Huy-ag nin Kamangnuhan (Plane of Awareness)

Ang Kapungawan

2011-06-10T07:39:00.002+08:00

An kapungawan sarong tanda nin daeng katapusan na pagkamoot; sarong simbolo nin dakulang kaugmahan sa pag-abot kan aldaw na kamo giraray magkakaibahan sagkod pa man. Maski si AMA, napupungaw man sato, pero natitios niya gabos para lang kita gabos maoogma sa sadiri tang kahigosan asin pagsunod kan saiyang mga kasugoan.
Kadakol na tawo an napapasala sa pag-isip na an kapungawan sarong tanda nin kaluyahan. An kapungawan sarong ingrediyente nganing makanood kitang mamoot sa mga bagay o tawo na napaharayo sato. Satong pagtan-aw kan mga nakaagi asin pagrirop sa maarabot na mga panahon tanganing magin kasararo giraray. Kun mayo an kapungawan, ano baya an kaoogmahan sa harayong panahon nin pagrayo asin pagrani.
Magayunon na paghurop-huropan an mga nakaaging maogmahon na pag-iribahan sa sarong lugar na kun saen, an paghirirasan daeng sagkod. Kung minsan, naisip ta na an kapungawan sarong limitasyon tanganing kita mawaraan na nin gana para maghingoha sa ikakarahay sa maarabot. Totoo, pero bako ini sarong kaulangan sa pagpadagos kan mga napun-an nang mga marahayon na gibo asin magin inspirasyon tanganing maghingohang makamit an kaogmahan dara nin kapungawan.
An estorya kan sutil na ake sa Bibliya iyo an saro sa mga ehemplo na puwedeng pag-adalan.
An ake nagmawot na magharayo sa buhay niya bilang sarong ake sa saiyang ama asin mamuhay na solo sa kayamanan na saiyang minana. Alagad, pinaggastos niya ang kayamanang-mana sa mayong kamanungdanan na bisyo asin iyo na dagos an kapinunan kan saiyang dakulaon na pagbabago---sa pananaw nin buhay---sa tahaw kan malipunguton na kamugtakan bilang sarong surugoon na nagkakakan nin bahog kan urig.
Hale sa marangyaon na kamugtakan, nagduman sa makangorongirhat na kapobrehan sa pangangaipo pisikal. Nagutom siya, pero idto resulta kan sala niyang isip asin gibo. Nagmawot siyang magin maogma sa paggamit kan kayamanan na minana sa magurang, pero napasala siya sa pag-isip asin paggamit kaini, kun kaya nakamati siya nin kapungawan sa dakulaon na pagkamoot asin atensiyon na pinagtatao kan saiyang namomoot na magurang. Kaya nin huli sa kapungawan niyang namatean, nagdesisyon siyang magbalik giraray pero bako nang sarong ake kundi sarong hamak na surugoon na sana.
Pero hilnga kun ano ang namamatian kan saiyang ama na nagparahalat sa saiyang pagbalik. Ang kapungawan na namatian kan ama sa ake, sarong dakulaon na manipestasyon nin pagkamoot na tanganing sa harayo pang kinamugtakan kan saiyang ake, namati niya ang makuniot na pangyayari sa buhay kaini. Harayo pa, nabisto na niya tulos-tulos an namomotan niyang ake na haloy na nawara sa poder niya. Kaya, nagpapiyesta siya sa bilog niyang pagharongon tanganing selebraron ang pagkabuhay-liwat kan saiyang ake na haloy nang nagadan, alagad uya sa atubangan niya buhay!
Arog man kaini ang namamatian ta sa lambang tawo na satuyang namomotan asin nagrayo sato. An dakulang kahaditan sa puso iyo an nagtutulak sato tanganing mapungaw kita. Alagad, kung gamiton ta an mga kaluyahan na ini tanganing maintindihan ta kun ano ang kahulugan sa kabaliktaran kaini, kadunungan an satuyang maguguno asin ini sarong dakulaon na kayamanan nin puso na tanganing magin responsable kita sa pag-atubang kan mga pagsubok na nag-uulang sa pag-abot kan nagdadangadang na dakulaong kaogmahan.
Hilingon ta an kapungawan bilang positibong ingrediyente kan dakulaong pagkamoot na nakasaray sa puso nin lambang tawo asin mas lalo na ki AMANG LANGITNON na nagtao kan susi nin pagtugot satuya [ara magpasiring digde sa kinaban tanganing mamuhay bilang sarong mortal asin agihan an pagsakit asin kaogmahan, an sakripisyo asin trayumpo; makanamit nin pait asin hamis, makaaram kung ano an marahay asin maraot; makapaghinimbang nin tama o mali.
Magpasalamat kita sa gabos na satuyang naagihan, inaagihan o maaagihan sa buhay na ini nin huli ta iyo ini ang katuyuhan kan gabos kun tadaw ta yaon kita ngunyan.

