ڈاکٹر محمد حسین مُشاہد رضوی

Kaukab-E-Midhat By Dr Mushahid Razvi

2026-03-07T03:29:11.932-08:00

Kaukab-E-Midhat

By Dr. Mushahid Razvi

Aabshaar-E-Sana By Dr Mushahid Razvi

2025-09-02T19:00:00.000-07:00

Aabshaar-E-Sana

By Dr Mushahid Razvi

Chashma-E-Karam By Dr Mushahid Razvi

2025-08-05T04:11:00.000-07:00

Chashma-E-Karam

By Dr Mushahid Razvi

Tujhe Hamd Hae Khudaya Dr Mushahid Razvi

2025-04-25T02:53:00.000-07:00

Tujhe Hamd Hae Khudaya

Dr. Mushahid Razvi

Bahisht-E Naat By Dr Mushahid Razvi

2025-04-11T03:30:00.000-07:00

Bahisht-E Naat

By Dr Mushahid Razvi

Arbaeen-E-Sharaf By Dr Mushahid Razvi

2025-03-11T03:53:00.000-07:00

Arbaeen-E-Sharaf

By Dr Mushahid Razvi

Arbaeen E Karam Dr. Mushahid Razvi

2024-11-01T08:40:00.003-07:00

Arbaeen E Karam

Dr. Mushahid Razvi

Fasl E Bahaar By Dr Muhammed Husain Mushahid Razvi

2024-07-21T06:49:00.000-07:00

Fasl E Bahaar

By Dr Muhammed Husain Mushahid Razvi

Arshad Mina Nagri Awr Naat Goi Me Hae'ati Tanawwo

2024-02-05T08:02:00.002-08:00

ارشد مینانگری اور نعت گوئی میں ہیئتی تنوع

ڈاکٹر محمد حسین مشاہد رضوی

_(ارشد مینانگری کے نعتیہ مجموعۂ کلام "رحمۃ للعالمين" پر 2011ء میں لکھا گیا مضمون)_

جناب عبدالرشید المعروف ارشدؔ مینانگری شعری ادب کے ایک ہمہ جہت، پُر گو، زود نویس اور فعال و متحرک فن کار ہیں۔ ان کی فنی ریاضتیں اور مشقتیں نصف صدی کے لگ بھگ محیط ہیں۔ اپنے مخصوص لب و لہجے اور پاٹ دار آواز کے سبب مشاعروں کی دنیامیں آپ کی شخصیت ہر دل عزیز مانی جاتی ہے اور آپ کا شمار بھی مقبول ترین شاعروں میں ہوتا ہے ۔ آپ کا فکری و فنی اور شعری و ادبی سفر مبدئِ فیاض کے ودیعت کردہ وجدان و شعور کی روشنی میں مسلسل جاری و ساری ہے۔ اردو کی مروجہ بیش تر اصنافِ سخن میں آپ کامیاب طبع آزمائی کررہے ہیں۔ حمد و نعت، مناجات و مناقب ، سلام و دعا ، قصیدہ،غزل، غزل نما، آزاد غزل، نظم، آزاد نظم، معرا نظم، مرثیہ، رباعی، قطعہ، گیت، دوہا، سانیٹ، ہائیکو، ثلاثی، مربع، مسدس، مخمس، ماہیے، کہہ مکرنی، سری چھند اور ٹپے وغیرہ اصناف میں آپ کے کلام بہ کثرت موجود ہیں۔ ارشد صاحب کا ذہن و فکر جس انداز سے دنیاے شعر و ادب کو اپنی گراں قدر شعری و ادبی خدمات سے مالا مال کررہا ہے وہ آپ کو تادیر زندہ رکھنے کے کافی ہے۔ اردو زبان و ادب کی معتبر اور جید شخصیات نے آپ کو فراخ دلی کے ساتھ سراہا ہے جو آپ کی مقبولیت کی بین دلیل ہے۔ احساس، نئے اُجالے، دھرتی کے تارے اور عید جیسی شعری تصانیف طبع ہوکر اپنی انفرادیت اور ہیئتی تنوع کا نقشِ جاوداں کائناتِ ادب پر مرتسم کررہی ہیں ۔

اردو میں حالیؔ ، نظیرؔ ، اکبرؔ اور اقبالؔ وغیرہ کے یہاں مختلف موضوعات پر اچھی اچھی نظمیں ہمیں شاد کام کرتی رہتی ہیں۔ لیکن ارشدؔ مینانگری کے یہاں موضوعاتی تجربات کا کینوس ایسا وسیع اور منفرد ہے کہ مختلف موضوعات پر آپ کے مکمل مجموعہ ہاے کلام مرتبہ ہیں جو آپ کے شعری امتیاز کی علامت ہیں ۔ ’’عید‘‘ پر آپ کی شعری تصنیف میرے روبہ رو ہے یہ کتاب ادب کے لیے ایک بہترین تحفہ ہے جس میں عید الفطر جیسے عظیم اسلامی تہوار کی معنویت اور افادیت کو کئی اصناف کا استعمال کرتے ہوئے اُجاگر کرنے کی کام یاب کوشش کی گئی ہے۔

اس مجموعہ میں شامل بیش تر کلام منظر نگاری، عصری حسیت اور احساسات کی بالغ ترجمانی کے ساتھ ساتھ نشاط و انبساط کا دل کش عکاس ہیںجو قاری و سامع کو کیف و سرور عطا کرتے ہیں۔ کئی نظموں میں رواداری ، مفلسوں کی اعانت اور غربا کی ہم دردی کااظہار جس کربیہ آہنگ کے ساتھ کیا گیا ہے وہ ہمیں بھی اپنے ساتھ لے کر چلتا ہوا محسوس ہوتا ہے ۔ علاوہ ازیں بعض نظموں میں خیالات اور افکار کا اعادہ بھی ہمیں نظر آتا ہے لیکن پیرایۂ بیان میں جو نفاست ہے اُسے دیکھتے ہوئے ہم ایسے اشعار کو تکرار کے نقائص کا آئینہ دار نہیں قرار دے سکتے ۔

منورؔ رانا کا ’’ماں‘‘ پر لکھے گئے مختلف شعروں کا ایک انتخاب’’ماں‘‘ کے نام سے شائع ہوکر مقبول ہوچکا ہے، لیکن اُسے ’’ماں‘‘ پر مستقل شعری تصنیف نہیں کہی جاسکتی۔ نوجوان شاعر و ادیب، عالم و مفتی محمد توفیق احسنؔ برکاتی مصباحی (ممبئی) کا ’’ماں‘‘ پر مبنی ایک دل کش مجموعہ ’’ماں کے آنچل پہ شبنم ٹپکتی رہی‘‘ فروری 2010ء میں منصۂ شہود پر جلوہ گر ہوکر خراج تحسین حاصل کررہا ہے۔ یہ سن کر مسرت ہوئی کہ ارشدؔ صاحب کا بھی ’’ماں‘‘ جیسی مقدس ہستی کے مراتب و مناقب کو ظاہر کرتا ہیئتی تنوع اور فنی محاسن سے آراستہ ایک وقیع شعر ی مجموعہ عنقریب منظر عام پر آرہا ہے۔ امید ہے کہ دیگر تصانیف کی طرح یہ بھی اپنی شناخت بنانے میں کام یاب ہوگا۔ اسی طرح قطعا ت کا ایک مجموعہ’’ بولتے پتھر‘‘ زیرِ طبع ہے اور شادی بیاہ کے موقع پر پڑھی جانے والی تہنیتی نظم جسے ’’سہرا ‘‘ کہا جاتا ہے اس مقبولِ عام صنف پر مبنی خوب صورت مجموعہ ’’ سہروں کے چہرے‘‘ بھی طباعت کے مراحل سے گذرنے والا ہے۔ ارشدؔ مینانگری کے سینے میں ایک درد مند دل دھڑکتا ہے جو محبت آشنا اور الفت ریز ہے۔ یہی وجہ ہے کہ آپ نے اپنے احساسات و جذبات کا اظہار کرتے ہوئے شاعری کے ذریعہ اصلاحِ اعمال کا کام لینے کی بھر پور کوشش کی ہے۔

اصنافِ ادب میں حمد و نعت، مناقب و سلام، مناجات و دعا ایسی اصناف ہیں جنھیں تقدیسی حیثیت حاصل ہے یہ وہ پاکیزہ اصناف ہیں جن پر طبع آزمائی کرنا ہر کس و ناکس کے بس کی بات نہیں خصوصاً نعت گوئی کا فن تو خالص اللہ عزو جل کی عطا اور اس کے رسول صلی اللہ علیہ وسلم کی رحمتوں سے شاعر کو میسر آتا ہے۔ اردو کا ہر چھوٹا بڑا شاعر خواہ و ہ مسلم ہو یا غیر مسلم اس نے تبرکاً حمد و نعت ضرور لکھی ہے۔ لیکن یہ سعادت بہت کم شعرا کے حصے میں آئی ہے کہ مکمل مجموعۂ کلام اور دواوین اس مقدس صنف پر مشتمل منظر عام پر آئے ہوں۔ امام احمد رضاؔ بریلوی، امیرؔ مینائی، محسن ؔکاکوروی، حسنؔ رضا بریلوی وغیرہم جیسے شعراے کرام کے نعتیہ کلام تو آفاقی مرتبے کے حامل ہیں، آج ہمارے قلوب و اذہان کو ان کے کلام محبتِ رسول صلی اللہ علیہ وسلم کا نورِ بصیرت عطا کررہے ہیں۔ ان حضرات نے نعتیہ ادب کے فروغ و ارتقا میں جو کردار ادا کیا وہ ناقابلِ فراموش ہے۔ یہ انھیں نفوسِ قدسیہ کی کوششوں کا حسین ثمرہ ہے کہ آج نعت جیسی محترم اور پاکیزہ صنف ، ادب کے عصری منظر نامہ پر بے پناہ مقبول ہے ۔ حتیٰ کہ بعض ناقدین اکیسویں صدی کو نعت گوئی کی صدی خیال کررہے ہیں۔

لیکن یہ بھی سچ ہے کہ دنیا نے وہ دور بھی دیکھا جب نعت کو بہ طورِ صنف تسلیم کرنا تو کُجا اسے شاعری سے ہی خارج کردیا گیا تھا، انجمن ترقی پسند مصنفین اور حلقۂ اربابِ ذوق کے غلبے نے لاکھ کوشش کی کہ اس صنف کو پروان چڑھنے نہ دیا جائے لیکن آزادی کے بعد بعض جدید شعرا نے کائناتِ عالم کو اسمِ محمد صلی اللہ علیہ وسلم سے منور و مجلا کرنے کا عزمِ مصمم کرلیا اور سببِ تخلیقِ کائنات اور وجہِ حیاتِ کائنات صلی اللہ علیہ وسلم کی سیرتِ طیبہ ، اخلاق و کردار او ر شمائل و فضائل سے تاریک ذہنوں کو نورِ یقین عطا کرنا شروع کردیا ان میں حفیظؔ میرٹھی، حسنینؔ رضا بریلوی، حافظؔ پیلی بھیتی، مصطفی رضا نوریؔ بریلوی، زائرِ حرم حمیدؔ صدیقی لکھنوی، ضیاؔ بدایونی، نعیمؔ صدیقی، یونس ؔقنوجی، ماہرؔ القادری، سید محمد اشرفی سیدؔ کچھوچھوی وغیرہم کے نام اہمیت کے حامل ہیں۔ نعت گوئی کے ذریعہ شعور و فکر کی طہارت و پاکیزگی سے ہم کنار کرنے والوں میں علاوہ ان شعرا کے نعت گوئی کے فن کو وسعت دینے میں عمیقؔ حنفی، عبدالعزیزخالدؔ، شمسؔ بریلوی، رازؔ الٰہ آبادی، عثمان عارفؔ نقش بندی، حفیظؔ تائب، اعظمؔ چشتی، راجا رشیدؔ محمود، شبنم کمالی ، قیصرؔ وارثی، اخترؔ الحامدی، مظفروارثی، اجملؔ سلطان پوری، طلحہ رضوی برقؔ دانا پوری، سید شمیم گوہرؔ الٰہ آبادی وغیرہم کی خدمات لائقِ قدر ہیں۔

یہ بات بڑی خوش آیند ہے کہ آج ہند و پاک میں کئی شعرا ایسے ہیں جنھوں نے اپنے آپ کو نعت گوئی کے لیے وقف کر رکھا ہے ان میں سید آلِ رسول حسنین نظمی مارہروی، اخترؔ رضا ازہری بریلوی، ابرار کرت پوری، خلیل ؔ وارثی، سید صبیح ؔ رحمانی وغیرہم نمایاں حیثیت کے حامل ہیں۔ اور بعض شعرا ایسے بھی ہیں جنھوں نے دیگر اصناف کے ساتھ ساتھ نعت گوئی کے فن سے بھی اپنا والہانہ رشتہ استوار رکھا اور مدحتِ سرکار صلی اللہ علیہ وسلم کے گل بوٹے کھلائے ۔ ایسے شعرا میں بیکلؔ اُتساہی، نادمؔ بلخی، حماد احمد صابر ؔقادری،علیم صباؔ نویدی، سید وحیدؔ اشرف کچھوچھوی، سلیم شہزاد، اشفاق انجم، ناوکؔ حمزہ پوری، ظہیرؔ غازی پوری، مناظر عاشق ہرگانوی وغیرہم کے شانہ بہ شانہ ارشدؔ مینانگری کا شمار بھی کیا جانا چاہیے کہ ان کے یہاں قابلِ لحاظ تعداد میں نعتیہ کلام موجود ہیں۔ مسرت و انبساط کی بات تو یہ ہے کہ ایک ایسے دور میں جب کہ نعت کو صنفی حیثیت دینے میں ناقدین پس و پیش میں مبتلا تھے ارشدؔ صاحب نے محض غزل کی ہیئت میں محصور نہ رہتے ہوئے اردو میں رائج کئی اصناف میں نعتیں قلم بند کیں اور یہ باور کرادیا کہ نعت صرف ارادتِ اسلامی اور تقدس و طہارت کی بِنا پر ہی نہیں بل کہ ہیئتی اور صنفی تنوع کے لحاظ سے بھی ایک ایسی ہمہ جہت اور طاقت ور صنفِ سخن ہے کہ دوسری اصناف اس کے پاسنگ بھی نہیں۔ ارشدؔ صاحب کے یہاں غزل، غزل نما، رباعی، قطعہ، ثلاثی، نظم، گیت، دوہا، ہائیکو، سانیٹ ، مربع، مسدس، مخمس وغیرہ اصناف میں نعت گوئی کے کام یاب تجربات جلوہ فگن ہیں ۔ نعت گوئی میں ایسا ہیئتی تنوع اور کثیر صنفی انداز دیگر شعرا کے یہاں خال خال نظر آتا ہے۔ ارشدؔ صاحب کی یہ کاوشیں فنِ نعت گوئی سے آپ کے مخلصانہ لگاو کا پتا دیتی ہیں۔ موصوف کے زیرِ طبع نعتیہ مجموعۂ کلام ’’رحمۃ للعالمین‘‘سے مختلف ہیئتوں میں قلم بند کیے گئے نعتیہ کلام خاطر نشین کریں ؎

ہئیتوں کا ذکر :

رباعی

احساسِ تمنا ہے منور میرا

میں خود ہی نظر آتا ہوں ہم سَر میرا

سرکار کے در پر ہے جھکی میری جبیں

پہنچا ہے بلندی پہ مقدر میرا

قطعہ

اک بشر صاحبِ معراج بنا

عظمتوں کے جہاں کا راج بنا

آپ کا ہر قدم خدا کی قسم

عرشِ اعظم کے سر کا تاج بنا

دوہا

راحت خیز خزینہ ہے ، شیوہ احمد کا

رحمت بیز نگینہ ہے ، رستہ احمد کا

غزل(مطلع وشعر)

ذاتِ احمد اگر نہیں آتی

زندگی راہ پر نہیں آتی

دیدِ احمد میں جس کی آنکھ کھلی

نیند اُسے عمر بھر نہیں آتی

غزل نما( مطلع وشعر)

قدوم ، عرشِ علا پہ جس کے ، بلندیوں کا نصیب ہے وہ

عجیب ہے وہ ، عجیب ہے وہ

عداوتوں کا مزاج بدلا ، خباثتوں کا بھی راج بدلا

محبتوں کا نقیب ہے وہ

نظم (ایک بند)

فخرِ کائنات مصطفیٰ

عظمتِ حیات مصطفیٰ

جن کو پَر نہیں تھے پَر دیے

بے بسی کو ختم کر دیے

دامنِ جہان بھر دیے

ان کے خالی ہاتھ مصطفیٰ

فخرِ کائنات مصطفیٰ

گیت(مکھڑا و بند)

مصطفیٰ تمہیں تم ہو خلق کے نظاروں میں

مسکرائے تم ہی تم چاند میں ستاروں میں

شبنمی اُجالوں میں کون مسکراتا ہے

گوہروں کی جھل مل میں کون جگمگاتا ہے

ہیروں کی چمک بھر دی کس نے رہگذاروں میں

مصطفیٰ تمہیں تم ہو خلق کے نظاروں میں

ثلاثی

خارزاروں کو لالہ زار کیا

مصطفیٰ کی نگاہ نے ارشدؔ

جلتے صحرا کو برف بار کیا

ہائیکو

ہیں شاہِ لولاک

آپ کے قول و فعل سبھی

سر تا سر ادراک

سانیٹ

بے محل بندشوں کو توڑ دیا

بچھڑے ملنے لگے ہیں صحرا میں

پھول کھلنے لگے ہیں صحرا میں

فکر کو خوش گوار موڑ دیا

خار بھی گُل صفت نظر آئے

جیسے یک سَر بدل گیا موسم

سر خوشی سے مچل گیا موسم

نخلِ امید میں ثمر آئے

ہر سو اوجھل ہوئے ہیں اندھیارے

روشنی کا نصیب جاگ اٹّھا

زندگی کا نقیب جاگ اٹّھا

مسکرانے لگے ہیں اُجیارے

مصطفی کے خلوص کی نکہت

زحمتوں میں بھی بن گئی رحمت

ارشدؔ مینانگری نے اپنے کلام کو عقیدت و ارادتِ رسول صلی اللہ علیہ وسلم کا پُراثر اظہاریہ بنانے کے ساتھ ساتھ رسولِ گرامی وقار صلی اللہ علیہ وسلم کے اعلا اخلاق و کردار، اسوۂ حسنہ ، پاکیزہ شب و روز، اصولِ امن و مساوات، عدل و انصاف ، رحم و مروت ، ایثار و قربانی اور نظم و ضبط کا بے دار کُن اشاریہ بھی بنایا ہے۔ آپ نے اپنی نعتوں میں اردو کے ساتھ ہندی بھاشا اور گیتوں کی لفظیات کے علاوہ تشبیہات، استعارات، محاورات، محاکات ، پیکرات ، ترکیبات ، علامات ، جمالیات ، نئے امکانات، جدید تجربات اور ہیئتی تنوع وغیرہ شعری محاسن کو عمدگی سے فن کارانہ طور پر برتنے کی کام یاب کوشش کی ہے ۔جو تاثیر کے جوہر سے سجی ہوئی ہیں۔

