Guwahati Tlangsam

EI HNAM SAN DINGIN........

noreply@blogger.com (Guwahati Tlangsam Editor) — Sun, 4 Sep 2011 23:31:00 -0700

Erickson J. Varte

Sappui nun reng ngai lovin ni le thla kara tuon ei relna. Athing zarmawi vatin kaina, a chang ramhnuoi sarun lumna… thlangtieng kawlrawnah aliem mek ie.. I chel tang naw chun famrun in lawi a ta singkhuol changin, tlangtin muoltin hrutin,luoithli nulin..an ngaiin taplai puon-ang i bang awm si nawh. Lenruol ropui ei relna, ei tuonna tlang le muola hai khan singkhuol in chang ding rengin maw.. ei Hmar hnam hin i tawnah thu a hril ve si nawh.
Zam ngailo Hmar tlangval han, ‘Aw ka lungdi suilung lo phang naw la ‘, ti a cheng- rang chawia ram ngawpui hnuoiah hnam damna zawng a an in vak vai lai zing ta khawma thupui hlapui nei mumal thei lova Hmar mipui mihriem nuoi sawm velzet lan phusuou suou nawk lawi si a ei khawsak dan thlirin lunglai ana hlak ngei. Ei vawk lal lengna vangkhuo hai hi miram ani an sawn naw..
Mihriem hi ei bo chun hnam abo a. Mani ram sunga rorelna hranneilo a hiengang renga mi rama hai ei khawsa zing chun chimralin la um ei ta. A mihriem ei boral si chun ei Hmar hnam hi iengtin am dam zing thei a ta. Hi thu ngaituo hin mitam takin zanmu reng an tuothei ta naw anih. Ka unau , i hnam, nangma thisen ngei kha a boral i phal chu ka ring bik nawh. Hnam mawina chu nang le keiah an nghata, hnam damna khawm nang le keiin ei phur sa si.
Pi le pu hai suilung mawl leiin hnam zalenna zawngdan an thiem naw a. Sienkhawm ram le hnam chu an lo humhal chieng an nawm. Kha an ram lohumhal kha suonthar la hung pei hai ta dingin ei ram le ei ta ngei a inchangtir dingin an min hlan sawng a ani. Pi le pu lungtum reng dawn lovin ei dam lai nun hi ei khal chur chur el si. Ei pi le pu han a khi thlanpiel kawt a inthawk khin singmittui leh an mi thlir zing an naw. Lenruol chimrala um le in ruolin boral ve el ding tho tho nek ngawt chun boral in huomin Hman damna zawng el ta lem ei tiu.
Hmar nau hai hin politics lamtluong ei hraw fuk mumal thei naw leiin ei boral hman vang el ta a. Amiruokchu Lalpa Pathien nei hnam ei ni na tak a hung in lang tan ta a. Khang chen eiin vakvaina khawvela ei la um sunga lo bei dawng hman Hmar khawm ni nuom ta lo rak mihuoisen hai kha innghilni in um thei naw ie.Ei hnam politics- in mi tlawmte hai phing asuk bel leia hnam inbiruksan ka unau hai,nangni in thang naw chun iengtin am chun le zuo chawilai thalai hai hin kal pen thei kan ta .Thangthar mithiem zara ei hnam a parvul na ding hun kha a tlung tep ta a, lamlakah in min phatsan el chun ramtiem ram tlung hma hin lampenga hai thamral kan ta, thuoitu bovin chunnu lungmawl singmittui infar tirtu mei mei kan ni awm si. Enta, Baal hmaa la dingthathuon ngailo hnam san dingin sangkhat bek kan la um hi.
Mihriem chu a lunghnuol le a lungse zawnga ei inngaituo chun mani le mani khawm ei invuok tap thei a. Lalpan kawng le lam tamtak ami buotsai pek hai hi ei hmangthiem apawimaw ani. Lungrilin a eng zawnga ei thlir tlat chun karlovin Kanaan ram tlung el ei tih. Mitin mani thisenin aphu dan ang peia hnam rawng bawl dingin ei in ditsak hle ani.Hnam thu le hla ei hril zata pakhat bekin a lo hril hnawng ngei ngei hlak nuna inthawk chun lampui apik taluo. Hnam Sipaihai fak ding bufai nokhat lo pe a hnam rawng bawla inngaitu khawm a thisenin aphut ang tawk ani chun malsawmin um tho ati. Chuleiin, a chintaka inthawka alientak chenin, mani thisenin ami phut angtaka ei hnam ei san hi a kawng le lam ani lem ani. Thaw neia san ngei hi. Hmurin hnam ei san thei nisienlachu tienlai khan “RAM” nei dei tang ei ti.
“THAW RO HARTHARNA MAKSAK TAK NGHAK LO HIN HIENG HIN HAR EL EI TIU.”

Guwahati Hmar hai

noreply@blogger.com (Guwahati Tlangsam Editor) — Sun, 4 Sep 2011 23:13:00 -0700

Guwahati pawimaw zie chu hril nawn ngailovin mitin in ei hriet seng ring a um. A pawimaw em leiin “Gateway of the North East” ti a ko hiel a ni bawk. Chuong ang hmun pawi maw em em a chun ei ni Hmarhai in hmun ei khuor tan ve mek a, ei bu khuor na hmun hi a pawi maw em leiin bu sep dan ei thiem in, ruongam siem dan ei thiem viu nuom a um. Ei var a ei thiem chun Hmarhai ta ding a hmun pawimaw ei in changtirin ei siem thei a nih. Chu ding chun Ei thuoitu hai in plan fun fe tak nei a mipui hai an mi thuoi hi a pawi maw takzet, chuonglai chun mipui hai khawm in ieng kim a hotuhai ei thlawp in ei zui tlat hi a tul takzet a nih.
Guwahati Hmarhai “Centre point” a siem dingin mitin ei pawi maw. Thuoitu hai an var le remhriet lei ringawt a an siem el thei an nawh. Hmar mipui ei tam lei el a siem thei a ni bawk nawh. Thuoitu hai le mipuihai in hmu tuo zingin le kut insui tuo zing a ei fe hi ei dam khuosuok na ding le ei ding chang thei na hnar hmasa chu a nih. Hotu var le rem hre tak tak nei in la khawm mipui hai in ei thlawp si naw chun an thiemna le varna chu ieng malo el a ni si, mipui in thuruol in hrat tak in fe hlak in la khawm thuoitu tha ei nei si naw chun ei zik bul nawk hlak a tih. Guwahati hi iengkim a Hmarhai ta ding a kawtsuo pawimaw a siem dingin Guwahati Hmar mipui hai in ei vawisun ni anthawk thang la in in siem thar ei tiu.
Guwahati Hmar mipui hai ei hmel a tha in ei mawi, ei hmel that na, mawina, thiemnahai hi Hmar mipui hai ta dingin in engsuok tir ei tiu. ‘Ei ram le hnam mawi na chu nang le kei a in nghat a ni’ ti kha hre zingin. .Hmun pawimaw tak a um ei ni ti hi in hrieng ei tiu. Nang le kei kal chawina tinreng hai kha HMAR hnam sukmawi tu le suk hmelhem thei tu a ni hi hre sa bawk ei tiu. Ei um na hmun le ei chang cha vei an mil naw chun tu mawng hlim khawm ni lo in ei ni Guwahati Hmar hai tho ding ei nih, chuleiin var tak in ei Hnam pumpui ta dingin sin thaw tlang lem ei tiu.Vawisun a inrimna le i sawlna chu zinga i hlimna la ni ngei a tih a lo ni naw tawp khawm an i suon la hung thar mek hai ta ding a hlimna le lawmna la ni mawl a tih. Chuong ang hung tlung thei na dingin Guwahati Hmar hai thang la thar mawl mawl ei tiu.

Hmangaina

noreply@blogger.com (Guwahati Tlangsam Editor) — Tue, 30 Aug 2011 03:12:00 -0700

(28/08/2011):

H. Rama Ralsun

“Nangma in hmangai angin I venghai khawm I hmangai ding a nih.” Matthai 22:39

Khawvel mihriemhai po povin ei pawimawtak chu hmangaina hi ni dingin ka ring. Tawng bultieng ei en chun hmangaina ti thumal hi chi tamtak a um a. Ngaizawng hmangaina, ruol hmangaina, unau inhmangaina dam le a dang dang. Hieng hmangaina chi tamtak hai hih hi lekha phek chite hin zieksuok vawng ruok chu thil harsatak ning a tih. Amiruokchu, hmangaina hi khawvel mihriem haiin ei pawimaw em em, lungai khawm lawma inchangtir rawptu anih ti ruok hi chu ei chieng hle thain ka hriet. A neitu le tawngtu chun tu hril khawm ngai lovin a hlutna hi a hrietsuok ngei ngei hlak a nih.

Hmangaina thu tamtak hang inzawt sei duot dingin mihai anga tawngbau thlum ei nei ve sinaw leiin ei thupuiah lut chawr nghal el ei tih. Ei Lalpa Isu’n a Inchuktirhai kuomah Thupek Ropui a hrila, “Nangma in hmangai angin I venghai khawm I hmangai ding a nih,” tiin. Titak ema chu, Kristien sakhuoah ei seiliena, ei chinteta inthawkin Sunday Schoola ei hotuhai le ei Nu le Pahai min chuktirna a inthawk ringawt khawma mihai hmangai ding ei nih ti chu ei chieng hle a nih. Krista hnungzuitu kristien inti hai chu midanghai hmangai ding ei ni hrima; chu chu ei thuring min chuktir dan khawm ani bawk a nih. Mi ieng ang khawm lo ni raw seh, a dum tam, a ngo tam ei hmangai ding hi a ni ringawt. A mi ngainatuhai chau khawm nilovin ei hmelmahai chen khawm ei hmangai ding a nih. Chu chu Bible Pathien thu min chuktir dan a nih. Amiruokchu, Isu’n Thupek Ropui a hril hi ani dan ding ang takin ei zawm fuk nawna met umin an lang. A thu hi hang tiemin dilsut deuvin hang ngaituo chet chet hman rawh. “Nangma in hmangai angin…” a ti ni leiin midanghai ei va hmangai hma hin eini tiengah thaw ding iemanitak chu um hmasain an lang. Tulai khawvel, abiktakin thalaihai ei en chun mani inhmangai theilo tamtak ei um tah. “Biblein midanghai hmangai dingin a minchuktira chuleiin ka hmangai che.” Ieng ang hmangaina am an ta ding chu maw eh!! Mani khawm inhmangai theilo chun iengtinam midang lem chu ei hmangai ding chuh!! Thupek Ropui hi ani ang anga ei zawm ding chun, mani hi theipatawpa inhmangai phawta, chu eini ei inhmangaina ang tlukpui char chun midanghai khawm ei hmangai ve ding anih. Chuong ang hawizawng chu Isu khawma a hril nuom le an chuktir tum dan tak ni dingin an lang.Tulai nunghakhai hi hang ensin hman unla, mani inhmangai chu tlawmtak an nih. Darthlalang ah an hang in en a, awi hah!! ka hnar hi chu a lo bawng met ani ti, ka hmai a puor met bawk, ka bawk an bur met bawk, ah!! Ka mitmeng khawm hi lo sexynaw ngeia, ka hnera hner khawm hih!! hieng ringawt chuh!! Mani inhmangai ta nek nek hmanin an lim an hmu rawn po leh insawiselna ding an hriet rawn ting el chu ni hih. Diktaka hril chun, tulai hin nunghak pieng nallo ve tak tak an tam ta bawk a nih. Pum thum cheng nga man, a hapna pakhat ti ang chi deu dam. Lu le pum inmil raklo dam. Figure nal deu zat nuom hmel vieua inlang ve siha kerai le malpui muk tul hlak chu an tam tah. Hnar bawng tul hlak chu a ni telin an pung deu deu. Pathien malsawmna a chuong a liema dawng bik ni awm fahrana hahmai hner vunin a tuom sengnaw met dam. A awm ve tho, inrai ni silova nunghak lai taka phing inbel per pur chu nal nghal lo chu sawisello chi ziezang ni lo chuh!! Dieting thaw nasa taluo tah a sunghai khawma infuk raknawna nei amani ding an ta an invirbuoi vel zak el ta khawma a ruongamin zir nganglo chun infit bek bek thu um chuonglo chuh!! A tawp a tawpa chu “chu nu chu a va zawi pir pawr, infuknawna met a nei am anih, sap natna anvawi ning a ti maw?,” mi’n an ti nawk mei mei hlak a nih. Hmel khawm kuhi a pieng danin a zir ngangnaw chun ieng ang thuomhnaw hmang khawma Katrina Kaif hai anga ngainobei tuot thu um chuonglo chuh!! Complexion khawm a vunin a zirnaw chun nuoma mi hmang ang ang hmang ve khawma umzie um thei tak tak nawh. Mani nina anga lungawi el lova mi danghai ang ni ve kher kher tumna leia sum seng khawm a tam nuom tei a nih. Mit khawm kuchu a nghat danin a zir ngangnaw chun nuoma hmangruo ieng ang hmang khawm khawma Angelina Jolie anga zuk meng sexy rak thu um chuonglo chuh!! Beisei suktlawntu mei mei anchang nawk hlak.

Tlangvalhai khawm a chuong a liem bik anni chuong nawh. Tulai thleirawlhai kuhi kekawr khawm kawnga an bun ta ngai lem ie!! An hnungtienga inthawka hmu thut lem chun ti an um rak el hlak. Zakuo hlak chu ansing thei raptlak siha, kekawr kawnga bun lo na na na chu an mawngkuokak an dawk tut hlak. Sawisel chi lem chu anni le, “I thing taluo, tulai style a ni hih” an ti pei hlak a nih. Tulai mi ni nuom si chun to tawka thlir liem chu ei thawthei umsun chu a ni el. Chu chau khawm chu nilova, tulai chu technology tieng khawm khawvel hma a sawn hrat ta em em a. Iemani chena chu ei thil hmu le hriethai khawm hin ei ngaituona a lak pengin a mi chawkbuok hlein an lang. Korean movie a an tlangval pa hran velo tak tak hai kuhi mi tam tak chun nal an lo ti tawl hlak chu ning a tih. An inchei dan le an hairstyle hai chenin an lo entawn fir fer tawl chu tie!! Ieng angin an samhai suk makin hla khawhri vel hai sienkhawm a Jung Hun tak tak chu va ni chuong silo hai. Mani nina ang anga inpawm thiem el lova midanghai ang va ni ve kher kher ei tum hlak hi chu nun sawlumtak ni dingin ka ring hlak.

Mani inhmangai taluot leia midanghai hmangaina ding hmun nei velo ruok hi chu thil thanawtak a nih. Thupek Ropui indik taka zawmna dinga step hmasatak chu mani inhmangai phawt a ni lai zingin, mani hmakhuo ngai taluot leia midanghai hmangai thei velo chu thil tiumtak a nih. Bible Pathien thu le khawm thil inaihal tlat a nih. Mani phingpui chau ngaituoha unauhai chan ai khawm fa ram thak thak ngam hai hi Ram le Hnam hmangaitu ei ti thei tak tak dim chu maw leh!!

A lo ni takluo ngei hi tie, ei Lalpa Isu’n Thupek Ropui a hril hi ani ang anga indiktaka zawm ding chun mani hi theipatawpa inhmangai phawt a lo ngai ani hi tie!! Chuleiin, Ka hmel hi Katrina Kaif angin ngainobei tuot nawin ka figure hi Aishwarya Rai angin infit deu zat naw sien khawm, ka mitmeng hi Angelina Jolie angin sexy ve raknawin, ka hairstyle Jung Hun hai anga smart lovin thing ve bur sienkhawm, tuta inthawk chu ka theipatawpin kei le kei, keima ngei hi inhmangai ve bur el tang ka tih.

(Hi article ziektu Tv. H.Rama Thiek hi NEREFS Ltd ah Accountant sinthaw lai mek niin tuhin Guwahati ah a um mek -Ed..)

