i d l e m a n

தமிழ்ப்படம் 2 - விமர்சனம்

2018-07-15T19:09:00.000+05:30

முதல் முயற்சி வித்தியாசமாக இருந்ததாலும், அக்காலகட்டத்தில் இப்போது இருக்கும் இணையதளங்களின் வளர்ச்சி இல்லாததாலும், அமுதனின் முதல் தமிழ்ப்படம் வெற்றி பெற்றதில் ஆச்சர்யமில்லை. அவருடைய இரண்டாவது படமான ரெண்டாவது படம் தயாரிப்புச் சிக்கலில் சிக்கி சின்னாபின்னமானது வருந்தத்தக்கது. ஆனால், அதைவிட வருத்தம் தருவது அவரின் மூன்றாவது படமான தமிழ்ப்படம் 2.

போலீஸ் அத்தியாயம் என்ற Tagline உடன் வந்திருக்கும் இப்படம் spooked those who are expecting a good spoof.
ஆரம்பக் காட்சியில் ஆரம்பிக்கும் ஆயாசம் கொஞ்சம் கொஞ்சமாக அதிகரித்து, இடைவேளைக்குப்பின் நம்மை உறக்கத்தில் ஆழ்த்துகிறது. அதற்காகப் படம் மொத்தமுமே மோசம் எனச் சொல்லிவிட முடியாது.

ஆங்காங்கே இயக்குநரின் புத்திசாலித்தனம் பளிச்சிட்டாலும், சந்துருவின் வசனங்கள் மிகப் பெரிய let down என்பதை மறுக்கமுடியாது. நடிப்பே வராது என்பது சாபமல்ல, வரம் - சிவாவுக்கு. சற்றும் முகபாவனைகள் காட்டாது நடிப்பதாக நடிக்கிறார். பார்ப்பவர்கள்தான் நொந்துபோக நேரிடுகிறது. சதீஷ் மாறுவேடப்போட்டியில் கலந்துகொண்டதாகத் தோன்றுகிறது. அந்தக் கதாநாயகியின் நிலையைப் பார்த்தால் ஸ்ரீ ரெட்டி தமிழ்ப்படத்தில் நடிக்கும் எண்ணத்தைக் கண்டிப்பாகக் கைவிட்டுவிடுவார்.

முதல் படத்தின் பலங்களில் ஒன்று நண்பர்களாக வந்த வெ.ஆ.மூர்த்தி, எம்.எஸ்.பாஸ்கர் மற்றும் மனோபாலா. இதில் மனோபாலா மட்டும் மீண்டும். அவர்கள் வரும் காட்சிகளை spoof செய்தே இன்னொரு படம் எடுக்கலாம். அவ்வளவு திராபை. Game of Thrones spoof எல்லாம் எடுபடும் என நம்பியது தன்னம்பிக்கை அல்ல. தலைக்கனம்.

பக்கத்தில் அமர்ந்த சுட்டிகள் இரண்டு, படம் ஆரம்பித்த உடன் ஒவ்வொரு காட்சிக்கும் படங்களின் பெயரைக் கூறி ரசித்தார்கள். இடைவேளை வந்தபோது உறங்கிவிட்டிருந்தார்கள்.

மரணமொக்கை

சொன்னா புரியாது!!

2013-07-28T11:22:00.001+05:30

சொன்னா புரியாது.

சொல்லாட்டி தெரியாது.

சொல்லித்தான் ஆகணும்.

புரியாது போனாலும் பரவாயில்லை.

தெரியுற மாதிரி சொன்னா புரியும்.

எதுவும் புரியலையா? இத..இதத்தான் மொதல்லியே சொன்னேன்...

சொன்னா புரியாது!!!

நடிகர் சிவா. தமிழ் சினிமாவின் வரமா சாபமான்னு ஒரு கேள்வி வரும். அவர் கண்டிப்பா இயக்குனர்களின் சாபம்... ஏன்னா அவங்கதான் ரொம்பவே பாவம். ஒரு ‘பா’வமும் வராத ஒரு ஹீரோவை வெச்சு படம் எடுக்கிறதுக்கு அவங்க படற கஷ்டம்... சொன்னா புரியாது!!

எல்லா சீனிலும் ஒரே மாதிரி முகத்தை வெச்சுக்கிறது ரொம்பவே கஷ்டம். அதை திறமையா செய்ய முடியுற ஒரே ஹீரோ நம்ம சிவாதான். காமெடி, செண்டிமெண்ட், பாட்டு, கோபம், அழுகை எந்த சீனா இருந்தாலும் ஒரே எக்ஸ்பிரஷன்... சொன்னா புரியாது!!

ஆனா தன்னோட பிரச்சினைகளைப் பத்தியோ குறைகளைப் பத்தியோ கவலையே படாம, தனக்கு என்ன வருமோ (எதுவுமே வராட்டியும்) அத வசனம் பேசறதை (சொல்றதை) வெச்சே படம் முழுக்க நடிக்கறதுக்கும்(?!) ஒரு தில் வேணும். அது நம்ம சிவாவுக்கு நிறைய இருக்கு. அதை எத்தனை தடவை நம்ம ஜனங்க பாத்து ரசிப்பாங்கன்னு..... சொன்னா புரியாது!!.

நடிக்கிற மாதிரியே நடிக்கிறது எப்படிங்கிறது... சொன்னா புரியாது!!

எத்தன வருசத்துக்குத்தான் சாராயம் குடிக்கிறதை வெச்சு தமிழ் சினிமாவுல கதை விடுவாங்கன்னு (எழுதுவாங்கன்னு) தெரியல. அதைப் பாக்கும்போது வர கோவத்தை... சொன்னா புரியாது!!

காமெடிங்கிற பேர்ல எப்படிப் படம் எடுத்தாலும் நம்ம மக்கள் பார்த்து ரசிச்சு கைதட்டி சிரிச்சு ஆராவாரம் செய்வாங்கன்னு...சொன்னா புரியாது!!

நேர்ல தியேட்டர்ல போய் பார்த்து தெரிஞ்சுக்கங்க.

ஏன்னா...சொன்னா புரியாது!!

மறக்க முடியா இரவு - மே 21, 1991

2013-05-22T22:34:00.000+05:30

மே 22ஆம் தேதி அப்பாவோட பிறந்த நாளுக்காக கண்டிப்பாக 21 இரவே மெட்ராசுக்கு (அப்ப எல்லாரும் மெட்ராஸ்னுதான் சொல்லிட்டிருந்தாங்க) கிளம்பணும்னு சேலத்துக்கு வந்திருந்த எங்க அம்மா ஆர்டர் போட்டாங்க..

அம்மா பேச்சுக்கு மறு பேச்சு எப்போதுமே கிடையாதென்பதால் (வாயைத் திறந்தால் நடக்கிற விஷயமே வேற எனத் தெரிந்ததால்) நானும் என் தம்பியும் காலேஜ் திறக்க பத்து நாளைக்கு மேலிருந்தாலும்,விடுமுறை தினக் கொண்டாட்டத்துக்காக சென்றிருந்த சேலத்து பாட்டி வீட்டிலிருந்து, கிளம்ப மனமேயின்றி கிளம்பினோம்.

தெரியாத்தனமாக இரண்டடியில் குறள் சொன்ன ஒரே காரணத்துக்காக ஊர் ஊராகத், தெருத்தெருவாக ஓடிக்கொண்டிருந்த திருவள்ளுவரில், லேடீஸ் வராங்க என்று எங்க அம்மாவைக் காரணம் காட்டி பஸ்ஸுக்கு நடுவில் 17, 18, 19 என சீட் வாங்கிக் கொண்டு வரிசையாக அமர்ந்திருந்தோம்.

விழுப்புரத்துக்கு முன்னாலியே பஸ்ஸை ஒரு மரத்தோரமா நிறுத்திட்டாங்க. பஸ் நின்னது தெரியாம பல பேரு தூங்கிட்டிருந்தாங்க. ஏன் நிக்குதுன்னு தெரியாம சில பேரு 'முழிச்சிட்டிருந்தாங்க'!! எழுந்துபோய் ட்ரைவர் அண்ணனைக் என்னாச்சுன்னு கேட்டேன். நம்ம ராஜீவ் காந்தி கலந்துகிட்ட கூட்டத்துல யாரோ பூந்து மெசின் கன்னால சுட்டு பல பேரு செத்துட்டாங்களாம். ராஜீவும் செத்துட்டாராம்னாரு... நம்பவே முடியல.. என்னடா இது, சினிமால தானே இப்படியெல்லாம் வரும்னு நெனைச்சேன்.

அப்பத்தான் கண்டக்டர் வந்து சொன்னாரு.. யாரோ, ராஜீவ்காந்தி கலந்துகிட்ட கூட்டத்துல குண்டு வெச்சு அவரு செத்துட்டாராம்ப்பா.. மெட்ராசுல ஒரே கலவரமாம். கடைங்களெல்லாம் உடைக்கிறாங்களாம். வண்டிங்களை எரிக்கறாங்களாம்னு...

பகீர்னு ஆயிடுச்சு.. என்னடா இது.. பேசாம சேலத்துல ஸ்ரீகாந்த்தோட விளையாடிட்டாவது இருந்திருக்கலாம்.. எப்ப ஊருக்குப் போய்ச்சேரப் போறோமோன்னு நினைச்சுகிட்டே இருக்கும்போதுதான் கண்டக்டர் அந்த டெசிஷன் எடுத்தாரு..

விசிலை எடுத்து ஊதி எல்லாத்தையும் எழுப்பி விஷயத்தைச் சொல்லி, நிம்மதியா தூங்கிட்டிருந்த எங்கம்மாவை டென்ஷனாக்கிட்டாரு. பாலாஜி அந்த சத்தத்திலியும் செம தூக்கம். முடிஞ்சவரை மெட்ராஸ் கிட்டவரைக்கும் போயிடலாம். அப்புறமா அவங்கவங்க எப்படி வீட்டுக்குப் போலாம்னு பாத்துக்குங்க. இங்க நின்னா ரொம்ப பிரச்சினை ஆயிரும்னாரு. ஒரு பயலும் எதுத்துக் கேள்வியே கேக்கலை. தூக்கமா, பயமான்னு இன்னிக்கும் எனக்கு டவுட்டு...

கண்ணாடி ஜன்னலை எல்லாம் சாத்த சொல்லிட்டு - கல் வீசுவாங்கன்னு பயம்... - ட்ரைவர் பஸ்ஸை ஓட்டினாரு செம ஸ்பீடா.. அவர் பின்னால ஒரு பெஞ்ச் இருக்குமே அங்க உக்காந்து ரோடை வேடிக்கை பாத்துட்டே வந்தேன். எதிர்ல வண்டிகள் ரொம்ப கம்மியா வந்ததால விடிகாலை
4 மணி வாக்குல செங்கல்பட்டு வந்துட்டோம். சரியான ட்ராஃபிக் ஜாம். வரிசையா வண்டிங்க நிக்குது. கேட்டா போகக் கூடாதுன்னு போலீஸ் தடுத்திருக்காங்களாம்.

கீழ இறங்கின கண்டக்டர் திரும்ப வந்து, பக்கத்துல தான் ரயில்வே ஸ்டேஷன். சீக்கிரமா போனா ஏதாவது ரயிலைப் பிடிச்சு ஊருக்குப் போயிடலாம்னு சொன்னாரு. எங்க அம்மாவைக் கன்வின்ஸ் பண்ணி, தூங்கிட்டிருந்த பாலாஜியையும் கூட்டிட்டு கீழ இறங்கி பக்கத்துல இருந்த கடைக்காரர் கிட்ட ரயில்வே ஸ்டேஷனுக்கு எப்படிப்போகணும்னு கேட்டா, ரொம்ப கேவலமா ஒரு லுக் விட்டுட்டு, அதான் கும்பலா போறாங்கள்ல.. அவங்க பின்னால போன்னு சொல்லிட்டு ஒரு எரிச்சலோடு கம்பியை எடுத்துவிட்டு கடையை மூடினார்.

