Fartones

Punto y Coma (Riannu - Llión)

noreply@blogger.com (Fartones) — Thu, 20 Jul 2017 16:58:00 +0000

Riañu (Riannu nos cartelos turísitcos) ye un pueblu perafayaízu na montaña oriental llionesa que supo reinventase depués de facer el pantanu. La verdá que merez una visita (y más) para caminar, andar en bici o garrar el barcu turísticu que te da una vueltina (de 1h y picu) pel embalse ente picos.

Nesti entornu y con una variada oferta hostelera ye dificil nun alcontar un sitiu con bones vistes pa cenar, pero igual ye más complicao que'l sitiu merezca la pena. Ehí ye onde entra el Puntu y Coma. Sitiu perafayaízu, bien decoráu con una terracina perprestosa onde atienden bien y xintes estupendamente.

Vais perdoname poles semeyes pero nun sé que fice colos modos de la máquina de retratar del móvil y sólo tengo unes poques decentes (por dicir dalgo).

Pa esperar la comida traxeronnos un choricín casero que taba bien rico y bien presentáu (porque de tamañu como les tapines del bar)

Los neños compartieron una d'ales de pitu frites, que taben bien bones, bien firtes ensin aceitón y rustiadines. Un d'ellos tuvo la idea de pedir "salsa de chimichurri que non pique" pa elles, pero dimos-y el cambiazu por una de barbacoa yanqui :-)

Ya para compartir ente toos pidimos una de presa y una de bonitu con tomate y xenxibre. Nun sabría dicir cuala taba más rica. La presa, cuatro filetinos tienros y al puntu cola compaña d'unes pataques frites y de la que nun tengo semeya que ponevos o'l bonitu que taba impresionante, frescu, tienru y la salsa perbona con un puntu de xenxibre pero ensin pasase. Lo de tener semeya del bonitu, ye un dicir, pa mí que voi tener de dir al güeyólogu porque nin apunto guah.es :-)

Prestosu sitiu, prestosa cena (para los grandes fartones igual les raciones son pequeñes pero nosotros nun comemos muncho y teníen el tamañu xustu) na que tomemos de compaña una botellina del Rueda de chateo que taba abondo rico, un agua y un vasín de llechi polo que paguemos 40,5 €. U bon sitiu pa finar un bon día en Riannu.

Por ciertu, que n'esti pueblu ye prestoso alcontrar los cartelos turísitcos n'astur-llionés, hai xente que teníen de deprender n'Asturies d'esti exemplu

Llagar de Quelo (Tiñana - Siero)

noreply@blogger.com (Fartones) — Thu, 22 Jun 2017 08:01:00 +0000

Al Llagar de Quelo ya lu conocíemos dende tiempos inmemoriales (tanto qu'enantes llamábase Fanjul) pero la verdá que sólo conocía parte. ¿Qué quiero dicir? pues que abrió siendo un sitiu d'espiches, xintaes o cenes pa grupos más bien mentantu prebabes la sidre, que ye lo que conocía, pero d'unos años para acá tamién tien sidrería (que ye lo que nun conocía).

De la parte de BBC tengo que dicir que les dos primeres vegaes (milenta d'años atrás) quedome bona sensación pero que la cabera visita (en Ñavidá) nun me dexó bon regustu. Lo curioso ye que dempués d'esa diernos por dir prebar la sidrería que ye lo que fiximos.

Ensin munches espectatives aparecimos perllí y lo primer que mos llamó l'atención ye la parte de fuera con mesines tipu merenderu pero nes que te sirven y que ta un poco escondíu tres del parque infantil. Eso dionos alguna pista pa futures visites con neños ensin saber cómo se resolvía'l tema de la cena.

La sidrería ye grande asgaya, pero nun ye un loft, asina que tien los sufiicentes espacios como para que seya afayaíza.

Tien de bono tamién que Quelo fai sidre brut y a nos que mos presta poder salir con "baxa graduación" ye siempre una compaña estupenda para una bona cena. La marca comercial ye Solaya, brut champanoise de segundu furmientu en botella, mui poca graduación (6,5º como una natural), tastu a muncha fruta pero fuerte de carbónicu. De les Brut que llevo probaes le que más nos presten son les champanoise, sedrá coincidencia o que'l métodu dexa-yos un tastu más natural. Para gustos, hai colores pero'l mio escalón de les brut (una gran idea) ye'l siguiente:

- Prau Monga (Viuda de Angelón- Champanoise)
- EM (Gobernador -Champanoise)
- Riestra (Riestra - Champanoise)
- Solaya (Quelo - Champanoise)
- BVF (Gaitero - Champanoise)
- Poma Áurea (Trabanco- Gran Vas)
- Pomarina (Gaitero - Gran Vas)

Al casu, coño, que de prebes y esto nun sé munchu, que la sidre brut taba bona y la cena tamién :-)

De primeru unes alcachofes plancha con xamón pa rellambese. Cuando'l producto ye bono para qué complicase, plancha pura y dura. 10 medies alcachofes con tallu, perbones.

De segundu, too fue para compartir, pitu caleya con pataquinos. Para'l nuesu gustu taba perefeutu de cocina, y nada secu, bien xugosín, bien cocinau. Prestosu.

Les raciones xuste pa nun quedar con fame (nosotros que tampoco ye que comamos gran cosa), pero de bona calidá. Un café con xelu pa fina y 49 € de cuenta (12 € son de la sidre). Nun ye barato (paguemos con tiques) pero dexonos mui bona sensación. Volveremos.

Capa d'Honra (Miranda De l Douro - Tras Os Montes - Portugal)

noreply@blogger.com (Fartones) — Mon, 05 Jun 2017 11:43:00 +0000

Capa d'honra ye'l nome que na zona y-dan a la capa que se poníen pa abrigase qu'agora son d'usu folclóricu. El chigre, que fuimos por recomendación, ta a la entrada del cascu vieyu de la ciudá, camín del castiellu esi que tienen al 25% (nin la metá queda, pero merez la pena les vistes y el parque d'alrodiu). Chigre ensin ventanes al esterior (llamaime raru, pero son coses que nun me gusten munchu) tien una bona atención, bona cocina y

Pa compartir pedimos la típica ensalada mista, vamos, na que dicir, típica equí, ellí ya en Tristan de Acuña, pero dalgo verde presta meter de compaña. Lo más rico el pepinillu.

Pa los peques unos escalopinos con pataques, como ya sabéis los nuesos vecinos portuguesos nun se destaquen por quedar curtios en cantidaes y esti nun foi el casu tampoco. Cenaronlo too, que tien méritu. La verdá que nun lu prebé, pero a la velocidá que lu cenaron xunto coles pataquines frites y a la panadera malu nun debía tar :-).

Pa nos pidimos el bacalláu de la casa (recomendación del xefe) en versión dos persones. Trátase d'un bacalláu fritu y pasáu dempués por fornu con verdures (destaca'l repollu) y munchu aceite d'oliva. Vien de compaña con más pataques a la panadera y nun resulta aceitosu magar de la cantidá que-y echen, que lo que-y da ye un puntín xugosu.

Prestosa xintá, con agua grande, un café con xelu, un vino de la casa frescu de la zona por unos 57 € en total. ¿Caru? N'España non, pero en Miranda depende. El nivel de cocina ye'l mesmu que'l del Miradouro, la diferencia ye'l preciu nel menú infantil, si vais 4 adultos probablemente salga asemeyao :-). En cualisquier casu, doivos bones opciones, el restu ye cosa vuesa.

El Llagú (Llagú - Uviéu)

noreply@blogger.com (Fartones) — Sun, 30 Apr 2017 22:15:00 +0000

El Llagú, tou un descubrimientu al pie d' Uviéu. Nel pueblu del mesmu nome, onde per delgún llau tien qu'haber un castru celta, ta esti chigre prestosu con un menú de fin de selamana pa fartones como los que lleeis, entovía lleeis, blogs.

El Llagú ye'l típicu chigre de pueblu (bien puestu, con maerina y abondo afayaízu) que amás tien unes meses nel prau pa esfrutar d'un día soleyeru como'l que tuvimos l'otru día (anque mayu va ser que vien robecu del too, fios). Chigre prestosu nel que lo único dificil ye aparcar ensin molestar al restu'l pueblu, si ye que vais munchos.

