Mu ngero 10 z’ikawa u Rwanda rwari rwashyize muri aya marushanwa yabereye muri Singapore, esheshatu zahawe ibihembo, zirimo eshatu zahawe Platinum Awards ku manota 90% cyangwa arenga n’izindi eshatu zahawe Gold Awards ku manota ari hagati ya 80% na 89%.

Iki gihembo cya Platinum kivuze ko ikawa igihawe iba igiye ku ikawa nziza yo ku rwego rwa mbere cyangwa “specialty coffee.” Ni mugihe iyahawe Gold Award iba iri ku rwego rwa kabiri muri kawa nziza.

Ibihembo byatanzwe mu nama mpuzamahanga y’ikawa ya ASEAN International Coffee Summit 2026, aho abatunganya n’abacuruza ikawa babonye umwanya wo kumurika umusaruro wabo, guhura n’abaguzi ndetse no gushaka amasoko mashya.

Ikigo cy’Igihugu gishinzwe Iterambere ry’Ubuhinzi n’Ibyoherezwa mu Mahanga (NAEB) kivuga ko iyi ntsinzi igaragaza umusaruro w’imbaraga zimaze igihe zishyirwa mu kuzamura ireme ry’ikawa, kuva ku murima kugeza ku isoko.

Umuyobozi Mukuru wa NAEB, Claude Bizimana, yavuze ko ibihembo u Rwanda rwabonye bigaragaza ko abahinzi, amakoperative, abatunganya ikawa n’abayohereza mu mahanga bakomeje gukora ibishoboka kugira ngo ikawa y’u Rwanda ihangane ku masoko asaba umusaruro mwishi kandi mwiza.

Ati “Kuba twaramenyekanye ku rwego mpuzamahanga nk’uru bigaragaza ireme n’ubushobozi bw’ikawa y’u Rwanda. Ni umusaruro w’imbaraga z’abahinzi, amakoperative, abatunganya ikawa n’abayohereza mu mahanga, kandi bidutera imbaraga zo gukomeza kuzamura ireme, gukurikirana inkomoko y’ikawa no gukomeza kwerekana u Rwanda nk’igihugu gitanga ikawa yihariye kandi ihangana ku isoko mpuzamahanga.”

Abahinzi babonye imbaraga zo gushaka amasoko mashya

Ku bahinzi n’amakoperative, ibihembo byabonetse ni amahirwe yo gukomeza kunoza umusaruro no gushaka amasoko atanga agaciro kanini ku ikawa.

Aimable Nshimiye, uyobora Koperative Abateraninkunga ba Sholi yo mu Karere ka Muhanga, ifite ikawa yahawe igihembo cya Platinum, yavuze ko iki gihembo cyabahaye imbaraga zo gukomeza kuzamura ireme ry’ikawa no kwagura ibikorwa bya koperative.

Ati “Iki gihembo cyongeye kuduha imbaraga zo gukomeza gukora ikawa y’ireme no kwagura ibikorwa bya koperative. Kidufasha kandi kubona amahirwe yo kumenyekanisha ikawa yacu ku masoko mpuzamahanga, bikazagera ku bahinzi binyuze mu kongera amahirwe n’iterambere rya koperative.”

Singapore yabaye umuryango ujya ku isoko rya Aziya

Kwitabira aya marushanwa kandi byahuriranye no gusinya amasezerano y’ubufatanye hagati ya NAEB n’Urugaga rw’Abacuruzi b’Ikawa muri Singapore.

Aya masezerano agamije gukomeza ubufatanye hagati y’inganda z’ikawa z’ibihugu byombi no gufasha ikawa y’u Rwanda kubona umwanya munini ku isoko rya Singapore ndetse n’andi masoko yo mu bihugu bigize ASEAN.

NAEB ivuga ko ibihembo u Rwanda rwabonye bishobora gufasha kongera kumenyekanisha ikawa yarwo ku baguzi mpuzamahanga, abacuruzi, abayitunganya n’abayotsa, cyane cyane ku masoko yo muri Aziya.

U Rwanda rukomeje gushyira imbere kuzamura ireme ry’ikawa no kubona amasoko mashya, kugira ngo kuba ikawa yarwo ikomeje kumenyekana ku rwego mpuzamahanga bihinduke inyungu zifatika ku bahinzi n’abandi bakora muri uru rwego.

Ibi bihembo bije mu gihe u Rwanda rwihaye intego yo kuzamura amafaranga rwinjiza aturutse ku ikawa akagera kuri miliyoni 192 z’amadolari ya Amerika ku mwaka mu 2029.

Imibare ya NAEB igaragaza ko mu mwaka w’ingengo y’imari wa 2025/26, u Rwanda rwohereje mu mahanga toni 23,000 z’ikawa zinjiza miliyoni $139.3, ziyongereyeho 20% ugereranyije na miliyoni zirenga $116 u Rwanda rwinjije mu mwaka wa 2024/25, ubwo rwoherezaga hafi toni 21,000.

Fitnesspoint yakomeje kwagura ibikorwa byayo mu Mujyi wa Kigali, ifungura ishami ryayo rya kane i Kanombe, ryiyongera ku yandi mashami isanzwe ifite i Kimihurura, Remera na Gacuriro.

Ibirori byo gutangiza iri shami byitabiriwe n’abakunda siporo ndetse n’inzobere mu bijyanye n’imyitozo ngororamubiri, byabereye muri iyi nyubako nshya iherereye iruhande rwa USMT, muri Kaminuza ya KIM i Kanombe.

Iyi gym nshya ifite ahantu hagari ho gukorera imyitozo, ndetse n’ibikoresho n’ibice bitandukanye byaguwe. Harimo ahantu hanini kurusha ahandi hakoreshwa n’abagore gusa mu gukora imyitozo, ahagenewe imyitozo ya aerobics, icyumba kinini cyo gukoreramo spinning ndetse n’ikibuga cy’umukino w’iteramakofe. Ibi byose bigamije guha abanyamuryango amahitamo atandukanye y’imyitozo bakora.

Mu ijambo rye mu birori byo gufungura iri shami, Umuyobozi Mukuru wa Fitnesspoint, Ole Haugum, yavuze ko iri shami rishya rizakomeza gutanga serivisi ku rwego rumwe n’izindi zari zisanzwe zitangwa n’amashami ya Fitnesspoint.

Yashishikarije kandi abantu b’ingeri zose, harimo n’abafite imyaka 50 n’iyirenga, kugira umuco wo gukora imyitozo ngororamubiri buri gihe.

Iyi gym ifite ubuso bwa metero kare 820, ikaba yubatswe mu magorofa atandukanye. Ishobora kwakira abantu bari hagati ya 100 na 120 icyarimwe, bigatuma abanyamuryango babona umwanya uhagije wo gukora imyitozo bisanzuye.

Umuyobozi w’ishami rya Kanombe, Timothy Maraka, yashimye uruhare rw’ikipe ye, irimo abatoza n’abakozi bakira abakiliya, mu gutegura iyi nyubako kugira ngo yakire abanyamuryango bayo ba mbere.

Yavuze ko iri shami rizibanda ku gutanga ahantu heza, hatuma buri wese yumva yisanzuye kandi yakiriwe neza.

Yagize ati: “Ibintu byose biri hano byakozwe mu rukundo, ubwitange n’ubunararibonye, hitabwa ku tuntu duto kugira ngo abantu babone ibyo bakeneye. Buri wese aba afite ibyo yiteze, ariko ndabizeza ko aha hantu hazaba urusengero rw’imyitozo ngororamubiri kuri buri wese.”

Ishami rya Kanombe rizajya rifungura kuva saa kumi n’imwe za mu gitondo (5:00) kugeza saa tanu z’ijoro (23:00), kuva ku wa Mbere kugeza ku wa Gatanu.

Mu mpera z’icyumweru, rizajya rifunga saa tatu z’ijoro (24:00).

Kuri uyu wa Kabiri, ikipe ya Rayon Sports yashyize hanze ibiciro by’umukino w’umunsi wa cyenda wa shampiyona izakiramo APR FC ku wa 21 Ugushyingo 2026 kuri Stade Amahoro, Saa Kumi n’Imwe z’umugoroba.

Ni ibiciro byasohowe mu byiciro bibiri aho kugeza tariki 18 Ugushyingo Saa Sita z’ijoro itike ya menshi izaba ari miliyoni 2 Frw muri Sky Box, ibihumbi 150 Frw kuri Executive Seat, ibihumbi 50 Frw muri VVIP, ibihumbi 30 Frw muri VIP, ibihumbi 15 Frw muri Classic Seat mu gihe kugeza kuri uwo munsi itike ya macye izaba ari ibihumbi 3000 Frw hasi no hejuru.

Kuva tariki 19 Ugushyingo 2026, ibiciro bizahinduka ariko itike ya menshi yo ikomeze kuba ari miliyoni 2 Frw muri Sky Box, ibihumbi 150 Frw muri Executive Seat, ibihumbi 100 Frw muri VVIP, ibihumbi 50 Frw muri VIP, ibihumbi 20 Frw muri Classic Seat mu gihe itike ya macye izaba ari ibihumbi 5000 Frw hasi no hejuru.

Kugeza ubu Rayon Sports imaze gukina imikino itanu ya shampiyona yatsinzemo ibiri, itsindwa umwe, inganya indi ibiri ikaba ifite amanota arindwi kuri 15 imaze gukinira ikaba ku mwanya wa 11 n’ibirarane bitatu. Ku rundi ruhande APR FC imaze gukina imikino itatu yonyine yatsinzemo ibiri inganya umwe ikaba ifite amanota arindwi ku icyenda n’ibirarane bitanu.

Kuri uyu wa Kabiri, tariki 10 Ugushyingo 2026 ikipe y’igihugu y’u Rwanda ’Amavubi’ yahagurutse ku Kibuga cy’Indenge Mpuzamahanga cya Kigali i Kanombe yerekeza muri Mali aho igiye gukinira umukino w’umunsi wa gatatu w’amatsinda yo gushaka itike y’Igikombe cya Afurika 2027, uteganyijwe ku wa Gatanu w’iki cyumweru, Saa Tatu z’jjoro.

Uru rugendo rwatangiye Saa Tatu za mu gitondo,ruranyura i Lagos muri Nigeria mbere yo kugera i Bamako muri Mali biteganyijwe ko bagera Saa Kumi n’Imwe n’iminota 35 za Kigali . Nyuma y’iminsi itanu Amavubi ari mu mwiherero yakoreraga kuri hoteli ya FERWAFA, yahagurukanye abakinnyi 18 bavuye mu Rwanda mu gihe abandi batandatu bazahurira muri Mali.

Mu bakinnyi 29 bari bahamagawe muri rusange, Uwiyaremye Fidali wa APR FC yasezerewe ku ikubitiro kubera ibibazo by’imyitwarire mibi, Muhire Kevin wa Jamus SC, Mbonyumwami Taiba wa Ethiopian Coffee , Ishimwe Ganijuru na Mugisha Yves ba Rayon Sports nabo barasezererwa.

Abakinnyi bazahurira n’Amavubi muri Mali ni Mickels Joy Slayd ukinira Hibernians FC yo muri Malta, Kavita Phanuel wa Birmingham Legion yo muri USA, Kwizera Jojea wa Rodheisland yo muri Leta Zunze Ubumwe za Amerika, Biramahire Abeddy wa Al-Batin Football Club yo muri Arabie Saoudite , Joy Lance Mickels wa Sabah FK yo muri Azerbaijan na kapiteni Djihad Bizimana wa CS Constantine yo muri Algeria we uhagera kuri uyu wa Gatatu.

Ni ku nshuro ya Gatanu Amavubi agiye gukina na Mali mu marushanwa, aho mu mikino ine imaze kubahuza, Mali yatsinze itatu banganya rimwe aho Amavubi yinjije ibitego bibiri(2) Mali yinjiza birindwi.

Kugeza ubu Amavubi ayoboye itsinda rya 11 n’amanota atandatu n’ibitego bitatu azigamye aho akurikiwe na Mali nayo ifite amanota atandatu n’ibitego bitatu izigamye gusa u Rwanda rukaba urwa mbere kubera ibitego byinshi rwinjije.

Nyuma y’uyu mukino w’umunsi wa gatatu, Amavubi azakirira Mali ku munsi wa Kabiri, tariki 17 Ugushyingo 2026 kuri Stade Amahoro, Saa Tatu z’jjoro.

Umuhanzikazi w’Umunyarwanda ufite ubwenegihugu bw’Ubwongereza yagaragaje inkuru y’abantu bamuca intege muri gahunda yiyemeje yo guteza imbere ubuhanzi, cyane cyane ububyinnyi buzamura impano z’abana, avuga ko hari n’abageze aho bayobya inkunga y’abashakaga kumufasha.

Mu nyandiko ndende yanyujije ku rubuga rwe rwa X, Sherrie yagize ati "Biratangaje kubona umuntu ashobora gutangira ikintu cyiza afite ishyaka n’umurava mwinshi, ariko kubera kubura ubufasha no guhora ahura n’abamunenga gusa, buhoro buhoro akagenda acika intege, akabura n’ishyaka yari afite."

Aha yagaragaje ko aho umuntu akorera ibikorwa bye hagira uruhare rukomeye mu musaruro aba ategereje.

Yagize ati "Ubu namaze gusobanukirwa impamvu hari abantu bamaze kugera ku byo bifuzaga bahitamo kwiyitaho, bakikorera ibyabo kandi bakishimira amafaranga babonye, aho guhora bashyira imbaraga mu bintu bidahabwa agaciro n’abo babikorera."

Yongeraho ati "Natunguwe cyane no kumva ko hari umuntu washakaga gutera inkunga Umuryango wa Sherrie Silver Foundation, akagerageza kungeraho binyuze ku bantu batandukanye bo mu gihugu, ariko aho kumufasha kumbona, bamugiriye inama yo gutanga iyo nkunga ku wundi muryango ukora ibikorwa bisa n’ibyacu, bamubwira ko “Silver adakeneye ubufasha kuko akize.”

Sherrie Silver ati ’Murakoze nta kindi nababwira’

Yagize ati "Mvugishije ukuri, hari byinshi namaze kwigira kuri ibi byose. Ubusanzwe ndi umuntu utuje, wirinda kwivanga mu by’abandi kandi agakora ibye. Icyo nshaka gusa ni uguhindura ibintu mu buryo burambye mu rwego nkoreramo, kugira ngo n’urundi rubyiruko ruzaza rubashe gukoresha impano zabo, biteze imbere kandi bagere ku rwego rurenze urwo nagezeho.

Ariko nanjye ndi umuntu nk’abandi, sinshobora kubikora njyenyine, cyane cyane mu gihe nkomeza kudahabwa agaciro no gusuzugurwa."

Sherrie yavuze ko abandi bantu bakora nk’ibyo akora wenda bazaza, ariko akagira abantu inama ati "Inama nabagira ni ukubafasha no kubaba hafi. Mujye mufatanya na bo aho kugerageza kubaca intege, kuko abantu bose batagira kwihangana kungana, kandi si bose bazahitamo gukomeza guhatana no kwihangana nubwo bahura n’inzitizi."

Nta gihembo cyihariye kiri muri aka kazi dukora. None se kuki dukomeza kugakora?

Yagize ati "Nkunda igihugu cyanjye kandi ndi urugero rugaragaza ko ibyo umuntu yiyemeje ashobora kubigeraho. Ariko kandi, buri muntu agira aho ubushobozi bwo kwihangana bugarukira.

Icyo mubona gusa ni abantu bishimye, baririmba kandi babyina. Kuko ntitujya dushyira ku mbuga nkoranyambaga abana bari mu bitaro, uko twishyurira abana amafaranga y’ishuri, n’abana bareka ishuri kubera ko uyu mwaka ntashoboye kubona ubushobozi bwo kwishyurira benshi nk’uko nabikoraga mbere."

Yabwiye abamuca intege ko birengagiza ukuri aho yagize ati "Ntimubona uko duharanira ko buri mwana abona ibyo kurya, cyangwa uko ntanga amasomo yo kubyina ku buntu.

None se ubufasha buri he? Kuki abantu batabona ibyo bikorwa byose biri inyuma y’ibyo bishimo babona?

Ese koko gahunda yo kugira uruhare mu iterambere ry’abaturage (CSR) nta gaciro igifite? Cyangwa se ni ibikorwa byo kwamamaza gusa iyi miryango iba ishaka?"

Yabajije ati "Ese ntidushobora gufatanya twese kubaka igihugu cyacu? Urubyiruko ni rwo hazaza h’igihugu. Impano zifite ubushobozi bwo gufungura amarembo y’amahirwe, nk’uko bigenda no muri siporo.

Umuziki wahinduye ubuzima bwanjye, ariko umukobwa wanyu ubu yarushye cyane, kandi yumva ananiwe mu mutima no mu bitekerezo."

Mu itangazo bumaze gusohora muri uyu mugoroba, Ubushinjacyaha Bukuru bw’u Rwanda bwavuze ko Teganya yashyiriweho inyandiko itanga ikirego mu 2014, aregwa ibyaha bivugwa ko yakoreye mu Mujyi wa Butare.

Teganya Jean Léonard yavukiye mu 1971 mu Murenge wa Gatumba, Akarere ka Ngororero, mu Ntara y’Iburengerazuba.

Mu 1994, igihe Jenoside yakorewe Abatutsi yabaga, yari atuye mu Karere ka Huye, aho yigaga ibijyanye n’ubuvuzi muri Kaminuza Nkuru y’u Rwanda.

Yari umwe mu banyeshuri bigaga ibijyanye n’ubuvuzi banimenyerezaga umwuga mu Bitaro bya Kaminuza bya Butare.

Ubushinjacyaha Bukuru bwashimiye inzego z’ubutabera za Leta Zunze Ubumwe za Amerika ku bufatanye zigira mu kohereza mu Rwanda abantu bakekwaho ibyaha bya Jenoside bahunze ubutabera.

Bwagaragaje kandi ko ubwo bufatanye mu by’amategeko bufasha mu kurwanya umuco wo kudahana no gutuma abakoze ibyaha bya Jenoside babiryozwa.

Intumwa zaturutse mu Mujyi wa St. Louis, muri Leta ya Missouri muri Leta Zunze Ubumwe za Amerika, ziyobowe na Meya wawo, Cara Spencer, zasuye Urwibutso rwa Jenoside yakorewe Abatutsi rwa Kigali ruri ku Gisozi, zunamira abazize Jenoside baharuhukiye.

Ni igikorwa cyabaye kuri uyu wa Mbere, tariki ya 9 Ugushyingo 2026, izi ntumwa zikaba ziri mu ruzinduko rw’akazi zirimo kugirira mu Rwanda, rugamije gushaka amahirwe n’ubufatanye hagati y’umujyi wa St. Louis n’uwa Kigali.

Gusura Urwibutso rwa Jenoside yakorewe Abatutsi byahaye izo ntumwa umwanya wo kumenya amateka ya Jenoside yakorewe Abatutsi mu 1994, no kunamira inzirakarengane zishwe muri Jenoside zishyinguye muri uru rwibutso.

Izi ntumwa ziri mu itsinda ry’abantu 36 barimo abayobozi n’abahagarariye inzego z’ubucuruzi n’iterambere, baje mu Rwanda kuva tariki ya 8 kugeza ku wa 11 Ugushyingo 2026, mbere yo gukomereza urugendo i Nairobi muri Kenya.

Nk’uko byatangajwe n’Ibiro bya Meya wa St. Louis, uru ruzinduko rugamije gushaka amahirwe y’ubufatanye mu bucuruzi, ishoramari, ubuhinzi, ubuvuzi, ikoranabuhanga, uburezi n’umuco.

Harimo kandi ibiganiro bigamije gushyiraho umubano w’ubufatanye hagati y’imijyi ya Kigali na St. Louis, uzwi nka Sister City Partnership, kugira ngo iyi mijyi ibashe guhanahana ubumenyi n’ubunararibonye no gushyiraho ibikorwa bihuriweho.

U Rwanda na Leta Zunze Ubumwe za Amerika bifitanye umubano wa dipolomasi umaze imyaka myinshi, ukaba waratumye ibihugu byombi bishyiraho ubufatanye mu nzego zitandukanye zirimo ubuzima, uburezi, umutekano n’iterambere ry’ubukungu, binyuze mu masezerano n’ibiganiro bigamije guteza imbere inyungu bihuriyeho.

Ikipe y’igihugu y’u Rwanda y’abagore ya Handball yasoreje ku mwanya wa gatatu mu irushanwa ry’Akarere ka Gatanu, nyuma yo gutsinda Tanzania yari yaryakiriye ibitego 32-31.

Ni irushanwa ryakinwe kuva tariki 4 kugeza ku ya 8 Ugushyingo 2026, aho u Rwanda rwari mu itsinda ryarimo Tanzania na Djibouti. Mu mukino wa mbere u Rwanda rwatsinze runyagiye Djibouti ibitego 49-9.

Mu mukino wa kabiri u Rwanda rwatsinze Tanzania yakiriye irushanwa ibitego 42-32 rugera muri 1/2. Muri iki cyiciro aba Banyarwandakazi bahahuriye na Uganda ku wa Gatandatu w’icyumweru gishize maze bigoranye ibatsinda ibitego 37-35 bisabye iminota y’inyongera kuri 60 umukino usanzwe umara.

Gusezererwa na Uganda byari bivuze ko u Rwanda rubuze amahirwe yo gukina umukino wa nyuma wari gutanga itike y’Igikombe cya Afurika kizabera muri Tunisia cyagombaga kwitabirwa n’ikipe itwaye igikombe.

Icyakora ku Cyumweru, u Rwanda rwakiniye umwanya wa gatatu, ruhura na Tanzania ku nshuro ya kabiri maze nkuko byagenze mu mukino w’itsinda rwongera kuyitsinda, ku bitego 32-31 rwegukana umwanya wa gatatu mu gihe ari ubwa mbere mu mateka ikipe yari ibayeho.

Ku mukino wa nyuma ikipe y’igihugu ya Uganda niyo yegukanye igikombe itsinze Kenya ibitego 29-28 ikaba ari nayo izahagararira Akarere ka Gatanu mu Gikombe cya Afurika.

Kuri iki Cyumweru, ikipe ya APR FC yatangaje ko Umugande Hakim Kiwanuka ukina anyuze ku ruhande yongereye amasezerano.

Ibi APR FC yabitangaje ibinyujije ku mbugankoranyambaga aho yavuze ko uyu musore wayigezemo muri Mutarama 2025 yongereye amasezerano y’imyaka itatu azageza mu 2029.

Muri shampiyona 2025-2026 Hakim Kiwanuka yafashije APR FC gutwara shampiyona akinnyemo imikino 17 atsinda ibitego bine mu gihe 2026-2027 amaze gukina imikino itatu yatsinzemo igitego kimwe atanga imipira ibiri yavuyemo ibitego.

Iyi kipe kandi yanayifashije gutwara Igikombe cy’Amahoro muri uwo mwaka w’imikino.

Umufaransa akaba n’umunyezamu w’ikipe y’igihugu y’ubufaransa na Paris Saint-Germain Lucas Chevalier ari I kigali mu ruzinduko rw’iminsi itatu agiriye mu Rwanda muri gahunda ya Visit Rwanda.

Lucas yageze i kigali kuri iki cyumweru taliki ya 8 Ugushyingo aho ku ikubitiro yasuye Urwibutso rwa Jenoside rwa Kigali ruri ku Gisozi, yunamira inzirakarengane zazize Jenoside yakorewe Abatutsi mu 1994 aho yasuye ibice by’urwibutso bigaragaza uko Jenoside yateguwe ikanashyirwa mu bikorwa ndetse n’urugendo u Rwanda rwanyuzemo mu kongera kwiyubaka no kwimakaza ubumwe n’ubwiyunge.

U Rwanda binyuze muri Visit Rwanda na Paris Saint-Germain bafitanye imikoranire kuva muri 2019 yari ifite intego zo kumenyekanisha u Rwanda binyuze mu bucyerarugendo, Umuco no kwamamaza “Visit Rwanda” ku kibuga cya Parc des Princes, ku myambaro y’imyitozo y’ikipe y’abagabo ndetse no ku myambaro y’umukino (match jerseys) y’ikipe y’abagore

Ubu bufatanye bwongeye kuvugururwa ndetse buranongerwa muri Gicurasi muri 2023 ndetse no muri Mata 2025 aho buzageza muri 2028 aha ndetse hongewemo uburyo bw’imikoranire yagutse harimo no gushinga ishuri ry’umupira (Football Academy) aho iri shuri ryagiye rinitabira amarushanwa ategurwa na Paris Saint-Germain ku isi.

Kuva u Rwanda rwatangira inzira y’imikoranire na Paris Saint-Germain, Lucas Chevalier abaye umukinnyi usuye u Rwanda agikina nyuma ya Sergio Ramos, Keylor Navas Julian Dracler na Thilo Kehrer basuye u Rwanda muri 2022 ndetse na Warren Zaïre Emery muri 2023 ndetse n’abandi bagiye baza mu bihe bitandukanye harimo n’abanyabigwi ba Paris Saint-Germain.

Biteganyijwe ko nyuma yo gusura u rwibutso rwa Jenoside rwa Gisozi, Lucas Chevalier arasura ibindi bice bitandukanye mu mujyi wa Kigali ndetse binateganyijwe ko azanasura Parike y’ibirunga iri mu karere ka Musanze ho mu majyaruguru y’ u Rwanda.

Shampiyona y’icyiciro cya mbere muri volleyball yakomezaga hakinwa umunsi wa kane aho ikipe ya REG VC bigoranye yavuye inyuma maze itsinda Gisagara VC amaseti 3-2.

Ni umunsi wa kane wa shampiyona wakinwe kuri uyu wa gatandatu taliki ya 7 Ugushyingo mu ntara y’amagepfo ho mu karere ka Gisagara. Ni umunsi wakinwe n’amakipe y’abagabo gusa aho mu cyiciro cy’abagore bo bari baruhutse.

Indi mikino yabaye kuri uyu wa gatandatu, ikipe ya APR VC yatsinze Rwanda Polytechnic Ngoma college (RP Ngoma) amaseti 3-0, Police VC itsinda ikipe ya KVC amaseti 3-1 naho Kirehe VC yo itsinda East African University (EAUR) amaseti 3-1.

Nyuma yo gutsinda ikipe ya Gisagara VC, ikipe ya REG VC yahise ifata umwanya wa kane n’amanota 7, Gisagara VC ku mwanya wa gatatu n’amanota 8, Police VC ku mwanya kabiri n’amanota 10 naho ikipe ya APR VC yo ikaba ariyo ikiyoboye urutonde rwa shampiyona rw’agateganyo n’amanoata 11.

Mohammed Iga ukomoka mu gihugu cya Uganda ukinira ikipe ya EAUR, niwe ukiyoboye abandi mu bamaze gutsinda amanota menshi aho amaze gutsinda amanota 92 aho akurikiwe na Thon Maker Magembo ukinira ikipe ya REG VC aho we amaze gutsinda amanota 86.

Shampiyona izakomeza hakinwa umunsi wa gatanu taliki ya 13 Ugushyingo aho hateganyijwe Ömer mu mikino ikomeye harimo nizahuza amakipe ya APR VC na POLICE VC mu byiciro byombi abagabo n’abagore.

Ubwo ku nshuro ya 13 mu Rwanda hatangwaga ibihembo ku banyamakuru babaye indashyikirwa bitangwa hagamijwe kuzirikana uruhare rwabo mu guteza imbere ibikorwa bitandukanye, banashimirwa umuhate muri uyu mwuga, umunyamakuru wa Kigali Today Marie Jeanne Umutoni yatunguwe no guhamagarwa nk’indashykirwa akigera ahatangirwaga ibihembo.

Ni ibihembo byatanzwe ku mugoroba wo ku wa 6 Ugushyingo 2026, mu muhango wabereye muri Camp Kigali, wahuje abanyamakuru, abayobozi ba Leta, ibigo by’itangazamakuru n’abafatanyabikorwa mu iterambere, mu rwego rwo kwizihiza Umunsi Nyafurika wahariwe amakuru (Africa Day of Information) no gutanga ibihembo ngarukamwaka by’itangazamakuru.

Inkuru zahembwe ni 30 zo mu byiciro byihariye byatoranyijwe, zirimo iy’umunyamakuru wa Kigali Today Marie Jeanne Umuntoni yakoze kuri KT Radio, igaragaza ihohotera rikorerwa abagore n’abana.

Mu byiciro byose byahembwe umunyamakuru yasabwaga kugaragaza inkuru yakoze, zigakosorwa n’abahanga, izihize izindi zigahabwa amanota ya mbere. Hanatangwa igihembo cya 31 cyahawe umunyamakuru w’umwaka watoranyijwe n’abanyamakuru bahembwe mbere.

Marie Jeanne Umutoni wari wiriwe mu kazi kuri KT Radio, avuga ko yatunguwe kuko atari abyiteze nubwo yari yaratanze inkuru ihatana.

Ati “Byarantunguye kuko nari nakoze ndi mu makuru ya nimugoroba nk’ibisanzwe, yarangiye saa moya, ndavuga nti reka ngende aho abandi bari nishimane n’abandi, nk’umuntu wari urangije akazi saa moya numvaga ko ngerayo byarangiye. Nkihagera ntangiye kwiyandika, numva baravuze ngo uwatsindiye muri iki cyiciro ni Marie Jeanne wa KT Radio na Kigali Today, ntararangiza no kwiyandika mpita nsimbuka ngenda niruka ngiye kwakira igihembo. Ni ibintu byantunguye kuko naje numva ko banarangije gutanga ibihembo.”

Nubwo atari ubwa mbere yari atsindiye igihembo kandi muri icyo cyiro, ariko ngo ku nshuro ya mbere hari mu 2024 ubwo yakoreraga radio Salus, ari bwo bwa mbere yitabiriye ayo marushanwa, ariko ho yari yandikiwe ubutumwa bumumenyesha ko agomba kwitabira ibirori by’itangwa ry’ibihembo ndetse anahamagarwa kuri telefone.

Ati “Ejo rero numvaga abandi bavuga ngo babahaye ubutumwa, nta na kimwe jye nari nabonye, niyo mpamvu byantunguye, ndavuga nti bishoboka bite ko nta kintu na kimwe bampaye, habe n’amakuru nari mfite, usibye kuba nari nzi ko umunsi nyirizina wageze, isaha nyizi nkuko babitambutsaga ku mbuga nkoranyambaga zitandukanye.”

Inkuru yahembewe ivuga ku bagore babyara abana bafite ubumuga bw’uruhu, yubakiye ku mubyeyi wabyaye abana babiri bafite ubwo bumuga, agatangira kujya atotezwa n’umugabo kugera aho byabaviriyemo gutandukana.

Ni inkuru ashimira ubuyobozi bwa Kigali Today by’umwihariko umutokozi wa KT Radio (Editor), avuga ko nubwo yagize igitekerezo cyo kuyikora, ariko bamufashije kuyiha umurongo bigatuma igera ku ntego yari yayiteguriye.

Kuba amaze guhembwa kabiri mu myaka itatu ikurikirana, avuga ko ari ikintu kimwongerera imbaraga mu mwuga we w’itangazamakuru.

Ati “Bintera imbaraga zo kuba narushaho gukunda itangazamakuru kuko ni umuhamagaro wanjye, ni ibintu nize mbikunze, mbikora mbikunze, hanyuma kuba umuntu yahembwa rimwe, akongera ubwa kabiri, bihita bimwereka ko ibyo byose ibintu akora hari aho bigera kure, kandi bakabona hari imbaraga aba yashyizemo zirenze.”

Ibi kandi ngo binamuha imbaraga zo gutekereza no gukora cyane, kugira ngo akomeze gufasha no kuvugira ba bandi badafite kivugira, kuko iyo ukoze ntuhembwe cyangwa ntihagire ukwereka ko hari icyo wakoze, hari igihe utekereza ko ibyo ukora nta cyo bimaze cyangwa bigarukira aho.

Uyu mukobwa urimo kwiga icyiciro cya gatatu cya Kaminuza mu itangazamakuru, avuga ko afite inzozi ngari muri uyu uwo mwuga kandi ko na Kigali Today ari igitangazamakuru kigari kuko gikurikirwa na benshi, ku buryo asanga ari inzira nziza izakomeza kumwagurira amarembo ku buryo adashidikanya ko hashobora kumubera ikiraro kimufasha kuzikabya.

Ibihembo by’abanyamakuru babaye indashykirwa (Development Journalism Awards) bitangwa n’Ishyirahamwe ry’Abanyamakuru mu Rwanda (ARJ) ku bufatanye n’Urwego rw’Igihugu rw’Imiyoborere mu Rwanda (RGB), byatanzwe bwa mbere mu 2012. Icyo gihe abanyamakuru icyenda nibo bahembwe mu byiciro bitandukanye birimo inkuru z’iperereza, ubucuruzi, siporo, ibidukikije n’ibindi.

Ibigo by’ikoranabuhanga bikorera mu rwego rw’ubuhanzi n’inganda ndangamuco mu Rwanda, byahawe ibihembo mu irushanwa ryari rigamije guteza imbere ibigo bifasha abahanzi n’abandi bakora mu rwego rwo guhanga no kubyaza umusaruro ibikorwa byabo.

Ibi bihembo byatanzwe kuri uyu wa 5 Ugushyingo 2026, mu gikorwa cyo gusoza icyumweru cyiswe Rwanda–Israel Creative Industries & Technology Week, cyabereye i Kigali, cyahuje inzego za Leta, abashoramari, impuguke n’abashoramari bakiri bato bafite ibigo by’ikoranabuhanga bikorera mu nganda ndangamuco.

DAJAH Music Group, ikigo gifasha abanditsi b’indirimbo, abahanzi, abahimbyi, abatunganya umuziki, ibigo by’umuziki n’abafite uburenganzira ku bihangano kurinda, gucunga no kubyaza umusaruro uburenganzira ku muziki wabo ku rwego mpuzamahanga, ni cyo cyegukanye igihembo nyamukuru cy’amadolari ya Amerika 5,000.

Hervé Muvunyi, umwe mu bashinze DAJAH Music Group, yavuze ko iki gihembo ari intambwe ikomeye mu rugendo rw’ikigo, kuko kigiye kugifasha kongera ubushobozi bwo gutanga serivisi no kugeza igisubizo cyacyo ku bantu benshi.

Yagize ati: “Iki gihembo ni imbaraga nshya kuri twe. Kizatuma dukomeza kunoza uburyo dufasha abanditsi b’indirimbo, abahanzi n’abandi bafite uburenganzira ku muziki kurinda ibihangano byabo no kubibyaza umusaruro. Intego yacu ni uko umuhanzi atagomba gukora igihangano gusa, ahubwo agomba no kubona inyungu zituruka ku burenganzira agifiteho.”

Ikindi kigo cyegukanye igihembo ni SINC EVENT, cyahawe amadolari ya Amerika 3,000. Ni urubuga rw’ikoranabuhanga rwashyiriweho gufasha abantu kumenya ibirori n’ibikorwa bitandukanye, kugura amatike no gufasha ababitegura kubicunga.

Bazilia Maeva Rusamaza, umwe mu bashinze SINC EVENT, yavuze ko gutsinda iri rushanwa ari ibyishimo n’ikimenyetso cy’uko igitekerezo batangiye gifite ubushobozi bwo gukemura ibibazo biri mu rwego rw’ibikorwa n’imyidagaduro.

Ati: “Kwegukana iki gihembo ni ibintu bishimishije cyane kuri twe, kuko bitwereka ko ibyo twatangiye bifite agaciro kandi bishobora gutera imbere. Aya mafaranga azadufasha kunoza urubuga rwacu, kongera ubushobozi bw’ikoranabuhanga no kugera ku bantu benshi, haba abategura ibirori n’abifuza kubyitabira.”

Ambasaderi wa Israel mu Rwanda, Einat Weiss, yavuze ko icyumweru cy’udushya ari kimwe mu bikorwa igihugu cye cyateguye mu rwego rwo gushyigikira icyerekezo cy’u Rwanda cyo kuba igihugu kiyoboye ikoranabuhanga n’udushya muri Afurika no ku rwego mpuzamahanga.

Yasobanuye ko intego ari ugufasha ba rwiyemezamirimo b’Abanyarwanda kumenya uko bahindura ibitekerezo n’ibikorwa byabo isoko y’amafaranga, binyuze mu kungurana ubumenyi n’impuguke zifite ubunararibonye mu guteza imbere ibigo by’ikoranabuhanga.

Ati: “Twifuza gufasha urubyiruko n’ibigo bito kumenya uko byabyaza umusaruro ibyo bikora. U Rwanda rufite urubyiruko rufite impano n’ibitekerezo byinshi. Icyo dushaka ni ukubafasha kubona ubumenyi, amahirwe n’uburyo bwo guhindura ibyo bitekerezo ubucuruzi bushobora kwaguka bukagera no ku masoko mpuzamahanga.”

Ambasaderi Weiss yavuze ko iki ari icyiciro cya kabiri cy’icyumweru cy’udushya, aho umwaka wabanje hibanzwe ku bigo bikiri mu ntangiriro, mu gihe kuri iyi nshuro hitabajwe ibigo byari bisanzwe bifite ibikorwa n’ibimenyetso byerekana ko ibisubizo byabyo bishobora gukora.
Umunyamabanga Uhoraho muri Minisiteri y’Urubyiruko n’Ubuhanzi (MoYA), Parfait Ishungure, yavuze ko ikibazo cy’ingenzi uru rwego rugomba gukemura ari ukureba uko impano z’Abanyarwanda zahinduka isoko rirambye y’amafaranga ku bazihanga no ku bigo bibafasha kuzigeza ku isoko.

Yavuze ko mu minsi ine y’icyumweru cy’udushya, ibigo byitabiriye byahawe amahugurwa agamije kunoza imikorere yabyo mu bucuruzi, gusobanukirwa inshingano zijyanye n’uburenganzira ku mutungo bwite mu by’ubwenge no gutegura uburyo byagura ibikorwa byabyo.

Ati: “Icyo twifuza ni uko impano z’abakora mu rwego rw’ubuhanzi zihinduka isoko irambye y’amafaranga ku bazihanga no ku bigo bizifasha kuzigeza ku isoko. Ni yo mpamvu tugomba kubaka ibigo bifite ubushobozi bwo guhangana, kubahiriza amahame mpuzamahanga no gucunga neza uburenganzira ku bihangano.”

Nk’uko bigaragazwa na Minisiteri y’Urubyiruko n’Ubuhanzi, inganda ndangamuco zari zimaze gutanga imirimo ku bantu 174,387 mu mwaka wa 2023, zinagira uruhare rungana na 5.1% by’umusaruro mbumbe w’igihugu (GDP), angana na miliyari 1,344 z’amafaranga y’u Rwanda.
Rwanda–Israel Creative Industries & Technology Week yateguwe mu rwego rwo gufasha ibigo bikorera muri uru rwego kunoza imikorere yabyo, gushaka amasoko, kubona abashoramari no guteza imbere ibisubizo by’ikoranabuhanga byafasha abahanzi kubona inyungu zikomoka ku bihangano byabo.

Ibihembo byatanzwe muri iri rushanwa biri mu rwego rwo gushyigikira ibigo bifite ibisubizo bishobora kwaguka, bigafasha guhindura ubuhanzi n’ibindi bikorwa ndangamuco isoko y’amahirwe y’akazi n’ubukungu ku rubyiruko rw’u Rwanda. Hakaba hahembwe Company z’urubyiruko 3, zose hamwe zikaba zahembwe angana na 10,000 by’amadorali ya Amerika.

Banki ya Kigali (BK) yafunguye ku mugaragaro ishami rishya mu Karere ka Rubavu, mu rwego rwo kurushaho kwegera abakiriya no kuborohereza kubona serivisi z’imari.

Iki gikorwa cyabaye kuri uyu wa 6 Ugushyingo 2026 mu ruzinduko Umuyobozi Mukuru wa BK, Dr. Diane Karusisi, yagiriye muri aka karere, aho yanagiranye ibiganiro n’abakiriya b’iyi banki barimo Vision Jeunesse Nouvelle na RICO (Rubavu Investment Company).

Muri ibyo biganiro, Dr. Diane Karusisi yari agamije kumva ubunararibonye bw’aba bakiriya mu mikoranire yabo na BK, kumenya serivisi bishimira ndetse n’aho bifuza ko banki yakongera imbaraga kugira ngo irusheho kubafasha mu bikorwa byabo.

Abikorera bo mu Karere ka Rubavu bashimye BK ku bw’umuhate igaragaza mu kwegera abakiriya, ariko bayisaba gukomeza kunoza serivisi, kwihutisha itangwa ryazo, guteza imbere ikoranabuhanga no korohereza abacuruzi bato kubona inguzanyo.

Perezida w’Urugaga rw’Abikorera (PSF) mu Karere ka Rubavu, Habarurema Antoine, yavuze ko guhura n’ubuyobozi bwa BK ari amahirwe yo kugeza ku rwego rw’ubuyobozi ibyifuzo by’abikorera, cyane cyane ibijyanye no guteza imbere ishoramari muri aka karere.

Yagize ati “Nk’abacuruzi bo mu Karere ka Rubavu, ni amahirwe kuba tubashije guhura n’Umuyobozi wa BK, kuko hari ibyifuzo byinshi abikorera batugaragariza, cyane cyane mu bijyanye n’ishoramari. Turifuza ko umujyi wacu wazamuka ukagera ku rwego rw’indi mijyi yose yo mu gihugu.

Dufite ibyifuzo bitandukanye, birimo koroshya uburyo bwo gutanga inguzanyo ku bacuruzi n’abikorera bakiri bato kugira ngo na bo babashe kwagura ibikorwa byabo.

Harimo kandi gutanga serivisi zihuse, kunoza ikoranabuhanga kuko isi igenda itera imbere ku muvuduko ukomeye, no kwegera abakiriya. Ibyo ntibikwiye kuba igikorwa kiba rimwe mu mwaka, ahubwo bigomba kuba umuco uhoraho.

Turifuza ubufatanye hagati y’abikorera na BK kugira ngo dufatanye kuzamurana. Iyo umucuruzi yungutse, banki na yo irunguka ariko kandi iyo banki yungutse n’umukiriya wayo aba akwiye kungukiramo. Ntitugomba kubona banki nk’ahantu tujya kubitsa cyangwa kubikuza amafaranga gusa, ahubwo dukwiye kuyibona nk’umufatanyabikorwa ukomeye udufasha kugera ku iterambere twifuza.”

Umuyobozi w’Akarere ka Rubavu w’agateganyo, Ruhamyambuga Olivier yavuze ko ishami rishya rya BK ryafunguwe mu Mujyi wa Gisenyi rizagira uruhare mu guteza imbere ishoramari muri aka karere, by’umwihariko korohereza abikorera kubona serivisi z’imari hafi yabo.

Yagize ati “Iyi banki ije gufasha mu kuzamura ishoramari mu Karere ka Rubavu, ifasha abantu bose bakora ibikorwa by’ubucuruzi n’abikorera muri rusange kubona serivisi za banki hafi yabo.

Iyo ibigo nk’ibi bigeze mu karere kacu, bifasha abikorera gukomeza kwagura ibikorwa byabo, bakabona inguzanyo mu buryo buboroheye, ibyo bakora bikarushaho gutera imbere natwe umujyi wacu tukabona iterambere, kuko ahanini iterambere turikesha abikorera ku giti cyabo.”

Yakomeje asaba abaturage bo mu Karere ka Rubavu kwitabira gukorana n’ibigo by’imari, bakitabira gahunda zo kugurizanya no gufata inguzanyo mu buryo bubafasha kwagura ibikorwa byabo, aho kumva ko serivisi z’imari zigenewe gusa abakora biro.

Ku ruhande rwa BK Umuyobozi Mukuru wayo, Dr. Diane Karusisi, yavuze ko kwegera abakiriya no kumva ibyifuzo byabo biri mu muco w’iyi banki, asobanura ko kwimura ishami ryayo i Rubavu rikajyanwa hafi y’isoko rya RICO biri muri iyo gahunda.

Yagize ati “BK isanzwe ifite umuco wo kwegera abakiriya. Nubwo twitwa Banki ya Kigali, turi banki y’Abanyarwanda.

Duhora tugira ingendo zo kwegera abakiriya no kuganira na bo, twasuye ibikorwa bitandukanye by’ishoramari biteza imbere aka karere, kugira ngo tuganire n’abashoramari, dufatanye na bo kugira ngo ibikorwa byabo bigende neza, bakomeze guteza imbere aka karere.

Uyu munsi kandi twaje gufungura ishami ryacu rishya rya Rubavu. Twaryimuye turizana mu isoko rya RICO, kuko na byo biri muri gahunda yo kwegera abikorera. Mu isoko harimo abakiriya benshi bacu, kandi iyo tubegereye babona serivisi bitabagoye.

Icyo twifuza ni uko abakiriya bacu bakomeza gutera imbere, natwe tukabigiramo uruhare binyuze mu bufatanye.”

Gufungura ishami rishya rya BK mu Mujyi wa Gisenyi ni imwe mu ntambwe iyi banki iteye mu rwego rwo kwagura aho itangira serivisi, cyane cyane iyegereza abikorera n’abandi bakiriya bakorera mu isoko rya RICO.

Rubavu ni umwe mu mijyi ifite ibikorwa by’ubucuruzi n’ishoramari bikomeye mu Burengerazuba bw’u Rwanda. Kwegera abikorera bahakorera bikaba ari uburyo bwo kumva ibibazo bahura na byo no kubafasha kubona serivisi z’imari zijyanye n’ibikenewe mu bikorwa byabo.

Pasiteri Bizimungu, wabaye Perezida wa Repubulika y’u Rwanda, yashimiye imikoranire bafitanye na Banki ya Kigali (BK), ayisaba kumufasha kurangiza imirimo yo kubaka hoteli iri ku nkengero z’Ikiyaga cya Kivu.

Iyi hoteli izaba igizwe n’icyumba cy’inama kizajya cyakira abantu barenga 1,000, resitora enye, ahantu abantu bazajya bicara hejuru bareba ibirunga n’Ikiyaga cya Kivu, ndetse n’ibyumba byo kuraramo.

Bizimungu yagize ati “Ni hoteli twifuza ko yaba ifite inyenyeri enye. Icyo twifuza kuri BK ni uko yadufasha kuyirangiza, kuko ubu inyubako tuyigeze kure. Ndetse no kuyubaka twari twaratangiye dufatanyije na yo, kandi kugeza ubu hari amafaranga tuyibereyemo. Ariko aho imirimo igeze, hakenewe imbaraga nyinshi kugira ngo irangire mu gihe gito. Icyo ni cyo twaje kubereka, kugira ngo tubereke ibyo dukeneye kugira ngo hoteli irangire itangire gukora.”

Bizimungu yavuze ko iyi hoteli izagira uruhare mu guhanga imirimo, kuko izaha akazi abantu bari hagati ya 300 na 400.

Yavuze kandi ko kugira ngo imirimo yose irangire, hoteli itangire gukora, izaba itwaye amafaranga arenga gato miliyari 10 z’amafaranga y’u Rwanda, cyangwa akagabanukaho gato.

Yongeyeho ko hari abashoramari bane bari kuganira na bo ku bijyanye no gucunga iyi hoteli.
Yasobanuye ko hoteli izibanda cyane cyane ku kwakira abantu baje kuruhuka, kuko Umujyi wa Rubavu ari umwe mu mijyi izwiho ibikorwa by’ubukerarugendo no kwidagadura. Icyakora, izajya inatanga izindi serivisi zitandukanye zisanzwe zitangirwa muri hoteli.

Bizimungu yavuze kandi ko yagiranye ibiganiro n’Urwego rw’Igihugu rw’Iterambere (RDB) ku bijyanye no guteza imbere ibikorwa remezo byakira inama mu turere, kugira ngo na two tubashe kwakira inama n’amahuriro mpuzamahanga, bityo bifashe guteza imbere ubukerarugendo.

Kimwe n’abandi bakiriya ba BK bafite ibikorwa byasuwe, Bizimungu Pasteur wari kumwe na Madamu Seraphine Bizimungu, yahawe impano ya BK

Ubucuti buba hagati ya George W.Bush wayoboye Amerika ari Perezida wa 43 aturuka mu ishyaka ry’Abarepubulike (Republicans), na Michelle Obama, Madame wa Barrack Obama wabaye Perezida wa 44 wa Amerika aturuka mu ishyaka ry’Abademokarate (Democrates), bwakunze kuvugwaho cyane ku mbuga nkoranyambaga.

Bamwe mu baturage ba Amerika batiyumvishaga ko byashoboka kubona abanyapolitiki baturuka mu mashyaka atandukanye bagirana ubucuti bumeze butyo, byarabatunguye.

George W.Bush yemeza ko ubwo bucuti bwe na Michelle Obama bwavutse bitewe n’uko mu birori cyangwa izindi gahunda za Leta babaga bicaranye cyangwa bahagararanye, bitewe n’uko bombi bari mu bahoze ari abayobozi bakuru b’igihugu n’abagore babo. Aha rero, muri Protocole ya Amerika, aba bombi iteka aho bahuriye mu birori byateguwe na Leta, yewe no mu kiriyo, bisanga bicaranye.

Ibyo ngo byabaye nko mu muhango wo gutangiza inzu ndangamurage y’amateka y’Abanyamerika b’Abirabura mu mwaka wa 2016, mu muhango wo gushyingura Nancy Reagan,wari Madame wa Ronald Reagan nawe wigeze kuyobora Amerika, ndetse no mu muhango wo gushyingura Senateri John McCain mu mwaka wa 2018. Buhoro buhoro, bagiranye ubucuti burangwa no kwisanzura no gusabana, batitaye cyane ku mategeko akomeye agenga imihango izo gahunda za Leta babaga barimo.

Mu muhango wo gushyingura John McCain mu mwaka wa 2018, George W. Bush yahaye Michelle Obama bombo ya Altoid igira impumuro y’ibyatsi byitwa ‘menthe’. Ifoto y’ako kanya amuhereza bombo, yakwirakwijwe cyane ku mbuga nkoranyambaga, maze abantu benshi bayifata nk’ikimenyetso cy’uko abantu bafite ibitekerezo bya politiki bitandukanye,bashobora kubana neza no kugirana ubucuti bigakunda.

Uko Bush yabisobanuye mu gihe yabazwaga kuri iyo foto, cyane cyane mu kiganiro yagiranye n’umukobwa we Jenna Bush kuri televiziyo ya TODAY, yavuze ko muri izo gahunda yabaga yagiyemo, yumvaga atuje cyane, kuko yakundaga gutera urwenya na Michelle Obama, kandi ko icyo gihe atari azi neza icyo ijambo «trending» risobanura(ni ukuvuga ikintu kirimo kuvugwa cyane ku mbuga nkoranyambaga).

George W. Bush yasobanuye ko Michelle Obama yakundaga uburyo bwe bwo gusetsa kandi ko «bahise bakundana mu buryo bw’ubucuti». Yavuze ko Abanyamerika bari bakeneye kubona umuntu wo mu Ishyaka ry’Abarepubulike ufite ibitekerezo bitagendera ku murongo ukakaye ndetse n’umuntu wo mu Ishyaka ry’Abademokarate ufite ibitekerezo by’iterambere, bashobora kuganira no gusabana nk’abantu basanzwe

George W. Bush yashimangiye ko ubucuti bwe na Michelle Obama bwakomeye bitewe n’uko Michelle yakundaga uburyo bwe bwo gusetsa no gufata ibintu mu buryo bworoheje.

Yagize ati “Igihugu gifite inyota yo kubona umuntu wo mu Ishyaka ry’Abarepubulike ufite ibitekerezo bijyanye n’ishyaka rye, n’umuntu w’Umunyamerika w’Umunyafurika wo mu Ishyaka ry’Abademokarate ufite ibitekerezo bijyanye n’ishyaka rye, bishimye ndetse bagashobora kuganira no gusabana, atari nk’abanyapolitiki, ahubwo nk’abaturage basanzwe”.

Mu bihe bitandukanye, abo bombi bagiye bagaragaza ko, nubwo batavuga rumwe ku ngingo nyinshi za politiki bitewe n’uko umwe ari Umurepubulike undi akaba Umudemokarate,ariko basangiye indangagaciro zimwe na zimwe, zirimo urukundo, kubahana no kubana nk’abantu basanzwe.

Uko George W.Bush avuga ubucuti bwe na Michelle Obama, ni kimwe n’uko nawe Michelle ubwe abyivugira. Kuko nawe yagiye amuvuga mu buryo bwuje urugwiro, amwita ‘umuntu bafatanya mu bikorwa byo kwishimisha’(partner in crime) ndetse n’inshuti ye, cyane cyane mu birori bya Leta no mu yindi mihango rusange aho abahoze ari ba Perezida n’abagore babo bicara hamwe hakurikijwe umuco n’amategeko agenga iyo mihango.

Mu gihe cyose yabazwaga icyo atekereza ku bantu banenze ubucuti bwabo, Michelle Obama yagiye asobanura ko abantu bashobora kutemeranya kuri politiki ariko bagakomeza gusangira indangagaciro z’ubumuntu.

Mu biganiro bitandukanye, harimo n’ibyo yagiranye n’itangazamakuru mu rugendo rwo kumenyekanisha igitabo cye yise ‘Becoming’ cyasohotse mu mwaka wa 2018, ndetse no mu biganiro byakurikiyeho, yagiye avuga ati,”Ntitwemeranya kuri politiki n’amategeko yayo, ariko ntitunyuranya ku bijyanye n’ubumuntu. Ntabwo tunyuranya ku rukundo no kugira impuhwe”.

Yemeza ko ubucuti burenze amashyaka ya politiki. Yavuze ko uburyo bagaragarizanyamo ubucuti mu ruhame, nko guhana bombo z’inkorora cyangwa izindi bombo nto mu birori bitandukanye, ibintu byakoze ku mitima ya benshi, ari ikigaragaza ko abantu bashobora kubahana, kubana neza no kugirana ubucuti nubwo baba bakomoka mu mashyaka ya politiki atandukanye.

Michelle Obama yasobanuye ko akenshi bicara hamwe bitewe n’umuco n’amategeko agenga ibirori n’indi mihango ya Leta. Yemeza ko akunda uburyo George W. Bush asetsa, ndetse n’uburyo ashobora gutuma abantu bisanzura no mu bihe biba bikomeye kandi bisaba ituze.

Muri macyeya, Michelle Obama agaragaza ko ubucuti hagati ye na George W. Bush butagomba kureberwa mu ndorerwamo ya politiki gusa, ahubwo ko bushingiye ku kubahana, gusangira ubumuntu, urukundo n’ubushobozi bwo gusabana n’abantu bafite ibitekerezo bitandukanye.

George W.Bush we yigeze kuvuga ko yakundaga gusetsa Michelle Obama, kuko yumvaga ko mu buzima bwa Barack na Michelle Obama, babaga bakikijwe n’abantu bakomeye kandi bakunze gufata ibintu mu buryo bukomeye cyane.

Izo bombo za Altoids zamamaye kubera ko George W. Bush yajyaga aziha Michelle Obama, ngo ntiyigeze areka kuzimuha mu bihe bitandukanye, ndetse, ubwo hafungurwaga ku mugaragaro Ikigo cya Perezida Barack Obama i Chicago, muri Kamena 2026, George W.Bush yamuhaye agakarito kose k’izo bombo.

Joyeuse Marie Claire umunyamakuru umaze igihe kinini mu itangazamakuru, cyane cyane akaba yarakoze imyaka myinshi muri Kinyamakuru Kigali Today Ltd, yiyongereye mu rugaga rw’abanditsi batanga umusanzu wabo mu kubungabunga ubuzima bw’abana, abangavu n’ingimbi, binyuze mu banditsi bw’ibitabo.

Akoresheje izina ry’umwanditsi rya Muhorakeye, Joyeuse Marie Claire yatangiriye umusanzu we mu kurwanya ikibazo cy’inda ziterwa abangavu, maze yandika ibitabo bigaragaza amayeri atandukanye akoreshwa n’abashuka abo bangavu, bikarangira babagushije mu mutego, bikarangira ubuzima bwabo buhungabanye mu buryo butandukanye.

Joyeuse yagize igitekerezo cyo kwandika igitabo kimwe ndetse yandika n’icya Kabiri, nyuma y’uko yari amaze kubona ko nta bitabo bihari bihagije byanditse mu Kinyarwanda, bituma yibaza icyo yakora, kuko ngo nubwo hari imvugo ko ‘Abanyarwanda badakunda gusoma’, we yabonaga ko n’ababikunda, abakunda gusoma inkuru ndende, ntabyo gusoma babona, bitewe n’uko ibitabo byinshi bihari byanditse mu ndimi z’amahanga. Ubwe yagiye mu nzu zigurishiriwamo ibitabo, ashakamo igitabo cy’Ikinyarwanda yasoma arakibura.

Yagize ati,” Nararebye mbona kubona inkuru ndende zanditswe mu Kinyarwanda mu masomera bigoye, ndavuga nti ko hari abasoma inkuru ndende zanditse mu Cyongereza cyangwa mu Gifaransa, uwakwandika n’inkuru ndende mu Kinyarwanda, abantu bakabona izo basoma. Ni aho igitekerezo cyavuye.Numva ko ngiye gutanga umusanzu wanjye, ngateza imbere ubwanditsi ariko mu Kinyarwanda. Hanyuma ndangije ndeba uko ibi bihe turimo bimeze,ndeba ukuntu abangavu barimo guterwa inda ari benshi, mpita mvuga nti hari ababigwamo, ari imitego abantu babagushijemo kuko babaruta, bakabahenda ubwenge. Mpita mvuga nti reka nandike igitabo kivuga ku mitego abana bagushwamo”.

Muhorakeye yanditse igitabo cya agamije kugaragaza imitego itandukanye abana bagushwamo,nk’uburyo bwe bwo kurwanya icyo kibazo cy’abangavu bisanga batewe inda.Nyuma yo kubona ko abo bangavu n’ingmbi bavuga Ikinyarwanda, yumvise uburyo bwiza bwo kubaha ubutumwa ari ukubwandika mu Kinyarwanda, maze yandika igitabo cya mbere yise ‘Umushibuka’, umushibuka bukaba ari ubwoko bw’umutego.

Yagize ati”, Iyo abantu bari muri gahunda yo kurwanya ibiyobyabwenge, biba byiza cyane kujyana umuntu wabibayemo, akerekana ububi bwabyo, akerekana uko yabiguyemo n’uko yabikize, bifasha benshi. Nararebye mbona ko abangavu n’ingimbi bacu,kugira ngo tubashe kubafasha bamenye iyo mitego bagwamo,ntibyakunda ko tugera kuri buri wese tumubwira ukwe,mpita mvuga nti uwakwandika ibitabo, akabikwirakwiza bikagenda bibageraho hirya no hino. Ni uko nanditse izo nkuru. Nandikiye ingimbi n’abangavu”.

Mu gitabo ‘Umushibuka’ Muhorakeye avugamo inkuru yahimbye, ariko azishingiye ku bintu byabayeho, harimo ibyo yabonye n’ibyo yaganiriye n’abantu mu bihe bitandukanye, kuko mu kazi ke nk’umunyamakuru yagiye agira umwanya wo guhura n’abantu bari mu ngeri zinyuranye bakamuganiriza ku byababayeho, ingaruka byabagizeho n’ibindi.

Inkuru ya mbere mu gitabo ‘Umushibuka’ ivuga ku mukobwa witwa Kanakuze w’imyaka 15 wigaga mu mwaka wa 4 w’amashuri yisumbuye, watewe inda nyuma yo gushukwa n’inshuti ye yitwa Kankindi, wamubeshye ko hari umuntu iwabo bamutumyeho, akamusaba ko yamuherekeza bakajyana kureba uwo muntu, ariko mu by’ukuri ari ikinyoma, ahubwo amugemuye ku musore. Uwo Kankindi yaribese arigendera, asiga inshuti ye Kanakuze mu nzu y’uwo musore birangira amusambanyije ku ngufu, bimuviramo gutwara inda atari abyiteze.

Inkuru ya Kabiri ivuga ku mukobwa witwa Nirere w’imyaka 19, nawe watewe inda agifite imyaka 17. Akomoka mu muryango wifashije kuko ababyeyi be bombi ni abakozi ba Leta, yatwaye inda, kubera ibyo yarebaga bitandukanye kuri televiziyo n’ahandi, hanyuma agira amatsiko yo kumenya uko bimera iyo umukobwa aryamanye n’umuhungu, abikorana n’umusore biganaga, kuko bigaga bataha hanze. Yaje kumenya ko yatwaye inda, ariko ntacyo uwo muhungu yari kumufasha kuko bose bari abanyeshuri. Nirere yaje kubyara impanga, ariko aza kugira ibyago abo bana bombi barapfa.

Inkuru ya Gatatu ivuga ku mukobwa witwa Mukamasabo w’imyaka 14 wigaga mu mwaka wa gatatu w’amashuri yisumbuye, watewe inda n’umusore wari ufite imyaka 21, wari urangije kwiga Kaminuza, ariko agakunda kuza iwabo, kuko ababyeyi ba Mukamasabo bari baramufashije mu myigire ye, bakamwishyurira. Mukamasabo yamufataga nk’umwe mu bagize umuryango we, ngo akamwita ‘Tonton’, bigatuma amwisanzuraho cyane. Uwo musore nawe ngo agakunda kumuha impano zitandukanye, rimwe aza kumuha utwenda yari yamuguriye nk’impano, amusaba ko yatwigera akamwereka niba tumubereye, ariko abikora ababyeyi badahari, maze muri uko kwigera imyenda, ahita amusambanya ndetse amutera inda.

Inkuru ya Kane, yo ivuga ku mukobwa witwa Murekatete w’imyaka 22 wari umudozi, kuko atashoboye gukomeza amashuri asanzwe. We ngo yivugira ko yatewe inda n’umusore wari ufite Butiki hafi y’aho yadoderaga, kubera ko yamugiriye impuhwe, bikarangira aryamanye nawe nubwo atari yabigambiriye. Uwo musore ngo yasabye Murekatete kumusura, ahageze amubwira ko yumva ameze nabi ku buryo, aramutse ataretse ngo baryamane, ashobora no gupfa. Murekatete ngo yahise amugirira impuhwe, arabyemera. Gusa nyuma yo kumenya ko yamuteye inda, uwo musore ngo yahise amwirengagiza, ntiyemera kugira ikintu na kimwe yamufasha.

Inkuru ya Gatanu ivuga ku mukobwa witwa Keza w’imyaka 16, we watewe inda nyuma yo gushukwa n’umuntu bamenyaniye kuri Facebook, hashira igihe bagatangira kujya bavugana kuri WhatsApp,noneho akaza kumusaba kujya kumusura. Keza ngo yarabyemeye, abeshya ababyeyi ko agiye gusura umuntu wo mu muryango, ariko birangira agiye kwisurira uwo musore bamenyaniye ku mbuga nkoranyambaga. Uwo musore yamuzimaniye Fanta irimo imiti ibiyobyabwenge, umukobwa arasinzira, birangira amusambanyije. Aho akangukiye asanga yaraye aho, atangira gusakuza yibaza uko byagenze, nyuma ngo umusore atangira kumubwira nabi, amubaza niba yari yaje kumusura azi ko nyirarume cyangwa se hari icyo bapfana kindi…Byaje kurangira Keza amenye ko yatwaye inda y’uwo musore.

Izo nkuru zose uko ari eshanu, zikubiye mu gitabo kimwe ‘Umushibuka’,igice cya mbere, ariko kizagira ibindi bice bikurikiraho, bizavuga uko ubuzima bwagenze nyuma y’uko guterwa inda zitateguwe.

Muhorakeye yanditse igitabo kivuga no ku rundi ruhande, bitewe n’uko hari ubwo abantu bibagirwa ko hari n’abasore cyangwa abagabo bahura n’ingaruka zo gutera inda zitateguwe, ndetse bikabaviramo ibibazo by’igihe kirekire.

Igitabo cya Kabiri yanditse yakise ‘Umutego mutindi’, ubusanzwe,ngo uwo ni umugani w’Ikinyarwanda uvuga ko umutego mutindi ushibukana nyirawo. Aho rero umwanditsi yashatse kuvuga ko mu basore cyangwa mu bagabo, harimo abashobora gutera inda abangavu bibwira ko nta ngaruka bibafiteho, ariko byazatinda bakisanga zabagezeho.

Mu Gitabo ‘Umutego mutindi’ harimo ubuhamya bw’umusore uri mu kigero cy’imyaka 30, wicuza kuba yarateye inda umunyeshuri mugenzi we mu gihe bari bakiga mu wa gatatu w’amashuri yisumbuye, maze umuryango wabimenya bigatuma atoroka akava mu gace bari batuyemo akajya kuba ahandi mu rwego rwo guhunga.

Uwo musore ngo ntiyigeze amenya niba umwana we yaravutse,cyangwa se ngo amenye amakuru y’uwo babyaranye uko byagenze,ku buryo ubu ngo yibwira ko atazashaka umugore mu gihe cyose ataramenya aho uwo mwana yabyaranye n’umunyeshuri biganaga aherereye.

Muri icyo gitabo kandi harimo inkuru y’umugabo w’imyaka 55, wagiye atera inda abangavu benshi, ku buryo abo we yamenye, ngo bagera ku 10. Muri abo bangavu ngo harimo abo yashukishaga lifuti kuri moto, abo yaguriraga impano zitandukanye. Uwo mugabo yaje gushaka umugore, babyarana abana 4, ariko umwana w’imfura wabo w’imfura ageze mu kigero cy’ubwangavu nawe arashukwa ndetse aterwa inda.

Ariko ikibazo gikomeye yagize, ni uko uwo mwana yari azi imyitwarire Se yagize yo kuba yarabyaye abana hirya no hino. Ibyo byatumaga atamwemerera kugira icyo amubaza ku myitwarire afite, kuko yahitaga amubwira ko nta rugero rwiza amufiteho nk’umubyeyi, birangira yisanze atagira ijambo mu bana be.

Muhorakeye avuga ko yifuza ko ibitabo bye byagera ku rubyiruko rwinshi cyane cyane mu mashuri, kubera ko ari ho urubyiruko rwinshi ruri, cyane ko ari rwo rurebwa n’ubutumwa bukubiye muri ibyo bitabo. Abantu bifuza kubigura, ubu babisanga ku nzu zigurisha ibitabo harimo Librairie Ikirezi muri Kigali na Librairie Caritas mu Karere ka Huye.

Umukinnyi w’Umunyarwanda Hakizimana Muhadjili wakiniye amakipe atandukanye yahishuye uko yasezerewe mu Irerero rya APR mbere yo gutangirira urugendo muri Etincelles FC y’iwabo i Rubavu, avuga ko Mukura VS ariyo yamugize uwo ariwe mu gihe nubwo atigeze akinira Aba-Rayons ariko bamukundaga.

Ibi yabigarutseho mu kiganiro cyihariye yagiranye na Kigali Today aho yavuze ko byose yabitangiriye mu Karere ka Rubavu iwabo aho yakinnye igihe gito mu irerero rya Bizumuremyi Radjab, ndetse mu bihe bitandukanye akajya akina muri Etincelles FC mu myitozo ahawemo umwanya n’abayitoza nka nyakwigendera Nduhirabandi AbdoulKarim na Bizimana Abdou ’Bekeni’ dore ko yari akiri muto.

Hakizimana Muhadjili mu gutangira urugendo rwe rwa ruhago yashoboraga gukomereza mu irererero rya APR FC yakinagamo umuvandimwe we Haruna Niyonzima ariko asezererwa rugikubita, aho avuga ko uyu mukuru atashoboraga no kumusunika kuko yatozwaga kugera ku byo yakoreye.

Ati"Mu gutoranya abajya mu irerero rya APR FC muri za 2009 nasezerewe mu ba mbere. Haruna ntacyo yamariye byo kunsunika, ikintu yakoraga kwari ukumpa ibikoresho ngo ntazitwaza ko nabibuze. Ikindi yamfasha ni ukuba twakorana imyitozo."

Nyuma yo kudatoranywa n’irerero rya APR FC Hakizimana Muhadjili yahise atangirira urugendo muri Etincelles FC yatozwaga na Sogonya Hamiss ’Kishi’ aho avuga ko umukino wa mbere we yakinnye wa shampiyona yabanje mu kibuga iyi kipe yari yakinnye na Marine FC anatsinda igitego.

Ati "Umukino wa mbere nakinnye nibuka nashyizwe mu kibuga ni uwa Marine FC nanabanjemo. Nari nsanzwe nkina ariko nsimbura gusa kuri uyu nibwo nabanjemo nkina nk’iminota 70. Nahise nsinda n’igitego ariko icyo ntabwo naryamye pe. Icyo gih muri Etincelles FC nahembwaga ibihumbi 70 Frw."

Nyuma yo kuva muri Etincelles FC, mu 2012 Hakizimana Muhadjili yasinye ikipe ya Kiyovu Sports imyaka ibiri ahamagawe na Kayiranga Baptiste wayitozaga nyuma yo kumubona neza mu mukino wari wahuje Etincelles na Rayon Sports kuri Kigali Pele Stadium.

Ati"Turi muri Etincelles FC batwemeye ibihumbi 100 Frw byo kwisuganya ariko ntibayaduha. Nyuma y’umukino twakinnye na Rayon Sports, Kayiranga Baptiste yarampamagaye ambwira ko anshaka yanshimye. Nabiganirijeho umuryango ariko nanjye nahsakaga kuza i Kigali. Kuko nta masezerano nari mfite muri Etincelles FC nahise ngenda."

Akigera muri Kiyovu Sports, Hakizimana Muhadjili yahakinanye n’abarimo Bokota Labama, Mutarambirwa Djabil n’abandi bari bakomeye ahamara imyaka ibiri ariko atabona umwanya uhagije wo gukina, gusa anagorwa n’ibibazo by’amakikoro yabaga ifite.

Ati" Nkiza ntabwo nabonaga umwanya cyane, ariko nkihangana. Nakinaga ku mwanya umwe na mukuru wanjye Djabil ariko igihe nabonaga umwanya nanjye narigaragaje. Mu mwaka wa kabiri umutoza Kanyankore Gilbert Yaounde aje natangiye kubona umwanya wo gukina ndetse nsoza neza."

Nyuma yo gusoza imyaka ibiri, mu 2014 Kiyovu Sports yashatse ko yongera amasezerano, Rayon Sports ariko abona ntaho yakina ahitamo kujya mu Karere ka Huye asinyira Mukura VS imyaka ibiri aho icyo gihe nabwo yari ajyanywe n’umutoza Baptiste Kayiranga, ajyayo ari nawe mukinnyi uhembwa amafaranga menshi.

Ati" Nsoze amasezerano muri Kiyovu Sports yashakaga ko mpaguma, na Rayon Sports inshaka ariko yo yari ifite abakinnyi bakomeye nka ba Cedric Amiss, Sina Jerome ntaho nakina kandi aribyo nkeneye. Mukura VS yaranshakaga impa amafaranga meza, ndetse ni njyewe bahembaga amafaranga menshi ibihumbi 200 Frw. Mpageze ntabwo nahise ntangira gukina binatuma abakinnyi bibaza uko mpembwa amafaranga menshi."

Muhadjili yakomeje avuga ko "ndanareba ndavuga nti hano i Kigali hari n’ubuyobobe, mpitamo kujya i Huye kugira ngo gukina mbishyireho umutima."

Hakizimana Muhadjili w’imyaka 32 avuga ko mu rugendo rwe rwose Mukura VS ariyo ashimira cyane kuko yamugize uwo ari we.

Ati "Ni ukuri kugeza ubu Mukura VS ndayubaha kuko kugeza ubu niyo yatumye mba umukinnyi ukomeye. Yatumye umuntu ukomeye wajya muri APR FC akaba ari umukinnyi ukina w’ingenzi. Ikindi niyo kipe yatumye mpamagarwa bwa mbere mu ikipe y’igihugu."

Ubwo yari mu mwaka we wa kabiri, Hakizimana Muhadjili avuga ko yatangiye gukorogana n’umutoza wa Mukura VS Okoko Godfroid bapfa ko yazaga i Kigali buri uko asoje umukino, ibihtu avuga ko we nta kazi yicaga.

Ati" Nashwanaga n’umutoza Okoko dupfa ko umukino urangiye nkaza i Kigali ari naho bahereye navuga ko nkorogana ariko ntabwo nasibaga imyitozo nubwo we yumvaga ntagenda. I Huye nari umuntu ukomeye cyane, abantu bambwira ngo uze dusangire, kuko nubwo nashwanaga n’umutoza ariko abaturage ntabwo babyumvaga."

Nubwo hari igihe bitagendaga neza hamwe n’umutoza ariko niwo mwaka Hakizimana Muhadjili yayoboyemo abatsinze ibitego byinshi muri shampiyona 2016-2017 afite 16 bitarimo penaliti aho avuga ko kubigeraho, yabifashijwemo no guhinduka.

Ati" Icyamfashije ni njyewe, nari mpindutse, mpinduye imyumvire kuko muri uwo mwaka baranampagaritse. Umwaka nari nawinjiyemo mvuga ko ariwo wa nyuma i Huye.Nakomeje kuza i Kigali umutoza arabyakira kuko natangaga umusaruro, yewe ageraho akajya anampamagara ngo nze mve antekere."

Muri uyu mwaka wa nyuma muri Mukura VS, Hakizimana Muhadjili na bagenzi be bafashije Mukura VS gusoreza ku mwanya wa kabiri muri shampiyona ahita asinyirika ikipe ya APR FC mu mpeshyi ya 2016.

Ubutaka atuyeho yabuguze mu mafaranga yahawe na AS Kigali mu 2016 nubwo yahise akinira APR FC......

Mu mpera z’umwaka w’imikino Hakizimana Muhadjili yahamagawe n’umutoza Eric Nshimiyimana watozaga AS Kigali bamuha n’amafaranga ariko muri uwo mwaka akinira APR FC mu buryo avuga ko we atazi.

Ati" Njyewe nasinye muri AS Kigali kuko umutoza Eric yarampamagaye ambwira ko anshaka bahita bampa amafaranga shampiyona itari yarangira. Mushiki wanjye yahise ampamagara ambwira kugura ubuta hano ntuye Nyamata. Ntabwo nzi uko byagenze ngo ntakinira AS Kigali kuko nabwiye APR FC ko nasinye bo barivuganira, bambwira kujya gutangira imyitozo muri APR FC gusa, bavuga ko ibindi bazabyirangiriza."

Muri APR FC Hakizimana Muhadjili avuga ko " Nari ngeze ku nzozi zanjye kuko iza mbere kwari ugukinira Amavubi kandi narabigezeho muri Mukura VS. Icyari gisigaye kwari ugukina hanze y’u Rwanda." Muri APR FC Hakizimana Muhadjili yahakinnye imyaka itatu kugeza mu mpeshyi ya 2019 ubwo yerekezaga muri Leta Zunze Ubumwe z’Abarabu mu ikipe ya Emirates Club aguzwe asaga ibihumbi 300 by’Amadolari ku mwaka umwe yari asigaranye ku myaka ibiri yari yarongereye mu 2018.

Muri APR FC Hakizimana yahatwaye igikombe kimwe cya shampiyona 2017-2018 umwaka yahembwemo nk’umukinnnyi mwiza w’umwaka akanarushanwa igitego kimwe na Ndarusanze Jean Claude watsinze byinshi, Igikombe cy’Amahoro 2016-2017 n’andi marushanwa atandukanye.

Ubwo yari mu ikipe ya APR FC avuga ko atazibagirwa imikino iri yabahuje na Rayon Sports harimo uwo yatsinzemo igitego kimwe akabona ikarita itukura ariko bikarangira bagenze be bamurwaniye bagatahana inteinzi, ndetse n’uwo yatsinzemo uyu mukeba ibitego bibiri. Uyu mugabo ariko avuga ko mu mwaka we wa nyuma atazibagirwa batwarwa igikombe cya shampiyona 2018-2019 na Rayon Sports nyamara barigeze kuyirusha amanota 13.

Muhadjili avuga ko muri uyu mukeba bahanganaga abantu baho bamukundaga cyane kuko nta kibazo yagiraga yahuye na bamwe muri bo, yewe ko hari n’abamuguriraga ibyo kurya mu bihe bitandukanye.

Ati "Muri Rayon Sports umugabo wakunze kubona ubushobozi bwanjye ni Gacinya kuko na mbere mu 2014 niwe wari wamvugishije. N’igihe nakinaga muri APR FC, abantu bo muri Rayon Sports barankundaga kuko hari n’igihe banampahiraga rwose, baranyikundiraga gusa,kuko nta kibazo nagiraga nahuye n’umurayon. Bashobora kuba ari uko nabaryoherezaga mu kibuga kuko mu kubiga haba.hanakenewe kuryoshya bitari ubu ikipe itsinda ukabura umuntu wacenga undi, kuko iyo twahuraga narabatsindaga."

Nyuma yo kujya muri Leta Zunze Ubumwe z’Abarabu mu 2019, ntabwo yamazeyo igihe kirekire dore ko mu 2020 yasinyiye AS Kigali umwaka umwe maze mu 2022 asinyira Al-Kholood Club yakinaga muri shampiyona y’icyiciro cya kabiri muri Saudi yasinyiye amasezerano y’umwaka umwe icyo gihe.

Aha yari yagiye mu mpeshyi ya 2022 naho ntabwo yatinzeyo kuko muri Mutarama 2023 yahise agaruka mu Rwanda asinyira Police FC yagiye yongerera amasezerano kugeza ayivugemo mu Ukwakira 2025 ku bwumvikane bw’impande zombi aho avuga ko yayihaye byose yari afite.

Ati "Police FC ni ikipe nziza kandi ntekereza ko twayihaye ibyo twari dufite kuko hari umwaka twatwaye Igikombe cy’Amahoro(2024), Super Cup 2024, Igikomba cya Polisi zo mu Karere, turanasohoka."

Nyuma yo gutandukana na Police FC , muri Mutarama 2026 yasinyiye ikipe ya Nairobi United yo muri Kenya nayo yakiniye amezi atandatu yonyine bagatandukana mu mpeshyi y’uyu mwaka aho kugeza ubu nta kipe afite. Amashakiro atandukanye agaragaza ko kuva muri Werurwe 2016, Hakizimana Muhadjili yakiniye Amavubi imikino 33 yatsinzemo ibitego birindwi byonyine.

Ku munsi mpuzamahanga w’itangazamkuru, abanyamakuru 31 bahawe ibihembo kubera inkuru bakoze ku bibazo by’iterambere, mu gihe ibiganiro byagarutse ku ruhare rw’itangazamakuru mu guteza imbere ubucuruzi muri Afurika.

Uyu muhango wabereye muri Camp Kigali ku wa Gatanu, wahuje abanyamakuru, abayobozi ba Leta, ibigo by’itangazamakuru n’abafatanyabikorwa mu iterambere, mu rwego rwo kwizihiza Umunsi wa Afurika wahariwe amakuru (Africa Day of Information) no gutanga ibihembo ngarukamwaka by’itangazamakuru.

Ikiganiro mpaka cyatangije uyu muhango cyibanze ku ruhare rw’itangazamakuru mu guteza imbere ubucuruzi, hibandwa ku Isoko Rusange rya Afurika (African Continental Free Trade Area – AfCFTA), gahunda igamije guhuza ibihugu bya Afurika ku isoko rimwe no kongera ubucuruzi hagati yabyo.

Abitabiriye ikiganiro bagarutse ku bunararibonye bw’u Rwanda muri iyi gahunda, burimo kohereza icyayi n’ikawa muri Ghana binyuze muri gahunda yo korohereza ubucuruzi hagati y’ibihugu bya Afurika (Guided Trade Initiative), yatangiye mu 2021.

Bagaragaje ko ibitangazamakuru byo muri Afurika bikwiye kongera imbaraga mu gusobanurira abaturage amahirwe n’imbogamizi biri mu bucuruzi bwambukiranya imipaka y’ibihugu by’Afurika, by’umwihariko urubyiruko rufite imishinga y’ubucuruzi rwifuza kwagurira ibikorwa byarwo ku masoko yo mu karere.

Abitabiriye ikiganiro banagaragaje ko abanyamakuru bakwiye kurenga ku gutangaza gusa ibikorwa n’imihango by’abayobozi, ahubwo bakibanda ku nkuru zigaragaza ubuzima bw’abaturage, zisobanura uko politiki n’amategeko agenga ubucuruzi bigira ingaruka ku bacuruzi n’abaturage muri rusange.

Abatanze ibitekerezo bavuze kandi ko kugira ngo ibihugu bya Afurika byongere ubucuruzi hagati yabyo no kugabanya kwishingikiriza ku bicuruzwa bitumizwa hanze yayo, hakenewe kongera ubushobozi bw’inganda zikora ibicuruzwa imbere mu bihugu.

Ibi biganiro byakurikiwe n’itangwa ry’ibihembo by’abanyamakuru bahize abandi, byateguwe n’Ishyirahamwe ry’Abanyamakuru mu Rwanda (Rwanda Journalists Association), ku bufatanye n’Urwego rw’Igihugu rw’Imiyoborere (RGB), Urwego rw’Abanyamakuru Bigenzura (RMC), Ishyirahamwe ry’Abanyamakuru b’Abagore mu Rwanda n’abandi bafatanyabikorwa.

Akanama nkemurampaka kasuzumye inkuru 125, gatoranyamo 35 zari zujuje ibisabwa kugira ngo zihatanire ibihembo. Inkuru zasuzumwaga hashingiwe ku kamaro kazo, ireme ry’ikusanyamakuru, ubunyamwuga, imyitwarire mbonezamwuga, impinduka zateje, imikoreshereze y’ururimi n’uburyo zateguwe zikanashyikirizwa abasomyi cyangwa abazumva.

Dan Ngabonziza, Perezida w’Ishyirahamwe ry’Abanyamakuru mu Rwanda akaba n’Umuyobozi Mukuru wa Kigali Today Ltd, ni we wafunguye ku mugaragaro uyu muhango.

Yashimiye abanyamakuru ubwitange, ubunyangamugayo n’umurava bagaragaza mu kazi kabo, avuga ko itangazamakuru rifite inshingano zo guha abaturage ijambo no kugira uruhare mu iterambere ry’imiryango babarizwamo.

Joseph Hakuzwumuremyi ukorera Umuryango News na Umuryango TV ni we watangajwe nk’Umunyamakuru w’Umwaka, ahabwa igihembo cya miliyoni zirindwi z’amafaranga y’u Rwanda (miliyoni 7 Frw).

Mutangana Emmanuel wa TOP AFRICA NEWS yegukanye igihembo cy’inkuru mbarankuru nziza kurusha izindi (Best Feature Story), abikesha inkuru yise “Life After Relocation: Are Mpazi Residents Adjusting to Their New Homes in Kigali?” (Ubuzima nyuma yo kwimurwa: Ese abari batuye i Mpazi bamenyereye ingo nshya batujwemo i Kigali?).

Iyo nkuru yasohotse muri Werurwe 2026, ikaba yaragarukaga ku buzima bw’abaturage bimuriwe mu mazu mashya i Kigali n’uko bari bamerewe nyuma yo kwimurwa.

Radiyo Salus ya Kaminuza y’u Rwanda, ikoresha abanyeshuri biga itangazamakuru, ni yo yahawe ibihembo byinshi kurusha ibindi mu bigo by’itangazamakuru, aho yegukanye ibihembo bitanu mu byiciro birimo inkuru z’ubutabera n’imikorere y’inkiko, siporo, ubucuruzi, uburinganire n’uruhare rw’ibyiciro bitandukanye by’abaturage, imiyoborere myiza no gutanga serivisi.

Bunani Janvier wa Radio Ishingiro yahawe igihembo mu cyiciro cy’inkuru ku buzima n’ubuzima rusange, mu gihe Ishimwe Iradukunda Patience w’Ikigo cy’Igihugu cy’Itangazamakuru (RBA) yegukanye igihembo mu cyiciro cy’inkuru ku ikoranabuhanga mu itumanaho (ICT) n’itumanaho.

Charles Nyandwi wa The New Times yahawe igihembo cy’inkuru ku binyabiziga bikoresha amashanyarazi (e-mobility).

Mu cyiciro cy’inkuru ku iterambere ry’umwana, ibihembo byahawe Muhire Aphrodice w’Ikigo cy’Igihugu cy’Itangazamakuru (RBA), Youssuf Ubonabagenda wa Radio/TV 10 na Micomyiza Balinda Fidele wa Imvaho Nshya.

Umutoni Marie Jeanne wa KT Radio yahawe igihembo mu cyiciro cy’inkuru ku ihohoterwa rishingiye ku gitsina n’ihohoterwa rikorerwa abana. Ni ku nshuro ya kabiri ahabwa iki gihembo. Umutoni ni umunyamakuru n’umushyushyarugamba kuri KT Radio, imwe muri serivisi za Kigali Today Ltd.

Abandi begukanye ibihembo barimo Mbonimpa Népomuscène wa Radio Isangano, Rosine Ntawurikura wa Radio Salus na David Ndagijimana wa Radio Ishingiro.

Ibihembo byatanzwe mu byiciro bitandukanye birimo inkuru ku buzima, iterambere ry’umwana, amazi n’isuku, ikoranabuhanga, siporo, uburinganire n’uruhare rw’ibyiciro bitandukanye by’abaturage, imiyoborere myiza no gutanga serivisi, ubutabera, ubucuruzi, ibinyabiziga bikoresha amashanyarazi, ihohoterwa rishingiye ku gitsina n’ihohoterwa rikorerwa abana, ndetse n’imisoro no gukusanya umutungo w’imbere mu gihugu.

Martin Nyirijabo, umwe mu bagize akanama nkemurampaka, yavuze ko impinduka inkuru ziteza mu muryango nyarwanda n’akamaro kazo ari bimwe mu by’ingenzi byashingiweho mu gusuzuma inkuru zahatanaga.

Mu gusoza uyu muhango, Ambasaderi Nkurunziza Williams yasabye abanyamakuru gukomeza kubahiriza amahame mbonezamwuga yo mu itangazamakuru, banifashisha ikoranabuhanga rishya mu gufasha abaturage gusobanukirwa politiki n’ingamba za Leta, gushyigikira iterambere ry’ubukungu no guteza imbere imikoranire n’ubufatanye hagati y’ibihugu bya Afurika.

Uyu muhango wagaragaje uruhare rw’itangazamakuru mu iterambere, unashimira abanyamakuru bakoze inkuru zigamije gufasha abaturage gusobanukirwa bimwe mu bibazo by’ingenzi birebana n’imibereho n’ubukungu by’u Rwanda na Afurika muri rusange.

Hashize iminsi humvikana umwuka utari mwiza hagati ya Muyoboke Alex, usanzwe afasha The Ben mu bikorwa bya muzika, na Nduwimana Jean Paul uzwi nka Noopja Noopja, inshuti magara y’uyu muhanzi. Amakuru avuga ko kimwe mu byatumye umubano w’aba bombi urushaho kuzamo agatotsi ari urugendo The Ben yagiriye muri Uganda.

The Ben yari yatumiwe mu gitaramo cyo kwizihiza imyaka 10 ishize Comedy Store itangiye, igikorwa gitegurwa n’umunyarwenya w’Umunya-Uganda, Alex Muhangi ku wa 30 Ukwakira 2026.

Mbere y’urwo rugendo, byari biteganyijwe ko The Ben azaherekezwa n’abantu barindwi, ariko umubare w’abagombaga kujyana na we uza kugabanywa ugera kuri bane gusa, bisabwe n’uwateguye icyo gitaramo.

Bivugwa ko Alex Muhangi yamenyesheje The Ben n’abantu bamufashaga mu rugendo n’igitaramo yari afite muri Uganda di bari mu ikipe ko mu matike arindwi bari bamusabye yabashije kubona ane gusa.

Aha rero byahise bisaba ko habaho guhitamo abantu bagombaga. Ariko kandi hari amakuru y’uko nubwo Noopja yagaragaje ko uwatumye ibyangombwa bye bisigara ari Alex Muyoboke hari amakuru ahamya ko Muyoboke mu byo yari yaroherereje Muhangi harimo na Passport ya Noopja.

Muri iryo hinduka, Noopja yasigaye mu bantu batagombaga kujyana na The Ben muri Uganda, ibintu bivugwa ko byarushijeho kuzamura umwuka mubi hagati ye na Muyoboke Alex. Ndetse bikavugwa ko The Ben ubwe ariwe wahisemo abagombaga kujyana nawe.

Ni mugihe abandi bavuga ko Muyoboke Alex, wari ufite uruhare mu gutegura gahunda z’urugendo rwa The Ben, ari we waba waragize uruhare mu gutuma Noopja atajyana n’uyu muhanzi bikazamura umwuka mubi hagati y’aba bombi.

Mu gushaka igisubizo cy’uburyo Noopja atasigara, The Ben yaje gufata icyemezo cyo kumwishyurira urugendo n’aho yagombaga gucimbika muri hoteli, kugira ngo adasigara nyamara yarari ku rutonde rw’abagombaga kumuhereza muri Uganda.

Noopja ubwo yageraga muri Uganda, bivugwa ko atari yishimiye Alex Muyoboke, kubera uburyo yamufashe mu myiteguro y’urugendo kuko ngo byageze aho Noopja yandikira Muyoboke ubutumwa, amugaragariza ko yamuhemukiye kandi ko na we azamwishyura.

Noopja na Muyoboke Alex ni abantu bamaze igihe mu ruganda rw’imyidagaduro mu Rwanda, aho bagiye bagira uruhare mu bikorwa bitandukanye by’abahanzi. Icyakora, ibyabaye mu rugendo rwa Uganda byongeye kugaragaza ko hari ibibazo bitarakemuka hagati yabo.

Kugeza ubu, biracyari ikibazo cyakuruye impaka ku mubano w’aba bombi n’uruhare rwabo mu bikorwa bya The Ben nubwo aya makimbirane hagati y’aba bombi atari aya vuba nk’uko aba hafi y’aba bombi babivuga.

Madamu Jeannette Kagame, yari mu bashyitsi batumiwe mu bukwe bwa Charlene Ruto na Isaya Yunge bwabereye mu Mujyi wa Mwanza muri Tanzania kuri uyu wa Gatanu tariki 06 Ugushyingo 2026.

Charlene Ruto, umukobwa wa Perezida wa Kenya, William Ruto, yasezeranye na Isaya Yunge mu birori byitabiriwe n’abashyitsi batandukanye barimo abayobozi n’abandi bantu bakomeye.

Perezida wa Kenya, William Ruto, yagaragaje ibyishimo n’ishema yatewe no kubona umukobwa we, Charlene Ruto, ashinga urugo na Isaya Yunge, mu bukwe bwabereye i Mwanza muri Tanzania.

Mu butumwa yandikiye umukobwa we, Ruto yavuze ko nta kindi gishimisha umubyeyi nko kubona umukobwa we abona urukundo, ibyishimo n’umuntu bazafatanya kubaka ejo hazaza.

Yavuze ko yishimira urugendo Charlene yagize kuva akiri umwana muto ubwo yamukuriraga mu maboko, kugeza ubwo abaye umugore uhamye, urangwa n’impuhwe n’izindi ndangagaciro.

Perezida Ruto yagize ati: “Mu gihe wowe na Yunge mwahanaga indahiro zo gushyingiranwa muri Mwanza muri Tanzania, umutima wanjye wari wuzuye ishema, gushimira Imana n’ibyishimo bikomeye.”

Yongeye kugaragaza ko kubona umukobwa we atangira urugendo rushya rw’ubuzima ari kimwe mu bihe by’agaciro gakomeye kuri we nk’umubyeyi.

Charlene Ruto na Isaya Yunge babanje gusezerana imbere y’imiryango yabo mu muhango gakondo w’Abanyakenya bo mu bwoko bw’Abakalenjin uzwi nka ‘Koito’, uhuza imihango yo gusaba no gutanga inkwano. Uyu muhango wabaye ku wa 8 Kanama 2026, ubera mu rugo rwa Perezida William Ruto ruzwi nka Intonna Heritage Farm, ruherereye i Kilgoris mu Ntara ya Narok.

Mbere y’ubukwe bwabereye muri Tanzania uyu munsi, Charlene Ruto yanateguye igikorwa cy’amasengesho yo kumusabira umugisha mbere yo gutangira ubuzima bw’urushako, kizwi nka ‘Mother’s Blessing’. Iki gikorwa cyitabiriwe na nyina, Madamu Rachel Ruto, hamwe n’abandi bagore bakuru bo mu muryango, basengera Charlene bamusabira umugisha n’urugendo rwiza mu buzima bushya agiye gutangira.

Nyuma y’ayo masengesho, hakurikiyeho ibirori byo gusezera ku buzima bw’ubukumi (Bridal Shower) byabereye i Nairobi, mbere y’uko ubukwe nyirizina bubera i Mwanza muri Tanzania.

Musengamana Rosette, atuye ku Gisozi mu Mujyi wa Kigali, afite umuryango w’abantu 6, akaba yaratangiye gukoresha abakozi kuva yashinga urugo mu 2000.

Gusa, icyo gihe ngo byari byiza kuko hari abakozi bo mu ngo baza bakamara igihe, umwe akaba yamara nk’imyaka itanu cyangwa irenga, akabona gutaha, agashaka undi nawe akaba yamara indi myaka bityo bityo.

Ubu amaze imyaka 8 adakoresha abakozi bakora baba mu rugo, kubera ko yari asigaye ashaka umukozi, akamara ukwezi kumwe akagenda, undi yaza akamara iminsi itatu, cyangwa se akaba Yamara n’umunsi umwe bugacya avuga ko atahakunze, akagenda.

Yagize ati,” Ubu hashize imyaka 8, nararetse burundu gukoresha abakozi baba mu ngo, kubera ko byari bimaze kuntesha umutwe. Njya kubareka burundu, umwana wanjye muto yari afite imyaka 9. Nari naramenyereye gukoresha abakobwa baza tukamara imyaka itanu cyangwa irenga, uwa nyuma muri abo twatindanye agiye, natangiye kugira ibibazo hakaza bahita bagenda, umwe yaraje amara ukwezi ati nagize ibyago ndatashye sinzagaruka, undi aje amara iminsi itatu ati sinkunda kurara mu nzu yo hanze ndatashye, undi aje amara umunsi umwe bucya ataha, kuva ubwo niyemeza kutazongera kubashaka”.

