قدرت کا ایسا کوئی ارادہ نہ ہو بس ہم ہی کسی وجہ سے جان نہ پا رہے ہوں۔'

یہ بھی ممکن ہے۔'

دونوں کچھ دیر تک کام کرتے رہے اور جب کافی دیر ہو گئ تو سارہ نے کہا۔ 'میرا خیال ہے اب چلنا چاہیے بہت دیر ہو گئ ہے۔'

جیسے آپ کی مرضی۔' ذیشان نے اٹھتے ہوۓ کہا۔ 'لیکن آپ جائیں گی کیسے اس وقت اکیلے جانا مناسب ہوگا؟'

میرے پاس اپنی گاڑی ہے اور ابھی تو اتنی رات بھی نہیں ہوئی باہر نکل کر دیکھیں سارا شہر ابھی جاگ رہا ہے۔'

وہی تو میں سوچ رہا تھا اتنا وقت بھی نہیں ہوا پھر یہ پلیٹ فارم کیوں خالی پڑا ہے۔' اس نے خیرت کا اظہار کرتے ہوۓ کہا۔

وہ اس لیے کہ یہاں ٹرینیں بس کسی خاص خاص وقت پر رکتی ہیں اس لیے انہی مخصوص اوقات میں رش دکھائی دیتا ہے۔'

ہاں شاید اسی لیے۔۔۔ تو چلیں پھر؟'

نہیں آپ جائیں میں کمرے کو بند کرکے چلی جاؤں گی۔'

لڑکی نے اس سے کہا تو وہ سلام دعا کے بعد باہر نکل آیا۔ جب وہ کمرے سے باہر نکلا تو اسے عجیب سا احساس ہوا اسے لگا وہ کسی الگ ہی دنیا سے نکل کر آیا ہے۔ اسے بھوک لگ رہی تھی اس لیے وہ ریلوے اسٹیشن سے نکل کر اس جانب چل دیا جہاں ریستوران اور ڈھابوں وغیرہ کی قطار تھی۔

کھانا کھا کر اور تھوڑی سی چہل قدمی کرکے وہ واپس کمرے کی طرف چل دیا۔ پلیٹ فارم پر پہنچ کر اس نے صغیر صاحب کے کمرے کی طرف دیکھا کمرہ بند تھا اور وہ لڑکی جا چکی تھی۔ مگر خیرت انگیز بات یہ تھی کہ جو پلیٹ فارم تھوڑی دیر پہلے تک مکمل طور پر سنسان پڑا تھا اب وہاں لوگوں کی کافی بھیڑ لگی تھی یہاں تک کہ چاۓ والا جو دکان بند کرکے جا چکا تھا وہ بھی اپنی جگہ پر موجود تھا اسے سارہ کی کہی ہوئی بات یاد آئی کہ یہاں مخصوص اوقات میں ہی ٹرینیں آتی ہیں اس لیے رش بھی اسی وقت ہوتا ہے۔ شاید چاۓ والا بھی کسی کام سے باہر گیا تھا۔ اس نے سوچا اور پھر لوگوں پر ایک اچٹتی سی نگاہ ڈال کر آگے بڑھ گیا۔ کمرے میں پہنچ کر اس نے بٹوہ اور موبائل وغیرہ ایک طرف رکھا اور میز پر بیٹھ گیا۔ اب اس کا ذہن لکھنے کے لیے مکمل طور پر تیار تھا اور وہ اپنے آپ کو ہلکا پھلکا محسوس کر رہا تھا۔ اس نے لکھنا شروع کیا۔

'اس کی آنکھوں میں بلا کی کشش تھی۔ ایسی پرکشش آنکھوں والی لڑکی میں نے زندگی میں پہلے کبھی نہیں دیکھی تھی مگر ساتھ ہی اس لڑکی اور اس کمرے کی فضا میں معلوم نہیں وہ عجیب اور انوکھے پن کا احساس کیا تھا جو کمرے سے باہر نکلتے ہی ختم ہو گیا تھا۔ وہاں کچھ تو ایسا الگ تھا جس کا ادراک و احساس مجھے پہلے کبھی نہیں ہوا۔'

رات کافی دیر تک وہ لکھتا رہا صبح اس کی آنکھ کھلی تو نو بج چکے تھے۔ وہ جلدی سے بستر سے اٹھا اور نہا دھو کر لباس تبدیل کرکے باہر آگیا۔ اس وقت پلیٹ فارم پر بہت رش تھا پورا ریلوے اسٹیشن لوگوں سے کھچا کھچ بھرا تھا۔ کچھ لوگ بنچوں پر بیٹھے گپیں لگا رہے تھے اور کچھ اپنے موبائل میں مگن تھے۔ جبکہ چند لوگ زمین پر چادر بچھا کر نیچے بیٹھے تھے۔ بہت سے لوگ دو دو تین تین کی ٹولیوں میں کھڑے گاڑی کا انتظار کر رہے تھے۔ ان سب میں کئ لوگ وہ تھے جو خود تو مسافر نہیں تھے مگر وہ یا تو کسی نہ کسی کو چھوڑنے آۓ تھے یا لینے آۓ تھے۔ ان کے بیچ میں خوانچہ فروش اور چھابڑی والے گھوم پھر کر اپنا سامان بیچ رہے تھے۔ اس وقت دو چار قلی بھی کہیں سے آدھمکے تھے، جونہی کوئی گاڑی پلیٹ فارم پر آ کر رکتی وہ فوراً بھاگ کر مسافر کے اترنے سے پہلے وہاں پہنچ جاتے تھے۔ وہ آہستہ آہستہ چلتا ہوا کینٹین کی جانب چل دیا۔ وہاں بھی بہت سے لوگ بیٹھے چاۓ پی رہے تھے یا ناشتہ کر رہے تھے۔ کوئی جگہ خالی نہ پا کر وہ ایک طرف جا کر کھڑا ہو گیا۔ مگر خوش قسمتی سے ابھی اسے وہاں کھڑے ہوۓ صرف ایک آدھ منٹ گزرا تھا جب دو ایک لوگ چاۓ پی کر اٹھ کھڑے ہوۓ اور وہ وہاں جا کر بیٹھ گیا۔ اس نے چاۓ والے کی طرف دیکھا جو اپنی مخصوص ہنسی چہرے پر سجاۓ کام میں مصروف تھا۔ ابھی وہ اسی کو دیکھ رہا تھا جب ایک چھوٹا لڑکا جو اس چاۓ والے کی کینٹین میں کام کرتا تھا اس کے پاس آگیا۔ اس نے اسے چاۓ، ناشتے کا آرڈر دیا اور خود دوسری طرف جہاں لوگ کھڑے گاڑی کا انتظار کر رہے تھے اس طرف دیکھنے لگا۔ تھوڑی دیر بعد ناشتہ آگیا اس نے سیر ہوکر ناشتہ کیا اور چاۓ پینے کے بعد سگریٹ سلگا لیا۔ ابھی اس نے سگریٹ کے چند کش ہی لگاۓ تھے کہ اچانک اسے بھیڑ میں وہی لڑکی دکھائی دی۔ اس نے سگریٹ ایک طرف پھینکا اور جلدی سے اٹھ کھڑا ہوا جب وہ اس جگہ پر پہنچا تو وہاں کوئی نہیں تھا۔ اس نے ادھر ادھر اسے تلاش کیا مگر وہ اسے کہیں دکھائی نہ دی۔ اسے لگا شاید اس کا وہم تھا۔ کچھ دیر وہاں مٹرگشت کرنے کے بعد اس نے صغیر صاحب کے کمرے کا رخ کیا۔ وہ اس وقت کمرے میں اکیلے بیٹھے کوئی کام کر رہے تھے وہ کمرے میں داخل ہوا تو صغیر صاحب اس سے بڑی حندہ پیشانی سے ملے۔ اس نے باتوں باتوں میں ان سے ان کی بیٹی کی پراسرار موت کا ذکر چھیڑا مگر اس سے پہلے کہ وہ کچھ کہتے اور بات آگے بڑھتی چند لوگ اسی وقت کمرے میں داخل ہوۓ اور بات آئی گئی ہو گئی ہے۔ وہ تھوڑی دیر ان کے پاس بیٹھا پھر باہر نکل آیا۔ تمام دن اس نے پلیٹ فارم پر گزارا۔ جہاں خالی جگہ ملتی وہاں جا کر بیٹھ جاتا اور کبھی کسی جگہ جا کر کھڑا ہو جاتا۔ پچھلے پہر وہ اپنے کمرے میں چلا آیا۔ کچھ دیر سستانے کے بعد اس نے کتاب اٹھائی اور مطالعہ میں مصروف ہو گیا۔

کتاب کے مطالعے میں بہت دیر تک مگن رہنے کے بعد جب یکلخت فون کی گھنٹی بجی تو اس نے فون اٹھایا اور نہ جانے کتنی دیر تک فون پر بات کرتا رہا۔ جب اس نے کال بند کرکے کھڑکی سے باہر دیکھا تو اندھیرا کافی پھیل چکا تھا۔ وہ ٹھیک اسی وقت کمرے سے باہر نکل آیا جس وقت وہ پچھلی رات کو نکلا تھا۔ آج بھی اس وقت پلیٹ فارم مکمل طور پر خالی تھا۔ چاۓ والا بھی کہیں دکھائی نہیں دے رہا تھا۔ اس نے محسوس کیا کہ پلیٹ فارم آج پہلے سے زیادہ تاریک دکھائی دے رہا ہے۔ صغیر صاحب کے کمرے کے پاس پہنچ کر اس نے دیکھا کمرے کی بتی جل رہی تھی۔ وہ اندر داخل ہوا سامنے وہی لڑکی بیٹھی تھی۔ جونہی وہ اندر پہنچا اسے بالکل اسی طرح کے عجیب و غریب احساس نے گھیر لیا جو اس نے پچھلی رات کو بھی محسوس کیا تھا۔ اسے لگا وہ ایک دنیا سے نکل کر کسی اور دنیا میں چلا آیا ہے۔ اس نے پیچھے مڑ کر دروازے سے باہر جھانک کر دیکھا وہاں سواۓ تاریکی کے اور کچھ نہیں تھا۔ اس کے بعد اس نے لڑکی کو غور سے دیکھا آج بھی اس کی آنکھوں میں وہی کشش تھی اور اسی طرح کا انوکھا اور اجنبی احساس جھلک رہا تھا۔

آپ'؟ اس لڑکی نے بولنے کے لیے لب ہلاۓ تو اسے لگا وہ کسی اور دنیا کی باسی ہے۔

جی میں یونہی یہاں سے گزر رہا تھا تو دیکھا بتی جل رہی ہے تو اندر چلا آیا۔ لیکن مجھے لگا نہیں تھا کہ آپ آج پھر آئیں گی۔' اس نے اس کی آنکھوں میں دیکھتے ہوۓ کہا۔

آنے کا کوئی ارادہ تو نہیں تھا مگر آج پھر اک بہانہ مل گیا تو چلی آئی۔' اس نے اپنی جگہ سے اٹھ کر کھڑے ہوتے ہوۓ کہا۔ 'مجھے اصل میں اس جگہ پر آکر کام کرنا اچھا لگنے لگا ہے تو وقتاً فوقتاً چلی آتی ہوں۔ خیر، آپ بتائیں آپ کا دن کیسا گزرا آج، کوئی پریشانی تو نہیں ہوئی؟'

اچھا گزر گیا ہے۔' وہ چند قدم چل کر کھڑکی سے ٹیک لگا کر کھڑا ہو گیا۔ 'پریشانی تو کوئی نہیں ہوئی لیکن جب سے میں یہاں آیا ہوں بہت سی باتیں ایسی ہوئی ہیں جس نے مجھے حیرت میں مبتلا کر دیا ہے۔ ایسی عجیب و غریب باتیں جن کو میں سمجھ نہیں پا رہا۔'

میں نے تو پہلے ہی کہا تھا بہت سی باتوں کو ہم سمجھ نہیں سکتے۔'

تو کیا انہیں سمجھنے یا جاننے کی کوشش بھی نہیں کرنی چاہیے؟'

معلوم نہیں۔' وہ چند قدم چل کر آگے بڑھی اور فضا میں کہیں دیکھتے ہوۓ بولی۔ 'شائد نہیں۔۔۔ یا شاید ہاں۔'

ذیشان نے کھڑکی سے باہر دیکھا۔ اندھیرا پہلے سے بہت بڑھ گیا تھا اور تیز آندھی کے جھکڑ چلنے لگے تھے۔

لگتا ہے طوفان آنے والا ہے۔'

آندھی اور طوفان تو آتے رہتے ہیں اور پھر آکر گزر جاتے ہیں۔' سارہ نے لاپرواہی سے کہا۔

مگر جاتے ہوۓ بہت کچھ تباہ و برباد بھی تو کر جاتے ہیں۔'

جی۔'

وہ جتنی دیر تک کمرے میں رہا اسے لگا وقت بہت تیزی سے گزر رہا ہے مگر جب وہ کمرے سے باہر نکلا اس نے فوراً گھڑی دیکھی تو ابھی اتنا وقت نہیں گزرا تھا۔ باہر آنے کے بعد آج بھی اسے بالکل وہی احساس ہوا تھا جو پچھلی رات کو اس نے محسوس کیا تھا۔ تھوڑی دیر ادھر ادھر کے چکر لگانے اور کھانا وغیرہ کھانے کے بعد وہ اپنے کمرے میں چلا آیا۔ لکھنے کی میز پر بیٹھ کر کئ طرح کے خیال اس کے ذہن میں گھوم رہے تھے۔ اس نے ایک دروازہ کھول رکھا تھا اور جالی دار بند دروازے سے باہر دیکھ رہا تھا۔ کچھ دیر پہلے تک جو تیز آندھی کے جھکڑ چل رہے تھے وہ ختم ہو چکے تھے لیکن رات ویسی ہی سیاہ اور تاریک تھی۔ پھر اس نے لکھنا شروع کیا۔

'یہ کیسی دہشتناک اور عجیب و غریب رات ہے۔ ایسی عجیب جو شاید ہی کبھی کسی نے دیکھی ہو۔ یہاں کی ہر چیز ہی تو عجیب ہے۔ ایک آدمی جو ہر روز شام کو ایک ہی وقت میں ٹرین کا سفر کرتا ہے اور پھر گاڑی آنے سے کتنی دیر پہلے پٹری کے پاس جا کھڑا ہوتا ہے۔ لیکن جب گاڑی آتی ہے تو سوار ہونے کی بجاۓ اپنی جگہ پر کھڑا رہتا ہے اور ٹرین چلنے کے بعد بھاگ کر اس میں سوار ہوتا ہے۔ اور وہ چاۓ والا جس کے چہرے پر اور کوئی خاص بات نہیں مگر ایک ایسی ہنسی جو معلوم نہیں کیسے اس کے چہرے پر ہمیشہ کے لیے جم گئ ہے۔ یوں جیسے کسی نے ہنسی لا کر اس کے چہرے پر فٹ کر دی ہو۔ اور وہ لڑکی! جس کی آنکھوں سے لے کر باتوں تک بہت کچھ عجیب ہے۔ جب تک وہ یہاں موجود رہتی ہے اردگرد کی پوری فضا کس قدر الگ دکھائی دیتی ہے۔ اس کے آنے پر پورا پلیٹ فارم سنسان اور ویران ہو جاتا ہے اور ہر جگہ خاموشی چھا جاتی ہے لیکن اس کے جانے کے فوراً بعد دوبارہ سے بھیڑ لگ جاتی ہے۔ اور وہ لڑکی جو مر چکی ہے اور جس کا کسی کو کچھ پتہ نہیں کہ وہ کیسے اور کیونکر مری۔۔۔ یہ کیسی خیرت انگیز دنیا ہے کیا واقعی بہت سی باتیں قدرت ہم سے پوشیدہ رکھنا چاہتی ہے؟'

جب وہ لکھتے لکھتے تھک چکا تو اس نے وہیں بیٹھے بیٹھے پیچھے گردن پر ہاتھ رکھا اور سر کو ادھر ادھر گھمایا، پھر سگریٹ سلگا لیا۔ باہر تیز ہوا کے ساتھ ہلکی سی بارش ہونے لگی تھی۔ کتنی دیر تک وہ سگریٹ پیتے ہوۓ انہی باتوں پر غور کرتا رہا اور پھر جب نیند سے اس کی آنکھیں بوجھل ہونے لگیں تو وہ اٹھ کر اپنے بستر پر آ گیا۔

اگلا دن بھی اس نے پلیٹ فارم پر ہی گزارا۔ صغیر صاحب سے آج اس کی ملاقات ہوئی لیکن بہت تھوڑی دیر کے لیے کیونکہ آج وہ بہت مصروف تھے اس لیے وہ کچھ دیر ان کے پاس بیٹھ کر چلا آیا۔ پچھلے پہر جب چاۓ والے کے پاس رش بہت کم ہو گیا تو وہ اس کے پاس جا کر بیٹھ گیا۔ وہاں اس وقت بس ایک دو آدمی تھے۔ ایک چاۓ پیتے ہوۓ موبائل دیکھنے میں مگن تھا اور دوسرا سگریٹ پیتے ہوۓ اپنے ہی خیالوں میں کہیں کھویا تھا۔ اس کا سگریٹ پینے کا انداز بہت نرالا تھا۔ اس نے سگریٹ کو اپنی دو چھوٹی انگلیوں کے درمیان پھنسا رکھا تھا اور کش لیتے وقت اپنی مٹھی بند کرکے اوپر سے زور سے سانس اندر کھینچتا تھا۔ جب وہ راکھ کو جھاڑتا تھا تو ایک چٹکی سی بج اٹھتی تھی۔ چاۓ والا چولہے کے پاس کھڑا کوئی کام کر رہا تھا جبکہ وہ لڑکا جو اس نے کام کے لیے رکھا ہوا تھا وہ دکان سے کچھ فاصلے پر ایک ٹونٹی کے نیچے بیٹھا چاۓ کے برتن دھو رہا تھا۔ پچھلی رات کی بارش سے موسم یکسر تبدیل ہو گیا تھا اور چھاؤں میں اس وقت سردی محسوس ہونے لگی تھی لیکن شام کے ڈھلتے سورج کی دھوپ کی حدت ابھی کسی حد تک برقرار تھی اس لیے وہ اپنی کرسی گھسیٹ کر دھوپ میں لے آیا تھا۔ اس نے سگریٹ کا ایک لمبا کش لگایا اور چاۓ والے سے پوچھا۔ 'ایک بات تو بتاؤ یار۔ تم رات ہوتے ہی دکان بند کرکے کیوں چلے جاتے ہو اور پھر کچھ دیر بعد دوبارہ واپس بھی آجاتے ہو؟'

کیا بتاؤں جناب پچھلے کچھ دنوں سے مجھے روز اس وقت کوئی نہ کوئی ضروری کام پڑ جاتا ہے اور مجھے دکان بند کرکے جانا پڑتا ہے۔ اس نالائق کے حوالے بھی دکان کرکے نہیں جا سکتا کیونکہ اس کو ابھی کچھ نہیں آتا۔' اس نے اس لڑکے کی طرف اشارہ کرتے ہوۓ کہا جو برتن دھو رہا تھا۔

لیکن میں نے دیکھا ہے اس وقت پلیٹ فارم مکمل طور پر سنسان ہو جاتا ہے۔'

یہ تو پھر میرے نصیب اچھے ہیں جو اس وقت گاہک بھی کوئی نہیں ہوتا۔' اس نے گیس آن کی اور ماچس کی تیلی جلا کر چولہے کو سونگھائی جس سے چولہا بھک سے جل اٹھا۔ پھر اس نے کہا۔ 'بھائی جی اگر دکان پہ ٹھیک طرح سے ٹیم نہ دیں تو پکا گاہک بھی بھاگ جاتا ہے۔ کچے کی تو پھر بات ہی کیا۔ اس لیے میں دکان چھوڑ کر کہیں نہیں جاتا مگر پچھلے کچھ دنوں سے پتہ نہیں کیا ہو رہا ہے کجھ سمجھ نہیں لگ رہی۔ روز مجھے ایک ہی وقت پر کوئی نہ کوئی کام پڑ جاتا ہے۔'

وہ غروبِ آفتاب کے بعد تک اس کے پاس بیٹھا رہا۔ جب اندھیرا پھیلنے لگا تو وہ اٹھ کر چلا آیا۔ پلیٹ فارم پر اسے وہی آدمی دکھائی دیا جو روزانہ گاڑی سے اسی وقت سفر کرتا تھا۔ ابھی بھی وہ اردگرد سے بے خبر بیٹھا ٹانگ ہلا رہا تھا۔ وہ اس کے پاس جا کر بیٹھ گیا۔ اس کے فون کی گھنٹی بجی جو اسے بالکل سنائی نہ دی۔ آج بھی اس کے آواز دینے پر وہ چونک اٹھا۔ اس نے کال اٹھائی اور اسی طرح کے دو تین جملے دہرانے کے بعد کال بند کر دی اور دوبارہ اپنی پرانی حالت میں لوٹ گیا۔ دور سے ٹرین کی سیٹی کی آواز سنائی دی تو وہ اٹھا اور پٹری کے پاس جا کر کھڑا ہو گیا۔ ٹرین آئی مسافر اترے، کچھ سوار ہوۓ مگر وہ اپنی جگہ پر ساکت رہا۔ اس کے آگے پیچھے اور اردگرد سے لوگ گزر رہے تھے مگر اس کو ان میں کوئی بھی دلچسپی نہیں تھی۔ وہ بالکل اپنے سامنے پٹری کو دیکھ رہا تھا اور دیکھتا جا رہا تھا۔ گاڑی روانگی کے لیے تیار ہوئی مگر اس نے ابھی بھی کوئی حرکت نہ کی۔ ایک آدھ منٹ بعد گاڑی چل پڑی تو وہ اس کے پیچھے بھاگا اور بھاگ کر گاڑی کو پکڑ لیا۔ اس کے جانے کے بعد ذیشان کتنی دیر تک وہیں بیٹھا رہا پھر اٹھ کر اپنے کمرے میں چلا آیا۔

رات کو اس کی سارہ سے پھر وہیں ملاقات ہوئی۔ اس کے آنے پر آج بھی سارا پلیٹ سنسان ہو گیا تھا اور ہر طرف تاریکی اور سکوت طاری تھا۔

آپ ایک بات بتائیں گی؟'

جی پوچھیں؟'

جب بھی آپ آتی ہیں یہ جگہ سنسان اور ویران کیوں ہو جاتی ہے؟'

وہ دھیرے سے ہنسی پھر اس نے کہا۔ 'آپ نے ایسا کیوں سوچا کہ جب میں آتی ہوں تب یہ جگہ سنسان ہو جاتی ہے۔ یہ بھی تو ہوسکتا ہے جس وقت یہ جگہ سنسان ہوتی ہے میں اسی وقت آتی ہوں۔'

ہاں۔ ایسا ہو تو سکتا ہے۔' اس نے کہا۔ 'مگر روز روز تو ایسا اتفاق نہیں ہوتا۔'

یہ بھی تو ہو سکتا ہے یہ آپ کا وہم ہو۔'

ایسے وہم بھی روز روز نہیں ہوتے۔'

ایسا کچھ نہیں ہے ذیشان صاحب۔' وہ کرسی سے اٹھی اور ایک طرف جا کر کھڑی ہو گئی۔ 'یہ صرف آپ کے ذہن کی فسوں کاری ہے۔ یہ محض فریبِ نظر ہے اور کچھ نہیں۔ انگریزی میں جسے الیوژن کہتے ہیں۔'

چلیں ایسا ہی سہی لیکن اس الیوژن کا کوئی سبب تو ہو گا۔ یہ ایک دن کی، ایک لمحے کی یا ایک مختصر وقت کی بات تو نہیں۔'

سبب جان کر آپ کیا کریں گے۔ بہت سی باتوں کے سبب نہیں ہوتے بس وہ ہو جاتی ہیں۔'

میں آپ کی بات سے اتفاق نہیں کرتا۔ مجھے تو لگتا ہے ہر بات کا کوئی نہ کوئی سبب ضرور ہوتا ہے۔ چاہے ہم اس تک پہنچ پائیں یا نہیں، اسے جان پائیں یا نہیں۔'

تو ٹھیک ہے آپ اس کو اس طرح کہہ لیں، سبب ہوتا ضرور ہے مگر ہم میں اتنی سکت نہیں، اتنی قوت نہیں کہ ہم اس کو مکمل طور پر جان پائیں۔ تو پھر کیا اتنا مان لینا کافی نہیں کہ کوئی ہے جو کہتا ہے ہو جا تو وہ چیز ہو جاتی ہے۔'

ذیشان نے باہر دیکھا اسے ایسا لگا باہر تیز آندھی چل رہی ہے مگر بغیر کسی آواز کے۔۔۔ درخت وغیرہ بڑی تیز رفتاری سے جھول رہے تھے مگر ایک پتا تک کھڑکنے کی آواز نہیں آرہی تھی۔ ہوا بہت زوروں کی چل رہی تھی لیکن اس کا شور سنائی نہیں دے رہا تھا۔ اس نے کھڑکی کے قریب ہو کر آواز سننے کی کوشش کی مگر باہر مکمل سکوت تھا۔

لگتا ہے باہر طوفان ہے لیکن اس کی آواز کیوں نہیں آرہی ایسا خاموش طوفان میں نے زندگی میں کبھی نہیں دیکھا۔'

کبھی یوں بھی ہوتا ہے ذیشان صاحب۔طوفان ہماری زندگی میں خاموشی سے آتا ہے اتنا کہ ہمیں اس کا احساس تک نہیں ہوتا۔ لیکن جب وہ گزر جاتا ہے تو ہمیں ادراک ہوتا ہے کہ وہ اپنے ساتھ کیا کچھ لے گیا۔'

کچھ دیر تک وہاں رہنے کے بعد وہ باہر نکل آیا۔ اسے بالکل بھی معلوم نہ ہو سکا کہ وہ کتنی دیر تک کمرے میں رہا کیونکہ اندر وہ وقت کا درست اندازہ نہیں لگا پاتا تھا۔ کبھی اسے لگتا وقت بہت تیزی سے بیت رہا ہے اور کبھی یوں محسوس ہوتا وقت یہاں موجود ہی نہیں۔

وہاں سے نکل کر وہ اپنے کمرے میں چلا آیا۔ رات کو دیر سے سونے کی وجہ سے صبح اس کی آنکھ بھی قدرے دیر سے کھلی۔ نہا دھو کر اس نے اپنا سامان باندھا کیونکہ رات کو ہی وہ فیصلہ کر چکا تھا کہ وہ اب واپس لوٹ جاۓ گا۔ دن کے وقت صغیر صاحب کے کمرے میں بیٹھے ہوۓ اس نے ان کے پاس سارہ کی تصویر دیکھی۔ وہ ان سے ان کی بڑی بیٹی کی بابت کچھ پوچھنے چاہتا تھا مگر وہ خاموش رہا۔ انہیں یہ بتا کر کہ وہ آج رات واپس جا رہا ہے سلام دعا کرنے کے بعد وہاں سے چلا آیا۔ اس کا ارادہ سارہ سے آخری بار مل کر جانے کا تھا اس لیے اس نے رات تک کا انتظار کیا۔ رات سارہ کو اس نے بتایا کہ وہ جارہا ہے تو سارہ نے کہا۔

اتنی جلدی ابھی تو آپ کو بس چند دن ہی ہوۓ ہیں۔'

جی۔' اس نے کہا۔ 'مجھے لگتا ہے اپنے ناول کے لیے جو مواد درکار تھا وہ مجھے مل گیا ہے۔ میرا نہیں خیال اس سے زیادہ میں یہاں سے کچھ حاصل کر پاؤں گا۔ اور اس کے علاوہ میرا اپنا کام بھی ہے اس کا بھی حرج ہو رہا ہے۔'

چلیں جیسے آپ کی مرضی۔' اس نے اس سے نظریں ہٹائیں اور باہر دیکھنے لگی۔

اس نے اس کی آنکھوں اور چہرے کو غور سے دیکھا اسے لگا کہ وہ شاید نہیں چاہتی کہ وہ یہاں سے جاۓ۔ اس نے قدرے توقف کے بعد اس سے پوچھا۔

کیا آپ اب بھی کچھ نہیں بتائیں گی؟'

کیا؟' اس نے چونک کر اس کی طرف دیکھا۔ 'کیا بتاؤں میں؟'

اپنے بارے میں اور اپنی بہن کے بارے میں۔۔۔ وہ بات جو صرف آپ جانتی ہیں۔'

میں کچھ نہیں جانتی۔' اس نے پھر سے نظریں پھیر لیں اور باہر ہوا سے جھولتی درختوں کی شاخوں کو دیکھنے لگی۔

تو پھر کم سے کم اپنا رابطہ نمبر ہی دے دیجئیے۔' قدرے توقف کے بعد اس نے کہا۔ 'تاکہ میں آپ سے رابطے میں رہوں اور مجھے آپ کے بارے میں کچھ تو معلوم ہو سکے۔'

یہ نہیں ہو سکتا ذیشان صاحب۔' اس نے ہنستے ہوۓ کہا۔

اس کی ہنسی میں غم اور دکھ کی ایسی جھلک تھی جو اس کے لہجے میں بھی نمایاں طور پر ظاہر ہو رہی تھی۔ وہ ایک طرف چل کر دیوار کے ساتھ ٹیک لگا کر کھڑی ہو گئ اور فضا میں کہیں دیکھتے ہوۓ بولی۔ 'میں آپ کو بہت کچھ تو نہیں بتا سکتی لیکن ایک وعدہ کرتی ہوں۔'

کیا؟'

آج رات کو اسٹیشن چھوڑنے سے پہلے آپ کو میرے بارے میں ایک بات پتہ چل جاۓ گی۔ جو میرا خیال ہے کافی ہو گی۔'

اچھا کیا واقعی؟'

جی۔'

مجھے انتظار رہے گا۔' اس نے کہا اور کمرے سے نکل آیا۔ اس کے نکلتے ہی اردگرد کی فضا میں تبدیلی آنا شروع ہو گئ۔ دھیرے دھیرے سنسان پلیٹ فارم آباد ہونے لگا۔ اس کی ٹرین کچھ دیر بعد تھی اس لیے اس نے کمرے سے اپنا سامان لیا، چابی ملازم کے حوالے کی اور خود چاۓ والے کے پاس جا کر بیٹھ گیا۔ چاۓ والے نے اس کے ہاتھ میں سامان دیکھا تو اس سے پوچھا۔

آپ واپس جا رہے ہیں؟'

ہاں۔ میں نے سوچا اب چلنا چاہیے کافی دن ہو گۓ ہیں۔ لیکن جانے سے پہلے میں تم سے ایک بات پوچھنا چاہتا ہوں یہ بتاؤ صغیر صاحب کی بیٹی جو فوت ہو گئی ہے کہاں فوت ہوئی تھی گھر پر یا کہیں باہر؟'

اسی ریلوے اسٹیشن میں اسی پلیٹ فارم پر فوت ہوئی تھی۔'

اچھا۔۔۔ تو ان کی جو چھوٹی بیٹی ہے وہ کہاں ہوتی ہے اور کیا کرتی ہے؟'

چھوٹی بیٹی؟' اس نے خیرت سے کہا۔ 'ان کی تو کوئی چھوٹی بیٹی نہیں۔'

کیا مطلب؟'

ہاں ان کی تو ایک ہی جوان بیٹی تھی جو مر چکی ہے۔'

اس نے فوراً صغیر صاحب کے کمرے کی طرف دیکھا۔ وہاں اندھیرا تھا۔ لیکن ساتھ ہی بتی جل اٹھی۔ پھر بجھ گئی۔ بتی بار بار جل اور بجھ رہی تھی۔ روشنی میں اس نے سارہ کو کھڑکی کے پاس کھڑے دیکھا وہ اسی کی طرف دیکھ رہی تھی۔ اس کی آنکھیں ویسی ہی حسین اور پر کشش لگ رہی تھیں اور اس کے چہرے پر غم آمیز تبسم پھیلا تھا۔ اسٹیشن چھوڑنے سے پہلے اس کو جواب مل چکا تھا۔ ٹرین کی سیٹی بجی اس نے چونک کر ادھر دیکھا۔ پھر اس نے دوبارہ کھڑکی کی جانب دیکھا وہاں سارہ موجود نہیں تھی۔ اس نے سر ہلا کر چاۓ والے کو آخری بار سلام کیا اور آہستہ سے چلتا ہوا ٹرین کی جانب بڑھنے لگا۔ سوار ہوتے وقت اس نے آخری مرتبہ کمرے کی طرف دیکھا مگر وہاں کوئی بھی نہیں تھا۔

ذوقِ آشیاں

2026-09-08T04:47:57.249+05:00

زندگی میں انسان بہت سے دوسرے انسانوں سے محبت کرتا ہے، اولاد سے محبت کرتا ہے، والدین سے محبت کرتا ہے اسی طرح مرد عورت سے اور عورت مرد سے محبت کرتی ہے مگر اشتیاق صاحب کا معاملہ ذرا مختلف تھا انہیں اپنے مکان سے بے حد محبت تھی۔ دن رات وہ اس کی دیکھ بھال میں لگے رہتے تھے۔ جس طرح کسی نوجوان کو اپنی نئی موٹر سائیکل یا کسی بچے کو اپنی نئی نئی سائیکل سے محبت ہوتی ہے اور وہ اسے بڑے پیار سے اور چاؤ سے رکھتا ہے، ذرا سا کہیں دھول مٹی کا کوئی دھبہ نظر آ جاۓ تو فوراً اسے صاف کرنے لگتا ہے اور اسے بڑی احتیاط سے سنبھال کر رکھتا ہے بالکل یہی حال اشتیاق صاحب کا بھی تھا۔ وہ بھی اپنے مکان میں جہاں بھی کوئی معمولی سی خرابی دکھائی دیتی تھی اسے فوراً درست کرنے میں لگ جاتے تھے۔ دیواروں پر پیار سے اس طرح ہاتھ پھیرتے تھے جیسے کوئی باپ اپنے بچے کے سر پر لاڈ سے ہاتھ پھیرتا ہے۔ دروازوں اور کھڑکیوں کو بڑی نرمی سے اس طرح پکڑتے تھے جیسے انہیں کوئی تکلیف پہنچتی ہو۔ جس وقت بھی وہ گھر پر ہوتے بس اسی کی دیکھ بھال میں لگے رہتے تھے یوں جیسے کوئی تیماردار اپنے کسی عزیز مریض کی دیکھ بھال کرتا ہے۔

اس وقت بھی جب وہ گھر میں داخل ہوۓ تو انہوں نے سودا سلف کے شاپر میز پر رکھے اور بلند آواز سے اپنی بیوی کو پکار کر اپنے آنے کی اطلاع دی اور فوراً دراز سے پیچکس اور پلاس وغیرہ نکال کر اس لکڑی کے دروازے کو ٹھیک کرنے میں جت گۓ جس کو کھولتے اور بند کرتے وقت اس کی چولوں میں سے چر چر کی آواز آتی تھی۔ دروازے کو درست کرکے انہوں نے اسے اچھی طرح ہلا جلا کر دیکھا اور اپنی تسلی کر چکنے کے بعد وہ کھڑکی کی جانب بڑھے جو کھلتے وقت ذرا سا اٹکتی تھی۔ ان کی بیوی آئی اور اشتیاق صاحب کو دیکھ کر کہنے لگی 'آپ پھر سے اس کو لے کر بیٹھ گۓ، اس گھر کو اور تو کچھ ہو نہ ہو آپ نے اسے رگڑ رگڑ کے ضرور گھسا دینا ہے۔' اشتیاق صاحب نے اپنی بیوی کی بات پر زیادہ دھیان نہ دیا اور اپنے کام میں لگے رہے۔ ان کی بیوی سودا سلف کے شاپر اٹھا کر چلی گئی جبکہ انہوں نے اچھی طرح کھڑکی کو درست کیا اور جب انہیں مکمل طور پر اطمینان حاصل ہو گیا کہ کھڑکی اب بالکل ٹھیک ہے تو واپس آکر انہوں نے پیچکس وغیرہ کو دراز میں رکھا اور اکر صوفے پر بیٹھ کر اردگرد کسی اور چیز کا جائزہ لینے لگے۔

اس گھر کا سب سے خوبصورت اور سب سے نمایاں حصہ یہ حال تھا جو لونگ روم کا کام دیتا تھا جس میں اس وقت اشتیاق صاحب بیٹھے تھے۔ یوں تو یہ پورے کا پورا گھر انہوں نے خود اپنے ذوق کے مطابق ڈیزائن کروایا تھا مگر اس لونگ روم پر انہوں نے خاص طور پر توجہ دی تھی۔ اپنی عمر کا ایک طویل حصہ انہوں نے کراۓ کے ایک چھوٹے سے بدصورت اور حستہ حال گھر میں گزارا تھا اس لیے بچپن سے انہیں اپنے ایک خوبصورت گھر کی تمنا تھی مگر اب جب ان کی عمر ڈھل گئی تھی تو انہیں اپنا یہ گھر نصیب ہوا تھا۔ یہ گھر زیادہ بڑا تو نہیں تھا مگر اس کو بنانے میں ان کی تمام جمع پونجی صرف ہو گئ تھی۔ اس مکان کی خاص بات یہ تھی کہ اس کا آرکیٹیکچر جدید طرز کی چکا چوند والی کوٹھیوں کی بجاۓ پرانے طرز کے مکانوں سے ملتا جلتا تھا۔ سب سے پہلے صحن، پھر کھلا ڈھلا برآمدہ جس کے درمیان میں ایک دو ستون تھے جن پر بیل بوٹوں سے بڑی دیدہ زیب نقاشی کی گئی تھی اور اس کے بعد بڑا سا حال جس میں ٹی وی وغیرہ رکھا تھا اور اس کے گرد چند کمرے اور باورچی خانہ تھا۔ کھڑکیاں اور روشن دان بڑے بڑے تھے۔ فرنیچر نہایت عمدہ اور سادہ تھا جس میں جدید طرز کے صوفوں کی بجاۓ پرانی طرز کی کرسیاں، پیڑھے اور موڑھے تھے جو کسی زمانے میں ہمارے پنجاب کے دیہاتوں اور شہروں میں گھروں کی زینت تھے۔ یہ پورے کا پورے گھر اور فرنیچر پرانے مشرقی طرز کے گھروں کو سامنے رکھ کر بنایا گیا تھا اور جدید طرز کی کوٹھیوں سے جتنا ہو سکے اجتناب کیا گیا تھا۔ اس طرح کا گھر بنانا ہمیشہ سے اشتیاق صاحب کا سب سے بڑا خواب رہا تھا جو اب کہیں جا کر پورا ہوا تھا۔ تمام گھر کھلا ڈھلا، ہوادار اور روشن تھا۔ حال کے داخلے میں لکڑی کا ایک دیوہیکل قسم کا دروازہ تھا جو درمیان سے کھلتا تھا اور کھل کر دو حصوں میں بٹ جاتا تھا۔ یہ دروازہ تمام دن کھلا رہتا تھا جس سے روشنی شام تک حال کے اندر آدھے حصے تک پڑتی تھی۔ اس کے علاوہ برآمدے میں بڑی بڑی چکیں لگائی گئ تھیں جو خوبصورتی کے علاوہ گرمیوں میں دھوپ سے بچاؤ کے کام آتی تھیں۔ وہاں بھی بڑے بڑے پیڑھے اور چند کرسیاں پڑی تھیں جن پر چھوٹے چھوٹے نہایت خوبصورت پھول بڑی نفاست سے کاڑھے گۓ تھے۔ کرسیوں اور پیڑھوں کو رنگنے اور ان پر نقش و نگاری کا کام بھی اشتیاق صاحب نے اپنے ذوق کے مطابق خود کروایا تھا۔ صحن میں مرکزی دروازے کے پاس سیڑھیاں تھیں جو اوپر چھت پر جاتی تھیں۔ چھت بھی صاف ستھرا اور کھلا ڈھلا تھا جہاں چند آہنی کرسیاں اور ایک میز پڑا تھا۔ سادگی، نفاست اور قدیم طرز تعمیر کے امتزاج نے اس گھر کی خوبصورتی کو چار چاند لگا دیۓ تھے اور اسے مزید پرکشش بنا دیا تھا۔

اشتیاق صاحب ابھی وہیں بیٹھے بیٹھے گھر کی کسی اور چیز میں کوئی خرابی تلاش کر رہے تھے کہ باہر سے ان کی بڑی بہن اور بیٹی اندر داخل ہوئیں۔ انہوں نے ہاتھوں میں ڈھیر سارے شاپنگ بیگ پکڑ رکھے تھے جو انہوں نے آتے ہی میز پر پھینکے اور خود آکر صوفوں پر گر گئیں۔ ان کی بیٹی کہنے لگی 'ابو قسم سے پھوپھو کے ساتھ خریداری کرنا بڑا مشکل ہے ایک ایک دکان میں اتنی اتنی دیر لگاتی ہیں میری تو حالت خراب ہو گئ تھی۔'

'تو کیا کروں دیکھے بغیر ہی کوئی چیز لے لوں؟ دیکھ بھال کر ہی کچھ خریدنا پڑتا ہے ورنہ دکانداروں کا کیا ہے وہ تو کوئی بھی گھٹیا چیز تھما دیں۔'

ان کی باتیں سن کر اشتیاق صاحب کی بیوی بھی آگئی اور کہا 'سب کچھ لے آئیں کچھ رہ تو نہیں گیا؟'

نہیں ابھی کل پھر جانا پڑے گا۔' ان کی بیٹی نے جواب دیا۔

یہ سن کر اشتیاق صاحب نے فوراً کہا 'دو دن رہ گۓ ہیں شادی کو اور تم لوگوں کی ابھی تک خریداری ختم نہیں ہوئی؟'

ان کی بیوی تنک کر بولی 'جیسے آپ کو تو بڑی فکر ہے شادی کی۔ کیا بتاؤں آپاں ان کو اپنی بیٹی کی شادی کی کم اور اس مکان کی فکر زیادہ ہے۔ ہر وقت تو اسی میں لگے رہتے ہیں۔'

آۓ ہاۓ کبھی تو اس کی جان چھوڑ بھی دیا کرو اشتیاق۔' ان کی بہن نے کہا۔ 'تم تو اس گھر کے پیچھے پاگل ہی ہو گۓ ہو اچھا بھلا تو ہے پھر کیا ٹھیک کرنے میں لگے رہتے ہو۔'

میں تو یہ دیکھ رہا تھا آپاں کوئی چیز خراب ہے تو ٹھیک کر دوں کل سے گھر میں مہمان آنے شروع ہو جائیں گے اچھا تو نہیں لگتا شادی والے گھر میں کوئی چیز خراب ہو۔'

ابو کو یہ بہانہ مل گیا ہے ورنہ اس کے علاوہ بھی یہ ہر وقت یہی کرتے رہتے ہیں۔' ان کی بیٹی نے کہا۔

شادی کے دن بھی اشتیاق صاحب کو بس یہی فکر دامن گیر تھی کہ گھر میں آۓ مہمان بالخصوص بچے کسی چیز کو خراب نہ کر دیں۔ اس لیۓ وہ ہر وقت ان پر نظر رکھتے اور اگر کوئی بچہ ذرا سی بھی شرارت کرنے لگتا تو اسے فوراً ڈانٹ کر بھگا دیتے۔ جب شادی بخیر و عافیت گزر گئی اور انہوں نے اپنی بیٹی کو رخصت کر دیا تو وہ گھر کے ایک ایک کمرے میں گۓ اور ہر کونے کو بڑی باریک بینی سے دیکھا کہ شادی کے ہنگام میں اگر کوئی چیز بگڑ گئی ہو تو اسے ٹھیک کر دیں۔ تمام گھر ٹھونک بجا کر دیکھنے کے بعد انہیں کئ چیزوں میں نقص نظر آۓ لہذا وہ فوراً بازار گۓ اور کیلیں اور پیچ اور اس طرح کی جس جس چیز کی ضرورت تھی خرید لاۓ۔ صحن میں دروازے کے پاس اور اوپر سیڑھیوں پر جو چند گملے رکھے تھے جو شاید بچوں نے کھیلتے ہوۓ یا کسی اور سے گزرتے ہوۓ ٹوٹ گۓ تھے وہ بھی ساتھ لے لاۓ اور دوبارہ انہیں اسی جگہ پر سجا دیا جس جگہ وہ پہلے موجود تھے۔ البتہ کرسی کی ایک ٹانگ اور موڑھے کا کپڑا ایک جگہ سے پھٹ گیا تھا جسے وہ دکان پر مرمت کے لیۓ دے آۓ تھے۔ برآمدے کی دیوار سے ایک جگہ پلستر اکھڑ گیا تھا جسے وہ فوراً ٹھیک کروانا چاہتے تھے مگر مصروفیت کی وجہ سے یہ کام انہوں نے فراغت یا چھٹی کے دن تک کے لیے موخر کر دیا تھا۔

اگلے کئ دن تو وہ مصروف رہے مگر جب انہیں کچھ فراغت حاصل ہوئی تو وہ بازار گۓ اور کرسی اور موڑھا جو انہوں نے مرمت کے لیے دیۓ تھے لے کر گھر آگۓ۔ شام کو اچانک ان کی بیوی کی طبعیت خراب ہو گئی تو وہ انہیں فوراً ہسپتال لے گۓ۔ ڈاکٹر نے معائنے کے بعد جو بتایا اسے سن کر اشتیاق صاحب کو کافی دھچکا لگا۔ ڈاکٹر نے کہا کہ ان کی بیوی کو کینسر کی طرح کی کوئی بیماری ہے جس کا علاج خاصا مشکل اور طویل ہے اور یہ کہ جلد از جلد اس کا علاج شروع کرنا پڑا گا ورنہ مریض کو کافی نقصان پہنچ سکتا ہے۔ ڈاکٹر سے علاج کے بارے میں چند ضروری ہدایات اور معلومات لینے کے بعد وہ اپنی بیوی کو لے کر گھر آگۓ۔ انہوں نے اپنی بیوی کو کمرے میں لٹایا اور خود باہر برآمدے میں آگۓ۔ اپنی بیوی کی حالت کے علاوہ انہیں یہ پریشانی بھی لاحق تھی کہ ڈاکٹر نے جو علاج بتایا تھا اس کے لیے ڈھیر سارا روپیہ درکار تھا اور یہ گھر بنوانے اور اپنی بیٹی کی شادی کرنے کے بعد ان کے پاس اب پھوٹی کوڑی نہیں بچی تھی۔ ان کے کام سے جو انہیں آمدن حاصل ہوتی تھی اس سے محض گھر کا خرچ وغیرہ چلتا تھا لیکن اتنی ساری اکٹھی رقم کا حصول ان کے لیے ناممکن تھا۔ اگلے کئی دنوں تک انہوں نے ادھر ادھر سے روپیہ اکھٹا کرنے کی کوشش کی مگر جو رقم وہ جمع کر پاۓ وہ علاج کے لیے بہت ہی ناکافی تھی۔ ڈاکٹر نے انہیں ایک مرتبہ پھر یہ کہا کہ علاج فوراً نہ کیا گیا اور اگر پوری طرح احتیاط نہ کی گئی تو مریض کے لیے خطرناک ہو سکتا ہے۔ اس کے علاوہ اس نے یہ بھی کہا کہ ممکن ہے چند دن تک سرجری بھی کرنی پڑے۔

اشتیاق صاحب نے بہت ہاتھ پاؤں مارے مگر روپیہ نہ ملنا تھا نہ ملا۔ بالآخر ان کے پاس روپیہ حاصل کرنے کا ایک ہی ذریعہ بچا تھا اس لیے انہوں نے فوراً فیصلہ کر لیا۔ انہوں نے گھر کے کاغذات نکالے اور باہر نکلنے والے تھے جب ان کی بیوی نے انہیں روک لیا اور کہا۔ 'اس گھر کو بیچنے جا رہے ہیں جو آپ نے بڑی محنت سے بنایا ہے اور جو آپ کو بہت عزیز ہے۔

ہاں عزیز تو ہے۔' اشتیاق صاحب نے کہا۔ 'مگر اس کے علاوہ اور کوئی چارا بھی تو نہیں۔ کوئی بھی چیز جس سے ہمیں چاہے کتنی ہی محبت کیوں نہ ہو انسان کا نعم البدل تو نہیں ہو سکتی۔

اگر اور کوئی چارا نہیں تو آپ ایسے ہی رہنے دیں، جیسے چلتا ہے چلنے دیں جو ہو گا دیکھا جاۓ گا'۔

'نہیں ایسے تو بالکل بھی درست نہیں۔'

'مگر یہ بھی تو سوچیے ہم رہیں گے کہاں؟'

کہیں بھی رہ لیں گے۔ یہ گھر تو ابھی بنا ہے اس سے پہلے بھی تمام عمر ہم کہیں نہ کہیں رہتے ہی رہیں ہیں'۔

ان کی بیوی نے انہیں گھر بیچنے سے بہت روکا مگر وہ جانتے تھے کہ مزید دیر نہیں کی جا سکتی۔ اگلے چند ہی دنوں میں مکان بک گیا اور انہوں نے اس گھر کو چھوڑنے اور دوسری جگہ منتقل ہونے کی تیاری شروع کر دی۔ آخری شب جب آنے والی صبح انہیں گھر کو ہمیشہ ہمیشہ کے لیے خیرباد کہنا تھا وہ تمام رات انہوں نے بیداری میں کاٹی۔ گھر کے ایک ایک کونے کو ہاتھ سے چھو کر یوں دیکھا جیسے اس کا لمس محسوس کر رہے ہوں۔ چھت پر گۓ تو گھنٹوں وہاں کھڑے رہے اور پھر نیچے آکر برآمدے اور صحن میں ٹہلنا شروع کر دیا۔ صبح جب وہ اپنی بیوی کو لے کر گھر سے نکل رہے تھے تو آخری مرتبہ انہوں نے پیچھے مڑ کر دیکھا۔ ایسے لگا جیسے وہ اپنی آنکھ کے کیمرے میں گھر کے آخری لمحات کی تصویر لے کر ہمیشہ کے لیے محفوظ کر لینا چاہتے ہوں۔

لاوارث لاش

2026-08-27T02:50:40.406+05:00

وہ آدمی جو اس وقت فٹ پاتھ کے پاس سڑک پر اوندھے منہ پڑا تھا اپنی شکل و صورت سے اس قدر معصوم و پاکیزہ دکھائی دے رہا تھا لگتا تھا بارش نے اس کی روح کے داغ تک دھو ڈالے ہیں اور وہ تمام گناہ جو اس نے اپنی زندگی میں کیے تھے وہ بارش کے پانی میں بہہ کر تحلیل ہو گۓ ہیں۔ وہ سڑک پر یوں پڑا تھا جیسے اپنے گھر کے نرم و گداز بستر پر الٹا لیٹ کر گہری نیند سو رہا ہو۔ اس کے گرد جو چند آدمی کھڑے تھے اس کی نبض ٹٹول کر اور سانسوں کو جانچ کر تصدیق کر چکے تھے کہ یہ آدمی مر چکا ہے لیکن ان میں سے کوئی بھی نہیں جانتا تھا کہ اس کی لاش یہاں کیسے پہنچی یا اس کے ساتھ کیا حادثہ پیش آیا۔ کسی کا کہنا تھا شاید کوئی گاڑی والا ٹکر مار کر فرار ہو گیا ہے اور کسی کے مطابق اسے دل کا دورہ پڑا تھا۔ یہ سب قیاس آرائیاں تھیں کیونکہ وہ تمام لوگ جو اس وقت موجود تھے ان میں سے کسی نے بھی اسے یہاں گرتے ہوۓ نہیں دیکھا تھا۔ اردگرد جو چند دکانیں اور عمارتیں تھیں ان میں سے بھی کوئی اس بارے میں نہیں جانتا تھا۔ اس سڑک پر بے شمار واقعات و حادثات ہوتے رہتے تھے کبھی دو موٹر سائیکل سواروں کا آپس میں تصادم ہوتا کبھی کوئی گاڑی کسی سے ٹکرا جاتی مگر ان تمام حادثات کا اردگرد کے لوگوں اور راہ گیروں کو ضرور پتہ چلتا لیکن یہ واقعہ ایسا تھا کہ کسی کو اس بارے میں کچھ بھی معلوم نہیں تھا۔ بارش مسلسل ہو رہی تھی اور وہ ابھی تک بالکل اسی طرح سڑک کے کنارے پڑا تھا۔ کسی نے بھی اس کی جیبوں کی چھان بین کرنے کی کوشش نہیں کی تھی جس سے اس آدمی کے بارے میں کچھ پتہ چلتا کیونکہ لوگوں کا خیال تھا اس کو کسی نے پہلے قتل کیا ہے اور پھر بعد میں اس کی لاش کو یہاں لاکر پھینک دیا ہے کیونکہ اگر اسے یہاں مارا جاتا یا اس کے ساتھ یہاں کوئی حادثہ پیش آیا ہوتا تو اردگرد کے لوگوں کو اس کی ضرور بھنک پڑتی اور انہیں فوراً پتہ چل جاتا مگر لگتا تھا کسی نے سوچ سمجھ کر اسے یہاں پھینکا ہے کیونکہ اس طویل سڑک کے اس حصے پر علاقہ قدرے سنسان تھا اردگرد بس چند دکانیں تھیں اور مکانات تو نہ ہونے کے برابر تھے۔ مسلسل بارش کی وجہ سے ٹریفک اور رش بھی بہت کم تھا۔ اس لیے لوگ اس کی لاش کو زیادہ چھیڑنے سے کترا رہے تھے کیونکہ وہ خواہ مخواہ کسی چکر میں پھنسنا نہیں چاہتے تھے۔ جب کچھ دیر گزر گئی اور اس آدمی کے بارے میں کچھ بھی پتہ نہ چل سکا تو کسی نے پولیس کو اطلاع دینے کا مشورہ دیا لہٰذا فوراً پولیس کو اطلاع کر دی گئی مگر پچھلے دو تین دنوں سے لگاتار بارشوں کی وجہ سے شہر بھر کی سڑکوں پر ڈھیر سارا پانی جمع تھا جس سے راستے تقریباً بند ہو چکے تھے اور یہ علاقہ شہر کے مرکز سے کافی ہٹ کر شہر سے باہر واقع تھا جس کو صرف ایک پل کے ذریعے شہر سے جوڑا گیا تھا جو ایک برساتی نالے کے اوپر سے گزرتا تھا اور جو ان دنوں تیز بارشوں اور سیلاب کے سبب ٹوٹ کر بہہ گیا تھا جس سے اس علاقے کا رابطہ شہر سے منقطع ہو چکا تھا۔ اس لیے گاڑیوں کی آمدورفت کا سلسلہ مکمل طور پر بند تھا۔ جب مزید کچھ وقت بیت گیا اور پولیس کے آنے کے آثار دکھائی نہ دیۓ تو وہاں پر موجود لوگ آہستہ آہستہ کرکے چھٹنے لگے۔ جن کی دکانیں پاس ہی تھیں وہ اپنی اپنی دکانوں میں جا گھسے اور جو راہگیر تھے وہ اپنے اپنے راستے ہو لیے۔ صرف چند آدمی اور کچھ نوجوان جو فارغ تھے محض وقت گزاری کی خاطر وہاں ٹھہرے رہے۔ آدمی خوش گپیوں میں مصروف ہو گۓ اور نوجوان اس آدمی کی لاش کی ویڈیو اور تصاویر بنانے میں مشغول ہو گۓ۔ کسی وقت کوئی گاڑی والا یا موٹر سائیکل سوار گزرتے ہوۓ ٹھہر جاتا اور مرے ہوۓ آدمی کے بارے میں چند ایک باتیں دریافت کر کے آگے بڑھ جاتا۔ کچھ تھے جو نہ جانے کس ضروری کام کے لیے اتنی بارش میں گھر سے نکلے تھے مگر اب یہیں ٹھہر گۓ تھے۔ جب کچھ وقت اور بیت گیا تو ایک آدمی نے کہا کہ پولیس سے دوبارہ رابطہ کرنا چاہیے اور ان سے دریافت کرنا چاہیے کہ وہ ابھی تک یہاں پہنچی کیوں نہیں۔ جواب میں پولیس نے وہی عذر پیش کیا کہ پل ٹوٹنے سے راستہ بالکل بند ہو گیا ہے اس لیے وہاں پہنچنا خاصا دشوار ہے لیکن انہوں نے تسلی دی کہ وہ جلدازجلد کوئی بندوبست کرکے وہاں پہنچنے کی کوشش کرتے ہیں۔ پولیس سے بات کرنے کے بعد آدمی جو بارش سے بچنے کے لیے کونوں کھدروں میں مختلف ٹولیوں میں کسی نہ کسی سائبان کے نیچے کھڑے تھے اب واپس انہی جگہوں پر پناہ لے چکے تھے۔ جبکہ نوجوان جو پہلے تصاویر اور ویڈیوز وغیرہ بنانے میں مصروف تھے اب ایک طرف ہٹ کر ذرا فاصلے پر بڑے سے درخت کے نیچے جا کھڑے ہوۓ تھے اور ہنسی ٹھٹھوں میں مگن ہو گۓ تھے۔ اس آدمی کی لاش کو ابھی تک کسی نے بھی سیدھا نہیں کیا تھا وہ جیسے پہلے اوندھی پڑی تھی بالکل اسی طرح ابھی بھی ویسے ہی پڑے پڑے بارش میں بھیگ رہی تھی۔ جو لوگ یہاں سے ہو کر گۓ تھے ان کی بدولت جب یہ بات دوسرے لوگوں تک جو یہاں نزدیک ہی رہائش پذیر تھے یا یہاں کام دھندہ کرتے تھے ان تک پہنچی تو ان میں سے بہت سے لوگ خصوصاً نوجوان لڑکے اس پراسرار مردہ آدمی کو دیکھنے چلے آۓ۔ کچھ ہی دیر میں یہاں لوگوں کا اچھا خاصا تانتا بندھ گیا۔ ایک طرف چند آدمی کھڑے مردہ آدمی کے بارے میں گفتگو کر رہے تھے تو دوسری طرف دوسری ٹولی پولیس پر اظہارِ خیال کر رہی تھی۔ چند نوجوان جو ابھی ابھی پہنچے تھے ویڈیوز وغیرہ بنانے میں جت گۓ تھے۔ لوگ آتے تھے اور تھوڑی دیر ٹھہر کر لوٹ جاتے تھے، پھر اور لوگ آتے تھے پہلے سے موجود لوگوں سے تمام قصے کے بارے میں چند باتیں دریافت کرتے تھے اور وہ بھی لوٹ جاتے تھے۔ کئی ایسے تھے جو شروع وقت سے وہیں موجود تھے۔ بہت سی ادھیڑ عمر اور عمر رسیدہ عورتیں گزرتے ہوۓ گاڑی، موٹرسائیکل یا رکشے وغیرہ کو کچھ دیر کے لیے ٹھہرا لیتی تھیں اور مردہ آدمی کو دیکھ کر کفِ افسوس ملتے ہوۓ آگے بڑھ جاتیں تھیں۔ لوگوں کی اتنی گہما گہمی دیکھ کر کچھ پھیری والے اور ٹھیلے والے بھی آدھمکے اور یہاں آکر اپنی اپنی دکان لگا لی۔ شام تک یہ سلسلہ یونہی چلتا رہا۔ بارش کسی کسی وقت تھم جاتی مگر کچھ دیر بعد دوبارہ برسنے لگتی تھی۔ شام کے بعد جب اندھیرا پھیلنے لگا تو لوگ اپنے اپنے گھروں کو لوٹنے لگے یہاں تک کہ وہ لوگ بھی جو بہت پہلے سے وہاں موجود تھے وہ بھی اپنے گھروں کو چل دیۓ اور وہاں سواۓ اس مردہ آدمی کے اور کوئی بھی موجود نہ رہا۔ بارش کی وجہ سے ٹریفک کا سلسلہ بھی تقریباً رک گیا تھا اس لیے وہ ویران علاقہ تاریکی اور بارش کے سبب اور بھی زیادہ تاریک، اجاڑ اور سنسان دکھائی دینے لگا تھا۔ تھوڑی دیر کے لیے بارش رکی تو کہیں سے دو تین آوارہ کتے نکل کر آۓ اور چلتے چلتے اس مردہ آدمی کے پاس آگۓ جو ابھی بھی بالکل اسی طرح سڑک پر پڑا تھا۔ ایک کتا آگے بڑھا اور لاش کو سونگھنے لگا پھر اس نے اپنی زبان اس کے منہ کے پاس لے جا کر اسے چاٹنا شروع کر دیا۔ دوسرے کتوں نے بھی اس کی پیروی کی اور لاش کو اپنے جبڑوں اور زبان سے بھنبھوڑنے اور چاٹنے لگے۔ بارش دوبارہ شروع ہوگئ تو وہ لاش کو چھوڑ کر بھاگ گۓ۔

موسم اور ادب

2026-06-24T03:26:55.122+05:00

موسموں اور ادب کا بڑا پرانا اور بڑا گہرا تعلق ہے، تقریباً ہر دوسرے شعر اور نثر پارے میں آپ کو موسموں کا ذکر ضرور ملتا ہے جس میں ہر اچھا شاعر و ادیب اپنے پروازِ تخیل اور اندازِ بیان سے اسے اتنا پر تاثیر بنا دیتا ہے کہ پڑھنے والا اس سے لطف اندوز ہوۓ بغیر نہیں رہ سکتا۔ مگر یہ زبان و بیان کی فنکاریاں اور تخیل کی پروازیاں شاعری اور فکشن میں تو جچتی ہیں اسی لیے موسموں کو پر لطف انداز میں انہی صنفوں میں بیان کیا جا سکتا ہے جبکہ انہیں کسی غیر افسانوی مضمون میں بیان کرنا بالکل ایسا ہی ہے جیسے آپ محمکہ موسمیات میں کام کرتے ہیں اور لوگوں کو موسم کی صورتحال کی جانکاری یا آگاہی کے لیے کوئی تحریر لکھ رہے ہیں۔

موسموں میں شاعروں کا جو سب سے پسندیدہ اور چہیتا موسم ہے وہ موسم بہار ہے۔ اگر آپ شعر و ادب سے تھوڑا سا بھی شغف رکھتے ہیں تو یقیناً آپ جانتے ہوں گے کہ جتنا اس موسم کو شاعروں نے سر پر چڑھا رکھا اور کسی موسم کو نہیں رکھا۔ سینکڑوں، ہزاروں شعر ایسے بتاۓ جا سکتے ہیں اور کئی ایسے فن پارے پیش کیۓ جا سکتے ہیں جن میں اس موسم کو کسی نہ کسی صورت میں ضرور بیان کیا گیا ہے۔ چاہے آپ رومانوی شاعری پڑھیں یا انقلابی اس موسم کا ذکر لازماً آۓ گا۔ کسی نے اس موسم کو یونہی رومانٹسائز کیا ہے اور کسی نے اسے اپنے انقلابی پیغام کے اظہار کے لیے محض استعارۃً بیان کیا ہے۔ معلوم نہیں انہیں اس موسم سے کیا انسیت ہے۔ البتہ یہ بات ضرور ہے کہ یہ موسم واقعتاً بہت دلکش، حسین اور لاجواب ہے۔ اس موسم کا حسن، دلفریبی اور رومان باکمال ہے۔ لیکن مسئلہ یہ ہے کہ اگر آپ کسی ایسے علاقے میں رہائش پذیر ہیں جہاں صرف بڑی بڑی عمارتیں ہیں اور درخت، پھول، پودے و سبزہ یا ہریالی وغیرہ نہیں تو آپ کو اس موسم کا احساس تک نہیں ہو گا اور یہ چپ چاپ گزر جاۓ گا۔ اس لیے کہ اس موسم کا سارا حسن و خوبی اس لیے ہے کہ اس موسم میں کلیاں کھلتی ہیں، شگوفے پھوٹتے ہیں اور رنگ برنگے پھول کھلتے ہیں جن پر تتلیاں آ کر بسیرا کرتی ہیں، کئی رنگوں کے پرندے بھانت بھانت کی بولیاں بولتے اور نغمے گنگناتے ہیں۔ اردگرد ہریالی ہے اور پھولوں کی خوشبو ہے جو ہر سو پھیلی رہتی ہے۔ مجھے ابھی بھی اپنے بچپن کے وہ دن یاد ہیں جب ابھی کم سے کم میرے شہر میں بڑی بڑی عمارتیں، جدید طرز کے جوتوں کپڑوں وغیرہ کی رنگین دکانیں اور وسیع و عریض شاپنگ مالز کا رواج نہیں ہوا تھا تو شہر بھر میں ڈھیر سارے درخت، پھول اور سبزہ تھا۔ اب تو پورے شہر میں کوئی کھلی جگہ نظر نہیں آتی بلکہ ایک چھوٹا سا کونا بھی اگر خالی ملتا ہے تو اگلے دن وہاں پر کسی نۓ برانڈ کی دکان یا ریستوران کھل جاتا ہے۔ کوئی قریہ ایسا نہیں بچا جو اس ترقی سے آلودہ نہ ہوا ہو۔ جبکہ اس وقت جب درختوں کی بہتات تھی تو دور دور سے پرندے آکر یہاں ڈیرے ڈالتے تھے۔ غروبِ آفتاب کے وقت جب بھی آسمان پر نگاہ ڈالتے تھے تو پرندوں کے مختلف گروہ وقفوں وقفوں سے واپس اپنے گھونسلوں کو لوٹتے ہوۓ دکھائی دیتے تھے۔ دس پندرہ سفید رنگ کے بڑے بڑے پرندوں کا ایک غول مشرق سے مغرب کی سمت جا رہا ہے تو اس کے تھوڑی دیر بعد اس کے پیچھے چند چھوٹے رنگین پرندوں کا ایک جھنڈ چلا آرہا ہے۔ پاس ہی کہیں سے چڑیاں چہچہاتی ہوئی سنائی دے رہی ہیں اور کئ دیگر پرندے ہوا میں تیر رہے ہیں۔ رات کے وقت خصوصاً بہار کی راتوں میں اکثر اوقات پودوں اور پھولوں کے پاس جگنو اڑتے ہوۓ دکھائی دیتے تھے۔ جب میں کافی چھوٹا تھا تو کئی بار اڑتے ہوۓ جگنو کو پکڑ اپنی قمیص کی آگے والی جیب میں ڈال لیتا تھا جس سے باہر سے دیکھنے میں وہ جلتی اور بجھتی ہوئی دکھائی دیتی تھی۔ کتنی کتنی دیر تک ہم بچے جگنوؤں کو مٹھیوں میں پکڑ کھیلتے رہتے تھے اور اس کے جلنے بجھنے کے عمل سے محظوظ ہوتے رہتے تھے۔ یہ عجیب سے کھیل شاید اب بہت عجیب لگتے ہوں مگر تب موبائل اور گیجٹس وغیرہ ابھی ہم تک نہیں پہنچے تھے اس لیے اس وقت اسی قسم کے کھیل کھیلے جاتے تھے۔ مجھے نہیں معلوم وہ دور اچھا تھا یا یہ اچھا ہے۔ میں یہ بھی نہیں جانتا کہ میں نے جس ماحول میں اپنا بچپن گزارا وہ بہتر تھا یا جو بچے اب گزار رہے ہیں وہ بہتر ہے۔ میں ان دونوں میں کوئی موازنہ بھی نہیں کر رہا ہے۔ مجھے اس بات کا بھی علم نہیں کہ میرے ہم عمر یا وہ لوگ جو میری ہی طرح اس قسم کے عجیب و غریب کھیل کھیل کر بڑے ہوۓ اب اتنے سارے تغیرات کو دیکھ کر کیا محسوس کرتے ہیں اور ان کی پسند کیا ہے، یہ جدید طرزِ حیات یا وہ طرزِ زندگی جو انہوں نے اپنے بچپن اور لڑکپن میں گزارا۔ ممکن ہے ان کے خیالات اور ان کے احساسات اس بارے میں مجھ سے مختلف ہوں لیکن جہاں تک میری ذات کا تعلق ہے مجھے نیچر کے قریب رہنا زیادہ پسند ہے۔

بہار کے بعد جس دوسرے موسم کا ذکر ادب میں سب سے زیادہ ملتا ہے وہ خزاں اور پت جھڑ کا موسم ہے۔ شاعری و ادب میں اس موسم میں پتوں کے گرنے، برگ و بار کے جھڑنے اور درختوں کے بالکل خشک ہو جانے کے عمل کو زوال، غم اور اداسی کی علامت کے طور پر پیش کیا جاتا ہے۔ کسی کو محبوب کی جدائی کا غم ہے تو وہ خواہ مخواہ اپنے شعروں میں خزاں کو بدنام کرتا چلا جا رہا ہے، کسی کو قوم کے زوال کا تذکرہ چھیڑنا ہے تو اسے بھی پت جھڑ کا موسم ملتا ہے اور اگر کسی کو زندگی و سماج کے دکھوں، مصائب اور مسائل پر ٹسوے بہانے ہیں تو بھی وہ اس موسم کا سہارا لے رہا ہے۔ اے لوگو! اگر تمہیں اپنے رنج و غم کا اظہار کرنا ہے تو شوق سے کرو لیکن بے چارے خزاں و پت جھڑ کے موسم کو کیوں بیچ میں لاتے ہو۔ اس نے تم لوگوں کا کیا بگاڑا ہے۔ اگر آپ مجھ سے پوچھیں تو سچی بات ہے مجھے تو اس موسم میں کوئی بھی غم، دکھ اور اداسی والی بات نظر نہیں آتی بلکہ مجھے تو اس موسم میں بھی بڑی راحت و مسرت کا احساس ہوتا ہے۔ اس موسم کا بھی اپنا ایک حسن ہے۔ جب درخت اپنا سبز خلعت اتار کر اور پتے اپنا رنگ بدل کر آہستہ آہستہ زمین پر اترتے ہیں تو یہ منظر بھی اپنے اندر بڑی جاذبیت رکھتا ہے۔ ہاں البتہ جب درخت سے پتے مکمل طور پر جھڑ جاتے ہیں اور پیچھے صرف خشک ٹہنیاں رہ جاتی ہیں تو اس وقت اس کی خوبصورتی اور کشش ضرور ماند پڑتی ہے مگر حقیقتاً اس موسم کا لطف بھی کسی دوسرے موسم سے کم نہیں۔ مگر اس کے ساتھ بھی المیہ یہ ہے کہ اس موسم کا بھی ادراک و احساس آپ کو تب ہی ہوتا ہے جب آپ کے اردگرد درخت، پھول اور پودے وغیرہ ہوں اور آپ نیچر کے قریب رہ رہے ہوں۔ ورنہ یہ موسم بھی آپ کو بغیر اطلاع دیۓ خاموشی سے گزر جاتا ہے۔

ان دو موسموں کے علاوہ ادب کا سب سے محبوب موسم موسمِ برسات ہے۔ ہر دوسرا شاعر بارش پر شعر کہنے کو اپنا فرضِ منصبی سمجھتا ہے۔ نثر میں بھی اکثر اس موسم کا بیان کسی نہ کسی صورت ضرور آتا ہے۔ یہ ایک ایسا موسم ہے جس سے تقریباً ہر خطے کے لوگ مستفید ہوتے ہیں، چاہے آپ سرد علاقوں میں رہ رہے ہوں یا گرم مرطوب خطوں میں بارشیں ہر جگہ برستی ہیں بلکہ کئ علاقوں میں تو بے تحاشا بارشیں ہوتی ہیں اتنی کے کئی کئی دنوں تک چلتی ہیں جسے عموماً جھڑی لگنا کہا جاتا ہے۔ ہمارے ہاں بھی ساون کی جھڑی بہت عام ہے اس لیے شعر و ادب میں بھی اس کا بہت ذکر ملتا ہے۔ بارشوں سے ندی، نالے، جھیلیں، دریا بھر جاتے ہیں اور پھول، پودے، سبزہ نکھر کر تر وتازہ ہو جاتا ہے جس سے ان کا حسن دوبالا ہو جاتا ہے۔ میری اپنی بچپن کی بہت سی یادیں اس موسم سے وابستہ ہیں۔ اکثر ایسا ہوتا کہ شدید گرمی ہے اور سب کا برا حال ہوا جا رہا ہے اتنے میں اچانک آسمان پر بادل نمودار ہونا شروع ہوگۓ اور کچھ ہی دیر میں جل تھل ہو گیا۔ ہم بچے اپنے اپنے گھروں سے نکل آتے اور پانی سے بھری گلیوں میں دوڑتے بھاگتے رہتے۔ کسی میدان میں یا کسی کھلی جگہ پر ڈھیر سارا پانی اکٹھا ہو جاتا جس سے وہاں ایک تالاب سا بن جاتا، ہم وہاں گھس جاتے اور دیر تک وہاں ایک دوسرے پر پانی پھینکتے، چھینٹے اڑاتے اور دوڑتے بھاگتے رہتے۔ بارشوں سے لطف اندوز ہونے کے اور بہت سے طریقے لوگوں نے نکالے ہیں اور ان میں سے ایک مختلف اقسام کے پکوان تیار کرنا بھی ہے۔ سردیوں کی بارشیں ہوں یا گرمیوں کی باذوق لوگ اس میں پکوڑے، سموسے، سوپ، چاۓ، کافی وغیرہ کا لازماً اہتمام کرتے ہیں۔ جو لوگ یہ سب چیزیں کھانے سے عموماً پرہیز کرتے ہیں معلوم نہیں کیوں بارشوں کے دنوں میں ان کا بھی یہ سب کچھ کھانے کو جی للچا اٹھتا ہے۔ ان کے علاوہ جو نہایت اعلیٰ قسم کے باذوق لوگ ہیں وہ بارشوں سے لطف اندوز ہونے کے لیۓ کچھ اور اہتمام بھی کرتے ہیں لیکن ان کا ذکر یہاں مناسب نہیں۔

جہاں باذوق لوگوں کی کئ اقسام ہیں وہیں بارشوں کی بھی بہت سی قسمیں ہیں۔ سب سے پہلے نمبر پر آتی ہیں وخشی بارشیں۔ یہ ایسی بارشیں ہوتی ہیں جو نہایت بدتمیزی سے برستی ہیں، یہ غیض و غضب سے بھری رہتی ہیں اور سب کچھ تہس نہس کر دیتی ہیں یہ تنہا آتی بھی نہیں بلکہ اپنے ساتھ تند و تیز ہوائیں بھی لے آتی ہیں۔ ان بدتہذیب بارشوں سے لطف اندوز ہونا تو درکنار لوگ ان سے پناہ مانگتے ہیں۔

دوسری قسم کی بارشیں وہ بارشیں ہوتی ہیں جنہیں سست و بے ضرر بارشیں کہا جاتا ہے۔ یہ اس قدر سست رفتاری سے برستی ہیں کہ معلوم ہی نہیں ہوتا برس رہی ہیں کہ رکی ہوئی ہیں۔ یہ بارشیں اس قدر بے ضرر ہوتی ہیں کہ آپ کو بالکل بھی بھگوتیں یا نقصان نہیں پہنچاتیں۔ اگر آپ ایک گھنٹہ بھی ان میں کھڑے رہیں تو یونہی لگتا ہے کہ آپ کو بس گدگدی کرنے آئی ہیں۔ ایسی بارشوں کو عرفِ عام میں بونداباندی کہا جاتا ہے۔

بارشوں کی تیسری قسم وہ ہے جنہیں آپ ترچھی بارشیں کہہ لیں انہیں آپ لاغر و معذور بارشیں بھی کہہ سکتے ہیں کیونکہ یہ کبھی سیدھی نہیں برستیں بلکہ ترچھی یا ٹیڑھی برستی ہیں۔ آپ سڑک پر جا رہے ہیں اور ان سے بچنے کے لیے آپ کسی سائبان کے نیچے پناہ لیتے ہیں، آپ سمجھتے ہیں کہ اب آپ ان سے محفوظ ہو گۓ لیکن یہ وہاں بھی پہنچ جاتی ہیں اور آپ کو اپنا شکار بنا لیتی ہیں۔ اسی طرح آپ کمرے کے اندر بیٹھے ہیں اور بارش کی آواز سن کر کھڑکی کے پٹ کھولتے ہیں، جونہی آپ نے پٹ کھولے یہ فوراً آپ کو دیکھ لیتی ہیں اور آپ پر وار کر دیتی ہیں۔ آپ نے اپنے بچاؤ میں چاہے جتنی بھی پھرتی سے قدم پیچھے ہٹاۓ ہوں یا کھڑکی کے پٹ بند کرنے کی کوشش کی ہو یہ اس سے پہلے اپنا کام کر چکتی ہیں۔

اس کے بعد آتی ہیں چالاک اور مکار بارشیں۔ ان کا کوئی بھروسہ نہیں ہوتا، یہ اس پل برس رہی ہیں تو اگلے ہی پل آپ کو لگے گا کہ یہ تو بالکل خاموش ہو گئیں۔ آپ کسی کام سے باہر جانے کا ارادہ کرتے ہیں جونہی آپ نے قدم باہر رکھے یہ تیزی سے برسنے لگتی ہیں، آپ جلدی سے واپس آجاتے ہیں اور آکر جیسے ہی صوفے پر بیٹھتے ہیں یہ اچانک تھم جاتی ہیں۔ آپ چند لمحے بیٹھ کر انتظار کرتے ہیں جب آپ کو مکمل طور پر یقین ہو جاتا ہے کہ یہ تھم چکی ہیں تو آپ اٹھ کر باہر نکل جاتے ہیں ابھی آپ نے آدھا راستہ بھی طے نہیں کیا ہوتا کہ یہ دوبارہ اتنی تیزی سے برسنے لگتی ہیں کہ آپ نہ آگے جانے کے قابل رہتے ہیں اور نہ واپس آنے کے۔ ان بارشوں کی ایک مکارانہ چال یہ بھی ہوتی ہے کہ آپ جس جگہ کھڑے ہیں وہاں یہ خوب برس رہی ہیں آپ گاڑی یا موٹر سائیکل پر یا پیدل ذرا سا فاصلہ طے کر آگے جاتے ہیں تو دیکھتے ہیں وہاں تو سوکھا پڑا ہے بالکل خشک سالی کا سا سماں ہے۔ آپ خیرت سے مڑ کر پیچھے دیکھتے ہیں تو آپ کو دکھائی دیتا ہے کہ پیچھے کچھ فاصلے پر جہاں سے آپ چلے تھے وہاں تو یہ زاروقطار برس رہی ہیں۔ ایسی بارشیں آپ کو کنفیوز کرنے کے لیے کبھی کبھی دھوپ کے ساتھ بھی برستی ہیں۔

اور آخر میں آتی ہیں وہ بارشیں جو بڑی سیدھی سادی اور بھولی بھالی ہوتی ہیں۔ ایسی بارشیں بڑی باکمال ہوتی ہیں جو بڑے سیدھے اور سادے طریقے سے برستی ہیں۔ ایسی بارشیں برستی تو خوب ہیں مگر مجال ہے جو آپ کی فصلوں، عمارتوں یا اور کسی بھی چیز کو ذرا سا بھی نقصان پہنچائیں۔ اس طرح کی بارشیں جب بھی آتی ہیں آپ کو کوئی تکلیف پہنچاۓ بغیر اچھی طرح برس کر جاتی ہیں۔ ان بارشوں سے سب اچھی طرح مستفید اور لطف اندوز ہوتے ہیں۔

موسموں میں ایک موسمِ سرما بھی ہے جسے ادب میں بہت سراہا جاتا ہے اور اکثر اوقات خوب رومانٹیسائز بھی کیا جاتا ہے۔ خصوصاً برف باری کا موسم تو ہر ایک کا محبوب موسم ہے۔ جو لوگ ان علاقوں میں رہتے ہیں جہاں برف باری نہیں ہوتی وہ خاص طور پر پیسے خرچ کرکے ان علاقوں میں گھومنے جاتے ہیں جہاں برف باری ہو رہی ہو۔ بہت سے ایسے لوگ ہیں جو جانا تو چاہتے ہیں مگر جا نہیں پاتے تو میں ان سے کہوں گا ایسا بھی کیا ہے اس موسم میں بس برف ہی تو ہے۔ اگر آپ کو برف دیکھنے کا زیادہ شوق ہے تو آپ کے گھر میں فریزر ضرور ہو گا خوب برف جمائیں اور خوب دیکھیں اتنی دور جا کر دیکھنے کا بھی کوئی تک ہے اور اگر آپ یہ کہتے ہیں کہ محض برف نہیں بلکہ برف باری سے لطف اندوز ہونا چاہتے ہیں تو جناب کسی کو کہیں وہ برف لے کر چھت پہ جاۓ اور اوپر سے خوب برف باری کرے۔ اب آپ یہ کہیں گے یہ تو سنگ باری کے مترادف لگتا ہے۔ تو دوستو یہ بھی اگر۔۔۔

مفت ہاتھ آۓ تو برا کیا ہے۔۔۔

اس کے بعد آتا ہے وہ موسم جس سے ادب میں سوتیلوں سا سلوک کیا جاتا ہے۔ ایسا نہیں کہ اس کا ذکر نہیں کیا جاتا، ذکر تو کیا جاتا ہے اور خوب کیا جاتا ہے مگر بڑے برے الفاظ میں کیا جاتا ہے۔ اس موسم سے کسی کو چاہت نہیں اس لیے ادب میں اسے ولن کے طور پر پیش کیا جاتا ہے۔ سب اس کے لتے لیتے ہیں اور اسے ایک ظالم کے طور پر پیش کرتے ہیں۔ کوئی اس کی شدت کا بڑا خوفناک اور تکلیف دہ منظر پیش کرتا ہے اور کوئی جو زیادہ انقلابی ہے وہ اسے مزدوروں اور کسانوں کا بدترین دشمن قرار دیتا ہے۔ سب اس کی سختیوں سے تنگ ہیں۔ لیکن ایسا بھی نہیں کہ اس موسم کی کہیں بھی پذیرائی نہیں کی جاتی ہمارے ہاں نہ سہی مگر سرد علاقوں میں جہاں یہ موسم بہت تھوڑی دیر کے لیۓ آتا ہے اور جس کی شدت بھی اتنی نہیں ہوتی وہاں اس کی خوب آؤ بھگت کی جاتی ہے۔ اس لیے ان کے ادب میں اس موسم کے بھی محاسن بیان کیۓ جاتے ہیں جو ہمیں زہر لگتا ہے۔ کئ ایسی نظمیں حتیٰ کہ گیت بھی آپ کو مل جائیں گی جو اس موسم کو بھی رومانٹیسائز کرتی ہیں۔ ہمارے ہاں بھی اس موسم سے لطف اندوز ہونے کے لیے لوگوں نے چند ایک طریقے نکال ہی لیے ہیں۔ اکثر لوگ خصوصاً لڑکے بالے اس موسم میں نہروں، ندی، نالوں، ٹیوب ویلوں اور تالابوں میں نہاتے ہوۓ پاۓ جاتے ہیں۔ وہاں آپ کو ایسے لوگ بھی مل جاتے ہیں جو سال بھر میں بس انہی دنوں نہاتے ہیں۔ ایسے لوگ جب پانی میں اترتے ہیں تو پانی شرم سے پانی پانی ہو جاتا ہے، شاید اسی لیے اس کی رنگت بدل جاتی ہے۔

نہانے کے علاوہ اس موسم کا لطف یہ ہے کہ اس موسم میں کئی اقسام کی اشیاۓ خورونوش کی دکانیں گلیوں اور سڑکوں میں کھل جاتی ہیں۔ کہیں گنے کی رو کی دکان نظر پڑتی ہے تو کہیں املی آلو بخارے کی ریڑھی لگی دکھائی دیتی ہے۔ ایک طرف باداموں والے شربت کا ٹھیلہ ہے تو دوسری طرف لیمن سوڈا پینے کو مل جاتا ہے۔ ان کے علاوہ گھروں میں بھی لسی اور دیگر کئی طرح کے شربت بنا کر پیے جاتے ہیں اور برف گولہ، آئس کریم اور فالودہ وغیرہ تو بنے ہی اس موسم کے لیے ہیں۔ لیکن ان سب سے بڑ کر اگر کوئی لطف واقعی اس موسم کا ہے تو وہ راتوں کو چھت پر یا کھلے آسمان کے نیچے سونا ہے۔ شہروں میں کھلے میں سونے کا رواج تو تقریباً ناپید ہو چکا ہے مگر دیہاتوں میں ابھی بھی بہت سے لوگ کھلے میں سوتے ہیں۔ رات کی تاریکی، سکوت اور اوپر تاروں بھرے پراسرا آسمان کا بھی اپنا چارم ہے جو آپ کو مسحور کر دیتا ہے۔

یہ تمام موسم یقیناً بہت عمدہ ہیں لیکن ان سب سے صرف اسی وقت مستفید ہوا جا سکتا ہے جب آپ کو تمام بنیادی ضروریات زندگی میسر ہوں اور بنیادی حقوق اور آزادی حاصل ہو۔ جبر و استحصال و نا انصافی کے موسم میں نہ تو ذہنی سکون حاصل ہو سکتا ہے اور نہ ہی کوئی لطف کشید کیا جا سکتا ہے چاہے آپ یوگا کریں، میڈیٹیشن کریں، تھراپی لیں یا عبادت کریں۔

فراغت کے فوائد اور مصروفیت کے نقصانات

2026-06-07T07:10:19.773+05:00

آپ نے بہت سی باتوں اور بہت سے کاموں کے فوائد سنے ہوں گے جیسے کہ ورزش کے فوائد، صبح کی سیر کے فوائد یا سبزیاں کھانے کے فوائد وغیرہ۔ لیکن آپ نے کبھی بھی فراغت کے فوائد نہیں سنے ہوں گے۔ آپ نے کبھی یہ نہیں سنا ہو گا یا کہیں نہیں پڑھا ہو گا کہ فارغ رہنے کے یہ یہ جسمانی، ذہنی، فکری، مالی یا سماجی فوائد ہوتے ہیں۔ آپ نے کبھی کسی کی سی وی میں یہ لکھا نہیں دیکھا ہو گا کہ میرا اتنے برس فارغ رہنے کا تجربہ ہے یا مہارتوں کے خانے میں اس نے یہ درج کیا ہو کہ مجھے فارغ رہنے کے مختلف طریقوں پر عبور حاصل ہے۔ اسی طرح کسی لڑکی یا لڑکے کا رشتہ کرتے وقت کوئی یہ نہیں کہتا کہ ہماری لڑکی یا لڑکے کو فارغ رہنے پر جو ملکہ حاصل ہے کسی اور کو حاصل نہیں۔ لیکن ان سب کے باوجود میں نے فراغت کے چند فوائد بہرحال دریافت کر لیے ہیں۔ جو آپ کو بھی بتاۓ دیتا ہوں۔

فارغ رہنے کا سب سے بڑا فائدہ یہ ہے کہ آدمی فلسفی بننے کے بہت قریب پہنچ جاتا ہے۔ وہ ان باتوں پر بھی غور کرتا چلا جاتا ہے جنہیں عموماً توجہ کے قابل نہیں سمجھا جاتا۔ مثلاً چھت والے پنکھے کے تین پر کیوں ہیں چار کیوں نہیں۔ اگر پر کم رکھنے کے پیچھے حکمت یہ تھی کہ اس سے ہوا زیادہ ملتی ہے تو پھر تین کی جگہ دو پر کیوں نہ رکھے گۓ؟ بالکل اسی طرح فراغت میں یہ بات بھی قابلِ غور بن سکتی ہے کہ جب ہوا کا ہلکا سا جھونکا آتا ہے یا بارش کا ایک قطرہ گرتا ہے تو بجلی کیوں بند کر دی جاتی ہے اور پھر جب بارش یا ہوا رک جاتی ہے تو بجلی اسی وقت واپس کیوں نہیں آتی وہ چار، پانچ گھنٹے بعد کیوں آتی ہے؟ لوڈشیڈنگ کو تو ہم سمجھ سکتے ہیں لیکن بارش اور ہوا کی وجہ سے بجلی بند کرنے کے پیچھے کیا منطق ہے یہ بالکل سمجھ سے باہر ہے۔ یہ میرے خیال میں اس سوال سے بڑا سوال ہے کہ کائنات کسی ازخود حادثے کا نتیجہ ہے یا اس کے پیچھے کوئی منصوبہ ساز ہے، یا یہ سوال کہ وقت کی تخلیق کب ہوئی؟ یا پھر یہ کہ کائنات میں پھیلے ہوۓ ڈارک میٹر کا کیا راز ہے؟ بہرحال بارش یا ہوا کے سبب بجلی جانے کا راز ابھی تک راز ہے اور کائنات کے تمام رازوں سے بڑا راز ہے۔

دوسرا بڑا فائدہ جو فارغ رہنے کا ہو سکتا ہے وہ یہ کہ آپ سے کوئی ادھار نہیں مانگتا۔ اس بات پر کچھ انٹلکچول قسم کے لوگ یہ کہیں گے کہ اس سے آدمی خود بھی تو ادھار مانگنے کی حالت میں آجاتا ہے۔ ایسی بیہودہ اور بیکار قسم کی باتوں پر توجہ دینے کی چنداں ضرورت نہیں ایسے لوگوں کو تو ہر بات میں مین میخ نکالنے کی عادت ہوتی ہے۔ اس لیے آپ اپنی تمام تر توجہ فراغت کے فوائد پر مرکوز رکھیں۔

تیسرا فائدہ جو فارغ رہنے کا میرے نزدیک ہو سکتا ہے وہ یہ کہ جب آدمی کوئی کام کرتا ہے (ملازمت وغیرہ) تو اسے اس کام کا معاوضہ ملتا ہے جس سے اسے طرح طرح کی پریشانیاں لاحق ہو جاتی ہیں۔ اسے یہ فکر کھاۓ جاتی ہے کہ وہ اپنی محدود اور قلیل آمدنی کو کہاں کہاں اور کیسے خرچ کرے۔ بجلی، گیس کے بل بھرنے ہیں، بچوں کے سکول کی فیس دینی ہے، کوئی بیمار ہو جاۓ تو اس کا علاج کرانا ہے۔ گھر کا کرایہ دینا ہے، اس کے علاوہ کھانے پینے اور دیگر سینکڑوں اخراجات کو پورا کرنا ہے۔ یہ سب باتیں اسے پریشان کیۓ رکھتی ہیں مگر جب آدمی مکمل طور پر فارغ ہو تو اس کے پاس آمدنی ہو گی نہیں اس لیۓ اسے کیسے اور کہاں خرچ کرنے والی تمام پریشانیوں اور دباؤ سے وہ محفوظ رہے گا۔

فراغت کا ایک اور فائدہ یہ ہوتا ہے کہ فارغ انسان کے پاس ڈھیر سارا وقت ہوتا ہے یہ سوچنے کے لیے کہ کن کن طریقوں سے مزید فارغ رہا جا سکتا ہے۔

فارغ رہنے کی اہمیت کا اندازہ آپ اس بات سے بھی لگا سکتے ہیں کہ غالب بھی فراغت کے فوائد سے بخوبی آگاہ تھے اسی لیے تو انہوں نے کہا تھا۔

جی ڈھونڈتا ہے پھر وہی 'فراغت' کے رات دن۔۔۔

بات فراغت کے فوائد کی ہو رہی ہے تو اس کے ساتھ اگر مصروفیت کے نقصانات کا ذکر بھی کر لیا جاۓ تو کیا ہرج ہے۔ کیونکہ جہاں فراغت کے فائدے ہیں وہاں مصروفیت کے نقصانات بھی تو ہو سکتے ہیں۔ لہذا میرے نزدیک مصروفیت کا سب سے بڑا نقصان یہ ہے کہ مصروف آدمی زندگی کو بالکل سمجھ نہیں سکتا کیونکہ وہ زندگی کو بہتر بنانے میں جٹا رہتا ہے۔ جبکہ سیانوں کا کہنا ہے کہ زندگی کو بہتر بنانے سے زیادہ زندگی کو سمجھنا ضروری ہے اور زندگی کو سمجھنے کے لیے فارغ رہنا بہت ضروری ہے۔

مصروفیت کا ایک اور نقصان یہ ہے کہ مصروف آدمی بعض اوقات مالی طور پر آسودگی و خوشحالی حاصل کر لیتا ہے جس سے اس کے اندر تکبر پیدا ہونے کا اندیشہ ہوتا ہے۔ جبکہ بڑے لوگوں بلکہ بہت بڑے بڑے لوگوں کا کہنا ہے کہ جس کام سے برائی پھیلنے کا اور نقصان کا ذرا سا بھی خدشہ ہو اس سے اجتناب کرنا چاہیے۔ اسی لیے عورتوں کو حجاب اور پردے پر مجبور کیا جاتا ہے کیونکہ اس سے مردوں کے بہکنے کا اندیشہ ہوتا ہے، اس کے علاوہ ان کو گھر کی چار دیواری میں رکھنے پر زور دیا جاتا ہے کیونکہ اس سے بے راہ روی پھیلنے کا خطرہ ہوتا ہے۔ سائنس اور عقل الحاد کی طرف لے جاتی ہیں اس لیے اس سے بھی دور رہنا ضروری ہے۔ مجھے لگتا ہے اس اصول کو ان امور کے علاوہ دیگر امور پر بھی لاگو کرنا چاہیے۔ جیسے کہ جہاز پر بیٹھنے پر پابندی ہونی چاہیۓ اس لیے کہ جہاز کے گرنے کا اندیشہ ہوتا ہے۔ دوا کھانے پر ممانعت ہونی چاہیۓ کیونکہ اس کے سائیڈ افیکٹس ہو سکتے ہیں۔ سیڑھیاں چڑھنے اترنے سے اجتناب کرنا چاہیے کیونکہ اس سے پاؤں پھسلنے کا خدشہ ہوتا ہے۔ بلکہ میرے خیال سے تو بچے پیدا کرنے پر ہی پابندی لگا دینی چاہیے کیونکہ یہی بچے بڑے ہو کر برائی اور گناہ کی طرف راغب ہوتے ہیں۔ جب بچے ہوں گے ہی نہیں تو وہ یقیناً بڑے بھی نہیں ہوں گے جب بڑے نہیں ہوں گے تو گناہ بھی نہیں کریں گے۔

ویسے میں اکثر سوچتا ہوں اس ملک میں رہنے کے کیا کیا سود و زیاں ہو سکتے ہیں؟ آپ چاہے مصروف رہیں یا فارغ یہاں رہنے کے نقصانات تو بغیر کسی تردد کے ڈھیروں گنواۓ جا سکتے ہیں مگر فائدہ تلاش کرنا خاصا دشوار ہے۔ اس بات کا ذکر جب میں نے اپنے ایک دوست سے کیا تو اس نے کہا 'اس ملک میں رہنے کا مادی فائدہ چاہے کوئی نہ ہو مگر ایک روحانی فائدہ بہرحال ضرور ہے۔' میں نے پوچھا وہ کیا؟ کہنے لگا۔ 'اس ملک میں رہ کر جب ہم بے روزگاری، مہنگائی، کم آمدنی، بجلی، گیس کی بندش، صاف پانی کی عدم دستیابی، کھڈوں سے بھرپور ناپائیدار سڑک، ہر سو گندگی، غلاظت، افراتفری، ہنگامہ آرائی و ہنگامہ خیزی اور اس قسم کے سینکڑوں ہزاروں مسائل کا سامنا کرتے ہیں جن کا ہم کچھ بھی نہیں بگاڑ سکتے اور سواۓ برداشت کرنے کے کچھ بھی نہیں کر پاتے تو اس سے ہم میں صبر کی قوت قوی ہوتی ہے۔ اسی طرح جب ہم یہ دیکھتے ہیں کہ اتنے سارے مسائل کے باوجود ہم ابھی تک زندہ ہیں اور سانسیں لے رہے ہیں تو ہم میں شکر کا جذبہ پیدا ہوتا ہے۔ صابر اور شاکر کو چونکہ جنت کی بشارت دی گئ ہے لہذا اس ملک میں رہنے کا یہ روحانی فائدہ ہے۔

جوں جوں میری عمر گزرتی جا رہی ہے مجھے اپنے دوست کی بات درست لگنے لگی ہے ویسے بھی کہا جاتا ہے یہ دنیا کی زندگی تو عارضی زندگی ہے جو محض دھوکے کے سوا کچھ نہیں۔ اصل زندگی اگلی زندگی ہے اس لیے اس کے پیچھے بھاگنے کی بالکل بھی ضرورت نہیں۔۔۔ آپ کا کیا خیال ہے؟

پاکستانیوں کے نام خط

2026-05-21T08:50:19.280+05:00

!پیارے پاکستانیو

امید ہے آپ سب خیریت سے ہوں گے۔ میں جو خط تحریر کرنے جا رہا ہوں وہ اصل میں ایک معافی نامہ ہے جسے انگریزی میں کنفیشن کہتے ہیں جو دراصل اپنی کسی غلطی یا گناہ کے اعتراف کے لیے لکھا جاتا ہے۔ میں نے بھی چاہا کہ اپنی غلطیوں اور کوتاہیوں کے اعتراف کے طور پر ایک معافی نامہ اہلیانِ پاکستان کے نام تحریر کروں۔ لہذا میں نے یہ خط لکھنے کا ارادہ کیا۔

پیارے پاکستانیو! میں یہ تسلیم کرتا ہوں کہ میں کل تک پاکستان کو ایک گھٹیا ملک اور پاکستانی قوم کو ایک گھٹیا قوم سمجھتا تھا۔ مجھے اس میں کئی طرح کی برائیاں نظر آتی تھیں۔ میں اعتراف کرتا ہوں کہ میں غلطی پر تھا۔ آج میں جان چکا ہوں کہ یہ ملک بہت شاندار ملک ہے اور یہ قوم سب قوموں سے برتر اور اعلیٰ ہے۔ اس کا نظامِ معیشت، معاشرت اور سیاست بہت عمدہ و باکمال ہے۔ لوگ بہت سچے، دیانتدار اور خوش اخلاق ہیں اور ایک دوسرے سے نہایت حسنِ سلوک سے پیش آتے ہیں۔ شرافت و پاکیزگی ان کے چہروں پہ لٹکتی دکھائی دیتی ہے۔۔۔معاف کیجیے میرا مطلب ہے چہروں سے ٹپکتی دکھائی دیتی ہے۔

میں یہ بھی تسلیم کرتا ہوں کہ یہاں بھوک و افلاس، بدحالی و بدانتظامی اور تنگ دستی و تنگ نظری کا دور دور تک نام و نشان نہیں۔ تعصب و نفرت اور بدامنی و بد عنوانی کا بھی کہیں گذر نہیں۔ بلکہ ہر فرد آزاد و خودمختار، خوشحال و خوش گوار اور پرامن و پر سکون زندگی بسر کر رہا ہے۔ سماجی انصاف کا یہ عالم ہے کہ مظلوم چاہے کسی بھی طبقے سے تعلق رکھتا ہو وہ بلا خوف و خطر عدالت کا دروازہ کھٹکھٹاتا ہے اور عدالت کو اسے انصاف مہیا کرنے میں ذرا بھی تردد نہیں ہوتا۔ بلکہ اکثر اوقات عدالت خود مظلوم کے دروازے تک جاتی ہے اور اسے انصاف مہیا کرکے لوٹتی ہے۔ رہا معاشی انصاف! تو جہاں دنیا میں ابھی تک کوئی ایک بھی انسانی معاشرہ ایسا نہیں جو معاشی لحاظ سے مکمل طور پر عدل پر قائم ہو یا ماضی میں رہا ہو، وہاں اس قوم نے عدل و مساوات پر مبنی ایسا شاندار معاشی نظام متعارف کرایا ہے کہ امیر و غریب کے درمیان تفاوت بالکل مٹ گیا ہے۔ اب شیر اور بکری ایک گھاٹ پر پانی پیتے ہوۓ نظر آتے ہیں۔ معلوم ہی نہیں ہو پاتا کہ شیر کون ہے اور بکری کون۔

مجھے لگتا تھا یہاں تعلیم کا نظام بھی بہتر نہیں مگر میں اعتراف کرتا ہوں کہ میں یہاں بھی غلط تھا۔ اس ملک میں ایسا غصب کا تعلیمی نظام رائج ہے جسے دوسری قومیں رشک کی نگاہ سے دیکھتی ہیں۔ کچھ قومیں تو حسد کی نگاہ سے بھی دیکھتی ہیں۔ (ایسے حاسدوں سے اللہ بچائے) حقیقتاً یہ خطہ اس قدر علم کا گہوارہ بن چکا ہے کہ دور دراز سے طالب علم یہاں کی اعلیٰ معیار کی درسگاہوں اور تعلیمی اداروں میں تعلیم پانے آتے ہیں۔ دنیا بھر سے علم کے متلاشی اپنی پیاس بجھانے جوق در جوق یہاں چلے آتے ہیں۔ سائنس، ادب، آرٹ، تاریخ، تخلیق کون سا شعبہ ایسا ہے جس میں اعلیٰ معیار کا کام نہیں ہو رہا۔ دنیا کے بڑے بڑے سائنسدان، شاعر، مفکر، ادیب، مؤرخ، فلاسفر سب اسی سرزمین سے تو نکلے ہیں۔

مجھے اس کا کوئی شہر، کوئی گاؤں بھی پسند نہیں تھا میں اس کے لیۓ بھی معافی کا طلبگار ہوں۔ اب میں مانتا ہوں یہاں کا ہر شہر اور ہر دیہات بہت شاندار اور بہت جاندار ہے۔ نہ صرف بڑے شہروں میں بلکہ چھوٹے شہروں یہاں تک کہ دور دراز کے دیہاتوں میں بھی تمام بنیادی سہولتیں میسر ہیں۔ ہر شہر اور گاؤں صفائی ستھرائی، نظم، نفاست اور حسن و جمال کا ایسا مرقع ہے کہ تمام دنیا کے لوگ خصوصاً سیاح اس کی ایک جھلک دیکھنے کے لیے ترستے ہیں اور یہاں آنے کے لیے مرے جاتے ہیں۔

بات کچھ لمبی ہو گئی۔ کہنے کا مطلب بس اتنا ہے کہ پہلے مجھے اس ملک کی یہ خوبیاں اپنی کوتاہ بینی کی وجہ سے دکھائی نہیں دیتی تھیں مگر اب میری آنکھیں کھل چکی ہیں اور مجھے ادراک ہو چکا ہے کہ یہ ملک و قوم کتنے بلند اوصاف کے مالک ہیں۔ اس قدر خوبیوں کی مالک سر زمین اور ایسے باکمال خصائل کے ملک کو چھوڑ کر جانے کو جی تو نہیں چاہتا مگر میں پھر بھی یہی بہتر سمجھتا ہوں کہ میں یہاں سے کسی دوسرے ملک چلا جاؤں۔ یہی میرے گناہوں کی سزا ہے۔ میں اس ملک میں رہنے کے بالکل بھی قابل نہیں۔ میں نے جتنی غلطیاں، گناہ اور جرائم کیے ہیں میں چاہتا ہوں ان کی پاداش میں مجھے ملک بدر کر دیا جاۓ اور کسی دوسرے جگہ (یورپ وغیرہ میں) پھینک دیا جاۓ۔ جب میں وہاں رہوں گا تو مجھے ٹھیک طرح اس بات کا احساس ہو گا کہ میں کس قدر عظیم ملک کی شان میں گستاخی کرتا رہا تھا۔ ایسی عظیم قوم تو دنیا کی تاریخ میں کبھی بھی نہیں آئی لیکن میں محض اپنے نا شکرے پن کی وجہ سے اس کی دی ہوئی نعمتوں کو سراہ نہ سکا۔ یہ سب کچھ میں وہاں جا کر محسوس کرنا چاہتا ہوں تا کہ میرے گناہوں کا 'پراسچت' ہو سکے۔

آپ کہیں گے میں نے اس ملک میں آنے کی جرات ہی کیوں کی تو دراصل اس میں میرا کوئی خاص قصور نہیں کیونکہ یہ فاش غلطی برسوں پہلے میرے والدین سے سرزد ہوئی تھی۔ انہی کی ملی بھگت کا نتیجہ تھا کہ میں یہاں آ دھمکا۔ یقین کیجیے اگر مجھے اپنی پیدائش پر ذرہ برابر بھی اختیار ہوتا تو میں شاید ایسی جرات و حماقت کبھی نہ کرتا۔ میرے والدین تو اب رہے نہیں لیکن اگر پھر بھی کوئی میرے والدین سے اس بات کی شکایت کا ارادہ رکھتا ہے تو وہ ان کے پاس جا کر براہِ راست اپنی شکایت پیش کر سکتا ہے مجھے کوئی اعتراض نہیں۔۔۔ اس سے زیادہ مجھے اور کچھ نہیں کہنا ۔

جملہ طرازیاں

2026-04-14T09:25:00.006+05:00

شیطان اور انسان میں فرق یہ ہے کہ شیطان نہایت شریف آدمی ہے۔

کہتے ہیں دوسروں کو نصیحت اور تلقین کرنا بھی نیکی ہے اس لیۓ سواۓ نصیحت کرنے کے میں اور کچھ نہیں کرتا۔

غصہ حرام ہے اور غصہ دلانے والا حرام زادہ۔

پرانے گانوں کو سن کر لگتا ہے موسیقی سچ میں روح کی غذا ہے جبکہ آج کل کے گانے سن کر یوں لگتا ہے موسیقی روح کی نہیں بلکہ بدروح کی غذا ہے۔

پاکستانی ڈرامے اور بھارتی ڈرامے میں بنیادی فرق یہ ہے کہ پاکستانی ڈرامہ بالآخر اختتام کو پہنچتا ہے جبکہ بھارتی ڈرامہ محد سے لحد تک ساتھ چلتا ہے۔

پاکستان سے نکلنا اور دور رہنا بھی کارِ ثواب ہے۔

شیطان رمضان میں قید ہو جاتا ہے مگر مسئلہ یہ ہے وہ قید ہو کر ہمارے ملک میں آجاتا ہے۔

جب اس ملک میں رہ کر کردہ اور ناکردہ گناہوں کی سزا اسی دنیا میں مل گئی ہے تو اگلی زندگی میں انہی گناہوں پر دوبارہ سزا ملنا سراسر زیادتی نہیں؟

خوشگوار، خوشحال اور پر سکون زندگی کے تین بنیادی اصول۔

سوشل میڈیا سے دور رہنا، میڈیا سے دور رہنا اور پاکستان سے دور رہنا

پاکستان میں بجلی اور بیوی کے موڈ کا کوئی بھروسہ نہیں دونوں کسی وقت بھی 'آف' ہو سکتے ہیں۔

بیویوں یا عورتوں کو خوش کرنا اتنا آسان نہیں انہیں اگر آسمان سے ستارے توڑ کر بھی لا دیں تو کہیں گی یہ تو ٹوٹے ہوۓ ہیں ہم نے نہیں لینے۔

شادی سے پہلے ہر لڑکی ہونہار لگتی ہے لیکن شادی کے بعد یہی لڑکی خونخوار بن جاتی ہے۔

حسنِ جاناں

2025-05-25T04:05:00.003+05:00

گرمیوں میں حبس کا موسم مجھے بالکل بھی پسند نہیں۔ اس موسم میں طبعیت میں اک عجیب سی بیزاری پیدا ہو جاتی ہے اور مزاج بھی کچھ بوجھل سا ہو جاتا ہے۔

مگر کبھی کبھار اس موسم میں ایسا خوشنما، خوش رنگ، خوشگوار واقعہ پیش آتا ہے کہ آدمی کی ساری بیزاری رفع ہو جاتی ہے اور طبعیت ہشاش بشاش ہو جاتی ہے۔

ایک دن صبح میں اپنے دفتر کے لیۓ گھر سے نکلا تو آسمان ابرآلود تھا اور حبس پہلے سے بہت بڑھ گیا تھا جو اس بات کا غماز تھا کہ بارش ہونے والی ہے۔ مجھے دیر ہو گئی تھی اس لیۓ میرا دوست احسن میٹرو اسٹیشن پر کھڑا بار بار کال پہ کال کرتا چلا جا رہا تھا۔ میں لمبے لمبے ڈگ بھرتا ہوا چل رہا تھا۔ تقریباً پانچ سات منٹ کے بعد میں میٹرو اسٹیشن پہنچ گیا۔ میں نے جلدی سے اوپر جا کر ٹوکن خریدا اور دوسری طرف سے سیڑھیاں اترنے لگا۔ احسن مجھے وہیں سے نظر آرہا تھا۔ وہ اپنی معمول کی جگہ پر کھڑا میرا انتظار کر رہا تھا جہاں سے ہم دونوں نے اپنی مطلوبہ گاڑی میں سوار ہو کر دفتر کی طرف روانہ ہونا تھا۔ میں جب اس کے پاس پہنچا تو وہ مجھے گالیاں دینے لگا اور کہنے لگا کہ تم کیوں اتنی دیر سے آۓ ہو۔ میں کب سے کھڑا تمہارا انتظار کر رہا تھا۔ میں نے اسے بتایا کہ میں رات کو شادی کے ایک فنکشن سے کافی دیر سے آیا تھا اس لیۓ صبح آنکھ نہیں کھل رہی تھی۔ جب ہم ان باتوں سے فارغ ہوۓ تو ایک گاڑی آکر سٹاپ پر لگی۔ یہ ہماری مطلوبہ گاڑی نہیں تھی جس پر سوار ہو کر ہم نے جانا تھا۔ چند مسافر گاڑی سے اترے اور چند دیگر مسافر جو ہمارے ساتھ کھڑے تھے اس گاڑی میں سوار ہو گۓ۔