ارشدؔ صاحب کی نعتوں میں مقصدیت اور معنویت پائی جاتی ہے، عالمی سطح پر اُمتِ مسلمہ کی روبہ زوال عظمت و شوکت کا المیہ پیش کرنے کی بجاے آپ نے براہِ راست اِس عظیم بیماری کے علاج و مداوا کی بات کی ہے اور یہ بتایا ہے کہ سیرتِ طیبہ کا عامل کبھی بھی رسوا نہیں ہوسکتا ، فنِ نعت گوئی کے لوازمات اور آدابِ نعت کا پاس و لحاظ بھی آپ کی نعتوں میں ملتا ہے۔ رسولِ کائنات صلی اللہ علیہ وسلم کی سیرتِ طیبہ سراسر قرآن کی تفسیر ہے اور آپ کے جملہ افعال و اعمال اور اقوال و فرامین وَمَا یَنطِقُ عنِ الھَویٰ اِن ہُوَا اِلا وَحْیُ یُّوحیٰ کے مصداق حق تعالیٰ کی طرف سے ہی ہیں ۔ اِس اعتبار سے ذاتِ رسول صلی اللہ علیہ وسلم کا مقام و منصب کتنا بلند و بالا ہے اس کااندازہ لگانا ممکن نہیں ۔ شاعر کے لیے ضروری ہوتا ہے کہ وہ نعت لکھتے وقت اس امر کو ملحوظ رکھے کہ وہ جس بارگاہِ عظمت نشان کے لیے قلم اٹھا رہا ہے وہ بارگاہ ممدوحِ خالقِ کائنات جل شانہٗ بھی ہے، یہاں ’’باخدا دیوانہ باش و با محمد ہوشیار‘‘ کی نازک ترین منزل ہمہ دم پیشِ نظر رہنی چاہیے۔

اِس تناظر میں ارشدؔ مینانگری کے نعتیہ مجموعۂ کلام ’’رحمۃ للعالمین‘‘کا تنقیدی جائزہ لینے کے بعد یہ احساس ابھرتا ہے کہ آپ نے اپنے کلام کو رسولِ مختار صلی اللہ علیہ وسلم کی الفت و محبت کے تئیں مبالغہ و غلو سے پَرے قرآنی ادب کا مظہر بنانے کی بھر پور کوشش کی ہے۔ ساتھ ہی آپ کے کلام میں رسول اللہ صلی اللہ علیہ وسلم کو اللہ تعالیٰ جل شانہٗ کی طرف سے عطا کردہ نوازشات و انعامات ، تصرفات و اختیارات اور عظمت و رفعت کا بالغ اقرار بھی ملتا ہے ۔ غرض یہ کہ ارشدؔ صاحب نے اپنے مجموعۂ کلام کے نام ’’رحمۃ للعالمین ‘‘ کو اسم بامسمیٰ بنانے کے لیے اپنی نعت گوئی کے ذریعہ عقیدہ و عقیدت کے ساتھ کائناتِ ارضی پر بسنے والے جملہ انسانوں کو اُسوۂ حسنہ کا آفاقی پیغام دینے کی سعیِ بلیغ کی ہے جو لائقِ تحسین و آفرین ہے، ’’رحمۃ للعالمین‘‘ سے چند اشعار نشانِ خاطر ہوں ؎

اُس کا شعور حاصلِ عرفان و آگہی

یادِ نبی سے رشتہ ہے جس کے شعور کا

کانٹوں کو بھی پھولوں کا احساس دلا دینا

سنّت ہے محمد کی دشمن کو دعا دینا

ذاتِ احمد اگر نہیں آتی

زندگی راہ پر نہیں آتی

نقشِ پا آپ کا نظر آیا

خلد کا راستا نظر آیا

یہ ترے قدم کے فیوض ہیں ، یہ ترے قدم سے ظہور ہے

تری رہِ گزر میں جگہ جگہ ، کہیں عرش ہے کہیں طور ہے

ہم پھر گئے تعلیمِ رسولِ عرَبی سے

بو بکر و عمر حضرتِ عثمان و علی سے

مطلق ذلیل ہوکے پشیمان نہیں ہیں

صد حیف کہ ہم عاملِ قرآن نہیں ہیں

یوں دور ہوئے جذبۂ احساسِ خودی سے

ہم پھر گئے تعلیمِ رسولِ عرَبی سے

المختصر یہ کہ پیشِ نظر مجموعۂ کلام ارشدؔ مینانگری کی فکری و فنی گہرائی و گیرائی کا ایک دل کش اظہاریہ ہونے کے ساتھ ساتھ نعتیہ شاعری کے حوالے سے مختلف ہیئت اور اصناف کے بلیغ تجربات کا آئینہ دار بھی ہے۔مختلف ہیئتوں اور اصنافِ سخن میں اتنی خوب صو رت نعتیں لکھنے پر میں ارشدؔ صاحب کو صمیمِ قلب سے ہدیۂ تبریک پیش کرتا ہوں ۔ یقین ہے کہ موصوف کے دیگر مجموعہ ہاے کلام کی طرح نعتِ رسولِ مقبول صلی اللہ علیہ وسلم پر مبنی یہ خوب صورت نذرانۂ عقیدت بھی قبولیتِ عامّہ سے سرفراز ہوگا جو اِن شآء اللہ آپ کے لیے توشۂ نجات بنے گا۔

(6؍ رجب المرجب 1432ھ / 9؍ جون 2011ء بروز جمعرات)

Rafeeq E Millat K Aqwaal Compiled by Dr Mushahid Razvi

2023-10-15T22:36:00.002-07:00

Rafeeq E Millat K Aqwaal

Compiled by Dr Mushahid Razvi

Hurmat E Harf Ka Hamil Shabbir Asif

2023-08-01T06:45:00.003-07:00

حُرمتِ حرف کا حامل --- شبیرآصفؔ

ڈاکٹر محمد حسین مُشاہدؔ رضوی

(موصوف کے شعری مجموعے "مسافر خواب لکھتا ہے" کی اشاعت کے موقع پر 2012ء میں لکھا گیا مضمون)

شبیرآصفؔ شہرِ عزیز مالیگاؤں کے شعری و ادبی افق کا ایک معتبر اور مشہور و معروف نام ہے۔ آپ کاآبائی وطن ناسک ہے۔ جہاں30 جولائی 1947ء کو آپ کی ولادت ہوئی ۔ ابتدائی اور ثانوی تعلیم آپ نے وہیں پائی ، بعدہٗ پیشہ وارانہ تعلیم کے لیے مالیگاؤں کا رخ کیا ۔ تعلیم کی تکمیل کے بعد مالیگاؤں کی میونسپل پرائمری اسکول میں ملازمت مل گئی اس طرح آپ نے ناسک سےمالیگاؤں میں مکمل طور پر بود و باش اختیار کرلی۔

مالیگاؤں کے علمی و ادبی اور مخصوص ثقافتی ماحول میں آپ کا ذوقِ شعری پروان چڑھنا شروع ہوا۔ جس کے نتیجے میں آپ نے 1975ء میں باضابطہ شعر گوئی کا آغاز کیا۔اردو زبان و ادب اور فارسی شاعری کا بڑی گہرائی سے مطالعہ کیا ۔ اردو ادب میں مختلف تحریکات کے زیرِ اثر رونما ہونے والے تغیرات سے بھی موصوف مکمل طور پر واقف ہیں یہی وجہ ہے کہ اُن کے شعری اظہار میں روایت کی متوازن پاس داری کے ساتھ ساتھ عصری حسّیت اور مروّج فنّی رجحانات مکمل طور پر دکھائی دیتے ہیں۔

شبیر آصفؔ صاحب شہرِ عزیزکے وہ فن کار ہیں جن کے روابط اردو دنیا کی قد آور علمی و ادبی شخصیات سے ہر دور میں اُستوار رہے ہیں۔ آپ کے کلام ملک و بیرونِ ملک کے مختلف اخبارات و رسائل ،ماہ ناموں اور جرائد کی مسلسل زینت بنتے رہے ہیں ۔ شعر گوئی کے ساتھ ساتھ نثر کے میدان میں بھی آپ کے قلم نے خوب جولانیاں دکھائی ہیں ۔ مختلف شعرا و ادبا پر لکھے گئے مضامین آپ کی سلیس و رواں دواں نثر نگاری کی عمدہ مثالیں ہیں۔ آپ کا سلوب نہایت دل نشین ، شگفتہ، بولتا اور چمکتا دمکتا ہے۔ خاص طور پر آپ نے میرؔ، غالبؔ ، محمد حسین آزادؔ، کالی داس گپتا رضاؔ، پروینؔ شاکر، جاوید ناصرؔ اور بعض معاصر فن کاروں پر مضامین لکھے ہیں جو آپ کے عمیق مطالعے کے غمّاز ہیں۔

1990ء میں آپ کی غزلوں اور نظموں کا پہلا مجموعہ " مٹّی کے حوالے " کے نام سے شائع ہوکر مقبولیت پاچکا ہے۔ "مٹّی کے حوالے"کو مہاراشٹر اسٹیٹ اردو اکیڈمی نے اوّل انعام سے نوازا تھا۔ جب کہ اُس زمانے میں مالیگاؤں کے کسی شاعر کو یہ امتیاز حاصل نہ ہوا تھا۔ "مٹّی کے حوالے" کے بعض اشعار ایسے مقبولِ عام ہوئے کہ زباں زدِ خاص و عام ہوکر اب اُن کی حیثیت ضرب المثل کی بن چکی ہے ، مثلاً : ؎

یہ بات میں نے بڑے احترام سے کی ہے

کہ ابتداے سخن تیرے نام سے کی ہے

نہ جانے کون دعاوں میں یاد رکھتا ہے

میں ڈوبتا ہوں تو دریا اُچھالتا ہے مجھے

یہ برگ و بار یوں ہی نہیں لہلہائے ہیں

پیڑوں نے موسموں کے بہت دُکھ اُٹھائے ہیں

اس طرح کے زندہ ، سچّے اور مقبولِ عام اشعار قلم بند کرنے والے مالیگاؤں کے اِس فن کار کا دوسرا شعری مجموعہ "مُسافر خواب لکھتا ہے" اس وقت میرے مطالعہ کے میز کی زینت اور میری تبصراتی کاوش کاعنوان ہے ۔ اپنے شعری مجموعے "مُسافر خواب لکھتا ہے"کو ماں کی یاد میں ، شریکِ حیات کے نام اور لخت ہاے جگر کے لیے کرتے ہوئے شبیر آصفؔ نے جو اشعار لکھے ہیں اُن سے اِن ہستیوں کے تئیں آپ کی پُرخلوص محبت و الفت اور والہانہ اُنسیت مترشح ہوتی ہے۔ شبیر صاحب کی زندگی کا مکمل اثاثہ سخن وری ، سخن سنجی اور سخن فہمی ہے ، حیاتِ مُستعار کے اِس پورے سرماے کو کس قدر خوبی سے اپنی شریکِ حیات کے نام کیا ہے کہ بے ساختہ دل سے داد نکلتی ہے ؎

اِک سخن ہی مرا اثاثہ ہے

وہ بھی میں تیرے نام کرتا ہوں

ماں کی یاد میں لکھا گیا شعر بھی بڑا خوب ہے ، یقیناً ماں کا وجودِ مسعود بڑی برکتوں اور رحمتوں کا موجب ہوتا ہے۔ جب وہ نہیں رہتی تو ہمیں اُس کی اہمیت اور ضرورت کا بہ شدّت احساس ہوتا ہے ؎

اِک ذات میں برکتیں بہت تھیں

اب قدر سمجھ میں آئی ماں کی

ملازمت سے سبکدوشی کے کے بعد شبیر آصفؔ صاحب عمر کی جس منزل سے صبر و استقلال کے ساتھ گذر رہے ہیں وہ اُن کے بچّوں کی محبّت آمیز رفاقت اور شراکت کا ایک حصّہ ہے ۔ جس کا اُنھیں اعتراف بھی ہے ، وہ اپنے لخت ہاے جگر کے لیے کہتے ہیں کہ ؎

عمر کے سفر میں اب تم مرا سہار اہو

میں تمہارے قدموں سے اپنی راہ چلتا ہوں

پاکیزہ اور سچّے جذبات کو شعری پیکر میں ڈھالنے والےحُرمتِ حرف کے حامل شاعرِ محترم کی اُجلی اور روشن فکر سے مملو زیرِ نظر شعری مجموعے میں ایک حمد ، دس نظموں کے علاوہ ستّر کے قریب غزلیں اور سَو سے زائد ثلاثیاں شامل ہیں ۔ نیزمجموعے کے اخیر میں اولین شعری کاوش "مٹّی کے حوالے " سے چند منتخب اشعار بھی خوانِ مطالعہ پر سجادئیے گئے ہیں۔ بالکل آخر میں ایک نظم "دوسری دُعا " ہے اور یہ بھی "مٹّی کے حوالے" سے ماخوذ ہے۔

"مُسافر خواب لکھتا ہے"کا دریچۂ سخن روایت کے مطابق حمدِ باریِ تعالیٰ سے وا ہوتا ہے۔ حمد میں شاعر نے پروردگارِ عالم جل شانہٗ کے بے پایاں رحم و کرم کا اظہار کیا ہے ۔ اللہ عزو جل کی صفات اور اس کی قدرت کا بیان انسانی ادراک سے ماورا بل کہ وراء الورا ء ہے ، لیکن وہ ہماری شہ رگ سے بھی قریب تر ہے ۔ وہ اپنے بندوں پر اس قدَر مہربان ہے کہ کرۂ ارض پر بسنے والے انسانوں کی قوت و استعداد کے مطابق موسموں کو بدلتا رہتا ہے ؎

محبتوں کا صِلہ بے مثال رکھتا ہے

وہ میرا مجھ سے زیادہ خیال رکھتا ہے

گو ، میرے حیطۂ ادراک میں نہیں آتا

مگر وہ دل سے تعلق بحال رکھتا ہے

زمیں کہیں کی بھی ہو ، آسماں کہیں کا بھی ہو

وہ موسموں کو مرے حسبِ حال رکھتا ہے

حمدِ باریِ تعالیٰ کے بعد شاعرِ موصوف نے اپنی محبتوں کا نذرانہ بارگاہِ سالت مآب صلی اللہ علیہ وسلم میں مکمل حزم و حتیاط کےساتھ نچھاور کیا ہے ۔ شبیر آصفؔ یوں تو بنیادی طور پر غزل کے شاعر ہیں لیکن نعت سے اُن کو عشق کی حد تک لگاو ہے ، میری اُن سے شناسائی بھی نعتِ رسولِ مقبول صلی اللہ علیہ وسلم ہی کے حوالے سے ہوئی۔ موصوف نعتیہ کلام کے اس قدر دل دادہ اور شوقین ہیں کہ جہاں بھی کوئی نعتیہ شعر سنتے ہیں اُسے اپنے حافظے کی ڈائری میں محفوظ کرلیتے ہیں ۔ میں نے بہت کم ایسے شعرا دیکھے ہیں جنھیں شبیر آصفؔ کی طرح کثیر تعداد میں نعتیہ اشعار ازبر ہیں۔

"مُسافر خواب لکھتا ہے" میں شامل نصف درجن نعتیں نبیِ کریم صلی اللہ علیہ وسلم سے آپ کی محتاط وارفتگی کا خوب صورت اشاریہ ہیں ۔ ان نعتوں میں آپ نے ذات و صفاتِ رسول صلی اللہ علیہ وسلم ، مقامِ رسول صلی اللہ علیہ وسلم ، سیرتِ طیبہ ، شفاعتِ عظمیٰ اورشہرِ رسول صلی اللہ علیہ وسلم کے دیدار کی خواہش جیسے موضوعات کو بڑی خوش سلیقگی سے برتا ہے۔ اِس مجموعے میں شامل ایک نعت غالبؔ کی مشہور فارسی نعت ؎

حق جلوہ گر زِ طرزِ بیانِ محمد است ﷺ

آرے ، کلامِ حق بہ زبانِ محمد است ﷺ

کا منظوم ترجمہ ہے جسے کافی مقبولیت حاصل ہوئی ، اِس کا مطلع نشانِ خاطر کریں ؎

حق جلوہ گر ہے طرزِ بیانِ رسول سے (ﷺ)

اللہ بولتا ہے زبانِ رسول سے(ﷺ)

نبیِ کریم صلی اللہ علیہ وسلم کے اسوۂ حسنہ کی بات ہی نرالی ہے ، آپ نے دنیا میں پائی جانے والی ہر قسم کی نفرتوں ، کدورتوں اور عصبیتوں کا مکمل طور پر صفایا فرمادیا ، حسب و نسب ، ذات پات اور رنگ و نسل کی تمام تر تفریقوں کو آپ نے مٹا ڈالا۔ اگر ہم سرکار ﷺ کے اُسوہ پر عمل کریں تو دونوں جہاں کی سرخروئی ہمارا مقدّر بن جائے گی ؎

حسب نسب کی مٹادیں تمام تفریقیں

فروغِ عشق پہ مامور ہے پیامِ رسول ﷺ

ہم اپنے دشتِ سفر میں بھٹک نہیں سکتے

نشانِ منزلِ مقصود ہے نظامِ رسول ﷺ

دیگر نعتیہ کلام سے چند منتخب اشعار نشانِ خاطرکریں ، جو شاعر کی نبیِ کریم ﷺ سے پُرخلوص محبت کے آئینہ دار ہیں ؎

