Green Views Media

അത്യുഗ്രന്‍ ,, ജിമെയില്‍ ഇനി പുതിയ ഡിസൈനില്‍

2018-04-13T21:49:00.000-07:00

ഗൂഗിളിന്‍റെ ഏറ്റവും മികച്ച സേവനമായ ജിമെയില്‍ കൂടുതല്‍ ഫീച്ചറുകളുമായി വരുന്നുവെന്ന് റിപ്പോര്‍ട്ട്‌. ലോകമെമ്ബാടുമുള്ള ഇന്റര്‍നെറ്റ് ഉപയോക്താക്കളുടെ ഇമെയില്‍ സേവനദാതാവായ ജിമെയിലില്‍ വമ്ബന്‍ മാറ്റങ്ങള്‍ വരുത്തിയാണ് അവതരിപ്പിക്കുന്നത്.

പരീക്ഷണ പതിപ്പുകള്‍ക്ക് പുറമേ പുതിയ ജിമെയില്‍ ഫീച്ചറുകള്‍ ദിവസങ്ങള്‍ക്കുള്ളില്‍ ഉപയോഗിക്കാന്‍ കഴിയുമെന്നാണ് റിപ്പോര്‍ട്ടുകള്‍. ഉപയോക്താക്കളും ജിമെയിലും തമ്മിലുള്ള വിനിമയം ഊര്‍ജിതപ്പെടുത്താനുള്ള എഎംപി (ആക്സിലറേറ്റഡ് മൊബൈല്‍ പേജസ്) സംവിധാനം തന്നെയാണ് ഏറ്റവും പ്രധാനപ്പെട്ട ഫീച്ചറുകളിലൊന്ന്.

ഉപയോഗത്തില്‍ കൂടുതല്‍ വേഗത വരുമെന്നും ഫ്ലൈറ്റ് സമയം, പുതിയ ഉല്‍പന്നങ്ങളെക്കുറിച്ചുള്ള വിവരങ്ങള്‍ തുടങ്ങി ഒട്ടേറെ കാര്യങ്ങള്‍ അറിയാന്‍ ജിമെയിലില്‍ അവസരമൊരുങ്ങുമെന്നും ഗൂഗിള്‍ വ്യക്തമാക്കി.

മാറ്റങ്ങള്‍ ഉപയോക്താക്കള്‍ക്ക് അനുഭവിച്ചറിയാനായി ഡവലപ്പര്‍ പ്രിവ്യൂ നേരത്തെ തന്നെ ഗൂഗിള്‍ പുറത്തിറക്കിയിരുന്നു.

ചില ടെക് വെബ്സൈറ്റുകള്‍ നേരത്തെ തന്നെ പുതിയ ജിമെയില്‍ ഡിസൈന്‍ പുറത്തുവിട്ടിരുന്നു. ഏറെ വര്‍ഷങ്ങള്‍ക്ക് ശേഷം ജിമെയിലിന്റെ ഡെസ്ക്ടോപ് പതിപ്പിലാണ് ഇത്രയും മാറ്റങ്ങള്‍ കൊണ്ടുവരുന്നത്.

ജി സ്യൂട്ട് ആപ്പുകളുടെ എളുപ്പത്തിലുള്ള ഉപയോഗം (ഗൂഗിള്‍ കലണ്ടര്‍, കീപ് നോട്ട്, ടാസ്‌കുകള്‍), സ്മാര്‍ട് റിപ്ലെ (മൊബൈല്‍ പതിപ്പിലേതിന് സമാനമായി), ഇമെയില്‍ സ്‌നൂസ്, ഓഫ്‌ലൈന്‍ സപ്പോര്‍ട്ട് (2018 ജൂണ്‍ മുതല്‍ സേവനം ലഭിക്കും), പുതിയ ഡിസൈനിലുള്ള സൈഡ് ബാര്‍, മൂന്ന് വ്യത്യസ്ത ലേ ഔട്ടുകള്‍, ആക്സിലറേറ്റഡ് മൊബൈല്‍ പേജസ് (എഎംപി) തുടങ്ങിയവയാണ് മറ്റ് പുതിയ ഫീച്ചറുകള്‍.

വിചിത്രമായ കാരണങ്ങള്‍കൊണ്ട് ഉപേക്ഷിക്കപ്പെട്ട ദേവാലയങ്ങള്‍

2018-04-12T10:45:00.000-07:00

കാഴ്ചയില്‍ ഏറെ മനോഹരവും എന്നാല്‍ ആളുകള്‍ പോകാന്‍ മടിക്കുന്നതുമായ കുറച്ച് ദേവാലയങ്ങള്‍ പരിചയപ്പെടാം.

ഉപേക്ഷിക്കപ്പെടുക...കെട്ടിടങ്ങളുമായി ബന്ധിപ്പിച്ച് വായിച്ചാല്‍ പ്രേതഭവനങ്ങള്‍ക്കാണ് ഈ വാക്ക് കൂടുതല്‍ യോജിക്കുക.

എന്നാല്‍ ദേവാലയങ്ങള്‍ക്കും ഈ പേരു യോജിക്കും. കാരണം പ്രേതാനുഭവങ്ങള്‍കൊണ്ടും അതീന്ദ്രിയമായ ശക്തികളുടെ സാന്നിധ്യം കൊണ്ടും ഇതുവരെയും കണ്ടെത്തിയിട്ടില്ലാത്ത കാരണങ്ങള്‍ കൊണ്ടും വിശ്വാസികള്‍ ഉപേക്ഷിച്ച നിരവധി ദേവാലയങ്ങള്‍ രാജ്യത്തിന്റെ വിവിധ ഭാഗങ്ങളില്‍ കാണുവാന്‍ സാധിക്കും. കാഴ്ചയില്‍ ഏറെ മനോഹരവും എന്നാല്‍ ആളുകള്‍ പോകാന്‍ മടിക്കുന്നതുമായ കുറച്ച് ദേവാലയങ്ങള്‍ പരിചയപ്പെടാം....

സെന്റ് അഗസ്റ്റിന്‍ ദേവാലയം, ഗോവ

ഓള്‍ഡ് ഗോവയില്‍ സ്ഥിതി ചെയ്യുന്ന സെന്റ് അഗസ്റ്റിന്‍ ദേവാലയം ലോകത്തിലെ തന്നെ ഏറ്റവും പ്രശസ്തമായ മൂന്ന് അഗസ്റ്റിനിയന്‍ ദേവാലയങ്ങളില്‍ ഒന്നാണെങ്കിലും ഇപ്പോള്‍ ഏറെക്കുറെ ഉപേക്ഷിക്കപ്പെട്ട നിലയിലാണ്. ഹോളി ഹില്‍ എന്നറിയപ്പെടുന്ന മോണ്ടെ സാന്റോ എന്ന കുന്നിന്റെ മുകളിലാണ് ദേവാലയം സ്ഥിതി ചെയ്യുന്നത്. 1597 നും 1603 നും ഇടയില്‍ നിര്‍മ്മിക്കപ്പെട്ട ഈ ദേവാലയം അഗസ്റ്റിനിയന്‍ ഫ്രൈയേഴ്‌സ് എന്നവരുടെ നേതൃത്വത്തിലാണ് നിര്‍മ്മിക്കുന്നത്. എട്ടു ചാപ്പലുകള്‍, നാലു വലിയ ഗോപുരങ്ങള്‍,നാല് അള്‍ത്താരകള്‍, ഒരു മഠം എന്നിവ ഇവിടെ ഉണ്ടായിരുന്നുവത്രെ.
ദേവാലയം ഉപേക്ഷിക്കപ്പെടുന്നു

1830 കളില്‍ ഗോവയില്‍ പോര്‍ച്ചഗീസുകാര്‍ നടപ്പാക്കിയ പുതിയ നിയമങ്ങളുടെയും മാറ്റങ്ങളുടെയും ഭാഗമായാണ് ഈ ദേവാലയം ഉപേക്ഷിക്കപ്പെടുന്നത്. അങ്ങനെ 1835 മുതല്‍ ഈ ദേവാലയത്തെ ആളുകള്‍ തിരസ്‌കരിച്ചു തുടങ്ങി. പിന്നീട് 1842 ല്‍ ഇവിടം പൂര്‍ണ്ണമായും അവഗണിക്കപ്പെടുകയും പള്ളി കെട്ടിടം തന്നെ തകര്‍ന്നു വീഴുകയും ചെയ്തു. പിന്നീട് 1871 ല്‍ ഇവിടുത്തെ പള്ളിമണി ഔര്‍ ലേഡി ഓഫ് ഇമ്മാക്കുലേറ്റ് ചര്‍ച്ചിലേക്ക് കൊണ്ടുപോവുകയും ചെയ്തു. പനാജിമിലാണ് ഔര്‍ ലേഡി ഓഫ് ഇമ്മാക്കുലേറ്റ് ചര്‍ച്ച് സ്ഥിതി ചെയ്യുന്നത

ഷെട്ടിഹള്ളി റോസറി ചര്‍ച്ച്

ഗോഥിക് മാതൃകയില്‍ നിര്‍മ്മിച്ചിരിക്കുന്ന ഷെട്ടിഹള്ളി റോസറി ചര്‍ച്ച് കര്‍ണ്ണാടകയിലെ പ്രശസ്തമായ വിനോദ സഞ്ചാര കേന്ദ്രങ്ങളില്‍ ഒന്നാണ്. ഗോരൂര്‍-ഹോമാവതി റിസര്‍വോയറിന്റെ തീരത്തു സ്ഥിതി ചെയ്യുന്ന ഇവിടം ഇടയ്ക്കു് മുങ്ങുകയും ഇടയ്ക്ക് പൊങ്ങുകയും ചെയ്യുന്ന ഒരു ദേവാലയമാണ്.

മണ്‍സൂണ്‍ സമയത്ത് ഹേമാവതി ഡാം നിറയുമ്പോള്‍ പള്ളി പൂര്‍ണ്ണമായും വെള്ളത്തില്‍ മുങ്ങാറുണ്ട്. പിന്നെ ദേവാലയത്തിന്റെ യഥാര്‍ഥ സൗന്ദര്യം ആസ്വദിക്കണമെങ്കില്‍ വേനല്‍ക്കാലത്തു വരേണ്ടി വരും. വര്‍ഷത്തില്‍ പകുതി വെള്ളത്തിനടിയിലും ബാക്കി സമയങ്ങളില്‍ വെള്ളത്തിനു പുറത്തുമാണ് ഷെട്ടിഹള്ളി റോസറി ചര്‍ച്ച് കാണപ്പെടുന്നത്.

ദേവാലയം ഉപേക്ഷിക്കപ്പെട്ട കഥ

860കളിലാണ് ഫ്രഞ്ച് മിഷനറിമാര്‍ ഷെട്ടിഹള്ളി എന്ന ഗ്രാമത്തില്‍ റോസറി ചര്‍ച്ച് സ്ഥാപിക്കുന്നത്. പിന്നീട് സര്‍ക്കാര്‍ 1960ല്‍ സ്ഥാപിച്ച ഹേമാവതി ഡാമിന്റെ റിസര്‍വോയറിന്റെ ഭാഗമായി മാറുന്നതുവരെ ഗ്രാമത്തില്‍ ആളുകള്‍ ഉണ്ടായിരുന്നു. റിസര്‍വോയറിന്റെ ഭാഗമായി മാറിയതോടെ അടിക്കടിയുണ്ടാകുന്ന വെള്ളപ്പൊക്കം ഗ്രാമീണരെ ഇവിടെനിന്നും മാറിതാമസിക്കുന്നതിന് നിര്‍ബന്ധിതരാക്കി. തുടര്‍ന്ന് ദേവാലയവും സമീപ പ്രദേശങ്ങളും ഒറ്റപ്പെടുകയായിരുന്നുവത്രെ

ധനുഷ്‌കോടി പോര്‍ച്ചുഗീസ് ദേവാലയം

ഇന്ത്യയിലെ ഔദ്യോഗിക പ്രേതനഗരമെന്ന് സ്വദേശികള്‍ക്കിടയിലും വിദേശികള്‍ക്കിടയിലും അറിയപ്പെടുന്ന ധനുഷ്‌കോടിയിലെ ഉപേക്ഷിക്കപ്പെട്ട ഒരു ദേവാലയമാണ് ധനുഷ്‌കോടി പോര്‍ച്ചുഗീസ് ദേവാലയം.
ധനുഷ്‌കോടി ബീച്ചിലേക്കുള്ള പാതയിലാണ് ഇത് ്സ്ഥിതി ചെയ്യുന്നത്. ചുവരുകള്‍ മാത്രം നിനനില്‍ക്കുന്ന ഈ ദേവാലയത്തിന്റെ ബാക്കി ഭാഗങ്ങള്‍ ഒന്നും കാണാനേ ഇല്ല.

സെന്റ് ജോണ്‍ ദ ബാപ്റ്റിസ്റ്റ് ചര്‍ച്ച്, മുംബൈ

1579ല്‍ പോര്‍ച്ചുഗീസ് ജസ്യൂട്ട് വൈദികരുടെ നേതൃത്വ്തതില്‍ നിര്‍മ്മിക്കപ്പെട്ട സെന്റ് ജോണ്‍ ദ ബാപ്റ്റിസ്റ്റ് ചര്‍ച്ച് ഇന്ന് മുഴുവനായും നശിക്കപ്പെട്ട നിലയിലാണ് ഉള്ളത്. ഇപ്പോള്‍ അന്ധേരിയിലെ സ്പീസ് ഇന്‍ഡസ്ട്രിയല്‍ ഏരിയയിലാണ് ഉള്ളത്. 1579ല്‍ വിശ്വാസികള്‍ക്കായി തുറന്നു കൊടുത്ത ഈ ദേവാലയം 1840 ലാണ് ഉപേക്ഷിക്കപ്പെടുന്നത്. അതിന്റെ പ്രധാന കാരണം ആ വര്‍ഷം ഈ പ്രദേശത്തെ പിടിച്ചുകുലുക്കിയ പകര്‍ച്ചവ്യാധിയാണ്. അതില്‍പെട്ട് ആയിരക്കണക്കിന് ആളുകള്‍ മരണമടയുകയും ബാക്കിയുള്ളവര്‍ ഇവിടം ഉപേക്ഷിച്ച് രക്ഷപ്പെടുകയുമായിരുന്നു. പിന്നീട് ഈ ദേവാലയത്തെ തൊട്ടടുത്തുള്ള മറോല്‍ ഗ്രാമത്തില്‍ കൊണ്ടുപേയി വെച്ചു. ഇവിടെ നിന്നും തൂണുകള്‍, അള്‍ത്താര തുടങ്ങിയവ അവിടെ കൊണ്ടുപോയി സ്ഥാപിക്കുകയായിരുന്നു.
ഇന്ന് ഈ ഉപേക്ഷിക്കപ്പെട്ട ദേവാലയത്തില്‍ നവര്‍ഷത്തില്‍ ഒരു ദിവസം ആളുകള്‍ എത്താറുണടു.