میٹرو اسٹیشن کے اندر بھی بہت گرمی اور حبس تھی۔ میں نے اپنی ٹائی کو ڈھیلا کیا اور قمیض کا اوپر کا بٹن کھول دیا۔ چند لمحوں بعد میں نے گردن گما کر سیڑھیوں سے کسی کو اترتے ہوۓ دیکھا۔ میری نظر وہیں کی وہیں ٹھہر گئی۔ وہ ایک ایسی صورت تھی جو صرف خوابوں میں دکھائی دیتی ہے۔ اک ایسی صورت جو صرف کہانیوں اور داستانوں میں ملتی ہے۔ مجھ پر اک خواب کی سی کیفیت طاری ہو گئی۔ اسی خواب آلود کیفیت میں میں نے شیشے کی دیوار سے باہر جھانک کر دیکھا باہر بارش شروع ہو گئی تھی اور ہوا چلنے لگی تھی۔ موسم کا حبس جاتا رہا تھا۔ مزاج کی بیزاری دور ہو گئی تھی۔ وہ صورت سیڑھیوں سے اتر کر میرے قریب آکر کچھ فاصلے پر کھڑی ہو گئی۔ یہ فاصلہ میلوں کا فاصلہ تھا۔ یہ دوری برسوں کی دوری تھی۔ ابھی مجھے جسے طے کرنا تھا۔ میں اس صورت کا نام نہیں جانتا تھا مگر اسے دیکھتے ہی نام پتہ سب جاننا چاہتا تھا۔ میرا دوست چند قدم پر کھڑا نہ جانے کن سوچوں میں گم تھا۔ وہ ایسی باتوں کو بالکل نہیں مانتا تھا۔ وہ کہتا تھا یہ تو نہایت پاگل پن ہے کہ بندہ کسی شخص کو بس اک نظر دیکھے اور اس سے اتنی محبت کر بیٹھے کہ اس سے شادی کرنے پر آجاۓ۔ اس کا کہنا تھا میں شادی سے پہلے محبت کے خلاف نہیں لیکن بھلا شادی اور محبت جیسا ذمہ داری والا کام محض کسی کو اک نظر دیکھ کر کیا جا سکتا ہے؟ وہ کہتا تھا مجھے تو 'لو ایٹ فرسٹ سائٹ' اور 'ارینج میرجز' میں کوئی زیادہ فرق معلوم نہیں ہوتا۔ دونوں میں اک دوسرے کو بس اک تصویر یا اک نظر دیکھ کر پسند کر لیا جاتا ہے۔ لیکن کیا کسی کو پسند کرنے کا معیار صرف شکل و صورت ہے؟ دو لوگ جنہوں نے پوری زندگی ایک ساتھ رہنا ہے اگر وہ ایک دوسرے کی شخصیت کو جانے بغیر محض ایک تصویر دیکھ کر یا اک دوسرے کو ایک نظر دیکھ کر شادی کا فیصلہ کر لیں تو کیا یہ احمقانہ پن نہیں؟ کیا اس طرح کا انتخاب درست انتخاب ہو سکتا ہے؟

میرا دوست جو بھی راۓ رکھتا ہو سچ پوچھیں تو میں نے ان باتوں پہ کبھی غور نہیں کیا۔ عہدِ شباب میں تو رہا ایک طرف۔۔۔ اب جب کہ میں میں ایک پختہ عمر کو پہنچ چکا ہوں ابھی تک ان باتوں پر کبھی سنجیدگی سے نہیں سوچا۔

میٹرو اسٹیشن پر کھڑا میں اس سے نظریں نہیں ہٹا پا رہا تھا۔ سچی بات ہے میں ایسا کرنا چاہتا بھی نہیں تھا مجھے لگا میری نظر ہٹی تو وہ صورت کہیں غائب ہو جاۓ گی۔ میں خواب سے بیدار ہو جاؤں گا اور ایک بار پھر حبس زدہ موسم میں گھر جاؤں گا۔

اس کی نظر مجھ پر ابھی تک نہیں پڑی تھی یا شاید اس نے مجھے دیکھ لیا تھا اور نظر انداز کیا تھا۔ غالباََ وہ مردوں کی ایسی نظروں کی عادی تھی۔ مجھے جونہی یہ خیال آیا میں نے فوراً اپنی نظریں اس سے ہٹا لیں۔ میں اسے اپنے بارے میں کوئی غلط تاثر نہیں دینا چاہتا تھا۔ میں نے سوچا ہم مرد بھی عجیب مخلوق ہیں دن بھر بیسیوں لڑکیوں کو بلا وجہ تاڑتے رہتے ہیں لیکن جہاں معاملہ دل کا ہو تو نظریں فوراً ہٹا لیتے ہیں۔ اگر یہاں بات کسی خوبصورت لڑکی کو بلاوجہ تاڑنے کی ہوتی تو میں اب تک بلا خوف و خطر اسے تاڑتا چلا جاتا اور مجھے ذرا سا بھی خیال نہ آتا کہ اسے کیسا محسوس ہو رہا ہوگا لیکن یہاں بات دوسری تھی۔ میرے دوست کی راۓ سے قطع نظر میں اسے اسی لمحے اپنے دل میں بھسانے اور اپنا جیون ساتھی بنانے کا ارادہ کر چکا تھا۔

تھوڑی دیر بعد اور لوگ بھی آنے شروع ہو گۓ اور رش پہلے سے بہت بڑھ گیا۔ وہ ایک طرف چپکے سے کھڑی باہر دیکھ رہی تھی۔ میرا دوست اس 'قلبی واردات' سے بے خبر اپنی ہی کسی دنیا میں کھویا ہوا تھا۔ کچھ لمحوں بعد ہماری گاڑی بھی آ گئ۔ میرے دوست نے میری طرف دیکھا اور گاڑی کی طرف قدم بڑھاۓ۔ میں نے اس لڑکی کی طرف دیکھا وہ اپنی جگہ پر کھڑی رہی اس کا مطلب تھا اس نے اس گاڑی میں نہیں جانا تھا۔ غالباََ وہ کسی کا انتظار کر رہی تھی کیونکہ ابھی ابھی اس نے کسی سے فون پر بات کی تھی۔ گاڑی کے دروازے کھلے تو میرے دوست نے پیچھے مڑ کر میری طرف دیکھا مجھے وہیں کھڑا پایا تو خیرت سے چلایا۔ 'آ بھی جاؤ وہاں کیوں کھڑے ہو۔' میں نے اس سے کہا کہ تم چلے جاؤ میں اگلی گاڑی میں آتا ہوں۔ اس نے کچھ نہ سمجھتے ہوۓ سوالیہ نظروں سے میری طرف دیکھا۔ میں نے اسے فون کا اشارہ کرتے ہوۓ کہا کہ تمہیں فون پر سمجھاتا ہوں تم جاؤ۔ گاڑی کے دروازے بند ہونے والے تھے اس لیۓ وہ جلدی سے گاڑی میں سوار ہو گیا۔ اس لڑکی کو شاید اندازہ ہو گیا تھا کہ میں کیوں اپنے دوست کے ساتھ گاڑی میں سوار نہیں ہوا۔ اس نے ایک اچٹتی سی نظر مجھ پر ڈالی لیکن اس کے چہرے سے کسی قسم کا کوئی ثاثر نہ ابھرا۔ وہ جیسے پہلے کھڑی تھی ویسے ہی خاموشی سے کھڑی باہر برستی بارش کو دیکھنے لگی۔

ابھی ایک منٹ سے زیادہ نہیں گزرا تھا کہ میرے دوست کی کال آگئی۔ میں نے فون اٹھا کر اسے ساری تفصیل بتائی تو اس نے بلند آواز میں قہقہہ لگایا اور طنزیہ انداز میں بولا۔ 'تم نے فیصلہ کرنے میں زیادہ دیر نہیں کر دی۔ شادی کا فیصلہ وہ بھی صرف پندرہ منٹ میں۔۔۔تمہیں تو اس کے نظر آتے ہی یہ فیصلہ کر لینا چاہیۓ تھا۔' اپنے دوست کے طنز کو نظر انداز کرتے ہوۓ میں نے اس کی طرف دیکھا وہ موبائل پر کچھ ٹائپ کر رہی تھی۔ میں نے فون بند کر دیا۔ کچھ دیر بعد سیڑھیوں سے اتر کر ایک لڑکی اس کے پاس آ کر کھڑی ہو گئی۔ شاید وہ اسی کا انتظار کر رہی تھی۔ دونوں ایک دوسرے سے آہستہ آہستہ باتیں کرنے لگیں۔ میں نے سننے کی کوشش کی مگر مجھے ایک بھی لفظ سنائی نہ دیا۔ تھوڑی دیر بعد گاڑی آگئی وہ آگے بڑھیں تو میں بھی ان کے پیچھے چل دیا۔ وہ گاڑی کے خواتین والے حصے میں چلی گئیں اور میں دوسرے حصے میں داخل ہو گیا۔ رش کافی تھا لیکن خوش قسمتی سے مجھے خواتین والے حصے کے قریب ہی کھڑے ہونے کی جگہ مل گئی۔ یہاں سے میں ان پر آسانی سے نظر رکھ سکتا تھا۔ گاڑی چل پڑی۔ راستے میں جب بھی گاڑی کسی سٹاپ پر رکتی میں فوراً ان کی طرف دیکھتا۔ بالاآخر جب وہ سٹاپ آیا جہاں پر وہ گاڑی سے اتریں تو میں بھی وہاں پر اتر گیا۔ گاڑی سے اتر کر وہ میٹرو اسٹیشن کے باہر جانے والے راستے کی طرف چل پڑیں۔ میں کھڑا ہو کر انہیں کچھ دیر تک دیکھتا رہا جب ان کے اور میرے درمیان فاصلہ مناسب ہو گیا تو میں ان کے پیچھے چل پڑا۔ میٹرو اسٹیشن سے باہر نکل کر میں نے دیکھا تو وہ سڑک عبور کرکے دوسری طرف جا چکی تھیں۔ دوسری جانب ایک بڑی سی عمارت تھی وہ اس میں داخل ہو گئیں۔ اس عمارت میں بہت سارے دفاتر تھے شاید وہ ان دفاتر میں سے کسی دفتر میں کام کرتی تھی۔ میں جلدی سے آگے بڑھا اور بارش میں بھیگتا ہوا سڑک عبور کرکے دوسری طرف عمارت میں گھس گیا۔ میں نے اردگرد دیکھا وہ کہیں نہیں تھیں۔ اتنی بڑی عمارت میں اسے تلاش کرنا بہت مشکل تھا اور مجھے اپنے دفتر سے بھی بہت دیر ہو گئی تھی۔ لہٰذا میں واپس چلا آیا۔

مجھے اس بات کی تسلی تو تھی کہ میں نے اس کے دفتر کا پتہ لگا لیا تھا لیکن ایک خدشہ بھی تھا۔ یہ میرا صرف اندازہ تھا کہ وہ اس دفتر میں کام کرتی ہے یہ بھی تو ہو سکتا تھا کہ وہ آج اس دفتر میں کسی کام کی غرض سے گئ ہو۔ وہ خود وہاں کام نہ کرتی ہو۔ اگر ایسا ہوا تو کل وہ میٹرو اسٹیشن پر بھی نہیں آۓ گی۔ پھر اس کے بعد یہ تو یقینی تھا کہ وہ مجھے کبھی دکھائی نہیں دے گی۔ پورا دن میں اسی فکر میں غلطاں رہا۔

اگلے دن میں جلدی میٹرو اسٹیشن پہنچ گیا۔ میں نے سوچا یہ نہ ہو وہ مجھ سے پہلے بس میں سوار ہو کر چلی جاۓ اور مجھے پتہ بھی نہ چلے کہ وہ آئی تھی کہ نہیں۔ میرا دوست احسن ابھی تک نہیں پہنچا تھا۔ میں اپنی کل والی جگہ پر جا کر کھڑا ہو گیا اور لوگوں کو دیکھنے لگا۔ اس وقت صبح صبح بھی اتنی بھیڑ تھی یوں لگتا تھا پورا شہر میٹرو اسٹیشن کی طرف امڈ آیا ہو۔ ان میں مختلف سرکاری و نجی اداروں میں کام کرنے والے ملازمین بھی تھے اور مختلف یونیورسٹیوں اور کالجوں میں جانے والے طلبہ و طالبات بھی۔ دیہاڑی دار مزدور بھی تھے اور دور دراز سے آۓ ہوۓ مسافر بھی۔ روزانہ سینکڑوں ہزاروں لوگ اس اسٹیشن پر اترتے تھے اور تقریباً اتنے ہی سوار ہو جاتے تھے۔ سب کو کہیں نہ کہیں پہنچنا تھا۔ سب زندگی کی دوڑ دھوپ میں شامل ہونے کے لیۓ صبح سویرے گھروں سے نکل آتے تھے۔ تھکے ہارے، بے بس، لاچار لوگ، ماتھے پر تفکر و پریشانی کی شکنیں سجاۓ، مسکراہٹیں اور قہقہے بکھیرتے اپنی اپنی منزل کی جانب گامزن تھے۔ یہاں زندگی کس قدر سانس لیتی محسوس ہوتی تھی۔ کتنے رنگ برنگے کردار تھے جو زندگی کے کینوس پر ایک ساتھ نمودار ہو گۓ تھے۔ سب کے اپنے اپنے مسائل تھے، اپنی اپنی پریشانیاں تھیں، اپنے اپنے دکھ اور غم تھے۔ سینکڑوں کہانیاں تھیں جو یہاں اردگرد ہر سو بکھری پڑی تھیں۔ یہ بھی ایک دنیا تھی۔ یہ بھی ایک زندگی تھی۔ جو یوں تو سب کے سامنے تھی مگر حقیقت میں سب کی نظروں سے اوجھل تھی۔

کچھ دیر بعد میرا دوست بھی آ گیا۔ وہ مجھے اتنی جلدی دیکھ کر خیران ہوا لیکن پھر خود ہی سمجھ کر ہنسنے لگا۔ 'لگتا ہے آج بھی دفتر دیر سے پہنچیں گے۔' ہم وہاں کھڑے ہو کر اپنی گاڑی کی بجاۓ اس کا انتظار کرنے لگے۔ کافی وقت بیت گیا تھا۔ یہاں تک کہ جس وقت وہ کل آئی تھی وہ وقت بھی گزر گیا تو میرے دوست نے کہا۔ 'مجھے لگتا ہے چلنا چاہیۓ اس نے آنا ہوتا تو اب تک آجاتی۔' میں نے اسے تھوڑی دیر اور انتظار کرنے کو کہا اور خود سیڑھیاں چڑھ کر میٹرو اسٹیشن کے باہر جا کر انتظار کرنے لگا۔ جب مجھے یقین ہو گیا کہ وہ نہیں آنے والی تو میں واپس چلا آیا۔ بس میں سفر کے دوران اور دفتر میں کام کرتے ہوۓ بھی مجھے بار بار اسی کا خیال آرہا تھا۔ اس کی صورت ہر دوسرے تیسرے پل میری آنکھوں کے سامنے گھوم جاتی تھی۔ مجھے یقین ہو چلا تھا کہ میں نے اسے ملنے سے پہلے کھو دیا ہے۔ اب وہ مجھے کبھی دکھائی نہیں دے گی۔ شام کو دفتر سے گھر واپس آکر بھی اسی کا تصور میرے دل و دماغ پر چھایا رہا۔ اگلے دن میں میٹرو اسٹیشن میں بالکل بددل سا افسردہ سا کھڑا تھا۔ میرا دوست میرے ساتھ تھا۔ ہماری گاڑی آچکی تھی اور ہم بس سوار ہونے والے تھے۔ لیکن ہمارے سوار ہونے سے چند لمحے پہلے میں نے سیڑھیوں سے اس کو نیچے اترتے ہوۓ دیکھا۔ اس کے ساتھ اس کی دوست بھی تھی۔ میرا دوست میری طرف دیکھ کر دھیرے سے ہنسا۔ میں بھی اس کی طرف دیکھ کر مسکرا اٹھا۔ اس نے مجھے اشارہ سے کہا میں جارہا ہوں تم اگلی بس میں آجانا۔ میرا دوست چلا گیا اور وہ دونوں میرے سامنے کچھ فاصلے پر آکر کھڑی ہو گئیں۔ اپنی دوست سے باتیں کرتے ہوۓ اس نے اپنی لانبی پلکیں اٹھائیں اور اک اچٹتی سی نگاہ مجھ پر ڈالی۔ اس کے دیکھنے کے انداز سے مجھے لگا جیسے وہ مجھے پہچان گئی ہو۔ گاڑی آئی اور ہم تینوں اس میں سوار ہو گۓ۔ آج گاڑی میں پہلے سے اتنا رش تھا کہ مجھے اس کے قریب جگہ نہ ملی جہاں سے میں اسے دیکھ پاتا۔ میں بے چینی سے اس سٹاپ کا انتظار کرنے لگا جہاں اس نے اترنا تھا۔ کوئی بیس پچیس منٹ کے بعد اس کا سٹاپ آگیا۔ یہاں بھیڑ بالکل نہیں تھی۔ گاڑی سے اترتے ہی وہ مجھے نظر آگئی۔ اس بار میں نے وقت ضائع نہ کیا اور ان کے ساتھ ساتھ میٹرو اسٹیشن سے باہر نکل آیا۔ وہ سڑک عبور کرکے عمارت کی جانب بڑھیں تو میں بھی ان کے بالکل پیچھے اس عمارت میں داخل ہو گیا۔ ان کا دفتر اوپر کی کسی منزل پر تھا اس لیۓ انہوں نے لفٹ کی جانب قدم بڑھاۓ۔ میں نے ان کے ساتھ لفٹ میں جانا مناسب نہ سمجھا کیونکہ میں انہیں کسی قسم کے شک و شبہ میں مبتلا کرنا نہیں چاہتا تھا۔ میں ان پر کسی طرح بھی یہ ظاہر نہیں کرنا چاہتا کہ میں ان کے تعاقب میں ہوں۔ میں ایک طرف ہٹ کر کھڑا ہو گیا اور ان کے جانے کا انتظار کرنے لگا۔ لیکن مجھے یہ فکر لاحق تھی کہ اگر وہ اوپر جا کر میرے پہنچنے سے پہلے کسی دفتر میں گھس گئیں تو میں انہیں کیسے تلاش کروں گا۔ ابھی میں اسی ادھیڑ بن میں تھا کہ لفٹ نچلی منزل پر آکر رکی اور اس میں سے ایک لڑکا باہر نکل کر آیا۔ وہ انہیں دیکھ کر مسکرایا۔ انہوں نے آپس میں کوئی چھوٹی سی بات کی جو میں اتنی دور سے سن نہیں پایا لیکن ان کے انداز سے یوں ظاہر ہوتا تھا کہ انہوں نے اک دوسرے کو سلام کیا ہے۔ لڑکے نے میری طرف قدم بڑھاۓ اور وہ دونوں لڑکیاں لفٹ میں گھس گئیں۔ اس لڑکے کو میں پہچانتا تھا۔ مجھے معلوم تھا کہ وہ یہاں کس دفتر میں کام کرتا ہے۔ لڑکیوں کا اس طرح اس سے بات کرنے کا مطلب تھا کہ وہ اس سے شناسا ہیں جس کا یقیناً مطلب تھا کہ وہ تینوں ایک ہی دفتر میں کام کرتے ہیں۔ میری پریشانی دور ہو گئی تھی اب مجھے اسے تلاش کرنے کی ضرورت نہیں تھی۔ میں اطمینان سے اس دفتر میں جا کر اس کی تصدیق کر سکتا تھا۔ وہ لڑکا میرے قریب پہنچا تو میں لوگوں کے پیچھے چھپ گیا۔ وہ بھی مجھے پہچانتا تھا اس لیۓ میں نے اس کے سوالوں سے بچنے کے لیۓ اسے گزر جانے دیا۔ وہ جلدی میں لگ رہا تھا شاید وہ دفتر سے باہر اس وقت کسی کام کے لیۓ نکلا تھا۔ اس کے باہر نکل جانے کے بعد میں نے لڑکیوں کی طرف دیکھا وہ جا چکی تھیں۔ میں لفٹ کی طرف بڑھا اور اس منزل پر آ گیا جہاں اس کا دفتر تھا۔ چند قدم کے فاصلے پر ایک بڑا سا شیشے کا دروازہ تھا۔ میں دروازہ کھول کر اندر چلا گیا وہ ایک طرف کھڑی کسی عورت سے بات کر رہی تھی۔ اس کی نظر مجھ پر نہیں پڑی تھی۔ میں چند سیکنڈ وہاں کھڑا رہا پھر واپس پلٹ آیا۔

ایک مرحلہ تو میں نے سر کر لیا تھا۔ لیکن اب مسئلہ یہ درپیش تھا کہ بات کو آگے کیسے بڑھایا جاۓ۔ میں نے احسن سے پوچھا تو اس نے کچھ مذاق سے اور کچھ سنجیدگی سے فضول قسم کے مشورے دیۓ جنہیں میں نے فوراً رد کر دیا۔

رات کو میں اور احسن ایک چھوٹے سے ریستوران کی اوپری منزل پر کھلے میں بیٹھے تھے۔ یہاں ہم اکثر آیا کرتے تھے۔ یہ ایک درمیانے درجے کا ریستوران تھا جہاں پر زیادہ تر اردگرد کے نجی ہاسٹلز میں رہنے والے طلبہ کا رش لگا رہتا تھا۔ اس وقت بھی قریب کے کسی ہاسٹل کے چند طلبہ ہمارے کچھ فاصلے پر بیٹھے تھے۔ ان میں سے تین تو اپنے کالج یا یونیورسٹی کے کسی موضوع پر بحث کر رہے تھے جبکہ ان میں سے ایک اپنے دونوں پاؤں کرسی کے اوپر ٹکا کر خاموشی سے فضا میں کہیں دیکھتے ہوۓ سگریٹ کے کش پہ کش لگاۓ جا رہا تھا۔ اس کے ساتھی نے ایک دو بار اسے مخاطب کرکے گفتگو میں شریک کرنا چاہا مگر اس نے ایک آدھ جملے سے زیادہ کوئی بات نہ کی اور ایک سگریٹ ختم ہونے کے بعد اسی سے دوسرا سگریٹ سلگا لیا۔ یہ والا سگریٹ بھی ختم کرنے کے بعد اس نے اپنے دونوں ہاتھ جوڑ لیۓ اور آنکھیں بند کر کے بیٹھ گیا۔ مجھے وہ کوئی سادھو قسم کا آدمی لگا جو چونکڑی مار کر ہاتھ جوڑ کر اور آنکھیں بند کرکے کسی پراتھنا میں مصروف ہو۔

فضا میں اس وقت حدت تھی مگر ریستوران کی چھت پر ہلکی ہلکی ٹھنڈی ہوا چل رہی تھی۔ میں اور احسن دونوں خاموش بیٹھے تھے وہ موبائل پر شاید کسی سے 'چیٹ' کرنے میں مگن تھا اور میں نیچے سڑک پر گزرتی ٹریفک کو بلا مقصد دیکھے چلا جا رہا تھا۔ دیر تک ہم دونوں میں خاموشی رہی۔ پھر احسن نے موبائل سے نظریں ہٹا کر میری طرف دیکھا۔ 'کہاں کھوۓ ہو۔' میں نے اس سے کہا کہیں نہیں کھویا تم یہ بتاؤ آگے کیا کرنے چاہیۓ۔ اس نے موبائل نیچے رکھ دیا اور پہلو بدل کر بولا۔ 'یار میں تمہیں یہ مشورہ تو نہیں دوں گا کہ اس کے گھر کا پتہ لگاؤ اور رشتہ بھیجو۔ کیونکہ تم جانتے ہو میں صرف صورت دیکھ کر محبت یا شادی کرنے کے خلاف ہوں اور دوسرا یہ کہ جیسی تمہاری شکل ہے مجھے نہیں لگتا وہ تمہیں صرف تمہاری شکل دیکھ کر پسند کرے گی۔'

میری شکل والی بات اس نے یوں تو مذاق میں کہی تھی مگر اس میں کافی حد تک صداقت بھی تھی۔ میں نے اسے اک نظر دیکھ کر پسند کر لیا تھا وہ بھی مجھے اس طرح پسند کر لے ایسا ضروری نہیں تھا۔

تو پھر کیا کیا جاۓ؟' میں نے اس سے پوچھا۔

'مجھے لگتا ہے کچھ فلمی قسم کے کام کرنے پڑیں گے۔ جیسا کہ تم کسی آدمی کو بھیجو وہ اس کا پرس چھین کر بھاگے اور تم ہیرو بن کر چور کو پکڑ لو اور اسے اس کا پرس واپس دلا دو۔ اس سے وہ تم سے متاثر ہو جاۓ گی۔ یا پھر کچھ کراۓ کے غنڈے بھیجو جو اسے چھیڑیں اور تم عین موقع پر جا کر غنڈوں کو مار کر ہیرو بن جاؤ۔

میں اس کی بات سن کر ہنسنے لگا۔ ہمیں کوئی بھی ترکیب نہیں سوجھ رہی تھی اس لیۓ ہم دونوں کافی دیر تک ہنسی مذاق کرتے رہے۔

گھر آ کر لیٹتے ہی مجھے نیند آ گئ۔ تقریباً نصف شب کے بعد میری آنکھ کھل گئ اس کے بعد مجھے دیر تک نیند نہیں آئی۔ کچھ وقت تک میں کروٹیں بدلتا رہا پھر اٹھ کر چھت پر چلا آیا۔ ہوا چل رہی تھی اور موسم خوش گوار تھا۔ چار سو خاموشی کا پہرا تھا بس کبھی کبھار گلی میں کوئی گاڑی یا موٹر سائیکل چنگھاڑتا ہوا گزر جاتا تھا۔ آسمان بالکل صاف تھا۔ تارے اپنے معمول کے فرائض سر انجام دے رہے تھے اور سامنے والے مکان کے عقب میں آسمان کے ایک کونے پر چودھویں کا چاند پوری آب و تاب سے چمک رہا تھا۔ تھوڑی دیر بعد ہوا نے ہلکی آندھی کی صورت اختیار کر لی اور آسمان پر کہیں کہیں بادلوں کے سفید ٹکڑے نمودار ہونے لگے۔ معلوم نہیں کتنی دیر تک میں چھت پر ٹہلتا رہا پھر نیچے اپنے کمرے میں آکر سو گیا۔

صبح میرے گھر والوں نے مجھے جنجھوڑ جنجھوڑ کر اٹھایا۔ میں نے اٹھ کر دیکھا تو سورج سر پر چڑھ آیا تھا۔ جلدی سے تیار ہو کر میں دفتر کے لیۓ نکل کھڑا ہوا۔ احسن کی کال پہ کال آتی چلی جا رہی تھی جسے میں بار بار کاٹ رہا تھا۔ میں جب اسٹیشن پہنچا تو وہ تپا ہوا کھڑا تھا اسے دیکھ کر میری ہنسی چھوٹ گئی۔ وہ میری ہنستے ہوۓ کی نقل اتار کر بولا۔ 'ہنسو زور سے ہنسو پر اب جو میں تمہیں بتاؤں گا تمہاری ساری ہنسی دم توڑ دے گی۔' میں نے پوچھا ایسا کیا ہوا ہے تو اس نے بتایا کہ وہ آکر چلی بھی گئی ہے۔ مجھے اس کی بات پر یقین نہ آیا کیونکہ ابھی اس کے جانے کا وقت نہیں ہوا تھا۔ احسن شاید بھانپ گیا تھا کہ میں کیا کہنے والا ہوں اس لیۓ میرے پوچھنے سے پہلے ہی وہ بول پڑا۔ 'آج اس کی دوست جلدی آگئی تھی لہذا وہ جلدی چلی گئیں۔' میں خاموشی سے ایک طرف جا کر کھڑا ہو گیا۔ پہلے ہی اس سے ملنے اور بات آگے بڑھانے کا موقع نہیں مل رہا تھا اوپر سے یہ جو پانچ دس منٹ کی ہلکی سی ملاقات ہو جاتی تھی آج کے دن میں نے وہ موقع بھی گنوا دیا تھا۔ اب مجھے کل تک کا انتظار کرنا پڑنا تھا۔ میں ابھی سوچ ہی رہا تھا کہ وہ سیڑھیوں سے اترتی ہوئی دکھائی دی۔ احسن میری طرف دیکھ کر زور سے ہنسا۔ میں اسے ایک بڑی سی گالی دینا چاہتا تھا مگر اردگرد لوگوں کا خیال کر کے میں نے اسے دل ہی دل میں چھ سات گالیاں دیں اور کہا تم سے میں بعد میں نپٹوں گا۔ گاڑی آ چکی تھی اس لیۓ وہ ہنستے ہنستے جلدی سے بھاگ کر گاڑی میں سوار ہو گیا۔

وہ میرے سامنے کچھ فاصلے پر بالکل اسی جگہ آکر کھڑی ہو گئی جس جگہ وہ روز کھڑی ہوتی تھی۔ آج اس نے پہلی بار مجھے ٹھیک طرح سے دیکھا تھا۔ میرا خیال تھا یہی طریقہ بہتر ہے اگر میں روز اس کے دفتر تک اس کے ساتھ جاؤں تو یقیناً وہ میری طرف متوجہ ہو گی یا میں اس کی نظروں میں آؤں گا۔ تھوڑی دیر بعد اس کی دوست بھی پہنچ گئ اور اس کے آتے ہی گاڑی بھی آگئ جس میں انہوں نے سوار ہو کر جانا تھا۔ آج مجھے خوش قسمتی سے ان کے قریب ہی جگہ مل گئی تھی۔ مجھے سیٹ بھی مل رہی تھی لیکن میں کھڑا رہا اور اپنی جگہ کسی اور کو دے دی تا کہ وہ مجھے آسانی سے نظر آتی رہے۔ میں کن اکھیوں سے اسے دیکھ رہا تھا۔ اس کی دوست نے اک نظر میری طرف دیکھا اور اس کے کان میں کوئی بات کی شاید انہیں معلوم ہو چکا تھا کہ میں ان پر نظر رکھے ہوۓ ہوں اور ان کا پیچھا کر رہا ہوں۔ یہ ایک بری حرکت تھی اگر انہوں نے کسی سے شکایت کر دی تو یقیناً میرے لیۓ مصیبت کھڑی ہو سکتی تھی مگر اس کے سوا اور کوئی چارہ نہیں تھا۔

گاڑی اسٹیشن پر آ لگی تو وہ باہر نکل آئیں میں بھی ان کے ساتھ گاڑی سے باہر نکل آیا۔ وہ اسٹیشن سے باہر جانے والے راستے کی طرف چل پڑیں میں بھی ان کے پیچھے پیچھے چلتے ہوۓ میٹرو اسٹیشن سے باہر آگیا۔ سڑک پار کر کے وہ عمارت میں داخل ہوئیں تو میں ان کے چند سیکنڈ بعد عمارت میں داخل ہوا لیکن وہ کہیں نظر نہیں آرہی تھیں۔ میں نے انہیں اردگرد تلاش کرنا شروع کر دیا۔ جب وہ کہیں دکھائی نہ دیں تو میں نے اوپر کی منزل میں ان کے دفتر جا کر دیکھا وہ وہاں بھی نہیں تھیں۔ میں خیران تھا کہ وہ ایک دم کہا چلی گئیں تھیں۔ عمارت کے اندر آکر وہ کہاں غائب ہو گئیں۔ مجھے بہت دیر ہو گئ تھی اس لیۓ میں خیران و پریشان عمارت سے نکلا اور اپنے دفتر کی جانب چل دیا۔ ابھی میں چند قدم چلا تھا کہ پیچھے سے کسی کی آواز آئی۔۔۔! رک جاؤ۔ میں نے مڑ کر دیکھا تو وہی دونوں تھیں۔ میں چل کر ان کے پاس گیا تو اس کی دوست سختی سے بولی۔ 'تم روز ہمارا پیچھا کیوں کرتے ہو۔ کون ہو تم؟' میں نے بہانہ بنا کر بات کو ٹالنا چاہا مگر وہ دوبارہ اسی انداز سے بولی۔ 'دیکھو جھوٹ مت بولنا وہ جو سامنے چوکیدار ہیں ہم ان سے کہہ دیں گی تم روز ہمارا پیچھا کرکے ہمیں تنگ کرتے ہو۔' میں سوچنے لگا کہ انہیں کیا جواب دوں پھر میں نے فیصلہ کیا کہ انہیں سچ سچ بتا دیتا ہوں بعد میں جو بھی ہو گا دیکھا جاۓ گا۔ میں نے انہیں ا سے لے کر ے تک سارا قصہ بیان کر دیا جب سے میں نے اسے پہلی بار دیکھا تھا اور جب سے میں اس کا پیچھا کر رہا تھا تب تک سب کچھ بتا دیا۔ میں اپنی ختم بات کرکے خاموش ہوا تو اس کی دوست چند لمحوں بعد بولی۔ 'تمہیں شرم نہیں آتی لڑکیوں کا پیچھا کرتے ہوۓ اب یہاں سے چلے جاؤ اور اگر دوبارہ ایسی حرکت کی تو پھر دیکھنا تمہارے ساتھ کیا خشر ہوتا ہے۔' میں نے ان سے معذرت کی اور کہا کہ آئندہ میں آپ لوگوں کا پیچھا نہیں کروں گا۔ میں سر جھکاۓ خاموشی سے واپس پلٹ آیا۔ اس پوری گفتگو کے دوران اس نے ایک لفظ بھی نہ کہا بس خاموش کھڑی میری طرف دیکھتی رہی۔

میں دفتر پہنچا تو احسن مجھے دیکھ کر صبح میٹرو اسٹیشن والی بات کو لے کر ہنسنے لگا اسے لگا میں آتے ہی اسے دو چار گالیاں دوں گا مگر جب اس نے میرا لٹکا ہوا منہ دیکھا تو کہا۔'خیریت ہے منہ پر بارہ کیوں بجے ہوۓ ہیں۔' میں نے اسے ساری بات بتائی تو اس نے کہا 'چلو ایک لحاظ سے اچھا ہی ہو گیا ہے تم نے اسے سب کچھ تو بتا دیا ہے تمہیں یہی پریشانی تھی بات آگے کیسے بڑھے گی۔ اسے بتائیں گے کیسے اب اسے سب کچھ پتہ چل چکا ہے اب سب کچھ اس پر ہے۔'

سارا دن میں اسی بات پر غور کرتا رہا کہ یہ ٹھیک ہوا ہے کہ نہیں اسے میں نے بتا تو دیا تھا میں چاہتا بھی یہی تھا لیکن جس انداز سے اسے پتہ چلا تھا اس سے شاید اس پر میرا کچھ اچھا تاثر نہیں پڑا تھا۔ اگلے دن وہ اسٹیشن نہیں پہنچی تھی۔ مجھے لگا میری وجہ سے اس نے دفتر جانے کا راستہ یا وقت بدل لیا ہے۔ غالباََ اس نے سوچا ہو کہ میں پھر سے اس کا پیچھا کروں گا یا اپنی کسی حرکت سے اسے پریشان کروں گا۔ مجھے کل کا انتظار تھا اگر وہ کل بھی نہ آئی تو اس بات کی تصدیق ہو جاۓ گی کہ اس نے اپنا راستہ بدل لیا ہے۔ وہ دن گزرنے کا نام نہیں لے رہا تھا۔ خدا خدا کرکے میں نے وہ دن کاٹا۔ اگلی صبح میں بہت جلدی اپنے دوست سے بھی کتنی دیر پہلے میٹرو اسٹیشن پہنچ گیا تھا۔ اس کی کوئی خاص وجہ نہیں تھی میری جلدی آنکھ کھل گئی تھی اور کوشش کے باوجود بھی دوبارہ نیند نہیں آرہی تھی اس لیۓ میں جلدی اٹھ کر تیار ہو کر اسٹیشن آ گیا تھا۔ احسن آیا تو وہ مجھے دیکھ کر بہت خیران ہوا۔ کہنے لگا 'لگتا ہے آج خواب میں تمہیں وہ نظر آئی تھی۔' میں اس کی بات سن کر مسکرا دیا۔ ہم دونوں گاڑی کا انتظار کر رہے تھے جب اچانک میری نظر سیڑھیوں کی طرف گئی میں نے اسے نیچے اترتے دیکھا۔ وہ چل کر بالکل اسی جگہ پر آکر کھڑی ہو گئی جہاں روز کھڑی ہوتی تھی۔ جب اس نے مجھے دیکھا تو میں نے نظریں جھکا لیں اور دوسری طرف دیکھنے لگا۔ اس کے بعد جتنی دیر تک میں وہاں کھڑا رہا میں نے اس کی طرف ایک بار بھی نہیں دیکھا۔ تھوڑی دیر بعد اس کی دوست بھی آگئ۔ ہماری گاڑی پہنچ چکی تھی میرے دوست نے مجھ سے اشارے سے پوچھا۔ 'چلنا ہے کہ۔۔۔' میں اسے کوئی جواب دیئے بغیر خاموشی سے جا کر گاڑی میں بیٹھ گیا۔ میں نے اک اچٹتی سی نگاہ اس کی جانب ڈالی وہ یہیں میری طرف دیکھ رہی تھی۔ میں نے فوراً منہ دوسری طرف پھیر لیا تاکہ اسے یہ نہ لگے کہ میں وعدہ کرنے کے باوجود ابھی بھی اسے تنگ کرنے کی کوشش کر رہا ہوں۔

اگلا پورا ہفتہ یونہی گزر گیا۔ وہ میرے سامنے آکر اسی جگہ کھڑی ہو جاتی تھی اور میں اپنی گاڑی آنے پر سوار ہو کر چل دیتا۔ لیکن اس دوران میں نے محسوس کیا کہ وہ رفتہ رفتہ مجھ میں دلچسپی لینے لگی تھی۔ اس کی توجہ کچھ تو میری جانب مبذول ہوئی تھی۔ میں نے اس سے بات کرنے یا اس کی طرف زیادہ دھیان دینے کی کوشش نہیں کی کیونکہ ایسا ممکن تھا کہ یا تو وہ اسٹیشن پر کسی سے میری شکایت لگا دیتی یا اپنے آنے جانے کا رستہ بدل لیتی۔ لیکن ایک دن اس نے مجھے خیران کر دیا۔ میں اور احسن اسٹیشن پر کھڑے اپنی بس کا انتظار کر رہے تھے اور وہ اپنی سہیلی کے ساتھ ہم سے کچھ فاصلے پر کھڑی تھی۔ میں نے ذرا سی نگاہ اس کی طرف گما کر اسے دیکھا۔ اس کی دوست نے اس سے کچھ کہا جس کا جواب اس نے سر کی ہلکی سی جنبش سے دیا۔ اس کے بعد اس کی دوست اگے بڑھی اور سیدھا میری جانب چلی آئی۔ میں گھبرا کر دوسری طرف دیکھنے لگا۔ وہ میرے پاس آکر بولی۔ 'آپ سے ایک بات کرنی ہے کیا آپ اسی جگہ مل سکتے ہیں۔۔۔ ہمارے دفتر کے باہر۔'

میں خیران تھا کہ اس کو آخر مجھ سے کیا بات کرنی ہے۔ 'آپ نے کیا کہنا ہے اب تو میں نے آپ کا پیچھا نہیں کیا۔'

وہ بات نہیں آپ بس یہ بتائیں آپ شام کو چھ بجے مل سکتے ہیں۔'

ہاں مل سکتا ہوں لیکن۔۔۔'

تو پھر ٹھیک ہے۔' اس نے میری بات مکمل نہ ہونے دی اور کہا۔ 'آپ آج شام کو چھ بجے ہمارے دفتر کے باہر آجائیے گا۔'

وہ چلی گئی تو میں نے احسن کی طرف دیکھا جو مجھ سے کچھ فاصلے پر کھڑا میری طرف خیرت سے دیکھ رہا تھا۔ اس نے شاید ہماری باتیں نہیں سنی تھیں کیونکہ ہم بہت آہستگی سے بات کر رہے تھے۔ بس میں بیٹھ کر میں نے اسے ساری بات بتائی جو اس کی سہیلی نے مجھ سے کہی تھی۔

شام کو ٹھیک چھ بجے میں ان کے دفتر کے باہر پہنچ گیا۔ وہ پہلے سے وہاں ایک درخت کی چھاؤں میں کھڑی میرا انتظار کر رہی تھیں۔ میں نے سلام دعا کے بعد ان سے اپنے یہاں بلاۓ جانے کے بارے میں پوچھا تو انہوں نے کہا کہ یہاں نہیں چھٹی کا وقت ہے اور دفتر کے لوگ گزر رہے ہیں یہاں بات کرنا مناسب نہیں وہاں چلتے ہیں۔ اس کی دوست نے ایک طرف اشارہ کرتے ہوۓ کہا۔ وہاں ایک چھوٹا سا باغیچہ تھا ہم چل کر باغیچے میں آگۓ۔ یہاں اونچے اونچے اور گھنے درختوں کی وجہ سے دفتر کی عمارت بالکل چھپ سی گئی تھی۔

جی تو کیا کہنا چاہتی ہیں آپ؟' میں نے ان سے پوچھا تو اس سے پہلے اس کی دوست کچھ بولتی وہ چند قدم چل کر کچھ فاصلے پر جا کر کھڑی ہو گئی۔ میں اس کی اس حرکت پر خیران ہو رہا تھا کہ اس کی دوست نے اپنی بات شروع کر دی۔ 'بات یوں ہے۔۔۔ایک منٹ۔۔۔ پہلے آپ اپنا نام تو بتائیں۔' میں نے اسے اپنا نام بتایا۔ تو وہ کہنے لگی۔ 'جی تو آپ یہ بتائیں آپ نے جو اس دن کہا تھا وہ بالکل سچ تھا۔ آپ واقعی مہوش کو پسند کرتے ہیں اور اس سے شادی کرنے کا ارادہ رکھتے ہیں؟'

تو اس کا نام مہوش تھا۔ کتنا پیارا نام تھا آج مجھے پہلی بار اس کا نام پتہ چلا تھا۔ 'جی میں یہی ارادہ رکھتا ہوں۔' میں نے اس سے کہا۔

دیکھئیے میں آپ کو بتا دوں مہوش ایسی ویسی لڑکی نہیں اگر آپ کا ارادہ سچ میں نیک ہے تو پھر تو بات بن سکتی ہے لیکن اگر آپ محض وقت گزاری کرنا چاہتے ہیں تو براۓ مہربانی ابھی اس بات کو یہیں ختم کر دیں۔'

میں نے اس سے کہا 'آپ بتائیں مجھے اپنی نیک نیتی ثابت کرنے کے لیۓ کیا کرنا ہو گا۔

وہ بولی۔ 'کچھ کرنے کی ضرورت نہیں وہ تو پتہ چل ہی جاۓ گا۔ فی الحال میں آپ کو یہ بتا دوں کہ مہوش کو بھی آپ اچھے لگے ہیں۔

یہ بات سن کر میرا دل اچھلنے لگا۔ قریب تھا کہ میں ابھی ناچنے لگتا لیکن میں نے اپنے آپ پر قابو رکھا۔ میں نے اس کی طرف دیکھا وہ کچھ گبھرائی ہوئی سی لگ رہی تھی۔ اس کی دوست نے اسے آواز دے کر اپنے پاس بلا لیا۔ کچھ دیر وہاں ٹھہرنے کے بعد ہم وہاں سے چلے آۓ۔

ہمارا باتوں اور رابطوں کا سلسلہ شروع ہوا تو ہم نے آغاز میں ہی یہ فیصلہ کر لیا کہ ہم دونوں جلد از جلد کوئی مناسب وقت دیکھ کر اپنے والدین سے بات کریں گے اور منگنی وغیرہ کرکے اس رشتے کو مضبوط کریں گے۔ اس کا کہنا تھا اگر ہماری نیت میں کوئی فتور نہیں تو ہم اس بات کو کیوں لٹکائیں اور جان بوجھ کر تاخیر کیوں کریں۔ جہاں تک میری بات ہے میں تو اسے دیکھتے ہی پہلے دن یہ فیصلہ کر چکا تھا۔

چند روز یونہی گزر گۓ۔ تقریباََ ایک ماہ بعد ہم نے طے کیا کہ اب اپنے والدین سے بات کر لینی چاہیۓ۔ لہذا سارا دن میں دفتر میں احسن کے ساتھ مل کر یہ سوچتا رہا کہ گھر والوں کو کیسے اعتماد میں لینا ہے۔ مہوش سے بات ہوئی تو وہ بھی یہی کہہ رہی تھی کہ وہ بہت بے چین ہے پتہ نہیں گھر والے کیا کہیں گے۔ وہ بھی اپنی دوست سے اسی بارے میں بات کر رہی تھی۔

شام کو میں دفتر سے نکلا تو مجھے اس کا فون آیا میں نے کال اٹھائی تو اس کی دوست بول رہی تھی۔ اس نے بتایا کہ ہمارے دفتر کی عمارت میں آگ لگ گئی ہے اور بہت سے لوگ زخمی ہو گۓ ہیں۔ مہوش بھی زخمی ہے اور اس وقت ہسپتال میں ہے۔ میں اور احسن جلدی سے ہسپتال پہنچے۔ ایمرجنسی میں بے تخاشا رش تھا بہت سے لوگ زخمی ہوۓ تھے ان کو دیکھ کر مجھے مہوش کا خیال آیا تو میں پریشان ہو گیا اور ادھر ادھر بھاگ کر اسے ڈھونڈنے لگا۔ اچانک میری نظر اس کی دوست پر پڑی وہ ایک وارڈ کے دروازے پر کھڑی کسی سے باتیں کر رہی تھی۔ اس نے ہمیں دیکھ لیا تھا اور ہمیں اشارے سے وہیں رکنے کو کہا تھا۔ شاید اندر اس کے گھر والے تھے۔تھوڑی دیر بعد اس کی دوست ہمارے پاس آگئی اس نے بتایا کہ دفتر میں اچانک آگ لگی تو ایک دم بھگدڑ مچ گئ وہ اتفاق سے اس وقت دفتر کے باہر نچلی منزل پر کسی کام سے آئی تھی اس لیۓ وہ تو بچ گئی مگر مہوش بری طرح سے جل گئی تھی۔ اس کے چہرے کا آدھا حصہ پوری طرح سے جھلس گیا تھا۔ میں نے کہا کہ میں اسے دیکھنا چاہتا ہوں تو اس نے کہا کہ کچھ دیر تک میں تمہیں اندر لے جاؤں گی تم مل لینا۔

وہ چلی گئی تو میں دیوار کے ساتھ ٹیک لگا کر کھڑا ہو گیا اور احسن بالکل میرے سامنے ایک بنچ پر جہاں پہلے سے ایک آدمی اور ایک بزرگ عورت بیٹھے تھے ان کے ساتھ جا کر بیٹھ گیا۔ ہر طرف چیخ و پکار تھی، بھاگ دوڑ تھی۔ جن کے عزیز اس حادثے میں جاں بحق ہو گۓ تھے یا بری طرح زخمی تھے وہ زار و قطار رو رہے تھے۔ ان کو دیکھ کر میں اور بھی زیادہ بے چین ہو گیا تھا۔ میں جلدی سے مہوش کو دیکھنا چاہتا تھا تاکہ کچھ اطمینان حاصل ہو۔ اس کی دوست آئی اور وہ مجھے اور احسن کو اندر وارڈ میں لے گئی۔ جانے سے پہلے اس نے ہمیں بتایا کہ اس وقت اس کے پاس صرف اس کی والدہ ہوں گی تم کہنا تم لوگ ہمارے دفتر میں ہمارے ساتھ کام کرتے ہو اور بہت سے کولیگز جو اس حادثے میں زخمی ہوۓ ہیں انہیں دیکھنے کے لیۓ آۓ ہو۔ ہم اندر پہنچے تو اس کی والدہ سر جھکاۓ اس کے پاس بیٹھی تھیں۔ ان کو دیکھ کر اندازہ کیا جا سکتا تھا کہ ان کی اس وقت کیا حالت ہو گی۔ اس کی دوست نے ہمارا تعارف کرایا اور ہم سلام کرکے ایک طرف کھڑے ہو گۓ۔ میں نے اسے دیکھا اس کا آدھا چہرہ بالکل خراب ہو گیا تھا۔ وہ اس وقت نیم بے ہوشی کے عالم میں تھی لیکن جیسے اس نے ہمیں دیکھ کر پلکیں جھپکی تھیں اس سے لگتا تھا کہ اس نے ہمیں پہچان لیا ہے۔ احسن اس کی والدہ سے اس کی طبعیت کے بارے میں پوچھنے لگا۔ مجھ سے اس کی حالت دیکھی نہیں جا رہی تھی اس لیۓ میں نے احسن کو اشارہ کیا اور ہم اس کی امی کو سلام کرکے باہر آگئے۔

رات بھر مجھے نیند نہ آئی۔ اس کا آدھا جلا ہوا چہرہ بار بار میری آنکھوں کے سامنے آجاتا تھا۔ کئ روز تک میری یہی کیفیت رہی۔ کچھ دن وہ ہسپتال میں رہنے کے بعد اپنے گھر واپس آگئی۔ اس کی دوست مجھے اس کے بارے میں اطلاع دیتی رہی اور کبھی کبھی وقتاً فوقتاً میری اس سے بات بھی ہو جاتی تھی۔ چند دن بعد جب وہ پوری طرح صحت یاب ہو گئی تو میں نے دیکھا اس کے زخم تو مندمل ہو چکے تھے مگر اس کے چہرے کا آدھا حصہ مکمل طور پر بگڑ گیا تھا۔ اس پر بہت ہی بدنما داغ بن گۓ تھے۔ مجھے اس کی وہ صورت یاد آگئی جب میں نے اسے پہلی بار میٹرو اسٹیشن کی سیڑھیاں اترتے دیکھا تھا اور دیکھتے ہی اسے پر فدا ہو گیا تھا۔ لیکن اب وہ صورت کہانیوں اور افسانوں والی صورت نہیں رہی تھی۔ خوابوں کی اس حسین و جمیل دوشیزہ کا حسن و جمال کہیں کھو گیا تھا۔

میری اس میں دلچسپی رفتہ رفتہ کم ہونے لگی۔ آہستہ آہستہ میں اس سے پیچھے ہٹتا گیا اور اتنا پیچھے ہٹ گیا کہ وہ کہیں دور بہت دور رہ گئی۔ یہ دوری لمحوں کی دور نہیں تھی یہ تو میلوں کی دوری تھی۔ وہ فاصلہ جو ہم نے صرف چند دنوں میں طے کر لیا تھا اب اس میں برسوں کی مسافت تھی۔

میں سمجھ نہیں پایا تھا کہ ایسا کیوں ہے چند دن پہلے تک میں اپنی تمام عمر اس کو دینے کو تیار تھا اور اب ایسا اچانک کیا ہو گیا تھا کہ میں اسے تہنا چھوڑ کر بھاگ آیا تھا۔

درحقیقت میں نے جس بنیاد پر محبت کی فلک بوس عمارت تعمیر کرنا چاہی تھی وہ اس قدر کمزور تھی کہ محض ہوا کے اک جھونکے سے زمیں بوس ہو گئی تھی۔

میں میٹرو اسٹیشن پر کھڑا اس واجبی سی صورت والے عمر رسیدہ جوڑے کو دیکھے چلا جا رہا تھا جو اس وقت سیڑھیاں چڑھ کر اوپر جا رہا تھا۔ دونوں ہاتھ میں ہاتھ دیۓ اک دوسرے کو سہارا دیتے کتنی سہولت سے زینہ طے کر گۓ تھے۔ لیکن میں پہلی سیڑھی سے پھسل کر نیچے آرہا تھا۔ ایسا کیوں تھا۔ شاید اس لیۓ کہ انہوں نے محبت کی جس بنیاد پر یہ رشتہ استوار کیا تھا وہ خاصی مظبوط تھی۔

دلیر بزدل

2025-04-28T04:58:00.001+05:00

نادیہ نے چوبارے کی کھڑکی میں سے جھانک کر دیکھا تو شمشیر علی گلی میں سے گزر رہا تھا۔ اس نے ایک چھوٹا سا ڈھیلا اٹھایا اور نیچے لڑھا دیا۔ ڈھیلا شمشیر علی کو ہلکا سا چھو کر آگے زمین پر جا گرا۔ شمشیر علی نے رک کر اوپر دیکھا اس سے پہلے وہ کچھ دیکھ پاتا نادیہ فوراً نیچے جھک گئی۔ اس کی چھوٹی بہن نعیمہ اور خالہ زاد بہن سدرہ جو اس کے ساتھ دوسری کھڑکی میں کھڑی تھیں فوراً نیچے بیٹھیں اور دبی دبی ہنسی ہنسنے لگیں۔ نادیہ نے اپنے ہونٹوں پہ انگلی رکھ کر دونوں بچیوں کو خاموش رہنے کا اشارہ کیا اور خود دھیرے سے سر اوپر اٹھا کر کھڑکی سے نیچے جھانک کر دیکھا۔ شمشیر علی ابھی وہیں کھڑا تھا اس نے چادر کی بکل کو اپنے دائیں ہاتھ سے اٹھا کر بائیں کندھے پر پھینکا اور اپنی مونچھوں کو انگلیوں سے سہلاتا ہوا اک نظر اوپر کھڑکی کی جانب دیکھ کر آگے بڑھ گیا۔ نادیہ، نعیمہ سدرہ تینوں اٹھ کھڑی ہوئیں۔ ابھی وہ وہیں تھیں جب ڈھول کی تھاپ کی آواز فضا میں گونجی۔ تینوں بھاگ کر دوسری طرف اس کھڑکی کے پاس گئیں جہاں سے گاؤں کا میدان صاف دکھائی دیتا تھا جہاں اس وقت میلا لگا تھا۔ یہ میدان خاصا وسیع تھا جس کے بالکل درمیان میں دو آدمی ڈھول پیٹ رہے تھے اور چند بچے ڈھول کی تھاپ پر ناچ رہے تھے۔ کچھ آدمی ان کے اردگرد کھڑے بچوں کو ناچتے اور اچھلتے کودتے دیکھ کر خوش ہو رہے تھے۔ میدان میں جگہ جگہ اشیاۓ خورونوش کی دکانیں سجی تھیں۔ کچھ خوانچہ فروش کھانے پینے کے علاوہ بچوں کے کھلونے، باجے اور رنگ برنگی ٹوپیاں لیۓ کھڑے تھے۔ ڈھول کی آواز کے علاوہ متعدد اقسام کے باجوں اور سیٹیوں کی آوازوں سے فضا اٹی پڑی تھی۔ کچھ فاصلے پر بچوں کے بے شمار جھولے لگے تھے جن پر اس وقت بے انتہارش دکھائی دے رہا تھا۔

'آپی ہم بھی چلیں میلے میں؟' سدرہ جھولے کی طرف دیکھ کر بولی۔

ہاں آپی چلیں جھولے بھی لے کر آئیں گے۔' نعیمہ نے اس کی تائید کی۔

دماغ خراب ہے ہم کیسے جا سکتی ہیں۔' نادیہ تنک کر بولی۔ 'ہمیں کون جانے دے گا۔

آپی آپ نہیں جا سکتیں پر ہم تو جا سکتی ہیں۔' سدرہ نے کہا۔ 'آپ میری امی کو بولیں کہ وہ بھائی اعظم سے کہیں ہمیں میلے میں لے جائیں۔'

میں کیوں بولوں تم دونوں خود جا کر خالہ سے بات کرو۔' نادیہ نے ہاتھ میں پکڑی ہوئی چاکلیٹ کا ریپر اتارا اور چاکلیٹ منہ میں رکھتے ہوۓ کہا۔

نادیہ آپی مان جائیں قسم سے آپ کہیں گی تو امی بات نہیں ٹالیں گی۔' سدرہ نے اس کی منت کرتے ہوۓ کہا۔

ہاں آپی آپ اجازت لے دیں امی سے بھی اور خالہ سے بھی۔' اس بار نعیمہ بولی۔

اچھا چلو فرض کیا امی اور خالہ دونوں مان بھی گئیں تو تمہارا کیا خیال ہے بھائی اعظم تمہیں لے کر جائیں گے؟'

نعیمہ نے نادیہ کو نرم پڑتے ہوۓ اور ذرا سی رضا مندی ظاہر کرتے ہوۓ دیکھا تو جھٹ سے بولی۔ 'اگر بھائی اعظم نہ لے کر گۓ تو بھائی آصف سے بولیں گے وہ ہمیں لے جائیں گے۔'

نادیہ سوچ میں پڑ گئی۔ 'آپی کیا سوچ رہی ہیں بتائیں بھی کچھ۔' سدرہ نے اسے کندھے سے پکڑ کر تقریباً جھنجھوڑتے ہوۓ پوچھا۔

چلو ٹھیک ہے میں بات کروں گی امی اور خالہ سے لیکن ایک شرط پر۔۔۔'

کیا شرط ہے جلدی بتائیں۔ 'نعیمہ بے چینی سے بولی۔

وہ میں تمہیں بعد میں بتاؤں گی۔' نادیہ کچھ سوچ کر زیرِ لب مسکرائی۔

تینوں کے درمیان جب معاہدہ طے پا گیا تو تینوں بھاگ کر نیچے آ گئیں۔ ان کی امی فرش پر سلائی مشین رکھے کچھ سینے میں مصروف تھیں۔ نعیمہ بولنے کے لیۓ اپنا منہ کھولنے ہی والی تھی کہ نادیہ نے اس کے منہ پہ ہاتھ رکھ دیا اور خود کہا۔ 'امی ہم خالہ کے گھر جا رہی ہیں ابھی آجائیں گی پانچ منٹ میں۔'

خالہ کے گھر تم لوگوں نے اس وقت کیا کرنے جانا ہے۔۔۔' امی قینچی سے کپڑے کا ایک سرا کاٹتے ہوۓ بولیں۔ 'تم بھی نادیہ ان بچیوں کے ساتھ بالکل بچی بن جایا کرو۔ ہنڈیا چڑھا لو اوپر سے وقت دیکھو کیا ہو گیا۔ تمہارے ابو کو کھانا بھی بھجوانا ہے۔'

اچھا امی بس پانچ منٹ میں آئی۔'

تینوں بھاگ کر گھر سے باہر نکل گئیں۔

ایک تو اس لڑکی کی مجھے سمجھ نہیں آتی ابھی ہانڈی روٹی کرنے والی رہتی ہے اور کتنے سارے کام پڑے ہوۓ ہیں پر اسے بالکل بھی فکر نہیں۔' امی بڑبڑاتی ہوئی اپنے کام میں مگن ہو گئیں۔

خالہ کے گھر سے نعیمہ اور نادیہ اکیلی واپس آرہی تھیں کیونکہ سدرہ کو اس کی امی نے وہیں روک لیا تھا۔ گھر سے کچھ دور جب وہ ایک تنگ گلی سے گزر رہی تھیں تو دوسری طرف سے شمشیر علی آتا ہوا دکھائی دیا۔ قریب پہنچ کر وہ ان کا راستہ روک کر کھڑا ہو گیا اور قدرے درشت لہجے میں بولا۔ 'سچ سچ بتاؤ وہ پتھر والی شرارت تم لوگوں نے کی تھی نا؟'

کون سی پتھر والی شرارت ہمیں کیا پتہ آپ کس پتھر کی بات کر رہے ہیں۔' نادیہ نے معصومیت کے سے انداز سے جواب دیا۔

تم بتاؤ نعیمہ۔۔۔ سچ سچ بتانا ورنہ ابھی چاچی رقعیہ کو جا کر بتا دوں گا پھر وہ تم لوگوں کو ٹھیک کریں گی۔' شمشیر نے نعیمہ کو ڈانٹتے ہوۓ کہا۔

نعیمہ پہلے ان سے پوچھو' نادیہ بیچ میں بول پڑی۔ 'چچی سے یہ بات کرنے کے لیۓ بھی جو ہمت چاہیۓ وہ آپ میں ہے؟'

نعیمہ دھیرے سے زیر لب مسکرائی۔ شمشیر علی کچھ جھینپ سا گیا پھر بولا۔ 'ٹھیک ہے ٹھیک ہے ابھی چھوڑتا ہوں آئندہ اگر ایسی خرکت کی تو مجھ سے برا کوئی نہیں ہو گا۔'

وہ تو ویسے بھی نہیں۔' نادیہ سرگوشی کے انداز سے بولی۔

کیا کہا'؟ شمشیر علی اس کی بات سن کر فوراً بولا۔

کچھ نہیں۔ ہم جائیں؟' نادیہ نے پوچھا۔

ہاں ٹھیک ہے جاؤ۔'

دونوں ہنستی ہوئی آگے بڑھ گئیں۔

شمشیر بھائی بھی کیا ڈرپوک بندے ہیں آپی ان کی بزدلی کے بارے میں تو سارا گاؤں جانتا ہے۔' نعیمہ بولی۔

تو چل اب زیادہ باتیں نہ کر۔' نادیہ نے اسے ایک چپت رسید کرتے ہوۓ کہا۔

شمشیر علی وہیں کھڑا انہیں جاتا ہوا دیکھتا رہا۔ جب وہ دونوں موڑ مڑنے لگیں تو نادیہ پیچھے مڑ کر اسے دیکھ کر مسکرائی۔ وہ بھی مسکرا کر آگے بڑھ گیا۔

گلی سے نکلنے کے بعد شمشیر علی اینٹوں سے بنے ایک کشادہ راستے پر چلنے لگا اور تھوڑا چلنے کے بعد ایک موڑ مڑ کر کچے راستے پر آگیا جہاں اس کے دوست ارشاد کا ڈیرہ تھا۔ راستے میں اسے مودا مل گیا جس کے ساتھ اس کی ایک نہیں بنتی تھی۔ جب وہ قریب پہنچا تو مودے نے اسے آنکھیں نکال کر گھور کر دیکھا۔ شمشیر علی اسے دیکھ کر مسکرایا اور آگے بڑھ گیا۔

وہ ڈیرے میں داخل ہوا تو ارشاد بھینسوں کے لیۓ چارا کاٹ رہا تھا۔ وہ اسے دیکھ کر بولا۔ 'کہاں رہ گیا تھا تم نے کہا تھا میں پانچ منٹ تک آرہا ہوں اور پورے آدھ گھنٹے بعد آۓ ہو۔'

وہ یارا ایک کام چلا گیا تھا۔'شمشیر علی پاس پڑی ہوئی چارپائی پر بیٹھ گیا۔

ارشاد نے زمین پر پڑے پٹھوں کے ڈھیر میں سے کچھ پٹھے اٹھاۓ اور انہیں ٹوکے پر رکھ کر درست کیا۔ پھر دستے کو دونوں ہاتھوں سے مضبوطی سے پکڑا اور گھمانا شروع کر دیا۔ پٹھے کتر کتر کر آگے فرش پر پڑی چادر پر گرنے لگے۔

اچھا بتا مودے سے تو پھر ملاقات نہیں ہوئی؟' ارشاد نے پوچھا۔

ابھی راستے میں ملا ہے۔'

کچھ کہا اس نے؟'

کیا کہنا تھا۔' شمشیر بولا۔ 'بڑا گھور رہا تھا میں ہنس کر اس کے پاس سے گزر آیا۔'

تو بیوقوف ہے۔ گھور رہا تھا تو اسے روک لیتا اور گریبان سے پکڑ کر پوچھتا کیوں گھور رہے ہو۔'

چھوڑ یار دفعہ کر وہ تو چاہتا ہی یہ ہے کہ لڑائی ہو۔'

تو کیسا بندہ ہے یارا۔' ارشاد نے پٹھوں کے ڈھیر میں سے مزید پٹھے ٹوکے میں رکھتے ہوۓ کہا۔ 'میں کہتا ہوں بزدلی چھوڑ دے۔ سارا گاؤں پتہ ہے تیری بزدلی کی وجہ سے کیا کیا باتیں کرتا ہے'

کہنے دے یار کیا فرق پڑتا ہے۔' شمشیر نے لاپرواہی سے جواب دیا۔

تیرا کچھ نہیں ہو سکتا۔ چل چھوڑ تو لسی پی پہلے ہی ٹھنڈا بندہ ہے اور تھوڑا ٹھنڈا ہو جا۔'

کہاں ہے لسی؟' شمشیر نے اردگرد دیکھ کر پوچھا۔

وہ گڈوی میں پڑی ہے خود بھی پی اور مجھے بھی ڈال کے دے۔'

شمشیر نے اٹھ کر لسی کے دو گلاس بھرے اور واپس آکر ایک گلاس ارشاد کو پکڑایا اور دوبارہ اسی جگہ پر آکر بیٹھ گیا۔ ارشاد نے ایک گھونٹ میں آدھا گلاس پی کر ایک طرف رکھا اور کترے ہوۓ پٹھے اٹھا کر کچھ فاصلے پر بندھی ہوئی دونوں بھینسوں کے آگے ڈال دیۓ پھر واپس آکر دوبارہ لسی کا گلاس اٹھایا اور باقی لسی پی کر پھر سے پٹھوں کے ڈھیر میں سے اپنے دونوں بازوؤں میں کافی سارے پٹھے بھرے اور اسے ٹوکے پر رکھ کر جھکا اور دستہ پکڑ کر ٹوکا چلانا شروع کر دیا۔ شمشیر لسی پی کر چارپائی پر یوں لیٹ گیا کہ اس کی ایک ٹانگ چارپائی کے اوپر تھی اور دوسری چارپائی کے ایک طرف نیچے زمین پر تھی۔ جبکہ اس نے ایک بازو اپنے سر کے نیچے رکھ کر تکیہ بنا لیا اور اوپر آسمان کی طرف دیکھنے لگا۔ دیر تک ان دونوں کے درمیان خاموشی رہی پھر ارشاد بولا۔ 'یار شمشیر ایک بات تو بتا۔'

ہاں پوچھو۔' وہ اسی انداز میں لیٹے ہوۓ اس کی طرف دیکھے بغیر بولا۔

تجھے کبھی اپنی مونچھوں کا خیال نہیں آیا؟'

کیا مطلب؟' اس نے ابھی بھی آسمان پر نظریں گاڑھے ہوۓ جواب دیا۔

تم نے مردوں کی طرح مونچھیں تو رکھ لی ہیں۔' ارشاد بولا۔ 'بے شک چھوٹی ہیں پر رکھی تو ہوئیں ہیں۔ لیکن تمہیں کبھی ان مونچھوں کی لاج رکھنے کا خیال نہیں آیا۔'

تو کیا کہہ رہا یارا سیدھا سیدھا بول۔'

تو اتنا ڈرپوک کیوں ہے اتنی تو لڑکیاں ڈرپوک نہیں جتنا تو ڈرپوک ہے۔ یار مرد بن۔ کچھ پتہ چلے پنڈ میں کوئی مرد کا بچہ رہتا ہے۔'

شمشیر نے اس کی بات سن کر کروٹ بدلی اور اس کی طرف دیکھ کر کہا۔ 'اچھا! تیرا پورے پنڈ کو پتہ ہے کہ تو مرد کا بچہ ہے؟'

ہاں پتہ ہے پتہ کیوں نہیں۔' اس نے ٹوکا گھماتے ہوۓ ہاتھ روک لیۓ اور سیدھا ہو کر بولا۔ 'یاد کر پچھلے سال جب میری فانے اور بالے کے ساتھ لڑائی ہوئی تھی تو دونوں کو میں نے کیسا پینجا لگایا تھا۔ اگر لوگ بیچ میں آکر چھڑاتے نہیں تو ان کی ہڈیاں سک جانی تھی۔ نال آلے پنڈ تک یہ بات گئی تھی۔

او رہنے دے یار تو رہنے دے۔ مجھے نہ ایسی پٹیاں پڑھا۔' شمشیر دوبارہ سیدھے ہو کر لیٹ گیا۔

چل تو میری چھوڑ تو پا سفیر کی مثال لے لے۔ کیسا جگرا ہے اس آدمی کا پچھلے دنوں اس نے کیا پھینٹا لگایا تھا۔'

رہن دے تو۔۔۔ پھینٹا لگایا تھا۔۔۔ تو مجھے ایک بات بتا۔' شمشیر اٹھ کر بیٹھ گیا۔ 'لڑائی کرنا بھی کوئی دلیری ہے۔ یہ بھی کوئی بہادری کا کام ہے؟'

تیرے نزدیک پتہ نہیں پھر بہادری کیا ہے۔' ارشاد بالٹی اٹھا کر بھینسوں کے لیۓ پانی لینے چلا گیا۔ شمشیر علی دوبارہ سیدھا لیٹ کر اوپر آسمان پر اڑتے پرندوں کو تکنے لگا۔

رات کو نادیہ نے اپنی امی سے نعیمہ اور سدرہ کے میلے پر جانے کی اجازت طلب کی اور انہیں بتایا کہ خالہ سے وہ پہلے ہی اجازت لے چکی ہیں۔ یہ سن کر امی نے بھی انہیں اجازت دے دی۔

اگلے دن جب وہ میلے سے واپس لوٹیں تو نادیہ نے انہیں اپنی شرط یاد دلائی۔ 'ہمیں یاد ہے آپی! پر شرط کیا ہے؟' سدرہ نے پوچھا۔

تم دونوں میرے ساتھ شہر جاؤ گی ابھی۔ بس میرے کالج تک جانا ہے۔' نادیہ نے کہا۔

نہیں آپی اس وقت نہیں!' نعیمہ تھکے ہوۓ انداز سے بولی۔ 'آپ بہت پھراتی ہیں ہم پہلے ہی تھکی ہوئی ہیں۔'

نہیں پھراؤں گی بس ایک دو کتابیں اور ایک آدھ چیز اور لینی ہے۔'

پر آپی۔۔۔' سدرہ بولی۔

دیکھو تم لوگوں نے وعدہ کیا تھا۔ آئندہ پھر یاد رکھنا میں تمہارے کسی کام نہیں آؤں گی۔' نادیہ دھمکی آمیز لہجے میں بولی۔

اچھا آپی ٹھیک ہے چلو چلتے ہیں۔' نعیمہ نے بددلی سے کہا۔

ٹھیک ہے تم یہی رکو میں چادر اور بیگ لے لوں اور امی کو بتا کر آتی ہوں۔'

وہ دونوں ابھی پوری طرح بیٹھی بھی نہیں تھی کہ نادیہ چادر لیۓ اور کندھے پر بیگ لٹکاۓ آگئی۔

چلو چلیں۔' نادیہ نے باہر نکلتے ہوۓ کہا۔

وہ دونوں بھی اس کے پیچھے باہر نکل گئیں۔

شہر پہنچ کر نادیہ نے دو تین دکانوں پر گھوم پھر کر کچھ کتابیں اور چند دیگر اشیاء خریدیں پر جب وہ ایک اور دکان میں گھسنے لگی تو نعیمہ بول اٹھی۔ 'آپی خدا کے لیۓ بس کریں ہم مرنے والی ہو گئیں ہیں۔ ہمیں بھوک بھی بڑی سخت لگ رہی ہے۔'

یہ بس آخری دکان اس کے بعد کچھ کھائیں گی اور پھر واپس گھر'۔ نادیہ نے دکان میں گھستے ہوۓ کہا۔

آپی پہلے کچھ کھا لیتے ہیں۔' سدرہ بولی۔ 'پھر ادھر سے جو بھی لینا ہوا لے لینا۔'

ندیدیو صبر نہیں ہوتا تم لوگوں سے چلو آؤ مرو پہلے کچھ کھا لو یہ نہ ہو یہیں بے ہوش ہو جاؤ۔' نادیہ دکان میں گھسنے کی بجاۓ دوسری طرف چل پڑی۔

وہاں جگہ جگہ کھانے پینے کے چھوٹے چھوٹے ریستوران، دکانیں اور ٹھیلے تھے۔ ایک چھوٹے سے ریستوران میں گھسنے کے بعد نادیہ نے ان دونوں کو ایک جگہ بٹھایا اور خود ان سے ذرا دور جا کر بیگ سے موبائل نکال کر کال ملائی۔ تقریباً ایک آدھ منٹ بات کرنے کے بعد وہ واپس آگئی۔

کھانا کھانے کے بعد وہ جونہی باہر نکلیں تو سامنے انہیں شمشیر علی دکھائی دیا۔

شمشیر بھائی آپ یہاں؟' سدرہ نے خیرت سے پوچھا۔

ہاں وہ میں یہاں کسی کام سے آیا تھا۔ آپ لوگ یہاں کیسے؟' شمشیر نے انجان بنتے ہوۓ کہا۔

نادیہ اس کی بات سن کر مسکرائی۔

آپی کو کچھ چیزیں لینی تھیں تو اس لیۓ۔' سدرہ نے جواب دیا۔

ہونہہ! تو لگتا ہے کھانا وغیرہ کھا چکے ہیں آپ لوگ؟' شمشیر ان کے پیچھے ریستوران کی طرف دیکھ کر بولا جہاں سے وہ ابھی نکل کر آئیں تھیں۔

جی کھانا کھا کر اب بس نکلنے ہی والے تھے۔' نعیمہ بولی۔

اچھا۔۔۔! تو آؤ میری طرف سے ایک ایک آئس کریم ہو جاۓ۔' شمشیر آئس کریم والے کی طرف اشارہ کرکے بولا۔

نہیں رہنے دیں آپ کا شکریہ ہمیں پہلے ہی بہت دیر ہو گئی ہے۔' اس بار نادیہ بولی۔

کوئی بات نہیں بس پانچ منٹ کی تو بات ہے یہیں کھڑے کھڑے تو کھانی ہیں۔ آپ رکیۓ میں ابھی لے کر آتا ہوں۔' شمشیر انہیں وہیں کھڑا کرکے آئس کریم لینے چلا گیا۔ کچھ فاصلے پر ایک درخت کے نیچے سیمنٹ کا ایک بنچ نصب تھا نعیمہ اسے دیکھ کر بولی۔ 'آپی ہم وہاں بیٹھ جائیں ہم بہت تھک گئی ہیں۔'

ہاں بیٹھ جاؤ۔' نادیہ نے جواب دیا۔

کچھ دیر بعد شمشیر دونوں ہاتھوں میں آئس کریم تھامے آیا اور نعیمہ اور سدرہ کو آئس پکڑا کر نادیہ کے پاس جا کر کھڑا ہو گیا۔ اس کو آئس کریم دینے کے بعد بولا۔ 'ہاں اب بتاؤ مجھے یہاں کیوں بلایا'؟

بات کرنے کے لیۓ بلایا تھا۔'

کون سی بات؟'

یہی کہ آپ اپنے گھر والوں سے کب بات کریں گے؟' نادیہ نے پوچھا۔

میری بات کی تمہیں بڑی فکر ہے میں بات کر لوں گا پہلے تم تو اپنے گھر بات کرو۔'

ارادہ تو روز کرتی ہوں مگر ابھی تک کر نہیں پائی۔'

تو کوئی بات نہیں اب کر لو۔' شمشیر بولا۔ 'مجھے لگتا ہے میرے گھر والوں کو تو کوئی اعتراض نہیں ہو گا۔ تمہارے امی ابو ہمارے سگے چاچا چاچی تو نہیں پر بچپن سے ہم سب بہن بھائیوں نے انہیں اپنے چاچا چاچی ہی سمجھا ہے۔ آج تک کوئی ایسی بات ہمارے گھر میں ہوئی ہے جس میں چاچی رقعیہ سے مشورہ نہ لیا گیا ہو؟'

ہاں وہ تو ہے۔' نادیہ کچھ سوچتے ہوۓ بولی۔

تو پھر ٹھیک ہے تم ان سے بات کر کے دیکھو ان کے ذہن میں کیا ہے۔ پھر دیکھیں گے آگے کیا کرنا ہے۔ جب کہو گی میں اپنی امی کو چاچی رقعیہ سے بات کرنے کے لیۓ بھیج دوں گا۔'

ہونہہ۔' نادیہ نے سر ہلایا۔

بس یہ بات تھی۔' شمشیر بولا۔ 'اتنی سی بات کے لیۓ تم نے مجھے یہاں بلایا۔'

نہیں صرف یہ بات نہیں تھی۔'

تو کیا تھی؟' شمشیر نے پوچھا۔

میں نے آپ کو کچھ دکھانا تھا۔'

کیا؟'

نادیہ نے بیگ میں سے کوئی چیز نکالی اور اسے ہتھیلی پر رکھ کر بولی۔ 'یہ۔۔۔ یہ دیکھیں۔'

شمشیر نے دھیان سے دیکھا تو چھوٹا سا نہایت خوبصورت ائیفل ٹاور تھا جس کے اوپر اس کے نام کا پہلا حرف انگریزی میں کندہ تھا۔

واہ یہ کہاں سے لیا؟' شمشیر نے پوچھا۔

وہ پچھلے مہینے جب میں کالج کے ٹرپ کے ساتھ مری گئی تھی وہاں سے خریدا تھا۔ کیسا ہے؟' نادیہ نے اس سے پوچھا۔

شاندار ہے۔' شمشیر نے تعریف کرتے ہوۓ کہا۔

دونوں کچھ دیر تک باتیں کرتے رہے پھر نادیہ نے کہا۔ 'ٹھیک ہے اب چلنا چاہیۓ۔ اگر گاؤں کے کسی آدمی نے دیکھ لیا تو پتہ نہیں کیا سوچے گا۔'

ہاں چلو چلتے ہیں۔ تم لوگوں نے کیسے جانا ہے؟' شمشیر نے پوچھا۔

ظاہر ہے رکشے پہ ہی جائیں گے۔'

ٹھیک ہے وہ رکشہ کھڑا ہے میں اس سے بات کرتا تم لوگ آجاؤ۔'

شمشیر نے انہیں رکشے پر بٹھا کر رخصت کیا اور پھر اپنے موٹرسائیکل پر بیٹھ کر خود بھی گاؤں کی طرف چل پڑا۔

جب وہ گاؤں پہنچا تو کھیتوں کے پاس کچے راستے پر گزرتے ہوۓ اسے سڑک کنارے ایک آدمی گرا دکھائی دیا۔ وہ اسے فوراً پہچان گیا۔ جلدی سے اس نے موٹرسائیکل کھڑا کیا اور اسے اٹھایا۔

'کیا ہوا چاچا بوٹا؟' اس نے اسے سہارا دے کر اٹھاتے ہوۓ کہا۔

چاچے بوٹے نے بیٹھ کر چند لمحے سانس درست کیا۔ جب اس کی حالت کچھ بہتر ہوئی تو شمشیر نے دوبارہ پوچھا۔ 'اب بتاؤ کیا ہوا؟'

ہونا کیا ہے غلطی سے میری بکریاں ملک کرم داد کے کھیتوں میں چلی گئیں اس کے آدمیوں نے دیکھ لیا تو مجھے آکر مارا اور میری بکریاں بھی چھین کر لے گۓ۔'

تو تم نے انہیں روکا نہیں؟'

بڑا روکا انہیں بڑے ترلے کیۓ۔۔۔ میں نے تو یہ بھی کہا مجھے بے شک جتنا مارنا ہے مار لو لیکن میری بکریاں نہ لے کر جاؤ میں غریب بندہ ہوں ان دو چار بکریوں سے میرا گزارا ہوتا ہے پر وہ نہیں مانے۔'

چاچے بوٹے نے جونہی بات ختم کی اسے کھانسی کا زبردست دورہ پڑا اور وہ وہیں بے ہوش ہو گیا۔ شمشیر اسے کسی نہ کسی طرح موٹر سائیکل پر بٹھا کر گاؤں لے آیا۔ کچھ ہی دیر میں یہ بات تقریباً گاؤں بھر میں پھیل گئی۔ تھوڑی دیر بعد چند لوگ چاچے بوٹے کے گھر میں بیٹھے یہ سوچ رہے تھے کہ اب کیا کرنا چاہیۓ۔ کیسے اس معاملے سے نپٹا جاۓ۔ لہذا طے یہ پایا کہ تین چار لوگ چاچے بوٹے کے ساتھ کل ملک کرم داد کی حویلی میں جائیں گے اور اس سے التجا کریں گے کہ وہ چاچے بوٹے کی بکریاں واپس کر دے۔

اگلے دن چاچا بوٹا چند لوگوں کے ساتھ چوہدری ملک کرم داد کی حویلی میں داخل ہوا تو کرم داد اس وقت اپنی تخت نما کرسی پر براجمان تھا۔ اس کے گرد چند اور لوگ بھی بیٹھے تھے اور کچھ اس کے ملازمین اردگرد کھڑے تھے۔ یہ لوگ بھی اس کے سامنے ہاتھ باندھے کھڑے ہو گۓ۔ ملک صاحب نے ان کے آنے کی وجہ پوچھی تو چاچے بوٹے کے ساتھ جو آدمی تھا بولا۔ 'چوہدری صاحب کل آپ کے آدمی چاچے بوٹے کی بکریاں اٹھا کر لے آئیں ہیں۔ جناب آپ تو بڑے آدمی ہو یہ دو چار بکریاں آپ کے کس کام کی۔ یہ بیچارا غریب آدمی ہے اسے بکریاں واپس کر دیں جناب۔'

آدمی کی بات سن کر ملک کرم داد نے اپنے ملازم سے جو اسکے پیچھے کھڑا تھا پوچھا۔ 'کیوں شیر محمد یہ کیا کہہ رہے ہیں؟'

یہ بڑا ذلیل آدمی ہے ملک صاحب۔' شیر محمد بولا۔ 'اسے بڑی دفعہ منع کیا ہے پر یہ بعض نہیں آتا۔ اسے پتہ ہے یہ کھیت آپ کے ہیں پھر بھی یہ جان بوجھ کر اپنی بکریاں وہاں چھوڑتا ہے۔'

ایسی بات نہیں ملک صاب۔' چاچا بوٹا بولا۔ ' بے زبان جانور ہے پتہ نہیں چلنے دیا جی اس نے کب وہ گھس گئیں آپ کے کھیتوں میں۔۔۔ میں تو بڑا دھیان رکھتا ہوں جی۔'

جھوٹ بولتا ہے ملک صاحب اک واری نہیں میں نے اسے بڑی واری سمجھایا ہے۔ مگر یہ پھر بھی وہاں بکریاں چھوڑ کر خود درخت کے نیچے لیٹ کر سو جاتا ہے۔'

سوتا نہیں ہوں ملک صاب۔' چاچا بوٹا بولا۔ 'میری اتنی مجال جو میں بکریوں کو آپ کے کھیتوں میں چھوڑ کر سو جاؤں۔ وہ تو اس وقت انہوں نے جھاکا دے دیا جی۔ ورنہ میں تو اک منٹ بھی انہیں اکیلا نہیں چھوڑتا۔'

تیرے خلاف پہلے بھی بڑی شکیتیں آتی رہی ہیں بوٹے۔ تجھے لکھ واری سمجھائیں پر تجھے بات سمجھ کونی آتی۔' ملک کرم داد سخت گیر لہجے میں بولا۔ 'اب تیری یہ سزا ہے تجھے بکریاں نہیں ملیں گیں۔'

چوہدری صاب ایسا نہ کریں خدا کے واسطے ایسا نہ کریں۔' چاچا بوٹا التجا کرتے ہوۓ بولا۔ 'میری تو روزی روٹی ہی یہ ہے۔ میں کیا کروں گا ملک صاب۔ میرے چھوٹے چھوٹے بچے ہیں۔'

یہ تمہیں پہلے سوچنا چاہیۓ تھا۔ چلا جا اب یہاں سے۔'

چاچے بوٹے کے ساتھ آۓ دوسرے آدمیوں نے بھی بولنا چاہا مگر چوہدری کرم داد نے انہیں ہاتھ کے اشارے سے خاموش کروا دیا اور گرجدار آواز میں بولا۔ 'تم سب لوگ بھی چلے جاؤ میں نے فیصلہ سنا دیا ہے اب یہاں تم میں سے کوئی نہ رکے۔'

اس سے پہلے وہ لوگ پلٹتے چاچا بوٹا اس کے پاؤں میں گر گیا اور گڑگڑا کر التجا کرنے لگا۔ 'خدا کے واسطے ملک صاب مجھے معاف کر دیں آگے سے میں اپنی بکریاں آپ کے کھیتوں کے نزدیک بھی نہیں لاؤں گا۔'

چوہدری کرم داد نے اپنی ٹانگ کو زوردار جھٹکا دیا اور چلا کر کہا۔ 'دفعہ ہو جا یہاں سے تجھے کہا جو ہے تجھے بکریاں نہیں مل سکتیں۔'

ٹانگ کی ٹھوکر لگنے سے چاچا بوٹا کچھ دور جا گرا اور گرتے ہی بے ہوش ہو گیا۔ اس کے ساتھی اس کی طرف لپکے اور اسے ہلا جلا کر اٹھانے کی کوشش کرنے لگے۔ مگر وہ نہ اٹھا۔ چوہدری کرم داد کا ایک ملازم آگے بڑا اور اس کی نبض ٹٹول کر بولا۔ 'ملک صاحب یہ تو مر گیا ہے۔'

ملک صاحب اپنی کرسی سے اٹھ کھڑے ہوۓ۔ ان کے پاس جتنے مہمان بیٹھے تھے وہ بھی اٹھ کر کھڑے ہو گۓ۔ چاچے بوٹے کا ایک ساتھی آگے بڑا اور اس کے سینے پر جھک کر دل کی دھڑکن محسوس کرنے کی کوشش کرنے لگا۔

اب کیا حکم ہے ہمارے لیۓ ملک صاحب؟' ملک صاحب کے ملازم نے پوچھا۔

تم ایسا کرو اس کی لاش کو لے جاؤ اور اس کے کفن دفن کا انتظام کرو اور اس کے گھر والوں کو میری طرف سے افسوس بھی کر دینا۔'

ملک صاحب ملازم کو ہدایات دے کر اپنے مہمانوں کے ساتھ باہر نکل گۓ۔ ان کے جانے کے بعد ان سب نے اس کی لاش کو اٹھایا اور باہر لے جاکر گاڑی میں ڈال دیا۔

چاچا بوٹے کی لاش جب اس کے گھر پہنچی تو اس کے گھر میں صفِ ماتم بچھ گئی۔ ملک صاحب کا ملازم اپنے دو بندوق بردار ساتھیوں کے ساتھ اس کے گھر میں لاش رکھ کر اور ان کے لواحقین سے کفن دفن کے انتظام کا وعدہ کرکے واپس لوٹ گیا۔ اردگرد سے لوگ اکھٹے ہونے لگے۔ ہر ایک کی آنکھوں میں ایک ہی سوال تھا جو وہ ان تین آدمیوں سے پوچھنا چاہ رہے تھے جو چاچے بوٹے کے ساتھ چوہدری کرم داد کی حویلی میں گۓ تھے۔ مگر سب خاموش تھے۔ شاید جواب سب ہی کو معلوم تھا۔ لیکن ایک شخص تھا جو جواب جانتے ہوۓ بھی جواب جاننا چاہتا تھا۔ وہ بھیڑ میں سے نکل کر آگے آیا اور ان تینوں کے سامنے آکر کھڑا ہو گیا۔

بتاؤ وہاں چاچے بوٹے کے ساتھ کیا ہوا تھا؟' شمشیر علی ان میں سے ایک آدمی کے دونوں کندھے پکڑ کر بولا۔

وہ آدمی خاموشی سے سر جھکاۓ کھڑا رہا تو شمشیر علی نے چلا کر پوچھا۔ 'بتاؤ کیا ہوا تھا حویلی میں؟'

چند لمحے پہلے تک جو لوگوں کے شور اور رونے دھونے کی آوازیں آرہی تھیں ایک دم سے خاموش ہو گئیں۔ شمشیر علی دوبارہ چلایا۔ 'میں پوچھ رہا ہوں کیا ہوا تھا حویلی میں؟'

تم جان کر کیا کرو گے؟' وہ آدمی بولا۔

تم بس بتاؤ کیا ہوا تھا۔'

میں بتاتا ہوں۔' اس آدمی کی بجاۓ ساتھ والا آدمی بولا۔

سب اس کی طرف دیکھنے لگے۔

'میں پوری بات بتاتا ہوں لیکن بات جاننے کے بعد بہتری اسی میں ہے تم لوگ خاموش رہو۔'

جب وہ پورا واقعہ سنا چکا تو دیر تک کسی کی آواز نہ آئی۔ بالآخر شمشیر علی بولا۔ 'تم کو کیا لگتا ہے یہ کیا ہے؟'

کیا مطلب کیا ہے؟'

تمہیں نہیں لگتا یہ ایک قتل ہے۔'

اس آدمی نے کوئی جواب نہ دیا۔ شمشیر علی کچھ توقف کے بعد دوبارہ بولا۔ 'تم اچھی طرح جانتے ہو چاچے بوٹے کی موت ایک قتل ہے۔ تم تینوں اس کے گواہ ہو۔ بلکہ تم تینوں کیا ہم سب اس کے گواہ ہیں ہم سب جانتے ہیں کل اگر میں وقت پر کھیتوں کے پاس نہیں پہنچتا اور اسے بے ہوشی کی خالت میں اٹھا کر نہیں لاتا تو وہ وہیں دم توڑ چکا ہوتا۔ کل پورے گاؤں کے سامنے چاچے بوٹے نے بتایا تھا کہ اسے ملک کے آدمیوں نے مارا ہے اور آج بھی اسی کی حویلی میں اس کی موت ہوئی ہے۔ یہ بات بھی پورا گاؤں جانتا ہے۔'

ٹھیک ہے ہم جانتے ہیں لیکن ہمارے جاننے سے کیا ہوتا ہے۔ ہم ملک جیسے آدمی کا کیا بگاڑ لیں گے۔' بھیڑ میں کھڑے لوگوں میں سے ایک آدمی بولا۔

ہم کم سے کم تھانے جاکر اس کے خلاف درخواست تو دے سکتے ہیں'۔ شمشیر بولا۔ 'اور اگر ضرورت پڑی تو عدالت میں گواہی بھی دیں گے۔'

تمہارا دماغ خراب ہے۔' وہ آدمی بولا۔ 'تم جانتے ہو تم کس کے خلاف درخواست دینے کی بات کررہے ہو۔'

اچھی طرح جانتا ہوں۔'

تم کچھ نہیں جانتے۔' دوسرا آدمی بولا۔ 'تمہیں کیا لگتا ہے ہماری درخواست منظور ہو گی۔ جب تھانے دار کو پتہ چلا گا ہم چوہدری کرم داد کے خلاف درخواست دینے آۓ ہیں وہ بھی قتل کی تو وہ ہمیں دھکے دے کر باہر نکال دے گا۔'

اگر ہم سب مل کر جائیں تو شاید وہ ایسا نہ کر سکے۔ اتنے سارے لوگوں کی درخواست وہ کیسے منظور نہیں کرے گا۔' شمشیر علی بولا۔

ایسے نہیں ہوتا تم ابھی بچے ہو تمہیں زندگی کا تجربہ نہیں۔' وہ آدمی بولا۔

بالکل ٹھیک بات ہے یہ منڈا ابھی جوان ہے، گرم خون ہے اسی لیۓ جذباتی ہو رہا ہے۔' ایک بزرگ آدمی آگے بڑا اور شمشمیر کے پاس جا کر بولا۔ 'جا پتر اپنا کام کاج کرو جا کر تمہاری یہ عمر نہیں ایسی باتیں کرنے کی۔ ایسے موقعوں پر جذبات سے نہیں عقل سے کام لیتے ہیں۔'

مجھے نہیں چاہیۓ ایسی عقل۔۔۔' شمشیر بولا۔ 'تم لوگوں میں سے اگر کوئی بھی نہیں جانا چاہتا تو بے شک نہ جاۓ لیکن میں ضرور جاؤں گا اور جا کر گواہی دوں گا۔' شمشیر علی جونہی آگے بڑا بھیڑ میں سے کسی کی آواز آئی۔

رک جاؤ۔'

اس نے پیچھے مڑ کر دیکھا تو اس کے اپنے والد کی آواز تھی۔ 'تو اتنا بڑا ہو گیا ہے کہ مجھ سے پوچھے بغیر ہی چل پڑا ہے۔ تم کہیں نہیں جاؤ گے آرام سے گھر بیٹھو۔'

میں جاؤں گا ابا جی۔' شمشیر علی بولا۔

تمہیں کچھ پرواہ ہے گھر میں بہنیں ہیں۔ ماں ہے، چھوٹے بھائی ہیں اور بوڑھا باپ ہے۔ ہم اتنے جوگے ہیں جو ملک کرم داد سے ٹکر لے سکیں؟' اس کے والد نے کہا۔

میں کسی سے کوئی ٹکر نہیں لے رہا ابا جی۔ میں تو بس وہ کہنے جا رہا ہوں جو میں نے دیکھا ہے اور جو سچ ہے۔ اور وہ میں ہر حال میں کہوں گا چاہے اس کا انجام کچھ بھی ہو۔' شمشیر علی بات کرکے وہاں سے چل دیا۔

ابھی وہ بھیڑ سے نکل کر موٹر سائیکل پر بیٹھنے والا تھا کہ کسی نے اس کا ہاتھ پکڑ لیا۔ اس نے گردن گھما کر دیکھا تو اس کا دوست ارشاد تھا۔

کہاں جا رہے ہو؟' ارشاد نے پوچھا۔

تھانے جا رہا ہوں۔'

پاگل ہو گۓ ہو۔ تم جانتے بھی ہو اس کا کیا نتیجہ نکلے گا۔'

مجھے اس کی پرواہ نہیں۔' وہ اپنا ہاتھ اس کی کلائی کی گرفت سے آزاد کراتے ہوۓ بولا۔

تمہارا دماغ چل گیا ہے۔ تم جانتے نہیں اس سے ہم سب کا یہاں رہنا مشکل ہو جاۓ گا۔ بلکہ خود تمہارے گھر والوں کی اور تمہاری زندگی خطرے میں پڑ جاۓ گی۔' ارشاد نے اسے سمجھانے کی کوشش کرتے ہوۓ کہا۔

اچھا! تم لوگوں میں تو بڑا جگرا تھا۔ تم تو بہادری کی بڑی باتیں کرتے تھے۔ وہ قصے، وہ باتیں، وہ کہانیاں، وہ جگرے کہاں گۓ؟' شمشیر طنزیہ انداز سے دھیرے سے ہنسا اور موٹر سائیکل پر بیٹھ کر وہاں سے چل دیا۔

تھانے میں پہنچ کر جب اس نے تھانے دار کو چوہدری کرم داد کے خلاف درخواست کا کہا تو تھانے دار چونک اٹھا۔ پہلے وہ سمجھا شاید شمشیر علی نشے میں ہے پھر وہ اس کی ذہنی حالت پر شک کرنے لگا۔ اس کے بار بار اصرار کرنے پر بھی اس نے اس کی درخواست منظور نہ کی اور اسے تھانے سے باہر نکال دیا۔ شمشیر علی کے جانے کے بعد تھانیدار اٹھا اور گاڑی سٹارٹ کرکے سیدھا چوہدری کرم داد کی حویلی کی جانب چل پڑا۔

جب وہ حویلی میں پہنچا تو ملک کرم داد اپنی محفل لگاۓ بیٹھا تھا۔ اس نے تھانیدار کو آتے دیکھ کر پوچھا۔

'آؤ تھانےدار صاحب خیر سے آۓ ہو بڑی چھیتی میں لگ رہے ہو۔'

بات ہی کچھ ایسی ہے چوہدری صاحب اسی لیۓ جلدی میں آیا ہوں۔' تھانیدار نے کرسی پر بیٹھتے ہوۓ جواب دیا۔

کیوں ایسا کی ہو گیا؟'

چوہدری صاحب آپ کے خلاف گاؤں سے ایک درخواست آئی ہے۔'

کیسی درخواست؟' چوہدری صاحب نے پوچھا۔

آپ پر یہ الزام لگایا گیا ہے کہ آپ نے چاچے بوٹے کا قتل کیا ہے۔'

ہونہہ۔۔۔ تو آپ مجھے گرفتار کرنے آۓ ہیں؟' چوہدری صاحب کچھ توقف کے بعد بولے۔

کیس باتیں کرتے ہیں ملک صاحب آپ۔' تھانیدار بولا۔ 'میں بھلا ایسا کر سکتا ہوں۔ میں نے اس کی درخواست منظور نہیں کی اور اسے واپس بھیج دیا ہے۔'

ہونہہ! اچھا تو پھر اب آپ کیا چاہتے ہیں؟' چوہدری صاحب نے پوچھا۔

میں کچھ نہیں چاہتا چوہدری صاحب میں تو بس آپ کو اطلاع کرنے آیا تھا اور یہ بتانے آیا تھا کہ اگر گاؤں سے کچھ اور لوگ بھی آگۓ تو مجھے ان کی درخواست رد کرنا مشکل ہو جاۓ گی۔'

آپ کا بہت شکریہ تھانے دار صاحب۔ میں دیکھ لیتا ہوں کون ہے اس کے پیچھے۔'

ٹھیک ہے پھر مجھے اجازت دیں۔' تھانیدار اٹھتے ہوۓ بولا۔

ایسے کیسے تھانیدار صاحب چاۓ پانی کچھ پی کر جائیں۔'

شکریہ جناب!' تھانیدار بولا۔ 'مجھے اصل میں یہاں سے کسی اور جگہ ایک ضروری کام جانا ہے۔ ابھی آپ اجازت دیں پھر کبھی حاضر ہوں گا۔'

ٹھیک ہے پھر جیسے آپ کی مرضی۔'

تھانیدار نے خدا خافیظ کہا اور باہر نکل گیا۔ اس کے جانے کے بعد ملک صاحب نے اپنے ملازم شیر محمد کو پکارا جو ان کے پیچھے کچھ فاصلے پر کھڑا تھا۔ شیر محمد پاس آکر بولا۔

جی ملک صاحب!'

