Gott í gogginn

Kryddsmjör

noreply@blogger.com (Þórný) — Tue, 28 Nov 2023 11:51:00 +0000

Kryddsmjör getur verið punkturinn yfir i-ið með grillmatnum.

Fyrir fisk:
100 g smjör
3-4 hvítlauksrif, kramin
1 tsk. sítrónusafi
1/2 tsk. rifinn sítrónubörkur
1 tsk. sítrónu- eða lime pipar

Fyrir kjöt:
100 g smjör
3-4 hvítlauksrif, kramin
1 tsk. nýmulinn svartur pipar
1 tsk. Chilisalt

Smjörið sem verður að vera mjúkt, er sett í skál, bragðefnunum bætt útí og allt hrært vel saman.

Einfalt brauð

noreply@blogger.com (Þórný) — Sun, 26 Nov 2023 16:45:00 +0000

600 gr. hveiti (blátt hveiti eða type 00)

2 msk fræblanda, eða bara graskersfræ
2-3 tsk husk trefjar
1 msk salt
1 tsk þurrger
5 dl volgt vatn (38-9°C)

Blandið þurrefnunum (mínus ger) saman í stóra skál. Setjið gerið í litla skál og blandið vatni saman við, hrærið í uns gerinn er uppleystur. Þá er vatninu helt saman við og hrært saman með sleikju. Setjið matarfilmu yfir og látið bíða í amk klukkutíma, helst tvo eða jafnvel í ískápnum yfir nótt. Þegar deigið er fullhefað er því hvolt á hveiti stráða borðplötu og teygt aðeins út í horn og brotið svo inn að miðju, þegar þið hafið teygt deigið til allra átta er deiginu snúið á hvolf á bökunarpappír aftur í skálina og látið bíða.

Hitið ofn í 220°C, setjið steypujárnspott inn og hitið hann í hálftíma, þá er potturinn tekinn út, deiginu með bökunarpappírnum sett í hann. Ég úða aðeins með vatni og dreifi sesamfræblöndu með hvítlaukssalti yfir, set lokið á. Inn í ofn í hálftíma, þá er lokið tekið af og bakað áfram í hálftíma.

Nokkrar ábendingar:

Þetta með að velta deiginu á smjörpappírinn, gerir það að verkum að sami hluti deigsins snýr upp og var ofan á í fyrstu hefun, þannig að virkni gerlanna truflast ekki, þeir hefast áfram í sömu átt (þetta lærði ég á YouTube af einhverjum frönskum bakara.) Skerið með beittum hníf yfir deigkúluna áður en þið setjið brauðið í ofninn, þetta hjálpar til með hefunina í bakstrinum.

Ilmurinn er ómótstæðilegur ég veit, en það er samt betra að leyfa brauðinu að bíða í 15-20 mínútur undir hreinu stykki áður en það er skorið.

Prófið alls konar blöndur af fræjum og kryddum, búið til sjálf ykkar uppáhalds, stundum er gaman að setja smá kúmen annað sem gefur gott bragð og smátilbreytingu.

Bon appetit!

Gráðostasósa

noreply@blogger.com (Þórný) — Fri, 04 Mar 2016 00:18:00 +0000

Annaðhvort elskar maður gráðost eða fílar hann alls ekki, þessi sósa er fyrir þá fyrrnefndu og hún smellpassar hvort sem er með grilluðu kjöti eða sem ídýfa með brytjuðu grænmeti.

1 gráðostur
1 dós sýrður rjómi (10%)
nýmulinn svartur pipar

Hrærið sýrða rjómann í dósinni svo hann verði sléttur og kekkjalaus. Setjið gráðostinn í skál og myljið með gaffli, malið svartan pipar yfir, magnið fer eftir smekk, en mér finnst gott að setja svolítið mikið. Hrærið sýrða rjómanum saman við. Það er gott að leyfa sósunni að standa í ca. 1/2 til heila klukkustund meðan máltíðin er undirbúin.

Ekki spillir gott rauðvín með ;)

Bon appetit!

Kálbögglar og heimagert kjötfars

noreply@blogger.com (Þórný) — Wed, 10 Feb 2016 23:00:00 +0000

Kálbögglar eins og amma gerði þá, er eitt af því besta sem ég fæ en vegna samviskubits yfir hvað kjötfars sé óhollt geri ég þá helst á bolludaginn ef nokkurn tímann. En það kom mér verulega á óvart hvað það er lítið mál að gera heimatilbúið kjötfars, og það besta við það er að þú veist nákvæmlega hvað er í því og getur aðlagað kryddunina (og saltmagnið) algjörlega að þínum smekk.

Heimatilbúið kjötfars
500 g hakk (ég nota ærhakk, en það má vera nauta, eða blandað hakk)
2 msk kartöflumjöl
1 tsk lyftiduft
1 tsk hvítur pipar
1 tsk mulinn þurrkaður engifer
1 tsk múskat
2 tsk salt
3-4 dl mjólk

Setjið hakkið í hrærivélarskálina og kryddið, bætið kartöflumjölinu saman við og 1 dl. mjólk, bætið síðan meiri mjólk saman við smátt og smátt meðan hrært er á meðalhraða.

Til að gera kálböggla þarf að auki 1/2 hvítkálshaus, sem er kjarnhreinsaður og skorinn í tvennt. Kálblöðunum er flett sundur.

Hleypið suðu upp á 1 1/2 - 2 lítrum af vatni sem bætt er við msk af salti. Þegar vatnið sýður er matskeið dýft í vatnið og náð í kjötfars, það mótað nokkurn veginn í bollu og sett út í sjóðandi vatnið. Þegar allar bollurnar eru komnar í vatnið er kálblöðunum bætt út í og allt látið sjóða við vægan hita í rúmlega tuttugu mínútur - hálftíma. Þegar bollurnar eru orðnar bústnar og pattarlegar er maturinn tilbúinn.

Borið fram með soðnum kartöflum, gulrótum og rófum ef vill, og bráðnu smjöri... ummm!

Bon appetit!