اُمتِ شافعِ محشر میں ہوں

مجھ کو امیدِ شفاعت ہے بہت

ناموافق ہی سہی آب و ہواے عالم

لہلہاتا ہے خیابانِ رسولِ اکرم ﷺ

نعت ہر درد کا مداوا ہے

دردِ دل کی دوا کروں مَیں بھی

وضو بغیر نہ آئے زباں پہ نامِ رسولﷺ

پڑھوں میں آخری سانسوں تلک سلامِ رسول ﷺ

حمد و نعت کے بعد ایک دُعا بھی اِس مجموعے کی زینت ہے ، جس کا مطلع تو بڑا ہی پُرکیف ہے ۔ دُعا کا یہ انداز عشقِ رسول ﷺ کا والہانہ اظہاریہ اور بارگاہِ مصطفوی ﷺ کے تئیں شاعر کی خوش عقیدگی کا حسین مظہر ہے۔ دیگر اشعار بھی ایسے ہیں کہ نہاں خانۂ دل سے آمین کی صدائیں بلند ہوتی ہیں، مطلع دیکھیں ؎

کونین کا مدعا عطا کر

یارب، غمِ مصطفیٰ عطا کر

بعد ازاں "مُسافر خواب لکھتا ہے" میں نظموں کا سفر شروع ہوتا ہے ، شریکِ حیات کے ساتھ پروینؔ شاکر، کالی داس گپتا رضاؔ اور ارشد نظرؔ (مرحوم و مغفور) کے لیے لکھی گئیں نظمیں شاعر کی اِن شخصیات سے جذباتی وابستگی اور مخلصانہ شیفتگی کا عکس ہیں۔

میاں بیوی کے رشتے کی پاکیزگی اور اہمیت و نزاکت سے کون واقف نہیں؟ ہماری اُردو شاعری میں بہت کم شعرا ایسے ہیں جنھوں نے اپنی شریکِ حیات کو اپنی شاعری کا موضوع بنایا ہے۔شبیرآصفؔ صاحب کا یہ اختصاص ہے کہ انھوں نے اپنی شریکِ حیات کے لیے دو خوب صورت نظمیں لکھی ہیں۔اُن کی یہ نظمیں اپنی زوجۂ محترمہ کے لیے مخلصانہ رویّوں کی غمازی کرتی ہیں ۔ دونوں نظموں سے چند اشعار ؎

تو شریکِ حیات ہے میری

تجھ سے تکمیل ذات ہے میری

دل تری آرزو سے زندہ ہے

تو رہے تو حیات ہے میری

میں مہکتا ہوں تیری خوشبو سے

تو بناے صفات ہے میری

دل تری نذر کو مَیں لایا ہوں

یہی کُل کائنات ہے میری

۔۔۔۔۔

باغ ہوتا نہ باغباں ہوتا

تو نہ ہوتی تو مَیں کہاں ہوتا

تو جو رودادِ دل نہیں سنتی

قصۂ غم کہاں بیاں ہوتا

پروین ؔ شاکر، کالی داس گپتا رضاؔ اور ارشدنظرؔ کے لیے لکھی گئیں نظمیں بھی خاصے کی چیز ہیں۔ یہ نظمیں سلاست و روانی ، جذبہ و تخیل اور زبان وبیان کے اعتبار سے بھی بلند رُتبہ ہیں ۔ کالی داس گپتارضاؔ کی یاد میں لکھی گئی نظم کا یہ شعر غور طلب اور محلِّ نظر ہے کہ ؎

پیکرِ خاک میں فرشتہ تھا

ہم نے اُس کو پرکھ کے دیکھا تھا

نظموں کے بعد زیرِ نظر مجموعے کا سلسلہ غزلوں کی سمت دراز ہوتا ہے ۔ پروفیسر رشیداحمد صدیقی نے غزل کو اُردو شاعری کی آبروٗ کہا تھا ۔ لیکن عصری منظر نامے پر جب ہم غزلیہ شاعری کا جائزہ لیتے ہیں تو اس قول کا اعتبار ہمیں کم ہوتا دکھائی دیتا ہے ۔ ویسے فی زمانہ بعض شعرا ایسے ہیں جن کے کلام سے غزل کی دل کشی اور دل رُبائی کی خوب صورت پرچھائیاں اُبھرتی ہیں ۔ شبیر آصفؔ کا شمار بھی ایسے ہی شعرا میں ہوتا ہے جنھوں نے غزل کے وقار کو قائم رکھا ہے۔ آپ کاکلام نام نہاد جدیدیت اور فیشن زدگی کی وبا سے پاک و صاف ہے۔ آپ کی غزلوں میں محض لفظی بازی گری نہیں بل کہ اُن میں حُرمتِ حرف کا لحاظ رکھتے ہوئے اصلاحِ فکر کا ایک پیغام دینے کی کامیاب کوشش کی گئی ہے ۔ جذبہ و تخیل کی مناسب آنچ، شعری اظہار میں روایت کی پاس داری ، عصری حسّیت کی آمیزش ، مروّج فنّی رجحانات کا رچاو، معنوی تہہ داری اور اظہار کی سادگی آپ کی غزلوں کی خصوصیات ہیں ۔ آپ کی غزلوں میں داخلیت اور خارجیت کا ایسا خوب صورت انسلاک ہے کہ اکثر اشعار قاری کو کیف آگیں جذبات سے ہم کنار کردیتے ہیں۔ "مُسافر خواب لکھتا ہے "سے چند نمایندہ اشعار نقل کرنے سے قبل شبیرآصفؔ کے معاصر جناب سلیم شہزادؔ کے اِن جملوں کو پیش کرنا غیر مناسب نہ ہوگا : "جن غزل گو فن کاروں کے یہاں روایت کا مطالعہ اور اس کا احترام باقی ہے اور جو عصری فنّی اور فکری تقاضوں کی اہمیت سے بھی واقف ہیں اُن کے غزلیہ اظہار میں گُم ہوتی تخئیلی انفرادیت کی چنگاریاں ضرور چمکتی نظر آتی ہیں ۔ جو کبھی کبھی لپک کر شرارے بھی بن جاتی ہیں۔ ایسے فن کاروں میں شبیرآصفؔ کا نام شمولیت کا مستحق ہے کہ اِن کی غزل حافظؔ و سعدیؔ وغیرہ سے لے کر میرؔ و غالبؔ اور جوشؔ و اقبالؔ اور زیبؔ و بانیؔ کی روایت اور فکری جدّت کے ساتھ یوں سامنے آتی ہے کہ غزل گو شعرا کے اچھے خاصے ہجوم میں انھیں پہچانا جاسکتا ہے۔"

تلاشِ گوہرِ نایاب تو سبھی کو ہے

مگر اُترتا نہیں کوئی گہرے پانی میں

نہ جانے شمعِ شبِ غم میں تاب تھی کیسی

ہوا بھی ہانپ گئی روشنی بجھانے میں

(ہوا بھی ہانپ گئی بالکل اچھوتی ترکیب واہ کیا کہنے)

سرک ہی جاتی ہے سر سے رِدا قناعت کی

کہاں کہاں میں سمیٹوں ضرورتیں اپنی

رات آنکھوں میں خواب کیا سلگے

بڑھ گئی اور تیرگی مجھ میں

میں قلم پر کوئی قدغن نہیں لگنے دیتا

روز ہوتی ہے مری خود سے لڑائی کتنی

غالبؔ سے شبیرآصفؔ بے پناہ متاثر ہیں ۔بہ قول سلیم شہزاد:" جوشِ جنونِ جستجو انھیں غالبؔ کی کثیر پہلو شخصیت اور کثیر معنی شاعری کا ایسا گرویدہ بنائے ہوئے ہے کہ اٹھتے بیٹھتے اُس کے نام کی مالاجپتے نہیں تھکتے۔"یقیناً غالبؔ کے اردو فارسی کلام ، سوانح غالبؔ اور مجموعی طور پر غالبیات کے حوالے سے شبیر صاحب کا مطالعہ قابل رشک ہے۔

غالبؔ پر اُن کے وسیع مطالعے کو دیکھتے ہوئے یہ کہنا بے جا معلوم نہیں ہوتا کہ شہرِ عزیز مالیگاؤں میں وہ "غالبؔ شناسی" کے باب میں اپنی ایک منفرد شناخت رکھتے ہیں۔ "آشوبِ غالبؔ" کے تناظر میں اُن کی چوبیس اشعار پر مشتمل غزل "مُسافر خواب لکھتا ہے" کی ایک انفرادی چیز بن گئی ہے۔ جو لوگ غالبؔ ، غالبؔ کے عہد اور اس کے عہد میں رونما ہونے والے واقعات وغیرہ سے واقف ہیں اگر وہ اس غزل کو پڑھیں تو اُن کو کافی لطف آئے گا اور ایسا محسوس ہوگا جیسے یہ غالبؔ کی خود کلامی ہے ؎

صورت ہی نہیں سکونِ جاں کی

یہ خاک ہے کون سے جہاں کی

ہموار نہ رہ سکی زمیں بھی

حسرت ہی رہ گئی مکاں کی

تغئیر پسند ہے طبیعت

اور چال ہے وہی آسماں کی

کب دستِ کرم دراز ہوگا

کب آنکھ اُٹھے گی مہرباں کی

کب دھوپ سفر کااَنت ہوگا

کب چھاؤں ملے گی سائباں کی

کب وقت ٹلے گا کربلا کا

کب پیاس بجھے گی تشنگاں کی

پوچھا بھی نہیں کبھی کسی نے

کیا قیمت ہے متاعِ جاں کی

اِس عہدِ ناشناسِ فن میں

کیا قدرہے حرفِ شائیگاں کی

اسی قبیل کی ایک غزل بہ عنوان "شعرآشوب" بھی بڑی مزے دار ،پُرلطف اور حقیقت نگاری کا مرقع ہے۔ جو پڑھنے سے تعلق رکھتی ہے۔ "شعر آشوب" کی زیریں رَو میں ہلکا ہلکا طنز بھی پنہاں ہے ۔ غزل کے فارم میں لکھا گیا یہ کلام بھی شبیر آصفؔ کی ایک جداگانہ کوشش ہے ؎

گر چہ قدرِ سخن کی قلّت ہے

شعر گوئی مری ضرورت ہے

نامناسب سلوک شعراسے

اور ناشاعروں کی عزت ہے

میں نے سودانہیں کیا فن کا

یہ مرے عہد کی امانت ہے

شعر حرفِ دُعا میں ڈھلتے ہیں

شاعری بھی مری عبادت ہے

اس مجموعے کی ایک خصوصیت یہ بھی ہے کہ شبیر آصفؔ نے اس میں اپنی لکھی ہوئی ثلاثیاں بھی شامل کی ہیں ۔ویسے اُن کی زنبیل شاعری میں اس قدَر ثلاثیاں ہیں کہ صرف ثلاثیوں کا ایک علاحدہ مجموعہ ترتیب دیا جاسکتا ہے ۔ بہ ہر کیف! اِس مجموعے میں شامل ثلاثیاں بہت خوب ہیں۔ ثلاثیوں کے گوشے کا سرنامہ موصوف نے "دیکھویہ میرے زخم ہیں" دیا ہے اور سرنامے کے اوپر جو ثلاثی درج ہے ، اس کے مطالعے سے ثلاثیوں کا پس منظر مکمل طور پر سامنے آجاتا ہے ؎

دل سے نالے نکل ہی جاتے ہیں

زخم مِلتے ہیں جو عزیزوں سے

وہ ثلاثی میں ڈھل ہی جاتے ہیں

شبیر آصفؔ کی ثلاثیوں کے موضوعات ہمہ رنگ ہیں۔ ان میں عزیزوں سے ملی محبت کاا ظہار بھی ہے اور زخم کابیان بھی، اَخلاقی اَقدار کی پامالی اور اُن سے پیدا شدہ ناگفتہ بہ حالات کا تذکرہ بھی ، اور اِصلاحِ معاشرہ کےلیے طنز و نشتریت کے کاٹ دار وار بھی،۔۔۔ چند ثلاثیاں نشانِ خاطر کریں ؎

زر ہی سے ہے منزلت بشر کی

اِس علم و ادب کے شہر میں بھی

کیا قدر ہے صاحبِ نظر کی

۔۔۔۔

انصاف کی آنکھ بے بصر ہے

جس نے مرا حق غصب کیا ہے

وہ سب کی نظر میں معتبر ہے

۔۔۔۔

سوچو تو بہت بُرا ہوا ہے

تم نے بھی دُکھ دیا ہے اُس کو

پہلے ہی سے جو دُکھا ہوا ہے

۔۔۔۔

حد ہوگئی بد معاملت کی

جس کے لیے سب سے دشمنی لی

اس نے ہی مری مخالفت کی

مجموعے کے اخیر میں "مٹّی کے حوالے" سے ماخوذ دوسری دُعا بھی شامل کی گئی ہے ۔ اِس دُعا میں شاعراپنی عجز بیانی کو اعجاز بیانی ہوجانےکی تمنّا کرتا ہے ، لیکن وہ کچھ سوچ کر غیر مطمئن ہوجاتا ہے۔ وہ سوچنے لگتا ہے اگر ایسا ہوبھی گیا تو آخر کیا حاصل ہوگا ؟؟ شاعر کو اپنی آخرت کی بھلائی کا خیال ہے ، اس لیے وہ اِس دُعا میں دنیاوی عزت و شہرت سے دُور اپنے لیے ایسی خواہش کرتا ہے کہ چاہے میرا نام حرفِ غلط کی طرح مٹ جائے لیکن جب میدانِ محشر میں مَیں ربِ کریم کے حضور لایا جائوں تو اُس کے پسندیدہ بندوں میں میرا نام بھی شامل ہو۔

مختصر یہ کہ جناب شبیر آصفؔ کی شاعری حُرمتِ حرف کی حامل ، خلوص و للہیت کی آئینہ دار، خیالات کی سچائی سے آراستہ ، جذبات کی پاکیزگی سے مزیّن ، انسان دوستی اور اصلاحِ معاشرہ کے لیے ایک پیغام کا درجہ رکھتی ہے ۔ لفظی بازی گری کے اِس ماحول میں ایسی سچّی اور اچھی شاعری کا یقیناً خیر مقدم کیا جانا چاہیے ۔ ڈاکٹر الیاس وسیمؔ صدیقی کے اِن جملوں پراپنے تبصراتی اظہاریے کو ختم کرتا ہوں :" مُسافر خواب لکھتا ہے کے مطالعےکے بعد مَیں پوری ذمہ داری ، پورے یقین اور دل کی گہرائیوں سے نکلنے والی دعاوں کی آمیزش کے ساتھ کہہ سکتا ہوں بل کہ کہہ رہا ہوں کہ اِن شاء اللہ دنیاے شعر وادب کی زبان سے بے ساختہ یہ الفاظ نکلیں گے کہ بہت عرصے بعد سچّی شاعری پڑھنے کومل رہی ہے۔ اللہ قبولیت کا معاملہ فرمائے، (آمین)

(مشمولہ: حرفِ سخن، از : ڈاکٹر محمد حسین مشاہد رضوی ، مطبوعہ الفاظ پبلیکیشنز، کامٹی، ص : 141/ 151)

Rafeeq E Millat K Aqwaal Compiled by Dr Mushahid Razvi

2023-05-25T03:42:00.003-07:00

Rafeeq E Millat K Aqwaal

Compiled by Dr Mushahid Razvi

Naseem E Subh E Noor Dr Mushahid Razvi

2023-03-22T01:38:00.005-07:00

Naseem E Subh E Noor

Dr Mushahid Razvi

Naat Collection

Arbaeen E Midhat Dr Mushahid Razvi ki Dil Aawez Kawish Allama Syed Aulad E Rasool Qudsi

2023-01-09T18:23:00.002-08:00

اربعینِ مدحت : ڈاکٹر مشاہدؔ رضوی کی دل آویز کاوش

از: علامہ سید اولادِ رسول قدسی مصباحی، نیویارک ، امریکا

یہ ایک ناقابلِ انکار حقیقت ہے کہ نعت گوئی کسبی نہیں بلکہ وہبی ہے۔ جس کے اندر من جانب اللہ نعت گوئی کا ملکہ موجود ہوتا ہے وہ اسے بروے کار لاکر جب شعر کہنے کی کوشش کرتا ہے تو اس پر ربِّ اکرم جل جلالہٗ اور اس کے حبیبِ مکرم صلی اللہ تعالیٰ علیہ وسلم کا ایسا احسان و فیضان ہوتا ہے کہ اس کے نوکِ قلم سے نعتیہ اشعار کے وُرود کا سلسلہ چل پڑتا ہے۔ پھر یہ وُرود آورد نہیں بلکہ آمد سے ہم آہنگ و مربوط نظر آتا ہے۔

یہ بات مہرِ نیم روز کی طرح ظاہر و باہر ہے کہ جن اشعار میں آمد کی جلوہ گری ہوتی ہے اس میں وجد و کیف ایسا بااثر اور پُرکار سیلان ہوتا ہے کہ قاری انھیں پڑھ کر بے خود سا ہونے لگتا ہے ۔

کچھ ایسی ہی کیفیات و خوبیاں ڈاکٹر مشاہدؔ رضوی کے نعتیہ اشعار کے پرت پرت میں ہویدا ہیں۔ میرے مذکورہ دعوے کی پشت پناہی کے طور پر مشاہدؔ کی ماہِ صیام میں لکھی گئی چالیس نعتوں کے مجموعے’’اربعینِ مدحت‘‘ کے درج ذیل اشعار سے لطف اندوز ہوسکتے ہیں ؎

جو لکھے ہر روز نعتیں آپ کی

ہو ودیعت وہ قلم شاہِ امم

نعت گوئی ہو مشاؔہد کا اَثاث

ذوقِ مدحت ہو نہ کم، شاہِ امم

دُرود پڑھنے سے فکر و نظر سنورتے ہیں

خطا شعار کو کرتا ہے نیکوکار دُرود

دور کرتا ہے خوفِ یاس و قنوط

رنج و غم کی دوا ہے ذکرِ نبی

مل جائے مجھے صدقۂ حسان و رواحہ

تاعمر کروں نعت رَقَم سیدِ عالم

ڈوبا ہے گناہوں کے سمندر میں مشاہد

محشر میں رکھیں اِس کا بھرم سیدِ عالم

اللہ تبارک و تعالیٰ کی بارگاہِ بے نیاز میں دعا ہے کہ مولیٰ تعالیٰ رسولِ اکرم صلی اللہ تعالیٰ علیہ وسلم اور آپ کے نعت گو صحابۂ کرام رضی اللہ تعالیٰ عنہم کے صدقے ڈاکٹر مشاہدؔ رضوی کی اِس گراں قدر و دل آویز کاوش کو مقبولِ خاص و عام فرمائے اور اُن کے ملکۂ نعت گوئی میں خوب اضافہ فرمائے، آمین بجاہ سید المرسلین صلی اللہ تعالی علیہ وسلم !

