HUHESO DIGITAL BLOG

MAGAZETI YA LEO JUMATANO SEPTEMBA 16,2026

2026-09-16T08:14:09.859+03:00

Magazeti

AMANI NA UTULIVU NDIO NGUZO KUU YA UCHUMI NA MAENDELEO ENDELEVU ZANZIBAR

2026-09-15T23:33:08.222+03:00

Mwenyekiti wa Taifa wa Chama cha ACT Wazalendo, Othman Masoud Othman, amesema amani na utulivu wa Zanzibar ni msingi mkuu wa uchumi wa visiwa hivyo, akisisitiza kuwa rasilimali hiyo ya amani ndiyo biashara yenyewe na maisha halisi ya wananchi.

Othman aliyasema hayo jana wakati wa uzinduzi wa Kamati ya Pamoja ya Kufanyia Kazi Tamko la Pamoja la Maridhiano ya Kisiasa uliofanyika Ikulu mjini Unguja, akibainisha kuwa Zanzibar inategemea zaidi uchumi wa huduma ambao unahitaji mazingira tulivu ili kushamiri.

Alieleza kuwa wawekezaji wa ndani na nje hawawezi kupeleka mitaji yao katika eneo lisilo na utulivu, jambo ambalo linafanya ujenzi wa amani ya kudumu kuwa nguzo ya kupata uwekezaji wa maana na kuchochea ustawi wa kiuchumi.

Akizungumzia historia ya visiwa hivyo, Othman alieleza kuwa Zanzibar imepitia vipindi mbalimbali vya kihistoria ambavyo vinapaswa kutumika kama funzo la kujenga mustakabali bora badala ya kurudia makosa ya zamani.

Alisema kuwa wakati umefika kwa nchi hiyo kuandika hadithi mpya inayotokana na misingi ya maendeleo, mshikamano, na amani ya kweli, huku akiwakumbusha wajumbe wa kamati hiyo kuwa ndio waandishi wakuu wa misingi hiyo mipya itakayojenga heshima na utukufu wa Zanzibar.

Aidha, aliwataka viongozi na wadau wote kuweka kando itikadi za kisiasa na mirengo yao na kuutazama mchakato huo kama jukumu kubwa la kizalendo linalopaswa kutekelezwa kwa heshima ili kuliweka taifa mbele.

Alisisitiza kuwa mafanikio ya kazi hiyo yataacha alama ya kudumu katika historia ya Wazanzibari, Watanzania, na dunia kwa ujumla.

Othman aliwapongeza marais wastaafu wa Zanzibar kwa hekima na busara zao zilizowezesha kufikia hatua hiyo ya maridhiano, huku akimpongeza Rais Dk. Hussein Mwinyi kwa baraka na usimamizi wake thabiti katika safari hiyo ya maridhiano, akiahidi kuwa chama cha ACT Wazalendo kitatoa ushirikiano kamili ili kuhakikisha malengo ya kamati hiyo yanafikiwa.

WAZIRI SANGU APONGEZA WCF KUUNGA MKONO JUHUDI ZA RAIS SAMIA MATUMIZI YA NISHATI SAFI

2026-09-15T23:29:31.844+03:00

Waziri wa Nchi, Ofisi ya Waziri Mkuu Kazi, Ajira na Mahusiano Deus Sangu amepongeza Mfuko wa Fidia kwa Wafanyakazi (WCF) kwa kuunga mkono juhudi za Serikali katika kuhamasisha matumizi ya nishati safi kwa wananchi.

Mhe. Sangu ametoa pongezi hizo Septemba 13, 2026 wakati akizundua mradi wa nishati safi ya kupikia katika shule ya Sekondari ya Kinambeu iliyopo wilaya ya Iramba, Mkoani Singida ikiwa ni sehemu ya utekelezaji wa dhana ya kurejesha kwa Jamii (Corporate Social Responsibility) iliyofadhiliwa na WCF.

Aidha, amesema Serikali ya Awamu ya Sita, inayoongozwa na Mheshimiwa Rais, Dkt. Samia Suluhu Hassan, imeendelea kuhamasisha matumizi ya nishati safi ya kupikia ili kulinda mazingira, kupunguza athari za kiafya zinazotokana na matumizi ya nishati chafu na kuboresha maisha ya wananchi.

Amesema, Dira ya Taifa ya 2050 kupitia nguzo namba 3 inasisitiza kuhusu suala la uhifadhi wa mazingira na ustahimilivu wa mabadiliko ya tabia nchi.

“Nikupongeze Mkurugenzi Mkuu wa WCF kwa kumuunga mkono Mheshimiwa Rais wetu Dkt. Samia Suluhu Hassan pamoja na kutekeleza kwa vitendo vipaumbele vya Dira ya Taifa ya Maendeleo ya 2050 kwa kuwezesha jamii ya wanairamba majiko yanayotumia nishati safi.,” amesema

Kadhalika, Waziri Sangu amewataka Viongozi wa Halmashauri, Walimu pamoja na Wanafunzi kuhakikisha wanalinda miundombinu hiyo ya Nishati Safi ili uwekezaji huo pia uweze kutumiwa na vizazi vijavyo vya wanafunzi watakaokuja kusoma katika shule hiyo.

Kwa upande wake, Mkuu wa Wilaya ya Iramba, Mhe. Suleiman Mwenda ameishukuru Serikali kwa kuendeleza miradi mbalimbali ya maendeleo katika Wilaya hiyo ikiwemo sekta ya elimu, afya, miundombinu, nishati ya umeme na maji.

Naye, Mkurugenzi Mkuu wa WCF, Dkt. John Mduma amesema mradi huo wa nishati safi umesaidia takribani wanafunzi 2,000 wanaosoma katika shule ya sekondari ya Kinambeu na Kizaga zilipo katika halmashauri ya Wilaya ya Iramba.

Amesema, msaada huo umelenga kuunga mkono kampeni ya kitaifa ya kuhamasisha matumizi ya nishati safi ya kupikia ambayo inaenda sambamba na utunzaji wa mazingira ambapo kiasi cha shilingi Milioni 40 zimetumika kusimika miundombinu ya nishati safi ya kupikia

SERIKALI YACHUKUA HATUA KUSHUSHA BEI YA SARUJI NA KUBORESHA MFUMO WA UNUNUZI WA PAMBA

2026-09-15T23:24:25.525+03:00

Serikali imetoa agizo la kuchukuliwa kwa hatua za haraka ili kudhibiti na kupunguza bei ya mfuko wa saruji ambayo imekuwa ikipanda hadi kufikia shilingi 27,000, 30,000 na hata 32,000 katika baadhi ya maeneo.

Agizo hilo limetolewa na Waziri Mkuu, Dk. Mwigulu Nchemba, wakati akizungumza na wananchi kwenye mkutano wa hadhara katika Kijiji cha Lagangabili, Wilaya ya Itilima mkoani Simiyu, ambapo alieleza kuwa amepokea maelekezo maalum kutoka kwa Rais Dk. Samia Suluhu Hassan ya kutaka wananchi wapate bidhaa hiyo kwa bei nafuu na inayoeleweka.

Alisema kuwa amewapa wataalamu muda wa wiki moja pekee kukaa na kuandaa mpango mahususi utakaorejesha bei ya saruji katika hali yake ya kawaida ili kuondoa kilio cha wananchi, huku akibainisha kuwa serikali inaendelea kufuatilia kwa karibu minyororo ya uzalishaji na usambazaji.

Wakati akifafanua changamoto hiyo ya saruji, Dk. Mwigulu aligusia pia maagizo yaliyotolewa hivi karibuni na viongozi wengine wa serikali, yakiwemo ya Makamu wa Rais Deogratius Ndejembi, ambaye aliagiza Wizara ya Viwanda na Biashara pamoja na Mamlaka ya Mapato Tanzania (TRA) kukutana na wazalishaji ili kubaini mianya inayochochea kupanda kwa gharama hizo.

Takwimu za wizara zinazohusika zinaonyesha kuwa Tanzania ina viwanda 15 vya saruji vinavyozalisha kiasi kinachozidi mahitaji ya ndani kwa mwaka, jambo ambalo linaashiria kuwa kupanda kwa bei hakutokani na uhaba wa bidhaa bali kunachangiwa na changamoto za kiushindani, usambazaji na mbinu za wafanyabiashara wa kati wanaohifadhi bidhaa kwenye maghala.

WAFANYABIASHARA WAKUMBUSHWA KUTUMIA MITANDAO YA KIJAMII KWA UBUNIFU NA UAMINIFU KUKUZA BIASHARA

2026-09-14T17:07:49.037+03:00

Dunia ya sasa ya kidijitali imefanya mitandao ya kijamii kuwa nyenzo kuu ya kukuza biashara, jambo linalowataka wajasiriamali kutumia majukwaa kama Facebook, Instagram, TikTok, na WhatsApp kwa ubunifu ili kutangaza bidhaa, kuwafikia wateja wengi, na kuongeza mauzo bila kujali umbali.

Pamoja na urahisi wa majukwaa haya, mafanikio yanahitaji zaidi ya kutangaza bidhaa pekee, kwani wafanyabiashara wanapaswa kuandaa picha na video zenye ubora, kutoa taarifa sahihi, na kuweka maelezo yanayoeleweka yanayoongeza thamani, kuleta imani, na kuwavutia wateja kufanya maamuzi ya kununua.

Matumizi ya lugha nzuri na yenye staha wakati wa kuwasiliana na wateja ni nguzo nyingine ya msingi, sambamba na kuepuka kutoa taarifa za uongo au kutumia mbinu za kupotosha, kwa kuwa uaminifu unabaki kuwa msingi pekee wa kumteka mteja na kufanya biashara kuwa endelevu.