Ubu Musengamana, ngo akoresha abakozi baza bagakora imirimo runaka hanyuma bagataha. Abo bakora bataha, ngo ntibagorana cyane nk’ababa mu ngo iminsi yose, kubera ko baraza niba ari ukumesa imyenda bakamesa, ibyo byarangira bakitahira. Niba ari ugukora isuku mu busitani baraza bagakora ibyo bagataha.Mbese abo bakora bataha ngo bamworohereza ubuzima kuko baraza bagakora icyo yabahamagariye gusa bakitahira.

Yagize ati,” Muri iyo myaka ishize ndetse gukoresha abakozi bo mu rugo bahoraho, nabonye harimo ibyiza byinshi nubwo nzi ko bigoye ku bantu bagifite abana bato.Buriya abenshi muri bo, bagira ukuntu bangiza cyane, ariko ubu kubera ko ari njyewe ubyikorera, njya guhaha bijyanye n’abantu mfite mu rugo, iyo nteka, nteka bijyanye n’umubare w’abantu bahari ngateka ibishira, kandi abakozi wasanga batetse byinshi, hagasigara ibyo bamena mu mifuka.Gaz ndayitekesha nkarambirwa, ariko icyo gihe nkibakoresha ntiyamaraga Kabiri.Kwikorera akazi ko mu rugo birananiza ku mubiri kuko bisaba imbaraga n’umwanya, ariko mu mutwe uba wumva umeze neza, nta muntu wirirwa atuma uvuga nabi, umubwiriza, n’ibindi. Ubu abana barakuze bose, bari no mu kazi ariko bambwiye ko rwose tuzakomeza kwikorera akazi kuko nta mukozi bashaka uza kuba mu rugo…”.

Umukozi uza gufasha mu byo kumesa cyangwa no gutunganya mu busitani kwa Musengamana, ngo aza inshuro eshatu mu kwezi, hanyuma akamuhemba 40.000 by’Amafaranga y’u Rwanda, kandi yumva ari igiciro cyiza, kubera ko abyumvikanaho nawe, bijyanye n’akazi aba yakoze.

Mukamwezi Chantal, atuye muri Kimironko, afite abana babiri bakiri bato, we bimusaba kuba afite abakozi bo mu rugo babiri bakora baba mu rugo, kuko we afite akazi akora gatuma agenda mu gitonda akagaruka ku mugoroba. Abana bafite umwe afite imyaka 3, umuto afite umwaka 1.

Umukozi umwe w’umuhungu ashinzwe guteka, n’indi mirimo yo mu rugo harimo no koza imodoka mu gitondo, mu gihe uw’umukobwa ashinzwe kwita ku bana,harimo kubagaburira, kubamesera n’ibindi.

Yagize ati,” Abakozi bo mu ngo muri iki gihe babaye imari pe, njyewe nkoresha babiri kuko mfite abana bato kandi sinirirwa mu rugo. Ukora imirimo yo mu gikoni w’umuhungu muhemba 50.000Frw ku kwezi, naho umukobwa urera abana, nkamuhemba 35. 000 ku kwezi. Muri rusange,nsohora 85.000Frw ku kwezi agenewe abakozi. Kandi buriya no kubatunga ubwabyo birahenda, kuko ibyo bakoresha byose mu rugo, ni njyewe ubigura.Njyewe ntibyanyorohera kubaho nta mukozi, kubera ko ubwo akazi kanjye kahita gahagarara.Gusa bisigaye bigoye, yaba amafaranga bahembwa yabaye menshi, ariko noneho no kuboneka ntibakiboneka nk’uko byari bimeze mbere”.

Kamanzi Jacky, atuye mu Karere ka Kicukiro, afite umugabo n’abana batatu, umwana muto afite imyaka 6, yaba we n’umugabo we, ntabwo birirwa mu rugo, bazinduka bajya ku kazi, kandi n’abana babo bose ngo biga ku mashuri birirwayo bagataha saa kumi z’umugoroba. Nyuma yo kubona ko nta muntu uba uri mu rugo, ngo bahisemo gukoresha umukozi wo mu rugo uza buri munsi, ariko agataha nimugoroba amaze gutegura amafunguro y’ijoro.

Yagize ati, “ Twararebye dusanga nta mpamvu, yo gushaka uriya mukozi uba mu rugo ku buryo buhoraho, kubera ko nta muntu wirirwa mu rugo, yaba njyewe simpiriwa, yaba abana na papa wabo twese tuzinduka tugenda, ubwo mu gitondo nzinduka ntegura abana, tukabasiga ku ishuri tugakomeza ku kazi. Uwo nashatse ukora ariko agataha, aza saa moya za mu gitondo agataha saa kumi n’ebyiri z’umugoroba, ataha hafi y’aho dutuye, ntabwo ari kure. Muhemba 60.000 Frw ku kwezi, ariko hari nubwo njya nyuzamo nkamuha icyo nakwita nk’agahimbazamusyi, bitewe n’uko mbona akazi kagenze neza, njya nyuzamo nkabikora, nubwo ntavuga ngo ni ku buryo buhoraho”.
Kamanzi avuga ko iyo urebye ayo mafaranga yishyura uwo mukozi umufasha nubwo akora ataha,ubona ari menshi, ariko nanone wareba uko ibiciro bisigaye bimeze ku masoko, ukabona ko atari menshi cyane. Nk’uwo umukorera, ngo ni umubyeyi ufite umwana agomba kwitaho, bivuze ko aba agomba guhaha muri ayo mafaranga no kwita ku mwana we, n’ibindi bikenerwa mu buzima bwa buri munsi.

Yagize ati, “ Ubuzima bwarahenze, ku buryo n’ayo mafaranga duha aba bantu badufasha mu kazi ko mu rugo ubara ukabona ni macye, ahubwo bibaye bikunda twayongera, ahubwo ikibazo ni uko natwe ubushobozi buba butari bwinshi. Nonese ibi dukenera mu ngo nabo babikenera byose, urumva biba byoroshye! Gusa baradufasha cyane, turabakeneye, nubwo amafaranga yo kubahemba yakomeza kwiyongera tuzakomeza kubashaka. Buriya mu rugo haba akazi kenshi biragoye ko twakikorera ngo tuzabone n’uko tujya gushaka amafaranga. Ahubwo ubu ikibazo gihari kinakomeye, ni uko batakiboneka cyane. Cyera wasangaga udashobora gushaka umukozi wo mu rugo ngo umare iminsi ibiri utaramubona, ariko ubu wamara n’icyumweru, ushakisha hose, yaza bugacya agenda, mbese bisigaye bigoye…”.

Amariba y’Ubukunzi

Mu Mariba ya Bukunzi ni ahantu hafite amateka akomeye, kuko ari ho Umwami Ndagano n’abandi bami b’u Bukunzi bakoreraga imihango yo kuvuba imvu mbere y’umwaduko w’abazungu.

Ahitwa mu Mariba ya Bukunzi ni ho hari ivubiro rya Ndagano wategekaga u Bukunzi ku mwaduko w’abazungu. Bukunzi yari iherereye mu Majyepfo y’Uburengerazuba bw’u Rwanda, ihana imbibi n’uturere tw’u Busozo, i Cyesha, Impara, na Biru ndetse n’igihugu cy’u Burundi.

U Rwanda rwigarurira i Kinyaga mu kinyejana cya 18, u Bukunzi bwari mu gice cyafashwe n’umutwe w’ingabo z’Impara, ari na cyo cyatumye aho hantu hose hitwa Impara.

Mu mpera z’icyo kinyejana, Umwami Kigeri III Ndabarasa yategetse umutware w’Impara, Rwanteri, kugabira u Bukunzi umuvubyi witwaga Kija. Kuva ubwo u Bukunzi bwabaye impugu yigenga itegekwa n’Abami b’Abavubyi bakomoka kuri Kija, bagatura ikoro umwami w’u Rwanda ndetse n’umutware w’Impara.

Abanditsi b’amateka bavuga ko Kija yageze mu Bukunzi akomotse i Rwingi hakurya ya Rusizi. Kubera ubuhanga yari afite bwo kuvuba imvura, uwo muvubyi ntiyatinze kumenyekana no kuba ikirangirire mu Rwanda. Umwami amumenye amugabira u Bukunzi kugira ngo ajye amuvubira imvura igihe yabuze.

Uko imigenderanire hagati y’Abami b’u Rwanda n’ab’u Bukunzi yarushagaho kuba myiza, abami b’u Rwanda babagabiraga indi misozi, u Bukunzi buraguka buba impugu nini igizwe n’imisozi ya Nyamubembe, Mutare, Nkungu, Nyakabuye, Karambo, Mwezi, Karengera, Kanyinya, Gitambi, Cyingwa, Rubona, Kaboza, Mahonga, Cyimpundu, Kigurwe, Mwiyando, Mubori, Rwintare, Rurama, Wanyangura, Rwinkuba, Kibazi, Gaseke, Matyazo na Rwabidege.

Abatware ndetse n’umwami w’u Rwanda baturaga Abami bo mu Bukunzi kugira ngo babagushirize imvura mu Gihugu. Buri gihe uko umwami asabye imvura ikagwa, yahaga umuvubyi inka nibura eshanu ndetse n’impfizi yazo.

Uretse kuvuba imvura, abami bo mu Bukunzi ngo bari bafite ububasha budasanzwe bwo kwirukana inzige n’utundi dukoko twangiza imyaka, bakarumbura imirima, bakavura inka ndetse bagatuma zigira imitavu myiza.

Kuva u Bukunzi bubaye impugu yigenga kugeza igihe yavaniweho n’abakoroni b’Ababirigi mu w’1925, yategetswe n’Abami barindwi kandi bose bari Abavubyi. Abo ni Kija I Gisuma, Ngoga, Kabeja, Ruzigamanzi, Kija II, Ndagano Ruhagata na Ngoga Bihigimondo.

Buri gihe uko umwami w’u Rwanda yatangaga hakima undi, impugu y’u Bukunzi yatangaga abantu babiri bagapfa, bakaba ‘imisego y’umwami’. Hatangwaga umuhungu n’umukobwa, umuhungu akajugunywa mu gishanga cya Nyagafunzo kiri hafi yo ku Karambo, naho umurambo w’umukobwa bakawohereza i Bumbogo.

Umwami Ruganzu II Ndori ngo ni we wategetse abanyabukunzi kujya batanga imisego y’umwami. Umunsi umwe Ruganzu arambagira Igihugu, yageze mu Bugarama imwe mu mpfizi ze iva mu zindi irarorongotana igera ku mugezi w’amashyuza. Abacuku ni ukuvuga abo mu muryango w’Abacuku bayibonye barayifata. Ruganzu yakurikiye ikirari cyayo, ageze aho asanga barangije kuyibaga.

Abasaba ku nyama zayo, izo bamuhaye azitunga ku icumu rye, azamuka iya Bukunzi. Ageze i Nyamubembe, ahura n’umugabo wo mu bwoko bw’Abayombo, aramuhagarika amwaka za nyama.

Ruganzu abonye ibimubayeho ariyamira ati: « Mwa banyabukunzi mwe, mugize kumbagira impfizi, none munyaze n’inyama zayo”! Ruganzu arumirwa, ngo ni ko kuvuga ati: « Uko umwami yimye i Rwanda, mujye mutanga igitambo cy’umukobwa w’Umucuku n’umuhungu w’Umuyombo”. Ngiyo inkomoko y’imisego y’umwami yaturukaga mu Bukunzi!

Mu myaka ya nyuma y’ingoma y’ u Bukunzi, uwamenyekanye cyane ni umugabekazi Nyirandakunze. Uyu mugabekazi yari umugore wa Ndagano, akaba nyina wa Ngoga Bihigimondo, umwami wa nyuma wa Bukunzi. Nyirandakunze yavukaga mu Busozo, akaba igishegabo, ndetse ngo ni we wategekeraga umuhungu we.

Nk’uko bivugwa n’abatuye ahahoze ari mu Bukunzi ndetse barimo n’Umushambo witwa Bazakiruru Innocent ukomoka kuri Ndagano, ngo Ndagano yubatse inzu nziza cyane y’umuratwa, ifite igisenge kiboshye nk’ikibo, ashaka kuyirongoreramo undi mugore kuko yabonaga Nyirandakunze ari igishegabo gikabije.

Umwamikazi agira ishyari aritewe n’uko agiye guharikwa, ndetse ababazwa n’iyo nzu atazaturamo. Ikindi kandi na we yashakaga ko umuhungu we ari we uzasimbura se ku ngoma y’u Bukunzi. Ibyo byose ngo byatumye acisha amarozi, yica Ndagano akiri muto. Bavuga ko yamutunze inkaka y’ingona ikamukenya.

Nyuma y’urupfu rwa Ndagano rwabaye ku wa 30 Werurwe 1923 Nyirandakunze yimukiye muri ya nzu y’umuratwa, yimana ingoma n’umuhungu we Ngoga Bihigimondo. Kuko Ngoga yari akiri muto, yategekerwaga na nyina hamwe na se wabo witwaga Bigirumwera. Ubutegetsi bw’abakoroni b’Ababirigi bwafataga ubwami bwa Bukunzi nk’ubwigometse kuko bwanze kubayoboka ngo butange imisoro n’abantu bo gukora imirimo ya Teritwari. Ibyo byatumye Adiminisitarateri wa Teritwari ya Cyangugu witwaga Bwana Keyser ategura igitero cyo guhirika ingoma y’u Bukunzi.

Bigirumwera amenye ko u Bukunzi bugiye guterwa yasabye Padiri mukuru wa Mibirizi witwaga P.Knoll kumuhuza n’Ababirigi, arabikora ariko biranga biba iby’ubusa.

Ubutegetsi bw’Ababirigi bufatanyije na Rwagataraka wategekaga i Kinyaga bwagabye ibitero bitatu mu Bukunzi. Icya mbere cyagabwe muri Mata 1923, kigabwa n’abasirikare boherejwe na Keyser; kiratsindwa. Icya kabiri cyagabwe n’ingabo zoherejwe na Adiminisitarateri Fiolle tariki 12-14 Werurwe 1924, i Bwami barahunga.

Icyo gihe ngo Nyirandakunze yahungiye mu ishyamba cyimeza rya Cyamudongo aribamo umwaka wose. Iryo shyamba Nyirandakunze yahungiyemo ubu ni igice cya Pariki y’Igihugu ya Nyungwe, ariko abaturage barituriye baryita Ishyamba rya Nyirandakunze cyangwa mu Ryanyirandakunze.

Igitero cya nyuma ari na cyo cyatsinze u Bukunzi cyagabwe tariki 09 Werurwe 1925. Aho umwami n’umugabekazi bihishe hari hamenyekanye bahatera mu ijoro ryo kuri iyo tariki, Nyirandakunze baramurasa kuko yarwanyije abaje kumufata, Ngoga arakomereka arafatwa ajya gufungirwa i Kigali ari na ho yaguye mu Ukwakira 1925, naho Bigirumwera aracika ahungira muri Repubulika Iharanira Demokarasi ya Kongo. Ingoma y’u Bukunzi ihera ityo.

Aho amavubiro ya Ndagano yahoze hitwa mu Bwiza bwa Bweramvura ya Mataba. Ubu ni ku nkengero z’ishyamba rya Cyamudongo, mu Mudugudu wa Rwamaraba, Akagari ka Mataba, mu Murenge wa Nkungu, Akarere ka Rusizi; ku muhanda uva i Nkungu ujya mu Mataba. Ni agashanga gato karimo amazi menshi, gafite ubuso nk’ubwa metero kare 150, karimo ibyatsi by’imigugu babohesha ibirago, igiti cy’umugano, igihondohondo n’imizibira. Ako gashanga gakikijwe n’imirima bahingamo ibigori, ibisheke, n’ibindi.

Mu Bwiza bwa Bweramvura ya Mataba, ahahoze amavubiro ya Bukunzi

Muri ako gashanga ngo kera harimo amahembe Ndagano yavubishaga. Abahatuye bavuga ko yari amahembe abiri y’inzovu iry’ingore n’iry’ingabo. Ku ngoma ya Kayibanda, umutwa witwaga Rwibasira ngo yakuyemo ihembe rimwe arishyira bene Ndagano aho bari barahungiye i Murenge. Irindi hembe ngo riracyarimo kugeza magingo aya, akaba ari yo mpamvu abahahinga n’abahaturiye birinda kunywa amazi yaho, dore ko ngo n’iyo bahahinga babona igishanga gitigita!

Mu Bwiza bwa Bweramvura ya Mataba hahanamiwe n’agasozi ka Rwamaraba, ngo akaba ariko Ndagano yicaragaho avuye kuvuba ari kumwe n’umutwa witwaga Rudakemwa wamutwazaga ingoma na yo yakoreshwaga muri iyo mihango.

Abagize Inteko Ishinga mategeko baherutse kubaza Komisiyo y’Igihugu y’Uburenganzira bwa Muntu (NCHR), ikibazo cy’umusore umaze kujyanwa mu magororero y’ibanze inshuro icyenda, niba barasuzumye bagasanga nta kindi kibazo cyihariye afite.

Ni bimwe mu byo bagarutseho mu cyumweru gishize, ubwo iyo Komisiyo yagezaga ku Nteko Ishinga Amategeko, imitwe yombi, raporo y’ibikorwa byayo by’umwaka ushize wa 2025-2026, inagaragaza ibyo iteganya uyu mwaka.

Nyuma yo gusobanura no kugaragariza Inteko Ishinga Amategeko uko umwaka ushize wagenze no kugaragaza ibyo bateganya muri uyu, Depite Christine Bakundufite yabajije ikibazo cyagaragajwe na Perezida wa Komisiyo Providence Umurungi, cy’umusore basanze agarutse mu igororero ry’ibanze inshuro icyenda, abaza niba barasuzumye impamvu ibimutera niba nta kindi kibazo cyihariye basanze afite.

Mu gusubiza iki kibazo Umurungi yavuze ko ari mu itsinda ryagiye gusura Igororero ry’ibanze rya Gikondo (ahazwi nko kwa Kabuga).

Ati “Iyo umurebye ni umusore mwiza cyane, umurebye utanavuga ko afite ikibazo cyo mu mutwe, ariko afatirwa ubujura Musanze, bamurekura ejo agafatirwa Rubavu. Wagira ngo ni ibintu yiyemeje, sinkeka ko uko yari ameze n’uko asa, sinavuga ko ari umuntu wari ufite ikibazo uvuga ngo mu muryango wenda nintaha ndabura icyo ndya. Hari abo usanga nk’abo ngabo ari ingeso nyine yamwokamye, yumva ko agomba guhora muri ibyo bibazo gusa.”

Si mu magororero y’ibanze gusa uwo musore amaze kujyanwa kuko basanze yaranajyanwe mu bigo ngororamuco inshuro zirenze imwe nkuko Umurungi abisobanura.

Ati “Uwo nguwo twasanze yarajyanywe Iwawa nka 3, mu igororero ry’ibanze yari ahaje nka 6, ariko Iwawa yagiyeyo 3. Hari uwo ureba ugasanga wakora ubuvugizi, wagira ute, baramurekura ejo bakaba bagonganye na we. Nk’uwo yari ikibazo cyihariye, ariko ubundi abandi bagaruka inshuro zirenze imwe, ni cyane cyane ibijyanye n’ubujura cyangwa se ibiyobyabwenge. Ibiyobyabwenge akaba yaragiye nk’Iwawa akabibura, akamarayo wa mwaka bamarayo biga, kuba yarabiretse si umutima we ahubwo ni uko atabibonye.”

Icyo gihe ngo bituma iyo agarutse agasubira muri wa muryango yahozemo yisanga yabisubiyemo, niyo yaba yahawe icyo gukora, ari nabyo bibazo bikunze kugenda bigaragara ku basezererwa bakongera bakisanga bahagaruwe.

Umuyobozi Mukuru wa Banki ya Kigali (BK), Dr. Diane Karusisi, yatangaje ko iyi banki yiyemeje gukomeza gufasha abashoramari n’abacuruzi bahuye n’ingaruka z’inkongi y’umuriro yibasiye isoko rya GOICO riherereye mu Karere ka Musanze, kugira ngo bongere kubaka ibikorwa byabo by’ubucuruzi.

Ibi yabigarutseho ubwo yari mu ruzinduko rw’akazi mu Karere ka Musanze, aho yasuye ishami rya BK, aganira n’abakozi baryo ndetse anasura abakiriya ba banki bakorera mu nzego zitandukanye, barimo ibigo by’amashuri, uruganda rwa A1 Iron & Steel Rwanda n’abashoramari n’abacururizaga muri GOICO.

Mu bigo by’uburezi yasuye harimo Virunga Valley Academy, INES Ruhengeri na Excel International Academy, aho baganiriye ku mikoranire yabo na BK ndetse n’imishinga bafite bifuza ko iyi banki yabunganiramo.

Muri INES Ruhengeri, Umuyobozi w’ikigo, Fr. Dr. Jean Bosco Baribeshya, yashimye imikoranire bafitanye na BK, avuga ko iyi banki yabafashije mu bikorwa bitandukanye birimo no kubona inguzanyo zo kwagura ibikorwa by’ishuri.

Yagize ati “Twishimiye gusurwa na BK uyu munsi. Ni banki ishaka iterambere ry’iki gihugu, natwe ni byo duharanira mu rwego rw’uburezi.

Birumvikana ko ari ho tunyuza amafaranga dukoresha, ariko iranadufasha mu kuduha inguzanyo iyo dushaka kwagura ibikorwa byacu, bigatuma turushaho gutera imbere.”

Yakomeje avuga ko bifuza ko BK yabafasha mu mishinga itandukanye, irimo inyubako iri kubakwa muri iki gihe, ndetse ko bafite n’indi mishinga bifuza gufatanyamo na yo.

Muri iyo mishinga harimo kubaka ivuriro (Clinic) rizafasha abanyeshuri biga ibijyanye n’ubuzima kubona aho bimenyereza umwuga, rikanatanga serivisi ku baturage batuye hafi y’ishuri.

Yavuze ko kuba BK ifata umwanya wo gusura abakiriya bayo, ikaganira na bo ku byo bakeneye, bibashimisha kuko bituma bakorana baziranye kandi bahuje icyerekezo cy’iterambere.

Abubatse GOICO basabye koroherezwa kwishyura inguzanyo

Nyuma yo gusura ibigo by’uburezi n’uruganda rwa A1 Iron & Steel Rwanda, Dr. Karusisi yanasuye abashoramari bagize uruhare mu kubaka isoko rya GOICO ndetse n’abacururizagamo, kugira ngo yumve ibibazo bahuye na byo nyuma y’inkongi y’umuriro yaryibasiye.

Aba bacuruzi n’abashoramari basobanuriye ubuyobozi bwa BK ingaruka z’iyi nkongi, banagaragaza ubufasha bakeneye kugira ngo bongere kwiyubaka.

Umuyobozi w’Urugaga rw’Abikorera mu Ntara y’Amajyaruguru, Tugengwenayo Theonase, yavuze ko BK yababaye hafi kuva batangira umushinga wo kubaka isoko rya GOICO, ibaha inguzanyo ndetse ikomeza kubaba hafi mu bihe by’imbogamizi.

Yagize ati “Muri kiriya gikorwa cy’ishoramari ryo kubaka isoko rya GOICO ryahiye, BK yaduhaye inguzanyo mu ntangiriro zo kuryubaka, ndetse no hagati aho twagiye tugira ibibazo, ikomeza kutuba hafi.”

Yasobanuye ko nyuma y’inkongi hari inguzanyo zigera kuri miliyari y’amafaranga y’u Rwanda zari zitarishyurwa, bityo asaba BK kubafasha mu korohereza abashoramari kwishyura, by’umwihariko bahagarika inyungu kuri izo nguzanyo mu gihe bagihangana n’ingaruka z’icyo cyago.

Guverineri w’Intara y’Amajyaruguru, Mugabowagahunde Maurice, yashimiye BK kuba ikomeje kwegera abahuye n’ingaruka z’inkongi yibasiye isoko rya GOICO, avuga ko ibiganiro bagiranye bigamije gushaka ibisubizo byafasha abacuruzi n’abashoramari kongera ibikorwa byabo.

Yagize ati “Twifuzaga kuganira na BK uyu munsi, abubatse GOICO n’abacururizaga muri iri soko, nyuma y’ibyago byabaye ku isoko ryacu. Hari abakoreraga muri iri soko bari bafite inguzanyo muri BK, ndetse n’inyubako ubwayo yari yarubatswe ku nguzanyo ya BK itari yakarangira kwishyurwa.”

Yakomeje avuga ko bifuzaga kumvikana ku buryo abacuruzi n’abanyiri inyubako boroherezwa kwishyura inguzanyo, ndetse n’abandi bagahabwa ubufasha bwo kongera kuzahura ibikorwa byabo by’ubucuruzi.

Ati “Twumvikanye ko abakoraga muri iri soko bari bafite inguzanyo, ndetse n’abandi bifuza inguzanyo, bagomba kubona uburyo bwo kuganira na banki ku bibazo bafite.

Igikurikiyeho ni ugushyiraho uburyo ku ishami rya BK, kugira ngo buri wese azajye ahagera bakumva ikibazo cye, bityo ubufasha butangirire aho.”

Guverineri Mugabowagahunde yanavuze ko bifuza ko n’indi mishinga y’ishoramari iri mu Mujyi wa Musanze itahagarara, ahubwo igakomeza gushyigikirwa kugira ngo iterambere ry’ubukungu bw’akarere rikomeze.

Yashimye kandi umuco wa BK wo kwegera abakiriya no kumva ibyifuzo byabo, asaba n’andi mabanki kuwugiraho.

BK yiyemeje gukomeza gushyigikira abashoramari

Umuyobozi Mukuru wa BK, Dr. Diane Karusisi, yavuze ko uru ruzinduko rugamije kuganira n’abakiriya ba banki, by’umwihariko abahuye n’ingaruka z’inkongi ya GOICO, kugira ngo bafatanye gushaka ingamba zo kongera kubaka ibikorwa by’ubucuruzi.

Yagize ati “Uyu munsi twaje i Musanze, aho abakiriya bacu benshi bagize ibyago, barimo abubatse GOICO n’abayikoreragamo, kugira ngo tuganire dufate ingamba zo kongera kubaka, ariko no kuzahura ubucuruzi bwo muri Musanze muri rusange.

Abo dusura ni abakiriya bacu. Turabashimira gukorana natwe, bakaduha ibikorwa byabo, natwe tukumva imihigo n’ingamba bafite kugira ngo tubafashe kubishyira mu bikorwa. Akazi kacu ni ugushyigikira ubucuruzi kugira ngo ba nyirabwo babashe kugera ku nzozi zabo.”

Ku bijyanye na INES Ruhengeri, Dr. Karusisi yavuze ko ari kimwe mu bigo bamaze igihe bakorana na cyo, kandi ko cyabagaragarije imishinga gifite kigamije guteza imbere ireme ry’uburezi.

Yavuze ko muri iyo mishinga harimo kubaka ahazajya hakorerwa amahugurwa ngiro y’abanyeshuri (workshops), Digital Hub ndetse n’ibindi bikorwa remezo byafasha ikigo kwagura ubushobozi bwacyo.

Ati “INES Ruhengeri ni ishuri rikomeye tumaze igihe dukorana na ryo. Batweretse ingamba bafite, inyubako bafite, aho bashaka kubaka Digital Hub n’ahantu bashaka kubaka workshops z’abanyeshuri kugira ngo bazamure ireme ry’uburezi. Batweretse aho bageze n’aho bashaka ko BK iza kubunganira kugira ngo barangize izo nyubako.”

Yakomeje avuga ko basuye na laboratwari zirenga 26 z’iki kigo, bakaganira ku ngamba gifite zo kurushaho guteza imbere kaminuza, BK na yo ikagaragaza ubushake bwo kugishyigikira.

Dr. Karusisi yavuze ko mu myaka isaga 60 BK imaze ikorera mu Rwanda, ikomeje gushyira imbaraga mu kwegera abakiriya bayo, kumva imishinga yabo no gufatanya na bo mu kuyishyira mu bikorwa.

Yasobanuye ko gushyigikira ubucuruzi n’ishoramari bifite uruhare mu guteza imbere ubukungu bw’igihugu, binyuze mu guhanga imirimo, kongera umusaruro no gutanga imisoro.

Uru ruzinduko rwa Dr. Diane Karusisi mu Karere ka Musanze ni kimwe mu bikorwa bigamije gukomeza umubano wa BK n’abakiriya bayo, kumenya ibyo bakeneye no gushaka ibisubizo byafasha ibikorwa byabo gukomeza gutera imbere.

Inteko ishinga amategeko yatoye Umushinga w’Itegeko ryerekeye Inshingano (Draft Law on Obligations).Ni itegeko rije gukemura ibibazo bishingiye ku masezerano, n’amakosa akorwa hagati y’abantu, ariko bikaba bitakemurwaga neza n’amategeko asanzwe.

Ni itegeko rigena ibyerekeye inshingano zikomoka ku masezerano, harimo n’ubwumvikane hagati y’impande zombi (nk’amasezerano y’ubukode, aho zimwe mu ngingo zaryo ziteganya uburyo amafaranga y’ubukode ashobora kongerwa cyangwa kugabanywa).

Iryo tegeko kandi rigena ibijyanye n’inshingano zikomoka ku bisa n’amasezerano (Quasi-contracts), urugero nk’igihe urukiko rutegetse umuntu kwishyura undi bitaturutse ku masezerano bari bafitanye mbere. Rivuga kandi ku nshingano zikomoka ku makosa no ku bisa n’amakosa (Torts/Delicts), harimo ingaruka z’ibikorwa umuntu akora bikagira ingaruka ku bandi, byaba byagenderewe cyangwa bitagenderewe.

Mu gihe cyo gutora ingingo ku yindi mu zigize uwo mushinga w’itegeko mbere y’uko ritorwa muri rusange, abadepite bagiye babaza ibibazo ku ngingo zimwe na zimwe babona ko zidasobanutse neza cyangwa se ko zirimo icyuho mu bisobanuro byazo, maze umuyobozi wa Komisiyo ibishinzwe agatanga ibisobanuro.

Depite Mukandekezi Francoise ni umwe mu babajije ikibazo ku ngingo ya 642 ivuga ku bijyanye n’ubwikorezi, aho iyo ngingo ivuga ku ibura ry’ugomba kwakira ibintu, kwanga kubyakira cyangwa se kugira uburangare mu kubyakira.

Yagize ati,” …Agaka ka kabiri karavuga ngo icyakora,iyo hari impamvu yihutirwa, umwikorezi,ashobora kwikuraho ibintu byangirika,atabanje kubimenyesha, uwabimuhaye. Ndibaza impamvu yihutirwa, yatuma umwikorezi yikuraho ibintu bamuhaye gutwara atamenyesheje uwabimuhaye yaba ari iyihe? Ikindi ibintu byangirika biri mu bwoko bwinshi, ashobora kuba ari amata, ashobora kuba ari inyama, bishobora kuba amafi n’ibindi, ese aramutse bamuhaye gutwara ibintu agasanga ubyakira adahari cyangwa se adashaka kubyakira, guhita ahabwa uburenganzibra bwo kuba yabyikuraho, ntibyatanga icyuho cyo kunyereza umutungo? Numva iyi ngingo yatanga icyuho, utwara ibintu akaba yabinyereza kubera ko ubyakira atamubonye”.

Asubiza icyo kibazo, Perezida wa Komisiyo y’Imiyoborere, Uburinganire n’Ubwuzuzanye bw’Abagabo n’Abagore, Nabahire Anastase, yavuze ko iyo ngingo ivuga byinshi umwikorezi yahura nabyo n’uko yabyitwaramo.

Yagize ati,” …iyo ugomba kwakira ibintu atabonetse, yanze kubyakira cyangwa se agize uburangare mu kubyakira,cyangwa iyo umwikorezi nta kosa afite, adashobora kubera impamvu iyo ari yo yose gushyikiriza ibyo yikoreye ugomba kubyakira, ahita abimenyesha uwabyohereje, kandi akamusaba kumumenyesha uko bagomba kugenza ibyo bintu. Aka gaka ubwako karatwereka ibintu byinshi cyane byaba ku mwikorezi uvuye Mombasa,yagera i Kigali aho agomba gushyitsa ibintu, akabura uwo agomba kubishyitsaho, yabimugezaho se akabyanga, yashaka se telefoni ye akayibura, agahabwa inshingano yo guhita amenyesha uwamutumye uri Mombasa ibimubayeho, niba hari undi bakorana yabigezaho, cyangwa niba yabigarura, cyangwa niba hari aho yabigurisha,…”.

“ Igika cya Kabiri kiravuga ngo icyakora iyo hari impamvu zihutirwa, umwikorezi, ashobora kwikuraho ibintu byangirika yagejeje aho agomba kubigeza atabanje kumenyesha uwabimuhaye…”.

Depite Nabahire Anastase yifashishije urugero rw’umucunda (uvana amata ku kiraro cy’inka ayajyana ku ikusanyirizo), yavuze ko uwo mucunda ashobora kugemura amata yagera aho ku ikusanyirizo agasanga hafunze. Kandi amata yangirika vuba, yareba akabona ko litiro 50 cyangwa 100 zigiye gupfa, yagerageza kumenyesha uwamutumye, agasanga telefoni itariho, aho ngo haba hari impamvu zihutirwa, aho kugira ngo ayo mata amwangirikane ngo ashobora kuyagemura ahandi, nyuma akabisobanura. Impamvu, ni uko utwara ibintu aba afite inshingano zo kubyitaho nubwo atari ibye, ariko igihe abifite mu ntoki aba agomba kubyitaho kugira ngo arinde inyungu z’uwo akorera.

‎Rutahizamu w’Umunya Burkina Faso Cheick Djibril Ouattara yamaze kongera amasezerano y’imyaka ibiri mu APR FC, mu gihe ayo yari afite yaganaga ku musozo maze ashimira ubuyobozi bw’ikipe, abakinnyi bakinana, abakunzi ndetse n’abagize iyi kipe bose.
‎

‎Kuri uyu wa Kane, tariki ya 5 Ugushyingo 2026, ku cyicaro cy’ikipe y’Ingabo z’Igihugu nibwo kapiteni wa APR FC, Djibril Ouattara w’imyaka 27, yashyize umukono ku masezerano azamugeza mu mpera za 2028 ari umukinnyi wayo.
‎
‎Uyu mukinnyi yagiye yitwara neza mu bihe bitandukanye nkaho yafashije Ikipe yambara umukara n’umweru kwegukana ibikombe bibiri bya shampiyona biheruka, ibikombe bibiri by’Amahoro ndetse n’igikombe kiruta ibindi cya Super Cup.
‎
‎Djibril Ouattara wageze muri iyi kipe mu ntangiriro za 2025 yabaye umukinnyi watsinze ibitego byinshi muri APR FC, aba n’uwa kabiri muri shampiyona ya 2024-2025.

Uyu rutahizamu mu mwaka w’imikino ushize yabaye uwatsinze ibitego byinshi muri BK Pro League 2025-26 aho yatsinze 18 yongeraho no kuba uwatsinze ibitego byinshi muri CECAFA Kagame Cup 2026.

‎Mbere yo kuza muri APR FC Djibril Ouattara yanyuze muri Vitesse FC na ASF Bobo-Dioulasso (aho yabaye rutahizamu watsinze ibitego byinshi mu 2017 na 2018), RS Berkane na OC Safi zo muri Maroc, ndetse na JS Kabylie yo muri Algeria.

Ouattara yitezweho gufasha APR FC kwisubiza igikombe cya shampiyona y’u Rwanda n’icy’Amahoro.

‎

Minisitiri y’Imari n’Igenamigambi (MINECOFIN), ivuga ko imyumvire y’Abanyarwanda ku bijyanye no kuzigama igenda izamuka kuko imibare igaragaza ko ikigero cy’ubwizigame ku musaruro mbumbe w’Igihugu kiri hejuru ya 12%, leta ikaba ifite intego y’uko nibura bizaba bigeze 25.9% mu 2029.

Buri mwaka ku wa 31 Ukwakira, ku Isi hizihizwa umunsi mpuzamahanga wahariwe kuzigama, uyu mwaka ukaba warizihijwe ku nshuro ya 37.

Mu Rwanda wizihirijwe mu Karere ka Kayonza kuri uyu wa Kane, ku nsanganyamatsiko igira iti "Kuzigama, Umusingi w’Iterambere."

Abatuye muri ako Karere bamaze gukengerwa n’umuco wo kwizigamira bagaragaza ko byabafashije kwiteza imbere kuko hari aho byabakuye n’aho bimaze kubageza.

Ruth Tuyiringire, wo mu Murenge wa Ruramira, wibumbiye mu ishyirahamwe rikora ibijyanye n’ubworozi no gukora ibiryo by’amatungo, avuga ko batangiye bafite igishoro kiri hasi, ariko mu gihe gito bamaze bafite aho bamaze kugera.

Ati "Twatangiye dufite igishoro nabara ko kiri muri miliyoni 5, noneho tuyoboka ibigo by’imari, dutangira kuzigama, tuza gusaba inguzanyo, bwa mbere baduhaha iya miliyoni 8, bitewe n’uko twari dutangiye kugenda tuzamuka, tuza gusaba iya kabiri baduha milyoni 16. Ubu navuga ko birimo biragenda neza kuko korora, turorora, tugakora n’ibiryo by’amatungo kandi dukoresheje iby’iwacu bidahenze cyane."

Ku rundi ruhande ariko hari abavuga ko kuba izuba ryaravuye igihe kirekire, bikagira ingaruka ku izamuka ry’ibiciro ku isoko, byatumye ayo bazigamaga hari abo agabanuka, abandi barayabura kubera ko bahisemo kuyakoresha muri gahunda zo gutunga umuryango.

Deborah Nyirahabimana wo mu Murenge wa Gahini, ni umwe mu bazigama bakoresheje ibimina, uvuga ko ayo yazigamaga yagabanutse.

Ati "Ntabwo byoroshye kubera ko umusaruro wo muri sizoni ishize wabaye muke, no kwizigamira byabaye bike. Mbere nazigamaga 2,000 mu cyemweru ariko ubu hari igihe mbona 500, hari n’igihe nyabura nkararanya."

Umuyobozi Mukuru ushinzwe amabanki n’ibigo by’imari bitari amabanki muri MINECOFIN, Cyllile Hategekimana, avuga ko ubwizigame bw’Abanyarwanda burimo kugenda butera imbere cyane, kuko abenshi bitabira gahunda y’ibimina na za SACCO.

Ati " Iyo urebye ukuntu Abanyarwanda bitabira izo gahunda ndetse na gahunda ya Ejo Heza, bikwereka ko Abanyarwanda bose serivisi z’imari zagiye zibegerezwa kandi bagenda bazigana. Ikibigaragaza cyane nk’ubwizigame bw’ibimina dufite uyu munsi, ibyo tumaze kwandika muri MINECOFIN, bigera hejuru y’ibihumbi 15, bifite ubwizigame bumaze kugera kuri miliyali 54 Frw, ayo mafaranga aturuka muri abo baturage bari hirya no hino."

Imirenge SACCO yo iganwa n’abaturage barenga miliyoni 4.4, ikaba zifite umutungo ugera kuri miliyali 301 Frw byerekana ko ibijyanye n’ubwizigame abaturage batangiye ku byumva neza.

Aya kandi yiyongeraho ayandi arenga miliyali 95 Frw, amaze kuzigamwa n’abari murii ’Ejo Heza’.

Umuyobozi w’Intara y’Iburasirazuba, Pudence Rubingisa, avuga ko kuba izuba ryaravuye rigatinda ari ibintu bamaze kumenyera kandi bakwiye no kugira ingamba zihoraho zo guhangana nabyo.

Ati "Ni ibintu bibaho buri mwaka biba bisaba ko twiteganyiriza, mu gushaka imyaka ihangana n’iryo hindagurika ry’ikirere, ntidutere bya bihingwa tumenyereye kandi bisaba imvura nyinshi tudafite muri ibyo bice."

Aha kandi ubuyobozi buvuga ko harimo no gushakwa indi mirimo ibafasha kuzamura imibereho y’abaturage idashingiye cyane ku buhinzi butegereza ibisubizo ku kirere.

Abaturage bashishikarizwa kumva no kumenya ko na duke umuntu afite ashobora kuzigamamo, kuko bidasaba ko umuntu aba afite ibya mirenge kugira ngo abone ayo azigama.

Amagambo aherutse kuvugwa na Perezida Félix Tshisekedi ku mutwe wa FDLR ateye kwibaza ibibazo bikomeye ku bushake bwa Repubulika Iharanira Demokarasi ya Congo (RDC) bwo kubahiriza amasezerano y’amahoro ya Washington.

Mu kiganiro yagiranye n’Abanyekongo baba mu Burusiya ku wa 30 Ukwakira, Tshisekedi yavuze ko ubutegetsi bwe burimo gukorakoranya abarwanyi ba FDLR i Kitona, bikaba bigaragara ko bushobora kuba burimo gutegura kubohereza mu kindi gihugu.

Ibi bituma hibazwa ikibazo cy’ingenzi: Kuki Kinshasa irimo kuganira ku kwimura abarwanyi ba FDLR aho kubahiriza ibyo yiyemeje byo guca intege no gusenya ubushobozi bw’uwo mutwe?

Amasezerano y’amahoro ya Washington si gahunda yo kwimura abarwanyi. Asaba ko hafatwa ingamba zifatika z’umutekano zigamije gukemura ikibazo cy’iterabwoba ritewe na FDLR.

Kwimura bamwe mu barwanyi bayo bakava ahantu hamwe bajyanwa ahandi, cyangwa bakoherezwa ku butaka bw’ikindi gihugu, ntibisobanura gusenya uwo mutwe, gukuraho ubushobozi bwawo bwa gisirikare cyangwa guhangana n’ingengabitekerezo ya jenoside ushingiyeho. Ahubwo ni ukwimurira ahandi ikibazo cyari gihari.

Ibivuguruzanya mu bayobozi ba Congo bituma iki kibazo kirushaho gutera impungenge

Hasigaye iminsi ibiri gusa ngo Tshisekedi atangaze ibyo, Minisitiri w’Ububanyi n’Amahanga wa RDC, Thérèse Kayikwamba Wagner, yabwiye televiziyo ya RT ko igihugu cye kidashobora kwambura imbunda FDLR kuko abarwanyi bayo bakorera mu bice bigenzurwa na M23.

Umuvugizi wa Guverinoma, Patrick Muyaya, na we yagiye atanga ibisobanuro bisa n’ibyo inshuro nyinshi, igihe Kinshasa ibazwa impamvu itarashyira mu bikorwa inshingano zayo zo guhangana na FDLR.

Nyamara ubu Perezida w’icyo gihugu arimo kubwira amahanga ko ubutegetsi bwe bwakorakoranyirije abarwanyi ba FDLR i Kitona.

None se amahanga akwiye kwemera iyihe mvugo? Niba abarwanyi ba FDLR badashobora kugerwaho kuko bakorera mu bice bigenzurwa na M23, Kinshasa yabashije ite kubakorakoranyiriza i Kitona? Niba Guverinoma ishoboye kubashyira hamwe ahantu runaka hagenewe gukusanyirizwamo, ni iki kiyibuza gukomeza ikabambura intwaro, ikanaca intege ubushobozi bw’uwo mutwe?

FDLR ntishobora kubura mu magambo ya Guverinoma ku wa Mbere, ku wa Kabiri ikavugwa ko iri mu bice bigenzurwa na M23, ku wa Gatatu ikongera kugaragara i Kitona, hanyuma ku wa Kane ikibazo cyayo kikitirirwa ikindi gihugu. Kinshasa ifitiye amahanga umwenda wo gutanga ibisobanuro bihamye kandi bitavuguruzanya.

Ahari ikivuguruzanya kurushaho ni uburyo Tshisekedi ubwe asobanura iki kibazo mu bya politiki. Yakunze gushinja u Rwanda gukoresha FDLR nk’urwitwazo rw’impungenge zarwo z’umutekano ndetse n’uruhare ruvugwa ko rufite mu burasirazuba bwa RDC. Yigeze no kugaragaza ko atishimiye igitutu Leta Zunze Ubumwe za Amerika ishyira kuri Guverinoma ye kugira ngo ice intege uwo mutwe.

Ariko niba FDLR ari urwitwazo gusa, nk’uko Tshisekedi abivuga, kuki arwanya igikorwa ubwacyo cyakuraho urwo rwitwazo? Ni gute umuntu yimura urwitwazo akaruha ikindi gihugu? Kandi kuki yitotomba ku gitutu mpuzamahanga gisaba gusenya umutwe witwaje intwaro, kandi igihugu cye cyamaze kwiyemeza mu nyandiko kuwuca intege no kuwusenyera ubushobozi?

FDLR si umutwe ubaho mu bitekerezo gusa. Amateka yawo, ingengabitekerezo ya jenoside ndetse n’ibikorwa byawo bikomeje kugaragara mu burasirazuba bwa RDC ni ibintu byanditsweho kandi bizwi. Guca intege uwo mutwe si igikorwa cyo kugirira neza u Rwanda, ahubwo ni inshingano mu rwego rw’umutekano ndetse n’intambwe y’ingenzi iganisha ku mahoro arambye mu karere.

Leta Zunze Ubumwe za Amerika zagize uruhare rukomeye mu korohereza isinywa ry’amasezerano ya Washington. Ubu icyizere ayo masezerano ashingiyeho kizaterwa n’uko hazagenzurwa ko ibyo abayashyizeho umukono biyemeje bihinduka ibikorwa bifatika kandi bishobora kugenzurwa.

Tshisekedi ntashobora gushyira umukono ku masezerano asaba ko FDLR icibwa intege, nyuma akinubira igitutu cyo kuyashyira mu bikorwa, hanyuma akerekana ko kuyimura ari bwo buryo bwo gukemura ikibazo.

Washington ikwiye gusaba ibisobanuro bisobanutse: Ni abarwanyi bangahe ba FDLR, niba bahari, bari i Kitona? Ese bambuwe intwaro? Biteganyijwe ko imiyoborere y’uwo mutwe n’imiyoboro yawo ya gisirikare bizagenda bite? Ni ayahe masezerano cyangwa uburyo bw’amategeko Kinshasa ishingiraho umugambi wo kubohereza mu kindi gihugu?

Ikibazo nyamukuru ntikikiri ukumenya icyo Kinshasa isabwa gukora, ahubwo ni ukumenya niba ifite ubushake bwa politiki bwo kugikora. Kandi Washington izakomeza kugeza ryari kurebera ntigire icyo ikora kuri uku kudashyira mu bikorwa ibyo RDC yiyemeje?

Ahagana saa tanu n’iminota 22 za mugitondo, mu Rwanda humvikanye umutingito ukaze wanyeganyeje amazu, ariko nta kintu wangije.

I Kigali, inzu ndende zanyeganyejwe n’uyu mutingito wamaze amasegonda miriongo itatu, maze abakorera mu nzu basiganwaa basohoka ngo bahunge icyago bumvaga gishaka kubagwirira.

Uyu mutingito urangiye, biruhukije imitima ko barokotse.

Urwego rw’Igihugu rushinzwe Mine, Peteroli na Gaz (RMB), rwatangaje ko uyu mutingito wari ufite ubukana bwa 6.4, ariko ngo kugeza ubu nta bikorwa byigeze bigaragara waba wangije.

RMB yasobanuye ko uyu mutingito waturutse hafi ya Ushirombo muri Tanzania, mu ntera y’ibilometero 292 uvuye i Kigali.

Ubundi, ubukana bwa 6.4 ngo ntibuhora butera iyangirika ringana. Uburyo umutingito wangiza biterwa n’ubujyakuzimu bwawo, aho wabereye, imiterere y’ubutaka n’ubwiza bw’inyubako.

Mu 2023, umutingito w’ubukana nk’ubwo wabaye muri Turkiya ugwisha amazu icumi, uhitana abantu batandatu, abandi cumi n’umunani barakomereka.

Aha ngaha, ngo hari hashize iminsi habaye undi mutingito, wasize inzu zazahaye, nuko uwakurikiyeho uje urazisonga.

Kuri uyu wa Kane, Cristiano Ronaldo w’imyaka 41 y’amavuko yatangaje ko asezeye mu ikipe y’igihugu ya Portugal nyuma y’imyaka 23 ayikiniye bwa mbere, mu gihe asize ayikiniye imikino 234.

Ibi icyamamare mu mupira w’amaguru ku Isi, Cristiano Ronaldo, yabitangaje abinyujije ku mbugankoranyambaga ze asoza urugendo rw’imyaka 23 yaranzwe n’amateka akomeye, ibikombe n’ibihembo bitandukanye akinira ikipe y’igihugu ya Portugal.

Mu mashusho maremare yashyize ku rubuga rwa Instagram, yasomeye abakunzi be ibaruwa ibamenyesha ko igihe kigeze ngo asezere mu ikipe y’igihugu.

Mu magambo ye, Ronaldo yagize ati: “Umunsi wageze ngo nsubize nimero 7 y’ikipe y’igihugu cyacu. Sinigeze ntekereza ko yari iyange njyenyine gusa, ariko mu gihe cy’imyaka 23 nagize amahirwe n’inshingano byo kuyambara.”

Ronaldo asize amateka akomeye mu ikipe y’Igihugu ya Portugal, aho yayikiniye imikino 234, ayitsindira ibitego 146. Iyi mibare imugira umukinnyi wakiniye igihugu cye imikino myinshi ndetse akanagitsindira ibitego byinshi mu mateka y’umupira w’amaguru ku rwego rw’ibihugu.

Yatangiye gukinira Portugal mu 2003, ubwo yari afite imyaka 18, kuva icyo gihe aba umwe mu bakinnyi b’ingenzi mu rugendo rw’iyi kipe mu marushanwa akomeye ku Isi.

Mu byo azahora yibukirwaho harimo gufasha Portugal kwegukana igikombe cya UEFA Euro 2016, nyuma yo gutsinda u Bufaransa ku mukino wa nyuma, ndetse no kwegukana UEFA Nations League mu 2019 no mu 2025.

Yitabiriye ibikombe bitandatu by’Isi, kuva mu 2006 kugeza mu 2026, aba umwe mu bakinnyi bake cyane bageze kuri ayo mateka. Yanasize izina rikomeye mu marushanwa ya UEFA European Championship, aho yabaye umukinnyi watsinze ibitego byinshi mu mateka yayo.

Kuva mu 2003 kugeza mu 2026, Ronaldo yagaragaje ubudasa mu ikipe y’igihugu, aho imyaka myinshi yayibereye kapiteni, ayobora bagenzi be kandi akomeza kuba intwaro ikomeye mu busatirizi.

Kuva ubu, Portugal igiye gukomeza urugendo rwayo idafite umukinnyi wari umaze imyaka irenga makumyabiri ari isura yayo mu mupira w’amaguru.

Ubuyobozi bw’Umujyi wa Kigali bwatangaje ko inyubako n’ibikorwa by’ubucuruzi 10 bitujuje ibisabwa mu kwirinda inkongi z’umuriro bigiye gufungwa by’agateganyo, mu rwego rwo kurengera ubuzima bw’abantu n’imitungo yabo.

Mu itangazo ryashyizwe ahagaragara kuri uyu wa 4 Ugushyingo 2026, Umujyi wa Kigali wavuze ko iki cyemezo gikurikira ubugenzuzi bukomeje gukorwa hagamijwe kureba niba inyubako zubahiriza amabwiriza agenga gukumira no kwirinda inkongi.

Izo nyubako n’ahakorerwa ibikorwa by’ubucuruzi biteganyijwe gufungwa guhera ku wa Gatanu, tariki ya 6 Ugushyingo 2026, saa moya z’umugoroba (19:00), kugira ngo ba nyirazo babanze bashyire mu bikorwa ingamba zikenewe zo gukumira inkongi.

Ahagenewe gufungwa harimo Catchup Building iri ku Gisementi, Agakiriro ka Gatenga, Agakiriro ka Gahanga, Rwanda Foam Showroom iri i Gikondo, KAL Plaza iri Gikondo, N&B Plaza iri Kigarama, Eden Tower, Matheus House, Ntaganzwa House na Ndaru Arcade, byose biri mu Karere ka Nyarugenge.

Umujyi wa Kigali wavuze ko izi ngamba zigamije kurengera ubuzima bw’abakora muri izo nyubako, abazisura n’abahakorera ibikorwa by’ubucuruzi, ndetse no kurinda imitungo yabo ishobora kwangizwa n’inkongi.

Ba nyir’inyubako, abazicunga n’abandi bose bagaragajweho ibitagenda neza mu bijyanye no kwirinda inkongi basabwe kwihutira gukemura ibibazo byagaragaye, bakuzuza ibisabwa n’amabwiriza agenga umutekano w’inyubako.

Ubuyobozi bw’Umujyi wa Kigali bwashimangiye ko inyubako izaba yujuje ibisabwa mu kwirinda inkongi izemererwa kongera gufungura, nyuma y’uko inzego zibishinzwe ziyigenzuye zikemeza ko yujuje ibisabwa.

Bwibukije ba nyir’inyubako n’abazicunga ko bafite inshingano zo guhora bazibungabunga no kubahiriza amabwiriza y’umutekano, kugira ngo ubuzima bw’abazikoreramo, abazigana n’abaturiye aho ziherereye burindwe.

Komisiyo y’Ubukungu n’Imari muri Sena yagaragaje ko Ikigo cy’Igihugu gishinzwe Amazi, Isuku n’Isukura (WASAC) kigifite ibibazo mu micungire y’umutungo no mu ishyirwa mu bikorwa ry’imishinga, kuko mu myaka itanu ishize kitigeze gihabwa amanota agaragaza imicungire myiza mu bugenzuzi bwakozwe n’Umugenzuzi Mukuru w’Imari ya Leta.

Ibi byagarutsweho kuri uyu wa gatatu tariki 4 Ugushyingo ubwo Komisiyo y’Ubukungu n’Imari muri Sena yagezaga ku Nteko Rusange ya Sena raporo y’Umugenzuzi Mukuru w’Imari ya Leta y’umwaka w’ingengo y’imari warangiye ku wa 30 Kamena 2025.

Senateri Fulgence Nsengiyumva yavuze ko ikibazo cya WASAC gikwiye kwitabwaho by’umwihariko, kuko mu myaka itanu ishize yabonye "biragayitse" nk’uko bigaragara muri raporo y’Umugenzuzi Mukuru w’Imari ya Leta.

Ku rundi ruhande, raporo igaragaza ko amazi WASAC itabasha kwishyuza agera kuri 30%, bitewe n’imiyoboro ishaje, amazi yononekara ataragera ku bayakoresha.

Mu mwaka ushize, amazi WASAC itabashije kwishyuza abakiriya angana na 36% by’amazi yose yakwirakwije, ariko mu gihembwe cya mbere cy’uyu mwaka icyo gipimo cyaragabanutse kigera kuri 30%.

Bimwe mu bituma amazi apfa ubusa harimo imiyoboro ishaje, imiyoboro itabasha gutwara amazi ahagije, amatiyo ashaje ndetse n’ibura ry’abakozi.

Raporo y’Umugenzuzi Mukuru w’Imari ya Leta y’umwaka wa 2025 igaragaza ko WASAC yakoze metero kibe miliyoni 85,75 z’amazi, ariko ikabasha kwishyuza abakiriya metero kibe miliyoni 53,33 gusa, bingana na 62,2% by’amazi yose yakozwe.

Amazi atishyuwe yari afite agaciro ka miliyari 10,4 z’amafaranga y’u Rwanda, hakoreshejwe igiciro fatizo cya 323 Frw kuri metero kibe.

Nubwo igipimo cy’amazi apfa ubusa cyagabanutse, Abasenateri bagaragaje impungenge z’uko hari uduce tugikomeje kubura amazi.

Mu mishinga igamije kongera amazi harimo iya Nzove na Kanzenze, ndetse n’iteganyijwe mu rugomero rwa Nyabarongo ya Kabiri.

Mu bindi bibazo iyi Komisiyo yabonye bihuriweho n’inzego birimo imishinga y’abaterankunga isinywa ariko ikaba itaratangira gushyirwa mu bikorwa.

Ati “Byabonetse muri RTDA, RTPA, ariko byose twasanze biterwa no kudakora inyigo ku gihe turasanga inzego zibishinzwe zikwiye gufata ingamba”.

Ikindi yagarutseho ni amasezerano atinda gushyirwa mu bikorwa na ba rwiyemezamirimo agasaba ko inzego bireba ziba zikwiye kubikurikirana bigakorwa hakiri kare.

Ati “Ikindi kibazo twabonye n’ikijyanye n’Amafaranga yishyurwa mbere y’uko akazi gatangira(avance) zihabwa ba Rwiyemezamirimo kandi bataratangira imirimo”.

Ibindi bikubiye muri iyi Raporo ni agera kuri miliyoni 474 yasesaguwe, n’inzego zitandukanye zakorewe ubugenzuzu. Senateri Nsengiyumva ashimangira ko bidakwiye ko umutungo wa Leta ukoreshwa nabi kandi bishoboka kuwucunga neza.

Abasenateri bagaragaje kandi ibikwiye kwitabwaho birimo imishinga idindira, amasezerano y’imishinga adashyirwa mu bikorwa uko bikwiye , kutishyura abaturage ku gihe ingurane ku mitungo yabo, imitungo ya leta idakoreshwa, gutinda kugeza ku baturage serivisi z’ingenzi bakenera nk’amazi, amashanyarazi, imiti, ibikoresho byo kuhira imyaka, ibikoresho byo mu burezi, kudashyira mu bikorwa uko bikwiye inama z’ubugenzuzi.

Seanteri John Bideri Bond yavuze ko yizeye ko ibibazo birangwa mu nzego zitandukanye by’imicungire mibi y’imari ya Leta bizakemuka nk’uko umugenzuzi w’imari ya Leta Claudette Mukashyaka aherutse kubitangaza ubwo yinjiraga muri izi nshingano.

Perezida wa Sena, Dr. Kalinda François-Xavier, yavuze ko nyuma yo kugezwaho ibibazo bikubiye muri raporo ya Komisiyo y’Ubukungu n’Imari, Abasenateri bazabinyuza muri Komisiyo zitandukanye za Sena nazo zigasuzumira hamwe uko zizabigeza ku nzego bireba kugira ngo bishakirwe ibisubizo n’uburyo byakemuka.

Ambasaderi w’u Rwanda muri Sénégal, Festus Bizimana, yakurikiye amarushanwa yo koga mu Mikino Olempike y’Urubyiruko ya 2026 iri kubera i Dakar, aho abakinnyi bane b’Abanyarwanda bahagarariye Igihugu muri iri rushanwa.

Abo bakinnyi ni Mugabo Aragsan Liban, Ntwali Jayden, Keza Kalisa na Murenzi Sheja Kean. Ambasaderi Bizimana yabashimiye umuhate, ubutwari n’umwuka wo guhatana bagaragaje bahagarariye u Rwanda kuri uru rwego mpuzamahanga.

Yavuze ko kwitabira iyi mikino ari amahirwe akomeye ku rubyiruko, kuko bibafasha guhangana n’abandi bakinnyi bakiri bato beza ku Isi, kunguka ubunararibonye no kurushaho kuzamura urwego rwabo.

Ambasaderi Bizimana yashishikarije abakinnyi gukomeza kwigirira icyizere, gushyiramo imbaraga no gukoresha neza aya mahirwe, abizeza ko igihugu kibari inyuma kandi kizakomeza kubatera ingabo mu bitugu mu gihe cy’amarushanwa.

Yagize ati: “Turi inyuma yanyu kandi tuzakomeza kubatera inkunga mu gihe cyose amarushanwa azamara.”

Ku munsi wa gatatu w’Imikino Olempike y’Urubyiruko ya Dakar 2026, abakinnyi bahagarariye u Rwanda mu mukino wo koga bitwaye neza, aho umwe yashyizeho agahigo gashya kurwego rw’igihugu, mu gihe abandi babiri bagize ibihe byiza kurusha ibyo bari basanzwe bafite.

Mugabo Aragsan ni we washyizeho agahigo gashya mu Rwanda mu cyiciro cya metero 50 mu koga mu buryo bwa Freestyle, aho yakoresheje amasegonda 29.94.

Ntwali Jayden na we yitwaye neza, agira ibihe bibiri bishya byiza kurusha ibyo yari asanzwe afite. Yakoze amasegonda 27.15 muri metero 50 za Freestyle, avuye ku masegonda 27.41, ndetse akora amasegonda 28.66 muri metero 50 za Butterfly, avuye ku masegonda 29.12.

Kalisa Keza na we yanditse amateka ye bwite, akora amasegonda 36.11 muri metero 50 za Butterfly, bikaba ari ibihe byiza kurusha ibyo yari asanzwe afite.

U Rwanda rwitabiriye iyi mikino mu byiciro bitanu birimo koga, imikino ngororamubiri, gusiganwa ku magare, Taekwondo na Wushu (Kung-fu).

Imikino Olempike y’Urubyiruko ya Dakar 2026 yatangiye ku wa 31 Ukwakira 2026, mu muhango wo kuyitangiza ku mugaragaro wabereye kuri Stade Abdoulaye Wade i Diamniadio, muri Sénégal.

Kuri uyu wa Gatatu, ikipe ya Rayon Sports yanganyirije na Al Hilal SC 1-1 kuri Kigali Pele Stadium mu mukino w’umunsi wa munani wa shampiyona wari uryoheye ijisho.

Ni umukino watangiye Saa Kumi n’Ebyiri n’Igice z’umugoroba utangirana imbaraga ku mpande zombi mu guhererekanya umupira byaryoheye abari kuri Kigali Pele Stadium. Ikipe ya Al Hilal SC mu guhererekanya umupira yari hejuru ya Rayon Sports ariko iyi kipe nayo ikaba hejuru mu kugerageza amashoti agana mu izamu.

Nyuma yo kugerageza uburyo bwinshi kuri Rayon Sports ariko ntibubyare umusarura, iyi kipe yakosowe na Al Hilal SC ku munota wa 35 ubwo yafunguraga amazanu ku mupira wa mbere yateye ugana mu izamu, ku gitego cyatsinzwe na Mohamed Yousif ahawe umupira na Abderlazig Omer Taha, igice cya mbere kirangira igitego 1-0.

Mu gice cya kabiri, Al Hilal SC yatangiye ikuramo Adama Coulibaly ishyiramo Ansumana watangiye kugerageza uburyo burimo ishoti yateye umunyeza Dande Junior akarikuramo. Rayon Sports ku munota wa 51 yavunikishije Mohamed Ouattara asimburwa Nshuti Didier. Kugeza mu minota 15 ya mbere y’igice cya kabiri amakipe yombi yari akerekana umupira mwiza.

Ku munota wa 67 Muhoza Daniel yinjiye mu kibuga asimbuye Moise Sandja wakinaga nka rutahizamu wa kabiri kuri Junior Kameni. Uyu musore yatangiye guha akazi gakomeye Boshala wakinaga iburyo bwa Al Hilal inyuma. Iyi mpinduka yabyaye umusaruro ku munota wa 89 ubwo Mokono Elie Eldinho yahaga umupira Muhoza Daniel mu rubuga rw’amahina.

Uyu musore yahise areba uko umunyezamu Sofiani Farid wari wagoye cyane Rayon Sports ahagaze amutera ishoti rikomeye n’imoso ku giti cya kabiri cy’izamu yishyura igitego. Umukino wongereweho iminota itanu y’inyongera Rayon Sports ikomeza gusatira izanu rya Al Hilal SC inahusha uburyo kuri rutahizamu Junior Kameni umukino urangira amakipe yombi anganya 1-1.

Muri uyu mukino Rayon Sports yateye amashoti 15 arimo atanu agana mu izamu mu gihe Al Hilal SC yateye amashoti 10 arimo atanu agana mu izamu, gusa isoza ariyo iri hejuru mu kwiharira umupira ku ijanisha rya 56 % kuri 44 ya Rayon Sports.

Rayon Sports yahise igira amanota umunani ku mwanya wa munani mu mikino itanu imaze gukina mu gihe izagaruka mu kibuga ku munsi wa cyenda tariki 21 Ugushyingo2026 yakira APR FC kuri Stade Amahoro.

Kuva ku myenda yambawe n’abandi kugeza ku ikawa n’ibindi bicuruzwa byoherezwa mu mahanga, icyemezo cya Washington cyongeye kuzamura impaka ku burenganzira bw’ibihugu bya Afurika bwo kwihitiramo politiki y’iterambere ry’inganda zabyo.

Ku wa 2 Ugushyingo 2026, Leta Zunze Ubumwe za Amerika zatangaje ko Perezida Donald Trump yamenyesheje Kongere ya Amerika n’u Rwanda icyemezo cy’uko igihugu gishobora gukurwa muri gahunda y’ubucuruzi izwi nka African Growth and Opportunity Act (AGOA), guhera ku wa 1 Mutarama 2027.

Ni icyemezo gishobora kugira ingaruka ku bicuruzwa by’u Rwanda byoherezwa ku isoko rya Amerika, ariko kugira ngo dusobanukirwe n’icyo bivuze, ni ngombwa kubanza kumenya AGOA icyo ari cyo, icyo yari imariye ibihugu bya Afurika n’icyo u Rwanda rushobora gutakaza.

Icy’ingenzi ni uko iyi gahunda itarebana n’ubucuruzi gusa, ahubwo inafitanye isano n’impaka zimaze imyaka myinshi hagati y’ibihugu bikomeye n’ibihugu bya Afurika ku bijyanye n’uburyo byakubaka ubukungu bwabyo.

AGOA ni iki, kandi yari igamije iki?

AGOA ni impine y’amagambo African Growth and Opportunity Act, mu Kinyarwanda twavuga ko ari gahunda yashyizweho na Amerika igamije guteza imbere ubukungu n’amahirwe y’ubucuruzi ku bihugu bya Afurika yo munsi y’Ubutayu bwa Sahara.

Yashyizweho na Kongere ya Amerika mu mwaka wa 2000, igamije gufasha ibihugu bya Afurika kubona amahirwe yo kugurisha ibicuruzwa byabyo ku isoko rya Amerika, byungukira ku kuba ibicuruzwa byujuje ibisabwa byinjirayo bidatanze imisoro ya gasutamo.

Mu buryo bworoshye, iyo igihugu cyemerewe muri iyi gahunda, ibicuruzwa byacyo bishobora kwinjira muri Amerika bitishyuriwe imisoro imwe n’imwe isanzwe yishyurwa n’ibicuruzwa biva mu bindi bihugu.

Ibi biha abacuruzi n’abashoramari bo muri Afurika amahirwe yo guhangana ku isoko rya Amerika, kuko ibicuruzwa byabo bishobora kugurishwa ku giciro kisumbuyeho.

AGOA itanga amahirwe ku bicuruzwa birenga 1,800, birimo imyenda, ibikomoka ku buhinzi, ibikomoka ku nganda, amabuye y’agaciro n’ibindi.

Ariko kugira ngo igihugu gikomeze kuyungukiramo, kigomba kuzuza ibisabwa birimo guteza imbere ubukungu bushingiye ku isoko, kubahiriza amategeko, guteza imbere ubwisanzure mu bya politiki, kurengera uburenganzira bw’abakozi, kurwanya ruswa no gukuraho inzitizi ku bucuruzi n’ishoramari biva muri Amerika.

Bivuze ko AGOA atari ubufasha butagira ibisabwa, ahubwo ari gahunda y’ubucuruzi ihuza amahirwe yo kubona isoko rya Amerika n’ibisabwa n’ubuyobozi bw’icyo gihugu.

U Rwanda ruzahomba iki?

Mu myaka yashize, u Rwanda rwakoresheje amahirwe ya AGOA mu kohereza ibicuruzwa bitandukanye muri Amerika, birimo ikawa, icyayi, ibikomoka ku buhinzi, ibikoresho bikozwe mu bukorikori n’ibindi bicuruzwa.

Gukurwaho muri iyi gahunda bishobora gutuma ibicuruzwa by’u Rwanda byari byemererwaga kwinjira muri Amerika nta misoro ya gasutamo bisabwa kwishyura iyo misoro isanzwe ibireba.

Ibi bishobora kugira ingaruka ku biciro, inyungu z’abohereza ibicuruzwa hanze, ubushobozi bwo guhangana ku isoko ndetse n’ishoramari mu bigo byari byarubatse ubucuruzi bishingiye kuri ayo mahirwe.

Abakora ubucuruzi bw’ikawa n’icyayi bashobora kuba mu bahura n’ingaruka, cyane cyane abari barateguye kongera umusaruro n’ubucuruzi bwabo ku isoko rya Amerika.

Iyo ibicuruzwa bisabwa kwishyura imisoro itari isanzweho, bishobora gutuma abaguzi bo muri Amerika bahitamo ibindi bicuruzwa biva mu bihugu biri muri AGOA cyane ko byo igiciro kitakwiyongera.

Ariko kandi gukurwa muri AGOA ntibivuze ko ibicuruzwa by’u Rwanda bikumiriwe ku isoko ryo muri America. U Rwanda ruzakomeza koherezayo ibicuruzwa, gusa ibyari byungukiraga kuri iyi gahunda bishobora gutakaza uburenganzira bwo kwinjirayo bitishyuwe imisoro ya gasutamo.

Nanone, ntabwo ari buri gicuruzwa cyose kizahita gisabwa umusoro mushya, kuko hari ibindi bishobora kuba byari bisanzwe byemererwa kwinjira muri Amerika nta misoro hashingiwe ku yandi mategeko y’ubucuruzi.

Kagame yagarutse ku gitutu cyatumye ibihugu bya Afurika bisubira ku cyemezo cyo guteza imbere inganda zabyo

Kugira ngo umuntu yumve neza amateka y’u Rwanda muri AGOA, ni ngombwa gusubira mu mwaka wa 2016, ubwo ikibazo cy’imyenda yambawe n’abandi, izwi nka caguwa, cyatezaga impaka hagati y’ibihugu byo mu Muryango wa Afurika y’Iburasirazuba n’Amerika.

Icyo gihe, ibihugu byo mu karere byari byemeranyije kugabanya no kuzagera aho bihagarika kwinjiza imyenda yambawe n’abandi, mu rwego rwo guteza imbere inganda zikora imyenda n’inkweto muri Afurika y’Iburasirazuba.

Intego yari uguteza imbere inganda zo mu karere, kugira ngo abaturage babone ibikorerwa iwabo, abashoramari bashore imari mu nganda, ndetse n’imirimo mishya iboneke.

Ariko icyo cyemezo nticyakiriwe neza n’impande zimwe zifite inyungu mu bucuruzi bw’imyenda yambawe muri Amerika.

Abacuruzi b’imyenda yambawe muri Amerika bagaragaje ko kugabanya ibicuruzwa byabo ku isoko rya Afurika byari kubagiraho ingaruka, ndetse ikibazo kigera no mu biganiro bijyanye n’amahirwe ibihugu by’akarere byari bifite muri AGOA.

Ibihugu byinshi byaje kwisubiraho ku cyemezo cyo guhagarika imyenda yambawe, ariko u Rwanda rwo rukomeza gushimangira politiki yarwo yo kurinda inganda z’imbere mu gihugu.

Perezida Paul Kagame yongeye kugaruka kuri ayo mateka mu ijambo yavugiye mu nama yagiranye n’abadipolomate i Kigali ku wa 16 Mutarama 2025.

Yasobanuye ko u Rwanda rwari rwemeranyije n’ibindi bihugu byo mu karere gukorera hamwe mu kugabanya imyenda yambawe, ariko nyuma ibyo bihugu bikisubiraho nyuma yo gushyirwaho igitutu, bitabanje no kubimenyesha u Rwanda.

Perezida Kagame yagize ati:

“ Twari twumvikanye n’ibihugu bimwe byo mu karere ko tuzabikora, ariko tutaramenya uko byagenze, ibihugu byose twari twaraganiriye kuri iki kibazo kandi tukumvikana kuri iyo nzira byaje kwemera kuyivaho nyuma yo kubishishikariza kwisubiraho, bitanabanje kutubimenyesha. ”

Yakomeje avuga ko nyuma y’aho u Rwanda rwahise rukurwa ku rutonde rw’ibihugu byari byemerewe kungukirwa na AGOA, bitewe n’uko rutigeze rureka politiki yarwo yo kwanga caguwa.

Yagize ati:

“ Bukeye bwaho, twahise dukurwa ku rutonde rw’ibihugu byari byemerewe kungukirwa na AGOA, bitewe gusa n’uko u Rwanda rwakomeje gushikama ku cyemezo cyarwo, ibyo abandi babonaga nk’ukutava ku izima .”

Ibi ni byo Perezida Kagame yagaragaje nk’urugero rw’uburyo igitutu cyo hanze gishobora kugira ingaruka ku byemezo ibihugu bya Afurika bifata mu rwego rwo guteza imbere ubukungu bwabyo.

Yavuze ko icyari kigamijwe mu kugabanya imyenda yambawe cyari ugushaka uko Afurika yateza imbere inganda zayo, aho gukomeza kwishingikiriza ku bicuruzwa bitunganyirizwa mu bindi bice by’isi.

Mu yandi magambo, u Rwanda rwashakaga ko imyenda n’inkweto bikoreshwa n’abaturage b’akarere bishobora no gukorerwa muri ako karere, bityo bigatanga imirimo bikanazamura ubukungu.

Ese u Rwanda rushobora gukomeza ubucuruzi na Amerika?

Yego. Gukurwah muri AGOA ntibivuze ko umubano w’ubucuruzi hagati y’u Rwanda na Amerika uhagarara.

U Rwanda rushobora gukomeza kohereza ibicuruzwa muri Amerika, ariko ibiciro by’ibicuruzwa bimwe na bimwe bishobora kuzazamuka, bigatuma abaguzi cyangwa abatumiza ibicuruzwa muri Amerika bahitamo ibiva mu bindi bihugu biri muri AGOA cyane ko byo ibiciro bitazahinduka.

Ikibazo kirenze AGOA: Afurika izakomeza kuba isoko ry’ibicuruzwa by’abandi kugeza ryari?

Icyemezo cya Amerika cyongeye kugaragaza ikibazo kimaze imyaka myinshi kigarukwaho mu biganiro byerekeye iterambere rya Afurika: Ese umugabane ushobora kwigenga mu bukungu mu gihe ugifite ubushobozi buke bwo gutunganya ibyo ukora no kubyaza umusaruro amahirwe y’ubucuruzi?

Ku ruhande rumwe, AGOA yari amahirwe akomeye yafashaga ibihugu bya Afurika kubona isoko rinini, kongera ibyoherezwayo no kuzamura ishoramari.

Ku rundi ruhande, amateka y’u Rwanda n’ibindi bihugu byo mu karere ku bijyanye na caguwa agaragaza ko hari igihe inyungu z’ubucuruzi zishobora kugongana n’intego z’igihe kirekire zo kubaka inganda z’imbere mu gihugu.

Ikibazo u Rwanda rugiye guhura na cyo ntabwo ari ugutakaza gusa amahirwe yo kwinjiza ibicuruzwa muri Amerika nta misoro ya gasutamo. Ni n’ikizamini cy’ubushobozi bwo gukomeza guteza imbere ubukungu no gushaka andi masoko mu gihe amahirwe yari asanzweho agabanutse.

Mu gihe Afurika ikomeje gushaka uko yava ku kuba isoko ry’ibicuruzwa by’abandi ikaba umugabane ukora, ugatunganya kandi ukohereza ibicuruzwa bifite agaciro kiyongereye, ikibazo gikomeye gisigaye ni iki:

Ese ibihugu bya Afurika bizashobora gushyira imbere inyungu rusange z’inganda zabyo, nubwo byahura n’igitutu cy’ibihugu bikomeye mu bucuruzi mpuzamahanga?

Gutsindwa kw’Abarepubulike (Republicans) mu matora yo hagati ya manda ya Perezida Donald Trump, aho Abademokarate (Democrats) bigaruriye imitwe yombi y’Inteko Ishinga Amategeko ya Amerika (Congress).

Ni impinduka ikomeye muri politiki y’iki gihugu, ishobora kugira ingaruka ku miyoborere ye mu myaka ibiri isigaye ngo manda ye irangire.

Imibare ya BBC yari imaze kubarurwa, dutegura iyi nkuru, igaragaza ko Abademokarate bamaze kubona imyanya 54 muri Sena, mu gihe Abarepubulike bari bafite 44.

Mu Nteko Ishinga Amategeko ihagarariye abaturage (House of Representatives), Abademokarate bari bamaze kubona imyanya 228, irenga 218 ikenewe kugira ngo bagire ubwiganze, mu gihe Abarepubulike bari bafite 139.

Ibyo byatumye Abademokarate bigarurira Kongere yose, nyuma yo kunguka imyanya irindwi muri Sena na 25 mu Nteko Ishinga Amategeko.

Ibi bivuze ko Trump atakaje inkunga y’ishyaka rye yari afite muri Kongere, ariko ntibivuze ko yambuwe ububasha bwo kuyobora igihugu cyangwa gufata ibyemezo mu bya dipolomasi n’umutekano mpuzamahanga.

Impamvu za gutsinzwa kw’Abademokarate zirimo ibibazo by’ubukungu, izamuka ry’ibiciro by’ibikomoka kuri peteroli n’intambara ya Iran. Trump ubwe yemeye ko intambara ya Iran yagize uruhare mu gutsindwa kw’ishyaka rye, nubwo yavuze ko aticuza icyemezo cyo kuyitangiza, kandi ko yari kongera kugifata.

Ibi bigaragaza ko nubwo amatora atari referendum ku ntambara ya Iran gusa, uburakari bw’abaturage ku ngaruka zayo ku buzima bwabo bwagize uruhare mu guhana ishyaka rya Perezida.

Kongere igiye kuba imbogamizi kuri Trump

Kuva ku wa 3 Mutarama 2027, ubwo Kongere nshya izatangira imirimo, Abademokarate bazaba bashobora kugenzura ibikorwa by’ubutegetsi bwa Trump, gutumiza abayobozi bakuru kugira ngo batange ibisobanuro, gukora iperereza ku byemezo bya Leta no kubuza ko zimwe muri gahunda ze zemerwa.

Bazagira kandi ijambo rikomeye mu kwemeza ingengo y’imari n’amategeko mashya. Muri Sena, bazagira uruhare mu kwemeza bamwe mu bayobozi bakuru n’abahagarariye Amerika mu mahanga.

Cyakora, Perezida ntazajya ategereza uruhushya rwa Kongere kuri buri cyemezo. Itegeko Nshinga rya Amerika rimuha ububasha bwo kugena politiki y’ububanyi n’amahanga no kuba Umugaba w’Ikirenga w’Ingabo. Ashobora kandi kwanga gushyira umukono ku mategeko yatowe na Kongere (veto), usibye mu gihe Abademokarate babonye ubwiganze bwa bibiri bya gatatu muri buri mutwe kugira ngo bayarengeho.

Ingaruka ku ntambara ya Iran n’iya Ukraine

Ku ntambara ya Iran, Abademokarate bashobora gusaba ubutegetsi gusobanura intego z’ibikorwa bya gisirikare, amafaranga bitwara n’igihe biteganyijwe kumara.

Kongere ifite ububasha ku ngengo y’imari y’ingabo, bityo ishobora gushyiraho imbogamizi ku mafaranga akoreshwa muri iyo ntambara.

Ku bijyanye na Ukraine, ingaruka zishobora kugaragara mu nkunga y’amafaranga n’ibikoresho bya gisirikare, kuko Trump, kuri ubu, ari we ugena icyerekezo cy’ubutegetsi bwe mu biganiro n’u Burusiya na Ukraine, ariko Kongere igira uruhare rukomeye mu kwemeza amafaranga yo gufasha Ukraine. Abademokarate bashobora gusaba ko iyo nkunga ikomeza cyangwa ikongerwa.

Ese u Rwanda rushobora kungukira muri izi mpinduka?

Ku Rwanda, impinduka muri Kongere zishobora kugira ingaruka ku mubano warwo na Amerika, cyane cyane ku bibazo by’umutekano mu Burasirazuba bwa Repubulika Iharanira Demokarasi ya Congo (RDC).

Ku wa 28 Ukwakira 2026, Amerika yafatiye ibihano Minisiteri y’Ingabo z’u Rwanda n’Ikigo cy’Imari Zigama CSS, ibishinja gufasha umutwe wa M23.

Kuba Abademokarate bagiye kugenzura Kongere bishobora gutuma ibihano n’imibanire ya Amerika n’u Rwanda bikomeza kugibwaho impaka. Bashobora gusaba ibisobanuro ku mpamvu z’ibihano n’uburyo bishyirwa mu bikorwa.

Icyakora, ntibivuze ko ibihano ku Rwanda bizahita bikurwaho. OFAC, urwego rwa Minisiteri y’Imari ya Amerika rushinzwe kugenzura umutungo w’abashyizweho ibihano, rushobora gukomeza kubishyira mu bikorwa hashingiwe ku bubasha n’amategeko bisanzweho. Kongere na yo ishobora kugerageza guhindura amategeko agenga ibihano, ariko bisaba inzira yo kwemeza amategeko.

Mu myaka ibiri isigaye kuri manda ya Trump, Amerika izaba iyobowe na Perezida wo mu Barepubulika, ariko igenzurwa na Kongere iyobowe n’Abademokarate.

Mu yandi magambo, Abanyamerika ntibahinduye Perezida, ahubwo bahinduye imiterere y’ububasha buzamufasha kuyobora. Trump azakomeza gufata ibyemezo byinshi, ariko azajya ahura n’imbogamizi zikomeye mu gushyira mu bikorwa gahunda zisaba ubufatanye bwa Kongere. Ibyo bishobora kugira ingaruka ku cyerekezo cya politiki ya Amerika ku isi, harimo no ku Rwanda.

Itsinda ryaturutse muri Ireland, riyobowe na Seán Farrell, Umuyobozi Mukuru w’Umuryango Trócaire, riherekejwe n’Abepiskopi Gatolika bo muri icyo gihugu, kuri uyu wa 2 Ugushyingo 2026, ryasuye Ikigo cya Mutobo giherereye mu Karere ka Musanze, kugira ngo barebe uko u Rwanda rufasha abahoze mu mitwe yitwaje intwaro kwiyubaka no gusubira mu buzima busanzwe.

Komisiyo y’Igihugu Ishinzwe Gusezerera no Gusubiza mu Buzima Busanzwe Abari Abasirikare (RDRC), rwari rugamije yasangije abashyitsi ubunararibonye bw’u Rwanda mu gufasha abahoze mu mitwe yitwaje intwaro, by’umwihariko abavuye mu mitwe yakoreraga mu mashyamba ya Repubulika Iharanira Demokarasi ya Congo (RDC).

Abashyitsi baganiriye n’abahoze mu mitwe yitwaje intwaro, babagezaho ubuhamya bw’urugendo banyuzemo kugira ngo bave mu buzima bw’uburwanyi, bongere kwiyubaka kandi basubire mu muryango nyarwanda.

Aba bahoze mu mitwe yitwaje intwaro bagaragaje ko gahunda zitangirwa mu Kigo cya Mutobo zabafashije guhindura imyumvire, kongera kubana neza n’abandi no gutangira ubuzima bushya.

Kaporali Demobe Hategekimana Jean Claude yavuze ko yinjiye mu mutwe wa FDLR mu 2018, nyuma y’uko avukiye muri Repubulika Iharanira Demokarasi ya Congo mu 1996.

Yagize ati “Navutse mu 1996, mvukira muri Congo. Mu 2018 ni bwo ninjiye muri FDLR, nkorera mu gace ka Masisi.
Tukiri mu mashyamba, tumaze kwinjira mu gisirikare cya FDLR, mu 2022 ni bwo twatangiye kurwana na M23 i Runyoni. Batwizezaga ko mu gihe kitarenze umwaka tuzaba twatsinze M23, tukazahita tujya kurwanira mu Rwanda.

Twakomeje muri iyo mirwano kugeza mu 2025, ubwo twatsindwaga i Goma. Bamaze gufata uwo mujyi, twarahunze tujya mu gace ka Bashali Mukoto, muri Masisi. Icyo gihe ni bwo natangiye kubura icyizere cy’uko tuzafata u Rwanda, bituma ntekereza gutaha.
Naganiriye na bagenzi banjye bari baratashye, bambwira ko mu Rwanda ari amahoro. Nahise mfata icyemezo cyo gutaha. Ngeze hano i Mutobo, nakiriwe neza. Ubu ubuzima burakomeje, kandi ndi kwiteza imbere mfatanyije n’abo nasanze, cyane ko mfite imbaraga zo gukora.”

Yakomeje ashishikariza abo yasize muri FDLR n’indi mitwe iyishamikiyeho gutaha, bakava mu buzima bwo mu mashyamba, kuko mu Rwanda ari amahoro kandi ko kubura igihugu ari nko kubura byose.

Major Demobe Peter Kubwayo na we yagarutse ku myaka yamaze mu mashyamba, uko yafashijwe n’Ikigo cya Mutobo ndetse n’ibyo yigiye muri gahunda zo kumusubiza mu buzima busanzwe.

Yagize ati “Namaze imyaka isaga 15 ndi mu mashyamba, nyuma ngira amahirwe yo kuyavamo. Ngeze hano i Mutobo, nahawe inyigisho z’indangagaciro n’umuco nyarwanda, harimo n’ibyo dukwiye kwirinda.
Batwigishije ko turi Abanyarwanda, badusobanurira gahunda za Leta, kugira ngo twongere kwisanga muri sosiyete no kugira uruhare mu kubaka igihugu.”

Yakomeje avuga ko, ku bwe, Leta ya Repubulika Iharanira Demokarasi ya Congo ari yo itera inkunga FDLR, agaragaza ko iramutse ihagaritse kuyifasha, uwo mutwe wacika intege burundu. Yavuze ko iwushyigikira mu buryo butandukanye, burimo kuwuhereza ibikoresho bya gisirikare n’imodoka ukoresha.
Ku ruhande rw’abashyitsi, Seán Farrell, Umuyobozi Mukuru wa Trócaire, yashimye ibikorwa u Rwanda rukora mu gusubiza mu buzima busanzwe abahoze mu mitwe yitwaje intwaro, agaragaza ko ubufatanye bw’inzego zitandukanye ari ingenzi mu kubaka amahoro arambye no gufasha abantu kongera kugira icyizere cy’ejo hazaza.

Yagize ati “Twaje duhagarariye Trócaire, umuryango wa Kiliziya Gatolika wo muri Ireland, kugira ngo tugaragaze ko dushyigikiye kandi twifatanyije n’ibikorwa bikorerwa muri iki kigo.

Ubufasha bwacu buzibanda ku ngeri ebyiri. Iya mbere, tuzafasha abantu barangije gahunda z’iki kigo bagasubira mu miryango yabo, tubashyigikire muri gahunda zo kongera kwiyubaka no kwisanga mu muryango.

Iya kabiri, tuzafasha ikigo ubwacyo. Twebwe nk’abaturage ba Ireland, tuzi neza ingaruka amakimbirane ashingiye ku mateka y’igihugu cyacu yasize, ndetse n’akamaro ko kubaka amahoro n’ubwiyunge. Ni yo mpamvu twiyemeje gukorana n’u Rwanda mu bikorwa bigamije guteza imbere amahoro n’ubwiyunge.
Nk’umuryango ukorera mu rwego rwa Kiliziya Gatolika, twemera ko buri muntu afite agaciro n’icyubahiro akwiriye.

Tuzi amateka y’u Rwanda, by’umwihariko Jenoside yakorewe Abatutsi mu 1994, yasize igihugu gifite ibikomere bikomeye mu nzego zitandukanye.

Icyakora, u Rwanda rwagaragaje icyizere, ubushake n’ubushobozi bwo kongera kwiyubaka, binyuze mu bumwe, ubwiyunge n’amahoro, ndetse rwongera kugira icyerekezo cyiza cy’iterambere.

Twishimiye ko, nk’umuryango wa Kiliziya Gatolika, turi kumwe n’u Rwanda muri uru rugendo rwo kubaka amahoro n’ubwiyunge.

Umuryango wacu ukorera ku rwego mpuzamahanga ufite gahunda y’imyaka itanu. Muri iyo gahunda y’imyaka itanu iri imbere, twiyemeje gukomeza gushyigikira ibikorwa bitandukanye mu Rwanda.

Dufite imishinga itandukanye mu Rwanda, irimo gahunda zo guhangana n’imihindagurikire y’ikirere, gufasha abaturage bo mu bice by’icyaro n’izindi gahunda zigamije iterambere.

Dufite kandi gahunda zigamije gushyigikira u Rwanda mu gukomeza kubaka amahoro n’ubwiyunge.

Dutegerezanyije amatsiko ubufatanye bushya n’Ikigo cya Mutobo, kugira ngo tugishyigikire mu gukomeza ibikorwa by’ingirakamaro byo gufasha abantu gusubira mu buzima busanzwe no kubaka ejo hazaza habo.”

Perezida wa Komisiyo y’Igihugu Ishinzwe Gusezerera no Gusubiza mu Buzima Busanzwe Abari Abasirikare (RDRC), Nyirahabineza Valérie, yagarutse ku kamaro k’ubufatanye n’abafatanyabikorwa mpuzamahanga mu gushyigikira gahunda zo gusubiza mu buzima busanzwe abahoze mu mitwe yitwaje intwaro, kubafasha kwiyubaka no kongera kugira uruhare mu iterambere ry’igihugu.
Yagaragaje ko Ikigo cya Mutobo gifite uruhare rukomeye mu gufasha abahoze mu mitwe yitwaje intwaro guhindura imyumvire, kongera kwisanga mu muryango nyarwanda no kwimakaza ubumwe n’ubwiyunge.

Yagize ati “Turashimira abashyitsi bacu batugendereye uyu munsi, cyane ko ari ubwa gatatu basura iki kigo.

Twabagaragarije ibikorwa dukora n’uburyo tubishyira mu bikorwa, barabyishimira. Bagaragaje ubushake bwo gukorana natwe, cyane ko muri gahunda yabo y’imyaka itanu bifuza ko bazafatanya n’u Rwanda mu bikorwa byo gusubiza mu buzima busanzwe abahoze mu mitwe yitwaje intwaro.

Mu gihugu cyabo na bo bahuye n’intambara, bityo bakaba basobanukiwe neza akamaro k’ibi bikorwa. Bifuza ko twafatanya kugira ngo ibikorwa byiza u Rwanda rumaze kugeraho bikomeze gutera imbere.”

Yakomeje avuga ko Komisiyo ayoboye iteganya gukorana n’imiryango itandukanye kugira ngo ifashe abahoze mu mitwe yitwaje intwaro kongera kwisanga muri sosiyete nyarwanda, kwiyubaka no kugira uruhare mu kubaka u Rwanda rufite abaturage bishimye.

RDRC ivuga ko uru ruzinduko ari umwanya mwiza wo gusangiza abafatanyabikorwa mpuzamahanga ubunararibonye bw’u Rwanda mu bikorwa byo kubaka amahoro, guteza imbere imibereho myiza y’abaturage no gushimangira ubumwe n’ubwiyunge mu Banyarwanda.

Umukinnyi w’ikipe ya CD Tenerife yo muri Espagne, Jesús de Miguel Alameda, yitabye Imana kuri uyu wa Kabiri tariki ya 3 Ugushyingo 2026 nyuma yo gukomereka bikomeye mu mukino iyi kipe yari yahuyemo na FC Andorra.

Iyi nsanganya yabaye ku wa Mbere, mu minota ya nyuma y’umukino wabereye kuri Stade Heliodoro Rodríguez López aho De Miguel w’imyaka 30 yagonganye n’umunyezamu wa FC Andorra, Jesús Owono, ubwo batanguranwaga umupira, ahita agwa hasi ameze nk’utakaje ubwenge.

Abaganga bamwitayeho impanuka ikimara kuba nyuma ajyanwa mu bitaro bya Nuestra Señora de Candelaria. Mu nzira ajyanwayo, yagize ikibazo gikomeye cyo guhagarara umutima, abaganga babasha kumufasha ariko mu rukerera rwo kuri uyu wa Kabiri, Tenerife yatangaje ko yitabye Imana.

Iyi mpanuka yatumye umukino uhita uhagarara amakipe yombi anganya ibitego 2-2 ndetse Umunyezamu Jesús Owono yahawe ikarita itukura nyuma y’icyo gikorwa.

Mu itangazo ryayo, CD Tenerife yagaragaje ko itewe akababaro n’urupfu rw’uyu mukinnyi, inihanganisha umuryango we, inshuti ze, bagenzi be bakinana n’abafana b’iyi kipe.

Urupfu rwa Jesús de Miguel ni igihombo gikomeye kuri Tenerife nk’umukinnyi wayo no ku bakunzi b’umupira w’amaguru muri rusange.

Mu gitondo cyo kuri uyu wa Kabiri, ubwo ikipe ya Real Madrid yatangiraga imyitozo, abakinnyi n’abatoza bafashe umunota wo guceceka mu rwego rwo kunamira no kwibuka Jesús de Miguel.

Ishyirahamwe ry’Umukino wa Basketball muri Amerika (NBA) ryatangaje ko rizakomeza ubufatanye n’u Rwanda, nubwo Abasenateri babiri bo muri Leta Zunze Ubumwe za Amerika barisabye kongera gusuzuma imikoranire yaryo narwo, bitwaje impungenge zijyanye n’uburenganzira bwa muntu n’umutekano mu Karere.

Mu ibaruwa yashyizwe ahagaragara, Komiseri Wungirije wa NBA, Mark Tatum, yasubije Abasenateri Jeff Merkley wo mu Ishyaka ry’Aba-Demokarate na Marsha Blackburn wo mu Ishyaka ry’Aba-Repubulikani, bari bandikiye Komiseri wa NBA, Adam Silver, basaba ibisobanuro ku bufatanye bw’iri shyirahamwe n’u Rwanda.

Aba basenateri bavuze ko bahangayikishijwe n’uko NBA ikomeje kwagura imikoranire n’u Rwanda, mu gihe bashinja Guverinoma y’u Rwanda kugira uruhare mu bibazo by’umutekano mu Burasirazuba bwa Repubulika Iharanira Demokarasi ya Congo, ndetse no kutubahiriza uburenganzira bwa muntu.

Ntabwo aribyo gusa kuko banavuze ko ubufatanye bushingiye kuri Siporo bushobora gukoreshwa mu kunoza isura y’Igihugu mu gihe hari ibibazo nk’ibyo bashingiraho bitwaza, ibyo bita sportswashing.

Mu gusubiza, Tatum yavuze ko NBA igendera kuri politiki ya Leta Zunze Ubumwe za Amerika mu gufata ibyemezo bijyanye n’ibihugu ikoreramo ibikorwa by’ubucuruzi.