Túnfisksalat með lárperumauki og rækjum

noreply@blogger.com (Þórný) — Sun, 07 Feb 2016 00:40:00 +0000

2 litlar lárperur, vel þroskaðar
1/2 dós sýrður rjómi (10%)
3 soðin egg
1 dós túnfiskur
1/2 bolli rækjur
safi úr 1/2 sítrónu
sítrónupipar og Chili krydd eftir smekk

Byrjið á að afþýða rækjur og sjóða eggin og kæla. Takið utan af avókadó-unum og fjarlægið steinana, maukið með töfrasprota uns silkimjúkt og kekkjalaust. Hrærið sítrónusafa saman við og sýrðum rjóma. Kryddið með sítrónu eða limepipar og chiliblönduðu kryddi, t.d. Chili Explosion eða Chili salti. Túnfiskinum hrært saman við og síðan söxuðum eggjum og rækjum.

Æðislegt með alls konar kexi eða ristuðu brauði.

Bon appetit!

Egg og beikon brauðréttur

noreply@blogger.com (Þórný) — Sat, 30 Jan 2016 20:38:00 +0000

Ákaflega góður og þægilegur réttur til að taka með í vinnuna, hann má nefnilega útbúa kvöldið áður og hita að morgni

2-250 gr gott beikon
1/2 - 1 askja Flúðasveppir, e. smekk (má sleppa)
12 brauðsneiðar
12 egg
1 1/2 bolli mjólk
1 kúfuð tsk Dijon sinnep
ferskmalaður pipar
100-150 gr bragðmikill ostur, sterkur gouda, Óðalsostur eða Cheddar, rifinn

Steikið beikonið í ofni uns það er orðið stökkt, þá er það sett á eldhúspappír og kælt.

Á meðan rífið þið brauðið niður í eldfast mót. Myljið beikonið yfir brauðið og dreifið söxuðum sveppum og rifnum osti yfir.

Setjið eggin í skál og þeytið þau rétt aðeins, bætið mjólk og sinnepi saman við. Hellið eggjablöndunni yfir allt saman, smá pipar að lokum.

Lokið forminu með filmu ef þið ætlið að láta þetta bíða til næsta dags, annars strax í ofninn.

Bakað við 180°C í 20-25 mínútur.

Bon appetit1

Kryddlegið ávaxtasalat

noreply@blogger.com (Þórný) — Sat, 30 Jan 2016 20:28:00 +0000

Þetta er yndislega gott þó það borgi sig að gera það kvöldið áður en það er borið fram til þess að kryddin nái sér vel á strik.Þessi réttur minnti mig mikið á miðjarðarhafið og löndin þar í kring en líka pínulítið á sunnudagseftirrétt úr bernsku minni, niðursoðnir blandaðir ávextir með rjóma, en bara miklu betra!

Ávextir í salatið
3-4 vænar og stinnar perur
1 bökunarepli (gult eða grænt)
Fræ úr hálfu granatepli

Kryddlögur
3/4 bolli sykur
4 bollar vatn
3 anísstjörnur
1/2 vanillustöng, klofin eftir endilöngu
8 þurrkaðar aprikósur, skornar í tvennt
8 þurrkaðar gráfíkjur, skornar í fernt
Sítrónubörkur, fjórar 3-5 sm langar sneiðar sem best er að skera með flysjara,
kreistið líka safann úr sítrónunni því hann er notaður líka

Setjið vatn, sykur, stjörnuanís og vanillustöng og sítrónubörk í pott og komið upp suðu. Sjóðið við hægan hita uns sykurinn er vel uppleystur og ilmurinn kominn vel fram. Takið af hellunni og látið kólna rétt aðeins áður en þið bætið brytjuðum þurrkuðu ávöxtunum saman við. Þá er þetta kælt vel áður en lengra er haldið.

Flysjið perurnar og skerið í fremur þunnar sneiðar og gerið eins með eplið. Setjið í skál og blandið sítrónusafnanum saman við. Hellið þá köldum sykurleginum ásamt öllu sem í honum er yfir og þéttið skálina með plastfilmu. Geymið í ísskáp til næsta dags.

Hellið leginum frá og takið sítrónubörkinn, anís og vanillustöng í burtu. Setjið í skál og dreifið granateplafræjum yfir og berið fram.

Með þessu má hafa hreinan þeyttan rjóma, eða kryddrjóma

Kryddrjómi
Einn peli rjómi, þeyttur
Ein dós sýrður rjómi (10%) sem er hrærður áður en honum er bætt við þeytta rjómann
1 tsk kanill og hálf teskeið vanillusykur

Bon appetit!

Sellerírótarsúpa

noreply@blogger.com (Þórný) — Wed, 13 Jan 2016 23:33:00 +0000

1 sellerírót, stór og væn - hreinsuð og skorin í grófa bita
1 msk ólífuolía eða kókosolía
1 rautt chilialdin, fræin hreinsuð og saxað gróft
3-5 sm engiferrót, rifin
2-3 hvítlauksrif, rifin
búnt af vorlauk, saxað gróft
1 lítri vatn
1 msk grænmetiskraftur
1 dós kókosmjólk
1 msk soyasósa
nýmulinn svartur pipar, etv. smá salt

Hitið olíuna í potti og bætið engifer, hvítlauk, chili og vorlauk út í, steikið án þess að það brúnist smá stund. Þá er vatni og sellerírót bætt í pottinn.

Látið sjóða uns þetta er meyrt. Þá er súpan maukuð með töfrasprota og kókosmjólkinni bætt saman við. Bragðbætt með soya sósu, pipar og salti.

Borið fram með góðu brauði.

Bon appetit!

Sörur með hraði

noreply@blogger.com (Þórný) — Mon, 07 Dec 2015 14:41:00 +0000

Stundum er bara ekki tími til að dunda við Sörugerð, en manni finnst þær samt svooo góðar að maður vill helst ekki sleppa þeim. Þá er þessi uppskrift algjörlega málið því þessar sörur eru bakaðar í ofnskúffunni, og skornar í bita. Dásamlega góðar og fljótlegar sörur :)

Möndlumarengsbotn
400 g möndlur - hakkaðar fínt í matvinnsluvél
400 g sykur
4 tsk lyftiduft
6 stífþeyttar eggjahvítur (geymið rauðurnar)

Aðferð: blandið þurrefnunum saman með sleikju og stífþeyttum eggjahvítunum varlega saman við og dreifið síðan yfir bökunarpappír í ofnskúffu. Bakið við 175° í um 20 mínútur og takið út og látið kólna vel áður en þið setjið kremið.