മാഗ്‌നറ്റിക് സ്ട്രിപ്പുള്ള ഡെബിറ്റ് കാര്‍ഡുകള്‍ ഡിസംബര്‍ 31ന് ശേഷം അസാധു : ആര്‍.ബി.ഐ

2018-04-11T06:55:00.001-07:00

ന്യൂഡല്‍ഹി: മാഗ്‌നറ്റിക് ഡെബിറ്റ് കാര്‍ഡുകള്‍ക്കു വിട. മാഗ്‌നറ്റിക് സ്ട്രിപ്പുള്ള കാര്‍ഡുകള്‍ ഡിസംബര്‍ 31 മുതല്‍ അസാധുവാകും. സുരക്ഷ മുന്‍നിര്‍ത്തി ചെറിയ ചിപ്പ് ഘടിപ്പിച്ച ഇ.എം.വി. കാര്‍ഡുകളിലേക്കു മാറാനുള്ള റിസര്‍വ് ബാങ്ക് നിര്‍ദേശത്തെ തുടര്‍ന്നു ബാങ്കുകള്‍ നടപടി വേഗത്തിലാക്കി. മാഗ്‌നറ്റിക് ഡെബിറ്റ് കാര്‍ഡുകള്‍ ഡിസംബര്‍ 31ന് ശേഷം അസാധുവാകുമെന്നു ആര്‍.ബി.ഐ വ്യക്തമാക്കിയിട്ടുണ്ട്. പുതിയ കാര്‍ഡുകള്‍ നല്‍കാനുള്ള നടപടി ഉടന്‍ പൂര്‍ത്തിയാക്കാന്‍ ബാങ്കുകള്‍ സര്‍ക്കുലര്‍ നല്‍കിത്തുടങ്ങി. പല ബാങ്കുകളും ഇ.എം.വി. കാര്‍ഡുകള്‍ ഉപയോക്താക്കള്‍ക്ക് അയയ്ക്കാന്‍ നടപടി തുടങ്ങി. തുടര്‍ന്ന് 30 ദിവസത്തിനകം പഴയ കാര്‍ഡ് അസാധുവാകും.

ചിലപ്പോള്‍ കാര്‍ഡുകള്‍ മാറ്റിയെടുക്കാന്‍ ബ്രാഞ്ചുകളെ സമീപിക്കേണ്ടി വരും. ഇതുസംബന്ധിച്ച വിവരങ്ങള്‍ എസ്.എം.എസായും ഉപയോക്താക്കളെ അറിയിക്കണമെന്നു റിസര്‍വ് ബാങ്ക് നിര്‍ദേശമുണ്ട്.
പുതിയ കാര്‍ഡുകളുടെ പിന്‍നമ്ബര്‍ ബ്രാഞ്ചില്‍ നിന്നു നേരിട്ടു കൈപ്പറ്റണം. നിലവിലുള്ള കാര്‍ഡുകള്‍ ഉപയോഗിച്ചു ബാങ്ക് തട്ടിപ്പുകള്‍ വര്‍ധിച്ചതിനാലാണ് ഇ.എം.വി. കാര്‍ഡുകളിലേക്കു മാറുന്നത്. യൂറോപേ, മാസ്റ്റര്‍ കാര്‍ഡ്, വീസ എന്നിവയുടെ ആദ്യക്ഷരങ്ങള്‍ ചേര്‍ത്ത ചുരുക്കപ്പേരാണ് ഇ.എം.വി.

ജലദോഷത്തെക്കുറിച്ച്‌ കൂടുതല്‍ അറിയൂ

2018-04-11T02:14:00.001-07:00

എന്താണ് ജലദോഷം? (What is common cold)

തൊണ്ടയിലും മൂക്കിലും അണുബാധയുണ്ടാവുകയും തുടര്‍ന്ന് മൂക്കൊലിപ്പ്, ചുമ, തുമ്മല്‍, ശരീരവേദന അല്ലെങ്കില്‍ ചെറിയ പനി അനുഭവപ്പെടുന്ന അവസ്ഥയാണ് പൊതുവെയുള്ള ജലദോഷം.

എങ്ങനെയാണ് ജലദോഷം പിടിപെടുന്നത്? (How does one catch a cold)

ജലദോഷം ബാധിച്ച ഒരാളില്‍ നിന്ന് ഇനി പറയുന്ന രീതികളില്‍ അത് അനായാസം പകരാം;

ഒരാളെ കെട്ടിപ്പിടിക്കുമ്ബോള്‍ അല്ലെങ്കില്‍ ഹസ്തദാനം നടത്തുമ്ബോള്‍ ശരീരവുമായി സമ്ബര്‍ക്കമുണ്ടാവുന്നതിലൂടെ.
നിത്യോപയോഗ സാധനങ്ങള്‍ മറ്റൊരാളുമായി പങ്കുവയ്ക്കുന്നതിലൂടെ; കളിപ്പാട്ടങ്ങള്‍, വെള്ളം കുടിക്കാനുള്ള ഗ്ലാസ്സുകള്‍, കമ്ബ്യൂട്ടര്‍ കീബോര്‍ഡുകള്‍ തുടങ്ങിയവ.
വായ മൂടാതെ ചീറ്റുകയോ ചുമയ്ക്കുകയോ ചെയ്യുമ്ബോള്‍.
മൂക്കിന്റെയും തൊണ്ടയുടെയും ഉള്ളില്‍ ഉപരിതല പാളികളിലാണ് വൈറസ് ആദ്യം ആക്രമിക്കുക.

പിന്നീട് അണുബാധ മറ്റുഭാഗങ്ങളിലേക്ക് പടരും. വൈകാരിക കാരണങ്ങള്‍ മൂലമുള്ള തളര്‍ച്ചയും അലര്‍ജികളും ഒരാള്‍ക്ക് ജലദോഷമുണ്ടാവാന്‍ കാരണമാവാം.

കാരണങ്ങളും അപകടസാധ്യതാ ഘടകങ്ങളും (Causes and risk factors)

കാരണങ്ങള്‍ (Causes)

വളരെ ചെറിയ ജീവജാലങ്ങളായ വൈറസുകളാണ് ജലദോഷത്തിനു കാരണമാവുന്നത്. മിക്ക കേസുകളിലും റൈനോവൈറസുകളാണ് (Rhinovirus) സാധാരണ ജലദോഷത്തിന് കാരണമാവുന്നത്.

ആറ് വയസ്സില്‍ താഴെയുള്ള കുട്ടികള്‍ക്കും പൊതുവെ പ്രതിരോധശേഷി കുറഞ്ഞവര്‍ക്കും സാധാരണ ജലദോഷം അടിക്കടി ഉണ്ടായേക്കാം. കാലാവസ്ഥാ മാറ്റവും ഇതിന് കാരണമാവുന്നു. പുകവലിക്കാര്‍ക്കും ജലദോഷം ഉണ്ടാകാനുള്ള സാധ്യത കൂടുതലാണ്.

മുകളില്‍ പറഞ്ഞ കാരണങ്ങള്‍ക്ക് പുറമേ, ജലദോഷം ഉള്ള ഒരാളുമായി സമ്ബര്‍ക്കത്തിലേര്‍പ്പെടുന്നതും അപകടസാധ്യത ഉണ്ടാക്കുന്നു.

ലക്ഷണങ്ങളും സൂചനകളും (Symptoms and signs)

സാധാരണ ജലദോഷത്തിന്റെ സൂചനകളിലും ലക്ഷണങ്ങളിലും ഇനിപറയുന്നവയും ഉള്‍പ്പെടുന്നു;

തൊണ്ടയിലെ അണുബാധ
മൂക്കടപ്പ് അല്ലെങ്കില്‍ മൂക്കടപ്പ്
ചുമ
തൊണ്ടയടപ്പ്
തുമ്മല്‍
ക്ഷീണം
ശരീരവേദന
പനി
ജലദോഷം അധികരിക്കുന്നതിനൊപ്പം മൂക്കൊലിപ്പ് കൂടുകയും അതിന്റെ നിറത്തില്‍ വ്യത്യാസമുണ്ടാവുകയും ചെയ്യുക.
രോഗനിര്‍ണയം (Diagnosis)

വ്യക്തവും സര്‍വസാധാരണവുമായ ലക്ഷണങ്ങളുടെ അടിസ്ഥാനത്തില്‍ സാധാരണ ജലദോഷം കണ്ടുപിടിക്കാന്‍ സാധിക്കും. നിങ്ങള്‍ക്ക് കൂടുതലായി ശ്വാസകോശ അണുബാധയോ മറ്റെന്തെങ്കിലും രോഗാവസ്ഥയോ ഉണ്ടെന്ന് സംശയം തോന്നിയാല്‍, ഡോക്ടര്‍ നെഞ്ചിന്റെ എക്സ്-റേ എടുക്കാനും മറ്റ് പരിശോധനകളും നടത്താനും നിര്‍ദേശിച്ചേക്കാം.

ചികിത്സയും പ്രതിരോധവും (Treatment and prevention)

ചികിത്സ (Treatment)

കടകകളില്‍ നിന്ന് നേരിട്ടു വാങ്ങുന്ന മരുന്നുകള്‍ തൊണ്ടയിലെ അണുബാധ, വേദന, മൂക്കൊലിപ്പ് തുടങ്ങിയ ലക്ഷണങ്ങള്‍ ഇല്ലാതാക്കാന്‍ സഹായിക്കും. എന്നാല്‍, ഇത്തരം മരുന്നുകള്‍ നാല് വയസ്സില്‍ താഴെയുള്ള കുട്ടികള്‍ക്ക് നല്‍കരുത്. ഇത്തരം മരുന്നുകള്‍ കുട്ടികളില്‍ പരീക്ഷണം നടത്തിയിട്ടുണ്ടാവില്ല. ഗുരുതരമായ കേസുകളില്‍ രോഗത്തിന്റെ അവസ്ഥ അനുസരിച്ച്‌, ഡോക്ടര്‍ ആന്റിവൈറലുകള്‍, ആന്റിഹിസ്റ്റാമിനുകള്‍, ഡീകണ്‍ജസ്റ്റനറുകള്‍ എന്നിവ നിര്‍ദേശിച്ചേക്കാം.

ലളിതമായ വീട്ടുചികിത്സകള്‍ (Simple home remedies)

നിര്‍ജലീകരണം ഉണ്ടാകാതിരിക്കാനായി ധാരാളം വെള്ളം കുടിക്കുക. ഇത് തൊണ്ട നനവുള്ളതായിരിക്കാനും തൊണ്ടയടപ്പ് മാറാനും സഹായിക്കും.
ആവികൊള്ളുക. ഒരു പാത്രത്തിലെ (ഇടുങ്ങിയ കഴുത്തുള്ളതാണെങ്കില്‍ നന്ന്) ആവിപറക്കുന്ന വെള്ളത്തില്‍ നിന്ന് വളരെ സാവാധാനത്തില്‍ വേണം ആവികൊള്ളേണ്ടത്. പൊള്ളല്‍ ഏല്‍ക്കാതിരിക്കാന്‍ പ്രത്യേകം ശ്രദ്ധിക്കണം.
തണുപ്പടിക്കാതെ മുറിക്കുള്ളില്‍ വിശ്രമിക്കുക.
ചൂടുള്ള സൂപ്പുകള്‍, ഇഞ്ചിയും കറുവാപ്പട്ടയും ചേര്‍ത്ത ഔഷധ ചായകള്‍ എന്നിവ തൊണ്ടയ്ക്ക് സുഖം നല്‍കും.
വൃത്തി: നിങ്ങളുടെ കൈകള്‍ വൃത്തിയായി കഴുകുക. കുട്ടികള്‍ക്ക് കൈകള്‍ വൃത്തിയാക്കുന്നതിന്റെ ആവശ്യകതയെ കുറിച്ച്‌ പറഞ്ഞു മനസ്സിലാക്കി കൊടുക്കണം.
തുമ്മുകയും ചുമയ്ക്കുകയും ചെയ്യുന്നതിനായി ടിഷ്യൂ പേപ്പറുകള്‍ ഉപയോഗിക്കുന്നത് നന്നായിരിക്കും. അണുക്കള്‍ വ്യാപിക്കാതിരിക്കാന്‍ ഇത് സഹായിക്കും.

പ്രതിരോധം (Prevention)

വൈറസ്ബാധ പടരാതിരിക്കാന്‍ വെള്ളം കുടിക്കുന്ന ഗ്ലാസുകള്‍, ടവ്വലുകള്‍, കൈലേസുകള്‍ എന്നിവ വീട്ടിലെ മറ്റംഗങ്ങളുമായി പങ്കുവയ്ക്കരുത്.
രോഗബാധയുള്ള കുട്ടികളെ ഡേ-കെയര്‍ സെന്ററുകളിലും പ്ലേസ്കൂളുകളിലും മറ്റും പോകാന്‍ അനുവദിക്കരുത്.
ജലദോഷമുള്ളവരുമായി സമ്ബര്‍ക്കത്തില്‍ ഏര്‍പ്പെടാതിരിക്കാന്‍ ശ്രദ്ധിക്കുക.
ആന്റിഓക്സിഡന്റുകളുംവൈറ്റമിന്‍ സി യും സമ്ബുഷ്ടമായ ഭക്ഷണങ്ങള്‍ കഴിക്കുക.