Dr Mushahid Razvi ka Ph D Maqala By Allama Qamruzzaman Khan Azmi

2022-12-18T01:53:00.002-08:00

*ڈاکٹر مشاہدؔ رضوی کا تحقیقی مقالہ: دنیاے علم و ادب میں ایک گراں قدر اضافہ*

*از: مفکر اسلام علامہ قمرالزماں اعظمی صاحب قبلہ*

*سکریٹری جنرل ورلڈ اسلامک مشن ، انگلینڈ*

اس وقت میرے زیرِ مطالعہ ادیبِ شہیر ، ناقدِ شعر و سخن حضرت ڈاکٹر محمد حسین مشاہدؔ رضوی کی کتاب ’’مفتیِ اعظم کی نعتیہ شاعری کا تحقیقی مطالعہ‘‘ ہے ۔ میں اپنی ناسازیِ طبع کی بنا پر اپنے تاثرات تاخیر سے بھیج رہا ہوں خدا کرے کہ وقت پر پہنچ جائے اور اس کتاب کے قارئین میں میرا نام بھی شامل ہوجائے۔ یہ کتاب اپنی علمی اور فکری خوبیوں کے ساتھ ایک تفصیلی تبصرے کا مطالبہ کررہی ہے مگر میں اپنی خرابیِ صحت کی وجہ سے چند کلمات پر ہی اکتفا کروں گا۔

ڈاکٹر محمد حسین مشاہدؔرضوی صاحب نے میرے مرشدِ کریم حضور مفتیِ اعظم کی نعتیہ شاعری پر نقد و تبصرہ کا عظیم کام اپنے ذمہ لے کر دنیاے علم و ادب پر احسانِ عظیم فرمایا ہے ورنہ حضرت نوریؔ بریلوی علیہ الرحمہ کے محاسنِ شعری سے دنیاے ادب ناواقف رہتی ۔ بلاشبہ مذہبی حلقوں میں ان کے کلام کو پڑھا جاتا ہے اور انتہائی عقیدت سے سنا جاتا ہے مگر جن حلقوں میں ان کے کلام کی فنی عظمتوں کی رسائی ہونی چاہیے وہ شاید نہ ہوتی۔

حضو رمفتیِ اعظم کا دَور اشتراکی ادب بنام ترقی پسند ادب کے غلبے کا دَور تھا اور اشتراکی نظام کی سرپرستی میں پروان چڑھنے والے اردوادب میں اسلامی ادب کے لیے کوئی جگہ نہیں تھی ۔اسی طرح بہت سے عظیم شعرا کو ادبی دنیا سے باہر رکھا گیا جب کہ اُس دَور میں چند ایسے شعرا جن کے کلام کو نقد و تبصرہ کے میزان پر رکھاجانا ممکن نہیں تھاوہ آسمانِ شہرت کی بلندیوں پر پہنچا دئیے گئے اور آج جب کہ اشتراکی یا ترقی پسند ادب کا دَور اشتراکیت کی موت کے ساتھ ختم ہوچکا ہے اسلامی ادب کو منظرِ عام پر لانے کی ضرورت ہے ،خدا کا شکر ہے کہ ڈاکٹر مشاہدؔرضوی نے اس کا م کا آغازکر دیا ہے ۔

جناب ڈاکٹر محمد حسین مشاہدؔرضوی نے اپنے مشاہدات اور عمیق مطالعے کی بنیاد پر حضرت نوریؔ بریلوی علیہ الرحمہ کی نعتیہ شاعری کے ادبی اور فکری محاسن کو بہت خوبی کے ساتھ نمایاں کیا ہے ۔ باب اول میں انھوں نے نعت کی تعریف اور اس کی خصوصیات پر روشنی ڈالی ہے اور حزم و احتیاط کے ذکر سے صنفِ نعت گوئی کو جملہ اصناف سے ممتاز کیا ہے۔دوسرے باب میں حضرت نوری ؔ بریلوی علیہ الرحمہ کی حیات اور خدمات کا جائزہ لیا گیا ہے ۔ یہ جائزہ اس لیے بھی ضروری تھا کہ شاعری شاعرکی شخصیت اور کردار کی نمائندہ ہوتی ہے۔

حضرت نوریؔ بریلوی علیہ الرحمہ کی نعت گوئی ایک عظیم فقیہ کے حزم و احتیاط ، حقیقی مُوَحِّد کے نظریۂ توحیدکی وضاحت ،ایک عاشقِ رسول کے وارداتِ قلبی ، ایک عظیم صوفی کی شب بیداری ، ذکرِ الٰہی کی آئینہ دار ، اپنے ممدوح کی بے پناہ محبت کی کیفیات ، سوز ِ دروں ، دردِ دل ، آہِ صبح گاہی اورنالۂ نیم شبی کا اظہار ہے مگر شریعت کی تمام رعایتوں کے ساتھ - یہ وہ خوبیاں ہیں جو امامِ نعت گویاں سیدنا اعلیٰ حضرت علیہ الرحمہ کے علاوہ خال خال پائی جاتی ہیں۔

تیسرے باب میں حضرت نوری ؔ بریلوی علیہ الرحمہ کے دَور کی نعتیہ شاعری کا ذکر اور کلامِ نوریؔ کی اُن امتیازی خصوصیات کا تذکرہ کیا گیا ہے جو اُن کے معاصرین سے اُن کو ممتاز کرتی ہیں۔

یوں تو ہر دَور کے شعراے نعت نے اپنی شاعری میں امتیازاتِ رسول علیہ التحیۃ والثناء کونمایاں فرمایا ہے ، اسی طرح ان کے کلام سے فیض یاب ہونے والے قارئین اور سامعین عظمتِ مصطفی صلی اللہ علیہ وسلم سے نہ صرف آشنا ہوتے ہیں بلکہ ان کی محبت کو اپنا سرمایۂ حیات بنالیتے ہیں۔

کلامِ نوریؔ میں رنگِ تغزل بہت نمایاں ہے اگر ان کے مجموعۂ نعت کے اُن اشعار کو جن میں تغزل اپنے شباب پر نظر آتا ہے علاحدہ سے شائع کیا جائے تو وہ اپنے دور کے امام المتغزلین نظر آئیں گے ۔ جناب ڈاکٹر مشاہدؔرضوی نے کلامِ نوریؔ میں معانی وبیان اور جملہ صنائع اور بدائع کی وضاحت کی ہے جو کلامِ نوریؔ کی خصوصیات کی نمائندہ ہیں او ر جو دوسرے شعرا میں کم پائی جاتی ہیں۔

مجھے امید ہے کہ ڈاکٹر مشاہدؔ کی یہ کتاب علم و ادب کی لائبریریوں میں ایک گراں قدر اضافہ ہوگی اور اہلِ علم سے خراجِ عظمت حاصل کرے گی ، ان شآء اللہ!

*خاکسار محمد قمرالزماں اعظمی*

سکریٹری جنرل ورلڈ اسلامک مشن ، انگلینڈ

10؍ جولائی 2022ء بروز اتوار

Arbaeen E Midhat Dr. Mushahid Razvi

2022-09-16T03:43:00.002-07:00

Arbaeen E Midhat

Dr. Mushahid Razvi

Dr Mushahid Razvi Apne Tahqiqi Maqale Ki Raushni Me

2022-07-11T03:22:00.001-07:00

ڈاکٹر مشاہدؔ رضوی اپنے تحقیقی مقالے کی روشنی میں

از : علامہ محمد قمرالحسن قادری قمرؔ بستوی

بانی بزم حسان انٹرنیشنل نعت اکیڈمی ہوسٹن،امریکہ

خطیب و امام جامع مسجد النور ، ہوسٹن ، ٹیکساس ، امریکہ

تحقیق و جستجو فکری جولانیت کا مظہر ہوتی ہیں ۔ دماغ کی انجلائی کیفیت جب کسی نئے عنوان کی تلاش میں پرواز کرتی ہے تو زاویۂ فکر کی وسعتوں میں ایک غیر محسوس دنیا سماتی چلی جاتی ہے۔ اگر فکر کو غیر متحرک رکھا جائے توارتقا کے سارے روزن ایک ایک کرکے بند ہونے لگتے ہیں اور ایک منزل وہ آتی ہے کہ سوچنے اور سمجھنے کی صلاحیت دم خوردہ ہوکر رہ جاتی ہے۔ اشہبِ قلم کی رفتار اس وقت تیز تر ہوجاتی ہے جب فکر کو مسلسل مصروف رکھاجاتا ہے۔ پھر ایک منزل ایسی آتی ہے کہ ذہن کو ذرا تحریک دی اور مضامین کا طوفان اٹھ کھڑا ہوا۔ یہ اہلِ ذوق اور صاحبانِ قلم جانتے ہیں کہ فکر ایک سیال چشمہ ہے۔ جب تک جاری رہتا ہے تو اس کی طراوت ، شیرینی اور ذائقہ باقی رہتا ہے اور جب وہ خشک ہوجاتا ہے تو اس کی حیثیت ختم ہوجاتی ہے۔

حضور سید ی ، آقائی و مرشدی مفتی اعظم ہند علیہ الرحمۃ والرضوان پر غالباً Ph.D. کا یہ پہلا مقالہ ہے ۔ غالباًاس لیے لکھ رہا ہوں کہ میں جس دنیا میں رہتا ہوں وہ بالکل الگ تھلگ دنیا ہے ۔ وطن مالوف میں تحریکی سرگرمیوں سے واقفیت کم ہی ہوپاتی ہے۔ یہ تو جب سے الکٹرانک میڈیا میں مواصلات کے نئے ذرائع کی ایجاد ہوئی تو کچھ روابط ہونے لگے ورنہ تیرہ ہزار کلو میڑ کی دوری پر مشرق کی خبر مغرب میں پہنچتے پہنچتے ایک عرصہ لگ جایا کرتاتھا۔ مرشدی حضور مفتی اعظم علیہ الرحمہ پر ڈاکٹر محمد حسین مشاہدؔ رضوی، مالیگاؤں ، مہاراشٹر نے تھیسس لکھ کر ایک نئی جہت کی طرح ڈال دی ہے۔ موصوف اس بار ے میں یقیناً مبارک بادی کے مستحق ہیں کہ انھوں نے اپنے مقالے کا عنوان حضرت علیہ الرحمہ کی ذات کو بنایا اور تہنیت ہے اس ادارے کو جس نے اس موضوع کو قبول کرکے رجسٹریشن کیا اور وہ نگراں جن کی نگرانی میں یہ مقالہ لکھا گیا۔

ڈاکٹر مشاہدؔ سے میری کوئی ملاقات نہیں ہے۔ بلکہ جب ان کا پہلا میسیج موصول ہوا تو یہ پہلی مواصلت تھی ورنہ اس سے قبل کوئی رابطہ نہیں تھا۔ تاہم مرشد برحق کی شخصیت پر ان کا یہ کام مواصلت کے لیے کافی ہے۔ یہ مشیت کے لیے مخفی انتظامات تھے خضرِ راہ کی شکل میں حضرت سید ڈاکٹر امین میاں جیسی شخصیت سے ملاقات ہوئی اور انھوں نے سیدی مفتی اعظم کی شخصیت پر کام کرنے کا حکم دیا۔ ڈاکٹر مشاہدؔ صاحب نے اس کا ذکر خود کرکے حضرت امین میاں کا اعترافِ شکر کیا ہے، بیان کرتے ہیں:

’’اسی دوران مجھے حضرت علامہ پروفیسر ڈاکٹر سید محمد امین میاں قبلہ مارہروی ( سجادہ نشین خانقاہ عالیہ قادریہ برکاتیہ مارہرہ مطہرہ ، پروفیسر شعبۂ اردو مسلم یونیورسٹی علی گڑھ) سے شہر جلگاؤں میں جناب اقبال بھائی برکاتی کے دولت کدہ پر ملاقات کا شرف حاصل ہوا ، ثناے گفتگو راقم نے آپ کی خدمت والا بابرکت میں پی۔ایچ۔ڈی۔ کرنے اور موضوع سے متعلق مؤدبانہ عریضہ پیش کیاتو آپ نے ’حضور مفتی اعظم علامہ شاہ مصطفی رضا نوریؔ بریلوی کی حیات و خدمات اور نعتیہ شاعری‘ کے حوالے سے تحقیقی کام کرنے کا مفید ترین مشورہ عنایت فرمایاساتھ ہی خصوصی دعاؤں سے بھی نوازا۔‘‘

(مفتی اعظم علامہ مصطفی رضا نور ؔی بریلوی کی نعتیہ شاعری کا تحقیقی مطالعہ ، ص: 17)

خانوادۂ برکات سے امام اہل سنت کا جو روحانی تعلق تھا وہ اظہر من الشمس ہے اور حضرت سید امین میاں کی یہ خواہش کہ سیدی مفتی اعظم کی شاعری پر تحقیقی مقالہ سپردِ قلم کیا جائے یہ ایک الہامی امر تھا جو پردۂ خفا سے نکل کر وجود میں آیا اور یہ سعادت بھی ڈاکٹر محمد حسین مشاہدؔ رضوی صاحب کے حصے میں آئی ؎

خوشا نصیبی کہ آں ساعتِ ہمایوں بود

قرعۂ عشق بنامِ منِ دیوانہ زدند

ڈاکٹر مشاہدؔ صاحب وہ خوش نصیب ہیں کہ مشیت الٰہی نے یہ کام ان سے لیا ورنہ یہ قرعۂ فال کسی اور کے نام بھی نکل سکتاتھا۔ کتاب کا سرسری مطالعہ کرنے سے جہاں ڈاکٹر مشاہدؔ صاحب کے علمی طمطراق کا پتا چلتا ہے وہیں ان کی انتھک محنت بھی مترشح ہے کہ شب و روز کی محنت کرکے انھوں نے اپنی تھیسس کو پایۂ تکمیل تک پہنچایااور ڈاکٹریٹ کی ڈگری حاصل کی۔

ڈاکٹر مشاہدؔ رضوی صاحب کا تحقیقی مقالہ آٹھ ابواب پر مشتمل ہے ۔ باب اول: نعت کے لغوی اور اصطلاحی مفہوم کی وضاحت ، باب دوم میں فنِ نعت گوئی پر روشنی ڈالی گئی ہے۔ باب سوم میں نعت گوئی کی تاریخ کا اجمالی جائزہ لیا گیاہے۔ باب چہارم: ہندستان میں اردو نعتیہ شاعری 1412ء سے لے کر حضرت نوریؔ بریلوی تک ،باب پنجم : پانچ ضمنی عنوانات، باب ششم : کلامِ نوری ؔ بریلوی کا بالتفصیل تحقیقی جائزہ لیتے ہوئے آپ کے کلام کے مختلف شعری و فنی محاسن کو تحقیق کی روشنی اجاگر کیا گیا ہے۔ باب ہفتم میں حضرت نوریؔ بریلوی کی شعری و فنی محاسن ، آپ کے نعتیہ رجحانات ، خیالات اور افکار پر اہل علم و دانش نیز شاعروں ، ادیبوں اور محققین و ناقدین کی گراں قدرآراجمع کی گئی ہیں، باب ہشتم: گذشتہ ابواب کی روشنی میں نوریؔ بریلوی کے اسلوب نگارش ، کلام کی خوبیوں ، آپ کے نعتیہ رجحانات ، خیالات اور افکار کی عالم گیر شہرت و مقبولیت کو واضح کرتے ہوئے یہ بیان کیا گیا ہے کہ آپ کی نعتوں میں تصوف و معرفت کی جوروح پنہاں ہے وہ ہماری قومی و ملی ،تہذیبی و تمدنی اور علمی و ادبی ورثہ ہیں۔

مگر رضا اکیڈمی ، ممبئی سے جو کتاب شائع ہوئی ہے اس میں صرف پانچ باب شامل کیے گئے ہے۔ اس سے یہ کہا جاسکتا ہے کہ پوری تھیسس کی تلخیص کرکے عوام کے لیے جو ناگزیر سمجھا گیا اس کو شائع کیا گیا۔ جس پر خود ڈاکٹر مشاہدؔ رضوی نے اپنے پیش لفظ روشنی ڈالی ہے۔

ڈاکٹر مشاہدؔ صاحب نے کلامِ نوریؔ کا بھرپور جائزہ لیا ہے اور اپنی بساط کے مطابق اس کے فنی تجزیے کا آئینہ بھی سجایاہے۔ خاص طور سے کتابِ مذکور کا ’’باب سوم : مفتی اعظم کی نعتیہ شاعری کا تحقیقی و ادبی مطالعہ‘‘ اپنے اندر بڑی جوہریت رکھتا ہے اورمیری ناقص راے میں یہ باب کتاب کا خلاصۂ ابواب ہے۔

چوں کہ نقشِ اول ڈاکٹر مشاہدؔ صاحب نے بنادیاہے اور اس کی طرح ڈال دی ہے اب اس پر دوسرے لوگ مزید اضافہ کرتے رہیں۔ دراصل امام اہل سنت کے خانوادے کی یہ خوبی ہے کہ جوبھی حضرات جیسے حضرت حسن ؔ بریلوی ، حضرت حجۃ الاسلام ، حضرت مفتی اعظم ،حضرت تاج الشریعہ ، حضرت ریحانِ ملت وغیرہم جو مشقِ سخن سے تعلق رکھتے تھے ان کے یہاں نعت اپنے پورے حُسن کے ساتھ موجود ہے۔ نعت کی اَساس شرعی حدود کی پابندی ہے جو اِن حضرات کے یہاں بدرجۂ اتم پائی جاتی ہے۔ بقیہ بدائع و صنائع یہ شرعی حدود کے توابع ہوتے ہیں۔ کیوں کہ جب اَساس ہی خام ہوتو اس پر اٹھنے والی بنیاد بے معنیٰ ہے۔ کلام میں ندرتِ بیانی ان شرعی پاسداریوں کے ساتھ ہی زیب دیتی ہے اگر اس سے ہٹ کر ہوتو وہ بے جان لاشہ کے سوا کچھ بھی نہیں۔

