Guwahati Tlangsam

Guwahati Hmar hai

noreply@blogger.com (Guwahati Tlangsam Editor) — Sun, 4 Sep 2011 23:13:00 -0700

Guwahati pawimaw zie chu hril nawn ngailovin mitin in ei hriet seng ring a um. A pawimaw em leiin “Gateway of the North East” ti a ko hiel a ni bawk. Chuong ang hmun pawi maw em em a chun ei ni Hmarhai in hmun ei khuor tan ve mek a, ei bu khuor na hmun hi a pawi maw em leiin bu sep dan ei thiem in, ruongam siem dan ei thiem viu nuom a um. Ei var a ei thiem chun Hmarhai ta ding a hmun pawimaw ei in changtirin ei siem thei a nih. Chu ding chun Ei thuoitu hai in plan fun fe tak nei a mipui hai an mi thuoi hi a pawi maw takzet, chuonglai chun mipui hai khawm in ieng kim a hotuhai ei thlawp in ei zui tlat hi a tul takzet a nih.
Guwahati Hmarhai “Centre point” a siem dingin mitin ei pawi maw. Thuoitu hai an var le remhriet lei ringawt a an siem el thei an nawh. Hmar mipui ei tam lei el a siem thei a ni bawk nawh. Thuoitu hai le mipuihai in hmu tuo zingin le kut insui tuo zing a ei fe hi ei dam khuosuok na ding le ei ding chang thei na hnar hmasa chu a nih. Hotu var le rem hre tak tak nei in la khawm mipui hai in ei thlawp si naw chun an thiemna le varna chu ieng malo el a ni si, mipui in thuruol in hrat tak in fe hlak in la khawm thuoitu tha ei nei si naw chun ei zik bul nawk hlak a tih. Guwahati hi iengkim a Hmarhai ta ding a kawtsuo pawimaw a siem dingin Guwahati Hmar mipui hai in ei vawisun ni anthawk thang la in in siem thar ei tiu.
Guwahati Hmar mipui hai ei hmel a tha in ei mawi, ei hmel that na, mawina, thiemnahai hi Hmar mipui hai ta dingin in engsuok tir ei tiu. ‘Ei ram le hnam mawi na chu nang le kei a in nghat a ni’ ti kha hre zingin. .Hmun pawimaw tak a um ei ni ti hi in hrieng ei tiu. Nang le kei kal chawina tinreng hai kha HMAR hnam sukmawi tu le suk hmelhem thei tu a ni hi hre sa bawk ei tiu. Ei um na hmun le ei chang cha vei an mil naw chun tu mawng hlim khawm ni lo in ei ni Guwahati Hmar hai tho ding ei nih, chuleiin var tak in ei Hnam pumpui ta dingin sin thaw tlang lem ei tiu.Vawisun a inrimna le i sawlna chu zinga i hlimna la ni ngei a tih a lo ni naw tawp khawm an i suon la hung thar mek hai ta ding a hlimna le lawmna la ni mawl a tih. Chuong ang hung tlung thei na dingin Guwahati Hmar hai thang la thar mawl mawl ei tiu.

noreply@blogger.com (Guwahati Tlangsam Editor) — Tue, 30 Aug 2011 03:19:00 -0700

A hnuoia ang hin thlirtu tienga inthawka ngaidan tha tak tak hai seitak an naw khawma tawite beka tarlang nuomhai tadingin hmun ei inruok a, ei Hmar tawng hmang dan indik naw tak tak hai ei insiemthat theina ding beiseina leia ei hung siem an leiin ei ngaidan seng hang vawr vir tawl ei tiu leh...Ed.

NGAIDAN

Mipui pung khawmni amanih le Pathien chawibiek inkhawm hun khawm ni sien, tulai tawng ser thar ang ziezanga, thu hriltu ding ei ko pha 'tuhin Pu/Pi ... ... ... thu hril dingin ei ko 'ni raw seh' ei ti hlak hi an dik naw ti ka hriet zing lai zing hin ka hmang tan ve ta tlat el e! Hi thu hi hang hril tlang inla, ei tawng hmang dan (spoken Hmar) khom hi siem that a tul tan ding a hawi ngei.

