HUHESO DIGITAL BLOG

MAGAZETI YA LEO JUMATANO OKTOBA 28,2026

2026-10-28T07:15:02.594+03:00

MAGAZETI YA LEO JUMANNE OKTOBA 27,2026

2026-10-27T08:33:43.130+03:00

UJENZI WA BARABARA YA KAHAMA - KAKOLA KWA UWEZESHAJI WA MIGODI YA BARRICK-TWIGA WAFIKIA ASILIMIA 90

2026-10-26T15:33:37.066+03:00

Waziri wa Ujenzi, Mhe. Masanja Kadogosa, akizungumza mwakilishi wa mkandarasi wa ujenzi wa Barabara ya Kahama–Bulyanhulu Jct–Kakola, M/s China Civil Engineering Construction Corporation (CCECC) Bw. Wang Lei (Mchina mwenye miwani) , kushoto kwa Waziri , Meneja wa TANROADS Mkoa wa Shinyanga, Mhandisi Ntuli Mwaikokesya, anayefuata ni Mbunge wa Jimbo la Msalala, Mabula Magangila na baadhi ya wahandisi wa Mkoa wa Shinyanga.

Waziri wa Ujenzi, Mhe. Masanja Kadogosa, akisoma ramani ya ujenzi wa barabara hiyo ya Kahama- Bulyanhulu Jct-Kakola wakati alipofanya ziara kwenye ujenzi wa barabara hiyo.

Waziri wa Ujenzi, Mhe. Masanja Kadogosa akizungumza wakati akitembelea ujenzi wa barabara ya Bulyanhulu Jct-Kakola.

Sehemu ya Barabara ya Kahama–Bulyanhulu Jct–Kakola

***

#Mkandarasi atakiwa kumaliza kazi mapema mwezi ujao.

Waziri wa Ujenzi, Mhe. Masanja Kadogosa, amemtaka Mkandarasi wa ujenzi wa Barabara ya Kahama–Bulyanhulu Jct–Kakola, M/s China Civil Engineering Construction Corporation (CCECC), kuongeza kasi ya utekelezaji wa mradi huo ili ukamilike kwa wakati mapema mwezi ujao kwa mujibu wa mkataba.

Mradi wa ujenzi wa barabara barabara hiyo kwa kiwango cha lami yenye kilomita 73 unatekelezwa kwa uwezeshaji wa migodi ya Barrick nchini inayoendeshwa kwa ubia na serikali kupitia kampuni ya Twiga ya Bulyanhulu na North Mara kwa gharama ya shilingi bilioni 101.2 na umeanza kutekelezwa mwaka juzi kwa usimamizi wa Wakala wa Barabara nchini (TANROADS).

Akiongea baada ya kutembelea barabara hiyo amemtaka mkandarasi kuongeza kasi ili barabara hiyo iweze kumalizika katika muda uliopangwa na kuwaondolea wananchi wanaotumia barabara hiyo kero ya usafiri sambamba na kuwanufaisha wananchi wanaotegemea kuitumia kwa usafirishaji wa bidhaa mbalimbali na kupanua wigo wa ufanyaji wa biashara na kukuza uchumi.

Waziri Kadogosa amesisitiza kuwa mkandarasi anatakiwa kukamilisha mradi huo kwa mujibu wa mkataba ifikapo Desemba 7, 2026, akionya kuwa Serikali itachukua hatua kali endapo atashindwa kutekeleza wajibu wake, ikiwemo kukata asilimia 0.1 ya thamani ya mkataba na kufuta kibali cha kampuni hiyo kutekeleza miradi ya aina hiyo nchini.

Akitoa taarifa ya maendeleo ya mradi huo, Meneja wa TANROADS Mkoa wa Shinyanga, Mhandisi Ntuli Mwaikokesya, amesema ujenzi wa barabara ya Kahama – Bulyanhulu Jct–Kakola wenye urefu wa kilomita 73 unagharimu Shilingi bilioni 100.6.

Amesema mradi huo ulipangwa kukamilika mwezi Septemba 2026, hata hivyo, kutokana na changamoto mbalimbali zilizojitokeza wakati wa utekelezaji, mkandarasi aliomba kuongezewa muda wa kukamilisha kazi na mpaka sasa kilomita 32 kati ya 73 zimekamilishwa kwa kuwekwa lami, huku kazi nyingine za ujenzi zikiendelea katika maeneo mbalimbali ya mradi.

Akizungumza wakati wa ukaguzi huo, Mbunge wa Jimbo la Msalala, Mhe. Mabula Magangila, amesema wananchi wamekuwa na uhitaji wa muda mrefu wa barabara hiyo, akibainisha kuwa kukamilika kwake kutachochea shughuli za kiuchumi katika eneo hilo.

Mwakilishi wa Mgodi wa Barrick ambao ndiyo wafadhili wa Ujenzi wa Barabara hiyo kwa asilimia 100, Mhandisi Ibrahim Paul ameunga mkono kauli ya Waziri Kadogosa kwa kumtaka mkandarasi kumaliza kazi kwa wakati kwa kuwa fedha za uwezeshaji zinatoka kwa wakati mkandarasa akihitaji kulipwa na kuwa Barrick inapenda kuona dhamira yake ya kuona wananchi wananufaika na mradi huo ikitimia.

Mhandisi Bw. Wang Lei kutoka kampuni ya CCECC inayojenga barabara hiyo ameahidi kuongeza juhudi na kufanya kazi usiku na mchana ili kuhakikisha mradi unakamilika ndani ya muda uliopangwa.

Kukamilika kwa barabara hii ambayo ilianza kujengwa mnamo mwezi Julai mwaka juzi kutafungua fursa za kiuchumi za madini, Kilimo, Misitu na Utalii katika mikoa ya Shinyanga, Geita, Tabora, Kagera na Kigoma.

Pamoja na Barabara hiyo kufungua fursa za kiuchumi za madini, kilimo, misitu na utalii katika mikoa ya Shinyanga, Geita, Tabora, Kagera na Kigoma mara baada ya kukamilika pia barabara hiyo ni muhimu katika shughuli za kiuchumi na kijamii kwa Mkoa wa Shinyanga hususani Manispaa ya Kahama ambako kuna mkusanyiko mkubwa wa Wasafirishaji wa mizigo kutoka bandari kuu ya Tanzania kwenda nchi za jirani za Rwanda na Uganda.

Mkakati endelevu wa kampuni ya Barrick ambayo inawezesha ujenzi huo unabainisha kuwa Uchimbaji madini ukifanyika kwa umahiri ni nguvu kubwa ya kuleta maendeleo na jamii zinazoishi kwenye maeneo ya shughuli zake zikipata mafanikio ni mafanikio yake pia.

MAGAZETI YA LEO JUMATATU OKTOBA 26, 2026

2026-10-26T07:35:41.434+03:00

MAGAZETI YA LEO JUMAMOSI OKTOBA 24,2026

2026-10-24T05:28:41.694+03:00

NEEMA NKUMBI WINS BEST FEMALE MEDIA PERSONALITY AWARD IN SHINYANGA

2026-10-22T15:45:20.848+03:00

Blogger Neema Nkumbi from Kahama District has won the Best Female Media Personality award at the second edition of the MDAU SHUPAVU Awards – Shinyanga 2026.

The awards were presented on 20 October 2026 at Miligo Hall in Kahama, Shinyanga Region, with winners across the various categories chosen through public voting.

Neema contributes to several digital news platforms, including Huheso Digital, Meza ya Mafanikio, Udadisi Live and Malunde 1 Blog, sharing news and information with the wider community.

Her award recognises her contribution to journalism and the work of women in keeping the public informed, particularly through digital platforms that provide news and educational content.

The MDAU SHUPAVU Awards were organised by HOLYSMILE, under its Director, Arnold A. Bweichum Jr, to recognise individuals, institutions and businesses contributing to community development.

The awards covered categories including media, business, entrepreneurship, entertainment, education, fashion and beauty, innovation and community development.

MWANAHABARI NEEMA NKUMBI ATWAA TUZO YA BEST FEMALE MEDIA PERSONALITY MDAU SHUPAVU AWARDS 2026

2026-10-21T09:40:57.411+03:00

Mwandishi wa habari Neema Nkumbi kutoka Wilayani Kahama ameibuka mshindi wa tuzo ya Mwanahabari Bora wa Kike 'Best Female Media Personality' katika tuzo za MDAU SHUPAVU Awards – Shinyanga 2026, Season 2, zilizotolewa Oktoba 20, 2026, katika ukumbi wa Miligo Hall, mjini Kahama, mkoani Shinyanga.

Neema ni miongoni mwa waandishi wa habari wanaotumia majukwaa mbalimbali ya kidijitali kufikisha habari na taarifa kwa jamii, akiandika kwa majukwaa yakiwemo Huheso Digital, Meza ya Mafanikio, Udadisi Live na Malunde 1 Blog.

Ushindi huo ni utambuzi wa mchango wake katika tasnia ya habari na nafasi ya wanawake katika kuhabarisha umma kupitia majukwaa ya kidijitali, ambayo yameendelea kuwa sehemu muhimu ya upashanaji habari na uelimishaji wa jamii.

Tuzo za MDAU SHUPAVU Awards zimeandaliwa na Taasisi ya HOLYSMILE, chini ya Mkurugenzi wake Arnold A. Bweichum Jr, kwa lengo la kutambua na kuenzi watu binafsi, taasisi na biashara zinazochangia maendeleo ya jamii katika sekta mbalimbali.

Tuzo hizo zimejumuisha kategoria mbalimbali zinazohusisha habari, biashara, ujasiriamali, burudani, elimu, mitindo na urembo, ubunifu na maendeleo ya jamii, huku washindi wakipatikana kupitia kura za wazi.

ILELEMA GOLD MINE FC YAANDIKA HISTORIA MAHONA CUP, KDFA YATAKA TIMU ZISAJILIWE

2026-10-19T16:33:13.279+03:00

Mkurugenzi wa Mahona Cup, Patrick Mahona akizungumza katika sherehe ya kujipongeza kwa timu ya Ilelema goldmine fc kutwaa ubingwa wa Mahona Cup, msimu wa 2025/2026, mzunguko wa 12.

NA NEEMA NKUMBI, KAHAMA

Timu ya Ilelema Gold Mine FC imeibuka bingwa wa mashindano ya soka ya Mahona Cup msimu wa 2025/2026, huku viongozi wa soka wilayani Kahama wakizitaka timu za Halmashauri ya Msalala kusajiliwa rasmi ili ziweze kushiriki ligi na mashindano mbalimbali yanayotambuliwa na mamlaka za michezo nchini.

