జైకిసాన్

ఇది రైతు ప్రభుత్వమా... హవ్వ! - జేపీ

2012-02-21T23:33:00.000-08:00

గవర్నర్ ప్రసంగానికి ధన్యవాదాలు తెలిపే తీర్మానంపై ఈ రోజు రాష్ట్ర శాసనసభలో మాట్లాడిన లోక్ సత్తా నేత జయప్రకాష్ నారాయణ రైతాంగ సమస్యలపై ప్రభుత్వ నిర్వాకాన్ని తీవ్రంగా ఎండగట్టారు. రాష్ట్రంలో కిలో కందిపప్పు ధర రూ. 100 అయినప్పుడు గగ్గోలు పెట్టిన నాయకులు నేడు రైతుకు కిలో కందిపప్పుకు కేవలం రూ. 30 ధర వస్తోంటే నోరుమెదపడంలేదని విమర్శించారు. ఉత్పత్తులకు తగిన ధర కల్పించలేని ఈ ప్రభుత్వం వ్యవసాయ అనుకూల ప్రభుత్వంగా భావించాలా అని ప్రశ్నించారు. తన చేతకాని విధానాలతో రైతుల పరిస్థితిని దిగజార్చిన ప్రభుత్వం, వారిని నిలువునా మోసగిస్తోందని, విద్యుత్ కోతలతో అటు రైతుల్ని ఇటు పరిశ్రమల్ని ఇబ్బంది పెడుతోందంటూ జేపీ కిరణ్ సర్కారు వైఖరిని తూర్పార పట్టారు. క్షేత్ర స్థాయిలో రైతుల దుర్గతిని పట్టించుకోకుండా ప్రభుత్వం మన్ను తిన్న పాములా వ్యవహరిస్తే రైతుల బాగోగుల్ని ఎవరు పట్టించుకున్తారని నిగ్గదీశారు. ఉత్పత్తి ఖర్చులు పెరిగి రైతుల నికరాదయం తగ్గుతోందని, ఆ మేరకు గిట్టుబాటు ధరలు అందేలా చూడాల్సిన ప్రభుత్వం తనకేమీ పట్టనట్టు వ్యవహరించడం దారుణమన్నారు. ఎన్ని విమర్శలు ఎదురవుతున్నా రాష్ట్ర ప్రభుత్వం పరిస్థితి దున్న పోతుపై వాన పడ్డ చందంగానే ఉంది.

జేపీ పాదయాత్ర -ప్రభుత్వం నేర్వాల్సిన గుణపాఠం

2012-02-18T03:50:00.000-08:00

రాష్ట్రంలో ధాన్యం రైతుకు గిట్టుబాటు ధరలు దక్కడం లేదు. కేంద్రం ప్రకటించిన మద్దతు ధరలను కూడా మిల్లర్లు అందించడం లేదు. రాష్ట్ర ప్రభుత్వం కనీసం బోనస్ సైతం అందించకపోవడంతో రైతులు తీవ్రంగా నష్టపోతున్నారు. ఇటువంటి పరిస్థితుల్లో రైతులు గిట్టుబాటు ధర అందించడం ప్రభుత్వ కనీస బాధ్యత. "అమ్మ పెట్టదు అడుక్కు తిననివ్వదు" చందంగా రాష్ట్ర ప్రభుత్వం ధాన్యానికి మంచి రేటు వచ్చే ఇతర ప్రాంతాల్లో అమ్ముకునే అవకాశం ఇవ్వకుండా రైతుల్ని అడ్డుకుంటోంది. రైతులు స్వేచ్చగా ధాన్యాన్ని పొరుగు రాష్ట్రాల్లోనూ విక్రయించుకోవచ్చని కేంద్రం ఇచ్చిన ఆదేశాలను సైతం రాష్ట్ర ప్రభుత్వం ఉల్లంఘించడం సిగ్గుచేటు. దీన్ని నిరసిస్తూ లోక్ సత్తా పార్టీ అధ్యక్షుడు జయప్రకాష్ నారాయణ్ ఈ రోజు ఉదయం కర్నూల్ జిల్లా ఎమ్మిగనూరు నుంచి కర్ణాటకలోని గిల్కసూగుర్ వరకు "రైతు సత్యాగ్రహ పాదయాత్ర" చేపట్టారు. వ్యవసాయానికి అయ్యే ఖర్చు 40 నుంచి 50 శాతం పెరిగితే ప్రభుత్వాల విధానాల వల్ల రైతుకు లభించే రేటు 30 - 40 శాతానికి పడిపోయిందని ఆయన ఈ సందర్భంగా విమర్శించారు. ప్రభుత్వ నిబంధనల్ని ఉల్లంఘించి కర్ణాటకలో ధాన్యాన్ని విక్రయిస్తామని చేతనైతే దీన్ని అడ్డుకోవాలని ఆయన ఈ సందర్భంగా ప్రభుత్వానికి సవాల్ విసిరారు. చట్ట విరుద్ద ఆంక్షల్నిఉల్లంఘించడం వినా రైతులకు మరో మార్గం లేదంటున్న జేపీ, తన పాదయాత్ర ద్వారా ప్రభుత్వం కళ్ళు తెరిచి రైతులకు మేలు చేస్తే చాలంటున్నారు. జేపీ నిబంధనల్ని ఉల్లంఘించడం అటుంచి కేంద్రం ఆదేశాల్ని అమలు చేయకుండా రైతుల్ని అడ్డుకుంటున్న రాష్ట్ర ప్రభుత్వానికి ఎటువంటి శిక్ష వేయాలి..? ఈ పాలకుల్ని ఇంకా ఎందుకు ఉపేక్షించాలి..?ప్రభుత్వం జేపీ పాదయాత్ర తర్వాతైనా క్షేత్ర స్థాయిలో రైతులు పడుతున్న కష్టాలను గుర్తించి దిద్దుబాటు చర్యలు చేపట్టాలి.

జీరో బడ్జెట్ వ్యవసాయంపై సుభాష్ పాలేకర్ సదస్సులు ఆంధ్ర ప్రదేశ్ లో...

2012-02-14T21:56:00.000-08:00

సహజ వ్యవసాయ విధానాలను ఆచరిస్తూ దేశంలో ఎందరో రైతులకు స్ఫూర్తినిస్తోన్న సుభాష్ పాలేకర్ గురించి ఆంధ్ర ప్రదేశ్ రైతులకు సుపరిచితమే. ఆయన అనుసరిస్తున్న విధానాలను తెలుసుకుని ఆచరించేందుకు మన రాష్ట్రానికి చెందిన కొందరు పాలేకర్ ను ఆంధ్రప్రదేశ్ కు ఆహ్వానించి రైతులకు రెండేళ్లుగా అవగాహనా సదస్సులు నిర్వహిస్తున్నారు. ఫిబ్రవరి 18 నుంచి 22 వ తేదీ వరకు తిరుపతిలో జీరో బడ్జెట్ వ్యవసాయం పై ఈ సదస్సు నిర్వహిస్తున్నారు. తిరుపతి సదస్సు గురించి 09849059573 ఈ నెంబరులో సంప్రదించవచ్చు.
అలానే ఏప్రిల్ 1 నుంచి 5 వ తేదీ వరకు హైదరాబాద్ లో సైతం ఇటువంటి సదస్సు జరగనుంది. హైదరాబాద్ లకడికపూల్ లో ఉన్న మారుతి గార్డెన్స్ లో జరగనున్న ఈ సమావేశానికి ఆసక్తి ఉన్న రైతులు హాజరు కావచ్చు. పర్యావరణ ఉద్యమకారుడు "సేవ్" సంస్థ నిర్వాహకుడు అయిన విజయరాం హైదరాబాద్ సదస్సును నిర్వహిస్తున్నారు. మరిన్ని వివరాలకు 040 - 27654336 నెంబరులో సంప్రదించవచ్చు.

బాధ్యతల నుంచి వైదొలగటమే జలవిధానమా...?

2012-02-02T22:09:00.000-08:00

భవిష్యత్తులో ప్రతి నీటి బొట్టు వినియోగానికి లెక్కలు చెప్పాలని మంగళవారం విడుదలైన జాతీయ జలవిధానం ముసాయిదా నిర్దేశిస్తోంది. ప్రస్తుతం సేవలు సమకూరుస్తున్న రాష్ట్ర ప్రభుత్వాలు నెమ్మదిగా సేవలు నియంత్రించే సంస్థలుగా మారాలంటోంది. ఇప్పటికే తక్కువగా ఉన్న జల విద్యుత్ ధరలను పునః సమీక్షించాలంటోంది. నీటి సరఫరాలో పట్టణ, గ్రామీణ ప్రాంతాల వ్యత్యాసాన్ని తగ్గించాలన్నది ఈ ముసాయిదాలోని మరో కీలకాంశం. రాష్ట్రాల మధ్య జలవివాదాల పరిష్కారానికి పనిచేస్తున్న పలు ట్రైబ్యునళ్ళ స్థానంలో శాశ్వత ప్రాతిపదికన ఒకే ట్రైబ్యునల్ ఉండాలని ముసాయిదా ప్రతిపాదించింది. ఫెడరల్ విధానాన్ని తుంగలో తొక్కి దేశం మొత్తం ఒకే జలవిధానం అంటూ సరళీకరణ ఆర్ధిక విధానాలను మరింతగా రాష్ట్రాలపై రుద్డటమే లోగుట్టనే విమర్శలున్నాయి. కేంద్ర ప్రణాలికా సంఘం ఉచిత విద్యుత్తుపై ఆక్రోశం వెళ్ళగక్కిన నేపధ్యంలో కొత్త జలవిధానం అమలైతే రాష్ట్ర రైతులకు ఉచిత విధ్యుత్ అందే అవకాశం ఉండకపోవచ్చు. అలానే భూగర్భ జలాలకు సెస్సు వసూలు చేయాలని పేర్కొన్న దృష్ట్యా కేంద్రం ఆమ్ ఆద్మీని కాల్చుకుతినే ఏ అవకాశాన్ని వదిలిపెట్టబోదని స్పష్టమవుతోంది.