Mayong dakulang pagbabago sa gobyerno kundi sana mga tawo

2011-01-25T16:09:00.003+08:00

Sa laog nin duwang bulan, pinag-obserbaran ko ang daralagan sa gobyerno nasyonal asin lokal. Asin sa panahon na pinagsusurat ko ini, grabeng gayo an sakuyang pinag-iisip kun paano pinagmaneho kan gobyerno an industriya kan petrolyo asin kun ano an dakulang dara kan dagdag na presyo kaini sa saradit na mga tawo na yaon sa makuniot na pagtios sa arog kaining panahon.

Nag-obserba ako sa mga parasira kong pag-iriba (ta ako baya, parasira man kaidto habang mayo pa akong trabaho) ta aram kong gayo kung gurano an saindang paghingoha tanganing makakua nin pantungod nin bagas o pambakal nin mga gamit o pamasahe kan saindang eskuwela.

Sa halawig na panahon na ako kairiba ninda, nahihiling ko na mas lalo pa sindang nagtitios sa ngunyan. Dagdag pa kaiyan, kulang ang saindang panremedyo kun an saindang mga kaarakian nagkakaigwa nin kamatean. Sa arog kaining kamugtakan, nahihiling ko na dagos pa man giraray an saindang pakikipaglaban sa katiosan. Sa kadikiton na dakop, kun minsan kulang pa sa sarong kilo, grabeng kapung-utan an saindang namamatean na kung minsan binabasol na ninda an Diyos kun tadaw ta yaon sinda sa arog kaining tios na kamugtakan. Naghihiling sinda sa mga tawong may kadakol na kuwarta, alagad yaon sana sa pagpapasikat kan saindang kaoragan o nagpapaara sa dakulaon nindang kita.

Laen pa sa mga parasira, nagbisita man ako sa mga amigo kong kargador o mga parabagahe sa duwang porte nin samuyang banwaan na San Jose asin naghahapot-hapot kun kumusta na man an saindang kamugtakan. Alagad an simbag ninda saro sanang tanog: “Iyo man giraray…hingoha nganing may kakanon an pamilya”.

Dae ko daw gayo maintindihan kun ano na man nanggad an daralagan sa pangobyerno ta sa ngunyan. Kun baga tabang sa tawo o tabang sa pansadireng ambisyon sana. Nin huli ta, an mga darakulang pulitiko lalo na nasyonal, harayoon man baga ang pinag-oorolayan. Bako man sa ikakarahay kan dakulang porsiyon kan satuyang nasyon, kundi karahayan kan saindang masunod na lutsada sa pulitika. Grabe sanang kahambugan an nahihiling ko sa telebisyon, mga patutsadang kanigoan, na sagin para sa karahayan kan kagabsan.

Sa Kongreso kan Pilipinas, kanigoan sanang mga ley ang pinaghihimo na an tema haros regulasyon para sa ikakarahay kan darakulang mga negosyos, ngani daa makakapagtao nin kadakol na trabaho. Pero hilnga, haen an pinagpromisang empleyo kan mga darakulang negosyong ini. Nagkapira sana an yaon sa laog na may suweldong tultol, alagad an haros gabos, anas kontraktuwal dikit sana an permanente.

