کلام

رات دن چین ہم اے رشک قمر رکھتے ہیں

2021-12-25T01:13:00.000-05:00

رات دن چین ہم اے رشک قمر رکھتے ہیں

شام اودھ کی تو بنارس کی سحر رکھتے ہیں

بھانپ ہی لیں گے اشارہ سر محفل جو کیا

تاڑنے والے قیامت کی نظر رکھتے ہیں

اشک قابو میں نہیں راز چھپاؤں کیوں کر

دشمنی مجھ سے مرے دیدۂ تر رکھتے ہیں

کیسے بے رحم ہیں صیاد الٰہی توبہ

موسم گل میں مجھے کاٹ کے پر رکھتے ہیں

کون ہیں ہم سے سوا ناز اٹھانے والے

سامنے آئیں جو دل اور جگر رکھتے ہیں

دل تو کیا چیز ہے پتھر ہو تو پانی ہو جائے

میرے نالے ابھی اتنا تو اثر رکھتے ہیں

چار دن کے لیے دنیا میں لڑائی کیسی

وہ بھی کیا لوگ ہیں آپس میں شرر رکھتے ہیں

حال دل یار کو محفل میں سناؤں کیوں کر

مدعی کان ادھر اور ادھر رکھتے ہیں

جلوۂ یار کسی کو نظر آتا کب ہے

دیکھتے ہیں وہی اس کو جو نظر رکھتے ہیں

عاشقوں پر ہے دکھانے کو عتاب اے جوہرؔ

دل میں محبوب عنایت کی نظر رکھتے ہیں

نورجہاں کا مزارتلوک چند محروم

2021-12-25T01:11:00.000-05:00

نورجہاں کا مزار

تلوک چند محروم

دن کو بھی یہاں شب کی سیاہی کا سماں ہے

کہتے ہیں یہ آرام گہہ نورجہاں ہے

مدت ہوئی وہ شمع تہ خاک نہاں ہے

اٹھتا مگر اب تک سر مرقد سے دھواں ہے

جلووں سے عیاں جن کے ہوا طور کا عالم

تربت پہ ہے ان کے شب دیجور کا عالم

اے حسن جہاں سوز کہاں ہیں وہ شرارے

کس باغ کے گل ہو گئے کس عرش کے تارے

کیا بن گئے اب کرمک شب تاب وہ سارے

ہر شام چمکتے ہیں جو راوی کے کنارے

یا ہو گئے وہ داغ جہانگیر کے دل کے

قابل ہی تو تھے عاشق دلگیر کے دل کے!

