W.bloggar е софтвер за страсните блогери. Освен што е бесплатен, нуди голем број на алатки и уредувачки можности, плус извонредна леснотија на поврзување со блогерските сервиси што постојат на Интернет мрежата.

Клиентски решена софтверска апликација за пишување и уредување на вашиот блог „off-line“ или „on-line“. Генерално вклучува опции што ги нудат повеќето познати веб-базирани блог уредувачи. Една од предностите во користење на w.bloggar е можноста да го уредувате вашиот блог локално и без Интернет конекција. Сите записи што се објавени или чекаат да бидат објавени се зачувуваат на компјутерот. Што се однесува на палетата од сервиси и блог апликации што ги подржува овој софтвер се прилично широка, но еве неколку од познатите: Blogger, TypePad, MSN Spaces, TheBlog, Blogalia, UBlog, MovableType, WordPress, b2, Nucleus, Drupal итн. За сите овие сервиси и алатки има соодветна инструкција за поврзување, но сепак поврзувањето со нив е ептен олеснато, а повеќето блогери најчесто знаат што значи API. Користењето на една апликација како еден интерфејс на повеќе блог платформи е добро помагало.

Уредувач на текст

За разлика од WYSIWYG (What You See Is What You Get или добиваш тоа што го гледаш) уредувачите, не го прикажува форматирањето на текстот туку го внесува HTML кодот директно. Корисниците што се запознати барем со основата на HTML кодот полесно ќе се снајдат за разлика од тие што не го познаваат. Но сепак постои „Преглед“ (Preview) во истиот контекст како опција за тоа што сте го напишале со што ќе ја добиете приближно сликата на тоа што покасно ќе го објавите. Вметнувањето на слики или видео е рачно со оглед на фактот дека е само HTML код, сликата треба претходно да е ажурирана на интернет и големината можете да ја уредувате единствено со бројки. Истото се однесува и на видеото или другите елементи што сакате да ги додадете како украс во текстот. Доколку текстот е на Англиски имате на располагање Spell Check што ќе го олесни техничкиот дел околу англиската семантика.

Зошто w.bloggar?

Има повеќе предности при користењето на оваа апликација или слични на неа. Една од нив е можноста да пишувате текст независно од Интернет врската на вашиот компјутер или уред. Некогаш текстовите ги пишувате како скица (драфт) за покасно или друг ден пред да го објавите тој текст можете да го надградите или прочитате со различен пристап и да добиете некаква реална слика за тоа што сте го напишале. Поправката на пропуштени букви или нејасни реченици ќе станат историја, а текстот ќе биде добро испеглан пред да биде достапен за сите. Друга предност е повеќето платформи што можете да ги користите преку еден софтвер. За секоја платформа или членство си внесувате посебно корисничко име плус лозинка еднаш и без големи перипетии го правите само тоа што е битно, а тоа е приказната на самиот текст што сакате да ја споделите. Ако навлеземе малку подетално, сите овие платформи што ги подржува w.bloggar се во потполна синхронизација на целата палета од алатки, уредувања, категории, етикети што ги има и во веб верзијата на оригиналната платформа што ја користите.

Постои и нагодување со CSS стилови на Preview делот со што при прегледување на блог записот можете да добиете поблиска слика до тоа како би изгледал тој запис објавен. Што се однесува во тековното одржување на оваа апликација последно што е лансирано е самостојна (portable) верзија што може да ја користите едноставно на USB уред или слично, притоа без да ја имате маката да ја инсталирате.

w.bloggar е одлична алатка, дури и да не е примарна тогаш може да се користи како стабилна алтернатива за моментот кога би имале инспирација да напишете нешто, а Интернетот „секнал“.

Денеска славиме роденден и наполнивме цели две години. Ви благодариме на сите што помогнавте да се слушне гласот на Лист.мк и ги читате нашите содржини.

За таа цел ќе го одбележиме овој радосен ден со една заедничка креативна соработка. Би сакале од вас да слушнеме предлози за подобрување на содржините и начинот на кој можеме да ги инволвираме креативните вибрации кај сите нас.

Овој пост терба да претставува отворена дискусија за предлози, идеи и теми што би сакале да ги видиме како подобрување во идната година. Отворени сме за предлози и би ве замолиле да бидете прецизни во излагањето на вашите идеи.