అలానే నీటిని ప్రైవేటీకరిస్తే ప్రతి చుక్క నీటిని లెక్కగట్టి ధరలు నిర్ణయించి రైతులు, ఇతర వినియోగదారుల నుంచి ముక్కుపిండి మరీ వసూలు చేసే అవకాశముంది. ఒక్కమాటలో చెప్పాలంటే నీటి పంపిణీ బాధ్యతల నుంచి ప్రభుత్వం పూర్తిగా వైదొలగనుంది. నీటిని అందించలేని ప్రభుత్వానికి అధికారంలో కొనసాగే అర్హత లేదని గతంలో సుప్రీంకోర్ట్ చేసిన వ్యాఖ్యలతోనైనా పాలకులకు జ్ఞానోదయం కాకపోవడం నేటి విషాదం. మొత్తానికి నీటిని ఆర్ధిక వస్తువుగా గుర్తించి సమర్ధ వినియోగానికి పెద్ద పీత వేయాలన్నదే ఈ జాతీయ జల విధానం అసలు లక్ష్యంగా కనిపిస్తోంది.

"శ్రీ" వరి సాగులో బీహార్ రైతుల ప్రపంచ రికార్డ్

2012-01-29T23:07:00.000-08:00

బీహార్ కు చెందిన ఐదుగురు రైతులు సాధించిన అపూర్వ విజయమిది. వీరంతా చైనాకు చెందిన ఒక రైస్ బ్రీడర్ సాధించిన ప్రపంచ రికార్డును తిరగ రాశారు. వరి సాగులో ఈ రైతులు సాధించిన విజయం వెనుక అక్కడి వ్యవసాయ అధికారుల కృషి ఎంతో ఉంది. బీహార్లోని నలంద జిల్లా కత్రిసరాయ్ బ్లాక్ లోని దార్వేష్ పురా అనే ఓ మారుమూల గ్రామం ఈ ప్రపంచ రికార్డ్ కు వేదిక కావడం విశేషం. ఈ గ్రామానికి చెందిన ఐదుగురు రైతులు " శ్రీ " సాగు పద్ధతిలో (సిస్టం ఆఫ్ రైస్ ఇంటెన్సిఫికేషన్) వరి సాగు చేసి హెక్టారుకు 224 క్వింటాళ్ళ (22 .4 టన్నులు) ధాన్యం దిగుబడిని సాధించారు. ముఖ్యంగా ఈ గ్రామానికి చెందిన యువ రైతు సుమంత్ కుమార్ ఈ రికార్డ్ ను సాధించిన రైతుగా ప్రపంచ ఖ్యాతిని అందుకున్నాడు. ఇదే గ్రామానికి చెందిన కృష్ణ కుమార్ అనే రైతు 220 క్వింటాళ్ళు., నితీష్ కుమార్ అనే రైతు 196 క్వింటాళ్ళు., రామానంద్ సింగ్ 192 క్వింటాళ్ళు., సంజయ్ కుమార్ 190 క్వింటాళ్ళ దిగుబడిని సాధించడం అపూర్వం. వీరిలో ఒకరు మాత్రం గతంలో చైనా నెలకొల్పిన రికార్డును సమం చేయగా మిగిలిన నలుగురూ దాన్ని బ్రేక్ చేశారు. చైనాకు చెందిన యాన్ లాంగ్ పింగ్ అనే రైస్ బ్రీడర్ 2004 లో DH-2525 అనే వరి వంగడాన్ని వాడి హెక్టారుకు 190 క్వింటాళ్ళ దిగుబడిని సాధించి రికార్డ్ ను నెలకొల్పాడు. ఇతన్ని చైనాలో " ఫాదర్ అఫ్ హైబ్రిడ్ రైస్ " గా పిలుస్తారు.

బీహార్ రాష్ట్ర వ్యవసాయ శాఖ డైరెక్టర్ అరవింద్ సింగ్., జిల్లా వ్యవసాయాధికారి సుధామ మహతో తదితరులు సుమంత్ అతని సహచరుల పొలాలకు వెళ్లి స్వయంగా ఈ రికార్డ్ దిగుబడికి నెలవైన పంట పొలాలను పరిశీలించి వచ్చారు. నలంద జిల్లాలో 2008 లో మొదలైన " శ్రీ " సాగు విధానం వల్ల దాదాపు 25 వేల మంది రైతులు నేడు ఈ పద్దతిలో వరి సాగు చేస్తున్నారు. తమ రైతులు సాధించిన ఈ విజయాలతో పొంగిపోయిన బీహార్ డైనమిక్ ముఖ్యమంత్రి నితీష్ కుమార్ దేశంలో రెండో హరిత విప్లవం బీహార్ నుంచే ప్రారంభమవుతుందని చెబుతున్నారు.

నిజానికి బీహార్ లో "శ్రీ " వరి సాగులో ఇంత విప్లవం రావడం వెనుక మన వ్యవసాయ విశ్వవిద్యాలయం అందించిన సహకారం కొంత ఉంది. 2003 లో ఒక రకంగా దేశంలో తొలిసారిగా మన రాష్ట్రం "శ్రీ " వరి సాగుకు శ్రీకారం చుట్టింది. 1983 లో మడగాస్కర్లో ప్రపంచంలో తొలిసారి "శ్రీ " సాగు పద్దతి మొదలయ్యాక నేడు విశ్వ వ్యాప్తమైంది. మన రాష్ట్రంలోని ఆచార్య ఎన్జీ రంగా విశ్వవిద్యాలయం ఈ పద్ధతిని పాటించాక దేశంలో ఎన్నో రాష్ట్రాలు మన నుంచి స్పూర్తిని పొందాయనే చెప్పాలి. అప్పట్లో విశ్వవిద్యాలయం విస్తరణ సంచాలకులుగా ఉన్న డాక్టర్ ఆలపాటి సత్యనారాయణ అప్పటికే శ్రీలంక లో సాగులో ఉన్న "శ్రీ" సాగు విధానాన్ని పరిశీలించి వచ్చి మన రాష్ట్రంలో ఈ పద్దతిని ప్రోత్సహించారు. వారి కృషి వల్ల " శ్రీ" సాగు అమలులో మన రాష్ట్రం ఇతర రాష్ట్రాలకు ఆదర్శంగా నిలిచింది. 2004 లో రాష్ట్రానికి చెందిన గుడివాడ నాగరత్నం నాయుడు అనే రైతు హెక్టారుకు సుమారు 17 . 25 క్వింటాళ్ళ దిగుబడిని సాధించి జాతీయ స్థాయిలో ఆదర్శ రైతుగా నిలిచారు.

అదే కాలంలో బీహార్ రాజధాని పాట్నా లో ఉన్న Directorate of rice Developement డైరెక్టర్ గా ఉన్న దివాకర్ మన విశ్వవిద్యాలయానికి వచ్చి " శ్రీ " సాగులో శిక్షణ పొంది, మెలకువలు తెలుసుకుని తన రాష్ట్రంలో ఈ పధ్ధతి వ్యాప్తికి ఎంతో కృషి చేశారు. దీని ఫలితంగా నేడు బీహార్లోని ఒక్క నలందా జిల్లాలోనే 90 శాతం మంది రైతులు "శ్రీ " పద్దతిలో వరి సాగు చేస్తున్నారు. 2005 లో సత్యనారాయణ గారు పదవీ విరమణ చేశాక " శ్రీ " సాగు వ్యాప్తి గురించి విశ్వవిద్యాలయంలో ఆశించిన మేరకు కృషి జరగలేదు. వ్యవసాయ శాఖతో సహా ఎవరూ పట్టించుకోలేదనే చెప్పాలి. ఫలితంగా మన రాష్ట్రంలో ఈ పద్దతిని పరిశీలించిన బీహార్, బంగ్లాదేశ్, అస్సాం, బెంగాల్ తదితర ప్రాంతాలకు చెందిన రైతులు " శ్రీ " సాగుతో విప్లవాత్మక మార్పులు తీసుకు వస్తే., మన రైతులు మాత్రం ఆరేళ్ళు గడిచినా "శ్రీ" వ్యాప్తికి ముందుకు సాగలేక పోయారు. సత్యనారాయణ గారు అందించిన సహకారంతో పాటు స్వయం కృషితోనే నాగరత్నం నాయుడు వరి సాగులో అధిక దిగుబడులు సాధించగలిగారు. నేడు ఆయన ఒక్కరే "శ్రీ " పద్దతిని ప్రాచుర్యంలోకి తెచ్చేందుకు దేశవ్యాప్తంగా తోటి రైతులకు సేవలందిస్తున్నారు.

సుమంత్ అనే యువ రైతు సాధించిన ఈ విజయం ఎందరికో స్ఫూర్తి నివ్వాలని కోరుకుందాం.

ఇన్నాళ్ళకు కరవు బృందం వస్తుందట!