کتاب کے مطالعے سے یہ بات بھی واضح ہوتی ہے کہ ڈاکٹر مشاہدؔ خود بھی صنف سخن کی پیچ داریوں سے واقف ہیں۔ کیوں کہ جب تک شعور کی راہ داریوں میں ذاتی جوہریت رہنمائی نہ کرے تو قدم اٹھانا مشکل ہوتا ہے ۔ ڈاکٹر مشاہدؔ صاحب کا شمار نہ صرف اچھے نثر نگار میں ہوتا ہے بلکہ وہ کافی مقبول خوش فکر نعت گو شاعر بھی ہیں ۔ انھوں نے فکرِ نوریؔ کی فنی تہہ داریوں کی پرتیں جس احسن اسلوب میں کھولی ہیں اور اس کے اسرارِ بستہ کو واشگاف کیا ہے ۔ اس داعیہ پر یہ کتاب خود ایک دلیل ہے کہ مشاہدؔ صاحب صنف نعت کے جوہر شناس ہیں ۔ یہ کتاب روشن آئینے کی طرح فکر و نظر کو جگمگارہی ہے۔ باب سوم کا ہر عنوان بذاتِ خود ایک دلیلِ واضح ہے۔

ڈاکٹرمشاہدؔ رضوی کی فکر نے خیابانِ مفتی اعظم سے جو رنگارنگ گل اخذ کیے ہیں وہ لائقِ مبارک باد ہیں۔موصوف کا طرزِ بیان سادہ، رواں اور غیر گنجلک ہے۔ نثری شہ پاروں میں پہلے قافیہ پیمائی ہوتی تھی مگر اب وہ دَور باقی نہیں رہا۔ جب فارسی کا چلن زیادہ تھا اس وقت ترصیعی عبارتوں کو اہمیت سے دیکھاجاتا تھا مگر اب سہل، رواں، مربوط اور زود فہم عبارتیں نثری اسلوب کا حصہ ہیں کیوں کہ کوئی بھی تحریر قاری کے مذاقِ طبع کو سامنے رکھ کر پیش کی جاتی ہے ۔ اگر مغلق عبارتیں، مشکل الفاظ، گنجلک مفہوم اور غیر مربوط تحریر ہوتو قاری اس سے استفادہ نہیں کرپائے گا۔ ایسے میں مقصود حاصل نہیں ہوپائے گا اور جو حاصل ہوگا وہ مقصود نہیں ہوگا۔ کوئی بھی تحریر اگر اس سے استفادہ ممکن نہ ہوتو وہ تحریر بے جان ہے۔ اس لیے ہر قلم کار کو چاہیے کہ وہ بہ غرضِ افادہ لکھے اور اس سے عوام کو مستفید ہونے کا موقع فراہم ہوسکے۔ ڈاکٹر مشاہدؔ رضوی نے اپنی تحریر میں اس کا خاص خیال رکھا ہے کہ میری تھیسس صرف میرے سپروائزر سے خراجِ تحسین حاصل نہ کرے بلکہ عوام سے بھی کلماتِ تحسین حاصل کرے۔ یہ اقتباس دیکھیے، عبارت واضح، مفہوم غیر مبہم اور رواں ہے:

’’حضرت نوریؔ بریلوی کی شاعری دراصل وہبی تھی کسبی نہیں۔حضرت نوریؔ بریلوی صرف شاعر ہی نہیں شارح ادب بھی تھے اور طلاقتِ لسانی ، برجستگی و شگفتہ کلامی کا پیکر بھی، آپ نے اپنے والد ماجد امام احمد رضا بریلوی کے چند اشعار کی شرح بھی فرمائی ہے جسے فتاویٰ مصطفویہ میں نشانِ خاطر کیاجاسکتا ہے۔ نیزتصنیفِ رضا ’الاستمداد علیٰ اجیال الارتداد‘ پر نوریؔ بریلوی نے حواشی بھی لکھے ہیں اور اشعار کی شرح بھی فرمائی ہے۔ ان امور سے بھی شعر و سخن سے آپ کے دلی لگاؤ اور شغف کاانداز ہوتا ہے نیز تخییلی رویے کاپتا چلتاہے۔‘‘ (ص : 203)

کلامِ نوریؔ کے جن گوشوں پر اس میں اجمالی نظر ڈالی گئی ہے ا ن کو تفصیل میں لانے کے لیے مزید اس طرح کے اور بھی مقالوں کی ضرورت ہے۔ مگر یہ کام سیدی مفتی اعظم کے علمی کارناموں میں اُس پر ہوا ہے جو ’اصلی‘ نہیں ’ضمنی‘ ہے۔ شاعری آپ نے اصالت کے طور پر نہیں بلکہ ضمنی طور پر کی ہے آپ کا اصل کام وہ فقہی جواہر پارے ہیں جو آپ کی تصنیفات میں یادگار ہیں۔ ضرورت اس بات کی ہے کہ کوئی اہل علم و دانش اٹھے اور حضور مفتی اعظم کی فقہی خدمات پر مقالہ لکھے اور ڈاکٹریٹ کی ڈگری لے۔ کیوں کہ آپ کا اصل کارنامہ فقہیات کی شکل میں بھی موجود ہے۔ اگر دست بردِ زمانہ سے وہ سارے فتاویٰ محفوظ رہ گئے ہوتے تو آپ کے مجموعہ فتاویٰ کی حیثیت ’’فتاویٰ رضویہ‘‘ کی ثانویت کی شکل میں ہوتی۔ تاہم موجودہ ’’فتاویٰ مفتی اعظم‘‘ جو مولانا جمال احمد صاحب نے ازسرِ نوترتیب دے کر شائع کیا ہے وہ دراصل باقیات ہیں پھر بھی خذ ماصفیٰ ودع ماکدر کے مطابق جو ہے وہ بذاتِ خود ایک عظیم علمی سرمایہ ہے۔ اس پر پی۔ایچ۔ڈی۔ کرنا گویا فقہیات کے تناظر میں عصرِ جدید کے لیے ایک نئی سوغات ہوگی۔ کیوں کہ سیدی مفتی اعظم کے فتاویٰ میں جو گیرائی اور گہرائی اور استدلال کی قوت مخفی ہے وہ کسی سے پوشیدہ نہیں۔ ہر صاحب علم اس کو جانتا ہے، ہوسکتا ہے:

’’مردمی از غیب بروں آید و کاری بکند‘‘

ڈاکٹر مشاہدؔ رضوی صاحب کو ہدیۂ تبریک ہے، اللہ تعالیٰ ان کی اس کاوش کو قبولیت عطا فرمائے اور مستقبل میں حضرت علیہ الرحمہ پر کام کرنے والوں کے لیے سنگ میل بنادے، نیز المرء مع من احب کے مصداق ان کو بھی اور ہم سب کو بھی انھیں محبوبین کی جماعت میں اٹھائے ، آمین بجاہ سید المرسلین صلی اللہ علیہ وسلم !

محمد قمرالحسن قادری قمرؔ بستوی غفرلہٗ القوی

چیئرمن رویت ہلال کمیٹی آف نارتھ امریکہ

بانی بزم حسان انٹرنیشنل نعت اکیڈمی ہوسٹن،امریکہ

خطیب و امام جامع مسجد النور ، ہوسٹن ، ٹیکساس ، امریکہ

25؍ جون 2022ء

25؍ ذی قعدہ 1443ھ ہفتہ

E-Book Syed Mohammed Ashraf ki Taqdeesi Shaeri

2021-11-01T18:48:00.001-07:00

E-Book Syed Mohammed Ashraf ki Taqdeesi Shaeri

Ar Raheel Allama Badrul Qadri Misbahi

2021-09-09T21:14:00.001-07:00

Ar Raheel

Allama Badrul Qadri Misbahi

..:: Follow us on ::..

Aqeeda E Khatm E Nubuwwat Par Urdu K Muntakhab Ashaar

2021-09-07T00:49:00.001-07:00

بسم اللہ الرحمن الرحیم

عقیدۂ ختم نبوت پر اردوکےمنتخب نعتیہ اشعار

----- محمد حسین مشاہد رضوی

اللہ رب العزت جل جلالہٗ نےسب سے پہلے اپنے محبوب محمد ٘مصطفیٰ صلی اللہ تعالیٰ علیہ وآلہ وسلم کے نور کو پیدا فرمایا ، اس نور کے طفیل سارے عالم و عالمیان کی تخلیق فرمائی ۔ انسانوں کی ہدایت و رہنمائی کے لیےدنیا میں اُس نے انبیاومرسلین علیہم السلام کو مبعوث فرمایا۔ حضرت آدم علیہ السلام سے لے کر حضرت عیسیٰ علیہ السلام تک انبیا و مرسلین علیہم السلام اِس دنیا میں تشریف لاتے رہے اور عالمِ انسانیت کو فوز و فلاح کی راہ دکھاتے رہے۔ جس نور سے اللہ نے ساری کائنات کو خلق فرمایا ۔ اخیر میں اسی نورِ مبین یعنی خاتم المرسلین حضرت سیدنا و مولانامحمد مصطفیٰ صلی اللہ علیہ وآلہ وسلم کے فرقِ اقدس پر نبیِ آخر الزماں کا تاجِ فضیلت و کرامت سجا کر اِس خاکدانِ گیتی پر جلوہ گر فرماتے ہوئے :مَا کَانَ مُحَمَّدٌ اَبَاۤ اَحَدٍ مِّنۡ رِّجَالِکُمْ وَلٰکِنۡ رَّسُوۡلَ اللہِ وَ خَاتَمَ النَّبِیّٖنَ ؕ وَ کَانَ اللہُ بِکُلِّ شَیۡءٍ عَلِیۡمًا کا فرمانِ والا شان بھی قرآن میں نازل فرمایا کہ : محمد(صلی اللہ علیہ وآلہ وسلم) تمہارے مَردوں میں کسی کے باپ نہیں ، ہاں! اللّٰہ کے رسول ہیں ، اور سب نبیوں کے پچھلے ،اور اللّٰہ سب کچھ جانتا ہے( سورۃ الاحزاب آیت ۴۰)یعنی نبیِ کریم ﷺآخر الانبیاء ہیںکہ نبوّت آپ پر ختم ہو گئی آپ کی نبوّت کے بعد کسی کو نبوّت نہیں مل سکتی حتّٰی کہ جب حضرت عیسیٰ علیہ السلام نازل ہو ں گے تو اگرچہ نبوّت پہلے پا چکے ہیں مگر نُزول کے بعد شریعتِ محمدیہ پر عامل ہوں گے اور اسی شریعت پر حکم کریں گے اور آپ ہی کے قبلہ یعنی کعبہ معظّمہ کی طرف نماز پڑھیں گے ، حضور کا آخر الانبیاء ہونا قطعی ہے ، نصِّ قرآنی بھی اس میں وارد ہے اور صحاح کی بکثرت احادیث توحدِّ تواتر تک پہنچتی ہیں ۔ ان سب سے ثابت ہے کہ حضور سب سے پچھلے نبی ہیں آپ کے بعد کوئی نبی ہونے والا نہیں جو حضور کی نبوّت کے بعد کسی اور کو نبوّت ملنا ممکن جانے ، وہ ختمِ نبوّت کا منکِر اور کافِر خارج از اسلام ہے ۔

عقیدۂ ختم نبوت کو تسلیم کرنا عین اسلام و ایمان ہے ۔ نبیِ کریم مصطفیٰ جانِ رحمت صلی اللہ علیہ وآلہ وسلم کو آخری نہ ماننا غیر اسلامی عقیدہ ہے ۔ جو بھی آپ کے بعد کسی بھی شخص کو نبی مانے وہ مسلمان نہیں بلکہ دائرۂ اسلام سے خارج مانا جائے گا۔ دورِ صحابہ سے لے کر اب تک جتنے بھی افراد میں نبوت کا جھوٹا دعویٰ کیا اُن کےفاسد اور کفریہ عقائدو نظریات کی ہر دور میں تردید کی جاتی رہی ہے۔ ان کذابوں کی دروغ گوئی کا ہر زمانے میں پرد ہ چاک کرنے میں علماے کرام کے ساتھ ساتھ شعراے اسلام نے بھی اہم کردار ادا کیا۔ چناں چہ مختلف اندازمیں اپنی قوتِ متخیلہ کو بروے کار لاتے ہوئے شعرا ے اسلام نے اپنی نعتوں اور دیگر اصناف کے وسیلے سے عقیدۂ ختم نبوت کو اشعار کے پیکر میں ڈھالنے کی خوب صورت کوششیں کی ہیں۔ خصوصیت کے ساتھ برصغیر ہندو پاک میں جب اردو اپنے تشکیلی دور سے آگے بڑھ کر ادبی زبان کا درجہ حاصل کرچکی تھی اُس عصر میں مرزا غلام احمد قادیانی کذاب نے نبوت کا جھوٹا دعویٰ کیا تھا۔ یہی وجہ ہے کہ اردو زبان و ادب میں نثر و نظم کےذریعے جس قدر عقیدۂ ختم نبوت کے تحفظ اور جھوٹے دعواے نبوت کی تردید میں مضامین اور خیالات ملتے ہیں وہ سب اِسی مرزاے قادیان کذاب کے رد میں ہی ہیں۔ انگریزی عہد میں انگریزوں کے نمک خوار اسلام مخالف اِس کذاب نے نبوت کا جھوٹا دعویٰ کیاعلماے اسلام نے اس کی پُرزور انداز میں مخالفت کی ، مناظرے کیے، اجلاس کا انعقاد کیا ، کانفرنسیں منعقد کیں ، کتابیں تصنیف فرمائیں ،شعرا نے اپنے اشعار کے ذریعے اِس کذاب کے عقائدِ باطلہ کا ردِ بلیغ کیا۔ غرض کہ ہر ہر محاذ پر علما نے عقیدۂ ختم نبوت کی حفاظت و صیانت کا کام انجام دیا اور انھیں کے شانہ بہ شانہ شعراے اسلام نے بھی عقیدۂ ختم نبوت کو اپنی فکر و نظر کا مرکز و محور بنایا۔ اردو نعت میں کافیؔ، محسنؔ ، رضاؔ،امیرؔ مینائی،اکبرؔ وارثی، ظفرؔ علی خاں، مظہرؔ، نصیرؔ، حسنؔ، نظرؔ، اخترؔ الحامدی، ماہرؔ القادری، حفیظ تائبؔ، مظفرؔ وارثی، بشیر حسین ناظمؔ، راجا رشید محمودؔ وغیرہم نے جو روشن نقوش مرتب کیے ہیں ، وہ مثالی حیثیت کے حامل ہیں ۔ان شعرا کے ہاں عقیدۂ ختم نبوت کا بھرپور نظارا ہمیں دیکھنے کو ملتا ہے ۔ علاوہ ان حضرات کے اردو کے جدید شعراے نعت کے ہاں بھی عقیدۂ ختم نبوت کا گہرا رچاؤ پایا جاتا ہے۔ اردو نعت کے عصری منظر نامے پر بھی جب ہم طائرانہ نگاہ ڈالتے ہیں تو بیشتر شعرا کے یہاں نبی آخرالزماں صلی اللہ علیہ وسلم سے عشق و محبت اور اُن کے اسوۂ حسنہ پر عمل کی تلقین کے ساتھ ساتھ عقیدۂ ختم نبوت کا رنگارنگ اندازجلوہ گرنظر آتا ہے۔ اس مضمون میں بلاتبصرہ مختلف نعت گو شعراے کرام کےایسے منتخب اشعار پیش کیے جارہے ہیں ،جن میں عقیدۂ ختم نبوت کا بیان کیا گیا ہے :

قلی قطب شاہ معانی ؔ:

تج مکھ اجت کی جوت تھے عالم وپین ہارا ہوا

تج دین تھے اسلام لے موہن جگت سارا ہوا

یک لک اسی پیغمبراںاپجے جگت میانے ولے

تج پر ہے نبوت ختم سب تھے تو ہی پیا را ہوا

----

ملاوجہیؔ:

اسی ہور ایک لاک پیغمبر آئے

ولے مرتبا کوئی تیرا نہ پائے

چھپا نور سب کا ترے نور انگے

کہ جیوں تارے چھپتے اہے سور انگے

----

نصرتیؔ :

رہے نامور سید المرسلین

کہ آخر ہے وے شافع المذنبیں

نول رُکھ پہ خلقت کے اے دل تو ریج

وہی پھل ہے آخر جو اول ہے بیج

----

غواصیؔ:

تو طہٰ تو یٰٓس تو ابطحی

تو امی تو مکی تو مرسل سبھی

توں اول توں آخر توں ہی ہے امیر

توں ظاہر توں باطن نبی بے نظیر

----

میر حسنؔ :

کیا حق نے نبیوں کا سردار اسے

بنایا نبوت کا حق دار اسے

نبوت جو کی اس پہ حق نے تمام

لکھا اشرف الناس خیر الانام

----

کافیؔ مرادآبادی:

خاتم الانبیاء ہوئے پیدا

مجتبیٰ مصطفیٰ ہوئے پیدا

٭٭٭

شبِ میلادِ ختم المرسلیں ہے نور کے جلوے

کنارے شرق سے مغرب تلک گھر گھر ہوئے پیدا

٭٭٭

شبِ ولادتِ ختم پیغمبراں ہے آج

شبِ ولادتِ سردارِ سرورا ہے آج

٭٭٭

وہ صاحبِ لولاک نبی ختم رسل کی

ہےنوبت و شہرت ورفعنا لک ذکرک

٭٭٭

خاص محبوبِ خدا ختم رسالت پہ سلام

عین رحمت شافعِ روزِ قیامت پہ سلام

٭٭٭

سیدسادات و فخرِ انبیا ختم رسل

سرورِ کونین و سلطانِ رسالت السلام

٭٭٭

سزاوارِ خطابِ رحمۃ للعالمیں ہو تم

بانگشتِ شہادت خاتم ختم رسولاں ہو

----

داغؔ دہلوی:

تو جو اﷲ کا محبوب ہوا خوب ہوا

یانبی خوب ہوا خوب ہوا خوب ہوا

اے شہنشاہِ رسل فخرِ رسل ختمِ رسل

خوب سے خوب خوش اسلوب ہوا خوب ہوا

----

امام احمد رضا ؔبریلوی :

