CARIBOU

Internet tangkai em emna kara a that lohna tlem

2015-05-21T23:24:00.002+05:30

Internet a tangkai zia kan hria a, a that zia, thil tih a awlsam phah zia te, thian hlui inzawn hmuh lehna hmanrua atan te, group chatting, social networking, banking, investment, online ticket booking, mobile top-up and recharging, information and data collection, online shopping leh a tangkaina tam tak sawi tur a awm.....

Chutihlaiin, fimkhur tawk lohna te leh ngaihtuahna fim hman tawk lohna te avangin internet hian mihring nunah nghawng tha lo tak tak a thlen ve fo thin. A that tawk lohna tlemte i han sawi chhuak mai mai ang hmiang

1. Porn lamah: Tunhmaa porn (zahmawh) lehkhabu leh magazine harsa taka kan neih thin ang kha, awlsamtein internet atangin a neih zung zung theih tawh a. Thuziak, milem leh videos awlsam takin internet atangin a en theih a. Hei hian nasatakin thalaite nun a hruai kawi nasa thei hle a. Hetiang en nasat avanga tih ve chakna thinlung rilruah a awm a, hurherhna sualah kan tluk phah a, thenkhat lahin saruak thlalak leh videos an lak nasat phah bawk.

2. Lehkhabu chhiar kan thatchhiat phah: Internet atangin thuziak tam tak a chhiar theih a. Mizotawnga thuziak chu a la tlem hle nain, saptawng thiam tan chuan chhiar sen rual lohva tam thuziak chhiar tur a awm a ni. Hei vang hian lehkhabu chhiar lamah tlakhniam a awl duh niin mithenkhat chuan an sawi.

3. Hun khawhralna a ni: Internet thutchilh hian website hrang hrang kan tlawh kual a, hmeh theiha awm apiang kan hmet a, kan duh ang thuziak, milem leh videos te a rawn chhuak mai thin. Mit a tlaiin thut reng a awl a, hun a hek em em thin. Internet avangin kan hunt ha tam tak kan khawhral fo thin.

4. Thian tha lo a tawn palh theih: Internet, email, chat leh orkut te kaltlangin la inhre ngai reng reng lo te an inbia a, chutih karah misual an lo tlazep ve chawk thin bawk. Patling pui tawh, tleirawl anga inchhal a, nula tuaitir lo bum tawk pawh a awm fo thin….

5. Inbumna a awm thin. ‘Pawisa chuti zat i dawng e’ tiin email rinawm hmel tak tak an dawng a, mi tamtakin tak take maw tiin an awih a, an chhanglet a, a tawpah heti zozai pawisa la chhuak tur chuan account buaipui nan pawisa sing hnih emaw a lo ngai ta a, an han thawn a, a bopil ta hmak mai thin a ni. Internet kaltlanga inbumna hi a nasa em em a, chuvang chuan internet kan khawioh ve duh anih pawhin mahni bank account lampang khawih tel their tur lakah fimkhur em em tur a ni.

6. Computer virus kai a awl: Internet atangin virus kan kai fo thin a, kan computer ah a kai chuan awlsam takin midangte kan kaidarh thuai thin. Computer virus leh mobile virus te chimawm zia leh, a kai tawh chuan a manganthlak zia hretu leh tawng tawhtu kan tam hlein a rinawm. Internet atangin virus kan kaidarh tlangpui thin a ni tih hriain, website tha lo leh rintlak loh deuh nia lang chu tlawh lo hram hram ila, kan computer leh mobile a him a ni mai.

7. Internet hi a addict theih: Internet hi a hmang thang tan chuan hman a nuam em em mai si a, hei vang hian addict theih deuh mai a ni a, ni khat chhung lek internet a that loh pawhin a hrehawm em em thei thin. Sawi tawh angin hun a heh em em a, kan hun tha tam tak kan khawhral fo thin a ni.

8. Online games: Online game khelh hi taksa leh mit tana tha lo. Internet khawih tinuam em emtu pakhat chu online PC games hi a ni awm e. Online-a khelh theih tur games a tam em em a, mahnia khelh theih te, midang lo online ve mek nena khelh theih te a tam. Midang lo online ve mek te nena (multiplayer) khelh phei chu a nuam, a game a rei thei si, a then te phei chu tawp hlei thei lo emaw tih hial tur te a ni a, hun tam tak khawhralna a ni.World of Warcraft te phei chu addict theih lutuk maw le.

9. Bill a sang: Mamawh miah loh, mi ten an neih avanga internet connect ve tawp te hi thil awm thei a ni. Thenkhat ten an hna atana an mamawh em em lain, keini thalai te hian mamawhna awm ve uk si lovin kan connect ve anih chuan, thla khat bill hi a sang fu a, kum khat a tlin phei chuan pawisa senral a tam hman em em thin.

Council of Ministers te hna chanpual

2013-12-16T22:32:00.005+05:30

Chief Minister Lal Thanhawla hna chanpual te:
Political and Cabinet Affairs te, Vigilance, General Administration,Secretariat Administration,Personnel & Administrative Reforms, Information and Public Relations, PWD, P&E leh District Council Affairs te a chang a.

Cabinet Ministers te hna chanpual:

1. Pu R Lalzirliana:
Pu R Lalzirliana chuan Home Including Prison and Sainik Welfare te, Agriculture, Rural Developement leh Excise and Narcotics Deptt te a chang ang..

2. Pu Lalsawta:
Pu Lalsawta chuan Finance, Planning and Programme Implementation,Taxation leh Law and Judicial te a chang ang.

3. R Romawia:
Pu R Romawia chuan Higher and Technical Education, Art and Culture, Land Revenue and Settlement leh Parliamentary Affairs te a enkawl ang.

4. H Rohluna:
Pu H Rohluna'n School Education, Industries, Directorate of Geology and Mineral Resources leh Trade and Commerce Deptt te a enkawl ang.

5. Zodintluanga:
Pu Zodintluanga'n UD&PA, Sports and Youth Services leh PHE te a chang ang.

6. John Rotluangliana:
Pu John Rotluangliana'n Food Civil Supplies and Consumer Affairs, Transport leh Tourism te a chang ang.

7. PC Lalthanliana:
Pu PC Lalthanliana'n Horticulture, LAD leh Social Welfare Deptt te a chang ang.

Minister of States:

1. Lalthanzara: Pu Lalthanzara chuan Health and Family Welfare, Minor Irrigation leh Information and Communication Technology te a chang a, PWD leh P&E ah Chief Minister a pui bawk ang.

2. Lalrinmawia Ralte: Pu Lalrinmawia Ralte chuan Environment and Forest, Cooperation, Labour and Employment, Industrial Training leh Soil and Water Conservation te a enkawl ang.

3. Ngunlianchunga: Pu C Ngunlianchunga chuan AH&Vety, Disaster Management and Rehabilitation leh Printing and Stationary te a chang ang.

4. BD Chakma: Pu BD Chakma chuan Sericulture leh Fisheries te a enkawl ang.

Deptt dang tarlan ve lohte chu Chief Minister in a enkawl vek dawn a ni awm e.

Parliamentary Secretaries:

Parliamentary Secretary pasarih zet kan nei a. Anni hian Minister thenkhat an puibawm ang a, an puihbawm tur ministers te chu kualkhung chhungah dah a ni a, a piahah an puih tur Deptt chanpual bik dah a ni bawk e.

1. KS.Thanga (Rohluna): School Education, Industries, Trade & Commerce
2. Lt. Col. ZS Zuala (Lalsawta) -Finance, Planning, Taxation, Law & Judicial
3. H. Zothangliana (R Romawia) -H&TE, Art & Culture, Revenue, Parliamentary Affairs
4. Joseph Lalhimpuia (R Lalzirliana) -Home, Agriculture, RD, Excise
5. TT Zothansanga (PC Lalthanliana) -Horticulture, LAD, Social Welfare
6. K Lalrinthanga (John Rotluangliana) -Supply, Transport, Tourism
7. Hmingdailova Khiangte (Zodintluanga) - UD&PA, Sports, PHE

Chairmans: MLA thenkhat te (except Liansailova) Chairman nihna tur pek an ni bawk a, chungte chu a hnuai ami ang hi a ni e.
1. Liansailova: Planning Board Vice Chairman( cabinet rank)
2. JH.Rothuama : NLUP Implementing Chairman
3. S.Laldingliana: HPC Vice Chairman
4. John.Siamkunga: Chairman Law Commission
5. T.Sangkunga : Chairman Mizoram Youth Commission
6. Dr. Ngurdingliana: MAMCO Chairman

Mizoram Legislative Assembly 2013 ah Congress in hnehna an chang chiang hle

2013-12-09T23:04:00.004+05:30

Dt 9.12.2013 (thawhtanni) zinglam dar 8 atangin vote chhiar tan a ni a, Congress in hnehna an chang chiang hle a. Heng a hnuai ami te hi Mizoram mipui te'n an aiawh atana duh taka an thlan chhuah te an ni e:

Aizawl E I:     Lalrinawma INC
Aizawl E- II: Lalsawta INC
Aizawl N I:    R. Romawia INC
Aizawl N II:   Lalthanliana MDA
Aizawl N III: Lal Thanzara INC
Aizawl S I:     R. Vanlalvena INC
Aizawl S II:   Lt Col Zosangzuala INC
Aizawl S III: KS Thanga INC
Aizawl W I: K Sangthuama MDA
Aizawl W II: Lalruatkima INC
Aizawl W III: Vanlalzawma MDA
Lunglei S:     S. Laldingliana INC
Lunglei E:     Joseph Lalhimpuia INC
Lunglei W: Chalrosanga INC
Lunglei N:    Pc Lalthanliana INC
Chalfilh:        Dr Ngurdingliana INC
Champhai N: TT Zothansanga INC
Champhai S: JH Rothuama INC
Dampa:      Lalrobiaka INC
Hachhek:    Lalrinmawia Ralte INC
Hrangturzo: Lal Thanhawla INC
Kolasib:        Pc Zoramsangliana INC
Lawngtlai W: C. Ngurlianchhunga INC
Lawngtlai E: H. Zothangliana INC
Lengteng:    Rohluna INC
Mamit:       John Rotluangliana INC
Palak:         Hiphei INC
Saiha:        Dr K. Beichhua MDA
Serchhip: Lal Thanhawla INC
Serlui:        K. Lalrinthanga INC
Tawi    :     R. Lalzirliana INC
Thorang: Zodintluanga INC
Tuichang: Lalrinliana Sailo INC
Tuichawng: BD Chakma INC
Tuikum:     Er Lalrinawma MDA
Tuirial:       Hmingdailova Khiangte INC
Tuivawl:    RL Pianmawia INC
Tuipui S : John Siamkunga INC
Tuipui E : T. Sangkunga INC
Tuipui W: Nihar Kanti INC

Hetiang hi Party tin te seat lak dan a ni:
Congress: 34
MDA : 6 MNF= 5 & MPC = 1)
ZNP:    NIL

FIFA World Cup 2014 qualified team

2013-11-22T07:50:00.002+05:30

FIFA World Cup 2014, Brazil-a neih turah ram 32 te an qualified ta a. Chung ram 32 te chu:

1. CONMEBOL (South America): Ram 6 an qualified.

Brazil
Argentina
Uruguay
Colombia
Chile
Ecuador

2. UEFA (Europe): Ram 13 an qualified.
Spain
Germany
England
France
Netherlands
Italy
Belgium
Portugal
Switzerland
Russia
Bosnia-Herzegovina
Croatia
Greece

3. AFC (Asia): Ram 4 an qualified.
Japan
Australia
Iran
South Korea

4. CONCACAF (North & Central America): Ram 4 an qualified.
Costa Rica
USA
Honduras
Mexico

5. CAF (Africa): Ram 5 an qualified.
Nigeria
Ghana
Algeria
Cameroon
Cote d'Ivoire (Ivory Coast)

Hmanni lawka ka rawn dah chhuah kha tu te emaw ninhleiin group an thliar chhin mai mai a lo nia. Fixtures final draw hi FIFA lamin an lo la nei lo va, an neih thuai rin a ni (a hun tur an la fix lo).

English Football chanchin tawi

2013-11-17T09:53:00.001+05:30

Mizo te hian English football kan tuipui hle a, kan en taima a, en mai duhtawk lovin titi nikhuaah a serh zinga a mei ang maiin kan sawi tel ve ta zel chu anih hi. Chanchinbu lamah lah phek khat awh hnawk hnawka ziak a ni fo bawk nen.Kan lo tuipui em em thin hi English football league tam em em zinga a chungnung ber Premier League a ni mai a. Premier League hnuaiah hian league level dang a tam hle. Chung ho chu tlem azawng tarlang ila.

1. Premier League (20 teams)
2. Football League Championship (24 teams)
3. Football League One (24 teams)
4. Football League Two (24 teams)
5. Conference Premier League (24 teams)
6. (a) Conference North (22 teams)
   (b) Conference South (22 teams)
7. (a) Northern Premier League (24 teams)
   (b) Southern Football League Premier Division (24 teams)
   (c) Isthmian League Premier Division (24 teams)

8. (a) Northern Premier League Division One North (22 teams)
   (b) Northern Premier League Division One South (22 teams)
   (c) Southern Football League Division One Central (22 teams)
   (d) Southern Football League Division One South & West (22 teams)
   (e) Isthmian League Division One North (24 teams)
   (f) Isthmian League Division One South (24 teams)

9. Level 9 ah league 13 a awm a, league tinah club 14 aia tamin an khel.

24th level: A level hniam ber chu Mid-Sussex Football League tih a ni.

Level 9 hnuai lamah hian level tam tak a la awm a, level 24 thleng a awm; level tinah league hrang hrang a awm leh a. Ziak chhuah vek sen pawh a ni lo ve. League zawng zawnga club zat belh khawm hi kumtin a inang lo fo thin a, a chhan chu a then an bang a, a then an tel a, chutiang avang chuan kumtinin team/club 7000 vel bawrin competition leaguer khel ziah anga chhut a ni.

