Hisham.M

மறக்கக் கூடாத, ஒருபோதும் மன்னிக்கக் கூடாத ஒரு நிஜத்தின் குரல்! 🇵🇸

2026-06-29T20:02:23.000+05:30

Majestic Cineplexஇல் திரையிடப்பட்ட 'The Voice of Hind Rajab' திரைப்படத்தின் பீரிமியர் காட்சிக்கு சென்றிருந்தேன். திரை இருண்டு, விளக்குகள் ஒளிரத் தொடங்கிய கணம்... அரங்கிலிருந்த எவராலும் அத்தனை எளிதாகத் தத்தம் இருக்கைகளிலிருந்து எழுந்துவிட முடியவில்லை. அங்கு நிலவியது வெறும் நிசப்தமல்ல; ஒட்டுமொத்த மானுடமும் தோற்றுச் சிறுத்துப்போனதன் பேரவல மௌனம்!

இலங்கைக்கான பாலஸ்தீனத் தூதுவர், இஹாப் ஐ.எம். கலீல் அவர்களுடன்

ஹிந்த் ரஜப்... வெறும் ஆறு வயதே நிரம்பிய சிறுமி. சற்று கற்பனை செய்து பாருங்கள்... ஒரு கார். சுற்றிலும் உறவுகளின்—மாமா, மாமி, அக்கா, அண்ணன் என அத்தனை பேரின்—ரத்தம் தோய்ந்த சடலங்கள். அந்தப் பிணக்குவியலின் நடுவே, உறைந்துபோன பெருவலியோடும் மரண பயத்தோடும் உயிருக்குப் போராடும் அந்தச் சின்னஞ்சிறு மலர், கைகளில் ஒரு செல்பேசியைப் பற்றிக்கொண்டு விம்மி விம்மித் துடிக்கிறாள்:

"என்னை வந்து கூட்டிட்டு போங்க... எனக்கு ரொம்பப் பயமா இருக்கு... யாராவது என்னைக் காப்பாத்துங்க..."

ஒரு மணி நேரமல்ல, பல மணி நேரங்கள். ஒவ்வொரு வினாடியும் ஒரு பெருயுகமென நகர, மரணத்தின் வாயிலில் நின்று அவள் எழுப்பிய அந்த அபயக் குரல் இன்றும் என் ஆன்மாவை உலுக்கிக் கொண்டே இருக்கிறது.

அவள் இருந்த அந்த காரை நோக்கி 350-க்கும் மேற்பட்ட தோட்டாக்களைப் பாய்ச்சி, மனிதாபிமானத்தின் சுவடுகூட இல்லாமல் சல்லடையாகத் துளைத்தெடுத்திருந்தார்கள். உலகமெங்கும் அவளது மரணக் கதறல் ஒலித்துக்கொண்டிருந்த அதே வேளையில், அவளை மீட்கப் புறப்பட்ட செம்பிறைச் சங்கத்தின் (Red Crescent) ஆம்புலன்ஸும் இரக்கமற்றுத் தாக்கப்பட்டது. உயிர்காக்கச் சென்ற அந்த இரு உன்னத மருத்துவச் சேவையாளர்களும் ஆம்புலன்ஸோடு சேர்த்துச் சாம்பலாக்கப்பட்டனர்.

மரணத்தின் விளிம்பில் நின்றுகொண்டு ஒரு பிஞ்சு உயிர் கதறியும்கூட, அவளைக் காப்பாற்ற இந்தச் சபிக்கப்பட்ட உலகத்தால் முடியாமல் போனது. 

இது ஹிந்த் என்ற ஒரு சிறுமியின் துயரம் மட்டுமல்ல. குருதி தோய்ந்த இந்தப் பாலஸ்தீனப் போரில் இதுவரை 70,000-க்கும் மேற்பட்ட அப்பாவி உயிர்கள் பலியாகியிருக்கின்றன. இதில் பெருங்கொடுமை என்னவென்றால், பலியானவர்களில் பெரும்பாலானோர் பெண்களும் பிஞ்சுக் குழந்தைகளுமே. ஒவ்வொரு மரணமும் வெறும் காகிதப் புள்ளிவிவரமல்ல; அவை ஒவ்வொன்றும் ஹிந்தைப் போல ஈவிரக்கமின்றிக் கலைக்கப்பட்ட ஆயிரமாயிரம் அழகிய கனவுகள். இவற்றைக் காணும்போது நெஞ்சம் இன்னும் கனக்கிறது; காரணம், இலங்கை போரின் இறுதித் தருணங்களும் இதுபோல ரத்தம் தோய்ந்த ஆயிரம் கதைகளைச் சொல்லும் என்பதுதான் வலிநிறைந்த நிதர்சனம்.

ஏற்பாடு செய்த இலங்கைக்கான பாலஸ்தீன தூதரகம் (Embassy of Palestine in Sri Lanka), பாலஸ்தீன மக்களுக்கான இலங்கை நட்புறவுச் சங்கம் மற்றும் சிலோன் தியேட்டர்ஸ் ஆகியோருக்கு நன்றிகள்.

'The Voice of Hind Rajab' – நாம் மறக்கக் கூடாத, ஒருபோதும் மன்னிக்கக் கூடாத ஒரு நிஜத்தின் குரல்! 

'தகவல் யுத்தம்' Information War

2026-06-29T19:59:11.768+05:30

"உண்மை தனது காலணிகளை அணிந்துகொள்வதற்குள், பொய் உலகையே ஒருமுறை சுற்றி வந்துவிடும்" என்பார்கள். இது இன்று வெறும் பழமொழி அல்ல; நம் கைகளில் இருக்கும் ஸ்மார்ட்போன்களின் நிதர்சனம்.

இன்றைய அரசியல் என்பது களத்தில் நடக்கும் மோதல் அல்ல; அது உங்கள் அலைபேசித் திரையில் நடக்கும் 'தகவல் யுத்தம்' Information War.

முன்பெல்லாம் ஒரு பொய்யைப் பரப்ப அச்சகங்கள் வேண்டும், தொலைக்காட்சிகள் வேண்டும். இன்று ஒரு WhatsApp Forward அல்லது ஒரு 'Facebook Reel' போதும். அடுத்த பத்து நிமிடங்களில் பல லட்சம் இதயங்களுக்குள் ஒரு நஞ்சை விதைத்துவிட முடியும்.

பொய் என்பது இருட்டில் வளரும் காளான் போன்றது. எங்கே தகவல் வெற்றிடம் இருக்கிறதோ, அங்கே பொய் அரியணை ஏறுகிறது. உதாரணமாக ஒரு புதிய திட்டம் அறிவிக்கப்படும்போது, அதன் நன்மைகளைச் சொல்ல உண்மை தடுமாறினால், "இந்தத் திட்டத்தால் உங்கள் சொத்து பறிபோகப் போகிறது" என்று ஒரு பொய் கிளப்பிவிடப்படும். அந்தத் திட்டத்தின் அசல் நோக்கம் உங்களுக்குத் தெரிவதற்கு முன்பே, உங்கள் மனதில் பயம் உட்கார்ந்துவிடும். கோபமும் பயமும் வந்துவிட்டால், மனித மூளையின் தர்க்க ரீதியான பகுதி வேலை செய்வதை நிறுத்திவிடும். இதையே அந்தப் பிரச்சாரப் பீரங்கிகள் விரும்புகின்றன.

உண்மையின் பக்கம் நிற்பவர்களுக்கு Counter-Propaganda கற்றுத்தரும் முதல் பாடம் என்ன தெரியுமா?
ஒரு பொய் முளைக்கும் முன்பே, "அவர்கள் இப்படித்தான் சொல்ல வருவார்கள், ஆனால் உண்மை இதுதான்" என்று முன்கூட்டியே எச்சரிக்க வேண்டும். இதுவே இன்றைய காலத்தின் மிகச்சிறந்த தற்காப்பு. இதைத்தான் 'Pre-bunking' என்று செல்வார்கள். அதாவது, நோய்த்தொற்று வந்தபின் சிகிச்சை பெறுவதை விட, அது வராமல் இருக்கத் தடுப்பூசி போட்டுக்கொள்வது போன்றது.

அதே நேரம் பிரச்சார பீரங்கிகளின் வலையில் சிக்காமல் இருக்க ஒரு செய்தி நம்மை அதீத கோபத்திற்கோ அல்லது பயத்திற்கோ உள்ளாக்கினால், அதை Share செய்வதற்கு முன் ஐந்து நிமிடம் பொறுத்திருக்க வேண்டும். ஏன் என்றால் அந்த உணர்ச்சிதான் பொய்யின் முதலீடு. உங்களுக்கு ஞாபகம் இருக்கும் குர்பானை அரசு தடை செய்தது என்ற செய்தி எத்தனை பேரை பொங்கி எழச்செய்தது என்று.