Kei ka ngaidan chun 'tuhin ei thuhriltu ding Pu ... ... ... hang ko ei tih' amanih 'tuhin ei thuhriltu dingin a hun hung la raw se.' ti ang dam hi tawng fe dan (spoken Hmar a dingin) an dik lem naw maw?

Ngai dan hung hril sup sup ro leh.

Chongrolien Chonzik

Guwahati Tlangsam

noreply@blogger.com (Guwahati Tlangsam Editor) — Tue, 30 Aug 2011 02:20:00 -0700

(22/08/2011 Issue):
Hmar Welfare Society Guwahti huoihawtna hnuoi a siem HWSG NEWS in hmingthar “GUWAHATI TLANGSAM” lawmna special issued siem thei a mi thangpui tu ei Pa Pathien kuomah a hmasan lawmthu um raw seh, chun Guwahati hmar mipuihai, tlawmngai le hlutsak tak a HWSG News lo inchaw hlak tu hai pop o chung a khawm ei lawm thu umbawk rawh she. Ei news in vawisun a Special Issued a hmuthei na khawm hi Mipui hai tlawmngai na lei liu liu le tlawmngai thei dinga malsawmna mi petu Pathien zar cho a ni ti hi ei hriet ka nuom.
Hun kha chen hming nei lovin, HWSG News tiin ei hang tan teng teng a, hming mumal nei lova um ringawt chuh thil remchang an naw leiin, a hming ding zawng in Guwahati Hmar mipuihai ei in pung a, chuzar a chun hming mawi tak hmingbo news ni hlak chun “Guwahati Tlangsam” Pu. Ropuithang hung phuok chuh mitam tak hung thawlawm hai lai a mi chuh tlang in a hung put ta a nih. Hming mawi le umzie fun fe tak nei hung thawlawm tu Pu Ropuithang chung a ei lei lawm tak zet.
Tuhin “Guwahati Tlangsam” hlawtlingna le damsawtna chu a enkawltu Guwahati Hmar mipui hai kut a hin an nghat takzet a nih ti hi vawisun ni hin mipui hai in ei hriet thar nuom a um. Lungruol na zion thlir a kal ei chawi chun Vawisun a ei Guwahati Tlangsam khawm hi nakie chu hi nek in hung puisui in, hmarnau thang la hung thar mek hai lungbuo zotu Hmar magazine a ni ngei hih vawisun a editors hai beisei na le duthu suk sei tu chuh a nih.
‘Guwahati Tlangsam’ hin abik in ei ni Hmarhai lai, inthuruolna, tlawmngaina, taikmakna, takinningna hai hung phursuok sien nuom a um tak zet. GT hin Welfare, HSA, GHCF le a dang dang, hnam suk hmel hem thei thil naw phawt chu a keng in hmun an chang thei zing a nih. Chu chuh News ei buoipui nasan tak a ni hrim bawk a nih. Sim le hmar, sak le tlang a um hmar mipui, umhai thupawi maw hai chu Tlangsam kuom a inhriettir hlak ei tiu mipui hai lai aa tlangsam pui thei na dingin. GT hi hmang tangkai ding in thuoitu tin le mimal tin hai ei infiel nawn thar ni raw seh. Guwahati Tlangsam hi Tlangsam tha le fel ni ding in Malsawm tun malsawm mawl raw seh..