Website thenkhat te

2013-11-17T00:35:00.001+05:30

Website pawimawh leh tlawh tlak thenkhatte

Mizo website pawimawh leh lar te:

http://www.misual.com/

http://www.lawrkhawm.com/

http://www.zoin.info/
http://mizofiamthu.com/

http://www.vanglaini.org/

http://www.inkhel.com/
http://www.zofooty.com/
http://alexxfender.com/news.php
http://zonet.in/
http://www.mizonews.net/

Football ngainatu te tana Facebook Page thenkhat:

https://www.facebook.com/ChelseaFC?ref=stream
https://www.facebook.com/manchesterunited
https://www.facebook.com/Arsenal
https://www.facebook.com/IndiaLFC
https://www.facebook.com/TottenhamHotspur?rf=107820895918996
https://www.facebook.com/mcfcofficial
https://www.facebook.com/RealMadrid
https://www.facebook.com/fcbarcelona
https://www.facebook.com/BBCFOOT
https://www.facebook.com/groups/infiamna
https://www.facebook.com/groups/349307348451991
https://www.facebook.com/pages/Mizo-Chelsea-Fans/212099845504567

2014 FIFA World Cup Brazil Qualified tawh ram te

2013-10-16T21:43:00.000+05:30

2014 FIFA World Cup Brazil final round khel thei tur a hriat kim theih tep tawh a. Africa khawmualpui tih loh chuan qualification an zo deuh vek tawh a. Direct-a tling ve zo lo, play-off khel tur ram te pawh a hriat theih nual tawh a. Qualified tawh ram te leh Play-off khel tur ram te chu:

1 AFC: Asia khawmualpui atanga qualified tawhte chu

1. Iran,
2. South Korea,
3. Japan and
4. Australia

Play-off khel tur:

1. Uzbekistan and
2. Jordan

2. CONCACAF: North and Central America atanga ram Qualified tawh te chu

1. USA,
2. Costa Rica leh
3. Honduras

Play-off khel tur: Mexico

3. CONMEBOL: South America ram atanga Qualified tawh te chu

1. Argentina,
2. Colombia,
3. Chile,
4. Ecuador leh
5. a thlengtu Brazil

Play-off khel tur: Uruguay

4. OFC: Oceania thliarkar rual te hian direct in World Cup an khel ngawt thei lo va, an zinga point hmu sang ber New Zealand hian play-off ah Mexico nen an inkhel ang. A chak zawk zawkin World Cup an khel thei ang.

5. UEFA: Europe ram atanga qualified tawh te chu:

1. Belgium,
2. Italy,
3. Germany,
4. Netherland,
5. Switzerland,
6. Russia,
7. Bosnia & Herzegovina,
8. England and
9. Spain

UEFA Play-off 1st leg khel result:

Portugal 1 - 0 Sweden

Ukraine 2 - 0 France

Iceland 0 - 0 Croatia

Greece 3 - 1 Romania

6. CAF: Africa khawmualpui atanga World Cup khel tur a la hriat loh

Thu nepnawi mai mai

2013-07-26T07:36:00.000+05:30

Thu nepnawi ah pawh a nawi lehzual hmangin blog ka'n thual mawi ang e.

*Mihring kan pung zel a, tui thianghlim kan mamawh tam tulh tulh. Tuna kan tuitlan lai hian nakinah chuan min chawm zo lo thuai ngei ang. Lui thianghlim, tuitlan tur tha, zo tlangsang atanga zoluitui vawt thiang fim kak luang dem dem thin te hian zawi zawia min kang san tial tial hma hian tun aia nasa lehzuala kan reserve a ngai.

*Luihnar lamah ramngaw a that viau chuan tuihawk a luang muang a, leilungah tui a lut tha a, chu chuan tuihna a siam tam thin. Tuihawk kal chak lutuk tur ven nan leh lei hnuaia tui a luh that theih nan luihnar hmun engemaw zatah a mual tan zawnga "contour trenching" siam hi duhthusam a ni. Hei hian tuihawk luang chak lutuk tur a vang ang a, lei chhungah tui a lut tha ang a, chu chuan tuihna a titam dawn a ni. Kan tuitlan thin hnar ramhnuai hmun engemaw zatah contour trench lai ila, hei hian nasatakin tuihna a tihpun ka ring.

*Mihring kan pung zel, kan bawlhhlawh pawh a pung zel, kan tuitlan a thianghlim lo tulh tulh. Kan khawpui hnaivaia luang luipuite an thianghlim lo tulh tulh bawk ang. Kan zun-ek thli te hi kan eiin kan la in ngei a ngai dawn anih hi.............

*Khawchhungah ramngaw siam tum lo ila, khaw daifema ramchhia leh luanghmun mai mai te hi ramngaw ah chantir i tum zawk teh ang u. Khawpui chhunga thingphun te hi chu khawpui cheimawi nan ni thei se, nakina hnawksak mai tur thing lian chi ni lo, thing te lampang, a kung mawi tak, a par chi emaw te pawh ni thei se duhthusam a ni. Khawpui chhunga thing phun dawnin plan mumal tak neih hmasak a tha khawp mai.

*Ramsa te i khawngaiha i hmangaih anih chuan ramhnuaiah, nakina ramsa ten a rah an la ei theih turin rahtlan thingtiak pakhat tal phun puitlin tum rawh. Ramhnuaiah bung, chawmzil, etc kung sawm tal i phun puitling anih ngat chuan Mizoram chhunga ramsa te tan malsamna i va ni chiang dawn tak em.

*Sava hmuh hleka perh tum tlat te, sava per tuma veh dun dun te, savabu lak te hi a zahthlak tia naupang kan zirtir loh chuan nakinah kan tu leh fate'n sava hram ri mawi tak tak te an benga ngaihthlak tur an la nei lo thuai ang.

*Min tina thintu rul humhalh ai chuan min tina ve ngai lo, ralti taka nung ve hram hram thin sava, sakhi, sazuk, saza, etc te hian humhalh an va mamawh tak em.Min tina thei ramsa te pawh hian humhalh nih an mamawh ve tho vangin kan humhalh dawn anih chuan khua atanga hla tak, ramhnuai pilril ah humhalh ni rawh se.

*Mithenkhatin khawpui chhungah rul hlauhawm tak, rulngan leh saphai khawi an ching thin. Hei hi a thalo hulhual a ni. Saphai hi i khawi aniha chaw tha taka i pek chuan a hlauhawm loh maithei, mahse riltama a awm vaih chuan naupang tan a hlauhawm thei. Rul hlauhawm ber chi rulngan hi khawi a tulna pakhatmah a awm lo. Domestic animal an ni lo va, wild animals zingah pawh hlauhawm tak an ni. Khawchhunga domestic animals vulh hi kan sorkar chak tak hian khap bur teh se.

*Hmangaihna, rinawmna, khawngaihna, duhsakna, lainatna, inzahdertawnna, te hi awm ta lo se, kan khawvel hi a lo va hrehawm dawn tak em.

Naupang chumchiap boarding/hostel-a dah hi

2013-01-07T00:02:00.001+05:30

Tunhma hun rei tawh tak atang khan sikul naupang, kum lama naupang lutukte hostel-a khung hmiah hmiah kan ching thin hle a. Nu leh pa te'na kan duh chu zirna luhchilh se, english thiam em em sela, lehkhathiam takah rawn chhuak sela tih kha kan duhthusam a ni thin. Tette atanga hostel-a awm thin na na na chu english an thiam a, an discipline pawh a tha nge nge thin anih kha. Mahse an rawn puitling a, mahni in atanga zir chhuak nen chuti em emin an inthlau lo leh fo thin erawh hi chuan ngaihtuahna a tithui thin hle. Engkim kalsanin hostelah an awm a, lehkha an zir ngut ngut a; lehkha zir ngut ngut reng hi, kum la naupang tak leh pawl la hniam tak tan chuan enge maw a tulna le?

Zirna kalphung her danglam a ni tawh

Tunah chuan India sorkarin zawi zawiin zirna kalphung a her danglam hret hret a. Hmana lehkhabu lama inthlurbing ngut ngutna ang kha a zawi zawiin a paih tial tial a. Naupangte tuina leh theihna chi hrang hrang haichhuahna kawng lampang a awn tan ta. Lehkhabu chhiar atang chauh lo pawh eizawnna kawng a kua ani tih a hrechiang tawh a, chuvangin zirlaite curriculum pawh a zangkhai sawt hle a. Pawl hniam tak tak lamah phei chuan Mathematics, Science leh English/Hindi bak hi zirpui tul a ti lem lo.

Naupangin sikul nuama ti tur a ni a. Lehkha zirna lamah a chak lo anih paw'n a tuina lamah a invawrh chhoh theihna turin chance dang a nei tho bawk. Zirlaite zirna lamah an chaklo aniha an tuan a fum bik anih paw'n an fail tawp tawpa akum an hloh loh nan chance pek an ni thin. Note copy-a vawn tluar tluar reng ringawt lovin thil chi hrang hrang, drama, lam, quiz, painting, leh sport lampang te tihpui tam an ni ta bawk.

Hetianga zirna kalpui chhoh anih tak si ah chuan theihpatawp chhuaha lehkha zir tura zing-zana intirhluih kha a bo tial tial a. Tlai lamah naupang te'n infiamna hun tha an neih theih phah a, infiamna mai ni lo, activities dang dangah an tel thih phah bawk. A hmaa zirna kalpui ngut ngut anh lai khan zirlai naupangte kha "isolated" in an awm thin a, tunah erawh hunawl an nei ve ta a, an "sociable" ve ta.

Naupang lutuka hostel-a indah hi

Naupangte hian uap lumtu leh hmangaih taka kaihruaitu nu leh pa an mamawh hle a. Nu leh pa thlazar hnuaia thanglian tur an nih laiin an duh lo leh an hreh chung chungin hostel lamah tirh liam an ni fo thin. Hmangaihtu nu leh pa pawhin an zirtir theih loh chu thisena inzawmna nei miah lo mihrang daih chuan engtin chiah nge hmangaih taka a enkawl chuan ang le. Hostel ah chuan zing thawh hun, lehkha zir hun, chawei hun leh mut hun darbi fel taka thliahsa thlap a ni thin a. Chutiang chu nu leh pa te hian kan duha kan tum tak tak anih phawt chuan kan ti ve thei vek. Kan tum lova kan peih lo mai mai a ni.

Naupang lutuka hostela an awm hian naupangte hi a rukin an khua a har em em a, an lung a leng a. Zanah kuah lum tur an mamawh a, muthmuna thu tha hrilhtu tur te, a changa thawnthu hrilhtu tur te an mamawh em em thin. Naupangte hian chhun lama an thil tawn te, an hlimna te, an lunngaihna te, an thil tawn chi hrang hrangte, an nu leh pate hrilh an chak em em thin a. An warden te lah an hrilh ngam awm si lo. Hrilh duh pawh ni se, saptawng hman emaw te a lo ngai a, naupang chumchiap, saptawng thiam vak mang lo tan chuan sawi duh sawi chhuah a harsa lutuk dawn a, ngawihbopui mai kha a tih theih tawk a ni ngei ang.

Hostelah an awm a, Board Exam hmachhawn turte ang maia nasataka lehkha zir tlut tlut a ngai si lo, enge maw an tih chuan ang le? Tunlaia kan Boarding sikul tam takte phei hi chuan zing leh tlai karah infiamna tur hmun an nei mang lo a ni si a, tihtur an van duh ngawtin ka ring.

Hostel-a an awm hian an aia u zawk leh an aia lian zawk te hian aia naupang zawk na na na chu tihnawmnah a awl hle a, tirhkah mai maia lo hman ching an awm duh hle bawk. An zirtirtu te hriat laia fel taka awm chung siin an hmuh loh laia na tak taka fiam te, chhaih nawmnah te hi a thleng ve duh chawk a nia.

Nu leh pa te hi kan thatchhia

Nu leh pa te hnathawkin kan chhuak a, tlaiah naupang kan infiampui hman lo va, zan lamah kan hahchawl ve duh a bawk a. Naupang han kilkawina hun reng reng kan nei lo va. Lehkha zirpui emaw, an zir laia lo thutpui te, an zirlai lo enpui te phei chu kan peih lo tlangpui. Kei ngei pawh hi ka bang bik lo. Naupang te hian nu leh pa hi min mamawh asin maw le. Kan fate hian lehkhazir an thatchhe ringawt lo, keini nu leh pa te hi kan thatchhe em mai a, mahni leh mahni in control kan tum reng reng si lo. TV serial en, movies en, internet online, football match en, etc te avang hian naupang lehkha zirpuina hhun reng reng a lo awm thei hleinem maw le.

Nu leh pa te kan inring tawk lo

Naupangte hian an nu leh pa te hi khawvela thiltithei ber ang hialah an ngai thin a, chuvangin nu leh pa te hi kan inring tawk tur a ni a. Lehkhathiam lo pawh ni ila naupang zirna lamah puitu kan ni thei. An note a felfai em, homework an nei em, vawn ngai a awm anih chuan vawn tir, lehkha zir hun felfai taka duan sak te leh lehkha an zir laia lo vil peih te hi a tulin nu leh pa zawng zawngin kan ti ve thei vek ani. Kan fate hian min ringtawk em em a, chuvangin keini pawh kan inrintawk a tul ve khawp dawnin ka hre ta.

Naupang infiampui

Nu leh tan chuan zingtin tlaitina naupang infiampui chu harsa tak a ni. Mahse hman chang changa infiampui tura chhuah ve hrim hrim hi naupang tan a tha a, mahni tan pawh a tha. Kan enkawl atan Pathianin fa min pe a, sum thawhchhuahsa hmang chauhvin kan tuamhlawm tur ani lova, tisa leh thlarau lamah kan kaihrai tur a ni a, an taksa hrisel nan infiamna lamah pawh a kaihruaitu nih kan tum tur a ni.

Naupang kaihhruaina

Boarding sikulah te hian english an hmang uar hle a. Naupang chumchiap, la naupang lutuk tan chuan hriatthiam a har thin ngawtin ka ring. English hmangin thu an sawi a, saptawngin Pathian thu an sawi a, saptawng vekin an hrilhfiah leh a, saptawngin an tawngtai a, sap hla an sa bawk a, thlarau lam chu an inchawm that lutuk ka ring lem lo. Mizotawng pawhin kan inhrilh fiah zo lo lek lek a ni si a.

Naupang lutuk tution kal tir

Sikul naupang, pre-school kal lai mek te leh class I emaw zirlai thenkhat tlai lama tution akl thinte pawh an awm a nia. Hetiang pawl hniam lutuk zir mek te hi chuan sikula lama an zir hi an tan a tawk thawkhat viauin ka hria. Thlatin fee man tam tak an chawi a, an thiam lo anih chuan an zirtirtu te mawh a ni ve tlat. An thiam lo lutuk bik emaw, an thiante an pawl phaklo lutuk dawn anih chuan an zirtirtu te'n special care an pe mai tur a ni. A hranpaa regular taka tution pek hi a tulna reng reng ka hre lo.

Sikul naupang, han en mai pawha la naupang tak tak te mahni inlum leh nu leh pa uaplumna tlansan a hostela awm ta mai ka hmuh changte hian, 'hostel-a awm char char an ni bawk a, nakinah chuan an la turu ngawt ang' tih mai tur chu an ni. Mahse naupangte hian an than chhoh zelna kawngah hian mamawh an nei a ni. Hmangaih taka nu leh pate kuahlum leh kaihhruaina an mamawh takzet a, zalen tak leh engthawl takin engkim zir chunga an than chhoh a ngai a. Lehkha zir tur hrim hrima rawn piang chhuak ang hrima naupang chumchiam an nih lai atanga hostela indah ngawt mai hi chu, ngaihtuahna a tithui thin khawp mai. Lehkhabua thu inziak chauh ni lo hi naupangte hian zir tur an ngah em em si a. Sap ramah ka la kal lo va, ka hre lo; sap ho hian an fate, nu leh pa nei reng naupang, la naupang tak tak te hi hostel/boardingah an dah ve thin em le?