அதனால் யார் சொன்னார்கள்? ஏன் இப்போது சொல்கிறார்கள்? இதனால் யாருக்கு லாபம்?" - இந்த மூன்று கேள்விகள் எந்த ஒரு பிரம்மாண்டமான பொய்யையும் உடைத்துவிடும்.

பொய் பரவுவதற்கு 10 நிமிடம் போதும். ஆனால், சிதைக்கப்பட்ட உண்மையை மீட்டெடுக்க 10 நாட்களோ அல்லது 10 ஆண்டுகளோ கூட ஆகலாம். ஈஸ்டர் தாக்குதலின் பின்னர் முஸ்லிம் சமூகம் அடைந்த மன உளைச்சலில் இருந்து மீள எத்தனை காலம் எடுத்தது.

விழிப்புணர்வே முதல் வெற்றி!
#MediaLiteracy #CounterPropaganda #SocialMediaAwareness #HishamM

See less

Comments

Anushyanthan Sivappiragasam

2w
Reply
Hide

தேங்காயும் தேயிலையும்: சிம்மாசனத்திற்கான யுத்தம்! 🥥☕

2026-05-26T08:52:51.487+05:30

"இலங்கையின் அடையாளம் எது?" என்று யாராவது கேட்டால், காலம் காலமாக நம்மிடம் இருந்த பதில் 'தேயிலை'. ஆனால், இப்போது தென்னங்கீற்றுகளின் சலசலப்பு அந்தச் சிம்மாசனத்தை நோக்கி மெல்ல நகர்ந்து கொண்டிருப்பதை அவதானிக்க முடிகிறதா?

சமீபத்திய ஏற்றுமதித் தரவுகள் (Jan-Apr 2026) ஒரு சுவாரஸ்யமான கதையைச் சொல்கின்றன. நமது தேயிலை 451 மில்லியன் டாலர்களை ஈட்டித் தந்து முதலிடத்தில் கம்பீரமாக நிற்கிறது. ஆனால், அதற்குச் சற்றும் சளைக்காமல் தேங்காய் சார்ந்த பொருட்கள் 406 மில்லியன் டாலர்களை அள்ளி வந்து அதன் தோளுக்குப் பின்னால் வந்து நிற்கின்றன.

வெறும் 45 மில்லியன் டாலர்கள் தான் இடைவெளி! ஒருவேளை, மிக விரைவில் தேயிலையைக் கடந்து தேங்காய் முதலிடத்தைப் பிடித்தாலும் ஆச்சரியப்படுவதற்கில்லை.

உங்களுக்குத் தெரியுமா? கடந்த 2025-ஆம் ஆண்டு நமது தேங்காய் ஏற்றுமதி வரலாற்றில் ஒரு பொற்காலம். அந்த ஆண்டின் முதல் 10 மாதங்களிலேயே தேங்காய் சார்ந்த பொருட்களின் ஏற்றுமதி வருமானம் 1 பில்லியன் அமெரிக்க டாலர்களை ($1 Billion) கடந்து சாதனை படைத்தது.

இது ஏதோ தற்செயலாக நடந்த விளைச்சல் உயர்வு மட்டுமல்ல; இது ஒரு 'Structural Shift' எனப்படும் பாரிய கட்டமைப்பு மாற்றம். இன்று உலகச் சந்தையில் தேங்காய் எண்ணெய் (Coconut Oil), தேங்காய் நீர் (Coconut Water) மற்றும் தேங்காய் மாவு (Coconut Flour) ஆகியவற்றுக்கான தேவை தீயாய் கொதிக்கிறது. உலகத்தரம் வாய்ந்த மதிப்புக்கூட்டப்பட்ட தயாரிப்புகள் மூலம் இலங்கை அந்தத் தேவையை மிகச் சரியாகப் பயன்படுத்திக் கொள்கிறது.

ஆனால், இங்கே நாம் கவனிக்க வேண்டிய நிஜமான செய்தி இதுவல்ல...

இது வெறும் இரண்டு துறைகளுக்கு இடையிலான போட்டி மட்டுமல்ல; இது சரிந்து கிடந்த ஒரு தேசம் மெல்ல நிமிர்ந்து நிற்கும் கதை. 2024-ம் ஆண்டின் இதே காலகட்டத்தில் இலங்கையின் மொத்த ஏற்றுமதி வருமானம் 5.1 பில்லியன் டாலர்களாக இருந்தது. இன்று, இரண்டே ஆண்டுகளில் அது 5.7 பில்லியன் டாலர்களைத் தொட்டிருக்கிறது.

600 மில்லியன் டாலர் கூடுதல் வருமானம் என்பது சாதாரணமான விஷயம் அல்ல. ஆடைத் தொழில் (Apparel), தகவல் தொழில்நுட்பம் (ICT), பெட்ரோலியம், ரப்பர் என எல்லாத் துறைகளும் ஒரே நேர்க்கோட்டில் வளர்ந்து கொண்டிருக்கின்றன.

ஒரு நாடு பொருளாதார நெருக்கடியின் இருண்ட பக்கங்களிலிருந்து மீண்டு, வெளிச்சத்தை நோக்கிப் பயணிக்கிறது என்பதற்கு இதைவிடச் சிறந்த சாட்சி வேறென்ன வேண்டும்?

தேங்காய் தேயிலையை முந்துமா என்பதைத் தாண்டி, நம் தேசம் உலகச் சந்தையில் தனது இழந்த பெருமையை மீண்டும் மீட்டெடுக்குமா என்பதே இன்றைய முக்கிய கேள்வி

புதையல் மேல் அமர்ந்திருக்கும் தேசமும்... ஒரு புதிய விடியலும்! 🔋☀️

2026-05-25T00:22:52.918+05:30

"தயவுசெய்து உங்கள் வீட்டு சோலார் (Solar) இணைப்பைத் தற்காலிகமாக நிறுத்துங்கள்" –

வார இறுதி நாட்களில் மின்சார சபையிடமிருந்து (CEB) இவ்வாறான ஒரு குறுஞ்செய்தி
Solar பயன்படுத்தும் பலரின் அலைபேசிக்கும் வந்திருக்கலாம். 

அள்ளித் தரும் இயற்கை வளங்களை மடியில் வைத்துக்கொண்டு, அதை எப்படிப் பயன்படுத்துவது
என்று தெரியாமல் ஒரு பெரும் புதையலின் மேல் அமர்ந்திருக்கும் தேசம் நம்முடையது.
ஆண்டு முழுவதும் தாராளமாகக் கிடைக்கும் சூரிய ஒளி நமக்கு ஒரு வரப்பிரசாதம்.
ஆனால், அந்த மின்சாரத்தைச் சேமித்து வைக்கும் நவீனக் கட்டமைப்பு நம்மிடம் இதுவரை
இல்லை என்பதுதான் கசப்பான உண்மை.

ஏன் இந்த 'Switch Off' குறுஞ்செய்திகள்? 

சனி மற்றும் ஞாயிறு தினங்களில் பெரும் தொழிற்சாலைகள் இயங்குவதில்லை. அந்த
நேரங்களில் நம் வீடுகளில் உற்பத்தியாகி தேசிய
மின்கட்டமைப்புக்கு (National Grid) பாயும்
அதிகப்படியான மின்சாரத்தைப் பயன்படுத்த ஆளில்லாமல் போய்விடுகிறது.
தேவையற்ற மின்சாரம் திடீரென அதிகரித்தால் ஒட்டுமொத்த
மின்கட்டமைப்பும் பழுதடைந்துவிடும் அபாயம் உண்டு.

இலவசமாகக் கிடைக்கும் சூரிய சக்தியை கூட சேமிக்க வழியில்லாமல், அதை வீணாக்குவதைத்
தவிர வேறு வழியில்லை என்ற நிலையில்தான் இதுவரை நாம் இருந்தோம். இடையில் ஒரு
குரங்கு பாய்ந்ததால் மின்தடை ஏற்பட்ட கதையெல்லாம் கூட நாம் கேட்டிருக்கிறோம்.

40 பில்லியன் ரூபாயும்... ஒரு புதிய சகாப்தமும்! 

இந்தத் தொழில்நுட்பத் தேக்கநிலைக்கு ஒரு நிரந்தர முற்றுப்புள்ளி வைக்க, ரூ. 40
பில்லியன் மதிப்பிலான மாபெரும் 'பேட்டரி சேமிப்புத் திட்டம்' (BESS)
இப்போது இலங்கையில் உத்தியோகபூர்வமாக ஆரம்பமாகியுள்ளது.
இதன் முதற்கட்டமாக, 20 மெகாவாட் கொள்ளளவு கொண்ட பிரமாண்டமான பேட்டரி தொகுதிகள்
கொழும்பு துறைமுகத்தை வந்தடைந்துள்ளன. இது நம் நாட்டின் மின்சக்தி
வரலாற்றில் ஒரு மிக முக்கியமான திருப்புமுனையாக அமையக்கூடும்.

