Istorya ni Inday

Rated Kalabasa

noreply@blogger.com (Juliet) — Wed, 06 Jul 2011 06:09:00 +0000

Sayod na tang tanan nga kasagaran kung dili man gani tanan nga mga sangay sa gobyerno langayan kaayo. Ang mga empleyado magpunay lang ug pagwapa kundi pa kaha magsige ug chika. Naa ra bay uban nga hilas kaayo. Dili kamao mo-abi-abi sa mga tawo. Mao nang kasagaran sa mga tawo, mag-antus na lang sa kalangan sa sistema labi na kung naa kay iprocess, sus, pabalik-balikon pa gyud ka.

Mao ni ang sistema nga naandan na nato. Naandan na nato ug antus. :) Duna sab bayay mga lakang nga gihimo ang uban aron ma-improve ang langan nga sistema. Pero naa sab gyud mga empleyado nga gipangkublan na sa kagahi sa ulo.

Pero kining langan nga sistema dili lang nato makita sa gobyerno. Maskin sa mga private companies, daghan sab ni sila. Makalagot baya usahay labi na nagkinahanglan gyud ka. Ikaw na gani mo-offer na mo-process ug personal sa imong mga documents, dili musugot kay sila ra. Pero, asa ka, dugay pa kaayo matagad. Malihok lang ug mahinumduman o di ba kaha imong pahinumduman. Di man sab ta maka-ingon nga pwerte gyud ka busy kay gamay ra baya among company. Granting na busy sila, kami na mismo mipasalig ug lakaw sa among mga papers aron makuhaan ilang workload.

Nakasample gyud ko ani. Makumpara man gud nako ang experience nako sa akong previous company. Maskin, ingnon ta, mas daghan mi nga empleyado, nilibo, pero dali ra ang processing sa benefits. So, okay kaayo. Naggamit gyud nako on time ang benefit para sa medication.

Mao sab ni akong gi-expect sa among company karon labi na kay gamay ra mi empleyado, dili kaayo daghan ang atimanon. Pero nadiscourage gyud ko kay nangalabasa gyud ang performance sa among person-in-charge. Paghatag namo sa form paabot pa mi ug pila ka adlaw ayha pa nila gisubmit sa SSS nga unta pwede ra man mahatud dayon kung buot lang gyud. Ilang explanation, naa silay schedule kanus-a sila muadto sa SSS. Okay, follow ta sa schedule. Pero pwede ra man nga kami na lang ang magfile kay nagdali man mi. If magpaabot mi sa schedule masamot na kalangan. Sila man ang nasa position, sila gyud ang masunod. Ila sab gyud giigo nga dili sila mulapas sa 5 days nga gi-alot sa ila para i-file ang form. Haaayyy...... Wrinkles .... Form submitted to company May 31, received by SSS June 2, pag June 22 gipabalikan kay naay sayop. Lastly, June 27 na gyud namo nakuha ang approved form. Langan sa opisina + Langan sa SSS = Langan nga benefit. Kung wala gyud kay laing kwarta, nigrabe na imong sakit pinaabot para makatambal.

Hisgutan sab nato ning extension sa sickness. Ingon ang in-charge, katong gisubmit nga form before ra ang gamiton namo. Mao ra gihapon to ang papirmahan namo sa doktor. Sila man ang nakasuheto, sila ang gituman. Gi-submit namo last week Wednesday. Kay wala pa man gyud nila masubmit sa SSS, hangyo na sab mi nga kami na lang magprocess pag-Friday. Sila lang daw, kay ilang i-submit nig-Monday. Nah, kay holiday man diay sa among company nig-Monday. Resulta, Tuesday na nasubmit sa SSS. Pastilan ... Tsk ... Tsk ... Tsk ... Karon Wednesday, rejected ang application kay dapat lahi na sab na form ang gamiton dili katong gi-submit before. Hay, kapoy. Magpapirma na sab mi ani sa doktor. Another week na sab ni matanggong ang papers sa office. Nahibaw-an ni namo ang status pinaagi sa among liaison officer. Wala pa magsulti namo ang in-charge sa status ug wala pa sab muhatag namo sa form. Magpaabot na sab siguro ug matusukan ug dagum, lol! "Busy" siguro kaayo ang beauty sa among in-charge. Pwede ra man nga kami na ang modownload ug mo-print sa form ug kami na lang ang moprocess sa tanan. Duh, ngano man gyud magsalig man ta sa ubang tawo, bwahaha! Maayo lagi unta kung molihok dayon ning in-charge.

Sa gikaingon ko na, rated kalabasa ning among in-charge. Maabtik ra ni kung ang mga dagkong tawo na ang musugo niya. Hinuon, sila baya ang ga-sweldo. Natural, magkisi-kisi gyud ang ubod. Unsaon man nga ordinaryong empleyado ra man gud ta. Maag-antus na lang ta kanus-a sila ganahan molihok sa atong panginahanglan. Amen!

Sa inyong company, ingon ani ba sab ang sistema? I'm sure naa pay daghan kaluha ning among in-charge dinhe.