Al casu, xintá familiar (con muncha familia) que nun dexó a naide indeferente. Nel comedor, que ta nel pisu de riba del chigre sentaronnos traquilamente a les 20 persones (nun nos conté, pero perhí) ensin problemes y eso que ye piquiñín.

Menú de fin de selmana a unos 17-18 € cabeza onde, eso sí,encamientovos a pedir sidre o camudar el vino :-), de comida casero y onde tenéis unos 6 primeros a escoyer (dos ensalades) y otros tantos segundos. La primera nota de que la xintá diba dir bien foi que un de los que tábemos tien intolerancia ala gluten, pues namás que nun podía xintar un primeru y nun sé si un segundu, vamos que d'espesar les salses con fariña, 0 patateru.

Falando de lo que xinté yo (casi muerro, porque nun como muncha cantidá) de primeru fueron unos callos caserinos que veníen coles pataquines frites aparte). Xelatinosos (nun yeren los del Abrelates, pero perbien), bien cocinaos, bien nel puntu de picante. La verdá qu'una ración contundente con unos callinos perprestosos.

De segundu tireme, por si el colesterol lu tenía baxu pa que xubiere un poco, uno tortu con picadiellu, pataquines y un par de güevos fritos que resucitaben a un muertu.
Un tortu nada aceitosu, un picadiellu rico (nun tuve malu en tola tarde, asina que casi nun tenía grasa) y otra ración xenerosa y prestosa.

Un cocina cenciella, ensin trampes, con bonos productos y que mos dexó fartos y contentos. De segundos tamién teníen corderu, pitu caleya...y nun hubo quexes. De primeros voy dexavos cola semeya de la ensalada templada, pa que calibréis tamién....a ver cuando ponen mediu menú :-)

Sitiu pa repetir, ta claro, y epero que vos preste.

Miradouro (Miranda De l Douro- Tras Os Montes - Portugal)

noreply@blogger.com (Fartones) — Wed, 19 Apr 2017 19:54:00 +0000

Ganes tenía de conocer la zona de Miranda De l Douro. Una zona perguapa que xunta dos parques nacionales, el de los Arribes del Duero na zona española y el Parque Nacional do Douro Internacional en Portugal (o Pertual pa los Mirandeses). La zona en sí merez una visita, tanto la parte natural colos cañones del Duero (que podéis velos de mirador en mirador col coche o nel barcu del cruceru ambiental del parque que sal tolos díes dende Miranda), como la cultural, ya que Miranda tien un cascu vieyu que merez la pena y, claro a los que nos presta esto de la llingua, ver como una variante dialectal del astur-llionés ye oficial, presta munchu. Tengo que decivos, ye una impresión personal, que dame qu'a la llingua mirandesa (lhéngua - que usen grafía portuguesa onde "lh" ye "ll") nun la va salvar nin la oficiliadá. Los cartelos, delles cartes de los chigres, los cartafueyos de les feries tan en portugués y mirandés, pero na cai de la capital nun se siente nin un "ye" más que'l de los asturianos que taben perllí :-(. Pateando pelos pueblos, los xóvenes nun falen ná de ná, nin en Patuecu, onde hai un ecomuseu onde too ta'n mirandés la la entruga de si se falaba munchu, díxome que los vieyos nada más. De xuru que los vieyos falen más puru el mirandês que nos l'asturianu, pero la presión del portugués ya del castellán ye perfuerte, espero equivocame, anque mentantu pues entender los cartelos ensin munchos problemes, namás que'l usu la grafía portuguesa :-)

Si vamos al nuestru tema voi entamar recomendando un de los sitios cola meyor RCP de la zona. En metá de la zona comercial de Miranda tenéis el Miradouro, un chigre con un comerdor modernu, en loft, nel que con suerte pues tar en primera llínea mirando'l cañón o, si non, viendo la catedral.

Como vos digo, una RCP impresionante sofitada pol menú infantil. Una cosa curiosa en Miranda, ye que'n dengún lláu nos punxieron los famosos entamos de Portugal, nun sé si ye la influencia de la raya o qu'equí, nun s'estila.

Nel chigre tienen un menú infantil de perbona calidá y cantidá que los mios guah.es nun asalten, pero reparten ensin problemes. A la nena y-gusten los espaguetis de primeru (que nun dexó rastru) y a él y-presta munchu el pitu a la brasa (nada de pechuga: zanques, ales con pataques y arroz). Yo, nun finaría el menú infantil, con eso tamién vos digo. El primeru pa ella y'l segundu pa él (7 € el total).

Fuimos un par de vegaes, los adultos el primer día tomemos bacalláu a la brasa y'l segundo la famosa Puosta Mirandesa con D.O (con D.O sólo la tienen equí y nel Hotel El Parador).

Nos dos platos hai que destacar l'acompñamientu de repollu, la verdá que lu borden. El bacalháu a brás pue escoyese pa una o dos persones (que foi'l casu), nun tien munchu qu'esplicar, bacallau desecao, con un llixeru rebozu, compaña de pataques cociés y repollu. Bien, prestonos, taba abondo xugosín.

La Puosta Mirandesa (Posta en portugués) ye una chuletón de vaca con D.O poco fechu cola compaña de pataques y repollu. Perbien de puntu y perbona calidá de carne. Teníemos duldes de si un pa dos, pero sí, comiendo poco como comemos nosotros y coles cantidaes que manexen en Portugal, un pa dos ye de sobra.

Para beber siempre tiremos d'agua y de una frasca de vino verde de la casa. Un vino con una aguya llixera ensin munchos grados qu'entra fresquín. Cafetinos con xelu, un día cayó un postre, otru non, pero'l preciu de too fueron 30,8 € el día del bacalláu y 27,8 € el de la pousta. Ya vos dixe que pa xintar bien con bona RCP esti ye, al menos, un de los sitios de Miranda ;-)

Biba (Xixón)

noreply@blogger.com (Fartones) — Mon, 06 Feb 2017 16:44:00 +0000

Los sábados "llibres" hai que los aprovechar para salir un ratín de casa, asina que dionos por mirar la aplicación de tiques y ver si había delles coses por prebar que nun conociéremos y lleguemos al Biba.

Debí pasar un millón de vegaes delantre d'el, y tengo alcordances de qu'esto fuera enantes que chigre una especie de café (nel que tomaría dalgo fai milenta años), pero nun me daba cuenta del chigre. Al casu, que parecionos un sitiu a prebar en plan "parexina" con bona pinta y, nesi sentíu, acertemos.

Sitiu grande, pero afayaízu con una entrada particular, a media altura la puerta con dos salones, un para riba y otru para baxo. Toconos el de baxu, n'una esquinina afayaíza, música sele de fondo y atención prestosa. Sólo faltaba la cena ;-)

El detallín de la casa consistió n'una especie de gazpachu pero de tomate con dos rodaxes de plátanu machu fritu, pa dir garrando tono, ensin más.

D'entamu un par d'ostres del Eo fresquines y bien grandes, mui riques, bien presentaes, bon productu. Hasta equí, too bien. Gran trabayu tan faciendo dende'l Eo consiguiendo-yos sitiu a estes ostres nos chigres.

El siguiente foi 1/2 ensalada de gambes y güeves de trucha (ta bien que tengas la opción en dellos platos de pedir 1/2 raciones porque queríemos llegar al pexe ensin fartanos primero). Esti falló un poco. Les gambes bien, pero hai que meyorar; Una ensalada "Florette" de los más insípida, que nun arreglaba nin los plizcos de paté de fuá que veníen con ella. Una ensalada que nun taba a l'altura del preciu de la carta. Cuando vienes a estos sitios sabes que vas pagar más pola comida por tolo qu'hai alrodiu, pero esperes que lo primero, al menos, tea al nivel y nun taba.