Благодариме!

Роденденска дискусија:

HomeBank е бесплатен софтвер за регулирање и менаџирање на домашните финансиски трошоци и доходи. Можеби повеќето корисници на компјутер за оваа цел би користеле Microsoft Excel или LibreOffice.org Calc со табеларно уредување на формули и бројки, но овие софтвери обично им се најомилени на економистите.

Овој софтвер е објавен под GPL лиценца што го прави достапен и отворен за сите. Како платформа може да го возите на Windows, GNU/Linux и Mac OS. Тука не станува збор за некаков софтвер со банкарски способности од највисок ранг. Напротив со него може да се прават многу едноставни пресметки и евиденција на финансиите што ви се во оптек низ секојдневниот живот. Генерално целото користење е многу едноставно, внесувате плата, додатни доходи и потоа внесувате плаќања во кеш, кредитна картичка или друга некоја трансакција како сметки и партиципации. По извесен период во текот на месецот или на крај од годината можете да погледнете статистика на што сте трошеле најмногу пари и колку сте заштедиле. За најголемото плаќање што сте го направиле ќе гледате да не се повтори, односно подобро ќе го регулирате трошењето на вашите пари.

Регулирање на буџетот

HomeBank работи локално, не се поврзува со вашата сметка во банка или интернет сервис. Тоа што го прават во другите држави каде што има и интернет сервиси што се директно поврзани со вашата сметка во банка и плаќањата се извршуваат директно преку тој софтвер не е случај со HomeBank. Ваквите софтвери се користат повеќе како евиденција за трошењето на вашите финанскиски средства преку добро спакуван интерфејс. Внесувате колку примања имате во текот на месецот и кога трошите или добивате пари ги додавате со „Add Transaction“ копчето и го евидентирате преносот. Во тој запис има неколку информации што ги запишува HomeBank, датата на трансакцијата, колку евра/денари и категорија во која влегува таа трансакција (пример: кирија, кредит, сметки, гориво, намирници, поклони и слично). Исто така може да запишувате и идни трансакции што би се случиле во иднина или се планирани. На едноставен начин, имате евиденција на тоа колку пари имате во банката на располагање со повеќе сметки и трошоци.

Приказ на податоците

Најдобрата придобивка од овој тип апликација е математиката и статистиката во позадина што нема да ви одзема дополнително време. Над таа економска математика визуелно во графи или пити се прикажани резултатите на вашата финансиска приказна. Поради фактот што работи локално и не се поврзува со сметката во банката треба редовно да ја проверувате и сметката во банката со цел да имате паралелна слика од тоа што го евидентирате и тоа што е вистински во банка. За нејзиното користење не треба многу да разбирате како работат банките или економистите. Со само триесетина минути запознавање со апликацијата веќе е јасно како се користи. Освен категоризацијата за тоа што сте го платиле исто така во најновата верзија има и начин на плаќање: кредитна картичка, кеш, електронско плаќање, депозит, претплата, партиципација и слично. Поради фактот што во основна е базирана за GNU/Linux оперативните системи нејзиното користење во Windows бара и инсталација на GTK+ што и не е некаков проблем.

Преземи

HomeBank е брз, едноставен и лесен софтвер за употреба што ви овозможува регулирање и евиденција на вашите пари. Има повеќе од доволно алатки што ќе ви се најдат доколку ја користите оваа софтверска апликација, а исто така помага и во заштедата на пари. Постои и можност за зачувување на извештаи во OFX/CSV датотеки и овозможува секој регуларен коисник на компјутер лесно да се снајде со неа.

AIMP е софтвер за слушање музика на компјутер, создаден од Artem Izmailov руски програмер што го создал интересниот Artem Izmailov Media/Music Player (AIMP) што фино ме изненади. Овој бесплатен софтвер е наменет за слушање музика на вашиот компјутер со интсталирана Windows платформа како оперативен систем.

Не е ништо поразлично од еден Winamp или iTunes. Единствена разлика се нијанси што во многу случаи ме натераа да го ставам Winamp во историја. На Windows оперативен систем секогаш користев Winamp и тоа со обичниот класичен изглед. Користењето на Winamp е бесплатно и едноставно, лесно за симнување од интернет и ептен лесно во искористување на ресурси при репродукција на музика. Од кога знам за компјутер секогаш сум користел Winamp како музичка репродукциска алатка под Windows. Сега кога знаете колку сум бил „закоравен“ корисник на Winamp си дозволив промена!