Smjörkrem
250 g smjör
200 g flórsykur
6 eggjarauður
4 tsk kakó
2 tsk vanilludropar
Látið smjörið vera við stofuhita, mjúkt sem sagt, áður en þið byrjið að hræra. Best að brytja það í hrærivélaskálina og blanda sykri og eggjarauðum einni í einu saman við. Þá bragðefnum því þau eru smekksatriði og sumir vilja meira af þeim.

Þegar botninn er orðinn kaldur er kreminu smurt ofan á, eins jafnt og mögulegt er. Kælið áður en þið hjúpið. Ef þið komið ofnskúffunni ekki í ísskápinn er bara að klæða hana með álpappír eða plasti og setja út fyrir.

Hjúpur
200 g suðusúkkulaði - ef þið viljið heldur nota hjúpsúkkulaði er óþarfi að bæta við það fitu ;)
2 msk smjör (eða kókosolía)

Brætt saman yfir vatnsbaði og smurt yfir kalda kökuna. Kælt aftur og síðan skorið í litla ferninga, 2x2 sm og raðað í box og fryst.

Bon appetit!

Rifsberjahlaup

noreply@blogger.com (Þórný) — Sat, 10 Oct 2015 12:45:00 +0000

Rifsberjahlaup er svo miklu miklu betra heimagert en keypt í búð, það er allt annað og meira bragð af þessu heimagerða svo ég hvet ykkur til að prófa og verja einum degi til þess að gera það ef þið hafið aðgang að rifsberjarunnum einhversstaðar

Ég hef stuðst við biblíu íslenskra húsmæðra, Helgu Sig., en ég nota minni sykur og nota hleypi fyrir sykurminni sultur og hlaup (einn gulan og einn bláan).

Rifsber, 1 kg.
5-600 g. sykur
1 poki hleypir - þetta er þumalfingurreglan.

Ég fékk 2,5 kíló af rifsberjum að þessu sinni og notaði 1,6 kíló af sykri og tvo poka af hleypi.

Byrjið á að skola berin og hreinsa lauf frá, stilkarnir mega vera og eitt og eitt lauf er allt í lagi. Setjið síðan í nógu stóran pott og blandið sykrinum saman við, hrærið lauslega og komið suðu upp rólega.

Þegar suðan er komin upp þarf að fleyta froðuna ofan af, því betur sem maður vandar sig við það því tærari verður hlaupið, en ég er ekkert of smámunasöm með það. Sultan þarf ekki langa suðu, 10 mínútur er nóg, þá þarf að sigta hana. Sumir eiga grisjupoka en það getur verið nóg að nota þétt sigti.

Hér reynir svolítið á þolinmæðina því þetta þarf að leka í gegn og ekki þjappa berjamaukið í sigtinu um of því þá verður sultan skýjuð. En á meðan er gott að undirbúa krukkurnar.

Ég nota alltaf gamlar krukkur undan hinu og þessu, þvæ þær vel og set rakar í ofnskúffuna og leyfi þeim að vera á 120°C meðan ég er að sigta og hleypi suðunni upp aftur á berjasafanum.

Þegar safinn er kominn í pott er suðunni hleypt upp að nýju og aftur þarf að fleyta af bleiku froðuna sem kemur, nú er hleypinum bætt við, soðið eins og leiðbeiningar á pakka mæla með.

Þá eru krukkurnar teknar úr ofninum, hlaupinu ausið í og krukkunni lokað strax. Það er gott að nota mjúka ofnhanska við þetta svo maður brenni sig ekki.

Látið kólna og njótið síðan á vetrarkvöldum með góðum ostum eða mat. Ef þið viljið getið þið soðið saft úr hratinu, þá setjið þið það í pottinn og bætið við vatni. Hleypið upp suðu og setjið 1 msk af Benson nat í hvern lítra. Setjið á flöskur og njótið, t.d. með kolsýrðu vatni.

Bon appetit!

Sítrónuterta að frönskum hætti

noreply@blogger.com (Þórný) — Sat, 10 Oct 2015 12:10:00 +0000

Við fórum í brúðkaupsferð til Frakklands sumarið 2015 og þar fékk ég svo góða sítrónuböku í eftirrétt að ég linnti ekki látum fyrr en ég var búin að finna uppskrift sem ég gat notað til að endurskapa þessa himnasælu. Og ekki spillti það fyrir að hún er hitaeiningaminni en orginallinn, því það er sýrður rjómi í henni í staðinn fyrir rjóma :)

Fyrst þarf að gera bökudeigið

140 g hveiti
50 g smjör
1 eggjarauða
1 tsk flórsykur
1 msk matarolía
og 1-2 msk vatn

Smjörið skorið í teninga og mulið saman við hveitið milli handanna uns þetta verður að jafnri mylsnu. Þá er flórsykrinum blandað saman við. Að síðustu er eggjarauðu, olíu og 1-2 msk af köldu vatni hnoðað saman við uns deigið verður að kúlu. Fletjið deigið út í bökuform, pikkið með gaffli og setjið í ísskápinn í ca. 10 mínútur. Kveikið á ofninum, 180°C og blástur eða 190°C án blásturs.

Þá er komið að fyllingunni

3 meðalstór egg og tvær eggjahvítur
140 gr flórsykur
tvær matskeiðar rifinn börkur af sítrónu (muna að þvo hana vel úr volgu vatni fyrst)
125 ml sítrónusafi, sem er safi úr 4-5 sítrónum
1 dós sýrður rjómi (ég nota 10%)

Setjið eggin í skál og hrærið þau saman með sleif, sigtið flórsykurinn smám saman og hrærið stöðugt í. Ef blandan verður kekkjótt getið þið þeytt hana aðeins með sósuþeytara eða gaffli. Hrærið því næst sítrónuberkinum og sítrónusafanum saman við og látið standa meðan þið bakið botninn, þannig nær sítrónan að draga fram meira bragð.