Yagize ati: “Ibikorwa byacu mu bihugu bitandukanye ntibishingira ku buryo bumwe, ariko muri byose dukurikiza politiki ya Leta Zunze Ubumwe za Amerika mu kugena aho dukorera n’uburyo dukoramo.”

Yongeyeho ko NBA yamagana ihohoterwa ry’uburenganzira bwa muntu aho ryaba ribera hose, kandi ko izakomeza guhindura imikorere yayo uko impinduka muri politiki ya Amerika zizabisaba.

Mu kugaragaza uko NBA ishyira mu bikorwa iyo politiki, Tatum yagarutse ku ikipe ya APR Basketball Club, yagombaga kwitabira irushanwa rya Basketball Africa League (BAL). Iyi kipe isanzwe ari iya Minisiteri y’Ingabo z’u Rwanda ntabwo yakinnye irushanwa rya BAL rya 2026 nyuma y’ibihano Amerika yafatiye Ingabo z’u Rwanda muri Werurwe 2026.

Tatum yavuze ko ariyo mpamvu APR itazemererwa kongera gukina muri BAL igihe ibyo bihano bizaba bitarakurwaho.

Ubusanzwe ufatanye bw’u Rwanda na NBA burimo kwakira imikino ya Basketball Africa League muri BK Arena yakira abagera ku bihumbi 10.

‎Ikipe ya Gasogi yanganyije na APR FC igitego 1-1, mu mukino w’ununsi wa munani wa BK Pro League, wabereye kuri Kigali Pele Stadium kuri uyu wa Kabiri tariki ya 3 Ugushyingo 2026.
‎

‎Uyu mukino watangiye Saa Moya z’umugoroba, watangiranye imbaraga ku mpande zombi, Gasogi United ishaka gutungura ikipe y’ingabo z’igihugu ariko ubwugarizi bwa Nshimiyimana Yonusu na Madou Zon buhagarara neza. Ku munota wa 24 Byiringiro Jean Gilbert yavuye mu kibuga kubera ikibazo cy’imvune asimburwa na Niyonzima Abidal.
‎
‎Ku munota wa 33 Ngono Herve yatsindiye Gosogi igitego ku mupira yahawe na Iradukunda Axel nyuma nyuma y’umupira w’umuterekano bari bateye ariko abakinnyi ba APR FC bakiza izamu, umupira usanga Axel, maze igice cya mbere kirangira ari 1-0.
‎

‎Igice cya kabiri cyatangiranye impinduka, Mamadou Traore na Niyonzima Abidal baha umwanya Hakim Kiwanuka na Ishimwe Abdul, maze ikipe yambara umukara n’umweru itangira gukina neza hagati mu kibuga. Ku munota wa 62 Kiwanuka Hakim yafunguye amazamu ku mupira yahawe na William Togui Mel maze APR FC yisanga mu mukino.

Abasore ba Gasogi United bakomeje kwihagararaho umukino urangira amakipe yombi agabanye amanita ku gitego 1-1. APR FC yakinaga umukino wa gatatu muri rusange yujuje amanota arindwi mu gihe Gasogi United nayo yagize arindwi mu mikino umunani.
‎

‎

Paris Jackson, umukobwa w’umuhanzi Michael Jackson, yasabye urukiko gutegeka ko miliyoni 600 z’amadolari ya Amerika ava mu mutungo wa se agashyirwa mu kigega cy’umuryango kigenewe kumufasha na basaza be babiri, Prince na Bigi Jackson.

Paris avuga ko icyo kigega kimaze imyaka irenga 17 kitarashyirwamo n’urupfumuye nyamara umutungo wa se warakomeje kwinjiza amafaranga menshi binyuze mu masezerano akomeye y’ubucuruzi.

Inyandiko y’ubu busabe yagejejwe mu rukiko rw’i Los Angeles igaragaza ko, hakurikijwe gahunda yari yarateganyijwe mu micungire y’umurage wa Michael Jackson, abana be bari kuzajya bahabwa inyungu zituruka ku migabane yabo buri wese amaze kugira imyaka 21.

Paris agaragaza ko iki kibazo gihangayikishije cyane cyane kuko musaza we Prince ari hafi kugira imyaka 30, we akaba azuzuza imyaka 29 muri Mata 2027, mu gihe murumuna wabo Bigi azuzuza imyaka 25 muri Gashyantare 2027.

Ku rundi ruhande, abashinzwe kurinda umutungo wa Michael Jackson bavuga ko hakiri ibibazo by’amategeko bigomba kubanza gukemuka mbere y’uko amafaranga ashyirwa mu bigega by’abana be. Muri ibyo bibazo harimo n’urubanza rurebana n’ikigo cy’imisoro cya Leta Zunze Ubumwe za Amerika (IRS).

Michael Jackson yitabye Imana ku wa 25 Kamena 2009, asiga abana batatu aribo Prince, Paris na Bigi. Kuva icyo gihe, umutungo we wakomeje gucungwa n’abawushinzwe, uninjiza amafaranga menshi aturutse mu bikorwa bitandukanye birimo umuziki, uburenganzira ku bihangano bye n’andi masezerano y’ubucuruzi.

Ubu impaka ziri mu rukiko zishingiye ku gihe amafaranga agenewe abana ba Michael Jackson bagomba kuyahabwa, uburyo umurage ucungwa n’uburenganzira bw’abazungura ku migabane yabo.

Icyemezo cy’urukiko gitegerejwe ku wa 4 Ukuboza kikazagaragaza niba ubusabe bwa Paris buzemerwa, niba kizagena n’andi mafaranga bakwiriye guhabwa cyangwa niba kizasaba ko habanza gukemuka ibibazo by’amategeko bikigaragara.

Depite Damien Mazimpaka yatanze igitekerezo cy’uko hashakwa uburyo bwo kongera ishoramari mu gutunganya umusaruro w’ibitoki, kugira ngo u Rwanda rubone ibinyobwa bikomoka ku bihingwa byujuje ubuziranenge.

Yagize ati: “Dukeneye ibyo kunywa, urajya ku isoko ugasanga ni Fanta ugasanga ibindi bintu, ariko ugashaka umutobe w’ibitoki byacu ugashaka urwagwa rw’ibitoki byacu ukarubura—byujuje ubuziranenge, ariko ukibaza uti ‘Biraza gukorwa na nde?’”

Yasabye ko Leta yareba uburyo yashora imari mu ruganda runini rutunganya umusaruro w’ibitoki, rwafasha kuwugurira abahinzi no kuwutunganya mu gihe inganda zisanzwe zidashobora kuwugura.

Yatanze urugero rw’uruganda rwa OBIVAR rwahoze rukora, avuga ko hashobora kubakwa cyangwa kongera gushyigikirwa uruganda rw’ubushobozi buhagije, ku buryo mu gihe havutse ikibazo cy’isoko, abahinzi babona aho berekeza umusaruro wabo.

MINICOM yemera intege nke mu bugenzuzi

Minisitiri w’Inganda n’Ubucuruzi, Marie-Antoine Kajangwe, yasobanuriye abadepite impamvu inganda zimwe na zimwe zenga inzoga zafunzwe, avuga ko igenzura ryagaragaje ibibazo mu buryo zakoragamo.

Yavuze ko abashinzwe kugenzura ubuziranenge bagiye bagira intege nke, kuko hari igihe barebaga inyubako z’inganda n’ibikoresho zifite, ariko ntibakurikirane niba ibyo bikoresho byakoreshwaga mu buryo bukwiye mu gukora ibicuruzwa byujuje ubuziranenge.

Yagize ati: “Abashinzwe ubuziranenge baragendaga bakarebera uruganda imbere, bakabona rusa neza, runafite ibikoresho bakigendera, bagaruka bagasanga bya bikoresho beretswe ntibyigeze bikoreshwa kandi nyamara uruganda rwo rusohora ibicuruzwa.”

Yakomeje avuga ko hari inganda zagaragazaga ko zifite ibikoresho n’ibindi bisabwa kugira ngo zikore ibicuruzwa byujuje ubuziranenge, ariko nyuma zikajya kubikorera ahandi hatujuje ibisabwa.

Minisitiri Kajangwe yijeje abadepite ko MINICOM n’izindi nzego bireba bari gukora ku mabwiriza agenga uburyo inzoga zikomoka ku musaruro w’ubuhinzi w’Abanyarwanda zigomba kwengwamo, kugira ngo umusaruro ubone isoko kandi abashoramari bashobore gusubukura ibikorwa byabo mu buryo bwubahiriza ubuziranenge.

Yashimye kandi igitekerezo cyo gushora imari mu ruganda runini rushobora gutunganya umusaruro w’ibitoki, kugira ngo rufashe abahinzi kubona isoko mu bihe inganda zisanzwe zidashobora kuwugura.

Yavuze ko icyo gitekerezo kizigwaho, agaragaza ko gishobora kugira akamaro mu gukemura ibibazo by’isoko ry’umusaruro w’ubuhinzi.

Nubwo bimeze bityo, abadepite bagaragaje ko hakenewe igisubizo cyihutirwa, kugira ngo ibitoki bikomeza kwera bitangirika, abahinzi n’abashoramari badakomeza guhomba, kandi ubuziranenge bw’ibinyobwa bukomeze kubahirizwa.

Abadepite bagaragaje impungenge z’igihombo abahinzi b’urutoki bakomeje guterwa n’ifungwa ry’inganda zenga inzoga zikomoka ku bitoki, basaba Minisiteri y’Inganda n’Ubucuruzi (MINICOM) gufata ingamba zihutirwa kugira ngo uwo musaruro ubone isoko.

Ibi byagarutsweho ubwo abadepite babazaga Minisitiri w’Inganda n’Ubucuruzi, Marie-Antoine Kajangwe, impamvu inganda zafunzwe nyuma y’uko ba nyirazo bashoye imari, bagafata inguzanyo mu mabanki, n’abahinzi na bo bakaba barahinze urutoki bizeye ko bazabona isoko ry’umusaruro wabo.

Depite Christine Mukabunani yavuze ko MINICOM yari ikwiye gukumira ibibazo byagejeje izo nganda ku ifungwa, binyuze mu bugenzuzi bwagombaga kugaragaza ibitagenda neza hakiri kare.

Yagize ati “MINICOM ifite inzego zikora ubugenzuzi. Ndashaka kumva uko byagenze kugira ngo babone ko ziriya nganda zidakora abantu baramaze kwitegura, barashoyemo, ari ku ruhande rw’abanyenganda bari bariteguye bafite imyenda mu mabanki, mbese biteguye ari ho business yabo ishingiye, hanyuma bugacya mu gitondo ngo uruganda rurafunzwe, kandi haragiye hakorwa ubugenzuzi butandukanye.”

Mukabunani yavuze ko n’abahinzi bashishikarijwe guhinga urutoki kuko hari inganda zari zemewe gutunganya umusaruro warwo, bityo na bo bakaba barashoye amafaranga bizeye ko bazabona isoko.

Yagaragaje ko hari abahinzi bageze aho gutekereza ko imitungo yabo ishobora gutezwa cyamunara n’amabanki kubera imyenda bafashe, mu gihe batagishobora kubona isoko ry’ibitoki byabo.

Yabajije MINICOM impamvu itakoze inshingano zayo uko bikwiye, ku buryo ibibazo byari mu nganda byari gukemurwa bitarateza igihombo gikomeye ku bashoramari no ku bahinzi.

Depite Mukabunani yanagarutse ku mabwiriza agenga isuku n’ubuziranenge bw’inzoga za gakondo, avuga ko no mu nzego z’ibanze hakiri urujijo ku bipimo byakoreshwa mu kumenya niba inzoga zengwa n’abaturage zujuje ubuziranenge.

Yagize ati: “Na bo iyo muganiriye barakubwira bati ‘Natwe ntabwo tuzi icyo twashingiraho twemeza ko uriya muntu yakoze ibintu byujuje ubuziranenge cyangwa bitujuje ubuziranenge.’”

Yavuze ko kuba nta buryo bwumvikana bwo gupima ubuziranenge bw’inzoga za gakondo bishobora guteza amakimbirane hagati y’abaturage n’abayobozi, cyane cyane iyo inzoga z’umuturage zimennwe mu gihe atazi neza impamvu zifatwa nk’izitujuje ubuziranenge.

Abadepite basaba ko umusaruro w’ibitoki uhabwa isoko

Depite Erneste Nsangabandi yavuze ko ikibazo cy’ifungwa ry’inganda cyakajije ikibazo cy’isoko ry’ibitoki, kandi ko umusaruro ukomeza kwiyongera mu gihe abahinzi badafite aho bawerekeza.

Yabajije niba, mu gihe MINICOM n’izindi nzego bireba zigitegura amabwiriza y’ubuziranenge, hatashakwa ubundi buryo bwatuma umusaruro w’abaturage ukomeza kubona isoko.

Depite Damien Nyabyenda na we yagaragaje ko uburyo bwo kugenzura ubuziranenge bw’ibiribwa n’ibinyobwa bya gakondo bikoreshwa mu bukwe bwakwigwaho, kugira ngo harebwe niba hari ibyakurikizwa no mu bicuruzwa bigenewe isoko.

Yavuze ko igenzura rikorwa ku rwego rw’umudugudu rishobora gufasha mu gukumira ikorwa n’ikoreshwa ry’inzoga za gakondo zitujuje ubuziranenge, ariko ko hakwiye no kurebwa uko abahinzi b’urutoki batagira uruhare mu ikorwa ry’ibinyobwa bitujuje ubuziranenge barindwa igihombo.

Yasobanuye ko hari abahinzi bateye urutoki bagamije kurubyaza umusaruro ubafasha kwishyurira abana amashuri no kubona ibitunga imiryango yabo, bityo bakaba badakwiye kugirwaho ingaruka z’ibibazo bitagize uruhare mu guteza.

Depite Mazimpaka yagaragaje ubwinshi bw’umusaruro w’ibitoki byengwamo inzoga, ashingiye ku mibare y’Ikigo cy’Igihugu cy’Ibarurishamibare (NISR).

Yavuze ko mu Rwanda buri mwaka haboneka toni 562.968 z’ibitoki byengwamo inzoga, asobanura ko uwo musaruro ukomoka ku buso bunini bw’ubutaka bwateweho urutoki, ku buryo kuwubura isoko bishobora kugira ingaruka zikomeye ku bahinzi.

Yagaragaje impungenge ko ikibazo cy’isoko gishobora gukomeza gukomera, kuko abahinzi badashobora kurandura urutoki bari barateye biteze ko ruzabinjiriza amafaranga.

Depite Yvonne Mujawabega yabwiye Minisitiri w’Inganda n’Ubucuruzi (MINICOM) ko bitumvikana ukuntu “mu gihugu gitemba amata n’ubuki,” umworozi yagurirwa umukamo ku mafaranga Magana ane kuri litiro (400FRW/L), ariko akagera ku muturage ugiye kuyanywa ageze hejuru y’ibihumbi bibiri kuri litiro (+2,000FRW/L).

Yabivuze ubwo Minisitiri wa MINICIM, Antoine-Marie Kajangwe, yari yitabye abadepite kuri uyu wa Kabiri, ngo abasobanurire ibibazo bagejejweho n’abaturage bijyanye no gutunganya umusaruro w’ubuhinzi no kuwubonera isoko.

Mujawabega yagize ati “Umworozi aratanga litiro y’amata ku mafaranga 400, ariko ubungubu turimo kuyigura twebwe ku mafaranga arenze ibihumbi bibiri, sinzi niba rero kino kibazo kidakwiye gushyirwamo imbararaga zihuse kugira ngo umworozi ahabwe agaciro, ndetse n’Umunyarwanda abone amata, cyane cyane ko kino gihugu kizwi nk’igihugu cy’amata n’ubuki.”

Ati “Numva hari igikwiye gukorwa kugira ngo umworozi ahabwe agaciro n’Umunyarwanda ndetse n’umuturarwanda abone amata.”

Minisitiri Kajangwe yasobanuriye abadepite ko MINICOM n’abafatanyabikorwa bayo bafashe ingamba ko Leta iva mu byo kugena ibiciro by’umusaruro bigakorwa n’abahinzi n’aborozi ubwabo, bakaba ari bo bicara bakabigenza bakurikije ibyo baba bashoye, ndetse n’uko isoko rihagaze.

Yavuze ko kugeza ubu, ku bihingwa bimwe na bimwe nk’ibirayi, umuceri, kawa n’ibindi byatangiye gushyirwa mu bikorwa, kandi bakaba bashaka no kubikora ku mata. Bityo ngo bakaba bumva bizaba igisubizo ku biciro by’amata kuko “usanga yagurishwaga ku giciro kimwe mu gihe cy’umwaka wose.”

Ati “Ariko ubungugu, hazajya habaho inama zibishinzwe (Boards), ku buryo niba ari iy’amata izajya yicara mu gihe cy’imvura hari amata menshi bakagena igiciro bayagurishaho, byagera no mu gihe cy’impeshyi, igihe amata aba yabuze bakongera bakicara bakagena igiciro kijyanye n’icyo gihe.”

Ni ibiganiro bibaye mu gihe, kuba mu Gicurasi uyu mwaka amata yabaye ingume, ku buryo abaturage bageze n’aho bifuza ko yabahenda, ariko akaboneka. Byageze n’aho ku maguriro amwe n’amwe bagena umubare w’udusashi ntarengwa tw’amata bashobora guha umukiliya.

Nko muri Simba, amakuru dukesha umwe mu bahahirayo, avuga ko bo batigeze bazamura ibiciro by’amata ngo bayatange ku biciro by’umurengera nk’uko ahandi hamwe na hamwe bimeze, ariko ko ntawe bashobora kurengereza udupaki (udusashi) dutatu tw’amata.

Ibi babigarutseho mu biganiro y’abadepite bagize Komisiyo y’Imiyoborere n’Uburinganire yagiranye na MINALOC, kuri uyu wa Kabiri, bigamije kureba aho Politiki y’Igihugu yo Kwegereza Abaturage Ubuyobozi n’Ubushobozi yo mu 2021 igeze ishyirwa mu bikorwa.

Depite Sylivie Muyango Mukayiranga yavuze ko kuba serivisi nyinshi zigikorerwa ku rwego rw’igihugu bidahuye n’intego yo gushyira umuturage ku isonga no kumwegereza ubuyobozi.

Yagize ati “Ko duhora tubivuga, slogan yacu nk’igihugu ari ugushyira umuturage ku isonga, none 56% bya serivisi ziracyari ku rwego rw’igihugu. Mu yandi magambo, umuturage ntaraba ku isonga uko tubyifuza.”

Yasabye MINALOC kugaragaza ingengabihe igaragaza serivisi zizajya zimanurwa zikegerezwa abaturage, n’igihe bizakorerwa, kugira ngo ishyirwa mu bikorwa ry’iyo politiki rigaragare mu bikorwa bifatika.

Minisitiri w’Ubutegetsi bw’Igihugu, Dominique Habimana, yavuze ko kuba 44% bya serivisi ari byo bitangirwa mu nzego z’ibanze bitavuze ko izindi zose zigomba kuvanwa ku rwego rw’igihugu, kuko hari izikwiye gutangirirwa ku rwego rwo hejuru.

Yagize ati “Ntabwo bisobanura ko hari ikibazo kubera ko n’ubundi hari serivisi zishobora gutangwa ku rwego rw’igihugu. Ibyo ntacyo bitwaye, icy’ingenzi ni uko tumenya ngo serivisi zirimo gutangirwa ku rwego runaka, ni ho zigomba kuba zitangirwa, kugira ngo izigomba gutangirwa ku rwego rw’ibanze zimanuka zigatangirwa mu nzego z’ibanze.”

Abadepite banagaragaje ko kwegereza abaturage serivisi bidakwiye kugarukira ku kuzishyira hafi yabo gusa, ahubwo ko hakenewe kunoza uburyo bakirwa n’uburyo ibibazo byabo bikurikiranwa.

Depite Muyango yasabye ko amahugurwa ahabwa abayobozi n’abakozi bo mu nzego z’ibanze yakongerwamo ajyanye no kubaha umuturage, bityo abayobozi bakamenya ko guhabwa serivisi nziza ari uburenganzira bw’umuturage, atari ukumugirira impuhwe (kumuha faveurs).

Yavuze ko umuturage agomba guhabwa ibisobanuro ku kibazo agejeje ku buyobozi, ndetse n’igihe bidashoboye gukemuka, akamenyeshwa impamvu n’imbogamizi zabayeho aho gusigara mu gihirahiro.

Abayobozi bahora mu nama aho guha abaturage serivisi

Ikindi kibazo cyagarutsweho ni igihe abayobozi bo mu nzego z’ibanze bamara mu nama, bikaba bishobora gutuma abaturage bajya gusaba serivisi ku biro bakabasanga badahari.

Imibare yatanzwe muri ibyo biganiro igaragaza ko mu minsi 365 igize umwaka, abayobozi bo mu nzego z’ibanze bamara iminsi 65 mu nama. Abadepite basabye ko harebwa uburyo izo nama zategurwa hadahungabanyijwe inshingano zo guha abaturage serivisi.

Depite Muyango yagaragaje ko bidakwiye ko umuturage ajya ku kagari cyangwa ku murenge gusaba serivisi agasanga abayobozi badahari kubera inama za hato na hato.

Abadepite basabye MINALOC gufata ingamba zifatika zo kunoza imitangire ya serivisi, gukurikirana ibibazo by’abaturage no kubasobanurira ibyemezo bibareba, kugira ngo politiki yo kwegereza abaturage ubuyobozi n’ubushobozi igire uruhare rugaragara mu buzima bwabo bwa buri munsi.

Urwego rw’Igihugu rw’Ubugenzacyaha (RIB), rwerekanye itsinda ry’abantu bafatiwe mu byaha bitandukanye birimo kwiba no kwangiza ibikorwa remezo by’amashanyarazi, birimo intsinga.

Aberekanywe ni abantu 11 bakora nk’itsinda bafatiwe mu Turere dutandukanye twiganjemo utwo mu Mujyi wa Kigali n’utwo mu nkengero zawo, bakaba bashobora kugirana isano no kuba ba nyirabayazana w’ibura rya hato na hato ry’amashanyarazi ryagiye rigaragara mu bice bitandukanye by’Igihugu mu minsi ishize.

Abakurikiranwe barimo abanyamahanga babiri bafite ubwenegihugu bwa Uganda, ari na bo baguraga intsinga z’amashanyarazi bakazigurisha mu bihugu by’amahanga.

Bafashwe ku bufatanye bwa Polisi na RIB, bafatanwa intsinga zingana na toni 1.5, zifite agaciro k’arenga miliyoni 20 Frw, zibwe mu Turere dutandukanye turimo utwo mu Mujyi wa Kigali, Kamonyi na Bugesera.

RIB ivuga ko bakurikiranyweho ibyaha bitatu birimo kurema umutwe w’abagizi ba nabi, ubujura no kwangiza ibikorwa remezo, bakaba bafungiye kuri sitasiyo ya polisi ya Kicukiro na Nyarugenge, dosiye yaba ikaba yaramaze gushikirizwa ubugenzacyaha.

Umuvugizi wa RIB, Thierry B. Murangira, avuga ko abafashwe bose bahuriye ku gikorwa cyo gusenya no kwangiza ibikorwa remezo byiganjemo kwiba intsinga z’amashanyarazi.

Ati "Intsinga z’amashanyarazi zibwa mu buryo butandukanye, zibwa n’abantu. Abanyarwanda bakaziba, bakagira aho bazigezaza, naho bakagira uko bazifata bakazambutsa mu bihugu by’abaturanyi. Ni intsinga z’amashanyarazi zo mu bwoko bwa kopa (copper), zibwe mu bice bitandukanye by’Igihugu cyacu."

RIB ivuga ko aba bantu bakoraga nk’itsinda ku buryo hari abari bashinzwe ibikorwa byo kwiba intsinga bakazijyanira bagenzi babo bazishishuraga, bakazikusanyiriza mu rugo rumwe, ari naho zarangurirwaga zikajyanwa mu bihugu by’abaturanyi.

RIB ivuga ko nyuma yo kumva ibirego bitandukanye by’abaturage yakoze iperereza igasanga ubujura burimo gukorwa atari ubusanzwe, kuko bitari bisanzwe ko intsinga z’amashanyarazi zibwa ngo zijyanwe ku isoko ry’imbere mu gihugu ngo zizagurwe.

Intsinga zafashwe zose, zafatiwe mu rugo rw’umwe mu banyamahanga bafashwe, kuko bose batuye mu Mujyi wa Kigali, ari naho bazikuraga bajya kuzigurisha hanze y’u Rwanda.

Ibyaha bakurikiranweho bihanwa n’amategeko y’u Rwanda, kuko icyo gushyiraho umutwe w’ubugizi bwa nabi no kuwujyamo gihanishwa igifungo kiri hagati y’imyaka 7-10, kigahanwa n’ingingo ya 224 y’itegeko riteganya ibyaha n’ibihano.

Itegeko riteganya kandi ko icyaha cyo kwangiza ibikorwa remezo cyangwa ibikoresho bitanga amashanyarazi, gihanwa n’ingingo ya 51, iteganya igifungo cy’imyaka iri hagati y’imyaka 3-5, ikanateganya ihazabu y’amafaranga y’u Rwanda miliyoni imwe kugera kuri eshanu.

Ikindi ni icyaha cy’ubujura, gihanwa n’ingingo ya 166 y’itegeko, gihanishwa igifungo kiri hagati y’umwaka 1-2, n’ihazabu y’amafaranga y’u Rwanda ya miliyoni 1 kugera kuri 2

Umwanditsi akaba n’umuhanzi w’Umunyarwanda, Gaël Faye yatanze ikiganiro muri Kaminuza ya Georgetown i Washington D.C., muri Leta Zunze Ubumwe za Amerika, aho yaganiriye ku gitabo cye ’Jacaranda’, cyibanda ku kwibuka amateka no kongera kubaka ubuzima n’umuryango Nyarwanda nyuma ya Jenoside yakorewe Abatutsi mu 1994.

Ni igikorwa cyabaye mu rugendo akomeje gukorera muri Leta Zunze Ubumwe za Amerika mu rwego rwo kumurikira iki gitabo cye ‘Jacaranda’, aho azasura imijyi itandukanye, akazahurira n’abakunzi b’ubuvanganzo n’abanyeshuri.

Muri iki kiganiro, Gaël Faye yagarutse ku rugendo u Rwanda rwakoze mu kwimakaza amahoro, ubumwe n’ubwiyunge nyuma ya Jenoside yakorewe Abatutsi, agaragaza ko kwibuka amateka ari ingenzi mu kubaka ejo hazaza.

Yanasabye ko hakomeza kwitabwa ku kibazo cy’ingengabitekerezo ya Jenoside n’abahakana cyangwa bagapfobya Jenoside yakorewe Abatutsi, agaragaza ko ari imbogamizi ikeneye ko abantu bakomeza kuyirwanya.

Igitabo Jacaranda kigaruka ku ngaruka za Jenoside ku bantu n’imiryango, ku kwibuka, ibikomere by’amateka n’uburyo abantu bashobora kongera kubaka ubuzima nyuma y’ibyabaye.

Iki kiganiro cyabereye muri Georgetown University cyatanze umwanya wo kuganira ku ruhare rw’ubuvanganzo mu kubika amateka, kuyasobanukirwa no gufasha ibisekuru bizaza kumenya ibyabaye mu Rwanda.

Igitabo ‘Jacaranda’ cyasohotse bwa mbere mu Gifaransa mu 2024, nyuma kigahindurwa mu Cyongereza na Sarah Ardizzone, kikagera ku isoko ku wa 25 Kanama 2026, kikaba kivuga inkuru y’umwana witwa Milan, wari utuye i Versailles mu Bufaransa mu gihe cya Jenoside yakorewe Abatutsi mu 1994.

Kikaba ari igitabo cya kabiri Gaël Faye yasohoye, nyuma ya ‘Petit Pays’ cyagiye hanze muri Kanama 2016.

Nk’uko bigaragara muri gahunda yashyizwe ahagaragara, uru rugendo rwo kumurika igitabo ’Jacaranda’ rukazakomereza mu bindi bigo no mu bindi bikorwa by’ubuvanganzo.

Kuri uyu wa 3 Ugushyingo, aritabira ikiganiro muri Politics & Prose i Washington D.C., ku wa 4 Ugushyingo akomereze muri Villa Albertine i New York, naho ku wa 5 Ugushyingo ajye muri La Maison Française muri Columbia University.

Ku wa 6 Ugushyingo, azaba ari muri Carter Center mu Mujyi wa Atlanta, akomereze muri SCADshow ku wa 7 Ugushyingo mu gihe azakomereza muri Spelman College ku wa 8 Ugushyingo, mbere yo gusoza uru rugendo ku wa 10 Ugushyingo muri Charleston Literary Festival.

Abasirikare 254 bo mu Ngabo za Repubulika ya Santarafurika (FACA) barimo Ofisiye n’andi mapeti basoje amahugurwa y’amezi atandatu y’imyitozo ya gisirikare igenerwa ingabo zo mu Mutwe Udasanzwe (Basic Special Operations Force Training Course), icyiciro cya kabiri cya 2026. Ayo mahugurwa yatanzwe n’abarimu bo mu Ngabo z’u Rwanda (RDF), yaberaga mu Kigo cy’Amahugurwa ya Gisirikare giherereye i Nasho, mu Karere ka Kirehe.

Uyu muhango wo gusoza amahugurwa wayobowe n’Umugaba Mukuru w’Ingabo z’u Rwanda, Gen MK Mubarakh, ari kumwe n’Umugaba Mukuru w’Ingabo za Santarafurika, Gen Zephirin Mamadou. Witabiriwe kandi n’abasirikare bakuru bo ku mpande zombi.

Aya mahugurwa yari agamije kongerera ubushobozi abasirikare ba FACA mu bikorwa bya gisirikare, binyuze mu mahugurwa akomeye, imyitwarire n’ubunyamwuga bikenewe kugira ngo bashobore gukora imirimo yihariye ya gisirikare no guhangana n’imbogamizi ziba mu bihe bigoye by’ibikorwa bya gisirikare.

Umugaba Mukuru w’Ingabo z’u Rwanda yashimiye abasoje amahugurwa ku bw’intambwe bagezeho nyuma y’amezi atandatu y’amahugurwa akomeye. Yashimye ubwitange, ikinyabupfura, kwihangana n’umurava bagaragaje mu gihe cyose cy’amahugurwa.

Yabashishikarije gukomeza kubahiriza amahame y’ubunyamwuga bungukiye muri ayo mahugurwa, gukorera igihugu cyabo babikunze no gukoresha neza ubumenyi bungutse. Yongeye gushimangira ko RDF yiyemeje gusangiza ubunararibonye n’ubumenyi ifite izindi ngabo z’ibihugu bafitanye ubufatanye, mu rwego rwo gukomeza imbaraga zihuriweho zo guteza imbere amahoro, umutekano n’ituze ku mugabane wa Afurika.

Umugaba Mukuru w’Ingabo za Santarafurika, Gen Zephirin Mamadou, yashimiye byimazeyo Guverinoma y’u Rwanda, ubuyobozi bw’Ingabo z’u Rwanda n’abarimu batanze aya mahugurwa, ku bw’ubwitange, ubunyamwuga n’umurava bagaragaje mu gihe cy’amezi atandatu. Yagaragaje ko ubumenyi, ikinyabupfura n’ubushobozi abasirikare be bungukiye muri aya mahugurwa bizabafasha kurushaho kuzuza inshingano zabo neza no kugira uruhare mu kubungabunga umutekano n’ituze muri Repubulika ya Santarafurika.

2LT Christ Ngboundourou, umwe mu basoje aya mahugurwa, yavuze ko yiyemeje gushyira mu bikorwa ubumenyi n’ubushobozi yungukiye mu Rwanda, mu kurinda igihugu cye n’abaturage ba Repubulika ya Santarafurika.

Mu gihe cy’amezi atandatu abahugurwaga bungutse ubumenyi n’ubushobozi buhanitse mu bijyanye n’amayeri akoreshwa ku rugamba. Muri byo harimo kurasa neza hakoreshejwe imbunda nto n’inini, kurwana badakoresheje intwaro, kwambuka imigezi n’ahantu hari amazi, kugendera ku makarita ya gisirikare, ibikorwa bya gisirikare bikorerwa hifashishijwe indege za kajugujugu, ndetse n’ubundi bumenyi bwihariye.

Gusoza aya mahugurwa ni intambwe ikomeye mu kongerera ubushobozi n’ubunyamwuga abasirikare ba Santarafurika, kandi bishimangira ubufatanye burambye mu bya gisirikare hagati y’u Rwanda na Repubulika ya Santarafurika, by’umwihariko mu bijyanye n’amahugurwa ya gisirikare, kongerera ubushobozi inzego z’ingabo no guteza imbere ubunyamwuga.

Intumwa z’Umuryango w’Ingabo ziteguye gutabara mu karere ka Afurika y’Iburasirazuba (Eastern Africa Standby Force – EASF), ziyobowe n’Umuyobozi wawo, Brig Gen Ronald Rwivanga, kuri uyu wa Mbere tariki 02 Ugushyingo 2026, zatangiye igikorwa cy’iminsi itandatu cyo kugenzura ubushobozi u Rwanda rwemeye gutanga muri uwo muryango.

Iki gikorwa kigamije gusuzuma no kugenzura ubushobozi u Rwanda rwemeye gutanga mu nzego z’igisirikare, Polisi n’abasivili, harebwa uburyo ubwo bushobozi buteguwe neza kandi bushobora gushyigikira ibikorwa byo kubungabunga amahoro n’umutekano mu karere igihe cyose bikenewe.

Mu muhango wo gutangiza ku mugaragaro iki gikorwa wabereye ku Cyicaro Gikuru cy’Ingabo z’u Rwanda (RDF), Maj Gen Dr Ephrem Rurangwa, Umugaba ushinzwe Serivice z’Ubuvuzi muri RDF, yakiriye izo ntumwa mu izina ry’Umugaba Mukuru w’Ingabo z’u Rwanda.

Yashimangiye ko ibikorwa nk’ibi byo kugenzura ari ingenzi mu guhindura ibyo ibihugu bigize uyu muryango byiyemeje mo ubushobozi bufatika bushobora koherezwa mu butumwa. Yagaragaje kandi akamaro ko kugira abasirikare n’abandi bakozi bahuguwe neza, bafite ibikoresho bihagije, ku buryo baba biteguye koherezwa mu butumwa igihe cyose bibaye ngombwa.

Brig Gen Ronald Rwivanga, uyobora Umuryango wa EASF, yasobanuye ko iki gikorwa kiri muri gahunda zisanzwe z’uyu muryango zo gusuzuma ubushobozi buri gihugu cyiyemeje gutanga.

Yavuze ko iki gikorwa kigamije kugenzura ubushobozi bw’abasirikare n’ibikoresho byabo, ndetse n’ubushobozi bw’urwego rwa Polisi n’inzego z’abasivili zishyigikira ibikorwa, harimo na Minisiteri y’Ububanyi n’Amahanga.

Brig Gen Rwivanga yagaragaje icyizere ku myiteguro y’u Rwanda, avuga ko adashidikanya ku bushobozi bwarwo bwo kuzuza inshingano rwiyemeje mu rwego rw’uyu muryango w’akarere.

Muri iyi minsi itandatu, intumwa za EASF zizasuzuma ubushobozi u Rwanda rwiyemeje gutanga mu Ngabo zirwanira ku butaka, izirwanira mu kirere n’urwego rw’Ubuvuzi mu Gisirikare, hakazagenzurwa abakozi n’ibikoresho.

Kuri uyu munsi wa mbere, izo ntumwa zasuzumye umutwe w’ingabo zirwanisha ibifaru (Motorised Battalion), umutwe wa Military Police (Military Police Company) n’Ibitaro byo ku rwego rwa kabiri (Level 2 Medical Unit).

Iryo tsinda kandi ryasuzumye ubushobozi u Rwanda rwiyemeje gutanga mu gutabara indembe cyangwa abakomerekeye mu bikorwa bya gisirikare hifashishijwe uburyo bw’indege, harimo kajugujugu yo mu bwoko bwa Mi-17 n’indege yo mu bwoko bwa Caravan.

Biteganyijwe kandi ko izo ntumwa zizagenzura umutwe w’Ingabo zidasanzwe (Special Forces Squadron), umutwe w’Ingabo zirwanira ku butaka (Light Infantry Battalion), ndetse zikanasuzuma ubushobozi u Rwanda rwiyemeje gutanga mu rwego rwa Polisi.

Iki gikorwa cyo kugenzura ni intambwe ikomeye mu kureba niba ubushobozi u Rwanda rwiyemeje gutanga bwujuje ibisabwa n’Umuryango w’Ingabo ziteguye gutabara mu karere ka Afurika y’Iburasirazuba, bugakoreshwa mu butumwa bwo gushyigikira ibikorwa byo kubungabunga amahoro n’umutekano mu karere.

Perezida w’u Rwanda, Paul Kagame, yavuze ko hakenewe guhindura imyumvire ivuga ko gushora imari mu bihugu biri mu nzira y’amajyambere bifite ibyago byinshi kurusha mu bihugu byateye imbere, ashimangira ko ubufatanye hagati ya Leta n’abikorera ndetse no guhuza amasoko byafasha ibyo bihugu gukurura ishoramari no kwihutisha iterambere.

Ibi yabigarutseho mu kiganiro cyabereye mu nama ya 28 y’Abakuru b’Ibihugu na za Guverinoma bigize Umuryango wa Commonwealth (CHOGM 2026), iri kubera muri Antigua na Barbuda.

Muri iki kiganiro cyibanze ku mpinduka zikenewe mu mitekerereze no mu mikorere kugira ngo ibihugu bibashe guhangana n’ibibazo by’iterambere no kubyaza umusaruro amahirwe bihari, Perezida Kagame yari kumwe na Minisitiri w’Intebe wa Jamaica, Andrew Holness, na Minisitiri w’Intebe wungirije wa Samoa, Mulipola Anarosa Ale Molioʻo.

Abayobozi bari bitabiriye iki kiganiro basabwe kugaragaza imyumvire imwe bumva ko ikwiye guhinduka mu buryo ibihugu byabo bikemura ibibazo bikomeye kandi bigakoresha amahirwe ahari.

Perezida Kagame yavuze ko kimwe mu bikwiye guhinduka ari imyumvire ivuga ko ishoramari mu bihugu biri mu nzira y’amajyambere rifite ibyago byinshi kurusha irikorerwa mu bihugu byateye imbere.

Yagize ati: “Hari imyumvire isanzweho ivuga ko ibihugu biri mu nzira y’amajyambere, iyo bishoye imari mu bikorwa by’iterambere, ishoramari ryabyo riba rifite ibyago byinshi kurusha irikorerwa mu bihugu byo mu majyaruguru y’isi”.

Perezida Kagame yagaraje ko iyi myumvire imaze igihe kirekire igaragara. Nyamara, ikaba atari ukuri. Perezida yavuze ko ishoramari rishobora guhura n’ibyago ahantu hose, naho umuntu yaba ahisemo gushora imari hose.

Yasobanuye ko kugira ngo iyo myumvire ihinduke, hakenewe ubufatanye, guhuriza hamwe ubushobozi no gushyiraho uburyo bwo kugabanya ibyago bishobora guhungabanya ishoramari.

Yongeyeho ko Umuryango wa Commonwealth ushobora kugira uruhare mu guhindura iyo myumvire, kugira ngo ibihugu bidakomeza gufatwa nk’ahantu hashobora guteza igihombo ku bashoramari bitewe gusa n’aho biherereye.

Ikindi kibazo cyagarutsweho ni ikivuga uburyo ibihugu bito byakurura ishoramari, umuyobozi w’ikiganiro yatanze urugero rw’u Rwanda, agaragaza ko nubwo rudakora ku nyanja kandi rudafite peteroli, ubukungu bwarwo bwakomeje kwiyongera ku kigero cyo hejuru.

Yabajije Perezida Kagame icyo ibihugu bito bigize Commonwealth byakora kugira ngo bikurure ishoramari, mu gihe abashoramari bashobora kugira impungenge zishingiye ku bunini bw’isoko, ubushobozi bw’igihugu bwo kwishyura imyenda n’ikiguzi cyo kubona igishoro.

Mu gusubiza, Perezida Kagame yavuze ko hakwiye kubanza gusobanurwa uko umushinga uzashyirwa mu bikorwa kandi ushobora kubyara inyungu, kandi hakagaragazwa uburyo utagomba kubuzwa amahirwe n’igihugu uzakorerwamo.

Yashimangiye ko Leta n’abikorera bakwiye gufatanya gushyiraho uburyo bworohereza abashoramari kubona ubushobozi n’ibindi bikenewe kugira ngo babashe gushyira mu bikorwa imishinga yabo.

Perezida Kagame kandi yagaragaje ko guhuza amasoko ari kimwe mu bisubizo byafasha ibihugu bikiri mu nzira y’Amajyambere kwagura amahirwe y’ishoramari.

Yavuze ko umushinga udakwiye gufatwa nk’ugenewe isoko rito ryo mu gihugu kimwe gusa, ahubwo ko ukwiye kureberwa mu rwego rw’isoko rinini kandi rigenda ryaguka, rirenga imbibi z’igihugu urimo.

Yashimangiye ko kugira ngo ibyo bigerweho hakenewe politiki zishyigikira ishoramari, inzego zifite ubushobozi bwo gushyira mu bikorwa inshingano zazo, imiyoborere myiza ndetse n’imikoranire ihamye hagati ya Leta n’abikorera.

Iyi nama ya 28 ya CHOGM 2026 yahurije hamwe Abakuru b’Ibihugu na za Guverinoma 30, ikaba ifite insanganyamatsiko igira iti: “Kwihutisha ubufatanye n’ishoramari bigamije kubaka Commonwealth iteye imbere.”

Twahirwa Alfred yongeye gutorerwa kuyobora Ishyirahamwe ry’umukino wa Handball mu Rwanda mu gihe cy’imyaka ine iri mbere kugeza mu 2030, atangirana n’amateka yo kubaho ku nshuro ya mbere ku ikipe y’Igihugu y’u nkuru y’abagore.

Ni amatora yabaye ku wa 1 Ugushyingo 2026, abera mu Nama y’Inteko Rusange idasanzwe, ahatorewemo Komite Nyobozi Nshya ya FERWAHAND izayobora muri manda y’imyaka ine iri imbere intsinzi yegukanwa na Twahirwa Alfred wari usanzwe ari Perezida akaba yari nawe mukandida rukumbi kuri uyu mwanya.

Ku mwanya wa Visi-Perezida wa mbere hatowe Dr Akumuntu Joseph, Visi-Perezida wa Kabiri aba Masengesho Dominique mu gihe Umunyamabanga Mukuru nawe yakomeje kuba Tuyisenge Pasca; naho umubitsi aba Niyomutuye Marie Chantal.

Agiye gutangirana n’Ikipe y’igihugu nkuru ya Handball y’abagore ibayeho bwa mbere mu mateka

Muri Manda ye ya kabiri, Twahirwa Alfred agiye gutangirana n’Ikipe y’igihugu y’u Rwanda ya Handball y’abagore ibayeho bwa mbere mu mateka aho yari imaze iminsi yitegura irushanwa ry’akarere ka Gatanu rizabera muri Tanzania hagati y’itariki 4 kugeza ku ya 8 Ugushyingo 2026 aho ndetse yahagurutse yerekeza nyuma yo guhabwa ibendera na Komite Nyobozi Nshya yari imaze gutorwa yabasabye yabasabye kuzitwara neza bakabona itike y’igikombe cya Afurika kizabera muri Tunisia.

Twahirwa Alfred yatangiye kuyobora FERWAHAND muri Werurwe 2022, ubwo yatorwaga n’amajwi 42 kuri 42 y’abanyamuryango bari bitabiriye Inteko Rusange aho icyo gihe yasimbuye Utabarutse Théogène aho yagiye kuri uyu mwanya yari yaranabaye Umunyamabanga Mukuru w;iri shyirahamwe.

Hari Videwo y’abakobwa babiri bavuga Ilingala yavugishije abantu amagambo, aho bavuga ko Abakongomani bashyigikiye ivangura rya Perezida Felix Tshisekedi batajya batekereza kabiri, ahubwo iyo babonye umuntu mwiza, bahita bamwita Umunyarwanda.

Umwe muri aba bakobwa bari bambaye imyenda imeze nk’iya gisirikare yatangiye avuga ati " Fatshi(Tshisekedi) yavuze ko azahagarara i Goma akarasa Kigali. Turi hano i Goma turabategereje."

Yonegeyeho kandi ati "Bavuga ko turi Abanyarwanda ariko ntabwo turi Abanyarwanda. M23 si Abanyarwanda. Ni Abakongomani uretse ko bavuga Ikinyarwanda, ariko ntabwo ari Abanyarwanda."

Umunyamakuru wamubajije yahise amubaza ibivugwa ko FRN/M23 ifite ivangura, maze arasubiza ati "Abacu se(M23/FRN) wagira ngo hari ivangura bagira? Nta vangura bagira, ahubwo kwa Fatshi(Tshisekedi) ni bo usanga umuntu wese uvuga Ilingala bamuvangura."

Yagize ati "N’iyo waba uvuga Ilingala rikaze, ukaba uri umuntu uturuka Kindu, ukaba wifitiye agasura keza(uri mwiza), bavuga ko uri Umunyarwanda."

Dans un message en lingala, une femme vivant dans les zones libérées envoie un clin d’œil au régime de Kinshasa qui prétend que le FRN est composée de Rwandais. Elle dit: "Même si tu es de Kindu, si seulement tu es belle, les Kinois diront que tu es Rwandaise." https://t.co/CaBZlSy50k

— CONGO RÉVOLUTION (@Congo_Revolu) November 2, 2026

Shampiyona ya y’icyiciro cya mbere muri Volleyball igeze ku munsi wa gatatu mu bagabo n’umunsi wa kabiri mu bagore aho amakipe ya Police VC n’ APR VC ariyo ayoboye abandi.

Umunsi wa gatatu mu bagabo wasojwe kuwa gatandatu taliki ya 31 amakipe ya APR VC, KVC, POLICE VC ndetse na Gisagara VC zabonye intsinzi naho REG VC, Kirehe VC, EAUR ndetse na RP Ngoma bo nti bahiriwe n’umunsi wa gatatu. REG VC ibitse igikombe cya shampiyona, yongeye gutsitara itsindwa na APR VC amaseti 3-2 mu gihe nyamara iyi kipe y’ikigo cy’igihugu gishinzwe ingufu ariyo yari yabanje amaseti 2 ariko bikarangira ikipe ya APR VC ivuye inyuma ikegukana umukino.

Kujyeza kuri uyu munsi wa gatatu wa shampiyona, ikipe ya RP Ngoma niyo itarabona inota na rimwe mugihe ikipe ya APR VC yo ikomeje kuyobora urutonde rwa shampiyona n’amanota 8 aho ikurikiwe na POLICE VC n’amanota 7.

Mu cyiciro cy’abagore Bo bakinaga umunsi wa kabiri wa shampiyona aho wasize amakipe ya APR WVC ndetse na POLICE WVC yongeye kubona intsinzi binatuma aba bombi bakomeza kuyobora shampiyona n’amanota atandatu dore ko nta mukino baratakaza.

Ikipe ya Kepler WVC itari yatangiye neza shampiyona, yabonye intsinzi yayo ya mbere nyuma yo gutsinda RP Huye amaseti 3-1 bituma RP Huye nayo ikomeza gutegereza intsinzi yayo ya mbere.

Kujyeza ubu Umugande Mohamed Iga ukinira ikipe ya EAUR niwe umaze gutsinda amanota menshi kuko amaze gutsinda amanota 71 aho akurikiwe n’umunya Brazil Saymon Feitosa ukinira ikipe ya POLICE VC aho we amaze gutsinda amanota 65.

Mu cyiciro cy’abagore, Uwase Celine ukinira ikipe ya KEPLER VC niwe umaze gutsinda amanota menshi kuko amaze gutsinda amanota 43 aho akurikiwe na Uwamaliya Solange ukinira ikipe ya Rwanda Polytechnic Huye college we umaze gutsinda amanota 36.

Shampiyona izakomeza mu mpera z’iki cyumweru hakinwa umunsi w kane aho uzakinirwa I Gisagara ho mu ntara y’amajyepfo.

Kubw’impamvu zitandukanye, hari ubwo haboneka imirambo yaba iyatoraguwe ku muhanda cyangwa mu mazi n’ahandi, ntihamenyekane ba nyirayo, n’imiryango ya ba nyakwigendera ntiboneke.

Hari nubwo umuntu arwarira kwa muganga, akanahapfira nta muryango afite. Ibyo byose bituma hari amatangazo akunze gutangwa n’ibitaro ko amatariki runaka, narenga nta muryango uraboneka, umurambo uzashyingurwa n’ibitaro cyangwa se ahandi bikavugwa ko uzashyingurwa na Leta. Ariko se bigenda bite? Ubwo se bikorwa na bande?

Mu Rwanda, biteganyijwe ko iyo habonetse umurambo utagira ba nyirawo (utazwi,cyangwa ari uwo mu muryango utabonetse), Leta ibinyujije mu buyobozi bw’inzego z’ibanze (Imirenge n’Uturere) bufatanyije n’inzego z’umutekano n’iz’ubuzima buba bufite inshingano zo kuwushyingura mu cyubahiro. Leta ifite inshingano n’ububasha bwo gushyingura umurambo wose udafite ba nyirawo (cyangwa uwo abavandimwe be badafite ubushobozi), hashingiwe ku Itegeko Nº 11/2013 ryo ku wa 11/03/2013 rigena imitunganyirize n’imikoreshereze y’amarimbi mu Rwanda.

Hari amategeko n’amabwiriza biteganya inshingano n’ububasha inzego z’ibanze , ziba zifite harimo kumenya no kwemeza urupfu. Iyo hatoraguwe umurambo udafite ba nyirawo (urugero: uwo mu muhanda, mu mazi, n’ahandi), inzego z’ibanze n’iz’umutekano (Polisi cyangwa RIB) zibanza kubimenyeshwa.

Ibijyanye no gushyingurwa na Leta, biteganyijwe ko iyo bimaze kwemezwa ko uwo muntu atazwi kandi nta muryango we uboneka, Umunyamabanga Nshingwabikorwa w’Umurenge uwo murambo wabonetsemo, afite inshingano n’ububasha bwo gutanga uruhushya rwo kuwushyingura mu irimbi rya Leta cyangwa irimbi rusange. Kwishyura ibikoresho n’imihango yo gushyingura bikorwa n’Akarere binyuze mu ngengo y’imari yagenewe imibereho myiza y’abaturage.

Mbere y’uko umurambo wose udafite ba nyirawo cyangwa uwabonetse ariko bikekwa ko nyirawo yapfuye, mu buryo butandukanye n’ubw’indwara isanzwe ushyingurwa, biteganyijwe ko hagomba gukorwa isuzuma rya muganga kugira ngo hamenyekane icyateye urupfu nk’uko bikubiye mu ngingo ya 29 y’Itegeko Nº 11/2013 ryo ku wa 11/03/2013 rigena imitunganyirize n’imikoreshereze y’amarimbi mu Rwanda.

Ubusabe bwo gukora isuzuma butangwa n’Urukiko rw’Ibanze cyangwa Umugenzacyaha (Judicial Police Officer/RIB) ukorera mu gace uwo murambo wabonetsemo. Uko bigenda, Ibitaro n’Inzego z’Umutekano, birakorana ku buryo, mbere y’uko umurambo nk’uwo ushyingurwa, ubanza kujyanwa mu buruhukiro bw’ibitaro (mortuary) kugira ngo ukorerwe isuzuma (autopsy) n’Urwego rw’Ubugenzacyaha (RIB) cyangwa Rwanda Forensic Institute (RFI). Iyo amatariki ateganyijwe ashize nta muryango uje kuwubaza, ibitaro bifatanyije n’Akarere bikoresha abakozi babyo cyangwa ab’irimbi rya Leta bakawushyingura.

Ibyerekeye ahantu n’uburyo bwo gushyingura, itegeko riteganya ko imirambo nk’iyo ishyingurwa mu bice by’amarimbi ya Leta byagenewe abantu batishoboye cyangwa abadafite ababo. Iyo byemejwe ko ushyingurwa mu buryo bwo gutwikwa(Cremation), Iryo tegeko rigenga iby’amarimbi ryo mu 2013, rivuga ko iyo ari umurambo udafite ba nyirawo, Umunyamabanga Nshingwabikorwa w’Umurenge abyemeza hashingiwe ku cyemezo cya muganga. Umuryango cyangwa abandi bantu bashobora kuzaza gushaka uwo muntu nyuma, bahabwa ivu rye ryabitswe mu buryo bwemewe n’amategeko.

Hari kandi ibyerekeye kubika neza amakuru n’imyirondoro by’umurambo ugiye gushyingurwa na Leta kuko udafite ba nyirawo, aho urwego rw’Umutekano rwandika amakuru yose ashoboka ku muntu wabonetse (ifoto, imyambaro yari ayoboye, n’ibimenyetso by’uwo ari we) mu rwego rwo gufasha abantu bashobora kuzaboneka nyuma bafite aho bahuriye na nyakwigendera.

Ku byerekeye aho Leta ikura abantu bo gushyingura iyo mirambo, bikorwa binyuze mu buryo bwo gukoresha amakoperative cyangwa ibigo bishinzwe isuku mu marimba. Uturere n’Imirenge bikunze kugirana amasezerano n’amakoperative cyangwa ibigo by’abikorera bishinzwe gucunga amarimbi rusange cyangwa gukora isuku mu mijyi. Iyo hari umurambo nk’uwo ugomba gushyingurwa, abo bakozi b’ibyo bigo ni bo babikora bakishyurwa na Leta.

Mu gushyingura imirambo nk’iyo yabonetse ariko nta ba nyirayo babonetse, inzego z’ibanze zishobora guhemba abakozi bazo basanzwe bafasha mu mirimo y’Akarere itandukanye cyangwa abasanzwe bacukura imva mu marimbi rusange.

Muri macye, Leta ntabwo ijya gushaka abantu mu muhanda,babonetse bose, kugira ngo babe ari bo bashyingura imirambo nk’iyo, ahubwo ikoresha abakozi b’amakoperative cyangwa ibigo byasinyanye amasezerano n’inzego z’ibanze mu gucunga amarimbi n’isuku, kandi bose bakishyurwa n’ingengo y’imari y’Akarere cyangwa iy’Ibitaro bya Leta.

Dr Sebajuri Jean Marie Vianney, Umuyobozi mukuru w’Ibitaro by’Akarere ka Bugesera(ADEPR-Nyamata), yasobonuye uko bigenda mu gihe, hari umurambo uri mu buruhukiro bw’ibyo bitaro ayobora kandi bikagaragara ko nta banyirawo bahari.

Yagize ati, “ Iyo umuntu ari muri ‘morgue’ yacu,bikaba bigaragara ko adafite umuntu uza kumufata,usanga ibyo bibazo tubigira (social cases) kandi biba bihari. Ibitaro dutanga itangazo,iryo tangazo ryamara gutangwa tugategereza iminsi itatu(3), muri iyo minsi 3, iyo hatabonetse umuntu uza kumufata ngo ajye kumushyingura,ibitaro biramushyingura.Nta ngengo y’imari yihariye tugira igenewe ibyo, ariko icyo dukora, ushinzwe uburuhukiro yandikira umuyobozi mukuru w’ibitaro,akandika ko hari umurambo ugomba gushyingurwa,kandi udafite ba nyirawo, hanyuma tugatanga amafaranga ya ‘manpower’ (abakozi bafasha muri icyo gikorwa), ayo mafaranga aturuka mu mafaranga yo gukoresha asanzwe y’ibitaro, icyakora hari ubufasha (support) Akarere kajya gatanga,kakabuha ibitaro,ariko hari ibintu byinshi baba bakubiye hamwe, ntabwo ari ukuvuga ngo ni ayo gushyingura imirambo nk’iyo yabuze ba nyirayo gusa,ahubwo haba hari n’ibindi bibazo nk’abaza kwivuza nyuma bakabura ubwishyu,n’ibindi. Hari ubufasha batanga nubwo bidahura neza na serivisi tuba twatanze”.

“ Abajya gushyingura, tureba abantu badufasha yaba abasanzwe bakora isuku ku bitaro (cleaners), cyangwa se abo dusanga ku irimbi,hanyuma tugakoresha ibikoresho byacu, ibisashi byagenewe gushyirwamo imirambo(body bags)”.

Iyo bagiye gushyingura umurambo nk’uko, byakozwe n’ibitaro, ngo ntabwo habaho bya bindi byo kuvuga ijambo nk’uhagarariye umuryango, Dr Sebajuri yavuze ko ibyo ntabibaho.

Yagize ati,” Iyo mihango ntayibaho, ni ukugenda gushyingura bisanzwe,hari itsinda ry’abantu bava ku bitaro bakagenda bagashyingura bisanzwe.Na bya bindi byo gukaraba iyo abantu bavuye gushyingura, ntabyo. Nonese byabaho bite kandi n’abantu bo mu muryango we batabonetse?ntabyo dukora ibyo gukaraba, kuko tuba turimo kumushyingura ku mafaranga yacu ubwacu. Ntabwo bikorwa.Amafaranga aba ahari yemera ibyo byo gucukura imva n’ibijyana nabyo, urumva ko ibyo bindi ntabwo ibijyamo”.

Ibijya bivugwa ko iyo hagize umuryango uboneka nyuma y’uko umuntu wabo yashyinguwe na Leta cyangwa se yashyuwe n’ibitaro, ngo uwo muryango usabwa kwishyura ikiguzi cy’ibyakozwe, Dr Sebajuri yavuze ko ibyo batajya babikora ngo bashyuze abantu nyuma y’uko bashyinguye uwabo.

Yagize ati, “ Iyo hagize umuryango uboneka nyuma, tubereka aho twashyinguye, hanyuma bakabikora uko babishaka, yaba kumwimura aho, bakajya kumushyingura ahandi,twebwe turamubereka kuko ni uburenganzira bwabo. Icyangombwa ni uko baba berekana amasano bafitanye na nyakwigendera.Nta bwishyu tubaka, ibyo ntitubijyamo.Izo mva ziba ziriho ibimenyetso,kandi uwashyinguwe aba yanditswe no muri ‘system’, ku buryo uwabishaka yabibona, kandi hari uburryo bwo kubika ibiranga uwo washyinguwe muri ubwo buryo cyane cyane amazina ye, iyo ari umurambo watoraguwe, hakaboneka nk’indangamuntu ye, birumvikana, iyo ndangamuntu ye turayibika”. s

Irerero rya ruhago rya Iron Sports Academy ryafunguye ku mugaragaro ishami rishya i Kigali, rizajya rikorera imyitozo ku kibuga cy’amashuri cya Green Hills Academy giherereye i Nyarutarama hagamijwe gukomeza guteza imbere impano z’abana no kubategurira kuzavamo abakinnyi bakina ku rwego rw’igihugu ndetse n’urw’Isi.

Ni igikorwa cyabaye ku wa 30 Ukwakira 2026, aho iri shami rishya ryatangiranye abana 20, mu gihe ishami rya Ruyenzi, ryafunguwe muri Mata 2026, naryo rikomeje kwaguka, aho kuri ubu rimaze kugera ku bana 40. Umuyobozi wa Iron Sports Academy, Uwimana Olivier, usanzwe ari umunyamakuru w’imikino, yavuze ko icyemezo cyo gufungura ishami i Kigali cyaturutse ku busabe bw’ababyeyi bifuzaga ko iri rerero ribegerezwa, kuko urugendo rwo kugera ku Ruyenzi rwabagoraga.

Ati “Hari ababyeyi bifuzaga ko tubegereza iri rerero, kuko kugera ku Ruyenzi byabagoraga.Iyo niyo mpamvu twafashe icyemezo cyo gufungura ishami i Kigali kugira ngo abana benshi babone amahirwe yo kwiga no guteza imbere impano zabo mu mupira w’amaguru.”

Uwimana Olivier yongeye kugaruka ku mpamvu zatumye ahitamo gushinga ishuri ryigisha umupira w’amaguru aho kuwukina nk’umwuga avuga ko mu myaka icumi ishize yari ahanganye n’amahitamo hagati yo gukina umupira w’amaguru no gukomeza amasomo aho nubwo yari afite impano yo gukina umupira w’amaguru, ababyeyi be batabishyigikiraga cyane, kuko babonaga ko umupira wamurangaza ndetse birangura ahisemo gukomeza kwiga, ari na byo byamugejeje ku mwuga w’itangazamakuru akora uyu munsi.

Icyakora, avuga ko gushinga Iron Sports Academy ari bumwe mu buryo bwo gufasha abana bafite impano kubona amahirwe we atabashije kubona mu gihe cye.

Ati “Siporo ni uruganda rwagutse, ariko kandi ni ubuzima. Intego yacu ni ukurera abana bafite impano, bakazavamo abakinnyi bashobora guhatana ku rwego mpuzamahanga no mu Rwanda.”

Irerero rya Iron Sports Academy ryakira abana b’ibyiciro bitandukanye, kuva ku myaka itatu y’amavuko kugeza ku myaka 16, haba abahungu cyangwa abakobwa. Iri rerero ryizera ko mu myaka itanu iri imbere rizaba ritangiye kubona umusaruro w’ibikorwa byaryo mu iterambere ry’abana rirera.

Senateri Emmanuel Havugimana yavuze ko hatagize igikorwa, ibiti gakondo bihatse amateka y’u Rwanda cyangwa bifite umwihariko mu myemerere gakondo y’abanyarwanda byazashiraho, maze ubushakashatsi ku hahise h’u Rwanda bukabura icyo bushingiraho.

Senateri Havugimana ukoresha cyane imbuga nkoranyambaga, cyane cyane Facebook atanga ibitekerezo, avuga amateka y’ahahise h’u Rwanda, yabihereye ku giti kimwe yabonye cyatemwe mu Karere ka Ngoma, Intara y’u Burasirazuba mu Cyumweru gishize.

Yagize ati "Ndababaye! Muribuka iyi foto ibanza ibumoso nafashe nkayibereka hano, ngira ngo ni nko muri 2022. Mu kanya rero mbonye iyo iri iburyo! Cya giti cy’umuvumu cyari cyarashibutse mu kigega cy’amazi, imbere ya Katedrali ya Kibungo, haruguru y’ahahoze Inatek.

Yahise abwira abo basanzwe babiziranyego barimo mugenzi we senateri Jean Pierre Dusingizemungu n’abandi barimo Gasana Emmanuel, Batamuliza Janet na Philibert Gakwenzire ati "aho mwakibonye! Baraye bagitemye!"

Aha, Senateri Havugimana ahangayikishijwe n’uko abantu bamwe bari kwambura igihugu ibintu by’agaciro, aho yagize ati "Nyamara ubwo hari abarimu bo muri University of Rwanda bari bamaze iminsi bakora ubushakashatsi kuri ibi biti bifite umwihariko, bimwe kubera imiterere yabyo, ibindi kubera amateka, imihango n’imiziririzo ivugwa bakoreraga munsi yabyo!"

Iyi nararibonye yerekanye ko atari ubwa mbere ibintu nk’ibi biba, aho yagize ati "Binyibukije i Rubengera batema ikigabiro cya Rwabugiri, hariya bita kwa Nyirakabano, igihe abashinwa bakora umuhanda Rubavu-Rusizi, bise Kivu Belt."

Aha rero, yahaye impuruza Akarere ka Gasabo gahatse andi mateka akomeye, kugira ngo na bo ikibazo nk’iki kitazahagera, ati "Gasabo District Nimutareba neza na bya bigabiro bya Gasabo, aho u Rwanda rwatangiriye, nabyo bazabitema!"

Polisi y’u Rwanda ishami rishinzwe kuzimya umuriro, yakuye imirambo y’abantu batatu, mu kirombe cya Kompanyi y’ubucukuzi bw’amabuye y’agaciro (Big Mining) bari bamazemo iminsi umunani bapfuye.

Polisi itangaza ko kubera ko indani bakuwemo yari itagikoreshwa, bagiyemo bitemewe n’amategeko, nyuma y’uburangare bw’uwaharindaga, bivugwa ko yari guhabwa amafaranga bamaze kuvanamo amabuye y’agaciro.

Umuvugizi wa Polisi y’Igihugu mu Ntara y’Amajyepfo CIP Kamanzi Hassan, avuga ko abo bantu bafite imyaka 29, 34 na 36, bamaze gukurwamo imirambo yajyanwe kwa muganga gukorerwa isuzuma, kandi ko batangiye iperereza ku rupfu rwabo.

Agira ati, "RIB yatangiye iperereza ku rupfu rwabo, kandi uwaharindaga yafashwe ngo akurikiranwe ku bunyamwuga bwe, kuko yakoreraga imwe muri sosiyeti zigenga zicunga umutekano, ibindi bizagaragazwa mu iperereza".

Umuyobozi wa Big Mining Eugène Shumbusho yambwiye KigaliToday, ko abapfiriye muri iyo ndani bari baje kwiba amabuye y’agaciro, ariko atari abakozi ba Kompanyi ayobora, gusa ko Kompanyi iri gufasha mu bikenerwa n’imiryango yabo mu gushyingura ba nyakwigendera.

Agira ati, "Ni abari baje kwiba si abakozi bacu, gusa ni Abanyarwanda kandi mu muco wacu turatabarana, niyo mpamvu ibijyanye no kubashyingura turi gukorana n’imiryango yabo".

Ku kijyanye no kuba iyo ndani yari irinzwe, hakaba hibazwa uko abantu bayinjiyemo, Shumbusho avuga ko byaturutse ku bunyamwuga bucye bw’umurinzi wayo, bityo ko bagiye kurushaho gushaka abakozi b’abanyamwuga.

Agira ati, "Tugiye kurushaho gushaka abakozi b’abanyamwuga kurusha abandi, kandi tunahugure abakozi bacu n’abaturiye aho dukorera, uko barushaho kugira ubumenyi ku mikorere y’ibirombe, bityo bamenye uko bitwara".

Polisi igaragaza ko kugira ngo umutekano no kwita ku bidukikije bikorwa neza, ahacukuwe hatagikoreshwa hongera gusubiranywa, kugira ngo hatagira ibindi byago hateza.

Big Mining yo igaragaza ko impamvu itahise ifunga iyo ndani, ari uko yashoboraga kuzayifashisha mu bindi bikorwa nko kunganira aho gusuhokera by’agateganyo cyangwa kwinjiza umwuka mu bindi bice by’indani bacukuye, (exit and Ventilation).

Polisi isaba abacukuzi kwitwararika ku bisabwa ngo bemererwe impushya zo gucukura, birimo kwita ku mutekano w’abakozi, no kubungabunga ibidukikije.

Inasaba kandi abaturage kwirinda kwishora mu bucukuzi butemewe, kuko usibye kuba bahaburira ubuzima, ari n’icyaha gihanwa n’amategeko.

Umutaliyani Andrea Kimi Antonelli ukinira Mercedes, yanditse amateka muri shampiyona ya Formula 1 nyuma yo kwegukana shampiyona ya 2026, ahita yandika amateka yo kuba umukinnyi muto uyegukanye ndetse aba Umunyataliyani wa mbere uyitwaye kuva Alberto Ascari abikoze mu 1953 bityo asubiza igihugu cye mu mateka y’iri rushanwa rikomeye ku Isi nyuma y’imyaka 73.

Uyu musore utwara imodoka ya Mercedes w’imyaka 20 n’iminsi 68, yegukanye iki gikombe nyuma yo gusoza isiganwa rya Grand Prix ya Mexico City ari ku mwanya wa gatatu, ku Cyumweru tariki ya 1 Ugushyingo 2026.

Ibyo byamuhesheje amanota agera kuri 380 atari gutuma bagenzi be bari bahangaye bayakuramo mu gihe hasigaye amasiganwa ane ngo umwaka wa Formula 1 urangire.

Umuholandi Max Verstappen ukinira Red Bull niwe wegukanye isiganwa rya Grand Prix ya Mexico City akaba afite amanota 261 ku mwanya wa Kabiri ku rutonde rusange agakurikirwa na Lewis Hamilton ufite amanota 259.

Verstappen yasoje isiganwa ari imbere ya Hamilton wa Ferrari, wamukurikiye ku mwanya wa kabiri, mu gihe Antonelli yegukanye umwanya wa gatatu ariko wahise umuhesha igikombe cya shampiyona asigaje amasiganwa ane gusa.

Ku myaka 20 n’iminsi 68, Antonelli yahise aba umukinnyi usiganwa muri uyu mukino w’utumodoka duto ukiri muto wegukanye Shampiyona ya Formula 1 mu mateka. Yakuyeho agahigo kari gafitwe na Sebastian Vettel, wagitwaye mu 2010 afite imyaka 23.

Kugeza ubu, Abataliyani batatu ni bo bamaze kwegukana Shampiyona ya Formula 1, aribo Giuseppe Farina mu 1950, Alberto Ascari mu 1952 na 1953, na Kimi Antonelli mu 2026.

Kwegukana iki gikombe kwa Antonelli ni intambwe ikomeye ku Butaliyani, bwari bumaze imyaka 73 butagira umushoferi ubuhagarariye wegukana iri rushanwa rikomeye ku rwego rw’isi.

Ambasaderi w’u Rwanda muri Ghana, Rosemary Mbabazi yasabye Abanyarwanda baba mu mahanga kurangwa n’imyitwarire myiza, guhesha ishema igihugu cyabo no gukoresha amahirwe bafite mu guteza imbere u Rwanda n’imibanire yarwo n’ibindi bihugu.

Yabitangaje mu nama ya mbere ya Unity and Resilience Forum, yabereye i Abidjan muri Côte d’Ivoire, yari ifite insanganyamatsiko igira iti: “Ubumwe n’Ubudaheranwa: Ni amahitamo yacu.”

Iyi nama yahuje Abanyarwanda baba mu mahanga baturutse mu bihugu bitandatu, abafatanyabikorwa baturutse mu Rwanda n’inshuti z’u Rwanda. Yabaye kandi umwanya wo kungurana ibitekerezo ku ruhare Abanyarwanda baba mu mahanga bashobora kugira mu iterambere ry’igihugu.

Mu butumwa yahaye abitabiriye iyi nama, Ambasaderi Mbabazi yabibukije ko aho batuye n’aho bakorera hose bahagarariye u Rwanda. Yagize ati: “Aho mujya hose, muba muri ba ambasaderi b’u Rwanda.”

Yongeyeho ko abantu barenga 200 bitabiriye iyi nama bashobora kugira uruhare rukomeye mu iterambere ry’igihugu igihe ibitekerezo byabo byashyirwa mu bikorwa.

Yasabye Abanyarwanda baba mu mahanga guhuza amahirwe n’iterambere ry’u Rwanda

Ambasaderi Mbabazi yavuze ko u Rwanda n’ibihugu bitandatu byahagarariwe muri iyi nama bifitanye umubano mwiza, ushingiye ku bufatanye n’amasezerano atandukanye, ndetse n’imikoranire y’abakuru b’ibihugu.

Yasabye Abanyarwanda baba muri Côte d’Ivoire by’umwihariko kugira uruhare mu gufasha kurushaho gushimangira uwo mubano, bakoresheje amahirwe babona mu Gihugu batuyemo.

Yagize ati: “Mufite amahirwe. Mujye muyagarura mu Rwanda. Twifuza abafatanyabikorwa benshi hano. Twifuza ko ikoranabuhanga n’ubumenyi byimuka.”

Yabasabye kuba ikiraro gihuza u Rwanda na Côte d’Ivoire, ku buryo habaho imikoranire irushijeho gukomera mu bucuruzi, ishoramari, ikoranabuhanga no gusangira ubumenyi.

Yabasabye kwamamaza ibikorerwa mu Rwanda

Ambasaderi Mbabazi yanashimangiye uruhare rw’abikorera mu iterambere ry’igihugu, asaba Abanyarwanda baba mu mahanga gushyigikira ubucuruzi bw’Abanyarwanda bagura ibikorerwa mu gihugu kandi bakabimenyekanisha mu mahanga.

Yagize ati: “Mugure ibikorerwa mu Rwanda kandi murwamamaze.”

Yavuze ko Abanyarwanda baba mu mahanga ari abafatanyabikorwa b’ingenzi mu rugendo rw’iterambere ry’igihugu, ashimangira ko gutegura ejo hazaza hagomba no kuzirikana inyungu z’urubyiruko n’ibiragano bizaza, nk’uko biteganywa muri gahunda y’Igihugu y’Icyerekezo 2050.

Iyi nama yatangijwe n’ibiganiro byahuje inzobere n’abafatanyabikorwa, hanatangwa ibisobanuro ku mahirwe y’ishoramari binyuze mu Kigo cy’Igihugu gishinzwe Iterambere (RDB), ndetse hanamurikwa ibicuruzwa bikorerwa mu Rwanda.

Ambasaderi Mbabazi yavuze ko iyi nama ari intangiriro y’ibikorwa bigamije guhindura ibitekerezo n’ibiganiro amahirwe afatika, ashimangira ko hari byinshi byitezwe mu bikorwa bizakurikiraho.

Nyuma y’uko umukino wa shampiyona Rayon Sports yatsinzemo Marine FC 2-1 usize impaka cyane cyane ku mutoza Yves Rwasamanzi wanenze imisifurire, rutahizamu wa APR FC Djibril yibajije uko byari kugenda iyo iba ari APR FC yatsinze Marine FC gutyo.

Ibi Djibril Ouattara yabigarutseho yifashishijwe urubuga rwa Instagram aho aseka cyane yibajije uko byari kugenda iyo biba ari APR FC yakinnye na Marine FC.

Ati" Tekereza, iyo iba ari APR FC yatsinze Marine FC muri ubu buryo[ Areseka cyane]."

Ibi Djibril Ouattara yabitangaje mu gihe umutoza wa Marine FC Yves Rwasamanzi avuze ko amakipe yise ko yiyita makuru ateteshwa ariko ntaho bizayageze ahi yavuze ko iyo baba bafatwa kimwe n’abandi Rayon Sports yari kuba yabonye ikarita y’umutuku.

Ibyo Djibril Ouattara yavuze ariko ku rundi asa nk’uwashatse gukomoza ku kuba abakunzi ba Rayon Sports bahora bavuga ko Marine FC idashobora gutsinda APR FC bashingiye ku kuba zose ari ikipe z’Ingabo z’Igihugu, bityo ko uyu mukeba wabo bimworohera kubona amanota dore ko iyi kipe ibarizwa mu Karere ka Rubavu itari yamutsinda muri shampiyona kuva yazamuka.

Umutoza wa Marine FC, Yves Rwasamanzi yagaragaraje kutishimira imisifurire ku mukino w’umunsi wa karindwi wa BK Pro League yatsinzwemo na Rayon Sports 2-1 kuri iki Cyumweru ndetse avuga ko byari kurutwa hagashyirwaho umutoza wa Rayon Sports akaba ariwe wisifurira.

Ibi yabigarutse nyuma y’uyu mukino aganira na Magic Sports TV yerekana Shampiyona aho akiva mu kibuga mu mujinya mwinshi yavuze ko amakipe yitwa ko akomeye ateteshwa kandi ntaho bizayageza agaruka ku makosa abiri arimo inkokora Issa Djiguiba yateye Innocent ku munota wa 28 ndetse n’ikosa Junior Kameni yakoreye Bishira Latif ku munota wa 45 byose umusifuzi yatangiye amakarita y’umuhondo.

Ati "Sinabura kuvuga ikintu kimwe. Igihe cyose abantu badahinduye imyumvire imyumvire, ukabona ikipe zumva ko zikoneye mukazitetesha gutya, umukinnyi akubita inkokora undi kabiri mukamwihorera, Champions League cyangwa Confederation ntabwo bazabareka. Ibi ntabwo ari umupira tuba dukina."

Uyu mutoza kandi yavuze ko Rayon Sports yakabaye yabonye ikarita itukura kandi ko n’igitego Junior Kameni yatsinze yari yabanje gukorera ikosa umunyezamu.

Kuri iki Cyumweru, umutoza w’Amavubi Stephen Constantine yahamagaye abakinnyi 28 bagiye kwitegura imikino ibiri yo gushaka itike y’Igikombe cya Afurika 2027 izayahuza na Mali muri uku Gushyingo 2026.

Ni urutonde rw’agateganyo rw’abakinnyi bagiye bagiye kwitegura umukino w’umunsi wa gatatu uzabera muri Mali tariki 13 ndetse n’umunsi wa kane uzakinirwa i Kigali tariki 17 Ugushyingo 2026, aho rwaranzwe no kudahinduka cyane ugereranyije n’abahamagawe mu mikino ibiri iheruka irimo Liberia na Cabo Verde gusa Emeran Noam akaba ari mu batagarutsemo.

Gusa hari abakinnyi biyongereyemo barimo myugariro Manzi Thierry wagarutse nyuma y’igihe yaravunitse, Ishimwe Ganijuru Elie gusa hongera kuburamo Hakim Sahabo utakibona umwanya wo gukina muri AEK Athens yo mu Bugereki, byatumye adahamagarwa ku nshuro ya kabiri gatatu yikurikiranya.

Nubwo atazakina umukino ubanza kubera amakarita y’umuhondo ariko Mugisha Bonheur ukinira Al Hazem yo muri Saudi Arqbia nawe ari kuri uru rutonde kuko yemerewe gukina umukino uzabera kuri Stade Amahoro.

Kugeza ubu Amavubi ayoboye itsinda rya 11,aho afite amanota atandatu yakuye mu mikino ibiri yose yatsinze, amanota ariko inganya na Mali.

Urutonde:

Abanyezamu:

Niyongira Patient (Police FC)

Hakizimana Adolphe (APR FC)

Mugisha Yves (Rayon Sports)

Ntwari Fiacre (Kruger Utd/South Africa)

Abakina Hagati:

Mugisha Bonheur (Al Hazeem/Saoudi Arabia)

Bizimana Djihad (Cs Constantine/Algeria)

Hamis Hakim (Kiyovu Sports SC)

Iradukunda Elie Tatou (Rayon Sports Fc)

Muhire Kevin (Jamus SC/South Sudan)

Ruboneka Jean Bosco (Atahaddy/Libya)

Ba Myugariro:

Mutsinzi Ange (Zira Fk/Azerbaijan)

Niyigena Clement (Smouha SC/Egypt)

Kavita Phanuel Mabaya (Birmingham Legion/USA)

Nkulikiyimana Nganji Darryl (Sl16 FC/Belgium)

Manzi Thierry (Al Golan SC/Iraq)

Abasatira:

Nshuti Innocent (Al Wafaq Ajdabia/Libya)

Mbonyumwami Taiba (Ethiopian Coffee SC/Ethiopia)

Biramahire Abeddy (Al Batin FC/Saoudi Arabia)

Mickels Joy Lance (Sabah FK/Azerbaijan)

Uwiyaremye Fidali (APR FC)

Mickels Joy Slayd (Hibernians/Malta)

Ba mababa:

Imanishimwe Emmanuel (Chennaiyn FC/India)

Mickels Jacques Leroy (Waldhof Manheim/Germany)

Niyomugabo Claude (Nta kipe afite)

Ganijuru Elje Ishimwe (Rayon Sports FC)

Uwumukiza Obed (Rayon Sports FC)

Kwizera Jojea (Rhode Island FC/USA)

Byiringiro Jean Gilbert (APR FC)

Mugisha Gilbert (Jwaneng Galaxy/Botswana)

Mu mpera z’iki cyumweru hakinwe imikino y’umunsi wa karindwi wa BK Pro League aho APR FC na Rayon Sports zatsindiye Etincelles FC na Marine FC i Rubavu.

Ni imikino yatangiye gukinwa ku wa Gatanu w’iki cyumweru aho ikipe ya Kiyovu Sports yatsinze Kigali FC ibitego 2-0 byatsinzwe na Mugisha Didier ku munota wa 36 ndetse na Hamiss Hakim ku munota wa 68. Uyu munsi wa karindwi wari ufite umwihariko w’uko amakipe ya Rayon Sports na APR FC yari mu karere ka Rubavu aho yari yasuye Marine FC na Etincelles FC.

Ku wa Gatandatu, ikipe ya Etincelles FC yakiriye APR FC kuri Stade Umuganda mu mukino watangiye Saa Cyenda z’igicamunsi. Iminota 45 y’uyu munsi yarangiye amakipe akinganya 0-0 hongerwaho indi ine ariyo APR FC yafunguyemo amazamu ku gitego cyatsinzwe na William Togui Mel igice cya mbere kirangira ari 1-0.

APR FC yagarutse ikomereza aho yari yasoreje, mu gice cya kabiri itsinda igitego ya kabiri ku munota wa 68 gitsinzwe na Yunusu Nshimiyimana ku mupira yahawe na Seidu Dauda Yussif wanabaye umukinnyi mwiza w’umukino, ari nacyo cyarangije umukino ari ibitego 2-0, APR FC ibonye intsinzi ya kabiri mu mikino ibiri imaze gukina kuko ifite ibirarane bitanu.

Nyuma yo kubona intsinzi kwa APR FC, kuri iki Cyumweru hari hatahiwe mukeba wayo Rayon Sports aho kuva Saa Cyenda z’igicamunsi nayo yari yakiriwe na Marine FC kuri Stade Umuganda.

Rayon Sports imbere y’iyi stade yari yuzuye abafana benshi niyo yatangiye ifungura amazamu ku munota wa 14 ku gitego cyatsinzwe na Junior Kameni wateye icyugazi umunyezamu akarekura umupira yari yafashe n’amaboko agiye kuwutera.

Iki gitego ntabwo cyatinzwe kwishyurwa ariko kuko ku munota wa 26 w’umukino Niyibizi Ramadhan ari hanze y’urubuga rw’amahina yatsinze igitego cyiza ateye ishoti rya kure nyuma yo kubona ko umunyezamu Dande Junior yari yamaze kwegera imbere, igice cya mbere kirangira ari 1-1.

Amakosa ku banyezamu yakomeje kuba menshi, maze ku munota wa 71 w’umukino umunyezamu wa Marine FC Nshimyumuremyi Vincent ashaka gutera umupira n’ikirenge awihera rutahizamu Junior Kameni wari imbere y’izamu rya Marine FC ahita acenga Bishira Latif umupira awutera mu izamu atsinda igitego cya kabiri.

Iminota 90 yarangiye Rayon Sports ikiyoboye umukino hongerwaho indi minota ine nayo yarangiye iyi kipe yegukanye intsinzi, itsinze ibitego 2-1, ibonye intsinzi ya kabiri mu mikino ine imaze gukina muri shampiyona aho ifite amanota arindwi kuri 12.

Mu yindi mikino yabaye ku munsi wa karindwi kandi, kuri iki Cyumweru, Police FC yatsindiye Bugesera FC kuri Kigali Pele Stadium igitego 1-0 cyatsinzwe na Christian Ingabire ku munota wa 71. Ikipe ya Gicumbi FC mu rugo yahanganyirije na Sunrise FC 0-0.

Mu yindi mikino, Ku wa Gatandatu Al Merrikh SC yanganyirije na Mukura VS kuri Kigali Pele Stadium igitego 1-1 aho batsindiwe na Mohamed Gbane kuri Al Merrikh SC ku munota wa 16 ndetse na Boateng Mensah watsindiye Mukura VS ku munota 51. Uyu mukino wasize Mukura VS igize amanota 11 mu mikino itandatu imaze gukina mu gihe Al Merrikh SC yagize amanota atanu mu mikino itatu imaze gukina.

Impuzamashyirahamwe y’Umupira w’Amaguru muri Afurika (CAF) yatangaje ko Samson Adamu yagizwe Umunyamabanga Mukuru wayo, nyuma y’amezi asaga arindwi yari amaze akora izi nshingano by’agateganyo.

Adamu yemejwe n’Inama Nyobozi ya CAF (EXCO) muri iki cyumweru, nyuma yo guhabwa izi nshingano by’agateganyo muri Werurwe 2026.

Perezida wa CAF, Dr. Patrice Motsepe, yavuze ko ishyirwaho rye ryakurikiye igikorwa cyo gushaka uguomba kujya muri uyu mwanya bitari agateganyo, aho byatangajwe ku mugaragaro kandi hakorwa n’ibizamini by’akazi kuri uwo mwanya ku bakandida batandukanye.

Samson Adamu afite ubunararibonye mu miyoborere y’umupira w’amaguru muri Afurika. Yinjiye muri CAF mu 2018, agirwa Umuyobozi ushinzwe amarushanwa (Director of Competitions), nyuma aza no kuyobora ibikorwa bijyanye n’amarushanwa n’ibindi bikorwa bya CAF (Director of Tournaments and Events).

Mu gihe amaze muri CAF, yagize uruhare rukomeye mu gutegura no gushyira mu bikorwa amarushanwa akomeye yo ku mugabane wa Afurika, arimo Igikombe cya Afurika cy’ibihugu, kizwi nka AFCON, ari na yo marushanwa akomeye kurusha ayandi ategurwa n’iyi mpuzamashyirahamwe.

Adamu kandi yarangije amasomo ya FIFA Master ajyanye n’imiyoborere mpuzamahanga, amategeko n’ubumenyi bifitanye isano na Siporo.

Mu nshingano nshya, azaba ashinzwe gucunga ibikorwa bya buri munsi bya CAF no gufasha gushyira mu bikorwa gahunda n’ingamba z’iyi mpuzamashyirahamwe zigamije guteza imbere umupira w’amaguru muri Afurika.

Ishyirwaho rye rije mu gihe CAF ikomeje ibikorwa byo guteza imbere amarushanwa yayo no kongera ubushobozi bw’imiyoborere y’umupira w’amaguru ku mugabane wa Afurika.

Polisi y’u Rwanda iri gushakisha abantu batatu bataramenyekana neza, bamaze iminsi irindwi barapfiriye mu kirombe cya Kompanyi yitwa Big Mining, ikorera mu Murenge wa Byimana mu Karere ka Ruhango.

Amakuru yamenyekanye ku mugoroba wo kuri uyu wa 31 Ukwakira 2026, avuga ko abo bantu binjiye muri imwe mu ndani za Big Mining ku cyumweru tariki ya 24 Ukwakira 2026.

Umunyamabanga Nshingwabikorwa w’Umurenge wa Byimana, Umwiza Jeanne d’Arc, avuga ko abo bantu binjiye bamaze kumvikana n’umuzamu warindaga iyo ndani, ngo bamwemereye kumuha amafaranga 10.000frw.

Uwo muzamu ubu wamaze gutabwa muri yombi n’urwego rw’ubugenzacyaha RIB, ngo yatanze ayo makuru nyuma y’uko ategereje ko abo bantu, binjiye mu ndani basohoka agaheba.

Gutangira gushakisha abo bantu byatangiye ku mugoroba wo ku wa gatatu tariki ya 30 Ukwakira 2026, ubwo abo mu miryango ya ba nyakwigendera batangaga amakuru ko babuze abantu babo, uwo muzamu ngo akabona kubivuga.

N’ ubwo hibazwa impamvu ayo makuru yakomeje gucecekwa, ntabwo biramenyekana niba abaguye mu ndani ari abakozi ba Big Mining cyangwa ari abajyaga gucukura bitemewe, kuko batarakurwamo ngo hamenyekane imyirondoro yabo.

Umunyamabanga Nshingwabikorwa w’Umurenge wa Byimana, avuga ko inzego zibishinzwe, zatangiye iperereza ngo hamenyekane impamvu ayo makuru yahishiriwe kandi hari abari bayazi,.mu minsi irindwi ishize kandi hari harinzwe.

Agira ati, "Ibyo RIB yatangiye kubikurikirana niyo izatangaza ibizava mu iperereza, twatangiye gushakisha abo bantu ngo bavanwemo, ariko Polisi yagaragaje ko hari gaze nyinshi, bityo ko bisaba ibindi bikoresho kugira ngo bagerageze, tuzakomeza ejo haje ibyo bikoresho".

Avuga ko muri rusange abo bantu barimo kugaragara ariko bitahuse bikunda ko bakurwamo, mu ntera barimo ariko hari icyizere cy’uko nihaboneka ubutabazi bwisumbuyeho biza gukunda.

Asaba abaturage kwirinda gukora ubucukuzi butemewe, kuko ubusanzwe ngo iyo ndani ya Big Mining itakorerwagamo ari nayo mpamvu yari irinzwe.

Tutakomeza kubakurikiranira iyi nkuru

U Rwanda rukomeje kugaragaza ubushake bwo kwinjira mu mateka ya Siporo mpuzamahanga, by’umwihariko nyuma yo gutangaza ko rwagiranye amasezerano y’imyaka 10 na Formula 1 yo kwakira isiganwa ry’imodoka rya African Grand Prix mu 2030, rikaba mu byitezweho gufungura amahirwe mashya mu bukungu, ubukerarugendo, ishoramari, guhanga imirimo no guteza imbere siporo.

Formula 1 ni rimwe mu marushanwa akomeye kandi akurikirwa cyane ku Isi. Uretse kuba ari isiganwa rihuza abashoferi n’amakipe akomeye, rinakora nk’urubuga rw’ubucuruzi, ubukerarugendo, ikoranabuhanga n’imenyekanishabikorwa ku rwego mpuzamahanga ari nazo nyungu u Rwanda rwiteze kuri iri siganwa.

Kwemeza u Rwanda nk’igihugu kigiye kwakira African Grand Prix, byabereye muri BK Arena tariki 12 Ukwakira 2026 aho Perezida Paul Kagame yari umwe mu bayobozi bakuru bari bitabiriye iki gikorwa. Iri rushanwa rizaba ari irya mbere rya Formula 1 ribereye ku mugabane wa Afurika kuva mu 1993, ubwo ryaherukaga kubera mu gihugu cya Afurika y’Epfo.

Iri rushanwa riteganyijwe kubera ku kibuga cyihariye kizubakwa mu Karere ka Bugesera, hafi y’Ikibuga Mpuzamahanga cy’Indege gishya cya Kigali. Uretse kuba ari amahirwe yo kwakira irushanwa rikurikirwa n’abatari bake ku Isi, umushinga wa Formula 1 uteganyijwe no kuba igice cya gahunda ya Leta y’u Rwanda zo guteza imbere ubukerarugendo, ishoramari, ibikorwa remezo, imirimo n’impano z’Abanyarwanda muri Siporo.

Inyungu mu bukungu: Ubukerarugendo, ishoramari n’amasoko mashya

Nyuma y’uko bitangajwe ku mugaragaro, kimwe mu byitezwe kuri Formula 1 ni uko izafasha u Rwanda gukurura ba mukerarugendo, abashoramari n’abandi bashyitsi baturutse mu bihugu bitandukanye. Formula 1 ni irushanwa mpuzamahanga rihuza amakipe, abashoferi, abafatanyabikorwa mu bucuruzi, abanyamakuru n’abafana, bityo rikaba rishobora kongera ibikorwa by’ubukungu mu gihugu kiryakira.

Mu gihe irushanwa rizaba ribera mu Rwanda, amahoteri, resitora, ibigo bitwara abantu, amaduka, ibigo by’ubukerarugendo n’abatanga serivisi zitandukanye hano bibona abakiliya bashya by’umwihariko aho abo bashyitsi bose baba bakeneye aho kurara, aho gufatira amafunguro, imodoka zo kubatwara, abayobora ba mukerarugendo bakeneye gusura ibyiza nyaburanga Igihugu gifite haba mbere mbere cyangwa na nyuma y’isiganwa.

Ibi bishobora gutuma amafaranga akoreshwa n’abo bashyitsi agera no ku bacuruzi bato, cyane cyane abakorera hafi y’ahazabera irushanwa [Mu Karere ka Bugesera nk’ahazubakwa imihanda izakinirwaho Formula 1] ndetse no mu Mujyi wa Kigali. Abakora ubukorikori, abatanga serivisi z’ubucuruzi bw’ibiribwa n’ibinyobwa, iz’ubwikorezi n’abategura ibikorwa by’imyidagaduro na bo biba ari umwanya mwiza wo kubona amasoko mashya.

Gusa, inyungu izaterwa n’umubare w’abashyitsi bazaza, igihe bazamara mu Rwanda, amafaranga bazakoresha n’ibindi bitandukanye bazakenera.

Reka dufate urugero rw’Isiganwa rya Formula 1 ryabereye muri Singapore tariki 11 Ukwakira 2026 aho imibare igaragaza ko ryitabiriwe n’abantu 301.294, bituma riba irya kabiri ryitabiriwe n’abantu benshi mu mateka y’iri rushanwa.

Amakuru agaragaza ko hafi kimwe cya kabiri cy’abitabira iri rushanwa bari abashyitsi baturutse mu mahanga, mu gihe abandi ari abaturage ba Singapore.

Ibi bigaragaza uruhare isiganwa rya Formula 1 rishobora kugira uruhare rukomeye mu bukerarugendo, kuko rikurura abantu baturutse mu bihugu bitandukanye, bagakoresha amadovize bishyura mu mahoteli, resitora, ubwikorezi, imyidagaduro n’ibindi bikorwa by’ubucuruzi.

Kuba umubare munini w’abitabira iri rushanwa baba baturutse hanze y’igihugu, bituma ridafatwa gusa nk’igikorwa cya Siporo, ahubwo rikaba n’umwanya wo kwinjiza amafaranga ava mu bukerarugendo no kumenyekanisha Igihugu ku rwego mpuzamahanga.

Isiganwa rya Formula 1 ribera muri Singapore ryinjirije iki gihugu amafaranga arenga miliyari 2.2 z’amadolari ya Singapore (S$), ahwanye na miliyari 1.72 z’amadolari ya Amerika, hagati ya 2008 na 2024, binyuze mu bukerarugendo bwiyongereye bitewe n’iri rushanwa.

Aya mafaranga agaragaza uruhare rwa Formula 1 mu gukurura ba mukerarugendo, aho impuzandengo y’amafaranga yinjiraga buri mwaka muri icyo gihe yari hafi miliyoni 150 z’amadolari ya Singapore.

Kuva Singapore yakira bwa mbere iri rushanwa mu 2008, ryagiye rifasha kumenyekanisha iki gihugu ku rwego mpuzamahanga, rigakurura abafana, abanyamakuru, abakozi b’amakipe n’abandi bashyitsi baturutse mu bihugu bitandukanye.