2012-01-27T21:11:00.000-08:00

రాష్ట్రంలో తీవ్ర కరవు పరిస్థితులు ఏర్పడి రైతులు భారీగా నష్టపోయిన సంగతి తెలిసిందే. సుమారు 34 .24 లక్షల హెక్టార్లలో పంటలు దెబ్బతిన్నాయి. ఖరీఫ్ లో మొదలైన కరవు నేటికీ రబీ లోనూ కొనసాగుతుండటం రైతుల్ని తీవ్ర నిరాశకు గురిచేసింది. రైతుకు అంతకు మించిన విచారం ప్రభుత్వ సహాయ నిరాకరణ రూపంలోనూ ఎదురైంది. ఖరీఫ్ కరవు పరిస్థితులపై కేంద్రానికి నివేదించిన రాష్ట్రం తగిన సహాయాన్ని పొందటంలోనూ, స్వయంగా రైతులకు తానూ సహాయం చేయడంలోనూ విఫలమైంది. కరవు తీవ్రతను తెలుసుకునేందుకు, రైతులకు వాటిల్లిన నష్టాన్ని పరిశీలించేందుకు కేంద్ర బృందం ఫిబ్రవరి 5 న రాష్ట్రంలో పర్యటించనుంది. కరువొచ్చిన ఆర్నెల్లకు కేంద్ర బృందం ఏం చూసి రైతుకు సహాయ పడుతుందో ఏలిన వారికే తెలియాలి.

గత కొన్నేళ్లుగా రైతుకు దెబ్బ మీద దెబ్బ తగులుతున్నా కేంద్ర రాష్ట్ర ప్రభుత్వాలు ఆదుకోవడం మాని చేష్టలుడిగి చూస్తున్నాయి. కేంద్రం సైతం ఆంధ్ర ప్రదేశ్ పట్ల సవతి ప్రేమ చూపుతోంది. ఇటీవల "థానే" తుపాన్ దెబ్బ తగిలిన తమిళనాడుకు కేంద్రం తక్షణ సాయంగా రూ. 600 కోట్లు ప్రకటించింది. అటువంటి భారీ నష్టాలను ఇటీవలి కాలంలో తరచుగా చవిచూసిన ఆంధ్ర ప్రదేశ్ విషయంలో కేంద్రం దారుణంగా వ్యవహరిస్తోంది. కోరిన సాయంతో పోల్చితే ముష్టి విదిల్చినట్టు నామమాత్రపు సాయం ప్రకటిస్తున్న కేంద్రం ఆంధ్ర ప్రదేశ్ రైతుల జీవితాలతో ఆటలాడుతోంది. ఇటు రాష్ట్ర ప్రభుత్వం సైతం రైతు శ్రేయాన్ని గాలికి వదిలేసింది. రైతాంగం ఇంత తీవ్ర కరవు కష్టాల్లో ఉండగా వారిని ఆదుకునేందుకు నోరు మెదపని మన ఎంపీలను ఏం చేయాలి...? రాజకీయాలు లేదా వారి సొంత ఆస్తులు పెంచుకోవడం తప్ప వీరు ప్రజలకు చేస్తున్నదేమిటి..? వీరి నిర్లక్ష్యానికి తగిన జవాబు చెప్పేందుకు రైతులు సంసిద్ధం కావాలి. రైతులకు ఇచ్చే పరిహారంలోనూ వాటాలు పంచుకునే నీతిలేని నాయకులకు పార్టీలకు అతీతంగా రైతులు గట్టి జవాబు చెప్పాలి.

"ఉచిత" డ్రామాలొద్దు

2012-01-16T21:33:00.000-08:00

ఉత్తరప్రదేశ్ అసెంబ్లీ ఎన్నికల్లో ములాయం కూడా ఉచిత హామీలు గుప్పిస్తున్నారు. ఉచిత విద్యుత్, రుణాల మాఫీతో రైతుల్ని, చేనేత వర్గాలను బుట్టలో వేసుకోవాలని తపిస్తున్నారు. భారతీయ రైతులు ఆరుగాలం కష్టపడి సంపాదిస్తారే తప్ప రాజకీయ నాయకుల్లా తేరగా వచ్చే వాటికి ఆశపడరు. ఓట్ల కోసం అడ్డమైన గడ్డీ కరిచే నేతలు రైతుల కోసం ఉచిత వాగ్దానాలను ఇవ్వటం కంటే రైతులు ఎందుకు అప్పుల పాలవుతున్నారో తెలుసుకునే ప్రయత్నం చేయాలి. వ్యవసాయం ఎందుకు గిట్టుబాటు కావడం లేదు..? పంట పండించేందుకు అవసరమయ్యే ఉత్పాదకాల ధరలు ఏ స్థాయిలో ఉన్నాయి..? అసలవి అందుబాటులో ఉన్నాయా..? గిరాకీ సరఫరాకు తగిన రీతిలో ఉత్పత్తి వస్తోందా.. లేక ఉత్పత్తి పెరిగినప్పుడు ధరలు పతనమై రైతులు నష్టపోతున్నారా.. అటువంటి సందర్భాల్లో మద్దతు ధర ఇచ్చి ప్రభుత్వం రైతుల్ని ఏ మేరకు ఆదుకుంటోంది ..? అలానే ఉత్పత్తికి విలువ జోడించే పరిశ్రమలు ఏర్పాటు చేసి రైతులకు ఆదాయం పెంచుకునేందుకు అవకాశం ఏ మేరకు కల్పిస్తోంది..? దేశంలో కుప్పలు తెప్పలుగా వచ్చి పడుతున్న వ్యవసాయ దిగుమతుల పై సుంకాలు విధించి దేశీయ రైతులకు తగిన రక్షణలు కల్పిస్తోందా...? తద్వారా మన రైతులకు మంచి ధరలు వచ్చేలా చూస్తోందా... ? ఇక్కడ ఒక్క ములాయం గురించే కాదు ఉచిత వాగ్దానాలతో రైతుల్ని మభ్యపెట్టి అధికారంలోకి వచ్చి వారి పరిస్థితిని దిగజార్చే ప్రతి పార్టీకీ., ప్రతి నాయకునికీ ఈ విమర్శ వర్తిస్తుంది. నేతలూ గుర్తుంచుకోండి... మీ ఉచిత వాగ్దానాలతో ప్రజల్ని సోమరుల్లాగా మార్చకండి. ఆర్ధిక వ్యవస్థను నాశనం చేయకండి. మన నేతలు ముఖ్యంగా అధికారంలో ఉన్నవారు పైన పేర్కొన్న వన్నీ చేస్తే ఉచిత వాగ్దానాలు ఇచ్చి రైతుల్ని మోసగించాల్సిన అవసరం లేదు. వారి కష్టానికి ఫలితాన్నివ్వండి చాలు. రైతుకు అదే పదివేలు.

ఈటీవీ- 2 లో నేటి రాత్రి 9 గంటలకు సంక్రాంతిపై ప్రత్యేక చర్చ

2012-01-14T00:44:00.000-08:00

సమ్యక్ క్రాంతి సంక్రాంతి. సంప్రదాయాలలోని సౌందర్యాన్ని, అంతర్లీన సందేశాన్ని ., ఒక తరం నుంచి మరో తరానికి అందించే పెద్ద పండుగ సంక్రాంతి. నేటి భోగి రోజు రాత్రి 9 గంటలకు ఈటీవీ- 2 ప్రతిధ్వని కార్యక్రమంలో "సంక్రాంతి శోభ" పేరిట పండుగ విశిష్టతపై ఒక చర్చా కార్యక్రమం నిర్వహించాము. ఈ చర్చలో సాహితీవేత్త, అవధాని డాక్టర్ రాళ్ళబండి కవితా ప్రసాద్ గారు, ఆధ్యాత్మికవేత్త డాక్టర్ మైలవరపు శ్రీనివాసరావు గారు, పరిశోధకులు డాక్టర్ కావూరి రాజేష్ పటేల్ గారు, ఆధ్యాత్మికవేత్త డాక్టర్ సునీతా రామ్మోహన్ రెడ్డి గారు పాల్గొన్నారు. సంక్రాంతి గొప్పదనాన్ని తెలియజేసే సంగతులెన్నో ఈ చర్చలో చోటు చేసుకున్నాయి.

సంక్రాంతి అంటే పవిత్ర దివ్యకాంతి. హృదయానికి శాంతిని ప్రసాదించేదే సంక్రాంతి. రంగవల్లులు, గొబ్బెమ్మలు, హరిదాసులు, పాడిపంటలు, పిండి వంటలు, కొత్త దుస్తులు, బందుమిత్రులతో సంక్రాంతి సందడి గ్రామ గ్రామానా వెల్లివిరుస్తోంది. భోగిమంటలు, భోగిపళ్లు, బొమ్మల కొలువులతో నేడు భోగి కనువిందు చేస్తుంటే., రేపటి మకర సంక్రాంతి ఎల్లుండి కనుమ పండుగ సంబరాలను పతాక స్థాయికి తీసుకువెళతాయి. ఎటొచ్చీ రైతుల పండుగ నాడు అన్నదాతలే ఆనందంగా లేరు. ఈ పండుగ అందరికీ సకల శుభాలను అందించాలని కోరుకుంటూ బ్లాగు మిత్రులందరికీ సంక్రాంతి శుభాకాంక్షలు.
                                  మీ
                         అమిర్నేని హరికృష్ణ

రైతు మళ్ళీ ఓడిపోయాడు!