Næst er að baka botninn og svo fyllinguna

Setjið bökunarpappír yfir og fergjið með hrísgrjónum eða þurrum baunum og bakið í 20 mín. Takið út og takið pappírinn varlega af og baunir eða grjón. Bakið án fargs í ca 5 mín og þá ætti deigið að vera gullið og tilbúið. Takið út og geymið á meðan lokahönd er lögð á fyllinguna, hrærið sýrða rjómann í skál uns hann er kekkjalaus (ef einhverjum er illa við börkinn, má sigta fyllinguna á þessu stigi áður en sýrði rjóminn er hrærður samanvið) þá er hann hrærður rólega saman við sítrónueggjablönduna. Ef skálin er ekki gerð til þess að hella úr henni, er best að setja blönduna í könnu. Setjið nú bökuformið á hálfútdregna ofngrindina og hellið fyllingunni rólega í hana og setjið hana varlega inn í ofninn. Minnkið hitann á ofninum í 150°C og bakið í 25-30 mínútur. Þá er bakan tekin út og látin kólna alveg áður en flórsykri er dreift yfir.

Bon appetit!

Trönuberjasmákökur

noreply@blogger.com (Þórný) — Sat, 13 Dec 2014 21:02:00 +0000

Þetta er amerísk uppskrift og samkvæmt henni á að vera hvítt súkkulaði í kökunum og þær verða kannski enn jólalegri þannig en ég átti það ekki til og notaði því 70% dökkt súkkulaði. Það er líka ljómandi gott.

1 bolli smjör
3/4 bolli ljós púðursykur
3/4 bolli sykur
2 stór egg (3 lítil)
1 1/2 tsk vanilludropar
2 1/4 bolli hveiti
1/2 tsk matarsódi
1/2 tsk lyftiduft
1/2 tsk salt
1 bolli þurrkuð trönuber (ég setti þau í bleyti í kalt vatn meðan ég hrærði deigið)
1 bolli grófsaxað súkkulaði að eigin smekk (hvítt, suðu, 70%)
1 bolli grófsaxaðar pekanhnetur (mega vera valhnetur)

Smjörið skorið í smábita og hært ljóst og létt með sykrinum, þá er eggjunum bætt í einu í senn. Vanilludroparnir næst og síðan er þurrefnunum bætt smám saman út í. Þegar deigið er tilbúið er trönuberjum, súkkulaði og hnetum hrært saman við með sleif.

Bakað við 180° á blæstri i ca. 8-10 mín. eftir stærð. Uppskriftin gefur ca. 80 stk.

Bon appetit!

Vatnsdeigsbollur með mokkarjóma og karamellubráð

noreply@blogger.com (Þórný) — Sun, 02 Mar 2014 16:07:00 +0000

Svona bollum ánetjaðist ég í Kaupmannahöfn haustið 1992 og því ættu þær eiginlega að heita Hafnarbollur eða Bollurnar frá Köben. Ég var ófrísk af mínu fyrsta barni og átti von á mér innan bráðar og gekk daglega um hverfið til að fá hreyfingu og ferskt loft, gönguferðin endaði iðulega með viðkomu í bakaríinu þar sem keypt var "et af dagens grove tilbud" og svo ein svona rjómabolla! Ég hef reynt að endurgera þessa sætu synd og hér er útkoman

Vatnsdeig - uppskrift hinnar frómu Helgu Sig

65 g smjörlíki
2 1/2 dl vatn
125 g hveiti
3 egg
salt, sykur

Smjörlíki (já ég nota líka smjörlíki) og vatn er brætt saman í potti, þar til allt er bráðið og vatnið sýður vel. "Hitinn minnkaður og allt hveitið látið í einu út í pottinn og hrært stöðugt í með sleif þangað til það er þykkt, jafnt og kekkjalaust og losnar við pott og sleif. Látið í skál og breitt upp um barmana. Salti og sykri stráð á, til þess að skán myndist ekki og látið kólna, en þarf ekki að verða alveg kalt. Eggin eru þeytt í sundur (öll sett í skál og pískuð saman) og hrært saman við hálfu og hálfu í einu og síðan hrært viðstöðulaust í 20 mín. í höndunum en skemur í hrærivél" svona lýsir Helga aðferðinni. Ég notaði auðvitað hrærivél og hrærði bara þangað til deigið var jafnt og mjúkt, skóf það einu sinni niður með sleikju og hrærði örlítið lengur. Hún ráðleggur síðan að reyna að hafa bollurnar eða lengjurnar sem jafnastar að stærð á plötunni því þær þurfa nákvæman bakstur. Bakað við 200°C í 20 mínútur, látið kólna á grind. Forðist að opna ofninn meðan kökurnar eru að bakast, segir Helga, svo þær falli ekki.

Mokkarjómi
1 tsk skyndikaffiduft
1 tsk vanillusykur
2 msk rjómi
- og svo það sem eftir er úr pela af rjóma
Setjið kaffiduft og vanillusykur í skálina sem þið ætlið að þeyta rjómann í, hrærið tveimur matskeiðum af rjóma út í og leyfið að standa smá stund, eða meðan þið gerið karamellubráðina, þið getið hrært í þessu annað slagið þar til kaffið hefur náð að leysast upp en það tekur smá stund því þetta er kalt.

Karamellubráð
1/2 dl smjör
1 dl púðursykur
1/4 dl rjómi
vanilludropar, 1 - 1 1/2 tappi
1-1 1/2 dl flórsykur

Smjörið brætt í potti og púðursykurnum síðan hrært saman við. Þegar það hefur bráðnað saman er rjómanum bætt út í og suðan látin koma upp, hrært í á meðan, leyfið karamellunni að malla í ca 2 mínútur. Takið pottinn af hitanum og hrærið vanillunni saman við og látið bíða. Þið getið farið að þeyta rjómann, bætið bara restinni úr pelanum saman við og þeytið, og þið getið sett í bollurnar á meðan karamellan kólnar. Síðan er karamellan sett í skál og flórsykri hrært saman við þar til hún er passlega þykk, þið gætuð þurft að þynna með örlitlu vatni til að fá hana til að renna aðeins.

Síðan er bara að hita gott kaffi, gefa ástvinum sínum að smakka og njóta vel.

Bon appetit!

Rauðkál

noreply@blogger.com (Þórný) — Tue, 25 Feb 2014 21:42:00 +0000

Nýsoðið rauðkál með kanil og kryddum er eitt af því sem kemur jólailmi í húsið og manni finnst einhvern veginn að kálið úr krúsinni komi ekki í staðinn, þó auðvitað verði maður stundum að láta það duga. En ef tíminn er nægur... ummm...