Wafanyabiashara wanatakiwa kujifunza mwenendo wa soko na kutumia takwimu zinazopatikana kwenye mitandao hiyo kutambua aina ya wateja wanaowafikia, bidhaa zinazopendwa zaidi, na muda ambao wateja wengi huwa mtandaoni ili kupanga mikakati madhubuti ya kibiashara.

Wakati huohuo, mamlaka na wadau wa sekta ya biashara wanayo wajibu wa kuendelea kutoa elimu kuhusu matumizi salama na yenye tija ya teknolojia ili wajasiriamali waweze kutumia fursa za kidijitali kwa ufanisi huku wakizingatia sheria, haki za watumiaji, na maadili ya biashara.

Kwa wafanyabiashara wadogo na wa kati, mitandao ya kijamii ni njia rahisi na ya gharama nafuu ya kujenga chapa na kupanua soko, hivyo wanapaswa kuondoa uoga wa teknolojia na kuifanya kuwa fursa halisi badala ya kuishia kujionyesha tu bila kujenga biashara zenye tija na uwezo wa kushindana.

KAMPUNI KUBWA ZA JAPAN KUTUA NCHINI MACHI 2027 KUTATHMINI FURSA ZA UWEKEZAJI WA VIWANDA NA BIASHARA

2026-09-14T17:01:51.785+03:00

Kampuni kubwa kutoka nchini Japan zinatarajia kufanya ziara rasmi nchini mwezi Machi 2027 kwa lengo la kutathmini fursa za uwekezaji na kukuza uzalishaji wa ndani, ikiwa ni matokeo ya mazungumzo yaliyofanywa na ujumbe wa Serikali ya Tanzania ukiongozwa na Waziri wa Nchi, Ofisi ya Rais, Mipango na Uwekezaji, Profesa Kitila Mkumbo, alipokutana na viongozi wa Shirikisho la Sekta Binafsi la Japan na taasisi mbalimbali nchini humo.

Akieleza malengo ya ziara hiyo, Profesa Kitila alisema inalenga kubadili mfumo wa biashara uliopo ambapo kwa sasa Japan huuza bidhaa nyingi zaidi nchini Tanzania kuliko Tanzania inavyouza huko, ambapo serikali inataka kampuni hizo kuja kuwekeza na kutengeneza bidhaa hizo hapa nchini, zikiwemo mashine na bidhaa za kilimo, badala ya kuendelea kuwa soko la kuagiza bidhaa kutoka nje.

Alibainisha kuwa sehemu kubwa ya bidhaa zinazoingizwa nchini kutoka Japan ni pamoja na magari, hivyo serikali inalenga kuvutia uwekezaji wa uzalishaji wa vyombo hivyo na bidhaa nyingine ili kuongeza ajira, matumizi ya teknolojia, na kuboresha uwiano wa biashara ambao ulifikia Dola za Marekani milioni 622.3 mwaka 2024 sawa na Bilioni 94.27 za Yen.

Katika ziara hiyo, ujumbe wa Tanzania ulikutana pia na Shirika la Biashara ya Nje la Japan (JETRO) na kukubaliana kuimarisha ushirikiano na Mamlaka ya Uwekezaji na Maeneo Maalumu ya Kiuchumi Tanzania (TISEZA), sambamba na kufanya mazungumzo na wizara mbalimbali za Japan kuhusu miundombinu, biashara, na kuandaa Mkataba wa Makubaliano (MoU) utakaotekelezwa kupitia Shirika la Ushirikiano wa Kimataifa la Japan (JICA).

Profesa Kitila aliongeza kuwa ziara hiyo itafungua pia fursa za ushirikiano wa kiuchumi na utalii kati ya Zanzibar na Okinawa kutokana na kufanana kwa maeneo hayo mawili katika utalii na fukwe, huku hatua hii ikija wakati Tanzania na Japan zikitimiza miaka 60 ya uhusiano ambapo mwelekeo sasa ukitoka kwenye misaada na kuelekezwa kwenye biashara na uwekezaji ili kufikia malengo ya Dira ya Maendeleo ya Tanzania 2050.

TANZANIA YAKARIBIA KUUNGANISHWA NA SOKO LA UMEME KUSINI MWA AFRIKA

2026-09-14T16:57:22.812+03:00

Tanzania ipo katika hatua za mwisho za kuunganishwa na soko la umeme la Kusini mwa Afrika huku Mradi wa Kuunganisha Gridi za Umeme Tanzania na Zambia ukiwa umefikia asilimia 90 ya utekelezaji na unatarajiwa kukamilika rasmi mnamo Februari 2027, hatua itakayoongeza uwezo wa nchi kushiriki katika biashara ya umeme kuvuka mipaka kupitia Jumuiya ya Umeme ya Kusini mwa Afrika (SAPP) na kufungua fursa za kuuza na kununua nishati hiyo kwa nchi wanachama.

Akizungumza katika ufunguzi wa Mkutano wa 67 wa Kamati ya Usimamizi ya SAPP uliofanyika Zanzibar kuanzia Septemba 7 hadi 11, 2026, Naibu Waziri wa Maji, Nishati na Madini wa Zanzibar, Seif Kombo, alisema biashara ya umeme kikanda ni muhimu katika kuongeza upatikanaji wa nishati, kuimarisha usalama wa gridi, na kupunguza gharama za umeme, huku akisisitiza kuwa serikali na Shirika la Umeme Tanzania (TANESCO) linaendelea kuwekeza katika kuimarisha miunganisho ya gridi ikiwemo mradi huo wa msongo wa kilovoti 400.

Kwa upande wake, Mwenyekiti wa Kamati ya Usimamizi ya SAPP, Andrew Etzinger, alieleza kuwa ushirikiano wa kikanda ni nguzo kuu ya kuimarisha usalama wa nishati hasa wakati huu ambapo mabadiliko ya tabianchi na ukame vinaathiri uzalishaji, akibainisha kuwa muunganisho wa Tanzania na Zambia utakuwa hatua kubwa katika kuunganisha SAPP na Jumuiya ya Biashara ya Umeme Mashariki mwa Afrika (EAPP) ili kupanua wigo wa biashara kati ya kanda hizo mbili.

Naye Naibu Mkurugenzi Mtendaji wa Usafirishaji Umeme wa Tanesco, Zakaria Mgalama, akizungumza kwa niaba ya Mkurugenzi Mtendaji wa shirika hilo, alieleza kuwa mkutano huo umejadili namna ya kuimarisha miundombinu na usalama wa nishati, huku akikazia kuwa kukamilika kwa mradi huo kutaimarisha nafasi ya Tanzania katika mtandao mpana wa biashara ya umeme ya kikanda na kuwezesha matumizi bora ya rasilimali na miundombinu iliyopo ya uzalishaji

MAGAZETI YA LEO JUMATATU SEPTEMBA 14,2026

2026-09-14T08:58:31.112+03:00

Magazeti

SIRI YA KUUZA MTANDAONI: MAUDHUI MAZURI YASHINDA WAFUASI WENGI

2026-09-12T17:50:40.253+03:00

Wafanyabiashara wanaotumia mitandao ya kijamii kujitangaza wametakiwa kuwekeza katika utengenezaji wa maudhui yenye ubora na mvuto ili kuongeza ushawishi kwa wanunuzi, badala ya kutegemea idadi kubwa ya wafuasi pekee.

Rai hiyo imetolewa na mtaalamu wa maudhui ya mitandao ya kijamii kutoka Kampuni ya Distinctsocials ya Sinza Kijiweni, Dar es Salaam, Basili Pasience, alipozungumza na moja ya magazeti makubwa nchini hivi karibuni.

Alibainisha kuwa siri kuu ya kuvuta wateja na kufanya biashara kubwa mtandaoni iko kwenye jinsi bidhaa inavyowasilishwa na kusisimua hadhira.

Pasience alieleza kuwa kuwa na idadi kubwa ya wafuasi hakuhakikishii mauzo ya juu, kwani wateja hufanya maamuzi ya kununua au kuagiza bidhaa wakitokea kuvutiwa na ubora wa maudhui yaliyowasilishwa.

Alishauri wafanyabiashara kutumia vizuri mifumo kama vile Instagram na Facebook kwa kutumia mikakati madhubuti, ikiwemo kuwa hai katika kujibu maswali na maoni ya wateja, sambamba na kutumia matangazo ya kulipia ili kufikia wigo mpana zaidi wa wanunuzi.

Aidha, mtaalamu huyo alikemea tabia ya baadhi ya wafanyabiashara kupakia bidhaa nyingi kwa pamoja kwenye mfumo wa WhatsApp Status, akieleza kuwa mtindo huo huwachosha wateja na kuondoa hamu ya kutazama.

Alisisitiza badala yake kuandaa ujumbe au picha moja yenye mvuto na ushawishi mkubwa kwa mnunuzi, badala ya kujaza kurasa kwa wakati mmoja.

WAWEKEZAJI WA UTALII WATENGENEZE FAIDA KWA WANANCHI, SIO FAIDA TU

2026-09-12T17:44:08.777+03:00

Rais wa Zanzibar, Dkt. Hussein Mwinyi, amewasisitiza wawekezaji katika sekta ya utalii kuhakikisha miradi yao inaleta tija ya moja kwa moja kwa wananchi wa maeneo husika kupitia uzalishaji wa ajira na fursa za biashara, sambamba na kuchangia uchumi wa Zanzibar.