ரயில்வே ஸ்டேஷனில் சரியான கூட்டம். பல பேர் டிக்கெட் வாங்க க்யூவில நின்னுகிட்டிருந்தாங்க.. ரயில் நீளத்தை விட க்யூ நீளம் அதிகமா இருந்திருக்கலாம். ரயில் ஒண்ணும் நின்னது. அது நிக்கும் போதே ஃபுட்போர்ட் அடிக்கிற அளவு கூட்டம். மூணு பேரும் ஆளுக்கு ஒரு க்யூவில் நின்னாலும் எந்த வரிசையும் நகரவே இல்லை.

ரயில் கிளம்பறதுக்காச்சு... 4 : 30 மணியாகப்போகுது... வாம்மா போகலாம்னு சொன்னா அம்மா கோவிச்சுக்கிறாங்க.. டிக்கெட் எடுக்காம ரயில்ல ஏறக்கூடாதுன்னு தத்துவம் வேற... வந்த கோவத்தை அடக்கிகிட்டு, எவ்ளோ பேரு ஓடிப்போய் ஏறுறாங்க.. பாரு. வேணா தாம்பரத்துல இறங்க்கினதும் டிடிஆரைப் பாத்து சொல்லி டிக்கெட் வாங்கிடலாம்னு சமாதானப்படுத்தி மூணு பேரும் ரயில்ல ஏறினோம்.

சரியான கூட்டம். தம்பியை உள்ள ஏத்தி விட்டா, அம்மா ஃபுட்போர்ட்ல.. யாரும் ஒரு லேடி தொங்கிட்டு வருதேன்னு கண்டுக்கவே இல்ல. அப்புறம், பக்கத்துல இருக்கிறவங்களைத் தள்ளி உள்ள வந்தா நிக்கக்கூட இடம் இல்ல,. அவ்வளவு கூட்டம். அத்தனை இம்சையிலும் எல்லோரும் ராஜீவுக்காகப் பரிதாபப் பட்டனர். ஒரு சிலர் புலம்பவே செய்தனர். ஆனால் என்ன நடந்தது என யாருக்கும் சரியாகத் தெரியவே தெரியாது.

தாம்பரத்துல வந்து இறங்கி, ரயில்வே நடை மேம்பாலத்தில் ஏறி ஜிஎஸ்டி ரோடைப் பாத்தா பகீர்னு இருந்தது. நடு ரோட்ல ஒரு ஜீப் எரிஞ்சு போய் நின்னுட்டிருந்தது அங்கங்க டயரைக் கொளுத்தியிருந்தாங்க.. பல ரோடோரக்கடைகள் போர்டெல்லாம் அடிச்சு நொறுக்கி,லைட்டெல்லாம் உடச்சு வெச்சிருந்தாங்க.

ஈஸ்ட் தாம்பரம் பக்கமா ரயில்வே ஸ்டேஷனை விட்டு வெளியே வந்தா பஸ் ஆட்டோ எதுவும் கணோம். அந்த ரோட்டிலும், அங்கங்க டயர் எரியுது. கடைங்க கதவு போர்டெலாம் உடைஞ்சு கிடக்கு. அம்மா கொஞ்சம் கூட பயப்படவே இல்ல. வாங்க..அப்படியே நடக்கலாம். ஏதாவது வழியில் ஆட்டோ வந்தா பாத்துக்கலாம்னு சொல்லிட்டு நடக்க ஆரம்பிச்சிட்டா.

நல்லவேளையா ஒரு மோட்டார் வெச்ச சைக்கிள் ரிகஷாக்காரர் வந்து எங்க போகணும்னு கேக்க, செம்பாக்கம்னு சொன்னேன். கொஞ்சம் யோசிச்சாரு. அங்க நிறைய திமுக காரங்க கடைங்க இருக்குமேன்னாரு. என்ன பிரச்சினைண்ணேன்னு கேட்டதுக்கு, ஒண்ணுமில்ல வாங்க போலாம்னு ஏத்திகிட்டு கிளம்பிட்டாரு. வழியெல்லாம் டயர் எரிப்பு. பல கடைகளை உடைச்சிருந்தாங்க..

அப்ப சொன்னாரு அந்த ரிக்க்ஷாக்காரர், திமுககாரங்க கடைங்களா பாத்து பாத்து அடிச்சிருக்கானுக.. ஆனா அவனுங்களுக்கும் வேணும். ராஜீவ்காந்தி செத்ததுக்கு இவனுகதான் காரணம்னாரு.. ஒண்ணும் புரியல எனக்கு அப்ப.. வீட்டுக்குப் போய் சேந்தா போதும்னு இருந்தது.

வீட்டுக்குப் போனதும், ஹேப்பி பர்த்டேன்னு கூட சொல்லாம அப்பாகிட்ட முதல்ல ராஜீவ் செத்த விஷயத்தைச் சொன்னோம். அப்புறமாதான் வாழ்த்துக்களே சொன்னோம்.

நாங்க போய் சொல்ற வரைக்கும் செம்பாக்கத்துல பல பேருக்கு ராஜீவ் செத்ததே தெரியாது. நண்பர்கள் வீட்டுக்கெல்லாம் போய் சொல்லி ரேடியோவைக் கேக்க வெச்சோம்.

எங்கம்மா அன்னிக்கு நைட் வரை சாப்பிடவே இல்லை. ராஜீவ் கொலையையும், அவரோட பல பேரு செத்த விஷயத்தையும் அவளால் ஒத்துக்கொள்ளவே முடியவில்லை. என்னாலும்தான்.

நாகராஜசோழன் M.A, M.L.A - திரைப்பட விமர்சனம்.

2013-05-11T18:29:00.001+05:30

“சோழர் பரம்பரையில் ஒரு எம் எல் ஏ” என சத்யராஜ் சொல்லி தியேட்டர் அதிர்ந்த கிளாப்ஸ் வாங்கிய அமைதிப்படையின் இரண்டாம் பாகம் எனச் சொல்லிக்கொண்டாலும், இரண்டு படத்திற்கும் மலைக்கும் மடுவுக்கும் உள்ள வித்தியாசம் என்று கூடச் சொல்லிவிட முடியாது. அதற்கும் மேல் ஏதாவது இருந்தால்கூடச் சொல்லலாம்.

படம் ஆரம்பித்து ரொம்ப நேரம் கதை என்பதே என்ன எனச் சொல்லாமல் மணிவண்ணனும் சத்யராஜும் பேசிக்கொண்டேயிருப்பது சிறிது நேரத்தில் போரடிக்க ஆரம்பித்துவிடுகிறது. நெளியும் அளவு கூட இல்லாத சீட் (ARRS Multiplex, Salem) ஆதலால், ஆடாமல் அசையாமல் உட்கார்ந்து... ஒரே நேரத்தில் ரெண்டு பிரச்சினை.

சீமான்.. ஐயோ பாவம்!! பிராபாகரன் ரேஞ்சுக்கு அவரைச் சித்தரிக்க நினைத்து கேவலப்படுத்தியிருக்கிறார்கள். யாரைக் கேவலப்படுத்தியிருக்கிறார்கள் என்பதே மில்லியன் டாலர் கேள்வி.

இசை ஜேம்ஸ் வசந்தன் என்பது பேர் போடும்போது கவனித்ததால் தெரிகிறது.

மணிவண்ணன் ஒரு டைம் வார்ப் (Time Warp)பில் சிக்கி நம்மை கன்னாபின்னாவென சின்னாபின்னப் ‘படுத்தியிருக்கிறார்’.

எதிர்நீச்சல் - செய்முறை !!

2013-05-04T20:31:00.000+05:30

முதலில் படம் பார்க்க வருபவர்களின் வயிற்றெரிச்சலில் வாணலியை வைத்து கால் டீஸ்பூன் கதையை ஊற்ற வேண்டும். நன்கு கொதித்ததும், அதில் ஈரோவின் நண்பனின் கடி ஜோக்ஸ் ரெண்டு டீஸ்பூன் போட்டு நன்கு சிவக்கும் வரை வறுத்து பின் ஏற்கெனவே ஹிட்டான பாடல்கள் அரை லிட்டரை ஊற்றி கொதிக்கவிடவும்.

நன்கு கொதித்த உடன், ஈரோவின் மொக்கை ஜோக்ஸ் கால் கிலோ மற்றும் அசமஞ்சமான முகபாவனை ஒரு நூறு கிராம் ஆகியவற்றை தனியே நன்றாகக் கலந்து பின் கொதிக்கும் கலவையில் கலந்துவிடவும்.

மிகமிக மொக்கையான ஈரோயின் ஒரு சிட்டிகையை அப்படியே சேர்த்து கிளறவும்.

அனைத்தும் கலந்து ஒரு உப்புமா பதம் வந்தவுடன், நெய்யில் வறுத்த இரண்டாம் ஈரோயினி ஒரு ஐம்பது கிராம் போட்டு அலங்கரித்து இறக்கி விடவும்.

எச்சரிக்கை : சாப்பிட்டுப் பார்க்க ரிஸ்க் எடுப்பது அவரவர் விருப்பம்!

சூது கவ்வும் - மனதைக் கவ்வும்!!

2013-05-01T20:07:00.000+05:30

ரொம்ப நாளைக்கப்புறம் ரெட்டை அர்த்த வசனம், பெண்களைக் கிண்டலடித்து வசனம், பஞ்ச் டயலாக் ஏதுமில்லாமல் ஒரு நல்ல ரசிக்கத் தகுந்த படம். சிரித்துக்கொண்டே ஸ்கிரிப்ட் எழுதியிருக்க வேண்டும். பல காட்சிகளில் நம்மை அறியாமல் புன்னகைக்க வைக்கிறார்கள்.

சேம்பிளுக்கு, கடத்தப்பட்ட பெண்ணின் அப்பாவிடம் 45000 ரூபாய் எடுத்து வைக்கச் சொல்லிவிட்டு அவரிடம் போனில் பேசிக்கொண்டே சட்டென அவர் ஆபீஸ் அறையில் நுழைந்து அவரிடம் காசை வாங்கிச் செல்வது மட்டுமில்லாமல் கடத்தப்பட்ட பெண்ணிடம் ஷாப்பிங்கிற்கு வெச்சுக்கோ எனப் பணம் கொடுக்கையில் அரங்கம் அதிர்கிறது.

சின்னச் சின்ன நிகழ்வுகளால் திரைக்கதையை தூக்கி நிறுத்தியிருக்கிறார்கள். வசனங்களும் அது போலவே. ஒரு சீனில் கடத்தவும் செய்துவிட்டு, நாளைக்கு ஞாயித்துக்கிழமை வொர்க் செய்ய மாட்டோம் என்கிறார் விஜய் சேதுபதி.

அனைத்து நடிகர்களும் நன்றாக நடித்திருக்கிறார்கள். முக்கியமாக மீண்டும் ராதாரவி.

சந்தோஷ் நாராயணனின் இசை படத்திற்கு தேவையான அளவில் இருக்கிறது. கம்னா கம்.. பாடலும், மணி.. மணி பாடல் மற்றும் அதன் பிக்சரைசேஷன் வித்யாசமான அழகு.

நலன் குமாரசாமி ஒரு பெரிய ரவுண்டு வருவதற்கான எல்லா வாய்ப்பும், அறிகுறியும் இருப்பது தமிழ் சினிமாவின் அதிர்ஷ்டம்.

உதயம் - NH 4

2013-04-21T18:53:00.000+05:30

ஒரு பணக்காரப் பெண். ஒரு ஏழைப்பையன். காதல்....

பெண்ணின் அப்பா மிகப் பெரும் அரசியல்வாதி. அவர்கள் காதலை எதிர்க்கிறார். பெண்ணுக்கு அம்மா கிடையாது. பையனுக்கு பெற்றோர் கிடையாது. நியாயத்துக்காக போலீசாக இருந்தாலும்'தட்டிக்' கேட்பவன்.