Akizungumza katika sherehe ya kujipongeza kutwaa ubingwa wa Mahona Cup, msimu wa 2025/2026, mzunguko wa 12, mmoja wa viongozi wa Ilelema Gold Mine FC, Henry Ntoba, amesema mafanikio hayo ni hatua muhimu kwa timu hiyo, ambayo imeweza kutwaa ubingwa katika kipindi kifupi tangu kuanzishwa kwake.

Amesema uongozi wa timu hiyo una dhamira ya kuendeleza michezo na kuboresha miundombinu, ikiwamo kujenga uwanja wa kisasa utakaotumika kama uwanja wa nyumbani wa Ilelema Gold Mine FC na kuwawezesha wakazi wa Segese, Kahama na maeneo jirani kunufaika na shughuli mbalimbali za michezo.

Kwa upande wake, Katibu Mtendaji wa Chama cha Mpira wa Miguu Kahama (KDFA), Paschal Malulu, amepongeza Ilelema Gold Mine FC kwa kutwaa ubingwa wa Maona Cup, huku akizitaka timu ambazo bado hazijasajiliwa kukamilisha taratibu za usajili ili zitambulike rasmi na kupata fursa za kushiriki mashindano mbalimbali.

Malulu amesema usajili rasmi utaziwezesha timu kutambulika na Baraza la Michezo la Taifa (BMT) na kupata sifa za kushiriki ligi za wilaya, mkoa na mashindano mengine yanayosimamiwa na mamlaka husika za soka, ikiwamo Shirikisho la Mpira wa Miguu Tanzania (TFF), kwa kuzingatia masharti ya kila mashindano.

Ameeleza kuwa KDFA inaendelea na majadiliano kuhusu uwezekano wa kuwa na ligi za wilaya katika Halmashauri ya Msalala na Halmashauri ya Ushetu, sambamba na Manispaa ya Kahama, ili timu nyingi zaidi zipate nafasi ya kushiriki mashindano katika maeneo yao.

Amesema changamoto mojawapo inayokabili maendeleo ya soka katika eneo hilo ni uhaba wa viwanja vyenye sifa za kuandaa ligi, hali inayosababisha michezo mingi kuchezwa katika Uwanja wa Taifa wa Kahama.

Kwa mujibu wa Malulu, ujenzi wa viwanja vya nyumbani na kuboresha miundombinu ya michezo kutasaidia kupanua wigo wa mashindano, kupunguza utegemezi wa uwanja mmoja na kutoa fursa kwa chama cha soka kupeleka ligi karibu zaidi na wananchi.

Naye Mwenyekiti wa Kamati ya Mashindano ya Mahona Cup msimu wa 2021/2022, Hussein Issa, amesema mashindano hayo yameendelea kukua na kuboresha ushindani wake, akieleza kuwa mafanikio ya msimu huo ni hatua ya kujivunia kwa waandaaji na wadau wa michezo.

Issa amemshukuru Diwani wa Kata ya Segese, Patrick Mahona, kwa kuwaamini waandaaji na kuwapa nafasi ya kusimamia mashindano hayo, akisema ushirikiano huo umechangia kufanikisha mashindano yaliyowakutanisha wakazi wa Segese na maeneo mbalimbali ya Kahama.

Kwa upande wake, Nahodha wa Ilelema Gold Mine FC, Cheche Damas, amemshukuru Mwenyezi Mungu pamoja na uongozi wa timu na wakazi wa kijiji cha Ilelema kwa mchango wao ulioiwezesha timu hiyo kutwaa ubingwa.

Damas amesema timu ilifanya maandalizi na kupata wachezaji wenye uwezo, jambo lililochangia mafanikio hayo, huku akieleza kuwa mashindano hayo yamewapa wachezaji fursa ya kuonyesha vipaji vyao na kuongeza mwamko wa michezo kwa wakazi wa eneo hilo.

Ameongeza kuwa mashindano kama Mahona Cup yana umuhimu mkubwa kwa jamii kwa kuwa yanatoa burudani, yanaunganisha wananchi na kuwashirikisha vijana katika shughuli za michezo, hatua inayoweza kuwasaidia kutumia muda wao katika shughuli zenye manufaa.

Damas amewataka waandaaji kuendelea kuandaa mashindano hayo katika misimu ijayo, akisema mafanikio yake yanaonyesha umuhimu wa kuwekeza katika michezo na kuendeleza vipaji vya vijana.

Mkurugenzi wa Mahona Cup, Patrick Mahona amesema anapoandaa mashindano na kombe linatoka nje ya mji na kuchukuliwa na watu wa pembezoni mwa mji linampa hamasa ya kuandaa mashindano zaidi.

" Mimi kama mwandaaji wa mashindano ninapoandaa mashindano na kombe likachukuliwa na washindi kutoka nje ya mji inanipa hamasa ya kuandaa mashindano zaidi maana kama kombe linabaki palepale kila siku nakuwa sinahaja ya kuandaa mashindano" amesema Mahona.

Mahona amewashukuru wote wanaomuunga mkono, uongozi wa chama cha mpira wa miguu Wilaya ya Kahama, Mkoa hata taifa, pia ameuomba uongozi wa wilaya kutuma wataalamu wa kutengeneza viwanja vya michezo kuunga mkono juhudi za mkurugenzi wa Ilelema goldmine fc ambaye amenunua eneo kwa ajili ya ujenzi wa kiwanja cha mpira wa miguu.

Amesema uwanja ukijengwa watapata maendeleo katika kijiji hicho kwani wawekezaji wanaweza kuja kuwekeza na biashara mbalimbali na kuongeza pato la halmashauri.

TEKNOLOJIA YA NYUKLIA KUWA SILAHA DHIDI YA MBUNG’O, NDOROBO AFRIKA

2026-10-19T16:16:38.556+03:00

Na Mwandishi Wetu - Arusha.

Tume ya Nguvu za Atomu Tanzania (TAEC) kwa kushirikiana na Wakala wa Kimataifa wa Nguvu za Atomu (IAEA) imeandaa mafunzo ya kikanda jijini Arusha kwa lengo la kuwajengea uwezo wataalamu kutoka nchi 16 barani Afrika katika ukusanyaji wa takwimu za kisayansi zitakazosaidia kuimarisha mapambano dhidi ya wadudu aina ya mbung’o wanaosababisha kuenea kwa ugonjwa wa ndorobo kwa mifugo.

Mafunzo hayo ya wiki mbili, yanayofanyika katika Hoteli ya Best Western Parot Hotel jijini Arusha kuanzia leo Oktoba 19 hadi 30, 2026, yanalenga kuongeza ujuzi wa wataalamu katika kutambua maeneo yenye mbung’o, kukusanya na kuchambua takwimu pamoja na kupanga mikakati madhubuti ya kudhibiti wadudu hao kwa kutumia mbinu za kisasa, ikiwemo teknolojia ya nyuklia.

Akifungua mafunzo hayo, Mkurugenzi Mkuu wa Tume ya Nguvu za Atomu Tanzania (TAEC), Prof. Najat Kassim Mohammed, amesema mbung’o na ugonjwa wa ndorobo vinaendelea kuwa changamoto kubwa kwa maendeleo ya sekta ya mifugo na kilimo katika nchi nyingi za Afrika, kutokana na kusababisha vifo vya mifugo, kupungua kwa uzalishaji na kuongeza gharama za matibabu kwa wafugaji.

Prof. Najat amesema pamoja na juhudi mbalimbali zilizofanyika kwa miaka mingi, bado kuna maeneo yenye ardhi yenye rutuba ambayo hayatumiki ipasavyo kwa shughuli za kilimo na ufugaji kutokana na uwepo wa mbung’o, hali inayochangia kudhoofisha uchumi wa wananchi na kuhatarisha usalama wa chakula.

Ameeleza kuwa matumizi ya teknolojia ya nyuklia kupitia mbinu ya kuzalisha na kuachia mbung’o dume waliohasiwa, inayojulikana kama Sterile Insect Technique (SIT), ni miongoni mwa njia muhimu zinazoweza kusaidia kupunguza idadi ya wadudu hao na hatimaye kuwaondoa katika maeneo yaliyoathirika.

“Teknolojia hii inahusisha kuzalisha mbung’o dume, kuwahasi kwa kutumia mionzi na kuwaachia katika mazingira ili wapandane na mbung’o jike wa kawaida bila kuzalisha kizazi kipya. Kwa kufanya hivyo, idadi ya mbung’o hupungua hatua kwa hatua na kusaidia kudhibiti kuenea kwa ugonjwa wa ndorobo,” amesema Prof. Najat.

Ameongeza kuwa mafanikio ya matumizi ya teknolojia hiyo yanategemea upatikanaji wa takwimu sahihi kuhusu maeneo wanakopatikana mbung’o, idadi yao na mazingira wanamoishi, jambo linalofanya mafunzo hayo kuwa muhimu katika kuimarisha mipango ya kitaifa na kikanda ya kudhibiti wadudu hao.

Prof. Najat ameitaja Zanzibar kuwa mfano wa mafanikio ya matumizi ya mbinu za kisayansi katika kutokomeza mbung’o, akieleza kuwa uzoefu huo unaonesha namna ushirikiano wa taasisi, matumizi ya teknolojia na mipango endelevu vinavyoweza kuleta matokeo chanya katika sekta ya mifugo.

Amesema mafunzo hayo yanafanyika kupitia Mpango wa Ushirikiano wa Kikanda wa Afrika katika Utafiti, Maendeleo na Mafunzo ya Sayansi na Teknolojia ya Nyuklia (AFRA), unaosaidiwa na IAEA, kwa lengo la kuimarisha uwezo wa nchi za Afrika kutumia teknolojia ya nyuklia katika kutatua changamoto zinazokwamisha maendeleo ya wananchi.

Kwa upande wake, Mkuu wa Kitengo cha Mawasiliano wa Tume ya Nguvu za Atomu Tanzania (TAEC), Bwana Peter Ngamilo, amesema mafunzo hayo yanaonesha umuhimu wa matumizi ya teknolojia ya nyuklia katika kushughulikia changamoto zinazogusa moja kwa moja maisha ya wananchi, hususan katika sekta za kilimo na mifugo.

“Wananchi wengi wanaposikia teknolojia ya nyuklia wanaweza kufikiria matumizi yake yanahusu uzalishaji wa umeme au masuala ya silaha pekee. Ukweli ni kwamba teknolojia hii ina matumizi mengi yenye manufaa makubwa katika maisha yetu ya kila siku, ikiwemo kudhibiti wadudu waharibifu, kuboresha uzalishaji wa kilimo na mifugo na kuimarisha usalama wa chakula,” amesema Ngamilo.