2012-01-11T02:23:00.000-08:00

అవును. మరోసారి ప్రకృతి చేతిలో కోస్తా రైతు చావుదెబ్బ తిన్నాడు. పట్టించుకోని పాలకులు రైతుల్ని పదే పదే దేబ్బతీస్తుంటే., ప్రకృతి సైతం అన్నదాతల సహనాన్ని పరీక్షిస్తోంది. గత కొన్నేళ్లుగా వాతావరణ పరిస్థితుల్లో పెను మార్పులు చోటు చేసుకుంటున్నాయి. కాలంగాని కాలంలో వర్షాలు కురుస్తూ రైతుల ఆశల్ని ఆవిరి చేస్తున్నాయి. పంటకు అవసరమైనప్పుడు వర్షాలు కురవటంలేదు. అవసరం లేని సమయాల్లో కుండపోతగా కురుస్తున్న వర్షాలు అపార పంట నష్టాలకు కారణమవుతున్నాయి. సాధారణంగా నవంబర్ తర్వాత తుపాన్లు రావు. కానీ సీజన్లు గతి తప్పడంతో డిసెంబర్ లోనూ జనవరి లోనూ తుపాన్లు, అల్ప పీడన ద్రొణులూ ఏర్పడుతూ పంట పూత, కాత
దశల్లో తీవ్ర నష్టం కలిగించి రైతుల్ని అప్పులపాల్జేస్తున్నాయి. ఇవన్నీ ప్రకృతి చేస్తున్న గాయాలైతే., ఆ నష్టాల నుంచి రైతుకు ఉపశమనం కల్గించాల్సిన పాలకులు పట్టించుకోకపోవడంతో అన్నదాతకు గుండెకు అంతకు మించిన గాయమవుతోంది. తాజా భారీ వర్షాలతో గుంటూరు, ప్రకాశం, కృష్ణా, నెల్లూరు ఇతర కోస్తా జిల్లాల్లో భారీ వర్షాలు కురుస్తూ రైతుల్ని కలవరపరుస్తున్నాయి. ఫలితంగా వరి, పొగాకు, మిర్చి, మినుము, పెసర, సెనగ పంటలకు అపార నష్టం వాటిల్లింది. చేలో కోసిన వరి పనలు వశాలకు తడిసి గింజలు మొలకెత్తే ప్రమాదముంది. ముఖ్యంగా గుంటూరు జిల్లా రైతులు తీవ్ర నష్టాన్ని చవి చూశారు.

ఈ సీజన్లో ఇప్పటికే ఖరీఫ్ పంటలు కోల్పోయి రైతులు అప్పుల పాలయ్యారు. రబీ పంటలు వేయగానే థానే తుపాన్ కొంత ప్రభావం చూపింది. తాజాగా కోస్తాపై నెలకొన్న ఉపరితల ఆవర్తనం కారణంగా కురుస్తున్న వర్షాలు రైతుకు కంట నీరు తెప్పిస్తున్నాయి. అకాల వర్షాలతో ఆశలు ఆవిరి చేసుకున్న రైతులు తమ దురదృష్టానికి నేడు చింతిస్తునారు. కాలం కలసి రాక ప్రభుత్వం పట్టించుకోక ఏకాకిగా మిగిలిన రైతులు, ఈసారి సంక్రాంతి పండుగను కూడా ఉత్సాహంగా చేసుకోలేని స్థితిలో ఉన్నారు. తమ లక్ష్యాల సాధన కోసం ఉద్యమాలు, సమ్మెలు చేసి ప్రభుత్వాలను అదిలించి కదిలించే వర్రితో పోల్చితే అన్నదాతలెంత అమాయకులు. ఒకవైపు చుట్టుముట్టిన కరవు, మరోచోట భారీ వర్షాలతో పంట నష్టాలు... కరవుపై కార్యాచరణ ప్రకటించని సర్కారు... రాష్ట్రంలో అసలు వ్యవసాయాన్నే పట్టించుకోని పరిస్థితులుంటే అన్నదాతలు ఒంటరిగా మిగలక ఏం చేస్తారు..?

రైతుల ఆత్మహత్యల్ని ఆపలేరా...?

2012-01-05T01:37:00.000-08:00

రాష్ట్రంలో తూర్పు గోదావరి సహా పలు జిల్లాల రైతులు గత ఖరీఫ్ లో పంట విరామం ప్రకటించి ప్రభుత్వానికి తమ నిరసన తెలియజేసినా పాలకులు ఈ విషయాన్ని తేలికగా తీసుకున్నట్టు స్పష్టమవుతోంది. గత సెప్టెంబరు 17 వ తేదీన మోహన్ కందా కమిటీ నివేదికపై చర్చలు జరిపిన ముఖ్యమంత్రి కిరణ్ కుమార్ రెడ్డి, కమిటీ సూచనల్లో చాలా వాటికి ఆమోదం తెలిపిన సంగతి తెలిసిందే. నాలుగు నెలలు పూర్తి కావస్తున్నా ఇవి అమలుకు నోచుకోకపోవడం రైతు శ్రేయం పట్ల ప్రభుత్వానికి చిత్తశుద్ధి లేదన్న సంగతిని స్పష్టం చేస్తోంది. వీటికి తోడు దాదాపు 772 కి పైగా కరవు మండలాలను ప్రకటించిన ప్రభుత్వం అందుకు తగిన కార్యాచరణను మాత్రం నేటికి ప్రకటించి అమలు చేయలేకపోయింది. వ్యవసాయ వ్యవస్థ నాశన మవుతున్నా కొద్ది రోజులు గడిస్తే రైతులే ఆ విషయం పట్టించు కోరులే అన్న దుర్మార్గపు ఆలోచనలు చేస్తున్న ప్రభుత్వం అందుకు తగిన మూల్యాన్ని చెల్లించుకుంటుంది. కనీసం తాను హామీ ఇచ్చిన వాటిని సైతం అమలు చేయకుండా పంట విరామం ప్రకటించిన రైతుల్ని ప్రభుత్వం అవమానపరుస్తోంది. తాము ఎన్ని పోరాటాలు చేసినా ప్రభుత్వం పట్టించుకొకపోవటాన్ని రైతులోకం తప్పుబడుతోంది.

వరుసగా సీజన్ల తరబడి రైతులు నష్టాల పాలవుతున్నారు., ప్రభుత్వం సహాయక చర్యలు చేపట్టడం లేదు. గత మూడు నెలల్లో రాష్ట్రంలో వందకి పైగా రైతులు ఆత్మహత్యలకు పాల్పడ్డారు. తాజాగా థానే తుపాన్ వచ్చి దక్షిణ కోస్తా జిల్లాల రైతుల ఆశల్ని దెబ్బతీసింది. ప్రతి సీజన్లో ఏదో ఒక భారీ నష్టం రైతుల ఆశల్ని ఆవిరి చేస్తుంటే ఏ ధీమాతో రైతులు మరో పంట సాగుకు వెళ్ళే అవకాశముంది..? వరుస నష్టాలు రైతుల మనో ధైర్యాన్ని దెబ్బతీస్తాయి. అప్పులు పెరిగి వ్యవసాయంపై విరక్తిని పెంచుతాయి. అవి తీర్చే మార్గం లేక ఆత్మహత్యలకు పురికొల్పుతాయి. ఆదుకోవాల్సిన ప్రభుత్వాలే పట్టించుకోకపోతే రైతులు ఎవరిని ఆశ్రయిస్తారు...? రైతుల ఆత్మహత్యలు కొనసాగుతున్నా పాలకులు దిద్దుబాటు చర్యలు చేపట్టకపోవడం దేనికి సంకేతం..? వ్యవసాయం కునారిల్లితే ఆర్ధిక ప్రగతి కుంటుపడుతుందన్న ఇంగిత జ్ఞానం కూడా లేని నేతల పాలనలో పాపం రైతుల పరిస్థితి మరింత దయనీయంగా మారుతోంది. ఇప్పటికైనా సేద్యరంగ మూలాలకు చికిత్స చేసి వ్యవసాయదారుల్ని కాపాడలేరా...? పెరుగుతున్న రైతుల ఆత్మహత్యల్ని ఆపలేరా...? రాష్ట్రంలో కొంతకాలంగా రాజకీయాలు తప్ప మరో వ్యాపకం పట్టించుకోని నేతలు తమను ఎన్నుకున్న ప్రజల గోడును ఇకనైనా పట్టించుకుంటారా అన్నదే ప్రశ్న!

రేపటి నుంచి ఒంగోలులో ప్రపంచ తెలుగు మహోత్సవం

2012-01-04T05:23:00.000-08:00

ప్రపంచ తెలుగు మహోత్సవం రేపటి నుంచి ఒంగోలులో ప్రారంభం కానుంది. ఒంగోలులోని పీ.వీ.ఆర్. పురపాలక ఉన్నత పాటశాలలో తెలుగు మహోత్సవాలు నిర్వహించనున్నారు. రాంకీ ఫౌండేషన్ ఆధ్వర్యంలో కేంద్ర సాహిత్య అకాడెమి, న్యూడిల్లీ, ఆంద్ర ప్రదేశ్ సాంస్కృతిక శాఖ సహకారంతో ఈ ఉత్సవాలను నిర్వహిస్తున్నారు. ఈమహోత్సవంలో రాష్ట్రానికి చెందిన కళారూపాలతో పాటు ఇతర రాష్ట్రాలకు చెందిన కళాకారులు సైతం పాల్గొంటున్నారు. రాంకీ ఫౌండేషన్ హెడ్ ఎంవీ రామిరెడ్డి ఈనాడు ఆఫీసుకు వచ్చి ఈ ఉత్సవాల్లో వ్యవసాయంపై ఉపన్యసించాలని కోరారు. సంక్రాంతి సందర్భంగా ప్రత్యేక కార్యక్రమాలు, ఛానల్ సమావేశాలు ఉన్నందున బిజీ గా ఉండటంవల్ల సాధ్యపడదని చెప్పి కృతఙ్ఞతలు తెలిపాను. తీవ్రమైన పని ఒత్తిడి వల్ల వెళ్ళలేకపోతున్నందుకు బాధగా ఉంది.