پتہ کرو یہ کون ہے جس نے ہمارے خلاف درخواست دی ہے۔' چوہدری صاحب نے کہا۔ 'اس کو سزا دینا بہت ضروری تا کہ کوئی اور اس طرح کی جرات نہ کرے۔'

جی ملک صاحب۔' شیر محمد نے آگے قدم بڑھاۓ تو چوہدری صاحب نے اسے آواز دے کر روک لیا۔

ٹھہرو! ابھی اسے کچھ مت کہنا بوٹے کے جنازے کے ایک دو دن بعد اسے پکڑنا۔'

ٹھیک ہے ملک صاحب۔' شیر محمد باہر نکل گیا اور چوہدری صاحب اپنے مہمانوں سے گپ شپ میں مصروف ہو گۓ۔

بوٹے کی تجہیز و تکفین کے دو دن بعد شمشیر علی موٹرسائیکل پر سوار شہر سے واپس لوٹ رہا تھا۔ جب وہ کچے راستے پر پہنچا تو اسے نادیہ اپنی دونوں بہنوں کے ساتھ کھیتوں کے بیچ ٹیوب ویل کے پاس کھڑی دکھائی دی۔ اس نے موٹر سائیکل روک کر اسے وہیں کھڑا کیا اور خود ان کے پاس چلا گیا۔

شمشیر بھائی آپ یہاں؟' نعیمہ نے خیرت سے پوچھا۔

ہاں وہ میں شہر گیا ہوا تھا یہاں سے گزرا تو آپ لوگوں پر نظر پڑ گئی۔ تم لوگ یہاں کیسے؟' شمشیر نے پوچھا۔

ہم بس سیر کرنے نکلی تھیں۔' نادیہ نے جواب دیا۔

چاروں کچھ دیر تک باتیں کرتے رہے پھر نعیمہ اور سدرہ دونوں ٹیوب ویل کے خوض کی چھوٹی سی دیوار پر پاؤں پانی میں لٹکا کر بیٹھ گئیں اور وہ دونوں باتیں کرتے ہوۓ وہیں پگڈنڈی پر چلنے لگے۔

کتنا اچھا موسم ہے اور کتنا حسین نظارہ ہے۔' نادیہ بولی۔ 'بادل بنے ہوۓ ہیں۔ ہلکی ہلکی ٹھنڈی ہوا چل رہی ہے اور دور تک پھیلے ہوۓ لہلہاتے کھیت ہیں۔'

ہاں یہ موسم اور یہ نظارہ تو پہلے بھی بہت اچھا اور بہت پیارا تھا نادیہ! مگر آج ہم دونوں ساتھ میں ہیں تو اور بھی خوبصورت لگ رہا ہے۔' شمشیر علی بولا۔

نادیہ نے سامنے دیکھا کچھ فاصلے پر ذرا سا آگے گندم کے سنہری کھیتوں کا سلسلہ شروع ہو جاتا تھا۔ کٹائی کے دن قریب تھے اس لیۓ گندم کے سٹے بھرے ہوۓ تھے۔ شمشیر نے آگے بڑھ کر ایک سٹے کو مٹھی میں زور سے بھینچا اور کھینچ کر توڑ لیا۔ پھر اسے نادیہ کو دکھا کر بولا۔ 'یہ دیکھو گندم کا سٹہ۔۔۔اور یہ میرا ہاتھ۔۔۔'

نادیہ نے اس کا ہاتھ دیکھا۔ تھوڑا سا چِھل گیا تھا اور کہیں کہیں سرخ لکیریں سی بن گئی تھیں۔

آپ کو کس نے کہا تھا اسے توڑنے کے لیۓ۔۔۔ خواہ مخواہ اپنا ہاتھ زخمی کروا لیا۔' نادیہ اپنے دوپٹے کے پلو سے اس کے ہاتھ کو صاف کرتے ہوۓ بولی۔

دونوں واپسی کے رخ پگڈنڈی پر چلنے لگے۔ ٹھنڈی ہوا کا تیز جھونکا آ کر ٹکرایا جس سے تازگی کی ایک لہر ان کے جسم میں سرایت کر گئی۔ کھیتوں کے بیچوں بیچ گھنے بادلوں سے گھرے آسمان کے نیچے شمشیر کے ساتھ چلتے ہوۓ بادِ نسیم کے جھونکے نے نادیہ کے اندر عجیب سا خوشگوار احساس پیدا کر دیا تھا۔ ایسا احساس جو اسے پہلے کبھی نہیں ہوا تھا۔ وہ سمجھ نہیں پا رہی تھی یہ احساس شاندار موسم کی وجہ سے تھا۔ اِس دلفریب نظارے کی وجہ سے تھا یا شمشیر کے ساتھ کی وجہ سے تھا یا پھر تینوں کی وجہ سے تھا۔ نہ جانے اس کا جی کیوں چاہنے لگا کہ وہ کھلے کھیتوں کے بیچ کھڑی ہو جاۓ اور بانہیں کھول کر اوپر آسمان کی طرف منہ کرکے خوشی سے زور زور سے چلاۓ۔ لیکن اس نے اپنے آپ پر قابو رکھا۔

شمشیر کا جی چاہ رہا تھا یہ پگڈنڈی جس پر وہ چل رہے تھے اس قدر طویل ہو جاۓ کہ وہ نادیہ کے ساتھ دور تک اور دیر تک چلتا رہا مگر چند قدم چلنے پر وہ ٹیوب ویل کے پاس پہنچ گۓ اور ان کا سفر اختتام کو پہنچا۔

ہمیں چلنا چاہیۓ کافی دیر ہو گئی ہے۔' نادیہ نے سدرہ اور نعیمہ سے کہا۔

رک جاؤ تھوڑی دیر اتنی جلدی کیا ہے۔' شمشیر بولا۔

نہیں ہم راستے میں کھڑے ہیں لوگ گزر رہے ہیں ایسے اچھا نہیں لگتا۔۔۔چلو اٹھ جاؤ اب۔' نادیہ ان دونوں کو مخاطب کرکے بولی۔

وہ تینوں آخری بار شمشیر کو سلام کرکے اپنے راستے کی طرف چل پڑیں تو شمشیر نے بھی اپنے قدم موٹرسائیکل کی طرف بڑھاۓ۔ جب وہ موٹر سائیکل کے پاس پہنچا تو اس سے کچھ فاصلے پر جہاں پکی سڑک تھی پر ایک گاڑی آکر رکی اور چند لمحوں بعد گولی چلنے کی زوردار آواز آئی۔ پھر گاڑی کے بھاگنے کی آواز آئی۔ نادیہ لوگوں نے جلدی سے پیچھے مڑ کر دیکھا۔ شمشیر زمین پر گرا پڑا تھا اور اس کے جسم سے خون نکل کر مٹی میں بہے چلا جا رہا تھا۔

غمِ حیات

2025-03-25T03:59:00.008+05:00

کردار

نسیم احمد بیگ: پینتالیس، پچاس برس کا ایک اعلیٰ تعلیم یافتہ آدمی۔

فہد نسیم: بیس بچیس پرس کا جوان لڑکا۔ نسیم احمد بیگ کا بیٹا۔

سکینہ: نسیم بیگ کی بیوی، فہد کی امی۔

اماں بلقیس: ایک بوڑھی، ان پڑھ، مخلص اور سیدھی سادی عورت۔ سکینہ کی رشتے دار۔

رشیدی+ فاروق: نسیم احمد کے دوست۔

پہلا منظر

دن۔ نسیم احمد کا گھر۔

ایک وسیع کمرا جس میں نسیم احمد تنہا کرسی پر بیٹھا ہے۔ اس کے سامنے ایک بڑا سا میز ہے جس پر دو تین کتابیں پڑی ہیں۔ ایک کتاب بالکل اس کے سامنے کھلی پڑی ہے لیکن وہ اسے پڑھ نہیں رہا بلکہ وہ دوسری طرف دیکھ رہا ہے اور کسی خیال میں کھویا ہے۔ کتاب کے ساتھ میز پر ایک چاۓ کا کپ پڑا ہے۔ سکینہ اندر آتی ہے۔

سکینہ: (اندر آکر) آپ ابھی تک یہاں بیٹھیں ہیں باہر شام ہونے والی ہے۔ اور یہ چاۓ آپ نے ابھی تک پی کیوں نہیں اب تو ٹھنڈی ہو کر شربت بن گئی ہو گی۔ (اردگرد الماری اور میز وغیرہ کو کپڑے سے جھاڑنے لگتی ہے) دیکھیں کتنی دھول اڑ رہی ہے۔ نفیسہ آج پھر نہیں آئی۔ کل آۓ گی تو اسے ٹھیک کروں گی۔ کتنی دفعہ کہا ہے اتنی چھٹیاں نہ کیا کر پھر بھی بعض نہیں آتی سارا گھر گندا ہوا ہوا ہے۔ اور آپ! آپ کو بتایا بھی تھا کہ کل فہد آرہا ہے اس کے کمرے کے باتھ روم کا فلش خراب ہے اسے ٹھیک کروانا ہے۔ پر آپ۔۔۔! (اس کی طرف دیکھ کر) سن بھی رہے ہیں کہ نہیں؟ (نسیم اس کی بات سن لیتا ہے لیکن جواب نہیں دیتا)

!سکینہ: نسیم۔۔۔

(ابھی بھی نہیں بولتا۔ دوبارہ آواز دیتی ہے)

سکینہ: نسیم! نسیم

نسیم: ہونہہ

سکینہ: کیا ہوا؟

نسیم: کچھ نہیں ہوا۔ (چاۓ پر نظر ڈال کر) میری چاۓ! یہ تو ٹھنڈی ہو گئی۔

سکینہ: ٹھنڈی تو ہونی تھی میں اتنی دیر پہلے رکھ کر گئی تھی۔ اب بھی ٹھنڈی نہ ہوتی۔

نسیم: اچھا چھوڑو اسے! تم بتاؤ تم فہد کے بارے میں کیا کہہ رہی تھی۔

سکینہ: میں کہہ رہی تھی کل اس نے آنا ہے تو اس کے باتھ روم کا فلش ٹھیک کروا دیں۔

نسیم: او ہو! تم فلش کو چھوڑو یہ بتاؤ آ کب رہا ہے۔

سکینہ: کل شام تک پہنچے گا۔

نسیم: (اٹھتے ہوۓ) اچھا ٹھیک ہے پھر کل دیکھیں گے۔

سکینہ: اب جا کہاں رہے ہیں؟

نسیم: کمرے سے باہر جا رہا ہوں۔ خود ہی کہہ رہی تھی سارا دن باہر نہیں نکلے اب جب نکل رہا ہوں تو اعتراض کر رہی ہو۔ وہ رشیدی اور فاروق کا فون آیا تھا وہ آنے والے ہوں گے۔

سکینہ: تو ایسے کہیں نا آپ کے دوست آنے والے ہیں۔ اچھا مجھے یاد آیا وہ اماں بلقیس کہہ رہی تھی اسے آپ سے کوئی ضروری بات کرنی ہے۔

سکینہ: مجھ سے کیا بات کرنی ہے اسے؟

سکینہ: مجھے کیا پتہ! میں نے پوچھا تھا لیکن اس نے کہا کہ آپ کو ہی بتاؤں گی تو میں خاموش ہو گئی۔

نسیم: اچھا چلو ٹھیک ہے۔ آ کر کر لے جو بات بھی کرنی ہے۔

(کمرے سے نکل جاتا ہے)

دوسرا منظر

رات۔ نسیم بیگ کا گھر۔

ایک ڈرائینگ روم میں نسیم بیگ اور اس کے دونوں دوست بیٹھے ہیں۔ ایک طرف اماں بلقیس بھی بیٹھی ہے۔

نسیم بیگ: ہاں اماں بول! مجھ سے کیا بات کرنی تھی؟

اماں بلقیس: میں نے یہ کہنا تھا پتر تو مجھے صبح ایک جگہ لے جاۓ گا؟

نسیم بیگ: کہاں اماں؟ کہاں جانا ہے تمہیں؟

اماں بلقیس: پتر مجھے پتہ چلا ہے یہاں ایک بزرگ بیٹھتے ہیں بیری والے کھوہ کے پاس تو مجھے وہاں لے چل۔

نسیم بیگ: پر اماں تو کیوں جانا چاہتی ہے اس بزرگ کے پاس؟

اماں بلقیس: پتر میں نے سنا ہے بڑے کرنی والے بزرگ ہیں جو بھی ان کے پاس جاتا ہے اس کی مراد ضرور پوری ہوتی ہے۔ میں بھی ان سے دعا کے لیۓ جاؤں گی شاید میری بھی مراد پوری ہو جاۓ۔

نسیم بیگ: وہ تو ٹھیک ہے اماں پر تیری کیا مراد ہے کیا چاہیۓ تجھے سب کچھ تو ہے تیرے پاس۔

اماں بلقیس: مجھے اپنے لیۓ تو کچھ نہیں چاہیۓ پتر بس اس شودی، نماڑیں کے لیۓ دعا کروانی ہے۔ بے چاری بڑی تکلیفیں سہہ رہی ہے۔

نسیم بیگ: کون اماں؟ کس کی بات کر رہی ہو۔

اماں بلقیس: وہ اپنی کلثوم نہیں گھکھڑ والی! اس کے لیۓ۔۔۔ بے چاری بڑی مصیبت میں ہے۔

نسیم بیگ: کیوں کیا ہوا اسے؟

اماں بلقیس: ہونا کیا ہے شودی کو چوتھی بار بھی لڑکی ہوئی ہے۔ اس کا خاوند بڑا کھروی طبعیت کا بندہ ہے وہ اسے مارتا ہے اور دھمکیاں بھی دیتا ہے۔ کہتا ہے اگر اب کی بار بھی لڑکی ہوئی تو اسے چھوڑ کر دوسرا بیاہ کر لے گا۔ بے چاری بڑی پریشان ہے۔ میں اس کے لیۓ دعا کرواؤں گی ہو سکتا اس بار اس کی سنی جاۓ اور اس کو لڑکا ہو جاۓ۔ تو مجھے لے چل ان کے پاس۔

رشیدی: اماں تو خود دعا کیوں نہیں کرتی کیا تیری دعا خدا نہیں سنے گا؟

اماں بلقیس: نہ پتر ہم جیسوں کے ایسے نصیب کہاں۔ اس کے لیۓ تو کچھ خاص لوگ ہوتے ہیں جو اللہ کے بڑے قریب ہوتے ہیں۔ جو اسے بڑے پیارے ہوتے ہیں۔ اللہ ان کی دعا کبھی رد نہیں کرتا۔

فاروق: اماں یہ سب جہالت کی باتیں ہیں ایسے لوگ دھوکے باز ہوتے ہیں صرف پیسوں کے لیۓ یہ سب کرتے ہیں۔

اماں بلقیس: نہ پتر میں نے سنا ہے وہ بزرگ تو کسی سے ایک روپیہ نہیں لیتے بس اللہ واسطے یہ کام کرتے ہیں۔ ایسے کرنی والوں کو ہم سے لینے کی بھلا کیا ضرورت ہے ان کو تو اپنے رب کے ہاں سے مل جاتا ہے۔ وہ کوئی ہمارے مختاج ہیں۔ ایسے لوگ تو بڑے پہنچے ہوۓ ہوتے ہیں۔ ان کو بھلا ہماری کیا ضرورت۔۔۔ (نسیم سے) تو مجھے لے چلے گا نا ان کے پاس؟

نسیم بیگ: ہاں اماں صبح لے چلوں گا تو اب جا کر آرام کر۔ صبح جہاں بولے گی وہاں لے چلوں گا۔

اماں بلقیس: ٹھیک ہے پتر میں چلتی ہوں رب تمہیں خوش رکھے۔ (اٹھ کر جاتے ہوۓ) بس اللہ سن لے نماڑیں کی، بے چاری کی مراد بھر آۓ بڑی تکلیف میں ہے شودی۔ اللہ بھلا کرے، اللہ اسکی مصیبتیں دور کرے۔ اللہ اس کی خیر کرے۔ بڑی مصیبت میں ہے شودی۔۔۔

(بڑبڑاتے ہوۓ باہر نکل جاتی ہے)

رشیدی: تم عجیب آدمی ہو نسیم! تم پڑھے لکھے ہو کر ایسی باتوں کو مانتے ہو۔ تم اماں کو روکنے کی بجاۓ خود اسے وہاں لے کر جا رہے ہو۔

نسیم: میں نے کب کہا میں ایسی باتوں کو مانتا ہوں۔ وہ تو بس اماں بلقیس کے لیۓ۔۔۔

فاروق: جو بھی ہے یار کیسے کیسے ڈھونگی پاۓ جاتے ہیں جو بیچاری سیدھی سادی ان پڑھ عورتوں کو بیوقوف بناتے ہیں۔

رشیدی: وہ تو ٹھیک ہے پر لوگوں کو خود بھی تو عقل سے کام لینا چاہیۓ انہیں صرف خدا سے مانگنا چاہیۓ کسی اور سے نہیں۔

نسیم: میں اس سارے معاملے کو کسی اور نظر سے دیکھتا ہوں۔

فاروق: وہ کیا؟

نسیم: یہ ساری باتیں کہ خدا سے براہ راست مانگنا چاہیۓ یا کسی نیک اور پرہیزگار بزرگ کے وسیلے سے مانگنا چاہیے۔ یہ ساری باتیں، یہ خیال اس لیۓ پنپتے ہیں کیوں کہ اس کے پیچھے یہ فکر، یہ سوچ ہے کہ لڑکے یا لڑکی کی جینڈر کا فیصلہ یا اس قسم کا کوئی اور فیصلہ خدا کرتا ہے۔

رشیدی: کیا مطلب؟ تو پھر کون کرتا ہے اگر خدا نہیں کرتا؟۔

نسیم: یہ بات آج سے دو تین سو سال پہلے تو پھر بھی مانی جا سکتی تھی مگر آج حیاتیات کے علم نے ہمیں بتا دیا ہے کہ یہ سارا چکر ایکس اور واۓ کروموسومز کا ہے۔ دو ایکس مل جائیں تو لڑکی اور اگر ایکس اور واۓ مل جائیں تو لڑکا۔ اس قانون کو دریافت کرنے کے بعد ہم نے ایسی ٹیکنالوجی بنا لی یا ایسا طریقہ ڈھونڈ لیا کہ اب ہم اپنی مرضی سے لڑکا بھی پیدا کر سکتے ہیں اور لڑکی بھی۔ یعنی کہ یوں کہہ لو! جو فیصلے پہلے خدا کرتا تھا اب ہم خود کرنے لگے ہیں۔ (شرارت سے) خدا سے ہم نے فیصلے کا اختیار چھین لیا ہے ویسے۔۔۔

فاروق: تو تم کہنا چاہتے ہو خدا اپنے بناۓ ہوۓ قوانین کا اسیر ہے وہ قانون سے بالا کوئی فیصلہ نہیں کر سکتا ختیٰ کہ لوگوں کی مصیبت میں مدد بھی نہیں کر سکتا۔

نسیم: کر سکتا ہے اس کے پاس قوت و اختیار تو ہے مگر اس کا طریقہ کار یہ نہیں لگتا۔ وہ ایسا کرتا ہوا نظر نہیں آتا۔

رشیدی: نہیں ایسا نہیں ہے خدا نیک پرہیزگار اور سچے لوگوں کی ضرور مدد کرتا ہے۔

نسیم: تو پھر اس نے امام حسین کی کیوں مدد نہیں کی؟

فاروق: کیا؟ کیا کہا؟

نسیم: ہاں! امام حسین۔۔۔! وہ تو نیک اور پرہیزگار بھی تھے اور حق پر بھی تھے۔ مصیبت بھی جو ان پر آئی وہ کوئی معمولی مصیبت نہیں تھی۔ تپتے صحرا میں بھوکا پیاسا رکھ کر مارا گیا انہیں جن میں عورتیں اور بچے بھی تھے۔ ایسا ہیبت ناک اور اندوہناک واقعہ جسے آج محض سن کر یا پڑھ کر ہماری چیخیں نکل جاتی ہیں لیکن خدا کا تو دیکھ کر بھی دل نہیں پسیجا۔

فاروق: تم خدا کے بارے میں اس طرح کے الفاظ استعمال مت کرو۔

(نسیم اٹھ کر کھڑا ہو جاتا ہے اور ایک طرف جا کر بات کرتا ہے)

نسیم: تو پھر بتاؤ عمر کی مدد کیوں نہیں کی خدا نے؟ عثمان کی مدد کیوں نہیں کی؟ علی کی کیوں نہیں کی؟ یہ تینوں تو اسلامی حکومت کے سربراہ بھی تھے اور پیغمبر کے قریبی ساتھیوں اور عزیزوں میں سے تھے۔ نیک اور متقی بھی تھے۔ لیکن خدا تینوں کو قتل ہونے سے نہیں بچا سکا۔ چلو یہاں تک تو پھر بھی بات قبول ہوتی۔ اس نے نوح کی مدد کیوں نہیں کی؟ وہ تو اس کے اپنے منتخب کیۓ ہوۓ پیغمبر تھے۔ انہیں کشتی بنانے پہ کیوں لگا دیا۔ بیچارے تن تنہا اتنے جوکھم اٹھا کر اتنی بڑی کشتی بناتے رہے۔ خدا کے لیۓ کیا یہ مشکل تھا کہ وہ کوئی پھونک مارتا یا کُن کہتا تو وہ اور ان کے ساتھی اڑ کر کسی پہاڑ کی چوٹی پر جا پہنچتے۔ ایسا خدا نے کیوں نہیں کیا؟۔۔۔ میرے بھائی جب یہ سب عظیم لوگ بھی دنیاوی اسباب کے مختاج تھے تو میں، آپ، ہم سب کس کھیت کی مولی ہیں۔ ہم کیا اُن سے زیادہ متقی، زیادہ پرہیزگار ہیں؟ یا ہم خدا کو ان سے زیادہ پیارے، زیادہ عزیز ہیں؟

تیسرا منظر

دن۔ نسیم کا گھر۔

نسیم اپنے گھر میں بڑے سے لان میں کرسی پر بیٹھا تقریباً اونگھ رہا ہے۔ اردگرد درختوں اور پودوں پر چڑیوں اور دوسرے پرندوں کے چہچہانے کی آوازیں آرہی ہیں۔ چند لمحوں بعد سکینہ آتی ہے۔ اس کے ہاتھ میں ایک پلیٹ ہے جس میں سے وہ چمچ سے کچھ کھاتے ہوۓ چلی آرہی ہے۔

سکینہ: (کرسی پر سامنے بیٹھتے ہوۓ) آپ کو پھر سے نیند آنے لگی۔

نسیم: (ہلکا سا چونک کر) ہاں! نیند۔۔۔! ہاں آج صبح سے کچھ غنودگی سی طاری ہے۔ اوپر سے دھوپ میں بیٹھ کر اور زیادہ نیند آنے لگی ہے۔

سکینہ: خیرت ہے آپ تو رات بھر سوۓ رہے ہیں پھر بھی آپ کو نیند آرہی ہے۔ جبکہ میں ساری رات ٹھیک طرح سے سوئی نہیں اور اب بھی نیند مجھ سے کوسوں دور ہے۔

نسیم: میں جانتا تھا رات کو تمہیں بالکل نیند نہیں آۓ گی۔ کیونکہ آج تمہارا لاڈلا جو آرہا ہے۔ اور اسی خوشی میں تم آج برسوں بعد اپنی پسندیدہ فیرنی کھا رہی ہو۔

سکینہ: ہاں نسیم! برسوں پہلے جب اپنا راشد فوت ہوا تھا اس دن کے بعد سے میں نے کبھی فیرنی کو ہاتھ تک نہیں لگایا۔ حالانکہ اس سے پہلے میں تقریباً روز کھایا کرتی تھی۔ اس کے جانے کے بعد پتہ نہیں ایسا کیا ہوا مجھے فیرنی کی خوشبو سے ابکائی سی آنے لگتی تھی۔ لیکن آج برسوں بعد پتہ نہیں کیوں نسیم میرا دل کیا کہ میں پھر سے فیرنی بنا کر کھاؤں۔

نسیم: تم ٹھیک کہتی ہو سکینہ! جب انسان کی زندگی میں کوئی حادثہ پیش آتا ہے یا کوئی بہت اہم واقع رونما ہوتا ہے خاص کر کسی بہت قریبی عزیز جس سے اس کو بہت محبت ہو کے بچھڑ جانے کا یا برسوں بعد اس کے ملنے کا، تو انسان کی زندگی میں کئ تبدیلیاں وقوع پذیر ہوتی ہیں۔ تم نے دیکھا نہیں بہت سے لوگ جو اپنے شعبے میں بہت نام بنا چکے ہوتے ہیں کیسے ایک واقعہ یا حادثہ ان کی کایا کلپ کر دیتا ہے۔ وہ جس راستے پر برسوں سے چل رہے ہوتے ہیں ایک دم اس کو چھوڑ کر کوئی بالکل متبادل راستہ اختیار کر لیتے ہیں۔ مذہب کو غیر سنجیدگی سے لینے والے کسی حادثے کے بعد مذہبی رسومات میں بڑھ چڑھ کر حصہ لینے لگتے ہیں۔ یا مذہب کو بہت پسند کرنے والے ردعمل میں اس کے بالکل برعکس راستہ اختیار کر لیتے ہیں۔۔۔۔ لیکن تم جانتی ہو سکینہ؟ ایک تیسری قسم کے بھی لوگ ہوتے ہیں۔

سکینہ: کون سے؟

ِنسیم: وہ لوگ سکینہ! جن پر حوادثِ دنیا یا حوادث زمانہ کا کوئی اثر نہیں ہوتا۔ جن میں واقعات اور سانحات کوئی تغیر پیدا نہیں کر سکتے۔

سکینہ: توبہ ہے ایسے پتھر دل لوگ بھی ہوتے ہیں۔

نسیم: نہیں سکینہ تم بات سمجھی نہیں۔ ایسا نہیں کہ زندگی کے خوادث و سانحات سے ان کو کوئی تکلیف نہیں پہنچتی یا ان کو دکھ نہیں ہوتا۔ یا کسی خوشگوار واقعہ سے ان کو مسرت کا احساس نہیں ہوتا۔ کسی بھی نارمل انسان کی طرح انہیں بھی یہ سب کچھ جھیلنا پڑتا ہے جیسے باقی سب جھیلتے ہیں۔ میرے کہنے سے مراد یہ ہے سکینہ! کوئی واقعہ یا کوئی حادثہ ان کی زندگی کے نصب العین اور طور طریقوں کو نہیں بدل سکتا۔ ان کے افکار و نظریات کے قلعے کی مضبوط فصیلوں کو مسمار نہیں کر سکتا۔۔۔۔ جانتی ہو ایسا کیوں ہوتا ہے؟

سکینہ: کیوں؟

نسیم: کیونکہ وہ جانتے ہیں زندگی کیسی ہے اور اسے کیسا ہونا چاہیۓ یا اسے کیسے گزارنا چاہیۓ۔ وہ جانتے ہیں کہ جس انسانی سماج میں وہ سانس لے رہے ہیں وہ کیسا ہے اور اسے کیسا ہونا چاہیۓ۔ وہ اور ان جیسے بہت سے لوگ زندگی اور سماج کے بارے میں اپنی پختہ اور ٹھوس راۓ رکھتے ہیں۔ یہی وجہ ہے کوئی حادثہ و سانحہ اور کوئی واقعہ یا تجربہ ان کو دکھ اور تکلیف تو پہنچا سکتا ہے، انہیں مسرت اور راخت تو بخشتا ہے مگر ان کی زندگی کے نصب العین اور طور طریقوں میں کوئی بڑا تغیر پیدا نہیں کرتا۔ ایسے لوگوں نے اپنا نصب العین اور اپنی راہ چونکہ سوچ سمجھ کر پختہ اور ٹھوس دلائل سے متعین کی ہوتی ہے اس لیۓ ان میں تبدیلی بھی وہ کسی واقعے یا حادثے کی بجاۓ پختہ دلائل سے کرتے ہیں۔

سکینہ: آپ ٹھیک کہتے ہیں نسیم۔ میرے کالج میں میری ایک کلاس فیلو تھی۔ بہت چنچل لڑکی تھی۔ بڑی ماڈرن اور براڈ مائنڈڈ۔۔۔جینز پہنتی تھی، گانے سنتی تھی، فلمز دیکھتی تھی۔ ہر وقت یہاں وہاں گھومتی رہتی تھی۔ بڑی زندہ دل لڑکی تھی۔ وہ ایک لڑکے سے محبت کرتی تھی اور اس سے شادی کرنا چاہتی تھی۔ اس نے بہت کوشش کی کہ وہ اسے مل جاۓ مگر شاید اس کی قسمت میں نہیں تھا۔ اس واقعے کا اس پر ایسا اثر ہوا کہ اس کے بعد وہ مکمل طور پر بدل گئی۔ پہلے اس نے جینز پہننا چھوڑی پھر نقاب کرنے لگی۔ اس کے بعد تو وہ برقعے میں کالج آنے لگی۔ اور تو اور اس نے ہاتھ میں تسبیح بھی پکڑ لی۔ اس لڑکی کی ایسی کایا پلٹی کے اب کوئی دیکھے تو پہچان نہ پاۓ کہ یہ وہی لڑکی ہے۔

نسیم: میرا خیال ہے لوگوں میں ایسی تبدیلی محض اپنی جذباتی و فکری الجھن کی تسکین کے لیۓ ہوتی ہے۔

سکینہ: کسی اور کی کیا بات کریں جب راشد فوت ہوا تھا تو میرا اپنا دل کرتا تھا کہ میں ہر وقت مصلے پر بیٹھی رہوں۔۔۔ اچھا ویسے آپ بتائیں راشد کے فوت ہونے کے بعد آپ میں کوئی تبدیلی نہیں آئی؟

نسیم: میں تمہارے سامنے ہی ہوں اگر کوئی ہوتی تو تمہیں اس کا احساس ہو جاتا۔

سکینہ: ایک تبدیلی بہرحال آپ میں آئی تھی۔

نسیم: کیا؟

سکینہ: راشد کے فوت ہونے کے بعد آپ فہد کے معاملے میں بڑے مختاط ہو گۓ تھے۔ ذرا سا وہ ادھر ادھر کہیں ہو جاۓ تو آپ کو فکر ہونے لگتی تھی۔

نسیم: ہاں بھئی! یہ تو ظاہر سی بات ہے۔ یہ کوئی تبدیلی تو نہیں۔ ایک بیٹے کو کھونے کے بعد دوسرے بیٹے کی فکر تو ہر باپ کو پہلے سے زیادہ ہی ہو گی۔ لیکن پھر بھی دیکھو میں نے اسے اتنی دور جرمنی پڑھنے کے لیۓ بھیج دیا۔ کیونکہ حادثے تو کہیں بھی ہو سکتے ہیں۔ وہ تو گھر بیٹھے بھی ہو جاتے ہیں۔

سکینہ: چلیں چھوڑیں ایسی باتیں نہ کریں۔ آج وہ پورے چار سال بعد آرہا ہے اللہ خیر کرے وہ ٹھیک ٹھاک گھر پہنچ جاۓ۔

چوتھا منظر

دن۔ نسیم کا گھر۔

ایک بڑے سے حال یا لیونگ روم میں سکینہ اور اماں بلقیس بیٹھی ٹی وی دیکھ رہی ہیں۔ سکینہ ساتھ گھر کا کوئی کام کر رہی ہے۔ موبائل کی گھنٹی بجتی ہے سکینہ اپنے پاس رکھا موبائل اٹھا کر بات کرتی ہے۔

سکینہ: (اماں بلقیس سے) اماں ذرا ٹی وی کی آواز آہستہ کرنا۔

(اماں ریموٹ سے ٹی وی کی آواز کم کرتی ہے)

سکینہ: (فون پر) ہیلو!۔۔۔جی۔۔۔وعلیکم السلام ابا جی۔۔۔ پتہ نہیں شاید واش روم میں ہوں گے۔۔۔ہاں جی آج ہی آرہا ہے۔۔۔ٹھیک ہے۔۔۔جی میں بتا دوں گی۔۔۔جی۔۔۔ٹھیک ہے۔

(فون بند کر دیتی ہے)

اماں بلقیس: کتنے بجے تک پہنچے گا اپنا فہد؟

سکینہ: اماں کہہ تو رہا تھا شام تک پہنچ جاۓ گا۔ پر مجھے لگتا ہے ائیرپورٹ سے گھر تک پہنچتے پہنچتے رات کے آٹھ نو بج جائیں گے۔

اماں بلقیس: چل اک دو گھنٹہ پہلے کی تے بعد میں کی۔ بس منڈا خیر خیریت نل پہنچ جاۓ۔۔۔ ویسے کتنے سال بعد آرہا ہے میرا خیال ہے جب اپنی رضیہ کی شادی تھی تب گیا تھا۔

سکینہ: نہیں اماں رضیہ کی شادی کو تو ابھی دو اڑھائی سال ہوۓ ہیں۔ وہ تو اس سے بہت پہلے گیا تھا۔ پورے چار سال اور دو مہینے اوپر ہو گۓ ہیں اسے گۓ ہوۓ۔

اماں بلقیس: (سر ہلا کر) اچھا اچھا۔ اللہ اس کے نصیب چنگے کرے۔ خیر سے جب جانے والا تھا تو ایک دن پہلے میرے پاس آیا تھا کہتا تھا اماں میں جا رہا ہوں تو دعا کریں میرا ادھر دل لگ جاۓ۔ اس وقت تو مجھے لگتا تھا اتنا سا لڑکا جس کی ابھی داڑھی مونچھ بھی ٹھیک طرح سے نہیں آئی اتنے برس پردیس میں اکیلا کیسے گزارے گا۔ پر اب دیکھو چار سال گزر گۓ پتہ ہی نہیں چلا۔

سکینہ: ہاں اماں مجھے بھی ایسے ہی لگتا تھا۔ ابھی اس کی عمر ہی کیا تھی۔ جب گیا تھا تو صرف انیس سال کا تھا۔ مجھے تو یہ فکر تھی کہ یہ تو ماں باپ کے بغیر ایک رات کہیں نہیں رہا پتہ نہیں وہاں کیسے رہے گا۔ شروع شروع میں تو میں اسے روزانہ دو دو تین تین بار فون کرتی تھی۔ کہتا تھا امی میں بالکل ٹھیک ہوں مجھے کوئی مسئلہ نہیں آپ بار بار فون نہ کیا کریں میرے پاس اتنا وقت نہیں ہوتا جو میں بار بار بات کر سکوں۔

اماں بلقیس: ٹھیک ہی کہتا تھا شودا۔ پردیس جا کر بھلا اتنا فارغ وقت کہاں ملتا ہے جو کوئی اپنوں سے اتنی دیر بات کر سکے۔

پانچواں منظر

دن۔ نسیم کا گھر۔

گھر کا ایک کمرا جس میں نسیم بیٹھا کوئی کتاب پڑھ رہا ہے۔ سکینہ اندر آتی ہے۔

سکینہ: آپ کو چھٹی ہے تو آپ نے قسم کھائی ہے کہ آج گھر سے باہر نہیں نکلنا۔

نسیم: تم نے مجھ سے کیا کروانا ہے؟

سکینہ: میں کہہ رہی تھی مارکیٹ سے کچھ سامان لا دیں۔ اور وہ فلش بھی ٹھیک کروانے والا رہتا ہے۔

نسیم: کر دیا ہے میں نے پلمبر کو فون تھوڑی دیر تک آکر ٹھیک کر جاۓ گا۔

سکینہ: اچھا ٹھیک ہے آپ اٹھ جائیں جلدی سے مجھے سامان لا دیں۔ (واپس جانے کے لیۓ پلٹتی ہے)

نسیم: اٹھتا ہوں پر بات سنو! تمہیں میں نے چاۓ کا کہا تھا آئی نہیں ابھی تک۔

سکینہ: (دوبارہ اس کی طرف مڑتی ہے) اوہ! وہ میں بھول گئی۔ ابھی بنا کر لاتی ہوں۔

نسیم: رہنے دو اب میں مارکیٹ جارہا ہوں باہر سے پی لوں گا۔

سکینہ: نہیں خدا کے لیۓ آپ چاۓ پینے نہ بیٹھ جانا۔ اگر آپ کسی کے پاس چاۓ پینے بیٹھ گۓ تو پھر دو تین گھنٹوں سے پہلے نہیں آتے۔

نسیم: خدا کی بندی کسی ایک بات پہ ٹکا کرو۔ گھر سے نہ نکلوں تو کہتی ہو باہر کیوں نہیں جا رہے اور باہر اگر تھوڑی دیر ہو جاۓ تو۔۔۔

سکینہ: آپ نے زیادہ دیر لگا دینی ہے اور مجھے چیزیں جلدی چاہیئیں میں نے فہد کے لیۓ ڈھیر ساری ڈشز بنانی ہے۔

نسیم: مجھے تو تمہاری سمجھ نہیں آرہی تم آج اس کے لیۓ اتنا کچھ کیوں بنا رہی ہو۔ رات کو وہ دیر سے پہنچے گا کھانا بھی شاید کھا کر آۓ گا۔ پھر آج یہ سب بنانے کا کیا مقصد؟

سکینہ: اس لیۓ کہ کچھ آج بنا لوں گی اور کچھ کل بن جائیں گی۔ ورنہ کل سارا دن مجھے کچن میں رہنا پڑے گا۔

نسیم: (اٹھ کر کھڑا ہو جاتا ہے) اچھا ٹھیک ہے جیسے تمہاری مرضی ہے کرو۔ مجھے بتاؤ کیا کیا لانا ہے میں جا رہا ہوں۔

سکینہ: (باہر نکلتے ہوۓ) چلیں آجائیں باہر میں آپ کو لسٹ دیتی ہوں۔

چھٹا منظر

دن۔ رشیدی کا دفتر۔

کسی دفتر کا ایک کمرا جس میں رشیدی ایک بڑی سی میز کے پیچھے بیٹھا ہے۔ اس کے سامنے میز کی دوسری طرف نسیم اور ایک آدمی بیٹھا ہے۔ جبکہ میز کے دائیں جانب دو اور آدمی ہیں۔ چاۓ کا دور چل رہا ہے۔ بائیں جانب ایک ملازم کھڑا ہے۔ رشیدی دراز میں سے دو بڑے سے پیپر نکالتا ہے ان پر مہر لگاتا ہے اور ملازم کو دے دیتا ہے۔

رشیدی: (ملازم سے) یہ دونوں ڈاکیومنٹس لے جاؤ اور ان پر آصف صاحب کے سائن کروا کر لاؤ۔

(ملازم ڈاکیومنٹس لے کر چلا جاتا ہے)

رشیدی: (دائیں جانب بیٹھے ہوۓ پہلے آدمی سے) جی تو کیا کہہ رہے تھے آپ صادق صاحب

پہلا آدمی: میں تو نسیم صاحب سے یہ کہہ رہا تھا کہ آدمی کو ہر حال میں اللہ کی رضا پہ راضی رہنا چاہیۓ۔

نسیم: آپ کی بات بجا لیکن خدا کی رضا پہ تو تب راضی رہیں جب دنیا خدا کی رضا اور منشا کے مطابق چل رہی ہو۔ کیا نا انصافی، استحصال، ظلم، جبر یہ خدا کی رضائیں ہیں؟ کیا اس پر راضی ہو جائیں؟ اس کو تسلیم کر لیں؟ آپ ہی بتائیے کیا یہ خدا کی رضا و منشا ہو سکتی ہے؟ بات شاید آپ کو بری لگے لیکن سچ یہ ہے یہ افیون ہمیں مذہب اور تصوف نے دے رکھی ہے۔ یہ مذہب اور تصوف دونوں ایک جیسے ہیں صادق صاحب۔ ایک ہمیں خانقاہ اور درگاہ میں پڑے رہنے کا درس دیتا ہے اور دوسرا مسجد کے گوشے یا حجرے میں۔ ایک کی راتیں آلتی پالتی مار کر خدا سے لو لگانے میں گزرتی ہیں اور دوسرے کی مصلے پر کھڑے ہو کر خدا کو راضی کرنے میں۔۔۔ کچھ لوگ چاند پر پہنچ چکے ہیں اور آگے مریخ پر زندگی تلاش کرنے کی تگ و دو میں ہیں جبکہ ان میں سے ایک چٹائی پر بیٹھے بیٹھے پوری کائنات کا نظارہ کر لینے کی جستجو میں ہے اور دوسرا مصلے پر محض اک سجدے سے دونوں جہان پا لینے کے لیۓ کوشاں ہے۔۔۔

(چاۓ کا کپ اٹھاتا ہے ایک گھونٹ بھرتا ہے اور کچھ توقف کے بعد دوبارہ بولتا ہے)

ایسے میں آپ ہی بتائیے صادق صاحب ہم کیا کریں۔ اگر خدا کی رضا ہوتی تو ہم فوراً اس پر سر تسلیم خم کر لیتے مگر یہاں تو معاملہ ہی دوسرا ہے۔

دوسرا آدمی: آپ بالکل ٹھیک کہتے ہیں نسیم صاحب۔ ہر دور میں مظلوم و محکوم لوگوں کو یہی گولی دی جاتی ہے کہ وہ اپنی محرومی و مختاجی کو منجانب اللہ سمجھیں اور راضی بہ رضا رہیں۔

(ملازم اندر آتا ہے اس کے ہاتھ میں ڈاکیومنٹس ہیں)

ملازم: یہ لیں رشیدی صاحب آصف صاحب نے سائن کر دیۓ ہیں۔

رشیدی: (ڈاکیومنٹس لے کر) ٹھیک ہے تم جاؤ۔۔۔ اور ہاں آصف صاحب سے پوچھنا میں نے جو کل انہیں ایک کام دیا تھا انہوں نے کیا ہے کہ نہیں۔

ملازم: جی اچھا۔

(ملازم چلا جاتا ہے)

رشیدی: (سامنے بیٹھے ہوۓ آدمی سے) یہ لیں جی آپ کے ڈاکیومنٹس بالکل تیار ہیں۔

تیسرا آدمی: (دونوں پیپرز کو الٹ پلٹ کر دیکھتا ہے) یہ ٹھیک ہے ان پر بے فارم وغیرہ لگانے کی ضرورت تو نہیں؟

رشیدی: نہیں کافی ہے بے فارم کی ضرورت نہیں۔

تیسرا آدمی: ٹھیک ہے پھر مجھے آپ اجازت دیجیے۔

نسیم: تھوڑی دیر ٹھہر جائیں چاۓ پی کر اکٹھے ہی چلتے ہیں۔

رشیدی: (نسیم سے) کیوں تم تو بیٹھو۔ تم کہاں جا رہے ہو؟

نسیم: نہیں یار میں تو مارکیٹ سے کچھ سامان لینے کے لیۓ نکلا تھا تو تھوڑی دیر کے لیۓ تمہارے پاس آگیا۔ بس سمجھو چاۓ پینے آیا تھا۔

رشیدی: (دھیرے سے ہنس کر) اچھا! چلو ٹھیک ہے جیسے تمہاری مرضی۔

ساتواں منظر

دن۔ نسیم کا گھر۔

نسیم ہاتھ میں چند شاپر وغیرہ پکڑے ہوۓ حال میں داخل ہوتا ہے۔ حال میں اماں بلقیس اکیلی بیٹھی ہے۔

نسیم: ( بلند آواز سے) سکینہ یہ لو سامان میں لے آیا ہوں۔

(شاپر میز پر رکھتا ہے اور اماں بلقیس کے پاس بیٹھ جاتا ہے)

نسیم: اماں کیا حال ہے تیرا؟

اماں بلقیس: ٹھیک ہوں بس ذرا گوڈوں میں درد نہیں جا رہا۔

نسیم: اماں اس عمر میں تو گوڈوں میں درد رہتا ہی ہے میں نے جو دوائی لا کر دی تھی گوڈوں پر لگانے کے لیۓ لگا رہی ہو؟

اماں بلقیس: ہاں وہ تو روز لگاتی ہوں۔

نسیم: تو بس پھر کیا ہے لگاتی جاؤ ٹھیک ہو جاۓ گا۔ تو پریشان نہ ہوا کر اماں۔

اماں بلقیس: پریشان نہیں ہو رہی پتر بس ذرا ٹرنے پھرنے میں تکلیف ہوتی ہے۔

نسیم: اماں تو کیوں ٹرتی پھرتی ہو اتنا آرام کیا کرو تم نے ٹر پھر کر اس عمر میں کون سے کام کرنا ہوتے ہیں۔

اماں بلقیس: زیادہ تو نہیں ٹرتی پر ہر وقت بیٹھا بھی تو نہیں جاتا۔

(سکینہ فون پر بات کرتی ہوئی آتی ہے)

سکینہ: ہاں۔۔۔پہنچ گۓ ہو۔۔۔ کب تک۔۔۔نہیں۔۔۔ہاں

( میز پر سے شاپر اٹھا کر واپس جانے لگتی ہے)

نسیم: کس کا فون ہے؟

(سکینہ واپس جاتے جاتے اسے جواب دیتی ہے)

سکینہ: فہد کا۔

(کمرے سے نکل جاتی ہے)

آٹھواں منظر

وہی وقت۔ نسیم کا گھر۔

سکینہ باورچی خانے میں کھڑی کام کر رہی ہے اور فون پر فہد سے بات بھی کر رہی ہے۔

سکینہ: کب تک آؤ گے بیٹا تمہیں دیکھے ہوۓ کتنے برس ہو گئے ہیں۔

فہد: بس امی ائیرپورٹ پر پہنچ چکا ہوں اب کچھ ہی گھنٹوں کی تو بات ہے۔ اور آپ یہ کیوں کہہ رہی ہیں مجھے دیکھا نہیں روز تو آپ وڈیو کال پر مجھ سے بات کرتی ہیں۔

سکینہ: ہاں لیکن وہ بات تو اور ہے۔

فہد: اچھا امی آپ سے پاکستان پہنچ کر بات کرتا ہوں۔ پاپا کو کہنا ائیرپورٹ آنے کی ضرورت نہیں میں خود آجاؤں گا۔

سکینہ: چل ٹھیک ہے اللہ خافظ۔

فہد: اللہ خافظ۔

نواں منظر

رات۔ نسیم کا گھر۔

نسیم کمرے میں بیٹھا کتاب پڑھ رہا ہے جبکہ سکینہ کوئی کام کر رہی ہے۔ نسیم کتاب سے نظر اٹھا کر دیوار پر لٹکی گھڑی کی طرف دیکھتا ہے۔ گھڑی پر آٹھ بجے ہیں۔ فون کی گھنٹی بجتی ہے۔ نسیم اٹھ کر چند قدم دور میز پر سے اپنا موبائل اٹھاتا ہے اور کال رسیو کرتا ہے۔ دوسری طرف سے کوئی آدمی بات کرتا ہے۔

نسیم: ہیلو۔

آدمی: السلام علیکم! آپ نسیم بیگ بات کر رہے ہیں؟

نسیم: جی۔ میں نسیم بیگ بول رہا ہوں۔

آدمی: آپ کا بیٹا فہد نسیم آج شام کی فلائیٹ سے جرمنی سے پاکستان آنے والا تھا؟

نسیم: جی بالکل ہم سب گھر والے اس کا انتظار کر رہے ہیں۔

آدمی: جی نسیم صاحب میں جو خبر آپ کو سنانے والا ہوں وہ بہت افسوس ناک ہے آپ کو حوصلے سے سننی ہو گی۔

نسیم: کون سی خبر فہد کو تو کچھ نہیں ہوا؟

(سکینہ بات سن کر اٹھ کر کھڑی ہو جاتی ہے اور کچھ خوفزدہ سی نسیم کی طرف دیکھتی ہے)

آدمی: دیکھیۓ بات یوں ہے۔ جس جہاز میں آپ کا بیٹا سفر کر رہا تھا اس کو ایک حادثہ پیش آگیا ہے۔ مجھے بے حد افسوس سے یہ کہنا پڑ رہا ہے کہ ہمیں جو اطلاع ملی ہے اس کے مطابق شاید ہی کسی مسافر کے بچنے کی کوئی امید ہے۔

(چند لمحے خاموشی رہتی ہے)

آدمی: نسیم صاحب آپ سن رہے ہیں۔

(نسیم خاموش رہتا ہے)

آدمی: آپ میری بات سن رہے ہیں۔ نسیم صاحب۔۔۔نسیم صاحب۔

نسیم: ( دھیرے سے بولتا ہے) جی۔۔۔میں سن رہا ہوں۔

آدمی: نسیم صاحب میں سمجھ سکتا ہوں یہ بڑا تکلیف دہ لمحہ ہے مگر آپ کو ہمت سے کام لینا پڑے گا۔ جس وقت بھی مجھے کوئی مزید اطلاع ملی تو میں آپ سے رابطہ کروں گا۔ خدا خافظ۔

(فون بند ہو جاتا ہے)

دسواں منظر

رات۔ نسیم کا گھر۔

ایک کمرے میں سکینہ جاۓ نماز پر سجدے میں گری پڑی ہے۔ اماں بلقیس اسے اٹھانے کی کوشش کررہی ہے۔

اماں بلقیس: سکینہ پتر اٹھ جا کب تک مصلے پر پڑی رہے گی۔ پندرہ دن سے تو دن رات مصلے پر پڑی ہے۔ ایسے بیمار ہو جاۓ گی۔

سکینہ: (اسی انداز سے سجدے کی حالت میں) نہیں اماں تو جا مجھے پڑا رہنے دے ایسے ہی۔

اماں بلقیس: پتر میری بات مان اٹھ جا اٹھ کر اپنی حالت ٹھیک کر اور اپنا کار سنبھال۔۔۔ یہ کار تو تم نے ہی سنبھالنا ہے۔ یہ تو ربی کام ہیں اس کے آگے کس کی چلی ہے۔

سکینہ: نہیں اماں میں ٹھیک ہوں تو جا بس میں یہیں ٹھیک ہوں۔

اماں بلقیس: ایسے نہ کر پتر۔ چل رات کے وقت تو بستر پر آکر سو جا۔ صبح پھر یہاں بیٹھ جانا۔

سکینہ: اچھا اماں سو جاؤں گی تو جا ابھی۔

(اماں خاموش ہو جاتی ہے اور آہستہ آہستہ باہر نکل جاتی ہے)

گیارواں منظر

وہی وقت۔ نسیم کا گھر۔

نسیم کمرے میں اکیلا کھڑا ہے۔ اور کسی خیال میں گم ہے۔ اماں بلقیس آتی ہے۔

اماں بلقیس: (کمرے میں داخل ہو کر) نسیم پتر۔

نسیم: جی اماں۔

اماں بلقیس: تو جا اور سکینہ کو کجھ سمجھا کہ اب اٹھ کر کام کاج کرے گھر کو سنبھالے دن رات مصلے پر پڑی رہتی ہے۔

نسیم: اماں میں کیا کروں میں نے تو اسے بڑا سمجھایا ہے پر نہیں مانتی۔

نسیم: مانتی تو نہیں پر تو ہی اسے سمجھا سکتا ہے۔ اور کتنے دن اسی طرح پڑی رہے گی۔

نسیم: ہاں اماں پتہ نہیں اور کتنے دن۔۔۔ پر اماں اس کے پاس ایک سہارا تو ہے، ایک آسرا تو ہے۔ وہ اپنے دکھوں اور غموں کا مداوا مصلے پر گر کر کر سکتی ہے۔ لیکن اماں میں کیا کروں۔ میں کہاں جاؤں۔ میں کون سا آسرا تلاش کروں۔۔۔ اماں؟

اماں: ہاں پتر؟

نسیم: (جاری رکھتے ہوۓ) میں جانتا ہوں یہ راستہ جو سکینہ نے اختیار کیا ہے فرار کا راستہ ہے۔ ایسے لوگ زندگی کا سامنا کرنے کی بجاۓ خجروں اور گوشوں میں پناہ تلاش کرتے ہیں۔ مقبروں، درباروں مسجدوں اور مندروں میں جا چھپتے ہیں۔ بالکل اس شرابی کی طرح جو زندگی کے دکھوں اور مصائب کو، ظلم و ستم کو جھیلنے کے لیۓ اور غم غلط کرنے کے لیۓ میخانے میں پناہ تلاش کرتا ہے۔ شراب میں غرق ہو کر اپنے دکھوں کی دوا کرتا ہے۔۔۔ لیکن جانتی ہو اماں ان دونوں میں کیا فرق ہے؟

اماں بلقیس: کیا؟

نسیم: شرابی کو اپنے گناہ کا احساس ہوتا ہے وہ چاہے زبان سے اس کا اقرار نہ بھی کرے مگر دل میں وہ سمجھتا ہے کہ وہ اپنی اور دوسروں کی زندگی برباد کر رہا ہے۔ لیکن یہ لوگ جو دوسرا راستہ اختیار کرتے ہیں رفتہ رفتہ انہیں اس راستے پر اطمینان حاصل ہونے لگتا ہے۔ ان پر بھی شرابی کی طرح ایک نشہ سا طاری ہو جاتا ہے۔ لیکن اماں یہ شرابی سے بڑے مرض میں مبتلا ہو جاتے ہیں۔ یہ خود کو صراطِ مستقیم پر سمجھنے لگتے ہیں اور دوسروں کو ٹھیک کرنے کے لیۓ اس راستے کی تبلیغ پر لگ جاتے ہیں۔۔۔

مگر اماں ہم لوگ کیا کریں۔ میں اور مجھ جیسے بہت سے لوگ کہاں جائیں؟ کون سی پناہ تلاش کریں؟ کہاں آسرا ڈھونڈیں۔ اپنے غموں اور دکھوں کا مداوا کیسے کریں؟ ہمارے لیۓ تو نہ یہ راستہ ہے اور نہ وہ۔

شام سے ذرا پہلے

2025-02-26T00:24:00.004+05:00

صبح سے چھاجوں مینہ برس رہا تھا لیکن ابھی تھوڑی دیر پہلے جب دن ڈھلنے والا تھا تو اس کی رفتار میں سستی آگئی تھی۔ ہلکی ہلکی بوندا باندی میں بھیگتی سڑک پر گاڑیاں سبک رفتاری سے چل رہیں تھیں۔ ابھی ابھی ایک کار ایک موڑ کاٹ کر سیدھی سڑک پر بوندا باندی سے بھی دھیمی رفتار سے چل رہی تھی۔ یہ کار آگے جاکر ایک دوسرے موڑ کے پاس رک گئی اور چند لمحے وہاں ٹھہرنے کے بعد سیدھا جانے کی بجاۓ موڑ پر مڑ گئی۔ کچھ دیر بعد گھوم کر دوبارہ پہلے والے موڑ پر واپس آگئ اور پھر سے سیدھی سڑک پر چلنے لگی۔ دوسرے موڑ پر پہنچ کر اس نے پھر ایسے ہی کیا اور دوسری مرتبہ ایک چکر کاٹ کر پہلے موڑ پر واپس آگئ۔ تین چار بار گاڑی یہ عمل دہراتی رہی۔ ایک موڑ سے دوسرے موڑ پر جاتی اور چند لمحے وہاں ٹھہر کے ایک چکر کے بعد دوبارہ وہاں پہنچ جاتی۔ جب یہ کھیل کچھ دیر تک جاری رہا تو برلبِ سڑک بنچ پر بیٹھے ایک شخص کی توجہ اس جانب مبذول ہوئی جو تھوڑی دیر پہلے دنیا و مافیہا سے بے خبر سر جھکاۓ تنہا بنچ پر بیٹھا تھا۔ اس آدمی نے گھٹنوں سے نیچے تک سیاہ رنگ کا لمبا کوٹ پہن رکھا تھا جس کے نیچے سیاہ رنگ کی پتلون تھی جس کے پائنچے کوٹ سے باہر جھانک رہے تھے۔ پاؤں پر سیاہ رنگ کے ہی جوتے تھے جس کے لمبے تسمے نیچے لٹک کر زمین پر بارش کے پانی سے بھیگ رہے تھے۔ سر پر گہرے بھورے رنگ کا ہیٹ تھا جو ذرا ترچھا سا سر پر سجھا ہوا تھا۔ چہرے پر ہلکی سی داڑھی کچھ بڑھی ہوئی تھی لیکن ظاہر ہوتا تھا چند دن پہلے اسے بڑی نفاست سے تراشا گیا تھا۔

گاڑی جب چوتھی مرتبہ اس کے پاس سے گزری تو اس نے اندر بیٹھے مسافروں کو غور سے دیکھا اندر تین چار لڑکیاں تھیں جو شاید شرارت کے موڈ میں تھیں یا بارش کے موسم سے لطف اندوز ہونے کی کوشش کر رہی تھیں۔ ان کی گاڑی اگلے موڑ پر جا کر رک گئی۔ اس بار گاڑی کا پچھلا دروازہ کھلا جس میں سے ایک لڑکی باہر نکلی اور گھوم کر ڈرائیونگ سیٹ کے پاس پہنچ گئی۔ پھر گاڑی کا اگلا دروازہ کھلا ایک دوسری لڑکی باہر نکلی اور اس پہلی والی لڑکی کی سیٹ پر جا کر بیٹھ گئی۔ پہلی لڑکی نے گاڑی کا اسٹیئرنگ سنبھالا اور گاڑی آگے بڑھا دی۔ ایک چکر کاٹ کر گاڑی دوبارہ اسی سڑک پر آگئی۔ ڈرائیور بدلنے کے باوجود گاڑی کی رفتار میں کوئی خاطر خواہ فرق نہیں آیا تھا لیکن اس دفعہ لڑکی نے شرارتاً گاڑی اس بنچ والے آدمی کے بالکل پاس سے گزاری جس سے پانی کی چھینٹیں اس آدمی کے چہرے اور کپڑوں پر پڑیں۔ چاروں لڑکیوں نے بلند آواز میں قہقہہ لگایا۔

اگلی بار جب گاڑی موڑ مڑ کر سیدھی سڑک پر آئی تو وہ آدمی اپنی سیٹ سے اٹھ کھڑا ہوا اور جونہی گاڑی اس کے قریب پہنچی وہ اچانک اس کے آگے آگیا۔ گاڑی اس سے ٹکرائی اور وہ بونٹ کے اوپر اوندھے منہ ڈھیر ہو گیا۔ گاڑی بریکس اور ڈرائیور لڑکی کی زوردار چیخ کے ساتھ رک گئی۔ چاروں لڑکیاں باہر نکلیں اس آدمی کو جلدی سے سیدھا کرکے دیکھا چوٹ کا نشان کہیں نظر نہیں آرہا تھا لیکن وہ آدمی بیہوش ہو چکا تھا۔ لڑکیاں گبھرا گئیں۔ اس سے پہلے کوئی انہیں دیکھتا انہوں نے جلدی سے آدمی کو کسی نہ کسی طرح گھسیٹ کر گاڑی میں بٹھایا اور اسے لے کر وہاں سے فرار ہو گئیں۔

تقریباً رات کے دس بجے کے قریب وہ چاروں لڑکیاں کمرے کے اکے بالکل وسط میں زمین پر بچھے کارپٹ پر لاش کی طرح پڑے لمبے کوٹ والے آدمی کے اردگرد کچھ فاصلے پر بیٹھی اونگھ رہی تھیں۔ کمرے کے ایک کونے میں آتش دان جل رہا تھا جس کی روشنی آدمی کے چہرے پر پڑ رہی تھی۔ باہر لگاتار بارش ہو رہی تھی جس نے رات کے اس پہر ٹھنڈ میں مزید اضافہ کر دیا تھا لیکن آتش دان سے کمرے کے اندر کا درجہ حرارت بہت بہتر ہو گیا تھا۔ لاش میں ذرا سی حرکت ہوئی تو ایک لڑکی جس نے ابھی ابھی آنکھ کھول کر نیند کے عالم میں لاش کی طرف نگاہ ڈالی تھی تقریباً چلا اٹھی۔ 'لگتا ہے اس کو ہوش آرہا ہے۔' باقی تینوں لڑکیاں جو ابھی تک نیند کے خمار میں تھیں فوراً متوجہ ہوئیں۔ انہوں نے آگے بڑھ کر آدمی کو جگانے کی کوشش کی مگر وہ پھر سے بےہوش ہو چکا تھا۔ چاروں لڑکیاں تھک ہار کر دوبارہ اپنی اپنی سیٹوں پر جا بیٹھیں۔

'مجھے لگتا ہے اسے ڈاکٹر کے پاس لے جانا چاہیۓ۔' ایک لڑکی جس نے سب سے پہلے آدمی کو حرکت کرتے دیکھا تھا بولی۔

پاگل ہو گئی ہو اگر اسے کچھ ہو گیا تو ہم مارے جائیں گے کیونکہ وہ ہماری گاڑی سے ٹکرایا ہے۔' دوسری لڑکی نے کہا۔

یہی تو میں کہہ رہی ہوں اگر اسے کچھ ہو گیا تو ہم مارے جائیں گے۔ اگر وہ بچ گیا تو بتا تو سکے گا کہ ہمارا اس میں کوئی قصور نہیں وہ خود گاڑی سے ٹکرایا تھا۔' پہلی لڑکی نے جواب دیا۔

میرا خیال ہے سمیرا ٹھیک کہہ رہی ہے۔'تیسری لڑکی جو ذرا ہٹ کر آتش دان کے پاس اوپر صوفے پر بیٹھی تھی بولی۔ 'اگر ہم اسے ڈاکٹر کے پاس نہ لے کر گۓ تو بیچارے کی جان جا سکتی ہے۔ پھر تو ہم پکا پھنسیں گی۔'

ٹھیک ہے پھر اٹھاؤ اسے لے چلیں ڈاکٹر کے پاس۔' دوسری لڑکی نے رضامندی ظاہر کرتے ہوۓ کہا۔

چاروں لڑکیاں آگے بڑھیں مگر جونہی وہ اس کے پاس پہنچیں وہ آدمی فوراً اٹھ کر بیٹھ گیا۔ یہ عمل اتنی تیزی سے ہوا کہ چاروں گبھرا کر پیچھے ہٹ گئیں۔

میں کہاں ہوں؟' وہ آدمی نیم بے ہوشی کے عالم میں دھیرے سے بولا۔

گھبرائیں نہیں آپ بالکل محفوظ ہیں۔ آپ ہماری گاڑی سے ٹکرا کر بے ہوش گۓ تھے اس لیۓ ہم آپ کو اٹھا کر یہاں لے آۓ۔' ایک لڑکی نے کہا۔

میں آپ کی گاڑی سے کب ٹکرایا تھا؟' آدمی نے اسی نیم بے ہوشی کے سے انداز سے پوچھا۔

آپ کو یاد نہیں؟' لڑکی نے پوچھا۔

نہیں۔'

یاد کریں سڑک پر بارش ہو رہی تھی۔۔۔

سڑک۔۔۔بارش۔۔۔کب ہو رہی تھی بارش۔۔۔میں سڑک پر کب آیا تھا؟'

چھوڑیں اس کو' دوسری لڑکی بولی۔ 'آپ یہ بتائیں آپ کا گھر کہاں ہے؟ ہم آپ کو وہاں چھوڑ آتے ہیں.'

گھر۔۔۔کون سا گھر۔۔۔کہاں ہے میرا گھر۔۔۔مجھے معلوم نہیں۔' آدمی مکمل طور پر ہوش میں آچکا تھا لیکن اسے ابھی بھی کچھ بھی یاد نہیں آرہا تھا۔

آپ کو اپنا گھر معلوم نہیں' لڑکی نے خیرت سے پوچھا۔

مجھے کچھ یاد نہیں آرہا۔ میں کون ہوں، میرا نام کیا ہے؟'

او میرے خدایا! لگتا ہے اس کی یاداشت چلی گئی۔' تیسری لڑکی نے گبھرا کر کہا۔ 'اب کیا ہو گا۔'

کچھ نہیں ہوا اسے ایسے ہی ڈرامے کر رہا ہے۔ ابھی اسے ہوش میں لاتی ہوں۔' سمیرا جو اس وقت سے خاموش کھڑی تھی آگے بڑھی اور اسے جنجھوڑ کر پوچھنے لگی۔ 'بتاؤ کون ہو تم اور کیا چاہتے ہو۔ تم جان بوجھ کر ہماری گاڑی سے ٹکراۓ تھے اور اب یاداشت جانے کا ڈھونگ کر رہے ہو۔'

آپ کون ہیں اور مجھے کیوں مار رہی ہیں؟' آدمی نے دھیمے انداز سے بڑے بھولپن سے پوچھا۔

ہماری چھوڑو پہلے تم بتاؤ تم کون ہو۔' لڑکی اس کا کالر پکڑ کر اسے زور سے کھینچ کر بولی۔

میں کیا بتاؤں میں کون ہوں۔ میں خود نہیں جانتا میں کون ہوں۔' آدمی نے فضا میں کہیں گھورتے ہوۓ کہا۔

سمیرا چھوڑ دو اسے' ایک لڑکی بولی۔ 'یہ ٹھیک کہہ رہا ہے لگتا ہے واقعی اس کی یاداشت چلی گئی ہے۔ تھوڑا انتظار کرو ہو سکتا ہے صبح تک اسے یاد آجاۓ۔'

اور اگر نہ آیا تو؟' ایک لڑکی نے پوچھا۔

پھر اس وقت دیکھیں گے اس کا کیا کرنا ہے۔'

پانی۔۔۔! مجھے پانی مل سکتا ہے۔ بڑی سخت پیاس لگی ہے۔' آدمی نے کہا۔

پیاس کے علاوہ آپ کو بھوک بھی لگی ہو گی؟' لڑکی نے پوچھا۔

جی تھوڑی لگی تو ہے۔'

ٹھیک ہے آپ کو پانی، کھانا اور رضائی کمبل وغیرہ مل جاۓ گا آپ اس صوفے پہ سو رہنا۔ آج رات آپ یہاں ٹھہریں رہیں صبح آپ کا گھر تلاش کرنے کی کوشش کریں گے۔۔۔ چلو ہم لوگ چلتے ہیں اسے آرام کرنے دو۔' لڑکی باہر نکل گئی۔ اس کے پیچھے باقی سب لڑکیاں بھی باہر نکل گئیں۔

لڑکیوں کے جانے کے بعد آدمی نے اردگرد دیکھا ایک کونے میں کرسی پر اس کا ہیٹ پڑا ہوا تھا۔ وہ اٹھا اور ہیٹ اٹھا کر الٹ پلٹ کر دیکھنا شروع کر دیا۔ کچھ دیر دیکھنے کے بعد اس نے اسے واپس اسی جگہ پر رکھ دیا۔ پھر آگے بڑھا اور کھڑکی سے پردہ اٹھا کر باہر جھانکنے لگا۔ باہر اندھیرا تھا لیکن کھڑکیوں کے شیشے نم آلود تھے لگتا تھا بارش ابھی ہو رہی ہے۔ اس نے پردہ دوبارہ کھڑکی کے آگے کر دیا اور آتش دان کے پاس آگیا۔ اپنا کوٹ اتار کر اس نے کھڑکی کی پشت پر ٹانک دیا۔ اس کے بعد اس نے گھوم پھر کر کمرے کا جائزہ لیا اور دیوار کے سامنے پڑے ہوۓ قدِ آدم آئینے کے سامنے آکر کھڑا ہو گیا۔ آئینے میں اپنی صورت دیکھنے کے بعد اس نے اپنے داہنے ہاتھ سے اپنے بالوں کو درست کیا اور دوسری دیوار پر آویزاں ایک بڑی سی پینٹنگ دیکھنے میں مصروف ہو گیا۔ ابھی وہ پینٹنگ دیکھنے میں مگن تھا کہ دروازے پر ہلکی سی دستک ہوئی۔ اس نے گردن گھما کر دروازے کی طرف دیکھا ایک آدمی کھانے کا ٹرے ہاتھ میں پکڑے اندر داخل ہوا۔ شکل و صورت اور حلیے سے وہ آدمی ملازم دکھائی دیتا تھا۔ وہ ٹرے میز پر رکھ کر باہر نکل گیا۔ لمبے کوٹ والا آدمی آگے بڑھا اور ٹرے اٹھا کر دیکھا کھانے کی خوشبو سے اس کی بھوک اور بڑھ گئی تھی۔ اس نے وہیں کھڑے کھڑے کھانا شروع کر دیا۔ وہ یوں تیزی سے کھا رہا تھا جیسے برسوں کا بھوکا ہو۔ دروازے پر دوبارہ دستک ہوئی وہی آدمی جو تھوڑی دیر پہلے کھانا دے کر گیا تھا اندر آیا۔ اس بار اس کے ہاتھ میں کمبل اور تکیہ تھا۔ اس نے دونوں چیزیں صوفے پر رکھیں اور آدمی سے پوچھا۔ 'آپ کو کچھ اور چاہیۓ؟' اس نے نفی میں سر ہلایا اور کرسی پر بیٹھ کر اطمینان سے کھانا شروع کر دیا۔ ملازم جیسے آیا تھا ویسے ہی خاموشی سے باہر نکل گیا۔ اس کے جانے کے بعد آدمی نے خوب سیر ہو کر کھانا کھایا اور آکر بستر پر دراز ہوگیا۔

صبح تک بارش تھم چکی تھی مگر آسمان پر ابھی گھنے اور سیاہ بادلوں کا رقص ان کے ارادوں کو صاف ظاہر کر رہا تھا۔ گذشتہ رات کی بارش سے پیڑ، پودے، سبزہ ہر چیز نہا کر ترو تازہ و شاداں و فرحاں دکھائی دے رہی تھی۔ پھولوں کی پتیوں پر بارش کے ننھے ننھے قطرے استراحت فرما رہے تھے اور درختوں کی شاخوں اور ڈالیوں پر رکی ہوئی بارش آہستہ آہستہ کرکے قطروں کی صورت زمین پر اتر رہی تھی۔

دن کا اجالا پھیلتے ہی لمبے کوٹ والے آدمی کی آنکھ کھل گئی تھی۔ اس نے اٹھ کر سب سے پہلے کھڑکی سے پردہ ہٹا کر باہر دیکھا اور دوبارہ صوفے پر آکر بیٹھ گیا۔ ابھی تک اس کمرے میں باہر سے کوئی بھی نہیں آیا تھا۔ شاید ابھی سب سو رہے تھے۔ تھوڑی دیر بعد وہ اٹھا اور دروازے کی طرف بڑھا۔ دروازے کے پاس پہنچ کر وہ رک گیا۔ وہ فیصلہ نہیں کر پا رہا تھا کہ دروازہ کھول کر باہر نکل کر دیکھے یا وہیں انتظار کرے۔ چند لمحے وہاں کھڑا رہنے کے بعد اس نے دروازے کا کنڈا آہستہ سے نیچے کی طرف دبایا جس سے دروازہ کھل گیا۔ بڑے آرام سے وہ باہر نکلا اور دروازے کے پاس کھڑے ہو کر اردگرد دیکھنے لگا۔ ایک طرف چند کمرے تھے اور ایک طرف راہ داری تھی جو نیم تاریکی میں ڈوبی ہوئی تھی۔ اس نے راہداری کی طرف قدم بڑھاۓ اور چلتا ہوا ایک کھلے حال میں پہنچ گیا۔ اردگرد کا جائزہ لینے کے بعد وہ ایک طرف کو چل پڑا۔ آگے ایک بڑا سا دروازہ تھا جو بند تھا۔ اس نے آہستگی سے دروازہ کھولا اور باہر جھانک کر دیکھا۔ باہر برآمدہ تھا جس کے پیچھے وسیع صحن تھا۔ صحن میں جانے کی بجاۓ اس نے دروازہ دوبارہ بند کر دیا اور واپس مڑ کر دوسری جانب کا رخ کیا۔ چند قدم چلنے کے بعد اسے باورچی خانہ نظر آیا۔ اس نے باہر کھڑے ہو کر اندر جھانک کر دیکھا وہاں کوئی نہیں تھا۔ اتنا بڑا گھر اس وقت یوں ویران اور سنسان پڑا تھا کہ اسے لگا وہ قبرستان میں آگیا ہے۔ چلتا ہوا وہ سیڑھیوں کے پاس آگیا۔ اس نے اوپر جاتی سیڑھیوں کا بغور جائزہ لیا اور پھر آہستہ آہستہ سیڑھیاں چڑھنے لگا۔ اوپر جاتے ہوۓ وہ سیڑھیوں کے درمیان میں پہنچ گیا۔ یہاں سے سیڑھیاں ایک بل کھا کر اوپر جاتی تھیں۔ وہ ایک پل کے لیۓ وہاں ٹھہرا اور پھر اوپر چڑھنے لگا۔ جب وہ سیڑھیاں چڑھ کر اوپر پہنچا تو آگے ایک بڑا سا دروازہ تھا اس نے دروازہ کھولا اور چھت پر آگیا۔ جیسے ہی اس نے دروازے کے باہر چھت پر قدم رکھا سرد ہوا کا ایک جھونکا اس کے سر اور چہرے کو چھو کر فرار ہو گیا۔ اس نے اوپر دیکھا آسمان پر گہرے سیاہ بادلوں کا سایہ ہر سو پھیلا تھا۔ وہ آگے بڑھا اور منڈیر کے پاس پہنچ کر سردی سے ٹھٹھرتی کانپتی بارش سے تر بتر آہنی ریلنگ پر اپنے دونوں ہاتھ ٹکا کر کھڑا ہو گیا۔ اردگرد کے تمام گھر ایک دوسرے سے دوری بناۓ کھڑے تھے مگر سب کے سب ایک جیسے دکھتے تھے۔ ذرا ہٹ کر بل کھاتی ہوئی باریک سی خوبصورت سڑک ان گھروں کو چھوۓ بغیر ان کے پاس سے خاموشی سے گزر رہی تھی۔ ان کے اوپر سیاہ بادلوں کے مرغولے یہاں وہاں چہل قدمی کر رہے تھے۔ اس نے گھوم کر چاروں طرف دیکھا دوسری جانب بھی وہی سڑک چل کر وہاں تک پہنچ گئی تھی جس کے اردگرد دوری کو قائم رکھے چند گھر تھے جن کے عقب میں سبزہ تھا اور جس کے پرلی طرف کچھ فاصلے پر درختوں کے جھنڈ تھے جو میلوں تک پھیلے ہوۓ تھے۔ وہ پلٹ کر دوبارہ اس جانب دیکھنے لگا جس سمت وہ پہلے دیکھ رہا تھا۔ ایک لڑکی اوپر آئی اور آکر بولی۔ 'آپ یہاں ہیں ہم نے کہا پتہ نہیں کہاں چلے گۓ ہیں۔'

اس نے پیچھے مڑ کر دیکھا اور کہا۔ ' وہ میری جلدی آنکھ کھل گئی تھی اس لیۓ اوپر چلا آیا۔'

اور کیسی طبعیت ہے آپ کی؟ کچھ یاد آیا؟'

نہیں ابھی تک تو کچھ یاد نہیں آیا۔'

چلیں آپ نیچے آجائیں ناشتہ وغیرہ کریں پھر دیکھتے ہیں۔' لڑکی بول کر نیچے چلی گئی۔

وہ کچھ دیر وہاں کھڑا رہا پھر وہ بھی سیڑھیاں اتر گیا۔

ناشتہ کیۓ ہوۓ اسے بہت وقت بیت گیا تھا لیکن ابھی تک اس کمرے میں ان لڑکیوں میں سے کوئی بھی نہیں آیا تھا۔ وہ کھڑکی کے پاس کھڑا باہر رنگ برنگے پھولوں میں گرے لان کو دیکھنے میں محو تھا کہ دروازے پر دستک کے بعد دو لڑکیاں اندر آئیں۔

ناشتہ ٹھیک سے کر لیا ہے کسی چیز کی ضرورت تو نہیں۔' اندر آتے ساتھ ایک لڑکی نے پوچھا۔

جی نہیں فی الحال تو کسی چیز کی ضرورت نہیں۔'

ہم آپ سے ایک بات کرنا چاہتے ہیں۔' دوسری لڑکی بولی۔

جی کہیۓ۔'

بات یہ ہے ہم نے سوچا تھا شاید آپ کو صبح تک کچھ یاد آجاۓ گا تو ہم آپ کو آپ کے گھر پہنچانے کی کوشش کریں گے۔ مگر ابھی تک تو آپ کو اپنا نام بھی یاد نہیں آیا۔'

جی۔'

بات یوں ہے' لڑکی نے اپنی بات جاری رکھی۔'یہ گھر جو آپ دیکھ رہے ہیں ہے تو ہمارا اپنا مگر ہم یہاں رہتے نہیں ہیں۔ ہمارے والدین اور دوسرے گھر والے سب بیرونِ ملک ہیں۔ یہاں ہم اکیلی لڑکیاں رہ رہی ہیں اس لیۓ آپ کو زیادہ دن یہاں رکھنا مناسب نہیں۔ ہم بھی کچھ دنوں تک یہاں سے چلے جائیں گی پھر یہ گھر بند پڑا رہے گا۔

جی میں سمجھ سکتا ہوں۔'

لیکن آپ کو بھیجے کہاں آپ کو تو راستہ وغیرہ کچھ بھی یاد نہیں۔' دوسری لڑکی نے پوچھا۔

آپ فکر نہ کریں آپ مجھے رخصت کریں میں کہیں نہ کہیں کوئی ٹھکانہ ڈھونڈ لوں گا۔' آدمی نے جواب دیا۔

پھر بھی آپ کہاں جائیں گے؟'

چل پڑوں گا کسی نہ کسی سمت پھر جہاں یہ قدم لے جائیں۔'

نہیں ایسے ٹھیک نہیں۔' لڑکی بولی۔ 'آپ ہماری گاڑی سے ٹکراۓ تھے آپ کی اس حالت کے ذمے دار کسی حد تک ہم لوگ بھی ہیں۔ ہم آپ کو ایسے تو نہیں جانے دے سکتے۔ آپ ایک دو دن تک یہیں ٹھہریں ہم کسی ڈاکٹر سے بات کرتے ہیں جو یہاں آکر آپ کو دیکھ جاۓ ممکن ہے اس سے آپ کو کچھ یاد آجاۓ۔'

ٹھیک ہے جیسے آپ بہتر سمجھیں۔ میں تو اس وقت کسی قسم کا فیصلہ کر سکنے کی حالت میں نہیں ہوں۔' آدمی نے اس کی بات سے اتفاق کرتے ہوۓ کہا۔

ٹھیک ہے پھر آپ آرام کریں۔ کسی چیز کی ضرورت ہوئی تو بلا جھجھک بتا دیجیۓ گا۔' لڑکیاں کمرے سے نکل گئیں۔

آدمی نے اس کی بات کے جواب میں سر ہلایا اور دوبارہ کھڑکی سے باہر دیکھنے لگا۔

باہر لان میں سامنے والی کیاری میں سرخ اور سفید گلاب کی ایک قطار کافی آگے تک جارہی تھی جبکہ بائیں جانب دوسری کیاری میں موتیے کے سفید پھول کھلے تھے۔ اس کے علاوہ گملوں میں بھی کئ طرح کے پھول رات بھر کی بارش سے نہا کر تر و تازہ مہک بکھیر رہے تھے۔ ان پودوں پر چڑیاں چہچہا رہی تھیں جن کی چہک کمرے میں بھی صاف طور پر سنائی دے رہی تھی۔ دن بھر وہ کھڑکی کے پاس بیٹھا چڑیوں کی چہکاریں اور پھولوں کی مہکاریں سننے اور سونگھنے میں محو رہا جبکہ شام سے کچھ دیر پہلے سپہر کے وقت وہ کمرے سے نکلا اور چھت پر آگیا۔ چھت پر ہلکی ٹھنڈی ہوا چل رہی تھی جو اسے بھلی لگ رہی تھی۔ ابھی وہ وہیں ٹہل رہا تھا جب سمیرا اوپر آئی۔ حال احوال پوچھنے کے بعد اس نے کہا۔ 'میں آپ سے معافی مانگنے آئی تھی۔ میں نے جو اس وقت آپ کے ساتھ سلوک کیا اس کے لیۓ میں معذرت خواہ ہوں۔ میں سمجھی تھی شاید آپ جان بوجھ کر یاداشت جانے کا ناٹک کر رہے ہیں۔ لیکن میں غلط تھی۔'

کوئی بات نہیں۔ آپ کی جگہ اگر میں ہوتا تو شاید میں بھی ایسا ہی سمجھتا۔'

پھر بھی آپ کو برا تو لگا ہو گا۔' لڑکی بولی۔ 'میں اس کے لیۓ دوبارہ آپ سے معافی مانگتی ہوں۔'

نہیں کچھ زیادہ برا نہیں لگا لیکن اگر آپ بار بار معافی مانگیں گیں تو ضرور برا لگے لگا۔' آدمی نے کہا۔

ٹھیک ہے نہیں مانگتی معافی لیکن اس کا مطلب یہ ہوا آپ نے مجھے معاف کر دیا۔'

ہاں کر دیا۔ اب چھوڑیں اس بات کو آپ بتائیں آپ کیا کرتی ہیں یا کیا کرنا پسند کرتی ہیں؟' آدمی نے پوچھا۔

پہلے آپ بتائیں آپ کیا کرتے ہیں؟'

میں اگر یہ بتا سکتا ہوتا تو اس وقت یہاں موجود ہی کیوں ہوتا۔'

اوہ! میں معافی چاہتی ہوں میں بھول گئی تھی کہ آپ۔۔۔' لڑکی نے جملہ ادھورا چھوڑ دیا۔

کہ آپ کو کچھ یاد نہیں یہاں تک کہ اپنا نام بھی نہیں۔' آدمی نے اس کا ادھورا فقرا مکمل کر دیا۔ 'خیرت ہے یاداشت میری گئی ہے اور بھول آپ رہی ہیں۔'

جی وہ بس۔۔۔' ابھی وہ بات مکمل نہ کر پائی تھی کہ ایک لڑکی اوپر آئی اور آتے ہی اس نے اسے پکارا۔

سمیرا تمہیں کتنی آوازیں دیں ہیں سنتی نہیں۔ نیچے آؤ تم سے کام ہے۔'

سمیرا اس لڑکی کے ساتھ نیچے چلی گئی اور وہ وہیں چھت پر ٹہلنے لگا۔ شام کے بعد جب اندھیرا ہر سو پھیل گیا اور سب کچھ دکھائی دینا بند ہو گیا تو وہ نیچے چلا آیا۔ رات اس نے سوتے جاگتے میں کاٹی جبکہ اگلی صبح ابھی اسے نیند سے بیدار ہوۓ کچھ ہی وقت ہوا تھا کہ ایک لڑکی اندر آئی۔

آجائیں ڈاکٹر صاحب۔' اس لڑکی نے ایک آدمی کو پکارا جو اس کے پیچھے کمرے میں چلا آرہا تھا۔ یہ مریض ہیں۔' لڑکی لمبے کوٹ والے آدمی کی طرف اشارہ کرکے بولی۔ ڈاکٹر اندر آیا تو لڑکی آدمی سے مخاطب ہوئی۔ 'یہ ڈاکٹر صاحب ہیں۔ یہ آپ کا معائنہ کریں گے۔'

لمبے کوٹ والے آدمی نے ڈاکٹر کو سلام کیا اور خاموشی سے بیٹھ گیا۔ ڈاکٹر اس کا معائنہ کرنے لگا۔ 'کہیں درد تو نہیں ہے؟' ڈاکٹر نے اس کے سر کو مختلف جگہوں سے اپنی انگلیوں اور انگوٹھے سے دبا کر پوچھا۔

نہیں۔ درد تو کہیں نہیں۔' آدمی نے آہستگی سے جواب دیا۔

ڈاکٹر کچھ دیر تک اس کا معائنہ کرتا رہا پھر لڑکی سے مخاطب ہوا۔ 'اس طرح کچھ بھی بتانا مشکل ہے آپ کو انہیں ہاسپٹل لانا پڑے گا۔ ان کے سر کا ایکسرے کریں گے تب پتہ چلے گا چوٹ کہاں پر لگی ہے اور کتنی گہری لگی ہے۔ تب ہی اندازہ ہو گا کہ ان کی یاداشت کو کتنا نقصان پہنچا ہے۔'

ٹھیک ہے ڈاکٹر صاحب ہم انہیں ہاسپٹل میں لے آئیں گے۔ آپ کا بہت شکریہ آپ یہاں تشریف لاۓ۔'

ڈاکٹر نے مزید چند سوال اس سے پوچھے اور رخصت ہو گیا۔ لڑکی بھی اس کے ساتھ باہر نکل گئی۔ وہ آدمی جلدی سے اٹھا کرسی کی پشت پر اس کا لمبا کوٹ ابھی بھی لٹک رہا تھا اس نے کوٹ کرسی سے اٹھایا اور پہن لیا۔ پھر اپنا ہیٹ اٹھایا اور سر پر رکھ لیا۔ اس کے بعد اپنے جوتوں کی طرف بڑا ابھی وہ جوتے پہننے والا تھا کہ کچھ سوچ کر رک گیا۔ اس نے جوتے وہیں چھوڑے اور کچھ سوچتے ہوۓ آہستہ آہستہ واپس پلٹ آیا۔ کوٹ اور ہیٹ اتار کر دوبارہ اسی جگہ پر رکھ دیۓ جہاں وہ پہلے پڑے تھے۔

وہ تمام دن اس نے اپنے کمرے میں ہی گزارا لیکن شام سے کچھ دیر پہلے وہ چھت پر چلا آیا۔ آج دن بھر ہلکی سی دھوپ نکلی تھی جو اس وقت بالکل ٹھنڈی پڑ چکی تھی اور چند گھڑی کی مہمان تھی۔ مغرب کی سمت سورج درختوں کے جھنڈ کے پیچھے کہیں سے جھانک رہا تھا جس کی چند گنی چنی دم توڑتی کرنیں ان درختوں کی شاخوں کو چیرتی ہوئی وہاں تک پہنچ رہی تھیں۔ آسمان پر ہر سو سرخی پھیل گئ تھی۔ وہ ٹہل کر ایک جانب گیا اور پھر کچھ دیر بعد دوسری منڈیر کی طرف بڑھا لیکن سیڑھیوں سے اسے کسی کے قدموں کی چاپ سنائی دی تو وہ وہیں رک کر سیڑھیوں کی جانب دیکھنے لگا۔ چند لمحوں میں جب وہ قدم چھت پر پہنچ گۓ تو وہ مسکرا اٹھا۔ وہ سمیرا کو دیکھ کر بہت خوش ہوا۔

آپ'! اس نے خیرت سے پوچھا۔ 'ویسے میرا دل کہتا تھا آج بھی آپ معافی مانگنے ضرور آئیں گی۔'

جی بس میں نے سو چا ایک بار پھر معافی مانگنے میں کیا خرج ہے۔' وہ مسکرائی۔ 'ویسے آپ کو یہ کیوں لگا کہ میں آج پھر آؤں گی؟'

معلوم نہیں۔ میں خود نہیں جانتا مجھے ایسا کیوں لگا۔' آدمی نے دور سڑک پر کہیں دیکھتے ہوۓ کہا۔

دونوں دیر تک باتیں کرتے رہے۔ جب سورج دور پہاڑوں میں روپوش ہو گیا اور دن کا اجالا تمام ہوا اور جب رات کی سیاہی آسمان سے اتر کر زمین پر پھیلنے لگی تو وہ بھی نیچے اتر آۓ۔

اگلے دن لڑکیوں نے اسے بتایا کہ جو ڈاکٹر اسے دیکھنے آیا تھا اور جس نے اسے ہسپتال میں آنے کو کہا تھا وہ اگلے دو دنوں تک اپنے کسی ضروری کام کی وجہ سے چھٹی پر ہے۔ اس لیۓ اب دو دن بعد ہسپتال جانے ہو گا۔ وہ دن بھی اس نے تقریباً کمرے میں گزارا اور پھر شام سے کچھ دیر پہلے بالکل اسی وقت وہ چھت پر چلا آیا۔ ایک دو چکر لگانے کے بعد وہ منڈیر پر اپنی دونوں کہنیاں ٹکاۓ بلا مقصد سامنے والی خالی سڑک کو دیکھنے لگا۔ کتنی دیر تک وہ وہیں بے حس و حرکت کھڑا رہا۔ تب اسے اپنے پیچھے کسی کے چلنے کی آواز آئی اس نے پیچھے مڑ کر دیکھا تو سمیرا تھی۔ وہ اسے دیکھ کر مسکرایا۔ وہ بھی اس سے کچھ فاصلے پر منڈیر پر ہاتھ رکھ کر خالی سڑک کو دیکھنے لگی۔

آپ روز چھت پر آتی ہیں؟' اس نے اسی انداز میں جس انداز سے وہ کھڑا تھا اس سے پوچھا۔

نہیں کھبی کھبی۔ لیکن ایسا پہلی بار ہوا ہے کہ لگاتار تین دن آئی ہوں۔'

کیوں۔۔۔ ایسا کیوں؟'

ایک دن تو آپ سے معافی مانگنے آئی تھی اور اس کے بعد۔۔۔پتہ نہیں کیوں۔ میں خود نہیں جانتی۔' اس نے سامنے فضا میں کہیں دیکھتے ہوۓ کہا۔

اس نے کوئی جواب نہ دیا اور وہ بھی سامنے سڑک پر دیکھنے لگا جہاں دور سے ایک گاڑی اس جانب چلی آرہی تھی۔

چند لمحے خاموشی کے بعد وہ بولا۔ 'آپ کو کیا واقعی یقین آگیا ہے کہ میری یاداشت میں چلی گئ ہے؟'

شاید۔۔۔۔'

شاید سے کیا مراد؟'

شاید یقین کر لیا ہے۔' اس نے کہا۔ 'لیکن یاداشت والی بات سے زیادہ اس بات پر کہ آپ ایک اچھے انسان ہیں۔'

یہ آپ نے کیسے جانا؟' اس نے خیرت سے پوچھا۔ 'یہ تو خود میں بھی نہیں جانتا۔'

مجھے ایسا لگتا ہے۔'

وہ دوبارہ خاموش ہو گیا۔ سڑک پر دور سے آرہی گاڑی قریب پہنچ گئی اور ان کے پاس سے بغیر کوئی آواز کیۓ گزر گئی۔

وہ دونوں دیر تک وہاں کھڑے رہے کبھی باتیں کرتے اور کبھی ان کے درمیان گہری خاموشی چھا جاتی یوں جیسے کہ وہاں کوئی موجود نہ ہو۔ جب دن ڈھل چکا اور شام کے اثرات دور افق تک پھیل گۓ تو وہ نیچے لوٹ آۓ۔

اگلے دو روز بھی اس کا یہی معمول رہا۔ سارا دن کمرے میں بیٹھا رہتا اور شام سے ذرا پہلے سپہر کے وقت چھت پر چلا جاتا تھا۔ کچھ دیر بعد سمیرا بھی وہاں پہنچ جاتی اور وہ دونوں دن ڈھلنے تک باتیں کرتے رہتے تھے۔

تیسرے دن صبح جب وہ بیدار ہوا تو اسے لڑکیوں نے آکر بتایا کہ ڈاکٹر اگلا پورا ہفتہ چھٹی پر ہے۔ مشکل یہ ہے جس علاقے میں وہ رہائش پذیر ہیں وہ ایک سیاحتی علاقہ ہے جہاں آبادی بہت کم ہے اس لیۓ یہاں کسی اور ڈاکٹر کا ملنا انتہائی دشوار ہے لیکن اتنے دن انتظار نہیں کیا جا سکتا اس لیۓ انہوں نے کہا کہ وہ کوشش کرکے دیکھتی ہیں۔

اس نے اس بات کا کوئی جواب نہ دیا اور خاموش رہا۔ وہ دن بھی اس نے لان میں پھولوں اور چڑیوں کے ساتھ گزارا اور بے صبری سے شام کا انتظار کرنے لگا۔ جب شام قریب آئی تو وہ چھت پر چلا آیا۔ سمیرا آج وہاں پہلے سے موجود تھی۔ دونوں اسی جگہ پر منڈیر کے پاس بالکل خاموش کھڑے باتیں کرتے رہے۔ پھر آدمی کے لب ہلے اور دونوں کے درمیان خاموش باتوں کا سلسلہ ٹوٹ گیا۔

ایک بات تو بتاؤ سمیرا؟'

جی پوچھیں۔'

ابھی تم میرا نام تک نہیں جانتی لیکن جب تمہیں میرے بارے میں پتہ چلے گا تب اگر میں ویسا آدمی نہ نکلا جیسا تم سمجھتی ہو اور جیسا تم نے تصور کر لیا ہے۔ تو۔۔۔؟'

تو۔۔۔'۔ اس نے سامنے سڑک کی طرف دیکھا اور کسی خیال میں کھو گئی۔ چند لمحوں بعد وہ بولی۔ 'پتہ نہیں! میں نہیں جانتی اس وقت کیا ہو گا اور میں کیا کروں گی۔'

اس دن کے بعد اگلے دن دو لڑکیاں اس کے پاس آئیں جن میں سمیرا بھی تھی۔ انہوں نے کہا اتنی جلدی ڈاکٹر کا ملنا مشکل ہے اس لیۓ بہتر ہے ہم آپ کے گھر اور گھر والوں کو تلاش کرنے کی کوشش کریں۔ لیکن اس کے لیۓ ہمیں پولیس کی مدد لینی پڑے گی۔ وہ ہی آپ کے گھر بار کا پتہ لگا سکتی ہے۔

پولیس!' وہ بولا۔ 'پولیس کے پاس جانے کی کیا ضرورت ہے آپ خود پتہ نہیں لگا سکتیں؟'

ہم یہ کام نہیں کر سکتیں۔' لڑکی نے کہا۔ 'آپ کا گھر بار، عزیز رشتہ دار پتہ نہیں کس جگہ ہیں۔ یہ بھی ممکن ہے اس شہر میں ہی نہ ہوں کسی دوسرے شہر میں ہوں۔ ایسے میں ہم کیسے پتہ لگا پائیں گی۔ یہ کام صرف پولیس کر سکتی ہے۔'

اور پھر یہ بھی تو ہو سکتا ہے آپ کے گھر والے آپ کو ڈھونڈ رہے ہوں۔' سمیرا بولی۔ 'کیا پتہ انہوں نے آپ کے گم ہونے کی اطلاع پولیس کو کی ہو۔ جب ہم پولیس کے پاس جائیں تو آپ کے گھر والوں کے بارے میں کچھ پتہ چل جاۓ۔'

اس نے اثبات میں سر ہلایا۔ 'ٹھیک ہے اگر آپ کو یہ بہتر لگتا ہے تو پھر چلے چلتے ہیں۔'

لڑکیوں کے جانے کے بعد وہ دیر تک کسی سوچ میں ڈوبا رہا۔ پچھلے پہر چھت پر بھی وہ کھویا کھویا سا رہا۔ سمیرا نے اسے اس حالت میں دیکھا تو پوچھا۔ 'آج خیریت ہے آپ کچھ پریشان دکھائی دے رہے ہیں؟'

نہیں۔۔۔ایسا تو کچھ نہیں۔' وہ ہلکا سا چونکا۔

پر آج آپ کچھ کھوۓ کھوۓ سے لگ رہے ہیں۔'

نہیں بس ایسے ہی وہ رات کو نیند ٹھیک طرح سے نہیں آئی تو اس لیۓ۔۔۔' اس نے بات کو ٹالا اور سامنے کی طرف اپنی انگلی سے اشارہ کرتے ہوۓ بولا۔ 'وہ دیکھو یوں لگ رہا ہے سورج زمین میں ڈوب رہا ہے۔'

سمیرا نے سامنے دیکھا دور افق کے پاس سورج زمین پر اتر رہا تھا۔

رات کو سمیرا کھڑکی کے پاس کھڑی باہر لان میں برقی قمقموں کی روشنی میں چکمتے پھولوں کو دیکھے جا رہی تھی۔ باقی لڑکیاں بھی کمرے میں موجود تھیں جو کسی نہ کسی کام میں مصروف تھیں۔ ایک لڑکی جو کتاب پڑھنے میں مشغول تھی نے اس نے سر اٹھا کر سمیرا کی طرف دیکھا اور اشارے سے دوسری لڑکی کو اس کی جانب متوجہ کیا۔ اس نے تیسری لڑکی کو اشارہ کیا پھر تینوں مل کر سمیرا کی طرف دیکھنے لگیں۔ ایک لڑکی اٹھ کر اس کے پاس گئی اور اس کے پیچھے کھڑے ہو کر اس کے کندھے کے اوپر سے کھڑکی سے باہر دیکھ کر بولی۔ 'لگتا ہے باہر کوئی ہے؟'

سمیرا نے چونک کر پیچھے دیکھا۔ لڑکی دھیرے سے ہنسی۔ 'اس وقت باہر کیا دیکھ رہی ہو؟'

کچھ نہیں بس ایسے ہی۔' سمیرا کھڑکی سے ہٹ کر ایک طرف بیٹھ گئی۔

لگتا ہے تمہیں بھی کھڑکی سے پھولوں کو دیکھنا بے حد پسند ہے۔' لڑکی نے کہا۔

تمہیں بھی۔۔۔؟ یعنی کہ کوئی اور بھی ہے جس کو پسند ہے۔' دوسری لڑکی شرارت سے بولی.

ہاں ہیں کچھ اور لوگ بھی.' پہلی لڑکی نے کہا۔

اچھا! کون ہیں وہ لوگ؟' دوسری لڑکی دوبارہ شرارت کے سے انداز سے بولی۔

ہیں کچھ لوگ۔' پہلی لڑکی نے کہا۔

کہیں وہ لوگ آج کل ہمارے مہمان تو نہیں؟' تیسری لڑکی نے پوچھا۔

ہاں مہمان بن کر تو آۓ ہیں۔ ہمارے گھر میں بھی اور۔۔۔ کسی کے دل میں بھی۔' پہلی لڑکی نے نظریں گھما کر سمیرا کی طرف دیکھ کر جواب دیا۔

پھر تو اس لڑکی سے پوچھنا پڑے گا کہ یہ کھڑکی سے پھولوں کو دیکھنا پہلے بھی پسند تھا یا مہمان کے آنے کے بعد ہوا ہے۔' تیسری لڑکی نے کہا۔

کیوں لڑکی بتاؤ؟' پہلی لڑکی سمیرا کو مخاطب کرکے بولی۔

ایسا کچھ بھی نہیں تم لوگ بکواس مت کرو۔' سمیرا ان کو ڈانٹتے ہوۓ بولی۔

اچھا جی کچھ بھی نہیں۔ ہم کیا چھنی کاکیاں ہیں جن کو تم بیوقوف بنا لو گی۔' پہلی لڑکی تنک کر بولی۔

چلو چھوڑو یار اسے تنگ مت کرو۔' تیسری لڑکی آگے بڑھی اور سمیرا کے پاس بیٹھ کر بولی۔ 'سنو لڑکی! اور تو کوئی مسئلہ نہیں بس خیال رہے وہ مہمان ہیں اور مہمان زیادہ دیر ٹھہرا نہیں کرتے۔'

رات کافی گہری ہو گئی تھی۔ آدمی جو کتنی دیر سے کھڑکی کے پاس کھڑا کسی سوچ میں ڈوبا ہوا تھا کھڑکی سے ہٹ آیا اور اپنا لباس تبدیل کرکے جوتے پہن کر اپنا لمبا کوٹ پہنا اور سر پر ہیٹ رکھ کر دروازے کی طرف بڑھا۔ دروازہ کھول کر نکلنے والا تھا لیکن پھر کچھ سوچ کر رک گیا۔ واپس پلٹا اور ادھر ادھر کچھ تلاش کرنے لگا۔ ایک جگہ پر اسے ایک کاغذ اور پینسل مل گۓ۔ اس نے کاغذ اور پینسل لیۓ اور بیٹھ کر کچھ لکھنے لگا۔ تھوڑی دیر تک وہ کچھ لکھتا رہا پھر کاغذ پینسل وہیں چھوڑ کر دروازے کی طرف قدم اٹھاۓ۔ دروازہ کھولنے سے پہلے اس نے اک نظر سارے کمرے کو دیکھا اور پھر دروازہ کھول کر باہر نکل گیا۔

صبح جب لڑکیاں کمرے میں آئیں تو اسے کمرے میں موجود نہ پا کر انہوں نے اسے چھت پر اور گھر میں ادھر ادھر تلاش کرنا شروع کر دیا۔ ایک لڑکی کی نظر میز پر پڑے ہوۓ کاغذ پر پڑی تو اس نے باقی لڑکیوں کو بھی آواز دے کر بلا لیا۔ پھر کاغذ پر لکھی تحریر پڑھنے لگی۔

یہ تحریر یوں تو تم چاروں کے لیۓ ہے لیکن خاص کر اس کے لیۓ ہے جس کی وجہ سے میں نے یہ لکھنے کا ارادہ کیا۔ کوئی اور طریقہ مجھے نہیں سوجھ رہا تھا کہ تم لوگوں کو کس طرح تمام سچائی اور حقیقت سے آگاہ کروں۔ میں تم لوگوں کو کچھ بھی بتاۓ بغیر یہاں سے نکلنے والا تھا لیکن پھر سمیرا کا خیال آیا تو اس طرح جانے کی ہمت نہیں ہوئی۔ اس لیۓ سب کچھ یہاں لکھ کر جا رہا ہوں۔

اس دن جس دن میں تم لوگوں کی گاڑی سے ٹکرایا تھا تو تم سمجھی تھیں کہ یہ حادثاتی طور پر ہوا ہے۔ لیکن ایسا نہیں تھا میں جان بوجھ کر تمہاری گاڑی سے ٹکرایا تھا۔ اس کا مقصد تمہاری اس شرارت کا بدلہ لینا نہیں تھا جو تم لوگوں نے مجھ پر پانی کے چھینٹے اڑا کر کی تھی بلکہ اس کے پیچھے مقصد کوئی اور تھا۔ میں تم لوگوں سے اس امید سے ٹکرایا تھا کہ ہو سکتا ہے تم لوگوں سے کچھ پیسے وصول ہو جائیں اور میرے کھانے پینے کا بندوبست ہو جاۓ۔ میں نے جان بوجھ کر بے ہوش ہونے کا ناٹک کیا تاکہ تم مجھے ہسپتال لے جاؤ تو وہاں علاج کے بہانے شاید تم سے کچھ مل جاۓ۔ لیکن تم مجھے اپنے گھر لے آئیں جس سے میرا لالچ بڑھ گیا اور میں نے اپنی یاداشت کھونے کا بہانہ کیا تاکہ کچھ دنوں تک کھانے اور ٹھکانے کا بندوبست ہو جاۓ۔ یہ پڑھ کر تم لوگ مجھے شاید پیشہ ور مجرم یا چور سمجھو مگر سچی بات ہے ایسا بالکل نہیں۔ میں ایک تعلیم یافتہ آدمی ہوں ملازمت نہ ملنے کی وجہ سے کافی دنوں سے میرے پاس ایک روپیہ بھی نہیں تھا۔ میرے ماں باپ یہاں سے بہت دور ایک چھوٹے سے گاؤں میں رہتے ہیں ان کی مالی حالت ایسی نہیں کہ مجھے کچھ پیسے بھیج سکیں۔ اس سے پہلے میں بڑے شہر میں رہتا تھا اور چھوٹے موٹے کام کرکے اپنی پڑھائی اور دیگر اخراجات پورے کرتا تھا۔ لیکن پچھلے کچھ عرصے سے مجھے کوئی کام نہیں ملا تھا جس کی وجہ سے میرے اوپر بہت قرضہ چڑھ گیا تھا۔ قرض خواہوں کے مطالبات سے تنگ آکر میں نے وہ شہر چھوڑ دیا اور یہاں آکر رہنے لگا۔ مگر ابھی تک یہاں بھی وہی صورت حال تھی۔ بس ایک فرق تھا یہاں قرض خواہوں سے جان چھوٹ گئی تھی۔

اس دن جب ڈاکٹر صاحب نے کہا کہ ہسپتال آکر دکھانا پڑے گا تو میں نے سوچا کہ پکڑا نہ جاؤں اس لیۓ میں اس دن وہاں سے بھاگنے والا تھا لیکن پھر ایک خیال نے مجھے روک لیا۔ وہ سمیرا کا خیال تھا۔ سمیرا کے خیال نے مجھے چند دن اور یہاں رکنے پر مجبور کر دیا۔ میں نے اسے سب سچ بتانے کی کوشش کی لیکن نہیں بتا سکا۔

میں اتنا بیوقوف نہیں کہ ایک لڑکی کی دل کی حالت نہ جان پاؤں اور سچی بات تو یہ تھی میرے دل کا حال بھی وہی تھا۔ لیکن میں بات کو آگے بڑھانے سے کتراتا رہا۔ اس لیۓ کہ اس سے کچھ حاصل نہیں ہوتا۔ اس سے سواۓ تکلیفوں کے اور کچھ بھی نہ ملتا۔ کیونکہ میں جو اصل میں تھا سمیرا اس کو نہیں جانتی تھی۔ اور اگر جان بھی لیتی تو بھی کچھ فائدہ نہیں تھا۔ مجھے تو اپنی زندگی کے کسی راستے کا علم تھا اور نہ منزل کا۔ وہ میرے ساتھ کیسے چلتی اور کہاں تک چل پاتی۔

اس روز جب تم لوگوں نے پولیس کے پاس جانے کی بات کی تو میں سوچ میں پڑ گیا۔ اس لیۓ کہ پولیس الٹا طرح طرح کے سوال پوچھ کر تم لوگوں کو اور مجھے دونوں کو پریشان کرتی۔ لہذا میں نے مناسب سمجھا کہ اس سلسلے کو یہیں ختم کر دینا چاہیۓ۔ سو میں چلا آیا۔

تم لوگ سوچ رہی ہو گی میرے لباس اور حلیے سے تو بالکل نہیں لگتا تھا کہ میرے حالات اس قسم کے ہیں۔ دراصل وہ لمبا کوٹ اور ہیٹ میرے ایک دوست نے مجھے دیا تھا۔ تم لوگوں نے وہ ہیٹ اور کوٹ تو دیکھ لیا مگر اس پر برسوں کی تھکن، مایوسی اور محرومی کی پڑی سلوٹیں تمہیں دکھائی نہیں دیں۔ سچ ہے انسان ظاہر پرست ہے۔ وہ صرف ظاہر کو دیکھ کر معروب ہو جاتا ہے باطن میں اتر کر کم ہی دیکھتا ہے۔

میں جانتا ہوں میں نے تم لوگوں کا دل دکھایا ہے خاص کر سمیرا کا لیکن میرا ایسا کوئی ارادہ نہیں تھا۔ یہ جو کچھ ہوا بس انجانے میں ہوا۔ ہو سکے تو اسے بھی تمہاری اس شرارت کی طرح جو تم لوگوں نے مجھ پر پانی ڈال کر کی تھی ایک چھوٹی سی شرارت سمجھ کر معاف کر دینا۔

سمیرا! اس دن تم نے مجھ سے معافی مانگی تھی آج میں تم سے معافی کا طلب گار ہوں، امید ہے تم مجھے معاف کر دو گی۔ اور ہاں! مجھے تو چھت میسر نہیں لیکن تم روزانہ شام سے پہلے چھت پر جانا اور اس بل کھاتی ہوئی سڑک کو دیکھنا۔ اور اس کے پیچھے افق کے پاس سورج کو زمین میں اترتے دیکھنا۔ میں بھی افق کی جانب بڑھتا رہوں گا اس احساس کے ساتھ کہ افق کے پار تم ملو گی۔ حالانکہ میں جانتا ہوں افق کے پار تو کوئی بھی نہیں پہنچ پایا۔

لڑکی تمام خط پڑھ چکی تو خاموشی سے ایک طرف بیٹھ گئ۔ باقی لڑکیاں بھی وہیں بیٹھ گئیں۔ صرف سمیرا اپنی جگہ پر جیسے کھڑی تھی ویسے کھڑی رہی۔ کمرے میں مکمل سکوت طاری تھا۔ کوئی بھی ایک دوسرے سے بات نہیں کر رہا تھا اور نہ کرنا چاہتا تھا۔

شام قریب آئی تو سمیرا چھت پر چلی آئی۔ بل کھاتی ہوئی سڑک کے پرے دور افق کے پاس سورج زمین میں ڈوب رہا تھا۔

سیونگ اکاؤنٹ

2025-01-11T02:41:00.005+05:00

کردار

داؤد= پچیس تیس برس کا تعلیم یافتہ بے روزگار غریب لڑکا

ملک سکندر= پچاس ساٹھ برس کا متمول و متکبر آدمی جو غربت کا ذمہ دار خود غرباء کو سمجھتا ہے۔

اماں= سکندر کی ماں۔ نیک دل اور مہربان عورت۔

زلفی= داؤد کا ہم عمر دوست۔

ماریہ= پچیس تیس برس کی غریب نوجوان لڑکی۔

اشتیاق: سکندر کی فیکٹری میں مینجر۔

صغیر: فیکٹری میں مزدور۔ داؤد کا دوست

سوپروائیزر: فیکٹری میں سوپر وائیزر

بخاری چاچا : داؤد اور زلفی کو یتیم خانے میں پالنے والا۔

چند دیگر کردار۔

پہلا منظر

دن۔ ڈھابہ

داؤد اور زلفی ایک چھوٹے سے ڈھابے پر بیٹھیں ہیں۔ رش زیادہ نہیں ہے اردگرد مختلف سیٹوں پر صرف چند لوگ ہیں۔ ڈھابے کا مالک کاؤنٹر کے دوسری طرف بیٹھا اپنے کام میں مصروف ہے۔

داؤد: (بلند آواز سے مالک کو پکار کر) ابراہیم بھائی کھانا نہیں آیا ابھی تک کتنی دیر ہو گئ ہے۔

ابراہیم: بھول جاؤ کھانا آج نہیں ملے گا۔ پہلے پچھلا حساب کلیئر کرو پھر کھانا دوں گا۔ تم لوگوں کے ادھار کا کھاتا اس ڈھابے کی چھت تک پہنچ گیا ہے۔ پہلے اسے نیچے لاؤ پھر میں کھانا لاؤں گا۔

داؤد: کیا ابراہیم بھائی تم جانتے ہو نوکری چلی گئ ہے آج کل جیب بالکل خالی ہے۔

ابراہیم: وہ تو ہمیشہ سے خالی ہے نوکری کرتے ہوۓ تم کون سا خیرات بانٹتے پھرتے تھے تب بھی تو یہی حال تھا۔

زلفی: تب تھوڑا تھوڑا کرکے ادھار چکا تو دیتے تھے اب اس وقت کہاں سے لائیں۔

ابراہیم: جہاں سے مرضی لاؤ میں کیا کروں! میں نے تمہارا ٹھیکہ لیا ہے جو میں تمہیں مفت کا کھانا کھلاتا پھروں۔

داؤد: اچھا اچھا ٹھیک ہے! رکھو تم اپنا کھانا اپنے پاس۔

(ایک چھوٹا لڑکا بھاگتا ہوا آتا ہے)

لڑکا: (دونوں کے پاس آکر) داؤد بھائی زلفی بھائی آپ لوگوں کے کمرے میں چوری ہو گئ ہے۔

دونوں ایک ساتھ: کیا۔۔۔

(دونوں جلدی سے اٹھتے ہیں اور بھاگتے ہیں وہ لڑکا بھی ان کے پیچھے بھاگتا ہے)

دوسرا منظر

وہی وقت۔ سڑک

سڑک کے کنارے لوہے کی سیڑھیاں ہیں داؤد اور زلفی دونوں سیڑھیاں چڑھ کر اوپر جاتے ہیں۔ اوپر ایک چھوٹا سا کمرا ہے جس کے دروازے کی کنڈی ٹوٹی ہوئی ہے۔ دونوں دروازہ کھول کر اندر جاتے ہیں۔ چھوٹا سا کمرا ہے جس کے فرش پر قالین بچھا ہے جہاں دو بستر لگے ہیں۔ اردگرد چند کپڑے بکھرے پڑے ہیں۔ کمرے میں سامان نام کی اور کوئی چیز نہیں۔ دونوں ادھر ادھر اپنی چیزیں دیکھتے ہیں ہر چیز اپنی جگہ پر موجود ہے۔وہ چھوٹا لڑکا جس نے ابھی انہیں چوری کی اطلاع دی تھی اندر آتا ہے۔

زلفی: کچھ بھی چوری نہیں ہوا سامان تو سارا موجود ہے۔

لڑکا: چوری کیا ہونا تھا اندر کچھ ہو گا تو چوری ہو گا۔ چور آپ کے لیۓ (رقعہ اسے دے کر) یہ چھوٹا سا رقعہ لکھ کر چھوڑ گیا ہے۔ لکھتا ہے کمرے میں سب سے زیادہ قیمتی چیز تالا ہے جو تم لوگوں نے کمرے کے دروازے پر لگایا ہوا ہے اس لیۓ میں یہ تالا لے کر جا رہا ہوں۔۔۔ ویسے بھائی میں ایک مشورہ دوں۔ (شرارت سے) اب دروازے پر تالا مت لگانا فضول میں خرچہ ہو گا۔

زلفی: (ڈانٹ کر) تجھے بڑی باتیں آرہی ہیں چل بھاگ یہاں سے۔

(لڑکا ہنستا ہوا چلا جاتا ہے)

زلفی: (داؤد سے) اب کیا کریں یار پہلے میرا کام بند ہوا اب تمہارے پاس بھی نہیں رہا۔ دونوں میں سے ایک کے پاس کام ہونا ضروری ہے۔

داؤد: ہاں یہ تو ہے کچھ تو کرنا پڑے گا۔

(وہ چھوٹا لڑکا دوبارہ اندر آتا ہے)

زلفی: تم ابھی بھی یہیں ہو تمہیں کہا ہے بھاگو یہاں سے۔

لڑکا: میں نے کہاں جانا ہے زلفی بھائی آپ کے لیۓ ایک پیغام لے کر آیا ہوں۔

زلفی: کیا؟

لڑکا: مکان مالک نے بھیجا ہے وہ کمرے کا کرایہ مانگ رہا ہے۔ کہہ رہا ہے تین مہینے ہو گۓ ہیں تم لوگوں نے کرایہ نہیں دیا جلدی کرایہ دو نہیں تو کمرا چھوڑ دو۔

زلفی: تمہارے پاس سارے پیغام برے ہی ہیں کبھی کوئی اچھی خبر بھی لے کر آجایا کرو۔

لڑکا: میں کیا کروں زلفی بھائی آپ دونوں کے لیۓ ساری باتیں اسی طرح کی ہوتی ہیں۔ میں اپنے پلے سے تھوڑی لاتا ہوں۔ ویسے آپ لوگوں کو کچھ دنوں تک کرائے کی فکر کرنے کی ضرورت نہیں میں نے مکان مالک کو بتایا ہے آج آپ کرایہ دینے والے تھے پر آپ کی چوری ہو گئ تو کچھ دن بعد دیں گے۔

زلفی: تم نے جھوٹ کیوں کہا ہم لوگ تو آج کرایہ نہیں دینے والے تھے۔

لڑکا: آج نہیں دینا تھا پر دینا تو تھا۔ اب کچھ دنوں تک بات ٹل جاۓ گی آپ بندوبست کر لینا۔۔۔ میں چلتا ہوں۔

(باہر نکل جاتا ہے)

زلفی: (داؤد سے) پھر کیا سوچا ہے؟

داؤد: اب ایک ہی راستہ ہے۔

زلفی: کیا؟

داؤد: اپنے گھر چلتے ہیں

زلفی: (کچھ سوچ کر) ہاں یہ ٹھیک ہے۔ تو چلو پھر۔۔۔

تیسرا منظر

دن۔ سڑک

داؤد اور زلفی دونوں ایک عمارت کے باہر کھڑے ہیں۔ عمارت کے باہر جلی حروف میں یتیم خانہ لکھا ہے۔ دونوں چند لمحے کھڑے ہو کر عمارت کے مین گیٹ کو دیکھتے ہیں پھر اندر داخل ہو جاتے ہیں۔

چوتھا منظر

دفتر نما کمرے میں ساٹھ پینسٹھ برس کا ایک نفیس آدمی بیٹھا ہے۔ لباس اور حلیہ بالکل سادہ ہے۔ گفتگو اور لہجے سے محبت اور شفقت کا اظہار ہوتا ہے۔ داؤد اور زلفی کو بڑی اپنائیت سے ملتا ہے۔ جب دونوں کمرے میں داخل ہوتے ہیں تو وہ میز کے دوسری طرف بیٹھا کوئی فائل دیکھ رہا ہوتا ہے۔

داؤد اور زلفی: (کمرے میں داخل ہو کر) کیا حال چال ہیں بخاری چاچا؟

بخاری: تم لوگ...! آؤ آؤ بیٹھو۔۔۔(دونوں بیٹھ جاتے ہیں) میں تو ٹھیک ہوں تم لوگ سناؤ کیسے ہو۔

داؤد: ہم لوگ بھی بالکل ٹھیک ہیں۔

بخاری: اور۔۔۔! کیسے آنا ہوا؟

زلفی: بس آپ سے پھر ایک کام پڑ گیا تو چلے آۓ۔

بخاری: ہاں جی! تم لوگوں کو جب کام پڑتا ہے تب ہی آتے ہو۔ ورنہ کہاں آتے ہو۔

داؤد: نہیں بخاری چاچا۔ یہ تو ہمارا گھر ہے یہ در و دیوار دیکھ کر ہی تو ہم بڑے ہوۓ ہیں۔ ہمیں تو یاد بھی نہیں کون ہمیں یہاں چھوڑ گیا تھا۔ اب اسے بھول تھوڑی جائیں گے۔ بس زندگی کی دوڑ دھوپ میں فرصت ہی اتنی ملتی ہے جس میں ملنے ملانے کا بہت کم وقت بچتا ہے۔ ابھی بھی اگر اشد ضرورت نہ آن پڑتی تو شاید چکر نہ لگتا۔

بخاری: کیوں خیریت تو ہے ایسی کیا ضرورت پڑ گئ؟

زلفی: کیا بتائیں بخاری چاچا! پہلے میرے پاس کام تھا تو اس کے پاس نہیں تھا پھر میرا کام بند ہو گیا تو اسے مل گیا۔ اس طرح ہمارا گزارا ہوتا رہا۔ لیکن اب مسئلہ یہ ہے کہ دونوں کے پاس کام نہیں رہا اس لیۓ گزارا کرنا ناممکن ہو گیا ہے۔

داؤد: اب تو کھانے کا بل اور کمرے کا کرایہ تک ادا نہیں ہو رہا۔ ہم آپ کے پاس اس لیۓ آۓ ہیں آپ اگر ہمیں کوئی کام دلا سکیں تو آپ کی بڑی مہربانی ہو گی۔ ہم دونوں میں سے کسی ایک کو بھی کام مل جاۓ تو چلے گا۔

بخاری: (ساری بات سن کر کچھ سوچنے کے بعد) میں تمہاری کیفیت سمجھتا ہوں بیٹا غربت بڑی تکلیف دہ چیز ہے اور اگر غربت کے ساتھ بے روزگاری بھی آدھمکے تو غربت کی تکلیف ناقابلِ برداشت ہو جاتی ہے۔ اس کی اذیت میں دوگنا اضافہ ہو جاتا ہے۔ غربت آدمی کو آہستہ آہستہ کھاتی چلی جاتی ہے اسے نچوڑتی جاتی ہے۔ اور اگر اس کے ساتھ بے روزگاری کا ٹیکہ بھی لگ جاۓ تو یہ ایک ایسا زہر ہے جس کا تریاق کہیں ممکن نہیں۔ غربت و افلاس ایک ایسا زخم ہے جو بڑھتے بڑھتے ناسور بن جاتا ہے جس سے مسلسل ٹیسیں اٹھتی رہتی ہیں۔ یہ ایک ایسا عارضہ ہے جس کو لاحق ہو وہ بڑی مشکل سے جاں بر ہو پاتا ہے۔

زلفی: جی بحاری چاچا! غربت کو تو جیسے تیسے جھیل رہے تھے لیکن اب دونوں بیروزگار ہو گۓ ہیں اسی لیۓ تو آپ کے پاس آۓ ہیں۔

بخاری چاچا: وہ تو ٹھیک ہے پر تم لوگ ذرا دیر سے آۓ ہو ابھی دو دن پہلے میں نے ایک لڑکے کو ایک جگہ پر کام دلایا ہے۔ اگر تم پہلے آجاتے تو تم لوگوں کو دلا دیتا۔ لیکن تم فکر مت کرو میں پتہ کرتا ہوں کہیں اگر کسی جگہ کوئی کام نکلا تو تم کو اطلاع کروں گا۔

داؤد: آپ کا بہت شکریہ بخاری چاچا۔

بخاری: شکریے کی ضرورت نہیں تم دونوں تو اپنے ہی بچے ہو میرے ہاتھوں میں پل کر جوان ہوۓ ہو۔ بلکہ اس یتیم خانے کے سارے بچے میرے اپنے بچوں کی طرح ہیں۔ تم پریشان نہ ہو میں کوشش کروں گا جلد از جلد تمہارے لیۓ کسی بہتر ملازمت کا بندوبست ہو جاۓ۔ باقی جو اللہ کو منظور۔

پانچواں منظر

دن۔ سکندر کا گھر۔

ایک بڑا سا حال نما کمرا جس کی آرائش و زیبائس بڑی خوبصورتی سے کی گئ ہے۔ فرش پر قالین، صوفے، مہنگے پردے ہر چیز بڑی اعلیٰ معیار کی اور قیمتی ہے۔ دیوار پر ایک بڑی سی پینٹنگ آویزاں ہے۔ سکندر کی ماں صوفے پر بیٹھی کسی کام میں مصروف ہے۔ ایک عورت جو اس کی ملازمہ ہے اور شکل و صورت اور خلیے سے ہی پہچانی جاتی ہے اس کے سامنے کچھ فاصلے پر کھڑی ہے اس کے ساتھ ایک چھوٹا سا بچہ کھڑا ہے جو بیمار دکھائی دیتا ہے۔

سکندر کی ماں: کہاں تھی تو صغریٰ! دو دن سے تو کام پہ نہیں آئی۔

ملازمہ: بی بی جی کیا بتاؤں آپ کو۔۔۔دو دن سے میری حالت بڑی خراب تھی اتنا تیز بخار تھا بستر سے ہلا تک نہیں جا رہا تھا۔ اوپر سے (بچے کو ہلکا سا تھپڑ مار کر) یہ بھی بیمار ہو کے بیٹھ گیا۔ دیکھیں اسے اس کا رنگ کیسے پیلا ہو گیا ہے۔

اماں: کیا کرتی ہو صغریٰ بچے کو کیوں مارتی ہو۔ اس کی حالت ٹھیک نہیں لگ رہی۔

ملازمہ: جی بی بی جی۔ یہ ایسا ہی ہے ہر دوسرے چوتھے روز بیمار ہو جاتا ہے پتہ نہیں اس کو کیا ہے۔ میں اسی کے لیۓ آئی تھی بی بی جی! اس کی دوائی لینے ڈاکٹر کے پاس جانا ہے۔ اگر آپ مجھے کچھ پیسے دے دیں تو۔۔۔ میری تنخواہ سے کاٹ لینا۔ اپنی دوائی کی تو خیر ہے پر اس کی دوائی ضروری ہے بی بی جی۔