Ameongeza kuwa TAEC itaendelea kushirikiana na taasisi za ndani na kimataifa katika kuhamasisha matumizi salama ya sayansi na teknolojia ya nyuklia ili kuhakikisha wananchi wananufaika na fursa zinazotokana na teknolojia hiyo katika kukuza uchumi na kuboresha maisha yao.

Mafunzo hayo yanajumuisha vipindi vya nadharia na vitendo vinavyohusu maandalizi ya ukusanyaji wa takwimu za mbung’o, uandaaji wa mikakati ya uchukuaji wa sampuli na utekelezaji wa tafiti za awali katika maeneo yenye wadudu hao.

Katika mafunzo hayo, wataalamu kutoka IAEA wanashirikiana na taasisi mbalimbali, zikiwemo Wizara ya Mifugo na Uvuvi, Wakala ya Maabara ya Veterinari Tanzania (TVLA), Shirika la Hifadhi za Taifa Tanzania (TANAPA) na Taasisi ya Utafiti wa Wanyamapori Tanzania (TAWIRI), katika kuimarisha uwezo wa kitaalamu wa kukabiliana na changamoto ya mbung’o barani Afrika.

Mafunzo hayo yanatarajiwa kusaidia nchi zinazoshiriki kuboresha ukusanyaji wa taarifa za kisayansi, kuimarisha ushirikiano wa kikanda na kuongeza ufanisi wa programu za kudhibiti mbung’o na ugonjwa wa ndorobo, hatua itakayochangia kulinda afya ya mifugo, kuongeza uzalishaji na kuimarisha usalama wa chakula barani Afrika.

MAOFISA 39 WA JESHI LA MAGEREZA WAPANDISHWA VYEO

2026-10-19T16:10:44.547+03:00

‎Mkuu wa Jeshi la Magereza (CGP), Jeremiah Yoram Katungu, leo Oktoba 19, 2026, kwa niaba ya Rais wa Jamhuri ya Muungano wa Tanzania na Amiri Jeshi Mkuu, amewavalisha vyeo Maafisa 39 wa Jeshi la Magereza, wakiwemo Naibu Makamishna 17 na Makamishna Wasaidizi Waandamizi 22, katika hafla iliyofanyika Makao Makuu ya Jeshi la Magereza Msalato, jijini Dodoma.

‎

‎Akizungumza katika hafla hiyo, CGP Katungu amemshukuru Rais kwa kuendelea kuliwezesha Jeshi la Magereza kwa kujaza nafasi za uongozi, kuboresha stahiki za watumishi na kutoa vibali vya ajira. Amesema kupandishwa vyeo kwa idadi hiyo ya Maafisa ni tukio la kihistoria, huku akiahidi kuwa Jeshi litaendelea kutekeleza majukumu yake kwa weledi na ufanisi.

‎

‎Amewataka Maafisa hao kutumia vyeo walivyopata kuongeza bidii na kusimamia majukumu ya Jeshi, ikiwemo kutoa hifadhi salama kwa wafungwa na mahabusu, kutekeleza programu za urekebu na kutoa ushauri wa kuzuia uhalifu katika jamii.

‎

‎Kwa upande wake, Kamishna wa Sheria na Uendeshaji wa Magereza (CP), Nicodemus Tenga, amewataka Maafisa hao kutafsiri mikakati na maelekezo ya Serikali kwa vitendo, huku wakizingatia Sheria,Taratibu na miongozo inayotolewa ya Jeshi.

MAGAZETI YA LEO JUMATATU OKTOBA 19,2026

2026-10-19T09:01:23.110+03:00

SERIKALI YAAHIDI KUENDELEZA USHIRIKIANO NA MADHEHEBU YA DINI

2026-10-18T23:50:53.554+03:00

*KUENZI HAKI YA KUABUDU*

Na Mwandishi Wetu, Dar es Salaam – 18 Oktoba, 2026

Serikali imesisitiza dhamira yake ya kuendelea kushirikiana na madhehebu ya dini nchini, ikitambua mchango wake katika malezi ya kiroho, utoaji wa huduma za kijamii na kuimarisha amani na mshikamano wa kitaifa. Kauli hiyo imetolewa na Waziri wa Nchi, Ofisi ya Waziri Mkuu, Kazi, Ajira na Mahusiano, Mhe. Deus Sangu, aliyemwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan, katika ibada takatifu ya kumweka wakfu Askofu John Jumanne Wambura wa Kanisa la Mennonite Tanzania (KMT), iliyofanyika jijini Dar es Salaam, Oktoba 18, 2026.

Akizungumza katika ibada hiyo, Mhe. Sangu amesema viongozi wa dini wameendelea kuwa nguzo muhimu katika kutoa mafundisho, ushauri na malezi bora, pamoja na kuwahudumia wananchi wenye mahitaji maalumu, wakiwemo yatima, wajane na watu wenye ulemavu.

Amesema Serikali inatambua mchango wa taasisi za dini katika sekta za afya, elimu na huduma nyingine za kijamii, hususan katika maeneo ya pembezoni, na kwamba ushirikiano huo ni muhimu katika kuharakisha maendeleo ya wananchi. Aidha, amewataka viongozi wa dini kuendelea kuliombea Taifa na kuhamasisha jamii kulinda amani iliyopo nchini, akisisitiza kuwa Ofisi ya Waziri Mkuu iko tayari kushirikiana na wadau wote katika kuimarisha mshikamano na maendeleo ya Taifa.

Kwa upande wake, Askofu Mkuu wa Kanisa la Mennonite Tanzania, Nelson Kisare, amewataka viongozi kutumia nafasi walizopewa kwa manufaa ya watu wanaowaongoza na jamii kwa ujumla, badala ya kujinufaisha binafsi. Amesema viongozi wanapaswa kuwa vielelezo vya maadili mema na matendo yanayojenga jamii. Huku Mkuu wa Wilaya ya Ilala, Mhe. Edward Mpogolo, amelishukuru Kanisa la Mennonite kwa kuendelea kuliombea Taifa na kuchangia juhudi za kudumisha amani nchini.

SERIKALI KUTUMIA MILIONI 600 KUBORESHA HUDUMA ZA AFYA MAKAMBAKO - PROF. SHEMDOE

2026-10-18T08:17:23.814+03:00

Na: OWM–TAMISEMI, Makambako

Waziri wa Nchi, Ofisi ya Waziri Mkuu - Tawala za Mikoa na Serikali za Mitaa (OWM-TAMISEMI), Mhe. Prof. Riziki Shemdoe, amesema Serikali itapeleka shilingi milioni 600 katika Halmashauri ya Mji wa Makambako kabla ya Desemba 2026 kwa ajili ya ujenzi wa Kituo cha Afya Kitandililo, hatua itakayosaidia kusogeza huduma bora za matibabu karibu na wananchi.

Prof. Shemdoe ameyasema hayo Oktoba 17, 2026, akiwa Makambako, baada ya kupewa fursa na Makamu wa Rais, Mhe. Deogratius Ndejembi, kueleza hatua zinazochukuliwa na OWM-TAMISEMI kuboresha huduma za afya ya msingi, katika mkutano wa hadhara uliofanyika wakati wa ziara ya Makamu wa Rais ya kukagua utekelezaji wa miradi ya maendeleo mkoani Njombe.

“Mhe. Makamu wa Rais, tumeshapata shilingi milioni 600 ambazo tutazileta hapa Makambako kwa ajili ya ujenzi wa Kituo cha Afya Kitandililo kabla ya Desemba, ili wananchi wapate huduma bora za matibabu kwa wakati,” amesisitiza Prof. Shemdoe.

Kuhusu ombi la Mbunge wa Makambako ambaye pia ni Waziri wa Kilimo, Mhe. Daniel Chongolo, la kujenga zahanati mbili, Prof. Shemdoe amesema ofisi yake inaendelea kulifanyia kazi kwa kutafuta fedha ili zitakapopatikana zitumike kujenga zahanati hizo na kusogeza huduma za afya karibu zaidi na wananchi.

Kwa upande wake, Makamu wa Rais, Mhe. Deogratius Ndejembi, amesema anatambua jitihada zilizofanywa na Naibu Waziri wa OWM-TAMISEMI anayeshughulikia Elimu, Mhe. Dkt. Festo Dugange, pamoja na Waziri wa Nchi, OWM-TAMISEMI, Mhe. Prof. Riziki Shemdoe, wakati akiwa Katibu Mkuu, katika kusimamia ujenzi wa Shule ya Mkoa ya Wasichana ya Sayansi ya Vipaji Maalumu iliyojengwa Wanging’ombe.

Ujenzi wa Kituo cha Afya Kitandililo ni sehemu ya jitihada za Serikali katika kuboresha huduma za afya na kuchangia utekelezaji wa Dira ya Maendeleo ya Taifa 2050 kwa kupunguza vifo vya mama na mtoto, gharama za matibabu na usafiri, huku ukiimarisha afya ya jamii, kuongeza tija na uzalishaji, na kujenga rasilimali watu yenye afya kwa maendeleo endelevu ya taifa.

KAMATI YA BUNGE YA TAMISEMI YATAKA WAFANYABIASHARA WA ZAMANI KUPEWA KIPAUMBELE KWENYE MIRADI YA MAENDELEO, KAHAMA

2026-10-17T21:40:50.214+03:00

Mwenyekiti wa Kamati ya Kudumu ya Bunge ya Tawala za Mikoa na Serikali za Mitaa (TAMISEMI), Florent Kyombo, akizungumza wakati kamati hiyo ilipotembelea kuona na kukagua miradi mbalimbali ya maendeleo Manispaa ya Kahama, ikiwemo jengo la mama na mtoto pamoja na miradi ya Tactic.

Na Neema Nkumbi - KAHAMA

Mwenyekiti wa Kamati ya Kudumu ya Bunge ya Tawala za Mikoa na Serikali za Mitaa (TAMISEMI), Florent Kyombo, ameielekeza Manispaa ya Kahama kuhakikisha wafanyabiashara waliokuwa wakifanya shughuli zao katika maeneo yanayojengwa upya, wanapewa kipaumbele katika masoko na vituo vipya vya biashara.

Kyombo amesisitiza upangishaji wa bei rafiki kwa wajasiriamali wa maeneo hao ili kutoa fursa kwa kila mmoja kufanya shughuli za kujiingizia kipato.