نہ رکھی گل کے جوشِ حسن نے گلشن میں جا باقی

چٹکتا پھر کہاں غنچہ کوئی باغِ رسالت کا

٭٭٭

بزمِ آخر کا شمع فروزاں ہوا

نورِ اوّل کا جلوہ ہمارا نبی

٭٭٭

فتحِ بابِ نبوت پہ بے حد درود

ختمِ دورِ رسالت پہ لاکھوں سلام

٭٭٭

آتے رہے انبیا کما قیل لہم

والخاتم حقکم کہ ختم ہوئے تم

یعنی جو ہوا دفترِ تنزیل تما

آخر میں ہوئی مہرکہ اکملت لکم

----

ڈاکٹر اقبالؔ :

وہ دانائے سبل ختم الرسل مولائے کل جس نے

غبارِ راہ کو بخشا فروغِ وادیِ سینا

نگاہِ عشق و مستی میں وہی اول وہی آخر

وہی یاسیں وہی طٰہٰ وہی قرآں وہی فرقاں

----

حسنؔ رضا بریلوی :

تمام ہوگئی میلادِ انبیاکی خوشی

ہمیشہ اب تیری باری ہے بارہویں تاریخ

٭٭٭

اے نظم رسالت کے چمکتے ہوئے مقطع

تو نے ہی اسے مطلع انوار بنایا

٭٭٭

تھی جو اس ذات سے تکمیل فرامیں منظور

رکھی خاتم کے لیے مُہر نبوت محفوظ

٭٭٭

آپ ہیں ختم رُسل ختم رسالت مہر ہے

آپ آئینہ ہیں وہ تصویرِ پشت آئینہ

گر رسالت کی گواہی چاہتے ختم رسل

بول اُٹھتا طوطیِ تصویر پشت آئینہ

----

جمیلؔ قادری بریلوی:

وہ ختم الانبیاء تشریف فرما ہونے والے ہیں

نبی ہر ایک پہلے سے سناتا یہ خبر آیا

٭٭٭

نہیں ہے اور نہ ہوگا بعد آقا کے نبی کوئی

وہ ہیں شاہِ رسل ختمِ نبوت اس کو کہتے ہیں

لگا کر پشت پر مہرِ نبوت حق تعالیٰ نے

انھیں آخر میں بھیجا خاتمیت اس کو کہتے ہیں

٭٭٭

نہیں ہے اور نہ ہوسکتا ہے بعد اُن کے نبی کوئی

ہوا ظاہر یہ ختم الانبیاء کی مہرِ انور سے

٭٭٭

تمامی انبیا آئے مبشِّر

خبر اول تھی اس مبتدا کی

نہ ہوگا بعد اُن کے پیغمبر

بتاتی ہے مہرِ نبوت نبی کی

----

مفتی اعظم ہندنوریؔ بریلوی:

تم ہو فتحِ بابِ نبوت ، تم سے ختم دورِ رسالت

ان کی پچھلی فضیلت والے صلی اللہ علیک وسلم

٭٭٭

تمہارے بعد پیدا ہونبی کوئی نہیں ممکن

نبوت ختم ہے تم پر کہ ختم الانبیاء تم ہو

----

صفیؔ لکھنوی:

ختم ہو جاتے جو حسن و عشق کے ناز و ادا

شاعری بھی ختم ہو جاتی نبوت کی طرح

----

نیاز ؔفتح پوری:

نبوت ختم ہے اُس پر یہ اپنا دین و ایماں ہے

وہ ہے مثل آپ ہی اپنا یہ مرکوزِ دل وجاں ہے

محمد سا اگر دنیا میں کوئی اور انساں ہے

تو میں کہہ دوں گا ہمتاے خدا ہونا بھی آساں ہے

٭٭٭

گر انساں ہمسرِ شانِ رحیمی ہونہیں سکتا

تو کوئی رحمۃ للعالمیں بھی ہونہیں سکتا

----

احسان دانشؔ:

اب نہ اتریں گے صحیفے اب نہ آئیں گے رسول

لے کے قرآں آخری پیغامبر پیدا ہوئے

----

مفتی احمد یار خاں سالکؔ نعیمی:

باغِ رسالت کی ہیں جزا اور بہارِ آخری

مبدا جو اس گلشن کے تھے وہ منتہیٰ یہی تو ہیں

٭٭٭

سب اولین و آخریں تارے ہیں تم مہرِ مبیں

یہ جگمگائے رات بھر چمکے جو تم کوئی نہیں

----

پیر نصیرالدین نصیرؔ:

جسم میں جب تک جان رہے

یہ تیرا ایمان رہے

سدا رہے یہ تجھ کو یاد

ختم نبوت زندہ باد

ختم نبوت ہے ایمان

ختم نبوت دین کی جان

یہ اِسلام کی ہے بنیاد

ختم نبوت زندہ باد

اِس سے کرے گا جو اِنکار

وہ اِسلام کا ہے غدار

دین ہوا اُس کا برباد

ختم نبوت زندہ باد

بات یہ ہے بالکل ظاہر

کہیں گے ہم اُس کو کافر

جو بھی کرے منسوخ جہاد

ختم نبوت زندہ باد

یہی ہے مومن کی پہچان

کرتا ہے حق کا اعلان

سہہ لیتا ہے ہر اُفتاد

ختم نبوت زندہ باد

حق منوا کر چھوڑیں گے

باطل کا منہ توڑیں گے

عزم ہمارا ہے فولاد

ختم نبوت زندہ باد

----

عتیق احمد عتیقؔ:

آپ اولین و آخریں نورِ خداے پاک ہیں

مختص بنام ِ مصطفیٰ صلوا علیہ وآلہ

----

صابرؔ گوالیاری:

دین حق کو آپ نے تکمیل پر پہنچادیا

آخری پیغامِ حق ٹھہری نبوت آپ کی

----

حزیںؔ صدیقی:

ابتدا آپ سے انتہا آ پ سے

دونوں عالم کا ہے سلسلہ آپ سے

----

اعظمؔ چشتی:

ہوئی تھی آپ ہی سے ابتدا امکانِ عالم کی

ہیں سب کی انتہا بن کر محمد مصطفیٰ آئے

----

سید آل رسول حسنین میاں نظمی مارہروی:

وہ ہی حریمِ بزمِ رسالت صلی اللہ علیہ وسلم

وہ ہی نشانِ ختمِ نبوت صلی اللہ علیہ وسلم

٭٭٭

بعثت پہ تیری ختم نبوت کا سلسلہ

پھر کیوں نہ مہرِ ختمِ نبوت کہوں تجھے

----

سید محمد اشرفؔ برکاتی :

لوحِ ازل پہ اولیں ، بزمِ جہاں میں آخری

اسم جسے لکھا گیا ، کون ہے ؟ ہاں! تم ہی تو ہو

----

مفتی اختر ؔرضا بریلوی:

کرنا تھا خدا کو ہم پر یہ آشکارا

آخری نبی ہے اس کو سب سے پیارا

کوئی بھی نبی ہو پچھلی امتوں کا

تم پہ سب کو سبقت یارسول اللہ

٭٭٭

حسنِ اول کی نمودِ اولیں

بزمِ آخر کا اجالا آپ ہیں

٭٭٭

فاتح و خاتمِ پیامبری

گلشنِ دہر کی بہار سلام

----

قمرالزماںقمرؔ اعظمی:

وہ نقشِ اولینِ کلکِ قدرت

نبوت اور رسالت کے وہ خاتم

----

قمرؔ یزدانی:

قمرؔ ! اختتامِ نبوت ہے اُن پر

نبی خاتم الانبیاء بن کے آئے

٭٭٭

رونق فروزِ بزمِ رسالت ترا وجود

اور تاجِ اختتامِ نبوت ہے تیرے سر

٭٭٭

تمہی تو مقتداے اولیں ہو یاحبیب اللہ!

تمہی تو پیشواے آخریں ہو یا حبیب اللہ!

٭٭٭

بالیقیں ہیں وہ انبیا کے امام

خاتمِ مرسلاں محمد (ﷺ)ہیں

٭٭٭

ناسخِ ادیاں رسالت ہے تمہاری واہ واہ

قاطعِ باطل شریعت ہے تمہاری واہ واہ

٭٭٭

مینارِ نور ،حدِّ یقیں کا ہیں بالیقیں

راہِ وفا کی آخری منزل ہیں مصطفیٰ

٭٭٭

ہیں نبیِّ اولیں محبوبِ رب العالمیں

اور رسولِ آخریں محبوبِ رب العالمیں

محفلِ کون و مکاں میں آپ کی ذاتِ جمیل

اولین و آخریں محبوبِ رب العالمیں

٭٭٭

تمہی تو خاتمِ پیغمبراں ہو یارسول اللہ

تمہی تو صدرِ بزمِ مرسلاں ہو یارسول اللہ

٭٭٭

جہانِ کن فکاں کی ابتدا و انتہا تم ہو

ہوئی ہے جن سے تزئینِ حریمِ دوسَرا تم ہو

ہوئی ہے ختم جس پر آیت رفعنا کی

وہی تو مسند آراے حریمِ کبریا تم ہو

----

محمد علی ظہوریؔ:

حضرت ِ موسیٰ جن کو ترستے رہے ، ابنِ مریم بھی جن کی خبر دے گئے

پہلے آئے ہوئے جن کے پیچھے کھڑے ، آج وہ خاتم الانبیاء آگئے

----

محمد عبد الحمید صدیقی نظرؔ لکھنوی:

وہ ختمِ رسل ہیں جسے تسلیم نہیں یہ

وہ راندۂ درگاہِ خداوند وہ مغضوب

٭٭٭

بندھا تھا تارِ نبوت جو اس پہ ختم ہوا

یہ سلسلہ نہ پھر آگے شہِ شہاں سے چلا

٭٭٭

ختم اس پہ ہے نبوت ختم اس پہ ہے رسالت

اس تاج و تخت پر ہے اس کا ہی اب اجارا

٭٭٭

آگے تو سب فسانۂ دجل و فریب ہے

میرے نبی پہ ختم نبوت کی داستاں

٭٭٭

اسی پہ ختم نبوت اسی پہ دیں کامل

ہے تاج و تختِ نبوت اسی کا تا محشر

٭٭٭

اللہ نے اس ذات پہ کی ختم نبوت

اب آئے نبی کوئی نیا ہو نہیں سکتا

٭٭٭

تم ختمِ نبوت صلِّ علیٰ ہم آخرِ امت ہیں واللہ

تا حشر تمہیں تم کیا کہنا تا حشر ہمیں ہم کیا کہیے

٭٭٭

جو آپ کو سمجھے کہ نہیں ختمِ رُسُل آپ

ظالم ہے، وہ کافر ہے، وہ مردود و لعیں ہے

٭٭٭

محمد ابنِ عبداللہ پہ ہاں ختم ہوتا ہے

نبوت کا چلا تھا سلسلہ اوّل جو آدم سے

٭٭٭

قولِ اکملتُ لکم ہے ثبتِ قرآنِ مبیں

ہو گیا اتمامِ دیں بر ذاتِ ختم المرسلیں

٭٭٭

نبوت ختم ہے ان پر رسالت اختتامی ہے

میانِ بندہ و مولا وہ آخر کا پیامی ہے

٭٭٭

نبیوں میں مصطفیٰ ہی وہ فردِ فرید ہے

جس پر کہ ختم وحی خدائے وحید ہے

٭٭٭

ہے ختم کارِ نبوت ان پر رسالت ان پر تمام دیکھیں

ہر ایک پہلو سے ہے مکمل ہزار پہلو یہ کام دیکھیں

٭٭٭

محبوب ہے خدا کا مخدوم ہے جہاں کا

ختم الرسل پہ میرے تکمیلِ دینِ فطرت

٭٭٭

ختم ہے سلسلۂ وحی و نبوت اس پر

دین پائندہ و کامل ہے شریعت محکم

٭٭٭

اے وہ کہ جس پہ منتہی سلسلۂ پیمبری

اے وہ کہ جس نے ختم کی دنیا سے رسمِ آذری

اے وہ امامِ انبیا سب پہ ہے جس کو برتری

اے وہ عطا ہوئی جسے دونوں جہاں کی سروری

خاتم الانبیاء، خاتم المرسلیں منتہی آپ پر کارِ پیغمبری

٭٭٭

نبوت کے منصب کا وہ مختتم

رسالت ہوئی آپ پر منتہی

٭٭٭

رسالت منتہی ان پر نبوت مختتم ان پر

نظرؔ اس میں جسے شک ہو وہ مانگے خیر ایماں کی

٭٭٭

مختتم جس پہ رسالت وہ رسولِ اکرم

منتہی جس پہ نبوت وہ نبی ہے ساقی

٭٭٭

تجھ پر ہی منتہی ہے نبوت کا کارِ طول

اللہ کی طرف سے ہے تو آخری رسول

٭٭٭

اسی پر منتہی کارِ نبوت بھی رسالت بھی

اسی پر دیں ہوا کامل، ہوئی کامل شریعت بھی

٭٭٭

منتہی سلسلۂ کارِ نبوت تجھ پر

تا بہ ہنگامۂ محشر تری آقائی ہے

----

واصف علی واصف ؔ:

سلطانِ انبیا ہے ، تری ذاتِ باصفا

اوّل کہوں یا اوسط و آخر کہوں تجھے

تجھ پر ہوئی ہے ختم ، نبوّت کی داستاں

خاتمِ پیمبروں کا پیمبر کہوں تجھے

----

مظفرؔ وارثی:

حرفِ اول بھی تو حرفِ آخر بھی تو

دیکھتا ہوں مسلسل زمانہ ترا

٭٭٭

تجھ سے پہلے کا جو ماضی تھا ہزاروں کا سہی

اب جو تا حشر کا فردا ہے وہ تنہا تیرا

روزِ ازل انسان کو خدا نے اک منشور دیا

اور اسی منشورِ ہدایت کی تکمیل ہیں آپ

٭٭٭

لقب ہیں رحمتہ للعالمین ختم الرسل جن کے

اُنھیں لطف خدا کی انتہا کہیے بجا کہیے

٭٭٭

خود میرے نبی نے بات یہ بتا دی ، لانبی بعدی

ہر زمانہ سن لے یہ نوائے ہادی ، لانبی بعدی

لمحہ لمحہ اُن کا طاق میں ہوا جگمگانے والا

آخری شریعت کوئی آنے والی اور نہ لانے والا

لہجۂ خدا میں آپ نے صدا دی، لانبی بعدی

تھے اصول جتنے اُن کے ہر سخن میں نظم ہو گئے ہیں

دیں کے سارے رستے آپ تک پہنچ کر ختم ہو گئے ہیں

ذات حرفِ آخر ، بات انفرادی، لانبی بعدی

٭٭٭

بروزِ میثاق

ذات باری نے

عہد نبیوں سے یہ لیا تھا

کریں گے تائید وہ سب اُن کی

جو سب سے آخر میں آنے والے ہیں اِس جہاں میں

وہی جو مصداقِ آرزوئے خلیل بھی ہیں

کلیم جن کے ہوئے منادی

مسیح جن کے بنے مبشر

سلام مبعوثِ آخریں پر

نکالنے والے ظلمتوں سے

وہ حق کے حامل

وہ حق کے مرکز

انھی کو حق نے بنا کے بھیجا

جہاں کی رحمت

انھی پہ دیں ہو گیا مکمل

ہوئی تمام اُن پہ حق کی نعمت

سلام اُس نازشِ زمیں پر

وہ ہیں محمد وہ ہیں احمد

وہی ہی ماحی وہی ہیں حاشر وہی ہیں غالب

وہ ٹھہرے سب انبیا کے خاتم

نبی کوئی اُن کے بعد آئے نہیں یہ ممکن

اٹھائے جائیں گے روزِ محشر وہ سب سے پہلے

ملے گا اذنِ شفاعت اُن کو

وہ دیں گے مایوس امتوں کو

بشارتیں بخشش و عطا کی

انھی کے ہاتھوں میں سب خزانوں کی کنجیاں ہوں گی

پرچمِ حمدِ پاک ہو گا

وہ سب سے پہلے عطا کریں گے

بہشت کےگلشنوں کو رونق

فقیر و محتاج اُن کی امت کے

اُس گھڑی ان کے ساتھ ہوں گے

سلام اُس تاجدارِ دیں پر

٭٭٭

عیاں ہیں دن کی طرح سب صفات ختمِ رسل

کھلی کتاب ہے گویا حیاتِ ختمِ رسل

ہر ارتقا ہے انھی کی نظر سے اذن طلب

تمام حسنِ تمدن زکات ختمِ رسل

ضیا فگن ہے دلیلِ وجود حق بن کر

جریدۂ دوسرا پر ثباتِ ختمِ رسل

جو زندگی کو ہمیشہ حرارتیں دےگا

وہ آفتاب ہے دنیا میں ذاتِ ختمِ رسل

کتابِ زندہ و شرح متین و دینِ مبیں

جہاں میں کم تو نہیں معجزاتِ ختمِ رسل

٭٭٭

محمدِ عربی اعتبارِ لوح و قلم

محمدِ عربی افتخارِ جن و بشر

دارومدار کس پہ ہے فیضِ مدام کا

ختمِ رسل حبیبِ خدا اور کون ہے

تیری عظمت زمانے میں مسلم سیدِ عالم

مؤخر ہو کے بھی تو ہے مقدم سیدِ عالم

قائدِ مرسلیں تمہی ہادئ آخریں تمہی

رحمتِ عالمیں تمہی مصدرِ التفات ہو

٭٭٭

ہستیِ ختمِ رسل ہے زیب دیتا ہے جسے

کشتیِ انسانیت کی ناخدائی کا شرف

----

عباس عدیمؔ قریشی:

میرے نبی کے بعد نبوت کا مدّعی

ملعـونِ دوسرا ہے ، زنیم و پلید ہے

مہدی سمجھ، مسیح سمجھ ،چاہے جو سمجھ

کانا ہمارے ہاں تو مغلّظ رسید ہے

٭٭٭

حرفِ آخر ہے یہ فرماں لانبی بعدی

قولِ آقا ہے نمایاں لا نبی بعدی

اپنا ایماں ہے زبس ختمِ نبوت پہ عدیمؔ

میرے آقا کو ہے شایاں لانبی بعدی

----

تنویر پھولؔ:

وہ ختم الانبیا ہیں ، تا قیامت یہ شریعت ہے

نہیں ہے باز دروازہ رسالت یا نبوت کا

رسالت منصب اعلی ، نبوت اس میں ہے شامل

پیمبر اب نہ آئے گا ، یہ ہے مفہوم آیت کا

٭٭٭

افضل الانبیا ! آپ ہی ہیں شہا ! خاتم الانبیا

آپ کے نام پر ہم ہیں دل سے فدا خاتم الانبیا!