ബദാം മില്‍ക്കിന്റെ പോഷകഗുണങ്ങള്‍ മനസ്സിലാക്കൂ

2018-04-11T02:03:00.001-07:00

ഇക്കാലത്ത് സൂപ്പര്‍ മാര്‍ക്കറ്റുകളില്‍ ചെന്നാല്‍ പാലുകളുടെ ഒരു നീണ്ട നിരതന്നെ കാണാന്‍ സാധിക്കും. കൊഴുപ്പുകളയാത്ത പാല്‍, 2% കൊഴുപ്പുള്ള പാല്‍, സ്കിംഡ് മില്‍ക്ക്, സോയ മില്‍ക്ക്, ബദാം മില്‍ക്ക് അങ്ങനെ നീളുന്ന നിരയില്‍ നിന്ന് ഏതാണ് തെരഞ്ഞെടുക്കുക എന്ന ആശയക്കുഴപ്പം നമുക്ക് ഉണ്ടായേക്കാം. ഏതാണ് ഗുണകരം എന്നാവും നാം ചിന്തിക്കുക.

ബദാം മില്‍ക്ക് ഒരു പാല്‍ ഉത്പന്നമല്ല. ഇത് ആരോഗ്യ ഭക്ഷണങ്ങളുടെ പട്ടികയിലെ ഒരു പുതിയ കൂട്ടിച്ചേര്‍ക്കലാണ്. പ്രധാനമായും ബദാമില്‍ നിന്ന് ഉണ്ടാക്കുന്ന സസ്യജന്യമായ പാലാണിത്. ഇതിന് പാല്‍പ്പാടയുടെ നിറം അല്ലെങ്കില്‍ ഇളം തവിട്ടുനിറമായിരിക്കും. നേര്‍മ്മയുള്ളതും സ്വാദുള്ളതുമായിരിക്കുമിത്.

ബദാം മില്‍ക്കിന്റെ ആരോഗ്യഗുണങ്ങളെക്കുറിച്ച്‌ നോക്കാം (Let us know more about the nutritional benefits of almond milk);

കാലറി കുറവ് ( Low in calories ) :

നിങ്ങള്‍ ശരീരഭാരം കുറയ്ക്കാന്‍ ആഗ്രഹിക്കുന്ന ആളാണെങ്കില്‍, ബദാം മില്‍ക്ക് തെരഞ്ഞെടുക്കാം. ഒരു കപ്പ് ബദാം മില്‍ക്കില്‍ ഏകദേശം 60 കാലറി മാത്രമേ അടങ്ങിയിട്ടുള്ളൂ. അതേസമയം, 2% കൊഴുപ്പ് അടങ്ങിയ പാലില്‍ ഏകദേശം 124 കാലറിയാണ് അടങ്ങിയിരിക്കുന്നത്.

ചര്‍മ്മത്തിന് തിളക്കം നല്‍കും ( Good for skin ) :

ചര്‍മ്മത്തിന് അല്‍പ്പം തിളക്കം നല്‍കാന്‍ ആഗ്രഹിക്കുന്നോ? ബദാം മില്‍ക്കിലേക്ക് ചുവടു മാറ്റൂ. ഇതില്‍ ധാരാളം വൈറ്റമിന്‍ 'ഇ' അടങ്ങിയിരിക്കുന്നതിനാല്‍ ചര്‍മ്മത്തിനു ഗുണപ്രദമാണ്.

ഹൃദയാരോഗ്യത്തിന് ( Good for heart ) :

നിങ്ങളുടെ ഹൃദയാരോഗ്യത്തിന്റെ ഏറ്റവും വലിയ രണ്ട് ശത്രുക്കളാണ് കൊളസ്ട്രോളും പൂരിതകൊഴുപ്പും. ഇവ ബദാം മില്‍ക്കില്‍ അടങ്ങിയിട്ടില്ലാത്തതിനാല്‍ ഹൃദയാരോഗ്യത്തെ സംരക്ഷിക്കുന്ന ഒരു പാനീയമായി ഇതിനെ കണക്കാക്കാം.

ദഹനത്തെ പ്രോത്സാഹിപ്പിക്കുന്നു ( Improve digestion ) :

ബദാം മില്‍ക്കില്‍ ധാരാളം നാരുകള്‍ അടങ്ങിയിരിക്കുന്നു. ഒരു കപ്പ് ബദാം മില്‍ക്കില്‍ ഒരു ഗ്രാം നാരുകളാണ് അടങ്ങിയിട്ടുള്ളത്. ഇത് ദഹനത്തെ പ്രോത്സാഹിപ്പിക്കുന്നു.

കണ്ണുകള്‍ക്ക് ഗുണപ്രദം ( Good for eyes ) :

ബദാം മില്‍ക്കില്‍, പ്രത്യേകിച്ച്‌ സമ്ബുഷ്ടമാക്കിയതില്‍, ധാരാളം വൈറ്റമിന്‍ 'എ' അടങ്ങിയിരിക്കുന്നു. ഇത് കണ്ണുകള്‍ക്ക് ഗുണപ്രദമായതിനാല്‍ കാഴ്ച സംബന്ധമായ പ്രശ്നങ്ങള്‍ പ്രതിരോധിക്കാന്‍ സഹായകമാവുന്നു.

കാര്‍ബോഹൈഡ്രേറ്റുകള്‍ കുറവ് ( Low in carbs ) :

മധുരം ചേര്‍ക്കാത്ത ബദാം മില്‍ക്കില്‍ കാര്‍ബോഹൈഡ്രേറ്റുകള്‍ വളരെ കുറവായിരിക്കും. ഇത് രക്തത്തിലെ പഞ്ചസാരയുടെ നില അല്‍പ്പം ഉയര്‍ത്തുമെങ്കിലും വലിയതോതില്‍ ആയിരിക്കില്ല. അതിനാല്‍, പ്രമേഹരോഗമുള്ളവര്‍ക്കും കഴിക്കാന്‍ സാധിക്കും.

എല്ലുകളുടെ ആരോഗ്യത്തിനു ഗുണകരം ( Good for bone health ) :

സ്വാഭാവികമായി ബദാം മില്‍ക്കില്‍ കാല്‍സ്യം കുറവായിരിക്കും. എന്നാല്‍, സമ്ബുഷ്ടമാക്കിയ ബദാം മില്‍ക്കില്‍ അവശ്യം വേണ്ട കാല്‍സ്യവും വൈറ്റമിന്‍ 'ഡി' യും അടങ്ങിയിട്ടുണ്ട്. ഇത് ആര്‍ത്രൈറ്റിസ്, ഓസ്റ്റിയോപൊറോസിസ് എന്നിവയില്‍ നിന്നുള്ള സംരക്ഷണം നല്‍കും. കാല്‍സ്യത്തിന്റെയും വൈറ്റമിന്‍ 'ഡി' യുടെയും നില അറിയുന്നതിനായി ബദാം മില്‍ക്കിന്റെ ലേബല്‍ ശ്രദ്ധിക്കുക.

ബദാം മില്‍ക്ക് ആര്‍ക്കൊക്കെ ഗുണപ്രദമായിരിക്കും ( Who should opt for almond milk ) ?

ഇനി പറയുന്ന വിഭാഗങ്ങളിലുള്ളവര്‍ക്ക് ബദാം മില്‍ക്ക് അനുയോജ്യമായിരിക്കും;

വേഗന്‍സ് (പാല്‍ ഉത്പന്നങ്ങളും കഴിക്കാത്ത സസ്യാഹാരികള്‍).
ലാക്ടോസ് അലര്‍ജിയുള്ളവര്‍ - ബദാം മില്‍ക്കില്‍ ലാക്ടോസ് അടങ്ങിയിട്ടില്ല.
ബദാം മില്‍ക്കില്‍ കാലറിയും കാര്‍ബോഹൈഡ്രേറ്റുകളും പഞ്ചസാരയുടെ അളവും കുറവായതിനാല്‍, ശരീരഭാരം കൂടാതെ ശ്രദ്ധിക്കുന്നവര്‍ക്ക് ഗുണപ്രദമാണ്.
ബദാം മില്‍ക്ക് വീട്ടില്‍ ഉണ്ടാക്കാന്‍ കഴിയുമോ ( Can almond milk be made at home ) ?

തീര്‍ച്ചയായും, ബദാം മില്‍ക്ക് വീട്ടില്‍ ഉണ്ടാക്കാന്‍ സാധിക്കും. ഇതിനായി, ബദാം പരിപ്പ് രാത്രി മുഴുവന്‍ വെള്ളത്തിലിട്ട് കുതിര്‍ക്കുക. രാവിലെ, ഇതിന്റെ തൊലി കളഞ്ഞ ശേഷം വെള്ളം ചേര്‍ത്ത് അരച്ചെടുക്കുകയും ഖരപദാര്‍ത്ഥങ്ങള്‍ ഒഴിവാക്കുന്നതിനായി പിഴിഞ്ഞെടുക്കുകയും ചെയ്യുക.

ഒരു കപ്പ് ബദാം മില്‍ക്കിനായി 70-75 ബദാം പരിപ്പ് (ഏകദേശം 85 ഗ്രാം) ആവശ്യമായിവരും.

രണ്ടു സ്‌ക്രീനുകളുള്ള മടക്കാന്‍ പറ്റുന്ന ഈ ഫോണ്‍;

2018-04-10T10:42:00.000-07:00

കുറേയധികം നാളുകളായി എല്ലാ ഹാന്‍ഡ്‌സെറ്റ് കമ്ബനികളും മടക്കാനും നിവര്‍ത്താനും എല്ലാം പറ്റുന്ന തരത്തിലുള്ള ഫോണുകള്‍ ഉണ്ടാക്കാനുള്ള തിരക്കിട്ട പണികളിലാണ്. ഇതില്‍ അവസാനമായി കേട്ട വാര്‍ത്ത മടക്കാന്‍ പറ്റുന്ന ഫോണുകള്‍ക്കായുള്ള പേറ്റന്റ് എല്‍ജി നേടിയെടുത്തു എന്നതാണ്. ഏതായാലും പരീക്ഷണങ്ങളൊക്കെ കഴിഞ്ഞ ശേഷം അത്തരം ഒരു ഫോണ്‍ വരുന്നതിന് ഇനിയും നാളേറെ ആകും എന്ന് തീര്‍ച്ച. പക്ഷെ ഇവിടെ ഒരു കമ്ബനി ഫലത്തില്‍ മടക്കാന്‍ പറ്റുന്ന എന്ന് പറയാവുന്ന ഒരു ഫോണ്‍ അവതരിപ്പിച്ചിരിക്കുകയാണ്.

നമ്മള്‍ പ്രതീക്ഷിക്കുന്ന പോലെയുള്ള ഒരു മടക്കല്‍ നിവര്‍ത്തല്‍ സൗകര്യമല്ല ZTE കൊണ്ടുവന്നിട്ടുള്ള ഈ മോഡലില്‍ ഉള്ളത്. പകരം രണ്ടു ഡിസ്പ്ളേ ആണ് ഈ ഫോണിലുള്ളത്.

രണ്ടും കൂടെ ചേര്‍ന്ന് മടക്കുകയും തുറക്കുകയും ചെയ്യാം. രണ്ടിലും ആപ്പുകള്‍ ഉപയോഗിക്കാം. രണ്ടും കൂടെ ചേര്‍ന്ന് വലിയ സ്‌ക്രീനില്‍ ചിത്രങ്ങളും വിഡിയോകളും കാണാം. എങ്കിലും എല്ലാവരെയും സംബന്ധിച്ച്‌ ഈ മോഡല്‍ ഇഷ്ടമാകണം എന്നുമില്ല.

ZTE Axon M എന്ന് പേരിട്ടിരിക്കുന്ന ഈ മോഡല്‍ കഴിഞ്ഞ മാസം അവസാനമാണ് ഇറങ്ങിയത്. ആഗോളമാര്‍ക്കറ്റില്‍ എല്ലായിടത്തും ഫോണ്‍ എത്തുന്നതേയുള്ളൂ. കാണാന്‍ ഒരു ഭംഗിയൊക്കെ ഉണ്ടെങ്കിലും അല്‍പ്പം കനം കൂടിയതും വണ്ണമുള്ളതുമാണ് ഈ മോഡല്‍ എന്നത്‌എ പലരെയും ഫോണ്‍ വാങ്ങണോ വേണ്ടയോ എന്ന ആശയക്കുഴപ്പത്തിലാക്കും. എന്തൊക്കെയാണ് ഫോണിന്റെ മറ്റു പ്രത്യേകതകള്‍ എന്നുകൂടെ നോക്കാം.

ചിത്രത്തില്‍ കാണുന്ന പോലെ സ്ക്രീനുകള്‍ രണ്ടുഭാഗവും എതിരെ നില്‍ക്കുന്ന രീതിയിലാണ് ഫോണിന്റെ ഡിസൈന്‍. നമ്മുടെ പഴയ നോക്കിയ 9000 സീരീസ് ഓര്‍മയില്ലേ. അതുപോലെ ഒരു ഡിസൈന്‍. അതിലെ കീബോര്‍ഡിന് പകരം ഇവിടെ ഡിസ്പ്ളേ ആണെന്ന് മാത്രം. ഫോണ്‍ തുറന്നു വെച്ചാല്‍ രണ്ടു സ്‌ക്രീനുകളും കൃത്യമായി ഒരേ അളവില്‍ ചേര്‍ന്ന് ഒരു ചതുര ഡിസ്പ്ലേ ലഭിക്കും.