Hun Ka Nei Nawh

noreply@blogger.com (Guwahati Tlangsam Editor) — Tue, 30 Aug 2011 02:43:00 -0700

(22/08/2011 Issue):

Dr.C.Chonzik

May 19 zingkar khan Tv. Rosanglien Puruolte in a mi hung phone a. “HWSG News May 22 (Pathienni) edition a suok dinga insuo ding article hung ziek thei i ti?” ti a mi hung indawn a. “Hun ka nei naw em a, ka ziek hman dim ka hril thei naw ngei, hung tum phawt ka ti aw,” tiin ka dawn a. Ka hang ngaituo kir chun, “hun ka nei naw em a” ka ti chu kan zak letling lem a. Ni tina ka hun hmang dan ka hang sui chet chet chun, hospitala damnawhai enkawlna sin ka thaw zo hnung khawma ka nuom zawng thil tangkailo thaw ding chun hun ka nei thei zing hlak si a. Chuonghai chu ka ngai pawimaw lem hlak leiin thil tangkai ding thawna “hun ka nei naw” lem a nih.
A ni hrim a, eini rawi chu “hun ka nei nawh”, “kan hman nawh” zuk ti tla rawk hi ei ching khawp el a. Hang ngaituo chet chet inla chu keia ang tho in ni tawl ka ring. Hun hi mitinin ei nei, thil dang iengkhom neilo hai khawmin hun chu an nei a nih. Ei thil nei laia a hmang ei thiem naw tak a ni bawk a nih. Mi var le mi hmingthang tak tak hieng, Mother Teresa, Albert Einstein, Mahatma Gandhi le Thomas Jefferson hai le khawm ei hun nei dan an ang seng a; nikhata darkar 24 seng tho a nih. An hun an hmang thiem leiin an hlawtling a, an hming an thang a, hun hmang thiem le thiemnaw in a mi the tawl a nih. Mi buoi taktak le hun hmang thiem haiin “hun ka nei nawh” an ti ngai nawh. Thomas Jefferson chun, “Um meimei tum naw rawh. Hun khawral ngailo hai chun “hun ka nei nawh” tiin an complain ngai nawh. Ei thaw zing chun thaw zo thei a lo tamzie hi mak tak a nih” tiin a hril a. Hun ka nei nawh ei ti chun hun ei lo khawral hlak lei a lo ni lem a nih.
Ieng leia hmangloa hun ei khawral hlak am? Hun hlutzie ei hrietnaw lei a nih. Hun hi ei hau taluo leiin ei hlutsak naw a nih. Thil iengkhawm hi ei hau pha ei hlutsak naw a, a vang pha a hlu bik hlak a. Ka nu’n rengthei bil a siem lai chun kan hau thei em leiin kan hlutsak emem naw a, a fak khawm kan fak pei rak nawh. Amiruokchu, Guwahati bazaar ah, rengthei um huna chun ngaihlu ememin a man a tam khawma fak ngeingei tumin kan chawk hlak. Hiengang deu hin ei hun neiin a mi dai naw pha a hlutzie ei hriet chauh hlak a nih.
Hun hlutzie hretuhai chun indik takin hun an hmang hlak. Hun hlutzie fel lema hriet theina dingin internet a inthoka ka hmu a author hriet chieng lo hi tha ka ti em leiin ka hung zieksa a nih. –
Kum khat hlutzie i hriet nuom chun
inchuklai kum tawp exam fail kha indawn rawh.
Thla khat hlutzie i hriet nuom chun
nupui thla kimlo nau nei kha indawn rawh.
Kar khat hlutzie i hriet nuom chun
kar tina suok chanchinbu editor kha indawn rawh.
Darkar khat hlutzie i hriet nuom chun
inngaizawng inhmuhai kha indawn rawh.
Minit khat hlutzie i hriet nuom chun
rel fe ding nang hmanlo pa kha indawn rawh.
Second khat hlutzie i hriet nuom chun
eksiden tuok thel zo hlawl pa kha indawn rawh.
Milisecond khat hlutzie i hriet nuom chun
Olympic games a silver medal hmu pa kha indawn rawh.

Hun hlutzie hi ngaituo zing hlak inla chu ei Welfare sports khawm kha a hun takah ei tan thei ring a um a, a hun takah tan inla chu games item khawm tamtak ei zo hman ding a na. Hun hmang thiem tieng panga hma tieng pan ei tiu a. Ei sport hun nawka chu a hun takah tan thei dingin thang la seng ei tiu. Hlawtlingna lampui kalbi pawimaw pakhat chu hunbi hmang indik hi a nih.
Ei hun nei seng hi a hlutzie hre thar nawk seng ei tiu a, hun hmang indik tum seng bawk ei tiu a, “hun ka nei nawh” ti thei ding khawpa um thawveng le thil tangkailo thaw bansan tum seng ei tiu.

(Hi article hi 22nd May, 2011 Issue a insuo ani tah a, tiemtu haia inthawka insuo nawk dinga ngenna a um leia ei hung insuo nawn nawk anih. - Editor)

Thabo Theulawzi

noreply@blogger.com (Guwahati Tlangsam Editor) — Tue, 30 Aug 2011 02:28:00 -0700

(22/08/2011 Issue):
-L Keivom
Sin thaw pei naw chun a fàk khom fa naw raw se (2 Thes 3:10)

Ei tienamia thabo leia hming hlun ser hiel pakhat chu Sämdäl a nih. A thâ a bo taluo leiin theichang hmin tuor khom lo pei loin a hnuoiah a thalin a zâl a, theichang hmin hung tril ding nghâkin bàu a daw a. Vangneia siemin a hmin zûm hi a bàuah a hung tla lût nol el a, sienkhom a soi pei nawh, an ti chu! Thuvar 19:24 a, “Mi thabo chun bu thlèng a pur a, sienkhom bu beng dingin a kut a hlàng pei si nawh” ti kha Sämdäl ta ding bika ziek ni sien a awm khop el. Amiruokchu, ei sawsaiti ei hang inbi chieng a, che châng pei hlol lo ang hiela ei lungril ngaituona le hrietna thà a hang bo tàkzie ei inhmu chun, eini rawi ta dinga ziek hman hman a hoina chin a um bok.

Thabona hi iem a na?
An leh, thabona ei ti hi iem a na? Thil thaw ding thaw pei lo le thaw khoma thaw zo hmaa chawlsan dam, ieng khom thaw loa um mei mei dam, thil trangkai ding thaw loa thil trangkai loa inhmang khawthawng dàm hi ni mei a tih. French mi lekha ziektu Jules Renard chun, “Laziness is nothing more than the habit of resting before you get tired” (Thabo ei ti hi ieng dang ni loin sawl hmaa chawl ching a nih) tiin a hril fie a. A hril fie dana inkhi chun, a thawa thaw pei lo hrim hrim hai lem hi chu an tha khom a bo phak nawh tìna a nih. Eini hriet thiem thei zawnga hnai tea hril chun, sorkara sin insang dit ve si, sienkhom Competitive Exam-a thrang dinga inbuotsai pei si lohai hi an thà a bo phâk naw el khom ni loin tling naw khom an tling naw phàk naw a, ekzama thrang, a tling lohai ruok hi chu an thà a bo phâk a, an tling naw phâk bok a nih. Chu khêla mihai chu hlawtling khopa taima phâk le tling phâk hai an nih.

Ei hang bi chik zuol chun, thabona hi mawl taka hril fie el thei a ni nawh. Thabo ei ti tam tak hi thil thra le trangkai thaw pei lo, an thaw khoma teirei pei lo, sienkhom thil thra naw le trangkai lo thaw ding ruok chun tluk lo rim innam khopa taima an um tlat si a nih. Sinthaw pei si lo, sùnnithlâka zâl tlep le khawlai lênga titi hmang lo sep mei mei, sienkhom zàn khawvara inthim hnuoia mi thil inrùk ding zonga invâk pei an um tlat a nih. Sin hmang ding thaw pei si loa sùn le zàna lekha indèng amanih carom inkhèl pei khom an um bok. Chuong ang mihai chu an inhnikna zawng le taimakna zawnga chu tluk ruol an ni nawh. Chuleiin, mi thabo ei tihai hi thil thra naw chu thaw pei hle si, thil thra ruok chu thaw pei si lo an ni nuom khop el. Chuong mihai chu ‘thabo’ am ei ti ding an lungril a piengsuol lem?

An naw leh, ‘thabo’ ei ti hi thaboa ngaitu inkhìna hmola innghat am a ni? Sùnnithlak le zànkhawvâra khuong le dâr le lêngkhawm le lâm pei, sienkhom kuta sinthaw amani le lekha tiem amani ruok chu darkar khat khom thaw pei si lo an um. Zàn thrang chen chena titi bawraw sep le gawp pei, sienkhom lekha an hang tiema inlusu nghal el mi an um bok. Kuta sin hram thaw nèk hmanin lungril sênga thil ngaituo hi a sawlum lem hrim a. Lekha ei tiem a, imu a suok nghal chun ei lungril le ngaituona a chechâng pei dèr nawh tìna a nih. Ei taksa sukchàngtu le inchêttirtu chu ei lungril le ngaituona a ni leiin, lungril le ngaituona chechâng pei lo hi thabona hnârpui chu a nih. Chun, lungril hi taksa nêkin a thâu ol lem a, lungril thâu hi taksa thâu nêkin a trium lem bok.

Chun, thabo le ‘suonlam’ ei ti hi thil inzom tlat ni bokin a’n lang. Thil ei thaw ding, ei thabo leia ei thaw naw pha leh ei thaw nawna san inhril tlipna dingin thukhêl ei dap khawm a, chu chu ‘suonlam siem’ ei tih. Suonlam le khêlhril hi thil inzom tlat a nih. Mi thabo chun thil an thaw nawna san thu awm taka phuokfawm an ching a, thil um lo mai khawmin, ‘Tuolah sakeibaknei a um; kotthlerah an mi that ding a nih’ tiin suonlam an siem hlak (Thuvar 22:13). Nu taima le fel thu a hrilnaa ruok chu, “Insung khawsak thra takin a enkai a, thabona bu a fâk ve ngai nawh” (31:27) tiin a hril thung a nih. Mi thabo hriet theina pakhat chu an suonlam siem thiem le hràt dànah a nih.

Baibul le thabona
Baibul bu 66-a thabona thu mal sàm rawnna tak chu Thuvar a na, chu taka chun ‘thabo’ (laziness) voi thum le zomthaw (sluggard) ti voi sawm pathum zet a chuong a, chuonghai chu Hmar trong chun ‘thabo’ tia inlet vong a nih. Chuonghai laia miin an chang thlang rawn tak ni dinga ka ring chu 6:6-11 hi a nih:
6 Nang thabo, phaivang kuomah fe la,
An um dànhai ngaituo la, var rawh.
7 Lal le hotu an nei naw a,
Rorêltu khom an nei bok nawh.
8 Nipuiah fàk ding an zong khawm a,
Busîk hunah bu an sèk khawm hlak.
9 Mi thabo, ieng chen am i zâl ding?
I zâl chu ieng tik a’m i tho ding?
10 ‘La hang zâl met ka tih,
La hang inhnâr met ka tih,
Kut hmasuiin, hadam takin,
La’n zam met ka tih’ i ti sûng khan,
11 Pasietna chun rûkru angin,
Hung nang thut a ti che a,
Tlâksamna khomin râl angin,
Hung nangchîng thut a ti che.

Hieng nèka nasa lema hang inzil dàn chuong rak a um ka ring nawh. Zing tieng ei nauhai imu inhnik lai ei kei thoa sikula ei tir ang elin, Solomon chun thabohai khom sikula fe dingin a tir a nih. A sikul tirna ruok chu sikul danglam tak, PHAIVANG SIKUL a nih. Chu taka zirtirtu chu mihriem, Ph.D dikri amanih Master in Education (M.Ed) dikri amanih neihai ni loin, thilhring lai khoma a chîn pawl tak phaivang an nih. Pathienin a angpuia a siem mihriem ni ve si, thilhring laia a chîn pawl tak phaivang kuomah fe a, a khawsak dàn inchûk a, chu taka inthoka var suok dinga hang intir thlawt el chu a muolpho thlàkin thil inzakum laia pakhat chu a ni hrim hrim.

Ieng tak am a na, phaivang kuoma inthoka inchuk dinga a dit chu? A taimakzie le a hun takah fak le dawn ding a sek khawm dàn a nih. Nipui lum vanglaiin um mei mei loin phaivang chun thlasik huna a fak ding bu a sêk khawm a, thlasik ieng angin hrâng sien khom a lungkham ngai nawh. Khuongbai amanih khauthrikthri ruok chun nipui lai fak ding sêk khawl loin inhoi a chèn a, hla sakin a lâm dâr dâr a, sienkhom thlasik a hung tlung pha chun fak ding le intuom lumna ding a nei naw a, phingtràm le deiin a sawm hlum hlak a nih.

Hi taka hin iem a na mihriem kuoma inchuktir a tum chu? Kum khatah sik le sa hrang hrang thral, fùr, favang le thlasik hun a um ang bokin mihriem nuna khom naupang lai hun, nunghak-tlangval hun, nuhmei pasal inneia sungkuo indin hun le tar hun a um ve a, chu chu khuoi anga inkhêl loa mi tin chunga tlung ngèi ngéi hlak a nih. Naupang hun le thralai hun hi a hnunga sungkuo indinna ding le tar hnunga lungkham loa khawsak theina ding bulthrut nghet remna hun a nih. Vanglai hun chu inhoi taka hmang ding a ni lai zingin, chu hun bok chu hun la hung um dinga ngirhmun nghet bawl le rem hun a nih. Chu ding chun inbûk tawka hun hmang thiem a trûl makmaw. Khuongbai lampui hrawtu chu an upat hun a tlung hma ngei khomin an zûr hmang hlak. I kawl le kienga i hmu phâk ela khom khan hei ngha vel la, chuong ang mi chu hmung i tih. Phaivang lampui hrawtu danglamzie khom hmu bok i tih. Thuvar 12:24 a chun, “24 Mi taima chun rorêlna chel a ta, mi thabo chu suokin sor a tih” a tih.

Chuleiin, vanglai hun hi zàl tlep mei meinaa hmang ding a ni nawzie le chuonga khawsahai chu pasietnain râl le rûkru anga an la hung nang thut ding thu a hril a nih. Hi nêka chieng lema hril dingin mi ti hai sien, ni tam le zàn tam ka ngaituo hnung khomin a nêka thra lem ka ngaituo suok thei ka ring nawh. Thabona le pasietna hi lai hrui inzom tlat an nih. Pasiet i nuom si naw chun lungril le thlarauin Solomon thuvar hi hang ngaithla nawk hrim ta’m! Thabo ta ding chun piengtharna tham a ni naw maw?

9 Mi thabo, ieng chen am i zâl ding?
I zâl chu ieng tik a’m i tho ding?
10 ‘La hang zâl met ka tih,
La hang inhnâr met ka tih,
Kut hmasuiin, hadam takin,
La’n zam met ka tih’ i ti sûng khan,
11 Pasietna chun rûkru angin,
Hung nang thut a ti che a,
Tlâksamna khomin râl angin,
Hung nangchîng thut a ti che.

Suonlam indik lo
Threnkhat chu Isu Krista a hung vak ding nia an ring leia an thil neihai chèn a, taksa khawsakna tieng ngaituo loa zomthaw taka khawsa an um a. A phâk hla nawk zuolhai chun Isu chu hung dèr tah le kum sang rorèl khom hnuoia intran dêr taa hril le pom khom an um bok. Threnkhat chu thienghlim famkima inngai khom an um. Hieng ang mihai hin dannaranin dam sung khawsakna thilhai hi ngainêp le ngaithà an inhrilhmu. Paula dam lai ngei khom khan Thesalonika kohran lai chuong ang mi chu an um hman dèr tah a nih. Chuleiin, chuong anga dawngda tak le thabo taka khawsa mihai laka chun inthier fihlim dingin ringtuhai chu Paulan a hril mol mol a nih (2 Thess 3:6-15). Eini sawsaiti lai khom en vang vang la, hieng anga ringna tienga petek, ngaizamna le ngaizalna thlarau chang, iengkim thlarau rama khum tum vonga Kanan ram thar zùna inuoihai le an sungkuo enkolhai chu chîk takin hang sui la, khawsakna tieng an mazu mei tiel tiel el a nih.

Iemani chena ei sawsaitia thabona hringtu pakhat chu piengtharna le sandamna bo thei ta lo dinga ei inzirtir hi a ni el thei. A ram le a felna zong hmasa phot dingin ei inzirtir a, chu chu ei hmu pha chun thil dang po po chu a thlawna pek belsa ni dingin ei inzirtir bok. Amiruokchu, ei inzirtir dan hi a fûk chie am ti hi ei insuikir trûlin a’n lang tah. Piengthar hi van ram kainaa ei inzirtir a ni leiin, “Piengthar phot la, thil dang chu i nuom nuom la thaw de ti nih” dam ei ti hlak. Ei zong tak chu ‘Pathien ram’ amanih, ‘a felna’ amanih khom a ni chiein a’n lang nawh. Ei zong tak chu ‘van ram’ a na, chu lut theina tiket-a ei ngai chu ‘piengtharna’ a nih. Piengthar hi thangsuonaa ei ngai a ni leiin piengthara ei inngai ta hnung chun thil thra iengkim einiah a thlawna hung luong lut dinga beiseina ei nei a, chu chun thabona chauh hring suok loin kutdaw nuomna lungril khom a hring sa bok niin a’n lang. Hieng lai thil hi Pathien thutak le inmila ei ching fel a ngaiin ka hriet. A ram le a felna neitu tak takhai chu an thabo thei nawh; thli angin an phakna chin chin chu a chechang suou suou el a nih. An thli pai chu Thlarau Thienghlim thli, thilthawa intar lang hlak a nih. Thabona thlarau, huou huou le nuomchenna thlarau a ni nawh.

