PANDA SHUKA ZA MKONDO WA MAISHA

KIVULI KIZITO CHA KIWEWE

2012-08-23T13:13:00.000+03:00

MTUNZI: ODHIAMBO DANYELL

Wa kwanza alikuwa Rehema, njia zetu zilikutana kwenye ufuo wa bahari hindi msimu wa upanzi wa mwaka 1999. Kidonda hicho kingali kibichi. Japo nilibaki na kovu, nahisi ni kama nazungumzia ya jana. Kwa ufupi, yake na yangu yalikuwa mafupi hata ingawa vioja vilikuwa teletele. Uhusiano wa kunoga tulilinda kwa takriban miezi miwili.

Siku moja, aliamka na kuniambia yu mja mzito. Nilimshauri akakiangamize kijusi hicho. Hii ilitokana na wingi wa uoga kuhusu majukumu ambayo yangendamana na hali hiyo. Alikubali wito japo shingo upande. Baadaye, niliarifiwa yuko hali mahututi katika katika zahanati ya Dr. Tiba wa Maradhi. Kesho yake Jioni , nilipata simu ya dharura. “harakisha mpenzio amevuja damu nyingi sana akijaribu kuavya mimba changa. Nasikitika kusema, si wa dunia hii tena.” hitimisho likawa ni maombolezi na baadaye mazishi huku vidole zote nikielekezewa.

Vivyo hivyo, aliyefuatilia mkondo huu alikuwa kipusa kwa jina Amina. Mtoto yatima ambaye nilipata kumjua kupitia rafiki yangu aliyekuwa afisa wa umma katika makao ya watoto ya Huruma. Nilimlisha, nikamvisha na hata kumpa penzi ambalo nilijua kilele ingekuwa ni harusi. Lakini, kama wasemavyo. binadamu hupanga, mungu naye akapangua. Mpenzi wangu alifariki dunia katika ajali mbaya kwenye barabara ya kuelekea mji wa salama.

Wa tatu naye alikuwa ‘black beauty’ almaarufu cheusi chan’gaa kwa jina Anyango. Huyu naye alikuwa msichana wa chuo kikuu. Taaluma yake ilikuwa udakitari. Tulikutana katika tamasha la kusheherekea utamaduni katika ukumbi wa Pataneni. Hapa nilidhani nimegonga ndipo kwa vile ishara zote zilionesha bibi nilikuwa nishamtia kiganjani. Nilimrai akubali azma yangu ya kumvisha pete lakini aliabudu zaidi anasa. Tulimzika yapita miaka mitatu baada yake kunywa sumu alipogundua ameambukizwa virusi vya ukimwi.

Jaribio langu la nne lilikwa ni dada kwa jina Chebet, mtangazaji maarufu wa televisheni na pia mwanariadha shupavu. Amini usiamini, raundi hii nilijua pamehusika kudra ya maulana. Sawa na hapo awali, penzi liliota kwenye mchanga wenye rutuba. Kadri siku zilivyo shikana na kuwa miezi ndivyo huba ilinawiri na kuganda.

Kitumbua kiliingia mchanga jioni moja aliponifumania nikifanya masihara na kijakazi mmoja pale kijijini. Heri nilitaje kama masihara. Kwa vile, nikifafanua zaidi nitaona aibu kiasi ya kwamba nitakosa hamu ya kuendelea na waraka huu. Cha mno ni kwamba, siku moja baada ya tukio hilo, niligutushwa na kamsa aliyepata mwili wake ukininginia kwenye mbuyu mkongwe kijijini.

Hatari zaidi, aliwacha waraka fupi kueleza sababu ya kauli hiyo iliyowacha kila mtu kinywa wazi. Kwa mara nyingine, vidole nilinyoshewa huku nikigeuzwa chombo cha kupigiwa mfano katika ushauri wowote kuhusu usherati. Hata hivyo, wanasema mchumia janga hula na wakwao. Kwa hivyo ilinibidi kufukuzwa kijijini baada ya kuzuka tuhuma kwamba nilikuwa nimewapaka wanakijiji aibu.

Hiyo ilikuwa ni miaka miwili kabla ya kukubaliwa kurudi nyumbani mwezi jana. Leo, nimekutana na dada Sikitu. Si mahala pengine ila ni katika jumba la ibada. Kwa umbali, natambua ana baadhi ya sifa za kimaumbile walizokuwa nazo Rehema, Amina, Chebet na hata dada Anyango. Natamani kupata muda wa kutoa malilio ya moyo wangu ila naogopa kumjumlisha katika msururu wa mkosi ambao umetawala maisha yangu.

Sitaki ajue kwamba wiki nyingi ambazo zimepita nimekuwa nikipokea matibabu kutoka kwa mganga mmoja maarufu nchini jirani ili kutibua balaa zinazonifuata. Si siri, waganga nimefukuzia kusini, kaskazi, kushoto hata kulia bila mafanikio. Niliona safari hizi ni hasara tupu ndiposa nikajishauri kufuata njia ya kidini angalau nishushiwe mzigo huu.

Hata ingawa tambiko zimefanywa na magoti kupigwa ili kunikomboa, ningali nimetekwa nyara na uoga kwamba marudio ya balaa yangali yananikodolea macho. Kutoka mahala nilipoketi nyuma ya kanisa, nawaona wanadada wa kila aina. Wembamba, wanono, warefu, wafupi, weusi na hata weupe lakini gundi la huba limenielekeza kwake Sikitu.

Sina tofauti na bubu ambaye anahisi njaa ila hawezi kuagiza chakula. Sina tofauti na kipofu ambaye amewekwa kwenye mwangaza ila hawezi kujielekeza. Ni kitendawili ambacho kimepooza ulimi wangu nisijue la kusema.

Kwa makini nilifuatilia ibada huku nikisawiri biblia kudaka sehemu alizonukuu askofu. Kwa dakika kadhaa, nilitembeza macho huku na kule nikajipata nimerudi alipoketi mpenzi mtarajiwa.

Muda huu wote nilikuwa nimejikunyata mithili ya kuku aliyenyeshewa. Kando yangu alikuwa jibabu moja la kutiririkwa jasho njia mbili mbili mashavuni. Hii ni kutokana na wimbi la joto lililofagilia kanisani. Babu alishika kitambaa chake na kupangusa jasho toka kilele cha kipara utosini hadi kwenye videvu vya kuchakaa kama beberu.

Ajabu ni kwamba, kinyume na hali ya kawaida mwili uliganda utadhani nimedungwa sindano ya barafu. Ikulu ya baridi ikawa ni moyo wangu mlegevu ambao ulibadikia na kuwa bohari ya kuhifadhi magunia ya upweke. Wakati mmoja nilizubaa nikimwangalia sikitu hadi akanishika ‘red handed’. Lililobaki lika

wa ni kubadilishana tabasamu huku ……..tuendelee ama tusiendeleee?

WENYEJI WA ZIWA BARINGO WANAUA UTALII................

2012-06-21T13:17:00.000+03:00

MTUNZI: ODHIAMBO DANYELL

CHUO KIKUU CHA DAYSTAR

NAIROBI

Magurudumu ya matatu yalikimbizana kuelekea kwenye lango kuu la ziwa Baringo. Nyuma yetu barabara ilikuwa safi japo kwa vumbi nyepesi pamoja na moshi ambayo ilionekana kutuandama kabla ya kusokota angani.

Pembeni mwa lango hilo, palisimama wima kibao “Welcome to Lake Baringo” hii ikawa ni ridhisho tosha kwamba makaribisho kabambe yalikuwa yatungoja. Kama ada, tuliegesha gari mbele ya kizuizi cha baraza la jiji. yaliyofuata, yakawa ni kuhesabiwa kisha kulipia kiingilio. “Karibuni na mjienjoy kabisa” askari kwenye lango alitueleza.

Baadaye, kizuizi kiliinuliwa kuashiria tulikuwa huru kuvinjari kila kona ya ziwa ambalo nilikuwa nimesikia tuu kupitia uvumi wa marafiki pamoja na maarifa ya vitabu za jiografia.

Kuonekana kwa ziwa upeoni kuliwafanya hata waliokuwa wanasinzia kupata sababu ya kuchangamka. “Lake Baringo here we come!” kidosho aliyekuwa kando yangu alisema wakati akingangana kupiga picha kutumia simu yake ya rununu. Ajabu zaidi, alikosa kutulia kiasi ya kutoa shingo dirishani utadhani kaona mbinguni.

Bila kusita, dereva naye alirukia kiti chake , akajifunga mshipi , kubadilisha giya. ufunguo wa gari uliingia mahala pake na Vrrrrrrmm! Vrrrrrrmm! Vrrrrrrmm! tukaondoka.

Moja kwa moja, tulifululiza hadi kwenye maduka viungani mwa ziwa hilo angalau kushughulikia shinikizo za minyoo ambao tayari walikuwa wanatishia kuandamna tumboni..

Wanasema, ukistaajabu ya musa utayaona ya firauni. Punde tuu tuliponunua kreti ya soda na mandazi ndipo tulishuhudia maajabu.

Kwanza, kunguru wawili kumbe walikuwa wamepata mwanya kwenye dirisha wazi na wakabaki kujipakulia chakula kidogo iliyokuwa kwenye gari. Sitasema walikuwa wanakula popcoon.

“Kaisari amekuja kuchukua kilicho chake” kijana mmoja alitania na kuibua kicheko si kidogo.

Isitoshe, Kama vile siafu wanavyomvamia chakula chao, jeshi lile la watoto lingeonekana likitukaribia pasi na sisi kujua walikuwa wanapanga nini dhidi yetu. “Uncle nipatie shilingi kumi” alisikika mmoja akisema.

Akivaliwa na sura ya ukarimu, dereva aliingia mfukoni, akachomoa jani la shilingi hamsini na kumpa mmoja wao akidhani hii ingetunasua kutoka mtego huo. “Hawa ni masonko!” alisikika mmoja wao akimnongonezea mwenzake. Gahfla, wimbo ulibadilika na kuwa “Na mimi jee uncle?”

Kumbe alikuwa kachokoza nyuki.utngedhani amepiga mbiu ya mgambo kwani umati ule ulijikusanya kama kutaka kumparamia dereva.wanasema lisilo budi hutendwa na kwa hivyo, ikabaki tumevalia sura za ukali ndipo wakatawanyika.

Baadaye, tulielekea kwenye maegesho ya gari na likafuatia sala ya kulinda ziara letu. mmoja baada ya mwingine, bila kusita, tuliambua nyayo taratibu hadi kwenye ufuo wa ziwa Baringo. Njiani, hatungeepuka kuteleza kwenye chochoro za mawe ambazo zilichongeka kutokana na kazi ya miaka nyingi. amini usiamini, mawe zilichongeka utadhani panga.

Kushoto, tungewaona watalii wakifurahia kuzungushwa kwa kasi na motaboti ya samawati ambayo ncha yake ilipasua maji kama wembe. kando kandowalizingirwa na wavuvi kwenye madau yao madogo wakiendelea na tafuta tafuta zao.

“Uncle si ukule kasamaki choma” aliniuliza mmoja wa wachuuzi. “Pesa ngapi?” nikauliza. “mia tatu tuu kwa kipande kimoja” alijibu huku akisongesha sinia karibu na pua langu.labda aliamini hii ni mtego tosha kwa kuchokoza hamu yangu. nikielekeza mkono mfukoni ndipo nilikucha zake za kustiri uchafu hata hamu ikanitoka.

“Tupande motaboti kwanza halafu tuatarudi kula samaki”binti fulani alitoa wazo la kuninusuru na kukatiza biashara yetu. Hii ilimfanya mchuuzi Yule kuudhika ungedhani kaumwa na nyuki.