ఈ మహోత్సవంలో స్త్రీ చైతన్యం., వ్యవసాయం., ప్రచార ప్రసార సాధనాలు., సాంస్కృతిక ప్రదర్శనలు., సాహిత్యం., ఉపాధి కల్పనా., విదేశీ స్వదేశీ ప్రతినిధుల చర్చ., ప్రజా ప్రతినిధుల గళం., అష్టావధానం., భాష., పర్యావరణం., విద్య., చరిత్ర సంస్కృతీ., తదితర అంశాలపై చర్చలు ఉన్నాయి. రాష్ట్ర ముఖ్యమంత్రి కిరణ్ కుమార్ రెడ్డి తో పాటు పలువురు రాష్ట్ర మంత్రులు., జిల్లా ఎంపీలు, ఎమ్మెల్యేలు, జిల్లాలో పనిచేసిన కలెక్టర్లు, అన్ని రంగాల ప్రముఖులు ఈ మహోత్సవంలో పాల్గొంటున్నారు.

నూతన సంవత్సర శుభాకాంక్షలు

2011-12-31T22:43:00.000-08:00

గడచిన కాలం మనకు సంతోషాన్ని, విషాదాన్ని పంచి ఉండొచ్చు! జరిగి పోయిన వాటిని పదే పదే తలచుకుని ఇప్పటి కర్తవ్యాన్ని విస్మరించేకంటే ఇప్పటి నుంచి జరగాల్సిన, చేయాల్సిన పనుల గురించి ఆలోచించడం మంచిది. కాలం మనకోసం ఆగదు. దానిని ఎవ్వరూ నిలువరించలేరు. మారుతున్న, సాగిపోతున్న కాలంతో పాటే మనమూ ముందుకు సాగటమే మనం నిర్వర్తించాల్సిన కర్తవ్యమ్. ఈ కొత్త సంవత్సరం సరికొత్త ఆలోచనలకు వేదిక కావాలి. మనిషిగా జీవితంలో ఎదిగేందుకు., వ్యక్తిత్వాన్ని పెంపొందించుకునేందుకు., పదుగురికీ సాయపడే బుద్దిని అలవరచుకునేందుకు., చుట్టూ ఉన్న ప్రపంచానికి ప్రేమను పంచేందుకు ఈ నూతన సంవత్సరం సకల జనావళికి దోహదపడాలని., ప్రతి ఒక్కరి కలలు ఫలించి ఈ ఏడాది శుభప్రదం కావాలని కోరుకుంటూ అందరికీ నూతన సంవత్సర శుభాకాంక్షలు.

లోక్ పాల్ పై ఇంతవంచనా ..?

2011-12-29T21:19:00.000-08:00

అవినీతిపై సమర శంఖం పూరిస్తామని లోక్ పాల్ బిల్లు తెచ్చి తీరుతామని ప్రగల్భాలు పలికిన అధికార పార్టీ బొక్కబోర్లా పడింది. అవినీతి వ్యతిరేక బిల్లును నిరోదించే విషయంలో రాజకీయ పక్షాలన్నీ ఏకం కావడం వారి దుర్నీతిని తేటతెల్లం చేసింది. లోక్ సభలో హైడ్రామా మధ్య ఆమోదం పొందిన లోక్ పాల్ బిల్లును గట్టేక్కించడంలో అధికార కాంగ్రెస్ తన భాగస్వామ్యపక్షాలను ఒప్పించలేకపోయింది. రాజ్య సభలో సుదీర్ఘ చర్చ సమయంలో విపక్షాల నిలదీతతో అధికార కాంగ్రెస్ లోక్ పాల్ పై వెనకడుగు వేయటం సిగ్గుచేటు. నాలుగున్నర్ర దశాబ్దాల లోక్ పాల్ బిల్లుకు నేటికీ ఆమోదం పొందలేకపోవడం అవినీతిని తుదముట్టించడంలో నేతలకున్న చిత్తశుద్ధి ఏ పాటిదో అర్ధమవుతోంది. పార్టీలను ఒప్పించడంలో సర్కారు విఫలం కావడం వల్ల నాటకీయ పరిణామాల మధ్య లోక్ పాల్ బిల్లుకు గ్రహణం పట్టింది. అవినీతిని తుదముట్టించే బిల్లు అన్నా హజారే చెప్పినట్టు కాకుండా ఇలా ఉండాలంటూ తమ సొంత సూత్రీకరణలు చేసిన పార్టీలు ఏకంగా 187 సవరణలు ప్రతిపాదించి బిల్లును శక్తిహీనం చేశాయి. పార్టీలన్నీ అవినీతి బురదలోనే తాము పోర్లాడతామని మరోసారి రుజువు చేశాయి. ప్రజాస్వామ్యాన్ని అపహాస్యం చేశాయి. స్కాంలతోనే సహవాసం చేస్తామని నిరూపించాయి. హజారేలు ఎందరు వచ్చినా, నిజంగా ఆ గాంధీయే తిరిగి జన్మించినా నేటి రాజకీయ నేతల బుద్దిని మార్చలేం. ఏమంటారు?

తుపాన్ ముందటి ప్రశాంతత!

2011-12-29T00:05:00.000-08:00

"థానే" తుపాన్ ముంచుకొస్తోంది. ఇప్పటికే సగం చచ్చిన రైతుల్ని ఈ తుపాన్ మరింతగా నష్టపరచనుంది. తీవ్ర కరవుతో అల్లాడుతున్న ప్రకాశం, నెల్లూరు, సీమ జిల్లాల్లో పంటల్ని తుపాన్ ప్రభావితం చేయనుంది. ఇది ప్రధానంగా చెన్నైని దేబ్బతీయనున్నప్పటికీ రాష్ట్ర రైతులకు సైతం తీవ్ర నష్టం కలుగుతుంది. తుపాన్ల కాలం పూర్తయ్యాక వస్తున్న ఇటువంటి వైపరీత్యాలు రైతుల తలరాతల్ని మార్చేస్తున్నాయి. నష్ట తీవ్రతను బాగా పెంచే అవకాశం
ఉన్నదిగా భావిస్తున్న "థానే" తుపాన్ తీసుకురానున్న కష్టాల గురించి తలచుకుని రైతులు బెంబేలెత్తుతున్నారు. ఒక సీజన్ నష్టపోతే మరో సీజన్ కాపాడుతుందనుకుని రబీ పంటలు వేసుకున్న రైతుల ఆశల్ని ఈ తుపాన్ ఆవిరి చేయనుంది. సాగు వ్యయం పెరిగి, గిట్టుబాటు ధరల్లేక, వరుస నష్టాలతో రైతులు అప్పుల ఊబిలో కూరుకుపోయి ఆత్మహత్యలకు పాల్పడుతున్నారు. రాష్ట్రంలో గత వంద రోజుల్లోనే దాదాపు 163 మంది రైతులు ఆత్మహత్యలకు పాల్పడ్డారని సమాచారం. కనీసం వారికి కరవు సహాయక చర్యలు కూడా చేపట్టకుండా ప్రభుత్వం చేసిన అలక్ష్యం అందరికీ తెలిసిందే. కరవుపై నేటికీ కార్యాచరణను ప్రకటించకుండా తాత్సారం చేసిన పాలకులు కనీసం రైతుల్ని ఈ తుపాన్ నుంచయినా కాపాడాలి. తీవ్ర ఆందోళనలో ఉన్న రైతుల్ని ప్రభుత్వం బాధ్యతాయుతంగా స్పందించి ప్రభుత్వం ఆదుకుంటుందన్న భరోసా కల్పించాలి.

క్రిస్మస్ శుభాకాంక్షలు

2011-12-24T20:07:00.000-08:00

ప్రపంచానికి శాంతిమార్గం చూపిన ఆ మహానీయిని జన్మదినం విశ్వ మానవాళికి పండుగ దినం. మంచిని పెంచి, చెడును వదిలివేయాలని ప్రభోదించిన ఏసుక్రీస్తు పుట్టిన రోజును "క్రిస్మస్ పండుగ"గా జరుపుకోవడం మనందరి ఆనవాయితీ. పాపులు, దీనుల కోసం పరితపించి వాళ్ళను జీవోన్ముక్తుల్ని చేసిన లోక రక్షకుడాయన. మానవాళికి ఆ మహనీయుడు అందించిన విలువల్ని కాపాడుకోవడం, ఆచరించడమూ మనందరి బాధ్యత. ఆ పవిత్ర కర్తవ్యాన్ని గుర్తెరిగి మసలాలని కోరుకుంటూ యావత్ మానవాళికి క్రిస్మస్ శుభాకాంక్షలు.

స్వతంత్ర భారతంలో చెత్త వ్యవసాయ మంత్రి ఎవరు ?