تجھ سی ملکہ کے لیے بارہ دری ہے

غالیچہ سر فرش ہے کوئی نہ دری ہے

کیا عالم بے چارگی اے تاجوری ہے

دن کو یہیں بسرام یہیں شب بسری ہے

ایسی کسی جوگن کی بھی کٹیا نہیں ہوتی

ہوتی ہو مگر یوں سر صحرا نہیں ہوتی

تعویذ لحد ہے زبر و زیر یہ اندھیر

یہ دور زمانہ کے الٹ پھیر یہ اندھیر

آنگن میں پڑے گرد کے ہیں ڈھیر یہ اندھیر

اے گردش ایام یہ اندھیر! یہ اندھیر

ماہ فلک حسن کو یہ برج ملا ہے

اے چرخ ترے حسن نوازش کا گلا ہے

حسرت ہے ٹپکتی در و دیوار سے کیا کیا

ہوتا ہے اثر دل پہ ان آثار سے کیا کیا

نالے ہیں نکلتے دل افگار سے کیا کیا

اٹھتے ہیں شرر آہ شرر بار سے کیا

یہ عالم تنہائی یہ دریا کا کنارا

ہے تجھ سی حسینہ کے لیے ہو کا نظارا

چوپائے جو گھبراتے ہیں گرمی سے تو اکثر

آرام لیا کرتے ہیں اس روضے میں آ کر

اور شام کو بالائی سیہ خانوں سے شپر

اڑ اڑ کے لگاتے ہیں در و بام کے چکر

معمور ہے یوں محفل جاناں نہ کسی کی

آباد رہے گور غریباں نہ کسی کی

آراستہ جن کے لیے گل زار و چمن تھے

جو نازکی میں داغ دہ برگ سمن تھے

جو گل رخ و گل پیرہن و غنچہ دہن تھے

شاداب گل تر سے کہیں جن کے بدن تھے

پژمردہ وہ گل دب کے ہوئے خاک کے نیچے

خوابیدہ ہیں خار و خس و خاشاک کے نیچے

رہنے کے لیے دیدہ و دل جن کے مکاں تھے

جو پیکر ہستی کے لیے روح رواں تھے

محبوب دل خلق تھے جاں بخش جہاں تھے

تھے یوسف ثانی کہ مسیحائے زماں تھے

جو کچھ تھے کبھی تھے مگر اب کچھ بھی نہیں ہیں

ٹوٹے ہوئے پنجر سے پڑے زیر زمیں ہیں

دنیا کا یہ انجام ہے دیکھ اے دل ناداں

ہاں بھول نہ جائے تجھے یہ مدفن ویراں

باقی ہیں نہ وہ باغ نہ وہ قصر نہ ایواں

آرام کے اسباب نہ وہ عیش کے ساماں

ٹوٹا ہوا اک ساحل راوی پہ مکاں ہے

دن کو بھی جہاں شب کی سیاہی کا سماں ہے

2021-12-25T01:10:00.000-05:00

کسی کو دے کے دل کوئی نواسنج فغاں کیوں ہو

نہ ہو جب دل ہی سینے میں تو پھر منہ میں زباں کیوں ہو

وہ اپنی خو نہ چھوڑیں گے ہم اپنی وضع کیوں چھوڑیں

سبک سر بن کے کیا پوچھیں کہ ہم سے سرگراں کیوں ہو

کیا غم خوار نے رسوا لگے آگ اس محبت کو

نہ لاوے تاب جو غم کی وہ میرا رازداں کیوں ہو

وفا کیسی کہاں کا عشق جب سر پھوڑنا ٹھہرا

تو پھر اے سنگ دل تیرا ہی سنگ آستاں کیوں ہو

قفس میں مجھ سے روداد چمن کہتے نہ ڈر ہمدم

گری ہے جس پہ کل بجلی وہ میرا آشیاں کیوں ہو

یہ کہہ سکتے ہو ہم دل میں نہیں ہیں پر یہ بتلاؤ

کہ جب دل میں تمہیں تم ہو تو آنکھوں سے نہاں کیوں ہو

غلط ہے جذب دل کا شکوہ دیکھو جرم کس کا ہے

نہ کھینچو گر تم اپنے کو کشاکش درمیاں کیوں ہو

یہ فتنہ آدمی کی خانہ ویرانی کو کیا کم ہے

ہوئے تم دوست جس کے دشمن اس کا آسماں کیوں ہو

یہی ہے آزمانا تو ستانا کس کو کہتے ہیں

عدو کے ہو لیے جب تم تو میرا امتحاں کیوں ہو

کہا تم نے کہ کیوں ہو غیر کے ملنے میں رسوائی

بجا کہتے ہو سچ کہتے ہو پھر کہیو کہ ہاں کیوں ہو

نکالا چاہتا ہے کام کیا طعنوں سے تو غالبؔ

ترے بے مہر کہنے سے وہ تجھ پر مہرباں کیوں ہو

کیا عشق پائدار سے ناپائدار کا

2019-09-22T21:07:00.002-04:00

کیا عشق ایک زندگیِ مستعار کا