اماں: اچھا ٹھیک ہے۔ (پرس میں سے پیسے نکال کر) یہ کچھ پیسے لے لو تنخواہ سے کٹوانے کی ضرورت نہیں۔

(سکندر دوسرے کمرے سے نکل کر آتا ہے اور اماں کے سامنے دوسرے صوفے بیٹھ جاتا ہے)

اماں: (ملازمہ سے جاری رکھتے ہوۓ) یہ پیسے تم اپنے پاس رکھ لو اور اس کے ساتھ اپنی بھی دوائی لے لینا۔

ملازمہ: (پیسے لے کر) آپ کا بہت شکریہ بی بی جی۔ اللہ آپ کو ہمیشہ خوش رکھے۔

(ملازمہ اپنے بچے کے ساتھ اماں کو دعائیں دیتی ہوئی چلی جاتی ہے)

سکندر: کیا اماں تو بھی روز ان کے جھانسے میں آجاتی ہے۔ یہ ان کے امیر لوگوں سے پیسے نکلوانے کے حربے ہوتے ہیں۔

اماں: نہ پتر ایسے نہیں کہتے اس کو ضرورت تھی پیسوں کی۔

سکندر: اماں چھوڑ تو بھی۔ میں سب سمجھتا ہوں انہوں نے کام دھندہ تو ٹھیک سے کرنا نہیں ہوتا یہ غریب لوگ اس چکر میں رہتے ہیں کہ کہیں سے مفت میں کچھ مل جاۓ بس۔ اماں تو نہیں سمجھتی! ان کو غربت کا چسکا پڑ جاتا ہے کیونکہ اس طرح انہیں بغیر کچھ کیۓ خیرات کے طور پر بہت کچھ مل جاتا ہے اور لوگوں کی ہمدردیاں بھی ساتھ مفت میں مل جاتی ہیں۔ اس لیۓ وہ خود نہیں چاہتے ان کے حالات ٹھیک ہوں۔ نہیں تو انہیں محنت جو کرنی پڑے گی۔

اماں: نہیں ایسی بات نہیں۔ اس نے تو مجھ سے پیسے نہیں مانگے وہ تو ادھار مانگ رہی تھی کہہ رہی تھی میری تنخواہ سے کاٹ لینا۔ میں نے تو خود اسے پیسے دیۓ ہیں۔

سکندر: اماں تو تو بھولی ہے۔ سب جانتے ہیں تیرا دل کتنا نرم ہے اسی بات کا تو وہ فائدہ اٹھاتے ہیں۔ تیرا بیٹا ایسے ہی نہیں اتنا کامیاب اور اتنا بڑا آدمی بن گیا۔ ایسے ہی نہیں میں ڈھیر سارے کاروبار اور اتنی ساری فیکٹریاں چلا رہا میں اچھی طرح جانتا ہوں ان لوگوں کو۔ تو کیا سمجھتی ہے یہ غریب اس لیۓ ہیں کہ یہاں انصاف نہیں؟ یکساں مواقع نہیں؟ ایسی بات نہیں یہ اس لیۓ غریب ہیں کیونکہ ان کی عادتیں ٹھیک نہیں۔ ان کو کمانا نہیں آتا۔ کوئی کام دھندہ ٹھیک طرح سے نہیں کرتے، اس میں ڈنڈی مارتے ہیں۔ یہ اپنی سستی، کاہلی اور نالائقیوں کی وجہ سے غریب رہ جاتے ہیں اور پھر واویلا کرتے پھرتے ہیں، چیختے چلاتے ہیں ہمارے ساتھ یہ ہو گیا ہمارے ساتھ وہ ہو گیا۔ ہمیں حقوق نہیں ملے ہمیں انصاف نہیں ملا۔ یہ اپنی ناکامیوں کا ذمے دار دوسروں کو سمجھتے ہیں اور ہر وقت شکوے شکایتیں کرتے رہتے ہیں۔ اسی لیۓ یہ آگے نہیں بڑھ پاتے۔

اماں: نہ پتر ایسا نہ سوچا کر۔ اپنے دل سے میل نکال، ذہن کو صاف کر پتر۔ ان لاچار، بے آسرا، بے سہارا لوگوں کی خاموش سسکیاں تمہیں سنائی نہیں دیتیں؟ تیری اپنی فیکٹریوں میں دن بھر سخت مشقت سے گزرنے والے مزدوروں کے ہاتھوں کے چھالوں سے اٹھنے والی ٹیسیں تجھے خبردار نہیں کرتیں؟ تیری اپنی زمینوں پر چلچلاتی اور کڑکتی دھوپ میں خون جلاتے اور پسینہ بہاتے کسانوں کی درد بھری آہیں تجھ تک نہیں پہنچتیں؟ تو کیسا کٹھور دل ہے۔ تو ان کو سست اور کاہل کہتا ہے جو صبح پو پھٹنے سے لے کر رات چاند نکلنے تک تیری فیکڑیوں اور تیری زمینوں پر اپنی ہڈیاں گھلاتے رہتے ہیں۔ تو نے کبھی سوچا ہے جب تو اپنے ائیر کنڈیشند کمرے میں میٹھی نیند کے مزے لوٹ رہا ہوتا ہے تو تیرے کارخانوں میں تپتی مشینوں کی حدت کو کون برداشت کرتا ہے؟ جب تو سرد راتوں میں اپنے قیمتی نرم وگرم لحاف میں دبکا پڑا ہوتا ہے تو تیری فصلوں کو ٹھٹرتی سردی میں کون سیراب کرتا ہے؟ تیرے دفتر میں تیرے نیچے کام کرنے والے سینکڑوں ہزاروں مجبور ملازمین جو اپنے بچوں کے دوا دارو کے لیۓ تیری جھڑکیاں برداشت کرتے ہیں ان کا تجھے کبھی خیال نہیں آیا؟ اتنی تگ و دو اور سخت محنت و مشقت کے بعد معاوضے کے طور پر انہیں کیا ملتا ہے؟ وہ معمولی سی ریزگاری جس سے وہ اپنے بال بچوں کو بمشکل دو وقت کی روکھی سوکھی کھلا سکتے ہیں۔ لیکن تو۔۔۔تو تو بغیر تنکا تک دہرا کیۓ ساری دولت، سارے ثمرات سمیٹ لیتا ہے۔ پھر بھی تو کہتا ہے کہ انہیں کام دھندہ کرنا نہیں آتا۔ وہ محنت و مشقت سے جی چراتے ہیں۔

سکندر: اماں تو تو بس ان کی ہر وقت طرف داری کیا کر۔

موبائل فون کی گھنٹی بجتی ہے۔ اٹھ کر فون سننے لگتا ہے اور باہر نکل جاتا ہے)

چھٹا منظر

دن۔ ریلوے ٹریک۔

داؤد اور زلفی ریل کی خالی پٹری پر چلتے جارہے ہیں۔ اردگرد کوئی اور آدمی دکھائی نہیں دے رہا۔ چلتے چلتے زلفی رک جاتا ہے۔

زلفی: (پٹری سے اتر کر ایک طرف جا کر) یار میں تو تھک گیا ہوں یہاں بیٹھتے ہیں تھوڑی دیر۔

(داؤد بھی اس کے پاس جا کر بیٹھ جاتا ہے)

زلفی: کھانے کا کیا کریں بھوک بڑی سخت لگی ہے۔

(داؤد خاموش رہتا ہے۔ اچانک ایک طرف سے کوئی آواز سنائی دیتی ہے)

داؤد: یہ کیسی آواز ہے لگتا ہے کوئی ہتھوڑے سے زور زور سے ضربیں لگا رہا ہے۔

زلفی: (لاپرواہی سے) مزدور ہوں گے۔ اردگرد کوئی کام چل رہا ہوگا۔

داؤد: پر یہاں تو نہ کوئی گھر ہے اور نہ کوئی اور عمارت دور تک ویرانہ ہی ویرانہ ہے۔ بس یہ ریل کی پٹری ہے۔

زلفی: چھوڑ نہ یار ہو گا کچھ۔ فی الحال اپنے پیٹ کی سوچو اس کا کیا کرنا ہے۔

(داؤد اٹھ کر اردگرد دیکھتا ہے۔ کسی کے قدموں کی چاپ سنائی دیتی ہے۔ وہ چل کر اس سمت جاتا ہے۔ تھوڑا آگے جاتا ہے تو اسے ایک باڑ دکھائی دیتی ہے وہاں رک کر آواز کو غور سے سنتا ہے۔ آواز باڑ کے پیچھے سے آرہی ہوتی ہے۔ پیچھے جاکر دیکھتا ہے تو ایک لوہے کے جنگلے پر نظر پڑتی ہے جس پر سلاخیں لگیں ہیں۔ جنگلے کے بیچ میں سے کئ سلاخیں غائب ہیں۔ وہاں ایک لڑکی کھڑی جنگلے میں سے ایک سلاخ کو اکھاڑ رہی ہے۔ یہ لڑکی ماریہ ہے وہ اسے دیکھ کر بھاگ کھڑی ہوتی ہے۔ داؤد آوازیں دیتا ہوا اس کے پیچھے بھاگتا ہے۔

داؤد: (بھاگتے ہوۓ) رک جاؤ۔۔۔ٹھہرو۔۔۔ کیا کر رہی تھی۔۔۔

(ماریہ رکتی نہیں بھاگتی جاتی ہے۔ داؤد تھوڑی دور جا کر اسے پکڑ لیتا ہے)

داؤد: جنگلا کیوں اکھاڑ رہی تھی۔۔۔بتاؤ۔

ماریہ: پہلے تم بتاؤ تم کون ہو؟

داؤد: سوال پہلے میں نے پوچھا ہے۔

ماریہ: نہ بتاؤں تو؟

داؤد: تو پھر ٹھیک ہے پولیس پوچھ لے گی تم سے۔

ماریہ: اچھا بتاتی ہوں چھوڑو میرا ہاتھ۔

(داؤد ہاتھ چھوڑ دیتا ہے زلفی بھی بھاگتا ہوا وہاں پہنچ جاتا ہے)

داؤد: ہاں بتاؤ کیوں جنگلا اکھاڑ رہی تھی۔ تم جانتی ہو یہ گورنمنٹ کی پراپرٹی ہے اگر پولیس تک بات پہنچ گئ تو تمہاری خیر نہیں۔

ماریہ: بتاتی ہوں پر وعدہ کرو تم لوگ کسی کو بتاؤ گے نہیں اور مجھے جانے دو گے۔ میں وعدہ کرتی ہوں آئندہ کبھی یہاں نہیں آؤں گی۔

داؤد: نہیں بتائیں گے اب بتاؤ۔

ماریہ: وہ اصل میں میں یہاں۔۔۔اس جنگلے سے سلاخیں اکھاڑ کر بیچتی ہوں۔

زلفی: یعنی کہ تم کہہ رہی ہو تم یہاں سے سلاخیں چوری کرکے کباڑیےکو بیچتی ہو؟

ماریہ: ہاں۔

داؤد: لیکن کیوں؟ چوری کیوں کرتی ہو۔ اتنی سی سلاخ کا تمہیں کیا مل جاتا ہے؟

ماریہ: لوہا بہت مہنگا ہے یہ ایک سلاخ تقریباً اڑھائی تین سو سے زیادہ کی بکتی ہے۔

زلفی: بس۔۔۔اڑھائی تین سو روپے کے لیۓ تم چوری کرتی ہو۔ تمہیں شرم نہیں آتی۔

ماریہ: شروع میں آتی تھی جب پہلی دفعہ چوری کی تھی۔ پھر میں نے سوچا کہ میں کون سا کسی کا ذاتی مال چرا رہی ہوں۔ یہ جگہ کتنے عرصے سے بیکار پڑی ہے یہاں پر یہ جنگلا ویسے ہی گل سڑ رہا ہے تو کیوں نہ میں اس سے فائدہ اٹھا لوں۔

داؤد: لیکن تم ایسا کرتی کیوں ہو اس سے تمہیں کیا مل جاتا ہے؟

ماریہ: ایک وقت کا کھانا۔۔۔اس سے مجھے ایک وقت کا کھانا مل جاتا ہے۔

داؤد: (خیرت سے) کھانا؟

ماریہ: ہاں کھانا۔۔۔ میں اپنے ابو کے ساتھ اکیلی رہتی ہوں میرے ابو ایک مل میں ملازم تھے برسوں سے وہ اس مل میں کام کر رہے تھے لیکن ایک دن ان کے ساتھ ایک حادثہ پیش آگیا۔

زلفی: حادثہ؟ کیسا حادثہ؟

ماریہ: ایک دن وہ مل میں کسی بلند جگہ پر مل کا کوئی کام کر رہے تھے وہاں سے ان کا کام کرتے کرتے پاؤں پھسلا اور وہ نیچے گر گۓ۔

(لڑکی خاموش ہو جاتی ہے)

داؤد: پھر۔۔۔پھر کیا ہوا؟

ماریہ: وہ زندگی بھر کے لیۓ اپاہج ہو گۓ۔ پچیس سال جس مل میں کام کرتے رہے اس مل کے مالک نے ایک لمحہ ضائع کیۓ بغیر انہیں کھڑے کھڑے نکال دیا کیونکہ اب میرے ابو اس کے لیۓ بالکل بیکار ہو گۓ تھے۔ ان کے اس طرح اچانک بستر سے لگ جانے کے بعد مجھے روزی روٹی کے لیۓ نکلنا پڑا۔ کبھی کام ملتا تھا کبھی نہیں۔ تو جب کبھی کھانے کو کچھ نہیں ہوتا میں یہاں سے ایک سلاخ چرا لیتی ہوں۔۔۔ (چند لمحے خاموشی کے بعد) لیکن اب یہ ذریعہ بھی گیا۔۔۔ چلو! دیکھتے ہیں شاید کچھ اور مل جاۓ۔ آپ سے بس یہ التجا ہے پولیس کو کچھ مت بتانا۔

(کچھ دیر خاموشی رہتی ہے۔ پھر داؤد اور زلفی اک دوسرے کی طرف دیکھتے ہیں اور دونوں بلند آواز سے قہقہہ لگاتے ہیں۔ لڑکی خیرت سے ان کی طرف دیکھتی ہے)

ماریہ: ہنس کیوں رہے ہو؟

داؤد: اپنی بیوقوفی پہ ہنس رہے ہیں۔

ماریہ: (خیرت سے) کیا مطلب؟

زلفی: مطلب یہ کہ ہم یہاں سے روز گزرتے ہیں لیکن ہمارے دماغ میں یہ بات نہیں آئی۔ تم ایک لڑکی ہو کر ایسا کام کر گئ۔

ماریہ: ایسا کام کرنے کے لیۓ کوئی وجہ بھی تو ہونی چاہیۓ اور بھوک سے بڑی وجہ کیا ہو سکتی ہے۔ بھوک بہت سے ایسے کام کروا دیتی ہے جو انسان عام حالات میں نہیں کرتا۔

(دونوں دوبارہ ہنستے ہیں)

ماریہ: اب کیوں ہنسے؟

زلفی: اس لیۓ کہ ہم بھی کل سے بھوکے ہیں بلکہ صدیوں سے بھوکے ہیں۔ ہم تینوں ایک ہی راستے کے مسافر ہیں تمہارے اور ہمارے حالات میں کوئی زیادہ فرق نہیں۔

ماریہ: تو اس کا مطلب تم بھی۔۔۔؟

داؤد: ہاں ہم بھی۔ ہم ابھی یہی سوچ رہے تھے کہ کھانے کا بندوبست کیسے کریں۔

زلفی: اور تم ہمیں مل گئ۔

ماریہ: تو کیا تم میرے ساتھ مل کر یہ لوہا۔۔۔

داؤد: ہاں۔ فرق بس یہ ہے پہلے تم ایک سلاخ چراتی تھی اب ہم چار سلاخیں چرائیں گے۔

ماریہ: چار کیوں؟ ہم تو تین ہیں۔

داؤد: چوتھے تمہارے ابو بھی تو ہیں ان کے لیۓ کھانا نہیں لے کر جانا۔۔۔

ماریہ: (ہنس کر) ہاں لے کر تو جانا ہے۔۔۔

زلفی: (آگے بڑھ کر) تو چلو آؤ پھر جلدی کرو بڑی بھوک لگی ہے۔

(تینوں جنگلے میں سے سلاخیں اکھاڑنے لگتے ہیں)

زلفی: اگر ہم ایک ایک سلاخ کی بجاۓ تین چار سلاخیں اکھاڑ لیں تو وہ زیادہ بہتر نہیں؟ ہمیں زیادہ پیسے مل جائیں گے۔

ماریہ: نہیں ایسا کرنے سے ہم پکڑیں جائیں گے۔ اور ویسے بھی میں یہ کام اس وقت کرتی ہوں جب میرے پاس کھانے کو کچھ نہیں ہوتا۔

زلفی: تو تم نے اسے مشکل وقت کے لیۓ رکھا ہوا ہے۔۔۔

ماریہ: ہاں۔

داؤد: اس کا مطلب ہے یہ تمہارا سیونگ اکاؤنٹ ہے۔

(تینوں ہنستے ہیں)

ساتواں منظر

دن۔ کباڑ خانہ

ماریہ، داؤد اور زلفی تینوں ایک کباڑ خانے میں داخل ہوتے ہیں۔ کباڑ خانہ ایک کھلے احاطے میں ہے جہاں ہر طرف پرانا لوہا اور دیگر بہت ساری پرانی چیزیں پڑی ہیں۔ کباڑ خانے کا مالک ایک کونے میں زمین پر بیٹھا لوہے کو بڑے سے ہتھوڑے سے کوٹ رہا ہے۔

ماریہ: اسلام علیکم غفور بھائی۔

غفور: وعلیکم سلام۔ بڑی جلدی آگئ ابھی پچھلے دنوں تو چکر لگایا تھا۔

ماریہ: جی غفور بھائی آج پیسوں کی ضرورت تھی اس لیۓ آنا پڑا۔ ان چار سلاخوں کا حساب لگاؤ کیا بنتا ہے۔

غفور: ابھی لگا لیتے ہیں۔ (بلند آواز سے) اوۓ فانے۔۔۔(دوسری طرف سے آواز نہیں آتی) اوۓ فانے کہاں مر گیا ہے۔ یہاں آ جلدی۔

فانا: (صرف آواز آتی ہے) جی استاد جی! آیا۔

(ایک پندرہ سولہ سال کا لڑکا آتا ہے)

فانا: جی استاد جی!

غفور: یہ سلاخیں پکڑ اور تول کر بتا کتنا وزن ہے۔

(فانا سلاخیں اٹھاتا ہے اور باری باری ہر ایک سلاخ کا وزن کرتا ہے)

فانا: استاد جی ایک سلاخ تقریباً تین کلو کی بنتی ہے۔

غفور: ہونہہ۔۔۔ایک سلاخ تین کی۔۔۔ تو تین چوکے ہوگۓ بارہ۔۔۔ بارہ کلو کا تم لوگوں کا بن گیا گیارہ سو روپیہ۔۔۔ چلو تم بارہ لے لو۔

ماریہ: کیا غفور بھائی کم سے کم پندرہ تو دو۔

غفور: پندرہ۔۔۔اتنے کا تو کوئی بھی نہیں لیتا۔ تمہیں میں نے بالکل ٹھیک ریٹ لگایا ہے۔

ماریہ: چلو ٹھیک ہے غفور بھائی جیسے تم خوش۔

(پیسے لیتے ہیں اور تینوں کباڑ خانے سے نکل جاتے ہیں)

آٹھواں منظر

دن۔ ملک سکندر کا گھر۔

ملک سکندر کسی سے فون پر بات کر رہا ہے۔

ملک سکندر: (فون پر) جی کیوں نہیں آپ کہیں گے تو ہم مال تیار کروا دیں گے۔۔۔ وہ تو آپ کے مال کے حساب سے ہو گا۔۔۔جی ہاں بدھ کو۔۔۔بالکل ٹھیک۔۔۔

(ایک آدمی اندر آتا ہے)

ملک سکندر: (آدمی کو دیکھ کر فون پر) ٹھیک ہے پھر آپ سے بعد میں بات ہوتی ہے میں تھوڑا مصروف ہوں۔۔۔ہاں ہاں کیوں نہیں۔۔۔بہت شکریہ جی بہت شکریہ۔۔۔

(فون بند کر دیتا ہے)

ملک سکندر: جی اشتیاق صاحب کیسے آنا ہوا؟

آدمی: سر وہ فیکٹری میں مزدور کام کرنے سے انکار کر رہے ہیں۔ انہوں نے کام کرنا چھوڑ دیا ہے اور مشینیں بند کر دی ہیں۔

ملک سکندر: کیوں کیا ہوا؟ کیا کہتے ہیں وہ لوگ؟

آدمی: جناب وہ کہتے ہیں پہلے ہم بارہ گھنٹے کام کرتے تھے لیکن اب چودہ گھنٹے کام کرتے ہیں جبکہ تنخواہ ہمیں بارہ گھنٹوں کے حساب سے ہی ملتی ہے۔ ان کا کہنا ہے پہلے ہی ہماری تنخواہیں جتنی ہونی چاہییں اتنی نہیں ہیں اور کوئی الاونسز وغیرہ بھی نہیں۔ اوپر سے گھنٹے بھی بڑھ گۓ ہیں لیکن تنخواہ اتنی ہی ہے۔ لہذا ہماری تنخواہوں میں فی گھنٹہ کے حساب سے اضافہ کیا جاۓ۔

ملک سکندر: اور کتنی تنخواہ دوں انہیں پوری فیکٹری ان کے نام کردوں؟ جاؤ جا کر انہیں کہہ دو کسی کی ایک فیصد بھی تنخواہ نہیں بڑھے گی۔ انہیں جتنی بھی تنخواہ دے دی جاۓ وہ یہی کہیں گے ہماری تنخواہیں کم ہیں۔ انہیں اپنے اخراجات کو مینج کرنا آتا نہیں اور الزام تنخواہوں پہ ڈال دیتے ہیں۔

آدمی: لیکن سر وہ نہیں مانیں گے۔ صرف یہی نہیں وہ تو یہ بھی اعتراض کر رہے ہیں کہ ساری زندگی ہم فیکٹری میں کام کرتے رہتے ہیں لیکن ہمارا کوئی پینشن سسٹم نہیں اور اگر کوئی مزدور فیکٹری کا کام کرتے ہوۓ زخمی یا جاں بحق ہو جاۓ تو اس کی کوئی انشورنس اور میڈیکل الاؤنس وغیرہ نہیں۔ ان کا مطالبہ ہے کم سے کم ان کا ایک مناسب میڈیکل الاؤنس مقرر کیا جاۓ۔

ملک سکندر: خیرت کی بات ہے تیس پینتیس سال ہو گۓ مجھے اس فیکٹری کو چلاتے ہوۓ آج تک کسی نے ایسی بات نہیں کی۔ اس قسم کی باتیں یہ مزدور خود نہیں کر سکتے یقیناً ان کے پیچھے کوئی اور آدمی جو انہیں یہ سب سکھا رہا ہے۔

آدمی: جی جناب ایک نیا ورکر آیا ہے ذولقرنین، تھوڑا پڑھا لکھا ہے باہر کی فیکڑیوں میں کام کرکے آیا ہے۔ وہ انہیں مزدوروں کے حقوق اور اس قسم کی باتیں کرکے اکستا ہے۔ یہ ہڑتال بھی لگتا ہے انہوں نے اسی کے کہنے پر کی ہے۔

ملک سکندر: ہونہہ! (کچھ سوچ کر) ٹھیک ہے تم جاؤ میں دفتر آتا ہوں پھر بات کرتے ہیں۔

آدمی: جی ٹھیک ہے۔

(آدمی چلا جاتا ہے۔ ملک سکندر کچھ سوچنے لگتا ہے)

نواں منظر

دن۔ داؤد اور زلفی کا گھر۔

کمرے میں زلفی اس وقت اکیلا ہے اور اپنی پٹھی ہوئی پتلون کو پیوند لگانے کی کوشش کر رہا ہے۔ داؤد اندر آتا ہے۔

داؤد: (پرجوش انداز میں) مبارک ہو کام مل گیا ہے۔

زلفی: (خوش ہو کر) کیا۔ واقعی! کہاں پر؟

داؤد: وہ ہمارے یتیم خانے میں ایک لڑکا نہیں تھا ظہیر؟

زلفی: ہاں تھا۔ تو؟

داؤد: وہ مجھے آج راستے میں مل گیا۔ جب اسے میں نے ہم دونوں کا بتایا تو اس نے کہا کہ میں جس فیکٹری میں کام کر رہا ہوں وہاں کچھ دن پہلے سوپر وائزر کہہ رہا تھا کہ اسے ایک لڑکے کی ضرورت ہے تم میرے ساتھ چل کر دیکھو اگر انہوں نے لڑکا رکھ نہیں لیا تو شاید تمہیں رکھ لیں۔

زلفی: پھر؟

داؤد: پھر میں فوراً اس کے ساتھ گیا اور سوپر وائزر سے ملا اس نے مجھ سے دو تین منٹ بات چیت کی اور پھر مجھے اسی وقت کام پر رکھ لیا۔۔۔لیکن ایک مسئلہ ہے۔

زلفی: اب کیا مسئلہ ہے؟

داؤد: ابھی فیکٹری میں ہڑتال چل رہی ہے تو کام بند ہے۔ سوپر وائزر کہہ رہا تھا جیسے ہی ہڑتال ختم ہو گی وہ مجھے بلا لے گا۔

زلفی: وہ تو ٹھیک ہے پر اس وقت تک کیا کریں ہمارے پاس تو کھانے پینے کے بھی پیسے نہیں۔ اور ہڑتال کا تو پتہ نہیں کب ختم ہو۔

داؤد: انتظار کرتے ہیں پھر اور کیا کیا جا سکتا ہے۔

(زلفی سر ہلاتا ہے اور دوبارہ پتلون سینے میں مصروف ہو جاتا ہے)

دسواں منظر

دن۔ ملک سکندر کا دفتر۔

ملک سکندر اپنے دفتر میں ٹہل رہا ہے۔ دروازہ کھلتا ہے اور وہی آدمی جس کا نام اشتیاق ہے جو پہلے ملک سکندر کے گھر پر اس سے ملا تھا اندر آتا ہے۔

ملک سکندر: آؤ اشتیاق میں تمہارا ہی انتظار کر رہا تھا۔ میرے پاس ان کی ہڑتال ختم کروانے کے لیۓ ایک اسکیم ہے۔

اشتیاق: کیا اسکیم جناب؟

ملک سکندر: تم ایسا کرو کمپنی کی طرف سے مزدوروں کے لیۓ ہفتے میں ایک بار مفت لنگر کا انتظام کرو۔ تم جا کر انہیں بتاؤ کہ کمپنی کی طرف سے ہر مزدور ہفتے میں ایک بار ایک وقت کا مفت کھانا کھا سکے گا۔ اور ایسا کرو! مزدوروں میں ایک ایک جوڑا کپڑوں کا یا اس قسم کی کوئی چیز خیرات کے طور پر بانٹ دو۔

اشتیاق: جی جناب میں ابھی ان سب چیزوں کا انتظام کر دیتا ہوں۔

ملک سکندر: ٹھیک ہے تم جاؤ۔

(چلا جاتا ہے)

گیارواں منظر

دن۔ ریلوے ٹریک۔

ویران اور سنسان ریلوے ٹریک پر ماریہ اور داؤد اکیلے بیٹھے ہیں۔ ریلوے ٹریک کے اردگرد وسیع و عریض خالی میدان کے سوا اور کچھ دکھائی نہیں دے رہا۔

ماریہ: بس کہیں سے ہزار پندرہ سو روپے ہاتھ لگے تھے ان میں سے کچھ ابو کی دوائیوں پر خرچ ہو گۓ اور کچھ کا کھانا آگیا۔

داؤد: ہم تو اس انتظار میں ہیں کہ جلد سے جلد ہڑتال ختم ہو جاۓ۔

ماریہ: تو ہڑتال ختم ہونے تک کیا کرو گے۔ اور پھر جاتے ہی تمہیں پیسے تو نہیں مل جائیں گے اس کے لیۓ بھی کچھ دن لگے گیں۔

داؤد: ہاں وہی تو ہمیں بھی سمجھ نہیں آرہی۔ اتنے دن تو رہے ایک طرف ہمیں تو یہ بھی سمجھ نہیں آرہی ہم آج کے دن کے لیۓ کیا کریں۔

ماریہ: آج کے لیۓ تو صرف ایک ہی کام ہو سکتا ہے۔

داؤد: وہ کیا؟

ماریہ: (مسکرا کر) وہی! اپنا پسندیدہ۔۔۔

داؤد: اچھا وہ۔۔۔ وہ بھی ٹھیک ہے۔

ماریہ: تو چلیں پھر؟

داؤد: چلو! نیک کام میں دیر کیسی۔

(دونوں اٹھ کر اک طرف چل پڑتے ہیں)

بارہواں منظر

دن۔ ملک سکندر کی فیکٹری۔

فیکٹری میں اشتیاق اپنے ایک دو ساتھیوں کے ساتھ کھڑا مزدوروں میں کپڑے اور دیگر چیزیں بانٹ رہا ہے۔ باری باری سب کے پاس جا کر چیزیں انہیں پیش کرتا ہے۔

اشتیاق: کیوں چاچا! ٹھیک ہے نا اب خوش ہو نا اپنی کمپنی سے۔۔۔آج سے لنگر کا انتظام بھی ہو جاۓ گا کھانا بھی کھا کر جانا۔ (دوسرے آدمی سے) یہ لو شکور بھائی اپنا تحفہ! تم بھی کھانا وانا کھا کر جانا اور کل وقت پر فیکٹری پہنچ جانا۔ مشینیں تمہارا انتظار کر رہی ہیں۔ جیسا شکور بھائی تم مشین پر کھڑے ہو کر کام کرتا ہو ویسا کام اس پوری فیکٹری میں کوئی نہیں کر سکتا۔

(ذولقرنین آتا ہے)

ذوالقرنین: (مزدوروں سے بلند آواز سے) اب بھی وقت ہے باز آجاؤ میرے بھائیو۔ اتنی دور آکر تم کیوں پیچھے ہٹ رہے ہو۔ تم کیوں نہیں سمجھ رہے یہ صاحب کی چال ہے وہ تمہیں تمہارے حقوق دینے کی بجاۓ تمہیں تھوڑی سی خیرات دے کر خاموش کروانا چاہتا ہے۔ وہ تمہیں یہ سب اس لیۓ پیش کر رہا تاکہ تم اپنے حق کے لیۓ آواز نہ اٹھاؤ۔ خیرات چھوڑو میرے بھائیو حق مانگو حق۔

(اس کی آواز کوئی نہیں سنتا سب خیرات لیتے ہیں اور چلے جاتے ہیں۔ ایک آدمی ذولقرنین کے پاس سے گزرتے ہوۓ رک جاتا ہے)

آدمی: (ذوالقرنین سے) چھوڑو بھائی ذوالقرنین میری مانو تو تم بھی اسے قبول کر لو اور ہڑتال ختم کر دو۔ کچھ دن اور فیکٹری بند رہی تو ہم بھوکے مر جائیں گے۔ تم اچھی طرح جانتے ہو پہلے ہی ہم کتنی دشواری سے اپنے گھر کا خرچہ چلاتے ہیں۔

ذولقرنین: میں جانتا ہوں اور اس کی وجہ بھی اچھی طرح جانتا ہوں اسی لیۓ تو کہہ رہا ہوں تمہیں اپنے حقوق کے لیۓ لڑنا چاہیۓ۔

آدمی: ایک آدمی سے لڑنا ہو تو اور بات ہے پر پورے سسٹم سے ہم جیسے لوگ کیسے لڑ سکتے ہیں جنہیں دو وقت کی روٹی کے حصول کے لیۓ اپنے آپ سے جنگ کرنی پڑتی ہے۔۔۔ اور پھر اس بات کی کیا گارنٹی ہے کہ ہڑتال کرنے سے صاحب ہمارے مطالبات مان لے گا۔۔۔ میرے بھائی جو کچھ مل رہا ہے اس پر گزارا کرو ورنہ اس سے بھی ہاتھ دھونا پڑے گا۔

ذولقرنین: تو تم کیا چاہتے ہو میں اپنے حق کے لیۓ آواز نہ اٹھاؤں اس کا ذکر تک نہ کروں؟ اور پھر یہ میرے اکیلے کی نہیں ہم سب کی بات ہے۔

آدمی: ذکر کرو ضرور کرو۔ جو بھی حق اور سچ کی بات ہے کرو، کوئی اور تمہارے ساتھ کھڑا ہو یا نہیں میں ضرور تمہارے ساتھ کھڑا رہوں گا۔ لیکن خدا کے لیۓ کام بند مت کرو۔ ہڑتال ختم کر دو۔ نہیں تو لوگوں کے گھروں کا چولہا بھی بند ہو جاۓ گا۔ جو تھوڑا بہت انہیں مل رہا ہے وہ بھی نہیں ملے گا۔

(اس کے کندھے پر ہاتھ رکھ کر نرمی سے) میں مانتا ہوں تم بالکل ٹھیک کہتے ہو جب بھی ہم حقوق و انصاف کی بات کرتے ہیں ہمیں ایسی معمولی سی خیرات دے کر ٹرحا دیا جاتا ہے۔ پر تم یہ بھی تو سوچو ان کے حصول کا جو طریقہ تم نے اختیار کیا ہے اس سے ہمیں فائدے کی بجاۓ زیادہ نقصان ہو رہا ہے۔ اس لیۓ میرے بھائی اس کی بجاۓ کوئی بہتر طریقہ اختیار کرو۔۔۔۔ میں چلتا ہوں لیکن میری بات کو ذرا ٹھنڈے دماغ سے سوچنا۔

(چلا جاتا ہے)

تیرہواں منظر

رات۔ سکندر کا گھر

حال میں سکندر اکیلا بیٹھا فون پر کسی سے بات کر رہا ہے۔ اس کی ماں اندر آتی ہے۔ سکندر کال بند کر دیتا ہے اور فون کی اسکرین پر نظریں جما لیتا ہے۔

اماں: آگیا تو فیکٹری سے۔۔۔ کس وقت آیا؟

سکندر: بس اماں تھوڑی دیر ہوئی ہے۔

اماں: وہ تیری فیکٹری میں ہڑتال ختم ہوگئ؟

سکندر: ہاں سمجھو بس ہو گئ۔

اماں: کیسے ختم کی انہوں نے۔۔۔ ان کے مطالبات تم نے مان لیۓ؟

سکندر: نہیں اماں مطالبات نہیں مانیں میں نے انہیں کچھ اور پیشکش کی جو انہوں نے قبول کر لی۔

اماں: کیا پیشکش کی تم نے؟

سکندر: میں نے ان میں کچھ چیزیں بانٹیں اور کہا کہ ہفتے میں ایک بار ایک وقت کا کھانا میری طرف سے ہو گا۔

اماں: یہ پیشکش تم نے ان مطالبات کے بدلے میں دی ہے جو انہوں نے کیۓ تھے۔۔۔

سکندر: ہاں اماں۔ تو کہتی تھی مزدوروں کا خیال کیا کر اب تو تو خوش ہے۔

اماں: خوشی کس بات کی یہ سب تو تم نے ہڑتال ختم کرنے کے لیے کیا ہے۔

سکندر: جس وجہ سے بھی کیا ہے پر تمہارے مزدوروں کے لیۓ ہی تو کیا ہے۔

اماں: یہ تم نے مزدوروں کے لیۓ نہیں کیا ملک سکندر! میں تمہاری ماں ہوں خوب سمجھتی ہوں یہ سب تم نے کیوں کیا ہے۔ یہ تم نے اس لیا کیا ہے تاکہ تمہیں مزدوروں کے مطالبات نہ ماننے پڑیں۔۔۔ اکیلے تم کیا! اس دنیا میں تم جیسے ہزاروں لوگ ہیں جو غرباء اور مساکین کو خوش کرنے کے لیۓ مندروں اور مسجدوں کے باہر خیرات بانٹتے پھرتے ہیں، صدقات دیتے ہیں، این جی اوز بناتے ہیں، چیرٹی فنڈ مختص کرتے ہیں۔ مگر بالکل تمہاری طرح اپنی کمپنیوں کارخانوں میں، اپنی جاگیروں اور زمینوں پر ان کے جائز حقوق انہیں نہیں دیتے۔ یہ صدقہ و خیرات، یہ چیرٹی اور ویلفئیر کے کام یہ سب اس لیۓ نہیں کہ انہیں غربت ختم کرنے میں کوئی دلچسپی ہے بلکہ یہ اس لیۓ ہے تاکہ غرباء کو زندہ رکھا جا سکے تاکہ وہ محنت و مشقت سے تم جیسے لوگوں کے لیۓ مزید دولت پیدا کر سکیں۔ اپنا خون پسینہ جلا کر تم لوگوں کے لیۓ پر آسائش زندگی کے سامان پیدا کرسکیں۔

سکندر: اماں تو بھی کسی حال میں خوش نہیں ہوتی۔

اماں: میں خوش تب ہوں گی پتر جب تو سچ مچ سمجھ جاۓ گا کہ صحیح کیا ہے اور غلط کیا۔۔۔ نہ صرف سمجھ جاۓ گا بلکہ صحیح راہ پر چل بھی پڑے گا۔

سکندر: اماں چھوڑ یہ سب! تو کن چکروں میں پڑ رہی ہے۔ تجھے دنیا اور لوگوں کی نہیں سمجھ تو یہ سب مجھ پر چھوڑ دے۔ (اٹھ کر) میں کسی کام سے جا رہا ہوں تم سو جانا میں تھوڑی دیر تک آجاؤں گا۔

(چلا جاتا ہے)

چودھواں منظر

دن۔ سکندر کا دفتر۔

سکندر اپنے دفتر میں اشتیاق کے ساتھ بیٹھا ہے۔

اشتیاق: سر وہ ذوالقرنین خطرناک ہو سکتا ہے مزدوروں نے ہڑتال تو ختم کر دی ہے لیکن وہ انہیں ابھی بھی بھڑکا سکتا ہے۔

سکندر: تو کیا خیال ہے کیا علاج کیا جاۓ اس کا؟

اشتیاق: میرا خیال ہے سر اس کو دوسری فیکٹری میں بھیج دیتے ہیں یہاں اس نے کافی پاؤں جما لیۓ ہیں، بہت سے مزدوروں کو اس نے اپنے ساتھ ملا لیا ہے۔ فی الحال تو اس کے روکنے کے باوجود مزدوروں نے ہڑتال ختم کر دی ہے لیکن وہ کسی بھی بات کو لے کر دوبارہ انہیں ہڑتال پر آمادہ کر سکتا ہے۔

سکندر: بات تو تمہاری ٹھیک ہے لیکن اسے دوسری فیکٹری نہیں بھیجا جا سکتا یہاں پر مزدوروں کو بڑی مشکل سے قابو کیا ہے اگر اسے ادھر بھیج دیا تو وہاں بھی وہ انہیں اپنے ساتھ ملا لے گا۔ اس لیۓ بہتر یہی ہے اس کی چھٹی کرا دی جاۓ۔ تم کوئی مناسب سا بہانہ بنا کر اسے فارغ کر دو۔

اشتیاق: ٹھیک ہے جناب میں کرتا ہوں بندوبست۔

(اٹھ کر کمرے سے نکل جاتا ہے)

پندھرواں منظر

دن۔ ریلوے ٹریک۔

ایک خالی ریلوے ٹریک جس پر داؤد اور ماریہ اکیلے باتیں کرتے چلے جارہے ہیں۔

ماریہ: ہم ہر دفعہ اس خالی ریلوے ٹریک پر کیوں ملتے ہیں؟

داؤد: شاید اس لیۓ کہ ہم پہلی دفعہ یہیں ملے تھے اسی ریلوے ٹریک کے پاس۔۔۔ اور پھر ہم دونوں کی زندگی بھی تو اس خالی ریل کی پٹری کی طرح ہے، بظاہر گزر تو رہی ہے مگر اصل میں یہیں کھڑی ہے۔

ماریہ: ٹھیک کہتے ہو۔ میری زندگی بھی چلتے چلتے یوں رک گئ جیسے کوئی ریل گاڑی تیز رفتاری سے بھاگتے ہوۓ کسی خرابی سے اچانک تھم جاتی ہے۔۔۔ امی کے جانے کے بعد زندگی کی رفتار میں تبدیلی ضرور آئی تھی مگر پھر بھی چل رہی تھی لیکن اب جب سے ابو بیمار پڑے ہیں یوں لگتا ہے اس پر طاری جمود کبھی نہیں ٹوٹے گا۔

داؤد: میری زندگی تو شروع سے یونہی تھی۔ جنہوں نے میری زندگی کی گاڑی کے انجن کو سٹارٹ کرنا تھا وہ تو پتہ نہیں کہاں تھے۔ جب سے ہوش سنبھالا اور زندگی کو کچھ جاننے کے قابل ہوا تب سے خود کو بس ایسے ہی دیکھ رہا ہوں۔

ماریہ: تم نے کبھی انہیں ڈھونڈنے کی کوشش نہیں کی؟

داؤد: کیا کوشش کروں۔۔۔ مجھے تو یہ بھی معلوم نہیں وہ اس دنیا میں ہیں بھی یا نہیں۔ مجھے تو ان کے نام تک نہیں پتہ۔ ویسے بھی ابھی کام تلاش کروں کہ انہیں تلاش کروں۔

ماریہ: کام کا کیا بنا ہڑتال ختم ہوئی کہ نہیں؟

داؤد: ہو گئ ہے صبح جاؤں گا جا کر دیکھوں گا کیا کہتے ہیں۔ انہوں نے کہا تو تھا ہڑتال کے بعد آنا تو رکھ لیں گے۔

ماریہ: خدا کرے رکھ لیں۔

(ٹرین کی سیٹی کی آواز آتی ہے)

داؤد: لگتا ہے گاڑی آرہی ہے۔ پٹری سے اتر جاؤ۔

ماریہ: ہاں! چلو گھر چلتے ہیں کافی دیر ہو گئ ہے ابو میرا انتظار کر رہے ہوں گے۔

داؤد: تو آج وہ رہنے دیں؟

ماریہ: میرے پاس تو آج کے لیۓ پیسے ہیں ابو کے لیۓ اور اپنے لیۓ کھانا لے جاؤں گی۔

داؤد: ہمارے پاس بھی ابھی ہیں کل والے رات کے کھانے کا بندوبست ہو جاۓ گا۔

ماریہ: تو پھر ٹھیک ہے آج رہنے دیتے ہیں۔

داؤد: ہاں صحیح ہے۔ (ہنس کر) سیونگ اکاؤنٹ۔

(ماریہ بھی ہلکا سا ہنستی ہے۔ ٹرین کی آواز قریب آجاتی ہے)

داؤد: چلو ہٹو یہاں سے جلدی۔

(دونوں پٹری سے اتر کر ایک طرف چلنے لگتے ہیں۔ ان کے پیچھے سے ٹرین تیزی سے گزر جاتی ہے)

سولہواں منظر

دن۔ سکندر کی فیکٹری۔

فیکٹری میں داؤد مختلف کام کرتا ہوا نظر آتا ہے۔ ایک گتا اٹھاتا ہے اور اسے مشین پر رکھ کر درست کرتا ہے گتا مشین میں سے گزرتا ہے اور دوسری طرف سے بڑی نفاست سے کٹ کر باہر نکل آتا ہے۔ کٹے ہوۓ گتے کو دوسری مشین میں رکھتا ہے اور واپس آکر دوبارہ ایک نیا گتا مشین پر رکھ دیتا ہے۔ اردگرد مزدور دوسری مشینوں پر کام کرتے ہوۓ نظر آتے ہیں۔ مشینوں کی آوازوں کا شور سنائی دے رہا ہے۔

سترھواں منظر

شام کا وقت۔ سکندر کی فیکٹری۔

داؤد کام ختم کرکے کپڑے تبدیل کرتا ہے اور سوپر وائزر کے پاس جاتا ہے۔ سوپر وائیزر رجسٹر پر کچھ لکھنے میں مصروف ہے۔

سوپروائیزر: (داؤد کو دیکھ کر) آؤ داؤد آج کا کام تمہارا ختم ہو گیا تم یہ۔۔۔یہاں (رجسٹر آگے کرکے انگلی رکھ کر جگہ کی نشاندہی کرتا ہے) پر دستخط کردو۔ (داؤد دستخط کرتا ہے) ٹھیک ہے اب تم جاسکتے ہو پر کل وقت پر آجانا۔

داؤد: آجاؤں گا۔۔۔ سوپروائیزر صاحب آپ سے ایک بات کرنی تھی؟

سوپروائیزر: ہاں کرو کیا بات ہے؟

داؤد: اگر آپ میری تنخواہ میں سے کچھ پیسے مجھے ابھی ایڈوانس میں دے دیں تو آپ کی بڑی مہربانی ہوگی۔ مجھے پیسوں کی اشد ضرورت ہے۔

سوپروائیزر: دیکھو۔۔۔ایسے نہیں ہوتا ابھی تمہیں ایک دن تو ہوا ہے آۓ ہوۓ ابھی تو ہم دیکھیں گے تم کیسا کام کرتے ہو پھر تمہیں یہاں رکھیں گے۔

داؤد: تو پھر ایسا کریں آپ مجھے ایک دن کے پیسے دے دیں۔ آج میں نے جتنا کام کیا ہے اس حساب سے میرے جتنے پیسے بنتے ہیں آپ وہ مجھے دے دیں۔

سوپروائیزر: نہیں میں یہ نہیں کر سکتا ایسا کرنے کی مجھے اجازت نہیں۔

(ایک طرف سے ظہیر ان کی باتیں سن کر آجاتا ہے۔)

ظہیر: (پاس آکر) کیا ہوا سوپروائیزر صاحب؟

سوپروائیزر: یار یہ جو تم بندا لے کر آۓ ہو بڑا عجیب آدمی ہے ابھی ایک دن ہوا ہے اسے اور کہتا ہے میری تنخواہ میں سے کچھ پیسے ابھی دے دو۔

ظہیر: کوئی بات نہیں سوپروائیزر صاحب پیسے دے دو اسے میں جانتا ہوں اسے سچ مچ پیسوں کی ضرورت ہے۔

سوپروائیزر: کچھ عقل سے کام لو ظہیر! میں اسے پیسے کیسے دے دوں اگر یہ ایڈوانس پیسے لے کر کل سے کام پر نہ آیا تو پھر۔۔۔میں کہاں سے پورا کرتا پھروں گا اتنے پیسے۔۔۔

ظہیر: نہیں یار یہ ایسا آدمی نہیں میں اسے جانتا ہوں۔ ہم اکٹھے ہی یتیم خانے میں پلے بڑھے ہیں میری طرح اس کا بھی کوئی نہیں۔ اگر کوئی مسئلہ ہوا تو تم میری تنخواہ سے کاٹ لینا۔

سوپروائیزر: تو پھر ٹھیک ہے میں تمہاری تنخواہ میں سے پیسے اس کو دے دیتا ہوں جب اسے تنخواہ ملے گی تو تم اس سے لے لینا پر رجسٹر میں انٹری تمہارے نام کی ہو گی۔

ظہیر: ٹھیک ہے سوپروائیزر صاحب جیسے تم خوش رہو تم میرے نام کی انٹری کر دو اور میری تنخواہ میں سے پیسے اسے دے دو۔

داؤد: تمہارا بہت شکریہ ظہیر! میں اپنی تنخواہ ملتے ہی تمہیں پیسے دے دوں گا۔

ظہیر: شکریے کی کوئی بات نہیں یارا بس کل سے وقت پہ کام پر آجانا۔

داؤد: میں آجاؤں گا تم فکر مت کرو۔

اٹھارواں منظر

رات۔ ماریہ کا گھر

ماریہ کا گھر نہایت خستہ حال اور بوسیدہ ہے۔ ایک جھلک سے ہی غربت اور پسماندگی نمایاں طور پر نظر آجاتی ہے۔ چھوٹا سا ایک برآمدہ نما حال ہے جس میں کچھ فاصلے پر دو چارپائیاں بچھی ہیں۔ ایک چارپائی پر ماریہ کا والد لیٹا ہے جبکہ دوسری چارپائی خالی ہے۔ برآمدے کے ایک کونے پر چولہا پڑا ہے جہاں ماریہ چاۓ بنا رہی ہے۔ چولہے سے برتن اٹھاتی ہے اور زمین پر پڑے ہوۓ دو کپوں میں چاۓ انڈیلتی ہے۔ چاۓ ڈال کر برتن دوبارہ چولہے پر رکھ دیتی ہے اور چولہا بند کر دیتی ہے۔ پھر کپ اٹھاتی ہے اور اپنے والد کی چارپائی کے پاس آجاتی ہے۔ چارپائی کے پاس دونوں کپ زمین پر رکھتی ہے اور والد کو آواز دیتی ہے۔

ماریہ: ابو چاۓ پی لیں۔

(اس کا والد تھوڑا سا اوپر اٹھتا ہے ماریہ اس کے تکیے کے اوپر ایک اور تکیہ رکھ دیتی ہے۔ وہ دونوں تکیوں سے ٹیک لگا کر بیٹھ جاتا ہے۔)

ماریہ: (چاۓ کا کپ پکڑاتے ہوۓ) آج رات پھر چاۓ پر گزارا کرنا پڑے گا ابو۔ رات کے کھانے کا بندوبست نہیں ہو سکا۔

ابو: کوئی بات نہیں۔ دن کو کھا لیا تھا کافی ہے اب کل دیکھیں گے۔

(ماریہ اس کے قریب موڑھے پر بیٹھ کر چاۓ پینے لگتی ہے)

ماریہ: ابو کل آپ کی دوائی بھی ختم ہو جاۓ گی پتہ نہیں کل کیا بنے گا۔ اگر دوائی کا انتظام کروں گی تو کھانا نہیں آۓ گا اور اگر کھانے کا بندوبست کرتی ہوں تو دوائی نہیں ملے گی۔

ابو: تم کھانے کا انتظام کر لینا دوائی رہنے دینا ویسے بھی دوائی سے مجھے آرام تو آ نہیں رہا۔

ماریہ: نہیں ابو دوائی سے فرق پڑ رہا ہے پہلے آپ بالکل چل نہیں سکتے تھے اب آپ تھوڑا بہت تو چل پھر لیتے ہیں۔

(دروازے پر دستک ہوتی ہے)

ماریہ: (خیرت سے) اس وقت کون ہے۔

(اٹھ کر چند قدم دور دروازے تک جاتی ہے۔ دروازہ کھولتی ہے تو سامنے داؤد اور زلفی کو دیکھتی ہے۔ دونوں نے ہاتھ میں کچھ شاپر پکڑ رکھے ہیں)

ماریہ: (خیرت سے) تم لوگ یہاں؟

داؤد: ہاں ہم لوگ یہاں! جلدی کرو کھانا ٹھنڈا ہو رہا ہے ہمیں بڑی سخت بھوک لگی ہے۔ اور مجھے یقین ہے تم لوگوں کو بھی بھوک لگی ہو گی۔

(دونوں اندر آجاتے ہیں۔)

ابو:کون ہے ماریہ بیٹا؟

ماریہ: ابو داؤد اور زلفی ہیں وہ جن کے بارے میں میں نے آپ کو بتایا تھا۔

(داؤد اور زلفی دونوں آگے بڑھتے ہیں اور اس کے والد سے ملتے ہیں)

داؤد: کیا حال ہے انکل آپ کا! طبعیت اب کیسی ہے؟

ابو: میں ٹھیک ہوں۔ پہلے سے بہتر ہوں۔

(داؤد اور زلفی دونوں خالی چارپائی پر بیٹھ جاتے ہیں۔)

داؤد: (ماریہ سے مسکرا کر) تم کیوں کھڑی ہو؟ اسے اپنا ہی گھر سمجھو۔ شرمانے کی ضروت نہیں یہ شاپر اٹھاؤ اور جلدی سے کھانا پلیٹوں میں ڈال کر لے آؤ۔ سب مل کر کھاتے ہیں۔

(ماریہ داؤد کی طرف خیرت سے دیکھتی ہے کچھ کہنا چاہتی ہے مگر بغیر کچھ کہے شاپر اٹھا کر لے جاتی ہے)

زلفی: انکل آپ بالکل اٹھ نہیں سکتے یا تھوڑا بہت چل پھر لیتے ہیں؟

ابو: پہلے تو بالکل اٹھ نہیں سکتا تھا لیکن اب تھوڑا بہت چل لیتا ہوں۔ کسی دیوار یا کسی چیز کا سہارا لے تھوڑا سا ٹہل بھی لیتا ہوں۔

(ماریہ کھانا شاپر سے برتنوں میں منتقل کر لیتی ہے اور برتن اٹھانے لگتی ہے۔ داؤد اسے دیکھ کر اٹھ کھڑا ہوتا ہے۔

داؤد: میں مدد کرتا ہوں۔

(اس کے پاس جاتا ہے اور برتن اٹھانے لگتا ہے)

ماریہ: (آہستگی سے) تمہارے پاس اتنے پیسے کہاں سے آۓ؟ اتنا سارا کھانا کیسے لاۓ ہو؟

داؤد: بتاتا ہوں پہلے کھانا کھا تو لیں پھر آرام سے بتاؤں گا۔ بڑی بھوک لگی ہے۔

ماریہ: (اس کی قیمص پکڑ کر کھینچتی ہے) نہیں پہلے بتاؤ۔

داؤد: کیا کر رہی ہو برتن گر جاۓ گا۔ کس قدر ضدی ہو تم کہا تو ہے بتاتا ہوں اب چھوڑو مجھے۔

(برتن لے کر چارپائیوں کے پاس چھوٹے سے میز پر رکھ دیتا ہے۔ ماریہ باقی برتن اٹھا کر لے آتی ہے۔ سب مل کر کھانا کھانے لگتے ہیں۔)

ماریہ کا والد: (کھانا کھاتے ہوۓ) تم لوگوں کا بہت شکریہ! تم لوگوں نے یہ سب کیا۔ جب ماریہ نے مجھے تمہارے بارے میں بتایا کہ دو لڑکے ہیں جن سے مل کر وہ کام کرتی ہے تو میں تھوڑا سا گھبرایا میں نے سوچا پتہ نہیں کیسے لوگ ہیں۔ لیکن یہ کہتی تھی اچھے لڑکے ہیں آپ فکر مت کریں۔ جیسے یہ تم لوگوں کے بارے میں بتاتی تھی اس کی باتیں سن کر کچھ تسلی تو ہو جاتی تھی مگر پھر بھی میں پریشان رہتا تھا۔ لیکن اب تم سے مل لیا ہے تو کچھ اطمینان ہو گیا ہے۔

داؤد: آپ بے فکر رہیں انکل! ہماری طرف سے ماریہ کو کبھی کوئی مسئلہ نہیں ہوگا۔ اور پھر یہ تو خود ہی اپنے کام کی بہت ماہر ہے (ماریہ کی طرف مسکرا کر دیکھتا ہے) ہم نے تو سارا کام اس سے سیکھا ہے۔

(ماریہ زیرِ لب مسکراتی ہے)

زلفی: ہاں یہ بات تو بالکل ٹھیک ہے کام تو ہم نے واقعی اس سے سیکھا ہمیں تو سچ میں کچھ نہیں آتا تھا۔ بلکہ ہمیں تو پتہ ہی نہیں تھا یہ کام بھی ہو سکتا ہے۔

(داؤد اس کو کہنی مار کر ایسی بات کرنے سے روکتا ہے)

ماریہ کا والد: پھر بھی پریشانی تو رہتی ہے یہ اکیلی باہر جاتی ہے سارا دن پتہ نہیں کہاں کہاں دھکے کھاتی ہے۔ میرا جو حال ہے وہ تم لوگوں کے سامنے ہے میں تو چل کر دروازے تک نہیں جا سکتا۔

داؤد: آپ فکر نہ کریں انکل ہم اس کا پورا دھیان رکھیں گے۔

(ماریہ کا والد خاموش ہو جاتا ہے)

انیسواں منظر

وہی وقت۔ ماریہ کا گھر

صحن کے ایک کونے میں بیسن لگا ہے جہاں داؤد ہاتھ دھو رہا ہے۔ اس کے کچھ فاصلے پر ماریہ خاموش کھڑی اس کو دیکھ رہی ہے۔

داؤد: (اس کی طرف دیکھ کر) خاموش کیوں ہو۔۔۔کیا سوچ رہی ہو؟

ماریہ: کچھ خاص نہیں۔

داؤد: خاص نہیں تو کچھ عام تو سوچ ہی رہی ہو۔

ماریہ: تم نے ایسا کیوں کیا داؤد! اتنے سارے پیسے تم نے ایک ہی دن لگا دئیے باقی دن کیا کرو گے جب پیسے ختم ہو جائیں گے۔ اوپر سے مہینے کے آخر میں تمہیں تنخواہ بھی نہیں ملے گی جو ملے گی وہ تو تمہیں لوٹانی پڑے گی۔

داؤد: نہیں کون سا ساری تنخواہ میں نے ایڈوانس لی ہے۔ تنخواہ میں سے صرف کچھ پیسے لئیے ہیں تم پریشان نہ ہو کچھ نہیں ہو گا۔

ماریہ: پھر بھی داؤد۔۔۔

داؤد: بس اب چپ کر جاؤ۔ اس بارے میں مزید کوئی بات نہ کرنا۔

(زلفی کی آواز آتی ہے)

زلفی: داؤد آجاؤ یار کافی وقت ہو گیا ہے اب چلیں۔

(ماریہ اور داؤد دونوں چل کر ان کے پاس جاتے ہیں۔ زلفی اور داؤد آخری مرتبہ ماریہ کے والد سے ملتے ہیں۔)

زلفی: اچھا انکل جی ہم چلتے ہیں آپ آرام کریں۔

ماریہ کا والد: ٹھیک ہے بہت شکریہ تم دونوں کا۔ دوبارہ ضرور آنا۔

زلفی: جی انکل ضرور آئیں گے۔ (ماریہ سے) ٹھیک ہے ماریہ ہم چلتے ہیں۔

(دونوں دروازے کی طرف بڑھتے ہیں اور باہر نکل جاتے ہیں۔ ماریہ دروازے کے پاس جاتی ہے کچھ دیر تک انہیں جاتا ہوا دیکھتی ہے پھر دروازہ بند کر لیتی ہے۔ اس پورے منظر میں ماریہ کچھ بجھی بجھی سی رہتی ہے)

بیسواں منظر

دن۔ سکندر کی فیکٹری

فیکٹری میں داؤد، ظہیر اور ایک اور آدمی ایک جگہ پر کھڑے ہیں۔ اردگرد مشینیں چل رہی ہیں اور کام جاری ہے۔ مشینیں چلنے کی آوازیں مسلسل آرہی ہیں۔

آدمی: ویسے یار جو بھی ہے پر ذوالقرنین تھا بڑا دلیر آدمی۔۔۔ اس جیسی ہمت آج تک اس فیکٹری میں کسی نے نہیں دکھائی۔

ظہیر: یہ تو ہے جب تک وہ تھا ہمارے حقوق کی بات کرنے والا تو کوئی تھا۔ اب کس میں اتنی جرات ہے ایسی بات کرنے کی۔

داؤد: تو پھر اس نے ہڑتال ختم کیوں کی؟

آدمی: اس نے کہاں ختم کی! یہ تو مزدوروں نے ختم کی۔ اس کے منع کرنے کے باوجود مزدوروں نے ہڑتال ختم کردی اگر سب لوگ اس کا اور تھوڑی دیر تک ساتھ دے جاتے تو شاید بات بں جاتی۔

ظہیر: مزدور بھی کیا کرتے اگر ہڑتال جاری رکھتے تو کھاتے کہاں سے۔۔۔ اور کچھ عرصہ کام نہ کرتے تو گھر چلانا مشکل ہو جاتا۔

(سوپر وائیزر آتا ہے)

سوپروائیزر: وہ والا بنڈل مکمل ہو گیا ہے؟

آدمی: ہاں ہو گیا ہے۔ اب کھانے کا وقفہ ہونے والا ہے اس کے بعد ہی نیا بنڈل لگائیں گے۔

سوپروائیزر: ٹھیک ہے! وہ گودام سے باقی سامان اٹھا کر باہر رکھ دینا میں جارہا ہوں۔

ظہیر: بے فکر رہو صاحبو رکھ دیں گے۔

(سوپروائیزر چلا جاتا ہے)

داؤد: یہ سوپر وائیزر صاحب آج بڑی جلدی میں ہیں؟

ظہیر: ہاں صبح بتا رہے تھے کسی شادی پہ جانا ہے۔

داؤد: اچھا! اسی لیئے۔۔۔

اکیسواں منظر

رات۔ داوؤد اور زلفی کا گھر۔

داؤد اپنے کمرے کے باہر ایک چھوٹی سی بالکنی میں بیٹھا ہے۔ سامنے سڑک پر رواں ٹریفک کو دیکھ رہا ہے لیکن دراصل دھیان اس کا کہیں اور ہے۔ کسی خیال میں کھویا ہے۔ زلفی خوشی سے جھومتا ہوا کمرے کے اندر سے ہی اسے آوازیں دیتا ہوا آتا ہے۔

زلفی: داؤد۔۔۔داؤد۔۔۔کہاں ہو یار!

(بالکنی میں آکر) یہاں بیٹھے ہو میں بھی کہوں پتہ نہیں کہاں گیا ہے۔ مبارک ہو شاید اب میرے کام کا بھی بندوبست ہو جاۓ۔ آج اپنے گھر گیا ہوا تھا۔ بخاری چاچا سے مل کر آرہا ہوں کہہ رہے تھے میں نے ایک جگہ بات کی ہے ہو سکتا ہے ایک دو دن تک بلا لیں۔

(داؤد اس کی بات پر زیادہ توجہ نہیں دیتا اور اسی طرح سامنے سڑک کی طرف دیکھتا رہتا ہے۔)

زلفی: (اس کے پاس بیٹھ کر) خیر ہے! کیا ہوا ہے؟

داؤد: کچھ نہیں یار بس کچھ سوچ رہا ہوں۔

زلفی: کیا؟

داؤد: میں سوچ رہا ہوں نوکری مل گئ ہے اور اللہ کا شکر ہے اچھی چل رہی ہے تو کیوں نا اس کے بعد والا مرحلہ بھی طے کر لیا جاۓ۔

زلفی: (خیرت سے) بعد والا مرحلہ۔۔۔! وہ کیا؟

داؤد: شادی....! یار دیکھو تمہیں بھی کام مل جاۓ گا کچھ دنوں تک پھر کوئی بھی مسئلہ نہیں رہے گا۔ تو مجھے لگتا ہے ہمیں شادی کر لینی چاہیۓ۔

زلفی: مجھے چھوڑو مجھے شامل نہ کرو تم اپنی بات کرو۔ میں خیران ہوں تمہیں یہ خیال اچانک بیٹھے بٹھاۓ کہاں سے آگیا۔ پہلے تو کبھی تم نے اس کا ذکر نہیں کیا۔

داؤد: پہلے کام بھی تو نہیں ملا تھا اس کا خیال کیسے آتا۔

زلفی: تو تمہیں کیا لگتا ہے ابھی تمہیں بہت اچھا کام مل گیا ہے جس سے تم شادی کے بعد آرام سے زندگی بسر کر لو گے؟

داؤد: نہیں ایسا تو نہیں لیکن۔۔۔

زلفی: لیکن ویکن چھوڑو میرے بھائی ابھی اس چکر میں مت پڑو اور ویسے بھی شادی کے لیئے ایک عدد لڑکی کی ضرورت ہوتی ہے وہ کہاں سے لاؤ گے۔

داؤد: یار لڑکی تو ہے۔۔۔

زلفی: کہاں ہے لڑکی۔۔۔ لڑکی تو ایسے جیسے پیڑ پر۔۔۔(کچھ یاد آنے پر) ایک منٹ۔۔۔ کہیں تم ماریہ کی بات تو نہیں کر رہے؟

داؤد: ہاں اسی کی کر رہا ہوں۔

زلفی: ہاں جی مجھے اندازہ تھا کہ جناب کچھ ایسا ہی گل کھلائیں گے۔ لڑکی تو چلو ٹھیک ہے اچھی ہے پر تمہیں کیا لگتا ہے جیسے تمہارے اور اس کے حالات آج کل چل رہے ہیں وہ ابھی شادی کے لیۓ راضی ہو جاۓ گی؟ اس سے بات کی ہے؟

داؤد: نہیں اسے تو ابھی کچھ نہیں بتایا۔

زلفی: تو پہلے اسے بتاؤ کہ تم اس سے شادی کرنا چاہتے ہو۔ مجھے نہیں لگتا وہ مانے گی کیونکہ اس کے والد کی حالت تم اچھی طرح جانتے ہو۔ اور اگر تم یہ سوچ رہے ہو کہ تم اس کی اور اس کے والد کی ذمہ داری اٹھا لو گے تو ایسا اس نوکری سے تو ممکن نہیں۔

داؤد: میں جانتا ہوں یار! لیکن کون سا میں نے ہمیشہ اسی نوکری پر رہنا ہے اس سے بہتر کام بھی تو ملے گا۔

زلفی: تو جب تمہیں بہتر کام ملے گا۔ جب تمہاری ترقی ہوگی تب اس بارے میں سوچنا ابھی فی الحال ایسے خیال دل سے نکال دو۔

(داؤد کوئی جواب نہیں دیتا اور سامنے دوبارہ سڑک کی جانب دیکھنے لگتا ہے)

بائیسواں منظر

دن۔ ریلوے ٹریک۔

ریل کی پٹری پر داؤد اور ماریہ دونوں بالکل خاموش کھڑے ہیں۔ دونوں کچھ دیر تک خاموش رہتے ہیں۔

داؤد: اس طرح خاموش تو نہ رہو۔ ایسی کوئی انوکھی بات تو میں نے نہیں کی۔ میں مانتا ہوں ہمارے حالات ابھی ایسے نہیں کہ ہم اس بارے میں کچھ سوچیں۔ زلفی تو مجھے کہہ رہا تھا ایسے خیال ابھی اپنے دل سے نکال دو فی الحال اس کے کوئی چانسز نہیں۔ مگر ماریہ میں نے سوچا تمہیں اپنی خواہش اور ارادے سے آگاہ تو کر سکتا ہوں اور تمہاری خواہش اور ارادے کے بارے میں جان تو سکتا ہوں۔ اگر تمہاری طرف سے ہاں ہے تو پھر ہم تمہارے ابو سے بھی بات کر لیں گے اور اگر انہوں نے بھی رضامندی ظاہر کردی تو اس کے بعد ہمارے حالات میں جب بھی بہتری آئی ہم اگلا مرحلہ بھی طے کرلیں گے۔

(ماریہ خاموشی سے ریل کی پٹری پر چلنے لگتی ہے)

داؤد: کچھ بولو تو! کہاں چل دی۔۔۔

(داؤد بھی اس کے پیچھے چلتا ہے) دیکھو ماریہ ابھی بے شک اس بارے میں کسی قسم کا جواب نہ دو۔ تم گھر جا کر سکون سے سوچنا پھر کل آکر کوئی جواب دینا۔ ابھی بس اتنا بتا دو تمہیں برا تو نہیں لگا۔

(ماریہ رک کر اس کی جانب مڑتی ہے۔ داؤد بھی ٹھہر جاتا ہے۔ ماریہ اسے چند لمحے خاموشی سے دیکھتی رہتی ہے)

داؤد: کیا دیکھ رہی ہو۔ کچھ تو بولو۔۔۔برا تو نہیں لگا؟

ماریہ: برا نہیں لگا۔ تم جواب جاننا چاہتے ہو؟

داؤد: ہاں جاننا تو چاہتا ہوں مگر کوئی بات نہیں تم تسلی سے ایک دو دن سوچ کر بتا دینا۔ اتنا انتظار میں کر لوں گا۔

(ٹرین آنے کی آواز آتی ہے)

ماریہ: نہیں اتنا انتظار کرنے کی ضرورت نہیں بس تھوڑا سا انتظار کرنا پڑے گا۔

داؤد: کتنا؟

ماریہ: بس یہ ٹرین گزرنے تک۔۔۔ جب ٹرین آۓ گی تو تم بائیں طرف پٹری سے اترو گے اور میں دائیں طرف اتروں گی۔ ٹرین گزرنے کے بعد تمہیں جواب خود ہی مل جاۓ گا۔

(چند لمحے انتظار کے بعد ٹرین قریب آجاتی ہے۔ دونوں ایک دوسرے کے مخالف سمت پٹری سے اتر جاتے ہیں۔ داؤد کھڑا ہو کر ٹرین کو گزرتے ہوۓ دیکھتا ہے۔ چلتی ہوئی ٹرین کے پار دوسری طرف دیکھنے کی کوشش کرتا ہے مگر کچھ دکھائی نہیں دیتا۔ کچھ دیر بعد ٹرین گزر جاتی ہے۔ داؤد دوسری طرف دیکھتا ہے ماریہ وہیں کھڑی مسکرا رہی ہوتی ہے۔ داؤد بھی جواب جان کر مسکرا اٹھتا ہے۔)

تئیسواں منظر

رات۔ داؤد لوگوں کا گھر۔

کمرے میں زلفی کسی کام میں مصروف ہے۔ داؤد اندر آتا ہے جو بڑا ہشاش بشاش اور خوش باش نظر آرہا ہے۔ آکر خاموشی سے بیٹھ جاتا ہے اور مسکراتا ہوا کسی خیال میں کھو جاتا ہے۔ زلفی سر اٹھا کر اس کی طرف دیکھتا ہے۔ چند لمحے اسے دیکھتا رہتا ہے۔ داؤد کو بالکل بھی خبر نہیں ہوتی کہ وہ اسے دیکھ رہا ہے۔

زلفی: آج خیریت ہے کس دنیا میں پہنچے ہوۓ ہو؟

داؤد: (ہلکا سا چونک کر) ہونہہ! کیا کہا؟

زلفی: میں نے کہا کس دنیا میں ہو؟

داؤد: یہیں ہوں۔ کیوں؟

زلفی: جتنے تم خوش نظر آرہے ہو لگتا تو نہیں تم یہاں ہو۔ اتنی خوشی اس دنیا میں تو میسر نہیں آسکتی۔

داؤد: آسکتی ہے۔۔۔ایک صورت میں آسکتی ہے۔

زلفی: اچھا جی! کس صورت میں؟

داؤد: اگر اس شخص کا ساتھ مل جاۓ جس کے ساتھ آپ پوری زندگی گزارنا چاہتے ہیں تو آسکتی ہے۔

زلفی: تو اس کا مطلب ہے ماریہ نے۔۔۔

داؤد: جی ہاں! اس نے ہاں کر دی ہے۔ بس اب اس کے ابو مان جائیں۔۔۔

زلفی: بڑی بیوقوف لڑکی ہے فوراً مان گئ۔ حالانکہ ہمارے ہاں کی لڑکیوں پر تو فرض ہے چاہے ان کا اپنا کتنا ہی دل ہو، چاہے دل میں کتنی ہی ہاں ہو لیکن جلد ماننا نہیں لٹکاتے جانا ہے۔ لیکن یہ تو اسی وقت مان گئی۔

داؤد: ہاں تو اچھی بات ہے۔ اگر آپ کا اپنا دل یہی چاہتا ہے اگر آپ کی اپنی خواہش بھی یہی ہے تو کیوں بات کو ٹالتے چلے جانا۔ اور اگر آپ یہ نہیں چاہتے تو سیدھا انکار کرنے میں کیا حرج ہے۔

زلفی: بیٹا جی بات تو اچھی ہے مگر دوسری بہت سی اچھی باتوں کی طرح ہمارے ہاں یہ اچھی بات بھی کہیں نہیں پائی جاتی۔ یہ واحد لڑکی ہے جس نے یہ حرکت کی ہے۔ میں تو کہتا ہوں اس کو اس حرکت کی بنا پر سماج سے نکال دینا چاہیۓ۔

داؤد: اچھا مزاق چھوڑو! یہ بتاؤ کیا بنا تمہارے کام کا۔۔۔ آج گۓ تھا جہاں بحاری چاچا نے بھیجا تھا۔

زلفی: ہاں گیا تھا کچھ نہیں بنا۔ انہوں نے کسی کو پہلے ہی رکھ لیا ہوا ہے۔

داؤد: چلو کوئی بات نہیں بحاری چاچا سے کہنا کہیں اور پتا کر دیں۔

زلفی: (بد دلی سے) کہا ہے انہیں۔ واپسی پر ان سے مل کر آیا تھا۔

چوبیسواں منظر

دن۔ فیکٹری۔

فیکٹری میں داؤد سمیت دیگر بہت سے مزدور کام کر رہے ہیں اچانک ایک طرف سے شور اٹھتا ہے سب بھاگ کر وہاں جاتے ہیں۔ کسی مزدور کا ہاتھ مشین میں آکر کٹ جاتا ہے۔

پہلا آدمی: ہاتھ پورا کٹ گیا ہے جلدی سے ایمبولینس بلاؤ۔

دوسرا آدمی: ایمبولینس کا انتظار کرنے کی بجاۓ اسے ایسے ہی لے چلو۔

تیسرا آدمی: ہاں یہ صحیح ہے۔۔۔لے چلو ایسے ہی۔۔۔اٹھاؤ اسے۔

تیسرا آدمی: (بازو سے پکڑ کر اٹھاتے ہوۓ) کوئی دوسری طرف سے اسے اٹھاۓ۔

(تین چار آدمی اسے اٹھا کر لے جاتے ہیں۔ باقی مزدور بھی افسوس کرتے ہوۓ اپنی اپنی جگہ پر چلے جاتے ہیں۔ ایک جگہ پر داؤد، ظہیر اور دو تین آدمی کھڑے رہتے ہیں۔)

پہلا آدمی: بیچارا اسی عمر میں اپنا ہاتھ گنوا بیٹھا ہے اب اسے کون کام پر رکھے گا۔

دوسرا آدمی: یہ چھ مہینوں میں دوسرا ایسا واقعہ ہے۔

داؤد: (خیرت سے) دوسرا واقعہ۔۔۔

دوسرا آدمی: ہاں یہاں تو ایسے واقعات اکثر ہوتے رہتے ہیں تم اختیاط سے کام کرنا۔

داؤد: اگر ایسا ہے تو مزدوروں کی حفاظت کا کوئی انتظام کیوں نہیں کیا جاتا؟

پہلا آدمی: میرے بھائی کون سنتا ہے یہاں، مزدوروں کی کس کو پڑی ہے۔

داؤد: پھر بھی یار مزدورں کی حفاظت کا کچھ تو بندوبست ہونا چاہیے۔ ہمیں جا کر مینجر سے بات کرنی چاہیۓ۔

ظہیر: پاگل ہو۔ ایسی بات سوچنا بھی مت پہلے ہی تمہیں اتنی مشکل سے کام ملا ہے چپ کرکے کام کرتے رہو۔

دوسرا آدمی: ظہیر بالکل ٹھیک کہہ رہا ہے چپ کرکے کام کرتے رہو گے تو بہتر رہو گے نہیں تو ملازمت سے ہاتھ دھو بیٹھو گے۔

داؤد: لیکن پھر بھی۔۔۔

ظہیر: کہا تو ہے چپ کر جاؤ اور کام پر لگ جاؤ سوپروائیزر صاحب آتے ہی ہوں گے۔

(سب اپنی اپنی جگہ پر چلے جاتے ہیں داؤد کچھ دیر تک وہاں کھڑا رہتا ہے)

پچیسواں منظر

دن۔ فیکٹری

فیکٹری میں چھٹی کا وقت ہے۔ داؤد کپڑے تبدیل کرکے کام والی جگہ سے باہر نکل رہا ہے۔ ظہیر آتا ہے دونوں ایک ساتھ چلنے لگتے ہیں۔

داؤد: (تھوڑا سا چلنے کے بعد) تم چلو مجھے ذرا ایک چھوٹا سا کام ہے میں ابھی آیا۔

ظہیر: ٹھیک ہے جلدی آنا۔

(داؤد ایک جانب چل پڑتا ہے)

چھبیسواں منظر

وہی وقت۔ فیکٹری

داؤد مینجر اشتیاق کے کمرے میں کھڑا ہے۔ کمرے میں اشتیاق اور اس کے سوا اور کوئی نہیں۔

داؤد: میں صرف یہ کہہ رہا ہوں اشتاق صاحب اگر مزدوروں کو اور سہولتیں نہیں دے سکتے تو کم سے کم کام کے دوران ان کی حفاظت کا تو کوئی انتظام کر سکتے ہیں۔ آۓ دن اتنے حادثات ہوتے ہیں مگر آپ پھر بھی کچھ نہیں کرتے۔

اشتیاق: تو تم کیا چاہتے ہو میں کام کرتے ہوۓ ہر مزدور کے پاس کھڑا رہا ہوں اور دیکھتا رہوں کہ اس کے ساتھ کوئی حادثہ تو نہیں پیش آنے والا۔

داؤد: میں کیا کہہ رہا یہ آپ اچھی طرح جانتے ہیں اشتیاق صاحب۔ اگر آپ صرف چند اقدامات کر دیں تو ایسے حادثات میں بہت کمی واقع ہو سکتی ہے۔

اشتیاق: فی الحال اس قسم کے اقدامات کرنے کے لیۓ ہمارے پاس اتنے وسائل نہیں۔ پچھلے دو تین مہینوں سے ہماری سیل گرتی جا رہی ہے۔ ابھی جاؤ جب ہمارے پاس وسائل ہوں گے تو پھر ہم اس کا بھی بندوبست کر دیں گے۔

داؤد: میں جانتا ہوں آپ کچھ نہیں کریں گے میں اس کے لیۓ سکندر صاحب سے ملوں گا اور ان سے بات کروں گا۔

اشتیاق: مجھے یہ بتاؤ صرف تم کو تکلیف کیوں ہو رہی ہے اور تو کوئی نہیں آیا بات کرنے کے لیۓ۔

داؤد: وہ بھی آئیں گے۔ لیکن آپ سے بات کرنے کا فائدہ نہیں ہم سیدھا سکندر صاحب کے پاس جائیں گے۔

اشتیاق: شوق سے جاؤ۔ ان سے بات کرکے دیکھ لو۔

داؤد: ٹھیک ہے میں چلتا ہوں۔

(کمرے سے نکل جاتا ہے)

ستائیسواں منظر

دن۔ ملک سکندر کا دفتر

ملک سکندر اپنے دفتر میں اکیلا بیٹھا ہے۔ اشتیاق اندر داخل ہوتا ہے۔

اشتیاق: السلام علیکم سر؟

ملک سکندر: (گرم جوشی سے) وعلیکم السلام! آؤ اشتیاق صاحب کیا حال چال ہیں؟ آؤ بیٹھو۔

اشتیاق: سر آپ سے ایک ضروری بات کرنی تھی۔

ملک سکندر: ہاں ہاں کیجیۓ، کہیۓ کیا بات ہے؟

اشتیاق: جناب وہ کل پھر ایک مزدور کے ساتھ حادثہ پیش آگیا ہے۔ اس کا ہاتھ مشین میں آکر کٹ گیا ہے۔

ملک سکندر: تو پھر؟

اشتیاق: جناب بات وہ نہیں اصل بات یہ ہے کہ ایک داؤد نام کا نیا مزدور آیا ہے وہ مزدوروں کو بھڑکا رہا ہے کہ حادثہ ہمارے مناسب اقدامات نہ کرنے کی وجہ سے پیش آیا ہے۔ وہ کہتا ہے ایسے حادثے اس لیۓ ہوتے ہیں کیونکہ مزدوروں کی حفاظت کے لیۓ ٹھیک انتظامات نہیں کیۓ جاتے۔

سکندر: اس کا مطلب ہے نیا ذوالقرنین پیدا ہو گیا ہے۔ ایک سے جان چھڑائی تھی یہ دوسرا کہاں سے آگیا۔

اشتیاق: جی جناب میں اسی لیۓ آیا ہوں کیونکہ یہ آدمی خطرناک ہو سکتا ہے۔ ابھی یہ نیا نیا ہے اسے زیادہ مزدور پہچانتے نہیں۔ لیکن اگر اس نے ذوالقرنین کی طرح پاؤں جما لیۓ تو پھر اسے اکھاڑنا مشکل ہو جاۓ گا۔ اس لیۓ اس کا ابھی سے بندوبست کر لیا جاۓ تو بہتر ہے۔

سکندر: تو ٹھیک ہے کرو اس کا بندوبست جو بھی تمہیں مناسب لگتا ہے تم کرو تمہیں کوئی نہیں پوچھے گا۔

اشتیاق: اچھا پھر مجھے اجازت دیں میں چلتا ہوں۔

سکندر: جلدی کیا ہے بیٹھو چاۓ پی کر جانا۔

اشتیاق: نہیں سر مجھے ذرا جلدی ہے چاۓ پھر کبھی۔

سکندر: چلو ٹھیک ہے جیسے تمہاری مرضی۔

اٹھائیسواں منظر

رات۔ داؤد لوگوں کا گھر

کمرے کے باہر بالکنی میں داؤد سر جھکاۓ بیٹھا ہے۔ زلفی اس کے پاس کھڑا ہے۔

داؤد: بس پھر انہوں نے میرے ساتھ دوسرے دو تین لڑکوں کو بھی فارغ کر دیا۔ مجھے اسی بات کا افسوس ہے کہ میری وجہ سے ان کی نوکری بھی چلی گئ۔

زلفی: لیکن یار تمہیں ضرورت کیا تھی مینجر سے جا کر یہ بات کرنے کی۔

داؤد: وہ اس لیۓ کہ یہ بات کرنی ضروری تھی۔ جو میں نے کیا مجھے اس کا بالکل بھی پچھتاوا نہیں کیونکہ میرے نزدیک یہی صحیح تھا۔

زلفی: تو پھر اب گزارا کیسے ہو گا مجھے بھی کام نہیں مل رہا۔

داؤد: (سامنے سڑک پر دیکھتے ہوۓ) پتہ نہیں کیسے ہو گا۔

انتیسواں منظر

دن۔ ریلوے ٹریک۔

ریلوے ٹریک کے پاس جنگلے کے قریب داؤد، ماریہ اور زلفی تینوں موجود ہیں۔ تینوں افسردہ دکھائی دے رہے ہیں۔

ماریہ: کچھ پیسے ہیں پاس یا۔۔۔

داؤد: جو پیسے بچے تھے دو دن تک وہی چلاتے رہے ہیں اب کچھ بھی نہیں بچا۔

ماریہ: میرے پاس بھی کل تک تھے آج کچھ بھی نہیں۔

زلفی: تو پھر سوچ کیا رہے ہو چلو اپنا وہی سیونگ اکاؤنٹ استعمال کرتے ہیں۔

ماریہ: ہاں ٹھیک کہہ رہے ہو آج تو کرنا پڑے گا۔

داؤد: (آگے بڑھتے ہوۓ) چلو پھر۔

(تینوں بھاگ کر جاتے ہیں اور سلاخیں اکھاڑنا شروع کر دیتے ہیں۔ اسی دوران پولیس کی گاڑی آکر رکتی ہے۔ گاڑی میں تین چار سپاہی باہر نکلتے ہیں اور ان تینوں کی طرف بھاگتے ہیں۔)

پہلا سپاہی: پکڑو انہیں بھاگنے نہ دینے۔

(تینوں بھاگنے کی کوشش کرتے ہیں مگر فوراً پکڑے جاتے ہیں۔)

قیدِ تنہائی

2024-10-12T02:27:00.005+05:00

رات کا تیسرا پہر ہونے کو آیا تھا لیکن نیند شاید اس سے روٹھ گئ تھی۔ چارپائی پر لیٹے لیٹے کروٹیں بدل بدل کر جب وہ تھک چکا تو اٹھ کر بیٹھ گیا۔ چارپائی سے اتر کر اس نے چپل پہنے اور دیوار کے پاس چھوٹے سے لکڑی کے بوسیدہ میز پر سے پانی کے جگ میں سے پانی گلاس میں انڈیلا اور ایک ہی سانس میں پورا گلاس پی گیا۔ واپس چارپائی پر آکر چت لیٹ کر اس نے اپنی بازو سر کے پیچھے ٹکائی اور بے مقصد چھت کو گھورنے لگا۔ چھت پر کہیں کہیں جالے لگے تھے۔ پورا کمرا بوسیدہ سا گردوغبار سے اٹا تھا جس کی دیواروں کا روغن جگہ جگہ سے اکھڑا ہوا تھا۔ ایک بلب روشن تھا جس کی مٹیالی روشنی کمرے کے مختصر سے سامان پر پڑ رہی تھی جو کہ ایک میز دو کرسیوں ایک چارپائی اور چند جوڑے کپڑوں پر مشتمل تھا۔ کچھ کپڑے اس کے ایک بڑے سے بستے میں تھے جو ایک کونے میں میز کے نیچے پڑا تھا اور دو ایک جوڑے دیوار پر کھونٹی سے لٹک رہے تھے۔ پورے گاؤں میں وہ تنہا تھا جو اس وقت جاگ رہا تھا۔ یہ چھوٹا سا گاؤں آبادی سے کافی ہٹ کر تھا اور بالکل ویران اور سنسان تھا اس لیۓ اس وقت پتا کھڑکنے تک کی آواز بھی نہیں آرہی تھی۔ ایک طویل مدت تک وہ اسی طرح چھت کو گھورتا رہا۔ یہاں تک کہ گاؤں کی واحد مسجد سے صبح کی اذان کی آواز کھڑکی کے راستے اندر آنا شروع ہوئی۔ وہ کچھ دیر تک لیٹا اذان سنتا رہا پھر اٹھ کر بیٹھ گیا۔ چارپائی سے اتر کر لباس درست کیا اور باہر نکل کر مسجد کی جانب چل دیا۔ عام طور پر وہ اس وقت اٹھ کر نماز پڑھنے کا عادی نہیں تھا اور اسے یاد بھی نہیں تھا کہ آخری بار اس نے کب نماز پڑھی تھی۔ اپنے گھر میں تھا تو کبھی کبھی جمعہ کی نماز پڑھ لیا کرتا تھا لیکن جب سے اس گاؤں میں اس کی تعیناتی ہوئی تھی اس نے ایک بھی جمعہ نہیں پڑھا تھا۔ آج بھی اگر وہ معمول کے مطابق سورہا ہوتا تو اس وقت اٹھ کر مسجد نہ جاتا لیکن رات بھر کی بیداری کی وجہ سے وہ اٹھ کر باہر نکل آیا۔ اس میں اس کا نماز پڑھنے کے جذبے سے زیادہ بوریت کو رفع کرنے کا خیال زیادہ حاوی تھا۔ اجاڑ رات کے جگراتے کی تھکاوٹ اور اکتاہٹ سے بیزار ہو کر اس نے مسجد کا رخ کیا تا کہ کچھ وقت کٹ سکے۔ وہ باہر نکلا تو ہر طرف ہو کا عالم تھا۔ جو چند نمازی نماز کے لیۓ جایا کرتے تھے وہ ابھی گھروں سے نہیں نکلے تھے۔ وہ چلتا ہوا آبادی والے حصے سے باہر نکل آیا کیونکہ مسجد گاؤں سے باہر تھی اور قدرے غیرآباد علاقے میں واقع تھی۔ یہاں اسے ٹھنڈ لگنے لگی۔ ابھی جاڑے کا موسم نہیں آیا تھا لیکن صبح اور رات کے وقت کھلی اور ہوادار جگہوں پر سردی محسوس ہوتی تھی۔ اس نے اپنے دونوں بازو سینے پہ باندھ لیۓ اور تیز تیز چلنے لگا۔ اردگرد جھاڑیوں اور کھیتوں سے گھاس کے ٹڈوں اور جھینگروں کی آوازیں مسلسل سنائی دے رہی تھیں۔ مسجد کے قریب پہنچ کر دو تین کتے اسے دیکھ کر دور ہی سے باری باری بھونک کر خاموش ہو گۓ۔ وہ مسجد کی سیڑھیاں چڑھنے لگا۔ یہ مسجد ایک ٹیلے پر آباد تھی اور گاؤں کے تمام گھروں سے بلند سطح پر تھی۔ سیڑھیاں چڑھ کر اس نے گاؤں کی جانب دیکھا گھروں کی بتیاں جل رہیں تھیں جو دور سے یوں لگ رہیں تھیں جیسے بہت سے دیۓ روشن ہوں۔ وہ سیڑھیوں کے پاس وضو کے لیۓ مختص جگہ پر بیٹھ گیا اور وضو کرنے لگا۔ وضو کے بعد مسجد کی مختصر سی دہلیز عبور کرکے وہ اندر چلا گیا۔ بہت چھوٹی سی مسجد تھی جس میں بمشکل تمام پچاس آدمیوں کے نماز پڑھنے کی گنجائش تھی جو کہ گاؤں کی آبادی کے لحاظ سے کافی تھی۔ عمارت انتہائی پرانی تھی اور اس کا ڈیزائن بھی پرانی طرز کا تھا۔ گاؤں کے بزرگوں کا کہنا تھا یہ مسجد ان کی بھی پیدائس سے بہت پہلے کی تھی اور ان میں سے کوئی بھی نہیں جانتا یہ مسجد کب تعمیر ہوئی تھی۔ شاید جب یہ گاؤں آباد ہوا تھا تب گاؤں والوں نے اسے خود تعمیر کیا تھا۔ مسجد کی خستہ حال عمارت اور اس کی طرز تعمیر کو دیکھ کر یہی لگتا تھا کہ مسجد کافی قدیم ہے۔

وہ اندر داخل ہوا تو امام مسجد نے جو اس وقت قران مجید پڑھنے میں مصروف تھے اسے سر اٹھا کر دیکھا جس کے جواب میں اس نے اپنے سر کی ہلکی سی جنبش سے انہیں سلام کیا اور ایک کونے میں چپ چاپ دیوار کے ساتھ ٹیک لگا کر بیٹھ گیا۔ امام مسجد دوبارہ قران شریف پڑھنے میں مصروف ہو گۓ۔ کچھ دیر میں چند اور لوگ آگۓ۔

نماز کے بعد وہ باہر نکلا تو دن نکل آیا تھا۔ اس نے مسجد کے صحن میں کھڑے ہو کر مسجد کی ٹوٹی ہوئی دیوار کے اوپر سے جہاں تک نگاہ جاتی تھی جھانک کر دیکھا وہاں دور بہت دور خشک پہاڑیوں کا ایک سلسلہ دکھائی دے رہا تھا۔ یہ پہاڑ گاؤں سے بہت دور تھے جو صرف اس مسجد سے جو کہ ایک بلند ٹیلے پر واقع تھی دکھائی دیتے تھے۔ مسجد میں وہ ایک دو لوگوں سے جن کے ساتھ اس کی علیک سلیک تھی سلام دعا کے بعد نیچے اتر آیا۔ وہ اس گاؤں میں نووارد تھا اس لیۓ ابھی اس کی بہت کم لوگوں سے شناسائی تھی۔ البتہ گاؤں کے بہت سے لوگ اسے پہچانتے تھے کیونکہ وہ اس گاؤں کے ایک چھوٹے سے دواخانہ میں بطور ایک ڈسپینسر کے بھرتی ہو کر آیا تھا اس لیۓ بہت سے لوگوں کا اس سے واسطہ پڑتا تھا۔ نماز کے بعد چند لوگ وہیں کھڑے ہو کر باتیں کرنے لگے اور چند آگے سیر کے لیۓ نکل گۓ۔ وہ واپس اپنے گھر کی طرف چل دیا۔ راستے میں باری باری دو تین آدمیوں سے اس کی مڈبھیڑ ہوئی جو کسی کام سے کہیں جا رہے تھے ان میں سے ایک کو وہ جانتا تھا۔ پورے گاؤں میں یہی ایک آدمی تھا جس سے ابھی تک اس کی تھوڑی بہت دوستی ہوئی تھی کیونکہ وہ روزانہ دو مرتبہ اس کے ڈھابے سے کھانا کھاتا تھا۔ اس کا نام شیفا تھا اور گاؤں بھر میں اس کا ہوٹل 'شیفے دا ہوٹل' کے نام سے مشہور تھا۔

گھر پہنچ کر اس نے بڑے سے بستے میں سے اپنا لباس نکالا جو اس نے آج کام پر پہن کر جانا تھا۔ لباس نکال کر استری کرنے کے بعد اس نے اسے دروازے کے اوپر لٹکا دیا اور خود چارپائی پر آکر لیٹ گیا۔ ابھی ڈسپینسری جانے کے لیۓ بہت وقت تھا اس لیۓ اس نے آنکھیں بند کیں اور اطمینان سے سو گیا۔

کافی دیر بعد دھوپ کی کرنیں کھڑکی سے گزر کر اس کے چہرے پر پڑنے لگیں تو اس کی آنکھ کھل گئ۔ اس نے وقت دیکھا جو بہت کم رہ گیا تھا۔ وہ جلدی سے اٹھا اور نہا دھو کر تیار ہو گیا۔

سارا دن کام کرنے کے بعد وہ تقریباً سپہر کے وقت ہسپتال سے نکلا اور شیفے کے ہوٹل کی طرف چل دیا۔ ہوٹل پہنچا تو وہاں شیفا نہیں تھا کسی کام سے کہیں گیا ہوا تھا اس نے اپنے بیٹھنے کے لیۓ مناسب جگہ تلاس کی اور بیٹھ گیا۔ شیفے کے ملازم نے اس سے کھانے کا پوچھا اس نے کھانے کی بجاۓ صرف ایک پیالی چاۓ لانے کو کہا اور خود کرسی سے ٹیک لگا کر ٹانگیں میز کے نیچے پھیلا کر آرام سے سگریٹ پینے میں مںشغول ہو گیا۔ ہوٹل میں اس وقت رش زیادہ نہیں تھا صرف چند گنے چنے لوگ تھے ان میں سے کچھ کھانا کھانے یا چاۓ پینے آۓ تھے اور کچھ بس یونہی وقت گزاری کے لیۓ بیٹھے تھے۔ شیفے کا ہوٹل گاؤں کا واحد ہوٹل تھا اس لیۓ وہاں ہر وقت لوگوں کا تانتا بندھا رہتا تھا۔ صبح جب وہ کام شروع کرتا تھا اس وقت سے لے کر رات دیر تک گاؤں کے تین چار آدمی لازماً اس کے ہوٹل میں موجود ہوتے تھا۔

کچھ دیر میں شیفا لوٹ آیا اس نے آتے ہی اپنی بیٹھی ہوئی آواز میں پہلے اپنے ملازم کو کوئی ہدایات دیں اور پھر اسے دیکھ کر اس کی جانب لپکا اور اس کے سامنے بیٹھتے ہوۓ بولا۔ 'آ ممود (محمود) پائی! کیسا ہے چا نئ (نہیں) پی ابھی تک۔ اوۓ غفورے چا لا اپنے ممود پائی کے لیۓ اور ایک کپ میرے لیۓ بھی لا فٹا فٹ۔'

شیفا جب بولتا تھا تو یوں لگتا تھا اس کے گلے میں مستقل طور پر کوئی چیز پھنسی ہوئی ہے۔ اس کی آواز میں ایک رکاوٹ تھی ایک ہرہراہٹ تھی جو ہر وقت اس کے بولنے پر محسوس ہوتی تھی۔ جیسے کسی ریڈیو سیٹ کا سپیکر خراب ہو جاۓ تو اس کی آواز بیٹھ جاتی ہے اور یوں لگتا ہے سپیکر کے اندر کوئی چیز اٹک گئ ہے۔ شیفے کی آواز بھی بالکل اسی طرح تھی۔ اس کے گلے کا سپیکر کب خراب ہوا تھا یا یہ کہ بچپن سے ہی ایسا تھا کسی کو معلوم نہیں تھا۔ اس نے کچھ دیر تک محمود کے پاس بیٹھ کر چاۓ پی اور پھر اپنے کام میں لگ گیا۔ محمود نے بھی چاۓ پی کر ایک دو سگریٹ پیئے اور اپنے گھر کی طرف چل دیا۔

باہر نکلا تو شام ہونے والی تھی۔ کچھ لوگ جو کام کاج کے لیۓ گاؤں سے باہر جاتے تھے واپس گھروں کو لوٹ رہے تھے۔ آسمان پر پرندوں کے غول کے غول بھی قطار اندر قطار اپنے ٹھکانوں کا رخ کر رہے تھے۔ ایک وسیع میدان میں کھیلتے ہوۓ بچے اپنا کھیل ختم کر کے شور مچاتے نعرے لگاتے ہوۓ گھروں کو بھاگ نکلے۔ گھروں کے اندر سے کھانا پکانے کی آوازیں اور خوشبوئیں ایک ساتھ آرہی تھیں۔ وہ آرام سے چلتا ہوا اپنے ٹھکانے پر پہنچ گیا۔

کمرے میں پہنچ کر اس نے نہا دھو کر کپڑے بدلے اور کھڑکی کھول کر باہر جھانک کر دیکھا باہر اندھیرا ہو چکا تھا۔ وہ چارپائی پر لیٹ گیا۔ اس نے آنکھیں بند کیں تو اسے نیند آگئ۔ لیکن کچھ ہی دیر میں اس کی آنکھ کھل گئ زیادہ سے زیادہ ڈیڑھ دو گھنٹے گزرے تھے اور ابھی پہاڑ جیسی رات اس کے سامنے تھی۔ کافی دیر تک وہ چارپائی پر لیٹ کر چھت کو گھورتا رہا۔ پھر اٹھا اور کچھ دیر کمرے میں ٹہلنے کے بعد باہر گلی میں نکل آیا اپنے کمرے کو تالا لگا کر ایک طرف کو چل پڑا۔ ابھی رات اتنی زیادہ نہیں ہوئی تھی اس لیۓ گاؤں میں گھومتے پھرتے ہوۓ چند آدمی دکھائی دے رہے تھے۔ چند ایک دکانیں بھی کھلی ہوئیں تھیں۔ اس نے ایک دکان سے سگریٹ کا پیکٹ خریدا اور سیدھا شیفے کے ہوٹل کی طرف چل دیا۔

شیفے کے ہوٹل میں اس وقت بہت سے آدمی تھے۔ ان میں زیادہ تر وہ بزرگ یا بڑی عمر کے لوگ تھے جو اپنا فارغ وقت گزارنے کے لیۓ روزانہ کافی دیر تک ہوٹل میں بیٹھے رہتے تھے۔ موسمِ گرما تھا اس لیۓ بہت سے لوگ باہر کھلے میں بیٹھے تھے اس نے بھی باہر بیٹھنے کو ترجیع دی اور چاروں طرف نظر دوڑا کر دیکھا ایک کونے میں جہاں کم لوگ تھے وہ وہاں جا کر بیٹھ گیا۔ پہلے اس نے میز پر پڑے ہوۓ پانی سے ایک گلاس پانی پیا اور پھر سگریٹ سلگا لیا۔ آج دوپہر کے وقت اس نے ہسپتال میں تھوڑا سا کھانا کھایا تھا لیکن ابھی اسے بھوک بالکل بھی نہیں لگ رہی تھی۔ سگریٹ پیتے ہوۓ اس نے گردن ایک طرف گھما کر شیفے کو دیکھا جو اپنے کام میں مگن تھا۔ اس کی کام میں پھرتی اور مہارت دیکھ کر وہ کافی متاثر ہوا۔ اس کے چہرے پر موٹی سی مونچھیں تھیں جو اسے بہت پسند آئی تھیں۔ جب اسے یہاں آۓ ابھی چند دن ہوۓ تھے تو اس نے بھی شیفے کی طرح مونچھ رکھنے کا فیصلہ کیا اور کچھ دنوں تک اس نے اپنی مونچھوں کی وضع بالکل شیفے کی مونچھوں کی طرح کر لی تھی مگر اس کے باریک چہرے پر اس قسم کی لحیم و شحیم مونچھیں بالکل نہیں جچتی تھیں جیسے وہ شیفے کے چہرے پر جچتی تھیں لہذا وہ انہیں تراش کر دوبارہ اپنی پہلے والی حالت میں لے آیا۔

وہ دیر تک وہاں بیٹھا رہا۔ یہاں تک کہ لوگوں کا رش کافی کم ہو گیا اور چند گنے چنے لوگ رہ گۓ۔ جب وہ سب بھی چلے گۓ اور شیفے کے ہوٹل کے بند ہونے کا وقت ہو گیا تو وہ بھی اٹھ کر چل دیا۔ واپسی پر سارے راستے اسے کوئی بھی آدمی دکھائی نہ دیا۔ ابھی دس بجے تھے مگر اس گاؤں میں جو شہری آبادی سے کافی دور ویرانے میں آباد تھا آدھی رات گزر چکی تھی۔ چند آدمی جو ابھی تھوڑی دیر پہلے ہوٹل میں بیٹھے تھے وہ بھی گھروں میں جا گھسے تھے۔ فصلیں، کھیت ، کھلیان، کھڑکیاں، چوبارے، میدان یوں لگتا تھا ہر چیز گہری نیند سو گئ ہے۔

وہ اپنے کمرے میں پہنچا اور آتے ہی چارپائی پر ڈھیر ہو گیا۔ رات کو دو تین بار اس کی آنکھ کھلی لیکن کچھ دیر بعد وہ دوبارہ سو گیا۔ صبح جب اٹھا تو سورج سر پر چڑھ آیا تھا۔ وہ جلدی سے اٹھ کر تیار ہوا اور کام پر چل دیا۔

دن بھر کام کرنے کے بعد اس نے کچھ ضروری رسیدیں اپنے ساتھی کے حوالے کیں اور ہسپتال سے نکل کر حسبِ معمول شیفے کے ہوٹل کی طرف چل دیا۔ آج اس نے ہسپتال میں کھانا نہیں کھایا تھا اس لیۓ اس نے ہوٹل میں کھانا کھایا اور پچھلے پہر وہاں سے نکل آیا۔ جب وہ باہر نکلا تو تیز ہوا چل رہی تھی اور آسمان پر کہیں کہیں بادلوں کے ٹکڑے نمودار ہونا شروع ہو گۓ تھے۔ وہ جلدی آگیا تھا اس لیۓ جب میدان کے پاس پہنچا تو بچے ابھی کھیل رہے تھے وہ کھڑے ہو کر ان کا کھیل دیکھنے لگ گیا۔ کافی دیر تک وہ بڑے انہماک سے ان کا کھیل دیکھتا رہا۔ ابھی وہ آگے بڑھنے کے بارے میں سوچ ہی رہا تھا کہ تیز آندھی آئی اور گردوغبار اڑنے لگی۔ آسمان گھنے سیاہ بادلوں سے بھر گیا۔ دھول سے بچنے کے لیۓ اس نے آنکھوں کے آگے اپنا بازو رکھ لیا اور قدم آگے بڑھاۓ لیکن ابھی دو چار قدم چلا تھا کہ تیز بارش ہونے لگی۔ وہ بھیگنے سے بچنے کے لیۓ کوئی پناہ گاہ تلاش کرنے لگا مگر وہاں دور دور تک کھلے کھیت اور وسیع و عریض میدان کے سوا اور کچھ نہیں تھا۔ میدان میں کھیلتے ہوۓ بچوں نے اپنے کھیل کا سامان اٹھایا اور بھاگ کھڑے ہوۓ۔ وہ بھی ان کے ساتھ بھاگا مگر جلد رک گیا۔ بارش اتنی تیز تھی کہ وہ ابھی سے پوری طرح بھیگ گیا تھا اس لیۓ بھاگنے کا کوئی فائدہ نہیں تھا۔ بچے شور مچاتے اور شرارتیں کرتے آگے بڑھ گۓ اور وہ آرام سے ان کے پیچھے چلنے لگا۔

کچھ دور جا کر وہ گھر جانے والے راستے کی طرف جانے کی بجاۓ دوسری جانب ایک بڑی سی پگڈنڈی پر اتر گیا اور کھیتوں کے بیچ میں سے گزرتا ہوا نہر کی طرف نکل گیا۔ ٹھنڈی اور تیز ہوا کے تھپیڑوں میں درختوں کی شاخیں اور پتے گنگنا رہے تھے اور فصلیں جھوم رہی تھیں۔ نہر کے اوپر ایک پرندہ آندھی اور بارش سے لڑتا ہوا ہوا میں بہے چلا جا رہا تھا۔ ایک آدمی سائیکل پر تیز تیز پیڈل گھماتا ہوا اس کے قریب سے گزر گیا۔ وہ نہر کے کنارے ٹہلتے ہوۓ کافی دور تک گیا اور پھر گھوم کر دوسری جانب چل دیا۔ ایک لمبا چکر کاٹ کر وہ گاؤں کے عقب سے گاؤں میں داخل ہوا اور اپنے گھر کی راہ لی۔

اگلے کئ دنوں تک اس کے معمول میں کوئی خاطر خواہ فرق نہیں آیا تھا۔ لیکن آہستہ آہستہ گاؤں کے دیگر افراد سے اس کی شناسائی ہونے لگی تھی۔ کچھ عرصے بعد اس کی ملاقات ایک لڑکے جبار سے ہوئی جو فوراً دوستی میں بدل گئ۔ وہ تقریباً ہر روز رات کو جب وہ شیفے کے ہوٹل سے کھانا کھا کر لوٹتا تو راستے میں اس کے پاس کچھ دیر ٹھہر جاتا۔ جبار کا اپنا ایک چھوٹا سا کارخانہ تھا جس میں وہ اور اس کا باپ دن بھر لکڑی کی کرسیاں میز بنایا کرتے تھے۔ ان میں سے کچھ مال ان کا اپنے گاؤں میں بک جاتا تھا اور کچھ وہ آس پاس کے دیہات میں بیچ دیتے تھے۔ دن کے وقت دونوں باپ بیٹا کام کرتے تھے جبکہ شام کو اس کا باپ گھر چلا جایا کرتا تھا اور جبار اکیلا کارخانہ سنبھالتا تھا۔

شام ہو گئ تھی وہ شیفے کے ہوٹل سے نکلا اور جبار کے گھر کی طرف چل دیا۔ ایک بڑی گلی عبور کرنے کے بعد وہ مڑا اور ایک چھوٹے سے احاطے کے بیرونی دروازے میں داخل ہوا۔ جیسے ہی اس نے قدم اندر رکھا ایک لڑکی اندر سے تقریباً بھاگتی ہوئی آئی اور اس کے قریب پہنچ کر ٹھٹک گئ۔ اس نے اپنے دوپٹے کے پلو سے اپنا چہرا ڈھانپا اور دروازے سے باہر نکل گئ۔ وہ چند لمحے خیرت زدہ وہیں کھڑا رہا پھر اندر احاطے میں چلا گیا جہاں سے وہ لڑکی نکل کر آئی تھی۔ اندر داخل ہوا تو جبار رندے سے کسی لکڑی کو چھیلنے میں مصروف تھا۔ اس نے اک نظر اٹھا کر محمود کو دیکھا اور بولا۔ ' آگۓ۔ آجا بیٹھ جا۔ چا پیۓ گا! یہ پڑی ہوئی ہے کپ میں ڈال کے پی لے۔' اس نے ایک طرف اشارہ کرتے ہوۓ کہا جہاں ایک کرسی کے اوپر تھرمس پڑا ہوا تھا۔ محمود نے کوئی جواب نہ دیا اور خاموشی سے ایک طرف بیٹھ گیا۔ وہاں اردگرد ہر جگہ لکڑی کا برادہ بکھرا پڑا تھا اور لکڑی کی مخصوص قسم کی ہلکی سی بو پھیلی تھی۔

ایک بات تو بتا جبارے؟' محمود کپ میں چاۓ ڈالتے ہوۓ بولا۔

!ہاں پوچھو'

یہ لڑکی کون ہے جو ابھی یہاں سے گئ ہے۔'

جبار نے اس کی طرف نظر اٹھا کر دیکھا پھر ہنستے ہوۓ بولا۔ 'تم نے دیکھ لیا۔ چل بتاتا ہوں پر بتائیں نہ کسی کو۔'

نہیں بتاتا تو بتا تو سہی کون ہے۔'

یار یہ لڑکی مجھ سے ملنے آئی تھی۔ تین چار سال ہو گۓ ہیں ہمیں اس طرح ملتے ہوۓ۔ جب کبھی موقع ملتا ہے ہم چھپ کر ملاقات کر لیتے ہیں۔ میں نے اپنے ابے سے اس کے ساتھ ویاہ کی بات کی ہے پر ابا نہیں مانتا۔'

کیوں! وہ کیوں نہیں مانتا؟' محمود نے چاۓ کا گھونٹ بھر کر پوچھا۔

وہ کہتا ہے اوبڑوں میں نہیں کرنا۔ کرنا ہے تو اپنی برادری میں کرنا ہے۔' اس نے اپنے کان کی پشت میں اڑسی ہوئی پینسل نکالی اور پیمائس کے آلے سے لکڑی کی پیمائش کرکے نشان لگا کر کہا۔

میں نے بھی سوچ لیا ہے۔ میں نے اک دن اسے بھگا کر لے جانا ہے'۔

لڑکی اس کے لیۓ تیار ہے؟' محمود نے خیرت سے پوچھا۔

ہاں وہ بھی تیار ہے۔' جبار نے ایک اور پیمائش کے بعد نشان لگایا اور لکڑی کو آری سے تھوڑا سا کاٹ کر بولا۔ 'بس کسی دن ہم نے کوئی چنگا سا موقع دیکھ کر فرار ہو جانا ہے۔