De segundu pedimos una dorada al sal, perbien el productu, bien la cocina; Equí vimos sufrir, como facía munchu tiempu que nun veíemos, al camareru pa servila, tanto que tuvo que pedir sofitu (nun sé si al 112 internu) a otru collaciu pa poder sacala. El resultau fueron dos platos dignos de mí en casa :-), ye lo qu'hai, dorada esmigayada, anque nada que dicir del bichu.

La carta de vinos tien delles entrades interesantes, magar que ye dalgo comercial y pasada de precios. De compaña un Nisia sobre lías Verdejo que cumplió bien. Dos cafetinos con xelu, un agua, ensin prostres y vino la dolorosa pagada colos santos tiques, porque si tengo que pagalo yo dolería, !94€!. La dorada, que nun yera un bichu enorme, taba fuera de carta y nun sabiémos lo que costaba, pues llevose 56 € de la nota.

El sitiu ta bien, cumple ensin estidencies, pero tien precios de Estrella Michelín y cuando pasa esto hai que pedi-yos, más, munchu más. En resumen mala, mala RCP, pero, oyisti, si tenéis tiques podéis prebalo por vosotros mesmos, si nun los tenéis aconseyo-vos un Estrella Michelín, a esi preciu.

Casa Colo (Cecea - Nava)

noreply@blogger.com (Fartones) — Sun, 18 Dec 2016 00:23:00 +0000

Tarde de seronda espectacular pa arimase a Cecea a xintar con unos amigos y la reciella de guah.es de toos.

Teníemos acutao dientro, pero col día que taba ofrecieronnos una mesa fuera al solín, debaxu del porche de maera que tienen en patiu. La verdá que con neños ye más prestoso tar al aire llibre, más que nada porque ellos cansen enseguida y mentantu los mayores siguimos xintando puen entretenese pel prau (que ye lo que fixeron)

En total yeremos 10, 6 adultos y 4 guah.es pa danos un homenaxe como Dios manda. Pa los peques pidieronse croquetes, papos de xata y xelaos de postre (ya vos digo que ser ser, sedría avientu, pero la tarde impresionante), como los tenía al estremu contrariu de la mesa, nun yos-saqué denguna semeya, pero dieron bona cuenta de toos los platos.

Pa la zona adulta (dos rombos) pidimos pa compartir una serie de platinos. Quiciabes los que menos me convencieron fueron les berenxenes enllenes de carne y les setes a la crema de cabrales. Les berenxenes taben bones, pero nun ye que seya un tastu qu'a mi me vaiga munchu, prestoses.

Les setes al cabrales pa mi taben un poco insulses, pero gustaron.

Ta claro que'l fuerte del chigre son otros platos, los de tola vida, el pitu caleya yera una ración curiosa pa compartir, d'un pitu nada secu y de bon color prietu, como debe ser. Perbona carne y platu mui rico.

Los dos esfamiaos del grupo tabene esperando pol filete al quesu, la especialidad del pueblu, tanto equí, como nel ya trancau Casa Josefina. Más finu qu'un cachopu (porque ye un filete) nun dexa de ser la mesma idea, filete rebozau con quesu y xamón dientro. Apunteme a prebalu y la verdad que taba bono.

Hubo dellos postres pola mesa (llechi frita, que llevó aplausos, una crema de almendres que llevó unos pocos menos y un quesín azul que taba abondo bien). Cafetinos, agua, bonos amigos y la compaña de una bona sidra como Zapatero fixeron una tarde prestosísima na que los 10 salimos por unos 120 €, un preciu tamién estupendu.

Un sitiu recomendable pa pegase una bona fartura, que finemos con unos cafetinos en un de los dos bares del pueblu (que merez la pena pasear) que tan onde la ilesia.

La Traserilla (Palencia - Castiella)

noreply@blogger.com (Fartones) — Fri, 21 Oct 2016 14:31:00 +0000

Una visitina a Palencia pa pesllar el branu nun vien mal. Esta vegada por fin pudimos esfrutar, magar del guía, d'una visita a la impresionante Catedral (y eso que nun soi yo munchu de piedres). Ciudá piquiñina, afayaíza y enllena de vida na cai, ye un sitiu prestosu pa relaxase (o non).

Decidimos repetir en La Traserilla, ente otres coses porque sigue siendo un referente en Palencia y porque na anterior visita eso de "otres formes de llechazu" dexóme raru y había que lo compensar y que bien cenemos :-). Eso sí, tengo que dicir, qu'esi intentu de metenos a cenar nel comedor trancáu que golía a humedá sentome mal, pero que lo compensaron (El restaurante ye una casa vieya remociada con varios pisos y varios comedores). Señores, eso nun se fai.

Al granu, depués de que la camarera, con xestu de sustu y-entrugara'l xefe si podíemos camudar de comedor (si non quedaben sin dos cenes, mui al nuesu pesar). Sentaos n'un comedor de la planta de riba (munchu más afayaízu y ensin olores) y col fenshui necesariu pa centranos en la nuechi y la comida, punximonos a ello.

D'entamu la casa llegaron unos palmitos con güevares que taben perbonos, pa entonar el butiellu.

Como siempre, teniendo'n cuenta que nun comemos muchu, equivoquemos el pasu cola comanda. Vamos, que nun nos dimos cuenta del tamañu de les raciones hasta que foi tarde. De primeru pa compartir unes alcachofes naturales con setes y xamón que taben d'escñandalu. Bono, ya que somos fanes d'eso de les alcachofes y ya nos ganen con bon productu, pero perbien. Saldsa ligadina, tastos integraos, prestosa asgaya y ración "mínima".

De segundos yo decidí resarcime, llechazu tradicional. Agua sal y fornu, nun pedía más y eso vino. Cola compaña d'una ensaladina. Yo prefiérolo un plizcu más fecho, pero taba cotonudu y yo, a puntu de morrer de la fartura.

Pel otru lláu de la mesa, unos papos de xata de ración piquiñina, que prebé enantes de desamarrar el cintu, por dicir que lo prebaba. Prestoses, xugoses y bien cocinaes, un platu redondu.

La carta de vinos ye grande (y tradicional) decidimos un Hesvera crianza 2010 que nun sedrá del gustu de los wine lovers ;-), pero vamos, que cumplió como un campéon y según les mio notes d'preba "taba bono".

Un par de cafés con xelu y 79 € de cuenta pagaos con tiques (otra razón más pa venir perquí), prestosa cean una vegada arreglao lo de la mesa.

El Campestre (La Esperanza - Tenerife - Canaries)

noreply@blogger.com (Fartones) — Thu, 13 Oct 2016 14:39:00 +0000

El Campestre ye un chigre de tola vida decoráu en piedra y maera, que furrula n'un esquema asemeyáu al Tierra Astur: Nun se acuta, dante un númberu (como na carnicería) y sientente onde caigas, eso incluye meses compartides y platos de maera .Chigre nel que si nun vas con un d'ellí nun creo que te dé por parar y eso que'l pueblu de La Esperanza ta na baxada del Teide direición La Laguna.

Como vos dicía, a mí si que me llevaron dos collacios d'elli a xintar, a pesar de tar folgando acuté un día de de turismu teunolóxicuo o como queráis velo, pero ya que taba en Tenerife había que visitar el Dalix y velu en sábadu, en un "pa tí too" y ensin molestar a los qu'ellí trabayen de normal, foi una pasada, magar que finar con dos collacios nel Campestre y esfrutar d'unes bones puyes Canariones-Chicarreres ensin que te tocare denguna foi más.

Sitiu de carne y bones raciones, yo dexeme llevar na comanda. De primeru y pa comaprtir un platu de chistorra, salchicha y morciella canaria que vino "al fueu", pa que finasen de facese na mesa mesma.

La verdá que productu de perbona calidá. La morciella canaria, pa que nun vos pille con cara fatos como a mí al prebala, ye dulce y lleva pases y almendres picaínes. L'amestu ente morciella y salchiches/chistorra ye, como mínimu, curiosu.

Los segundos ya individuales, pero tamién me dexé llevar. Un sollombu de xata (yo nun ví munches perllí, pero rico taba) poco fechu solo pa amantes carnívoros. Vaya fartura.