کیا عشق پائدار سے ناپائدار کا

وہ عشق جس کی شمع بُجھا دے اجل کی پھُونک

اُس میں مزا نہیں تپش و انتظار کا

میری بساط کیا ہے، تب و تابِ یک نفَس

شُعلے سے بے محل ہے اُلجھنا شرار کا

کر پہلے مجھ کو زندگیِ جاوداں عطا

پھر ذوق و شوق دیکھ دلِ بے قرار کا

کانٹا وہ دے کہ جس کی کھٹک لازوال ہو

یا رب، وہ درد جس کی کسک لازوال ہو

جس شہر میں بھی رہنا، اُکتائے ہوے رہنا

2017-12-27T15:06:00.000-05:00

بے چین بہت پھرنا، گھبرائے ہوئے رہنا

اک آگ سی جذبوں کی دہکائے ہوئے رہنا

اک شام سی کر رکھنا کاجل کے کرشمے سے

اک چاند سا آنکھوں میں چمکائے ہوئے رہنا

چھلکائے ہوے چلنا خوشبو لبِٰ لعلیں کی۔۔

اک باغ سا ساتھ اپنے مہکائے ہوے رہنا

اُس حسن کا شیوہ ہے جب عشق نظر آئے

پردے میں چلے جانا، شرمائےہوے رہنا

عادت ہی بنا لی ہے تم نے تو منیر اپنی

جس شہر میں بھی رہنا، اُکتائے ہوے رہنا

مُنیر نیازی

شورش ۔ ہم اہل قلم کیا ہیں؟

2016-10-08T14:40:00.004-04:00

اَلفاظ کا جھگڑا ہیں ، بے جوڑ سراپا ہیں

بجتا ہوا ڈنکا ہیں ، ہر دیگ کا چمچا ہیں

ہم اہلِ قلم کیا ہیں ؟

مشہور صحافی ہیں ، عنوانِ معافی ہیں

شاہانہ قصیدوں کے، بے ربط قوافی ہیں

ہم اہلِ قلم کیا ہیں ؟

چلتے ہوئے لَٹّو ہیں ، بے ِزین کے ٹَٹّو ہیں

اُسلوبِ نگارش کے، منہ زور نِکھٹّو ہیں

ہم اہلِ قلم کیا ہیں ؟

یہ شکل یہ صورت ہے، سینوں میں کدورت ہے

آنکھوں میں حیا کیسی؟ پیسے کی ضرورت ہے

ہم اہلِ قلم کیا ہیں ؟

اپنا ہی بَھرم لے کر، اپنا ہی قلم لے کر

کہتے ہیں …کہ لکھتے ہیں، انسان کا غم لے کر

ہم اہلِ قلم کیا ہیں ؟

تابع ہیں وزیروں کے، خادم ہیں امیروں کے

قاتل ہیں اَسیروں کے، دشمن ہیں فقیروں کے

ہم اہلِ قلم کیا ہیں ؟

اَوصاف سے عاری ہیں ، نُوری ہیں نہ ناری ہیں

طاقت کے پُجاری ہیں ، لفظوں کے مداری ہیں

ہم اہلِ قلم کیا ہیں ؟

تصویرِ زمانہ ہیں ، بے رنگ فسانہ ہیں

پیشہ ہی کچھ ایسا ہے، ہر اِک کا نشانہ ہیں

ہم اہلِ قلم کیا ہیں ؟

رَہ رَہ کے ابھرتے ہیں ، جیتے ہیں نہ مرتے ہیں

کہنے کی جو باتیں ہیں ، کہتے ہوئے ڈرتے ہیں

ہم اہلِ قلم کیا ہیں ؟

بے تیغ و سناں جائیں ، با آہ و فغاں جائیں

اس سوچ میں غلطاں ہیں ، جائیں تو کہاں جائیں ؟

ہم اہلِ قلم کیا ہیں ؟

ساغر ۔ اے دوست خدا کا نام نہ لے ایمان یہاں بھی اندھے ہیں

2016-06-09T22:09:00.002-04:00

دستور یہاں بھی گونگے ہیں ، فرمان یہاں بھی اندھے ہیں

اے دوست خدا کا نام نہ لے ، ایمان یہاں بھی اندھے ہیں

تقدیر کے کالے کمبل میں ، عظمت کے فسانے لپٹے ہیں

مضمون یہاں بھی بہرے ہیں ، عنوان یہاں بھی اندھے ہیں

زر دار توقّع رکھتا ہے ، نادار کی گاڑھی محنت پہ

مزدور یہاں بھی دیوانے ، ذیشان یہاں بھی اندھے ہیں

کچھ لوگ بھروسہ کرتے ہیں ، تسبیح کے چلتے دانوں پر

بے چین یہاں یزداں کا جنوں ، انسان یہاں بھی اندھے ہیں

بے نام جفا کی راہوں پر ، کچھ خاک سی اڑتی دیکھی ہے

حیران ہیں دلوں کے آئینے ، نادان یہاں بھی اندھے ہیں

بے رنگ شفق سی ڈھلتی ہے بے نور سویرے ہوتے ہیں

شاعر کا تصوّر بھوکا ہے ،سلطان یہاں بھی اندھے ہیں

ساغر ۔ جس عہد میں لٹ جائے فقیروں کی کمائی