An gobyerno nagtitiwala sa mga negosyante, pero an mga negosyante, kulang an tiwala sa mga tawo. Grabe nang gayo an perwisyo lugod an nangyayari sa panahon ngunyan kan satuyang gobyerno.

Nagngangana sana an kahugakan kan mga tawong pinagsusuwelduhan. Arog baga sa mga paratukdo lalo na sa elementarya. Naobserbaran ko sa distrito o maski ngani sa kabilugan kan DEPED, na an mga paratukdo, lalo na kun permanente, hinuhugakan nang gayo magtukdo o maglaog sa klase ninda tanganing tukdoan an mga kaarakian. Haros natapos an sarong semana na nakatutok an mga maestra sa pag-atendir sa mga seminar na binabayadan an mga imbitadong mga matitibay kunong mga yaon sa akademiya tanganing tukdoan an mga paratukdo kun paano tukdoan an mga patal o madudunong nindang mga estudyante.

Digde ko sinasabi na pinagnenegosyo na kan mga propesyunal niyatong mga yaon sa akademiya an pagigin “Ph.D.” ninda tanganing magkita nin kuwarta na kun minsan hale sa kontribusyon kan mga kaarakian o tios na mga magurang. Garo baga ngunyan an DEPED negosyo na kan seminar o workshop kan mga tawong yaon sa itaas na awtoridad. O sa diretsong pagtaram, maestra na ngunyan an pinagnenegosyo ta may pambayad sindang kontribusyon hale sa pundo kan PTCA o boluntaryong kontribusyon kuno kan mga estudyante.

Makangisihon na maray pagmasdan. Dae lamang pagkamangno an mga inosenteng kaarakian na pinagnenegosyohan na sinda sa simplehon sanang paagi, asin pati an saindang mga maestro asin maestra, kinubalan na an mga lubot sa tukawan kan labi-labing seminar, training o workshop na saindang pinag-atendiran, alagad pagbalik sa laog nin klase, iyo man giraray. Mayong pinagbago sa sistema asin metolodiya kan saindang pagtutukdo.

Laen pa diyan, kadakol na mga paratukdo na nadadangog kan mga eskuwela na nagmumuda. Hilinga na. Ata ngani sinda an dapat na magpahiling nin maray na pag-uugali, iyo pa lugod si nagpapahiling nin maraot na
wisyo kan buhay ninda. Kaya ano an luwas kan mga eskuwela ta sa ngunyan?…Kulang na kulang na gayo an saindang pagkanood sa mga leksiyon na dapat kuta man ipinapamuhay kan mga paratukdo. An sistema kan edukasyon ta sa ngunyan, iyo an nagpalala sa sitwasyon nin pagtios sa gabos na mga kahimanwa ta sa bilog na nasyon. Asin sa pagtubod ko, arog kaini an nangyayari nin huli ta malala nang gayo an sitwasyon nin korapsyon sa lindong kan akademiya ta sa ngunyan. Sabi ngani kaiyan, mas maray magpaadal sa mga pribadong eskuwelahan, alagad hilnga man an matrikulasyon, aba anang langkaw, dae kaya kan pobre.

Iyo, yaon kita sa demokratikong padalagan kan gobyerno; alagad hilnga an sobrang korapsyon asin pandadaya kan mismong mga tawo na yaon sa pangogobyerno asin yaon sa pagnenegosyo. Garo baga sa paghiling ko, haros gabos na hiro ngunyan ninda, perak an pinag-eestoryahan. Kun gurano an gastos, asin gurano an ginansiya.
Seguro sa puntong ini, boot kong magpagiromdom sa mga tawong igwahon na. Tadaw baya ta hararom an saindong mga bulsa tanganing makatabang kamo sa mga tawong nagtitios. Minsan pinagsasabi nindo, ang tawong nagtitios may kahugakan. Sa tuno pa sana kan saindong mga kaisipan, winaraan na nindo nin paglaom kami na mga nagtitios.