Agizo hilo limetolewa katika hotuba iliyosomwa kwa niaba yake na Kaimu Waziri wa Utalii na Mambo ya Kale, Mudrik Ramadhan Soraga, wakati wa uzinduzi rasmi wa hoteli mpya ya Joud by the Sea iliyopo Jambiani, Kusini Unguja, ambapo alibainisha kuwa ongezeko la uwekezaji ni dhihirisho la kuimarika kwa imani ya wawekezaji visiwani humo lakini ni lazima matokeo yake yaonekane kwa jamii inayozunguka miradi hiyo.

Akielezea mwenendo wa sekta hiyo, Dkt. Mwinyi alieleza kuwa Zanzibar ilifanikiwa kupokea watalii 917,167 mwaka 2025 ikilinganishwa na watalii 736,755 mwaka 2024, takwimu zinazoashiria kuongezeka kwa asilimia 24.5 na kuifanya Zanzibar kuwa kivutio kinachozidi kung'ara kimataifa, jambo linaloitaka serikali na sekta binafsi kuendelea kuimarisha ubora wa miundombinu, huduma na malazi ili kuendana na ushindani wa soko la utalii duniani.

Aliongeza kuwa uwekezaji katika sekta ya hoteli una uwezo mkubwa wa kufungua masoko mapya kwa bidhaa za ndani, wakulima, wajasiriamali wadogo na wa kati, huku akipongeza uongozi wa hoteli hiyo kwa kutoa ajira 85 kati ya 85 zilizopo kwa wananchi wa eneo hilo, hatua aliyoitaka iigwe na wawekezaji wengine wote.

Katika hatua nyingine, Rais Mwinyi amewataka wawekezaji kuzingatia matumizi ya bidhaa zinazozalishwa nchini, kulinda mazingira, kudumisha viwango vya juu vya huduma, na kushirikiana kwa karibu na jamii, huku akiahidi kuwa serikali itaendelea kuboresha mazingira ya uwekezaji pamoja na miundombinu ya kimkakati kama vile barabara, viwanja vya ndege, bandari na huduma za afya.

Aliwakumbusha pia wananchi kuendelea kulinda amani na usalama ili wageni wajisikie salama, wakati akitoa pongezi kwa wawekezaji hao kutoka nchi za Kiarabu kwa kuchagua Zanzibar, pamoja na kuipongeza Mamlaka ya Uwekezaji Zanzibar (ZIPA) na Wizara ya Kazi na Uwekezaji kwa kurahisisha utekelezaji wa mradi huo.

Naye mmiliki wa hoteli hiyo, Ahmed Baki, alieleza kuwa hoteli hiyo yenye vyumba 40 imesanifiwa kwa kuangazia utamaduni wa pwani ya Zanzibar, huku akibainisha kuwa zaidi ya asilimia 90 ya wafanyakazi ni Watanzania na Wazanzibari, na kwamba awamu ya pili ya mradi huo inatazamiwa kuongeza vyumba zaidi pamoja na kuanzisha huduma za ustawi, afya na mgahawa wa kisasa.

WANAFUNZI 150 WA KITANZANIA KUNUFAIKA NA FURSA YA ELIMU YA JUU ALGERIA

2026-09-12T17:38:21.914+03:00

Balozi wa Tanzania Nchini Algeria, Mobhare Matinyi

Waziri wa Elimu, Sayansi na Teknolojia Prof. Adolf Mkenda

***

Tanzania imepata nafasi 150 za ufadhili wa masomo ya elimu ya juu nchini Algeria kwa mwaka 2026, zikilenga wanafunzi waliofanya vizuri zaidi katika masomo ya sayansi.

Akizungumza na waandishi wa habari Septemba 11 jijini Dar es Salaam, Waziri wa Elimu, Sayansi na Teknolojia Prof. Adolf Mkenda alisema kuwa Aljeria itagharamia ada za masomo huku Tanzania ikitoa fedha za kujikimu kupitia mpango wake wa Samia Scholarship.

Samia Scholarship imetajwa kuwa ni mpango maalum wa serikali uliowekwa kutoa ufadhili wa masomo ya elimu ya juu kwa wanafunzi waliofanya vizuri zaidi katika mitihani ya kidato cha Sita kwenye masomo ya sayansi, kwa lengo la kukuza wataalam wa ndani na kuongeza fursa za elimu bila kikwazo cha kipato.

Fursa hii adimu inalenga kuwanufaisha wanafunzi wenye uwezo kutoka familia zenye kipato cha chini, wakiwemo watoto wa wakulima na wafugaji, bila kujali uwezo wao wa kifedha.

Imeelezwa kuwa mpango huu unajumuisha pia wanafunzi 10 waliochaguliwa kwenda Moscow, Urusi, huku ukiongezeka kwa kiasi kikubwa kutoka nafasi 45 zilizotolewa na Algeria mwaka jana.

Akizungumza kufuatia taarifa ya Waziri kuhusu fursa hiyo ya elimu, Balozi wa Tanzania Nchini Algeria, Mobhare Matinyi, aliishukuru Algeria kwa kutoa nafasi nyingi mwaka huu 2026 kuliko miaka mingine na kuonesha matumaini kwamba mwakani zitaongezeka zaidi.

"Mwaka jana Algeria ilipokea wanafunzi wa Tanzania 45 lakini mwaka huu kutokana na mpango wa Samia Scholarships inayosimamiwa na Wizara ya Elimu wanakuja wanafunzi 150," alisema Balozi Matinyi.

Aidha, Balozi Matinyi aliongeza kuwa ubalozi kwa kushirikiana na Wizara ya Elimu, Sayansi na Teknolojia uliomba nafasi hizo ili nchi iweze kujipatia wataalam wa kutosha katika nyanja za sayansi na teknolojia zikiwemo sayansi za afya na TEHAMA.

Alisema, wanafunzi watakaoteuliwa watatakiwa kujifunza lugha ya Kifaransa inayotumika katika masomo nchini humo, huku majina yao yakitarajiwa kuwekwa rasmi kwenye tovuti ya wizara.

Serikali imewahakikishia wanafunzi hao kuwa itawaongoza katika hatua zote za kuwasilisha nyaraka na kuwakamilishia taratibu za safari, zikiwemo hati za kusafiria.

Hatua hii imetajwa kudhihirisha dhamira ya dhati ya serikali ya awamu ya sita katika kuimarisha ushirikiano wa kimataifa ili kukuza sekta ya elimu ya juu nchini.

Hata hivyo, utekelezaji wa mpango huu unatarajiwa kuongeza chachu ya ufaulu katika masomo ya sayansi na kuinua kiwango cha wataalam wa ndani kwa ajili ya maendeleo ya taifa.

TANZANIA NA KOREA KUSINI ZASUKUMA MBELE USHIRIKIANO WA KIUCHUMI

2026-09-12T17:37:02.907+03:00

Serikali ya Tanzania na Jamhuri ya Korea Kusini zimefikia makubaliano ya kuharakisha utekelezaji wa ahadi ya dola za Marekani bilioni 2.5 zinazolenga kufadhili miradi mikubwa ya kimkakati nchini.

Katika mazungumzo yaliyofanyika pembezoni mwa Jukwaa la Ushirikiano wa Kiuchumi kati ya Korea na Afrika (KOAFEC) jijini Seoul, Waziri wa Fedha, Mhe. Balozi Khamis Mussa Omar, aliongoza ujumbe wa Tanzania na kusisitiza umuhimu wa kuondoa vikwazo na ucheleweshaji uliokuwepo katika tafiti za upembuzi yakinifu na usanifu wa kihandisi chini ya Mfuko wa Ushirikiano wa Maendeleo ya Kiuchumi wa Korea (EDCF).

Pande hizo mbili zimekubaliana kufuatilia kwa karibu utekelezaji wa miradi iliyoafikiwa wakati wa ziara ya Rais Dkt. Samia Suluhu Hassan nchini humo, ikiongozwa na ujenzi wa Chuo Mahiri cha Tehama jijini Dodoma, sambamba na miradi mingine kama vile Kituo cha Kimataifa cha Mikutano na Maonesho Zanzibar, Hospitali ya Rufaa ya Binguni, uendelezaji wa Hospitali ya Taifa ya Muhimbili, na ujenzi wa barabara ya Ifakara kwenda Mahenge inayohusiana na uchimbaji wa madini ya graphite, huku suala la ununuzi wa mabehewa ya SGR likifanyiwa mapitio ya pamoja ili liweze kutekelezwa kwa tija.

Wakati huo huo, Waziri wa Mawasiliano na Teknolojia ya Habari, Mhe. Angelah Kairuki, alitumia jukwaa hilo kunadi fursa za uwekezaji wa kidijitali na kuwakaribisha wafanyabiashara wa Korea kuwekeza katika miundombinu ya mawasiliano, vituo vya kutunzia taarifa, upanuzi wa mtandao wa 5G, na huduma za Serikali Mtandao ili kuboresha utoaji wa huduma za jamii. Alibainisha kuwa ushirikiano huo unalenga pia kuimarisha teknolojia za kilimo, afya, na fedha, pamoja na kupata mitaji ya kuwezesha Shirika la Mawasiliano la Taifa (TTCL), kutumia nguvu kazi ya vijana wengi waliopo nchini ili kuzalisha ajira na kukuza uchumi kupitia uchumi wa kidijitali.

Majadiliano hayo yalihitimishwa kwa msisitizo wa kuimarisha ushirikiano wa kikanda na kimataifa katika nyanja ya Akili Unde (AI) na miundombinu ya kisasa, ikiwa ni sehemu ya utekelezaji wa malengo ya jukwaa la KOAFEC lililoandaliwa kwa ushirikiano na Benki ya Maendeleo ya Afrika (AfDB) na Benki ya Exim ya Korea.