Gift Coupon

noreply@blogger.com (Guwahati Tlangsam Editor) — Tue, 30 Aug 2011 01:34:00 -0700

(14/08/2011 Issue):
Inrinni tuk khan Pilangkata a, “One day market” a thang dingin Nuhmei ruol thak in Pilangkata ka va fe chu ringnaw dei in ei Gift Coupon First Prize ding Ford Figo inno tawk tak el lo in thut vur el ka zuk hmu chu ka phu zawk el a, ka hang en vel hin nal hi ka tiin ka man hun a ka khal dan ding kha ka mittla hin ka hang suongtuo zui ngal a, a tak in la khal el naw lang khawm. Kei ang tho a beisei na nei a lo tlir vel sang tam tak chuh um ve ngei an ti, ei bible a ei hmu ang in intlansiek chu tam tak an na, nisien khawm pakhat cho in lawmman a lak ang deu khan, ei ni khawm Ford Figo ngei man tum le beisei lei a Gift Coupon inchaw khawm tam tak um ngei ei ti, choung po po lai chun pakhat cho in a man ding a ni si a, pakhat nek a tam in an man thei naw lei le dan a ni law leiin.
Hieng lai zing hin, mipui in ei hriet ding a ka dit chu a prize el ni lovin, iem a thiltum, ienglei a hi Gift coupon hi an thaw am ti hi ei ngaituo in chik tak a ei dawn hi ka nuom, Ford Figo man nuom na lei ringawt a, ei Gift Coupon i lo inchawk an chun inchawk suol ning a tih, a san chu i beisei na khamhrui hlimna thuruk khan nakie lungril natna khardan a thuoi lut pal a che ti hi kan lau pui che. chuleiin an thaw nasan hre in, inchawla i lo man naw a ni khawm in hlim le lawm in um thei i tih, asan chu inchawk na sum kha liem el lo in nakie i tu le tehai sawr thei ding in i lo inkhawl tha lem a ngaila, chuong a i thaw a ni ruok chun, Gift Coupon inchawk nan singtel lo sengla Ford Figo man naw bawk la khawm i lungril hi a hlimnaw in a na ka ring naw, asan chu i sum fen kha i hriet tlat leiin, Ford Figo man dingin i lo inchawk a i man naw chun inchawkna sum kha i ta ding chun iengma lo meimei in chang in a luongral leiin i lungril chu mathei lovin na ngei ngei a tih. Sienkhawm tap in kokir tum la khawm ko kir zo ta naw ti ni. chu hripui lak a i fihlim na ding chun Gift Coupon inchawk kha ‘Gift ‘a ni ang bawk in hnam ta ding a “gift” i pek a ngai la i lungkhawm awi a ta, i lungril khawm hadam bawk a tih.
Hieng Gift Coupon puitling thei na ding a tha le zung, sum le pai hnam hmakhuo ngai lei a ka sawl ka kham khawm ti reng lo a buoipui tuhai hi in pak an um in lawm a um tak zet. An ni hai khawm hi Ford Figo man nuom lei ni der lo in hnam mipui hmakhuo an ngai na lei a a thaw lem cho a nih. Inpak an um in chawimawi hi an phu le in ka hriet.Inchawimawi intawn hi thaw rawp hlak ei tiu.

HWSG NEWS hi

noreply@blogger.com (Guwahati Tlangsam Editor) — Mon, 8 Aug 2011 09:31:00 -0700

(7/8/2011):

Guwahati sunga Ei ni Hmarhai mi kei hruoitu Hmar Welfare Society Guwahati hai in rawina hnuoi a HWSG News ti hming chawi in kartin suok chanchinbu chu 8th Thlaphur(May), 2011 tan in a um a. Pathien thangpuina le mipui hai tlawmngai na zar in vawisun chen hin hring in thalthum hmel hmu thei in a lo um a ta nih. Suon tam tak hmu thei dingin khuonu’n malsawm in thuoi mawl raw sen.

Thla thum a upa ni ta sienkhawm ei news hang insuo ding articles hi a la nei naw em em a, hra zawng tak in ei la zawng fawm na zar a bit le dam a la um a nih. Puotieng mi pur rak lo khawm a in to del a dam thei ding chu ni awm tak. Aricle/ Sermon nisien puotieng an thawk hin kut ei daw rawp zing el chu a nih. Ei ni Guwahti sung a ngei khawm mithiem, var tak tak ei tam ve vei le Ei News nei ve sun phingtam (insuo ding nei ngai loin)in ei siem rawp el dim a nih. Guwahati mipui hai in ngaituo thar ei tiu khai. Ei nau mal nei sun (HWSG NEWs) a puotieng mi hai hrai khawp le chawm khawp ringawt a in seilien tir din I phal bik am a nih? Vawisun hin nang le kei in ngaituo thar ei tiu. I nau neisun kha mi hai chawm lien na hnuoi a in seilien tir I nuom a I phal a ni ruok chun nang a mawphur na. Chuong a ni lei chun ei nau neisun hi duot a enkawl tha ding in ei thei na seng insuo thar ei tiu, Article ziek thiem in article, Career guidance tieng thei in career guidance tieng, Hriselna (Health) tieng theim in Hriselna tieng pang le a dang dang, chuong a ei thei na tieng kawng seng a thang ruol a ei thaw chun HWSG News in a bu dutak chu dittawk a fak ding nei in hung thau duok duok in hung in thang lien ve duok tang a tih. Chu hun a chun HMAR mipui hai in chanchin an lak khawm na Chanchin bu hung ni ve thei tang a ta, chu ruol ruol Chun HWSG NEWS” mawl kha la hung ti ve ngei tang an tih. Chuong ngir hmun in sang le chantha a siem ding in ei thiemthil senghai insuo khawm ding in Chunga Pathien in Guwahati Hmar mipui hai malsawm in thuoiin vur mawl raw se.