1 vænn rauðkálshaus, skorinn smátt - í báta og bátana svo í sneiðar
2 litlar kanilstangir
2 lítil lárviðarlauf
5-7 negulnaglar
200 gr sykur (púðursykur - má vera ljós, eða hrásykur)
150 ml rauðvínsedik
100 ml Ribena
100 ml vatn

Helmingnum af rauðkálinu skellt í pottinn (passa að nota stóran pott) þá kryddunum og loks rest af káli, þá sykri dreift yfir ásamt vökvanum og suðunni komið rólega upp. Síðan þarf að láta kálið malla við vægan hita í um það bil klukkutíma og passa að alltaf sé nægur vökvi á því, bæta við vatni eftir þörfum.

Sumir setja kryddið í grisjupoka og taka uppúr að suðu lokinni, ég læt nægja að tína það frá þegar ég ber kálið fram.

Bon appetit!

Snúðar

noreply@blogger.com (Þórný) — Sun, 10 Nov 2013 13:16:00 +0000

Gerbakstur hefur ekki verið mín sterka hlið hingað til og ég var eiginlega hætt að reyna, en ákvað nýlega að endurnýja kynnin við Tupperware hnoðskálina mína og okkur hefur bara gengið vel að vinna saman. Hér er uppskrift að alveg lungamjúkum snúðum sem gott er að eiga í frysti og grípa til á góðum degi.

Ég hef komist að því að best er að byrja með ca. 100-150 grömmum minna af mjöli en uppskriftir segja til um og sjá svo til hversu mikið maður þarf að bæta við í hnoðunina eftir að deigið hefur hefað sig. Eins er ráð að gefa sér góðan tíma við þetta, gerbakstur lukkast ekki í stressi og það þarf að passa vel að deiginu sé hlýtt allan tímann.

700 g hveiti (í uppskriftinni segir 850 g)
1 1/2 tsk sykur
1 pk þurrger
1 1/2 tsk salt
70 g matarolía (í uppskriftinni er talað um bráðið smjörlíki í sama magni)
5 dl mjólk
1 tsk kardimommudropar

Þurrefnin eru sett í skálina og þeim hrært saman. Mjólkin er velgd ásamt olíunni og passlegur hiti er þegar þér finnst hún hvorki heit né köld þegar þú dýfir fingrinum í. Kardimommudropunum bætt við vökvann og honum hellt í skálina. Lokið sett á og síðan taka við léttar líkamsæfingar við að hrista og velta skálinni, ég stíg gjarnan léttan dans og geri þetta í léttum takti. Þegar deigið hefur blandast á það að velta um í skálinni eða vera eins og hnausþykkur grautur. Hálffylla eldhúsvaskinn af ylvolgu vatni og láta skálina standa þar. Þegar lokið losnar frá er kominn tími til að vinna áfram með deigið. Þetta getur tekið um klukkutíma.

Þá er mjöli sáldrað á borðið og deigið hnoðað létt, rólegar jafnar hreifingar og deigið er tilbúið að fletja út þegar það er hætt að klessast við borðið. Þá er því skipt í tvennt og flatt út frekar ílangt og ekki of þunnt, ca. 5-7 mm á þykkt. Penslað með mjólk og kanilsykri stráð yfir. Þá er því rúllað nokkuð þétt upp og skorið í ca. 2 sm þykkar sneiðar sem er raðað á bökunarpappír á plötu.

Nú þurfa snúðarnir að fá að hefast aftur áður en þeir eru bakaðir. Ég bý svo "vel" að eiga eldgamla eldavél sem hitar vel út frá sér og ég hita ofninn í 100 gráður og set plöturnar ofan á hellurnar og þar líður gerdeiginu mínu mjög vel. Ég breiði hrein viskustykki yfir snúðana og leyfi þeim að bíða í hlýjunni í 45-60 mín. Þá hækka ég hitann í 200°C og baka þá í 13-15 mín.

Síðan er bara að leyfa þeim að kólna undir viskustykki (til að halda rakanum í þeim og þá verða þeir mýkri) og skreyta með glassúri eða bráðnu súkkulaði.

Bon appetit!

Ratatouille

noreply@blogger.com (Þórný) — Wed, 16 Oct 2013 19:54:00 +0000

Þessi frægi franski réttur er yfirleitt eldaður í potti eins og kássa, en mér finnst hann betri úr ofninum og ég bæti gjarnan við hann smáum kartöflum og mér finnst best að eiga vel þroskaða tómata og nota þá ferska heldur en að nota niðursoðna. En þetta er það dásamlega við eldamennsku að allt snýst þetta um smekk og svona uppskriftir eru ekki heilagar...

2 eggaldin
2 kúrbítar
1 stór rauðlaukur
2 paprikur, ein græn og ein rauð
1 stór rauðlaukur, eða 2 smærri
4-5 hvítlauksrif
4-5 vel þroskaðir tómatar, skornir í báta (eða 1 dós af niðursoðnum)
Glænýjar íslenskar kartöflur, skornar í fernt, magnið er smekksatriði og má alveg sleppa
Ólífuolía
Ferskar kryddjurtir (eða þurrblanda, t.d. Franskar kryddjurtir eða þá dass af basil, myntu og oreganó)
salt og nýmalaður svartur pipar e. smekk

Eggaldinið þarf að skera fyrst í þykkar sneiðar (1 1/2 sm) og salta, þegar dropar af sneiðunum er vökvinn þerraður af og þeim snúið við, endurtekið. Eggaldinsneiðarnar síðan skornar í fernt. Kúrbítarnir skornir í þykkar sneiðar og svo í fernt. Laukurinn er skorinn gróft, eða í báta. Hvítlaukurinn skorinn í þunnar sneiðar. Paprikurnar skornar í stóra bita.

Grænmetinu er komið fyrir í eldföstu móti og ólífuolíunni dreift yfir, kryddum dreift yfir og sett í 200°C heitan ofn. Eftir ca. hálftíma þarf að hræra aðeins í blöndunni og svo er þetta bakað áfram í hálftíma.

Svakalega gott með grilluðu lambakjöti og jógúrtsósu með myntu.

Bon appetit!