محمود نے اس کی بات کا کوئی جواب نہ دیا اور خاموشی سے چاۓ پینے میں مصروف ہو گیا۔ دونوں اس وقت جس جگہ موجود تھے وہ بڑا سا حال نما کمرا تھا جس میں جلتا ہوا ایک بلب پورے کمرے کو روشنی پہنچانے کے لیۓ ناکافی تھا لیکن جبار عین بلب کے نیچے کام کر رہا تھا اس لیۓ اسے کوئی دقت پیش نہیں آرہی تھی۔ اس کے عقب میں کچھ فاصلے پر جہاں قدرے اندھیرا تھا چند زیرِ تعمیر کرسیاں میز پڑے تھے۔ کمرے کی چھت بہت اونچی تھی جس کے ساتھ ایک بڑا سا روشن دان آدھا کھلا اور آدھا بند تھا۔ دونوں کبھی باتیں کرنے لگتے تھے اور کبھی یوں خاموش ہو جاتے جیسے کمرے میں کوئی موجود نہ ہو۔ وہ بہت دیر تک جبار کے پاس بیٹھا رہا پھر جب جبار کے کام بند کرنے کا وقت ہوا تو دونوں اٹھ کر اپنے اپنے گھر آگۓ۔

اگلی صبح اس نے اپنے معمول کے مطابق ڈسپینسری میں کام کیا اور پھر شیفے کے ہوٹل سے دوپہر کا کھانا کھا کر گھر آکر سو گیا۔ جب اس کی آنکھ کھلی تو شام ہو چکی تھی۔ وہ منہ ہاتھ دھو کر باہر نکل آیا اور ہوٹل کی طرف چل دیا۔ راستے میں اسے جبار مل گیا وہ کچھ پریشان دکھائی دے رہا تھا۔ جب اس نے اس سے پوچھا کہ کیا ہوا ہے تو اس نے کہا۔ 'میں تمہاری طرف ہی آرہا تھا تم سے ضروری بات کرنی تھی پر یہاں نہیں کر سکتا۔ چلو احاطے میں چلتے ہیں ابا گھر چلا گیا ہو گا وہاں چل کر بات کرتے ہیں۔'

وہ دونوں احاطے کی طرف چل پڑے۔ جب وہ احاطے میں پہنچے تو جبار کا باپ گھر جا چکا تھا۔ وہاں پہنچ کر جبار نے اس سے کہا۔ 'ہم نے سوچ لیا ہے ہم کل یہاں سے بھاگ رہے ہیں۔'

اتنی جلدی کیا پڑ گئ ہے۔ ہوا کیا ہے؟' محمود نے خیرت سے پوچھا۔

جلدی پڑ گئ ہے کیونکہ پتہ چلا ہے اس کا باپ ایک دو دن تک اس کی کہیں بات پکی کر رہا ہے۔ اس لیۓ ہم کل ہی بھاگ کر شادی کر لیں گے۔' جبار نے محمود کے ہاتھ سے سگریٹ لے کر کش لگایا جو اس نے احاطے میں بیٹھتے ہوۓ سلگا لیا تھا۔

پھر بھی یار پہلے اچھی طرح سوچ لے۔ تو لڑکی کو بول کہ اپنے باپ کو تمہارے بارے میں بتاۓ۔ ہو سکتا وہ مان جاۓ۔'

وہ نہیں مانے گا۔' جبار ایک لمبا کش لگا کر بولا۔ 'وہ کہتا ہے اس کی شادی وہیں ہو گی جہاں وہ چاہتا ہے۔ اور پھر میرا باپ بھی تو نہیں مان رہا۔ تم بس بتاؤ تم بھاگنے میں میری مدد کرو گے؟'

'ہاں وہ تو کردوں گا پر۔۔۔'

تو پھر ٹھیک ہے۔' جبار اس کی بات کاٹ کر بولا۔ 'کل رات تم ہمیں لاری تک چھوڑ کر آؤ گے۔'

وہ تو ٹھیک ہے پر وہاں تک جائیں گے کیسے؟ اگر تمہارا موٹرسائیکل لے کر جائیں گے تو واپس کرتے ہوۓ وہ تمہارا پوچھیں گے نہیں؟'

ہاں یہ تو ہے۔ پھر کسی اور سے تھوڑی دیر کے لیۓ موٹر سائیکل مانگ لیں؟ کیا خیال ہے؟' جبار کچھ سوچ کر بولا۔

اس سے بھی سیدھا شک مجھ پر جاۓ گا جب اگلے دن تم غائب ہو گے تو سب یہی کہیں گے کہ میں تم لوگوں کو چھوڑ کر آیا تھا۔ پھر میں انہیں کیا جواب دوں گا۔'

تو پھر کیا کریں؟' جبار کچھ پریشان ہو کر بولا۔ اس نے سگریٹ کا کش لگا کر سگریٹ محمود کو پکڑایا اور خود کمرے میں ٹہلنا شروع کر دیا۔ کچھ دیر سوچ کر دوبارہ بولا۔ 'پھر ایک ہی طریقہ ہے؟'

کیا؟'

ہم چل کر وہاں تک جائیں گے۔'

اتنا لمبا راستہ چل کر کیسے جائیں گے؟' محمود نے پوچھا۔

جانا تو پڑے گا اور کوئی طریقہ نہیں۔ ہم رات کے اندھیرے میں نکلیں گے تم ہمیں لاری میں بٹھا کر واپس آجانا اور چپ چاپ اپنے گھر جا کر سو جانا۔ کسی کو بھی کچھ پتہ نہیں چلے گا۔ بس گاؤں سے نکلتے ہوۓ اختیاط کرنی پڑے گی اس وقت ہمیں کوئی دیکھ نہ لے۔'

محمود نے اس کی بات کا کوئی جواب نہ دیا اور کسی سوچ میں پڑ گیا۔

کیا سوچ رہے ہو ہمیں چھوڑ کر آؤ گے کہ۔۔۔' جبار نے مشکوک نظروں سے اسے دیکھتے ہوۓ پوچھا۔

ہاں یار چھوڑ آؤں گا۔' محمود نے کہا۔ 'میں کل شام کو اسی طرح تمہارے پاس آؤں گا جس طرح روز آتا ہوں اور اپنے وقت پر گھر چلا جاؤں گا تاکہ کسی کو شک نہ ہو۔ پھر میں رات کو دوبارہ آؤں گا اور ہم اکٹھے یہاں سے نکل جائیں گے۔'

نہیں یہاں سے نہیں نکلیں گے بلکہ نہر کی طرف سے جائیں گے وہاں رات کے وقت کوئی نہیں ہوتا۔ میں لڑکی کو لے کر نہر کے پاس آجاؤں گا تم وہاں ہمارا انتظار کرنا۔'

یہ ٹھیک ہے۔ اس طرح مجھے بھی دوبارہ یہاں نہیں آنے پڑے گا۔ یہاں آنا زیادہ خطرناک ہے کوئی بھی مجھے دیکھ سکتا ہے۔' محمود نے اس سے اتفاق کرتے ہوۓ کہا۔

دونوں جب وقت، جگہ اور دیگر تفصیلات طے کر چکے تو اٹھ کر اپنے اپنے گھر چلے گۓ۔ وہ رات گزر گئ۔ اگلا دن بھی گزر گیا۔ شام آئی تو محمود شیفے کے ہوٹل سے نکل کر جبار کی طرف چل دیا۔ راستے میں دو تین آدمیوں نے جو اسے پہچانتے تھے جبار کی طرف جاتے ہوۓ دیکھا لیکن کوئی پریشانی والی بات نہیں تھی کیونکہ اس وقت وہ روزانہ یہاں سے گزر کر جبار کی طرف جایا کرتا تھا۔ جب وہ جبار کے پاس پہنچا تو جبار پہلے سے اس کا بے صبری اور بے چینی سے انتظار کر رہا تھا۔

دونوں کچھ دیر وہاں ٹھہرے اور پھر اپنے طے شدہ منصوبے کے مطابق اٹھ کر گھر چلے گۓ۔ گھر آکر محمود اپنی چارپائی پر لیٹ کر مقررہ وقت کا انتظار کرنے لگا۔ جب وقت قریب آیا تو وہ اٹھ کر باہر نکل آیا بڑے آرام سے اس نے دروازے کو تالا لگایا اور بہت آہستگی کے ساتھ گلی سے نکلا۔ موسم بدل چکا تھا رات کے وقت سردی کافی بڑھ گئ تھی اس لیۓ اس وقت گلیاں ویران اور سنسان پڑی تھیں۔ پورا گاؤں گہری نیند سویا تھا مگر وہ پھر بھی اردگرد دیکھ کر بڑی اختیاط سے چل رہا تھا۔ جب وہ گلیوں سے نکل کر کھلے میں آگیا تو اس نے سکھ کا سانس لیا اور اپنی رفتار تیز کردی۔ کچھ دور تک چلنے کے بعد اسے بھینسوں کا ایک باڑہ نظر آیا وہ وہیں رک گیا اور ذرا فاصلے سے ایک طرف ہٹ کر اختیاط سے چلنے لگا۔ وہ نہیں چاہتا تھا باڑے میں موجود کوئی آدمی جو ان بھینسوں کی رکھوالی پر معمور تھا اسے دیکھ لے اس لیۓ وہ آہستہ آہستہ چلنے لگا تاکہ پاؤں کی حرکت سے آواز پیدا نہ ہو۔ باڑہ عبور کرنے کے بعد اس نے اپنی رفتار دوبارہ بڑھا دی۔ وہ جتنی جلدی ممکن ہو نہر تک پہنچ جانا چاہتا تھا۔ چند قدم چل کر اسے کوئی آہٹ محسوس ہوئی وہ وہیں رک گیا اور درخت کی اوٹ لے کر آواز کی سمت کا تعین کرنے لگا۔ مگر وہاں کوئی نہیں تھا۔ چند لمحے انتظار کے بعد وہ آگے چل پڑا اور کچھ دیر میں نہر کے پاس پہنچ گیا۔ ابھی تک جبار اور وہ لڑکی یہاں نہیں پہنچے تھے۔ وہ ایک درخت سے ٹیک لگا کر کھڑا ہو گیا۔اس نے نہر میں جھانک کر دیکھا چاند نہر میں اتر آیا تھا اور بہتے پانی پر رقصاں تھا۔ پانی کا ہلکا ہلکا شور سنسان رات کی گہری خاموشی میں سنائی دے رہا تھا۔

تھوڑی دیر انتظار کرنے کے بعد اسے دور سے دو ساۓ اپنی طرف آتے ہوۓ دکھائی دیۓ۔ پہلے تو اس نے سمجھا جبار اور وہ لڑکی ہے مگر جب ساۓ تھوڑا اور قریب آۓ تو ان کی چال سے اسے اندازہ ہوا کہ دونوں مرد ہیں۔ وہ انہیں بڑے غور سے دیکھنے لگا جب وہ اتنے قریب آگۓ جہاں سے وہ انہیں آسانی سے پہچان سکتا تھا تو وہ فوراً ایک طرف ہٹا اور درختوں کے پیچھے جاکر چھپ گیا۔ وہ دونوں آدمی تیز تیز قدم اٹھاتے ہوۓ باتیں کرتے آگے نکل گۓ۔ ان کی باتوں سے اسے بلکل بھی معلوم نہ ہوا کہ وہ دونوں کون تھے اور رات کے اس پہر کہاں جا رہے تھے۔ اسے جبار اور اس لڑکی کے بارے میں تشویش ہونے لگی۔ اسے یہ خیال آرہا تھا کہیں وہ پکڑے نہ گۓ ہوں۔ وہ انہی وسوسوں میں الجھا تھا جب اسی سمت سے جس سمت سے وہ دونوں آدمی آۓ تھے دو اور ساۓ آتے دکھائی دیۓ۔ ابھی وہ بہت دور تھے اندھیرے میں ان کی چال سے کچھ بھی اندازہ لگانا مشکل تھا۔ مگر جب وہ اور قریب آگۓ تو اس نے جبار اور اس لڑکی کو دور ہی سے پہچان لیا۔ پاس آکر پوچھنے پر جبار نے اسے بتایا کہ راستے میں دو آدمیوں کی وجہ سے وہ ایک جگہ چھپ گۓ تھے اس لیۓ انہیں دیر ہو گئ۔ محمود نے ایک اچٹتی سی نگاہ لڑکی پر ڈالی جس نے آج بھی اس دن کی طرح اپنا چہرہ دوپٹے کے پلو سے ڈھانپ رکھا تھا۔ وہ کچھ گبھرائی ہوئی لگ رہی تھی۔ محمود نے انہیں جلدی سے چلنے کو کہا اور کہا کہ وہ دو آدمی جو ابھی یہاں سے گۓ ہیں ممکن ہے واپس بھی آئیں اس لیۓ انہیں دھیان رکھنا ہو گا۔

تینوں بڑی تیزی سے چلنے لگے ان کی کوشش تھی جتنی جلدی ہو سکے وہ گاؤں سے باہر نکل جائیں۔ گاؤں کے آخر میں ایک اور بھینسوں کا باڑہ تھا جب وہ اس کے قریب پہنچے تو اندر سے کسی کے قدموں کی چاپ سنائی دی۔ محمود آگے آگے چل رہا تھا جبکہ جبار اور وہ لڑکی پیچھے تھے۔ محمود آہٹ سن کر رک گیا وہ دونوں بھی وہیں رک گۓ۔ محمود نے انہیں خاموش رہنے کا اشارہ کیا۔ آوازیں جب قریب ہوئیں تو وہ تینوں سڑک سے ہٹ کر جھاڑیوں میں چھپ گۓ۔ دو آدمی باتیں کرتے ہوۓ باڑے سے نکل رہے تھے۔ قدموں کی آوازوں کے ساتھ ان کی اپنی آوازیں بھی شامل ہو گئ تھیں۔ باہر آکر وہ اس جانب چل دیۓ جس جانب گاؤں تھا۔ اندھیرا اس قدر تھا کہ دونوں آدمی پہچان میں نہیں آرہے تھے ان کا چہرا بالکل دھندلا سا دکھائی دے رہا تھا۔ ان میں سے ایک آدمی نے ہاتھ میں کوئی چیز پکڑ رکھی تھی۔ شاید یہ دونوں وہی تھے جو کچھ دیر پہلے یہاں سے گزرے تھے۔ وہ آگے چلے گۓ تو ان کے جانے کے بعد وہ تینوں کچھ دیر تک وہیں ٹھہرے رہے جب انہیں تسلی ہو گئ کہ باڑے میں سے کوئی اور آدمی باہر نہیں آنے والا تو وہ جھاڑیوں سے نکل آۓ اور مختاط انداز سے چلنے لگے۔ باڑے کے سامنے سے گزر کر ابھی وہ دوسری دیوار کے پاس پہنچے تھے کہ پیچھے سے کسی کی آواز آئی۔ کسی نے بلند آواز سے پکارا 'کون اے باہر' وہ تینوں جلدی سے آگے بڑھے اور سڑک سے اتر کر باڑے کی دیوار کی اوٹ میں چھپ گۓ۔ وہ آدمی باہر نکل کر سڑک پر آیا اس کے ہاتھ میں ٹارچ تھی اس نے ٹارچ کی روشنی اردگرد پھینک کر دیکھا اور دوبارہ بلند آواز سے پکارا۔ 'کون یہاں سے گزرا ہے۔ وہاں کون ہے؟' وہ تینوں چپ چاپ اپنی جگہ پر چھپے رہے۔ لڑکی کافی گبھرا گئ تھی جبار نے اسے تسلی دی اور اشارے سے اسے کسی بھی قسم کی حرکت کرنے سے منع کیا۔ وہ آدمی آگے بڑھا اور گاؤں سے باہر جانے والے راستے کی طرف چند قدم چل کر اس نے سڑک کے دونوں جانب روشنی پھینک کر دیکھا۔ جب اسے کچھ بھی دکھائی نہ دیا تو وہ اسے اپنا وہم سمجھ کر واپس اندر چلا گیا۔ کچھ دیر بعد محمود نے ان دونوں کو وہیں رہنے کو کہا اور خود آہستہ آہستہ آگے بڑھا۔ سڑک پر پہنچ کر اس نے اردگرد دیکھا کوئی نہیں تھا۔ اس نے سرگوشی کے انداز میں ان دونوں کو باہر نکل آنے کو کہا۔

تینوں دوبارہ اپنے سفر پر روانہ ہوۓ۔ وہ کافی تیز چل رہے تھے تاکہ جلد از جلد گاؤں سے دور نکل جائیں۔ کچھ دور جاکر لڑکی رک گئ اور کہا کہ وہ مزید نہیں چل سکتی۔ وہ تینوں تھوڑی دیر سستانے کے لیۓ وہیں ٹھہر گۓ۔ سڑک کے ایک جانب دو بڑے سے پتھر تھے جبار اور وہ لڑکی پتھروں پر بیٹھ گۓ۔ محمود چند قدم آگے بڑھا وہاں ایک چھوٹی سی پلیا تھی پلیا کے دونوں اطراف چھوٹی چھوٹی دیواریں تھیں محمود ایک دیوار پر جا کر بیٹھ گیا اور جیب سے سگریٹ نکال کر پینے لگا۔ دونوں جانب تاحدِ نگاہ پھیلے سر سبز کھیت تھے۔ اس چھوٹے سے پل کے نیچے کوئی ندی، نالا یا نہر نہیں بہہ رہی تھی بلکہ اس کے نیچے نکاسئ آب کے لیۓ چھوٹا سا راستہ بنایا گیا تھا جس کا مقصد سڑک کے دونوں جانب والے کھیتوں کو سیراب کرنا تھا۔ محمود نے اک نظر جبار اور اس لڑکی کی طرف دیکھا جو اس سے کچھ فاصلے پر بیٹھے ہوۓ تھے پھر سامنے کھیتوں کی طرف دیکھنے لگا۔ چاند بادلوں کی اوٹ سے نمودار ہوا اور اردگرد کا سارا علاقہ جگمگا اٹھا۔ ہرے بھرے کھیت سنہری چاندنی میں چمکنے لگے۔ ان کے اوپر جگنو جلتے بجھتے اڑتے پھر رہے تھے۔ چاولوں کی فصل کی مخصوص خوشبو ہر سو پھیلی تھی۔

محمود نے سگریٹ کا آخری کش لگا کر سگریٹ پھینکا اور جبار کو چلنے کے لیۓ کہا وہ دونوں اٹھ کھڑے ہوۓ۔ اس بار وہ زیادہ تیز نہیں چل رہے تھے وہ گاؤں سے کافی دور آچکے تھے اور یہ سارا علاقہ سنسان اور ویران تھا کہیں کوئی ایک مکان تک نہیں تھا۔ اس لیۓ وہ کافی حد تک محفوظ تھے۔ لیکن وہ اچھی طرح جانتے تھے جب تک وہ لاری میں بیٹھ کر نکل نہیں جاتے تب تک خطرہ ان کے سروں پر منڈلا رہا تھا۔ اس لیۓ ان کی رفتار اس قدر دھیمی بھی نہیں تھی۔

راستے میں ایک بار پھر وہ ایک دو منٹ کے لیۓ ٹھہرے اور سانس بحال کرکے دوبارہ چل پڑے۔ بالآخر وہ بڑی سڑک پر پہنچ گۓ جہاں گاڑیاں آکر رکتی تھیں۔ اب انہیں گاڑی کا انتظار تھا۔ ان کا دھیان گاؤں کی طرف سے آنے والے راستے پر بھی تھا کیونکہ کسی بھی وقت لوگ یہاں پہنچ سکتے تھے۔ وہ سڑک کے کنارے اس جگہ کھڑے تھے جہاں اندھیرا تھا اور دور سے صاف دکھائی نہیں دیتا تھا۔ آس پاس اور کوئی بھی نہیں تھا۔ کبھی کبھار سڑک پر وقفے وقفے سے کوئی گاڑی گزر جاتی تھی۔ تقریباً پندرہ بیس منٹ کے بعد گاڑی آگئ۔ محمود نے جلدی سے انہیں گاڑی میں بٹھایا اور روانہ کردیا۔

ان کے جانے کے بعد وہ پلٹا اور واپس گاؤں کی طرف چل دیا۔ ایک مرحلہ سر ہو چکا تھا مگر ایک مرحلہ ابھی باقی تھا۔ ابھی اسے اپنے گھر پہنچنا تھا۔ اگر جبار اور اس لڑکی کے گھر والوں یا گاؤں میں سے کوئی بھی آدمی اسے اس وقت دیکھ لے تو وہ سب یقیناً یہی سمجھیں گے کہ جبار اور لڑکی کو بھگانے میں اس نے ان کی مدد کی ہے۔ اس لیۓ وہ تیز تیز چلنے لگا تاکہ گاؤں والوں کو ان کا پتہ چلنے سے پہلے وہ گھر پہنچ جاۓ۔ اس نے سارا راستہ بڑی جلدی اور آرام سے طے کر لیا لیکن گاؤں میں داخل ہونے کے بعد وہ بڑی اختیاط سے چلنے لگا۔ نہر پار کرنے کے بعد وہ بہت آہستگی سے چاروں طرف دیکھ کر چل رہا تھا۔ جب وہ آبادی کے قریب آیا تو وہاں مکمل طور پر سکوت تھا اس کا مطلب تھا گاؤں والوں کو ابھی تک ان کی خبر نہیں ہوئی تھی۔ وہ کسی پریشانی کے بغیر اپنے گھر پہنچ گیا۔

بستر پر لیٹ کر وہ تھوڑی دیر پہلے کی ساری واردات پر غور کرنے لگا۔ شروع سے لے کر آخر تک تمام مناظر اس کی آنکھوں کے سامنے چلنے لگے۔ رات آدھی سے زیادہ بیت چکی تھی اور وہ بہت تھک چکا تھا اسے لیٹے لیٹے اسے نیند آگئ۔ صبح جب اس کی آنکھ کھلی تو چند لمحوں تک اسے بالکل ہوش نہ تھا کہ وہ کہاں ہے۔ آہستہ آہستہ جب وہ مکمل طور پر جاگ گیا تو اس نے وقت دیکھا دن کافی نکل آیا تھا۔ وہ اٹھ کر بیٹھ گیا۔ آج ہسپتال سے چھٹی تھی اس لیۓ اسے دیر ہو جانے کی فکر نہیں تھی۔ وہ دوبارہ لیٹ گیا۔ ابھی وہ لیٹا ہی تھا کہ اچانک دروازے پر دستک ہوئی وہ پہلے تو خیران ہوا اس وقت اسے یہاں کون ملنے آیا ہے پھر اسے رات کے واقعہ کا خیال آیا اس نے سوچا یقیناً جبار لوگوں کے گھر میں سے کوئی ہو گا۔ وہ جانتا تھا صبح جب جبار اور وہ لڑکی غائب ملیں گے تو اس سے ضرور کوئی نہ کوئی پوچھنے آۓ گا۔ دستک دوبارہ ہوئی تو وہ جلدی سے اٹھا اور دروازہ کھول دیا۔ باہر دو لڑکے تھے ان میں سے ایک جبار کا چھوٹا بھائی تھا محمود اسے پہچانتا تھا۔ محمود نے جب اسے دیکھا تو پوچھا 'تم اس وقت یہاں! خیر ہے؟'

وہ محمود پائی رات سے پائی جبار نہیں مل رہا پتہ نہیں کہاں گیا ہے آپ کو تو بتا کر نہیں گیا؟'

نہیں مل رہا؟' محمود خیرت سے بولا۔ مجھے تو اس نے کچھ نہیں بتایا شام کو میں اس کے پاس کتنی دیر بیٹھ کر آیا ہوں۔ بلکہ احاطے سے ہم دونوں اکٹھے نکلے تھے۔'

جی اس کے بعد وہ گھر تو آیا تھا پر رات کو جب سب سو رہے تھے تو کہیں نکل گیا۔' لڑکا بولا۔

کہاں جا سکتا ہے یہیں ہو گا۔ نہر کی طرف جا کر دیکھا ہے؟'

ہر جگہ دیکھ لیا پورے پنڈ میں کہیں نہیں ملا۔'

یہ کیسے ہو سکتا ہے عجیب بات ہے۔' محمود کچھ سوچنے لگا۔

آپ کو ابا نے بولایا ہے انہوں نے جلدی آکر ملنے کو کہا ہے۔' لڑکا بولا۔

اچھا ٹھیک ہے تم لوگ جاؤ میں تھوڑی دیر تک آتا ہوں '۔

لڑکے چلے گۓ تو محمود نے دروازہ بند کیا اور دوبارہ چارپائی پر آکر لیٹ گیا۔ اسے معلوم تھا اس سے پوچھ داچھ ضرور ہوگی اس لیۓ وہ پہلے سے تیار تھا۔ تھوڑی دیر لیٹنے کے بعد وہ اٹھ کھڑا ہوا اور نہا دھو کر تیار ہو گیا۔

جب وہ جبار لوگوں کی گلی میں داخل ہوا تو گلی میں کافی لوگ کھڑے تھے۔ اندازہ لگانا مشکل نہیں تھا کہ لوگ اس وقت یہاں کیوں کھڑے تھے۔ وہ خاموشی سے چلتا ہوا جبار لوگوں کے گھر کے پاس پہنچا تو اسے جبار کا چھوٹا بھائی جو ابھی کچھ دیر پہلے اس سے مل کر گیا تھا اسے باہر گلی میں مل گیا۔ وہ اسے دیکھ کر بولا۔ 'ابو آپ کا ہی اتنظار کر رہے تھے۔' وہ اسے اندر بیٹھک میں لے گیا۔ وہاں پہلے سے دو تین بڑی عمر کے آدمی جبار کے والد کے ساتھ بیٹھے تھے۔ سلام دعا کے بعد جبار کے والد نے اس سے سرگوشی کے انداز میں پوچھا۔ 'سچ سچ بتاؤ تمہیں کچھ بھی نہیں پتہ جبار کہاں گیا ہے؟'

نہیں مجھے تو اس نے بالکل کچھ بھی نہیں بتایا میں تو خود خیران ہوں ابھی رات کو ہم اکٹھے احاطے سے نکلے تھے اس کے بعد ہم دونوں اپنے اپنے گھر چلے گۓ۔' محمود نے جواب دیا۔

اس نے تمہیں کسی لڑکی کے بارے میں بھی کچھ نہیں بتایا؟' اس نے دوبارہ ایک سوال کیا۔

لڑکی؟ محمود خیرت سے بولا۔ 'کون لڑکی؟'

وہ گاؤں کی ایک لڑکی کو لے بھاگا ہے۔' جبار کے والد نے کہا۔ 'وہ اس سے شادی کرنا چاہتا تھا لیکن ہم میں سے کوئی راضی نہیں تھا۔ مجھے لگتا ہے وہ دونوں ساتھ میں بھاگیں ہیں کیونکہ وہ لڑکی بھی غائب ہے۔'

ایک لڑکی کا ذکر اس نے کیا تو تھا جس سے وہ شادی کرنا چاہتا تھا۔ لیکن۔۔۔' محمود کچھ سوچ کر بولا۔ 'بھاگنے کے بارے میں اس نے کچھ نہیں بتایا۔'

جبار کے والد نے اس سے چند مزید سوال کیۓ پھر خاموش ہو گۓ۔ محمود کچھ دیر تک ان کے پاس بیٹھا رہا پھر اٹھ کر چلا آیا۔ اگلے دن پولیس کو بھی اطلاع کر دی گئ۔ پولیس نے گاؤں میں تفتیش شروع کی تو جس جس سے بھی جبار کا تعلق تھا سب کو بلا لیا۔ محمود کو بھی بلا بھیجا۔ وہ ان سے ملنے جبار کے گھر گیا انسپیکٹر اور اس کے دو ساتھی جبار لوگوں کی گلی کے باہر ایک چھوٹے سے میدان میں کرسیوں پر بیٹھے تھے۔ ان کے سامنے دو چارپائیوں پر جبار کا والد اس کے رشتے دار اور گاؤں کے دوسرے بزرگ بیٹھے تھے۔ ان میں لڑکی کا والد اور رشتے دار بھی تھے۔ چند لوگ ان کے پیچھے نیم دائرے کی شکل میں کھڑے تھے۔ جبار جب وہاں پہنچا تو انسپیکٹر اور اس کے ساتھیوں نے اسے ایسے دیکھا جیسے وہ پہلے سے جانتے ہوں کہ مجرم یہی ہے اور یہ کہ جیسے وارادات کے وقت وہ وہاں موجود تھے۔ انہوں نے محمود سے چند سوالات کیۓ جس کا جواب اس نے بڑے اطمینان سے دیا۔ پولیس والے کچھ دیگر لوگوں سے پوچھ داچھ کرنے کے بعد چلے گۓ۔ محمود بھی تھوڑی دیر جبار کے والد کے پاس بیٹھا پھر واپس چلا آیا۔

اگلے کئ دنوں تک گاؤں بھر میں جبار اور اس لڑکی کے بارے میں چہ میگوئیاں ہوتی رہیں۔ شیفے کے ہوٹل میں، میدانوں میں چوپالوں میں ہر جگہ یہی باتیں تھیں۔ بزرگ انہیں لعن طعن کرنے اور توبہ استغفار کرنے میں مشغول رہے جبکہ جوان لڑکے لڑکیوں کے لیۓ وہ ایک مزاح اور شغل میلے کا موضوع بن گیا تھا۔ وہ جہاں بھی اکٹھے ہوتے اسے ہنسی مذاق کے طور پر لیتے تھے۔ چند جوان اپنے دوستوں کو جو خود بھی کسی نہ کسی سے شادی کا ارادہ رکھتے تھے انہیں کبھی مذاق کے طور پر اور کبھی سنجیدگی سے اسی قسم کی حرکت کرنے کا مشورہ دیتے تھے۔ ہسپتال میں محمود کے ساتھی بھی اکثر اس موضوع پر بات کرتے محمود کبھی جواب دیتا مگر زیادہ تر خاموشی سے سنتا رہتا اور مسکراتا رہتا تھا۔ کچھ لوگوں کو اس پر شک تھا وہ سمجھتے تھے ہو نہ ہو محمود نے جبار اور اس لڑکی کی بھاگنے میں مدد کی ہے۔ جب انہوں نے دیکھا کہ محمود اس موضوع پر بات کرنے سے کتراتا ہے تو وہ اور بھی زیادہ شک کرنے لگے۔ اس لیۓ محمود نے اس موضوع پر تھوڑا بہت حصہ لینا شروع کر دیا تھا اور یہ ظاہر کرنے لگا تھا کہ وہ بھی دوسروں کی طرح اس بات میں دلچسپی رکھتا ہے۔ کچھ عرصہ تک گاؤں بھر میں یہ موضوع گرم رہا پھر رفتہ رفتہ لوگ انہیں بھولنے لگے اور زندگی دوبارہ پرانی ڈگر پر چل پڑی۔ اس دوران پولیس، جبار اور لڑکی کے گھر والوں کی تلاش جاری رہی مگر وہ کہیں نہ ملے۔ البتہ ایک دن ان کی طرف سے ان کے گھر والوں کو پیغام پہنچ گیا کہ دونوں نے شادی کر لی ہے اور بالکل خیریت سے ہیں۔

جبار کے جانے کے بعد محمود کے معمول میں دوبارہ تبدیلی آگئ تھی۔ پہلے وہ شیفے کے ہوٹل سے رات کا کھانا کھا کر جبار کے پاس چلا جایا کرتا تھا اور گھنٹوں اس کے پاس بیٹھا رہتا تھا مگر اب وہ کھانے کے بعد وہیں ٹھہرا رہتا اور ہوٹل بند ہونے کے بعد اپنے کمرے میں لوٹتا تھا۔ کئ ہفتوں تک اس کا یہی معمول رہا لیکن پچھلے دو تین دنوں سے اس میں ایک عجیب سی تبدیلی آئی تھی۔ شیفے کا ہوٹل بند ہونے کے بعد وہ گھر جانے کی بجاۓ یونہی بے مقصد گاؤں میں گھومتا رہتا تھا۔ سردیاں اپنے جوبن پر تھیں لوگ شام ہوتے ہی گھروں میں دبک جاتے تھے۔ شیفے کے ہوٹل میں رات کے وقت پہلے جیسا رش نہیں رہا تھا اس لیۓ وہ ہوٹل جلد بند کر دیتا تھا۔ عشاء کی نماز کے بعد گاؤں کی گلیاں سنسان ہو جاتی تھیں۔ کسی آدمی کا سایہ تک دکھائی نہیں دیتا تھا ایسے میں محمود شیفے کے ہوٹل سے نکل کر جس طرف چاہتا تھا چل پڑتا تھا۔ کبھی وہ گھومتا پھرتا نہر کی طرف جا نکلتا اور کبھی میدان کا رخ کرتا جہاں دن کے وقت بچے کھیلا کرتے تھے۔ اس وقت وہ مٹر گشت کرتا ہوا مسجد کی طرف جا نکلا۔ مسجد ویران اور سنسان پڑی تھی۔ وہ اس کے سامنے سے گزر کر دوسری طرف چل پڑا جہاں ایک کچا راستہ تھا جس کے دونوں جانب وسیع کھیت تھے۔ یہ راستہ کہیں بھی نہیں جاتا تھا۔ البتہ تھوڑی دور جا کر جہاں یہ راستہ ختم ہوتا تھا وہاں ایک طرف کھیتوں کے بیچ ایک تنگ سی پگڈنڈی تھی جو آگے جا کر پکی سڑک سے جا ملتی تھی۔ یہ راستہ کسی کے استعمال میں نہیں تھا سواۓ ان چند لوگوں کے جو صبح کی نماز کے بعد سیر کو جایا کرتے تھے۔ وہ مسجد سے نکل کر اس کچے راستے کا رخ کرتے تھے اور جہاں یہ راستہ ختم ہوتا اور پگڈنڈی شروع ہوتی تھی وہاں سے واپس ہو لیتے تھے۔

محمود اس کچے راستے پر چلنے لگا۔ وہ وہاں تک پہنچا جہاں یہ راستہ ختم ہوتا تھا۔ وہاں کھڑے ہو کر چاند کی روشنی میں وہ پگڈنڈی کو دیکھنے لگا جو آگے جا کر پکی سڑک سے جا ملتی تھی۔ یہ پگڈنڈی اس قدر تنگ تھی اور اس پر سرکنڈے اگے ہوۓ تھے اس لیۓ اس پر چلنا انتہائی دشوار تھا۔ کچھ دیر وہاں کھڑے رہنے کے بعد وہ واپس پلٹ آیا۔

اگلی شب وہ شیفے کا ہوٹل بند ہونے کے بعد وہاں سے نکلا اور سیدھا اس کچے راستے کی طرف چل پڑا۔ آج بھی وہ راستے کے اختتام تک گیا اور وہاں کھڑے ہو کر تنگ و تاریک پگڈنڈی کو دیر تک دیکھتا رہا۔ پھر واپس پلٹ آیا۔ اگلے دن بھی اس نے ایسا ہی کیا۔ رات کے وقت جب سارا گاؤں سو رہا تھا وہ ٹھٹھرتی سردی میں ہوٹل سے نکلا اور اس راستے پر پہنچ گیا جو آگے کہیں بھی نہیں جاتا تھا اور جس کے اختتام پر ایک تنگ سی پگڈنڈی تھی۔ وہ کھڑے ہو کر پگڈنڈی کو دور تک دیکھتا رہا جہاں تک اس کی نگاہ جاتی تھی۔ پگڈنڈی کے اردگرد میلوں تک پھیلے سرسبز کھیتوں میں سے جھینگروں، گھاس کے ٹڈوں، مینڈکوں اور دوسرے کیڑے مکوڑوں کی آوازیں آرہیں تھیں۔ ٹھنڈی تیز ہوا کے جھونکے اس کے جسم سے ٹکرا رہے تھے۔ اس نے اپنی سردی میں بھیگتی جیکٹ اور پتلون کو درست کیا، گہرا سانس لیا اور دشوار گزار پگڈنڈی پر اتر گیا۔

دل افگار

2024-08-26T04:51:00.002+05:00

کردار

ثانیہ= نوجوان ماڈرن لڑکی

طلحہ= نوجوان ماڈرن لڑکا

ساحر= بظاہر عجیب و غریب لیکن حقیقت میں بالکل سیدھا سادہ۔ طلحہ کا دوست اور روم میٹ۔

سائرہ= ایک نوجوان خود مختار لڑکی

شاداب= طلحہ اور ساحر کا دوست

ڈاکٹر امجد فاروق= ثانیہ کا والد (پی ایچ ڈی سکالر ان فزکس)

شعیب انصاری= ڈاکٹر امجد کا دوست

مس سعدیہ ظفر= یونیورسٹی پروفیسر

شکیل= طلحہ اور ساحر کا دوست، شاداب کا روم میٹ

چند دوسرے کردار۔

پہلا منظر

دن کا وقت۔ مقبرۂ جہانگیر۔

ثانیہ مقبرے کے باغ میں ٹہل رہی ہے وہ باغ کی پگڈنڈی پر یوں چلتی ہوئی دکھائی دیتی ہے جیسے کسی کا انتظار کر رہی ہو۔ مقبرے میں اس وقت رش کم ہے لیکن کہیں کہیں درختوں کے نیچے گھاس کے قطعے پر اور بنچوں پر چند ایک نوجوان جوڑے بیٹھے ہوۓ دکھائی دیتے ہیں۔ مقبرے کی عمارت کے اوپر چاروں مینار دور سے دھوپ میں چمکتے ہوۓ نظر آرہے ہیں۔ چند لمحوں بعد ایک طرف سے طلحہ تیز تیز قدم اٹھاتا ہوا چلا آتا ہے۔

طلحہ: (قریب پہنچ کر) ہاۓ

ثانیہ: آگۓ۔۔۔کتنی دیر لگادی تم نے کہاں رہ گۓ تھے؟

طلحہ: کہاں رہ سکتا ہوں ۔۔۔ فون پر بتایا تو تھا ٹریفک میں پھنس گیا ہوں۔ مقبرۂ جہانگیر دیکھنے کا شوق تمہیں ہی تھا جو اتنی دور آکر ملاقات کرنے کے لیۓ کہا۔ ورنہ تو شہر میں اور بھی اچھی جگہیں ہیں۔

ثانیہ: یہ بھی تو اچھی جگہ ہے۔ تمہیں پتہ ہے مجھے بادشاہوں کے مقبرے اور پرانے قلعے دیکھنے کا کتنا شوق ہے گزرے ہوۓ زمانوں کی ایسی جھلک تاریخ کی کتابوں میں کہاں دکھائی دیتی ہے وہاں تو آپ کو صرف معلومات ملتی ہیں جبکہ تاریخ کا درست احساس اور صحیح ادراک تو یہاں آکر پیدا ہوتا ہے۔

طلحہ: ہاں جی بڑا احساس پیدا ہو رہا ہے (ہاتھ جوڑ کر) اے میری محبوب کہیں اور ملا کر مجھ سے۔۔۔

ثانیہ: کیوں یہاں ملنے میں کیا برائی ہے؟

طلحہ: اس میں اچھائی کیا ہے۔ بھلا مقبروں پر بھی کوئی ملاقات رکھتا ہے۔

ثانیہ: اوروں کا تو پتہ نہیں مجھے تو یہ اچھے لگتے ہیں۔

طلحہ: توبہ ہے۔۔۔ (ایک طرف ہٹ کر سامنے مقبرے کو دیکھنے لگتا ہے)

ثانیہ: یہاں سے کیا دیکھ رہے ہو چلو اندر چل کر دیکھتے ہیں۔

طلحہ: چلیں جی اب آگۓ ہیں تو دیکھ بھی لیتے ہیں۔ (چلتے چلتے شعر پڑھتا ہے) مردہ شاہوں کے مقابر سے بہلنے والی

اپنے تاریک مکانوں کو تو دیکھا ہوتا

(دونوں مقبرے کی عمارت میں داخل ہوتے ہیں)

طلحہ: (اردگرد کا جائزہ لے کر) واہ جی واہ کیا کہنے۔۔۔(پھر سے شعر پڑھتا ہے)

یہ منقّش در و دیوار یہ محراب یہ طاق

اک شہنشاہ نے دولت کا سہارا لے کر

ہم غریبوں کی محبت کا اڑایا ہے مذاق

ثانیہ: جی ہاں ایک آپ غریب ہیں اور ایک آپ کی محبت۔

طلحہ: نہیں بالکل نہیں۔۔۔ہم غریب ہو سکتے ہیں مگر ہماری محبت بالکل بھی غریب نہیں یہ تو مالا مال ہے اگر یقین نہ آۓ تو ہمارے دل سے پوچھ لو۔

ثانیہ: آپ کا دل تو جیسے بہت سچا ہے۔

طلحہ: سچا تو ہے۔ اگر یقین نہیں تو بتاؤ اس کی سچائی کو ثابت کرنے کے لیۓ مجھے کیا کرنا ہو گا۔ کہو تو ابھی مینار کے اوپر چڑھ کر چھلانگ لگا دوں؟

ثانیہ: جناب فی الحال آپ خاموش رہیں تو کافی ہے۔

طلحہ: خاموش!۔۔۔یہ کام تھوڑا مشکل ہے۔

ثانیہ: جانتی ہوں۔

(ثانیہ آگے آگے چلنے لگتی ہے۔ طلحہ بھاگ کر اس کے ساتھ جا ملتا ہے)

طلحہ: چلو شکر ہے کچھ تو تم میرے بارے میں جانتی ہو۔

ثانیہ: کچھ نہیں میں بہت کچھ جانتی ہوں۔

طلحہ: مثلاً کیا؟

ثانیہ: بتاؤں گی لیکن ابھی نہیں کسی دن تفصیل سے بتاؤں گی۔ پہلے تم بتاؤ تمہیں آج کل ساحر لدھیانوی بڑا یاد آرہا ہے میں نے فیس بک پر بھی دیکھا ہے آج کل ساحر کی شاعری کی بڑی پوسٹیں لگا رہے ہو۔

طلحہ: نہیں وہ تو بس ایسے ہی۔۔۔ اصل میں میرا روم میٹ ہے وہ ساحر کی شاعری کا بڑا دیوانہ ہے وہ تقریباً ہر وقت ساحر کی شاعری پڑھتا رہتا ہے یا اس کے لکھے ہوۓ گیت سنتا رہتا ہے۔ اس نے اپنا نام بھی بدل کر ساحر رکھ لیا ہے۔ بس اس کی وجہ سے مجھے بھی تھوڑا چسکا پڑ گیا ہے اس لیۓ میں کبھی کبھی فیس بک پر پوسٹیں لگا دیتا ہوں۔ تم یقین نہیں کرو گی وہ ایک عجیب و غریب قسم کا کریکٹر ہے خلیے سے بلکل آج کل کے فیشن ایبل لڑکوں کی طرح ہے۔ بڑے بڑے بال ہیں جن پر کلپ یا ہیئر بینڈ لگائی رکھتا ہے۔ چہرے پر فیشن ایبل داڑھی ہے اور کبھی کبھی لوفروں کی طرح کانوں میں بالی اور گلے میں چین ڈال لیتا ہے۔ لیکن اس کے پاس آج کے دور میں بھی ایک پرانا ریڈیو ہے جس میں وہ پرانے زمانے کے گانے سنتا رہتا ہے اور سگریٹ ایسے انداز میں پیتا ہے جیسے کوئی پرانی فلموں کا غنڈا سگریٹ پی رہا ہو۔

ثانیہ: سیدھی طرح کہو کھسکا ہوا ہے۔

طلحہ: ہاں کہہ سکتی ہو کسی حد تک کھسکا ہوا تو ہے۔ لیکن دل کا بہت اچھا ہے۔

(دونوں کچھ دیر تک عمارت کے اندر گھومتے رہتے ہیں)

دوسرا منظر

دن کا وقت۔ طلحہ اور ساحر کا کمرا یا اپارٹمنٹ

کمرے میں چیزیں ادھر ادھر بے ترتیبی سے بکھری پڑی ہیں۔ ساحر بستر پر یوں لیٹا ہے کہ ٹانگیں اس کی اوپر دیوار پر ہیں اور دوسری طرف سر بستر سے نیچے لٹک رہا ہے۔ اس کے ہاتھ میں سگریٹ ہے جسے وہ بڑے مزے لے کر پی رہا ہے۔ پاس ہی ایک ریڈیو پڑا ہے جس پر یہ گانا بج رہا ہے۔

تمہیں بھی کوئی الجھن روکتی ہے پیش قدی سے مجھے بھی لوگ کہتے ہیں کہ یہ جلوے پراۓ ہیں

میرے ہمراہ بھی رسوائیاں ہیں میرے ماضی کی

تمہارے ساتھ بھی گزری ہوئی راتوں کے ساۓ ہیں

چلو اک بار پھر سے اجنبی بن جائیں ہم دونوں

گانا کچھ دیر تک بجتا ہے پھر طلحہ اندر داخل ہوتا ہے۔

طلحہ: کیا ہو رہا ہے شاعر؟۔۔۔پر تم سے کیا پوچھنا کیا ہو رہا یقیناً ساحر کے گانے سن رہے ہو گے۔

(ساحر اس کی طرف بالکل بھی دھیان نہیں کرتا اور اسی انداز میں لیٹا سگریٹ پیتا رہتا ہے۔ طلحہ آگے بڑھتا ہے اور ریڈیو بند کر دیتا ہے۔ ساحر جلدی سے اٹھ کر بیٹھ جاتا ہے)

ساحر: کیا ہے ریڈیو کیوں بند کیا؟

طلحہ: وہ اس لیۓ کہ اس کو بند کیۓ بغیر تمہاری موجودگی کا احساس نہیں ہوتا۔ مجھے لگنا تھا تم کمرے میں نہیں ہو اور میں دیواروں سے باتیں کر رہا ہوں۔

ساحر: تم نے میری موجودگی کے احساس کو کیا کرنا ہے۔ تم یہی سمجھو میں نہیں ہوں۔ اور ویسے بھی میں پل دو پل کا شاعر ہوں پل دو پل میری کہانی ہے۔

طلحہ: پل دو پل کے شاعر صاحب کچھ کھانے کا بھی بندوبست کیا ہے یا آپ کی ہر پل کی بکواس سے ہی پیٹ بھرنا ہے۔(میز پر پیزے کا ڈبہ اور دوسری کھانے کی چیزیں دیکھ کر) لگتا تو ہے کہ تم نے کچھ منگوایا ہے۔

ساحر: ہاں پیزا منگوایا تھا تمہارا حصہ بھی رکھا تھا مگر بہت انتظار کرنے پر بھی جب تم نہیں آۓ تو میں نے وہ بھی کھا دیا۔

طلحہ: (رک کر اس کی طرف دیکھتا ہے) قربان جاؤں تمہارے انتظار کے وہ انتظار بھی تمہارا بس پل دو پل کا ہی ہو گا۔۔۔اور یہ کیا یار! کتنا گند مچایا ہوا ہے کم سے کم کھانا تو سلیقے سے کھانا چاہیۓ۔

ساحر: میری جان بھوک آداب کے سانچوں میں نہیں ڈھل سکتی۔

طلحہ: یار یہ تم ہر بات میں ساحر کی شاعری کو بیچ میں مت لے آیا کرو۔

(شاداب کمرے میں داخل ہوتا ہے)

شاداب: شکر کرو یہ صرف ساحر کی شاعری کو بیچ میں لاتا ہے اپنی شاعری کو نہیں لے آتا۔

طلحہ: اپنا شعر کبھی کہا ہو تو لاۓ۔

شاداب: کیوں جونیئر ساحر صاحب! تخلص تو شاعر کا کاپی کر لیا لیکن کبھی اپنا شعر بھی کہا ہے کہ نہیں؟

ساحر: ایک دو بار کوشش کی تھی لیکن بات پہلے مصرعے سے آگے بڑھی نہیں۔

طلحہ: یہ بھی قدرت کا ایک احسان تھا۔

ساحر: کس پر؟

طلحہ: شاعری پر۔۔۔اگر بات دوسرے مصرعے تک پہنچ جاتی تو اردو شاعری پر کتنا بڑا ظلم ہوتا۔

شاداب: وہ مصرعہ تھا کیا ویسے کچھ یاد ہے؟

ساحر: ہاں یاد تو ہے۔

شاداب: سناؤ ذرا!

ساحر: وہ تھا۔۔۔ہر اک خیال تیرا ہمیں ناشاد کرتا رہا۔۔۔

شاداب: کیا کیا۔۔۔کیا کہا دوبارہ کہو۔

ساحر: ہر اک خیال تیرا ہمیں ناشاد کرتا رہا۔۔۔

شاداب: یار ساحر دوسرا مصرعہ ادھر بڑی آسانی سے آسکتا تھا۔

ساحر: وہ کیا؟

شاداب: وہ یوں کہ

ہر اک خیال تیرا ہمیں ناشاد کرتا رہا

اے عشق کب سے تو ہمیں برباد کرتا رہا

ساحر: واہ واہ واہ واہ کیا کہہ دیا۔۔۔کیا کہہ دیا یار (اٹھ کر اس کو گلے لگا لیتا ہے) کیا شعر مکمل کیا ہے۔ ہر اک خیال تیرا۔۔۔(پورا شعر دوبارہ پڑھتا ہے) کیا کہنے۔۔۔ کوئی تین برس پہلے میں نے یہ مصرعہ کہا تھا تم نے آج دوسرا مصرعہ کہہ کر شعر مکمل کر دیا۔

طلحہ: چلو کوئی نہیں دونوں مل کر کوشش کرو تین برس میں ایک شعر مکمل ہوا ہے تو اگلے آٹھ دس برس تک پوری غزل ہو ہی جاۓ گی۔ پھر لوگ کہا کریں گے ایک غزل دو شاعر۔

ساحر: چھوڑو اس کو یہ تو جلتا ہے تم نے کمال کر دیا کیا مصرعہ کہا ہے۔

طلحہ: جی ہاں میں تو جلتا ہوں لیکن تم لوگ ذرا احتیاط کرنا اگر یہ بات باہر نکل گئ اور لوگوں کو پتہ چل گیا کہ تم لوگوں نے ایک شعر کہا ہے تو ہنگامہ کھڑا ہو سکتا ہے۔ یہ بھی ممکن ہے کچھ لوگ پتھر اٹھا لیں۔

طلحہ: لوگوں کا تو پتہ نہیں لیکن اگر تم نے اپنی بکواس بند نہ کی تو ہم دونوں چپل ضرور اٹھا لیں گے۔

ساحر: چھوڑ اسے۔۔۔وہ کیا کہتے ہیں ایسے جہلا کے منہ نہیں لگتے۔

طلحہ: آۓ ہاۓ میرے دو عالم فاضل دوست۔۔۔(ساحر کے دونوں گال پکڑ کر پیار سے کھینچتا ہے۔ اور اس کے ہاتھ سے سگریٹ چھین کر خود پینے لگتا ہے)

ساحر: (اکتاہٹ سے) یار یہ تمہاری بڑی بری حرکت ہے ایک تو تو میرے گال مت کھینچا کرو اور دوسرا میرے ہاتھ سے سگریٹ مت چھینا کرو جب بھی میں سگریٹ پینے لگتا ہوں آدھا سگریٹ مجھ سے چھین لیتے ہو۔

طلحہ: تو کوئی بات نہیں تمہیں اعتراض ہے تو آئندہ میں آدھا سگریٹ نہیں چھینوں گا۔۔۔پورا چھینوں گا۔

شاداب: چھوڑو یار! کچھ کھانے کو منگواؤ بڑی بھوک لگی ہے۔ شکیل اپنے گھر گیا ہوا ہے اور میرا اکیلے کھانا کھانے کو بالکل موڈ نہیں کر رہا۔

ساحر: تم دونوں اپنے لیۓ منگوا لو میں کھا چکا ہوں۔ (اٹھ کر دوبارہ سگریٹ سلگا لیتا ہے)

طلحہ: پکی بات ہے تم نے کچھ نہیں کھانا ہم اپنے لیۓ منگوا لیں؟

ساحر: (مسکرا کر) نہیں تھوڑا بہت ٹیسٹ تو کروں گا۔

طلحہ: دیکھا مجھے پتہ تھا۔

شاداب: (اٹھ کر جاتے ہوۓ) منگوا لے یار اس کے لیۓ بھی پہلے یہ اسی طرح کہتا ہے بعد میں ہمارے حصے کا بھی کھا جاتا ہے۔

طلحہ: تم تو بیٹھو کہاں جارہے ہو؟

شاداب: ہمارا کمرے کا کرایہ دینے والا رہتا ہے میں وہ دے کر آیا۔ (کمرے سے نکل جاتا ہے)

طلحہ: (پیچھے سے آواز دے کر) منگواؤں کیا کچھ بتا کر تو جاؤ۔

شاداب: (باہر سے) کچھ بھی منگوا لو میں کھا لوں گا۔

ساحر: (بلند آواز سے) زہر منگوا لیں؟

(طلحہ اس کی طرف دیکھ کر ہنستا ہے)

تیسرا منظر

دن کا وقت۔ ثانیہ کا گھر۔

کمرے میں ڈاکٹر امجد، اس کا دوست انصاری اور پروفیسر سعدیہ بیٹھے ہیں۔ تینوں ہلکے پھلکے انداز میں گفتگو کر رہے ہیں۔

فاروق: جی پروفیسر صاحبہ! میں کہہ رہا ہوں

matter can not be destroyed but it change its form

۔۔۔ یعنی زندگی جب عدم سے وجود میں آجاتی ہے تو وہ دوبارہ عدم میں نہیں چلی جاتی بلکہ وہ صرف اپنی حالت بدلتی ہے، وہ اپنی ہیئت تبدیل کرکے کسی اور فارم میں ڈھل جاتی ہے۔ زندگی کو کسی صورت فنا نہیں بس وہ نگاہوں سے اوجھل ہو جاتی ہے۔ اسی بات کو شاعر نے کتنی عمدگی سے بیان کیا ہے۔

غافل موت کو سمجھے ہیں اختتامِ زندگی

ہے یہ شامِ زندگی صبحِ دوامِ زندگی

پروفیسر: کیا بات ہے فاروق صاحب آپ سائنسدان ہیں مگر سائنس کے ساتھ آپ نے جو شاعری کا تڑکا لگایا ہے کمال ہے۔

فاروق: آپ کا شکریہ پروفیسر صاحبہ۔ میں تو سمجھتا ہوں شاعر اور سائنسدان ایک ہی کشتی کے مسافر ہیں۔ شاعر پر بھی خیالات اترتے ہیں، آمد ہوتی ہے اور سائنسدان پر بھی۔

انصاری: اس بات کو چھوڑیۓ فاروق صاحب آپ نے پروفیسر صاحبہ کو بیرون ملک ملازمت ملنے پر مبارک باد نہیں دی؟

فاروق: ارے ہاں وہ تو میں بھول ہی گیا تھا۔ مبارک ہو آپ کو اب تو آپ ہماری طرح پردیسی ہو جائیں گی۔

پروفسر: جی فاروق صاحب بس اللہ کا کرم ہے۔ موقع مل رہا تھا تو میں نے کہا اس سے فائدہ اٹھا لینا چاہیۓ۔ آپ بتائیں آپ ابھی وہیں ملازمت کر رہیں ہیں یا پاکستان ہمیشہ کے لیۓ چلے آۓ ہیں؟

فاروق: نہیں جی ابھی تو چھٹی آیا ہوں۔ یہاں آکر میں کیا کروں گا میں تو ثانیہ سے بھی کہتا ہوں وہ وہاں چلی آۓ اور میرے ساتھ رہے مگر وہ بضد ہے کہ یہیں رہے گی۔ اصل میں اس کے چچا زاد، ماموں زاد سب یہیں ہے تو اس کا یہاں دل لگا ہوا ہے۔ کہتی ہے ڈگری مکمل کرنے کے بعد سوچوں گی۔

پروفیسر: چلیں یہ تو اچھی بات ہے۔ ڈگری مکمل کرکے بے شک چلی جاۓ درمیان میں چھوڑنا کوئی دانش مندی نہیں۔ لیکن وہ ہے کہاں میں اسی سے ملنے آئی تھی کہہ رہی تھی میم آپ نے مجھے جانے سے پہلے ضرور ایک بار مل کے جانا ہے۔

فاروق: فون تو کر دیا ہے بس آتی ہوگی۔

(ثانیہ اندر آتی ہے)

ثانیہ: میں آگئ۔

فاروق: لیں وہ آگئی۔

(پروفیسر سے گلے ملتی ہے)

پروفیسر: تم نے اتنی دیر لگا دی میں تو جانے والی تھی۔

ثانیہ: اگر آپ مجھے آنے سے پہلے فون کر دیتیں تو میں کہیں جاتی ہی نہیں۔

فاروق: (اٹھتے ہوۓ) چلیں انصاری صاحب ہم چلتے ہیں ان کی شاگردہ آگئی ہیں تو ہمارا اب یہاں کیا کام۔

ثانیہ: کیوں آپ لوگ کہاں جا رہے ہیں؟

انصاری: بیٹا ہمیں ذرا کام ہے ہم نکلنے والے تھے کہ پروفیسر صاحبہ آگئیں۔ اب آپ آگئی ہیں تو آپ لوگ بیٹھیۓ ہم چلتے ہیں۔ ٹھیک ہے پروفیسر صاحبہ ہم چلتے ہیں۔

(چلے جاتے ہیں)

پروفیسر: لگتا ہے تمہارے ابو اور انصاری صاحب کی بڑی گہری دوستی ہے جہاں دیکھو اکٹھے ملتے ہیں۔

ثانیہ: جی میم آپ ٹھیک کہہ رہی ہیں۔ ابو تو لگتا ہے پاکستان آتے ہی انصاری صاحب کے لیۓ ہیں۔ ہر وقت یا تو وہ ہمارے گھر پاۓ جاتے ہیں یا یہ ان کے گھر۔ دونوں باہر بھی ساتھ ساتھ جاتے ہیں۔ خیر چھوڑیں آپ یہ بتائیں آپ کب جارہی ہیں؟

پروفیسر: بس ایک دو کام ہیں وہ نپٹا کر دو تین دن تک نکل جاؤں گی۔

ثانیہ: یونیورسٹی چکر نہیں لگائیں گی؟

پروفیسر: نہیں یونیورسٹی تو مشکل ہے چکر لگے۔

ثانیہ: اچھا! چلیں کوئی نہیں آپ یہاں ملنے آگئیں یہی کافی ہے۔

چوتھا منظر

دن کا وقت۔ سڑک

تیز بارش ہو رہی ہے۔ ساحر بس اسٹاپ پر کھڑا ہے۔ اس کے موبائل کی گھنٹی بجتی ہے جیب سے موبائل نکال کر کال اٹینڈ کرتا ہے۔

ساحر: ہیلو۔۔۔نہیں بس سٹاپ پر کھڑا ہوں۔۔۔بس میں کہیں نہیں جارہا بارش رکنے کا انتظار کر رہا ہوں۔۔۔ہاں بس پانچ دس منٹ تک پہنچ جاؤں گا۔۔۔یار پہنچ جاؤں گا کہا تو ہے۔۔۔نہیں ہوتی تمہیں دیر۔۔۔

(اچانک اس کی نظر سڑک کے دوسری جانب اک لڑکی پر پڑتی ہے جو سڑک کے اس پار ہینڈ بیگ کندھے پر لٹکاۓ سڑک پار کرنے کی کوشش کر رہی ہے۔ وہ فوراً کال کاٹتا ہے اور فون جیب میں رکھ کر بڑے انہماک سے لڑکی کو دیکھنے لگتا ہے۔ لڑکی جو سائرہ ہے بمشکل تمام بارش میں سڑک پار کرتی ہے اور بس اسٹاپ پر آکر رک جاتی ہے۔ کندھے سے ہینڈ بیگ اتار کر بنچ پر رکھتی ہے اور دوپٹے کے پلو سے اپنا چہرا اور سر کے بالوں کو خشک کرنے کی کوشش کرتی ہے۔ اک اچٹتی سی نگاہ ساحر پر ڈالتی ہے پھر بڑے مختاط انداز سے کھڑی ہوکر سامنے سڑک کی طرف نگاہ کر لیتی ہے۔ ساحر جو ابھی تک اسے دیکھ رہا ہوتا ہے اس کی نظر پڑتے ہی فوراً نظریں ہٹا لیتا ہے۔ لیکن کچھ دیر بعد دوبارہ کنکھیوں سے دیکھنے کو کوشش کرتا ہے۔ اس کے دیکھنے کے بعد جب وہ نگاہ دوسری طرف کر لیتا ہے تو لڑکی بھی دوبارہ اسے اک نظر دیکھتی ہے۔ چند لمحے یونہی گزر جاتے ہیں۔ بارش کی آواز مسلسل آتی رہتی ہے۔ کچھ دیر بعد بس آکر سٹاپ پر رکتی ہے پانی میں بس کے کھڑے ہونے کی آواز آتی ہے۔ چند مسافر اترتے ہیں اور اس کے ساتھ ہی لڑکی تیزی سے بس پر سوار ہو جاتی ہے۔ ساحر چند لمحے کچھ سوچتا ہے اور پھر فوراً وہ بھی بس پر سوار ہو جاتا ہے۔)

پانچواں منظر

وہی وقت۔ سڑک

بس چل رہی ہے۔ ساحر دیگر چند مسافروں کے ساتھ کھڑا ہے۔ وہ لڑکی آگے دوسری خواتین کے ساتھ بیٹھی ہے اس کا دھیان آگے کی طرف ہے وہ ساحر کو نہیں دیکھ رہی جبکہ ساحر کا دھیان اسی کی طرف ہے۔ کچھ دیر بعد گاڑی ایک جگہ رکتی ہے۔ چند مسافر اترے ہیں اور چند سوار ہو جاتے ہیں، گاڑی دوبارہ چلنے لگتی ہے۔ کنڈکٹر نئے آنے والے مسافروں سے کرایہ وصول کرنے اور ٹکٹ کاٹنے کے لیۓ ان کے پاس جاتا ہے۔ کنڈکٹر دو چار مسافروں کی ٹکٹ کاٹتا ہے اتنے میں گاڑی پھر سے ایک سٹاپ پر آرکتی ہے۔ کچھ مسافروں کے ساتھ وہ لڑکی بھی نیچے اتر جاتی ہے۔ ساحر بھی بھاگ کر تیزی سے بس سے اتر جاتا ہے۔ باہر آکر اردگرد دیکھتا ہے وہ لڑکی اسے کہیں دکھائی نہیں دیتی وہ خیران ہو کر ادھر ادھر گھوم کر اسے تلاش کرتا ہے۔ ایک راہ گیر کو روکتا ہے۔

ساحر: بات سنو تم نے اس طرف جاتے ہوۓ کسی لڑکی کو تو نہیں دیکھا۔ اس نے کندھے پر ہینڈبیگ لٹکایا ہوا ہے اور ابھی ابھی بس سے اتری ہے۔

راہ گیر: نہیں میں نے نہیں دیکھا۔

(راہ گیر چلا جاتا ہے۔ ساحر کچھ دیر کھڑا ہو کر سوچتا ہے پھر واپس بس اسٹاپ کی طرف چل پڑتا ہے)

چھٹا منظر

دن کا وقت۔ ساحر اور طلحہ کا کمرا۔

طلحہ اور شاداب کمرے میں موجود ہیں طلحہ اپنا فون کان پر لگاۓ کھڑا ہے۔

طلحہ: (شاداب سے) دیکھو پھر فون کاٹ دیا کہہ رہا تھا میں بس سٹاپ پر ہوں پتہ نہیں کون سے سٹاپ پر ہے۔ بس سٹاپ سے یہاں کا فاصلہ تو بس تین چار منٹ کا ہے۔

شاداب: تو پھر پکا یہ کہیں اور ہے۔

طلحہ: مجھے بھی لگتا ہے جھوٹ بول رہا ہے۔

شاداب: آلینے دے آج اسے ٹھیک کرتے ہیں۔

طلحہ: ہاں ایک بار آۓ تو پھر اس کا بندوبست کرتے ہیں۔

ساتواں منظر

وہی وقت۔

ساحر کمرے کے باہر پہنچتا ہے اور طلحہ اور شاداب کی باتیں سن لیتا ہے۔ وہیں رک جاتا ہے اور فوراً اپنی شرٹ کے اوپر کے بٹن کھولتا ہے، اپنے بال بکھیر لیتا ہے اور فرش سے تھوڑی سی دھول یا مٹی ہاتھ پر مل کر اپنے کپڑوں پر لگاتا ہے۔ اپنا حلیہ بگاڑ کر لنگڑاتا ہوا کمرے میں داخل ہوتا ہے۔

ساحر: (کانپتی ہوئی آواز میں) پانی دو

یار پانی۔

(شاداب اور طلحہ بھاگ کر اسے پکڑتے ہیں)

طلحہ: کیا ہوا؟

شاداب: خیریت ہے لگتا ہے کہیں گرے ہو۔

(دونوں اسے بستر پر بٹھاتے ہیں)

طلحہ: اب بتاؤ کیا ہوا ہے؟

ساحر: کچھ نہ پوچھو یار بڑا برا ایکسیڈنٹ ہوا ہے یوں سمجھو بس مرتا مرتا بچا ہوں۔

طلحہ: وہ کیسے کہاں پر لگی ہے؟

ساحر: ٹانگ پر لگی ہے۔

طلحہ: دکھاؤ ذرا۔

ساحر: دیکھ کر کیا کرو گے۔

شاداب: دیکھاؤ تو سہی پتہ تو چلے زیادہ سخت تو نہیں لگی۔

ساحر: اچھا! ۔۔۔ دکھا دیتا ہوں۔

(اپنی پتلون کا پائنچہ فولڈ کرنے لگتا ہے)

شاداب: آتے ہوۓ تو تم بائیں ٹانگ سے لنگڑا رہے تھے تو بائیں ٹانگ پر لگی ہو گی دائیں ٹانگ کا پائنچہ کیوں فولڈ کر رہے ہو؟

ساحر: ہاں ہاں بائیں ٹانگ۔ میں بھول گیا تھا تکلیف میں کس کو یاد رہتا ہے بایاں کون سا ہے دایاں کون سا۔

شاداب: بالکل ٹھیک کہا۔۔۔ چلو دکھاؤ۔

(آہستہ آہستہ پائنچہ اوپر کرتا ہے)

طلحہ: یہ کیا چوٹ تو کہیں نہیں؟

ساحر: وہ۔۔۔ اندرونی چوٹ ہے۔

طلحہ: اچھا اندرونی چوٹ ہے۔ ٹھیک ہے ہم ایسی دوا دیں گے اندرونی بیرونی سب چوٹیں ایک دم بالکل ٹھیک ہو جائیں گی۔

ساحر: کیا مطلب؟

شاداب: مطلب ابھی سمجھاتے ہیں۔

(شاداب اور طلحہ دونوں تکیے اٹھاتے ہیں اور ساحر پر پل پڑتے ہیں۔ باہر سے شکیل بھی اندر آتا ہے اور انہیں دیکھ کر مسکراتا ہے۔)

شکیل: ارے واہ۔ ایسے نیک کام میرے بغیر ہی۔

(وہ بھی کوئی چیز اٹھاتا ہے اور شروع ہو جاتا ہے۔ کچھ دیر تک چاروں لڑائی کرتے ہیں)

آٹھواں منظر

دن کا وقت۔ ثانیہ کا گھر

ثانیہ گھر کے کسی کام میں مصروف ہے فاروق اسے آواز دیتا ہوا اندر داخل ہوتا ہے۔ اس کے ہاتھ میں ایک شاپر ہے جو وہ ثانیہ کو پکڑاتا ہے۔

فاروق: (اندر آکر) ثانیہ۔۔۔ ثانیہ۔۔۔

ثانیہ: جی ابا آپ آگۓ۔

فاروق: ہاں آگیا ہوں۔ (شاپر اسے دیتا ہے)

ثانیہ: بڑی دیر لگادی آپ نے کہاں رہ گۓ تھے؟

فاروق: وہ بس انصاری صاحب کا تھوڑا کام تھا تو ذرا دیر ہو گئ۔ (کوٹ اتار کر صوفے پر بیٹھتے ہوۓ) پروفیسر صاحبہ چلی گئیں؟

ثانیہ: (شاپر لے کر دوسرے کمرے میں جاتے ہوۓ) وہ تو کب کی چلی گئیں۔

فاروق: تو کب جارہی ہیں تمہاری پروفیسر صاحبہ ملک سے باہر؟

ثانیہ: (دوسرے کمرے سے) کہہ رہی تھیں تین دن بعد کی فلائیٹ ہے۔ کھانا لاؤں آپ کے لیۓ؟

فاروق: ہاں لے آؤ۔

ثانیہ: (واپس کمرے میں آکر کھانا پروستے ہوۓ) اچھا ابا میں نے ان سے پوچھا میں آگے کون سا مضمون لوں تو کہہ رہی تھیں تمہیں تاریخ میں دلچسپی ہے تو بہتر ہے تاریخ میں داخلہ لو۔ آپ کیا کہتے ہیں؟

فاروق: میں کیا کہوں اگر تمہیں واقعی تاریخ میں دلچسپی ہے تو ایڈمشن لے لو۔ تاریخ کوئی ایسا برا مضمون تو نہیں جس میں ایڈمشن نہیں لیا جا سکتا۔

ثانیہ: لیکن ابا ایک مسئلہ ہے۔

فاروق: کیا؟

ثانیہ: تاریخ ایسا مضمون ہے جسے میں پروفیشنل کیریئر کے طور پر اختیار نہیں کر سکتی۔ تاریخ میں ڈگری لینے کے بعد میں آگے جاب کیا کروں گی۔

فاروق: ہاں یہ مسئلہ تو ہے تاریخ میں ڈگری لینے کے بعد تم اسے پروفیشنل کیریئر تو نہیں بنا سکتی اور پاکستان میں تو بالکل بھی نہیں بنا سکتی۔ زیادہ سے زیادہ یہ ہو سکتا ہے تم کسی کالج یا یونیورسٹی میں پڑھانا شروع کردو۔

ثانیہ: (پاس بیٹھتے ہوۓ) تو پھر بتائیں میں کیا کروں؟

فاروق: میں کیا کہہ سکتا ہوں یہ فیصلہ تو تمہیں کرنا ہے چاہے تو تاریخ لے لو چاہے کچھ اور اختیار کر لو۔

ثانیہ: ابا کبھی تو آپ کوئی مشورہ دے دیا کریں۔ لوگوں کے باپ اور خاندان کے بڑے بزرگ بچوں پر حکم چلاتے ہیں انہیں اپنی پسند نا پسند پر مجبور کرتے ہیں اور ایک آپ ہیں آپ تو مشورہ بھی نہیں دیتے۔

فاروق: (ہنسں کر) میں کیا مشورہ دوں۔ اگر تو تمہیں پروفیشنل کیریئر عزیز ہے تو پھر وہی اختیار کرو جو آج کل کے زیادہ تر نوجوان لڑکے لڑکیاں کرتے ہیں۔ یعنی کامرس میں داخلہ لے لو اور ایم بی اے یا بی بی اے کرکے کسی کارپوریٹ سیکٹر میں ملازمت اختیار کرکے موج کرو۔ لیکن اگر تمہیں علم سے اتنی محبت ہے تو پھر وہی مضمون منتخب کرو جس میں تمہارا دل ہے۔

ثانیہ: تاریخ سے مجھے محبت تو ہے لیکن ابا پڑھانا مجھے بالکل بھی پسند نہیں اس لیۓ میں تعلیم مکمل کرکے ٹیچنگ نہیں کرنا چاہتی۔

فاروق: تو پھر جیسے مرضی ہے کرو میں کیا کر سکتا ہوں۔

ثانیہ: ابا کیا ایسا نہیں ہو سکتا میں دونوں کو ساتھ لے کر چلوں۔ کیونکہ نہ تو میں کیریئر چھوڑنا چاہتی ہوں اور نہ اپنی پسند کا مضمون۔

فاروق: (کھانا کھاتے ہوۓ) ہو تو سکتا ہے بالکل ہو سکتا ہے۔ تم تاریخ میں بھی ڈگری حاصل کرو اور اس کے بعد کوئی پروفیشنل ڈگری بھی حاصل کر لو جس سے تمہیں اپنی پسند کی جاب بھی مل جاۓ گی اور تعلیم بھی تمہاری اپنی مرضی کی ہو جاۓ گی۔

ثانیہ: ہاں یہ ہو سکتا ہے۔ اچھا ابا! آپ نے کیسے فیصلہ کیا تھا آپ کو بھی تو یہی مسئلہ پیش آیا ہو گا۔

فاروق: مجھے۔۔۔ مجھے تو فزکس سے عشق تھا داخلہ لینے سے پہلے میں اچھی طرح جانتا تھا فزکس کے میدان میں پروفیشنل کیریئر کے حوالے سے مجھے کافی مشکلات پیش آئیں گی۔ پاکستان میں تو اس کا بالکل بھی سکوپ نہیں تھا اور نہ اب ہے۔ لیکن پھر بھی میں نے اپنے عشق کو چنا۔ خدا کا کرنا یہ ہوا فزکس میں آنرز کرتے ہی مجھے ماسٹر اور پی ایچ ڈی کے لیۓ بیرون ملک جانے کا موقع مل گیا اور اس دوران وہاں جاب بھی مل گئ۔

ثانیہ: یہ تو کمال ہو گیا۔

فاروق: ہاں اسی لیۓ تو میں کہتا ہوں تم بھی یہاں پڑھنے کی بجاۓ باہر ایڈمشن لے لو۔ ہمارے ملک میں بے شمار لوگ ایسے ہیں جو بے چارے پڑھنے کے لیۓ یا ملازمت کے لیۓ باہر جانے کو ترستے ہیں اور ایک تم ہو تمہیں بیٹھے بٹھاۓ موقع مل رہا ہے پر تم جانا نہیں چاہتی۔

ثانیہ: ابا آپ نے کہا تھا آپ اس بات کا ذکر بار بار نہیں کریں گے۔

فاروق: بار بار نہیں کر رہا پر میں اپنی راۓ کا اظہار تو کر سکتا ہوں۔ پھر کہتی ہو آپ کوئی مشورہ نہیں دیتے۔

ثانیہ: ویسے ابا۔۔۔! آپ ایک بات تو بتائیں آپ نے مجھے کبھی کسی بات کے لیۓ نہیں روکا، کبھی کوئی ناجائز پابندی نہیں لگائی یہاں تک کہ میرے پاکستان رہنے کے فیصلے پر بھی آپ نے اعتراض نہیں کیا تو کیا آپ مجھے میری شادی کے فیصلے کا بھی اختیار دیں گے؟

فاروق: ہاں بالکل دوں گا۔ بشرطیکہ تمہارا وہ فیصلہ بھی تاریخ کے مضمون کی طرح بہتر ہوگا۔

ثانیہ: اور اگر اس فیصلے میں کوئی خرابی ہوئی؟

فاروق: تو پھر میں تمہیں سمجھاؤں گا، تمہیں بتاؤں گا کہ یہ کیوں اور کیسے درست نہیں۔ لیکن فیصلے کا اختیار تمہارے ۔پاس ہی رہے گا۔ہ

:ثانیہ

You are the best father in all over the world

(فاروق مسکرا کر سر ہلاتا ہے)

نواں منظر

دن کا وقت۔ ساحر اور طلحہ کا کمرا۔

کمرے میں ساحر، طلحہ، شاداب اور شکیل چاروں موجود ہیں۔ ابھی ابھی ساحر کو پیٹنے اور لڑائی کے شغل سے فارغ ہو کر بیٹھے ہیں اور اسی موضوع پر بات کر رہے ہیں اور ہنسی مذاق کر رہے ہیں۔

شکیل: جو اسے میری پڑی ہے وہ کمال کی تھی۔

طلحہ: نہیں شاداب کی ٹھیک پڑی ہے تمہاری بس آواز زیادہ آئی تھی۔

ساحر: نہیں مجھے پڑی بھی اسی کی سخت ہے۔ (شکیل کی طرف اشارہ کرکے) اس ظالم نے تو پولیس والوں کی طرح مارا ہے۔

شاداب: ہاں یہ ٹھیک بات ہے اس نے تو اچھل اچھل کر مارا ہے۔ اور مزے کی بات ہے اسے ابھی تک پتہ بھی نہیں کہ ہم اسے مار کیوں رہے تھے۔

طلحہ: لگتا ہے تم نے اس سے کوئی پرانا بدلہ لیا ہے۔

شکیل: نہیں یار! میں نے کہا نیک کام میں اپنا حصہ ڈال لینا چاہیۓ۔

ساحر: تم لوگ ساری باتیں چھوڑو اس شاداب کے بچے کی جاسوسی چیک کرو کہتا ہے پہلے تم بائیں ٹانگ سے لنگڑا رہے تھے اور اب دکھا دائیں ٹانگ رہے ہو۔

طلحہ: صحیح بات ہے پورا شرلاک ہوم ہے یہ۔۔۔ ویسے تم اب تو بتا دو آخر گۓ کہاں تھے۔ بس سٹاپ سے یہاں کا فاصلہ اتنا زیادہ تو نہیں؟

ساحر: (مسکرا کر، شرما کر) وہ۔۔۔ وہ بس راستے میں کوئی مل گیا تھا۔

شاداب: ہاں دیکھا آگئ نا وہی بات۔۔۔ سچ سچ بتانا کوئی لڑکی تھی؟

ساحر: (مسکرا کر) ہاں۔

شکیل: کون تھی وہ کہاں گۓ تھے اس کے ساتھ؟

ساحر: پتہ نہیں کون تھی یار! جیسے ہی میں نے اسے دیکھا مجھے اس کا چہرا اتنا شناسا لگا جیسے میں اسے برسوں سے جانتا ہوں۔ وہ بس میں بیٹھ کر کہیں گئ تو میں غیرارادی طور پر اس کے پیچھے چل پڑا۔

طلحہ: تو پھر کیا پتہ لگا کون تھی وہ؟

ساحر: پتہ نہیں وہ بس سے اتری تو میں بھی اس کے پیچھے بس سے اتر گیا لیکن پھر وہ غائب ہو گئ۔

(اٹھ کر کھڑکی سے باہر دیکھنے لگتا ہے پھر شعر پڑھتا ہے)

گۓ دنوں کا سراغ لے کر کدھر سے آیا کدھر گیا وہ

عجیب مانوس اجنبی تھا مجھے تو خیران کر گیا وہ

دسواں منظر

دن کا وقت۔ شالیمار باغ

شالیمار باغ میں طلحہ اور ثانیہ پیدل چلے جارہے ہیں جبکہ ان کے پیچھے کچھ فاصلے پر ان کی یونیورسٹی کے دوست اور ہم جماعت سب مختلف ٹولیوں میں کھڑے ہیں۔ یہ دونوں ان سب سے ہٹ کر اک طرف چل رہے ہیں۔

طلحہ: تمہارے ساتھ اور تو کوئی مسئلہ نہیں بس ایک مسئلہ ہے۔ تم مجھے تاریخی مقامات کی سیر کروا کروا کر مار دو گی۔ کبھی مقبرۂ جہانگیر، کبھی شالیمار باغ، کبھی کہاں اور کبھی کہاں۔

ثانیہ: یہاں آنے کا فیصلہ صرف میرا تو نہیں تھا پوری کلاس کا تھا۔

طلحہ: جی اور انہیں یہاں آنے پر قائل کس نے کیا تھا میں اچھی طرح جانتا ہوں یہ آئیڈیا تمہارے سوا اور کسی کا نہیں ہو سکتا۔

ثانیہ: ہاں تو میں نے کسی کو مجبور تو نہیں کیا تھا میں کسی کو زبردستی اٹھا کر یہاں تو نہیں لے آئی۔ پوری کلاس کا آؤٹنگ کا پروگرام بن رہا تھا تو میں نے کہا شالیمار باغ چلتے ہیں۔ سب مان گۓ تو ہم یہاں آگۓ۔

طلحہ: تم بڑی تیز ہو کل میں چھٹی پر تھا تو تم لوگوں نے کل ہی پروگرام طے کر لیا تمہیں پتہ تھا میں ہوتا تو یہاں آنے کی مخالفت کرتا۔

ثانیہ: تم نے تو ہر بات کی مخالفت کرنی ہوتی ہے ورنہ کیا ہے اس جگہ میں اتنی خوبصورت تو ہے مغل آرکیٹیکچر کا کتنا شاندار نمونہ ہے۔

طلحہ: پاس رکھو تم اپنا مغل آرٹ۔۔۔ان مغلوں کی تو میں۔۔۔

(ٹانگ ہوا میں زور سے کک مارنے کے انداز سے لہراتا ہے جس سے اس کا جوتا اتر کر تالاب میں جا گرتا ہے۔ ثانیہ زور زور سے ہنسنے لگتی ہے۔ دور کھڑے چند طلبہ بھی یہ منظر دیکھ کر ہنسنے لگتے ہیں)

ثانیہ: ٹھیک ہے جناب طلحہ امین صاحب! ہم اپنا مغل آرٹ اپنے پاس رکھتے ہیں اور آپ نے ابھی جو اپنے آرٹ کا مظاہرہ کیا ہے اس سے آپ خود بھگتیں۔ ہم تو چلے۔

(جانے لگتی ہے اور واپس جاتے ہوۓ مڑ کر دوبارہ ہنستی ہے۔ طلحہ منہ پھلاۓ وہیں ساکت کھڑا اپنے جوتے کو دیکھتا رہتا ہے)

گیارواں منظر

دن کا وقت۔ ساحر کا کمرا۔

ساحر باتھ روم میں آئینے کے سامنے کھڑا شیو بنا رہا ہے۔ کہیں دور سے کسی گانے کی آواز آتی ہے۔ ہاتھ روک کر کان آواز کی طرف لگاتا ہے اور گانا دھیان سے سننے کی کوشش کرتا ہے۔ آواز کافی دھیمی ہے گانے کے بول سنائی نہیں دے رہے۔ باتھ روم کی کھڑکی سے کان لگا کر سننے کی کوشش کرتا ہے۔ پھر باہر نکلتا ہے اور کمرے کی کھڑکی پر کان لگا کر سننے کی کوشش کرتا ہے۔ پھر چھت پر چڑھ جاتا ہے یہاں آواز بالکل صاف سنائی دیتی ہے۔ نیل ڈائمنڈ کا گانا what a beautiful noise بج رہا ہے۔

ساحر اردگرد آواز کی سمت کا تعین کرنے کی کوشش کرتا ہے ایک دم اس کی نظر سامنے ایک گھر پر پڑتی ہے جس کی کھڑکی کھلی ہے اور کھڑکی کے بالکل پاس وہی لڑکی سائرہ بیٹھی کتاب پڑھ رہی ہے جو اسے بس اسٹاپ پر ملی تھی۔ اس کے پاس ایک میز پر ریڈیو پڑا ہے جس سے گانے کی آواز آرہی ہے۔

What a beautiful noise

Comin' up from the street

Got a beautiful sound

It's got a beautiful beat

It's a beautiful noise

Goin' on everywhere

Like the clickety-clack

Of a train on a track

It's got rhythm to spare...

ساحر کھڑے ہو کر کافی دیر تک گانا سنتا ہے۔ لڑکی کا دھیان اس پر ابھی تک نہیں پڑا۔ کچھ دیر میں اس کی نظر ساحر پر پڑتی ہے جب وہ ساحر کو اپنی طرف متوجہ دیکھتی ہے تو فوراً کھڑکی بند کر دیتی ہے۔ ساحر وہیں کھڑا رہ کر بند کھڑکی کو چند لمحے دیکھتا ہے۔

بارہواں منظر

دن کا وقت۔ شالیمار باغ

طلحہ ایک درمیانے سائز کی چھڑی سے تالاب کے کنارے جھک کر اپنا جوتا باہر نکالنے کی کوشش کررہا ہے۔ چھڑی چھوٹی ہے جوتے تک مشکل سے پہنچتی ہے کافی کوشش کے بعد جوتا چھڑی میں اٹکتا ہے لیکن طلحہ اسے جیسے ہی کھینچتا ہے جوتا پھسل کر دوبارہ گر جاتا ہے۔ دوسری مرتبہ ذرا زیادہ جھک کر جوتا پکڑنے کی کوشش کرتا ہے اور پھسل کر خود بھی پانی میں گر جاتا ہے۔ اس کے گرتے ہی ہر طرف قہقہے بلند ہوتے ہیں۔ ثانیہ بھی ایک طرف کھڑی ہنسنے لگتی ہے۔ طلحہ غصے سے ان سب کو دیکھتا ہے پھر خود بھی ہنسنے لگتا ہے۔

تیرھواں منظر

دن کا وقت۔ ساحر کا کمرا

ساحر اپنی چھت پر کھڑا ہے۔ وہ لڑکی اپنی کھڑکی میں ہے۔ ساحر کی چھت اور اس کھڑکی کے درمیان یوں تو فاصلہ کافی ہے لیکن اس منظر میں چونکہ ساحر خواب دیکھ رہا ہے اس لیۓ وہ کھڑکی اور ساحر کی چھت دونوں بالکل پاس آجاتے ہیں۔ دونوں اپنی اپنی جگہ پر رہ کر مکالمے ادا کرتے ہیں۔

ساحر: تو بتاؤ پھر کیا سوچا ہے؟

لڑکی: کس بارے میں؟

ساحر: شادی کے بارے میں۔

لڑکی: پہلے تم بتاؤ تم میرے لیۓ کیا کر سکتے ہو؟

ساحر: میں۔۔۔(سوچتے ہوۓ) میں۔۔۔تمہارے لیۓ کیا کر سکتا ہوں۔ میں تمہیں برابری کے حقوق دے سکتا ہوں۔

لڑکی: (خیرت سے) کیا مطلب؟

ساحر: مطلب یہ کہ تم اپنی مرضی سے نوکری کر سکو گی۔ گھر کے اور خاندان کے بہت سے امور میں تمہاری راۓ کو اہمیت دی جاۓ گی اور تم اپنی مرضی سے آزادانہ فیصلے کر سکو گی۔ اور۔۔۔۔اور کیا۔۔۔ہاں اور یہ کہ گھر کے کام ہم دونوں مل کر کر لیا کریں گے تمہیں اکیلے نہیں کرنے پڑیں گے۔ کبھی میں کھانا بنا دیا کروں گا کبھی تم بنا لینا۔ کم سے کم تم ایک لڑکی ایسی ہو گی جسے دیگر عورتوں کی طرح بینر پکڑ کر عورت مارچ نہیں کرنا پڑے گا۔ تمہیں مکمل طور پر برابری کے حقوق ملیں گے۔

لڑکی: در فٹے منہ۔ یہ بھی کوئی بات ہوئی۔ لوگ تو ایسے موقعوں پر چاند تارے توڑ کر لانے کی بات کرتے ہیں، اتنے بڑے بڑے دعوے کرتے ہیں میں تمہیں دنیا بھر کی آسائشیں دوں گا، قیمتی سے قیمتی چیز تمہارے قدموں میں لاکر رکھ دوں گا یہ کر دوں گا وہ کر دوں گا۔ اور تم ایسے معمولی سے دعوے کر رہے ہو۔

ساحر: یہ معمولی دعوے نہیں ہیں مخترمہ یہ چاند تاڑے توڑ کر لانے سے زیادہ مشکل کام ہیں شاید اسی لیۓ اس کا دعوی بھی کوئی نہیں کرتا۔

لڑکی: دعوی بڑا ہو گا لیکن اس میں وہ رومانویت نہیں جو چاند تارے توڑ کر لانے کی بات میں ہے۔

ساحر: بس اسی رومانویت کے چکر میں تم لڑکیاں اپنا نقصان کرواتی ہو۔ ایسے ایسے دعووں کی توقع کرتی ہو جو ممکن بھی نہیں اور شاید ناجائز بھی ہیں۔ میں یہ نہیں کہتا رومانویت بالکل نہ ہو، ہو لیکن حقیقت کے ساتھ ساتھ رہے تو بہتر ہے۔

لڑکی: اچھا چلو مان لیا ناممکن تو ہوئیں لیکن ناجائز کیسے ہو گئیں۔ ہمارے کھانے پینے اور دیگر اخراجات کی ذمےداری کیا تم لوگوں پر نہیں؟ تم لوگ بس اپنی ذمے داری سے بھاگتے ہو اور کچھ نہیں۔

ساحر: میں یہ نہیں کہہ رہا یہ ذمے داری ہماری نہیں، بالکل ہماری ہے لیکن وہ ذمے داری تمہاری ضرورتوں کو پورا کرنے کی ہے عیاشیوں اور قیمتی آسائشوں کے لیۓ نہیں۔ کسی سے بھی ایسی توقع کرنا کہ وہ دنیا بھر کی آسائشیں تمہارے قدموں میں لاکر رکھ دے ناجائز نہیں تو اور کیا ہے۔ اور پھر تمہارا برابری اور آزادی کا مطالبہ بھی تو ہے۔ یہ دونوں باتیں ایک ساتھ نہیں چل سکتیں۔ یہ فیصلہ تمہیں کرنا ہے تم لوگوں کو آزادی اور برابری کے حقوق چاہیئں یا بھیک کے طور پر ملنے والی آسائیشیں۔

(اچانک سے ساحر کو کوئی شور سنائی دیتا ہے۔ وہ چونکتا ہے اور بیدار ہو جاتا ہے۔ آنکھ کھلتی ہے تو کمرے میں طلحہ اور شاداب کو دیکھتا ہے جو اسے آوازیں دے کر اور جھنجوڑ کر اٹھا رہے ہیں۔ ساحر اٹھ کر بیٹھ جاتا ہے)

ساحر: کیا ہے کیوں شور مچا رہے ہو، اٹھ گیا ہوں۔

شاداب: یار اتنا بے ہوش کون سوتا ہے۔۔۔پچھلے پندرہ منٹ سے تمہیں اٹھا رہے ہیں۔

ساحر: کیوں اٹھا رہے تھے ایسی کون سی قیامت آگئ۔ ابھی ابھی تو آنکھ لگی تھی۔۔۔ اتنا اچھا خواب دیکھ رہا تھا میں۔

طلحہ: (پاس بیٹھ کر) کیا خواب دیکھ رہے تھے۔ ہمیں بھی بتاؤ۔

شاداب: اسی لڑکی کا ہو گا۔

ساحر: ہاں اسی کا تھا۔

شاداب: یار یہ تم لڑکوں کا بڑا مسئلہ ہے ابھی لڑکی پوری طرح دکھی نہیں اور اس کے خواب دیکھنے شروع۔

طلحہ: ہم لڑکے ہیں؟۔۔۔تو تم کیا ہو؟۔۔۔بابا جی۔۔۔

شاداب: نہیں میرا مطلب ہے۔۔۔

ساحر: چھوڑو یار یہ سب۔۔۔وہ آج مجھے پھر نظر آئی ہے۔

طلحہ: ارے واہ۔۔۔کہاں پر؟

ساحر: یہیں چھت پر۔ وہ یہیں پاس میں رہتی ہے۔۔۔چند گھر چھوڑ کر۔

طلحہ: سچ میں۔۔۔تمہیں کیسے پتہ چلا؟ یہ تو بڑی خیران کن بات ہے۔

ساحر: ہاں میں بھی خیران ہوا تھا۔ اس سے پہلے اسے کبھی یہاں دیکھا نہیں۔

شاداب: وہ ملی کیسے یہ تو بتاؤ؟ اور اس نے بھی تمہیں دیکھا کہ نہیں؟

ساحر: ہاں اس نے بھی مجھے دیکھا۔ میں آج شیو کر رہا تھا جب مجھے کسی گانے کی آواز آئی میں نے باہر نکل کر دیکھا تو آواز چھت سے آرہی تھی۔ میں چھت پر چلا گیا اردگرد دیکھنے پر مجھے وہ چند گھر چھوڑ کر کھڑکی میں بیٹھی نظر آئی۔ گانے کی آواز اس کے ریڈیو سے آرہی تھی جو اس کے پاس پڑا ہوا تھا۔

طلحہ: پھر کیا ہوا؟

ساحر: پھر کیا ہونا تھا میں کچھ دیر تک اسے دیکھتا رہا پر جب اس کی نظر مجھ پر پڑی تو اس نے کھڑکی بند کر دی۔

شاداب: (ہنستا ہے) چلو کوئی بات نہیں اکثر محبت کا آغاز یونہی ہوتا ہے۔ لیکن تم امید رکھو کبھی تو کھڑکی تمہارے لیۓ کھلے گی۔

طلحہ: آغاز تو جیسا بھی ہوا ہو انجام اچھا ہونا چاہیۓ۔

شاداب: ویسے آغاز بھی کوئی اتنا برا نہیں ہوا ایک بات کی تو تصدیق ہو گئ۔ وہ بھی تمہاری طرح تھوڑی سی (انگلی سے پاگل پن کا اشارا کرکے) کریک ہے۔ وہ بھی ریڈیو پر گانے سنتی ہے جیسے تم سنتے ہو۔ تو ایک بات تو تم دونوں میں مشترک ہے۔

طلحہ: ایک بات اور ہے جو سوچنے والی ہے۔

شاداب: کیا؟

طلحہ: اگر وہ یہیں رہتی ہے تو اس دن یہاں سے بس سٹاپ پر بیٹھ کر کہاں گئ تھی؟

شاداب: یہ بھی کوئی سوچنے والی بات ہوئی۔ کسی کام سے گئی ہو گئ۔

ساحر: نہیں سوچنے والی بات ہے ایسے لگ رہا تھا وہ اس وقت کہیں اور سے آئی تھی تو بجاۓ اس کے وہ یہاں اپنے گھر آتی وہ بس پر بیٹھ کر کہیں چلی گئ۔ اور مجھے لگتا ہے وہ روز یہاں سے بس پر بیٹھ کر جاتی ہے۔ (سوچتے ہوۓ) کہاں جاتی ہو گی؟ پتہ لگانا پڑے گا۔

چودھواں منظر

رات کا وقت۔ ثانیہ کا گھر

ثانیہ اپنے گھر میں پروفیسر صاحبہ سے فون پر بات کر رہی ہے۔

ثانیہ: جی میم! میں بالکل ٹھیک ہوں آپ سنائیں آپ کو جگہ پسند آئی۔ کیسا لگا وہاں کا ماحول؟

پروفیسر: اچھا ہے۔ یہاں کا ماحول تو کافی اچھا ہے اور مراعات بھی وہاں سے بہت بہتر مل رہی ہیں۔ میری مانو تو تم بھی امتخان دے کر یہاں آجاؤ اور یہاں آکر ایڈمشن لو۔ یہاں کی تعلیم کا معیار بھی وہاں سے بہت اعلیٰ ہے۔

ثانیہ: کیا میم آپ بھی ابا کی طرح بات کرنے لگیں۔ وہ اکثر اصرار کرتے ہیں کہ میں ان کے ساتھ وہاں جاکر رہوں پر میں ٹال جاتی ہوں۔ اور اب آپ۔۔۔

پروفیسر: نہیں میں اصرار تو نہیں کر رہی میں تو بس یونہی کہہ رہی تھی۔

ثانیہ: چلیں چھوڑیں پھر اس بات کو۔۔۔ آپ بتائیں آپ وہاں جا کر مجھے بھول تو نہیں گئیں؟

پروفیسر: نہیں بھولی تو بالکل نہیں بس ذرا بات کرنے کے لیۓ وقت کم ملتا ہے۔

(کچھ دیر تک دونوں فون پر بات کرتی نظر آتی ہیں)

پندھرواں منظر

دن کا وقت۔ سڑک

ساحر بس اسٹاپ پر کھڑا ہے کلائی پر بندھی گھڑھی بار بار دیکھتا ہے اور بے چینی سے ادھر ادھر نظر دوڑاتا ہے۔ سڑک کے اس پار سے وہ لڑکی آتی ہوئی دیکھائی دیتی ہے۔ اس نے کندھے پر بیگ لٹکایا ہوا ہے اور ہاتھ میں دو تین کتابیں تھام رکھی ہیں۔ ساحر اسے دیکھ کر خوش ہو جاتا ہے۔ لڑکی سڑک پار کرتی ہے تو اس کی نظر ساحر پر پڑتی ہے وہ اسے دیکھ کر ٹھٹھکتی ہے۔ بس اسٹاپ پر کافی بھیڑ ہے وہ خاموشی سے چلتی ہوئی ایک کونے میں جا کر کھڑی ہو جاتی ہے۔ جیسے ہی بس آتی ہے وہ فوراً بھاگ کر بس میں سوار ہو جاتی ہے۔ ساحر بھی دوسرے لوگوں کے ساتھ بس میں سوار ہو جاتا ہے۔

سولہواں منظر

بس ایک سٹاپ پر آکر رکتی ہے وہ لڑکی نیچے اترتی ہے۔ چند دیگر مسافر بھی اترتے ہیں جن کے ساتھ ساحر بھی اتر کر نیچے آجاتا ہے۔ لڑکی تیز تیز قدم اٹھاتی ہوئی ایک طرف کو چل پڑتی ہے۔ ساحر بھی اس لڑکی کے پیچھے جاتا ہے۔ لڑکی اچانک رک جاتی ہے ساحر بھی رک جاتا ہے۔ پھر لڑکی چل کر اس کے قریب جاتی ہے۔

لڑکی: ( سخت لہجے میں) تمہیں کیا مسئلہ ہے میں دیکھ رہی ہوں کتنے دنوں سے تم میرا پیچھا کر رہے ہو۔ کون ہو تم اور کیا چاہتے ہو؟

ساحر: میں معذرت خواہ ہوں میں آپ کا پیچھا کرنا نہیں چاہتا میں تو آپ سے صرف ایک بات کرنا چاہتا ہوں۔ آپ سے بات کرنے کا اور کوئی طریقہ میرا پاس نہیں تھا اس لیۓ۔۔۔

لڑکی: (اسی لہجے میں) کیا بات کرنا چاہتے ہو تم؟

ساحر: بات یہ ہے۔۔۔(کچھ کہنے لگتا ہے لیکن رک جاتا ہے) چھوڑیں پھر کبھی۔۔۔فی الحال آپ کو یہ کتاب دینی تھی۔ آپ اسے بس سٹاپ پر گرا آئیں تھیں۔

(لڑکی ہاتھ میں پکڑی ہوئی اپنی کتابیں دیکھتی ہے وہاں ایک کتاب غائب ملتی ہے جسے وہ بس میں تیزی سے سوار ہوتے ہوۓ گرا آئی تھی۔ وہ اس کے ہاتھ سے کتاب لے لیتی ہے)

لڑکی: (کتاب لیتے ہوۓ نرمی سے) آپ کا شکریہ۔ شاید جلدی میں بس میں سوار ہوتے ہوۓ گر گئ تھی۔

ساحر: جی میں نے اسی وقت اٹھا لی تھی۔ بس میں آپ کو لوٹانے کا موقع نہیں ملا اس لیۓ آپ کے پیچھے چلا آیا۔

لڑکی: آپ کا بہت بہت شکریہ۔

ساحر: شکریے کی کوئی بات نہیں۔ میں چلتا ہوں۔

(ساحر واپس چل پڑتا ہے۔ لڑکی بھی اپنی راہ لیتی ہے)

سترھواں منظر

دن کا وقت۔ طلحہ اور ثانیہ کی یونیورسٹی۔

یونیورسٹی کی کسی راہ داری یا لان میں طلحہ اور ثانیہ چہل قدمی کر رہے ہیں۔ ان سے کچھ فاصلے پر اردگرد مختلف جگہوں پر دیگر بہت سے طلبہ و طالبات گھومتے پھرتے اور ٹولیوں میں بیٹھے گپیں لڑاتے ہوۓ نظر آرہے ہیں۔

طلحہ: آج میرے بڑے بھائی کے لیۓ گھر والے لڑکی دیکھنے جا رہے تھے مجھے بھی ساتھ چلنے کو بول رہے تھے لیکن میں یونیورسٹی چلا آیا۔ قسم سے ثانیہ! مجھے تو یہ لڑکی دیکھنے کا رواج یا رسم بڑا بےہودہ اور گھٹیا لگتا ہے۔ ایسا لگتا ہے لڑکی نہیں کوئی چیز ہے، کوئی کموڈٹی

(commodity)ہے

جسے آپ مارکیٹ سے خریدنے جاتے ہیں۔ جیسے کوئی گاڑی بھیڑ بکری خریدنے بازار جاتے ہیں بالکل اسی طرح ہم لڑکی دیکھنے جاتے ہیں۔ پہلے اس کا اچھی طرح معائنہ کرتے ہیں، دیکھتے ہیں کہ گاڑی کے فنکشنز سب درست کام کر رہیں، بھیڑ بکری کے دانت وانت سب ٹھیک جگہ پر ہیں پھر اگر پسند نہیں آۓ تو اگلی دکان پر چل پڑتے ہیں۔

ثانیہ: تو اگر تمہاری بیٹی ہوئی اور اسے کوئی اس طرح دیکھنے آۓ تو کیا کرو گے؟

طلحہ: میری بیٹی ہوئی تو میں کبھی نہیں چاہوں گا اسے کوئی اس طرح دیکھنے آۓ۔ کیونکہ میں سمجھتا ہوں اس طرح ہم بیٹی کو بیاہتے نہیں اسے فروخت کرتے ہیں، اسے بیچتے ہیں۔ جیسے کوئی گاہک سودا پسند کرنے جاتا ہے اگر اسے سودا پسند آجاتا ہے اور ڈیل مکمل ہو جاتی ہے تو وہ مقررہ تاریخ کو آکر اپنا سودا لے جاتا ہے۔ یہ ایک ایسی بیہودگی ہے جو صدیوں سے ہمارے سماج کا حصہ چلے آرہی ہے۔ اور افسوس ناک بات یہ ہے ہم اسے مشرقی اقدار اور اپنی اعلیٰ روایات قرار دے کر اس پر فخر کرتے اور اتراتے پھرتے ہیں۔ یہ بات ہے تو بڑی تلخ آسانی سے ہضم ہونے والی نہیں مگر حقیقت یہ ہے کہ یہی سچ ہے۔ اس قسم کی پرانی رسومات اور رواجوں سے جو ابھی تک چلی آرہی ہیں مجھے سخت نفرت ہے۔ اسی لیۓ تاریخ مجھے پسند نہیں کیونکہ وہ بھی پرانی باتوں پر زور دیتی پھرتی ہے۔

ثانیہ: اے ہے۔۔۔تاریخ بیچ میں کہاں سے آگئ۔ تاریخ کا مضمون پرانی باتوں یا گزرے ہوۓ زمانے کو اپنانے کا نہیں کہتا بلکہ تاریخ کا علم ہمیں یہ بتاتا ہے کہ ہم سے پہلے جو لوگ، جو قومیں جو معاشرے یا جو انسان گزر چکے ہیں وہ اپنی زندگی کیسے بسر کرتے تھے۔ ان کا رہن سہن، رسوم و رواج، معاشرت، بودوباش، چال چلن کیسا تھا۔ ان میں سے جو ہمیں اچھا لگے اور آج کے دور میں ممکن بھی ہو ہم اپنا سکتے ہیں۔

طلحہ: بس شروع ہو گئ اپنی پسند کے مضمون کی تعریفیں کرنے۔

ثانیہ: اپنی پسند کی تو ہر کوئی تعریف کرتا ہے لیکن یہ بالکل سچی اور صحیح تعریف ہے۔

طلحہ: اچھا جی! چلو آؤ تمہیں کچھ کھلاؤں نہیں تو بک بک کرتی رہو گی۔

ثانیہ: ہاں یہ ہوئی نا بات۔

(دونوں ایک طرف کو چل پڑتے ہیں)

طلحہ: (جاتے ہوۓ) ویسے لگتا ہے مجھے تمہارے مضمون میں دلچسپی لینی پڑے گی۔

ثانیہ: (اس کے ساتھ جاتے ہوۓ) ہاۓ میں تو خوشی سے مر جاؤں گی۔

اٹھارواں منظر

دن کا وقت۔ ساحر اور طلحہ کا کمرا یا اپارٹمنٹ۔

سپہر کا وقت ہے۔ ساحر چھت پر کھڑا ہے۔ اس کا رخ اس لڑکی کے گھر کی طرف ہے اس کے پیچھے کوٹھیوں کے اوپر سے غروب ہوتا ہوا سورج دکھائی دے رہا ہے۔ اس کی آخری کرنیں مکانوں کی چھتوں پر پڑ رہی ہیں۔ چند لمحوں بعد کھڑکی کھلتی ہے اور ساحر کو وہ لڑکی دکھائی دیتی ہے۔ اس لڑکی کی نظر ساحر پر پڑتی ہے ساحر جھینپ جاتا ہے اور فوراً رخ دوسری طرف موڑ لیتا ہے۔ وہ لڑکی ہنس پڑتی ہے۔ ساحر دوبارہ رخ اس کی جانب پھیرتا ہے۔ وہ لڑکی مسکرا کر اسے دیکھتی ہے۔ پھر چلی جاتی ہے۔ ساحر خوش ہوتا ہے اور مسکراتا ہوا نیچے چلا جاتا ہے۔

انیسواں منظر

دن کا وقت۔ ساحر اور طلحہ کا کمرا۔

کمرے میں اس وقت ساحر، طلحہ اور شاداب تینوں موجود ہیں۔ ساحر اور شاداب سگریٹ پی رہے ہیں جبکہ طلحہ اپنے کپڑے استری کرنے میں مصروف ہے۔

طلحہ: (کام کرتے ہوۓ) میرا خیال ہے اب تمہیں اس لڑکی سے بات کرنی چاہیۓ۔

ساحر: کیا بات کروں۔

طلحہ: اسے اپنا مدعا بتاؤ اور کیا۔

ساحر: (کش لگا کر) یار ہمت کہاں سے لاؤں؟

شاداب: (سگریٹ کا آخری کش لگا کر سگریٹ ایش ٹرے میں بجھا کر) اس میں ہمت کی کیا بات ہے وہی کہو جو بالکل سچ ہے۔ لڑکے تو اکثر جھوٹ بول کر لڑکیوں کو جعلی محبت کے جال میں پھنسا لیتے ہیں۔ انہیں غلط بیانی کرنے کی ہمت ہو جاتی ہے اور تم ہو کہ سچ کہنے سے ڈر رہے ہو۔ تمہاری تو کسی بات اور کسی جذبے میں ذرا بھی فریب نہیں تم تو جو کہو گے بالکل سچ کہو گے۔ پھر تم کیوں ڈر رہے ہو۔

ساحر: نہیں یار یہ کہنا بڑا آسان لگتا ہے پر ہے بڑا مشکل۔ پہلے میں نے بہت کچھ سوچا ہوتا ہے۔ اسے یہ کہوں گا وہ کہوں گا پر جب اس کے سامنے جاتا ہوں ساری باتیں بھول جاتی ہیں۔

طلحہ: ہوتا ہے یارا ایسا ہی ہوتا ہے مگر تم ہمت کرکے بات تو کرو۔ اور بالکل سیدھی بات کرو کسی اور چکر میں پڑنے کی بجاۓ اسے سیدھی طرح بتاؤ تم کیا چاہتے ہو اور تمہارا ارادہ کیا ہے۔

شاداب: اور اگر پھر بھی بات نہ بنی تو میں ایک رسی لادوں گا اس پنکھے سے باندھنا اور لٹک کر شہید ہو جانا۔

(طلحہ ہنستا ہے)

ساحر: (ہلکا سا ہنس کر) چھوڑ یار ادھر میری جان پر بنی ہے اور تمہیں مذاق سوجھ رہا ہے۔

(سگریٹ کا کش لگاتا ہے اور کسی گہری سوچ میں ڈوب جاتا ہے)

بیسواں منظر

دن کا وقت۔ سڑک۔

بارش ہو رہی ہے بس اسٹاپ پر ساحر اور وہ لڑکی کھڑے ہیں۔ اس وقت وہاں ان دونوں کے سوا اور کوئی نہیں۔

ساحر: میں آپ سے صرف ایک بات کرنا چاہتا ہوں اور کچھ نہیں۔

لڑکی: آپ سڑک پر کھڑے ہو کر کیا بات کرنا چاہتے ہیں؟

ساحر: میں جانتا ہوں سڑک پر کھڑے ہو کر بات کرنا مناسب نہیں لیکن اس کے سوا اور کوئی راستہ نہیں۔

لڑکی: تو پھر جلدی سے کریں جو بات بھی آپ نے کرنی ہے۔

ساحر: بات یوں ہے۔۔۔ میں آپ سے گھما پھرا کر کچھ بھی نہیں کہوں گا نہ کسی اور بکھیڑے میں پڑنے کے لیۓ آپ کو بولوں گا۔ میں بس یہ کہنا چاہتا ہوں جس دن میں نے آپ کو دیکھا تھا اسی وقت میں نے سوچ لیا تھا اور اسی وقت ارادہ کر لیا تھا کہ مجھے اسی لڑکی سے شادی کرنی ہے۔ (ثانیہ خیرت سے اس کی طرف دیکھتی ہے) جی ہاں آپ کو یہ سب بڑا عجیب لگ رہا ہو گا۔ کسی کو یوں ایک دم اس طرح کہہ دینا بڑی عجیب بات ہے لیکن میرا خیال ہے یہ انداز سب سے بہتر ہے۔

لڑکی: کہہ دیا آپ نے جو کہنا تھا۔ اب بہتر یہی ہے آپ خاموش ہو جائیں اور یہاں سے چلے جائیں۔ بات کرنے سے پہلے آپ نے سوچا بھی تھا کہ آپ کیا کہنے جارہے ہیں۔ آپ ایک انجان لڑکی کو جسے آپ ٹھیک طرح سے جانتے بھی نہیں اور شاید آپ کو ابھی تک اس کا نام بھی نہیں پتا آپ اسے سڑک پر کھڑے ہو کر شادی کا پرپوزل دے رہے ہیں۔

ساحر: نام تو میں آپ کا جانتا ہوں آپ کی وہ کتاب جو آپ اس بس سٹاپ پر بھول گئ تھیں اس پر آپ کا نام لکھا ہوا تھا۔ سائرہ نام ہے نا آپ کا؟ اور اس کے علاوہ مجھے یہ بھی معلوم ہے کہ آپ یونیورسٹی میں پڑھتی ہیں اور یہاں اپنی ایک دوست کے ساتھ رہتی ہیں۔ یونورسٹی کے بعد جاب پر بھی جاتی ہیں ابھی آپ وہیں جا رہی ہیں۔

لڑکی: بس؟ آپ سمجھتے ہیں شادی کے لیۓ اتنا جاننا کافی ہے؟

ساحر: نہیں۔ آپ کو لگتا ہے میں آپ کو بس اتنا سا جانتا ہوں اور آپ کی صرف شکل دیکھ کر میں نے آپ سے شادی کا فیصلہ کیا ہے؟ ایسی بات نہیں۔ میں آپ کی اس خوبی کے بارے میں جانتا ہوں جو شاید آپ خود بھی نہیں جانتی۔

لڑکی: اچھا وہ کیسے آپ مجھ سے کبھی ملے نہیں بس دور سے دیکھا ہے اور آپ میری خوبیوں کو بھی جان گۓ۔

ساحر: آپ کی وہ خوبی تو آپ کی شخصیت میں جھلکتی ہے دیکھنے سے ہی پتہ چل جاتا ہے۔

لڑکی: ایسی کیا خوبی ہے مجھ میں جسے جان کر آپ نے مجھ سے شادی کا فیصلہ کر ڈالا۔

ساحر: وہ یہ کہ خوبصورت ہونے کے علاوہ آپ میں یہ خوبی ہے کہ آپ ایک عام سی سیدھی سادی لڑکی ہیں بالکل میری طرح میں بھی ایک عام سا سیدھا سادہ لڑکا ہوں۔

لڑکی: یہ خوبی ہے؟ لوگ تو اسے خوبی نہیں سمجھتے۔

ساحر: لوگ نہ سمجھیں لیکن میری نظر میں تو یہ بہت بڑی خوبی ہے۔

(ایک آدمی اسٹاپ پر آتا ہے۔ دونوں جلدی سے دور ہٹ کر کھڑے ہو جاتے ہیں۔ ایسے ظاہر کرتے ہیں جیسے ایک دوسرے کو نہیں جانتے۔ بس آکر رکتی ہے وہ آدمی اور لڑکی دونوں بس میں سوار ہو جاتے ہیں۔ بس میں بیٹھ کر لڑکی کھڑکی میں سے اک نظر ساحر کو دیکھتی ہے پھر بس چل پڑتی ہے)

اکیسواں منظر

دن کا وقت۔ ثانیہ کا گھر۔

ثانیہ کا والد امجد فاروق اور اس کا دوست انصاری کمرے میں موجود ہیں۔ ان کے پاس ایک مہمان آدمی بیٹھا ہے۔ تینوں ہلکے پھلکے انداز میں باتیں کر رہیں۔

آدمی: فاروق صاحب آپ نے بہت سے دوسرے شعبوں پر تنقید کی ہے آپ کی باتیں بجا پر خود سائنس کے بارے میں آپ کا خیال ہے؟

فاروق: نیاز صاحب اس دور میں مسابقت کی جو فضا بن چکی ہے مقابلے بازی کا جو ماحول بنا دیا گیا ہے وہ نہایت افسوس ناک ہے۔ ہر کوئی ایک دوسرے سے سبقت لے جانے کی فکر میں ہے ہر کوئی چاہتا ہے وہ دوسرے کو پچھاڑ کر آگے بڑھ جاۓ۔ اس ماحول سے یقیناً سائنس اور دیگر علوم بھی متاثر ہوۓ ہیں۔ اب لوگ علم اس لیۓ حاصل نہیں کرتے کہ اس سے اپنی اور دوسرے انسانوں کی فکری اور عملی زندگی میں بہتری اور بھلائی کے آثار پیدا ہوں گے بلکہ لوگ اس لیۓ علم سیکھتے ہیں تاکہ وہ دوسروں کو پچھاڑ سکیں۔ وہ علم کی طاقت سے دوسروں کو زیر کر سکیں۔ یہ معاملہ افراد تک محدود رہتا تو پھر بھی شاید کسی حد تک قبول ہوتا لیکن شرمناک اور خطرناک بات یہ ہے کہ یہ رویہ قوموں اور ریاستوں تک میں پایا جاتا ہے۔ ہر قوم دوسری قوم سے سبقت لے جانے کی فکر میں ہے۔

انصاری: کیا ہی اچھا ہو اگر سب لوگ مادی اسباب کی بجاۓ نیکی، بھلائی، سچائی اور ایمانداری میں سبقت لے جانے کی جدوجہد کریں۔ یہاں کبھی کسی نے مقابلے بازی کی کوشش نہیں کی۔ اس میدان میں کبھی کوئی کھیل دیکھنے کو نہیں ملا۔ یہاں کبھی کسی کا میچ نہیں پڑا۔ کیا ہی اچھا ہو اگر تمام علوم اور فنونِ عالیہ کا مقصد صرف مادی اور ذاتی منفعت کے حصول کی بجاۓ مجموعی نسلِ انسانی کی اصلاح اور فلاح ہو جاۓ۔ان علوم و فنون کی سمت تبدیل ہو جاۓ۔ سائنس اور آرٹ کا رخ مادیت سے روحانیت کی جانب مڑ جاۓ۔

فاروق: معلوم نہیں انصاری صاحب ایسا کبھی ہو گا کہ نہیں۔ لیکن امید رکھنی چاہیۓ شاید کبھی یہ خواب پورا ہو جاۓ۔ ہماری زندگیوں میں نہ ہو تو ہمارے بعد ہو جاۓ۔

آدمی: اچھا فاروق صاحب انصاری صاحب مجھے اجازت دیجیے۔

فاروق: اتنی کیا جلدی ہے کچھ دیر بیٹھیۓ۔

آدمی: نہیں مجھے ذرا ڈاکٹر کے پاس جانا ہے۔

انصاری: کیوں خیریت ہے۔ کیا ہو گیا؟

آدمی: وہ پچھلے کچھ عرصے سے نظر کا تھوڑا مسئلہ بنا ہوا ہے تو میں نے سوچا دکھا لینا چاہیۓ بات زیادہ نہ بگڑ جاۓ۔ شاید عینک کا نمبر تبدیل ہونے والا ہو۔

فاروق: ہاں یہ ہو سکتا ہے۔ چلیں پھر تو آپ کو نہیں روکا جا سکتا۔ لیکن کسی دن دوبارہ چکر لگائیے گا جب تک میں یہاں ہوں ایک بار اور ملاقات ہو جاۓ گی۔

آدمی: ہاں ضرور کیوں نہیں۔ کب تک ہیں آپ یہاں پر؟

فاروق: ابھی تقریباً دو تین ہفتے تک تو ہوں۔

آدمی: (اٹھتے ہوۓ) ٹھیک ہے میں چلتا ہوں پھر کسی دن آؤں گا۔

بائیسواں منظر

رات کا وقت۔ ساحر کا کمرا۔

ساحر کمرے میں اکیلا کھڑکی کے پاس کھڑا ہے اور کھڑکی سے باہر دیکھ رہا ہے۔ ریڈیو پر گانا بج رہا ہے۔

آپ آۓ تو خیالِ دلِ ناشاد آیا۔۔۔

گانا کچھ دیر تک بجتا ہے پھر طلحہ اندر آتا ہے۔

طلحہ: (اردگرد تلاش کرتے ہوۓ) یار میرے موزے کہاں ہیں صبح تم نے رکھے تھے۔

(ساحر اس کی بات پر دھیان نہیں دیتا۔ جیسے اس نے بات سنی ہی نہیں)

طلحہ: کہاں کھوۓ ہو میری بات سن رہے ہو؟

(وہ ابھی بھی دھیان نہیں دیتا)

طلحہ: تم ایسے نہیں سنو گے۔

(آگے بڑھتا ہے اور ریڈیو بند کر دیتا ہے۔ ساحر اسی انداز میں کھڑا رہتا ہے)

طلحہ: (خیرت سے) یہ کیا یہ تو ابھی بھی نہیں بولا۔ (اس کے کندھے پر ہاتھ رکھ کر) کس دنیا میں ہو بھائی جان!

