Hamro Tanahun

एमाले नेतृको छोरामाथि काँग्रेस कार्यकर्ताको आक्रमण

2017-11-27T20:03:00.002-08:00

मंसिर १०, अत्रौली
घिरिङ्ग गाउँपालिका १ अत्रौलीमा एमाले समर्थित युवा विदुर सिग्देल र सफल सिग्देल काँग्रेसका कार्यकर्ताहरुको आक्रमणबाट घाइते भएको छन् । शनिबार राति घरमा कोही नभएको मौका पारि सिग्देलद्धयलाई काँग्रेस कार्यकर्ता समेत रहेको स्थानिय पदम थापाको नेतृत्वमा पुगेका १० जनाले आक्रमण गरेको बताइएको छ ।
नेकपा एमालेका जिल्ला उप सचिव विष्णु भक्त सिग्देलले दिएको जानकारी अनुसार ५ वटा मोटर साइकलमा आएका १० युवाले सिग्देलद्धयलाई आक्रमण गर्दा विदुरको टाउकोमा गम्भिर चोट लागेको छ भने ढाडमा समेत रड प्रहार गर्दा चोट लागेको छ । यता सफल सिग्देलको भने खुट्टा भाँचिएको बताइएको छ । अनेरास्ववियु तनहुँका अध्यक्ष आर के पोख्रेलले काँग्रेसका कार्यकर्ताबाट भएको साँघातिक आक्रमण ज्यान लिने उदेश्यले भएको बताउदै दोषीलाई कडा कारबाही हुनु पर्ने बताएका छन् । उनले पोख्रेल अहिले पोखरा स्थित मणिपाल शिक्षण अस्पतालमा घाइतेहरुको उपचार स्थलमा रहेका छन् । उनका अनुसार उपचार पछि घाइते विदुरको अवस्था खतरा मुक्त रहेको छ ।
विदुर गत स्थानिय तहको निर्वाचनमा नेकपा एमालेको तर्फबाट निर्वाचित घिरिङ्ग गाउँपालिकाकी उपाध्यक्षका छोरा हुन् । शनिबार उक्त स्थानमा प्रतिनिधि सभाका उम्मेदवार रहेको नेपाली काँग्रेसका नेता तथा पूर्व मन्त्री शंकर भण्डारी चुनाव प्रचार प्रसारको क्रममा दलबलको साथमा पुगेका थिए ।
यस विषयमा गजरकोट प्रहरी कार्यालयमा थप जानकारी लिन खोज्दा सम्पर्क हुन सकेन । प्राप्त जानकारी अनुसार घटना स्थलबाट प्रहरीले आक्रमणकारीहरुले प्रयोग गरेको लु २७ प १९६४ नम्वरको मोटर साइकल बरामद गरेको छ ।

रौतहटको सन्तपुरमा धमाधम निर्माण हुँदैछ धुर्मुस सुन्तलीको अर्को नमुना बस्ती

2017-10-28T06:43:00.002-07:00

रौतहट : धुर्मुस सुन्तली फाउन्डेसनले एकीकृत बस्ती निर्माणको चौथो परियोजना अन्तर्गत हाल चन्द्रपुर नगरपालिका ८ सन्तपुरका दलित बस्तीमा ४७ घर बनाउँदैछन्। असोज ४ गतेदेखि सुरु भएको बस्ती निर्माणको काम अहिले तिब्र गतिमा भइरहेको छ। माघको २४ गते बस्ती हस्तान्तरण गर्ने लक्ष्यका साथ काम भइरहेको फाउन्डेसनले जनाएको छ।

पाँच करोड ७५ लाखको लागतमा बन्न लागेको यस बस्तीमा ४७ वटा आवासीय घर, एउटा भ्यु टावर, एउटा सामुदायिक भवन, एउटा मन्दिर, सार्वजनिक धारा र शौचालय बनाउने फाउण्डेसनका अध्यक्ष कलाकार सीताराम कट्टेल धुर्मुसले बताए। हाल धुर्मुस र उनकी पत्नी कलाकार कुञ्जना घिमिरे सुन्तलीले बस्ती निर्माणको काममा जुटेका छन्। हालसम्म बस्तीका २२ घरको जग राख्ने काम सकिएको फाउन्डेसनका अध्यक्ष धुर्मुसले जानकारी दिए।

धुर्मुसले आफ्नो जन्मदिनको अवसर पारेर गत असोज ४ गते बस्ती निर्माणको काम सुरु गरेका थिए। 'माघ २४ गते बस्ती हस्तान्तरण गर्ने उद्देश्यका साथ काम अघि बढाए पनि अझै धेरै सहयोग संकलन गर्न बाँकी रहेको छ र सहयोगको अपेक्षा पनि गरेको छु' धुर्मुसले भने ‘धुर्मुस सुन्तली फाउण्डेसनका हरेक परियोजना सहयोगीहरुकै कारण निर्माण सम्पन्न भएका हुन, उहाँहरु बिना त हामी अधुरो छौं। सबै सहयोगी मनहरुले हामीले सहयोग गर्नुपर्छ भनेर सहयोग दिनुभयो भने हामीलाई बस्ती निमार्ण गर्न कठिन हुँदैन।' बस्ती निर्माणका लागि हालसम्म १ करोड रुपैयाँ मात्र संकलन भएको छ।

अझै साढे ४ करोड रुपैयाँ आवश्यक पर्ने धुर्मुस सुन्तली फाउन्डेसनले जनाएको छ। फाउन्डेसनले यसपटक बाढी पीडितका लागि नमुना बस्ती बनाउन लागेका हुन्। 'यस्ता कार्यमा राज्यको पनि लगानी हुन आवश्यक छ, अब पीडित परिवारलाई राहत हैन पुनर्निर्माणतिर लाग्नुपर्छ' धुर्मुसले भने। एकीकृत बस्तीमा निर्माण हुने दुई तले घरको लागत १० लाख लाग्ने अनुमान गरिएको छ। एउटा घर लगभग साढे ३ धुर जग्गामा निर्माण हुनेछ। घर पूर्ण रुपमा भुकम्प प्रतिरोधी, बालमैत्री, अपाङ्ग मैत्री र बातावरणमैत्री हुनेछ। अहिले परियोजना १२ कठ्ठा क्षेत्रफल भएको बस्ती निमार्णमा दैनिक २ सय ५० जना भन्दा बढी कामदारहरु काम गरिरहेका छन्।