Chun, Baibul chang khat chauh thlûr binga tranghma kei taka sermon ei ching hi thil trium tak a nih. Sam 37:5 a, “I um dan ding chu LALPA chungah innghat la, ama chu ring la, amain thaw vong a tih” ti hi a chang thlang ei tam ang bokin ei hmang suol nasa èm êmin ka hriet. Hi taka “amain thaw vong a tih” ti hi changchawi a, mani sin ding thaw si loa Pathiena ringna innghat a, iengkim a hung thawpek el dinga ngai pawl ei um el khom ni loin, chuong thil chu pulpit tlanga chen khom inchuktir ei ching. Chuleiin, kei chun hi châng hi ‘Thabo Theulawzi’ innghatna pakhat laia Setan hmangruo hmang niin ka ngai a nih. Hi châng hi Delhi Version-a chu NIV anga inlet a ni tàk leiin ngai buoina ding a um ta nawh. Hi châng umzie hi a hla pumpui tiema hriet fie thei chauh a ni leiin a châng mal ngawk, inlet suol nawk nghal, ei thlûr bing hin nasa takin mi a thruoi suol thei a nih.

Ringna poimawzie ei inchuktir a, a poimaw hrim bok a nih. Amiruokchu, ringna ei ti hi a ni naw zawnga mani ngaituona tieng keia hmang suol thei a nih. Pathien sierkop chu mihriem kut hmanga sinthaw a nih. Ieng angin Pathien ring la khom, i lekha tiem ding amanih, i bu suk ding le suong ding amanih, i puonkhawng ding amanih, i lo vàt ding le thlo ding amanih, i lekha tiem ding le ekzam ding amanih thawpêk naw ni che. Pathien ei ring a ni chun ama ringtuhaiin an thaw dinga a hrilhai chu zawma ei thaw nghal a ngai. Ringna hi thilthawin a zui naw chun thil thi a nih. “Um raw se” tia iengkim inumtir theitu Pathien chun mihriem hmangin sin a thaw hlak a, mihriem chu Pathien hmangruo hmang a nih. Chu a hmangruo hmang chun a ti anga thaw nuom loin amanih thaw loin amanih um trok trok sien, hmangruo trangkai lo le hmang thei lo a ni leiin Pathienin hmang naw nih. Hmang theia umhai chauh a nih Pathienin a hmang hlak. Chuonga hmang theia um dinga inhlàn nun chu a nih ‘inthawina hring le thienghlim le Pathien lawmtlak’ tia Paulan a hril kha.

IAS tling tum siin lekha tiem loin um la, Pathienin chu sin chu a pek el che ringin trongtrai rak rak la khom, lekha i tiem si naw chun hmu ngai naw ti nih. Chuong ang ringna chun umzie a nei naw thu Jakob 2:14-26 khan chieng takin a hril. Chuong ang ringna chu mani le Pathien sukmuolphona chauh a nih. Thilthaw thrang loa mihriemin a thlawn lieu lieua a dong um sun chu Pathien lunginsietna zara Krista Isua mi tin ta dinga sandamna lampui a buotsai chauh hi a nih. Chu intlanna man chu a thlawn lieu lieua Pathien lunginsietna thilpêk a nih. Chu chu i ta ding ngei a nizie i ring chun sandamin um i ta, i ring nuom naw ruok chun thilthlawnpek chu i hnawl tina a na, i hnawl tlat chun nangma thua nei loa insiem i nih. Pathien ngaia suol po po laia suol tirdakum tak chu intlan i nizie thu Baibula inziek pom nuom nawna le ring nuom nawna, Pathien lunginsietna thilthlawnpek ropui hnawl hi a nih. Chu lunginsietna thilthlawnpek ti lo thil dang hrim hrim chu a thlawn pakhat khom a um nawh.

Isu ringtu le zuitu ni dinga Isu ngeiin a thil phût kha iem a na? Thil pahnih chieng èm èmin a hril (Mat 16:24-25). Pakhat chu, mani insie hmang le inhnawl hmang, mihriem lungrila lien tak ‘kei’ tina amanih ‘ka ka ka’ tina po po dehawn a nih. Kong danga hril chun, mani thu le mani ta dinga hring ta loa ei zui ta dinga hring ta lem tina a nih. Pahnina chu mani kros seng puta zui a nih. Chu chu iengkim tuor huom dinga inpêkna nun a nih. Eini rawi chu ruok le zâng huoua Isu zui tum vong ei nih. Chu chu a nih ‘Thabo Theulawzi’ ka ti chu. An leh, iem a na i kros chu? Ni tin mihriem khawsaknaa ei thaw ding mawphurna phur puma zui tina a nih. A hmasa le a pahnina hi an inletling top a nih. A hmasa chun mani inhnawl a phût a, a nuhnung chun mani mawphurna hnawl a khap thung a nih.

A pahnina hi hang hril sei met ei tih. Mani kros put pei si loa Isu zui tum chu mi thabo nungchang a ni leiin chuong anga zui chu Isu dit dàn a ni nawh. Mani sin thaw le mawphurna phur dukdak pei si loa kohran thil le a bebawma inhmang rak khom hi Isu dit dàn ni kher naw nih. Inchuklai ka ni chun ka mawphurna hmasa tak chu ka thil inchuk a na, chu chu ka kros put chu a nih. Ka kros chu thlathlam a, ka put pei si naw chun mi dawngda le zomthaw, phaivang sikula kai dinga tir tlâk chauh ning ka tih. Daniel le a ruolhai khan an inchukna amanih an sin amanih châi pha le bahla khopin an Pathien bein an buoi naw a, an Pathien dit dàn anga an sin ringum taka thaw kha an nuna Pathien an biekna le chawimawina a nih ti an man chieng a, an hlawtling hrim bok a nih.

Pathiena innghat dàn indik le indik naw khom hriet fie a poimaw. I lungzingna hai, beidongna hai, lungkhamna hai le mangangna hai chu ring zo taka Pathien chungah i’n nghat ngam phot chun rik takin i phur ta naw leiin i chung zâng ngei a ta, sienkhom i thaw ding sin ruok chu Pathien chungah innghat la khom thawpek ngai naw ni che. I kros put lai khom thiem tak le zâng taka put dàn inchuktir a ti che a, hnè taka i put theina dingin thahrui khom pêng a ti che a, sienkhom putpêk naw ni che. “Ka ringkol a hàdam a, ka phur khom a zâng” (Mat 11:30) titu chun a kuoma rikphurhai hung dinga a kona san chu an kros put chu putpêk ding ni loin, ama ringkol hmanga hadam taka an phurrik chu phur dan inchuktir dingin a ko lem a nih. Inlet threnkhata chu “Ka ringkol a’n hoi a” ti dâmin an sie a, sienkhom trongkam indik lo a nih; ringkol inhoi a um ngai nawh. Ringkol inhoi chu Thabo Theulawzi a nih.

Chuleiin, phur boa ruok huoua Isu zui tumna lungril hi ‘Thabo Theulawzi’ a nih. Trongtraina le rongbawlna po po laia hlawk tak chu mani mawphurnaa innghat seng thil thra thawa inhmang a nih. Taimaknaa Pathien rongbawl hi ei chawibiek dàn ding tak chu a nih. Pathien nau inti chu a thä a bo ding a ni naw a, Pathiena mi a nina kha thil thra thaw dinga mor zingtu a ni leiin a thä a bo thei bok nawh. Minit tin hmang hlawktu chun minit tinin Pathien le ama le a ram le hnam a chawimawi a nih. Ei thuvar chun, “Taimak mi tinin an lawm, kawngin a theida” ti a nih. Kawng kham khopa taimakna hi hlawtlingna bulpui a nih.

Chun, iengkim thaw thei, malsawmna po po neitu Pathien ringtu le zuitu inti sia ram le hnam pasie ni dâm hi thil inhmè lo le intu lo tak a nih. Pheikhok siema inhlaw William Carey (1761-1834)-in hi thu dik hi a hmu suok ni chun, “Pathiena inthokin thil ropui tak beisei unla, Pathien ta dingin thil ropui tak thaw ro” tiin a khêk suok a, ama ngei chu misawnari sin thaw dingin India ramah a hung a, a hril char chu ama ngeiin a thaw a, khawvela misawnari ropui laia tiem sa el khom ni loin a tlar hmatawng hluotu a hung ni tah a nih. Hi thuruk hi an mana inthokin Europe-ah, abikin England ramah tuoitharna a tlung a, chu chun Industrial Revolution a hring suok a, chu ra dong nasa tak, thlierkar chikte Britain chun hun sawt nawte sungin khawvel hmun thuma threa hmun hni zet hnein ramperah a siem el a nih. Chu chu a nih thilthaw le inkop ringna ra suok chu. Anni chu hmangin khawvel hmun tinah gospel puongdarin a um pha tah a nih. Chu hamthratna lo dongtu laia mi chu ei nih.

Thabona hnê dàn

Taimâk hi inchûk thei le chìng thei a ni ang bokin thabo hi insukhmu thei le chìng thei a nih. Thabona hi hnè ding chun a hmasa takin ei thà a bo a nih ti hriet chieng le pom hmasa phot a ngai. A pahninaa chun, ieng leia ei thàbo am ei na ti mani insui chieng a poimaw. Thaboa ngai tam tak hi thaw ding mumal an hriet naw leia thabo anga um mei mei amanih le an thil inhnikna zawng an la thaw fûk naw lei dam a ni nuom. Pathumna chu, thil tum chieng tak nei le chu chu sukhlawtling ngei dinga bawzui char char a nih. Miin thil tum chieng tak a nei pha chun, a tum ram chu tlung thei dinga insingsat poimawzie a hung hriet a, chu ding chun a’n buotsai a, chawl loin hma a nor a, mi taima le hlawtling a hung ni hlak a nih. A sungrila mor zingtu chu a tum ram tlung nuomna lungril chu a nih. Chuong anga mortu chu mihriemin a nei phá phà leh thabona chu hnot hmangin taimakna thuom a’n bel hlak a nih.

Chun, taima taka thil ei thawna san chu lawmman hmu ei inbeisei lei a nih. Tu lai hnaia Washington DC bula um US National Institute of Mental Health chun Dr. Barry Richmond inrawina hnuoiah zawng hmangin thabona le zomthawna hi lawmman beisei leia hne thei a ni le a ni naw fie tumin an bei a. Zawnga khan thathona ‘hardworking gene’ an kâp lût bok a. Thaw dinga an ti kha an thaw inrang po leh an lawmman dinga an sie fak ding chu an dong inrang a. Lawmman beisei leiin zawnghai chun thatho takin an thaw el a ni thu kum 2004 khan an thil enfie rizal chu an insuo a. Taimakna le thathona damdawi an kâp chu kar sawm lai a thok a, chu sung chun thil an thawna tinrêngah an chakvak bik niin an hril bok. Hi research thil tum tak chu mihriem lungril zuoi le ngui (depression) sukharna dingin gene therapy hi hmang a thrat le thrat naw thu mihriem inhnaipui tak zawng hmanga fie a nih.

I thabona leiin thil i thaw ding ieng zat hiel am thaw loin i um a? Voisuna thaw zo el ding zinga thaw dingin ieng zat am i khêk a? I thaw ding i thaw naw leiin harsatna i chungah ieng zat am a tlung ta a? A hun taka thaw ding i thaw naw leiin hamthratna i dong ding ieng zât hiel am i chân ta a? Ieng chen am i zâl ding a na? I zâl chu ieng tik am i tho ding? Ringtu chu a taima ding a nih.

(Delhi, May 31, 2007)

WELFARE CHANCHIN

noreply@blogger.com (Guwahati Tlangsam Editor) — Tue, 30 Aug 2011 02:18:00 -0700

(22/08/2011 Issue):
Pu Lalzuithang, Secy,HWSG

Hun iemmani chena inthawk khan Nu le Pa, khawtlang ngaituo mihai chun Hmara Welfare Society indin kha ei lungril le eingaituona nizing sienkhawm., Guwahati sunga ei nimi um hai hi ei umna hai alo inkilkar el bakah Society hei indin el chu thil awl ai alo ni naw a. Sienkhawm student le Sungkuo ei hung pungpei tak leiin, khawtlang thuoitu neilo ringawta um chu thil theilo a hung nitakleiin, Guwahati a nu le pa, student umhai chun lotheilo angaiin khawtlang thuoitu ding in Dt.22.02.1997 in Hmar Welfare Society. Guwahati chu indin alo nitah
.
Hmar Welfare Society Guwahati thouitu hmasatak hai.(1997-1999).
1. Chairman                     : Pu.L.K.Varte
2. Vice Chairman            : Pu.Thanghlun Hmar
3. Secretary                     : Pu.L.Infimate
4. Asstt. Secy                  : Tv.Roger L.Zote
5. Fin. Secy : Pu.Lalzuithang
6. Treasurer : Pu.Thanghlun Hmar
Committee Members:
1.Pu.Lalthangluoi
2.Tv. Jimmy Hrangate
3.Tv.Jimmy R.Joute
4.Tv.Hrilthankung Sielhnam
5.Tv.HD Ramtawnlien
Advisers:
1. Rev.HM Songate
2. Pu.LT Hmar
3. Pu.John K.Sellate.

Kum 2011-2012 sunga Hmar Welfare Society Guwahati.
1.Chairman : Pu.Thanghlun Hmar
2.Vice Chairman : Upa L.Infimate
3.Secretary : Pu.Lalzuithang
4.Asstt. Secy : Tv.Rothanglien Khawlum
5.Fin. Secy : Pu.C.S.Daniel
6.Treasurer : Dr. C.Chonzik
7. Information Secys: Pu L.K.Varte & Pu Sumsemthang Faihriem

Committee Members:
1.Pu.Rothangkhum Suungte
2.Tv.James Neingaite
3.Tv.Rosanglien Puruolte

Einilai member ei hungtampei tak lei le tula ei hriettak leiin, Dt.26.07.02011 in By-resolution in committee member thlangna aum a, hieng ahnuoia ang hin:
1.Tv.Pu.Ropuithang Darngawn
2.Tv.Medad Khawbung.
3.Pu.Vanlalding

Advisers:
1. Rev.Lalchawlthang Thiek
2. Pu.David Neitham, APS.
3. Pu.L.B.Sinate.

1997 a inthawka tuchen hin Term indiktak in thuoitu Pathien zarin eila neitheipei. Termtin a mihai hang zieklang vawngdingin chun ahmun in adai nawding anleiin, a abul lo tan tu hai le tuta sunga chel mek tuhai ei hung tarlang anih. Hmundangah a renga tarlang nilem el sien.

Hun iemnani chen a inthawk khan ei thuoitu hai le tlawmngaipawl tamtak chun Thlanmuol (Cemetery) neihi ei pawimaw hle ti eihrieta, Pawisa tamtak le tha tamtak sengnading anleiin buoipui theilovin um inla khawm. Kum 2004 khan ei thuoituhai Pu.LK Varte, Chairman, H.W.S.G. le Pu. CS Daniel, Secy H.W.S.G. hai min rawina hnuoiah nasataka buoipui in, ei Welfare chun sum (Pawisa) kutah umsa neinaw inla khawm, a theidan dan angaituo le lungril le ngaituona hai tamtak sengin, Pillangkatta ah Thlanmuol hmun Begha khat (1) ei lonei antah. Tuchena, ei thlan muola inphum tachu mi pariet (8) an tling tah, chulai chun ei member indiktak chu mi pahni (2) anih.

Ei thuoitu hmasahai khan ei khawtlang tadingin nasatakin hmahai la in, sinhai anthaw a, chuongang bawkin tuta thuoituhai khawmhin, an sin anlak chara inthawk khan pawimawtaka ngaiin, Welfare registration nading buoipuiin, Society registration chu zofel anitah. Bank Account khawm beiseitaka ei umzinglai, tutatum chu nasataka buoipui anihnungin Bank A/C khawm chu eilo nei tah.

Ei Thlanmuol khawm hunsawtnawte hnungah eihung ditkhawpnaw elding antaleiin, inchawk belsa beisei ania. Abul taka (a sir) ami, Khatha thum (3) vel an zawrnuom bawk leiin buoipui mek anih. Kutah sum eineinawleiin, Fund raise nading in Gift Coupon siem ania, achin alien, a tar azurin, ka sawltah ie kei chu, tikhawm umlovin, nasataka buoipui supsup mek anih.

Hmar nauhai anlo duoi bik lem ie!

noreply@blogger.com (Guwahati Tlangsam Editor) — Tue, 30 Aug 2011 01:59:00 -0700

(22/08/2011 Issue):
L.K. Varte
18.08.2011
Hmar pahnam, manmasi thlahai hi anlo duoi bik lem ie!. An thlatu haiin thingbul, lungbul makpo, si‘tui muolsu kara hu chechephai an tia, hrietlo pathien umnaa ngaia biea, inthawi hlakhai kha AD 1910 khan Gospel Chanchintha eng in a hung sun var ta a, hun sawt a riel nawh, zaah za deu thaw Kristien an hung ni tah duok el a nih. Chu hnam chawmhai chu van Pathien thuhring, Gospel Chanchintha innghatna anlo ni ta zing el.

Hun hung fe peiin, mihai angin thiemna le varna field ah inruolsiekna chang an hung hriet ve a, Pathienin thluok hrietna le varna zungzam a pek ve hrim chu hung kak suokin Hmar A W B an hung nei vea, Lower School, Middle School le High School runpui ahhai chen, vala le nghaknuhai chu hung inlawi ve in an thluok an hung chalei ve tan tah. Mihai hraiditlai le duotlai an hung ni a, thiemna le varna tinreng an hung inchuk ve a. Sierkawp tinreng, saptawng, geography, grammer le miropuihai chanchin ro anrel dan le ram anlak dan ziekna history haiin an lungril a hung challenge ve tah. Algebra, sierkawp tinreng (chakravarty) le sailaidi, geography le biengno hang dawn pawl naw thei an bik ta bawk si nawh.

