Latgolys Studentu centrs

Rēzeknis birojs ziņoj

LgSC — Wed, 22 Feb 2012 20:28:44 +0000

“Pastāvēs, kurš pārmainīsies!” Itai nazkod ir sacejs kaids vysim zynoms gudrs veirs.
Īsadvesmojūt ari mes, LgSC Rēzeknis biroja aktivisti, izdūmuojom, ka vajaga nazko jauna.
Jaunu pazeišonu, jaunu ideju i nūtykumu.
Ituo gods 8. febralī LgSC aicynuoja vysus aktivus, ar Latgolu sirdī asūšus studentus iz sasatikšonu, kur vysi kūpā dalejomēs pīredzē, jaunuos idejuos i pozitivuos emocejuos. Runuojom, smiejomēs, taisejom buļbu bļinčukus i vokorā guojom iz balu.
Paļdis vysim, kas atguoja i padareja Rēzeknes LgSC ikdīnu par nūtykumu!

LgSC izvierzeits vairuokom nominacejom „Boņukam 2011”

LgSC — Thu, 16 Feb 2012 09:22:37 +0000

Itūnedeļ tyka paziņuotys nominacejis Latgalīšu kulturys goda bolvai „Boņuks 2011”, storp tom trejuos ir izvierzeits ari „Latgolys Studentu centrs”.

Konkurence beja dīzgon seiva, kūpumā viertiešonai tyka īsnāgti vairuok kai 150 nūtykumi i cylvāki. Itūgod izdūtuo gruomota “Es soku. Tu soki. Puosokys par krīzi” ir izvierzeita divejuos nominacejuos – lobuokais pasuokums/projekts i lobuokuo publicitatis akceja latgalīšu kulturā. Taipat LgSC ir izvierzeits arī nominacejai latgalīšu sabīdryskuo organizaceja. Puorejuos nominacejis skaiti LaKuGā

Turi eikšus par mums i atej iz bolvu pasnīgšonys ceremoneju 26. februarī 17:00 stuņdēs Rēzeknis kulturys nomā.

Ej piec latgalīšu gruomotu i muzykys disku!

LgSC — Wed, 15 Feb 2012 22:42:22 +0000

Nu 1. leidz 4. martam vīnlaiceigi ar izstuodi „Škola 2012” Reigā, Kīpsolys izstuožu zalā, byus ari „Latvejis Gruomotu izstuode 2012”.

Bīdreiba „Latgolys Studentu centrs” aicynoj Tevi atīt iz latgalīšu stendu i nūpierkt jaunys gruomotys. Byus pateikamys cenys i plaša izvēle.

Stendā jaunuokuo latgalīšu dzeja i proza, gruomotys par Latgolys kulturu i viesturi.

Byus īspieja nupierkt ari latgalīšu muzykus diskus i suvenīrus.

Gaideisim gostūs!

Daugpiļs LgSC jauni interesenti

LgSC — Wed, 15 Feb 2012 08:26:32 +0000

Lai nūdrūšynuotu „Latgolys Studentu centra” atpazeistameibu i jaunu bīdru īsasaisteišonu LgSC darbeibā, ituo gods 8.febralī LgSC Daugovpiļs nūdalis bīdri i aktivisti aicynuoja cytus Daugpiļs Universiteta (DU) studentus iz LgSC īsapazeišonys piecpušdīni.

Sasatikšonys laikā interesenti tyka īpazeistynuoti ar LgSC darbeibu, mierkim, aizdavumim, cylvākim, pasuokumim, planim i cytom LgSC aktivitatem.

Piec prezentacejom LgSC bīdri interesentim lyka drupeit padūmuot – paminēt latgalīšu mozuok lītuotūs vuordu nūzeimi. Studenti beja cīši zynūši, i vuordu miniešona izavērte par saceņseibu. Piečuok suocēs diskusejis par izlūkšņu daudzveideibu i sovam apvydam rakstureigajim vuordim.

Nūslāgumā kotrs students vaira pastuosteja par sevi, sovom interesem i tū, par kū jis grybātum īsasaisteit „Latgolys Studentu centrā”. Gaideisim jaunūs interesentus ari iz nuokušajim pasuokumim!

Daugpiļs LgSC bīdri

LgSC aicynoj iz rokstu volūdys stuņdi Daugpilī

LgSC — Mon, 13 Feb 2012 21:45:14 +0000

Bīdreiba „Latgolys Studenu centrs” 16.februarī 17.00 stuņdēs Vīneibys īlā 13-113 (Daugpilī) vysus latgaliski raksteit grybātuojus aicynoj iz latgalīšu rokstu volūdys apvuiceibu “Vuceisimēs latgalīšu rokstu volūdu vīnuvīt”.

Rokstu volūdys apvuiceiba nūteik LR Kulturys Ministrejis izsludynuotuo konkursa „Integracejis pasuocīni 2011” tematiskajā jūmā par latgalīšu rokstu volūdys saglobuošonu apstiprynuotuo projekta „Vuiceisimēs latgalīšu rokstu volūdu!” ītvorūs, kura mierkis ir paplašynuot latgalīšu rokstu volūdys pratieju lūku jaunīšu vydā, veicynuot jaunīšu interesi par regionalū kulturu, rūsynuot sevkuru izmontuot latgalīšu volūdu na viņ mutvuordu saziņā, bet ari rokstūs.