(ساحر اس کی طرف مڑتا ہے)

طلحہ: آجاؤ جناب واپس ہماری دنیا میں آجاؤ۔

ساحر: (چل کر بستر پر بیٹھ جاتا ہے) کیا کروں تمہاری دنیا میں آکر۔ تمہاری دنیا میں رکھا کیا ہے۔ نہیں چاہیۓ مجھے تمہاری دنیا۔

طلحہ: کیوں ہماری دنیا سے آپ کو کیا تکلیف ہے؟ اس نے آپ کا کیا بگاڑا ہے؟

ساحر: (شعر پڑھتا ہے)

یہ محلوں یہ تختوں یہ تاجوں کی دنیا

یہ انساں کے دشمن سماجوں کی دنیا

یہ دولت کے بھوکے رواجوں کی دنیا

یہ دنیا اگر مل بھی جائے تو کیا ہے

طلحہ: پھر سے ساحر لدھیانوی کو بیچ میں لے آۓ۔ جناب اپنے لدھیانوی صاحب کو معذرت کرکے کچھ دیر خاموش کروائیے اور مجھے بتایۓ میرے موزے کہاں رکھے ہیں۔

ساحر: (لاپرواہی سے) مجھے کیا پتہ یہیں کہیں ہوں گے ڈھونڈ لو۔

طلحہ: یار میں نے اس وقت تمہیں پکڑاۓ تھے کہ انہیں صوفے پر رکھ دینا۔

ساحر: (سگریٹ سلگا کر) تو یہیں رکھے ہوں گے دیکھ لو۔

طلحہ: رکھے ہوں گے کا کیا مطلب۔ یعنی تمہیں یاد بھی نہیں کہ تم نے رکھے تھے کہ نہیں۔

ساحر: (آہ بھر کر) مجھے تو آج کل کچھ بھی یاد نہیں۔ مجھے تو یہ بھی یاد نہیں میں کون ہوں، کیا ہوں۔

طلحہ: آپ وہ ایک عدد خیوانِ ناطق ہیں جس نے انتہائی قیمتی موزوں کا جوڑا کہیں رکھ کر چپ سادھ لی ہے۔

ساحر: مجھے لگتا ہے میں کوئی دروازہ ہوں، یا کوئی میز ہوں یا شاید ایک کرسی ہوں۔

طلحہ: یہ تینوں بڑی اعلیٰ چیزیں ہیں میز کرسی بننے میں کوئی حرج نہیں۔ لیکن میرا ذاتی خیال ہے میز بننا زیادہ بہتر ہے کیونکہ کرسی ایک ایسی چیز ہے جس پر انسان اپنا سارا وزن ڈال کر بیٹھ جاتا ہے اور پھر اٹھنے کا نام نہیں لیتا۔ رہا دروازہ تو دروازے کا جو بار بار کھلنے اور بند ہونے کا فعل ہے اس پر بہت سے اعتراضات اٹھ سکتے ہیں۔ فتویٰ بھی صادر ہو سکتا ہے۔

ساحر: (اپنی دھن میں) مجھے لگتا ہے مجھے اپنی خود کی تلاش میں نکلنا چاہیۓ۔

طلحہ: یہ اچھا ہے پر خود کی تلاش سے پہلے میرے موزے تلاش کرنے زیادہ ضروری ہیں۔

ساحر: لیکن خود کو تلاش میں کروں گا کہاں؟

طلحہ: وہیں جہاں میرے موزے ہیں۔

(شاداب اندر آتا ہے)

شاداب: کون کس کو تلاش کر رہا ہے؟

طلحہ: میں میرے موزوں کو اور یہ جناب اپنے آپ کو۔

(ساحر اٹھ کر دوبارہ کھڑکی کے پاس جا کر کھڑا ہو حاتا ہے)

ساحر: (کھڑکی سے باہر جھانکتے ہوۓ) ہم سب کسی نہ کسی کو تلاش کر رہے ہیں۔

شاداب: یہ ٹھیک کہا۔ سب متلاشی ہیں۔ ہر کسی کا کچھ نہ کچھ کھو گیا ہے جسے وہ ڈھونڈ رہا ہے۔

تئیسواں منظر

دن کا وقت۔ سڑک

بس اسٹاپ پر ساحر کھڑا سائرہ کا انتظار کر رہا ہے۔ بس اسٹاپ پر اس وقت اور کوئی نہیں۔ سائرہ سڑک کے دوسری طرف سے اسے آتی ہوئی دکھائی دے جاتی ہے۔ وہ بھی اسے دور ہی سے دیکھ لیتی ہے۔ قریب پہنچتی ہے اور ایک کونے میں جا کر کھڑی ہو جاتی ہے۔ ساحر کھسک کر اس کے پاس جاتا ہے۔

سائرہ: آپ پھر آگۓ۔ آپ کو پتہ ہے سڑک پر اس طرح بات کرنا ٹھیک نہیں۔

ساحر: میں بس آپ کے جواب کا منتظر ہوں۔

سائرہ: آپ پاگل ہیں اتنے بڑے فیصلے کوئی سڑک پر کھڑے ہو کر کرتا ہے۔

ساحر: میں آپ کو سڑک پر کھڑے ہو کر فیصلہ کرنے کے لیۓ تو نہیں بول رہا یہاں تو میں آپ سے صرف بات کر رہا ہوں۔ میرا خیال ہے اپنی شادی کا پیغام پہنچانے کا حق تو مجھے حاصل ہے۔

سائرہ: لیکن میں رضا مند نہیں ہوں۔ انکار کا حق مجھے بھی حاصل ہے۔

ساحر: آپ کیوں رضا مند نہیں ہیں اس کی کوئی وجہ؟

سائرہ: وجہ بتانا میں ضروری نہیں سمجھتی۔

ساحر: یہ کیا بات ہوئی؟ دیکھیۓ آپ کو کہیں نہ کہیں تو شادی کرنی ہے۔ اگر آپ کو انکار ہے تو آپ کو معقول وجہ بتانی ہو گی۔

سائرہ: وجہ یہ کہ آپ مجھے جانتے ہوں گے لیکن میں آپ کو بالکل بھی نہیں جانتی۔

ساحر: اس میں کیا ہے آپ جس وقت جو کچھ بھی میرے بارے میں جاننا چاہتی ہیں جان سکتی ہیں۔ میں حاضر ہوں۔

سائرہ: دیکھیۓ آپ بات کو سمجھ نہیں

رہے۔ میں اب آپ کو کیسے سمجھاؤں۔۔۔

(چند لمحے خاموش ہوتی ہے پھر بولتی ہے)

اچھا ٹھیک ہے میں آپ کو سچ سچ بتاؤں گی لیکن شرط یہ ہے کہ آپ پھر دوبارہ مجھے تنگ نہیں کریں گے۔

ساحر: وہ تو وجہ جان کر ہی پتہ چلے گا۔

سائرہ: نہیں پہلے آپ وعدہ کریں۔

ساحر: کس بات کا وعدہ کروں۔ میں آپ کو تنگ تو نہیں کر رہا بس آپ سے انکار کی وجہ پوچھ رہا ہوں اگر وجہ معقول اور مناسب ہوئی تو اسے قبول کر لوں گا۔

سائرہ: ٹھیک ہے۔ بات یوں ہے ایسا نہیں کہ مجھے آپ سے شادی سے انکار ہے آپ مجھے اچھے انسان لگے ہیں۔ بات دراصل یہ ہے کہ میں ابھی کسی سے بھی شادی نہیں کر سکتی۔ اس کی وجہ میرا گھر اور میری فیملی ہے۔ مجھے آپ کا تو نہیں پتہ کہ آپ کا کیا سٹیٹس ہے لیکن میں ایک لوئر مڈل کلاس سے تعلق رکھتی ہوں۔ میرے والد کی اتنی زیادہ آمدن نہیں کہ وہ اکیلے پورے کنبے کے اخراجات پورے کر سکیں اسی لیۓ میں پڑھائی کے ساتھ ملازمت کرتی ہوں تاکہ اپنی پڑھائی کے خرچے بھی پورے کروں اور ساتھ فیملی کو بھی سپورٹ کر سکوں۔ آپ یقین کریں میرا گھر میری جاب سے چلتا ہے۔ میں شادی کرکے گھر چھوڑ کر چلی جاؤں گی تو پیچھے سے میرے گھر والوں کا کیا بنے گا۔ (سائرہ دوبارہ خاموش ہو جاتی ہے۔ چند لمحے خاموش رہنے کے بعد دوبارہ بولتی ہے) امید کرتی ہوں آپ کو بات سمجھ آگئ ہو گی اور آئندہ میرے پیچھے یہاں نہیں آئیں گے۔

(ساحر کچھ کہنا چاہتا ہے لیکن بس آکر اسٹاپ پر رکتی ہے۔ چند مسافر اترتے ہیں۔ سائرہ بس پر سوار ہو جاتی ہے۔ ساحر اسے کھڑا ہو کر دیکھتا رہتا ہے۔ سائرہ بھی اسے بس میں بیٹھ کر بس چلنے تک دیکھتی رہتی ہے۔ پھر بس چل پڑتی ہے۔)

چوبیسواں منظر

دن کا وقت۔ ساحر کا کمرا۔

کمرے میں اس وقت ساحر، شاداب اور طلحہ تنیوں موجود ہیں۔ کمرے میں مکمل خاموشی ہے۔ ساحر کھڑکی کے ساتھ لگ کر کھڑا ہے اور باہر دیکھ رہا ہے۔ وہ دونوں خاموشی سے یوں بیٹھے ہیں جیسے کسی بات پر غور کر رہے ہوں۔

شاداب: تو بات اتنی ہے کہ وہ صرف اپنی گھریلو زندگی اور حالات کی وجہ سے انکار کر رہی ہے۔ لیکن یار بات تو اس کی درست ہے یہ مسئلہ تو واقعی کافی گھمبیر ہے۔ اور تم خود بھی کوئی بادشاہ سلامت نہیں اور نہ ہی کسی بزنس ٹائیکون کی اولاد ہو جو اس کے لیۓ کچھ کر سکو۔

ساحر: وہ بات تو تمہاری ٹھیک ہے لیکن اگر میں اس کی مدد کر سکتا بھی تو بھی شاید وہ میری مدد نہ لیتی۔ اور پھر اس کے باوجود وہ شادی کے لیۓ ہاں تو نہیں کرے گی کیونکہ اسے مستقل طور پر اپنی فیملی کو سپورٹ کرنا ہے۔

شاداب: ہاں یہ بات بھی ہے۔ تو پھر سمجھو وہ تمہارے مقدر میں نہیں ہے۔ (طلحہ کی طرف دیکھ کر) تم کیا کہتے ہو؟

طلحہ: میرے پاس اس مسئلے کا ایک حل ہے۔

شاداب: کیا؟

(طلحہ اٹھتا ہے اور میز پر پڑی ہوئی کیتلی میں سے چاۓ کپ میں ڈالتا ہے۔ ایک گھونٹ بھرتا ہے اور بولتا ہے)

طلحہ: حل بڑا سیدھا ہے۔ لیکن پہلے میں یہ کہوں گا (ساحر سے) تم ہر وقت ساحر کی شاعری پڑھتے رہتے ہو اور اس کے گیت سنتے رہتے ہو لیکن اس کا یہ گیت تمہیں یاد نہیں۔

ساحر: کون سا گیت؟

طلحہ: (گنگنا کر) تدبیر سے بگڑی ہوئی تقدیر بنا لے۔۔۔خود پہ بھروسہ ہے تو دھاؤ لگا لے۔۔۔یہ دھاؤ لگا لے۔

ساحر: تو کیا ہے تدبیر!۔۔۔ بتاؤ؟

طلحہ: وہ یہ کہ اگر وہ فیملی کو سپورٹ کرنا چاہتی ہے جیسے کہ ابھی کر رہی ہے تو اسے کرنے دو۔

ساحر: کیا مطلب؟

طلحہ: پہلے آرام سے بیٹھ جاؤ پھر بتاتا ہوں۔

(ساحر بد دلی سے بیٹھ جاتا ہے)

طلحہ: بات یہ ہے کہ تم ایک بار پھر اس سے ملو اور اس سے کہو۔۔۔

پچیسواں منظر

دن کا وقت۔ سڑک

بس اسٹاپ پر ساحر اور سائرہ دونوں کھڑے ہیں۔ وہاں اور کوئی نہیں۔

سائرہ: آپ پھر کیوں آگۓ آپ نے وعدہ بھی کیا تھا کہ آپ نہیں آئیں گے۔

ساحر: میں بس آپ سے آخری دفعہ ایک بات کرنے آیا ہوں۔

سائرہ: مجھے آپ سے کوئی بات نہیں کرنی۔

ساحر: دیکھیں میں نے آپ کی بات تحمل سے سنی تھی اور کہا تھا کہ اگر آپ کا عذر مناسب ہوا تو اسے اپنی قسمت سمجھ کر قبول کر لوں گا۔ اب میں بھی ایک بات کرنے آیا ہوں تو اصولاً آپ کو سننی چاہیۓ۔

سائرہ: اچھا ٹھیک ہے جلدی سے بتائیں؟

ساحر: پہلے آپ بھی وعدہ کریں آپ میری بات کا دیانتداری سے جائزہ لیں گی اور اگر میرا جواب مناسب نہ لگا تو اس کی کوئی معقول وجہ بتائیں گی۔

سائرہ: آپ پہلے بتائیں تو۔

ساحر: آپ نے کہا تھا آپ ایک لوئر مڈل کلاس فیملی سے تعلق رکھتی ہیں۔ تو میں آپ کو بتا دوں میرا تعلق بھی متوسط طبقے سے ہی ہے۔ اور یہ کہ آپ نے کہا تھا آپ شادی اس لیۓ نہیں کر سکتیں کیونکہ آپ کو اپنی فیملی کو سپورٹ کرنا ہے۔

سائرہ: جی۔

ساحر: اس کا میرے پاس ایک حل ہے اور بڑا سیدھا حل ہے۔

سائرہ: وہ کیا؟

ساحر: ابھی آپ اپنی فیملی کو سپورٹ کس طرح کر رہیں ہیں۔۔۔ ملازمت کرکے؟

سائرہ: ظاہر ہے۔

ساحر: تو یہ کام تو آپ شادی کے بعد بھی جاری رکھ سکتی ہیں۔ بلکہ اس سے زیادہ اچھی طرح کر سکتی ہیں۔ کیونکہ ابھی تو آپ اپنے خرچے خود اٹھاتی ہیں جو کہ شادی کے بعد ظاہر ہے میرے ذمے ہو جائیں گے۔ آپ جیسے ابھی گھر والوں کو سپورٹ کر رہی ہیں بالکل اسی طرح کرتے رہنا میں کوئی آپ سے آپ کی سیلری میں سے حصہ تو نہیں مانگ لوں گا۔ آپ کی اپنی کمائی ہے آپ کو حق ہے جہاں مرضی لگائیں۔ اور پھر شادی کے بعد آپ میری مدد بھی تو لے سکیں گی۔

سائرہ: ایسا نہیں ہوتا یہ کہنا آسان ہے کرنا بڑا مشکل ہے۔ جب میں دوسرے گھر چلی جاؤں گی تو اپنے گھر والوں کی دیکھ بھال کس طرح کر پاؤں گی۔

ساحر: ابھی بھی آپ اپنے گھر میں تو نہیں رہ رہیں۔ آپ تو یہاں اپنی دوست کے ساتھ رہتی ہیں۔ آپ کی فیملی تو دوسرے شہر میں ہے یہاں سے آپ ان کو سپورٹ کرتی ہیں۔

سائرہ: آپ بات کو کیوں نہیں سمجھتے ایسے نہیں ہوتا۔

ساحر: دیکھیۓ آپ نے کہا تھا بات معقول ہوئی تو قبول کر لوں گی۔

سائرہ: نہیں ایسے۔۔۔(سختی سے) آپ بس جائیں یہاں سے آپ کو بات سمجھ ہی نہیں آتی۔

ساحر: لیکن۔۔۔

(دو تین مسافر اسٹاپ پر آکر کھڑے ہوتے ہیں۔ سائرہ اور ساحر دونوں خاموش ہو جاتے ہیں۔ پھر بس آکر رکتی ہے سائرہ بیٹھ کر چلی جاتی ہے)

چھبیسواں منظر

دن کا وقت۔ طلحہ کی یونیورسٹی۔

طلحہ اور ثانیہ یونیورسٹی کیفٹیریا میں بیٹھے ہیں۔ کیفٹیریا میں اردگرد طلبہ کا کافی رش ہے۔ طلحہ موبائل کی سکرین پر نظریں جماۓ بیٹھا ہے۔

ثانیہ: طلحہ!

طلحہ: ہونہہ۔

ثانیہ: میں نے فیصلہ کر لیا ہے۔

طلحہ: (موبائل سے نظریں ہٹاۓ بغیر) کیا؟

ثانیہ: میں یونیورسٹی کے بعد ملک سے باہر جا رہی ہوں۔

طلحہ: (موبائل چھوڑ کر) کیا کیا کہا؟

ثانیہ: ہاں۔ میں نے سوچ لیا ہے۔ ڈگری مکمل کرکے میں چلی جاؤں گی۔

طلحہ: لیکن کیوں پہلے تو تم جانا نہیں چاہتی تھی۔

ثانیہ: اس لیۓ کہ مجھے لگتا ہے ابا ٹھیک کہتے ہیں۔ مجھے آگے پڑھنا ہے یا جاب کرنی ہے جو بھی کرنا ہے وہاں جا کر کرنا چاہیۓ۔

طلحہ: تو جو یہاں ہیں ان کا کیا؟

ثانیہ: تم تو خود جانا چاہتے ہو۔ تمہارا بھی تو ڈگری کے بعد یہی پلان ہے۔

طلحہ: ہاں ہے لیکن اتنی جلدی بھی نہیں ابھی تو آخری سمیسٹر کے دو ماہ رہتے ہیں۔

ثانیہ: تو میں کون سا ابھی جارہی ہوں میں بھی آخری سمیسٹر مکمل کرکے جاؤں گی۔

طلحہ: لیکن مجھے وقت لگے گا ثانیہ! مجھے ابھی بہت سی تیاری کرنی ہے۔ میں کچھ عرصہ اپنے گھر میں جا کر رہنا چاہتا ہوں چار سال ہو گۓ ہیں مجھے اپنے گھر سے دور اس شہر میں رہتے ہوۓ۔

ثانیہ: تو میں کون سا یونیورسٹی ختم ہونے کے بعد فوراً چلی جاؤں گی مجھے بھی اس کے بعد کافی وقت لگے گا۔

طلحہ: اچھا چلو پھر دیکھیں گے جب وقت آۓ گا۔ اتنی دیر تک ہماری منگنی بھی ہو جاۓ گی پھر کچھ پلان کر لیں گے۔ میری امی تو کہہ رہی تھیں ابھی منگنی کر لیتے ہیں میں نے کہا آپ لوگوں سے بات ہو گئ ہے اتنا کافی ہے منگنی ہم امتحان کے بعد کر لیں گے۔

ثانیہ: ٹھیک کہا تم نے ابھی اگر منگنی کریں تو منگنی کے فنکشن کی تیاری میں تقریباً دس پندرہ دن تو پکے گۓ۔ ایسے میں امتحان میں دن کتنے رہ جائیں گے۔ پہلے ہی ہماری تیاری بالکل نہیں۔

طلحہ: تمہاری تو پھر بھی ہو گی مجھے تو کچھ بھی نہیں آتا۔ میں تو دعا کر رہا ہوں یہ آخری سمیسٹر کسی طرح پار ہو جاۓ۔

(چند لڑکے لڑکیاں جو ان دونوں کے کلاس فیلوز اور دوست ہیں کیفٹیریا میں آتے ہیں۔)

ستائیسواں منظر

دن کا وقت۔ ساحر کا کمرا۔

ساحر چھت پر دیوار کے ساتھ ٹیک لگا کر کھڑا ہے۔ اس کا دھیان مکمل طور پر کھڑکی کی طرف ہے۔ وہ کھڑکی کھلنے کا انتظار کر رہا ہے۔ کافی دیر تک کھڑا رہتا ہے لیکن کھڑکی نہیں کھلتی۔ یہاں تک کہ سورج غروب ہو جاتا ہے۔ پھر افسردہ سا نیچے چل پڑتا ہے۔

دن کا وقت۔ سڑک۔

ساحر بس اسٹاپ پر کھڑا ہے۔ یہاں بھی کافی دیر تک سائرہ کا انتظار کرتا ہے۔ بار بار گھڑی دیکھتا ہے۔ ادھر ادھر چکر لگاتا ہے۔ دو تین مسافر اسٹاپ پر آتے ہیں کچھ دیر ٹھہرتے ہیں پھر بس میں سوار ہو کر چلے جاتے ہیں۔ اگلی بس آتی ہے کچھ مسافر اترتے ہیں اور چلے جاتے ہیں۔ جب بہت وقت گزر جاتا ہے تو مایوس ہو کر چل پڑتا ہے۔

اٹھائیسواں منظر

رات کا وقت۔ ساحر کا کمرا۔

ساحر کمرے میں اکیلا سر جھکاۓ بیٹھا ہے۔ طلحہ اندر آتا ہے۔ اندر آکر بستر پر بیٹھ کر جوتے کے تسمے کھولنے لگتا ہے تو اس کی نظر ساحر پر پڑتی ہے)

طلحہ: کیوں جناب کیوں منہ لٹکاۓ بیٹھے ہو؟

ساحر: کچھ نہیں۔

طلحہ: کچھ تو ہے۔

ساحر: (بیزاری سے) کہا نا کچھ نہیں۔

طلحہ: یہ تو ہو نہیں سکتا کچھ نہ کچھ تو ہے۔ اچھا اس کا کوئی جواب آیا؟

ساحر: (بیزاری سے) مجھے نہیں پتہ۔

طلحہ: اس کا مطلب ہے نہیں آیا اور کہیں اس کا کوئی پتہ چلا؟

(ساحر خاموش رہتا ہے)

طلحہ: اس کا مطلب ہے نہیں چلا۔۔۔یار پریشان نہ ہو یہیں ہو گی جانا اس نے کہاں ہے۔

ساحر: دو تین دن ہو گۓ ہیں اسے غائب ہوۓ ہوۓ۔ اس آخری ملاقات کے بعد نہ تو وہ چھت پر نظر آئی ہے اور نہ ہی بس سٹاپ پر آرہی ہے۔ مجھے تو لگتا ہے کہیں چلی گئ ہے۔

طلحہ: کہاں جا سکتی ہے۔ جب جاب وہ یہاں کرتی ہے پڑھتی یہاں ہے تو جاۓ گی کہاں۔ ہو سکتا ہے اپنے گھر گئ ہو کچھ دن صبر کرو آجاۓ گی۔

(ساحر سر ہلا کر خاموش ہو جاتا ہے)

طلحہ: اور ایک بات اگر پھر بھی نظر نہ آئی تو کسی دن اس جگہ جا کر دیکھنا جہاں وہ رہتی ہے۔

ساحر: اس سے کیا ہوگا؟

طلحہ: شاید اس کے بارے میں کچھ پتہ چل جاۓ۔

(ساحر سر ہلا کر اشارے سے جواب دیتا ہے)

انتیسواں منظر

دن کا وقت۔ سڑک۔

ساحر ایک خالی سڑک پر چلتا ہوا جارہا ہے۔ چند قدم چل کر ایک جانب مڑ کر ایک گلی میں اتر جاتا ہے۔ گلی میں دونوں جانب کوٹھیاں ہیں وہ ایک ایک کو بڑے دھیان سے دیکھتا ہوا جاتا ہے۔ ایک مکان کے قریب آکر رکتا ہے اور اسے غور سے دیکھتا ہے۔ ایک طرف سے گلی میں چل کر دو لڑکیاں باتیں کرتی ہوئیں آتی ہیں اور مکان کے قریب آکر رک جاتی ہیں ساحر تھوڑا ہٹ کر کھڑا ہو جاتا ہے۔ ایک لڑکی اس گھر کی گھنٹی بجاتی ہے۔

پہلی لڑکی: تمہیں پکا یقین ہے یہاں جگہ مل جاۓ گی۔

دوسری لڑکی: ہاں یارا مجھے ہتہ ہے یہ مکان خالی ہے۔ وہ اپنی انگلش ڈیپارٹمنٹ کی سائیرہ نہیں؟ وہ اپنی کسی کلاس فیلو کے ساتھ پہلے یہاں رہتی تھی۔ ابھی چند دن ہوۓ ہیں وہ یہ گھر چھوڑ کر گئی ہیں۔ اس نے ہی مجھے بتایا ہے کہ اگر تم لوگ رہنا چاہتے ہو تو پتہ کر لو کافی اچھا مکان ہے اور ابھی خالی بھی ہو گا۔

پہلی لڑکی: اگر مکان اچھا تھا تو ان لوگوں نے کیوں چھوڑا؟

دوسری لڑکی: میں نے بھی پوچھا تھا لیکن اس نے کچھ ٹھیک طرح سے بتایا نہیں کہہ رہی تھی اس کا اپنا کوئی مسئلہ ہے لیکن جگہ بہت اچھی اور محفوظ ہے تم لوگوں کو پسند آۓ گی۔

پہلی لڑکی: چلو دیکھ لیتے ہیں۔ دوبارہ گھنٹی بجاؤ کوئی باہر نکل ہی نہیں رہا۔

(لڑکی دوبارہ گھنٹی بجاتی ہے۔ ساحر چند لمحے وہاں رک کر ان کی باتیں سنتا ہے پھر واپس چل پڑتا ہے۔ گلی سے نکل کر سڑک پر آتا ہے اور سر جھکاۓ ایک طرف کو چل پڑتا ہے)

بیسواں منظر

وہی وقت۔ بس اسٹاپ۔

ساحر چلتا ہوا آرہا ہے اور بس اسٹاپ کے قریب پہنچ کر رک جاتا ہے۔ بس اسٹاپ اس وقت خالی ہے اردگرد کوئی نہیں۔ ساحر کو سائیرہ کا خیال آتا ہے اور اسے وہ اسٹاپ پر کھڑی نظر آتی ہے بالکل اسی طرح جس طرح وہ پہلے اسے وہاں کھڑے دیکھتا تھا۔ چند لمحے بعد وہاں ایک آدمی آتا ہے ساحر کا خیال ٹوٹ جاتا ہے اور سائیرہ غائب ہو جاتی ہے۔ وہ آگے چل پڑتا ہے)

اکیسواں منظر

دن کا وقت۔ ساحر کا کمرا یا اپارٹمنٹ

ساحر چھت پر منڈیر پر کہنیاں ٹکاۓ کھڑا ہے۔ کسی کسی وقت کھڑکی کی طرف بھی دیکھ لیتا ہے۔ کھڑکی مکمل طور پر بند ہے وہاں کوئی نہیں۔ اس پر ایک آواز اوورلیپ کرتی ہے اور یہ نظم کہی جاتی ہے۔

مری تری نگاہ میں

جو لاکھ انتظار ہیں

جو میرے تیرے تن بدن میں

لاکھ دل فگار ہیں

جو میرے تیرے شہر کی

ہر اک گلی میں

میرے تیرے نقش پا کے بے نشاں مزار ہیں

جو میری تیری رات کے

ستارے زخم زخم ہیں

جو میری تیری صبح کے

گلاب چاک چاک ہیں

یہ زخم سارے بے دوا

یہ چاک سارے بے رفو

کسی پہ راکھ چاند کی

کسی پہ اوس کا لہو

یہ ہے بھی یا نہیں، بتا

یہ ہے، کہ محض جال ہے

مرے تمہارے عنکبوت وہم کا بنا ہوا

جو ہے تو اس کا کیا کریں

نہیں ہے تو بھی کیا کریں

بتا، بتا،

بتا، بتا

شیطان عدالت میں

2024-07-15T13:41:00.006+05:00

کردار

شیطان= اس کی شکل و صورت عام انسانوں جیسی نہیں۔ سر پر دو سینگ ہیں اور کان اور ناک بڑے بڑے ہیں۔ چہرا اور دانت بھی عجیب و غریب ہیں۔ شکل کچھ خوفناک ہے اور کچھ مضحکہ خیز جسے دیکھ کر ہنسی آۓ۔

جج۔ وکیل۔ ڈاکٹر۔ مذہبی عالم۔ اور چند دیگر افراد۔

منظر

کمرۂ عدالت میں کٹہرے میں شیطان ملزم کی خیثیت سے کھڑا ہے۔ کٹہرے کے باہر وکیل کھڑا ہے جو شیطان سے سوال و جواب کرتا ہے۔ جج اپنی مخصوص نشست پر بیٹھا ہے، کمرۂ عدالت لوگوں سے بڑا پڑا ہے بہت سے لوگ عدالت کی اس خصوصی کاروائی کو دیکھنے آۓ ہیں۔

پہلے وکیل جج سے مخاطب ہوتا ہے۔ اپنی بات ختم کرنے کے بعد پھر شیطان سے مخاطب ہوتا ہے۔

وکیل: (بلند آواز سے) مخترم جج صاحب! آج تک انسانی تاریخ میں ایسی انوکھی اور نرالی عدالتی کاروائی کبھی دیکھنے کو نہیں ملی جہاں ملزم کوئی انسان نہیں بلکہ وہ ہستی ہے جس پر دنیا بھر کے تقریباً سبھی انسانوں کو اعتراض ہے۔ اس ہستی پر انسانوں کی طرف سے بہت سنگین الزامات لگاۓ جاتے ہیں۔ دنیا بھر میں انسان سے جتنے بھی برے فعل سرزد ہوتے ہیں جیسا کہ جھوٹ ،فریب، چوری، ڈکیتی، بدکاری، دنگہ، فساد، قتل و غارت گری، ذخیرہ اندوزی، غبن اور رشوت سب کے بارے میں کہا جاتا ہے کہ ان کے پیچھے اس ہستی کا ہاتھ ہوتا ہے۔ آج ہم اس ہستی کو پکڑ کر عدالت تک لے آئیں ہیں اور چاہتے ہیں کہ یہ اپنے اوپر لگاۓ گۓ ان الزامات کا جواب دے۔ یہ مقدمہ اس لیۓ بھی بہت اہمیت کا حامل ہے کیونکہ اس میں تمام لوگوں کی ذاتی دلچسپی ہے ہر انسان اس کو اپنا مجرم سمجھتا ہے، لہذا میری عدالت سے درخواست ہے مجھے دنیا کے اس انوکھے اور خصوصی مقدمے کی کاروائی کو شروع کرنے کی اجازت دی جاۓ۔

جج: اجازت ہے۔

وکیل: شکریہ جج صاحب۔ ایک بات اور۔۔۔ اس ہستی کے یوں تو کئ نام ہیں مختلف جگہوں پر اسے مختلف ناموں سے پکارا جاتا ہے لیکن ایک نام ایسا ہے جو سب میں عام اور مشترک ہے اور تقریباً ہر جگہ بولا جاتا ہے۔ اس لیۓ پورے مقدے کے دوران ہم اسے اسی نام سے مخاطب کریں گے۔

جج: ٹھیک ہے کاروائی شروع کی جاۓ۔

وکیل: جی تو شیطان صاحب مقدمہ شروع کرنے سے پہلے میں آپ سے پھر کہوں گا اگر آپ اپنا وکیل کرنا چاہتے ہیں تو کر سکتے ہیں۔

شیطان: نہیں اس کی ضروت نہیں میں اپنا کیس خود لڑوں گا۔

وکیل: ٹھیک ہے جیسے آپ کی مرضی۔ تو بتایۓ کیا حال چال ہیں آپ کے؟

شیطان: بالکل ٹھیک ٹھاک بہت خوش باش۔

وکیل: خیرت کی بات ہے آپ پر اتنے سنگین الزامات ہیں اور آپ پھر بھی خوش ہیں؟

شیطان: (عجیب و غریب طریقے سے ہنستا ہے) الزامات کی چھوڑو وکیل صاحب خوش باش میں کیوں نہ رہوں تم لوگ کوئی ایسا کام کرتے ہی نہیں جس سے مجھے مایوسی ہو۔ تم لوگ تو خود ہر وقت مجھے خوش کرنے کے چکر میں رہتے ہو۔

وکیل: لیکن ہمارا الزام تو یہ ہے کہ ہم جو بھی غلط کام کرتے ہیں اس کے پیچھے آپ کا ہاتھ ہوتا ہے۔ آپ ہم سے ایسے کام کرواتے ہیں۔

شیطان: (ہنس کر) کیا وکیل تم بھی ان الزامات کے چکر میں پڑے ہو۔۔۔ چھوڑو ان کو یار!

وکیل: خبردار جو مجھے یار کہا تو! میں آپ کا یار بالکل نہیں ہوں۔

شیطان: کہتے سب اسی طرح ہیں پر اصل میں تو یاریاں مجھ سے ہی نبھاتے ہیں۔ تم نے بھی تو مجھ سے بہت سی یاریاں نبھائی ہیں کہو تو ایک دو کا ذکر کروں۔ ابھی پچھلے دنوں ایک مقدمے میں۔۔۔

وکیل: (گھبرا کر) میں نے؟۔۔۔ پچھلا مقدمہ؟۔۔۔(کھنگار کر) آپ میری بات چھوڑیں ابھی آپ پر مقدمہ چل رہا ہے تو آپ اپنے اوپر لگاۓ گۓ الزامات کا جواب دیں۔

شیطان: چل یار وکیل تمہارا ذکر نہیں کرتا پوچھو کیا پوچھنا ہے۔

وکیل: پھر یار۔۔۔! پہلے آپ مجھے یار کہنا بند کریں۔

شیطان: اچھا نہیں کہتا ناراض کیوں ہوتے ہو۔ تم سوال پوچھو۔

وکیل: سب سے پہلے آپ یہ بتائیں آپ نے ہم انسانوں کو سجدہ کرنے سے کیوں انکار کیا تھا؟

شیطان: غلطی ہو گئ جناب۔

وکیل: اچھا تو آپ تسلیم کرتے ہیں آپ سے غلطی ہوئی؟

شیطان: ہاں تسلیم کرتا ہوں۔

وکیل: آپ کو اس کا افسوس ہے؟

شیطان: ہاں تھوڑا بہت افسوس تو ہے۔

وکیل: اس پر کوئی ندامت؟

شیطان: نہیں ندامت تو نہیں بس تھوڑا افسوس ہے۔ وہ اس لیۓ کہ اگر مجھے تم لوگوں کی خرکتوں کا پہلے علم ہو جاتا تو کبھی انکار نہ کرتا، خدا مجھے تم لوگوں کا ڈیمو پہلے دکھا دیتا تو معماملہ کچھ اور ہو سکتا تھا۔ اگر مجھے تم لوگوں کی صلاخیتوں کے بارے میں اس وقت پتہ چل جاتا تو انکار کرنے کی ضرورت پیش نہ آتی، اب جب میں دیکھتا ہوں کہ تم لوگ خدا کے خلاف جاکر کیسے کیسے اقدامات کرتے ہو تو قسم سے میرا دل کرتا ہے تم لوگوں کو سجدہ کر ڈالوں مگر اب کیا فائدہ اب تو وقت گزر چکا ہے۔

وکیل: کیا مطلب ہے آپ کا آپ کہنا کیا چاہتے ہیں؟

شیطان: مطلب یہ کہ میں نے کبھی سوچا نہیں تھا تم لوگ اس طرح کے نکلو گے میں تو خواہ مخواہ تم سے حسد میں مبتلا ہو کر انکار کر بیٹھا تھا۔

وکیل: حسد میں مبتلا ہو کر، کیا مطلب؟

شیطان: بس یار میں سمجھا تھا تم لوگ پتہ نہیں کیا توپ چیز ہو گے جو مجھے تم لوگوں کو سجدہ کرنے کا کہا گیا ہے۔ مگر جب بعد میں میں نے تم لوگوں کی خرکتیں دیکھیں تو تم لوگ تو مجھے اپنے ہی بھائی لگے۔

وکیل: آپ کا کہنا ہے ہماری خرکتیں درست نہیں جبکہ حقیقت یہ ہے آپ ہم سے ایسے کام کرواتے ہیں۔

شیطان: (احمقانہ طریقے سے ہنستا ہے) چھوڑو وکیل یہ بات تو رہنے ہی دو۔ قسم خدا کی جیسے کام تم لوگ کرتے ہو میرے تو ذہن میں بھی نہیں ہوتے۔ میں تو خود خیران رہ جاتا ہوں تم لوگ ایسے 'آئیڈیاز' لاتے کہاں سے ہو، چالاکی اور ہشیاری و فریب کاری میں تو تم لوگ مجھے بھی پیچھے چھوڑ دیتے ہو۔

وکیل: تو کیا آپ ہمیں برائی کی ترغیب نہیں دیتے؟

شیطان: دیتا تو ہوں لیکن تم میں سے بہت سے لوگ ایسے اعلیٰ پاۓ کے کاریگر اور ایسے باہنر ہیں کہ بعض اوقات میں ان سے ٹرِکس سیکھتا ہوں۔ خاص کر تم لوگوں کے حکومتی عہدے داران اور صاحبانِ اقتدار سے تو بہت کچھ سیکھنے کو ملتا ہے کیونکہ وہ اپنی چکنی چوپڑی باتوں اور مکارانہ چالبازیوں سے جس طرح عوام کی آنکھوں میں دھول جھونکتے ہیں کسی عام آدمی کے بس کی بات نہیں۔

وکیل: آپ ہمیں بتائیں گے آپ کس طرح برائی کی ترغیب دیتے ہیں۔ آپ لوگوں کو بہکاتے اور بھٹکاتے کس طرح ہیں؟

شیطان: بہت سے طریقے ہیں مختلف لوگوں کے لیۓ مختلف طریقے استعمال کرتا ہوں۔

وکیل: کوئی ایک دو یہاں بتائیں گے؟

شیطان: چھوڑو اس کو جان کر کیا کرو گے۔

وکیل: یہ بہت ضروری ہے عدالت جاننا چاہے گی آپ یہ کام کرتے کس طرح ہیں اس سے عدالت کو فیصلہ کرنے میں آسانی ہو گی۔

شیطان: اچھا! تم کہتے ہو تو کچھ دکھا دیتا ہوں۔

فوراً اپنا دایاں ہاتھ بلند کرتا ہے اور چٹکی بجاتا ہے جس کے ساتھ ہی وہ چھلانگ لگا کر جج کے سامنے میز پر جا کھڑا ہوتا ہے۔ ہاتھ ہلاتا ہے تو میز پر ڈھیر سارے پیسوں کے بنڈل اور زیورات وغیرہ آجاتے ہیں۔ جج سحرزدہ سا انہیں دیکھنے لگتا ہے)

شیطان: کیا دیکھ رہے ہو؟ سوچ رہے ہو کاش یہ سب میرے ہوتے؟۔۔۔ مگر یہ تمہارے ہرگز نہیں ہو سکتے کیونکہ تم ایک انتہائی نکمے اور احمق قسم کے آدمی ہو، خدا کی یہ نعمتیں ذہین و فطین لوگوں کو ملتی ہیں بیوقوفوں سے دھن دولت روٹھ جاتی ہے۔ تم اپنے آپ کو بہت بڑا منصف سمجھتے ہو، اتنی بڑی عدالت کے اتنے بڑے عہدے پر فائز ہو مگر تم میں عقل نام کو نہیں۔ اپنے دیگر ساتھیوں کو دیکھو وہ بھی تمہارے ساتھ اسی عدالت میں بیٹھتے ہیں لیکن دیکھو انہیں وہ کہاں سے کہاں پہنچ گۓ، آج کیا نہیں ہے ان کے پاس اور ایک تم ہو تم ابھی تک وہیں کے وہیں ہو۔ (میز کے اوپر چلنے لگتا ہے) میں تمہاری ساری زندگی سے واقف ہوں تم شروع سے ایسے ہو۔ جوانی میں بھی ایسے تھے اور اب بڑھاپے میں بھی بالکل ویسے کے ویسے ہو۔ تم ایک تھکے ہوۓ شکست خوردہ آدمی ہو جو زندگی کی بازی میں مکمل طور پر مات کھا چکا ہے۔ تمہارے جیسے لوگ زندگی کے کھیل میں کبھی جیت نہیں سکتے کیونکہ تم خود کو نہیں بدلتے اس لیۓ شکست ہمیشہ تمہارا مقدر بنی رہتی ہے۔ لیکن ابھی وقت ہے ابھی تم جیت سکتے ہو بس یہ انصاف کا گھنٹہ بجانا چھوڑ دو، یہ محبت و انسانیت کا ڈھنڈھورا پیٹنا بند کردو، یہ خلوص و مروت کے گیت گنگنانا ترک کر دو۔ پھر دیکھنا تمہاری ہار کیسے جیت میں تبدیل ہوتی ہے، کیسے دنیا جہان کی رعنائیاں اور رنگینیاں، کامیابیاں اور کامرانیاں تمہارا نصیب بنتی ہیں۔ لیکن۔۔۔(اس کے چہرے کے بالکل قریب آکر انگلی کے اشارے سے اسے خبردار کرتا ہے) یاد رکھنا اگر تم نے اس بار بھی یہ موقع گنوا دیا تو یہ آخری بار ہو گا اس کے بعد زندگی تمہیں کوئی موقع نہیں دے گی۔

جج ہاتھ آگے بڑھا کر نوٹوں کو پکڑنے لگتا ہے۔ شیطان فوراً چٹکی بجاتا ہے اور دوبارہ کٹہرے میں واپس آجاتا ہے۔ جج کو ایک دم جھٹکا سا لگتا ہے جیسے وہ کسی سحر کے اثر سے باہر آیا ہو

شیطان: (وکیل سے) اسی قسم کی ترکیبوں سے میں لوگوں کو اپنی جانب راغب کرتا ہوں۔

وکیل: تو آپ کو لگتا ہے اس قسم کی ترکیبوں سے لوگ راہِ راست سے بھٹک جاتے ہیں؟

شیطان: ابے یار تمہیں وکیل کس نے لگایا ہے۔ یہ بھی کوئی پوچھنے کی بات ہے؟

وکیل: پھر یار! (جج سے) جج صاحب آپ انہیں کہیۓ کہ مجھے بار بار یار نہ کہیں۔

جج: (شیطان سے) عدالت آپ کو حکم دیتی ہے مقدمے کی کاروائی کے دوران زیادہ بے تکلفانہ پن کا اظہار مت کیجیۓ تاکہ مقدمے کی سنجیدگی متاثر نہ ہو۔

شیطان: کیا یار جج تو بھی۔۔۔میرا تو ہر ایک کے ساتھ بے تکلف دوستانہ ہے۔ تمہارے ساتھ بھی تو ہے بھول گۓ کیا؟

جج: (ذرا سخت لہجے میں) اگر اب آپ نے اس انداز سے بات کی تو عدالت آپ سے سختی سے پیش آۓ گی۔

شیطان: (منہ پر ہاتھ رکھ کر ہنستا ہے) سختی اور مجھ سے۔۔۔؟ تمہاری میری دوستی کے بھی بہت قصے ہیں کہو تو چند ایک سناؤں۔۔۔لیکن چھوڑو میں نہیں چاہتا تمہاری اس عدالت کا ماحول خراب ہو۔ (وکیل سے) ہاں وکیل تم پوچھو کیا پوچھنا ہے تمہیں؟

وکیل: میں اصل میں پوچھنا چاہ رہا ہوں چند لوگ ایسے بھی تو ہوں گے جو آپ کے دام میں نہیں آتے ہوں گے؟

شیطان: ہاں کچھ لوگ بہت ڈھیٹ ہوتے ہیں انہیں جتنا مرضی بہلاؤ پھسلاؤ وہ نہیں بہکتے لیکن ایسا بھی نہیں کہ میری ان کے آگے بالکل نہیں چلتی کسی بڑی بات کے لیۓ نہ سہی مگر چھوٹے موٹے کام تو وہ بھی کر جاتے ہیں۔ ایسا تو دنیا میں کوئی انسان نہیں جس نے کبھی کوئی چھوٹا سا گناہ بھی نہ کیا ہو۔

وکیل: (جج سے) مخترم جج صاحب! اب میں چند گواہوں کو کٹہرے میں بلانا چاہتا ہوں اور ان سے چند سوالات کرنا چاہتا ہوں۔ میری عدالت سے درخواست ہے مجھے اس کی اجازت دی جاۓ۔

جج: اجازت ہے۔

وکیل: (حاضرین سے) میں چاہوں گا سب سے پہلے ڈاکٹر صاحب تشریف لائیں۔

(حاضرین میں سے اٹھ کر ایک آدمی کٹہرے میں آتا ہے)

وکیل: (ڈاکٹر سے) کیا حال ہیں آپ کے ڈاکٹر صاحب؟

ڈاکٹر: بالکل ٹھیک ٹھاک۔

وکیل: کیسا چل رہا ہے آپ کا کام؟

ڈاکٹر: اللہ کی مہربانی سے بہت اچھا چل رہا ہے۔

شیطان: اللہ کی مہربانی سے یا میری؟

ڈاکٹر: (درشتی سے) کیا مطلب ہے تمہارا؟

وکیل: (شیطان سے) آپ بیچ میں مت بولیں۔

جج: (شیطان سے) ابھی آپ خاموش رہیں آپ کو اپنی بات کہنے کا پورا موقع دیا جاۓ گا۔ وکیل صاحب آپ اپنی بات جاری رکھیں۔

وکیل: شکریہ جج صاحب۔ (ڈاکٹر سے) جی تو ڈاکٹر صاحب آپ یہ بتائیں آپ کو میڈیکل کے شعبے میں پریکٹس کرتے ہوۓ کتنا عرصہ ہوا ہے؟

ڈاکٹر: یہ ہی کوئی پینتیس چالیس برس۔

وکیل: خوب پینتیس چالیس برس۔ یعنی اس فیلڈ میں کام کرتے ہوۓ آپ کی آدھی عمر گزر گئ ہے۔

ڈاکٹر: جی ہاں۔

وکیل: تو ڈاکٹر صاحب آپ یہ بتائیں کیا آپ کو یا آپ کے پیشے سے تعلق رکھنے والے دوسرے لوگوں کو بھی شیطان صاحب سے شکایات ہیں؟ کیا آپ بھی ان پر الزام لگاتے ہیں کہ یہ آپ لوگوں کو بھی برے کام کرنے پر مجبور کرتے ہیں؟

ڈاکٹر: ہاں اس سے شکایتیں تو ہیں یہ ہم ڈاکٹروں کو بھی بہکانے اور ورغلانے کی کوشش کرتا ہے لیکن اللہ کا بڑا کرم ہے کہ ہمارا طبقہ کافی حد تک اس کی چالوں سے محفوظ ہے۔

شیطان: (قہقہہ لگا کر ہنستا ہے) کیا کہا! تم لوگ نہیں بہکتے۔ یار یہ بات تمہاری کمال ہوتی اگر سچ ہوتی، حقیقت یہ ہے میں جتنا تم لوگوں کی 'پرفارمنس' سے خوش ہوں اور کسی سے نہیں ہوں۔ تم لوگ تو یار قسم سے کمال کر دیتے ہو۔ (ہاتھ کے اشارے سے اسے کِس کرتا ہے) تم لوگ تو میری جان ہو۔

جج: (شیطان سے) آپ ایسا کیسے کہہ سکتے ہیں یہ لوگ تو سماج میں سب سے باعزت اور پڑھے لکھے سمجھے جاتے ہیں۔

شیطان: یہی تو بات ہے جج صاحب ان کے پاس علم کی طاقت ہے یہ کرنے پہ آئیں تو بہت کچھ کر جاتے ہیں۔ (رکتا ہے پھر جج کو غور سے دیکھتا ہے) نہیں سمجھے؟۔۔۔تم بھی لگتا ہے جج پیسے دے کر بنے ہو کمال کرتے ہو۔ چلو میں سمجھاتا ہوں۔۔۔ تم ہی بتاؤ ایک عام ان پڑھ سیدھا سادہ آدمی کسی کا زیادہ سے زیادہ کیا بگاڑ سکتا ہے وہ اگر کسی کا نقصان کرے گا بھی تو زیادہ سے زیادہ کتنا کر لے گا۔ وہ اگر کسی کو فریب دینا چاہے بھی تو کتنا دے لے گا۔ لیکن یہ لوگ۔۔۔ان لوگوں کے پاس تو ایسا ہتھیار ہے جو کسی اور کے پاس نہیں،

ان لوگوں کے آگے تو بڑے سے بڑے عہدے والا اور سمجھدار آدمی بھی بے بس ہے۔ کیونکہ وہ نہیں جانتا کہ علاج کے نام پر یہ اس کے ساتھ کیا کررہے ہیں۔ وہ لٹ رہا ہوتا ہے اور یہ اسے جی کھول کر لوٹتے ہیں۔ ان سے اچھا تو وہ ڈاکو ہے جو ہر راہ چلتے کو لوٹ لیتا ہے لیکن اپنی پہچان نہیں چھپاتا۔ یہ تو باعزت بن کر لوگوں کو لوٹتے ہیں۔ یہاں ڈاکو اور ڈاکٹر میں اگر کوئی فرق ہے تو وہ یہی ہے۔

ڈاکٹر: (غصے سے) تم اپنا منہ بند رکھو اور تمیز سے بات کرو۔

وکیل: دیکھیۓ ڈاکٹر صاحب اس بات میں سچائی تو ہے ایسا دیکھنے اور سننے کو تو بہت ملتا ہے کہ آپ ڈاکٹر بھی ایسے کاموں میں کسی سے پیچھے نہیں ہیں۔ کبھی آپ جعلی آپریشن کر دیتے ہیں، اگر مریض کو سرجری کی ضرورت نہیں بھی تو بھی آپ پیسے زیادہ بنانے کے چکر میں اس کی سرجری کردیتے ہیں اور کبھی اسے مہنگے مہنگے ٹیسٹ لکھ کر دے دیتے ہیں جو ہوتے بھی صرف متعلقہ ڈاکٹر کے اپنے ہسپتال میں ہیں۔ اس طرح کے بے شمار حربے ہیں جو آپ لوگ مریض سے پیسے اینٹھنے کے لیۓ استعمال کرتے ہیں۔ آپ کے لیۓ تو وہ مریض نہیں بلکہ ایک گاہک ہے جو اپنا مطلوبہ سامان آپ سے خریدنے آیا ہے۔ آپ کا وہ معالج اور مریض والا تعلق تو رہا نہیں بلکہ وہ اب دکاندار اور گاہک کا تعلق بن گیا ہے۔

ڈاکٹر: ٹھیک ہے۔ ایسا ہوتا ہے میں مانتا ہوں۔ لیکن اس کے پیچھے بھی تو (شیطان کی طرف انگلی کرکے) اس کا ہاتھ ہے۔ یہی تو اصل فساد کی جڑ ہے۔

شیطان: (طنزیہ انداز میں ہنستا ہے) لیکن ابھی تو تم کہہ رہے تھے تم لوگ بہت شریف ہو، تم لوگوں نے تو کبھی کچھ نہیں کیا۔ تھوڑی دیر پہلے تم اپنے آپ کو معصوم ثابت کر رہے تھے۔

ڈاکٹر: اگر ہم ایسا کچھ کرتے بھی ہیں تو تم ہم سے یہ سب کرواتے ہو۔ ہمارے ایسے کاموں کے ذمے دار تم ہو۔

(شیطان بلند قہقہہ لگاتا ہے)

وکیل: ٹھیک ہے ڈاکٹر صاحب آپ جا سکتے ہیں مجھے آپ سے اور کچھ نہیں پوچھنا۔

(ڈاکٹر چلا جاتا ہے)

وکیل: (جج سے) میرے اگلے گواہ ایک مذہبی عالم ہیں میں عدالت سے درخواست کرتا ہوں کہ انہیں کٹہرے میں بلانے کی اجازت دے۔

جج: اجازت ہے۔

(حاضرین میں سے ایک آدمی اٹھ کر کٹہرے میں آتا ہے۔ اس آدمی کے چہرے پر لمبی سی داڑھی ہے اور سفید لباس پہنے ہوۓ ہے۔ سر پر امامہ یا پگڑی ہے۔)

وکیل: کیا حال چال ہیں مولانا صاحب؟

مولانا: اللہ کا شکر ہے بہت اچھے ہیں۔

وکیل: مولانا بتائیے آپ شیطان صاحب پر کیا الزام لگاتے ہیں؟ آپ ان کے بارے میں کیا کہیں گے؟

مولانا: لاحول ولاقوۃ! آپ اس کو شیطان صاحب کہہ رہے ہیں آپ اسے عزت دے رہیں یہ عزت کے قابل ہے؟ میں تو اس کا ناپاک نام بھی اپنی زبان پر لینا گوارا نہ کروں اور آپ اسے صاحب کہہ رہے ہیں۔

(شیطان بات سن کر مسکراتا ہے)

وکیل: آپ کی بات ٹھیک ہے مولانا لیکن یہ عدالت ہے اس کے کچھ اپنے پروٹوکول ہیں یہاں شیطان صاحب ملزم کی خیثیت سے لاۓ گۓ ہیں ابھی عدالت نے اپنا فیصلہ نہیں سنایا۔

مولانا: تو پھر ٹھیک ہے آپ اسے صاحب کہہ کر پکارئیے میں تو اسے اتنی عزت نہیں دوں گا۔

وکیل: جیسے آپ کی مرضی آپ بس اپنی سٹیٹمنٹ دیجیۓ۔ آپ کو ان سے کیا شکایات ہیں؟

مولانا: اس سے کس کو شکایت نہیں۔ اس نے لاکھوں کڑوڑوں انسانوں کو گمراہ کرکے تباہ و برباد کیا ہے اسے تو کڑی سے کڑی اور سخت سے سخت سزا ملنی چاہیۓ۔

شیطان: میں نے تو جو بھی کیا ہے مولانا وہ تو میری ڈیوٹی تھی میرا تو کام ہی یہی ہے لوگوں کو گمراہ کرنا اور بھٹکانا۔ لیکن تم اور تمہاری طرح کے اور بہت سوں نے تو پارسائی کا چولا پہن کر جس طرح خلقِ خدا کو گمراہ کیا ہے اس کی سزا کون بھگتے گا؟

مولانا: تم بکتے ہو۔ اگر ہم نہ ہوتے تو تم لوگوں کو لے ڈوبتے، تم انہیں صراطِ مستقیم سے بھٹکا کر یوں فساد پھیلاتے کہ تمام نسلِ انسانی اب تک فنا ہو گئ ہوتی۔

شیطان: جانے دو مولانا میرا منہ نہ کھلواؤ۔ تم نے لوگوں کو ان بحثوں میں الجھا رکھا ہے جس کا نہ انہیں اس دنیا میں کوئی فائدہ ہے اور نہ اگلی زندگی میں۔ تم نے اپنے گرد تقدیس کا ایسا ہالہ بنا رکھا ہے، عقیدت کا ایسا جال بٌن رکھا ہے جس کو پار کرنا کسی عام انسان کے بس کی بات نہیں۔ تم نے ان کے دلوں، دماغوں، آنکھوں اور کانوں پر ایسے دبیز پردے ڈال رکھے ہیں جہاں سے روشنی کی کوئی کرن اندر داخل نہیں ہو سکتی، تم نے ان کے دل و دماغ کی کھڑکیوں کو یوں بند کر رکھا ہے جہاں سے کسی تازہ ہوا کے جھونکے کا گزر ممکن نہیں۔ تم لوگوں نے انہیں جنت و ثواب کی ایسی میٹھی گولیاں دے رکھی ہیں کہ وہ اس لالچ میں تمہارے ہاتھ چومتے ہیں، پاؤں چھوتے ہیں اور کچھ تو سجدہ ریز بھی ہو جاتے ہیں۔ تم لوگوں نے انہیں ورغلا کرکے آپس میں لڑوایا ہے، تم لوگ جو ان عام لوگوں کے دیۓ ہوۓ پیسوں پر پلتے ہو، ان کے چندوں سے اپنے بڑے بڑے مدارس اور مساجد تعمیر کرتے ہو جہاں سواۓ جہالت، تعصب اور تنگ نظری کے اور کچھ پروان نہیں چڑھتا، تم لوگ جو بغیر کوئی کام کیۓ انہی کے دیۓ ہوۓ نذرانوں اور عقیدتوں سے اپنی پوری زندگی آرام سے بسر کر لیتے ہو، اور پھر انہیں نفرت اور دشمنی کی تعلیم دیتے ہو۔ ان سب کا ذمے دار کون ہے؟ اس کی سزا کس کو ملنی چاہیۓ؟

مولانا: دیکھو تم حد میں رہو بدتمیزی نہ کرو۔

شیطان: کیا مولانا! ایک تو مجھے شیطان کہتے ہو اور پھر مجھ سے تمیز و تہذیب کی توقع بھی کرتے ہو۔

وکیل: اچھا مولانا صاحب شیطان صاحب پر ایک اور الزام ہے کہ انہوں نے ہمارے ہاں ڈیرے ڈال لیۓ ہیں یہ یہاں سے جانے کا نام نہیں لے رہے۔ کیا آپ بھی ان پر یہی الزام لگاتے ہیں؟

مولانا: نہیں میرا نہیں خیال کہ ایسا ہے یہ ہر جگہ رہتا ہے۔ دنیا کے ترقی یافتہ اور مہذب سماجوں میں بھی اس کا داخلہ بغیر کسی پاسپورٹ اور ویزے کے بالکل مفت ہے، نہیں تو عراق افغانستان اور فلسطین جیسے واقعات پیش نہ آتے۔ یہ سب اسی کی تو کارستانیاں ہیں۔ ہاں البتہ آپ ایسا کہہ سکتے ہیں ہمارے سماج میں اس نے مستقل سکونت اختیار کر رکھی ہے۔ شاید اس نے یہاں کی نیشنیلٹی لے رکھی ہو۔

وکیل: ٹھیک ہے مولانا صاحب آپ جا سکتے ہیں۔

(مولانا کٹہرے سے نکل کر دوبارہ اپنی سیٹ پر چلا جاتا ہے)

وکیل: (شیطان سے) جی تو شیطان صاحب آپ مولانا صاحب کا یہ الزام قبول کرتے ہیں کہ آپ نے یہاں مستقل سکونت اختیار کر رکھی ہے؟

شیطان: بالکل نہیں! میرا دماغ خراب ہے جو میں یہاں رہوں۔ میرا بھلا یہاں کیا کام۔

وکیل: اس سے آپ کا کیا مطلب ہے؟

شیطان: تم بھی بھولے بادشاہ ہو یا بھولے بننے کا ناٹک کرتے ہو۔ چلو ایک سوال کا جواب دو۔ اگر ایک جگہ جوا خانہ ہو اور ایک جگہ مسجد تو تمہارا کیا خیال ہے میں کہاں ہوں گا؟

وکیل: ظاہر ہے مسجد تو آپ نہیں جا سکتے جوے کے اڈے پر ہی ہوں گے۔

شیطان: بس یہاں سے تم دھوکا کھا جاتے ہو یہ تمہاری غلط فہمی ہے۔ او بھائی میرے! میں جوے کے اڈے پر کیا کروں گا میرا کام تو لوگوں کو بھٹکانا ہے۔ سیدھی سی بات ہے میں مسجد میں یا مسجد کے باہر کھڑا رہوں گا تاکہ لوگوں کو بہکا پھسلا سکوں، انہیں گمراہ کر سکوں۔ جوا خانے پر جاکر میں کیا کروں گا جہاں لوگ پہلے ہی میری راہ پر چل رہے ہیں۔ جو پہلے ہی بھٹکے ہوں انہیں میں اور کیا بھٹکاؤں؟۔۔۔ اب آئی بات سمجھ میں؟

وکیل: یعنی آپ کہہ رہے ہیں آپ یہاں نہیں رہتے۔

شیطان: ہاں یہی کہہ رہا ہوں۔ میں وہیں رہوں گا جہاں لوگوں کو بھٹکانے پھسلانے کی ضرورت ہے تم لوگوں کے پاس رہ کر میں کیا کروں گا، یہاں تو میں بالکل بیروزگار ہو جاؤں گا۔ میرا کام تو تم لوگ سنبھالے ہوۓ ہو۔ میں نے تو تم لوگوں کو اپنا مرشد مان رکھا ہے، جب کبھی میری 'شیطانیاں' ختم ہو جاتی ہیں اور مجھے مزید 'شیطانیاں' سیکھنے کی ضرورت پیش آتی ہے تو میں یہاں رہنے آجاتا ہوں۔

(ہلکا سا ہنستا ہے اور داد طلب نظروں سے حاضرین کی طرف دیکھتا ہے)

وکیل: ٹھیک ہے شیطان صاحب آپ یہ بتائیے آپ کے بچے ہیں؟

شیطان: اس بات کا اس کیس سے کیا تعلق؟

وکیل: تعلق ہے آپ بتائیں آپ کے اگر بچے ہیں تو کتنے ہیں اور کہاں ہیں؟

شیطان: بچے بے شمار ہیں۔

وکیل: کہاں ہیں؟

شیطان: پوری دنیا میں ہیں۔ کچھ میرے چیلے ہیں کچھ میری اولادیں ہیں۔ وہ اپنے اپنے دھندوں پر لگے ہوۓ ہیں۔

وکیل: یہاں بھی ہیں؟

شیطان: ہاں یہاں بھی ہیں لیکن تم میں سے اکثر تو میرے بھی گرو ہیں۔

وکیل: ابھی آپ کہہ رہے تھے آپ یہاں نہیں رہتے پر آپ کے چیلے اور بچے تو یہاں ہیں؟

شیطان: ہاں تو میں انہیں ٹریننگ کے لیۓ آپ لوگوں کے پاس بھیجتا ہوں۔ یہاں ان کی اتنی اچھی تربیت ہوتی ہے کہ وہ بہت جلد اپنے پاؤں پر کھڑے ہو جاتے ہیں۔ ابھی کچھ دن پہلے میں نے اپنے ایک بچے کو جھوٹ بولنے اور وعدہ خلافی کرنے کے طریقے سیکھنے کے لیۓ یہاں بھیجا تھا۔ صرف چند روز آپ لوگوں کی صحبت میں رہنے کے بعد اس نے اس کام میں کمال مہارت حاصل کر لی ہے۔ یہاں تک کہ اس نے ایک کتاب بھی لکھ ڈالی ہے۔ جس کا نام ہے

'دروغ گوئی اور عہد شکنی کے ایک سو ایک سنہری اصول'۔

یہ کتاب ہمارے شیطانی حلقوں میں اتنی مقبول ہوئی ہے لوگ کہہ رہے ہیں اس سال کی بیسٹ سیلر بک شاید یہ ہی کتاب ہو گی۔ آپ کو جان کر خیرت ہو گی اس کا پہلا اڈیشن تو مارکیٹ میں آتے ہی ختم ہو گیا تھا۔ اب تو اس کا دوسرا اڈیشن شائع ہونے والا ہے۔ یہ سب کس کی بدولت ہوا؟ بتاؤ۔۔۔(جج کی طرف دیکھ کر) کیوں جج صاحب! یہ سب کس کی بدولت ہوا ہے؟ میرے بچے کو یہ کامیابیاں آپ لوگوں کی وجہ ہی سے تو ملی ہیں۔ (حاضرین کی طرف دیکھ کر) میں آپ لوگوں کا جو یہاں موجود ہیں اور جو یہاں نہیں ہیں سب کا شکریہ ادا کرتا ہوں۔ آپ لوگوں کی انتھک محنت اور لگن کی وجہ سے میرے بچے کو آج یہ مقام حاصل ہوا ہے۔

وکیل: اچھا شیطان صاحب کیا آپ کا کوئی بچہ آپ کی راہ سے ہٹ کر نیک راہ پر بھی چل نکلا ہے۔ میرا مطلب ہے جیسے اکثر ہوتا ہے کہ بچے والدین کی نہیں سنتے اور وہ کوئی دوسری راہ پکڑ لیتے ہیں کیا آپ کے کسی بچے نے بھی ایسا کیا ہے؟

شیطان: یہ آپ نے اچھی بات پوچھی۔ کیا بتاؤں بچے تو سنتے ہی نہیں انہیں لاکھ سمجھاؤں پر وہ کہاں مانتے بڑی مشکل سے انہیں ٹھیک راستے پر لانا پڑتا ہے۔ لیکن میرا ایک بچہ ایسا تھا جس نے مجھے بہت تنگ کیا ہے۔ آپ کو کیا بتاؤں وہ بالکل الٹی کھوپڑی تھا پتہ نہیں اس پر اچھائی اور نیکی کا بھوت کیسے سوار ہو گیا تھا نہ صرف یہ کہ وہ خود دوسروں کے ساتھ اچھا سلوک کرنے لگ گیا تھا بلکہ دوسروں کو بھی اس کی تلقین کرتا تھا۔ اس سے دوسرے بچے بھی خراب ہورہے تھے۔ اکثر کہتا تھا دوسروں کے ساتھ ایسے رہو جیسے ایک سچا اور نیک منصف عدالت میں رہتا ہے۔ سب کے ساتھ انصاف سے کام لیا کرو۔ اب آپ ہی بتائیے یہ باتیں شیطان کے بچے کو زیب دیتی ہیں؟ (جج کی طرف دیکھ کر) کیوں جج صاحب آپ تو پڑھے لکھے سمجھدار آدمی ہیں ایسی باتیں اگر شیطان کرنے لگیں تو پھر کیسے چلے گا؟

جج: تو پھر کیا کیا آپ نے اس بچے کا؟

شیطان: کرنا کیا تھا جج صاحب! بڑا سمجھایا مگر وہ کسی صورت مانتا ہی نہیں تھا۔ آپ تو خود بال بچے دار آدمی ہیں آپ کو معلوم ہے جب بچے بگڑنے پہ آئیں تو ماں باپ کے ساتھ کیا سلوک کرتے ہیں۔ میں بہت پریشان تھا اسے کئ ڈاکٹروں کو دکھایا بہت سے سائیکاٹرسٹ سے اس کی کاؤنسلنگ کروائی مگر وہ ویسے کا ویسا ہی رہا۔ اس کا دماغ بالکل سیدھی لائن پر چلتا تھا نہ وہ کوئی سازش کرتا تھا اور نہ کسی قسم کی شیطانی اور چالاکی کرنے کی کوشش کرتا تھا۔ پھر ایک دن مجھے کسی نے کہا کہ اسے آپ لوگوں کے پاس لے کر جاؤ اور یہاں اس کا علاج کرواؤ۔ میں نے ایسا ہی کیا۔ قسم خدا کی کچھ ہی عرصے میں وہ جوان ایسا بدلا ایسا بدلا کہ پوچھو مت۔ اب وہ بچہ میرا سب سے لائق اور ہونہار بچہ ہے۔

وکیل: (جج سے) مخترم جج صاحب! میرا خیال ہے اس مقدمے کی بہت سی باتیں واضح ہو گئ ہیں آپ اپنا فیصلہ سنا سکتے ہیں۔ لیکن ایک اور چھوٹی سی بات میں شیطان صاحب سے پوچھنا چاہوں گا اس کا براہ راست تعلق اس کیس سے تو نہیں لیکن اس کا تعلق شیطان صاحب سے اور ہم سے کافی گہرا ہے اس لیۓ میں چاہتا ہوں کہ میں وہ بات بھی پوچھ ہی لوں۔

جج: جی پوچھیۓ۔

وکیل: (شیطان سے) جی تو شیطان صاحب آپ نے ہمارا اور ہمارے ملک کا ذکر بہت دفعہ کیا ہے۔ آپ نے کہا ہے جتنا ہم آپ کی راہ پر چلتے ہیں اتنا کوئی نہیں چلتا۔ تو آپ بتانا پسند کریں گے ہم میں سے وہ کون ہیں جو زیادہ تر آپ کی پیروی کرتے ہیں۔ وہ کوئی طبقات ہیں، ادارے ہیں یا وہ کون سی طاقتیں ہیں جو ایسا کرتی ہیں یا کر رہی ہیں؟

شیطان: کسی بھی ملک میں بنیادی طور پر تین طرح کی طاقتیں ہوتی ہیں خاندان، معاشرہ اور ریاست۔ اگر وہ درست نہ ہوں تو مسائل جنم لیتے ہیں۔ ہر ملک میں اس کا ہولڈ یا تسلط کم یا زیادہ ہوتا ہے لیکن آپ کے اور آپ جیسے دوسرے پسماندہ ممالک میں تو تینوں پوری طرح سرگرم ہیں۔ وہ چاہتی ہیں وہ فرد پر اپنا استبداد، تسلط اور جبر قائم رکھیں اس لیۓ یہ سب مسائل ہیں۔ فرد کی آزادی کو آپ لوگ کوئی اہمیت نہیں دیتے جبکہ فرد کی آزادی اور انصاف یہ دو ہی تو صورتیں ہیں ترقی، خوشحالی اور کامیابی کی۔

وکیل: تو آپ کو لگتا ہے یہ سب بدلنے کے کوئی چانسز ہیں؟

شیطان: نہیں مستقبل قریب میں تو بالکل نہیں۔ یہ شیطانی طاقتیں ہیں انہیں میں نے بڑی محنت سے بنایا ہے اتنی آسانی سے اور اتنی جلدی تو میں اسے ختم نہیں ہونے دوں گا۔ اور نہ ہی تم لوگوں میں وہ گٹس ہیں کہ تم انہیں درست کر سکو۔

وکیل: (پیچھے ہٹتا ہے اور جج سے مخاطب ہوتا ہے) جی جج صاحب آپ اپنا فیصلہ سنائیے۔

جج: عدالت گواہوں کے بیانات اور ملزم کی باتوں کو مدنظر رکھتے ہوۓ اس نتیجے پر پہنچی ہے کہ ملزم بے شک قصور وار ہے وہ لوگوں کو بہکاتا اور گمراہ کرتا ہے لیکن انسان اپنے کرتوتوں کا خود ذمےدار ہے۔ اس کا ذمہ نہ تو شیطان پر ڈالا جا سکتا ہے نہ قدرت پر اور نہ تقدیر پر۔ اس کا اگر کوئی قصوروار ہے تو وہ خود انسان ہے۔ جہاں تک شیطان کو سزا دینے کی بات ہے یہ عدالت ابھی اس قابل نہیں ہوئی کہ یہ شیطان کے مقدمے کا فیصلہ کر سکے، انسان کی عدالت تو ابھی خود انسان کو انصاف دلا سکنے کے قابل بھی نہیں وہ شیطان کا فیصلہ کیا کرے گی۔ اس لیۓ یہ عدالت شیطان کے مقدمے کا فیصلہ خدا کی عدالت کے سپرد کرتی ہے اور انسان سے درخواست کرتی ہے کہ وہ اپنی فکر کرے، شیطان کا مقدمہ خدا پہ چھوڑ دے۔ لہٰذا عدالت شیطان صاحب کو یہاں سے باعزت بری کرتی ہے۔

(شیطان خوش ہوتا ہے اور بلند آواز سے نعرے لگانے لگتا ہے۔ ہاتھ کھڑے کرکے حاضرین اور جج کا شکریہ ادا کرتا ہے)

دقیانوس

2024-06-16T04:05:00.001+05:00

اس بار بہار آئی تو وہ یہاں نہیں تھی۔ وہ کہاں تھی یہ خود شہروز حسن بھی نہیں جانتا تھا۔ ہر بہار کی آمد پر وہ اس سے ملاقات کے لیۓ جایا کرتا تھا مگر اس بار بہار ختم ہونے کو آئی تھی اور وہ ابھی تک اس سے ملنے کے لیۓ نہیں گیا تھا۔ ایسا کبھی نہیں ہوا تھا بہار کے موسم میں وہ سب کام چھوڑ کر کم سے کم ایک بار اس سے ضرور ملنے کے لیۓ جاتا تھا لیکن اس بار معلوم نہیں ایسا کیا ہوا تھا کہ اس نے ایک مرتبہ بھی جانے کا ذکر تک نہیں کیا تھا۔ میں اس کی اس خلافِ معمول حرکت پر کافی خیران تھا اور اس سے ایک دو بار پوچھنے کی کوشش بھی کر چکا تھا مگر وہ ہر بار بات کو ٹال جاتا تھا۔ پچھلے کئ برسوں سے ہم دونوں اکھٹے رہ رہے تھے اور میں تقریباً اس کے ہر کام سے واقف تھا یا میرا ایسا گمان تھا کہ میں اس کی ہر بات سے شناسا ہوں۔ اسی لیۓ جب اس کے معمول اور مزاج میں ذرا سی تبدیلی آئی تو میں فوراً بھانپ گیا کہ کوئی بات ضرور ہے جو شہروز چھپا رہا ہے۔ سب سے بڑی اور نمایاں تبدیلی تو یہی تھی کہ اس بار موسمِ بہار کے اختتام تک وہ ایک بار بھی 'بہار' سے ملنے نہیں گیا تھا۔ بہار اس لڑکی کا حقیقی نام نہیں تھا میں نے شرارتاً ان دونوں کی ہر سال موسمِ بہار میں ملاقاتوں کے باعث اس کا نام بہار رکھ دیا تھا۔ شہروز کو یہ نام پسند آیا تھا۔ اس نے اس کا ذکر 'بہار' سے بھی کیا تھا جسے سن کر وہ خوب محذوز ہوئی تھی اور اس نے شہروز سے کہا کہ تم آئندہ مجھے اسی نام سے پکارا کرنا۔

شہروز ان لڑکوں میں سے تھا اور ہے جو اچھے تعلق اور رشتے کو جان بوجھ کر ختم کرنے یا توڑنے کو گناہِ عظیم سمجھتے ہیں پھر چاہے وہ تعلق دوستی کا ہو یا محبت کا وہ ہر ممکن حد تک کوشش کرتا ہے کہ کسی طرح یہ رشتہ قائم رہے۔ اور پھر یہاں تو معاملہ بھی اس کے اپنے دل کا تھا یہاں وہ کیسے پیچھے ہٹ سکتا تھا۔ یہ کیسے ممکن تھا کہ وہ اتنے گہرے تعلق کو جو اس نے بڑے خلوص سے قائم کیا تھا منزل پر پہنچاۓ بغیر بیچ راستے میں چھوڑ کر آگے بڑھ جاۓ۔ وہ تو جس کسی کے ساتھ چلنے کا فیصلہ کر لے تمام عمر اس کے ساتھ چلتا رہتا ہے چاہے راستے میں کتنی مشکلات کیوں نہ آئیں۔ لیکن پھر اس بار ایسا کیا ہوا تھا کہ شہروز موسمِ بہار میں بہار سے ملنے نہیں گیا تھا۔

وہ تو جس دن اس کی زندگی میں آئی تھی اس دن سے اس کی زندگی میں حقیقتاً بہار آگئ تھی۔ اس کے دل کے چمن میں خوشیوں اور شادمانیوں کے سینکڑوں رنگ بھرنگے پھول کھل گۓ تھے جہاں ہر سو ہریالی تھی اور پرندوں کے دلآویز خوشگوار نغمے تھے۔ اگرچہ وہ ابھی اس سے بہت دور تھی مگر اس نے اپنے دل و دماغ میں اسے اپنی زندگی کے ایک حصے ایک جزو کے طور پر تسلیم کر لیا تھا۔ وہ اس سے کبھی الگ نہیں ہوئی تھی۔ شب و روز کی ہر گھڑی، ہر ساعت، ہر لمحے وہ اس کے ساتھ تھی۔ میں جانتا تھا اگر کبھی وہ جدا ہو گۓ یا بچھڑ گۓ تب بھی وہ ہمیشہ اس کے ساتھ رہے گی وہ اپنی زندگی سے اسے کبھی بھی الگ نہیں کر پاۓ گا۔ اب جبکہ وہ نہیں تھی تب بھی اس کا احساس ہر پل ہر گھڑی اس کے ساتھ تھا۔

ایک رات میں اپنے کمرے میں کھڑکی کے پاس بیٹھا کچھ لکھ رہا تھا تبھی میری نظر باہر شہروز کے کمرے پر پڑی وہ دروازہ کھول کر باہر جارہا تھا۔ میں نے وقت دیکھا تو ایک بجا تھا۔ یہ کوئی اچنبے کی بات نہیں تھی ایسا اکثر ہوتا تھا۔ ہم دونوں میں سے کسی کو اگر رات کو نیند نہیں آرہی ہوتی تھی تو وہ سڑک پر سیر کو نکل جاتا تھا اور تھوڑی سی مٹرگشت کے بعد لوٹ آتا تھا۔ ابھی بھی ایسا ہی تھا لیکن اس بار میرے تجسس نے مجھے ابھارا اور میں اٹھ کر اس کے پیچھے چل دیا۔ عام طور پر میں کسی کا پیچھا کرنے اور کسی کی ٹوہ میں رہنے سے پرہیز کرتا ہوں اگر کوئی اپنی مرضی سے اپنی ذاتی نوعیت کی بات بتا دے تو اچھی بات اور اگر نہ بتانا چاہے تو میں اسے جاننے کے لیۓ زیادہ بے چین نہیں ہوتا۔ مگر اس بار میں اصل بات کو جاننے کے لیۓ اس کے پیچھے چل پڑا۔ شاید کبھی کبھی ایسا ہی ہوتا ہے آدمی جس کام کو درست نہیں سمجھتا وقت کے کسی لمحے وہی کام کر گزرتا ہے۔ میرے خیال میں انسان کے اندر آرزؤں،امنگوں، خواہشات، میلانات، رجحانات کا پیدا ہونا اور تجسس کا ابھرنا فطری ہے اگر ان کی سمت درست رکھی جاۓ تو ٹھیک لیکن اگر ان کا رخ غلط سمت کی طرف ہو تو گناہ ہے۔ انسان کی ساری تگ و دو انہی امنگوں اور آرزوؤں کو درست سمت پر رکھنا ہے۔ اگر ان کا رخ غلط ہو تو تباہی اور بربادی ہے۔ عقل کے ساتھ عشق نہ ہو تو عقل محض فساد اور بربریت کے سوا کچھ نہیں، دماغ کے ساتھ دل کی دنیا آباد نہ ہو تو نرا فریب اور دھوکا ہے، علم کے ساتھ اگر اخلاق نتھی نہ ہو تو ظلم و جبر ہے۔

اس رات میں اپنے فطری تجسس کا رخ درست سمت پر رکھنے میں ناکام رہا اور اک معمولی سی بات کو جاننے کے لیۓ اس کے تعاقب میں چل پڑا۔ حالانکہ مجھے اندازہ تھا کہ شہروز کا اس طرح تعاقب کرنے پر بھی مجھے وہ بات معلوم نہیں ہو سکے گی جو میں جاننا چاہتا تھا۔ اس وقت تو وہ بس چھوٹی سی چہل قدمی کرنے نکلا تھا اس سے مجھے اس کے دل کی بات کیسے معلوم ہو سکتی تھی لیکن پھر بھی میں ایک موہوم سی امید لیۓ اس کے پیچھے چلنے لگا۔ میں اس سے کافی فاصلے پر چل رہا تھا تاکہ اسے شک نہ ہو کہ کوئی اس کا پیچھا کر رہا ہے۔ نصف شب گزر چکی تھی مگر موسمِ گرما کے باعث سڑک پر اس وقت بھی گہما گہمی تھی۔ دونوں جانب ٹھیلے والے متعدد کھانے پینے کی اشیاء سجاۓ بیٹھے تھے۔ چاۓ خانے پر خوب رونق تھی۔ لوگ فٹ پاتھ پر کرسیاں میز لگاۓ مختلف ٹولیوں کی شکل میں بیٹھے چاۓ پی رہے تھے۔ سگریٹ پان کی دکان پر بھی اس وقت کافی رش تھا۔ شہروز ان کے پاس سے گزرتا ہوا سگریٹوں کی دکان پر رکا اور دکان والے سے ایک سگریٹ خرید کر سلگایا اور آگے چل پڑا۔ میں اس سے اتنے فاصلے پر تھا کہ اگر وہ پیچھے مڑ کر دیکھتا بھی تو اتنے لوگوں میں مجھے پہچان نہ پاتا۔ اس کے تو وہم و گمان میں بھی نہیں تھا کہ میں اس کا پیچھا کر رہا تھا۔

کچھ دیر چلنے کے بعد وہ ایک جانب مڑا اور آگے جاکر ایک چھوٹے سے باغیچے میں گھس گیا۔ میں خیران تھا رات کے اس پہر وہ اس باغیچے میں کیوں گیا ہے۔ یہ باغیچہ کالونی کے بالکل وسط میں تھا جہاں صبح اور شام کے وقت لوگ سیر کرنے کے لیۓ آیا کرتے تھے جبکہ دن بھر کالونی کے چھوٹے بچے یہاں آکر کھیلا کرتے تھے۔ میں دروازے سے اندر جانے کی بجاۓ چھوٹی سی دیوار پھلانگ کر اندر گیا اور آہستہ آہستہ چلتا ہوا شہروز سے کچھ فاصلے پر ایک جانب جاکر کھڑا ہو گیا۔ باغیچے میں یوں تو اندھیرا تھا مگر چاند کی روشنی سے اس کا کچھ حصہ منور تھا۔ جہاں شہروز بیٹھا تھا وہ حصہ مکمل طور پر روشن تھا اور جہاں میں کھڑا تھا وہاں مکمل اندھیرا تھا۔ کچھ پل وہاں کھڑے رہنے کے بعد مجھے یاد آگیا کہ شہروز یہاں کیوں آیا ہوگا۔ اس نے ایک بار مجھے بتایا تھا کہ اس نے پہلی بار یہاں اس باغیچے میں بہار کو دیکھا تھا۔ اس کے بہت عرصے بعد وہ لڑکی دوبارہ اسے اس کی یونیورسٹی میں ملی وہ اس وقت یونیورسٹی میں داخلے کے لیۓ آئی تھی اور اتفاق کی بات تھی کہ شہروز خود بھی اس یونیورسٹی میں داخلے کے لیۓ گیا ہوا تھا۔ اس سے بڑا حسنِ اتفاق یہ تھا کہ دونوں نے ایک ہی مضمون میں داخلہ لیا تھا اور دونوں ایک ہی جماعت میں اکٹھے تھے۔دونوں کی جب بات چیت ہوئی تو شہروز نے اسے بتایا کہ اس نے سب سے پہلے اسے باغ میں دیکھا تھا اور تب سے اب تک وہ اسے یاد تھی۔ اس لڑکی نے بھی شہروز کو بتایا کہ اس نے بھی اسے پہلی بار وہیں دیکھا تھا اور وہ بھی اسے تب سے یاد تھا۔

یہ سب یوں تو اتفاق تھا مگر شہروز اسے کسی اور زاویے سے دیکھتا تھا۔ وہ کہتا تھا یہ سب قدرت کے اشارے ہیں اور انہیں قدرت نے آپس میں ملایا ہے۔ اس کے لیۓ وہ دلیل یہ دیتا تھا کہ کتنے لوگوں کو وہ باغ میں روزانہ دیکھتا تھا مگر وہ ایک لڑکی صرف ایک بار دیکھنے پر اسے کیونکر یاد رہ گئ اور صرف اسے ہی نہیں بلکہ اس لڑکی کو بھی وہ یاد رہ گیا تھا اور پھر اتنا ہی نہیں دونوں کا اتنے عرصے بعد ایک ہی یونیورسٹی اور ایک ہی جماعت میں اکٹھے ہونا اتفاق نہیں ہو سکتا۔ وہ کہتا تھا 'میرا اعتقاد ہے کہ یہ فیصلہ کہیں اور ہوا تھا۔ ہمارا ملنا پہلے سے طے تھا اور یہ کہ یہ سب کچھ پہلے سے لکھا جا چکا تھا۔'

اپنے ان خیالات کا اظہار اس نے بہار سے بھی کیا تھا اس کا بھی یہی ماننا تھا کہ یہ سب محض اتفاق نہیں تھا اور نہ ہی کسی انسانی کاوش کا نتیجہ، بلکہ یہ قدرت کا پہلے سے تیار کیا گیا منصوبہ تھا۔

اگر یہ قدرت کا منصوبہ تھا تو بعض اوقات میں سوچنے پر مجبور ہو جاتا ہوں کہ قدرت کن کاموں میں لگی ہے۔ اتنی بڑی کائنات اور دنیا کے بڑے بڑے اہم امور کو چھوڑ کر وہ دو لوگوں کے لئے اتنے معمولی سے منصوبے کیوں بناتی پھرتی ہے۔ وہ دنیا میں بھوک و افلاس سے بلکتے اور سسکتے لاکھوں کروڑوں انسانوں کے لیۓ کوئی منصوبہ کیوں نہیں بناتی؟ پتھر میں رزق دینے کا وعدہ کرکے مکرجانا کہاں کی خدائی ہے؟ عہد شکنی اور دروغ گوئی کی ایسی مثال تو انسانوں میں بھی کہیں نہیں ملتی۔ قدرت کیوں جان لیوا اور مہلک بیماریوں میں مبتلا انسانوں کے لیۓ کوئی پروگرام، کوئی پلان، کوئی منصوبہ تیار نہیں کرتی؟ کیوں انسانوں کو اتنی تگ و دو اور جدوجہد کرکے علاج دریافت کرنا یا دوا ایجاد کرنی پڑتی ہے؟ قدرت نے صدیوں تک انسانیت کو غلامی کی زنجیروں میں جکڑے اور تکالیف اور مصائب برداشت کرتے لاچار انسانوں کے لیۓ کیوں کوئی فیصلہ نہیں کیا؟ اگر قدرت کا منصوبہ انسان کی ایسی تذلیل تھا جس کی نظیر ڈھونڈنا مشکل ہے، اگر قدرت نے ان کے مقدر میں یہی لکھا تھا تو کیوں قدرت کا ہر فیصلہ، ہر منصوبہ، اور ہر پروگرام لاچار، مجبور، بے کس و بے بس انسانوں کے خلاف ہوتا ہے؟ کیوں اس کی ساری دلچسپیاں بس دو لوگوں کو ملانے میں ہیں؟ اگر اس نے محبت اور شادی کے ان معمولی سے کاموں کے فیصلے بھی خود کرنے تھے تو ہمیں اس دنیا میں بھیجا ہی کیوں؟

میں ابھی وہیں کھڑا تھا کہ اچانک میرے موبائل فون کی گھنٹی بجی۔ اتنی خاموشی میں آواز دور تک گئ جسے شہروز نے بھی سن لیا اس نے مڑ کر آواز کی سمت دیکھا۔ میں نے فوراً کال کاٹ دی مگر اب چھپنے کا کوئی فائدہ نہیں تھا شاید اس نے مجھے پہچان لیا تھا۔ میں نکل کر اس کے سامنے آگیا۔ وہ مجھے دیکھ کر بہت خیران ہوا اور مجھ سے پوچھنے لگا 'تم یہاں کیا کر رہے ہو؟'

میں نے اسے بتایا کہ میں اس کا پیچھا کر رہا تھا اور کہا کہ میں بہت شرمندہ ہوں مجھے اس طرح تمہارا پیچھا نہیں کرنا چاہیۓ تھا لیکن مجھے تم پچھلے کافی دنوں سے پریشان سے لگ رہے تھے اس لیۓ ایسا کیا۔ میں نے تم سے دو تین بار پوچھا بھی تھا لیکن تم نے بتایا نہیں۔ اور تم اس بار بہار سے ملنے بھی نہیں گۓ؟

شہروز میری بات سن کر بولا۔ 'تمہیں کیا بتاؤں مجھے خود کچھ سمجھ نہیں آرہی مجھے کچھ سمجھ آۓ تو تمہیں بتاؤں۔'

میں نے اس سے کہا تم مجھے بتاؤ آخر ہوا کیا ہے کوئی بات تو ضرور ہوئی ہے جس سے تم اور بہار اک دوسرے سے دور ہو گۓ ہو۔

وہ کچھ دیر خاموش رہا اور پھر اپنی بات بتانی شروع کی۔ وہ بولا 'میرا اور بہار کا تعلق ٹھیک ٹھاک چل رہا تھا لیکن پھر ہمارا رابطہ منقطع ہو گیا۔ میں سمجھ رہا تھا یہ وقتی اور عارضی ہے کچھ دنوں تک ٹھیک ہو جاۓ گا۔ تم تو جانتے ہو میرے ذاتی اور گھریلو معمالات ان دنوں کچھ پیچیدہ اور گھمبیر سے ہو گۓ تھے اس لیۓ میں وہاں مصروف ہو گیا۔ پھر تھوڑے عرصے بعد میں نے اس سے دوبارہ رابطہ قائم کرنے کی کوشش کی مگر اس سے رابطہ ہو نہیں پا رہا تھا۔ بڑی مشکل سے میں نے اس سے کسی نہ کسی طرح رابطہ قائم کیا مگر وہ ٹھیک طرح سے بات ہی نہیں کر رہی تھی۔ میں بہت خیران ہوا کہ آخر ایسا کیا ہوا اور اس سے بات نہ کرنے کی وجہ پوچھی۔ پہلے تو وہ ٹال مٹول کرتی رہی لیکن پھر اس نے جو بات کی وہ میرے لیۓ کسی شاک سے کم نہیں تھی۔ اس نے کہا وہ مجھ سے اب کوئی رابطہ نہیں رکھنا چاہتی۔ میں نے وجہ پوچھی تو اس نے کہا ہمارے بیچ ایسا کیا ہے جو ہم مسلسل اک دوسرے سے رابطے میں رہیں، ہمارے درمیان نہ پہلے کچھ ایسا تھا نہ اب کچھ ایسا ہے۔ مجھے اس کی باتیں سن کر خیرت پہ خیرت ہو رہی تھی۔ میں نے اس سے کہا تو وہ سب کیا تھا، ہمارا اتنے عرصے کا تعلق، وہ باتیں، وہ سب کچھ کیا تھا؟ وہ بولی۔ وہ تو بس وقت گزاری تھی۔ دل بہلانے کے لیۓ اچھا وقت گزارنا تھا گزار لیا۔ ہمارے بیچ ایسا کچھ نہیں جسے مزید آگے بڑھایا جاۓ۔ جسے کسی منزل تک پہنچایا جاۓ۔ ہم تو راستے کے دو اجنبی مسافر تھے جو چلتے چلتے تھک کر چند لمحے سستانے کے لیۓ کسی ٹیلے پر بیٹھ گۓ۔ ہمارا ساتھ بس ان چند گھڑیوں تک تھا۔ ہم اتنی دیر کے لیۓ ہی ملے تھے۔ ان ساعتوں میں، ان چند لمحوں میں ہمارے دل و دماغ میں ایسا کوئی تعلق پیدا نہیں ہوا کہ ہم اگلا پورا سفر دونوں ایک ساتھ جاری رکھیں۔ ہم تو راستے کے مسافر تھے تھوڑی دیر کے لیۓ راستے میں ملے تھے اور پھر الگ ہو گۓ۔

لیکن میں ایسا نہیں مانتا۔' میں نے اس سے کہا۔ 'مجھے اس بات پر یقین نہیں کہ ہمارے درمیان ایسا کچھ نہیں تھا ہم دونوں کا تعلق بس وقت گزاری تھا۔ تم جھوٹ بول رہی ہو مجھے تمہاری بات پر بالکل بھی یقین نہیں۔'

اس نے کہا تمہیں جو سمجھنا ہے سمجھو لیکن اب میں تم سے کسی بھی قسم کا کوئی تعلق نہیں رکھ سکتی۔ تمہارے لیۓ بھی یہی بہتر ہے تم وہ سب بھول جاؤ۔'

میں خیران ہوں یہ سب تم کہہ رہی ہو۔' میں نے اپنی خیرت کا اظہار کیا تو وہ بولی۔ 'اس میں خیران ہونے والی کیا بات ہے یہ کوئی ایسی انوکھی بات تو نہیں ہزاروں لڑکے لڑکیاں وقت گزاری اور دل بہلاوے کے لیۓ ایسے سینکڑوں تعلق بناتے اور توڑتے ہیں ہم ایسا کر لیں گے تو کون سی قیامت آجاۓ گی۔'

لیکن میں ایسا نہیں کر سکتا نہ کرنا چاہتا ہوں۔'

وہ بولی۔ 'وہ اس لیۓ کہ تم آرتھوڈاکس قسم کے ایک دقیانوس لڑکے ہو جو آج کے دور میں بھی ایسے گھسے پٹے نظریات رکھتا ہے۔ اگر مجھے پہلے معلوم ہوتا تو تم سے کبھی کوئی تعلق نہ رکھتی۔'

وہ یہ کہہ کر چلی گئ اور میں وہاں گھنٹوں کھڑا رہا، مہینوں رہا یا برسوں مجھے معلوم نہیں۔ میں تو شاید اب بھی وہاں کھڑا ہوں۔'

شہروز نے بات ختم کی تو کتنی دیر تک ہم دونوں چپ بیٹھے رہے۔ پورے باغیچے میں اتنا سکوت تھا کہ ہم دونوں کو اپنی سانسوں کی آوازیں آرہی تھیں۔ کچھ دیر بعد وہ اٹھا اور ایک جانب کو چل دیا۔ میں نے اوپر دیکھا چاند درخت کی اوٹ میں چھپ گیا تھا اس لیۓ اس کونے پر بھی اب اندھیرا چھا گیا تھا جہاں میں بیٹھا تھا۔ رات کافی گہری ہو گئ تھی۔ میں نے شہروز کو آخری بار باغیچے سے نکلتے دیکھا وہ واپس جانے کی بجاۓ دوسری طرف جا رہا تھا۔ شاید اس کا رات یونہی بسر کرنے کا ارادہ تھا۔ میں اٹھا اور شعر گنگناتا ہوا گھر کو چل دیا۔

ہم پہ جو گزری سو گزری مگر شبِ ہجراں

ہمارے اشک تیری عاقبت سنوار چلے

رات

2024-01-30T02:52:00.003+05:00

سردیوں کی یخ بستہ، تنہا اور خاموش رات تھی۔ نیم تاریکی میں ڈوبا اس کا گرم کمرا تھا جس کے باہر کی فضا میں ہر چیز ٹھٹھرتی، کانپتی اور لرزتی پھرتی تھی۔ پیڑ پودے درودیوار ہر شے دھند میں لپٹی تھی۔ کسی آدمی کے پاؤں کی چاپ تک سنائی نہیں دے رہی تھی یہاں تک کہ گلیوں کے آوارہ کتے بھی کوئی محفوظ کونہ تلاش کرکے خاموشی سے کہیں دبکے بیٹھے تھے۔ سڑک پر بھی کوئی گاڑی نہیں تھی۔ البتہ دور بہت دور ریل کی پٹری پر کوئی ریل گاڑی طویل وقفوں کے بعد سیٹی بجاتی ہوئی تیزی سے گزر جاتی تھی جس سے خاموشی کے دبیز پردے میں ذرا سی ہلچل پیدا ہوتی اور چند لمحوں بعد دوبارہ مکمل طور پر خاموشی چھا جاتی ایسے جیسے پرسکون پانیوں میں کوئی شخص ہاتھ ڈالے تو لہروں کا چھوٹا سا دائرہ بنتا ہے اور جب ہاتھ نکال لیتا ہے تو دائرہ پھر سے پانی کا حصہ بن جاتا ہے۔

باہر کی نسبت کمرے کے اندر کا موسم خاصا بہتر تھا۔ وہ اپنی آرام دہ کرسی پر بیٹھا سگریٹ کے دھویں کے چھلے ہوا میں اچھالتا چلا جا رہا تھا۔ یکے بعد دیگرے اس کے چھ سگریٹ پینے کی وجہ سے بند کمرا دھویں اور سگریٹ کی بو سے بھر گیا تھا۔ کرسی کے ساتھ میز پر رکھا ہوا شیشے کا چھوٹا سا خوب صورت راکھ دان سگریٹ کے بجھے ہوۓ ٹوٹوں اور راکھ سے بھرا پڑا تھا۔ اس نے اپنے ساتویں سگریٹ کا آخری کش لگایا جو ابھی تک اس نے آدھا پیا تھا اور اسے راکھ دان میں پھینک کر اٹھ کھڑا ہوا۔ کھڑکی کے پاس جا کر اس نے پردہ ہٹایا کھڑکی کا شیشہ دھند کے باعث نم آلود تھا اس نے بند شیشے سے باہر جھانک کر کچھ دیکھا پھر پردہ آگے کرکے بستر پر پڑی ہوئی بڑی سی چادر اٹھائی اور کمرے سے باہر نکل آیا۔ باہر آکر اس نے چادر کو اپنے گرد اچھی طرح لپیٹ لیا اور صحن عبور کرکے باہر کا دروازہ کھول کر گلی میں آگیا۔ گلی ویران اور سنسنان پڑی تھی جس میں صرف دودھیا رنگ کی دھند چہل قدمی کر رہی تھی۔ وہ دھند میں راستہ بناتا ہوا ایک گلی سے دوسری گلی میں اور پھر دوسری سے تیسری گلی عبور کرنے کے بعد ایک بڑے سے گلے میں پہنچ گیا۔ گلے کے درمیان میں جا کر وہ دائیں جانب مڑا اور ایک تنگ اور تاریک گلی میں اتر گیا۔ چند قدم چل کر وہ ایک گھر کے سامنے جا کھڑا ہوا اس نے بیٹھک کے لکڑی کے دروازے پر اپنی دو انگلیوں کی پشت سے آہستہ سے دستک دی اندر سے کسی کے قدموں کی آواز سنائی دی اور چند لمحوں میں دروازہ کھل گیا۔ وہ اندر چلا گیا۔

کہاں رہ گیا تھا صغیرے تو۔۔۔ہمیں لگا تو اب نہیں آۓ گا۔' دروازے کھولنے والے آدمی نے پوچھا۔

یہیں تھا یار'۔ صغیرا بیزاری سے بولا اور کمرے کے فرش پر رکھی ہوئی کوئلوں کی انگیٹھی کے پاس چوکی پر جا کر بیٹھ گیا۔ انگیٹھی کے پاس ایک اور آدمی بیٹھا تھا وہ مسکرایا اور اپنے کان کے پیچھے پھنساۓ ہوۓ سگریٹ کو نکال کر انگیٹھی کے کوئلے سے جلا کر بولا۔'لگتا ہے آج پھر دل جل رہا ہے۔ یہ لے سوٹا مار قرار ملے گا۔' اس نے ہاتھ آگے بڑھا کر اسے سگریٹ پیش کرتے ہوۓ کہا۔

نہیں یار بڑے سوٹے مار کر آیا ہوں رہنے دے کوئی فرق نہیں پڑتا۔' صغیرا اسی بیزاری کے انداز سے بولا۔

بیوقوفا کچے سے کیا فرق پڑے گا پکا سوٹا مار تب کوئی بات بنے گی۔'

نہیں رہنے دے ابھی موڈ نہیں ہے۔' صغیرے نے منہ بناتے ہوۓ کہا۔

پہلا آدمی ابھی تک دروازے کے پاس کھڑا تھا وہ آگے بڑھ کر بولا۔ 'لگا لے لگا لے آج دوائی پاس ہے کل جب ختم ہو جاۓ گی تو کہے گا پکا بنا کر دے۔'

صغیرے نے دوسرے آدمی کے ہاتھ سے سگریٹ لے لیا اور آنکھیں بند کرکے ایک کش لگا کر بڑے آرام سے دھواں فضا میں چھوڑا۔

یہ ہوئی نہ بات۔' پہلا آدمی دیوار کے پاس موڑے پر بیٹھ کر ٹیک لگا کر بولا۔

دیکھنا دوائی اندر جاتے ہی تجھے کیسے چین ملتا۔ 'دوسرے آدمی نے سگریٹ پیتے ہوۓ کہا۔

پہلے آدمی نے اپنی قمیض کی اوپر والی جیب سے سگریٹ نکالا اور اپنے دوسرے ہاتھ کی ہتھیلی پر سگریٹ کے اندر کا سارا تمباکو نکال کر رکھ دیا۔ اس کے بعد جیب سے ایک سیاہ رنگ کی چھوٹی سی موتی کے جیسی گول گولی نکالی اور اسے تمباکو میں ملا کرکے اپنے انگھوٹھے سے اچھی طرح مسل کر دوبارہ سگریٹ میں ڈال لیا۔پھر سگریٹ کے آگے کے کاغذ والے حصے کو مڑوڑ کر اچھی طرح بند کر دیا۔ اس کے بعد اس نے لائیٹر لیا اور سگریٹ سلگایا ایک گہرا کش لگا کر آنکھیں بند کرکے سانس اندر کھینچا اور آنکھیں کھول کر بولا۔ 'آج دوائی بہتر ہے، یار شکورے تو مانے سے دوائی کیوں لیتا ہے وہ دو نمبر مال بیچتا ہے۔'

پتہ ہے! پر اتنے پیسوں میں ہمیں مانے کے سوا اور کون دوائی دے گا اس لیۓ جیسی بھی ہے کم سے کم مل تو رہی ہے۔' شکورا خاموش ہوا ایک کش لگا کر اپنی ٹانگیں سیدھی کیں اور سگریٹ کو چوم کر دوبارہ بولا۔ 'یہ دوائی تو ہماری زندگی ہے اگر یہ نہ ہو تو میں تو دو دن بھی زندہ نہ رہوں۔'

تینوں کے پکے سگریٹ کی وجہ سے چھوٹے سے کمرے میں ایک ناگوار سی بو پھیل گئ تھی۔ صغیرا اپنا سر پیچھے دیوار کے ساتھ ٹکا کر سامنے والی دیوار پر لگے بجلی کے بلب کو گھورنے لگا۔ چند لمحے بلب کو گھورنے کے بعد اس نے آنکھیں بند کیں اور خود کو ایک دوسرے چھوٹے سے کمرے میں پایا۔

صغیرے۔۔۔ صغیرے۔۔۔ تو کیا اس وقت سے بلب کو گھوری جا رہا ہے میری طرف دیکھ۔' ایک لڑکی اسے تقریباً جھنجھوڑتے ہوۓ بولی۔

ہونہہ!۔۔۔ہاں بول کیا بات ہے؟' صغیرا اپنی کہنی سر کے نیچے ٹکاۓ بلب کو گھورتے ہوۓ بولا۔

تو میری طرف دیکھے تو کوئی بات کروں کب سے تو تو بلب کو دیکھی جا رہا ہے۔ پتہ نہیں اس بلب میں ایسا کیا ہے ہر وقت گھورتا رہتا ہے۔'

میں سن رہا ہوں تو بول۔' صغیرا اسی حالت میں بولا۔

نہیں پہلے اس طرف دھیان کر پھر بات کروں گی۔'

اچھا لے کر لیا۔۔۔ اب بول۔' صغیرا لڑکی کی طرف رخ کرکے بولا۔

لڑکی کچھ دیر خاموش رہی تو صغیرا بے چینی سے بولا۔ 'اب بول بھی۔'

صغیرے! میں سوچ رہی ہوں۔۔۔ بلکہ کئ بار سوچتی ہوں ہمارا اس طرح ملنا ٹھیک نہیں۔'