Ibi ni bimwe mu bishobora kubera isomo ku Rwanda rwitegura kwakira Formula 1. Mu gihe u Rwanda ruteganya kwakira isiganwa rya Formula 1 mu 2030, urugero rwa Singapore rushobora gutanga isomo ku buryo igikorwa gikomeye cya siporo cyabyazwa umusaruro mu bukerarugendo no mu bukungu.

Gusa, umubare w’abashyitsi n’amafaranga bashobora gukoresha mu Rwanda uzaterwa n’ibintu bitandukanye, birimo ibiciro by’ingendo, ubushobozi bw’amahoteli, gahunda yo kumenyekanisha isiganwa n’ibindi bikorwa by’ubukerarugendo bizaba bihari.

Bityo, kugira ngo u Rwanda ruzungukire kuri iri rushanwa, bizaba ngombwa kurihuza n’ibikorwa bituma abashyitsi bamara igihe kinini mu gihugu, bagasura ibyiza nyaburanga kandi bagakoresha serivisi zitangwa n’ibigo by’Abanyarwanda.

Ibikorwa remezo: Amahirwe y’iterambere rirambye

Ikibuga cya Formula 1 giteganyijwe kubakwa mu Bugesera, mu bilometero 40 mu Majyepfo y’Umujyi wa Kigali, hafi y’Ikibuga Mpuzamahanga cy’Indege gishya cya Kigali, abazacyubaka bavuze ko kizubakwa ku rwego rwa FIA Grade 1, urwego rukenewe kugira ngo ikibuga cyemererwe kwakira isiganwa rya Formula 1.

Ni ikibuga kizubakwa na Alexander Wurz binyuze mu kigo cye cyitwa WurzDesign, akaba ari gufatanya n’ikigo cy’abahanga mu bwubatsi cyitwa Tilke Engineers & Architects basanzwe bubaka ibibuga bya F1 ku Isi.

Abategura uyu mushinga bavuga ko ikibuga kitazakoreshwa mu marushanwa ya Formula 1 gusa, ahubwo ko kizubakwa kuburyo kizajya cyakira andi marushanwa mpuzamahanga y’imodoka, aya moto, inama, ibitaramo n’ibindi bikorwa bikomeye.

Ibi bishobora gufasha mu guteza imbere ibikorwa by’ubucuruzi mu Karere ka Bugesera no mu nkengero zako bigatuma abashoramari bashishikarizwa kubaka amahoteri, resitora, amazu y’ubucuruzi n’ibindi bikorwa byunganira ubukerarugendo.

Aha ni yo mpamvu ari ngombwa ko ibikorwa remezo bifasha abashyitsi kugera ku kibuga, ingendo rusange, imihanda, amazi, amashanyarazi n’itumanaho bigomba gutegurwa mu buryo bujyanye n’iterambere ry’Akarere muri rusange, aho kwibanda ku minsi mike iri rushanwa rimara gusa.

Imibereho myiza y’abaturage: Ubumenyi, amahirwe n’iterambere ry’Urubyiruko

Inyungu z’irushanwa rya Formula 1 ku Rwanda ntabwo zikwiye gupimirwa ku mafaranga azinjira cyangwa ku mubare w’abashyitsi bazaryitabira gusa. Umushinga ushobora no gufasha Abanyarwanda kubona ubumenyi bushya, amahirwe y’akazi n’uburyo bwo kwiteza imbere.

Formula 1 ishingiye ku bumenyi n’ikoranabuhanga rihanitse. Ni irushanwa riba risaba abahanga mu buhanga bw’imodoka, gusesengura amakuru, rikenera amashanyarazi, ibikoresho bigezweho, umutekano, itumanaho, imicungire y’ibikorwa n’ubumenyi bwo gupima no kunoza imikorere y’imodoka.

Abanyarwanda bakora muri izo nzego bashobora kubona amahirwe yo guhugurwa no gukorana n’impuguke mpuzamahanga. Abanyeshuri biga ibijyanye n’ubwubatsi, ikoranabuhanga, ubukanishi, ubucuruzi n’imicungire y’ibikorwa na bo bashobora kubona icyerekezo gishya cy’akazi.

Dufashe urugero rwa Formula 1 muri Singapore, imibare igaragaza ko irema imirimo igera ku 30,000 mu cyumweru cy’iryo siganwa gusa, harimo iy’abakozi b’igihe gito, abatanga serivisi n’abandi bafatanyabikorwa.

Ibi bigaragaza ko kwakira iri rushanwa mpuzamahanga bidatanga inyungu mu bukerarugendo gusa, ahubwo binatanga amahirwe y’akazi ku baturage, bigafasha ibigo by’imbere mu gihugu kongera ibikorwa byabyo.

Ibigo birenga 700 bya Singapore bigira uruhare mu gutegura isiganwa kuko hafi 90% by’imirimo ijyanye no gutegura iri rushanwa ihabwa ibigo byo muri icyo Gihugu binyuze mu masezerano yo gutanga serivisi.

Ibyo bigo birenga 700 bikorera mu nzego zitandukanye, zirimo ubwubatsi, ubuhanga mu by’imashini n’amashanyarazi, ubwikorezi, ibikoresho n’amahoteli. Ni uburyo bufasha amafaranga ajyanye no gutegura isiganwa kugera ku bigo by’imbere mu gihugu, bigatanga akazi kandi bigateza imbere ubucuruzi bwabyo.

Urubyiruko ruhabwa amahugurwa n’akazi aho buri mwaka abagera ku 1.000 bahabwa amahugurwa ndetse bakanahabwa akazi mu mirimo yihariye ijyanye no kwakira no kuyobora abitabira isiganwa.

Muri iyo mirimo harimo gufasha abantu kumenya aho berekeza, kwinjiza abantu mu byicaro n’ahagenewe abafana, gutanga amakuru no gufasha mu micungire ya serivisi zo kwakira abashyitsi.

Ibi biha urubyiruko amahirwe yo kubona ubunararibonye mu kazi, kwiga gukorana n’abantu benshi no kongera ubumenyi bushobora kurufasha no mu bindi bikorwa by’imyidagaduro n’ubukerarugendo.

By’umwihariko abakozi benshi bakenerwa mu gihe cy’isiganwa aho gutegura Singapore Grand Prix ibera kuri Marina Bay Street Circuit bisaba ubufatanye bw’inzego zitandukanye. Aba bakozi bafasha kugira ngo isiganwa rikorwa mu mutekano, abafana babone serivisi bakeneye kandi ibikorwa byose bigende neza.

Isomo ku Rwanda rwitegura kwakira Formula 1 mu 2030, hano urugero rwa Singapore rushobora kurufasha gutekereza ku buryo iryo rushanwa ryabyazwa umusaruro mu guhanga imirimo, guteza imbere ibigo by’Abanyarwanda no guha urubyiruko ubumenyi n’ubunararibonye.

Kugira ngo ayo mahirwe azagerweho, byaba ngombwa gushyiraho gahunda zihariye zo guhugura urubyiruko mu by’ubukanishi, ikoranabuhanga, umutekano, kwakira abashyitsi no gucunga ibikorwa remezo bikomeye.

Ikindi ni ugufasha ibigo by’imbere mu gihugu kubona amasoko ajyanye n’imyiteguro n’imicungire y’irushanwa. Ibi byafasha amafaranga akoreshwa mu kuritegura kugira uruhare mu guteza imbere ubucuruzi bw’Abanyarwanda.

Ushingiye ku myaka Singapore imaze yakira Formula 1 bigaragaza ko ishobora kuba amahirwe yo guhanga imirimo no guteza imbere ubucuruzi, ariko inyungu zayo ku baturage zikaba zishingira ku buryo Igihugu cyateguye umushinga no ku ruhare ibigo by’imbere mu gihugu bihabwa.

Guteza imbere siporo: U Rwanda rushobora kuba ihuriro ry’amarushanwa y’imodoka(Motorsports) muri Afurika

Formula 1 ni shampiyona ikomeye kandi ikurikirwa cyane muri siporo mpuzamahanga mu rwego rw’imoroka. Kuyakira bizafasha u Rwanda kwagura ibikorwa bya Siporo birenze imikino isanzwe imenyerewe, nka ruhago, Basketball, Volleyball n’amagare.

U Rwanda rusanzwe rufite amarushanwa arimo nka Mountain Gorilla Rally, ariko kwakira Formula 1 bizongera ubushobozi bwo guteza imbere Siporo y’imodoka no kuyihuza n’urwego mpuzamahanga.

Iyo urebye ikibuga kizubakwa mu Bugesera kizagira uruhare mu kwakira amarushanwa atandukanye y’imodoka, amahugurwa y’abashoferi n’ibindi bikorwa bijyana n’umukino wo gusiganwa ku ma modoka kuko kizaba cyujuje ibisabwa ku rwego mpuzamahanga mu bijyanye n’umutekano n’amabwiriza ya Siporo y’amamodoka.

Ibi bishobora no gutuma urubyiruko rwinshi rumenya ko Siporo y’imodoka itagarukira ku kuba umushoferi gusa, ahubwo ikenera abakanishi, abahanga mu ikoranabuhanga, abashinzwe amakuru, abatoza, abasifuzi n’abategura amarushanwa.

Mu byo u Rwanda rwagaragaje ko rwifuza guteza imbere ubwo hatangazwaga ko ruzakira African Grand Prix mu 2030, harimo gahunda y’ishuri cyangwa ikigo cy’amahugurwa muri motorsports, kizafasha guteza imbere impano z’Abanyarwanda n’abandi Banyafurika.

Ishuri nk’iryo, mugihe rizaba ritangiye rigahabwa ibikoresho n’abarimu babifitiye ubumenyi, rizafasha urubyiruko kwiga ubukanishi bw’imodoka zikoreshwa zo mu marushanwa, umutekano, imicungire y’amakipe, ikoranabuhanga n’uburyo amarushanwa ategurwa.

Nk’uko abayobozi babigarutse guhabwa ubwo bumenyi ntabwo bizahita bivuga ko umuntu u Rwanda cyangwa Afurika muri rusange bizahita bibona umwanya muri Formula 1, kuko urwego rwo hejuru rw’uyu mukino rusaba ubumenyi, uburambe n’amafaranga menshi. Ariko amahugurwa azagira uruhare mu gufungura amahirwe mu yandi marushanwa yo gusiganwa mu modoka no mu mirimo ijyanye n’ubuhanga bw’imodoka.

GUFASHA AFURIKA KUBONA ABAKINNYI N’IMPUGUKE KU RWEGO MPUZAMAHANGA

Ubwo Formula 1 iheruka kubera muri Afurika y’Epfo mu 1993, hashize imyaka 33 uyu mugabane utakira isiganwa ryayo. Kuba u Rwanda ruzayakira mu ntangiriro z’imyaka ya 2030 bishobora kongerera amahirwe Abanyafurika yo kubona uyu mukino hafi yabo ndetse kandi bishobora no gutuma urubyiruko rwiyumvamo uyu mukino, rukamenya inzira z’ubumenyi n’imyuga ishobora kuruganisha muri Siporo y’imodoka.

Kumenyekanisha u Rwanda no guteza imbere ubukerarugendo

Formula 1 ikurikirwa n’abafana bo mu bice bitandukanye by’Isi. Kuba u Rwanda ruzakira iri rushanwa bizatuma izina ry’Igihugu, ahantu nyaburanga, umuco n’ibindi bikorwa by’ubukerarugendo bigera ku bantu benshi bikazaba inyongera nziza ituruka ku bufatanye u Rwanda rumaze kugirana n’amakipe mu mikino no ku migabane itandukanye binyuze muri gahunda ya #VisitRwanda

Dukurikije imibare y’abaitabiriye Singapore Grand Prix uyu mwaka, abafana bazaza kureba iri rushanwa ntabwo bazagenzwa n’ikintu kimwe gusa kuko bizaba n’umwanya mwiza wo gusura pariki z’igihugu, ingagi zo mu misozi, ibiyaga, ingoro ndangamurage n’ahandi nyaburanga. Ibi bishobora kongera igihe abashyitsi bamara mu gihugu n’amafaranga bazakoresha.

Ikindi ni uko amashusho y’irushanwa azatambutswa ku rwego mpuzamahanga ashobora kugaragaza u Rwanda nk’ahantu habera ibikorwa bikomeye. Ibi bishobora gufasha gukurura inama mpuzamahanga, ibitaramo n’andi marushanwa nk’uko bimaze kumenyerwa.

Kugira ngo ariko Igihugu kirusheho kumenyekana kandi bikibyarire inyungu ifatika, ni ngombwa ko abashyitsi bazahabwa serivisi nziza, koroshya serivisi z’ingendo, umutekano n’amahitamo atandukanye y’ibikorwa by’ubukerarugendo.

Imyidagaduro, itangazamakuru n’ubucuruzi bushingiye ku myidagaduro

Formula 1 ntabwo igizwe n’isiganwa ry’imodoka gusa kuko ihuriza hamwe Siporo, imyidagaduro, kwamamaza, itangazamakuru n’ubucuruzi.

Mu gihe African Grand Prix izaba ibera mu Rwanda, bizatanga amahirwe yo gutegura ibitaramo, ibikorwa by’imyidagaduro, imurikagurisha n’ibindi bikorwa by’ubucuruzi bifasha abafana n’abashyitsi kwishimira igihe bazamara mu gihugu.

Abanyamakuru, abafotora, abakora amashusho, abahanga mu kwamamaza n’abategura ibirori bizabafasha kubona amasoko mashya. Ibigo by’itangazamakuru na byo bishobora kubona amahirwe yo gukorana n’abafatanyabikorwa mpuzamahanga no kongera ubushobozi mu gutara no gutangaza amakuru ya Siporo ariko kandi bikazajyana no kubanza kubategura bagahabwa amahugurwa ahagije kuri uyu mukino.

Binyuze kuri Alexander Wurz, mu kiganiro n’itangazamakuru ubwo hatangazwaga ko u Rwanda ruzakira African Grand Prix, yavuze ko ikibuga kizubakwa mu Bugesera nacyo gishobora gukoreshwa mu birori bitandukanye mu minsi itari iy’isiganwa, bikazatuma kigira uruhare mu bukungu mu gihe cy’umwaka wose aho kuba umutungo ukoreshwa rimwe gusa.

Kuba u Rwanda ruzakira Formula 1, birenze kuba isiganwa ry’imodoka gusa ahubwo ni amahirwe akomeye y’iterambere ry’igihugu ariko kugira ngo ibyo bizagerweho, ni ngombwa ko inyungu zizavamo hakenewe kuzitegurira inzira hakiri kare kugira ngo mu myaka 10 African Grand Prix izamara ibera mu Rwanda bizagirire umusaruro n’abaturage.

Ikigo cya Leta y’u Burusiya gishinzwe ingufu za Nikeleyeli, Rosatom, cyiyemeje gufasha u Rwanda guteza imbere ibikorwa remezo bikenewe mu gukoresha Ingufu za Nikeleyeri (Nucléaire) zigamije amahoro, birimo kubaka ubushobozi bw’inzego, guhugura abakozi no guteza imbere ubushakashatsi muri uru rwego.

Ibi byatangajwe nyuma y’uko Rosatom n’Ikigo cy’Igihugu gishinzwe Ingufu za Atomike (Rwanda Atomic Energy Board — RAEB) bashyize umukono ku masezerano y’ubufatanye) agamije guteza imbere ibikorwa remezo by’ingufu za Nikeleyeli mu Rwanda, hakurikijwe amahame y’Ikigo Mpuzamahanga gishinzwe Ingufu za Atomike (IAEA).

Aya masezerano yashyizweho umukono mu nama ya gatatu ihuza u Burusiya na Afurika, ikaba igamije gushimangira ubufatanye hagati y’impande zombi mu nzego zitandukanye.

Ambasaderi w’u Rwanda mu Burusiya Gen. Maj. Joseph Nzabamwita yavuze ko aya masezerano mu by’ikoranabuhanga rya Nikeleyeli ategerejwemo kugira uruhare mu iterambere ry’u Rwanda, cyane cyane mu rwego rw’ubuvuzi, ubuhinzi, ubucukuzi bw’amabuye y’agaciro, ingufu n’uburezi bwibanda ku bumenyi n’ikoranabuhanga.

Mu nyungu zitezwe harimo gukoresha ikoranabuhanga rya Nikeleyeli mu kuvura indwara zitandukanye, zirimo kanseri. Mu buhinzi, iryo koranabuhanga rizafasha mu kubungabunga umusaruro w’ibihingwa, kuwurinda kwangirika no kongera igihe ushobora kumara ubitswe. Ibi bikazagabanya igihombo no guteza imbere uburyo bwo guhunika no gukwirakwiza umusaruro.

Mu bucukuzi bw’amabuye y’agaciro, ambasaderi Nzabamwita yavuze ko ikoranabuhanga rya Nikeleyeli rizafasha mu bikorwa by’ubushakashatsi ku miterere y’ubutaka, kumenya aho amabuye y’agaciro aherereye no kunoza uburyo bwo kuyatunganya.

Ku bijyanye n’ingufu, iterambere ry’ikoranabuhanga rya Nikeleyeli rizafasha u Rwanda kwagura amahitamo y’isoko ry’ingufu no kongera ubushobozi bwo kubona amashanyarazi. Ikindi ni uko ikoreshwa ry’iri koranabuhanga ritegerejwemo guteza imbere uburezi mu masomo ya siyansi, ikoranabuhanga, ubwubatsi n’imibare, ndetse no kongera ubushobozi bw’Abanyarwanda mu myuga n’ubumenyi bwihariye.

Ambasaderi Nzabamwita avuga ko ibi bikorwa byose bigize inkingi zizafasha u Rwanda kugera ku ntego zarwo z’iterambere, zirimo iziteganywa muri Gahunda ya Kabiri y’Igihugu yo Kwihutisha Iterambere (NST2) n’Icyerekezo 2050 (Vision 2050).

U Rwanda rukomeje guharura inzira izarugeza ku ikoreshwa ry’ingufu za nucléaire kuko bitarenze mu 2030 ruzaba rufite uruganda ruzitunganya. Ibi bizatuma mu 2050 ruzaba rukora amashanyarazi angana na megawatt 1500 akomoka ku ngufu za nucléaire.

Ruzaba ruri mu bihugu mbarwa bikora izi ngufu kuko ubu Afurika y’Epfo ari cyo gihugu rukumbi gikoresha ingufu za nucléaire muri Afurika.

Perezida wa Repubulika y’u Rwanda, Paul Kagame, yageze i Dakar muri Sénégal, aho yitabiriye ibirori byo gutangiza ku mugaragaro Imikino Olempike y’Urubyiruko (Dakar 2026 Youth Olympic Games).

Perezida Kagame yageze muri iki gihugu ku gicamunsi cyo kuri uyu wa Gatandatu, tariki ya 31 Ukwakira 2026, yakirwa na Minisitiri w’Intebe wa Sénégal, Ahmadou Al Aminou Lo, ku Kibuga cy’Indege cya Gisirikare cya Léopold Sédar Senghor.

Biteganyijwe ko kuri uyu mugoroba, Perezida Kagame yifatanya na Perezida wa Sénégal, Bassirou Diomaye Faye, ndetse n’abandi bayobozi batandukanye mu muhango wo gutangiza ku mugaragaro iyi mikino.

Uyu muhango urabera kuri Stade ya Abdoulaye Wade, iherereye i Diamniadio, mu nkengero z’Umujyi wa Dakar.

Dakar 2026 Youth Olympic Games ni imikino mpuzamahanga ihuza urubyiruko rufite impano mu mikino itandukanye, ikaba ari n’Imikino ya mbere ta Olempike y’Urubyiruko ibereye ku mugabane wa Afurika.

Imikino Olempike y’Urubyiruko (Youth Olympic Games – YOG) ni imwe mu marushanwa akomeye mpuzamahanga ahuza abakinnyi bakiri bato baturutse mu bihugu bitandukanye ku isi, bagahatanira imidali mu mikino itandukanye.

Iyi mikino itegurwa na Komite Mpuzamahanga y’Imikino Olempike (IOC), ikaba igamije guteza imbere impano z’abakiri bato, kubatoza indangagaciro za siporo no kubafasha kwitegura amarushanwa akomeye mu gihe kizaza.

Igitekerezo cyo gushyiraho Imikino Olempike y’Urubyiruko cyatangijwe na Komite Mpuzamahanga y’Imikino Olempike mu 2007.

Imikino ya mbere yo mu cyiciro cy’impeshyi (Summer Youth Olympic Games) yabereye i Singapore mu 2010.

Kuva icyo gihe, imikino yo mu cyiciro cy’impeshyi imaze kubera mu mijyi itatu irimo iya 2010 yabereye muri Singapore, 2014 ibera i Nanjing mu Bushinwa na 2018 yabereye Buenos Aires muri Argentine.

Hari kandi Imikino Olempike y’Urubyiruko yo mu gihe cy’itumba (Winter Youth Olympic Games), yatangirijwe i Innsbruck muri Autriche mu 2012.

Imikino ya Dakar 2026 ifite amateka akomeye kuko ari yo ya mbere mu mikino Olempike ibereye ku mugabane wa Afurika.

Sénégal yahawe kuyakira mu 2018, mu nama ya 133 ya Komite Mpuzamahanga y’Imikino Olempike yabereye i Buenos Aires muri Argentine.

Ku ikubitiro, iyi mikino yagombaga kuba mu 2022, ariko iza kwimurirwa mu 2026 kubera ingaruka z’icyorezo cya COVID-19.

Iratangira none ku wa 31 Ukwakira izasozwe ku wa 13 Ugushyingo 2026.

Biteganyijwe ko iyi mikino izitabirwa n’abakinnyi 2,655, bafite imyaka iri hagati ya 14 na 17, baturutse mu bihugu bitandukanye.

Hari n’abahagarariye Komite Olempike z’ibihugu 204, ndetse n’ikipe y’impunzi (Refugee Olympic Team).

Ikindi cyihariye ni uko ari ubwa mbere muri aya marushanwa hazitabira ikipe y’impunzi, igizwe n’abakinnyi batandatu bakomoka muri Afurika.

Dakar 2026 izaba irimo imikino 25 izahatanirwamo imidali n’indi 10 igamije kumenyekanisha no gukundisha urubyiruko imikino itandukanye.

Mu mikino 25 izahatirwamo imidali harimo, Imikino ngororamubiri (Athletics),
Koga (Swimming), Umupira w’amaguru wo mu nzu (Futsal),Basketball 3x3, Iteramakofe (Boxing), Judo, Taekwondo, Volleyball yo ku mucanga, Rugby, gusiganwa ku magare, Tennis de table, Gymnastics, Wrestling, Skateboarding na Badminton.

Harimo kandi Golf, Karate, Hockey, Surfing, Tennis, Weightlifting na Sport Climbing.

Muri rusange hazatangwa imidali mu byiciro 153, mu marushanwa azabera mu mijyi itatu yo muri Sénégal irimo
Dakar, Diamniadio na
Saly ahazakoreshwa ibibuga umunani by’imikino.

Biteganyijwe ko kwakira iyi mikino bizafasha Sénégal guteza imbere ibikorwa remezo by’imikino, kuzamura urwego rw’abatoza, guha urubyiruko amahirwe yo kugaragaza impano no gukurura ishoramari mu rwego rwa siporo.

Nanone ni amahirwe yo kugaragaza ubushobozi bw’ibihugu bya Afurika mu gutegura amarushanwa mpuzamahanga akomeye.

Dakar 2026 ifite intego yo kugera ku buringanire bwuzuye hagati y’abakobwa n’abahungu kuko mu midali 153 izatangwa, 73 izahatanirwa n’abakobwa, 73 ihatanirwe n’abahungu, naho irindwi ibe iy’ibyiciro bivangavanze.

Itorero Angilikani (EAR) mu Rwanda ryatangije umushinga wo guhinga Kawa, mu rwego rwo kuzamura imibereho myiza y’abaturage, no kugera ku bukungu barambye bw’abakirisitu baryo.

Ni igikorwa cyatangirijwe mu muri Paruwasi ya Shyogwe mu Karere ka Muhanga, aho abayobozi b’umuryango mpuzamatorero Protestant (UEM) ku rwego rw’isi n’urwa Africa baje kwifatanya n’abakirisitu, mu muganda udasazwe haterwa kawa ku buso bwa hegitari enye.

Umwepisikopi wa EAR Shyogwe Musenyeri Louis Pasteur Kabayiza, avuga ko igihe kigeze ngo kubwiriza ubutumwa bwiza, bijyane no guhindura imyumvire y’abaturage ku buzima kandi bagakora bakiteza imbere.

Agira ati, "Twamaze igihe kinini tuvuga ubutumwa mu magambo, ubu ni igihe cy’ibikorwa, umuturage wacu akagera ku mafaranga, ubu tumaze gutera ku butaka bwa Paruwasi, abaturage bamaze kubona uko bayitera, nabo tugiye kubaha imbuto batere mu mirima yabo, binyuze muri Komite zibishinzwe, ku buryo bizakorwa neza".

Umuyobozi w’Akarere ka Muhanga wungirije ushinzwe iterambere ry’Ubukungu Eric Bizimana, avuga ko kuba Diyosezi ya Shyogwe yemeye gutanga ubutaka bwagurirwaho igihingwa cya kawa, bizafasha mu kongera igipimo cyayo no kuzamura ubukungu bw’abaturage.

Agira ati, "Twari dusanzwe dufite Koperative umunani zihinga kawa kuri hegitari 830, ubu EAR ibaye umufatanyabikorwa mushya, yongera ubuso buhingwaho hegitari zisaga 70, guhinga kawa ni ukugira amafaranga, kandi igiciro cyayo kirarushaho kuzamuka, abaturage bacu bagiye kuzamura ubukungu n’’Akarere kabyungukiremo".

Bizimana avuga ko kuba Akarere ka Muhanga gaherutse kuba aka mbere mu Gihugu mu kugira kawa nziza muri uyu mwaka, bityo ko abitabira kuyishoramo imari biyongera, aho bamaze kugera kuri Kompanyi enye ziyitunganyiriza abasura Akarere n’abagatuye bakayinywa.

Umuyobozi w’ihuriro ry’amatorero Angilikani muri Afurika no ku Isi (VEM), avuga ko bemeye gutera inkunga umushinga wa Kawa, nyuma yo kubona ko uzinjiriza Diyosezi ya Shyogwe, umukirisitu wayo b’Abanyarwanda muri rusange.

Agira ati, "Turifuza ko Abanyarwanda bahindura imyumvire ntibakomeze kubaho nk’abazapfa ejo, ahubwo bakanguke bakore ibikorwa biramba kuko kawa ni igihingwa kimara ibihe kirekire cyinjiriza umuntu akiteza imbere"

Itorero Angilikani mu Rwanda Diyosezi ya Shyogwe, ubwo ryakiraga Musenyeri wa EAR Ucyuye igihe Dr. Mbanda Laurent, yarisabye ko abakirisitu bitabira guhinga Kawa, nk’umwe mu mishinga yasize atangije.

Ikigo cy’Igihugu gishinzwe guteza imbere ibikomoka ku buhinzi byoherezwa mu mahanga NAEB, kikaba ari cyo cyatanze imbuto nziza ya kawa iri guhabwa abaturage muri Diyosezi ya EAR Shyogwe.

Umuhanzi w’Umunyarwanda Mugisha Benjamin wamamaye nka The Ben, yatangaje ko afata umuhanzi mugenzi we w’Umunyaranzaniya, Diamond Platnumz nk’igitabo ahora asoma kugira ngo amwigireho kuko amufata nk’icyitegererezo mu muziki.

The Ben yabigarutseho ubwo yagiranaga ikiganiro n’itangazamakuru muri Uganda, aho yitabiriye ibikorwa bijyanye n’igitaramo cyo kwizihiza imyaka 10 ibitaramo by’urwenya bizwi nka Comedy Store UG, bitegurwa na Alex Muhangi, bimaze bitangiye.

Iki gitaramo giteganyijwe kuri uyu wa Gatanu, tariki ya 30 Ukwakira 2026, kuri Lugogo Cricket Oval muri Uganda.

The Ben yagaragaje ko Diamond Platnumz ari umwe mu bahanzi afatiraho urugero, bitewe n’ibyo amaze kugeraho mu muziki ndetse n’uruhare afite mu kubera icyitegererezo abandi bahanzi bo muri Afurika.

Yagize ati: “Sinzi niba ushimwa uko bikwiye [Diamond Platnumz], kuko kuri twe nk’abahanzi uri nk’igitabo. Njye ni igitabo nsoma buri munsi kugira ngo umbere icyitegererezo.”

Yakomeje avuga ko akunda Diamond Platnumz kandi ko atajya ahisha kubivuga, yaba bari kumwe cyangwa batari kumwe. Yashimangiye knadi ko amushima ku bw’urugero rwiza atanga ku bandi bahanzi.

The Ben na Diamond Platnumz basanzwe bafitanye imikoranire

Umubano w’aba bahanzi ntugarukira ku gushimana gusa, kuko mu 2022 bahuriye mu ndirimbo “Why”, yahuje The Ben na Diamond Platnumz, ikanarushaho kumenyekanisha umuziki w’uyu muhanzi w’Umunyarwanda mu Karere ka Afurika y’Iburasirazuba.

Diamond Platnumz na we yahishuye ko hari undi mushinga w’indirimbo ahuriyeho na The Ben ushobora gusohoka mu gihe cya vuba. Ibi yabivuze ubwo yari ageze ku Kibuga cy’Indege cya Entebbe muri Uganda ku wa 29 Ukwakira 2026, abajijwe n’abanyamakuru niba hari indi ndirimbo bateganya gukorana n’igihe izasohokera.

Nubwo hatatangajwe umunsi nyirizina izasohokeraho, igisubizo cya Diamond cyagaragaje ko uwo mushinga ushobora kuba wegereje.

The Ben yashimye Alex Muhangi

The Ben yanashimiye Alex Muhangi, utegura ibitaramo bya Comedy Store UG, avuga ko mu myaka 10 amaze abitegura yakoze ibikorwa bikomeye kandi bishimishije.

Iki gitaramo cyo kwizihiza imyaka 10 ya Comedy Store UG giteganyijwe guhuriza hamwe abahanzi n’abanyarwenya batandukanye bo muri Afurika y’Iburasirazuba.

Mu bari bukitabire harimo abahanzi bo muri Uganda nka Spice Diana, Lydia Jazmine, Winnie Nwagi na Fik Fameica, ndetse n’Umunyarwenya Eric Omondi wo muri Kenya. Abanyarwenya Madrat & Chiko, Maulana & Reign na Salvador na bo bateganyijwe gususurutsa abazitabira iki gitaramo.

Iki gikorwa kije mu gihe Comedy Store UG imaze imyaka 10 ihuza urwenya, umuziki n’imyidagaduro, ikagira uruhare mu guteza imbere impano zitandukanye muri Uganda no mu Karere.

Umunyamakuru Tessy, Burikantu na Bwiza ni bamwe mu bantu bagiye bagarukwaho cyane ku mbuga nkoranyambaga, bitewe n’ibitekerezo, amagambo n’ibikorwa byabo byakuruye impaka n’ibiganiro mu bakoresha izo mbuga.

Mu gihe imbuga nkoranyambaga zikomeje kuba urubuga abantu bagaragarizaho ibitekerezo, ubuzima bwabo n’ibikorwa bitandukanye, hari abamenyekana cyane kubera izindi mpamvu zitandukanye bijyanye n’abo aribo cyangwa se ibyo bakoze bigatuma abantu batandukanye bagira icyo babivugaho.

Mu byaranze imbuga nkoranyambaga mu Rwanda muri iki cyumweru, harimo umunyamakuru Kayitesi Yvonne uzwi nka Tessy, wavuzweho cyane nyuma yo kunanirwa kuvuga neza Icyongereza ubwo yari yakiriye umutumirwa mu kiganiro cye.

Amashusho y’iki kiganiro yakwirakwijwe ku mbuga nkoranyambaga, akurura ibitekerezo bitandukanye. Bamwe mu bayakwirakwije banenze uburyo uyu munyamakuru bibaza uko umuntu ufite impamyabumenyi kugeza ku cyiciro cya gatatu cya Kaminuza (Master’s Degree) ashobora kunanirwa kuganira mu Cyongereza n’umushyitsi utazi Ikinyarwanda.

Amagambo yavuze kuri bafana ba Rayon Sports yongeye kuyibutswa

Mu kwezi kwa Kanama 2026, Tessy ukorera Radio/TV10, akaba n’umugore w’umuraperi Shizzo, yateje impaka ubwo mu kiganiro This & That cyanyuraga kuri YouTube yavugaga ku bafana ba Rayon Sports, abagereranya n’abafana ba APR FC.

Mu magambo ye, yavuze ko abafana ba Rayon Sports badafite ubusirimu nk’ubw’abafana ba APR FC, anabita “abaturage”. Ibi byababaje abafana ba Rayon Sports, batangira kumunenga ku mbuga nkoranyambaga ndetse abisabira imbabazi.

Umugabo we, umuraperi Shizzo, yaje kwinjira muri izo mpaka ashyigikira umugore we. Mu butumwa yashyize kuri Instagram, yakoresheje amagambo akakaye ku bafana ba Rayon Sports, arimo kubita “injiji”.

Aya magambo yakajije umwuka mubi hagati ye n’abafana b’iyi kipe, bamwe bakomeza kuyagarukaho mu biganiro byabo ku mbuga nkoranyambaga. Kugeza ubwo Shizzo yagiye akoresha imvugo n’ibitutsi bikomeye byatumye asabirwa gutabwa muri yombi agafatwa ibipimo by’ibiyobyabwenge.

Nyuma y’amashusho aherutse kugaragaza Tessy agorwa no kuganira mu Cyongereza n’umutumirwa, bamwe mu bakoresha imbuga nkoranyambaga bahise bahuza ibyabaye n’amagambo yari yaravuze ku bafana ba Rayon Sports.

Bamwe bibajije niba bidakwiriye ko na we anengwa nk’uko yigeze kunenga abandi, cyane cyane ariko bakanabijyanisha no kuba afite impamyabumenyi y’icyiciro cya gatatu cya Kaminuza, bibaza uko yabashije kuyasoza atazi Icyongereza ku rwego rumufasha kuganira n’umuntu utazi Ikinyarwanda.

Umugabo we nawe yaje kongera kwinjira muri iyo ntambara yikoma abakomeje kwibasira umugore we ku mbuga nkoranyambaga, ashimangira ko kumenya kuvuga neza indimi atari cyo gipimo cy’ubwenge cyangwa ubushobozi bw’umuntu.

Mu butumwa banyujije ku mbuga nkoranyambaga zabo, bagize bati “Indimi zirigwa ariko ubupfura buravukanwa.”

Abamusubije, bamubajije niba yarabanje gutekereza neza ibyo yanditse kuburyo ubupfura yabuhuza no kuba umugore we yarananiwe kuvuga Icyongereza ku karubanda.

BURIKANTU NAWE YAVUGISHIJE BENSHI NYUMA YO KUVUGA KO AZAHUNGA U RWANDA PEREZIDA KAGAME AVUYE KU BUTEGETSI

Ikindi cyagarutsweho ku mbuga nkoranyambaga ni amagambo ya Burikantu, wavuze ko azahita ava mu Rwanda ubwo igihugu kizaba kitakiyobowe na Perezida Paul Kagame.

Yabigarutseho mu butumwa yashyize ku mbuga nkoranyambaga avuga ko hari amakuru ashaka guha Perezida Kagame, ko bamwe mu rubyiruko bafite ubwoba ubwo azaba atakiyobora u Rwanda ndetse anagaragaza pasiporo yamaze gutegura azahita akoresha ahunga Igihugu.

Aya magambo yatumye bamwe mu bakoresha imbuga nkoranyambaga bamunenze bavuze ko akeneye kongera kwiga amateka n’imiterere ya politiki y’u Rwanda, aho kumvikanisha ko ejo hazaza h’igihugu hagomba kuba hafitanye isano n’umuntu umwe gusa.

Hari n’abibajije impamvu Burikantu yahisemo kuvuga ko yahunga Igihugu mu gihe ubuyobozi bwaba buhindutse, aho gutekereza ku ruhare buri Munyarwanda afite mu kubaka Igihugu, hatitawe ku muyobozi uri ku butegetsi.

Abandi bagiye bagaragaza impungenge z’uko hari urubyiruko rutegura ubutumwa bujyanye no gukunda igihugu rutabanje gusobanukirwa neza intego zabwo n’uburyo bukwiye gutangwa.

Aho bamwe bavuze ko hakwiye gutekerezwa ku buryo urwo rubyiruko rwahabwa amahugurwa n’ibiganiro bibafasha kumenya gukora ubutumwa bujyanye no gukunda Igihugu, kubaka ubumwe no guteza imbere igihugu.

Muri ibyo bikorwa harimo no gutegurirwa ibiganiro n’amahugurwa, hagamijwe kubongerera ubumenyi ku bijyanye no gutegura no gutangaza ubutumwa ku mbuga nkoranyambaga ndetse hagashyirwaho uburyo bwo kugenzura ubutumwa mbere y’uko busohoka, aho umuntu ufite uburambe n’ubumenyi muri urwo rwego yabusuzuma akagira inama ababukoze.

BWIZA YAVUGISHIJE BENSHI NYUMA YO GUSEZERANA IMBERE Y’AMATEGEKO NA UHUJIMFURA HAGASOHOKA AMASHUSHO YAMBIKWA IMPETA ’UNDI MUSORE BARI KUZABANA

Umuhanzikazi Bwiza Emerance nawe yatigishije imihanda cyangwa se imbuga nkoranyambaga ndetse nubu ntiharatuza, nyuma y’amashusho atandukanye akomeje gukwirakwira amugaragaza ari kumwe n’undi musore wari waramwambitse impeta ndetse bagombaga no kubana, bikarangira ashyingiranywe imbere y’amategeko n’undi.

Nyuma y’iminsi mike Bwiza asezeranye imbere y’amategeko na Uhujimfura Jean Claude, usanzwe unarebera inyungu ze mu bikorwa bya muzika, hatangiye gukwirakwizwa amafoto n’amashusho y’uwo musore usanzwe atuye muri Leta Zunze Ubumwe za Amerika, wari warambitse Bwiza impeta mu 2025.

Aya mashusho yakwirakwiye ku mbuga nkoranyambaga agaragaza uyu muhanzikazi ari mu bihe by’umunezero n’uyu musore aho bamwe mu bayabonye ndetse n’ubutumwa bajyaga bohererezanya, bavuga ko nubwo batazi icyo bapfuye ariko agaragaza ko ari ikimenyetso cy’umubano w’urukundo bari bafitanye.

Mu butumwa n’ibitekerezo bikomeje kugaragara ku mbuga nkoranyambaga, cyane ko hakiri gushyirwa hanze ibindi bizibiti, hari abazi uyu musore bavuga ko nyuma yo kumwambika impeta, urukundo rwabo rwajemo agatotsi ndetse bafata umwanzuro wo gutandukana maze buri wese agakomeza ubuzima bwe.

Nubwo byagenze gutyo ariko, nyuma y’uko uyu musore witwa Abdul abonye Bwiza asezeranye na Uhujimfura yaba atarabyakiriye neza bigatuma atangira gushyira hanze amashusho ndetse n’amafoto n’ibindi byose by’ibanga yari afitanye na Bwiza.

Mu 2025 ubwo Bwiza yambikwaga impeta, hari amakuru yari yarakwirakwijwe ko azahita ahindura n’idini yasengeragamo kuko uyu musore asanzwe ari uwo mu idini ya Islam ndetse ko ubukwe bwari kuzaba muri uyu mwaka wa 2026.

Nubwo ayo mashusho akomeje kuvugisha benshi ndetse akazamo n’amakuru atandukanye ajyanye n’uburiganya, Bwiza ku ruhande rwe ntacyo aragira icyo abitangazaho.

UMUCHOU W’ABANYARWANDA, LOUISE MUSHIKIWABO YASHIMIYE IGITARAMO YAKOREWE MBERE Y’AMATORA YA FRANCOPHONIE

Umunyamabanga Mukuru w’Umuryango Mpuzamahanga w’Ibihugu bikoresha Igifaransa (OIF), Louise Mushikiwabo, yashimiye Abanyarwanda baba i Paris mu Bufaransa, nyuma yo kumutumira mu gitaramo avuga ko byamuhaye ibyishimo n’ihumure mbere y’urugendo agiye kugirira muri Cambodge ahazabera inama y’Abakuru b’Ibihugu na za Guverinoma bigize OIF, ikazaba n’umwanya w’ingenzi ku hazaza h’ubuyobozi bw’uyu muryango.

Mu butumwa yanyujije ku mbuga nkoranyambaga, nk’uko akunda kubigenza Mushikiwabo yagaragaje by’umwihariko ko yari amaze igihe kinini atabonana n’abo yise “Abachou b’i Paris”, ariko ko nubwo afite akazi kenshi, atajya abibagirwa.

Yavuze ko yatumiwe n’Abanyarwanda baba i Paris mu gitaramo cyamuhaye imbaraga n’ihumure mbere yo kwerekeza muri Cambodge, aho hazabera inama y’Abakuru b’Ibihugu na za Guverinoma bigize OIF, ikazaba n’umwanya w’ingenzi ku hazaza h’ubuyobozi bw’uyu muryango.

Muri ubwo butumwa, yashimiye by’umwihariko abateguye icyo gikorwa, agaragaza ko yakiriwe neza kandi akabona umwanya wo gusabana n’abavandimwe.

Igitaramo cyaririmbyemo Massamba Intore, ari kumwe na Lionel na Daniel, na bo batuye mu Burayi. Mushikiwabo yashimye aba bahanzi avuga ko bazi gutaramira abantu no kubasusurutsa.

Yasoje ubutumwa bwe ashimira Abanyarwanda baba i Paris n’abahanzi Nyarwanda, abifuriza imigisha kandi abizeza ko bazongera kubonana nyuma y’urugendo rwe muri Cambodge.

Amatora y’Umunyamabanga Mukuru w’Umuryango w’Ibihugu bikoresha ururimi rw’Igifaransa (OIF) ateganyijwe kuba hagati ya 15 na 16 Ukuboza 2026 i Phnom Penh muri Cambodia.

Louise Mushikiwabo usanzwe ari Umunyamabanga Mukuru, yongeye gutangwa n’u Rwanda nk’umukandida kuri uwo mwanya muri manda ya gatatu. Ni amatora azaba ahatanyemo na Juliana Amato Lumumba wo muri Repubulika Iharanira Demokarasi ya Congo, Coumba Bâ wo muri Mauritaniya ndetse na Dacian Cioloș wahoze ari Minisitiri w’Intebe wa Romania.

Ishuri Rikuru ry’Ubumenyingiro rya INES-Ruhengeri ryatanze impamyabumenyi ku nshuro ya 18, zihabwa abanyeshuri 1,729 barangije amasomo mu byiciro bitandukanye, birimo icyiciro cya kabiri cya kaminuza (Bachelor’s Degree) n’icya gatatu (Master’s Degree).

Abahawe impamyabumenyi bagaragaje ibyishimo byo kugera ku ntego bari barihaye, biyemeza gukoresha ubumenyi n’ubumenyingiro bahawe mu guhanga imirimo no kugira uruhare mu iterambere ry’ibihugu byabo.

Muri abo banyeshuri harimo Abanyarwanda n’abanyamahanga, bose bagaragaza ko kurangiza amasomo ari intambwe ikomeye mu buzima bwabo no mu rugendo rwo kwiteza imbere.

Abanyeshuri bishimiye kugera ku nzozi zabo

Abanyeshuri barangije amasomo bagaragaje ko kubona impamyabumenyi ari umusaruro w’imbaraga, kwihangana no gukorana umurava mu gihe cyose bamaze mu masomo.

Rugwiza Vital, umwe mu barangije mu Ishami ry’Amategeko muri INES-Ruhengeri, yavuze ko mu mpanuro bahawe basobanuriwe ko impamyabumenyi ari nk’urupapuro rw’inzira rubafungurira amarembo y’amahirwe atandukanye.

Yagize ati “Mu mpanuro twahawe, batubwiye ko kuba turangije amasomo hano ari nk’aho duhawe pasiporo izadufasha kugera ahantu hatandukanye. Batubwiye ko impamyabumenyi atari yo izadutegeka icyo tugomba gukora, ahubwo ko ari twe tugomba kuyikoresha mu guhitamo inzira zitandukanye z’ubuzima zidufitiye akamaro.”

Yakomeje avuga ko azakoresha ubumenyi yakuye muri kaminuza mu gukemura ibibazo byugarije abaturage, by’umwihariko ibirebana n’ubutabera n’akarengane.

Yavuze ko azaharanira kurenganura abarengana no gufasha abaturage gukemura ibibazo byabo, kuko umunyamategeko mwiza agomba kurangwa no guharanira ubutabera.
Yagiriye kandi inama bagenzi be basoje amasomo kutitega akazi ko mu biro gusa, ahubwo bagakoresha ubumenyi bahawe bihangira imirimo ndetse bakanatanga akazi ku bandi.

Deborah Yar Makuei, umunyeshuri ukomoka muri Sudani y’Epfo, na we yagaragaje ibyishimo byo kurangiza amasomo ye muri INES-Ruhengeri. Yavuze ko ubumenyi yahakuye buzamufasha kugira uruhare mu gukemura ibibazo biri mu gihugu cye no mu muryango mugari.

Yagize ati “Nkigera mu Rwanda bwa mbere, by’umwihariko mu cyumweru cya mbere cy’amasomo, byarangoye kuko ntari nzi Ikinyarwanda. Icyakora, nagiye menyera binyuze mu gusabana na bagenzi banjye b’Abanyarwanda, cyane ko ari abantu beza kandi bakunda kwakira abandi.”

Yakomeje agira ati “Kuba nsoje amasomo yanjye ni ibyishimo kuri njye no ku muryango wanjye, kandi ni ishema ku gihugu cyanjye.”

Yashishikarije abandi banyamahanga kuza kwiga mu Rwanda, avuga ko ari igihugu cyiza kirangwa n’isuku, umutekano n’ubusabane , by’umwihariko muri INES-Ruhengeri.

Ababyeyi bishimiye umusaruro w’imbaraga bashyize mu bana babo.

Ku babyeyi n’abarezi bari bitabiriye uyu muhango, wari umwanya wo kwishimira intambwe ikomeye abana babo bagezeho no kubona umusaruro w’ubwitange bagize mu kubashyigikira mu rugendo rw’amasomo.

Bamwe mu babyeyi bagaragaje ko kubona abana babo barangije kaminuza ari ibyishimo bikomeye, kuko baba babonye umusaruro w’imbaraga, n’ubwitange bw’amikoro bashyize mu burezi bwabo.

Gumiriza Mugunga Paulo, umwe mu babyeyi bari bitabiriye uyu muhango, yavuze ko bishimira kubona urubyiruko rwinshi rurangiza amashuri makuru, ariko ko urugendo rw’uburezi rutagarukira aho.

Yagize ati “Twe nk’ababyeyi, uyu munsi ni uw’ibyishimo kuko tubonye urubyiruko rungana gutya rurangije amasomo. Icyakora, tuzi neza ko urugendo rwo kwiga rutagarukira aha, kuko kwiga ari uguhozaho.”

Yakomeje avuga ko bazakomeza kwishakamo ubushobozi kugira ngo bafashe abana babo gukomeza amashuri, harimo no kubageza ku cyiciro cya gatatu cya kaminuza ndetse na dogitora.

Yasabye abasoje amasomo kurangwa na disipuline no gukunda umurimo, avuga ko ari bimwe mu bizabafasha guhangana n’ibibazo bahura na byo mu buzima busanzwe.

Ubuyobozi bwa INES-Ruhengeri bushimangira ireme ry’uburezi

Ubuyobozi bwa INES-Ruhengeri bwagaragaje ko kuba butanze impamyabumenyi ku nshuro ya 18 ari ikimenyetso cy’iterambere n’umusaruro w’ibikorwa by’uburezi iri shuri rimaze imyaka rishyira mu bikorwa.

Umuyobozi wa INES-Ruhengeri, Fr. Dr. Jean Bosco Baribeshya, yashimangiye ko intego y’iri shuri atari ugutanga impamyabumenyi gusa, ahubwo ari no guha abanyeshuri ubumenyi n’ubushobozi bizabafasha guhangana n’ibibazo biri ku isoko ry’umurimo.

Yagize ati “Uyu munsi twagize umubare w’abanyeshuri barangije urenze uw’indi myaka yabanje. Ibi birumvikana kuko INES-Ruhengeri ikomeza kwaguka uko umwaka utashye. Turishimira ko umubare w’abanyeshuri ugenda wiyongera, ariko ikirushijeho kudushimisha ni uko ireme ry’uburezi dutanga rigenda rirushaho kwegera ibyo abakoresha bifuza.”

Yakomeje agira ati “Icyo dushyize imbere ni uko abanyeshuri bacu barangiza bafite ubushobozi bwo kwihangira imirimo. Ku batabishoboye, turifuza ko bajya gushaka akazi, bagakora ibizamini bakabitsinda, kandi bakagira ubumenyi buzabafasha kongera umusaruro w’ibigo bakoramo.”

Yavuze ko batishimira gusa umubare munini w’abanyeshuri barangiza amasomo, ahubwo ko bifuza ko uburezi butangwa na INES-Ruhengeri bugira uruhare mu iterambere ry’u Rwanda n’ibindi bihugu bya Afurika.

Minisiteri y’Uburezi ishimira uruhare rwa INES-Ruhengeri

Umuyobozi ushinzwe ikoranabuhanga n’ubushakashatsi mu Nama Nkuru y’Amashuri Makuru na Kaminuza, Dr. Habimana Olivier, yasabye abasoje amasomo kumva ko amahirwe abategereje aho bagiye atari uguhabwa akazi gusa, ahubwo ko ari no kugahanga imirimo kugira ngo batange amahirwe ku bandi.

Yagize ati “Nk’uko twabivuze, igihugu gifite icyerekezo cyiza aho mu mwaka wa 2029 tugomba kuba twarahanze imirimo mishya ingana na miliyoni imwe n’ibihumbi magana abiri na mirongo itanu (1,250,000). Iyo mirimo yose izasaba guhanga udushya (innovation). Iyo turebye mu nzego za Leta, ari zo zikoresha abantu benshi, dusanga imyanya y’akazi ihari ari mike.”

Yakomeje agira ati “Kugira ngo dutere imbere, turasaba abanyeshuri barangije kwihangira imirimo, kandi ni na byo batojwe. INES-Ruhengeri, nka kaminuza ishingiye ku bumenyi ngiro, turayisaba gukomeza inzira yatangiye, yongera ibikorwa remezo, yubaka laboratwari, amashuri ndetse inongerera abarimu.”

Dr. Habimana yashimiye kandi INES-Ruhengeri kuba iri muri kaminuza zifite abanyeshuri benshi baturuka mu mahanga, avuga ko ibyo bihura n’icyerekezo cy’u Rwanda cyo kuba igicumbi cy’uburezi muri Afurika.

Yashishikarije INES-Ruhengeri n’andi mashuri makuru gukomeza guteza imbere ubumenyi n’ubumenyingiro, kugira ngo abanyeshuri b’abanyamahanga baza kwiga mu Rwanda basubire mu bihugu byabo bafite ubumenyi bubafasha kandi bakomeze kuvuga neza u Rwanda.

INES-Ruhengeri ikomeje gushyira imbere uburezi bufite ireme, yibanda ku guteza imbere ikoranabuhanga, ubushakashatsi bugamije gukemura ibibazo biri mu muryango nyarwanda no gutanga ibisubizo bifatika, ndetse no gutegura porogaramu z’amasomo zijyanye n’ibikenewe ku isoko ry’umurimo.

Muri uyu muhango, hatanzwe impamyabumenyi ku banyeshuri 1,729, barimo 1,634 barangije icyiciro cya kabiri cya kaminuza na 95 barangije icyiciro cya gatatu cya kaminuza.

Biramenyerewe ko Abayisilamu benshi bitwa amazina afatwa nk’aho ari ay’idini (Islam) ku buryo bituma benshi mu bantu batekereza ko kuba we (Umuyisilamu) bijyana no kugira izina ry’Abayisilamu.

Nubwo ari ko bitekerezwa na benshi ariko siko bimeze kuko umuntu ashobora kuba Umuyisilamu nubwo yaba adafite izina risanzwe rifatwa nk’iry’Abayisilamu. Mu idini ya Islam, ikintu cy’ingenzi gituma umuntu aba Umuyisilamu ni ukwemera Imana (Allah) imwe rukumbi ikwiye gusengwa no kwemera ko Muhammad ari Intumwa y’Imana (Allah), akabihamya abikuye ku mutima.

Ibi bisobanuye neza ko umuntu ashobora kuba Umuyisilamu yitwa amazina asanzwe mu muco w’iwabo, atari nka Muhammad, Ahmed, Ibrahim, Aisha cyangwa Fatima, ahubwo akitwa amazina nka Niyonzima Jean, Niyonsenga Peter, cyangwa Uwimana igihe cyose yemera kandi agakurikiza amahame ya Islam.

Si itegeko ko buri muntu winjiye muri Islam ahindura izina. ariko, iyo izina rifite igisobanuro kibi cyangwa rihabanye n’ukwemera kwa Islam, abahanga mu idini bashobora kugira inama umuntu yo kurihindura.

Ikindi ni uko Islam atari idini igenewe Abarabu gusa. Abayisilamu bo mu bihugu bitandukanye bashobora kugira amazina akomoka mu ndimi n’imico byabo, igihe ayo mazina adafite ibisobanuro binyuranyije n’amahame y’idini.

Umuyobozi w’Inama y’aba Sheikh mu Rwanda, Sheikh Kassim Nzanahayo, avuga ko impamvu iyo umuntu abaye Umuyisilamu bamuhindurira izina, bifite aho bihuriye n’imyemerere ya Islam ndetse n’umuco.

Ati “Kubera ko intumwa y’Imana Muhammad, Imana imuhe amahoro n’umugisha, yaravuze iti ‘mu by’ukuri amazina meza imbere y’Imana ni ukwita Abdullah cyangwa Abdurrahaman. Ni ukuvuga ngo aya ni amazina, ‘Abdu’ ubundi bivuga umugaragu, kubera ko twese turi abagaragu. Turi abantu baremwe n’Imana. Ni ukuvuga ngo amazina meza tugomba guheraho, ni amazina atugira abagaragu, tukitwa abaja kubera ko turi abagaragu.”

Uyu mumenyi mu idini ya Islam, avuga ko ayo mazina n’andi, bayakura ku nyigisho z’intuma y’Imana Muhammad, kuko aba afite icyo avuga n’igisobanuro cyiza.

Ati “Umuntu ashobora kuba abaye Umuyisilamu mushya, akaba yari asanzwe afite amazina, wenda yitwa nka Habimana Nshuti, cyangwa se Habimana Mugisha, uwo ashatse ashobora gukomeza akitwa ayo mazina kandi akaba n’Umuyisilamu ntabwo bimukura mu idini. Ariko Intumwa y’Imana Muhammad hari amazina yagiye ihindura, atari meza.”

Amwe muri ayo mazina avugwa ko atari meza mu idini ya Islam ni arimo ibangikanyamana, aho Umuyisilamu cyangwa undi wese winjiye muri iryo dini agirwa inama yo kuyahindura.

Sheikh Nzanahayo ati “Ubundi izina ni ubusabe, ubusabe bwawe rero buba bugomba kuba bwiza. Guhindura izina muri Islam si itegeko rya ngombwa, gusa ni byiza kwitwa izina rigaragara neza, ariko utaryiyise ntabwo bigukura mu buyisilamu. Iyo ufite izina ryiza ushobora kurigumana, ariko iyo harimo ibangikanyamana bararihindura.”

Muri rusange abamenyi mu idini ya Islam bagaragaza ko kwitwa izina rifitanye isano n’umuco w’Abayisilamu atari cyo kigena ko umuntu ari Umuyisilamu cyangwa ko yemera iryo dini. Icy’ingenzi ni ukwemera kwe, ariko n’izina rifite igisobanuro cyiza rifatwa nk’ikintu gifite agaciro mu idini.

Umupilote na we ashobora gukora amakosa ahanwa n’amategeko, nk’uko umushoferi w’imodoka ahanirwa kurenga ku mategeko y’umuhanda. Icyakora, mu ndege ibihano ntibishingira gusa ku ikosa ryakozwe, ahubwo harebwa n’ingaruka ryateje, niba ryakozwe ku bushake cyangwa kubera uburangare, n’amategeko y’indege yarenzweho.

Ubusanzwe iyo umushoferi w’imodoka akoze amakosa cyangwa arenze ku mategeko y’umuhanda, ashobora gucibwa amande ako kanya n’umupolisi wo mu muhanda, ariko mu by’indege amakosa amwe ashobora gukurikiranwa n’ubuyobozi bw’indege za gisivili, umukoresha w’umupilote cyangwa inzego z’ubutabera, bitewe n’uburemere bw’ikosa.

Impuguke mu Micungire y’Indege n’Ibibuga (Expert in Airline and Airport Management), Emmy Arsonval Maniriho, avuga ko abapilote na bo bagengwa n’amategeko n’amabwiriza agenga indege.

Ati “Nubwo nta polisi ibahagarika mu kirere ibapimisha akuma gapima umuvuduko nk’uko bikorwa ku modoka, hari uburyo bwo gukurikirana uko indege zigenda, kwandika amakuru y’urugendo no kugenzura niba amabwiriza yubahirijwe."

Hari amakosa ashobora gutuma umupilote akurikiranwa arimo kuba yarenga ku mabwiriza y’abagenzura ingendo zo mu kirere nta mpamvu yemewe, kutubahiriza ubutumburuke cyangwa umuvuduko byategetswe, kwinjira mu kirere cyabujijwe cyangwa kutubahiriza ibisabwa kugira ngo umuntu yinjire mu gace runaka k’ikirere n’ibindi.

Andi makosa arimo guhaguruka cyangwa kuguruka atebiherewe uruhushya, cyangwa adafite impamyabushobozi n’uburenganzira bisabwa ku bwoko bw’indege.

Kuguruka afite uburwayi cyangwa umunaniro bituma atabasha gukora akazi neza, cyangwa atujuje ibisabwa n’icyemezo cy’ubuzima na byo yabihanirwa.

Harimo kandi kunyuranya n’amabwiriza agenga umutekano w’indege, harimo kutubahiriza amabwiriza y’ingenzi yo guhaguruka no kumanuka, hakaba no gukora ibikorwa byo mu kirere mu buryo bw’uburangare bukabije cyangwa bwateza abandi ibyago.

Icyakora, ntibikwiye gufatwa ko buri kosa rihita rihanishwa ihazabu kuko hari amakosa akosorwa binyuze mu mahugurwa, inama cyangwa inyandiko isaba gukosora imikorere, andi akaba ashobora gusaba ko hakorwa iperereza n’ibihano bikomeye.

Mu Rwanda, urwego rushinzwe kugenzura iyubahirizwa ry’amategeko y’indege, Rwanda (Civil Aviation Authority /RCAA), rushobora gukora iperereza ku makosa ajyanye n’amategeko agenga indege, rugafata ingamba zijyanye n’uburemere bw’ikosa n’ingaruka zaryo ku mutekano.

Bimwe mu bihano bishobora gutangwa n’urwo rwego birimo gutanga umuburo cyangwa ibaruwa isaba gukosora imikorere, gutanga ihazabu y’amafaranga, guhagarika by’agateganyo uruhushya rw’umupilote rwo gutwara indege, kwamburwa uruhushya rwo gutwara indege no gukurikiranwa mu nkiko igihe habaye icyaha giteganywa n’amategeko.

Maniriho ati “Mu mbonerahamwe ya RCAA y’ibihano by’ubuyobozi yasohotse mu 2021, kutubahiriza ibisabwa rusange ku ruhushya rw’umupilote byari bifite ihazabu ya 500,000–1,000,000Frw ku muntu ku giti cye, naho kutubahiriza imbago z’uruhushya rw’umupilote w’indege zitwara abantu n’ibintu (Air Transport Pilot Licence) byari bifite ihazabu ya 1,000,000–2,000,000Frw.”

Ibi ariko ngo ni ingero z’amafaranga yagaragajwe muri iyo nyandiko, si icyemezo ntakuka cy’amafaranga akoreshwa kuri buri kosa uyu munsi, kuko iyo habaye ikibazo kigize icyaha, inzego z’ubutabera na zo zishobora kugira uruhare hakurikijwe amategeko. Ikosa rikorwa n’umupilote ntirihita risobanura ko ari we wenyine ubiryozwa, iperereza rishobora no kureba uruhare rw’ikigo cy’indege, abagenzura ingendo zo mu kirere, uburyo bwakoreshejwe n’ibindi bishobora kubigiramo uruhare.

Bimwe mubyo umupilote asabwa birimo kugira uruhushya rwo gutwara indege rujyanye n’ubwoko bw’indege n’akazi akora. Ariko uruhushya rwo gutwara indege rutandukanye na permis y’imodoka, kuko rusaba ubumenyi bwimbitse ku bijyanye n’ikirere, uburyo bwo kuyobora indege, itumanaho, imikorere y’indege n’umutekano w’ingendo zo mu kirere.

Impushya zo gutwara indege zihabwa abapilote zigira ibyiciro bitandukanye birimo, uruhushya rw’uwiga gutwara indege (Student Pilot Licence), hakazamo uruhushya rwo gutwara indege ku mpamvu bwite, hakurikijwe imipaka yarwo (Private Pilot Licence /PPL), harimo kandi uruhushya rwo gutwara indege mu mirimo y’ubucuruzi mu rwego rw’ibyemewe n’urwo ruhushya (Commercial Pilot Licence (CPL).

Hari kandi uruhushya rwo ku rwego rwo hejuru, rugira ibisabwa n’uburenganzira bwihariye mu gutwara indege zitwara abagenzi cyangwa imizigo (Airline Transport Pilot Licence /ATPL). Aha kandi mu Rwanda RCAA niyo ifite amabwiriza agenga itangwa ry’izo mpushya n’ibyangombwa bisabwa.

Ku gicamunsi cyo kuri uyu wa Gatanu, nibwo Perezida wa Repubulika Paul Kagame yakiriye indahiro z’abayobozi baheruka guhabwa imirimo n’inshingano nshya.

Abakiririwe indahiro ni Uwacu Julienne wagizwe Minisitiri w’Abakozi ba Leta n’Umurimo, Judith Uwizeye wagizwe Senateri, Mukashyaka Claudette wagizwe Umugenzuzi Mukuru w’Imari ya Leta hamwe na Kubwimana Gratien uzaba umwungirije.

Nyuma yo kurahira Perezida Kagame yabibukije ko kurahira bisobanuye ko biyemeje gukorera Igihugu, mu mirirmo bahamagariwe kugira ngo bagire uruhare mu iterambere ry’Igihugu.

Yagize ati "Abamaze kurahira ntabwo ari bwo bwa mbere cyangwa se abandi mwari musanzwe muri mu zindi nzego zikoreta Igihugu. Ibyo Igihugu kibatezeho amaso birumvikana kandi birazwi, ntabwo ari ngombwa kubisubiramo."

Umukuru w’Igihugu yavuze ko iteka uko ibihe biha ibindi, umwaka ushira hagataha uwundi, ari mu nshingano baba basanzwe barimo cyangwa izindi nshya bahamagariwe, ikiba gikenewe cyane ari ukugira ngo buri wese ahitemo kwisuzuma, bakareba uko imirimo yakorwaga no gutekereza ku buryo bigomba gukorwamo, kugira ngo birusheho kunozwa.

Yagize ati "Ibi ni ibya buri wese, ni kuri buri wese, ari abarahira, ari abafite inshingano zindi barahiriye, n’abandi bari hanze bafite ibyo bakorera Igihugu cyangwa banikorera. Uyu bi umwanya wo gutekereza kugira ngo abantu bahore bashaka uburyo barushaho gukora neza uko bikwiye."

Perezida Kagame yanibukije abayobozi ko ibyo bakora bireba abandi benshi, ku buryo iyo bakoze neza bibagirira akamaro, bakora nabi nabwo bikabagiraho ingaruka.

Impuzamashyirahamwe y’Umupira w’Amaguru muri Afurika (CAF) yafashe icyemezo cyo gusubiza Igikombe cya Afurika cy’ibihugu (AFCON cyangwa CAN) kuri gahunda yo gukinwa buri myaka ibiri, nyuma yo gusuzuma icyemezo cyari cyarafashwe cyo kujya gikinwa buri myaka ine.

Icyo cyemezo cyafashwe ku bwumvikane n’abagize Komite Nyobozi ya CAF (EXCO), nk’uko bigaragara mu itangazo ryatanzwe n’iri shyirahamwe.

Perezida wa CAF, Dr. Patrice Motsepe, yari yatangaje mu nama ya CAF yigaga ku cyerekezo cy’iri shyirahamwe yabereye muri Cabo Verde kuva ku wa 7 kugeza ku wa 9 Ukwakira 2026, ko Komite Nyobozi izongera gusuzuma icyemezo cyo gukina CAN buri myaka ine.

Nyuma y’iryo suzuma, CAF yafashe icyemezo cyo gusubiza irushanwa kuri gahunda yari isanzweho, aho rikinwa buri myaka ibiri.

Perezida w’Impuzamashyirahamwe y’Umupira w’Amaguru muri Afurika (CAF), Dr Patrice Motsepe, yasobanuye ko icyemezo cyo gusubiza Igikombe cya Afurika cy’Ibihugu (AFCON/CAN) kuri gahunda yo gukinwa buri myaka ibiri kigamije kurengera no guteza imbere inyungu z’umupira w’amaguru muri Afurika.

Motsepe yavuze ko icyemezo cyafashwe n’Inama Nyobozi ya CAF (EXCO) cyashingiye ku nyungu z’amashyirahamwe 54 agize CAF, ndetse n’iz’abakinnyi b’Abanyafurika bakina mu makipe yo hanze y’umugabane.

Yagize ati: “Icyemezo cya CAF EXCO cyo gukina Igikombe cya Afurika buri myaka ibiri kigamije guteza imbere, kurengera no guteza imbere inyungu z’umupira w’amaguru muri Afurika n’amashyirahamwe 54 agize CAF, ndetse n’inyungu z’abakinnyi b’Abanyafurika bakina mu makipe yo hanze ya Afurika.”

Motsepe kandi yavuze ko CAF yari ihangayikishijwe n’igihe kirekire cyari gushira mbere y’uko irushanwa rishya ryari ryatatangajwe, rizwi nka Africa Nations League, ritangira gutanga umusanzu ugaragara mu iterambere ry’umupira w’amaguru no mu bukungu bwawo.

Iri rushanwa ryari ryitezweho kuba rifite imiterere isa n’iya CAN kandi rigakinwa buri myaka ibiri. Icyakora, Motsepe yavuze ko gutegereza imyaka myinshi kugira ngo ritangire gutanga umusaruro byari kudindiza inyungu za CAF n’umupira w’amaguru muri Afurika byari kurivanamo.

Yasobanuye ko intego ari ukongera ubushobozi bw’amarushanwa ya Afurika kugira ngo arusheho guhangana n’ayo ku rwego mpuzamahanga no kwibeshaho mu bijyanye n’imari.

Dr Patrice Motsepe kandi yatangaje ko Igikombe cya Afurika cy’Ibihugu (AFCON/CAN) kizakomeza gukinwa mu myaka itandukanye bitewe na gahunda y’amarushanwa mpuzamahanga, aho icy’2027 kizabera muri Kenya, Tanzania na Uganda.

Yavuze ko yizeye ko iri rushanwa rizagenda neza, ashimangira ko gutegurirwa hamwe n’ibi bihugu bitatu bizaba umwanya ukomeye wo guteza imbere umupira w’amaguru muri Afurika. Yagize ati: “CAN itaha izaba mu 2027 muri Kenya, Tanzania na Uganda, kandi nizeye ko izagenda neza cyane.”

Yongeyeho ko nyuma y’irushanwa ryo mu 2027, andi azakurikiraho ateganyijwe mu 2028, 2031 na 2033.

Motsepe yasobanuye ko gahunda y’amarushanwa ya CAN igomba kuzirikana n’Igikombe cy’Isi cya FIFA, giteganyijwe mu 2030. Yavuze ko, hakurikijwe umuco wa FIFA, imikino ya nyuma y’Igikombe cya Afurika n’andi marushanwa y’amakipe y’ibihugu ku migabane ishobora kutazakinwa mu mwaka umwe n’Igikombe cy’Isi.

Yagaragaje ko CAN itagamije gusa guhatana mu mupira w’amaguru, ahubwo inatanga umwanya wo kwishimira umuco Nyafurika, imigenzo n’indangagaciro zitandukanye, no guhuza abantu baturutse mu bihugu 54 bigize Afurika, Abanyafurika baba mu mahanga ndetse n’abandi bantu bo hirya no hino ku isi.

Motsepe yavuze ko icyemezo cy’Inama Nyobozi ya CAF cyo gukomeza iyi gahunda yari isanzweho kiri mu nyungu z’umupira w’amaguru muri Afurika n’amashyirahamwe 54 agize iri shyirahamwe, kandi ko kizagira uruhare rukomeye mu iterambere no mu kwaguka kw’uyu mukino ku mugabane.

Icyakora, gahunda y’amarushanwa yatangajwe igaragaza ko CAN itazajya ikinwa buri myaka ibiri mu buryo buhoraho, kuko nyuma y’irushanwa ryo mu 2028, irizakurikiraho riteganyijwe mu 2031.

Depite Jacqueline Msongozi avugira abana na ba nyina mu Nteko

Abakunze gukurikira amakuru cyane cyane ayo mu Karere, bibuka umudepite witwa Jacqueline Msongozi wo mu nteko ishinga amategeko ya Tanzania, mu gihe Minisiteri y’uburenganire n’iterambere ry’umuryango muri icyo gihugu yarimo igeza ku nteko rusange y’abadepite gahunda yayo ya 2022-2023.

Uyu mutegarugori yarahagurutse yamagana bikomeye abagabo bamwe, bakomeza kuzamura ingeso mbi zo konka amashereka y’abagore babo, ndetse bagacura ba buhinja aho usanga hari n’abana bafite ikibazo cy’imirire mibi, kuko batabona izo ntungamubiri zo mu mashereka.

Icyo gihe yasabye guverinoma gukora ubushakashatsi kuri icyo kibazo no kugira icyo ibikoraho mu rwego rwo kugikemura. Kuko yemezaga ko abana babura intungamubiri bakeneye mu mikurire yabo, kuko ziba zitwariwe n’abantu bakuze.

Yagize ati,”…Hari ikibazo kirimo kwiyongera cyane muri sosiyete yacu, hari abagabo bamwe, ababyeyi b’abagabo, bahungabanya uburenganzira bw’abana, bakonka amashereka y’abagore babo, kandi umwana ari yo yagombye konka. Kandi iki kibazo kiri mu Ntara zitandukanye, ndasaba Minisiteri gukora ubushakashatsi. Hari ingirwababyeyi (abagabo badashobotse), zonka amashereka y’abana. Bakonka abagore babo bonsa, aho kugira ngo umwana yonke ayo mashereka abone izo ntungamubiri, bikarangira Ise ari we uyonse. Hari n’umuntu unyunganiye hano, ambwira ko ayo mashereka y’umubyeyi agira ibivumbikisho byinshi,ibyo hakaba hari abagabo bamwe bamaze kubivumbura, ariko ayo mashereka ngo anakiza ‘hangover’ ku basinzi baba banyoye inzoga. Ubwo rero ndasaba Minisiteri gishyiraho gahunda ihamye, inatange inyisho zikwiye, kugira ngo aba bagabo badakomeza kubuza abana uburenganzira bwabo”.

Intara zivugwamo icyo kibazo cy’abagabo bonka amashereka y’abagore babo muri Tanzania, ngo uzisangamo ikibazo gikomeye cy’abana bafite imirire mibi no kugwingira gukabije, kuko baba babuze intungamubiri z’ingenzi zigira uruhare rukomeye mu mikurire y’abana, ugasanga abana bahura n’ikibazo cyo kugira ibiro bicye cyane ugereranyije n’ikigero cy’imyaka yabo(sous-poids).

Impamvu zitera icyo kibazo ahanini, ngo ni imyumvire cyangwa se ibintu bivugwa ariko bidafite aho bishingiye kuko nta bushakashatsi bwakozwe ngo bubyemeze; abagabo ngo babwiwe ko amashereka avura isindwe ‘hangover’ cyangwa se akiza intege nkeya no kwiyumva nabi ku bantu baraye basinze cyane.

Ibindi bivugwa ndetse abagabo bamwe bakizera ko ari byo, bikanatuma batangira konka amashereka y’abagore babo, ngo ni uko ayo mashereka yongera imbaraga zo gukora imibonano mpuzabitsina (performances sexuelles). Hari kandi no kuba yongera imikaya, ku bantu bakora siporo bagamije kugira imikaya (muscles) zikomeye.

Icyo kibazo cy’abagabo bamwe badukanye konka amashereka y’abagore babo, batitaye ku buzima bw’abana babo, ngo cyanabaye intandaro y’ihohotera ku bagore bamwe bonsa, kuko bashyirwaho igitutu n’abagabo babo ngo bemere kubonsa, bamwe bikabaviramo ibibazo by’ubuzima nko kubyimba imoko z’amabere, ahandi zikazaho ibisebe kubera konsa umuntu mukuru. Ibi kandi ngo bituma abana babura intungamubiri nkenerwa, bikabatera igwingira.

Intara za Tanzania zivugwamo iki kibazo cyane harimo Shinyanga, Tanga, ndetse na Iringa. Muri Tanzania, hatangiye ubukangurambaga bukozwe n’ubuyobozi bwite bwa Leta, bufatanyije n’inzego z’ubuzima, bukaba bugamije kwibutsa abagabo ko amashereka agenewe abana gusa, ndetse ko umwana uyabuze bimugiraho ingaruka ku buzima bwe bwiza n’imikurire ye.

Ikibazo cy’abagabo bonka amashereka y’abagore babo, ntabwo ari umwihariko muri Tanzania, kuko no muri Uganda hari abagabo bategeka abagore babo kubonsa, mu bafite n’impinja bonsa, kuko ngo bituma biyumva nk’aho bibegereza abagore babo kurushaho. Ikindi ngo abagore babikora, babyemera kuko baba bumva ko nta yandi mahitamo, kuko baramutse babyanze abagabo babagirira nabi. Muri Uganda, nubwo bihari ariko ntibikunze kuvugwaho biba mu ibanga (tabou), gusa ngo Minisitiri w’Ubuzima wa Uganda, Sarah Opendi, mu 2018 yagerageje kubivugaho no kubyamagana kuko bihungabanya ubuzima bw’abana, mu gihe yari imbere y’inteko ishinga amategeko ya Uganda. Ariko nyuma y’icyo gihe ntibyakomeje kuvugwaho cyangwa gufatirwa ingamba mu rwego rwa gahunda za Leta nk’uko byatangajwe n’ikinyamakuru Africanews mu 2024.

Hari kandi muri Kenya nk’uko byakunze gutangazwa n’ibinyamakuru nka The Standard na The Guadian, aho abagabo bamwe, ngo bonka amashereka y’abagore babo, kuko bayafata nk’ayifitemo ibintu bibatera imbaraga, akigiramo ubushobozi bwo kubakiza indwara zimwe na zimwe, abandi bakabikora nk’uburyo bwo kugira ngo bakomeze urukundo hagati yabo n’abagore babo.

Abandi bagabo bo muri Kenya, ngo bonka amashereka y’abagore babo, kuko bizera ko yifitemo ubushobozi bwo gukura imyaku, bigatuma bahirwa mu buzima. Naho abandi bon go bonka amashereka y’abagore babo, nk’uburyo bwo kugaragariza abagore babo ko bakibakunze na nyuma yo kubyara n’impinduka zijyana nabyo. Uwo muco ufitwe n’abagabo bamwe wo konka amashereka y’abagore babo, muri Kenya, ngo uboneka cyane cyane mu gice cy’Uburengerazuba (Western Region), muri Kawunti ya Kakamega, ahazwi cyane ni ahitwa Butere.

Kimwe no muri Tanzania, inzego z’ubuzima za Kenya nazo, ngo ntizihwema kwamagana uwo muco mubi w’abagabo bamwe barushanwa konka amashereka ubundi agenewe abana, bigatuma abo bana babuze izo ntungamubiri bagira ikibazo cy’igwingira kubera ko batabona intungamubiri zihagije, kandi aho mu mashereka ari ho honyine bakagombye kuzikura nibura mu mezi atandatu bakivuka.

Ubwenge n’imikurire y’ubwonko biterwa n’ibintu byinshi, birimo imirire yuzuye, irage, ibitotsi, uburere, uburezi, ubuzima rusange n’ibindi umuntu akura ahura na byo.

Inzobere mu mirire no gutegura indyo iboneye zigaragaza ko ifi igira intungamubiri z’ingirakamaro zirimo ubwoko bw’amavuta y’ingenzi umubiri ukenera, afasha ubwonko, umutima n’amaso gukora neza, (Omega-3) kuko umubiri udashobora kuyikorera yose ku rugero ukenera, bityo agomba no kuboneka mu biribwa.

Harimo kandi ubwoko bw’amavuta yo mu muryango wa Omega-3, agira uruhare rukomeye mu mikurire y’ubwonko n’amaso, cyane cyane ku mwana ukiri mu nda no mu myaka ye ya mbere (Docosahexaenoic Acid/DHA) Ifasha mu kubaka no mu mikorere y’uturemangingo tw’ubwonko.

Ifi kandi ishobora gutanga poroteyine zubaka umubiri, iyode (Iode) ifasha imikorere y’urwagashya rwa thyroïde (Glande ya thyroïde), vitamine B12 ifasha imikorere y’imyakura, ndetse na seleniyumu (Selenium) na zinki (Zinc) zigira uruhare mu mikorere myiza y’umubiri.

Akamaro k’izi ntungamubiri gashobora guterwa kandi n’uko umuntu azibona mu mirire ye yose, atari mu mafi gusa.

Anastasie Mukakayumba, inzobere mu mirire no gutegura indyo iboneye, avuga ko nubwo kurya ifi bifasha mu mikurire y’ubwonko, ariko nta kigero cyihariye cyemejwe mu bushakashatsi, kivuga ko kurya ifi bishobora kongera ubwenge cyangwa gufasha imikurire y’ubwonko ku kigero runaka.

Ati “Icyo ubushakashatsi bugaragaza ni uko kubona intungamubiri zihagije, cyane cyane mu gihe cy’ubwiyongere bw’ubwonko bw’umwana, ari ingenzi ku mikurire no ku mikorere yabwo. Ni ngombwa kandi gutandukanya gufasha ubwonko gukura neza no kongera amanota y’ikizamini cy’ubwenge. Ibyo si ibintu bihita bingana.”

Hari kandi abashobora kwibaza niba hari igice runaka cy’ifi gishobora kuba gikungahaye ku ntungamubiri kurusha ibindi, ariko ngo biterwa n’ubwoko bw’ifi n’intungamubiri zirimo.

Mukakayumba ati “Inyama z’ifi, zitanga poroteyine, vitamin B12 n’izindi ntungamubiri. Omega-3 iboneka cyane cyane mu mafi arimo ibinure byinshi. Uruhu rw’ifi, ruribwa mu mafi amwe n’amwe kandi rushobora kugira ibinure n’izindi ntungamubiri, ariko si rwo rwonyine rukungahaye ku ntungamubiri zifitiye ubwonko akamaro.”

Umutwe w’ifi, na wo ni kimwe mu bice byayo bishobora kugira intungamubiri zitandukanye, bitewe n’ubwoko bw’ifi, nubwo bidasobanura ko ari wo ufitiye ubwonko akamaro kurusha inyama zayo.

Amagufa mato ashobora gukacangwa nayo ashobora gutanga imyunyungungu y’ingenzi ifasha umubiri kwiyubaka no gukomeza amagufa n’amenyo, ndetse ukagira uruhare mu mikorere y’imikaya, imyakura no kuvura kw’amaraso, (calcium), ariko nanone si yo ntungamubiri y’ingenzi yihariye ku bwonko.

Muri rusange, kurya inyama z’ifi ni uburyo bwiza bwo kubona intungamubiri nyinshi, kandi nta mpamvu rusange yo kuvuga ko umutwe cyangwa uruhu ari byo byonyine byubaka ubwonko.

Mukakayumba avuga ko ari byiza ko ifi itangira guhabwa umwana igihe atangiye guhabwa imfashabere, akenshi afite amezi atandatu, igihe yiteguye kwakira ibiribwa bikomeye.

Ati “Icy’ingenzi ni ugutegura ifi neza, kuyikuramo amagufa yose ashobora kumuniga, kuyiteka igashya neza no kuyimuha mu buryo bujyanye n’imyaka ye. Ifi ni kimwe mu biribwa bishobora gutanga poroteyine n’izindi ntungamubiri zikenewe mu mikurire.”

Ingano y’ifi umuntu akwiye kurya iterwa n’imyaka afite, uko ubuzima bwe buhagaze, ndetse n’ubwoko bw’ifi arya. Ariko muri rusange, kurya ifi inshuro ebyiri mu cyumweru ni inama itangwa n’inzobere mu mirire, cyane cyane ifi zikungahaye kuri Omega-3.

Inzobere mu bijyanye n’imirire zigaragaza ko umuntu mukuru ashobora kurya amafunguro arimo ifi inshuro ebyiri, buri funguro rikaba ririmo hafi ya garama 140 z’ifi itetse. Ibyo bingana na garama 280 mu cyumweru.

Bumwe mu bwoko bw’ifi bwiza bwo kurya burimo izifite ibinure byiza bya Omega-3, urugero nka sardine na mackerel, zifasha kubona intungamubiri zifitiye akamaro umutima n’ubwonko.

Ni byiza kandi guhinduranya ubwoko bw’ifi umuntu arya aho guhora arya ubwoko bumwe. Abana, abagore batwite n’abonsa bagomba kwita cyane ku ngano n’ubwoko bw’ifi, kuko zimwe zishobora kugira ikinyabutabire (mercure) cyinshi gishobora kwangiza imikorere y’ubwonko, cyane cyane mu gihe cy’imikurire.

Kurya ifi byonyine ntibishobora kubyibushya umuntu cyangwa ngo bitume agira umubiri munini mu buryo bwihariye nkuko Mukakayumba abisobanura.

Ati “Ifi itanga poroteyine, kandi zimwe zitanga n’ibinure bifitiye umubiri akamaro. Ariko kwiyongera kw’ibiro guterwa ahanini n’isano iri hagati y’ingufu umuntu afata mu biribwa n’izo umubiri ukoresha, hamwe n’ibindi bintu birimo imisemburo, indwara n’imibereho. Ifi ikaranze mu mavuta menshi ishobora gutanga ingufu nyinshi kurusha iyatetswe mu mazi, ihishije cyangwa itogosheje. Icyakora, kurya ifi kenshi ntibihita bivuga ko umuntu azabyibuha.”

Abana n’abakuru bose bashobora kungukira mu kurya ifi, kuko ku bana, ifi itanga intungamubiri zifasha imikurire y’umubiri n’ubwonko, kandi mu myaka ya mbere y’ubuzima, kubona intungamubiri zihagije bikaba ari ingenzi cyane.

Ku bantu bakuru, ifi itanga poroteyine, vitamine B12 n’izindi ntungamubiri. Amafi amwe arimo omega-3 ashobora no kugira uruhare mu buzima bw’umutima n’imikorere isanzwe y’ubwonko.

Ku bageze mu zabukuru, ifi ishobora kuba igice cy’imirire yuzuye ifasha mu kubungabunga imikaya n’ubuzima rusange. Ariko kurya ifi ntibihagarika cyangwa ngo bivure indwara zose zitera kwibagirwa.

Ifi itogosheje cyangwa itetse mu mazi, ni bwo buryo bwiza kuko budasaba kongeramo amavuta menshi. Ifi yokeje, nayo ishobora kuba uburyo bwiza, cyane cyane iyo idahiye cyane cyangwa ngo ishye.

Ifi ikaranze, na yo ishobora kuba igice cy’imirire myiza, ariko gukoresha amavuta menshi byongera ingufu ziri muri yo. Ni byiza kandi kwirinda gutwika ifi cyane. Guhitamo uburyo bwo guteka bugabanya amavuta menshi no kurya amafunguro atandukanye bifasha kugira imirire yuzuye.

Ifi ishobora kuribwa n’abantu batandukanye, barimo abana batangiye gufata imfashabere, ingimbi n’abangavu, abagore batwite, abonsa, abantu bakuru n’abageze mu zabukuru.

Icyakora, hari ibintu bigomba kwitabwaho, nko ku bantu bafite allergie y’ifi bagomba kuyirinda, abagore batwite n’abana bato bagomba guhitamo amafi afite mercure nke. Abantu bafite indwara zisaba kugabanya umunyu cyangwa gukurikiza amabwiriza yihariye y’imirire bagomba guhitamo ifi n’uburyo bwo kuyitegura bijyanye n’ubuzima bwabo. Ikindi ni uko ari byiza kurya amafi atandukanye, agatekwe neza kandi akaboneka mu ndyo iboneye.

Umuntu ashobora kutabona ifi kenshi, ariko akabona intungamubiri nyinshi zifasha ubwonko akoresheje ibindi biribwa birimo amagi kuko atanga poroteyine, vitamin B12 na choline, ifasha imikorere isanzwe y’ubwonko.

Amata n’ibiyakomokaho bitanga poroteyine, vitamin B12 n’izindi ntungamubiri. Ibishyimbo, amashaza n’ubunyobwa nabyo bishobora gutanga poroteyine z’ibimera, ibyubaka umubiri n’izindi ntungamubiri.

Imboga rwatsi, na zo zishobora gufasha mu gutanga folate n’izindi vitamin n’imyunyu ngugu. Imbuto n’imboga zitandukanye nabyo biri mu bitanga vitamin n’ibindi bifasha ubuzima rusange. Imbuto zirimo ibinure byiza n’imbuto z’ibihingwa nka chia na flaxseed, zitanga omega-3 yo mu bwoko bwa ALA. Ariko umubiri uhindura ALA ikayigira DHA ku rugero ruto cyane, bityo ntibihita bisimbura DHA iboneka mu mafi.

Ni ngombwa kumenya ko nta biribwa bibiri bihora bisimburana neza ku ntungamubiri zose. Icyiza ni uguhuza ibiribwa bitandukanye, ukurikije ubushobozi bw’urugo n’ibiboneka aho batuye.

Aya makuru avuga ko umwana uriye ifi agira ubwenge: Dore icyo inzobere mu mirire zibivugaho

Ifi ni kimwe mu biribwa bifite intungamubiri nyinshi zifitiye umubiri akamaro. Itanga poroteyine zifasha kubaka no gusana uturemangingo, vitamin B12 ifasha imikorere y’imyakura, ndetse n’izindi ntungamubiri. Amafi amwe atanga omega-3, cyane cyane EPA na DHA, zifitiye umubiri akamaro.

Kurya ifi mu rwego rw’imirire iboneye bishobora kugira uruhare mu buzima bw’umutima no mu kubona intungamubiri zikenewe ku mikurire n’imikorere isanzwe y’ubwonko. Ariko ni ngombwa kwirinda kuvuga ko ifi ari umuti w’indwara zose cyangwa ko kurya ifi byonyine bituma umuntu agira ubwenge bwinshi.

Iyo umuntu atabona intungamubiri zikenewe binyuze mu mafi cyangwa mu bindi biribwa, ashobora kugira ibibazo bifitanye isano no kubura izo ntungamubiri zirimo kubura vitamin B12 bishobora gutera amaraso make n’ibibazo by’imyakura. Kubura iode bishobora kugira ingaruka ku mikorere ya tiroyide no ku mikurire y’ubwonko bw’umwana.

Mu masaha y’igitondo, ku mihanda imwe n’imwe yo muri Kigali no mu nkengero zayo, ushobora kuhabona abantu bahagaze imbere y’utuzu tugurishirizwamo ibiribwa, bategereje kugura amafunguro ahendutse.

Bamwe baba bagiye mu kazi, abandi ari abacuruzi bato n’abaciriritse, abamotari, abanamba, abakozi ba nyakabyizi cyangwa abandi badafite akazi gahoraho.

Ahandi, mu masaha ya saa sita, ni ho usanga bamwe bagana aho bagurisha ibishyimbo kugira ngo babone ifunguro rihendutse, ribafasha gukomeza imirimo yabo.

Ku muntu ufite ubushobozi buke, guhitamo icyo arya ntibishingira buri gihe ku byo yifuza cyangwa ku byifuzo by’umubiri we, ahubwo bigengwa n’amafaranga afite mu mufuka.

Umumotari twise Mabure, avuga ko akenshi mu gitondo bakunda kwirira capati n’ibishyimbo ku buryo byose bidashobora kujya hejuru y’amafaranga 1000Frw.

Ati “Ibishyimbo usanga bigura 300Frw, capati igura 250Frw hari n’aho zigura 200Frw, ntabwo ushobora kujya hejuru y’ebyiri hamwe n’icyayi cya mukaru. Byose biba bihagaze 1000Frw. Ibindi byoroheje bikoreshwa cyane abantu bataramenya ni imyumbati, kuko igipande kiba kigura amafaranga 200Frw, ukarya n’ibishyimbo bya 300Frw, kandi umuntu aba akeneye ibintu byamufata mu nda.”

Mugenzi we ati “Ubushobozi bwa boyilo (boil) buri hejuru, kandi boyilo ni isupu n’inyama, umuntu aba akeneye ibintu byafata mu gifu.”

Eric Sibomana akora akazi ko kogosha, we avuga ko mu bushobozi bwe buke, ajya muri resitora itamusaba ibihambaye.

Ati “Hari igihe bakwarurira imvange ya 700Frw, iba irimo ibirayi n’igitoki, byaba na ngombwa bagashyiraho umuceri cyangwa akawunga. Ukaba uririye 700Frw, ukaka nk’igikoma cya 200Frw, ugafata n’irindazi rya 100Frw, bigahita byuzura 1000Frw. Ibyo bintu byose urumva iyo bigiye mu nda, uba uhaze, ukirirwa ukomeye.”

Undi ati “Iyo ugiye muri resitora ziba zihambaye ziriya twita iz’abakire, amafaranga 1000Frw nta n’icyayi kiba kirimo, kuko agakombe gato bakagurisha 600Frw, n’akandazi gato aba ari 200Frw. Mu by’ukuri izi resitora nto ziradufasha cyane, kuko zituma tudasesagura amafaranga menshi kandi zigatuma twisanzura mu rwego turiho. Ubwo se nkoreye nka 2000Frw nkaryamo amandazi atatu bikaba birashize, urumva ko nta kintu nasigarana. Nazashiduka n’inzu ntafite ukuntu nyinshyura kandi nagakwiye kumenya urwego ndimo.”

Icyo bose bahurizaho ni uko izi resitora ziborohereza ubuzima kuko umuntu ashobora gukoresha amafaranga 3000Frw ku munsi cyangwa munsi yayo kandi yariye mu gitondo, saa sita na n’ijoro. Kandi nyamara izindi resitora zisa nkaho zoroheje ngo isahani y’ibiryo iba igura amafaranga 2500Frw. Ibi bituma bashobora kubona ayo bazigama, bikazabashoboza kubona ubundi bushobozi bwo kwishyura ubukode bw’inzu n’ibindi bakenera mu buzima bwa buri munsi.

Abafite resitora ziciriritse mu Mujyi wa Kigali, bavuga ko batagaburira abantu bo mu nzego zo hejuru, ahubwo bagaburira abafasha abo muri izo nzego, ku buryo ibyo bakora bikenewe kandi ari ingenzi ku bantu bamwe na bamwe kandi bafitiye Igihugu akamaro.

Umwe muri bo ati “Niba ndi hano mu Mujyi wa Kigali, nkaba nabasha kugaburira wa mufundi na wa muyede, aragenda ajye kuzamura bya bindi bashaka ko bizamuka, bitume bitagorana kuri bariya bamukeneye, kandi na we akoreshe ubushobozi yakuyeyo. Hari aho umuyede ahembwa 5000Frw, ayo mafaranga hari resitora wajyamo ntunarure, ariko jye uri hano hasi, iyo aje afite ayo 500Frw, ashaka irindazi n’ibishyimbo ndabimuha nibura bikamufata mu nda, akagenda akajya gukora.”

Undi ati “Ncuruza amandazi, ibishyimbo, igikoma n’icyayi. Ibiryo nabyo biba bihagaze make kuko hari ibya 1000Frw hakaba n’ibya 700Frw, ariko uko uje wenda kugira ngo nanjye mbashe kuyabona, ayo umbwiye ndakwarurira ugahita uyampa. Ukubwiye ati mpa kawunga ya 500Frw, urayimuha, ushaka imvange, bose urabibaha. Uko umuntu aje niko umwakira.”

Aba kandi biyongeraho indi miryango ikoresha ibishyimbo bizwi nka Me2u (bagura bitetse), bavuga ko bakunda kubigura kubera ko biborohereza ubuzima, kuko nubwo byahenze ariko n’ufite amafaranga 200Frw ashobora kubona ibyo barya ari abantu babiri.

Ibi ngo bibafasha no mu gutuma badakoresha amakara menshi yo kubiteka ku buryo iyo ugereranyije igiciro bisaba kugira ngo umuntu agure ibishyimbo bibisi abiteke kugera bihiye, gishobora gukuba inshuro zirenga eshatu ku mafaranga yakoreshejwe n’uwaguze ibya Me2u, bityo bigatuma hari abahitamo kuba ari byo bakoresha kurusha kubigura bakabyitekera.

Inkuru ya Harry Kane itwibutsa ko uko ibintu bimeze uyu munsi atari ko bigomba kuzahora.

Mu ijoro ryo kuri uyu wa 26 Ukwakira 2026, Harry Kane yegukanye Ballon d’Or, igihembo gikomeye gihabwa umukinnyi ku giti cye mu mupira w’amaguru, agitwaye ku myaka 33, aba Umwongereza wa mbere wegukanye iki gihembo kuva Michael Owen yagitwara mu 2001.

Ariko kugira ngo umuntu yumve uburemere bw’iyi ntsinzi, agomba gusubira inyuma, akareba aho urugendo rwatangiriye.

Ku myaka umunani: Yarekuwe na Arsenal kubera ubushobozi buke

Harry Edward Kane yavukiye i Walthamstow, mu burasirazuba bwa Londres, ku wa 28 Nyakanga 1993. Yakuriye mu muryango wakundaga umupira w’amaguru, kandi kuva akiri muto yawukundaga cyane.