Ametoa wito huo wakati wa ziara ya kamati hiyo, iliyokagua miradi sita ya maendeleo katika Manispaa ya Kahama, akieleza kuwa uwekezaji huo unapaswa kuwanufaisha wananchi waliokuwa wakitegemea maeneo hayo kwa shughuli zao za kiuchumi.

Amesema “Kwa niaba ya Rais wa Jamhuri ya Muungano wa Tanzania Dkt Samia Suluhu Hassan, miradi hii wakati inajengwa kuna wananhi ambao walikuwa wanatoa huduma katika mazingira ambayo hayakuwa katika kiwango kile kinachotakiwa, tunaomba viongozi wetu wa mkoa na wilaya, tuhakikishe kwamba wale wenyeji wa maeneo yote wanapewa kipaumbele waweze kuendeleza shughuli zao za kiuchumi.”

Sambamba na hilo amesisitza viongozi wa Manispaa kusimamia gharama za upangishaji katika masoko na vituo vya mabasi zinaendana na uwezo wa wafanyabiashara, ili miundombinu inayojengwa isiwatenge wananchi ambao wamekuwa wakijipatia kipato kupitia shughuli hizo.

“Tunaendelea kuwasihi kuhusu bei za kupangisha katika maeneo yetu ziwe bei rafiki kwa wananchi na wajasiriamali wote wanaojitafutia kipato katika maeneo hayo.” Amesema Kyombo

Amesema wastani wa utekelezaji wa miradi iliyokaguliwa umefikia asilimia 61, akiwataka viongozi, wakandarasi na washauri elekezi kuongeza kasi ya kazi ili miradi ikamilike kwa wakati na wananchi waanze kunufaika na huduma zake.

Amesema “Wananchi wanataka matokea, wanataka kuona mirdi hii imekamilika, kwa hiyo tunaamini ndani ya kipindi hiki cha mkataba mtamaliza, tukirudi wakati mwingine tukute miradi hii imekamilika. TAMISEMI, naibu katibu mkuu tunaomba fedha tukamilishe”

TAMISEMI YAHIDI FEDHA ZA MIRADI

Naibu Katibu Mkuu wa TAMISEMI, John Cheyo, amesema Serikali inaendelea kutoa fedha kwa ajili ya utekelezaji wa miradi ya maendeleo Kahama, akiwahakikishia wakandarasi kuwa fedha za kuwalipa zipo.

“Naomba niseme tu kwamba fedha kwa ajili ya kuwalipa wakandarasi wetu zipo, wakandarasi wanaofanya vizuri tupo nao sambamba na tunatambua michango yao.” amesema Cheyo.

Kuhusu wafanyabiashara waliokuwa katika eneo la soko kabla ya ujenzi, Cheyo amesema watapewa kipaumbele kurejea katika maeneo hayo.

Amesema “Tutahakikisha wafanyabiashara walioondoka katika maeneo yao kupisha ujenzi, watapewa kipaumbele kurejeshwa kwenye maeneo yao. Kwa wengine sasa tutasimamia taratibu zingine ziendelee.”

Katibu Tawala wa Mkoa wa Shinyanga, Pili Mnyema, amesema uwekezaji wa miradi ya kimkakati unaofanywa na Serikali mkoani humo, unalenga kuinua uchumi wa Shinyanga, hivyo kwa kushirikiana na halmashauri, watahakikisha utekelezaji wake unakuwa wa viwango vinavyotakiwa.

“Tumejipanga vizuri kuhakikisha kwamba miradi yote inayoendelea inakamilika kwa wakati, kuna miradi mingi ya kimkakati, kwa sababu dhamira na nia njema ya Mheshimiwa Rais ni kuhakikisha mkoa wa Shinyanga unainuka kiuchumi, tupo tayari kuendelea kuisimamia.” Amesema Mnyema.

NGAYIWA ATAKA WANANCHI WAPEWE NAFASI

Mbunge wa Kahama Mjini, Benjamin Ngayiwa, amesema ugawaji wa maeneo haupaswi kufuata misingi ya vyama vya siasa, bali kuzingatia maslahi ya wananchi na fursa za kiuchumi zinazotokana na uwekezaji huo.

Aidha, ameitaka Serikali kuendelea kutoa fedha kwa wakati ili mradi ukamilike haraka na wananchi waanze kunufaika na huduma zinazotarajiwa.

MASINDI AWATAKA WAWEKEZAJI KUMIMINIKA KAHAMA

Mkuu wa Wilaya ya Kishapu, Peter Masindi, anayekaimu Wilaya ya Kahama, amewataka wawekezaji kutoka ndani na nje ya Tanzania kutumia fursa za kiuchumi zilizopo Kahama, akieleza kuwa mazingira ya kukuza biashara na uzalishaji ni rafiki.

Amesisitiza kuwa fursa za uwekezaji Kahama zinapaswa kutumiwa kuongeza uzalishaji na kuchochea ukuaji wa uchumi, huku akieleza kuwa maendeleo ya eneo hilo yanahitaji ushiriki wa Serikali, sekta binafsi na wananchi wenyewe.

“Kahama milango ya kiuchumi imefunguliwa saa 24, watanzania njooni muwekeze Kahama, tunahitaji wawekezaji watakaochukua fursa za kuzalisha kutoka maeneo mengine wazilete hapa.” Amesema Masindi.

Ameipongeza Serikali chini ya Rais wa Jamhuri ya Muungano wa Tanzania, Dkt. Samia Suluhu Hassan, kwa uwekezaji unaofanyika, huku akiwataka wananchi kutunza miundombinu hiyo ili iendelee kutoa huduma kwa muda mrefu.

MAGAZETI YA LEO JUMAMOSI OKTOBA 17, 2026

2026-10-17T06:28:39.214+03:00

Magazeti

ESRAC DODOMA: KITUO KINACHOWAFUNGULIA WATOTO WENYE MAHITAJI MAALUMU FURSA YA ELIMU

2026-10-16T09:32:42.898+03:00

NA OKULY JULIUS, OKULY BLOG, DODOMA

MTOTO mwenye changamoto ya usikivu anaweza kukaa darasani bila kuelewa kinachofundishwa, mwingine mwenye usonji anaweza kutengwa na jamii kwa kudhani hawezi kujifunza, huku mwenye changamoto ya viungo akiachwa nyumbani kwa sababu familia haijui kuwa anaweza kupata elimu kulingana na uwezo wake.

Hata hivyo, hali hiyo inaanza kubadilika katika Jiji la Dodoma kupitia Kituo cha Utambuzi na Upimaji wa Kubaini Mahitaji Maalumu ya Ujifunzaji kwa Watoto (ESRAC), kilichopo Shule ya Msingi Nkuhungu.

Kituo hicho, kilichoanzishwa mwaka 2022 kwa gharama ya Sh milioni 48.6, kinalenga kuwabaini watoto wenye mahitaji maalumu mapema, kufanya tathmini na kuwaunganisha na huduma za elimu na afya kulingana na mahitaji yao.

Kuanzishwa kwa ESRAC kunatokana na maelekezo na mwongozo wa Serikali wa kuhakikisha watoto wenye changamoto za ujifunzaji wanatambuliwa mapema na kupata huduma stahiki badala ya kuachwa bila elimu au kufichwa majumbani.

KITUO KINAFANYA NINI?

Afisa Elimu Maalumu wa Jiji la Dodoma, Issa Kambi, anasema ESRAC inahusika na utambuzi, upimaji na upangaji wa fursa stahiki kwa watoto wenye mahitaji maalumu, hususan katika eneo la elimu.

Anasema kituo hufanya kazi kila siku, huku Jumanne na Alhamisi zikitengwa kwa ajili ya kliniki ambapo wazazi huwaleta watoto kwa uchunguzi, pamoja na wanafunzi kutoka shule mbalimbali wanaohitaji tathmini au mapitio ya awali.

Kwa watoto wanaobainika kuwa na changamoto za kiafya, kituo hutoa rufaa kwenda hospitali na kushirikiana na Hospitali ya Rufaa ya Mkoa wa Dodoma, Hospitali ya Benjamin Mkapa na Hospitali ya Taifa ya Magonjwa ya Akili Mirembe.

Kwa watoto wenye changamoto za macho, baadhi yao huunganishwa na huduma katika Hospitali ya Benjamin Mkapa pamoja na ufadhili wa Light for the World.

Aidha, wataalamu kutoka Mirembe, wakiwemo speech therapists, occupational therapists, physiotherapists na madaktari wengine, hutoa kliniki kituoni hapo na huduma hizo hutolewa bila malipo.

WATOTO 1,756 WAMEPIMWA

Msimamizi wa Kituo cha Upimaji ESRAC Nkuhungu, Neema Mukama, anasema tangu kuanzishwa kwake mwaka 2022, jumla ya watoto 1,756 wamepimwa, wakiwemo wavulana 905 na wasichana 851.

Kwa mujibu wa Neema, takwimu hizo zinaonyesha ukubwa wa mahitaji ya huduma za utambuzi na upimaji wa watoto wenye mahitaji maalumu, huku kituo kikiendelea kuwafikia watoto walioko katika jamii.

Anasema kupitia upimaji huo, watoto wamekuwa wakibainishwa changamoto zao na kuunganishwa na huduma zinazolingana na mahitaji yao, ikiwemo elimu, matibabu na huduma nyingine za kitaalamu.

WANAANZA KATA KWA KATA

Kambi anasema wataalamu wa kituo hicho wamekuwa wakifanya ubainishaji wa watoto wenye mahitaji maalumu kata kwa kata, hatua inayolenga kuwafikia hata wale ambao hawajawahi kufikishwa kituoni.

Akizungumza kwa niaba ya Mkurugenzi wa Halmashauri ya Jiji la Dodoma, Denis Gondwe, anaeleza kuwa jiji hilo lina kata 41 na mitaa 222, ambapo timu za wataalamu hushirikiana na watendaji wa kata na mitaa, wenyeviti pamoja na wadau wengine kuwafikia watoto waliopo kwenye jamii.

Lengo, anasema, ni kuwabaini watoto ambao huenda hawajafikishwa kituoni na kuwawezesha kupata upimaji pamoja na huduma wanazohitaji.

Kambi anasema idadi ya watoto waliobainika imeongezeka kutoka takribani 600 miaka minne iliyopita hadi zaidi ya 1,700, jambo analolihusisha na kuendelea kwa zoezi la ubainishaji na uhamasishaji wa jamii.