Menos mal que nunca tomo postre, porque si lu tomare depués d'esta fartura diba tener que pedir tiempu muertu pa pensar la estratexa. Eso sí, yo que diba finar tranquilamente con un cafetín solo, tampoco pude, el chicarrero nos "impuso" un barraquito completo. Postre non, pero con esti café procura nun medir el nivel de glucosa n'unos díes. El barraquito vien con llechi condensao, llicor 43, llimón, canela y unos granos de café tostau y si quies morrer de llambión (cosa que nun ficimos dengunu) dantelu con 2 sobres d'azúcar...por si acasu.

Tomemos cerveces y cerveces ensin, pero la cuenta nun sé como quedó, ya que'l anfitrión empeñose en convidanos.

Como vos digo, prestosu final pa una prestosa xorná.

Tasca La Cantera (Granadilla de Abona - Tenerife - Canaries)

noreply@blogger.com (Fartones) — Wed, 28 Sep 2016 17:35:00 +0000

Magar que'l conceyu de Granadilla de Abona tien munches bones playes, la capital del mesmu, que ta para l'interior, nun ye'l sitiu más turísticu de la zona, eso sí, otra recomendación llocal llevonos a cenar ellí el caberu día d'estancia en Tenerife.

La Cantera, ye un sitiu perafayaízu, qu'a mesta piedra y maera na decoración, amás de tar integrada cola propia montaña. Como véis na primer semeya, el techu y la paré de la zona onde cenemos y onde teníen de decoración eses pipes de vino, ye natural.

La cena foi más bien un pica, pica de coses que mos fueron comentando y poniendo pa los cuatro. La primera fueron unes gambes endolcades n'una pasta brí (había varies por brí), acompañaes de una salsa alio-oli y ensalada. Perbono, de lo meyor de la cena.

El siguiente platu yera sólo pa un y finemos prebando toos un plizcu. Tamién mui rica el pinchu de tortiella de bacalláu, que venía con una vinagreta y una salsina de ali-oli.

Otru puntín pa les parroches, bien frites y cruxentes. Eso sí, los pexes en Canaries tienen menos tastu que los del cantábricu. Rico tamién, mui prestoses.

El caberu platu pa compartir un bacallaú a la parrilla con verdurines que foi lo que más nos gustó. Bien preparáu, prestosu.

A los postres un quesín de cabra perfuerte y perbono y unes trufes caseres de diferentes chocolates ys tastos onde las que más nos prestó foi la de chocolate escuru.

A la bebida, agua, un Rueda a copes (único vino de chateo de la carta) que cumplió bien y un par de chupitines de ron canario con carambelu. Al final paguemos 54 € que tuvo perbien.

Tasca La Lata de Gofio (El Médano - Tenerife - Canaries)

noreply@blogger.com (Fartones) — Fri, 16 Sep 2016 20:07:00 +0000

A La Lata de Gofio, como a casi toos los chigres que fuimos, lleguemos por recomendación llocal. Un chigre perafayízu situáu en un paseu a pie de mar y un poco más llevantáu lo que permite tener unes vistes perguapes mentantu cenes.

Comida casero canaria, cenciello y rico. Entamemos, con unes gambes a la salsa del almogrote (un paté gomeru fechu con un quesu de cabra fuerte y mojo que ya prebáremos en La Gomera) que taben perbones y la salsa d'almogrote mui conseguida. Los guah.es tuvieron faciendo "barcos" col pan y la salsa hasta que nun quedaron nin salsa, nin gambes, claro. A esti platu hai que-y dar un sobresaliente.

Un plizcu más floxos, pero más que nada porque nun yeren muncha novedá (pedímoslos porque hai un "choperu" na familia) fueron los chopitos fritos con pataques y güevos plancha. Los chopitos bien, ricos, la compaña nun me pegaba nin con quesu, eso sí, nun aparte patques y güevos tamién sirvieron de cena.

Bono, bono, pero que mui bono taba la carne de cabra guisao con papas arrugadas. Polo visto ye la especialidá de la casa. Tal y como mos dixo'l camareru al día siguiente diba tar munchu meyor, difícil de creyer. Salsa lligadina, tastu potente, carne tienra y bien fecha. Un platu bien prestosu.

1/2 xarra de vino del país blanco y seco (equí en Les Canries dexai claro como queréis el vino blanco, conseyu), una botella grande d'agua y un par de cafetinos con xelu por menos de 44€ (11 per cápita). Sitiu nel que parar si tais pela zona.

La Molina (Agulo - La Gomera - Canaries)

noreply@blogger.com (Fartones) — Tue, 13 Sep 2016 21:54:00 +0000

Nun ye que saliéremos munchu a comer o cenar n'estes vacaciones peles Canaries, pero como siempre, de sliar fuera lo que más nos presta ye dir a chigres típicos de onde temos. Nun lleguemos a xintar n'un guachinche tinerfeñu (sitiu de bodegues onde dante garbanzas, filete y vinu) pero sí en dellos chigres llevaos por recomendaciones de collacios de la zona o, como n'esti casu, por una paisana peramable que vionos perdíos a la gueta d'un chigre onde xintar na Gomera.

La visita a la Gomera ficimosla un domingu (los horarios de los ferries dende Tenerife son más amplios) y qedósenos percorta. Una isla perguapa, pequeña pero de munchos contrastes (montañes, valles, nubes, sol, bosques de llaurisilva...)

Agulo ye'l primer pueblu qu'alcuentres na costa a la baxada de Garajonay (una maravía esta isla) y La Molina ye un chigre que ta a la entrada, magar d'un poco escondíu. Chigre prestosu con ambiente canario (nun había nin un foriatu, sólo nosotros como "peninsulares" y dientro habíalos comiendo mentantu cantaben cancios de la zona y tocaben la guitarra).

Decidimos xintar na terracina porque anque taba ñublao n'esta parte de la isla, facía un chornón de su madre y yera onde meyor se taba ensin dulda. Amás, teniendo'n cuenta que'l chigre ta elevau sobre Agulo, habias unes vistes perguapes mar/monti.

Entamemos con un almogrote gomeru, una especie de paté fechu con quesu de cabra vieyu y mojo picón. Tapina pa prebar de la que nun quedaron nin los restos porque nun sólo nos prestó a los mayores, los neños punxeronse como'l quicu.

Tolo demás tamién vino pa compartir de dos en dos. Les croquetes caseres de pexe (atún de lata y un frescu canariu del que nun m'alcuerdo del nome) foi ente los guah.es. Taben abondo bones y veníen con una salsina de ali-oli.

El coneyu al mojo, tienru, de bon tastu y cola compaña de les típiques papas arrugadas, foi pa'l neñu y pa mí. La verdá que'l coneyu, introducíu dende la península y ensin depredadores naturales, ye un problema nes isles, pero gastronómicamente saquen-y muchu partíu. Taba perbono con una salsina sele de mojo que nun picaba (entruga que facer si vais compartir con guah.es, claro).

Pel otru llau, la neña y la madre prefirieron l'atún fervíu tamién al mojo nun picante :-). Una bona ración d'atún, bien preparáu con papas arrugadas de compaña. Nun ye la mio forma preferida de preparar el bonitu / atún pero taba bono que ye lo importante.

Un agua pequeño, un zumu, dos botellines de Dorada (la cerveza de Tenerife) y una frasca de vino gomero blanco de la casa seco y mui rico (1/2 de litro) nun llegó a los 8,5 €/cabeza. Vamos, que si nos aeropuertos la comida ye caro cuando sales de Canaries parecente astronómicos.

Lo dicho, un chigrín prestosu pa facer un altu nel camín.

La Posada de Antrialgo - La Posada d'Antrialgu (Antrialgu- Piloña)

noreply@blogger.com (Fartones) — Fri, 22 Jul 2016 15:59:00 +0000

La Posada ye un hotelín, piquiñín y afayaizu con una terrza cubierta de maera na que te presta tar a la vera'l ríu Piloña. Bona atención, presentaciones guapes y esa nuechi, amás, con música persele de fondu y'l sitiu escoyíu esta vegada pal mio cumpleaños.