Kwa dakika kadhaa mawazo yangu yaliibiwa na mwanadada mmoja ambaye alifanya moyo kunideka ovyo ovyo. Kaskazini alivalia "tumbo cut" ama kata tumbo yenye maandishi "look but dont touch", kusini alikuwa amebana kumakalio yake ya kushiba ndani ya minisketi fupi iliyofichua mapaja yake. Mengine sitasema ukitaka kujua zaidi, njoo ntakuonyeshe picha.

Wakati tukisubiri kiongozi wetu kuelewana kuhusu nauli ya kusafiri motaboti tuliridhia kuketi chini ya kitalu cha miti. hii ni kutokana na jua kali iliyokuwa inangaa utadhani inashirikiana na watoto wake. Kwa mtu mweusi kama mimi niliogopa kunuka moshi.Wenzangu walichirizikwa na jasho njia mbili mbili mashavuni utadhani mvua kubwa yanyesha katika msitu wa nywele utosini.

“Kaka hebu njoo” sauti dhabiti na yenye ukaidi iliniita kutoka nyuma.mtu hakatai wito bali aitwalo. “Enhe nikusaidiaje?”niliitika na kusogelea alipokuwa.

Jamaa huyo alinitisha kwa jinsi alivalia miwani pamoja na rasta zilizochakaa. Alinikumbusha jambazi fulani kijijini aliyeogopewa kwa ustadi wake wa kuiba mayai ya kuku pamoja na vifaranga. ikiwa umeona majarida ya sokwe mtu basi utafahamu kile ninachozungumzia.

“Hapo mmeketi ni ufuo wa kibinafsi. Kuweka mkutano kwenye jiwe hilo litawagharimu shilingi mia kila mmoja ” aliongea huku akinyosha mkono kama wa kuataka vita.

“Hatulipi na hatulipi! Mmemetuzoea sana” kidosho aliyekuwa anategea sikio mazungumzo yetu alitukatiza na hivyo kuchemsha hasira ya 'rastaman'.

"Hey! Mashaka kuwa mpole hapa si kwetu na hatutaki kuzua sokomoko ugenini." niliingilia kati angalau kutuliza temprecha za 'sokwe' yule.

"Una bahati sana niliamka kwa maombi, stupid! who do you think you are?" Rasta man alimjibu.

Kama wakristo watiifu, baadaye tuliweza kumrai 'rastaman' kutupunguzia bei hata baadaye akaridhia kukubali kuchukua shilingi hamsini. Wakati huo wote tukibishana, jeshi la watoto ombaomba lilikuwa limetuzingira.

“Mwenye motaboti amesema kila mmoja atatoa shilingi mia tatu ili kuabiri boti lake hadi kisiwani" alitangaza kiongozi. wachache walikubali kulipa na wakandamana naye kuabiri boti.

Tukikadiria kwa macho, kisiwa kile kilikuwa takriban mita mia tano hivi kutoka tulipokuwa. “Heri nikule samaki. Hiyo ni nauli ya kutoka Nairobi hadi mji wa Eldoret” kijana mmoja mbishani alidakia na kuibua kicheko.

Usemi huo uliwaleta wachuuzi wa samaki hata karibu na hiyo ikachochea wale waoga wa kusafiri majini kununua samaki ambayo tulikula shingo upande. kinaya ni kwamba, wachuuzi hawa walifuatwa na mbwa waliokuwa wamekonda kiasi ya kwamba mbavu zao zingehesabika.

“Mbona mbwa wa huku wamekonda hivi ilhali wanaishi penye soko kubwa la samaki?” dada mmoja aliuliza. Mmoja wa wachuuzi wale alicheka huku akijibu kwamba mbwa ana ustadi wa kuogelea na kwa hivyo haoni maana ya mbwa kulala njaa ilhali anaweza kujitafutia samaki baharini. "Sisemi kitu" nilisema kimoyomoyo huku nikisonya.

Minyoo tumboni walikuwa wameanza maandamano na kwa hivyo tulianza kutoa vyakula mbalimbali tulivyokuwa tumebeba. Ushawahi kuangaliwa na macho ambayo yanakumulika mpaka moyoni?

Hivyo ndivyo hali ilikuwa pale. Kwa kila tonge ulichomeza watoto wale walikuangalia kwa macho ya huruma. kama ambao wanakulaani. ukidhani nakudanganya, chupa yangu ya soda iliteleza na kumwagika. Ghafla, mbwa mmoja kijivu wa kufanana na jamii ya fisi alinikaribia kuanza kulamba jiwe palipomwagika soda. Kweli baa la njaa ni janga la kitaifa.

Baadaye tulihama pale na kuelekea ufuoni palipokuwa na mamba ambao walikuwa wamezoeana na binadamu. Tulipata kundi la vijana fulani chipukizi wakiwalisha matumbo. Walituamkua kabla ya kutukaribisha kupiga picha karibu na mamba.

Kwa vila nazijua hatari za mzee mamba nilisalia kuzitizama kwa mbali huku milio ya ndege aina ya korongo na kunguru ikitawala angani. Wenzangu walifurahia wakati kijana mmoja alipopanua mdomo wa mamba akijaribu kuwadhihirishia maajabu kwamba mamba hana ulimi.

Sarakasi ilipofikia kikomo kundi la vijana lilituzingira na kutushrutisha kutoa shilingi mia moja. Hii ikiwa ni gharama ya kupiga picha pamoja na kupewa mafunzo. Baadhi walikubali kulipa huku wengine kama sisi tuliotizamna kwa mbali tukidinda.

“lazima mtulipe! Kwani mnadhani tunakula nini hapa?” kijana mmoja mtukutu akaanzisha mabishano akielekea tulipokuwa tumeketi.

Usalama wetu ulikuwa haupo tena na kwa hivyo kidosho yule akasalia kubadilisha maneno na wao. “ Mnafaa kufunzwa jinsi ya kuwakaribisha wageni kwani ni wazi nyinyi wenyewe mna angamiza utalii ziwani humu” aliwaeleza.

“Sista! Usidhani utatoka huko kwenu ukuje kutufunza kazi yetu” kijana fulani mwenye upanga mkononi alitujibu kwa ukaidi.

Angani, mawingu meusi yangeonekana yakijikusanya kama kujitayarisha kupoesha ardhi ambayo ilikuwa imechemshwa na jua kali. Ghafla, ngurumo na radi zilisikika kuashiria mvua kubwa ingenyesha wakati wotote.

“Let’s go” kiongozi wetu alitoa amri huku akituelekeza kwenye matatu ambayo ilikuwa tayari kuondoka. Hii iliashiria kilele cha matembezi yetu. Kweli! safari bado mbali kabla ya kufanikisha matarajio ya millenia.

HEKAYA ZA KAKA RASHIDY: SIRI ZA “JAM” JIJINI NAIROBI; TOLEO LA PILI

2012-06-07T11:07:00.001+03:00

HEKAYA ZA KAKA RASHIDY: SIRI ZA “JAM” JIJINI NAIROBI; TOLEO LA PILI: MTUNZI: ODHIAMBO DANYELL Jinsi basi lilivyozidi kufukuzia kuelekea mzunguko wa Nyayo stadium, ndivyo ilizidi kuwachilia moshi ya mpingo i...

KUFUNGWA KWA SOKO YA BURMA NI FURAHA WAKAAZI WA NAIROBI

2012-06-06T11:39:00.004+03:00

Mtunzi: Odhiambo Danyell

Ni bayana kwamba wenyeji wa Nairobi na vitongoji vyake wana kila

sababu ya kutabasamu baada ya tangazo la kufungwa kwa soko maarufu la

nyama kwa jina Burma. Hatua hii imechochewa na tabia ya wafanyi

biashara kukaidi kutii sheria za wakaguzi wa afya.

Kabla ya kungamua hatari inayowakodolea macho walamba minofu katika

soko hilo ni heri nikufafanulie taswira halisi angalau ufahamu

chimbuko la hatua hii. Punde tuu unapofika katika lango kuu la soko

hilo utakaribishwa na harufu mbaya inayoninginia hewani.

Kando na hayo, utashuhudia jaa kubwa la taka la kusheheni pembe za

wanyama, makombo ya minofu pamoja na maji taka iliyozagaa kila sehemu.

Hatimaye, utawaona chokora wakibishana na mbwa ambao hukukwangura jaa

hilo wakitafuta pato lao.

Kuingia ndani, utapishana na wafanyi biashara wa nyama waliovalia

ovaroli chafu za kutona damu wakibeba bidhaa hiyo kiholela huku

wakivuka mitaro iliyosakamwa na maji taka iliyoganda wakati

wakisindikizwa na vikosi vya nzi.

Aidha, kwenye maduka na hoteli , hutakosa kujionea jeshi kubwa la nzi

ambao wameteka nyara kila sehemu hata kuwalazimisha wenyeji kurusha

rusha mikono wakati wakiendelea kufurahia mapishi rojorojo ambayo

huandaliwa kwenye hoteli hizo za Burma.

Tushamhoji mgonjwa na sasa hatuna budi kugeukia daktari angaa tupate

tiba kwa hali hii mbaya kwa vile ni wazi, tusipojenga ufa tutajenga

ukuta. Hivyo, wakati tukiwakemea wafanyibiahsra wa Burma na kukumbatia

hatua ya kufunga soko hilo ni muhimu mikakati kabambe iwekwe ili

kuepusha wenyeji wa soko hilo na mikurupuko ya magonjwa.

Hayo ni tisa, kumi ni kwamba ili kupata suluhisho la kudumu soko hilo

lafaa kubomolewa na hatimaye kujengwa upya huku wakizingatia miundo

msingi za kuimarisha usafi. Aidha, sheria za baraza la jiji pamoja na

zile za wizara husika zinapaswa kukazwa. Mwisho, wenyeji wanapaswa

kufanyiwa hamasisho kuhusu umuhimu wa kudumisha usafi na hatari ya

kuendelea kufanya kazi zao katika mazingira hayo.

OPERATION TUTETEE WANAUME!!!

2012-02-16T20:45:00.003+03:00

MTUNZI: ODHIAMBO DANYELL
SEHEMU YA KWANZA:

Mzee Matendechere alionekana kuokotwa na usingizi mwepesi wakati akiuguza majeraha ya panga hospitalini. Kisa na maana, adabu ilimhama mkewe hata akaamua kuchukua sheria mkononi na kumpa mumewe kichapo cha mbwa kabla ya kutorokea kusichojulikana.

Kichwa chake kilibanwa kwa kilemba cheupe chenye matone ya damu. Isitoshe, Kwenye shavu la kushoto, palidhihirika jeraha bichi lenye kushonwa kwa uzi. Cha kusikitisha zaidi, Pembezoni mwa kitanda, wangeonekana wapiga picha kutoka vyumba vya habari waking’ang’ana kuchukua picha za kuvutia watazamaji.

picha kwa hisani ya http://medievalminds.com

Maskini Matendechere alizidiwa na usingizi hata akabakia kukoroma huku akifungua mdomo mithili ya mamba mwenye njaa. “Wow! This seems to be the best shot, I,m loving this” alisikika akisema mmoja wa wapigaji picha tuliyeshuku ni wa asili ya kimarekani. Kweli, vita vya panzi furaha ya kunguru.

Wakati haya yakijiri, ndoto ya matukio yaliyotendeka kabla ya masaibu haya kumpata Matendechere yalivamia mawazo yake. Akilini, alijaribu kukusanya picha hizo bila ya kitendawili cha asili ya maumivu yake kuteguka.