BAADHI YA WAZAZI BADO WANAFICHA WATOTO

Pamoja na uwepo wa kituo hicho, bado kuna changamoto ya uelewa miongoni mwa baadhi ya wazazi na jamii, hali inayochangia baadhi ya watoto kuchelewa kupata huduma.

Neema anasema baadhi ya wazazi hawatoi taarifa sahihi kuhusu historia ya watoto wao wakati wa uchunguzi, jambo linaloweza kuwafanya wataalamu kutumia muda zaidi kubaini changamoto iliyopo.

“Katika zoezi la ubainishaji linalofanyika katika kata mbalimbali, tunakutana na maeneo ambayo ushirikiano na jamii unakuwa mdogo sana,” anasema.

Mwalimu Mkuu wa Kitengo cha Mahitaji Maalumu katika Shule ya Msingi Mlezi, Hashim Msemo, anasema changamoto nyingine ni baadhi ya watoto kufichwa majumbani na kufikishwa shuleni wakiwa wamechelewa.

“Mtoto unamkuta tayari ana miaka minane, tisa, wakati kwenye mwongozo wa upimaji inatakiwa kuanzia miaka mitano,” anasema.

WALIMU: MTOTO AKIBAINIKA, ANAPELEKWA KWENYE FURSA INAYOMFAA

Msemo anasema baada ya mtoto kubainika kuwa ana changamoto, wataalamu hushirikiana na wazazi, jamii, walimu na madaktari kutambua aina ya changamoto aliyonayo kabla ya kumpangia mazingira ya elimu yanayomfaa.

Anasema walimu nao wamepatiwa mafunzo ya namna ya kuwabaini watoto wenye mahitaji maalumu na kutumia mwongozo unaowaelekeza katika utambuzi na ubainishaji.

“Walimu pia tumepata mafunzo ya namna ya kuwabaini watoto wenye mahitaji maalumu na kutumia mwongozo unaotuelekeza kuhusu utambuzi na ubainishaji,” anasema.

Naye Mwalimu Digna Temba, anayefundisha wanafunzi wenye ulemavu wa macho, anasema walimu huangalia viashiria mbalimbali, ikiwemo changamoto za uoni, usonji na changamoto za ufahamu.

“Mtoto anapoonekana kuwa na changamoto, huwasiliana na wataalamu wa kituo cha Nkuhungu kwa ajili ya ubainishaji wa awali,” anasema.

SHULE YA MLEZI YAWAFIKIA WATOTO MITAANI

Mwalimu Mkuu Shule ya Msingi Mlezi, Magreth Kisanga, anasema shule hiyo yenye huduma za elimu jumuishi imekuwa ikiwafikia watoto wenye mahitaji maalumu kwa njia mbalimbali.

“Walimu hufanya home visiting kila Ijumaa kwa ajili ya kuwabaini watoto waliopo mitaani au wale ambao wameacha kuja shule kutokana na changamoto mbalimbali,” anasema.

Anaongeza kuwa mahusiano kati ya shule na jamii yamekuwa njia nyingine ya kuwafikisha watoto shuleni hapo.

Kwa mujibu wa Kisanga, Shule ya Msingi Mlezi ina wanafunzi 120 katika eneo la elimu maalumu, huku walimu wenye mafunzo maalumu wakiendelea kuwahudumia.

Hata hivyo, anasema changamoto ya usafiri ni miongoni mwa sababu zinazowafanya baadhi ya watoto kutohudhuria shule mara kwa mara.

WALIMU: WATOTO WANAWEZA KUBADILIKA

Msemo anasema baadhi ya watoto waliokuwa wamefichwa majumbani wameonyesha mabadiliko baada ya kuanza kupata elimu.

“Mfano, wapo watoto ambao walifika shuleni hapa wakiwa hawawezi kufanya baadhi ya shughuli za msingi, lakini baada ya kufundishwa wameanza kujitegemea zaidi,” anasema.

Anasema baadhi ya wazazi wamekuwa wakitoa ushuhuda wa mabadiliko yanayoonekana kwa watoto wao baada ya kuanza shule.

Hata hivyo, anasema changamoto ya usafiri bado inazuia baadhi ya watoto kuhudhuria masomo yao kwa mwendelezo mzuri.

DAKTARI: UCHUNGUZI WA MAPEMA NI MUHIMU

Daktari wa Kituo cha Afya Nkuhungu na mshiriki wa timu ya ubainishaji, Dkt. Rehema Magesa, anasema uchunguzi wa mapema unasaidia kubaini changamoto za mtoto kabla hazijawa kubwa zaidi.

“Watoto wenye changamoto za usikivu, uoni au changamoto nyingine za kiafya wanapaswa kubainishwa mapema na kupelekwa katika maeneo sahihi ya huduma,” anasema.

Dkt. Magesa anasema mojawapo ya changamoto wanazokutana nazo ni baadhi ya wazazi kutambua kwa kuchelewa hali za watoto wao, hasa kwa watoto wenye usonji.

Anaongeza kuwa imani potofu katika jamii nazo zinaweza kuchelewesha wazazi kutafuta ushauri wa kitaalamu.

Kwa mujibu wa daktari huyo, mtoto mwenye ulemavu anaweza kuwa na uwezo mkubwa katika eneo fulani hata kama anakabiliwa na changamoto katika baadhi ya masomo ya darasani.

CHUMBA MAALUMU CHA UPIMAJI WA USIKIVU

Katika kituo hicho pia kuna chumba maalumu kinachotumika kufanya ubainishaji wa awali kwa watoto wenye changamoto za usikivu.

Mwalimu Elizabeth Katunzi anasema kituo kina vifaa vya kisasa, vikiwemo audiometer na digital otoscope, vinavyosaidia kufanya uchunguzi wa awali wa masikio.

“Baadhi ya watoto wanaofikishwa hapa kituoni hugundulika kuwa na changamoto zinazoweza kutibiwa, kama nta nyingi au vitu vilivyoingia kwenye sikio na watoto hao hupewa rufaa kwenda hospitali kwa ajili ya matibabu,” anasema.

Anasema huduma ya uchunguzi wa awali kituoni hapo hutolewa bila malipo na baada ya mtoto kubainika kuwa na changamoto, hupangiwa shule kulingana na mahitaji yake.

WATOTO WAPELEKWA SHULE KULINGANA NA MAHITAJI

Kwa watoto wenye changamoto kubwa ya usikivu, wataalamu hutoa rufaa na baada ya kuthibitishwa na daktari hupangiwa shule zinazolingana na mahitaji yao.

Katunzi anasema baadhi yao hupelekwa Shule ya Msingi Dodoma Viziwi, wengine Hombolo na wengine katika shule jumuishi zilizo karibu na maeneo wanayoishi.

Lengo ni kuhakikisha mtoto hapotezi fursa ya elimu kutokana na aina ya changamoto aliyonayo.

WAZAZI: USAFIRI NI CHANGAMOTO

Kwa upande wa wazazi, changamoto kubwa iliyotajwa ni usafiri.

Farida Khamis, mzazi wa watoto mwenye mahitaji maalumu, anasema gharama za usafiri zimekuwa mzigo, hasa kwa familia zinazowapeleka watoto shuleni kutoka maeneo ya mbali.

“Nauli imekuwa ikifikia kati ya Sh3,000 hadi Sh5,000, hali inayotuwia vigumu sisi wazazi wenye kipato kidogo,” anasema.

Anaishauri Serikali kuangalia uwezekano wa kuweka usafiri maalumu au mabweni kwa watoto wenye mahitaji maalumu ili kupunguza mzigo kwa wazazi.

Licha ya changamoto hiyo, anasema anaridhishwa na huduma zinazotolewa kituoni, lakini anasisitiza umuhimu wa kutafutiwa majawabu changamoto ya usafiri kwa watoto wenye ulemavu.

“WATOTO HAWAPASWI KUFICHWA”

Wadau waliohojiwa wanatoa ujumbe unaofanana kwa jamii kwamba watoto wenye mahitaji maalumu hawapaswi kufichwa majumbani.

Msimamizi wa kituo hicho, Neema, anasema watoto wenye changamoto mbalimbali wanapaswa kufikishwa katika vituo vya upimaji ili kubaini fursa stahiki kulingana na uwezo wao.

Anasema hata mtoto mwenye usonji, changamoto ya usikivu, ulemavu wa viungo au changamoto ya ufahamu anaweza kupata elimu na kujifunza kulingana na uwezo wake.

Naye Dkt. Magesa anasisitiza kuwa watoto wenye ulemavu wana haki ya kupata elimu na huduma nyingine muhimu na wanapaswa kuonekana ili jamii iweze kuwasaidia.

SERIKALI YAOMBWA KUONGEZA VITUO NA MAFUNZO

Pamoja na mafanikio yaliyoelezwa, watendaji wa kituo wameainisha maeneo yanayohitaji maboresho, ikiwemo mafunzo ya mara kwa mara kwa wataalamu wanaotumia vifaa vya kisasa.

Mahitaji mengine ni kuongezwa kwa vituo katika halmashauri nyingine na kuimarishwa kwa bajeti ya shughuli za ubainishaji ili kuwafikia watoto wengi zaidi.

Neema anasema baadhi ya vifaa vya kidijitali vimepatikana, lakini mafunzo ya matumizi yake yanahitajika mara kwa mara ili kuongeza ufanisi wa huduma.

Anaongeza kuwa baadhi ya wazazi kutoka mikoa mingine, ikiwemo Manyara na Moshi, wamekuwa wakifika Dodoma kutafuta huduma za upimaji.

DODOMA YAENDELEA KUPANUA ELIMU JUMUISHI

Kwa mujibu wa Afisa Elimu Maalumu wa Jiji la Dodoma, Kambi, jiji hilo lina jumla ya shule 213, ambapo takribani shule 60 zimebainishwa kutoa huduma ya elimu jumuishi.

Aidha, takribani shule 11 zina vitengo vya watoto wenye mahitaji maalumu, huku halmashauri ikiendelea kutumia klabu za elimu jumuishi katika shule mbalimbali.

Kambi anasema klabu hizo ni sehemu ya kuwafundisha wanafunzi kuhusu elimu jumuishi na kuwasaidia kupeleka ujumbe huo katika jamii.

Takribani miaka minne tangu kuanzishwa kwa ESRAC Dodoma, kituo hicho kimekuwa sehemu ya utambuzi wa watoto wenye mahitaji maalumu na kuwaunganisha na huduma za elimu na afya.

Kupitia ubainishaji unaofanyika kituoni na katika jamii, watoto wanaobainika kuwa na changamoto wamekuwa wakipatiwa tathmini, huduma za awali, rufaa na kupangiwa mazingira ya elimu yanayolingana na mahitaji yao.