धुर्मुसले सधै बिहान ६ बजेदेखि बेलुका ६ बजेसम्म आफै काममा खटिएका छन्। धुर्मुस बने भगवान सन्तपुरमा नुमना बस्ती बनाएर घर दिने भएपछि दलित बस्तीका मानिसले धुर्मुस र सुन्तली भगवान बनेर उत्पत्ती भएको बताएका छन्। पुरानो र जीर्ण झुपडीमा बस्दै आएका ५० घर दलित परिवारले माघ २४ गतेपछि सुविधायुक्त घरमा बस्न पाउने भएका छन्। गरिबलाई घर नै बनाइदिएर सहयोग गर्न आएका धुर्मुस सुन्तली मानिसमात्र नभएर भगवान नै भएको बस्तीका शैलेन्द्र माझी मुसहरले बताए। जीर्ण झुपडीमा बस्दै आएका माझी, मुसहर, दूषाध, लोहार र हजामका ५० परिवारका लागि फाउन्डेसनले घर बनाउन लागेको हो। नमुना बस्ती बनाउन जमिन, बाटो, लगायत सबै पूर्वाधार भएकाले सन्तपुरको दलित बस्ती नै छनोट गरिएको धुर्मसले बताए।

तौल घटाउने नाममा गरिने ७ गल्ती

2017-10-27T21:38:00.002-07:00

जिरो क्यालोरी डाइट

शरिरको फ्याट खर्च गर्न शरिरलाई असंतृप्त फ्याटको आवश्यक पर्छ । तौल घटाउने नाममा तपाईं कृत्रिम गुलियो र पेय पदार्थ पिउन सक्नुहुन्छ । जुन तपार्इंको स्वास्थ्यको लागिहानिकारक हुन सक्छ ।

औषधी तथा पिल्स

सजिलै तौल घटाउन कहिल्यकाहिँ हामीले औषधी तथा पिल्स खाने गर्छौ । तर, यसले तपाईको स्वास्थ्यमा गम्भीर हानी गर्छ । सन्तुलित भोजन र व्यायामसँगै पूरक पोषणयुक्त खानेकुरा पनि शरिरलाई आवश्यक पर्छ ।

खाना छोड्ने

तौल घटाउँछु भनेर लामो समय भोकभोकै बस्नु बेकार छ । यसले तपार्इंको मेटाबोलिजमलाई सुस्त बनाउनुका साथै शरिर आलस्य हुने र बिरामी बनाउँछ ।

जबर्जस्ती वान्ता गर्ने

केही व्यक्तिले आफूले मन लागेको खानेकुरा खाएर आफ्नो भोक मेटेपछि केही बेरमै जवरजस्ती मुखमा औंलाकोचारेर वान्ता गरी क्यालोरी फालेको पनि पाइन्छ । यसले व्यक्तिमा गम्भीर मनोवैज्ञानिक असर पर्न सक्छ र झनै खन्चुवा स्वभावको बनाउँछ ।

पखलालाग्ने औषधि

पाचनपक्रियामा गडबढी गरी बारम्बार शौचालयजाने विधि धेरैले प्रयोग गरेका हुन्छ । तर औषधीको प्रयोगले पाचन प्रणालीलाई कम्जोर पार्नुका साथै पेटसँग सम्बन्धितअन्य समस्याउत्पन्नहुन सक्छ ।

धुमपान

कोहीकोहीले भोक दबाउन धुमपान गर्ने गर्छन् । धुमपानले दिमागको संकेतलाई अबरोध गरी भोक मार्ने गर्छ । त्यहीभएर चुरोट खाने अधिकांश व्यक्तिलाई खाना छोडे पनि खासै अशर पर्दैन । तर, लामो समयसम्म यस्तो गर्दा शरिरलाई हानी गर्नुका साथै क्यान्सरको जोखिम बढ्छ ।

अत्यधिक व्यायम

अत्यधिक व्यायायमको परिणामले शरिरलाई घाइते बनाउछ । किनकी अत्यधिक व्यायमले मुटुमा अशर गर्न सक्छ । बरु हल्का दौडने, तौल घटाउने तालिम गर्दा शरिरलाई फाइदा हुन्छ ।

उपचार गर्ने पैसा छैन? देशभरका यी ७२ अस्पतालबाट पाइन्छ ८ रोगमा एक लाखसम्मको निःशुल्क उपचार

2017-10-27T21:36:00.003-07:00

काठमाडौँ- सरकारले विभिन्न ८ प्रकार कडा रोगको उपचारका लागि ३२ अस्पताललाई स्वीकृति दिएको छ।

मुटु, मिर्गौला, क्यान्सर, पार्किन्सन्स, अल्जाइमर्स, हेड इन्जुरी, स्पाइनल इन्जुरी र सिकलसेल एनिमिया रोगको उपचारका लागि राजधानीबाहिरका बिरामीलाई नजिकका अस्पतालमा उपचार सेवा पुर्याउन स्वीकृति दिइएको हो। योसँगै अब उपचार गर्न पैसा नभएका बिरामीले देशका ७२ अस्पतालबाट ८ रोगमा एक लाखसम्मको उपचार सेवा पाउने भएका छन्।

स्वास्थ्य मन्त्रालय स्वास्थ्य सेवा विभाग व्यवस्थापन महाशाखाको विपन्न नागरिक औषधि उपचार कोष व्यवस्थापन शाखाले सूचीकृत अस्पतालबाट कडा रोगको उपचारका लागि मिर्गौला बाहेकका अन्य ७ रोगका लागि एक लाख बराबरको उपचार सेवा प्रदान गर्न स्वीकृत दिएको हो। मिर्गौला फेल भएकाहरुले भने प्रत्यारोपणका लागि साढे ५ लाखसम्म र नि:शुल्क डायलाइसिस सेवा पाउँछन्।

महाशाखाको विपन्न नागरिक औषधि उपचार कोष व्यवस्थापन शाखाका सिनियर अहेब प्रकाश घिमिरेले मिर्गौला रोगीका लागि डायलाइसिस निःशुल्क, मिर्गौला प्रत्यारोपणका लागि ४ लाख र प्रत्यारोपणपछि औषधि उपचारका लागि रु एक लाख उपलब्ध गराउँदै आएको बताए। मिर्गौला प्रत्यारोपण गर्नुअघि प्रयोगशाला परीक्षणका लागि ५० हजार रुपैयाँ उपलब्ध गराउँदै पनि उनले जनाकारी दिए।

त्यसबाहेक मिर्गौला रोग अन्तर्गत एक्युट रिनल फेलियर (एआरएफ) का बिरामीका लागि एक लाख बराबरको औषधि उपचार खर्च पनि प्रदान गरिँदै आएको छ।

तोकिएका अस्पतालमध्ये बाथ मुटुरोगको शल्यक्रियाका लागि बिरामीले सिधै अस्पतालमा पुगेर उपचार सेवा पाउन सक्छन् भने अन्य रोगमा भने कागजी प्रक्रिया पूरा गर्नुपर्ने हुन्छ। बिरामीले यो सहयोग रकम नेपालमा उपचार सम्भव नभएका रोगका लागि विदेश जाँदा पनि पाउनेछन्।

कसरी लिने सहायता?