Asa Na ang Sakyanan sa Lapu-Lapu?

noreply@blogger.com (Juliet) — Thu, 03 Feb 2011 06:52:00 +0000

Unsa na man kining hitabua
Sakyanan sa Opon, pwerte nang nihita
Mga pasahero nag-antus ug linya
Sa bag-ong terminal nga walay kwenta

Ti-aw mo terminal lapad kaayo
Pero tua sa gawas gipalinya ang mga pasahero
Pasahero lisod kaayo ang kahimtang
Labi na sa panahon karon nga sige ug uwan

Atop sa terminal haskang lapara
Ug ang lugar hamugaway pa
Apan ambot kung para kang kinsa
Daghan pasahero sa gawas naglinya

Taas nga linya tua sa karsada
Ambot ug nganong wala sa sulod gipalinya
Kahimtang delikado daplin sa dalan
Basin unya ug sa jeep matapsingan

Labing makaluluoy ang mga bata
Duol sa sakit, labi na mabasa
Sa uwan nga daw way pagtuang
Walay gipili, bata man o tiguwang

Hinungdan daw sa kahimtang
Rerouting sa sakyanan
Pasahero halos wala nay masakyan
Ga-antus bahala ug mabasa sa uwan

Kinsay duolan sa mga yanong tawo
Aron dili na maglisod ang mga pasahero
Asa na ang sakyanan sa Lapu-Lapu
Palihug intawon, tabangi mi ninyo!

-- oo0oo --

Uban pang hulagway sa Lapu-Lapu Terminal

Tua pa sa tumoy sa terminal ang sakyanan, kami naglinya pa sa gawas.

Linya sa sulod sa terminal, kuha kilid sa terminal.JPG

Linya sa gawas sa terminal.

Hapit na mi makasulod sa terminal.

Nakasulod na gyud mi, daghan pa naglinya sa gawas.

Pasahero naglinya sa gawas, kuha gikan sa sulod sa terminal.

Duol na gyud mi sa sakyanan.

Linya sa gawas ug sa may entrance sa terminal,
nagsakay na mi ug jeep ani human sa pag-antus.

Mutuo Ba Ka Ug Dili Ingon Ato?

noreply@blogger.com (Juliet) — Mon, 25 Oct 2010 10:24:00 +0000

Dugay na sige ug sakit-sakit ang akong tulo ka mga anak. Magpuli-puli lang silang tulo. Kasagaran gyud masakit ang akong kamanghuran nga usa pa ka tuig. Maayo na lang karon, kaluoy sa Ginoo, himsog na iyang panglawas.

Pait kaayo kung naay magsakit sa pamilya. Gawas sa kahago sa mga ginikanan pag-atiman sa mga bata, dako pa gyud ug gasto sa tambal. Natingala gyud mi ngano, nga maskin kumpleto pa akong mga anak sa vitamins, dali ra man sila taptan ug sakit.

Usa nako ka kauban sa trabaho, nagsuggest nga magpalina mi sa among balay kay basin daw naa pay nagpuyo gawas namo. Kuyawan ko aning istoryaha dah pero wala man sab siguroy mawala namo kung among tumanon iyang gisulti. Namalit mi ug usa ka set nga palina sa merkado.

Niadtong sabado sa gabie, nagsugod and unang palina. Una namong gipa-asuhan ang mga kwarto sa taas dayon ninaug mi sa ubos ug gipaasuhan namo ang tibuok silong gikan sa c.r., sa luyo sa among balay ug ang katapusan ang atubangan sa balay. Amo sab gipa-asuhan ang tulo namo ka mga anak. Naa pay sobra nga palina ug amo tong gibutang sa atubangan sa balay duol sa pultahan.

Paghuman namo ug paaso, naligo na ang akong bana ug ako nagpadayon pagtan-aw ug TV. Mag-andam na unta ko ug higdaanan para sa akong gamay nga anak apan nikalit lang sa pagkusog ang tingog sa TV. Nagsige ko ug pangita sa remote control kay basin nadat-ugan sa akong duha pa ka mga anak nga nanghigda na. Pero wala maskin usa nila ang nakadat-ug sa remote ug wala pa gyud namo makit-an ang remote. Ako na lang gipislit ang (-) volume sa TV aron kini mapahinayan kay mora na gyud mi ug naa sa disco bar sa kakusog. Tuod man, nihinay ang tingog sa TV. Nagpadayon ko pagpangita sa remote pero sa paglayo nako sa TV, nikusog na sab ni pagbalik. Ako na sab giduol ang TV ug gipahinayan. Pero kung ako nang buhian ang (-) volume, mubalik na sab pagkusog, maong ako na lang gipalong ang TV. Nagpadayon ko pagpangita sa remote hangtud akong nakit-an ibabaw sa bangko ug nadat-ugan sa sudlanan sa biskwit. Kana bitaw sudlanan sa biskwit nga mora ug tupperware, rectangle ug naay gunitanan.

Medyo bug-at gyud ang sudlanan sa biskwit ug kung nadat-ugan man gani ato ang (+) volume, mukusog gyud ang TV. Maong wala na lang sab ko magtagad kung unsa gyud ang hinungdan sa pagkalit ug kusog sa TV. Ako na sab gibalik pagpasalida ang TV. Pero, sa dihang ako na unta kining pakusgan, dili na nuon mugana ang (+) volume sa remote. Maskin unsaon pa nako pagduot-duot sa volume, dili gyud motingog ang TV. Unsa man kaha ning hitaboa. Medyo nakulbaan na ko ani dah. Aron mapatingog nako ang TV, ang (+) volume na lang sa TV ang akong gipislit kay dili na man mugana ang remote.

Dako gyud kaayo ang among katingala sa nahitabo. Nangita mi sa akong bana ug unsay mga posibleng hinungdan sa pagkalit ug kusog sa TV pero wala mi mahuna-hunaan. Wala pa mi magsugod ug palina, nadat-ugan na to daan ang remote, unya ayha ra mukusog nga nahuman na mi? Sukad na sukad, kadto pa to nahitabo namo. Ingon akong bana, basin nibawos daw kung kinsa man gani ang natugaw sa among pagpalina. Hala ka, nisamot akong kahadlok. Mao pay talawan kaayo ko ug ingon ana nga mga istorya.

Unsay huna-huna nimo ani nga hitabo? Mutuo ka ba ug dili ingon ato? Tinuod ba kaha ang mga istorya sa mga katiguwangan?