இந்த பேட்டரிகள் என்ன செய்யும்? 

பகலில் தாராளமாகக் கிடைக்கும் சூரிய ஒளியில் உற்பத்தியாகும் அதிகப்படியான
மின்சாரத்தை இந்த பேட்டரிகள் தன்னுள் சேமித்துக்கொள்ளும்.
பின்னர், மின்சாரத் தேவை உச்சத்தில் இருக்கும் இரவு நேரங்களில் (Peak
Hours), சேமிக்கப்பட்ட இந்த சுத்தமான மின்சாரத்தை நமக்கு வழங்கும்.

இதன்மூலம், இரவு நேரங்களில் அதிக விலை கொடுத்து டீசல் அல்லது நிலக்கரி மூலம்
மின்சாரம் தயாரிப்பது பெருமளவு குறையும். இதனால் நாட்டின் பணம்
மிச்சமாகும்; நமக்கும் தடையற்ற, பசுமையான மின்சாரம் கிடைக்கும்.

அமெரிக்கா, ஆஸ்திரேலியா போன்ற நாடுகள் 2015-லேயே எட்டிய இந்த 'Grid-scale Battery'
தொழில்நுட்பத்தை, நாம் இப்போதுதான் எட்டியிருக்கிறோம். கொஞ்சம் தாமதம் என்றாலும்,
உலகத் தொழில்நுட்பத்தோடு இப்போதுதான் நாம் கைகோர்த்திருக்கிறோம்.

காலி மற்றும் மாத்தறையில் ஆரம்பிக்கப்படும் இத்திட்டம், விரைவில் நாடு முழுவதும்
உள்ள 16 பிரதான துணை மின் நிலையங்களுக்கும் விரிவுபடுத்தப்படவுள்ளது.

நமது கடல்... ஒரு மாயையும், நங்கூரமிட்ட உண்மையும்! 🚢🌊

2026-05-17T17:15:16.668+05:30

"நம்ம நாட்டைச் சுத்தி கடல் இருக்கு, அதனால மீன்களுக்குப் பஞ்சமே இல்லை... நினைச்ச நேரமெல்லாம் வலை விரிச்சு மீன்களை அள்ளிக்கிட்டே இருக்கலாம்" - இப்படித்தான் நம்மில் பலரும் ஒரு கற்பனை உலகில் வாழ்ந்து கொண்டிருக்கிறோம். ஆனால், நிதர்சனம் நாம் நினைப்பது போல அத்தனை அழகானதல்ல.

சமீபத்தில் கொழும்பு துறைமுகத்திற்குச் சென்றிருந்தபோது, 32 நாட்கள் நீடித்த ஒரு நீண்ட ஆய்வை முடித்துவிட்டு நங்கூரமிட்டிருந்த அந்தப் பிரம்மாண்டமான கப்பலைப் பார்க்கும் அரிய வாய்ப்பு கிடைத்தது. அதன் பெயர் R/V Dr. Fridtjof Nansen. ஐக்கிய நாடுகளின் கொடி பறக்க, கம்பீரமாக நின்றிருந்த அந்த இராட்சத கப்பல் சொன்ன கதைகள் பல.

விந்தையான விஷயம் என்னவென்றால், அமெரிக்கா - ஈரான் நாடுகளுக்கு இடையிலான அந்தப் போர் பதற்றம் மட்டும் இல்லாதிருந்தால், இந்தக் கப்பல் இலங்கை மண்ணிற்கு வந்திருக்கவே வாய்ப்பில்லை. உண்மையில் இது ஓமன் கடலுக்குச் செல்ல வேண்டியது. அங்கே நிலவிய பாதுகாப்பற்ற சூழலால், அதன் திசை மாறி நம் நாட்டிற்கு ஒரு வரப்பிரசாதமாக வந்து சேர்ந்தது.

உலகளவில் சுமார் 90 சதவீத கடல் மீன் வளங்கள் இப்போது 'அளவுக்கு அதிகமாகப் பிடிக்கப்பட்டு' (Over-fished) அல்லது முற்றாக அழிந்து (Depleted) போய்க்கொண்டிருக்கின்றன. நம் கடலடியில் என்ன நடக்கிறது, இன்னும் எவ்வளவு மீன்கள் மிச்சமிருக்கின்றன என்ற எந்தத் தரவுகளும் (Data) நம் அரசாங்கத்திடமும் இல்லை, மக்களாகிய நமக்கும் தெரியாது.

இந்தக் கப்பல் கடந்த 32 நாட்களாக எமது நாட்டின் பிரத்தியேக பொருளாதார வலயத்தில் (EEZ) சுற்றித் திரிந்து, மீன் வளம் எங்கே செறிவாக இருக்கிறது, கடல் நீர் எவ்வளவு சூடாகியிருக்கிறது, நாம் தூக்கியெறியும் பிளாஸ்டிக் துகள்கள் (Microplastics) கடலை எந்தளவுக்குக் பாதித்திருக்கிறது என அத்தனையையும் நுணுக்கமாக ஆய்வு செய்திருக்கிறது Dr. Fridtjof Nansen கப்பல்.

நோர்வே நாடும், FAO அமைப்பும் இணைந்து சுமார் 1 மில்லியன் டொலர்களை இதற்காகச் செலவிட்டிருக்கிறார்கள். இந்த ஆய்வில் இலங்கை விஞ்ஞானிகளும் பங்கேற்றனர், அதிலும் குறிப்பாகப் பெண் விஞ்ஞானிகளின் பங்களிப்பு மிக அதிகம் என்பது நமக்கெல்லாம் பெருமை.

துறைமுகத்தில் நின்று அந்தப் பிரம்மாண்டத்தைப் பார்த்தபோது எனக்கு ஒன்றுதான் தோன்றியது... இன்று நம் கண்ணுக்குப் புலப்படாத இந்தத் தரவுகள்தான், நாளை நம் மீனவக் குடும்பங்களின் வாழ்வாதாரத்தையும், எமது எதிர்காலத்தையும் தீர்மானிக்கப் போகின்றன.

#DrFridtjofNansen #SriLanka #OceanResearch #SaveOurSeas #FutureOfFisheries #ColomboPort #இலங்கை #கடல்ஆராய்ச்சி #மீன்வளம் #HishamMohamed

ஏற்றமிகு இளைஞர் விருதைக் கரங்களில் ஏந்திய தருணம்

2026-05-17T16:12:25.934+05:30

சில தருணங்கள் காலத்தின் பக்கங்களில் என்றென்றும் உறைந்துவிடுகின்றன; அந்தப் பிரமாண்டமான மேடையும், பேராசிரியர் சாலமன் பாப்பையா அவர்கள் நிறுவிய "

ஏற்றமிகு இளைஞர் விருதைக் கரங்களில் ஏந்திய கடந்த ஏப்ரல் 30-ஆம் திகதி வியாழன் மாலையும் அப்படியானதொரு பொக்கிஷமே.

நேர முகாமைத்துவமும், கலையழகும், கட்டுக்கோப்பும் ஒருங்கே கைகோர்க்க, குறித்த நேரத்தில் அவ்வளவு நேர்த்தியாக அரங்கேறியது அகில இலங்கை கம்பன் கழகத்தின் விழா 2026. அங்கே கழகத்து உறுப்பினர்கள் மட்டுமன்றி, கடல்கடந்து அவுஸ்திரேலியா, இலண்டன் எனப் பல தேசங்களிலிருந்தும் வருகை தந்து, என்னை அன்பால் அரவணைத்த உள்ளங்கள் தந்த ஊக்கம் என்னை நிஜமாகவே மெய்சிலிர்க்க வைத்தது.

தமிழ் இலக்கியத்தின் பெருங்கடல், மதிப்பிற்குரிய கம்பவாரிதி ஜெயராஜ் ஐயா அவர்கள் திருவாயிலிருந்து உதிர்ந்த ஒவ்வொரு சொல்லும் ஆசீர்வாதங்களாய் அமைய, அந்த வாழ்த்து மழையில் திளைத்து நின்றேன். என் குடும்பத்தினரையும் அவருக்கு அறிமுகம் செய்து வைத்து, அவரின் ஆசிகளைப் பெற்றுக் கொண்ட அந்த நொடிகள், என் வாழ்வில் நான் ஈட்டிய அரும்பெரும் பேறு.

தங்களின் அன்றாடப் பணிகளை எல்லாம் புறந்தள்ளிவிட்டு, நான் விருதுபெறும் தருணத்தைக் காண ஓடோடி வந்து வாழ்த்திய அந்தப் பேருள்ளங்களுக்கு என் வார்த்தைகளால் எங்ஙனம் நன்றி நவில்வேன்? இத்தனை பெரியதொரு சபையில், திசையெங்கும் வீற்றிருந்த மாபெரும் சான்றோர்களின், ஆளுமைகளின் அன்பை வென்றெடுத்தமை நான் செய்த பெரும் பாக்கியமே அன்றி வேறில்லை.