Súkkulaði soufflé

noreply@blogger.com (Þórný) — Mon, 07 Oct 2013 19:59:00 +0000

Álfrún dóttir mín kom með þessa uppskrift um daginn og vildi endilega prófa hana. Ég hafði aldrei gert soufflé áður en horft á marga matreiðsluþætti þar sem það mistekst og kveið því svolítið að gera þetta - en það þýðir ekkert og þó að souffléið okkar félli aðeins, var það samt ljómandi gott.

Til að smyrja skálar (6-8 litlar eldfastar skálar):
5 msk smjör (brætt)
4-5 msk sykur
1-2 msk kakó

Skálarnar smurðar með smjörinu og sykur/kakó blöndu dreift inn í þær, gott að setja smá í botninn og snúa skálinni uns blandan þekur líka hliðarnar.

Soufflé-ið:
60 g smjör
40 g hveiti
2 1/2 dl mjólk
1 1/5 tsk vanilludropar
175 g dökkt súkkulaði (70%) saxað
5 eggjarauður
140 g sykur
6 eggjahvítur

Bræðið smjör í potti, bætið hveiti út í og hrærið saman, vætið í með mjólk, smátt og smátt og búið til kekkjalausan jafning með því að hræra vel á milli. Bætið vanilludropunum og súkkulaði út í og blandið vel saman. Þeytið eggjarauðurnar í skál ásamt 70 g af sykri og bætið í jafninginn. Þetta allt má gera með góðum fyrirvara.

Hitið ofninn í 200°C. Stífþeytið eggjahvítur í skál og bætið afganginum af sykrinum (70g) smám saman út í og þeytið í 2-3 mínútur. Bætið eggjahvítunum varlega saman við súkkulaðiblönduna, fyrst smávegis og síðan öllu.

Hellið deiginu í soufflé-skálarnar, þær mega vera alveg fullar og bakið þær í 16-18 mínútur. ALLS ekki opna ofninn á meðan kökurnar eru að bakast. Soufflé rís mikið í ofninum og hjá okkur flæddi aðeins út úr formunum, þær féllu aðeins þegar þær kólnuðu en það kom ekki að sök.

Bornar fram volgar með bráðnu rjómasúkkulaði og þeyttum rjóma.

Bon appetit!

Kjúklingur af frönskum ættum

noreply@blogger.com (Þórný) — Wed, 07 Aug 2013 19:30:00 +0000

Rigningarspá kallaði á kósíheit og bragðmikinn ofnrétt úr kjúklingi sem annars hefði lent á grillinu. Þessi réttur er tilbrigði við klassískan franskan kjúklingarétt (Poulet à l'Estragon) sem til dæmis má finna hér en ég ákvað að impróvisera aðeins og hafa kjúklinginn á beði af grænmeti og hluta hann í sundur líka.

Ég tók upp undan tveimur grösum af íslenskum rauðum, náði í 3 næpur úr garðinum og sæta kartöflu (úr Bónus :). Ég átti bara þurrkað Estragon (sem sumir segja að komist ekki í hálfkvist við ferskt, en c'est la vie!) en bætti við örlitlu garðablóðbergi og fersku óreganói sem ég átti í kryddjurtabeðinu.

Ég hreinsaði og skar 3 litlar næpur í bita og setti í botn á eldföstu móti, sletti smá olíu yfir þær og bætti síðan við glænýjum kartöflum, ca. 200 g og hálfri sætri kartöflu sem ég skar í bita. Síðan þurfti að bjarga tveimur hvítlaukum frá yfirvofandi myglu og ég setti rif úr öðrum saman við, blandaði saman og kryddaði með bleiku himalajasalti og nýmöluðum svörtum pipar og örlitlu af estragoni og söxuðum kryddjurtum. Einn tengingur af kjúklingakrafti var mulinn yfir og loks var kjúklingabitum (einum ferskum kjúlla hlutuðum í 6 bita, bringur, læri og vængi) raðað yfir. Kjúklingurinn vel kryddaður með salti og pipar og estragoni og kryddi stráð á þá hlið sem sneri að grænmetinu fyrst. Þá hellti ég yfir kjúklinginn í ofnpottinum, 1/2 bolla af vatni og 1/2 bolla af hvítvíni og kryddaði svo ofan á kjúklinginn eins og undir. Þá skar ég hinn hvítlaukinn í smærri bita, hálfan rauðlauk og dreifði yfir og auk þess fóru nokkrar klípur af smjöri ofan á, ca. 25 g. og lokið yfir. Inn í ofn við 200°C í um klukkutíma.

Soðið síað frá og sett í pott, pela af rjóma bætt við og suðunni hleypt upp, bragðbætt með örlitlu Estragoni, smá slettu af hvítvíni, salti og pipar. Ég notaði Maizena sósujafnara til að þykkja hana örlítið.

Bon appetit!

Hnetu- og chili kjúklingur

noreply@blogger.com (Þórný) — Tue, 23 Jul 2013 21:36:00 +0000

Þessa marineringu fann ég í grillbók kokkalandsliðsins sem gefin var út með stuðningi frá Kók, nema hvað henni er ætlað að bragðbæta svínakjöt, en hún smellpassar við kjúkling líka.

Marineringin

100 g hnetusmjör
50 g Sweet Chili sósa
50 ml matarolía
1 msk steinselja
smakkað til með salt og pipar

Ég játa að ég setti örlítið meira af chili sósunni, ca. 10 g í viðbót. Síðan var kjúklingurinn hlutaður í sundur í eina 10 bita, lærin tekin í tvennt og bringurnar líka, ég hamhreinsaði hann líka nema vængina. Síðan var marineringunni blandað vel á bitana og látið taka sig í ísskápnum í 1 1/2 tíma, þolir vel að bíða lengur en þetta dugði alveg.

Síðan var kjúklingurinn grillaður og borðaður með soðnum hrísgrjónum, sweet chili sósu og fersku salati úr garðinum ásamt niðursaxaðri gúrku, fínsöxuðum næpum og vatnsmelónubitum. Afar ljúffengt.

Bon appetit!

Tandoori kjúklingur

noreply@blogger.com (Þórný) — Sat, 20 Jul 2013 13:30:00 +0000

Ég prófaði að kaupa Tandoori kryddblöndu í Tiger í vor en kom því ekki í verk fyrr en um daginn að prófa hana og hún er ljómandi góð, mild en bragðmikil. Ég hefði kannski kosið að hafa hana aðeins sterkari (eða heitari) en það fannst hinum fjölskyldumeðlimunum ekki. Uppskriftin er stór, fyrir 6 bringur eða 1 kjúkling sem er hlutaður í sundur og tvær auka bringur.