تو کس طرح ملنا ٹھیک ہے؟' صغیرے نے خیران ہو کر پوچھا۔

اس طرح مطلب جیسے ہم ملتے ہیں رات کے اندھیرے میں چھپ کر۔۔۔ تو اس وقت اپنے گھر سے میرے گھر آتا ہے اور ہم دونوں چوری چھپے یہاں ملتے ہیں۔ مجھے تو یہ بہت برا لگتا ہے۔ تجھے برا نہیں لگتا؟

برا ہو گا پر تو یہ کیوں سوچ رہی ہے؟'

مجھے یہ سب غلط لگتا ہے صغیرے۔' لڑکی نے جواب دیا۔

تو غلط اور صحیح کے چکر میں نہ پڑ۔۔ میرا یار شکورا کہتا ہے بندے نے اچھے کاموں کا ٹھیکہ نہیں لیا ہوا کوئی کام برا بھی کرنا چاہیۓ ورنہ اوپر جا کر خدا کو کیا منہ دکھاۓ گا وہ تو کہے گا میں نے تو اسے انسان بنا کر بھیجا تھا یہ فرشتہ پتہ نہیں کیسے بن گیا جس سے ایک کام بھی غلط نہیں ہوا۔

پھر بھی صغیرے ۔۔۔

چھوڑ بھی دے اب۔۔۔ تو بھی پتہ نہیں آج کیا باتیں لے کر بیٹھ گئ۔' صغیرا اس کی بات کاٹ کر بولا۔

لیکن اگر پکڑے گۓ تو؟' لڑکی کچھ پریشان سی ہو کر بولی۔

نہیں پکڑے جاتے ابھی تک پکڑے گۓ ہیں جو اب پکڑے جائیں گے اور اگر پکڑے بھی گۓ تو ایک طرح سے اچھا ہی ہوگا تیری اماں شادی کے لیۓ ہاں کر دے گی تب تو انکار نہیں کر سکے گی۔' صغیرے نے جیب سے سگریٹ نکالا اور سلگانے والا تھا کہ لڑکی نے اسے روک دیا۔

یہاں سگریٹ نہ پی صبح تک کمرے سے بو نہیں جاتی اور اماں سویرے سویرے آکر کمرے کی صفائی کرنے لگ جاتی ہے اسے شک ہو جاۓ گا یہاں کوئی آیا تھا۔'

ایک تو تیری اماں سے میں بڑا تنگ ہوں ایک دفعہ شادی کے لیۓ ہاں کر دے پھر اسے دیکھوں گا۔' صغیرے نے سگریٹ دوبارہ جیب میں رکھتے ہوۓ کہا۔

اماں ایسی نہیں تھی' لڑکی بولی 'بس ابا کے مرنے کے بعد ایسی ہو گئ ہے اسے ہر وقت میری فکر کھاۓ رکھتی ہے وہ چاہتی ہے میری اس کے جیتے جی کہیں شادی ہو جاۓ تاکہ یہ نہ ہو اس کے جانے کے بعد میں اکیلی ہو جاؤں۔'

تو پھر شادی کے لیۓ ہاں کیوں نہیں کرتی؟' صغیرے نے پوچھا 'یہاں تو لڑکا بھی اس کا دیکھا بھالا ہے اور لڑکے کے گھر والوں کو بھی وہ اچھی طرح جانتی ہے۔'

وہ تو ہے پر وہ چاہتی ہے میری شادی کسی سوکھے اور کھاتے پیتے گھر میں ہو۔'

تو میرا گھر کیا ماڑا ہے؟۔۔۔ بھوکا تو نہیں رکھوں گا تجھے؟'

تو بات سمجھ نہیں رہا اس کا دل ہے میری شادی کسی اونچے گھر میں ہو۔ وہ سوچتی ہے لڑکا چاہے جیسا بھی ہو بس پیسے والا ہو۔'

تو کیا تمہارے لیۓ وہ کوئی راجہ مہاراجہ یا کسی محل کا شہزادہ ڈھونڈ رہی ہے؟'

پتہ نہیں کیا ڈھونڈ رہی ہے پر مجھے لگتا ہے وہ یہی چاہتی ہے۔' لڑکی خاموش ہوئی پھر پریشان ہو کر مغموم انداز سے بولی۔ 'لیکن صغیرے۔۔۔! اگر اسے کوئی مل گیا تو؟'

صغیرے نے آنکھیں کھولیں تو اس کے ہاتھ میں سگریٹ بجھ چکا تھا اس نے بچا ہوا سگریٹ انگیٹھی میں پھینک دیا۔ اس کے دونوں ساتھی خاموش بیٹھے تھے شکورے نے آنکھیں کھول رکھی تھیں مگر وہ کمرے میں موجود کسی چیز کو نہیں دیکھ رہا تھا اس کی آنکھیں کہیں اور لگی تھیں بلکہ وہ خود بھی یہاں موجود نہ تھا ایک چھوٹے سے حستہ حال کمرے میں تھا جس میں تین چار پائیاں بچھیں تھیں ایک چارپائی پر شکورا تکیے سے ٹیک لگاۓ سر کے پیچھے دونوں ہاتھ باندھ کر بیٹھا تھا اور خیالوں میں گم تھا۔ اس کے پیچھے دوسری چارپائی پر ایک تین چار سال کی چھوٹی سی بیمار بچی لیٹی تھی اس کے ساتھ اس کی ماں بیٹھی اسے دوا کھلا رہی تھی۔ اس کے بالکل سامنے والی چارپائی پر ایک عورت بیٹھی تھی اس نے ہاتھ آگے بڑھایا اور بچی کی دونوں آنکھوں کا معائنہ کر کے بولی۔ 'سکینہ بچی کا تو کوئی حال نہیں تو اسے کسی چنگے ڈاکٹر کے پاس کیوں لے کر نہیں جاتی؟'

لے کر گئ تھی باجی!' سکینہ اپنے دوپٹے کے پلو سے بچی کا منہ صاف کرتے ہوۓ بولی۔ 'چنگا ڈاکٹر پیسے بھی چنگے مانگتا ہے اس کا باپ دن بھر کی مزدوری کے بعد جو کما کر لاتا ہے وہ تو ہانڈی روٹی اور گھر کے دوسرے خرچوں پر لگ جاتے ہیں اس کے بعد تو کچھ نہیں بچتا۔ اگر ہم پورے مہینے کی مزدوری بھی جوڑیں تب بھی اتنے پیسے اکٹھے نہیں کرسکتے کہ اس کا علاج کسی چنگے ڈاکٹر سے کروا سکیں۔'

تو یہ والا ڈاکٹر کیا بتاتا ہے؟'

اس نے دوائی تو دی ہے پر وہ بھی یہی کہتا ہے کہ اسے وڈے ہسپتال لے جاؤ وہیں اس کا بہتر علاج ہو گا۔'

چل کوئی بات نہیں تو پریشان نہ ہو دل چھوٹا نہ کر اللہ ماڑوں کی سننے والا ہے وہ کوئی سبیل نکالے گا۔ وہ بچی کو شفاء دے گا۔ اور پا شکورے تو بھی پریشان نہ ہو اللہ پہ چھوڑ دے اس کے ہر کام میں کوئی بہتری ہوتی ہے وہ سب ٹھیک کر دے گا۔'

شکورا خاموش رہا اور صرف سر ہلا کر اس کی بات کا جواب دیا۔ عورت اٹھ کھڑی ہوئی اور اپنے دوپٹے کے پلو سے بندھا ہوا پانچ سو کا نوٹ نکال کر بچی کے سرہانے رکھ کر بولی۔ 'یہ رکھ لو میں بس اتنا کر سکتی تھی اس سے زیادہ کر سکتی تو ضرور کرتی۔'

نہیں باجی میں یہ نہیں لے سکتی اس کی ضرورت نہیں۔' سکینہ نے نوٹ اٹھایا اور اسے واپس لوٹانے کی کوشش کرتے ہوۓ کہا۔

عورت سکینہ کی مٹھی کو بند کرکے اس کا ہاتھ دبا کر بولی۔ 'رکھ لو اس سے تم لوگوں کا زیادہ تو کچھ نہیں بنے گا لیکن شاید ایک آدھ دن کی بچی کی دوائی آجاۓ یا کسی اور ضروری کام آجائیں۔' عورت پیچھے ہٹی اور بولی 'میں چلتی ہوں پھر کسی دن آؤں گی۔' اس نے جاتے ہوۓ آخری بار شکورے اور سکینہ دونوں کو سلام کیا اور باہر نکل گئ۔ شکورا اس بار بھی بالکل اسی طرح بیٹھا رہا اور بس سر کی ہلکی سی جنبش سے اسے سلام کا جواب دیا۔

رات کافی گہری ہو گئ تھی اور سردی بھی پہلے سے بڑھ گئ تھی۔ لیکن کمرے کا اندر کا درجہ حرارت جلتے ہوۓ کوئلوں کے باعث بہتر تھا۔ شکورا چوکی گھسیٹ کر انگیٹھی کے پاس آگیا اور جیب سے سگریٹ نکال کر انگلیوں میں پھنسا کر دروازے کے پاس بیٹھے ہوۓ آدمی سے کہا۔ 'غفورے دوائی دے یار آج ایک دو سے کام نہیں بنے گا۔'

غفورے نے جیب میں ہاتھ ڈالا اور ایک سیاہ رنگ کی گولی شکورے کو دے کر بولا۔ 'ہتھ ہولا رکھ یار دوائی تھوڑی رہ گئ ہے ختم ہو جاۓ گی تو کل کیا کریں گے۔'

شکورا پکا سگریٹ بنانے میں مصروف ہو گیا اور غفورا چھوٹی سی چھڑی اٹھا کر کوئلوں کو درست کرنے میں لگ گیا۔ انگیٹھی میں چھڑی گھماتے ہوۓ اسے اک خیال آیا جو اسے اٹھا کر کہیں اور لے گیا۔

ایک قدرے بڑا سا کمرا تھا جہاں وہ بالکل اسی طرح انگیٹھی میں چھڑی گھما رہا تھا۔ کمرے میں تین چار چارپائیاں بچھی تھیں۔ اس کے دو بچے ادھر ادھر بھاگ کر کھیل رہے تھے جبکہ اس کی بڑی بیٹی ایک طرف بیٹھ کر سکول کا کام کر رہی تھی۔ سب سے آخر والی چارپائی پر دیوار کے پاس اس کی بوڑھی ماں لیٹی تھی۔ اس کی بیوی اندر آئی اور بولی۔ 'ابھی تک کوئلوں کو چھیڑ رہے ہو اٹھ کر بستر میں چلے جاؤ بہت رات ہو گئ ہے۔'

اٹھنے لگا ہوں۔' غفورا کوئلوں میں چھڑی گھماتے ہوۓ بولا۔

اچھا میری ایک بات سن۔' اس کی بیوی اس کے پاس والی چارپائی پر بیٹھ کر بولی۔ ' اپنا انور پورے آٹھ برس کا ہو گیا ہے اسے سکول سے اٹھا کر کسی کام پر لگا چار پیسے لے کر آۓ گا تو گھر کے حالات کچھ بہتر ہوں گے۔'

ابھی اسے پڑھنے دے اس کی بجاۓ نفیسہ کو سکول سے چھڑوا لیتے ہیں تو اسے گھر کے کام کاج سیکھا بعد میں بھی تو اس نے یہی کرنا ہے۔' غفورے نے کوئلوں میں ہلکی سی پھونک مار کر کہا۔

نفیسہ کو چھڑوا کر کیا فائدہ ہو گا۔' اس کی بیوی بولی 'وہ کما کر تو نہیں لاۓ گی۔ میں تو کہتی ہوں تو اسے کام پر لگا تاکہ یہ کچھ سیکھ جاۓ اور چار پیسے گھر میں آئیں۔ دو دن اسے اپنے ساتھ پھیری پر لے کر جا اور پھر اسے مال لے کر دے تاکہ یہ خود پھیری لگاۓ۔'

تو بھی کمال کرتی ہے ابھی اس کی عمر ہوئی ہے پھیری لگانے والی۔ پچھلے دنوں میں نے اس کے ماسٹر سے بھی بات کی تھی وہ کہتا ہے اس کا ذہن اچھا ہے اسے پڑھنے دو۔'

ذہن اچھا ہے تو کیا ہوا تو کتنی دیر تک اسے پڑھا لے گا زیادہ سے زیادہ ایک دو سال اور۔۔۔ اس کے بعد کیا کرے گا اس کی پڑھائی کے خرچے کیسے اٹھاۓ گا۔

جو بھی ہے کم سے کم اسے دسویں تو کرنے دے۔ میں چاہتا ہوں یہ پڑھ لکھ کر کچھ بن جاۓ میری طرح ساری زندگی پھیریاں نہ لگاتے پھرے۔' غفورا مغموم انداز سے بولا۔

دسویں کرکے کون سا تیر مار لے گا۔ یہ اپنے ساتھ والی باجی رخسانہ کا لڑکا پوری سولہ جماعتیں پاس ہے دو سال ہو گۓ بیچارے کو دھکے کھاتے ہوۓ کہیں کوئی ڈھنگ کا کام نہیں ملا۔'

وہ تو ہے پر۔۔۔'

میں کچھ نہیں جانتی تو اسے جلدی سے کسی کام پر لگا۔ کھانے کو روٹی ٹھیک طرح سے مل نہیں رہی اور تو اسے پڑھانے کی ضد کر رہا ہے۔'

غفورا سر ہلا کر خاموش ہو گیا اور چھڑی سے کوئلوں کو بکھیرنے میں لگ گیا۔

کمرے میں ابھی بھی مکمل خاموشی تھی۔ غفورا انگیٹھی میں چھڑی گھما رہا تھا اور شکورا پکا سگریٹ پینے میں مصروف تھا۔ صغیرے نے شکورے کے ہاتھ سے سگریٹ لیا ایک دو کش لگایا اور سر پیچھے گرا کر دوبارہ آنکھیں بند کر لیں۔ اس بار وہ اس لڑکی کے ساتھ ایک تنگ گلی میں کھڑا تھا۔ شام ہو چکی تھی لیکن اندھیرا ہونا ابھی باقی تھا۔ لڑکی آہستہ آواز میں سرگوشی کے انداز میں بولی 'میں بس تجھے یہ بتانے آئی تھی اماں کو کوئی مل گیا ہے۔'

صغیرے کو چند لمحے اس کی بات پر بالکل بھی یقین نہ آیا۔ 'کون ہے وہ؟' اس نے خیرت سے پوچھا۔

پتہ نہیں سنا ہے بہت پیسے والا ہے۔'

صغیرا طنزیہ انداز میں ہلکا سا ہنسا۔ لڑکی چند لمحے خاموش کھڑی رہی پھر بولی 'میں چلتی ہوں اندھیرا ہو گیا۔'

ہاں اندھیرا تو ہو گیا ہے۔' صغیرا اس کے چہرے پر نظریں گاڑھ کر بولا۔

لڑکی پیچھے ہٹی اور واپس چل پڑی۔ گلی کے موڑ پر جا کر رک کر اس نے پیچھے دیکھا صغیرا وہیں کھڑا اسے جاتا ہوا دیکھ رہا تھا لڑکی کچھ دیر تک اسے دیکھتی رہی پھر گلی سے باہر نکل کر موڑ مڑ گئ۔

صغیرے نے آنکھیں کھولیں اور بلب کی طرف دیکھا ایک چھپکلی رینگتی ہوئی بلب کے پاس سے گزری اور پھسل کر زمین پر آگری۔ دور کہیں سے ریل گاڑی کی سیٹی کی آواز گونجی، اس نے دیوار پر ٹنگی گھڑی سے وقت دیکھا تین بج رہے تھے، وہ اٹھا اور دروازہ کھول کر باہر نکل گیا۔

طاہر کا کنبہ

2023-12-31T16:16:00.003+05:00

کردار

طاہر= میچور عمر کا ایک لڑکا یا آدمی۔

فری= اصلی نام فرخندہ۔ طاہر کی بیوی۔

احمر= طاہر اور فرخندہ کا نو دس برس کا چھوٹا بیٹا۔

اسجد= احمر کا بڑا بھائی۔

ثانیہ= احمر اور اسجد کی تین چار برس کی چھوٹی بہن۔

آنٹی شعمونہ= ہمسائی۔

ٹیپو= آنٹی شمعونہ کا بیٹا۔ احمر کا ہم عمر دوست۔

شاہد= طاہر کا چھوٹا بھائی۔

سعدیہ= شاہد کی منگیتر۔

شاہزیب= اسجد کا دوست۔

امی= طاہر کی امی۔

پہلا منظر

دن کا وقت۔ طاہر کا گھر۔

ایک بڑا سا لوِنگ روم ہے۔ فرخندہ کمرے میں کھڑی جھاڑ پونچھ کر رہی ہے اور بے ترتیب چیزوں کو درست کر رہی ہے۔ وہ گھر کے روزمرہ کے کاموں میں پوری طرح مصروف نظر آرہی ہے۔ جبکہ ایک طرف طاہر صوفے پر بیٹھا کسی کتاب کی ورق گردانی کر رہا ہے۔

فرخندہ: (اپنا کام کرتے ہوۓ ذرا بلند آواز سے) احمر۔۔۔اسجد۔۔۔آجاؤ جلدی پڑھائی کا وقت ہو گیا ہے۔ کھیلنا بند کرو۔۔۔اور کمرے میں جاکر دیکھو ثانیہ ٹھیک سے سوئی ہوئی ہے، کہیں اٹھ کر رونا نہ شروع کر دے۔

طاہر: (کتاب سے نظریں اٹھا کر) ویسے بیگم صاحبہ بچوں کی آپ کو بڑی فکر ہے۔۔۔

فرخندہ: (بات کاٹ کر) تو کیا نہ کروں؟

طاہر: نہیں وہ تو اچھی بات ہے مگر آپ شاید بھول رہی ہیں اس گھر میں آپ کا ایک عدد نادار و ناچار قسم کا شوہر بھی پایا جاتا ہے۔

فرخندہ: جی۔۔۔! آپ نادار اور ناچار؟ ایسی ناداری اور ناچاری کے تو کیا کہنے۔

طاہر: بات دراصل یہ ہے بیگم صاحبہ! ہمارا مطالبہ بس اتنا ہے بچوں کے ساتھ اگر ہمیں بھی تھوڑا سا 'ٹریٹ' کر لیا جاۓ تو کیا ہی اچھا ہو۔

فرخندہ: آپ کے مطالبات تو کبھی ختم نہیں ہوتے۔ ایک پورا کرو تو دوسرا شروع، دوسرا پورا کرو تو تیسرا شروع۔ اور پھر اتنا تو بچے نخرے نہیں کرتے جتنا آپ کرتے ہیں۔ یہ چیز ایسی نہیں ایسی ہونی چاہیۓ، یہ اس طرح کیوں ہے اس طرح کیوں نہیں، اِس میں میٹھا زیادہ ہے اٌس میں نمک کم ہے۔ بچوں سے زیادہ تو آپ تنگ کرتے ہیں۔

طاہر: میں نے تو 'ٹریٹ' کرنے کو بولا تھا تم تو 'ڈیفیٹ' کرنے پر اتر آئی۔

فرخندہ: شکر کریں ابھی صرف ڈیفیٹ کر رہی ہوں ورنہ میں 'بیٹ' بھی کر سکتی ہوں۔

طاہر: اچھا جی! یہ ہنر تم نے کب سیکھا؟

فرخندہ: شادی سے پہلے سیکھ کر آئی تھی مجھے معلوم تھا شادی کے بعد اس کی ضرورت پڑے گی۔

طاہر: اچھا تو تمہیں مجھ پر اس قدر شک تھا؟

فرخندہ: (شرارت سے) نہیں مجھے تو آپ پر پورا بھروسہ تھا۔

(ہنستا ہے)

طاہر: تو تمہیں پورا بھروسہ تھا میں ایسی حرکتیں ضرور کروں گا کہ تمہیں مجھے 'کوٹنا' پڑے گا۔۔۔ تو پھر ابھی تک تم نے اپنا یہ ہنر مجھ پر آزمایا کیوں نہیں؟ اس کا تو مطلب یہ ہوا میں نے ابھی تک ایسی ویسی کوئی حرکت نہیں کی؟

فرخندہ: (شرارت سے) نہیں! حرکتیں تو آپ کی بہت ساری ایسی ہیں بس ذرا زمانے کا خیال آجاتا ہے۔ لوگ کیا کہیں گے۔

طاہر: (ہنس کر) بس بیگم صاحبہ بس۔ تم جیتی ہم ہارے۔۔۔ بیگم اگر جملے باز ہو تو اس کے بھی اپنے کچھ 'پراز اینڈ کانز' ہوتے ہیں۔

فرخندہ: مثلاً کیا؟

طاہر: ہیں کچھ۔ ذرا تفصیل طلب ہیں کسی دن فرصت میں بتاؤں گا۔

(دروازے کی گھنٹی بجتی ہے)

فرخندہ: (بلند آواز سے) اسجد۔۔۔! باہر دیکھو کون ہے۔

(جانے لگتی ہے)

طاہر: کہاں جا رہی ہو؟ بات تو سنو۔

فرخندہ: کچن میں جا رہی ہوں۔ خوب سمجھتی ہوں آپ نے اپنی یہ جو (خصوصی پر زور دے کر) خصوصی توجہ کتاب سے ہٹا کر میری جانب کی ہے تو کیوں کی ہے۔

طاہر: کیوں کی ہے؟

فرخندہ: کیونکہ آپ کا چاۓ پینے کا وقت ہو گیا ہے۔

طاہر: ارے واہ! سیانے کہتے ہیں اچھی بیگمات کی ایک نشانی یہ ہے وہ خاوند کے بغیر کہے ہی اس کی من کی بات جان لیتی ہیں۔

فرخندہ: آپ اور آپ کے سیانے۔

(چلی جاتی ہے)

(احمر اندر آتا ہے)

احمر: ماما آنٹی شعمونہ آئی ہیں۔ اور ساتھ ٹیپو بھی آیا ہے۔

فرخندہ: (اندر کچن سے) اچھا بٹھاؤ انہیں میں آتی ہوں۔

(آنٹی شعمونہ اور احمر دروازے سے اندر کمرے میں داخل ہوتے ہیں)

آنٹی شعمونہ: اسلامُ علیکم طاہر بھائی صاحب! کیا حال چال ہیں آپ کے؟

طاہر: اللہ کا شکر ہے ٹھیک ٹھاک آپ سنائیں؟

آنٹی: (صوفے پر بیٹھ کر) کیا بتاؤں بھائی صاحب۔ (ٹیپو کی طرف اشارہ کرکے) اس لڑکے نے ناک میں دم کیا ہوا ہے۔

طاہر: کیوں کیا ہوا؟

شعمونہ: ہونے کیا ہے بس اس نے مجھے بہت پریشان کیا ہوا ہے۔

(فرخندہ آتی ہے)

فرخندہ: کیا کر دیا شمعونہ ہمارے اس چھوٹے سے ٹیپو نے جو تم اتنا پریشان ہو رہی ہو۔

شعمونہ: کچھ نہ پوچھو فری! اسی بات کی تو پریشانی ہے یہ ابھی بہت چھوٹا ہے اسے زندگی کی سمجھ نہیں۔ مگر ڈرتی ہوں اگر یہ ابھی نہ سیکھا تو آگے جا کر اسے مشکل ہو گی۔

طاہر: لیکن بہن جی کچھ تو بتائیں آخر اس نے کیا کیا ہے؟

شعمونہ: بات یہ ہے بھائی صاحب یہ نارمل بچوں کی طرح نہیں ہے۔ میں چاہتی ہوں یہ نارمل بچوں کی طرح بی ہیو کرے۔ اب دیکھیں نا یہ چھوٹے سے چھوٹا جھوٹ بھی نہیں بولتا۔ معمولی سے معمولی بات بھی پوچھو تو سچ سچ بتا دیتا ہے۔ گھر آکر سکول کی باتیں بالکل ٹھیک ٹھیک بتاتا ہے اور سکول میں ٹیچرز کے ساتھ بھی یہی 'سلوک' کرتا ہے۔ کلاس میں چاہے خراب مارکس بھی آۓ ہوں یہ ہمیں بالکل ٹھیک بتاتا ہے۔ اب آپ ہی بتائیے یہ کوئی نارمل بی ہیویئر ہوا؟ بچے اتنا تو جھوٹ بول دیتے ہیں۔

(طاہر اپنی بیوی کی طرف دیکھ کر مسکراتا ہے۔ وہ بھی اسکی طرف دیکھ کر ہنستی ہے)

طاہر: (طنزیہ انداز میں) ہاں یہ بات تو ہے یہ نارمل تو بالکل نہیں ہے۔

شعمونہ: یہی تو۔۔۔آپ تو جانتے ہیں اس دور میں جھوٹ بولے بغیر آدمی ترقی کر سکتا ہے، ترقی تو چھوڑیں اگر آدمی تھوڑا بہت ڈپلومیٹ نہ ہو تو سروائیو نہیں کرسکتا۔ میں تو سوچ سوچ کر پریشان ہوتی ہوں یہ بڑھا ہو کر کیا کرے گا۔اسے اتنا سمجھایا ہے مگر یہ سمجھے تب نا۔

طاہر: (طنزیہ انداز میں شرارت سے) ہاں بات تو واقعی پریشانی والی ہے۔

شعمونہ: میں نے اس کے پاپا کو کہا ہے اسے کسی سائیکائٹرسٹ کو دکھائیں وہ اس کی کاؤنسلنگ کرے گا تو ہو سکتا ہے یہ دوسرے بچوں کی طرح نارمل بی ہیو کرنے لگے۔

طاہر: (طنزیہ انداز میں) ہاں ہاں آپ اسے ضرور کسی سائیکائٹرسٹ کو دکھائیں۔ اگر ابھی سے اسے نہ روکا تو اس کی عادت پختہ ہو جاۓ گی اور پھر اسے سنبھالنا مشکل ہو جاۓ گا۔

شعمونہ: بالکل یہی بات میں اس کے پاپا کو کہہ رہی تھی۔

فرخندہ: اور کوئی مسئلہ بھی ہے اس میں یا صرف یہی ہے؟

شعمونہ: ایک دو باتیں اور بھی ہیں جیسے کہ یہ ہر ایک سے بڑی پولائٹنس سے بات کرتا ہے۔ اب اگر آدمی میں رعب دبدبہ نہ ہو، اس کی آواز میں کرختگی اور خوف نہ ہو تو وہ مرد کیا ہوا۔ یہ تو ہر ایک سے ایسے بات کرتا ہے جیسے یہ لڑکا نہیں لڑکی ہے۔

فرخندہ: لیکن شعمونہ میں نے تو اسے کبھی لڑکیوں کی طرح باتیں کرتے نہیں سنا یہ تو بالکل ٹھیک ٹھاک بولتا ہے جیسے لڑکے بولتے ہیں۔

شعمونہ: بولتا تو لڑکوں کی طرح ہی ہے میرے کہنے کا مطلب تھا کہ یہ اتنی شائستگی اور پولائٹنس سے بولتا ہے یوں لگتا ہے جیسے لڑکا نہیں لڑکی بات کر رہی ہو۔ لڑکوں کا بھلا شائستگی، پولائٹنس یا کائنڈنس سے کیا کام۔۔۔ آج کل تو لڑکیاں بھی ایسے بات نہیں کرتیں یہ تو پھر لڑکا ہے۔

فرخندہ: تو ٹھیک ہے تم یہ بات بھی ڈاکٹر کو بتانا وہ اس کی کاؤنسلنگ بھی کرے گا اور شاید دوا بھی دے جس سے یہ بالکل ٹھیک ہو جاۓ گا۔

شعمونہ: ہاں بتاؤں گی یہ بھی بتاؤں گی۔۔۔اچھا میں باتوں میں لگ کر بھول گئ کہ میں یہاں آئی کس مقصد سے تھی۔ میں اصل میں تمہیں صوفیہ کی منگنی کی دعوت دینے آئی تھی۔

فرخندہ: اچھا صوفیہ کی منگنی طے ہو گئ۔ کہاں ہوئی؟

شعمونہ: وہیں جہاں میں نے تمہیں بتایا تھا کہ اس کے رشتے کی بات چل رہی ہے۔

فرخندہ: پھر تو مبارک ہو۔

شعمونہ: خیر مبارک۔۔۔(اٹھنے لگتی ہے) اچھا میں اب چلتی ہوں۔

فرخندہ: ارے ایسے کیسے آئی ہو تو چاۓ پانی کچھ تو پی کر جاؤ۔

شعمونہ: نہیں مجھے دیر ہو رہی ہے میں نے ابھی رخشندہ کی طرف بھی جانا ہے۔

فرخندہ: تھوڑی دیر بیٹھ جاؤ پھر چلے جانا اتنی بھی کیا جلدی ہے۔ میں اِن کے لیۓ چاۓ بنا رہی تھی تمہارے لیۓ بھی بنا کر لاتی ہوں۔

شعمونہ: نہیں اس کی ضرورت نہیں۔ تم آکر بیٹھ جاؤ میرے پاس اتنا وقت نہیں ہے۔ میں بس تھوڑی دیر بیٹھوں گی۔

(فرخندہ بھی جا کر بیٹھ جاتی ہے)

دوسرا منظر

رات کا وقت۔ طاہر کا گھر۔

سب افراد کھانے کی میز پر بیٹھے ہیں جبکہ فرخندہ کوئی چیز ہاتھ میں پکڑے باورچی خانے سے نکل کر آتی ہے اور لاکر میز پر رکھتی ہے۔ واپس پلٹنے لگتی لیکن باہر سے کسی کی آواز سن کر رک جاتی ہے۔ کچھ ہی پل میں شاہد فون پر باتیں کرتا ہوا اندر آتا ہے۔

شاہد: (فون پر) ہاں ہاں ٹھیک ہے کر دوں گا، فون بند کرو میں پہنچ گیا ہوں۔ بعد میں بات کرتا ہوں۔ (فون بند کر دیتا ہے) (بچوں سے) کیا حال ہے بچہ لوگ؟

بچے: (ایک ساتھ چلا کر) شاہد چاچو۔۔۔شاہد چاچو آگۓ۔

(شاہد آگے بڑھ کر ثانیہ کو گود میں بٹھا لیتا ہے)

شاہد: ثانیہ میڈیم کیا کھا رہی ہے؟

ثانیہ: چاچو کٹڈ کھا رئی ہوں۔

شاہد: کیا کھا رہی ہو؟

ثانیہ: (چلا کر) کٹڈ۔۔۔

شاہد: اچھا کسٹرڈ کھا رہی ہو۔

ثانیہ: کٹڈ نہیں۔۔۔کٹڈ

شاہد: (ہنس پڑتا ہے) ٹھیک ہے کٹڈ کھا رہی ہو۔

ثانیہ: جی۔ سمجھ ہی نہیں آتی آپ کو۔

(دوبارہ ہنستا ہے)

فرخندہ: شاہد کھانا لاؤں تمہارے لیۓ؟

شاہد: ہاں بھابھی لے آئیں بڑی بھوک لگی ہے۔

طاہر: (کھانا کھاتے ہوۓ) اچھا کیا تم آگۓ۔ میں تمہیں فون کرنے والا تھا۔

فرخندہ: ابھی تو وہ آیا ہے اسے کھانا تو کھا لینے دیں آپ کو تو اپنے کام کی پڑ جاتی ہے۔

طاہر: میں بس بات کر رہا ہوں بعد میں بھول نہ جاؤں اس لیۓ ابھی بتا رہا ہوں۔

شاہد: آپ نے مجھے پھر سے گھمن صاحب کی طرف تو نہیں بھیجنا؟

طاہر: ہاں وہیں جانا ہے۔

شاہد: یار بھائی خدا کے لیۓ میں نہیں جانا والا اس کی طرف۔ وہ آدمی اتنا پکاتا ہے کہ پوچھو مت، اتنی باتیں کرتا ہے اتنی باتیں کرتا ہے بندہ تنگ پڑ جاتا ہے۔

طاہر: یار تم نے کون سا اس کے پاس پورا مہینہ رہنا ہے۔ پانچ منٹ کا کام ہے کرکے نکل آنا۔

شاہد: پانچ منٹ میں وہ آدمی پچاس منٹ کی باتیں کر جاتا ہے۔

طاہر: چل یارا تھوڑی دیر سن لینا پھر کیا ہے۔

شاہد: ہاں جی پھر کیا ہے۔ سننا تو مجھے پڑنا ہے آپ کو کیا۔ (بھابھی سے) بھابھی قسم سے اگر آپ تھوڑی دیر اس کی باتیں سن لیں تو دو دن تک آپ کے کان درد کرتے رہیں گے۔

فرخندہ: (شرارت سے) اس معمالے میں تھوڑا بہت تو تمہارے بھائی پر گیا ہے۔

( جانے لگتی ہے)

شاہد: جی ہاں اور اسے جھیل بھی یہ ہی سکتے ہیں۔ مجھ میں وہ صلاحیت نہیں۔

طاہر: تم تو ایسے کہہ رہے ہو جیسے کسی اور دنیا سے آۓ ہو۔ تم سے اس شخص کی پانچ منٹ کی باتیں برداشت نہیں ہو رہیں حالانکہ پوری قوم دن رات باتوں میں مشغول ہے۔ ،چیختے چنگھاڑتے ٹی وی چینلز ہیں جہاں دن رات بحث و تکرار جاری ہے، چوبیس گھنٹے بھک بھک چلتی ہے، چوکوں چوراہوں میں، منبر و محراب پر، جلسے جلوسوں میں ہر جگہ لمبے لمبے بھاشن ہیں، تقریریں ہیں، خطابات ہیں۔ اتنا شور ہے، اتنی چیخ و پکار ہے، کسی کی کچھ سمجھ نہیں آتی۔ ہمارا کل اثاثہ باتیں ہی تو ہیں۔

شاہد: یہ بات تو تم نے ٹھیک کہی بھائی! مجھے لگتا ہے اس کرۂ ارض پر نائیز پولوشن (شور کی آلودگی) کے ذمے دار ہم لوگ ہی ہیں۔

اسجد: (آنکھوں سے احمر کی طرف اشارہ کرکے) کچھ اور لوگ بھی ہیں چاچو!

شاہد: کون احمر! کیوں آج اس نے کیا کیا ہے؟

اسجد: صبح سے مجھ سے آٹھ دفعہ وڈیو گیم ہار چکا ہے اور ہر دفعہ ہارنے کے بعد چیخنا شروع کر دیتا ہے۔

احمر: وہ اس لیۓ چاچو بھائی ہر دفعہ چیٹنگ کرتا ہے۔

اسجد: ہاں یہ اچھا ہے خود جیتنے نہیں ہوتا اور دوسروں کو کہتا ہے چیٹنگ کرتا ہے۔

(فرخندہ باورچی خانے سے نکل کر آتی ہے۔ اس کے ہاتھ میں برتن اور روٹیاں وغیرہ ہیں)

فرخندہ: (دور سے) چیٹنگ تو تم کرتے ہو اسجد! میں نے خود تمہیں دیکھا ہے۔

اسجد: کیا ماما! کبھی تو میری سائیڈ لے لیا کریں۔

فرخندہ: (پاس آکر برتن رکھتے ہوۓ) بیٹا جو سچ ہے وہ تو سچ ہے۔ جب تم صحیح ہو گے تو تمہاری سائیڈ لوں گی۔

احمر: (منہ بگاڑ کر بھائی کو چڑاتا ہے)

اسجد: (چڑ کر) دیکھا!۔۔۔ دیکھا ماما پھر آپ کہتی ہیں میں اسے کیوں کچھ کہتا ہوں۔ خود مجھے چڑا رہا ہے۔

فرخندہ: (ڈانٹ کر) انسان بنو احمر بڑا بھائی ہے تمہارا۔

تیسرا منظر

رات کا وقت۔ طاہر کا گھر۔

فرخندہ اور طاہر ایک بڑے سے ٹیرس میں بیٹھے ہیں۔ فرخندہ ہاتھوں پر نیل پالش لگا رہی ہے اور طاہر موبائل دیکھ رہا ہے۔ ثانیہ اپنی چھوٹی سی سائیکل چلا رہی ہے۔

فرخندہ: طاہر! میں سوچ رہی تھی پرسوں امی کی طرف ہو آؤں۔

طاہر: (اس کی طرف دیکھے بغیر) کیوں، پرسوں کیا ہے؟

فرخندہ: (چڑ کر) ولیمہ ہے۔

طاہر: کس کا؟

فرخندہ: میرے شوہر کا۔

طاہر: اچھا واہ۔ پھر تم کیوں جا رہی ہو تمہارا شوہر ادھر ہے تو ولیمہ بھی تو ادھر ہی ہو گا اٹینڈ کرکے جانا۔

فرخندہ: نہیں کر سکتی مجھے آپ نے انوائیٹ نہیں نہ کیا۔

طاہر: تو کوئی بات نہیں ابھی تمہیں لائیو انویٹیشن دے تو رہا ہوں۔

فرخندہ: مجھے آپ کا انویٹیشن نہیں چاہیۓ۔ آپ اپنا ولیمہ انجواۓ کریں اور مجھے جانے دیں۔

طاہر: (سنجیدگی سے) ابھی کیسے جا سکتی ہو تم فری، امی بھی گھر نہیں ہیں تم بھی چلی جاؤ گی تو پیچھے سے گھر اور بچوں کو کون سنبھالے گا۔

فرخندہ: آپ اپنی بات کریں بچے اور گھر سنبھل جائیں گے۔

طاہر: یہ کیا بات ہوئی ۔۔۔ابھی ٹھہر جاؤ امی کو آلینے دو پھر چلے جانا۔

فرخندہ: امی تو اگلے ہفتے آئیں گی۔

طاہر: تو اگلے ہفتے چلی جانا تم نے کون سا ابھی جا کر وہاں حساس اور نازک ملکی معاملات پر میٹنگ کرنی ہے۔ تم نے غیبتیں اور بد خویاں وغیرہ کرنی ہیں اگلے ہفتے کر لینا۔

فرخندہ: (ناراضی سے) آپ سے تو بات کرنا ہی بیکار ہے۔

(اٹھ کر چلی جاتی ہے۔ طاہر ہنس کر دوبارہ موبائل دیکھنا شروع کر دیتا ہے۔۔۔ اسجد آتا ہے)

اسجد: پاپا۔۔۔!

طاہر: جی۔

اسجد: میری ایک بات مانیں گے؟

طاہر: کیا؟

اسجد: ماما سے کہیں مجھے صبح ایک دوست کی پارٹی میں جانے دیں۔

طاہر: خود جا کر کہو۔ خود کیوں نہیں کہتے؟

اسجد: وہ مجھے اجازت نہیں دیں گی آپ جاکر بات کریں۔

طاہر: بیٹا جی اگر اس وقت میں نے بات کی تو تمہارا دوست کے گھر جانا تو رہا ایک طرف ہم دونوں اس گھر سے ضرور باہر جائیں گے۔ اس لیۓ بہتری اسی میں ہے ابھی خاموش رہو جب فریقِ مخالف کا پارہ ذرا زوال پذیر ہو گا اور حالات کچھ سازگار ہوں گے تو بات کریں گے۔

اسجد: بزدلی چھوڑیں پاپا! ہمت کریں اور آگے بڑھ کر اپنے شوہرانہ اختیارات کا استعمال کریں۔

طاہر: نہ بچہ جی نہ۔۔۔بہادری اور بیوقوفی میں بڑا باریک سا فرق ہوتا ہے اور علما اور فضلا کا کہنا ہے ایسی سچوایشنز میں قدم آگے بڑھانا بیوقوفی کے زمرے میں آتا ہے۔ رہی بات شوہرانہ اختیارات کی تو اس میں مسئلہ یہ ہے ان کے پاس بھی بیگمانہ اختیارات ہیں جو ہمارے برابر ہیں۔

اسجد: تو پھر اب؟

طاہر: پھر اب یہ کہ صبح ہونے تک انتظار کرو تاکہ یہ رات ڈھل جاۓ جاۓ اور تاریکی چھٹ جاۓ۔

اسجد: تو اگر صبح حالات بہتر ہوۓ تو آپ بات کریں گے؟

طاہر: نہ۔۔۔! میدانِ جنگ میں تو تمہیں ہی اترنا پڑا گا البتہ میں پیچھے سے تمہیں کمک پہنچا دوں گا۔

اسجد: چلیں ٹھیک ہے۔ صبح پھر آپ میدانِ جنگ کے آس پاس رہنا یہ نہ ہو آپ دور دور تک کہیں دکھائی نہ دیں۔

طاہر: وہ تو حالات پر منحصر ہے۔ اگر حالات میں بہتری دکھائی نہ دی تو۔۔۔

اسجد: (چڑ کر) کیا پاپا آپ بھی!

(چلا جاتا ہے۔ اس کے بعد ثانیہ سائیکل چلاتے ہوۓ گرتی ہے۔ رونے لگتی ہے)

طاہر: (اٹھ کر اسے سیدھا کرتے ہوۓ) کچھ نہیں ہوا۔۔۔اٹھ جاؤ۔۔۔رونا نہیں کچھ بھی نہیں ہوا۔

چوتھا منظر

صبح کا وقت۔ طاہر کا گھر۔

ناشتے کی میز پر احمر، اسجد، ثانیہ اور طاہر بیٹھے ناشتہ کر رہے ہیں۔ فرخندہ اندر باورچی خانے میں ہے۔ احمر ناشتہ کرکے اٹھتا ہے۔

احمر: (بلند آواز سے) ماما جلدی کریں دیر ہو رہی ہے۔

فرخندہ: (اندر سے) اچھا!۔۔۔ناشتہ کرلیا ہے؟

احمر: جی کر لیا ہے۔

(سکول بیگ اٹھاتا ہے، ٹائی درست کرتا ہے۔ فرخندہ کچن سے ٹفن باکس ہاتھ میں لیۓ آتی ہے)

فرخندہ: یہ لو اپنا ٹفن باکس اور اگر لنچ سارا نہیں کرنا ہوتا تو ٹفن میں کیوں رہنے دیتے ہو، ٹفن میں پڑا پڑا خراب ہو جاتا ہے۔ ضائع کرنے سے بہتر ہے تم نے جتنا کھانا ہوتا ہے کھا لیا کرو اور باقی کا کسی کو دے دیا کرو کوئی اور کھا لے گا۔

احمر: (آئینے میں بال درست کرتے ہوۓ) اچھا ماما۔

(ٹفن ہاتھ سے لے لیتا ہے اور دوبارہ آئینے میں دیکھ کر بال درست کرنے لگتا ہے)

فرخندہ: اسجد تمہیں کچھ چاہیۓ؟

اسجد: نہیں ماما کافی ہے۔

فرخندہ: ٹھیک ہے جلدی سے ناشتہ کرلو گاڑی آنے والی ہو گی اور اوپر کمرے میں تمہاری بکس پڑی ہوئیں ہیں وہ یاد سے لے لینا۔

اسجد: اچھا ماما۔

(فرخندہ واپس چلی جاتی ہے)

اسجد: (سرگوشی کے انداز میں) پاپا حالات نارمل لگ رہے ہیں میں ایسا کروں گا سکول سے آکر بات کروں گا اگر ضرورت پڑی تو آپ کی بھی فون پر بات کروا دوں گا۔

طاہر: اچھا ٹھیک ہے دیکھ۔۔۔

اسجد: (بات کاٹ کر) آگے کچھ مت کہنا۔۔۔مجھے پتہ ہے آپ نے کیا کہنا ہے۔

طاہر: (ہنس کر) اچھا نہیں کہتا۔

(گاڑی کے ہارن کی آواز آتی ہے)

اسجد: (کھڑے ہو کر) ٹھیک ہے میں جا رہا ہوں۔ (بلند آواز سے) ماما ہم لوگ جا رہے ہیں۔

فرخندہ: (اندر سے) دھیان سے جانا اور بھائی کا خیال رکھنا۔

اسجد: اچھا ماما۔

فرخندہ: اپنی بکس لے لی ہیں؟

اسجد: (بیگ اٹھا کر) نہیں ماما آج ان کی ضرورت نہیں آکر لے لوں گا۔

(دونوں باہر نکل جاتے ہیں)

ثانیہ: پاپا میں نے بھی بھائی ساتھ 'ستول' جانا ہے۔

طاہر: (اسی کے انداز میں) آپ نے بھی بھائی ساتھ 'ستول' جانا ہے؟ ٹھیک ہے جب بڑی ہو جاؤ گی تو آپ بھی بھائیوں ساتھ سکول جانا۔

ثانیہ: تو میں بڑی تو ہو گئ ہوں۔۔۔(اٹھ کر کھڑی ہوجاتی ہے) دیکھیں میں کتنی بڑی ہو گئ ہوں۔

طاہر: (ہلکا سا ہنس کر) ہاں بس تھوڑی سی اور بڑی ہو جاؤ پھر تم بھی سکول جانا۔ (بلند آواز سے) فری میرا سامان کہاں ہے میں بھی نکلوں نہیں تو دیر ہو جوۓ گی۔

فرخندہ: (اندر سے) کمرے میں پڑا ہے میز کے اوپر لے لیں۔

(طاہرکرسی سے اٹھ کر جانے لگتا ہے)

پانچواں منظر

دن کا وقت۔ ایک وسیع و عریض باغ۔

شاہد اور سعدیہ باغ میں گھوم پھر رہے ہیں۔ دونوں ایک پگڈنڈی پر چلتے ہوۓ آرہے ہیں۔ موسم خوشگوار ہے۔ رش زیادہ نہیں ہے۔ چڑیوں اور دوسرے پرندوں کے چہچہانے کی آوازیں آرہی ہیں۔

شاہد: (چلتے ہوۓ) بس یہی تھی ان دونوں کی دکھ بھری کہانی۔ اب وہ دونوں کہاں ہیں کس شہر میں ہیں کسی کو کچھ پتہ نہیں۔

سعدیہ: ہاۓ شاہد! محبت میں سچ میں اتنے دکھ اور غم ملتے ہیں؟

شاہد: (ایک جگہ رک کر) تم یہ بات کیوں کر رہی ہو ہماری منگنی ہو چکی ہے اور کچھ عرصے بعد ہماری شادی بھی ہو جاۓ گی۔ تمہارے ذہن میں تو یہ بات نہیں آنی چاہیۓ۔

سعدیہ: ویسے ہی۔۔۔ میں بس تمہاری راۓ جاننا چاہ رہی ہوں۔

شاہد: (دوبارہ چلتے ہوۓ) اچھا جی۔۔۔ (سوچتے ہوۓ) میری راۓ۔۔۔ میرے خیال میں ایسا نہیں ہے۔ اس کا تعلق ملنے اور بچھڑنے سے ہے اگر محبت مل جاۓ تو کوئی مسئلہ نہیں لیکن اگر نہ ملے تو پھر ایسا ہو سکتا ہے۔ یہ سارا چکر ہجر و وصال کا ہے میڈم!

سعدیہ: بڑی بات کی ہے۔ یہ بات تو ظاہر سی ہے بات کرنے سے پہلے سوچا تو ایسے تھا جیسے بڑی اعلیٰ بات کرنے لگے ہو۔

طاہر: ہاں تو تم نے خود ہی مجھ سے پوچھا تھا۔ تم نے میری راۓ پوچھی تھی وہ میں نے بتا دی۔ میں کوئی فلاسفر تھوڑی ہوں جو محبت کے موضوع پہ سیر حاصل گفتگو کر سکوں۔

سعدیہ: سوچ تو ایسے رہے تھے جیسے بہت بڑے فلسفی ہو۔

شاہد: وہ تو تم نے پوچھا تھا اس لیۓ۔۔۔

سعدیہ: اچھا چھوڑو۔۔۔۔ (چلتے چلتے رک کر) تو تمہاری راۓ کے مطابق اس کا مطلب یہ ہوا اگر ہم بھی نہ ملتے اور بچھڑ جاتے تو تمہیں دکھ ہوتا؟

شاہد: ظاہر سی بات ہے ہوتا اور تمام عمر رہتا۔ کیا تمہیں نہیں ہوتا؟۔۔۔پر نہیں تمہیں اتنا نہیں ہوتا لڑکیوں کو زیادہ فرق نہیں پڑتا۔ وہ جلد سب کچھ بھلا کر دنیا کے دیگر دھندوں میں مگن ہو جاتی ہیں۔

سعدیہ: جناب آپ کو میں نے محبت پہ راۓ دینے کو کہا تھا لڑکیوں پہ راۓ زنی کرنے کو نہیں بولا تھا۔

شاہد: ہاں تو یہ راۓ میں نے بونس کے طور پر اپنی طرف سے دے دی ہے۔ ایک کے ساتھ ایک فری۔

سعدیہ: آپ اپنی قیمتی راۓ اپنے پاس رکھیں۔ لڑکیوں کو اچھی طرح پتہ ہے وہ کیا ہیں۔ آپ تو جیسے بہت ساری لڑکیوں کو جانتے ہیں۔

شاہد: (مذاق سے) نہیں زیادہ کو نہیں، البتہ دو چار سے میری شناسائی ہے۔

سعدیہ: اچھا جی تو میرے علاوہ اور بھی ہیں؟

شاہد: (پاس آکر رازداری کے انداز سے) ہاں ہیں کچھ بتانا نہیں کسی کو۔

(دونوں ہلکا سا ہنستے ہیں)

سعدیہ: (دوبارہ چلتے ہوۓ) اچھا مذاق چھوڑو۔ یہ بتاؤ شادی کے بارے میں کیا سوچا ہے؟

شاہد: اس کے بارے میں کیا سوچنا ہے جب تم بولو گی کر لیں گے۔ کہو تو ابھی جاتے ہوۓ راستے میں کر لیتے ہیں۔

سعدیہ: پھر مذاق۔۔۔

(ہنستا ہے)

شاہد: (سنجیدگی سے) ابھی اس کے بارے میں کیا بتاؤں۔۔۔ میری نئ نئ جاب شروع ہوئی ہے۔۔۔میرا خیال ہے پرمانینٹ ہو جاؤں تو پھر کوئی ارادہ کریں گے۔

سعدیہ: ہاں۔۔۔ ٹھیک ہے یہ بھی اچھا ہے۔

شاہد: ویسے تمہیں بتاؤں شادی کے اپنے کچھ 'سائیڈ ایفیکٹ' ہوتے ہیں جو ہر ایک کو جھیلنے پڑتے ہیں چاہے آپ محبت کی شادی کریں یا بغیر محبت کی۔

سعدیہ: اچھا جی!

شاہد: ہاں! لیکن لڑکیوں کو عموماً کم جھیلنے پڑتے ہیں۔

سعدیہ: وہ کیوں؟

شاہد: اس لیۓ کہ لڑکیوں کی کون سا کوئی بیوی ہوتی ہے۔

سعدیہ: (ہنستے ہوۓ) دو منٹ بھی تم سیرئیس نہیں رہ سکتے۔

شاہد: سیریئس رہ کر کرنا بھی کیا ہے۔ اس سے آدمی کے مسائل حل ہونے سے تو رہے الٹا سنجیدگی مصیبتوں اور تکلیفوں کی شدت میں اضافہ کر دیتی ہے۔ اس لیۓ سعدیہ صاحبہ! جتنا وقت ہنسی مذاق میں گزر جاۓ اتنا بہتر ہے۔

(دونوں باتیں کرتے ہوۓ کچھ دور تک چلتے جاتے ہیں)

چھٹا منظر

دن کا وقت۔ طاہر کا گھر۔

فرخندہ کچن میں کھڑی کام کر رہی ہے۔ اسجد اندر آتا ہے۔

اسجد: ماما!

فرخندہ: ہونہہ۔

اسجد: مجھے آپ سے ایک بات کرنی ہے۔

فرخندہ: ہاں کرو۔

اسجد: آج شام کو شاہ زیب کے گھر پارٹی ہے تو (ٹھہر ٹھہر کے) میں۔۔۔چلا۔۔۔ جاؤں۔

فرخندہ: ایک تو تمہاری اور تمہارے دوستوں کی پارٹیاں ختم نہیں ہوتیں آۓ روز تم کوئی نہ کوئی پارٹی رکھ لیتے ہو۔ پڑھائی کی تم لوگوں کو ذرا بھی فکر نہیں۔ ایگزیمز تمہارے سر پر ہیں۔

اسجد: ماما ایک دن پارٹی پر جانے سے کیا ہو جاۓ گا۔ ایگزیمز کی تیاری کر تو رہا ہوں۔

فرخندہ: ہاں جانتی ہوں کتنی اچھی تیاری کر رہے ہو پچھلے ہفتے کا ٹیسٹ یاد ہے یا بھول گۓ؟

اسجد: ماما اس کے بعد میرے اتنے اچھے ٹیسٹ ہوۓ ہیں وہ آپ کو یاد نہیں آپ بس اس ایک ٹیسٹ کو لے کر بیٹھے رہنا۔

فرخندہ: تو ایک ٹیسٹ بھی کیوں خراب ہوا ہے اور تو کسی کا نہیں ہوا تمہارا کیوں ہوا ہے۔

اسجد: ماما اب بس بھی کریں۔ پلیز جانے دیں تھوڑی دیر کی تو بات ہے۔

فرخندہ: ٹھیک ہے کرو اپنی مرضی جو دل چاہے کرو مجھ سے مت پوچھو تم جانو اور تمہارا باپ جانے جس نے تمہیں بگاڑا ہوا ہے۔ میری اس گھر میں سنتا ہی کون ہے۔

(کام چھوڑ کر باہر چلی جاتی ہے۔ چند لمحے اسجد یونہی کھڑا دیکھتا رہتا ہے)

ساتواں منظر

دن کا وقت۔ طاہر کا گھر۔

اسجد ایک کمرے میں اکیلا ہے۔ فون اٹھا کر ملاتا ہے اور طاہر سے بات کرتا ہے)

اسجد: ہیلو پاپا!

طاہر: ہاں جی!

اسجد: پاپا بات ہاتھ سے نکل گئ ہے اور حالات مزید بگڑ گۓ ہیں۔

طاہر: تو پھر؟

اسجد: پھر کیا۔۔۔ آپ بات کریں۔

طاہر: لیکن ہوا کیا پہلے کچھ بتاؤ تو؟

اسجد: ہونا کیا ہے بس وہی پرانا ڈائیلاگ۔۔۔ کرو اپنی مرضیاں، میری سنتا کون ہے وغیرہ وغیرہ۔۔۔

طاہر: (مسکرا کر) اور آخر میں یہ بھی کہا ہو گا تمہارے باپ نے تمہیں بگاڑا ہے۔

اسجد: جی ہاں یہ بھی کہا ہے۔

طاہر: تو ٹھیک ہے کرو پھر اپنی مرضی۔

اسجد: پاپا یہ کیا بات ہوئی ایسے کیسے کروں، آپ ان سے بات تو کریں۔

طاہر: اچھا میں شام کو گھر آؤں گا تب بات کریں گے۔

اسجد: آج شام کو تو میں نے جانا ہے اور آپ کہہ رہے ہیں شام کو بات کروں گا۔

طاہر: چل یار ٹھیک ہے میں جلدی آجاؤں گا میں نے شام کو ایک جگہ جانا ہے تو گھر سے ہو کر جاؤں گا۔

اسجد: ٹھیک ہے پھر جلدی آجانا۔

طاہر: ہاں ہاں آجاؤں گا۔ چل اب بند کر مجھے کام ہے۔

اسجد: ٹھیک ہے خداخافظ۔

(فون بند کر دیتا ہے)

آٹھواں منظر

شام سے پہلے کا وقت۔ طاہر کا گھر۔

احمر اور ٹیپو چھت پر کھڑے گیند سے کھیل رہے ہیں۔ ان کے اردگرد چاروں طرف دور دور تک پھیلے مکان دکھائی دے رہے ہیں۔ دونوں گیند زمین پر مار کر ایک دوسرے کی طرف پھینکتے ہیں اور ساتھ ساتھ باتیں بھی کرتے جاتے ہیں۔

ٹیپو: میرے تو ابھی دونوں کام رہتے ہیں ٹیچر سامعیہ نے صبح دونوں چیک کرنے ہیں۔

احمر: میرا تو ایک ہی رہتا ہے رات کو بیٹھ کر کروں گا۔

ٹیپو: کروں گا تو میں بھی رات کو پر سمجھ نہیں آرہی دونوں ایک دن میں کیسے کروں۔

احمر: تو ایک رات کو کر لینا اور ایک صبح جلدی اٹھ کر کر لینا۔

ٹیپو: نہیں کر سکتا۔ صبح سویرے تو میرے فرشتے بھی نہیں اٹھتے وہ بھی اس وقت اٹھتے ہیں جب سکول کی گاڑی دروازے پر ہارن بجا رہی ہوتی ہے۔ صبح اٹھ کر تو مجھ سے یہ کام نہیں ہونے والا۔

(بیزاری سے گیند ایک طرف پھینک کر منڈیر پر کہنیاں ٹکا کر کھڑا ہو جاتا ہے)

کیا یار! پتہ نہیں یہ ہوم ورک نام کی چیز کس نے بنائی تھی۔ یہ نہ ہوتا تو پڑھائی کتنی آسان ہوتی۔

احمر: (منڈیر کی دیوار کے ساتھ اسی کی طرح کہنیاں ٹکا کر افسردگی سے) تم نے ٹھیک کہا میں بھی ہوم ورک سے بہت تنگ آجاتا ہوں۔۔۔لیکن میں نے سنا ہے بڑی کلاسوں میں ہوم ورک نہیں کرنا پڑتا۔

ٹیپو: سنا تو میں نے بھی ہے۔

احمر: میں نے تو دیکھا بھی ہے۔ بھائی کو ہوم ورک نہیں ملتا میں نے اسے ایک دن بھی ہوم ورک کرتے نہیں دیکھا۔

ٹیپو: (خیرت سے) کیا بات ہے یار اس کی تو موجیں ہوں گی۔ اسی لیۓ اس کے پاس کھیلنے کے لیۓ اتنا وقت بچ جاتا ہے۔۔۔ اور ایک ہم ہیں! ہم تو سکول سے آنے کے بعد بس سارا دن یہی کرتے رہتے ہیں جیسے دنیا میں ہمیں اور کوئی کام نہیں۔

احمر: ہاں ٹھیک کہا۔۔۔ (افسردگی سے) ہمارے پاس تو کھیلنے کے لیۓ اور ٹی وی دیکھنے کیلۓ بھی وقت نہیں بچتا۔

ٹیپو: میں تو اپنا فیورٹ کارٹون شو سنڈے والے دن دیکھتا ہوں۔

احمر: سنڈے والے دن بھی ہمارے پاس وقت کہاں بچتا ہے اس دن تو اور بھی زیادہ کام ملتا ہے۔ سارا دن بس یہی تو کرتے رہتے ہیں۔

ٹیپو: یہ تو بڑی زیادتی ہے ہمارے ساتھ۔۔۔ بڑے بچوں کی صحیح موجیں لگتی ہیں جب تک ہم بڑے نہیں ہو جاتے اور بڑی کلاسوں میں نہیں چلے جاتے ہمارے ساتھ اسی طرح ہوتا رہے گا۔

احمر: ہاں یہ تو ہے لیکن اب ہم چپ نہیں بیٹھیں گے ہم اس کے خلاف آواز اٹھائیں گے ہم چھوٹے ہیں تو کیا ہوا آخر ہمارے بھی کچھ حقوق ہیں۔

ٹیپو: بالکل ٹھیک کہا تم نے (پرجوش انداز میں) ہم اپنے حق کے لیۓ لڑیں گے اور ہر حال میں اپنا حق لے کر رہیں گے۔

احمر: (پرجوش انداز میں مکہ لہرا کر) ہاں لے کر رہیں گے۔

ٹیپو: تو کیوں نہ آج سے ہی شروع کریں۔ آج ہم اپنی ممیوں کو بتا دیں گے ہم کسی صورت بھی ہوم ورک نہیں کریں گے (پرجوش انداز میں بازو ہوا میں لہرا کر) چاہے آپ ہمارے سر تن سے جدا کردیں۔

احمر: اور کل سکول جا کر بھی احتجاج کریں گے اور انہیں بتا دیں گے آئندہ ہم کسی قسم کا ظلم برداشت نہیں کریں گے۔

ٹیپو: (پرجوش انداز میں) ہاں بلکل نہیں کریں گے۔۔۔ ملاؤ ہاتھ۔

(دونوں اپنے ہاتھ فضا میں بلند کرکے بڑے جوش و جذبے سے ملاتے ہیں)

نواں منظر

رات کا وقت۔ طاہر کا گھر۔

لونگ روم میں اسجد بیٹھا پڑھ رہا ہے۔ ثانیہ کھیل رہی ہے اور فرخندہ گھر کا کوئی کام کر رہی ہے۔

فرخندہ: (بلند آواز سے) احمر! کدھر رہ گۓ ہو آجاؤ آکر تم بھی سکول کا کام کر لو۔

(احمر اندر آتا ہے)

احمر: (فرخندہ کے پاس آکر سینہ تان کر) ماما! میں ہوم ورک نہیں کروں گا۔

فرخندہ: تو ابھی پڑھائی کر لو ہوم ورک کچھ دیر بعد کر لینا۔

احمر: نہیں میں کچھ دیر بعد بھی نہیں کروں گا۔

فرخندہ: کیا مطلب کچھ دیر بعد بھی نہیں کرو گے؟

احمر: میں آئندہ ہوم ورک کبھی نہیں کروں گا۔

فرخندہ: تو وہ کون کرے گا، تمہارے پاپا۔

احمر: میں سکول میں بھی بات کروں گا اور اگر ہم بچوں کو ہوم ورک دینا بند نہ کیا گیا تو ہم اختجاج کریں۔

(اسجد اس کی بات سن کر مسکراتا ہے)

فرخندہ: دماغ تو ٹھیک ہے تمہارا کیسی باتیں کر رہے ہو۔

اسجد: ماما لگتا ہے اس نے آج کوئی فلم دیکھی ہے اسی لیۓ ایسی حرکتیں کر رہا ہے۔

احمر: (اسجد سے) تم چپ رہو تمہیں بیچ میں بولنے کے لیۓ کس نے کہا ہے۔

فرخندہ: تمیز سے بات کرو بھائی ساتھ۔۔۔ چپ چاپ آکر بیٹھ کر کام کرو میرے پاس تمہاری فالتو باتوں کے لیۓ وقت نہیں ہے۔

احمر: میں نے کہہ جو دیا میں ہوم ورک نہیں کروں گا۔

فرخندہ: احمر مجھے غصہ مت دلاؤ مجھے ابھی بہت سے کام ہیں میرا موڈ پہلے ہی ٹھیک نہیں یہ نہ ہو ساری کسر تم پر نکل جاۓ۔ خاموشی سے بیٹھ کر کام کرو فضول باتیں نہ کرو۔

احمر: نہیں کروں گا میں نے کہا نا نہیں کروں گا۔

(تھپڑ مارنے کے لیۓ ہاتھ فضا میں بلند کرتی ہے)

فرخندہ: (چلا کر) احمر!

دسواں منظر

شام سے کچھ دیر پہلے۔ طاہر کا گھر۔

احمر اور ٹیپو گھر کی چھت پر منڈیر کی دیوار کے ساتھ ٹیک لگاۓ بیٹھے ہیں۔ دونوں کے منہ لٹکے ہوۓ ہیں اور دونوں افسردہ دکھائی دے رہے ہیں۔ احمر ایک ہاتھ سے اپنا گال سہلا رہا ہے۔

احمر: کیا بتاؤں یار جتنا جوش و جذبہ پیدا ہوا تھا ماما نے سارا ایک جھٹکے میں ختم کر دیا۔ ابھی تک میرا گال درد کر رہا ہے۔ صبح تک تو انگلیوں کے نشان بھی تھے سکول میں ہر کوئی پوچھ رہا تھا گال پہ کیا ہوا گال پہ کیا ہوا۔

ٹیپو: تمہیں تو صرف مار پڑی ہے مجھے تو ماما نے کھانا بھی نہیں دیا اور آدھی رات تک جگاۓ بھی رکھا بولا جب تک ہوم ورک مکمل نہیں کرو گے تمہیں سونے نہیں دوں گی۔

احمر: سچ کہتے ہیں جو بھی حق کے لیۓ آواز اٹھاتا ہے اس کا یہی حشر ہوتا ہے۔ اس کی آواز کو اسی طرح دبا دیا جاتا ہے۔

ٹیپو: ہاں وہ تو ہے۔۔۔ (جوش سے اٹھتے ہوۓ) لیکن ہم ہار نہیں مانیں گے اب ہم سکول میں اختجاج کریں گے۔

احمر: سکول میں ایسا کریں گے تو ڈبل مار کرے گی گھر سے بھی اور سکول سے بھی۔

ٹیپو: (دوبارہ بیٹھتے ہوۓ) مار تو سچ میں ڈبل پڑے گی۔۔۔

احمر: (گال پر ہاتھ رکھ کر) میرا تو ابھی تک گال درد کر رہا ہے۔

(دونوں دوبارہ منہ لٹکا کر بیٹھ جاتے ہیں)

گیارواں منظر

دن کا وقت۔ سڑک۔

اسجد موٹرسائیکل پر اپنے دوست شاہزیب کے ساتھ چلا آرہا ہے۔ سڑک سے اتر کر کچے پر موٹر سائیکل روکتا ہے۔ دونوں اترتے ہیں۔ اسجد وہیں موٹرسائیکل کے ساتھ ٹیک لگا کر کھڑا ہو جاتا ہے۔ اس کا رخ سڑک کی مخالف سمت ہے۔ جبکہ شاہزیب چند قدم چل کر ایک کھوکھے سے سگریٹ خریدتا ہے۔ سڑک بالکل سنسان ہے اور پورے ایریا میں دور دور تک صرف اس دکان کے اور کوئی دکان اور کوئی عمارت دکھائی نہیں دے رہی۔ سڑک کے دونوں اطراف وسیع میدان ہیں۔ اس کا دوست ایک سگریٹ سلگا لیتا ہے اور واپس آکر ایک سگریٹ اسجد کو دیتا ہے۔ دونوں کھڑے ہو کر سگریٹ پینے لگتے ہیں۔

شاہزیب: پھر کیا سوچا ہے؟

اسجد: نہیں یار ابھی ٹرپ کا پلان مت بناؤ۔ بڑی مشکل سے تو پارٹی کی اجازت ملی تھی ٹرپ کی کسی بھی صورت نہیں ملے گی۔

شاہزیب: آسانی سے تو مجھے بھی نہیں ملے گی مگر کوئی نہ کوئی جگاڑ لگا لیں گے۔

اسجد: ان دنوں کوئی جگاڑ نہیں لگے گا۔ میری مان تو ابھی اس خیال کو جانے دو ایگزیمز کے بعد دیکھیں گے۔ ابھی بات کی تو یہ نہ ہو باہر نکلنا بھی بند ہو جاۓ۔

شاہزیب: بات تو تمہاری ٹھیک ہے پر یار اتنا عرصہ ہو گیا ہے کہیں نہیں گۓ ایک ٹوؤور تو بنتا ہے۔

اسجد: بنتا تو ہے مگر تم غلط وقت پر پلان بنا رہے ہو۔ صبر کر لو دو تین مہینے کی تو بات ہے پیپروں کے بعد چلیں گے۔

شاہزیب: لیکن یار اسجد۔۔۔ (سامنے سڑک پر کچھ دیکھ کر) یہ کہاں سے آگۓ۔۔۔اسجد بھاگو۔۔۔سگریٹ پھینکو اور بھاگو۔۔۔ پیچھے مت دیکھنا بس بھاگو۔

(خود بھی سگریٹ پھینک کر بھاگ کھڑا ہوتا ہے)

اسجد: (خیرت سے) کیا ہوا؟

شاہزیب: (بھاگتے ہوۓ) میرے پیچھےآؤ جلدی۔۔۔ بھاگو اور پیچھے بالکل مت دیکھنا۔

(اسجد بھی اس کے پیچھے بھاگنا شروع کر دیتا ہے۔ بھاگتے بھاگتے دونوں دکان کے عقب میں کسی جگہ رک جاتے ہیں چھپ کر سڑک کی جانب دیکھتے ہیں)

اسجد: (ہانپتے ہوۓ) کچھ بتاؤ گے ہوا کیا ہے؟

شاہزیب: (سانس بحال کرکے) وہ ہوا ہے جو نہیں ہونا چاہیۓ تھا۔ تمہارے چاچو ادھر سے گزر کر گۓ ہیں اور مجھے لگتا ہے انہوں نے ہمیں سگریٹ پیتے ہوۓ دیکھ لیا ہے۔

اسجد: کیا بکواس کر رہے ہو وہ یہاں کیسے آگۓ؟

شاہزیب: وہ بھی سگریٹ پینے آۓ ہوں گے۔۔۔ عجیب آدمی ہو ہم مریخ پہ تو نہیں آۓ کہ یہاں کوئی نہیں آسکتا۔ ظاہر ہے کسی کام سے ہی آۓ ہوں گے۔

اسجد: پکی بات ہے وہی تھے؟

شاہزیب: ہاں یار پکی بات ہے وہی تھے میں نے انہیں دیکھا ہے اور ان کے موٹرسائیکل کی بھی مجھے پہچان ہے۔

اسجد: انہوں نے ہمیں دیکھا ہے؟

شاہزیب: پتہ نہیں شاید دیکھ لیا ہو۔

اسجد: یار اب کیا کریں گے اگر انہوں نے دیکھ لیا ہوا تو۔۔۔

شاہزیب: تو پھر ہم نے کیا کرنا ہے پھر تو جو کرنا ہے انہوں نے کرنا ہے۔ آج تو پکا ہم دونوں گھر سے باہر سونے والے ہیں۔ بس ایک بات یاد رکھنا جب وہ گھر سے نکالیں تو کسی طرح ایک موٹی سی چادر یا کھیس وغیرہ نکال لانا بڑی سردی ہے اس کے بغیر رات نہیں کٹے گی۔

اسجد: بکواس نہیں کرو۔ کچھ سوچو۔

شاہزیب: میں کیا سوچوں اگر انہوں نے دیکھ لیا ہے تو پھر سوچنے کو کیا رہ جاتا ہے۔

اسجد: (چند لمحے خاموش رہنے کے بعد) ویسے مجھے لگتا ہے انہوں نے ہمیں نہیں دیکھا ہو گا اور اگر دیکھ بھی لیا ہو گا تو ہمارے ہاتھ میں سگریٹ نہیں دیکھا ہو گا۔ ورنہ وہ رکتے ضرور۔

شاہزیب: بس یہی ایک بات ہے جو ہمارے حق میں جارہی ہے۔ کیا پتہ انہوں نے ہمیں واقعی نہ دیکھا ہو۔

اسجد: وہ تمہارے موٹرسائیکل کو تو نہیں پہچانتے؟

شاہزیب: پتہ نہیں۔ شاید پہچانتے ہوں۔

اسجد: (کچھ دیر خاموش رہنے کے بعد) پھر اب؟

شاہزیب: پھر اب گھر چلتے ہیں اور جاکر دیکھتے ہیں کیا سین ہے۔

(دونوں واپس اپنے موٹرسائیکل کی طرف جاتے ہیں)

اسجد: (چلتے ہوۓ) یار ابھی گھر نہیں جاتے کچھ دیر بعد چلتے ہیں ابھی بالکل بھی ہمت نہیں ہو رہی۔

شاہزیب: کچھ دیر بعد جانے سے کیا ہو گا جانا تو پھر بھی پڑے گا بہتر ہے ابھی چلتے ہیں جو ہونا ہے اسی وقت ہو جاۓ۔

اسجد: یار کبھی چاچو ماما کو نہ نہ بتائیں کیونکہ ماما اتنی سی بات کو کہاں سے کہاں تک پہنچا دیں گی۔ وہ تو کہیں گی پتہ نہیں یہ باہر اور کیا کیا گل کھلاتا ہے ضرور یہ چرس، شراب بھی پیتا ہو گا اسی لیۓ اس کا پڑھائی میں دل نہیں لگتا۔ پتہ نہیں یہ اور کون کون سے نشے کرتا ہے۔ وہ تو مجھے پورا نشئی بنا دیں گی۔

شاہزیب: ہاں یہ تو ہے میرے بھی پاپا تک بات رہے تو ٹھیک ہے پاپا تو صرف ڈانٹیں گے لیکن ماما!۔۔۔ ماما تک بات گئ تو بہت دور تک جاۓ گی۔

(دونوں چلتے ہوۓ موٹرسائیکل تک پہنچ جاتے ہیں)

اسجد: چل میں سگریٹ کے پیسے دے کر آتا ہوں تو موٹرسائیکل سٹارٹ کر)

بارہواں منظر

شام کا وقت۔ طاہر کا گھر۔

اسجد اور اس کا دوست موٹرسائیکل پر گھر کے دروازے کے باہر آکر رکتے ہیں۔ اسجد اترتا ہے۔

شاہزیب: نارمل رہنا بالکل ایسا نہ لگے کہ تم کسی بات سے گھبرا رہے ہو کیونکہ ہو سکتا ہے انہوں نے ہمیں نہ دیکھا ہو خوامخواہ انہیں شک ہو جاۓ گا۔ اور کچھ بھی ہو مجھے فون کرکے بتا دینا۔

اسجد: اچھا۔

شاہزیب: ٹھیک ہے میں چلتا ہوں۔

(چلا جاتا ہے۔ اسجد ڈرتے ڈرتے آگے بڑھتا ہے گھنٹی پر ہاتھ رکھتا ہے مگر گھنٹی بجاۓ بغیر اٹھا لیتا ہے۔ دوبارہ ہمت کرکے ہاتھ رکھتا ہے ابھی بجانے لگتا ہے تبھی اس کے پیچھے ایک موٹرسائیکل آکر رکتا ہے۔ موٹرسائیکل پر شاہد ہے۔ اسجد اسے دیکھ کر گبھرا جاتا ہے۔ وہ ڈرے ہوۓ انداز میں کچھ بولنے لگتا ہے مگر اس سے پہلے شاہد اس کے آگے ایک بڑا سا ڈاک کا لفافہ کر دیتا ہے)

شاہد: اسجد یہ پیکٹ لے جاؤ اور پاپا کو دے دینا کہنا دو ملے ہیں تیسرا ابھی نہیں ملا۔

(اسجد گم سم کھڑا رہتا ہے جیسے اس نے اس کی آواز سنی ہی نہیں)

شاہد: (بلند آواز سے) اسجد۔۔۔! (اسجد چونکتا ہے) کیا سوچ رہے ہو؟

اسجد: (سنبھل کر) وہ۔۔۔کچھ نہیں میں بس ایسے ہی۔۔۔آپ اندر نہیں آئیں گے؟

شاہد: نہیں مجھے کام ہے میں ابھی جارہا ہوں۔ تم یہ پاپا کو یاد سے دے دینا۔

اسجد: ٹھیک ہے دے دوں گا۔

(شاہد چلا جاتا ہے۔ اسجد اسے جاتا ہے ہوا دیکھتا ہے۔ جب وہ آنکھ سے اوجھل ہو جاتا ہے تو اسجد گہرا سانس لیتا ہے۔ اک نظر ہاتھ میں پکڑے پیکٹ پر ڈالتا ہے اور مسکرا اٹھتا ہے۔ پھر خوشی سے چھلانگ لگاتا ہے اور دروازے کی گھنٹی بجا دیتا ہے)

تیرہواں منظر

رات کا وقت۔ طاہر کا گھر۔

اسجد اپنے کمرے میں بیٹھا فون پر شاہزیب سے بات کر رہا ہے۔

اسجد: بس پھر انہوں نے پیکٹ دیا اور چلے گۓ۔

شاہزیب: کوئی ایک لفظ بھی نہیں بولا۔

اسجد: نہیں کچھ بھی نہیں کہا۔

شاہزیب: اس کا مطلب ہے انہوں نے ہمیں نہیں دیکھا۔

اسجد: ہاں۔

شاہزیب: چلو شکر ہے بچ گۓ۔ پر ہمیں جگہ بدل لینی چاہیۓ آج تو بچت ہو گئ یہ نہ ہو کل کو پکڑے جائیں۔

اسجد: میں بھی یہی سوچ رہا تھا۔ سڑک پر کھڑے ہو کر پینے کی بجاۓ اب ہم دکان کے پیچھے جا کر پیئیں گے۔

(باہر سے فرخندہ کے چلانے کی آواز آتی ہے)

فرخندہ: اسجد۔۔۔اسجد

اسجد: جی ماما! میں یہاں ہوں کمرے میں!

فرخندہ: جلدی ادھر آؤ۔۔۔ یہ تمہاری جیب میں سگریٹ کہاں سے آیا؟

اسجد: کیا۔۔۔کون سا سگریٹ؟

شاہزیب: اوہ خدایا! ایک سگریٹ اس وقت میں نے تمہاری جیب میں ڈالا تھا سوچا تھا جانے سے پہلے پی کر جائیں گے پر اس ہڑبڑی میں نکالنا بھول گیا۔

اسجد: کیا۔۔۔ کیا بکواس کر رہے ہو؟

(فرخندہ غصے سے دروازہ کھول کر اندر آتی ہے اس کے ہاتھ میں سگریٹ ہے)

چودھواں منظر

رات کا وقت۔ طاہر کا گھر۔

کمرے میں فرخندہ الماری سے کپڑے نکال کر بیگ میں رکھ رہی ہے۔ طاہر ایک طرف بیٹھا موبائل استعمال کر رہا ہے۔

طاہر: یہ اتنے سارے کپڑے کیوں رکھ رہی ہو تم نے کیا پورا سال رہنا ہے؟

فرخندہ: (کام کرتے ہوۓ) پورا سال بے شک نہیں رہنا پر ایک ہفتہ تو ضرور رہوں گی اس سے پہلے میں آنے والی نہیں۔

طاہر: اچھا ٹھیک ہے ہفتہ رہ لینا پر ابھی سے سامان کیوں پیک کر رہی ہو۔ ابھی کل تو امی آئیں گی۔

فرخندہ: ہاں تو کل دن کے وقت امی آ جائیں گی اور شام کو میں چلی جاؤں گی۔

طاہر: اتنی بھی کیا جلدی ہے ایک دو دن بعد جانا۔

فرخندہ: نہیں مشکل سے میں نے ایک ہفتہ انتظار کیا ہے اب اور نہیں رکوں گی۔ پیچھے سے سنبھالنا گھر اور بچوں کو آپ کو بھی پتہ چلے بچے کیا کر رہے ہیں۔ کسی کو پڑھائی سے تکلیف ہے اور کسی کی جیب سے سگریٹ نکل رہے ہیں پر آپ کو کیا پرواہ آپ تو اپنی دنیا میں مگن ہیں۔

طاہر: اچھا ٹھیک ہے چلی جانا پر جاؤ گی کیسے؟

فرخندہ: آپ چھوڑ آنا کل چھٹی ہے نا آپ کو؟

طاہر: میں تو نہیں جانے والا۔ دفتر سے چھٹی ہے لیکن مجھے اور بھی بڑے کام ہیں۔

فرخندہ: پوچھا تو آپ نے ایسے تھا جیسے آپ کو بڑی فکر ہے۔ خود چلی جاؤں گی میں آپ کو فکر کرنے کی ضرورت نہیں۔

طاہر: (ہلکا سا ہنس کر) اچھا چلو خود نہ جانا اسجد کو بولوں گا وہ تمہیں چھوڑ آۓ گا۔

فرخندہ: وہ تو پھر مجھے چھوڑ ہی آۓ گا آپ کو مشورہ دینے کی ضرورت نہیں۔

(باہر نکل جاتی ہے۔ طاہر ہنستا ہے اور دوبارہ موبائل دیکھنا شروع کر دیتا ہے)

پندرھواں منظر

دن کا وقت۔ طاہر کا گھر۔

فرخندہ آئینے کے سامنے کھڑی تیار ہو رہی ہے۔

فرخندہ: (کانٹا پہنتے ہوۓ) احمر! ثانیہ کو لے کر آؤ بولو ماما بلا رہی ہیں۔ میں اسے بھی تیار کر دوں۔

(طاہر اندر آتا ہے اس کے ہاتھ میں اخبار ہے جسے وہ فولڈ کرتا ہوا آتا ہے)

طاہر: (فرخندہ کو دیکھ کر خیرت سے) یہ کیا تم تو تیار بھی ہو گئ پر امی تو ابھی آئیں نہیں۔

فرخندہ: (لپ سٹک لگاتے ہوۓ) تو کیا! بس آنے والی ہوں گی۔ وہ آجائیں گی تو ہم تھوڑی دیر بعد چلے جائیں گے۔

طاہر: (چل کر صوفے پر بیٹھ کر) تمہیں تو یوں جانے کی پڑی ہے جیسے ہمیشہ کے لیۓ جا رہی ہو۔

فرخندہ: ہاۓ! کاش جا سکتی۔ مگر کیا کروں زندگی بھر کے لیۓ نصیب آپ کے ساتھ جو جڑ گۓ ہیں۔

طاہر: لگتا ہے تمہیں کافی افسوس ہے اس بات کا۔

فرخندہ: (شرارت سے) جی! بہت سی باتوں پر انسان سواۓ افسوس کے اور کیا کر سکتا ہے۔

(فون کی گھنٹی بجتی ہے)

فرخندہ: اسجد دیکھو کس کا فون ہے۔

(اسجد فون اٹھاتا ہے)

اسجد: ہیلو۔۔۔جی دادو۔۔۔جی۔۔۔اچھا ٹھیک ہے۔۔۔بتا دوں گا۔۔۔ جی ہاں ٹھیک ہے۔۔۔خدا خافیظ۔

(فون رکھ دیتا ہے)

اسجد: ماما دادو کا فون تھا وہ کہہ رہی تھیں دو تین تک کسی ہڑتال کی وجہ سے گاڑیاں بند ہیں۔ اس لیۓ وہ نہیں آسکتیں۔

(فرخندہ تیزی سے مڑ کر اسجد کو دیکھتی ہے، پھر طاہر کو دیکھتی ہے۔ چند لمحے خاموشی رہتی ہے)

طاہر: (کندھے اچکا کر، شرارت سے) بہت سی باتوں پر انسان سواۓ افسوس کے اور کیا کر سکتا ہے۔

ہمسفر

2023-12-18T23:53:00.001+05:00

موسلادار بارش ہو رہی تھی۔ سڑک پر ٹریفک رواں تھی۔ ایک خوبصورت لڑکی ہاتھ میں چھتری تھامے سڑک کے کنارےچلی جا رہی تھی۔ تیز ہوا کے باعث بار بار اس کے ہاتھ سے چھتری اڑنے لگتی جسے وہ بڑی مشکل سے قابو کرتی۔ کچھ دور جا کر لڑکی کے دل کی سمت یعنی اس کے بائیں جانب اک موڑ آیا جہاں سے ایک لڑکا بارش میں بھیگتا ہوا تیز تیز قدم اٹھاتا ہوا چلا آرہا تھا۔ موڑ پر پہنچ کر لڑکی لڑکا دونوں رک گۓ دونوں ایک دوسرے کو دیکھ کر مسکراۓ۔ یکدم تیز ہوا کا جھونکا آیا جس سے لڑکی کی چھتری اڑ کر اس کے ہاتھ سے نکلنے لگی۔ اس سے پہلے چھتری اس کے ہاتھ سے نکلتی لڑکا فوراً آگے بڑھا اور چھتری کو مضبوطی سے تھام لیا۔ لڑکی نے اس کا دوسرا ہاتھ اپنے ہاتھ میں لیا اور دونوں ایک چھتری تلے سیدھی سڑک پر چلنے لگے۔

دیدۂ بینا

2023-11-07T15:22:00.006+05:00

کردار

ایم زیڈ راشد= پچاس پچپن سال کا آدمی۔ سائنسدان

یونس= راشد کا دوست۔

چند نوجوان لڑکے لڑکیاں۔

پہلا منظر

دن کا وقت۔ سائنس لیب۔

ایک کمرے کے اوپر ایک تختی دکھائی دیتی ہے جس پر سائنس لیب لکھا ہوا ہے اور اس کے بالکل نیچے ایم۔زیڈ راشد لکھا ہوا ہے۔ اس کے بعد لیب کے اندر کا منظر دکھائی دیتا ہے۔

سائنس کی ایک تجربہ گاہ میں راشد سفید رنگ کا اوورکوٹ پہنے کسی تجربہ میں مصروف ہے۔ اس کے اردگرد بے شمار صراحیاں، بیکرز، پیمائس کے لیۓ پیمانے، گیلوانو میٹر اور چند دوسرے سائنسی آلات پڑے ہیں۔ وہ ایک تار کسی آلے پر لگاتا ہے جس سے کرنٹ پیدا ہوتی ہے۔ ایک میٹر پر سے کوئی پیمائش نوٹ کرتا ہے اور اسے لکھ لیتا ہے۔ اسی طرح مختلف طریقوں سے دو تین پیمائشیں نوٹ کرنے کے بعد اسے لکھتا جاتا ہے۔ کچھ دیر بعد دروازے پر دستک ہوتی ہے۔

راشد: ( اس طرف دیکھے بغیر) یس کم ان۔

(دو لڑکیاں اندر آتی ہیں۔)

لڑکیاں : اسلام علیکم راشد صاحب۔

راشد: (ان کی طرف دیکھے بغیر) وعلیکم سلام۔

پہلی لڑکی: سر ہم ڈیلی سائنس میگزین کی طرف سے آپ کا انٹرویو لینے آئیں ہیں۔ آپ سے فون پر بات ہوئی تھی۔

راشد: (ہاتھ کے ہلکے سے اشارے سے ان کی طرف دیکھے بغیر) جی۔ آپ تشریف رکھیں میں بس ایک دو پیمائشیں نوٹ کر لوں۔

(لڑکیاں کرسیوں پر بیٹھ جاتی ہیں۔)

راشد: (سر اوپر اٹھا کر انہیں دیکھ کر) بلکہ میرا خیال ہے میں اسی طرح کام کرتے ہوۓ آپ سے بات کروں تو زیادہ بہتر رہے گا۔ آپ کو کوئی دقت تو نہیں؟

پہلی لڑکی: نہیں کوئی دقت نہیں۔

راشد: تو پھر ٹھیک ہے پوچھیں آپ نے جو بھی پوچھنا ہے۔

دوسری لڑکی: راشد صاحب! ہم سب سے پہلے آپ سے آپ کے اس آرٹیکل کے بارے میں بات کرنا چاہتے ہیں جو پچھلے ہفتے ایک سائنسی میگزین میں چھپا تھا۔

راشد: جی۔

دوسری لڑکی: (جاری رکھتے ہوۓ) آپ نے اس آرٹیکل میں سائنس اور مذہب کے حوالے سے ایک بات کہی تھی کہ سائنس اور مذہب دراصل ایک ہی ہیں۔ جیسے ایک سکے کے دو پہلو۔۔۔ یہ بات آپ کیسے کہہ سکتے ہیں؟ آپ نے اس بات کی نہ تو کوئی وضاحت فرمائی اور نہ اس کی کوئی دلیل دی بس سرسری سا تذکرہ کرکے آگے گزر گۓ۔

راشد: وہ اس لیۓ کہ اگر آپ نے میرا آرٹیکل دھیان سے پڑھا ہے تو آپ کو معلوم ہو گیا ہو گا کہ اس آرٹیکل کا موضوع یہ نہیں تھا وہ بات تو ایسے ہی ضمناً بیچ میں آگئ تھی۔

پہلی لڑکی: تو اب آپ اس پر کچھ روشنی ڈالیں گے؟

راشد: دیکھیئے میں نے کوئی ایسی انوکھی بات نہیں کی اور نہ ہی میں مذاہب کے بارے میں زیادہ جانتا ہوں۔ میرا خیال تو بس اتنا ہے کہ اگر آپ الہامی لٹریچر یا جسے آپ آسمانی لٹریچر کہہ لیں کا مطالعہ کریں تو ایک بات آپ کو بڑی واضح اور نمایاں نظر آتی ہے۔ وہ یہ کہ اس کائنات کا ایک خالق ہے۔ جسے خدا یا گاڈ یا جو کچھ بھی آپ نام دے لیں۔ دنیا کے تمام مذاہب اسی ایک بات پر کھڑے ہیں، سب الہامی کتابوں کا زور اسی بات پر ہے کہ اس کائنات میں جو کچھ بھی ہے انسان سمیت، سب کو ایک عظیم ذات نے بنایا ہے۔ آپ یوں کہہ سکتی ہیں کہ تمام آسمانی کتابیں اور مذاہب اس بات کی آگاہی کے لیۓ بنے ہیں کہ اس کائنات کا کوئی ایک پیدا کرنے والا ہے۔ رہی سائنس کی بات تو سائنس دارصل اس خالق کی بنائی ہوئی کائنات کو دریافت کرنے، اس کا مطالعہ اور اس کا مشاہدہ کرنے کا نام ہے۔ مذہب ہمیں یہ بتاتا ہے کہ اس کائنات کو ایک خدا نے پیدا کیا ہے اور سائنس یہ بتاتی ہے اس ایک خدا کی بنائی ہوئی کائنات کیسے چلتی ہے یا چل رہی ہے، اس میں کون سے قوانین کارفرما ہیں، اس میں کتنی مخلوقات ہیں۔ یعنی یوں کہہ لو کہ مذہب جہاں ہمیں یہ بتاتا ہے کہ کائنات خدا نے بنائی ہے تو دوسری طرف سائنس یہ بتاتی ہے کہ یہ کائنات خدا نے کیسے بنائی ہے اور وہ کیسے سفر کر رہی ہے۔ تو کیا یہ ایک ہی بات نہیں؟ اس لحاظ سے دیکھیں تو سائنس ایک بہت بڑی عبادت ہے جو خالقِ کائنات کے بارے میں مزید آگاہی فراہم کرتی ہے۔

دوسری لڑکی: لیکن راشد صاحب کچھ سائنس دان تو خدا کے وجود سے ہی انکاری ہیں اور آپ کہہ رہے ہیں سائنس اور مذہب ایک ہی چیز ہے یہ تو عجیب بات ہو گئ۔

(کام چھوڑ کر تھوڑا پیچھے ہٹتا ہے اور ایک بڑے سے میز سے ٹیک لگا کر کھڑا ہو جاتا ہے)

راشد: ان کی عقل پر صرف ماتم کیا جاسکتا ہے۔ اچھا آپ ایک بات بتائیں۔۔۔کیا نام بتایا آپ نے؟

دوسری لڑکی: ماہم۔

راشد: (پہلی لڑکی کی طرف اشارا کرکے) اور آپ کا؟

پہلی لڑکی: عظمیٰ۔

راشد: جی عظمیٰ اور ماہم آپ یہ بتائیں آپ نے کبھی خود رو جڑی بوٹی یا خود رو گھاس دیکھی ہے؟۔۔۔ جو کسی پلاٹ یا لان میں خود بخود اگتی ہے۔

دونوں لڑکیاں: جی۔۔۔ دیکھی ہے۔

راشد: وہ جڑی بوٹی دیکھنے میں کتنی بدصورت لگتی ہے، بے ہنگم سی، کچھ ادھر جارہی ہے کچھ ادھر، کوئی چھوٹی ہے کوئی بڑی۔ دیکھنے سے ہی پتہ چل جاتا ہے کہ یہ خود بخود اگی ہے۔ لیکن اگر کوئی مالی یا کوئی اور آدمی اسے تراشے خراشے اور ایک ڈیزائن دے دے تو وہی گھاس کتنی پیاری لگنے لگتی ہے۔ سرسری سی نظر ڈالنے سے ہی معلوم ہو جاتا ہے کہ اسے کسی نے تراش خراش کر ایسا بنایا ہے۔ ایسا ہی ہے؟

پہلی لڑکی: بالکل ایسا ہی ہے۔

راشد: تو کیا یہ نہیں لگتا کہ اس کائنات کو بھی کسی نے تراشا خراشا ہے اور اسے ایک ڈیزائن دیا ہے؟ ورنہ اگر یہ خود رو جڑی بوٹیوں کی طرح خود بخود اگتی تو کتنی غیرمنظم، بے ہنگم اور بدصورت ہوتی۔ لیکن ایسا تو نہیں۔ صرف اک اچٹتی سی نگاہ ڈالنے سے اور ظاہری مشاہدے سے یہ بات واضح ہو جاتی ہے کہ اتنا عظیم اور پیچیدہ ڈیزائین خود بخود تو تیار نہیں ہو سکتا۔ اس کے پیچھے لازماً کوئی ڈیزائینر ہے۔۔۔ جو لوگ مذہب کو اور اس کے بتاۓ ہوۓ خدا کو نہیں مانتے وہ بے شک نہ مانیں مگر وہ اس بات کو کیسے ثابت کر سکتے ہیں کہ یہ عظیم ڈیزائن کسی عظیم قوت کے بغیر وجود میں آگیا؟ میری تو عقل اس کو تسلیم نہیں کرتی۔ کیونکہ اس بات کو ثابت کرنا مشکل نہیں کہ اس کے پیچھے کوئی بڑا دماغ ہے یہ تو کائنات کے سرسری سے مشاہدہ سے ہی ظاہر ہو رہا ہے چاہے آپ سائنس دان کی طرح چیزوں کے اندر اتر کر نہ بھی دیکھیں۔ بلکہ اس کے برعکس اس بات کو ثابت کرنا مشکل ہے کہ یہ عظیم ڈیزائین بغیر کسی بڑی قوت اور انٹلیکٹ کے ازخود تیار ہو گیا ہے۔ ایک سائنس دان کی خیثیت سے میں جب اس کائنات پر غور کرتا ہوں اور چیزوں کے اندر اتر کر دیکھتا ہوں تو میرا ایمان تو اور بھی پختہ ہو جاتا ہے کہ یقیناً اس کا کوئی خالق ہے۔ سائنس دان کی طرح گہرائی میں جاکر دیکھنا تو دور کی بات میں تو محض ظاہری آنکھ سے طلوعِ آفتاب اور طلوعِ غروب کے مناظر کا مشاہدہ کرکے دنگ رہ جاتا ہوں۔ میں تو صرف رات کی گود میں سے صبح بیدار ہوتی دیکھتا ہوں تو خیرت میں مبتلا ہوجاتا ہوں۔۔۔ شاعر نے اسی لیۓ تو کہا تھا،

ہم ایسے اہلِ نظر کو ثبوتِ حق کے لیۓ

اگر رسول نہ ہوتے تو صبح کافی تھی

دوسرا منظر

شام کا وقت۔

آسمان پر سورج غروب ہو رہا ہے اور شفق کی لالی پھیلی ہے۔ کہیں کہیں بادلوں کے ٹکڑے ہیں جو آتشی غلابی یا سرخی مائل دکھائی دیتے ہیں۔ راشد اپنے لان میں کھڑا بڑے انہماک سے یہ منظر دیکھ رہا ہے۔ اس کا دوست یونس آتا ہے۔ یونس اسے یوں اوپر دیکھتے ہوۓ دیکھ کر مسکراتا ہے۔

یونس: (کرسی پر بیٹھتے ہوۓ) اوپر کوئی خاص چیز ہے؟

راشد: (چونک کر) یونس۔۔۔! اچھا کیا آگۓ، آؤ بیٹھو۔

یونس: میں تو بیٹھ گیا ہوں تم بتاؤ تم اوپر کیا تلاش کر رہے تھے؟

راشد: کچھ بھی نہیں۔ بس مصور کی کاریگری کو دیکھ رہا تھا۔

یونس: (خیرت سے) مصور۔۔۔! کون سا مصور؟

راشد: (انگلی سے اوپر اشارہ کرتا ہے) وہ مصور۔۔۔ (کرسی پر بیٹھ کر) خیر چھوڑو تم بتاؤ کیسے آنا ہوا؟

یونس: بس ایسے ہی یہاں سے گزر رہا تھا تو سوچا تم سے ملتا چلوں۔

راشد: اچھا کیا۔

یونس: اور تم سناؤ خیریت ہے، آج اپنی لیب میں نہیں ہو؟

راشد: لیب میں ہی تھا ابھی آیا ہوں سوچا تھوڑا نیچر کا مشاہدہ کر لوں۔

یونس: نیچر کا مشاہدہ بے شک کرتے رہو مگر ایک سائنس دان کو انسانیت کی فلاحی و بہبود کے لیۓ بھی کچھ کرنا چاہیۓ۔

راشد: تم کہنا کیا چاہتے ہو؟

یونس: وہی جو تم سمجھے ہو۔

راشد: تو تمہیں کیا لگتا ہے سائنس نے یا سائنس دانوں نے انسانیت کی فلاحی و بہبود کے لیۓ کچھ نہیں کیا؟ ایک سائنسدان عیش و آرام تج کر اور دولت اور پیسے کے پیچھے بھاگنے کی بجاۓ تحقیق کرتا ہے، مراقبہ کرتا ہے، دھیان لگاتا ہے، تجربات کرتا ہے۔ اس کی اس ریاضت کے بدلے میں اسے جو بھی علم حاصل ہوتا ہے، جو بھی معلومات ملتی ہیں وہ اسے اپنی ذات تک محدود نہیں رکھتا بلکہ ساری انسانیت اس سے فائدہ اٹھاتی ہے۔ صدیوں پہلے کی گئ دریافتوں سے بھی آج تک لوگ فائدہ اٹھا رہے ہیں۔ چلو یہ تو رہا اس کا روحانی یا فکری فائدہ اس کے علاوہ ایجادات کی بدولت جو مادی اور معاشی فوائد لوگوں کو حاصل ہوۓ ہیں وہ کوئی ڈھکے چھپے تو نہیں۔

یونس: لیکن بہت سی ایجادات نے نقصان بھی تو پہنچایا ہے؟

راشد: ہاں ٹھیک ہے بہت سی غیرضروری ایجادات کی بھرمار نے اور کچھ انسانیت کش ایجادات نے تباہی بھی پھیلائی ہے اور نقصان بھی پہنچایا ہے بلکہ پہنچا رہی ہیں مگر مجموعی طور پر تو سائنس نے لوگوں کا بھلا ہی کیا ہے۔ یقیناً کچھ قوموں اور ملکوں نے اپنے مادی اور معاشی مفادات کے لیۓ سائنس اور علم کو ایک ہتھیار کے طور استعمال کیا ہے۔ لیکن اس میں سائنس کا کیا قصور؟۔۔۔ سائنس تو بیک وقت عبادت بھی ہے اور خدمت بھی۔ کوئی سیاسی تحریک اتنا بڑا انقلاب نہیں لا سکی جتنا سائنس نے دنیا کو تبدیل کیا ہے۔ سائنس نے نہ صرف انسانی فکر میں انقلاب برپا کیا ہے بلکہ انسان کی عملی زندگی کو بھی تبدیل کرکے رکھ دیا ہے۔ اس نے انسان کے تمام فرسودہ نظریات، افکار اور اعتقادات کو یکسر بدل دیا ہے۔

یونس: اچھا چھوڑو یار میں اس وقت اس بحث کے موڈ میں نہیں ہوں۔

راشد: تو ٹھیک ہے چھوڑ دیتے ہیں۔۔۔ چاۓ پیو گے؟

یونس: ہاں ضرور پیوں گا۔ آیا ہوں تو چاۓ تو پی کر جاؤں گا۔

یونس: (اٹھتے ہوۓ) ٹھیک ہے میں چاۓ کا بول کر آتا ہوں۔

(راشد چلا جاتا ہے اور یونس اوپر آسمان کی طرف دیکھنے لگتا ہے جہاں تھوڑی دیر پہلے راشد دیکھ رہا تھا۔)

تیسرا منظر

دن کا وقت۔ لیب

راشد اپنی لیب میں کھڑا کام کر رہا ہے۔ چند نوجوان لڑکے لڑکیاں اندر آتے ہیں۔

سب ایک ساتھ: اسلام علیکم سر۔

راشد: وعلیکم سلام۔

ایک لڑکی: سر ہم یونیورسٹی آف سائنس اینڈ ٹیکنالوجی سے آپ سے ملاقات کے لیۓ آۓ ہیں۔

راشد: (مسکرا کر) تو آئیے کیجیۓ ملاقات۔ (سب آگے بڑھ کر کرسیوں پر بیٹھ جاتے ہیں) آپ یونیورسٹی کے سٹوڈنٹ ہیں؟

ایک لڑکا: جی سر ہم بیچلر آف فزکس کے فائنل ائیر کے سٹوڈنٹ ہیں۔

دوسری لڑکی: سر ایک بار آپ ہماری یونیورسٹی میں آۓ تھے تو آپ نے فزکس کی اہمیت پر لیکچر دیا تھا۔ جس سے یہ تاثر ملا کہ سائنس میں فزکس ہی سب سے اہم برانچ ہے اس لیۓ طلباء کو چاہیۓ اس کی طرف زیادہ توجہ مرکوز کریں۔ لیکن سر سائنس کے باقی شعبے بھی تو اہم ہیں؟

راشد: بالکل اہم ہیں۔ میں نے تو بس یہ کہا تھا کہ جو سائنس کا سٹوڈنٹ نہیں یا جو سائنس کے دوسرے شعبوں سے تعلق رکھتا ہے اس کو بھی چاہیۓ کہ فزکس کو ضرور پڑھے ۔۔۔آپ تو سائنس کے باقاعدہ سٹوڈنٹس ہیں لیکن جو لوگ سائنس یا فزکس کو نہیں جانتے یا اس کے باقاعدہ سٹوڈنٹ نہیں رہے اسے کم سے کم فزکس تو ضرور پڑھنی چاہیۓ کیونکہ فزکس ہی تو میٹا فزکس میں ڈھلتی ہے۔

دوسرا لڑکا: سر آپ کا کیا خیال ہے، سائنسی میتھڈ یا طریقہ کار کے مطابق جس میں ہم کسی مفروضے کو ثابت کرنے کے لیۓ ایکسپیریمنٹ کرتے ہیں کیا عام روزمرہ کی عملی زندگی میں بھی اس کو استعال کیا جا سکتا ہے؟

راشد: نہیں۔ جہاں تک بات نیچر کے لاز کی ہے جس میں انسان کے طبعی یا جسمانی عوامل بھی شامل ہیں جیسے اس کے دل کی دھڑکن، اس کا نظام انہظام، یا نظام تنفس۔ ان سب پر تو سائنسی میتھڈ استعمال ہو سکتا ہے لیکن جہاں بات انسان کے اعمال اور افعال کی ہے تو وہ کوئی فطرت کے اصولوں کے مطابق نہیں ہوتے۔ سائنس چونکہ فطرت کے قوانین کے مشاہدے اور مطالعے کا نام ہے اس لیۓ انسان کے افعال و اعمال کے اصولوں کو آپ سائنس کے ایکسپیریمینٹ سے ثابت نہیں کر سکتے۔۔۔اس کی ایک مثال میں آپ کو دیتا ہوں جس سے بات واضح ہو جاۓ گی۔ فرض کریں کسی گلی کے بارے میں یہ مشہور ہے کہ وہاں اکثر چوریاں ہوتی ہیں، جو بھی وہاں سے گزرتا ہے اسے لوٹ لیا جاتا ہے۔ تو یہ دیکھنے کے لیۓ کہ یہ مفروضہ درست ہے یا غلط آپ تجربے کے طور پر وہاں سے دن اور رات کے مخلتف اوقات پر گزرتے ہیں لیکن آپ کے ساتھ اس طرح کا کوئی حادثہ پیش نہیں آتا، تو کیا آپ اسے سائنسی اصول کے طور پر مان لیں گے کہ اس گلی میں گزرنے پر کوئی چوری نہیں ہوتی؟

دوسرا لڑکا: نہیں بالکل نہیں مانیں گے۔

راشد: ہاں! کیونکہ آپ جانتے ہیں کہ ایسا محض اتفاق ہو سکتا ہے کہ آپ کو کسی نے نہیں لوٹا۔ شاید اگلی بار جب آپ جائیں تو آپ کے ساتھ بھی یہ واقع پیش آجاۓ۔

پہلی لڑکی: چلیں سر ایکسپیریمنٹ نہ سہی لیکن پرسنل ایکسپیئرنس کی تو اہمیت ہے اسے تو ایک اصول کے تخت مانا جا سکتا ہے۔

راشد: نہیں بالکل نہیں۔ ذاتی تجربے کی خیثیت تو اس سے بھی گئ گزری ہے۔ اس کو بھی آپ ایک مثال سے سمجھیں۔ فرض کریں آپ کو کسی لڑکے نے یا آپ کو (لڑکے کی طرف اشارہ کرکے) کسی لڑکی نے دھوکا دیا ہے۔ کسی بھی معماملے میں یا کسی بھی بات کو لے کر۔۔۔ تو کیا آپ اپنے اس ذاتی تجربے کی بنا پہ یہ اصول بنا لیں گے کہ تمام مرد یا تمام عورتیں دھوکے باز ہیں؟۔۔۔ اسی طرح سڑک پر آپ کو گاڑی چلاتے ہوۓ حادثہ پیش آگیا ہے تو آپ اپنے اس تجربے کی بنیاد پر آئندہ گاڑی نہیں چلائیں گے؟۔۔۔ یا دوسروں کو گاڑی چلانے سے روک دیں گے؟

پہلی لڑکی: لیکن سر جب یہ دونوں طریقے درست نہیں تو پھر کن اصولوں کے مطابق زندگی کے فیصلے کریں اور زندگی کا لائحہ عمل طے کریں؟

راشد: وہ اصول جو (انگلی سے اوپر اشارہ کرکے) اس ذات نے بتاۓ ہیں۔ اس نے جن کاموں کی اجازت دی ہے انہیں اختیار کر لو اور جن کاموں سے روکا ہے رک جاؤ۔

دوسری لڑکی: سر بات کچھ ٹھیک طرح سے سمجھ نہیں آئی۔

راشد: (تھوڑا پیچھے جا کر) اچھا اس بات کو کسی اور طرح سے سمجھتے ہیں۔ تم سب نے اکثر ایسے لوگوں کی باتیں سنی ہوں گی جو اپنی پروفیشنل فیلڈ کے بہت ماہر یا کامیاب لوگ ہیں۔۔۔ سنی ہیں؟

دوسری لڑکی: جی سنی ہیں۔

راشد: تو تم نے سنا ہو گا وہ اکثر اپنے ذاتی تجربات کو بیان کرتے ہیں کہ کیسے انہیں بڑی مشکلات کا سامنا کرنا پڑا اور وہ کن کن مراحل سے گزر کر یہاں تک پہنچے ہیں۔ اپنی اس ساری جدوجہد اور ذاتی تجربات کی بدولت وہ یہ اصول اخذ کر لیتے ہیں کہ کامیابی کی راہ میں ہمیشہ بڑی رکاوٹیں آتی ہیں اور بڑی مشکلات سے گزرنا پڑتا ہے۔ تب کہیں جا کر کامیابی ملتی ہے۔۔۔ ایسا ہی ہے؟

دوسری لڑکی: جی۔

راشد: (جاری رکھتے ہوۓ) لیکن اس اصول کو سائنسی اصول کے طور پر نہیں مانا جا سکتا۔ کیونکہ ضروری نہیں کہ ہر ایک کی پروفیشنل زندگی میں ایسی مشکلات آئیں۔ ہو سکتا ہے آپ اس پروفیشن کو اختیار کریں اور آپ کو ایسی کسی مشکل یا رکاوٹ کا سامنا نہ کرنے پڑے۔۔۔ کیونکہ آپ کا ماحول، خاندان، زمانہ یا حالات یا علاقہ جس میں آپ رہ رہے ہیں ممکن ہے اس سے مختلف ہوں۔ اس لیۓ آپ کو ان مصائب کا سامنا شاید نہ کرنا پڑے۔۔۔ کیوں آگئ بات سمجھ میں؟

دوسری لڑکی: جی سر۔

راشد: تو بات بس اتنی ہے آپ نے اپنی زندگی میں کوئی بھی فیصلہ کرنا ہے، کسی بھی پروفیشن کو اپنانا ہے یا زندگی کا کوئی بھی لائحہ عمل طے کرنا ہے تو آپ نے یہ دیکھنا ہے کہ وہ خدا کے بتاۓ ہوۓ اصولوں کے مطابق ہے یا نہیں۔۔۔آپ کی جو مرضی ہے وہ کریں۔ اپنے دل کی راہ پر چلیں یہ دنیا تو بس ایسے ہی ہے۔

(چل کر ایک طرف جاتا ہے)

نیچر کے لاز کی طرح عملی زندگی میں بھی اسی کے بناۓ ہوۓ اصول حقیقی ہیں۔ ان پر تو کوئی ایکسپیریمنٹ کرنے کی بھی ضرورت نہیں۔ وہی اصول کامیابی کا راستہ ہیں، وہی فلاح کا راستہ ہیں۔

چوتھا منظر

رات کا وقت۔ لان۔

راشد اپنے لان میں اکیلا ٹہل رہا ہے۔ وہ کسی گہری سوچ میں ڈوبا ہوا ہے۔ لان میں بتیاں جل رہی ہیں جن میں چاروں طرف پھول اور پودے چمکتے نظر آتے ہیں۔ راشد چند لمحے ٹہلتا رہتا ہے۔ پھر رک کر اوپر آسمان کی طرف دیکھتا ہے۔ آسمان پر چاند اور ستارے روشن دکھائی دیتے ہیں۔ ایک دم سے راشد کے اردگرد مکمل تاریکی چھا جاتی ہے صرف روشن آسمان اور راشد دکھائی دیتے ہیں۔ راشد کا چہرا نظر آتا ہے وہ خاموشی سے اوپر چمکتے آسمان کو دیکھ رہا ہے۔ کہیں سے ایک آواز گونجتی ہے جو دراصل راشد کے اپنے دل کی آواز ہے۔

آواز: (شعر پڑھنے کے انداز میں)