De detallín de la casa traxéronnos unos cereales rebozaos con cúrcuma y con un toque de salsina de yoghur per baxo que taben ricos, diferntes, lo que siempre presta.

D'entamu y pa compartir escoyimos media ensaladina de quesos nos qu'un d'ellos venía en cruxente. Prestosa, bien aliñada con una vinagreta d'arándanos y una presentación " en dos" que permitía compartir munchu meyor.

Ya de segundos decidime pol arroz, ya que na carta tienen variades formes de preparalo y recomendáronme fuera de carta el meloso con pitu de caleya.

El pitu esgüesau, claro, y un arroz bien de puntu nel que xueguen con diferentes especies pero ensin destacar y sólo pa dar un puntu de tastu (lo que ye complicao). El pitu esgüesau del que eserpaba un poco más de tropiezu. Un platu correctu que me prestó porque nun suelo tener munches oportunidades de comer arroz "pa un".

L'otru platu fueron unes molleh.es de corderu llechal a la plancha con pataques panadera. Bien de tastu, taben pa mí un poco pasaes de puntu de plancha. Otru platu correctu.

Les raciones en tolo casos son abondo curioses y nun quedes con fame.

De compaña tuvo perllí un Pies Negros de La Rioja, que non de les montañes del Colorau, que cumplió más que bien con tola cena. Un vinín de gran RCP.

Pa fina terminemos con un par de cafetinos con xelu y un PX de postre :-).

Resumiendo, dempués de munchos años ensin venir perquí, la verdá que tenía un recuerdu munchu más "esplosivu" de la comida. L'otru día quedeme col correctu, col bien altu, bona comida, bon sitiu, bona RCP anque (ye mui particular esto) falta-y un "nun se qué" pa namorar nes preparaciones. En cualisquier casu ye cumpidor pa una ocasión especial por menos de 31€ cabeza.

Fumarel (Ribadeo - Lugo - Galiza)

noreply@blogger.com (Fartones) — Wed, 13 Jul 2016 09:05:00 +0000

Parada de vuelta a casa en Ribadeo y, como cualisquier domingu equí, munchu ambientín pela cai. Siguiendo una recomendación más de tapeo que de xintá fartucona y por siguir prebando chigres nuevos que siempre nos presta, finemos nel Fumarel. Sitiu nuevu na ciudá con bona presencia y afayaizu con una terracina cubierta na parte de tras na que nos punximos a xintar.

Fuimos a la gueta de los calamares na so tinta que mos recomendaron, pero la verdá que nun pudimos escoyer nada, xintemos lo qu'había porque nun quedaba nin 1/3 de la carta (y yo mirando pa tolos llaos y sólo había dos meses con xente, la hora rondande les 15:00 d'un domingu....) un plizcu raro, pero nada, allá que pidimos les tres cosines que quedaben pa compartir. Entamemos con la semeya que falta, "llombos de sardina plancha", pues llombos yeren y ricos taben, pero habra que yos-esplicar la diferencia ente sardina y parrocha, amás, 10 llombos son 5 parroches, vamos, dió pa mediu bocau.

El siguiente fueron unos fritos de bacalláu, tamién ricos, bon rebozu y bon productu que tampoco vistes les parroches esto parecionos la ración del mes, anque nun fuera pa tanto. Prestosos, anque nun ye dalgo que yo pida normalmente.

Meyor el caberu platu, unos calamares que'n vez de ser na so tinta yeren a la plancha. Frescos, ricos, bon puntu magar que los calamares frescos sigo prefierinedolos a la romana, pa gustos colores.

Como tábemos en viaxe bebimos dos copes d'albariño, un agua grande, un kas y un café con xelu y la cuenta fueron casi 54 €. Quiciabes tábemos de vuelta de la Galicia "de más allá de Foz" y acercándonos a les nuestres Asturies de preciu, de comer por dos duros hasta'n en bonos chigres y ensin botella de vino, ensin postres y raciones resultonos francamente tirando a caro.

Pareciome un chigre ideal pa tomar un vermut, y una tapina de compaña, pa comer dame, primera impresión que pa comer, magar del bon productu y bona atención ye caro y más si mires alrodiu en Ribadeo onde hai perbonos chigres. Mal nun xintemos :-)

Panorámico Las Sirenas (Covas - Lugo - Galiza)

noreply@blogger.com (Fartones) — Tue, 05 Jul 2016 15:05:00 +0000

L'hotel Les Sirenes ye un sitiu perguapu onde desestresar unos díes, un sitiu nel que si'l tiempu nun te acompaña siempre te quedará la piscina y les vistes a la ría de Viveiro y, d'acompañate tienes una playina al pie y dos más a menos de 5 minutos caminando.

El restaurante del hotel ta situau na planta más alta, con una zona de cafetería dixebrada too'l conxuntu tien unes vistes privilexiaes de la ría y los sos alrodios. El restaurante en sí ye tou acristalao pa nun perdese nada y dispon de una terracina pa esos dias de branu (a ver si lleguen) nel que se pue tar fuera. Solo faltaba que se comiera bien y mira per onde, cómese bien si quitamos el pan, nun ye de recibu esi pan, ya pueden dir camudando de panaderu, por Dios :-).

Cenemos la primera nuechi ellí y intentesmoslo la cabera, pero nun pudimos por "culpa" d'una boda. Más allá de lo bien que ta'l chigre vayamos a lo que tienen pa comer. Polo que vimos nel ascensor, amás de la carta hai un menú ente selmana que los fines de selmana desapaez (al menos nun lu vimos de vienres a sábadu) de 14 € ensin bebida, altamente recomendable.

La nuesa cena (y esta vegada voi contala como de 4) consistió en dos (sí dos) raciones de croquetes de xamón con ensalada de les que debió quedar una fueya de llechuga del caberu platu. Nun llegué nin a prebales, cuando creí que nun finaba cola primera ración desapeció del platu y doña croqueta quiso otra más...coses de la edá, tará medrando. La pinta coyonudes y el resultaú debió ser bonu :-).

Nun somos mui amantes d'eso platos que ponen "surtido de..." pero teniendo'n cuenta que'l bicheru come menos qu'un moscu y que-y gusten los bichos como que se yo, la má y él compartieron un surtíu de cigles, gambes, zamburiñes y amasueles plancha con bona pinta y diferente resultáu con media plzcu superior al aprobáu. Vamos, cigales 6, gambes 5, amasueles 5 y zamburiñes 7, pa que vos faigais media idega.

El menú tenía perbona pinta, asina que tireme por él, equí tengo que dicir que'l segundu tuve que pedilu una porque nun venía a resultes de que taben esperando a que los demás finansen colo suyo, en fin, eses coses que pasen igual queríen dexame cenar sólu, cosa que nun pasó.

El menú merez la pena, polo menos esi día. Entamó con unes amasueles mariñana perbones (esí cocinaes sí) fresquines, de bon tamañau y bon tastu, n'un primer platu de ración abondo grande. Prestosísimes (na semeya ya faltaben delles, ye que tenía fame).

De segundu, un llombín de merluza del pinchu de Celeiro, que de primeres asustaba un poco (poles verdures de la salsa que venñien por riba), pero que al prebalo taba abondo meyor que la pinta inicial, onde nun se mazcararon los tastos pa nada y pude esfrutar d'una merluza prestosa (y eso que nun ye pa nada el mio pexe preferíu), fresquina y de puntu perfeutu de cocina.

El menú tenía postre, del que yo diba pasar (porque siempre paso y porque nun había nada atrayente), pero ay amigu! doña sacu ensín fondu taba como si tuviera una furacu nel butiellu, asina qu'ellí dio cuenta de casi toa la Contesa con chocolate delantre los güeyos abiertos como platos de los sos pás. Lo dicho...sedrá la edá.

Un bon vinín de compaña (Leirana 2014), dos cafetinos con xelu, un agua grande y un kas de naranxa por 69 € un preciu que resultome más qu'atractivu.