بعد اللہ کے آپ کا مرتبہ، آپ صدرالعلیٰ

سب جہانوں میں کوئی نہیں آپ سا خاتم الانبیا !

رب نے پیغام ' اقراکا بھیجا وہیں ، لائے روح الامیں

آپ کے نور سے ہے منور حرا ، خاتم الانبیا !

سنگ برسائے طائف میں بدبختوں نے ، خوں سے جوتے بھرے

آپ نے پھر بھی ان کا نہ چاہا برا ، خاتم الانبیا !

آپ ہی کو سراجامنیرا ' کہا رب نے قرآن میں

آپ شمس الضحیٰ ، آپ بدرالدجیٰ خاتم الانبیا !

مہرباں مہرباں ، راحت قلب و جاں، مونس بے کساں

آپ رحمت لقب اور عطا ہی عطا، خاتم الانبیا !

پھول روضے پہ کہتا ہے رو رو کے اب ہو کرم کی نظر

دین و دنیا میں ہے آپ کا آسرا، خاتم الانبیا !

٭٭٭

عزیزالدین خاکیؔ:

خلق میں چرچا ہوا ختم نبوت زندہ باد

سارے عالم نے کہا ختم نبوت زندہ باد

آپ کو اللہ نے بخشا ہے ایسا مرتبہ

ہیں امام الانبیاء ختم نبوت زندہ باد

----

سلمان رضا فریدیؔ :

ہے بلندی پہ سدا، ختمِ نبوت کا عَلَم

نہ جھکےگا نہ جھکا، ختمِ نبوت کا عَلَم

زیر کرپائیں گے کیا اس کو زمانے والے

رب نے ہے اونچا کیا، ختم نبوت کا عَلَم

----

مشاہد رضا عبیدؔالقادری :

مر کر بھی نہ پاؤگے کبھی چور در اس کا

آقا کی مرے ختمِ نُبوت زَمَنی ہے

----

فہیم بسمل ؔ:

رب واحد کا دینے پتا آئے ہیں

بن کے ہر بے نوا کی نوا آئے ہیں

مصطفیٰ ! خاتم الانبیا ء آئے ہیں

لے کے آئی خبر کیف پرور ہوا

ہو مبارک حبیبِ خدا آگئے

----

انس نواز رحیمیؔ:

ناز کیوں کر نہ کریں آپ سے نسبت والے

لوگ کہتے ہیں ہمیں ختم نبوت والے

----

مرزاخان ارشدؔ:

ہم ختمِ نبوت کا جو اظہار کریں گے

گر جرم عقیدت ہے تو ہر بار کریں گے

----

محمد آصفؔ قادری:

خدا نے تاج ہے جن کو دیا ختم نبوت کا

وہی ہیں دیں وہی ایماں دُرود ان پر سلام ان پر

----

عبدالمجید محامدؔ مصباحی:

تاج دارِ نبوت سدا آپ ہیں

بابِ ختم نبوت سدا آپ ہیں

----

ابرار حسین نیرؔ:

اسلام کی ہے شرط ، یہ جزو یقین ہے

ختم الرسل کی ختم نبوت کا اعتراف

----

غلام مجتبیٰ ہاشمیؔ:

شریعت ہو ، طریقت ہو، نبوت ہو ، رسالت ہو

ہوا آغاز تم سے ہی ، سبھی کی انتہا تم ہو

یہی فرماں ہے رب کا اور یہی ایمان ہے میرا

’’نبوت ختم ہے تم پر کہ ختم الانبیاء تم ہو‘‘

----

شجاعت علی راہیؔ:

سب انبیا کا عکس جھلکتا ہے آپ میں

سب انبیا کی شان ہیں معراج ہیں

ہے ختم آپ ہی پہ نبوت کا سلسلہ

موسیٰ کے اور مسیح کے سرتاج آپ ہیں

----

محمد عارفؔ قادری:

ہیں وہی ختم الرسل ان پر نبوت ختم ہے

بعدِ رب ، سرکار پر ہر افضلیت ختم ہے

جاں لٹادیں گے اے عارفؔ ہم نبی کے نام پر

اس سعادت پر یقیناً ہر سعادت ختم ہے

----

سید حبدار قائمؔ:

آخری آقا ہیں ، عقیدہ رکھ

حشر تک دل کا یہ وظیفہ رکھ

----

سید فاضل میسوری :

کہے خاتمیتِ مصطفےٰ مرے بعد کوئی نبی نہیں

یہ کسی نبی نے نہیں کہا مرے بعد کوئی نبی نہیں

چلے لاکھ کذب کا سلسلہ یہ اصول رد نہیں ہو سکا

جو بیانیہ ہے حدیث کا مرے بعد کوئی نبی نہیں

ہے خدائے پاک کا فیصلہ نہیں اس میں کوئی بھی شائبہ

کہ مرے رسول نے کہہ دیا مرے بعد کوئی نبی نہیں

تھے غلام جتنے حضور کے وہ یقین والے ضرور تھے

کہ لبِ حضور سے تھا سنا مرے بعد کوئی نبی نہیں

یہ کتابِ حق سے عیاں ہوا کہ ضروری جزو ہے دین کا

جو نبی کا قول ہے برملا مرے بعد کوئی نبی نہیں

----

شمس تبریز انجمؔ:

نائبِ ذاتِ رب العلیٰ آگئے

مالکِ کل ، شہِ انبیا آگئے

اب نہ ہوگا کوئی بھی نبی دوسرا

مصطفیٰ خاتم الانبیاء آگئے

----

طفیل احمد مصباحی:

مظہرِ ذاتِ رب العلیٰ آپ ہیں

مالکِ کل ، حبیبِ خدا آپ ہیں

نصِّ قرآں سے ثابت ہے یہ مسئلہ

مصطفیٰ ، خاتم الانبیاء آپ ہیں

----

محمد اویسؔ رضوی صدیقی:

اے سراپا نور ، اے دل نشین و مہ جبیں

چہر ہ ہے والشمس اور واللیل زلفِ عنبریں

آپ سب سے افضل و اعلیٰ خدا کے بعد ہیں

اے شہِ دیں ، رحمتِ کونین ، ختم المرسلیں

----

محمد حسین مشاہدؔرضوی:

خدا کی حمد کا مطلع ہے مصطفیٰ کی ذات

تمام نبیوں کا مقطع ہے مصطفیٰ کی ذات

خدا گواہ ، رسالت کی نظم کا لاریب

مشاہدؔ آخری مصرع ہےمصطفیٰ کی ذات

٭٭٭

مشعلیں ادیانِ سابق کی سبھی گل ہوگئیں

لے کر آئے مصطفیٰ ختم نبوت کا چراغ

٭٭٭

اور کوئی نہیں خاتم الانبیاء

آپ ہیں بالیقیں خاتم الانبیاء

آپ ہیں آخری آخری آخری

سید المرسلیں خاتم الانبیاء

آپ کی خاتمیّت پہ شاہد ہے خود

ہاں کتابِ مبیں خاتم الانبیاء

میرا ختمِ نبوت پہ ایمان ہے

اے شہنشاہِ دیں خاتم الانبیاء

جان و دل اِس عقیدے پہ واریں گے ہم

اولیں آخریں خاتم الانبیاء

عقیدۂ ختم نبوت کے حوالے سے سوشل میڈیا کے مختلف گروپس اور فورمز پر متعددطرحی و غیر طرحی نعتیہ مشاعرے مسلسل ہورہے ہیں اور اس موضوع پر شعرا حضرات پیہم طبع آزمائی بھی کررہے ہیں ۔ زیر نظر مضمون میں ختم نبوت پر مبنی اردو نعتیہ شاعری کے ذخیرے سے اس اعتراف کے ساتھ منتخب اشعار خوانِ مطالعہ پر سجانے کی کوشش کی گئی ہے کہ یہ نامکمل ہے۔ آپ حضرات سے بھی گزارش ہے کہ اس سلسلے کو آگے بڑھاتے ہوئے اپنے یا اپنے پسندیدہ شعراے کرام کے ختم نبوت پر منحصر اشعار پیش کریں ۔

محمد حسین مشاہدرضوی ، مالیگاؤں

Allama Badrul Qadri Ek Taaruf

2021-08-21T06:59:00.001-07:00

*علامہ بدر القادری ایک تعارف*

ولادت: خلیفہ حضور مفتی اعظم ہند علامہ بدر القادری مصباحی اعظمی حفظہ الله ٢۵ اکتوبر سنہ ١٩۵٠ء کو محلہ ملک پورہ (مرزا جمال پور) قصبہ گھوسی ضلع اعظم گڑھ (اب ضلع مئو) میں پیدا ہوئے۔ آپ کا اصل نام محمد بدر عالم اور تخلص "بدر" ہے۔

تعلیم: علامہ بدر القادری نے ابتدائی تعلیم مدرسہ ناصر العلوم گھوسی و مدرسہ خیریہ فیض عام گھوسی میں حاصل کی، اور اعلیٰ تعلیم کے لیے دار العلوم اشرفیہ مبارکپور تشریف لے گئے، دارالعلوم اشرفیہ میں علامہ محمد احمد مصباحی و مولانا عبد المبین مصباحی آپ کے ہم سبق تھے۔ ١٠ شوال سنہ ١٣٨٩ھ/ ٢٣ اکتوبر ١٩٦٩ء کو دار العلوم اشرفیہ سے آپ کی فراغت ہوئی۔

اساتذہ: آپ کے چند اساتذہ کے نام درج ذیل ہیں:

● حافظ ملت علامہ شاہ عبد العزیز محدث مرادآبادی، ● شیخ الحدیث علامہ عبد الرؤف بلیاوی، ● بحر العلوم علامہ عبد المنان اعظمی مبارکپوری، ● مولانا مظفر حسن ظفر ادیبی مبارکپوری، ● علامہ مولانا محمد شفیع اعظمی مبارکپوری، ● مولانا قاری یحییٰ مبارکپوری، ● مولانا شمس الحق گجہڑوی، ● مولانا سید حامد اشرف کچھوچھوی علیہم الرحمه۔

بیعت: شہزادہ اعلیٰ حضرت حضور مفتی اعظم ہند علامہ مصطفیٰ رضا خاں بریلوی علیہ الرحمه کے دست مبارک پر ٢٢ جمادی الآخر سنہ ١٣٩٩ھ میں بیعت ہوئے۔

تدریسی خدمات: فراغت کے بعد سنہ ١٩٧٠ء میں دارالعلوم غوثیہ ہبلی (کرناٹک) میں بحیثیت صدر المدرسین تشریف لے گئے، دار العلوم غوثیہ کے بعد مدرسہ سید العلوم بہرائچ شریف (یو پی) و مدرسہ ضیاء الاسلام اناؤ (یو پی) میں تدریسی خدمات انجام دینے کے بعد اپنے مادر علمی اشرفیہ میں بحیثیت ناظم نشریات تشریف لائے۔ اور سنہ ١٩٧٨ء میں "حافظ ملت نمبر" پریس کے حوالے کرکے ہالینڈ چلے گئے۔

اشاعتی خدمات: سنہ ١٩٧٦ء میں ماہنامہ اشرفیہ مبارکپور کا پہلا شمارہ شائع ہوا، اور جب تک آپ کا اشرفیہ میں قیام رہا تب تک آپ اس ماہنامہ کے مدیر اعلیٰ کی حیثیت سے اس کی ادارت کے فرائض انجام دیتے رہے، حافظ ملت نمبر (شمارہ اپریل، مئی، جون ١٩٧٨ء) آپ ہی کی کاوشوں کا ثمرہ ہے، المجمع الاسلامی مبارکپور جیسی تصنیفی، تحقیقی و اشاعتی ادارے کا قيام و سہ ماہی نداء اسلام ہالینڈ بھی آپ کی صحافتی صلاحیت کے شاہد ہیں.

تعمیری خدمات: تدریسی، تبلیغی، تصنیفی و اشاعتی خدمات کے علاوہ آپ نے تعمیری خدمات بھی انجام دیں۔ مسجد زاہدہ قادری قصبہ گھوسی، رضوی مسجد اور مدرسہ رضویہ بدر العلوم گھوسی وغیرہ کی تعمیرات اس کی شاہد ہیں۔

تصانیف: تقریبا دو درجن مطبوعہ کتب و رسائل آپ کی قلمی صلاحیتوں کے آئنہ دار اور آپ کی بہترین یادگار ہیں، آپ کی چند تصانیف درج ذیل ہیں:

● اسلام اور امن اسلام، ● بزم اولیا (علامہ یافعی شافعی کی عربی کتاب روض الریاحین کا ترجمه)، ●جاده و منزل، ● حافظ ملت نمبر، ● اشرفیہ کا ماضی و حال، ● میاں بیوی اسلام کی روشنی میں، ● یورپ و اسلام، ● زمین پر الله کا گھر، ● فلسفہ قربانی، ● عورت اسلام میں، ● سنت کی آئینی حیثیت، ● اسلام اور خمینی مذہب، ● مولانا رضوان احمد اعظمی، ● مسلمان اور ہندوستان، ● اسلام اور تربیت اولاد، ● اسلام اور امن عالم، ● تذکرہ سید سالار مسعود غازی۔

(ماہنامہ کنز الایمان/ص:٣٩-۴١/ جون/٢٠٠٣ء اور علامہ محمد احمد مصباحی کے ایک سوانحی مضمون سے مواد اخذ کیا گیا ہے۔)

Sahifa E Majlis E Sharai Vol 1

2021-07-26T04:52:00.004-07:00

Sahifa E Majlis E Sharai Vol 1

..:: Follow us on ::..

Khaka Daira E Muarif E Imam Ahmed Raza

2021-07-11T22:01:00.001-07:00

Khaka Daira E Muarif E Imam Ahmed Raza

By : Hazrat Masood E Millat

..:: Follow us on ::..

E Book Mufti E Aazm Allama Mustafa Raza Noori Barailwi Ki Naatiya Shaeri Ka Tahqiqi Mutalea

2021-07-03T10:37:00.001-07:00

E Book : Mufti E Aazm Allama Mustafa Raza Noori Barailwi

Ki Naatiya Shaeri Ka Tahqiqi Mutalea

ISBN : 978-93-5493-067-6

..:: Follow us on ::..

Dr. Mushahid Razvi Ka Azeemushshan Kaarnaama

2021-07-03T10:08:00.002-07:00

ڈاکٹر مشاہد رضوی کا عظیم الشان تحقیقی کارنامہ

محمد اشرف رضا قادری

مدیر اعلیٰ سہ ماہی امین شریعت

کانکر ٹولہ ،بریلی شریف

ماہرِ علم و ادب ، نازشِ فکر و فن جناب ڈاکٹر محمد حسین مشاہد رضوی دام ظلہ العالی علم و ادب اور تحقیق و تنقید کا ایک معتبر نام ہے ۔ ان کی دینی ، علمی اور ادبی فتوحات کا دائرہ کافی وسیع ہے ۔ گذشتہ بیس سالوں سے ان کا قلم مسلسل حرکت میں ہے اور دینیات و ادبیات کے میدان میں فتح و نصرت کا علم لہراتے ہوئے مسلسل آگے بڑھ رہا ہے ۔ ادب اور بالخصوص مذہبی ادب سے خصوصی دلچسپی رکھتے ہیں ۔ نظم اور نثر دونوں صنفوں پر یکساں قدرت رکھتے ہیں ۔ ماہرِ تعلیم ، بلند پایہ محقق ، اعلیٰ نثر نگار ، کامیاب مصنف ، منفرد لب و لہجہ کے نعت گو شاعر اور جادۂ تنقید کے ایک تیز رو اور پُر عزم مسافر کی حیثیت سے ان کی ایک نمایاں شناخت ہے ۔ جس موضوع پر قلم اٹھاتے ہیں ، اپنی علمیت ، زورِ استدلال اور نکھرے ہوئے اسلوبِ بیان سے اس میں جان ڈال دیتے ہیں اور سچ پوچھیے تو عنوان کا حق ادا کر دیتے ہیں ۔ مذہبی ، تعلیمی ، اصلاحی ، سماجی اور ادبی موضوعات پر ان کے گراں قدر مضامین و مقالات ہند و پاک کے مشہور اخبار و جرائد میں شائع ہوا کرتے ہیں اور علمی و ادبی حلقوں میں پسندیدگی کی نگاہوں سے پڑھے جاتے ہیں ۔ آپ کے بعض اہم اور گراں قدر مضامین کے تراجم دوسری زبانوں میں بھی شائع ہو چکے ہیں ۔ ان کی تحریروں میں اسلوب کی چاشنی اور لہجے کی متانت و سنجیدگی قابلِ تعریف ہے ۔ ان کی رواں دواں ، سلیس و سادہ اور شائستہ و شگفتہ نثر ذہن و فکر کو اپیل کرتی ہے اور قارئین پر گہرے اثرات مرتب کرتی ہے ۔ اس وقت موصوف کا شمار جماعت اہل سنت کے نام ور محققین ، ماہرینِ تعلیم ، بلند پایہ مصنفین اور قادر الکلام نعت گو شعرا میں ہوتا ہے ۔ آپ صحیح معنوں میں ’’ عظیم شخصیت ‘‘کے مالک ہیں ۔ آپ کی شخصیت کی تعمیر و ارتقا میں خانقاہ برکاتیہ ، مارہرہ مطہرہ کے بزرگوں کی خاص عنایات شامل ہیں ۔ یہی وجہ ہے کہ شخصِ واحد میں علم و ادب اور تحقیق و تنقید کی ایک انجمن آباد ہے ۔ مختلف موضوعات پر اب تک چھوٹی بڑی پچاس کتابیں لکھ چکے ہیں اور ابھی تصنیف و تالیف کے کئی محاذوں پر ثابت قدمی کے ساتھ اپنے فکر و قلم کے کارواں کو منزل سے ہمکنار کرنے میں لگے ہوئے ہیں ۔

اپنی گراں قدر علمی و ادبی و قلمی خدمات کے صلے میں درجنوں ایوارڈ ( وقارِ قلم ایوارڈ ، حجۃ الاسلام ایوارڈ ، فخرِ سنیت ایوارڈ ، فیضانِ رشید ایوارڈ، نشانِ احسن العلماء ایوارڈ ) اور اعزازات سے سرفراز ہو چکے ہیں ۔ علمی و ادبی لحاظ سے جتنے عظیم ہیں ، اخلاق و کردار کے اعتبار سے بھی اتنے ہی بڑے ہیں ۔ حسنِ اخلاق کے پیکر ، متواضع ، منکسر المزاج ، حلیم الطبع ، شریف النفس ، کم گو، بسیار جو ، خندہ رو ، شگفتہ مزاج ، بڑوں کے قدر داں اور چھوٹوں پر غایت درجہ شفیق و مہربان ہیں ۔ خیر خواہی اور قومی و ملی ہمدردی آپ کی تہہ دار فکر و شخصیت کا ایک نمایاں پہلو ہے ۔ اللہ تعالیٰ اس قیمتی ہیرے کو سلامت رکھے اور اس کی چمک دمک باقی رکھے ۔ آمین !

