මාධවගේ බ්ලොග් සටහන් | Madhawa's Weblog

"ඔබගේ වෙබ් අඩවියේ ට්‍රැෆික් වැඩි කරගන්නේ කෙසේද?" පළමු සංස්කරණය නිකුත් කෙරේ

noreply@blogger.com (Madhawa Habarakada) — Sat, 04 Feb 2012 00:30:00 +0000

කට්ටියට මතක ඇති මම පොඩි පොත් පිංචක් හදල ඔයගොල්ලන්ට දුන්න "ඔබගේ වෙබ් අඩවියේ ට්‍රැෆික් වැඩි කරගන්නේ කෙසේද?" කියන නමින්. ඒක ඔයාලට ලබාදුන්නේ, මගෙ බ්ලොග් එකේ 2010 අන්තිම ටිකේ ලියපු ලිපි ටිකක තිබුණු අන්තර්ගතය භාවිතා කරලයි. මේ වෙනකොට ඒක 441 වතාවක් කට්ටිය භාගත කරගෙන තිබෙනවා.
ඉතින් ඒකට අදහස් දුන්න කියවපු සමහරක් දෙනා. පොඩි පොඩි අවුල් ටිකකුත් තිබුන කිව්ව. ඉතින් මම මේ දවස් ටිකේ ඒකෙ ඒ තිබ්බ අවුල් ටිකක් හදල අලුත් සංස්කරණයක් ලෙස ඒ පොතම දැන් ඔබ වෙත ලබා දෙනවා.

ලොකු වෙනස්කම් වෙලා නෑ. වෙනත් වෙබ් අඩවි වලට දීල තිබුණු සබැඳි සමහරක් වැඩ කරන්නෙ නෑ කියල තිබුණු නිසා හැම සබැඳියක්ම සමඟ ඒ වෙබ් පිටුවේ ලිපිනය වෙනමම දැම්ම. පොඩි පොඩි වැරදි ටිකක් හා formatting දෝෂ ටිකක් හැදුව. ඉතින් මුල් එක භාගත කරගත්තු අයට ඒකෙ වැඩ කළේ නැති සබැඳි බලාගන්න ඕනෙ නම් මේකත් භාගත කරගන්න.

මේක කියෙව්වෙම නැති අයට ආරාධනා කරනවා කියවල බලන්න. මම හිතනව, ඔබට පුළුවන් වේවි යම් යම් ප්‍රයෝජනවත් දේවල් ටිකක් එකතු කරගන්න.
මේ පොත පිටු 26කින් සමන්විතයි. සරළ සිංහල භාෂාවෙන් තමයි ලියල තියෙන්නෙ.

මේක තියෙන්නෙ PDF ගොනුවක් විදිහට. ඒක RAR Archive එකක් විදිහට මුරපදයක් යොදල ZIP Archive එකක් ඇතුළෙ දාල තියෙන්නෙ. ඒක ඇතුළෙ තියෙන Read Me එකේ මේ ලිපියට සබැඳියක් තිබෙනවා. ගොනුවේ ප්‍රමාණය වෙන්නෙ 1.21MB පමණයි.

මෙන්න බාගන්න ලින්ක් එක.
http://www.mediafire.com/?gn0jzfdb8e1tecr

මුරපදය වෙන්නෙ "madhawaweblog.blogspot". (Double Quotes නැතිව.)

ඉතින් අලුතින්ම මේක කියවන අය, කියවල බලල අදහස් කියන්නකෝ.

මේ වගේම තවත් දේවල් ගැන විස්තර ඇතුළත් තවත් පොත් පිංචක් ඔබ වෙත ඉදිරියේදී ලබාදෙන්න බලාපොරොත්තු වෙනවා. (තාම ලියන්න පටන් ගත්තෙවත් නෑ හොඳේ.)