An tluong lampui hraw chu a tluong ta naw leiin thenkhat an in suia, sailaidi, tuthlaw le lawmruolin lungmawlna ram tieng a thuoi kira, sininrimna leh an biengah thlantui luong zawi zawiin an damsung nihai Genesis 3:18 sukdikna in an hmang rala, vawisunni chen hin an thlahai sawlna hri le tamna hri in ala bawm zing el. Unau chuong hai chun santu an ngai a nih.

Biengno fawp phakloa sailaidi ramtang sanhai, zole‘zolova inchuk tawk tawkhai, be‘hna changal hme mei meia duthu aianga sam hlak loni hai sienlakhawm Gospel Chanchintha le inchuk kawp anni leiin; juda tlangval kaldai varna inchuktuhai ang el khan vailu‘bawk, ngaituo sawl ding chuong neilohai, lekha ringawt buoipuihai chu an hung el phak ve tah. Hnam hnufuol le hnamchawm in thlierna um sienkhawm thlier thlak thei ruol anni chuong ta nawh. Sawrkar sutpui, rorelna khawlpui hmun pawimawhai ah pa rawnkai, nurawnkai an hung ni pei tho anih, Hmar nauhai hi anlo duoi bik lem ie!.

Chulai zing chun, an lekhathiem hmasa haiin chawlhmun ang mei meia an ngai, sawrkar school tehai le mission school haiin an vanglai nihai a nangchila kohran ram chau naw chu invaivungna ding a um ta nawh. Kohran pakhat elin a keng tak naw leiin, in the buoi nuoi nuoi a hung tul ta a, tu ruok hin chu Lalpa tlangthienghlima insuknat hrim um ta naw nih. Chuonglai chun a then azar hung thangharin khawpui lien lem tieng an thlira, chantawka sawrkar sin a um ve el rawm tiin ramril an pan a, sienkhawm date of birth thumhnuoi seng alo ni bawk si nawh. First March a pieng tam takhai sawrkar sinthaw dingin anlo upa ta si. An var bik lei khawm nichuong lem loa, inchukna insang, trainingna tieng lo ban tal tal tuhai, Pathienin a vochuom sa hrim thiemna le varna zungzam annia um chu hung to‘in, hung parsuokin a hung ra suok ta a, competitive examhai fe thlengin sawrkar sin an hung chel tan ve tah. Hmar upahai duthusam pielralah, faisaring in, khawvel kanan ram anlo chen ve ta zing alo nih.

Vawisunni hin chu an ram del vena chin chin a chu hril hat hat an kai ve an tah. Government department tinah, district administration, educationa institutions, universities, reputed colleges le ki dang dangah mi sirde thei ding bik anni ta nawh, India sawrkar aiawa foreign embassey haia thuneithei tak tak kawm an tam anih. Hmar var lo tlai deu ta sienkhawm, i ringnawna hmun ahhai khawm hmar-nauhai hmu pei i tih, Chanchintha le fe kawp anni tlat leiin. Chu chau chu anle, dar‘anga anlo sai hlak New Delhi a lem chu sawrkar thlungpuiin a suong le a ring zo emem elhai ankat nuk el a nih. A then lo retired tahai sienkhawm anin kapupchaw zut zinga, tu lem hin chu tiemkim theilo hiel khawpin achin le a lien, company chi dang dangah Hmar nau anin zi‘nuoi nuoi el a nih. Ropui le insangtak tak bolo, inhnuoi taktak bo lo, inbuldet nei hlak an tam, street boy le street girl khawm an kat nawk an tah. Vairam tia ko hlak, New Delhi, Guwahati, Silchar, Bangalore, Kolkata, Mumbai, Pune, Chennai, Chandigarh, Allahabad, Dehradun, e! a tam taluo. Hmar tawng anleng ve deu nawknawk vawng an tah. Khawvel rambung hran hranhai hlak chu tienapa rama anlo del chil ve an ta a, khawvel hi Hmarhai inzunna ram alo nih.

Democracy lukhaitu, Member of Parliament, Member of Legislative Assembly tihai ruok a hin chu hmu ding an tam naw khawp el, Gospel in a ngarkhuoa khawm ning a ta. Mizoram a ruok khin chu dulian tawng hmang an um deu pheupheu zinga. Hmartawng thienghlim hlawka hmanghai laia chu hril ding meu an um nawh; Tipaimukh Constituency a khin Aithingbil siem vanglai in‘el ang elin anin zi‘nuoi nuoia. Hmarhai hi mak ve tak chu an nih.

Hieng mipuihai inenkawlna ding hin an tienlai Zawlbuk chu Gospel-Kohran buka hungin thlakthlengin khawtlangnun khawm chu Gospel thanglo chun ser‘amu‘athur thei tak tak ta nawh. Tienapa rama inthawka anlo del ve tah hieng Mizoram, Assam (NC Hills le Karbi Anglong, Cachar), Manipur, Meghalaya ahhai hin chu a hmun le khuo deldan izirin Kohran buldet neiin, Gospel Chanchintha zungbula hmangin, khawtlangnun khawm mawitakin an siem pei hlak. Village Authority, Val‘upahai neiin nunghak tlangval tlawmngaina chuoilovin, Gospel hmangaina belsain an tlawmngainun an hmang hlak a nih. Hun iemani chen a inthawk khan an pilepuhai hnung thuolin Assam State hieng Karimganj, Hailakandi, Kamrup, Kamrup(Metro) haia hin hmun an hung khuor ta pei bawk a , Hmar nauhai hi anlo duoi bik lem ie!.

Khawtlang nun enkawlna dingin Hmar Youth Association (HYA), Hmar Inpui (Hmar Supreme House), Hmar Welfare hai hung pieng suokin Gospel Chanchintha a zung keidet tlatin annghet bur el a nih. Political organisationhai, hnam vengtu sipaihai chanchin hang hril sa lem lem inla chu aw hmulthi an ding uoi uoi el ding a ni si. Hmar nauhai hi hril khawp anlo kai hrim anih.

Amiruokchu, hieng mani khuolevenga inenkawlna huopphak bak, khawpui lien, ni danglaia a saia anlo sai hlak khawpuiah hai chun umhmun det khuorin, vanram kai hma po a dingin tuon anlo rem tawl tah. Hieng Hmar hnam thlangthlahai khawm hi nuom pawng umdara zu umdar el khawm anni naw a, Gospel zungpui zawma inkhai khawmna neia um vawng an nih. Thlangthla laia bengvar hmasahaiin Hmar Worship Service (tuhin chu Hmar Christian Fellowship an ti tlangpui tah), Hmar Welfare Society/Association hai hung hmusuokin, Hmar Students Association (HSA) hai hung suk tharin anin sengmuk tak tak a nih. Hmar nauhai hi avar le a hrie, mithiem anlo tam ngei el.

Asia rambung, India rama khawpui lien deu deu haia umhmun an remna hi ala sawt bek bek naw a, thangli thangnga bak hi chu suikir ding ala um hri nawh. Hieng hun hma hin English Fellowship, Evangelical Union (EU–National & International) ahhai, Mizo Fellowship umna na ahhai Gospel ram hmathuoitu, lukhaitu ahhai anlo thang pei hlak a nih. Tu chen khawm hin Hmar Fellowship um nawna hmun haia chu neitu chan changin an Pathienin mei nilovin luah a siem pei chu tie!. Gospel Chanchintha an bel lei hi chu ni tak tang a tih.

Sakhuona le khawtlang inenkawl dan kawng thu ah, an khuo‘hlun tieng le vairam khawpui khawthar satna hmun chu an ang thei naw a, in tingmitna um de sienkhawm a ram leilung izirin, khawpuihaia in enkawl dan chu thlur dangin afe ve ve alo ngai ta a.Vairam khawpui an bawna ram hang thlur bik deu ei tih. Mak ve tak chu a ni, Hmar mi ni taphawt chu tukhawm kohran bik, kohran buldet neilo an um der naw a, mani vengtienga kohran; EFCI, ICI, EAC, RPC, PCI, AG, UPC, Methodist or pawlthar tulaia suokthar pawl pakhat bek chu anni tei tei hlak. Kei Paula pawl, kei Paullo pawl ti a tam khawp el, Hmar nauhai hi pui ve tak chu an nih.

Chuonghai chu fuonkhawmin Gospel thla hnuoi ah Hmar Christian Fellowship anin din pei bawka, Hmar Welfare Society/Association in a zui pei bawk. Tu hri ngirhmun a chu Guwahati khawpui, Silchar khawpui, New Delhi khawpui, Pune khawpui, Bangalore khawpui, Mumbai khawpui, Chandigarh khawpui ahhai lungruolin anin dina. Anla zuk indin el nawna khawpui, Kolkata, Dehradun, Dibrugarh, Jorhat,Allahabad, Hyderabad, Chennai, etc. ahhai hin Hmar nauhaiin leadership an lak pei tho chu tie!. An Pathien bel hin nasatakin mission field ahhai an pensuok tir tak meu a nih, dang tum inla khawm, zuk dang el ruol ding anni nawh. An lungril phek chungah Gospel Chanchintha chi tua um chuh, par ding le ra ngei dinga enkawl dinga thu pek anni si a.

Amiruokchu, kohran dang danga inthawka fuonkhawm anni leiin Krista Fellowship, simple le inthieng felllowship taka, parent Church hai, an kohran bulpui inzatak le theinghillova Lalpa an Pathien rawng an bawla, zang khaitaka ro aninrel chu a pawimaw hle a nih. Chuongnaw chun, an i dohai hi tisa le thisen anni si naw a, vanhmunhaia thlarau suol umhai, diabol a rawihai anni lem si a, hne naw nihaia an boral el ding anih.

Chuong ang bawkin, Hmar Welfare khawm anin din zui pei bawka, HSA khawm suk tharin a um pei bawk; tuva a hrat bik zuolnahai chu, New Delhi, Guwahati, Silchar, Bangalore, Mumbai le Pune hai hi anni deu tak. Welfare tlawmngaina thiltum chu, thilemang angna, rikrup thil haia le, khawtlang le hnam sukbuoi zawng, sukhmelhem, sukmuolpho tumtuhai laka hnam humhal hi a nih. Pilepuhai tlawmngaina Gospel taka kenkawa, mi hmuphaklo ramah, inpak fawm hnawt lova, a rinum a khawm mani intheinghil thak ram, beidong lova tlawmngaina insuo chu a nih. Studenthai khawmin Welfare ni zingin education tieng an thei nghil ngai ding an nawh, HSA hi inthuruolna kengkawtu ani sia. Hnam dang dan thahai la veng ei ta, an dan suol thik lovin, in pumkhata ngir tlatin, ti rawhai seh!

Kohran v/s Kohran

noreply@blogger.com (Guwahati Tlangsam Editor) — Tue, 30 Aug 2011 01:19:00 -0700

Pu Ramthienghlim Varte
Shillong
(14/08/2011 Issue):
Hmarhai hi tam bek beknaw inla khawm Kohran pawl iemani zatzet ei um a. Sawrkar inthuoidan ang deu hlekin Headquarters, District ( Kohran thenkhat chun Pastorate an tih ) le Local ti’n ei thawa, bieltu Pastor khawpui le khawtea hai neiin India ram le puotieng hmun hran hranah Missionary ei tir suok a. Ieng kohran khawm nisien tuchena rawngbawl dan system hi en chun Isrealhai ang deu khan, hieng– (a) Roreltu (b )Rawngbawltu le (c) Sum enkawltu tia the ani deu vawng bawk. Sawma pakhat le fund head dang dang siemin, sum le thil dang dang ei neihai dengkhawmin, Kohran pawl tina sum ei laklut hi a tam em em a. India puotienga thangpuina dawng khawm tam tak ei um. Chuleiin, Pathien ramlienna dinga indin, Pathien kohranhai Kohran inthieng ei nih.
Sakhuo puithiemhai hi kohran memberhai tading chun inza an umin, harsatna le beidawngna tuok chang khawma mi hnemtu, Pa, Naupa le thlarau thienghlim hminga Pathien ai-aw a mipuihai lu chungah kut innghata malsawmna Pathien kuoma mi hnipektu dinga ordination pek an nih ti khawm ei hriet seng. An mawphurna hi an sangin Isreal hnam sawm le pahni ram insemna a thangve lo Levi chi Puithien sinthaw dinga Lalpa’n a ruothai chun rochan neive nawni hai a ‘Lalpa Pathien chuh an rochan ning a tih’ tia ei hmu ang khan vawisun a ei Sakhuo puithiemhai ngirhmun ding khawm hi nive awm tak a nih. Hmun inthienga rawngbawltu ding le Pathien hausakna intawmpuia ringum taka Lalpa rawngbawl dinga ngai an nih. Chuleiin, Pathien kona hre mumal lova khawvel khawsak-fakzawngna ding ringawt ngaituoa inbur mei mei na chi ni’n anlang nawh. Chubakah, khawtlang nun chen a ramtin-ramtanga inlap rak rak ding le khawvel thila hausa ther-thur ding khawm an hawinaw hle.
Ei hnam mipui tam le tlawm ngaituo chun Sakhuo puithiem (Levi chi a saphun) a nei rawn pawltak ni mei ei ta. Ei sawma pakhat le thawlawm dengkhawmin ei chawm hnenaw vang vang tawl an ta hi. Cher cher el a.
Hi hi nirawi nawnim ‘Thiempui hnam annawleh, Pathien mansa bangna’ eiin ti rawp rawp chuh. Inhril sa thau zul thei dingin pi le pu sakhuo sie hrea kristien a ei hung inlet hnunga ei sulhnunghai enin record tha tha hnamdanghai nekin eilo nei zelzul bawk leiin, ei kawlvela unauhai kuoma rawngbawlna ah a thaw hlawk pawl tak eini reng.
Chuongangin, Pathien rama roreltu dinga ruota umhai chun indik le huoisen takin ro rel hai sienla, mi dangin inchupui naw raw se; rawngbawltu dinga ruothai chun ringum takin rawngbawl hai sienla, mi dangin inchupui naw raw se, sum enkawltu dinghai chun ringum takin enkawl hai sienla, mi dangin inchupui naw raw se; mipui sinthawtu dinga ruota um hai chun ringum takin malsawmna dawng thlak dingin thaw raw hai seh. Chuongchun, ei buthleng le kuong hrein ei hmazawn sengah ringum taka sinthaw dingin pathienin mawphurna a mi pek hi a pawimaw takah sie inla.
Hi thu hi ka ngaituo chang kei chuh sakhuo puithiem sinthaw dinga ruot hi ni’n kan hrietve ngai nawa, Pathienin thiemna le varna ami pek hi hmang tangkai a, ka phak tawka a ram suklienna sinthaw dingin kan ngai tawp el. Ka buoi ngai nawh. Kum 1991 a inthawk Sawrkar sin ka thaw tan vea. Pathienin ka mawphurna dinga ami ruota ka ngai leiin tuchen hin ringum takin ka thawa. Ka hun remchang anga kohran le khawtlanga ka rawngbawl vena dam, thei ang anga thangpui ngai kalo thangpui vena dam, naupang inchuklaihai le sawrkara sin hmutharhai, mirethei te te, annawleh Sipai pension ofis kalhmang hre bek beknaw hai inzak dawr dawr a mi dang kuoma ‘Sir’ annawleh, ‘Sap’ ti ngailova eilo thangpuihai dam hi an tadingin hluve tak a nih. ‘Mi dang tadinga malsawmna’ tihi hiengang bak hih ani chuong ding am aw, ka ti hlak. Chuongangin mi dang khawm nive tho an ta. Eini, a mipui, sinthaw pawlhai hin ei sinthawna hmun senga sum ei hlawsuok sawma pakhat le dang danghai dengkhawmin Pathien rama rawng ei bawlve a nih. Hi taka ka suklang nuom tak chuh, mani kuong le kuonglo ngaituo derlova Lalpa’n ramri ami khangpek dai ner a, Kohran rama dam, khawtlang thil a dam mani mawphurna ramri hrelo annawleh ngaisaklo hi a pawi em ema, hienglei hin kohran pawl hrang hrangah inhrietthiemnawna le buoina a um thei hlak a nih tihi. Hi thulaimu hi phawr laklaw chun ziekding tam tak el a um, a khelneng a khelnawng a hei thaikuol dingin phek tam a hluobit ding a ni leiin mi puitling chinhai lo ngaituo dingin sie lem ei tih. Pathienin mawphurna a pek che thuruk kha hrietchieng tum la, i nunah a pawimaw takah sie la, chu ramri chuh pel ngailo dingin nitin i nun Pathien kuomah inhlan rawh.
Chuongang peiin, Nupui thahnemngai, busuong zata a kutpar a an tham bufai tlawmte te, rethei thangpuina, missionary fund, hmeruo zawr, pounthuia harsa em ema an hmusuokhai dam le nitin nisa suok zuia ei sinthaw rasuokhai sawma pakhat le dang dang Sakhuo thiempuhai tadingin ei peksuok a. Theitawp tawpin ei tawngtai pui a, ramthim thangpuina ti’n sum le pai chauh nilovin ei fak sikhai pein bungheiin ei tawngtai a, ei thuomhnaw tha thahai ei pek bawk hlak. Chuonglaia sakhuo thiempu thenkhatin kawttler le khawlai dunga thieng le thiengnaw inkar a pawisa hmusuokhai ang mei mei a ngaia an mi dekral pek pei el chun pawi ngawt a tih. Kohran hotu lien le sakhuo thiempu tuelkhawm a ti umzie ngaituo derlova insuk milienna a hmanga khawral le hmang mei mei hi thaw tam chi ani ka ring nawh. Pathien sum hmangsuol ti umzie hi hre seng ei tiu.
Chun, hiengang ching mi, thuoitu le rawngbawltu hi pawltin a hin ei umnaw thei nawa. Kohran tadinga mi hnawksak, chier hrat, hlaw tlawm sawisel zing zing, fena tieng tienga buoina siem hi an mizie tlangpui ni’n ka hriet. Hiengang mi rawngbawltu le puithiem ilo ni pal chun thiempu Ali hai sungkuo kha hrezingin i suolra sik hma’n i sina inthawk inban nghal rawh, i ta dingin thalem a tih..
Hiengang mihai leiin, kohran mipuiin ‘Ei kohran a sumlut ngaituo’n ei rawngbawlna leh an mil naw ngei ie’ ti dam ‘Ei Pastor, Pro-Pastor annawleh Tirko pa hi iengtikam an sawn ding chu aw, insawn vat vat sien tha ding ana, amiruokchuh, hotu lien sung-kuo ami ani bawk si maw ‘an ti rawp hlak rawngbawltu le sakhuo thiempu thlarauva hringna nei lo, Pathien kona hre bawk lova thawkve, sawrkar a sinthawhai khawm tluklo rawngbawltu ni pal ei tih tihi inlau um tak a nih.
Chun, kohranin dan fel le tha tak tak ei siem a, ser le sanghai uluk theipatawpin ei buotsai hlaka. Nuhmei-pasal dan lova innei le nunghak-tlangval lo um suolhai chungchang thu rel ding chun Sudden Muong nek hmanin ei phawirang chang a tamin ka hriet. Chuonglai zing chun kohran member thenkhatin thieng le thiengnaw kar a an sumdawngna sawma pakhat a sing /lakh tel an hung pek ruok chun thuhril an thiem tam an thiemnaw tam Pulpit a ei nam kai el hlak hi tie maw. Inzak um tak a nih. Hiengneka Pulpit hmangsuol hi a um bik chuong ding am aw ka ti hlak. Pathienin ‘suol’ ati chuh hril chier ding a um nawh ‘suol’ a ni el. Pathienin Tribal concession a nei ve nawh. Khingtiengpanga ruok chun suol tawpkhawka ei ngai Khawtlang le hnam hmel suksetu Zurui, damdawi addict, rukru, khel hrila fakzawng le tharum hmanga mi pawitawk hlak hai ti teh. Dan puoa ei sie kala hrietve der nawh. Kohran thuoitu haiin ieng ngirhmun am ei sie tawl aw. Suol seng seng chuh. Abraham kuoma chi tamtak thla dinga Pathien thutiem ngaituo chun Nuhmei-pasal indit em em a innei hi Pathien thu ani lem naw maw ma nih..
La hei belsa met lang, kohran pawl thenkhatin dan lova innei kohran dai ner tiin mi ei hnawtsuok vak vaka, dan puoa umsung chun ser le sang iengkhawm an tawk a thieng nawh, ti’n, khuongvuok phallo, pulpit kai phallo….. phallo…phalo vawng, thiemnaw Arbawm rik em em ei inawr tira, an inneina thingpui khawm dawn ei khapa, kohran zanthima um, zalenna neilo Kohran Jail a ei khumlai zing an nih. Amiruokchuh, dan sunga laklut ding chun Pastorin an lu chungah kut innghatin Kohran ser-le-sang laia pawimaw tak hmangin innei tir phawt ata, chuzova dan sunga laklut thei chauh tihi mak kati tawp theilo a nih. Dan pangai a an thawsuol awrhai po po hliptlak vawng hnunga thawlem ding chau ni awm tak. Iengkhawm nisien dan siemtu ka ni tlatnaw leiin ka hrietthiemnaw thu ka hei hrilve a nih.