پردہ چہرے سے اٹھا، انجمن آرائی کر

چشمِ مہر و مہ و انجم کو تماشائی کر

تو جو بجلی ہے تو یہ چشمک پنہاں کب تک

بے حجابانہ میرے دل سے شناسائی کر

تتلیوں کے دیس میں

2023-10-10T02:38:00.001+05:00

پہاڑ کی ایک چوٹی پر ایک چھوٹے سے خوبصورت کاٹج کا چوبی دروازہ ہلکی سی چرَ کی آواز سے کھلا اور بند ہو گیا۔ شہر یار نے وہیں کھڑے کھڑے اوپر نگاہ ڈالی ستارۂ سحری نمودار ہو چکا تھا۔ اردگرد کا جائزہ لینے کے بعد وہ ایک چھوٹے سے ڈھلوانی راستے پر چلنے لگا۔ چند قدم چل کر اس نے نیچے وادی میں جھانک کر دیکھا چھوٹے چھوٹے مکانات یوں لگ رہے تھے جیسے ایک دوسرے کے اوپر سوۓ پڑے ہوں۔ ان مکانات کے اوپر سے بادلوں کے ٹولے رینگتے ہوۓ چلے جا رہے تھے۔ ڈھلوانی راستہ طے کر کے جب وہ نیچے پہنچا تو اسے ذیلی سڑک سے خان بہادر اوپر آتا ہوا دکھائی دیا۔ قریب پہنچ کر اس نے خان بہادر کو آواز لگائی۔ 'کیوں خان بہادر۔۔۔کہاں صبح صبح؟'

آپ ہی کی طرف آرہا تھا صاحب جی۔ آپ کا کچھ سامان دینا تھا پر آپ تو نیچے آگۓ۔' خان بہادر نے جواب دیا۔

کوئی بات نہیں تم اوپر چلے جاؤ اور سامان رکھ آؤ۔ میں نیچے وادی تک جا رہا ہوں آکر دیکھ لوں گا۔۔۔اور ہاں! وہ میرا سگریٹ کا بنڈل لاۓ ہو؟'

نہیں صاحب جی۔ وہ جو سگرٹ آپ مانگتا ہے وہ یہاں سے نہیں ملتا۔' خان بہادر اپنے مخصوص انداز سے بولا۔ 'پر آپ کے لیۓ ایک اور سگرٹ لایا ہوں ابھی صرف ایک پیکٹ ہے آپ پی کر دیکھنا اگر پسند آیا تو اور لے آؤں گا۔'

یار خان میں نے تمہیں کہا تھا میں کسی اور برانڈ کے سگریٹ نہیں پیتا۔۔۔اچھا چلو دیکھتا ہوں۔ فی الحال تم یہ سامان رکھ آؤ۔'

اچھا صاحب جی۔'

خان بہادر آگے بڑھ گیا اور شہریار دوبارہ نیچے وادی میں اترنے لگا۔ اترائی ختم ہوئی تو شہریار نے رک کر لمبا سانس لیا اور سامنے کی طرف کچے راستے پر چلنے لگا۔ اوپر کی نسبت یہاں ابھی کچھ اندھیرا تھا مگر سب کچھ صاف دکھائی دے رہا تھا۔ چلتے چلتے وہ وادی میں پہنچ گیا اور ایک بڑے سے گھر کے سامنے آکھڑا ہوا۔ یہاں تمام گھر پہاڑ کو کاٹ کر بڑے بڑے پتھروں سے تعمیر کیۓ گۓ تھے جن پر اکثر کے اوپر سٹیل یا لوہے کی چھتیں تھیں۔ البتہ جس گھر کے باہر شہریار کھڑا تھا اس کی چھت لکڑی سے بنی تھی۔ یہ گھر باقی گھروں کی نسبت ذرا بڑا اور خوبصورت تھا۔ شہر یار نے دروازے پر ہاتھ رکھا تو دروازہ کھل گیا۔ وہ اندر چلا آیا۔ صحن اور برآمدہ عبور کرکے وہ گھر کے اندر داخل ہو گیا۔ اندر اس اس کی دادی اماں لکڑی کے تخت پر دو زانو بیٹھی تھی جس کے ہاتھ میں تسبیح تھی جسے وہ آنکھیں بند کرکے پڑھ رہی تھی۔شہریار کمرے میں داخل ہوتے ہی سامنے پڑی چارپائی پر دراز ہو گیا۔ دادی نے آنکھیں کھول کر پوچھا۔ 'آگۓ شہریار؟'

ہاں اماں آگیا ہوں۔ ابا کدھر گیا ہے؟' شہریار آنکھوں پر کہنی رکھ کر بولا۔

تیرا ابا تو ساتھ والے بڑے گاؤں گیا ہے کہہ رہا تھا کوئی سامان لانا ہے، شام تک لوٹے گا۔'

شہر یار چھت کو گھورنے لگا۔ اس کی دادی تسبیح پر ہاتھ پھیرتے ہوۓ بولی۔ 'خان بہادر کو میں نے تمہاری طرف بھیجا تھا راستے میں تمہیں ملا نہیں؟'

ملا تھا اماں! میں نے سامان رکھنے اوپر بھیج دیا ہے واپس آتا ہی ہوگا۔' شہر یار نے بیزاری سے جواب دیا۔

دادی تھوڑا سا آگے جھکی اور کچھ پڑھ کر شہریار پر پھونک مار کر بولی۔ 'روٹی لاؤں تیرے لیۓ؟'

نہیں اماں! تجھے معلوم ہے میں اس وقت کچھ نہیں کھاتا پھر بھی روز پوچھتی ہے۔'

تیری ماں کی بھی یہی عادت تھی۔ وہ بھی اس وقت کچھ نہیں کھاتی تھی۔ دن چڑھنے سے پہلے کام میں جت جاتی تھی اور دوپہر کے وقت جب سورج سر پر چڑھ آتا تھا تو تیرے ابے کو روٹی بھیج کر خود کھانے بیٹھتی تھی۔ آخری وقت میں سوکھ کر تیلا ہو گئ تھی۔' دادی تخت سے اترتے ہوۓ بولی۔ 'چل تو روٹی نہ کھا پر دودھ پی لے۔ میں تیرے لیۓ دودھ گرم کرکے لاتی ہوں۔' وہ شہریار کے چہرے پر ایک مرتبہ پھر پھونک مار کر کمرے سے باہر نکل گئ۔ شہریار نے کروٹ بدلی اور دیوار میں چھوٹی سی کھلی کھڑکی سے باہر جھانکنے لگا۔ باہر دیکھتے دیکھتے اسے نیند آگئ۔ کچھ دیر بعد دادی دودھ کا پیالہ لیۓ لوٹی تو شہریار کو سوۓ دیکھ کر بولی۔ 'لے اب سو گیا ہے۔ دودھ ٹھنڈا ہو جاۓ گا۔'

شہریار نے آنکھیں کھول دیں اور دادی کو میز پر دودھ کا پیالہ رکھتے ہوۓ دیکھ کر کہا۔ 'لا اماں مجھے پیالہ پکڑا دے۔ جب تک میں دودھ پی نہیں لوں گا تجھے چین نہیں آۓ گا۔'

ہاں پہلے دودھ پی لے پھر سونا ہوا تو سو جانا۔' اماں دودھ کا پیالہ اسے پکڑاتے ہوۓ بولی۔

شہریار اٹھ کر بیٹھ گیا اور اماں کے ہاتھ سے دودھ کا پیالہ لے لیا۔ 'کہاں اماں! اب نیند کہاں آۓ گی۔ نیند آئی بھی ہو تو نیچے وادی تک آتے آتے اڑ جاتی ہے۔'

تو تجھے کس نے کہا ہے تو اوپر جا کر سویا کر۔ اوپر سونے کے لیۓ خان بہادر جو ہے۔'

نہیں اماں جب تک میں یہاں ہوں میں اوپر رہوں گا۔ جب چلا جاؤں گا پھر جس کو مرضی ہے بھیج دینا۔' شہریار نے بڑا سا گھونٹ بھرتے ہوۓ کہا۔

میں تو کہتی ہوں یہیں رہ اپنے گاؤں میں، کیا رکھا ہے وہاں۔'

نہیں اماں! جانا تو پڑے گا وہاں میری نوکری ہے، کام ہے۔ اسے چھوڑ نہیں سکتا۔ یہاں ان پہاڑوں میں رہ کر کیا کروں گا مجھے کوئی کام بھی تو نہیں آتا۔ کھیتی باڑی مجھے آتی نہیں اور بکریاں میں چرا نہیں سکتا۔'

تو اس کی فکر نہ کر۔ میں جانتی ہوں تو پڑھ لکھ کر یہ کام تھوڑی کرے گا۔ تیرے ابے کو آنے دے میں اسے کہوں گی وہ تجھے کوئی ایسا کام تلاش کر دے گا جو تیرے لائق ہوگا۔'

نہیں اماں ایسی بات نہیں۔ ساری زندگی میں شہر میں رہا ہوں اب اس عمر میں اس ویران سے گاؤں میں اور اس چھوٹی سی وادی میں آکر رہنا میرے بس میں نہیں۔' شہریار نے دودھ پی کر پیالہ میز پر رکھ دیا اور تکیۓ کو تھوڑا اوپر اٹھا کر سیدھا ہو کر لیٹ گیا۔

عمر کی بات تو تو ایسے کہہ رہا ہے جیسے تیری بڑی عمر ہو گئ ہے۔ ابھی تو تیرا بیاہ بھی نہیں ہوا۔۔۔ اس وقت تو چاہے جو مرضی کر، جہاں جی چاہتا ہے رہ پر اک بار تیری شادی ہو جاۓ تو تیری دلہن کو یہیں اپنے پاس رکھوں گی۔ اسے تیرے ساتھ شہر نہیں جانے دوں گی۔'

اچھا اماں رکھ لینا اسے اپنے پاس۔' شہریار ہنستے ہوۓ بولا۔ 'جہاں جی چاہے رکھنا۔ پر مجھے تو معاف ہی رکھ میں یہاں رہنے والا نہیں۔'

ڈھونڈھوں پھر تیرے لیۓ کوئی لڑکی؟' اماں نے مسکرا کر پوچھا۔

نہیں اماں ابھی سے ڈھونڈنے نہ نکل جانا ابھی نہیں کرنی مجھے شادی۔'

اے ہے۔ ابھی نہیں تو کب کرے گا، تیری عمر نکلتی جا رہی ہے۔'

اماں ابھی تو تو کہہ رہی تھی تیری عمر ہی کیا ہوئی ہے اور اب کہہ رہی ہے تیری عمر نکلتی جا رہی ہے۔'

وہ سب تو چھوڑ۔۔۔بس تو یہ بتا اس گاؤں کی لڑکی سے شادی کرے گا یا گاؤں سے باہر کوئی لڑکی ڈھونڈھوں تیرے لیۓ؟'

اماں لڑکی جہاں کی بھی ہو بس رشتہ کرنے سے پہلے مجھے ایک بار دکھا لینا۔'

آۓ ہاۓ دکھاؤں گی کیوں نہیں تجھے دکھاۓ بغیر شادی تھوڑی کروں گی۔۔۔اماں نے خوش ہو کر کہا۔ 'بس پھر ٹھیک ہے تجھے کوئی اعتراض نہیں تو لڑکی اپنے گاؤں میں ہی دیکھتے ہیں۔ اپنے گاؤں میں اچھی لڑکیوں کی کوئی کمی ہے جو ہم باہر جائیں۔'

اچھا اماں جیسے تیری مرضی ہے تو کر۔' شہریار کروٹ بدل کر بولا۔

پورا دن شہریار نے وہیں لیٹے لیٹے گزار دیا شام سے تھوڑی دیر پہلے گھر سے نکلا اور اوپر اپنے کاٹج کی طرف چل دیا۔ اوپر پہنچ کر اس نے دروازہ کھولا اور اندر آکر بتی جلائی، اندھیرے میں ڈوبا کمرا بھک سے روشن ہو گیا۔ آج سارا دن اس نے سگریٹ نہیں پیا تھا اس لیۓ اس نے فوراً دراز کھولا اور اندر سے سگریٹ کے پیکٹ میں سے ایک سگریٹ نکال کر باہر آگیا۔ کاٹج کی عقبی جانب آکر اس نے سگریٹ سلگایا اور نیچے بہتے دریا کو دیکھنے لگا۔ دو تین کش لگانے کے بعد اسے دریا کے کنارے تین ساۓ دکھائی دیۓ، اس نے غور سے دیکھا تو تین لڑکیاں تھیں۔ تینوں نے ایک دوسرے سے ملتے جلتے لمبے سے کرتے پہن رکھے تھے اور سر پر سکارف اوڑھ کر اس کے پلوؤں کو کندھوں سے پیچھے کی طرف باندھ رکھا تھا۔ یہاں لڑکیاں عموماً اسی قسم کا لباس پہنا کرتی تھیں اس لیۓ شہریار کو کوئی خیرت نہ ہوئی۔ وہ تینوں دریا کے کنارے ہنستیں باتیں کرتیں چلی جا رہی تھیں۔ شہریار جانتا تھا وادی کی اکثر لڑکیاں پچھلے پہر دریا کے کنارے گھومنے یا قریبی چشمے سے پانی بھرنے کے لیۓ یہاں آتیں ہیں اور شام ہونے سے پہلے لوٹ جاتی ہیں۔ وہ تینوں لڑکیاں بھی شاید گھر واپس جا رہی تھیں۔ ان تینوں میں سے درمیان والی لمبے قد والی لڑکی نے سبز رنگ کا سکارف اوڑھ رکھا تھا۔ شہریار کو وہ لڑکی بہت اچھی لگی۔ چلتے چلتے وہ تینوں اتنی قریب آگئیں کہ شہریار کو صاف دکھائی دینے لگی تھیں۔ مگر لڑکیوں کو اس بات کی بالکل خبر نہیں تھی کہ انہیں کوئی پہاڑ کی چوٹی سے مسلسل دیکھ رہا ہے۔ بلندی اتنی زیادہ تھی اگر وہ جانتی بھی ہوتیں اور نیچے کھڑے ہوکر دیکھنا چاہتیں تو بھی نہ دیکھ پاتیں۔ شہریار کی نظر اس سبز سکارف والی لڑکی پر آکر ٹھہر گئ تھی۔ وہ اسے دیکھنے میں اتنا مگن تھا کہ اسے بالکل ہوش نہ رہا کہ اس نے اپنی انگلیوں میں جلتا ہوا سگریٹ تھام رکھا ہے۔ وہ تینوں باتیں کرتی ہوئی آگے گزر گئیں۔ شہریار انہیں تب تک جاتا ہوا دیکھتا رہا جب تک وہ اس کی آنکھوں سے اوجھل نہیں ہو گئیں۔ جونہی وہ لڑکیاں غائب ہوئیں شہریار نے اپنا ہاتھ زور سے جھٹکا۔ سگریٹ نے اس کی انگلی کو جلادیا تھا۔ اس نے اندر آکر دراز سے سگریٹ کا پورا پیکٹ اٹھایا اور دوبارہ اسی جگہ آکر نیا سگریٹ سلگا لیا۔ کافی دیر تک وہ وہاں کھڑا دریا کے اس پار ڈوبتے سورج کو دیکھتا رہا۔ جب اندھیرا کافی پھیل گیا اور نیچے دریا پر کچھ بھی دیکھنا ممکن نہ رہا تو وہ اپنے کاٹج میں چلا آیا۔ اندر آکر وہ اپنے بستر پر لیٹ گیا اور ایک بار پھر سگریٹ سلگا لیا۔ سگریٹ پیتے ہوۓ وہ کسی سوچ میں ڈوبا تھا کہ اس کے موبائل کی گھنٹی بجی، اس نے جیب سے موبائل نکال کر دیکھا اس کے کسی دوست کا فون تھا۔ اس نے کال اٹینڈ کی دوسری طرف سے اس کا دوست بولا۔ 'کیوں شیری کیسی گزر رہیں تمہاری چھٹیاں۔۔۔پہاڑوں میں تمہیں مزا تو خوب آرہا ہو گا۔'

کہاں یار! مزا کیا! بس گزر رہی ہیں چھٹیاں جیسے گزرتی ہیں۔' شہریار سگریٹ کا کش لگا کر بولا۔

کیوں جگہ اچھی نہیں؟' اس کے دوست نے خیران ہو کر کہا۔ 'تمہارا اپنا گاؤں ہے، شکر کرو تمہیں اتنی گرمی میں مفت میں پہاڑوں میں رہنے کا موقع مل رہا ہے۔ ورنہ ہم جیسے بڑے شہروں میں رہنے والوں کو خاص طور پر پیسے خرچ کر کے وہاں جانا پڑتا ہے وہ بھی صرف چند دن کے لیۓ۔ وہاں جا کر واپس اس بھیڑ بھاڑ میں شامل ہونے کا من نہیں کرتا پر مجبوری میں واپس آنا پڑتا ہے۔ اور تم ہو کہ تمہیں مزا نہیں آرہا۔'

نہیں یارا ایسا نہیں' شہریار سگریٹ ایش ٹرے میں بجھاتے ہوۓ بولا۔ 'جگہ تو اچھی ہے بس ایک مسئلہ ہے، یہاں کرنے کو کچھ نہیں۔ صبح سے شام تک بس بستر پر پڑے رہتا ہوں۔'

تو میری جان باہر نکل کر گھوما کرو۔ اتنی خوبصورت جگہ ہے اور تم ہو کہ سارا دن گھر میں بیٹھے رہتے ہو۔'

ہاں وہ تو ہے علاقہ تو بڑا خوبصورت ہے۔ اور۔۔۔کچھ لوگ بھی۔' شہریار دھیمی آواز سے بولا۔

کیا! کیا کہا! لوگ؟' اس کا مطلب ہے کچھ خاص لوگوں سے ملاقات ہوئی ہے تمہاری۔' اس کا دوست لفظ خاص پر زور دے کر بولا۔

ہاں آج ابھی تھوڑی دیر پہلے ملاقات ہوئی ہے۔ بلکہ ملاقات کیا صرف میں نے اسے دیکھا ہے، وہ بھی دور سے۔'

اچھا تو کیا دیکھا پھر؟'

بتاؤں گا۔ ذرا دوسری ملاقات ہو لینے دو پھر تفصیل سے بتاؤں گا۔'

واہ اس کا مطلب ہے باقی چھٹیاں تو تمہاری مزے کی گزریں گی۔'

شہریار مسکرایا۔ 'پتہ نہیں۔ کیا پتہ وہ آئندہ کبھی مجھے دکھے یا نہیں۔۔۔ اچھا چل ٹھیک ہے بعد میں بات کرتے ہیں۔' شہریار نے فون بند کر دیا۔

فون بند کرکے اس نے ایک طرف رکھا اور سیدھا ہو کر لیٹ گیا۔ کچھ دیر میں اسے نیند آگئ۔ صبح جب اس کی آنکھ کھلی تو سورج نکل آیا تھا۔ وہ جلدی سے اٹھا اور منہ ہاتھ دھو کر کاٹج سے باہر نکل آیا۔ وہ روزانہ رات کو دیر سے سوتا تھا مگر صبح طلوعِ آفتاب سے پہلے نیچے وادی میں پہنچ جاتا تھا لیکن آج رات جلدی سونے کے باوجود وہ صبح دیر سے اٹھا تھا۔

آج اس نے گاؤں دیکھنے اور پوری وادی گھومنے کا پروگرام بنایا تھا اس لیۓ وہ گھر پہنچ کر تھوڑی دیر دادی اماں کے پاس بیٹھا اور جب دن پوری طرح چڑھ آیا تو تیار ہو کر گھر سے نکل کر باہر آگیا۔ اس کا ارادہ پہلے پورا گاؤں دیکھنے کا تھا اور اس کے بعد گاؤں سے باہر گھومنے کا تھا۔ گاؤں کی سیر کے دوران اسے اس سبز اسکارف والی لڑکی کا خیال آیا جسے اس نے کل دریا کے کنارے دیکھا تھا۔ اس نے سوچا ہو سکتا ہے وہ اسے آج گاؤں میں گھومتے ہوۓ دیکھائی دے جاۓ۔ مگر سارا گاؤں گھوم پھر کر دیکھ لینے پر بھی وہ اسے کہیں دکھائی نہ دی۔ گاؤں کا چکر مکمل کرنے کے بعد اپنے پہلے سے طے کیۓ ہوۓ منصوبے کے مطابق وہ گاؤں سے باہر نکل آیا اور سڑک پر ایک طرف چلنے لگا۔ کچھ دور جا کر اسے کوئی خیال آیا تو واپس پلٹ آیا۔ دوپہر ہو گئ تھی اس لیۓ اس نے سوچا گھر واپس جا کر کھانا کھا کے کچھ آرام کیا جاۓ اور سپہر کے بعد دریا کی طرف جایا جاۓ۔ شاید وہ لڑکی آج پھر دریا کے کنارے ٹہلنے کے لیۓ آجاۓ۔ لیکن جب وہ واپس گھر کی طرف جا رہا تھا تو راستے میں اس کی نظر ایک مکان کے دروازے پر پڑی۔ دروازہ آدھا کھلا تھا اور وہاں ایک لمبے قد والی لڑکی کھڑی تھی۔ اس لڑکی کا رخ گھر کے اندر کی طرف تھا اس لیۓ شہریار اس کا چہرا نہیں دیکھ پایا تھا۔ لیکن جونہی شہریار اس گھر کے بالکل سامنے پہنچا اس لڑکی نے پیچھے مڑ کر دیکھا۔ شہریار نے اسے دیکھتے ہی پہچان لیا۔ یہ وہی تھی۔ آج بھی اس نے اپنے بالوں کو اسکارف میں چھپا رکھا تھا مگر اس بار اسکارف کا رنگ سیاہ تھا۔ یہ اسکارف یہاں کی عورتوں کے لباس کا حصہ تھا اس لیۓ وہ اسے تقریباً ہر وقت پہنے رکھتی تھیں۔ آج بھی اس نے اسکارف کو بالکل اسی انداز سے کندھوں کے پیچھے باندھ رکھا تھا۔ اسکارف کو اس انداز سے باندھنا یہاں کا رواج تھا۔

شہریار نے اک نظر اس کی طرف دیکھا اور آگے گزر گیا۔ اس بار اس لڑکی نے بھی اسے دیکھ لیا تھا۔ اس کا جی چاہا کہ وہ پیچھے مڑ کر دوبارہ اس لڑکی کو دیکھے مگر یہ سوچ کر کہ کہیں اسے برا نہ لگ جاۓ اس نے اپنے آپ پر قابو رکھا۔ لیکن جب وہ اس گھر سے کچھ مناسب فاصلے پر چلا آیا تو اس نے پیچھے مڑ کر دیکھا، یہاں سے اسے کچھ بھی دکھائی نہ دیا۔ آگے جاکر گلی دائیں جانب مڑجاتی تھی اس نے مڑتے ہوۓ اک بار پھر پیچھے دیکھا، وہاں سواۓ ایک آدمی کے جو گلی کی دوسری جانب جارہا تھا اور کوئی نہیں تھا۔

گھر آکر اس نے کھانا کھایا اور سستانے کے لیۓ چارپائی پر لیٹ گیا۔ اس کی دادی اماں اپنے کاموں میں مصروف رہیں اور وہ چپ چاپ لیٹا کھلی کھڑکی سے باہر دھوپ میں چمکتے پہاڑوں کو دیکھتا رہا۔ کبھی کبھی دادی اس سے کوئی بات پوچھ لیتی تھیں جس کا مختصر سا جواب دے کر وہ دوبارہ خاموش ہو جاتا۔ دادی نے پوچھا 'شہریار! تمہاری چھٹیاں کب ختم ہو رہی ہیں؟'

ابھی ہیں کچھ دن اماں۔' اس نے پہاڑوں کو دیکھتے ہوۓ جواب دیا۔

دادی کچھ دیر خاموش رہنے کے بعد پھر کوئی بات کر دیتیں۔ 'اس دفعہ جب تم شہر جاؤ تو واپس جلدی آجانا۔ تم ایک بار جو جاتے ہو تو چھ چھ مہینے واپس نہیں پلٹتے۔'

کیا کروں اماں نوکری ہی ایسی ہے۔ اور پھر چھ آٹھ مہینے بعد آتا ہوں تبھی تو اتنی چھٹیاں ملتی ہیں۔' شہریار اس بار بھی دور پہاڑوں کو جواب دے کر خاموش ہو گیا۔ کمرے میں تھوڑی دیر کے لیۓ خاموشی چھا گئ۔ کچھ دیر بعد دوبارہ آواز آئی مگر اس بار شہریار بولا۔ 'اماں ایک بات تو بتا؟'

ہاں کیا بات ہے؟'

میری امی کیسی تھیں؟'

کیسی تھیں کا کیا مطلب؟' دادای نے شہریار کا سوال سن کر خیرت سے پوچھا۔

میں نے امی کو کبھی دیکھا نہیں اس لیۓ پوچھا۔'

تو نے اس کی تصویر تو دیکھی ہے۔ بس ویسی ہی دکھتی تھی جیسی تو نے تصویر میں دیکھی ہے۔'

پھر بھی کچھ تو بتا اماں۔ وہ کیسی تھی، کیا کرتی تھی، میں کتنا چھوٹا تھا جب وہ اس دنیا سے چلی گئ؟' شہریار نے استفسار کیا۔

تو اس وقت بہت چھوٹا تھا صرف تین چار مہینے کا تھا۔ تب سے تمہیں میں نے ہی پالا ہے۔ وہ بے چاری تو اپنی جوانی میں ہی چل بسی تھی۔ ہاۓ۔ ابھی عمر ہی کیا تھی اس کی۔' دادی آہ بھر کر بولی۔ 'تیرے باپ کو سب لوگوں نے بہت کہا کہ دوبارہ شادی کر لو چھوٹے سے بچے کو اکیلے کیسے پالو گے مگر اس نے ٹھان لی تھی کہ وہ دوبارہ شادی نہیں کرے گا۔ اس کی بھی ابھی عمر کتنی تھی وہ بھی تو اس وقت بالکل جوان جان تھا۔ 'دادی اٹھی اور بڑبڑاتے ہوۓ ایک طرف چل پڑی۔ 'بس بیٹا رب کے کام رب ہی بہتر جانے اس نے تیری ماں کو جلدی اپنے پاس بلا لیا تو اس کی مرضی۔' دادی کمرے کے اندر ایک دروازے میں داخل ہو کر کمرے کے ساتھ ملحق دوسرے کمرے میں چلی گئ اور شہریار دوبارہ کھڑکی سے باہر سرسبز پہاڑیوں کو زرد دھوپ میں نہاتے ہوۓ دیکھنے مگن میں ہو گیا۔

سپہر کے بعد جب دھوپ قدرے ڈھل گئ تو شہریار نے اٹھ کر منہ ہاتھ دھویا اور بڑے قرینے سے کنگھی کرنے کے بعد ایک سیاہ چشمہ آنکھوں پر چڑھا کر کمرے سے باہر نکل آیا۔ کچھ یاد آنے پر دوبارہ کمرے کے اندر گیا اور چارپائی پر تکیے کے پاس اپنا موبائل اٹھا کر باہر آگیا۔ گھر کے بیرونی دروازے سے نکلتے وقت اس نے دادی اماں کو آواز دے کر کہا۔ 'اماں میں دریا کی طرف جا رہا ہوں شام تک آجاؤں گا۔' یہ کہہ کر وہ دادی اماں کا جواب سنے بغیر گھر سے نکل آیا۔

گاؤں سے نکلتے وقت اس نے بہت سے لوگوں کو دیکھا مگر وہ ان میں سے کسی کو بھی نہیں جانتا تھا۔ البتہ ان میں سے کچھ لوگ اس کے باپ کی وجہ سے اسے پہچانتے تھے۔ ان میں سے چند ایک نے دور سے اسے سلام کیا جس کا جواب اس نے مسکرا کر سر کی ہلکی سی جنبش سے دیا اور آگے گزر گیا۔ گاؤں سے نکل کر وہ دریا کی طرف جانے والے راستے کی طرف چل پڑا۔ پورے راستے پر اس وقت کوئی نہیں تھا وہ اکیلا چلا جا رہا تھا۔ دریا کے قریب پہنچ کر اس نے بائیں جانب دیکھا دور سے اسے پہاڑ کی چوٹی سے ایک چشمہ نیچے دریا میں گرتا ہوا دکھائی دیا۔ وہ دریا کے کنارے کے ساتھ ساتھ اس سمت چلنے لگا۔ کچھ دور جا کر اسے معلوم ہوا چشمے پر چند عورتیں اس وقت پانی بھر رہی ہیں۔ وہ آگے بڑھتا رہا جب ان کے قریب پہنچا تو اس نے اک نظر ان عورتوں کی طرف دیکھا اسے معلوم ہو گیا کہ وہ جس دراز قد لڑکی کی تلاش میں یہاں آیا تھا وہ یہاں نہیں تھی۔ وہ خاموشی سے آگے گزر گیا۔ تھوڑا دور جا کر وہ ایک پہاڑ کی ڈھلوان پر ایک بڑے سے ٹیلہ نما پتھر پر دریا کی سمت رخ کر کے بیٹھ گیا۔ دریا اس کے بالکل سامنے چند قدم کے فاصلے پر تھا۔ اس کے پیچھے ایک چھوٹی سی پہاڑی تھی۔ ساری پہاڑی ڈھلوان ہری بھری تھی جس کے درمیان میں چھوٹے چھوٹے پتھروں اور کنکر کا راستہ بنا ہوا تھا جو اوپر پہاڑ کی چوٹی پر جاتا تھا۔ اس کا سیدھا مطلب تھا کہ یہاں سے لوگ نیچے اتر کر دریا میں آتے جاتے ہوں گے۔ وہ اندازہ لگانے لگا کہ یہ راستہ یہاں قدرتی طور پر بن گیا تھا یا لوگوں نے اسے خود بنایا تھا۔ بہت غور کرنے پر بھی وہ یہ نہ جان سکا کہ یہ راستہ کیسے بنا تھا۔ وہ اپنے سامنے بہتے ہوۓ تیزرفتار دریا کو دیکھنے لگا۔ دریا کا پانی بالکل صاف شفاف تھا۔ اس نے شہروں میں بہت سے دریا دیکھے تھے مگر اس دریا کی بات کچھ اور تھی۔ اتنا صاف ستھرا اور شفاف دریا اس نے زندگی میں کبھی نہیں دیکھا تھا۔ وہاں کے دریاؤں کا پانی گدلا تھا اور ان کا رنگ بھی بالکل مٹی کے رنگ کی طرح کا ہو گیا تھا۔ مگر یہ دریا اس قدر صاف ستھرا تھا کہ شہریار کی خیرت کی انتہا نہ رہی۔ وہ یہاں کشمیر میں اپنے گاؤں میں پہلے بھی بہت بار آیا تھا مگر اتنے قریب سے اس نے دریا کو کبھی نہیں دیکھا تھا۔

وہ ابھی دریا کی شفافیت اور خوبصورتی کو دل ہی دل میں سراہ رہا تھا کہ اسے پہاڑ کی چوٹی پر سے چند آوازیں آتی ہوئی سنائی دیں۔ اس نے مڑ کر اوپر دیکھا لیکن اسے وہاں کوئی بھی دکھائی نہ دیا۔ آوازیں مسلسل آرہی تھیں۔ اس نے چشمہ اتار کر جیب میں رکھا اور آہستہ سے اوپر چڑھنے لگا۔ تھوڑا سا اوپر جانے پر اسے معلوم ہوا یہ نسوانی آوازیں ہیں۔ وہ آوازوں پر غور کرنے لگا اس نے اندازہ لگایا کہ تین یا چار عورتیں ہوں گی۔ لیکن بہت کوشش کرنے پر بھی وہ یہ نہ جان سکا کہ وہ کیا باتیں کر رہی ہیں۔ چلتے چلتے وہ چوٹی کے قریب پہنچ گیا۔ اوپر جانے کی بجاۓ اس نے وہیں کھڑے ہو کر دیکھا اسے دو لڑکیاں دکھائی دیں جو درختوں کے ساتھ لگ کر کھڑی تھیں۔ ان کا رخ دوسری طرف تھا، شہریار ان کے پیچھے تھا۔ ان کے انداز سے صاف ظاہر تھا کہ وہ لڑکیاں درختوں کے پیچھے چھپ کر کسی کو دیکھ رہی ہیں۔ شہریار نے ان درختوں کے پار دیکھنا چاہا مگر یہاں سے کچھ بھی دکھائی نہیں دیتا تھا۔ وہ ان کی باتیں سن کر اندازہ لگانے لگا کہ آخر وہ کس سے چھپ رہی ہیں۔

وہ آ تو نہیں رہی؟' ایک نے دوسری سے پوچھا۔

نہیں۔' دوسری نے جواب دیا۔ 'ابھی شاید وہ ہمیں وہیں ڈھونڈ رہی ہو گی۔'

لیکن اگر وہ پکڑی گئ تو'؟ پہلی نے پوچھا۔

تو اچھا ہے ڈانٹ پڑے گی۔ مزا آۓ گا۔' دوسری شرارت کے انداز سے بولی۔ 'لیکن ایک مسئلہ ہے سیب اس کے پاس ہیں کہیں وہ نہ جاتے رہیں۔'

ہاں یہ تو ہے۔ دیکھو پھر کیا ہوتا ہے۔'

وہ آ گئ۔' پہلی لڑکی تقریباً اچھلتے ہوۓ تیزی سے چلائی۔

کہاں؟'

وہ۔۔۔وہاں۔'

شہریار کو وہ تیسری لڑکی دکھائی نہیں دے رہی تھی۔ وہ بغیر آواز پیدا کیۓ بڑی آہستگی سے اوپر چڑھ آیا اور ایک درخت کی اوٹ لے کر کھڑا ہوگیا۔ اس نے درخت کے پیچھے سے جھانک کر دیکھا ایک لڑکی بھاگتی ہوئی آرہی تھی۔ جب اس نے دھیان لگا کر دیکھا تو دیکھتا ہی رہ گیا۔ یہ لڑکی وہی تھی جس کی تلاش میں وہ یہاں آیا تھا۔ وہ بہت خوش ہوا۔ جب لڑکی تھوڑا قریب آئی تو اس نے دیکھا کہ اس کے ہاتھ میں ایک بڑا سا شاپر ہے۔ اسے یاد آیا کہ اس میں وہ سیب ہوں گے جن کے بارے میں یہ دو لڑکیاں ابھی ابھی باتیں کر رہی تھیں۔ وہ بھاگتی ہوئی ان دو لڑکیوں کے پاس آگئ۔ وہ بری طرح ہانپ رہی تھی۔ جب اس کا سانس بحال ہوا تو وہ ان دونوں لڑکیوں پر برس پڑی۔

'تم دونوں دفعہ ہو جاؤ اور آئندہ مجھ سے بات مت کرنا۔ تم دونوں کو شرم نہیں آئی مجھے اکیلے چھوڑ کر بھاگ آئیں۔'

وہ سب تو ٹھیک ہے پر وہ سیبوں کا دوسرا شاپر کدھر ہے؟' ایک لڑکی نے ہنستے ہوۓ کہا۔

واہ یہ ہیں میری دوستیں۔ جن کو دوست سے زیادہ شاپر کی پڑی ہے۔' تیسری لڑکی ایک درخت کے ساتھ ٹیک لگا کر بولی۔ 'وہ شاپر وہیں گر گیا ہے اس میں تم لوگوں کا ہی قصور ہے۔ تم نے بھاگنا تھا تو کم سے کم ایک شاپر تو ساتھ لے آتیں۔ دونوں مجھے پکڑا گئی تھیں۔'

چلو کوئی بات نہیں ایک ہی کافی ہے۔' ایک لڑکی نے شاپر میں ہاتھ ڈال کر سیب نکالتے ہوۓ کہا۔

خبردار اگر شاپر کو ہاتھ لگایا تو۔' تیسری لڑکی اس کے ہاتھ پر تھپڑ مار کر بولی۔ 'گھر جا کر ان سیبوں کو میں تقسیم کروں گی اور جتنے سیب میں تم دونوں کو دوں گی تمہیں وہ لینے پڑے گے۔ زیادہ کی بات نہ کرنا۔۔۔ محنت ساری میں کروں، خطرہ مول میں لوں اور تم دونوں بس مزے اڑاؤ۔'

اچھا ٹھیک ہے ہم زیادہ کی بات نہیں کریں گے جیسے تم تقسیم کرو گی ہم قبول کر لیں گے۔ بس اب جلدی چلو کافی دیر ہو گئ ہے۔' دوسری لڑکی بولی۔

ہاں ٹھیک ہے چلو۔'

جونہی ان دونوں لڑکیوں نے مڑ کر شہریار کی طرف رخ کیا اس نے ان کی صورت دیکھ کر انہیں فوراً پہچان لیا۔ یہ دونوں وہی لڑکیاں تھیں جو اس دن بھی اس تیسری لڑکی کے ساتھ دریا کے کنارے ٹہل رہی تھیں جنہیں اس نے اوپر اپنے کاٹج پر سے دیکھا تھا۔ وہ تینوں اسی راستے سے نیچے اتر گئیں جس راستے سے ابھی تھوڑی دیر پہلے شہریار اوپر آیا تھا۔ وہ ابھی اپنی جگہ سے بھی نہیں ہلا تھا کہ وہ لمبے قد والی لڑکی جس کے لیۓ وہ یہاں آیا تھا اوپر آگئ۔ وہ زمین پر کچھ تلاش کرنے لگی شائد اس کی کوئی چیز کھو گئ تھی۔ ایک دم سے اس کی نظر شہریار پر پڑی، وہ ٹھٹھک کر رہ گئ۔ چند لمحوں تک وہ اسے خیرت سے دیکھتی رہی۔ شہریار بھی چپ چاپ کھڑا رہا اس سے پہلے کہ وہ کوئی بات کرتا نیچے سے ایک لڑکی کی آواز آئی۔ 'مہرو ملا کہ نہیں؟'

نہیں'۔ اس نے بلند آواز سے بولنا چاہا مگر اس کی آواز اس کے خلق میں اٹک کر رہ گئ اور صرف شہریار اسے سن پایا۔ نیچے سے لڑکی کی آواز دوبارہ آئی۔ 'مہرو! کچھ بولے گی کہ مر گئ۔ نہیں ملا تو آجاؤ بڑی دیر ہو گئ ہے۔'

آرہی ہوں۔' اس بار اس نے اپنی پوری قوت لگا کر بولا اور آہستہ آہستہ پیچھے ہٹنے لگی مگر ابھی بھی وہ شہریار کو بڑی خیرت سے دیکھ رہی تھی۔ چند قدم پیچھے ہٹ کر وہ بھاگی اور اسی راستے سے نیچے اترنے لگی جس سے اوپر آئی تھی۔ جاتے ہوۓ اس نے ایک مربتہ پھر شہریار کو دیکھا۔ جب وہ اس کی نظروں سے اوجھل ہو گئ تو وہ آگے بڑھا اور کچھ فاصلے پر کھڑا ہو کر اسے نیچے اترتا ہوا دیکھنے لگا۔ وہ تینوں ڈھلوان سے اتر کر دریا کے کنارے پہنچیں تو اس لڑکی نے پیچھے مڑ کر اوپر دیکھا۔ شہریار کو اپنی طرف متوجہ پا کر اس نے سر جھکا لیا اور سامنے دیکھنے لگی۔ وہ اپنی دونوں سہیلیوں کے پیچھے چل رہی تھی۔ وہ دونوں آپس میں باتیں کر رہی تھیں مگر یہ خاموشی سے پیچھے چلی جا رہی تھی۔ جاتے ہوۓ اس نے آخری مرتبہ شہریار کی طرف دیکھا اور غائب ہو گئ۔

جب وہ تینوں لڑکیاں شہریار کی نظروں سے دور چلی گئیں تو وہ واپس پلٹا اور درختوں کے جھنڈ میں سے گزر کر اس راستے پر چلنے لگا جس راستے پر وہ لڑکی بھاگتی ہوئی آئی تھی۔ تھوڑی دور جانے پر اسے زمین پر ایک کنگن گرا ہوا ملا۔ اسے خیال آیا شاید یہی وہ چیز تھی جسے ڈھونڈنے کے لیۓ وہ لڑکی دوبارہ اوپر آئی تھی۔ اس نے کنگن اٹھا کر اپنی جیب میں رکھ لیا اور آگے بڑھ گیا۔

اردگرد ہر طرف چیڑ اور صنوبر کے درخت تھے جن کے بیچوں بیچ وہ چل رہا تھا۔ وہ درختوں کے جھنڈ سے باہر نکلا تو اسے اپنے سامنے کچھ فاصلے پر دو تین چھوٹے سے مکان نظر آۓ۔ ان مکانوں کے قریب سے ایک راستہ گزر کر آگے جا رہا تھا۔ وہ اس راستے پر چلنے لگا۔ تھوڑا دور جا کر اسے سامنے سے ایک بزرگ اپنی طرف تیزی سے آتا ہوا دکھائی دیا۔ وہ بزرگ منہ ہی منہ میں کچھ بڑبڑا رہا تھا۔ جب وہ قریب آیا تو اس نے رک کر شہریار سے پوچھا۔ 'یہاں سے ابھی ابھی تین لڑکیاں گزر کر گئی ہیں؟'

ہاں۔۔۔نہیں۔۔۔ہاں چاچا گزری تو ہیں ابھی تین لڑکیاں۔' شہریار نے جھجھکتے ہوۓ جواب دیا۔

اگلی بار آنے دو ان تینوں کو۔ اب آئیں تو ان کی خیر نہیں۔' چاچا آگے بڑھنے لگا تو شہریار نے اسے روک کر پوچھا۔ 'کیوں چاچا کیا ہوا؟ کیا کیا ہے ان تینوں نے؟'

کیا بتاؤں بیٹا۔ تین شیطان لڑکیاں آتی ہیں اور میرے سیبوں کے باغ میں گھس کر بہت سارے سیب چوری کرکے بھاگ جاتی ہیں۔ اوپر سے درختوں کی ڈالیاں بھی توڑ دیتی ہیں۔ میں نے کتنی بار سمجھایا ہے کہ جب سیب کھانے ہوں تو مجھے بتایا کرو میں خود تمہارے لیۓ اچھے اچھے سیب اتار دیا کروں گا مگر کہتی ہیں چاچا ایسے مانگ کر کھانے میں مزا تھوڑی آتا ہے جو مزا یوں چوری کرکے کھانے میں ہے۔'

چاچا خاموش ہوا تو شہریار نے پوچھا۔ 'کون ہیں یہ تینوں لڑکیاں چاچا؟'

اپنی ہی بچیاں ہیں بیٹا اپنے گاؤں کی ہی ہیں۔ اس پہاڑی سے نیچے دریا کے پاس رہتی ہیں۔ ایک نمبر کی شیطان ہیں تینوں۔' چاچا آگے چلنے لگا پھر رک کر بولا۔ 'تم کون ہو بیٹا تمہیں یہاں کبھی نہیں دیکھا اس گاؤں کے تو نہیں لگتے؟'

نہیں چاچا اسی گاؤں کا ہوں مگر میں یہاں کبھی رہا نہیں کبھی کبھی بس گھر والوں سے ملنے کے لیۓ آتا ہوں اور چلا جاتا ہوں۔'

اچھا! کس کے گھر آتے جاتے ہو؟ تمہارے باپ کا نام کیا ہے؟' چاچا نے متجسس ہو کر پوچھا۔

میں شیخ سرفراز ابراہیم کا بیٹا ہوں۔'

شیخ سرفراز! وہ جو لکڑی کا کام کرتا ہے؟'

جی ہاں وہی۔'

ارے واہ پھر تو تم اپنے بھتیجے ہوۓ۔ اپنے سرفرازے کے بیٹے ہو، سرفرازا تو اپنا یار ہے۔ آؤ پھر میرے گھر میں ذرا مجھے مہمان نوازی کا موقع دو۔ یہاں تک آگۓ ہو تو تمہیں ایسے تو نہیں جانے دوں گا۔ یہاں پاس ہی اپنا گھر ہے وہ دیکھو وہ۔۔۔ تیسرے والا مکان میرا ہے۔' چاچا نے مکانوں کی طرف اشارہ کرتے ہوۓ کہا۔

نہیں چاچا ابھی نہیں۔' شہریار بولا۔ 'ابھی تو شام ہونے والی ہے میں بس تھوڑا آگے تک یہ جگہ دیکھ کر واپس جا رہا ہوں پھر کبھی اس طرف آیا تو تمہارے گھر ضرور آؤں گا۔'

اچھا بیٹا جیسے تمہاری مرضی۔ لیکن آنا ضرور۔'

ضرور آؤں گا۔ اچھا چاچا ایک بات تو بتاؤ۔ تمہاری بولی سے نہیں لگتا کہ تم یہاں کے مقامی ہو بلکہ تمہارا انداز تو پنجابیوں سے ملتا جلتا ہے۔'

تم نے ٹھیک پہچانا میرا بچپن پنجاب میں ہی گزرا ہے۔ لیکن جب میں لڑکپن کی عمر کو پہنچا تو میرے والد صاحب کی یہاں کشمیر میں پوسٹنگ ہو گئ تب ہم لوگ یہیں آکر بس گۓ۔۔۔ چالیس برس ہو گۓ ہیں یہاں رہتے ہوۓ اب تو کافی حد تک میری بولی اور میرے بولنے کا انداز یہاں کے لوگوں کی طرح کا ہو گیا ہے۔

ہاں یہ تو ہے۔' شہریار بولا۔ 'ٹھیک ہے چاچا مجھے اجازت دو میں چلتا ہوں۔' شہریار اس سے سلام لے کر آگے چل دیا۔

کچھ دور جا کر اسے وہ سیبوں کا باغ دکھائی دیا اس کے ہونٹوں پر اپنے آپ مسکراہٹ پھیل گئ۔ باغ کے اندر جانے کی بجاۓ اس نے باہر سے ہی باغ کا جائزہ لیا اور چند قدم دور جا کر واپس پلٹ آیا۔ شام ہو گئ تھی اس لیۓ وہ اندھیرا ہونے سے پہلے اپنے کاٹج پہنچ جانا چاہتا تھا۔

جب وہ دریا کے پاس پہنچا تو میلوں دور پہاڑوں کے عقب میں سورج کہیں روپوش ہو چکا تھا اور اس کی چند آخری دم توڑتی سنہری کرنیں پانی کی سطح پر ناچ رہی تھیں۔ چشمے پر پانی بھرنے والی عورتیں جاچکی تھیں۔ پورا علاقہ مکمل طور پر سنسان نظر آرہا تھا۔ وہاں پر سواۓ اس کے قدموں کی چاپ کے اور دریا کی تیز لہروں کے شور کے اور کوئی نہیں تھا۔ وہ چلا جا رہا تھا تبھی اس کے دل میں ایک عجیب طرح کی خواہش جاگی۔ اس کا دل چاہا کہ کاش وہ دریا کے ساتھ ساتھ چلتا ہوا جا سکتا اور جب تک دریا ختم نہ ہوتا وہ چلتا رہتا۔ ایسا خیال اس کے من میں کیوں آیا وہ نہیں جانتا تھا۔ تھوڑی دور جا کر دریا تو ختم نہ ہوا مگر اس کا اپنے کاٹج کی طرف جانے والا راستہ آگیا۔

جب وہ اپنے کاٹج پر پہنچا تو خان بہادر پہلے سے اس کا انتظار کر رہا تھا۔ وہ شہریار کو دیکھ کر بولا۔

بڑی دیر لگا دی صاحب جی کدھر رہ گۓ تھے میں کب سے آپ کا انتظار کر رہا ہوں۔'

میں ذرا دریا کی طرف ٹہلنے کے لیۓ نکل گیا تھا لیکن خیریت تو ہے تم اس وقت یہاں کیا کرہے ہو؟' شہریار اس کے قریب آکر سانس بحال کرکے بولا جو چڑھائی چڑھنے کی وجہ سے پھول گیا تھا۔

صاحب جی آپ کے لیۓ تخفہ لایا ہوں۔' خان بہادر اسے ایک بڑا سا پیکٹ تھماتے ہوۓ بولا۔

یہ کیا ہے خان بہادر؟' شہریار نے خیرت سے پوچھا۔

صاحب جی آپ کی پسند کے سگریٹ لایا ہوں۔' خان بہادر اپنے دائیں ہاتھ سے اپنی بائیں طرف والی مونچھ کو مروڑ کر یوں بولا جیسے اس نے کوئی بہت بڑا کارنامہ سرانجام دیا ہو۔

واہ کیا بات ہے۔ یہ تمہیں کہاں سے مل گۓ؟' شہریار خوش ہو کر بولا۔

بس صاحب جی مل گۓ کہیں سے۔'

تمہارا بہت شکریہ خان بہادر اس کے بغیر تو میرا گزارا مشکل تھا۔'

شکریے کی بات نہیں صاحب جی آپ کا کام کرکے مجھے دل سے خوشی ہوتی ہے۔' خان بہادر اپنے سینے پر ہاتھ رکھ کر بولا۔

ٹھیک ہے وہ تو ٹھیک ہے'۔۔۔ شہریار دھیرے سے بولا۔ 'چلو آؤ پھر آج شام کی چاۓ تم میرے ساتھ پیو۔'

نہیں صاحب جی آپ تھکے ہوں گے اس وقت میں کہاں۔۔۔'

نہیں یار تھکنا کیا ہے یہاں میرے لیۓ کرنے کو ہے ہی کیا جو میں تھکوں گا۔ اور ویسے بھی آج شام سے پہلے میں نے چاۓ نہیں پی تھی تو ابھی شام کے بعد پی لیتے ہیں۔' شہریار اس کا ہاتھ پکڑ کر اسے اندر لے گیا۔

صاحب جی آپ بیٹھیں میں چاۓ بناتا ہوں۔' اندر آکر خان بہادر نے اس سے کہا اور سامنے میز پر پڑی ہوئی کیتلی اٹھا کر چاۓ بنانے میں مصروف ہو گیا۔ شہریار نے بستر پر بیٹھ کر اپنا پسندیدہ سگریٹ سلگا لیا اور ایک لمبا کش لگا کر دھواں ہوا میں چھوڑتے ہوۓ بولا۔ 'یار خان بہادر ایک بات تو بتاؤ تم کیسے سارا دن ان پہاڑوں پر چڑھتے اترتے رہتے ہو میں تو ایک بار نیچے کا چکر لگا لوں تو میری بس ہو جاتی ہے۔'

صاحب جی ابھی آپ کی ان پہاڑوں سے دوستی نہیں نہ ہوئی آپ کچھ دن یہاں رہیں پھر دیکھیں آپ کو ان پہاڑوں سے اچھا کوئی دوست نہیں ملے گا۔' خان بہادر نے کیتلی میں پانی ڈال کر کیتلی کا بٹن آن کیا اور پانی کو گرم ہونے کے لیۓ چھوڑ دیا۔ پھر میز پر پڑے ہوۓ کپوں کو اٹھا کر صاف کرتے ہوۓ بولا۔ 'صاحب جی آپ کی کیا عمر ہوگی جب آپ کشمیر چھوڑ کر پنجاب رہنے کے لیۓ گۓ تھے؟'

شہریار نے دھواں اندر کھینچا پھر باہر نکال کر سوچتے ہوۓ بولا۔ 'عمر۔۔۔! یہی کوئی آٹھ دس سال ہو گی۔ امی کی وفات کے بعد کچھ عرصہ تو مجھے اماں نے پالا پھر جب وہ خود بیمار پڑ گئ تو مجھے میری خالہ کے پاس پنجاب بھیج دیا۔ تب سے وہیں ہوں۔'

میری مانیں تو یہیں آجائیں یہ جگہ بڑی اچھی ہے ان بڑے شہروں سے کئ گناہ اچھی۔' خان بہادر نے اسے صلاح دی۔

ہاں اچھی تو ہے خان بہادر پر۔۔۔' شہریار کسی سوچ میں پڑ گیا۔

پر کیا صاحب جی؟ اگر آپ کو کام کا مسئلہ ہے تو آپ کے ابا کا اپنا کام ہے اسے سنبھال لینا۔'

خان بہادر نے چاۓ کپوں میں ڈالی اور ایک کپ شہریار کو پکڑا کر خود اس کے سامنے کچھ فاصلے پر پڑے ہوۓ موڑھے پر بیٹھ گیا۔

وہ بات تو تمہاری ٹھیک ہے خان بہادر پر ہم جیسے شہروں میں رہنے والے پہاڑوں کی مشقت بھری سخت جان زندگی کے جوکھم نہیں اٹھا سکتے۔ ہم یہاں چند دن آکر سیرو تفریح تو کر سکتے ہیں مگر یہاں مستقل رہنا بڑا مشکل ہے۔'

مشکل کہاں صاحب جی۔ یہاں تو بڑی آسان زندگی ہے مشکل زندگی تو شہروں کی ہے۔ یہاں تو لوگوں کا رہن سہن بڑا سادہ ہے۔ وہاں کے لوگوں کو اپنا معیار بلند رکھنے کے لیۓ بڑی مشقت کرنی پڑتی ہے۔ وہاں کے لوگ قیمتی فرنیچر، اعلیٰ قالین، قیمتی پردے، مہنگے فون اور مہنگی گاڑیاں حاصل کرنے کے چکر میں دن رات کام کرتے رہتے ہیں۔ وہ کیا اسے کہتے ہیں لگژورس سٹایل کہ کیا۔۔۔'

لگژیوریئس لائف سٹائل۔' شہریار نے ہنستے ہوۓ فقرہ مکمل کیا۔

ہاں وہی۔' خان بہادر بولا۔ 'بس اسی لائف سٹائل کے چکر میں اپنی پوری جان گھلا دیتے ہیں۔'

یہ بات تو تم نے بالکل ٹھیک کہی خان بہادر اس لحاظ سے تو واقعی بڑے شہروں کی زندگی مشکل ہے۔' شہریار نے چاۓ کا گھونٹ بھرتے ہوۓ کہا۔

کافی دیر تک خان بہادر شہریار کے پاس بیٹھا رہا۔ جب وہ چلا گیا تو شہریار نے جیب میں ہاتھ ڈال کر وہ کنگن نکالا جو اسے پیڑوں کے جھنڈ کے پاس ملا تھا۔ کتنی دیر تک وہ کنگن کو ادھر ادھر گھما کر دیکھتا رہا۔

اگلے دن وہ دریا کے کنارے ٹھیک اسی جگہ پر جا کر بیٹھ گیا جہاں سے راستہ اوپر کی طرف جاتا تھا۔ کل کی نسبت آج وہ کچھ جلدی آگیا تھا اس لیۓ اسے لگا کہ وہ لڑکیاں ابھی یہاں نہیں پہنچیں ہوں گی۔ اس نے پتھر کے ساتھ ٹیک لگائی اور جیب سے کنگن نکال کر اس کے ساتھ کھیلنے میں مصروف ہو گیا۔ کچھ دیر انتظار کرنے کے بعد اسے وہ لڑکی دور سے آتی ہوئی دکھائی دی۔ لیکن آج دوسری دونوں لڑکیاں اسکے ساتھ نہیں تھیں وہ اکیلی چلی آرہی تھی۔ وہ راستے میں بیٹھا تھا اس لیۓ جب وہ لڑکی قریب آئی تو وہ اٹھ کر کھڑا ہو گیا۔

آپ ۔۔۔' لڑکی نے اسے دیکھ کر جھجھکتے ہوۓ پوچھا۔

جی میں! کل آپ کی غالباً کوئی چیز کھو گئ تھی جسے ڈھونڈنے کے لیۓ آپ دوبارہ اوپر گئ تھیں؟'

جی ہاں وہ میرا کنگن۔۔۔'۔

یہی ہے؟' شہریار اسے کنگن دکھاتے ہوۓ بولا۔

ہاں جی یہی ہے۔' لڑکی نے اس سے کنگن لے لیا۔ 'پر یہ آپ کو کہاں اور کیسے مل گیا؟ یہ تو کھو گیا تھا۔'

بس یوں سمجھیں مجھے کھوئی ہوئی چیزیں تلاش کرنے کا شوق ہے۔ بدقسمتی سے ان میں سے اکثر مجھے نہیں ملتیں، مگر آپ کی خوش قسمتی تھی کہ یہ مجھے بغیر تلاش کیۓ ہی مل گیا۔'

آپ کا بہت شکریہ۔ میں نے تو سمجھا تھا کہ یہ مجھے اب کبھی نہیں ملے گا اسے میں نے ہمیشہ کے لیۓ کھو دیا ہے۔ مگر آپ کا شکریہ کہ آپ نے اسے مجھے واپس لوٹا دیا۔'

شکریہ کی بات نہیں یہ مجھے اتفاق سے مل گیا تھا تو میں نے اسے آپ تک پہنچا دیا۔' شہریار خاموش ہوا پھر کچھ سوچ کر بولا۔ 'آج آپ کی وہ دونوں دوستیں نہیں آئیں؟'

نہیں آج وہ کسی کام کی وجہ سے مصروف تھیں اس لیۓ نہیں آسکیں۔ میں بھی ان کے بغیر کبھی دریا کی طرف نہیں آتی مگر آج پتہ نہیں کیوں صبح سے میرا یہاں آنے کو دل چاہ رہا تھا۔ اس لیۓ میں اکیلی ہی چلی آئی۔'

شاید آپ کا کنگن آپ کو اپنی طرف کھینچ رہا تھا۔'

ہاں شاید۔' لڑکی نے ہنستے ہوۓ جواب دیا۔

آپ یہاں روز آتی ہیں؟' شہریار نے پوچھا۔

روز تو نہیں آتی لیکن ان دنوں اکثر آجاتی ہوں۔'

ہونہہ۔'

چند لمحے خاموشی کے بعد لڑکی بولی۔ 'ٹھیک ہے میں چلتی ہوں۔'

آج اوپر نہیں جائیں گی؟'

نہیں آج یہیں تک کافی ہے۔ میں بس دریا تک ٹہلنے کے لیۓ نکلی تھی۔'

کل آئیں گی آپ؟' شہریار نے دوبارہ ایک سوال کیا۔

معلوم نہیں۔' لڑکی نے کندھے اچکاتے ہوۓ جواب دیا۔

ٹھیک ہے اگر آپ کو معلوم ہو جاۓ تو مجھے بتانے آجانا۔' شہریار نے مسکراتے ہوۓ کہا۔

بالکل ٹھیک ہے۔' لڑکی نے ہنستے ہوۓ کہا اور آگے چل پڑی۔

شہریار پیچھے سے آواز دے کر بولا۔ 'اپنا نام تو بتاتی جائیں؟'

نام جان کر آپ کو کیا کرنا ہے؟' لڑکی وہیں کھڑے ہو کر بولی۔

مجھے پتہ تو ہو کہ کون سی لڑکی مجھے معلوم کرانے آۓ گی۔'

ہونہہ۔ اچھا۔۔۔ تو یہ بات ہے۔۔۔ نام جاننے کے لیۓ تو آپ کو فلیش بیک میں جانا پڑے گا۔' لڑکی کچھ سوچتے ہوۓ بولی۔ 'کل جب میں کنگن ڈھونڈھنے آئی تھی تو نیچے سے میری دوست نے میرا نام پکارا تھا۔ اب آپ اپنا ریوائنڈ بٹن دبائیں اور یاد کرنے کی کوشش کرتے رہیں اگر آپ کی یادداشت اچھی ہوئی تو آپ کو یاد آجاۓ گا۔ خداخافیظ۔ میں چلتی ہوں۔' لڑکی آگے بڑھ گئ۔

لڑکی کے جانے کے بعد شہریار کافی دیر تک کل والے واقعے کو یاد کرکے اس کا نام سوچتا رہا مگر اسے کچھ یاد نہ آیا۔ اسے یہ تو معلوم تھا کہ اس کی دوست نے اس وقت اس کا کوئی نام لیا تھا مگر دور ہونے کی وجہ سے وہ ٹھیک طرح سے سن نہیں پایا تھا۔ اس نے سگریٹ سلگایا اور وہیں پتھر پر بیٹھ کر اس کا نام یاد کرنے لگا۔ کافی دیر غور کرنے پر بھی جب اسے یاد نہ آیا تو وہ اٹھ کر اپنے گھر کی طرف چل دیا۔ راستے میں بھی وہ اس کا نام یاد کرنے کی کوشش کرتا رہا مگر کامیاب نہ ہوا۔

رات کو وہ اپنے کاٹج میں سویا ہوا تھا کہ تیز ہوا کے جھکڑ چلنے لگے۔ لکڑی کا دروازہ بند تھا مگر پھر بھی بجنے لگا تھا۔ شور سے اس کی آنکھ کھل گئ تو وہ اٹھ کر بستر پر بیٹھ گیا۔ دروازے کے بجنے اور باہر درختوں کی ٹہنیوں کے شور سے اسے اندازہ ہو گیا تھا کہ آندھی کافی تیز ہے۔ وہ اٹھا اور لکڑی کے ایک چھوٹے سے میز کو گھسیٹ کر دروازے کے آگے رکھ دیا جس سے دروازہ بجنا بند ہو گیا۔ پھر کھڑکی کے قریب آیا اور کھڑکی کھول دی۔ ایک تیز یخ ہوا کا جھونکا اس کے جسم سے ٹکرایا، اس نے فوراً کھڑکی بند کر دی۔ بستر سے باہر نکلنے پر اسے سردی محسوس ہونے لگی تھی۔ وہ جلدی سے دوبارہ بستر میں گھس گیا۔ اس نے وقت دیکھا رات کے دو بج رہے تھے۔ اسے آج شام کو اس لڑکی سے ہونے والی ملاقات یاد آگئ۔ اپنے آپ اس کے ہونٹوں پر مسکراہٹ پھیل گئ۔ وہ پھر سے اس کا نام یاد کرنے لگا۔ بہت یاد کرنے پر بھی بات نہ بنی تو اس نے سوچنا چھوڑ دیا اور اپنے دوست کو فون ملا لیا۔ اس کی اپنی نیند اڑ چکی تھی اور اسے یہ علم تھا کہ اس کا دوست اس وقت یقیناً بیدار ہو گا اس لیۓ اس نے اپنے دوست کو کال ملائی اور اس کی توقع کے عین مطابق اس کے دوست نے فون اٹھایا اور اٹھاتے ہی پوچھا۔ 'خیریت ہے اس وقت تک سوۓ نہیں؟ کہیں ابھی تک اس کا نام تو یاد نہیں کر رہے؟'

نہیں یار سویا ہوا تھا آندھی نے جگا دیا ہے۔ دوبارہ نیند نہیں آرہی تھی تو تمہیں فون کر لیا۔'

وہ تو چلو اچھا کیا۔ پر کچھ یاد بھی آیا کہ نہیں؟' اس کے دوست نے پوچھا۔

ابھی تک تو کچھ بھی یاد نہیں آیا۔' شہریار نے جواب دیتے ہوۓ کہا۔ 'سمجھ نہیں آرہی کہ آخر اس نے کیا نام لیا تھا۔ مجھے اس وقت دھیان سے سننا چاہیۓ تھا۔'

کوئی بات نہیں آجاۓ گا۔ نہ آیا تو اگلی ملاقات پر پوچھ لینا۔' اس کا دوست بولا۔

یار ایک منٹ میرا خیال ہے میں سارا واقعہ شروع سے دہراتا ہوں شاید اس سے کچھ یاد آجاۓ۔'

ہاں ٹھیک ہے شروع سے سناؤ۔' اس کے دوست نے کہا۔

وہ پھر سے کل کا واقعہ دہرانے لگا کہ کیسے وہ دریا کے پاس جا کر بیٹھا اسے کچھ آوازیں آئیں پھر وہ اوپر گیا ، لڑکیوں کی باتیں سنیں اور اس کے بعد وہ لڑکی سامنے سے دوڑتی ہوئی آئی۔ وہاں ان کی آپس میں تھوڑی دیر تکرار ہوئی۔ پھر وہ تینوں لڑکیاں نیچے اتر گئیں۔ چند لمحوں بعد وہ لڑکی دوبارہ اوپر آئی اور کچھ دیر بعد نیچے سے اک لڑکی بولی۔ 'مہرو ملا کہ نہیں'۔ بات کرتے ہوۓ اچانک سے اس کا نام اس کی زبان پر آگیا۔ وہ چلایا 'ہاں مہرو تھا اس کا نام۔۔۔ ہاں بلکل یہی تھا۔ 'مہرو'۔۔۔ کیا پیارا نام ہے مہرو۔'

خاک پیارا ہے۔ یہ بھی کوئی نام ہے 'مہرو'۔۔۔'اس کا دوست بولا۔ 'اس کا اصل نام کوئی اور ہو گا۔ یہ تو اس کی دوستیں اسے پیار سے کہتی ہوں گی۔'

ہاں تو پیارے نام پیار سے ہی کہے جاتے ہیں۔۔۔مہرو۔۔۔پیاری مہرو'۔ شہریار کھوۓ ہوۓ انداز سے یوں بولا جیسے وہ لڑکی اس کے ساتھ ہو اور وہ اس کو پکار رہا ہو۔

'جاگ جاؤ بیٹا جاگ جاؤ۔ آنکھیں کھولو ابھی سے اس کے خواب دیکھنے شروع کر دیۓ ابھی تو پتہ نہیں اس سے تمہاری دوبارہ ملاقات ہوتی بھی ہے کہ نہیں۔'

ہو گی ضرور ہو گی۔ ہمارا دوبارہ ملنا آسمانوں میں لکھا جا چکا ہے۔' شہریار اسی کھوۓ ہوۓ انداز سے بولا۔

آسمانوں میں لکھا جا چکا ہے تو پھر تمہاری ملاقات بھی آسمانوں پر جا کر ہی ہو گی۔' اس کے دوست نے ہنستے ہوۓ کہا۔

کچھ دیر تک دونوں باتیں کرتے رہے پھر شہریار نے فون بند کر دیا اور مہرو کے ساتھ ہونے والی دو تین ملاقاتوں کو یاد کرتے کرتے اسے نیند آگئ۔

دن کا وقت تھا سورج کی چند کرنیں درختوں کے جھنڈ میں سے گزر رہی تھیں۔ شہریار ایک درخت کے پاس ہاتھ میں چاقو لیۓ کھڑا تھا اور چاقو سے درخت کو کھرچ رہا تھا۔ اس کے پیچھے کچھ فاصلے پر مہرو ایک درخت سے ٹیک لگاۓ بیٹھی تھی۔ اس نے آج سرخ رنگ کا سکارف پہن رکھا تھا۔

شہریار! یہ آپ پچھلے بیس منٹ سے اس بے چارے درخت کو کیوں چھیل رہے ہیں اس نے آپ کا کیا بگاڑا ہے۔' مہرو اسے اس عجیب و غریب کام میں مگن دیکھ کر بولی۔

بتاتا ہوں ذرا صبر تو کرو۔' شہریار نے اپنا کام جاری رکھتے ہوۓ کہا۔

یہ تو آپ کب سے کہہ رہے ہیں، بتاتا ہوں بتاتا ہوں۔ اب بتا بھی دیں۔'

بس ایک منٹ اور ابھی بتاتا ہوں۔' شہریار نے دو تیں بار چاقو درخت پر مارا اور پیچھے ہٹ کر بولا۔ 'آؤ دیکھو اور بتاؤ کیسے لگ رہے ہیں۔'

مہرو اپنی جگہ سے اٹھی اور درخت کے قریب جا کر دیکھ کر بولی۔ 'یہ کیا ہم دونوں کے نام۔۔۔یہ یہاں کیوں لکھے؟'

میں نے اس درخت پر ہم دونوں کے نام لکھ دیۓ ہیں یہ نشانی کے طور پر ہمیشہ یہاں رہیں گے۔' شہریار بولا۔ 'جب ہم بوڑھے ہو جائیں گے تو یہاں آکر دیکھیں گے، یہ نام ہمیں اِن دنوں کی یاد دلائیں گے جو ہماری زندگی کے خوبصورت ترین دن ہیں۔ یہ نام ہمیں اس جگہ کی یاد دلائیں گے جہاں ہم نے پہلی بار اک دوسرے کو دیکھا تھا۔' شہریار ایک دو قدم پیچھے ہٹا اور اپنے بازو پھیلا کر بلند آواز سے بولا۔ 'یہ اونچے اونچے پیڑ اور اس پیڑ پر کھدے ہمارے نام ہماری محبت کی یادگار بنے گے مہرو۔'

بس بس زیادہ جوش میں آنے کی ضرورت نہیں اگر کسی نے سن لیا تو محبت کی یادگار کی بجاۓ ہماری یہاں تربت بنے گی۔' مہرو نے اسے ٹوکتے ہوۓ کہا۔

یہ تو اور بھی اچھا ہے۔' شہریار بولا۔ 'لوگ ہماری قبروں پر پھول چڑھانے آئیں گے اور کہیں گے اس خود غرضی، مفاد پرستی اور مادیت پرستی کے دور میں جہاں لوگ صرف پیسے سے، جائیداد سے اور چیزوں سے محبت کرتے ہیں وہاں یہ دو لوگ تھے جو صرف انسانوں سے اور قدرت سے محبت کرتے تھے۔ ہمارے نام سچی اور خالص محبت کی علامت کے طور پر لیۓ جائیں گے۔'

واہ واہ جناب کیا اعلیٰ بات آپ نے فرمائی ہے۔ مگر مسٹر شہریار ابراہیم بات دراصل یہ ہے کہ اگر ابھی ہمیں کسی نے دیکھ لیا تو مرنے کے بعد ہم پر پھول چڑھانے کی بات تو بعد کی ہے فی الحال لوگ ہمیں پتھر مارنے ضرور آئیں گے۔ تو بہتر یہی ہے ہم یہاں سے کھسک لیں۔' مہرو اس کا ہاتھ پکڑ کر اسے ساتھ لے جاتے ہوۓ بولی۔

وہ تو ٹھیک ہے پر ادھر کہاں جا رہی ہو؟' شہریار نے اس کے پیچھے چلتے ہوۓ پوچھا۔

آپ نے یہاں کی سب سے اچھی جگہ تو ابھی تک دیکھی ہی نہیں۔ میرے ساتھ آئیں میں آپ کو یہاں کی سب سے خوبصورت جگہ دکھاتی ہوں۔'

تقریباً پانچ منٹ چلنے کے بعد وہ پھولوں کے ایک قدرتی باغ میں داخل ہو گۓ۔ باغ میں کئ رنگوں کے خوشنما پھول تھے جن پر رنگ برنگی خوبصورت تتلیاں اڑتی پھرتی تھیں۔ شہریار نے اتنے رنگوں کے پھول اور اس قدر دلنشیں تتلیاں زندگی میں پہلی بار دیکھی تھیں۔ وہ باغ کو دیکھ کر مبہوت سا ہو گیا۔ اس قدر حسن اور دلکشی نے اسے سحرزدہ سا کر دیا تھا۔ کتنی دیر تک وہ دانتوں میں انگلیاں دیۓ محوِ خیرت پھولوں اور تتلیوں کو دیکھتا رہا۔ مہرو نے اسے کھویا ہوا دیکھا تو چٹکی بجا کر کہا 'کہاں کھو گۓ جناب یہ تو کچھ بھی نہیں ابھی تو سارا باغ آگے ہے۔' شہریار جیسے کسی دوسری دنیا سے واپس آیا۔ 'یہ جگہ تو حقیقت میں جنت ہے میں تو اپنی ساری عمر اس باغ میں گزار دینا چاہوں گا۔'

شہریار نے پھول پر بیٹھی ہوئی ایک تتلی کو پکڑ کر ہتھیلی پر بٹھانا چاہا مگر وہ اڑ گئ۔ پھر وہ دونوں تتلیوں کے پیچھے بھاگنے لگے۔ بھاگتے بھاگتے مہرو کا پاؤں پھسلا اور وہ نیچے گر گئ۔ اس کا سکارف سر سے ڈھلک گیا اور اس کے بال بکھر گۓ۔ شہریار نے آگے بڑھ کر اسے اٹھانا چاہا مگر اسے دیکھتا رہا۔ بال درست کرتے ہوۓ مہرو کی نظر اس پر پڑی تو اس نے پوچھا۔ 'ایسے کیوں دیکھ رہے ہیں؟'

ایسے کیسے؟' شہریار اسی انداز میں اسے دیکھتے ہوا بولا۔

ایسے نہ دیکھیں۔' مہرو نے التجا کی۔

تو کیسے دیکھوں۔' وہ دوبارہ اسی انداز سے بولا۔

ایسے تھوڑی دیکھتے ہیں۔'

تو کیسے دیکھتے ہیں؟'

آپ اس قدر ذوق و شوق سے بالکل جنونیوں کی طرح دیکھ رہے ہیں۔' مہرو نے کہا۔

شہریار ہنسا۔ پھر شعر پڑھنے لگا۔

'ابھی تو تنقید ہو رہی ہے میرے مذاقِ جنوں پہ لیکن

تمہاری زلفوں کی برہمی کا سوال آیا تو کیا کرو گے؟'

شعر سن کر مہرو مسکرائی اور سکارف درست کرتے ہوۓ ایک طرف چلنے لگی۔

اچانک سے زور زور سے دستک کی آوازیں آنے لگیں۔ شہریار کی آنکھ کھلی تو اس نے دیکھا کہ وہ اپنے کاٹج میں بستر پر پڑا ہے۔ چند لمحوں تک اسے سمجھ نہ آئی کہ وہ کہاں ہے۔ باہر سے دروازہ بجنے کی آوازیں مسلسل آرہی تھیں۔ وہ جلدی سے اٹھا اور دروازہ کھول دیا۔ باہر دن نکل آیا تھا اور خان بہادر دروازے پر کھڑا تھا۔ وہ اندر آکر بولا۔ 'صاحب جی آج اتنی دیر ہو گئ ہے آپ نیچے نہیں آۓ۔ باہر دیکھیں کتنا دن نکل آیا ہے۔ مجھے اماں نے بھیجا ہے کہہ رہی تھی جا کر دیکھو شہریار ابھی تک کیوں نہیں آیا۔ آپ کو کیا ہوا؟ ابھی تک سوۓ ہوۓ تھے آپ کا فون بھی بند تھا۔'

خان بہادر بولے جا رہا تھا اور شہریار کو لگ رہا تھا کہ وہ کسی اور دنیا سے بول رہا ہے اور شہریار کسی اور دنیا کا باسی ہے۔ جب اسے کچھ ہوش آیا تو وہ آنکھیں ملتا ہوا بولا۔ 'ہاں وہ رات کو دیر سے سویا تھا اس لیۓ آنکھ نہیں کھلی۔ آؤ بیٹھو۔' شہریار نے آگے بڑھ کر کھڑکی کھولی تو کھڑکی سے گزر کر دھوپ کمرے کے فرش کے آدھے حصے پر پڑنے لگی۔

نہیں صاحب جی میں بیٹھوں گا نہیں مجھے اس وقت کئ کام ہیں۔ میں جا رہا ہوں آپ جلدی آجانا نہیں تو اماں پریشان ہوں گی۔' خان بہادر کمرے سے باہر نکل گیا اور شہریار کھڑکی میں کھڑے ہو کر باہر دھوپ میں چمکتے پہاڑوں اور دریا کو دیکھنے لگا۔ اس کے ذہن میں رات بھر کا خواب گھوم رہا تھا۔

پچھلے پہر وہ دریا پر گیا اور شام تک اس لڑکی کا انتظار کرتا رہا مگر وہ اس دن نہ آئی۔ وہ افسردہ صورت لیۓ واپس لوٹ آیا۔ جب وہ گھر آیا تو اس کی دادی نے اس سے کہا کہ اس نے ایک جگہ پر اس کے رشتے کی بات کی ہے۔ شہریار نے اس کی طرف دیکھا اور خاموشی سے اس کی بات سننے لگا۔ دادی بولی ' رشتہ لے کر آنے والی بتا رہی تھی کہ بڑے اچھے لوگ ہیں اگر ہم لوگ جلدی ہاں کر دیں گے تو بہتر ہو گا کیونکہ ان کے پاس ایک اور رشتہ آیا ہے یہ نہ ہو آپ سے پہلے وہ اپنی لڑکی کا وہاں رشتہ طے کر دیں۔ میں نے اس سے کہا کہ شہریار لڑکی دیکھ کر کوئی فیصلہ کرے گا تو وہ لڑکی کی تصویر بھی لے کر آئی ہے۔ تم دیکھ لو اگر تمہیں پسند ہے تو میں کل تمہارے ابے کے ساتھ جا کر ان سے مل لیتی ہوں۔' دادی دراز سے تصویر نکال کر اسے دکھاتے ہوۓ بولی۔

نہیں اماں مجھے نہیں کرنی کہیں شادی وادی۔' شہریار تصویر دیکھے بغیر بولا۔

لے اب یہ کیا بات ہوئی۔ اس دن تو تو راضی تھا اب تجھے کیا ہوا۔' دادی نے خیرت سے پوچھا۔

بس اماں میں ابھی شادی نہیں کرنا چاہتا ابھی اس بات کو رہنے دو۔' شہریار اٹھا اور میز سے چابیاں اٹھا کر بولا۔ 'میں اوپر جا رہا ہوں۔ آج بھوک نہیں کھانا نہیں کھاؤں گا۔'

آۓ ہاۓ ایک بار تصویر تو دیکھ لو۔ کیا پتہ تمہیں اچھی لگے۔'

نہیں اماں میں چلتا ہوں مجھے نہیں دیکھنی کوئی بھی تصویر۔' شہریار باہر نکل گیا۔ اس کے جانے کے بعد اماں کتنی دیر تک بڑبڑاتی رہی۔ 'پتہ نہیں آج کل کے لڑکوں کو کیا ہو گیا ہے۔ ان کی تو کسی بات کی کچھ سمجھ نہیں آتی۔'

شہریار اگلے کئ دنوں تک دریا کے چکر لگاتا رہا مگر وہ لڑکی دوبارہ اسے نہ دکھی۔ یہاں تک کہ وہ اوپر جا کر سیبوں کے باغ تک بھی چکر لگا آیا مگر نہ تو اسے مہرو اور نہ ہی اس کی دوستیں اسے کبھی دکھائی دیں۔ وہ ہر روز یہ امید لیۓ دریا پر جاتا کہ شاید آج اسے وہ وہاں مل جاۓ مگر ہر روز شام کو اسے مایوس لوٹنا پڑتا۔

ایک شام وہ دریا سے واپس آکر دادی اماں کے پاس بیٹھ کر کھانا کھا رہا تھا کہ دادی اسے گم سم دیکھ کر بولی۔ 'تم نے جس رشتے سے انکار کیا تھا انہوں نے اپنی لڑکی کا رشتہ کہیں اور کر دیا ہے۔ اتنا اچھا رشتہ تم نے ٹھکرا دیا۔ لڑکی بھی اچھی تھی تم تصویر دیکھ لیتے تو تمہیں پسند آتی۔'

شہریار اس کی بات سنی ان سنی کرتے ہوۓ خاموشی سے کھانا کھاتا رہا۔ اس کے دل میں ایک بار بھی دادی کی تصویر والی لڑکی کا خیال نہ آیا، نہ ہی اسے اس بات کا افسوس تھا کہ اس نے بقول دادی کے ' گھر چل کر آۓ اتنے اچھے رشتے کو گنوا دیا ہے۔' وہ تو ابھی بھی مہرو کے متعلق سوچ رہا تھا اور اس بارے میں غور کر رہا تھا کہ اس سے ملنے کی یا اسے دیکھنے کی کوئی صورت کیونکر پیدا ہو۔ ایک ترکیب اس کے ذہن میں آئی کہ کیوں نہ وہ گاؤں میں اس گلی کی طرف جاۓ اور اس گھر کے سامنے سے گزرے جس گھر کے دروازے پر اس نے اسے ایک بار کھڑے دیکھا تھا۔

لہذا اگلی صبح کو وہ اپنی قسمت آزمانے اس گلی میں پہنچ گیا اور اس گھر کے پاس سے دو تین چکر لگاۓ۔ کچھ دیر تک اس گلی میں کھڑا بھی رہا مگر وہ اسے کہیں دکھائی نہ دی۔ پچھلے پہر وہ دریا کے کنارے اپنی پہلے والی جگہ پر جا کر بیٹھ گیا۔

تقریباً آدھے گھنٹے تک وہ دریا میں کنکریاں پھینکنے میں مشغول رہا۔ اس نے پتھر دریا میں پھینکا، پتھر پانی کی سطح پر لہریں بناتا ہوا لڑھتا چلا گیا۔ وہ ایک اور کنکر اٹھا کر پھینکنے والا تھا کہ اس کی نظر دور سے آتی ہوئی دو لڑکیوں پر پڑی۔ اس کا ہاتھ وہیں رک گیا۔ وہ لڑکیوں کو آتا ہوا دیکھتا رہا جب لڑکیاں قریب آئیں تو اس نے انہیں پہچان لیا۔ یہ دونوں لڑکیاں مہرو کی دونوں سہیلیاں تھیں۔ اس نے ان کے پیچھے دیکھنے کی کوشش کی کہ شاید مہرو ان کے تعاقب میں آرہی ہو مگر ان کے پیچھے کوئی بھی نہیں تھا۔ جب وہ لڑکیاں پاس آئیں تو وہ اٹھ کر کھڑا ہوگیا اور انہیں سلام کیا۔ لڑکیوں نے سلام کا جواب دیا۔ ایک لڑکی بولی۔ 'آپ ہیں جنہوں نے مہرو کو اس کا کنگن واپس لوٹایا تھا؟'

جی۔ میں ہی ہوں۔۔۔وہ خود کہاں ہیں آپ کے ساتھ نہیں آئیں؟'

نہیں۔' دوسری لڑکی بولی۔ 'اسی نے ہمیں آپ کے پاس یہ کنگن لوٹانے کے لیۓ بھیجا ہے۔' لڑکی نے کنگن اس کے آگے کرتے ہوۓ کہا۔

شہریار خیرت سے اسے دیکھنے لگا۔ لڑکی اس کی کیفیت بھانپ کر بولی۔ 'جانتی ہوں آپ کو خیرت ہو رہی ہو گی کہ یہ کنگن مجھے واپس کیوں کیا جا رہا ہے۔ اس کے لیۓ میں بس اتنا بتا دیتی ہوں کہ مہرو نے ہمیں کہا کہ یہ کنگن آپ کو دے دوں کیونکہ کل مہرو کی شادی ہے۔'

شہریار کو لگا کہ اس کے اوپر کوئی بھاری چیز گر گئ ہے۔ قریب تھا کہ وہ لڑکھڑا جاتا مگر اس نے اپنے آپ کو سنبھالا اور لڑکیوں سے پوچھا۔ 'میں آپ کی بات کا مطلب ابھی بھی نہیں سمجھا ایک لڑکی جو میرا نام تک نہیں جانتی وہ اپنی شادی سے ایک دن پہلے مجھ تک یہ کنگن پہنچاتی ہے مخض اس لیۓ کہ یہ کنگن جو اس سے کچھ دن پہلے کہیں کھو گیا تھا اور جو اتفاق سے مجھے مل گیا اور میں نے اسے واپس لٹا دیا۔ صرف اتنی سی بات پر۔۔۔'

اتنی سی بات نہیں شہریار صاحب۔' شہریار اس کے منہ سے اپنا نام سن کر بہت خیران ہوا۔

آپ میرا نام کیسے جانتی ہیں؟'

مہرو نے بتایا ہے۔' لڑکی نے جواب دیا۔

لیکن میں نے تو انہیں اپنا نام نہیں بتایا تھا۔' شہریار نے کہا۔

جانتی ہوں۔' پہلی لڑکی بولی۔ 'آپ نے مہرو کو آپ اپنا نام نہیں بتایا تھا۔ دیکھیۓ شہریار صاحب جو بات میں آپ کو بتانے جا رہی ہوں اس پر آپ بلکل بھی یقین نہیں کریں گے۔ مگر حقیت یہ ہے کہ بات بالکل سچ ہے۔'

کون سی بات؟' شہریار نے پوچھا۔

بتاتی ہوں۔' لڑکی بولی۔ 'پہلے آپ یہ بتائیں کیا آپ کو یاد ہے کہ آپ مہرو سے ایک بار پہلے بھی مل چکے ہیں؟ آپ ایک بار ہماری گلی سے گزر رہے تھے جب مہرو نے آپ کو پہلی بار دیکھا تھا۔ اس وقت وہ ہمارے گھر کے دروازے پر کھڑی تھی اور آپ گلی میں سے اس گھر کے بالکل سامنے سے گزرے تھے۔ آپ نے مہرو کو دیکھا تھا پر شاید آپ کو وہ یاد نہ رہی ہو مگر اسے آپ بہت اچھی طرح یاد ہو گۓ تھے۔ مہرو کو آپ بہت اچھے لگے تھے۔ اور پھر اتفاق سے اس پہاڑ پر اس نے آپ کو دوبارہ دیکھا جب وہ کنگن تلاش کرنے آئی تھی۔' لڑکی نے اوپر چوٹی کی طرف اشارہ کرتے ہوۓ کہا۔ 'اس کے بعد مہرو آپ کو کافی یاد کرنے لگی تھی۔' لڑکی خاموش ہوئی چل کر ایک طرف گئ اور ایک پتھر سے ٹیک لگا کر بولی۔ 'آپ جانتے ہیں اس دن مہرو ہم دونوں کے نہ آنے کے باوجود اکیلی اس طرف کیوں چلی آئی تھی جس دن آپ نے اس کو یہ کنگن واپس لٹایا تھا۔'

کیوں؟' شہریار نے بالکل آہستہ سے کہا۔

وہ صرف آپ کے لیۓ آئی تھی۔ اس نے سوچا کہ شاید آپ یہاں پھر سے آۓ ہوں اور وہ آپ کو دیکھ لے۔ یہ بات اس نے آپ کو اس وقت تو نہیں بتائی مگر یہ بات بالکل سچ ہے۔'

شہریار اس کی باتیں سن کر خیران ہو رہا تھا۔ لڑکی اس کی خیرانی بھانپ کر دوبارہ بولی۔ 'ابھی تو اصل خیرانی کی بات آگے ہے شہریار صاحب! ابھی وہ بات تو میں نے آپ کو بتائی ہی نہیں۔'

جی ہاں یہ ٹھیک کہہ رہی ہے۔' اس بار دوسری لڑکی بولی۔ 'ابھی جو بات آپ کو پتہ چلے گی اس پر آپ کو بالکل بھی یقین نہیں آۓ گا۔ وہ کچھ یوں ہے شہریار صاحب کہ چند دن پہلے مہرو نے ایک خواب میں آپ کو دیکھا تھا۔ اس نے دیکھا کہ آپ دونوں کسی پھولوں کے باغ میں گھوم رہے ہیں جہاں تتلیاں اڑ رہی ہیں۔ اس کے علاوہ آپ دونوں نے درختوں پر اپنے نام بھی لکھے تھے۔ مہرو کو لگتا ہے یہ خواب نہیں تھا بلکہ یہ سب حقیقت میں ہوا ہے۔ اسے محسوس ہوتا ہے کہ اس نے آپ سے اصل میں ملاقات کی تھی۔ یہی نہیں بلکہ اسے آپ کا نام بھی اسی خواب کے ذریعے پتہ چلا تھا۔'

ہے نہ خیرت کی بات۔' پہلی لڑکی بولی۔ 'ہم جانتی ہیں آپ سوچ رہے ہوں گے کہ ہم ایسے ہی گپ ہانک رہی ہیں مگر یہ بات سچ ہے شہریار صاحب۔ ورنہ آپ ہی بتائیں ہمیں آپ کا نام کیسے پتہ چلتا؟'

میں جانتا ہوں آپ سچ بول رہی ہیں۔' شہریار نے کہا۔ 'پر آپ یہ بتائیں جب سب کچھ ایسا تھا جیسا آپ بیان کر رہی ہیں تو پھر یہ شادی اور کنگن لوٹانے کا کیا مطلب ہے؟'

شادی کا فیصلہ تو اس کے ہاتھ میں نہیں تھا۔ شاید یہ قدرت کا فیصلہ تھا۔ اس کی اتنی جلدی شادی طے ہو جاۓ گی کسی نے بھی نہیں سوچا تھا۔ ابھی چند دن پہلے رشتہ آیا اور آج اس کی شادی ہے۔'

لیکن اسے کچھ کہنا تو چاہیۓ تھا گھر والوں کو کچھ بتانا تو چاہیۓ تھا۔'

وہ کچھ نہیں کر سکتی تھی شہریار صاحب۔ کچھ ایسے حالات پیدا ہو گۓ تھے، ایسے مسائل درپیش آگۓ تھے کہ اس کے گھر والے اس شادی سے انکار نہ کر سکے اور نہ ہی وہ کچھ بول سکی۔' لڑکی بات کرکے خاموش ہوئی تو چند لمحے شہریار کو یوں لگا جیسے ساری فضا پر سکوت طاری ہو گیا ہے۔ وہ کچھ کہنا چاہتا تھا مگر سمجھ نہیں پا رہا تھا کہ کیا بات کرے۔ اب کچھ بھی کہنا بیکار تھا۔ وہ ابھی یہ سوچ رہا تھا کہ ایک لڑکی بولی۔ 'ہم چلتی ہیں کافی دیر ہو گئ ہے۔'

وہ جانے لگیں تو شہریار انہیں روک کر بولا۔ 'ٹھہریں۔' لڑکیاں رک گئیں۔ شہریار بولا۔ 'آپ نے تو مجھے آج خوب خیران کیا ہے لیکن چند باتیں میری بھی سن لیں تا کہ آپ کو خیران کرنے کا مجھے بھی کچھ موقع مل جاۓ۔' شہریار نے گہرا سانس لیا اور دوبارہ بولنا شروع کیا۔ 'آپ نے کہا کہ اس نے مجھے پہلی دفعہ گھر کے پاس سے گزرتے ہوۓ دیکھا تھا تو اسی وقت میں اسے ہمیشہ کے لیۓ یاد ہو گیا تھا۔ لیکن آپ یہ نہیں جانتیں کہ میں وہاں اسی کی تلاش میں گیا تھا۔'

لڑکیوں نے اسے خیرت سے دیکھا۔ 'جی ہاں۔ میں نے اسے ایک دن پہلے آپ دونوں کے ساتھ ٹھیک اس جگہ پر دریا کے کنارے ٹہلتے ہوۓ دیکھا تھا اور اس وقت وہ مجھے ہمیشہ کے لیۓ یاد ہو گئ تھی۔ اگلے دن میں اس لیۓ گاؤں کی طرف نکلا تھا کہ شاید وہ مجھے وہاں دوبارہ دکھ جاۓ۔ اور یہ کہ میں اس کے بعد جتنی دفعہ بھی دریا کی طرف آیا تھا اسی کی تلاش میں آیا تھا۔' شہریار خاموش ہوا اور چند قدم چل کر ان لڑکیوں کی طرف پیٹھ کر کے کھڑا ہو گیا۔ چند لمحوں بعد مڑ کر اپنا رخ دوبارہ لڑکیوں کی طرف کیا اور پھر سے بولنا شروع کیا۔ 'لیکن یہ بات اتنی خیرانی کی نہیں اس سے بھی خیرانی کی بات یہ ہے کہ چند دن پہلے میں نے بھی بالکل ویسا ہی خواب دیکھا جیسا ابھی آپ نے بتایا کہ اس نے دیکھا تھا۔ خواب سے بیدار ہونے پر مجھے بھی ایسے ہی محسوس ہوا تھا کہ جیسے یہ سب حقیقت میں ہوا ہے۔ میں بھی اس بات کو بالکل بھی سمجھ نہیں سکا مگر یہ سچ ہے۔' اس بار خیران ہونے کی باری لڑکیوں کی تھی۔ 'مجھے بس اتنا ہی کہنا تھا۔ آپ اسے یہ سب بتا دینا۔ خدا خافیظ۔' لڑکیاں خیرت زدہ سی اک دوسرے کی طرف دیکھتیں ہوئیں خاموشی سے وہاں سے چل دیں۔ شہریار نے اک چھوٹا سا کنکر اٹھایا اور دریا میں دے مارا۔ پتھر دریا پر لہریں بناتا ہوا کچھ دور جا کر ڈوب گیا۔

رات کے وقت وہ بہت دیر تک اپنے کاٹج کی کھڑکی میں کھڑا رہا۔ کھڑکی سے باہر دور پہاڑوں پر بنے چھوٹے چھوٹے گھروں میں روشن قمقموں کو دیکھتا رہا۔ رات آدھی سے زیادہ گزر چکی تھی۔ فضا میں خنکی تھی مگر شہریار کو ٹھنڈ کی بجاۓ ہلکی ہلکی سرد ہوا بھلی لگ رہی تھی۔ اس نے ایک طرف ہو کر کھڑکی کے دروازے سے ٹیک لگائی اور سگریٹ سلگا لیا۔ تقریباً آدھا سگریٹ پی کر اس نے سگریٹ کھڑکی سے نیچے پھینک دیا اور دونوں ہاتھ سینے پر باندھ لیۓ۔ نہ جانے کتنی دیر تک وہ وہاں کھڑا رہا۔ اسے وقت کا بالکل احساس نہ ہوا۔ جب پو پھٹی تو اسے احساس ہوا کہ رات گزر چکی ہے مگر وہ جانتا تھا کہ رات کا تو ابھی آغاز ہوا ہے۔

اگلے دن وہ واپس اپنے شہر جانے کے لیۓ تیار تھا۔ اپنا سامان باندھنے کے بعد وہ کسی چیز کو ڈھونڈھنے کے لیۓ نیچے جھکا تو اسے میز کے نیچے سے ایک تصویر الٹی پڑی ہوئی ملی۔ اس نے تصویر اٹھا لی۔ اس کی دادی جو کچھ فاصلے پر اس کے سامنے بیٹھی تسبیح پھیر رہی تھی اس کے ہاتھ میں تصویر دیکھ کر بولی۔ 'یہ اسی لڑکی کی تصویر ہے جس کا رشتہ تم نے بغیر دیکھے ٹھکرا دیا تھا۔'

شہریار نے تصویر سیدھی کرکے دیکھی۔ تصویر دیکھتے ہی وہ سکتے میں آگیا۔ تصویر میں مہرو تھی۔

جشنِ آزادی

2023-08-14T14:39:00.006+05:00

رضوان کی آنکھ کھلی تو صبح کے نو بج رہے تھے۔ اس نے سوچا آج جشنِ آزادی منایا جا رہا ہے تو اسے بھی اس جشن میں شریک ہونا چاہیۓ اور چھت پر جا کر جھنڈا لگانا چاہیۓ۔ وہ چھلانگ لگا کر بستر سے اٹھا اور جھنڈا اٹھا کر چھت پر چلا آیا۔ جھنڈا لگانے سے پہلے اس نے اردگرد دیکھا، تقریباً ہر گھر کی چھت پر جھنڈا لہرا رہا تھا۔ کچھ گھروں کو جھنڈیوں سے بھی سجایا گیا تھا۔ اس کی نظر ایک بڑی سی کوٹھی پر پڑی جس پر سب سے بلند جھنڈا لہرا رہا تھا۔ رضوان اس گھر کے مکین کو جانتا تھا۔ یہ گھر کسی ٹھیکیدار کا تھا جس نے اس محلے کی گلیاں اور سڑکیں بنائی تھیں۔ اس نے جو سڑک بنائی تھی وہ چند دن بعد بارش میں بہہ گئ تھی، اور جو گلیاں تھیں وہ بھی ٹوٹ پھوٹ چکی تھیں۔ اس کنٹریکٹ کو مکمل کرنے کے بعد ہی اس نے یہ بڑی سی کوٹھی تعمیر کی تھی۔ رضوان مسکرایا اور آزادی مبارک کا نعرہ لگا کر جھنڈا لہراۓ بغیر نیچے چلا آیا۔ دروازہ کھول کر وہ گھر سے باہر آگیا اور اپنی گلی سے نکل کر باہر مین روڈ پر پہنچ گیا۔ پچھلی رات کی بارش سے سڑک پر پانی ہی پانی تھا۔ اس نے اپنی پتلون کے پائنچے اٹھاۓ اور پانی کے بیچ میں چلنے لگا۔ سڑک پر بہت سے لوگ پانی میں چل رہے تھے۔ کچھ کی گاڑیاں اور موٹر سائیکل پانی میں بند ہو گئیں تھیں اور وہ انہیں دھکا لگا کر لے جارہے تھے۔ رضوان نے چلتے چلتے آزادی مبارک کا نعرہ لگایا۔ کچھ دور جا کر اسے سڑک کے درمیان میں بھیڑ دکھائی دی۔ قریب پہنچ کر اس نے دیکھا چند آدمی ایک عورت اور ایک بچے کو جو سڑک کے درمیان کھلے مین ہول میں گر گۓ تھے انہیں باہر نکال رہے تھے۔ بچے کی حالت بہت نازک تھی اس لیۓ اسے جلدی سے ہسپتال لے جارہے تھے۔ رضوان نے ایک مرتبہ پھر آزادی مبارک کا نعرہ لگایا اور آگے بڑھ گیا۔ چلتے چلتے وہ ایک کھلی سڑک پر آگیا۔ فٹ پر ایک عورت اور ایک مرد چلے جا رہے تھے پیچھے سے ایک بڑی سی گاڑی آئی جس کے اوپر جھنڈا لہرا رہا تھا۔ وہ گاڑی تیزی سے ان کے قریب سے گزر گئ۔ وہ دونوں پانی اور کیچڑ سے پوری طرح بھیگ گۓ۔ مرد نے غصے سے گاڑی والے کو دیکھا اور موٹی سی گالی دی مگر گاڑی جا چکی تھی۔ آگے ایک چوک پر چند آدمی جھنڈیوں اور بیجز وغیرہ کا سٹال لگاۓ بیٹھے تھے۔ رضوان نے سوچا اس نے جھنڈا نہیں لگایا تو کم سے کم ایک بیج لے کر اپنی قمیص پر لگا لینا چاہیۓ۔ اس نے سٹال سے ایک اچھا سا بیج خریدا جس پر چھوٹا سا جشن آزادی مبارک لکھا ہوا تھا۔ بیج والے نے اسے پچاس روپے کا بیج سو روپے میں دیا تھا۔ اس نے آزادی مبارک کا ہلکا سا نعرہ لگایا اور بیج اپنی قمیص پر لگانے کے بعد آگے چل پڑا۔ جیسے ہی وہ آگے بڑھا سامنے دو موٹر سائیکل سوار آپس میں لڑتے ہوۓ دکھائی دیۓ۔ دونوں ایک تنگ راستے پر پہلے گزرنے کے لیۓ لڑ رہے تھے۔ رضوان ہنسا اور نعرہ لگا کر آگے چل پڑا۔ ایک ہسپتال کے باہر اسے چند لوگوں کا جمگھٹا دکھائی دیا۔ اس نے غور سے دیکھا تو اسے وہی عورت دکھائی دی جو کچھ دیر پہلے ایک بچے کے ساتھ مین ہول میں گری تھی۔ وہ خیران ہوا کہ یہ کیا ماجرا ہے یہ عورت اس طرح باہر کیوں کھڑی ہے۔ قریب جا کر اسے معلوم ہوا ہسپتال والوں نے اس بچے کو داخل کرنے کے لیۓ بھاری فیس مانگی تھی جو عورت کے پاس نہیں تھی اس لیۓ انہوں نے اسے باہر نکال دیا تھا۔ چند لمحوں بعد عورت کے چیخنے کی آوازیں آئیں۔ 'میرا بچہ۔۔۔میرا بچہ'۔ اس کا بچہ نہیں رہا تھا۔

رضوان نے ہاتھ اپنے سینے پر رکھا، قمیص پر لگاۓ ہوۓ بیج کو زور سے کھینچا اور اسے دور سڑک پر کھڑے پانی میں پھینک دیا۔ بیج ٹھپے کھاتا اور پانی پر لہریں بناتا ہوا تھوڑے فاصلے پر جا کر ڈوب گیا۔ اس نے بلند آواز سے 'آزادی مبارک' کا نعرہ لگایا اور واپس پلٹ آیا۔

پراسرار بستی

2023-08-08T14:53:00.001+05:00

کردار

پِپلو بابا= ایک بڑا سا گھنا اور پرانا درخت۔

چونچو= لمبی چونچ والا بگلا نما سفید رنگ کا پرندہ جو سردیوں میں سرد علاقوں سے گرم علاقوں کی طرف ہجرت کرتا ہے۔

باجی صفّو= بڑی سی لوہے یا سٹیل کی ٹوکری یا ڈسٹبین جو درخت کے ساتھ ٹنگی ہے۔

منظر

چونچو اڑتا ہوا کہیں جا رہا ہے۔ چند دوسرے پرندے کہیں سے آتے ہیں اور اس سے لڑنا شروع کر دیتے ہیں۔ چونچو بڑی مشکل سے وہاں سے جان بچا کر بھاگتا ہے۔ ایک باغ میں پہنچتا ہے اور ایک درخت کی شاخ پر آکر بیٹھ جاتا ہے۔ درخت کے ساتھ ایک بڑی سی ڈسٹبین لٹکی ہے۔ جس کے نیچے اور ارگرد جوس کے خالی ڈبے، خالی بوتلیں، ریپر اور اسی قسم کا بہت سا کوڑا پڑا ہے۔ ڈسٹبین مکمل خالی ہے۔ اچانک ڈسٹبین پر دو بڑے بڑے ہونٹ ابھرتے ہیں اور بولنا شروع کرتے ہیں۔

باجی صفو: ارے چونچو! کیا ہوا تجھے، ہانپ کیوں رہے ہو، خیریت تو ہے؟

چونچو: کیا بتاؤں صفّو باجی! اسی طرف آرہا تھا راستے میں پتہ نہیں کہاں سے کچھ غنڈے آگۓ اور آکر مجھ سے لڑنا شروع کر دیا۔ بڑی مشکل سے جان بچا کر بھاگا ہوں۔ سمجھ نہیں آرہی جب سے میں یہاں آیا ہوں بھاگتا پھر رہا ہوں، کبھی کسی چکر میں اور کبھی کسی چکر میں۔

باجی صفو: بیوقوفا تو یہاں کیوں آگیا۔ یہ تو ایک دوسرے کو جینے نہیں دیتے یہ تجھے کہاں جینے دیں گے۔ چلا جا واپس جہاں سے آیا ہے۔ کیوں پپلو بابا تم کیا کہتے ہو؟

(درخت کے موٹے تنے سے ایک سفید ریش بزرگ چہرا ابھرتا ہے)

پپلو بابا: ہاں بٹیا ٹھیک کہا تم نے میں تو برسوں سے یہاں کھڑا ہوں یہی کچھ دیکھتا آیا ہوں۔

باجی صفو: تو ویسے ایک بتا تو بتا چونچو! تو یہاں آیا کیا لینے ہے؟

چونچو: بس باجی! سرد موسم سے بھاگ کر یہاں آیا تھا۔ اپنی بستی میں بڑی ٹھنڈ پڑتی ہے، اس موسم میں ہر چیز جم جاتی ہے۔ کوئی پتا، کوئی بوٹا نہیں بچتا ہر چیز برف سے ڈھک جاتی ہے۔ گھونسلہ بنانے میں دقت ہوتی ہے۔ کھانا حاصل کرنے کے لیۓ بھی بڑے جوکھم اٹھانا پڑتے ہیں۔

باجی صفو: وہ تو ٹھیک ہے چونچو! پر تو جہاں آیا ہے وہاں تو ہر چیز کے حصول کے لیۓ جوکھم اٹھانا پڑتا ہے یہاں تک کہ زندہ رہنے کے لیۓ بھی جوکھم اٹھانا پڑتا ہے۔

چونچو: ہاں باجی ٹھیک کہتی ہو تم۔ پر ایک بات مجھے اس بستی کی بڑی عجیب لگی ہے۔ کھانے کو ان کے پاس ہے کچھ نہیں، بھوکوں یہ مرتے ہیں، مرمر کر گزارہ کرتے ہیں، بڑی مشکل سے اپنے بچوں کو پالتے ہیں۔ بیمار پڑ جائیں تو علاج کرانا ان کے بس سے باہر ہو جاتا ہے۔ لیکن پھر بھی ان کے پاس لڑائی جھگڑوں کے لیۓ بڑی فرصت ہے۔ کبھی مذہب کے نام پر لڑتے ہیں تو کبھی فرقوں پر، کبھی ذات پات پر جگھڑتے ہیں تو کبھی خاندان پر۔ اتنی مشکل زندگی کے باوجود ان کے پاس لڑائی کے لیۓ وقت کیسے نکل آتا ہے؟

پپلو بابا: ہاں بیٹا چونچو! یہاں کی ہر بات نرالی ہے۔ مذہب پر جھگڑتے سب ہیں، مذہب ان کا اوڑھنا بچھونا ہے مگر مذہب پر عمل کرتے کسی کو نہیں دیکھا۔ دوسروں کو تلقین و نصیحت سب کرتے ہیں مگر خود اس پر کبھی نہیں چلتے۔ خدا سے عشق و محبت کے دعوے کرتے ہیں پر خدا کے راستے پر نہیں چلتے۔ جھوم جھوم کر اللّٰه کا ذکر کرتے ہیں مگر اس کی بتائی ہوئی راہ اختیار نہیں کرتے۔۔۔ یہ عجیب نگری ہے بیٹا۔ تم تو اس بستی میں اجنبی ہو لیکن میں جو برسوں سے یہاں رہ رہا ہوں اس پراسرار بستی کو کبھی جان نہیں پایا۔ یہاں کے لوگوں کی چال ڈھال بڑی نرالی ہے۔ کہتے کچھ ہیں کرتے کچھ ہیں۔ صبح اٹھتے ہیں اور شام تک جھوٹ کی تسبیح پڑھتے ہیں، بے ایمانی کا وظیفہ کرتے ہیں اور مکاری اور فریب کاری کی مالا جپتے ہیں۔ یہ بستی تو ایسا تعفن زدہ بدبودار گٹر ہے جہاں سانس تک لینا دشوار ہے اور تم یہاں پناہ لینے کے لیۓ چلے آۓ ہو۔

باجی صفو: تم نے بالکل سچ کہا پپلو بابا۔

(ایک ہاتھ نظر آتا ہے جس میں ایک جوس کا خالی ہے۔ ڈبہ آکر ڈسٹبین کے نیچے پڑے ہوۓ کچرے پر گرتا ہے)

باجی صفو: (جاری رکھتے ہوۓ) اب اسے ہی دیکھ لو۔ پچھلے کتنے مہینوں سے میں یہاں ڈیوٹی دے رہی ہوں پر کوئی ایک دن ایسا نہیں جب میں نے یہ سب نہ دیکھا ہو۔ کوئی ایک بھی دن ایسا نہیں گزرا جب مجھے کام کرنا پڑا ہو۔ پہلے دن سے لے کر اب تک میں یہاں بالکل فارغ بیٹھی ہوں۔

چونچو: (شرارت سے) تو اچھا ہے نہ باجی! تیری تو ادھر موجیں لگی ہیں کوئی کام نہیں کرنا پڑتا۔

باجی صفو: اے ہے۔ میں تو لعنت بھیجوں ایسی موجوں پر۔ میری بڑی چچی کی ڈیوٹی ایک بڑے سرکاری دفتر میں لگی ہے وہ بتاتی ہے وہاں سرکاری افسر سارا سارا دن کام کرنے کی بجاۓ بس وقت گزاری کرتے ہیں۔ اور ہر مہینے تنخواہیں لے کر موجیں اڑاتے ہیں۔ میں تو اس کمائی کو حرام کی کمائی سمجھتی ہوں جو اپنی ڈیوٹی پوری کیۓ بغیر حاصل ہو جاۓ۔

پپلو بابا: ایسا تو تو سمجھتی ہے بیٹی پر وہ لوگ تو ایسا نہیں سمجھتے۔

چونچو: اور بابا تم بتاؤ تم کب سے ہو یہاں؟

پپلو بابا: میں تو بیٹا برسوں سے یہاں ہوں۔ یہیں میرے ساۓ میں بہت سے لوگ آکر بیٹھے اور بہت سے گزر گۓ۔ پھر ان کی اولادیں آئیں اور وہ بھی چلی گئیں۔ کسی زمانے میں بچیاں آتی تھیں اور میرے ساتھ رسی باندھ کر جھولا جھولا کرتی تھیں۔ بچے آکر کھیلا کرتے تھے۔ محبت کرنے والے نوجوان جوڑے میرے ساۓ میں بیٹھ کر پہروں محبت کی باتیں کرتے اور محبت کے گیت گاتے تھے۔ اور اپنے نام محبت کی ایک یادگار کے طور پر یہاں لکھ کر چھوڑ جایا کرتے تھے۔ مگر اب یہاں کون آتا ہے بیٹا۔ زندگی کی چلچلاتی اور کڑکتی دھوپ میں سرپٹ بھاگتے مسافر چند لمحے سستانے کے لیۓ رکتے ہیں اور آگے بڑھ جاتے ہیں۔ کچھ ہیں جنہیں زندگی بھر سایہ نصیب نہیں ہوتا۔ وہ بس دوڑتے جاتے ہیں۔ دوسروں سے سبقت لے جانے کی فکر انہیں بھگاۓ رکھتی ہے۔ وہ بس اس تگ و دو میں زندگی گزار دیتے ہیں کہ کہیں وہ دوسروں سے پیچھے نہ رہ جائیں۔ ایسے لوگ عمر بھر ٹھنڈی پر سکون چھاؤں سے محروم رہتے ہیں۔

(کہیں سے گولی چلنے کی آواز آتی ہے۔ چونچو لڑکھڑا کر نیچے زمین پر آگرتا ہے۔)

باجی صفو: (چلا کر) کیا ہوا تجھے چونچو!۔۔۔چونچو تو ٹھیک تو ہے۔۔۔چونچو!۔۔۔مار ڈالا ظالموں نے۔۔۔چونچو کو مار ڈالا۔۔۔بابا چونچو مر گیا۔۔۔ظالموں نے مار ڈالا۔۔۔(روتے ہوۓ) چونچو!۔۔۔تو یہاں رکا کیوں۔۔۔تو یہاں کیوں آیا۔۔۔بولا تھا تجھے یہاں سے چلا جا۔ یہ جگہ تیرے رہنے کے لیۓ نہیں ہے۔ تونے میری بات کیوں نہیں مانی چونچو۔۔۔(دھاڑیں مار کر رونے لگتی ہے)

پپلو بابا: صبر کر بیٹی! صبر کر۔۔۔

(بابا کی آنکھوں سے آنسو رواں ہوتے ہیں)