उपचार सहायताका लागि सबैभन्दा पहिला रोग पहिचान भएपछि डाक्टरको पूर्जी (प्रिस्किप्सन) लगेर गाउँपालिका वा नगरपालिकाबाट विपन्न नागरिक सिफारिसपत्र लिनुपर्छ। सो पत्रका लागि जिल्ला स्वास्थ्य कार्यालय वा जिल्ला जनस्वास्थ्य कार्यालयबाट सिफारिसपत्र लिएर उसले तोकेको अस्पतालबाट उपचार सहायता प्राप्त गर्न सकिन्छ। उपचार आफ्नो घर पायक पर्ने अस्पताल रोजेर गर्न सकिनेछ।

यी हुन् ८ रोगका लागि सूचीकृत ७२ अस्पताल-

कसले मार्ला बाजी ?

2017-10-27T21:32:00.003-07:00

कार्तिक ११, २०७४-कांग्रेसका रुद्रबहादुर खड्का र एमालेका पार्वत गुरुङ दोलखाको एउटै गाउँपालिकाका बासिन्दा हुन् । उनीहरू आसन्न प्रतिनिधिसभा चुनावका लागि दुई फरक पार्टीबाट आमनेसामने भएका छन् । कांग्रेस अगुवा जिपछिरिङ लामाले इच्छा नदेखाएपछि खडकाले मौका पाउनु र निकै घम्साघम्सीपछि एमालेका गुरुङले टिकट पाउनुलाई ‘भाग्यको संयोग’ ठान्नेहरू पनि प्रशस्तै छन् । यी दुईबीचको चुनावी प्रतिस्पर्धा निकै रोचक हुने मतदाताबीच चर्चा छ ।

जिल्लामा यसअघिका अधिकांश चुनावी नतिजा एमालेको पक्षमा गएको छ । त्यही परिणामका आधारमा गुरुङ आफूलाई बलिया उम्मेदवार ठान्छन् । खड्का भने परिस्थितिले कोल्टे फेरेको र मतदाताले परिवर्तन खोजेकाले आफ्नो अवस्था मजबुत भएको बताउँछन् ।

गौरीशंकर गाउँपालिकाअन्तर्गत झ्याँकुमा जन्मिएका खड्का र त्यसैको साँधसीमा सुरीका गुरुङ सफल व्यापारी पनि हुन् । प्रजातन्त्र प्राप्तिपछि स्थानीय निर्वाचन हुँदा देशकै कान्छा सभापति हुने अवसर सदुपयोग गरेर ‘हैसियत’ बनाएका खड्काको दशक लामो अमेरिका बसाइको मुद्दा भने बेलाबेला कमजोरीका रूपमा उठ्ने गर्छ । उनले सुरुवातमा सामान्यस्तरको होटल व्यवसायबाट ठूलो उद्यममा हात हालेका हुन् ।

एकपटक कारोबारमा सँगै जोडिएका गुरुङसँग उनको राम्रै सम्बन्ध छ । व्यापार व्यवसायको सम्बन्ध भने उहिल्यै टुटेको खड्काको दाबी छ । ‘खड्काको कांग्रेसभित्र गहिरो आलोचना हुने गरेको विषय नै एमाले नेतासँग व्यापारमा हातेमालो गरेकामा हो,’ जिल्ला तहका एक कांग्रेस नेताले भने । पार्टी जिल्ला सभापतिमा उठ्दा प्रतिस्पर्धीले विपक्षी दलसँग उनको नरमपना, व्यक्तिगत मामिलाको सहकार्य र विदेश पलायनको मुद्दा चर्कोसँग उठाएका थिए । ती सबै कारण पहिलो प्रयासमा पार्टी जिल्ला सभापतिमा हार व्यहोरेका खड्का दोस्रोपटक जितको खुड्किलो पार गर्दै सहकार्यको राजनीतिलाई अँगालेर अघि बढेका छन् । जिल्लाको विकासमा एकजुट हुनुपर्ने सन्देश उनले पटकपटक दोहोर्‍याउने विषय हो ।

वामपन्थी गठबन्धन बन्ने भएकाले जिपछिरिङले प्रतिनिधिसभाको टिकट लिइदिए कांग्रेस चुनावी मैदानमा दह्रोसँग उभिन सक्ने कार्यकर्ताको विश्लेषण थियो । व्यापक दबाबका बावजुद २०७० को प्रतिनिधिसभामा हार व्यहोरेका जिपछिरिङले चुनावमा उठ्न अस्वीकार गरेपछि खड्काले अवसर पाएका हुन् ।

जडीबुटी व्यवसायबाट लघुउद्यम हुँदै परिवारका सदस्यको सहयोगमा अन्तर्राष्ट्रियस्तरसम्म व्यापार बढाएका एमाले उम्मेदवार गुरुङ उद्यम र राजनीति दुवैमा सफल मानिन्छन् । उनी राजनीति र उद्यमशीलतालाई साथै लैजान २०५१ सालदेखि क्रियाशील भएको बताउँछन् । २०४८ देखि पार्टी जिल्ला कमिटीमा प्रवेश गरेका गुरुङ ०६६ मा अध्यक्षको जिम्मेवारीमा पुगे । निकै कष्टपूर्वक जित निकालेका उनले पार्टीलाई नयाँ ढाँचामा उठाएपछि ०७० को निर्वाचनमा क्षेत्र १ बाट प्रतिनिधिसभाको निर्वाचनमा टिकट पाउन त्यति कष्ट गर्नुपरेन ।

सजिलै टिकट पाएको तर कठिन मिहिनेतपछि निर्वाचन जितेकाले एमालेको नवौं महाधिवेशनबाट उनलाई केन्द्रीय सदस्य हुनसमेत सघाउ पुग्यो । जिल्लाबाट सिफारिस भएका पार्टी पोलिटब्युरो सदस्य र पूर्वमन्त्री आनन्दप्रसाद पोखरेलसँग रस्साकस्सी गर्दै प्रतिनिधिसभा सदस्यको टिकट हात पार्नु उनका लागि चानचुने चुनौती थिएन । केहीले जनजाति भएर पनि उनीहरूलाई माथि उठ्न नदिएको आरोप गुरुङमाथि लगाउँदै आएका छन् । तर, जिल्लाको पार्टी इन्चार्ज भएकाले पछिल्लो समय गुटगत स्वार्थबाट माथि उठेर केही अवसर बाँडफाँट गरेको जससमेत उनलाई जाने गरेको छ ।

मतदाता रिझाउने परीक्षा

रामेछापमा प्रतिनिधिसभामा वाम गठबन्धनबाट बहालवाला राज्यमन्त्री श्यामकुमार श्रेष्ठ चुनावी मैदानमा छन् । जिल्लाको क्षेत्र नम्बर २ बाट २०७० को संविधानसभा निर्वाचनमा विजयी उनलाई अहिले कांग्रेसका युवा नेता पूर्णबहादुर तामाङ (कान्छाराम) ले टक्कर दिएका छन् । तामाङ २०७० को निर्वाचनमा समानुपातिक सूचीमा थिए ।