Hata hivyo, changamoto bado zipo, ikiwemo uelewa mdogo wa baadhi ya wazazi, watoto kufichwa majumbani, usafiri, upungufu wa walimu na wataalamu katika baadhi ya maeneo pamoja na mahitaji ya mafunzo na bajeti kwa ajili ya shughuli za ubainishaji.

Kwa wazazi na wataalamu, ujumbe wao ni mmoja: mtoto mwenye mahitaji maalumu hapaswi kubaki nyumbani kwa sababu ya changamoto aliyonayo. Anatakiwa kutambuliwa, kupimwa na kupewa fursa ya elimu inayolingana na uwezo na mahitaji yake.

SERIKALI KUTUMIA BILIONI 15 KUPUNGUZA MSONGAMANO WA MAGARI SONGWE, BILIONI 6 KWA TUNDUMA NA MOMBA - PROF. SHEMDOE

2026-10-16T09:01:50.244+03:00

Na: OWM–TAMISEMI, Tunduma

Waziri wa Nchi, Ofisi ya Waziri Mkuu – Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, amesema Serikali kupitia TARURA imetenga shilingi bilioni 15 katika mwaka wa fedha 2026/27 kwa ajili ya ujenzi wa barabara za maingilio na mchepuko mkoani Songwe, lengo likiwa ni kupunguza msongamano wa magari na kurahisisha usafiri pamoja na usafirishaji wa bidhaa. Kati ya fedha hizo, shilingi bilioni 6 zitatumika Wilaya ya Momba, ambapo bilioni 3 zitatumika Tunduma na bilioni 3 kwa maeneo mengine ya wilaya hiyo, huku bilioni 9 zikielekezwa katika wilaya za Mbozi, Ileje na Songwe.

Prof. Shemdoe ameyasema hayo Oktoba 15, 2026, baada ya kupewa fursa na Makamu wa Rais wa Jamhuri ya Muungano wa Tanzania, Mhe. Deogratius Ndejembi, kueleza hatua zinazochukuliwa na OWM–TAMISEMI katika kutatua kero zilizowasilishwa na wananchi wa Tunduma wakati wa mkutano wa hadhara uliofanyika katika ziara ya Makamu wa Rais ya kukagua utekelezaji wa miradi ya maendeleo mkoani Songwe.

Amefafanua kuwa ujenzi huo utasaidia kupunguza msongamano katika barabara ya Tunduma–Mpaka wa Zambia, barabara kuu ya TANZAM inayounganisha Igawa–Songwe–Tunduma, pamoja na barabara ya Mpemba–Tunduma, hususan eneo la mizani ya Mpemba.

“Mhe. Makamu wa Rais, TAMISEMI tuko tayari. Katika mwaka huu wa fedha, Serikali imetenga shilingi bilioni 15 kwa ajili ya kujenga barabara za maingilio na mchepuko mkoani Songwe,” amesema Prof. Shemdoe.

Ameongeza kuwa hatua hiyo ni sehemu ya juhudi za Serikali za kuboresha miundombinu na kupunguza changamoto za usafiri zinazowakabili wananchi na wafanyabiashara, hasa katika maeneo yenye shughuli nyingi za biashara na usafirishaji wa mizigo ya ndani na kuvuka mipaka.

Katika sekta ya afya, Prof. Shemdoe amemueleza Makamu wa Rais kuwa OWM–TAMISEMI imetekeleza maelekezo ya kutenga shilingi milioni 600 kwa ajili ya ujenzi wa Kituo cha Afya Ivuna, kilichopo katika Jimbo la Momba, ambalo Mbunge wake ni Mhe. Condester Sichalwe. Amesema uwekezaji huo utaboresha upatikanaji na utoaji wa huduma za afya kwa wananchi wa eneo hilo.

Kuhusu elimu, Prof. Shemdoe amesema Serikali inakamilisha ujenzi wa shule ya saba ya ghorofa, huku shule sita zikiwa zimekamilika. Ujenzi huo umewezesha kukabiliana na ongezeko la mahitaji ya nafasi wakati wa kupokea wanafunzi watakaoanza kidato cha kwanza mwaka 2028 kwa mfumo wa double cohort, utakaowahusisha wanafunzi wanaomaliza darasa la saba na darasa la sita kutokana na utekelezaji wa mtaala mpya. “Halmashauri ya Mji wa Tunduma iko tayari kuwapokea wanafunzi hao,” amesema.

Aidha, Prof. Shemdoe amesema Serikali inaendelea na ujenzi wa jengo la ghorofa katika Hospitali ya Wilaya ya Tunduma kwa ajili ya wodi ya mama na mtoto, ili kuongeza uwezo wa hospitali hiyo kutoa huduma za afya ya uzazi. Tunduma, kama ilivyo Katoro, ni miongoni mwa maeneo yenye idadi kubwa ya watoto wanaozaliwa, ambapo kwa mujibu wa takwimu zilizopo, watoto 1,500 huzaliwa kila mwezi; 800 katika vituo vya Serikali na 700 katika vituo vingine.

Prof. Shemdoe amesema uwekezaji huo katika barabara, elimu na afya unaonesha dhamira ya Mheshimiwa Rais Dkt. Samia Suluhu Hassan ya kuboresha huduma za kijamii na miundombinu, kupunguza changamoto za wananchi na kuweka mazingira bora kwa shughuli za kiuchumi na kijamii mkoani Songwe.

MAGAZETI YA LEO IJUMAA OKTOBA 16,2026

2026-10-16T08:49:48.455+03:00

WAZIRI DEUS SANGU AFANYA ZIARA YA KIKAZI SUMBAWANGA

2026-10-14T10:06:41.355+03:00

Waziri wa Nchi, Ofisi ya Waziri Mkuu, Kazi, Ajira na Mahusiano, ambaye pia ni Mbunge wa Jimbo la Kwela, Mhe. Deus Sangu, tarehe 13 Oktoba, 2026, amefanya ziara ya kikazi katika Halmashauri ya Wilaya ya Sumbawanga, mkoani Rukwa.

Katika ziara hiyo, Mhe. Sangu amekutana na Mkurugenzi Mtendaji wa Halmashauri hiyo, Mwalimu Kwangula Missana, pamoja na viongozi wengine, akiwemo Mwenyekiti wa Halmashauri ya Wilaya ya Sumbawanga, Bwana Ephraim Konta.

NSSF NI FURSA YA VIJANA KUJIKWAMUA KIUCHUMI

2026-10-14T10:00:38.174+03:00

*Ni wakati wa kufunga Kongamano la Wiki ya Vijana mkoani Rukwa

Na Mwandishi Wetu, Sumbawanga

Vijana nchini wametakiwa kutumia fursa zinazotolewa na Serikali na taasisi mbalimbali, ikiwemo Mfuko wa Taifa wa Hifadhi ya Jamii (NSSF), ili kujikwamua kiuchumi na kujiandaa kwa maisha ya sasa na ya baadaye.

Wito huo umetolewa Oktoba 12, 2026, na Waziri wa Kazi, Ajira, Vijana na Uwezeshaji wa Serikali ya Mapinduzi ya Zanzibar, Mhe. Ali Suleiman Ameir, wakati akifunga Kongamano la Vijana lililofanyika katika Ukumbi wa Nazareth, wilayani Sumbawanga, mkoani Rukwa.

Kongamano hilo lilihudhuriwa na vijana zaidi ya 1,000 kutoka Tanzania Bara na Zanzibar, ikiwa ni sehemu ya maadhimisho ya Wiki ya Vijana kuelekea kilele cha mbio za Mwenge wa Uhuru kitaifa mkoani Rukwa.

Mhe. Ameir alisema vijana wanapaswa kutafuta na kutumia fursa zilizopo, kuongeza ujuzi na kutumia vipaji na uwezo wao kujiajiri au kuajiriwa. Alisisitiza pia umuhimu wa kuweka akiba na kujiunga na mifumo ya hifadhi ya jamii ili kuwa na maandalizi mazuri ya kukabiliana na changamoto za maisha.

Alieleza kuwa vijana waliojiajiri na walioajiriwa wanapaswa kujiunga na mifuko ya hifadhi ya jamii, ikiwemo NSSF na ZSSF, kupitia programu zinazowafaa, kama vile Hifadhi Skimu na Weka Tuweke, kwa kuzingatia masharti ya kila mpango.

Aidha, alizitaka Serikali, taasisi na wadau wengine kuhakikisha kuwa mazingira ya kiuchumi na kijamii yanawezesha vijana kupata fursa za kujikwamua na kutimiza malengo yao.

Kupitia Hifadhi Skimu, NSSF inatoa fursa kwa wananchi waliojiajiri, wakiwemo waendesha bodaboda, wakulima, wavuvi, wafugaji, wachimbaji wadogo wa madini, mama na baba lishe, wasanii na wajasiriamali wengine, kujiunga na mfumo wa hifadhi ya jamii na kupata mafao kwa mujibu wa masharti ya mpango huo.

Awali, Meneja wa NSSF Mkoa wa Rukwa, Nsengiyuva Msechu, aliwahimiza vijana kujiunga na Hifadhi Skimu mapema na kufanya uchangiaji kuwa sehemu ya mipango yao ya kifedha, akieleza kuwa utaratibu huo unaweza kuwasaidia kuimarisha usalama wao wa kifedha wanapokabiliwa na changamoto mbalimbali za maisha.

Msechu alisema mwanachama anayechangia kiwango cha chini cha shilingi 30,000 kwa mwezi kwa kipindi cha miezi mitatu mfululizo anaweza kupata mafao ya matibabu kwa ajili yake mwenyewe, huku anayechangia shilingi 52,200 kwa mwezi akipata fursa ya kupata mafao hayo kwa ajili yake na familia yake, kwa kuzingatia masharti ya mpango husika.

Aliongeza kuwa NSSF imerahisisha taratibu za kujiunga na kuchangia kupitia mifumo ya kidijitali, ikiwemo simu za mkononi na njia mbalimbali za malipo ya kifedha, ili kuwawezesha wanachama kuchagua njia inayowafaa kwa mujibu wa taratibu zilizowekwa.

Kwa upande wao, baadhi ya vijana walioshiriki kongamano hilo waliishukuru NSSF kwa kutoa elimu ya hifadhi ya jamii, wakieleza kuwa elimu hiyo imewasaidia kuelewa umuhimu wa kuweka akiba, kujiunga na mifumo ya hifadhi ya jamii na kupanga maisha yao ya sasa na ya baadaye.

