FreeMan "+1+1+1+1+1+1+1..."

ՀՀԿ-ն ու Վարդան Մամիկոնյանը:

2012-02-16T06:32:00.002-08:00

Այսօր առավոտվանից Երևանի կենրոնական փողոցներում կարելի էր նկատել Հանրապետական կուսակցության դրոշներով երթի դուրս եկած երիտասարդների: Երիտասարդներն ինչպես պարզվեց տարբեր բուհերի ուսանողներ էին, որոնք ազատվել էին դասերից ՀՀԿ-ի դրոշի ներքո եկեղեցի գնալու, և ի հիշատակ Վարդան Մամիկոնյանի մոմ վառելու նպատակով: Ուսանողների հետ միասին` առատ ձյան տակ, Հանրապետականին էին ծառայում նաև դասախոսները, դեկաններն ու ամբիոնների վարիչները, որոնք ամեն կերպ խուսափում էին տեսախցիկից և չէին ցանկանում պատասխանել հարցերին: Առերես (առանց տեսախցիկի) շփման ընթացքում որոշ ուսանողներ, ինչպես նաև դասախոսներ հայտնում էին իրենց դժգոհությունը:

Ուսանողների երթը գլխավորում էին` ԵՊՀ-ի ուս. խորհրդի նախագահը, ՀՀԿ-ի անդամ Ցոլակ Հակոբյանը, և ԵՊՀ ուս. խորհրդի քարտուղարը`Հարություն Ազգալդյանը, որը նույնպես ՀՀԿ-ի անդամ է, ինչպես նաև ուս. խորհրդի այլ ՀՀԿ-ական անդամներ:

Թ'ե ուսանողների, թ'ե դասախոսների շուրթերից հաճախ կարելի էր լսել դժգոհություններ ստիպողաբար երթի մասնակցելու համար, սակայն, որևիցէ մեկի մտքով անգամ չէր անցնում` չստրկանալ և ուղղակի չենթարկվել, չքայլել ոչխարի նման` ՀՀԿ-ի դրոշի ներքո:

ԱԶԱՏ ՀԱՅԱՍՏԱՆ

Կալանավորվել է «Հայկական Ժամանակ»-ի լրագրող Հայկ Գեւորգյանը (լրացված)

2012-02-03T02:44:00.000-08:00

Այսօր առավոտյան կալանավորվել է «Հայկական Ժամանակ»-ի թողարկման պատասխանատու Հայկ Գեւորգյանը: Նրան նախ տեղափոխել են Ոստիկանության Կենտրոնականի բաժին, իսկ հետո՝ Նուբարաշեն քրեակատարողական հիմնարկ:

Panorama.am-ը Ոստիկանության լրատվական ծառայությանը հղում անելով նշում է, որ Հայկ Գևորգյանի նկատմամբ քրեական գործ է հարուցվել ՀՀ ՔՕ 242 հոդվածի 1-ին մասի այն է` «Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթևեկության կամ տրանսպորտային միջոցների շահագործման կանոնները խախտելը, որը մարդու առողջությանն անզգուշությամբ պատճառել է ծանր կամ միջին ծանրության վնաս և 244-րդ հոդվածի «Ճանապարհատրանսպորտային պատահարի վայրը թողնելը տրանսպորտային միջոց վարող եւ ճանապարհային երթեւեկության կամ տրանսպորտային միջոցների շահագործման կանոնները խախտած անձի կողմից» հատկանիշներով:

Հայկ Գեւորգյանի փաստաբան Վահե Գրիգորյանը ոստիկանությունում կարողացել է տեսնել Հայկին եւ համոզվել, որ նրա հետ ամեն ինչ կարգին է:

Հայկ Գեւորգյանը հետախուզման մեջ է հունվարի 23-ից: Լրագրողը ոստիկանությունից չի թաքնվել եւ տեղյակ էլ չի եղել, որ ինքը հետախուզվում է: Հայկն ամեն օր աշխատանքի է գնացել ու անգամ, ասենք, կառավարության շենք է մտել եւ դուրս եկել: Թե ինչու է նա հատկապես այսօր կալանավորվել, պարզ չէ:

«Հայկական Ժամանակի» խմբագիր Նիկոլ Փաշինյանը հնարավոր է համարում, որ Հայկի կալանավորումը կարող է կապված լինել նրա մասնագիտական գործունեության, մասնավորապես, Ոստիկանապետ Վլադիմիր Գասպարյանի մասին հրապարակումների հետ:

ՀԱԿ պետա-իրավական հանձնախմբի դիտարկումներն ու գնահատականները ՀՔԾ տեղեկատվական հաղորդման վերաբերյալ

2012-01-23T07:16:00.000-08:00

ԵԽԽՎ 1837 բանձևի 3-րդ կետի պահանջի կատարման բավարարման ակնկալիքով ՀՀ հատուկ քննչական ծառայությունը մարտի 1-2-ի իրադարձությունների կապակցությամբ Հատուկ քննչական ծառայության վարույթում գտնվող քրեական գործով նախորդ տարվա դեկտեմբերի վերջին տեղեկատվական հաղորդում է տեղադրել իր ինտերնետային կայքում: Ծավալուն այդ փաստաթղթի հետ ծանոթացումը ոչ միայն չի փարատել մեր ունեցած կասկածները գործի քննության օբյեկտիվության, բազմակողմանիության ու լրիվության ապահովման առումով, այլև հարուցել է նորերը, որոնցից ընդամենը մի քանիսի մասին Ձեզ տեղեկացնելը ստորև կարևորել ենք: Տեղեկատվական հաղորդման ուսումնասիրությունը թույլ է տալիս եզրակացնել, որ փաստաթղթի հիմնական նպատակը մարտյան դեպքերին, իրավապահ և ուժային մարմինների գործողություններին նախկինում տրված իրավաբանական անգրագետ ու սխալ քրեա-իրավական գնահատականների ու որակումների ամեն գնով հաստատումն ու հիմնավորումն է, ինչպես նաև սպանություններից մի քանիսի բացահայտման աջակցելուն միտված Փաստահավաքխմբի երեք զեկույցներում վկայակոչված փաստերի ու եզրակացությունների անթաքույց առարկումն ու հերքումը:
Ընդ որում, տեղեկատվական հաղորդման առարկությունների բաժիններին ծանոթանալիս կարծիք է ձևավորվում, թե Փաստահավաք խմբի զեկույցներում ամեն ինչ միտումնավոր խեղաթյուրված ու կեղծված է, թե սպանությունների փաստական հանգամանքները, թե փորձաքննությունների եզրակացությունների ելակետային տվյալներն ու հետևությունները, թե փաստահավաք հրավիրված բարձրաստիճան ոստիկանների ու բանակի սպաների, փորձագետ-մասնագետների, նույնիսկ քննչական խմբի անդամ քննիչների բացատրությունները: Ինչպես երևում է նյութի շարադրանքից, փաստահավաք խումբ ներկայացած, պարզաբանումներ և բացատրություններ տված այս անձիք ՀՔԾ-ում միաբերան հրաժարվել են իրենց տված բացատրություններից, դժգոհել են, թե իրենց սխալ են հասկացել, իրենք նման բաներ չեն ասել, այլ բան է արձանագրվել, թե իրենց վրա ճնշել են և այլն: Մնում է ցավ ապրել մեր բանակի ու ոստիականության գնդապետների ու գեներալների թուլակամության ու անսկզբունքայնության համար:
Զրկված լինելով հերքումների հերաքմամբ հանդես գալու հնարավորությունից, /մեր տրամադրության տակ չունենք սույն քրեական գործի նյութերը/ հենվելով քննարկման առարկա տեղեկատվական հաղորդման, փաստահավաք խմբի հրապարակած զեկույցների ու տրամադրության տակ եղած նյութերի, «7-ի գործի» նյութերի, մամուլի հրապարակումների և այլ լեգալ աղբյուրներից ստացված տեղեկությունների վրա, ստորև ներկայացնելու ենք մեր նկատառումներն ու գնահատականները, ինչպես մարտի 1-2-ի իրադարձությունների, դրանցում ներգրավված պետական ու իրավապահ մարմինների գործողությունների վերաբերյալ, այնպես էլ արձանագրված հացագործությունների, մասնավարոպաես սպանությունների փաստերով հարուցված գործերի քննության ընթացքում թույլ տրված իրավական սխալների ու բացթողումների վրա:
Ա. ՀՔԾ ու ՀՀ գլխավոր դատախազությունը Ազատության հրապարակում 2008թ. Փետրվարի 19-ի նախագահական ընտրությունների արդյունքները բողոքարկող քաղաքացիների բազմահազարանոց խաղաղ հավաքներն, երթերն ու ցույցերը չորս տարի ի վեր որակում են օրենքով սահմանված կարգի խախտմամբ զանգվածային միջոցառումներ, չնայած այն հանգամանքին, որ մինչ այսօր որևէ հայտնի ընդդիմադիր այդպես էլ դատի չի տրվել ու չի դատապարտվել ՀՀ քր. Օր.-ի 2251 հոդվածով:
Բ. Մինչ օրս մարտի 1-ի առավոտյան Ազատության հրապարակում ոստիկանության, ներքին զորքերի, հատուկ նշանակության ջոկատայինների իրականացրած հակաօրինական ու վայրենի գործողություններին ինչ պատճառաբանություն ու բացատրություն ասես, որ չեն բերել, բայց այդպես էլ ոչ մի օրինական հիմնավորում չեն կարողացել ներկայացնել: Նախ, մարտի 1-ին ՀՔԾ ՀԿԳ ավագ քննիչ Վ. Հարությունյանի թիվ 622025508 համարի քրեական գործ հարուցելու որոշման մեջ ոստիկանության գործողությունները ներկայացվել են շուրջօրյա ակցիաների «հարկադիր դադարեցման նպատակով ձեռնարկված միջոցառումներ»: Ավելի ուշ, ստիպված հրաժարվել են այդ բացատրությունից, որովհետև պարզել են, որ ոստիկանությունը չի ունեցել այդ ակցիաները հարկադիր դադարեցնելու «Ժողովներ, հանրահավաքներ, երթեր և ցույցեր անցկացնելու մասին» այն ժամանակ գործող օրենքի 14-րդ հոդվածի 3-րդ մասի 2-րդ կետով նախատեսված հիմքերը: Այնուհետև, ստիպված փորձել են այդ գործողությունները տեղավորել, խծկել ՀՀ քրեական դատավարության շրջանակ, վերջիններս մեկնաբանել որպես «տեղանքի զննություն» քննչական անհետաձգելի գործողության կատարում: Սակայն այդ վարկածն էլ է ձախողվել, որովհետև պարզվել է, որ մոռացել էին նախապես Ազատության հրապարակ հրավիրել մեծաթիվ քննչական խմբի, կրկնակի անգամ ավել ընթերակաների, բազմաթիվ փորձագետների և այլն: Ու բացի այդ, այն չեն սկսել քննչական գործողությունների համար սովորաբար թույլատրելի ցերեկային ժամերին /7.00-22.00/: Վստահ եմ, հիշում եք, թե խեղճ պատասխանատուները ինչ ջանքեր էին գործադրում ԱԺ ժամանակավոր հանձնաժողովում գործողությունների սկիզբը ժամը 6-ից 7-ը տեղափոխելու համար: Տեղեկատվական հաղորդագրության մեջ ՀՔԾ-ն ու գլխավոր դատախազությունը ի վերջո կանգ են առել, իրենց կարծիքով նվազ խոցելի «տեղանքի հետազոտում» օպերատիվ-հետախուզականմիջոցառման տարբերակի վրա: Մինչդեռ, ցանկացած օպերատիվ աշխատողի, էլ չեմ խոսում իրավաբանի ու իրավագետի համար ակնհայտ է, որ «Օպերատիվ-հետախուզական գործունեության մասին» ՀՀ օրենքի կարգավորման առարկան, այդ գործունեության տեսակները սահմանելուց զատ, դրանց անլուր, գաղտնի իրականացման կարգի ու պայմանների նախատեսումն է: Հետևաբար նշված օրենքով նախատեսված «տեղանքի հետազոտում» օպերատիվ միջոցառումը չէր կարող կատարվել բացահայտ, մոտ 1000 ոստիկանական ու հատուկ ջոկատայինների համազգեստ կրող ծառայողների մասնակցությամբ: Նման միջոցառման իրականացման համար լիովին բավարար էին համապատասխան տեխնիկական միջոցներով հագեցված 2-3 օպերատիվ փոքր խմբերի գաղտնի, քողարկված գործունեությունը:
Եզրակացությունը մեկն է՝ մարտի 1-ի առավոտյան Ազատության հրապարակում ոստիկանության գործողությունները կրել են բացահայտ ապօրինի, հանցավոր, իսկ ինքնապաշտպանության դիմած ՀՀ քաղաքացիներինը՝ օրինական ու իրավաչափ բնույթ: Հանցավոր, հանրորեն վտանգավոր ոտնձգությունից պաշտպանվելը, անկախ այն հանգամանքից, թե ոտնձգություն կատարողը պետական պաշտոնյա է, ոստիկան թե հասարակ քաղաքացի, ինքնապաշտպանության դիմելը ՀՀ քր. Օր.-ի 42-րդ հոդվածի համաձայն, ՀՀ յուրաքանչյուր քաղաքացու իրավունքն է, ընդ որում, «անձի կյանքի համար վտանգավոր բռնություն կամ այդպիսի բռնության իրական սպառնալիքով զուգորդված ոտնձգությունից պաշտպանվելիս կարող է պատճառվել ցանկացած վնաս, այդ թվում՝ մահ»:
Հետևաբար, հրազենով, հատուկ միջոցներով ու տեխնիկայով զինված ոստիկանության, ներքին զորքերի, բանակի, հատուկ նշանակության ստորաբաժանումների, ապօրինի զինված խմբերի հարձակումներից մարտի 1-2-ին Ազատության հրապարակում, ապա Միասնիկյանի արձանին հարող տարածքներում պաշտպանվելու նպատակով քաղաքացիների ինքնաբուխ ձեռնարկած բոլոր քայլերը՝ սկսած բարիկադների կառուցումից, մինչև ինքնապաշտպանության նպատակով իրերի ու առարկաների հայթայթում՝ լիովին օրինաչափ ու օրինական գործողություններ են և ամբողջովին համապատասխանում են արարքի հանցավորությունը բացառող անհրաժեշտ պաշտպանության քրեաիրավական ինստիտուտի թե տեսական, և թե օրեսդրական դրույթներին ու ձևակերպումներին:
Ընդհանրացնելով վերը շարադրվածը, կարող ենք եզրակացնել, որ ՀՔԾ-ն ու ՀՀ գլխավոր դատախազությունը դեպքերից չորս տարի անց էլ շարունակում են մարտի 1-2-ի իրադարձությունները ներկայացնել գլխիվայր, շուռ տված, տեղի ունեցած դեպքերի պատճառները որպես հետևանք, և ընդհակառակը, իրավապահ և ուժային մարմինների բացահայտ ապօրինի գործողություններին տալիս են կամայական գնահատականներ ու որակումներ, փորձում դրանք ներկայացնել որպես վերջիններիս օրինական լիազորությունների իրականացում: Ասվածի մեկ այլ հավելյալ ապացույց ևս. Ազատության հրապարկից փախչող, ծեծված ու թրջված քաղաքացիների հետապնդումը Երևանի կենտրոնով մեկ /ինչը ապացուցող բազմաթիվ տեսանյութեր կան/ քննարկվող փաստաթղթում ներկայացված է որպես թե «ՊՊԾ գնդի ոստիկանները հետևել են կարգազանց քաղաքացիների՝ վերջիններիս կողմից իրավախախտումները կանխելու և հասարակական կարգը պահպանելու նպատակով»: Սա էլ բավական չէ, շարունակել են, թե այդ ընթացքում էլ, չնայած որ ոստիկանները փորձել են պաշտպանվել վահաններով, նրանք այնուամենայնիվ ստացել են մարմնական վնասվածքներ:
Ելակետ ունենալով մարտի 1-2-ին տեղի ունեցած հիմնական իրադարձություններին, իրավապահ և ուժային կառույցների սկուզբունքային նշանակություն ունեցող գործողություններին տրված ընդհանուր, սխալ գնահատականները, ՀՔԾ-ն ու ՀՀ գլխավոր դատախազությունը իրենք իրենց մեթոդաբանաորեն զրկել են կոնկրետ իրավիճակներին ու գործողություններին իրավաբանական համարժեք որակումներ տալու, քրեաիրավական և քրեադատավարական ճշգրիտ որոշումներ կայացնելու հնարավորությունից, ինչի ականատեսը ստորև բազմիցս կլինենք:
Գ. Սպանությունների փաստերով հարուցված քրեական գործերով կատարված քննչական գործողութունների ծավալի ցուցադրումից բացի, նախաքննական մարմինը զգալի ջանքեր է գործադրել Համլետ Թադևոսյանի, Տիգրան Աբգարյանի և «Չերյոմուխա 7-ի» գործադրմամբ սպանությունների վերաբերյալ Փաստահավաք խմբի զեկույցներում վկայակոչված փաստերի, հայտնաբերված թերությունների ու հակասությունների, արված հետևությունների հերքման համար: Փոխանակ Փաստահավաքի զեկույցներում վկայակոչված սպանությունների նոր հանգամանքները, ձեռք բերված նոր տվյալները դառնաին առնվազն քննչական նոր վարկածների առաջ քաշման, քննության ու ստուգման առարկա, ՀՔԾ-ն լծվել է Փաստահավաքի աշխատանքը ամեն գնով փնովելու, ձեռք բերված տվյալները, արված հետևությունները կասկածի տակ դնելու անշնորհակալ գործին:
Վստահ ենք, որ այդ ուղղությամբ գործադրած ջանքերի ու ծախսած միջոցների չնչին մասն իսկ լիուլի բավարար էին կատարված սպանություններից առնվազն մի քանիսը բացահայտելու և մեղավորներին քրեական պատասխանատվության ենթարկելու համար:
Հատուկ աչք է զարնում այն հանգամանքը, թե նախաքննական մարմինը ինչպես է փորձում սևացնել, վարկաբեկել բոլոր սպանվածներին /բացի ներքի զորքերի սպայից ու շարքայինց/: Նրանք բոլորն առնվազն զանգվածային անկարգությունների մասնակիցներ են, մի մասը կազմակերպչական ինչ-ինչ գործողությունների դերակատարներն են, նույնիսկ նրանց վերաբերյալ ոչնչով չհիմնավորված օպերատիվ տեղեկություններ են հիշատակվել, դատվածություն ունենալու վկայակոչումներ և այլն: Նպատակը, մեր կարծիքով, մեկն է՝ հասարակության, միջազգային կառույցների, դեպքերի իրական բնույթին անտեղյակ մարդկանց մոտ տպավորություն ստեղծել, թե սպանվածները քրեաբանական բացասական բնութագիր ունեցող անձինք են, մի խոսքով հանցագործներ, ևհենց հանցանքներ գործելու իրավիճակներում զոհվել ու սպանվել են:
Դ. Որքան էլ անհասկանալի, բայց փաստ է, որ ՀՔԾ-ն սույն տեղեկատվական հաղորդման մեջ բացարձակ չի անդրադարձել փաստահավաքի այլ երկու զեկույցներին: Խոսքը հետընտրական մարտի 1-2-ի իրադարձություններին բանակի հակասահմանադրական ներգրավվման և ապօրինի զինված խմբերի մասնակցության մասին է: Այս մեծածավալ փաստաթղթում նշված խնդրին վերաբերվում է ընդամենը մեկ պարբերություն, որտեղ նշված է, որ բանակի ստորաբաժանումները մշտապես գտնվել են ոստիկանության զորքերի և ոստիկանության ստորաբաժանումների թիկունքում և զանգվածային անկարգությունների մասնկիցների հետ անմիջական շփումներ չեն ունեցել:
Որևէ փորձ չի արվել, քննության առարկա դարձնել ՀՀ ՊՆ նախարարի դեռևս փետրվարի 23-ի 0038 հույժ գաղտնի հրամանը և իրավական գնահատական տալ այդ հրամանին: Արդյոք այդ հրամանի ընդունումը ու գործադրումը, ինչը հանգեցրել է մարդկային զոհերի ու այլ ծանր հետևանքների, իր մեջ առնվազն չի պարունակում իշխանազանցության, պաշտոնական դիրքի չարաշահման հատկանիշներ:
Լռության է մատնված Ռ. Քոչարյանի մարտի 1-ի «Արտակարգ դրություն հայտարարելու մասին» հրամանագրի սահմանադրականության խնդիրը և մասնավորապես Արտակարգ դրության ռեժիմի ապահովմանը Պաշտպանության նախարարության ներգրավան օրինականությանը: Արդյոք նման հրամանագիր ընդունելով Ռ. Քոչարյանը ակնհայտորեն դուրս չի եկել Սահմանադրությամբ ՀՀ Նախագահին վերապահված լիազորությունների շրջանակից և ընդհանուր պատասխանատվություն չի կրում հետագա բոլոր հանցագործությունների ու վրա հասած ծանրագույն հետևանքների համար: Չէ որ, քրեական հետապնդումից ՀՀ Նախագահը անձեռմխելի է միայն իր կարգավիճակից բխող գործողությունների համար, ասել է թե, եթե դրանց համար նա լիազորված է Սահմանադրությամբ: Մինչդեռ, բանակի ներգրավվման մասին Փաստահավաքի զեկույցում այդ հրամանագրի հակասահմանադրականությունըհաստատող սահմանադրագիտական անվիճարկելի հիմնավորումներ ու անառարկելի վկայություններ են ներկայացված:Մեր խորին համոզմամբ մարտի 1-2-ի իրադարձություններին բանակի հակասահմանադրական ներգրավումն է, որ անպարտության ու պաշտպանվածության պատրանք ու համոզվածություն է ստեղծելթե ոստիկանության, ներքին զորքերի, հատուկ նշանակության ստորաբաժանումների և թե ապօրինի զինված խմբերի մոտ, նրանց դրդել ծեծ ու ջարդի, թալանի, հրկիզումների ու սպանությունների:
Տեղեկատվական հաղորդման համակ լռությունը մատնում է ՀՀ գլխավոր դատախազության ու ՀՔԾ-ի վախը այս իրավական ակտերի իրավաչափության հարցի քննարկումից, թեկուզև նախաքննության շրջանակներում:
Ե. Առավել անհասկանալի է մարտի 1-2-ի իրադարձություններին ապօրինի զինված խմբերի մասնակցության խնդրի ամբողջական անտեսումը, հատկապես երբ ՀՔԾ-ն ինքն է՝ ընդունում, որ սպանված քաղաքացիական անձանցից երեքի /Հովհանես Հովհաննիսյան-5,45 մմ, Զաքար Հովհաննիսյան-9 մմ, Դավիթ Պետրոսյան- 9 մմ/ մարմիններից հանված գնդակները իբր չեն նույնականցվել ոստիկանության սպառազինությունում գտնվող և մարտի 1-2-ին գորադրված հրազեններից և ոչ մեկի գնդակների հետ: Եթե հավատանք /մի պահ/, որ դա իրոք այդպես է և քանի որ ապացուցված փաստ է նաև, որ ցուցարարները մարտի 1-2-ին հրազեն և պայթուցիկ սարքեր չեն օգտագործել, ապա դա կարող է ունենալ թերևս հնարավոր երկու բացատրություն. Առաջին, ոստիկանության աշխատակիցներն ու ներքին զորքերի զինծառայողները իրենց մոտ ունեցել, կրել և գործադրել են չհաշվառված ապօրինի հրազեններ: Երկրորդ, որ մարտի 1-2-ի իրադրաձություններին իրոք մասնակցել են բանակի, ԼՂՀ ոստիկանության այլ զիված ստորաբաժանումներ և ապօրինի զինված խմբեր, որոնց սպառազինությունում կամ տնօրինության տակ գտնվող հրազենները քննությամբ հայտնաբերված ու առգրավված չեն, և դրանց փորձագիտական տվյալները բացակայում են ՀՀ ոստիկանության պարկուճադարանում, հետևաբար դատաձգաբան փորձագետները դրանք չէին կարող համեմատել սպանվածների մարմիններից հանված գնդակների հետ և նույնակացնել զենքերը: Այլ ուժային ստորաբաժանումների և ապօրինի զիված խմբերի մարտի 1-2-ին մասնակցության հարցը լրացուցիչ ապացուցված է նաև «7-ի գործով» կատարված դեպքի վայրի զննությունների արձանագրություններով /այդ թվում լրացուցիչ արձանագրություններով/, ըստ որոնց, հազարավոր այլ պարկուճների հարևանությամբ հայտնաբերվել ու առգրավվել են նաև ձեռքի գնդացրի՝ PП-ի մի քանի տասնյակ պարկուճներ և փամփուշտ: Ըստ գործի տվյալների մարտի 1-2-ին ոստիկանության ուժերը գնդացիր չեն օգտագործել: Բացի այդ, մինչև օրս, ըստ մեր ունեցած տեղեկությունների, դեպքի վայրի զննություններով հայտնաբերված ու առգրավված տարբեր տրամաչափերի հազարավոր պարկուճների՝ ոստիկանության, բանակի սպառազինություններում գտնվող հրազենների հետ նույնականացման նպատակով դատաձգաբանական փորձաքննություններ նշանակված չեն կամ դրանց արդյունքները հանրությունից գաղտնի են պահվում:
Այդ պատճառով պնդում ենք, որ ՀՔԾ-ն այս առումով լուրջ բացթողում է թույլ տվել և կատարված նախաքննության շրջանակից միտումնավոր դուրս են մնացել մարտի 1-2-ի իրադարձությունների անմիջական մասնակից զինված պետական կառույցներ, ստորաբաժանումներ ու ապօրինի զինված խմբեր: Եթե ՀՀ ԶՈՒ, ԼՂՀ ոստիկանության ստորաբաժանումների դերակատարության, անձնակազմի, սպազինության բացահտումն ու ճշգրտումը իրենից օպերատիվ ու քննչական մեծ բարդություն ներկայացնող հարց չէ, ապա ապօրինի զինված խմբերին նախ պետք է հայտնաբերել, ճշտել նրանց կազմը, հայտնաբերել ու առգրավել նրանց ապօրինի զնեքն ու զինամթերքը, յուրաքանչյուր խմբի ունեցած դերը, տեղակայումը, շարժը և այլն:
Զ. Բոլոր սպանությունների նկարագրությունների հետ ծանոթացումը մեզ հանգեցնում է հետևության, որ նախաքննական մարմինը կարծես հիմնականում կարողացել է վերականգնել մինչև սպանությունների կոնկրետ ակտերի կատարումը գրեթե բոլոր սպանվածների գտնվելու վայրը, նրանց կողքին անմիջական գտնվող անձանց, նրանց շարժման ուղղությունը, ձեռքերին առարկաների առկայությունը /մահակ, գարեջրի շիշ, հեռախոս/, ինչով զբաղվելը և այլն:Մեծի մասամբ բացահայտված է նաև ծանր վնասվածք ստանալուց կամ սպանվելուց հետո կատարված դեպքերի ընթացքն ու դրանց մասնակիցների շրջանակը՝ թե վիրավորին կամ մահացածին ովքեր, ում մեքենայով, մինչև ուր տեղափոխեցին, շտապ օգնության որ բրիգադին հանձնեցին և այլն: Բայց բուն սպանության գործողությունը, կրակոցի ուղղությունը, կրակողի անձը /ոստիկան էր, զինվոր էր, քաղաքացիական անձ էր/նրա արտաքին նույնիսկ մոտավոր նկարագրությունը, առանց բացառության բոլոր տասը դեպքերում այդպել էլ ոչ-ոքչի տեսել, ոչինչ չի կարող ասել: Մի աներևույթ ուժ թե սպանվածքաղաքացիական անձանցկողքին անմիջականորեն գտնվողներին, թե ոստիկանության սպայի ու շարքայինի համածառայողներին, բոլորին անխտիր, այդ պահին պարտադրել է նայել այլ կողմ, մի ուրիշ գործով զբաղվել և բոլորը միասին մի տարօրինակ զուգադիպությամբ հենց այդ կարևոր դրվագը չեն տեսել ու չեն նկատել:
Է. Մեկ այլ զարմանալի զուգադիպություն ևս: Ինչպես հայտնի է, սպանվածներից երեքը մահացել են «Չերյոմուխա 7» հատուկ միջոցի կրակոցից և նրանց մարմիններից դիահերձումների ժամանակ հանվել են գազային նռնակի մետաղյա և պլաստմասե կտորներ, իսկ Գոռ Քլոյանի մարմնից՝ կրակված փամփուշտի ամբողջական կոնտեյներ: Հավելենք, որ «Չերյոմուխա 7» հատուկ միջոցներից ևս երեք վնասվածքներ ստացած անձնանց մարմիններից դատաբժշկական փորձաքննությունների ժամանակ հանվել ու առգրավվել են գազային նռնակի համանման բեկորներ: Թեև հատուկ միջոցների, այդ թվում նաև «Չերյոմուխա 7-ի» ու դրանց գազային նռնակների դատաձգաբանակն փարձաքննության նախադեպ ու փորձառություն ՀՀ փորձագիտական հիմնարկներն ու փորձագետները երբևէ չեն ունեցել, վերը նշված բոլոր դեպքերում նրանք անսխալ, զարմանալի զուգադիպությամբ սպանվածների ու վիրավորների մարմիններից հանված բեկորների, ինչպես նաև մեկ ամբողջական կոնտեյների վրա միահամուռ հայտնաբել ու արձանագրել են պինդ առարկաների հետ շփվելու և որևէ արգելքի միջով անցնելու հնարավոր հետքեր: Չհասկացաք թե ինչու: Լավ, կարծում եմստորև ամեն ինչ պարզ կլինի:
Վերևում նշել էինք, որ հրազենային վերքերից մահացածներից երեքի մարմիններից հանվել էին մեկական գնդակներ: Կրկին, տարօրինակ մի զուգադիպությամբ, դատաձգամբան փորձագետները այս երեք գնդակների վրա նորից առանց բացառության, հայտնաբերել են պինդ առարկաների հետ շփման կամ նրանց միջով անցնելու հնարավոր հետքեր: Հիմա կարծեմ արդեն պարզ է, թե շեղացատկի հնարավորությունը բոլոր վնասվածքների դեպքում ինչ նպատակ է հետապնդում: Ցուցարարնեի վրա ուղիղ նշանառությամբ կրակ չի արձակվել, մեզանից այլ բան չսպասեք:
Ինչ եք կարծում, ինչպես կվարվեին, եթե ՀՔԾ-ին ցուցարարների վրա ուղիղ նշանառությամբ դիմահար կրակի անհերքելի ապացույցներ ներկայացվեին: Օրինակ, youtube տեղադրված տեսանյութերից մեկում հստակ երևում է, թե ինչպես է հատուկ ջոկատայինի համազգեստ հագած, դիմակավոր, ինքնաձիգով զինված հրաձիգը դուրս գալիս շենքի անկյունից դիմահար կրակում և ապա թաքնվում: Նախ այդ տեսանյութով նշանակվում է դատահամակրգչային փորձաքննություն, որը պատճառաբանելով տեսագրման հեռավորությունը, գիշերային ժամն ու վատ լուսավորությունը եզրակացրել է, որ ստացված տեսապատկերները պիտանի չեն համակարգչային եղանակով նույնականացման համար:Ապա արդեն նշանակվել է տեսաձայնագրային և դատաձգաբանական համալիր փորձաքննություն, որով ի վերջո եզրակացրել են, որ կատարված երկու կրակոցները հավանական է կատարված լինեն «ԱԿՍՈՒ» ինքնաձիգից՝ անգնդակ փամփուշտներով: Լավ, չեք ցանկանում ճշտել հրաձիգի ինքնությունը՝ հասկացանք, բայց եթե նա կրակում էր անգնդակ փամփուշտնեորվ, այդ դեպքում նախ ինչի էր դիմակավորվում, երկրորդ՝ ինչու էր թաքստոցից դուրս գալիս և հետո կրակում, թաքստոցից չէր կարող օդ կրակել:
Ը. Հասարակության և միջազգային կառույցների ուշադրությունը կենտրոնացված է առավելապես տասը սպանությունների բացահայտման պահանջի վրա: Սակայն ակնհայտ է, որ մինչ օրս չեն բացահայտվել նաև մի քանի տասնյակ քաղաքացիական անձանց /փաստահավաք խմբին տրամադրված միայն մի աղյուսակի համաձայն դրանց թիվը մոտ 25-ն է/ գնդակային ու բեկորային ծանրության տարբեր աստիճանի մարմնական վնասվածքներ պատճառելու և ոչ մի դեպք: Ասվածը լրացուցիչ անգամ ապացուցում է, որ մարտի 1-2-ին հրազեն ու պայթուցիկ սարքեր գործադրողներին բացահայտելու ու նրանց քրեական պատասխանատվության ենթարկելու խնդիրը ոչ միայն իրավական, այլև քաղաքական փակի, արգելքի տակ է: և ՀՔԾ-ն սույն տեղեկատվական հաղորդման մեջ որքան էլ փարձել է այդ արգելքի գոյությունը թաքցնել, դա նրան, ինչպես տեսնում եք, բոլորովին չի հաջողվել: Քննարկվող փաստաթղթի տարբեր մասերում այդ արգելքի թաքցրած ականջները բազմիցս դուրս են ցցվում: Ահավասիկ, մեկ օրինակ: Խոսքը տասը սպանությունների փաստերով քրեական գործ հարուցելու որոշումների մասին է: Պարզվում է, որ սպանությունների փաստերով քրեական գործեր հարուցվել են միայն 2009թ. գարնանը ՀՀ Քր. Օր.-ում փոփոխություններ և լրացումներ կատարելուց հետո, այն էլ, ամենայն հավանականությամբ, ՀՀ քրեական օրեսնգրքի 104-րդ հոդվածի 2-րդ մասի լրացված 10-րդ կետով, որը պատասխանատվություն է սահմանում զանգվածային անկարգությունների մասնակիցների կողմից կատարած սպանությունների համար: Այսինքն քրեական գործ հարուցելու որոշման մեջ արդեն որոշված է, որ մարտի 1-2-ի սպանությունները կատարել են զանգվածային անկարգությունների մասնկիցները: Ոչ իրավաբանների համար պարզաբանեմ, որ ոստիկանության ծառայողները, ՆԶ-ի, բանակի զինծառայողները ոչ մի դեպքում չեն կարող դիտարկվել զանգվածային անկարգության մասնակից: Ստացվում է, որ ՀՔԾ-ն, բնականաբար նաև ՀՀ գլխավոր դատախազությունը ի սկզբանե քննարկել ու որոշել են, որ այդ սպանությունները կատարել են ընդդիմության ներկայացուցիչները: Չնայած, որ նրանց սկզբում չհաջողվեց վերջնականապես այդ սպանությունները մեղսագրել «7-ի գործով» մեղադրյալներին, այնուամենայնիվ մինչ օրս նրանք չեն հրաժարվել դրանք ընդդիմության այլ ներկայացուցիչների վրա բարդելու իրենց ծրագրից: Սա ուղղակի խայտառակություն է, նույնիսկ մեր իրավակիրառ պրակտիկայի համար, չտեսնված ու չլսված խայտառակություն: Սրանից հետո հույս տածել, թե ՀՔԾ-ն ու ՀՀ գլխավոր դատախազությունը ցանկանում են ու կարող են բացահյտել որևէ սպանություն՝ ուղղակի անմտություն է: Նման պայմաններում սպանություններից որևէ մեկը կարող է բացահյտվել միայն այն դեպքում, երբ այն հնարավոր լինի մեղսագրել մարտի 1-2-ի բողոքի ակցիայի մասնակիցներից որևէ մեկին:

Քանի դեռ ՀՀ գլխավոր դատախազությունն ու ՀՀ հաուկ քննչական ծառայությունը անտեսելով օրենք և օրինականություն, ինքնամոռաց ծառայում են գործող իշխանությանը մարտի 1-2-ի դեպքերի իրական պատասխանատուները, այդ թվում սպանություններ գործած անձինք չեն հայտնաբերվելու ու քրեական պատասխանատվության չեն ենթարկվելո

23 Հունվար 2012

Կոնգրեսի ներկայացուցիչների հանդիպումը Ջոն Պրեսկոտի հետ

2012-01-22T09:01:00.000-08:00

Հունվարի 16-ին Հայ Ազգային Կոնգրեսի համակարգող Լեւոն Զուրաբյանը հանդիպել է ԵԽԽՎ Հայաստանի հարցով համազեկուցող Ջոն Պրեսկոտի հետ:
Հանդիպման ընթացքում քննարկվել են ԵԽԽՎ 1837 բանաձեւի կատարման ընթացքը, Հայաստանի ներքաղաքական զարգացումները, ընտրական գործընթացի բարելավման եւ վերահսկման խնդիրները: Լեւոն Զուրաբյանը նաեւ քաղաքական գնահատական է տվել անցած տարվա դեկտեմբերին հրապարակված Մարտի մեկի վերաբերյալ ՀՔԾ զեկույցի կապակցությամբ:

Այնուհետեւ ԵԽԽՎ համազեկուցողի հետ հանդիպել է Կոնգրեսի պետաիրավական հանձնախմբի համակարգող Գագիկ Ջհանգիրյանը: Նա ներկայացրել է Կոնգրեսի դիտարկումները ՀՔԾ զեկույցի բացթողումների ու թերացումների վերաբերյալ, մասնավորապես, անդրադարձ է կատարել ՀՔԾ-ի կողմից Մարտի 1-ի սպանությունների, ինչպես նաեւ գնդակային եւ բեկորային մարմնական վնասվածքներ ստացած անձանց գործերի վերաբերյալ ոչ արդյունավետ քննության խնդիրներին:

Հանդիպմանը մասնակցել են նաեւ Կոնգրեսի Կենտրոնական գրասենյակի ներկայացուցիչներ Ավետիս Ավագյանը եւ Վլադիմիր Կարապետյանը:

16 Հունվար 2012

http://anc.am/

Սասուն Միքայելյանը կառաջադրվի Հրազդանի քաղաքապետի թեկնածու

2012-01-21T12:27:00.001-08:00

Հայ ազգային կոնգրեսի անդամ Սասուն Միքայելյանը պատրաստվում է որպես թեկնածու մասնակցել 2012 թվականի փետրվարի 12-ին կայանալիք Հրազդանի քաղաքապետի ընտրություններին: Այս մասին «Ազատություն» ռադիոկայանին հայտնեց ինքը Միքայելյանը` հավելելով, որ եթե արդար ընտրություններ անցկացվեն, ապա իր ընտրվելու հավանականությունը կկազմի «150 տոկոս»:

«Դե ժողովուրդն է պահանջում, որ` «մենք ուզում ենք փրկվենք», նույնիսկ մարդիկ են եղել, որ ասել են` «տան մեջ մահանում ենք, եկեք` մեզ փրկեք»։ Ես բարոյական իրավունք չունեմ իմ թեկնածությունը չառաջադրելու», – ասաց ընդդիմադիր գործիչը։

Նշելով, որ իշխանությունները անընդհատ հայտարարում են, թե Հայաստանում առաջիկա ընտրություններն անցկացվելու են արդար ու թափանցիկ, Միքայելյանը շեշտեց, որ Հրազդանի քաղաքապետի ընտրությունները լավ առիթ են նրանց հայտարարությունները կյանքի կոչելու համար։

«Մեր իշխանությունն է ասում` պետք է արդար ընտրություն անի, մենք էլ զորավիգ ենք կանգնում։ Մենք գնում ենք արդար ընտրության», – հայտարարեց Սասուն Միքայելյանը` շարունակելով. – «Ես էն չափանիշի, էն կալիբրի տղա եմ, որ, գիտեք, ամեն ինչի գնալու եմ։ Ես էս իշխանություններից պահանջում եմ արդար ընտրություն։ Թող բերեն դրսից հանձնաժողովների անդամներ դնեն, կանգնեն` մի անգամ էս երկրում արդար ընտրություններ կայանան։ Իսկ եթե հանկարծ գնան խախտումների, իմ ինքնասիրությունը, իմ ժողովրդի պահանջը էսօր թույլ չի տա, որ իրենք էդքան կարողանան` անարդար աշընտրություններ անցկացնեն։ Ես ամեն ինչի գնալու եմ»։

Միքայելյանի` Հրազդան քաղաքը կառավարելու որոշման վրա ազդեցություն է ունեցել ինչպես Հայ ազգային կոնգրեսի Հրազդանի կառույցի, այնպես էլ հրազդանցիների ցանկությունը: Հրազդանում անցած շաբաթավերջին կայացել է Հայ ազգային կոնգրեսի, ինչպես նաեւ ակտիվ քաղաքացիների հանդիպում, որտեղ էլ որոշվել է Միքայելյանի թեկնածության առաջադրման մասին:

Հրազդանի գործող քաղաքապետ Արամ Դանիելյանը Հանրապետական կուսակցության անդամ է, նա քաղաքը ղեկավարում է արդեն տասը տարի:

Հայ ազգային կոնգրեսի Հրազդանի կառույցի ղեկավար Մեսրոպ Մեսրոպյանը «Ազատություն» ռադիոկայանի հետ զրույցում կարծիք հայտնեց, որ տասը տարվա ընթացքում քաղաքում դրական փոփոխություններ գրեթե չեն կատարվել, եւ Սասուն Միքայելյանը գալիս է, որպեսզի նոր շունչ հաղորդի քաղաքին:

«Եթե իրենք մի քար դրել են մինչեւ էսօր, մենք գալիս ենք երկրորդը դնելու, իսկ այնտեղ, որտեղ չեն արել` գալիս ենք այդ չարածը անելու։ Իսկ այդ տաս, տասնքանի տարիների ժամանակահատվածը ցույց տվեց, որ իրենք շատ վատ են աշխատել, մեղմ ասած, իրենք չեն աշխատել», – հայտարարեց Մեսրոպյանը։

Հրազդանի գործող քաղաքապետի մասին Հայ ազգային կոնգրեսի տեղական կառույցի ղեկավարը ասաց. – «Ես կարող եմ ընդամենը ժամանակ գտնել` իր շքեղ մեքենաների լուսանկարները ուղարկեմ ձեզ, իր առանձնատների լուսանկարները ուղարկեմ ձեզ ու ընդամենը տակը մի հարց տամ. պետության կողմից սահմանված քաղաքապետի աշխատավարձով ո՞նց էր հնարավոր էդքան ունեցվածքի տեր դառնալ»։

Միքայելյանը իր փաստաթղթերը ընտրատարածքային ընտրական հանձնաժողով կներկայացնի 2012 թվականի հունվարի 8-13-ը ընկած ժամանակահատվածում:

Ազգային ժողովի նախկին պատգամավոր Սասուն Միքայելյանը 2008 թվականի հետընտրական իրադարձությունների կապակցությամբ դատապարտվել էր 8 տարվա ազատազրկման եւ համաներման մասին խորհրդարանի որոշմամբ ազատ արձակվեց այս տարվա մայիսի վերջին։
Ազատություն ռադիոկայան

http://hayazgayincongress.wordpress.com/2011/12/26/%D5%BD%D5%A1%D5%BD%D5%B8%D6%82%D5%B6-%D5%B4%D5%AB%D6%84%D5%A1%D5%B5%D5%A5%D5%AC%D5%B5%D5%A1%D5%B6%D5%A8-%D5%AF%D5%A1%D5%BC%D5%A1%D5%BB%D5%A1%D5%A4%D6%80%D5%BE%D5%AB-%D5%B0%D6%80%D5%A1%D5%A6%D5%A4/#more-103

Հայ Ազգային Կոնգրեսի` Ընտրական գործընթացի բարեփոխման պլատֆորմ

2012-01-19T11:21:00.000-08:00

Ընտրական համակարգի արատները

2003 թվականի նախագահական եւ խորհրդարանական ընտրությունների աղմկալի ընթացքից, ետընտրական հուզումներից եւ դրանց հետ կապված միջազգային ճնշումներից հետո Հայաստանի իշխանությունները ձեռնամուխ եղան ընտրական կեղծիքների այնպիսի մի համակարգի ձեւավորմանը, որը թույլ կտա առավել աննկատ դարձնել կեղծիքները տեղական եւ միջազգային դիտորդների համար, կնվազեցնի ինչպես վերջիններիս, այնպես էլ` ընդդիմադիր քաղաքական ուժերի կողմից ընտրական գործընթացի վերահսկելիությունը:

1. Մշակված համակարգի առանցքը կազմում է հանրապետությունից բացակա մոտ 500,000 քաղաքացիների, ինչպես նաեւ Հայաստանում բնակվող, բայց ընտրություններին չմասնակցած քաղաքացիների զգալի մասի ապօրինի հաշվառումը որպես քվեարկությանը մասնակցած քաղաքացիների եւ նրանց ձայների կեղծումը հոգուտ կառավարող ուժի: Այդ նպատակով իշխող ուժը ստեղծել է հազարավոր մարդկանց կազմակերպված մի բանակ, որը ընտրության օրը մասնակցում է ընտրակեղծիքների իրականացմանը կամ՜ որպես ընտրական հանձնաժողովների անդամներ, կամ՜ կառավարության կողմից վերահսկվող ուժերի վստահված անձինք, կամ՜ որպես հատուկ դերակատարություն ստանձնած ընտրողներ` կեղծ քվեարկողներ: Մասնավորապես, կեղծ քվեարկողները, օգտվելով այն հանգամանքից, որ տեղամասերում իրենց փաստաթղթերը ստուգողները եւ մատյանում համապատասխան գրառումներ կատարողները, հատուկ գաղտնանշանների կամ գաղտնաբառերի փոխանակման շնորհիվ, թույլ են տալիս նրանց անարգել քվեարկել հանրապետությունից բացակա կամ քվեարկությանը չմասնակցած քաղաքացիների փոխարեն, ամբողջ օրվա ընթացքում բազմաթիվ տեղամասերում բազմակի քվերկություն են կատարրում հօգուտ իշխող քաղաքական ուժի:

2. Ընտրակեղծիքների մեկ այլ աղբյուրը պետական իշխանության մարմինների կողմից /սոցիալական ապահովության պետական ծառայություն, ոստիկանություն, բանակ, համատիրություններ, տեղական ինքնակառավարման մարմիններ/ տարատեսակ ճնշումների համար խոցելի ընտրողների հաշվարկումն է, այդ ճնշումների կազմակերպումը, ընտրակաշառքի միջոցով նրանց ձայների գնումը, ընտրության օրը նրանց կազմակերպված կերպով, հատուկ տրամադրված հանրային եւ մասնավոր տրանսպորտի միջոցով դեպի տեղամասեր փոխադրումը, նրանց քվեարկության վերահսկումը:

3. Գյուղական տեղամասերում, ինչպես նաեւ այն տեղամասերում, ուր թույլ է լինում լրագրողական կամ դիտորդական վերահսկողությունը, քաղաքացիներին պարտադրվում է բաց քվեարկություն:

4. Վստահված անձանց նկատմամբ կիրառվում են բարոյահոգեբական ճնշումներ, ներառյալ սպառնալիքներ եւ կաշառքի առաջարկներ, ինչպես նաեւ բռնություններ, ինչի շնորհիվ վստահված անձանց կամ ստիպում են լռել ապօրինությունների մասին եւ հաստատել կեղծված արդյունքները, կամ ուղղակի վտարում են ընտրատեղամասից: Ճնշումների իրականացման համար օգտագործվում են տեղական կրիմինալ աշխարհի ներկայացուցիչները, որոնք անարգել թափանցում են տեղամասերը, իսկ որոշ դեպքերում նույն նպատակով օգտագործվում են նաեւ ոստիկանները:

5. Ձայների կեղծման մի հսկայական աղբյուր է բանակը. զինվորներին ստիպում են քվեարկել մի քանի տեղամասում, սպաների հսկողությամբ տեղի է ունենում բաց քվեարկություն:

6. Հայաստանի Խորհրդարանի 131 տեղից 41-ը որոշվում են մեծամասնական քվեարկությամբ, ինչը նույնպես նպաստում է ընտրական համակարգի կոռումպացմանը եւ ընտրակեղծիքներին: Այդ 41 ընտրատարածքներում առաջադրվում են օլիգարխներ կամ տեղական «հեղինակություններ», որոնք ընտրակեղծիքների կազմակերպման գործում համագործակցում են իշխանությունների հետ: Մեծամասնական մանդատ ստանալու փոխարեն նրանք պարտավորվում են իրենց ողջ ռեսուրսը` ֆինանսական, ուժային եւ կրիմինալ, օգտագործել նաեւ համամասնական քվեարկության համար անհրաժեշտ կեղծիքները ապահովելու նպատակով:

7. Նախընտրական քարոզչության համար նախորդ ընտրություններում սահմանված էր չափազանց փոքր ժամանակ`2-ից 4 րոպե օրական, իսկ հեռարձակումը կատարվում էր մարդկանց համար անհարմար ժամանակ` ժամը 17.00-18.00-ի միջակայքում` հեռուստադիտողների լսարանը նվազագույնի հասցնելու նպատակով:

Ընտրական գործընթացը առավելագույնս թափանցիկ եւ օրինական դարձնելուն ուղղված առանցքային առաջարկներ

1. Բազմակի քվեարկությունը բացառելու նպատակով քվեարկության մասնակցած անձի ձեռքին պետք է թողնել թանաքի կայուն հետք:

2. ԱԺ ընտրական համակարգից իսպառ պետք է բացառել մեծամասնական ընտրակարգը, բոլոր 131 տեղերը համալրել համամասնական ընտրակարգով:

3. Վստահված անձանց եւ դիտորդներին պետք է թույլատրել ծանոթանալ ստորագրված ընտրացուցակներին եւ ստանալ դրանց պատճենները, կամ քվեարկությունից հետո տեղամասի պատին փակցնել ստորագրված ընտրացուցակները, ինչը թույլ կտա դիտորդների եւ վստահված անձանց ստուգել դրանց իսկությունը եւ բացառել Հայաստանից բացակա քաղաքաացիների փոխարեն քվեարկությունը:

4. Համաձայն օրենքի պահանջի անհրաժեշտ է մաքրել ընտրական ռեգիստրը Հայաստանից մշտապես եւ առավելապես բացակայող քաղաքացիներից: Ընտրական օրենսգրքի 7.1 հոդվածում ասված է, որ «Հայաստանի Հանրապետության ընտրողների ռեգիստրը մշտապես վարվող փաստաթուղթ է, որը կազմվում է ըստ մարզերի և համայնքների: Հայաստանի Հանրապետության ընտրողների ռեգիստրում ընդգրկվում են Հայաստանի Հանրապետության բնակչության պետական ռեգիստրում ընդգրկված, Հայաստանի Հանրապետության որևէ համայնքում հաշվառված և ընտրելու իրավունք ունեցող Հայաստանի Հանրապետության քաղաքացիները:» Հայաստանից դուրս ապրող քաղաքացիների համար նախատեսցած է ընտրելու համար հաշվառվելու այլ կարգ: Համաձայն «Բնակչության պետական ռեգիստրի մասին» օրենքի 7.2 հոդվածի «Հայաստանի տարածքից դուրս վեց ամիս եւ ավելի ժամկետով բնակության մեկնող կամ վեց ամսից ավելի ժամկետով բնակվող Հայաստանի հանրապետության քաղաքացին պարտավոր է այդ մասին գրավոր տեղեկացնել Հայաստանի հանրապետության համապատասխան հյուպատոսական ծառայությանըկամ դիվանագիտական ներկայացուցչությանը, որը յոթնօրյա ժամկետում այդ մասին պաշտոնապես տեղեկացնում է կենտրոնական ռեգիստր վարողին»: Մյուս կողմից, համաձայն Ընտրական օրենգրքի 2.5 հոդվածի, «Հայաստանի Հանրապետությունում հաշվառում չունեցող քաղաքացիները համապետական ըտրությունների ժամանակ քվեարկությանը մասնակցում են սույն օրենքով սահմանված կարգով ընտրողների լրացուցիչ ցուցակում ընգրկվելու դեպքում:» Հայաստանի իշխանությունները, ի խախտումն «Բնակչության պետական ռեգիստրի մասին» օրենքի 12.1 հոդվածի համալրել են պետական ռեգիստրը ոչ թե, ինչպես օրենքն է պահանջում, Հայաստանի Հանրապետությունում բնակվող, այլ նախկինում հաշվառված, սակայն մշտապես կամ առավելապես արտասահմանում բնակվող անձանց տվյալներով: Իշխանությունները պարտավոր են շտկել այդ ապօրինության հետեւանքները: Պետությունը պետք է լրացուցիչ միջոցառումներ եւ, եթե անհրաժեշտ է, նաեւ օրենսդրական փոփոխություններ ձեռնարկի` վերոհիշյալ կարգը իրագործելու համար, ինչը թույլ կտա հանել ընտրական ցուցակներից մոտ 500,000 քաղաքացիների, որոնց անունները օգտագորվում են ընտրակեղծիքների համար, բայց մյուս կողմից կպահպանի նրանց համար օրինականորեն ընտրական իրավունքից օգտվելու հնարավորությունը լրացուցիչ ցուցակների միջոցով:

5. Պետք է լրիվ եւ մշտապես բացել ընտրական ռեգիստրը հանրության համար, ինչպես պահանջվում է Ընտրական օրենգրքի 7.4 հոդվածով. «Լիազոր մարմինը տարին 2 անգամ՝ հունիսին և նոյեմբերին (առաջին մեկ շաբաթվա ընթացքում), Հայաստանի Հանրապետության ընտրողների ռեգիստրը` ըստ համայնքների, իսկ համապետական ընտրությունների դեպքում քվեարկության օրվանից ոչ ուշ, քան 41 օր առաջ՝ նաև ըստ ընտրական տեղամասերի, էլեկտրոնային տարբերակով ներկայացնում է կենտրոնական ընտրական հանձնաժողով՝ կենտրոնական ընտրական հանձնաժողովի համացանցային կայքում որոնման հնարավորությամբ տեղադրելու համար: Հայաստանի Հանրապետության ընտրողների ռեգիստրը կենտրոնական ընտրական հանձնաժողովի համացանցային կայքի մշտական և անբաժանելի մասն է»: Հակառակ օրենքի այդ դրույթի Կենտրոնական ընտրական հանձնաժողովը ամբողջական ցուցակը հրապարակում է միայն ընտրություններից 41օր առաջ, մինչդեռ նույն ամբողջական ցուցակը ըստ համայնքների պետք է լիներ կայքի մշտական և անբաժանելի մաս: Ցուցակի հրապարակումը թույլ կտա ավելի տեւական վերահսկողություն կատարել ցուցակի մաքրությունը ապահովելու նպատակով:

6. Հանրային հեռուստատեսությամբ համապետական ընտրությունների համար նախատեսված անվճար եթերաժամի տեւողությունը պետք է սահմանել օրական մինչեւ 15 րոպե, հաղորդումները հեռարձակել հիմնականում ժ. 20-24-ի միջակայքում։

7. Բոլոր տեղամասերում եւ դրանց մուտքի մոտ պետք է տեղադրել տեսախցիկներ, որոնք կտեսագրեն քվեարկության, ձայների հաշվարկման եւ արդյունքների ամփոփման ողջ ընթացքը: Վստահաված անձի պահանջով տեսագրության պատճենը պետք է տրամադրվի նրան:

8. Կենտրոնական ընտրական եւ ստորադաս հանձնաժողովները պետք է ձեւավորել պետության կողմից, որը ստանձնում է ընտրությունների պատասխանատվությունը` դառնալով ընտրական ողջ գործընթացի օրինականության երաշխավորը:

9. Պետք է ապահովել քաղաքացիական վերահսկողության հնարավորություն զինվորական մասերում կազմվող ընտրողների ցուցակների նկատմամբ: Բազմակի քվեարկումը կանխելու նպատակով զինվորականների ընտրական ցուցակները պետք է տրամադրել ԿԸՀ-ին եւ հնարավորություն ընձեռել այնտեղ գրանցված վստահված անձանց ունենալ այդ ցուցակների ինչպես ամբողջական, այնպես էլ ըստ տեղամասերի տարանջատված թվային տվյալները։
http://aregevorgyan.blogspot.com/2012/01/blog-post_19.html

Փետրվարի 17-ից հանրահավաքային ալիք. Հայ Ազգային Կոնգրեսի հայտարարություն

2012-01-19T10:46:00.000-08:00

Օրինակարգ իշխանությունը կարող է ձեւավորվել միայն ընտրակեղծարարության մեքենայի ջախջախման, օրինական և թափանցիկ ընտրության անցկացման դեպքում։ Դա հնարավոր է իշխանության քաղաքական կամքի և որակյալ օրենսդրության պայմաններում։ Հայաստանում անցկացվող ընտրությունները քանիցս ցույց են տվել, որ ներկա վարչախումբը չի կարող նման կամք դրսեւորել։ Քաղաքական ուժերի և հասարակության ճնշմամբ համապատասխան օրենսդրության կատարելագործումը կարող է էականորեն կրճատել ընտրախախտումների ու կեղծիքների հնարավորությունը։ Հայ Ազգային Կոնգրեսը, նկատի ունենալով խնդրի կարեւորությունը, հայտարարում է փետրվարի 17-ից հանրահավաքային ալիքի վերսկսման մասին, որի օրակարգը կլինի Սերժ Սարգսյանին հրաժարականի պարտադրումը, ինչպես նաև ազատ և արդար ընտրությունների անցկացումն ապահովող մեխանիզմների ձեւավորումը։ Հայ Ազգային Կոնգրեսը ամեն ինչ անելու է հասարակական ճնշմամբ օրենքի ուժ տալ դեռ 2010թ. մարտի 15-ին ձեւակերպած ու հրապարակած օրենսդրական փոփոխությունների իր պահանջներին։ Ստորեւ ներկայացնում ենք այդ փաստաթղթի հետագայում վերամշակված տարբերակը։ Գոհունակությամբ արձանագրում ենք, որ հիշյալ փաստաթղթում ընդգրկված պահանջներից մեկը, այն է՝ խորհրդարանական ընտրությունները միայն համամասնական համակարգով անցկացնելու խնդիրը, այժմ հետապնդում են նաև խորհրդարանական երկու ուժեր։ Մենք ողջունում ենք քաղաքական այդ ուժերի ջանքերը, տվյալ օրակարգով հունվարի 20-ին կազմակերպված ֆորումի անցկացումը, նախատեսում ենք խնդիրը Ազգային Ժողովում քննարկման օրերին հանրահավաքի անցկացում։ Կոչ ենք անում ֆորումի մասնակիցներին, այլ քաղաքական ուժերին, որոնք շահագրգռված են ազատ և արդար ընտրությունների միջոցով օրինակարգ իշխանության ձեւավորման հարցում, իրենց աջակցությունը ցուցաբերել հետեւյալ պլատֆորմի նաև մյուս, ոչ պակաս կարեւոր պահանջների իրականացմանը։ Կոնգրեսը հակված է կառուցողական համագործակցության և այդ նկատառումով կաջակցի ֆորումի կայացրած՝ արդար ընտրությունների անցկացմանը նպաստող ցանկացած որոշման։

ՀԱՅ ԱԶԳԱՅԻՆ ԿՈՆԳՐԵՍԻ ԿԵՆՏՐՈՆԱԿԱՆ ԳՐԱՍԵՆՅԱԿ

19.01.2012

http://aregevorgyan.blogspot.com/2012/01/17.html

2012-ը 2008-ի համեմատ լրիվ նոր «դարաշրջան» է. Լեւոն Զուրաբյանի հարցազրույցը ՉԻ-ին

2012-01-16T00:16:00.000-08:00

- Պարոն Զուրաբյան, Դուք նախօրեին հայտարարել էիք, թե փետրվար-մարտին «պլանավորել եք մարդկանց նոր ալիք բարձրացնել, զանգվածային լուրջ միջոցառումներ անցկացնել, որոնց շնորհիվ ճնշում կգործադրեք իշխանությունների վրա»։ Արդյո՞ք այդ ալիքը կապված կլինի սպասվող ԱԺ ընտրությունների հետ, թե՞ խոսքը նաեւ Հրազդանում սպասվող քաղաքապետի ընտրությունների մասին է, որտեղ առաջադրվել է նաեւ Սասուն Միքայելյանը։

- Մենք չենք գործում դեմոկրատական երկրում, մենք գործում ենք մի բռնապետության ռեժիմի պայմաններում, որը կառուցել է դեմոկրատական ֆասադ, որում կարծես` կարող են ազատորեն գործել կուսակցությունները, անցկացվել ընտրություններ, բայց, իհարկե, մենք հասկանում ենք, որ այդ ամենը այդպես չէ, եւ որ ստեղծվել է ահաբեկման, ժողովրդի կամքի աղավաղման, ընտրությունների կեղծման մի հսկայական մեխանիզմ, ինչի պատճառով էլ մենք սա համարում ենք բռնապետություն դեմոկրատական ֆասադով։ Նման վիճակում ընտրությունները դառնում են ընդամենը գործիք` ժողովրդի ակտիվացման, մոբիլիզացիայի համար` հանուն ժողովրդավարության մղվող համաժողովրդական շարժման հաղթանակի արձանագրման։ Եւ մենք, ցանկացած գործիք` լինի դա հանրահավաք, ցույց, երթ, քաղաքապետի ընտրություններ, ԱԺ ընտրություններ, պետք է օգտագործենք հենց այդ նպատակով, որպեսզի լայնացնենք ազատության սահմանները երկրում, սասանենք ռեժիմի դիրքերը եւ հասնենք ժողովրդավարության լիակատար հաղթանակին։ Այս առումով շատ կարեւոր է նաեւ Հրազդանի քաղաքապետի ընտրությունները, որը կծառայի, այսպես ասենք, մեր հիմնական ճակատամարտից առաջ տաքացման համար, որը հնարավորություն կստեղծի կամ արձանագրել ոգեւորիչ հաղթանակ (Հրազդանում), կամ եւս մեկ անգամ բացահայտել կեղծարար բռնապետական ռեժիմի դեմքը հենց Աժ ընտրություններից առաջ։ Սա նաեւ թույլ կտա նեղացնել ռեժիմի մանյովրի ազատությունը` ԱԺ ընտրությունների ժամանակ։