MAGAZETI YA LEO JUMAMOSI SEPTEMBA 12,2026

2026-09-12T07:32:19.249+03:00

MAGAZETI YA LEO IJUMAA SEPTEMBA 11, 2026

2026-09-11T00:14:50.317+03:00

ZAIDI YA VIJANA 4,200 WANUFAIKA NA AJIRA NCHI ZA KIARABU

2026-09-10T23:24:05.523+03:00

Serikali ya Mapinduzi ya Zanzibar ikishirikiana na Serikali ya Jamhuri ya Muungano wa Tanzania zimefungua milango ya ajira katika nchi za Kiarabu na kufanikisha kunufaisha vijana 4,211 kati ya mwaka 2025 hadi 2026.

Hayo yameelezwa na Waziri wa Kazi na Uwekezaji, Sharif Ali Sharif, wakati akijibu swali la Mwakilishi wa Mtambile, Alley Masoud Alley, aliyetaka kujua idadi ya vijana waliopata nafasi za kazi nje ya nchi kupitia makubaliano yaliyopo.

Waziri Sharif amefafanua kuwa kati ya ajira hizo, 3,527 ni kwa ajili ya wanawake, huku nafasi 684 zikiwa ni za wanaume zilizopatikana katika nchi kama vile Qatar, Oman, na Umoja wa Falme za Kiarabu.

Ameongeza kuwa nafasi hizo zinapatikana kwa kuratibiwa na mawakala walioingia mikataba na taasisi za nchi husika, huku serikali ikiweka taratibu thabiti ikiwemo utoaji wa viza na ushirikishwaji wa balozi za Tanzania nje ya nchi ili kuondoa usumbufu, changamoto, na matukio ya udhalilishaji yaliyokuwa yakijitokeza hapo awali.

Aidha, amebainisha kuwa wizara yake inashirikiana kwa karibu na Ofisi ya Waziri Mkuu, Kazi, Ajira na Mahusiano ya Serikali ya Jamhuri ya Muungano wa Tanzania katika kutoa mgawanyo sawa wa nafasi hizo, hatua ambayo imeondoa kabisa malalamiko na mivutano ya zamani ambapo Zanzibar ilikuwa haipati mgao stahiki wa ajira za nje

VIJANA WATAKIWA KULINDA AMANI NA USALAMA ILI KUFAIDI MABILIONI YA SERIKALI YA UWEZESHAJI KIUCHUMI

2026-09-10T23:19:53.081+03:00

Wito umetolewa kwa vijana nchini kuzingatia amani na usalama ili mabilioni ya shilingi yanayotolewa na serikali kupitia mikopo na miradi ya uwezeshaji kiuchumi yaweze kuwanufaisha katika kujiletea maendeleo.

Hayo yameelezwa na Kiongozi wa Mbio za Mwenge wa Uhuru, Wazo Mwang’onda, wakati Mwenge ulipotembelea kikundi cha Umoja wa Madereva wa Bodaboda Makere katika Halmashauri ya Wilaya ya Kasulu mkoani Kigoma, akisisitiza kuwa amani na usalama vikiwa mashakani hakuna kijana atakayefaidika na fedha zinazotolewa na serikali.

Mwang'onda amebainisha kuwa serikali imetenga shilingi bilioni mia mbili kwa ajili ya kuinua shughuli za kiuchumi za vijana, huku ikihimiza halmashauri kutumia mapato ya ndani kuwezesha makundi hayo pamoja na wanawake na watu wenye ulemavu, akitolea mfano Halmashauri ya Wilaya ya Kasulu kwa kutoa zaidi ya shilingi bilioni moja kwa mpango huo kwa mwaka uliopita.

Ameongeza kuwa serikali ya Rais Dk. Samia Suluhu Hassan imejipambanua katika kuhakikisha vijana wanapata nafasi za uongozi na kuimarishwa kiuchumi ili waweze kujiajiri na kuajiri wenzao kwa maslahi ya taifa.

Kwa upande wake, Mwenyekiti wa Kikundi cha Madereva Bodaboda Makere, George Kagoma, ameeleza kuwa tangu kuanzishwa kwa kikundi hicho mwaka 2018 wamekopeshwa shilingi milioni sabini nukta tano kutoka mapato ya ndani ya halmashauri, na wanatarajia kumaliza mkopo uliosalia ili kuomba mkopo mwingine wa kununua basi la abiria kwa ajili ya kuimarisha shughuli zao.

TEKNOLOJIA ISIWE SABABU YA WAANDISHI WA HABARI KUKIUKA MAADILI

2026-09-10T23:15:25.500+03:00

Waandishi wa Habari nchini wametakiwa kutoruhusu maendeleo ya teknolojia kuathiri uzingatiaji wa maadili na misingi ya taaluma wanapotekeleza majukumu yao ya kila siku.

Wito huo umetolewa na Kaimu Mkurugenzi Mkuu wa Bodi ya Ithibati ya Waandishi wa Habari (JAB), Wakili Patrick Kipangula, wakati wa mafunzo ya siku mbili kwa Waandishi wa Habari wa EFM na TVE, yaliyofanyika Septemba 9 na 10, 2026 katika Ofisi za Bodi hiyo jijini Dar es Salaam.

“Mkiwa Waandishi wa Habari, mna wajibu wa kuhakikisha mnasimamia misingi ya taaluma kwa kuzingatia sheria, kuepuka kutoa taarifa za uongo na kujiepusha na makosa ya jinai,” amesema Wakili Kipangula.

Kwa upande wake, Msaidizi wa Mkuu wa Vipindi wa EFM, Bw. Evalist Razeck, amewasihi wamiliki wa vyombo vya habari kuwapa Waandishi wa Habari fursa ya kushiriki mafunzo ya mara kwa mara ili kujikumbusha misingi muhimu ya taaluma na kuwawezesha kukusanya na kutoa taarifa zenye tija kwa jamii wanayoihudumia.

Naye Mtangazaji wa EFM, Bi. Fatuma Muhidini Likwata, amesema mafunzo hayo yamewaongezea uelewa kuhusu maadili na misingi ya taaluma, jambo litakalowasaidia kutekeleza majukumu yao kwa weledi na kuzingatia maslahi ya jamii.

“Mafunzo haya yametukumbusha umuhimu wa kuzingatia maadili na misingi ya taaluma katika kila hatua ya kazi yetu, kuanzia kutafuta taarifa hadi kuzifikisha kwa jamii kwa usahihi na uwajibikaji,” amesema Bi. Likwata.

Mafunzo hayo yamejikita katika mada mbalimbali, zikiwemo Sheria ya Huduma za Habari, maadili ya uandishi wa habari na uzalendo katika utangazaji.

Mafunzo hayo ni sehemu ya utekelezaji wa majukumu ya JAB ya kuwajengea uwezo Waandishi wa Habari, kwa lengo la kuimarisha weledi na uzingatiaji wa maadili na misingi ya taaluma ya uandishi wa habari.

WAANDISHI WAPEWA MAFUNZO YA HCD KUKABILIANA NA HABARI POTOFU

2026-09-10T23:12:47.574+03:00

Afisa Mtendaji Mkuu wa kampuni ya teknolojia na habari ya Nukta Africa, Nuzulack Dausen, akizungumza wakati wa mafunzo ya Ubunifu Unaomlenga Mtumiaji (HCD) yanayolenga kuwajengea uwezo wadau wa habari kukabiliana na taarifa potofu na matamshi ya chuki (hate speech).

Programu Meneja wa International Media Support (IMS), Fausta Musokwa, akizungumza wakati wa mafunzo ya Ubunifu Unaomlenga Mtumiaji (HCD) yanayolenga kuwajengea uwezo wadau wa habari kukabiliana na taarifa potofu na matamshi ya chuki (hate speech), jijini Arusha.

Mwezeshaji wa mafunzo hayo kuhusu Ubunifu Unaomlenga Mtumiaji (HCD), Dkt. Hellen Maziku, Mhadhiri Mwandamizi wa Chuo Kikuu cha Dar es Salaam na Mwanzilishi wa HCD Services Tanzania, akizungumza wakati wa mafunzo hayo.

Na Waandishi wetu - Malunde 1 blog

Waandishi wa habari, wahariri na wataalamu wa masoko na biashara kutoka taasisi 10 za habari nchini Tanzania wamejengewa uwezo wa kukabiliana na taarifa potofu na za upotoshaji kupitia mafunzo ya Ubunifu Unaomlenga Mtumiaji (Human-Centred Design - HCD).

Mafunzo hayo yanalenga kuimarisha uwezo wa taasisi za habari kuandaa na kuendeleza mawazo bunifu na kubuni suluhisho zinazozingatia mahitaji, uzoefu na tabia za watumiaji wa taarifa, katika kukabiliana na taarifa potofu na matamshi ya chuki (hate speech) nchini Tanzania.

Mafunzo hayo ya siku tatu yanafanyika jijini Arusha kuanzia Septemba 9 hadi 11, 2026, yakiendeshwa na Shirika la International Media Support (IMS) kwa kushirikiana na Kampuni ya Teknolojia na Habari ya Nukta Africa , Umoja wa Klabu za Waandishi wa Habari Tanzania (UTPC) na JamiiAfrica.

Akizungumza wakati wa mafunzo hayo, Afisa Mtendaji Mkuu wa Kampuni ya Teknolojia na Habari ya Nukta Africa , Nuzulack Dausen, amesema taarifa sahihi ni jambo nyeti katika jamii kwa kuwa zina nafasi kubwa katika kusaidia wananchi na taasisi kufanya maamuzi sahihi kwa ajili ya maendeleo.