Happy New Year

2013-01-02T05:42:00.000+05:30

Kumhlui a her liam a

Pathian khawngaihna zar zova taksa a dam hi chuan hun hi rinaiin a lo liam chak a, reilote emaw tih chhungin kum 2012 chu a inher liam leh ta reng mai. Nimin maiah kham kumhlui thlahin a pui a pang, a lian tein kan buai mup mup a. Kumhlui liam tur thlah nan tiin a kan theih theih kan kang a, a ei theih theih kan eiin, a in theih theih kan in a. A then an hlim a, a then an lung a leng a, mahni tawk te teah kan buai mup mup anih kha. Kan chhehvelah hnamdang tam tak an cheng ve a, min chenchilhtu thahnem tham tak an awm bawk a, heng hnamdang te hian heti taka nasa hian Kumhlui hi an buaipuiin an thlah ve thin ang em le? A hnam pum ang huapa zanrei tak tak thlenga zi mup mup thin an awm ve em le???? Thenkhat tan lah zu leh sa leh sex hmanga nawmchen zan a lo ni bawk si.............. Mahni theihna zawn theuhvah tiin kumhlui chu thlahin leilung dan angin a inher liam ta.

Kumthar a rawn inher chhuak ta

Tunah chuan kumthar duhawm tak, hlim tak leh dam tlang takin kan lo chuangkai leh thei ta. Hei hi chu lawm tlak a ni. Kum 2013 thleng phak lova thihna kutvawt ina a man tak, mahni inlum ngeia chhungkuaa hlim taka kumthar chuankai leh chak em em si khan beisei loh tak chungin famrolung mualah chham ang mi an zal san ta hlawm si. Thenkhat lah na tuarin natna khumah an vial an vial a, thenkhat lah thlafam chang hnu ngaiin an tap bawk. Chutihlaiin keini chu pangti dam diaia awmin hlim takin kumthar kan chuangkai thei a. Hei hi Pathian khawngaihna vang liau liau a lo ni. Keini hi kan lo va vannei chungchuang bik tak em. Kumthar lo thleng hi lawm tlak a lo ni.

Kumthar ah hi chuan keimah tihnawktu leh timawilo tu thin te hi ka paih bo an hun tawh lo maw? Ka anchhia aiinka tawngkam mawi kha mi te'n an hre chak zawk a, ka ang buan buan thawm aiin ka nui ri hian mite thinlung a chhawk zangkhai zawk. K lungawi lo leh ka titau hmel aiin ka hlim hmel hi hmuh a nuam zawk bawk. Hlim thei i nih chuan hlim la, lawm rawh, naktukah i chungah enge lo thleng dawn i hre reng reng si lo. Tuna ka nihna ang hian mi te'n min hre reng thin ang tih ka hlau.........

Kum 2013 hi i tan kumtha leh kum duhawm lo ni se, he kumthar lo thleng hian i tan damna leh hriselna lo thlen che se la, malsawmna tam takin rawn vur che rawh se. Kumthar Chibai mawlh mawlh le.

Krismas Urlawk zan

2012-12-30T05:38:00.000+05:30

Thlasik boruak vawt leh reh ruih karah Lal lo piang tur lawmin a thei thei zaikhawmna lam panin an kal thliai thliai a. Kumpui lingleta an nghahfak leh a hun lo thlen hun nghakhlel taka an lo thlir thin a ni bawk a, a pui a nawiin, pitar putar te nen lam, khawvawt pawh sawi lovin phur takin zaikhawm turin an kal a. Zan lam anih vangin khawvawt laka intuam lum nan a thenin kawmawl an bat a, a tam zawk chuan an thawmhnaw lum neih that ang ang an inbel bawk. Khuangpui leh khuante inthum rawn tluk tluk karah

Remna Lal thianghlim ber chu a piang ta
Davida thlah arsi eng mawi chatuan ata
Kumkhuain a lal reng ang a
A hming ropui chatuanin an fak ang

tiin an zai dup dup a. Pathian fak nan an theihtawpa mawi leh ringin an zai a, a thei thei Pathian fak nan an kut te bengin an ban an phar chhuak a, an lam bawk a. Thalai mipa lam lah zaikhawm thingpui lumin kawt tualah mei an chhem a, an titi laih laih bawk a. A piah lam sirah mipa naupang te'n krismas thingkhawn hmangin buk lem an sa a, an ri ve chel chul bawk. Nula leh tlangval thingpui luma vir buai ve lem lo ho kha chuan zaikhawmna inchhung lamah an zai ve bawk a. Chhun lamah krismas chhang ruai tur buaipuia chhang an kang hman lo anih chuan zan lamah hlim tak leh phur takin chhang an kang thin bawk. Khang hunlai khan thalaite rilruah mahni theihna zawn zawnah Lalpa tan tiin an buai mup mup thin a. Thalaite tel lo chuan programme engmah a kal tha hlei thei lo anih kha.

Tunlaia krismas urlawk zan:

Tunlaiah mi kan inti changkang tawh a. Thalai tamtakin krismas zaikhawmna lam pan ai chuan inlumah lo inkawm emaw, lo party emaw kan ching ta a. Thenkhat chuan chhang an kang a, thenkhatin chow an kang a, a tam zawk chuan heng an thiltih khawmnaah hian a rukin emaw, zalen takin emaw zu an leklam thin. Thalai nula leh tlangval rual te'n phur taka zu an in tawh chuan thisen lum vanglai a ni bawk a, a boruak a hot duhin a rei hnuah phei chuan.................... Zana khawlaia a pair tetea inphur chhuak kan hmuh thinte hian enge maw an tih dawn le? Rui chunga cara inphur chuak, car tape play chunga ri ham ham ho te hi khawnge an kal dawn a, enge an va tih dawn le? Heng ho hi chuan krismas urlawk zan ni lovin hurlawk zan an hmang zawk a ni mai lawng maw?

Engtin nge ni zel ang le?

Hetiang hi kan kal chhoh zel dan tur anih dawn chuan kristian thalaite krismas urlawk hman tum dan boruak hi a danglam chho tulh tulh dawn niin a lang. Tunhmaa thianghlim taka thalaite'n krismas urlawk zana hun an hmang thin ang khan tunlai hunah pawh hian thalai te'n hun kan hman chhoh ve zel theih nan eng tiangin nge nu leh pa leh khawtlang hruaitu te, kohhran hruaitu te hian hma an lak dawn le? Mahni inchhungkhurah mahni fate hi uluk taka zirtirin fuih thin ila, kohhran pawhin theihtawpin hma la ta se, khawtlangah thalaite pual programme tha tak tak buatsaih ni bawk sela, zawi zawiin kawng tha lamah kan inhruai tial tial theiin a rinawm.

Zu tel lovin a hlim theih a, ruihhlo tel lovin a hlim theih a, sex tenawm taka hmang kher lovin a hlim theih asin. Thinlung a lamah hawn ila, he hun lawmawm tak chuangkai thei tura damna min petu hnenah lawmthu sawi nachang hria ila. Mihringte tlan tura mahni nihna hlip meuhva lokal van lalfapa Isua Krista fak nan kan aw leh ka te hi hman theuh tum ta ila chuan, sualnain hmun reng reng a chang hauh lovang.

Krismas Chibai

2012-12-22T02:34:00.004+05:30

December ni 22 zinglam dar 1:50am a ni a. Tui taka kan zan mu bawrh awrh lai ka thangharh a. Chhangchhepa tan chuan fate mut hlan leh, a remchan hun apiang, hun leh hun lo pawh sawi theih a ni lo, online na hun tur hi a zawna zawn chawp ngai thin hek le. Mutbu lum nuam tak thawhsanin computer hmaah ka thu a, a reh tlawk tlawk a, a vawt kher mai. Hetiang mai mai hian alawm ka online a, ka misual a, ka lo blog ve thin le.

Lal pian hun champha lawmawm tak kan thleng leh dawn ta reng mai. Chhungkaw tinin hlim taka kan hman theih nan mahni buai buaiin kan buai mup mup a. In leh a vel kan tifai a, inchhung kan cheimawi a. Naupang hrilhhai hlauvin thawmhnaw thar kan lei sak a, puitling paw'n engemaw tal thil thar neih ve theih hram kan tum thin. Thingtlang lam unau te pawn chakkhai lamin khawpui an rawn pan khawm a, bazar pawh a tawtin a tawt ta mup mup ngei mai. Zanah han tei chhuak ila khawlai leh kawngpui dung a eng mawiin a de sep sep a. Lal piang tur hmuahna leh lawmna hla mawi tak taka sak an play chuah chuahte chuan a va ti Christmas tam em. Biakin lama zai ri te, thalai leh pawl thenkhat te Advance Christmas hmang zai ri dup dup te leh zan boruak thiang vawt reih rawih kara chunglam arsi pe chuah chuah te chuan lung an tilengin rilruin hun liamtaa Christmas kan lo hman thin dante mi a tihrechhuak rum rum mai.

Mi tamtak, he hun hlimtaka chhungkuaa hman thlakhlelh ngawih ngawih te, tum loh leh beisei loh taka natuara damdawiina krismas hmang ta mai turte an awmlai leh, loh theihlohna avanga hmun hlatak leh ram hla taka khawhar taka krismas hmang tur te tam tak an awm laia chhungkuaa hlimtaka krismas hmang ve thei tur dinhmuna kan han dingte hi kan lo va vannei tak em. Hmalam hun thlir chunga chhungkuaa hlimtaka krismas hman ve theih ngei tuma mi'n nasatak leh theihpatawp chhuaha an thawh sauh sauh laia thihna kutvawt tak avanga he krisma thleng ve zo ta lova fam rolung muala zal ta te, anmahni ngaia lungngai leh khawhar taka indawm kun reng chhungkaw tam takte pawn krismas hi an thleng ve ngei dawn a. He krismas hlimawm tak hi an tan chuan lung tilengtu, an khawhar tizualtu leh an lungngaihna tizualtu mai a ni ngei ang. Thihna te hi tu ta bik mah a ni lova, kan chunga thleng thei vek a ni si. Aw.........kei hi enge maw ka nih bik le, ka lo va vannei bik tak em.

Christmas ruaitheh ni a lo thleng ang a, kumpui lingleta inhmu khawm ngai lo te nen lam thukhat vuain Lal piang lawmna chibai ruai ropui tak kan theh mup mup ang. Mirethei, mihausa, pachhia, hmeltha, hmelchhia, a-pui-a-nawiin hmunkhatah hlimtakin chawhlui kan kil za leh ang. Hei lo liama Zofate tana kut ropui leh hlimawm, a zoram pum huapa kan inlungrual tlanna hunpui hi a awm thei tawh dawn chuang emaw ni le?

He kawlkilah te lo thovin

Tingtang leh phaiphuleng remin

"Chungnungberah ropui rawh se"

Tiin Angel i zaipui ang

Karhlaa leng thian duhtak te u, kan hma lawka krismas lo thleng tur hian i tan leh i chhungkaw tan hlimna leh malsawmna te lo thlen che sela, hlim taka krismas i hman theih ngeina turin Krismas Chibai ka buk a che. Krismas Chibai le.

HAPPY CHRISTMAS

Students te nen Tlawnglui lamah

2012-12-06T20:35:00.000+05:30

Kumpui lingletin mahni thawhna sikulah naupangte nen lehkha kan zir tluk tluk a. Exam leh test, homework, practical, note preparation, learning, classroom lecture leh blackboard, naupang tan a ninawm lutuk, an hne hlei hlui tawh. Heti ringawt zawng, naupang tan a thawipik thlakin a ninawm zozai dawn em mai tiin kum tawp dawn aruaiah kan chhuah harhpui hnuhnawh e ka tia. Khua a vawt tawh si a, tlawng phai ruam a lum nuam ber ang tiin tlawng lui kan pan ta ngawt mai a. Kumtluana lehkha zira classroom chep taka inhnawhkhawm nitin thin tan chuan a engthawlthlak bawk a aniang, naupangte paw'n nuam an tiin an ri chel chul mai.

(Thlalak te hi Nokia c2-01, 3.2 mp hmanga ka lak a nia, a fiah lo ri ruai khawp mai. Hmmm... digital camera ka neih ve hun chu aw........ ka hmeh loh leh, ka awrh reng ang).

'Lailen tuipal' an tia maw ni, khitiang khi......

Tlang sang lama khua a vawh tawh nen, tlawng ruamah chuan a la vawt lutuk lem lo bawk a, tui a chen theih fu mai

Ka fapa paw'n nuam a ti, tui a khuap ve nasa mai

Thlasik khua zawng rei mawi hek lo, sikni paw'n tlak zai relin kawl lamah a awn tial tial, tinzai rel a ngai

Kan kal hla miah lo, mahse sikul naupangte hian nuam an tiin an kham lo hle. Sikul naupangte hlim taka an ri chel chul hriat te hi a va nuam tak em. Anmahni pawn nuam an ti, he hun reilote hi an theihnghilh mai mai tawh lovang a, helai ruam an paltlang apiangin an la hrechhuak fo thin ngei ang.

A pa, a va'n sang ve...........

Kum 10 lai a liam ve ta

2012-10-25T00:23:00.003+05:30

              Dt 24^th October 2012 a lo inher chhuah meuh chuan ka nupui duhtak K Lallawmsiami nena Kohhran leh Khawtlang hriatpuia Pathian hmaa kut insuiha kan inneihna ni champha kum 10-na a lo thleng ve leh ta reng mai. Kum dang leh ni dangah chuan chuti teh ualin ka ngaipawimawh lem lova, a chang phei chuan ka theinghilh fo va, nikum phei kha chuan sikul naupang hruaiin mahni inlum chhuahsanin ka zin chhuak daih anih kha. Kumin erawh kumbi nei bik anih vang pawh ani mahna, ka hre reng lo thei bik lo. Kum 10 lek liamta phei kha chu a ni a, rei pawh a la ni lem lo, mahse hmanni lawk emaw ka tih chhungin kum 10 bi khatna chu a lo inher liam ve leh ta mai chu a nia.

               Tunlai ah mi kan fing a, kan inchhiar zauva, inneihna pawh simple taka tiha insenso pawh tihhniam theih dan a awm a ni tih kan hria. Sap ho tihdan thikin mitlemte te hmaa inneihna thutiam chham ve mai te pawh kan duh rum rum. Mahse kan lo thu lo vei vei khawp mai. Pi leh pu, chhungkhat laina te'n hetiang ngaihdan hi chu a theh thal rang mai mai asin. Hautak lo leh holam taka tih liam mai mai hi an phal teuh lo.

               Hetia inneih champha kum 10 a lo thlen takah chuan a hmaa ka lo ngaihnep viau ang kha a lo ni miah lo. Rilruah thil tam tak a lo lut a, khatih hunlaia thil thlengte mitthlaah a rawn lang zut zut mai. Khawnge thup chin tlem tlem nei chungin ka'n ziak ang e.