Իսկ ԱԺ ընտրությունները` հաշվի առնելով այն հանգամանքը, որ օրենքի պահանջով իշխանությունները պարտավոր են տրամադրել ընդդիմությանը եթերային ժամանակ, հաշվի առնելով դռնեդուռ քարոզչության հնարավորությունները, այն հանգամանքները, որ ընդհանրապես, նման համապետական ընտրությունների անցկացումը շեշտակիորեն նպաստում է ժողովրդի ակտիվացմանն ու քաղաքականացմանը, ուստի մենք այս ամբողջ գործընթացը` եւ նախընտրական, եւ ընտրությունների օրը, եւ հետընտրական շրջանում, օգտագործելու ենք գլխավոր նպատակի իրականացման համար` Հայաստանում լեգիտիմ, ժողովրդի առջեւ հաշվետու իշխանության ձեւավորման համար։ Ինչքան էլ փորձեն կեղծել ընտրությունները, այնուամենայնիվ, շնորհիվ մեր հզոր, այս 4 տարի չդադարող համաժողովրդական շարժման, մենք գրանցելու ենք ԱԺ-ում այնպիսի նշանակալից ներկայություն, որը թույլ կտա արդեն նոր դիրքերից, շատ ավելի նպաստավոր դիրքերից գրոհել այս ավազակապետական ռեժիմի դեմ։

- Ասում եք, որ Հրազդանի քաղաքապետի ընտրություններում օգտագործելու եք հնարավոր բոլոր գործիքները. կմանրամասնե՞ք` ինչի մասին է խոսքը, Կոնգրեսի ներգրավվածությունն ինչպիսի՞ն կլինի, ի՞նչ մակարդակով է լինելու Կոնգրեսի մասնակցությունը։
- Սասուն Միքայելյանը ժողովրդի մեջ մեծագույն հեղինակություն ունեցող մարդ է, եւ լինելով այս Շարժան, Կոնգրեսի ամենահավատավոր, աննկուն անդամներից մեկը` նա ստանալու է Կոնգրեսի անվերապահ աջակցությունը այս ընտրություններում։ Դա նշանակում է, որ մենք պատրաստ ենք իր նախընտրական շտաբի կողմից նախագծված բոլոր միջոցառումներին մասնակցել, տրամադրել նրան խորհրդակցական օգնություն, մարդկային ռեսուրսներ` հանրահավաքներ, երթեր կազմակերպելու, ինչպես նաեւ ընտրատեղամասերում ընտրությունների ընթացքը վերահսկելու գործում։ Մենք պատրաստ ենք նաեւ համագործակցելով իր կողմից ստեղծված նախընտրական շտաբի հետ` իրականացնել դռնեդուռ քարոզչություն Հրազդանում։ Մենք պատրաստ ենք տրամադրել նաեւ իրավական աջակցություն։ Մենք կոչ ենք անում նաեւ մեր համակիրներին ԶԼՄ-ներով եւս նպաստել նրա հաղթանակին։ Սասուն Միքայելյանի հաղթանակը Հրազդանում մենք բոլորս պետք է դիտարկենք որպես ժողովրդավարության հաղթանակ եւ կարեւորագույն գործ ամբողջ Հայաստանի մասշտաբով։

- Իսկ մտավախություն չունե՞ք, որ եթե ԱԺ ընտրություններից առաջ Հրազդանում ընտրությունները կեղծվեն, ապա դա կհիասթափեցնի ժողովրդին հետագա ընտրություններին մասնակցելու եւ ակտիվանալու համատեքստում։
- Նախ, Սասուն Միքայելյանի դեպքում իշխանությունները դրան կարող են հասնել միայն ծայրահեղ ապօրինություններով։ Բայց անգամ եթե դա լինի, այս շարժման մեջ ոչ հուսահատվող կա, ոչ` կոտրվող, ոչ` վհատվող։ Իրականում դա միայն ավելի մեծ վճռականություն կսերմանի մարդկանց մեջ` այս ռեժիմի դեմ ընդվզելու առումով։ Թող մեզ մարտահրավեր չնետեն։ Թող հասկանան, որ իրենց ապօրինի գործողությունները առաջացնում են միայն վճռականություն, ցասում եւ պատրաստակամություն` գնալու մինչեւ վերջ։

- Իսկ ինչպե՞ս եք վերաբերում իշխանությունների ներկայացուցիչների այն հայտարարություններին, թե 2012-ի ԱԺ ընտրությունները իրենց որակով լիովին ուրիշ ընտրություններ են լինելու։

- Լիովին համաձայն եմ, որ այս ԱԺ ընտրությունները լինելու են ուրիշ ընտրություններ։ Բայց ոչ թե այն պատճառով, որ նրանք կոկորդիլոսի արցունքներ են թափում, իսկ մենք էլ հավատում ենք նրանց, այլ որովհետեւ դա մենք ենք, մեր Շարժումն է, որը այս ընթացքում իրավիճակ է փոխել Հայաստանում։ Մենք ստեղծել ենք ավելի պահանջատեր քաղաքացիական հասարակություն, ապացուցել ենք, որ նրանք չեն կարող մարսել մարտի մեկի սպանդը, մենք կայացել ենք, միջազգային ճանաչում ենք ստացել ամբողջ աշխարհում, եւ այսօր իշխանությունները չեն կարող նույնպիսի ապօրինություններ եւ լկտիություններ թույլ տալ, ինչը որ արել են 2007-2009 թվականներին անցկացված ընտրություններում։

- Որտեղի՞ց Ձեզ այդ վստահությունը, որ չնայած Ձեր թվարկածին, իշխանությունները նորից չեն անի նույն բանը։
- Մենք դա պարզ տեսնում ենք. այն, ինչ նրանք կարող էին անպատժելիորեն, լկտիաբար արգելել 2008-ին, օրինակ` արգելել ընդհանրապես հանրահավաքները, երթերը, Ազատության հրապարակը պահել օկուպացիայի տակ, այսօր ի վիճակի չեն անել։ Եթե 2008-2009-ին կարող էին անպատիժ մասսայաբար քաղբանտարկյալներ պահել բանտերում, ապա այսօր ի վիճակի չեն անել։ Նույնը վերաբերում է եւ ընտրություններին. մենք ստեղծել ենք նոր` եւ ներպետական, եւ միջազգային միջավայր, որում նրանք չեն համարձակվի կատարել կամ անկարող են կատարել նույն ծավալի կեղծիքներ։

- Պարոն Զուրաբյան, անընդհատ խոսվում է այն մասին, թե ինչպես են իշխանությունները պատրաստվում 2012-ի ընտրություններին, իսկ ընդդիմությունն ինչպե՞ս է պատրաստվում` հաշվի առնելով հենց 2007-2009 թվականների կեղծված ընտրությունների փորձը։
- Այս չորս տարվա մեջ մենք արդեն շատ բան փոխել ենք, ինչի մասին արդեն խոսեցի։ Հասարակությունը նույնպես փոխվել է. չմոռանանք, որ զուտ ինֆորմացիոն, կոմունիկացիոն տեխնոլոգիաների առումով մենք հիմա ապրում ենք լրիվ այլ «դարաշրջանում»։ Ի դեպ, դա է, որ չկարողացան հասկանալ արաբական դիկտատորները եւ ոչ դեմոկրատական ռեժիմները այլ երկրներում։ Ինտերնետը, սոցիալական ցանցերը, սմարտֆոնները եւ նրանց թափանցումը բնակչության մշակույթի, կենցաղի մեջ, ստեղծել է լիովին նոր իրավիճակ։ 2012-ը 2008-ի համեմատ լրիվ նոր «դարաշրջան» է. իշխանությունների կարողությունը` ինֆորմացիան թաքցնել մարդկանցից, միջազգային հանրությունից, գնալով ավելի է սահմանափակ դառնում, եւ այսօրվա իշխանությունները պետք է հասկանան, որ Հայաստանի ապօրինությունները ամբողջ աշխարհի եւ մեր հասարակության կողմից դիտվելու են խոշորացույցի տակ` օնլայն ռեժիմով։ Մենք էլ սա պետք է հասկանանք եւ համապատասխանաբար պատրաստվենք այս նոր իրողությանը։

- Իսկ այդ առումով ինչպե՞ս եք տեսնում համագործակցությունը այլ քաղաքական ուժերի հետ` մասնավորապես ընտրություններում հավանական կեղծիքների դեմ պայքարելու համատեքստում։
- Մենք մեր քայլերն այս ուղղությամբ արել ենք. լինելով ամենաառաջատար եւ ազդեցիկ քաղաքական ուժը Հայաստանում` Կոնգրեսն, այնուամենայնիվ, շեշտեց ընտրությունների օրինականության ապահովման գործընթացում, այդ ընդհանուր ջանքերի մշակման գործում ոչ առաջատար դիրքերում լինելու եւ բոլորի հետ հավասարապես համագործակցելու պատրաստակամությունը։ Մենք սա հայտարարեցինք, մեր աջակցությունը հայտնեցինք խորհրդարանական ընդդիմության նախաձեռնությանը եւ պատրաստ ենք խորացնել այս համագործակցությունը` հանուն ժողովրդավարության։ Ամեն ինչ կախված է նրանից, թե բոլոր շահագրգիռ քաղաքական ուժերը ինչքանով են իրականում շահագրգիռ, որպեսզի գործը առաջ շարժվի։ Մենք տրամադրված ենք լավատեսորեն։

- ՀՅԴ-ի եւ «Ժառանգության» նախաձեռնությանը աջակցող Ձեր հայտարարությունից բավականին ժամանակ է անցել, Դուք պատասխան մեսիջներ` հրապարակային կամ ոչ հրապարակային, տեսնո՞ւմ եք այդ ուժերից։
- Վստահ եմ, որ հենց որ մենք հասարակությանը ինչ-որ բան ունենանք հայտնելու, մենք դա անմիջապես կանենք։

- Բայց Դուք այդ ուժերի մեջ համագործակցելու տրամադրվածություն տեսնո՞ւմ եք։
- Մեզ չեն հետաքրքրում ոչ նրանց տրամադրվածությունը, ոչ տրամադրվածության նշանները, մեզ հետաքրքրում է միայն արդյունքը։ Իսկ եթե այն լինի, բոլորը դա կտեսնեն։

- Այդուհանդերձ, ընտրություններից առաջ Կոնգրեսը ընտրակեղծիքների դեմ պայքարելու, օրինական ընտրություններ անցկացնելու համար այլ ուժերի հետ համագործակցության անհրաժեշտությունը տեսնո՞ւմ է, թե՞ Կոնգրեսն ընդունակ է միայնակ էլ այդ խնդիրները լուծել։

- Մեր Շարժումը, անկախ նրանից, թե ով է մեզ դաշնակցել, կամ ով է պայքարել մեր դեմ, միշտ արել է իր գործը։ Մենք դա անելու ենք ցանկացած պարագայում, բայց որպես արդյունքի միտված քաղաքական ուժ, մենք պարտավոր ենք ապահովել առավելագույն չափով դաշնակիցներ։ Այս գործում պատրաստ ենք նախաձեռնել առավելագույն չափով քաղաքական գործընթացներ, որոնք նպաստավոր կլինեն ավազակապետության կազմաքանդման, ռեժիմի դիրքերի սասանման համար։

Որեւէ քաղաքական ուժ, որը պատրաստ է այս ուղղությամբ իր նպաստը բերել, լինի դա խորհրդարանական ընդդիմությունը, ԲՀԿ-ն, ՀՀԿ-ի հատվածներ, մենք պարտավոր ենք այդ հնարավորությունն օգտագործել։ Մենք այդ բանը պատրաստ էինք անել անգամ բանակցելով ռեժիմի, Սերժ Սարգսյանին ներկայացնող պատվիրակության հետ։ Այսինքն, մենք իրավունք չունեք որեւէ շանս բաց թողնել` երկիրը ճիշտ ուղղությամբ տանելու հարցում։ Մենք բոլոր շանսերը օգտագործում ենք. որոշ դեպքերում այդ շանսերից որոշները կստացվի օգտագործել, որոշները` ոչ, բայց դա որեւէ կերպ չի փոխելու մեր վճռականությունը` շարունակելու մեր գործը։

- Պարոն Զուրաբյան, ներկա փուլում կոնկրետ ինչպե՞ս եք պատկերացնում այդ հարցում համագործակցության ձեւերը, եզրերը։

- Ինչ վերաբերում է խորհրդարանական ընդդիմության հետ համագործակցությանը, ապա մենք մեր պատրաստակամությունն ենք հայտնել համագործակցել ընդհանուր ընտրական գործընթացի վերափոխման պլատֆորմի եւ այն առաջ տանելու գործընթացի շուրջ։ Եթե երկրում ժողովրդավարացման հաստատմանը պատրաստ լիներ նպաստել ինքը` ռեժիմը, ինչի պատմական օրինակները մենք ունենք Լեհաստանում, Չիլիում, ապա մենք պատրաստ էինք գնալ նաեւ այդ ճանապարհով եւ համատեղ ջանքերով անցնել օրինական, ազատ եւ արդար ընտրությունների ժամկետների եւ պայմանների մշակմանը։ Որեւէ քաղաքական ուժ չի կարող քարացած լինել իր մեթոդների եւ ռազմավարության մեջ. պետք է փորձել բոլոր ուղղությունները` բեկման նպատակով եւ սլանալ այն ուղղություներով, որտեղ այդ բեկումը հնարավոր է դառնում։

- Այժմ Դուք այլ ուժերից սպասո՞ւմ եք արձագանքի։
- Մենք ոչ մի բան չենք սպասում ոչ մեկից։ Մենք շատ լավ գիտենք մեր գործը, մշակել ենք մեր ծրագրերը ե՛ւ մեր քաղաքական պայքարի կազմակերպման, ե՛ւ ընտրությունների մասնակցության գործընթացում։ Բայց դաշնակիցների, համագործակցողների եւ լրացուցիչ հնարավորությունների փնտրտուքը ցանկացած լուրջ քաղաքական ուժի գործունեության բաղադրիչներից մեկը պետք է լինի։ Որեւէ ուժ, որը չի մտածում իր գործին աջակցության ընդլայնման մասին` թե հասարակական, թե քաղաքական ուժերի, թե միջազգային ասպարեզում գործող խաղացողների շրջանում, դատապարտված է անհաջողության։ Այդուհանդերձ, բնականաբար, մեր գործի հաջողության վճռորոշ պաշարը, աղբյուրը մեր հասարակության, մեր ժողովրդի աջակցությունն է։

Հարցազրույց ՉԻ-ին

15 Հունվար 2012

http://aregevorgyan.blogspot.com/2012/01/blog-post_5772.html

Ընդունելություն նախագահականում Լ. Տեր-Պետրոսյանի հրաժարականից անմիջապես հետո.(VIDEO)

2011-12-16T13:31:00.000-08:00

Հիմնադիր նախագահ Լևոն Տեր-Պետրոսյանը անմիջապես հրաժարականից հետո կազմակերպված ընդունելության ժամանակ դիմում է նախագահականի աշխատակիցներին՝ կոչ անելով նրանց չունենալ որևե բարոյական պարտավորվածոություն և շարունակել ծառայել Հայաստանի Հանրապետությանը:

http://aregevorgyan.blogspot.com/2011/12/video_13.html

Իրազեկում. Հայ Ազգային Կոնգրես

2011-12-05T01:09:00.001-08:00

Դեկտեմբերի 5-ին մեկնարկել են Հայ Ազգային Կոնգրեսի կողմից կազմակերպված երթի իրազեկման աշխատանքները:

Դեկտեմբերի 10-ի՝ մարդու իրավունքների պաշտպանության միջազգային օրվան նվիրված երթի հիմնական պահանջը լինելու է Սերժ Սարգսյանի պաշտոնանկությունը, ազատ ընտրությունների միջոցով իշխանություն ձևավորելու քաղաքացու, մարդու և ժողովրդի իրավունքի վերականգնումը:
Երթը մեկնարկելու է ժամը 14:00-ին Ազատության հրապարակից:

http://aregevorgyan.blogspot.com/2011/12/blog-post_05.html

«ՎԻԿԻԼԻՔՍԻ» ՆՈՒՐԲ ԲԱՑԱՀԱՅՏՈՒՄՆԵՐ

2011-12-03T16:51:00.001-08:00

ԱՄՆ դեսպանատան գաղտնի փաստաթղթերի ՝«Վիկիլիքսի» բացահայտված նյութերի «ոսկեբեր երակը» օգնում է հաստակեցնել Հայ ազգային կոնգրեսի մաս կազմող Հայոց համազգային շարժման ներսում 2010 թվականի առաջին կեսին ինչ-ինչ իրադարձություններ՝ դրանով իսկ լույս սփռելով նաև այսօրվա քաղաքական կյանքի որոշ իրողությունների վրա,կանխատեսելի դարձնելով դրանց հնարավոր զարգացումները և էությունը: Ստորև ներկայացնում ենք քաղվածքներ այդ փաստաթղթերից՝ ժամանակագրական հաջորդականությամբ:

09YEREVAN78/2009-02-10

(14)«ՀԱԿ-ի առաջատար և խոշոր մաս կազմող ՀՀՇ կուսակցության գործող փախնախագահ Խաչիկ Քոքոբելյանը մասնավոր զրույցում (դեսպանատան) քաղաքական բաժնի ղեկավարին հայտնել է,որ ՀԱԿ-ի ղեկավարներից շատերն այն կարծիքի են,թե ԵԽԽՎ 1643 բանաձևը լավ նորություն է:Նա ասել է,որ 1643 բանաձևի համեմատական մեղմությունը նրանք մեկնաբանել են որպես վկայություն այն բանի,թե Հայաստանը և Ադրբեջանը պետք է որ մոտ լինեն Լեռնային Ղարաբաղի հակամարտության հանգուցալուծման վերաբերյալ շրջանակային համաձայնագրի ստորագրմանը:Նա ասել է,թե ՀԱԿ-ի շտաբը հիացած է այդ հեռանկարով,քանի որ դրանով իսկ լավ հնարավորեւթյուն է ստանում ազգայնական մեծ հակազդեցություն խթանելու ընդդեմ նախագահ Սարգյանի,և կարծում է, որ այդպիսով նոր լիցք կհաղորդվի ՀԱԿ-ի հակակառավարական արշավին:Քոքոբելյանը ասել է,որ իր համար նման ռազմավարությունը ուղղակի կսմտնելի է,և ինքը դա համարում է թե շատ ցինիկ հաշվի առնելով այդ խնդրի շուրջ Լևոն Տեր-Պետրոսյանի քաղաքականությունը նախագահի պաշտոնում,թե խաղաղ կարգավորմանը հասնելու գործում Հայաստանի ազգային շահերին հակասող դիրքորոշում»:

ՅՈՎԱՆՈՎԻՉ

09YEREVAN190/2009-03-19

(4)«ՀՀՇ-ի փոխնագահ Խաչիկ Քոքոբելյանը մարտի 17-ին մեզ հայտնեց,որ ՀԱԿ-ը առաջարկել է 8-ական տեղ (Երևանի ավագանու ընտրություններում) ՀԱԿ-ի կորիզը կազմող կուսակցություններից 3-ին,այսինքն ՀՀՇ-ին, ՀԺԿ-ին և «Հանրապետությանը», և 8 տեղ «ժառանգությանը», ինչը միասին կկազմեր 32 տեղ 65-ից: Քոքոբելյանն ասել է, որ ՀՀՇ-ն այնքան կարևոր է համարում «ժառանգության» հետ հանդես գալը,որ իր կուսակցությունը «ժառանգությանը» առաջարկել է ՀՀՇ-ի քվոտայից (լրացուցիչ) տեղեր տալ առաջարկը գրավիչ դարձնելու համար:Քոքոբելյանն ասաց, որ Լևոն Տեր-Պետրոսյանը հրավիրել էր Րաֆֆի Հովհաննիսյանին հանդիպելու և բանակցելու նպատակով, սակայն «Ժառանգության» առաջնորդը մերժել էր՝ փոխարենը ուղարկելով իր տեղակալներից մեկին, ինչը զայրացրել էր Լևոն Տեր-Պետրոսյանին: «Ժառանգությունը» նաև հակընդդեմ առաջարկ էր ուղարկել, ըստ որի «Ժառանգության» անդամ Արմեն Մարտրոսյանը պետք է գրավեր ցուցակի առաջին տեղը (այլ կերպ ասած՝ լիներ քաղաքապետի թեկնածու), Լևոն Տեր-Պետրոսյանը պետք է լիներ երկրորդը, իսկ Րաֆֆի Հովհաննիսյանը 3-րդը՝ մի առաջարկ, որը ՀԱԿ-ի կողմից վիրավորական որակվեց:

(5) « Քոքոբելյանը մեզ ասաց,որ իր կարծիքով՝ դեռևս հնարավոր է, որ ՀԱԿ-֊ը համաձայնության գա «Ժառանգության» հետ մինչև մարտի թթ-ը, որի միացյալ դաշինքով ԿԸՀ ներկայանալու վերջնաժամկետն է: Քոքոբելյանը կարծում է, որ կարելի է Դեմիրճյանին համոզել, մեծահոգություն դրսևորելով, հրաժարվել 2-րդ տեղից հանուն ընդհանուր շարժման: Նա նաև ասաց,որ ՀԱԿ-ը այս առիթով «Ժառանգությանը» ակնարկել է իր ճկունության մասին»:

ՅՈՎԱՆՈՎԻՉ

10YEREVAN1/2010-01-04

(2) «ՀԱԿ-ի ներսում առկա (մեր) կոնտակտների համաձայն ՀԱԿ-ի ներսում հարաճուն հուսահատության և անհամաձայնության ձևավորմանը նպաստել է միաժամանակ չորս գործոն: Դրանք են Լևոն Տեր-Պետրոսյանի հաշտվողական դիրքորոշումը նախագահ Սարգսյանի արտաքին քաղաքականության նկատմամբ, Կոնգրեսում ներքին ժողովրդավարության պակասը, հայտարարված նպատակների ուղղությամբ շարժվելու ռազմավարության բացակայությունը և ֆինանսական ռեսուրսների բացակայությունը: Այս գործոնները, ինչպես հաղորդում են կոնտակտային անձինք, անդամակցող 17 կուսակցություններից շատերին ապատիայի և հիասթափության են մատնել և ազդակ են դարձել ՀԱԿ-ից անջատվելու ուղիներ որոնելու համար միաժամանակ չայրելով ականավոր, սակայն ինքնակենտրոն Լևոն Տեր-Պետրոսյանի հետ կապող կամուրջները»:

(3) «ՀԱԿ-ի առավել աղգայնական անդամներից մի քանիսը բացահայտ անհամաձայնություն են հայտնել Լևոն Տեր-Պետրոսյանի արտաքին քաղաքական դիրքորոշմանը կապված մասնավորապես հայ-թուրքական հարաբերությունների բարելավման և Լեռնային Ղարաբաղի հակամարտության լուծման հետ: Այս անդամների դժգոհության պատճառն է եղել այս հարցերում նախագահ Սարգսյանին բացահայտ սատարելը: Նշված հակասությունը, աստիճանաբար թեժանալով վերածվել է ՀԱԿ-ի ամենաազգայնական կուսակցությւոններից մեկի՝ Հնչակյան կուսակցության ներսում ղեկավարության համար մղվող սուր պայքարի, ընդ որում՝ ձևավորվել են երկու հակոտնյա ֆրակցիաներ, որոնցից յուրաքանչյուրը ջանում է մյուսին դուրս մղել կուսակցության շարքերից: Հունվարի 9-ին նշանակված հերթական համաժողովում Հնչակյան կուսակցությունը կարող է որոշում կայացնել ՀԱԿ-ի կազմից դուրս գալու մասին, եթե փոխվի նրա ղեկավարությունը»:

(4) «Ինչպես մեզ ասում են ՀԱԿ-ի մեր կոնտակտները, ներքին ժողովրդավարության բացակայությունը մեկ այլ գործոն է, որը խաթարում է դաշինքի (ՀԱԿ-ի) ամբողջականությունը: Որոշումները կայացվում են միանձնյա Լևոն Տեր-Պետրոսյանի կողմից և հաստատվում, այսպես կոչված, « Քաղաքական խորհրդում », որը շոշափելի դերակատարում չունի որոշումների կայացման ընթացքում: ՀԱԿ-ի ներսում ծանրակշիռ դիրք ունեցողներից մեկը հայտնել է (դեսպանատան) քաղաքական գրասենյակի պաշտոնյային, որ իր հիմնական ելույթը արտասանելուց առաջ Լևոն Տեր-Պետրոսյանը չի սիրում դա ներկայացնել իր կողմնակիցներից որևէ մեկին և հազվադեպ է փորձում ստանալ նրանց կարծիքը: ՀԱԿ-ի ղեկավարությունից ևս երկուսը դեկտեմբերի կեսին գանգատվել են քաղաքական գրասենյակի պաշտոնյային, որ իրենք հակադրվել էին Երևան քաղաքի ավագանու այն տեղերց հրաժարվելու Լևոն Տեր-Պետրոսյանի որոշմանը, որ ստացել էին մայիսի վերջին կայացած վիճարկելի ընտրությունների արդյունքում: Երկուսն էլ բորբոքված նշում էին,որ թեև այդ ընտրություններն ազատ և արդր չէին․ «Մենք պետք է ներգրավվեինք Հայաստանի քաղաքական գործընթացներին,ոչ թե մշտապես դրանից դուրս մնայինք»:

(5) «Ըստ մեր կոնտակտների՝ Լևոն Տեր-Պետրոսյանը ՀԱԿ-ի քաղաքական համակարգումը հանձնարարում է այնպիսի անհատների,որոնք լիազորված չեն դաշինքի անդամ կուսակցությունների ղեկավարների կողմից,մի գործելակերպ,որը ևս դժգոհեւթյուն է առաջացնում»:

(6) «Ֆինանսական ռեսուրսների պակասը (կոնտակտների կողմից) հաղորդված մեկ այլ մարտահրավեր է, որին դիմակայում է դաշինքը:Այն գործարարները, որոնք ֆինանսական աջակցություն էին ցուցաբերում ՀԱԿ-ին հուսալով,որ դաշինքը կարող է իշխանության գալ, ըստ հաղորդումների՝ դադարել են դա անել:Այդ թվում նախկին պատգամավոր և հետապնդված օլիգարխ Խ․Սուքիասյանը»:

(8) «Մեկնաբանելով Լևոն Տեր-Պետրոսյանի քաղաքական տեսլակների բացակայությունը ՝ ՀԱԿ-ի մյուս յուրային մեզ ասաց․«Լևոն Տեր-Պետրոսյանի միակ ռազմավարությունը և հույսն այն է,որ Սարգսյանը կսայթաքի: Նա կսպասի մի սխայլ քայլի կամ հանգամանքի, որը կարող է կայծ հանդիսանալ կրակի բռնկման համար,հետո կվառի ջահը և կփորձի ըմբոստ զանգվածներին համախմբել:Այնուհանդերձ,այդ մարտավարությունը չի կարով ապահովել հետևորդների ներգրավածությունն ու խանդավառությունը»:

(10) «Այսօր կուսակցությունները շարունակում են մնալ ՀԱԿ-ում սոսկ Լևոն Տեր-Պետրոսյանի հանդեպ հարգանքից կամ չուզենալով,կամ վախենալով նրան դավաճանել», - ասում են ՀԱԿ-ի մեր կոնտակտները:Նրանք ավելացնում են․«Դրանցից և ոչ մեկն այլևս չի տեսնում դաշինքի ապագան,սակայն,քանի որ այդ կուսակցությունները մեծ մասամբ վերցրած որևէ ուժ չունեն,նրանք հուսահատորեն կառչում են Լևոն Տեր-Պոտրոսյանին՝ հուսալով մի քիչ երկարացնել իրենք քաղաքական կյանքը ր ցանկանալով հավատալ նրա այն բառերին,որ ամեն ինչ դեռևս վերջացած չէ»:

ՓԵՆԻՆԳԹՈՆ

Ակնհայտ արձանագրում-եզրահանգումներ

1․ 2009-ով թվագրված գաղտնի զեկուցագրերում որպես «կոնտակտ» ԱՄՆ դեսպանատունը հիշատակում է միայն Խաչիկ Քոքոբելյանին,մեկ տարի անց արդեն իր «կոնտակտների»մասին խոսում է հոգնակի թվով․սակայն առանց անվան հիշատակման:

2․Դատելով «ՀԱԿ-ի ներսում ծանրակշիռ դիրք ունեցոցներից մեկը», «ՀԱԿ-ի ղեկավարությունից ևս երկուսը» արտահայտություններից կարելի է ենթադրել, որ նկատի է առնվել Կոնգրեսի կենտրոնական գրասենյակի այն ժամանակ գորժող անդամների:

3. Տեղեկատվության բնույթից ելնելով դժվար չէ տեսնել,որ դեսպանատան «կոնտակտները» ոչ թե պարզ ինֆորմատորներ են,այլ Հայ ազգային կենգրեսի ներսում ակտիվ քայքայիչ գործունեություն ծավալած կամ նման պատվեր կատարող անձինք:

4․ Ակնհայտ է տեղեկատվության հնարովի լինելը և սադրիչ բնույթը(օրինակ Երևանի ավագանու նախընտրական ցուցակի 2-րդ տեղում Ստեփան Դեմիրճյանին,իբր,Րաֆֆի Հավհաննիսյանով փոխարինելու մտադրությունը):

5․ Դեռ 2010թ․ սկզբին Կոնգրեսի «հոգեվարքն»ազդարարող տեղեկատվությունը շինծու է և սուտ, համենայնդեպս, դրանից հետո և առ այսօր Կենգրեսը միայն շարունակել է հզորանալ որպես քաղաքական գործոն: Ակնհայտորեն,«կոնտակտները» դրանով, մի կողմից փորձել են բարձրացնել իրենք արժեքը (փաստորեն,նաև դեսպանատանը խաբելով), մյուս կողմից ԱՄՆ կառավարության աչքերում հնարավորինս նվազեցնել Կոնգրեսի և նևա առաջնորդի որպես քաղաքական գործոնի կշիռն ու դերը Հայաստանի ներքաղաքական կյանքում:

Այս ամենը,սակայն,դեռ,«անվնաս» պատմություն չի դարձրել:Ինչպես որ դեռ պատմություն չեն նույն 2010 թվականի սկզբով թվագրված փասթաթթին հաջորդածխ ամսիների որոշ իրադարձություններ,որնոնք մի կողմ ակնհայտորեն բուռն էին,մյուս կոմից շատ բան քողարկված մնաց հասարակությունից:Խոսքը վերաբերվում է 2010 թվականի գարնանը և ամռանը Հայոց համազգային շարժման ներսում կատարվող և Հայ ազգային կոնգրեսի ճակատագրին առնչված հարցերին:Հիշյալ իրադարձություններից ժամանակին հայտնի դարձած որոշ իրողությունների և մեր հայթայթած նոր տեղեկատվության համադրումը՝ գաղտնազերծված այս փասթաթղթերի լույսի տակ պարզում է որոշ հարցեր,որոնք շատ կարևոր են հենց այսօրվա քաղաքական իրողությունները հասկանալու ու կողմնորոշվելու համար:Դրա համար պետք է տեղափոխվել 2010 թվականի, նախ, ամառ և գարուն ու գտնել այն ժամանակ առեղծված մնացած երկու հարցի պատասխան:

«Հայկական Ժամանակ» 03.12.2011

http://aregevorgyan.blogspot.com/2011/12/blog-post.html

ԲՈՂՈՔԻ ԱԿՑԻԱ

2011-11-30T00:53:00.001-08:00

Այս պահին Աջափնյակի ոստիկանությունում ապօրինի ազատազրկման մեջ է գտնվում Լյուկ Վադեվալեն: Ոստիկանության մոտ արդեն մեկնարկել է բողոքի ակցիա: Հիշեցնենք,որ նա Հայաստանում բնակվող բելգիացի Լյուկ Վադեվալեն է, ով ակտիվ մասնակցում է Հայ Ազգային Կոնգրեսի կազմակերպած ակցիաներին և մեղադրվում է քրեական օրենսգրքի 258 հոդվածի (Խուլիգանություն) 3 մասի 1-ին և 2-րդ կետերի հատկանիշներով (արարք, որը կատարվել է մի խումբ անձանց կամ կազմակերպված խմբի կողմից և զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով):

Նկարում պատկերված է Լյուկ Վադեվալենը :

http://muradyansahak.blogspot.com/2011/11/blog-post_4420.html

ԵՐԹ՝ նվիրված ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆՈՒԹՅԱՆ միջազգային օրվան

2011-11-29T03:12:00.001-08:00

Հայ Ազգային Կոնգրեսը դեկտեմբերի 10-ին, ժամը 14:00-ին, կազմակերպում է երթ` նվիրված ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆՈՒԹՅԱՆ միջազգային օրվան:Երթը կմեկնարկի Ազատության հրապարակից:

Բելգիացի ակտիվիստին Երևանում մեղադրանք է առաջադրվել

2011-11-28T22:16:00.001-08:00

20:50 Լյուկ Վադեվալեի կինքը քիչ առաջ Epress.am-ին հայտնել է, որ իր ամուսնուն մեղադրանք է առաջադրվել քրեական օրենսգքրսի 258 հոդվածի (Խուլիգանություն) 3 մասի 1-ին և 2-րդ կետերի հատկանիշներով (արարք, որը կատարվել է մի խումբ անձանց կամ կազմակերպված խմբի կողմից և զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով):

Իր փաստաբանի միջոցով Վադեվալեն փոխանցել է, որ իրեն 7-8 ժամ թարգմանիչ չեն տրամադրել և անգամ խմելու ջուր չեն տվել: Այս պահին Լյուկ Վադեվալեին տեղափոխել են Ձերբակալվածների պահման վայր:

18:36 Այսօր կեսօրին ձերբակալվել է Հայաստանում բնակվող բելգիացի Լյուկ Վադեվալեն, ով ակտիվ մասնակցում է Հայ Ազգային Կոնգրեսի կազմակերպած ակցիաներին:

Epress.am-ի հետ զրույցում Վադեվալեի կինը` Գայանե Վարդանյանը, ով Հայ Ազգային Կոնգրեսի անդամ է, ներկայացրել է միջադեպի մանրամասները:

Նրա խոսքով` այսօր իրենց զանգահարել է իր դստեր համադասարանցիներից մեկի ծնողը և տեղեկացրել, որ դպրոցում (աղջիկը սովորում է թիվ 94 դպրոցում) ջեռուցման համար 3000-ական դրամ գումար են հավաքում:

Ամուսինները գնացել են դպրոց` պարզելու, թե ինչու պետք է ջեռուցման համար գումար վճարեն:

«Մենք գնացինք տնօրենի մոտ, ով, ինչպես միշտ, տեղում չէր: Խոսեցինք փոխտնօրենի հետ, նրանից ցանկացանք իմանալ, թե ինչու ջեռուցում չկա և ինչու են դրա համար վճարելու ծնողները: Փոխտնօրենն էլ դժգոհեց, թե պետությունն իրենց չի ֆինանսավորել: Մենք զանգահարեցինք Կրթության նախարարության թեժ գիծ, որտեղից մեզ փոխանցեցին, որ դպրոցը գումար հավաքելու իրավունք չունի, և մենք խնդրեցինք մարդ ուղարկել այդ դպրոց, ինքը, սակայն, չեղավ», – պատմել է Գայանե Վարդանյանը:

Նրա փոխացմամբ` ջեռուցման խնդրի վերաբերյալ փոխտնօրենի ու մի քանի ուսուցիչների միջև լեզվակռիվ սկսվեց, և այդ պահին, տիկին Գայանեի պնդմամբ, ամուսինը պատահաբար կպավ պատին փակցված Սերժ Սարգսյանի նկարին, որն ընկավ պատից, և ապակին կոտրվեց:

«Նրանք սպառնացին, որ ոստիկանություն կկանչեն: Երբ մենք եկանք տուն, մեր հետևից եկան մոտ 15 ոստիկաններ: Այնուհետև մեզ երկուսիս տարան ոստիկանության բաժին: Ինձ 5-6 ժամ պահելուց հետո բաց թողեցին, իսկ ամուսնուս բաց չեն թողնում: Քննիչն ինձ ասաց, որ նա ձերբակալված է: Նրա մոտ չեն թողնում նաև թարգմանիչ մտնի, որպեսզի ամուսինս հասկանա, թե իրեն ինչի համար են պահում ոստիկանությունում»,- ասել է Գայանե Վարդանյանը:

Կնոջ խոսքով` այս պահին Վադեվալեի մոտ պետք է գնա նրա փաստաբանը:

Գայանե Վարդանյանը նաև տեղեկացրել է, որ իրենցից հետո իր դստեր գրեթե բոլոր համադասարանցիներին և 7 ուսոցիչների հրավիրել են ոստիկանություն` պարզելու համար, թե ինչ է տեղի ունեցել իրականում, մինչդեռ, Վարդանյանի խոսքով, այդ պահին աշակերտները դասի էին և միջադեպին ականատես չեն եղել:

Epress.am

Շփման գիծը՝ մարտի դաշտ

2011-11-28T04:43:00.001-08:00

Պատժիչ գործողության մեկնարկը տրված է. այն իրականացվելու է հայ-ադրբեջանական շփման գծի ողջ երկայնքով

Հայկական զինված ուժերը պատասխանել են Ադրբեջանի հերթական սադրիչ գործողությանը. նախապես զգուշացվել էր, որ հայոց պատասխանը լինելու է առավել կոշտ և անհամաչափ։ Այս մասին տեղեկացրեց Հ1 հեռուստատեսության «Առաջին լրատվականը»։

Նախօրեին շփման գծի հարավարևելյան՝ Հորադիզի ուղղությամբ իրականացված գործողության արդյունքում ոչնչացվել է ադրբեջանական զինուժի մեկ զինծառայող։ Դա արվել է՝ ի պատասխան նոյեմբերի 19-ին և 20-ին ադրբեջանական կողմից դիպուկահարների կրակոցների միջոցով հայ զինծառայողների սպանության։

Պատժիչ այս գործողության մեկնարկը տրված է, և այսուհետ այն իրականացվելու է շփման գծի ողջ երկայնքով` ապահովելով պատճառված վնասի ողջամիտ անհամարժեքություն։

Tert.am

Հարցազրույց Հայ Ազգային Կոնգրեսի համակարգող Լևոն Զուրաբյանի հետ

2011-11-27T23:43:00.001-08:00

Հարցազրույց Լևոն Զուրաբյանի հետ

ՆԻԿՈԼ ՓԱՇԻՆՅԱՆԻ ԵԼՈՒՅԹԸ ՆՈՅԵՄԲԵՐԻ 25-Ի ՀԱՆՐԱՀԱՎԱՔՈՒՄ

2011-11-27T14:32:00.001-08:00

Սիրելի ժողովուրդ, Հայաստանի Հանրապետության հպարտ քաղաքացիներ:

Մեր նախորդ հանրահավաքից անցել է գրեթե մեկ ամիս, եւ այս ընթացքում քաղաքական իրավիճակը Հայաստանում էական փոփոխություն է կրել: Հոկտեմբերի 28-ի հանրահավաքում, հենց այս հարթակից Հայ ազգային կոնգրեսի առաջնորդ Լեւոն Տեր-Պետրոսյանը իշխանության ներսում խայտառակ պաշտոնանկություններ կանխատեսեց: Այդ օրը մենք Երեւանի փողոցներով երթ անցկացրինք «Ալիկ խուլիգան» վանկարկումներով: Եւ դրանից ընդամենը չորս օր հետո խայտառակ ձեւով պաշտոնանկ արվեց ոստիկանության պետ Ալիկ Սարգսյանը: Ասում եմ խայտառակ կերպով, որովհետեւ նա իր պաշտոնանկության մասին իմացել էր լրագրողներից:

Ու սա այն մարդն է, որ բանտերը նետեց ընդդիմության տասնյակ ակտիվիստների` Սամսոն Խաչատրյանին, Վարդգես Գասպարիին, Դավիթ Քիրամիջյանին, Վահագն Գեւորգյանին Սահակ Մուրադյանին, Արեգ Գեւորգյանին, Արտակ Կարապետյանին, Սարգիս Գեւորգյանին, լրագրող Անի Գեւորգյանին: Քաղբանտարկյալ Տիգրան Առաքելյանը այսօր էլ գտնվում է անազատության մեջ:

Ալիկ Սարգսյանը հույս ուներ, թե իր հանցագործ ղեկավար Սերժիկ Սարգսյանին այս պիղծ ծառայությունները մատուցելով նրա երախտիքին է արժանանալու, մինչդեռ ընդամենը արժանացավ նրան, ինչին արժանի էր իրականում, օգտագործվեց եւ դեն շպրտվեց, չստանալով նույնիսկ մարդավայել վերաբերմունք:

Ու սա այն մարդն էր, որ երեքուկես տարի ամենալկտի վայրահաչոցներով հարձակումներ է գործել ընդդիմադիրների եւ քաղաքացիական ակտիվիստների վրա, հոխորտալով, թե Հայաստանում թույլ չի տալու ղրղզական տարբերակով զարգացումներ: Քո ղեկավարն իսկ քեզ ղըրղզեց, ա´յ թշվառական, բայց նույնիսկ հիմա չկասկածես, որ քո ղեկավարին էլ են ղըրղզելու, քո ղեկավարին էլ են ղրղզելու, եւ դա անելու է ժողովուրդը, Հայաստանի Հանրապետության ժողովուրդը, Հայաստանի Հանրապետության հպարտ քաղաքացին, որ զզվել է ձեր անբարո կառավարումից, ձեր բութ ու շատակեր մռութներից, ձեր մարտնչող ու ինքնահավան տգիտությունից:

Բա վարչապետ կոչվա~ծը, բա վարչապետ կոչվա~ծը. դուք տեսա՞ք այդ խեղկատակին: Լափել էր ու լակել, եւ ապուշ ժպիտով հայտնվել սեփական ժողովրդի առաջ` նրան շնորհավորելու ինչ-որ մտացածին տոնի կըպըկցո´ւթյամբ:

Ով կարող է ժխտել, ո՞վ կարող է ժխտել. սերժանտական հանցագործ իշխանությունը հաջողություններ ունի, ակնհայտ հաջողություններ` հիմարության ոլոլորտում, տգիտության ոլոլորտում,արտագաղթի ոլոլորտում, կոռուպցիայի ոլոլորտում, երկիրը խայտառակելու ոլոլորտում,ապօրինության ոլոլորտում, մարդկանց թալանելու եւ հուսահատության հասցնելու ոլոլորտում եւ այս ոլոլորտներում նրանց ունեցած հաջողություններն են, որ Հայաստանի Հանրապետության մի սովորական քաղաքացու, չորս երեխաների հորը, Արմավիրի մարզի Հացիկ գյուղի բնակիչ Վաչագան Իսոյանին ստիպել են որպես բողոքի նշան իր «Գազ-2410» ավտոմեքենան քշել նախագահական նստավայրի վրա: Ու փոխանակ այս մարդուց ներողություն խնդրեն նրան հուսահատության հասցնելու, երազանքները խաթարելու, ապագայից ու հույսից զրկելու համար, բանտարկել են նրան, հետապնդում եւ ահաբեկում են նրա ողջ ցեղը, ազգուտակին, հարազատներին: Դա անում են ոչ թե նրանց, այլ նրանց օրինակով ուրիշներին, մեզ բոլորիս վախեցնելու համար: Բայց մեզ չեք վախեցնի, մեզ չեք կանգնեցնի: Մի տնից չենք, մի հալի ենք: Մենք բոլորս Վաչագան Իսոյաններ ենք եւ մենք գալու ենք ձեր ետեւից, բոլորով ենք գալու, միասին ենք գալու եւ այս սցենարը կանխելու մի եղանակ ունեք միայն, մի եղանակ. խելք ունեցիր, ուղեղ ունեցիր` հեռացիր եւ հետդ հեռացրու քո քաղաքական պապա Ռոբիկին, որովհետեւ եթե չգնացիք, ժողովուրդը գալու է ձեր հետեւից: Ձեր տասնամյա չակերտավոր հաջողությունները թող չշփոթեցնեն ձեզ: 2008-ին էլ չէիք հավատում, հիմա էլ չեք հավատում, բայց ես վստահ եմ, գիտեմ եւ համոզված եմ. ժողովուրդը գալու է ձեր հետեւից, ու այն ժամանակ մկան ծակին տասը շահի եք տալու, բայց չեք գտնելու, որովհետեւ Մուկը փակած է լինելու բոլոր ծակերը, ձեր նահանջի բոլոր ծակերը:

Սերժիկ-հեռացիր:

Ի դեպ, Մկան մասին: Մեր նախորդ հանրահավաքից հինգ օր հետո իր հրաժարականի մասին հայտարարեց Ազգային ժողովի նախագահ Հովիկ Աբրահամյանը: Նման պաշտոնանկության պատճառն այն է, որ Սերժ Սարգսյանը չի վստահել իր շտաբի երբեմնի պետին, եւ կասկածներ է ունեցել, թե նա Քոչարյանի հետ դավադրություն է պատրաստում իր իշխանության դեմ: Սերժ Սարգսյանը սկսել է չվստահել նույնիսկ իր ընտանիքի անդամներին, եւ պաշտոնանկ է արել հարազատ փեսային` Միքայել Մինասյանին, որ իր աշխատակազմի ղեկավարի տեղակալն էր, իրականում նախագահական նստավայրի ստվերային կարդինալ:

Սիրելի ժողովուրդ, Հայաստանի Հանրապետության հպարտ քաղաքացիներ.

Սերժ Սարգսյանը կատարյալ պարանոյայի մեջ է, եւ սրանում զարմանալի ոչինչ չկա: Ժողովրդական առածն ասում է` գող, սիրտը դող: Եթե դողում է նույնիսկ հարեւանից մի ձու գողացած մարդու սիրտը, պատկերացրեք, թե ինչ վիճակում կլինի մի ամբողջ ժողովրդի ձայնը, մի ամբողջ ժողովրդի իշխանությունը, մի ամբողջ ժողովրդի հույսերն ու ապագան գողացած հանցագործը:

Դողէրոցքի պակաս ուժգին նոպայի մեջ չէ մեկ այլ իշխանագող ու հանցագործ, Ռոբիկ կոչվածը: Նա էլ հասկանում է, որ Սերժ Սարգսյանը օր օրի վեր է ածվում իր նման քաղաքական դիակի եւ խառնվել է, մտածելով, թե ինչ է լինելու դրանից հետո, ինչ է լինելու իր գողացած միլիարդավոր դոլարների հետ, ով եւ ինչպես է տալու իր թափած արյան պատասխանը: Եւ հիմա հոլովակներ ու սյուժեներ են պատրաստում, թե իբր Հայաստանի ժողովուրդը պահանջում է, որ նա` Հայաստանին հոկտեմբերի 27 եւ Մարտի մեկ նվիրած այդ հանցագործը վերադառնա քաղաքականություն, վերադառնա իշխանության:

Սրանք բոլորովին թռցրել են խելքները. նույնիսկ եթե մտածում են, նույնիսկ եթե մտածում են, որ մեր ժողովուրդը 5 հազար, կամ 20 հազար դրամով կարող է ծախել սեփական ձայնը, սեփական քվեն, բայց այդ ո՞նց կարող են մտածել, թե մեր ժողովուրդը 5 հազար, կամ 10 հազար, կամ 20 հազար կամ որեւէ դրամով կարող է ծախել Կարեն Դեմիրճյանի արյունը, Վազգեն Սարգսյանի արյունը, Պողոս Պողոսյանի արյունը, Գոռ Քլոյանի արյունը, Տիգրան Խաչատրյանի արյունը, Դավիթ Պետրոսյանի արյունը, Սամվել Հարությունյանի արյունը, Գրիգոր Գեւորգյանի արյունը, Արմեն Ֆարմանյանի արյունը, Տիգրան Աբգարյանի արյունը, Հովհաննես Հովհաննիսյանի արյունը, Համլետ Թադեւոսյանի արյունը, Զաքար Հովհաննիսյանի արյունը: Մեր ժողովուրդը սոցիալական բեռի տակ ճկռած, հուսահատ ու գլխիկոր շատ սխալներ կարող է գործել, շատ գայթակղությունների կարող է տրվել, բայց արյունապիղծ չի դառնա երբեք: Բայց արյունապիղծ չի դառնա երբեք:

Խելքներդ գլուխներդ հավաքեք պարոնայք ռոբիկականներ. սա Երեւանն է, Հայաստանի Հանրապետությանը մայրաքաղաքը, սա Դաշքեսանը չէ, ու ոչ էլ առավելեւս Կիրովաբադը կամ Ղուբաթլին:

Սիրելի ժողովուրդ, Հայաստանի Հանրապետության հպարտ քաղաքացիներ:

Մեր երկիրը իսկապես չափազանց բարդ տնտեսական, բարոյահոգեբանական եւ քաղաքական վիճակում է: Սա նշանակում է, որ բարդ վիճակում է Հայաստանի Հանրապետության քաղաքացին, Հայաստանի Հանրապետության ապագան: Այս վիճակը հաղթահարելը մեզ համար ցանկություն չէ այլեւս, ոչ էլ քմհահաճույք: Մենք պարտք ունենք եւ պարտավորություն, եւ այդ պարտավորությունը մեզանից պահանջում է մտքի, ոգու, կամքի եւ սիրո աննախադեպ կենտրոնացում: Ոչ մի հուսահատություն, ոչ մի խռովկանություն, ոչ մի փնթփնթոց, ոչ մի անձնական ամբիցիա: Ոչ մի կասկած, ոչ մի երկմտություն: Այլ նվիրում, նվիրում, միայն նվիրում: Ծառայություն, ծառայություն միայն ծառայություն: Ապագային, Հայաստանին, Սահմանադրությանը, Ժողովրդին:

Իմ ելույթները սովորաբար ավարտում եմ բուռն վանկարկումներով: Այսօր ուզում եմ, խնդրում եմ. եկեք ուղղակի լռենք, մի կարճ ժամանակ լռենք, եւ այդ լռության մեջ թող բյուրեղանա մեր կամքը, մեր հավատը, մեր նվիրումը, մեր պարտավորությունը վաղվա առաջ, ապագայի առաջ, մեր երեխաների առաջ, մեր Հայրենիքի առաջ: Մենք հաղթելու ենք: Եկեք լուռ նայենք իրար աչքերի մեջ, եւ իրար աչքերի մեջ փնտրենք ու գտնենք այդ Հաղթանակը, Ժողովրդի Հաղթանակը, Հայաստանի Հաղթանակը, Քաղաքացու Հաղթանակը:

ՀԱԿ թերթոն:ԳՆԵՐԻ ԲԱՐՁՐԱՑՈՒՄ

2011-11-27T14:00:00.001-08:00

«Հայկական ժամանակ» օրաթերթը, որ 2009 թ. նոյեմբերից որոշակի ապրանքների գծով գների տեղաշարժի մոնիտորինգ է անում որոշակի խանութներում, արձանագրում է, որ եթե իր կողմից դիտարկված ապրանքները միասին 2009-ին կարելի էր գնել 33.500 դրամով, ապա ուղիղ 2 տարի անց դրանց գինը արդեն 41.300 դրամ է։ Դիտարկվող ապրանքատեսակներից ամենաշատը թանկացել են գառան միսը՝ 1 կգ-ը 2.590 դրամից դառնալով 4000 դրամ, հալած յուղը (Reddy)՝ 2920 դրամից դառնալով 3.960 դրամ, մանկական կերը («Nan»)՝ 2.900 դրամից դառնալով 3800 դրամ, տավարի միսը՝ 1650 դրամից դառնալով 2490 դրամ, խոզի ազդրը՝ 1990 դրամից դառնալով 2790 դրամ, շաքարավազը՝ 305 դրամից դառնալով 440 դրամ։ Պանիրը թանկացել է 400 դրամով, «Իշխան» ձուկը 500 դրամով, հավը՝ 341 դրամով և այլն։ Թանկացել են նաեւ ալյուրը, մակարոնը, սուրճը, բրինձը, ձեթը և ամենօրյա օգտագործման այլ ապրանքներ։ «Ռեգուլյար» բենզինը թանկացել է մեկ լիտրը 60 դրամվ, դիզվառելիքը՝ 100 դրամով։ Այս վերջին երկու ապրանքների թանկացումը մեծ չափով ազդել է հատկապես գյուղատնտեսության վրա՝ շատ դեպքերում անիմաստ դարձնելով հողի մշակումը։ Ընդ որում՝ գների այս սրընթաց բարձրացումների պայմաններում բազային կենսաթոշակները բարձրացել են ընդամենը 2500 դրամով, իսկ ուսուցչի 1 դրույքի աշխատավարձը ոչ մի փոփոխություն չի կրել։

Հայ Ազգային Կոնգրեսի թերթոն Նոյենբեր 2011
http://aregevorgyan.blogspot.com/2011/11/blog-post_4059.html

Flash Mob - ՀԱԿ երիտասարդներ

2011-11-27T13:42:00.001-08:00

2011 թ-ի նոյոմբերի 10-ին Հայ Ազգային Կոնգրեսի երիտասարդների Երևանի կենտրոնում անցկացրեցին Ֆլաշ Մոբ՝ երկրում տիրող ապօրինությունների դադարեցման և Սերժ Սարգսյանի հրաժարականի պահանջով:

Ֆլեշ-մոբ ակցիան սկսվել է յուրաքանչյուր հատվածից մեկ մարդու մասնակցությամբ, որը քայլում էր փողոցով, իսկ ինչ-որ ժամանակ անց նրան մոտենում էր մյուս մասնակիցը: Կազմակերպիչների խոսքով` այսպիսով կիրառվում էր 1+1 սկզբունքը:

Արդեն Հանրապետության հրապարակի մուտքերի մոտ մասնակիցների թիվը մեծացավ, և նրանք շարքով մտան Հհրապարակ` կանգնելով կենտրոնական գորգի վրա:

Նրանք ձեռքերին ունեին բազմաթիվ պաստառներ, մասնավորապես, «Օրինապահ պեպելնիցաներ», «Fuck you, dictators», «Բանակը` սպանդանոց», «Հաջորդը դու ես», «Շնորհակալություն, որ մեզ ծեծում եք ոստիկանությունում», «Շնորհակալություն, որ մեզ սպանում եք բանակում», «Սերժիկ, game over», «Մի լռիր, որ քեզ լռեցնում են»:

Հրապարակում մեքենաների խցանում էր առաջացել, քանի որ վարորդները արգելակում էին` հետաքրքրված կարդալով պաստառների բովանդակությունը:

Հանրապետության հրապարակից երիտասարդները Հյուսիսային պողոտայով շարժվեցին դեպի Ազատության հրապարակ: Ճանապարհին նրանք վանկարկում էին` «Ազատ, անկախ, Հայաստան», «Սերժիկ, Մուբարաք», «Պայքար, պայքար մինչև վերջ»:

Այդ ընթացքում երիտասարդներին ուղեկցում էին 3-ից 5 ոստիկաններ:

Այս պահին ակցիան շարունակվում է. ՀԱԿ-ի ակտիվիստները շարժվում են դեպի Շրջանային` բուհերի մոտ, որտեղ տեղակայված են Բժշկական, Ճարտարագիտական, Ճարտարապետաշինարարական համալսարանները:

http://www.youtube.com/watch?v=MiI2_HylpH8&feature=player_embedded

http://aregevorgyan.blogspot.com/2011/11/flash-mob.html

Նիկոլ Փաշինյան 25.11.2011

2011-11-27T11:54:00.001-08:00

‎"Վովա, դու Ալիկից լավ տղա չես, Սերժիկը քեզ էլ է ղրղզելու ու ժողովուրդն էլ վերջում սերժիկին էլ ա ղրղզելու!"
Նիկոլ Փաշինյան

Սոցիալական բունտ

2011-11-27T11:17:00.001-08:00

Նկարում պատկերվածը այն նույն «Գազ-2410»-ն է, որով Արմավիրի մարզի Հացիկ գյուղի բնակիչ Վաչագան Իսոյանը հարվածել է ՀՀ նախագահի նստավայրի դարպասին: Փաստորեն հենց սկզբից Իսոյանը չի էլ թաքցրել, որ դա արել է դիտավորյալ, այդպիսով արտահայտելով բողոքը` սոցիալական, հասարակական անելանելի վիճակի կապակցությամբ:

Ու չնայած պաշտոնական հաղորդագրություններում փորձ էր արվում տեղի ունեցածը ներկայացնել որպես հարբած մարդու չգիտակցված արարք, իշխանություններն իրականում միջադեպին շատ լուրջ են վերաբերվել: Գործի պաշտոնական քննությունը վարում է ՀՀ ոստիկանությունը, բայց հենց սկզբից դրանով սկսել են զբաղվել նաեւ Ազգային անվտանգության ծառայությունը, Պետական պահպանության ծառայությունը: Մանրամասն ուսումնասիրվել են Իսոյանի շփման միջավայրը, նրա քաղաքական հայացքները, կապերը քաղաքական այս կամ այն ուժի հետ: Համապատասխան մարմինների համար մեծ անակնկալ է եղել, որ 2008 թվականի նախագահական ընտրություններում Իսոյանը ներգրավված է եղել Սերժ Սարգսյանի քարոզարշավի մեջ եւ գյուղում սերժականի համարում է ունեցել:

Իսոյանի արարքի վերլուծությունը, սակայն, կասկածի տեղ չի թողնում. դա սոցիալական բունտի առաջին լուրջ դրսեւորումն է Հայաստանում: Ընդ որում, արարքի հեղինակը կայացած ընտանիքի հայր է: Սրա մասին է վկայում այն, որ նրա զավակներից մեկը Երեւանի պետական կոնսերվատորիայի, մյուսը` պետական համալսարանի ուսանող է: Եւ ուրեմն, աշխատելու, աշխատանքով ապրելու անհնարինությունն է աշխատավոր մարդու նման քայլի հիմնական դրդապատճառ դարձել: Հացիկ գյուղի բնակիչները մեր թղթակցի հետ զրույցում պարզ ասել են` մեր երկրում այլեւս հնարավոր չէ ապրել: Հողերը ավելի ու ավելի շատ են անցնում օլիգարխների տիրապետության տակ, եւ բնականորեն` առաջին հերթին վաճառվում է նրանց աճեցրած բերքը, իսկ գյուղացիների աճեցրածը կամ փչանում է նկուղներում, կամ մթերվածի դիմաց գյուղացին ժամանակին գումար չի ստանում: Վարկը վարկի ետեւից է վերցնում, առեւտրի հնարավորություն չկա, հեռանկար ու ապագա չկա: Իսկ Իսոյանի ընտանիքում վերջերս կրկնակի ողբերգություն է տեղի ունեցել. նախ` Ռուսաստանում մահացել է եղբայրը, եւ ընտանիքը չի կարողացել դիակը տեղափոխել Հայաստան, վերջերս էլ մորաքույրն է մահացել, քանի որ հարազատները չեն կարողացել պատշաճ սննդով ապահովել նրան: Համենայնդեպս, այսպիսի խոսակցություններ են պտտվում Հացիկ գյուղում: Իսկ համապատասխան մարմինները այսօր ահաբեկման մեջ են պահում Իսոյանի հարազատներին` փորձելով ամեն ինչ անել, որ տեղի ունեցածը ամենուրեք ներկայացվի որպես խմած վարորդի թույլ տված ավտոպատահար: Եւ այս ֆոնին ուշագրավ է ՀՀ կառավարության երեկ կայացրած որոշումը. կառավարությունն, ըստ այդմ, 79 միլիոն դրամ է հատկացրել ՀՀ նախագահի Սեւանի թերակղզու ամառանոցում ԱԱԾ պետական պահպանության ծառայության տեղակայման զորանոց կառուցելու համար:

Հ.Գ. Ինչպես հայտնի է, Վաչագան Իսոյանին խուլիգանության մեղադրանք է առաջադրվել: Տվյալ արարքը, սակայն, խուլիգանության հանցակազմի մեջ մտնել չի կարող, եւ ընդհանրապես` մեծ տաղանդ է հարկավոր այն քրեական գործի առարկա դարձնելու համար: Արարքի բնույթն ու հետեւանքները ակնհայտ են դարձնում, որ սա վարչական եւ ոչ թե քրեական տիրույթի գործ է, եւ ակնհայտ է, որ Վաչագան Իսոյանը կալանքի տակ է գտնվում բացառապես քաղաքական դրդապատճառներով: Մինչ օրս, ի դեպ, նա չունի փաստաբան:

ՀԺ -

Նոյեմբեր 25, 2011

Սերժ Սարգսյանի պաշտոնանկության իրավաքաղաքական հիմքերի հռչակագիրը 25.11.2011

2011-11-27T11:11:00.001-08:00

Հայաստանի Հանրապետության Սահմանադրության 57-րդ հոդվածի առաջին մասի hամաձայն ՝ «Հանրապետության Նախագահը կարող է պաշտոնանկ արվել դավաճանության կամ այլ ծանր հանցագործության համար»։

Ծանր հանցագործության սահմանադրական հասկացությունը ներառում է իշխանության յուրացումը (Հոդված 2), ինչպես նաեւ պաշտոնավարող նախագահի կողմից սահմանադրական լիազորությունների չարաշահումը եւ չկատարումը, որոնք հանգեցրել են սահմանադրական կարգի խաթարմանը, իշխանությունների բաժանման և հավասարակշռման սահմանադրական սկզբունքի խախտմանը (Հոդված 5)։
Ըստ այսմ՝ առկա են Ս. Սարգսյանի պաշտոնանկության հետեւյալ հիմքերը.