स्थानीय तहको परिणाम हेर्दा जिल्लामा एमाले र माओवादीको मत कांग्रेसको भन्दा दोब्बर छ । यसलाई आधार मान्दा तामाङको जित सहज छैन । यद्यपि जिल्लामा सामाजिक कार्यकर्ताको छवि बनाएका उनी त्यही परिचयले आफूलाई जिताउने दाबी गर्छन् । उनी निर्माण व्यवसायीसमेत हुन् ।

वाम गठबन्धनका उम्मेदवार श्रेष्ठलाई विगत निर्वाचनमा जितेको अनुभव त छ नै, राज्यमन्त्रीको पद पनि सहयोगी बन्ने धेरैको अनुमान छ । एमाले–माओवादी गठबन्धन बलियो रहन सके उनी जितको नजिक रहेको ठान्नेहरू थुप्रै छन् । गठबन्धनको नाममा जबरजस्ती जोडिएको अनुभव कार्यकर्ताले गरे त्यसको फाइदा तामाङलाई हुने एकथरी मतदाताको भनाइ छ । विगतमा जिल्लाको गाल्बाभन्दा पश्चिम काभ्रेसँग जोडिएको क्षेत्रकै मतले माओवादीले निर्वाचन आफ्नो पक्षमा बनाएको थियो । तर, उक्त क्षेत्रबाट तत्कालीन जनमोर्चाका उम्मेदवार कमलप्रसाद चौलागाईंबाहेक अरू नेताले उम्मेदवार बन्न पाएका छैनन् ।

२०५६ मा सुरक्षित क्षेत्र भनेर एमालेसहितको समर्थनमा रामेछाप २ बाट उम्मेदवार बनेका जनमोर्चाका नेता अमिक शेरचनले पराजय भोगेका थिए । जिल्लाकै व्यक्ति उम्मेदवार भए पनि सञ्चारमाध्यम र सामाजिक सञ्जालमा आएका दृष्टिकोण हेर्दा यसपटक वाम उम्मेदवारको पक्षमा सोचेजति मत नआउने अनुमान गर्नेहरू पनि कम छैनन् । क्षेत्र नम्बर १ मा २०४६ को परिवर्तनपछिका ५ वटा निर्वाचनमा २ पटक कांग्रेस, २ पटक एमाले र १ पटक माओवादी विजयी भएका थिए । क्षेत्र नम्बर २ मा ३ वटा निर्वाचनमा वामपन्थी र २ वटामा कांग्रेसले विजय प्राप्त गरेका थिए ।

हेभिवेट जिताउन संयुक्त अभियान

पहिलो संविधानसभा निर्वाचनमा ललितपुरबाट उठेका पूर्वअर्थमन्त्री वर्षमान पुन यसपालि गृहजिल्ला रोल्पाबाट भिड्दै छन् । वाम गठबन्धनबाट प्रतिनिधिसभाका साझा उम्मेदवार उनी एमाले नेतासँगै निर्वाचन अभियानमा जुटेका छन् । उनी बृहत् शान्ति सम्झौता भएको ११ वर्षपछि गृहजिल्लाबाट उम्मेदवार बनेका हुन् ।

‘जन्मथलोबाट उम्मेदवार बन्ने चाहना पूरा भएको छ । जिल्लाको माया लागेर यसपटक वाम गठबन्धनको साझा उम्मेदवार भएको हुँ,’ पुनले भने, ‘गठबन्धनबाट दुईतिहाइ बहुमतसाथ विजयी बनेपछि समाजवादको ढोका खोल्न आधार तयार हुनेछ ।’ पहिलो संविधानसभामा पार्टी अध्यक्ष पुष्पकमल दाहाललाई रोल्पाबाटै जिताउन महत्त्वपूर्ण भूमिका खेले उनले । दोस्रो संविधानसभामा रोल्पाबाट पत्नी पूर्वसभामुख ओनसरी घर्तीमगर र नेता कृष्णबहादुर महरालाई जिताउन लागिपरेका उनी आफैंले मोरङबाट भने हार बेहोर्नुपर्‍यो । त्यसबेला उनलाई ‘टुरिस्ट’ उम्मेदवारको आरोप लागेको थियो ।

सशस्त्र द्वन्द्वको सुरुआती समयदेखि सैन्य क्षेत्रमा समेत भूमिका निर्वाह गरेका पुन तत्कालीन माओवादी लडाकुका तेस्रो तहका सैन्य कमान्डरसमेत हुन् । निर्वाचन अभियानमा एमालेका पूर्वसचेतक एवं पोलिटब्युरो सदस्य गोकुल घर्तीमगरको साथ पाएका उनले सत्ताधारी दल कांग्रेसका जिल्ला सभापति एवं सिँचाइ राज्यमन्त्री अमरसिंह पुनसँग प्रतिस्पर्धा गर्दैछन् । विगत निर्वाचनमा माओवादी उम्मेदवारले जित हासिल गर्दा जिल्लामा कांग्रेस दोस्रो र एमाले तेस्रो दलका रूपमा थिए । यसपालि एमाले र माओवादीबीचको उम्मेदवारी बाँडफाँट सहमतिअनुसार प्रतिनिधिसभाको एउटा र प्रदेशसभाका ‘क’ र ‘ख’ क्षेत्र माओवादीले पाएको छ ।

वाम गठबन्धनका प्रभावशाली नेताको जित सुनिश्चित गर्न एमाले पोलिटब्युरो सदस्य गोकुल घर्तीमगर प्रसार संयोजक बनेका छन् । ‘दुवै पार्टीको निर्णयअनुसार चुनावी प्रचारका लागि संयुक्त अभियान कमिटी निर्माण गरेका छौं,’ उनले भने, ‘गठबन्धनको सहमतिअनुसार रोल्पामा माओवादी केन्द्रका उम्मेदवारलाई जिताउन हामी जुटे जसरी अन्यत्र एमालेका उम्मेदवारलाई जिताउन माओवादी केन्द्र पनि कस्सिएर लागेको छ ।’

वाम गठबन्धनको चुनावी सभा

मुगुमा वाम गठबन्धनमा आबद्ध दलले घरदैलो अभियानअघि सदरमुकाममा शुक्रबार संयुक्त चुनावी सभा गरेका छन् । सभामा विभिन्न स्थानबाट कार्यकर्ताले बाजागाजासहित र्‍याली निकालेका थिए ।