THINA VARAL

noreply@blogger.com (Guwahati Tlangsam Editor) — Mon, 8 Aug 2011 09:33:00 -0700

Lalringsan Hrangchal

(7/8/2011): Kum 2010 June thla khan Cauvery Vadung, Bangalore le Mysore inkar a khun tui sunga karkhat training kan zu neia. Kan training na lai tak chu feet 80 a inthuk a nia, a sunga chun Livir hrattak a um bawka. Mi137 kan nia chu lai chun mi 20 vel tui inhlieu thei kan nih. Nikhat chu mani damna ding seng siemfawm thuomhnaw (Improvised Equiptment) chawia tui sunga inchawm lut seng ding ti order a hunga. A thenin Zu bur hruiin an hung khit khawma, thenkhatin plastic bel an khit khawm bawka, midangin an zalna khum chu polythene lienpa a hung tuomin an hung inzawn dawk bawka, a then in ruo tawl le thing bawng an hung put bawka. A hunbi indiktaka chun tuia chun kan inchawmlut senga. Bel chawi pawl kha an thi ka ring deua chu damtakin Barrack kan inlawi thei senga.

Campa fakding inchua kan buoi nawk nawk lai chun minute 20 hnunga Chest No. wise a pakhat khata tuia inchawmlut nawk seng ding ti order a hung nawk a. Ka ruolpa D.J. Nath chu Chest No. 48 ani leiin a hmasa Platoona a thanga, fakding chu kan inchu sawk sawka, a fakzo chun tuia chun an chawmlut a. Vadung chu inhlieu tana hung kir nawk ding a nia. An hlieu tan zoa a hung kir nawk tieng vakam a hung kai nawna hlam hni vel chau bak ta a chun, ‘Mi san ro’ tiin a kheka, vakam kan hang lakdawk fel chun THINA VARAL a lo kai fel der ta si.

Beidawngtaka a phinghai nama thuok kan hang pek khawm chun a tangkai tanawa, a baua inthawk chun darkar khat liemta a thipuhaka kan inchu kan fakthei fakhai chau te kha a hung luoksuok ta si. Chuongchun nitina a thlum a al fa tlanga hremna chi tam tak tuora lungngaina kan tlangpui ka ruolpa chun chatuon hremhmun panin THINA VARAL ami kai san tah a.

Hunhai liempeiin nitina 3:30 am a thoa inthim rawta sinthawa sawl em em a thimbuta camp kan inlawi dap dap hunhai khawm te chu hunin a liempui ta a. Tuhin chu training lai ngaituo chun hotuhai tir chak tawk chau ni inlang khawm a hmingin thangpuitu naupanghai dam neive in nunthara lenga kan ngailai, April, 2011 khan lungngaina kan tlangpui ka ruolpa Churachandpura um Zou hai, Silchara posting mek chu a khaka 9mm Carbine mu hnia kap in a nuhmei a nauhai chu khawvela inhmu nawk ni um talo dingin THINA VARAL a kai san nawka. Chu zo sawtnawte May, 2011 khan kan training laia zal tawma Ziel hawpa ka tlanruk pui hlak ka ruolpa Vaipa chun chatuon hremhmun panin THINA VARAL a mi kaisan nawk a. Chu hma met March, 2011 khan harsatna tam tak tuora lungngaina kan tlangpui naupang mi 8 lai ramhnuoimihai ambush leiin chatuon hremhmun panin THINA VARAL an mi kaisan nawk a. May, 2011 khan Pakistan sipai ha’n ringlo thuta an mi hung kap leiin naupang pakhat chun chatuon hremhmun panin THINA VARAL a mi kai san nawk a.

Lungngaina kan tlangpui ka ruolhai le naupang ringum tak takhai san hman ni loa chatuon hremhmun pana Thina Varal an mi kai san ka beidawng thei vei le kan hotu lientak a inthawk message phek 4 a sei ka lo hmu vea. Kan umna area 8.7 kms huongsunga mihriemhai le ka i enkawl ‘A’ Coy a sipai umhai popo himna hi ka mawphurna ani ziet hre nawn ding le ka Company enkawl sunga Sipai, Pakistan sipai hai le ramhnuoimi hai kuta an thi a ni vei chun Commander tawp, mawphurna hlen theiloa ami sie ding thu a mi hung hrilna a nia. Chu nia inthawk chun ka ngaituoa, ka umna area 8.7 kms sunga mihriem umhai le ka I enkawl ‘A’ Company a sipai umhai popo hi India sipai ka ni leia ka mawphurna a nia. An hringna in THINA VARAL a kai hma ngeia an thlarau Krista kebula thuoilut ruok hi chu Pathien Nau ka ni leia ka mawphurna a ni ziet ka hrietsuok thar pha a.

Ka ruolpa tuia thi pa kha training kan zo chara nuhmei nei dinga inbie felsa vawng an ni ta a. In tieng fe kar hi a nghakhla thei em em a, zingkar kan tho phat hin, “Bai veng ei fena ding ni chu zat chu a la bak” a hung ti nguo nguo hlaka. A thi ni ding zingkar, hmai kan phi lai khawm chun, “Bai, tuhin chu In tieng ei fena dingin ni 3 chau a bak tah” tiin a la hung khek nawk luo luo ana. Sienkhawm khang lawm lawma in tieng fe chak kha a hmangai em em le hmu kar a nghakhla em em a nuhmei huol le a nu le pahai bula inlawi hman taloin chatuon hremhmun panin THINA VARAL a kai lem ta si.

May, 2011 a inthawk khan Line of Control, Pakistan le ei ramri titumna hmuna an hrilna lai tak khin Forward Defence Line in Bomb Platoon a ka hang um chu Thina Khotlanga ngir ka ni ziet kan hrietsuok thara. Hun sawtnawte hnunga chu keikhawm ka ruolhai zuiin Thina Varal ka kai ve vak ding an tah ti inringna dettak hi ka nei zinga. Tirko Paula’n, “Kei chu inhlan zinga um kan ta” a ti ang el khan ka thilthawhai le ka fena taphawt hi a tawpna tak ding ang vawnga ka ngai ta leiin ka khuo hi a sawt thei hlea, ka sin inrimpui naupanghai khawm te hi ka ngai tawla, an ni khawmin an mi hmangai hlea. Khawvar hmel hmu theia ka um dam, zan inthim hmu theia ka um nawk el dam le bu dam fa theia ka hang umhai dam hi ka lungril tak tak in ka lawm a. Ni dang khan chu Tar hi ka nuom ngainawa tu ruok hin chu Tarhai te hi kan hnar ngawi ngawi hlak chu!

Ka ngaituoa kei chu Thina Varal ka kai ve huna khawm Lalpa zara ka rama Krista Rohluopuitu ni dingin ropuitaka lut ding ka ni a. Sienkhawm nitina ti dawr dawra ka sin inrimpui naupanghai ruok te hi chu an dam sung rimsitaka an hmang hnungin Thina Varal an kai huna chatuon hremhmun pana an hang liem el ding hi ka lungril ana thei em em el a.

Forward Defence Line a chu sun-zan duty chawlna hun reng reng umloa in ralring zing a tul leiin OP Duty, Ambush, Patrolling, Recee le Nakabandi nei hlak kan ni leiin hun awl hi kan hmu tlawm em em a. Chubaka Vur rama chu thuomhnaw hi a hul intak leiin an Bullet Proof zakuohai lem chu ei naupang laia hnap hrukna ei zakuo hma tler inkawl rak ang el kha ana, an puonhnuoi silhai lem chu a bal luot lei hin a khu sut sut theia. Ambush kan nei huna lem chu ramhnuoia ramsa an tam leiin a chang chu Thinglera dam kan riek hlaka. Chuong sa khawm chun an nuhmei/nauhai thlalak te hi an zakuo mansa a hin an pai tet a, an zal pum chun an la hang en tawk tawk hlaka.

An khovel hringnun hi a rethei em em el a, nuhmei nauhai ngai ngawi ngawia ral hmatawnga khawsa annia. Khawvela hlimna le beiseina an neive sun chu theitawpa insukfaia an thuomhnaw tha tak inbela an hmangai em emhai hmu dinga suti fe hi a ni el a. Sienkhawm chu an i beisei ve sun khawm te chu fe thei taloa ralhai silaimua hliemtuora an hmu chak em em an nuhmei/nauhai bawisawm phakloa naupang ringum tak tak ha’n chatuon hremhmun pana Thina Varal an kai ka hmu hin chu ka mitthli hi a tla ve hiel hlaka.

Sipai dan hnuoia ka um leia ka mawphurna dinga ka liengkoa innghat chu zantieng dar 5:00 pm zat hin OK report ka pek thei hlaka. Sienkhawm a thlum a al ka I dawn pui, thina khotlanga thunga nitina sin ka inrimpui naupang fel tak takhai Lalpa’n an thlarau a kuoma thuoi dinga mawphurna a mi pekhai san hman ni ta loa lungngaitaka chatuon hremhmun pana Thina Varal an kai ka hmu chang hin chu Zawng Sipai ka thang hi kan sirna a zuol thei em em el a. Lo thangnaw ni lang chu ka bula um thlarau bohmanghai te hi hmangaina nei nawng ka ta, lungngaitaka Thina Varal an kai hi ka hmu naw ding ana, chu popo khela an thlarau Lalpa kebula thuoilut dinga mawphurna hi ka liengkova annghat naw ding ba!.

Natna hin misuol mitha thlierbiek a neinawa, thina hin mi fel mitha a ngamnaw a nei naw bawk, Pathien hun ruot a tlung pha chu amak de aw.. tiin Thina Varal ei kai pei ding a ni si leiin huntha tawite ei nei lai hin Nau einina leia ei mawphurna hi phursuok dingin thlarau bohmang tam takhaiin an mi nghakzing a nih. Foreign le ram hla kher khera fesuok kher niloiin nitina ei sinthawna hmuna thlarau bohmanghai kha Lalpa’n ei mawphurna dinga a siem an nih ti kha ei hriet thar hram nuom a um hle a nih.

Hmun tam taka Missionary ei tirsuok hlaka sienkhawm ei bul hnai el West Bengal simtieng pang khuong Jayantipur, Narayanpur, Petrapole, New Farraka, Malda, Murshidabad le Krisnanagar khuo kawla khuote tam tak a biekin Bangladesh le ramri lai khuo a hai khun Pathien Thu reng reng vawikhat khawm la hril nawna khuo tam tak a uma. Kan sin le inzawmin nikum Sept & Oct thla khan khuo 15 lai kan zu sira. Pathien thu reng reng an na ah anla hriet ngainaw thu an hrila. Khuo thenkhat a chu ka thei ang angin Pathien thu ka hang hrila, Hindi ka la thiem naw a, Bengali ka hriet naw bawk leiin a hril antak hlea. Sienkhawm ka hril thei sun sun hai chu an ngainuom em em el a. Sawt kan um theinaw lei chun hril nawk pei nuom um hle sienkhawm ka maksan tawla. Kohran nu le pahai ka hril hlak chun missionary dinga inpe mihriem eiin dai naw baka a chawmna ding sum le pai ei tlak am thuin anmi dawna.

A mihriemhai khu taksa khawsakna harsa tak takel ania. Lekha khawm inchuk theiloa nitin fakfawm zawng anni tlangpuia. Missionary pahni dam I thutchillin sikul dam hang hawng ni inla chu kumkhat sung khawmin tlarau bohmang za tam tak chu ei sansuok hman ring a um hle. Taksa khawsakna rama rethei le harsa bawk Thina Varal an kai huna chatuon hremhmun an hang fe nawk el ding hi lungsiet an um bek bek el a nih. Khawvel sipai ni ding chun a singtel anin tlara ei bul el a tlarau bohmanghai sansuokna sin thawding ruok chun mipakhat chau khawm Lalpa tadinga ngirsuok ngam ei umnaw ani chun Thina Varal ei kai ve huna Lalpa ke bula ei ngir ngam ding am a nih? Lal sinthawtuhai an indainaw leiin a ramsantu dingin Lalpan nang le kei ami mamaw anih.

“Lal sinthawtuhai an indainaw, Lal ramsan ding dang an umnaw maw? chatuon remhmun tieng panin tlarau tiemsenglo an liem zing si. Lal sinthawtuhai thangpui an ngai ngei ei thil nei hai khawlam an um a?.” Fesuok pawl um ei ta tawngtai pawl um ei ta, a petu um bawk ei ta ei mawphurna dinga Lalpa’n ei liengkoa annghat hi Thina Varal ei kai hma ngeiin phursuok hram hram tum ei tiu.

Chuleiin unau dittak, “Tlarau bohmang sang tam inhmang ding hi I phal nawh, Lalpa I hmangai anni, sienkhawm hriltu ding an indai si naw, Lalpa mi hmang raw kei hi feng ka tih” tia pensuok dingin Lalpa’n a nghakzing che anih.