ஊர் விட்டு ஊர் வந்தாலும் அங்கேயும் நான்கு நண்பர்கள். சிகரெட், குடி, கும்மாளம் எனப் படிப்பதைத் தவிர அனைத்தையும் செய்வார்கள். இப்போதெல்லாம் காலம் மாறி வருவதைக் சினிமாவில் பதிவு செய்ய, கதாநாயகிகளும் குடிக்கிறார்கள். ஆட்டம் போடுகிறார்கள்.

இந்தக் கதையை எழுதியது வெற்றி மாறன் என்று வேறு சொல்லிக்கொள்கிறார்கள். அவர் தயாரிப்பாளராக இருக்கையில் என்ன வேண்டுமானாலும் செய்துகொள்ள முடியும். நிற்க.

விஷயத்துக்கு வருவோம். இந்தக் அரதப்பழசான கதைக்கு கிரியேட்டிவ் ப்ரொடியூசராகவும் இயக்குனராகவும் இருந்து இபடத்தை இயக்கி இருக்கும் மணிமாறனுக்கு இறுக்கி அணைத்து ஒரு உம்மா தரலாம்.

என்ன ஒரு திரைக்கதை?! சின்னச் சின்ன விஷயங்களிலும் என்ன ஒரு நேர்த்தி. இப்படியெல்லாம் போலீஸ் செய்யமாட்டார்கள் என ஆரம்பத்தில் உஷாராகக் கார்டு போட்டு விட்டு, எப்படியெல்லாம் செயல்பட முடியும் என்பதை அப்பட்டமாகக் காட்டியிருக்கும் விதம் அருமை.

எப்படிப் படம் முடியப்போகிறது என்று தெரிந்தாலும், எப்போதடா முடிப்பார்கள் என்ற எண்ணமே எழா வண்ணம் கிட்டத்தட்ட இரண்டே கால் மணி நேரம் ஆர்வமாகப் பார்க்க வைத்திருக்கிறார்கள்.

கே கே மேனன் தமிழ் சினிமாவுக்கு நல்லதொரு வரவு என்றால், தமிழ் சினிமாவில் பாலச்சந்தரின் உத்தி எனப்படும் திரைக்கே வராமல் இரண்டு பாத்திரங்களாக அவர் மனைவியும் மகனும் காட்டப்படுவது இன்னும் சிறப்பு.

கடைசிவரையில் சித்தார்த் தொண்டை கட்டிக்கொண்டிருப்பது போலவே பேசியிருப்பதுதான் ஏனெனப் புரியவில்லை.

ஆங்காங்கே பின்னணி இசையில் ஒரு சில ஆங்கிலப் படங்களில் கேட்ட இசையே கேட்டாலும், ஜிவி பிரகாஷ் அப்படித்தான் என்பதால் விட்டுவிடலாம். யாரோ அவன் பாடல் பலமுறை கேட்டதினாலும், அந்த ஹஸ்கி வாய்சாலும் மீண்டும் கேட்கத் தூண்டுகிறது.

விறுவிறுப்பாகக் கதை சொல்லும் விஷயத்தில் உதயம் ஒரு வெற்றிப்படம் என்றே சொல்லலாம்.

கௌரவம் (அ) 32 பேர், 3 குழந்தைகள் பின்ன ஞானும் !!

2013-04-21T11:04:00.000+05:30

நானூறு பேருக்கு மேல் இருந்து பார்க்க வேண்டிய ஒரு திரையரங்கில் நாற்பதுக்கும் குறைவான ஆட்களோடு படம் பார்த்ததை கௌரவக் குறைச்சல் என்பதா இல்லை இப்படம் பார்ப்பதே கௌரவக்குறைச்சல் என எண்ணி திரையரங்குக்கு வராமலே இருந்துவிட்ட தமிழ் சினிமா ரசிகர்களை புரிந்துகொள்ள கடவுளாலும் முடியாது எனச் சொல்வதா??

ராதாமோகனின் படங்களுக்கு நான் ரசிகன் என்பதை விட அவரின் கதை சொல்லும் உத்திக்கு ரசிகன் எனச் சொல்லலாம். சமூகத்தின் ஒரு முக்கியமான அவலத்தைச் சொல்லும் படத்தில் அது இல்லை என்ற நெருடல் இருக்கிறது.

படம் எடுக்கும்போதே இப்படத்தை என்னவென்று சொல்லி விளம்பரப் படுத்தப் போகிறோம் எனக் கண்டிப்பாக யோசித்திருப்பார்கள். ஏனெனில், சற்றே பிசகினாலும் பல இடங்களிலிருந்து எதிர்ப்பு எழும் வாய்ப்பு உண்டு என அவர்கள் அறிவார்கள். அப்படி இருக்கையில், எப்படி இப்படி ஒரு திரைக்கதை அமைக்கப்பட்டது என்றுதான்

புரியவே இல்லை.

படம் பார்க்கும் அனைவருக்கும் முடிவு என்ன என்று தெரிந்துவிட்ட பின், கதையில் கூடவே தடம் பிறழாமல் ரசிகனைப் பயணிக்க வைக்கும் விஷயங்கள் ஏதும் திரைக்கதையில் காணோம்.

விஜியின் வசனத்துக்காகவே பலமுறை பார்த்த படங்களிலிருக்க, இப்படத்திற்கு வசனம் விஜியா என வியக்கவைக்கிறார். வெரி சாரி விஜி சார்... மனசுல பட்டதைச் சொலிட்டேன்..

பின்னணி இசை பற்றி எல்லாம் எழுதி ஏற்கெனவே நொந்துபோன உள்ளங்களை நோகடிக்கப் போவதில்லை.

கோயிலுக்குத்தான் போக நினைத்திருக்கிறார்கள் . ஆனால் தேர்ந்தெடுத்த பாதைதான் அவர்களை வ்ழி தவறவைத்திருக்கிறது.

சொல்ல வந்த கருத்தை நடு நிலையாகச் சொல்ல முயற்சித்ததில், சொல்ல வந்தது சரியாகச் சொல்லப்படாமல் போய்விட்டதுதான் வருத்தமளிக்கிறது.

சன் டிவி பாணியில் சொல்வதானால்....

கௌரவம்... குறைச்சல்!!

நட்பென்னும் பாதையிலே....

2013-04-14T11:27:00.001+05:30

பாதைகள் புதிதெனினும்

பயணங்கள் செய்திடுவோம்

கூட வரும் கூடவே வரும்

நட்பென்னும் நம்பிக்கையில்

பாதிவழி வந்தபின் விலகினாலும்

பாதிவழி சென்றபின் விலக்கினாலும்

காரணங்கள் நூறிருக்கலாம்

காரணிகள் வேறிருக்கலாம்.

காயத்தில் காயமாகாவிட்டாலும்

உள்ளத்தின் காயங்கள்

உலகத்தோர் அறிவதில்லை.

காலப்போக்கில் காயங்கள் ஆறினாலும்

கண்முன் நிற்கும் நீங்காத வடுக்கள்.

வடுவின் மூலம் வலி இருப்பதில்லையென்றாலும்

வடுவின் மூலம் வலிதானே...

காயம் என்பது மனதுக்குத் தானேயன்றி

நட்பென்றும் காயப்படுவதில்லை!!

'பாலா'வின் பரதேசி - ஒரு பார்வை!

2013-03-17T18:06:00.001+05:30

இயக்குனரின் பெயர் திரையில் வரும் போது கைதட்டல்கள் வருவது மிகச் சிலருக்கே. அதில் பாலாவும் ஒருவர். இந்தப் படத்திலும் அது தொடர்கிறது. அதற்கு முற்றிலும் தகுதியானவர்தான் தான் என நிரூபிக்கிறார் அவர் முதல் காட்சியில், கேமிராமேன் செழியனின் துணையுடன்! ஒளிப்பதிவாளரின் ஆதிக்கம் படம் முழுவதும் தொடர்கிறது.

சாலூர் கிராமத்தினையும் அதன் மக்களின் வாழ்க்கையையும் ஒரு நீளமான காட்சியமைப்பின் மூலம் நம் கண்முன் நிறுத்தி மனதில் பதிய வைக்கிறார். வேலை இல்லாமல் வாடும் மக்கள் படும் இன்னல்கள். சாப்பாட்டுக்காக இறந்தவனை கூட ஓரம் வைத்து விட்டு விருந்து நடக்கும் அவலம், அதில் கூட வரும் கிண்டலும் கேலிகளும் என பாலாவின் கைவண்ணம் நன்கு வெளிப்படுகிறது.

தேயிலைத்தோட்ட வேலைக்கு நம்பிச்செல்வதும் பின் அங்கு நடக்கும் கொடுமைகளும் பாலா இருளான வாழ்வின் துன்பத் தடத்திலேயே பயணிக்க விரும்புவதை வெளிச்சம் போட்டு காட்டுகிறது.

அதர்வா ஒட்டுப்பொறுக்கியாகவே வாழ்ந்திருக்கிறார். வேதிகா வழக்கம் போல பாலாவின் பைத்தியக்காரத்தனமான நடிப்பை வெளிப்படுத்தும் கதா நாயகிகளுள் ஒருவராக வந்து போகிறார். தன்ஷிகா சோகமாகவே இருந்து சோகமாகவே செத்தும் போகிறார்.

கலை இயக்குனர் புதியவராம். நல்வரவு. அருமையான அறிமுகம்.

அமைதியாக இருந்திருந்தாலே அருமையாக இருந்திருக்கக்கூடிய இடங்களிலும் இசையமைத்து இன்னும் கற்றுக்கொள்ள வெண்டியது எராளம் என வெளிப்படுத்தியிருக்கிறார் இசையமைப்பாளர் ஜி.வி. பிரகாஷ்குமார்.

வில்லன்கள் எனப்படுவதற்காகவே வெளி நாட்டவரை மோசமாகச் சித்தரிப்பது சரியா என்பது கேள்விக்குரியது.

இம்மாதியான படங்களில் பாத்திரங்களுடன் பார்வையாளன் ஒன்றிவிடமுடியாவிட்டால் சொல்ல வந்த விஷயம் அவனைச் சேராமல் போய் விடக்கூடிய அபாயம் உண்டு. அதுதான் இந்தப் படத்தில் நிகழ்ந்திருக்கிறது.

பின்குறிப்பு : சேது படம் பார்த்துவிட்டு காசி தியேட்டர் பால்கனியிலிருந்து இறங்கி கீழே வந்த பின் தான் அது உறைத்தது... படம் முடிந்தபின் வரும் பேச்சு சப்தங்கள் எதுவுமே இல்லாமல் அனைவரும் வாய்மூடி மௌனியாய் வெளியே வந்தது.

அமீரின் ஆதிபகவன் - திரைவிமர்சனம்.

2013-02-24T21:08:00.000+05:30

அமீரின் திரைப்பட வரலாற்றில் இப்படம் ஒரு மைல்கல்லாக இருக்கும் என்பதில் எள்ளளவும் சந்தேகமே இல்லை அற்புதமான பாத்திரப்படைப்பு. அருமையாகக் கதை சொல்லும் விதம். நேர்த்தியான திரைக்கதை என நம்மை வியக்க வைக்கிறார். ராம், மௌனம் பேசியதே, பருத்தி வீரன் போன்ற படங்களை எடுத்த இவரால் இப்படி எப்படி எடுக்க முடிந்தது என ரசிகர்கள் படம் ஆரம்பித்த பத்து நிமிஷத்திலேயே முணுமுணுக்க ஆரம்பிப்பது பலமாகவே தியேட்டரில் கேட்கிறது.

இந்தியாவில் கொள்ளையடித்து பங்கை பாங்காக்கில் வாங்கும் காட்சியமைப்பு பிரமிப்பூட்டுகிறது. அதுவும் வில்லனிடம் ஐம்பது சதவிகிதம் வேண்டும் என ரவி கேட்பதும் அவரும் பயந்துகொண்டு சட்டென எடுத்துக்கொடுப்பதும் ஆழமான அர்த்தச் செறிவுள்ள கதை சொல்லும் விதம்.