Midundo mizito ya rumba ilizidi kufagilia katika mkahawa maarufu wa ‘tamasha’ katika barabara ya tugawe umaskini. Kama kuchokoza wenye kuneng’ua viuno kwenye sakafu, Deejay Manyoya aliwachilia kibao maarufu ‘I,m not sober’ cha bendi maarufu ya Jamnazi Afrika. Kauli hii ilisindikizwa na vifijo na nderemo. ungedhani ni karamu ya kukaribisha kurudi kwa Yesu. Haya yakijiri, baadhi ya wenyeji walizidi kumimina chupa za mvinyo macho wakibandika kwenye runinga.

Wakati huu wote, Mzee Matendechere alikuwa amechokorwa kichwa na mizimwi ya mvinyo kiasi ya kwamba aliridhia kutafuta starehe kwenye kochi kando ya ‘counter’.

Ukitizama kushoto, ungeona kundi la makahaba ambao walikuwa wamejikwatua kwatu kwatu wakianika mitego yao tayari kunasa wateja. Mwingine alivalia ‘tumbo cut’ ya kubana kifua yenye maandishi “usiseme maziwa, sema ngombe”. Isitoshe, alivalia sketi fupi iliyofichua mapaja yake yenye madoadoa utadhani ni wa jamii ya chui au fisi.

Wakati viumbe hawa wakisasambua mapaja yao kwa wapita njia, Mzee Matendechere alibakia kuvuta mabaki ya sigara yaliyoangushwa na wateja sakafuni. Baba mtu alizubaishwa na vimulimuli vya taa ya ‘disco light’ akakaribisha moshi ndani ya mapafu kabla ya kuwachilia wingu kubwa hewani.

“Mzee! Inuka uende nyumbani. Tuko karibu kufunga na hatutaki ukamatwe na polisi” wahudumu pale kwenye mkahawa walimrai. “Kwani huyo Mututho anadhani ni nani atupimie starehe na pesa tunakunywa ni zetu? Leta kingfisher mbili hapo.” alisikika Matendechere akizusha kwa ujeuri huku akilaani mbunge aliyebuni sheria inayopima masaa ya kunywa pombe.

Wakati Matendechere akizizana na wale wahudumu , ghafla fikra zake zilivutiwa na maandishi FulanI ukutani. “Customers have a right to stay and to pay”. “Haya ndiyo madhara ya kususia masomo mapema. Can you please read the bold writings on the wall?” Mzee Matendechere aliwakabili huku akionekana kuzidiwa na kichefuchefu.

Kwa dakika zile chache, baba mtu alijiona jogoo wa kukomaa. kuwika kwake kuliwatisha wahudumu. Kwenye lango kuu la mkahawa, tayari wateja wengine wangeonekana wakiondoka wameshikana taratibu kumaanisha walikuwa wameona dalili ya . Kadri masaa yalivyoyoma ndivyo shughuli zilipungua pale hata mziki ikazimwa na stima kuzimwa.

“Ala! Mzee, hii ni siku ya pili tunakutoa hapa kwa nguvu. Kwani huna familia? Enda nyumbani tunafunga.” Askari aliyeshika doria langoni alimzomea Matendechere.

Baadaye, baba mtu aliona amezidiwa maarifa hata akajikusanya na kutembea taratibu akieleka nyumbani. Barabarani, hungempita bila ya kumtambua kutokana na kuimba kwake. “I,m not sober Odiero, I,m not sober……..i,m not sober because I,ve taken guiness.”hivyo ndivyo hali ilikuwa.

Ilibakia kona moja tuu kabla ya kuwasili kwenye maskani yake katika kambi ya wakimbizi wa ndani kwa ndani pale Soweto. Pale, aliteleza na kuanguka kwenye mtaro ya maji taka. “Auuuwi!.... Auuuwi! Mama Wanjiru bwana yako ameingia kwenye mtaro. Njoo tumsaidie” mama mmoja msamaria mwema alipaza sauti na kuvutia umati.

SHUKRAN!!!!

Endelea kufuatilia hadithi hii kujua kinachojiri!!!!!........

SIRI ZA “JAM” JIJINI NAIROBI; TOLEO LA PILI

2012-02-01T16:05:00.001+03:00

MTUNZI: ODHIAMBO DANYELL

Jinsi basi lilivyozidi kufukuzia kuelekea mzunguko wa Nyayo stadium, ndivyo ilizidi kuwachilia moshi ya mpingo iliyosokota angani kabla ya kutawanyika. Pale pia, tulimpata polisi wa trafiki mwanamke aliyefungia mshipi wa longi yake kwenye kifua. Amini usiamini, kwa ishara ya mkono alielekeza mkondo wa gari kama jinsi upepo huele...keza bendera.

Pale tulis...imama kwa dakika chache kabla ya msongamano kufunguliwa. Cha kuvutia tamaa ya macho yangu ilikuwa ‘tuk tuk’ fulani ambayo ilipenya penya kati kati ya magari huku ikipiga kelele kama mashine ya kusaga mahindi. Wenzangu wanaiita kule bara POSHOMILL. “We! Boss, ondoa hiyo kabati kwenye barabara” alisikika akishambuliwa na mmoja wa madereva wa matatu.

Wanasema muungwana hununa moyoni na wala siyo mashavuni na kwa hivyo Yule dereva wa ‘tuk tuk’ akaridhia kumjibu kwa kimya. Kando na tukio hili, kuna jambo lililotendeka ambalo liliwacha mbavu za kila mtu zikiuma.

Niseme nisiseme! Aaaah! Heri niseme angalau na wewe uonje uhondo. Hayaa! Kuna huyu omba omba aliyejifanya kuakalia miguu yake akijidai kilema. Isitoshe,uso wake ulijichora picha ya masumbuko bin mateso hata wapita njia wakamsikitikia na kumrushia sarafu kwenye kijisahani chake.

Ajabu! Kuna hili trela la magurudumu kumi na kadhaa la kubeba simiti lililopita karibu na hapo kabla ya kusimamishwa na yule polisi mwanamke. Ghafla! Kilichofuata kilikuwa ni mlipuko mkubwa ajabu uliobadilisha hali pale kuwa ya mguu niponye. Kumbe ni magurudumu yake mawili yalipasuka na kuibua sauti sawia nay a bomu.

Kilema huyoo! Alitia pato lake mfukoni kabla ya kukata kona akitafuta usalama wake. Ama kwa hakika, kisa hiki kiliwacha wengi mdomo wazi hasaa wasafiri waliokuwa wanasubiri matatu hapo karibu. “lo! Kajifanya kilema kumbe ni bingwa wa riadha?” nilijisemeza huku nikifungia kicheko baada ya mbavu kuanza kuuma.

Safari iliendelea, basi ikajikaza kupanda milima na kutereka mabonde hata tukafikia njia panda ya kuelekea uwanja wa ndege wa kimataifa wa JomoKenyatta. Katika maisha yangu, nimetamani vitu viwili tuu; kwenda mbinguni na kuabiri ndege.

Kwa umbali, ningeona ndege kadhaa zimeegeshwa nje ya mabohari zikipakiwa mizigo. Nikiwa nimezama katika dimbwi la mawazo,, nilishangaa kuwasikia wanaume fulani kwenye kiti kando yangu wakinong’ona. “Masalale! toto lenyewe fupi tena limetimia” huo ndio usemi uliozindua mafikira yangu hata nikarusha macho nje ya dirisha la basi kujua yaliyokuwa yanajiri.

Dododooooooo! Pale kando ya basi palifukuzia gari aina ya BMW X6 almaarufu ‘Be My Wife’. Ndani aliketi dereva mwanadada wa kuvalia minisketi ya kufichua magoti. Mdomoni alishikilia peremende ya ‘Pinpop’ huku picha yake akinakshiwa kwa vipuli vilivyong,aa si kidogo. Ya mrembo, tuyawache, sitaki tukeshe hapo. Najua wenzangu waume watapoteza makini ya hadithi hii. Heri tushughulikie ya BMW.

Yaitwa BMW, nyumbani kwao alikozaliwa ni katika nchi ya ujerumani kule bara uropa. Ulafi wa petrol ni lita kumi na mbili kwa kila kilomita mia moja. Ukisawazisha na maumbile ya mawanadada, gari hili lina kifua cha wastani, makalio maridhawa na mgurumo wa kumtoa nyoka pangoni. Mashallah! kidosho wa kuteka nyara fikra za wengi.

Taratibu, gari hilo liliruka kwenye tuta za kupunguza kasi na kuelekea moja kwa moja hadi kwenye lango kuu la uwanja wa ndege. Asiye na mwana aelekee jiwe, kila mmoja aligeuza fikra na kurudi katika shughuli za kawaida.

“miwa ni kumi! miwa ni kumi! ………miwa ni kumi!” hiyo ndiyo taarifa iliyotukaribishatulipowasili mji wa mlolongo. Huku haya yakijiri, dereva naye alikazana kupisha trela ambazo zilikuwa zinaingia katika stesheni ya kupima uzani. Zingine zilibaki kuegeshwa ovyo ovyo kando ya barabara na hivyo kufanya eneo hilo kuwa hatari sana.

Hatua chache, tungesikia midundo ya aina ya KATITO ikipenyeza kutoka kilabu moja ya burudani karibu na barabara. Ningewaona wenye mihela wakimimina machupa ya mvinyo kwenye roshani (balcony) ya hoteli hiyo huku mmoja akicheka kiasi cha kuinua mguu juu. ndo starehe za nyani kukalia mkia na kulalia masikio. haahahahaaha!

“Jumatatu na mtu tayari anaburudika na mvinyo mapema hivi?” aliuliza mmoja wetu kwenye basi. “Dunia ni yao, ukipewa pia utatekwa nyara na uraibu fulani” alijibiwa bila kusita.

Basi ya kisasa aina ya OXYGEN ama Mordern Coast ilipita kwa kasi na kuokota mawazo ya kila mtu. Kila mmoja, alikuwa na sifa spesheli aliyolimbikizia basi hilo. “Itakuaje mkifanikiwa kupanda ndege?” heri ningepewa nafasi ya kuwauliza swali hilo hadharani. Ukistaajabu ya musa utaona ya firauni.

SIRI ZA 'JAM' JIJINI NAIROBI

2012-01-30T20:22:00.001+03:00

MTUNZI:ODHIAMBO DANYELL

Dereva wa basi la kampuni ya RWAKEN alijistiri mbele ya usukani na kupiga gari moto wakati tukiondoka katika kitivo cha chuo kikuu cha Daystar yenye makao katika mzunguko wa barabara ya Valley road, Nairobi.

Ilikuwa dakika chache baada ya saa kumi na nusu jioni. Hii ni kumaanisha, wafanyikazi pamoja na wanafunzi wa mchana chuoni tayari walikuwa katika harakati zakufunganya virago na kurejea makwao baada ya panda shuka za mchana.

Vvrrrrrrrrrrrrrm! vvrrrrrrrm! Dereva alipasha gari moto na taratibu basi likaelekezwa nje ya lango kuu. kabla ya kuingia kwenye barabara kuu ya Valley road.

Auuuuuwi! imagine mbele yetu palisimama gari aina ya Range Rover Vogue iliyowachilia moshi nyeupe iliyosokota na kupata hifadhi katika mapua ya basi la RWAKEN. Katika mbuga la wanyama, gari hili linalinganishwa na mfalme Simba kutokana na udhabiti wake. Mashini hii yasifika kwa ulafi wa petroli pamoja na muundo wake wa kutamanisha. Aha! Sasa nimejua kwanini basi ilikuwa inanguruma kama yenye mafua....