Kan inneih sawmna lehkha tur ka buaipui nia ka buai zia te, a man tlawm thei ang ber leh simple thei ang bera Gov’t Press-a ka siamtir lai te, ka nupui tur nena kan pahniha kan sem dun lai te kha mitthla ah a cham reng mai. Mi tihdan anga “Khawngaihtakin in veng chhung ami hi chu min lo sem sak ta mai che u” tia mi kuta a hlawma dah ve mai lovin, keimahni ngei ina kan han sem tiah tiah mai te kha, mitthlaah a cham reng mai.

Kan innneih hma ni chiaha kan buai zia te, chhung leh khat, mitlawmngai tak tak te’n min rawn tanpui a, theihtawpa hna min rawn thawhpui te kha, ka theihnghilh thei ngai lovang. Khami nia kan buai zia te, zan lama zanrei tak thlenga insingsaa kan buai zia te, a then Biakin cheia zan dar khat thlenga an meng te kha ka mitthla a’n a cham reng mai. Kan inpeih fela mu tura khum lam ka pan meuh chuan zinglam dar hnih vel a ri tawh. Mite hi an lo va tlawmngai tak em.

Inneih dar an khawng ri bal bal a, chu dar chu ka pual liau liauva khawn rik a ni. Mihring kan dam chhung hian kan puala dar khawn rik theihna chance vawi hnih kan nei a, chu chu kan inneihni ah leh kan thihni ah a ni. Inneihni-a kan puala dar khawn rik chiah hi kan hriat ve theih a ni a, a hluin a ropui bik ngei mai. Chutia ka pual liau liau, kei leh ka nupui ni mai turte pual liau liauva dar khawn a rik ral ral lai chuan kei leh ka thian Hmachhuana Bawitlung te chu Biakin ah inti thupui fun takin kan lo thu ran tawh a. Suit nena insuih smart khat ve em em mai tih takah ka khawr tut mai. Hmabak a kovin a phurawm a, a huphurhawm bawk. Kan lo hah rimtawng tawh a, zan tam mutmu ka lo tuah fumfe lo bawk nen, rinloh takin kan ham bei bei mai ang tih hlauhawm tak a ni. Mi zawng zawng mit ka chungah a fu thuap dawn tih ka hre lawksa bawk a, chetsual a hlek a langsar dawn bawk a, fimkhur a ngai kher mai.

Inkhawm tantir lamah zavaia hla saa mipuite nena kan ding vek, zai zawhah mipui an thu ang a, keini chu kan ding tlang ang. Chutah le, hlauh ang ngeiin mipui thut rualin ka’n thu ve thut mai anih kha, ka tho rang ngei mai. Mipui lam an ri nghal huk bawk. Pulpit hmaah inneihna thuthlung, lehkhabupuia kan ziak zo, kan let leh tur, monu leh a thiannu nena a ruala muangchanga let phei leh tur kha, kei leh ka thianpa chuan chak tawkin kan han kalsan hmak mai anih kha. Mipui lampang an ri leh nghal huk mai. Chutah inneihna thutiam kan chham dawna Pastorin “I intiam thei em” a tih tuma, “Tiam thei e” tia chhan tur kha, tum loh deuhvin “Aw” ka ti tawi tup bawk. Khang kha chu engmah a ni lo, a liam ve mai.. Tlemin ka lai ve deuh nge, thlalak lai hmui ka lo pet ruh deuh thin erawh kha chu, rinaiin thlalak hi a in change mawh tawh sia, a pawi rei ta anih hi. Tlai lam a nih meuh chuan ka neck-tie kha ka nghawngah a in vet tawh lo, ka chalah a lo invet, min pawhthlak tir rang ngei mai.........

Kan inneihnia zaipawl pathum lai, Chanmari Bial Zaipawl, Electric Unit Zaipawl leh BHSS students zaipawl zaite kha, kan pual liau liauva mawi taka an han zai te kha a va ropui tak em. Min duhsaka, kan inneih min lawmpui tura mahni hna tlansana mi khati zozai, Biakin thutna zawng zawng khat vek khawpa an lo kal te kha a ropui ka ti. Kei takngial hi tunge maw ka nih a, mahni hna tul kalsan a khaw hla tak tak atanga kan inneihna hmang tura min rawn pan vang vang le ka ti thin. Chutah present chi hrang hrang, hlu tak tak kan la dawng zui. Kan inneihnia ka hnathawhpui, ka aihnah phahpuite pawr em em zia leh min tawiawm that em em zia te, khawtlang nula leh tlangval te'n kawng hrang hranga min puih dan te kha theihnghilh a harsa ngei mai.

Hun leh ni a inher liam ve zel a, hmanni lawk emaw ka tih chhungin kan ti nek nek a, kum 10 chu a liam ve leh ta reng mai. Nupui-pasal inneih hi tih namai a lo ni lo. A kawng hi nuam purhin lang mahse, a phenah hian thil tam tak inthup a awm thin. Nulat tlangval lai kha chuan a parmawina chauh kha kan tem a, nupaa insiam hnu hi chuan a parmawina zawng zawng bakah a hling zum leh a kha zawng zawng nen tem vek a ngai tawh thin. Nulat tlangval lai hian kan miziaa a thalo lai leh a mawi lo lai te kan thup bo hram hram a, kan duhawmna lai ber zel kan par chhuahtir thin. Chutiang ve vea intawnga innei theuh kan ni a, nupaa insiam hnu meuh chuan engmah thup theih ni tawh hek lo, inneihna hi risk a lo sang khawp mai. Nupa tluang taka innei reng thei tur chuan inhmangaihna te, induhsakna te, inchawimawitawnna te, inhriatthiamna te, inngaihsakna te a awm tur a ni a, tin a pawimawh ber chu rinawmna hi a ni bawk. Nupa nunkawng hi a rualrem reng lova, chuvangin nunkawng bumbohva kal chang pawha inthurual taka kaldun thiam hi, harsa thin hle mahse a lo pawimawh khawp mai.

Good Governance Seminar ka chhim ve a

2012-10-05T08:54:00.002+05:30

Hmanni chu Good Governance Seminar Saikuti Hall ah, DEO lam atangin tel ngei ngei tura thupek khauh tak ka hmuh avangin thiante nen kan tel ve a. Miropui tak tak zingah, a member titamtu atana tel luih tir ve mai mai ni mah ila, thuziak tha tak tak paper present kan dawng a, a bengvarthlakin a ngaihnawm hlawm kher mai. Chawhma lamah "Rorelna Dik - Bible-in a zirtir dan" tih thupuia hmangin Rev. C Rosiama'n seminar a kaihruai a. Chawhnu lamah "Rorelna Dik - Mizoramah" tih thupuia hmangin Revd. C Lalsangliana'n min kaihruai bawk. Kan resource person te an tha dun bawk a, a ngaihnawm khawp mai.

He seminar hi Ethics Committee ina a buatsaih a ni a, inzirtirna tha tak leh pawimawh tak anih avangin Mizoram Chief Minister Pu Lalthanhawla te nupa leh a thuihhruai te paw'n an ngai pawimawh a, an rawn tel bawk a. Chu mai bakah Autonomous District Council lama CEM leh an thuihhruai te nen, Lunglei Officer lian tak tak te nen, chung ho karah chuan keini ang mai mai kan han thu ve phak hrim hrim pawh kha a ropui ka ti.

Kan khuallian kha:

He seminar -a khuallian chu kan Chief Minister Pu Lalthanhawla a ni a. A hun diktakah a lo thlengin ka hria. Khuallian thenkhat tih dan ang lo takin kan Chief Minister te nupa hi chawhma hunah leh chawhnu hunah an thu tluan chhuak zak nia maw le. A rei a, keini pawh mawngza kan thawh uai uai lai paw'n an thu nghet churh mai. Midang tan a ruka haw daih ngam chi a ni lo. Kan khuallian khan thusawina hun tawite a nei a, a thusawi a tawi fel a, a tawngkam erawh a thluai thlum teh chiam lo niin ka hria. Corruption pawh kha a zung chawpa phoro a la tum hle.

Discussion kha a nawi ru deuh ka ti....

Kan thupui a thata kan thu ngaihthlak te a ropui tehreng nen, sawizauna hunlaia mipui lam atanga thusawi thenkhat kha chu a nawi ka ti. An rawn sawi zau ang a, zawhna te an rawt zawt bawk ang chu tih laiin thu ho mai maia riat ral ta mai mai te, engemaw vuivaina rawn au chhuahpui ta te an kat nuk mai. Eitur sem dan a inang lo, chhim lamah khaw awmdanin a zir loh avanga electric chhia tih vel te, a hun tak aiin minutes tlemtein kan tan tlai, etc tih ang reng kha chu kan seminar nen chuan a inpersan lek lek deuh em aw ka tia. Thahnemngaih a na bawk a, duhthawh a awl lua te pawh a nia nge.

Seminar ka hlawkpuina te:

Keia tan chuan a seminar leh a sawizauna ai mah khan chawhma hun leh chawhnu hun inkara eitur tuihnai tak an rawn sem kha ka hlawkpui emaw ni chu tihtur a nia. Tui bottle in min rawn chhawp a, paper min present a, eitur tuihnai takin minhrai puar bawk a, a hlawk thlak hle mai. Notepad leh ballpen min han pe tel phei se chuan eng eng emaw kan lo chhinchhiah ve thei ang a, a man a tam lutuk lem loh nen, an tichangtlung tep asin maw le.

Sawi hmaih theih miah loh tur Leitlangpui chhulchhuak Bethsy Lalrinsangi leh Pensy B Lalthangliani te zai ngaihnawm tak kan ngaithla bawk a. Hmeltha bawk, zaithiam bawk si hi chuan mit leh beng an lo titlai ber anih hi. Hemi te pahnih hi Baptist Higher Secondary School atanga lehkha zir chhuak an ni tih hi ka'n zep tel zauh teh ang..... Zaithiam pahnih zai live-a ka ngaithla thei hi ka hlawkna pakhat chu a ni leh a.

A tawp ber atan chuan sorkarin anmahni khalh ngiltu tur leh, an kal dik lohna lai hrilh thintu tur, sorkar kalphung tha taka sorkar hnathawkte fuihtu tur tein Ethic Committee a lo din ani tih ka hriat phah a. A ruka Ethic Committee in hma a lo lak ve thin dan te ka hriat phah bawk. A thalam kawng zawhna tur pawh nise, mahni dik lohna leh tlin tawk lohna ngaihthlak fo hi a nuam miah lo. Mahni diklohna hrilh hretu tur leh zihhau tu tur sorkarin a ruat ngam hi a ropui ka ti ve hrim hrim a ni tiin ka'n tlip mai ang e.

Mobile recharge, topup, internet pack leh SMS pack mahnia thun dan

2012-09-25T10:53:00.000+05:30

Mobile recharge leh top up thun tura dawr pan tuah tuah zel hi enge maw chang chuan a ninawm a, peih lo chung chunga chhuah changa topup a zo emaw, topup thun a lut thei lo emaw, dawr an khar tawh tih ang reng velin min han tibuai phei hi chu ninawm tak a ni. Tih fuh loh tum phei chuan topup thun tur midang an lo awm ve teuh bawk nen, ninawm duh tak a ni.

Internet connection nei reng chung sia landline leh postpaid mobile phone bill pe tura intlar ve reng te hi a zahthlak a, in lamah mahniin a tih theih vek a ni tih post hluiah kan ziak tawh kha. Tun tumah chuan awlsam taka mahnia rechare, topup, leh pack chi hrang hrang thun dan kan ziak leh thung ang. Mahse, BSNL chauh ka hman avangin BSNL mobile-a tihdan tur ka ziak ang a. Network dangah pawh a harsat ka ring miah lo.

Hriat hmasak tur

Internet khawiha thut pahin mahni dawhkanah awlsam tein recharge, topup, SMS pack, internet pack, call reducer te, mahniin, dawra kal buai ngai miah lovin a thun ve vek thei a. Mahse kan hriat tur chu heng kan thun zawng zawng hi mahni bank account atangin a in cut vek a, chumi cut thei tur chuan a hmasa berin mahni bank account neihna ah netbanking apply ngei ngei tur a ni. Netbanking hi i neih tawh chuan mobile phone atan mai ni lo, online shopping atan te, pawisa thawn nan te, life insurance premium pek nan te, bill pek nan te, thlawhna ticket lak nan te a tangkai em em a ni.

BSNL mobile-a tihdan tur

A hmasa berin he BSNL link ah hian i lut ang a, new user sign up atang khan i in register ang, username leh password i nei thei ang. I tihfel hnuah chuan i log in ang a, Mobile Number (Enter 10 Digits Number) a lo lang ang a, chutah chuan mobile i recharge, topup duhna tur phone number i type ang. Midang phone number pawh i type thei tho tihna anih chu. Phone no. i dahluh fel hnuah enter i hmet ang a, voucher thlan tur pathum a lo lang ang. Topup i thun duh chuan Talk time topup kha i select ang a, SMS pack, internet/GPRS pack leh call reducer te i thun duh chuan Special Tariff Voucher kha i select ang a, Recharge i thun duh anih chuan Plan Voucher kha i select dawn nia.

Topup Rs 50 man thun chhin ang hmiang

Talk time topup kan select ang a, topup kan thun duh zat ziakna tur a lo lang ang. Chutah chuan 50 tih kan type ang. Sumit button hmeh nghal tur a ni. Phek thar a rawn lang ang a, Netbanking atangin kan pe dawn a, tichuan Make pay kan hmet ang. Billing detail a lo lang ang a, internet banking i select ang a, netbanking i neihna i select leh ang a, tichuan submit i hmet dawn nia. Chumi hnuah payment gateway ah a luhpui ang che. I netbanking login form a lo lang ang a, i login ang a, bill pekna tur kha confirm a ngai leh a. Chumi hnuah i mobile phone ah High Security Password an rawn thawn ang chia, chu password chu i enter ang a, bill i pe fel chu a ni mai e. I phone ah topup a rawn lut nghal ang. Payment gateway huam chhunga luh hnu hian bank hrang hrangah hmeh tur rawn lang hi a inang lo maithei a, mahse hriatthiam loh tur khawpa thil harsa a awm lovang.

GPRS/internet pack thun duh ta ila

              A chunga kan ziak ang tho hian GPRS/internet pack i thun duh anih chuan Special Tariff Voucher i select ang a, DATA i i select leh ang a, Select STV Voucher tih kha i hmet leh ang a, 2G leh 3G Data plan hrang hrang a lo lang ang. 54 plan hi ka hmang thin a, chu chu thla khat a dam a, 500 MB data usage free a ni bawk. Mobile atang ringawta internet khawih thin tan chuan thla khat chhungin 500 mb kan hmang zo hman lo hrim hrim (thil kan download vak vak emaw, youtube video kan en thin emaw anih ngawt loh chuan). Submit i hmet ang a, a bak chu a chung ami ang vek khian a ni leh mai.