Први впечатоци

Првиот впечаток од освновната верзија AIMP е минимална зафатнина на ресурси и квалитетна репродукција на звук. Прво што пробав е репродукцијата на иста песна што ја слушав со инсталирана основна верзија од Winamp. Значително подобар звук ми прикажа AIMP, а што се однесува на контролите од интерфејсот само се спуштија на tray и беа ништо поголеми од околку 250px (ширина) со 20px (висина) зафатнина на мониторот. Сето тоа намалено на основните копчиња play/stop/pause/volume/slide и името на песната со времетраење. Додека е на tray немора да го кликате икончето, туку само застанувате на него со стрелката и веднаш се појавува во минијатурна форма.

Слушањето на музика денес се сведува или во play-list или media library што и во двата случаи во позадина си вртат песните по избраниот редослед. Едниствениот чекор напред е ефективно искористување на ресурси за активноста за што е наменет софтверот, што во случајов е само слушање музика. Затоа ваквото решение е квалитетно!

Уште еден интересен момент е можноста да располагате со повеќе листи од еднаш користејќи јазичиња (или плочки/tabs). Контролата врз таквата повеќеслојна листа на песни во посебни јазичиња ја контролирате на сличен начин како сурфањето со еден Firefox или друг интернет прелистувач. Влечење и спуштање од едно место на друго, исклучување на јазичињата со средно копче, прмена на името и ред други работи. Додека е во тек активната листа на песни, вие може да работите со содржината на другата. Да додадам дека е полесен во мегабајти за преземање од Winamp.

Детално

AIMP е софтвер програмиран во Delphi, изработен во Russia. Користи BASS аудио библиотека со подршка на најразлични формати-записи на звук. Освен за репродукција соджи и Tag уредувач, аудио конвертор, Audio CD преземач и снимач на звук од микрофон. Јас го користев на македонски јазик и би ги пофалил тие што придонеле за преводот. Моќен equalizer и одличен процесор на звук! Интересен додаток е автоматско гасење на компјутерот после избрана песна или на крај од активната листа на песни. Специјални ефекти Chorus, Echo, Flanger и Reverb. 32-bit аудио процесирање за најдобар квалитет. Препознатлив интерфејс многу сличен на Winamp со можност за снимање на листите со песни како текст документ или HTML датотека. Подржува M3U листа како и предефинирани интернет радио формати. Доколку сакате потемелно да владеете со софтверот или да станете „гуру“, официјалната интернет страна е добро набилдана со информации за користење, изглед на маската, додатоци, форум за подршка и блог.

Преземи

Не сакам да наметнам некаква агенда против Winamp, туку секогаш е добредојдена алтернатива. Додатна опција е добро да се користи. Затоа и сакам да го споделам овој софтвер со вас како алтернатива за слушање на музика што би требало да ја знаете. Јас го користам AIMP уште од верзијата AIMP2 и еве веќе направивме 4 години заедно кога сме на „романтичниот“ Windows.

Бесплатна апликација што може да ја преземе и употребува секој што снима DVD или CD на Windows оперативен систем. Тоа што е бесплатна не ја прави ограничена туку напротив, наменета е само за снимање дискови со целосен аранжман на алати за таа работа и плус подржува повеќејазичност.

Со неа може да креирате и снимате ISO датотеки, што ја прави комплетна со сите нишани, a многу корисници според тоа што го коментираат за неа ја креваат дури погоре од Nero што денес се претвори од софтвер за снимање цедиња во софтвер за еден куп други работи освен за тоа што беше оригинално направен. Било која апликација за снимање цедиња, барем според мене, треба да е наменета само за тоа и да не зафаќа многу голем простор.

Што може да правите со CDBurnerXP?