ആന്‍ഡ്രോയ്ഡ് നാവിഗേഷന്‍ ബാറില്‍ സ്ക്രീനുകള്‍ക്ക് വേണ്ടി ഒരു പ്രത്യേക ബട്ടണ്‍ ഉണ്ട്. ഇതുപയോഗിച്ച്‌ രണ്ടു സ്‌ക്രീനുകളിലും എന്ത് കാണണം എന്ത് കാണണ്ട എന്ന് നമുക്ക് തീരുമാനിക്കാം. ഒരു സ്‌ക്രീനിലുള്ള കാര്യം തന്നെ രണ്ടാമത്തെ സ്ക്രീനിലും വരുത്തണമെങ്കില്‍ അങ്ങനെ ചെയ്യാം. ഇനി അതല്ല വിഡിയോ ഒക്കെ കാണാനായി രണ്ടും ചേര്‍ത്ത് ഒരൊറ്റ സ്ക്രീന്‍ ആക്കണമെങ്കില്‍ അങ്ങനെയും ഈ ബട്ടണ്‍ മുഖേന ചെയ്യാം.

ആന്‍ഡ്രോയിഡ് 7.1 ഓപ്പറേറ്റിംഗ് സിസ്റ്റം ചതുരമായ സ്ക്രീനിലും പ്രശ്നങ്ങളൊന്നും തന്നെയില്ലാതെ പ്രവര്‍ത്തിക്കുന്നുണ്ട്. രണ്ടു സ്ക്രീനുകള്‍ ഉപയോഗിച്ച്‌ ഒരേ സമയം ഒന്നിലധികം ആപ്പുകള്‍ ഭംഗിയായി ഉപയോഗിക്കാന്‍ സാധിക്കും എന്ന പ്രത്യേകതയാണ് ഈ മോഡലിന്റെ എടുത്തുപറയേണ്ട പ്രത്യേകതകളില്‍ ഒന്ന്. എന്നാല്‍ എല്ലാ ആപ്പുകളും ചതുര സ്‌ക്രീനില്‍ മൊത്തമായി പ്രവര്‍ത്തിക്കണം എന്നില്ല. ഒരുപക്ഷെ ഈ പരീക്ഷണം വിജയകരമായാല്‍ ഭാവിയില്‍ ഈ മോഡ് പിന്തുണക്കുന്ന ആപ്പ് വേര്‍ഷനുകള്‍ ഇറങ്ങിയേക്കാം.

രണ്ടുഭാഗവും മടക്കി വെക്കുന്നതിനാല്‍ ഒരു പിന്‍ക്യാമറ ഫോണിനില്ല. ആകെയുള്ളത് മുന്‍ഭാഗത്ത് ഒരൊറ്റ ക്യാമറയാണ്. 20 മെഗാപിക്സലാണ് ഈ ക്യാമറയ്ക്കുള്ളത്. ഒപ്പം ഒരു ഫിംഗര്‍പ്രിന്റ് സ്കാനറും ഫോണിലുണ്ട്. 5.2 ഇഞ്ചിന്റെ ഫുള്‍ എച്ച്‌ഡി ഡിസ്‌പ്ലെകളാണ് രണ്ടും. സ്നാപ്ഡ്രാഗണ്‍ 821 ആണ് പ്രൊസസര്‍. 4ജിബി റാമും 64ജിബി മെമ്മറിയുമാണ് ഫോണിലുള്ളത്. ഡോള്‍ബി അറ്റ്മോസ്, ഇരട്ട സ്പീക്കറുകള്‍ തുടങ്ങി ഒരുപിടി മികച്ച സംവിധാനങ്ങളെല്ലാം തന്നെ ഈ ഫോണില്‍ ഉണ്ട് എന്നത് വെറുമൊരു ഡിസ്‌പ്ലെ കോണ്‍സെപ്റ് ഫോണ്‍ മാത്രമല്ല തങ്ങളുടേത് എന്ന് ZTE കാണിച്ചു തരുന്നു.

ചതുരമുള്ള സ്‌ക്രീനില്‍ വീഡിയോ കാണുന്നത് അത്ര നല്ല ആശയമല്ല. കാരണം സിനിമകളുടെയും പാട്ടുകളുടേയുമെല്ലാം റെസൊല്യൂഷന്‍ ഒരിക്കലും ഇവിടെ ചേരില്ല എന്നത് തന്നെ. ഭാരവും വണ്ണവും കൂടുതലാണ് എന്നത് മറ്റൊരു പ്രശ്നം. ഫോണിന്റെ രണ്ടു ഭാഗവും ഡിസ്പ്ളേ ആയതിനാല്‍ ഫോണിന് പരുക്ക് സംഭവിക്കാന്‍ സാധ്യതകള്‍ കൂടുതലാണ്. പക്ഷെ ഇത്തരത്തില്‍ ഒരു ആശയം അവതരിപ്പിക്കുമ്ബോള്‍ തുടക്കത്തില്‍ പോരായ്മകള്‍ വരുക സ്വാഭാവികം. ഈയൊരു മോഡല്‍ വിജയകരമാകുകയാണെങ്കില്‍ ഈ ഡിസൈനില്‍ കാതലായ മാറ്റങ്ങളോടെ പുതിയ മോഡലുകള്‍ പ്രതീക്ഷിക്കുകയും ചെയ്യാം.

ആധാർ കാർഡ് ഓണ്ലൈനായി തിരുത്താൻ

2018-04-05T00:20:00.003-07:00

ആധാര്‍ കാര്‍ഡിലെ മേല്‍വിലാസം ഓണ്‍ലൈനിലൂടെ എങ്ങനെ തിരുത്താം

കേന്ദ്രസര്‍ക്കാര്‍ ഇന്ത്യയിലെ എല്ലാ പൗരന്‍മാര്‍ക്കും നല്‍കിയ 12 അക്ക വിവിധോദ്ദേശ ഏകീകൃത തിരിച്ചറിയല്‍ നമ്ബരാണ് ആധാര്‍. യുഐഡിഎഐ (യുണീക് ഐഡന്റിറ്റി) എന്നും ഇതിനെ പറയുന്നു.

ഇന്ന് നമ്മുടെ എല്ലാ ആവശ്യങ്ങള്‍ക്കും ആധാര്‍ കാര്‍ഡ് അത്യാവശ്യമാണ്. ആധാര്‍ കാര്‍ഡിലെ വിശദാംശങ്ങള്‍ ഒരിക്കലും തെറ്റാന്‍ പാടില്ല. എന്നാല്‍ ആധാര്‍ കാര്‍ഡ് കിട്ടിക്കഴിഞ്ഞാല്‍ ധാരാളം കാഡുകളില്‍ തെറ്റുകള്‍ കാണാറുണ്ട്.

ഇപ്പോള്‍ ആധാര്‍ കാര്‍ഡിലെ എല്ലാ തെറ്റുകളും ഓണ്‍ലൈന്‍ വഴി തന്നെ നിങ്ങള്‍ക്കു തിരുത്താവുന്ന സംവിധാനം UIDAI നല്‍കിയിട്ടുണ്ട്. നിങ്ങള്‍ യുഐഡിഎഐ വെബ്‌സൈറ്റില്‍ സന്ദര്‍ശിച്ചാല്‍ ആധാര്‍ കാര്‍ഡിലെ മിക്ക തെറ്റുകളും വീട്ടിലിരുന്നു തന്നെ തിരുത്താവുന്നതാണ്.

ഇന്നു നമുക്ക് ഇവിടെ നോക്കാം, ആധാര്‍ കാര്‍ഡിലെ അഡ്രസ് ഓണ്‍ലൈനായി എങ്ങനെ തിരുത്താമെന്ന്. അതിനായി ഈ താഴെ പറയുന്ന ഘട്ടങ്ങള്‍ പാലിക്കുക.

സ്റ്റെപ്പ് 1: ആദ്യം നിങ്ങള്‍ UIDAI വെബ്‌സൈറ്റിലേക്ക് പോവുക.

സ്‌റ്റെപ്പ് 2: യുഐഡിഎഐ വെബ്‌സൈറ്റില്‍ നിങ്ങള്‍ 'Address Update Request' ഓണ്‍ലൈന്‍ എന്നതില്‍ ക്ലിക്ക് ചെയ്യുക. ഒരു വെബ്‌പേജ് പുതിയ ടാബില്‍ തുറന്നു വരും. ഇനി താഴെയുളള നിര്‍ദ്ദേശങ്ങള്‍ പാലിച്ചതിനു ശേഷം 'Proceed'-ല്‍ ക്ലിക്ക് ചെയ്യുക.

സ്‌റ്റെപ്പ് 3: അടുത്തതായി ആധാര്‍ കാര്‍ഡ് വിലാസം, ഏരിയ പിന്‍കോഡ് വഴിയോ അല്ലെങ്കില്‍ വിലാസം വഴിയോ തിരുത്തേണ്ടതെന്ന് തീരുമാനിക്കുക.

സ്‌റ്റെപ്പ് 4: അടുത്ത പേജില്‍ ആവശ്യമായ വിശദാംശങ്ങള്‍ പൂരിപ്പിച്ചതിനു ശേഷം 'Submit'-ല്‍ ക്ലിക്ക് ചെയ്യുക.

സ്‌റ്റെപ്പ് 5: ക്ലിക്ക് ചെയ്തതിനു ശേഷം, ആധാര്‍ കാര്‍ഡിലെ വിലാസം മാറ്റുന്നതിന് ഇപ്പോള്‍ ശരിയായ മേല്‍വിലാസത്തിന്റെ തെളിവ് നല്‍കേണ്ടതാണ്. അതിനയി പാസ്‌പോര്‍ട്ട്, ഇന്‍ഷുറന്‍സ് പോളിസി, ക്രഡിറ്റ് കാര്‍ഡ് സ്‌റ്റേറ്റ്‌മെന്റ്, ടെലിഫോണ്‍ ബില്‍ (ലാന്റ് ലൈന്‍), വസ്തുവക ടാക്‌സ് രസീതുകള്‍ എന്നിവ ഐഡി പ്രൂഫായി നല്‍കാം.

സ്‌റ്റെപ്പ് 6: BPO സേവനദാദാവിനെ തിരഞ്ഞെടുക്കുക എന്നതാണ് അവസാന ഘട്ടം. സേവനദാദാക്കളുടെ പേരിനു സമീപമുളള റേഡിയോ ബട്ടണില്‍ ക്ലിക്ക് ചെയ്യുക തുടര്‍ന്ന് 'Submit' എന്നതിലും ക്ലിക്ക് ചെയ്യുക.

നിങ്ങള്‍ നല്‍കിയ വിശദാംശങ്ങള്‍ ശരിയാണോ എന്ന് ഒരിക്കല്‍ കൂടി ഉറപ്പു വരുത്തുക.

2018-03-27T11:25:00.001-07:00

അര്‍ജന്റീന ആരാധകര്‍ക്ക് മറ്റൊരു തിരിച്ചടി; ഡിബാലയ്ക്കൊപ്പം കളിക്കാന്‍ ബുദ്ധിമുട്ടാണെന്ന് മെസ്സി

Tuesday, 27 Mar, 2018

ലോകകപ്പിനുള്ള അര്‍ജന്റീന ടീമില്‍ യുവന്റസ് യുവതാരം പോളോ ഡിബാല ഉണ്ടായേക്കില്ലെന്ന പരിശീലകന്‍ സാംപോളിയുടെ പ്രസ്താവനയില്‍ ആശങ്കയിലായ അര്‍ജന്റീന ആരാധകര്‍ക്ക് മറ്റൊരു തിരിച്ചടി കൂടി. ഡിബാലയ്ക്കൊപ്പം കളിക്കാന്‍ ബുദ്ധിമുട്ടാണെന്ന് സൂപ്പര്‍ താരം ലയണല്‍ മെസ്സിയും സമ്മതിച്ചു. രണ്ട് പേരും ഒരേ പൊസിഷനില്‍ കളിക്കാന്‍ ഇഷ്ടപ്പെടുന്നവരാണെന്നും മറ്റു പൊസിഷനില്‍ കളിച്ചാല്‍ രണ്ട് താരങ്ങള്‍ക്കും ബുദ്ധിമുട്ടാണെന്നും മെസ്സി പറഞ്ഞു. ഫോക്സ് സ്പോര്‍ട്സിന് നല്‍കിയ അഭിമുഖത്തിലാണ് മെസി ഇക്കാര്യം വ്യക്തമാക്കിയത്.

അറിവ്

2018-02-16T23:27:00.000-08:00

ഇന്നത്തെ അവസ്ഥ
അറിവ്

നന്മ

2018-02-16T20:18:00.000-08:00

ഉള്ളിൽ സ്പർശിക്കുന്ന ഒരു അനുഭവക്കുറിപ്പ്...
------------

മൂന്ന് മണിക്ക് എഴുനേറ്റ് ഇടയത്താഴം കഴിച്ചു സുബഹി നമസ്കാരവും ഓതലും ഒക്കെ കഴിഞ്ഞു ഒന്ന് വെറുതെ കിടക്കാമെന്ന് കരുതി കിടന്നതാണ്... കോരിച്ചൊരിയുന്ന മഴ കൂട്ട് ഉണ്ടായിരുന്നതിനാൽ ഞാൻ നല്ല അസ്സലായിട്ട് ഉറങ്ങി... ഉണർന്നപ്പോൾ സമയം പതിനൊന്നര... കണ്ണൊക്കെ വലിച്ചു തുറന്ന് പയ്യെ ഹാളിലോട്ട് ചെന്നപ്പോൾ അവിടെയെങ്ങും ഉമ്മയെ കാണാൻ ഇല്ല. തിരക്കി ചെന്നപ്പോൾ അടുക്കളയുടെ പുറകുവശത്ത് മുറ്റമടിക്കുന്ന സൗണ്ട് കേട്ടു. നോമ്പും പിടിച്ചോണ്ട് ഈ ഉമ്മ ഉച്ചയ്ക്ക് അടിച്ചു വാരുന്നോ എന്നും പിറുപിറുത്ത് അങ്ങോട്ട് ചെന്നപ്പോൾ ഉമ്മ അവിടെ നിൽക്കുന്നത് കണ്ടു. അടിച്ചു വരുന്ന സൗണ്ട് കേൾക്കുകയും ചെയ്യുന്നു... പുറകുവശത്ത് കുറച്ചു ഉള്ളിലോട്ട് മുഴുവൻ വാഴ കൃഷിയാണ്. ഇന്റർലോക്ക് ഇടാൻ സമ്മതിക്കാതെ വാപ്പ സൂക്ഷിച്ച സ്ഥലം. അതുകൊണ്ട് ഇപ്പോ നല്ല നാടൻ പഴം കഴിക്കാൻ പറ്റുന്നു..