Hun Hmang Indik

noreply@blogger.com (Guwahati Tlangsam Editor) — Mon, 1 Aug 2011 06:03:00 -0700

(31/7/2011):Hun ei ti hi mitin ei hmang dan i zir in umzie a nei tam in a nei tlawm thei, hun pawimaw zie chu hrilseng ni naw ni a,a hmangtu in a hmang dan izir in a hlutna a danglam thei bawk, Hun vawngdik/hmangdik hi a pawimaw em em a, a hlutzie hriet naw chun thil hrim hrim ei hlutsak thei nawh.Ei ni Guwahati Hmar nau hai khawm hun hmang dik kawng a ei la baksam em em in an lang, puipungkhawm ni khuo le Meeting ko ani chang hin a huntak a tan hi harsa ei ti em em, Hun hmangdik kawng a chu Fellowship, welfare, HSA le Thalaipawl .....etc atu tu khawm in harsa ei la ti seng, entirna dingin zantieng dar 6 a meeting ei ko a dar 7.30 khawm a ei la tan thei ngainaw dam hi chu thil pawitak chu ani, a huntaka tan thei inla chu a huntak a ei zo nawk thei ding ana, hi thil hi ei ni Guwahati Hmar nau hai chun ieng dang po neka a hmasatak a ei inchukding ni sienla nuom a um takzet, a hun tak a tan lo hi ngai in ei nei sawng chun thil pawitak, la hung ni ngei atih, tuhin ei hma el a welfare tieng pang a inthawk in programme lien pahni sport Final le Welfare meet cum HSA fresher’s meet ei nei ding ana hieng hun a hai hin thang la in, Hun in- sersuon hmang ding a ei ri ruong hai a huntaka tan ani ngei thei na dingin mani seng a thangla in a hun indik taka tlungkim seng tum ei tiu. Tukum ei sport Thupui khawm “hmatieng pan in”ti ani bawka, hun indik taka ei tan thei chun chu chu Hmatieng ei pan na ropuitak ni ngei atih, chu chu mitin chunga a nghat seng a ni ti hrie in Hun hmang dik inchuk in zawngsak tang ei tiu khai.

EI FELLOWSHIP HI

noreply@blogger.com (Guwahati Tlangsam Editor) — Sun, 24 Jul 2011 07:17:00 -0700

(24/7/2011):
Hun iemani chena inthawk ta khan India khawpui hmun dang dang a hai Hmar Christian Fellowship indin in a lo um tah a. A tu el khawm nisienla Hmar tawng hmang taphawt hai chu a tu pawl a kha pawl ti umbik lovin lungruol takin ei inkhawm tlang tawl a, kawng tamtakah inthuruolna mi siem pekin ei HMAR hnam khawm nasatakin a mi keikhawmin ami sukhrat niin an lang.

Hmar Gospel Centenary ei lawmna kha hun sawt ala ni nawh a, hmun dang dangah lawmna programme siemin hlimtlang takin ei hmang tawl ani kha. Hilai Guwahati hmun ngeia khawm programme phuisui taka siemin hmun hran hran a um pawl dang danga mihai keikhawmin ei mi pawimaw iemanizat hai kuomah chawimawina hai pein hlimtlang takin hmunkhatah programme ei hmang hai dam kha suiletin avan hawiin a va ropui ngei de!!

Hnam khat, ei ibiek pakhat, tawng dang hmang ni bawk si lova kohran khat ni si a pawl dang dang inkhawm ei ram mipui khi zozai hai khi tupawl kha pawl ti um lovin; Tirko Paula’n kohran mipuihai kuoma Paula pawl, Apollo pawl ti umbik lova Krista kohran eini angtaka pumkhata luong ding eini zie a hril ang khan, pawl khata insiemin hang inkhawm tlang diel diel inla chu aw!!! Ei ram kohran el hrat lovin ei hnam khawma thatpuiin hlawkpui ngei a tih.