Yatangiye gukina mu ikipe y’abana ya Ridgeway Rovers afite imyaka irindwi. Amahirwe yo kwinjira mu ishuri ryigisha umupira w’amaguru rya Arsenal yayabonye afite imyaka umunani.

Ariko nyuma y’umwaka umwe gusa, Arsenal yaramurekuye.

Amakuru y’amateka ye agaragaza ko icyo gihe yabonwaga nk’umwana utari ufite umuvuduko n’ingano y’umubiri byari byitezwe kuri we. Ni ngombwa kubivuga uko byagenze: si ngombwa kuvuga ko Arsenal yamwanze kubera ko yari “abyibushye cyane”, kuko amakuru yizewe nabonye ashimangira cyane ko ikibazo cyari umuvuduko we n’ingano y’umubiri.

Ku mwana w’imyaka umunani, kurekurwa n’ikipe ikomeye yari yizeyeho gukuriramo bishobora kuba ibintu bibabaza. Ariko kwangwa kwe ntikwabaye iherezo ry’urugendo rwe.

Mu kiganiro cyigeze gutangaza ku bijyanye n’icyo gihe, Kane yavuze ko, iyo asubije amaso inyuma, kurekurwa na Arsenal bishobora kuba ari cyo kintu cyiza cyane cyamubayeho, kuko byamuhaye imbaraga zo gukora cyane kurushaho.

Iryo jambo rifite uburemere: ikintu cyamubabaje akiri umwana cyaje guhinduka kimwe mu bintu byamukomeje.

Tottenham: Amahirwe ya kabiri

Nyuma yo kuva muri Arsenal, Kane yakomeje urugendo rwe rw’umupira w’amaguru, aza kwinjira mu ishuri rya Tottenham Hotspur mu 2004.

Ariko no muri Tottenham, ibintu ntibyahise bimworohera. Kuba umukinnyi w’icyizere mu ikipe y’abato ntibihita biguha umwanya mu ikipe nkuru.

Mu rwego rwo kubona uburambe no gukina umupira w’abakuru, yatijwe amakipe atandukanye: Leyton Orient, Millwall, Norwich City na Leicester City.

Yagiye ahura n’amarushanwa akomeye, ibibazo by’imvune n’igihe yagombaga kongera kwerekana ko ashoboye. Ibyo bihe byamwigishije ko impano yonyine idahagije; hakenewe gukora cyane, kwihangana no gukomeza kwiga.

Kane ubwe yagiye agaragaza ko igihe yamaze muri ayo makipe cyamufashije gukura nk’umukinnyi ndetse nk’umuntu.

Mu 2011, yakinnye umukino we wa mbere mu ikipe nkuru ya Tottenham. Ariko urugendo rwo kuba umukinnyi uhora ubanzamo rwari rugikomeje.

Igihe isi yatangiye kubona icyo ashoboye

Igihembwe cya 2014–2015 cyabaye intangiriro ikomeye mu kuzamuka kwe. Kane yatsinze ibitego 31 mu mikino 51 yakiniye Tottenham mu marushanwa yose, birimo 21 muri Premier League.

Yahawe igihembo cy’umukinnyi ukiri muto mwiza wa PFA, ndetse ajya mu ikipe y’umwaka ya Premier League yatoranyijwe n’ishyirahamwe ry’abakinnyi.

Yari atangiye guhindura uko abantu bamubonaga.

Hari umunsi umwe ufite umwihariko mu nkuru ye: ku wa 7 Gashyantare 2015, Tottenham yatsinze Arsenal ibitego 2–1, Kane atsinda ibitego byombi. Uwo wari umukino udasanzwe kuko Arsenal yari ikipe yamurekuye akiri umwana.

Ntabwo ari ngombwa kwemeza ko uwo munsi ari wo wari ugamije kwihorera gusa. Icyo imibare yemeza ni uko yatsinze ibitego bibiri mu mukino ukomeye, yongera kwerekana ko yari amaze kugera ku rwego rwo hejuru.

Kane yakomeje kuba umwe mu bakinnyi bakomeye ba Tottenham, atsinda ibitego byinshi, atwara ibihembo by’umukinnyi watsinze ibitego byinshi muri Premier League inshuro eshatu, kandi aba umukinnyi watsinze ibitego byinshi mu mateka ya Tottenham.

Yasoje urugendo rwe muri iyo kipe mu 2023 amaze kuyitsindira ibitego 280 mu marushanwa yose, mu mikino 435.

Ibyo ntibivuga ko Tottenham yatwaraga ibikombe byose cyangwa ko buri gihe ibintu byagendaga neza. Ahubwo byerekana ko Kane yari umukinnyi w’ingenzi wakomeje gukora neza mu bihe bitandukanye, nubwo atabashije gutwarana na Tottenham ibikombe bikomeye byose abantu bari bamwitezeho.

Urugendo rwo kuva i Londres kugera i Munich

Muri Kanama 2023, Kane yafashe icyemezo cyo kuva muri Tottenham nyuma y’imyaka myinshi yari amaze muri iyo kipe, ajya muri Bayern Munich yo mu Budage.

Kuva mu ikipe yari amaze igihe kinini akinira no kujya mu gihugu gishya byamusabaga kongera kumenyera uburyo bushya bw’umupira w’amaguru, bagenzi be bashya n’indi mico y’abafana.

Ariko yakomeje kwerekana ubushobozi bwe bwo gutsinda ibitego no gufasha ikipe ye. Yabaye umwe mu bakinnyi b’ingenzi ba Bayern, atsinda ibitego byinshi kandi afasha ikipe kwegukana ibikombe.

Mu gihembwe cya 2025–2026, yatsinze ibitego 73 mu mikino 65 yakiniye Bayern Munich n’ikipe y’igihugu cy’u Bwongereza mu marushanwa yose, nk’uko amakuru yatangajwe nyuma y’igihembo cya Ballon d’Or abigaragaza.

Ibyo byamufashije kuba umukandida ukomeye mu bahataniraga igihembo cy’umukinnyi mwiza ku isi.

Ballon d’Or: igihembo cyaje nyuma y’imyaka myinshi

Ku wa 26 Ukwakira 2026, Harry Kane yegukanye Ballon d’Or y’abagabo. Yaje imbere ya Kylian Mbappé na Lamine Yamal, aba Umwongereza wa mbere wegukanye icyo gihembo kuva Michael Owen yagitwara mu 2001.

Ku myaka 33, yari ageze ku rwego rwo hejuru mu bihembo by’umukinnyi ku giti cye.

Ariko iyo ntsinzi ntiyaturutse ku kuba yarigeze kwangwa gusa. Yaturutse ku myaka myinshi yo kwitoza, gukina mu bihe bikomeye, kwemera kujya gukina mu yandi makipe kugira ngo abone uburambe, gukomeza kwiteza imbere no gukoresha amahirwe yabonye.

Kurekurwa na Arsenal ni igice cy’inkuru. Ntabwo ari cyo cyonyine cyayigize.

Isomo rya Harry Kane: Kudacika intege

Mu 2022, Kane yatangije Harry Kane Foundation, umuryango ugamije gufasha abantu guhindura uko babona ubuzima bwo mu mutwe, kubatera inkunga yo kwiyitaho no gushishikariza abantu kuganira ku bibazo bahura na byo.

Mu bikorwa byo gutangiza uwo muryango, hasohotse filime y’animasiyo yitwa Harry Kane: Resilience. Igaragaza urugendo rwe mu mupira w’amaguru, kuva akiri umwana ukina muri pariki kugeza abaye kapiteni w’ikipe y’igihugu cy’u Bwongereza.

Ubutumwa bw’iyo filime ntibugarukira ku gutsinda ibitego cyangwa gutwara ibihembo. Bushimangira kwiyizera, gutekereza mu buryo bwiza no kumenya ko gushyigikirwa n’abandi bishobora kugufasha guhangana n’ibibazo.

Icyo ni cyo gituma inkuru ya Kane irenze umupira w’amaguru.

Hari abantu bigeze kwangirwa akazi. Hari abatsinzwe mu bizamini. Hari abafite impano ariko batabona amahirwe. Hari abigeze kubwirwa ko batabishoboye, bakagira igihe cyo gushidikanya ku byo bashoboye.

Inkuru ya Kane ntiyemeza ko umuntu wese uzangwa azahita aba icyamamare ku isi. Nta nubwo ivuga ko gukora cyane byonyine bihita biguha ibyo wifuza byose. Ariko itwibutsa ko kwangwa rimwe bidashobora kwemeza uko ubuzima bwawe bwose buzagenda.

Ntukemere ko urugi rwafunzwe uyu munsi rukubuza gukomanga ku zindi.

Harry Kane yarekuwe na Arsenal afite imyaka umunani. Yakomeje gukina, arakura, ariga, ahura n’ibibazo, arongera aragerageza, kugeza ubwo yageze ku rwego rwo hejuru mu mupira w’amaguru ku isi.

Ubutumwa si uko buri wese agomba kuba Harry Kane. Ubutumwa ni uko buri wese akwiye guhabwa amahirwe yo gukomeza kugerageza, kwiga no kwiteza imbere, aho gufata kwangwa nk’iherezo ry’inzozi ze.

Rimwe na rimwe, abantu ntibahita babona icyo ushoboye. Icy’ingenzi ni uko nawe utagomba guhita ureka kukizera.

Urugendo rwawe ntirugomba kurangirira aho abandi bakubwiye ko utazagera.

Minisitiri w’Intebe w’u Rwanda, Dr Justin Nsengiyumva, yavuze ko umutwe wa FDLR ukomeje kuba ikibazo gikomeye ku mutekano w’u Rwanda, ashimangira ko guhangana na wo ari ingenzi mu gushaka amahoro arambye mu karere k’Ibiyaga Bigari.

Yabigarutseho mu nama y’Uburusiya n’Afurika yabereye mu Ngoro Nkuru ya Kremilin i Moscow, aho yagaragaje uko u Rwanda rubona ubufatanye n’Uburusiya, ndetse n’ibibazo by’umutekano biri mu karere.

Nk’uko Minisitiri w’Ububanyi n’Amahanga n’Ubutwererane, Olivier Nduhungirehe yabigarutseho mu butumwa yashyize ku rubuga rwe rwa X, yagaragaje ko Minisitiri w’Intebe Dr Nsengiyumva yavuze ko amateka y’u Rwanda, cyane cyane ingaruka zatewe n’ibibazo by’umutekano zarwigishije ko rudakwiye kwirara cyangwa guteshuka ku nshingano zo kurinda umutekano warwo.

Yagize ati: “Nk’uko mubizi, u Rwanda ni Igihugu cyahuye n’ibibazo bikomeye by’umutekano kurusha ibindi byinshi. Ibyo byatwigishije ko tutagomba kwirara cyangwa guteshuka ku mutekano w’u Rwanda.”

Yakomeje avuga ko u Rwanda rukomeje guhangana n’iterabwoba rikomeye riterwa n’umutwe wa FDLR, wagize uruhare muri Jenoside yakorewe Abatutsi mu 1994. Yongeyeho ko uyu mutwe ukomeje guterwa inkunga ya Leta ya Repubulika Iharanira Demokarasi ya Congo (RDC).

U Rwanda rusaba ko ibibazo by’umutekano n’impamvu za politiki bikemuka

Nduhungirehe yakomeje avuga ko Minisitiri w’Intebe Nsengiyumva yasobanuye ko guhangana n’iki kibazo, nk’uko biteganywa mu masezerano ya Washington, ari ingenzi mu kugarura amahoro n’umutekano mu karere.

Yashimangiye kandi ko kurwanya imvugo z’urwango n’itotezwa rigamije kwambika isura mbi Abanyekongo bavuga Ikinyarwanda batuye mu burasirazuba bwa RDC ari ingenzi mu kurinda abasivili.

Yagize ati: “Gukemura impamvu za politiki zitera aya makimbirane na byo ni ingenzi kugira ngo tugere ku mahoro arambye.”

Ibi yabigarutseho mu gihe umutekano mu burasirazuba bwa RDC ukomeje kuba ikibazo gikomeye mu Karere, aho impande zitandukanye zikomeje gukora ibishoboka kugira ngo amakimbirane amaze igihe abashe gukemurwa.

U Rwanda rwavuze ko rwubahiriza amasezerano ya Washington

Minisitiri w’Intebe Dr Justin Nsengiyumva yavuze ko u Rwanda rwubahiriza byimazeyo amasezerano ya Washington n’izindi gahunda ziyobowe n’Umuryango wa Afurika Yunze Ubumwe (AU) zigamije gukemura ibibazo by’umutekano mu karere.

Yagaragaje ko gukemura ibyo bibazo byafasha ibihugu byo mu Karere kwibanda ku iterambere ry’ubukungu, ubufatanye n’ishoramari bishingiye ku mutungo kamere uhari.

Yasoje agaragaza ko amahoro arambye mu Karere azagerwaho ari uko ibibazo by’umutekano n’impamvu za politiki ziri mu mizi y’amakimbirane bikemuwe mu buryo burambye.

Joseph Kabila, wigeze kuba Perezida wa Repubulika ya Demokarasi ya Congo mu 2001-2019, ubu akaba ari umuyobozi w’umutwe wa FRN (Front pour la Refondation de la Nation), uwo ukaba ari umutwe wa Politiki ufite n’igisirikare ukorera mu Burasirazuba bwa Congo guhera ku itariki 12 Ukwakira 2026, aho wasimbuye ihuriro ryari risanzwe rizwi nka AFC/M23, yasobanuye icyatumye ahaguruka akaza kurwana.

Mu kiganiro kihariye yagiranye n’abanyamakuru ba ‘Conspiracy Tracker Great Lakes’, yavuze ko mu byari yari yarabwiye uwamusimbuye ku butegetsi, Perezida Felix Tshisekedi Tshilombo, ari uko yazakora ibishoboka byose igihugu ntigisubire inyuma ahubwo kigatera intambwe igana imbere.

Yagize ati, “ Kimwe mu byo navugaga agomba kwitaho ni umutekano,kuko mu 2019, ibintu ntibyari bimeze neza ku buryo bwuzuye, ariko 95% y’ibibera mu gihugu byari byarakurikiranwaga. Nta mitwe amagana yitwaza intwaro yari mu gihugu,nta bacanshuro bakoreraga muri Congo,nta ngabo z’ibihugu by’amahanga zakoreraga muri Congo,umutekano wari ucunzwe neza.Kuri njyewe icyo cyari ikintu cy’ingenzi, kuko ntiwavuga ngo urakora ku iterambere , kandi hari imvururu mu gihugu,intambara, byaba bari mu gice kimwe cy’igihugu, cyangwa se biri mu gihugu cyose”.

Joseph Kabila yavuze ko aherutse kubivuga kuko ari ko abibona, avuga hatagize igikorwa vuba, Congo yazisanga yabaye nka Sudani. Impavu ngo ni ukubera ko Congo ituwe n’abaturage babarirwa muri za Miliyoni amagana,batuye mu bice bitandukanye, bakavuga indimi zitandukanye,kandi ibyo bikaba atari ikibazo kuko mu itegeko nshinga rya Congo, birateganyijwe ko abatuye icyo gihugu ari bamwe kandi bagambo gukomeza kuba bamwe.

Joseph Kabila avuga ko yatangiye kubona ko igihugu cya Congo kigana mu kaga, mu mpera za 2019 no mu ntangiriro za 2020, ubwo Perezida Tshisekedi yakuragaho ihuriro rya politiki ryari rihari, kuri we ngo icyo cyari ikimenyetso ko ubwo butari uburyo bwiza bw’imikorere, kandi ibyo byanabaye mbere y’uko M23 itangira imirwano.Kuri Kabila, ibyo byari bivuze ko igihugu kiyobowe n’umuntu ukora ibyo yumva mu mutwe we ko ari byo bikwiye, atanitaye ku byo kubahiriza itegeko nshinga kandi ari ryo tegeko riruta ayandi.

Ikindi kibazo, ni ikijyanye n’ivangura ry’amoko, kiyongereye cyane muri iki gihe, kandi kuri Kabila ngo ntibishoboka kuyobora igihugu hagendewe ku ivangura ry’amoko. Yavuze uko kuri ubu, hari ikibazo cy’uko hari abaturage bamwe, bitewe n’igice batuyemo n’ururimi bavuga, bafatwa nk’abanzi b’igihugu.

Yagize ati, “ Ntushobora kujya ku butegetsi, ufite gahunda yo kwibasira abasirikare bakuru baturuka mu gice runaka bakoresha ururimi runaka,urwitwazo rwose waba ufite, ntushobora gukora ibintu nk’ibyo, ngo wizere ko urimo wubaka umutekano uhamye.Kandi ibyo byarabaye. Muri bimwe mu biganiro nagiranye na Perezida Tshisekedi mu 2019, namubwiye ikintu kimwe, naramubwiye politiki ni politiki, ushobora kuyikina n’abanyapolitiki, ariko uko mbibona, bimeze nk’aho ushaka gufata igisirikare ukagishingira ku bwoko, naramubwiye nti nubikora utyo, uzatuma iki gihugu kimera nabi cyane. Ubu rero iyo urebye uko ibintu bimeze ubu, kandi ntabwo ndimo gukabya, birenda kumera neza neza nk’uko byari bimeze mu 1997, mu gihe cya Perezida Mobutu Seseseko. Kandi ntawabyemera”.

“ Ntiwabyuka umunsi umwe ngo uvuga ko ugiye gufunga kanaka, kuko hari ibyo ntumvikanaho nawe, hari ibyo atemeranyaho nanjye, kanaka wundi agomba kujya muri gereza, cyangwa kanaka agomba gupfa,sinemeranya n’ibivugwa n’abaturage bo mu Burasirazuba,…Ntabwo twatoye itegeko nshinga kugira ngo umuntu aze ku butegetsi, abe ari we ufata icyemezo cyo kuvuga ati, iri tegeko nshinga sinemeranya naryo, ngiye kurihindura.Abantu benshi ntibumva ko muri iryo tegeko nshinga, ingingo ya 64,ivuga ko twanze kuzasubira mu butegetsi bw’igitugu.Ubu rero kubera ko igitugu gihari, impamvu zatumye turwanya Mobutu, ni zo mpamvu zihari ubu.Ku bw’amahirwe, turacyariho,turacyafite ubuzima bwiza, butuma tuvuga tuti oya ntitwemeranya nabyo, nk’uko tutigeze twemeranya na Marshall Mobutu Seseseko”.

Perezida wa Komisiyo y’Igihugu y’Uburenganzira bwa Muntu Umurungi Providence yavuze ko ikigo cy’Igororamuco cya Huye cyagaragayemo umwanda ukabije, ku buryo cyashyizwe mu bigomba kwitabwaho by’umwihariko.

Yabibwiye Inteko Ishinga Amategeko ku wa 28 Ukwakira, ubwo yatangaga Raporo y’ibyagezweho na Komisiyo mu mwaka w’ingengo y’imari wa 2025-2026.

Yasobanuye ko iki kibazo giterwa n’umubare munini w’abajyanwayo ugereranyije n’ibikoresho bihari bifasha kubungabunga isuku.

Komisiyo yasabye ko iki kigo cyitabwaho by’umwihariko, kugira ngo habeho kunoza isuku n’imibereho y’abakijyanwamo.

Umurungi yavuze ko nyuma yo kuganira n’inzego zegerejwe abaturage bakazigira inama ku bikwiye gukosorwa, Komisiyo yongeye gusura igasanga hari impinduka zabaye.

Ati “Twaganiriye n’inzego z’ubuyobozi bw’Akarere ndetse n’inzego z’umutekano, tubasaba ko bahahoza ijisho. Twasubiyeyo nyuma y’inama twabahaye, dusanga hari impinduka zigaragara.”

Komisiyo y’Igihugu y’Uburenganzira bwa Muntu yanagaragaje ko hakiri imbogamizi mu kubona ubuvuzi bukwiye ku bagororwa.

Mu bibazo byagaragajwe harimo gutinda kubona imiti yihariye, no kubona ubuvuzi bwisumbuye igihe bibaye ngombwa.

Hari kandi ibura ry’abaganga b’inzobere mu buzima bwo mu mutwe, mu gihe amavuriro yo mu magororero amwe n’amwe adafite ubushobozi buhagije bwo kwakira no kuvura abantu benshi bayagannye.

Ibi bibazo bishobora gutuma abagororwa batabona ubuvuzi bukwiye ku gihe, cyane cyane abafite indwara zisaba ubuvuzi bw’inzobere cyangwa gukurikiranwa byihariye.

Komisiyo ishimangira ko nubwo umuntu aba afunzwe cyangwa ari mu kigo cy’igororamuco, hagomba kubahirizwa uburenganzira bwe bw’ibanze, harimo uburenganzira bwo kugira isuku, kuruhuka mu buryo bukwiye no kubona ubuvuzi.

Raporo ya Komisiyo y’Igihugu y’Uburenganzira bwa Muntu y’umwaka wa 2025/2026 igaragaza ko hari intambwe imaze guterwa mu kugabanya ubucucike mu magororero, ariko ko hakiri ibibazo bisaba gukomeza gukurikiranwa, kugira ngo imibereho y’abagororwa n’abari mu bigo by’igororamuco irusheho kunozwa.

U Rwanda rwakiriye abaturage 251 batashye bavuye mu bice bitandukanye bya Kivu y’Amajyaruguru n’iy’Amajyepfo muri Repubulika Iharanira Demokarasi ya Kongo (RDC).

Abatashye bakiriwe kuri uyu wa 29 Ukwakira barimo 194 banyuze ku mipaka ya La Chroniche mu Karere ka Rubavu hamwe n’abandi 57 banyuze mu Karere ka Rusizi, ku mipaka ya Kamanyola na Rusizi.

Bose bakiriwe n’abayobozi mu nzego bwite za Leta hamwe n’abandi bo mu miryango ifite impunzi mu nshingano.

Abatashye biganjemo abagore n’abana, barimo abageze muri RDC mu 1994, bavuga ko bari babayeho mu buzima bubi muri icyo gihugu, kubera ko abana babo batigaga, kurya no kuryama ari ikibazo gikomeye.

Impamvu nuko ngo ibice babagamo bihora mu ntambara, bakaba batahukanye ingamba zo kwifatanya n’abandi Banyarwanda kubaka u Rwanda.

Umubyeyi watahaye abana bane anyuze ku mupaka wa La Chroniche mu Karere ka Rubavu, avuga ko babaga ahitwa i Bukombo, bakaba barahoraga mu ntambara gusa, ku buryo abana be batagize amahirwe yo kwiga.

Yagize ati “Mfite abana bane, nta n’umwe wigaga, twahoraga mu ntambara za buri gihe. Gutinda gutaha ni uko ntari nakamenya uko barimo gucyura impunzi, aho nabimenyeye nahisemo gutaha. Intego mfite ubu ni iyo gutura mu Rwanda, akazi abandi bakoze kugira ngo batere imbere nanjye niko nzakora.”

Umunyamabanga Nshingwabikorwa w’Akarere ka Rubavu, Olivier Ruhamyambuga yabasabye gutanga umusanzu wo gushishikariza abasigayeyo gutaha, bakababwira ko mu mu gihugu basanze ari amahoro.

Yagize ati “Muze mwisanzuye, mwumve ibyiza u Rwanda rumaze kugeraho, namwe bibagereho, kandi mudufashe kuzana abagabo mwasize hariya. Icyiciro gitaha kizaze kirimo abagabo benshi, bitandukanye n’ingengabitekerezo ya FDLR, ivangura, bayoboke ubuyobozi bwiza u Rwanda dufite, bukunda Abanyarwanda, bwanaciye ibintu byose by’inzangano n’ivangura.”

Delphine Uwineza na Jean de Dieu Harerimana bamaze imyaka 15 babana nk’umugore n’umugabo batashyingiranywe imbere y’amategeko.

Mu myaka irenga irindwi, amakimbirane yabakururiye umwiryane udashira, kugeza ubwo bafashe icyemezo cyo gutandukana.

Nyuma yo gusubirana, biyemeje gusezerana imbere y’amategeko n’imbere y’Imana, bakaba bizeye ko bizabafasha kubaka urugo rutekanye.

Kuri uyu wa 29 Ukwakira 2026, Uwineza na Harerimana bari mu miryango 16 yasezeraniye imbere y’amategeko mu Murenge wa Kinyinya, mu Karere ka Gasabo. Bavuga ko ibyababayeho byabigishije ko kubana gusa bidahagije, ahubwo ko ari ngombwa kubaka urugo rushingiye ku bwumvikane, icyizere n’inshingano buri wese yiyemeza.

Uwineza avuga ko mu myaka bamaze babana, amakimbirane yari yarabaye akarande, ku buryo ubuyobozi bw’aho batuye bwaje kubagira inama yo gutandukana, bubona ko gukomeza kubana bitakibashobokera.

Yagize ati “Twagiranaga amakimbirane mu miryango aho dutuye, ubuyobozi bukabizamo. Bashingiye ku buryo twahoraga mu makimbirane, bafashe umwanzuro w’uko tugomba gutandukana kuko twumvaga kubana bitagishobotse.”

Harerimana na we avuga ko amakimbirane yari yarabaye menshi, rimwe na rimwe akayagaragarizamo uburakari, bikagira ingaruka ku mibanire yabo no ku mutungo w’urugo.

Ati “Byabaga ari ibicika, nkajya kunywa inzoga, nagera mu rugo nkirwana, ngakubita amasafuriya n’ibindi byose. Wasangaga mu rugo ari amakimbirane gusa, nta gusinzira, kugeza igihe twatandukanye. Twahombye byinshi kuko natakaje ibyo nari mfite, birimo n’ikibanza nagurishije.”

Gusubirana byabigishije kubaka urugo bundi bushya

Nyuma yo gutandukana, Uwineza yatangiye kujya mu rusengero no kugira uruhare mu bikorwa bitandukanye by’itorero. Avuga ko guhinduka kwe kwagize uruhare mu kongera kubaka umubano n’umugabo we, kugeza ubwo nyuma y’umwaka urenga bongeye gusubirana.

Kuri ubu, bombi bavuga ko bahisemo gusezerana imbere y’amategeko n’Imana kugira ngo barusheho kugirirana icyizere no gufatanya mu guteza imbere umuryango wabo.

Uwineza ati “Ubu mu muryango wacu ni amahoro. Ayo mahoro tuyakesha kuba twaramenye Imana, kuko ari yo shingiro ry’ibyo byose. Inkingi ya mbere yatubashishije gufata uwo mwanzuro ni uko twabaye abakirisitu, tugafata icyemezo cyo gusenga, amakimbirane akava mu rugo rwacu. Ubu turashima Imana kuko mu rugo rwacu ari amahoro.”

Harerimana avuga ko kuba barasezeranye ari intambwe ikomeye mu buzima bwabo, kuko biyemeje gushyira hamwe no guharanira iterambere ry’urugo rwabo.

Yagize ati “Twamaze kwemeranya ko tugomba gushyira hamwe, ibyo bikazatuma dutera imbere twese hamwe, kuko twamaze kuba umwe. Dufite icyizere kuko twabikoze twabiteguye kandi twabitekerejeho.”

Gusezerana bigira uruhare mu kugabanya amakimbirane

Ubuyobozi bw’Umurenge wa Kinyinya buvuga ko hakiri imiryango myinshi ibana itarasezeranye imbere y’amategeko, bikaba biri mu bibazo bukeneye gukomeza gukemura kugira ngo imiryango irusheho kugira umutekano n’ituze.

Umunyamabanga Nshingwabikorwa w’Umurenge wa Kinyinya, Deo Rugabirwa, avuga ko gushyingiranwa imbere y’amategeko bifasha kurengera uburenganzira bw’abagize umuryango, cyane cyane abana n’abashakanye.

Ati “Iyo umwana avutse ku bantu batashyingiranywe, bisaba ko umubyeyi w’umugabo abanza kumwemera. Hari igihe atabikora vuba, ugasanga umwana arimo kurengana. Ariko iyo bashyingiranywe, amategeko ateganya uko umwana yandikwa n’uko imitungo icungwa. Bigabanya ku rwego rukomeye amakimbirane yo mu miryango.”

Umushumba Mukuru w’Itorero Bethesda Musenyeri Albert Rugamba, avuga ko Leta n’amadini bafite uruhare mu gufasha abaturage kubaka imiryango ibanye mu mahoro.

Yishimiye ko iyo miryango yiyemeje gutangira ubuzima bushya, ishyingiranwa ryayo rikemezwa n’amategeko ndetse ikarusezeranira imbere y’Imana.

Yagize ati “Batangiye ubuzima bushya uhereye ku rwego rw’amategeko, basezerana n’imbere y’Imana, bagirana igihango cy’ubudahemuka, bambikanye impeta. Ni ukuvuga ngo umugore ahawe agaciro imbere y’umugabo we, n’umugabo na we agahabwa agaciro kuko afite umugore. Imana ikoze ikintu gikomeye tutabura kuyishimira.”

Uwineza na Harerimana bavuga ko mbere yo gusubirana no gusezerana, buri wese yabagaho afite impungenge z’uko umubano wabo ushobora kongera gusenyuka igihe icyo ari cyo cyose. Kuri ubu, bizeye ko kwiyemeza kubana mu buryo bwemewe n’n’amategeko, bafatanyije no guhindura imyitwarire yabo, bizabafasha gukomeza kubaka urugo rurangwa n’amahoro.

Imibare y’Ikigo cy’Igihugu cy’Ibarurishamibare mu Rwanda (NISR) igaragaza ko umubare w’abashyingiranwe imbere y’amategeko wagabanutse mu 2025 ugereranyije n’umwaka wabanje.

Raporo ya NISR y’ibarurishamibare ku iyandikwa ry’abaturage ya 2025 (Rwanda Vital Statistics Report 2025) igaragaza ko mu 2025 handitswe imiryango 50.256 yashyingiranywe imbere y’amategeko, mu gihe mu 2024 yari 52.878. Ibi bivuze ko umubare wagabanutseho imiryango 2.622.

Ni umukoro Komisiyo ya Sena y’Ubukungu n’Imali yavuze ko yamuhaye ubwo bagiranaga ikiganiro kigamije kugenzura umwirondoro we, nyuma yo gushyirwaho n’Inama y’Abaminisitiri ku wa 26 Ukwakira 2026.

Senateri Dr. Frank Habineza, wasomeye Sena raporo ya Komisiyo ku isuzumwa ry’umwirondoro wa Mukashyaka, yavuze ko mu biganiro bagiranye yabagaragarije ko afite ubumenyi n’ubunararibonye bizamufasha kuyobora urwego asabwe kuyobora.

Yasobanuye ko Mukashyaka afite amashuri ajyanye n’akazi ashinzwe, ndetse akaba yarakoze mu Rwego rw’Ubugenzuzi Bukuru bw’Imari ya Leta mu gihe cy’imyaka ine.

Yagize ati “Yatugaragarije ko amashuri yize n’imirimo yakoze byamuhesheje ubumenyi n’ubushobozi mu gukora ubugenzuzi bw’imari, kandi ko abona bizamufasha kuzuza inshingano asabirwa kuyobora.”

Senateri Habineza yakomeje avuga ko Mukashyaka azi neza imikorere y’urwo rwego, bityo ko yiteguye kubakira ku byagezweho kugira ngo ubugenzuzi burusheho kugira ireme no kugendera ku bipimo mpuzamahanga.

Ati “Yatugaragarije ko azubakira ku byiza Urwego rw’Ubugenzuzi Bukuru bw’Imari ya Leta rumaze kugeraho, ndetse agaharanira ko ubugenzuzi burushaho kugira ireme no kuzuza ibipimo bisabwa ku rwego mpuzamahanga.”

Komisiyo ya Sena y’Ubukungu n’Imari yanamusabye kwita ku mpamvu zituma hari inzego zidashyira mu bikorwa inama z’Urwego rw’Ubugenzuzi Bukuru bw’Imari ya Leta, kandi zigamije kunoza imicungire y’umutungo wa Leta.

Senateri Habineza yavuze ko iyi ari ingingo komisiyo ihora yitaho mu isesengura rya raporo z’ubugenzuzi, kuko hari inama zitubahirizwa n’ibigo ziba zagenewe.

Yakomeje agira ati “Hari inama z’Umugenzuzi Mukuru w’Imari ya Leta zidashyirwa mu bikorwa. Twamusabye ko yazitaho kugira ngo hamenyekane impamvu ibigo bigirwa inama bitazikurikiza, kandi ari inama z’ingirakamaro mu gucunga neza umutungo n’imari bya Leta.”

Indi nshingano komisiyo yamuhaye ni uguharanira ko ibigo byose bihabwa ingengo y’imari ya Leta bikorerwa ubugenzuzi buri mwaka, kugira ngo imikoreshereze y’amafaranga ya Leta ikurikiranwe neza.

Uretse Claudette Mukashyaka, Sena yanemeje abandi bayobozi bari basabiwe kwemezwa ku myanya itandukanye.

Muri bo harimo Gratien Kubwimana, wemejwe ku mwanya w’Umugenzuzi Mukuru Wungirije w’Imari ya Leta, na Alphonse Zigira, wagizwe Umuyobozi Mukuru w’Iposita.

Sena yanemeje Athanasie Nyiragwaneza, Viateur Bangayandusha na Aissa Umutoni ku myanya y’abakomiseri muri Komisiyo y’Igihugu y’Uburenganzira bwa Muntu.

Yemeje kandi Ambasaderi Dr. Valentine Uwamariya ku mwanya wa Ambasaderi w’u Rwanda muri Suwede.

Kuri uyu wa Kane, ku cyicaro cy’Ishyirahamwe ry’Umupira w’Amaguru mu Rwanda habereye umuhango w’ihererekanyabubasha hagati ya Perezida ucyuye igihe, Fabrice Ngoga Shema, na Perezida w’agateganyo, Me Claudine Gasarabwe, maze Shema wari umaze umwaka urenga atowe ariko akegura avuga ko atagiye kure ya ruhago kandi azajya anahereza Amavubi.

Ibi byabaye nyuma y’uko ku wa 29 Nzeri 2026, Shema Ngoga Fabrice yanditse ibaruwa asezera mu nshingano zo kuba Perezida yari yatorewe tariki 30 Kanama 2025 aho yavuze ko ari ari icyemezo cyafashwe mu bunyangamugayo bufite aho buhuriye n’imyitwarire yanjye bwite, ibyaje bikurikira itabwa muri yombi rye tariki 11 Kanama 2026 akurikiranyweho icyaha cyo gutanga sheki zitazigamiwe n’icyo kwihesha ikintu cy’undi hakoreshejwe uburiganya.

Muri iri hererekanyabubasha Shema Fabrice yashimiye abo bakoranye, gusa avuga ko atazajya kure y’umupira kuko azajya ajya ku mastade kandi ko byumwihariko azajya aherekeza Amavubi mu bihe bitandukanye kandi ko yizeye ko azajya mu Gikombe cya Afurika 2027.

Ati "Ndashimira abantu bose bamfashije mu nshingano. Ntabwo ngiye kure y’umupira. Nzaza kuri Stade, ndebe imikino kandi nzaherekeza Amavubi mu bihe bitandukanye. Nizeye ko tuzagera mu Gikombe cya Afurika.”

Ibyaha Shema Fabrice yari akurikiranyweho mu manza yamaze ukwezi kurenga, zirebana n’imirimo asanzwe akora hanze ya ruhago, aho yabikoze mu bucuruzi bw’ibijyanye n’ibikoresho by’ubuvuzi asanzwe akora binyuze muri kompanyi ye ya Africa Medical Supplier.

Umunya-Portugal Cristiano Ronaldo yegukanye igihembo cy’umupira wa zahabu Ballon d’Or y’ibihe byose binyuze mu mu matora y’abafana, kuva ibi bihembo byatangira gutangwa mu 1956 aho abikesha icyo yatwaye mu 2008.

Abategura Ballon d’Or batangaje ko ibi byabaye bigizwemo uruhare n’abafana hirya no ku Isi aho hashyizweho uburyo n’ahantu ho gutorera buri wese agatora. Aya matora yasize Ballon d’Or Cristiano Ronald yatwariye muri Manchester United mu 2008 aho yari amaze imyaka itanu icyo gihe ariyo ibaye iy’ibihe byose.

Ibyo Cristiano Ronaldo yagezeho mu 2008:

Iyu mupira wa zahabu icyo gihe Cristiano Ronaldo yawutwaye awukesha ibitego 42 yari yatsinze mu marushamwa yose yatanze imipira umunani yavuyemo ibitego byose yakoze mu mikino 49.

Muri uwo mwaka, Cristiano Ronaldo yafashije Manchester United gutwara Premier League, byatumye aba umukinnyi wa shampiyona 2007-2008. Yasheje Manchester United kandi UEFA Champions League batsinze Chelsea ku mukino wa nyuma ndetse anayihesha Igitego cy’Isi cy’amakipe. Yabaye uwatsinze ibitego byinshi muri Premier League(31) ndetse n’uwatsinze ibitego byinshi (8) muri Champions League.

Yatwaye igihembo cy’umukinnyi watsinze ibitego byinshi muri shampiyona zose z’i Burayi. Yababaye umukinnyi mwiza watowe n’abafana muri uwo mwaka, yegukana igihembo cy’umukinnyi mwiza w’umwaka cy’ishyirahamwe ry’abakinnyi babigize umwuga mu Bwongereza, atwara igihembo cy’umukinnyi mwiza w’abanyamakuru bandika mu Bwongereza.

Cristiano kandi yegukanye igihembo cy’umukinnyi mwiza wa gitangwa na FIFA n’icy’umukinnyi witwaye neza i Burayi cyatangwaga n’Iishyiramwe ry’umupira w’amaguru i Burayi ariko cyahagaze mu 2010.

Muri rusange Cristiano Ronaldo yegukanye Ballon d’Or inshuro eshanu, aho iyi yo mu 2008 yari iye ya mbere. Yayitwaye kandi 2013, 2014, 2016 na 2017.

Perezida wa Repubulika y’u Rwanda, Paul Kagame, yavuze ko ubwenge buhangano (AI) bukwiye gutezwa imbere ku buryo inyungu zabwo zigera ku bantu bose, buri wese akagira uruhare mu gufata ibyemezo bigena icyerekezo cy’iri koranabuhanga.

Ibi yabigarutseho ubwo yitabiraga inama yo kuri murandasi ya Komisiyo Mpuzamahanga ya AI for Good, ifite inshingano zo kurebera hamwe uko ubwenge buhangano bwakoreshwa mu guteza imbere imibereho myiza y’abantu no kwihutisha iterambere ry’ubukungu ku Isi.

Perezida Kagame, uri mu bayoboye iyi Komisiyo, yitabiriye iyi nama ari kumwe na Marc Benioff, Umuyobozi Mukuru akaba n’umwe mu bashinze ikigo cya Salesforce, na Doreen Bogdan-Martin, Umunyamabanga Mukuru w’Ishami ry’Umuryango w’Abibumbye ryita ku Ikoranabuhanga mu Itumanaho (ITU), usanzwe ari visi-perezida w’iyi Komisiyo, hamwe n’abandi bayigize.

Mu butumwa yatanze, Perezida Kagame yagaragaje ko kugira ngo ubwenge buhangano bugire uruhare mu iterambere rirambye, hakenewe uruhare rw’abantu batandukanye mu kugena uko iri koranabuhanga rizakoreshwa.

Yagize ati: “Inyungu z’ubwenge buhangano zizakomeza kwiyongera, niba twese tugira ijambo mu kugena ejo hazaza h’iri koranabuhanga rishya. Inshingano yacu nka Komisiyo ni ugukomeza kwibaza ibibazo bikomeye, no kwiyemeza gukoresha igihe cyacu, ubumenyi n’ubushobozi dufite mu gushaka ibisubizo bifatika.”

Iyi nama yibanze ku kureba aho ibikorwa bya Komisiyo bigeze, ndetse no kuganira ku ntambwe zikurikiraho mu gushimangira ko ubwenge buhangano butanga inyungu zisangiwe, haba mu bukungu no mu mibereho y’abaturage bo hirya no hino ku Isi.

Ubwenge buhangano ni rimwe mu ikoranabuhanga rikomeje guhindura uburyo abantu bakora, biga, bavura indwara, bakora ubushakashatsi ndetse n’uburyo ibigo bitandukanye bitanga serivisi.

Nubwo rifite ubushobozi bwo kongera umusaruro no kwihutisha iterambere, ikoreshwa ryaryo rinajyana n’ibibazo bijyanye n’imikoreshereze y’amakuru bwite, umutekano, ihame ry’uburinganire mu kugera ku ikoranabuhanga ndetse n’ingaruka rishobora kugira ku mirimo imwe n’imwe.

Komisiyo ya AI for Good igamije kurebera hamwe uburyo bwo gukoresha iri koranabuhanga mu gukemura ibibazo byugarije abantu, no gushaka ibisubizo bituma inyungu zaryo zitagera ku bantu bake gusa, ahubwo zigafasha abantu bo mu bice bitandukanye by’Isi.

Ubutumwa bwa Perezida Kagame bushimangira akamaro ko gukomeza ibiganiro n’ubufatanye mpuzamahanga mu gushyiraho uburyo bwo guteza imbere ubwenge buhangano ku buryo bugirira akamaro abantu benshi, mu gihe isi ikomeje kwinjira mu bihe bishya by’ikoranabuhanga.

Nevada Pierre, umwana w’imyaka itatu wo muri Leta ya Florida muri Leta Zunze Ubumwe za Amerika, akomeje kuvugisha benshi nyuma y’uko impano ye mu mupira w’amaguru imenyekanye ku mbuga nkoranyambaga, ikaba yanatumye ikigo cya Roc Nation Sports giteganya kumufasha kujya muri Espagne mu Ukuboza 2026.

Iki kigo kizwi mu gucunga no guteza imbere impano z’abakinnyi bakomeye ku rwego mpuzamahanga, barimo LaMelo Ball ukina basketball na Vinícius Júnior ukinira Real Madrid, kirashaka gufasha uyu mwana kubona amahirwe yo kurushaho guteza imbere impano ye.

Uyu mugambi ujyanye n’ibyo ababyeyi ba Nevada, Martasia Griffin na Don Pierre, bari barigeze kuganiraho byo kwimukira muri Espagne kugira ngo umuhungu wabo abone amahirwe yo kwiga no gukina umupira w’amaguru mu buryo bwamufasha gutera imbere muri uyu mukino.

*Amakimbirane yabereye mu mukino w’abana ni yo yatumye amenyekana*

Nevada yamenyekanye cyane nyuma y’amakimbirane yabereye mu mukino w’umupira w’amaguru wahuzaga abana wabereye i Winter Park, muri Florida, ku wa Gatandatu tariki ya 24 Ukwakira 2026.

Uyu mwana yari ari gukina n’abandi bana bafite imyaka itanu. Amakuru avuga ko bamwe mu babyeyi bari bitabiriye umukino bagaragaje kutishimira uburyo Nevada yakinaga, bakavuga ko afite ubuhanga bwinshi ugereranyije n’abana babo kandi ko atatangaga umupira kenshi.

Icyakora, amakimbirane yarakomeye kugeza ubwo abayobozi b’irushanwa bahamagaye polisi.

Martasia Griffin, nyina wa Nevada, ubwo abapolisi bari bahageze yababwiye ko umwana we yarimo arenganywa kubera ubuhanga afite mu mupira w’amaguru. Yagize ati: “Barakariye umuhungu wanjye kubera ko azi gukina umupira w’amaguru. Barimo kumwirukana aha hantu kubera ko akina neza.”

Nubwo aya magambo yakwirakwijwe cyane ku mbuga nkoranyambaga, ikigo cya i9 Sports cyasobanuye ko amakimbirane yabaye muri uwo mukino yaturutse ku babyeyi aho kuba ikibazo cyatewe n’impano ya Nevada.

*Roc Nation Sports ishaka kumufasha guteza imbere impano ye*

Amahirwe yo kujya muri Espagne ashobora gufasha Nevada n’umuryango we kumenya uburyo butandukanye bwo gutoza abana no guteza imbere impano mu mupira w’amaguru.

Ababyeyi be bamaze igihe bagaragaza icyifuzo cyo gushakira umuhungu wabo amahirwe yo gukina umupira w’amaguru hanze ya Amerika, kandi Espagne ni kimwe mu bihugu bizwiho gahunda z’amashuri yigisha ruhago no guteza imbere abakinnyi bakiri bato.

Uretse gahunda ya Roc Nation Sports, Eddie Johnson wahoze akinira ikipe y’igihugu ya Leta Zunze Ubumwe za Amerika na we yemeye kumuha amahirwe mu ishuri rye ry’umupira w’amaguru riherereye muri Orlando.

Umuryango wa Nevada kandi kugeza ubu umaze gukusanya inkunga binyuze ku rubuga rwa GoFundMe, arenga ibihumbi 42 by’Amadolari ya Amerika, agamije kuwufasha mu rugendo rwo guteza imbere impano y’uyu mwana.

‎Ikipe ya Rayon Sports yatsinze Musanze FC ibitego 3-0 mu mukino w’ikirarane cy’umunsi wa gatanu wa BK Pro League, cyakinwe kuri uyu wa Gatatu, tariki ya 28 Ukwakira kuri Kigali Pele Stadium, maze ibona itsinzi ya mbere muri shampiyona.
‎

‎Ni umukino umutoza Haringingo Christian yakozemo impinduka maze
‎Nshimiyimana Fabrice na Muhoza Danniel babanza mu kibuga ku nshuro ya mbere naho Mkono Eldinho na Ouattara Mohamed bakina umukino wa mbere muri BK Pro League.
‎
‎Uyu mukino watangiye Saa Kumi n’Ebyiri n’Igice watangiranye imbaraga cyane cyane ku ruhande rwa Rayon Sports, maze ku munota wa kabiri ibona koroneli yatewe na Iradukunda Elia Tatou ntiyagira icyo itanga.
‎

‎Ku munota wa 20 Rayon Sports yafunguye amazamu nyuma yo guhagarara nabi kwa bamyugariro ba Musanze FC maze Junier Kameni atera umupira mu izamu yigaramye umunyezamu maze Nsabimana Jean de Dieu ntiyamenya aho umupira unyuze.
‎
‎Nyuma yo gutsindwa igitego ikipe y’Akarere ka Musanze yabaye nk’ikangutse itangira kugabanya amakosa yakoraga hagati mu kibuga, ikarema uburyo ariko bwugarizi bwa Gikundiro n’umunyezamu Dande Junior akomeza kugumisha ikipe mu mukino, maze igice cya mbere kirangira ari 1-0.
‎

‎Igice cya kabiri cyatangiranye impinduka Ganijuru Ishimwe Elia yinjiye mu kibuga asimbuye Nshimiyimana Fabrice. Ku munota wa 53 Iradukunda Elie Tatou yatsindiye Rayon Sports igitego cya kabiri ku mupira yahawe na Mokono Eldino
‎

‎Ku munota wa 57 Christivie Bioko yasigaranye n’umunyezamu Dande Junior amaze kumucenga umupira awutera hanze y’izamu. Iyi kipe yambara umutuku yakomeje gukina neza ikabona koroneli ku makosa Dande yakoraga ariko bananirwa kubyaza umusaruro uburyo babonaga.
‎
‎Ikipe yambara ubururu n’umweru yashimangiye itsinzi yayo itsinda igitego cya gatatu ku munota wa 68 gitsizwe na Mudeli Akbali ku mupira yazamukanye ku ruhande rw’iburyo rwa Rayon Sports ihindura umupira mu izamu. Umukino warangiye Rayon Sports yegukanye amanota atatu nyuma yo gutsinda ibitego 3-0.
‎

‎Mu mpera z’iki cyumweru ikipe ya Rayon Sports izasura Marine FC i Rubavu mu gihe Musanze FC izasura Amagaju FC hakinwa imikino y’umunsi wa Karindwi wa BK Pro League 2026-27.
‎

Kuri uyu wa Gatatu i Cairo mu Misiri habereye tombola y’uko amakipe azakina amatsinda y’imikino Nyafurika 2026-2027, Al Hilal SC yisanga hamwe n’amakipe arimo Pyramids FC yo mu Misiri.

Iyi kipe iri gukina shampiyona y’u Rwanda ku nshuro ya kabiri yikurikiranya nyuma yo gutwara iya 2025-2026, yasanze mu itsinda rya kane iri kumwe na Pyramids FC yo mu Misiri yakinnye na APR FC mu bihe bitandukanye, Horoya AC yo muri Guinnea Conackly yanasezereye Al Merrikh SC ndetse na MAS de Fès yo muri Maroc.

Mu yandi matsinda itsinda rya mbere ririmo ES Tunis, Atlético Petróleos, FC Nouadhibou na Wiliete de Benguela, itsinda rya kabiri ririmo Zamalek SC yasezereye APR FC, Young Africans, MC Alger NA Club Africain mu gihe rya gatatu ririmo RS Berkane, Simba SC, Orlando Pirates FC na Colombe Sportive.

Biteganyijwe imikino y’umunsi wa mbere w’amatsinda izakinwa hagati y’itariki 27 na 29 Ugushyingo 2026.

‎Al Merrikh SC yatsinze ikipe ya Police FC igitego 1-0 mu mukino w’ikirarane cy’umunsi wa kabiri wa BK Pro League 2026-2027, Al Hilal SC inyagirwa na Marine FC 3-0.
‎

‎Ni imikino yakinwe kuri uyu wa Gatatu tariki ya 28 Ukwakira 2026, itangira Saa Cyenda zuzuye. Kuri Kigali Pele Stadium Al Merrikh SC na Police FC batangiye batuje ku makipe yombi, ariko asatira bya hato na hato gusa Al Merrikh SC igashyiramo imbaraga ishaka gutsinda igitego,nubwo ubwugarizi bwa Police FC burimo David Chimezi na Ndizeye Samuel bwahagararaga neza.
‎
‎Abakinnyi ba Police FC banyuzagamo bakagaba udutero bashaka igitego ariko rutahizamu Mousa Limane agapfusha ubusa uburyo bucye bwavaga ku mpande za Kwitonda Allean Bacca na Kefa Tangara, bituma igice cya mbere kirangira ari 0-0. ‎Igice cya kabiri abatoza ku mpande zombi bakoze impidnuka zitandukanye kugira ngo bashake ibitego, maze ku munota wa 83 Fenohasina Gilles Razafimaro atsinda igitego ku mupira waruvuye muri koroneli, umukino urangira ari 1-0.

I Rubavu Marine FC yatunguranye itsinda mu buryo bwemeza, ikipe Al Hilal SC iri mu matsinda ya CAF Champions League ibitego 3-0. Ni ibitego birimo icyitsinzwe na Rawa Mohamed ku munota wa 13, Amani Rutayisire ku munota wa 67 ndetse na Niyibizi Ramadhan ku munota wa gatatu w’inyongera w’umukino.

‎Police FC yakinaga umukino wa gatandatu, aho ku manota 18 imaze kubonamo ane gusa kuko yatsinze umukino umwe ikanganya umwe igatsindwa ine mu gihe Al Merrikh SC yakinaga umukino wa kabiri aho yari yaranganyije uwa mbere.

Ku rundi ruhande, Al Hilal SC yakinaga umukino wa kabiri nayo, aho uwa mbere yawutsinzemo Kigali FC 2-0 mu gihe Marine FC yakinaga umukino wa gatandatu, yatsinzemo itatu, inganya ibiri itsindwa umwe, binayihesha kuba iri ku mwanya wa mbere ku rutonde rw’agateganyo n’amanota 11.

Abagenerwabikorwa b’ umushinga We Can Work Program, tariki 27 Ukwakira 2026, bahuriye mu gikorwa cyo guhuza urubyiruko rwafashijwe mu mwaka wa 2024 na 2025 bize imyuga itandukanye no mu bumenyi ngiro ndetse n’abandi bakora akazi gatandukanye. Bahuye kugira ngo basangire ubunararibonye, ndetse barusheho kumenyana, ndetse bamenye n’amahirwe ari hanze abategereje.

Bamwe mu bitabiriye ibyo biganiro batanze ubuhamya, bagaragaza urugendo banyuzemo rw’ubuzima bwabo, ndetse n’uko bakize ibikomere bari bafite mbere y’uko batangira gukorana n’umushinga We Can Work.

Ni Umushinga ufasha urubyiruko ruri hagati y’imyaka 18 na 35 rufite ubumuga. Abahurijwe hamwe kuri iyi nshuro ni abo muri Nyamasheke mu gice cy’icyaro n’abo muri Kigali mu Turere twa Gasabo, Nyarugenge na Kicukiro.

Nubwo mu buhamya bwabo bagaragaza ko bashoboye ndetse ko biteguye kugira uruhare mu iterambere ryabo n’iry’Igihugu, ndetse bakagaragaza n’ingero z’ibikorwa bagezeho n’ibyo bateganya, ngo baracyafite n’imbogamizi.

Muri izo mbogamizi harimo kuba abagerageza kwihangira imirimo bahita batangira gusoreshwa bizinesi zabo zikiri nto. Umwe muri bo yagize ati “Usanga umuntu afite igishoro cy’amafaranga macye, bikamugora guhita yinjira muri sisiteme y’imisoro kandi n’igishoro kikiri gito, rero bikamugora kwiteza imbere. Nk’uko Umukuru w’Igihugu akunda kuvuga ati ‘Rubyiruko mwihangire imirimo mwiteze imbere’, none ni gute tuzihangira imirimo tunasoreshwa ku munota wa mbere ntaho twari twagera?”

Urwo rubyiruko rufite ubumuga rwasabye Leta n’abandi bafatanyabikorwa ko barufasha bakareba niba hari uburyo baborohereza bakaba babashyiriraho igihe cyo kwemererwa gutangira bizinesi badasora, nyuma y’icyo gihe bakazatangira gusora kuko na bo bazi akamaro k’imisoro.

Indi mbogamizi ni iy’abakoresha batarumva ubushobozi bw’abantu bafite ubumuga. “Umwe muri bo ati “Hari abakoresha usanga bakireba abantu bafite ubumuga mu ndorerwamo y’ubumuga, akimubona agahita yumva ko adashoboye. Turasaba abakoresha batandukanye ndetse na Leta kujya duhabwa ayo mahirwe yo kumvwa mu gihe hari ipiganwa ry’amahirwe ku isoko ry’umurimo. Nibabanze bumve ubushobozi uriya muntu ufite ubumuga afite, ubundi bamwime akazi babona koko ko atabishoboye, ariko bimureba mu ntege nke zo kuba afite ubumuga.”

Mu zindi mbogamizi harimo kutabona igishoro gihagije, bigatuma batabasha kugera ku ntego z’ishoramari baba bashaka kugeraho. Basaba Leta n’abafatanyabikorwa kunganira inkunga baba bahawe na NUDOR.

Hari n’abakigorwa no kubona insimburangingo n’inyunganirangingo, bagasaba Leta ko ibyo bikoresho byashyirwa muri gahunda ya Mituweli ku buryo ubikeneye adafite ubushobozi buhagije bwo kubyigurira yabibona bitamuhenze kandi mu buryo butagoranye.

Bagaragaza ko no mu buyobozi bw’inzego za Leta n’izitari iza Leta abafite ubumuga barimo ari bacye kandi ko nyamara na bo bashoboye.

Mu rwego rwo gushakira ibisubizo izi mbogamizi, ihuriro ry’imiryango nyarwanda y’abantu bafite ubumuga (NUDOR), rivuga ko nk’uko mu biri mu nshingano zaryo, harimo ubushakashatsi ku kibazo gihari n’ubuvugizi, aho bareba imbogamizi ziterwa n’icyo kibazo, noneho bagakora ubuvugizi ku nzego zitandukanye.

Turyashemererwa Jacqueline, umukozi wa NUDOR mu mushinga witwa We Can Work Program, yagize ati “Ubu rero hari gukorwa ubuvugizi ku nzego zitandukanye, haba kuri Leta, mu baterankunga n’abafatanyabikorwa, kugira ngo na bo bumve ubushobozi bw’umuntu ufite ubumuga, iyo afashijwe neza mu gihe abikeneye. Niba ari insimburangingo nayibone, niba ari ubuvuzi bwiza cyangwa uburezi bwiza abubone, cyane ko tuzi ko uburezi bwiza ari urufunguzo rw’amahirwe yose no gutera imbere. Mu gihe rero afashijwe muri ibyo bintu byose haba mu bukungu, ubuvuzi, uburezi,… wa muntu azatera imbere. Gukora ubuvugizi ni urugendo tukirimo kandi tugikora. Turifuza ko umunsi umwe tuzabona sosiyete Nyarwanda idaheza, aho umuntu ufite ubumuga azahabwa amahirwe nk’ay’abandi, ku buryo mu ruhando rw’ibikorerwa mu gihugu byose by’iterambere, umuntu ufite ubumuga azaba abirimo.”

Umushinga We Can Work Program ushyirwa mu bikorwa na NUDOR uterwa inkunga na Light for the World ku bufatanye na Mastercard Foundation, ukorera mu bihugu birindwi ari byo u Rwanda, Uganda, Kenya, Ethiopia, Ghana, Nigeria na Senegal. Ni umushinga ugamije gufasha urubyiruko kubona umurimo unoze, ndetse ubahesha agaciro. Watangiye mu mwaka wa 2023 ukazarangira mu mwaka wa 2030.

Senateri Alfred Gasana yagize ati “Mwavuze ko abari mu magororero y’ibanze, abenshi ari ibibazo by’ubujura. Aha ndibaza nti ‘Ariko nta bantu ahubwo bakagombye kuba bajyanwa mu nkiko, mu bugenzacyaha, mu bushinjacyaha uyu munsi dusanga mu magororero y’ibanze nyamara barakoze ibyaga bihanwa n’amategeko’?”

Senateri Gasana yakomeje abaza Komisiyo y’Igihugu y’Uburenganzira bwa Muntu niba itaragiye ibona abantu nk’abo mu igenzura yakoze aho yagiye isura.

Perezida wa Komisiyo y’Igihugu y’Uburenganzira bwa Muntu, Providence Umurungi, na we yahamije ko muri ibyo bigo koko harimo abanyabyaha bakabaye bari mu nkiko.

Mu mvugo itsindagiye, Umurungi we ahubwo yagize ati “Ibyo muvuga ni byo kuko ni na bo benshi batuma zikomeza kugira ubucucike buri hejuru, hari abo usanga ari abanyabyaha pe, ba ruharwa! Bakanabikwibiwirira.”

Yakomeje avuga ko na Komisiyo y’Igihugu y’Uburenganzira bwa Muntu, na yo isaba ko umuntu ufite ibimenyetso bifatika bigaragaza ko ari umunyabyaha wese aba akwiye gutwarwa mu bugenzacyaha agakorerwa dosiye akajyanwa mu nkiko akaburanishwa.

Avuga ko, nubwo amagororero aba arimo umubare munini kandi bahanganye no kutarenza umubare wagenwe ugomba kubamo, hagomba kubaho inyandiko isabunura neza umuntu ugomba kuba mu magororero y’ibanze kuko “ubu umuntu wese, ugoganye n’itegeko, ugize ikindi kibazo, bose usanga batwara muri igororero ry’ibanze.”

Umurungi yabwiye Inteko Ishinga Amategeko ko bageze n’ubwo basaba ko Urwego rw’Igihugu rw’Ubugenzacyaha, RIB, rujya mu magororero rukicarayo rugakora amadosiye y’abarimo bose abo basanze ari abanyabyaha bakabatwara. Mu buryo bwuje amarangamutima ati “Bavanemo n’igihumbi basi!”

Umudepite mu Nteko ishinga amategeko yasabye Komisiyo y’Igihugu y’Uburenganzira bwa Muntu gukora ubushakashatsi ku cyaba gituma abagabo badasura abagore babo bafunze.

Mu gutanga raporo ya Komisiyo y’umwaka ushize, ni bwo depite Ngarambe yabajije icyo kibazo agira ati "Biterwa n’iki kuba abagabo badasura abagore babo bafunze? Ese byaba ari uko nta sentiment abagabo bagira?"

Umuyobozi wa Komisiyo yashubije agira ati "icyo kibazo natwe twarakibonye. Koko hari abafungiye mu magororero abiri yihariye ya Nyamagabe na Ngoma, ku buryo hari abakwitwaza ko bafungiye kure, ariko hari n’abari mu magororero yandi, nabo ntibasurwa. Ubwo rero niba cyana ari ikibazo cy’uko abagabo batagira sentiment, byasaba ubushakashatsi."

Ariko aha, Komisiyo yavuze ko hari n’abagore bafunganywe n’abana bato, kuko habuze imiryango yabo ibatahana.

Ngo n’imiryango iyo ibafashe ikajya kubitaho, umugore ufunze ntamenya amakuru y’uwo mwana.

Umuyobozi wa Komisiyo yavuze ko bazakora ubushakashatsi bakamenya igituma abo bagore badasurwa.

Dore indirimbo Abapolisi bato baririmbanye ibyishimo ubwo basozaga icyiciro cya 22 cy’amahugurwa mu Ishuri ry’Amahugurwa rya Polisi y’u Rwanda i Gishari, mu Karere ka Rwamagana.

Ibyishimo byari byose ku bapolisi bato basoje icyiciro cya 22 cy’amahugurwa mu Ishuri ry’Amahugurwa rya Polisi y’u Rwanda riherereye i Gishari, mu Karere ka Rwamagana, kuri uyu wa Gatatu, tariki ya 28 Ukwakira 2026. https://t.co/hhdITMbC8P

— Kigali Today (@kigalitoday) October 28, 2026

Polisi y’Abanyarwanda, twambariye u rugamba twambariye itabaro, ntidukangwa n’ibihe turi abakomando.

Polisi, Polisi, twararahiye, umutekano i Rwanda ugere hose, kurinda Abanyarwanda twararahiye, impande n’impande twarakaniye.

Ubundi n’iyo umusatsi washira ku mutwe, ugashiraho tukangana umusumari, ku butaka bw’u Rwanda hazahora amahoro, RNP ntiduteze kudohoka.

Polisi, Polisi, twararahiye, umutekano i Rwanda ugere hose, kurinda Abanyarwanda twararahiye, impande n’impande twarakaniye.

Guhera muri 2000 ntitwacitse intege, dukorana umuganda n’abaturage, gira inka Munyarwanda dufatanyeho, dukobokera u Rwanda rwamushyize ku isonga.

Polisi yo mu Rwanda ntiduteze kudohoka, oya oya, ntiduteze kudohoka, umutekano w’u Rwanda uri mu biganza byacu, oya oya ntiduteze kudohoka, gutanga ubutabera ni umwanzuro twafashe, oya oya ntiduteze kudohoka.

Polisi, Polisi, twararahiye, umutekano i Rwanda ugere hose, kurinda Abanyarwanda twararahiye, impande n’impande twarakaniye.

Komisiyo y’Igihugu y’Uburenganzira bwa muntu yagejeje ku nteko ishinga amategeko imitwe yombi raporo y’ibikorwa byayo by’umwaka urangiye.

Mu bibazo Komisiyo yabonye harimo icy’abagore bari mu magororero, aho bavuze ko imyenda bambara ibonerana, ku buryo ibagaragaza, bakumva ko batikwije.

Umuyobozi wa Komisiyo ati "Abagore basabye ko uyu mwanya wahindurwa kuko ubagragaza."

Uretse iki kibazo, muri rusange abari mu magororero bagaragaje ko iyi myambaro y’impuzankano yabo itaboneka ku buryo buhagije

Mu bindi bibazo, bagaragaje ko ubucucike mu magororero bwagabanutse muri rusange, ariko hamwe na hamwe, mu magororero atanu hakiri ubucucike, hakaba hari aho bugeze ku 130%.

Byavuzwe na Perezida wa Komisiyo y’Uburenganzira bwa Muntu, Providence Umurungi, kuri uyu wa 28 Ukwakira, ageza ku Nteko Ishinga Amategeko, imitwe yombi, raporo y’ibikorwa byayo by’umwaka ushize wa 2025-2026, anavuga ibikorwa iyi Komisiyo iteganya uyu mwaka.

Yagaragaje ko ubwo bakoraga ubugenzuzi basanze ubucucike mu magorero yo mu Rwanda bugeze ku 101%, ariko ko mbere y’uko bamurika iyi mibare bari bahawe amakuru ko kuri ubu ubucucike bugeze kuri 97%.

Umurungi ati “Ni ibintu byiza byo kwishimira kuko amagorero yacu atakakira abagororwa barenge ubushobozi bwayo bwo kubakira.”

Umurungi yagaragaje ariko ko nubwo ubucucike bugabanuka hakiri amagororero atanu agifite ubucucike burengeje 100%, arimo Rusizi ubu ifite ubucucike bwa 131%, Rubavu 125%, Rwamagana 110%, ndetse na Nyarugenge na Muhanga, na yo agifite ubucucike buri hejuru.

Cyakora, Umurungi yagaragaje ko kuba ubucucike bugenda bugabanuka bitavuze ko ibyaha bigabanuka kuko umwaka wa 2024-2025, abagororwa bari bafungiye mu magororero yo mu Rwanda babarirwaga mu bihumbi 60, ariko muri 2025-2026 ngo basanze bariyongereye bagera mu bihumbi 70.

Yagize ati "Nubwo tuvuga ngo ubucucike bwaragabanutse, ntibivuze ko ibyaha byagabanyutse ahubwo bamwe bagiye bafungurwa, haniyongeraho kuba amagororero agenda yagurwa."

Muri rusange, Komisiyo yakiriye ibirego 929 byasangaga 67 byari byararanyije umwaka wabanje. Bagaragaje ko Komisiyo yakurikiranye ibirego 1,009 hakemuka 850 bingana na 84% ibindi bakaba bakirimo kubikurikirana.

Gusa Komisiyo yagaragaje ko ibirego byiyongereye ku kigero cya 67% kuko muri 2024-2025 bari barakiriye ibirego 563.

Abadepite babaje Minisitiri w’Ubuhinzi n’Ubworozi icyo bari gukora kugira ngo amata ahagije yongere kuboneka, bahabwa igisubizo kigaragaza ko bishobora gutwara undi mwanya kugira ngo ibintu bisubire mu buryo.

Depite Mukabunani Christine ni we watangiranye n’iki kibazo ubwo Minisitiri Dr. Telesphore Nabamenye yatangaga ibisobanuro mu magambo ku bibazo biri mu buhinzi n’Ubworozi.

Yagize ati "Bigaragara ko amata yabuze, arahenze ariko byibuze nta n’ubwo ahari ngo abayakeneye bayabone. Ese harakorwa iki ngo amata yongere kuboneka ahagije?"

Mukabunani, yagiye inama y’uko bibaye na ngombwa hashyirwaho uburyo amata yajya arangurwa no mu bihugu by’abaturanyi biyafite, ariko ikibazo kigakemuka kuko amata ari ingenzi mu mirire nziza y’abato n’abakuru.

Minisitiri Ndabamenye, yashubije ko ikibazo cy’amata koko cyagaragaye cyane, kuko habayeho izuba rikomeye rikamara amezi ane, ubwatsi n’amazi bikabura.

Icyakora yagize ati "Twigiyemo amasomo menshi. Ubu twatangiye ubukangurambaga bwo gukangurira aborozi gutera ubwatsi, bakabikora muri iki gihe n’ubundi dutangira igihembwe cy’ihinga, kugira ngo ubwatsi buboneke buhagije."

Icyakora, Mukabunani ntiyanyuzwe n’iki gisubizo cyatanzwe mu nteruro imwe, kuko itari ihagije ugereranyije n’uburemere ikibazo gifite.

Ni yo mpamvu yongeye kugaruka ku ilisiti ya gatatu, maze abaza Minisitiri ati "Hagati yo gutera ubwatsi no kubugaburira inka kugira ngo zitange amata menshi, bizawara umwanya. Hagati aho bizagenda bite, amata azaboneka gute, ntabwo mwashyiraho uburyo yajya atumizwa mu karere batahuye n’ibibazo nk’ibyo twahuye na byo?"

Kuri iki ngiki icyakora, Minisitiri Ndabamenye, yavuze ko mu karere naho bafite ikibazo cy’amata, na bo izuba rikomeye ryabagezeho.

Joseph Kabila wahoze ari Perezida wa Congo, yabwiye abanyamakuru mu kiganiro kihariye, ko igihano cy’urupfu yahawe ari uburyo bw’iterabwoba abanyagitugu bashyira ku bantu ngo bahahamuke, ariko ntacyo cyamukoraho.

Kabila uherutse kujya ku ruhembe rw’abarwanya Leta ya Congo bitwa FRN yahoze ari M23, yavuze ko "umuntu uguha igihano cy’urupfu ubwo aba yishyize mu gatebo kamwe n’uwo agihaye, mbese ibyo ashatse kumukorera na we bikamugeraho."

Ikindi, yagize ati "ibi ni ibintu by’iterabwoba ry’abanyagitugu. Niba mwarakurikiye mu mateka, Idi Amin Dada yarabikoreshaga, muri Repubulika ya Santarafurika na we umunyagitugu yarabikoresheje, Guinee Equatoriale na yo yabinyuzemo, n’abandi. Gusa ubutegetsi nk’ubu ntiburamba."

Yongeyeho ati "Kwica itegeko nshinga, kwitwaza ko watowe ukigira umunyagitugu, ntabwo byashoboka. Ni byo tugomba guhagarika ubundi tukareba imbere."

Joseph Kabila wahoze ari Perezida wa Repubulika Iharanira Demokarasi ya Congo (RDC), yahakanye ko umutwe wa FRN ayoboye ufite umugambi wo gucamo igihugu ibice, avuga ko hakenewe imiyoborere idaheza n’ibiganiro ku buryo ubutegetsi bwakwegerezwa abaturage, harimo no gusuzuma federalism.

Mu kiganiro yagiranye n’abanyamakuru ba Conspiracy Tracker Great Lakes, cyasohotse muri iki gitondo, Kabila yavuze ko ibirego bya Kinshasa bivuga ko FRN ikorana n’u Rwanda kandi igamije gucamo igihugu ibice bitagaragaza intego y’uwo mutwe.

Yavuze ko ibendera ryari inyuma ye mu gihe cy’ikiganiro cyabaga ari irya RDC yose, atari iry’akarere runaka, ashimangira ko nta mugambi wo gusenya ubumwe bw’igihugu aharanira.

Yagize ati “Iki kibazo cyo gucamo igihugu ibice kimaze imyaka 30 cyangwa 40 kivugwa, ariko ntibyabaye. Sintekereza ko bizabaho kuko nta muntu ufite umugambi wo gucamo igihugu ibice.”

Kabila yavuze ko aho gukoresha ijambo balkanization, yakoresheje Sudanization, asobanura ko ari ryo abona rishobora kuba rijyanye n’ibibazo biri muri RDC. Gusa, ntiyasobanuye birambuye icyo iryo jambo risobanuye mu rwego rw’ibisubizo bya politiki.

Imiyoborere mibi itera amakimbirane

Kabila yavuze ko amateka ya RDC agaragaza ko iyo ubutegetsi butubahirije Itegeko Nshinga kandi bugakandamiza abaturage, havuka ababurwanya.

Yatanze ingero z’imitwe yagiye irwanya ubutegetsi kuva mu myaka ya 1960, avuga ko ibibazo by’igihugu bitakemurwa no kwibasira abatavuga rumwe n’ubutegetsi, ahubwo ko hakenewe ibiganiro byita ku bibazo by’Abanyekongo.

Yavuze ko igihugu gikeneye ubuyobozi buboneye, burimo abantu batandukanye kandi bushobora gukorana n’ibihugu bituranye kugira ngo akarere k’Ibiyaga Bigari kagire amahoro n’umutekano.

Ati “Icyo Congo ikeneye ni imiyoborere iboneye kandi idaheza, ndetse n’uburyo buhamye bwo kuyobora igihugu, ibintu bitariho muri iki gihe.”

Yongeyeho ko ibiganiro bikwiye kureba uko RDC yarushaho kubana neza n’ibihugu biyikikije, uko imipaka yarindwa n’uko ibibazo by’umutekano byakemurwa ku bufatanye.

Federalism yakwegereza ubutegetsi abaturage

Ku bijyanye n’uburyo RDC ikwiye kuyoborwamo, Kabila yavuze ko hakwiye gukomeza ibiganiro ku kuba igihugu cyagendera kuri federalism cyangwa kigakomeza gukoresha uburyo ubutegetsi bwinshi bukorera i Kinshasa.

Federalism ni uburyo igihugu kiyoborwamo aho ubutegetsi bugabanywa hagati ya Guverinoma nkuru n’ubuyobozi bw’ibice bigize igihugu, buri rwego rukagira inshingano n’ububasha biteganywa n’Itegeko Nshinga.

Kabila yavuze ko impaka kuri ubu buryo bw’imiyoborere zimaze imyaka myinshi, kandi ko Itegeko Nshinga rya RDC ryagerageje guhuza ibitekerezo by’abashaka ko ubutegetsi bwegerezwa intara n’abifuza ko bukomeza gukorera ku rwego rw’igihugu.

Yagaragaje ko intara zisanzwe zifite ba guverineri batowe, inteko z’intara n’ingengo y’imari, ariko ko iyi gahunda itaranozwa bihagije.

Yakomeje agira ati “Ntekereza ko ijambo rimwe ribura mu buryo bw’imiyoborere dufite ari federalism. Urishyizemo, wagira igihugu kigendera kuri federalism.”

Yavuze ko intego ari ukugira ngo abaturage barusheho kugira uruhare mu bibakorerwa, kandi ibibazo byabo bikemurwe n’inzego zibegereye aho guhora bategereje ibyemezo biva i Kinshasa.

Gusa, Kabila ntiyavuze ko federalism ari yo nzira yonyine RDC ikwiye guhitamo. Yasabye ko Abanyekongo bakomeza kuganira ku buryo bwanoza imiyoborere iriho cyangwa bagahitamo ubundi buryo bwatuma ubuyobozi burushaho kwegera abaturage.

Joseph Kabila, wahoze ari Perezida wa Repubulika Iharanira Demokarasi ya Congo (RDC), yavuze ko yemera ko igitero cy’indege zitagira abapilote cyagabwe mu mujyi wa Goma cyari kigamije kumwica, anenga uburyo ubutegetsi bw’i Kinshasa bushaka ko ibiganiro by’igihugu bikorwa.

Kabila, uherutse gushyiraho umutwe wa Front pour la Refondation de la Nation (FRN), ibi yabigarutseho mu kiganiro cyihariye yagiranye na CTGL (Conspiracy Tracker Great Lakes). Ni ikiganiro cyakozwe n’Umushakashatsi akaba n’Umwanditsi, Dr. Bojana Coulibaly n’Umunyamakuru Teddy Mazina.

Muri icyo kiganiro Kabila yabajijwe ku gitero cyabaye mu gihe hari agahenge kari kagamije guhagarika imirwano, avuga ko muri iyo minsi yumvaga ko we n’abandi bari i Goma bafite umutekano.

Yagize ati: “Muri ako gahenge ni bwo natekerezaga ko dufite umutekano muri uyu Mujyi. Hanyuma haza indege itagira umupilote, kandi igitekerezo cyari ukutwica twese.”

Abajijwe niba ashingira ku makuru afite akemeza ko icyo gitero cyari kigamije kumwica, Kabila yavuze ko abyizeye cyane. Yavuze ko amakuru bahawe nyuma y’igitero yavugaga ko hari abantu i Kinshasa barimo bishimira ibyo bari bakoze baziko bageze ku ntego zabo

Yakomeje agira ati: "Nabajije impamvu abantu bari kwishimira ibyabaye saa cyenda z’ijoro ndetse n’ahagana saa tatu za mu gitondo, bishimangira ko njye n’abo twari kumwe ari twe bari bagambiriye."

Kabila kandi yavuze ko indege zitagira abapilote zagiye zigaba ibitero byahitanye abantu muri Masisi, anavuga ko ibikorwa nk’ibyo bikomeje guhitana abantu muri Minembwe no muri Kivu y’Amajyepfo.

KABILA KU BIGANIRO BYA DOHA N’IBY’IGIHUGU

Ku bijyanye n’ibiganiro bya Doha bigamije gushaka umuti w’amakimbirane yo mu burasirazuba bwa RDC, Kabila yavuze ko umutwe avuga ko uhagarariye, FRN, ubibona nk’imwe mu nzira zishobora gukoreshwa mu gushaka amahoro, ariko atari yo yonyine.

Yagize ati: “Twemera ko inzira ya Doha ari imwe mu nzira zishoboka, mu zindi nzira zishobora gukoreshwa.”

Yagaragaje ko hakenewe kureba ubundi buryo bwafasha gukemura amakimbirane no kugera ku mahoro arambye muri Repubulika Iharanira Demukarasi ya Congo anashimangira ko ibiganiro bireba Abanyagihugi bigomba kuba bikubiyemo impande zose.

Kabila yavuze kandi ko mbere yo kubyita ibiganiro by’Igihugu, hakwiye kubanza kumvikana ku miterere yabyo n’abo bigomba guhuza.

Yagize ati: Ibiganiro nyakuri bigomba guhuza impande zose zifite uruhare rukomeye mu bibazo by’igihugu, cyangwa nibura izifite uruhare rukomeye mu bibazo biganirwaho. Bigomba kuba bidafite aho bibogamiye, kandi bikayoborwa mu bwisanzure."

Kabila yavuze ko hakenewe kandi urwego ruyobora ibyo biganiro n’abagomba kwishingira guharanira ko imyanzuro izabivamo ishyirwa mu bikorwa nubwo bitarakorwa. Yagize ati: “Twemera ko ibyo byose bikenewe bitarashyirwaho.”

Yashinje Perezida uriho Félix Tshisekedi, i Kinshasa gushaka gutegura ibiganiro bye bwite, aho guhuza impande zitandukanye ngo zishakire hamwe ibisubizo by’ibibazo igihugu gifite.

Kabila yavuze ko ibiganiro nk’ibyo bidashobora gufatwa nk’ibiganiro nyakuri, ahubwo ko abona ari uburyo bwo kuvuga uruhande rwe no gushyira abandi ku ruhande.

Yongeye kunenga ubutegetsi bwa Kinshasa, abushinja gushyira imbere kugundira ubutegetsi, guhindura Itegeko Nshinga no guteza akajagari muri politiki.

AMAKIMBIRANE AKENEYE UMUTI WA POLITIKI

Joseph Kabila agaragaza ko hari ibyo atemera ku buryo bwo gukemura amakimbirane yo muri RDC, cyane cyane ku ruhare rw’ibiganiro bya Doha n’uko ibiganiro by’igihugu byakorwa.

Mu gihe igihugu gikomeje guhura n’ibibazo by’umutekano, cyane cyane mu burasirazuba, ikibazo cy’uko impande zitandukanye zahuzwa n’uko imyanzuro y’ibiganiro yashyirwa mu bikorwa gikomeje kuba ingingo ikomeye mu gushaka amahoro arambye.

Joseph Kabila, yanenze kandi uburyo urubuga rwa politiki muri Repubulika Iharanira Demukarasi ya Congo rufunze, avuga ko abaturage badakwiye gusigara badafite ubundi buryo bwo gukemura ibibazo by’igihugu uretse intambara.

Mu magambo ye, Kabila yagize ati: “Iyo mufunze urubuga rwa politiki, kandi igisubizo cyonyine Kinshasa itanga ari ukurwana kugeza ku muntu wa nyuma, ni ayahe mahitamo muba musigiye Abanye-Congo?”

Yakomeje agira ati: “Ese baba bagomba kwicara bagategereza, bakemera gufatwa nk’abacakara?”

Abadepite basabye Minisitiri w’Ubuhinzi n’Ubworozi Dr Telesphore Ndabamenye kubabwira gahunda ihari mu rwego rwo kurinda ko hakomeza kubaho kwangirika k’umusaruro w’ubuhinzi.

Muri ibi bibazo, harimo nk’ibitunguru bijya bipfira mu mirima kuko byeze bikabura aho bigurishwa.

Icyo kibazo cy’umusaruro w’ibitunguru wangirika cyagarutsweho na Depite Christine Mukabunani.

Depite Nizeyimana Pie yagize ati,” Turacyabona umusaruro w’ubuhinzi wangirika. Birababaza cyane kubona umuhinzi avunika ngo yeze umusaruro mwinshi, hatari uburyo bwiza bwo kuwubika,bikarangira upfa ubusa. Urugero ibitunguru bikunda kwera za Nyabihu, Muhanga n’ahandi,hari igihe beza ibitunguru byinshi bigapfira mu mirima byabuze amasoko. Ese guhunika uyu musaruro bigeze he,imbogamizi zihari ni izihe?ingamba zihari ni izihe, ku buryo tutazongera gupfusha ubusa umusaruro kandi mu gihe gito twongera tukawukenera ndetse tukawutumiza mu mahanga”.

Ikibazo cy’umusaruro w’ibitunguru wangirika cyanagarutsweho na Depite Christine Mukabunani wabajije icyo abaturage bo muri Rubavu bafashijwe nyuma yo guhura n’igihombo bitewe n’uko batumije imishini yumisha ibitunguru mu rwego rwo kubibika neza, hanyuma bakazanirwa imashini ibitogosa bikababyarira igihombo kinini.

Yagize ati,” Hari ikibazo twagejejweho n’abaturage bo muri Rubavu, bavugaga imashini yagombaga gutunganya ibitunguru, kubyumisha, aho kugira ngo babazanire imashini, bakazana ibitogosa, nagira ngo mbaze uko byagenze, ese byarakemutse?Igihombo cy’abaturage Leta yagikozeho iki?”

Asubiza ibyo bibazo, Minisitiri w’Ubuhinzi n’Ubworozi yavuze ko hari gahunda yo kubaka ibikorwaremezo bizafasha mu kumisha no kubika neza uwo musururo wajyaga upfa ubusa.

Yagize ati,” Twajyaga tugira izi ngorane, wa mugani,abantu bakeza ibitunguru bakabura isoko, cyangwa bakabura n’uko babyitaho,dufite umushinga wo kubaka ibikorwaremezo,ariko hari na ‘centre’ iri I Gikondo iri hafi kuzura,izaba irimo imashini zumisha, ariko nibura hari ibyakozwe mu turere. Uturere twa Nyagatare,Bugesera, Rulindo na Rubavu, turiya ni uturere dufite ubutaka bweramo ibitunguru, rero muri utwo turere hazubakwa amakusanyirizo, ariko no ku rwego rw’igihugu, niba dushaka kubyohereza hanze no kubibika mu buryo burambye iyo gahunda nayo irahari. Iyo centre igeze kure iri hafi kuzura, icyo turimo gushaka ni abashoramari bagomba kuyikoresha”.

Asubiza iby’iyo mashini yateje igihombo abaturage b’i Rubavu, Minisitiri yagize ati, “ Rwiyemezamirimo mu byo atanga muri serivisi, akazanira abantu ibidafite ubuzirange,bagakurikirana, bakamurega,iyi dosiye nirangira tuzababwira uko bimeze kuko iracyari mu butabera”.

Uwacu Julienne wari Umunyamabanga Nshingwabikorwa wa Unity Club Intwararumuri yagizwe Minisitiri w’Abakozi ba Leta n’Umurimo akaba asimbuye Judith Uwizeye.

Ku mwanya yariho, Uwacu Julienne wigeze no kuba Minisitiri wa Siporo yasimbuwe na Edouard Bamporiki, washyizwe muri uyu mwanya bimaze kuganirwaho.

Uwacu Julienne

Itangazo rya Minisitiri w’Intebe ryatanzwe mu mwanya wa Perezida wa Repubulika rigira riti "Nyuma yo kubyumvikanaho na Unity Club Intwararumuri, bwana Bamporiki Edouard yagizwe Umunyamabanga Nshingwabikorwa wa Unity Club Intwararumuri."

Hagati aho, Uwizeye Judith yagizwe umusenateri.

Dushime Noella, umuyobozi mushya wa Irembo

Mu bandi bashyizwe mu myanya, Madamu Dushime Noella yagizwe Umuyobozi Mukuru w’Irembo, aho yasimbuye Israel Bimpe wari umaze igihe ayobora iki kigo gikomeye mu kwinjiza gahunda za Leta mu ikoranabuhanga.

Dushime yungirijwe na Bwana Ngabe Rutagarama.

Amb. Diane Gashumba

Hagati aho, Ambasaderi Diane Gashumba yagizwe Ambasaderi mu bwami bwa Hispaniya, aho asimbuye Christine Nkulikiyinka washyizweho ubwo iyi ambasade yatangizwaga mu mezi macye ashize.

Uwamariya Valentine wari Senateri yagizwe Ambasaderi w’u Rwanda muri Suwede, mu gihe Haguma Juan yagizwe Umunyamabanga Uhoraho muri Minisiteri y’Ububanyi n’Amahanga.

Nelson Mbarushimana

Hashyizweho kandi Ikigo cy’Igihugu gishinzwe itorero n’umuco kiyobowe na Nelson Mbarushimana.

Umuyobozi Mukuru w’Ikigo cy’Igihugu cy’Amaposita ni bwana Zigira Alphonse.

Depite Nizeyimana Pie yabwiye Minisitiri w’Ubuhinzi n’Ubworozi ko ubuhinzi bw’ibisheke bikorwamo isukari bukwiye guhagarara, igishanga cya Nyabarongo kigahingwamo ibindi bitanga umusaruro.

Piyo yabisabye ubwo Minisitiri w’Ubuhinzi n’Ubworozi Dr Telesphore Ndabamenye yatangaga ibisubizo mu magambo ku bibazo byagaragaye mu ngendo rusange zakozwe n’Abadepite mu mu gusura ibikorwa byo kongera umusaruro w’ubuhinzi.

Yagaragaje ko iki gishanga cya Nyabarongo, cyahingwamo ibihingwa bitanga umusaruro, igihugu kikemera kikagura isukari iturutse hanze, niba ibisheke bihari bidashobora kuvamo isukari ihagije.

Yagize ati, “igishanga cya Nyabarongo gihinzemo ibisheke turabibona,nagira ngo mbaze biriya bisheke bitanga isukari ingana gute cyangwa se ingana na kangahe ku ijana ugereranyije n’isukari dukeneye mu Rwanda? Impamvu mbaza kino kibazo, nagira ngo numve, kuko iramutse ari nkeya, ko hazatekerezwa uburyo icyo gishanga cyahingwamo ibindi bihingwa nk’imboga, umuceri, imbuto, byakongera, cyangwa se byatanga umusaruro mwinshi ku Banyarwanda tukihaza mu biribwa ndetse tugasagurura n’amasoko, aho kugira ngo tube twahingamo ibisheke bidatanga umusaruro ugaragara, ugereranyije n’isukari dukenera mu Rwanda”.

Minisitiri w’Ubuhinzi n’Ubworozi, yavuze ko icyo ari ikibazo kigaragara kandi kirimo gushakirwa umuti binyuze cyane cyane mu gushaka abashoramari bashora mu bijyanye no gutunganya isukari, kuko kugeza ubu, isukari itunganyirizwa mu Rwanda, itagera no ku 10% y’isukari yose ikenerwa mu gihugu.

Yagize ati, “ …hari igice cy’igishanga mwavuze gihingwaho ibisheke,isukari ni ikinyobwa cyangwa se ni ikintu tugitumiza hanze ndetse mu by’ukuri twifuza ko hakagombye kuboneka n’abashoramari baza kugira ngo twongere isukari, bityo tugabanye iyo tuvana hanze. Hari abo twagiye tuganira, bashobora gukora mu Ntara y’u Burasirazuba, ahantu hamwe na hamwe ubona haberanye n’ibisheke, ariko ntabwo ibiganiro byarangiye, turacyakomeje gushaka abandi, kugira ngo tugabanye, ingano y’iyo dutumiza”.

“Ngira ngo dushobora kuba tutabona na 10% y’isukari tunywa. Ariko ni ikibazo gihari nacyo kizwi n’inzego, ku buryo mu byo dukora harimo no kuzamura umusaruro. Ariko wabikomojeho, ikindi gice cy’icyo gishanga, kigiye gutunganywa mu rwego rw’ubuhinzi. Hari igice gifite hegitari 26.000 kizakoreshwa mu mirimo y’ubuhinzi. Ariko ikibazo cy’isukari ni byo rwose, turashaka gushishikariza abandi bashoramari ngo baze nibura tugabanye iyo dutumiza. Wenda ntitwakwihaza 100%,ariko nibura tukongera ingano y’isukari dutunganya hano mu gihugu”.

Minisitiri w’Ubuhinzi n’Ubworozi, Dr Telesphore Ndabamenye, yabivugiye mu Nteko Ishinga Amategeko ku wa 27 Ukwakira 2026, ubwo yasubizaga ibibazo by’abadepite ku mbogamizi zikibangamiye izamuka ry’umusaruro w’ubuhinzi, bashingiye ku byo babonye mu ngendo bakoreye mu baturage muri Kamena.

Depite Pie Nizeyimana yagaragaje ko ibiciro by’ibiribwa bikomeje kuzamuka, avuga ko abaturage bashobora kugira uruhare mu kongera ibiribwa biboneka mu ngo zabo bahindura uburyo bakoresha ubusitani bwabo, aho gutera ibiti n’ibyatsi bigenewe gusa kurimbisha.

Yabajije Minisiteri y’Ubuhinzi n’Ubworozi aho ubukangurambaga bwo guhinga mu ngo bugeze n’umusaruro bumaze gutanga.

Yagize ati “Minagri imaze iminsi idushishikariza guhinga mu ngo zacu, aho kugira ngo duhinge ibiti n’ibyatsi by’imitako bitaribwa twabisimbuza ibiti by’imbuto n’imboga. Ndashaka kubaza aho ubwo bukangurambaga bugeze n’umusaruro birimo gutanga.”

Yavuze ko guhinga mu ngo bishobora kuba imwe mu ngamba zunganira izindi mu guhangana n’izamuka ry’ibiciro by’ibiribwa no kongera ubushobozi bw’ingo bwo kwihaza mu biribwa.

Depite Jennifer Wibabara na we yagarutse ku mahirwe ari mu buhinzi bukorerwa mu mijyi, agaragaza ko igishushanyo mbonera cy’imikoreshereze y’ubutaka mu Mujyi wa Kigali kigena ko 20% by’ubutaka bwawo byagenewe ubuhinzi.

Yasabye Minisiteri y’Ubuhinzi n’Ubworozi gusobanura uko ishishikariza abaturage kubyaza umusaruro ubwo butaka, anabaza aho u Rwanda rugeze mu gukoresha uburyo bw’ikoranabuhanga mu buhinzi bwo mu mijyi, burimo guhinga hakoreshejwe amazi aho gukoresha ubutaka, bizwi nka hydroponics.

Mu kumusubiza, Minisitiri Ndabamenye yavuze ko ubukangurambaga bwo guhinga mu ngo bukomeje, ariko ko hakenewe kunoza uburyo ubutaka buhari bukoreshwa, cyane cyane mu mijyi.

Yagize ati “Guhinga mu ngo ni gahunda nziza, ariko dushaka kunoza. Hari ibiti hari n’imboga, ni ubukangurambaga tugomba gukomeza kugira ngo ubutaka dufite butabyazwa umusaruro bube bwajyamo ibiti by’imbuto n’imboga, cyane cyane mu mijyi, kuko hari ubutaka bwinshi butabyazwa umusaruro.”

Yongeyeho ko mu gihe cyo gutera ibiti cyegereje, Minisiteri irimo gukangurira abaturage gutera ibiti by’imbuto mu ngo zabo no ku mihanda.

Ubusitani bushobora kurimbisha no gutanga ibiribwa

Mu busitani bwinshi bwo mu ngo zo mu Rwanda, usanga hatewe ibyatsi by’imitako bikatwa kugira ngo bigire isura nziza, indabo n’ibiti bitandukanye bitera igicucu cyangwa bigamije kurimbisha gusa.

Icyakora, ubwo busitani bushobora no kubyazwa umusaruro haterwamo ibiti by’imbuto birimo amacunga, amadereni, indimu, amapapayi, avoka n’imyembe, bikarushaho gufasha ingo kubona imbuto no kugabanya izo zigurwa ku masoko.

N’imboga zishobora guhingwa mu busitani, mu turima tw’igikoni, mu mifuka cyangwa ku nkuta z’uruzitiro hakoreshejwe uburyo buboneye. Amashu, dodo na epinari, iyo biteye ku murongo kandi byitabwaho, na byo bishobora gutanga isura nziza mu rugo, ari na ko byongera ibiribwa bihari.

Guhindura ubusitani bukaba isoko y’imbuto n’imboga bishobora kuba bumwe mu buryo bwo gukoresha neza ubutaka bwo mu ngo, nubwo umusaruro wabyo uzaterwa n’ubutaka buhari, uburyo bwo kubitaho n’amahitamo y’ibimera bikwiranye n’aho buri rugo ruherereye.

Kuri uyu wa Kane tariki 22 Ukwakira 2026, Urwego rw’Umuvunyi rwashyirikije inteko ishinga amategeko, raporo ikubiyemo ibyo urwo rwego rwakoze muri uyu mwaka wa 2026 ndetse n’ibikorwa biteganyijwe mu mwaka utaha wa 2027.

Mu byo Umuvunyi Mukuru Nirere Madeleine, yavuze byinshi urwo rwego rwakoze harimo kwakira no gukemura ibibazo biganjemo amakimbirane ashingiye ku mitungo cyane cyane ubutaka, uburiganya, ruswa n’ibibazo bijyanye n’umurimo ndetse n’ibijyana n’akarengane…

Yavuze ko zimwe mu nshingano urwego rw’umuvunyi ruhabwa n’itegeko, harimo gusaba ko imanza ku mpamvu z’akarengane, muri uyu mwaka wa 2026, urwego rw’umuvunyi rukaba rwarakiriye ibibazo cyangwa se amadosiye 423, yasaba gusubirishamo imanza kuko banyirayo babonaga ko uburyo imanza zabo zakijijwe harimo akarengane.

Umuvunyi mukuru yagize ati, “ Muri ayo madosiye 423 yasabaga gusubirishamo imanza ku mpamvu z’akarengane, twasanze, 399 muri yo, nta karengane kari karimo. Twasanze dosiye 11 zirimo akarengane, zishyikirizwa Urukiko rw’Ikirenga,hanyuma ibibazo byari mu zindi dosiye 13, bikemurwa hisunzwe ubuhuza.Akenshi iyo urebye izi manza,cyangwa amadosiye twakira, ajyanye n’imanza z’imbonezamubano,hagakurikiraho iz’inshinjabyaha,umurimo, ubucuruzi, ubutegetsi”.