தான் யாரெனவே தெரியாமல் கூடவரும் பெண்ணை அவள் யாரெனவே தெரியாமல் ஒரு இன்டர்நேஷனால் தாதா விரும்புவதன் மூலம் காதலின் ஆழத்தைக் காட்டியிருக்கிறார் இயக்குநர்

வெட்டவெளியில் மொட்டை மாடியில் வில்லன்கள் பேசுவதாகக் காட்டி அப்போது ஒரு துப்பாக்கி சண்டை. அதில் ஜெயம் ரவிக்கு அடிபடுவது என யாரும் எதிர்பார்க்காத திரைக்கதை வைத்து, நெஞ்சில் பாய்ந்தகுண்டை சட்டென கத்திவைத்து நீத்து சந்திரா எடுப்பது தியேட்டரில் பலத்த கைதட்டல்களை வரவழைக்கிறது.

இடைவேளைக்குப் பின் சொல்ல வேண்டிய காட்சிகளை இடைவேளைக்கு சற்றுமுன் வைத்து தான் ஒரு கைதேர்ந்த இயக்குநர் என்பதை நிரூபித்திருக்கிறார் அமீர்.

இடைவேளைக்குமுன் திரையில் தோன்றும் பகவான் பாத்திரம் பற்றி எழுதினால் நீங்கள் யாரும் தியேட்டருக்குப் போக மாட்டீர்கள் என்பதால் அதைப் பற்றி எழுதபோவதில்லை.

வேண்டுமானால், மீதியை வெள்ளித்திரையில் கண்டு கொள்ளுங்கள்.

எனக்கு மட்டும் நேரம் வேஸ்ட் ஆனால் போதாது. யான் பெற்ற துன்பம் வையகமும் பெறுக என்ற நல்லெண்ணம் எனக்குள்ளது என நீங்கள் அனைவரும் அறித்துகொள்ள ஒரு அரிய சந்தர்ப்பம் இது.

அமீரைப்போல் வீணாக்கி விடமாட்டேன்.

அண்மைச் செய்தி : சென்னையில் நடக்கவிருந்த வெடிகுண்டு தாக்குதல் சதி முறியடிப்பு - போலீஸ் சாதனை!!

2013-02-23T09:14:00.000+05:30

சென்னை :

சென்னையில் நடக்கவிருந்த மிகப்பெரிய பயங்கரவாதத்தாக்குதல் போலீசாரால் தடுக்கப்பட்டுள்ளது. இது பற்றி உள்துறை அமைச்சர் சுஷில் குமார் ஷிண்டே பேட்டியளித்ததிலிருந்து.

“நான்கு நாட்கச்ளுக்கு முன்னராக சென்னையில் பல இடங்களில் குண்டு வெடிக்கப்போவதாகத் தகவல் வந்தது. அதை அப்படியே சென்னை போலீசிற்கு தெரியப்படுத்திவிட்டோம்.

பொதுவாகத்தான் செய்தி வந்ததே தவிர, என்றைக்கு, எப்போது, யார், எங்கே குண்டு வைக்கப்போகிறார்கள் என்ற தகவலகள் ஏதும் வரவில்லை.

சென்னை போலீசாரும் எங்களை மீண்டும் தொடர்புகொண்டு இப்படிப் பொதுவாகச் சொன்னால் எப்படித் தடுப்பது எனக் கேட்டதால், அமைச்சகம் உடனே தீவீரவாதிகளின் நாச செயல்கள் பற்றி முன்கூட்டியே தகவல் தருபவர்களிடம் மீண்டும் கேட்டோம்.

சென்னை போலீசின் கேள்விகளின் நியாயத்தைப் புரிந்துகொண்டு அவர்களும் உடனே யார், எங்கே, என்றைக்கு குண்டு வைக்கப் போகிறார்கள் என்ற தகவல்களை சென்னை போலீசாரிடம் கூறியதால் அவர்களும் உடனே விரைந்து சென்று, குண்டு வைக்கத் திட்டம் தீட்டியவர்களைக் கைது செய்து விட்டனர்.

இது போல் அனைவரும் விவரமாக சொல்லியிருந்தால் இதற்கு முன் நடந்த பல குண்டுவெடிப்புகளைத் தவித்திருக்கலாம்”, என சுஷில் குமார் ஷிண்டே கூறினார்.

(எதிர்கால செய்திகளை முன்னரே வெளிக்கொணர்வதில் வல்லவரான நமது செய்தியாளர் idleman தரும் செய்திகளை www.idleman.blogspot.com ல் படிக்கலாம்)

விஸ்வரூபம் தடைக்கு உண்மைக் காரணம் - ‘பகீர்’ தகவல்கள்!!

2013-01-31T08:54:00.000+05:30

சென்னை : விஸ்வரூபம் படத்தைத் தடை செய்ய தமிழக அரசு இவ்வளவு தீவீரமாகச் செயல்படுவதின் பின்னணி பற்றிய அதிர்ச்சித் தகவல்கள் இப்போது வெளி வந்திருக்கிறது.

இந்த ஆண்டு பருவ மழை குறைந்து காவிரி டெல்டா பகுதியில் விவசாயிகள் கடும் நஷ்டத்தில் உள்ளனர். தமிழகமெங்கும் உள்ள சீரான மின்வெட்டினால் பல தொழில்கள் முடங்கி தொழிலதிபர்களின் வருமானமும் அதனால் தொழிலாளர்களின் வருமானமும் குறைந்துள்ளது. மேலும், என்ன தான் இலவச வேட்டி, சேலை மற்றும் முதல்வர் பெயர் அச்சடித்து நூறு ரூபாய் ரேஷன் கடைகளில் வினியோகம் செய்தாலும், மக்கள் வாங்கும் திறன் வெகுவாகக் குறைந்துள்ளது. மேலும், சந்திராயன் ராக்கெட்டை விடவும் மிக மேலே விலைவாசி போய்விட்டது. போதாக்குறைக்கு மத்திய அரசால் எவ்வளவு முடியுமோ அவ்வளவு தூரம் மானிய சிலிண்டர் எண்ணிக்கை குறைப்பு, டீசல் விலை ஏற்றம் எனப் பலவகைகளில் மக்கள் மேல் துன்பம் திணிக்கப்பட்டிருக்கிறது.

இத்தனை துன்பங்களையும் மக்கள் மறந்து, மரத்து, மன்னித்து, சந்தோஷமாக வாழ இருக்கும் ஒரே ஆதாரம் டாஸ்மாக் கடைகளால் மக்களுக்கு தெருவுக்குத்தெரு தடையே இல்லாமல் வினியோகிக்கப்படும் மது வகைகள் மட்டுமே.

மேலே சொன்ன இத்தனை விலை ஏற்றங்களினாலும் அவதிப்படும் மக்கள் மதுவாங்கவே காசில்லாமல் திண்டாடி வரும் நிலையில், பண்டிகைக் காலத்தின்போதோ அல்லது விடுமுறை நாட்கள் அதிகமாக இருக்கும் நாட்களிலோ விஸ்வரூபம் படம் வெளிவந்தால் மக்கள் கையிலிருக்கும் காசையெல்லம் கம்ஹாசனின் திரைப்படத்திற்கு செலவு செய்துவிடுவார்கள்.

அதன் காரணமாக, டாஸ்மாக் விற்பனை வீழ்ச்சியடைந்துவிடக் கூடும். அவ்வாறு நடந்துவிட்டால், தமிழக அரசின் மொத்த வருமானத்தில் கால்வாசிக்கு மேலாக வருமானம் தரும் மது விற்பனை குறைந்துவிட்டால், அரசுப்பணியாளர்களுக்கு சம்பளம் கூட கொடுக்க முடியாத நிலையும், அரசு செலவினங்களுக்கு பணம் இல்லாத நிலையும் ஏற்பட்டு, தமிழக அரசாங்கமே ஸ்தம்பிக்கும் நிலை வந்துவிடும். அது நேரடியாக அனைத்து தமிழக மக்களையும் பாதித்துவிடும்.

தமிழக மக்கள் இம்மாதிரி பாதிப்புக்குகளுக்கு உள்ளாகிவிடக்கூடாதே என்ற பதைபதைப்பிலும், தாயுள்ளத்தோடு கூடிய கருணையினாலுமே விஸ்வரூபம் படம் தடை செய்யப் பட பல வழிவகைகள் மூலமாக தமிழக அரசு முயல்வதாக நம்பத்தகாத வட்டாரங்களிலிருந்து வரும் நம்பிக்கையான செய்திகள் கூறுகின்றன.

பின்குறிப்பு : நமது செய்தியாளர் idleman எப்போதுமே வெளிவராத, வெளிவரவே முடியாத செய்திகளை முந்தித் தருவதில் வல்லவர்!

கமல்ஹாசனின் விஸ்வரூபம் பட வழக்கில் நீதிபதி தீர்ப்பு :

2013-01-28T19:29:00.000+05:30

விஸ்வரூபம் திரைப்படம் தமிழக அரசால் தடை செய்யப்பட்டதும், அதை தொடர்ந்து கமல்ஹாசன் தொடர்ந்த வழக்கும் அனைவரும் அறிந்ததே. படம் சனிக்கிழமை அன்று நீதிபதிக்காகத் திரையிடப்பட்டது.

இன்று காலை அவர் அளித்த தீர்ப்பின் சாராம்சம். “விஸ்வரூபம் திரைப்படம் மத உணர்வுகளைப் புண்படுத்துகிறது என்றும், வெளியிடப்பட்டால் சட்டம் ஒழுங்கு கெட்டுவிடும் என்றும் அதனால் இப்படம் தடை செய்யப்படவேண்டும் என்று ஒரு சாராரும், தடை செய்யக்கூடாது எனத் தயாரிப்பாளரும் கூறியிருக்கின்றனர். நடுவே தமிழக அரசுக்கே தெரியாமல் அனைத்து மாவட்ட ஆட்சியாளர்களும் ஒருபோல தடையுத்தரவு பிறப்பித்துள்ளனர்.

ஒவ்வொரு மனிதனுக்கும் ஒவ்வொரு ஃபீலிங் என்ற அற்புதமான தத்துவத்தை நமக்களித்தது தமிழ் சினிமா என்பதை நாம் மறந்துவிடக்கூடாது. அதன் அடிப்படையில் பார்த்தால் ஒரு சிலருக்குப் பிடிக்கவில்லை எனத் தடைகள் இட ஆரம்பித்தால் நாம் வீட்டை விட்டே வெளியில் வர முடியாத நிலை ஏற்பட்டுவிடும்.

இப்படத்தைப் பார்த்தால் மற்ற மதத்தைச் சேர்ந்தவர்களுக்கு இஸ்லாம் சமூகத்தினர் மேல் கோபம் ஏற்படும் என்பது ஏற்கத்தகுந்த வாதமே அல்ல. மற்ற மதத்தினர் மிகுந்த சகிப்புத்தனமையுடையவர்களாக தமிழ் நாட்டில் வசிப்பது நாம் அனைவரும் அறிந்ததே. அரசியல்வாதிகளின் பொய்யான, சாதி சார்ந்த நிலைப்பாடுகளையே சகித்துக்கொள்வோர்க்கு இத்திரைப்படம் கேடு விளைவிக்கும் என்னும் வாதம் கண்டிப்பாக ஏற்கத்தகுந்ததே இல்லை. மேலும் இவ்வாறான பேச்சு, மொத்தத் தமிழ் மக்கள் மனதைப் புண்படச் செய்யும்படியான பேச்சு. இதற்காக இப்படிப் பேசியவர்கள் எம்மதத்தினராக இருந்தாலும், தமிழ் மக்களிடம் மன்னிப்புக்கோருவதே இரு சமூகத்திற்கும் நல்லதொரு உறவைத் தொடரச்செய்யும் என்பதே இந்த நீதிமன்றத்தின் கருத்தாகும்.

மேலும் ஆங்காங்கே இறைவனின் பெயரால் விஸ்வரூபம் தடை செய்யப்போராட்டம் எனச் சுவரொட்டிகள் வைத்திருப்பதாகவும் செய்திகள் வந்துள்ளது ஒரு சிலரின் செயல்கள் எந்த நோக்கத்துக்காக என்பதில் சந்தேகத்தை உண்டாக்குகிறது.