تحقیق نہایت دشوار کام ہے اور خاص طور سے وہ تحقیق جو کسی موضوع پر پی ایچ ڈی کی غرض سے کی جائے ، حد درجہ دقت طلب اور صبر آزما عمل ہے ۔ تحقیق کے لیے غایت درجہ محنت ، عرق ریزی ، فکرِ صائب ، ذہنِ ثاقب ، تنقیدی صلاحیت ، مختلف علوم اور بالخصوص ادبی و لسانی علوم میں حذاقت و مہارت ضروری ہے ۔ ہر کس و ناکس کو یہ اعزاز حاصل نہیں ہوتا اور نہ ہر ایراغیرااس میدان میں قدم رکھنے کا اہل ہوتا ہے ۔ تحقیق کے لیے عزمِ مصمم ، مضبوط قوتِ ارادی ، پر جوش جذبہ و ولولہ کی ضرورت ہوتی ہے ۔ جو شخص تیشۂ فرہاد لے کر کوہ کنی کا آہنی عزم رکھتا ہو ، وہی اس میدان کو سر کر سکتا ہے۔ موضوع کے اعتبار سے تحقیق کی چار قسمیں ہیں :

( ١ ) صحتِ متن کی تحقیق و تدوین ۔

( ٢ ) مصنف یا شاعر کی سوانح اور حالاتِ زندگی کی تحقیق ۔

( ٣ ) لسانی حقیقتوں کی تلاش ، جس میں قدیم زبان ، محاورات ، عروض اور رسم الخط وغیرہ شامل ہے ۔

( ٤ ) معلوم شدہ حقائق یا اصولوں کی تجدید کرنا اور انہیں نئے انداز سے پیش کرنا ۔ تجزیاتی تحقیق ، اطلاقی تحقیق ، لسانی تحقیق ، ادبی تحقیق ، شعری تحقیق ، تنقیدی تحقیق ، متنی تحقیق ، سوانحی تحقیق ، تقابلی تحقیق ، نفسیاتی تحقیق ، تہذیبی تحقیق اور تاریخی تحقیق وغیرہ تحقیق کی مختلف قسمیں ہیں ۔

کسی بھی علمی و ادبی موضوع پر تحقیقی مقالے دو طریقے سے لکھے جاتے ہیں ۔ ایک ذاتی اور انفرادی سطح پر ، اس میں ریسرچ اسکالر کا کوئی نگراں نہیں ہوتا اور نہ حکومت سے منظور شدہ کسی یونیورسٹی میں اسے پیش کیا جاتا ہے ۔ تحقیقی مقالہ کی دوسری قسم پی ایچ ڈی [ ڈاکٹر آف فلاسفی ] کی ہوا کرتی ہے جسے ڈاکٹریٹ بھی کہتے ہیں ۔ حکومتی سطح پر کسی بھی شعبے یا مضمون میں حاصل کی جانے والی یہ سب سے اعلیٰ ڈگری ہوتی ہے ۔ مقامِ شکر و طمانیت ہے کہ ادب کے دیگر شعبوں کی طرح اب حمدیہ شاعری ، نعت گوئی اور منقبت نگاری پر بھی پی ایچ ڈی کے مقالات تحریر کیے جا رہے ہیں اور ادبی شخصیات کی طرح مذہبی شخصیات کے ادبی کارناموں پر بھی محققین توجہ دے رہے ہیں ۔ اس سلسلے میںڈاکٹر امجد رضا امجدؔ، ڈاکٹر غلام مصطفےٰ نجم القادری، ڈاکٹر حسن رضا پٹنہ، ڈاکٹر رفیع الدین اشفاق ، ڈاکٹر ریاض مجید ، ڈاکٹر اسماعیل آزاد فتح پوری ، شاہ محمد تبریز ، جوہر قدوسی ، ڈاکٹر نگار سلطانہ ، ڈاکٹر شکیلہ خاتون ، افضال احمد انور اور ڈاکٹر مشاہد حسین رضوی وغیرہم کے اسما قابلِ ذکر ہیں ۔ زیرِ نظر کتاب ’’مفتیِ اعظم ہند کی نعتیہ شاعری کا تحقیقی مطالعہ ‘‘ڈاکٹر مشاہد رضوی کی پی ایچ ڈی کا وہ تحقیقی مقالہ ہے جو انہوں نے ڈاکٹر بابا صاحب امبیڈکر مراٹھواڑہ یونیورسٹی ، اورنگ آباد ( مہاراشٹر ) سے محترمہ ڈاکٹر شرف النساء صاحبہ ( صدر شعبۂ اردو ڈاکٹر رفیق زکریا کالج فار ویمن ، اورنگ آباد ) کی نگرانی میں لکھا ہے اور انہیں ڈاکٹریٹ کی ڈگری تفویض ہوئی ہے ۔

۴۸۴؍ صفحات پر پھیلا ہوا یہ تحقیقی مقالہ آٹھ ابواب پر مشتمل ہے ۔ بابِ اول میں نعت کے لغوی و اصطلاحی مفہوم کی وضاحت کی گئی ہے اور اس حقیقت پر روشنی ڈالی گئی ہے کہ ہر وہ ادب پارہ جو نبیٔ کریم ﷺ کی تعریف و توصیف پر مشتمل ہو ، وہ نعت ہے ، چاہے وہ نظمی ہو یا نثری ۔ فاضل محقق نے بابِ دوم میں صنفِ نعت گوئی سے متعلق محققینِ ادب کے اقوال و ارشادات پیش کیے ہیں اور اس ضمن میں نعت گوئی کے حزم و احتیاط ، موضوع و من گھڑت روایات ، اصنافِ سخن ، نعت کی ہیئت ، ضمائر کا استعمال ، آدابِ نعت اور لوازماتِ نعت پر بڑے اہم اور گراں قدر علمی و تحقیقی مباحث سپردِ قلم کیے ہیں ۔ بابِ سوم میں نعت گوئی کی اجمالی تاریخ بیان گئی ہے ۔ بابِ چہارم کا عنوان ہے۔ ’’ ہندوستان میں اردو کی نعتیہ شاعری ۱۴۱۲ء سے حضرت مفتی اعظم ہند بریلوی تک‘‘۔ اس عنوان کے تحت ہندوستان میں اردو کے ارتقائی عمل کو بیان کرتے ہوئے اس امر کی تحقیق پیش کی گئی ہے کہ اردو زبان کے آغاز کے ساتھ ہی نعت گوئی کا مبارک آغاز ہو گیا تھا ۔ ہندوستان میں اردو کی نعتیہ شاعری کا جائزہ لیتے ہوئے اس باب میں اردو کے ارتقائی سفر کی طرح اردو نعت کے لسانی و ارتقائی مراحل، زبان کی تہذیب و شائستگی اور پختگی کو سمجھنے کے لیے اردو نعت گوئی کو تین ادوار میں منقسم کیا گیا ہے۔

پہلا دور : ( ۸۱۵ھ / ۱۴۱۲ء سے ۱۱۵۴ھ / ۱۷۵۰ء تک )

دوسرا دور : ( ۱۱۵۴ ھ / ۱۷۵۰ء / سے ۱۳۰۸ھ / ۱۸۹۰ء تک )

تیسرا دور : ( ۱۳۰۸ھ / ۱۸۹۰ء سے حضور مفتی اعظم ہندبریلوی تک)

بابِ پنجم میں حضور مفتی اعظم ہند کی حیات و خدمات پر سیر حاصل بحث کی گئی ہے ۔ خصوصیت کے ساتھ آپ کی علمی ، تدریسی ، ادبی اور سیاسی خدمات کا محققانہ جائزہ لیا گیا ہے ۔ بابِ ششم ، کلامِ حضور مفتیٔ اعظم ہند کے تفصیلی جائزے پر مشتمل ہے ۔ اس باب میں آپ کے نعتیہ کلام کے مختلف شعری و فنی محاسن کو علم و درایت کی روشنی میں اجاگر کرنے کی سعیِ مشکور کی گئی ہے اور اس سلسلے میں آپ کے دور میں نعت گوئی کے معیار و روش ، آپ کی نعت گوئی کے آغاز و ارتقا ، ذہنی و تخلیقی رویے ، تصورِ عشق و فن ، عقیدۂ توحید ، خصائصِ مصطفیٰ صلی اللہ علیہ وآلہ وسلم ، ترکیب سازی ، شاعرانہ پیکر تراشی ، لسانی و عروضی چاشنی ، اردو محاورات کا بر محل اور مناسب استعمال ، مشکل زمینوں میں آپ کی طبع آزمائی ، خیال آفرینی ، پیرایۂ زبان و بیان ، صنائع و بدائع ، رنگِ تغزل ، عربی و فارسی اور اردو کے ساتھ ہندی اور پوربی زبانوں کی آمیزش ، نیز قرآن و حدیث اور فقہ و تفسیر جیسے علوم و فنون کی رنگا رنگی کلامِ مفتیِ اعظم ہند سے اجاگر کر کے فاضل محقق نے اپنے مقالے کی تحقیقی معنویت میں اضافہ کیا ہے ۔ یہ باب خالص علمی و ادبی و تحقیقی نوعیت کا ہے ۔ اس کی سطر سطر سے مقالہ نگار کی تحقیقی عظمت ، تنقیدی بصیرت اور ادبی و لسانی مہارت مترشح ہوتی ہے ۔ بابِ ہفتم میں حضرت مفتیِ اعظم ہند کے شعری و ادبی محاسن اور آپ کے نعتیہ رجحانات و خیالات پر اہلِ علم و قلم کے وقیع تاثرات و آرا نقل کیے گئے ہیں ۔ جب کہ بابِ ہشتم میں خلاصۂ کلام کے طور پر ما قبل ابواب کی روشنی میں حضور مفتی اعظم ہند کے اسلوبِ نگارش ، طرزِ سخن اور آپ کے افکارِ عالیہ کی عالم گیر شہرت و مقبولیت کی توضیح و تشریح کرتے ہوئے یہ بتانے کی کوشش کی گئی ہے کہ آپ کی نعتوں میں تصوف و معرفت کی جو روح پوشیدہ ہے ، وہ ہماری قومی و ملی ، تہذیبی و تمدنی اور علمی و ادبی ورثہ ہیں ۔

شہزداۂ اعلیٰ حضرت ، سیدی سرکار مفتیِ اعظم ہند کی حیات و خدمات ، محاسن و کمالات اور آپ کے گراں قدر فکر و فن پر ایسی جامع ، پُر مغز اور تحقیقی کتاب غالباً پہلی بار منظرِ عام پر آئی ہے اور آپ کی بلند پایہ فکر و شخصیت کے حسین خد و خال کو جس انداز میں پیش کیا گیا ہے ، وہ دیکھنے اور پڑھنے سے تعلق رکھتا ہے ۔ حضور مفتی اعظم ہند جس طرح فقہ و افتا اور تقویٰ و فتویٰ میں یگانۂ روزگار تھے ، اسی طرح ان کی نعتیہ شاعری بھی لاجواب و بے مثال تھی ، ڈاکٹر مشاہد رضوی نے آپ کی بلند پایہ شاعری کے معنوی ابعاد کو خالص علمی و تحقیقی نقطۂ نظر سے پرکھنے کی کوشش کی ہے اور اپنے مقصد میں کامیاب ٹھہرے ہیں۔ زیرِ مطالعہ کتاب ’’مفتیِ اعظم ہند کی نعتیہ شاعری کا تحقیقی جائزہ‘‘ تحقیق کے اصول و شرائط پر کھری اترتی ہے اور فاضل مصنف کے تحقیق شعور ، اخاذ طبیعت ، وفورِ علم ، ادبی مہارت اور تنقیدی آگہی کو اجاگر کرتی ہے ۔ پوری کتاب تحقیق و استدلال ، علم و درایت اور دلائل و شواہد سے مزین ہے ۔ دعویٰ کے ساتھ پُر زور دلائل اور قائم کردہ موقف کی پشت پر مضبوط دلیل بھی رکھی گئی ہے ، جس سے کتاب کی استنادی حیثیت دو چند ہو گئی ہے اور اہلِ علم و ادب کے درمیان اس کی اہمیت کئی گنا بڑھ گئی ہے ۔ پوری کتاب کی تفصیل اور تعارف و تجزیہ پیش کرنے کے لیے مختصر مضمون کی نہیں بلکہ مبسوط تحقیقی مقالہ کی ضرورت ہے ۔ محترمہ شرف النساء صاحبہ ( جو اس تحقیقی مقالہ کی نگراں رہی ہیں ) کا یہ مبنی بر حقیقت تبصرہ ملاحظہ کریں :

’’ آٹھ ابواب پر مشتمل یہ مقالہ تقسیم و تنظیم ، تہذیب و تسوید ، تحقیق و تعلیم اور ندرتِ فکر و اساس سے مزین اپنے محقق ( ڈاکٹر مشاہد حسین رضوی ) کے پختہ شعور ، عمیق مطالعہ اور بالیدہ ذہن کا بین ثبوت پیش کرتا ہے ۔ در اصل جس کے شب و روز محبوبِ الہی ﷺکی یاد اور فکر و نظر ، صحیفۂ رسول ﷺکی ورق گردانی میں مصروف ہوں اور جس نے اپنے بزرگوں کی بزمِ طریقت اور روحانی ماحول سے علمی شمع روشن کی ہو تو وہاں وہاں جذبۂ شوق ، جنونِ عشق اور عشق کا دیوانگی کی کیفیت میں تبدیل ہو جانا کوئی تعجب خیز نہیں ۔ عزیزی محمد حسین مشاہد رضوی کی کوششِ پیہم ، جد و جہد ، کام کی رفتار اور جوش و جذبہ کی تمازت و حرارت کو دیکھ کر مجھے بے حد خوشی ہوتی ہے اور اقبال کا یہ شعریاد آتا ہے :

اپنی دنیا آپ پیدا کر اگر زندوں میں ہے

سرّ ِ آدم ہے ، ضمیرِ کن فکاں ہے زندگی

یہ مقالہ صالح اندازِ تحقیق ، حقیقی اساس اور فکری بصیرت کا وہ عطیہ ہے جس میں مصنف نے محض مطبوعہ کتابوں کے حوالوں کے مآخذ تک اپنی بات کو محدود نہیں رکھا ، بلکہ انگنت معتبر حوالوں سے استفادہ کرنے کے بعد ان نکات کو تلاش کیا ہے ، جن کی بدولت حضرت نوری بریلوی ( مفتیِ اعظم ہند حضرت علامہ محمد مصطفیٰ رضا خان علیہ الرحمہ ) کی نعتیہ شاعری اپنے معاصرین سے منفرد لب و لہجہ اور اسلوب کی ندرت کے ساتھ فضائے بسیط میں خوشبو بکھیرتے ہوئے عاشقانِ رسول صلی اللہ علیہ وآلہ وسلم کے اذہان کو معطر کر رہی ہے ۔ ‘‘

( مفتیِ اعظم ہند کی نعتیہ شاعری کا تحقیقی مطالعہ ، ص : ۱۰/ ۱۱)

فاضل مقالہ نگار نے نعتیہ ہیئت و ساخت پر بڑی نفیس اور مدلل تحقیق پیش کی ہے اور مختلف اصنافِ سخن میں نعت کی مثالیں ذکر کرنے کے بعد آخر میں لکھا ہے :

’’گذشتہ خیالات و نظریات کی روشنی میں یہ بات واضح ہوتی ہے کہ جس طرح حمد ، غزل ، قصیدہ ، مرثیہ ، رباعی ، مستزاد ، مثنوی وغیرہ میں اصنافِ سخن کی ہیئت و ساخت کی واضح شکل نظر آتی ہے ۔ نعت کی کوئی خاص ہیئت و ساخت کا تعین اب تک نہیں ہو سکا ہے ۔ بہر حال اسے غزل ، مثنوی ، قصیدہ ، رباعی ، قطعہ ، مرثیہ ، مستزاد ، مسدس ، مخمس ، دوہا ، ماہیا ، سانیت ، ترائیلے ، ہائیکو ، ثلاثی وغیرہ میں لکھا جا سکتا ہے ۔ ‘‘

( مفتیِ اعظم ہند کی نعتیہ شاعری کا تحقیقی مطالعہ ، ص : ۸۳)

خلاصۂ کلام یہ کہ تقریباً پانچ سو صفحات کو محیط اس تحقیقی مقالے میں جس قدر مرکزی و ذیلی عناوین قائم کیے گئے ہیں ، موضوع سے متعلق ہر ایک عنوان اور گوشوں پر معلومات اور بیش قیمت علمی افادات کے انبار لگا دئے گئے ہیں ۔ کلامِ نوری میں پیکر تراشی و معنیٰ آفرینی کی بحث ہو یا لسانی و عروضی چاشنی کا مسئلہ ، صنائع و بدائع کی تکنیکی بحث ہو یا فصاحت و بلاغت کا معاملہ ، ہر ایک پر محققانہ انداز میں گفتگو کی گئی ہے ۔ مصنف کے علمی و ادبی اور تحقیقی افادات قابلِ قدر اور لائقِ مطالعہ ہیں ۔ شعر و ادب سے دلچسپی رکھنے والوں کو اس کتاب کا ایک بار ضرور مطالعہ کرنا چاہیے ۔ اللہ تعالیٰ اپنے حبیبِ پاک صاحبِ لولاک صلی اللہ علیہ وآلہ وسلم کے صدقے ڈاکٹر مشاہد رضوی کے فکر و فن میں مزید توانائی و پختگی عطا فرمائے اور ان کے عمر و اقبال میں برکت عطا فرمائے آمین !