Վարչապետի պաշտոնում Սերժ Սարգսյանը չարաշահել է պաշտոնական դիրքը՝ դիմել ընտրակեղծիքների կազմակերպման, այլ հակաօրինական գործողությունների և այդ կերպ կատարել իշխանության յուրացում: Մասնավորապես, Ս. Սարգսյանը

1. Խախտել է Ընտրական օրենսգրքի 78.1 հոդվածի պահանջը, ըստ որի` ՀՀ վարչապետը չի կարող պաշտոնավարել` միաժամանակ լինելով նաև ՀՀ նախագահի թեկնածու՝ բացառությամբ այն դեպքի, երբ վարչապետը նաև Հանրապետության նախագահի պաշտոնակատար է։ Ս. Սարգսյանը, նախագահի թեկնածու գրանցվելու պահից, կոպտորեն խախտել է օրենքի այս պահանջը՝ ընտրարշավի ողջ ընթացքում օգտագործելով պաշտոնական դիրքի առավելությունները։ Դրանով նա ոտնահարել է սահմանադրական նորմը ընտրությունների հավասարության մասին (Հոդված 4)։

2. Չարաշահելով պաշտոնական դիրքը` օգտագործել է պետական իշխանության լծակները, համակարգել է իր կողմից ստեղծված նախընտրական շտաբում ընդգրկված պաշտոնյաների ադմինիստրատիվ եւ քրեա-օլիգարխիկ ռեսուրսները, կառավարության մեջ մտնող կամ նրա վերահսկողության տակ գործող ուժային և այլ կառույցները` նրանց միջոցով քվեարկության օրը կատարելով համատարած ու բացահայտ բռնություններ, ահաբեկումներ, ընտրակաշառքի բաժանում, լցոնումներ, հօգուտ իրեն ձայների հավելագրումներ, ապօրինություններ ու կեղծիքներ։ Դրանով նա խախտել է ընտրությունների ազատ լինելու մասին սահմանադրական դրույթը (Հոդված 2)։

3. Որպես վարչապետ և խորհրդարանում մեծամասնություն կազմող քաղաքական ուժի ղեկավար` աջակցել է ապօրինի արտակարգ դրության հայտարարմանը և վավերացմանը, Մարտի 1-ին խաղաղ ցուցարարների դեմ բանակի ներգրավմամբ և հրազենի օգտագործմամբ բռնի ուժի կիրառմանը, ինչի հետեւանքով եղավ առնվազն 10 զոհ և հարյուրավոր վիրավորներ։

4. Ղեկավարել է ետընտրական շրջանում ստեղծված ապօրինի շտաբը, որը կազմակերպել է ուժային կառույցների, օլիգարխներին ենթակա խմբերի և կրիմինալ խմբավորումների գործողությունները խաղաղ ցուցարարների դեմ, ներառյալ սպանությունները։
Նախագահի պաշտոնում Սերժ Սարգսյանը կատարել է հետեւալ ծանր հանցագործությունները.

5. Խախտելով դատական իշխանության անկախության սահմանադրական սկզբունքը (հոդված 91), խոչընդոտել է արդարադատությանը, ուղղորդել դատարաններին իր քաղաքական հակառակորդների նկատմամբ զանգվածային բռնաճնշումների, ինչի հետեւանքով հարյուրավոր մարդիկ հայտնվել են անազատության մեջ, հազարավոր մարդիկ ենթարկվել են հետապնդումների, ունեզրկման, խտրական վերաբերմունքի, տասնյակ հազարավորների նկատմամբ խախտվել են Սահմանադրության 2-րդ գլխում ամրագրված մարդու և քաղաքացու հիմնարար իրավունքները, սահմանափակվել ազատությունները։

6. Խոչընդոտել է արդարադատությանը` մարտիմեկյան սպանությունների պարտակման նպատակով, մասնավորապես` լուծարել միջազգային ճնշման տակ ստեղծված Փաստահավաք խումբը` կատարված սպանությունների հանգամանքների մասին իր առաջին զեկույցի հրապարակումից հետո։ Ծանրագույն այս հանցագործության պարտակումը ինքնին ծանր հանցագործություն է ։

7. Չի ապահովել օրենսդիր, գործադիր և դատական իշխանությունների բնականոն գործունեությունը (Հոդված 49)։ Օրենսդիր իշխանությունը կորցրել է ինքնուրույնությունը, դարձել գործադիր իշխանության կցորդը։ Նույն կերպ ոտնահարվել է դատական իշխանության, դատարանների անկախությունը, որոնք վերածվել են գործադիր իշխանության և բարձաստիճան իշխանավորների պատվերների ու հրահանգների կատարման գրասենյակների։

8. Չարաշահելով վարչապետի եւ նախագահի պաշտոնները` սեփական հարստացման նպատակով օգտագործել է պետական իշխանության լծակները, պահպանել եւ զարգացրել է իր եւ իր մերձավոր օլիգարխների համար ապօրինի մենաշնորհների եւ հարկային ու մաքսային արտոնությունների համակարգը:

9. Հայաստանի զինված ուժերի գլխավոր հրամանատարի պաշտոնում դրսեւորել է հանցավոր անգործություն, ինչի հետեւանքով խաղաղ պայմաններում միայն կանոնադրական փոխհարաբերությունների խախտումների պատճառով սպանվել եւ զոհվել են հարյուրավոր զինծառայողներ, վատթարացել է բանակի բարոյահոգեբանական վիճակը` վնաս հասցնելով ազգային անվտանգությանը:

2008թ. ռազմական հեղաշրջման միջոցով իշխանության յուրացման և հետագա տարիներին կատարված նորանոր հանցանքների հետեւանքով երկիրը մղվել է քայքայման, պետականության վտանգման սահմանագիծ։ Ահագնացող արտագաղթը սպառնում է հանրապետությունում անդարձելի ժողովրդագրական փոփոխությունների, սեփական երկրում հայ ժողովրդի ազգային գոյության ապահովմանը։ Եւ դրա կանխման միակ ձևը Սերժ Սարգսյանի անհապաղ հեռացումն է իշխանությունից։
http://aregevorgyan.blogspot.com/2011/11/25112011_26.html

Լևոն Տեր-Պետրոսյանի ելույթը 25.11.2011թ. հանրահավաքում

2011-11-27T11:06:00.001-08:00

Լևոն Տեր-Պետրոսյանի ելույթը 25.11.2011թ. հանրահավաքում

Սիրելի հայրենակիցներ,

Վերջին շրջանում Հայաստանի ներքաղաքական կյանքի ամենաուշագրավ իրադարձությունը աղմկոտ հրաժարականներն ու որոշ պետական պաշտոնյաների նկատմամբ իրականացվող քրեական հետապնդումներն են, որոնք արդեն իսկ պատկառելի ցանկ են կազմում՝ սկսած Գագիկ Բեգլարյանից, Հովիկ Թամամյանից ու Մարգար Օհանյանից, ավարտած Ալիկ Սարգսյանով, զույգ Կարեն Կարապետյաններով, Հովիկ Աբրահամյանով եւ Միքայել Մինասյանով։ Ակնհայտ է, որ ռեժիմի ներսում լուրջ վերադասավորումներ են կատարվում, որոնք միտված են ազատվելու նրա գծից շեղվող կամ անհավատարմության նշաններ դրսեւորող տարրերից եւ առաջիկա ընտրություններից առաջ ապահովելու իշխող քաղաքական ուժի միասնությունը, որը նրա գոյատեւման ամենահուսալի, եթե ոչ միակ, գրավականն է։ Ոչ ոք, իհարկե, լուրջ չի կարող ընդունել այն, թե այդ պաշտոնանկություններն ու քրեական հետապնդումները տեղի են ունենում խնդրո առարկա անձանց վատ աշխատանքի կամ նրանց կողմից թույլ տրված օրինազանցությունների պատճառով, որովհետեւ բոլորի համար էլ պարզ է, որ նրանք պատժվում են կա՛մ սեփական խաղեր տալու, կա՛մ էլ գողական աշխարհի կանոնները խախտելու, այն է՝ վերադասին բաժին չհատկացնելու կամ «օբշագից» իրենց իրական եկամուտները թաքցնելու պատճառով։ Հարկ է ավելացնել նաեւ, որ ռեժիմի պարագլուխների համար պետական պաշտոնյաների աշխատանքի գնահատման մյուս կարեւոր չափանիշն էլ ոչ թե նրանց բուն պարտականությունների կատարումն է, այլ ընդդիմության դեմ անօրինական պայքարում նրանց ունեցած վաստակը եւ ընտրությունների կեղծման գործում նրանց առավելագույն օգտակարությունը։ Քաղաքական շրջանակների, վերլուծաբանների եւ լրագրողների կողմից տրվել են նշված պաշտոնանկությունների պատճառներին վերաբերող զանազան հիմնավոր կամ անհիմն մեկնաբանություններ, որոնք ավելորդ եմ համարում մեջբերել, գերադասելով հարցին անդրադառնալ բոլորովին մի այլ, առաջին հայացքից վերացական կամ ակադեմիական թվացող տեսանկյունից։ Ինձ հետաքրքրողը ոչ այնքան երեւույթի մակերեսային դրսեւորումներն են, այսինքն պաշտոնանկությունների սկանդալային բնույթը կամ ներիշխանական ցնցումների արտահայտությունը լինելու հանգամանքը, որքան շատ ավելի խորքային ու մտահոգիչ մի իրողություն, որը պետական ինստիտուտների լիակատար խաթարման անհերքելի ապացույց է։

Այս առումով ես մի կողմ եմ դնում գործադիր իշխանության համակարգում եւ պետական հիմնարկությունների աշխատակազմերում տեղի ունեցած պաշտոնանկությունները, որոնք քիչ թե շատ բնականոն երեւույթ են, եւ ուզում եմ առանձնակի ուշադրություն հրավիրել ընտրովի մարմինների ղեկավարների՝ Ազգային Ժողովի նախագահի եւ Երեւանի քաղաքապետի հրաժարականների արտառոց փաստի վրա։ Վերջին երեք տարիների ընթացքում փոխվել է Ազգային Ժողովի երեք նախագահ, իսկ երկու տարվա ընթացքում՝ Երեւանի երեք քաղաքապետ։ Եթե սրան գումարենք նաեւ տարիներ առաջ Ազգային Ժողովի մի այլ նախագահի անսպասելի հրաժարականը, ապա կարծում եմ, փաստի արտառոցությունն ավելի ցցուն կդառնա։ Ոչ ոքի համար գաղտնիք չէ, որ առանց բացառության բոլոր դեպքերում հրաժարականները եղել են ոչ թե ինքնակամ, այլ հարկադրական, այն էլ՝ ոչ թե գաղափարական կամ քաղաքական, այլ բացառապես ուրիշ նկատառումներով։ Ոչ ոքի համար գաղտնիք չէ նաեւ, որ հարկադրանքը բխել է երկրի գործող նախագահից։ Իսկ դա վկայում է, որ թե՛ Ազգային Ժողովի, եւ թե՛ Երեւանի ավագանու ղեկավարները ոչ թե ընտրվել, այլ նշանակվել են, որովհետեւ եթե իրոք ընտրված լինեին, ոչ մի նախագահ նրանց չէր կարող սեփական հայեցողությամբ պաշտոնանկ անել։ Փաստորեն վերջիններս վերածվել են խրտվիլակների, որոնց երկրի նախագահը կարող է ցանկացած պահի փողոց շպրտել։ Ինստիտուցիոնալ տեսակետից այս իրողությունն աղետալի է մանավանդ Ազգային Ժողովի պարագայում, որն, ըստ էության, 1999 թվականից սկսած, դադարել է կատարել անկախ օրենսդրական մարմնի եւ գործադիր իշխանության հակակշռի իր հիմնական դերը, վերածվելով հանրապետության նախագահի կցորդի ու հլուհնազանդ կամակատարի։ Եթե կուզեք, սա է, թերեւս, մեր պետության ամենագլխավոր համակարգային արատը, որի ուղղակի հետեւանքն են թե՛ երկրում մոլեգնող համատարած կոռուպցիան, թե՛ ժողովրդավարության եւ մարդու իրավունքների բացահայտ սահմանափակումները, եւ թե՛ իշխանական գրեթե բոլոր կառույցների սանձարձակություններն ու կամայականությունները։
Նորանկախ Հայաստանի պատմության մեջ խորհրդարանն անկախ օրենսդրական մարմնի եւ գործադիր իշխանության իրական հակակշռի դեր կատարել է միայն 1990-1998 թվականներին, եւ կարճ ժամանակով՝ 1999-ին։ Բավական է հիշել, թե 1990-ական թվականներին ինչ բուռն եւ բովանդակալից քաղաքական քննարկումներ էին ընթանում խորհրդարանում եւ ինչպիսի դժվարությամբ էին ընդունվում կառավարության ներկայացրած օրենքները, իսկ երբեմն հաղթահարվում էր նույնիսկ Հանրապետության նախագահի վետոն։ Եւ բոլորովին պատահական չէ, որ հենց այդ ժամանակահատվածում է, որ խորհրդարանն ունեցել է հիրավի ընտրված, եւ ոչ թե որեւէ մեկի կողմից նշանակված նախագահներ՝ հանձինս ինձ, Բաբկեն Արարքցյանի եւ Կարեն Դեմիրճյանի։ Կարծում եմ, չեք մոռացել, որ ես, Վլադիմիր Մովսիսյանի հետ մրցակցության արդյունքում, Գերագույն Խորհրդի նախագահ եմ ընտրվել չորս փուլից, իսկ Բաբկեն Արարքցյանը, Վազգեն Մանուկյանի հետ մրցակցության արդյունքում, հինգ-վեց փուլից հետո։ Ինչ վերաբերում է Կարեն Դեմիրճյանին, ապա նա միահամուռ կերպով ընտրվել է Ազգային Ժողովում «Միասնություն» դաշինքի ունեցած բացարձակ մեծամասնության շնորհիվ։ Բաբկեն Արարքցյանը նաեւ խորհրդարանի միակ նախագահն է, որն իր պաշտոնից հրաժարվել է ինքնակամ, այն էլ՝ զուտ քաղաքական դրդապատճառով, չցանկանալով մասնակիցը դառնալ ձեւավորվող ավտորիտար ռեժիմի կամ, իր խոսքերով ասած, չուզենալով վերածվել վերջինիս վարձու աշխատողի։

Պետականության ինստիտուցիոնալ արատները վերհանելուց բացի, ընթացիկ կադրային փոփոխությունների կամ սկանդալային պաշտոնանկությունների շարքը բացահայտում է նաեւ մի նշանակալից քաղաքական իրողություն։ Թեեւ, ինչպես նշվեց, միտված լինելով ռեժիմի ամրապնդմանը, հախուռն պաշտոնանկություններն իրականում ոչ թե ուժեղացնում, այլ ընդհակառակը, թուլացնում են այն՝ ակամայից նպաստելով դժգոհ տարրերի կամ «օբիժնիկների» բանակի ստվարացմանը, ինչը չի կարող իր ազդեցությունը չթողնել հետագա քաղաքական զարգացումների վրա։ Հետեւաբար, իշխանական բուրգի ինքնահոշոտումը ոչ թե նրա հզորության, այլ հագեվարքի նշանն է՝ համաձայն Ալեքսիս Թոքվիլի այն բնորոշման, որ «Վատ իշխանության համար ամենավտանգավորն այն պահն է, երբ նա սկսում է բարեփոխել ինքնիրեն»։ Եթե Սերժ Սարգսյանի իշխանությունը թույլ չլիներ եւ ավելի թուլանալու վտանգ չզգար, նա բոլորովին կարիք չէր ունենա ընտրությունների նախօրյակին այսպիսի ցնցումների գնալու։ Ժամանակին, փլուզման դատապարտված ռեժիմի փրկության նպատակով, նման ջղաձգումների եւ կադրային փոփոխությունների տենդի մեջ էր ընկել նաեւ Միխայիլ Գորբաչովը, ինչից, սակայն, նա ոչ միայն նոր բարեկամներ չշահեց, այլեւ թշնամացրեց հին բարեկամներից շատերին, քայլ առ քայլ ոչնչացնելով սեփական իշխանության հենարանը։ Իսկ թե ինչով ավարտվեց այդ ամենը, հայտնի է բոլորին։ Ամենեւին չեմ կասկածում, որ նույն վախճանն է սպասում նաեւ Սերժ Սարգսյանին ու նրա հանցագործ ռեժիմին։ Եւս մեկ դիտարկում. նախորդ ելույթներիցս մեկում ես ասացի, որ պաշտոնանկությունները շարունակվելու են, եւ իրոք շարունակվեցին։ Հիմա նորից եմ կրկնում՝ չեն դադարելու։

* * *
Ավազակապետական բուրգի թուլացման կամ քայքայման մյուս, թերեւս, ավելի նշանակալից ախտանիշն իշխող կոալիցիայի ներսում ծագած լուրջ տարաձայնություներն են, մասնավորապես Հանրապետական կուսակցության եւ Բարգավաճ Հայաստանի բացահայտ հակասությունները։ Մենք վաղուց կանխատեսել եւ բազմիցս պնդել ենք, որ իշխանական մոնոլիտը, ինչպես ցանկացած հանցագործ կառույց, վաղ թե ուշ ճաքեր է տալու, ինչն այսօր, կարծես թե, իրականություն է դառնում։ Խորացման պարագայում, նշված հակասություններն սպառնում են խարխլել ռեժիմի հիմքերը եւ երկրում բոլորովին նոր իրավիճակ ստեղծել՝ արմատապես փոխելով քաղաքական ուժերի դասավորությունը եւ հող նախապատրաստելով ընդդիմադիր դաշտի ընդլայնման համար։ Իջեւանի քաղաքապետի ընտրությունը, որը մեծ ցնցում ու տագնապ է առաջացրել Հանրապետականների ճամբարում, կարելի է համարել այդ գործընթացի խորացման առաջին նշաններից մեկը։ Ի դեպ, մամուլում տեղեկություններ են հայտնվել, թե իբր Իջեւանի քաղաքապետի ընտրություններում Դաշնակցության, Ժառանգության եւ Հայ Ազգային Կոնգրեսի տեղի կառույցներն աջակցել են Բարգավաճ Հայաստանի թեկնածուին։ Հարկ եմ համարում ընդգծել, որ Կոնգրեսի ղեկավար մարմիններն այդ ընտրությունների հետ կապված որեւէ որոշում չեն կայացրել։ Իսկ եթե տարբեր ընդդիմադիր ուժերի, այդ թվում Կոնգրեսի տեղի կառույցների կողմից իսկապես այդպիսի աջակցություն ցուցաբերվել է, ապա դա կարելի է միայն ողջունել, որովհետեւ ռեժիմի դեմ անհավասար պայքարում հաջողության հասնելու համար, իմ կարծիքով, ցանկացած ընտրություններում, սեփական թեկնածու չունենալու պարագայում, երկրի ճակատագրով մտահոգ բոլոր ընդդիմադիր ուժերը, որպես սկզբունք, պետք է աջակցեն իշխանական թեկնածուի մրցակցին, անկախ վերջինիս կուսակցական պատկանելությունից։

Իսկ այժմ ուզում եմ բացահայտել մի փոքրիկ գաղտնիք՝ հավատարիմ մնալով բաց քաղաքականություն վարելու եւ հասարակությունից ոչինչ չթաքցնելու Հայ Ազգային Կոնգրեսի որդեգրած սկզբունքին։ Հանրապետական կուսակցության եւ Բարգավաճ Հայաստանի հակասությունների հետեւանքով առաջացած նոր քաղաքական իրավիճակի գնահատմանը ես պատրաստվել էի անդրադառնալ դեռեւս նախորդ հանրահավաքում, սակայն Կոնգրեսի կենտրոնական գրասենյակում այդ հարցի շուրջ կոնսենսուսի չկայացման պատճառով ժամանակավորապես հրաժարվեցի այդ մտքից։ Թեեւ այսօր էլ կոնսենսուսը դեռեւս բացակայում է, այնուամենայնիվ քաղաքական գործընթացներից ետ չմնալու մտահոգությունն ինձ ստիպում է, թեկուզ ուշացած, արծարծելու հույժ հրատապ այդ հարցը։ Ներքոշարադրյալն, ըստ այդմ, ոչ թե Կոնգրեսի պաշտոնական, այլ իմ անձնական տեսակետն է, հետեւաբար, ես էլ կրում եմ նրա ողջ պատասխանատվությունը։