Airtel hmanga tihdan:

             www.airtel.in ah lut la, recharge prepaid mobile tih ah khan click here tih a awm kha. I click chuan page thar a rawn inhawng ang a,chutah chuan rechargwe pangai te leh internet recharge na tur select mai theih turin a awm kha. 2G internet recharge kha select ta ila, 98 plan (validity 1 month) kha duh ta ila. Proceed to transaction summary click la, confirm click leh rawh. Make payment using netbanking tih a lo chhuak ang a, i account neihna bank select la, pay kha i click dawn nia. Chumi hnuah chuan payment gateway ah a luhpui ang chia, i bank account neihna ah i login ang. A bak chu a chung ami ang vek kha a ni leh tawh mai.

Aircel ve thung:

              www.aircel.com ah lut la, area/circle select la, prepaid kha click leh rawh. A chungah khan Recharge tih a lo awm ang a, click leh la, Online hmanga recharge na tur form a rawn chhuak ang. Circle ah khan North East select la, mobile number ziak la, 2g nge 3 G select la, Choose Service tih ah khan Top up, internet, call reducer, etc thlan tur a awm kha, i duh i thlan hnuah amount thlan tur a rawn chhuak leh ang, amount i thlan fel hnuah Submit tih kha i hmet dawn nia. Phek thar a rawn lang ang a, netbanking select la, i proceed dawn nia. Payment Gateway ah a luhpui che ang a, internet banking i select ang a, i bank duh ber select na tur a lo lang leh ang a, submit i hmet dawn nia. A bak hi chu a chunga mi ang tho khian a ni ang.

Vodafone ah:
            www.vodafone.in ah lut la, area ah khan North east select la. Chumi hnuah Prepaid button ah khan Recharge now tih kha click leh la, i mobile number i type ang a, i recharge duhna zat i fill up bawk ang a, tichuan Buy now kha i click dawn nia. Thiante vodafone number hmang ka nei lo va, chuvangin vodafone ah hi chuan ka tichhin thei lo tlat mai.

Reliance ah ve thung:

            www.rcom.in ah lut la. A sir khawi emaw laiah khan Instant Recharge for Prepaid tih a lo awm ang a, chu chu hmet rawh. Mobile number dahluhna tur a rawn chhuak ang a, continue i hmet dawn nia. Confirm click tur a rawn chhuak ang, topup, tariff leh pack thlan tur a rawn chhuak leh ang. Duhthlan tur an rawn dah chhuak tam ang reng khawp mai a. Top up leh recharge bakah khian Pack chi hrang hrang select tur a tam hle. Topup i duh chuan i duh zat kha han type pawp phawt mai la, continue i click ang a, a hnuaiah topup voucher duh thlan tur a rawn lang teuh mai ang. I duh ber zawnah khan Buy Now kha han click rawh le. Pay Now click leh rawh. Payment Gateway ah a luhpui ang che a, Netbanking select la, i bank duh ber select la, Pay Now hmet rawh. A bak chu a chunga ka ziak tawh nen khian, i bank duhthlan azirin, a inang vek tawh.

             Kan nupain BSNL kan hamng a, chuvangin BSNL-a a tihdan chauh hi chiang em emin ka hria a, topup, recharge, pack thun turin dawr kan pan ngai ta meuh lo. Network dang heng Airtel, Aircel leh Vodafone te pawh hi ka han tichhin a, a harsat hmel lem loh hi. A pawimawh hmasa ber chu nationalised bank ah saving account neih a, netbanking neih tel bawk hi a ni. Topup, recharge, etc. online hmanga thun hian a hranpain bank lam hian cut engmah an nei lova, a zia ang reng khawp mai.

Amniocentesis

2012-08-28T00:35:00.000+05:30

Amniocentesis hi a medical ruih na a, genetics lamah zir a ni ve fo thin a, chuvang chuan medical lampang hre miah lo mah ila, genetics kaihhnawih anih avangin tawitein ka'n ziak ve reng reng ang e.

Nu pum chhunga naute (foetus) a awm laia nautui bawm chhunga tuiah hian naute cells (foetal cells) thenkhat a awm thin a. Nautui (amniotic fluid) chu syringe hmanga hip chhuakin chu chu laboratory ah an test thin a. Cells chhunga chromosomes chu zir chiangin chromosomes dik lo (chromosomal abnormalities) avangin naute chu piansualna nei a ni em tih an hre thei thin. Hetianga test-na hi Amniocentesis an ti.

A tangkaina:

Amniocentesis hmang hian naute in genetics disorder a neih leh neih loh a hriat theih a, naute chuap a that leh that loh, rawn paing chhuak ta se, chuap tha tak neia tha taka thaw thei turin a rawn piang chhuak thei ang em tih te, Rh positive nge, negative zawk tih hriat nan te leh naute chu mipa nge hmeichhia tih hriat nan te a hman theih bawk. Fa neih hmasak lamah pianken dik lo te, piangsual te an lo awm tawh anih chuan amniocentesis test hi tangkai hle tura ngaih a ni a. Nu naupai lai chuan genetics disorder rapthlak tak a nei a ni tih hriat chhuah anih chuan, hrehawm tinreng tuar tura pian tir ai chuan chu naute chu pian chhuah tir lova tihhlum nghal mai nan te pawh an hmang fo thin. Chhung leh khat, lamhnai tak zingah painken fuh lo, piangsual, an awm chuan test ngei ngei a tha viau maithei.

A tha lo zawnga hman:

Hetihlai vek hian Amniocentesis hi a ni lo zawnga lo hmang pawh an awm ve tho mai. A tlangpuiin nau lo piang tur hi mipa nise tia duhtu hi an tam zawk a, India ramah ngat phei chuan hmeichhia hrin hi an huphurh em em thin. Amniocentesis hmang hian awlsam em em leh chiang em emin nau lo piang tur chu mipa nge anih dawna hmeichhia zawk tih a hriat theih a. Naute chu hmeichhia anih chuan an paih (aborted) mai thin a ni. Chhan dang awm miah si lova, hmeichhia anih avang ngawta nau tihtlak hi female foeticide an ti a. Nakina thuam chhawm tur huphurh vang ngawta hmeichhe naute, nu pumchhunga thlamuang taka an awm laia, tihluihna hmanga paih chhuah emaw, tihhlum emaw India rama a tam tur zia hi, rapthlak tham zet tur a ni.

Amniocentesis te, ultrsound (sonography) te hi a tangkai em em rualin, a ni lo zawnga nasataka hman a nih avangin naute pawisawi lo te'n nunna an hloh nasa em em tawh a ni. Thisen far khat pawh la siam thiam lo leh cell pakhat lek pawh mahnia la siam thiam miah lo mihring hian a chang chuan nunna hlutzia hi kan hre zo lo fo thin.

Phytoremediation

2012-08-16T08:00:00.001+05:30

Thlai hian carbon dioxide a hip lut a, chu chu chaw siam nan hmang tangkaiin a taksa ah a lo dah tha hmak hmak thin a, hei hian boruaka carbon dioxide nasa lutuk tur a veng tlat thin. Hetiang deuh chiah green plants te hian leilunga pollutants thenkhat hip lutin a taksa ah a dah tha daih thei a. Chu chuan environment-a pollutants concentration sang lutuk tur a veng thei. Thlai thenkhat, pollutants hip khawm chak bik riau thlaite, polluted areas ah chingin pollutants tih tlem nan an hmang thin a, chu chu Phytoremediation an ti.

Soil hi kan thlai tona ber, a tel lova thlai chin theih miah lohna a ni a. Soil atangin thlaiin tui leh nutrients awm ang angte a hip thin. Thlai hian filter water a hip lova, tui leh nutrients inchawhpawlh soil solution a hip thin. Leilunga nutrients awm ang ang, a tha emaw, a chhia emaw a hip mai thin. Highly polluted soil ah thlai kan ching anih chuan thlai taksa ah pollutants an awm tel ngei tura ngaih a ni. Chuti anih si chuan thlai thianghlim nei tur chuan leilung hi a thianghlim a ngai tihna a ni.

Leilung atanga pollutants lakbo hi tih namai a ni lova, a harsa em em dawn ani tih chu hetia ngaihtuah mai pawh hian a hriat reng mai. A tih theih dan awmchhun chu pollutants hip khawm thei thlai chin mai kha a awlsam ber chu a ni ta a ni.

Brassica juncea (Antam) hian leilung atangin chromium leh lead a hiplut thei a, a taksa ah a dahtha thei a ni tih hriat a ni a. Tichuan antam chu polluted site ah nasatakin an ching a, a hnuah antam chu an seng khawm leh a, laboratory ah antam taksa atangin heng pollutants te hi la chhuakin an tibo leh a, duh chuan a recycle theih bawk. Antam hi a puitling hma a, a taksa a nem (non-woody) bawk a, a taksa atanga heavy metals lak chhuah pawh a awlsam deuh ngei ang.

Arsenic hi chemical hlauhawm tak mai pakhat a ni a, taksa ah natna a thlen thei a, chu chu arsenic poisoning an ti. Arsenic leilungah a tam chuan tui intur ah arsenic a tel fo thin. Lei hnuai atanga tui lak chhuah (underground water) ah te hlei hlei hian arsenic a tam fo thin. Ruah a sura leilunga tuilutin chhungril thuk lamah toxic chemicals a dahlut fo thin a, chu chu tuihnuai atanga tui pump chhuah atangin kan hmulet leh thei fo thin bawk. Pteris vittata (katchat chikhat) hian leilung atangin arsenic a hip khawm chak em em a, thlai dang zawng zawng aiin nasatakin a hip chak bik a, concentration hniam em em pawh nise a hip khawm tho tho thin. Pteris vittata phytoremediation atan a hman tangkai theih hle dawn tihna anih chu.

Red Green Colour Blindness

2012-08-05T15:05:00.014+05:30

Mit tha pangai reng, hmu fiah ve vek si, mahse rawng thenkhat thliar fuh hlei thei lo an awm thin a, chutiang harsatna chu Colour blindness an ti a. Colour blindness hi chi thum lai a awm a, chungte chu red-green colour blindness te, blue-yellow colour blindness te leh complete colour blindness te an ni. Blue-yellow colour blindness nei te chuan rawng pawl leh rawng eng an hre fuh hleithei lova, red-green colour blindness neite chuan rawng hring leh rawng sen an hre fuh hleithei lova, a inawm pawlh anih pawhin an thliar hrang hleithei lo fo thin. Complete colour blindness hi thil vang tak a ni a, hetiang natna neite chuan an thil hmuh reng reng a dum, a var leh grey angin an hmu vek thin. Heng colour blindness zingah hian red-green colour blindness hi a lar ber a ni.

Colour blindness hi inthlahchhawn theih thil a ni a, chutihlaiin accident emaw, mit naute that tawk loh vangin emaw vitamin A tlakchham vangin emaw, diabetes nasa tak avangin emaw a thleng thei thin. Inthlahchhawn thil avanga a lo thlen dan leh a inthlahchhawn chhoh dan i han chhui dawn ang hmiang.

Sex chromosomes:

Red-green colour blindness hi sex-linked inheritance ani a, chuvang chuan sex chromosomes chungchang tawite sawi kai lawk ang. Mihringin chromosomes 46 (23 pair) kan nei a. Chung zinga 44 (22 pair) te chu autosomes an ni a, a bang pahnih (pair khat) te chu sex chromosomes an ti. Sex chromosomes te hi chi hnih an awm a, chungte chu X chromosomes leh Y chromosomes an ti. Mipa ah chuan X leh Y te hi an inkawp a, hetiangin 44 + XY; tin, hmeichhia ah chuan X chromosome pahnih an inkawp ve thung (44 + XX). Chromosome combination ah Y chromosome hi mipana thlentu a ni a, Y chromosome hi a awm lo anih chuan hmeichhia a lo piang thin a, tin, X leh Y comination ah Y aia X a tam zawk chuan a mipana a dal tial tial thin bawk.

Genetics of Red -Green colour blindness:

Colour hrang hrang kan mitin a thliar hran theihna tur photopigments te hi X chromosome ah a insiam thin a. A siamtu gene te hi a tha lo (defects/mutation) emaw a awm lo (deletion) emaw anih chuan red leh green colour thliar hran theihna a nei dawn lo a ni. Mutation avangin gene tha lo hi a lo awm thin a, tuna kan sawi lai mek he mutation hi sex-linked genes ah anih avangin a inthlahchhawn theih bawk.

Mipa Chromosome = 44 + XY
Hmeichhe chromosome = 44 + XX

A chunga kan hmuh ang hian hmeichhia chuan X chromosome pahnih an nei a, chuvang chuan X chromosome pakhat hian colour blindness siam thei pawh nise, X chromosome dang hi a that tho thin avangin hmeichhia hian colour blindness an nei zen zen lo. Hei hi a chhan ber chu, colour blindness thlen theitu gene tak hi recessive a ni a, pakhat thalo mahse pakhat dang a that chuan a character siam tur kha a siam lo thei thin. Hetiang hmeichhia hian colour blindness an nei lovang a, mahse a rukin an pai thung ang; colour blindness atan carrier an ni a, an fa te ah an thlah chhawng thei thin. Hmeichhia hian colour blindness an nei lo tlangpui a, chutihlaiin hmeichhe colour blindness neih theihna chance chhete chu a awm ve tho mai.

Mipa ve thung chuan X chromosome pakhat chauh a nei a, chuvangin a X chromosome neih chhunah colour blindness siam thei turin defect a awm anih chuan X chromosome dang, hliahkhuhtu tur a neih ve loh avangin colour blindness a nei ngei ngei dawn tihna a ni thung. Colour blindness hi mipa hrivei bik anih ber mai chu.

Inthlahchhawnna:

Inthlahchhawnna kawnga chi a lo insiam lai hian mipa chromosome te hi a zatve ah a inthen darh a, 46 chromosomes nei thin kha a chinungte chuan chromosome 23 chauh a lo nei tawh ang a, a thenin 22 + X chromosome an neih laiin a thenin 22 + Y chromosomes an nei ve thung ang. Hmeichhia chuan Y chromosomes an neih ve loh avangin 22 + X chromosomes chauh nei gamete a siam ve thung ang. Chung gametes te inzawm dan azirin hmeichhia emaw mipa emaw an lo piang mai dawn a ni.

Male gamete (22 + Y) fused with female gamete (22 + X) = 44 + XY Male.
Male gamete (22 + X) fused with female gamete (22 + X) = 44 + XX Female

Heredity of colour blindness:

Colour blindness nei te'n an thlah kal zela an thlahchhawn chhoh dan hi chi hnih chi thum lai a awm thei ang a, kan sawi tawh ang khan colour blindness thlentu tak hi X chromosome ah a awm a nih kha. Mipa in colour blindness a nei a, hmeichhia erawh carrier angah a tang thin. Mipa sex chromosomes te leh hmeichhe X chromosome te in fertilize dan hi risk a ni a, a khawi nge in fertilize ang a, nau lo piang tur chu hmeichhia nge a nih anga mipa, colour blind nge a nih ang a, normal nge carrier tih chu vanneih thil liau liau a ni tawh.Combination hrang hrang awm thei zinga a khawi emaw ber chu nau piang tur chuan a nei dawn tihna a nih chu.