Sa ibong na lado, pagiromdom sa mga pobre: Dae po kita masupog sa mga tawong mayayaman o may inadalan. Kun minsan, sa grabeng katiosan, nakakalingaw kita na pararihas kitang may buhay. Kaipuhan ta sinda, tanganing kita magkaigwa nin oportunidad. Alagad bako ini boot sabihon na lingawan ta man an satuyang marahayon na prinsipyo asin paninindugan sa buhay. Maski na ngani na bakong parihas makiiba an mayayaman, pero pararihas kita sa Kagurangnang Diyos.
Maghingoha sana kita, maski mayong nagdadangog sa boses tang paos; maski mayo kitang nahihiling na pagbabago hale sa gobyerno.

Giromdoma baya ini tugang: “An tawong pano an bulsa sa pangungurakot, pag-abot nin tamang panahon, sa Diyos sinda magbabayad asin matatakot.”

Serbisyo sa tawo, Serbisyo sa Diyos; Ini pamana para sa maarabot na henerasyon

2010-11-18T21:48:00.002+08:00

Bako pang gayo hinog an mga lokal na opisyales kan lambang banwaan o barangay laen lang sa mga nagkapira na talagang nag-aradal tanganing magin epektibo sa pagpapamahala ninda sa laog kan saindang mga nasasakupan.
Pero sa dae pa sanang nahaloy na pa-seminar na ginibo sa laog kan Ateneo de Naga University mapanungod sa mga nagkaginibohan kan mga lokal na mga opisyal sa banwaan asin an saindang ginibo kung paano ninda akseptaron an katotohanan na igwa nin mga banwaan an nagigin epektibo an saindang pagpapamahala nin huli ta an saindang mga intensiyon nakatutok para sa karahayan kan saindang mga konstituwente.
Maogmahon akong gayong mabisto si Mayor Percival del Castillo kan Mobo, Masbate na iyo an naghiras kan saiyang naginibohan para sa karahayan kan saiyang banwaan. Sa paghiling ko pa sanang enot ki Mayor del Castillo naririsa kong gayo na siya sarong mabooton na opisyal. Mas lalo ini nagin kumpirmado kan siya nagtaram sa atubangan niyamong mga partisipante sa seminar.
Sa paghiling ko, simplihon sana ang ginibo ni Mayor del Castillo. An sabi niya na kan enot siyang nagtukaw sa banwaan nin Mobo bilang Mayor, kadakol na mga negatibong aspeto kan mga empleyado na kung bako sana siyang abogado possible na napasala kunta na siya sa pagpapamahala kan saindang banwaan.
Kan siya magtukaw bilang bag-ong Mayor, haros gabos na mga empleyado kan munisipyo mga tawohan kan dating mayor, kaya nadepisilan siyang gayo kung paano niya gigibohon an saiyang mga plano tanganing magin maasenso an saiyang banwaan.
Sinabi kan saiyang mga adviser na taranggalon an mga empleyado na pag-iriba kan dating mayor asin iribay an saiyang sadireng plano. Pero an ginibo niya, kinaolay niya sa mauswag na diskusyon an mga tawong ini, sagkod na nagin amigo ninda siya. An kagayunan lang sa Mobo, Masbate iyo na an mga namamahala igwa talagang intensiyon na mapakarhay an saindang banwaan.
Siring man kuta ang isipon kan ibang mga lokal na ehekutibo na embes baga na magtaranggal nin mga empleyado kan munisipyo, kaipuhan sana na magin sarong professional tanganing an mga plano para sa mga kahimanwa ninda an dapat na paurog sa gabos.
Mapanungod sa paghanda kan badyet para sa mga gastuson sa pagpapadalagan na gobyerno lokal, an may susi para sa epektibong serbisyo para magin lehitimo asin uyon sa ley iyo an Vice Mayor na iyo an namamayo kan Sangguniang Bayan. An lehislaturang pagtukar kan mga importanteng isyu kan banwaan asin mataw-anan ini nin magkanigong atensyon yaon sa mga kamot kan mga lehislador na dapat na nagmaigot sa pag-adal tanganing maresolbaran an problema kan mga namamanwaan.