Kando na hayo, sisemi nilivutiwa zaidi na rangi yake nyekundu ya kukoza pamoja na ‘rims’ za shaba ukipenda silver na isitoshe magurudumu inchi sita. Kutamanisha zaidi, ilikuwa nambari yake ya usajili KBR 001Z. “Bonge la wallpaper” alisikika mmoja akishangaa ndani ya basi.

Kushoto, palinguruma gari nyingine aina ya Hummer, almaarufu ‘nyundo’. huyu pia ni Ibilisi mwingine katika orodha ya maadui wa petroli. Nikimwita kifaru wa jiji hutanipinga. Maumbile yake, pamoja nasifa yake ya kutembea kifua mbele inalingana na ubingwa wake.

Mbele alirembeshwa kwa vyuma vya kumetameta. Nyuma alikosa nambari ya usajili hata tukashuku bado mgeni nchini. Kitendawili kumhusu ni uhusiano wake kimapenzi na wanasiasa nchini Kenya.ukitaka umaarufu huna budi kumchombeza.

Kwenye msafara, alifanya magari mengine ya kibinafsi kuonekana kama siafu. sitataja kina kaka Vitz, Alex,Runx, March, Probox orodha ni ndefu taja zingine........

Tuwache hayo. kuna huyu dereva wa vitz aliyeonekana kuwa na haraka na hata akapenyeza kijigari lake kwenye njia ya mguu kando kando hata kuwaudhi wapita njia. utanikashifu kwa kuwa mmbea lakini heri nimfichue.

Hayawi hayawi, hatimaye huwa. Polisi wa trafiki mwenye kitumbo cha kiriba alifungulia magari na taratibu msafara wa magari ulisonga kama jinsi mkondo wa mto huteremka mlima. Ghafla, mkondo ulishika kasi na magari yakapepea kwenye barabara kuu ya mbagathi.

Tulipofikia makutano ya barabara ya Langata, tulipata pamefanyika ajali mbaya sana. Kulingana na mashahidi wa karibu, dereva wa gari hilo aina ya Toyota Caldina alisemekana kupoteza mwelekeo kabla ya kurukia gomba la ndizi kando ya barabara. Gari ilijikunja sura ungedhani imepiga busu domo la gari moshi. "Wololo! Maskini!" alishangaa dereva wa basi.

USHUHUDA WA MKIMBIZI

2012-01-24T17:41:00.005+03:00

Januari tarehe 23, 2012
Saa iliyotulia wima kwenye kuta ya hema ilifichua kwamba ilibakia dakika chache kabla ya saa nane mchana . Akilini halikunijia wazo kwamba jaji wa mahakama ya Hague Bi Ekaterina Trendafilova alikuwa anasubiriwa kutoa uamuzi wa korti dhidi ya washukiwa sita wa vita vya baada ya uchaguzi.

Msimu wa masika tayari ulikuwa umeenda likizo, kiangazi kilikuwa kinatawala na umaarufu wa jua kijijini ungedhihirika kwa jinsi miale yake ilizidi kukausha nchi kavu hata nyufa zikatawala ardhini.

kambi ya wakimbizi ya faraja

Mara kwa mara, tufani kali za kutoka magharibi zingesikika zikifagilia na kufanya matawi ya miembe kupukutika kabla ya kuchezeshwa angani ovyo ovyo. Nilikuwa nimetulia kwenye mkeka ndani ya hema ndipo nikagutushwa na unyamale uliojiri kwenye kambi ya wakimbizi ya faraja. Mara moja, nikashuku hatari na kuchungulia nje angalau kuhakikisha kila kitu kilikuwa sawa.

Nikisimama kwenye mlango ya hema, ningehisi hali isiyo ya kawaida. Upweke ulitawala kote japo kwa ndege ambao walikuwa katika shughuli ya kujenga viota juu ya miembe. Hii ilikuwa tofauti na hali ya kawaida ambapo kelele za majirani zingevunja tamaa ya mtu kutaka kuonja usingizi wakati wa mchana.

Hata kabla ya mate kunikauka mdomoni, upepo mkali ulifagilia na kupepeta kila kitu ndani ya hema hata nikahofia ingeng’oa hema. “shetani ashindwe!” nilitamka maneno hayo kumkemea ibilisi ambaye tuliambiwa huandamana na upepo ya aina hii na kuletea wanadamu nuksi.

Kabla ya fikra zile kunikauka akilini, nilinyongwa na mate nikikadiria madhara ya upepo ule. Picha za familia yangu nilizozistiri kwenye kioo ziliangushwa na vipande vya kioo vikabaki kutapakaa sakafuni.
Picha hizo zilibeba kumbukumbu ya wazazi wangu pamoja na mandugu zangu mapacha ambao waliuliwa kinyama wakati wa machafuko ya baada ya uchaguzi mkuu wa mwaka 2007 nchini Kenya.

Shetani ashindwe!
Ghafla, milango ya machozi ilijiwachilia huru na nikadondokwa na machozi kama kitoto nisijue la kufanya. Nilijihisi ni kama nimedungwa msumari moto kwenye kidonda mbichi. Maumivu yalinizidi hata wazo likanijia la kujitoa uhai kwani uzito huu ulikuwa umelemea mabega yangu.

Nilijiliwaza nikisemeza moyoni. “heri mimi nimebaki na picha, laa sivyo nisingepata fursa kuona sura zao tena baada ya mkasa ule wa moto.” Kila mara nikisema hivi nilihisi nimefarijika kwani mara ya mwisho kuwaona familia yangu ilikuwa mkesha wa siku ya kutangazwa kwa matokeo ya uchaguzi mkuu. Singedhani kwamba katili fulani angefikia kauli ya moto nyumba yetu na kuwabadilisha wote kuwa jivu.

Aha! Kilio cha dakika chache kilisaidia kufungua macho ya ubongo wangu ambayo ilikuwa imeziba. Nilishangaa kamasi nyepesi ikinitoka puani hata nikahitimu kuwa zuzu.

“ Ala! Kumbe leo ni siku ya kutolewa kwa uamuzi wa korti ya kimataifa ya Hague kuhusiana na wale wasita wanaoshukiwa kuchochea vita vya baada ya uchaguzi? No wonder! ” nilijisemeza huku nikingata ulimi.

Kama mwenye kupandwa na kichaa nilijizoa kutoa sakafuni na kupanguza machozi kabla ya kufululiza hadi kwenye ukumbi wa burudani wa pataneni pale kijijini. Nilijua ni hapo pekee ndipo nilikuwa na hakikisho la kupata kutizama televisheni. Pale palifurika furi furi hata nzi hangepata mahala pa kutua salama. Nilijaribu kepenya katikati ya umati lakini lo! Ilishindikana.

Bi Ekaterina Trendafilova asoma uamuzi wa korti!!

“Daima dua la kuku halimpati mwewe” nilisema kimoyomoyo. Hayo ndiyo mawazo yaliyorandaranda akilini wakati Bi Ekaterina Trendafilova aliposoma uamuzi wa koti. Nilijua daima mnyonge hana haki na kwa hivyo nilijitayarisha vilivyo kupokea uamuzi nikijua washukiwa hao wangeondolewa mashtaka.

Ghafla, nilikunakuna sikio alipofikia kilele cha uamuzi kuhakikisha nta haingenizuia kupokea ujumbe ule moja kwa moja. Singeruhusu masikio kuokota uvumi wakati kama huo kwani uamuzi huu ungepelekea kudumisha haki kwa wahasiriwa wa vita hivyo almaarufu Post Election Violence. Angalau usiseme sijui kimombo.

Lililofuata ni ujumbe ambao ulifanya magoti yangu kuingia unyonge kwani wawili kati ya washukiwa wasita walitolewa mashtaka na nikabaki kujua wanne waliobaki pia wangeepuka hivyo tuu!
Katika ukumbi huo singejizuia kuona nyuso za wakimbizi wenzangu ambazo zilitawaliwa na mchanganyiko wa hisiya za ghadhabu pamoja na huzuni huku kope za wengine zikionekana kuloa machozi.

Baadaye ilitangazwa kwamba Hussein Ali pamoja na Henry kosgey walikuwa wameondolewa mashtaka kutokana na uchache wa ushahidi. Kwa upande mwingine, Uhuru Kenyatta, William Ruto, Francis Muthuara na Joshua Arap Sang walijipata matatani wakielekezwa katika mkondo wa pili wa kudhibitisha kesi dhidi yao.

Ajabu, Minongono ilisikika kichinichini na baadaye kutawala wakati wengi wakionesha kutoridhishwa na uamuzi ule. Sekunde chache baadaye, umati ulifumukana na kila mmoja akaelekea kwake. Kila mmoja alivalia sura ya mazishi.

Adhabu ya mlevi
Kwa umbali, mlevi mmoja alisikika akishangilia uamuzi huo akisema wote hawana hatia ni kusingiziwa tuu. “aaaaaaaaa! Porojo tupu. Hata hao wengine watatolewa tuu mashtaka” alisikika akisema.

“Uuuuuuwi! Uuuuuuwi! Nisaidieni! Nisaidieni!” hiyo ndiyo sauti iliyosikika baadaye. Tulipoharakisha kuelekea palipokuwa na kelele hiyo, tulimpata mlevi huyo amepewa kichapo cha mbwa huku damu ikimtiririka ovyo ovyo.

“Ni nini ya maana kabila zetu ama kudumisha umoja baina ya kabila zetu” aliuliza chifu huku umati ukimjibu kwa sura za mashangao!

KUMBU KUMBU ZA MWANA HAWA

2011-11-23T13:43:00.014+03:00

MTUNZI: Odhiambo Danyell

Manyunyu mepesi ya mvua yangesikika yakikung’uta mabati na kuibua mdundo flani iliozidisha tamaa yangu ya kuendelea kupanga mbavu kwenye kitanda. Mara, alisikika jogoo mmoja kijijini akiwika kama kuashiria nuru ilikuwa imekubali zamu yake ya mchana.

Nilibaki kugaragara kitandani huku mabishano makali yakiendelea akilini kati ya mwili dhaifu na nafsi yangu. Mwili ilisisitiza niendelee kulala huku nafsi ikinisihi niamke. Baada ya kutafakari kuhusu hasara za usingizi niliridhia kuamka.

Ghafla, fikra zangu zilielekezwa katika saa kubwa iliyoning'inia ukutani ambayo ilikatiza hali ya unyamafu uliokuwa umetawala chumbani. kuzidisha, chenene fulani aliyekuwa kajificha mvunguni alianza kutoa sauti ya kuudhi.

“Aah! Heri tuu niamke” nilijisemeza huku nikijikokota kuelekea kwenye dirisha. Nikichungulia nje, ningeona kunguru wakipigania makombo ya chakula kwenye pipa iliyosimama mkabala na chumba changu. Isitoshe, rukwama kukuu za wazegazega waliosambaza maji kijijini nazo zilisikika zikipita cheke! cheke! cheke!............cheke!. Aha! kumbe ndo ujanja wao wa kuwaita wateja.

“usione nasinzia, unayoyasema nayasikia”

Kama ada, mimi hupenda kuanzisha asubuhi yangu na kipindi moja maaarufu sana redionia. Kwa hivyo, taratibu nilinyosha mkono na kuwasha redio iliyokuwa inazungumza japo kwa udhaifu. "hawa mende wamevamia redio hata ikapata homa" nilijisemeza.

“usione nasinzia, unayoyasema nayasikia” mtangazaji mmoja kwenye kipindi maaarufu cha PAMBAZUKA kwenye idhaa ya SHINE FM alisikika akisema. "hahhaha........haahah! sadfa iliyoje" nilisema huku nikicheka. ungedhani amesikia usemi wangu.