A inthlah chhawn dan chi hrang hrang enchhin ang aw: (Thlalak te hi ka siam an nih hi)

1. Colour blindl male + Normal female:

Mipa hrisel pangai leh hmeichhia, a ruka colour blindness pai (carrier) an innei anih chuan an kara naute lo piang tur chu mipa pangai a ni thei a, colour blindness nei a ni thei bawk a, tin hmeichhe pangai a ni thei a, carrier colour blindness a ni thei bawk.

Gametes te in zawm (fertilised) dan khi line hmanga thai zawm ka'n tum zet a, mahse a hnawkhnai dawn riauvin ka hria a, tikhian ka dah mawl tawp mai. A hriatthiam theih tho chuan ka hria.

2. Normal male + Carrier female:

Hmeichhia hi normal anih avangin X chromosome tha pangai chauh a nei dawn a, mipa erawh chuan colour blindness thlentu X chromosome leh Y chromosome a nei thung. An kara fa lo piang hi hmeichhia anih chuan colourblind carrier a ni ang a, mipa a rawn piang anih chuan colour blindness nei lo a ni thung ang.

3. Colour blind male + Carrier female:

Colour blindness nei mipa leh carrier hmeichhia an innei anih chuan an fate lo piang chhuak tur chu, mipa pawh, hmeichhia pawh nise, colour blindness an nei vek ang. Mahse hetianga colour blindness nei mipa leh a ruka colour blindness pai (carrier) hmeichhia innei te erawh an vang em em thung. Hei vang hian hmeichhia hian colour blindness an nei zen zen thin lo. A awm erawh an awm ve zauh zauh thin tih chauh a ni.

Tihdam theih a ni em?

Colour blindness hi thil ho te nia lang si, enge maw hunlai chuan harsatna siamtu ni thei lawi si a ni a. Chuvang chuan tihdam theih anih beiseina a sang em em a. Mahse tun thlengin a tihdam dan tur an la hmuchhuak lo anih hmel. Gene therapy hmang hian tihdam theih mai awm tak chu a ni na a, zawng (squirrel monkey) a experiment an neih chhinah chuan a hlawhtling ngei mai a, mahse mihringah erawh an la hlawhtling chiah lo anih ka ring. A tihdamna tak tak la hmuchhuak lo pawh nise rawng hmuh theihna lama tanpui theitu tur tarmit leh lens erawh an siam chhuak tho va, hei hian nasatakin a tanpui ngei ang.

Red-green colour blindness nei te hi mi mipangai, mit khawhmuh fiah tha vek an ni a, rawng hring leh rawng sen an thliar hrang hleithei lo hi an harsatna pakhat a ni a. Chutihlaiin khawpui lianah, traffic road sign red leh green signal an pekna hmunah te chuan motor khalh laiin harsatna an tawk ang tih erawh a hlauhawm. Kan ram ang, khawpui lian te ang ni ve lem lovah chuan driving lamah harsatna a awm chuang lo thung.

Chromosome

2012-07-31T08:38:00.000+05:30

A hminga lehkha thiam tawh dek dek chuan chromosome hi kan hre theuhvin a rinawm, Mahse enge a nih chiah, enge a hnathawh, enge a tangkaina, khawilaiah nge a awm, tih erawh hre lo an awm nual thungin a rinawm. "DNA test" tih te pawh hi hre lo tura ka ngaihte pawh hian an hre zel mai. Enge DNA tih te, khawiah nge a awm a, enge a hnathawh tihte erawh an hre chuang lem hlei lo va. Hetiang thil ho mai mai zotawnga ziak hi a har ru zek a nia aw.

Kum 1875 kum khan a hmasa ber atan chromosome chungchang hi Strasberger chuan a lo ziak tawh a. Chromosome hming hrim hrim phuaha hmang hmasa bertu chu Waldeyer (1888) a ni thung. Cell staining (a mizotawng chuan rawnga chiah kan ti mai dawn em ni) an tih laiin chromosome hi fiah kek kawkin a lang thin a, hei vang hian chromosome hming pawh hi an puttir ta a ni. Chroma = colour, soma = body).

Chromosome lan chian lai:

Cell cycle hi hun hnih ah then a ni a, Mitotic phase (Division lai) leh Interphase (chawlh lawk lai) te an ni. Interphase hunlai hian chromosome te hi an sin em em mai a, hmuh a harsa em em thin. Mitotic phase hunlai hian chiang takin a lang thin a, mitotic phase hunlai rau rauvah metaphase hunlai hian hmuh a nuam bik thin.

Chromosome hruihrual:

Lazai sinte hi uluk takin en ila, a aia sin lehzual pahnih in vingvial a ni tih i hmu thei ang. He lazai sin tak invet tlat hi DNA nen ka tehkhin thin a. He lazai sin tak sei em em mai hi hrual ila, chu kan hrualsa chu hrual chhawng chho zel ila, lazai sin sei tak chu tawite lian tak a lo ni ang. Hetiang chiah hian DNA thread sei tak chu a inhrual muk chho chhawng zel a, a tawpah chuan tawite, lian tha tak a lo ni ta a. Chu chu chromosome an ti ta a ni. Chromosome chu DNA hrui sei takin a siam anih chu.

Chromosome structure lar deuh te:

Chromosome ah hian a part pawimawh zual thenkhat a awm a, chungte chu chromatids, centromere leh telomeres an ti. Metaphase hunlaiin chromosome te hi ban pali neiin a awm a, chung a ban pali te chu chromatids an ti a, heng a ban pali te hi hmun khatah, a laiah, an inzawm khawm a, an inzawm khawmna lai chu centromere an ti. Chromosome ban pali te hi chromosome dang nen an awmdunin, a chang chuan an inzawm thei thin a, mahse chromosome hmawr tak erawh hi chu tlemin a danglam deuhva, helaiah tak hi chuan a inzawm tak tak thei thin lo. He chromosome hrawr hi telomere an ti.

Mizotawng chuan ziak a har kher mai. Remchang hmasa berah kan chhunzawm ang.

Mobile postpaid vs prepaid; postpaid atanga prepaid-a ka convert dan

2012-07-26T22:55:00.011+05:30

Mizorama mobile phone nei hmasa ho kha postpaid hmang vek an nia. A hnuah postpaid hman reng an ning a, prepaid hman ve an duh a, number dang daih hmangin an thlak thin. Mahni number thlak chuang miah lovin postpaid atangin prepaid ah awlsam tein a leh theih a, ka tih dan ka han share ve mai mai ang e.

Mizorama mobile phone rawn luh tantirh lam kha chuan BSNL postpaid bak kha a awm lova, chu lah chu a duh nazawng tan neih ngawt theih a ni lo. Mobile phone connection nei tura nasa taka beih a ngaih thin zia te kha kan la hre reng awm e. Prepaid phei kha chu company dang Airtel leh Reliance an rawn luh hnuah chauh kan nei thei anih kha maw. Tunah zet chuan duh hun hunah connection a itih theih tawh a, postpaid hmang peih chu mi tlemte chauh an ni ta. Mobile postpaid leh prepaid te hian thatna kawng an nei ve ve a, that tawk lohna an nei ve ve bawk; chung an thatna leh that tawk lohna te chu i han thlir thuak thuak ang hmiang.

Postpaid mobile thatna:

Mobile phone postpaid that ve riauna chu a hranpain recharge, top-up leh data pack thun ve a ngai lo va. Kan hman ang ang kha thla tawpah bill a lo kal a, chu chu awlsam takin kan pe mai a. A hahdamthlak ang reng phian. "Balance ka nei lo" tih tham truak a awm ve lo va, inbiak laklawh laia balance zawh avanga tawp hmak a awm ve lo va, zan laklawha loh theih lohva topup thun a ngai ve lo bawk. Thla khat chhunga kan phone hman dan, tu te nge kan phone a, kan biak hun rei zawngte kan hre kilh kelh ziah duh anih paw'n 'itemised bill' a dil theih bawk. Postpaid customer te hi regular customer an ni a, duhsak pawh an hlawh deuh niin a lang a, company pawhin customer zawng zawngte Free Personal Accident Insurance Coverage (Bill hnung lamah a inziak kha) a tihsak vek bawk. He insurance scheme hmang hian Permanent Total Disability due to Accident a a claim theih bawk.

Postpaid that tawk lohna:

* Postpaid hmang thintu te buaina ber chu bill chungchangah a ni fo thin. Bill thleng tlai emaw, bill hmuh loh emaw avangin buaina a tawh theih a. A hun taka bill pek loh chuan outgoing call emaw an lo bar mai thin si a, bill hmuh loh palh chuan a buaithlak duh hle. Bill hi customers te'n a rualin kan dawng thup a, bill pe turin dakinah emaw, anmahni office ah emaw kal a ngai a, bill pe tur kan tam thin avangin sei tak tak intlar a ngai fo thin. A ninawm a, hun a heh em em thin bawk. Bill pe tura intlar nikhuaa kan hmalam ami te'n bill 5/6 vel an ken thuau mai phei chuan intlar chhung a rei duh khawp mai. Tun hnuah chuan online hmangin ka pe ta mai thin a, a awlsam ang reng fu.

* Bill pek chungchang chauh ni lo, facility neuh neuhah duhthu a sam tawk lo deuh thin. Prepaid hmanga awlsam tea tih theih kha, postpaid ah chuan a hranpa ngata subscribe a ngai thin. Entirna pakhat sawi zuai ila: SMS pack hi mahni duh zat zat, awlsamtein prepaid ah chuan a thun mai theih a, postpaid ah thung chuan permanent deuh hleka subscribe a ngai thung. Mamawh loh hunah pawh bill ah a tel zel thin.

* Internet subscribe chungchang pawh a buaithlak hle. Application form fill up a, a hranpa ngata subscribe a ngai a. Kan plan duh ang zat pawh fixed bur a ni thin. Entirna pakhat leh lawk: GPRS 199 plan subscribe ta ila, mahse engemaw avangin 49 plan ah thlak duh ta ila, a buaithlak ru zek a nia.

               * Chhungkaw thil pawimawh leh kutpui thlen nikhuaa thiante leh chhungkhat laina te SMS han thawn uar duh deuh chang pawhinSMS pack a thun ve mai theih loh. A hranpa ngata proper channel-a subscribe a ngai. Mahse subscribe tawh chuan a nghet bur a, thlatinin SMS pack kan chawi zat zat a ngai. Hetiang hi ka tawng tawh a, unsubscribe tur pawhin buaipui a ngai leh tho mai.

                * Engkim long term anga subscribe zel a ngai a, kan subscribe tawh chuan kan hmang emaw hmang lo emaw, bill ah a rawn tel zel tawh thin. Unsubscribe leh tur chuan a hranpa ngata buaipui leh a ngai thin si a, chuvangin tul lovah pawisa kan chawi thlawn fo thin.

              * Vawi khat chu ka duh vang ni maih lovin, mi ka call laia * sign ka hmeh palh vang ngawtin Hello Tunes ka subscribe a. Chuta tang chuan thlatinin Rs 20 ka chawi ziah thin. Ka duh lo hle a, tihtawp tumin office ah vawi hnih ka kal a, a tih dan min hrilh a, mahse a theih miah loh. Theih loh na na na chu hun enge maw chen ka han hmang leh ren rawn a; chumi hnuah Aizawl Customer Care ka va bia a, 'chumi khami chu phone rawh' tia kan inbiak kual fe hnuah, ka biak tur diktak ka be fuh ta. A ni chuan awlsam tein min lo unsubscribe sak ta a. Hello tunes mai mai pawh unsubscribe duh ila postpaid atang chuan a khirh talh asin.

             * Prepaid ah chuan SIM Card kan hmang peih lo anih chuan kan duhleh kan paih daih thei a, anih loh vek leh hmang miah lovin kan dah thei a. Postpaid ah chuan SIM tiriral ngawt mah ila bill a lo kal reng thin. Bill lah a pung chak em em bawk si.

               Prepaid hmanga awlsam tea thil tih theih thin kha, postpaid ah chuan buaipui nek a ngai fo thin a, hei tak hi postpaid a that tawk lohna pakhat chu a ni.

Prepaid that tawk lohna:

                Prepaid hian that tawk lohna a nei a, recharge thun chawp reng leh topup thun reng a ngai thin te, GPRS data pack (internet pack) thun chawp a ngai reng te hi a chang chuan a ninawm a, a luh fuh loh tum phei chuan nghah a ngai a, a chang chuan hun a heh hle thin. Recharge leh top up thun tum laia a luh theih lawk loh hian a ninawm a ni. Mamawh em em hunlaia topup thun chawp a han ngai tlat thin te pawh hi a chang chuan a buaithlakin a ninawm duh hle. Recharge leh top up thun tura zana chhuah a ngaih tum te pawh a awm fo thin hi.

Buklung ka han khai kang a....

               Postpaid leh prepaid te hi ka han buk tawn ngial thin a, anmahni ve veah thatna lai leh that lohna lai an nei ve ve a. Mahse postpaid hian that tawk lohna a ngah zawk. Prepaid ah hian facility a tha em em a, postpaid-a thil tih theihte prepaid ah a awm vek bakah prepaid atag chuan thil a awlsam bik a, duh thlan theih tur a tam bik em em a ni. Tlema inrenchem thiam deuh tan phei chuan thla khat chhungin pawisa tlemte te chawiin a in manage theih tlat bawk. Ka buklung atanga ka tehna ah chuan postpaid aiin prepaid a buk a rit fe zawk.

How to convert from postpaid to prepaid

                A chunga ka ziak takte avang khian ka BSNL postpaid hmanlai mek chu, a number thlak danglam chuang si lovin prepaid ah leh ka duh ta a. A buaithlak ru nek lehnghal. Transformation tak tak tih chhung, ni thum vel chhung phei chu ka phone hman theih miah lohvin a thi hmak a, a rawn nun leh meuh chuan postpaid ni tawh lovin prepaid a ni daih tawh asin le.

Ka buaipui dan tlangpui:

               A tih theih a ni tih ka hriat chian hnuah BSNL Office ah ka kal a, ka duhdan te ka sawi hnuah a dilna form min pe a, ka fill up a, thlalak leh document tlemte ka dah tel a. Ka submit hmain bill thar ber ka clear leh clear loh min check sak a. Chumi hnuah SIM Card thar min pe chhuak nghal a. "Ti hian kan thawn ang a, nakinah i postpaid SIM Card hmanlai hi a thi ang a, chumi hnuah i SIM Card thar i thun ang a, a hlui zawk chu i rawn submit dawn nia," tiin min thlah a.