Afisa Mtendaji Mkuu wa Nukta Africa, Nuzulack Dausen, akizungumza katika mafunzo hayo.

Dausen ameeleza kuwa kuenea kwa taarifa potofu na matamshi ya chuki (hate speech) kunaweza kuathiri sekta mbalimbali na kuhatarisha ustawi wa jamii, hivyo ni muhimu kwa waandishi wa habari kuwa na ujuzi na kutumia mbinu za kisasa katika kubaini, kuchambua na kukabiliana na taarifa potofu pamoja na maudhui ya chuki.

Ameongeza kuwa, mafunzo hayo yanatoa fursa kwa wadau wa habari kujengeana uwezo na kubadilishana uzoefu kuhusu mbinu za kisasa za kukabiliana na habari potofu katika vyombo vya habari, kwa lengo la kusaidia jamii kupata taarifa sahihi na kufanya maamuzi yenye tija kwa maendeleo yao.

Amesema Mafunzo hayo ni sehemu ya programu ya Maabara ya Fikra Bunifu na Uvumbuzi (Design Thinking and Innovation Lab) inayosimamiwa na IMS na washirika wake, ikiwa na lengo la kuwajengea washiriki uelewa na uwezo wa kutumia kanuni, hatua na mbinu za Ubunifu Unaomlenga Mtumiaji (Human-Centred Design - HCD katika kutambua na kutatua changamoto zinazohusiana na taarifa potofu.

Kwa upande wake, Programu Meneja wa Shirika la International Media Support (IMS), Fausta Musokwa, amesema taasisi hiyo inashirikiana na wadau wa habari nchini Tanzania kutekeleza mradi wa kukabiliana na taarifa zisizo sahihi na taarifa za upotoshaji (misinformation na disinformation), kwa kuvijengea uwezo vyombo vya habari kutumia mbinu sahihi za kuelimisha jamii.

Programu Meneja wa International Media Support (IMS), Fausta Musokwa.

Musokwa amesema ni muhimu kuongeza ubunifu katika vyombo vya habari na kuwajengea uwezo waandishi wa habari kukabiliana na taarifa potofu na matamshi ya chuki (hate speech), akisisitiza kuwa waandishi wana nafasi muhimu katika kulinda demokrasia kwa kuhakikisha wananchi wanapata taarifa sahihi na zilizothibitishwa.

“Ni muhimu kuongeza ubunifu katika vyombo vya habari kwa sababu mwandishi wa habari ni mlinzi wa demokrasia. Mwandishi wa habari ni askari muhimu anayewawezesha wananchi kupata taarifa sahihi na tunapaswa kujitofautisha na makundi mengine ya kijamii yanayoeneza taarifa mtandaoni, ‘citizen journalists’,” amesema.

Amefafanua kuwa kuenea kwa taarifa potofu na maudhui ya chuki ni changamoto inayoongezeka duniani, huku matumizi ya simu janja na upatikanaji mpana wa intaneti vikichochea kasi ya usambazaji wa taarifa hizo.

Amesema hali hiyo inaweza kuleta madhara kwa watu binafsi na jamii, ikiwemo kuathiri maamuzi ya wananchi, hivyo vyombo vya habari vinapaswa kuwa mstari wa mbele kuhakikisha jamii inapata taarifa sahihi na za kuaminika.

Naye Mwezeshaji wa mafunzo hayo, Dkt. Hellen Maziku, Mhadhiri Mwandamizi wa Chuo Kikuu cha Dar es Salaam na Mwanzilishi wa HCD Services Tanzania, amesema mafunzo hayo yanasisitiza umuhimu wa kutumia mtazamo unaomlenga mtumiaji katika kutafuta suluhisho la changamoto ya taarifa potofu.

Amesema mtazamo huo unazingatia mahitaji, matarajio, uzoefu na tabia za wananchi wanaokumbwa na changamoto ya taarifa potofu, hatua inayolenga kuhakikisha suluhisho zinazobuniwa zinakidhi mahitaji halisi ya watumiaji wa taarifa.

Washiriki wa mafunzo hayo wamesema yatawasaidia kupata uelewa na mbinu mbalimbali zitakazowasaidia kutambua, kuchambua na kukabiliana na habari potofu na taarifa za upotoshaji katika kazi zao za kila siku.

Wamesema mafunzo hayo yatawasaidia kuongeza umakini katika kuchakata taarifa kabla ya kuzifikisha kwa wananchi, hatua ambayo itachangia kuimarisha uaminifu wa jamii kwa vyombo vya habari na kuhakikisha wananchi wanapata taarifa sahihi na zenye manufaa kwa maisha yao.

Mkurugenzi wa Malunde Media, Kadama Malunde, akichangia hoja wakati wa mafunzo ya Ubunifu Unaomlenga Mtumiaji (HCD) yanayolenga kuwajengea uwezo wadau wa habari kukabiliana na taarifa potofu na matamshi ya chuki (hate speech).

RAIS SAMIA ANAVYOCHAGIZA SIASA ZA MARIDHIANO NA DIPLOMASIA YA UCHUMI KATIKA KUIJENGA TANZANIA

2026-09-09T21:42:15.339+03:00

Wakati Tanzania ikiendelea kukumbuka kipindi kigumu cha kihistoria kilichofuata kifo cha ghafla cha Rais wa Awamu ya Tano, Dkt. John Magufuli, mnamo Machi 19, 2021, uongozi wa nchi umeendelea kuimarika chini ya Rais Dkt. Samia Suluhu Hassan kupitia misingi ya amani, uwezeshaji wa kidiplomasia, na mageuzi makubwa ya kiuchumi.

Kupitia mwongozo wa wazi wa Katiba ya Jamhuri ya Muungano wa Tanzania ya mwaka 1977, Dkt. Samia aliapishwa kuwa Rais mwanamke wa kwanza katika historia ya nchi, akichukua kijiti katika mazingira ya kipekee na kugeuza sintofahamu ya awali kuwa matumaini mapya kwa wananchi.

Kabla ya kushika wadhifa huo wa juu, Dkt. Samia alijijengea uzoefu mpana wa kisiasa na kiutawala tangu kujiunga na Chama Cha Mapinduzi (CCM) mwaka 1987, uzoefu uliomwezesha kushika nafasi mbalimbali za uongozi ndani ya serikali na chama, pamoja na kuwakilisha Kanda ya Afrika Mashariki na Kusini katika jopo la Umoja wa Mataifa lililohusika na uwezeshaji wa wanawake kiuchumi.

Uzoefu huo uliweka msingi thabiti wa mtazamo wake wa uongozi unaozingatia ushirikishwaji na ujasiri katika kusimamia uwajibikaji wa umma, mapambano dhidi ya rushwa, na utoaji wa haki bila kuvumilia uzembe.

Uwezo wake wa kiuongozi ulidhihirishwa tena alipochaguliwa rasmi na wananchi kushika usukani wa nchi katika uchaguzi mkuu kupitia tiketi ya CCM, ambapo Tume Huru ya Taifa ya Uchaguzi ilimtangaza mshindi kwa kura nyingi zilizompa mamlaka ya kuiongoza awamu ya sita.

Chini ya uongozi wake, Tanzania imeshuhudia mageuzi makubwa katika sekta za kipaumbele zikiwemo elimu, afya, miundombinu, na huduma za jamii, sambamba na usimamizi madhubuti wa uteuzi wa viongozi wa kitaifa uliofanyika kwa utulivu na bila misukosuko ya kisiasa.

Katika kujenga mshikamano wa kitaifa, Rais Samia anatumia falsafa yake ya 4R inayojumuisha Maridhiano, Ustahimilivu, Mageuzi, na Ujenzi mpya wa taifa.

Hivi karibuni, Julai 30, 2026, alifanya mazungumzo rasmi na viongozi wa vyama vya siasa katika Ikulu ya Dar es Salaam ili kuimarisha amani na mshikamano. Juhudi hizo za siasa za kistarabu zimekwenda sambamba na uundaji wa Tume ya Haki Jinai ili kuboresha mifumo ya kisheria nchini.

Katika nyanja ya kimataifa, serikali imeweka msisitizo mkubwa kwenye diplomasia ya uchumi, hatua iliyofungua milango ya ushirikiano na taasisi za kifedha, nchi mbalimbali, na mashirika ya kimataifa, huku Tanzania ikiendelea kuwa mwenyeji wa mikutano mikubwa ya kimataifa na kuimarisha nafasi yake katika Jumuiya ya Afrika Mashariki na eneo huru la biashara barani Afrika.

Kupitia ushiriki wake katika filamu ya The Royal Tour, utalii wa Tanzania umezidi kutangazwa duniani kote.

Sambamba na hayo, utekelezaji wa miradi mikubwa ya kimkakati umeendelea kuleta mageuzi makubwa ya kiuchumi, ikiwemo Mradi wa Kufua Umeme wa Julius Nyerere (JNHPP), ujenzi wa Reli ya Kisasa (SGR), na Daraja la Kigongo-Busisi, miradi ambayo imethibitisha utashi imara wa kisiasa katika kuleta maendeleo ya kudumu.

Ni dhahiri kwa siaza zake za kistaarabu,uongozi wake umeendelea kuwa chachu ya usawa wa kijinsia, ukiwahamasisha wanawake kushika nafasi za juu za maamuzi na kuhakikisha ushiriki wao unachangia kikamilifu katika ustawi wa taifa.