"ആരാ ഉമ്മാ അത്..."

"അതോ... അത് അവിടെ കനാൽ പുറമ്പോക്കിൽ താമസിക്കുന്ന ഒരു ആന്റിയാ..."

ഉമ്മ ഇത് പറയുമ്പോൾ വാഴയിലയിൽ നിന്നും ദേഹത്ത് പറ്റിയ വെള്ള തുള്ളികൾ തുടച്ചു കൊണ്ട്, ഒരു എഴുപത് വയസ്സ് പ്രായം തോന്നിക്കുന്ന ഒരു അമ്മൂമ്മ വാഴകൾക്ക് ഇടയിൽ നിന്നും ഇറങ്ങി വന്നു. ഒരു ബ്ലൗസും മുഷിഞ്ഞ ഒരു മുണ്ടും ആയിരുന്നു വേഷം... തല മുഴുവൻ നരച്ചിട്ടുണ്ട്. ചുക്കി ചുളിഞ്ഞ തൊലി പ്രായകൂടുതൽ കൊണ്ട് കൂനിക്കൂടിയ ഉണങ്ങിയ ശരീരം.

"ഇതാണല്ലേ മരുമോള്. ഞാൻ ആദ്യമായിട്ട് കാണുന്നതാ... എന്നും പറഞ്ഞു കൊണ്ട് ആ അമ്മൂമ്മ ഞങ്ങളടുത്തേയ്ക്ക് വന്നു.

ഉം... മരുമോളല്ല മോൾ തന്നെയാ..." എന്ന് ഉമ്മ പറഞ്ഞു... അതും കേട്ട് ചിരിച്ചുകൊണ്ട് എന്റടുത്തേയ്ക്ക് വന്നു.

"മക്കളെ പോലുള്ള മരുമക്കളെ കിട്ടാനും ഭാഗ്യം വേണം."

ഞാൻ അവരെ നോക്കി ചിരിച്ചു.

"ഞാൻ ഇടയ്ക്കൊക്കെ ഇവിടെ വരാറുണ്ട്. അപ്പോഴൊന്നും മോള് ഇവിടെ ഇല്ലായിരുന്നു. ഇവിടത്തെ മോൻ വന്നില്ലേ..."

"ഇല്ല... ഞാനും മോനും മാത്രമേ വന്നുള്ളൂ..."

"പോവാറായോ... "
"ഇല്ല ഒരുമാസം കൂടെ കാണും..."

"ഞാൻ വെള്ളം എടുത്തിട്ട് വരാം... എന്ന് പറഞ്ഞു ഉമ്മ അടുക്കളയിലേക്ക് കയറി പുറകെ ഞാനും... "എന്തിനാ ഉമ്മ അവരെ കൊണ്ട് അവിടെ വൃത്തിയാക്കിപ്പിക്കുന്നെ... പാവം... "ഞാൻ പറഞ്ഞിട്ട് കേൾക്കണ്ടെ.... രാവിലെ വന്നതാ.. എന്തെങ്കിലും സഹായിക്കണം എന്നും പറഞ്ഞു. ഞാൻ നൂറുരൂപ കൊടുത്തു പക്ഷെ വെറുതെ വേണ്ട എന്തെങ്കിലും ചെയ്തു തരാമെന്നും പറഞ്ഞു നിർബന്ധത്തിൽ ചെയ്യുന്നതാണ്‌..."

"കണ്ടോ നിങ്ങളെ കൊണ്ട് ഞാനാ ഇതൊക്കെ ചെയ്യിപ്പിക്കുന്നത് എന്നും പറഞ്ഞു ഇവളെന്നെ വഴക്ക് പറയുവാ...

ഉമ്മ വെള്ളം കൊണ്ട് കൊടുത്തു കൊണ്ട് പറഞ്ഞു...

"ഉമ്മ വേണ്ടെന്ന് പറഞ്ഞതാ മോളെ... ഞാനായിട്ട് ചെയ്യുന്നതാണ്‌... വെറുതെ പൈസ വാങ്ങി കഴിച്ചു ശീലമില്ല... അതാ... എനിക്ക് സന്തോഷമേ ഉള്ളൂ... എന്നെകൊണ്ട്‌ ആവുന്നത് ചെയ്യും അത്രയേ ഉള്ളൂ...
ഞാൻ ചിരിച്ചുകൊണ്ട് അകത്തേയ്ക്ക് പോയി.

ഞാൻ ഹാളിൽ ചെന്നപ്പോൾ മുൻവശത്തെ ഡോറിൽ ചാരി നിന്ന് ഒരു കുട്ടി അകത്തേയ്ക്ക് നോക്കി നിൽക്കുന്നു. ഞാൻ അടുത്തേയ്ക്ക് ചെന്നപ്പോൾ അവൻ പുറകുവശത്തേയ്ക്ക് ഓടി.

ഞാനും അവനു പുറകെ പോയി... അവൻ ആ അമ്മൂമ്മയുടെ അടുത്തേയ്ക്ക് ഓടിപ്പോയി.

"അതാരാ ഉമ്മാ... ആ കുട്ടി..."

"അത് അവരുടെ ചെറുകുട്ടിയാ.... അവരുടെ കൂടെ വന്നതാ..."

ഞാൻ അങ്ങോട്ട് ചെന്ന് അവനെ വിളിച്ചു...

എന്നെ കണ്ടപ്പോൾ അവൻ അവരുടെ പുറകിൽ ഒളിച്ചു.

"ഇങ്ങ് വന്നേ ചോദിക്കട്ടെ..."

"ചെല്ല്... മാമി വിളിക്കുവല്ലേ..."

അവൻ മടിച്ചു നിൽക്കുന്നത് കണ്ട്‌ ആ അമ്മൂമ്മ അവനോട് പറഞ്ഞു...

മടിച്ചു മടിച്ചു അവൻ എന്റടുത്തേയ്ക്ക് വന്നു.

എല്ലും തോലുമായ ഒരു കുട്ടി... എണ്ണയില്ലാതെ പാറിപ്പറന്നു കിടക്കുന്ന തലമുടി... ബട്ടൻസ് എല്ലാം പോയി പിന്നുകൊണ്ട് രണ്ടറ്റവും കോർത്ത്‌ ഇട്ടിരിക്കുന്ന ഷർട്ട്. മുട്ടിനു മുകളിൽ നിൽക്കുന്ന ഒരു നിക്കർ.. ഇതായിരുന്നു അവന്റെ രൂപം.

"മോന്റെ പേരെന്താ..." ഞാൻ അവനോട് ചോദിച്ചു...

"വിഷ്ണു..."

"വിഷ്ണു വന്നേ നമുക്ക് അങ്ങോട്ട്‌ പോകാം... ഇവിടെ ഒക്കെ ഭയങ്കര കൊതുക് അല്ലേ... അത് കടിച്ചാൽ പനി വരും.. "

ഞാൻ അവന്റെ കൈയും പിടിച്ചു നടന്നു.

"വിഷ്ണു എന്താ ചെരുപ്പ് ഇടാതെ അവിടെ ഇറങ്ങിയത്... കാലിൽ എന്തെങ്കിലും കൊള്ളില്ലേ... "

"എനിക്ക് ചെരുപ്പ് ഇല്ല..."

അവൻ അത് പറഞ്ഞപ്പോൾ എന്റെ കണ്ണുകൾ ഷൂ റാക്കിൽ നിറഞ്ഞിരിക്കുന്ന മോന്റെ ചെരുപ്പുകളിലേയ്ക്ക് ആണ് നീണ്ടത്... ഇന്റർലോക്ക് ഇട്ട തറയിൽ ഇറങ്ങുമ്പോൾ പോലും ചെരുപ്പിടാതെ ഇറങ്ങിയാൽ വഴക്ക് പറയുന്നത് ഓർത്ത്‌ എനിക്ക് എന്നോട് തന്നെ പുച്ഛം തോന്നി...

"വിഷ്ണു പഠിക്കാൻ പോകുന്നില്ലേ..."

"ഇല്ല അടുത്ത വർഷം മുതൽ സ്കൂളിൽ വിടാമെന്ന് അമ്മൂമ്മ പറഞ്ഞിട്ടുണ്ട്..."

"വിഷ്ണുവിന് എത്ര വയസ്സായി... "

"നാല്..."

"ഉം..."

ഞാൻ അവനെയും കൊണ്ട് ഹാളിലേക്ക് പോയി...

"വിഷ്ണു വല്ലതും കഴിച്ചോ..."

"വെള്ളം കുടിച്ചു... വീട്ടിൽ പോകുമ്പോൾ അമ്മാമ്മ ചോറ് വാങ്ങി തരും..."

"അപ്പോ നീ രാവിലെ ഒന്നും കഴിച്ചില്ലേ..."

"ഇല്ല.... അമ്മാമ്മ പറഞ്ഞു ഉച്ചയ്ക്ക് ചോറും മീൻപൊരിച്ചതും വാങ്ങി തരാമെന്ന്...

ഞാൻ അടുക്കളയിൽ പോയി രണ്ടു അപ്പവും മുട്ടകറിയും എടുത്തുകൊണ്ട് വന്ന് അവനു കൊടുത്തു...

"എനിക്ക് വേണ്ട മാമി.... ആരുടെ കൈയിൽ നിന്നും ഒന്നും വാങ്ങി കഴിക്കരുതെന്നാ അമ്മാമ്മ പറഞ്ഞത്... "

"അമ്മാമ്മയുടെ അടുത്ത് ഞാൻ പറഞ്ഞോളാം വിഷ്ണു ഇപ്പോ ഇത് കഴിക്ക്..."

നിർബന്ധിച്ചു അത് അവന്റെ കൈയിൽ കൊടുത്തിട്ട് ഞാൻ അമ്മൂമ്മയുടെ അടുത്തേയ്ക്ക് പോയി...

"അമ്മേ.... ഒന്നിങ്ങു വന്നേ... "

കൈയ്യിൽ ഇരുന്ന മൺവെട്ടി അവിടെ ഇട്ട് മുണ്ടിന്റെ തുണ്ടിൽ കൈയും തുടച്ചു അവർ എന്റടുത്തേയ്ക്ക് വന്നു.

"എന്താ മോളെ....

"അമ്മ വല്ലതും കഴിച്ചാരുന്നോ..."

അവർ ഒന്നും മിണ്ടിയില്ല... ഞാൻ ഒന്നൂടെ ചോദിച്ചപ്പോൾ തലതാഴ്ത്തി...
ഒരു മൂളലിൽ ഉത്തരം ഒതുക്കി.

"എന്തിനാ കള്ളം പറയുന്നേ.... നിങ്ങൾ രണ്ട് പേരും ഒന്നും കഴിച്ചില്ല എന്ന് മോൻ പറഞ്ഞല്ലോ... "

"അത് മോളെ...."

"ഒന്നും പറയണ്ട... അമ്മ അതൊക്കെ അവിടെ ഇട്ടിട്ട് കൈയും കാലും ഒക്കെ കഴുകിയിട്ട് വന്നേ..."

"എന്തിനാ മോളെ... എനിക്ക് ഒന്നും വേണ്ട..."

"അമ്മ ഇങ്ങോട്ട് ഒന്നും പറയണ്ട... വേഗം കൈയൊക്കെ കഴുകിയിട്ട് വരൂ...

ഞാൻ അകത്തേയ്ക്ക് പോയി ഉമ്മയോട് കാര്യം പറഞ്ഞു...

"എന്റെ പടച്ചോനേ... വല്ലതും കഴിച്ചോ എന്ന് ചോദിച്ചപ്പോൾ കഴിച്ചെന്നാണ് അവർ പറഞ്ഞത്... നീ ഇങ്ങോട്ട് വിളിക്ക് അവരെ..."

"ഞാൻ വിളിച്ചുമ്മാ... ഇരുന്ന അപ്പം ഞാൻ അവന് കൊടുത്തു."

"ഫ്രിഡ്ജിൽ മാവ് ഉണ്ട്... നീ അത് ഇങ്ങ് എടുത്തേ..." ഉമ്മ പറഞ്ഞു...

ഉമ്മാ അപ്പം ചുടാൻ തുടങ്ങിയപ്പോഴേയ്ക്കും ആ അമ്മ കൈയ്യൊക്കെ കഴുകി അങ്ങോട്ട്‌ വന്നു.

"അയ്യോ എനിക്ക് വേണ്ടി ഉണ്ടാക്കണ്ട... ഉണ്ടെങ്കിൽ മോന് എന്തെങ്കിലും കൊടുത്താൽ മതി..."

"അവന് ഞാൻ കൊടുത്തു... ആന്റി ഇങ്ങോട്ട് കയറി വരീൻ..."

"വേണ്ട മോളെ... ഇനി ഒന്നും ഉണ്ടാക്കണ്ട... നോമ്പും പിടിച്ചു നിങ്ങൾ കഷ്ടപ്പെടണ്ട..."

"നമുക്ക് ഒരു കഷ്ടപ്പാടും ഇല്ല... ഞാൻ നേരത്തെ ചോദിച്ചപ്പോൾ നിങ്ങൾ എന്തിനാ കള്ളം പറഞ്ഞേ... "ഉമ്മ അവരോടു ചോദിച്ചു...