Alagad sa satuyang obserbasyon, kakadikit sana sa mga kagawad kan munisipyo an igwa nin dakulaong interes para pag-adalan an mga puwersa o impluwensiya na nagtatao nin motibasyon sa mga namamanwaan tanganing aktibong makipagsumarong pag-adalan an saindang mga pangangaipong mayor na nakaka-apekto sa saindang pan-aro-aldaw na pagkabuhay.
Haputon ta daw kamo, pira sa mga kagawad nindo sa munisipyo an nagbisita asin inaram lamang ang saindong mga problema. Bako daw na an ibang mga kagawad pinag-iisip na tulos an sunod niyang plano para sa maabot na eleksyon? Kanigoan pati an pasali kun yaon sa laog kan Sanggunian asin kun minsan nagin palta-rason an mga kaisipan na nagpapahiling sana man kan saiyang kasutilan sa mga mayor na mga plano na puwedeng makapagtao nin marahayon na epekto para sa mga kahimanwa ninda.
An tunog nin pulitika sa laog kan Sangguniang Bayan minakalembang sana kun ang pag-oorolayan na iyo an badyet para sa komon na pangangaipo kan mga kahimanwa ninda. Sa mga nagkokontrang mga kagawad na kun minsan an prinsipyo paraot sa mga nakatukaw sa puwesto, dae niyang gayo pinaghihimay an importansiya kan mga proyektong nakakapagtao nin kahinggianan para sa kagabsan. Tadaw? Nin huli ta mayo sindang makukuang kredito nin huli ta an maluwas kaggibohan kan yaon sa puwesto.
An arog kaining kaisipan balinsot sa tamang perspektibong pamamahala para sa kagabsan. Ini sarong kaisipang halipot ang turos na kumbaga sa paghilingon kaining mga kagawad na ini sinda mawawaraan na nin taya. Karibongan nin isip ninda an yaon sa mga puso ninda. Nalingaw na gayod na kun ano man na karahayan an nagiginibohan kan ehekutibo, igwa na pirme sindang dakulaon na kredito para sa ikakauswag kan saindang banwaan.
An repleksyon kan sarong kaggibohan, repleksyon kan mga tawo na yaon sa likod kaini na iyo ang nagtatao nin lehitimong pagka-intende kan sitwasyon. Pero, kun an isipon iyo na ngani an “makukurakot” hale sa proyektong ini, segurado kong dakulaon an bawas kaini sa kaban kan banwaan.
Sabi ngani ni Mayor Del Castillo, mas magayunon na an proyekto para sa karahayan nin kagabsan dapat na alokaron sa saradit na komposisyon sana tanganing mayo o kulang an madidilihensiya kan mga tawong igwa nin interes na magpasasa sa kita kan mga kontraktor, asin dakulon an makikinabang sa badyet na alokado para sa katuyuhan na ini.
Kumbinsido ako sa paaging ini. Asin si Mayor Del Castillo kan Mobo, Masbate igwa nin mas marahayon asin simpleng paagi tanganing an kuwarta kan banwaan dae masayang.
Buweno, sa panhuring parte kan temang ini. Boot ko pong magtao nin isipon sa mga opisyales kan banwaan. An termino nin serbisyo para sa tawo halipoton lang, alagad an panhaluyang epekto kan totoong serbisyo minalubag sa panhaluyang pakinabang. Nakasarong termino ka man o tulo, o kadakulong taon ka man nagtukaw bilang sarong Mayor, Vice Mayor o Kagawad nin banwaan, giromdomon mo sana na an serbisyo mo tawo, serbisyo mo naman sa Diyos.
Kun an gabos na mga elehidong opisyales asin man idtong pinagngaranan sana sa apod nin serbisyo, an panahon mo halipot sana, pero an epekto kan bagay na naginibohan mo panhaluyan na puwedeng manahon kan mga ake asin kamakoapoan mo.