Las Rocas (Vegacervera - Llión)

noreply@blogger.com (Fartones) — Mon, 23 May 2016 19:49:00 +0000

El sábadu pasáu fiximos una escursión perguapa per el norte de Llión. Pola mañana visitemos la cueva de Valporquero (mui recomendable dir agora, en Mayu, porque hai muncha agua dientro y dexa imáxenes espectaculares) y pola tarde tiremos hasta'l Muséu de la fauna xabaz de Valdehuesa. En metá del viaxe, paradina pa xintar en Vegacervera, con bona fame porque escoyimos el recorríu llargu de la cueva y son 2h bien agustu d'escalones y visita.

Las Rocas ye un chigre-hotel en metá del pueblu a al vera de la carretera xeneral, nun tien pérdida. Chigre prestosu y afayaizu en maera y piedra nel que comes con mantel :-) y tien una bona atención.

La verdá que sólu con dos guah.es calculaba que con un menú de tres platos a compartir diba sobráu (que ca un sabe lo que tien en casa) pero que si igual yera poco un menú, que meyor dos..bono, al final decidime por un menú y completar con unes croquetes y un revueltu de setes y trigueros....paseme, col menú y les croquetes díbemos de sobra (y eso que los dos primeros platos del menú son pequeños y despisten).

El primer platu del menú foi la cecina de Llión con tomate y piñones regada con aceite d'oliva virxen estra. Perbon productu, bon amestu, prestosu entamu de xintá.

Ente el primer y'l segundu platu del menú vinieron les croquetes de cecina casero, que nun prebé pero que xintaron bien a pesar de la protesta de doña croqueta que al prebar la primera dixo que la cecina nun-y daba más que prefería les de xamón (que picu finu, porque yo nun-y dixe que fueren de cecina h.e, h.e).

Bona ración y, lo dicho, debién tar riques.

A la mesma vegada llegó el revueltu de setes y trigueros que taba perbonu anque pa mí sobraba-y el carambelizáu de Módena que llevaba perriba (polo menos parte). En Las Rocas deben ser especialistes en setes (les paredes tan llenes de semeyes con diverses variedades) y nótase nel tratu d'esti platu, sobró la metá, pero mereció la pena (y nun m'entrugéis que pintaba la cencina esa enriba).

Dempués llegó el segundu platu del menú (del que se m'escaeció sacar la semeya) que yera una ensaladina pequeña con ñueces, canónigos y castrón escabechao (nunca lu prebara) que taba bien bona.

Por fin llegó el platu principal del menú que amás parez ser una especialidá de la casa. La verdá que foi la decepción de la comida. Nun mos convenció a dengunu, una mestura ente mar y montaña especialidá de la casa que non nos dio más. Pitu caleya con bugre.

Nun ayudó a que les pieces fueran pechuga (taba seco), nin tampoco que'l pitu la caleya más cercana que viera debió ser la que pisó de la que lu llevaben a matar. Igual con otra pieza quedaría más xugoso, pero aún asina, esi amestáu col bugre nun y-pegaba munchu...También vos digo que debemos ser rarinos porque ye una especialidá de la casa.

En resumen, tienen mano, bones raciones a pesar del final doi un aprobáu altu. Dos quintos de 0,0º de Buckler, un agua, un café solu y un kas de naranxa. 16,2 € por cabeza (el menú fueron 18 €) pagaos con tiques (un valor añadíu).

Paradina interesante pela zona sobre too si faceis la mesma ruta.

Tasca El Marinero (Castro Urdiales - Cantabria)

noreply@blogger.com (Fartones) — Wed, 11 May 2016 21:53:00 +0000

La verdá qu'hai vegaes nel que un ta de suerte y que, teniendo'n mente una comida rápida (con bonos pinchos y una cervecina) camudes d'opinión sobre la marcha y porque sí, porque lo güeles y nun sabes que ye.

Eso ye lo que nos pasó en Castro, parada pa xintar de domingu de viaxe de vuelta, idea de "vamos pal Puertu, que ye guapu, y tomamos unos pinchos mirando'l mar", abrir el guetador de tiques nel móvil sobre la marcha y ver la pinta que tenía el sitiu que nos marcaba foi too uno pa entamar a pensar que "igual en vez de pinchos....xintamos un poco de verdá" y ¡aciertu plenu!. Merez una visita tranquila, col vinin bien escoyíu y non una cerveza 0,0 y un blanco de chateo (ye lo que tien tar en viaxe).

La primera foi camudar d'idea y la segunda la de "vaya güeyu que tenemos, menos mal que tienen tiques, la Virxen..." y eso que veníemos d'Euskadi. Al final, nun foi pa tanto, un porque nun cayó vino, dos porque la comida nun foi copiosa, circunstancies obliguen, tres, porque vista la calidá, la cantidá y la preparación ye d'esos sitios onde nun duel lo que pagues anque nun llevares los "santos tiques" que tantu bien fain a los fartones na so economía :-) y cuatro, porque l'atención ye perbona.

Meudía de chornón, nel que finó lloviendo y que mos permitió caltener una idega, xintar fuera nel puertu :-)

L'unicu puntu asina raru, foi que nos traxo los dos platos a la mesma vegada cuando diximos que yeren pa compartir (igual nun nos entendió bien) lo que acabó rápidamente al dase cuenta del fechu y llevanos el pixín pa dientro, pa más tarde (con un golpín de calor, arreglao).

Entamemos poles anchoes de la zona fresques a la plancha. ¡Bua...lloro!...que riques. nun tengo más que dicir, plancha tal cual, acetín d'oliva y una ayada per riba con perrexil....¡pa qué más!

Pa finar el pixín, presentaú el pexe enteru, pero ya ensin espines centrales. Mesma preparación, mesma ayada per riba. Mira, equí sí, equí y-quitaba yo cantidá d'ayu que con esi pexe nun pintaba na. Pero ye fácil, arrostres el tenedor per riba y aparteslo. Imprsionante...toi rellambiendome entovía,¡Ay como sedrá una bona furagaña al llombu equí!.

Lo dicho, una 0,0º, dos Ruedas de chateo y un par de cafés con xelu 50,60€ bien agustu, ¿oyisti?

Cuatro Gatos (La Felguera - Llangréu)

noreply@blogger.com (Fartones) — Wed, 11 May 2016 21:53:00 +0000

Dempués de tanta mina había que reponer fuercies asina que dimos un paseín pela zona peatonal de La Felguera y tirando del guetador de tiques acabemos nel Cuatro Gatos.

Chigre curiosu, porque na parte de tras más paez una cafetería del sieglu XIX qu'una sidrería, pero nun dexa de ser afayaizu. Carta de chigre de tola vida cola curiosidá de tener la opción de tapes más piquiñines que te permite prebar d'equí y d'ellí.

Al comer alternemos "calidades", claro, qu'al nun tener referencia del chigre reuslta qu'acertemos col platu del que son especialistes y lo demás foi un puntu (o dos) per baxo, ¡que se y-va facer!.

Como vos digo entamemos con les molleh.es, impresionantes, al nivel del Pumarín diría yo (al menos esi día), guisaes con otra salsa diferente, pero seles, tienres, bon tastu, perbones...la mini-ración que venía con pataquines frites de verdá nun dio pa nada y como ya pidiéramos lo demás tampoco repetimos. ¡Ye mal entamar per riba!

A la mesma vegada vinieron les croquetes de les que tuvimos que pedir otras porque nun yos dieron pa na a los guah.es que veníen esfamiaos (y eso que tamién xintaron unes poque molleh.es primero). Bien porque ya vos digo que repitieron y yo que prebé una (nun soi croqueteru) prestome.

Dempués una de fígadu con pataquines frites que taba bien bono, pero que nun llegaba al nivel de les molleh.es. Típica preparación encebollao d'Asturies de siempre :-)

Lo más normaluco de too (tampoco esperábemos otra cosa) foi'l pitu al ayu, bien turriadín per fuera, normalucu, como ye esti platu qu'a los doa adultos nun nos da munchu más por ello, pero que nun quedó nada.

Dos botelles de sidra Piñera, dos cafés con xelu, un agua y un Kas por (nun m'alcuerdo bien) unos 35-40 € con tiques.

En reumen, un chigre de pasu nel que nun te dan mal de comer y nel que si vais, nun marchéis sin prebar les molleh.es.