माओवादीले स्वतन्त्र उम्मेदवारी फिर्ता लिएपछि एमाले र माओवादी केन्द्रले संयुक्तसभाको आयोजना गरेका हुन् । दुवै पार्टीले चुनावी एकताको सन्देश दिन संयुक्त सभा गरिएको एमाले अध्यक्ष धर्मबहादुर शाहीले बताए । माओवादी पोलिटब्युरो सदस्य मंगलबहादुर शाहीले केन्द्रीय निर्देशनअनुसार स्वतन्त्र उम्मेदवारी फिर्ता लिएको र दुवै पार्टीले संयुक्तरूपमा ग्रामीण क्षेत्रमा चुनावी अभियान थाल्ने जनाए । प्रतिनिधि र प्रदेशसभा चुनावका लागि एमालेले उम्मेदवारी दिएको छ । गठबन्धनबाट प्रतिनिधिसभामा एमालेका गोपाल बम तथा प्रदेशसभामा दानसिंह परियार र चन्द्रबहादुर शाही उम्मेदवार छन् ।

तात्यो माहोल

जाजरकोटमा प्रतिनिधिसभा सदस्यका लागि वाम गठबन्धनले पूर्वगृहमन्त्री शक्तिबहादुर बस्नेत र कांग्रेसले निवर्तमान सांसद राजीवविक्रम शाहलाई मैदानमा उतारेपछि चुनावी माहोल तातेको छ । गत संविधानसभा चुनावमा प्रत्यक्ष निर्वाचित यी दुई सभासद आमनेसामने भएपछि अहिल्यैदेखि विभिन्न अडकलबाजी लगाउन थालिएको छ ।

वाम गठबन्धनका कारण बस्नेत तुलनात्मक रूपले बलिया देखिए पनि शाह पनि जिल्लामा निकै लोकप्रिय छन् । बस्नेत माओवादीभित्र दोस्रो पुस्ताका प्रभावशाली नेता मानिन्छन् । पार्टीमा उनी अध्यक्ष पुष्पकमल दाहाल निकट हुन् । कांग्रेसका शाह राजनीतिसँगै समाजसेवीका रूपमा पनि चर्चित भएकाले यी दुई नेताबीचको प्रतिस्पर्धालाई उत्सुकताका साथ हेरिएको छ ।

२०७० को संविधानसभा र स्थानीय तह निर्वाचनमा दलहरूले प्राप्त गरेको मतका आधारमा वाम गठबन्धनका उम्मेदवार बस्नेतको ‘पल्ला भारी’ छ । लोकप्रियताका हिसाबले शाह पनि कमजोर नभएको भेरी ज्ञानोदय क्याम्पसका राजनीतिशास्त्रका उपप्राध्यापक छविराज शर्माले बताए । ‘दुवै उम्मेदवारबीच तीव्र प्रतिस्पर्धा देखिन्छ,’ उनले भने, ‘मतदाताका बीच दुवै नेता उत्तिकै रुचाइएकाले अहिल्यै अनुमान गर्न कठिन छ ।

विद्यार्थीकालदेखि राजनीतिमा होमिएका बस्नेतले सशस्त्र द्वन्द्वका बेला अग्रमोर्चाको नेतृत्व सम्हालेका थिए । शान्ति प्रक्रियामार्फत पार्टी यहाँसम्म आइपुग्दा उनले दोस्रो दर्जाका आशालाग्दा नेताको छवि बनाइसकेका छन् । २०७० को संविधानसभा निर्वाचनमा क्षेत्र १ बाट निर्वाचित बस्नेतले गृह र स्वास्थ्य तथा जनसंख्यामन्त्रीको जिम्मेवारी सम्हालिसकेका छन् ।

जाजरकोटी राजपरिवारका सन्तान शाहको भने राजनीतिभन्दा समाजसेवीको परिचय फराकिलो छ । २० वर्षदेखि पुख्र्यौली थलो आएर विभिन्न सामाजिक काम गर्दै आएका उनी २०७० को संविधानसभामा निर्वाचनमा क्षेत्र नं. २ बाट निर्वाचित भएका थिए । ०६६ मा महामारीकै रूपमा फैलिएको झाडापखाला र २०७२ को स्वाइनफ्लु प्रकोपका बेला उनले निजी खर्चमै रोग नियन्त्रणका लागि अभियानै सञ्चालन गरेका थिए ।

बस्नेतले प्रतिनिधिसभामा निर्वाचित भए भेरी करिडोर, नलगाड जलविद्युत् आयोजना, जडीबुटी उद्योगलगायत स्थापनामा जोड दिने बताए । ‘प्राविधिक तथा उत्पादनमूलक शिक्षाको विकासमा जोड दिइनेछ,’ उनले भने । कांग्रेस उम्मेदवार शाहले जिल्लाभर सडक सञ्जाल फैलाउने, युवा बेरोजगारी समस्या समाधान गर्ने, गरिबी घटाउने, जलविद्युत् उत्पादन, खनिज उद्योग र पर्यटन प्रवद्र्धनलगायतका काममा जोड दिने बताए । ‘जिल्लाको विकास, सम्पन्नता र रोजगारीलगायत काम नै मेरा मुख्य एजेण्डा हुन्,’ उनले भने ।

खड्काले एमालेलाई सघाउने

राष्ट्रिय प्रजातन्त्र पार्टीबाट काभ्रेको प्रतिनिधिसभा क्षेत्र नम्बर १ मा उम्मेदवार बनाइएका रवीन्द्र खड्काले पार्टी परित्याग गरेर एमालेलाई सघाउने घोषणा गरेका छन् । राप्रपाको भ्रातृ संस्था राष्ट्रवादी कलाकर्मी मञ्चका अध्यक्ष कलाकार खड्काले मञ्च छाडेको घोषणा गर्दै एमालेलाई सघाउने बताए । उनीसँगै प्रतिनिधिसभा क्षेत्र नम्बर १ (ख) मा प्रत्यक्षतर्फ सिफारिस शंकरलाल श्रेष्ठले पनि पार्टी परित्याग गरेका छन् ।

प्रतिस्पर्धामा पुरानै अनुहार

पर्वतमा दोस्रो चरणमा हुने प्रतिनिधि र प्रदेशसभा निर्वाचनमा संविधानसभा निर्वाचनकै सांसदबीच पुन: प्रतिस्पर्धा हुने चर्चा छ । वाम र प्रजातान्त्रिक गठबन्धनले उम्मेदवारको अन्तिम नामावली टुंगो गर्न कसरत गरिरहेका बेला निवर्तमान सांसदहरू क्षेत्र १ का अर्जुन जोशी र २ बाट विकास लम्सालले उम्मेदवारी पाउने पक्कापक्कीजस्तै छ । कांग्रेस केन्द्रीय कार्यसमितिले प्रतिनिधिसभाका लागि केन्द्रीय सदस्य जोशीको नाम टुंगो लगाएको छ ।