2016-05-11T00:40:00.001-04:00

برگشتۂ یزداں سے کچھ بھول ہوئی ہے

بھٹکے ہوئے انساں سے کچھ بھول ہوئی ہے

تا حّد نظر شعلے ہی شعلے ہیں چمن میں

پھولوں کے نگہباں سے کچھ بھول ہوئی ہے

جس عہد میں لٹ جائے فقیروں کی کمائی

اس عہد کے سلطاں سے کچھ بھول ہوئی ہے

ہنستے ہیں مری صورت مفتوں پہ شگوفے

میرے دل ناداں سے کچھ بھول ہوئی ہے

حوروں کی طلب اور مئے و ساغر سے ہے نفرت

زاہد ، ترے عرفاں سے کچھ بھول ہوئی ہے

افتخار ۔ آسمانوں پر نظر کر انجم و مہتاب دیکھ

2016-05-11T00:33:00.003-04:00

آسمانوں پر نظر کر انجم و مہتاب دیکھ

صبح کی بنیاد رکھنی ہے تو پہلے خواب دیکھ

ہم بھی سوچیں گے دعائے بے اثر کے باب میں

اِک نظر تو بھی تضادِ منبر و محراب دیکھ

دوش پر ترکش پڑا رہنے دے، پہلے دل سنبھال

دل سنبھل جائے تو سوئے سینہٴ احباب دیکھ

موجہٴ سرکش کناروں سے چھلک جائے تو پھر

کیسی کیسی بستیاں آتی ہیں زیرِ آب دیکھ

بوند میں سارا سمندر آنکھ میں کل کائنات

ایک مشتِ خاک میں سورج کی آب وتاب دیکھ

کچھ قلندر مشربوں سے راہ و رسمِ عشق سیکھ

کچھ ہم آشفتہ مزاجوں کے ادب آداب دیکھ

شب کو خطِّ نور میں لکھّی ہوئی تعبیر پڑھ

صبح تک دیوارِ آئیندہ میں کُھلتے باب دیکھ

افتخار عارف کے تند و تیز لہجے پر نہ جا

افتخار عارف کی آنکھوں میں اُلجھتے خواب دیکھ

ساغر ۔ رُودادِ محبّت کیا کہئیے کُچھ یاد رہی کچھ بھول گئے

2016-05-11T00:27:00.001-04:00

رُودادِ محبّت کیا کہئیے کُچھ یاد رہی کچھ بھول گئے

دو دِن کی مُسرّت کیا کہئیے کُچھ یاد رہی کُچھ بھول گئے

جب جام دیا تھا ساقی نے جب دور چلا تھا محفل میں

اِک ہوش کی ساعت کیا کہئیے کُچھ یاد رہی کُچھ بھول گیے

اب وقت کے نازک ہونٹوں پر مجروح ترنّم رقصاں ہے

بیدادِ مشیّت کیا کہئیے کُچھ یاد رہی کُچھ بُھول گئے

احساس کے میخانے میں کہاں اَب فکر و نظر کی قندیلیں

آلام کی شِدّت کیا کہئیے کُچھ یاد رہی کُچھ بھول گئے

کُچھ حال کے اندھے ساتھی تھے کُچھ ماضی کے عیّار سجن

احباب کی چاہت کیا کہئیے کُچھ یاد رہی کُچھ بھول گئے

کانٹوں سے بھرا ہے دامنِ دِل شبنم سے سُلگتی ہیں پلکیں

پُھولوں کی سخاوت کیا کہئیے کُچھ یاد رہی کُچھ بھول گئے

اب اپنی حقیقت بھی ساغر بے ربط کہانی لگتی ہے

دُنیا کی کی حقیقت کیا کہئیے کُچھ یاد رہی کُچھ بھول گئے

ساغر ۔ ﻣَﯿﮟ ﺗﻠﺨﺌﯽ ﺣﯿﺎﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

2016-05-11T00:24:00.003-04:00

ﻣَﯿﮟ ﺗﻠﺨﺌﯽ ﺣﯿﺎﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

ﻏﻢ ﮐﯽ ﺳﯿﺎﮦ ﺭﺍﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

ﺍﺗﻨﯽ ﺩﻗﯿﻖ ﺷﮯ ﮐﻮﺋﯽ ﮐﯿﺴﮯ ﺳﻤﺠﮫ ﺳﮑﮯ

ﯾﺰﺩﺍﮞ ﮐﮯ ﻭﺍﻗﻌﺎﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

ﭼَﮭﻠﮑﮯ ﮨﻮﺋﮯ ﺗﮭﮯ ﺟﺎﻡ، ﭘﺮﯾﺸﺎﮞ ﺗﮭﯽ ﺯُﻟﻒِ ﯾﺎﺭ

ﮐﭽﮫ ﺍﯾﺴﮯ ﺣﺎﺩﺛﺎﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

ﻣَﯿﮟ ﺁﺩﻣﯽ ﮨُﻮﮞ ﮐﻮﺋﯽ ﻓﺮﺷﺘﮧ ﻧﮩﯿﮟ ﺣﻀﻮﺭ

ﻣﯿﮟ ﺁﺝ ﺍﭘﻨﯽ ﺫﺍﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

ﺩﻧﯿﺎﺋﮯ ﺣﺎﺩﺛﺎﺕ ﮨﮯ ﺍﮎ ﺩﺭﺩ ﻧﺎﮎ ﮔﯿﺖ

ﺩﻧﯿﺎﺋﮯ ﺣﺎﺩﺛﺎﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