"അത് മോളെ... നീ പൈസ തന്നല്ലോ... പോകുമ്പോൾ അവന് വല്ലതും വാങ്ങി കൊടുക്കാം എന്ന് കരുതി..."

"അമ്മ ഇങ്ങോട്ട് കയറി വന്നേ..."

"വേണ്ട മോളെ ഞാൻ ഇവിടെ ഇരുന്നോളാം എന്നും പറഞ്ഞു അവർ അവിടെ അടുക്കളയുടെ പടിയിൽ ഇരിക്കാൻ ഒരുങ്ങി..."

വേണ്ട അവിടെ ഇരിക്കണ്ട എന്നും പറഞ്ഞു ഉമ്മ ആന്റിയെ പിടിച്ചു കൊണ്ട് പോയി ഡൈനിങ്ങ്‌ ടേബിളിൽ ഇരുത്തി. ഞാൻ അപ്പവും കറിയും കൊണ്ട് പോയി ആ അമ്മയ്ക്ക് കൊടുത്തു. ഓരോ ഗ്ലാസ്‌ ചായയും അവർക്ക് കൊടുത്തു. അപ്പോഴേയ്ക്കും അവൻ കഴിച്ചു തീർന്നിരുന്നു.. നിറകണ്ണുകളോടെ ആ അമ്മ അവനെ നോക്കുന്നത് കണ്ടപ്പോൾ ശരിക്കും സങ്കടം വന്നു. അവന്റെ ചായ ചൂടാറ്റി അവന് കൊടുത്തു. അതും കുടിച്ച് അവൻ ഹാളിൽ കിടന്ന ഒരു ബോളും എടുത്ത് പുറത്തേയ്ക്ക് പോയി.

"ഇവൻ ഒരാളെ ഉള്ളോ... ഞാൻ ആ അമ്മയുടെ അടുത്ത് ചോദിച്ചു..."

"ഓ... മോളെ ഒരാളെ ഉള്ളൂ... "

"ഇവന്റെ അമ്മയും അച്ഛനുമോ...."

നിറഞ്ഞു നിന്ന കണ്ണീർ തുള്ളികൾ ആ കണ്ണിൽ നിന്നും തുളുമ്പി ഒഴുകി...

"ക്ഷമിക്കണം... ഞാൻ അറിയാതെ..."

"അവന് ആരുമില്ല മോളെ അവന്റെ അച്ഛനും അമ്മയും എല്ലാം ഞാൻ തന്നെ... ഇവനെ പ്രസവിച്ചു ആറുമാസം കഴിഞ്ഞപ്പോൾ ഒരു പനി വന്നു ഞങ്ങളെ വിട്ട് പോയതാ എന്റെ മോള്... അവൾ മരിച്ചു രണ്ട് മാസം കഴിയും മുന്നേ കൂലിപ്പണിക്ക് വരുമായിരുന്ന ഏതോ പെണ്ണുമായി നാട് വിട്ടതാ ഇവന്റെ അച്ഛൻ... പിന്നെ തിരിഞ്ഞ് നോക്കിയിട്ടില്ല. എന്തെങ്കിലും വീട്ട് ജോലികൾ ഒക്കെ ചെയ്തു കൊടുത്തു കിട്ടുന്ന കാശ് കൊണ്ടാണ് അവനെ ഇത്രയും ആക്കിയത്. പ്രായം കൂടിയത് കാരണം ആരും ഇപ്പൊ ജോലിക്ക് വിളിക്കാറുമില്ല... പിന്നെ ആരെങ്കിലും തരുന്ന കാശ് കൊണ്ടാണ് ഓരോ ദിവസവും കടന്നു പോകുന്നത്..."

"അവിടെ ആ മുക്കിലെ വീട്ടിൽ രാവിലെ പോയി മുറ്റവും വൃത്തിയാക്കി ചന്തയിൽ പോയി സാധനങ്ങളും വാങ്ങി കൊണ്ട് കൊടുക്കുമ്പോൾ അവർ അമ്പതുരൂപ തരും അതും കൊണ്ട് പോയി ഒരു ഊണ് വാങ്ങും. രാവിലെയും വൈകിട്ടുമായി ഞാനും അവനും കൂടെ അത് കഴിക്കും. രണ്ട് ദിവസമായി അവർ എവിടെയോ പോയി. അതും കിട്ടിയില്ല. കഴിഞ്ഞ ദിവസം അമ്പലത്തിൽ കല്യാണം ഉണ്ടായിരുന്നു അവിടെ പോയി ഭക്ഷണം കഴിച്ചു. അവിടുന്ന് കിട്ടിയ രണ്ട് പഴം മാത്രമേ ഇന്നലെ ഉണ്ടായിരുന്നുള്ളൂ... ഇന്നും എങ്ങനെ അതിനെ പട്ടിണിക്കിടും എന്ന് കരുതിയാണ് ഞാൻ ഇങ്ങോട്ട് വന്നേ..."

എന്റെ കണ്ണുകൾ നിറഞ്ഞൊഴുകാൻ തുടങ്ങിയിരുന്നു. കരച്ചിൽ പിടിച്ചു നിർത്താൻ കഴിയാതെ ഉമ്മ അടുക്കളയിലേക്ക് പോയി.

"എന്റെ പൊന്നുമോൻ പാവമാണ് മോളെ... വിശക്കുന്നെന്ന് എന്റെടുത്ത് ഇതുവരെയും പറഞ്ഞിട്ടില്ല. വീട്ടിനടുത്തുള്ള പൈപ്പിൽ പോയി അവൻ വെള്ളം കുടിച്ച് വിശപ്പടക്കുന്നത് കണ്ട്‌ സഹിക്കാൻ കഴിയാതെ ആണ് ഞാൻ അവനെയും കൊണ്ട് വന്നത്. എന്റെ മോൻ എത്ര ദിവസം പട്ടിണി കിടക്കും മോളെ..."

ഇതും പറഞ്ഞു അവർ പൊട്ടി കരയാൻ തുടങ്ങി...

"എന്റെ മോൻ ഒരു പരിധി എത്തിയിട്ടേ എന്റെ ജീവൻ എടുക്കാവോളെ... എന്ന ഒരു അപേക്ഷയെ എനിക്ക് സർവേശ്വരനോട്‌ ഉള്ളൂ... " "എല്ലാം ശരിയാകും... ആന്റി കരയാതെ ഇത് കഴിക്ക്..." എന്നും പറഞ്ഞു ഞാൻ അവന്റടുത്തേയ്ക്ക് പോയി... ആ കരച്ചിൽ കാണാനുള്ള ശേഷി എനിക്ക് ഇല്ലായിരുന്നു എന്നതാണ് സത്യം...

ഞാൻ ചെല്ലുമ്പോൾ ബോൾ തട്ടി കളിക്കുവായിരുന്നു അവൻ..

"വിഷ്ണു..."

ഞാൻ വിളിച്ചപ്പോൾ ഒട്ടും ആശങ്കപ്പെടാതെ അവൻ എന്റടുത്തേയ്ക്ക് വന്നു.

"വിഷ്ണു ഇങ്ങ് വന്നേ..."

ഞാൻ അവനെ വിളിച്ചു കൊണ്ട് പോയി മോന്റെ കളിപ്പാട്ടങ്ങളിൽ നിന്നും രണ്ട് മൂന്നെണ്ണം എടുത്ത് കൊടുത്തു. മടിച്ചു നിന്ന അവനെ കൈയിൽ ഞാൻ അത് വെച്ചു കൊടുത്തു.

"വേണ്ട മാമി... അമ്മാമ്മ വഴക്ക് പറയും .."

"അമ്മാമ്മ ഒന്നും പറയില്ല.. "

അവൻ അതും കൊണ്ട് ആ അമ്മയുടെ അടുത്ത് പോയി...

"അമ്മാമ്മ ആ മാമി തന്നതാ...."

"നീ അത് തിരിച്ചു കൊടുക്ക് മോനെ..."

"തിരിച്ചു വാങ്ങിക്കാനല്ല ഞാൻ അവന് കൊടുത്തത്... അമ്മ വഴക്ക് പറയണ്ട അത് അവൻ എടുത്തോട്ടെ... നീ പോയി കളിച്ചോ മോനെ.... "

അവൻ അതും കൊണ്ട് സിറ്റൗട്ടിൽ പോയിരുന്നു കളിച്ചു. ആ അമ്മ പാത്രവും എടുത്ത് അടുക്കളയിലേക്ക് പോയി... ഉമ്മ അത് വാങ്ങി കഴുകി വെച്ചു... അവർ വെളിയിൽ ഇറങ്ങി വീണ്ടും ജോലി ചെയ്യാൻ പോയി.

ഞാൻ അലമാര തുറന്ന് മോന് പെരുന്നാൾ പ്രമാണിച്ച് കിട്ടിയ പുതിയ ഉടുപ്പുകളിൽ നിന്നും രണ്ട് പാന്റും രണ്ട് ഷർട്ടും എടുത്ത് അവന് പുതിയതായി വാങ്ങിയ ചെരുപ്പും എടുത്ത് ഉമ്മാടടുത്തേയ്ക്ക് ചെന്നു.

"ഉമ്മാ ഞാൻ ഇത് അവന് കൊടുത്തോട്ടെ..."

"എന്റെ പൊന്നുമോളെ ഞാൻ ഇത് നിന്റെടുത്ത് അങ്ങോട്ട് പറയാനിരിക്കുവായിരുന്നു.. ദാ ഇതും കൂടെ കൊടുക്ക് മോളെ..."

എന്നും പറഞ്ഞു കുറച്ചു പൈസ ഉമ്മ എന്റെ കൈയിൽ തന്നു.

"ഇത് അയ്യായിരം രൂപ ഉണ്ട്... പള്ളിയിൽ കൊടുക്കാൻ വെച്ചിരുന്നതാണ്... നീ ഇതും കൂടെ അവർക്ക് കൊടുക്ക്... കഴിക്കാൻ ആഹാരം ഇല്ലാതെ കഷ്ടപ്പെടുന്നവർക്ക് ആണ് ആദ്യം കൊടുക്കേണ്ടത്... ആ പുണ്യം മതി നമുക്ക്... പടച്ചോനും അത് തന്നെയാ പറഞ്ഞേക്കുന്നത്.. "

ഞാൻ അതെല്ലാം ഒരു കവറിൽ ആക്കി അവിടെ വെച്ചിട്ട് ആ അമ്മയെ വിളിച്ചു കൊണ്ട് വന്നു.. എന്നിട്ട് ആ കവർ ആ അമ്മയുടെ കൈയ്യിൽ കൊടുത്തു..

"എന്താ മോളെ ഇത്..."

"ഇത് അവന് രണ്ട് ഡ്രെസ്സും ഒരു ചെരുപ്പുമാണ്... വേണ്ടെന്ന് മാത്രം പറയരുത്.. അമ്മയുടെ മകൾ തരുന്നതാണെന്ന് കരുതിയാൽ മതി..."

ആ അമ്മയുടെ കണ്ണുകൾ വീണ്ടും നിറഞ്ഞൊഴുകാൻ തുടങ്ങിയിരുന്നു..

"അമ്മ കരയണ്ട.... എന്തിനാ കരയുന്നേ.... ദാ ഇത് കുറച്ചു പൈസ ഉണ്ട്.. വീട്ടിലേക്ക് സാധനങ്ങൾ ഒക്കെ വാങ്ങിച്ചു മോന് എന്തെങ്കിലും ഒക്കെ വെച്ചു കൊടുക്കണം... "

ആ അമ്മ അതും വാങ്ങി അവിടെ ഇരുന്ന് കരയാൻ തുടങ്ങി... ഉമ്മ അവരെ പിടിച്ചു എഴുന്നേൽപ്പിച്ചു.

"കരയണ്ട... നമുക്ക് ഉള്ളതിൽ ഒരു പങ്ക് കഷ്ടപ്പെടുന്നവർക്ക് കൊടുക്കേണ്ടത് നമ്മുടെ കടമയാണ് അത് വാങ്ങിക്കേണ്ട അർഹത നിങ്ങൾക്കും ഉണ്ട്. വിഷമിക്കണ്ട..."

"നിങ്ങളുടെ നല്ല മനസ്സിന് നല്ലതേ ഉണ്ടാകൂ..."

"മോനെയും കൂട്ടി പെരുന്നാളിന് വരണം... അത് മാത്രമല്ല എന്ത് ആവിശ്യമുണ്ടെങ്കിലും വരണം... " ഉമ്മ പറഞ്ഞു....

അവർ അതുംകൊണ്ട് അവന്റടുത്തേയ്ക്ക് ചെന്നു അവനെ കെട്ടിപിടിച്ചു അവന്റെ നെറുകയിൽ ഒരു മുത്തം കൊടുത്തു..

അവർ അവനുമായി പോകാൻ ഇറങ്ങിയപ്പോൾ ഗേറ്റിനടുത്ത് എത്തിയ അവൻ തിരിച്ചു വന്ന് എന്റെ കൈ പിടിച്ചു മുത്തിയപ്പോൾ ആയിരം പെരുന്നാൾ ഒന്നിച്ചു വന്ന സന്തോഷമാണ് തോന്നിയത്.