BANDARI YA DAR ES SALAAM NI LANGO KUU LA BIASHARA NA UCHUMI WA KIKANDA

2026-09-09T21:37:41.359+03:00

Bandari ya Dar es Salaam inazidi kuimarika kama lango kuu la kimkakati linalounganisha Afrika na masoko ya dunia, huku ikichochea ukuaji wa uchumi wa kikanda katika kipindi hiki ambacho mabadiliko ya minyororo ya ugavi duniani yanabadilisha mtazamo wa kibiashara.

Hayo yalisemwa na Mkurugenzi wa Kitengo cha Mashirika Makubwa wa Benki ya Absa Tanzania, Nellyana Mmanyi, wakati akizungumza katika mkutano wa GTR East Africa 2026 uliofanyika jijini Nairobi, Kenya, ukikutanisha wadau wa biashara, fedha, na uwekezaji.

Mmanyi alieleza kuwa mazingira yanayobadilika ya uchumi wa dunia yanaipa Afrika Mashariki fursa ya kipekee ya kuwa kitovu cha uzalishaji na kiunganishi cha kimkakati, akisisitiza kuwa eneo hilo linanufaika na msimamo wake wa kijiografia na uhusiano thabiti na Mashariki ya Kati na Asia.

Alibainisha kuwa bandari hiyo inafanya kazi kubwa ya kuhudumia biashara ya Tanzania pamoja na nchi jirani zisizo na bandari, zikiwemo Jamhuri ya Kidemokrasia ya Congo (DRC), Zambia, Uganda, na Rwanda, huku Ukanda wa Kati ukiendelea kuimarishwa kama njia kuu na muhimu ya usafirishaji wa mizigo ya kikanda.

Licha ya fursa hizo kubwa, Mmanyi alionya kuwa wafanyabiashara bado wanakabiliwa na vikwazo mbalimbali vya kuvuka mipaka, ikiwemo ucheleweshaji wa forodha, mifumo isiyo na ufanisi ya usafirishaji, tofauti za kanuni, na changamoto za miundombinu zinazoongeza gharama na muda.

Alisisitiza kuwa ili Eneo Huru la Biashara Barani Afrika (AfCFTA) liwe na tija ya dhati, linapaswa kutoka kwenye ahadi za kisera na kuwa utekelezaji wa vitendo kwa kuondoa vikwazo visivyo vya ushuru, huku benki zikiendelea kutoa ufadhili jumuishi na huduma za kifedha kusaidia kampuni kukabili changamoto za masoko ya kikanda.

mwisho

CCM NA ACT-WAZALENDO ZASISITIZA UMUHIMU WA SERIKALI YA UMOJA WA KITAIFA ZANZIBAR KWA USTAWI WA MUUNGANO

2026-09-09T21:32:16.670+03:00

Chama Cha Mapinduzi (CCM) kimesema Serikali ya Umoja wa Kitaifa Zanzibar ni muhimu kwa ustawi wa Tanzania, huku kikieleza kuwa mfumo huo unatoa uhakika wa utulivu unaonufaisha Jamhuri ya Muungano mzima kwa kuwa Zanzibar ni sehemu isiyotenganishwa ya muungano huo.

Msimamo huo ulitolewa jijini Dar es Salaam na Makamu Mwenyekiti wa CCM Tanzania Bara, Stephen Wasira, wakati akizungumza katika siku ya pili ya mkutano wa kitaifa wa wadau ulioandaliwa na Kituo cha Demokrasia Tanzania (TCD) kwa ajili ya kutafakari hali ya siasa nchini.

Wasira alisisitiza kuwa amani na utulivu wa pande zote mbili unategemeana tangu mwaka 1964 hadi leo, akifafanua kuwa changamoto za upande mmoja huathiri moja kwa moja upande wa pili hasa ikizingatiwa kuwa idadi kubwa ya Wazanzibari wanaoishi Bara ni moja ya matunda chanya ya Muungano huo.

Kwa upande wake, Mwenyekiti wa Chama cha ACT-Wazalendo, Othman Masoud Othman, alithibitisha utayari wa chama chao kushiriki katika Serikali ya Umoja wa Kitaifa na kueleza kuwa tayari wamewasilisha mapendekezo kuhusu mambo saba ya msingi.

Othman, ambaye aliwahi kuwa Makamu wa Kwanza wa Rais katika serikali hiyo, alieleza kuwa wanatambua vyema umuhimu wake katika kujenga mustakabali wa taifa kwa kuwa walishiriki kuipambania, akiongeza kuwa nia yao kuu ni kushirikiana na wenzao kujenga nchi kwa manufaa ya wananchi wote badala ya kususia.

Alitoa shukrani za pekee kwa viongozi wastaafu wa CCM kwa kuonyesha busara na mchango mkubwa uliowezesha kufikia upatanisho uliopo sasa.

Akiashiria mchakato wa mazungumzo ya kisiasa, Makamu Mwenyekiti wa ACT-Wazalendo Zanzibar, Ismael Jussa Ladhu, alieleza kuwa mafanikio ya maridhiano hayahitaji kila wakati kusimamiwa na watu kutoka nje, akisisitiza kuwa viongozi wanapokaa wenyewe na kuzungumza kwa uwazi huku wakisomana mioyo yao, wanaweza kupata ufumbuzi wa kudumu wa changamoto zao.

RAIS SAMIA ATAJWA KINARA AFYA YA MSINGI

2026-09-09T21:27:07.350+03:00

Waziri Mkuu wa Jamhuri ya Muungano wa Tanzania, Mhe. Dkt. Mwigulu Lameck Nchemba, amesema Rais Dkt. Samia Suluhu Hassan ametambuliwa kuwa kinara katika kuimarisha huduma za afya ya msingi kutokana na mafanikio makubwa yaliyopatikana nchini, hususan katika kupunguza vifo vitokanavyo na uzazi na kuboresha huduma za afya ya mama na mtoto.

Akifungua Mkutano wa Pili wa Kimataifa wa Aya ya Msingi (IPHC) kwa niaba ya Rais Samia katika Ukumbi wa Mikutano wa Kimataifa Jijini Arusha (AICC), Septemba 9, 2026, Waziri Mkuu amesema mafanikio hayo yameiwezesha Tanzania kutambulika kimataifa, ikiwemo Rais Samia kutunukiwa Goalkeeper Award mwaka 2025 na kuteuliwa kuwa kinara wa Umoja wa Afrika wa huduma za afya ya mama na mtoto mwaka 2026.

“Tanzania imepiga hatua kubwa katika kuhakikisha wananchi wanapata huduma za afya, na sasa Serikali inaelekeza nguvu zaidi katika kuboresha ubora na ufanisi wa huduma hizo,” amesema Waziri Mkuu. Ameeleza kuwa vifo vitokanavyo na uzazi duniani vimepungua kutoka takribani 328 hadi 197 kwa kila vizazi hai 100,000 kati ya mwaka 2000 na 2023, hali inayoonesha kuwa malengo ya afya yanaweza kufikiwa kwa kuongeza uwekezaji na kutekeleza mipango madhubuti.

Waziri Mkuu amesema Serikali imeendelea kuimarisha sekta ya afya kwa kuongeza miundombinu, wataalamu na rasilimali nyingine muhimu, huku zaidi ya watumishi 16,000 wa sekta hiyo wakiajiriwa kati ya Desemba 2025 na mwaka 2026. Aidha, Serikali imejenga nyumba zaidi ya 430 za watumishi wa afya na inapanga kujenga takribani nyumba nyingine 2,000 kuelekea mwaka 2030. Amesisitiza kuwa utekelezaji wa Sheria ya Bima ya Afya kwa Wote utawezesha wananchi, wakiwemo wenye kipato duni, kupata huduma bora kwa gharama nafuu na bila ubaguzi wa kipato.

Awali, Waziri wa Nchi, Ofisi ya Waziri Mkuu–TAMISEMI, Mhe. Prof. Riziki Shemdoe, amesema kati ya mahudhurio milioni 32.3 ya wagonjwa wa nje yaliyorekodiwa katika vituo vya afya vya umma, mahudhurio milioni 27.8, sawa na asilimia 86, yalikuwa katika vituo vya afya ya msingi. Aidha, kati ya vituo 8,288 vya afya vya Serikali nchini, vituo 7,946, sawa na asilimia 95.8, ni vya ngazi ya afya ya msingi vinavyomilikiwa na halmashauri. Ameongeza kuwa asilimia 96.6 ya vituo hivyo vimeunganishwa na mfumo wa GoTHOMIS na asilimia 87.6 vimeunganishwa na GePG, hatua inayoongeza ufanisi, uwazi na usimamizi wa mapato na huduma.

Kwa upande wake, Mkuu wa Mkoa wa Arusha, Mhe. CPA Amos Makalla, amesema Mkoa huo umepokea zaidi ya Sh bilioni 94 kwa ajili ya kuboresha huduma za afya ya msingi. Uwekezaji huo umechangia kuongezeka kwa vituo vya kutolea huduma za afya kutoka 382 hadi 450, kuajiriwa kwa watumishi wapya 823 wa kada za afya na kupatikana kwa magari 27 ya kuhudumia wananchi, hatua zilizosaidia kupunguza vifo vya akina mama na watoto.

Akizungumza kwa niaba ya asasi za kiraia zinazoshughulikia masuala ya afya nchini, Bw. Amson Mwendamake amependekeza kuimarishwa kwa ushiriki wa jamii katika kupanga, kutekeleza na kufuatilia mipango na bajeti za afya ya msingi. Pia, amesisitiza umuhimu wa kuongeza ufadhili wa ndani, kuwalinda wananchi walio katika mazingira hatarishi dhidi ya gharama kubwa za matibabu na kuimarisha uwajibikaji pamoja na ushirikiano kati ya Serikali na wadau.