Kaype Quintamar (Barru - Llanes)

noreply@blogger.com (Fartones) — Thu, 21 Apr 2016 17:22:00 +0000

El Kaype Quintamar ye un hotel en primera llínea de la playa de Barru y qu'almite tiques, lo que lu fai oxetivu pa comer si ye que tamos pela zona.

La cafetería tien una terraza pergrande y ya dientru atopeste con un comedor típicu d'hotel, poco afayizu (por grande y ampliu), pero con dellos atractivos importantes, les vistes al sable, que ta perllímpiu (míreslu peronde lu mires) y que tien un menú del día completín y perdignu a bon preciu, polo menos el par de vegaes que vinimos, nun hubo quexa.

El domingu pasáu, ente'l sable de Gulpiyuri y'l que nos quedaba por "comer de la playa Barru" paremos un ratín a xintar.

Raciones grandes polo que nos camentaron que los neños meyor compatieren platu y asina foi: pataques frites de verdá, con un poco d'ensalada, cuatru croquetes y tres bonos trozos d'adobu con perbona pinta. La trituradora de la familia dixo que l'adobu taba perbono y la verdá que sí. Bon platu del que dexaron cuatro patatuques y un filete (que ya vos imaxináis en qué butiellu finó).

Pel otru lláu de la mesa un revueltín de gambes, setes y oricios, que tamién prestaron munchu, nun lu prebé pero dixeronme que rico, amás de ser una ración xenerosa.

Pela mio parte, menú del día. de primeru una ensalada con salsa césar, digna, bien pa entonar con cruxentes de xamón y non de pitu, eso sí. Normalina.

De segundo una cabra a la plancha que taba perbona, francamente, rica meyor que munchos pexes de carta a preciu de caviar d'otros sitios, fresquina y bien de puntu, prestosa, sí señor. Sobraben-y esos espárragos de bote que nun se pa que s'empeñen en ponelos (como cuando ponen los pimientos tamién pa dar color)

L'agua (1,5l) y'l vinu (blanco de Rueda Señorío de Nava) del menú. Dos cafés con xelu, una tarrina de xelau de llimón del menú tamién y un Magnun white pa una xintá prestosa al pie del mar y con tiques. Por unos 39,5 € en total (13€ de menú) y que valionos pa reponer fuercies y la que m'esperaba dempués (ay!!, ya nun tengo edá pa esguilar peles roques).

Les Praeres (Les Praeres - Nava)

noreply@blogger.com (Fartones) — Mon, 11 Apr 2016 14:54:00 +0000

La zona de Les Praeres ta situá na sienra de Peñamayor, Nava, a unos 1.140 m d'altura. Podíemos llamalo Braña, porque nun hai más que cabañes d'animales pela zona, magar que delles tan habilitaes como llar, y un chigre, que ye a lo que mos lleva esti blog, ¿o non?.

L'accesu ta perbien indicáu ya dende Nava y va faciéndoses más complicáu a partir del pueblu de Piloñeta, onde namás salir la caleya tresfórmase en pista de formigón con fuertes ramples y estrechina pa que penseis eso de que pasa si te crucies con un que baxa (pues que hai que dir a la gueta de los apartaderos). Sólo el final de la pista (como a unos 100m del chigre) pasa a ser de tierra. Pue xubise en coche ensin problemes, mentantu nun tenga suspensiones deportives, aunque meyor si ye un pocu altu, y si queréis seguir ruta'n coche (pues llegase a Bimenes y a Piloña per pistes) meyor 4x4.

Merez la pena xubir n'un bon día poles vistes, polos paseos y porque bien enantes de pasear, bien dempués, pares nel chigre a ponete tibiu de comida casero.

El chigre, ye eso, un chigre de montaña, pero bien afayaízu, cola so chimenea prendía, la maera, la tranquilidá, en fin, pa relaxase. ¿Y la comida?. Pues la comida perbona, casero, ensin complicaciones, raciones abundantes de les que ya Aladinu (el dueñu) va diciéndote, "d'eso meyor media, si solo vas come tú y sí los neños nun son de munchu comer, ponemos-yos una pa compartir", pues ¡hala! nun hai más que falar.

Pues allá foi la mi media de fabes, tienres como mantega y perllograes de tastu, diome pa dos platos y casi reventar. Del compangu quédome col chorizu aunque taba too bono.

Pero eso nun ye na, porque pidimos una de xata guisao con pataquinos por si me quedaba butiellu pa compartir y pa allá que la compartí. Otra vegada, bon productu, bon tratu, bon platu, cenciellu, de tola vida.

Pa los guah.es, un platu "combináu" pataques de verdá, una par de güevos de casa y varios filetes d'adobu a repartir ente ellos (poca cosa dexaron). Ricu, ricu, faltaba-y el perrexil del Arguiñano.

Dempués de tamaña fartura, con dos cafés, un agua pequeó, una fanta y dos botellines de sidra y media de cabrales de postre, la cuenta foi d'unos 42 € (que podéis calcular ente tres pal preciu personal).

Un paseín pela zona, unes vistes enfoncando al nuesu Sariegu y una sorpresa, la cierva (Bambi) que va a la so bola pero que nun marcha d'equí nin a tiros, normal, colo bien que-y dan de comer.

El Molín de la Pedrera (Cangues d'Onís)

noreply@blogger.com (Fartones) — Tue, 05 Apr 2016 15:30:00 +0000

Paseu perguapu colos neños per Cangues a la vera de los dos ríos, kilos de piedres tiraos al Seya, vermutín pela zona a la vera d'unos culumpios, en fin, un domingu familiar y prestosu que tuvo una parada pa xintar n'un chigre al que facía munchos años que nun díbemos (El Molín de la Pedrera), pero que sigue conservando'l toque y la calidá.

Nun ye un sitiu baratu, pero xíntase bien, ye afayaízu y tien una bona atención y tres del "desastre gastru-económicu" de la cena del miércoles pasáu en Ribeseya, sentó como Dios.

Cocina cenciella lo que pidimos, pero de calidá de productu y calidá de cocina. Ensin pih.aes enmarutando la comida. A lo que vamos, nun pudimos ser más normales pidiendo.

Dos platos de pataques fites de verdá con dos mini-escalopines de calidá y tres croquetines bien bones pa los neños que yos- apeteció (y a mí que me xinté un de los escalopinos del que menos come h.e, h.e)

Per un llau, tacos de sollombu cola salsa de cabrales aparte. Bona calidá, bon puntu de tienru y tastu, pataquines frites y la salsa persele qu'a mí prestame más pa moyar les pataques que pa antroxar la carne :-)

Pel mio lláu preferí tirame a unes manes de ministru esgüesaes con xamón per dientro y setes. A mí prestaronme munchu, eso sí la reducción que llevaben igual dexábales un poco más dulce de lo qu'a mí me gusten, pero esi ye un tema mui personal. El casu ye que taben bien bones. Veníen con unes pataques frites de verdá, pero como de bolsa, que claro, pasaron a los platos de los guah.es namás les vieron y amás diben un poco moyadines na salsa y dexaronme dos pa prebar :-)

Col vinu, pásame como col arroz, nu tengo munchu quorum para los tintos. Asina que nun habiendo La Descarga bebimos un Fillaboa 2014 (la carta de vinos blancos ye pasable eso sí), agua grande, cafés con xelu y una fanta naranxa (o kas con burbuxes que ye lo que pide). Los adultos podéis salis por unos 30 € por cabeza y los neños por unos 9-10 €
Prestosu domingu.

El Rincón del Viajero - El Rincón del Viaxeru (Cuayoto - Uviéu)

noreply@blogger.com (Fartones) — Wed, 09 Mar 2016 16:11:00 +0000

Un vale regalu con un menú degustación que diba caducar foi lo que nos llevó fasta'l Rincón del Viaxeru ensin denguna espectativa, pa que vos voi engañar. Chigre cubanu montáu en Cuayoto da la impresión que cola intención de facer lo mesmo que los paladares habaniegos de los 90, ye dicir, comida casero, ensin pretensiones, con carta cantada, con atención familiar.