அனைத்தையும் பார்க்கும் போது படத்தைத் தடை செய்தது சரியல்ல என்றே இந்நீதிமன்றம் கருதுவதால், உடனே அத்தடையை நீக்குமாறு அரசுக்கு உத்தரவிடப்படுகிறது. மேலும், வன்செயல்கள் ஏதும் நேராமல் பார்த்துக்கொள்வதும், பாதுகாப்புக் கொடுக்கவேண்டியது அரசின் கடமை எனவும் அரசுக்கு ஞாபகப்படுத்தி இந்தத் தீர்ப்பை நிறைவு செய்கிறேன்.

பின் குறிப்பு : நாளைய செய்திகளை இன்றே அறிந்துகொள்ள எப்போதும் இணைந்திருங்கள்... www.intelhari.blogspot.com

திரைப்படங்களில் ரவுடிகளை மோசமாக சித்தரிக்கத் தடை - தமிழக அரசு உத்தரவு !

2013-01-26T12:27:00.002+05:30

சென்னை : தமிழ்த்திரைப்படங்களில் ரவுடிகள், தாதாக்கள் எனக்காட்டப்படுவோர் வன்செயல்களில் ஈடுபடுவதாகவோ, மோசமாகப் பேசுவதாகவோ காட்டக்கூடாது எனத் தமிழக அரசு ஆணை பிறப்பித்துள்ளது. அவ்வாறு காட்டப்படும் படங்கள் தணிக்கை செய்யப்பட்டிருந்தாலும் மக்கள் நலன் கருதி, பாதுகாப்புக்காரணங்களால் மாவட்ட ஆட்சியாளர்களால் தடை செய்யப்படும் எனவும் அறிவிப்பு வெளியிடப்பட்டுள்ளது.

சென்னை மாவட்ட ஆட்சியாளரிடம் இது பற்றி கேட்டபோது, “தாதாக்கள், ரவுடிகள் ஆகியோர் கொடுத்த புகாரின் பேரிலேயே இந்த நடவடிக்கை எடுக்கப்பட்டுள்ளது. இது போல தாங்கள் சித்தரிக்கப்படுவதால் பொதுமக்களுக்கு அவர்கள் மேல் கோபம் வந்து ரவுடித்தனமும், தாதாயிசமும் செய்ய முடியாத நிலை ஏற்படக்கூடும் என்றும், அதனால் அவர்கள் வாழ்வாதாரம் பாதிக்கப்படும் எனவும் அவர்கள் கேட்டுக்கொண்டதாலேயே இந்த முடிவு எடுக்கப்படுகிறது” எனவும் விளக்கமளித்தார்.

ரவுடிகளையும், தாதாக்களையும் மோசமாகக் காட்டும் திரைப்படங்கள் திரையிடப்படுமானால் தியேட்டர்களுக்கு தீ வைப்போம் எனவும், பார்க்க வரும் மக்களைத் தாக்குவோம் எனவும் அவர்கள் எச்சரிக்கை விடுத்ததாலேயே, மக்கள் நலன் கருதி இந்தத்தடை உத்தரவை அரசாங்கம் பிறப்பித்துள்ளதாக தலைமைச் செயலாளர் ஒரு அறிக்கையில் கூறியுள்ளது குறிப்பிடத்தக்கது.

இது குறித்து கருத்து கேட்டபோது அனைத்து இயக்குனர்களும், நடிகர்களும், தயாரிப்பாளர்களும் அவரவர்கள் எடுத்துக்கொண்டிருக்கும் படங்களில் வேலையில் மூழ்கியிருப்பதால் இது குறித்து கருத்து சொல்ல நேரமில்லை என்று கருத்து சொல்லியிருக்கின்றனர்.

ஆனந்த விகடன், குமுதம் மற்றும் மற்ற பத்திரிக்கைகளை விற்பனை செய்ய தடை : கடை உரிமையாளர்கள் சங்கம் அதிர்ச்சி முடிவு!!

2013-01-11T09:56:00.000+05:30

சென்னை : இனிமேல் தமிழகமெங்கும் உள்ள கடைக்காரர்கள் வலைத்தளத்தில் (internet) வெளியாகும் எந்த ஒரு பத்திரிக்கையும் விற்பனை செய்ய மாட்டார்கள் தமிழக கடைக்காரர்கள் சங்கத்தின் தலைவர், திரு. கருப்பன் கூறினார்.

நேற்று சென்னை ஆழ்வார்ப்பேட்டையில் நடந்த ஒரு கூட்டத்தில் அவர் பேசிய போது, “தமிழகத்தில் வெளியாகும் பத்திரிக்கைகளில் பலவும் வலைத்தளத்தில் வெளியாவது அனைவரும் அறிந்ததே. ஒரு முறை படிக்க அல்லது தொடர்ந்து பல முறை படிக்க எனப் பல வகைகளில் இப்பத்திரிக்கைகளை அச்சில் வெளியிடுவோர் வலை மூலமும் விற்கின்றார்கள். அவ்வாறு விற்பது தங்களது வாழ்வாதாரத்தை பாதிப்பதாகவும் கடைக்காரர்கள் சங்க உறுப்பினர்கள் எண்ணுவதாகவும் கருப்பன் கூறினார். ஏற்கெனவே அன்னிய முதலீடு சில்லறை வர்த்தகத்தில் அனுமதித்ததன் காரணமாக பல்வேறு கடைகள் இயங்க முடியாத நிலை ஏற்பட்ட நேரத்தில், தங்கள் வியாபாரத்தை தக்க வைத்துக்கொள்ளவே இப்போராட்டம்”, எனவும் மிக ஆவேசமாகப் பேசினார்..

சென்னை மாவட்ட கடைக்காரர்கள் சங்கத் தலைவர் பராக்கிரமசிங்க ராசா பேசுகையில், ‘அனைத்து பத்திரிக்கைகளையும் பல வருடங்களாக நாங்கள் மட்டுமே விற்று லாபம் ஈட்டி வந்த நிலையில் இன்று வேறு வழிகள் மூலமாக விற்பது என்ன விதத்தில் நியாயம்’ எனப் பரிதாபமாகக் கேள்வி எழுப்பினார்.

இதனால் தமிழகத்திலிருந்து வெளியாகும் ஆனந்தவிகடன், குமுதம் போன்ற பத்திரிக்கைகள் மற்றும் தினமலர், தினத்தந்தி போன்ற தினப்பத்திரிக்கைகளும் தமிழகமெங்கும் கடைகளில் விற்பனை செய்ய முடியாத நிலை ஏற்பட்டுள்ளது.

இதனைத் தொடர்ந்து குதிரைவண்டியைத் தவிர்த்து ஆட்டோக்களை உபயோகிக்கும் பொதுமக்கள் மீது வழக்குத் தொடரப்போவதாக பரங்கிமலை தொடர்வண்டி நிலைய குதிரை வண்டிக்காரர்கள் நடத்திய மாநாட்டில் முடிவெடுக்கப்பட்டுள்ளது. ஆட்டோக்கள் வருவதற்கு முன்னரே தாங்கள் தான் பொதுமக்களை கூட்டிச் சென்று கொண்டிருந்ததாகவும், தற்போது தங்களை மறந்துவிட்டு ஆட்டோவுக்கு மாறிச்சென்றுவிட்டதாகவும், அது தங்களுக்கும் குதிரைகளுக்கும் செய்யும் துரோகம் என்றும் குதிரை வண்டிக்காரர்கள் நல்வாழ்வு சங்கத்தின் தலைவர் திரு. கேயார் பன்னீர் கூறினார்.

பின்குறிப்பு : இந்தச் செய்திகளில் உண்மை இல்லை என நம்புபவர்கள் திரு. கமல்ஹாசன் அவர்களை தொடர்புகொள்ளுமாறு கேட்டுக்கொள்ளப்படுகிறார்கள்.

கண்ணாடி - முகம் பார்க்க அல்ல, அகம் பார்க்க!

2013-01-01T15:22:00.001+05:30

நேற்றிரவு அலுவலகத்திலிருந்து வீடு திரும்புகையில் பார்த்த/கேட்ட சில விஷயங்களைப் பகிர்ந்து கொள்ள விரும்புகிறேன். அண்ணா சாலையில் சரேல் சரேல் என இரு சக்கர வாகனங்கள் தரையின் மீதே பறந்துகொண்டிருந்தன. அனைத்திலும் இரண்டு அல்லது மூன்று இளைஞர்கள் வரை பயணம். நந்தனத்திலிருந்து சைதாப்பேட்டை வருவதற்குள் பத்து பதினைந்து வாகனங்கள் எங்களைக் கடந்துவிட்டிருந்தன. ஒருவர் கூட தலைக்கவசம் அணியவில்லை. ஜோன்ஸ் ரோடு சிக்னலில் நின்ற போது அருகில் வந்து நின்ற இருவர் பேசக் கேட்கும் போதுதான் புரிந்தது, அவர்கள் புத்தாண்டு வருவதைக்கொண்டாட கடற்கரைப் பக்கம் செல்கிறார்கள் என்று. அதிலும் மிக முக்கியம் அவர்கள் ஆட்கள் (பெண் நண்பிகள்) அங்கே வருவதற்குள் போக வேண்டுமாம். வாயில் புகையும் சிகரெட், மெலிதான பீர் வாடை என தற்கால நாகரீகம் அறிந்த கல்லூரி மாணவர்கள்.

சைதை பாலம் தாண்டியதும் கவர்னர் மாளிகை நோக்கிச் செல்லும் சாலையில் பல வாகனங்கள் சாலையருகிலேயே நிறுத்தப்பட்டு போக்குவரத்தே தடைபடும் நிலை. அருகில் ஒரு டாஸ்மாக் கடை. சாலையில் பறந்து சென்ற பலரும் அங்கே இறங்கியிருந்தனர். நியாயவிலைக்கடையில் கூட மண்ணெண்ணைக்கு மகளிர் இப்போதெல்லாம் சண்டை போடுவதில்லை. வரிசையாகச் சென்று வாங்குகிறார்கள். ஆனால் இங்கோ, தங்கள் சரக்கை வாங்க போட்டா போட்டி. தள்ளு முள்ளு வேறு. சற்றே நகர்ந்தால் சாலையிலேயே ‘குடி’யோடு சிலர் ’குடி’த்தனம் செய்துகொண்டிருந்ததையும் காண நேர்ந்தது.

புத்தாண்டு கொண்டாட்டமென்றால் குடித்துவிட்டு கும்மாளமடிப்பதுதான் இளைஞர்கள் செய்யவேண்டியது என அவர்கள் அறிவிற்கு எட்டச்செய்தது எது? எந்தக் குற்றம் நிகழ்ந்தாலும் காவல் துறையைக் குற்றம் சொல்லும் நாம், சட்டம் ஒழுங்கை முதலில் மதித்து நடக்கிறோமா? “அன்லிமிடெட் லிக்கர் ஃப்ரீ” என பத்திரிக்கைகளில் விளம்பரம் கொடுத்து, மக்களைக் குடிக்கத்தூண்டும் சமுதாயப்புரட்சியை அனுமதித்தது யார்?

அடுத்த புத்தாண்டிற்குள்ளாவது இது போன்ற வரைமுறையற்ற நிகழ்வுகள் நடப்பதைத் தடுக்க நாம் என்ன செய்யப்போகிறோம்?

SKYFALL - A REVIEW

2012-11-02T08:54:00.000+05:30

50 years of a Spy Movie franchisee is a great thing. And seeing different actors playing the same lead role and still most of us love the central character and also the theme music across ages is certainly one of its kind in the history of the cinema. However, does all of this makes the latest outing of James Bond 007 a memorable one? Let’s see.

SKYFALL is certainly not a regular run of the mill Bond movies. Started as saving a country and going on to save the world in earlier films, recently Bond movies hae personal vendetta as subplot and in the recent outing it has a story saving his boss.

Many film makers would give their one arm and leg and something more also, to have the first 15 minutes of Skyfall in their movie as a Climax. So much of adrenalin rush and excellent execution which includes a chase on top of the tiled roofs in Istanbul.