Guwahati a fellowship memberhai khawm hi pawl khata um lovin pawl dang dangah inkhawmin umdar tawl inla chu tuta ei inthuruol ang le ei hrat ang hin um intak mei a tih. Hnam dang karah khawsa in member 500 khawm ei tling ta dim ti lai hin hang in the dar nawk lem inla chu hmarcha deng khawp chau ni tang ei tih. Hmusitum hleng ei tih. Inkhawmna a dang chun inhmukhawm intak tang a ta, ei inthuruolna khawm nasatakin inhnuoi pha hle dingin an lang.Chuong a lo ni chun Welfare le HSA hai chu an sawl deu ding tina ni ding anih.

Ei hratna, ei thangruolna le ei insuikhawmna Hmar Fellowship hi a spirit hung intem phak chin thuoitu le memberhai chun a thanaw, an hawi naw ti tu chu an lo um ani khawma a tlawm lem an ni ngei ring a um. Chuleiin, ei hnam le kohran thuoituhai hin hma hung la in tuta ei ngirhmun ang hi ei ram a khawm keilut dan um hiel sienla ti nuom um hle in an lang.

A umkhawm sa keidar chu an hawi hlak a, an dar ta hnung keikhawm nawk ruok chu thil um thei nisienkhawm centenary ei hmang nawk ngai ta mei a tih. Chuleiin an khawm lai hin a det nawkzuol na dingin thang lak tum lem ei tiu.

INTHURUOLNA

noreply@blogger.com (Guwahati Tlangsam Editor) — Wed, 20 Jul 2011 07:26:00 -0700

(15/5/2011):Ahmasain Guwahati a HMAR mipui hai pop o HWSG New buoipuitu haiin chibai kan buk cheu.

HWSG NEWS, Kartin suok, vel hnina suok nawk ngei thei dinga malsawmna mi petu ei Pathien kuomah lawmthu um raw se.

Hung tlung ding Thawleni (Tuesday) ah Games & Sports nei a, insukhlimna ruoi ei kilna ding a hin Guwahati a Hmar mipui popo, a chin a lien, a tar a zur chen in theitawp suo a inhawi taka kil tlang seng dingin ei ditsak seng bawk anih. Hieng a huntha mi huoihawt pektu Hmar Welfare Society Guwahati thuoituhai chunga khawm lawman biethu eiin hlan nghal bawk anih. Hmatieng pei a khawm hieng ang ni hai hi mi hung huoihawt pek rawp hlak dingin eiin ngen zui nghal bawk a nih.

Taksa insawizawina hi taksa tadinga a pawimaw ang bawkin lungril sukfimna dingin a pawimaw takzet anih. Hi ni hi eini Guwahati Hmar hai tadinga ni pawimaw hung inchang ngei sien ei nuom takzet. Siemtu Pathien hrezingin, iengkim ei thawna taphawt ah lungril le titakzet in thaw hlak ei tiu. Games & Sports hin inlaichinna tha a siem hlak ang bawk hin, hi ni hin eini, abikin Guwahati Hmarhai lai inlaichinna tha, inpumkhatna, inthuruolna le inhmangaina a thar takin mitin lungrilah chi angin mi hung tu thar pekin , par ang hung invul tir mawl sien nuom a va um ngei de.

Inthuruol chu damna a nih ti kha hre zingin, chu thuro chu eini Hmarhai hringnun a hin hmang tan tang ei tiu. Gospel Centenary hmang rak thei ta hai tading lem chun hretu chau ni hi a hunt a nawh. Practical a hmangtu ni a hun ta lem naw maw unau? Hnam dang hai hnaw chep a ei um zo hma hin; hnam damsuokna dingin ‘Inthuruolna’ chu changchawi tlatin hmatieng panin fe pei lem ei tiu. Chu chu ngei chu anih tuta ei games & sports khawmin hung phur suok ngei sien ti a ka lo beisei le duthusam chu. Chuong thilhai takchang theina dingin khuonu’n Guwahati Hmar hai hmangruo a hmang dingin malsawmin thuoi mawl raw se. AMEN.