Tuyawache hayo. Akilini, palisongamana mawazo ambayo yalinifanya nijihisi kama mahame ya uhai. Kiwiliwili changu kilijihisi kuvaliwa na unyonge ajabu nisijue la kufanya. "Mashetani haya yataniua leo!" nilitamka. Pembezoni mwa kitanda palisimama chupa nyembamba ya ‘whisky’.

Bila ya kujali lolote, nilimimina chupa ile kabla ya kupiga mswaki angalau kufukuza harufu yake ambayo ingenisaliti kwa mjomba. Tulikuwa tumeishi kwa amani tangu aliponipa hifadhi miaka miwili iliyopita na sikutaka la kutuvunjia uhusiano huu.

Mara moja mvinyo ilijisambaza mwilini hata nikapata utulivu wa ajabu. Ghafla, kisunzi kilinijia na hata nikajiona mfalme mwenye himaya kubwa ajabu. "Ghaddafi! huyo hatoshi mboga!”

Mvinyo ile ilivyozidi kutembea mwilini ndivyo furaha ya ghafla ilinifurika. Maisha peremende! Nilisema huku nikicheka pekee yangu. Katika hali hiyo, maisha ilikuwa sherehe isiyo na kifani.

Krrrr! Krrrrrr! Simu ya rununu kwenye meza ilisikika ikilia.

Rashidy: Halo!.…Hallo!.......... Hallo!

Mwana Hawa: uhali gani mpenzi wangu?

Rashidy: Niko salama tuu ila nimekupeza ajabu.

Mwana Hawa: usijali mpenzi wangu kila kitu ki shwari.

Rashidy: Hamna neno dia.

Mwana Hawa: Mpenzi hebu tega sikio kuna la dharura natamani nikujuze.

Rashidy: kulikoni? Niambie tuu!.

Mwana Hawa: wazazi wangu wamenilazimisha kuenda kusoma uarabuni. Hivi naondoka leo usiku na sioni tukikutana tena Nakusihi unisamehe kwa kukueleza haya dakika ya mwisho.

Rashidy: eti nini? (ghafla simu inakakatika)

Matukio ya aina hii ni nadra sana kutendeka katika maisha ya mwanamume. Na kwa hivyo nilijipata kupandwa na hasira nisijue wa kumwelekezea. Bila ya kujali hili ama lile nilijipata nimeshika chupa tupu ya “whisky” na kuitupa ukutani.

“Rashidy! Rashidy! Kuna fujo gani humo?” mjomba alisafisha koo kabla ya kupaza sauti akiuliza.

“Samahani mjomba, ni chupa ya soda imeteleza kutoka mezani na kuanguka sakafuni” nilijiami kutumia uwongo.

Tuwache hayo, turudi dunia yangu ya huzunii. Kweli! shida haibishi hodi. haijui maskini wala tajiri, mweupe ama mweusi...............eee! mungu nisaidie.

Maswali yaliyoibuka baada ya simu ile ni mengi ila sikujua pa kupata jibu. Aha! Mungu hamwachi mja wake, nilijisemeza huku nikijifariji.

Nilikumbuka kuna huduma ya okoa jahazi. Simu tayari ilikuwa sikioni nikisubiri kusikia sauti nyororo ya Mwanahawa.

“Sorry the mobile subscriber cannot be reached” hadi wa sasa, ningali nakumbuka majibu hayo niliyopokea baada ya kubaini kwamba alikuwa kazima simu. Lisilo budi hutendwa na kwa hivyo nilijikaza kuokoa wasaa angalau nifike kwao nyumbani kujua mbivu na mbichi.

Champali nilizivaa, kofia ya chepeo ikajistiri kichwani kabla ya kukaza mshipi. Mara moja nilipenya penya kwenye vichochoro vya maji taka nisizuiwe na harufu mbaya iliyokuwa imeshiba hewani na kuchokoza usalama wa pua.

Rashidy! ……….Rashidy nilisikia sauti nyororo ikiniita wakati nilipopita mkahawa wa mabanda wa ‘cool breeze’. Ama kwa hakika sauti ilikuwa ya kuvutia ila sikutaka kusikia lolote ila kujua jinsi ya kumpata Mwanahawa.

Nilipita kona moja, mbili na hata bonde la mwisho ndipo nikampata mbwa mmoja mweusi tititi akitulia chini ya mwembe. Kumbe sikujua ukorofi wake. Mara, alianza kubweka kama ambaye amepokonywa mfupa wake.

"Aah! unatishia nani?" nilimshambulia kwa maneno ungedhani anasikia. Punde, nilianza kukusanya ujasiri wangu na kutembea taratibu hadi nilipomwona akinyemelea kisigino ndipo nikajua mazishi yanukia.

kando kando nilipitana na kundi moja la watoto waliokuwa wakimshangilia mbwa yule. "saadam! saadam! kamata mtu! kamata mtu!" “kumbe jina la baradhuli yule ni Saadam?” nilijisemeza kimoyomoyo.

Safari ya ajabu

Mimi huyoo! Nilichana mbuga huku mbwa yule gaidi akinifukuzia nyuma wakati akibweka na kumwaga nyute ni kama ameona nyama choma.

Bahati yangu nikapita kwa kasi na kuruka mtaro kubwa ya maji taka ndipo mbwa akaona ujanja wake umekwisha.

Ujanja wa nyani kweli huishia jangwani. "wewe! ningekumaliza leo" nilisema nikijipiga kifua.

Sitasema wakati huo nilikuwa nahema kwa nguvu huku kijasho kikinitiririka njia mbilimbili mashavuni. utacheka na leo labda kesho ni wewe.

Niliwasili pale kwao dakika chache baada ya saa mbili asubuhi. Chini ya kitalu cha miembe kwenye baraza, niliwapata wazee wake wameketi nje ni kama wanajadiliana kuhusu jambo la siri. Kama kijana mnyenyekevu, niliwaamkua kwa heshima kabla ya kuulizia alipokuwa mpambe wangu.

“kijana mbona wahema ni kama unafukuzia mawindo?” aliuliza mzee moja mwenye kipara cha kung’aa aliyevalia kanzu nyeupe. Chini ya viti palisimama glasi za kusheheni mnazi hata nikajua nimefika pa wenzangu.

“Nimefukuzia huku kumtafuta Mwana Hawa. Kuna ujumbe muhimu niko nao kutoka kwa mwalimu” nilijikinga na maswali kwa kudanganya.

“Pole kijana ila ni vizuri nikuarifu Hawa kesha ondoka majogoo kuelekea Nairobi kuabiri ndege ya auarabuni kwa mchumba wake. Nenda kamwambie mwalimu wenu Mwanahawa si wa hapa kijijini tena.”

Siku nyingi nimewalaani wale wa kujitia kitanzi ila sitaficha lolote kufichua kwamba wakati huo nilijihisi gofu tuu lisilo na maana. “mauti njoo unichukue” hayo ndiyo mawazo yaliyovaa.

Taratibu nguvu ilinishuka kabla ya fahamu kunihama. “Ala! Kisirani aina gain hii, kijana amekuja kufia hapa?” alizusha mzee mmoja.

Buriani

Heri niseme nilimpenda kwa dhati, msichana aliyenivumishia sifa pamoja na kuniongezea maadui kutokana na urembo wake.

sijui kama tutawahi kutana tena. nishapata udaku kwamba ni mja mzito. walimwengu kweli hawana imani.

“Kwaheri Mwanahawa, ulinisaliti duniani tukutane na akhera” nilijisemeza moyoni.

FEDHEHA ZA SWALEH

2011-09-29T17:30:00.000+03:00

MTUNZI: MARIA REHEMA

Swaleh kijana wa miaka ishirini na tisa alienda usingizini, akiwaza na kuwazua jinsi atakavyo jishindia jiko. Alihesabu miaka yake na kustaajabu kuwa miaka hiyo yote, alikuwa anavunda upweke. Kisa na maana hakuwa na bila barafu wa roho.

Liwike lisiwike kutakucha. Swaleh aliamka na kabla ya kupata staftahi, alianza siku kwa kujipodoa. Liche ya uzito wake na kipipa cha tumbo, aliamua kuvaa shati na suruale iliyombana kupindukia. “ Ndo mavazi ya kisasa haya, nitaweza kuwapata warembo kadhaa,” alijiambia Swaleh.

Baada ya staftahi, Swaleh huyo kiguu na njia jijini kutafuta kipenzi cha roho. Bak bandika bak bandua mpaka kwenye kituo cha basi. Alipoingia kwenye ‘matatu’ moja akakutana na kidosho aliyerembeka mno.

Hakupoteza wakati alikimbia na kuketi karibu na mrembo huyo. Alivutiwa na macho yake makubwa yaliyong’aa na ngozi yake nyororo. Mwili wake je? Nikisema zaidi utamwonea wivu. Maumbile haya yalimtia Swaleh wazimu.

Bila shaka Swaleh alibaki mdomo wazi maneno yakimganda kinywani. Dakika kumi zilipita kama bado wawili hao hawajaongea. Swaleh alikuwa akimeza mate tu huku akimrushia kijicho cha tamaa. Matatu lilipofika jijini wawili hawa walishuka.

Msichana huyo aliposhuka aliangusha mkoba wake. Swaleh huyooo! Alitaka kuonyesha hisani na kwa hivyo hakusita kutoa msaad.

Alipoinama kuuchukua mfuko huo, ghafla! suruali yake iliraruka huko nyuma asijue la kufanya. ikiwa ulisoma jiografia utakumbuka chimbuko la bonde la ufa. Hayo kando, mara Swaleh aliamka mbio kujiangalia huku haya ikimvaa usoni. Watu walioshuhudia tukio hilo hawangejizuia kicheko.

Kama kusugua chumvi kwenye kidonda, mara kifungo cha suruali ya Swaleh iling’oka na kuruka kumwahi mwanamke mkongwe aliyekuwa katika umati uliomzingira. Swaleh aliinama ili kuzuia suruali yake kumvuka. Lakini aibu haijui be wala te, suruali iliraruka zaidi.

Alichana mbuga na kuiingia na kuingia katika “ Public toilet”. Baada ya aibu hiyo, alijihisi kuenda msalani. Majasho yalikuwa yamemtoka midhili ya maji mferejini. Alipomaliza kujisaidia alienda kunawa mikono. Punde tu, alipofunguwa mfereji, maji yakatoka na fujo kumtoteshea upande wote wa mbele ya suruale yake.

“Salala! Aibu gani hii, si nguo zangu kuraruka, sasa nimetota.” Swaleh alilia.

Alipokuwa njiani kwenda kwake, kila aliyempita Swaleh angedhania amejikojolea. Alipofika nyumbani kwake, aliufunga mlango wake na kufuli na kuketi chini. Alitafakari jinsi tamaa yake ya kupata mke ilivyomletea aibu mno.

Usiku ulipofika, alijisongea sima na kukaanga mboga na akala. Alipokula, aliingia chumbani na kupanda kitandani akingoja usingizi umchukue.

… katika kipindi kijayo cha Fedheha za Swaleh.

“ Mwanangu huji kumtembelea mamako siku hizi?” Swabaha alilia.

NIMESADIKI MOMBASA NI KITOVU CHA STAREHE.