6 kjúklingabringur
(eða 1 kjúklingur, hlutaður í sundur, tvær bringur að auki eða fjögur læri)
2 dósir hrein jógúrt
5 matskeiðar Tandoori kryddblanda
2 hvítlauksrif, pressuð
safi úr 1 lime

Öllu hrært saman og dreift vel yfir kjúklinginn, ég skar rendur í lærin og bringurnar til að marineringin færi betur inn í kjötið. Þetta beið í ískáp í sólarhring.

Gott er að grilla Tandoori kjúkling en til stóð að prófa að steikja hann á Muurika pönnunni yfir opnum eldi, en eftir rigningartíðina var of blautt í eldiviðnum og gekk illa að fá hita í eldstæðið og því var gripið til þess að steikja kjúklingabitana á djúpri pönnu, hella síðan jógúrtsósunni yfir og láta þetta malla saman við vægan hita í ca. 20 mín.

Með þessu höfðum við að sjálfsögðu hrísgrjón, Naan brauð (úr pakka að þessu sinni) og ferskt salat úr garðinum og indverska jógúrtsósu með gúrku, eða Raitu.

Raita

1 dós hrein jógúrt
1/2 tsk malað cumin
1/2 tsk malað kóríander
hnífsoddur af salti og smá safi úr lime
1/2 agúrka, skorin í lengjur og fræhreinsuð áður en hún er söxuð í litla bita og sett saman við.

Bon appetit!

Kofta kjötbollur

noreply@blogger.com (Þórný) — Sat, 20 Jul 2013 13:17:00 +0000

Í rigningarsumrinu mikla hefur hugurinn leitað á suðlægar slóðir í stað grilluppskrifta og þessar tyrknesku kjötbollur vöktu þvílíka lukku að ég mátti til að setja uppskriftina hér

500 g. lambahakk
2 1/2 dl brauðrasp
1 egg
2-3 hvítlauksrif
1/2 tsk salt
1/2 tsk hvítur pipar
1 tsk cumin
1/2 tsk allrahanda
1/2 tsk mulið kóríander (má sleppa)
1 tsk þurrkuð mynta
2 msk þurrkuð steinselja

Allt sett í hrærivélarskál og hrært vel, eða þar til blandan er orðin þétt og loðir vel saman. Það er í góðu lagi að geyma þetta í kæli til næsta dags, en ég lét þetta standa meðan ég útbjó salat og jógúrtsósu og kom suðunni upp á hrísgrjónunum. Þá mótaði ég frekar litlar bollur og steikti í ólífuolíu, fékk ca. 12 bollur úr uppskriftinni. Það er líka gott að móta aflangar bollur og þræða upp á grilltein og grilla þær, en ef maður nennir ekki út í rigninguna með matinn sinn þá má vel steikja þetta inni.

Gult kúskús er líka ljómandi gott með, það er einfalt að skera hálfan lauk gróft og glæra í smjöri, setja túrmerik út í og dálitla papriku, kjúklingatening og vatn og bæta ókrydduðu kúskúsi út í þegar suðan er komin upp og láta standa ca. 5 mín.

Jógúrtsósa er afar góð með þessu, ég setti rúmlega teskeið af Zatziki kryddblöndu sem ég keypti í Tiger í eina dós af hreinni jógúrt og hrærði því vel saman, fræhreinsaði nýja íslenska tómata, saxaði þá fínt og setti saman við. Algengara er að nota gúrku, sem þá þarf líka að fræhreinsa svo jógúrtið haldi áferðinni, en það er góð tilbreyting að nota tómata.

Salatið kom ferskt úr garðinum, klettasalat, rautt og grænt blaðsalat. Smá gúrku bætt við og hálfri öskju af konfekttómötum en punktinn yfir i-ið setti vatnsmelóna í teningum og fersk mynta og basil úr eldhúsglugganum.

Við svona máltíð er allt í lagi að hann rigni aðeins :)

Bon appetit!

Vanilluhringir

noreply@blogger.com (Þórný) — Wed, 19 Dec 2012 23:47:00 +0000

Já, þessir gömlu góðu. Ég gerði þetta fyrst núna fyrir jólin 2012 því ég fékk loksins járn á gömlu hakkavélina mína í haust í Þorsteini Bergmann, þeirri eðalbúsáhaldabúð.

Uppskriftina fann ég í biblíu íslenskra kvenna, Helgu Sig og hún er svona:

1/2 kg hveiti
375 g smjörlíki
250 g sykur
1 egg
1/4 tsk hjartarsalt
Vanilla

Nú voru góð ráð dýr, ég á aldrei hjartarsalt og Helga segir ekki hvað eigi að vera mikil vanilla í vanilluhringjunum! Hringdi í mömmu og spurði hvort það hefði úrslitaáhrif að sleppa þessari 1/4 teskeið í hálfu kílói af hveiti og hún sagði nei (hjúkk), þá spurði ég hvað ætti að setja mikið af vanilludropum og þá snerist dæmið nú aðeins því svarið var "þú verður bara að prófa og smakka" - hmmm.

Jæja, hveitinu skellt í hrærivélaskálina og hnoðarinn settur á, sykrinum blandað varlega saman við og mjúku SMJÖRI (nota alltaf smjör í jólasmákökur) bætt saman við í bitum, látið hnoðast rólega og eggi bætt saman við. Þá var bara vafaatriðið eftir, vanillan, setti fyrst einn tappa, horfði aðeins á massann og setti síðan annan hálf fullan. Næst hika ég ekki við að setja tvo tappa. Deigið er síðan handhnoðað í slétta og fallega kúlu, pakkað í plast og kælt í ísskáp yfir nótt hið minnsta. Síðan er járnið góða sett á hakkavélina, deigið sett í bitum í hana og þegar lengjan sem út kemur er ca. 10 sm löng er hún tekin og mótuð í hring og sett á bökunarplötu.

Bakað við 200°C í 8-10 mín., mikilvægt að fylgjast með og láta þær ekki ofbakast.

Bon appetit!