"പെരുന്നാളിന് പുതിയ ഉടുപ്പുമിട്ട് രാവിലെ ഇങ്ങ് വരണം കേട്ടോ... "
എന്നും പറഞ്ഞു ഞാൻ അവന്റെ നെറ്റിയിൽ ഉമ്മ വെച്ചപ്പോൾ അവന്റെ കണ്ണുകൾ നിറഞ്ഞൊഴുകുന്നുണ്ടായിരുന്നു. അവൻ നടന്നകലുന്നതും നോക്കി കുറേ നേരം ഞാൻ ഗേറ്റിന് മുന്നിൽ നിന്നു.... നാല് വയസ്സുകാരന്റെ പക്വതയല്ല അവനിൽ പ്രകടമായത് പതിനാല് വയസ്സുകാരന്റെ പക്വതയാണ് അവന്റെ കണ്ണുനീരിൽ എനിക്ക് കാണാൻ കഴിഞ്ഞത്...
************

വലത് കൈ ചെയ്യുന്നത് ഇടതു കൈ അറിയാൻ പാടില്ല എന്ന് വിശ്വസിക്കുന്ന ആള് തന്നെയാണ് ഞാനും. ഞാൻ ഇവിടെ ഇത് പറഞ്ഞത് കൊണ്ട് ആ ചെയ്ത നന്മയുടെ പുണ്യം എല്ലാം എനിക്ക് നഷ്ടപ്പെടും. എന്നാലും ഈ എഴുത്ത് വായിച്ചു ഒരാളെങ്കിലും മാറി ചിന്തിച്ചാൽ അത് മതി എനിക്ക്.. വില കൂടിയ ഭക്ഷണവും ഡ്രസ്സ് എടുക്കാനും, അടിച്ചുപൊളിക്കാനും നമ്മൾ മാറ്റി വയ്ക്കുന്ന പണത്തിന്റെ ഒരംശം ഒരു നേരം ഭക്ഷണം കഴിക്കാൻ ഇല്ലാത്തവന് വേണ്ടി മാറ്റി വെയ്ക്കുക.
#കടപ്പാട്

വിദ്യ എന്ന അഭ്യാസം

2017-06-01T11:30:00.000-07:00

സ്കൂളുകൾ തുറന്നു, ഒട്ടു മിക്ക സ്കൂളുകളുടെ മുമ്പിലും രക്ഷിതാക്കളുടെയും അവർ വന്ന വാഹനങ്ങളുടെയും തിരക്കായിരുന്നു.സ്വന്തം മക്കളുടെ പഠനത്തിൽ ഉള്ള അതീവ സൂക്ഷ്മതയും ശ്രദ്ധയും തന്നെയാണ് കാര്യം.ഏതാനും വര്ഷങ്ങള്ക്കു മുൻപ് വരെ പ്രവേശന ദിവസം സ്കൂളുകൾക്ക് മുമ്പിൽ ഇത്തരം ഒരു അവസ്ഥയെ ഇല്ലായിരുന്നു.സ്കൂൾ ആരംഭിക്കുന്ന ദിവസം അവിടെ തന്നെ പഠിക്കുന്ന സഹോദരങ്ങൾക്ക് ഒപ്പമോ അയൽവാസി കുട്ടികൾക്ക്‌ ഒപ്പമോ ആയിരിക്കും സ്കൂളിൽ എത്തുക.ഏതു തരത്തിലുള്ള വീട്ടുകാരും സ്കൂളിലെ പോക്ക് വരവോ അവിടത്തെ മറ്റു വിഷയങ്ങളിലോ ഇന്നത്തെ പോലെ ശ്രദ്ധാലുക്കൾ ആയിരുന്നില്ല.അതിനു കാരണം ഇന്നത്തെ പോലെ രക്ഷിതാക്കൾ തമ്മിലുള്ള മത്സരം അന്നില്ല എന്നതായിരിക്കാം.തന്റെ കുട്ടിയെ മുന്നിലെത്തിക്കാനുള്ള നെട്ടോട്ടത്തിലാണ് ഇന്നത്തെ രക്ഷിതാക്കൾ.കുട്ടികളുടെ അഭിരുജിക്കപ്പുറമാണ് ഈ ചിന്ത.പണ്ട് ഒരു PTA മീറ്റിംഗ് പറഞ്ഞാൽ ആരും വരാത്ത അവസ്ഥ ആയിരുന്നെങ്കിൽ ഇന്ന് ഓഡിറ്റോറിയം ബുക്ക് ചെയ്യേണ്ട അവസ്ഥയാണ്.PTA കമ്മിറ്റിയിൽ കേറി പറ്റാനുള്ള കടിപിടി വേറെ...എല്ലാ രംഗത്തും കച്ചവട മനസ്സ് പിടി മുറുക്കുമ്പോൾ പിന്നെ ഇങ്ങനെയൊക്കെ ആയില്ലെങ്കിൽ മാത്രം അത്ഭുതപ്പെട്ടാൽ മതി

വിശുദ്ധ കഅബ

2017-05-17T06:47:00.002-07:00

#അറിയാത്തവർക്കായി_ഷെയർ
പരിശുദ്ധ കഅബയെ കുറിച്ച് ഒരു ലഘു പഠനം.

കഅ്ബ എന്ന വാക്കിനര്‍ത്ഥം എന്ത് ?

ഉ– സമചതുര രൂപം

? ഭൂമിയിലെ ആദ്യത്തെ പള്ളി ഏത് ?

ഉ– കഅ്ബ

? കഅ്ബ ആദ്യമായി നിര്‍മ്മിച്ചതാര് ?

ഉ– മലക്കുകള്‍

? കഅ്ബാലയം എന്തിന്റെ മാതൃകയിലാണ്?

ഉ– ആകാശത്ത് മലക്കുകള്‍ ത്വവാഫ് ചെയ്യുന്ന ബൈത്തുല്‍ മഅ്മൂറിന്റെ മാതൃകയില്‍

? പിന്നീട് കഅ്ബ പണിതത് ആര്?

ഉ– ആദം(അ)

? ആദമി(അ)നു ശേഷം കഅ്ബ പണിതത്?

ഉ– ഇബ്‌റാഹീം(അ), ഇസ്മാഈല്‍(അ) എന്നിവര്‍

? പുനര്‍നിര്‍മ്മാണത്തിന് വേണ്ടി കഅ്ബയുടെ ചുമര്‍ പൊളിച്ചുതുടങ്ങിയത് ആര്?

ഉ– വലീദ് ബ്‌നു മുഗീറ

? ഇബ്‌റാഹീം(അ) നിര്‍മ്മിച്ച കഅ്ബയുടെ അടിത്തറ ഖുറൈശികള്‍ പൂര്‍ത്തിയാക്കാഞ്ഞത് എന്ത്‌കൊണ്ട്?

ഉ– കഅ്ബാ പുനര്‍നിര്‍മ്മാണത്തിന് സംഭരിച്ച ‘ശുദ്ധസമ്പത്ത്’ തീര്‍ന്ന കാരണത്താല്‍

? എടുപ്പ് നിര്‍മ്മിക്കാത്ത കഅ്ബയുടെ ആ ഭാഗത്തിന് എന്താണ് പേര്?

ഉ– ഹഥ്വീം

? കഅ്ബയുടെ മേല്‍ക്കൂരക്കുള്ള മരം കൊണ്ടുവന്നത് എവിടെ നിന്നാണ്?

ഉ– റോമന്‍ കച്ചവടക്കാരുടെ ഒരു തകര്‍ന്ന കപ്പല്‍ ജിദ്ദ തുറമുഖത്തുണ്ടായിരുന്നു. അതിന്റെ മരം വിലക്കു വാങ്ങി.

? ഏത് ആശാരിയാണ് കഅ്ബയുടെ മേല്‍ക്കുര നിര്‍മ്മാണത്തിന് നേതൃത്വം നല്‍കിയത്?

ഉ– റോമന്‍ കപ്പലിലുണ്ടായിരുന്ന ബാഖൂം എന്നു പേരുള്ള ആശാരി

? കഅ്ബയുടെ നീളവും വീതിയും?

ഉ– 40 അടി നീളവും 35 അടി വീതിയും 50 അടി ഉയരവുമുള്ള ചതുരരൂപം.

? കഅ്ബയുടെ ഉയരം മീറ്റര്‍ കണക്കില്‍ എത്ര?

ഉ– 15 മീറ്റര്‍ ഉയരം

? കഅ്ബയുടെ വാതില്‍ എത്ര ഉയരത്തിലാണ് ഖുറൈശികള്‍ സ്ഥാപിച്ചത്?

ഉ– രണ്ടര മീറ്റര്‍ ഉയരത്തില്‍

? കഅ്ബാലയത്തിന്റെ പുനര്‍നിര്‍മ്മാണം നടക്കുമ്പോള്‍ തിരുനബി(സ) കല്ലു ചുമന്ന് കൊണ്ടുവന്നിരുന്നത് എങ്ങനെ?

ഉ– നഗ്നമായ തന്റെ ചുമലില്‍ വെച്ച്

? മറ്റു ചെറുപ്പക്കാരെപ്പോലെ ഉടുതുണിയുരിഞ്ഞ് ചുമലില്‍ വെക്കാന്‍ പറഞ്ഞ് പിതൃവ്യന്‍ അബ്ബാസ്(റ) തിരുനബി(സ)യുടെ തുണി അഴിക്കാന്‍ ശ്രമിച്ചപ്പോള്‍ എന്ത് സംഭവിച്ചു?

ഉ– തിരുനബി(സ) ബോധരഹിതനായി വീണു.

? ഹജറുല്‍ അസ്‌വദ് സ്ഥാപിക്കുന്നതിനെ ചൊല്ലിയുള്ള തര്‍ക്കം ഖുറൈശികള്‍ പരിഹരിച്ചത് എങ്ങനെ?

ഉ– നാളെ രാവിലെ ആദ്യം കഅ്ബയിലെത്തുന്നയാളെ അതിനു ചുമതലപ്പെടുത്താം എന്ന ആശയത്തില്‍.

? ആരാണ് ഈ ആശയം മുന്നോട്ട് വെച്ചത്?

ഉ– ഹുദൈഫ എന്ന് പേരുള്ള അബൂ ഉമയ്യ. (ഇദ്ദേഹം തിരുനബി(സ)യുടെ ഭാര്യ ഉമ്മുസലമ(റ)യുടെ പിതാവാണ്)

? ബാബുബനീശൈബ (ഇന്നത്തെ ബാബുസ്സലാം)യിലൂടെ പിറ്റേന്ന് ആദ്യമായി കഅ്ബയില്‍ പ്രവേശിച്ചതാര്?

ഉ– അല്‍ അമീന്‍

? ഹജറുല്‍ അസ്‌വദ് തിരുനബി(സ) സ്ഥാപിച്ചതെങ്ങനെ?

ഉ– ഒരു തുണി വിരിച്ച് അതില്‍ ഹജറുല്‍ അസ്‌വദ് വെച്ചു. ഖുറൈശികളിലെ ഓരോ കുടുംബത്തിലെയും നേതാക്കളോട് തുണിപിടിച്ച് ഉയര്‍ത്താന്‍ പറഞ്ഞു. അവരെല്ലാവരും ഹജറുല്‍ അസ്‌വദുള്ള തുണി ഉയര്‍ത്തിയപ്പോള്‍ തിരുനബി(സ) ഹജറുല്‍ അസ്‌വദ് അതിന്റെ യഥാസ്ഥാനത്ത് സ്ഥാപിച്ചു.

?കഅ്ബയുടെ പേരുകള്‍ ഏതെല്ലാം?

ഉ– 1. കഅ്ബ 2. അല്‍ബൈത്ത് 3. ബൈതുല്ലാഹ് 4. അല്‍ബൈത്തുല്‍ ഹറാം 5. അല്‍ ബൈതുല്‍ അതീഖ് 6. ഖിബ്‌ല.

? കഅ്ബയുടെ പുനര്‍നിര്‍മ്മാണം എത്ര തവണ നടന്നിട്ടുണ്ട്?

ഉ– പ്രധാനമായും 12 തവണ.

? ആരെല്ലാമാണ് പുനര്‍നിര്‍മ്മിച്ചത്?

ഉ– 1. മലക്കുകള്‍ 2. ആദം(അ) 3. ശീസ്(അ) 4. ഇബ്‌റാഹീം(അ) 5. അമാലിഖഃ 6. ജുര്‍ഹൂം 7. ഖുസ്വയ്യ്ബ്‌നു കിലാബ് 8. ഖുറൈശ് 9. അബ്ദുല്ലാഹിബ്‌നു സുബൈര്‍(റ) 10. ഹജ്ജാജുബ്‌നു യൂസുഫ് 11. സുല്‍ത്വാന്‍ മുറാദ് അല്‍ ഉസ്മാനി 12. ഖാദിമുല്‍ ഹറമൈന്‍ ഫഹദ്ബ്‌നു അബ്ദില്‍ അസീസ്.

? അബ്ദുല്ലാഹിബ്‌നു സുബൈര്‍(റ)ന്റെ പുനര്‍നിര്‍മ്മാണം നടന്നതെന്ന്?

ഉ– ഹിജ്‌റ 65ല്‍.

? ഹജ്ജാജ്ബ്‌നു യൂസുഫിന്റെ പുനര്‍നിര്‍മ്മാണം?

ഉ– ഹിജ്‌റ 74ല്‍.

? സുല്‍ത്താന്‍ മുറാദുല്‍ ഉസ്മാനിയുടെ പുനര്‍നിര്‍മ്മാണം?

ഉ– ഹിജ്‌റ 1040ല്‍.

? ഫഹദ് രാജാവിന്റെ പുനര്‍നിര്‍മ്മാണം?

ഉ– ഹിജ്‌റ 1417ല്‍.

? ഖുറൈശികള്‍ കഅ്ബ പുനര്‍നിര്‍മ്മിച്ചതെന്ന്?

ഉ– ഹിജ്‌റക്ക് 18 കൊല്ലം മുമ്പ്.

? ആദ്യകാലത്ത് കഅ്ബക്ക് പുറത്തേക്ക് എത്ര വാതിലുകളുണ്ടായിരുന്നു?

ഉ– രണ്ട്.

? ഇപ്പോള്‍ കഅ്ബക്ക് പുറത്തേക്ക് എത്ര വാതിലുകളുണ്ട്?

ഉ– ഒന്ന്.

? ആരാണ് കഅ്ബയുടെ ഒരു വാതില്‍ അടച്ചത്?

ഉ– ഖുറൈശികള്‍.

? ഖുറൈശികള്‍ കഅ്ബക്ക് മേല്‍ക്കുര പണിയാനുള്ള കാരണം?