ﮐﺎﻧﭩﮯ ﺗﻮ ﺧﯿﺮ ﮐﺎﻧﭩﮯ ﮨﯿﮟ ﺍِﻥ ﺳﮯ ﮔِﻠﮧ ﮨﯽ ﮐﯿﺎ

ﭘُﮭﻮﻟﻮﮞ ﮐﯽ ﻭﺍﺭﺩﺍﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

ﺳﺎﻏﺮ ﻭﮦ ﮐﮩﮧ ﺭﮨﮯ ﺗﮭﮯ ﮐﮧ ﭘﯽ ﻟﯿﺠﺌﮯ ﺣُﻀﻮﺭ

ﺍﻥ ﮐﯽ ﮔﺰﺍﺭﺷﺎﺕ ﺳﮯ ﮔﮭﺒﺮﺍ ﮐﮯ ﭘﯽ ﮔﯿﺎ

ساغر ۔ چراغِ طور جلاؤ ، بڑا اندھیرا ہے

2016-05-11T00:22:00.002-04:00

چراغِ طور جلاؤ ، بڑا اندھیرا ہے

ذرا نقاب اٹھاؤ ، بڑا اندھیرا ہے

ابھی تو صبح کے ماتھے کا رنگ کالا ہے

ابھی فریب نہ کھاؤ ، بڑا اندھیرا ہے

وہ جن کے ہوتے ہیں خورشید آستینوں میں

انہیں کہیں سے بلاؤ ، بڑا اندھیرا ہے

بصیرتوں پہ اجالوں کا خوف طاری

مجھے یقین دلاؤ ، بڑا اندھیرا ہے

بنامِ زہرہ جبینانِ خطۂ فردوس

کسی کرن کو جگاؤ ، بڑا اندھیرا ہے

ساحر ۔ دیکھا ہے زندگی کو کُچھ اتنے قریب سے

2016-05-11T00:11:00.001-04:00

دیکھا ہے زندگی کو کُچھ اتنے قریب سے

چہرے تمام لگنے لگے ہیں عجیب سے

شورش أ فغاں رُک گئی ہے نوا تھک چُکی ہے

2015-11-29T20:43:00.006-05:00

فغاں رُک گئی ہے نوا تھک چُکی ہے

حضُورِ خدا ہر دعا تھک چُکی ہے

کئی زمزمے جاگ کر سو چُکے ہیں

کئی جنگلوں میں ہوا تھک چُکی ہے

نواہائے معنی کی ٓہٹ ہے مدھم

عُروسِ ادب کی حیا تھک چُکی ہے

اُدھر شُعلئہ حُسن کجلا گیا ہے

اِدھرچل کےشب بھرصباتھک چُکی ہے

نئے دور کی اُلجھنیں کہہ رہی ہیں

کہ اب رُوحِ ارض و سما تھک چُکی ہے

لہک سو گئی ہے مہک سو گئی ہے

چمن لُٹ گئے ہیں صبا تھک چُکی ہے

ادھر قافلے راستے کھو چُکے ہیں

اِدھر ہمتِ رہنما تھک چُکی ہے

فرحت شیریں ۔کوئی لکھتا ہے ہمیں اور کوئی پڑھتا ہے

2015-09-05T16:57:00.003-04:00

لفظ۔۔

ہم سبھی شہرِ تماثیل کے کردار سہی

کوئی لکھتا ہے ہمیں اور کوئی پڑھتا ہے

ہم سبھی لفظوں کی ڈوری سے بندھے پُتلے ہیں

نام دشنام، خبر، ناوکِ مِژگاں ہیں لفظ

شور،ہنگام، اثر، روحِ زمستاں ہیں لفظ

خود کلامی کہیں مدفون ہے سناٹوں میں

لفظ کھو جانے کے ہر وہم سے ڈر جاتے ہیں

اپنی تنہائی کے آئینوں سے گھبراتے ہیں

کبھی نیندوں سے جڑے خواب ہیں لفظ

آرزو بن کے کسی دستِ حنائی کے لئے

کوئی اظہار شبِ عہدِِ عروس

جن سےبستر پہ بچھے موتيے کی خوشبو میں

مہک اٹھتا ہے کسی بندِ قبا کا ریشم

کوئی خود مست صدا نغمہ سرا ہوتی ہے

زندگی کرب کے محور سے جدا ہوتی ہے

لفظ آوارہ بھی

سرگشتہ و جاں سوختہ بھی

خوشنما چہروں پہ لکھی ہوئی تحریر بھی ہیں

خوش نگاہی سے دِکھےخوابوں کی تعبیر بھی ہیں

اور کہیں لفظ کہ رقصاں ہیں کسی وحشت میں

خون ٹپکاتے ہوئے

آگ برساتے ہوئے

طعنہ زن، موت کی زردی میں گُھلے لفظ کہ جو

دشتِ عبرت میں بنیں زہر سے ژولیدہ الاپ

لفظ در لفظ ، معانی کا طلسم

کہنے والے کو کہاں علم کہ کل لفظوں سے

وقت افسانہ لکھے گا یاکوئی مرثیہ

یا کسی نظم کو عنوان میسر ہو گا

کوئی لکھتا ہے ہمیں اور کوئی پڑھتا ہے۔۔

ساحر ۔ ظلم پھر ظلم ہے، بڑھتا ہے تو مٹ جاتا ہے

2015-08-01T16:17:00.003-04:00

ظلم پھر ظلم ہے، بڑھتا ہے تو مٹ جاتا ہے
خون پھر خون ہے، ٹپکے گا تو جم جائے گا

خاک صحرا پہ جمے یا کف قاتل پہ جمے
فرقِ انصاف پہ یا پائے سلاسل پہ جمے
تیغ بیداد پہ، یا لاشۂ بسمل پہ جمے
خون پھر خون ہے، ٹپکے گا تو جم جائے گا