Kjúklingur með Nachos

noreply@blogger.com (Þórný) — Sat, 08 Dec 2012 20:27:00 +0000

4-5 kjúklingabringur
1 rauð paprika
1 laukur, saxaður
2 tómatar
1 poki tortilla flögur
ferskt kóríander
250 g rjómaostur (2 litlar öskjur)
150 g (1 stk.) Mexíkóostur
1-2 dl matreiðslurjómi
150 g rifinn ostur

Byrjað á að krydda kjúklingabringur með papriku, salti og pipar og steikja í ofninum við 180°C í hálftíma, eða grilla þær. Setja rifinn mexíkóost, rjómaost og matreiðslurjóma í pott og bræða saman.

Saxa lauk, brytja papriku og tómata. Sneiða bringur í ca. sentimetersþykkar sneiðar. Dreifa 1/4 poka af flögum í botninn á rúmgóðu eldföstu móti, helmingnum af kjúklingasneiðum dreift yfir og smá slettu af rjómaosti dreift yfir hann. Helmingnum af grænmetinu dreift yfir, helmingi af brædda ostinum dreift yfir og helmingi af rifna ostinum. Þetta síðan endurtekið, flögur, kjúklingur, rjómaostur, grænmeti, bráðinn og rifinn ostur.

Bakað í ofni við 180°C í 15-20 mínútur.

Borið fram með salsa sósu, sýrðum rjóma og Guacamole, uppskrift hér.

Bon appetit!

Hrakfallasulta

noreply@blogger.com (Þórný) — Sat, 13 Oct 2012 21:54:00 +0000

Þetta er hrakfallasultusaga því ég ætlaði að gera rabarbarasaft og brytjaði samviskusamlega 3 kg af síðasta rabarbara sumarsins í pott, setti vatn skv. uppskrift samanvið og sykur og fór að lesa aðferðina betur og uppgötvaði þá að ég átti ekki að setja neinn sykur strax. Bölvaði sjálfri mér fyrir fljótfærnina en ákvað að reyna að gera eitthvað gott úr þessu. Lét suðuna koma upp og lét þetta malla góða stund, en þar sem ég var þegar búin að gera slatta af rabarbarasultu ákvað ég að bæta einhverju bragðgefandi saman við og fann engiferbút í ísskápnum, flysjaði hann og skar í 3 góða bita og setti samanvið. Lét þetta sjóða áfram góða stund ca. 45 mín. Enn var þetta nokkuð þunnt og ég ákvað að frysta ca. helminginn til að nota síðar í súpu eða graut því ég átti bara 1 pk af Melamin. Skar síðan engiferbitana í litla bita og bætti svo Melamin pakkanum saman við og lét krauma áfram í 10 mín. Setti á krukkur. En daginn eftir var þetta enn ekki hlaupið. Því ákvað ég að ég skyldi bara kaupa jarðaber (ekki til meiri rabarbari), hafði séð fersk og girnileg jarðaber í Bónus í Borgarnesi og fór þangað næsta dag, en fersku jarðaberin voru búin. Ákvað í búðinni að frosin ber væru örugglega jafngóð í sultu og keypti auk þess tvo melamín pakka, bláa til að nota í þetta gums. Þegar heim kom setti ég 700 g af jarðaberjum í pott og 350 g af sykri og lét suðuna koma upp, þegar þetta var orðið að góðum graut setti ég úr krukkunum saman við, lét það malla í ca. 15 mín og bætti þá báðum Melamin pökkunum saman við og lét krauma áfram í 10 mín. Setti aftur á krukkurnar sem ég hafði skolað og hitaði í ofninum við 100°C smástund. Útkoman var frábærlega góð. Svo góð að ég ákvað að taka þátt í árlegri sultukeppni Landbúnaðarháskóla Íslands, og þar fékk þessi sulta 1.-2. verðlaun þrátt fyrir hrakfarirnar, þar sem ekki þótti hægt að gera upp á milli hennar og brómberjasultu einhverrar ágætrar konu.

Í einfaldaðri útgáfu held ég að uppskriftin væri einhvern veginn svona:

1.5 kg rabarbari

700 g jarðaber (mega vera frosin)

1100 g sykur

Engiferbiti, ca. 10 sm, afhýddur og skorinn í litla bita.

2 pk Melamin (blár – fyrir sykurminni sultur)

Bon appetit!

Baka með skinku, blaðlauk og grænkáli

noreply@blogger.com (Þórný) — Sat, 01 Sep 2012 21:01:00 +0000

Bökudeig:

300 g hveiti
1/2 tsk salt
140 g smjör
1 eggjarauða
1-2 msk kalt vatn

Hnoðið smjör, hveiti og salt. Bætið eggjarauðu saman við og 1 msk vatn og hnoðið áfram, bætið vatni saman við uns þið náið í góða þétta kúlu. Geymið í kæli í ca. hálftíma. Fletjið þá út og setjið í bökuform og bakið með fargi í 10-12 mínútur við 220°C. Fargið getur verið hrísgrjón eða þurrkaðar baunir sem settar eru á bökunarpappír eða álpappír.

Fylling:
300-400 g köld skinka
1 stór blaðlaukur eða 2 minni
2 greinar grænkál
6 egg (5 + eggjahvítan sem gekk af í bökudeiginu)
4 dl rjómi (ég nota gjarnan kaffirjómapela og 1 1/2 dl mjólk)
salt og nýmalaður pipar

Þegar bakan er tekin út úr ofninum er fargið tekið af og skinkubitum raðað í botninn, þá blaðlaukssneiðum sem steiktar hafa verið í olíu og pipar dreift yfir. Grænkálið er skorið í þunnar sneiðar og settar á sömu pönnu og blaðlaukurinn var steiktur í, 1/2 dl af vatni bætt á pönnuna og kálið léttsoðið. Þá eru eggin sett í skál og rjóma og mjólk bætt saman við, salt og pipar og blandan þeytt uns hún freyðir. Síðan er henni hellt varlega yfir fyllinguna og bakað áfram í 40-45 mín. Ef grænkálið fer að brenna þarf að setja álpappír yfir bökuna meðan hún er í ofninum. Ég klikkaði aðeins á því og þess vegna er grænkálið aðeins brennt hjá mér á efstu myndinni ;)

Bon appetit!