            Nghah mai loh chu tih theih dang nei chuang hek lo i, tichuan a ka nghak ta vang vang mai a. Thla khat a ral hnuah tuk khat chu ka phone ah "SIM registration failed" tih a rawn lang a, chuta tang chuan tumah ka be thei lova, tuman min rawn be pawp thei tawh hek lo. Chutiang chuan hun rei tak ka lo hman ve tawh ka SIM Card chu, engtikah maha ka hman nawn leh miah loh turin a rawn thi ta a. Rang takin SIM Card thar ka thun a, mahse a nung nghal mai lo.

            Office lamah ka va kal a, ka SIM card hlui ka submitted a, a buaipuitu lamin an buaipui char char a. Aizawl atangin SIM registration ti tura an thawn tawh thu an rawn sawi awk a. Ni hnih chhung ka phone ka hmang thei lova, a nithumna chawhma lamah an rawn tinung tan a, nilenga a la hman theih loh fo hnuah tlai lamah a rawn nung ve ta hram a ni.

           Ka thuziak hi mi thenkhat tan chuan thil ho mai mai pawh a ni mahna, mahni number thlak danglam miah lova postpaid atanga prepaiid-a ka han let ve hrim hrim hi, a tihdan kawng bumboh deuh mahse a nuam ve tlat. Thu ropui tak ziak tur ka nei lem si lova, heti ve te mai hmang hian ka blog ka rawn thual mam leh zuai a ni e.

Upat hri

2012-07-08T22:20:00.002+05:30

Hun leh ni a liam zel a, rin loh karin hringnun chawhnu lamah ka hun hmang ve tan ta mek a lo ni reng mai. Infiamna kutpui neih nikhua ah pawh ‘veteran’ lamah kan tel ve ta zak zak mai. Mithenkhat intih naupan reng tum tan chuan 'chanchin thalo' a ni thei ang a, keini ang kum lama buai ve lo tan chuan upatna hi kan tan buaina a tling ve reng reng lo thung. Enge maw tih nikhuaah “Ka pu” tia min ko nawlh nawlh tawk an lo awm ve leh zel te hi nuam deuh mai a nia. Mahni lo maha tha a la zat vei zer zawr nen, thenkhat tan chuan 'upa' kan lo ni ve ta reng chu anih hi.

Engati nge mithenkhat hian upata senior nih hi an hlauh em em thin le? Upa tur chuan vanneih a ngai asin. Kan unaupa pakhat pawh a nupui fanaute nen hlim taka khawsak chhoh ve a, upat hnu thlenga fate enkawl chhoh zel a chak em em chungin Pathianin a remti miau si lova, ui chung chungin he khawvela inhmu leh tawh ngai lo turin hringnun hi a chhuahsan asin. Upatna hi Pathian khawngaihna liau liau a ni. A naupan reng theih lohva, kan duh emaw duhlo emaw nitin darkar tinin kan upa tulh tulh dawn tho tho.

Kan thianpa pakhat BA zir zo tawh, BEd a training lai mek khan “Kei chu ka la naupang em mai a,” a ti thla zen thin a. A dik, keini ai chuan a naupang, mahse amah hrim hrim kha a naupang lem lo. A sawia insawi naupan chi a ni lo. Kumin a chaldelh tawh maiu chuan intih naupanin awmzia a nei lova, naupangchhia ang maia awm thar leh velin awmzia a nei lo. Kutzungtang seh tat chungin zuang su auh auh pawh ni ila, hmel a chal tawh miau si chuan, awmzia a nei thui tak tak tawh lo. Leilunga thilte hi engmah reng reng a ngai renga awm thei a awm lova, a lian ber atanga a te ber thlengin kan inthlak che vel reng a ni tih hi, kan hun tawn danglam reng thin hian a hril chiang khawp mai. Engkim hian hunbik a nei a, naupan hun a awm ang a, upat hun pawh a awm tur a ni dawn lawm ni. Kan thil tawn apiangah hian kan in adjust thiam ve zel chu a ngai dawn a lo nih hi. Kum a upa a, chhingmit khawthlir erawh a upa ve si lo hi a chang chuan a buaithlak thin dawn a lo nih hi........

Kei pawh, mi fate’n infiamna an chawlhsan hun, inkhelmi te pawn an boot an dah thata inkhelh an bansan hmiah hun kum bawr chhovah inkhelh lam ka han buaipui chho ve leh a. Thenkhat tan chuan a nuihzatthlakin a atthlak dawn mang e aw. A hun hi chu a dik tawh chiah lo na a, ka hriselna hian a mawmawh maiu si a, ka ti lo thei lo anih hi. Upat lamah inkhel tluk tluk ila a ni mai alawm.... ha ha ha.......

New Pension Scheme

2012-06-02T14:25:00.012+05:30

Sorkar hnathawk ve lo te tan pawha Pension neih ve a tul zia HETAH hian ka ziak tawh a, engtin tin emaw NPS chungchang phuailuai takin ka rawn ziak ve leh e. A ziak tur niawm tak taka ka ngaih te'n an ziak tha duh mang si lova, a engmah lo ber hian ka'n ziak ve leh ngawt anih hi.

New Pension System (NPS) hi tunah chuan India ram chhunga sorkar hnathawk zawng zawngin Pension hmanrua atan an hmang chho ta a ni tih kan hre theuh awm e. A tir lamah chuan Sorkar hnathawk tan chauhva ruahman a ni a, 1^st January 2004 atang khan Central sorkar hnuaia hnalak thar ho chuan he NPS hi an hmang tan vek a ni; a that viau vang pawh a ni mahna, sorkar hnathawk kher lo pawhina pension an lo neih ve theih nan tiin 1^st May 2009 atang khan India mi tupawhin NPS a zawm ve phalsak a lo ni ta a ni. Hei mai bakah hian economically disadvantaged people tan bika siam NPS Lite pawh hman theihin duan chhuah a ni nghal bawk.

National Pension System (NPS) is an initiative of Pension Fund Regulatory and Development Authority (PFRDA), the apex body established by Government of India to regulate and develop the pension sector in India. NPS has been extended to all citizens of India with effect from 1st May 2009. To extend the coverage of NPS to the weaker and economically disadvantaged sections of the society with their limited investment potential, PFRDA has launched NPS- Lite which specifically targets the marginal investors and promotes small savings during their productive life. It aims at building up a corpus sufficient enough to buy an annuity for their old age. (PFRDA)

NPS zawm ve tura mamawh hmasa:

NPS hi kan zawm ve duh anih chuan heng documents - PAN Card leh KYC te hi kan neih a ngai. PAN Card chu neih a harsa lem lova, tin KYC pawh bank atangin neih mai theih a ni bawk. A bak chu address proof leh Identity proof document a ni tawh mai. Nationalised bank ah SB Account neih hmasak te pawh a ngai ang chu.

NPS subscribe ve dan tur

Online hmangin registration a tih theih loh a, chuvang chuan POP atangin form i la chhuak ang. Anih loh pawhin www.npscra.nsdl.co.in atangin form i download ang a, i fill up vek hnuah Point of Presence ah i submit ang. Anni chuan Acknowledgement Card an lo pe ang chia, tichuan i application form pawh CRA lamah an lo thawn sak ang che. PRAN Card i lo nghak veng veng mai dawn nia.

PRAN Card:

NPS dilna application form submit hnu lawkah PRAN Card an lo thawn ang che a. Chu PRAN Card number chu i pension fund account number tur a ni ang a, chu number hmang chuan internet atangin i sum khawl zat te, a pun dan te i hmu thei vek ang. Awmna hmun i sawn thei a, i hna i sawn thei a, mahse PRAN Card erawh thlak a ngai lovang.

Enge POP chu?

NPS zawm tur hian agent ang reng deuh Financial Institutions thahnem tham tak sorkarin a ruat a, chung te chu Point of Presence an ti a, anmahni kaltlang hian NPS hi a zawm theih reng a ni. Tunah hian registered POP 22 zet sorkarin a ruat mek a. Chung zingah chuan Mizoram atanga kan tih ve theihna tur te chu SBI, Axis Bank, Post Office leh ICICI Bank te hi an ni. Heng POP 4 te hi Aizawl main office ah a ni deuh zel bik.

NPS Online hmangin

NPS hi online hmanga tih theih tho dan a awm a. A hmasain Fundsindia ah in register la, chuta tang chuan awlsam tein NPS a tih theih. Fundsindia hi POP an ni lo va, mahse an zawmpui pakhat IL&FS Securities Services Ltd. te chu POP 22 te zinga pakhat an ni a, Fundsindia hian anmahni hnuaia account holders te tan NPS an tih sak thei a ni. Fundsindia hi a nihna diktakah chuan Online hmanga awlsam taka mutual fund tihna hmun a ni a, an hnen atangin awlsam takin NPS account a hawn theih. (POP tam tak te hi dawr an har khawp mai; engmah hre lo an intih loh vek leh harsatna hrang hrang sawi an ching deuh tlatin ka hria).

NPS Account chi hnih:

           NPS ah mi pakhat tan hian account pahnih hawn theih tura siam a ni a, chungte chu Tier I account leh Tier II account an ti.

           Tier I account hi compulsory a ni a, thlatina i pension fund tur pawisa i chhunluh tur chu he account ah hian a lut zel ang. He account chhunga pawisa i chhunluh tawhsa hi chu chuti mai maia khawih chet a thiang tawh lo. Pension hunah emaw, NPS hrim hrim kan tihtawp hunah emaw, thihna vang emaw chauh lo chuan khawih chet theih a ni lo.

         Tier II account hi chu mahni duhthlanna in hawna hawn loh theih a ni. Tier II account ami pawisa hi chu i duh dan danin i khawih che thei a, i duh zat zat i withdraw thei bawk.

Swavalamban Scheme:

Kum khat chhunga pension scheme account-a Rs 12000 bak dahlut ve thei lo te tan liau liau sorkarin an account ah kumtin Rs 1000 a dahluh sak thei dawn a. Chu chu Swavalamban Yojana an ti. Hetianga sorkarin kumtina pension accounta Rs 1000 a dahluh sak ziah ang chi hi chu hna hniam te te thawktu te, mirethei tak tak te an nih ngei a ngai. India sorkar nge nge, miretheite leh hnuaihnungte duhsaka chawisanna tur ruahmanna a zep tel leh hram anih hi.

NPS-a inhnamhnawih thenkhatte:

PFRDA (Pension Fund Regulatory and Development Authority)
CRA (Central Record Keeping Agency)
Trustee Bank
POP (Point of Presence)
Pension Fund Managers
ASP (Annuity Service Providers)

Tu te nge Pension Fund Managers (PFM)?

Pension account-a pawisa lut te lo peipung turin managers 6 ruat an ni a, chung te chu:

1. ICICI Prudential Pension Funds Management Company Limited
2. IDFC Pension Fund Management Company Limited
3. Kotak Mahindra Pension Fund Limited
4. Reliance Capital Pension Fund Limited
5. SBI Pension Funds Private Limited
6. UTI Retirement Solutions Limited

Peipung tam thei ber tur nia ngaih kha thlan mai tur a ni.

Trustee Bank:

NPS subscriber in Pension Fund pawisa a chhunluh zawng zawng zawng zawng lo khawih chingchivet a, PFM in peipun atana a lakchhuah leh a dahluh te, subscriber hnena pek chhuah thlenga lo khawihtu tura ruat chu Trustee Bank tih a ni a; chumi lo khawih tur chuan Bank of India ruat a ni.

NPS hi a tha em?

NPS hi investment leh savings pangai a ni lova, retirement hun atana pension scheme tha tak kan lo neih ve theihna tura hmanraw pakhat mai a ni zawk tih hi hriat a tul khawp mai. A hlawk em, a hlawk lovem, tih lam hi a pawimawh ber lo. Tha lo ta viau se, sorkar hian a duang chhuak hauh lo vang. Tin Private Company pakhat khawih mai a ni lova, India Sorkarin kalphung fel tak nena a duan chhuah a ni a, a him pawh him thawkhat viau turah ngaih a ni.

NPS a that tawk lohna

Online hmangin thil a tih tak tak theih loh va, contribution pawh direct bank debit hmangin a tih theih loh. Pawisa contribute tur chuan POP kaltlang zel a ngai a, paper hmanga thil tih a ngai, chu chuan hun a duh rei deuh va, duh hun takah unit allocation a tih theih loh. Tin, pension fund a nihna ang ngeiin duh hun hunah pawisa a draw ngawt theih loh va, pension hun, kum 60 tlin hnuah chauh a withdraw theih. Hei hi mi tamtakin an duh loh phah. Mahse, mutual fund te, bank recurring deposit te ang a duh hun huna pawisa lak chhuah theih anih chuan, keini mahni huana theihai rah hmin hun nghak thleng zo lo thin ho hian pension hun nghah thlen kan peih loh mai a rinawm.

NPS thatna:

Nitina inhlawhfaa eizawng kan ni emaw, hlawh tlemte hlawha thla kipa hlawh nei ve kan ni emaw, sumdawng pawh kan ni thei, thlatina kan income atanga 10% hi chu nakina kan pension hun atan kan dahtha ngei ngei tur niin mithiamte chuan an sawi thin. Hna hniam leh hlawh tlem hnathawk kan nih chuan Swavalamban Scheme kaltlangin sorkarin kan account min tanpui ziah thei dawn a, hlu tak a ni. Kan ramah lehkhathiam, kum tam tak private sikula thawk tawh te an awm a, an hna atangin an chawl a, engmah chhuahpui tur an nei si lo. An khawngaihthlak asin aw. Tuna la thawk mekte hi chuan NPS hi zawm ngei ngei sela, a tir lamah chuan harsa an ti mahna, mahse a rei tulh tulh ang a, an inchhir lo tulh tulh ang maw le. Pawisa dahluh hi thlatinin a theih a, chutiang ni kher lo pawhin mahni remchan hun hunah, thla thum, thla li danah emaw, kum khatah vawi khat chauh pawhin a dahluh theih bawk. A nghet lova thawk MR emaw, contract emaw, private firm hnuaia thawk emaw pawhin a hlawmin thla thum danah emaw dahlut se, arrear emaw bonus emaw a dawng hlauh anih chuan chu pawh chu vawm lut tel bawk se, kum tam tak a liam hnuah chuan a rinaiin a pung chak viau ngei ang.

Tichuan tlem tlemin a lo inkhawl tam tial tial ang a, a kum a lo upata a hna atanga a chawlh a lo hunah meuh chuan thlamuang takin a chawl hahdam thei tawh ang a, a pension fund accounta pawisa awm chuan sorkar hnathawk te neih ang zat chu phak lo hle pawh nise 'a maipar thlawn nawlh' satliah tawh lovang a, a pawisa tling khawm zawng zawng atanga 60% chu a hlawmin a la chhuak thei ang a, a bak 40% la awm chu sorkarin annuity lei nan a hman sak ang a, tichuan thlatin pension hlawh a lo nei ve thei tawh ang. A tha thawkhat chu a ni mai lawm ni?