لاکھ بیٹھے کوئی چھپ چھپ کے کمیں گاہوں میں
خون خود دیتا ہے جلادوں‌کے مسکن کا سراغ
سازشیں لاکھ اوڑھاتی رہیں ظلمت کا نقاب
لے کے ہر بوند نکلتی ہے ہتھیلی پہ چراغ

تم نے جس خون کو مقتل میں دبانا چاہا
آج وہ کوچہ و بازار میں آنکلا ہے
کہیں شعلہ، کہیں نعرہ، کہیں پتھر بن کر
خون چلتا ہے تو رکتا نہیں سنگینوں‌سے
سر اٹھاتا ہے تو دبتا نہیں آئینوں‌ سے

ظلم کی بات ہی کیا، ظلم کی اوقات ہی کیا
ظلم بس ظلم ہے آغاز سے انجام تلک
خون پھر خون ہے، سو شکل بدل سکتا ہے
ایسی شکلیں کہ مٹاؤ تو مٹائے نہ بنے
ایسے شعلے کہ بجھاؤ تو بجھائے نہ بنے
ایسے نعرے کہ دباؤ تو دبائے نہ بنے

ظلم کی قسمتِ ناکارہ و رسواسے کہو
جبر کی حکمتِ پرکارکے ایماسے کہو
محملِ مجلسِ اقوام کی لیلیٰ سے کہو
خون دیوانہ ہے ‘ دامن پہ لپک سکتا ہے
شعلہء تند ہے ‘خرمن پہ لپک سکتا ہے

ظلم پھر ظلم ہے، بڑھتا ہے تو مٹ جاتا ہے
خون پھر خون ہے، ٹپکے گا تو جم جائے گا

یہ ہے میری کہانی

2015-07-05T17:54:00.001-04:00

یہ ہے میری کہانی
خاموش زندگانی
سناٹا کہہ رہا ہے
کیوں ظلم سہہ رہا ہے
اک داستاں پرانی
تنہائی کی زبانی
ہر زخم کھل رہا ہے
کچھ مجھ سے کہہ رہا ہے
چھبتے کانٹے یادوں کے
دامن سے چنتا ہوں
گرتی دیواروں کے آنچل میں زندہ ہوں
بس یہ میری کہانی
بے نشاں نشانی
اک درد بہہ رہا ہے
کچھ مجھ سے کہہ رہا ہے
چھبتے کانٹے یادوں کے دامن سے چنتا ہوں
گرتی دیواروں کے آنچل میں زندہ ہوں
بجائے پیار کے شبنم میرے گلستاں میں
برستے رہتے ہیں ہر سمت موت کے سائے
سیاہیوں سے الجھ پڑتی ہیں میری آنکھیں
کوئی نہیں کوئی بھی نہیں جو بتلائے
میں کتنی دیر اجالوں کی راہ دیکھوں گا
کوئی نہیں ہے کوئی بھی نہیں نہ پاس نہ دور
اک پیار ہے دل کی دھڑکن
اپنی چاہت کا جو اعلان کیے جاتی ہے
زندگی ہے جو جیے جاتی ہے
خون کے گھونٹ پیے جاتی ہے
خواب آنکھوں سے سیے جاتی ہے
اب نہ کوئی پاس ہے
پھر بھی احساس ہے
راہیوں میں الجھی پڑی
جینے کی اک آس ہے
یادوں کا جنگل یہ دل
کانٹوں سے جل تھل یہ دل
چھبتے کانٹوں یادوں کے دامن سے چنتا ہوں
گرتی دیواروں کے آنچل میں زندہ ہوں

محسن بھوپالی ـ چاہت میں کیا دُنیا داری ، عشق میں کیسی مجبوری

2015-07-05T17:53:00.004-04:00

چاہت میں کیا دُنیا داری ، عشق میں کیسی مجبوری
لوگوں کا کیا؟ سمجھانے دو، اُن کی اپنی مجبوری

میں نے دِل کی بات رکھی اور تونے دُنیا والوں کی
میری عرض بھی مجبوری تھی اُن کا حُکم بھی مجبوری

روک سکو تو پہلی بارش کی بوندوں کو تم روکو
کچی مٹی تو مہکے گی ، ہے مٹی کی مجبوری

ذات کدے میں پہروں باتیں اور مِلیں تو مہر بلب
جبرِ وقت نے بخشی ہم کو اب کے کیسی مجبوری

جب تک ہنستا گاتا موسم اپنا ہے سب اپنے ہیں
وقت پڑے تو یاد آجاتی ہے ، مصنوعی مجبوری