இந்தக் காணொளியினூடாக அந்த உன்னதத் தருணத்தை உங்களுடனும் பகிர்ந்துகொள்கிறேன்.

எல்லாம் வல்ல இறைவன் உங்கள் அனைவரின் வாழ்விலும் சகல நலன்களையும் வழங்கி அருள்புரிவானாக! 

நன்றி!

அசுர வளர்ச்சிக்கு! ஒரு ஜப்பானிய ரகசியம்!

2023-01-29T17:43:00.000+05:30

"தொலைத்த இடத்தில் வாழ்க்கையை தேடு" என்று சொல்வார்கள் பிரச்சினைகளுக்கு தீர்வு காண்பதிலும் இது போன்ற தத்துவத்தை பயன்படுத்தி ஜப்பானியர்கள் தொழில்துறையில் முன்னேற்றம் கண்டதோடு வர்த்தக உலகத்திற்கே கற்றுக்கொடுத்த மந்திரம்தான் Genchi Genbutsu.

Genchi Genbutsu என்பது ஜப்பானிய தத்துவமாகும், இது முடிவெடுப்பதிலும் பிரச்சினைகளைத் தீர்ப்பதிலும் நேரடி கவனிப்பு மற்றும் அனுபவத்தின் முக்கியத்துவத்தை வலியுறுத்துகிறது. இதன் அர்த்தம் "நீங்களே சென்று பாருங்கள்" என்பதாகும். Toyota நிறுவனத்தின் உற்பத்தி பிரிவில் பணிபுரிந்த டய்சி ஓனோ தனது நிறுவனத்தின் உற்பத்தி சார்ந்த பிரச்சினைகளை தீர்த்து முன்னேற்றம் காண கண்டறிந்த தத்துவமே இது.

இது எந்தப் பிரச்சனையையும் விரைவாகவும் திறமையாகவும் புரிந்துகொள்வதற்கும் தீர்க்கும் பொருட்டும் உருவாக்கப்பட்டது. இன்னும் எளிமையாக சென்னால், எந்த இடத்தில் பிரச்சினை உள்ளதோ அந்த இடத்திற்கு நேரடியாக சென்று சூழ்நிலையை நன்கு அவதானித்து தீர்வு காணும் முறை.

இந்த அணுகுமுறை பல தசாப்தங்களாக வெற்றிகரமான வணிகத் தலைவர்கள் மற்றும் நிறுவனங்களால் பயன்படுத்தப்படுகிறது, மேலும் இது உங்கள் பிரச்சினைகளை தீர்க்கும் திறனைத் மேம்படுத்துவதற்கான ஒரு சக்திவாய்ந்த கருவியாகும்.

Genchi Genbutsu செயல்பாட்டிற்கு ஒரு பிரபலமான உதாரணம் MCDonalds அதிபர் Ray Kroc. ஓய்வு பெற்ற பிறகு, Kroc நிறுவனத்தில் தொடர்ந்து பணியாற்றினார், அவர் "நிறுவனத்தின் சந்தைப்படுத்தல் கண்கள்" என்று பெருமையாக அழைக்கப்பட்டார். அவர் தனது நாட்களை மெக்டொனால்டு உணவகங்களில் வாடிக்கையாளர்களையும் ஊழியர்களையும் கவனித்து, தனது அவதானிப்புகளை மீண்டும் குழுவிற்கு அறிக்கை செய்தார், மேலும் நிறுவனத்தின் வெற்றிக்கு உதவிய மதிப்புமிக்க நுண்ணறிவுகளை வழங்கினார். பின்னாட்களில் உணவகம் உலகம் முழுதும் வியாபிக்க து பெரும்பலமாக அமைந்தது.

மற்றொரு உதாரணம் டெர்ரி லீஹி, UK சூப்பர்மார்க்கெட் தெடரான டெஸ்கோவின் முன்னாள் CEO. லீஹி கடமையில் இணைந்து தனது முதல் ஆறு மாதங்களை CEO ஆக காரியாலயத்திற்கு செல்லாமல் விற்பனை தளங்களுக்கு சென்று, என்ன நடக்கிறது என்பதைக் கவனித்து, ஊழியர்களுடன் பேசியதாகக் கூறப்படுகிறது. இந்த அணுகுமுறை முன்னேற்றத்திற்கான பகுதிகளை அடையாளம் காண அவருக்கு உதவியது மற்றும் நிறுவனத்தின் வளர்ச்சிக்கும் வழிவகுத்தது.

Genchi Genbutsu என்பது சிக்கலைத் தீர்ப்பதற்கான எளிய மற்றும் பயனுள்ள அணுகுமுறையாகும். சிக்கலை நேரில் கவனித்து ஆராய்வதன் மூலம், நீங்கள் நிலைமையைப் பற்றிய ஆழமான புரிதலைப் பெறுவீர்கள், மேலும் சாத்தியமான தீர்வுகளை எளிதாகக் கண்டறியலாம். இன்றைய வேகமான வணிக உலகில் இந்த அணுகுமுறை மிகவும் மதிப்புமிக்கது.

உங்கள் சொந்த வாழ்க்கையிலும் வேலையிலும் Genchi Genbutsuவைப் பயன்படுத்துவதற்கு, பிரச்சினைகளை நேரில் கவனித்து பின் ஆராய நேரத்தை ஒதுக்கத்தொடங்குங்கள். கேள்விகளைக் கேளுங்கள், கருத்துக்களைக் கேளுங்கள் மற்றும் சிறிய விவரங்களுக்கு கவனம் செலுத்துங்கள். இந்த அணுகுமுறை சிறிது நேரத்தையும் முயற்சியையும் எடுக்கலாம், ஆனால் மேம்படுத்தப்பட்ட சிக்கலைத் தீர்ப்பது மற்றும் முடிவெடுப்பதில் நீங்கள் அடையப்போகும் பலன் மிகவும் மதிப்பு வாய்ந்தது.

தொழில் மற்றும் சொந்த வாழ்வில் அணுகுமுறையை கையாண்டு பிரச்சினைகளை சிறப்பாக தீர்ப்பதற்கான சில எளிய பயிற்சிகளை எனது யுடியுப் பதிவில் பாருங்கள்.

தொடுப்பு: https://youtu.be/-w3DioCRNmc

மனம் ஏன் எப்போதும் மோசமாக நினைக்கிறது?

2023-01-24T18:09:00.001+05:30

மோசமான சூழ்நிலையைப் பற்றி தொடர்ந்து கவலைப்படுவதில் நீங்கள் சோர்வாக இருக்கிறீர்களா? அப்படியானால், நீங்கள் தனித்துவிடவில்லை. பேரழிவு, அல்லது மோசமான விளைவுகளை தொடர்ந்து கற்பனை செய்யும் பழக்கம், மன அழுத்தம் மற்றும் பதட்டத்திற்கு வழிவகுக்கும் ஒரு பொதுவான சிந்தனை முறையாகும்.

இந்த வீடியோவில், பேரழிவுக்கான காரணங்கள் குறித்தும் எந்த பயனுமற்ற இந்த சிந்தனை பாணியை நிறுத்த உதவும் நடைமுறை உத்திகளையும் பகிர்ந்துகொள்கிறேன். உங்கள் எண்ணங்களை மறுவடிவமைத்தல், எதிர்மறை நம்பிக்கைகளை சவாலுக்குட்படுத்தல் மற்றும் தற்போதைய தருணத்தில் முழுக்கவனம் செலுத்த கற்றுக்கொள்வது போன்ற நுட்பங்களை பார்ப்போம்.

பயங்கரமான எண்ணங்களை தோன்றுவதை நிறுத்தி இன்னும் நிறைவான வாழ்க்கையை வாழத் தொடங்குவது எப்படி என்பதை அறிய விரும்பும் அனைவருக்கும் இந்த வீடியோ உதவும் என நம்புகிறேன். நீங்கள் மனஅழுத்தம், பதட்டம் போன்றவற்றில் ஈடுபட்டாலும் அல்லது உங்கள் மன நலனை மேம்படுத்த விரும்பினாலும், இந்த வீடியோ உங்களுக்கு மாற்றத்தை ஏற்படுத்த தேவையான கருவிகளை வழங்கும். எனவே, இனி காத்திருக்க வேண்டாம், இன்றே உங்கள் எண்ணங்களை வழிப்படுத்தி உங்கள் மன அழுத்தத்தைக் குறைக்கும் பயணத்தைத் தொடங்குங்கள்.

மக்கள் மனங்களை கவரும் அற்புதமான ரகசியம் ஒன்று!

2023-01-22T11:54:00.003+05:30

"எல்லாம் ஒரு நாள் மாறும் உங்க பிரச்சினைகள் எல்லாம் தீரும்" என்று ஆறுதலாக ஒரு வார்த்தை சொல்லி நம்பிக்கை கொடுப்பதில் தொடங்கி ஒரு சின்ன புன்னகை வரை சின்ன சின்ன விடயங்கள் என்று ஒருபோதும் சாதாரணமாக நினைத்துவிடக்கூடாது நண்பர்களே.