Lo primero que fiximos foi camudar el vino del menú (menos mal que lu prebemos primero) por el munchu más bebible Ramón Bilbao crianza que vimos que teníen perllí (nun esperéis una carta, nun ye'l sitiu). Gran detalle, nun nos quixeron cobrar pol cambiu y eso qu'insitimos, allí salió la madre-cocinera-dueña a dicinos que nin pa Dios. Vamos, un chigre de pueblu de tola vida, pero con comida cubana.

Entamó'l menú con unes boles de pataques rellenes de carne un plizcu picantes (los cubanos nun son mui d'echar picante) que taben abondo bien, de rebozu y rellenu que diome por puntuar nel facebook con un 6-7 sobre 10.

Siguimos cola ensalada de tola vida, sólo que con aguacate, bien aliñada, nun hai munchu que dicir, a nun ser que nun te guste l'aguacate, que-y da un toque.

El platu nun cubanu fueron los mexillones a la vinagreta, los mexillones bien, la vinagreta un poco fuerte. Normalucos.

Ameyoramos munchu colos platos siguientes. L'arroz secu con fabes prietes y pequeñes pero non en plan moros y cristianos, si non que tab especiau, notábase el cominu y l'ayu y vino de compaña colo qu'ellos llamen carne asao (lonches fines de carne aliñaes perriba). Esto tuvo bien y prestonos, amás d'entrugate que si quies repetir, cosa que fiximos cola carne (l'arroz yera munchu).

Un platu que nos sorprendió son los chips de plátanu, que tien que ser plátanu macho verde pa que-y den un toque acidín y supongo pa que quede cruxente. Prestosu acompañante. Esto hai que lo intentar en casa un día y sustituir les pataques frites...fartones, que sois unos fartones.

Paso al penúltimu plátu, la yuca fervío y llixeramente aliñao. Un tastu diferente al de la patata y, la verdá, que nunca la xintara asina, frita sí, pero cocida...

Al caberu platu nun y-saqué semeyes, va ser que'n esi momentu el chigre camudó en disco con DJ, baille y música, asina de repenti y escaecióseme del tou porque quedeme tontu pensando nel tema. Taba bono y nun soi llambión, xelau de vainilla con "flan", y pongo "flan" porque foi lo que dixo, pero de testura y tastu yera más bien tocinín de cielu d'eso.

Lo meyor, l'otru postre, pa animase a baillar.

En fin, espectatives cero, resultaú aprobáu, ye un chigre diferente que nos prestó (hai que tener el día y saber a lo que se va) a pesar de les sos carencies gastronómiques porque ponen de la so parte pa ello.

San Martino (Porto - Portugal)

noreply@blogger.com (Fartones) — Tue, 26 Jan 2016 17:01:00 +0000

Una opción bona, guapa y barata na Ribeira d'Oporto pa tar con guajes o pa los amantes de la cocina italiana. El San Martino ye'l típicu llocal pizzero-italiano con nun demasiao fen-shui, pero pasa por ser una de les meyores opciones de la ciudá n'esti tipu de chigres, de lo que da fe la cantidá de xente que foi apareciendo perllí a cenar.
Atención amable y dispuesta (como nel 99% de Portugal, vamos) sitios amplios, cocina a la vista y múltiples opciones "italianas"

Como los portuguesos son como son nel tamañu de les raciones pidimos un carpaccio con mozzarella para una de les poques persones que conozco (mira que debe haber poques nel mundiu y yo conozco a dos que me toquen direutamente) a les que nun hai manera de pasar pola pasta, pizza y/ otres variedades italianes del estilu.
Bona ración de bona carne polo que me contó. El restu punximonos tibios con una estupenda pizza 4 quesos recién forneada.

De compaña un Gazela (vinho verde), un agua grande y dos cafetinos con xelu. Total de la la cuenta 28 €. Asina da gustu.

Casa Leo (La Villa - Villaviciosa)

noreply@blogger.com (Fartones) — Mon, 18 Jan 2016 14:42:00 +0000

Casa Leo ye'l chigre que sustituye a un clásicu en La Villa como foi El Roxu. Una sidrería más dientro de la ufierta chigrera de la zona, na que falten restaurantes d'otru tipu.

Remocicáu llixeramente per dientru, el llocal ye de los de ventanes y puertes de maera de tola vida con contres y tamaños enormes, bien decoradín y puestu, tien un comedor pa la parte de tras. Nos quedemos na zona de chigre porque nun teníemos más intención que la del tapeu.

A falta de prebar pescáu y otres cosines, decir que pa tapear resultó bien. Entamemos con unes zamburiñes plancha que taben perbien feches de puntu y con una salsina na que sólo y-quitaría esi estra d'ayu que yos-dio por poner, con menos taríen meyor. La reación un plizcu piquiñina, ¡que menos q'una docenina, ho!.
Riques.

Unos pimientinos del padrón que volvíen a tar perbien de puntu y taben sabrosos, n'esti casu, fueron toos que "non", que ye un detalle :-). Esta vegada la ración foi lo que tenía que ser.

El caberu platu pa compartir fueron los calamares frecos a la romana. Otra ración interesante, calamares bien preparaos que comimos bien agustu.

Dos botellines de sidre Vigón, un par de cafetinos con xelu y un chupito para un total de 22,5 € persona que pa la zona ye tirando a caru.

Dom Peixe (Matosinhos - Porto - Portugal)

noreply@blogger.com (Fartones) — Thu, 17 Dec 2015 18:52:00 +0000

Hai dellos sitios raros para alcontrar información de les coses, pero creo que ponese a falar col dueñu de un chigre de "frixuelos y pizzes para llevar" en metá d'Oporto pue llevase la palma. Pues sí, mentantu esprábemos po los dos frixuelos con chocolate que queríen merendar los neños entamemos una charra perprestosa col dueñu, qu'estudiara n'Uviéu, y recomendonos que si díbemos al acuariu al día siguiente xintáremos pexes na Rua Herois de França en Matosinhos, en cualisquier llugar, nel que más nos prestare nel momentu y asina de casualidá entremos nel Dom Peixe, magar que n'nesa cai podéis alcontrar varios, d'estilos diferentes pero too col pescau frescu y un "grelhador" o parrilleru a la puerta faciéndolo.

El Dom Peixe ye un chigre formal, con perbona atención, bien decoráu y, en fin, que nos dio bona pinta pa entrar, ¡qué queréis que vos diga!.

En vez de Dom Peixe, tengo un neñu que podía llamar Don Gamba (por munches coses, pero tamién porque y-gusten) asina que pedimos pa que ellos compartiersen una de gambes al ayu que taben per prestoses. Eso sí, nun me dio tiempu a prepara el móvil y ya la metá del platu taba nos platos d'ellos....ye lo qu'hai :-). Aceite d'oliva, ayu, gambes semi pelades fresques (siempre dexen la cola ensin pelar) y pa dientro. Bones.

Ellos de segundu quxeron salmón a la parrilla. El salmón nun ye un pexe que a mi me preste, pero a ellos la verdá ye que yos-gusta munchu. Bien parrillau, con costrina per fuera y tienrín por dientru, dieron bona conta. Emplatáu pa cada un sobre la marcha, na semeya sólo ta puesta una metá del bichu.

Los mayores preferimos da-y a la dourada grelhada (dorada a la parrilla, eh! aunque ya sé que lo pillásteis) que desepinaron n'un plis-plas y emplataron los camareros na nuesa mesa en un momentín. Gran puntu, gran pexe, aceite, sal, algo d'ayu y a esfrutar. Meyos véis les semeyines, qu'esta vegada nun son tan males.

De compaña, un Planalto branco 2013 (Douro D.O) que fixo bien los deberes cola comida, agua grande, una mus de chocolate, una copina de oporto y un café solu. Si tuviéremos n'España, por calidá, y serviciu rondaríemos los 85-90 €, en Portugal, tando na zona VIP d'Oporto, con un 23% d'IVA y siendo, de lloñe, el sitiu más caru onde comimos durante'l fin de selmana, nun llegó a 66 €.

Si váis a Matosinhos a dalgo, vos recomiendo la cai, escoyer un chigre y a ver :-)