مدت گُزری اِک وعدے پر آج بھی قائم ہیں مُحسن
ہم نے ساری عمر نبھائی ، اپنی پہلی مجبوری

2015-07-05T17:53:00.002-04:00

اپنی تنہائیوں میں کوئی سایا بھی نہیں
کوئی اپنا بھی نہیں کوئی پرایا بھی نہیں
کسے آواز دوں، کسے آواز دوں
ساری جھوٹی باتیں ہیں
دن اپنے نہ راتیں ہیں
پل پل ایک کہانی ہے
جو جیون بھر دہرانی ہے
کسے آواز دوں، کسے آواز دوں
چہرے کیا تصویریں ہیں
نہ خواب ہیں نہ تعبیریں ہیں
آس ہے جو کہ جیون ہے
الجھا الجھا بندھن ہے
کسے آواز دوں، کسے آواز دوں
اپنی تنہائیوں میں کوئی سایا بھی نہیں
کوئی اپنا بھی نہیں کوئی پرایا بھی نہیں
کسے آواز دوں، کسے آواز دوں

سیف الدین سیف ـ در پردہ جفائوں کو اگر جان گئے ہم

2015-07-05T17:52:00.001-04:00

در پردہ جفائوں کو اگر جان گئے ہم
تم یہ نہ سمجھنا کہ بُرا مان گئے ہم

اب اور ہی عالم ہے جہاں کا دلِ ناداں
اب ھوش میں آئے تو میری جان ، گئے ہم

پلکوں پہ لرزتے ہوئے تارے سے یہ آنسو
اے حُسنِ پشیماں ، تیرے قربان گئے ہم

ہم اور تیرے حُسنِ تغافل سے بِگڑتے
جب تُو نے کہا مان گئے؟ مان گئے ہم

بدلہ ہے مگر بھیس غم عشق کا تونے
بس اے غمِ دوراں تُجھے پہچان گئے ہم

ہے سیف بس اتنا ہی تو افسانہءِ ہستی
آئے تھے پریشان ، پریشان گئے ہم

ـ ہمارا کیا ہے کہ ہم تو چراغ آخر شب صرف

2015-07-05T17:51:00.001-04:00

ہمارا کیا ہے کہ ہم تو چراغِ آخرِ شب، صرف
اب اس کے بعد تمھارے لئے ہیں رنگ سبھی

سبھی رتیں، سبھی موسم، تمھیں سے مہکیں گے
ہر ایک لوحِ زماں پر تمھارے نام کی مہر

ہر ایک صبح تمہاری جبیں پہ سجدہ گزار
طلوعِ مہرِ درخشاں، فروغِ ماہ تمام

یہ رنگ و نور کی بارش تمھارے عہد کے نام
اب اس کے بعد یہ ہو گا، کہ تم پہ ہونا ہے

ورود نعمتِ عظمیٰ ہو یا نزولِ عذاب
تمہی پہ قرض رہے گی تمہارے فرض میں ہے

دلوں کی زخم شماری غمِ جہاں کا حساب
گناہِ وصل کی لذت کہ ہجرتوںکا ثواب

تمام نقش تمھیں کو سنوارنا ہوں گے
رگوں میں زہر کے نشتر اتارنا ہوں گے

اب اس طرح ہے کہ گزرے دنوں کے ورثے میں
تمہاری نظر ہیں، ٹکڑےشکستہ خوابوں کے

جلے ہوۓ،کئی خیمے دریدہ پیراہن
بجھے چراغ ،لہو انگلیاں ،فگار بدن

یتیم لفظ ، ردا سوختہ ، انا کی تھکن
تمھیں یہ زخم تو آنکھوں میں گھولنا ہوں گے

عذاب اور بھی پلکوں پہ تولنا ..ہوں گے
وہ یوں بھی ہے کہ اگر حوصلے سلامت ہوں

بہت کٹھن بھی نہیں راہ گزارِ دشتِ جنوں
یہی کہ آبلہ سے جی نہ اکتائے

جراہتوں کی مشقت سے دل نہ گھبرائے
رگوں سے درد کا سیماب اس طرح پھوٹے

نشاط کرب کا عالم فضا میں طاری ہو
کبھی جو طبل بجے مقتل حیات سجے

تو ہر قدم پہ لہو کی سبیل جاری ہو
جو یوں نہیں تو چلو اب کے اپنے دامن پر

بہ فیضِ کم نظری داغ بیشمار سہی
ادھر یہ حال کہ موسم خراج مانگتا ہے

ادہر یہ رنگ کہ ہر عکس آئینے سے خجل
نہ دل میں زخم نہ آنکھوں میں آنسؤں کی چمک

جو کچھہ نہی تو یہی رسمِ روزگار سہی
نہ ہو نصیب رگِ گل تو نوکِ خار سہی

جو ہو سکے تو گریباں کے تار سی لینا
وگرنہ تم بھی ہماری طرح سے جی لینا

اقبال ـ آبتائوں تجھ کو رمز آیۂ 'ان الملوک'