Իմ ելակետն այս հարցում հետեւյալն է. Հանրապետական կուսակցության եւ Բարգավաճ Հայաստանի հակամարտությունն արդեն կայացած փաստ է, որը ոչ մի լուրջ քաղաքական ուժ չի կարող ուրանալ եւ հաշվի չառնել։ Ի դեմս Բարգավաճի, ըստ էության, ուրվագծվում է քաղաքական շրջանակներում վաղուց ակնկալված Երրորդ ուժի ձեւավորումը, ինչը, սակայն, հակառակ բոլոր կանխատեսումների, տեղի է ունենում ոչ թե ընդդիմության դաշտում, այլ իշխանական ճամբարում։ Արդարությունը, սակայն, պահանջում է նշել, որ նման զարգացում ժամանակին գուշակել էր քաղաքագետներից միայն մեկը՝ Արմեն Բադալյանը։ Ի դեպ, իրադարձությունների զարգացման տեսակետից, ամենեւին կարեւոր չէ, թե ինչպես կավարտվի Հանրապետականների եւ Բարգավաճի հակամարտությունը։ Եթե նույնիսկ վերջինս հերթական անգամ ընկրկի ու հարկադրված լինի առերես վերահաստատել իր հավատարմությունը կոալիցիոն հուշագրին, միեւնույն է, դա չի նշանակում, որ ինչ-որ պահի կրկին չի հրաժարվի դրանից, թեեւ, իհարկե, այդ տատանումները կարող են բացասաբար անդրադառնալ նրա վարկանիշի վրա։ Իսկ այդ վարկանիշը պարզապես զրոյի կհավասարվի, եթե Բարգավաճ Հայաստանը հստակորեն չսահմանազատվի Ռոբերտ Քոչարյանից եւ այդպիսով չխուսափի 2008թ. մարտի 1-ին վերջինիս թափած արյան պատասխանատվության տակ ընկնելու վտանգից։ Բարգավաճ Հայաստանն իր դեմքն իսպառ կկորցնի նաեւ այն պարագայում, եթե, բավարարվելով կրտսեր եղբոր կարգավիճակով, խորհրդարանական ընտրություններին մասնակցի Հանրապետականների հետ կազմած միասնական ցուցակով։ Ավելի մեծ նվաստացում կամ ինքնաոչնչացման ավելի կարճ ճանապարհ Բարգավաճի համար դժվար է պատկերացնել, քանի որ նա դրանով խաչ կքաշի արժանապատիվ քաղաքական գործոն լինելու իր բոլոր հավակնությունների վրա։

Իհարկե, առայժմ դժվար է գուշակել, թե որքան հեռուն կգնան իշխանական կոալիցիայի ներսում ծագած տարաձայնությունները, բայց եթե պարզվի, որ Բարգավաճ Հայաստանն անկեղծորեն մտադիր է դուրս գալ կոալիցիայից եւ պայքարել իրապես արդար ու օրինական ընտրություններ անցկացնելու համար, ապա, իմ կարծիքով, Հայ Ազգային Կոնգրեսն այդ պարագայում պետք է պատրաստ լինի լրջորեն քննարկել նրա հետ համագործակցելու հնարավորություններն ու հեռանկարները։ Այդ համագործակցությունը կարող է ունենալ տարբեր դրսեւորումներ, որոնք կհստակեցվեն քննարկումների ընթացքում, բացառելով միայն միասնական ցուցակով ընտրություններին մասնակցելու տարբերակը։ Հավատացած եմ, որ Հայ Ազգային Կոնգրեսի եւ Բարգավաճ Հայաստանի համագործակցությունն ի զորու է արմատապես փոխել քաղաքական ուժերի դասավորությունը եւ լուրջ երաշխիք դառնալ թե՛ սահմանադրական կարգի վերականգնման, եւ թե՛ ժողովրդի շահերից բխող անհրաժեշտ բարեփոխումների իրականացման համար։ Այն միաժամանակ հիմք կարող է հանդիսանալ ընդդիմադիր ուժերի ավելի լայն ճակատի ձեւավորման համար։
Հնարավոր շահարկումները կանխելու նպատակով հարկ եմ համարում ավելացնել, որ սա ոչ թե Բարգավաճ Հայաստանին ուղղված համագործակցության առաջարկ է, այլ ընդամենը քաղաքագիտական վերլուծություն կամ խորհելու նյութ, մանավանդ որ Կոնգրեսի եւ այդ կուսակցության միջեւ մինչ այժմ որեւէ շփում կամ նախնական քննարկում տեղի չի ունեցել։ Շահարկման մի այլ առիթ կարող է դառնալ եւ արդեն իսկ դարձել է այն, որ Կոնգրեսը թեկուզ տեսականորեն հնարավոր դիտի համագործակցել մի ուժի հետ, որին մինչ այդ ավազակապետության կամ քրեաօլիգարխիկ համակարգի բաղկացուցիչ մաս է համարել։ Քաղաքականության այբուբենին ծանոթ որեւէ մեկը, սակայն, այս տիպի քննադատությանը լուրջ չի կարող վերաբերվել, քանի որ ցանկացած գերխնդրի, տվյալ պարագայում բռնապետությունը թոթափելու նպատակի շուրջ զանազան ուժերի, անգամ երբեմնի անհաշտ հակառակորդների համագործակցությունը ոչ միայն սովորական երեւույթ է, այլեւ անհրաժեշտ քաղաքական վարքագիծ։ Վկա՝ բոլոր հեղափոխություններն ու ազգային-ազատագրական շարժումները, որոնք հաջողության չէին կարող հասնել առանց այլազան քաղաքական ուժերի համատեղ պայքարի։ Ուրիշ բան, եթե մեր ընդդիմախոսները բացեիբաց հայտարարեն, որ գերխնդիրը սխալ է, եւ ամենեւին հարկ չկա ազատվելու քոչարյանա-սերժական վարչախմբից։ Այլապես, իրենց անհասկանալի պահվածքով, նրանք հսկայական ծառայություն են մատուցում վարչախմբին։

Այս առումով չպետք է անտեսել եւս մի կարեւոր հանգամանք։ Մեր երկրի գլխավոր չարիքը ոչ թե գործարարները կամ օլիգարխներն են, այլ վերից վար կոռումպացված իշխանական համակարգը։ Գործարարությունը կամ օլիգարխիան ընդամենն այդ համակարգի ածանցյալն են, կցորդը եւ սպասարկուն։ Իշխանության ներկայացուցիչները մերթընդմերթ դիտավորյալ կերպով ատելության թիրախ են դարձնում օլիգարխներին՝ հասարակության ուշադրությունն իրենց սեփական հանցագործություններից շեղելու համար։ Իշխանության եւ օլիգարխիայի հարաբերություններին ես հանգամանորեն անդրադարձել եմ իմ ելույթներից մեկում (15.10.2010), մասնավորապես նշելով հետեւյալը. «Հասկացության բուն իմաստով՝ կոռուպցիան բացառապես իշխանությանը եւ ոչ թե գործարարությանը հատուկ երեւույթ է։ Գործարարությունը կոռուպցիայի մասնակիցն է, բայց ոչ հեղինակը։ Հեղինակը իշխանությունն է, որովհետեւ առանց նրա ցանկության ու թողտվության լայնամասշտաբ կոռուպցիա գոյություն չէր կարող ունենալ։ Մի առիթով ես նշել եմ, որ գործարարներն ստիպված են մշտապես խախտել օրենքը՝ խուսափել մաքսավճարներից ու հարկերից, կաշառել ու կաշառվել, թաքցնել իրենց իրական եկամուտները եւ այլն։ Բայց դա նրանց մեղքը չէ, այլ թերեւս դժբախտությունը, քանի որ նրանք հարկադրված են ենթարկվել այն խաղի կանոններին, որոնք սահմանել է իշխանությունը։ Նրանք չեն էլ կարող շրջանցել օրենքը, եթե գործարքի մեջ չմտնեն պետական պաշտոնյաների հետ։ Գործարարներն իրականում կատարում են իրենց հարկային պարտավորությունները, բայց նրանց մուծումները հայտնվում են ոչ թե պետական բյուջեում, այլ բոլորովին այլ տեղ։ Նրանցից շատերը, վստահաբար, ուրախ կլինեին գործել օրենքի դաշտում, որովհետեւ նույնիսկ ավելին են մուծում, քան պարտավոր են։ Այլ կերպ, սակայն, նրանք չեն կարող վարվել։ Հակառակ պարագայում կհայտնվեն բանտերում կամ ստիպված կլինեն լքել բիզնեսը։ Նույնիսկ ամենաօրինապաշտ օտարերկրյա գործարարները, երբ հայտնվում են մեր նման երկրներում, կամա թե ակամա, ենթարկվում են տեղի խաղի կանոններին՝ կաշառք բաժանում, հարկերից փախչում եւ այլն։ Քավ լիցի, ես ամենեւին միտք չունեմ արդարացնելու օլիգարխների հանցագործությունները, որոնք անթիվ են։ Ասածիս իմաստը սոսկ հետեւյալն է. դրե՛ք գործարարներին ուրիշ պայմանների մեջ, եւ նրանք կգործեն բոլորովին այլ կերպ»։ Ըստ այդմ, պետք է տարբերակված լինի նաեւ իշխանափոխությունից եւ օրենքի գերակայության հաստատումից հետո կոռումպացված իշխանավորների եւ օրինախախտ գործարարների նկատմամբ կիրառվելիք քաղաքականությունը։ Ինչպես նշել եմ նույն ելույթում, «Պետական պաշտոնյաների ձեռքով ժողովրդից հափշտակված ողջ հարստությունը պետք է վերադարձվի ժողովրդին։ Դա, բնականաբար, պետք է տեղի ունենա ոչ թե բռնագանձման եղանակով, այլ միանգամայն օրինական ճանապարհով, այսինքն՝ դատական կարգով, ինչի հնարավորությունը պարունակում է Հայաստանի ներկայիս, թեկուզ անկատար, Քրեական օրենսգիրքը։ Ինչ վերաբերում է օլիգարխներին կամ ընդհանրապես գործարարներին, ապա նրանց նկատմամբ պետք է կիրառվի բոլորովին այլ մոտեցում. նրանք պարզապես պետք է տեղափոխվեն գործունեության օրինական դաշտ»։

* * *
Վերջում չեմ կարող չանդրադառնալ մի թյուրիմացության, որը համառորեն տարածվում է որոշ քաղաքագետների ու լրատվամիջոցների կողմից, եւ որի աղբյուրը նախորդ հանրահավաքի իմ ելույթում հնչած հետեւյալ խոսքերն են. «Հայ Ազգային Կոնգրեսն, անշուշտ, շարունակելու է ամեն ինչ անել արտահերթ ընտրություններ անցկացնելու համար, բայց քանի որ դա միայն մեզանից կախված չէ, մենք պետք է պատրաստ լինենք ցանկացած զարգացման։ Եթե, հակառակ գործադրված բոլոր ջանքերին, այնուամենայնիվ առաջիկայում չհաջողվի հասնել Սերժ Սարգսյանի հրաժարականին, իսկ քաղաքականության մեջ ոչինչ բացառված չէ, ապա Կոնգրեսը պետք է ձգտի Ազգային Ժողովում ապահովել այնպիսի ծանրակշիռ ներկայություն, որն առանձին կամ այլ ուժերի հետ կազմած դաշինքով, ի վիճակի լինի անմիջապես բարձրացնելու նրա պաշտոնանկության, կամ այլ կերպ ասած, իմփիչմենթի հարցը» (28.10.2011)։ Որքա՞ն անուղղամիտ պետք է լինել այս պարզ շարադրանքից եզրակացնելու համար, այն էլ մի ահավոր դավադրություն բացահայտածի հրճվանքով, թե իբր Կոնգրեսը հրաժարվել է արտահերթ ընտրություններ անցկացնելու մտադրությունից եւ որոշել է գնալ հերթական ընտրությունների։ Այնինչ ասվածի իմաստը չափազանց հստակ է, եւ նրանում դավադրություն կամ կրիմինալ փնտրելու միտքը որեւէ առողջ ուղեղում հազիվ թե կարող է տեղավորվել։ Թեեւ դժվար է ավելի հստակ արտահայտվել, բայց հետագա նմանօրինակ ընկալումներից խուսափելու համար, այնուամենայնիվ, փորձեմ։ Երեքուկես տարի շարունակ մենք, այո՛, բոլոր հնարավոր միջոցներով պայքարել ենք արտահերթ ընտրություններ անցկացնելու համար։ Այսուհետեւ եւս մենք, նույն համառությամբ ու հետեւողականությամբ, շարունակելու ենք ամեն ինչ անել այդ նպատակին հասնելու համար, որովհետեւ համարում ենք, որ արտահերթ ընտրությունների անցկացման հնարավորությունները ոչ միայն ամենեւին չեն սպառվել, այլեւ, իշխանական ճամբարում առաջացած երկպառակությունների եւ սկանդալային պաշտոնանկությունների հետեւանքով, ավելի են մեծացել։

Բայց եթե, հակառակ մեր թափած բոլոր ջանքերին, արտահերթ ընտրություններ այդպես էլ տեղի չունենան, ինչը, ռեալիստ լինելով, հասկանում ենք, որ բացառված չէ, ապա մենք, բնականաբար, որպես ինստիտուցիոնալ քաղաքական ուժ, իրավունք չունենք չմասնակցել հերթական ընտրություններին։ Ահա եւ ձեզ՝ ողջ դավադրությունն ու կրիմինալը։

Հայ Ազգային Կոնգրեսը երեքուկես տարի շարունակ եղել եւ այսօր էլ մնում է երկրի քաղաքական կյանքում դրական տեղաշարժերի խթանման գլխավոր, եթե ոչ միակ, գործոնը։ Չունենալով իշխանական որեւէ լծակ, զուտ քաղաքական պայքարի ու ժողովրդական ճնշման միջոցներով, նա կարողացել է իշխանություններին հարկադրել կատարելու օգտակար որոշ քայլեր, որոնք ոչ մի այլ պարագայում նրանք չէին կատարի։ Հիշենք, թեկուզ, քաղբանտարկյալների ազատ արձակման, Ազատության հրապարակում հանրահավաքների անցկացման իրավունքի վերականգնման եւ մարտի 1-ի ոճրագործության բացահայտման վերաբերյալ տրված պաշտոնական հավաստիացման փաստերը։ Կոնգրեսի մշակած տնտեսական ծրագրի որոշ կարեւոր առաջարկներ լռելյայն տեղ են գտել կառավարության ծրագրերում եւ օրենսդրական նախաձեռնություններում։ Կոնգրեսի համառ հարցապնդումներից հետո իշխանամետ ուժերի ներկայացուցիչները վերջապես սկսել են խոսել Ազգային Ժողովում գործարար-պատգամավորների առկայության անթույլատրելիության մասին (թեեւ ինչու այդ հարցն, ըստ նրանց, պետք է լուծվի ոչ թե միանգամից, այլ քայլ առ քայլ, անհասկանալի է)։ Կոնգրեսի կողմից կազմակերպված հոկտեմբերյան շուրջօրյա նստացույց-հանրահավաքի եւ մարտի 1-ի զոհերի հարազատների բողոքի միջոցառումների ճնշման տակ Եւրոխորհրդի Խորհրդարանական Վեհաժողովը հարկադրված եղավ էականորեն վերանայելու Հայաստանի վերաբերյալ բանաձեւի նախագիծը եւ խիստ պահանջներ դնելու Հայաստանի իշխանությունների առջեւ, եւս մեկ անգամ ցույց տալով միջազգային կազմակերպությունների որոշումների կախվածությունը համաժողովրդական շարժման ակտիվության աստիճանից։ Կոնգրեսի հետեւողական մերկացումների ու բացահայտումների շնորհիվ միջազգային հանրությունն ընդհանրապես վերջերս զգալիորեն փոխել է իր դիրքորոշումը եւ ավելի լուրջ մտահոգություններ է արտահայտում մեր երկրում մոլեգնող կոռուպցիայի, օրենքի գերակայության բացակայության, ժողովրդավարության եւ մարդու իրավունքների անմխիթար վիճակի մասին։ Կոնգրեսի ակտիվ գործունեության հետեւանքով բարձրացել է ժողովրդի քաղաքացիական գիտակցությունը, եւ մեծացել ժողովրդավարության կայացման անհրաժեշտության նկատմամբ վերջինիս պահանջարկը։ Դա հաստատվում է, մասնավորապես, «Վերակառուցման եւ զարգացման եւրոպական բանկի» վերջին զեկույցներից մեկով, որի համաձայն՝ 2006 թվականից հետո ժողովրդավարության կողմնակիցների թիվը Հայաստանում աճել է 28%-ով եւ հասել 80%-ի, մեր երկիրն այդ ցուցանիշով դասելով աշխարհի ամենաառաջատար երկրների շարքը («ՉԻ». 17.11.2011)։ Եթե կուզեք, աղմկահարույց պաշտոնանկություններն ու իշխանական ճամբարում առաջացած հակասությունները եւս մեծապես արդյունք են Կոնգրեսի գործոնի առկայության։ Եթե Կոնգրեսը չլիներ, ապա ո՛չ այդպիսի պաշտոնանկություններ, ո՛չ էլ իշխանական ճամբարում խաղեր տվողներ կլինեին։ Ինչպես նշված է մամուլի հրապարակումներից մեկում, այդ ցնցումներն իսկապես «համաժողովրդական շարժման գոյության եւ հարվածների արդյունք են» («ՀԱԿ» թռուցիկ-թերթոն, նոյեմբեր, 2011)։ Հավատացնում եմ, Կոնգրեսի՝ որպես երկրի քաղաքական կյանքում վճռորոշ դերակատարություն ունեցող գործոնի, վերը տրված գնահատականը շատ ավելի համեստ է, քան իրականում կա։

Հայ Ազգային Կոնգրեսի գործունեության եւ ժողովրդական զանգվածների գերհամախմբման կիզակետը դառնալու են առաջիկա փետրվար-մարտ ամիսները։ Այս պնդումը, կամ եթե կուզեք, համոզումը հիմնված է ոչ միայն ավազակապետության ներքին ցնցումների տենդենցի խորացման, աղմկահարույց պաշտոնանկությունների շարունակման անխուսափելիության եւ նախընտրական փուլին բնորոշ իրավիճակային ակտիվացման, այլ նաեւ այն ապացուցված իրողության վրա, որ Հայաստանում քաղաքական կյանքի ամենաբուռն շրջանը միշտ էլ եղել է գարունը, ինչը, բացի սեզոնային գործոններից, պայմանավորված է նաեւ որոշ սոցիալական հանգամանքներով, որոնք, բոլորիդ հայտնի լինելով, ավելորդ եմ համարում մանրամասնել։ Մինչեւ գարուն, ինչպես նախորդ հանրահավաքում ասվեց, Կոնգրեսն իր ջանքերը կենտրոնացնելու է գլխավորապես մարզերում տարվող աշխատանքի եւ տարածքային կառույցների գործունեության ակտիվացման վրա, եւ այդ գործն արդեն իսկ ընթացքի մեջ է։ Նկատի ունենալով ձմռանը հատուկ դժվարությունները (իսկ այս ձմեռն, ըստ երեւույթին, խիստ է լինելու), հաջորդ հանրահավաքը, բնականաբար, տեղի կունենա փետրվարին։ Նրա անցկացման կոնկրետ օրը, իրադարձությունների զարգացմանը համահունչ, ձեզ կհայտարարվի լրացուցիչ։ Բայց քանի որ, ինչպես արդեն նշել եմ, միապաղաղ թվացող իրավիճակը կարող է փոխվել ցանկացած պահի՝ կապված ոչ միայն հավանական, այլեւ բոլորովին անսպասելի որեւէ իրադարձության հետ, ուստի բացառված չէ, որ հաջորդ հանրահավաքը տեղի ունենա նույնիսկ ավելի վաղ։

Մաղթում եմ՝ լավ տրամադրությամբ դիմավորել Նոր տարին եւ Սուրբ ծնունդը, ձեզ ցանկանալով ամենայն բարիք։ 2012 թվականը թող դառնա հույսի ու արժանապատվության վերականգնման եւ ձեր բոլոր անձնական ու հավաքական իղձերի կատարման տարի։ «Առա՛ջ, դեպի անսերժ Հայաստան»։

http://aregevorgyan.blogspot.com/2011/11/25112011.html