ഉ– ചില കള്ളന്മാര്‍ കഅ്ബയില്‍ സൂക്ഷിച്ചിരുന്ന നിധി മോഷ്ടിച്ചു കൊണ്ടുപോയി.

ഹജറുല്‍ അസ്‌വദ്
? ഹജറുല്‍ അസ്‌വദ് എന്ന പേരിന് അര്‍ത്ഥം?

ഉ– കറുത്ത കല്ല്.

? ഹജറുല്‍ അസ്‌വദിന്റെ ഉറവിടം?

ഉ– സ്വര്‍ഗ്ഗം.

? സ്വര്‍ഗ്ഗത്തില്‍ നിന്ന് ഇറക്കുമ്പോള്‍ ഹജറുല്‍ അസ്‌വദിന്റെ നിറം എന്തായിരുന്നു?

ഉ– ശക്തമായ വെളുപ്പ്.

? വെളുത്ത കല്ലെങ്ങനെയാണ് കറുത്ത കല്ലായത്?

ഉ– ആദം സന്തതികളുടെ പാപങ്ങളുടെ പ്രതിഫലനം കൊണ്ട്.

? ഇബ്‌നു സുബൈര്‍(റ) കഅ്ബാലയം പുനര്‍നിര്‍മ്മിച്ചപ്പോള്‍ കഅ്ബയുടെ ഭിത്തിയില്‍ പതിഞ്ഞ ഭാഗം വെളുത്ത നിറത്തില്‍ കണ്ടത് ആര്?

ഉ– മുജാഹിദ്(റ).

? കഅ്ബയുടെ ചുമരില്‍ ഹജറുല്‍ അസ്‌വദ് പതിച്ചപ്പോള്‍ എത്ര കല്ലുകളുണ്ടായിരുന്നു?

ഉ– ഒന്ന് മാത്രം.

? ഇപ്പോള്‍ ഹജറുല്‍ അസ്‌വദ് എത്ര കഷ്ണങ്ങളാണ്?

ഉ– പുറംഭാഗത്ത് എട്ട് കഷ്ണങ്ങള്‍.

? ഹജറുല്‍ അസ്‌വദ് പൊട്ടിയത് എന്ന്?

ഉ– ഹിജ്‌റ 319ല്‍.

? ഹജറുല്‍ അസ്‌വദ് ആരാണ് പൊട്ടിച്ചത്?

ഉ– ഖിറാമിത്വികള്‍.

? ആരാണ് ഖിറാമിത്വികള്‍?

ഉ– അബൂത്വാഹിര്‍ അല്‍ ഖിര്‍മിത്വി എന്ന നേതാവിന്റെ കീഴില്‍ ഒരുമിച്ച് കൂടിയ ശിയാക്കള്‍.

? ശിയാക്കളിലെ ഏതു വിഭാഗക്കാരാണ് ഖിര്‍മിത്വികള്‍?

ഉ– ഇസ്മാഈലിയതുല്‍ ബാത്വിനിയ്യ വിഭാഗം.

? ഖിറാമിത്വി ചെയ്ത അതിക്രമം എന്ത്?

ഉ– കഅ്ബയില്‍ അതിക്രമിച്ച് കയറി ഹജറുല്‍ അസ്‌വദ് പുഴക്കി എടുത്തു.

? ഹജറുല്‍ അസ്‌വദ് എങ്ങോട്ടാണ് അവര്‍ കടത്തിക്കൊണ്ട് പോയത്?

ഉ– അഹ്‌സാഅ് എന്ന പ്രദേശത്തേക്ക്.

? പിന്നീട് എന്നാണ് ഹജറുല്‍ അസ്‌വദ് പുനഃസ്ഥാപിച്ചത്?

ഉ– ഹിജ്‌റ 339ല്‍.

? ഹജറുല്‍ അസ്‌വദിന്റെ പുറത്തേക്ക് കാണുന്ന ഓരോ കഷ്ണത്തിന്റെയും വലിപ്പം എത്ര?

ഉ– ഏറ്റവും വലിയതിന് ഒരു കാരക്കയുടെ വലിപ്പം മാത്രം.

? ഹജറുല്‍ അസ്‌വദിന്റെ കഷ്ണങ്ങള്‍ ഇപ്പോള്‍ ഉറപ്പിച്ചിരിക്കുന്നത് എന്തിലാണ്?

ഉ– വെള്ളികൊണ്ട് പൊതിഞ്ഞ മറ്റൊരു വലിയ കല്ലില്‍.

? ഹജറുല്‍ അസ്‌വദിന്റെ പോരിശകളില്‍ ചിലത്?

ഉ– 1. സ്വര്‍ഗ്ഗത്തിലെ കല്ല്.
2. ഇബ്‌റാഹീം നബി(അ) സ്ഥാപിച്ചത്.
3. തിരുനബി(സ)യുടെ തിരുകരങ്ങള്‍ കൊണ്ട് പുനഃസ്ഥാപിച്ചത്.
4. തിരുനബി(സ)യുടെ ചുംബനം ലഭിച്ച കല്ല്.
5. മുന്‍കാല പ്രവാചകന്മാരുടെ ചുംബനം ലഭിച്ച കല്ല്.
6. ത്വവാഫിന്റെ ആരംഭവും അവസാനവും.
7. കോടാനുകോടി സ്വാലിഹീങ്ങളുടെ ചുണ്ട് പതിഞ്ഞ കല്ല്.
8. ദുആഇന് ഉത്തരം ലഭിക്കുന്ന സ്ഥലം.
9. അഭിവാദ്യമര്‍പ്പിച്ചവര്‍ക്ക് അന്ത്യനാളില്‍ ശുപാര്‍ശ ചെയ്യുന്ന കല്ല്.

? ഹജറുല്‍ അസ്‌വദിന് ആദ്യമായി വെള്ളി കൊണ്ട് ആവരണം ഉണ്ടാക്കിയത് ആര്?

ഉ– അബ്ദുല്ലാഹിബ്‌നു സുബൈര്‍(റ).

മുല്‍തസം

? എന്താണ് മുല്‍തസം?

ഉ– ഹജറുല്‍ അസ്‌വദിന്റെയും കഅ്ബയുടെ വാതിലിന്റെയും ഇടയിലുള്ള സ്ഥലം.

? ഈ സ്ഥലത്തിന്റെ പ്രത്യേകത?

ഉ– ദുആഇന് ഇജാബത്ത് ഉറപ്പുള്ള സ്ഥലം. തിരുനബി(സ) ദുആ ചെയ്ത സ്ഥലം.

ഹഥ്വീം

? ഹഥ്വീം എന്നാലെന്ത്?

ഉ– കഅ്ബാലയത്തിന്റെ പുറത്ത് കാണുന്ന അര്‍ദ്ധവൃത്താകൃതിയിലുള്ള കെട്ട്.

? ഇത് കഅ്ബയില്‍ പെട്ടതാണോ?

ഉ– അതെ.

? എന്തുകൊണ്ടാണ് അതിനു മുകളില്‍ എടുപ്പ് നിര്‍മ്മിക്കാതിരുന്നത്?

ഉ– ഖുറൈശികളുടെ കയ്യില്‍ ‘ശുദ്ധസമ്പത്ത്’ തീര്‍ന്നുപോയതിനാല്‍.

? ഹഥ്വീമിന്റെ നീളം?

ഉ– 6 മുഴവും ഒരു ചാണും (ഏകദേശം 3 മീറ്റര്‍)

മീസാബ്

? മീസാബ് എന്നാലെന്ത്?

ഉ– കഅ്ബയുടെ മുകളില്‍ വീഴുന്ന വെള്ളം താഴേക്ക് ഒഴുക്കാനുള്ള സ്വര്‍ണ്ണപ്പാത്തിയാണ് മീസാബ്.

? മീസാബ് ആദ്യമായി സ്ഥാപിച്ചത് ആര്?

ഉ– ഖുറൈശികള്‍.

? മീസാബിന്റെ പ്രത്യേകത?

ഉ– ഇതിനു ചുവട്ടില്‍ പ്രാര്‍ത്ഥനക്ക് ഉത്തരം ലഭിക്കുന്നതാണ്.

റുക്‌നുല്‍ യമാനി

? റുക്‌നുല്‍ യമാനി എന്നാലെന്ത്?

ഉ– യമനിനോട് അഭിമുഖമായി നില്‍ക്കുന്ന കഅ്ബയുടെ മൂലയാണ് റുക്‌നുല്‍ യമാനി.

? റുക്‌നുല്‍ യമാനിയുടെ പ്രത്യേകത?

ഉ– തിരുനബി(സ) റുക്‌നുല്‍ യമാനി തൊട്ടുമുത്താറുണ്ടായിരുന്നു.

ശാദിര്‍വാന്‍

? ശാദിര്‍വാന്‍ എന്നാലെന്ത്?

ഉ– കഅ്ബയുടെ അടിത്തറയോട് ചേര്‍ത്ത് നിര്‍മ്മിച്ച ചെറിയ മതിലാണ് ശാദിര്‍വാന്‍.

? ശാദിര്‍വാനിന്റെ ഉയരം, വീതി?

ഉ– 13 സെ.മീ ഉയരം, 45 സെ.മീ വീതി.

കഅ്ബയുടെ ഉള്‍വശം

? കഅ്ബയുടെ ഉള്ളില്‍ എത്ര തൂണുകളുണ്ട്?

ഉ– മൂന്ന്.

? അവകള്‍ എന്തിനാല്‍ നിര്‍മ്മിച്ചതാണ്?

ഉ– മരം കൊണ്ട്.

? കഅ്ബയുടെ ഉള്ളില്‍ തിരുനബി(സ) നിസ്‌കരിച്ച സ്ഥലത്താണ് ……………… ഉള്ളത്.

ഉ– മിഹ്‌റാബ്.

? കഅ്ബാലയത്തിനുള്ളില്‍ ഏതു ഭാഗത്തേക്ക് തിരിഞ്ഞാണ് നിസ്‌കരിക്കേണ്ടത്?

ഉ– ഏതു ഭാഗത്തേക്ക് തിരിഞ്ഞും നിസ്‌കരിക്കാം.

കഅ്ബയുടെ വാതില്‍

? ഇബ്‌റാഹീം നബി(അ) കഅ്ബ പണിതപ്പോള്‍ എത്ര വാതിലുകളുണ്ടായിരുന്നു?

ഉ– 2 വാതിലുകള്‍.

? ഏതു ഭാഗത്തായിരുന്നു ആ വാതിലുകള്‍?

ഉ– കിഴക്കും പടിഞ്ഞാറും ഭാഗത്ത്.

? അന്നത്തെ വാതിലിന്
പാളികളുണ്ടായിരുന്നോ?

ഉ– ഇല്ല, കേവലം കവാടം മാത്രം.

? അന്ന് ജനങ്ങള്‍ ഏതു വാതിലിലൂടെ പ്രവേശിക്കും?

ഉ– കിഴക്ക് വാതിലിലൂടെ പ്രവേശിച്ച് പടിഞ്ഞാറ് വാതിലിലൂടെ പുറത്ത് കടക്കും.

? ഈ വാതിലുകള്‍ എത്ര ഉയരത്തിലായിരുന്നു?

ഉ– തറ നിരപ്പില്‍.

? കഅ്ബക്ക് അടക്കാനും തുറക്കാനും പറ്റുന്ന വാതില്‍ സ്ഥാപിച്ചതാര്?

ഉ– യമന്‍ രാജാവായിരുന്ന അസ്അദ് തുബ്ബഅ് മൂന്നാമന്‍.

? കഅ്ബയുടെ പടിഞ്ഞാറ് ഭാഗത്തെ വാതില്‍ അടച്ചത് ആര്?

ഉ– ഖുറൈശികള്‍.

? കിഴക്ക് ഭാഗത്തെ വാതില്‍ ഖുറൈശികള്‍ എത്ര ഉയര്‍ത്തി?

ഉ– രണ്ട് മിസ്വ്‌റാഅ്

? ഖുറൈശികള്‍ ഒരു വാതില്‍ അടച്ചതും അടുത്തത് ഉയര്‍ത്തിയതും എന്തിന്?

ഉ– അവര്‍ക്ക് ഇഷ്ടപ്പെട്ടവരെ കയറ്റാനും അല്ലാത്തവരെ തടയാനും.

ബാബുത്തൗബ

? ബാബുത്തൗബ എന്നാലെന്ത്?

ഉ– കഅ്ബാലയത്തിന്റെ ഉള്ളില്‍ കവാടത്തിന് വലതുഭാഗത്ത് മേല്‍ക്കൂരയിലേക്ക് കയറാനുള്ള കോണിയും കവാടവും ഉണ്ട്. ഈ കവാടത്തിനാണ് ബാബുത്തൗബ എന്ന് പറയുന്നത്. ഇത് കഅ്ബയുടെ ഉള്‍വശത്താണ്. ഇതിനും പൂട്ടും മറയും (സിതാറ) ഉണ്ട്.

? കഅ്ബയുടെ രണ്ട് വാതിലുകളും നിര്‍മ്മിച്ചിരിക്കുന്ന ലോഹം?

ഉ– തനിത്തങ്കം.

? എന്നാണ് സ്വര്‍ണ്ണവാതിലുകളുടെ പണി പൂര്‍ത്തിയായത്?

ഉ– ഹിജ്‌റ 1399ല്‍.

വിജ്ഞാനം പകര്‍ന്നു നല്‍കല്‍ ഒരു സ്വദഖയാണ് അത് കൈമാറുന്തോറും പുണ്യം വർദ്ധിചുകൊണ്ടിരിക്കും ഈ വിജ്ഞാനം നിങ്ങളുടെ സുഹൃത്തുക്കള്‍ക്ക്കൂടി ഷെയര്‍ ചെയ്യാന്‍ മറക്കരുത്. നാഥന്‍ തൌഫീഖ് നല്‍കട്ടെ - (ആമീൻ യാ റബ്ബൽ ആലമീൻ.