Mkutano wa Pili wa Kimataifa wa Afya ya Msingi unafanyika jijini Arusha kuanzia Septemba 9 hadi 11, 2026, ukiwakutanisha wataalamu wa kada mbalimbali za afya kwa ajili ya kujadili na kutathmini masuala ya afya ya msingi. Mkutano huo unaongozwa na kaulimbiu isemayo: “Kuelekea upatikanaji wa huduma za afya kwa wote: Kuimarisha ugharamiaji endelevu wa huduma za afya, ufanisi na uboreshaji wa huduma katika ngazi ya msingi.”

GESI YA TANZANIA, MIKONO YA WATANZANIA: BOMBA LA KM 22 KISEMVULE–MBAGALA LAJENGWA NA WATANZANIA

2026-09-09T12:38:57.827+03:00

Mikono ya Kitanzania, Gesi ya Tanzania: Bomba la Gesi kutoka Kisemvule–Mbagala Linaenda Kasi

Kampuni ya Rashal Energies Limited, chini ya Afisa Mtendaji Mkuu Farhiya Warsame, yajenga bomba la kilomita 22 kwa fedha, wahandisi na wafanyakazi wa Kitanzania, likilenga viwanda zaidi ya kumi, kituo cha DART Mbagala, na mtandao wa vituo vya gesi ya CNG utakaobadilisha usafiri na nishati safi ya kupikia jijini Dar es Salaam

Na Mwandishi Wetu, Mbagala, DSM

TANZANIA imefikia hatua ya kihistoria katika mageuzi yake ya nishati. Kwa miaka mingi, mazungumzo kuhusu hazina kubwa ya gesi asilia nchini yalijikita zaidi kwenye uwezekano wa baadaye. Leo, uwezekano huo unabadilika kuwa nishati halisi, safi na ya bei nafuu inayotumika barabarani, viwandani na majumbani.

Wakati Shirika la Maendeleo ya Petroli Tanzania (TPDC) likistahili sifa kubwa kwa kuweka dira ya kimkakati na msingi wa kisera, sifa za utekelezaji zinaelekea kwa kampuni za ndani zinazobadilisha dira hiyo kuwa miundombinu halisi ardhini, ikiongozwa na Rashal Energies Limited.

Ujenzi wa bomba la kilomita 22 kutoka Kisemvule hadi Mbagala ulianza rasmi Julai 28, 2026, baada ya vibali na idhini zote za kisheria kukamilika Mei 2026 na maandalizi ya awali kukamilika mwezi Juni mwaka huu.

Hadi sasa, kilomita mbili za bomba zimeshaunganishwa, kilomita moja na nusu zimechimbwa mfereji, na sehemu za kwanza tayari zimewekwa ardhini, kufunikwa na kufanyiwa majaribio kwa mafanikio. Kampuni inalenga kukamilisha ujenzi wa bomba zima ifikapo Januari 2027.

Kazi zinazofanyika ni pamoja na kuunganisha mabomba kwa mfumo wa butt-fusion, uchimbaji sahihi wa mifereji, uwekaji wa tepu za tahadhari, na majaribio ya shinikizo la maji hatua zote za kiufundi zikitekelezwa vizuri licha ya mazingira magumu ya mjini yenye shughuli nyingi.

Aidha kinachoutofautisha mradi huu si tu kile utakachosafirisha, bali ni nani anayeujenga. Bomba hili linatekelezwa kwa mtaji binafsi wa Kitanzania kikamilifu, na kila mkataba wa ujenzi kwenye njia hii umepewa makandarasi wa ndani.

Timu zinazofanya kazi za uunganishaji wa mabomba, uchimbaji wa mifereji, ufunikaji na majaribio ya shinikizo ni Watanzania, na usimamizi wa kihandisi eneo la mradi pia ni wa Kitanzania.

Hili ni jambo la maana kwa sekta ambayo, kihistoria, imekuwa ikitegemea zaidi utaalamu wa kigeni. Ujenzi wa mabomba katika eneo la mjini lenye watu na miundombinu mingine ni kazi isiyovumilia makosa, inahitaji umakini, usimamizi madhubuti wa mifereji karibu na miundombinu hai ya maji, umeme na mawasiliano, pamoja na utaratibu wa majaribio usio na nafasi ya makosa.

Hadi sasa, mradi haujarekodi uharibifu wowote kwa miundombinu ya wahusika wengine, wala kiungo chochote kilichokamilika hakijahitaji kufanywa upya, rekodi iliyofikiwa na timu za ndani zikifuata taratibu za kimataifa.

Chini ya uongozi mahiri wa Farhiya Warsame, Afisa Mtendaji Mkuu wa Rashal Energies inathibitisha kuwa makampuni ya Kitanzania yana uwezo wa kiufundi, dira na uwezo wa kutekeleza miradi mikubwa na migumu ya miundombinu ya gesi.

Timu za mradi zimefanikiwa kuratibu kazi kwa ushirikiano na TANROADS (mmiliki mkuu wa njia), TANESCO, DAWASA na TTCL zikifikia rekodi safi na hakuna usumbufu wowote kwa miundombinu ya wahusika wengine, na hakuna ajali yoyote iliyosababisha upotevu wa muda wa kazi.

Kiwango hiki cha nidhamu ya kiutendaji kinaweka kiwango kipya kwa makampuni ya kihandisi ya ndani katika Afrika Mashariki.

Ujuzi unaojengwa kwenye mradi huu hauishii hapo. Uunganishaji wa mabomba kwa kuchomelea(welding), upimaji wa njia, majaribio ya uimara wa bomba na usimamizi wa miradi ya mjini ni ujuzi unaoweza kutumika katika kila mradi wa usambazaji gesi utakaohitajika nchini kwa miongo ijayo, huku wafanyakazi wanaofunzwa kwenye bomba la Kisemvule Mbagala wanawakilisha uwezo utakaobaki Tanzania.

Bomba hili litahudumia zaidi ya viwanda kumi kwenye ukanda wa Kisemvule Mbagala, likiwaunganisha kila mmoja kwenye gesi asilia badala ya dizeli na mafuta mazito kwa ajili kuendesha mitambo ya kuzalisha umeme wa dharura.

Kwa miaka mingi, viwanda vilivyopo Mbagala na maeneo jirani vimekuwa vikibeba gharama na usumbufu wa kusafirisha mafuta kwa malori, ujio wa bomba hili utabadilisha hilo na kuleta usambazaji endelevu wenye mita, kwa gharama ya chini kwa kila kipimo cha nishati na uzalishaji mdogo zaidi wa hewa chafu.

Ujenzi wa Kituo Kikuu (Mother Station) Mbagala:

Awamu ya Kwanza ya mkakati wa Rashal inajikita kwenye kituo kikuu cha Mbagala, kitakacho shindilia gesi moja kwa moja kutoka kwenye bomba kwa ajili ya kujaza magari na kupakia mzigo wa kusafirisha kwenda vituo vidogo.

Kituo Kidogo (Daughter Station) Vijibweni:

Ili kupambana na changamoto za kijiografia na kuhudumia viwanda katika maeneo ya Kigamboni, kituo maalum kinaanzishwa Vijibweni, kikihudumiwa na magari maalumu yenye gesi iliyoshindiliwa.

Awamu ya Pili:

Katika awamu itakayofuata, vituo vitano vya gesi asili(CNG) vitajengwa, ili kuwa na mtandao imara utakaopunguza gharama za mafuta kwa waendeshaji wa usafiri na kupunguza uchafuzi wa hewa jijini Dar es Salaam.

Kituo cha DART Mbagala:

Bomba hili pia litasambaza gesi asilia kwenye kituo cha mfumo wa mabasi ya mwendokasi (DART) kilichopo Mbagala. Mfumo wa DART husafirisha mamia kwa maelfu ya abiria kila siku, hivyo upatikanaji wa gesi kituoni hapo unafungua njia kwa mabasi kutumia CNG badala ya dizeli kupunguza gharama za uendeshaji na uchafuzi wa mazingira katika njia zenye shughuli nyingi zaidi jijini.

Mtandao wa Kitaifa wa CNG: Hali Ilivyo Sasa

Mradi wa Kisemvule-Mbagala haujitokezi kwenye ombwe; unakuja wakati ambapo taifa tayari limeanza kupiga hatua za dhati katika matumizi ya nishati ya CNG, ingawa bado kuna safari ndefu ya kwenda.

Kwa mujibu wa taarifa ya Serikali ya Februari 2026, nchi nzima ilikuwa na jumla ya vituo kumi na moja (11) vya CNG, ambapo vituo tisa (9) vilikuwa jijini Dar es Salaam, kimoja mkoa wa Pwani na kingine mkoa wa Mtwara.

Idadi hiyo ndogo, ukilinganisha na mahitaji ya taifa, tayari imeambatana na mwamko mkubwa miongoni mwa wamiliki wa vyombo vya moto: takwimu iliyochapishwa mwezi huohuo zinaonyesha zaidi ya magari 15,000 nchini yalikuwa tayari yakitumia CNG, kutoka kwenye magari binafsi hadi bajaji, dalili tosha kuwa soko la nishati hii safi na nafuu linakua kwa kasi kuliko miundombinu iliyopo kuihudumia.