2011-09-12T20:35:00.001+03:00

Na Odhiambo Danyell

Mawingu mepesi yalitawanyika angani utadhani yameanikwa ili kukaushwa na miale ya jua ambayo yalikuwa yanazidi kufifia. Ghafla ,upepo mkali ulifagilia kwenye nchi kavu na kuwacha matawi ya miti yakipukutika ovyo ovyo kabla ya kuchezeshwa angani.
Isitoshe, ilihamisha wingu moja baada ya nyingine hata anga ikabaki safi. Kilichobaki kuonekana ni kundi ndogo la kunguru

MAZINGAOMBWE YA SAA

2011-07-13T15:10:00.000+03:00

Na Danyell Odhiambo

Nimejirusha kwenye kiti kilegevu cha msonobari nikifikiria jinsi hali ya maisha nchini Kenya inavyozidi kupaa kila uchao. Mbele yangu, pametulia redio, kando pamesimama kikombe cha kahawa chungu na juu pananinginia saa ya ukuta.

Ghafla, fikra zangu zinatekwa nyara na saa iliyozubaa ukutani. Nikiangazaangaza, naona imetimia usiku mkuu. Hii ni kumaanisha, mishale yote ya saa imekutana kifuani pa namba kumi na mbili.

Ukipiga hesabu kwa makini, utakubalina nami kwamba tukio kama hili hujirudia mara mia tatu sitini na tano kila mwaka. Ukumbuke, kisa hiki pia huashiria kuzaliwa kwa siku mpya.

Hata ingawa mishale hizi zimedhibitisha ushirikiano ni kiungo muhimu katika katika kikundi, taswira fulani inaibuka nikiangalia mishale hizo. Taswira yenyewe yahusu tabia mbovu ya wabunge kukaidi shinikizo za kuwataka kulipa malimbikizi yao ya kodi.

Nikipamabanua kitendawili hiki, itakubali kwamba jamii imejigawanya kupitia mishale hizi tatu za saa.

Mahuluku taabu nawafananisha na mshale wa kuhesabia sekunde kwa maana, wao hufanya kazi zaidi hata ingawa maumbile yao yameshiba unyonge. Kama tuu mshale wa sekunde, wenyeji katika kiwango hiki hulazimishwa kulipa kodi hata ingawa kipato ni kilegevu.

Ukihesabu, utagundua kwamba mshale wa sekunde huzunguka mara elfu moja mianne na arobaini kila siku. Si bure, wakenya hawa huandamana kila mara kutokana na unyanyasaji unaofanywa dhidi yao.

Kwingineko, mshale wa kadri ama ukipenda wa kurekodi dakika unalingana na wakenya wa maisha ya wastani. Kiwango hiki chajumlisha wale walomudu kupata elimu na hatimaye wakabahatika kuhifadhi nafasi za katikati serikalini na katika kampuni za kibinafsi.

Hapa, kazi ni kiasi na kipato ni kiasi ndo maana mshale wa dakika huzunguka mara ishirini na nne pekee kwa siku . hebu tafakari tofauti kubwa iliyoko ikilingana na kazi ya mshale ya sekunde.

Mwishowe, kuna ile mshale wa kuhesabu masaa. Kimatani anaitwa “hatunganani ila twavuma” bwana huyu anasifika kwa unyanyasaji dhidi ya wenzake. Hata ingawa huzunguka mara mbili tuu kwa siku, yeye ndiye mwenye ushawishi zaidi.

Kimaumbile, yeye ni mfupi na kibonge. Isitoshe, itakubidi ukaze macho zaidi ili kumwona akitekeleza wajibu wake. Katika Kenya yetu, mshale huu unafananishwa na viongozi wetu ambao kazi yao imekua ni kupayuka na kutoa ahadi za uwongo huku wakizidi kufilisi mlipa kodi.

Hebu sasa tazama viwango tofauti katika jamii ukilinganisha na mishale hizi za saa. Kazi ya wanasiasa pamoja na wale wa kipato cha wastani kamwe haiwezi kulinganishwa na jasho ya wakenya wanaopata malipo ya chini ya dola kwa siku.

Jee! Itakuwaje siku moja mshale ya kuhesabu sekunde ikisusia kazi? Hata labda hii ndoo maana ya wewe kuchelewa kwenda darasani ama kazini leo asubuhi.

KULIFANYIKA NINI KATIKA KONGAMANO LA AFYA NA MAENDELEO - SAFARI PARK

2011-07-06T20:47:00.000+03:00

“Aisee! nani anashukia safari park?” Makanga wa matatu ya kuelekea Githurai alipaza sauti akiuliza. “Mimi hapa!” nilimjibu huku nikikazana kupenya katikati ya abiria. Hewani, palishiba midundo mizito ya mziki iliyosambazwa kupitia spika kubwa zilizostiriwa chini ya viti.

“Hujaniregeshea change yangu!” nilimkabili makanga mlangoni. “Ulinipa pesa ngapi?” aliuliza akihema utadhani ni yeye amebeba gari kutoka mjini. Kuvutia zaidi, kijasho chembamba kilimtiririka njia mbili mbili mashavuni na kudondoka kwenye shati yake ya manjano.

Kwa sekunde chache, nilizubaishwa na mavazi ya makanga yule wa kiwiliwili cha wastani. Kichwani alivalia kofia nyekundu ya kuchujuka rangi iliyonakshiwa na maandishi “kazi kwa vijana”.Kiwiliwili kilijificha ndani ya kabuti kubwa iliyomfanya afanane "hatari bin danger"

Mashavuni palisongamana “msitu” ndevu zilizochakaa hata nikashuku ni makao wanyama pori. Taya (jaws) zake nazo zilichapa kazi ungedhani ni mtambo wa kusaga mahindi. Gololi za macho zikachomoka nje kama zitaanguka wakati wowote.

Isitoshe, alisalitiwa na alama za kijani kibichi kwenye midomo yake. Hii ilikuwa dhihirisho tosha kwamba amekopa uraibu wa mbuzi kutafuna majani. Usingoje nikufafanulie alikuwa anatafuna nini kwani hata mimi sijui. Hata labda ni sukuma wiki!

Bila kusita, alichokora mifuko ya kabuti yake kubwa kabla ya kunichomolea jani la shilingi mia moja iliyokuwa imelalia nyingine ya hamsini. “Dere funguka!....................... Dere funguka!” alimshurutisha dereva kuendelea na safari.

“Aisee! Teremka haraka tunaondoka” upesi nikaruka chini kabla ya basi kupigwa moto. Kilichobaki kuniandama ni moshi nyeusi iliyosambaa kabla ya kupaa angani. Makanga Yule alionekana akininginia kwenye mlango ya matatu kwa ustadi utadhani ni nyani imetembea jijini.

“Welcome to Safari park” kibao kikubwa kilininginia taratibu kwenye paa ya hoteli hii maarufu. Ujumbe uliotangazwa kwenye kibao hicho ilikuwa elezo tosha kwamba mazuri yalikuwa yananisubiri kule ndani. Nilitembea kwa madaha ungedhani mimi mwenyeji pale. Begi ya wastani ilitulia mgongoni, juu nilivalia sweta nyepesi ya samawati, chini jeans nyeusi nikimalizia na viatu vyeusi.

“Habari ya wakubwa?” niliamkua askari wenye sare za G4S waliokuwa wameshika doria langoni.

“Mzuri sana kaka, karibu” walipokea salamu huku wakisindikiza kwa tabasamu.
Kwa sekunde kadhaa, nilisafisha koo kabla ya kujifanya kuzungumza kizungu kwa ncha ya ulimi angalau na wajue hapo pamefika kijana maarufu. Isitoshe, nililegeza miwani na kuwatizama kiujanja. Heri tuu nisifafanue zaidi tukio hilo nitawachanganya bure!

“Excuse me guys, where is the venue of the conference dealing on health and development communication?” niliuliza na kujifanya kukohoa kidogo.
“This way please” mmoja wa askari hao alinielekeza.

Mbele yangu niliona vibao kadhaa za kusheheni nembo ya chuo kikuu cha Daystar hata nikajua nimewasili salama wasalmin. Nikichungulia kwenye kioo nyeusi, ningeona umati mkubwa wa watu uliokuwa makini kumsikiza mzee fulani aliyekuwa kasimama mbele yao kama mhubiri.

“Auuuwi! Rashidy! Hata wewe uko hapa?” kidosho aliyekuwa kwenye meza ya makaribisho aliniita kwa mashangao. Ukijipata katika hali kama hiyo utajaribu kujificha kutumia chochote kile hata ikiwa ni bakora.

“Jiandikishe hapa!” alinishurutisha huku akinisihi kushusha begi yangu.
Waume tuna ugonjwa ambao kutibu si rahisi. Ugonjwa wa kuzubaishwa na vitu vizuri na hasaa warembo. Tafadhali msishambulie kwani hata mimi nimeadhirika.

Binti huyo alibarikiwa na nywele za kipilipili, shingo ya chupa, meno meupe kama theluji yaliyo pangana kama chane kombani na kiuno cha nyigu hata akateka nyara macho pamoja na mawazo yangu nisipate kuwa makini tena.

“Ukajuaje naitwa Rashidy?” nikauliza kiujanja huku nikiwachilia macho yangu kumtalii kiumbe yule. “Kwani wadhani hujulikani, si ni wewe uliandika ile barua kwa mpenzi wako sikitu?” alinijibu kwa ujasiri.

Mashallah! Kama ningekuwa mtangazaji wa spoti ningesema nimepigwa “kumi kwa nunge”
“Tafadhali jiandikishe hapa?” alinisihi.

Singejizuia kuchungulia kitambulisho kilichokalishwa kwa lazma kwenye blausi yake kutumia kipini. Tamaa yangu kuu ikawa ni kujua jina la kiumbe huyu aliyekuwa amenichachawiza. Bana eeee! Hata wewe najua ungeadhirika. Naona aibu kusema kwamba alinifanya kusahau malengo na madhumuni ya kuzuru hoteli hiyo.

Kwa makini, nilipiga sahihi kwenye kitabu cha kuandikisha wageni kabla ya kuelekezwa katika ukumbi wa mkutano.

“Shukran kwa ukarimu wako!” nilimnongononezea kwenye sikio. “ndo wajibu wangu kaka, karibu!”alinijibu huku akitabasamu na kunivutia kiti. Tabasamu ile ilinifanya kuchanganyikiwa hata zaidi. Aligeuka na kutokomea hata nikageuza shingo na kumsindikiza kwa macho hadi alipotoka nje ya ukumbi.

Mbele ya ukumbi palisimama wima mabango ya washiriki tofauti. Macho yangu yalinata zaidi kwenye zile za chuo kikuu cha Daystar ambazo zilitangaza taaluma tofauti za kusomewa katika taasisi hiyo. Zingine zilikuwa za mashirika kama Safaricom, Internews, shirika la umoja wa kimataifa pamoja na zingine.

“Karibu katika kongamano la kujadili uandishi wa habari za afya na maendeleo 2011” kitambaa cha pamba kilichoninginia kwenye kuta kilichezeshwa na upepo uliofagilia pale ndani kila mara.

Kwa dakika chache, nilijikusanya na kusikiza kwa makini majadiliano yaliyokuwa yameshika moto. Wajumbe kutoka nchi tofauti duniani walikusanyika hapa kuwahamasisha waandishi wa habari pamoja na wadau katika sekta ya mawasiliano kukumbatia zaidi uandishi wa habari za afya na maendeleo.

Profesa mmoja maarufu mwenye mvi aliiinuka na kuwashambulia wanahabari wa nchi za kiafrika kwa kuwapa wasiasa kipaumbele na kusahau vitengo muhimu vya afya na maendeleo.

Kama kurusha mwenge penye mafuta taa, tetesi hii ilibua mabishano si kidogo haswa kutoka kwa wahariri ambao walisingizia tabia hiyo kutokana na shinikizo za wamilki wa vyombo vya habari.