It seems the director got tired after those hectic scenes and the movie moves very slowly after that for quiet sometime, which is uncommon for a bond movie.

Q has a new young avatar and there are enough dialogues about Old Vs New - gadgets, Young Vs Old – people and strategies which make you yawn even though they are terse and upto the point. And the director takes so much of efforts to prove old fashioned methods still holds good in the new age by positioning the end of the movie in Bond’s old ancestral home in Ireland.

And we will be missing Judie Dench from the next movie - I am sure there will be many more - since 007 has a new boss now.

One reason for which I like 007 in Skyfall is that he would be the only person in the entire universe to go all out to save his Boss.

மாற்றான் - 'தமிழ்' திரைப்படம்

2012-10-14T19:07:00.002+05:30

ஆரம்பக் காட்சியிலிருந்து இன்டெர்வெல் வரை இரட்டை சூர்யாக்களைக் காட்ட மிகவும் மெனக்கெட்டிருக்கிறார் கே வி ஆனந்த். அவருடைய டீமின் உழைப்பு அப்பட்டமாகத் திரையில் நன்கு தெரிகிறது. அருமை.

கதா நாயகி அழகாக இருக்கிறார். வருகிறார். ஆடுகிறார். போகிறார்.

கதாசிரியர்கள் உதவியுடன் தமிழில் தைரியமாக படமெடுக்கும் வெகு சொற்ப இயக்குனர்களில் ஒருவர் என்றாலும் இந்தப் படத்தின் திரைக்கதையில் சற்றே சறுக்கியிருக்கிறார் இயக்குனர் என்றுதான் சொல்ல வேண்டும்.

அப்பாதான் வில்லன் என முதலிலேயே சொல்லி விட்டதாலோ என்னவோ விறுவிறுப்பு இல்லாதது போன்ற உணர்வு.

முக்கியமான விஷயம், படத்தின் நீளம். ரொம்ம்ம்ப அதிகம். எப்போதடா முடியும் என சீட்டில் நெளிய வைக்கிறார்கள்.

மொத்தத்தில் மசாலா படம் என்றாலும் மிக்சிங் சரியில்லை என்றே சொல்லத் தோன்றுகிறது.

முகமூடி- திரைவிமர்சனம்(அல்ல)!

2012-09-01T09:21:00.000+05:30

முன்கதை :

போன வாரம் என் நண்பர் வீட்டிற்கு சென்றிருந்த போது மிஷ்கினின் முகமூடி படம் பற்றி பேசினோம். திரு.சண்முக ராஜா நமக்கெல்லாம் மிஷ்கினாக அறிமுகமாவதற்கு முன்னரே அவரது நெருங்கிய நண்பர். இந்தப் படத்திலும் அதிகமாக கால்களைக் காண்பித்தால் அவ்வளவுதான். ஒரு முத்திரை குத்தி விடுவார்கள் என வருத்தப்பட்டார்.

நேற்று கேட்டவை :

நேரம் : மாலை 7 மணி முதல் 10 மணி வரை

இடம் : தேவி தியேட்டர், சென்னை.

டாஸ்மாக் குத்துப்பாட்டு :

ஒரு ஹிட்டான பாட்டோட மியூசிக்கைத் திரும்பப் போட்டாலே தப்பு, அது அவரு படத்து பாட்டாவே இருந்தாலும்... இவரு என்ன டான்ஸ் மூவ்மெண்ட், கேமிரா ஆங்கிளெல்லாம் கூட அப்படியே வைக்கிறாரு??

மஞ்சப்புடவை கட்டிட்டு யாரும் வந்து ஆடலையில்ல... சந்தோஷப்படு மச்சி!!

திருடும் காட்சி :

இவ்ளோ பெரிய வீட்டுக்கு உள் பக்கம் தாழ்ப்பாள் போட்டா பூட்டு போட மாட்டாங்களா??

கதவையெல்லாம் கஷ்டப்பட்டு திறக்குறாங்க.. ஆனா லாக்கர் மட்டும் ஈசியா திறந்துடறாங்க... என்ன கொடுமை சார் இது??

ஹீரோயின் அறிமுகக் காட்சி :

எவ்ளோ நேரம் தாண்டா ஹீரோயின் காலையே காமிப்பாங்க..

(ஹீரோயின் முகம் காட்டிய பின்)

இந்த மூஞ்சியைக் காமிச்சதுக்கு காலே பெட்டர்டா..

திருடர்களுடன் ஜீவா மோதும் காட்சி :

ஏண்டா... இந்த மாதிரி சண்டை தானே அஞ்சாதே’லேயும் இருந்தது, யுத்தம் செய்’லேயும் இருந்தது??

பாலுமகேந்திரா மாதிரி பெரிய டைரக்டர் ஒவ்வொரு படத்திலும் கதாநாயகன் சட்டையைக் கழட்டிட்டு கதாநாயகியோட

சுத்துவான். பின்னால பாட்டு வரும். கமல்ல இருந்து விக்னேஷ் வரைக்கும் சட்டைய கழட்டிருக்காரு அவரு. ஒரு பயலும் ஏன்னு கேட்டதில்ல.. ஆனா, மிஷ்கின் திரும்பத் திரும்ப ஒரே மாதிரி சீன் வெச்சா கேள்வி கேப்பீங்களா?? போடா.. போடா...

கூன் விழுந்த ஒரு கதாபாத்திரம் :

ஏன் இந்த ஆளு அஞ்சாதேல வர அந்த ஒரு கை இருக்கிற கேரக்டர் மாதிரியே பேசுறாரு??

அந்தப் படமும் இவர்தானேடா டைரக்ட் பண்ணினாரு.. அதனால இருக்குமோ??

கிரீஷ் கர்னாட் அறிமுகம்:

இவரு என்ன டார்க் நைட் ரைசஸ் படத்துல பட்லரா வர்ற மைக்கேல் கெயின் கேரக்டரா?? அப்ப ஜீவாவுக்கு கலர் ட்ரெஸ் தெச்சு தர்ற தாத்தா யாரு??

ஏதோ ரோபோவெல்லாம் செஞ்சு வெச்சிருக்காரே அதை எல்லாம் எதுக்கு செஞ்சு வெச்சிருக்காரு??

அதை மிஷ்கின்கிட்ட போய் கேளு... நானே கடுப்புல இருக்கேன்!!

போலீஸ் உயர் அதிகாரிகள் ஐவர் வருகையில்:

ஏன் இவங்க அல்லாம் மலையாளம் மாதிரி தமிழ் பேசுறாங்க? உயர் போலீஸ் அதிகாரி தமிழனா இருக்க முடியாதா?? அதுவும் தமிழ் நாட்டிலேயே??

ஹீரோயின் வீட்டு மொட்டை மாடி :

டேய்... புத்தர் சிலை... மொட்டை மாடியில ஏன்??

வாஸ்து படி அங்க வெச்சாதான் படம் ஓடும்னு சொல்லியிருப்பாங்களோ??

நரேன் :

என்ன சொல்ல வராரு டைரக்டர்?? இவரு பண்ற ஸ்டைலு எல்லாமே ஏன் கோணங்கித்தனமா இருக்கு??

க்ளைமேக்ஸ் :

ஒன்பதேகாலுக்கு ஆரம்பிச்ச க்ளைமேக்ஸ் பத்துமணி வரை ஓடியிருக்குடா...

என்ன?? அவ்ளோ நேரமா? அப்ப நாந்தான் தூங்கிட்டேனா?????

முடிவுரை :

இனிமே காலேஜ் பசங்க பக்கத்தில் உட்கார்ந்து படம் பார்க்கக்கூடாது. நாம காலேஜில் படிச்ச காலத்துல தியேட்டர்ல அடிச்ச லூட்டியை விட இது ரொம்ப ஓவரா இருக்கு...

தமிழன் என்றொரு இனம் !

2012-08-11T16:10:00.001+05:30

தமிழன் என்றொரு இனமுண்டு. தனியே அவர்க்கொரு குணமுண்டு எனப் பாடி வைத்த நாமக்கல் கவிஞர் ராமலிங்கம் பிள்ளை அவர்கள் இன்று தமிழ் நாட்டையும், அதன் மக்களின் குணங்களையும் மட்டும் காணுவாரேயானால் இதற்காகவா பாடினேன் என நாணுவார்.

என்னவெல்லாம் தன் தனிக்குணங்களாகக் கொண்டிருக்கிறான் தமிழன் இப்போது? சிந்தித்துப்பார்த்தால் வேதனையை விட சிரிப்புதான் வருகிறது. நகரம் முதல் கிராமங்கள் வரையில் தமிழனின் குணங்கள் கிட்டத்தட்ட ஒரே மாதிரியே மாறிக்கொண்டுவருகிறது. பக்கத்துவீட்டுக்காரரின் பெயர் கூடத் தெரிந்துகொள்ளாமலே ஒரு வாழ்க்கை. தன் குடும்பம், தன் மக்கள் அவ்வளவே முக்கியம்.

வேலைக்குக் கிளம்பிச் செல்கையில் பேருந்தில் சகபயணியை, மனிதனாகக்கூட மதியாமல் பேச்சுக்கள். நடத்துனரின் கோபங்களும் ஏச்சுக்களுமோ, ஆசிரியரிடமிருந்து வாங்கிய பிரம்படிகளையே மறக்கடிக்கும் வலிமை வாய்ந்தது. பேருந்தில் பெரும்பாலும் நின்றபடியே பயணம்.. சிலரோ உள்ளே இடமிருந்தாலும் படியிலேயே பயணம். முதியோருக்கான இருக்கையில் எப்போதுமே முதியோர் அமர இடம் விடுவதே இல்லை, அதில் அமர்ந்திருக்கும் மனம் முதிராதோர்.

பேருந்தில், முந்தைய நாள் மனைவியிடம் போட்ட சண்டை முதல் பண்டிகைக்கு எடுத்த புடவை வரை, பக்கத்து வீட்டுக்காரியின் பேச்சுக்கள் முதல் அலுவலகத்தில் நடக்கும் நடப்புக்கள் வரை கொஞ்சமுமே வெட்கமின்றி, அடுத்தவர் கேட்குமாறு கைபேசியில் பேசியவாறே பயணிப்பது தமிழனின் தனிச்சிறப்புகளில் ஒன்று.

எங்கு வரிசையாக நின்று வேலையைச் செய்ய வேண்டுமோ அங்கெல்லாம் வரிசை தாண்டி, முன் நிற்பவரிடம் ‘உதவி’ கேட்டு விரைவில் வேலையை முடிக்க எண்ணும் தமிழனின் குணம் மிகப் பிரசித்தமானது. அது கோவிலானாலும் சரி, இரயில் நிலையமானாலும் சரி! பொழுது போக்க நினைத்துச் செல்லும் திரையரங்கினுள் அனுமதிச்சீட்டு வாங்க நிற்கும் வரிசையில் கூட நிற்காமல் அவசர அவசரமாக முன்னே செல்லும் முயற்சி. அத்தியாவசியப் பொருட்கள் வாங்கும் கடை வரிசையிலிருந்து, பேருந்து நிறுத்தத்தில் வரிசையில் நின்று ஏறுவது வரை எந்த ஒரு ஒழுங்கான செயலையும் செய்வதில்லை என்பது தமிழனின் தனிப்பெரும் குணம்.