අලුත් අවුරුද්ද, අලුත් ජොබ් එක, ISO, උපන්දින, තවත් දේ.

noreply@blogger.com (Madhawa Habarakada) — Mon, 30 Jan 2012 05:14:00 +0000

අලුත් අවුරුද්ද ගැන නම් කතා කරන්න හොඳටම පරක්කු වැඩී, ඒත් මොනා කොරන්ඩද, මගෙ මේ මඟුල් කබල් කොම්පියුටරේ එක්ක වැඩක් කරන්න හිතෙන්නෙ නෑ. විනාඩි 5ක වැඩක් කරන්න පැය බාගයක් යනව. පෝස්ට් එකක් ලියන්න ඕනෙ කියල හැමදාම හිතනව, ඒත් මේක දාගත්තම එපා වෙනව, ෆිල්ම් එකක් බලල නිකා ඉන්නව. මේ ලියන්නෙත් නෝට්පෑඩ් එකේ, මේකෙන් කොපි පේස්ට් කරල ගන්නව.

ඉතින් අලුත් අවුරුද්ද කට්ටියට හොඳ ඇති කියල හිතනව. මට නම් පොඩි පොඩි වෙනස්කම් ටිකක් උනා, ඒත් එච්චර දේවල් නෙමෙයි. 2012, ලෝක විනාසෙ වෙනවයි කියන අවුරුද්දනෙ. මමත් එක දවසක් ලෝක විනාසෙ ගැන ලිපියක් ලිව්ව, කට්ටිය කියෙව්වද දන්නෙ නෑ. ඒක හැබැයි ටිකක් වෙන්ඩ scientific එකක් හොඳේ.

පරණ අවුරුද්දෙ අන්තිම මාසෙ 9 වෙනිද, මම ජොබ් එක කරමින් උන් මාග ඉංජිනේරු ආයතනයෙන් ඉවත් වෙලා දෙසැම්බර් 12 වනදා අලුත් තැනක ජොබ් එකට ගියා. පෝස්ට් එක නම් එකමයි, Quality Assurance Executive, තැන Lanka Walltiles PLC. මීපේ තිබෙන ලංකා වෝල් ටයිල් නිෂ්පාදන කර්මාන්ත ශාලාවේ.

යාම් ඊම් නම් හරිම පහසුයි. ගෙදර ඉඳන් 1.2km වගේ. මම එතනම Training හිටපු නිසා මට කිසිම කරදරයක් නැතිව වැඩ ටික නම් අල්ලගන්න පුළුවන් උනා. ඒත් තව මදි. ශිෆ්ට් එකට වැඩ කීවට, ශිෆ්ට් එකට නොවන වෙලාවලුත් තිබෙනව. (6.00 - 14.00 හා 14.00 - 22.00 ශිෆ්ට් දෙක පමණයි.) එතනත් අවුලක්, හිටපු QA executive කෙනෙක් යනව. (ගිය සිකුරාද ඉඳල එයා නිවාඩු දාල නැවතුනා.) තව එක්කෙනෙක්ව ගත්ත ජනවාරි වල. ඒත් ඒ මනුස්සය ටයිල් ගැන කිසිම දෙයක් දන්න කෙනෙක් නෙමෙයි. ඉතින් අද ඉඳල මම හා අලුත් එකා එක ශිෆ්ට් එකේ ඉන්නව, ලොකු ප්‍රශ්න ආවෙ නැති උනොත් එච්චරයි. ඌත් පුරුදු වෙලා, තව supervisor කෙනෙකුත් වැඩට අලුතින් ආවම, මම ශිෆ්ට් එකෙන් නිදහස් වෙනව. එතකොට මගෙ වැඩ වෙන්නෙ ISO වැඩ. (ඒ කිව්වෙ, ෆැක්ටරි එක ISO 9001 හා ISO 14001 තත්ව සහතික ලබාගෙන තිබෙනවා, ඒව පවත්වාගෙන යාමට අදාල වැඩ). කොහොම හරි වැඩේ කරගන්න පුළුවන් වෙයි. :)