Serikali, kupitia TPDC, imekiri pengo hilo na inaonesha nia ya kulizibua kwa kasi zaidi. Taarifa nyingine ya TPDC ya mwaka 2026 inaeleza mpango wa kuwekeza zaidi ya Shilingi bilioni 22.06 katika ujenzi wa vituo vinavyohamishika (mobile CNG stations) katika mwaka wa fedha 2026/27, hatua itakayosaidia kusogeza huduma karibu zaidi na maeneo yasiyo na miundombinu ya kudumu ya mabomba. Ni ndani ya muktadha huu wa kitaifa unaokua ndipo mradi wa bomba la Kisemvule-Mbagala, pamoja na mtandao wake wa vituo vitano vitakavyofuata, unapopata uzito wake wa kipekee, si tu kama uwekezaji mmoja wa kibinafsi, bali kama tofali muhimu litakalosaidia kuharakisha lengo pana la taifa la kuwa na mtandao imara, salama na wa uhakika wa nishati safi na nafuu kwa Watanzania wengi zaidi.

Kuelekea nishati safi ya kupikia

Mpango wa mbali zaidi wa mradi huu ni majumbani. Rais Samia Suluhu Hassan alizindua Mkakati wa Kitaifa wa Nishati Safi ya Kupikia mwezi Mei 2024, ukiweka lengo la angalau asilimia 80 ya Watanzania kutumia nishati safi ya kupikia ifikapo mwaka 2034.

Gesi asilia ya mabomba ni miongoni mwa suluhisho mojawapo linaloweza kufikia kaya nyingi za mjini kwa gharama ndogo ya matumizi ya kila siku. Uwepo wa mfumo wa usambazaji kupitia Mbagala unaweka msingi mara njia kuu na mtandao wa ndani unapokuwepo, muunganiko wa kaya unakuwa karibu zaidi.

Rashal Energies imeeleza kuwa bomba limebuniwa likizingatia upanuzi huo wa baadaye.

Ni suala pia la afya ya jamii. Uchafuzi wa hewa ndani ya nyumba unaotokana na nishati za jadi za kupikia unahusishwa na vifo vya makumi ya maelfu nchini Tanzania kila mwaka, jambo ambalo limekuwa likiwaathiri zaidi wanawake na watoto. Kila kaya inayoachana na matumizi ya mkaa ni faida inayoweza kupimika.

Hata hivyo utekelezaji wa miundombinu ya CNG kwa ajili ya Kituo Kikuu cha Mbagala na vituo vidogo vya Vijibweni na DIT umekabidhiwa kwa muungano wa makampuni saba yenye utaalamu wa kipekee kuanzia ujenzi wa miundombinu, utengenezaji na ufungaji wa mabomba, mawasiliano ya simu, teknolojia ya ufuatiliaji wa kidijitali, hadi vifaa maalum vya CNG.

Muundo huu wa ushirikiano unalenga kupunguza hatari za ucheleweshaji, kuhakikisha ubora na uzingatiaji wa taratibu, na kuepusha changamoto za kiufundi wakati wa uzinduzi huku ukijumuisha matumizi makubwa ya bidhaa na huduma za ndani.

Mradi sasa umeingia awamu ya kuongeza kasi. Timu za ziada za ujenzi zinapelekwa ili kufungua maeneo kadhaa ya kazi kwa wakati mmoja, huku timu maalum zikipangwa kushughulikia sehemu mbili nyeti za hali ya hewa kwenye njia hiyo mto Mzinga na Bwawa la Vikundu ili zote zikamilike ndani ya Septemba, kabla ya mvua za El Niño zinazotarajiwa.

Kampuni inaeleza kuwa kasi hii inatokana na uhusiano mzuri wa kikazi uliojengwa kwenye ukanda huo. Wawakilishi wa TANROADS, TANESCO, DAWASA na TTCL wapo eneo la mradi na timu za mradi kila siku, huku mamlaka za Wilaya za Kisemvule na Mbagala zikisaidia upatikanaji wa maeneo na ushirikiano wa jamii katika kipindi chote.

Katika taarifa yake, Rashal Energies Limited ilisema mradi huu unafadhiliwa na Watanzania, kuhandisiwa na Watanzania na kujengwa na Watanzania, kwa manufaa ya viwanda na kaya za Kitanzania, ikisisitiza kuwa gesi ni mali ya taifa, na ujuzi wa kuisambaza unapaswa pia kuwa mali ya Watanzania. Gesi inayosafirishwa kwenye bomba hili inatolewa na TPDC.

Bomba la Gesi Asilia kutoka Kisemvule hadi Mbagala linaelezwa kuwa hatua muhimu katika safari ya Tanzania kuelekea uchumi wa kijani, msingi imara wa viwanda, na jamii yenye uwezo zaidi. TPDC inastahili kupongezwa kwa kuweka mazingira wezeshi yanayoamini uwezo wa ndani, lakini ni uwekezaji wa kijasiri, ustadi wa kiufundi, na uongozi thabiti wa Farhiya Warsame na Rashal Energies unaoleta dira hii nyumbani. Huku timu zikijiandaa kushinda maeneo magumu ya Mto Mzinga na Bwawa la Vikundu kabla ya mvua za msimu, Watanzania wanaweza kusherehekea shujaa wa nishati wa ndani anayewaongoza kuelekea mustakabali safi na wa kujitegemea.

Mwisho

MAGAZETI YA LEO JUMATANO SEPTEMBA 9,2026

2026-09-09T00:56:48.343+03:00

Magazetini

SUGUYE AITIKIA KILIO CHA WATOTO WA KAHAMA PEACE ORPHAN, AHAIDI TOFALI ELFU 3 NA MIFUKO 50 YA SARUJI

2026-09-08T23:31:05.358+03:00

NA NEEMA NKUMBI, KAHAMA

PROPHET Nicolaus Suguye ameahidi kutoa matofali elfu tatu pamoja na mifuko 50 ya saruji kwa ajili ya ujenzi wa uzio katika Kituo cha Kahama Peace Orphanage Center, kilichopo Mtaa wa Dodoma Viwandani, Kata ya Zongomela, Manispaa ya Kahama.

Ahadi hiyo ameitoa leo Septemba 8, 2026, baada ya uongozi wa kituo hicho kueleza changamoto ya ukosefu wa uzio, ambao umekuwa ukihatarisha usalama wa watoto wanaolelewa katika kituo hicho.

Akizungumza baada ya kupokea msaada huo, Mkurugenzi wa Kahama Peace Orphanage Center, Abubakari Issa, amesema ukosefu wa uzio ni changamoto kubwa kwa kituo hicho, kutokana na baadhi ya watoto kutoka nje na kukutana na mazingira ambayo yanaweza kuhatarisha usalama wao.

Issa amesema kituo hicho tayari kimeanza kuweka msingi wa ujenzi wa uzio, lakini kimekuwa kikihitaji msaada wa vifaa ili kukamilisha kazi hiyo.

“Watoto wetu amekuwa wanapotea, watoto wetu walikuwa wanakutana na mambo yabkuhatarisha usalama wao kama kung'atwa na mbwa kutokana na ukosefu wa uzio, lakini kwa sababu Prophet Suguye amekuja na ameelewa changamoto yetu, sina shaka kwamba watatusaidia,” amesema Issa.

Amesema ujenzi wa uzio utasaidia kuboresha usalama wa watoto na kuwezesha kituo kuendelea kutoa malezi katika mazingira salama kwanibwanapokea watoto wadogo mpaka chini ya miaka mitano.

Kwa upande wake, Prophet Suguye amesema jamii ina wajibu wa kushirikiana katika kuwasaidia watoto wenye uhitaji, akisisitiza kuwa msaada haupaswi kuishia kwenye chakula pekee, bali pia kuangalia mahitaji mengine muhimu yanayoweza kuboresha maisha na mustakabali wa watoto hao.

Mbali na Kahama Peace Orphanage Center, Suguye ametembelea pia New Hope Orphanage Center, kilichopo Mtaa wa Mwime, Kata ya Zongomela, ambapo ametoa mahitaji mbalimbali kwa ajili ya watoto wanaolelewa katika kituo hicho.

Miongoni mwa mahitaji hayo ni sukari, maharage, sabuni, mafuta ya kupikia, unga wa sembe pamoja na mahitaji mengine ya matumizi ya kila siku.

Msimamizi wa New Hope Orphanage Center, Scolastika Fred, amesema kituo hicho kinatoa malezi pamoja na elimu kwa watoto wenye uhitaji, kuanzia shule ya msingi hadi ngazi ya chuo kikuu.

“Tuna kituo kinachotoa malezi pamoja na elimu kwa watoto wenye uhitaji kusoma, kuanzia shule ya msingi mpaka chuo kikuu. Tunashukuru sana kwa ujio wenu, tunaomba Mungu awabariki na awaongezee kila siku,” amesema Scolastika.

Mmoja wa watoto wanaolelewa katika kituo hicho Judith Suleman amemshukuru Suguye kwa msaada huo, akisema jamii ina nafasi kubwa katika kuwasaidia watoto wenye uhitaji.

Amesema licha ya changamoto wanazokutana nazo, baadhi ya watu wamekuwa wakijitolea kuwasaidia, jambo analoliona kuwa ni sehemu ya mshikamano wa jamii.

“Tunawashukuru sana hatuna cha kuwalipa zaidi ya kuwaambia tunawashukuru, Mungu ambariki kila anayejitolea kutusaidia,” amesema mtoto huyo.

Ziara hiyo imefanyika ikiwa ni sehemu ya shughuli za Suguye katika Manispaa ya Kahama kabla ya kuanza kwa mkutano wa injili unaotarajiwa kuanza kesho Septemba 9, 2026.