Si siri, majadiliano hayo yalifana sana ila tayari nilikuwa nawasikia minyoo tumboni wakipanga kuandamana. Mara moja ama mbili nilimeza funda la mate angalau kutawanya waandamanaji hao tumboni.

“We are now breaking for lunch but we resume here for another presentation at 2PM” mmoja wa waandalizi alikatiza mkutano na kutoa tangazo hili.

usemi huo kwangu ulikuwa ni ukombozi. Hata kabla ya mshale wa saa kuteleza ukumbi uligeuka na kuwa kama soko kwani watu walitawanyika wakifuata asili ya harufu tamu ya mapochopocho.

Kwa umbali, ningezisikia glasi zikigongana hata nikajua hapa pameanguka nyota. Nje ya mlango wa kuingia ukumbi wa maankuli palisimama mabinti wawili walioshiba tabasamu. “karibuni ndani tafadhali ” mmoja wao alitusihi.

Bila kusita tulipanga foleni kabla ya kupakua chakula tofauti zilizopangwa juu ya meza ndefu. Mara nyingi nimeambiwa nistarabike na kutumia jina “buffet” badala ya kusema mengi. Haya basi ilikuwa ni buffet ya aina yake.

Kushoto kulikuwa na nyama za kila aina, sisemi mbuzi ulaya,mbuzi mtaa tafadhali endeleza orodha hii. kulia palisongamana viungo tofauti ambavo vilinichanganya kiasi ya kwamba niliogopa kusogelea huko.

Just imagine! ikiwa ningeulizwa nitambulishe kitu hapo halafu nishindwe? Bila shaka ningejifanya kigugumizi ili kujiokoa.

Keshoye, ratba ilibadilika na kuwa ya mafunzo kwa wanahabari. Usishangae nilimisi hata mandhari ya hoteli kwani kikao chetu kilihamishwa hadi kitovu cha jiji la Nairobi katika afisi za Internews kwenye orofa ya I&M.

Huko, nilipata kugundua kwamba wanahabari wengi huogopea sana takwimu kama mauti. Mafundisho haya yalitekelezwa na wanahabari wa kimataifa ambao ni mabingwa katika fani mbalimbali za uanahabari.

Wa kunivutia sana, ni mhariri mkuu wa gazeti la “The people daily.” kisa na maana, alitufafanulia kwa kina mbivu na mbichi kuhusu habari za upekuzi. Nikimnukuu, alisema fani hiyo si ya wengi na kwa wale wachache wenye kufanisi katika fani hiyo wamepewa heshima si kidogo.

Isitoshe, alisimulia kuhusu wanahabari kadhaa waliohatarisha maisha yao ili kuanika hadharani sakata za serikali kuwafilisi walipa kodi. Mmoja aliyenisikitisha sana ni marehemu Bw.Munuhe aliyewawa kwa kutishia kutangaza maficho ya Bw.Felicien Kabuga anayetuhumiwa kwa kuhusika katika mauaji ya halaiki nchini Rwanda.

Tosha gari, tuelekee katika siku ya tatu. Kikao kilifunguliwa na na viumbe wazito katika anga za mawasiliano nchini. Mmoja kama huyo ni Bw.Ezekiel Mutua wa wizara ya habari na mawasiliano. Bila kupima maneno aliwakemea wanahabari ambao wameegemea sana upande wa siasa na kufungia jicho habari zinazohusu afya na maendeleo kwa kisingizio kwangu watu hawazipendi.

Isitoshe mandugu zetu kutoka Nigeria waliwakilishwa na wataalamu kutoka vyuo vikuu tofauti za ulaya. Kama kawaida yao usemi wao uliambukizwa vitendawili na misemo ambayo iliwacha wengi wakilia mbavu.

Kama ada, kikao kilivunjwa mara kwa mara na kiburudisho cha vinywaji pamoja na vinyamunyamu tofauti.
Endelea kufuata hadithi hii wiki ijayo………………………………………..

BIBI WA KUTAFUTIWA!

2011-07-01T14:03:00.001+03:00

Kwa Bi Saida
S.L.P 248
DAYSTAR, Athi-River
24/03/2011

Mama,
Habari za siku nyingi? Hivi naamini u salama wasalmin hata ikiwa utasema nmenyamaza sana. Kabla sijaendelea, ningependa kuuliza ikiwa ulipata gora ya leso niliyokutumia. Hata hivyo,Kama ulipata ni sawa.

Mama! Lengo na madhumuni ya kuiandika barua hii ni kulalama kuhusu binti mliyenitafutia. Naamini nyina hawezi kumpa mwanawe sumu. Lakini, ni wazi tunda ulilonichagulia kumbe ilivutia kwa nje ilhali ndani imeoza.

Sitaki nikupandishe presha bure, lakini, ni vema nikufichulie dosari zake kabla maji hayajazidi unga. Mama! Kitanda cha kifahari nimenunua lakini amini usiamini nimelala kila kukicha nikijishika tama. Kisa na maana, bibi ni mwana riadha wa usiku.

Kabla nifikie kuiandika barua hii. Nimetafuta ushauri kutoka kwa wataalamu wa kila aina. Lakini, tiba imeshindikana. Nimechoka kulipa dhamana ya kumkomboa kila anapotiwa nguvuni na askari wa baraza la jiji kwa shtaka la kukimbia ovyo usiku.

Hivi nikizungumza, tayari nishamweka kwenye basi ya kurudi alikotoka. Heri nijichagulie bibi hata kam nitaenda kinyume na na itikadi zetu.

Najuta ni kwanini nikakubali kauli yenu ya kumfukuza mpenzi wangu njoki kwa madai kwamba ni wa kabila tofauti.

Mama! najua umeudhika kwa vile nimepinga kauli yenu. Kumbuka ulinieleza kwamba mwana akinyelea paja halikatwi bali hupanguswa.

Nitakuja nyumbani jumapili ijayo tupate kujadiliana zaidi.

Mimi Mwanao
Radhia Onyango

SIRI ZA CHUO KIKUU CHA DAYSTAR

2011-06-22T16:04:00.000+03:00

Njoo unisome kwa makini
S.L.P 927
MACHO PLAZA
Kwa wewe unayenisoma,

Habari za utokako? Naona unahema kweli ukitaka kujua yaliyojiri hivi leo kwenye barua hii. Hee! By the way, ikiwa wataka tuelewane naomba uwache kuniangalia kwa hizo macho za kushiba chuki na dharau.

Kabla nikuendelezee udaku! Tafadhali wacha kuangalia kando kando ukinisoma. Unawafanya wapita njia wanadhani tunawasengenya humu. By the way, usha ambiwa na yeyote hivi leo kwamba watamanisha? Ooooooooooooh! Nisamehe. I mean.... you are fearfully and wonderfully made. Sitaongeza wala sitapunguza.

Niwie radhi siwes kutranslate, please! Mwelezee.. aliye kando yako aje akusaidie.
Kabla nikupatie udaku, natamani niulize swali moja tuu. Nihakikishie kwamba hutanuna! Naogopa lakini heri niulize tuu atleast tusafiane nia. Hivi mbona una blush sana? Kama nimekubamba si uniambie tuu ama uwaite wanafunzi wenzako waje wasome uhondo.

Matawi ya miti naona inapukutika kutokana na upepo mkali unaofagilia kutoka milima ya lukenya. Woishe nishikilie! Naogopa itanipeperusha na huenda nikatua penye maadui wa lugha tamu ya Kiswahili.

Back to business! Nina aibu kubwa kukutangazia habari hii. Aaah! Woga potelea mbali. Je! Umesikia kwamba? hivi majuzi wakora wamevamia hoteli moja kule off kampus na kuiba mali inayokisiwa kuwa ya takriban shilingi elfu tano. Hii inajumlisha vipande kadha za ugali wembe pamoja na sufuria ya “nyama”

Duru za kuaminika zilieleza ukurasa huu kwamba CCTV kamera iliyowekwa kwenye hoteli hiyo ya mabati iliwanasa wakora hao wakitekeleza maovu yao. Majina yashatambuliwa ila sitaki kueneza uvumi. Usimwambie mtu lakini nimewasikia watu wakisema genge hilo sugu lilikuwa kwenye orodha maarufu ya “OCAMPO 600”

Kulingana na mwenye hoteli hiyo, genge hilo lilijitokeza likiwa limejiami na bunduki bandia kabla ya kuamrisha wateja kulala chini. Baadaye walifanikiwa kukutoroka na sufuria moja ambayo walidhani ni ya nyama kumbe ilikuwa yenye maji ya kuosha vyombo pamoja na vipande hivyo vya ugali.

Nishakwambia! Ndo maana nikapewa jina barua na jukumu langu likawa ni kusafirisha ujumbe.

Kumbuka kunisoma kila ijumaa nkupe yaliyojiri katika ulimwengu wa umbea. kuwasiliana nami mtumie bosi wangu ujumbe kupitia kujiuunga na kundi la WAKIDA kwenye mtandao wa FACEBOOK ama msikize kila alhamisi jioni kwenye idhaa ya SHINE FM 103.1 katika kipindi cha KIMBUNGA CHA JIONI.

akhsante kwa wakati wako,

niite Odhiambo Danyell ama ukipenda Rashidy

nimeondoka.....

MAPENZI KIZUNGU ZUNGU “SEASON TWO”

2011-06-21T11:14:00.001+03:00

“Darling funga macho nikuambie kitu” Bahati alinishurutisha kwa sauti ya upole. Bila kusita, nilifikicha macho yangu kwa viganja vya mkono nikiwa na hamu ya kujua kilichokuwa chaningoja.

Bahati alikuwa na uzoefu wa kunifanyia utani wa aina hii haswa wakati penzi lilkuwa limemchachawiza. Mara ya mwisho alitumia mbinu hii, ni wakati aliponiletea pete ya dhahabu afisini.

Wakati nilipokuwa nimeziba macho, mawazo mengi yaligongana akilini. “labda ana siri Fulani anataka kunieleza ama ni zawadi anataka kunipa? aaah! Potelea mbali, liwe liwalo!” nilijisemeza moyoni.

Ghafla, Mlipuko mkubwa ulisikika hatua chache. sekunde kadhaa baadaye, nilijipata nimelala kifudifudi ardhini huku shati yangu ikitoja damu. “Mungu wangu! Mungu wangu! ” nilibaki kupiga kite huku nikichirizikwa ovyo na damu utosini.

Nilikazana kulinda nguvu kiasi niliyokuwa nimebaki nayo, macho yangu yalipepesa na kuranda randa ovyo nikitafuta alipokuwa Bahati wangu. Mita chache, niliona mawimbi ya bahari yenye hasira yakifagia ufuo na kubingirisha mwili wa mpenzi wangu kuelekea maji makuu.

Nilijaribu kupiga kamsa angalau kuita usaidizi lakini, maghala ya nguvu mwilini yalikuwa tupu. Nilibaki tuu kutizama bahari ikininyanganya kipenzi changu. Ghafla giza nene ilinijia hata nikapoteza fahamu nisipate kujijua.

********************

“Rashidy……………Mzalendo” sauti dhabiti ilinizindua kutoka ule usingizi mzito. “Naam! Ni mimi!” niliitika kwa utiifu, ungedhani nimeitiwa zawadi.

Mawazo yangu yalikuwa yangali yana randa randa. Kufumba na kufumbua nilijipata katika wodi ya wagonjwa mahututi. Kichwa kilikuwa kizito ungedhani limefungiwa gunia ya chumvi.

Pembezoni mwa kitanda, niliona kibuyu fulani kama kibofu ambayo ilikuwa imeshiba damu hata nikadhani naota. “What am I doing in this hospital?” kimombo kilifufuka kinywani.