2011-12-21T21:18:00.000-08:00

కేంద్ర వ్యవసాయ మంత్రి శరద్ పవార్ చెంప చెళ్ళుమని పించినా ఆయనకు బుద్ధి రావటం లేదు. స్వతంత్ర భారతంలో అత్యంత పనికిమాలిన వ్యవసాయ మంత్రిగా కీర్తిని సంపాదించుకున్న పవార్ రైతాంగ సమస్యల పట్ల తీవ్ర నిర్లక్ష్యాన్ని చూపుతున్నారు. ప్రభుత్వ మనుగడ కోసం కాంగ్రెస్ పవార్ తప్పిదాలను వెనకేసుకు వస్తూ పెద్ద తప్పే చేస్తోంది. పార్లమెంటులో రైతు సమస్యలపై చర్చ సందర్భంగా అటు ప్రతిపక్షాలు ఇటు కాంగ్రెస్ సభ్యులు ఆయన తీరును కడిగేసినా సిగ్గు రావటం లేదు. దేశంలో పామాయిల్ రైతులకు కిలోకు రూ. 15 సబ్సిడీ ఇవ్వమంటే కుదరదన్న మంత్రి., విదేశాల నుంచి దిగుమతి చేసుకునే వంట నూనెలపై 20 శాతం సుంకాన్ని ఎత్తివేయడాన్ని స్వయంగా కాంగ్రెస్ ఎంపీ కావూరి సాంబశివరావు ప్రశ్నించారు. నిజంగా ప్రపంచంలో ఆ మాటకొస్తే పామాయిల్ ఉత్పత్తిలో అగ్రస్థానంలో ఉన్న మలేసియా కంటే ఆయిల్ పామ్ సాగుకు మంచి భూములున్న ఆంధ్ర ప్రదేశ్లో ఈ పంట సాగుకు ఆశించిన ప్రోత్సాహాలు అందటం లేదు. దేశంలో రైతులు అన్ని రకాలుగా ఇబ్బందులు పడుతుంటే వారి సంక్షేమాన్ని విస్మరిస్తున్న పవార్ వంటి మిత్రపక్ష మంత్రుల్ని సరిచేయాల్సిన కాంగ్రెస్ తగిన మూల్యం చెల్లించుకోవాల్సి ఉంటుందని ప్రత్యేకంగా చెప్పాల్సిన పనిలేదు. సొంత రాష్ట్రంతో పాటు ఆంధ్ర ప్రదేశ్ లో రైతుల ఆత్మహత్యలు రోజురోజుకూ పెరిగిపోవడం స్వామినాథన్ సిఫార్సులను అమలు చేయలేక పోవడం వల్లనే. పవార్ ఇకనైనా బుద్ధి తెచ్చుకుని రైతాంగ శ్రేయం కోసం దృష్టి పెట్టు.

కరెంటు కష్టాలు....

2011-12-16T05:53:00.000-08:00

ఓ వైపు మంచు దుప్పట్లు రాష్ట్రాన్ని కప్పేస్తుంటే., నడి శీతాకాలంలోనే కారు చీకట్లు ప్రజల్ని కలవరపెడుతున్నాయి. రాష్ట్రంలో గ్రామం, పట్టణం అన్న తేడా లేకుండా కరెంటు కష్టాలు తీవ్రంగా ఇబ్బందులు పెడుతున్నాయి. కరవు దెబ్బతో ఇప్పటికే రాష్ట్ర రైతులు అల్లాడుతుంటే, కరెంటు సరఫరా సక్రమంగా లేక వేసిన పంటలు సైతం ఎండుముఖం పడుతుండటం వారిని ఆందోళనకు గురిచేస్తోంది. పెరిగిన విద్యుత్ డిమాండ్, సరఫరా పడిపోవడం వ్యవసాయానికి ఏడు గంటలు అందించాల్సిన పరిస్థితుల్లో గృహాలకు కోతలు తప్పడం లేదని కొందరు అధికారులు బాహాటంగానే ఆంగీకరిస్తున్నారు. వర్షాభావ పరిస్థితులతో రిజర్వాయర్ల నీటి మట్టాలు తగ్గటంతో జల విద్యుత్ 1500 మిలియన్ యూనిట్లకు పడిపోయింది. ఫలితంగా శీతాకాలం మధ్యలోనే దినసరి విద్యుత్ వాడకం 250 మిలియన్ యూనిట్లకు చేరువైంది. వేసవి సమీపించేకొద్దీ ఇది మరింత పెరుగుతుందన్న ఆందోళన విద్యుత్ శాఖను కలవరపెడుతోంది. ఈ పరిస్థితుల్లో ఇపుడు పంటలకు కరెంటు సరఫరాపై నీలినీడలు కమ్ముకుంటున్నాయి. కరవు దెబ్బతో నష్ట పోయిన రైతులు చేనుకు నీరందించే మార్గం లేక వారు తల్లడిల్లుతున్నారు. రాష్ట్రంలోని చాలా ప్రాంతాల్లో రబీ పంటలు ఎండుతుండటంతో రైతుల పరిస్థితి దయనీయంగా మారుతోంది. కాకతీయ ధర్మల్ ప్రాజెక్ట్ లో 70 రోజులుగా ఉత్పత్తి నిలిచిపోవడం జెన్ కోకు మరో దెబ్బ.

పరిస్థితి ఇంత తీవ్రంగా ఉన్నా పాపం రాష్ట్ర సర్కారు వినతుల్ని కేంద్రం పెడచెవిన పెట్టడంతో ఏం చేయాలో పాలుపోక కిరణ్ సర్కారు తలపట్టుకుంటోంది. మరో వైపు పరిశ్రమలకు చాలినంత సరఫరా లేక వారు సైతం ఇక్కట్లకు గురవుతున్నారు. సింగరేణిలో ఉత్పత్తి తగ్గిన కారణంగా ఇప్పటికే పరిశ్రమలకు 42 శాతం మేర ట్రాన్స్ కో కోత పెడుతోంది. ఈ నేపధ్యంలో కరెంటు కోతలకు స్వస్తి చెబుతామని పైకి గంభీరంగా చెబుతున్నా సమస్యను ఎలా అధిగమించాలో అర్ధం కాక సర్కారు గుంజాటన పడుతోంది. అటు రైతులు ఇటు పరిశ్రమలు మధ్యలో గృహ వినియోగదార్లు పడుతున్న అగచాట్లతో ఆంధ్ర ప్రదేశ్ తీవ్ర ఇబ్బందులు పడుతోంది. ఇప్పుడు దోమలతో మరో నెల తర్వాత వేసవిని తలపించే వాతావరణంతో ఉక్కపోతను భరించటానికి ప్రజలు సిద్దం కావాలి మరి!

రూపాయి బియ్యంలో పురుగులు ఇందుకే వస్తున్నాయ్..!

2011-12-15T20:15:00.000-08:00

ఉద్యోగుల కొరత కారణంగా నిల్వ చేసిన ఆహార ధాన్యాల నాణ్యతకు సంబంధించి తనిఖీలు చేపట్టడం లేదని భారత ఆహార సంస్థ చెబుతుండటం ఆందోళన కలిగిస్తోంది. భారత ఆహార సంస్థలో క్వాలిటీ కంట్రోల్ ఉద్యోగులు గత తొమ్మిదేళ్ళలో సుమారు వెయ్యి మంది తగ్గిపోవడంతో సాధారణ తనిఖీలు కూడా చేపట్టలేని స్థితిలో ఎఫ్.సి.ఐ ఉన్నట్టు తెలుస్తోంది. రాష్ట్ర ప్రభుత్వం, ఇతర ఏజెన్సీలు కొనుగోలు చేసి నిల్వ చేసే ఆహార ధాన్యాల విషయంలో ప్రభుత్వమే బాధ్యత వహించాల్సి ఉంటుంది. వికేంద్రీకరణ కొనుగోళ్ళ పధకం (డి.సి.పి) ప్రకారం ఆహార ధాన్యాల కొనుగోళ్ళు, జాగ్రత్తగా నిల్వ చేయడం రాష్ట్రాల బాధ్యత. ఎఫ్.సి.ఐ నుంచి నాణ్యమైన ఆహార ధాన్యాలను తీసుకుని చౌక దుకాణాల ద్వారా ప్రజలకు అందించడం కూడా రాష్ట్రాలే చూసుకోవాలి. ఎఫ్.సి.ఐ డిపోల నుంచి ఆహార ధాన్యాలు పంపిణీ కేంద్రాలకు వెళ్ళే ముందు కల్లెక్టర్లు, సివిల్ సప్లయ్ అధికారులు నాణ్యతను పరిశీలించుకోవాలి ఇప్పటికే ఎఫ్.సి.ఐ పౌరసరఫరాల శాఖను కోరింది. ప్రభుత్వం నిర్దేశించిన నాణ్యతా ప్రమాణాలను పాటించి ఆహార ధాన్యాలు కొనుగోలు చేసి వాటిని తగిన ప్రమాణాలతో నిల్వ చేయాలని గత ఆగస్టులో కేంద్ర ప్రభుత్వం రాష్ట్రాలను ఆదేశించిన నేపధ్యంలో ఆహారోత్పతుల నిల్వలో రాష్ట్రాలు మరింత జాగ్రత్తగా ఉండటం తప్పనిసరి.

ఇటీవలి కాలంలో ఆంధ్ర ప్రదేశ్ లో రూపాయికే కిలో బియ్యం పధకాన్ని ప్రవేశపెట్టడం ఆ బియ్యాన్ని అందుకున్న వారెందరికో బియ్యంలో పురుగులు కనిపించడం తెలిసిందే. ఆహార ధాన్యాల నిల్వల నాణ్యతా తనిఖీలు లోపించడం వల్లనే ఈ తరహా సమస్యలు తలెత్తి ఉంటాయని మనం ఊహించవచ్చు. ఈ తరహా నిర్లక్ష్యం వల్లనే ఆహార ధాన్యాలు ముక్కి పోతున్నాయని గత ఏడాది దేశ అత్యున్నత న్యాయస్థానం కేంద్రాన్ని పలుమార్లు మొట్టికాయలు వేసింది. ఇప్పటికైనా జాగ్రత్త పడి పేద ప్రజలకు పంపిణీ చేసే ఆహార ధాన్యాలను సక్రమంగా నిల్వ చేయడంపై ఎఫ్.సి.ఐ తో పాటు కేంద్ర, రాష్ట్రాలు బాధ్యత తీసుకోవాలి.

వ్యవ'సాయం' పెంచండి..!