Iriwal sa Badyet kan gobyerno, mayor na problema nin Banwaan

2010-11-05T09:03:00.002+08:00

Sa naobserbaran ko sa ngunyan, lalo na digde sa Partido area, may mga banwaan na nagkakaproblema an mga empleyado nin huli ta dae nagkakasarabutan an saindang mga elehidong opisyal mapanungod sa badyet kan banwaan na haloy-haloy nang pinaghuhurot na aprubaran kan saindang Sangguniang Bayan.
Habo ko lang po sambiton an mga banwaan na ini, kundi satuyang trataron ang problema kun ano man nanggad an dakulang kaulangan kun tadaw ta dae pa ini naaaprubaran.
Base sa ley, RA7160 an lambang lokal na ehekutibo na iyo ngani opisina kan meyor, dapat na makasumiter kan saindang badyet sa masunod na taon sa kada Oktubre 15 kan taon sa Sangguniang Bayan. An boot sabihon na pinagsumite na iyo ini: An lambang departamento kan banwaan nakapag-andam na nin kaniya-kaniyang badyet para isumite sa opisina ni meyor para pirmahan bago pa ini ipadara sa Sangguniang Bayan.
Ini nag-agi na sa proseso nin konsultasyon asin negosasyon asin ta nahiling kan meyor na okey an kamumugtakan kan alokadong kwarta makakapagtao nin maray na serbisyo para sa tawo, an meyor tulos ining pipirmahan asin ipapadara sa Sangguniang Bayan. Alagad, an lambang proponidong badyet kan departamento, dapat aram kan pamayo kaini asin siya mismo an minapatotoo kun tama o sala an yaon sa proponidong badyet asin mayong binag-o siring kan isinumite ini sa opisina ni meyor. Kun igwa man nin pagbabago na uyon sa suhestiyon o rekomendasyon ni meyor, dapat siya mismo an minagibo nin paagi nganing maipaliwanag ini.
Sa balyong lado, matapos na maresibe kan Sangguniang Bayan an proponidong badyet kan banwaan, kaipuhan na ipasa ini tulos-tulos sa komite na iyo an minakondusir nin maninigong pag-aadal, konsultasyon, negosasyon, asin iba pang proseso na tanganing an gabos na komposisyon kaini yaon sa tama asin uyon na pinagtutugot kan ley.
Makondusir nin public hearing asin pagpapaapod sa mga pamayo kan departamento tanganing klaripikaron o beripikaron an mga punto kan badyet na an resulta iyo an pagbabasehan sa oras na ini deliberaron sa laog kan sesyon sa Sangguniang Bayan. An pamayo kan komite sa alokasyon iyo an minapresentar kaini na uyon sa napag-aprubaran kan mga miyembro nin komite. Alagad kun igwa nin mayor na pagbabago sa mga kalkulasyon nin badyet, ini pagtutukaron sa oras nin deliberasyon o interpelasyon kan mga nagkokontra o may mga kahaputan sa mga bagay na ini.
An problema lang na na-eengkuwentro kan mga lehisladores kan banwaan iyo an dae pagsunod kan ehekutibo sa tamang pundasyon kan preparasyon nin badyet asin kun an lokal na ehekutibo hugakon na rebisaron an mga sumiteng mga datos kan lambang departamento, kun kaya, an badyet minaagi talaga sa makuniot na eksaminasyon kan Sangguniang Bayan. Pero sa punto pa sana kan preparasyon, an gabos na datos na pinagpresentar maninigo asin uyon sa mga probisyon kan ley, dae minahaloy an aprubasyon kan badyet asin an gabos seguradong yaon sa katanosan asin kahinggianan.
Pero, oras na an Sangguniang Bayan mayong kooperasyon sa nakatukaw na ehekutibo, an problema kan banwaan minadakula sanang minadakula, nin huli ta an ehekutibo masasakitan na implementaron an mga bagay sa banwaan kun mayo nin pag-aprubar an Sangguniang Bayan.
Kung minsan ang mga residente kan banwaan, pinagbabasol na pirme an opisina kan meyor nin huli ta iyo ngani an inaasahan nindang maghihiro para sa kapakanan kan banwaan. Alagad, naluluktusan nindang hilingon man an parte kan Sangguniang Bayan, kun nanggad an mga lehislador naghihimo kan saindang trabaho na uyon sa mandatong ipinagkatiwala sainda.
Madudunong po an mga miyembro kan Sangguniang Bayan, asin ako nagtutubod na sinda an may dakulang responsibilidad para sa ikakauswag kan banwaan. Kun mayo po an lehisladura, magigin pangitonon an pagpapadalagan kan banwaan nin huli ta mayo sa tamang punto nin ley an manihamento kan mga rekursos na kinakaipuhang gamiton para sa ikakarahay kan mga namamanwaan.
Ano baya ang kaipuhan?
Ang kaipuhan po iyo an danay na pagtitiwala kan lambang opisyal kan banwaan na nagkakapot nin awtoridad asin kapangyarihan tanganing papangyarihon an mga plano o proyekto na maninigong makamtan kan mga namamanwaan. Sa oras na an pagtitiwala kan lambang saro mawara na, masakiton nang maray na bawion pa an dating tiwala na pinagraot kan saro o dakol sainda. Digde na minapoon an kalbaryo nin pagtios asin iriwal. Baya sa iriwal na ini, damay po an bilog na banwaan. Kaya mayong asenso o mayo kang mahihiling na progreso nin huli ta pulitika o kapaabaw-abawan an pinapaurog kan lambang saro.
Para sako, ang tuninong na banwaan delikado na mayong magiginibohan; pero an sobrang maribok na banwaan, mas delikadong mapara asin malingawan nin panahon.
Yaon talaga sa tawo ang pagpili kun siisay ang ipupuwesto ninda sa lugar na kun saen an saindang bilog na pagtitiwala asin karahayan mangyayari. Pero kaipuhan talaga an maigot na eksaminasyon kun siisay an mga tawo maninigo para sa puwestong ipagkakatiwala ninda.
Asahan ko na sana na dae mag-uuntok an mga marahayon na tawo na gumibo nin mga marahayon na kaggibohan para sa ikapag-asenso kan banwaan. Sa oras po na sinda mag-untok na, iyo na man ini an kapinunan nin karaotan na minaabot baya garo bagyo o kunop.