வேகம் விவேகமல்ல என்பது மிகப் பழையமொழி. அதைத் தமிழன் மதிப்பதேயில்லை. வேகமே விவேகம் என்பது அவன் எண்ணம். சாலையில் செல்கையில் அதை நாம் பார்க்கலாம். உணரலாம். ஏனெனில் பெரும்பாலும் நாமே அதைத் தான் செய்துகொண்டிருப்போம். சிவப்பு வண்ணம் பச்சையாக மாறுமுன்னே மிக விரைவாகக் கிளம்புவான். அடுத்த பக்கத்திலிருந்து வரும் வாகனம் பற்றி கவலை கொள்ளவே மாட்டான். அதே போல் அவன் பயணிக்கும் சாலையில் பச்சை சிவப்பாக மாறப்போகிறதென்றால் அவன் வாகனத்தின் வேகம் இரண்டு மடங்காகி சாலையிலேயே பறக்க ஆரம்பிக்கும். அதுவும் பின்னால் பெண்களுடன் இரண்டு சக்கர வாகனத்தில் பயணிக்கும் போதோ அல்லது பக்கத்தில் ஒரு பெண்ணுடன் நாற்சக்கர வாகனத்தில் பயணிக்கும் போதோ தமிழ் இளைஞர்கள் தாங்கள் மட்டுமே சாலையில் செல்வதாகக் கனவு காண ஆரம்பித்துவிடுவார்கள். கண்களால் காணச்சகியாத அளவுக்கு காட்சிகள் வேறு சாலையிலேயே அரங்கேறும்.

இளைஞர்களை விட்டுவிடுவோம். புதிய விஷயங்கள் அறிய எண்ணும் பருவம். அவர்களின் பெற்றோர்கள் இருக்கிறார்களே அவர்களைப் பற்றித் தனியாகச் சொல்ல வேண்டும். தன் குழந்தை தாய் மொழியில் பேசிவிடக்கூடாது என்பதில் தமிழ்நாட்டுப் பெற்றோரை விடவும் அதிகமாகச் சிந்திக்கும் குணம் கொண்டோர் எந்த நாட்டிலும் இருக்க மாட்டார்கள். கல்விக் கட்டணம் அதிகம் எனக் கூப்பாடு போட்டுவிட்டு, கல்லூரிப் பேருந்து கட்டணம் என்ற பெயரில் பகல் கொள்ளை எனப் புலம்பிவிட்டு, நன்கொடை என்ற பெயரில் வருட சம்பளத்தையே கேட்கிறார்கள் என நீதிமன்றத்தில் புகாரும் கொடுத்துவிட்டு ஆங்கிலவழிக்கல்வி போதிக்கும் தனியார் பள்ளியில் மட்டுமே சேர்ப்பேன் என ஒற்றைக்காலில் தவமிருப்பதுபோல் கால் கடுக்க காத்து நின்று பிள்ளைகளைச் சேர்க்கும் அதிசய குணம் கொண்டவர்கள் தமிழ் நாட்டுப் பெற்றோர்கள். டாடீ..... மம்மீ.. எனக் குழந்தைகள் அவர்களைக் கூப்பிட்டால்தான் பிறந்ததின் பயன் அடைவோம் என்ற அசைக்க முடியாத நம்பிக்கை கொண்டவர்கள். தமிழ் வழிக் கல்வி போதிக்கும் அரசுப்பள்ளிகள் ஏழைகளுக்கு மட்டுமே என்பதும் அவர்களில் பலருக்கும் எண்ணம். பின் என்ன? தமிழக அரசுப் பணியில் இருப்போரே தன் பிள்ளைகளை அரசுப் பள்ளியில் சேர்க்க முன்வராத போது தமிழ் நாட்டின் பொதுமக்கள் மட்டும் என்ன ஏமாறும் குணம் கொண்டவர்களா??

பொழுதைப் போக்க திரையரங்குக்குச் செல்கையில் கூட, நான்கு மணிக்கு ஆரம்பிக்கும் காட்சிக்கு பதினைந்து நிமிடம் தாமதமாகச் சென்று இருளில் உட்கார்ந்திருப்போரின் கால்களை மிதித்து செல்வது மட்டுமின்றி, அதற்காக மன்னிப்பும் கேட்காமல் அப்படியே செல்லும் உயரிய குணம் படைத்தவன் தமிழன். உட்கார்ந்தவுடன் பக்கத்திலிருப்போரிடம் படம் போட்டு நிறைய நேரம் ஆயிற்றா எனவும் விசாரித்து நேரத்துக்கு வந்து படம் பார்ப்பவரையும் தொந்தரவு செய்வான்.

திருமண மண்டபத்தில் அனைவரும் அமர்ந்திருக்கையில் மணமக்களை யாருமே பார்க்க முடியாத வகையில் நடுவில் நின்று புகைப்படம் எடுக்க வழி செய்து கொடுப்பதும், அதையும் பொறுமையாகச் சகித்துக்கொண்டு மணமக்களை வாழ்த்தும் குணம் கொண்டவன் தமிழன்.

வீட்டுக் குப்பையாயினும் சரி, தெருவில் போகையில் அவனே போடும் குப்பையாயினும் சரி, அது நடுத்தெருவில் சென்று விழுமாறு பார்த்துக்கொள்வது தமிழனின் குணங்களில் தனிச்சிறப்பு வாய்ந்தது. அதை விட சிறப்பான குணமொன்று உண்டு. யாருமே சரியாக இல்லை என அங்கலாய்க்கும் குணம். தான் செய்யும் தவறுகளெல்லாம் தவறுகளே இல்லையெனவும், பிறரின் சிறு தவறும் இமாலயத்தவறு என்றும் எண்ணும் அருமையான குணம் கொண்டவன்.

குடி குடியைக்கெடுக்கும் எனத் தெரிந்தாலும், தான் அழிந்தாலும் பரவாயில்லை, தான் கொடுக்கும் பணத்தால் தமிழ் நாட்டு அரசாங்கம் நன்றாக இருந்தால் போதும் என்ற தியாக குணம் கொண்ட தமிழனின் நல்லெண்ணம் போற்றுதற்குரியது.

தன்னை ஆள்பவரைத் தேர்ந்தெடுக்கும் போது கூட ஆட்சி செய்ய அனுபவம் தேவையா எனச் சிந்திக்காமல் அவரின் பின்புலம் நோக்காமல், திரையில் தோன்றி தன்னை மகிழ்வித்தவர்களையும், வசனம் பேசியே தன்னை வஞ்சனை செய்வோரையும் மனப்பூர்வமாக நம்பி ஓட்டுப்போடும் அரிய குணம் கொண்டவன் தமிழன். உலகெங்கிலும் தேடினாலும் எங்குமே காண முடியாத அரசியல் சரித்திரம் படைத்தவன். நாடகத்திலும் திரைப்படங்களிலும் நடித்தவர்களுக்கு மட்டுமே மக்கள் முன் நிஜமாக நடிக்கத் தெரியாது என நம்பி பலப்பல வருடங்களாக ஓட்டுப்போட்டு வரும் ஒரு கூட்டம் - தமிழர்கள்! தூய தமிழில் சிலேடையாகப் பேசிவிட்டால் அவன் வல்லவன். தான் படிக்காத புத்தகங்களிலிருந்து மேற்கோள்கள் காட்டிவிட்டால் அவன் நல்லவன். உலகத் தலைவர்களின் பேரையெல்லாம் சொல்லி, மூச்சு விடாமல் மூன்று மணி நேரம் பேசி விட்டால் அவன்தான் உண்மையான அரசியல்வாதி என நம்பும் பேதைக்குணம் படைத்தவன் தமிழன்.

தன் வாழ்வின் ஒவ்வொரு நிமிடத்தையும், ஏன்.. ஒவ்வொரு நொடியையும் தன் தனித்துவமான குணங்களினால் செதுக்கி தானொரு தனிப்பிறவியாய்த் இத்தரணியிலே திகழ்ந்து கொண்டிருக்கிறான் தமிழன்!!

மறதி - ஒரு பக்கக் கதை !

2011-12-25T15:00:00.000+05:30

(1991ல் குமுதம் நடத்திய ஒரு பக்கச் சிறுகதைப் போட்டிக்கு அனுப்ப நினைத்து எழுதி, பின் சில காரணங்களால் அனுப்பாமல் விட்டுவிட்ட கதைகளில் ஒன்று) ------------------------------------------------------------------------------------------------------------------------------------------------------------------ வணக்கம். என் பேரு ........வேணாங்க. இப்ப எனக்கு பெயரில்லை. வெறும் நம்பர்தான். 153.ஜெயில்ல கைதிகளுக்கு நம்பர்தானே கொடுக்கறாங்க?!

நான் ஏன் ஜெயிலுக்குள்ள இருக்கேன்னு கேக்குறீங்களா? சொல்றேன். அதுக்குத்தானே உங்களைக் கூப்பிட்டு வணக்கமே சொன்னேன். நான் இங்கே வரக் காரணம் என்னோட மறதிதான்னு சொன்னா நம்புவீங்களா? ஆனா, அதுதான் உண்மை சார்..

ஊர்ல இருக்கிற பல வியாபார காந்தங்கள்ல..அதான் சார், ‘பிசினஸ் மேக்னெட்’கள்ல நானும் ஒருத்தனா இருந்தேன். என் வியாபாரத்துல பார்ட்னரா இருந்தான் ராம்குமார். அவனும் நானும் ஸ்கூலேர்ந்தே பிரண்ட்ஸ். அவனால தான் எல்லா பிரச்சினையுமே.

நமக்குத்தான் மறதின்னு ஒரு வியாதி இருக்கேன்னு அவனை நம்பி நிறைய ‘பவர்’ கொடுத்து வெச்சிருந்தேன். அவன் கேட்ட பேப்பரிலும் செக்கிலும் கேள்வியே கேக்காம கையெழுத்துப் போட்டிட்டிருந்தேன். அவன் என்னை ஏமாத்தி பணம் நிறைய அடிச்சது தெரிய வந்தப்போ, நஷ்டம் எனக்கு மட்டும்தான். ஐபி கொடுக்கிற நிலைக்கு கொண்டுவந்துட்டான்.

அன்னிக்கு தீர்மானிச்சேன். அவனைத் தீர்த்துக்கட்டுறதுன்னு. பக்காவா ப்ளான் பண்ணினேன். செய்ய வேண்டியதை எல்லாம் எழுதி, எழுதியே செஞ்சேன். மறதியினால மாட்டிக்கக்கூடாதேன்னு ஜாக்கிரதையா இருந்தேன். அவன் தனிக்கட்டை. வழக்கமா ஞாயித்துக்கிழமை அவன் வீட்டு வேலைக்காரனை அனுப்பிச்சு விஸ்கி வாங்கிட்டு வரச் சொல்லுவான். அவனும் வாங்கிக் கொடுத்துட்டு வீட்டுக்குப் போயிடுவான். கடையில நான் அவன்கிட்ட பேச்சுக்கொடுத்து கவனத்தை திசை திருப்பிட்டு, டெக்னிக்கா மூடியைத் திறந்தது போலவே தெரியாம திறந்து பாட்டிலுக்குள்ள 4 தூக்க மாத்திரைய போட்டு மூடிட்டேன்.

அவன் வீட்டோட ஒரு சாவி ரொம்ப நாளாவே என்கிட்ட ஒண்ணு உண்டு. சாயங்காலம் அரை இருட்டுல அவன் வீட்டுக்கு போனேன். போதையோட தூக்க மயக்கத்துல ஹால் சோபால படுத்துகிட்டிருந்தான்.. நான் கொண்டு போன ஒரு பேப்பர்ல அவன் வீட்ல இருந்த டைரைட்டர்ல என் சாவுக்கு யாரும் காரணமில்லைன்னு டைப் செஞ்சு டேபிள்ல வெச்சேன்.

கையோட எடுத்துட்டுப் போன ஒரு நைலான் கயித்தை ஃபேனில் மாட்டி அவனை துக்கில் தொங்கவிட்டு துடிச்சு சாகிறதை ரசிச்சு பார்த்தேன். ஆடோமேடிக் லாக் ஸிஸ்டம் வெச்ச கதவை உள் பக்கமா பூட்டின மாதிரி சாத்திட்டு யாரும் பார்க்காத நேரமா வெளிய வந்து வீட்டுக்கு வந்துட்டேன்.

காலையில என் வீட்டுக் கதவு தட்டுற சப்தம் கேட்டு எழுந்து போய் பாத்தா இன்ஸ்பெக்டர் நிக்கிறார். ராம்குமார் செத்துட்டான்னு சொன்னார். என்னன்னு நான் அதிர்ச்சியா கேக்குற மாதிரி கேட்டேன். அதுக்கு அவரு என்னைக் கைது பண்றேன்னு சொல்லி விலங்கு மாட்டி கூட்டிட்டு போயிட்டார்.