• снимање на сите видови записи на CD или DVD
• Audio цедиња со или без пауза помеѓу песните
• снимање и креирање ISO датотеки
• верификација на снимен диск
• креирање bootable дискови
• повеќејазичен интерфејс
• bin/nrg во ISO конверзија
• печатење на CD обвивка
• оперативен систем: Windows 2000/XP/Vista/7
• и други додатоци во сите горе наведени точки

Кратка историја

Софтверот е дело на Стефан Хаглунд, програмер од Шведска што се занимава со креирање компјутерски софтвери, кој направил успешна апликација со едноставна цел. Иако тој самиот е open source програмер и го подржува истиот, CDBurnerXP не е лансирана под таа капа. CDBurnerXP е бесплатна апликација што не е слободна, но наменета е за секој што сака да ја користи. Тоа е .NET апликација што значи доколку немате инсталирано .NET framework на вашиот Windows оперативен систем, ќе треба да го направите тоа за да може да ја користите.

Користење

Кога ќе ја вклучиме CDBurnerXP прво што ќе не сретне е прозорец за добредојде од каде јасно се гледа изборот на тоа што сакаме да правиме со неа. Почнува со „Data Disc“ снимање на обично CD/DVD со податоци, „Audio Disc“ снимање на музички аудио запис, „Burn ISO image“, „Copy disc“ комплетно копирање на CD/DVD или копирање на неговата содржина на вашиот хард диск и „Erase disc“ односно бришење на rewritable CD или DVD. На пример, ако снимаме диск со податоци („Data Disc“) на почетокот треба да го избереме тоа од почетниот прозорец. Следниот прозорец е избирањето на податоци што сакаме да ги ставиме на тој диск, а распоредот на панелите што ќе не сретне потоа е поделен во неколку делови. Во зависност од тоа како ви прилега вам може да изберете вертикален или хоризонтален преглед (View -> Tile -> Vertical или Horizontal). Од „Explorer Window“ во левиот дел или горе лево, во зависност од распоредот што сме го избрале, пребаруваме низ податоците на компјутерот што сакаме да ги ставиме на цедето. Тие податоци ги ставаме во „Compilation Window“ каде се содржани податоците што треба да ги снимаме на дискот. Во најдолниот дел се наоѓа статусна табла што ни покажува колку сме го исполниле дискот и информација со вертикална тенка црвена линија што ја означува големината на дискот што сакаме да го снимаме.

Ставањето на податоци се прави преку Add копчето што има сликичка со зелен плус или со влечење и спуштање на избраните податоци во делот наменет за цедето. Доколку се случи да ставиме нешто по грешка или нешто не сакаме да се сними на дискот, тогаш го избираме и го вадиме со Delete копчето на тастатурата, односно со копчето Remove што има сликичка со црвен Х (икс). После се кога ќе стигнеме до саканата големина на податоци или до големината што ни ја овозможува дискот, избираме Burn или Save во зависност од тоа дали сакаме веднаш да се снима дискот или не. Доколку го избереме копчето Save (Ctrl+S на тастатурата) тогаш сме ја зачувале компилацијата и можеме да ја повикаме кога сакаме. Ако избереме Burn (Ctrl+B на тастатурата) тогаш нов прозор ќе се појави што не прашува дали дискот ќе го доснимуваме (Leave disc open), го завршуваме (Finalize disc) или избор на напрадени нагодувања (Let me choose advanced settings). За крај избираме Burn disk или Cancel ако се откажеме од снимање на цедето.

Другите типови на снимање цеде се исто така лесни и се базираат на овој принцип, со соодветни промени во зависност од форматот на податоците со кои располагаме. Се на се CDBurnerXP е апликација што овозможува да правите се што може да се прави кога станува збор за снимање на дискови. Спакувана е квалитетно, особено по верзијата CDBurnerXP 4 со комплетен состав на решенија за експлоатирање на оптичкиот режач во вашиот компјутер и празните дискови што ги ставате во него.

Целта на овој текст е да си помогнеме сите што мислиме или се радуваме на овие лиценци. Информациите за постоењето на овие лиценци треба да стигнат до различни уметници, креативци и најразлични организации и медиумски куќи.

Најважниот дел на овие лиценци е да се прошири палетата на покриеност и ко-креација во процесот на споделување некаква уметност, текст, градба, фотографија итн.