2015-07-05T17:48:00.002-04:00

آبتائوں تجھ کو رمز آیۂ 'ان الملوک'

سلطنت اقوام غالب کی ہے اک جادوگری

خواب سے بیدار ہوتا ہے ذرا محکوم اگر

پھر سلا دیتی ہے اس کو حکمراں کی ساحری

جادوئے محمود کی تاثیر سے چشم ایاز

دیکھتی ہے حلقۂ گردن میں ساز دلبری

خون اسرائیل آجاتا ہے آخر جوش میں

توڑ دیتا ہے کوئی موسی طلسم سامری

سروری زیبا فقط اس ذات بے ہمتا کو ہے

حکمراں ہے اک وہی، باقی بتان آزری

از غلامی فطرت آزاد را رسوا مکن

تا تراشی خواجہ ے از برہمن کافر تری

ہے وہی ساز کہن مغرب کا جمہوری نظام

جس کے پردوں میں نہیں غیر از نوائے قیصری

دیو استبداد جمہوری قبا میں پاے کوب

تو سمجھتا ہے یہ آزادی کی ہے نیلم پری

مجلس آئین و اصلاح و رعایات و حقوق

طب مغرب میں مزے میٹھے، اثر خواب آوری

گرمی گفتار اعضائے مجالس، الاماں!

یہ بھی اک سرمایہ داروں کی ہے جنگ زرگری

اس سراب رنگ و بو کو گلستاں سمجھا ہے تو

آہ اے ناداں! قفس کو آشیاں سمجھا ہے تو

شاعر کا نام : علامہ محمد اقبال

کتاب کا نام : بانگ درا

فیض ـ ہم مسافر یونہی مصروف سفر جائیں گے

2015-07-01T23:02:00.001-04:00

ہم مسافر یونہی مصروف سفر جائیں گے

بے نشاں ہو گئے جب شہر، تو گھر جائیں گے

کس قدر ہو گا یہاں مہر و وفا کا ماتم

ہم تیری یاد سے جس روز اُتر جائیں گے

جوہری بند کیئے جاتے ہیں بازار سخن

ہم کسے بیچنے الماس و گُہر جائیں گے

نعمت زیست کا یہ قرض چکے گا کیسے

لاکھ گھبرا کے یہ کہتے رہیں, مر جائیں گے

شاید اپنا بھی کوئی بیت حدی خواں بن کر

ساتھ جائے گا، مرے یار جدھر جائیں گے

فیض آتے ہیں رہ عشق میں جو سخت مقام

آنے والوں سے کہو، ہم تو گزر جائیں گے

فیض ـ اِدھر نہ دیکھوکہ جو بہادر

2015-07-01T22:53:00.005-04:00

اِدھر نہ دیکھوکہ جو بہادر
قلم کے یا تیغ کے دھنی تھے
جو عزم و ہمت کے مدعی تھے
اب ان کے ہاتھوں میں صدقِ ایماں کی
آزمودہ پرانی تلوار مڑ گئی ہے

جو کج کلہ صاحبِ حشم تھے
جو اہلِ دستار محترم تھے
ہوس کے پرپیچ راستوں میں
کلہ کسی نے گرو رکھ دی
کسی نے دستار بیچ دی ہے

اُدھر بھی دیکھو
جو اپنے رخشاں لہو کےدینار
مفت بازار میں لٹا کر
نظر سے اوجھل ہوئے
اور اپنی لحد میں اس وقت تک غنی ہیں،

اُدھر بھی دیکھو
جو حرفِ حق کی صلیب پر اپنا تن سجا کر
جہاں سے رخصت ہوئے
اور اہلِ جہاں میں اس وقت تک نبی ہیں

محسن نقوی: کبھی لب ہلیں گے تو پوچھنا

2015-06-23T18:43:00.001-04:00

ابھی کیا کہیں ، ابھی کیا سنائیں
کہ سرِفصیلِ سکوتِ جاں
کفِ روز و شب پہ شرر نما
وہ جو حرف حرف چراغ تھا
اُسے کِس ہوا نے بُجھا دیا
کبھی لب ہلیں گے تو پوچھنا

سرِ سحرِ عہدِ وِصال میں
وہ جو نِکہتوں کا ہجوم تھا
اُسے دستِ موجِ فراق نے
تہہِ خاک کب سے مِلا دیا
کبھی گُل کھلیں گے تو پوچھنا

ابھی کیا کہیں ، ابھی کیا سنائیں
یونہی خواہشوں کے فِشار میں
کبھی بے سبب کبھی بے خلل
کہاں کون کِس سے بچھڑ گیا
کِسے کِس نے کیسے گنوا دیا
کبھی پھر ملیں گے تو پوچھنا