Ephesi kohran

noreply@blogger.com (Guwahati Tlangsam Editor) — Mon, 1 Aug 2011 06:01:00 -0700

L.K.Varte

Vice-Chairman,GHCF

(31/7/2011):Tulai khawvel a changkang ta a, mi tukhawmin suol an thaw nuom ta nawh, an invet nuom ta nawh; thiltha thaw an inchu senga, lungriltakin anni le anni inthiemnawhai sienkhawm, mi hmu ah bek thiemchang ni nuomna generation an tah; i awi zawng am? Ngaituo zui dingin hang sie hre phawt lem ei ti ie. Johan Thupuon bung 2na ei tiem chun, Lalpa Isu‘n hmangai Johan fethlengin kohran pasarihai kuomah hming suotin an umdan, an nungchang le an ngirhmun a puongsuok pek vawnga. Chu rawl chu tulai Christian kohranhai kuoma Krista Isu rawl a ni ti hi inhmei nawm ei niu a, na neia hretuhai ni ngei tumin, Pathien thlarau vau lawkna rawl khawm a nia, hi khawvel tawp el ding tah, hunler khawvel la hmang zingtuhai, a hmangai, a kohranhai lungril sung thangkhawk rawl chu ni mawl raw seh!

Kohran pasarihai Ephesi kohran, Samurna kohran, Pergamos kohran, Thuatira kohran, Sardis kohran, Filadelfia kohran le Laodikei kohranhai ngirhmun puong langa um hi an angnaw senga. Ephesi kohran ngirhmun a hril hi hang thlurbik ei nuom chu a nih. Johan Thupuon 2:1-7 hi nguntaka ei tiem chun, an record tha hle si, anachu hmangna bo kohran, kohran sawl thlawn an nih. Ephesi kohran thilthaw zie, a sin inrim zie, a sel zie, misuol a ngaitheinaw zie, tirko tehlem an fiea khelhlip an ni zie an hriettir ziehai, selna an nei ziehai, Krista hming leia an tuor zie le an chau el naw ziehai a puonglang peka, Ephesi kohranhai chu inpak an va hlaw nasa deh! Nisienlakhawm, Lalpa Isu Krista chun demna, sawiselna hmu pei nawna rieu a neia, chuchu hmangaina hmasatak bansan chu a nih. Chu chu a tluksan ta sia, chu chu a thaw nawk vat naw chun, Lalpa Isu hung a ta, a khawnvar siena a sawn pek tawp el ding a nih. Chu chu thutawp chu a nia, a ta dingin last warning a nih.

Chuleiin, an thilthaw that ni awma inlang intlar det duot sienkhawm, Ephesi kohranhai hin Krista hmabula uongpui ding iengkhawm an nei nawh. Ephesi kohran anga thaw tha vea inngaihai khawmin uongpui ding le uongna ding san iengkhawm an nei chuong bik der nawh. Anni chu thiltha thawa inngaiin an buoi rak raka, Krista Isu an hung theinghil tan tah. A phuta Lalpa Isu Kristaa, lawmna hril senglo an bienga luongliem hlak kha an nun a’nthawk a bo tiel tiela a vuong hmang tah; hmangaina hmasatak kha an bansan ta sia. Krista tadinga dem um, hmupei umlo, hmangtlaklo an hung ni ta a. An tluksan ta chu hrie zinga, sim insira an thaw hmasatakhai kha an thaw nawk naw chun, an khawnvar siena, an rawngbawlna chu sukriral le suktawp vawng ding a ni tah, hmangaina hmasatak a bansan tak leiin.

Ephesi 2:1-10 i en chun, Ephesi kohranhai hi Krista Isu an ring hma chun misuol le lungsietumtak, an nuom ang anga um le khawsa, mani ropuina ding chaua hun hmang hlak mihai an nih. Amiruokchu, Krista hmangaina huong sunga an hung luta, hmangaina hmasa, Krista Isu an hung neia, an lawmna chu an bienga luoithlin a luonga, rawngbawlna rama an hung inhmang ve tah, thahnem an ngaiin ringtuhai thaw awmtak hrimhai an thaw hlak a nih, an inrimin an sawla, an chau chuong nawh. Amiruokchu, hmangaina hmasatak ban santu an hung ni tah, Krista mit an tlung ta nawh. Anih, khawvel mi chun mani lawmna ding le inpak hlawna dingin a thaw hlaka, khawvel dan zawma, a mawitawk chaua tha le suol, Pathien thutak thu zawm silo chu setan a rawihai an na, ama chu an hotu le thuoitu lien, thlarau suol umna, van hmun, boruoka thuneitu lal, suol popo pa, Lalpa Isu khawma “khawvel lal” a iti pa chu an lalpa chu a nih.

GHCFellowship khawm hi Ephesi kohran angna ei nei khawp ela, misuolhai ei lawm naw zie dam, ei thahnemngai zie dam, ringnaa ei fir hle zie na thua dam, mihai mithmu ah chu ei fel a nih. Rorelna chitin reng, AGM, Executive, Local ei tih, department chitin reng, siem thei popo ei siema, hluo senglo ram ei neia, a mihriem hlak chu a pangngai a dang nawh, department tinin program le serlesang ei haua, puotieng en chun ei felin inpak nungchang ei hlaw ve hle khawm a lo ni‘el thei. Amiruokchu, the first love, i hmangaina hmasatak kha i bansan tak leiin Krista ta dinga dem‘um, hmangtlaklo, suktawp le sukboral ding hmabak el i ni ta a nih. Iengkhawm ni chuongnaw ti nih. Chuleiin, i tluksan ta chu hrezing la, simin i thaw hmasatakhai kha thaw nawk rawh; Lalpa Isu Krista ei nunachenga, roreltu le thuneitu a ni lai hunhai kha tapin kokir ei tiu khai! Lalpa mi them vel la, mi hung endik rawh; ritlona keimaa umhai hi; hung hrufaiin mi hung sukthienghlim la, thlarau meiser ka va ngai ngei aw! tiin lawmna luoithli‘n mi chimvel sien nuom a um ngei. Chuongnaw chun ei kuoma hung a ta, ei sim naw chun ei khawnvar siena, ei rawngbawlna, ei invawrlarnahai hi a hmuna inthawkin a mi sawn pek el ding a nih.

Khawvel remhrietna le varna hi Pathien varna le remhrietna a ni ve si naw leiin, Krista Fellowship simple le inthieng hlawk, hmangaina hmasa kha lungruoltakin chel nawk ei tiu khai! Lal David angin “I sandamna hlimna chu mi pe nawk la, I thlarau zalenna chu chawikang rawh”, tiin hmangaina hmasatak kha Lalpa ei Pathien kuoma hni tluttlut el ei tiu. Ei huop zolohai chu lungawitakin ei kohran bulpuihai kuomah intlun lem hlau ei tiu. Fellowship ei ni ang hrimin, Krista fellowship takin, a pawng bik a phai bik umlovin, lungruolna tlanga lengin sa`le mihriem doral bangna ding hmun lo intemlawk inla an hawi awm ngei deh!

ZAWNG SIPAI

noreply@blogger.com (Guwahati Tlangsam Editor) — Sun, 24 Jul 2011 07:32:00 -0700

ZAWNG SIPAI

(24/7/2011):

“June 25 khan Jammu a inthawk kms 60 a hla Vaishnodevi a Vaihai pathien en dingin ka fea, lampuia Zawng ruolin an mi vuok zeka ka lungasen em leiin hi lekha thupuia ‘Zawng’ ka hmang el a nih.”

Dan pangngai angina Feb 18, 2011 ni chun Baramulla a chun Vur a tla char chara, a dei luot lei chun pang suklangna ngam khawm a ni nawa. Ka chuongna motor hmai darthlalang khawm chu vur a tam taluo lei chun a hmai zapfaina in a zap hne tanaw leiin kea fein naupanghai le chun duty kan thaw tan a. Silai zang AK 47 ka chawi dea chu ka awmphaw awr le a mu ka pai rawn bawk le vur a tam lei chun duty chu rinum ka ti hlea.

College ka kai lai ka ruolpa sipai uniform hakin zana hin khawlai dunga kan lawn hlaka. Uniform haka Boot inri deu khuk khuka ka hang bun chun ka tha hi anthak thei luotin lam sira lungtehai chu ka pet leng dawr dawr hlaka. Awmphaw hakin AK 47 hei chawi lang hang inhlum biel vel tawp tawp lang ti hi ka chak thei em em hlaka. India sawrkar hin ka sipai thang chak ziet le ring ka um pek tawl dingn ziet hi hrehai sien chu sipaia hin min thang tir em em an ti ka ti hiel hlaka. Sipai ni si loa zana an uniform hak ve zie hlak chu thil remchang aninaw lei chun khuo a var phat ka hlip nawk hlaka. Khawvar huna hlip ngai nawk talo dingin a tak taka uniform hak ve thei dingin Lalpa’n sipai ni dingin lampui mi ruot pek ta sien ti hi ka nuom thei hle hlaka.

Ka duthusam ang tak chun Sipai full uniform in AK 47 le awmphaw hakin sipai boot inri khuk khuka ka hang bun chun ka tha anthak tanaw em em a, ka awmphaw awr na hai chun ka dar ansukkawnga .nitin vur chunga dei tia inthin dawr dawra ka hang duty chun rinum hi ka ti thei em ema, .aw……..iengleia zawng sipai hi ka lo thang kher kher amani aw ka ti nawk hlak si!

Training ka thaw laia inthawk khan zing dar 3:30 a ka tho rinngawt khawm kha in resigned na khawp in ka hriet a. Thla sari ka training zo chun resignation lekha ka zieka, sienkkhawm lakh hni lai pek a ngai ding an ti lei chun kan resigned thei nawa, tlanhmang ka tum a sienkhawm ka original certificate kan ruk dawk thei sinaw lei chun tlanhmang dan ding a umnawa. Ka beidawng chun motor kan chuongna dam hi accident sien, silai kan kap dam hin changsuol lang ti dam in ngaituona thanaw ngawt ka nei hlaka. Ka beidawng chun Pathien ka mawsiet nawka, iengleia hi zawng sipaia hin imin thang tir reng reng amani ka ti hlaka. Ka sin inhawk tak, ka thaw lei chun ka beidawng ekche thung chu anta hi!

In resigned theilo, tlanhmang thei ni bawk talo a beidawng ekche thung ka nita lei chun, ”Akhri gooli akhri dam tak” tiin ieng anga hmun titum le ral hmunakhawm sawrkarin ka mawphurna dinga ka liengkova an innghathai reng reng huoisen taka phursuok dingin vawitieng kuta silai khaikanga changtieng kut pharsuoka India Flag hma a Sesam kan taleiin pathling taka ka mawphurna hlen hi ka sin a nita si!

Ahrim hrim in India in silai tha a I neihai chawiin bullet proof awmphaw hakin iengang bullet proof motora chuong inla khawm lungmuongna tak tak hi aum theinawa. Ka ruong hmuloin am, ral kuta kala thi ding, laina tukhawm hmu phak loin am ka taksa hi bomb darin a la um ding tihai dam hi nitin duty laia ei lungrila ngaituona lotheiloa um hlak chu a nih. Ka ngaituona hi mi dawikawlawk ngaituona ani thei, sienkhawm nitin thichil pawl dam, Fidayeen, Mujhahideen, Laskar-e-taiba, ISI, etc etc hai le inhmasuon zing kan ni leiin ka chunga thlung thut thei zing a ni si. Ralmuong naw chu thukhat nisien, sunghai ngai ngawi ngawi na dam, kohran le ei society ngaina dam le ei ram tieng ngai leia khawsawt ngawi ngawi nihai lem hin chu nun hi rin a um zuol thei hlea. popo, ramhnuoimi le misuol tam tak hmasuona, vur lai dei tia inthin dawr dawr a ka sinthawnahai chawlsana Krista ke bula ka la chawl hadam ding ani ti Lalpa’n amin hmutir thar chun ka lawm em em el a. Ni danga ka lo hriet zing zing hlak nisienkhawm chu nia Pathienin Krista zara ka ram ka hluo vat ding an ta ti a thara amin hriettir chun ka ringhma in ka silai chawi lai chu perkhuonga hmangin,”Hnuoi hi ka in an nawh kan zinna cho ani, ka in ropui a um chung tieng rammawi a khin, angelha’n an mi nghak van kawtkhar mawi a khin, hnuoi hi ka in annaw kan zinna cho ani” ti hla hi ka sak suok hiela. A dei ka ti taluo lei chun ka perkhuong perna ka kuthai khawm chu ka thunun zo nawa, hla ka hang sak khawm chun ka ha a chung tieng le hnuoi tieng chu an intet ri bar bar el a. Vur thla chuoi chuoi ka hang en chun- Puon ropui silin anleng thlansahai-khawvel deiin a sukbuoi phak tanawna hmun tlansahai lengna rama khin keikhawm ka tadingin hmun a um ve ani ti fie em em in ka hrieta. Ka silai magazine (Amu bawm) chu khuong anga hmangin ka ben puiawka, ”Hnuoia riengin hmun neilo in vur ram rinum hrut vel inla khawm Lalpa’n kei din a buotsaia la chawl veng ka ti tuipui kama” ti hla sak pumin vur chunga chun ka lam der der el a.

Chuonga ka lam lai chun kan ngaituo har phuta, ka umna le ka lamna hmun ka hang ngaituo chun eheee… kei hi ka si let der, hilai hmuna hin a hmingin an Sap pa tak ka nia, hienga vur chunga an hotupa ka lam hi invet an mi tiding ani ka tia. Sienkhawm, ”Hieng nek hmanin inzapui la um pei ka ti” tia Davidin Pathien Bawm hma a alam chungchang thua a nuhmei Mikal a eselna a dawn ang el khan, mitha tam tak fe khela kei mi tawmkailo van khuo le tui hluotu dinga mi thlangtu Pathien hma a lam ka ni leiin a tul ani chun lam pei ka ta, sap/commander invet khawm hlaw pei ka ti ka tia. Chu ni chun ka duty hour sung po ka lam tumsuo zaka, a dei hmel khawm ka hriet tanaw. Chu nia ka lam chu khawmuol ka hriet hnunga Pathien inpaka ka lam phutna a nih.

Kum 2008 khan Tezpura posting dingin ka fea, Guwahati ka panna lampuia chun Sumoa ka chuongpuihaiin ka wallet/pawisa bawm le ka appointment lekha an min ruk peka, Sumo ka tum hnung Rickshaw ka chuonga aman ka hang pek tum chun ka hriet dawk chaua. Ka mangang em em ela, Paltan Bazara chun ka beidawng ekche thung ringawt ela, hotel ka tlungna zing zing hlaka chun ka fea an ATM min hmang tir dingin ka hnia chutaka chun ka sangnu Jenny Hrangchal in pawisa ami hung thawn chu ka lawm dan vawisunni chen hin ka la hril thiemnaw hiel a nih. ”Ngaita u Pa in a mi hmangaina chu ava nasa de!Pawisa ami pek chuh! Ti nisienkhawm lawm a um em em vei le, ngaita u Pa in ami hmangaina chu ava nasa de Pathien nauahai amin buk ta chu a hang ti el hi a ropuiin lawm a um em em el anih.

Zuk ngaituo chat chat tu’m vankhawpui ei hluo theina dinga Pathien naua inbuk ei hang ni el chuh!Aw..Pathien nau ei hang ni el ana. Iengkim thawtheitu le thil popo neitupa nau ei zuk ni el ana. Zuk ngaituo tha vang vang ro Pathien nau ei ni hih! Hee, salah! Pathien nau, a nau duot ngawi ngawi ei ni el

Chuonga ka ngaituona invak vel lai chun ka bula naupang inhnelhai chun ka lungril ngaituona anlak peng a ka lung an sukleng hlea. Ka naupanglai ruo sur hnuoia pheikhawk bova tuolzawl lungkawhrawt le bawngek lai thei tawpa saiser kan pet hun dam, tawlailir siema khawlaidung khu chum chuma kan tlan hun dam, motor chuong nuom leia motor hnawta ruolhai le kan tlan sup sup hun dam-ka ruolpa kekawr kalak in ekna a Jeep hnung tieng thir pakhata antang leia a thala Jeepin a fen hun dam, bawngek a sephum khikdawka kan insik tir hun lai dam, ‘a hruol mahrat hrat, a chi chan ma hrat hrat’ tia saihlum hruola vate per kan fen ngun lai dam, ‘khuoi lusinga luta ta, khuoi bel lusinga luta ta’ tia zan thlavar hnuoia kan inhnel hun lai dam. College chawla veng tieng fea Lo rieka ka fe hun dam, zana ruolhai le kurtai chawia nunghak kan leng hun dam, vadunga nga mana hlim em em kan fe hun dam, mazu man dinga pawl tuoma kan riek hun lai dam, KTP inhlaw le hlapawl thiem em ema inchuk hun dam, zing tieng-zantieng taptebula ka pa rawia gop kan thet hun dam ka ngaituo chun ka lung anleng em em a. Hunhai an liem peia hnuoi hlimna hai hi chu kokir thei ni talovin an liem pei si, khawvela lawmna a kim thei si naw.

