Kay Celia

Sa Babasa Nito (To the Reader)

rizalist@gmail.com (Dean Bocobo) — Sat, 24 Mar 2012 20:56:00 +0800

1
Salamat sa iyo, O nanansang irog,
kung halagahan mo itong aking pagod;
ang tula ma'y bukal ng bait na kapos,
pakikinabangan ng ibig tumarok.

2
Kung sa biglang tingi'y bubot at masaklap,
palibhasa'y hilaw at mura ang balat;
nguni't kung namnamin ang sa lamang lasap,
masasarapan din ang babasang pantas.

3
Di ko hinihinging pakamahalin mo,
tawana't dustain ang abang tula ko;
gawin ang ibigi't alpa'y nasa iyo
ay huwag mo lamang baguhin ang berso.

4
Kung sa pagbasa mo'y may tulang malabo,
bago mo hatulang katkatin at liko,
pasuriin muna ang luwasa't hulo,
at makikilalang malinaw at wasto.

5
Ang may tandang letra alinmang talata,
di mo mawatasa't malalim na wika,
ang mata'y itingin sa dakong ibaba,
buong kahuluga'y mapag-uunawa.

6
Hanggang dito ako, O nanasang pantas,
sa kay Sigesmundo'y huwag ding matulad;
Sa gayong katamis wikang masasarap
ay sa kababago ng tula'y umalat.

22 - Ikaw na bulaklak niring dilidili

rizalist@gmail.com (Dean Bocobo) — Wed, 21 Mar 2012 05:25:00 +0800

KC-22
Ikaw na bulaklak niring dilidili,
Celiang sagisag mo'y ang eMe A eRe
sa Birheng mag-ina'y ipamintakasi
ang tapat mong lingkod na si eFe Be.

21 - Ahon sa dalata't pampang na nagligid

rizalist@gmail.com (Dean Bocobo) — Wed, 21 Mar 2012 05:24:00 +0800

KC-21
Ahon sa dalata't pampang na nagligid,
tonohan ng lira yaring abang awit
na nagsasalitang buhay ma'y mapatid,
tapat na pagsinta'y hangad na lumawig.

20 - Masasayang Nimfas sa lawa ng Bai

rizalist@gmail.com (Dean Bocobo) — Wed, 21 Mar 2012 05:22:00 +0800

KC-20
Masasayang Nimfas sa lawa ng Bai,
Sirenas, ang tinig ay kawili-wili,
kayo ngayo'y siyang pinipintakasi
ng lubhang mapanglaw na Musa kong imbi.

19 - Kung kasadlakan man ng pula't pag-ayop

rizalist@gmail.com (Dean Bocobo) — Wed, 21 Mar 2012 05:21:00 +0800

KC-19
Kung kasadlakan man ng pula't pag-ayop
tubo ko'y dakila sa puhunang pagod;
kung binabasa mo'y isa mang himutok
ay alalahanin yaring naghahandog.

18 - Ito'y unang bukal ng bait kong kutad

rizalist@gmail.com (Dean Bocobo) — Wed, 21 Mar 2012 05:19:00 +0800

KC-18
Ito'y unang bukal ng bait kong kutad
na inihahandog sa mahal mong yapak;
tanggapin mo nawa kahit walang lasap,
nagbuhat sa puso ng lingkod na tapat.

17 - Celia talastas ko't malabis na umid

rizalist@gmail.com (Dean Bocobo) — Wed, 21 Mar 2012 05:17:00 +0800

KC-17
Celia talastas ko't malabis na umid
mangmang ang musa ko't malumbay ang tinig;
di kinabahagya kung hindi malait,
palaring dinggin mo ang tainga't isip.

16 - Itong di matiis na pagdaralita

rizalist@gmail.com (Dean Bocobo) — Wed, 21 Mar 2012 05:16:00 +0800

KC-16
Itong di matiis na pagdaralita
nang dahil sa iyo, O nalayong tuwa
ang siyang umakay na ako'y tumula,
awitin ang buhay ng isang naaba.

15 - Bakit baga noong kami'y maghiwalay

rizalist@gmail.com (Dean Bocobo) — Wed, 21 Mar 2012 05:14:00 +0800

KC-15
Bakit baga noong kami'y maghiwalay
ay di pa nakitil yaring abang buhay?
kung gunitain ka'y aking kamatayan,
sa puso ko Celia'y di ka mapaparam.

14-Nasaan si Celiang ligaya ng dibdib?

rizalist@gmail.com (Dean Bocobo) — Wed, 21 Mar 2012 05:04:00 +0800

KC-14
Nasaan si Celiang ligaya ng dibdib?
ang suyuan nami'y bakit di lumawig?
nahan ang panahong isa niyang titig
ang siyang buhay ko, kaluluwa't langit?