மாயா ஏஞ்சலோ ஒரு அற்புதமான சிந்தனை சொல்றாங்க,

"இந்த உலகத்தில் இருக்கக்கூடிய மக்கள் நீங்கள் சொல்வதை மறந்துவிடுவார்கள் நீங்கள் செய்ததையும் மறந்து விடுவார்கள் ஆனால் நீங்கள் அவர்களை எப்படி உணரச் செய்தீர்கள் என்பதை ஒருபோதும் மறக்க மாட்டார்கள்".

உங்களுடைய ஒரு நண்பன் மிகுந்த கவலையில் இருக்கும் சந்தர்ப்பத்தில் அவருக்கு ஒரு ஆறுதலான வார்த்தை சொல்லி மீண்டெழ நம்பிக்கை கொடுப்பது, ஒருவருடைய நல்ல பண்புகளை பாராட்டி அவரின் மதிப்பை உணரச்செய்வது அது போல ஒரு சின்ன காரியத்தின் மூலமாக ஒருவருடைய வாழ்க்கையில் மகிழ்ச்சியை ஏற்படுத்துவது காலத்துக்கு உங்களை ஞாபகத்தில் வைத்திருக்கச்செய்யும்.

நினைவில் கொள்ளுங்கள் நண்பர்களே மக்கள் மனங்களை கவரவும் உறவுகளிடத்தில் அன்பை வலுப்படுத்தவும் அன்புக்குரியவர்களை மேன்மையாக உணரச்செய்யுங்கள்.

என்ன இல்லை உன்னோடு? ஏக்கம் என்ன கண்ணோடு!

2023-01-15T21:22:00.002+05:30

வாழ்க்கை எத்தனை அழகான விடயங்களை நமக்கு அளித்தாலும் எப்போதும் நமது மனது இல்லாத ஒன்றையே தேடிக்கொண்டிருக்கும்.

நம்மிடம் சொற்ப வளங்களே இருக்கலாம் நமது முயற்சிகள் சிறியதாக தெரியலாம் இருப்பினும் என்ன நம்மிடம் இருக்கிறதோ அதில் முழு கவனத்தையும் செலுத்தி நன்றியுணர்கொண்டால், எதை நாம் விரும்புகிறேமோ வாழ்க்கை அதை இன்னும் அதிகமாக நமக்கு தரும்.

த சீக்ரட் (Secret) புத்தகத்தில் பிரபஞ்ச ஈர்ப்பு விதியை (The Law of Attraction) அடையும் முக்கிய காரணியாக நன்றியுணர்வே பார்க்கப்படுகிறது.

எதிர்மறை எணண்ணங்களிலிருந்து மீளவும் உறவுகளை பலப்படுத்தவும் நன்றியுணர்வின் அபாரமான சக்தியை பயன்படுத்துங்கள்.

அதிக ஸ்மார்ட்போன் பாவனையிலிருந்து மீண்டு உறவுகளை பலப்படுத்துவோம்

2023-01-15T14:34:00.000+05:30

ஸ்மார்ட்ஃபோனுக்குள் மூழ்கிப்போனதால், உங்கள் குடும்பத்திலிருந்து தொலைதூரமானதாக உணர்கிறீர்களா? நீங்கள் தனித்துவிடவில்லை.

தொழில்நுட்பத்தின் எழுச்சியுடன், நமது நேரத்தையும் கவனத்தையும் அன்றாடம் அதிகமாக எதில் செலவு செய்கிறோம் தெரியுமா? சராசரியாக ஒரு மனிதர் நாளொன்றுக்கு 6 மணி நேரம் ஸ்மார்ட்போனை பயன்படுத்துகிறார் என்று ஆய்வு முடிவுகள் சொல்கின்றன. ஸ்மார்ட்போன்கள் நம் வாழ்வில் பெரும் தாக்கத்தை ஏற்படுத்தியுள்ளது என்பதை நாம் அறிவோம்,

ஆனால் அவை நம் நேருக்கு நேர் தொடர்பு, குடும்ப நேரம் மற்றும் நமது உடல்உள ஆரோக்கியத்தையும் கூட பாதிக்கின்றன என்பது உங்களுக்குத் தெரியுமா?

மிதமான மற்றும் கடுமையான மனச்சோர்வு முதல் Autistic நடத்தை முறைகள் வரை, நீண்டகால ஸ்மார்ட்போன் பயன்பாட்டின் விளைவுகள் மிகுந்த கவலைக்குரியவை. ஆனால் நல்ல செய்தி என்னவென்றால், "Smartphone-Free" வீட்டை உருவாக்குவதன் மூலம், இந்த எதிர்மறை விளைவுகளிலிருந்து நம்மைப் பாதுகாத்துக் கொள்வது மட்டுமல்லாமல், நமது உறவுகளை வலுப்படுத்தி, நமது ஒட்டுமொத்த நல்வாழ்வை மேம்படுத்தவும் முடியும். ஸ்மார்ட்போன் பயன்பாட்டை முற்றுமுழுதாக நிறுத்திவிட்டு உலகத்தொடர்புகள் இன்றி நம்மால் வாழ்ந்துவிட முடியாது.

எனவே, நீங்கள் எவ்வாறு மிகவும் சமநிலையான மற்றும் இணைக்கப்பட்ட குடும்ப வாழ்க்கையை உருவாக்க முடியும்? நீங்கள் எங்கிருந்து எப்படி தொடங்கப்போகிறீர்கள்?

இதோ சில குறிப்புகள்:

1. நேர வரம்புகள் மற்றும் எல்லைகளை அமைக்கவும். உங்களுடைய ஸ்மார்ட்போன்களிலேயே ஒவ்வொரு Appஐயும் பயன்படுத்தும் நேரத்தை கட்டுப்படுத்தும் வசதி உண்டு அது தவிர Screen Time வசதியையும் அடிக்கடி கவனித்துக்கொள்ளுங்கள்.

2. Push Notificationகளை முடக்கி, உங்கள் முகப்புத் திரையில் இருந்து கவனத்தை சிதறடிக்கும் Appஸை அகற்றவும். முக்கியமான ஒரு பணியில் இருக்கும்போது கல்வி கற்கும் போது அல்லது அன்புக்குரியவர்களுடன் நேரத்தை பொழுதை கழிக்கும் போது உங்கள் ஃபோன் ஒலிக்கும் ஒவ்வொரு முறையும் அதைச் சரிபார்க்கும் சோதனையைத் தடுக்க இது உதவும்.

3. வாய்ப்பும் வசதியும் அமைந்தால் முக்கியமான அழைப்புகளுக்கு சாதாரண கையடக்கத்தொலைபேசி அல்லது ஸ்மார்ட்வாட்சைப் பயன்படுத்தவும். இந்த வழியில், உங்கள் ஸ்மார்ட்போனை முழுமையாகப் பயன்படுத்தாமல் தொடர்ந்து இணைந்திருக்க முடியும்.

4. உணவு அல்லது குடும்பக் கூட்டங்கள் போன்ற குறிப்பிட்ட நேரங்களில் Smart Phone பயனபடுத்துவதில்லை என்று உறுதியான முடிவெடுங்கள். உங்கள் குடும்பத்தினருடன் நேருக்கு நேர் உரையாடல்கள், பகிரப்பட்ட செயல்பாடுகள் மற்றும் விளையாட்டுகளில் ஈடுபடுங்கள். அது ஒரு திரைப்பட இரவாக இருந்தாலும் சரி அல்லது ஒரு விளையாட்டாக இருந்தாலும் சரி, தரமான நேரத்தை ஒன்றாகச் செலவிடுவதை உறுதிப்படுத்திக் கொள்ளுங்கள்.

5. வெவ்வேறு அணுகுமுறைகளை சோதனை செய்து, உங்களுக்கும் உங்கள் குடும்பத்துக்கும் எது சிறந்தது என்பதைக் கண்டறியவும். நினைவில் கொள்ளுங்கள், ஒவ்வொருவரின் சூழ்நிலையும் வேறுபட்டது, எனவே ஒரு குடும்பத்திற்கு பொருந்தக்கூடிய வழிமுறை மற்றொரு குடும்பத்திற்கு பொருந்தாமல் போகலாம்.

ஸ்மார்ட்போன்கள் இயல்பாகவே மோசமானவை அல்ல என்பதை நினைவில் கொள்வது அவசியம். அவை தகவல் தொடர்பு, தகவல் மற்றும் பொழுதுபோக்கிற்கான நம்பமுடியாத பயனுள்ள கருவிகளாக இருக்கலாம். முக்கிய விஷயம் என்னவென்றால், எங்கள் பயன்பாட்டைக் கவனத்தில் கொள்ள வேண்டும் மற்றும் Work-Life சமநிலையைக் கண்டறிய வேண்டும்.