Ka nina hi ka lawmnawa, ka sinthaw hi ka hnama, ka umna hi ka nghawk em em vei le tuol kan suok hin mipuiin lungin an mi deng chang bo lo, ka ning hi an tel hle hlaka.Chubaka nitin naupanghai le dei tia inthin dawr dawra ral kara sinthaw kan ni leiin lungsietum hi kan ti thei hlea. Khawvel ka cham sunga ka fakzawngna dinga tuisik ka ni laia inthawka Lalpa’n a lo ruot ani ta leiin vui thei ka nita sinaw.Rinum tiin veng tieng ngai hle lang khom ka thaw makmaw ani ta si!!

Hun sawtnawte hnunga suti in feng ka ta, nga mana dam, Lo riek a dam feng ka ta, zana ruolhai leh nunghak dam kan lengnawk ding an nawm ti chun ka ngaituona chu ka thlenga,ka nga man fe tum chun a mi sukhlim em em el a. Ka nga man zuk fe ding ka phur em em hmana ka hlim ana,hi khawvela ka sininrimnachu!Khawhe ka bula vur tlanghai hi ka zuk hnek dar tawl vawng dim ani aw! Lovat lai hienghin um lang chu hnachang chu chema sat ngailoin zuk hnek hmat vawng nuom el ka tih. Unau dittak Pathien nau ini kha, lungngai dernaw Pathienin a nau duot ngawi ngawi hai hi rinum le rethei taka ei khawsak hi a phal teu teu naw anih.Nau ei ni chau anle nau ei ni leiin Rohluotu Krista rohluopuitu ei ni nawk deu deu a ni chu!

Nau ei nia Rohluotu ei ni ti chena hin chu a tiem le ngai khawm anhawi hlea, amiruokchu ‘Anachu’ ti ala tul si.Rohluotu Krista rohluopuitu ei ni si chun Ama ei tuorpui ding ani si. Rohluotu a chawngpu ei ni si leiin mihai an chier sup supa an thaw pei tanaw hnung khawma lungawitaka tuortu le thawtu dinghai ei nih ”A lungngaina tuorpui ve di’n khawkawl tieng fe’ng ka ti” ti hla ei sak hlak a, khawkawl tieng chun insunga um dinga ei ditlo hmunhnawk le thil tirdakum tak takhai ei peihawnna hlak ani a. Pathien nau Rohluotu ding ei ni leiin mihai I ditlo pasietna dam, hriselnawna le harsatna dang dang tuortu dinghai ei nih. Mikhuol ei nei chang hin bu le hme alo indai raknaw chang khawma, bu le hme a tam fa teu teu ro ei ti hlaka, mikhuolhai an khawp ani phawt chun ei ni a chawngpuhai chu ei khawp rak naw ani khawma apawi ei ti ngainaw ang khan. Pathien nau rohluotu ei ni lei hin a chawngpu a neitu ei nia, chuleiin Pathien rama hin mihai an chiera an thawpei tanaw hnung khawma a thawtu le tuortu ding ei ni ti hi a thara ei hriet nawn hram nuom a um hle a nih. Krista leia ropuina chau nilovin, Krista leia pasietna, tuorna le a dang dang phurtu ni dingin thisena anchawk a nauhai hi mi baka tuortu ni dingin Lalpa’n ami mamaw tak meu anih.

An chawngpu nina hrezinga Krista le damlaini hmangtuhai tading chun khawvela hin vangduoina reng reng a umnaw a nih. “Chawimawina ri ka tadin hmelma hrilsietna mi chawisangtu a ni-tawngsie hrim aum naw ka rama tawngsie khawm vanrama lawmman ei lakna ding mi siempektu ani si——– vangduoi hi iem ana-mi ti sim thina a hung tlung hlak chun Van fena ani si” An ringkawl anhawia an phur khawm a zang leiin annia inthawkin mi tam takin chawlna an hmu hlak anih.

Zawng sipai khawm te hi aw… dara rank dang dang Chemte, Sakeilu le Arasi hai a hin lawman a umnawa, inlalna le thlabi hlaw tam tak nei inla khawm teplo el a nih. Sienkhawm BSF a Pathien hring hrelo mi sang tam takhai thlarau inhmang ding hi Lalpa’n a hmangaia a phalnaw leiin ka theina umnaw sienkkhawm ringnawtuhai pakhat bek Krista kebula thuoilut dingin Lalpa’n ka liengkova mawphurna innghat a nuom leiin BSF ramthima hin a mi lo thuoilut ani leiin nghawk hle lang khawm a chawngpu rohluotu ka ni si leiin vui thei ka nita si nawh.

Hi artikul ziektu Tv. Lalringsan Hrangchal hi BSF a sinthaw, Kashmir a posting mek a nih. A ma hi Guwahati Tv lo ni ta hlak a nih.

HUN KA NEI NAWH

noreply@blogger.com (Guwahati Tlangsam Editor) — Wed, 20 Jul 2011 07:56:00 -0700

Dr. Chawngrolien Chonzik

(22/5/2011):May 19 zingkar khan Tv. Rosanglien Puruolte in a mi hung phone a. “HWSG News May 22 (Pathienni) edition a suok dinga insuo ding article hung ziek thei i ti?” ti a mi hung indon a. “Hun ka nei naw em a, ka ziek hman dim ka hril thei naw ngei, hung tum phot ka ti aw,” tiin ka don a. Ka hang ngaituo kir chun, “hun ka nei naw em a” ka ti chu kan zak letling lem a. Ni tina ka hun hmang dan ka hang sui chet chet chun, hospitala damnawhai enkolna sin ka thaw zo hnung khoma ka nuom zawng thil tangkailo thaw ding chun hun ka nei thei zing hlak si a. Chuonghai chu ka ngai poimaw lem hlak leiin thil tangkai ding thawna “hun ka nei naw” lem a nih.

A ni hrim a, eini rawi chu “hun ka nei nawh”, “kan hman nawh” zuk ti tla rok hi ei ching khop el a. Hang ngaituo chet chet inla chu keia ang tho in ni tawl ka ring. Hun hi mitinin ei nei, thil dang iengkhom neilo hai khomin hun chu an nei a nih. Ei thil nei laia a hmang ei thiem naw tak a ni bok a nih. Mi var le mi hmingthang tak tak hieng, Mother Teresa, Albert Einstein, Mahatma Gandhi le Thomas Jefferson hai le khom ei hun nei dan an ang seng a; nikhata darkar 24 seng tho a nih. An hun an hmang thiem leiin an hlawtling a, an hming an thang a, hun hmang thiem le thiemnaw in a mi the tawl a nih. Mi buoi taktak le hun hmang thiem haiin “hun ka nei nawh” an ti ngai nawh. Thomas Jefferson chun, “Um meimei tum naw rawh. Hun khawral ngailo hai chun “hun ka nei nawh” tiin an complain ngai nawh. Ei thaw zing chun thaw zo thei a lo tamzie hi mak tak a nih” tiin a hril a. Hun ka nei nawh ei ti chun hun ei lo khawral hlak lei a lo ni lem a nih.

Ieng leia hmangloa hun ei khawral hlak am? Hun hlutzie ei hrietnaw lei a nih. Hun hi ei hau taluo leiin ei hlutsak naw a nih. Thil iengkhom hi ei hau pha ei hlutsak naw a, a vang pha a hlu bik hlak a. Ka nu’n rengthei bil a siem lai chun kan hau thei em leiin kan hlutsak emem naw a, a fak khom kan fak pei rak nawh. Amiruokchu, Guwahati bazaar ah, rengthei um huna chun ngaihlu ememin a man a tam khoma fak ngeingei tumin kan chawk hlak. Hiengang deu hin ei hun neiin a mi dai naw pha a hlutzie ei hriet chauh hlak a nih.

Hun hlutzie hretuhai chun indik takin hun an hmang hlak. Hun hlutzie fel lema hriet theina dingin internet a inthoka ka hmu a author hriet chieng lo hi tha ka ti em leiin ka hung zieksa a nih. –

Kum khat hlutzie i hriet nuom chun

inchuklai kum tawp exam fail kha indon rawh.

Thla khat hlutzie i hriet nuom chun

nupui thla kimlo nau nei kha indon rawh.

Kar khat hlutzie i hriet nuom chun

kar tina suok chanchinbu editor kha indon rawh.

Darkar khat hlutzie i hriet nuom chun

inngaizawng inhmuhai kha indon rawh.

Minit khat hlutzie i hriet nuom chun

rel fe ding nang hmanlo pa kha indon rawh.

Second khat hlutzie i hriet nuom chun

eksiden tuok thel zo hlol pa kha indon rawh.

Milisecond khat hlutzie i hriet nuom chun

Olympic games a silver medal hmu pa kha indon rawh.

Hun hlutzie hi ngaituo zing hlak inla chu ei Welfare sports khom kha a hun takah ei tan thei ring a um a, a hun takah tan inla chu games item khom tamtak ei zo hman ding a na. Hun hmang thiem tieng panga hma tieng pan ei tiu a. Ei sport hun nawka chu a hun takah tan thei dingin thang la seng ei tiu. Hlawtlingna lampui kalbi poimaw pakhat chu hunbi hmang indik hi a nih.

Ei hun nei seng hi a hlutzie hre thar nawk seng ei tiu a, hun hmang indik tum seng bok ei tiu a, “hun ka nei nawh” ti thei ding khopa um thawveng le thil tangkailo thaw bansan tum seng ei tiu.

RAM LE HNAM SUKMAWITU

noreply@blogger.com (Guwahati Tlangsam Editor) — Wed, 20 Jul 2011 07:53:00 -0700

L.K. Varte

Pillangkatta,Guwahati-29.

lk@varte.in

(22/5/2011):Gospel-Chanchintha hi Hmar nauhai suk changkangtu, chawisangtu, chawilientu le mi dawmsangtu, mi sukhmelthatu alo ni mawl el. Krista Chanchintha hi lo changnawpal ta inla chu, mihriema tiemtlak khawm ni naw mei ni a, mawng chu bal hleng a tih. Chanchintha ralthuom le ziekfunga hmangin, mihranglo liem ta hai le tuva la dam tawk tawkhai te hin Ram le Hnam anlo humhala, anlo sukmawi hle alo nih. An mimalin Krista sandamna ring zovin mani ta ding angin thiemna varna anlo inchuk tawk tawka, sawrkar sin le sin dang danghai, kohran rama dam, rinum tamtak fethlengin mihai hriet fuk khawpin anlo um tawla, Chanchintha zar chauvin,Hmar khawvel ta dinga tawnlairang, eilu sukmawitu anlo ni zing el. Mimal hming sut lovin thlir zui lem el tang ei tiu.

Tienlaia, hmartlangval hmeltha, ‘Hmuoizo’ chu ahmel a tha em ema, atisa a anbelbel hi an hmepui vawnga; nikhat chu a thingchekna hlek asam karah alo inzep pala, mihai chun mawi anti zuol em ema, a zinga chu tlangval taphawtin an samah thinghlek anzep fur el an ti chuh !. Hnam danghai, Hmuizo anga hmeltha hmingthang hrim an um naw a, hmarnauhai mi hmeltha a inthang tirtu chu ama hi a nih. Parbung Mawite khawm a hmel atha bekbek leiin, a vawi khawmin Zion ati vawngvawng ela, Tuora-nu a hang vawi ruokchun thun’ul, tiin an ri dum`el an ti chuh !.

Nang hmartlangval, nunghak, tlanglakte, naupangte, papui nupui chen khawm nila mani tadinga i thaw kha, mani-tumtwk ba`nzelah tia, vawisun nia i tumtawka i mawphurna thahnemngaitaka, Krista Chanchinthatha le inhmea i hne ban pei a, i bei taltala, i tum i suozo phawt chun, RamleHnam sukmawitu, mihai ngainat hnam-hmeltha hung ni ngei i tih. Thilthanawhai hrim hrim chu hnungsawna tosan vungvung el ding a nih.

Tulai abikin, Guwahati le a sevel ei chet amawi tan meka; tienlai Naupang Sunday Schoola, tum, thilthar nei?, kei Arte-thar, bawngte thar kan nei, zakuothar, kekawrthar ka nei, Pathien kuomah lawmthu hril ei tiu!, tilai hun kha ei hriet dawk rumrum el anih; lawm aum takzet el. Sinthar thatak, inchukna ah division tha, inchukna insang lemhai ei hang hmu tuk tuk hi thafan ava um ngei!. Pathien kuomah lawmthu hrilna ding hung hawn lut tuk tuk ro, bawihai. Thuhriltu 3:11 a chun,“Thil tinreng chu mani hun senga mawi dingin a siema”, Biekin inkhawmna a inthuom dan mawi, lusun ni le lawmna nia inthuom dan mawihaia in thuomin, i vawiin thun`ul ti lovin, Zion… ti pei lem raw sen, nang Hmar tlangval, nunghak duoi bik naw mei nih. Isun a kuomah, “Theichang bula ka hmu che , … Hieng neka thil ropui lem hi la hmung i tih,” a ta a dawna. [Johan 1:50].

Lak nekin pekin lukhawng a nei lem

noreply@blogger.com (Guwahati Tlangsam Editor) — Wed, 20 Jul 2011 07:31:00 -0700

-L.K.Varte - 12.05.2011

(15/5/2011):Hmar thuvarin, “Lak nekin pekin lukhawng anei lem” a ti a. Ngaituo chieng chet chet chun hang lak deu tup nek chun thiltha pek suok chun lukhawng alo nei lem a nih; ei PilePuhai kha midilsut le mivar chu anlo ni ngei anih. Ngaidam le thilpek hi hmangaina zungzam khawm a nih. HCLF chun Hmar Kohran sungah inkhuongruolna tha beseiin common Sunday School subject an mi siem peka, lawm a um ngawt el. Tukum, Deuteronomy inchuk kum ani a, GHCF lem chun bung 15 & 16 an phak an tah.

Deut. Bung 15:1-18 sung a hin Lalpan Israel sungkuohai chu zalen kum, ngaidam kum le sal insuo kum a ruot peka, chuchu an zawm ngei ding chu anih, “Ram a pek cheu a chun in unauhai lai mirimsi an um chun in unau mirimsihai kuomah chun in lungril sukngar naw unla, tikse bawk naw ro; an kuomah chun intiktlai ngei ding a nih, an tlaksamna phuhrukna ding chun in inpuktir ding a nih. In pek ngei ding anih; chun inpek pha khawm in lungril an hmul ding an nawh, chuongang thil lei chun Lalpa in Pathienin in thilthaw popoah mal asawm ding cheu ana; chu rama chun mirimsihai umnawlai a um awm si naw a; chuleiin, “In rama in unauhai chunga dam, tlasamhai chunga dam, in mirimsihai chunga dam, in tiktlai ngei ngei ding anih,” tiin thu a pek a nih, kum sari an vawi kum povah ngaidamna an siem ding a nih … Lalpa ngaidamna chu puong ani ta leiin. … Hnam dang mi chu thin thei in ta, nisienlakhawm inta iengkhawm inunauhai lo hmang ta chu in ngaidam ding ding a nih. Chuongchun, mirimsi hrimhrim um der naw ti niu! (Lalpa in Pathienin hluo dinga a pek cheu rama chun Lalpan mal asawm ngei ngei ding cheu a nih) tiin thu pek anni bawk a nih.

Mi tamtakin, mi rimsi, mirethei, mi vangduoi, ruol banlohai le piengsuolhai hi anni suolna lei le tawngsephur leia an chunga tlungah ngaina an neia, nawdang an nghatsan hlak; tulai khawm hin hi ngaidan thalo hin ami la chenchil zing leiin rethei le pasiehai, ruol banlo le piengsuolhaiin thangpuitu ding unau, ruoltha anin vaia, eiin khuongruol naw hle el. Hi suongtuona thalo hin, mihai hmangaina lungril le kut zangnaa inthawk a kei kira, lunginsietna le hmangaina lungril a khar pek hlak anih; a pawi ngwt el !. Chuleiin, hi suonlam thalo tak hin lungril hmangai ram inhne tir nawng ei ta, an retheina, an sietna chu a ieng lei khawm loni sien, Pathienin hlutna nei vea a siem anni leiin, ieng ang condition khawm loni sien, an mamaw, an tul chu ei mawphurna ani leiin ei theinghil ding an naw a, ei ngaidamin ei pek ding a nih. Pathien kuoma inthawkin ei mamaw ei tulhai, ei hnina khel deia dawnin, pekin ei um hlak ani kha !

Israelhai ang hin a ngiel`anganin thupek ninaw inla khawm, ei tulai khawvel boruk enin, unau le unau karahai, ruoltha le ruoltha karahai, Krista Kohranhai karah, mani hnam le hnam, chile`kuong inkara hai hin ieng bat chichi am ei nei, in ngaidamtuo sup sup el inla, inruolsiekna tha a ngaiin beipui thlak inla chu aw!, ei thuring Bible min chuktir dan ni bawk, Krista lampui ni bawk, ava thain a van hawi awm ngei deh! Ei ni Krista Kohranhai, Pathienin Hmar hnam bik dinga ami siem le Krista Kohrana amin dinthar hai hi; hmingtaka Lalpan ami kohai ei na, mani unaupui ngaidam ding le rethei le riengvaihai kuoma lungril inhmulna um lova pe suoktu, ngaidamtu ni pei dinga mawphurna liengkova phurtu eini seng nuom a um. Lak nekin pekin lukhawng a nei lem si a!.