Introduksyon

2010-11-03T17:55:00.001+08:00

Sa blog na ini, boot kong suraton an mga bagay na minapanungod sa mga banwaan asin bilog nyatong nasyon para magin basehan kumbaga para sa paghimo nin mga desisyon asin aktibidades para sa pag-asenso asin progreso kan mga ini. Kaiba man sa pagsurat ko sa blog na ini an mga estorya o huring-huding, asin arin pa man na mga topiko na puwedeng tukaron, arog baga sa topikong political, sosyal, relihiyoso, asin iba pa na puwede nyatong mapaggunoan nin mga leksyon o kaaraman.

An tono kan taramon na saindong mababasa sa blog na ini iyo an tono nin pinaghalong mga tataramon na nanud-an kaidto habang nagtatrabaho pa ako sa gobyerno. Arog baga sa tono nin tataramon sa Albay, Sorsogon, Rinconada (dikit sana), o Bikol-Naga, o kaya Bikol-Partido. Pero mas pinaurog sa pagsurat kong ini ang Bikol-Partido nin huli ta yaon ako digde sa ngunyan nag-eerok kaiba an sakuyang sadireng pamilya.

Ang tema sa blog kong ini, sinambit ko na, manlaen-laen na iyo ngani ang intensyon kaini. An "Huy-ag nin Kamangnuhan" o sa Ingles, "The Plane of Awareness", iyo an magdudulot nin kaisipan pero sa personal ko man sanang paghiling asin pagka-intende. Dae boot ipaabot kan parasurat na pagtukdoan an mga parabasa, kundi makapagtao sana nin mga perspektibong kamangnuhan tanganing maintindihan kun ano man nanggad an mga bagay-bagay.

Ang puwede nindong maaasahan sa pagbabasa kaini iyo na kung paano ginamit kan parasurat ang kaaraman niya tanganing maipaghuy-ag ang kamangnuhan na aram niyang kinakaipo kan gabos.