Hringbrot

Blogg vs. Facebook vs. Google+

Þorri — Thu, 28 Jul 2011 23:42:13 +0000

Svo virðist sem bloggið mitt sé að missa vægi sitt gagnvart Facebook og Google+ (sem ég er rétt byrjaður að fikta í). Sem er alls ekki gott því þó margir haldi að “allir” séu á Facebook þá er það bara alls ekki svo. Ég ætla að reyna að tjúna mig upp í bloggið aftur. Verið gæti að ég færi mig yfir í ensku. Er enn að spökúlera…

Innihaldslaus orð stórnmálamanna

Þorri — Sun, 10 Jan 2010 23:03:44 +0000

The Now Show (eða Friday Night Comedy) á BBC Radio 4 er fastur liður í iTunes hjá mér. Ég hef áður bloggað um lagið þeirra um ísbjörninn Knut, enda tær snilld þar á ferð.

Nú hafa þau hitt naglann sérstaklega vel á höfuðið aftur þar sem þau velta fyrir sér orðræðu stjórnmálamanna eða öllu heldur innihaldsleysi hennar. M.a. er dæmigert svar stjórnmálamanns hent yfir í hasarmynd, þar sem lausnin er alltaf í sjónmáli og stjórnmálamaðurinn hefur allt á tæru… eða þannig.

Þetta er stutt hljóðdæmi og algerlega nokkurra mínútna virði.

NowShow – Stjórmálamenn tala

Jólagjöfin hennar Lindu (í fyrra)

Þorri — Wed, 25 Nov 2009 22:36:21 +0000

Þegar jólaösin var sem mest í fyrra og Linda var niðrí í Spilavinum öll kvöld (eins og núna, að taka upp ný spil og gera klárt fyrir morgundaginn), þegar strákarnir voru sofnaðir og Ragna ekki enn fædd, þá fór ég niður á skrifstofu, hallaði hurðinni og glamraði inn lag sem ég samdi fyrir Lindu. Gaf henni svo lagið í jólagjöf (ég gaf henni fleiri gjafir til öryggis). Svo ætlaði ég alltaf að setja lagið á Netið og leyfa ykkur öllum (þér) að sækja lagið og hlusta á það.

Eníhú, þetta varð að allsherjar naglasúpuverkefni þar sem alltaf var eitt smáatriði sem mátti laga. Jæja, það eru enn smáatriði sem má laga en ég ætla ekki að láta árið líða án þess að hafa komið þessu frá mér.

Svo hér er lagið. Það heitir einfaldlega Linda, er á ímyndaðri plötu sem heitir Do Be Do (ég er svo existensíalískur, sko) og er sett saman með GarageBand. Gjössovel.

Þegar upplýsingar eru áhugaverðar…

Þorri — Thu, 13 Aug 2009 22:47:54 +0000

… þá er það oftar en ekki framsetningin sem vekur áhugann. Einfaldar (eða flóknar) staðreyndir um lífið, alheiminn og allt saman verða að hreinni skemmtun.

Hér er það sem sagt er um þetta myndband* á YouTube:

A unbelievable video, one for sure you need to watch. Fantastic video on the progression of information technology, researched by Karl Fisch, Scott McLeod, and Jeff Bronman, remixed.

* Myndband? Er það notað um svona? Mig vantar orð og þigg ábendingar.

Nýr og glæsilegur Þróttaravefur

Þorri — Wed, 03 Jun 2009 23:37:35 +0000

Við Linda erum mjög stolt af að kynna vefinn sem hefur fyllt tímaplanið okkar undanfarna mánuði: trottur.is. Vefurinn fór í loftið 23. maí, en síðan þá hefur maður verið upptekinn við að tína upp smáhlutina og fínpússa allt. Þetta hefur verið gríðarstórt verkefni og mjög skemmtilegt. Ég hef farið niður á áður ókannað dýpi í Joomla! með viðbótum á við Community Builder og finn að enn er mikið ókannað. Möguleikarnir eru miklir og spennandi að fá að skoða áframhaldandi þróun á vefnum.

Eitt vekur mikla athygli á vefnum — aðalleiðsögukerfinu er ekki skipt upp í deildir (fótbolti, handbolti…) heldur er því skipt upp í svæði tengd tilgangi heimsóknarinnar á vefinn: Fréttir, Bloggið (samskipti þjálfara við iðkendur og forráðamenn), Myndabanki (sem allir skráðir notendur geta bætt í) og Upplýsingar (Æfingaplön, iðkendalisti, símanúmer og allt það).

Markmiðið með skiptingunni er að gera notendum auðvelt að nálgast þær upplýsingar sem þeir vilja, en um leið stilla vefinn af þannig að hann geti stækkað. T.d. eru miklir möguleikar í uppröðun á hverju svæði sem þarf ekki að hafa áhrif á önnur svæði.

Ég er að minnsta kosti mjög spenntur.

Svo var JoomlaPolis, forritarar Community Builder að kynna nýja viðbót sem gerir vefstjórum kleift að búa til sérsniðinn aðgang fyrir notendur (sbr. “Þjálfari”, “Iðkandi” o.s.frv.). Sú viðbót markar vafalítið framtíðina fyrir trottur.is — og okkur.