NORAH EUSTADIUS ATWAA TAJI LA MISS SHINYANGA 2026; SAFARI SASA KUELEKEA MISS LAKE ZONE

2026-10-12T15:30:00.000+03:00

Miss Shinyanga 2026 Norah Eustadius Justas

KAHAMA, SHINYANGA – 11 OKTOBA 2026

Mlimbwende Norah Eustadius Justas kutoka Wilaya ya Kishapu ametwaa rasmi taji la MISS SHINYANGA 2026 katika fainali iliyofanyika Zakaria Hall – Miligo, Kahama, chini ya uratibu wa HOLYSMILE.

Mashindano hayo yaliyobeba kaulimbiu ya “Beauty For Positive Change” yamelenga zaidi ya kumpata mshindi wa taji, kwa kuweka msisitizo katika kujiamini, nidhamu, maarifa, vipaji, uongozi na uwezo wa mabinti kutumia nafasi zao kuleta mabadiliko chanya katika jamii.

NORAH AIBUKA MSHINDI

Baada ya kupitia hatua mbalimbali za mashindano na tathmini ya majaji, Norah Eustadius alitangazwa kuwa MISS SHINYANGA 2026.

Editha Shushu alishika nafasi ya 1st Runner-Up, huku Regina Charles Mashimba akitwaa nafasi ya 2nd Runner-Up. Regina pia alitwaa tuzo ya Best People’s Choice Award kutokana na uungwaji mkono alioupata kutoka kwa wananchi na wafuasi wa mashindano.

Hafswah Suleiman naye alifanya vizuri na kutwaa tuzo ya Best Top Model, ikiwa ni kutambua uwezo wake katika modeling, catwalk, kujiamini na uwasilishaji wake jukwaani.

Matokeo makuu ya MISS SHINYANGA 2026 ni:

👑 NORAH EUSTADIUS — MISS SHINYANGA 2026

🥈 EDITHA SHUSHU — 1ST RUNNER-UP

🥉 REGINA CHARLES MASHIMBA — 2ND RUNNER-UP

🏆 REGINA CHARLES MASHIMBA — BEST PEOPLE’S CHOICE AWARD

🏆 HAFSWAH SULEIMAN — BEST TOP MODEL

Ushindi katika vipengele hivyo umeonyesha dhamira ya mashindano ya Miss Shinyanga kutambua si taji kuu pekee, bali pia uwezo na vipaji tofauti vinavyoonyeshwa na washiriki.

SERIKALI YATAKA JAMII KUBADILI MTAZAMO KUHUSU MASHINDANO YA UREMBO

Akizungumza katika hafla hiyo kwa niaba ya Mkuu wa Mkoa wa Shinyanga, Mkuu wa Wilaya ya Kishapu, Mhe. Peter Masindi, aliwahimiza wazazi na walezi kuwaunga mkono watoto wao katika kufuata ndoto na kukuza vipaji vyao.

Mhe. Masindi alisisitiza umuhimu wa jamii kuondokana na mitazamo hasi kuhusu mashindano ya urembo na badala yake kutambua fursa zinazoweza kupatikana kupitia majukwaa hayo.

Kwa mujibu wa ujumbe wake, mashindano ya urembo yanaweza kuwa sehemu ya kuwajenga vijana, kuwapa kujiamini na kuwafungulia fursa mbalimbali za kijamii na kiuchumi.

Ujumbe huo umeenda sambamba na dhamira ya waandaaji ya kuhakikisha mashindano ya urembo hayabaki kuwa jukwaa la mwonekano pekee, bali yanakuwa sehemu ya kukuza vipaji na kuwawezesha mabinti.

ARNOLD BWEICHUM JR: “TAJI SI PAMBO PEKEE — NI DHAMANA”

Mkurugenzi wa HOLYSMILE na Mratibu Mkuu wa MISS SHINYANGA 2026, Arnold A. Bweichum Jr, amesema lengo la jukwaa hilo ni kujenga mabinti wenye uwezo wa kutumia uzuri, vipaji, maarifa na ushawishi wao kujenga maisha yao na kuleta mchango chanya katika jamii.

“Kwetu taji si pambo la kichwani pekee. Taji ni dhamana. Tunataka binti anapotoka katika jukwaa hili awe ameongezeka kujiamini, nidhamu, maarifa na uwezo wa kutumia nafasi yake kuleta mabadiliko chanya katika jamii,” amesema Bweichum.

Amesema kufanikisha MISS SHINYANGA 2026 kumehitaji muda, nguvu, gharama na ushirikiano mkubwa kutoka kwa watu na taasisi mbalimbali.

Ametoa shukrani kwa Serikali, Wadau Shupavu, sekta binafsi, vyombo vya habari, majaji, wakufunzi, wabunifu, wataalamu wa urembo, wazazi na walezi pamoja na watu binafsi waliochangia kufanikisha mashindano hayo.

“Kuna mengi ambayo hayaonekani kupitia picha au video. Kuna gharama, muda, nguvu na watu wengi waliojitolea nyuma ya pazia. Mafanikio haya si ya HOLYSMILE pekee; ni ya kila Mdau Shupavu aliyesimama nasi,” amesema.

Bweichum ameongeza kuwa waandaaji wataendelea kupokea ushauri na ukosoaji wenye kujenga ili kuongeza ubora wa mashindano katika misimu inayofuata.

“Hatusemi tumekuwa wakamilifu. Tumejifunza mengi na tutaendelea kuboresha. Ubora haujengwi kwa siku moja; unajengwa kwa kufanya, kujifunza na kurudi ukiwa bora zaidi.”

SAFARI SASA KUELEKEA MISS LAKE ZONE 2026

Kumalizika kwa MISS SHINYANGA 2026 si mwisho wa safari.

Hatua inayofuata ni maandalizi kuelekea MISS LAKE ZONE 2026, ambapo wawakilishi wa Mkoa wa Shinyanga wataendelea na safari yao katika ngazi ya Kanda ya Ziwa.

Hafla ya MISS LAKE ZONE 2026 inatarajiwa kufanyika tarehe 24 Oktoba 2026.

HOLYSMILE imesema nguvu kubwa sasa itaelekezwa katika kuhakikisha wawakilishi wa Shinyanga wanapata maandalizi yanayohitajika, yakiwemo mazoezi ya modeling na catwalk, kujiamini, uwasilishaji jukwaani, mavazi ya mashindano pamoja na maandalizi ya miradi yao ya kijamii.

“Tumemaliza hatua ya Mkoa, lakini hatujamaliza safari. Sasa jukumu letu ni kuwaandaa wawakilishi wetu kuelekea Kanda ya Ziwa. Tunataka waende si kwa kushiriki tu, bali kuiwakilisha Shinyanga kwa heshima na kuonyesha uwezo wa mabinti wetu,” amesema Bweichum.

Safari hiyo inaendelea kutoka:

MISS SHINYANGA 2026 👑

⬇️

MISS LAKE ZONE 2026

⬇️

HATUA ZA MASHINDANO YA KITAIFA 🇹🇿

NORAH AAHIDI KUIWAKILISHA SHINYANGA KWA HESHIMA

Kwa upande wake, Norah Eustadius ameahidi kulitumia taji lake kwa heshima, kuendelea kujifunza na kufanya maandalizi kwa umakini kwa ajili ya hatua zinazofuata.

Amesema yuko tayari kutumia fursa atakazopata kuitangaza Shinyanga na kuonyesha uwezo wa mabinti wa mkoa huo katika majukwaa mbalimbali.

Kwa HOLYSMILE, ushindi wa Norah unaanza awamu mpya ya kutafsiri kaulimbiu ya “Beauty For Positive Change” kutoka kuwa maneno ya jukwaani hadi kuwa matendo yenye manufaa kwa jamii.

SHUKRANI KWA WADAU SHUPAVU

HOLYSMILE imetoa shukrani za dhati kwa Serikali ya Mkoa wa Shinyanga, viongozi mbalimbali wa Serikali, Halmashauri, Wadau Shupavu, wadhamini na washirika, majaji, wakufunzi, wabunifu, wataalamu wa urembo, wazazi na walezi, vyombo vya habari pamoja na wananchi wote waliochangia kufanikisha MISS SHINYANGA 2026.

Wapo waliotoa fedha.

Wapo waliotoa huduma na vifaa.

Wapo waliotoa muda na maarifa.

Wapo waliofungua milango.

Na wapo waliosimama na waandaaji wakati wa changamoto.

Kwa HOLYSMILE, kila mchango ulikuwa na thamani katika kufanikisha hatua hiyo.

“UBORA HUJENGWA”

Kwa mujibu wa Arnold Bweichum Jr, mafanikio ya MISS SHINYANGA 2026 ni mwanzo wa safari kubwa zaidi ya kujenga jukwaa imara la urembo, vipaji na uwezeshaji wa mabinti mkoani Shinyanga.

Dhamira ni kuona jukwaa hilo likiwa sehemu ya kukuza modeling, fashion, ujasiriamali, utalii, biashara, vipaji na miradi yenye matokeo chanya katika jamii.

MISS SHINYANGA 2026 imehitimishwa — lakini safari haijaisha.

Taji limepata mwenyewe.

Shinyanga imepata mwakilishi.

Mabinti wamepata jukwaa.

Na sasa macho yanaelekea MISS LAKE ZONE 2026. 👑🔥

MISS SHINYANGA 2026

BEAUTY FOR POSITIVE CHANGE

Imetolewa na:

ARNOLD A. BWEICHUM JR

Mkurugenzi – HOLYSMILE

Mratibu Mkuu – MISS SHINYANGA 2026

Kahama – Shinyanga

Simu: 0756 254 146

MISA TANZANIA YATAKA TAASISI ZA UMMA NA BINAFSI KUSHIRIKIANA KUCHOCHEA UCHUMI KUPITIA HABARI

2026-10-12T14:30:26.345+03:00

Mwenyekiti wa MISA Tanzania, Edwin Soko, akisisitiza umuhimu wa ushirikiano kati ya taasisi mbalimbali na wadau wa habari katika kuimarisha sekta ya habari

Katibu Tawala Msaidizi wa mkoa Mwanza, Daniel Machunda akizungumza na waandishi wa habari kwa niaba ya Mkuu wa Mkoa wa Mwanza, CP Salum Hamdun.

NA NEEMA NKUMBI, MWANZA

Vyombo vya habari nchini vimetakiwa kuimarisha ushirikiano na taasisi za umma na sekta binafsi katika kuibua fursa za kiuchumi, kuhamasisha uwekezaji na kuhakikisha wananchi wanapata taarifa sahihi kuhusu mipango na miradi ya maendeleo inayotekelezwa nchini.