Сите права се резервирани

На пример, доколку како уметник сум создал музичка песна или неколку песни, колку луѓе ќе платат во трафика за да ми ја слушаат песната, радијата што го филтрираат етерот со нивната смисла за музика веројатно ретко ќе ја пуштат и ако не им фати уво ќе немам друг избор освен да ја ставам на албум. И по неколку песнички се склопиле десет за да спојам албум. Следен чекор, барам спонзори или пари од Министерство за култура и ако се присобере нешто ќе можам да спроведам квалитетен аудио запис и визелна кутија внатре со аудио диск што ќе го раздавам по луѓе, трафики или места за промоција. Супер, јас сум потпишан автор!
За да ви дозволам да ја слушате мојата музка треба да се договорам со ЗАМП, треба да ми платите права да ја слушате мојата музика било каде или купите аудио диск и на крај да дојдете на свирка каде може и ќе се видиме во живо. Што е светлото тука? Процес за авторизирање, процес за барање спонзори, процес за аудио обработка, процес за промоција и колку години ќе ми треба? Сите процеси си бараат пари, а спонзорот ќе ми биде млекара здравје радово и ќе треба да се сликам со сирење!? Ур(д)ааааа….

Веројатноста дека едвај 5000 луѓе ќе ја слушнат вашата песна и кога ќе настапувате на некоја свирка во барче може и ќе се појават 10 од нив. Резултатот е сите права се резервирани за да ја слушате мојата песна.

Некои права се резервирани

Creative Commons лиценцата е алатка што овозможува рамнотежа од традиционалната „сите права резервирани“ во „некои права резервирани“. Тоа овозможува дозвола за слушање, редистрибуција, користење на делата од други автори во нивните дела на лесен и едноставен начин. Вака разработен случајот со музиката погоре во текстот би се отвориле неколку можности. Мојата песна е обајвена под слободна редистрибуција и слушање било каде и од било кој со единствена референца до авторот.

Пример: Ја објавувам песната под CC Наведи извор и доколку им се допадне на првите слушатели имаат можност да ја објават песната на својот блог или веб-простор без да бараат специјална дозвола. Самата дозвола бара единствено да наведат извор, а изворот е веќе во самото име на авторот на песната. Од таму постои веројатност дека некој што се занимава со изработка на видео материјали може да ја искористи песната во неговото видео и да го наведе изворот на крајот од видеото. Сите посетители што би ги посетиле тие места каде што песната е веќе објавена ќе ја преземат и слушаат, разделат на други пријатели и познаници, а со тоа слушаноста на песната ќе порасне. Поради отвореноста за редистрибуција отворени се вратите песната да се појави на телевизор и радио, на некој настан и можност да се појави на најпознатите веб-страни во Македонија. Мојата песна е толку јака што сите ја сакаат и ја слушаат и за неколку месеци стигнала до 30.000 слушачи. Супер! Што ќе се случи ако следните десетина песни ги објавам под иста лиценца? Колку вкупно луѓе ќе ги слушаат моите песни? Колку време ќе ми треба да најдам спонзор и да спакувам албум што ќе го објавам под истата лиценца?

CC Наведи извор

Овозможува други да го редистрибуираат, обработуваат, изменуваат, креираат сопствени дела на сметка на вашето дело и комерцијализација на делото се додека го наведуваат изворот-авторот на тоа дело.

CC Наведи извор, без доработка и менување

Овозможува редистрибуција на делото со наведување на изворот-авторот, комерцијализација без менување и без вметнување во свои дела.

CC Наведи извор, без комерцијализација и под исти услови

Зачи користење на делото за редистрибуција, измена, доработка во сопствени дела под истата лиценца. Единствена забрана има за комерцијализација на делото.

CC Наведи извор и под исти услови

Подразбира секаква можност за редистрибуција, измени, доработки, комерцијализација, но да се објават новите дела под истата лиценца и да се наведе авторот.

CC Наведи извор и без комерцијализација

Подразбира исто така користење на делото во сите можности, но не обврзува објавување под истата лиценца. Исто така треба да се наведе авторот и не смее да се комерцијализира делото.

CC Наведи извор, без комерцијализација и без измени

Ова е најрестриктивната верзија на лиценцата и овозможува само редистрибуција на делото со наведен изворот.

Постои уште една лиценца што е најлиберална и таа се вика Општо добро (Public Domain), што значи вашето дело е слободно да се користи без никакви рестрикции од законите за авторски права и без никакви обврски при користење на делото.