13 - Anupa nga't walang di nasisiyasat

rizalist@gmail.com (Dean Bocobo) — Wed, 21 Mar 2012 05:03:00 +0800

KC-13
Anupa nga't walang di nasisiyasat
ang pag-iisip ko sa tuwang kumupas;
sa kagugunita, luha'y lalagaslas,
sabay ang taghoy kong "O, nasawing palad!"

12- Parang naririnig ang lagi mong wika

rizalist@gmail.com (Dean Bocobo) — Wed, 21 Mar 2012 05:01:00 +0800

KC-12
Parang naririnig ang lagi mong wika
"Tatlong araw na di nagtatanaw-tama,"
at sinasagot ko ng sabing may tuwa
"Sa isa katao'y marami ang handa."

11 - Nagbabalik mandi't parang hinahanap

rizalist@gmail.com (Dean Bocobo) — Wed, 21 Mar 2012 04:59:00 +0800

KC-11
Nagbabalik mandi't parang hinahanap
dito ang panahong masayang lumipas:
na kung maliligo'y sa tubig aagap,
nang hindi abutin ng tabsing sa dagat.

10 - Nililigawan ko ang iyong larawan

rizalist@gmail.com (Dean Bocobo) — Wed, 21 Mar 2012 04:57:00 +0800

KC-10
Nililigawan ko ang iyong larawan
sa Makatang Ilog na kinalagian;
binabakas ko rin sa masayang do'ngan,
yapak ng paa mo sa batong tuntungan.

9 - Ang katauhan ko'y kusang nagtatalik

rizalist@gmail.com (Dean Bocobo) — Wed, 21 Mar 2012 04:56:00 +0800

KC-9
Ang katauhan ko'y kusang nagtatalik
sa buntunghininga nang ikaw'y may sakit,
himutok ko noo'y inaaring langit,
paraiso naman ang may-tulong silid.

8 - Di mamakailang mupo ang panimdim

rizalist@gmail.com (Dean Bocobo) — Wed, 21 Mar 2012 04:54:00 +0800

KC-8
Di mamakailang mupo ang panimdim
sa puno ng manggang naraanan natin;
sa nagbiting bungang ibig mong pitasin,
ang ulilang sinta'y aking inaaliw.

7 - Ang kaluluwa ko'y kusang dumadalaw

rizalist@gmail.com (Dean Bocobo) — Wed, 21 Mar 2012 04:51:00 +0800

KC-7
Ang kaluluwa ko'y kusang dumadalaw
sa lansanga't nayong iyong niyapakan;
sa ilog Beata't Hilom na mababaw,
yaring aking puso'y laging lumiligaw.

6-Sa larawang guhit ng sa sintang pinsel

rizalist@gmail.com (Dean Bocobo) — Wed, 21 Mar 2012 04:47:00 +0800

KC-6
Sa larawang guhit ng sa sintang pinsel,
kusang inilimbag sa puso't panimdim
nag-iisang sanlang naiwan sa akin,
at di mananakaw magpahanggang libing.

5 - Ngayong namamanglaw sa pangungulila

rizalist@gmail.com (Dean Bocobo) — Wed, 21 Mar 2012 04:18:00 +0800

KC-5
Ngayong namamanglaw sa pangungulila,
ang ginagawa kong pang-aliw sa dusa,
nagdaang panaho'y inaalaala,
sa iyong larawa'y ninitang ginhawa.

4 - Lumipas ang araw na lubhang matamis

rizalist@gmail.com (Dean Bocobo) — Wed, 21 Mar 2012 04:04:00 +0800

KC-4
Lumipas ang araw na lubhang matamis
at walang matira kundi ang pag-ibig,
tapat na pagsuyong lalagi sa dibdib
hanggang sa libingan bangkay ko'y maidlip.

3 - Makaligtaan ko kayang di basahin

rizalist@gmail.com (Dean Bocobo) — Mon, 19 Mar 2012 17:02:00 +0800

KC-3 Makaligtaan ko kayang di basahin,
nagdaang panahon ng suyuan namin?
kaniyang pagsintang ginugol sa akin
at pinuhunan kong pagod at hilahil?

2 - Yaong Celiang laging pinanganganiban

rizalist@gmail.com (Dean Bocobo) — Mon, 19 Mar 2012 16:54:00 +0800

KC-2 Yaong Celiang laging pinanganganiban,
baka makalimot sa pag-iibigan;
ang ikinalubog niring kapalaran
sa lubhang malalim na karalitaan.

1 - Kung pagsaulan kong basahin sa isip

rizalist@gmail.com (Dean Bocobo) — Mon, 19 Mar 2012 16:24:00 +0800

KC-1
Kung pagsaulan kong basahin sa isip
ang nangakaraang araw ng pag-ibig
may mahahagilap kayang natititik
liban na kay Celiang namugad sa dibdib