Wito huo umetolewa wakati wa Kongamano la MISA TAN-WADAU 2026 lililofanyika Oktoba 12, 2026, katika ukumbi wa Chuo cha Benki Kuu ya Tanzania (BoT), jijini Mwanza, likilenga kuimarisha ushirikiano kati ya vyombo vya habari na taasisi mbalimbali ili kuongeza kasi ya ukuaji wa uchumi na maendeleo ya taifa.

Akizungumza kwa niaba ya Mkuu wa Mkoa wa Mwanza, CP Salum Hamdun, Katibu Tawala Msaidizi wa mkoa huo, Daniel Machunda, amesema vyombo vya habari vina nafasi muhimu katika kuhabarisha umma kuhusu fursa za kiuchumi, mipango ya serikali na utekelezaji wa miradi ya maendeleo.

Katika hotuba yake, Machunda ameeleza kuwa Mkoa wa Mwanza una fursa nyingi za kiuchumi ambazo hazijatumika kikamilifu, akizitaja sekta za kilimo, ufugaji, uvuvi, biashara, utalii, madini, usafirishaji na viwanda kuwa miongoni mwa maeneo yanayoweza kuchochea uwekezaji na kuongeza kipato cha wananchi.

Amesisitiza kuwa vyombo vya habari vinapaswa kutumia uwezo wake kufikisha taarifa hizo kwa lugha inayoeleweka ili kuwafikia wananchi wa makundi mbalimbali, wakiwemo wanawake, vijana, watu wenye ulemavu, wafanyabiashara na wawekezaji.

Aidha, amezitaka taasisi za umma kuimarisha mawasiliano na wanahabari kwa kutoa taarifa sahihi na kwa wakati kuhusu mipango, miradi, mafanikio na changamoto za utekelezaji, hatua inayoweza kuongeza uelewa wa wananchi na kuimarisha uwajibikaji.

Amesema ushirikiano huo unapaswa kuzingatia misingi ya kuheshimiana, kuaminiana na kutambua majukumu ya kila upande, huku vyombo vya habari vikiendelea kuzingatia weledi na maadili ya taaluma katika ukusanyaji na usambazaji wa taarifa.

Kwa upande wake, Mwenyekiti wa MISA Tanzania, Edwin Soko, amesisitiza umuhimu wa ushirikiano kati ya taasisi mbalimbali na wadau wa habari katika kuimarisha sekta ya habari na kuboresha utoaji wa taarifa kwa umma.

Soko ameeleza umuhimu wa kuwapa nafasi wadau mbalimbali kushiriki katika majadiliano na usimamizi wa masuala yanayohusu maendeleo ya sekta ya habari, akisisitiza haja ya kufanya kazi kwa pamoja ili kufikia malengo yaliyokusudiwa.

Ujumbe huo unaendana na lengo la kongamano hilo la kujenga uhusiano wa karibu kati ya vyombo vya habari, taasisi za umma na sekta binafsi ili kubadilishana uzoefu, kuongeza upatikanaji wa taarifa na kuibua njia za kutumia fursa zilizopo kuchochea maendeleo.

Hata hivyo, Machunda amewakumbusha wanahabari kuzingatia ukweli, usahihi na haki katika utoaji wa taarifa, akieleza kuwa kasi ya teknolojia na mitandao ya kijamii imeongeza umuhimu wa kuhakiki taarifa kabla ya kuzichapisha ili kuepusha usambazaji wa habari potofu na zinazoweza kuleta taharuki katika jamii.

Kongamano hilo limewashirikisha viongozi wa taasisi za umma na binafsi, wanahabari, viongozi wa dini na wadau wengine, wakiwemo wawakilishi wa Benki Kuu ya Tanzania (BoT), PSSSF, NHIF, TRA, TIRA, TASHICO na Idara ya Uhamiaji.

MWENGE WA UHURU WAMULIKA MIRADI YA MAENDELEO JIMBO LA KWELA

2026-10-12T11:50:22.310+03:00

WAZINDUA MIRADI YA ELIMU, AFYA NA MIUNDOMBINU

MAAFISA USAFIRISHAJI WACHANGAMKIA FURSA ZA HIFADHI SKIMU IKIWEMO MAFAO YA MATIBABU

Mwenge wa Uhuru umeendelea kuwa chachu ya maendeleo nchini baada ya kumulika na kuzindua miradi mbalimbali ya maendeleo katika Jimbo la Kwela, Wilaya ya Sumbawanga, mkoani Rukwa, huku viongozi wakisisitiza umuhimu wa kulinda amani kama msingi wa utekelezaji wa shughuli za maendeleo. Katika ziara yake iliyofika katika Kata ya Laela, Mwenge wa Uhuru umekagua na kuzindua miradi inayohusisha sekta za elimu, afya na miundombinu, ikiwemo shule ya sekondari, zahanati na daraja, sambamba na shughuli za ujenzi wa barabara.

Miradi hiyo inalenga kuimarisha upatikanaji wa huduma za kijamii na kuboresha mazingira ya wananchi katika jimbo hilo, huku Mwenge wa Uhuru ukiendelea kutekeleza jukumu lake la kuhamasisha uwajibikaji, mshikamano na maendeleo yanayomgusa mwananchi moja kwa moja. Akizungumza Oktoba 10, 2026, katika Kata ya Laela, Kiongozi wa Mbio za Mwenge wa Uhuru Kitaifa, Wazo Mwang’onda, amesema utekelezaji wa miradi hiyo ni miongoni mwa matokeo ya mazingira ya amani yaliyopo nchini.

Mwang’onda amewataka wananchi wa Mkoa wa Rukwa kuendelea kuitunza na kuilinda amani, akisisitiza kuwa maendeleo endelevu yanahitaji utulivu, ushirikiano na mshikamano miongoni mwa wananchi.

Kwa upande wake, Mbunge wa Jimbo la Kwela ambaye pia ni Waziri wa Nchi, Ofisi ya Waziri Mkuu, Kazi, Ajira na Mahusiano, Deus Sangu, ameishukuru Serikali inayoongozwa na Rais Dkt. Samia Suluhu Hassan kwa kuendelea kupeleka miradi ya maendeleo katika Mkoa wa Rukwa, hususan Jimbo la Kwela.

Sangu amesema miradi iliyozinduliwa na Mwenge wa Uhuru ina umuhimu mkubwa kwa wananchi wa jimbo hilo, akieleza kuwa utekelezaji wake unatarajiwa kuboresha huduma za kijamii na kuchochea maendeleo ya eneo hilo.

Katika hatua nyengine Mhe. Sangu ameupongeza Mfuko wa Taifa wa Hifadhi wa Jamii (NSSF) kwa kuendelea kuyafikia makundi mbalimbali ya vijana waliojiari wakiwemo madereva boda boda zaidi ya 1900 ambapo NSSF iliwapa elimu ya Hifadhi ya Jamii na kuwasajili kuwa wanachama kupitia mpango wa Hifadhi Skimu.

MAGAZETI YA LEO JUMAPILI OKTOBA 11,2026

2026-10-11T07:38:42.957+03:00

Magazeti

WANANCHI MWABOMBA WAOMBA KITUO CHA POLISI, WASIFU KUPUNGUA KWA UJAMBAZI, RPC MAGOMI: POLISI NI RAFIKI WA WANANCHI, SI WA KUOGOPWA

2026-10-10T08:01:01.665+03:00

NA NEEMA NKUMBI, KAHAMA

Wananchi wa Kijiji cha Mwabomba, Kata ya Idahina, Halmashauri ya Ushetu wilayani Kahama, wameiomba serikali kuharakisha juhudi za upatikanaji wa kituo cha polisi katika eneo hilo ili kuimarisha usalama wa wananchi na kulinda shughuli zao za kiuchumi.

Ombi hilo limetolewa wakati wa ziara ya Kamanda wa Polisi Mkoa wa Shinyanga, Janeth Magomi, kijijini hapo, ikiwa ni sehemu ya kampeni ya makamanda wa polisi kuzungumza na wananchi, kusikiliza changamoto zao na kuimarisha ushirikiano kati ya jamii na Jeshi la Polisi.

Akizungumza katika ziara hiyo, mwananchi Sospeter Bulendi amesema ujambazi umepungua katika eneo hilo, hali anayoihusisha na ushirikiano uliopo kati ya wananchi na Jeshi la Polisi.

Bulendi amesema Mwabomba ina shughuli nyingi za kiuchumi, zikiwemo uchimbaji mdogo wa madini, kilimo na biashara, hivyo kuwa na kituo cha polisi kutasaidia kulinda maisha ya wananchi na mali zao.

Diwani wa kata ya Idahina Mathias Makashi amesema wananchi wanahitaji mazingira salama yatakayowawezesha kuendelea na shughuli zao za kiuchumi bila hofu ya uhalifu, huku akisisitiza umuhimu wa kuimarisha huduma za kipolisi katika eneo hilo.

Kwa upande wake, Kamanda Magomi amesema Jeshi la Polisi ni rafiki wa wananchi na kuwataka wasisite kutoa taarifa kuhusu vitendo vya uhalifu na changamoto za usalama zinazowakabili.

Amesema serikali inataka wananchi, wakiwemo wachimbaji wadogo wa madini, wafanye shughuli zao katika mazingira salama yatakayowawezesha kuongeza kipato na kuboresha maisha yao.

Akizungumzia usalama migodini, Magomi amewataka wachimbaji na wamiliki wa migodi kuzingatia taratibu za usalama ili kuzuia ajali zinazoweza kusababisha majeraha na vifo.

Pia amekemea vitendo vya ukatili dhidi ya watoto, ikiwemo ubakaji, ulawiti na vipigo, huku akiwataka wananchi kushirikiana na vyombo vya dola kutoa taarifa za matukio hayo ili hatua za kisheria zichukuliwe.

Kuhusu ombi la kituo cha polisi, Magomi amesema kuna umuhimu wa kuboresha upatikanaji wa huduma za kipolisi katika eneo hilo na kuomba kuonyeshwa eneo linalopendekezwa kwa ajili ya ujenzi wa kituo hicho ili kuona uwezekano wa hatua zinazofuata.

Amesisitiza kuwa ushirikiano kati ya wananchi, viongozi wa serikali na Jeshi la Polisi ni muhimu katika kudumisha amani, kuzuia uhalifu na kuwezesha wananchi kuendelea na shughuli zao za maendeleo.

Ekari mbili zimetengwa kwa ajili ya ujenzi wa kituo cha polisi kata ya Idahina.