Работа, работа и само работа… без разлика дали е дома или на работа ! И мене ми се случува истата приказна, на пример освен на работа ми се собираат задачи за клиенти на кои ги прoдавам моите вештини регуларно скоро секој ден.

Прво се занимавав со фиксни цени за проекти и тоа не беше толку лошо, но по средбата со oDesk и користењето на oDesk Team софтверот за мерење продуктивно работно време многу работи ми се сменија. На пример разбрав дека наплаќањето по саат е многу по исплатливо, во повеќето случаи, отколку по фиксна цена. Ова секако не важи ако парите земени од фиксна наплата изнесуваат високи три-четири цифрени бројки. Но за неколку работни часа на ден мерењето и наплаќањето по саат е одлично решение.

За оваа задача пробав неколку софтвери на GNU/Linux и на Windows оперативни системи и овде ќе ви препорачам неколку решенија. Со овие алатки може да се „потковате“ и Вие и Вашиот тим без дополнителни трошоци.

Hamster

Овој софтвер за мерење време е еден од најпознатите и исто така најкористените на Gnome графичка околина. Освен што изгледа супер има едноставни алатки за користење и лесно може да генерирате извештај во регуларен документ или HTML формат, како и преглед на статистика за сработените задачи.

Timetracker

Сето тоа што се однесува на Hamster важи и за оваа алатка само што е наменета за Windows оперативни системи.

FreeMind

Слободен софтвер за мапирање на идеи што работи локално со инсталација на оперативниот систем и е еден од најдобрите што сум ги сретнал до сега.

WiseMapping

Ова е веб-базиран софвер за мапирање на идеи што се користи едноставно со регистрација. Може да се споделуваат проектите заеднички и е поврзан со FreeMind во размена на датотеки.

Redmine

Само неколку од важните својства на овој веб-базиран софтвер за водење проекти се можностите за водење повеќе проекти, следење на задачи, gantt chart и календар, вести, документи, wiki за документација и многу други својства што сигурен сум дека ќе ви се најдат. Redmine се користи со тоа што се хостира на вашиот сервер (локално/интернет) исто како веб страна и до него може да пристапат сите вклучени во проектите преку интернет прелистувач.

Секако дека постојат убави и комерцијални софтвери наменети за регулирање на работните задачи и доколку имате парички слободно користете си платени варијанти. Доколку имате некоја опција за препорака слободна/бесплатна/платежна, очекувам коментари .

Се мислев што честитка да спремам за новогодишните и божиќните празници и решив да споделам нешто со сите што сакаат да создаваат креативни вибрации. Слободно преземајте и користете ги д батон и д тул тип во вашите дизајни.

Овие примероци се изработени во Inkscape слободен софтвер сличен на комерцијалните Illustrator и CorelDraw, односно во еден дел и Photoshop, особено во обработката на векторската графика.

Сите што сакате или што ве интересира како се сработени, ви изгледаат привлечно, слободно зачувајте ги и користете ги без никакви прашања или авторизации.

Слободно за преземање: веб-копче и балонче

Преземи тука!

Слободен софтвер Македонија е организација што се занимава со воведување на слободниот софтвер во нашето општество и култура. Благодарение на оваа организација денеска може да ги користиме повеќето слободни софтвери на македонски јазик и можеме да го видиме Едубунту низ мониторите на школските клупи.

Со текот на време и зголемената информираност на нашите граѓани се создаде поголема бројка на ГНУ/Линукс корисници низ државата што организацијата го искористи како добра причина за воведување на помошна активност. Оваа единица ќе се потруди да им помогне на новите корисници (и тековните) во користењето на слободниот софтвер на нивните уреди.

Со Владан Поповиќ, како прилично ангажиран активист на 2смк што редовно го среќаваме таму, ќе го претставува гласот на КИКА понатаму во приказната .

Што е КИКА или ХАКЛАБ и дали има разлика?

КИКА е првиот скопски ХАКЛАБ. Функционира скоро две години и шест месеци без престан во понеделник и четврток од 19:00 до 21:00 и сабота од 13:00 до бескрај. За оние кои не се сретнале со овој термин претходно, хаклаб е место каде луѓе со заеднички интереси, најчесто компјутери и технологија како што е и во овој случај, можат да се среќаваат, социјализираат, соработуваат или едноставно да споделат знаење.