“NU, TETE THUOI NAW RAWH TAP ATIH!!” Proverbs 31

noreply@blogger.com (Guwahati Tlangsam Editor) — Mon, 18 Jul 2011 05:51:00 -0700

- Rev. Dr. H.M.Songate

(8/5/2011):Vawisun hi International Mothers’ day ani ang hrimin hmun tum tumah ringtu ni le ringnaw tu haiin inser le hmang ani ding ana. Nuhai pawimaw zie, tangkai zie, an that zie le adang dang hrilna hun ana. Nuhai ta ding chun lawm um fu’ng a tih! Kumkhatah Nuhai hi vawikhat bek hei chawimawi chu anphu taluo ringawt el anih! Tribal lai abik takin nuhmei inzana le ngainatna ei tlasam taluo taha, hihi thil ngai maw umtak anih. International mothers’ day thlirlawkna Pastor hmingthang iemani zatin an ziek ka ena. A ropui thei khawp el. Hi ni hin Christian biekin ah 65% in Proverbs 31 an tiem hlak an tih. ‘Pathien thua Nu indiktak mizie’ kim taka bible in a hrilna anih. Nuhai popo in an tiem le an zui ka nuom. Chun, nunghak haiin hi Pathien thu hi zui tum bawk unla pasal thatak nei el in tih. Chuong annaw chun nau inei pha mihaiin ‘Tete thuoi naw rawh, tap atih’ anti el ding anih! Nauhai an puitling hnunga TETE tapa antap hi thil ti um tak anih.

Nu in nau a siem anti ang hrimin nu hai hi insunga dinga hmangruo pawimaw tak, insung tungding theitu, nauhai siem theitu le sukse theitu annih. Abraham Lincoln chun “Ka nu tawngtaina in ami zui zing hlak leiin ka thla a phang ngai nawh” alo tih. Mizorama, ka ruolpa chu college kan kai lai zankhat chu zu ahung dawn ela, nasatakin atapa, amisukzak emema, alu tui bur katum chun hienghin ami dawn “Sanga, zu kan rui leia tap kan nawh. Zan dar 9 zatin kanu le pa in dingthathuonin anmi tawngtai pek hlaka, zu rui pumin hostel kahung lut leh dar 9pm alo niha. Kanu le pa tawngtai laitaka zu rim le ka hei um kha na kati taluoa ka tap anih” atih! Kan inchuk sung a zu dawn kahmu ta nawh. Hrilin a hne naw hi hringna in ahne hlak. Hi ka ruolpa hi tuhin Mizoram sorkarah officer lien deu ani zing. I nauhai in I hringna an hmu ve am? John Wesley nu chun nau 17 anei hnung khawma la neisa pei ka nuom! ati. A nauhai popo in Pathien rawng an bawl lei anih. The story of Ruth Graham Bell (Billy Graham anuhmei chanchin) lekhabu chun “a pasal in khawvel Pathien thua khawvel ahrawk khum lai, choka ah hmeruo zen pumin a nauhai Pathien thu in alo enkawl hlak”( when Billy roves the world, his wife Ruth tended her children in the kitchen) atih. Rev.Dr.Franklin Graham tuta Billy Graham thlaktu pa khu, anu Ruth a tawngtaina le counsellinga Pathien ring anih. Rila ra nau enkawl neka sin pawimaw le ropui lem aum nawh.

Nuhaiin ringtu an nina insungah an laklut phawt chun insung a sie ngai nawh “ka nauhai Pathien thutaka an um neka lawmna nasa lem ka nei nawh” hmangai Johan in ati kha andik tak anih. Theinghil der naw ro! Chuongnaw chun, ‘Tete tap atih, thuoi naw rawh’ ti hla atlung el ding anih!

Kha hma met khan Imphal airport ah Lt. Colonel pakhat hin eini tlangval mi BD zo hlim abieka. “Ieng dinga Bible inchuk?” atiha. Tlangval pa chun “Isu chanchin ka hril theina dingin” tiin a dawna. Lt. Colonel pa chun “Hril tum naw rawh; hringpui rawh” atih. Chu Colonel pa chu Nepali Hindu kulmuk tak Mizo nunghakin a convert anih. “Ka nuhmei hringna chu Isu Krista hringna ang aniha, tha kati emema, kazui el anih” atih. Peter in changziea mihai hne dinga nuhai alo infui kha Pathien thu pawmtlak anih

Cross lera ei Lalpa Isu tawngbau pangana hi thupui fun tak le pawimaw tak anih. Chuleiin, Mary kuomah “Nuhmei enta, I nau kha” ati anih. Ei ni rawi hi ka nuom nekin khawvel tieng intlansiekna ei uora, naupang thiemna ei hnawta, sum ei hnawta, atha tho, amiruokchu, nauhai Pathien thua inchuktirna le enkawlna ei tlasam emem. Pathiena hrat inti deu in insung inthladaa, pasalhai hmusit le nauhai ngaisak lova hmun danga invak dar khawm ei ching hlak. Tukuma inthawk chu, ‘insung ngaisak dingin’ nuhai insawi zawi ro. Nauhaiin I hringna takzie kha hremawl raw hai se. Tawngbau le hmura nam panga hril el nilo, hringna ngeia phursuok kha nauhai ta dingin entawn tlak le hlu anih. Mary chun ‘Ka nunin Lalpa a chawimawia’ ati anih. In nauhai mithmu le in pasal hai mit hmua, Lalpa chawimawi hlak nungchang input chun in nauhai hne zing hlak in tih. Chu ra chu Pathienin kum tlawmte hnungah an siktir ding che anih

HMATIENG PAN IN

noreply@blogger.com (Guwahati Tlangsam Editor) — Mon, 18 Jul 2011 05:49:00 -0700

-Pu Thanghlun Hmar (Chairman,HWS.Guwahati)

(8/11/2011): Hmar Welfare Society news letter buotsai theia ei hei um hi,ropui le lawmum ka ti bek bek a nih.

MA inchuk dinga March 1985 a Guwahati University Hostel ka um tir lai ngaituo chun,vawisun chenna ei ngir hmun hin,hma tieng ei pan pei ei ti naw thei naw.Hma tieng ei pan na a hin ei Pa Pathien thuoina lei cho anih ti ei hriet ka nuom.Member 10-15 an inthawk member 600-700 vel ni tain,insung khawsakna tieng ei en chun, two wheeler nei nek in four wheeler nei ei tam lem ta,mani inhmun ngeia inbawl a cheng le Apartment neia cheng le mi inhluotir iemani zat zet ei um ta bawk.In la bawl ding inhmun nei iemani tawk zet ei um.Inchukna tieng kawnga,vai hai cho thaw thei ei sawn kha ei ni khom technical le professional line a inchuk iemani zat zet ei um ta bawk.Sawkar,Company,Corporate le organization dang danga sin thaw thahnem tawk tak ei um. Mani mimal a sumdawg a into del thei ei um ta.Rawngbawlna tieng konga Pastor khun tak tak mi Pa li le Kohran Upa mi Pa li in an mi uop zing thei bawk.Hieng po po hi ei Pa Pathien zar a ni a,A hmangaina sinthaw lieu lieu a ni leiin,Ama hming chu inpakin um raw seh. Bible a hin umna hmun insawnna hma tieng pan pei na thu hi Thu thlunghlui le Thu thlungthar a hin hmu ding le entawn ding iemani zat zet a um.Family,inchuklai,kohrana le khawtlanga ei um na pangngai a um loa hma tieng pan pei hi a lo va pawimaw de aw! Umna pang ngai a um zing hi a hlawknaw zie le a ti um zie hril ngailoin mitinin ei hriet seng ka ring.

Technology,mihriem thiemna an sang peiin khawsak dan hai a hung danglam naw thei naw,tienlai a thil mak deua ei ngai hai kha tulai a ding chun a mak ta naw el thei.A ram le hmun a changkang ang peiin ei um dan le ei ngaituona le khawsak dana nasatakin a hung danglam.Hmatieng pan loa ei umna pangai a ei um zing chun,hlui le thing ei hung hlaw vat el ding a hawi.

Ei Welfare khom hmatieng ei pan pei hi thil trul le pawimaw a hung ni an tah.Hmatieng ei pan pei na dingin hma ei hung lak mek a,tuta a ei sports ding khom hi “ Hmatieng pan in” ti, thu puia hmangin ei huoihawt tum anih. Ei hriet seng ta angin Organization a hrat thei na ding chun sum le pai nei a ngai.A san/cause tha vieu sien khom, sum a dawl a dawl el hi chu inthlahrung a min thil in hoi chie khom an naw, mani umna seng ah sum seng na ding kohrana le khawthlanga a um zing hlak lein pe nuom tu hai ta ding khoma thil harsa ahung ni hlak. Chu leiin eini huongsung baka midang a inthawk donation ei hmuthei na dingin Gift Coupon ei hung buotsai ania,mitin tlawmngai a lo inchaw seng dingin eiin fiel,chun ei project-Tlanmuol inchawk belsa le Community Hall ding inchawk a ni ngei theina dingin, nitin ei tawngtaina hai ah theinghil nawng ei tiu.

MOTHER’S DAY CHANCHIN

noreply@blogger.com (Guwahati Tlangsam Editor) — Mon, 18 Jul 2011 04:00:00 -0700

-Ramthienghlim Varte, Shillong
(8/5/2011): “Ka chintea inthawk vawisun chena hiengang ngirhmun insanga hlangkai ka um hi ka Vantirko, ka Nu a inthawka hungsuok vawng a nih. Nu ka hmangai che”. ~ Abraham Lincoln

Hungthlungding May 8, 2011 hi Mother’s Day tia Kohran tinin ei hmang ding ani a. Thil hrim hrim a bul intan dan le a thiltum ngaituo lova khawlai thu lawrkhawma hril mei mei ei ching hlaka, thawsuol khawm ei hau reng a nih. Chuleiin, Mother’s day a hung intan dan le a thiltum hrea ei hmang thiem theina ding le ra thatak khawtlang le Kohran ah an suo theina dingin thahnemngai takin tawite chau ka hung ziek a nih.

Mother’s day hmusuoktu chuh Nunghak Anna Maria Jarvis ana. May 1, 1864 khan USA, West Virginia state Grafton simtieng kilometer 4 vela hla Webster khaw chitea khawvel var hmuin a hung pienga. A pa Granville le a nu chuh Ann Maria Reeves Jarvis hai an nih. A nu hi Kohran le khawtlang tadinga thahnemngai mi ana; ama rawiin Mothers Day work Clubs indinin an khuo le hmun dang dang a khawtlangin hriselna tha an nei theina dingin kawtthler, lamlien, lamkawla tuiluongna (canal) hai sukfaiin mipui tadingin nasatakin sin an thaw hlaka. Chun, a piengna khuo Webster le Grafton area hi kum 1861 vela American Civil War a um lai khan hmun pawimaw tak le infepawna railroad Center le dang danghai hmun ani leiin indona a hliem mi tam tak an um a, chuonghai enkawl le sawmdawlna sinthawin a nu Ann Maria Reeves Jarvis chun Women’s Peace Group indin puiin mi tam tak anlo thangpuia an hringna sansuokin an um nghe nghe a nih. Chuonglai chun Anna Maria Jarvis chuh Grafton public school a kaiin a seiliena, Mary Baldwin College Staunton, Virginia ah a graduate ve a nih.

Vangduoithlak takin kum 1902 khan apa’n a boralsan ta leiin hi hmuna inthawk Philadelphia tieng an hung insawn a, a nu chun May 9, 1905 ( May Pathienni vawihnina a nih) khan a hei boralsan nawk nghal a. A bei a dawngin buoina sumpuiin a tuomvel takzeta. A nu ruong chunga khawvela nu lo thi ta (a nu thangsain), nu nilai zing le la hung ni dinghai inzana le hrietzingna dingin thil iemani tak thawdingin thutiem a nei nghe nghe a. Nu le Pa bova nun hmang chuh harsa ti em emin a nghatna tieng tieng a tawp vawngin a hriet a, mumal lo takin hun iemani chen chuh a um ta a. Kum 1907 a nu thi champha vawihnina May Pathienni vawihnina chun ama ngainatu le ruolthahai ko khawmin a nu thi champha inserna a nei pui a. A nu ruong chunga thutiem a nei ang khan alo ngaituo lawk ta reng Mother’s Day ( Nuhai ni ) tia inser hlak dinga a nuom thu chuh hini hin a puongsuok ta a. Fekhawmhai chuh an lawm em em a, an khawmna Kohran St. Andrew’s Methodist Episocopal Church, West Virginia thuoituhai leh inrawna hini hih Mother’s Day a puong dingin an ngaituoa, hnina an siemzui nghal a nih.

An kohran St. Andrew’s Methodist Episocopal Church,West Virginia a thuoituhai khawma anlo remti leiin May 1908 Pathienni (Sunday) vawihnina Mother’s Day tiin an inser tan ta a. Hi kum vek hin America Young Men’s Association hai chun U.S.Senate ah kum tina May Pathienni vawihnina chuh Mother’s Day a inser dingin nasatakin an nawr nawk ta a. U.S.A-a state 46 Canada le Mexico thangsain an hung inser ve vawng nghala. Hienganga boruok a hung um pei leiin Anna M. Jarvis khawm thildang buoipui talovin America rama Kohran pawl hrang hrang, Politician, Sumdawng hausa, milien le pawimawhai inhmupuiin lekha thawn le theitawpa lo zawmpuive dingin hma a lak a. Kum 1912 General Methodist Conference, Minneapolis chun Anna M. Jarvis chuh ‘MOTHER’S DAY’ hmusuoktu ( Founder of Mother’s Day ) tiin an puong ta a. Hi kum vek hin a umna state West Virginia Governor ( Bawrsap )William E. Glasscock chun officialin May Pathienni vawihnina chuh ‘Mother’s day’ tia kum tina hmang dingin a puongve ta a nih. Hi hi ‘Mother’s Day’ hung intan dan chuh a nih. Chuleiin, Mother’s day a hungtlunga pha pitar le nu tam tak inkhawma fe theilohai Anna M. Jarvis-in ama sum sengin Biekin ah a thuoikhawm hlaka, thilpek ama siem ngei hai hung chawiin inhlanna a nei hlak.

Chuongang peiin kum 1914 khan U.S.A. Congress chun Join resolution lungruol taka neiin May Pathienni vawihnina hi ‘Mother’s Day’ dingin alo puong ve ta a, American President Woodrow Wilson chun suoi keiin ni pawimaw, mi po po inser dingin an namdet ta a nih. Chuleiin, vawisun chenin U.S.A. president chun kum tinin hi ni hih Mother’s day a puongin ursun taka inser a nih. ”The congress, by a joint resolution approved May 8,1914 has
designated the second Sunday in May each year as “Mother’s day”…Now, Therefore, I, Barack Obama President of USA do hereby proclaim May….and I call upon all citizens to observe this day with appropriate programs, ceremonies and activities…..tiin tuta USA President nilai zing khawmin tukum a Mother’s Day hnungthlung ding khawm a puong a nih.

Hun a hung liempeia, nu hmangaina inthuk taka inthawka hung piengsuok, nu hlutzie, nu inza umzie pathien thu le inzawma ursun taka inser ding ti kha thangtharhaiin a hlutna, a thiltum le a hungsuok dan ngaituo phaklova Greeting Cards, Gift, le thuomhnaw tha thahai inpetuoa mi tam takin sumdawngna hmangruoa an hmang ta leiin a hmusuoktu A.M. Jarvis le mipui thlek dan an ang thei ta nawa ”I wanted it to be a day of sentiment, not profit….” ti’n kum 1920 khan New York Governor Al Smith Court ah khingin an insik bur bur pha hiel a nih.

Nuhai hi ei pienga inthawka hmangai taka mi enkawltu anni leiin hienganga chawimawi a hmangaina le inzana inhlan chuh an phu hrim hrim a nih.Lungngai nia mi thlamuongtu, lawman ni le hlawtling nia mi lawmpuitu le khawlai khawm um inla tawngtaina a mi san hlaktu anni leiin inza an umin chawimawi tlak an nih. Hi ni hmangdan hi an ang tawlnawa, eini lai chun Biekin ah Parthi inhlanna dam le thilpek chi hrang hrang ei siema. Khawpui lien a hai chun an nu hai Hotel liena dam thuoiin bu an fakpui hlaka, chun hi ni hin chuh insung pa le nau haiin nu sinthaw ding po po thaw pekin duot takin an in-awl hlak. Chuleiin,Mother’s day umzie ei hung ziek hi thataka tiema hungthlungding May pathienni vawihnina i.e. May 8, 2011 hi MOTHER’S DAY an ta leiin a umzie buoinuoia hril lo dingin hriet ang ang tawitein ei hung tarlang a. Kohran tin Mother’s day programme siemtu hai po po hlimtlang taka hmang sengin ditsakna kan hlan.

HAPPY MOTHER’S DAY