சிறிய மாற்றங்களைச் செய்வதன் மூலம், மகிழ்ச்சியான, ஆரோக்கியமான, மேலும் அன்பால் இணைக்கப்பட்ட வீட்டை உருவாக்க முடியும். நம் அன்புக்குரியவர்களுடன் நமது உறவுகளை வலுப்படுத்த முடியும். மகிழ்ச்சியான மற்றும் ஆரோக்கியமான வீட்டிற்கு இந்த முயற்சி சிறப்பானதாக அமையும்.

குறைந்த முயற்சியில் எப்படி அதிகம் சாதிப்பது?

2023-01-09T20:22:00.000+05:30

உங்கள் தனிப்பட்ட அல்லது தொழில் வாழ்க்கையில் முன்னேற்றம் அடைய சிரமப்படுகிறீர்களா? நீங்கள் தொடர்ந்து உங்கள் சக்கரங்களைச் சுழற்றினாலும், அதே இடத்தில் நிற்பதை போல உணர்கிறீர்களா? அப்படியானால், நீங்கள் தனித்துவிடவில்லை. பலர் தங்கள் நேரத்தையும் வளங்களையும் எவ்வாறு அதிகம் பயன்படுத்துவது என்பது பற்றி அதிகமாகவும் நிச்சயமற்றதாகவும் உணர்கிறார்கள். ஆனால் குறைந்த முயற்சியில் நீங்கள் அதிகம் சாதிக்க உதவும் எளிய மற்றும் சக்திவாய்ந்த தீர்வு உள்ளது: 80/20 விதி, இது பரேட்டோ கொள்கை(Pareto Principle) என்றும் அழைக்கப்படுகிறது. உங்களின் 80% முடிவுகள் உங்கள் 20% முயற்சிகளில் இருந்து வந்தவை என்ற கருத்தை அடிப்படையாகக் கொண்டது இந்தக் கருத்து. மிக முக்கியமான விஷயங்களில் கவனம் செலுத்துவதன் மூலமும், முக்கியமற்ற விஷயங்களை நீக்குவதன் மூலமும் அல்லது பிரதிநிதித்துவப்படுத்துவதன் மூலமும், உங்கள் நேரத்தையும் வளங்களையும் நீங்கள் அதிகம் பயன்படுத்தலாம். இந்த வீடியோவில், 80/20 விதியை உங்கள் வாழ்க்கையில் எப்படிப் பயன்படுத்தலாம் என்பதையும், குறைந்த முயற்சியில் மேலும் பலவற்றைச் சாதிப்பதற்கு அது எப்படி உதவும் என்பதையும் ஆராய்வோம். 80/20 விதியை உங்கள் வேலை, உறவுகள் மற்றும் தனிப்பட்ட வாழ்க்கைக்கு எவ்வாறு பயன்படுத்தலாம் மற்றும் உங்கள் இலக்குகளை அடைய மிக முக்கியமான விஷயங்களில் கவனம் செலுத்துவது எப்படி என்பதை பார்ப்போம். எனவே குறைந்த முயற்சியில் எப்படி அதிகம் சாதிப்பது என்பதை அறிய நீங்கள் தயாராக இருந்தால், இந்த வீடியோவை தவறாமல் பார்க்கவும். மிக முக்கியமான விஷயங்களில் கவனம் செலுத்துவது மற்றும் உங்கள் நேரத்தையும் வளங்களையும் எவ்வாறு அதிகம் பயன்படுத்துவது என்பதை நீங்கள் கண்டுபிடிப்பீர்கள். #tamilmotivation #mondaymotivation

பலசாலிகள் அறிந்த வெற்றி ரகசியம்!

2022-10-31T23:07:00.000+05:30

விளையாட்டு வீரர்கள் சிறப்பாக செயல்பட உதவும் கருவியாக மனக்கண்ணில் காட்சிப்படுத்தல் நுட்பம் நீண்ட காலமாக பயன்படுத்தப்பட்டு வருகிறது. சவால்களை சமாளிக்க மக்களுக்கு உதவுவதில் இது பயனுள்ளதாக நிரூபிக்கப்பட்டுள்ளது. உண்மையில், செயல்படுவதற்கு முன் வெற்றியைக் காண்பது ஊக்கத்தையும் செயல்திறனையும் அதிகரிக்க உதவுகிறது என்று ஆய்வு முடிவுகள் எடுத்துக்காட்டுகின்றன.

காட்சிப்படுத்தல் என்பது உங்கள் உற்பத்தித்திறன், படைப்பாற்றல், ஆரோக்கியம், உறவுகள் மற்றும் உங்கள் நிதி நிலைமையை மேம்படுத்துவதற்கான ஒரு சக்திவாய்ந்த கருவியாகும். இது மந்திரம் அல்ல, ஆனால் அது வேலை செய்கிறது. மேலும், நடைமுறையில், உங்களுக்காக நீங்கள் நிர்ணயித்த எந்த இலக்கையும் அடைய காட்சிப்படுத்தலைப் பயன்படுத்துவதில் நீங்கள் பெரும் நன்மைகளைப் பெறலாம்.

மணக்கண்ணில் காட்சிப்படுத்தும் நுட்பத்தை பயன்படுத்தும் எளிய முறையை முழுமையான வீடியோவாக கீழே பதிவிட்டிருக்கிறேன்.

நினைப்பதெல்லாம் நடந்துவிட்டால்...

2021-12-15T15:53:00.001+05:30

அன்பான நண்பர்களே,

நமது வாழ்க்கையில் எல்லாமே ஒரு காரணத்தோடுதான் நடக்கிறது. இந்த ரகசியத்தை புரிந்துகொள்கிறவர்கள் சிகரம் தொடுகிறார்கள்.

பல சந்தர்ப்பங்களில் நமக்கு நடக்கக் கூடிய சில விஷயங்கள் பெரிய வருத்தத்தையும் கவலையையும் அந்த தருணத்தில் தரும் ஆனால் கொஞ்ச காலம் கழித்து அன்று இப்படி நடந்ததால்தான் இன்னைக்கு வாழ்க்கையில் என்னால் இவ்வளவு உயர முடிந்தது என்று நாம் அந்த சம்பவத்தை நினைத்து பெருமை கொள்வோம்.

டானி ரோபின்ஸ் அவருடைய அன்லிமிட்டட் பவர் என்கிற புத்தகத்தில் சொல்கிறார் "Everything happens for a reason" எல்லாமே ஒரு காரணத்தோடுதான் நடக்கிறது. ஸ்டான்ஃபோர்ட் பல்கலைக்கழகத்தில் ஒரு முறை ஸ்டீவ் ஜாப்ஸ் உரை நிகழ்த்தும் போதும் அவருடைய உரையில் Connecting the dots என்று சொல்லி ஒரு தியரியை மாணவர்களுக்கான உரையில் சொன்னார், அவருடைய வாழ்க்கையில் நடந்த சின்ன சின்ன விஷயங்களில் இருந்து பல்வேறுபட்ட சவாலான தருணங்கள் கூட பிந்நாட்களில் அவர் வாழ்க்கையில் மிகப் பெரிய உயரங்களை தொடுவதற்கும் எவ்வளவு துணையாக அமைந்தது என்பதை விளக்கினார்.

அன்லிமிட்டட் பவர் என்கிற புத்தகத்தில் இருந்து வெற்றியை வேகப்படுத்தும் இன்னும் சில நுட்பங்களை என்னுடைய யூடியூப் சனலில் தந்திருக்கிறேன் பாருங்கள் தொடுப்பு கீழே கிடைக்கும்.

சோர்வான மனநிலையில் இருந்து மீண்டு இழந்த சக்தியை பெறுவது எப்படி?

2021-01-17T23:07:00.000+05:30

அதீதமான களைப்போடு இருக்கக்கூடிய ஒரு நாளில் நாம் நமது சக்தியை முழுமையாக இழந்திருப்போம். ஒரு காரியம் செய்வதற்கும் நமக்கு மனது வராது. இப்படியான ஒரு சந்தர்ப்பத்தில் கொஞ்சம் உறங்கினால் மீண்டும் எழும்போது புத்துணர்வு கிடைத்துவிடும் என்கிற நம்பிக்கையோடு உறங்குவோம் ஆனால் அந்த உறக்கத்துக்கு பிறகும் கூட அதே சோர்வு நமக்குள்ளே அப்படியே இருக்கக்கூடும் உறக்கமும் ஓய்வும் இரண்டு வித்தியாசமான விஷயங்கள் இரண்டும் ஒன்று அல்ல என்பதை நாம் புரிந்து கொள்ள வேண்டும். நமது அன்றாட வாழ்க்கையில் நன்றாக உறங்கி இருக்கிறோம் அதனால் நல்ல ஒரு ஓய்வு கிடைத்துவிட்டது என்று நினைக்கிறோம் ஆனால் யதார்த்தத்தில் அந்த ஓய்வு உண்மையான நிறைவான ஒரு ஓய்வு தரக்கூடிய பலனை தந்திருக்காது. நிறைவான ஒரு ஓய்வு நமது ஆற்றலை அதிகப்படுத்துவது மாத்திரமல்ல புதிய கற்பனைத் திறனையும் நமக்குள்ளேயே அதிகப்படுத்தி நமது தொழில் ரீதியான வாழ்க்கையிலும் கல்வி சார்ந்த வாழ்க்கையிலும் கூட பல முன்னேற்றங்களை அடைய செய்யும். இந்த பதிவில் உண்மையான ஓய்வுக்கு வழிகாட்டக்கூடிய நான்கு விஷயங்களை பார்ப்போம்.