वाम गठबन्धनका लम्सालले पनि शुक्रबार आफ्नो नाम प्रतिनिधिसभा निर्वाचनका लागि टुंगो लागेको दाबी गरे । ‘प्रदेशसभामा २ मा माओवादी र १ मा एमालेलाई दिने कुरा छ,’ राजधानीमा रहेका उनले फोनमा भने, ‘प्रतिनिधिसभामा तयारी थाल्नुस् भनेर अध्यक्षले मलाई भन्नुभएको छ । चुनावी तयारीका लागि एक/दुई दिनमा जिल्ला आउँछु ।’ वाम गठबन्धनलाई पराजित गर्ने उद्घोष गर्दै आसन्न निर्वाचनका लागि कांग्रेसले शुक्रबारदेखि पर्वतमा प्रचार अभियान थालेको छ । अभियान शुभारम्भ कार्यक्रममा केन्द्रीय सदस्य रत्ना शेरचन, गरिबी निवारण तथा सहकारी राज्यमन्त्री चम्पा खड्कालगायतले एक भएर वाम गठबन्धनलाई जित्ने दाबी गरे ।

वाम गठबन्धनको कार्यालय

वाम गठबन्धनले बागलुङमा शुक्रबार प्रचार प्रसारका लागि सम्पर्क कार्यालय स्थापना गरेको छ । एमाले, माओवादी र राजमोको संयुक्त प्रचार कार्यालय स्थापनामा नेताहरूले आफ्नो विजय निश्चित भएको बताए । ‘विजय घोषणा गर्न मात्र बाँकी छ,’ प्रचार संयोजक मना केसीले भनिन्, ‘बागलुङलाई वाम किल्ला बनाएर छाड्नेछौं ।’ यसअघिका धेरै निर्वाचनमा पनि राजमो र एमालेको संयुक्त प्यानल निर्वाचनमा गएको थियो । २०७० को दोस्रो संविधानसभामा मात्र तीन वाम पार्टीले एकल उम्मेदवारी दिएका थिए । गठबन्धनले क्षेत्र १ मा एमालेका सूर्य पाठक र क्षेत्र २ मा माओवादीका देवेन्द्र पौडेललाई उम्मेदवार बनाएको छ ।

उम्मेदवार नतोकिंदै भोट माग्न सुरु

दोस्रो चरणमा निर्वाचन हुने स्याङ्जामा दलहरूले उम्मेदवार नटुंगिँदै भोट माग्न सुरु गरेका छन् । जिल्लामा १९ वटा दल दर्ता छन् । पार्टीले छिट्टै उम्मेदवार तोक्ने बताउँदै नेताहरू गाउँ पुगेर भोट माग्ने गरेका हुन् । केही जिल्लास्तरीय नेताहरू टिकटका लागि केन्द्रमा नै छन् भने केही प्रचारप्रसारका लागि गाउँ पसेका छन् । सम्भावित उम्मेदवारको चर्चा र लबिङ भित्रभित्रै सुरु भइसकेको स्रोतले जनाएको छ ।

चुनावी प्रतिस्पर्धामा अधिकांश आकांक्षी पुरानै छन् । पुरुषको हकमा महिला पनि सँगसँगै प्रतिस्पर्धी बनेका छन् । विशेषगरी कांग्रेस, एमाले र माओवादी केन्द्र ग्रामीण भेगमा मात्र चुनावी प्रचारप्रसारमा व्यस्त छ । पार्टीले चुनाव प्रसारप्रसारका लागि गाउँमा कार्यकर्ता तथा स्वयंसेवकहरू परिचालन गरिसकेको छ । बजार क्षेत्रमा भने चुनावी गतिविधि देखिएको छैन ।

कांग्रेसका उम्मेदवार आकांक्षी भरत लम्सालका अनुसार पार्टीको बैठकबाट उम्मेदवार तोकिएपछि प्रचारप्रसार कार्यक्रम ढिला हुने भएकाले अहिल्यै कार्यकर्ता परिचालन गरिएको हो ।

एमालेका कार्यालय सचिव रामचन्द्र भट्टराईले पार्टीको कार्यक्रम लिई प्रचारप्रसारमा गाउँ पुगेको बताए । ‘केन्द्रीय निर्णयअनुसार पहिलेदेखि नै आन्तरिक तयारीमा लागेका हौं,’ उनले भने । माओवादी केन्द्र पनि चुनाव प्रचारप्रसारका लागि निर्वाचन क्षेत्र संयोजकको नेतृत्वमा गाउँ पसेको छ । केन्द्रका जिल्ला संयोजक शैलेन्द्र घिमिरेका अनुसार पार्टीका भ्रातृ संगठनहरू प्रचारका लागि परिचालन भइसकेका छन् । ‘अब छिट्टै पार्टीले उम्मेदवार तोक्छ,’ उनले भने, ‘वाम गठबन्धनले गर्दा समय लागेको हो ।’

विद्यार्थी भिसा प्रक्रिया सहज गरिदिन राजदुत लक्की शेर्पाद्वारा अष्ट्रेलिया सरकारलाई आग्रह

2017-10-27T21:28:00.003-07:00

सिड्नी । अष्ट्रेलियाका लागि नेपाली राजदुत लक्की शेर्पाले नेपाली विद्यार्थीहरुलाई भिसा प्रक्रियामा भएको समस्या समाधान गरिदिन अष्ट्रेलिया सरकारसँग आग्रह गरेकी छन् ।

अष्ट्रेलियाकी परराष्ट्र मन्त्री जुली विस्वपमार्फत राजदुत शेर्पाले नेपाली विद्यार्थीहरुले झेल्नुपरेको समस्या अवगत गराएकी हुन् ।राजदुत शेर्पासँगको भेटमा अष्ट्रेलियाकी परराष्ट्रमन्त्री विस्वपले आवश्यक सुधार गरिने वचन दिएको बताइएको छ ।

बिहिवार संसद भवनमा भएको दुईपक्षीय भेटमा नेपाली विद्यार्थीहरुले कागजात पेश गर्दा भएको समस्यालाई समाधान गरिदिन आग्रह गरेकी हुन् ।

भिसा आवेदनका क्रममा नेपाली विद्यार्थीहरुको प्राविधिक समस्याका गुनासाहरु बढेपछि शेर्पाले परराष्ट्रमन्त्री विस्वपसँग सहजीकरणका लागि आग्रह गरेको वताइएको छ ।

बिर्तामोड घटनामा क्षतिपूर्ति दिन माग

2017-10-27T21:26:00.002-07:00

भद्रपुर, कत्तिक (रासस) ः नेकपा(एमाले)ले झापा, अर्जुनधारा–११ निवासी लक्ष्मण शिवाकोटीको मृत्युको विषयलाई लिएर भएको प्रदर्शनमा प्रहरीले गोलीसम्म हान्ने र सर्वसाधारणलाई घाइते बनाएकामा दुुःख व्यक्त गरेको छ ।