Yasobanuye ko izo manza z’imbonezamubano ziba ziganjemo iz’ubutaka, amasezerano atubahirizwa,izungura,uburengere n’ibindi. Ibyo ngo biba byaraciye mu manza, bikarangiza inzira zose z’inkiko, zarangiza zikaza ku rwego rw’Umuvunyi mu buryo budasanzwe bwo gusubirishamo imanza ku mpamvu z’akarengane.

Yagize ati, “ Ubwo buryo bwo gusubirishamo ku mpamvu z’akarengane, ni bwashyizweho n’igihugu, ni uburyo budasanzwe buba mu gihugu cyacu gusa, aho urwego rw’imiyoborere y’igihugu rushobora gusaba Urukiko rw’Ikirenga gusubiramo imanza kuko habonetsemo akarengane”.

Nyuma yo kubona ko hari izo dosiye ziza ari nyinshi ku Rwego rw’Umuvunyi zisaba gusubirishamo imanza ku mpamvu z’akarengane, nyamara zamara gusuzumwa bikagaragara ko inyinshi nta karengane kaba karimo nk’uko bigaragara mu mibare, yavuze ko hakenewe gukorwa ubukangurambaga kuri iyo ngingo.

Yagize ati” Navuga ko hano igikenewe cyane cyane ari ubukangurambaga, hakajya hakoreshwa cyane cyane uburyo bw’ubwumvikane mu kurangiza ibibazo,kugira ngo abantu bagabanye ibibazo mu nkiko, ariko no kugira ngo muri sosiyete Nyarwanda habe ubwumvikane, umushyikirano,kuko abantu benshi bagiye mu nkiko, akenshi ntabwo bakundana.Ibibazo rero iyo bicyemutse kare biba ari byiza. Ikindi twabonye ni uko abantu bashobora kuba bagiye mu manza bikagorana, ariko byajya mu buhuza bigakunda. Nk’izo dosiye 13 twakoreye ubuhuza bigakunda, ni abantu bananiwe kumvikana k’ukurangiza urubanza”.

"Ikibazo abantu bakwiye kwibaza kigira kiti: mu by’ukuri se Congo ikeneye amatora, cyangwa impinduramatwara"?

Uyu ni umusogongero w’ikiganiro Teddy Mazina na Coulibary Bojana bagiranye na Joseph Kabila, kikaba ari icya mbere ahaye abanyamakuru kuva yagera ku buyobozi bwa FRN, yahoze ari AFC/M23.

Aha kandi yagaragaje ko Ubutegetsi bw’uwamusimbuye, Felix Tshisekedi ari uri guhamagara iyi mpinduramatwara, kuko nta yandi mahitamo yasigiye Abanyekongo.

Yagize ati "Niba uhisemo gufunga urubuga rwo kwisanzura muri politiki, ndetse, nk’uko Kinshasa ibigenza, ugahitamo kurwana kugeza ku wanyuma, ese ubwo hari andi mahitamo uba usigiye Abanye Congo? Ni ukwicara bakaba abacakara mu Gihugu nka Congo? Ntabwo ushobora kuba umunyagitungu, ntidushaka abanyagitugu."

Yongeyeho kandi ko ibyo igihugu cyungutse mu myaka ikabakaba makumyabiri y’ubutegetsi bwe, byasenywe mu myaka umunani y’ubutegetsi bwa Tshisekedi.

Aha kandi, Kabira yavuze ko iyo Leta inaniwe, igihugu kibura umurongo w’imiyoborere, kigahinduka akavuyo.

Yongeyeho ati "Amasezerano yose wasinya, n’iyo yaba amasezerano y’amahoro, iyo habuze ubushake bwa politiki, byose biba imfabusa."

Abagore bangana na 45,5% by’abakandida 1.220 ni bo bari ku rutonde rw’agateganyo rw’abemerewe kwiyamamaza mu matora y’Inama Njyanama z’Uturere yo mu 2026. Abagabo ni 54,5%, nk’uko bigaragazwa n’isesengura ry’urutonde rwa Komisiyo y’Igihugu y’Amatora.

Muri rusange, abagore ni 555 mu gihe abagabo ari 665, bivuze ko abagabo barusha abagore ho abakandida 110. Iyi mibare igaragaza ko abagore bari hafi kimwe cya kabiri cy’abakandida bose.

Mu Ntara enye zigaragara ku rutonde, Amajyepfo aza ku isonga n’abakandida 355 bifuza kujya muri Njyanama z’uturere, igakurikirwa n’Iburasirazuba ifite 334. Iburengerazuba bufite 279, mu gihe mu Majyaruguru abarimo guhatanira kujya muri Njyanama bangana na 252.

Amajyepfo ni yo yegereye cyane uburinganire mu mubare w’abakandida, kuko ifite abagore 176 n’abagabo 179. Mu Burasirazuba, abagore ni 151, abagabo 183; mu Majyaruguru abagore ni 114, abagabo 138. Iburengerazuba ni yo ifite icyuho kinini kurusha izindi, kuko abagabo 165 barusha abagore 114.

Huye ni yo ifite abagore benshi ugereranyije n’abakandida bose

Mu turere tugaragara ku rutonde, Rwamagana ni yo ifite abakandida benshi, bangana na 62. Bugesera na Huye bikurikiraho, buri karere gafite 58, mu gihe Gakenke na Gicumbi buri kamwe gafite abakandida 56. Ruhango yo ifite 53.

Rusizi ni yo ifite abakandida bake, 26, ikurikirwa na Nyanza ifite 31, Rubavu ifite 35 na Nyagatare ifite 36.

Iyo harebwe umubare w’abagore ugereranyije n’abakandida bose bo mu karere, Huye iza ku isonga. Ifite abagore 36 mu bakandida 58, bangana na 62,1%, bakaba barusha abagabo ho 14. Gisagara ifite abagore 29 mu bakandida 55, naho Musanze ikagira 24 mu bakandida 49.

Hari n’uturere aho umubare w’abagore ukiri hasi cyane ugereranyije n’uw’abagabo. Muri Nyamasheke, abagore ni 14 mu bakandida 39; muri Ngororero ni 14 mu bakandida 46, naho muri Rusizi bakaba 11 mu bakandida 26.

Iyi mibare igaragaza ko uruhare rw’abagore mu guhatanira imyanya mu Nama Njyanama rutandukanye bitewe n’akarere. Icyakora, kuba abagore ari benshi cyangwa bake mu bakandida ntibihita bisobanura uko bazahagararirwa mu Nama Njyanama zizatorwa. Ibyo bizasobanuka neza hamaze kumenyekana ibyavuye mu matora n’abazabona imyanya.

BPR Bank Rwanda Plc yatangaje impinduka mu buyobozi bwayo, aho Umuyobozi Mukuru, Patience Mutesi, azava kuri izi nshingano ku wa 31 Ukwakira 2026.

Mutesi yari amaze imyaka ine ayobora iyi banki, muri iki gihe ifite umutungo wa miliyari 1491 Frw.

Amakuru y’uko agiye kuva ku buyobozi akubiye mu itangazo ryo ku wa 23 Ukwakira 2026 ryashyizweho umukono n’Umuyobozi Mukuru wa KCB Group, Paul Russo.

Tariki ya 1 Ugushyingo, Mutesi azasimburwa by’agateganyo na Xavier Mugisha Shema usanzwe ari Umuyobozi Nshingwabikorwa ushinzwe ibijyanye n’ubucuruzi.

Mu itangazo ryayo, banki ntiyatanze ibisobanuro birambuye, ahubwo yavuze ko Mutesi ayisezeye kugira ngo “akurikire izindi nyungu n’ibindi bikorwa ashaka kwitaho.”

Inama y’Ubutegetsi n’ubuyobozi bw’iyo banki bavuze ko “bababajwe n’icyemezo yafashe, ariko bakacyubaha, kandi bakamushimira byimazeyo ku buyobozi bwe n’umurava yagaragaje mu kazi” kuva yatangira kuyiyobora muri Gashyantare 2023.

Muri weekend itambutse, igitaramo cyiswe “Praise Unlimited” cyahurije hamwe abaririmbyi b’indirimbo zo kuramya no guhimbaza Imana baturutse mu bihugu bitandukanye bya Afurika.

Abayobozi ba Halal Afrika yateguy iki gitaramo, bavuze ko kigamije gushyiraho urubuga ruhuza Afurika n’umuco wayo, kigahuza abahanzi batandukanye mu kuramya no guhimbaza Imana, amakorali n’abizera bo mu bihugu bitandukanye by’uyu mugabane.

Iki igitaramo Praise Unlimited kitabiriwe n’Abahanzi bamenyerewe hano mu Rwanda na Afrika barimo Israel Mbonyi, amatsinda agizwe na Ben na Chance, True Promises, Rene na Tracy, na TNT Band.

Ku bahanzi bo ku mugabane wa Africa ni Joe Mettle, Evelyn Wanjiru, Joyful Way Inc, Oncemore Six, Emeka Songs, Lebo Sekgobela, Bella Kombo ndetse na Grace Charles.

Pastor Julienne Kabiligi Kabanda umuyobozi mukuru wa Grace Room Ministries na we ni umwe mu bitaboriye iki gitaramo.

Aho gushyira imbere abahanzi baririmba buri wese ku giti cye, iki gitaramo gihuza indirimbo zo mu ndimi, injyana n’uturere bitandukanye, zikavangwa mu buryo butuma abahanzi n’abizera baramya Imana bahuriza hamwe mu gitaramo kimwe.

Babajijwe impamvu bahisemo u Rwanda kuri iyi nshuro abategura iki gitaramo, bavuze ko ku rwego mpuzamahanga, u Rwanda ruzwi nk’igihugu cyagaragaje urugendo rwo kwiyubaka, ubumwe n’icyizere ko izi ndangagaciro zihura n’icyerekezo cya Halal Afrika.

Iki gitaramo gitegurwa na Halal Afrika ku bufatanye na Ultimate Music Group na Authentic Events, kikazabera muri BK Arena i Kigali.

Iki gitaramo cyabaye umwanya kuri bamwe mu bahanzi aho bakoranye indirimbo zikazagenda zisohoka buhoro buhoro.

Muri zo twavuga izakozwe na Israel Mbonyi yakoranye na OnceMore Six wo muri Afurika y’Epfo, Ben & Chance bakoranye na Lebo Sekgobela, naho René & Tracy bakorana na Joe Mettle.

Si abo gusa kuko Bella Kombo wo muri Tanzania yakoranye na Evelyn Wanjiru wo muri Kenya, Emeka Songsz wo muri Nigeria akorana na Grace Charles wo muri Ghana.

Mu ijoro ryo ku wa 27 Ukwakira 2026, mu nyubako ya London Palladium Theatre mu Bwongereza hatangiwe igihembo cy’umukinnyi mwiza kurusha abandi ’Ballon d’Or 2026’ hagendewe ku byagezweho mu mwaka w’imikino 2025-2026, cyegukanwe n’Umwongereza Harry Kane w’imyaka 33 y’amavuko ukinira Bayern Munich yo mu Budage.

Ni ibihembo byatangwaga ku nshuro ya 70 mu mateka, kuri iyi nshuro byatangiwe mu Mujyi wa London mu Bwongereza, byari ku nshuro ya mbere bitangiwe hanze y’u Bufaransa, ahabarizwa ikinyamakuru France Football cyibitegura kuva mu 1958. Byari biteganyijwe ko bitangira Saa Yine z’Ijoro ku isaha yo mu Rwanda ariko bikererwaho hafi isaha kubera umuvundo w’imodoka wari mu mihanda ya London.

Harry Kane Edouard wabaye Umwongereza wa mbere utwaye iki gihembo kuva 2001 Michael Owen yagitwara,mu mwaka w’imikino 2025-2026, yafashije ikipe ya Bayern Munich gutwara igikombe cya shampiyona y’u Budage, ndetse n’igikombe cy’igihugu aho yakinnye imikino 51,atsinda ibitego 61 anatanga imipira yavuyemo ibindi irindwi. Mu ikipe y’igihugu y’u Bwongereza yakinnye imikino 11 atsinda ibitego 11.

Harry Kane kandi mu mateka y’ibi bihembo yabaye Umwongereza wa gatanu wegukanye Ballon d’Or nyuma ya Sir Stanley Matthews mu 1956 akinira Blackpool, Sir Bobby Charlton mu 1966 akinira Manchester United, Kevin Keegan mu 1978 no mu 1979 akinira Hamburg ndetse na Michael Owen mu 2001 akinira Liverpool.

Uretse gutwara igihembo cy’umukinnyi mwiza w’umwaka yegukana Ballon d’Or 2026, uyu mugabo w’imyaka 33 y’amavuko kandi yanegukanye igihembo cya rutahizamu mwiza akesha ibitego 73 yatsinze muri rusange mu mwaka w’imikino 2025-2026.

Kylian Mbappe nwabaye uwa kabiri muri ibi bihembo nawe yari yitabiriye, mu mwaka w’imikino 2025-2026 yakiniye Real Madrid imikino 44 yatsinzemo ibitego 42 agatanga imipira irindwi yavuyemo ibindi kuri bagenzi be icyakora nta gikombe na kimwe yatwaranye n’iyi kipe mu gihe mu ikipe y’igihugu y’u Bufaransa yakinnyemo imikino 16 yatsinzemo ibitego 16.

Muri rusange uyu musore muri uyu mwaka w’imikino nta gikombe na kimwe yigeze atwara, gusa ibitego 16 yatsinze mu ikipe y’igihugu 10 muri byo yabitsinze mu Gikombe cy’Isi 2026 aho yafashije u Bufaranga kugera muri 1/2.

Lamine Yamal wa FC Barcelona, niwe wabaye uwa gatatu mu gihe kandi yanegukanye ariko igihembo cy’umukinnyi mwiza ukiri muto aho ikipe ye yayikiniye imikino 45 mu mwaka w’imikino 2025-2026 agatsinda ibitego 24, akanatanga imipira 18 yavuyemo ibindi, byose byayifashije gutwara cya shampiyona aricyo cyonyine batwaye.

Mu ikipe y’igihugu ya Espagne yakinnye imikino 12 atsinda igitego kimwe atwarana nayo Igikombe cy’Isi 2026. Ku mwanya wa haje Rodri wakiniraga Man City icyo gihe ariko ubu wa FC Barcelona akurikirwa na Lionel Messi wabaye uwa gatanu.

Umutoza mwiza w’umugabo yabaye Luis De La Fuente utoza ikipe y’igihugu ya Espagne aho yayihesheje Igikombe cy’Isi 2026 atsindiye Argentine ku mukino wa nyuma igitego 1-0.

Ikipe y’igihugu ya Espagne kandi yafashije Unai Simon guhembwa nk’umunyezamu mwiza w’umwaka nyuma y’uko ayifashije gutwara Igikombe cy’Isi 2026.

Mu bindi bihembo byatanzwe, Umwongereza Bukayo Saka yatwaye igihembo cyitwa Socrates gihabwa uwagize ibikorwa by’ubugiraneza bifitiye akamara umuryango muganari.

Ikipe nziza y’umwaka mu bagabo yabaye PSG yatwaye UEFA Champions League 2025-2026 mu gihe kandi yari yaranatwaye iya 2024-2025 aho nabwo yegukanye igihe cy’ikipe nziza y’umwaka mu bihembo nk’ibi bya 2025.

Mu bagore Alexia Putellas ukinira London City Lionesses niwe wegukanye Ballon d’Or 2026,yabaye iya gatatu mu mateka ye nyuma y’izindi ebyiri yatwaye akinira FC Barcelona.

Iyi kipe yo muri Espagne yahoze akinira muri ibi bihembo niyo yahembwe nk’inziza y’umwaka.

Ibihembo byose byatanzwe muri Ballon d’Or 2026:

Ballon d’Or 2026: Harry Kane (Bayern Munich & England)

Ballon d’Or mu bagore: Alexia Putellas (London City Lionesses & Spain)

Rutahizamu w’umwaka: Harry Kane (Bayern Munich & England)

Rutahizamu w’umwaka mu bagore: Charlyn Corral (CF Pachuca & Mexico)

Ikipe y’umwaka : Paris Saint-Germain

Ikipe y’umwaka mu bagore: Barcelona Femeni

Igihe cy’uwakoze ibikurwa by’ubumuntu: Bukayo Saka (Arsenal & England)

Umunyezamu w’umwaka: Unai Simon (Athletic Club & Spain)

Umunyezamu w’umwaka mu bagore: Cata Coll (Barcelona & Spain)

Umutoza w’umwaka: Luis de la Fuente (Spain)

Umutoza w’umwaka mu bagore: Pere Romeu (Barcelona)

Umukinnyi muto w’umwaka mu bagore: Vicky Lopez (Barcelona & Spain)

Umukinnyi muto w’umwaka: Lamine Yamal (Barcelona & Spain)

Inama y’Abaminisitiri yateranye ku wa Mbere, tariki ya 26 Ukwakira yagize Mukashyaka Claudette Umugenzuzi Mukuru w’Imari ya Leta, akaba asimbuye Alexis Kamuhire umaze imyaka itanu kuri uyu mwanya.

Kamuhire yagiye kuri uyu mwanya kua wa 13 Ukwakira 2021 asimbuye Obadiah Biraro, bivuze ko yushize ikivi cy’imyaka itanu igenwa n’amategeko.

Inama y’Abaminisitiri yari iyobowe na Perezida wa Repubulika Paul Kagame, yanashyizeho Umugenzuzi Mukuru wungirije, akaba ari Kubwimana Gratien.

Claudette Mukashyaka ni inzobere mu bugenzuzi bw’imari, ufite uburambe mu bugenzuzi bwite mu mu bigo bikora ibikorwa by’amabanki no mu bugenzuzi bw’inzego za Leta.

Kuva mu 2021, akora nk’Umuyobozi Mukuru ushinzwe Ubugenzuzi bwite muri I&M Bank Rwanda, aho ayoboye ibikorwa. Ni na Perezida wa Komite y’Inama y’Ubutegetsi y’Ubugenzuzi y’Inteko Ishinga Amategeko.

Mbere yaho, yakoze nk’umugenzuzi mu Biro by’Umugenzuzi Mukuru w’Imari ya Leta. Ni umucungamari w’umwuga ufite impamyabumenyi y’icyiciro cya kabiri cya kaminuza mu bukungu, yakuye muri Kaminuza y’u Rwanda afite amanota y’ikirenga, akaba n’umunyamuryango wa ACCA (Association of Chartered Certified Accountants).

Afite ubumenyi n’ubunararibonye mu miyoborere myiza y’ibigo, guhangana n’ibibazo bishobora kugira ingaruka ku mikorere y’ikigo, gushyiraho no kugenzura uburyo bw’imbere mu kigo bwo gukumira amakosa no kugenzura imikorere, ndetse n’imikorere y’ibikorwa bya banki.

Gratien Kubwimana wagize Umugenzuzi Mukuru w’Imari ya Leta Wungirije, ni inzobere mu by’imari n’igenzura, ufite uburambe mu igenzura ry’inzego za Leta, ndetse no guhangana n’ibibazo bishobora kugira ingaruka ku mikorere y’ibigo no mu miyoborere y’imari.

Kuva mu 2024, ni Umuyobozi Mukuru ushinzwe igenzura bwite ry’inzego z’ibanze, imishinga, gahunda na porogaramu muri Minisiteri y’Imari n’Igenamigambi (MINECOFIN).

Mbere yaho, yabaye Umuyobozi Mukuru w’agateganyo ushinzwe imari mu Kigo Ngenzuramikorere (RURA), ndetse anagira inshingano z’ubuyobozi mu igenzuramara bwitw muri MINECOFIN no mu Ishuri Rikuru ry’Ubumenyi n’Ikoranabuhanga rya Kigali (KIST).

Afite impamyabumenyi y’icyiciro cya kabiri cya kaminuza mu by’imari, impamyabumenyi y’icyiciro cya mbere cya kaminuza mu bijyanye n’imiyoborere y’ubucuruzi, ndetse n’impamyabumenyi y’umwuga ya ACCA. Ni umunyamuryango wa ACCA n’Urugaga rw’Abacungamari b’Abanyamwuga mu Rwanda (ICPAR).

Inama y’Abaminisitiri yanasuzumye raporo ku gipimo cy’imiyoborere na raporo ku ishusho y’uburyo abaturage babona imiyoborere n’imikorere ya serivisi mu nzego z’ibanze.

Yagaragaje ko igipimo cy’imiyoborere gikomeje kuba cyiza, inasaba inzego bireba gukomeza kubakira ku byagezweho, zishimira ibikora neza kandi zigakemura ibibazo bikigaragara.

Ku bijyanye n’imisoro, Inama y’Abaminisitiri yemeye Imbonerahamwe y’imyanya y’imirimo y’Ikigo gishinzwe Mine, Peteroli na Gazi mu Rwanda (RMB). Iyi gahunda igamije kunoza imikorere y’urwego rw’ubucukuzi bw’amabuye y’agaciro no kurushaho gushyigikira uruhare rwarwo mu bukungu bw’igihugu.

Inama y’Abaminisitiri yenemeje amasezerano y’ubufatanye hagati ya Guverinoma y’u Rwanda n’abafatanyabikorwa mpuzamahanga.

Harimo amasezerano hagati ya Guverinoma y’u Rwanda na Raffles Family Office Limited (RFO), agamije gushaka inkunga y’imishinga y’iterambere no guteza imbere ishoramari mpuzamahanga.

Yanemeje amasezerano hagati ya Guverinoma y’u Rwanda na Luma & Lua, agamije kuvugurura imicungire y’Ikigo Mpuzamahanga cya Musanze, hagamijwe guteza imbere ubukerarugendo bushingiye ku magare.

Mu rwego rwa dipolomasi, iyi nama yemeje kandi amasezerano y’ubufatanye hagati y’u Rwanda na Banki y’Ishoramari y’Uburayi, agamije guteza imbere imikoranire mu rwego rw’imari.

Yemeje kandi amasezerano y’ubufatanye hagati ya Guverinoma y’u Rwanda na Guverinoma y’Ubwami bwa Oman, agamije kongera ubufatanye mu kudasoresha kabiri ku byerekeye imisoro ku musaruro n’inyungu ziva mu ishoramari.

Inama y’Abaminisitiri yemeje kandi iteka rigena imirongo ngenderwaho ikurikizwa mu gushyira mu bikorwa ihame ryo gusangira amakuru n’imibare y’imicungire y’amakuru.

Mu byemezo birebana n’imiyoborere, yemeje abahagarariye ibihugu byabo mu Rwanda, barimo Ambasaderi wa Zimbabwe mu Rwanda, Helliate Rushwaya, na Ambasaderi wa Finland mu Rwanda, Anna Merrifield.

Mu bikorwa biteganyijwe mu minsi iri imbere, Inama y’Abaminisitiri yamenyeshejwe ko u Rwanda ruzakira inama mpuzamahanga zitandukanye, zirimo inama yiga ku bibazo by’ihungabana ry’ikirere, inama y’ubukerarugendo n’ihuriro mpuzamahanga ry’urubyiruko.

Kuri uyu wa Mbere, tariki 26 Ukwakira, Perezida wa Israel, Isaac Herzog, yakiriye impapuro zemerera Maj. Gen.(Rtd) Emmanuel Bayingana guhagararira u Rwanda muri icyo Gihugu.

Mu biganiro bagiranye, Perezida Herzog yerekanye ko umubano mwiza n’ubucuti hagati y’u Rwanda na Israel bikomeje kwaguka mu nzego nyinshi zirimo guhanga ibishya, ubuhinzi, iterambere n’uburezi n’ibindi.

Ambasaderi Maj. Gen.(Rtd) Emmanuel Bayingana, agiye guhagararira u Rwanda muri Israel asumbuye, Ambasaderi James Gatera wari umaze imyaka itanu kuri uwo mwanya, kuko yohorejwe muri icyo gihugu mu 2021 kugeza mu 2026.

Umubano w’u Rwanda na Israel, ushingiye cyane ku bufatanye hagati y’ibihugu byombi,binyuze mu masezerano atandukanye yasinywe no ku mishinga ikomeye bihuriyeho.

Inzego z’ingenzi zigize ubwo bufatanye, harimo uburezi n’ubushakashatsi, aho muri Nyakanga 2026, ibihugu byombi byashyize umukono ku masezerano y’ubufatanye mu burezi bw’ibanze, amashuri makuru na kaminuza, imyuga n’ubumenyingiro (TVET), ikoranabuhanga mu itumanaho n’amakuru, ndetse n’ubushakashatsi mu bya siyansi.

Hari kandi ubuhinzi n’inganda zitunganya umusaruro w’ubuhinzi, aho ubufatanye bukorwa binyuze mu Kigo cya Isirayeli gishinzwe ubufatanye mpuzamahanga mu iterambere (MASHAV). Muri ubwo bufatanye Kandi, havuyemo ikigo cy’indashyikirwa mu buhinzi bw’imboga n’imbuto gihuriweho n’u Rwanda na Israel, ndetse n’umushinga wa ‘Gabiro Agribusiness Hub’. Hari kandi gahunda zifasha urubyiruko rw’Abanyarwanda barangije amashuri kubona amahirwe yo kwimenyereza umwuga no kongera ubumenyi muri Israel.

Mu bijyanye n’ikoranabuhanga no guhanga ibishya, u Rwanda rwigira byinshi kuri Israel, ubu rukomeje guteza imbere ubufatanye mu ikoranabuhanga ry’amakuru n’itumanaho ndetse n’ubwenge buhangano (AI).

Mu bijyanye n’umutekano n’ingabo, ibihugu byombi bikomeje kungurana ubumenyi no gutanga amahugurwa ku ngabo z’igihugu n’inzego za polisi, harimo n’ibijyanye n’umutekano wo mu ikoranabuhanga (cybersecurity).

U Rwanda rwafunguye Ambasade muri Israel mu 1994, ifunga mu 2000 kubera ibibazo bijyana n’ingengo y’imari, rwongera kuyifungura mu 2015 kugeza ubu, mu gihe Israel yafunguye Ambasade mu Rwanda mu 2019 kugeza ubu.

Ambasaderi Maj. Gen. (Rtd) Emmanuel Bayingana,agiye guhagararira u Rwanda muri Israel mu gihe muri icyo gihugu hategurwa amatora ku wa Kabiri tariki 27 Ukwakira 2026, ni amatora ya referendum afatwa nk’akomeye cyane kuri Minisitiri w’intebe Benjamin Netanyahu, kuko abaye mu gihe abaturage, basa n’abacitsemo ibice, harimo abashyigikiye abatavuga rumwe n’ubutegetsi, mu gihe abanda bari ku ruhande rwe.

Umuhanzi w’Umunyamerika, Chris Brown, yakatiwe igifungo cy’amezi umunani, ariko gisubitswe mu gihe cy’amezi 12, nyuma y’uko urukiko rumuhamije icyaha cyo gukubita no gukomeretsa.

Uyu muhanzi yahamwe n’icyaha cyo kugira uruhare mu mirwano (affray), nyuma yo kwemera icyaha cyakomotse ku makimbirane yabereye mu kabyiniro ko mu Mujyi wa London mu Bwongereza mu 2023.

Iki gikorwa cyabereye mu kabari ka Tape Club mu gace ka Mayfair mu Bwongereza, muri Gashyantare 2023, cyaturutse ku gutongana kwa Chris Brown na Abraham Diaw usanzwe utunganya indirimbo mu buryo bw’amajwi.

Nyuma y’uko aba batonganye, bikavamo imirwano, Diaw yashinje Chris Brown kumukubita icupa mu mutwe.

Ku wa 20 Kamena 2025 nibwo Chris Brown yitabye bwa mbere urukiko rwa Southwark, ndetse icyo gihe yahakaniye Inteko y’abacamanza ko atemera ibyaha ashinjwa birimo gukomeretsa umuntu akoresheje icupa.

Uretse icyaha cyo gukomeretsa yari akurikiranyweho, Chris Brown kandi yanashinjwa kuba yaritwaje intwaro iteje akaga mu ruhame, ari ryo cupa ryakoreshejwe.

Uru rubanza rwaje kwimurirwa ku itariki ya 11 Nyakanga 2025, mu gihe muri uku kwezi k’Ukwakira aribwo hari hateganyijwe umwanzuro ku cyaha Chris Brown yari akurikiranyweho.

Urukiko rwamukatiye igifungo cy’amezi umunani gisubitswe mu gihe cy’amezi 12. Ibi bivuze ko adahita afungwa ako kanya, ariko ashobora kujyanwa muri gereza mu gihe yaba atubahirije ibisabwa n’icyemezo cy’urukiko cyangwa mu gihe yaramuka akoze ikindi cyaha muri aya mezi yakatiwe.

Uru rubanza rwongeye gutuma Chris Brown agarukwaho mu itangazamakuru, cyane cyane ku bijyanye n’ibibazo by’amategeko yagiye ahura na byo birimo urugomo.

Madamu Jeannette Kagame n’Igikomangomakazi cya Maroc, Princess Lalla Asmaa, bafunguye ku mugaragaro ikigo gisuzuma ndetse kikanavura indwara z’amatwi, giherereye mu Bitaro bya Gisirikare bya Kanombe, mu Mujyi wa Kigali kuri uyu wa mbere tariki 26 Ukwakira 2026.

Iki kigo cyashyizweho ku bufatanye bwa Leta y’u Rwanda n’Ubwami bwa Maroc, kigamije gufasha abantu bafite ibibazo by’uburwayi bw’amatwi, by’umwihariko abana, kubona serivisi z’ubuvuzi zibafasha kongera ubushobozi bwo kumva.

Kuva cyatangira gukora, iki kigo cyamaze kuvura abana bagera kuri 50 mu gihe cy’icyumweru kimwe, mu gihe abandi 100 bahawe utwuma twabugenewe tubafasha kumva neza.

Iyi gahunda ni intambwe mu kongera ubushobozi bwo gusuzuma no kuvura indwara z’amatwi mu Rwanda, ndetse no gufasha abana bafite ibibazo byo kutumva neza kugira amahirwe yo gukura, kwiga no gushyikirana n’abandi neza.

Ubufatanye bw’u Rwanda na Maroc muri uyu mushinga bugaragaza imikoranire y’ibihugu byombi mu guteza imbere ubuvuzi no kwagura serivisi zifasha abantu bafite ibibazo by’ubuzima nk’uko byatangajwe n’umuyobozi w’Ibitaro by’Icyitegererezo byigisha Ubuvuzi bya Gisirikare, Brig Gen Dr. Eugène Ngoga.

Ati “Umusaruro witezwe mu buvuzi butangirwa mu kigo gisuzuma ndetse kikanavura indwara z’amatwi giherereye muri ibi Bitaro bya Gisirikare bya Kanombe bizafasha abakiri bato bafite ibibazo byo kutumva”.

Brig Gen Dr. Eugène Ngoga avuga ko ubu buvuzi buri hejuru cyane kandi bukaba bukeneye n’ibikoresho bihambaye bakaba barabihawe n’Imbuto Foundation ifatanyije n’igihugu cya Maroc.

Brig Gen Dr. Eugène Ngoga yavuze ko igikorwa cyo kuvura aba bana cyakozwe n’inzobere zaturutse muri Maroc zifatanyije n’amaganga bo mu Rwanda. Yanasobanuye ko hazakomeza gutangwa ubuvuzi ku bana bafite uburwayi bwo kutumva bagahabwa utwuma tubafasha kumva neza.

Ubufatanye bw’u Rwanda na Maroc bukomeje kwaguka

Umubano w’u Rwanda n’Ubwami bwa Maroc ushingiye ku bufatanye mu nzego zitandukanye, zirimo dipolomasi, ubucuruzi, ishoramari, ubuhinzi, inganda n’iterambere ry’imibereho myiza y’abaturagendetse n’ubuzima.

Mu Kwakira 2016, ibihugu byombi byasinyanye amasezerano agamije guteza imbere imikoranire. Maroc yafunguye Ambasade i Kigali mu 2017, u Rwanda na rwo rufungura iyarwo i Rabat mu 2020.

Mu buhinzi, ibihugu byombi bifatanya mu mushinga wa Rwanda Fertilizer Company, ugamije kongera ifumbire mvaruganda ku bahinzi. Mu 2025, byanasinyanye amasezerano y’ubufatanye mu bya gisirikare no mu rwego rw’igororamuco.

Mu buzima, ikigo gisuzuma kandi kivura indwara z’amatwi cyafunguwe mu Bitaro bya Gisirikare bya Kanombe ku bufatanye bw’ibihugu byombi, kigamije gufasha abafite ibibazo byo kutumva neza. Ubu bufatanye bugaragaza ko umubano w’u Rwanda na Maroc urenga dipolomasi, ukagera no ku mishinga igamije guteza imbere imibereho y’abaturage.

Shampiyona y’icyiciro cya mbere muri shampiyona ya volleyball igeze ku munsi wa kabiri aho ikipe ya APR VC ikomeje kuyobora abandi n’amanota 6 ndetse ikaba yihariye ko itarinjizwa iseti nimwe.

Ni umunsi wa kabiri wakiniwe mu ntara y’iburasirazuba ho mu karere ka Kirehe mu nyuba ko nshya y’imikino y’intoki ndetse bikaba byari ku nshuro ya mbere iyi nyubako yakiriye imikino ya shampiyona y’icyiciro cya mbere muri volleyball.

Ni umunsi wa kabiri wakinwe gusa n’amakipe y’abagabo aho mu cyiciro cy’abagore bo bari bafite ikiruhuko. Umukino wahuje ikipe ya Rwanda Polytechinic Ngoma College (RP Ngoma) na Gisagara VC niwo wabimburiye indi aho biyoroheye ikipe ya Gisagara VC yegukanye uyu mukino ku maseti 3-0.

Umukino wahuje REG VC na Kigali Volleyball Club (KVC) niwo wakurikiyeho maze ikipe ya REG VC inabitse igikombe cya shampiyona cy’umwaka ushize itsinda KVC amaseti 3-0. ibi bituma ikipe ya KVC yuzuza imikino ibiri yikurikiranya itabona intsinzi.

Hakurikiyeho umukino wahuje ikipe ya POLICE VC ndetse n’ikipe ya EAUR VC aho uyu mukino warangiye ikipe ya Police VC itsinze EAUR amaseti 3-1. Uyu mukino wakurikiwe nuwahuje ikipe ya Kirehe VC na APR VC. Nubwo uyu mukino wari ugoranye, ikipe ya APR VC yatsinze ikipe ya Kirehe VC amaseti 3-0 byatumye iyi kipe y’ingabo z’igihugu ifata umwanya wa mbere n’amanota 6.

Iki ya Police VC iri ku mwanya kabiri n’amanota nayo 6 aho ikurikiwe ku mwanya wagatatu n’ikipe ya REG VC n’amanota 4 inganya na Gisagara VC yo iri ku mwanya wa kane.

Kirehe VC iri ku mwanya wa gatanu n’amanota 3 aho ikurikiwe na EAUR VC yo ifite amanota abiri ku mwanya wa gatandatu. KVC ndetse na RP Ngoma bombi nta manaota barabona aho bakurikirana ku mwanya wa karindwin ‘umunani.

nyuma y’umunsi wa kabiri, umukinnyi Iga Mohammed ukomoka mu gihugu cya Uganda niwe umaze gutsinda amanota menshi aho amaze gutsinda amanota 54 aho akurikiwe na Makuto Elphase wa Police VC we umaze gutsinda amanota 47.

Imikino ya shampiyona ya volleyball izakomeza kuri uyu wa gatanu taliki ya 30 hakinwa umunsi wa gatatu mu cyiciro cy’abagabo naho Abagore bo hazaba hakinwa umunsi kabiri.

‎Ikipe y’u Rwanda yasoreje ku mwanya wa kabiri ku rutonde rw’imidali muri Shampiyona Nyafurika y’Amagare 2026 yaberaga i Kisumu muri Kenya, nyuma yo kwegukana imidali itandatu.

‎Iyi Shampiyona Nyafurika y’Amagare, yasojwe kuri iki Cyumweru, tariki ya 25 Ukwakira 2026, hakinwa isiganwa ryo mu muhanda mu bagabo bakuru n’abatarengeje imyaka 23 ku ntera y’ibilometero 153, yegukanwe n’Umunya-Afurika y’Epfo Callum Ormiston akoresheje amasaha atatu, iminota 44 n’amasegonda abiri, akurikirwa n’Umunya-Maroc Driss El Alouani amusize amasegonda 20.
‎
‎Nsengiyumva Shemu ni we Munyarwanda witwaye neza kurusha abandi asoreza ku mwanya wa karindwi, mu gihe Niyonkuru Samuel yabaye uwa munani aho bageze ku murongo nyuma y’amasegonda 43 uwa mbere ageze ku murongo. Uwiduhaye Mike yabaye uwa 18 arushwa iminota itatu n’amasegonda 44, naho Mugisha Moïse aba uwa 20 arushwa iminota itatu n’amasegonda 47.
‎Mu gihe, Muhoza Eric na Masengesho Vainqueur bo ntibashoboye gusoza.
‎
‎Mu batarengeje imyaka 23, Ufitimana Schadrack, Ntirenganya Moïse na Ruhumuriza Aimé na bo ntibageze ku murongo usoza. Mu isiganwa ryitabiriwe n’abakinnyi 128. barimo, 18 batatangiye, naho 45 ntibasoza abandi 28 basoza barengeje igihe cyagenwe.
‎

‎Umunsi wa nyuma wasize u Rwanda rutabonye umudali gusa rwasoje iyi Shampiyona ruri ku mwanya wa kabiri muri rusange n’imidali itandatu, irimo itatu ya Zahabu, umwe wa Feza n’ibiri y’Umuringa. Afurika y’Epfo ni yo yabonye imidali 13, irimo itanu ya Zahabu, itanu ya Feza n’itatu y’Umuringa, naho Mauritius ibona imidali itanu harimo ibiri ya Zahabu n’itatu ya Feza.

Itorero Anglican ry’u Rwanda (EAR), ryimitse rinicaza mu ntebe Umuyobozi Mukuru mushya w’Itorero Anglican ry’u Rwanda Archbishop Dr. Manasseh Gahima.

Dr Gahima yemejwe n’inama nkuru y’abayobozi b’Itorero Anglican mu Rwanda, yabereye ku cyicaro gikuru cyaryo mu Mujyi wa Kigali, ku wa 11 Nzeri 2026, asimbuye Archbishop (Rtd) Dr. Laurent Mbanda.

Umuhango wo kwimika no kwicaza mu ntebe Archbishop Dr. Manasseh Gahima, witabiriwe na Minisitiri w’Intebe w’u Rwanda Dr. Justin Nsengiyumva n’abandi bayobozi mu nzego z’Igihugu zitandukanye, hamwe n’abayoboke b’Itorero Anglican ry’u Rwanda n’ahandi ku Isi.

Archbishop Dr. Manasseh Gahima yabaye Umuyobozi Mukuru wa Gatanu wa Anglican mu Rwanda, anaba Umushumba Mukuru wa gatatu wa Diyoseze ya Gasabo, binyuze mu muhango wo kumwimika wabereye i Kigali kuri iki cyumweru, tariki 25 Ukwakira 2026.

Musenyeri Dr Manasseh Gahima, yari asanzwe ari Umushumba mukuru wa Diyoseze ya Gahini, mbere yo gutorerwa kuba Arkiyepiskopi mukuru mushya w’Itorero Anglican ry’u Rwanda mu kwezi gushize (Nzeri).

Muri Werurwe 2026, Dr Gahima yari yatorewe kuyobora Inama y’Abaporotesitanti mu Rwanda, Conseil Protestant du Rwanda (CPR). Icyo gihe, gutorerwa uwo mwanya byatumye izina rye ritangira kuvugwa cyane mu bashoboraga gusimbura Dr Laurent Mbanda ku buyobozi bw’Itorero Anglican ry’u Rwanda.

Umuhango wo kwimika no kwicaza Archbishop Dr. Manasseh Gahima, wabimburiwe no kubanza gukomanga ahabwa ikaze, byakurikiwe n’uko Umuyobozi Mukuru ucuye igihe Dr. Mbanda Laurent yasomye icyemezo cy’uko asoje imirimo yo kuyobora Itorero Anglican ry’u Rwanda no kuyobora Diyoseze ya Gasabo.

Nyuma y’ibyo habayeho gahunda yo gusoma icyemezo cy’itorwa ry’umuyobozi mukuru w’Itorero Anglican ry’u Rwanda n’umuyobozi mukuru wa Diyoseze ya Gasabo, Arcbishop Dr. Manasseh Gahima, cyasomwe n’umujyanama mu by’amategeko mu Itorero Anglican ry’u Rwanda, Me Innocent Kayiranga Munyankindi.

Nyuma yaho Umuyobozi mukuru ucyuye igihe akikijwe n’abandi bepiskopi b’Itorero Anglican ry’u Rwanda, beretse abagize Itorero umuyobozi wabo mushya watowe, igikorwa cyakurikiwe no gusezeranira imbere y’Imana n’Itorero ku umuyobozi mukuru mushya w’Itorero.

Mu ijambo yagejeje ku bitabiriye uyu muhango, Dr. Mbanda umaze imyaka 16 mu mirimo y’ubwepiskopi irimo 8 amaze ari Arkiyepiskopi mukuru w’Itorero Anglican ry’u Rwanda, yavuze ko umutima we wuzuye amashimwe, ashimira Imana yamushoboje muri icyo gihe cyose.

Yagize ati “Si uko buri gihe byari byoroshye, si uko twabonaga ibisubizo by’ibibazo byose, si uko buri cyemezo cyashimwaga na bose. Ahubwo ni uko muri ibyo byose twabonye ubuntu bw’Imana buhagije, ko itadutereranye na rimwe kandi ko yadufashije gukomeza muri uyu murimo tuyizeye, tuyubashe kandi Imana yadukoreye byiza, natwe turishimye.”

Yagaragaje ko mu gihe cy’imyaka irenga umunani amaze ayobora Itorero Anglican ry’u Rwanda, Imana yabashoboje kugera ku bikorwa bitandukanye birimo kuvuga ubutumwa, gutegura abayobozi, kwita ku marerero n’abana b’incuke, gucunga umutungo neza no guharanira kwigira.

Archbishop Dr. Manasseh Gahima wahawe inkoni y’ubushumba bwo kuyobora Itorero Anglican ry’u Rwanda na Diyoseze ya Gasabo, yashimiye ubuyobozi bw’Igihugu bwahaye amahirwe Abanyarwanda yo gutanga umusanzu wabo mu kubaka Igihugu hatitawe ku mateka yabo n’icyo umuntu ari cyo.

Yagize ati “Ibi bituma buri Munyarwanda ashobora kugira uruhare mu buyobozi no mu iterambere ry’Igihugu cye. Ibi ndabivugana umutima uciye bugufi kandi ushima, kuko amateka yacu ntiyakabitwemereye twe abataratekerezaga ko tuzigera tugira Igihugu ngo tugituremo, tukinezererwemo ndetse ngo tugikorere. Imana yarakoze gukoresha ubuyobozi bw’iki gihugu cyacu, butumye umuntu nkanjye, agera aho ahawe inshingano nk’izi mu gihugu cye. Imana ihabwe icyubahiro.”

Umukirisito wari uhagarariye abandi muri Diyoseze ya Gasabo, Munara, yavuze ko biteguye gufatanya n’umuyobozi wabo mushya.

Yagize ati “umurongo w’imikorere mutugejejeho mu ijambo ryanyu twawakiriye neza, kandi turawushigikiye, ndetse nk’abakirisitu twiteguye gushyiramo uruhare rwacu rwose mu mbaraga zacu zose uko dushoboye.”

Minisitiri w’Intebe Dr. Justin Nsengiyumva wari uhagarariye Perezida wa Repuburika muri uyu muhango, yibukije amadini n’atorero ko basangiye na Leta inshingano ikomeye yo guhindura imibereho y’Abanyarwanda.

Yagize ati “Kugira ngo ibi bigerweho, birasaba ko twongera imbaraga mu bufatanye dusanzwe dufitanye ndetse no guharanira ko intego twihaye tuzishyira mu bikorwa uko bikwiye. Twese icyo twifuza ni ukugira imiryango ikomeye kandi itekanye, aho abayigize barangwa n’indangagaciro nziza zibereye Umunyarwanda, kugira ngo Igihugu cyacu gikomeze gutera imbere.”

Yanasabye amadini n’amatorero kunoza no kongera imbaraga mu bikorwa byo gutegura neza abagiye kubaka ingo, bakurikije amategeko y’Igihugu no gukomeza gufatanya na Leta mu bikorwa byo kubaka imiryango ishoboye kandi itekanye.

Archbishop Dr. Manasseh Gahima, yavutse mu 1970, akurira muri Uganda nyuma y’uko umuryango we uhungiye muri icyo gihugu. Amashuri abanza yayize i Kasonga muri Uganda, ayisumbuye ayakomereza muri Kololo no muri St Andrea Kahwa’s College.

Nyuma yaje kubona impamyabumenyi mu burezi, akomereza amashuri makuru mu bijyanye n’ubucuruzi muri Kaminuza y’u Rwanda, icyo gihe yari izwi nka Umutara Polytechnic. Afite kandi impamyabumenyi z’icyiciro cya gatatu cya kaminuza mu micungire y’abakozi no mu by’iyobokamana, ndetse n’impamyabumenyi y’ikirenga, PhD, mu bijyanye n’amasomo y’iyobokamana.

Mbere yo kwinjira mu buyobozi bw’Itorero Anglican, Dr Gahima yakoze mu nzego zitandukanye z’uburezi n’ubuyobozi bw’inzego z’ibanze, kuko kuva mu 1995 kugeza mu 1997, yabaye Umuyobozi wungirije w’ishuri Lycée de Kigali, aho yari ashinzwe abanyeshuri bigaga mu Cyongereza.

Hagati ya 1997 na 2001, yabaye Burugumesitiri w’iyahoze ari Komini Karangazi, naho kuva mu 2004 kugeza mu 2005 aba Burugumesitiri w’iyahoze ari Komini Gabiro. Nyuma y’amavugurura yabaye mu nzego z’ubutegetsi bw’Igihugu, Dr Gahima yerekeje mu buyobozi bw’Itorero Anglican muri Diyoseze ya Gahini, aho yabaye Umuyobozi wungirije wa Diyoseze.

Ikipe ya REG women Basketball Club, yegukanye igikombe cy’akarere ka gatanu cyaberaga muri Tanzania nyuma yo gutsinda APR WBBC nayo yo mu Rwanda amanota 84 kuri 77.

Ni irushanwa ryari rimaze iminsi ribera mu gihugu cya Tanzania aho ryitabiriwe n’amakipe yitwaye neza mu bihugu bya Tanzania, Kenya, u Rwanda ndetse n’ Uburundi.

Ikipe ya REG WBBC niyo yatangiye neza uyu mukino ubwo yatsindaga agace ka mbere n’amanota 23 kuri 20 ya APR WBBC. REG WBBC yakomerejeho umuvuduko maze yegukana n’agace ka kabiri inyagiye cyane APR WBBC kuko aka gace yakegukanye ku manota 23 ku 9 ya APR WBBC maze amakipe yombi ajya kuruhuka ikipe ya REG iri imbere ku giteranyo rusange.

Ubwo bari bavuye kuruhuka, ikipe ya APR WBBC nayo yongeye kuyobora umukino ndetse yegukana n’agace ka gatatu ku manota 26 kuri 20, gusa ikipe ya REG WBBC yari ikiri imbere ku giteranyo rusange.

Ikipe ya APR WBBC yakomeje gusatira ikipe ya REG WBBC ari nako igabanya ikinturanyo maze yegukana nanone aka gace ku manota 26 kuri 20. Ibi ntacyo byatanze kuko umukino waje kurangira ari amanota 84 ya REG WBBC kuri 77 ya APR WBBC.

Biteganyijwe ko aya makipe yombi ari nayo azahagararira akarere ka gatanu mu mikino ya Women’s Basketball League Africa iteganyijwe kubera mu gihugu cya Misiri mu Kuboza uyu mwaka wa 2026.

Amakipe ya APR FC na Rayon Sports yasezerewe muri CAF Champions League na CAF Confederation Cup atarenze ijonjora rya kabiri.

Ibi byabereye mu mikino yo kwishyura yabaye kuri uyu wa Gatandatu aho ikipe ya APR FC mu Misiri yakiriwe na Zamalek SC mu mukino wo kwishyura wa CAF Champions League igatsindwa igitego 1-0. Ni igitego APR FC yatsinzwe ku munota wa mbere w’umukino, gisanga 1-0 yatsindiwe i Kigali mu mukino ubanza isezererwa itsinzwe igiteranyo cy’ibitego 2-0.

Mu gihugu cya Mozambique, ikipe ya Rayon Sports yari yakiriwe na Black Bulls FC muri CAF Confederation Cup maze inganyirizayo ibitego 2-2 bisanga 2-0 yari yatsindiwe i Kigali mu mukino ubanza nayo isezererwa ku giteranyo cy’ibitego 4-2. Ibitego bya Rayon Sports byatsinzwe na Iradukunda Elie Tatou ku munota wa 18 ndetse na Muderi Akbar ku munota wa 85.

Mu wundi mukino ufite aho uhuriye n’u Rwanda, ikipe ya Al Merrikh SC yo muri Sudani ariko iri gukina shampiyona y’u Rwanda kuva umwaka ushize, yasezerewe na Horoya AC yo muri Guinnea kuri penaliti 5-3 nyumo yo gutsinda 1-0 mu mukino wo kwishyura wabereye kuri Stade Amahoro, kishyuraga 1-0 yari yatsindiwe muri Guinnea mu mukino ubanza.

Zamalek SC na Horoya AC zahise zigera mu cyiciro cy’amatsinda ya CAF Champions League mu gihe Black Bulls FC yageze muri iki cyiciro muri CAF Confederation Cup, igiye gukina ku nshuro ya kabiri nyuma ya 2024-2025.

‎Ikipe ya Gorilla yatsinze Amagaju FC ibitego 2-1 mu mukino w’umunsi wa Gatandatu wa BK Pro League 2026/27 wabereye kuri Kigali Pele Stadium kuri uyu wa Gatandatu, tariki ya 24 Ukwakira 2026, ihita ifata umwanya wa mbere.
‎

‎Uyu mukino watangiye Saa Cyenda zuzuye, watangiranye imbaraga ku makipe yombi, asatira bya hato na hato ariko Amagaju FC agashyiramo imbara nyinshi ishaka gutsinda umukino, ariko ubwugarizi bwa Gorilla FC buhagarara neza.
‎
‎Bidatinze ku munota wa 16 Amagaju FC yabonye koroneli maze Iradukunda Daniel ayipasa Niyonkuru Jean Pierre maze nawe amusubiza umupira ahita atera mu izamu maze Cuzuzo Aime Gael ntiyamenya aho umupira unyuze. Ku munota wa 43 Sunday Inemesit yishyuriye Gorilla FC igitego ahawe umupira na Chancellor Ndonga maze igice cya mbere kirangira 1-1.
‎
‎Igice cya kabiri habayemo impinduka ku makipe yombi kugira ngo abatoza barebe ko batsinda umukino, maze ku munota wa 72 Gorilla FC izamukana umupira Sunday Inemest awutera mu izamu gusa Karenzo Alex awusongamo iyi kipe yambara ubururu n’umweru ibona igitego cya kabiri.
‎
‎Nyuma yo gutsinda igitego cya Kabiri Gorilla FC yakomeje gukina neza, bituma umukino urangira ibonye amanota atatu ihita ifata umwanya wa mbere n’amanota 11 mu gihe Amagaju FC ari ku mwanya wa ane n’amanota arindwi.

Abanyarwanda bujuje imyaka y’ubukure kandi badafite imiziro bazindukiye mu matora ataziguye y’abayobozi b’inzego zegerejwe abaturage, ku rwego rw’umudugudu.

Hatowe abayobozi b’umudugudu n’ababungirije mu myanya yagenwe n’amategeko, abajyanama bahagararira umudugudu mu rwego rw’akagari, ndetse n’abagize inama z’igihugu z’abagore n’urubyiruko ku rwego rw’Umudugudu.

Mu Rwanda, gutora ni umuco n’inshingano, kandi byitabirwa na buri wese.

Ni amatora yaranzwe n’imirongo miremire, dore ko kuri uru rwego abatora bajya inyuma y’uwo bahisemo, hanyuma abakozi ba Komisiyo y’Igihugu y’Amatora bakabara abantu umwe ku wundi.

Mu Kagari ka Kinyaga, Umurenge wa Bumbogo, umuyobozi w’Umudugudu yabaye Rushombo Innocent wari usanzwe kuri uyu mwanya, ndetse akaba yagarukanye na benshi mu bari basanzwe muri komite ye.

Nk’umukandida rukumbi, Rushombo yatowe n’abari bitabiriye amatora uko bari magana atatu, ariko uyu mubare wagiye wiyongera ku buryo hari n’abakandida bagiye batorwa n’abantu hafi magana ane.

Mu yindi midugudu yose yo mu Rwanda, amatora na yo yazinduye abanyarwanda, kandi ugasanga ni ikintu bashyizeho umutima, bamwe bakamamaza, abandi bakiyamamaza, kandi abaturage bagatora umuntu babitekerejeho.

Nko mu Murenge wa Rukumberi, Akagari ka Rubago, Umudugudu w’Akabungo, NIZEYIMANA Emmanuel abaturage bamaze kumutora, maze kubera icyo bamutezeho, cyangwa se icyo yabakoreye, baramuterura, bamuzengurutsa umuhanda bamubyinira.

Mu Rwanda, amatora ni igikorwa kiza abaturage bakiteguye, kandi bakagikora bagikunze, bikagaragazwa n’umuteguro bashyira ahabera amatora.

Amakipe ya APR women basketball club ndetse na REG Women Basketball club ahagarariye u Rwanda mu mikino y’akarere ka gatanu, yageze ku mukino wa nyuma anabona itike yo gukuzakina imikino nya Afurika.

Ni irushanwa ry’akarere ka gatanu rigamije gushaka amakipe azahagararira aka karere mu mikino ya Women’s Basketball League Africa iteganyijwe kubera mu gihugu cya Misiri mu Kuboza uyu mwaka wa 2026 aho amakipe abiri ya mbere yagombaga guhita abona itike bityo akazahagararira abandi muri aka karere.

Bidasubirwaho amakipe ya APR WBBC ndetse na REG WBBC niyo azahagararira aka karere nyuma yo kwisanga ku mukino wa nyuma. Ikipe ya APR WBBC niyo yabimburiye abandi kugera ku mukino wa nyuma (Final) nyuma yo gutsinda ikipe ya Kenya Ports Authority to mu gihugu cya Kenya amanota 80 kuri 64.

REG WBBC yasanze ikipe ya APR WBBC ku mukino wa nyuma aho yo yabigezeho nyuma yo gusezerera ikipe ya Fox Divas Women Basketball Club yo muri Tanzania iyitsinze amanota 103 kuri 57.

Umukino wa nyuma hagati ya APR WBBC ndetse na REG WBBC uteganyijwe taliki ya 24 Ukwakira I Kibaha muri Tanzania aho iri rushanwa nyirizina ririmo kubera.

Eric Habumugisha, umuturage w’i Bumbogo mu Karere ka Gasabo, agihembwa mbere yo kugira ikindi akora ku mushahara we, yagombaga kubanza kuzigama ku ruhande amafaranga ibihumbi magana abiri na makumyabiri (220,000FRW) azamufasha kugera ku kazi mu kundi kwezi.

Uyu muturage utashatse kuduhishurira umushahara we, imodoka ye yanywaga lisanse nibura y’ibihumbi icumi (10,000FRW) ku munsi, litiro ikigura amafaranga ibihumbi bibiri (2,000FRW).

Leta ikimara gufata ingamba zo gushyiraho umuhanda wahariwe bus gusa, Habumugisha yigiriye inama yo kujya atega bus, none ubu yishyura ibihumbi bibiri (2,000FRW) ku munsi kuva i Bumbogo ajya ku kazi mu Mujyi wa Kigali rwagati no gutaha.

Agira ati “Byasabaga ko nywa lisansi y’ibihumbi cumi ku munsi, ariko ubungubu kubera ko yazamutse ikaba igura 2,950FRW, byaba nk’ibihumbi nka cumi na bitanu ku munsi (15,000FRW), bihwanye na litiro 5.”

Akomeza agira ati “Nyamara, ku rugendo nk’urwo kuri tap and go (akoresheje ikarita y;ingendo kuri bus) ndishyura 2,000FRW. Ubu rero, nahisemo kujya ngeza abana ku ishuri, imodoka nkayisigayo, nkajya ku kazi, nimugoroba nkagaruka nkayifata, gutyo gutyo.”

Nubwo atuye i Bumbogo, abana ba Habumugisha biga i Remera hafi yo mu Giporoso. Bityo, ahitamo kugeza abana ku ishuri, imodoka akayisiga akayifata agarutse bagatahana.

Avuga ko gukoresha imodoka rusange mu ngendo ze byatumye umwanya we wiyongera kuko “Imodoka za privée, mu gitondo zibyiganira mu gisate cy"umuhanda kimwe, bus kandi ari na zo nkeya, zikagenda zisanzuye mu gice gisigaye.”

Mu Mujyi wa Kigali, bus zihaguruka buri minota itanu mu masaha y’urujya n’uruza rwinshi (pick hours), mu gihe hagati mu munsi ku manywa zihaguruka buri minota icumi.

Habumugisha avuga ko kuri ubu, kuva muri Down Town (Gare yo mu Mujyi) ujya mu Giporoso i Remera mu masaha yo gutaha ya ambouteillage (igihe haba hari urujya n’ubuza runini) bimutwara iminota 30-40 muri bus mu gihe imodoka y’umuntu ku giti cye, yo ishobora kuhakoresha hafi amasaha abiri.

Ati “Uyu munsi, umuntu uri mu Mujyi ashobora gukora akazi ke atuje, akabwira umuntu umushaka Kimironko ati ‘reka ntege bus ndakugeraho mu minota 30’, kandi koko akamugeraho atamwiciye gahunda.”

Bus zitwaga Shirumuteto zisigaye zitwa Teta

Ubusanzwe bus zitwara abagenzi mu buryo bwa rusanga, abakiliya bari barazise Shirumuteto kubera ukuntu bagendaga bagerekeranye, ndetse n’igihe kinini bamaraga ku mirongo, kuko hari ubwo wasangaga umuntu arenza amasaha abiri ayitegereje.

Kuva muri Mata 2026, Umjyi wa Kigali watangaje ko hatangijwe ibice byahariwe bus zitwara abagenzi mu buryo bwa rusanga, aho mu mihanda ifite ibisate bibiri mu cyerekezo kimwe, kimwe muri byo giharirwa izo bus zitwara abagenzi mu masaha y’abagenzi benshi (pick hours), ibinyabiziga bisigaye byose bigakoresha igisigaye.

Ibi byatumye urujya n’uruza rw’abakoresha bus mu ngendo zabo rworoha, ingendo zirihuta, kandi umubare w’abagenzi mu mudoka uragabanuka ku buryo kuri ubu, abasigaye bagenda bahagaze ari mbarwa. Ibi ni byo byatumye icyari Shirumuteto gihindurirwa izika kikitwa Teta.

Ikindi kandi, kuri ubu iyo icyari Shirumuteto kibuze cyangwa gitinze ugereranyije n’amasaha imodoka zihagurukira ku byapa, Ikigo gishinzwe gutwara abantu mu Mujyi wa Kigali “Ecofleet” gitanga itangazo kikamenyesha abagenzi, kandi kikabisabira imbabazi kuko ibyo cyanasezeranyije biba bitubahirijwe.

Ubu umuntu ukora ingendo zihoraho yateganya amafaranga y’ingendo

Jules Dusabe, utuye Nyacyonga mu Murenge wa Jabana mu Karere ka Gasabo, akora mu iduka ricuruza inkweto muri Down Town (inyubako zo kuri Gare yo mu Mujyi). Avuga ko ubusanzwe byari bigoye kumenya amafaranga ashobora gutegesha ku kwezi, ku buryo rimwe na rimwe yisanganga nta na ticket (amafaranga y’urugendo) asigaranye akagera ku kazi bimugoye.

Agira ati “Urebye nta buryo bwo gutega buhoraho navuga twari dufite. Rimwe wasangaga hari umurongo munini ugatega moto, cyangwa se ubundi wagera Nyabugogo ugasanga hari ‘embuteillage’ ukavamo ugatega moto.”

Dusabe akavuga ko ibi byatumaga bigora ko wavuga uti “Nzakoresha aya njya mu kazi, bityo aya nayakoresha ibindi. Mbese wasangaga gukora igenamigambi ryawe bigora, ariko ubu nzi ko urugendo rwanjye aba ari amafaranga 695, bivuze ko kugenda no kugaruka ntegesha 1,400FRW.”

Ubu Dusabe akoresha 20,850 FRW, mu gihe batarashyiraho imihanda ya bus gusa wasanganga ategesha abarirwa hagati ya 30,000FRW na 40,000FRW, kandi akenshi bikanamwicira gahunda.

Mu gihe ubu buryo bushya bwo gutwara abantu butaraza, umuntu iyo yajyaga gushyira amafaranga ku ikarita wasangaga ashyiraho amujyana n’amucyura gusa ngo itazatakara agahomba ikarita n’amafaranga ayiriho, ubu noneho umugenzi ashobora gusaba ko ikarita ye ihuzwa n’indangamuntu ye, bityo mu gihe itakaye bakaba bamukorera indi, kandi na ya mafaranga yari ariho akagarukaho.

Dusabe ati “Ibi ni byiza cyane, kuko mu rwego rwo kwirinda gufata amafaranga ya transport ukayakoresha ibindi, ubu ushobora kuyafata ukayashyirira rimwe ku ikarita yawe nta ngingimira.”

Kuva hashyirwaho ibisate by’imihanda byahariwe bus zitwara abagenzi mu buryo bwa rusange, mu masaha abagenzi baba ari benshi, Ikigo Ecofleet giherutse gutangaza ko abagenzi bakoresha bus mu Mujyi wa Kigali bavuye ku bihumbi 150 bakagera ku bihumbi 240 ku munsi.

Ikawa y’u Rwanda yashyizeho agahigo gashya ku isoko mpuzamahanga, nyuma y’uko ikilo kimwe cyayo kigurishijwe amadolari ya Amerika 452, ni ukuvuga asaga ibihumbi 650 by’amafaranga y’u Rwanda, mu cyamunara mpuzamahanga cyabaye hifashishijwe ikoranabuhanga.

Ibi byatangajwe n’Ikigo cy’Igihugu gishinzwe guteza imbere ibyoherezwa mu mahanga bikomoka ku buhinzi (NAEB), mu itangazo cyashyizwe hanze ku wa 22 Ukwakira 2026, rivuga ko cyamunara ya Best of Rwanda 2026 yagurishijwemo ibyiciro 31 by’ikawa yihariye y’u Rwanda.

Igiciro cyo hejuru cyagezweho muri iki cyamunara cyikubye inshuro 66 ikigereranyo cy’igiciro cy’ikawa y’u Rwanda ku isoko mpuzamahanga muri iki gihe, nk’uko NAEB yabitangaje.

Abahinzi bitezweho kungukira muri aka gahigo

Evariste Karangwa, nyiri kompanyi ya K-Organics Ltd, yagaragaje ko iki ari ikimenyetso cy’uko ikawa y’u Rwanda ifite ubushobozi bwo kurushaho kuzamura ireme no guteza imbere imibereho y’abaturage bayihinga.

Yavuze ko ako gahigo afata nk’igihembo cy’icyubahiro azabikoresha mu kongera ishoramari mu buhinzi bw’ikawa, hagamijwe kunoza uburyo bwo kuyihinga no kuzamura ireme ry’umusaruro uzaboneka mu bihe biri imbere.

Yagize ati: “Iyi ntsinzi igaragaza akazi gakomeye n’umuhate dushyira mu gutanganya ikawa nziza. Kuba twamenyekanye muri ubu buryo bizamfasha gushora imari mu bikorwa byo guhinga ikawa nziza, bityo tugakomeza kunoza umusaruro no guteza imbere imibereho y’abaturage bo mu gace kanjye binyuze mu ikawa.”

Abaguzi baturutse ku migabane itandukanye

Iyi cyamunara yitabiriwe n’abaguzi mpuzamahanga baturutse mu Burayi, muri Aziya, muri Leta Zunze Ubumwe za Amerika no muri Afurika.

Ibyiciro 31 by’ikawa byagurishijwe byatoranyijwe mu byiciro 320 byari byatanzwe bivuye mu bice bitandukanye by’igihugu. Byanyujijwe mu byiciro bitatu byo gusuzuma uburyohe n’ireme ryayo, byakozwe n’abahanga b’Abanyarwanda n’abanyamahanga.

Claude Bizimana, Umuyobozi Mukuru wa NAEB, yavuze ko iki gikorwa kigaragaza akamaro k’ubufatanye hagati y’abahinzi, abohereza ikawa mu mahanga, abafatanyabikorwa n’abandi bafite uruhare mu ruhererekane rw’agaciro k’ikawa.

Yasobanuye ko igiciro cy’amadolari 452 ku kilo kigaragaza imbaraga zishyirwa mu kuzamura ireme ry’ikawa no gukurikirana inkomoko yayo, kuva ku murima w’umuhinzi kugeza ku isoko mpuzamahanga.

U Rwanda rukomeje guteza imbere ikawa yihariye

Irushanwa rya Kawa, Best of Rwanda National Specialty Coffee Competition ritegurwa buri mwaka na NAEB, ryashyizweho mu rwego rwo kumenyekanisha ikawa nziza cyane ihingwa n’abahinzi bato, kongera amahirwe yo kugera ku masoko mpuzamahanga no guteza imbere izina ry’ikawa y’u Rwanda ku rwego mpuzamahanga.

NAEB ivuga ko izakomeza gushyigikira abahinzi no kubafasha kubona andi masoko, kugira ngo ikawa y’u Rwanda ikomeze guhangana ku isoko mpuzamahanga no kongera amadovize igihugu cyinjiza binyuze mu bicuruzwa byoherezwa hanze.

Aka gahigo gashya kitezweho kongera kugaragaza ubushobozi bw’ikawa y’u Rwanda, cyane cyane iyihariye irangwa n’ireme ryo ku rwego rwo hejuru, no gufungura andi mahirwe ku bahinzi bashaka ko umusaruro wabo uhabwa agaciro gakwiye ku masoko mpuzamahanga.

Urupfu rwa Serija Majoro Kabera Robert muri Uganda rwongeye kugaragaza uburyo buteye inkeke bukoreshwa n’ibitangazamakuru bimwe byo mu Burengerazuba bw’Isi n’abarwanya u Rwanda mu kugaragaza ibyabaye ku bantu banenze Perezida Paul Kagame.

Mbere y’uko ibijyanye n’urupfu rwe bisobanuka neza, ibitekerezo bye bya politiki ni byo byabaye umutwe w’inkuru wiganje. Na none, izina ry’“unenga Kagame” rishobora gutuma ikibazo cy’ingenzi kirengagizwa: mu by’ukuri, ni iki cyabaye kandi ni nde wagize uruhare muri ibyo?

Kuri bamwe mu barwanya u Rwanda, mu bitangazamakuru byo mu Burengerazuba bw’Isi no mu biyita abaharanira uburenganzira bwa muntu, umuntu “unenga Kagame” ntiyemerewe gupfa urupfu rusanzwe. Ndetse no mu rupfu, uwo muntu agomba gukomeza gukoreshwa mu bya politiki, aho ibyamubayeho bihindurwa andi mahirwe yo gusebya ubuyobozi bw’u Rwanda.

Izina “unenga Kagame” ntirisobanurira abasomyi byinshi ku by’ingenzi Kabera Robert yavugaga, uko yavuye mu Rwanda cyangwa imiterere rusange y’ubuzima bwe.

Ikibazo si uko urupfu rw’Umunyarwanda wari utuye muri Uganda rudakwiye gukorwaho iperereza. Ahubwo ikibazo kivuka iyo ibitekerezo bya politiki n’ibirego bidafite gihamya bishyizwe imbere y’ibimenyetso bifatika, maze kuba umuntu yarigeze kurwanya Guverinoma y’u Rwanda bigafatwa nk’impamvu nyamukuru yo kuvuga ko inzego za Leta zaba zaragize uruhare mu rupfu rwe.

Kabera yari yaragiranye imibonano mpuzabitsina itemewe n’amategeko n’umwe mu bagize umuryango we. Umuntu atiriwe ajya kure, yavuga ko uyu muntu yahunze nyuma y’uko umugore we amureze icyaha cyo gusambanya umwana, nyuma yo gufata ku ngufu umukobwa we bwite.

Kabera yabwiye bamwe mu banyamakuru bo muri Uganda ko yari yarahunze u Rwanda kugira ngo yirinde ibyo yise gutotezwa. Ariko se, ibyo gutotezwa byari bimeze bite? Kuki umuntu wabarizwaga mu myidagaduro binyuze mu muziki mu gisirikare yaba yaratotezwaga?

Icyakora, ijambo “unenga Kagame” ntirisobanurira abasomyi byinshi ku by’ingenzi yavugaga, uko yavuye mu Rwanda cyangwa imiterere rusange y’ubuzima bwe. Kuki iryo jambo rero rigomba guhita rihinduka ikintu cy’ingenzi kiranga urupfu rwe?

Ibyaranze ubuzima bwa Kabera muri Uganda, abantu yari afitanye na bo imibanire ndetse n’ibikorwa bye bya politiki bishobora kuba bifite akamaro mu gusobanukirwa ibyabaye mbere y’urupfu rwe. Ariko gukekeranya ku mibereho ye cyangwa ku bantu yabanaga na bo ntibishobora gusimbura ibimenyetso bifatika. Ni na ko hagomba gukoreshwa amahame amwe mu gusuzuma ibirego byo gutotezwa n’ibirego by’uko umuntu yishwe azira politiki.

Izi mpaka zije mu gihe u Rwanda rukomeje kwagura uruhare n’icyubahiro rufite ku rwego mpuzamahanga, harimo no kuba rwaratoranyijwe kwakira isiganwa rya Formula 1 African Grand Prix mu 2030.

Ibyagezweho n’u Rwanda bikwiye gusuzumwa hashingiwe ku gaciro kabyo, aho kubirebera mu nkuru zateguwe mbere zigaragaza ko buri kibazo cyose ari gihamya y’amakosa. Ku rundi ruhande, kuba u Rwanda rukomeje kumenyekana ku rwego mpuzamahanga ntibigomba kuba impamvu yo kwirengagiza kunenga gufite ishingiro.

Ese umuntu wese unenga Kagame, yaba ari mu Rwanda cyangwa mu mahanga, yemerewe gupfa urw’ikirago?

Bisa n’aho “abanenga Kagame” badapfa; ntibemererwa gupfa ngo urupfu rwabo rudahinduka umutwe w’inkuru.

Baba bapfuye urupfu rusanzwe, bazize indwara cyangwa impanuka, urupfu rwabo ruhita ruba inkuru mpuzamahanga, bitewe gusa n’uko banenze Kagame. Urupfu rwabo ruhindurwa ingingo yo gukekeranyaho no guteza impaka, akenshi nta bimenyetso byizewe bigaragaza ko hari icyaha cyakozwe.

Ku bitangazamakuru bimwe byo mu Burengerazuba bw’Isi no ku bantu barwanya u Rwanda, umuntu unenga Kagame ntapfa. Ndetse no mu rupfu, akomeza kuba umutwe w’inkuru za politiki.

Hari ikintu kibabaje kandi gitangaje mu guhindura urupfu ikibazo cya politiki. Umuntu aba amaze gupfa, ariko ayo makuba agahita ahindurwa intwaro ikoreshwa mu bukangurambaga bwa politiki. Gushaka ukuri bigashyirwa inyuma y’icyifuzo cyo guharabika ubutegetsi.

Urupfu rw’umuntu unenga ubutegetsi ntiruhita ruba gihamya y’uko yatotezwaga na Leta, nk’uko ibikorwa bye bya politiki na byo bitagomba gutuma adahabwa ubutabera akwiye.

Kabera akwiye gukorerwa iperereza ryizewe, kandi abaryozwa urupfu rwe bakabiryozwa. U Rwanda rukwiye gucirwa urubanza rushingiye ku bimenyetso aho gushingira ku gukekeranya. Ikirenze byose, ukuri gukwiye kurindwa kurusha uko imitwe y’inkuru ihindura ibyago by’umuntu intwaro ya politiki.

Ku bitangazamakuru byo mu Burengerazuba bw’Isi, amatsinda arwanya u Rwanda n’abandi bantu bafite iyo myumvire, wenda ikibazo nyakuri bakwiye kwibaza ni iki: Ese bashobora gutangaza urupfu rw’“unenga Kagame” badahise bahindura Perezida Kagame we ubwe ingingo nyamukuru y’inkuru?

Minisitiri w’Ubutabera akaba n’Intumwa Nkuru ya Leta Emmanuel Ugirashebuja

Minisitiri w’Ubutabera akaba n’Intumwa nkuru ya Leta, Ugirashebuja Emmanuel yavuze ko u Rwanda rukomeje guteza imbere ubundi buryo bwo guhana no gukemura ibibazo mu butabera hatishingikirijwe ku gufunga abantu gusa, ahubwo hakibandwa ku guhindura imyitwarire y’abakoze ibyaha, kubafasha kwisubiraho no kunga ababa bagiranye amakimbirane.

Yabigarutseho ubwo u Rwanda rwatangira ibiganiro na Komite y’Umuryango w’Abibumbye ishinzwe uburenganzira bwa muntu i Genève mu Busuwisi, aho rwasuzumirwaga raporo yarwo ya gatanu ku ishyirwa mu bikorwa ry’Amasezerano Mpuzamahanga yerekeye Uburenganzira mu bya Politiki n’Imibereho Mbonezamubano (International Covenant on Civil and Political Rights – ICCPR).

Minisitiri Ugirashebuja yagaragaje ko hagati ya 2022 na 2026, mu Rwanda hakemuwe imanza 38.084 hifashishijwe uburyo bwo kumvikana ku bihano hagati y’ubushinjacyaha n’uregwa (plea bargaining), ndetse no guhuza uwakoze icyaha n’uwagikorewe hagamijwe kumvikana no gukemura amakimbirane (victim–offender mediation).

Abunzi

Mu bindi yabwiye iyi Komite ya Loni, harimo ko abasaga ibihumbi 23 barekuwe by’agateganyo kandi hagati ya 2016 na 2026 (parole), mu gihe abandi 1.028 bahawe imbabazi za Perezida wa Repubulika.

Muri ibi biganiro, u Rwanda kandi rwagaragaje intambwe rumaze gutera mu guteza imbere, kurengera no kubahiriza uburenganzira bwa muntu, rukanagaragaza imbogamizi rugihura na zo ndetse n’ingamba zo kurushaho kunoza imikorere mu bijyanye n’uburenganzira mu bya politiki n’imibereho mbonezamubano.

Iyi raporo isuzumwa hashingiwe ku masezerano mpuzamahanga ya ICCPR, ateganya amahame ibihugu byashyizeho umukono bigomba gukurikiza mu kurengera uburenganzira bw’ibanze bwa muntu.

Muri ubwo burenganzira harimo uburenganzira bwo kubaho, ubwisanzure n’umutekano bya muntu, uburinganire imbere y’amategeko, uburenganzira bwo guhabwa ubutabera buboneye, ubwisanzure bwo gutanga ibitekerezo n’ubwo guterana mu mahoro.

Komite y’Umuryango w’Abibumbye ishinzwe uburenganzira bwa muntu isuzuma raporo zitangwa n’ibihugu kugira ngo irebe uko byubahiriza inshingano byiyemeje muri aya masezerano. Ibiganiro bituma ibihugu bisobanura ibyo byagezeho, bigasubiza ibibazo by’abagize Komite, ndetse bikungurana ibitekerezo ku buryo bwo gukemura ibibazo bikigaragara.

Iyi gahunda ni imwe mu nzira z’ubugenzuzi mpuzamahanga zigamije gufasha ibihugu kurushaho kubahiriza uburenganzira bwa muntu no kunoza amategeko, politiki n’imikorere y’inzego zibishinzwe.

Ibiganiro u Rwanda rwagiranye na Komite wabaye umwanya wo gusuzuma ibyagezweho, kugaragaza ibikenewe kunozwa no kungurana ibitekerezo ku ngamba zafasha kurushaho guteza imbere uburenganzira mu bya politiki n’imibereho mbonezamubano.

Inzira z’indege (Airways) n’iz’imodoka zitandukaniye cyane cyane ku buryo zitegurwa, zigaragazwa, n’uko zigenzurwa n’amategeko azigenga. Imodoka zigendera ku mihanda yubatswe ku butaka, mu gihe indege zikoresha ikirere, aho inzira zazo zitegurwa hashingiwe ku mutekano, ubuyobozi bw’ikirere, ubutumburuke indege igenderaho n’imikorere y’ikoranabuhanga riyiyobora.

Mu busanzwe Inzira z’imodoka ni imihanda ifatika yubatswe ku butaka, ifite imirongo y’umuhanda, ibyapa, amatara bifasha abashoferi kumenya aho banyura. Abashoferi bagenda cyangwa batwara bakurikije amategeko y’umuhanda, ibyapa, umuvuduko wagenwe n’amabwiriza y’abashinzwe umutekano wo mu muhanda. Ariko Imihanda ishobora kugira inzira zihariye, nk’iz’abanyamaguru, amagare cyangwa imodoka zitwara abantu benshi.

Mu gihe inzira z’indege zo zitagaragara nk’imihanda ifatika mu kirere kuko zigaragarizwa ku makarita y’indege no muri sisitemu ziyobora indege. Zigabanyijemo ibice by’ikirere bifite amategeko yabyo, n’inzira z’indege. Indege igenzurwa n’abapilote bafatanyije n’abashinzwe kugenzura urujya n’uruza rw’indege (air traffic controllers), bitewe n’aho igenda n’ubwoko bw’ikirere irimo. Ikindi ni uko indege zigomba kubahiriza intera n’ubutumburuke bwazo, kugira ngo hirindwe kugongana n’izindi.

Indege kandi ntigendera ku murongo umwe uhoraho nk’imodoka iri mu muhanda. Inzira yayo ishobora guhinduka bitewe n’ikirere, umutekano, ubwinshi bw’indege, amabwiriza y’abagenzura urujya n’uruza cyangwa ibibazo byihutirwa.

Impuguke mu Micungire y’Indege n’Ibibuga (Expert in Airline and Airport Management), Emmy Arsonval Maniriho, avuga ko inzira z’indege zigenwa hakurikijwe imiterere y’ikirere, ibikoresho bifasha mu kuziyobora, aho zinyura n’amabwiriza agenga umutekano wazo.

Ati “Hari inzira zikoreshwa cyane mu ngendo ndende, izikoreshwa mu kwegera ibibuga by’indege n’izifasha indege kugera ku nzira y’umuhanda izamanukiraho (runway). Si inzira zose z’indege ziba zigaragara nk’umuhanda uhamye mu kirere. Ahubwo, indege ikurikiza inzira yateguwe kandi yemerewe, ikoresheje ibikoresho byo kuyiyobora, amabwiriza y’abashinzwe kugenzura ingendo zo mu kirere n’amabwiriza y’umutekano.”

Iyi mpuguke kandi ivuga ko muri izo nzira indege zishobora kunyuranaho mu kirere, ariko ntibikorwa nk’uko imodoka zinyuranaho mu muhanda, kuko umutekano wazo ushingira ku gutandukanya indege hakurikijwe ubuhagarike (vertical separation), intera iri hagati yazo mu buryo butambitse (horizontal separation) cyangwa igihe zifata hagati yazo.

Ati “Indege imwe ishobora kuba iri ku butumburuke bwa metero 10,000, indi ikaba iri kuri metero 11,000, igihe ubwo butandukane buhuye n’amabwiriza akurikizwa. Mu bindi bihe, zishobora guhabwa inzira zitandukanye cyangwa zigatandukanywa n’intera n’igihe. Abashinzwe kugenzura ingendo zo mu kirere ni bo akenshi baha abapilote amabwiriza yo gutandukanya indege.”

Ariko ngo hari n’uburyo indege zifashisha mu kwirinda kugongana, burimo sisitemu y’ikoranabuhanga yo mu ndege itahura izindi ndege ziyegereye, ikaburira abapilote, kandi igihe bibaye ngombwa, ikabaha amabwiriza y’uko bazamuka cyangwa bamanuka kugira ngo birinde kugongana (Traffic Alert and Collision Avoidance System /TCAS)).

Muri rusange indege inzira z’indege zigengwa n’amahame mpuzamahanga y’indege yashyizweho n’Ishami ry’Umuryango w’Abibumbye ryita ku by’Indege za Gisivili (ICAO), hamwe n’amategeko y’igihugu buri ndege irimo kugurukiramo.

Harimo ‘Annex 2 — Rules of the Air’: Aya ni amategeko rusange agenga kuguruka kw’indege. Asobanura uko indege zigomba kugenda, uko abapilote bagomba kubahiriza amabwiriza, n’uburyo bwo kwirinda kugongana.

Haza kandi ‘Annex 11 — Air Traffic Services: Iyi igenga serivisi zifasha mu kugenzura urujya n’uruza rw’indege, harimo kugena inzira, gutanga amabwiriza ku bapilote no guhuza ibikorwa by’indege ziri mu kirere. Hakabamo na ‘PANS-ATM (Doc 4444)’: Aya ni amabwiriza arambuye agenga imikorere yo gucunga urujya n’uruza rw’indege, harimo uburyo abagenzura indege n’abapilote bavugana n’uko indege zihabwa uburenganzira bwo kunyura mu nzira runaka.

Mu Rwanda, Urwego rw’Igihugu rushinzwe Ubugenzuzi bw’Indege za Gisivili (RCAA) ni rwo rugenzura iyubahirizwa ry’amategeko agenga ingendo zo mu kirere. Mu mategeko y’ingenzi harimo:

RCAR Part 40 — Rules of the Air: Ni amategeko agenga uko indege zigenda mu kirere. RCAR Part 22 — Air Traffic Services: Akaba amategeko agenga serivisi zo kugenzura urujya n’uruza rw’indege, mu gihe RCAR Part 23 — Visual and Instrument Flight Procedures Design: ari amategeko agenga imiterere y’inzira n’uburyo bwo kuyigenderamo hakoreshejwe kureba cyangwa ibikoresho by’indege.

Mu Rwanda kandi, izi ngendo zikorwa hakurikijwe amahame ya ICAO, hamwe n’amabwiriza yihariye agaragazwa mu nyandiko zemewe z’amakuru y’indege z’Igihugu.

Maniriho avuga ko mu kirere hataba ibyapa by’umuhanda bisanzwe bigaragarira abapilote nk’ibiboneka ku mihanda isanzwe y’imodoka, kuko abapilote bakoresha amakarita y’indege, ibikoresho by’ikoranabuhanga bibafasha kumenya aho bari, ibimenyetso by’itumanaho n’amabwiriza bahabwa n’abagenzura ingendo zo mu kirere.

Ati “Ku kibuga cy’indege ho haba ibyapa, imirongo n’ibimenyetso bigenga uko indege zigenda ku butaka (taxiways), aho zihagarara n’aho zinjirira cyangwa zisohokera ku nzira z’indege. Ibyo bifasha abapilote kugera ku nzira yo guhagurukiraho no kuyivamo batabangamiye izindi ndege. Ni ukuvuga ko mu kirere hakoreshwa cyane amakuru y’ikoranabuhanga n’itumanaho, mu gihe ku butaka hakoreshwa n’ibimenyetso bigaragara.”

Burya indege na zo zigira umuvuduko ntarengwa zigomba kubahirizwa, ariko hakagenderwa ku bwoko bw’indege, ubutumburuke iriho, amabwiriza y’ahantu igurukira n’imiterere y’ikirere.

Maniriho ati “Mu bihugu byinshi, indege zigenda munsi y’ubutumburuke bwa metero hafi 3,050, ni ukuvuga metero 10,000, zisanzwe zigengwa n’umuvuduko ntarengwa wa 250 knots, uhwanye na kilometero hafi 463 ku isaha. Ariko hari aho amategeko ashobora gutandukana, hakaba n’ibidasanzwe byemewe. Indege nini zitwara abagenzi zishobora kugenda ku muvuduko uri hejuru cyane iyo ziri ku butumburuke bwo hejuru. Zishobora kugera ku muvuduko wa kilometero 800–900 ku isaha cyangwa kurenga, bitewe n’ubwoko bwazo n’imiterere y’urugendo.”

Umuvuduko urenze uwemewe ushobora guteza ibyago bikomeye, cyane cyane igihe indege iri hafi y’ikibuga cy’indege, mu gihe cyo kumanuka cyangwa mu gihe iri mu kirere kirimo imivurungano (turbulence).

Umuvuduko ukabije ushobora gutuma indege igorwa no gukurikiza amabwiriza yo guhindura icyerekezo, kugabanya umuvuduko cyangwa gukomeza gutandukana n’izindi ndege. Iyo indege igeze mu bihe bidasanzwe, kurenza umuvuduko wagenwe bishobora no kwangiza imiterere yayo.

Mu nzira z’indege hashobora kubamo imivurungano (turbulence), ituma indege inyeganyega cyangwa izamuka ikamanuka mu buryo butunguranye. Ibi rimwe na rimwe abantu bashobora kubigereranya n’umuhanda ufite ibinogo, ariko mu by’ukuri nta binogo biba mu kirere.

Iyo imivugurungano (turbulence) ibaye, indege ishobora kunyeganyega cyane, ariko abapilote baba baratojwe uko babyitwaramo. Ni yo mpamvu abagenzi bagirwa inama yo gukomeza kwambara umukandara igihe cyose bicaye, n’iyo itara ribasaba kuwambara ryaba ryazimye.

Icyo abantu bakwiye kumenya, ni uko kugenda mu ndege bigengwa n’amategeko n’uburyo bw’umutekano bwubahirizwa ku rwego mpuzamahanga no ku rwego rwa buri gihugu. Nubwo mu kirere hataba imihanda ifite ibinogo cyangwa ibyapa bisanzwe nk’ibyo ku butaka, hari uburyo buhamye bwo kuyobora indege, kuzigumisha mu ntera itekanye no kugenzura imikorere y’abapilote.

Abapilote bahabwa amahugurwa ahambaye, bagasabwa kugira impushya zemewe kandi bagakurikiranwa n’inzego zibifitiye ububasha. Intego y’ayo mategeko si uguhana gusa, ahubwo ni ugukumira amakosa, kurinda ubuzima bw’abagenzi n’abakozi no gutuma ingendo zo mu kirere zikomeza kugira umutekano usesuye.

Umunyabigwi mu mukino wo gusiganwa mu tumodoka duto, Formula 1, Lewis Hamilton ukinira ikipe ya Ferrari, yatangaje ko atazahagarika uyu mwuga adakiniye iri siganwa ku mugabane wa Afurika, avuga ko ari zimwe mu nzozi akomeje guharanira gusohoza.

Hamilton, wegukanye shampiyona ya Formula 1 inshuro zirindwi, yagaragaje ko yifuza cyane kuzitabira isiganwa rya African Grand Prix rizabera mu Rwanda mu 2030.

Uyu mugabo w’imyaka 41, bivuze ko ashobora kuzaba afite hafi imyaka 45, bitewe n’igihe rizabera. Nubwo bimeze bityo, Hamilton agaragaza ko afite ubushake bwo gukomeza gukina kugeza igihe aboneye amahirwe yo gukinira Formula 1 muri Afurika.

Lewis Hamilton yagize ati: “Ubu ngomba kongeraho ikindi gihe cyo kuba ngisihanwa, kuko dufite isiganwa rizabera muri Afurika. Kandi izo ni zo nzozi zanjye kuba nakinira isiganwa muri Afurika.”

Uyu munyabigwi amaze igihe agaragaza ko Afurika ikwiye kongera kwakira isiganwa rya Formula 1, kuko ari umwe mu migabane ifite abakunzi benshi b’uyu mukino ariko ukaba imaze imyaka myinshi warasigajwe inyuma.

U Rwanda rwagiranye amasezerano y’imyaka 10 na Formula 1 yo kwakira iri rushanwa rikomeye ryo gusiganwa mu modoka, rikazatangira kujya kuri kalendari y’amarushanwa mu 2030 nyuma yo kubakwa k’umuhanda wihariye hafi y’Ikibuga cy’Indege Mpuzamahanga cya Bugesera.

Isiganwa rya nyuma rya Formula 1 ryaherukaga kubera ku mugabane wa Afurika ni Grand Prix yo muri Afurika y’Epfo, yabereye hafi y’Umujyi wa Johannesburg mu 1993. Icyo gihe Lewis Hamilton, wegukanye, yari afite imyaka umunani gusa.

Kwakira iri rushanwa byitezweho kongerera u Rwanda amahirwe yo kugaragara ku ruhando mpuzamahanga, gukurura ba mukerarugendo no guteza imbere ibikorwa by’ubukungu bifitanye isano na siporo.

Nubwo itariki nyayo n’ibisabwa byose kugira ngo iri siganwa ribe bigitegerejwe, icyifuzo cya Hamilton kigaragaza ko gahunda yo kugarura Formula 1 muri Afurika ishobora kugira igikundiro gikomeye mu bakinnyi no mu bakunzi b’uyu mukino.

Isoko rito ry’abamamaza kuri murandasi, ibyemezo by’abafite imbuga nkoranyambaga n’uburyo bwo kwishyura abakora ibikubiyemo ni zimwe mu ngingo z’ingenzi zigarukwaho mu gusobanura impamvu abakora ibikubiyemo bo mu Rwanda batarabasha kwinjiza amafaranga mu buryo bwuzuye binyuze kuri YouTube, Facebook, Instagram na TikTok.

Mu gihe ikoreshwa ry’imbuga nkoranyambaga rikomeje kwiyongera ku Isi, kuzikoresha ntibikiri uburyo bwo gusabana, kumenyekanisha ibicuruzwa cyangwa gusangiza abandi amakuru gusa, ahubwo byahindutse umwuga ushobora kubyarira ababikora amafaranga.

Mu bihugu bimwe na bimwe, abahanzi, abanyamakuru, abanyarwenya, abakora amashusho n’abandi banyabukorikori binjiza amafaranga binyuze mu matangazo yamamazwa ku mashusho yabo, mu bigenerwa abafana bishyura, ndetse no mu zindi gahunda zitandukanye zishyirwaho n’imbuga nkoranyambaga.

Icyakora, ku bakora ibikubiyemo benshi bo mu Rwanda, gukorera amafaranga kuri izo mbuga biracyari imbogamizi. Nubwo bashobora kugira ababakurikira benshi, amashusho yabo akarebwa n’abantu ibihumbi cyangwa miliyoni, ntibivuze ko bahita bemererwa kwinjiza amafaranga binyuze muri gahunda z’imbuga nkoranyambaga.

Iki kibazo cyongeye kugarukwaho ku wa Gatatu tariki 21 Ukwakira ubwo Perezida Kagame yahuraga n’urubyiruko mu gikorwa cyiswe Youth #MeetThePresident nk’uko nubundi cyari cyavuzweho mu nama y’Igihugu y’Umushyikirano yabaye ku wa 5 - 6 Gashyantare 2026, ubwo umuhanzi Bruce Melodie yasabaga ko hashakwa igisubizo cyafasha Abanyarwanda kubyaza umusaruro ibikubiyemo bashyira ku mbuga nkoranyambaga.

Mu gusubiza iki kibazo, Minisitiri w’Ikoranabuhanga na Inovasiyo, Paula Ingabire, yasobanuye ko imbuga nkoranyambaga zifite ibisabwa zigenderaho mbere yo gufungura uburyo bwo kwinjiza amafaranga mu gihugu runaka.

Yagaragaje ko u Rwanda rwakoze byinshi mu birebana n’amategeko, kurinda amakuru bwite y’abaturage n’uburyo bwo kwishyura, ariko ko isoko ry’amafaranga ashorwa mu kwamamaza kuri murandasi rikiri imwe mu mbogamizi zikomeye.

Monetization ni iki, kandi ikora ite?

Monetization ni uburyo bwo kwinjiza amafaranga binyuze mu bikorwa ukorera ku rubuga runaka rwa murandasi.

Ku mbuga nka YouTube, Facebook na Instagram, amafaranga ashobora kuva ku matangazo y’ubucuruzi agaragara ku mashusho cyangwa ku bindi bikubiyemo, mu gihe hari gahunda yemewe yo kugabana ayo mafaranga n’ababikoze.

Ku zindi gahunda, abakora ibikubiyemo bashobora guhembwa hashingiwe ku mikorere y’amashusho yabo, cyangwa bakinjiza amafaranga binyuze ku bafana bishyura kugira ngo babone ibintu byihariye bishyirwa kuri izo mbuga.

Icyakora, uburyo bwo guhemba buratandukanye bitewe n’urubuga. Kuba amashusho afite abantu benshi bayareba cyangwa konti ikagira abayikurikira benshi ntibihagije kugira ngo nyirayo ahite ahembwa.

Urubuga rushobora kubanza gusuzuma igihugu umuntu akoreramo, kuba gahunda yo guhemba iboneka muri icyo gihugu, umubare w’abakurikira urwo rubuga cyangwa abantu barebye ibikubiyemo, umwimerere wabyo, kubahiriza amategeko y’urubuga n’uburyo bwo kwakira amafaranga.

Bityo, ikibazo cy’abakora ibikubiyemo mu Rwanda ntikireba gusa umubare w’abareba ibyo bashyiraho, ahubwo kinareba niba igihugu n’abakoresha izo mbuga bujuje ibisabwa na gahunda zihari.

Isoko ry’abamamaza ritaragera ku rwego rukenewe

Imwe mu mpamvu zikomeye zagarutsweho mu bisobanuro byatanzwe na Minisitiri Paula Ingabire ni ubushobozi bw’isoko ry’amamaza kuri murandasi.

Imbuga nkoranyambaga zibyaza amafaranga menshi amatangazo y’ubucuruzi. Ibigo bishaka kumenyekanisha ibicuruzwa na serivisi zabyo byishyura kugira ngo amatangazo yabyo agere ku bantu bishaka ko bigeraho.

Amafaranga aturuka kuri ayo matangazo ni yo aba isoko ry’ingenzi rishobora gutuma urubuga rugabana inyungu n’abakora ibikubiyemo.