முதலாவது விஷயம் உடல்ரீதியாக நமக்கு கிடைக்கக்கூடிய ஓய்வு இதை இரண்டு விதமாக பார்க்கலாம். ஒன்று நாம் ஒரு செயலில் ஈடுபடும்போது செயல் ரீதியாக நமக்கு கிடைக்கக் கூடியது இன்னுமொன்று நாம் எந்த செயலும் செய்யாமல் செயலற்று இருக்கும் போது கிடைக்கக்கூடிய ஓய்வு. முதலில் நாம் ஒரு செயலில் ஈடுபடுவது என்பது உதாரணமாக தியானம் செய்வது அல்லது உடற் பயிற்சிகளை செய்யவது இதனூடாக உடல் ரீதியாக நமக்கு கிடைக்கக்கூடிய ஒருவிதமான ஓய்வு இது மனதளவில் நமக்கு அமைதியை தரும். அடுத்து இரண்டாவது விஷயம் செயலற்று இருக்கிற போது நமக்கு கிடைப்பது அதுதான் நிறைவான ஒரு உறக்கம் தரக்கூடிய ஒரு நல்ல ஓய்வு.

இரண்டாவது விஷயம் உளரீதியாக கிடைக்கக்கூடிய ஓய்வு அல்லது மனதளவில் கிடைக்கக்கூடிய ஓய்வு. ஒருநாள் இரவு பொழுது ஒரு ஏழு அல்லது எட்டு மணி நேரம் உறங்கி இருப்போம் அடுத்த நாள் காலையில் எழும்போது உடல் சோர்வாகவே இருக்கும் நல்லதொரு உறக்கம் தந்த நிறைவான ஒரு ஓய்வு கிடைக்காமல் போய் இருக்கும். அதற்கு என்ன காரணம்? இது போல எப்போதாவது நீங்களும் உணர்ந்திருக்கிறீர்களா? நண்பர்களே நாம் உறங்கினாலும் நமது உணர்வுகள் செயற்பட்டுக் கொண்டே இருக்கும். அன்றைய நாளில் நமது வாழ்க்கையில் நடந்த விஷயங்கள் சிக்கல்கள் அதுபோல அழுத்தங்கள் என்று பல்வேறுபட்ட விஷயங்கள் நமது சிந்தனையில் ஓடிக்கொண்டே இருந்திருக்கக்கூடும் ஆனால் நாம் உறங்கி இருப்போம் நிறைய கனவுகள் கூட அந்த இரவுப் பொழுதில் நீங்கள் கண்டு இருக்கவும் வாய்ப்பு இருக்கிறது. இது போன்ற சந்தர்ப்பங்களில் ஒரு நீண்ட நேர உறக்கமும் நல்லதொரு நிறைவான ஓய்வின் ஆற்றலை நமக்கு தருவதில்லை. இந்த சவாலை எதிர்கொள்வதற்கு நாம் என்ன செய்யலாம்? பரபரப்பான நமது வாழ்க்கையில் ஒரு குறிப்பிட்ட நேரத்திற்கு ஒரு தடவை ஒரு இடைவெளி எடுத்துக் கொள்வது நல்லது உதாரணத்துக்கு ஒரு இரண்டு அல்லது மூன்று மணி நேரத்துக்கு ஒரு தடவை 10 அல்லது 15 நிமிடங்கள் நமது பரபரப்பான வாழ்க்கையை கொஞ்சம் நிதானமாக மாற்றிக்கொள்ளலாம்(Slow-Down). அதில் நமக்கு அமைதியை ஏற்படுத்துகிற ஒரு காரியத்தை செய்யலாம். உங்களுடைய ஆன்மீக ரீதியான ஒரு விஷயமாக இருக்கலாம் அல்லது ஏதேனும் ஒரு விதத்தில் உங்களை அமைதிப் படுத்திக் கொள்கிற, ஒரு புத்துணர்வைத் தரக் கூடிய விஷயத்தை நீங்கள் செய்யலாம்.

மூன்றாவது விஷயம் உணர்வுரீதியான ஓய்வு நமது வாழ்க்கையில் எப்போதும் ஒரு வெளிச்சமான திரைக்கு முன்னால் அல்லது கணினி திரைக்கு முன்னால் அல்லது ஒரு conference callஇல் பலருடன் ஒரே சந்தர்ப்பத்தில் இணைந்த ஒரு உரையாடல். அது நீங்கள் காரியாலயத்தில் பணிபுரியும் போது அல்லது ஒரு message app வழியாக கூட இருக்கலாம். எப்போதும் பின்னணியில் கேட்டுக்கொண்டிருக்கும் கூடிய ஓர் இரைச்சல் சத்தம். இப்படி பல விஷயங்கள் உணர்வு ரீதியாக உங்களை சோர்வடையச் செய்யும். நாம் எப்போதும் ஒரு கடினமான காரியத்தை செய்தால் தான் அல்லது உடலளவில் இயங்கினால்தான் சோர்வடைகிறோம் என்று நினைக்கிறோம் ஆனால் அப்படியல்ல நண்பர்களே உணர்வு ரீதியாகவும் ஒரு மனிதன் வாழ்க்கையில் சோர்வடைய கூடும். இப்படி உணர்வு ரீதியாக நம்மை சோர்வடையச் செய்யக் கூடிய விடயங்களிலிருந்து நாம் நம்மை கவனித்துக் கொள்வது மிக அவசியம். குறிப்பாக இலத்திரணியல் சாதனங்களுக்கும் வாழ்க்கையில் கொஞ்சம் ஓய்வு கொடுத்துவிட வேண்டும். குறிப்பாக உறக்கத்துக்கு முன்பு ஸ்மார்ட்போனை நிறுத்தி வைத்து விடலாம். உறக்கத்துக்கு செல்வதற்கு முதல் சமூக ஊடகங்களில் நேரத்தை செலவு செய்தால் அது உணர்வு ரீதியாக நம்மை ஒரு விதத்தில் கஷ்டப்படுத்தலாம். சில நேரங்களில் தேவையற்ற சிந்தனைகளை கூட தரக்கூடும் இலத்திரனியல் சாதனங்களுக்கும் கொஞ்சம் ஓய்வு கொடுத்தால் உணர்வு ரீதியான ஒரு ஓய்வு நமக்கும் கிடைக்கும்.