2011-12-12T22:16:00.000-08:00

వ్యవసాయం పూర్తిగా చతికిలపడింది. శక్తి లేక రైతులు బాగా నీరసించారు. వారికి శక్తియుక్తులు కల్పించడం పైనే ప్రభుత్వం దృష్టి సారించాలి. దీర్ఘకాలిక ప్రణాళికలతో వచ్చే ఫలితాల గురించి ఇప్పుడు గొప్పలు చెప్పుకోవడం కంటే తక్షణం నిర్వర్తించాల్సిన కర్తవ్యం గురించి ముఖ్యమంత్రి ఒక్క మాట మాట్లాడటం లేదు. బ్యాంకర్ల సమావేశంలో రైతులు కరవుతో సతమతమవుతున్నందువల్ల వారికి విరివిగా రుణాలందించి ఆదుకోవాలని కోరారే తప్ప కరవును ఎదుర్కొనేందుకు తమ ప్రభుత్వం తీసుకుంటున్న చర్యలను వెల్లడించలేదు. వచ్చే రెండేళ్లలో వ్యవసాయం, అనుబంధ రంగాలకు సుమారు ఆరువేల కోట్లు ఖర్చు పెడతామన్న ముఖ్యమంత్రి తక్షణం తీసుకోవాల్సిన చర్యలపై దృష్టి పెడితే బాగుండేది. వ్యవసాయాన్ని ఒక పరిశ్రమగా గుర్తించి ప్రభుత్వం చేయూతనిస్తే రైతులు నిలదోక్కుకోగలుగుతారు. క్షేత్ర స్థాయిలో రైతుల వాస్తవ సమస్యలను తెలుసుకొని వాటిని చక్కదిద్దాలి. ఆత్మహత్యలకు పాల్పడుతున్న రైతులకు ఓదార్పు నిచ్చేలా ప్రభుత్వం కరవు సహాయ చర్యలు చేపట్టాలి. రైతుకు కావలసిన ఉత్పాదకాలను సకాలంలో గ్రామస్థాయిలోనే అందించాలి. దళారుల బెడద లేకుండా చేసి మంచి ధరలిస్తే అన్నదాతల పరిస్థితి మెరుగు పడుతుంది. ప్రభుత్వం ఈ మాత్రం చర్యలు చేపట్టినా రైతులకు చాలా వరకు మేలు జరుగుతుంది. కనీసం వీటిని చేయడానికైనా పాలకులు సిద్ధంగా ఉన్నారా...?

పాల ఉత్పత్తి పెంపునకు మిల్క్ మిషన్

2011-12-08T22:01:00.000-08:00

రాష్ట్రంలో త్వరలో మిల్క్ మిషన్ ఏర్పాటు చేసి పాల ఉత్పత్తిని పెంపొందించేందుకు ప్రభుత్వం కసరత్తు చేస్తోంది. రాష్ట్రంలోని 22 వేల గ్రామాల్లో తోలి విడతగా సుమారు 3766 గ్రామాల్లో స్వయం సహాయక బృందాల ద్వారా మిల్క్ మిషన్ పధకాన్ని అమలు చేయనున్నట్టు ముఖ్యమంత్రి కిరణ్ కుమార్ రెడ్డి ప్రకటించారు. రూ.5138 కోట్లు ఖర్చయ్యే ఈ పధకం కింద తొలిదశలో దాదాపు పదిహేనువేల పాల ప్రగతి కేంద్రాలను ఏర్పాటు చేయనున్నారు. మొత్తం ప్రాజెక్ట్ వ్యయంలో రూ. 491 కోట్లు రాష్ట్ర ప్రభుత్వ వాటాగా ఉంటుందని అధికారులు తెలిపారు. ప్రస్తుతం రాష్ట్రంలో నిత్యం 2 . 98 కోట్ల లీటర్ల పాలను సేకరిస్తున్నారు. దీన్ని 4 . 96 కోట్ల లీటర్లకు పెంచటం మిల్క్ మిషన్ లక్ష్యం. దీనిలో భాగంగా పాల సేకరణ, మార్కెటింగ్ కోసం తగిన ప్రణాళికలను రూపొందించాలని ముఖ్యమంత్రి అధికారుల్ని ఆదేశించారు. వీటికి తోడు ఒక్కో మండలంలో మినీ డెయిరీలు, నాలుగేసి పాల ప్రగతి కేంద్రాలు ఏర్పాటు చేసి పాల ఉత్పత్తిని పెంచేందుకు కృషి చేస్తారు. తద్వారా రాష్ట్రంలో 67 శాతం పాల ఉత్పత్తిని పెంచటం లక్ష్యంగా పెట్టుకున్నారు.

కరవుతో అల్లాడుతున్న రైతుల్ని ఆదుకునేది పాడి పరిశ్రమే. వ్యవసాయానికి పాడి పంట రెండు కళ్ళు లాంటివి. పంట నష్టపోతే పాడి రైతుల్ని ఆడుకుంటుంది. పశుపోషణ పై రైతులకు శ్రద్ధ తగ్గుతున్నందువల్లనే కరవు కాటకాలు వచ్చిన ప్రతిసారి రైతులు తట్టుకోలేకపోతున్నారు. స్థిరమైన ఆదాయాన్ని అందించే పాడిని ప్రభుత్వం ప్రోత్సహించాలి. ప్రభుత్వం పధకాలను ప్రకటిస్తోందే తప్ప వాటి అమలును పట్టించుకోవడం లేదు. ఫలితంగా మంచి పధకాలు కూడా పనికిరానివిగా మారుతున్నాయి. పశుక్రాంతి పధకమే దీనికి ఒక ఉదాహరణ. ఇప్పటికైనా పాలకులు రైతులకు పశుపోషణ పట్ల ఆసక్తి పెరిగేలా తోడ్పాటును అందించాలి. సబ్సిడీపై దాణాలను అందించి మంచి ధర ఇచ్చి రైతుల్నిప్రోత్సహించాలి. పధకాల అమలులో లోటుపాట్లను సరిద్దుకుంటే ఫలితాలు వాటంతట అవే వస్తాయి. పాలకులకు కావలసిందల్లా చిత్తశుద్ది మాత్రమే.

కౌలు రైతుకు రుణాలివ్వరా..?

2011-12-08T05:29:00.000-08:00

రాష్ట్రంలో కోటీ 35 లక్షల మంది రైతుల్లో దాదాపు 40 లక్షల మంది కౌలుదార్లు ఉన్నారు. నిజానికి వీరి సంఖ్య
మరింత ఎక్కువే. వీరంతా నోటిమాటతో పొలం కౌలుకు తీసుకుని వ్యవసాయం చేస్తున్నవారే. తమ భూములు కౌలుకు ఇచ్చినట్టు ఈ యజమానీ అంగీకరించడు. ఫలితంగా ఏ రైతుకూ బ్యాంకులు అప్పులు ఇవ్వవు. ఇన్నాళ్లుగా ఈ సమస్య కారణంగానే కౌలుదార్లకు అప్పులివ్వడానికి బ్యాంకులు ముందుకు రాలేదు. దీన్ని దృష్టిలో ఉంచుకున్న రాష్ట్ర ప్రభుత్వం ఈ ఏడాది లైసెన్స్డ్ కల్టివేటర్స్ యాక్ట్- 2011 ను తీసుకు వచ్చింది. గ్రామ సభలో కౌలు రైతుల్ని గుర్తించి వారికి గుర్తింపు కార్డుకు ఇచ్చి వారికి బ్యాంకుల ద్వారా రుణాలు ఇవ్వాల్సి ఉంటుంది. దీని ప్రకారం రాష్ట్రంలో నేటి వరకు సుమారు 5 . 85 లక్షల మంది రైతులు పేర్లు నమోదు చేయించుకోగా వారిలో దాదాపు 5 . ౭౬ లక్షల మందికి గుర్తింపు కార్డులు ఇచ్చారు. వీరందరికీ పంట రుణాలు ఇవ్వాలని ప్రభుత్వం బ్యాంకులను కోరినా అవి లక్ష్య పెట్టడంలేదు. నిన్నటిదాకా ఖరీఫ్ లో కౌలు దార్లకు మొండిచేయి చూపిన బ్యాంకులు వారు కరవు కారణంగా తీవ్రంగా నష్టపోయినా నేడు రుణాలు ఇవ్వడం లేదు. ముఖ్యంగా కౌలుదార్ల పరిస్థితి మరీ ఘోరం. నేడు రబీ లోనూ కౌలు దార్లకు పంట రుణాలు ఇవ్వకుండా బ్యాంకులు విసిగిస్తున్నాయి. ప్రభుత్వం హెచ్చరిస్తున్నా బ్యాంకులు లక్ష్య పెట్టడం లేదు. ఫలితంగా అధిక వడ్డీలకు అప్పులు తెచ్చి సేద్యం చేయాలంటే కౌలుదార్లు మరోసారి నష్టాలకు సిద్దపడక తప్పదు. అసలే కష్టాల్లో ఉన్నరైతులు, కౌలుదార్లకు విరివిగా పంట రుణాలు ఇచ్చేలా పాలకులు శ్రద్ధ చూపాలి. శాసన సభలో మీ కంటే తామే బెటరని గొంతు చించుకున్న పాలక ప్రభుత్వం ఇప్పుడు రైతు కష్టాల్లో ఉన్నాడన్న స్పృహ ఎరిగి తక్షణ కర్తవ్యాన్ని గుర్తెరగటం మంచిది. ఎన్ని చట్టాలు చేసినా వాటిని అమలు చేయించలేని తన చేతకానితనమే రైతు సమస్యలకు మూలకారణమని ప్రభుత్వం ఎప్పుడు గుర్తిస్తుందో మరి!