Sorkar hnathawk pension nen kan inthlau dawn em asin

Inthlau ang chu. Engah nge a inthlauh loh tehlul ang? Anni nen chuan inkhaikhin chi pawh a ni hleinem. Anni te chu sorkar vawk chawm thau an nia, kan inang lo alawm. An chaw ngen ri pawh a nain an bengchhen theih em hi. Anni te chu an vannei a, an thlatin hlawh atanga an cut sak ang zat vel sorkarin a khinglet/chhunluhpui a, chumai bakah DA arrier an nei a, hlawh siamthat apiangin arrear tam em em an nei bawk a, chung te chu an pension account ah a lut zel a, kum khat chhung ringawt pawhin a tam tham asin. Mahse, sorkar hnathawk kan nih loh avang maiin kan upat hnuah engmah nei lo leh hlawh chhete tal pawh nei lova hawi lawl lawl erawh kan tum tur a ni bik lo. Kan thihsan anih pawhin nupui fanaute ta tur tho ania......

GPF kan nei ve si lo va......

Ni e, a dik chiah. Keini chuan sorkar hnathawkte angin GPF kan nei ve lo. Mahse GPF tluk thawthanga tha PPF (Public Provident Fund), duh hun huna zawm theih mai turin India sorkarin a duang chhuak alawm. A duh tan chuan Dakinah emaw SBI ah emaw a zawm theih e.

NPS Lite vrs NPS for public:

NPS pangai ah chuan charge neuh neuh a awm ve nual a, chutihlaiin NPS Lite ah erawh chuan charge a tlem hle thung. Kumtin fee chawi leh transaction fee te hi a inthlau rem rem khawp mai. NPS Lite chu zawm thei chin (eligible) an awm a, NPS pangai erawh mi zawng zawngin kan zawm thei vek thung. Hlawh tlemte te neia thawk i nih chuan emaw, nitin inhlawhfa chawpa eizawng emaw i nih chuan NPS Lite zawm la, Swavalamban Scheme apply bawk ang che. Kumtinin sorkarin a tanpui dawn che nia.

Fee i sawi ri zauh a.....

EPF kha 12% vela pung tura beisei anih laiin 8% atanga 9% velah a su tlauh tlauh thin, pung sang tak bank lamin an pe thei lo. 12% vel returns pe ngawt dawn se sorkar tan hlohna hlir a ni dawn bawk si. NPS hi EPF ang lo takin bank-a sum daha peipun ngawt a ni lo va, stock market hmanga sum peipun tur a ni thung; chuvangin a pung pawh tha deuh hlek zawk tura beisei a ni a, investment pangai ang deuh hlek a nih ve na laiah fee chawi tur tlem a awm. Mahse heta fee hi insurance company pension plan te nena khaikhin chuan tlem tak a ni.

NPS chu tu te'n nge enkawl?

NPS hi Pension Fund Regulatory and Development Authority (PFRDA) ina a enkawl a ni a, i account zawng zawng pawh Central Record Keeping Agency (CRA) in a enkawl vek ang. Sorkar a ni a, insurance company thenkhat te ang a tlachhe thut thei a ni lo bawk a, him thawkhat hle tura ngaih a ni.

Kum 60 kan tlin hnuah engtin nge?

Kum 60 kan tlin hnuah chuan kum kha leh chen pawisa kan lo chhun khawl tawh leh a pung zawng zawng nen, a zavai atanga chhuta 60% chu a pawisa faiin kan la chhuak thei ang a, a bak 40% chu thlatin pension kan neih ve nan, annuity lei nan hman tur a ni.

Kum 60 tlin hmain inhnukdawk duh ta ila.....

Kum 60 i tlin hun hunah full pension nei thei tura ngaih i ni a, chumi hmaa NPS atanga inhnuhdawh i tum anih chuan a theih tho. Mahse, i pawisa vawmluh tawh zawng zawng atanga 20% chauh i la chhuak thei ang a, a bak chu a tam emaw, a tlem emaw, thlatin pension neih nan, Annuity lei nan an hman sak ang che.

A nih leh a hun hmain lo thi boral palh ta ila....

I lo thi boral palh anih chuan i pawisa dah zawng zawng i chhung ten an la chhuak vek thei. Withdrawal form hi POP in an kawl ang.Chu chu la chhuakin i chhung te'n fill up ang a, chu form chu POP ah emaw POP branch (POP-SP) ah emaw submit tur a ni. POP lamin an check chian vek hnuah CRA ah an thawn ang a, engkim an tihfel hnuah i bank account ah an lo thun mai dawn niin NPS handbook ah chuan a inziak.

Annuity hi i ti teh fova, enge maw ni tehreng le?

               Annuity chu mi an lo upata hna an thawh theih tawh loh hnua an lo pension hian thawk miah lova thlatin pawisa an hmuh theih reng na tura investment scheme pakhat a ni. Annuity bik buaipuitu tur chu Annuity Service Providers (ASPs) an ni ang a, chu chu Insurance Regulatory and Development Authority (IRDA) in a kalpui ang. Annuity ah hian Option 5 a awm mek a, thlatina kan pension lak dan tur pawh he option kan thlan dan azir hian a danglam thei ang. Heng option zingah hian kan pension hlima kan pawisa tling khawm atanga 60% kan lak chhuah bang, 40% kha kan chhung te'n, an duh phawt chuan, an lak chhuah vek theihna dan tur option pawh a tel.

Annuity khawihtu (Annuity Services Providers) ni tura Sorkarin a ruat mekte chu:

1. SBI Life Insurance Co. Ltd.
2. Life Insurance Corporation of India
3. ICICI Prudential Life Insurance Co. Ltd.
4. Reliance Life Insurance Co. Ltd.
5. Bajaj Allianz Life Insurance Co. Ltd.
6. Star Union Dai-Ichi Life Insurance Co. Ltd.

           Mi tam takin "Tunah chuan sorkarin pension scheme a ti tawp tawh," tiin an sawi fo thin a, hei hi chu an hriat chian tawk loh vang mai mai a ni. Tunhma kha chuan Employees Provident Fund kha sorkarin a kalpui thin a, mahse sorkar tan a hlawk loh em avang leh hlohna tur tam tak a awm thin avangin kha scheme kha a titawp ta a, a aiah hna lak thar apiang te chu NPS a zawmtir ta zel zawk mai a ni. Hnathawktuin a chhunluh zat chiah sorkarin a la chhunluhsak reng thin bawk.

Mutual Fund leh Equity a hlawk zawk daih lo maw????

            A dik. A hlawk zawk chiang. Mahse kuta pawisa awm chu hman a awlsam lutuk tlat. Mutual Fund SIP hmangin thlatin sum invest la, i retired thlenga i invest thei a nih ngat chuan a hlawk khawp ang. Mahse, hmangral miah lova insum tang tang chu a harsa lutuk ringawt. Chhungkua leh mahni'n mamawh hun kan lo nei a, awh zawng kan nei a, ban phak maia pawisa awm reng chung sia lei loh theih zel chu a harsa lutuk. Chuvangin retirement scheme atan chuan Pension plan (NPS) nge nge hi a that hmel tlat.

          Pension hi investment ngawr ngawr nena khaikhin chuan a hlawk lo hle a, sorkarin pension scheme atana a hman hlui zawk EPF pawh a hlawk chuang lo, a pawisa faia vawmluh kha a tam tham hrim hrim a, a pung nen chuan a tam tham mai zawk a lo ni.

            NPS ah hian 50 % vel thleng stock market ah invest turin duh thlan theih a ni a, chu pawh chu a equity rau rauvah pawh index fund lamah invest a ni, chuvangin a him tha thawkhat tura ngaih a ni. Him viau duh tan pheio chuan Government Security lama invest turin duh a thlan theih bawk.

Insurance Company's Pension Plan vrs NPS:

           Insurance company te hian anmahni pualin Pension Plan (ULIP Pension Plan) an siam ve thin a, a tha ve thin hle, chutihlaiin agent te hlep tur (Allocation charge) a sang thei lutuk a, chuvang chuan a hlawk tur angin a hlawk lo fo thin. Tunlai tak hian Insurance company hrang hrang te hian, NPS a lo lar tak viau hnu hian, an Pension Plan te kha an titawp ta hlawm emaw ni, annuity scheme chauh kalpui tawh an awm nual mai. NPS ah fee chawi tur a tlem zawk miau si a. ULIP Pension Plan ho kha chu charge a sang thei fia fia khawp mai a, allocation charge a san tluk zetin exit load pawh a sang.

Retirement scheme hi:

            Pension hi sorkar hnathawk tan chauh emaw kan ti thin hi a dik lo va, he ngaihdan hi kan hnawl hmak a hun tawh. Kuthnathawka ei zawng thin pawhin, a tuma a duh anih phawt chuan NPS kaltlangin Pension tha tak amah leh amah a insiam ve thei a. Sorkar office a MR a thawk te, private firm lama thawk te, sumdawnna lam khawih thin te, nitin eichawp dapa inhlawhfa thin te zawng zawng pawhin Pension tha tak an lo nei ve thei tawh ang.Fanghmir chuan thal laiin chaw a la khawm char char a, fur a lo thlen meuh chuan pawn chhuak miah lovin leh thawk miah lovin a bu laizawlah faisa ringin amah leh a chhungkua te nen an awm der der thin. Keini pawh hi, kan thawh theih hun chhung zawng rim takin kan thawk a, thawk chhuak thei tawh lo dinhmuna kan din hnuah pawh thawk miah lovin thlatin pension kan hmu ve thei tawh dawn a ni. Sorkar hnathawkin an thawh hlawh atanga 10% thlatin an chhun luh ziah theih chuan, keini pawh hian thlatina kan sum lakluh atangin 10% NPS account ah chhunglut ziah ila, nakinah kan lo upat hun, hna kan thawh theih tawh loh hunah thlatin pension kan lo nei ve thei mai dawn a lo ni.

Mizo lengzem hla thenkhat lyrics

2012-05-12T06:03:00.007+05:30

Mizo lengzem hla thenkhat ka lo tuipui em em thinte

Kan rawlthar chhuah chhoh hlim khan zai kan uar hle hle a, zantir atangin zan rei tak tak thlenga zai kan ching thin. Khang hunlaia kan hlasak thinte kha a tam zawk chu ka hrechhuak zo tawh lo. A thunawn takngial pawh sak chhuah zawh loh ka nei nual tawh a, thenkhat phei chu ka hrechhuak zo tawh lo hrim hrim bawk. Ka hlathu hriat ang ang te hi awmkhawhar hnema hmang duhte kan awm takah tiin ka han ziak chhuak a. A hlathu ka hriat dik loh pawh a tam hlein ka ring. Thianza hova chhawrthla eng lawma kan zai thin lai khan hla phuahtu lam rilruah a lan loh vang pawh a ni mahna, ka hla hriat ve chhun te hi a a phuahtu ka hre lo thei khawp mai.

Tihian Mizo Lyrics category ah dah ila, hman chang changin tlem tlemin dah belh keuh keuh ila, nakinah chuan tam tak a la tling khawm ve thei mai turah ngai ang; chumi hunah chuan lo tangkaipui tawkte pawh a la awm ve mahna......

Lyrics-a luhna chu: Mizo Lyrics

Heng hlathu te hi ka han dah thar chhin a, a tul danin kan la dah belh zel ang chu:

1. Lenrual an kim ta lo
2. Zonunmawi
3. Thian ngaihawm
4. Thenni kawl eng
5. Thang nunnem
6. Tawnmang lunglen
7. Tawnthar Di
8. Suihlunglen
9. Sakhmelmawi
10. Runmawi
11. Rinawmin aw Jasmine
12. Parmawi tin bawm
13. Nghilh bik suh la
14.Nghilh bik suh aw Rinpui
15. Ngaihzual nang nen
16. Mitthlain ka hmu che Ngaihzuali
17. Min hrilh rawh zanin ngeiah
18. La-i zun
19. Kar mah hla se
20. Kar a hla Di Bawihte
21.Kan va ngai dawn em
22. Ka zawng zel che
23. Ka tawng ta che
24. Inthen zai i rel lawng
25. I rau i thla tal rawn tir rawh
25. Fam chan hma chuan
26. Duhlai i Diin e
27. Ding rih la hlimlaini
28. Di Chambawihpuii
29. Damtakin mangtha le
30.Chhawrthlapui
31. Chhaktiang Chhawkhleipari
32. Annem Vala
33. An lungleng ve ngei ang
34. Nemte'n ka chawi ang che
35. A rei ta e
36. A rem tawh lul lo
37. A zual chuang em ni

A chunga hlathu (lyrics) tlemte ka dah te khi, a phuahtu, a phuah ni/kum te, a satu emaw ziak tur i hria anih chuan, a hla khi click la, a hnuaia comment box ah min ziak sak thei hram anih chuan ka lawm hle ang. A chepakai atanga chhui chhuaka i hrilhfiah thei anih phei chuan a lawmawm lehzual ngei ang a. Correct ngai lai i correct thei anih phei chuan 'most welcome'.....

A rei ta e.......

Chhawrthla en zan pawh nise, thlamang zan pawh nise, thianza hovin pawn bathlarah tingtang kan kuah a, kan hla hriat ve chhun ang ang te kan sak ho dual dual thin lai te kha, a kum ang zawnga chhiar chuan a rei ve leh ta hle mai. La upa lo nia kan inngaih laiin kan hmelin kan kum a rawn tarlang a, thup tumin awmzia a nei lem lo. Rinloh karin hun leh kumte a liam zut zut a, naupang tetakte te emaw kan tihte pawh an lo puitling ta der mai.Kan inhmuh naupan ai hian mite hian min lo hmu tar hle tawh dawn a lo nih hi. Rilru erawh a la upa tak tak thei si lo. Khawi ilo kalna leh lawiluhna lam apiangah 'inpu' kan hlawh chho tan ve ta reng mai. Tuk-zana damlai chena ni kan hman liam zut zut kha, tunah zet chuan fim karin kan chhui let ta nuap nuap mai a nih hi.

Lenrual an kim ta lo

2012-05-12T06:01:00.000+05:30

Lenrual an kim ta lo

(Phuahtu: Zirsangzela Hnamte)

Lam ang ka lo let leh ta e Vala
Min lo hmuak dawn lawm ni chhuahtlang a'n
In sakhmel vaiin ka hawi ruai e
Khawnge maw in awm lenrualte u

    Dawn a sei lenrual an kim ta lo
    Ngai ve maw lungruala lenlaini
    Mittui nen ka fang in run chul hnu
    Tleidang leng te'n zaiin lo sa e

Aw khawnge in awm ka lenrualte
Mahriak te'n engah min lo siam le
Chham ang in zalna laikhum tal hi
In hlan lo em ni ka tan biahthu

Chungmu ianga thlawkin hrut vel i
Vangkhawpui kan suli hnu zawng te
Mahse lunglen mittui bual chung hian
Thangvansang kai zawh ka zuam si lo