“Ukweli ni kwamba, umekuwa katika wodi hii kwa miezi miwili sasa. Hii baada ya kujeruhiwa vibaya katika shambulizi la kigaidi lililotekelezwa katika hoteli fulani jijini humu. Habari njema ni kwamba angalu umepata fahamu” jamaa mrefu mwenye surupwenye nyeupe pepepe aliniarifu kwa sauti nyenyekevu.

“Where is my Bahati?” zimwi la kimombo lilivamia usemi wangu tena.
Hata kabla ya kupewa jibu kwa swali hilo, tayari picha za kumbukumbu za Bahati wangu zilikuwa zinapishana akilini. Nilijaribu kuzikusanya picha hizo kujua alivyovalia mara ya mwisho tulipokutana lakini singekumbuka.

“We are very sorry to inform you that your lovely Bahati is no more” maneno yale yalipenyeza akilini kama upanga mkali. Tumboni, ningesikia ngurumo fulani kama radi ambayo iliharibia hata minyoo starehe.

Baadaye, nilishindwa kuhimili uzito wa ujumbe ule hata hewa ikanikatikia. “Haraka! Mlete mtambo ya oxigeni tutampoteza jamaa huyu, hurry up! You bustards” daktari alisikika akiwafokea wauguzi.

ENDELEA KUFUATA HADITHI HII YA KUSISIMUA!!!!!!!!!!

KUAGA KWA GWIJI, MJ

2011-06-20T20:31:00.000+03:00

Dunia iliomboleza, kulala kwa Gwiji
MJ tulimpoteza, vilio kwenye miji
Mauti umetukaza, Na tukutane kwa jaji
Kwaheri ya kuonana Mfalme wa Pop

Mauti huna arafa, tutayarishe mapema
Robot densi ilifaa, moon walk ikavuma
Ingawa ulikufa, sifa zitakusakama
Kwaheri ya kuonana Mfalme wa Pop

Mahasidi wenye wivu, kakupeleka kizimba
Wakakupa maumivu, bila hatia ukaimba
Umerudi kuwa jivu, kwetu ungali simba
Kwaheri ya kuonana Mfalme wa Pop

Mahala pema peponi, Na ilale roho yako
Takulinda kama mboni, zisipotee sifa zako
Sinayo woga usoni, kukupea wewe heko
Kwaheri ya kuonana Mfalme wa Pop

MAPENZI KIZUNGU ZUNGU

2011-06-16T10:52:00.000+03:00

MTUNZI: ODHIAMBO DANYELL

Mawimbi makali baharini yalikimbizana na hatimaye kusukuma maji hadi ufukweni. Pembeni, Bahati alionekana ameshika kijiti kirefu mkononi akijaribu kuchora umbo la moyo wa mapenzi kwenye changarawe mbichi huku maji ya bahari yakifuta.

Angani, ndege aina ya korongo na mbayu wayu wangeonekana wakicheza cheza huku tufani kali zikifanya matawi ya minazi ufuoni kupukutika. Nikijistiri juu ya roshani(balcony) katika hoteli ambayo tulikuwa tumekodisha nilisalia kula kwa macho.

Nilibakia kinywa wazi kuona madhari ya kutamanisha jinsi jua ilizama upeoni na kufanya maji ya bahari kupiga rangi ya manjano. mawazoni, nilitawaliwa na picha za harusi yetu jana yake katika ukumbi wa pataneni.

Hatua chache niliona suti yangu ambayo ilikuwa ingali sakafuni baada ya usiku yenye sarakasi si kidogo. Ajabu, marashi yenye uhai aliyopiga Bahati ilikuwa bado imesakama pua yangu.Waliosema harusi ni kilele cha mapenzi hawakukosea hata kidogo.

“Honey…………Rashidy! Rashidy!” Kwa mbali, nilimsikia Bahati wangu akiita. Nilipogeuka nilimwona akiruka huku akirusha mkono kama kunisihi niende alipokuwa.

Nikivalia makubadhi ,suruali fupi ya samawati na shati yenye michoro ya vibonzo na taratibu nikateremka kwenye ngazi ya mbao. badaye nilifuata njia ya nyasi iliyochongwa kando kando kuelekea alipokuwa mpenzi wangu.

Bila kusita alikimbia na kunirukia kwenye mabega huku akizamisha busu moto kwenye shavu langu. Hisiya kweli hazifungiwi mlango………………………endelea kutembelea ukurasa huu ujue yapi yatatokea katika hadithi hii

Kwa mpenzi wangu Bi Omena.

2011-05-09T15:23:00.001+03:00

Rashidy Mpendwa

Kwa mpenzi wangu

Bi Omena.

Sanduku la posta 10,

Jangwani.

Lazizi,

Mwaaaaah! ama wataka busu nyingine?

Nimeandika barua hii kwa hofu kuu kwani naogopa hii ni mara ya mwisho tutakutana kwenye mji mkuu wa sahani. Amini usiamini, nitamisi sana tabia yako nzuri ya kunitengezea kitoweo cha kufinyanga kwa sima wa mahindi.

Kwa hakika, sina furaha kwani ahadi zako kwamba tutakutana sokoni zimeambulia patupu.kila wakati nimeenda sokoni sijakupata. nimewapata tuu mandugu na madada zako kiboma, kambare, mbuta na tilapia.

Shemeji yako Tilapia ameniarifu kwamba idadi ya familia yenu imepungua sana katika ziwa victoria.

Kisa na maana,Tilapia aliteta vikali kwamba chemichemi ya maji ya mau imeharibiwa pakubwa na jamii ya wanadamu. ailisistiza kwamba msitu huo uhifadhiwe ikiwa nataka kuonja tena kitoweo chako.

Mpenzi, wajua kwamba nakuota kila nikila? matonge ya sima yananinyonga kila nikiwaza kukuhusu.

By the way nimeamua nitakujengea bonge la swimming pool uje uishi na familia yenu yote. mpenzi mgani mwingine kama miye?

Naomba tuu unieleze tutapatana wapi nkupe zawadi yangu.

MWAAAAAH!

Ni mimi wako Rashidy mla mboga.

MAKARIBISHO YA WANAFUNZI WAGENI CHUONI DAYSTAR!

2010-07-12T14:13:00.000+03:00

Hayawi! Hayawi! Hatimaye huwa. Msafara mrefu wa magari ya kifahari ulitawala barabara kuu ya mchanga kuelekea katika lango kuu la chuo cha Daystar, Athiriver. Kwangu ilikuwa ni kama jonzi kwani maishani halikuwahi kunidara wazo kwamba siku ingenijia ya kujiunga na chuo hili maaarufu.

Nikijisitiri kwenye piki piki moja kuu kuu ambayo ilinikumbusha kisa cha punda mzee aliye rusha mateke, kupiga nduru na kulia machozi alipofanyishwa kazi ya sulubu bila ya mwenyewe kujali.vivyo hivyo pikipiki ilisikika kuyumba yumba huku ikitoa sauti kubwa na moshi ya mpingo iliyosokota angani bila ya dereva kushtuka.

Wakati mbwe mbwe na shamra shamra zikitawala tulipofikia msafara huo katika lango kuu chuoni humo sikuwachwa nyuma kwani niliwasili kwa ‘style’ya aina yake. Godoro niliifunga mgongoni, begi kubwa yenye picha kubwa ya "rambo" ikiniwekelea tako utosini na ndoo ikininginia taratibu begani. Zaidi, dereva wa pikipiki alitia nakshi taswira hii kwa kuwasili kwa kishindo kikubwa.

Alipiga honi na breki ya ghafla iliyotifua wingu la vumbi kama kuashiria “hata sisi tumecome”
“Habari zenu?” askari mmoja aliyeshika doria langoni aliuliza kwa sauti dhabiti.
“Za kwetu salama, labda utujuze za kwako?” dereva wa piki piki alidakia kwa unyenyekevu huku jasho ikimkimbia njia mbili mbili mashavuni.

“Huyu ni mgeni wetu?” Askari huyo aliyevalia sare zilizotawaliwa na maandishi “G4S” Alizidi kutuhoji. “Mimi niko tuu katika hali ya kujitafutia riziki hebu mhoji yeye si bubu” alijibu kama kwa dharau.

Nikivumilia harufu mbaya ya dereva huyo aliyenukia Kama beberu sikujua jinsi ningejinasua kutoka kwenye mtego huu. Mara tuu nilipo jaribu kushuka ndipo nilijipata nimeramba mchanga huku pikipiki ikipinduka na mizigo yangu kutapakaa ovyo ovyo.
Kando yangu alionekana dereva huyo naye akijipangusa mchanga kichwani, hapo ndipo nikabaini kwamba piki piki ile mbovu ilikuwa ni kama inalipiza kisasi kutokana na jinsi ilikuwa inadhulumiwa.

“Pole kwa ajali!” sauti nyororo ilinizindua kutoka ardhini. Kweli hakuna sababu ya kutofautiana na waliodai sauti nzuri humtoa nyoka pangoni. Hata baada ya mimi kubingiria na kujeruhi goti, nilijisikia ni kama sauti hiyo ilikuwa ni barafu ya kunipoza machungu.

Kabla hata ya kuvinjari maumbile ya mrembo huyu aliyekuwa amevalia minisketi iliyonakshiwa na umbo za duara ndipo nilisikia dereva wa pikipiki akifoka “wewe ni mshamba kutoka wapi, Unashuka kwenye pikipiki ni kama unashuka kutoka mgongoni mwa punda?”

Muungwana wanasema hanuni mashavuni ila hununa moyoni. hivyo, kwa upole nilinyanyuka na kumwachia fursa ya kuzidisha mashambulizi yake makali.

Nikielewa fika kwamba jogoo wa shamba daima hawiki mjini ilikuwa ni zamu yangu kuficha makucha na kunyenyekea huku waliotazama kisa hicho wakimlaaani dereva na kunionea imani “maskini mtoto wa watu!” alisikika mmoja akisema.

Kama kutonesha kidonda baradhuli huyo alizidi kuimarisha ukaidi wake “wee hebu nipe pesa zangu unafikiri nilikuwa nikifanya kazi ya kupaka mbwa rangi”
“Unamdai pesa ngapi?” mrembo huyo alidakia tena kwa ile sauti nyororo.

Bila ya kusita na kujiepusha na aibu zaidi niliingia mara moja mfukoni na kumchomolea noti ya shilingi hamsini. “Nimeshukuru kwa ukarimu wako lakini wacha tuu nibebe msalaba wangu mwenyewe” nilimjibu mrembo huyo.
* * *
Lucy Bahati alikuwa msichana mrefu, shingo ya chupa, kiuno cha nyigu na meno meupe yaliyo pangana kama chane kombani. Sisemi ngozi yake laini, nywele yake ya kipilipili na pia sitaji mavazi yake uliyojumlisha “tumbo cut” ya samawati, minisketi nyeusi yenye umbo za mraba na kumalizia na harufu hai ya waridi iliyomwandama kote. We! Hata wewe ungeathirika.

Tisheti yake ilitawaliwa na mandishi “look but don’t touch”. Utanisamehe kwani sikupata fursa ya kuomba kufafanuliwa maana yake.
“Ina makosa nikijua jina lako” nilimchokoza kwa ujanja.

“Ah! Mimi naitwa Lucy Bahati mmoja wa wanafunzi wakongwe chuoni humu. Kutokana na lahaja yake na ujuzi wa lugha mara moja nilibaini asili yake ni pwani.
“Na wewe waitwaje, naomba nikubebee hiyo godoro?” ilianzia hapo.

“Wananiita Rashid Mchristow ukipenda Mwana Maoni” nilimjibu bila ya kusita huku jibu langu likiibua kicheko kikubwa.