విషాద పర్వంలో చెరకు రైతు

2011-12-07T20:50:00.000-08:00

ఎరువులు, డీజిల్ ధరలతో పాటు బహిరంగ మార్కెట్లో అన్ని రకాల ధరలు పెరిగి ఇప్పటికే సగం చచ్చిన చెరకు రైతుల్ని అటు మిల్లులు ఇటు ప్రభుత్వం బంతాడుకుంటున్నాయి. పెట్టుబడులు రెట్టింపైన తరుణంలో రైతుకు మంచి ధర ఇవ్వాల్సిన వారు చేతులెత్తేయడం ప్రభుత్వ చేతకానితనానికి నిదర్శనం. కనీసం రాష్ట్ర ప్రభుత్వం సలహా ధర కూడా ప్రకటించకుండా గిట్టుబాటు ధర ఇవ్వాలని మిల్లులకు సలహాలిస్తోంది. రాష్ట్రంలో ప్రభుత్వం ఉండీ లేనట్టు వ్యవహరిస్తుండటం చూస్తుంటే రైతుల్ని పట్టించుకునే తీరిక ఈ సర్కారుకు లేదన్న సంగతి స్పష్టమవుతోంది. చెరకు రైతులు ఎదుర్కొంటున్న ఇబ్బందులు, అంతర్జాతీయంగా పంచదార ధరలు, ఎగుమతులు, కేంద్ర, రాష్ట్ర సర్కార్ల స్పందనల పై నేను రాసిన వ్యాసాన్ని ఈ రోజు గురువారం 'ఈనాడు' ప్రచురించింది. స్కాన్ చేసిన ఈ కాపీని మీ కోసం ఇక్కడ లింక్ చేస్తున్నాను. కృతఙ్ఞతలు.

రైతు ఖర్చుకు తగ్గ ధరల్లేవు- సి.ఏ.సి.పి

2011-11-30T02:22:00.000-08:00

రైతులకు అవుతున్న వాస్తవ సాగు ఖర్చులకు ప్రభుత్వం ప్రకటిస్తున్న ధరలకు ఏంటో వ్యత్యాసం ఉందని వ్యవసాయ ధరల నిర్ణాయక సంఘం (సి.ఏ.సి.పి) కేంద్రానికి చురకలు వేసింది. కేంద్ర విధానాల వల్ల వరి రైతులు తమకు న్యాయంగా రావాల్సిన మొత్తాన్ని కూడా దక్కించుకోలేక పోతున్నారని సి.ఏ.సి.పి అభిప్రాయపడింది. ముఖ్యంగా వరి రైతులు 16 నుంచి 25 శాతం ఆదాయం కోల్పోతున్నారని నివేదికలో పేర్కొంది. రైతులు పెడుతున్న ఖర్చులు, వారికి దక్కుతున్న ధరలపై లోతుగా అధ్యయనం చేసిన సి.ఏ.సి.పి, ఈ మేరకు ప్రభుత్వానికి కొన్ని విలువైన సూచనలు చేసింది. పలు పంటలకు ధరలను నిర్ణయించేటప్పుడు దేశంలో ఆయా ఉత్పత్తుల గిరాకి, సరఫరాల మధ్య వ్యత్యాసాన్ని గుర్తించాలని కూడా కమిషన్ సూచించింది. ఇకపై బియ్యం లెవీ 25 శాతానికి మించకుండా చూడాలని సి.ఏ.సి.పి ప్రభుత్వాన్ని కోరింది. గత ఏడాది రైతులు సాగు చేసిన వరి వంటి కొన్ని పంటల్లో వారికి లాభసాటి ధరలు దక్కలేదని తేల్చింది. నిల్వ పద్ధతులు సక్రమంగా లేకపోవడం వల్ల ఏట పదిస్తున్న ఆహార ధాన్యాలను భారీగా నష్టపోతున్నామని, ఇందుకు ఆహార ధాన్యాలను అధికంగా నిల్వ చేయవద్దని, అదనపు నిల్వలను స్వేచ్చా మార్కెట్లో విక్రయించాలని కోరింది. ఆహారధాన్యాలను టోకుగా విక్రయించేందుకు ప్రజాపంపిణీ వ్యవస్థను మరింత మెరుగు పరచాలని సూచించింది. ప్రైవేటు రిటైల్ చైన్లను ప్రోత్సహించాలని మండీ వ్యవస్థను సంస్కరించాలని కూడా సూచించింది. మొత్తంగా కేంద్ర రాష్ట్రాలు అనుసరిస్తున్న విధానాల వల్ల రైతులు తీవ్రంగా నష్టపోతున్నారని, మద్దతు ధరలు నిర్ణయించేటప్పుడు రైతుల వాస్తవ సాగు వ్యయాలను మదింపు చేసి వారికి లాభసాటిగా ఉండేలా ప్రభుత్వం తగు జాగ్రత్తలు పాటించాలని సి.ఏ.సి.పి కేంద్రాన్ని కోరింది. కళ్ళుండీ రైతు కష్టాలను చూడలేకపోతున్న పాలకులకు ఇవి కనువిప్పు కావాలి.

కరవుపై కార్యాచరణ ఏదీ?

2011-11-28T01:14:00.000-08:00

వ్యవసాయంతో బతుకు ఆట ఆడేదీ ఓడేదీ రైతే! రాష్ట్ర రైతాంగానికి ఖరీఫ్ కలసిరాని కడగండ్ల సేద్యమే అయ్యింది. మరికొన్ని కరవు మండలాలను గుర్తించి మొత్తం సంఖ్యను 772 కు పెంచేసిన ప్రభుత్వం రైతాంగాన్ని ఆదుకునేందుకు ఇప్పటిదాకా ఎటువంటి కార్యాచరణ ప్రణాళికను ప్రకటించలేదు. విత్తనాలు, ఎరువుల సరఫరాతో మొదలు పెట్టి ధాన్యం కొనుగోలు, మద్దతు ధర చెల్లింపు .. ఇలా అన్నింటా ప్రభుత్వ ప్రణాళికా రాహిత్యం రైతు బతుకును కన్నీటిమయం చేస్తోంది. ఖరీఫ్ మార్కెటింగ్ సీజన్లో 50 లక్షల టన్నుల ధాన్యం కొనుగోలు చేయాలంటే, కచ్చితంగా రాష్ట్రంలోని అన్ని ప్రాధమిక సహకార సంఘాలు, కొనుగోలు సంస్థలు పెద్ద ఎత్తున రంగంలోకి దిగాలి. రాష్ట్ర వ్యాప్తంగా 1400 కేంద్రాలు ఏర్పాటు చేసినట్టు అధికారులు నమ్మబలుకుతున్నారు. కానీ క్షేత్ర స్థాయిలో పూర్తి విరుద్దమైన పరిస్థితులు నెలకొని ఉన్నాయి. కరవు రైతుల్ని ఆదుకుని రబీ పంటలు వేసుకునేలా వారికి తోడ్పడాల్సిన పాలకులు కరవు మండలాలు ప్రకటించి నెల గడుస్తున్నా తగిన కార్యాచరణను ప్రకటించక పోవడాన్ని ఏమనాలి? రాష్ట్రంలో రైతుల్ని పట్టించుకునేవారు లేరు., అసలు వ్యవసాయానికి ఒక మంత్రే లేడు., ఇంతకీ రాష్ట్రంలో అసలు ప్రభుత్వం ఉన్నదా....?

ఆహార భద్రత బిల్లు - రాజకీయ పాచిక!

2011-11-27T21:35:00.000-08:00

రానున్న సార్వత్రిక ఎన్నికల వ్యూహ తంత్రంగా ఆహార భద్రతను కేంద్రం అడ్డం పెట్టుకోవడం లేదు కదా అన్న అనుమానం కలుగుతోంది. 2009 ఎన్నికల్లో యుపీఏను ఉపాధిహామీ ఆడుకున్నట్టుగానే, 2014లో వచ్చే సార్వత్రిక ఎన్నికల్లో ఆహార భద్రత కాపాడుతుందన్న వాదన వినిపిస్తోంది. అసలు అంతకంటే ముందు అంటే వచ్చే ఏడాది జరిగే ఉత్తరప్రదేశ్, గుజరాత్, పంజాబ్ సహా ఏడు రాష్ట్రాల ఎన్నికల్ని దృష్టిలో పెట్టుకొని ఆహార భద్రతా బిల్లుపై యూపీ సర్కారు ప్రచార ఆర్భాటం ప్రదర్శిస్తోంది. కేంద్ర విత్తమంత్రి ప్రణబ్ సారధ్యంలోని మంత్రుల సంఘం ఒప్పుకున్న ఆహార భద్రతాబిల్లు పార్లమెంటు ఆమోదం పొంది, తర్వాత స్థాయీసంఘం పరిశీలనతో చట్టంగా మారడానికి మరికొన్ని నెలలు పడుతుంది. ఇదంతా వచ్చే ఎన్నికల్ని దృష్టిలో ఉంచుకొని కావాలని చేస్తున్న జాప్యమేనన్న సందేహం కలుగుతోంది.
ఒకవేళ బాలారిష్టాలన్నీ దాటి ఇది ప్రజల ముందుకు వచ్చినా దీన్ని సక్రమంగా అమలు చేయడం అనుమానమే. ధరల నియంత్రణలో ఘోరంగా విఫలమైన యూపీఏ ప్రభుత్వం ఆహార భద్రతపైనే ఆసలు పెట్టుకున్నట్టు కనిపిస్తోంది. ఎటొచ్చీ ఆహార భద్రత చివరికి ప్రజలను పరిహసించే రాజకీయ క్రీడగానే మిగిలిపోతుందేమోనన్న భయం కలుగుతోంది.