एमालेले बालक शिवाकोटीको मृत्युका बारेमा छानविन गरी दोषीलाई कानूनका दायरामा ल्याउन शिवाकोटी परिवारलाई न्याय दिलाउन माग गरेको छ ।

बिर्तामोड नगरपालिकाका प्रमुख धु्रवकुमार शिवाकोटीको घरमा आक्रमण गर्नेेदेखि गाडी तोडफोड गर्ने, मोटरसाइकलमा आगजनी गर्ने, पूर्वसांसद प्रेमबहादुर गिरीको मोटरसाइकल तोडफोड गर्ने, बिर्तामोड नगरपालिका बोर्ड सदस्य सुरेन राजवंशीका घरमा तोडफोड गर्ने, पार्टीका कार्यकर्ता नारायण चिमरियालगायतलाई आक्रमण गर्ने र मनमोहन अस्पतालमा तोडफोड गर्ने जस्ता कार्यको निन्दा गर्दै पार्टीले ‘नियोजित रुपमा गरिएको आक्रमण र तोडफोडसँगै प्रदर्शनकारीमाथि गोली चलाउने अवस्था आउनु’ सरकारविहीनताको पराकाष्टा भएको आरोप लगाइएको छ ।

एमालेका नेता कार्यकर्ता र जनप्रतिनिधिमाथि आक्रमण गर्नेलाई कारबाहीको माग गर्दै घटनामा परी मृत्यु वरण गरेकाहरुलाई क्षतिपूर्तिसहित प्रदर्शनका क्रममा भएका घाइतेलाई उपचारको माग र तोडफोड भएको सम्पत्तिको उचित क्षतिपूर्तिसहित समग्र घटनाको छानबिन गर्न सरकारसमक्ष एमाले झापाले विज्ञप्तिमार्फत माग गरेको छ ।

स्तन क्यान्सरबारे पोखरामा पैदल यात्रा गरिने

2017-10-27T21:05:00.003-07:00

पोखरा । पोखरामा आज स्तन क्यान्सर सम्बन्धि सचेतनामुलक कार्यक्रम हुने भएको छ । नेपाल ब्रेष्ट क्यान्सर फाउण्डेशनको आयोजनामा सचेतनामुलक २ किमि पैदल यात्रा कार्यक्रम आयोजना गरिएको हो । शनिबार बिहान पोखरा सभागृहबाट पैदल यात्रा शुरु भइ न्युरोड, चिप्लेढुंगा, महेन्द्रपुल, नयाँबजार, पृथ्वीचोक हुँदै पुन सभागृहमा पुगे पछि जुम्बा डान्स सहितका सचेतनामुलक कार्यक्रम आयोजना हुने बताइएको छ ।

कार्यक्रममा स्तन क्यान्सर बारे सचेतना जगाउन पैदल यात्रा र जुम्बा डान्स गरिने भएको छ । स्तन क्यान्सरबाट बचौं र बचाउ भन्ने नाराका साथ आयोजना हुने कार्यक्रममा पोखराका स्थानीय सामाजिक संघसंस्थाको पनि सहभागिता रहने आयोजक संस्थाका अध्यक्ष डा. सुजिता हिराचनले जानकारी दिए ।

कार्यक्रमलाई पोखरा लेखनाथ महानगर पालिकाका प्रमूख मानबहादुर जिसी, लायन्स क्लब अफ डिष्ट्रिक ३२५ बिका गर्भनर धनराज आचार्य लगायतले सम्बोधन गर्नेछन् । स्तन क्यान्सरका बारेमा सर्वसाधरणमा जनचेतना जगाउने उद्देश्यले पैदल यात्रा र जुम्बाको आयोजना गरिएको हिराचनको भनाई छ । उनका अनुसार अक्टोबर महिनाभर सर्वसाधरणले स्तन क्यान्सरबारे धेरैभन्दा धेरै कुरा गरुन भन्ने लक्ष्य पनि राखिएको छ ।

नेपालमा चौथो पटक आयोजना हुन लागेको यो कार्यक्रम पोखरामा पहिलो पटक हुन लागेको हो । सर्वसाधरणमा स्तन क्यान्सर बारे पर्याप्त जानकारी नहुँदा अकालमा ज्यान गुमाउन परिरहेको अवस्था छ ।

नेपाल आइडलका विजेता बुद्ध लामाले पाए कार र नगद २० लाख, कारमा हुक्किदै बुद्ध (फोटोफिचर)

2017-10-27T20:56:00.000-07:00

काठमाण्डौं । अन्‍नपूर्ण मिडिया नेटवर्क ९एएमएन०ले नेपाल आइडल पहिलो सिजनका विजेता बुद्ध लामालाई प्रथम पुरस्कार स्वरुप प्राप्त महिन्द्रा केयुभी वान ओओ (Mahindra KUV100) तथा नगद २० लाख रुपैयाँ प्रदान गरेको छ।

बुद्ध लामा र एपीवान एचडीबीच १५ लाख बराबरको एल्बमका लागि पनि सम्झौतामा हस्ताक्षर पनि भएको छ । त्यसै गरी नेपाल आइडल फष्ट रनरअप निशान भट्टराईलाई पनि पुरस्कार स्वरुप प्राप्त नगद १५ लाख र सेकेण्ड रनरअप प्रताप दासलाई नगद १० लाख रुपैयाँ प्रदान गरिएको छ।

गत असोज ६ गते कतारमा आयोजित नेपाल आइडल फिनालेमा बुद्ध लामा आइडल घोषित भएका भएपनि नेपाल आइडलका विजेताहरुको अति व्‍यस्तताका कारण शुक्रबार मात्र पुरस्कार वितरण गरिएको हो। नेपाल आइडल नेपालमा आयोजित पहिलो अन्तर्राष्ट्रिय फ्रेन्चाइज तथा सर्वाधिक पुरस्कार राशीको गायन प्रतियोगिता हो।

उत्कृष्ट तीनबाट विजेता छनोटका लागि ९ करोड ३१ लाख ८३ हजार ३ सय ३५ भोट प्राप्त भएको थियो। जसमध्ये ४ करोड ४८ लाख ४५ हजार २ सय ६३ भोट प्राप्त गर्दै बुद्धले प्रतिष्ठाको पहिलो आवाज नेपाल आइडलको उपाधि जितेका थिए। साभार:अन्नपूर्ण पोष्ट

एकाबिहानै रात्री बस त्रिशुलिमा खस्यो, १५ यात्रुको घाइते अवस्थामा उद्धार

2017-10-27T20:33:00.001-07:00

धादिङ । सप्तरीबाट काठमाडौं आउँदै गरेको यात्रु बाहक रात्री बस त्रिशुली नदीमा खसेको छ। प्रहरीका अनुसार यात्रुबाहक बस धादिङको गजुरी स्थित बांगेमोड भन्ने स्थानबाट त्रिशुलीमा खसेको हो ।

दुर्घटना हिान पौने ६ बजे भएको हो । बस पूरै नदीमा डुबेकाले यात्रुको संख्या र बस नम्बर खुल्न नसकेको र प्रहरी घटनास्थलमा पुगेर उद्धार कार्य सुरु गरी सकेको बताइएको छ ।

घटनास्थल पुगेको प्रहरीले १५ यात्रुको घाइते अवस्थामा उद्धार गरेको छ भने अन्यको उद्धार गर्ने काम भइरहेको बताइएको छ ।

१०७ क्षेत्रमा एमाले-माओवादी भागबण्डा टुंगियो, हेर्नुहोस् कसलाई कति?