எனக்கு ஒண்ணுமே புரியலை. எல்லாம் சரியா தானே செஞ்சேன். எப்படி மாட்டினேன்னே தெரியாம குழம்பிட்டேன். போலீஸ் ஸ்டேசன்ல போய் பார்த்ததும் தான் தெரிஞ்சது. தற்கொலை கடிதத்தை டேபிள்ல வைக்கும் போது மறந்து போய் அதுல என் கையெழுத்தைப் போட்டு வெச்சிருக்கேன்.

கோர்ட்ல நீதிபதியும் திட்டமிட்ட கொலைன்னு சொல்லி, இபிகோ........ஐயையோ.....எந்த செக்‌ஷன்??
எனக்கு மரண தண்டனையா..? ஆயுள் தண்டனையா..?? மறந்து போச்சே....!!

ஒஸ்தி - ஒரு ஒஸ்தியான காமெடி - நம்மள வெச்சுத்தான்!

2011-12-11T14:14:00.001+05:30

எல்லாமே மண்ணுதான்... செய்யுறவங்க கையிலதான் இருக்கு. மண்பாண்டம் அழகா வர்றதும், கோணலாப்போறதும். மண்ணுக்கும் தரம் இருக்கு. தண்ணிக்கும் அளவிருக்கு. எது மாறினாலும் எதிர்பார்த்தது நடக்காது.ரிச்சாவைக் மண்பாண்டம் விக்கிற பொண்ணா காட்டினதாலதானோ என்னமோ இப்படியெல்லாம் எழுத வருது. ஐயோ...ஐயோ....

திருநெல்வேலி பக்கத்துல கிராமத்துல ஒரு பொண்ணு போடற உடையா அது? அதுவும் உதடு முழுக்க சிவப்பு லிப்ஸ்டிக்கோட, எப்பவுமே சிவப்பு தாவணியா இல்லை என்ன எழவோ அதைப் போட்டுகிட்டு, முக்கியமா இடுப்புல ஒரு கொலுசை (சந்தானம் அப்படித்தான் சொல்றாரு) மாட்டிகிட்டு ஒரு நடை நடக்குறாங்க.... அடடா... டைரக்டரோட யோசனை புல்லரிக்கவைக்குது...

கடேசி வரைக்கும் நெடுவாலின்னா என்னன்னே சொல்லாம கணேஷையும் சாகடிச்சிட்டாங்க. பாத்தவங்களையும் நோகடிச்சிட்டாங்க.

படத்துல வர காமெடி சீன்களை எல்லாம் தூக்கிச் சாப்பிடற அளவுக்கு ஒரு செம காமெடிக் காட்சி இருக்கு. அதுதான் நம்ம ஜீவாவின் அண்ணன் ரமேஷை சிம்புவுக்குத் தம்பின்னு சொல்றது! ஹஹ்ஹஹ்ஹா....எழுதும் போதே கூட சிரிப்பு வருது.

வில்லன்கள் காமெடியன்கள் போல பேசுறாங்க. நெறைய சீன்கள் காமெடியன்கள் காமெடிங்கிற பேருல கோவம் உண்டக்குறாங்க. பாவம் சோனு... ஏன் தான் அவரை இப்படி பழி வாங்கியிருக்காங்களோ, தெரியல.

சிம்பு படம்னு சொல்லி தமன் ரொம்ப சந்தோஷமா வேலை செஞ்சிருக்காரு. படம் முழுசும், ஏதாவது சத்தம், இசைன்னு நெனைச்சு வாசிச்சது, கேட்டுக்கிட்டே இருக்கு. வீட்டுக்கு திரும்பி வந்த பிறகும் கேட்டுக்கிட்டே இருக்குன்னா பாருங்களேன்.

தரணி...என் நெனைப்பைப் பொய்யாக்கிட்டாரு. குருவியை விட மோசமா அவரால இனிமே படம் எடுக்கவே முடியாதுன்னு நெனைச்சேன். மிஞ்சிட்டாரு...

மறந்துட்டேன் பாத்தீங்களா... சிம்பு.... ஸ்கிரீன்ல வர எல்லாருமே அவரை ஒஸ்தியா பேசுறாங்க.. அவரும் பேசுறாரு, பேசுறாரு, பேசிகிட்டே இருக்காரு. என்னவெல்லாமோ இஸ்டைலு எல்லாம் பண்ணுறாரு. ஆனா எப்படிப்பாத்தாலும் நாலாவது வருசம் பி ஏ படிக்கிற பையன் மாதிரியே இருக்காரு. கடைசி வரைக்கும் போலீசு மாதிரியே தெரியல.

VERY NASTY ..!!

கூட்டுறவே நாட்டுயர்வு ! கூட்டுக் கொள்ளையே கூட்டணி தர்மம் !!!

2011-11-03T08:10:00.000+05:30

கூட்டுறவே நாட்டுயர்வு !

கூட்டுக்கொள்ளையே கூட்டணி தர்மம் !!!

எனக்குத் எதுவுமே தெரியாது... எல்லாமே என் (ஆ) ராசா தான்.. என்றெல்லாம் பிரமரும் மற்றவர்களும் பேசிக்கொண்டிருக்க, நான் எல்லாவற்றையும் பிரதம்ரிடம் சொல்லிவிட்டுத்தான் செய்தேன் என ஆ ராசாவும் பேசிக்கொள்வதைக் கேட்டு குழம்பிப் போன நமக்கு ஆபத்பாந்தவனாக வந்துள்ளது RTI. சமீபத்தில் கிடைத்த பிரதமர் அலுவலகக் கடிதம் பல உண்மைகளை வெளிச்சம் போட்டு காட்டியுள்ளது உங்கள் பார்வைக்கு.

அதிக கம்பெனிகளை உள்ளே கொண்டுவந்து விலை குறைத்தேன் எனக் கூறும் ஆ ராசாவின் வாதம் தவறானது

இல்லாத அலைவரிசையை பல பேருக்கு பிரித்துக்கொடுக்க நடந்த ஒரு முயற்சியை விளக்கும் எண்கள்

அதிக நிறுவனங்கள் வருகையால் அலைவரிசை வீண் ஆகும் எனச் சொல்லும் ஒரு விளக்கம்

நேர்மையாகவும் வெளிப்படையாகவும் அலைவரிசை ஒதுக்கீடு இருக்க வேண்டும் என வலியுறுத்தி.... ( நேர்மைன்னா என்ன?!)

புதிய நிறுவனங்களுக்கு, தொழில் ஆரம்பிக்கத் தேவையான அளவு அலைவரிசை ஒதுக்கீடு செய்தபின் மீதி 2ஜி அலைவரிசை ஏலம் விடப்படவேண்டும்
பிரதமர் அலுவலகம் சொன்னது

ஏற்கெனெவே கொடுத்துவிட்டார்கள் என ஒரு புலம்பல் - முதலில் வருபவர்க்கே முன்னுரிமை என்ற விதியை பணம் முதலில் கட்டுபவர்களுக்கு என மாற்றிய கதை

எனக்குத் தெரியும்... ஆனா தெரியாது !!!
WANTS PMO AT ARMS LENGTH !!!

7ஆம் அறிவு - பார்க்காதவர்கள் பாக்கியவான்கள் !

2011-10-26T18:39:00.001+05:30

எவ்வளவு நாள்தான் பாக்கிஸ்தானையே திட்டறது. அதுவுமில்லாம, எல்லா பாக்கிஸ்தான் தீவிரவாதியையும் கேப்டன் போட்டுத் தள்ளிட்டாரு. என்னடா பண்ணலாம்னு யோசிச்சா....ஆ.... பக்கத்துல சீனா....! ஓகே.. சீனாதான் வில்லன் நாடு. நம்ம கம்யூனிஸ்ட் தோழர்கள் கண்டுக்கமாட்டாங்க. கண்டுகிட்டு ஏதாச்சும் கேள்வி கேட்டா அதுவும் ஒரு விளம்பரம் தானே..?

முதல் 15 நிமிசம் படத்துக்கு நிமிசத்துக்கு ஒரு கோடி செலவழிச்சதா டைரக்டர் சொன்னதா கேள்வி. யாரு வீட்டுப் பணம்னு சரியாத் தெரியலை. கண்டிப்பா தயாரிப்பாளரோட சொந்தப் பணமா இருக்க வாய்ப்புக்கள் குறைவு. அதிகமா செலவழிச்சு எடுக்கப்பட்ட ஒரே டாக்குமெண்டரின்னு விளம்பரம் ஏன் செய்யலைன்னும் புரியலை.

ஜெனிலியா, தமன்னா இவங்களோட ‘கதாநாயகி’ கேரக்டரையெல்லாம் பார்த்து பழகிட்ட தமிழ் சினிமா ரசிகனுக்கு ஷ்ருதி மாதிரி ஒரு கதாபாத்திரம் புதுசு. என்ன மச்சான்..சூர்யா மொக்கை மாதிரி சும்மாவே சுத்திட்டிருக்காரு? இந்தப் பொண்ணுதான் எல்லாமே பேசுதுன்னு பக்கத்துல சூர்யா ரசிகர்கள்/ரசிகைகள் பேசிகிட்டாங்க. என்ன கொடுமை சார் இது?!

ஒரு தீசீஸ் கொடுத்ததை வெச்சே ஒரு விஞ்ஞான பூர்வமான விஷயம் சாத்தியம்னு நம்பி ஒரு அரசாங்கமே ஒரு பெண்ணைக் கொலை செய்ய ஒரு ஆளை அனுப்புது. ஆனா அவன் நாய்க்கு ஊசி போட்டிட்டிருக்கான். கேட்டா ஏதோ வைரஸ் பரப்புறானாம். அதனால ஒரு முப்பது லட்சம் பேராவது சாவாங்களாம். அப்போ சீனா என்ன சொன்னாலும் இந்தியா கேக்குமாம். ஒரு அருணாச்சல்பிரதேசம், நாகாலாந்து இதர சில இடங்களுக்காக சீனா இந்த லெவலுக்கெல்லாம் போக தேவையே இல்லை. இந்தியாவே வடகிழக்கு மா நிலங்கள் எல்லாத்தையும் மேப் மூலமாத்தானே நிர்வாகமே பண்ணிட்டிருக்காங்க. அவங்களே எடுத்துகிட்டாலும் இவங்க சும்மா பேசிட்டேதான் இருப்பாங்க.

ஹீரோ, ஹீரோயினுக்கெல்லாம் கொடுக்குற சம்பளத்துல ஒரு 10% கொடுத்தா நல்ல கதை, அதுக்கு திரைக்கதைன்னு எழுதினா நிஜமாவே உண்மையான வெற்றிப்படங்கள் கொடுக்கமுடியும். அடுத்தவன் போட்ட இசையையே திரும்பவும் போட்டு - டாக்ஸி..டாக்ஸி... பாட்டு அப்புறமா நாம் சின்ன வயசிலேர்ந்து பாடிட்டிருக்கிற ட்விங்கிள் ட்விங்கிள் லிட்டில் ஸ்டார்.... என்ன நடக்குது இங்கே?!

அரசியல்வாதியோட குடும்ப உறுப்பினர் தயாரிப்பாளர்னு ஆனதாலேயோ என்னவோ, விளம்பரமெல்லாம் தமிழ், தமிழன் பெருமைன்னு சினிமாவிலும் ஒரு புது ட்ரெண்டு ஆரம்பிச்சிருக்கு. படம் ஓடலைன்னா அவங்க வீட்டுத் தாத்தா மாதிரி ரசிகர்களை சோற்றால் அடித்த பிண்டங்கள் திட்டுவாரோன்னு கவலையா இருக்கு. தமிழ்மொழியை வெச்சு அரசியல் நடந்துகிட்டுருக்கு. இப்ப வியாபாரம் ஆரம்பிச்சிருக்காங்க. இது முளையிலேயே கிள்ளி எறியவேண்டிய விஷயம்.