Какви активности се случуваат таму и дали се редовни?

Редовни се активностите во понеделник – GNU/Linux прва помош. На овој настан доаѓаат луѓе кои имаат проблеми со било која GNU/Linux дистрибуција, но најчесто доаѓаат луѓе кои само што почнале да користат Linux и скоро сите се корисници на Ubuntu дистрибуцијата.

Во четврток вечерта е резервирана за поубавите програмски јазици – Python, Ruby, Javascript, но има и вечери каде што се програмира и во класичните С, С++, Java, РНР …

Во сабота е главниот настан „Сподели знаење“. Некогаш има рандом хакирање, некогаш има многу интересни програми и проекти кои се анализираат и развиваат, да не ги набројувам, сите работи што се до сега направени и што се во план се запишуваат на блогот.

Проектите кои се направени и кои се во план да се изработат се наоѓаат на вики страните, а сите настани што се случуваат во ноември, декември и јануари се поддржани од град Скопје. Има обука за програмирање со С/С++ за студенти со цел да можат полесно да ја поминат прва година и
обуки за GNU/Linux администрација и користење на web 2.0 технологии.

Почнувајќи од денес па сѐ до петок од 12:00 до 24:00 во хаклабот ќе се проектираат презентациите од 28с3 – најголемата хакерска конференција во Европа.

Каде точно се наоѓа и начини на контактирање?

Хаклабот КИКА се наоѓа на ул. „Васил Стефановски“ бр. 8/1, поточно, на првата улица десно од улицата која води од католичка црква до универзална сала:

View Skopje hacklab in a larger map

Може да не контактирате на (e-пошта) листа – ossm-members(at)lists.softver.org.mk, на ирц каналот #lugola на freenode серверот, или на твитер.

Работно време?

Хаклабот е отворен скоро секој ден, најпаметно е да се следи твитер профилот, твитаме кога го отвараме хаклабот за секој да знае

Колку активисти се вклучени во целата приказна и што ги мотивира истите?

Вклучени се околу 15 активисти кои редовно го посетуваат хаклабот и помагаат и финансиски и при неговото секојдневно одржување.

Дали имате начин за донации или други методи на помагање од страна на гостите и подржувачите? Дали можеби веќе ве помагаат некои фирми/организации/поединци?

Примаме различни динации во било каква форма. Пари пред сѐ, потребни за kирија и сметки, за докупување на хардверски и електронски компоненти, земаме стар хардвер од кој ги вадиме употребливите компоненти, а останатото го даваме на фондацијата Mетаморфозис кои се занимаваат со е-отпад и го користат неупотребливиот хардвер за правење ракотворби и други уметнички дела.

На сајтот на организацијата „Слободен софтвер Македонија“, која активно и во целост го поддржува хаклабот постои линк на кој граѓаните, посетителите и сите кои сакаат да го поддржат хаклабот може да се информираат за сите начини на кои можат да им помогнат на КИКА и на огранизацијата.

Донација за КИКА, на ж-сметка: 210-0570883401-10 при НЛБ Тутунска Банка АД – Скопје

Одење во тоалет – право или привилегија. Во некои земји тешко e да се снајдете со ознаките за тоалет и затоа земјите низ светот работат на стандардизација на ознаките, но некако слабо им оди…

Ова има и позитивни страни – како ќе уживавме во шареноликоста на ознаките ако имавме стандардизација… Нели?

Изборот што ви го подготвивме зрачи со креативност, инфантилност, графички дизајн па и уметност. Разгледајте ги 47-те ознаки за тоалети и WC-a земени од разни делови на земјината топка. Фантастичната разноликост во ознаките е она што најмногу воодушевува: од суптилна симболика до сурова конкретност, од фантастични пиктограми до симпатични типографски решенија, од вградување на Барби и Кен, до врзување на ортоми, од минимализам до реализам, итн, итн… Уживајте…

И за крај македонски тоалет – во природа, заклучен, во поранешниот К.Ц. Точка

И последниот – малку фотошоп (инспириран од твитот на @hemicarot , во духот на новите #Ж трендови)