Iyo isoko ry’igihugu ridafite ibigo byinshi byamamaza kuri murandasi cyangwa amafaranga ashorwa muri ubwo buryo akaba akiri make, urubuga rushobora kubona ko rudafite inyungu zihagije zo gufungura gahunda yo guhemba abakoresha barwo muri icyo gihugu.

Mu biganiro byabaye mu Nama y’Igihugu y’Umushyikirano, Minisitiri Ingabire icyo gihe yavuze ko hakenewe isoko ry’amafaranga agera kuri miliyoni imwe kugeza kuri miliyoni imwe n’igice z’amadolari ya Amerika ashorwa mu kwamamaza kuri izi mbuga.

Aya mafaranga agaragaza ingano y’isoko ry’amamaza ryagarutsweho mu bisobanuro byatanzwe icyo gihe. Icyakora, ntibikwiye gufatwa nk’amategeko rusange ashyirwaho n’imbuga zose, kuko buri rubuga rushobora kugira uburyo n’ibipimo byihariye rukoresha.

Mu Rwanda, hari ibigo byamamaza binyuze kuri internet, ariko ikibazo ni ukumenya niba amafaranga bishyura kuri izi mbuga ahagije kugira ngo izo sosiyete z’ikoranabuhanga zibone inyungu yo kwagura gahunda zo guhemba abakora ibikubiye muri ibyo bishyirwa ku mbuga.

Ni yo mpamvu kongera umubare w’ibigo byamamaza, kubishishikariza gukoresha imbuga nkoranyambaga no kongera amafaranga bishyira muri ubwo buryo bishobora kugira uruhare mu gukemura iki kibazo.

Umubare w’abakoresha imbuga nkoranyambaga n’agaciro k’isoko ry’u Rwanda

Ikindi kintu gishobora kwitabwaho ni ubunini bw’isoko ry’igihugu n’agaciro karyo mu bucuruzi bwo kwamamaza kuri murandasi.

Imbuga nkoranyambaga zishobora kureba umubare w’abantu bakoresha serivisi zazo, aho abo bantu baherereye, uko bitabira ibikubiyemo ndetse n’ubushobozi bw’isoko ryo kwamamaza.

Ibi ntibivuze ko u Rwanda rudafite abakoresha imbuga nkoranyambaga cyangwa ko ibikubiyemo bikorerwa mu Rwanda bidashimisha abantu. Ahubwo, ikibazo ni ukumenya niba isoko ry’ubucuruzi riri inyuma y’abo bazikoresha rihagije kugira ngo gahunda yo kubaha amafaranga ibeho mu gihe kirambe kandi ibyare inyungu.

Urugero, amashusho y’umunyarwanda ashobora kurebwa n’abantu benshi bo mu Rwanda, ariko niba ibigo byamamaza bitishyura bihagije kugira ngo ayo mashusho agaragareho amatangazo, umubare w’abayareba wonyine ntutanga amafaranga ahagije.

Ku rundi ruhande, amashusho arebwa n’abantu bo mu bihugu bifite isoko rinini ry’amamaza ashobora kubyara amafaranga bitewe n’aho abareba baherereye, ubwoko bw’amatangazo ashyirwaho n’andi mabwiriza agenga urubuga.

Ibi bituma abakora ibishyirwa kuri izo mbuga nkoranyambaga mu Rwanda bashobora kugira abantu benshi babakurikira ariko bakagorwa no kwinjiza amafaranga mu buryo bumwe n’abakora nkabyo bo mu bindi bihugu.

Ese amategeko n’uburyo bwo kwishyura ni byo bikibura?

Minisitiri Paula Ingabire, yavuze ko u Rwanda rwakoze ibikenewe mu bijyanye no kurinda amakuru bwite y’abaturage, imisoro, ibikorwa remezo by’ikoranabuhanga n’uburyo bwo kwishyura.

Ibi ni ingenzi kuko sosiyete z’ikoranabuhanga zikenera kumenya ko zishobora gukora mu gihugu runaka mu buryo bwubahiriza amategeko kandi ko amafaranga zigenera abazikoresha azagera ku bayagenewe.

Hari ibintu byinshi bishobora kurebwa muri uru rwego, birimo amategeko agenga amakuru bwite, uburyo bwo kumenya umwirondoro w’uwishyurwa, ibisabwa mu misoro, ubufatanye n’ibigo by’imari ndetse n’uburyo bwo kohereza amafaranga mu bihugu bitandukanye.

Aha niho Minisitiri Paula yagize ati: "Izi mbuga nkoranyambaga zishyura Abantu mu buryo butandukanye harimo Stripe na Pay Pal, ibyo bigo uko ari bibiri bigenda binyura mu bufatanye n’ibigo by’imari by’umwihariko amabanki yo mu Gihugu, twagiye tuvugana n’ibigo by’imari bitandukanye, amakuru ahari ni uko Equity Bank uyu munsi irimo kuvugana na Pay Pal kugirango bemeze ubwo bwishyu, aho abakora ibijya ku mbuga nkoranyambaga babashe kuba bakwishyurwa."

Iyo ibyo byose iyo bikora neza, bigabanya imbogamizi zishobora gutuma urubuga rudashaka gutangira kwishyura abakora ibirushyirwaho bo muri icyo gihugu. Icyakora, kuba igihugu gifite amategeko n’uburyo bwo kwishyura ntibihita bivuga ko urubuga rugomba gufungura monetization ako kanya.

Sosiyete zifite imbuga nkoranyambaga zigena ubwazo ibihugu zikoreramo gahunda zo guhemba abazikoresha, zikurikije uburyo izo gahunda ziteguwe n’ingamba z’ubucuruzi zazo.

Ni yo mpamvu, nubwo u Rwanda rushobora kuba rwarujuje byinshi mu bisabwa ku rwego rw’igihugu, hakenewe n’imikoranire n’abafite izo mbuga kugira ngo hemezwe niba gahunda zihariye zo guhemba abakoresha zishobora gutangizwa.

Kuki YouTube itarafungura monetization yuzuye mu Rwanda?

YouTube ni rumwe mu mbuga zikoreshwa cyane n’abahanzi, abanyamakuru, abakora ibiganiro, abanyarwenya n’abandi bashaka kugera ku bantu benshi.

Abakora ibishyirwaho bashobora kwinjiza amafaranga binyuze muri YouTube Partner Program (YPP), ibemerera kugabana amafaranga ava ku matangazo no gukoresha izindi gahunda zemewe n’urubuga. Ariko kugira ngo umuntu yinjire muri iyo gahunda, hari ibisabwa agomba kuzuza.

Mbere na mbere, agomba kuba atuye mu gihugu cyangwa akarere YouTube Partner Program ibonekamo. Agomba kandi kubahiriza amabwiriza agenga uburyo bwo guhemba, kugira konti idafite ibihano bibangamira kwinjira muri iyo gahunda, no kuzuza ibisabwa mu bijyanye n’umubare w’abakurikira urwo rubuga n’abantu barebye ibirushyirwaho.

Ku mashusho asanzwe, kimwe mu bipimo bizwi ni kugira nibura abafatabuguzi (Subscribers) 1,000 n’amasaha 4,000 amashusho rusange yarebwe mu mezi 12 ashize. Ku mashusho magufi ya Shorts, hari ubundi buryo busaba abafatabuguzi 1,000 n’imibare yihariye y’ayo mashusho arebwa mu minsi 90.

Ibyo bipimo ntibisimbura ibisabwa by’igihugu: umuntu ashobora kubyuzuza ariko ntabashe kwinjira muri iyo gahunda niba igihugu arimo kitarimo ku rutonde rw’ibyemerewe.

Mu makuru ya YouTube arebana n’ibihugu byemerewe gahunda ya Partner Program, u Rwanda ntiruri ku rutonde rw’ibihugu byemerewe kwinjira muri gahunda isanzwe yo kugabana amafaranga ava ku matangazo.

Ibi ni byo bituma kuba urubuga rw’umunyarwanda ufite abamukurikira benshi n’amashusho arebwa n’abantu benshi bidahita bivuga ko ushobora kwinjira muri iyo gahunda.

Amakuru ajyanye n’ibihugu byemerewe ashobora guhinduka, bityo abakora ibikubiyemo bakwiye gukurikirana ibisobanuro bitangwa na YouTube ari n’aho Minisitiri Paula yavuze ko u Rwanda ruzakomeza kuba maso kugira ngo iyo gahunda niyongera guhitamo ibihugu, narwo izaruhereho.

Kuki Facebook na Instagram na byo bitaratanga uburyo bwuzuye bwo guhemba Abanyarwanda?

Facebook na Instagram, byombi biri muri sosiyete ya Meta, bifite gahunda zitandukanye zifasha abakora ibikubiye ku mbuga nkoranyambaga kwinjiza amafaranga.

Harimo uburyo bwo kugabana amafaranga ava ku matangazo, gahunda zifasha abafana gushyigikira abakora ibijya kuri izo mbuga nkoranyambaga n’imikoranire hagati y’abakora ibizishyirwaho n’ibigo byamamaza.

Ariko izo gahunda ntiziboneka mu buryo bumwe mu bihugu byose.

Meta igena ibihugu n’uturere byemerewe gukoresha buri gahunda, kandi hari igihe umuntu agomba kuba atuye mu gihugu cyemerewe, afite konti yujuje ibisabwa kandi yubahiriza amabwiriza agenga monetization.

Ku bijyanye na Facebook Content Monetization, u Rwanda ntirwari ku rutonde rw’ibihugu byemerewe iyo gahunda nk’uko bigaragara ku makuru ya 2026.

Ibi bivuze ko kugira urubuga cyangwa page ya Facebook rufite abarukurikira benshi, amashusho menshi arebwa cyangwa abantu benshi bakunda ibyo urushyiraho bidahagije kugira ngo nyirarwo ahite ahabwa uburenganzira bwo gutangira kwishyurwa na Meta.

Ku rundi ruhande, abakora ibishyirwa kuri izo mbuga nkoranyambaga bashobora gukorana n’ibigo byamamaza, bakishyurwa kugira ngo bamenyekanishe ibicuruzwa cyangwa serivisi, nubwo gahunda yo kwishyurwa na Facebook ubwayo yaba itarabafungurirwa.

TikTok na yo ntirafungura gahunda yayo yo guhemba abayikoresha mu Rwanda

TikTok ni urubuga rufite uruhare rukomeye mu kumenyekanisha abahanzi, abanyarwenya, ababyinnyi n’abandi bakora amashusho magufi.

Abantu benshi bashobora kwamamara mu gihe gito bitewe n’amashusho bashyiraho, ariko kwamamara ntibihita bisobanura ko batangira guhembwa n’uru rubuga.

TikTok ifite gahunda zitandukanye zo gufasha abakora ibijyaho kubona amafaranga, ariko izo gahunda zifite ibisabwa byihariye kandi ntiziboneka mu bihugu byose.

Urugero, Creator Rewards Program ni imwe muri gahunda zishyura abakora amashusho yujuje ibisabwa, ariko iboneka gusa mu bihugu byatoranyijwe na TikTok.

Nyuma y’Inama y’Igihugu y’Umushyikirano ya 2026, hahjse hakwirakwira amakuru yavugaga ko TikTok yari yamaze gufungura monetization ku bayikoresha bari mu Rwanda. Aya makuru ariko yaje guhakanwa Minisiteri y’Ikoranabuhanga na Inovasiyo.

Ibi bigaragaza ko abakora amashusho bashyira kuri TikTok batagomba kwitiranya kuba konti yabo ifite abantu benshi bayireba no kuba bemerewe kwinjira muri gahunda yihariye yo guhembwa na TikTok.

Ni uruhe ruhare rw’ibigo by’ubucuruzi mu gukemura iki kibazo?

Nubwo hakunze kwibazwa icyo Leta yakora kugira ngo Abanyarwanda batangire kwinjiza amafaranga ku mbuga nkoranyambaga, ibigo by’ubucuruzi na byo bifite uruhare rukomeye. Iyo ikigo gishoye amafaranga mu kwamamaza kuri murandasi, kiba gifasha isoko ry’ayo matangazo kwaguka.

Ibigo bishobora kwamamaza binyuze kuri Facebook, Instagram, YouTube n’izindi mbuga, bigakorana n’abakora ibishyirwa kuri izo mbuga kugira ngo bigere ku bakiriya benshi. Uko ibigo byinshi byitabira ubu buryo, ni ko amahirwe yo kongera amafaranga ashorwa mu kwamamaza kuri murandasi yiyongera.

Ibi bishobora kugira uruhare mu gutuma amasoko y’ibihugu arushaho gukurura sosiyete z’ikoranabuhanga zishaka kwagura gahunda zo guhemba abakoresha imbuga nkoranyambaga zazo.

Ni yo mpamvu ubukangurambaga bugenewe ibigo by’ubucuruzi, inzego za Leta, ibitangazamakuru n’abandi bashoramari kugira ngo bashishikarizwe kwamamaza kuri murandasi nk’ishoramari rifite inyungu.

Leta yakora iki kugira ngo u Rwanda rubashe kwemererwa monetization?

Kugira ngo iki kibazo gikemuke, hakenewe ubufatanye hagati ya Leta, ibigo by’ubucuruzi, abakora ibijya kuri izo mbuga nkoranyambaga.

Icya mbere ni uguteza imbere isoko ry’amamaza kuri murandasi. Leta n’abafatanyabikorwa bashobora gushishikariza ibigo by’ubucuruzi kongera amafaranga bishora mu kwamamaza kuri murandasi no gukoresha imbuga nkoranyambaga mu kumenyekanisha ibicuruzwa na serivisi.

Icya kabiri ni ibiganiro bihoraho n’abafite imbuga nkoranyambaga. U Rwanda rushobora gukomeza ibiganiro na sosiyete nka Google, Meta na TikTok kugira ngo rusobanukirwe neza ibisabwa kuri buri gahunda, ibitaruzuzwa n’ingamba zishobora gufasha kwihutisha ibyemezo.

Ibi Minisitiri Paula yabigarutseho agira ati: "Ibyo bigo byose twavuganye nabyo, bimwe bigenda bitugaragariza ko izo gahunda babaye bazihagaritse nizisubukurwa u Rwanda ruzagerwaho, icyo twakora rero ni ugukora uburyo tugomba guhora twiteguye, ibyo bigo nibyongera gusubizaho iyo gahunda n’u Rwanda rugemo."

Icya gatatu ni ugukomeza guteza imbere uburyo bwo kwishyura no kubahiriza amategeko.

Nubwo Minisitiri Ingabire yavuze ko hari byinshi u Rwanda rwamaze kuzuza, ni ngombwa gukomeza gukorana n’ibigo by’imari n’abatanga serivisi zo kwishyura kugira ngo uburyo bwo kohereza amafaranga ku bakora ibikubiyemo burusheho kwizerwa no koroshya ibikorwa.

Icya kane ni uguteza imbere umwuga wo gukora ibijya kuri izo mbuga nkoranyambaga.

Abakora ibizishyirwaho bakwiye kongera ubumenyi mu gukora amashusho afite ireme, kurinda uburenganzira ku bihangano, kumenya amategeko y’imbuga nkoranyambaga no gukora ibijyaho by’umwimerere.

Ibi ntibihita bifungura monetization mu gihugu, ariko bifasha abakora ibijya kuri izo mbuga kuba biteguye igihe gahunda zizaba zibafunguriwe.

Icya gatanu ni uguteza imbere ibijya kuri izo mbuga nkoranyambaga bigera ku isoko mpuzamahanga.

Gukora ibijya kuri izo mbuga byiza mu Kinyarwanda, Icyongereza, Igifaransa cyangwa izindi ndimi zifasha kugera ku bantu batandukanye bishobora gufasha abakora ibikubiyemo bo mu Rwanda kwagura umubare w’ababakurikira.

Icyakora, kugera ku bantu bo mu bindi bihugu ntibihita bihesha umuntu uburenganzira bwo kwinjira muri gahunda itaraboneka mu gihugu akoreramo.

Ese Abanyarwanda bakwiye gutegereza gusa monetization?

Nubwo gahunda zo kwishyurwa n’imbuga nkoranyambaga zitarafungurirwa Abanyarwanda mu buryo bwuzuye, hari ubundi buryo bwo kwinjiza amafaranga binyuze mu byo bakorera kuri murandasi.

Uburyo bwa mbere ni ugukorana n’ibigo byamamaza. Ikigo gishobora kwishyura umuhanzi, umunyamakuru, umunyarwenya cyangwa undi ukora ibijya ku mbuga nkoranyambaga kugira ngo amenyekanishe ibicuruzwa byacyo.

Ubundi buryo ni ukugurisha ibicuruzwa cyangwa serivisi ukoresheje imbuga nkoranyambaga. Urugero, umuntu ashobora gukoresha amashusho mu kwamamaza imyenda, serivisi z’ubugeni, amahugurwa, ubujyanama cyangwa ibindi bikorwa by’ubucuruzi.

Hari kandi uburyo bwo gukorana n’ibigo cyangwa imiryango ikenera abantu bafite ubushobozi bwo gukora amashusho, amajwi, ibiganiro cyangwa ibindi bijyanye nabyo.

Ibi bitandukanye na monetization itangwa n’urubuga, kuko amafaranga aturuka ku bakiriya cyangwa ku bigo byamamaza aho guturuka kuri gahunda yo kugabana amafaranga y’amatangazo y’urubuga.

Abakora ibijya ku mbuga nkoranyambaga bakwiye kandi kwirinda abantu babizeza kubafungurira monetization babasaba amafaranga, ijambo ry’ibanga rya konti cyangwa ibyangombwa bitari ngombwa. Ni byiza gukurikiza amabwiriza atangwa n’imbuga nkoranyambaga ubwazo.

Ese monetization ishobora kugabanya ubushomeri mu rubyiruko?

Kuba abakora ibyo bikorwa bishyirwa ku mbuga nkoranyambaga babasha kwinjiza amafaranga binyuze kuri izo mbuga bishobora gufungura amahirwe mashya y’akazi, cyane cyane ku rubyiruko.

Uyu mwuga uhuza abantu benshi, barimo abafata amashusho, abandika, abatunganya amashusho n’amajwi, abanyamakuru, abahanzi, abashushanya, abahanga mu kwamamaza no gucunga imbuga nkoranyambaga.

Iyo uwukora abashije kwinjiza amafaranga, ashobora kwagura ibikorwa bye, agaha akazi abandi cyangwa agashora amafaranga mu bindi bikorwa by’ubucuruzi.

Icyakora, ntibivuze ko gufungura monetization byonyine byahita bikemura ikibazo cy’ubushomeri. Amafaranga umuntu yinjiza aterwa n’ubwiza bw’ibikubiye mu byo ashyira kuri izo mbuga, umubare w’abantu babireba, isoko ry’amamaza, gahunda yinjiyemo n’andi mahirwe abasha kubona.

Ni yo mpamvu monetization ikwiye gufatwa nk’imwe mu nzira zishobora gufasha guteza imbere ubukungu bw’abakora ibikubiyemo, aho kuyifata nk’igisubizo cyonyine ku kibazo cy’ubushomeri.

Ni kenshi uzumva abantu bita Abayisilamu amazina atandukanye arimo Sheikh cyangwa Hadji cyangwa Hadjat ku mugore, abenshi bakabikora babishingiye ku kuba uwo baryise ari Umuyisilamu kandi ukunda gusenga.

Nubwo ayo mazina n’andi ariyo akunda gukoreshwa na benshi kandi kenshi ariko hari n’andi arimo Mufti, Imam na Bilal, yose akaba ahuriye ku kuba ari amazina ahabwa umuntu bitewe n’inshingano n’ubumenyi runaka afite mu idini (Islam).

Sheikh ni izina ry’icyubahiro rikoreshwa ku muntu wubahwa kubera ubumenyi bw’idini, imyaka, ubunararibonye cyangwa ubuyobozi mu muryango w’abayisilamu. Rishobora kandi gukoreshwa ku ntiti mu idini ya Islamu, umwigisha w’idini cyangwa umuyobozi w’idini.

Uko rikoreshwa bishobora gutandukana bitewe n’igihugu n’umuryango w’abayisilamu. Umuntu ashobora kwitwa Sheikh atari Mufti, kuko kuba Sheikh bitavuze ko byanze bikunze afite ububasha bwo gutanga icyemezo cyangwa igitekerezo cya nyuma gishingiye ku mategeko n’amahame ya Islam, gitangwa n’intiti mu idini ifite ubumenyi buhagije (Fatwa / فتوى).

Mufti ni izina rihabwa umuyobozi w’Abayisilamu akenshi mu gihugu kandi aba agomba kuba ari intiti mu mategeko n’amahame ya Islamu, afite ubumenyi buhagije bwo gutanga icyemezo, igisubizo cyangwa igitekerezo cya nyuma kandi gishingiye ku mategeko ya Islam ku kibazo cy’idini.

Agomba kuba afite ubumenyi bwimbitse mu mategeko ya Islamu. Si buri muyobozi w’abayisilamu cyangwa umwigisha w’idini ushobora kwitwa Mufti. Mu bihugu cyangwa mu miryango imwe n’imwe y’abayisilamu, Mufti ashobora kuba umuyobozi mukuru ushinzwe ibibazo by’amategeko y’idini.

Umuyobozi w’Inama y’aba Sheikh mu Rwanda, Sheikh Kassim Nzanahayo, avuga ko kuba Sheikh bisaba kuba warize ukagera ku rwego runaka mu bumenyi bw’idini.

Ati “Hano mu Rwanda dufite aba Sheikh bo mu rwego rwa mbere, urwa kabiri ndetse n’abandi bo mu rwego rwa gatatu. Icyo dushingiraho ni ubumenyi umuntu aba agezeho. Ubundi dukunze gukoresha iri zina ku muntu ufite impamyabumenyi y’icyiciro cya kabiri cya Kaminuza mu byerekeranye n’idini, akaba yarize ubumenyi ubu n’ubu mu idini.”

Aha Sheikh Nzanahayo, asobanura ko Sheikh wo mu rwego rwa mbere aba afite nibura impamyabumenyi yo ku rwego rw’icyiciro cya kabiri cya kaminuza (Bachelor’s Degree), kuzamura. Uwo mu rwego rwa kabiri akaba nibura yagereranywa n’uwarangije amashuri yisumbuye kugera mu cyiciro cya mbere cya Kaminuza, mu gihe uwo mu rwego rwa gatatu, ari uwagereranywa n’utararangije amashuri yisumbuye ariko hari ahantu yageze yiga ubumenyi bw’idini agakora n’andi mahugurwa.

Uretse aba nta wundi muntu uba ukwiye kwitwa izina Sheikh mu gihe cyose aba atarize idini ngo arangize kimwe muri ibyo byiciro uko ari bitatu.

Izina ‘Imam’, naryo rikunze guhabwa bamwe mu bayobozi b’Abayisilamu, rikaba rikunze guhabwa umuntu uyobora abantu mu masengesho cyane cyane akoreshwa mu musigiti (urusengero).

Sheikh Nzanahayo, avuga ko iryo zina (Imam), mu Rwanda, rinahabwa abayobozi bahagarariye abandi ku rwego rw’Akarere, Intara n’Umujyi wa Kigali.

Ati “Ntabwo waba Imam utari Sheikh, kubera ko umuntu uyobora abantu agomba kuba abayobora mu bintu azi. Ntabwo waba Imam utari umu Sheikh. Ni ukuvuga ngo ntabwo wajya kuyobora abantu mu byo utazi, utize.”

Ni iki kigenderwaho kugira ngo umuntu abe Mufti

Sheikh Nzanahayo, avuga ko ibigenderwaho kugira ngo umuntu abe Mufti (Umuyobozi w’Abayisilamu) ari ibintu byinshi bitandukanye ariko birangajwe imbere no kuba ari umuntu wize neza idini kandi asobanukiwe neza n’ibyo agiye gukora.

Ati “Icyangombwa ni uko umuntu ujya kuba Mufti agomba kuba ari Sheikh afite urwego rwisumbuyeho rw’ubumenyi, akaba afite Impamyabumenyi y’Ikirenga (PhD) mu idini, Icyiciro cya gatatu cyangwa icya kabiri cya Kaminuza. Ariko ibyo nabyo ntibihagije, kuko aba agomba kuba indakemwa mu mico no mu myifatire.”

Ikindi ni uko nta Mufti w’umugore ushobora kubaho, bitewe n’uko ari ko amahame y’idini abiteganya, kubera ko no mu bihe bya mbere nta muyobozi mu idini w’umugore wigeze abaho.

Sheikh Nzanahayo Ati “Burya tugira umuco tugenderaho, tugira kirazira, tugira amategeko. Tugenda tubivoma no mu mateka ya mbere. Ni ukuvuga ngo kuva Ubuyisilamu bwagera muri iki gihugu cyacu (Rwanda), tugatangira kwigisha Ubuyisilamu nta Mufti w’umugore wabayeho nta na Imam w’umugore twigeze tugira, ariko bitavuze ngo ni uguheza umugore kuko afite umwanya ukomeye mu Buyisilamu.”

Hari andi mazina akunze gukoreshwa cyane na benshi cyane cyane igihe utari umuyisilamu ayita mugenzi we w’Umuyisilamu, arimo Hadji cyangwa Hadjat ku bagore.

Iri ni izina rishobora kwitwa buri muyisilamu hatagendewe ku bumenyi runaka afite mu idini, ahubwo ari ukuba yarashoboye kuzuza inkingi ya gatanu mu idini ya Islam, ivuga ko buri Muyisilamu wese ubishoboye ategekwa gukora umutambagiro mutagatifu.

Igihe cyose Umuyisilamu uwo ari we wese amaze gukora uwo mutambagiro mutagatifu akawurangiza yitwa Hadji iyo ari umugabo, akaba Hadjat iyo ari umugore.

Hari andi mazina atamenyerewe cyane n’abatari Abayisilamu cyangwa se agakunda kwibazwaho n’abatari bo, arimo izina Bilal.

Uwo izina Bilal ryaturutseho

Bilal ni izina rikunze guhabwa umuntu uhamagara Abayisilamu iyo amasaha yo gusenga ageze ibizwi nka Adhana (Al-Adhān / الأذان).

Ubusanzwe Adhana ni umuhamagaro ukoreshwa mu idini ya Islamu wo kumenyesha abayisilamu ko igihe cy’amasengesho kigeze, kugira ngo bajye gusenga. Gusa mu bihugu cyangwa mu muryango w’Abayisilamu, umuntu ushinzwe guhamagara abantu mu masengesho yitwa Mu’adhin.

Ubundi ijambo Bilal byaturutse ku muntu wa mbere uzwi mu mateka ya Islam wahamagariye abantu gusenga (Adhan) witwaga Bilal ibn Rabah, wari umwe mu bigishwa ba mbere b’Intumwa y’Imana Muhammad, bituma icyo gikorwa (Adhnan) kimwitirirwa, ku buryo ubikora wese ahenshi yitwa Bilal.

Umuyobozi w’iri shuri, Sr. Ann Macharia, muri uwo muhango wabaye kuri uyu wa Kane tariki 22 Ukwakira, yavuze ko ibi bikoresho bizafasha kugabanya ubucucike bw’abanyeshuri mu byumba by’amashuri, no mu cyumbwa cy’ikoranabuhanga.

Yagize ati “Ibikoresho batuzaniye bizagira uruhare rukomeye mu gufasha abanyeshuri bacu kwiga batekanye. Hari igihe habaga ubucucike, cyane cyane igihe bakoresha mudasobwa. Rimwe na rimwe, byabaga ngombwa ko bicara begeranye cyane.”

Yakomeje avuga ko kuba bongeyemo intebe 100 bizabafasha kugabanya ubwo bucucike, abanyeshuri bakabona umwanya uhagije no mu byumba by’amashuri, ahamya ko bizagira ingaruka nziza ku myigire, bikazanatuma umusaruro wabo uzamuka.

Sr. Macharia yavuze ko zimwe muri mudasobwa bahawe zizashyirwa muri laboratwari kugira ngo barebe ko zakoreshwa mu buryo zirushaho gutanga umusururo.

Uretse ibikoresho byatanzwe, umuyobozi w’iri shuri yavuze ko ubufatanye na Ambasade y’u Bushinwa bunagaragarira mu kuba ihora iryoherereza umwarimu wigisha ururimi rw’Igishinwa n’umuco w’u Bushinwa.

Yagize ati “Ubufatanye dufitanye na bo ni bwiza. Bahora batugezaho umwarimu wigisha abanyeshuri bacu ururimi rw’Igishinwa n’umuco w’u Bushinwa.”

Yavuze ko abanyeshuri b’iri shuri bashishikajwe no kwiga amasomo ya siyansi, bityo ko ibikoresho byiyongereye bizabafasha kurushaho kuyiga neza.

Ku rundi ruhande, Ambasaderi w’u Bushinwa mu Rwanda, Gao Wenqi, yavuze ko uru ruzinduko bagiriye ku Inyange Girls School of Science rugamije gukomeza guteza imbere ubwo bufatanye no gushyigikira ibikorwa by’ishuri.

Yagize ati “Nishimiye gusura iri shuri. Buri gihe uko ngiye i Musanze ndinyura iruhande, ubu rero nishimiye kuba ndigezeho. Twazanye ibikoresho birimo mudasobwa, ibya laboratwa n’ibindi birimo inkweto zo kongeramo, ndibwira ko izo nkweto abakobwa bazikeneye.”

Yibukije ko iyi nkunga iri mu rwego rwo kwizihiza isabukuri y’imyaka 50 y’umubano w’u Rwanda n’Ubushinwa bizihiza muri uyu mwaka, avuga ko uburezi biri mu byo uwo mubano wubakiyeho.

Ambasaderi Gao yavuze kandi ko u Rwanda buri mwaka rwohereza abanyeshuri babarirwa muri 400 bakajya kwiga amasomo atandukanye mu Bushinwa ku nkunga y’icyo gihugu, ndetse bukaba bugira uruhare mu kubaka ibikorwa remezo bitandukanye mu Rwanda.

Yavuze ko yifuza gusura ibigo by’amashuri bindi byinshi mu Rwanda akumva icyo bakeneye, bakareba ibyo bashobora kubafashamo.

Abafite ubumuga bavuga ko kuva u Rwanda rwabaho, batigeze bahabwa uburenganzira bungana n’ubw’abandi kuko bahezwaga muri gahunda zitandukanye kubera ko bafatwaga nk’abantu badashoboye, badafite icyo bashobora gufasha umuryango mugari w’Abanyarwanda.

Ibi byatumaga umuryango ubyaye umwana ufite ubumuga, ufatwa nk’ugushije ishyano, ku buryo uwo mwana yahezwaga mu nzu, akaba adashobora gusohorwa hanze, kubera kwanga ko hagira undi muntu wo hanze umubona cyangwa akamenya ko muri uwo muryango bafite umuvandimwe ufite ubumuga.

Si ibyo gusa kuko abafite ubumuga bahabwaga amazina atandukanye yabapfobyaga, ahanini ashingiye ku bumuga bafite, bikabagaragaza nk’abantu badashoboye cyangwa badafite akandi kamaro ako ari ko kose mu muryango mugari w’Abanyarwanda.

Kuba Leta y’ubumwe yarabatekerejeho, ikabaha uburenganzira bungana n’ubw’abandi Banyarwanda bakaba nta hantu na hamwe bagihezwa yaba mu burezi, ubuvuzi, akazi n’ahandi, ngo ni ibyo gushimirwa, kandi ko igihe kigeze ngo na bo bahabwe umwanya wo guhura na Perezida Kagame muri gahunda ya ‘Meet the President’ nk’uko byagiye bigenda ku bindi byiciro by’Abanyarwanda, kugira ngo bagire umwanya uhagije wo kuganira na we.

Bavuga ko bafite byinshi byo kumubwira ku buryo baramutse bahuye waba ari umwanya mwiza wo kuganira no kumushimira kubyo bamaze kugeraho bamugaragariza iterambere bamaze kugeraho babikesha Leta ayoboye, nkuko byagiye bikorwa no ku bindi byiciro by’Abanyarwanda birimo urubyiruko n’abagore.

Umuyobozi w’Ihuriro Nyarwanda ry’abafite ubumuga bwo kutabona, Jacques Mugisha, (Rwanda Union of the Blind /RUB), agira ati “Numva mu kwifuza kwanjye tugize ‘Meet the Presidente’ mu buryo bwihariye nk’abantu bafite ubumuga, twamubwira byinshi, kuva aho duherukanira na we kuva mu 2004, imyaka 22 ishize hari byinshi twagakwiye kumushimira, akanabyumva, akabisobanukirwa ko twishimira ibyo yakoze. Ariko tukabikora muri ya magambo yacu, mu kwisanzura kwacu, nyine akabona ko ibikorwa by’abantu bafite ubumuga bihari.”

Mugisha avuga ko hari byinshi byiza bamaze kugeraho kandi bifuza kumugaragariza kuko iyo bitaba ubushishozi bwe n’abandi bafatanyije kuyobora Igihugu, abafite ubumuga baba bakiri ba bantu bafatwa nk’abadashoboye.

Ati “Mbere ya Jenoside yakorewe Abatutsi mu 1994, abantu bafite ubumuga nta mukino n’uyu n’umwe twagiraga, ngo twitabire, dusabane, twishimire imikino n’imyidagaduro. Ariko ubu abantu benshi bafite ubumuga, buriye indege bayurijwe n’uko bitabiriye amarushanwa yo guhagararira Igihugu. Icyo ni ikintu tutagiraga mu Rwanda, reka mvuge ngo kuva rubayeho, kandi kuri twe dufite igisobanuro gikomeye.”

Ibi kandi ngo biri ku byiciro byose by’abafite ubumuga, kubera ko ari abafite ubukomatanyije, abafite ubwo kutabona, ingingo n’abandi, bose bafite ibyiciro by’amarushanwa bisangamo, kandi biba buri mwaka bikabafasha gusabana no kurushaho kwigirira icyizere.

Yungamo ati “Kuva Kaminuza y’u Rwanda yabaho, yari itarashobora kwakira ngo inigishe umwana ufite ubumuga bwo kutabona, ashobore kwiga arangize afite Impamyabumenyi ye, kandi mu mashami atandukanye. Ariko ubu dufite abarenga 200 barangije kaminuza mu mashami atandukanye. Ubu ni iki tutabona tumubwira koko? Ahubwo cyeretse niba abantu batabiha agaciro bakumva ari ba bandi bafite ubumuga nyine, kandi nabyo mbifata ko ari nko kumuduhezaho kuko ni uwa Abanyarwanda twese ntabwo ari uw’abantu bamwe.”

Mugisha avuga ko u Rwanda rw’uyu munsi rutangaje kuko ibiruberamo nta handi yigeze abibona.

Ati “Ni ryari twigeze tugira umudepite ufite ubumuga, ari mu Nteko Ishinga Amategeko ku bw’inyungu z’abantu bafite ubumuga? Iyo ni imiyoborere tuvuga, ntabwo abantu bumva agaciro kabyo n’uburemere bifite, ariko twe nk’abantu bafite ubumuga twumva impamvu yabyo n’ubushake bwa politike.”

Ibyo Mugisha avuga abihurizaho na Nezerwa Ukwishatse ufite ubumuga bw’uruhu, uvuga ko nubwo mu muryango bakunze kandi bakamukuza ariko yakuranye ibikomere bitandukanye.

Ati “Mu cyaro nakuriyemo bajyaga bavuga ngo umuntu ufite ubumuga bw’uruhu ni imari, ni iboro, umubonye ntugatume atambuka, bigatuma utageza saa kumi n’imwe utarataha mu rugo ngo uryame. Ndi muto, ariko nagiye numva ibyabaye mu gihugu cyacu, ndabisoma ndabisobanukirwa, numva n’ibibera hanze, nsanga mu Rwanda biratandukanye. Nshimira ku nkunga twahawe.”

Ibi n’ibindi byinshi nibyo abafite ubumuga baheraho bifuza guhabwa amahirwe bagahura na Perezida wa Repubulika, bakagirana umwanya wihariye wo kuganira ku iterambere ryabo no kumugaragariza amarangamutima bafite ku iterambere bamaze kugeraho babikesha Leta abereye umuyobozi.

Icyegeranyo cya RGB cya 2025-2026, cyasohotse kuri uyu wa 22 Ukwakira, kigaragaza uko abaturage bishimira serivisi bahabwa, Rwanda Governance Scorecard, kigaragaza ko igipimo cya serivisi za Leta zimaze kwimurirwa mu ikoranabuhanga mu buryo bwuzuye kiri hasi cyane ugereranyije n’izindi serivisi zasuzumwe.

Iki cyegeranyo kandi, kigaragaza ko inkingi y’ireme rya serivisi zatanzwe yagize amanota 68.48%, avuye kuri 71.73% muri raporo yabanje.

Mu bipimo byasuzumwe mu rwego rw’ikoreshwa ry’ikoranabuhanga, kunyurwa no kohererezanya serivisi binyuze kuri Irembo byagize amanota 81.80%, mu gihe kunyurwa na serivisi zo kuregera inkiko hakoreshejwe ikoranabuhanga byagize 65.40%.

Iri tandukaniro ritanga ishusho y’uko kuba serivisi iboneka mu buryo bw’ikoranabuhanga bidahita bisobanura ko inzira yose umuturage anyuramo kugira ngo ayihabwe yuzuye cyangwa yoroshye.

Kinagaragaza ko intego ya gahunda y’Igihugu yo Kwihutisha Iterambere, NST2, ari uko nibura 90% by’abaturage bazaba bishimira serivisi za Leta mu 2029.

Babisabye uru rwego kuri uyu wa Kane ubwo rwagezaga raporo yarwo y’ibikorwa by’umwaka wa 2025-2026, ndetse n’ibyo ruzakora muri 2026-2026.

Depite Judith Mukarugwiza ashingiye kuri raporo z’Urwego rw’Umuvunyi zo mu gihe cy’imyaka itanu ishize yagaragaje ko ibibazo bigezwa kuri uru rwego, nyuma yo gusesengurwa bigaragara ko imanza zibarirwa muri 95% basanga zidakeneye gusubirishwamo.

Agira ati “Ibibazo byose byakirwa, imanza zisesengurwa bikagaragara ko zidakenye gusubirishwamo zibarirwa hagati ya 90 % na 96%, bigaragara ko mu by’ukuri usanga harimo na bya bibazo byo kuba abaturage batanyurwa n’ibyemezo by’inkiko.”

Ati “Haba harimo na bya bindi byo kuvuga bati ‘umuntu arakomeza guhanyanyaza kugeza igihe atazi, ariko ari ugutinza ubutabera.”

Ashingiye kuri izo mpamvu, Depite Mukarugwiza akaba asaba ko Urwego rw’Umuvunyi rushyiraho ingamba zo gukumira abo baturage bakomeza guhanyanyaza bakurutura ibibazo kandi bazi neza ko batsindiwe mu nkiko, mu buryo bugaragara.

Nko mu myaka itatu ishize, muri raporo uru rwego rwagejeje ku Nteko, mu manze igihumbi magana ane na mirongo itandatu n’eshatu (1,463) rwagejejweho abaturage basaba ko zisubirishwamo ku mpamvu z’akarengane, mirongo itandatu n’umunani (68) gusa, ni zo basanze zarabatemo akarengane. Ibi bikaba bivuze ko hejuru ya 93%, zari imanza zacikwe neza ku buryo nta karengane kabayemo.

Mukarugwiza agakomeza avuga ati “Mu mibare igaragazwa muri iyi myaka itanu bigaragara ko nta karengane karimo, nkibaza ingamba uru rwego rufite zo gukumira ko uburenganzira bwo gukoresha Urwego rw’Umuvunyi bikoreshwa nabi, aho usanga abantu batanyurwa n’imyanzuro y’inkiko batinza imanza babigambiriye bakaregera umuvunyi bagamije gutinza ubutabera.”

Yasabye ko hashyirwaho uburyo bw’ibanze bwo kubanza kugenzura ibibazo bakira, aho kwakira ibirego by’abatesha umwanya bakababuza kwita kubibazo by’akarengane bifite ishingiro ugasanga imanza nyinshi ziraranya ku buryo usanga hari izimurirwa mu wundi mwaka.

Byanshimangiwe na Depite Aline Ingabire wagaragaje ko mu turere muri uyu mwaka bakiriye ibibazo igihumbi na magana atanu na mirongo itanu na bitanu (1,555), mu gihe muri raporo y’umwaka ushize wa 2024-2024 ibibazo byakiriwe mu turere bya igihumbi magana atatu na bitandatu (1,306), akabaza Urwego rw’Umuvunyi niba rwakoze isesengura ngo rumenye impamvu bikomeza kuzamuka.

Umuvunyi Mukuru, Madeleine Nirere, yavuze ko bashishikariza abantu kumva ko gusubirishamo urubanza ku mpamvu z’akarengane atari uburyo bwo kujurira, kuko usanga ubungubu umuturage avuga ati “reka ngerageze amahirwe ya nyuma ndebe ko hari ikivamo, iyo myumvire ikaba igomba guhinduka”

Yasobanuye ko gusubirishamo urubunza ku mpamvu z’akarengane ari uburyo budasanzwe bwashyizweho kugira ngo mu gihe “mu by’ukuri byagaragara ko hari aho umucamanza baba yaribeshye, dusuzuma tukavuga tuti ‘koko ahangaha umucamanza yaribeshye, reka tubisubize mu nkiko.”

Avuga ko hari n’igihe bahitamo guhuza abafitanye ikibazo, aho kugira ngo urubanza barusubize mu Rukiko rw’Ikirenga, bityo umwaka ushize ibibazo cumi n’icyenda (19) bikaba byarakemutse binyuze mu buhuza.

Umuvunyi Mukuru yabwiye abagize Inteko Ishinga Amategeko ko gusubirashamo urubanza ku mpamvu z’akarengane bidatinza ubutabera nk’uko babitekereza, kuko ngo bidahagarika ibyemezo by’inkiko.

Mu mwaka wa 2025–2026, Urwego rw’Umuvunyi rwakiriye ibibazo ibihumbi bitatu n’ijana na bitandatu (3,106). Muri byo, ibihum bibiri na magana abiri na cumi na bibiri (2,212), bingana na 71,2%, byarakemutse, mu gihe ibibazo 894, bingana na 28,8%, birikirimo gukurikiranwa n’Urwego rw’Umuvunyi n’ izindi nzego byashyikirijwe.

Umuvunyi Mukuru yabwiye Inteko Ishinga Amategeko imitwe yombi, ko Urwego rw’Umuvunyi rwashubije amafaranga Miliyoni 35 Frw yari agenewe imishahara y’abakozi.

Umuvunyi Mukuru Nirere Madeleine yabivuze atanga raporo y’ibyagezweho mu mwaka wa 2025-2026.

Yasubizaga ikibazo cyabajijwe na Senateri Charles Muligande, werekanye ko Urwego rw’Umuvunyi rwagenzuye uturere dutanu gusa, rukavuga ko rwabitewe n’ikibazo cy’ingengo y’imari ntoya.

Yagize ati "Mwadusobanurira uko byagenze kugira ngo muvuge ko ingengo y’imari yabaye nkeya, kandi nyamara bigaragara ko mwashubije amafaranga arenga Miliyoni ijana?"

Aha, Umuvunyi Mukuru yashubije agira ati "Aya mafaranga twashubije ntiyari ay’ibikorwa biri mu nshingano zacu - core mission, ahubwo yari ay’imishahara."

Umuvunyi Mukuru yavuze ko mu rwego rw’Umuvunyi, hari imyanya irimo abakozi bakora nk’abasigire(Acting), ku buryo usanga hari ibyo batemerewe guhabwa, bityo amafaranga agenewe abakozi bo mu myanya runaka, akaba ashobora gusaguka.

Ikindi, yavuze ko hari n’ibindi bikorwa bakora mu bufatanye bw’inzego, bigatuma bazigama amafaranga yari kugenda ku bakozi.

Yatanze urugero ati "hari nk’aho Minisiteri runaka ishobora kudusaba kuyihugurira abakozi, maze ikaba ari yo yishyura ibyo bakeneye. Icyo gihe ayo mafaranga tuba tuyazigamye.

Umuvunyi Mukuru yavuze ko mu igenzura ryakozwe, basanze ibibazo muri Koperative COPCOM ifite imari irenga Miliyari icumi Frw, bijyanye n’imicungire mibi.

Umuvunyi Mukuru, Nirere Madeleine yabivuze muri Raporo y’umwaka wa 2025-2026 yagejeje ku Nteko Ishinga Amategeko imitwe yombi.

Yagize ati "Muri COPCOM twasanzemo ibibazo by’imicungire y’imari, kunyereza umutungo, gutanga ubwasisi ku buryo budakurikije amategeko n’ibindi. Iki ni ikibazo kuko iyi ni Koperative nini ifite imari irenga Miliyari icumi."

COPCOM ni Koperative igizwe n’abanyamuryango biganjemo abacuruza ibijyanye n’ibikoesho by’ubwubatsi mu Murenge wa Gisozi, Akarere ka Gasabo, aho bubatse igorofa mu kibanza bahawe na Leta.

Umubyeyi yavuze ko Igihugu kigomba gushyira ingufu mu makoperative kuko ari inkingi ya mwamba y’iterambere mu Rwanda.

Ubu, mu Rwanda hari Koperative ibihumbi birindwi, birimo abanyamuryango Miliyoni eshanu.

Yagize ati "Ni ikintu kigomba gukurikiranirwa hafi."

Umuvunyi Mukuru, Nirere Madeleine yavuze ko kujya mu manza byagiye mu muco w’
Abanyarwanda, kandi nyamara ntibyari bikwiriye, kuko zihenda ababuranyi, akaba ababwira kugaruka ku nzira y’ubuhuza.

Umuvunyi Mukuru yabivuze muri Raporo y’urwego rw’umuvunyi ya 2025-2026, aho abadepite babonye ko hagaragaye ibibazo byinshi by’akarengane, byose byanyuze mu nkiko.

Umuvunyi Mukuru yagize ati "Muri sisitemu ya Amerika, ubu abantu baragana mu butabera cyangwa ubucamanza nsanasano - mediation, ariko twebwe twabaye mu mico yo kujyana ibintu byose mu manza."

Umuvunyi Mukuru, yatanze urugero rw’imanza zishingiye ku butaka, aho umuntu arega umuturanyi, maze ubutaka akabutsindira, mugenzi we watsinzwe akavuga ati "Jyewe sinzemera guturana na we, bashyiramo imbibi akajya ahora azirandura, bakamufunga, ugasanga barahora mu nkiko."

Umuvunyi Mukuru asaba ko inzego z’umuryango n’ubuhuza zashyirwamo imbaraga, aho kugira ngo abantu bakomeze guhendwa n’imanza.

Urwego rw’Umuvunyi, rwakiriye ibibazo 3106.

Umuvunyi Mukuru yavuze ko hari abantu 11 batamenyekanishije inkomoko y’umutungo wabo nk’uko biteganywa n’amategeko y’u Rwanda, bituma dosiye zabo zishyikirizwa urwego rw’Igihugu rw’Ubugenzacyaha - RIB.

Umuvunyi Mukuru Nirere Madeleine yabibwiye Inteko Ishinga Amategeko imitwe yombi, ubwo yatangaga raporo y’ibikorwa by’urwego rw’Umuvunyi 2025-2026 n’ibiteganyijwe gukorwa muri uyu mwaka w’ingengo y’imari.

Abayobozi b’inzego za Leta, guhera ku bayobozi b’ikirenga n’abakuru, abagize inteko ishinga amategeko n’abandi bayobozi batandukanye, basabwa buri mwaka kugaragaza inkomoko y’umutungo wabo.

Iri tegeko rireba n’abayobozi b’amashyaka ya Politiki.

Umuvunyi mukuru yagize ati "Abantu 11 ntibamenyekanishije imitungo yabo. Amadosiye yabo yashyikirijwe RIB kugira ngo bikurikiranwe."

Yatanze urugero ati "ni gute umuntu yaba afite kampani yanditse ku bandi, ni gute se umuntu aba afite konti yanditse ku bandi, ariko wareba ugasanga kuri konti ni we ukuraho amafaranga?"

Yongeyeho ati "Hari imitungo ubona yaturutse mu buriganya mu by’ukuri. Ubushinjacyaha si bwo bugomba kugaragaza inkomoko y’umutungo, ahubwo nyir’umutungo ni we ugaragaza aho yawukuye, ibyo bita reversal of proof."

Muri iyi mitungo itagaragarijwe inkomoko, Umuvunyi Mukuru yavuze ko harimo n’ibibanza.

Umuvunyi Mukuru yavuze ko uyu mwaka bazagenzura imitungo y’abantu 6900, mu bantu 22,000 itegeko riteganya ko bagomba kugenzurwa.

Umuvunyi Mukuru yavuze ko hibandwa ku bafite ibyago byinshi byo kunyereza imitungo no guhura na ruswa.

Hashize ibyumweru bibiri, hari imyigaragarambyo mu Bufaransa, aho ubona batangira bigaragambya bisanzwe, ubundi bakanyuzamo bagatwika, bakamena ibirahuri by’amazu, ahandi bagasahura,ku buryo na Polisi bitangiye kuvugwa ko yananiwe kubisubiza ku murongo.

Ariko se iyo myigaragambyo hari ubwo ibangamira by’umwihariko Abanyarwanda batuye muri icyo gihugu?

Renzaho Christophe, Umuyobozi w’Abanyarwanda baba mu Bufaransa, yasobanuye uko bimeze, mu kiganiro yagiranye na Kigali Today kuri telefoni.

Yagize ati,”Hano mu Bufaransa, imyigaragambyo navuga ko ari umuco wa Politiki, buri gihe cyose abaturage batanyuzwe n’ibintu runaka, ubanza no mu bihugu bya mbere ku isi byigaragambya cyane habamo u Bufaransa, ariko muri kino gihe, imyigaragambyo, ni uko yatangijwe n’urubyiruko,umuntu yabyitiranya na biriya byabaye muri Kenya by’aba Gen-Z, ariko bo ni bato. Ni abiga mu mashuri yisumbuye,mbese ishuri rigitangira,abana bahuye n’ibibazo,byo kutagira abarimu bahagije, abandi bakagira ibigo by’amashuri bidasannye,bifite ibibazo byo gushyuha cyangwa se gukonjesha, ibibazo by’ibikoresho byo mu mashuri.Rero byatangiye banga kujya kwiga, ibyo bita’blocage’”.

Renzaho avuga ko kuri ibyo bibazo abanyeshuri bafite byanatumye batangira kwigaragambya, hiyongeraho ko n’abarimu babashyigikiye, kuko ibyo abo bana bavuga bibura, n’abarimu ni ko babyumva. Gusa, guhera ku itariki 17 Ukwakira 2026, ngo nibwo abaturage basanzwe bagiye kwiyunga kuri abo banyeshuri, nabo batangira gufatanya nabo kwigaragambya, nubwo bafite impamvu zitandunye.

Abaturage muri rusange, bo ngo barigaragambya kubera ibibazo by’ubuzima barimo guhura nabyo bitewe n’uko intambara yo mu Burasirazuba bw’isi, muri Iran, irimo igira ingaruka no mu Burayi, ituma ibiciro bizamuka,ku buryo ibikomoka kuri peterori aho mu Bufaransa, ubu ngo bimaze kuzamuho 40%.
Kandi iyo ibiciro bya peterori byazamutse, byongera ibiciro ku bintu byose. Ikibazo kikaba ari uko ibiciro byiyongereye, kandi imishahara, itariyongereye. Kuri ibyo byose kandi, ngo hiyongeraho ibura ry’akazi ku rubyiruko rwinshi kubera ikoreshwa ry’ubwenge buhangano (AI), ndetse no gutakaza agaciro kw’ifaranga ryo muri icyo gihugu.

Renzaho ahamya ko ikibazo cy’imyigaragambyo kirimo kirushaho kwiyongera, kuko abigarambya nta gisubizo barimo bahabwa,kuko n’ibyo Minisitiri w’intebe yagerageje gusobanura, ngo byagaragaye ko abantu batabyizeye ndetse batabyishimiye, kuko bazi ko Leta idahita ikemura ikibazo by’ako kanya ahubwo ibanza kubaha icyizere cy’uko hari ibizakosorwa, ariko byahura n’uko hari ibindi Leta yigeze kwizeza abaturage ntibabibone,bigatuma n’ibyo Leta ivuga muri iki gihe batabyemera.

Uko Renzaho abibona, ni uko hashobora kuba hari n’abanyapolitiki, binjirira muri iyo myigaragambyo, kuko bumva bashaka kuzasimbura Perezida Emmanuel Macron, kuko ubu hateganyijwe amatora umwaka utaha.

Yagize ati, “ Ingaruka ku Banyarwanda, muri rusange, navuga ko ari ubwoba, kuko hari nk’umuntu twavuganye mu kanya, twari dufitanye inama mu Mujyi arambwira ati njyewe ntabwo nshaka kujya mu Mujyi kubera ko ntabwo wamenya igihe imyigaragambyo yahindurira isura, kandi sinshaka ko byaba ndi mu Mujyi…,abacuruzi bafunga kare kubera gutinya ko babasenyera, za banki zifunga kare kuko zikunze kumenagurwa.Kubera ko harimo ikintu cyo kuvuga ngo abakire nibo bazana ibibazo. Ikindi cyagaragaye, ni uko Abapolisi n’izindi nzego z’umutekano, zananiwe,n’abayobozi b’igihugu babyemeye,byarabarenze, imbaraga z’abasenya zarenze iz’abashinzwe umutekano”.

“ Ingaruka ikomeye cyane, njyewe ndi umubyeyi mfite umwana uri mu mashuri yisumbuye, nawe utajya kwiga.Icyo ni nacyo kiduhangayikishije nk’abantu batuye hano, ni uko abana bacu, batarimo kujya mu ishuri,tukaba twibaza niba uyu mwaka udashobora kuzaba imfabusa.Ubu bamaze ibyumweru bigera kuri bitatu kuva umwaka watangira.Ubu hashize bibiri,ariko bagitangira nabwo bagize iyo minsi yo kutajya kwiga. Byatangiye buhoro buhoro…batangiye tariki 2 Nzeri 2026,urumva ko ari igihe kinini, kandi tukaba tutabona aho birimo kugana, ni cyo kibazo. Iyaba twari dufite igisubizo. Birasa naho birimo kugenda byiyongera”.

Renzaho avuga ko nubwo hari iyo myigaragambyo, ariko nibura aho bahahira hagihari,ahubwo ikibazo kikaba ari uko kubera kudakora, ubushobozi cyangwa amafaranga yo guhaha arimo genda ashira, ku batabasha gukora.Amasoko manini, ngo akunze kuba ari hanze y’Umujyi bityo bikabafasha kubona aho bahahira. Ikindi kibafasha ngo ni uburyo bwaje mu gihe cya Covid-19, butuma abantu batajya guhaha mu isoko, ahubwo bagatumiza ibyo bashaka, bikabasanga aho bari, kuko imihanda yo itarafungwa.

Yagize ati,” Duhunga Umujyi hagati, abatuye mu Mujyi bo bashobora kuba bafite ibibazo, ariko abantu baracyakora, mfite amakuru ko abantu bajya mu kazi, ikibabaje ni abana bacu batiga”.

Renzaho avuga ko abanyeshuri bari mu myigaragambyo bifashisha n’imbuga nkoranyambaga, kuko bazikoresha cyane, abo banyeshuri ngo bafite hagati y’imyaka 15-19, ku buryo n’ababyeyi byabarenze, kubera ko umwana ashobora gusohoka avuga ko agiye ahantu runaka, nyuma akumva ko ari mu bagiye mu myigaragambyo ahantu runaka.

Ku kibazo cyo kuba abigaragambya bashobora kuba badafatwa kimwe nubwo impamvu zibatera kwigaragambya ari zimwe, Renzaho yemeza ko iyo Polisi irimo igerageza guhosha imyigaragambyo, igahura n’umwana w’umuzungu, itamufata kimwe n’umwirabura. Umwirabura niwe uba ufite ibyago byinshi, kandi ibyo ngo nibyo bitera ubwoba ababyeyi b’abirabura.

Renzaho yasobanuye ko bitewe n’uko ikibazo cyo kwigaragambya cyatangiriye ahanini mu bice bituwemo n’abakene, ngo bakunze kubitirira ibyo bibazo, kandi abahatuye biganjemo abanyamahanga b’abirabura. Ibi rero ngo bituma iyo umupolisi afite ingengabitekerezo yo kuvangura bishingiye ku ibara ry’uruhu aba ashobora gukubita cyane no gukomeretsa umwirabura wigaragambya kurusha uko yabikora ku muzungu. Gusa ibyo ntabwo biba ari gahunda ya leta, ndetse ubifatiwemo arahanwa.

Muri rusange, ngo hari uburakari mu baturage, ku buryo n’ibyo bikorwa byo gusenya bitababaza na gato, kandi ngo ni ubwa mbere bibaye muri ubwo buryo, ukurikije uko indi myigaragambyo yagiye ibanza yagendaga, nk’uko Renzaho umaze imyaka 21 mu Bufaransa yabibonye.

Abantu bamwe ubu barakorera mu ngo zabo, abana batoya bakaguma mu ngo iwabo, abarimu bakohorereza amasomo mu rugo, ikindi ubu ngo hari aho ibiruhuko byatangiye ku banyeshuri, kandi bituma hari abasubira mu ntara aho bakomoka, bityo bikagabanya uko guhura kw’abigaragambya.

Perezida wa Repubulika Paul Kagame yaraye yakiriye urubyiruko rw’abahungu n’abakobwa basaga ibihumbi icumi mu kiganiro kiswe Meet the President.

Uru ni urubuga Umukuru w’Igihugu ajya agenera abanyarwanda mu byiciro binyuranye, bakaganira akababwira icyo igihugu kibategerejeho n’icyo kibagomba, na bo bakamubwira ibitekerezo byabo, ndetse bakanamubaza ibibazo byagiye bisigara bidashubijwe n’abayobozi mu zindi nzego z’ubuyobozi zimufasha, cyangwa ibyashubijwe ariko ntibanyurwe.

Iki kiganiro cyasanze hari ibibazo nka bitatu cyangwa bine bimaze iminsi mu muryango nyarwanda, kandi abantu babifiteho ibitekerezo binyuranye.

Hari ikijyanye n’inzoga zitujuje ubuziranenge, zahawe agahimbano k’inzoga z’ibyuma, zaciwe, inganda zizikora zigafungwa, ndetse abagize uruhare mu kuzikora, kuzikwirakwiza no kuzicuruza bakaba bari gukurikiranwa, kuko byagaragaye ko izi nzoga zica.

Ni yo mpamvu, umwanya munini iki kibazo cyamaze ntiwatunguranye, bitewe n’iminsi ishize abayobozi bakora ubukangurambaga, ndetse berekana n’imibare y’abagizweho ingaruka z’ubuzima kubera kunywa ibyuma.

Kugeza kuri uru rwego, nta munyarwanda ugishidikanya ko ibyuma atari byiza, nta n’ukivuga ko bikwiye ko abantu bakwemererwa kongera kubinywa.

Abagifite ingingimira, ni abakivuga bati "ariko twebwe twacuruzaga izo nzoga tutazi ko ari mbi, kandi si natwe tuzikora, twari abadandaza basanzwe, ubwo se ko mwazimennye, kandi twaraziranguye tugujije banki, tuzishyura dute?"

Icyakora, mu kiganiro cy’ejo, urubyiruko si cyo rwagaragaje, ahubwo buri wese yateze amatwi, yumva ububi bw’inzoga n’ibiyobyabwenge.

Umukuru w’Igihugu akaba n’umubyeyi yerekanye ububi bw’inzoga, ndetse agakoresha n’ingero za kibyeyi, kugira ngo byumvikane. Byongeye, Minisitiri w’Ubuzima, we yanashyiragamo ibya kiganga, siyansi, yerekana uburyo inzoga zirukira mu mubiri mu kanya nk’ako guhumbya, zikawangiza.

Umupolisi wafashe umugore ’wambaye nabi’: Mujye mubumva hari n’igihe baba bananiwe

Ikibazo kindi cyagarutsweho, ni icyari kimaze iminsi cyarakuruye impaka mu muryango nyarwanda; imyambarire ikwiye.

Mu minsi ishize ni ho twumvise inkuru y’umupolisi wafashe umugore avuga ko yambaye atikwije, nuko akamwuriza imodoka ya Polisi, iyi bakunze kwita panda gari.

Ni inkuru yateje impaka, dore ko yakurikiraga amakuru aburira abambara batikwije, bakajya mu ruhame, ko bazahanwa.

Impaka zari zishingiye ku kuvuga ngo "kwikwiza ni gute, umwenda mugufi ni umeze ute, kwambara ubusa ni gute, igipimo cy’uwambaye nabi kireberwa he, amabwiriza ari he"?

Abanengaga iyo miburo, basubizwaga ko abambaye batikwije baba bica umuco nyarwanda, ariko bagasubiza bati "umuco urakura, n’ikimenyimenyi, cyera ho bambaraga ubusa buriburi."

Impaka zarakomeje, ndetse zigera aho zityaye, bamwe bagashinja abandi ko ntacyo babikoraho ngo iki kintu gihagarare, bakavuga ko ari ibije kubangamira umugore muri rusange, no kumubuza uburenganzira bwe n’ubwisanzure mu myambarire.

Perezida Paul Kagame, kuri kiriya kibazo cy’uwafashwe nk’uwambaye nabi, yagaragaje ko rimwe na rimwe Abapolisi bakwiye kujya babihanganira, kuko yagize ati "hari n’igihe baba bananiwe."

Ni ikibazo Umukuru w’Igihugu abona ko kidakwiye guhagurutsa inzego, ahubwo ko abantu bakwiye kujya bimenya mu myambarire yabo, bakamenya aho bagiye bikaba ari byo bigena uko bambara.

Icyakora, Umukuru w’Igihugu ntashyigikiye abambara nabi, kandi ntiyavuze ko hari amategeko agiye gushyirwaho agena imyambarire. Yagaragaje ko Sosiyete hari imirongo ntarengwa yashyizeho, buri wese akaba akwiye kujya areba niba atayirenze, kandi abantu bakareka kwambara bigana iby’ahandi kuko ibyo sosiyete isaba atari bimwe kuva mu gihugu ujya mu kindi.

Aha kandi, agaragaza ko umuntu na we mu myambarire ye akwiye kumenya aho ari, kuko umuntu adakwiye kwambara imyenda y’abajya ku mucanga(beach) ngo ajye mu birori.

Ibi kandi, umukuru w’Igihugu avuga ko bireba abahungu kimwe n’abakobwa.

Umuntu abirebeye hafi, iki kibazo cy’imyambarire ntikireba urwego runaka, yaba Polisi, RIB, MINALOC, Inteko y’Ururimi n’Umuco cyangwa abandi, ahubwo imyambarire irareba uwambara ubwe, mbere ya byose.

Deborah Ujeneza Alice, uzwi ku mbuga nkoranyambaga nka Umudozi w’Umujeni, avuga ko kubura amasomo y’imideli mu mashuri makuru na kaminuza zo mu Rwanda byamubereye imbogamizi mu rugendo rwo kugera ku nzozi ze, asaba ko hashyirwaho porogaramu zihariye zo kuyigisha.

Nyuma yo kurangiza amashuri yisumbuye mu bijyanye n’ikoranabuhanga, Ujeneza yifuje gukomereza amasomo ye mu bijyanye n’imideli. Cyakora, ubwo yageraga ku Ishuri Rikuru ry’Imyuga n’Ubumenyingiro rya Kigali (IPRC Kicukiro) agiye gusaba kwiga ibijyanye n’imideli, yabwiwe ko nta porogaramu nk’iyo bafite.

Yagiriwe inama yo gukomereza mu bijyanye n’ikoranabuhanga, kuko imideli itari mu masomo yigishwaga muri gahunda z’amashuri makuru za Leta.

Ibyo byaramubabaje, ariko ntiyacika intege. Yakomeje kwiga amasomo magufi y’imideli, kugeza ubwo agize ubushobozi bwo kugera ku nzozi ze zo guhanga no kudoda imyambaro.

Ku wa 21 Ukwakira 2026, Ujeneza yaboneyeho umwanya wo kugeza iki kibazo kuri Perezida wa Repubulika, Paul Kagame, ubwo yari mu rubyiruko rwitabiriye gahunda ya Youth Meet the President, igamije guha urubyiruko umwanya wo kuganira na we ku bibazo birureba n’uruhare rwarwo mu iterambere ry’igihugu.

Ujeneza, washinze ikigo cy’ubucuruzi mu bijyanye n’imideli yise Inzu y’Imideli mu 2022, yabwiye Perezida Kagame ko nubwo yashoboye kugera ku nzozi ze, urugendo rwamugejeje aho ari uyu munsi rutari rworoshye.

Yagize ati “Mu rugendo rwanjye nahuye n’imbogamizi nyinshi kugira ngo mbashe kubigeraho.”

Yagaragaje kandi ko hari abanyeshuri barangiza amashuri yisumbuye mu mashuri y’imyuga n’ubumenyingiro (TVET), ariko bakabura ubumenyi ngiro buhagije bubafasha guhangana n’ibisabwa ku isoko ry’umurimo.

Yasabye ko amasomo y’imideli yongerwa muri porogaramu zitangwa mu mashuri makuru na kaminuza zo mu Rwanda, ndetse amashuri ya TVET akongera imbaraga mu kwigisha abanyeshuri gushyira mu bikorwa ibyo bize, aho kugarukira ku bumenyi bw’inyigisho mu magambo gusa.

Yagize ati “Iyo turebye Made in Rwanda ku ruhando mpuzamahanga, imaze kugera ku rwego rwiza, cyane cyane mu mideli. Ariko nifuje kwiga imideli muri IPRC Kicukiro, barambwiye bati: ‘Iyi ni gahunda ya Leta, ugomba gukomeza kwiga ICT.’”

Ujeneza yavuze ko kutabona aho yiga imideli bitamuciye intege, kuko yakomeje gushaka ubumenyi binyuze mu masomo magufi, akagera ku ntego yo guhanga imideli no kwagura ibikorwa bye.

Ati “Ni yo mpamvu ndi hano nkaba nitwa Umudozi w’Umujeni.”

Yongeyeho ko hakenewe kureba uko isoko ry’umurimo n’isi muri rusange bihinduka, kugira ngo urubyiruko rufite impano n’inyota yo kwiga imideli rubone amahirwe yo kuyibyaza umusaruro.

Yakomeje agira ati “Ndasaba abantu bari muri kaminuza ko bareba uho isi igana n’uko isoko rimeze. Umuntu ashobora kuba yifuza kuba umunyamideli, ariko akabura amahirwe yo kwiga ibyo ashaka, bikamuca intege.”

Mu busabe bwe, Ujeneza yasabye ko hashyirwaho porogaramu yihariye yo kwigisha ibijyanye no guhanga imideli (Fashion Design) muri kaminuza zo mu Rwanda, kugira ngo abafite inzozi zo gukora uyu mwuga babashe kuwiga iwabo, aho gutekereza ko bagomba kujya mu bihugu nk’u Butaliyani cyangwa u Bufaransa.

Yagaragaje ko ubumenyi nk’ubwo bwafasha urubyiruko guteza imbere impano zarwo, kongera ireme ry’ibikorerwa mu Rwanda no kugeza ibihangano by’abanyamideli nyarwanda ku masoko mpuzamahanga.

Igitekerezo cya Ujeneza cyashimwe n’urubyiruko rwari rwitabiriye “Youth Meet the President” rumuha amashyi y’urufaya, maze na Perezida Kagame acyakira neza, amwizeza ko ababishinzwe bagiye kubikurikirana.

Shema Steve yahawe umwanya mu kiganiro cy’urubyiruko rwahuye na Perezida Kagame, maze atanga ubuhamya bw’uko yakiye ibiyobyabwenge, nyuma yo kuba imbata yabyo kandi atarabikoresheje igihe kirekire.

Shema avuga ko ari umunyakamakuru, akaba n’umubyeyi, ariko ubu akaba arimo gukira nyuma yo kureka ibiyobyabwenge birimo heroyine, kokayine, ubu akaba amaze imyaka irindwi abiretse.

Yagize ati, “ Hari abantu batekereza yuko ibiyobyabwenge byose, ubikoresha igihe kirekire, akaba ari bwo bikubata,ariko hari ibiyobyabwenge bishobora kukubata, ubikoresheje rimwe cyangwa se kabiri konyine. Njyewe ubwanjye, byambayeho, kandi ndi umuhamya wabyo, nagerageje ikiyobyabwenge cya heroyine ndi kumwe n’inshuti zanjye rimwe, kabiri, gatatu, iyo minsi itatu, yamfashe imyaka ibiri n’igice kugira ngo mbikire. Nkaba ntekereza ko urubyiruko rwagakwiye kubibona nk’isomo ry’ifatizo ko uburyo bwiza n’umuti wo kwirinda ibiyobyabwenge,ntimukabigerageze na rimwe”.

Perezida Kagame, yahise amwuzuza kuri iyo ngingo yo kutagerageza ibiyobyabwenge na rimwe, agira ati, “ Icyo nakongereraho,ntimukabigerageze na rimwe, kuko nta kirimo kibafitiye akamaro, uko byagenda kose”.

Shema yakomeje asobanura ko hari imyumvire abantu bagira itariyo, y’uko hari ibiyobyabwenge bitewe n’ubwoko bwabyo n’uko bihenze, bikaba ari iby’abantu bifashije barenzwe, cyangwa se ari iby’abantu batifashije bihebye, ariko ngo ni ukwibeshya, kuko buri wese ni umukandida wabyo.

Yagize ati,” Buri muntu uwo ari we wese, umutoya,umukuru, njya mbwira inshuti zanjye rimwe na rimwe, njyewe aho twabinyweraga,habaga hari abayobokamana babimanura batera isengesho. Hakaba ndetse n’abantu ruharwa, abanyabyaha ruharwa, babikoreshaga ari uko babiteraniye ibyuma. Rero harimo ingeri zose, harimo abize, harimo abarize, nawe, uwo ari wese, umwana, umukuru yaba umukandida . Ntukibwire ko bitakureba, cyangwa ngo wibwire ko ufite ubwenge bwinshi”.

Shema yasobanuye ko hari urubyiruko rutekereza ko ikibazo kiba kireba gusa uwo wakoresheje ibiyobyabwenge gusa, n’izindi nzego zikabyibwira zityo, ariko ngo ni ikibazo kiba kireba n’ababyeyi. Shema nk’umuntu washinze ikigo gifasha ababaswe n’ibiyobyabwenge kubimo, ngo hari ubwo ahamagarwa n’ababyeyi bamusaba ubufasha ku bana babo.

Yagize ati, “ Njyewe hari umubyeyi wampamagaye, arambwira ngo, ndangira umupfumu wakuvuye mushyire umuhungu wanjye.Hari iyo myumvire y’uko ari uburozi,n’abana bapfa, nubwo bisa n’aho bitavugwaho,abana tungana, ndetse n’abandi bantu bafata ibiyobyabwenge byinshi bagapfa,wajya ku kiriyo kubera rya pfunwe ntabwo rirangirira k’ubukoresha gusa ahubwo n’umuryango urarigira. Ubwo yapfa, bakakubwira ngo yishwe n’igifu kandi no kuba yafashe ibiyobyabwenge byinshi”.

Shema yavuze ko hari urubyiruko ruba ruri ku mihanda, aho bita ku ‘iligala’rutekereza ko gusangiza abantu ubuhamya nk’ubwo, ari ukuba umuntu udafututse.

Ati, “ Niba bishoboka Nyakubahwa Perezida muze kumpa agafoto, nzagende nkabereke, mbereke ko byabangejejeho. Murakoze cyane”.

Perezida Kagame yamusubije ko icyo asabye ari ikintu cyoroshye rwose, ariko amushimira ko ubuhamya atanze bwo busobanuye byinshi. Anenga abaca intege abaza gutanga ubuhamya bufasha mu kurwanya ibyo biyobyabwenge,abo ngo ntibagombye guhabwa umwanya muri sosiyete.Ahubwo ngo abantu bakwiye kubarwanya, bakorekwa ko ibyo bavuga ntacyo bimaze.

Ati, “ Abantu b’ikibi, ntibagatsinde ab’icyiza. Ntibyagombye kubaho”.

Ikigo gishinzwe amazi isuku n’isukura (WASAC), cyijeje abafatabuguzi bacyo ko kiri muri gahunda zo gukemura ibibazo by’isaranganywa ry’amazi mu Mujyi wa Kigali no mu nkengero zawo, ku buryo ibibazo byagaragaye mu mpeshyi y’uyu mwaka bitazongera.

Ibibazo by’amazi bikunze kugaragara cyane mu gihe cy’impeshyi mu bice bimwe na bimwe byo mu Mujyi wa Kigali no mu nkengero zawo, ku buryo hari aho bamara igihe kirenga ukwezi batarabona n’igitonyanga cy’amazi mu mavomo yabo kandi babarwa nk’abantu bafite amazi mu ngo zabo cyangwa hafi yabo.

Mu mpeshyi y’uyu mwaka (2026) ho bisa nkaba byabaye akarusho kubera ko hari n’abamaze igihe kigera ku mezi abiri batarayabona, ku buryo batasibaga kwinubira uburyo bahendwaga no kuyabona bayaguze ahandi kuko hari aho kubona injerekani imwe ya litiro 20 byasabaga nibura amafaranga 1000Frw.

Ubwo ku mugoroba wo kuri uyu wa Kabiri, Umunyamabanga wa Leta ushinzwe ibijyanye n’ingufu muri Minisitiri y’Ibikorwa remezo, yahaga Inteko Ishinga Amategeko umutwe w’Abadepide, ibisubizo mu magambo ku bibazo byagaragaye muri WASAC, byerekeye imitangire y’amasoko, imicungire y’imishinga, serivisi zo kugeza amazi ku baturage zitanoze n’igihombo cy’amazi atunganywa ntakoreshwe, yabajijwe icyo, icyo kigo kigenderaho gisaranganya amazi mu Mujyi wa Kigali no mu nkengero zawo ku buryo hari abashobora kumara igihe kirenga ukwezi baratarayabona kandi abandi bayafite.

Ashingiye ku buremere bw’ibibazo by’amazi bisigaye bigaragara, hamwe n’isaranganywa ryayo ridakorwa neza, Hon Christine Mukabunani, yasabye ibisobanuro ku kigenderwaho mu isaranganywa ryayo kubera ko bidakorwa mu buryo bukwiye.

Yagize ati “Ugasanga hari aho abaturage bashobora kumara ukwezi cyangwa amezi abiri nta mazi bafite kandi ahandi bayabona. Nagira ngo mbaze nyakubahwa Minisitiri bashingira kuki baha abantu amazi, utundi duce ntituyabone.?”

Mu gusubiza ikibazo cy’isaranganywa ry’amazi ritagenda neza mu Mujyi wa Kigali no mu nkengero zawo, Umunyamabanga wa Leta Ushinzwe ibikorwa by’ingufu, muri Minisiteri y’Ibikorwa remezo, Armand Zingiro, yavuze ko bafite ibibazo bijyanye n’ibikorwa remezo, birimo ibigega bishaje cyane, imiyoboro y’amazi ishaje, byose bitajyanye n’uburyo imiturire igenda yaguka mu buryo bwihuse.

Yagize ati “Ugasanga umuyoboro mugari ari izana amazi iyavanye ku ruganda ikayageza muri karisiye (quartier), aho abantu bafatira, ugasanga hari abaguze udutiyo dutoya, bagafatiraho. Ibyo bintu nibyo bituma mu gihe n’amazi yabonetse, hari uduce twamaze kubona, twagaragajwe n’itsinda ryacu rigenda rirebamo ukuntu isaranganywa ririmo gukorwa, dusanga muri Kigali honyine hari ahantu hagera 9, harimo Jali na Kanombe, hakunda kwibasirwa no kutagerwamo n’amazi, kubera ibyo bibazo by’ibikorwa remezo, birimo amatiyo adafite ibipimo bya nyabyo.”

Yunzemo ati “Twakoze inyigo, tuzi ibikenewe kugira ngo bikemurwe, ubu turimo turabikora mu byiciro, ku buryo isaranganywa, twabonye ko ubu iyo turikoze bigera ku kigero cya 85%, ariko nidukemura biriya bibazo byose bishobora kugera kuri 95%. Tukaba turimo kubyihutisha ku buryo impeshyi itaha dushaka kwizeza abafatabuguzi bacu ko bazabona ibintu bitandukanye n’ibyo babonye muri iyi mpeshyi ishize.”

Muri rusange amavomo rusange ya WASAC ari mu gihugu angana na 20,734, arimo 2,164 adakora bingana 10%. Muri yo 659 akaba afite ikibazo cy’imiyoboro y’amazi idakora, 363, yo yarangiritse, andi 343 ntagikoreshwa n’abaturage kuko babonye amazi mu ngo zabo, naho 309 yo yabuze abayacunga, agera 353 yo yarasenyutse, mu gihe 137 yabuze amazi kubera amasoko yakamye.

Abagize Inteko Ishinga Amategeko babajije Komisiyo y’Igihugu ishinzwe Abakozi ba Leta niba yumva ibyemezo ifata byubahirije amategeko mu gihe itujuje umubare w’abakomiseri ba ngombwa ngo iterane, ikore inama.

Ubwo imitwe yombi y’Inteko Ishinga Amategeko yagezwagaho mu magambo raporo y’ibikorwa bya Komisiyo y’Abakozi ba Leta by’umwaka wa 2025-2026 ndetse na gahunda y’ibikorwa byayo bya 2026-207, kuri uyu wa 21 Ukwakira, Depite Mukabunani yabibukije icyo itegeko riyishyiraho riteganya ko iyi komisiyo igirwa n’abakomiseri barindwi, nyamara ubu bakaba ari batanu ushyizemo Perezida wayo na Visi Perezida.

Ashingiye kuri uwo mubare uteganywa n’Itegeko, Depite Mukabunani ati “Ndagira ngo mbaze Komisiyo niba bumva ibyemezo bafata biba byubahirije amategeko.”

Perezida w’Agateganyo wa Komisiyo y’Abakozi ba Leta, SEBAGABO MUHIRE Barnabé, yavuze ko iki kibazo cy’abakomiseri batuzuye kizwi kandi bakiganiyeho na Minisiteri y’Abakozi ba Leta (MIFOTRA), na bo bakaba ngo bategereje igisubizo.

Mu gusubiza ariko, Sebagabo yirinze gusubiza ikibazo nyir’izina cyabazaga niba ibyemezo bafata biba byubahirije amategeko.

Byatumye Depite Mukabunani yongera kwaka ijambo avuga ko bidakwiye ko Komisiyo y’Igihugu cya Leta ikomeza gukora itubahiriza amategeko, mu gihe mu nshingano zayo harimo gusaba abandi kubahiriza amategeko.

Yagize ati “Igisubizo yampaye ntabwo cyanyuze, kuko ibyemezo iyi komisiyo ifata ubundi bifatwa n’abantu bane byagombye gufatwa n’abantu barindwi. Ntabwo rero bikwiye ko yakomeza gukora mu buryo bunyuranyije n’amategeko.”

Ni ikibazo cyagoye Komisiyo y’Abakozi, Perezida wayo w’Agateganyo asaba Inteko kuba ari yo igisubiza, agira ati “Kubera ko komisiyo itanga raporo ku Nteko, icyo kibazo Inteko yagifata.”

Iyi Komisiyo yavuze ko mu bugenzuzi yakoze yasanze hari bimwe mu byo abantu bafitiye dipolome, ariko ugasanga bitari mu myamya y’imirimo yateganyijwe ipiganirwa yinjijwe muri sisitemu ya MIFOTRA, ikaba ngo yarafashe umwanzuro wo kubarura amasomo abanyeshuri biga no kureba inyito za dipolome bahabwe kugira ngo byinjizwe muri sisitemu bityo na bo bajye bahabwa amahirwe yo gupiganirwa imirimo.

Iyi Komisiyo kandi yabwiye abadepite ko mu bugenzuzi yakoze yasanze ibikorwa bijyanye no gushyira abakozi mu mirimo n’imicungire y’abakozi byaratumye Leta itsindwa imanza cumi na zirindwi (17) muri 2024-2025, biteza Leta igihombo cy’asaga miliyoni 60FRW.

Ni mu gihe, muri 2025-2026, imanza zijyanye n’imicungire y’abakozi zateje Leta igihombo cy’arenga miliyoni 83FRW.

Kuri uyu wa Gatatu, mu gihugu cya Kenya hatangiye Shampiyona ya Afurika y’Amagare 2026, u Rwanda rutangira rwegukana imidali itatu ya zahabu mu cyiciro cy’abagore.

Mu cyiciro cy’abagore Ingabire Diane yegukanye umudali wa zahabu akoresheje iminota 31 n’amasegonda abiri mu gusiganwa ibilometero 20 na metero 400.

Undi mudali wa zahabu wegukanwe na Masengesho Yvonne mu batarengeje imyaka 19 aho yakoresheje iminota 15 n’amasegonda 37 mu gusiganwa ibilometero 10 na metero 200.

Mwamikazi Djazilla nawe yegukanye umudali wa zahabu mu batarengeje imyaka 23 ahize abandi agakoresha iminota 31 n’amasegonda 37 mu gusiganwa ibilometero 20 na metero 400.

Mu bagabo u Rwanda ntabwo rwahiriwe ngo rubone umudali kuko Umunyarwanda waje hafi ari Muhoza Eric wabaye uwa kane mu bagabo aho yarushijwe amasegonda 59 na Mayer Alexandre wabaye uwa mbere akoresheje iminota 40 n’amasegonda 32 mu gusiganwa ibilometero 30 na metero 600. Muri iki cyiciro kandi Nsengiyumva Shemu yabaye uwa gatatu muri rusange aho we yarushijwe n’uwa mbere umunota umwe n’amasegonda atanu.

Mu batarengeje imyaka 19, Umunyarwanda waje hafi ni Ishimwe Brian wabaye uwa cumi arushwa iminota itatu itatu n’uwa mbere Hardy Tristan wakoresheje iminota 26 n’amasegonda 49 mu gusiganwa ibilometero 20 na metero 400. Muri iki cyiciro kandi Niyonkuru Yassin yabaye uwa 14 warushijwe n’uwa mbere iminota itatu n’amasegonda 50.

U Rwanda muri iyi Shampiyona ya Afurika y’Amagare 2026 iri kubera muri Kenya kugeza tariki 25 Ukwakira 2026 ruhagarariwe n’abakinnyi 28 mu byiciro bitandukanye.

Amina Umuhoza, yavukiye mu Murenge wa Kimisagara mu Karere ka Nyarugenge mu 1996, mu muryango usanzwe utari wifashije cyane akaba yaragize amahirwe yo kwiga arihiwe n’imiryango y’abagiraneza.

Umuhoza ni umwe mu batanze ubuhamya muri BK Arena ubwo urubyiruko rwahuraga na Perezida wa Repubulika Paul Kagame muri gahunda yiswe Youth ‘Meet the President’, igamije guhuza Umukuru w’Igihugu n’ibyiciro bitandukanye by’Abanyarwanda.

Umuhoza yavuze ko ubwo yari mu amashuri abanza yagize amahirwe yo kumenya no kubona abana batorezwaga kubyina ku kigo cy’urubyiruko cya Kimisagara n’umubyeyi Mariya Yohana, na we asaba kujyayo, maze abisabye ababyeyi barabimwemerera.

Nyuma yaje kujyayo arakirwa, yigishwa kuvuga imivugo, n’indi mikino y’abana itandukanye, kugeza igihe yarangirije amashuri abanza, atsinda ibizamini bya Leta, bamwohereza kwiga mu Ntara y’Amajyepfo.

Ati “Ariko nabwo byari igitangaza kuko ni bake batsindaga ibizamini bya Leta icyo gihe. Ikintu gitangaje ni uko ngeze aho nigaga mu Majyepfo, mukuru wanjye yazanye ibaruwa ivuga ko natoranyijwe mu bana 8 babaga muri iryo tsinda, tukaba twari tugiye guherekeza nyakubahwa Perezida wa Repubulika muri Boston, aho yari agiye kwakira igihembo cy’uko yita ku bana, yari yagenewe na UNICEF.”

Icyo gihe ngo yari afite imyaka 13, bituma aba umuntu wa mbere mu muryango wabo ugiye mu ndege.

Amaze kugira imyaka 16, yararebye asanga abandi bana bakuranye mu ishuri bataragize amahirwe yo gukomeza ubuzima bw’inzozi zabo, kuko ejo hazaza habo hakomwe mu nkokora no gutwara inda zitateguwe, bituma yiyemeza ko agomba kuzagira icyo akora.

Aha, yahise yibuka umwana w’umuhungu biganye mu mashuri y’ibanze, wahoraga amutehga iminsi, amubwira ati "Wowe! Ntuzarenza imyaka cumi n’itanu utaraterwa inda."

Nyamara, yaramuhinyuje, arenga icyiciro gikomeye cy’ubugimbi adatewe inda itateganyiwe.

Hagati ahoo, yaje kwitabira amarushanwa yo ku rwego rw’Igihugu, yamusize abaye uwa kabiri mu mivugo, mu bihembo yahawe harimo na mudasobwa.

Ati “Iyo mudasobwa yaramfashije cyane kuko naje kumenya ko amasomo yo kwihangira imirimo bitewe n’ubumenyi twahabwaga, nize ko igitekerezo cyo kugira ngo utangire umushinga, utangira ureba aho utuye ikibazo gihari, kandi jye aho nari ntuye ikibazo cyari gihari, cyari abangavu baterwa inda.”

Mudasobwa yahawe yayijyanaga ku kigo cy’urubyiruko cya Kimisagara, akahabonera murandasi y’ubuntu, yamufasha gushaka amakuru yo kwiteza imbere.

Icyo gihe yahamenyeye amakuru y’amarushanwa ya ‘Youth Connekt’, arayitabira, asiga atoranyijwe muri 30 ba mbere mu gihugu, ahabwa igihembo cy’amafaranga ibihumbi 500Frw, ari nayo yatangiriyeho.

Ati “Kubera ko igishoro icyo gihe kitari gihagije, najyaga ku kigo cy’urubyiruko, nkajya mbasaba ko najya mpakorera ibikorwa twateguraga, baranyemerera. Mu gutangira kuko ntari mfite aho gukorera, negereye imwe mu nshuti zanjye impa intebe n’imeza aho yakoreraga. Ubu aho tugeze dufite santere ebyiri tudakodesha. Iya mbere iri mu Murenge wa Nyamirambo indi iri mu Murenge wa Kimisagara.”

Icyo bakora ni ukwigisha abangavu n’ingimbi ku buzima bw’imyororokere bakoresheje ibikoresho byifashishwa mu guhanga udushya (Creative tools), aho abagize ibyago byo guterwa inda bakiri bato, bigishwa imyuga itandukanye irimo ubudozi.

Bamaze guhugura abangavu n’ingimbi barenga ibihumbi 17, bakaba bamaze gutera intambwe ishimishije kuko umwaka ushize wa 2025, nta mwangavu cyangwa ingimbi bakorana wahuye n’ikibazo cyo guterwa cyangwa gutera inda.

Ni urugendo avuga ko rwamwigishije amasomo arimo kutazitirwa n’aho uturuka ngo wishyirireho umupaka ku mahirwe ushobora kubona, ahubwo ukumva ko ari abandi bigenewe. Ikindi yize ni ukudacika intege kuko hari byinshi yageragejemo amahirwe bikamusaba gutegereza imyaka irenga itanu kugeza abigezeho.

Perezida w’Inama y’Igihugu y’Abagore, Nyirajyambere Belancille, avuga ko bahuguye kandi bagakangurira abagore kwitabira amatora y’inzego z’ibanze ateganyijwe gutangira ku wa 24 Ukwakira 2026.

Nyirajyambere avuga ko ibi bigamije gufasha abagore kuva ku rwego rw’Umudugudu kugera ku rwego rw’Umurenge kwitabira amatora, kwiyamamaza no gutinyuka bakajya mu nzego z’ubuyobozi zifatirwamo ibyemezo.

Avuga ko Inama y’Igihugu y’Abagore ifite inshingano zo kubakira abagore ubushobozi no kubakangurira kugira uruhare muri gahunda z’iterambere, binyuze mu bikorwa by’ubukangurambaga n’ubuvugizi, mu bufatanye na Minisiteri y’Uburinganire n’Iterambere ry’Umuryango.

Nyirajyambere avuga ko Leta y’u Rwanda yashyize imbere umugore, ndetse abagore bakaba bafite umwanya wihariye mu nzego zifatirwamo ibyemezo, aho amategeko ateganya ko nibura 30% by’imyanya ihabwa abagore.

Ati: “Twe turimo gushishikariza abo duhagarariye kuva ku rwego rw’Umudugudu kugera ku rwego rw’Akarere, kwiyamamaza ndetse bakazitabira gutora no kujya mu nzego z’ibanze muri aya matora tugiye kwinjiramo.”

Nyirajyambere avuga ko muri ubu bukangurambaga hibanzwe kandi ku rubyiruko ndetse n’abafite ubumuga, kugira ngo na bo bitabire aya matora kandi bagire uruhare mu miyoborere y’igihugu.

Mu byo abagore bigishwa harimo kumenya uruhare rwabo mu gufata ibyemezo, cyane cyane mu nzego z’imitegekere zegerejwe abaturage.

Nyirajyambere avuga ko Inama y’Igihugu y’Abagore ikora ubukangurambaga bugamije gutuma ibyiciro bitandukanye by’abaturage bigira uruhare mu guteza imbere imiyoborere myiza, kwishakamo ibisubizo bishingiye ku muco no guteza imbere uburinganire hagati y’abagabo n’abagore.

Ati: “Hari aho ubona hagikenewe gushyirwamo imbaraga, nko mu bwitabire bw’abagabo n’abagore mu nzego zifatirwamo ibyemezo, kuko ubwitabire bw’abagore buracyari hasi, cyane cyane mu nzego z’imitegekere zegerejwe abaturage, kuko ikinyuranyo kikiri kinini ugereranyije n’abagabo babyitabira.”

Bimwe mu byo abagore bahugurwamo harimo kumenya gufata ibyemezo, kuvugira mu ruhame igihe biyamamaza, kumenya imyanya y’ubuyobozi ibabereye no gukoresha ubushobozi bafite, bakareka kwitinya bakumva ko bashoboye.

Nyirajyambere avuga ko ubwitabire bw’abagore mu nzego z’imitegekere y’igihugu zegerejwe abaturage ku rwego rw’Akarere bukiri hasi, kuko ari 23%.

Avuga ko ku mwanya w’abayobozi bungirije b’uturere bashinzwe ubukungu abagore bangana na 18%, mu gihe abashinzwe imibereho myiza y’abaturage ari 74%. Ku rwego rw’Umudugudu, abagore bari kuri 18%, naho ku rwego rw’Umurenge bakaba 19%.

Ati: “Turifuza ko nabo baza muri izi nzego kugira ngo dukomeze kubafasha gukuraho imbogamizi zose zibuza abagore kujya mu myanya y’ubuyobozi, kugira ngo nabo bazane impinduka mu cyerekezo cy’Igihugu 2050.”

Umuryango w’Abanyarwanda baba mu Bufaransa (CRF) wanenze ubutabera bw’u Bufaransa nyuma y’urupfu rwa Paul Barril, wahoze ari Kapiteni wa Jandarumori akaba n’umuyobozi w’ishami rishinzwe kurwanya iterabwoba mu biro bya Perezida w’u Bufaransa, wapfuye ataraburana ku birego bikomeye byo kugira uruhare muri Jenoside yakorewe Abatutsi mu Rwanda mu 1994.

Mu itangazo uyu muryango washyize hanze kuri uyu wa 21 Ukwakira 2026, wavuze ko urupfu rwa Paul Barril wapfuye ku wa 20 Ukwakira 2026, rutumye hari ibibazo byinshi bitabonewe ibisubizo, cyane cyane ibijyanye n’uruhare rwe n’imibanire ye n’abayobozi b’u Bufaransa n’abari ku butegetsi mu Rwanda mu gihe cya Jenoside.

CRF ivuga ko Paul Barril yari afitanye umubano wihariye n’abayobozi b’u Rwanda icyo gihe, aho ku wa 28 Gicurasi 1994, mu gihe Jenoside yakorewe Abatutsi yari ikomeje, nyuma y’uko Umuryango w’Abibumbye ufatiye u Rwanda ibihano birimo guhagarikirwa kugurishwa intwaro, ngo Barril yasinyanye amasezerano na Jean Kambanda, wari Minisitiri w’Intebe wa Guverinoma y’inzibacyuho yashyizweho mu gihe cya Jenoside.

Ayo masezerano yari yerekeye ubufasha mu bya gisirikare, harimo no kumuha intwaro, amasasu n’abakozi bashinzwe guhugura no kuyobora ibikorwa bya gisirikare.

Mu kwezi kwa Kamena 2013, imiryango irimo Ihuriro Mpuzamahanga ry’Uburenganzira bwa Muntu (FIDH), Ishyirahamwe ry’Uburenganzira bwa Muntu mu Bufaransa (LDH) na Survie yatanze ikirego kuri Paul Barril, imushinja kugira uruhare mu gufasha abakoze Jenoside yakorewe Abatutsi.

Icyo gihe hatangijwe iperereza ariko hashize imyaka 13, ndetse Paul Barril akaba yapfuye ataragezwa imbere y’urukiko ngo aburanishwe ku birego yashinjwaga.

Umuryango wa CRF wagaragaje impungenge ku gihe kirekire iperereza ryamaze, usaba ko hakorwa isesengura ry’inzitizi zatumye ritagera ku musaruro nk’uko byari biteganyijwe.

Wagarutse kandi ku kibazo cy’ubudahangarwa cyangwa ubufasha Paul Barril ashobora kuba yarahawe bwatumye adakurikiranwa uko bikwiye, cyane cyane ku bijyanye no kubona zimwe mu nyandiko zo mu bubiko zishobora gutanga amakuru ku bikorwa bye n’imibanire ye n’abayobozi b’u Bufaransa.

CRF yakomeje ivuga ko bitumvikana uburyo bishoboka ko ibirego bikomeye nk’ibyo bitigeze bisuzumwa n’urukiko, kandi bifitanye isano n’amateka akomeye ya Jenoside yakorewe Abatutsi.

Nubwo urupfu rwa Paul Barril rushobora gutuma adakomeza gukurikiranwa mu buryo bw’inshinjabyaha, uyu muryango ushimangira ko rutagomba kuburizamo ubushakashatsi bugamije kumenya ukuri ku byabaye n’uruhare yagize muri Jenoside yakorewe Abatutsi mu 1994.