நான்காவது, படைப்பாற்றலை அதிகப்படுத்துவதற்கான ஓய்வு நீங்கள் தொழில் ரீதியாகவோ அல்லது கல்வி கற்கக்கூடிய விடயங்களிலோ அதிகமாக பிரச்சினைகள் சிக்கல்களுக்குத் தீர்வு காண கூடிய ஒருவராக இருக்கலாம் அல்லது அதிகம் படைப்பாற்றலை பயன்படுத்தக் கூடிய ஒருவராக இருக்கலாம். அப்படியென்றால் இந்த வகையான ஓய்வு நிச்சயம் உங்களுக்கு உதவும் creative rest என்று ஆங்கிலத்தில் இதை சொல்வார்கள். நமக்குள்ளே பிரமிப்பையும் ஆச்சரியத்தையும் ஆர்வத்தையும் ஏற்படுத்தும் இந்த ஓய்வு தான் நமது வாழ்க்கையின் வளர்ச்சிக்கும் வெற்றிக்கும் மிகவும் முக்கியமான ஒன்று. நீங்கள் முதன் முதலாக பார்த்த நீர்வீழ்ச்சி அல்லது கடற்கரை அல்லது ஏதேனும் ஒரு இயற்கை காட்சி இன்றும் உங்களுடைய ஞாபகத்தில் நிற்கிறது ஏன் தெரியுமா? அந்த சந்தர்ப்பத்தில் உங்களுக்குள்ளே ஒரு பிரமிப்பும் ஆர்வமும் ஏற்பட்டிருக்கும். ஆக இப்போது உங்களுக்கு படைப்பாற்றலை அதிகப்படுத்தக்கூடிய அந்த ஓய்வு எப்படி கிடைக்கப் போகிறது? உள்ளூரில் இருக்கக்கூடிய ஒரு சிறிய பூங்காவுக்கு செல்லுங்கள் அல்லது இயற்கையோடு கொஞ்சம் நேரத்தை செலவு செய்யுங்கள் அப்படியும் வாய்ப்பு கிடைக்கவில்லை என்றால் வீட்டின் பின்புறத்தில் அல்லது வீட்டு தோட்டத்தில் இயற்கையோடு கொஞ்சம் நேரத்தை செலவு செய்யுங்கள். ஆனால் இயற்கையின் இந்த ஆசீர்வாதம் மாத்திரம் போதுமானதல்ல உங்கள் படைப்பாற்றலை அதிகப்படுத்துவதற்கு. படைப்பாற்றலை அதிகப்படுத்தும் ஓய்வு இன்னும் உங்களுக்கு கிடைக்க வேண்டுமென்றால். குறிப்பாக நீங்கள் பணிபுரியக்கூடிய இடம் அல்லது வீட்டில் கல்வி கற்கக்கூடிய இடத்தை சுத்தமாகவும் அழகாகவும் வைத்திருங்கள். நீங்கள் பல சந்தர்ப்பங்களில் பணிபுரியக்கூடிய, கல்வி கற்கக் கூடிய இடத்தில் அதிகமான குப்பைகள் இருக்கும் அந்த இடமே மிகப்பெரிய ஒரு மன அழுத்தத்தையும் தரக்கூடிய விதமாகத்தான் அமைந்திருக்கும். அந்த இடத்தை அழகுபடுத்திக் கொண்டால் நமக்குள்ளே ஒரு ஆர்வம் பிறக்கும் நாம் செய்யக்கூடிய பணியில் கல்வி கற்கக்கூடிய விஷயத்தில் ஒரு புதிய ஒரு சிந்தனை உதயமாகும். எப்போதும் ஞாபகத்தில் கொள்வோம் நீண்டநேர உறக்கம் மாத்திரம் நிறைவான ஓய்வை நமக்கு தந்து விடுவதில்லை.

Bots மூலம் பரப்பப்படும் இனவாதம்

2021-01-04T14:56:00.002+05:30

இலங்கையில் அண்மையில் இடம்பெற்ற விமானப்படைக்கு சொந்தமான விமான விபத்தொன்று குறித்த ஒரு செய்திப்பதிவில் வழக்கத்துக்கு மாறாக அனேகமான சிரிக்கும் ரியாக்‌ஷன்ஸ் இடப்பட்டிருந்ததை அவதானிக்க முடிந்தது. இதன் பின்னணி மற்றும் அதனோடு இயங்கும் ஆழமான அரசியல் குறித்த ஒரு விரிவான பதிவு.

மனம் விட்டு பேச ஒரு உறவு வேண்டும்!

2020-06-15T00:17:00.000+05:30

நீங்கள் தனித்துப்போய்விடவில்லை என்பதே இந்த உலகத்தில் நாம் மற்றவர்களுக்கு கொடுக்கக்கூடிய மகத்தான நம்பிக்கை. ஆனால் அழுத்தங்கள் மிக்க இந்த வாழ்க்கையில் தன் கவலைகளை கொட்டித்தீர்த்து மீண்டு வர எத்தனை பேருக்கு வாய்க்கிறது ஒரு திறமையான கலைஞனின் அவசரமான மரணம் மிகுந்த வருத்தம் தருகிறது. போரட்டங்கள் மிகுந்த தன் வாழ்க்கையில் ஒரு பைக் கூட வாங்க முடியாதவர் பொலிவூட்டின் சிகரங்களில் யார் துணையுமின்றி சிறகடித்துப்பறந்ததாய் படித்தேன். Sushant Singh Rajput தன் கடைசிப்படமான Chhichhoreஇலும் நம்பிக்கை தரும் வசனங்கள் பேசியவர் நண்பர்களையும் ரசிகர்களையும் ஏமாற்றிவிட்டாரே. அன்பான உறவுகளுடன் மனம் விட்டு பேசுவோம், வலி மிகுந்த உணர்வுகளை வெளிப்படுத்துவோம். ஒன்றும் கைக்கூடாத போது தயக்கமின்றி மருத்துவரின் உதவியை நாடுவோம். மன அழுத்தங்கள் நீங்க யாரும் தங்கள் மனக்கவலைகளை வெளிப்படுத்தும்போது காது கொடுத்து கேட்போம். வாழ்க்கை மிக மிக அழகானது அது அற்புதமானது! #SushantSinghRajput. #RIPSushantSinghRajput

இத்தருணத்தில் நோய் எதிர்ப்பு சக்தியை தக்கவைத்துக்கொள்ள 5 ஆலோசனைகள்

2020-04-06T23:33:00.001+05:30

உலகம் முழுதும் கொரோனா வைரஸ் தாக்கத்தினால் முடங்கிப்போயிருக்கும் நிலையில் பல நாடுகளில் ஊரடங்கு பிறப்பிக்கப்பட்டு மக்கள் வீடுகளில் முடங்கியிருக்கின்றனர்.

இத்தருணம் பலருக்கும் பயம் பதட்டம் மற்றும் மனச்சோர்வை கொடுக்கக்கூடும். இறுதியில் இதன் மூலமாக நாம் நோய் எதிர்ப்பு சக்தியை இழக்க நேரிடலாம். இந்நிலையில் இருந்து மீள உதவும் 5 ஆலோசனைகள் கீழ் காணும் வீடியோ பதிவில்.

டிஜிட்டல் வீடியோ படைப்பாளிகளுக்கு உதவும் Gadgets

2018-04-20T17:50:00.000+05:30

டிஜிட்டல் வீடியோ படைப்பாளிகளுக்கு உதவும் குறைந்த விலையிலான Basic Lav Mic. முக்கியமாக ஒரு கேபிள் ஊடாக இரண்டு மைக்குடன் வருவதால் ஸ்மார்ட் போன் மூலம் நேர்காணல் ஒன்றை பதிவு செய்யவும் முடியும்.
மற்றும் குறைந்த விலையில் கிடைக்கும் USB Vaccum Cleaner, USB card Reader பற்றி அறியவும் வீடியோவை பாருங்கள்.

கீழே தரப்பட்டுள்ள தொடுப்புகளினூடாக மேலதிக விபரம் அறியலாம்,

USB Vaccum Cleaner https://goo.gl/enMUbp

Lav Clip on Mic https://goo.gl/QMfFFg

USB Card Reader https://goo.gl/f9Xdb5

பலவீனத்தை பலமாக மாற்றுவோம்

2018-03-06T11:03:00.003+05:30

பலவீனத்தை பலமாக மாற்றிய 12 வயது ஜுடோ சாம்பியனின் தன்னம்பிக்கை கதை.

புத்தாண்டு தீர்மானங்கள் 2018

2018-01-07T13:08:00.000+05:30

அன்பான நண்பர்கள் அனைவருக்கும் இனிய புத்தாண்டு நல்வாழ்த்துக்கள்!

இந்த வீடியோ பதிவில் கடந்த ஆண்டிலிருந்து எதை புத்தாண்டுக்கு கொண்டு செல்லலாம் என்பது பற்றியும் புத்தாண்டின் தீர்மானங்கள் பற்றியும் பேசுகிறேன்.

எதுவும் நிரந்தரமல்ல!

2017-12-24T11:53:00.000+05:30

சில சிந்தனைகள் வாழ்க்கையின் யதார்த்தத்தை புரியவைக்கும். நம் வாழ்வின் சோகங்கள் துன்பங்களை போக்கும் ஒரு வீடியோ பதிவு.

நல்ல நண்பனை இழந்துவிடாதே!

2017-11-07T10:28:00.002+05:30

வாழ்க்கையில் அவ்வளவு எளிதில் நல்ல நண்பர்களின் நட்பு கிடைப்பதில்லை. அப்படி கிடைக்கும் நல்ல நட்பும் சிலருக்கு நீடிப்பதில்லை. என்றும் நட்புடன் நீடிக்க 6 எளிய வழிகள் இந்த வீடியோவில்.

பிரச்சினைகளை தீர்க்க எளிய வழிகள்

2017-11-01T15:00:00.001+05:30

பிரச்சினைகள் இல்லாமல் வாழ்க்கை இல்லை. வருகிற பிரச்சினைகளை தீர்க்கும் வழிகளை அறிந்தால் அதுபோல் ஆனந்தம் வேறில்லை. பிரச்சினைகளை தீர்க்க உதவும் 5 எளிய வழிகள் இந்த வீடியோவில்.

அதிஷ்டத்தை அடையும் வழி!

2017-10-18T20:36:00.002+05:30

வாழ்வில் அதிஷ்டம்இல்லை என்ற வருத்தத்தை கடந்து அதிஷ்டமே வாழ்க்கை என்று வாழ சில எளிய வழிகள் இந்த வீடியோ பதிவில்.