2017-10-27T20:20:00.002-07:00

कात्तिक ११, २०७४ काठमाडौं : एमाले र माओवादी केन्द्रले मंसिर २१ मा हुने दोस्रो चरणको चुनावका लागि सिट बाँडफाँड अन्तिम चरणमा पुर्‍याएका छन्। दोस्रो चरणको १२८ निर्वाचन क्षेत्रको बाँडफाँडबारे सम्भवत: शनिबार संयुक्त रूपमा सार्वजनिक गर्ने भएका छन्। दोस्रो चरणमा हुने प्रतिनिधिसभाका १२८ निर्वाचन क्षेत्रमा दुई दलका उम्मेदवारहरू लड्ने १०७ क्षेत्रको टुंगो लागिसकेको सिट बाँडफाँड समितिका एक सदस्यले बताए। त्यसमध्ये एमालेलाई ७२ र माओवादी केन्द्रलाई ३५ सिट छुट्याइएको छ। त्यही अनुपातमा सम्बन्धित प्रदेशमा पनि सिट बाँडफाँड भएको छ। एमाले महासचिव ईश्वर पोखरेलको संयोजकत्वमा दुवै दलका नेता सम्मिलित कार्यदलले दोस्रो चरणको चुनावका लागि उक्त बाँडफाँडसहितको प्रतिवेदन शीर्ष नेतृत्वलाई बुझाएको हो। कार्यदलले बुझाएको प्रतिवेदनमाथि छलफल गर्न एमाले स्थायी समितिको बैठक शुक्रबार रातिसम्म बसेको थियो। पहिलो चरणको मंसिर १० मा हुने चुनावका लागि प्रतिनिधिसभामा एमालेले २१ र माओवादीले १६ सिटमा सहमति गरेका थिए। सोहीअनुसार उम्मेदवार मनोनयनसमेत भइसकेको छ। दुई ठूला वाम दलबीच ६०/४० प्रतिशतका आधारमा सिट विभाजन गर्ने नीतिअनुसार कार्यदलले प्रतिवेदन तयार पारेको हो। ‘हामीले सिट विभाजन करिब टुंंग्याएका छौं, चाँडै त्यसलाई सार्वजनिक गर्छौं,’ दुवै दलका उम्मेदवारी चयनमा सक्रिय एमाले सचिव गोकर्ण बिष्टले भने। उनका अनुसार दुई दलबीच उम्मेदवार चयनमा केही विवाद देखिए पनि त्यसलाई शीर्ष नेतृत्व सम्मिलित एकता संयोजन समितिबाट टुंगो लगाइने छ। माओवादी केन्द्रका प्रभावशाली नेता वर्षमान पुनले दोस्रो चरणको चुनावका लागि दुई दलबीच ६०/४० कै प्रतिशतका आधारमा सिट चयन गरिएको बताए। ‘प्रतिनिधिसभामा कम्तीमा ६० माओवादीको हुने गरी सिट बाँडफाँड गरिएको छ,’ पुनले भने। उनका अनुसार टुंगो लाग्न बाँकी क्षेत्रहरूमा दुवै दलका शीर्ष नेता सम्मिलित समितिको बैठक शनिबार बिहान बसी टुंगो लाग्ने छ। सिट बाँडफाँड कार्यदलले झापा, मोरङ, सुनसरी, चितवन, कास्की, बारा, उदयपुरलगायत जिल्लाका निर्वाचन क्षेत्र टुंग्याउने जिम्मा शीर्ष नेतृत्वलाई सुम्पेको छ। कार्यदलले सिट बाँडफाँडको मुख्य आधार पछिल्लो स्थानीय तहको चुनावको मतलाई लिएको छ। त्यसबाहेक कतिपय क्षेत्रमा उम्मेदवारको लोकप्रियता र सामाजिक क्षेत्रमा पुर्‍याएको योगदानलाई पनि आधार बनाएको छ। स्थानीय चुनावमा राम्रो परिणाम ल्याएका धनकुटा, इलाम, तेह्रथुमलगायत जिल्लाबाट प्रतिनिधिसभामा एमालेका मात्र उम्मेदवार हुने भएका छन्। चितवनमा एमाले र माओवादीले १/१ सिटमा टुंगो लगाएका छन्। बाँकी १ सिटमा छलफल जारी छ। माओवादी केन्द्रका अध्यक्ष पुष्पकमल दाहाल भने चितवन–३ बाट उठ्ने छन्। काठमाडौंका १० सिटमा एमालेले ७ र माओवादीले ३ सिट लिनेछन्। ललितपुरमा माओवादीले क्षेत्र नं. ३ मा सम्भवत: प्रवक्ता पम्फा भुसाललाई अघि सार्ने तयारी गरेको छ। भक्तपुरमा प्रतिनिधिसभामा माओवादीको दाबी छैन। भक्तपुरमा क्षेत्र नं. २ मा एमालेका युवानेता महेश बस्नेत उठ्ने टुंगो लागेको छ।

तनहुँको दुलेगौडामा यात्रु बाहक बस पल्टियो(फोटो फिचर सहित)

2017-10-27T20:00:00.000-07:00

तनहुँको शुक्लागण्डकी नगरपालिका स्थित दुलेगौडामा यात्रुबाहक मिनि बस अनियन्त्रित भई दुर्घटना भएको छ । दमौलीबाट पोखरा तर्फ आउँदै गरेको ना ५ ख ४९४५ नम्वरबो बस दुलेगौडाको पञ्चमुनी चोकमा दुर्घटना हुदाँ १ बालक सहित ४ जना गम्भिर घाइते भएका छन् ।

घाईतेहरुको उपचारको लागी पोखरा रिफर गरिएको इलाका प्रहरीका कार्यालय बेलचौताराका प्रहरी प्रमुख राजेन्द्र अधिकारीले जानकारी दिए । अहिले उदर कार्य जारी रहेको बसमा सवार कति घाईते भए भन्ने एकिन जानकारी नभएको अधिकारीले बताए । उनले भने–“केही समय पछि विस्तृत जानकारी प्राप्त ्हुनेछ हामी उद्दारको लागी जुटी रहेका छौ”