Usaba ko inyandiko n’ibimenyetso bifitanye isano n’uru rubanza bishyirwa ahagaragara kugira ngo bishobore gukoreshwa mu kumenya abandi bantu bashobora kuba baragize uruhare cyangwa baratanze ubufasha ku byaha byakozwe.

CRF yasabye ko urupfu rwa Paul Barril rudahagarika gushaka ukuri. Yashimangiye ko imyaka 32 ishize Jenoside yakorewe Abatutsi ibaye itagomba kuba impamvu yo kwibagirwa inshingano zo kugaragaza ukuri no guharanira ubutabera ku barokotse Jenoside n’imiryango yabo.

Minisitiri w’Ubuzima, Dr Sabin Nsanzimana yasabye urubyiruko rwaje guhura na Perezida, kwambura agaciro inzoga, kuko ari mbi yaba ku buzima no ku gihugu muri rusange. Yasobanuye uko inzoga zibuza abantu kugera ku nzozi zabo.

Minisitiri Sabin yasobanuye uko urubyiruko rugira indoto, zikabavamo intego ariko hakaba ibintu kwitambika hagati y’indoto n’intego,bigira ingaruka ku rubyiruko no ku gihugu. Yasabye ko imvugo y’uko urubyiruko ari imbaraga z’igihugu zubaka kandi vuba, itaba amagambo gusa, ahubwo bikaba no mu bikorwa.

Yagize ati,” Ni ukwibaza muti ese ni imbaraga zo mu mitsi?ni imbaraga zo mu mutwe?ese imbaraga zawe zihurira he n’izanjye kugira ngo zibe iz’igihugu?dufashe Nyakubahwa Perezida wa Repubulika tugeze igihugu aho kigomba kugera.Hari byinshi bishobora kwitambika aho hagati kugira ngo izo mbaraga zacu zitagira aho zitugeza. Ariko ikizwi cyane, cyanakozweho ubushakashatsi buhagije,ni ubusinzi, ni ibiyobyabwenge, ni ibavangira ubwonko”.

Minisitiri Sabin yavuze ko ubushakashatsi bwagaragaje ko abantu banywa inzoga n’ibiyobyabwenge 50% ari bo bashobora kugera ku nzozi zabo mu gihe abanda 50% birangirira mu businzi.Mu mashuri kimwe cya kabiri ngo barayata iyo banywa ibiyobyabwenge.

Yagize ati, “ Reka tuvuge ku nzoga, inzoga zahawe agaciro kadakwiriye mu muco wacu no mu muryango Nyarwanda.Tugomba kuzambura ako gaciro, tugaha agaciro ibikwiriye.Urubyiruko rugera aho ukaba wagira ngo hari ikiba mu nzoga kindi kitazwi cyiza. Nta cyiza kiba mu nzoga, haba ku buzima, haba no mu iterambere ry’igihugu. Nta cyiza cy’inzoga kibaho,nta na kimwe.ushobora kubaho utazinywa”.

Minisitiri Sabin yifashishije ubuhanga mu by’ibinyabuzima, nka Muganga, yavuze ko bifata amasegonda 50 gusa, nyuma yo gusoma ku nzoga,ikaba yageze mu gice cyose cy’umubiri.Ibiryo kandi ari nabyo bifite akamaro, ntabwo bigera mu mubiri wose muri ako kanya gato.Ngo hari n’aho bitarenga mu bwonko. Yasobanuye ko hari akugi karinda ubwonko, karinda ko bwinjirwamo n’ibintu byabwangiza,ariko inzoga zo ngo zinyura muri ako kugi nkaho gakinguye muri ayo masegonda 50.iyo zigeze mu bwonko zihita zitangira kubangamira itumanaho ry’utunyangingo twabwo. Icyo gihe ibyemezo umuntu yari gufata ari muzima, birahinduka, utavugaga agasakuza, utarwanaga agatangira gukubita n’abamubyaye n’inshuti ze, umugore agakubita umugabo n’ibindi.Uwasinze ntacyo yikwigezaho.

Yagize ati, “ Inzoga tuzambure agaciro,duhe agaciro ibikwiye kugahabwa.hari noneho izi z’ibyuma, zaciwe ariko zitarashira neza. Zo ntabwo zitegereza igihe kirekire, zirahuma, zihuma abantu amaso. Dufite abantu babaye impumyi kubera icupa rya sentiritiro 75.Akaba impumyi akaba umuzigo ku gihugu”.

Minisitiri Sabin avuga ko itabi ry’urumogi, yavuze ko ari ribi cyane kubera ko ubwonko bw’urubyiruko buba bugikura, bityo kubushyiramo itabi bikaba bitatuma rugera mu cyerekezo igihugu kijyamo.Kanid ibyo ngo bireba abo mu Mujyi no mu cyaro.

Minisitiri Sabin yasabye urubyiruko kwita ku buzima bwarwo kugira ngo rubashe kugera ndoto zarwo, kuko bitizana, bisaba kubikorera, bakabivunikira. Ariko umeze neza abigeraho. Asaba abadakora siporo, bagakomeza kuvuga ko bazatangira ejo, gutangira ubu, kuko ikintu cyiza ugitangira uwo munsi. Avuga ko urubyiruko ari cyo gishoro cy’igihugu, kandi uwamaze kwica igishoro cy’igihugu ntibigarukira kuri we gusa, ahubwo byangiza n’igihugu muri rusange.

Minisitiri Sabin yasabye urubyiruko kujya rwibuka gusaba ubufasha kwa muganga, igihe rwagize ibibazo by’ubuzima, kandi bagasaba ubufasha bahereye ku nshuti zabo. Yibutsa urubyiruko kandi ko bidakwiye gutererana uwagize ibibazo, ahubwo bakamufasha.

Perezida Kagame yasabye abitabiriye ibiganiro byahuje urubyiruko muri BK Arena kugira amahitamo meza rukirinda gusesagura kuko atari amahitamo meza.

Prezida Kagame yatanze urugero rw’ umuntu yareze akiri muto amurera mu buryo bw’akazi amwishyurira amashuri kugera ku rwego rw’icyiciro cya Kabiri cya Kaminuza (Masters).

Perezida Kagame avuga ko muri uko kumufasha yagendaga amubonaho utuntu tw’imico itari myiza akabona ishobora kumwangiza ndetse agera ubwo amusaba ko yabireka kugira ngo bitazamwangiza ejo hazaza he.

Uwo muntu nyuma yo kurangiza amashuri yagiye kureba Perezida Kagame yishimye amubwira ko afite inshuti bagiye gushakana Perezida Kagame amubaza icyo yamufasha.

Ati “Icyo gihe yari afite agapapauro mu Mufuka kanditseho ibyo akeneye bingana na Miliyo 10 z’amanyarwanda. Ndabireba ndamubaza nti ese nyaguhaye ibibazo byawe bijyanye n’ubukwe byaba bikemutse? Aranyemerera.”

Perezida Kagame yavuze ko mbere yo kumuha ya mafaranga yabanje kubaza amakuru atandukanye amwerekeyeho aza kumenya ko ajya mu bacuruzi akabasaba amafaranga abitwererezaho ababwira ko agiye gukora ubukwe.

Icyo gihe Perezida Kagame yaramubajije ati ese ko numvise ko ugenda witwerereza mu bacuruzi bakomeye nibyo? Icyo gihe Perezida Kagame yahise amubwira ko hari ibintu bimwe agiye gukosora ahita ajya kuri rwa rutonde rw’ibintu.

Perezida Kagame avuga ko yamubwiye ko agiye kumukemurira ikibazo amusaba rwa rutonde agenda agira ibyo agabanyamo anamwemerera ko azamufasha gukora ubukwe bwiza.

Umukuru w’igihugu yamugiriye inama yo kudakorera ubukwe muri Hoteli kuko ieanze gusa byakabaye byiza iyo iyo hoteli ibaye ari iye.

Perezida Kagame yamwemereye ko yamukorera ubukwe mu Rugwiro akamushyiriramo Amahema meza ndetse ko azamubwirira inzego z’umutekano zishinzwe kuharinda bakemerera abatumirwa bose bakajya kuhiyakirira.

Ati “Imyambaro myiza uzambara n’abasore bandi bazaguherekeza bose, vuba aha ngiye kujya hanze nzagufatira itike y’indege tuzajyane ku Isafari hanyuma hanze hariya nzakwishyurira ujye mu iduka ufate imyenda ugaruke. Ikindi kuri ibi bijyanye n’inzoga zizakira abantu tuzazisimbuza ibindi binyobwa birimo umutobe w’imbuto, ikawa, Fanta, n’icyayi biryoshye cyane”.

Perezida Kagame yamubajije abantu azakira uko bangana uwo muntu amusubiza ko bagera kuri 600. Icyo gihe Perezida yamubwiye ko atifuza ko mukwiyakira kw’abatumirwa bakoresha inzoga ahubwo bazakoresha ibinyobwa bidasindisha.

Perezida Kagame yibukije uwo muntu ko mubo azatumira abenshi bazaba barimo barya bananywa izo nzoga yabateguriye ariko ko ibirori nibirangira ntawe uzibuka ibyo byose yabakirije.

Ati “Namubwiye ko ayo mafaranga angana na Miliyoni 10 nzayamuha yose uko yakabaye ariko nkazayamuha nyuma y’ubukwe kuko nshaka ko ayo mafaranga uzashaka icyo uyakoresha nyuma y’ubukwe aho kugira ngo abo bayanywere ashire”.

Perezida Kagame avuga ko nyuma y’Ubukwe yamubajije icyo yaba yaramuhombeje kuko atakirije abatashye ubukwe inzoga za Miliyoni 10frw undi amusubiza ko ntacyo.

Ati “Igituma mbabwira ibyo byose ni ukugira ngo mbabwire ko umuntu ariwe wiyubaha akiheraho mbere cyangwa akiyangiza. Umuryango cyangwa inshuti bakaba baza bagafasha abandi bakabakebura. Ntimugatume umuntu yemera ibintu bibi muhari mujye mubakebura”.

Perezida Kagame yatanze uru rugero mu rwego rwo gufasha urubyiruko kumenya kugira amahitamo meza igihe bagiye gukora ubukwe.

Ibi bizarufasha kudasesagura ndetse no kumenya gufata ibyemezo bitabangamira umuryango wabo ndetse bikaba bitabateza ubukene n’izindi ngorane.

Abavandimwe icumi baje mu Kiganiro Perezida yagiranye n’urubyiruko, kiswe Meet the President, bashaka kubona ubutabera.

Umwe muri abo, yahagurutse ati "Nyakubahwa Perezida, nitwa Byiringiro Elysee, ndi umwana wa cumi mu bana cumi n’umwe tuvukana. Twaje hano twese kugira ngo turebe ko twabona amahirwe yo kubaza ikibazo tumaranye imyaka myinshi."

Byiringiro ntiyavuze iminsi ikibazo kimaze, ariko yagize ati "Abantu baraje batwambura inzu ababyeyi batuguriye, baduta hanze nka za mayibobo. Rwose turabasaba ko mwaturenganura. Twagiye no mu nkiko turabatsinda, ariko biba iby’ubusa."

Perezida Kagame yamusubije agira ati "Icyo kibazo kirakurikiranwa vuba vuba mu butabera ibintu bisobanuke."

Icyakora, Kagame yabwiye n’abayobozi bari aho, ko uwo muryango wakongererwa n’ubundi bufasha, nuko Byiringiro asubiza Micro aseka.

Rwiyemezamirimo ukiri urubyiruko witwa Dominique Uwase, yabwiye Perezida Paul Kagame ko yifuza guhabwa amahirwe yo kumwandikaho igitabo.

Uwase umushoramari wavuze ko afite icapiro rikomeye mu Rwanda yagize ati "Twakunze kubona ibitabo ku buzima bwanyu bikunze kwandikwa n’ab’ahandi, harimo n’ababandikaho inkuru itari yo. Nyakubahwa, twifuzaga kubona amahirwe yo kuba twakwandika igitabo cyanyu, cyandikiwe mu Rwanda, kikaba igitabo cy’urubyiruko."

Perezida Kagame yakurikiye uyu rwiyemezamirimo wari ufite umwete, aramubaza ati "igitabo urashaka kucyandika?"

Rwiyemezamirimo yahise ashyira ijwi hejuru ati "Yego ndashaka kucyandika", maze Perezida Kagame amubwira mu rurimi rw’Icyongereza ati "We shall discuss", bivuze ngo "tuzabivuganaho", cyangwa se "tuzabiganiraho."

Uyu Rwiyemezamirimo yagaragaje kandi ko Abanyarwanda bakeneye kumenya inyungu abashoramari b’u Rwanda bazakura muri Formula 1 iteganyijwe mu ntangiriro za 2030, akaba avuga ati "ubu hasigaye imyaka itatu, dukeneye kumenya amakuru neza, tugasobanukirwa aho twazinjirira tugakorera amafaranga, tukungukira muri Formula 1."

Perezida Kagame yahise amwereka abakurikiranira hafi imyiteguro ya Formula 1 barimo na Minisitiri wa Siporo Nelly Mukazayire, kugira ngo bamufashe.

Umusore uvuka mu Karere ka Rubavu akaba afite ubumuga bw’uruhu, yashimiye Perezida Kagame ko yahaye u Rwanda umutekano, akaba adahura n’ibibazo nk’ibyo ajya yumva mu bindi bihugu.

Yagaragaje ko mu bindi bihugu, "abafite ubumuga bw’uruhu bahohoterwa n’abantu batekereza ko abameze batyo ari imari", ariko akaba asanga mu Rwanda, Perezida Kagame yaratanze umutekano usesuye, ku buryo nta kibazo bahura na cyo.

Uretse umutekano, uyu musore avuga ko ahabwa n’urubuga rwo kwerekana ubushobozi bwe, ubu akaba akaba akora imirimo imwinjiriza amafaranga ku mbuga nkoranyambaga.

Icyakora, yavuze ko hakiri ikibazo cy’inyito ijyanye n’abafite ubumuga, bikaba bikwiye gusumanwa ubushishozi, bagahabwa inyito ikwiriye, kandi ibubahisha.

Perezida Kagame yavuze ko ibi bikwiye kuzasuzumwa.

Umusore uvuga ko atuye i Kanombe yabwiye Perezida Paul Kagame, ko abantu bamwitagaho bamutaye none ubu akaba abayeho nabi.

Uyu musore, wagowe no gusobanurira Perezida Kagame ikibazo afite mu by’ukuri, yabajijwe niba ashaka kwiga, ariko aravuga ati "Oya, ndashaka ko mwamfasha nkajya mu myuga. Mumbonere uburyo nabona icyo nkora cyangwa umuntu wamfasha kugira ngo njye ndya neza."

Perezida Kagame wagerageje ibishoboka byose kugira ngo agire icyo asobanukirwa mu kibazo uyu musore afite, yahereye ko amwohereza kuri Meya w’Umujyi wa Kigali kugira ngo amufashe.

Urubyiruko rwabajije Perezida Kagame impamvu serivise za Leta, zigenda nabi kurusha serivise z’abikorera

Uyu musore wari witabiriye Meet the President, yatanze ingero agaragaza ko hari ikibazo mu buvuzi, aho abantu bibwira ko mu bikorera ari ho hari ubuvuzi bwihuta.

Yagize ati "Hari aho nagiye, mpasanga umubyeyi umaze iminsi ibiri ataravurwa, maze aramubwira ati mwana wanjye, wowe ndabona uri umusirimu, wikwirirwa uza hano kuko urahatinda, igire mu ivuriro ryigenga."

Aha, uyu musore yagize ati "Byarambabaje."

Uyu musore kandi yahise yungamo avuga ko ababyeyi benshi bajyana abana mu mashiri yigenga, kuko aya leta atigisha neza, bakemera bikabahenda.

Perezida Kagame yamubwiye ko iki kibazo atari gishya, bakizi koko, kandi igikeneye ari uguhangana na cyo, cyane cyane ibya serivise mbi

Perezida Kagame yamuhaye urugero rw’ahantu yagiye mu isoko - supermarket, maze ajya ku murongo, ari inyuma y’abandi.

Yagize ati "Uwari uri kuduha serivise yabaga yibereye kuri telefoni. Ngeze imbere ku murongo, yeguye amaso arambona. Ariko ndamubaza nti uzi umwanya tumaze aha?"

Iki gihe, Kagame avuga ko uyu watangaga serivise yamushubije ubona atabyitayeho.

Kagame we agira ati "Ibi bintu dukwiye kubivuga, ariko ntibigarukire mu kubivuga gusa, ahubwo tugomba no kubyanga."

Kabayiza yabitangaje mu kiganiro Youth Meet President, cyahuje urubyiruko rw’u Rwanda na Perezida Kagame kuri uyu wa Gatatu, agaragaza ko kwamamaza u Rwanda nk’ahantu heza ho gushora imari no gusura byakongerwamo ubutumwa bushishikariza ibigo mpuzamahanga gukorana n’abahanga mu ikoranabuhanga baho.

Yatanze igitekerezo cy’uko ubutumwa bwa ‘Visit Rwanda’ bwajya buherekezwa n’ubundi bugira buti ‘Hire from Rwanda’ cyangwa ‘Source from Rwanda’, busobanura gushaka abakozi cyangwa serivisi mu Rwanda.

Yagize ati “Turizera ko twakoresha kandi izina rya ‘Visit Rwanda’ rimaze kwamamara, kugira ngo tunamamaze u Rwanda nk’ubukungu bushingiye ku bumenyi.”

Yasobanuye ko ubu buryo bwafasha kumvikanisha ko u Rwanda rutagamije gukurura ba mukerarugendo n’abashoramari gusa, ahubwo ko rufite n’abahanga bashobora guha ibigo byo mu mahanga serivisi z’ikoranabuhanga, zirimo guteza imbere porogaramu za mudasobwa no gukoresha ubwenge buhangano.

Kabayiza yavuze ko gukurura ibigo mpuzamahanga bigaha akazi impuguke z’Abanyarwanda byafasha kongera amahirwe y’akazi ku rubyiruko, bityo bikagira uruhare mu guteza imbere ubukungu bw’igihugu no kugabanya ubushomeri mu rubyiruko.

Iki gitekerezo kigaragaza amahirwe ari mu gukoresha ikoranabuhanga n’ubumenyi nk’ibindi byifashishwa mu kumenyekanisha u Rwanda ku rwego mpuzamahanga, ku buryo igihugu cyarushaho kugaragaza ubushobozi bw’abakozi bafite ubumenyi bushobora gukenerwa n’amasoko yo hanze.

Awesomity Lab ni ikigo gikora mu bijyanye n’ikoranabuhanga, by’umwihariko guteza imbere ibisubizo by’ikoranabuhanga, kikaba gishobora kungukira mu gukorana n’amasoko mpuzamahanga no kubona amahirwe yo kugeza serivisi zacyo ku bakiliya bo hanze y’u Rwanda.

Nyuma yo kumwumva, Perezida Kagame yasabye inzego zishinzwe #VisitRwanda n’izishinzwe ikoranabuhanga kumwegera bakiga uko icyo gitekerezo cyashyirwa mu bikorwa.

Perezida wa Repubulika, Paul Kagame, yavuze ko yigeze gukorana n’umukozi wari warabaswe n’inzoga ku buryo byamubuzaga kuzuza inshingano ze uko bikwiye, kugeza ubwo kugenda bisanzwe bimugora.

Perezida Kagame yabigarutseho ku wa Gatatu, tariki ya 21 Ukwakira 2026, mu biganiro yagiranye n’urubyiruko rusaga ibihumbi 10 rwitabiriye gahunda ya Youth, yabereye muri BK Arena i Kigali.

Yatanze urugero rw’umuyobozi bakoranaga bya hafi, avuga ko hari igihe yamushakaga mu masaha atandukanye, ariko ntamubone, byagera mu masaha ya nimugoroba akamubura burundu, nyuma aza gusanga impamvu ari uko yari yabaswe n’inzoga.

Ati: “Iyo byageraga mu masaha ya nimugoroba, butangiye guhumana, sinamubonaga, ariko yabaga ari kunywa inzoga.”

Perezida Kagame yavuze ko yabanje kumugirira impuhwe, atekereza ko ashobora kuba aba ari kumwe n’umuryango we. Icyakora, yakomeje gukurikirana ibibera kuri uwo muyobozi, aza gusanga inzoga zari zarabaye ikibazo gikomeye mu buzima bwe.

Perezida Kagame yavuze ko umunsi umwe yigeze kumutumaho abashinzwe umutekano, abasaba kumuzana aho yaba ari hose.

Ati: “Baragiye baramuzana, yinjira mu nzu iwanjye. Hari ingazi umuntu azamuka kugira ngo agere aho nari ndi. Nahagaze ahantu kugira ngo murebe yinjira. Yarazamutse, agera aho kuzamuka ingazi byanga, afata ku rukuta, aza kugera aho ndi.”

Perezida Kagame yavuze ko yamubajije icyari cyamubayeho, ariko uwo muyobozi akomeza kwihagararaho avuga ko nta kibazo afite.

Ati: “Ndamubaza nti ‘Ibintu byo kugendera ku rukuta byagenze bite?’ Akomeza kunyihagararaho. Ndamubwira nti wimpindura umusazi, ibyo nashakaga kureba nabibonye.’”

Yavuze ko uwo muyobozi yatashye, bukeye agaruka kumureba, ariko amubwira ko ibyo yabonye bihagije kandi ko yari amaze gusobanukirwa ikibazo afite.

Perezida Kagame yavuze ko yamusabye kureka inzoga kugira ngo bakomeze gukorana neza, ariko bikanga, kugeza ubwo byabaye ngombwa ko areka gukorana na we kubera ubusinzi bwe.

Ikibazo cy’ubusinzi Perezida yabigarutseho mu gihe Leta y’u Rwanda yashyize imbaraga mu guhangana n’inzoga zitujuje ubuziranenge n’ibindi bishobora kwangiza ubuzima bw’abaturage, asaba inzego zibishinzwe gufatanya mu kubica burundu.

Perezida wa Repubulika Paul Kagame yabwiye urubyiruko ko ibibazo by’imyambarire bidakwiye guteza impagarara n’impaka, kuko umuryango nyarwanda wo ubwawo washyizeho imbibi, nyirantarengwa, cyangwa se umurongo umuntu adakwiye kurenga.

Perezida Kagame aganira n’urubyiruko kuri uyu wa Gatatu i Kigali, yagarutse ku nkuru iherutse gutera ikibazo y’abapolisi bafashe umugore bavuga ko yari yambaye nabi, maze agira ati "Sinibaza impamvu ibi bigomba guteza impaka. Sosiyete yacu yashyizeho umurongo ntarengwa."

Kagame, yavuze ko ikibazo cy’imyambarire, abantu badakwiye gutekereza ko gikwiye gukemukira mu mategeko, ariko mu byo sosiyete yashyizeho bidakwiye kurengwa.

Perezida Kagame yatanze urugero ati "Ubu ngubu umuntu yambaye imyenda bajyana ku mucanga akayizana aha, wasanga muvuga mwese muti uyu yayobye."

Icyakora, Perezida Kagame yavuze ko ikibazo cy’imyambarire, kitareba abagore gusa, kuko hari n’abagabo bashobora kwambara nabi, buri wese akaba awkiye gucyahwa.

Perezida wa Repubulika Paul Kagame, yavuze ko impinduka za buri we se, zituruka ku bushake bwe, ku buryo n’uwahana yagera aho akaruha niba uhanwa atabishyizemo ubushake.

Aganira n’urubyiruko muri Meet the President i Kigali, Perezida Kagame yagarutse ku myitwarire y’ababatwa n’inzoga, aho yagize ati "Sinzi icyo bakundamo inzoga, rwose ntizinaryoha."

Aha ngaha Perezida Kagame, yagaragaje ko akenshi, usanga n’ababaswe n’ibiyobyabwenge, batifitiye ubushobozi bwo kubireka.

Yagize ati "Usanga hari uwo bafatira mu bibazo bimwe, agafungwa inshuro ebyiri, eshatu, enye eshanu, bakananirwa kubireka."

Abwira urubyiruko muri Meet The President, yavuze ko yari afite umukozi wa hafi, maze akajya amushaka akamubura, cyane cyane nimugoroba, ariko buri gihe akamubura.

Agira ati "Haje kugera igihe nsaba ko bamunzanira, iwanjye, nuko baramutumiza. Icyo gihe ageze mu nzu, jyewe nari hejuru muri escalier, mbona ari hasi, agenda ku rukuta arwisunze."

Icyo gihe, Perezida Kagame yamubwiye ko akazi yashakaga kumuha agiye kugaha abandi, ariko we amuha ikiruhuko ngo inzoga zimushiremo, ariko ashaka kumwereka ko ibyo yirirwamo yabibonye.

Aha yagize ati "Rero mwa bana mwe, ikintu cyose aho uri, ntugate umwanya, jya wiga ukore, ndetse ushakishe kumenya, uvuge uti ikizima ni iki, ugikore, ikitari kizima ukirinde ubundi ukomeze kwiyubaka."

Aha kandi niho yavuze ati "Mu myaka y’ubugimbi niho umuntu ahindukira akaba umuntu muzima, cyangwa akahangirikira."

Icyakora, avuga ko n’uwata igihe, akangutse agomba guhita afatirana, akiteza imbere, ati "Ntimukihebe, mugire imyifatire myiza, muyikorere, ndetse muyikoreshe no ku bandi, kuko si wowe gusa ibaho, uri umu muryango n’igihugu."

Kagame yavuze ko kwiyubaka bijyana n’imyifatire mizima, aho umuntu we ku giti cye agomba kureba akagira ati "Buriya jyewe icyo nita kizima ni iki?"

Perezida Kagame yasobanuye igihango afitanye n’urubyiruko kidashobora gutuma na rimwe yumva atari kumwe na rwo, aho yavuze ko hari abantu, na we arimo, bakura ariko bakanga kuva mu rubyiruko, maze arenzaho ko na we ari muri abo, ariko we akaba afite umwihariko mu mibanire na rwo.

Ashingiye ku magambo yakoreshejwe na Minisitiri w’Ubuzima, Dr Sabin Nsanzimana, watangiye ikiganiro cyagarukaga ku bibata urubyiruko nk’ibiyobyabwenge n’ikoranabuhanga, yisanisha n’urubyiruko ati “Nyakubahwa Perezida wa Repubulika, Murakoze ku mwanya mwaduhaye nk’urubyiruko, ubwo na njye ndi urubyiruko. Ubwo na njye ndibaramo kuko hari abanze kuruvamo, twese turi urubyiruko,” Perezida kagame na we yibukije ko yisanga mu rubyiriko.

Yagize ati “Sabin yavuze ngo hari abanze kuva mu rubyiruko turi benshi. Ariko nje mfite akarusho. Akarusho mfite ni uko ari rwo rwanze kumvamo.”

Ati “Ubwo se murumva atari amahirwe! Ubu rero twese uko turi aha, ari abanze kuva mu rubyiruko, ari abo rwanze kuvamo, ari n’abarurimo koko nyakuri turi bamwe.”

Yavuze ko ari urubyiruko ari na bo bose bisanisha na rwo (abanze kuruvamo n’aba rwanze kuvamo) bose ari bamwe, bityo ko ibisigaye ari ukwiyubaka no gufatanya kubaka Umuryango Nyarwanda.

Perezida Kagame yumvikanye bwa mbere yisanisha n’urubyiruko ubwo yiyamamarizaga kuyobora u Rwanda muri 2003, maze akarubwira ko na we ari urubyiruko, agira ati “Ndi Mzee Kijana.”

Guhera icyo gihe kugeza ubu, mu bikorwa bye ndetse n’imbwirwaruhamwe ze, usanga umwanya munini awuharira urubyiruko aruhira inama zarufasha kwiteza imbere, gukorera igihugu no guharanira iterambere ryacyo.

Paremon Shimirwa waretse ibiyobyabwenge, avuga ko ubwo yari yarabaswe na Kanyanga, atashoboraga kunywa ikindi kinyobwa, ndetse ko atabashaga no koza amenyo atayivanze n’amazi.

Shimirwa yabitangaje ku wa Gatatu, tariki ya 21 Ukwakira 2026, mu buhamya yatanze mu biganiro byahuje urubyiruko na Perezida, Paul Kagame, byabereye muri BK Arena i Kigali, byitabirwa n’urubyiruko rusaga ibihumbi 10 muri gahunda ya Youth.

Shimirwa yavuze ko yavukiye mu Karere ka Gicumbi, mu Murenge wa Rubaya, akurira mu muryango mwiza wamutoje umuco n’ikinyabupfura.

Akirangiza amashuri yisumbuye, yagiriwe ikizere n’ubuyobozi bw’umurenge, ahabwa akazi ko kwakira abantu no gukora ibijyanye n’ikoranabuhanga.

Yavuze ko kubera ko aho yakoreraga hari hafi ya Sitasiyo ya Polisi, yagiranye ubucuti n’itsinda ry’abinjizaga Kanyanga mu Rwanda bayikuye muri Uganda, rizwi nk’Abarembetsi.

Aba bantu bemeranyije ko azajya abaha amakuru y’ibikorwa by’inzego z’umutekano kugira ngo badafatwa. Mu gutanga amakuru, yatangiye guhabwa amafaranga, ndetse nyuma aza no gutangira kunywa Kanyanga.

Ibyo byaje kumutera gutakaza akazi, yiyemeza kujya yinjiza Kanyanga ayikuye muri Uganda. Icyakora, ubuzima bwe bwarushijeho kuzamba, ava iwabo ajya kwibana, arushaho kuba imbata y’ibiyobyabwenge.

Ati: “Nabaye imbata ya Kanyanga ku buryo ntabashaga koza amenyo ntayivanze n’amazi kugira ngo numve ntekanye, kuko umubiri wanjye wari warayimenyereye kubera kuyinywa cyane.”

Shimirwa yaje gufatwa n’inzego z’umutekano ajyanwa mu kigo cyijyanwamo abantu bagaragayeho imyitwarire mibi muri sosiyete (transit center), ahamara amezi abiri, nyuma asubira mu rugo.

Ababyeyi be baramwakiriye, batangira kumugira inama. Se yemeye kujya amuha ikirahure kimwe cy’inzoga nimugoroba, mu rwego rwo kumufasha kugabanya inzoga buhoro buhoro.

Nyuma yaje gufata icyemezo cyo kwiga umwuga w’ububaji. Amaze kuwiga, yatangiye gukora uwo mwuga, aza kuwagura kugeza ubwo ashinga ateliye y’ububaji.

Yaje no kwitabira amarushanwa y’urubyiruko, ahatana n’abandi kugeza ku rwego rw’igihugu. Icyo gihe ngo yasanze hari abo bari barakuranye bamaze gutera imbere, mu gihe we yumvaga imyaka yamaze mu biyobyabwenge yarayipfushije ubusa.

Yavuze ko icyo gihe yafashe icyemezo cyo kutazongera kunywa ibiyobyabwenge, yiyemeza gukurikira gahunda za Leta no guteza imbere imishinga ye.

Yagize ati: “Rubyiruko, amahirwe arahari. Nta rwitwazo rwo gupfusha ubusa amahirwe twahawe n’Umukuru w’Igihugu yo kuduteza imbere.”

Perezida Kagame aheruka guhura n’urubyiruko rwo mu Itorero Indangamirwa ku wa 28 Nyakanga 2026, arusaba kurangwa n’ikinyabupfura, kuzuza inshingano no kugira uruhare mu gukemura ibibazo by’igihugu.

Iki kiganiro bagiranye none cyije gikurikira ingamba Leta y’u Rwanda yafashe zo guhangana n’inzoga zitujuje ubuziranenge, zishobora guteza ibibazo bikomeye by’ubuzima.

Irerero rya TM9R Football Academy ryateguye gahunda mpuzamahanga yo gushakisha no kuvumbura impano z’abakinnyi b’umupira w’amaguru, izabera iteganyijwe kubera i Kigali kuva ku wa 24 kugeza ku wa 28 Ugushyingo 2026 aho izitabirwa n’inzobere mu gutoranya abakinnyi ziturutse ku mugabane w’i Burayi.

Ni irushanwa rizitabirwa n’abakinnyi bari hagati y’imyaka 16 na 21 kandi bafite impano mu mupira w’amaguru n’inzozi zo kugera ku rwego mpuzamahanga maze bagatoranywa n’inzobere mu kuvumbura impano zizaturuka mu bihugu birimo Czech Republic, Sweden, Denmark, Spain, Germany na Portugal.

Abaziyandikisha bazahurizwa mu makipe 12, bazakina biyerekana mu gihe cy’iminsi itanu bagaragaze impano zabo abeza kurusha abandi abe aribo batoranywa. Ishimwe Ines ukora muri TM9R yasobanuye ko bateguye iki gikorwa mu rwego rwo gushakira inzira abafite impano ya ruhago ariko badafite ubuyo kwigaragaza.

Ati" Hazaba hagamijwe kubyazwa umusaruro impano ziri hano mu Rwanda zitabona amahirwe yo kujya gukina i Burayi. Twateguye iki gikorwa mu gushyiraho ikiraro gihuza abanyempano naho naho bashobora gukina."

Irerero rya TM9R Football rimaze imyaka ibiri rikorera mu Rwanda, riteguye iki gikorwa ku nshuro ya mbere ariko ubuyobozi bwaryo bukaba buvuga ko kizajya gikorwa buri mwaka.

Minisitiri w’Imari n’Igenamigambi, Yusuf Murangwa, yasabye ibihugu bya Afurika kongera ishoramari mu ikusanyamakuru n’ibarurishamibare, agaragaza ko amakuru yizewe ari ingenzi mu gufata ibyemezo bifitiye abaturage akamaro.

Ibi yabigarutseho kuri uyu wa Gatatu i Addis Ababa muri Ethiopia, aho yitabiriye umuhango ufungura ku mugaragaro inama ya 10 ya Komisiyo y’Ibarurishamibare ya Afurika (StatCom-Africa) n’inama ya 12 ya Komite Komite Nyafurika ya Loni ishinzwe Imicungire y’Amakuru Ajyanye n’Imiterere n’Ahantu ku Isi (UN-GGIM for Africa).

Izi nama ziri kubera ku cyicaro cya Komisiyo y’Umuryango w’Abibumbye ishinzwe Ubukungu muri Afurika (UNECA), aho zanitabiriwe n’Umuyobozi Mukuru w’Ikigo cy’Igihugu gishinzwe Ibarurishamibare mu Rwanda (NISR), Ivan Murenzi.

Mu ijambo yagejeje ku bitabiriye iyi nama, Minisitiri Yusuf Murangwa yashimangiye ko gushora imari mu ibarurishamibare bitanga inyungu ku bihugu, kuko bifasha abayobozi gufata ibyemezo bishingiye ku makuru yizewe.

Yagize ati: “Dushoye imari mu ibarurishamibare, tubona inyungu. Tutayishoyemo, duhomba byinshi. Ibyemezo bifatwa hatabayeho ibimenyetso bifatika birahenda cyane.”

Yagaragaje ko ibihugu bya Afurika bikwiye gushyira imbaraga mu kongera ubushobozi bw’inzego zikusanya kandi zigasesengura amakuru, kugira ngo zifashe mu igenamigambi, mu kugena politiki z’iterambere no mu gukurikirana umusaruro wazo.

Iyi nama ya StatCom-Africa n’iya UN-GGIM for Africa bitanga urubuga rwo kuganira ku buryo bwo kunoza imibare n’amakuru ajyanye n’imiterere y’isi, hagamijwe gufasha ibihugu bya Afurika gufata ibyemezo bishingiye ku bimenyetso no kwihutisha iterambere rirambye.

Kuri uyu wa Kabiri tariki 20 Ukwakira 2026, Umunyamabanga wa Leta muri Minisiteri y’Ibikorwaremezo Armand Zingiro, yagejeje ku nteko ishinga amategeko, umutwe w’Abadepite, ibisobanuro ku bibazo byagaragaye muri raporo y’Umugenzuzi Mukuru w’Imari ya Leta biri mu Kigo gishinzwe amazi, isuku n’isukura, WASAC, maze Abadepite bemeza ko banyuzwe n’ibyo bisobanuro.

Nyuma y’uko Umunyamabanga wa Leta muri Minisiteri y’ibikorwaremezo, Armand Zingiro, amaze gutanga ibisobanuro by’inyongera kuri iyo raporo, ndetse no gusubiza ibibazo bitandukanye byabajijwe n’Abadepite,birimo kugaragaza ingamba zihari zo kurangiza imishinga igamije kongera amazi, gugusanganya amazi uko bikwiye, gutanga za mubazi zifasha abakiriya kwishyura mbere amazi bazakoresha.

Hari kandi ibijyanye no kongera ingano y’amazi inganda zitunganya bijyanye n’ubushobozi bwazo, gusana inzira z’amazi n’amavomo yangiritse, kudatanga raporo y’ikoreshwa ry’ingengo y’imari ya Leta ku mugenzuzi mukuru w’imari ya Leta, ku buryo hashira imyaka itatu nta n’imwe itanzwe, imitangire ya serivisi itanoze, ishobora kuba iterwa n’amavugurura ahora muri WASAC, ibindi bitandukanye, Perezidante w’inteko ishinga amategeko yasabye ko hakorwa itora mu Badepite 78 bari bahari, hagamijwe kumenya abanyuzwe n’ibyo bisobanuro byatanzwe.

Umwanzuro w’inteko ishinga amategeko, wabaye ko Abadepite 60 batoye ko banyuzwe n’ibisobanuro, Abadepite 15 ntibanyuzwe n’ibyo bisobanuro, mu gihe Abadepite 3 bo batoye imfabusa. Bityo rero, umwanzuro wabaye ko inteko rusange,yanyuzwe n’ibisubizo,byatanzwe n’umunyamabanga wa Leta muri Minisiteri y’ibikorwaremezo.

Perezida wa Repubulika y’u Rwanda, Paul Kagame, yakiriye Minisitiri muri Minisiteri y’Ububanyi n’Amahanga y’u Budage, Serap Güler, baganira ku buryo bwo kurushaho guteza imbere umubano n’ubufatanye hagati y’ibihugu byombi.

Ku gicamunsi cyo kuri uyu wa 20 Ukwakira 2026, nibwo Perezida Kagame yakiriye Serap Güler mu biro bye, bagirana ibiganiro byibanze ku gushimangira ubufatanye busanzwe burangwa hagati y’u Rwanda n’u Budage mu nzego zifitiye inyungu ibihugu byombi.

Bibanze cyane ku gushaka uburyo bwo kurushaho kunoza no kwagura imikoranire hagati y’ibihugu byombi, bifitanye umubano umaze igihe kirekire kandi ukaba ukorerwamo ibikorwa bitandukanye by’iterambere.

Uruzinduko rwa Serap Güler rubaye mu gihe u Budage bukomeje kugaragaza ko bushishikajwe n’amahoro, umutekano n’iterambere rirambye mu karere k’Ibiyaga Bigari.

Mu itangazo ryashyizwe ahagaragara na Minisiteri y’Ububanyi n’Amahanga y’u Budage ku wa 19 Ukwakira 2026, Güler yavuze ko agiye gusura u Rwanda, u Burundi na Repubulika Iharanira Demokarasi ya Congo mu rwego rwo kuganira n’ubuyobozi bw’ibyo bihugu ku bibazo by’akarere, birimo umutekano, amahoro n’ubufatanye mu iterambere.

Umubano w’u Rwanda n’u Budage urimo ubufatanye mu iterambere ry’ubukungu, uburezi, ubuzima, ingufu, ikoranabuhanga n’ibikorwa byo kubungabunga amahoro n’ubumwe bw’abaturage.

U Budage kandi ni umwe mu bafatanyabikorwa b’u Rwanda mu bikorwa bigamije guteza imbere ubukungu burambye, guteza imbere ubumenyi n’imyuga, kongera amahirwe y’akazi no guteza imbere ikoranabuhanga.

Nubwo ibiganiro bya Perezida Kagame na Serap Güler byibanze ku gushimangira ubufatanye muri rusange, nta makuru arambuye yatangajwe agaragaza amasezerano mashya yaba yasinyiwe cyangwa ingamba zihariye impande zombi zumvikanyeho.

Uruzinduko rwa Güler kandi rugaragaza akamaro u Budage buha ibiganiro n’ibihugu byo mu karere k’Ibiyaga Bigari, mu gihe bikomeje guhangana n’ibibazo by’umutekano n’ingaruka zabyo ku mibereho y’abaturage.

Icy’ingenzi muri uru ruzinduko ni ugukomeza ibiganiro bya dipolomasi no gushimangira imikoranire y’u Rwanda n’u Budage, hagamijwe guteza imbere inyungu bihuriyeho no kwagura amahirwe y’ubufatanye mu nzego zitandukanye.

Minisiteri y’Ibikorwa remezo yavuze ko igiye gutangira igikorwa cyo gusimbuza imiyoboro y’amazi ishaje, mu buryo bwo kuziba icyuho cy’amazi ndetse n’amazi ameneka kandi yatunganyijwe.

Umunyamabanga wa Leta muri Minisiteri y’Ibikorwaremezo Armand Zingiro, yabwiye abadepite ko umushinga bafite ni uwo gusimbuza imiyoboro yose, ndetse umwaka utaha, bakaba bazatangirira ku birometero 30.

Yari mu kiganiro yagejeje ku nteko ishinga amategeko, umutwe w’abadepite, aho yasobanuraga ibibazo Umugenzuzi Mukuru w’Imari ya Leta yasanze mu Kigo gishinzwe amazi, isuku n’isukura, WASAC.

Umunyamabanga wa Leta yavuze ko mu buryo bwagutse, ikibazo cy’ibura ry’amazi cyahagurukiwe, ku buryo umwaka w’ingengo y’imari ushize, amazi yapfaga ubusa kandi yatunganyijwe, yavute ku mpuzandengo ya 43%, agera kuri 30% mu gihembwe cya mbere cy’uyu mwaka w’ingengo y’imari.

Ubuke bw’abakozi, kunoza imikorere ndetse n’ibibazo by’imiyoboro ishaje ni byo bibazo bikomeye byagaragajwe nk’iby’ingenzi bibangamiye itangwa ry’amazi.

Depite Munyandamutsa Jean Paul yavuze ko iyo urebye raporo ya WASAC wibwira ko Ikigo cyapfuye, ariko mu bisobanuro bitangwa, ukumva ko ikibazo ari imikorere itageze ku rugero rushyitse, ineficieny.

Yagize ati "Murebe niba ikibazo atari ikibazo ari igiterwa n’amategeko maze inteko ibibafashemo."

Armand Zingiro yavuze ko ikibazo kijyanye n’amategeko cyarakemutse, aho habagamo ikibazo,. kigatinda gukemuka kubera kujya muri gahunda isanzwe y’amasoko.

MUnyandamutsa yanavuze ko WASAC yari ikwiye gukoresha ubwenge buhangano kugira ngo igabanye amazi apfa ubusa, maze Minisiteri y’Ibikorwa Remezo, ivuga ko na yo iri gukoreshwa.

Icyakora ngo hari n’irindi koranabuhanga rigenda ryifashishwa, kugira ngo ibibazo biri mu mitangire y’amazi meza bibonerwe ibisubizo.

Abagize Inteko Ishinga Amategeko, babajije impamvu Ikigo gishinzwe amazi, isuku n’isukura - WASAC kibeshya abaturage ko kibahaye amazi, ariko bamara gutaha umuyoboro, bagahita bayabura burundu.

Ubwo Inteko Ishinga Amategeko yahamagaraga Umunyamabanga wa Leta Muri Minisiteri y’Ibikorwa Remezo Armand Zingiro ngo asobanure ibibazo byagaragaye muri Raporo y’Umugenzuzi Mukuru w’Imari ya Leta, umudepite yagize ati "biragayitse kubona WASAC itaha umuyoboro w’amazi, abaturage bakayabona kuri uwo munsi, bikarangirira aho, mu yindi minsi ntibongere kuyabona."

Abadepite bavuze ko, muri raporo yatanzwe, iyo bavuga ngo imishinga igiye gusubukurwa, kubivuga byoroshye, ariko abaturage barababaye, bamaze imyaka batarayabona, bakaba basabaga ko Minisiteri itanga icyizere gishingiye ku ngingo zifatika, atari ibintu bahora basubiramo, ariko ntibitange umusaruro.

Minisiteri y"ibikorwa remezo, yavuze ko kuba uyu munsi amazi meza agera ku baturage 89% hari icyizere cyo kuyageza ku baturage ijana ku ijana.

Umudepite mu Nteko Ishinga Amategeko, yavuze ko urwitwazo rw’imikorere mibi ruterwa n’amavugurura akenewe rukwiye kuvaho mu Kigo cy’Amazi, Isuku n’Isukura.

Uyu mudepite Mujawabega Yvonne yagize ati "Niba hari ikibazo gihora mu mavugurura, ni WASAC, yavuye kuri Electrogaz, igakomeza ikagera kuri RECO RWASCO, uyu munsi tukaba tugeze kuri WASAC, byose, ntibyakemuye ibibazo igihugu gifite cyo kubona amazi meza ahagije, nyamara n’ubu baracyavuga ko bakeneye andi mavugururwa. Simpamya ko amavugurura ari cyo kibazo."

Iki kibazo, Umunyamabanga wa Leta muri Minisiteri y’Ibikorwa Remezo Armand Zingiro yavuze ko hari amavugururwa akenewe, yo kongera abakozi mu nzego zinyuranye, kugira ngo umusaruro ugerweho.

Nyamara Depite Germaine Mukabalisa, we yerekanye ko aya mavugururwa amaze imyaka isaga itanu, ariko ngo WASAC ikomeje kubona biragayitse muri raporo y’Umugenzuzi Mukuru w’Imari ya Leta.

Icyakora ngo hari ivugururwa rusange rizatangira gushyirwa mu bikorwa mu ntangiriro z’Ugusghyingo, kuko ngo akenshi hari imyanya yari irimo abantu bakora nk’abasigire bamaze igihe kinini.

Depite Eugene Mussolini yabajije impamvu ikigo gishinzwe amazi isuku n’isukura yahagaritse umushinga wo gushyiraho ikoranabuhanga rizajya ryerekana ahari amazi ari gupfa ubusa, kandi nyamara ryari rigiye kurangira.

Hari mu kiganiro Umunyamabanga wa Leta muri Minisiteri y’Ibikorwaremezo Armand Zingiro, yagejeje ku nteko ishinga amategeko, umutwe w’abadepite, aho yasobanuraga ibibazo Umugenzuzi Mukuru w’Imari ya Leta yasanze mu Kigo gishinzwe amazi, isuku n’isukura, WASAC.

Iki gikoresho, ni urubuga rwitwa Scada, kandi rwari gufasha WASAC kugenzura amazi apfa ubusa, ateza igihombo kiri hagati ya Miliyari 10.5 Frw na Miliyari 29 Frw.

Mussolini agira ati "Kuki uwo mushinga wahagaritswe, kandi nyamara waraburaga gato ngo urangire, ndetse n’amafaranga hafi ya yose yarishyuwe?"

Umunyamabanga wa Leta, yavuze ko umushinga utangira, yawushyize kuri macye, ariko ageze hagati ashaka kubivamo, ariko baza kumvikana, yemera kuwusubukura, nta kiguzi cyongerewe(extension at no cost).

Yagize ati "imirimo izakomeza mu cyumweru gitaha."

Muri Turukiya, umugabo wari warihinduye umugore, yafashwe amaze imyaka 8 yaracitse ubutabera, nyuma y’uko kwihindura, akajya abaho nk’umugore.

Uwo mugabo wo muri Turukiya wari umaze imyaka yihisha inzego z’umutekano kuva mu mwaka wa 2018, yafatiwe mu mujyi wa Istanbul, aho yari abayeho nk’umugore wihinduye igitsina (transgender woman), afite isura itandukanye cyane n’iyo yari asanganywe.

Ni umugabo witwa Tuğrul Başar, akaba yari yarahamijwe ibyaha bitatu by’ubujura yakoze mu
mwaka wa 2010, yiyise umutegetsi ukorera Leta. Mu mwaka wa 2018, yashoboye gutoroka kuko,
atashakaga kubahiriza igihano cy’igifungo cy’imyaka itatu yari yarakatiwe.

Kuva icyo gihe, inzego z’ubutabera zarakomeje ziramushakisha, ariko ntizahita zimubona. Gusa,
ziherutse kumutahura aho yari asigaye aba, mu gace ka Kadıköy mu mujyi wa Istanbul, ubwo inzego z’umutekano zari ziri mu gikorwa cyihariye kigamije gufata abantu bari barakatiwe ibihano
by’igifungo ariko bakaba batarabirangije.

Icyatumye urubanza rwa Başar rutandukana n’izindi zakemuwe muri icyo gikorwa ni uko abashinzwe iperereza bavumbuye ko yari amaze imyaka myinshi abayeho nk’umugore, agakoresha umwirondoro
wa mushiki we, kandi agahindura isura ye ku buryo bitari bicyoroshye kumumenya.

Ntabwo bizwi neza uburyo Abapolisi bakoresheje kugira ngo bamenya aho Tuğrul Başar aherereye
nyuma y’iyo myaka yose, ariko bivugwa ko bashobora kuba barakoresheje uburyo bwo gukurikirana no kugenzura umuryango we n’abandi bantu yari asanzwe aziranye na bo. Ni muri urwo rwego, bamenye ko mu rugo rwa mushiki we, habaga abakobwa babiri, kandi ko bombi bakoreshaga umwirondoro umwe iyo babaga basohotse mu rugo cyangwa se bagiye gutembera aho basabwa gutanga ibyangombwa.

Nk’uko raporo za polisi zibivuga, Başar yari yarahinduye isura ku buryo bukomeye cyane, ku buryo
amafoto ye yarafashwe kera, ntacyo yari akimaze, nko kuba yakwifashishwa mu kumushakisha, kuko ntawari kumumenya. Abapolisi bahisemo gukurikirana uwo mugore wiyitaga mushiki we no
gukusanya ibimenyetso kugeza igihe bemeje ku buryo budasubirwaho ko ari Başar wihinduye
umugore.

Byaje kurangira abapolisi bageze mu rugo aho Tuğrul Başar yabaga baramufata. Icyo gihe afatwa,
ngo yari afite indangamuntu ya mushiki we, ariko hakozwe isuzuma ry’ibikumwe (fingerprint)
ryemeza umwirondoro we wa nyawo.

Nubwo hari amakuru amwe avuga ko yari yarahinduje isura, akagira isura isa neza neza
n’iy’umugore, ariko andi makuru avuga ko yari yarakoze n’ibyo kwibagisha, agamije guhindura
igitsina kugira ngo agere kuri izo mpinduka zikomeye yifuzaga. Kugeza ubu, nta na kimwe muri ibyo bisobanuro cyaremezwa.

Ikizwi ni uko Tuğrul Başar azarangiriza igihano cye cy’igifungo muri gereza y’abagabo, hatitawe ku
gitsina yiyumvamo cyangwa uko yiyita. Kubera ko atigeze ahindura ku mugaragaro amazina ye
cyangwa igitsina cye mu gitabo cy’irangamimerere cya Turukiya, ubwo ngo gufungirwa muri gereza hakurikijwe igitsina kiri ku ndangamuntu ye, hatitawe ku isura ye cyangwa ku gitsina yiyumvamo muri iki gihe.

Itsinda ry’abagore bahagarariye ibihugu bya Afurika muri Suwede ryateguye igikorwa cyo gushimangira ubufatanye hagati y’ibihugu byo mu Majyaruguru y’u Burayi na Afurika mu guteza imbere imibereho myiza y’abagore, by’umwihariko mu rwego rw’ubuzima.

Iki gikorwa cyabereye i Stockholm muri Suwede ku mugoroba wo ku wa 19 Ukwakira 2026, kiyoborwa na Ambasaderi w’u Rwanda muri Suwede, Dr. Diane Gashumba, akaba n’umuyobozi w’itsinda ry’abagore bahagarariye ibihugu bya Afurika muri icyo gihugu.

Iki gikorwa cyateguwe ku bufatanye na Porofeseri Anna Mia Ekström wo muri Karolinska Institutet, cyahuje kandi abandi bayobozi bahagarariye ibihugu byabo, abashinzwe gushyiraho politiki muri Suwede, abashakashatsi n’abafatanyabikorwa mu rwego rw’ubuzima ku Isi.

Ibiganiro byibanze ku buryo Suwede n’ibihugu bya Afurika byarushaho gukorana mu guteza imbere ubuzima mu myaka icumi iri imbere, hibandwa ku gushimangira ubufatanye no gushyiraho ingamba zifatika zo kunoza serivisi z’ubuzima.

Ambasade y’u Rwanda muri Suwede ivuga ko u Rwanda rwiteguye kwakira abafatanyabikorwa baturutse mu bihugu byo mu Majyaruguru y’u Burayi, hagamijwe guhindura ibiganiro amahirwe yo gushyiraho ubufatanye bufatika mu guteza imbere ubuzima n’imibereho myiza y’abaturage.

Porofeseri Anna Mia Ekström yavuze ko Suwede yakongera uruhare rwayo mu guteza imbere ubuzima ku Isi.

Karin Tegmark Wisell, Ambasaderi ushinzwe ubuzima ku Isi muri Minisiteri y’Ububanyi n’Amahanga ya Suwede, na we yagaragaje amahirwe ari hagati ya Suwede na Afurika yo kurushaho gufatanya muri uru rwego.

Björn Gillsäter, Umuyobozi Mukuru ushinzwe imikoranire n’abafatanyabikorwa, ubuvugizi no gukusanya inkunga muri Gavi, ihuriro mpuzamahanga rishyigikira gahunda zo gukingira, yatanze ubutumwa muri iki gikorwa.

Abahagarariye ibihugu bya Afurika na bo bagaragaje amahirwe y’ubufatanye hagati y’ibihugu byabo na Suwede. Iki gikorwa kandi cyabaye intambwe y’ingenzi mu myiteguro y’inama ya Africa-Nordic Health Summit izabera i Kigali ku wa 9 - 10 Gashyantare 2027.

Ubushakashatsi bwakozwe n’ikigo mpuzamahanga Gallup bugaragaza ko urubyiruko rwo muri Leta Zunze Ubumwe za Amerika, cyane cyane ururi hagati y’imyaka 18 na 29, rufite imbogamizi mu buzima bwo mu mutwe ndetse no mu buryo rubona imibereho yarwo.

Raporo ya Gallup yasohotse ku wa 4 Ukwakira 2026, yagaragaje ko 44% gusa by’urubyiruko rwo muri icyo kigero ari rwo ruvuga ko ubuzima bwarwo buri kugenda neza, mu gihe mu mwaka wa 2010 abavugaga batyo bari 64%.

Ubushakashatsi kandi bugaragaza ko hafi 27% by’abakiri bato bari hagati y’imyaka 18 na 29 bavuze ko bafite ikibazo cyo kwiheba (depression) cyangwa ko bari kuvurwa kubera icyo kibazo.

Ubwo bushakashatsi bwakorewe muri Leta Zunze Ubumwe za Amerika, bukorerwa mu ntara zose uko ari 50 no mu karere ka Washington, D.C. Bwakusanyije ibitekerezo by’abagera kuri 15.156, babajijwe mu mezi ya Gashyantare, Gicurasi na Kanama 2026, hifashishijwe uburyo bwo gusubiza ibibazo kuri interineti.

Ibyavuye muri ubwo bushakashatsi bigaragaza igabanuka ry’umubare w’urubyiruko rwumva ko ubuzima bwarwo buri kugenda neza, ugereranyije n’imyaka yashize.

Ibibazo by’ubuzima bwo mu mutwe, gushaka akazi, ibibazo by’amikoro n’igitutu cy’imibereho ni bimwe mu bintu bikunze kuganirwaho mu gihe hasesengurwa imbogamizi urubyiruko ruhura na zo. Icyakora, imibare yatangajwe ntihagije kugira ngo hemezwe ko ibyo bibazo ari byo byateye igabanuka ryagaragaye muri ubu bushakashatsi.

Icyakora nubwo ubu bushakashatsi bwakorewe muri Amerika, mu 2024 ikigo cy’Igihugu cy’Ubuzima, RBC cyatangaje ko ubushakashatsi bwakozwe bwagaragaje ko ubuzima bwo mu mutwe bw’urubyiruko mu Rwanda buri mu kaga kuko 25% bari bugarijwe no kunywa ibiyobyabwenge ndetse abagera kuri 52% muri bo basogongera ku bwoko butandukanye buri kwezi.

Ibyavuye muri ubu bushakashatsi bishimangira akamaro ko kwita ku buzima bwo mu mutwe bw’urubyiruko, kurushaho kurufasha kubona ubuvuzi n’ubujyanama bikenewe no gushyiraho uburyo burufasha kugira imibereho myiza.

U Rwanda rwagaragaje uburyo rwifuza guhuza ingamba zigamije kurufasha guteza imbere ikoranabuhanga n’ubwenge buhangano (AI), hagamijwe kubaka ibikorwa remezo byaryo, guhanga imirimo no kunoza serivisi zitangwa mu buryo bw’ikoranabuhanga.

Ibi byagarutsweho mu nama mpuzamahanga ya Global AI & Digital Summit 2026, yabereye muri Koreya y’Epfo, yahuje abayobozi n’abandi bafatanyabikorwa mu guteza imbere ikoranabuhanga n’ubwenge buhangano ku Isi.

Umunyamabanga wa Leta muri Minisiteri y’Ikoranabuhanga na Inovasiyo, Yves Iradukunda, wari witabiriye iyo nama, yatanze ikiganiro cyahuje abayobozi bo mu nzego za Leta, aho baganiraga ku buryo amasezerano agamije guhuza ingamba z’ikoranabuhanga n’ubwenge buhangano, azwi nka Digital and AI Compacts, yafasha ibihugu gushyira mu bikorwa intego byihaye muri izo nzego.

Iradukunda yasobanuye uburyo u Rwanda rushaka guhuza ingamba zisanzweho zijyanye n’ikoranabuhanga n’ubwenge buhangano zikagira gahunda imwe ifite intego zisobanutse n’ubufatanye buhuriweho n’abafatanyabikorwa batandukanye.

Iyi gahunda igamije kwihutisha iterambere ry’ibikorwa remezo byifashishwa mu ikoranabuhanga n’ubwenge buhangano, guteza imbere amahirwe y’umurimo bikajyana no kunoza serivisi za Leta zitangwa hifashishijwe ikoranabuhanga.

Ibiganiro byabereye muri iyi nama byibanze ku buryo ibihugu byahindura intego bifite mu guteza imbere ikoranabuhanga n’ubwenge buhangano, bikazishyira mu bikorwa bifatika binyuze mu ngamba zihuriweho n’ubufatanye mpuzamahanga.

U Rwanda rukomeje gushyira ikoranabuhanga mu by’ingenzi byifashishwa mu kwihutisha iterambere ry’ubukungu, kunoza imitangire ya serivisi no guteza imbere ubumenyi n’amahirwe y’umurimo bijyanye n’isoko ryawo rihinduka bitewe n’iterambere ry’ikoranabuhanga.

Ingabo z’ibihugu bigize Umutwe w’Ingabo za Afurika y’Iburasirazuba zihora ziteguye gutabara aho rukomeye (EASF), zatangiye amahugurwa n’imyitozo by’ibyumweru bibiri mu Ishuri Rikuru rya Gisirikare rya Gako, mu Karere ka Bugesera, agamije kongerera ubushobozi akarere mu guhangana n’ibibazo bishobora guhungabanya amahoro n’umutekano.

Ni amahugurwa yatangiye kuri uyu wa 19 Ukwakira 2026, yibanda ku kongerera abitabiriye ubumenyi n’ubushobozi bwo gutegura no gushyira mu bikorwa ibikorwa byo gufasha mu bikorwa byo kubungabunga amahoro, cyane cyane mu gihe habaye ibibazo bisaba ubutabazi bwihuse.

Iyi gahunda ibaye mu gihe ibibazo by’umutekano mu bice bitandukanye bya Afurika y’Iburasirazuba bikomeje kugaragaza akamaro k’ubufatanye hagati y’ibihugu, guhanahana amakuru no kugira inzego zishobora gutabara igihe bikenewe.

EASF ni urwego rw’akarere rukorera mu murongo w’ubufatanye bw’Umuryango wa Afurika Yunze Ubumwe (AU), rukaba rugamije guteza imbere amahoro n’umutekano binyuze mu gukumira amakimbirane, ibikorwa byo kubungabunga amahoro no gutabara mu bihe by’ibibazo bikomeye. Rugizwe n’inzego za gisirikare, iza polisi n’abasivili.

Mu butumwa bwe ku kamaro k’ubufatanye mu mutekano w’akarere, Umugaba Mukuru w’Ingabo z’u Rwanda, Gen Mubarakah Muganga, yagiye agaragaza ko ibihugu byo mu karere bikwiye gushyira imbere kongerera ubushobozi ingabo zabyo no gukorana mu guhangana n’ibibazo by’umutekano.

Mu myitozo nk’iyi, ubufatanye hagati y’ingabo z’ibihugu bitandukanye bufasha kunoza imikoranire, kubaka icyizere no kongera ubushobozi bwo gukora nk’umutwe umwe igihe habaye ikibazo gisaba ubutabazi bwihuse.

Gen Muganga yavuze ko ingabo zo mu karere zigomba gushyira imbere ubushobozi bwo gukorana neza no kongera ubushobozi bwo guhangana n’ibibazo by’umutekano ku rwego rw’ibihugu no ku rwego rw’akarere.

Yagize ati: “Ati “Turebye ibibazo binyuranye bijyanye n’umutekano byugarije akarere n’umugabane muri rusange, ubufatanye buhamye, imikoranire no kwitegura neza ibikorwa byo gucunga umutekano ni ingenzi cyane.
Intsinzi y’iyi myitozo izashingira ku bushobozi bwacu bwo gushyira mu bikorwa amasomo twavanyemo no kuzana impinduka zifatika mu micungire y’ibikoresho, igenamigambi n’ubushobozi bwo gukora ibikorwa."

Umuyobozi w’Ingabo za Afurika y’Iburasirazuba zihora ziteguye gutabara aho rukomeye (EASF), Brig Gen Ronald Rwivanga, yavuze ko aya mahugurwa agamije kugerageza niba gahunda ziteganyijwe zishobora gushyirwa mu bikorwa, kumenya ibyuho mu bushobozi, gusuzuma uburyo bwo kohereza ingabo aho zikenewe no kunoza imikoranire yazo.

Yashimangiye ko kuba ingabo zahuriye hamwe bidahita bivuga ko ziteguye gutabara, ahubwo ko ubushobozi bwazo bugaragarira mu kuba zishobora kugera aho zoherejwe ku gihe, zifite ibikoresho n’ubushobozi bukenewe, zigakomeza ibikorwa byazo kandi zikuzuza inshingano zahawe.

Yagize ati “Ingabo ntiziba ziteguye gutabara gusa kubera ko zahuriye hamwe, ahubwo ziba ziteguye iyo zishobora guhagurukira ku gihe, zikagera aho zoherejwe zifite ubushobozi bukenewe, zikabasha gukomeza ibikorwa byazo kandi zikuzuza inshingano zahawe.”

U Rwanda rukomeje kwakira amahugurwa n’imyitozo ihuriza hamwe inzego z’umutekano z’ibihugu bitandukanye, hagamijwe guteza imbere ubumenyi, imikoranire n’ubushobozi bwo guhangana n’ibibazo bishobora guhungabanya amahoro.

Icyakora, agaciro k’aya mahugurwa ntikazapimirwa gusa ku bumenyi abitabiriye bazunguka, ahubwo no ku bushobozi bwabo bwo kubukoresha mu bikorwa bifatika, igihe ibihugu byo mu karere bizaba bisabwe gufatanya mu gukumira cyangwa guhangana n’ikibazo cy’umutekano.

kuri uyu wa gatandatu taliki ya 17 Ukwakira, nibwo hasozwaga umunsi wa mbere wa shampiyona ya volleyball umwaka wa 2026-2027 aho amwe mu makipe yatunguwe n’intangiriro.

Ni umunsi wa mbere wabereye I Kigali aho amakipe 14 yose hamwe abagabo n’abagore yakinnye. Ni shampiyona kandi yagarutse itarimo amakipe ya KEPLER Volleyball club mu cyiciro cy’abagabo icyakoza mu cyiciro cy’abagore, Kepler VC yakomeje guharararirwa nubwo yagarutse intego zisa nk’izitandukanye kuko ubu yibanze cyane ku bakinnyi bakiri bato.

Si Kepler VC gusa itaragarutse muri iyi shampiyona iri muzikomeye muri Afurika, ahubwo n’ikipe ya East African University Rwanda mu cyiciro cy’abagore nayo uyu mwaka nti yagarutse. Ibi bivuze ko hari amakipe umunani mu cyiciro cy’abagabo n’amakipe atandatu mu cyiciro cy’abagore.

Ikipe ya APR VC na KVC niyo yabanjirije abandi, maze bitagoranye ikipe ya APR VC itsinda ikipe ya KVC amaseti 3-0. Uyu mukino wakurikiwe n’umukino wahuje ikipe ya POLICE women volleyball club na Kepler women volleyball club maze ikipe ya Police WVC itsinda Kepler amaseti 3-0.

Iyi mikino yakurikiwe n’umukino wahuje ikipe ya POLICE VC ndetse na Gisagara VC. Ni umukino waranzwe n’ihangana ku mpande zombi aho ndetse ikipe ya Gisagara VC ariyo yinjiye mu mukino neza maze yegukana amaseti 2 abanza. Ikipe ya Police VC y’umutoza musoni Fred yavuye inyuma maze yegukana umukino itsinze Gisagara n’amaseti 3-2.

Imikino y’umunsi wa mbere, yakomeje ku munsi wo kuwa gatandatu aho hakinwe imikino ine, mu cyiciro cy’abagore ikipe ya APR VC yatsinze ikipe ya Ruhango amaseti 3-0 naho Rwanda Revenue Authority itsinda ikipe ya Rwanda Polytechnic Huye College amaseti 3-0.

Iyi mikino yakurikiwe niyo mu cyiciro cy’abagabo aho ikipe ya Kirehe VC yatsinze RP Ngoma amaseti 3-0. Hakurikiyeho umukino wahuje ikipe ya REG VC ndetse na East African University Rwanda maze ikipe ya EAUR iwegukana ku ntsinzi y’amaseti 3-2 ya REG VC inabitse igikombe cya shampiyona giheruka.

Umwe mu bakinnyi bashya bagarutsweho cyane ku munsi wa mbere wa shampiyona ni umunya Brazil Saymon Feitosa ukinira ikipe ya Police VC wagize Uruhare runini mu gufasha ikipe ye kwegukana intsinzi.

Nicholas Matui usanzwe ukinira ikipe ya REG VC, niwe wahize abandi mu gutsinda amanota menshi aho yatsinze amanota 25.

Umunsi wa kabiri wa shampiyona, biteganyijwe ko uzabera I Kirehe mu ntara y’iburasirazuba kuwa 24 Ukwakira 2026 aho hazakinwa imikino yo mu cyiciro cy’abagabo gusa.

Umuherwe Elon Musk yatangaje ko mu 2027 azaha buri mwana uba muri Leta Zunze Ubumwe za Amerika umugabane umwe muri sosiyete ye ikora ibyogajuru n’ibikorwa byo mu isanzure (SpaceX) mu gikorwa gishobora gutwara umutungo ufite agaciro ka miliyari zirenga 10 z’amadolari ya Amerika.

Mu butumwa yashyize ku rubuga nkoranyambaga rwa X, kuri uyu wa Mbere, tariki ya 19 Ukwakira 2026, Musk yavuze ko iyi gahunda ari intangiriro y’ibindi bikorwa nk’ibi ateganya gukora mu bihe biri imbere.

Yagize ati: “Mu mwaka utaha, nzaha buri mwana wo muri Amerika umugabane umwe mu migabane yanjye ya SpaceX. Iki kizaba ari icya mbere mu bikorwa byinshi nk’ibi.”

Ni gahunda ishobora kugera ku bana barenga miliyoni 70 bari munsi y’imyaka 18 muri Leta Zunze Ubumwe za Amerika, nk’uko imibare y’inzego z’ibarurishamibare z’iki gihugu ibigaragaza.

Hashingiwe ku gaciro k’umugabane umwe ka SpaceX kari hafi y’amadolari 146,03 ku isoko ry’imari ryo ku wa Gatanu w’icyumeeru gishize, imigabane yose yatangwa ishobora kugira agaciro k’amadolari arenga miliyari 10,5.

Nubwo Musk yatangaje iyi gahunda, ntarasobanura uburyo imigabane izagera kuri buri mwana, imyaka ntarengwa y’abazayihabwa, ndetse n’amabwiriza azagenga imicungire yayo.

Ntabwo kandi harasobanurwa niba imigabane izahabwa abana binyuze kuri konti z’ishoramari zibandwaho na Leta ya Amerika cyangwa hakazakoreshwa ubundi buryo.

Iyi gahunda ije nyuma y’uko Gwynne Shotwell, Perezida wa SpaceX, yari yatangaje gahunda yo gutanga imigabane afite muri iyi sosiyete kugira ngo ifashe abana barenga miliyoni ebyiri bo mu miryango itisoboye, binyuze muri gahunda ya Trump Accounts.

Iyi konti igamije gufasha abana kugira umutungo w’igihe kirekire binyuze mu kuzigama no gushora imari.

Icyemezo cya Musk kije mu gihe ibigo bikomeye by’ikoranabuhanga n’abaherwe bakomeje gushaka uburyo umutungo wabo wagira uruhare mu bikorwa bigamije inyungu rusange.

Ku Cyumweru, tariki ya 18 Ukwakira 2026, Musk yari yanenze igitekerezo cyo kunyuza imfashanyo mu bigo by’ubugiraneza gusa, asaba ko imigabane yatangwa ku buryo igera ku baturage mu buryo butaziguye.

Musk, uyobora SpaceX na Tesla, ari mu bantu bakize kurusha abandi ku isi, umutungo we ahanini ukaba uva ku migabane afite muri ibyo bigo.

Mu gihe iyi gahunda yaramuka ishyizwe mu bikorwa uko uyu muherwe yabitangaje, ishobora gutuma abana babarirwa muri za miliyoni baba abafatanyabikorwa muri imwe muri sosiyete zikomeye ku isi mu bijyanye n’ikoranabuhanga n’ingendo zo mu isanzure.

Ikipe y’igihugu y’u Rwanda y’abatarengeje imyaka 17 isubiye mu gikombe cya Afurika, yaherukagamo 201, nyuma yo gutsinda iya Ethiopia ibitego 2-1 mu mukino wo guhatanira umwanya wa gatatu muri CECAFA.
‎

Amavubi U-17 yongeye kubona itike y’Igikombe cya Afurika nyuma y’imyaka 17

‎Uyu mukino wabaye kuri uyu wa Mbere tariki ya 19 Ukwakira, kuri Kigali Pele Stadium, watangiye Saa Sita n’Igice, ku kirere cyiza cyitari kirimo izuba ryinshi
‎
‎Umukino watangiye wegeranye amakipe yigana ariko abasore ba Mulisa Jimmy ukabona ko bari gukina neza bashaka igitego cyo kubinjiza mu mukino. Ku munota wa gatatu Amavubi yabonye koroneli Bahati Pacifique ayiteye umupira ubwugarizi bwa Ethiopia buwukuraho neza.
‎

‎Abasore b’u Rwanda bakomeje kwataka neza banyuze ku ruhande rw’iburyo rwari ruriho Heylen Jayden Shema, maze ku munota wa gatanu uyu musore atsinda igitego cya mbere cy’u Rwanda.

Shema Jayden amaze gutsinda igitego

Ethiopia yakomeje guhuzagurika mu bwugarizi maze ku munota wa 16 Ndizeye Isaac atsinda igitego cya kabiri ku mupira wari uvuye muri koroneri.
‎

Ndizeye Isaac (Nomero 15) amaze gutsinda igitego cya kabiri

‎Nyuma yo gutsindwa ibitego bibiri Ethiopia yatuje itangira gukuna neza cyane cyane hagati mu kibuga, ari nako barema uburyo bwinshi maze ku munota wa 42 Akrem Abduselam Jemal atsinda igitego cyo kwishyura nyuma y’uburangare bwabamyugariro ba Amavubi, igice cya mbere kirangira ari 2-1.
‎

‎Igice cya kabiri cyatangiranye impinduka ku ruhande rw’u Rwanda Shema Jeyden na Ujeneza Patrick basohoka mu kibuga maze hinjiramo Tuyizere Valentin na Ngiriyandemye Emmanuel mu buryo bwo kongera imbaraga mu busatirizi. Muri iki gice Ethiopia yihariye umupira cyane ariko igitego kirabura.
‎

‎Abatoza bombi bakomeje gukora impinduka mu mukino, amakipe akomeza kurema uburyo ariko abanyezamu bagumisha amakipe yabo mu mukino maze umukino urangira ari 2-1, u Rwanda rwegukana umwanya wa Gatatu runabona itike y’igikombe cya Afurika rwaherukaga gukina 2011.

Byari ibyishimo

Abatoza nabo bari bishimye

Abakinnyi bishimanye n’abafana

Wari umunezero nyuma y’umukino

Abanyamupira batandukanye bari banezerewe n’aya mateka

Visi Perezida wa FERWAFA Ushinzwe Tekinike Mugisha Richard

Umutoza w’Ikipe y’Igihugu y’u Rwanda nkuru Stephen Constantine yarebye uyu mukino

Minisiteri y’Ubuzima (MINISANTE), yagaragaje ko nubwo hafunzwe inganda zirenga 250 zakoraga inzoga zitujuje ubuziranenge (Ibyuma), ariko icyo gihe hari n’izindi zirenga 200 zitegereje ibyangombwa bizemerera gukora.

Mu kiganiro yagiranye n’abagize Ihuriro nyunguranabitekerezo ry’imitwe ya Politiki yemewe mu Rwanda mu cyumweru gishize cyagarukaga ku ngamba Leta yafashe mu kurwanya inzoga zitujuje ubuziranenge n’ibiyobyabwenge, Minisitiri w’Ubuzima, Dr. Sabin Nsanzimana, yagaragaje ko ikorwa ry’izo nzoga ryari rimaze kuba ubucuruzi burimo kwitabirwa na benshi, batitaye ku byo baha Abanyarwanda.

Uyu muyobozi yavuze ko aho iterambere ry’inganda ryaziye abantu bagashishikarizwa gukora inganda, ababyitabiriye benshi ari abifuzaga gukora ibisindisha, kuko uko inzoga uyihaye umuntu, hari uburyo igera ku bwonko bikazamutera kuba imbata yayo bihoraho.

Ati “Abakora inganda rero baba babizi, bashyiramo ibyo bintu bazi ko bikora ku bwonko, aho uzakabona ntubashe kubyihanganira utagafashe, cyangwa wabitekereza gusa. Bituma rero inganda zikora inzoga ziba nyinshi, buriya mu gihe cya Covid nibwo zihuse cyane ziza kugera kuri 250, zikora inzoga z’ibitoki zikavangamo ibindi bintu bitandukanye.”

Ngo batangiye bakoresha ibitoki, nyuma baza kubona ko ibitoki bibahenda batangira kujya bazana ibindi birimo etanol (ethanol) hamwe na za puderi zifite impumuro n’uburyohe nk’ubw’ibitoki (Flavors) cyangwa ikindi bavuga ko ari cyo bakoramo inzoga zabo.

Uyu muyobozi yavuze ko igihe, igihe cyo guca ibyuma cyageraga, hari hari mu gihugu hari inganda 250 zakoraga inzoga zitujuje ubuzirange.

Yagize ati “Hari n’abandi benshi bari barabibonyemo inyungu, na bo bari barasabye kubikora bategereje ibyangombwa. Inganda zigera kuri 200 zari zitaratangira, ariko ubwo hari n’abandi nta byangombwa bafite babikora kinyeshyamba, ubwo abo bo umubare wabo na bo ntabwo ari muto.”

Yunzemo ati “Abo bose turabagira inama yo kudategereza kuzongera gukora ibyuma, ahubwo bagashaka ibindi bakora Abanyarwanda bakeneye, byaba ibiribwa, ibinyobwa bidasembuye cyangwa bifite intungamubiri, aho kugira ngo batekereze kuzungukira mu byangiza ubuzima. Ntabwo ari bwo bucuruzi Igihugu gikeneye, ni wo murongo turimo, turifuza twese ibitwubaka, ntabwo twifuza ibitwangiza.”

Ngo utekereza ko uruganda rwe rwakoraga ibyuma ruzongera rugakora, byaba byiza agiye mu bindi birimo ubuhinzi n’ibindi bikenewe kuko bihari kandi bishobora kumufasha bigafasha n’Abanyarwanda.

Abagize Ihuriro Nyunguranabitekerezo ry’Imitwe ya Politiki yemewe mu Rwanda (NFPO), bagaragaje ko bitumvikana uburyo mu gihugu habaye inganda zingana zityo kandi zose zifite ibyangombwa zahawe n’urwego rwa leta rushinzwe kugenzura imiti n’ibiribwa.

Perezida w’Ishyaka ry’Iterambere n’Ubusabane (PPC), Dr. Alvera Mukabaramba, yagaragaje ko batumva uko inganda z’inzoga zishobora kurenga 200.

Ati “Twahoze twibaza tuti ubundi inganda z’inzoga zirenga 200 gute? Ntabwo ari izikora amasabune, imyenda, niyo mutabihagarika bari gukomeza batanga uruhushya ngira ngo zari no kugera kuri 500.”

Mu gihe kiranga gato amezi abiri Leta ingamba zo guhagarika no guca burundu inzoga zitujuje ubuziranenge, inzego zitandukanye zirimo iz’ubuzima, umutekano n’ubutabera, zigaragaza ko hari umusaruro bimaze gutanga, kubera ko ibyaha birimo gukubita no gukomeretsa byagabanutse ku kigero kiri hejuru ya 50%.

Senateri Uwizeyimana Evode yavuze ko kimwe mu bibazo bikomeye Perezida FelixaTshisekedi afite kugeza ubu nuko azisanga arimo agirana ibiganiro na Laurent Kabila wahoze ari Perezida wa Repubulika Iharanira Demokarasi ya Congo.

Yabigarutseho mu kiganiro yagiranye na Televiziyo y’Igihugu, tariki 18 Ukwakira 2026 cyibanze ku ngaruka zishobora gukurikiraho nyuma y’ishingwa ry’umutwe wa Front pour la Refondation de la Nation (FRN), uyobowe na Joseph Kabila wahoze ari Perezida wa RDC.

Senateri Uwizeyimana Evode yavuze ko ubutegetsi bwa Perezida Félix Tshisekedi wa Repubulika Iharanira Demokarasi ya Congo (RDC) bwakoze ikosa rikomeye mu buryo bw’imiyoborere ya politiki ryatumye Joseph Kabila akatirwa urwo gupfa, nyamara ari umwe mu bantu ubutegesti bwe bushobora kuzakenera mu biganiro bigamije gushakira amahoro iki gihugu.

Yabigarutseho ku wa 18 Ukwakira 2026, mu kiganiro yagiranye na Televiziyo y’Igihugu, cyibanze ku ngaruka zishobora gukurikiraho nyuma y’ishingwa ry’umutwe wa Front pour la Refondation de la Nation (FRN), uyobowe na Joseph Kabila wahoze ari Perezida wa RDC.

Senateri Uwizeyimana yavuze ko Perezida Tshisekedi yagize uruhare mu gutuma Kabila ava mu gihugu, ariko ko no mu gihe yari mu buhingiro yakomeje gushyirwaho igitutu, kugeza ubwo ahitamo kwinjira mu rugamba rwa politiki n’urwa gisirikare.

Mu itangazo ryo ku wa 14 Ukwakira 2026, rivuga ko ihuriro FRN ryatangaje ko risimbuye AFC/M23 mu nshingano n’amasezerano yari yarinjiyemo, harimo n’ibijyanye n’ibiganiro by’amahoro bya Doha.

Ati “Uyu mutwe wa politiki n’igisirikare, washinzwe ku wa 12 Ukwakira 2026, wasimbuye ihuriro rya AFC/M23 rimaze igihe rirwanya ubutegetsi bwa Kinshasa nonese ni gute atazagirana ibiganiro na Tshisekedi”.

Mu busesenguzi bwe Senateri Uwizeyimana avuga ko atabona ahazaza ha RDC hatarimo Kabila ndetse n’umutwe ayoboye kuko bafite imbaraga kandi Perezida Félix Tshisekedi yemeye ibiganiro by’amahoro hakongera hakagaruka umutekano.

Senateri Uwizeyimana yavuze ko ishingwa ry’ihuriro Front pour la Refondation de la Nation (FRN) rishobora gutuma ibiganiro by’amahoro bya Doha, byahuzaga Leta ya Repubulika Iharanira Demokarasi ya Congo na AFC/M23, byongera gusuzumwa bitewe n’impinduka zabaye mu buyobozi bw’uruhande rurwanya Leta. Yasobanuye ko ibyo biganiro bitahita byimukira kuri FRN kuko ishingwa ry’iri huriro ridahita risimbura AFC/M23 mu biganiro byari bisanzwe bihari.

Yongeyeho ko kuba Joseph Kabila, Tshisekedi yigeze gushyira mu batagomba kugira uruhare mu biganiro bya politiki, ari we uyoboye FRN, bishobora gushyira Perezida Tshisekedi mu bibazo, kuko bishobora kuzamusaba kuganira na Kabila kugira ngo ikibazo cy’umutekano n’amahoro muri RDC kibonerwe umuti.

Impuguke muri Politiki, Prof Tombola Gustave, avuga ku FRN iyobowe na Joseph Kabila, bigaragaza ko Kabila yari yarateguye ikibuga. Iyo bita atari byo, amahanga yose aba yarasakuje.

Prof Tombola avuga ko kuba Kabila yarashinze ihuriro Front pour la Refondation de la Nation (FRN) yabanje kujya mu mahanga kugaragaza impamvu yabyo bitaba ibyo amahanga aba yarasukuje amwamagana.
Prof Tombola Gustave asanga perezida Tshisekedi agomba kugirana ibiganiro na Kabila uyoboye iri huriro.

Guverinoma ya Kenya yatangaje ko yakiriye imiti yatanzwe n’u Rwanda mu rwego rwo kuyifasha guhangana n’icyorezo cya Ebola kimaze kugaragara ku bantu umunani muri icyo gihugu, umwe muri bo akaba yaritabye Imana.

Aya makuru yatangajwe n’Umuyobozi Mukuru muri Minisiteri y’Ubuzima ya Kenya, Dr. Patrick Amoth, mu kiganiro yagiranye na televiziyo ya Citizen TV ku Cyumweru, tariki ya 18 Ukwakira 2026.

Dr. Amoth yavuze ko Kenya ikomeje kwakira inkunga n’ibikoresho biturutse mu bihugu n’imiryango mpuzamahanga, mu rwego rwo gufasha inzego z’ubuzima guhangana n’iki cyorezo.

Yagize ati: “Dukomeje kwakira inkunga n’ibikoresho biturutse mu Bushinwa no mu Muryango w’Abibumbye wita ku Buzima OMS. Uyu munsi kandi twakiriye imiti yatanzwe n’u Rwanda, mu gihe dukomeje guhangana n’iki cyorezo.”

Minisiteri y’Ubuzima muri Kenya yatangaje ko abantu umunani ari bo bamaze kwandura Ebola muri icyo gihugu, umwe muri bo akaba yarapfuye.

Ebola ni indwara yandura binyuze mu guhura n’amatembabuzi yo mu mubiri w’umuntu wanduye, yaba akiriho cyangwa yarapfuye. Mu bimenyetso byayo harimo umuriro, kuruka n’impiswi. Mu bihe bikomeye, umurwayi ashobora no kuva amaraso imbere mu mubiri cyangwa hanze yawo.

Icyorezo cya Ebola cyo mu bwoko bwa Bundibugyo cyagaragaye muri Repubulika Iharanira Demokarasi ya Congo (RDC), kikaba cyaranagaragaye mu bindi bihugu byo mu karere.

Ubu bwoko bwa virusi ntibukunze kugaragara, kandi kugeza ubu nta rukingo cyangwa umuti wabwo byemejwe.

Muri Uganda na ho hagaragaye abarwayi ba Ebola muri Gicurasi na Kamena 2026. Icyakora, muri Kanama 2026, icyo gihugu cyatangaje ko kitakigaragaramo iyi virusi.

Mu gihe ibihugu byo mu karere bikomeje gufata ingamba zo guhangana n’iki cyorezo, ubufatanye mu gutanga ibikoresho n’ubundi bufasha bw’ubuvuzi ni ingenzi mu kongerera ubushobozi inzego z’ubuzima bwo gutahura abarwayi, kubitaho no gukumira ikwirakwira rya virusi.

Kuri iki Cyumweru, ikipe y’igihugu y’umukino w’amagare igiye guhagararira u Rwanda mu byiciro bitandukanye muri Shampiyona ya Afurika 2026 yakoreye imyitozo ya mbere Kisumu muri Kenya, ahazabera iyi shampiyona kuva kuri uyu wa Mbere kugeza tariki 25 Ukwakira 2026.

Ni imyitozo yakozwe nyuma y’urugendo rwakozwe hifashishijwe ubutaka, aho rwahagurukiye mu Karere ka Musanze rukanyura Kampala muri Uganda mbere yo kugera Kisumu muri Kenya. Kuri iyi nshuro u Rwanda ruzahagararirwa n’abakinnyi 29 aho uyu mwaka ari amateka kuko aribwo bwa mbere ruhagarariwe n’umubare munini witabiriye iri rushanwa.

Kugeza ubu Akimana Donatha ndetse na Shema Emmanuel bari basanzwe bari mu mwiherero wa UCI aha muri Kenya nibo batari kumwe n’abandi gusa bakaba bazaza bagiye gusiganwa mu gihe abandi, bose ku mugoroba wo kuri iki Cyumweru bakoze imyitozo banyuze mu mihanda bazakoresha basiganwa mu rwego rwo kurambura amaguru.

U Rwanda ruzahatana mu byiciro bine, aribyo abakuru, abatarengeje imyaka 23, abakiri bato hose mu bagabo n’abagore, ndetse n’ingimbi n’abangavu.

Abakinnyi bagiye guhagararira u Rwanda muri Shampiyona Nyafurika 2026:

Abatarengeje imyaka 17:

– Abangavu:
1. Liza Johovaire
2. Agasaro Gloria

– Ingimbi:

1. Mukwende Fuad
2. Ntwali Reponse
3. Byiringiro Mubarak

▪️ Abatarengeje imyaka 19:

– Abakobwa:

1. Masengesho Yvonne
2. Akimana Donatha

– Abahungu:

1. Nkulikiyinka Jackson
2. Ishimwe Brian
3. Niyonkuru Yassin
4. Shema Emmanuel

▪️ Abatarengeje imyaka 23

– Abagore:

1. Mwamikazi Jazilla
2. Byukusenge Mariatha

– Abagabo:

1. Ruhumuriza Aime
2. Ntirenganya Moise
3. Ufitimana Shadrack

▪️ Abakuru:

– Abagore:

1. Nirere Xaverine
2. Ingabire Diane
3. Nyirarukundo Claudette
4. Ntakirutimana Martha

– Abagabo:

1. Niyonkuru Samuel
2. Muhoza Eric
3. Mugisha Moise
4. Nsengiyumva Shemu
5. Byukusenge Patrick
6. Masengesho Vainqueur
7. Tuyizere Etienne
8. Uwiduhaye Mike

Richard Grenell (i bumoso) na Alina Habba Mildon

Ihererekanya rya miliyoni 17,6 z’amadolari ryavuye kuri konti ifitanye isano na Leta ya Congo, riri ryateje impaka n’amakimbirane mu byegera bya Trump na Leta ya Amerika ubwayo.

Nk’uko ikinyamakuru The New York Times kibitangaza, iperereza ryatangijwe na White House ku makimbirane ahanganishije Richard Grenell na Alina Habba Mildon, wahoze ari umunyamategeko bwite wa Donald Trump, rireba ihererekanya rya miliyoni 17,6 z’amadolari ryabaye muri Gicurasi 2025.

Ayo mafaranga yavuye kuri konti ya banki ifitanye isano na Guverinoma ya Repubulika Iharanira Demokarasi ya Congo (RDC), ajyanwa kuri TX-AT, ikigo gikora ibikorwa by’umutekano n’ubwirinzi gikorera muri Leta ya Texas muri Leta Zunze Ubumwe za Amerika.

Alina Habba Mildon arashinja Richard Grenell, icyo gihe wari intumwa idasanzwe ya Leta Zunze Ubumwe za Amerika muri Venezuela akaba na Perezida w’Ikigo cy’Umuco cya Kennedy Center, kunyereza igice cy’ayo mafaranga yagombaga gusubizwa icyo kigo. Grenell ahakana ibyo ashinjwa.

Mu ntangiriro, Habba Mildon yari yavuze ko ayo mafaranga yari yatanzwe n’umugabo we, Turhan Mildon, umushoramari ukomoka muri Turukiya, uvuga ko ari umujyanama wa Félix Tshisekedi.

Turhan Mildon afite pasiporo ya dipolomasi ya Congo, kandi ikigo cye Milvest cyatsindiye amasoko menshi ya Leta muri RDC, arimo n’umushinga wo kubaka ikigo cy’imari i Kinshasa.

Impamvu nyakuri y’iri hererekanya ry’amafaranga ntirarasobanuka. Yaba Minisiteri y’Ububanyi n’Amahanga ya Congo na TX-AT nta n’umwe wari wagira icyo avuga kuri ibi birego.

Mu cyumweru gishize, havuze inkuru y’iyezandonke rikomeye ryatahuwe mu muryango wa Perezida Felix Thisekedi wa Congo, mu mazu ari mu Bubiligi, rikaba ririmo Miliyoni zitabarika z’Amadolari.

Umuryango wa Tshisekedi watangiye guhakana ibyo birego.

Kuri uyu wa Gatandatu, ikipe ya Rayon Sports yatsindiwe ibitego 2-0 na Black Bulls FC yo muri Mozambique mu mukino ubanza w’ijonjora rya kabiri rya CAF Confederation Cup 2026-2027, isabwa gutegereza Ibizava mu mukino wo kwishyura ngo ibe yakina amatsinda nk’uko ibyifuza.

Ni umukino watangiye Saa Kumi n’Ebyiri z’umugoroba kuri Stade Amahoro, ikipe ya Rayon Sports bitungurana idafite ku rupapuro rw’umukino ariko bwa mbere ikinisha Elie Mokono wabanje mu kibuga, ndetse na Mohamed Ouattara wari ku rupapuro rw’umukino.

Igice cya mbere cy’uyu mukino cyaranzwe no gukina neza mu guhererekanya no kurema uburyo butabaye bwinshi ariko kububyaza umusaruro ntibyayikundira. Ku rundi ruhande ariko Black Bulls FC nayo yakinaga neza inarema uburyo bwinshi byatumye abafana bari bari muri Stade Amahoro baryoherwa, iki gice ariko kirangira ari 0-0.

Mu gice cya kabiri, amakipe yombi yatangiye nta mpinduka akoze maze. Ku munota wa 54 ikipe ya Black Black Bulls FC yabonye umupira w’umuterekano ku ruhande rw’ibumoso watewe maze uvamo koroneri. Iyi koroneri yatewe na Candido Mathe maze kapiteni Abdou Gueye mu buryo bwiza atsinda igitego cyiza n’umutwe.

Aha imibare yari ibaye nk’ikomera kuri Rayon Sports yari yinjirijwe igitego mu rugo maze ikora impinduka ikuramo Antonio Atisso Kodjo ishyiramo Moise Sandja Bulaya. Muri iki gice kandi yanashyizemo Muhoza Daniel wasimbuye Tambwe Gloire ndeyse na Ibrahim Djingarey wasimbuye Obed Uwumukiza.

Binyuze kuri Junior Kameni wateraga imipira n’umutwe mu izamu, Ganijuru Elie Ishimwe wahindurira imipira ibumoso Rayon Sports yakomeje gushakisha uko yakwishyura igitego ariko mu bihe bitandukanye umunyezamu wa Black Bulls FC Jose Ventura Guirrugo akomeza gukora akazi gakomeye akuramo imipira.

Iminota 90 yarangiye Black Bulls FC ikiyoboye umukino hongerwano itanu, iyi minota iyi kipe yahushijemo igitegi kidahushwa ubwo Abdou Gueye yahaga umupira Alirio Cuna acenga umunyezamu ariko umupira kuwushyira mu izamu biramunananira.

Black Bulls FC yahise yikosora ubwo Danilo Muze yahabwaga umupira ku ruhande rw’ibumoso rwari rwambaye ubusa maze asunika umupira gato, atera ishoti rikomeye cyane mu izamu rya Dande Junior utashoboye kugira icyo akora Rayon Sports itsinda igitego cya kabiri.

Umukino warangiye, Black Bulls FC itsinze Rayon Sports igitego 2-0 mu gihe umukino wo kwishyura uteganyijwe kuzabera muri Mozambique tariki 24 Ukwakira 2026.

‎Ikipe ya APR FC itsindiwe muri Stade Amahoro na Zamalek SC igitego kimwe ku busa mu mukino ubanza w’ijonjora rya kabiri ry’ibanze rya CAF Champions League, ikizere cyo kwerekeza mu matsinda kiragabanyuka.
‎

‎Uyu mukino wabaye kuri uyu wa Gatanu, tariki 16 Ukwakira 2026, watangiranye imbaranga zidasazwe ku makipe yombi ariko ukabona amakipe agenda yigana, gusa APR FC ikanyuzamo igasatira cyane byanatumaga ibona koroneri.
‎

‎Mu minota 45 y’igice cya mbere amakipe yakiniye mu kibuga hagati cyane ku buryo bwatumye nta buryo bwinshi tubona ku makipe yombi. Ku munota 38 Uwiyaremye Fidali yazamukanye umupira ateye ishoti umupira umunyezamu awushira muri koroneri.
‎
‎Igice cya kabiri Zamalek SC yagarutse yatinyutse iri guhererekanya neza ari nako ikoresha impande zayo bigatuma ibona koroneli n’ubwo nta ntacyo zabyaye. Hagati y’umunota wa 65 kugeza kuwa 80 APR FC yakinnye neza ari nako yahushije uburyo bwinshi kuri William Togue kapiteni Djibril Ouattara na Mamadou Traore.
‎