ඒ අස්සෙ කොම්පැනියෙන් මාව යැව්ව ට්‍රේනිං එකකටත් "ISO 9001 and Internal Auditing". බලන්න වෙන කොම්පැනි ඕවට කට්ටිය යවන්නෙ ඒ මනුස්සය permanant එහෙම උනාට පස්සෙ. මේකට ගිහිල්ල මාසයයි යැව්ව ට්‍රේනිං එකකට. :) මේක ගිය සතියෙ SLSI එකේ තිබුනෙ. ඒකෙන් කැම්පස් එකේ Total Quality Management විෂයට ඉගෙනගත්තු අමතක වෙලා ගිය ගොඩක් දේවල් මතක් කරගන්නත්, අලුතින් ගොඩක් දේවල් ඉගෙනගන්නත් පුළුවන් උනා. මමත් දැන් Certified, ISO 9001 Internal Auditor කෙනෙක්. :) හැබැයි එහෙම උනා කියල එක පාරම audit කරන්න යන්න බෑ, observer කෙනෙක් විදිහට audit කිහිපයකට සහභාගි උනාට පස්සෙ තමා මටම audit කිරීමේ හැකියාව ලැබෙන්නෙ.
Quality Mangement පැත්තෙන් ඉස්සරහට යන්න ඕනෙ නම් ඔයාලටත්, SLSI එකේ තිබෙනව ඉතාම හොඳ පාඨමාලා ටිකක්. එක් දින පාඨමාලා, තෙදින, සතියක, සති කිහිපයක, මාස 6ක ඩිප්ලෝමා පාඨමාලාව. මිල ගණං නම් හරියටම මතක නෑ. 3750, 8500, 11500, 50000 වගේ අවට ගණං තමා පිළිවෙලින්.

ඊළඟට, වෝල්ටයිල් එකේ ISO 14001 External Audit (Survelence Audit) එකත් තිබුනෙ ගිය සතියෙ. ඒකටත් මහන්සි උනා. SLSI එකෙන් කට්ටිය ඇවිල්ල Audit කරල බලනව, අපි හරි විදිහට ISO 14001 ක්‍රියාත්මක කරනවද කියල. (ISO 14001 - Environmental Management System - පරිසර කළමණාකරණ පද්ධතිය) ඒකෙත් අවුලක් උනේ නෑ. Minor Nonconformities 3ක් ආව. ඒව හරිගස්සල එයාලට කියන්න ඕනෙ මාස 2ක් ඇතුළත.

ඉතින් මේ හැම වැඩක්ම නිසා ගිය සතිය නම් මාරම බිසී සතියක් උනා.

ඊලඟට, මගෙ උපන්දිනේ පසුගිය 27 වෙනිදට වැටිල තිබුනලුනෙ. :) මට දැන් එතකොට වයස 26ක්ලු. හ්ම්ම්. ටික ටික නාකි වෙනව නේද අපි? :( ඇයි මගෙ හොඳම මිතුරියකගෙ උපන්දිනයකුත් මේ ඊයෙ තිබ්බනෙ. අපේ නිපුසා හෙට්ටිවට්ටගෙ. ;) අන්න එයාටත් සුභ උපන්දිනයක් පතනවා. (මම කතා කොළා, මෙන්න මෙයා කළුතර බෝධිය වඳින්න යනවලු, කොහෙන් ගියාද දන්නෙ නෑ, සිග්නල් තිබුනෙම නෑ. :( සාමාන්‍යයෙන් නම් හොරණ හරහා ගියොත් සිග්නල් නැති තැන් නම් තියෙන්න විදිහක් නෑ. :D )

මම කරගෙන ආපු "Photography සිංහලෙන්" වෙබ් අඩවිය තාක්ෂණික ප්‍රශ්න ටිකක් නිසා වසා දැමුනා. නමුත් අලුත්ම අදහස් ටිකක් හා, අලුත්ම දේවල් ටිකක් එක්ක, අලුත්ම අඩවියක් මේ දවස් වල හදමින් ඉන්නව PhotographyLK නමින්. ඒකෙත් වැඩ ගොඩක් තියෙනව. මාර්තු මාසෙ වගේ දියත් කරන්න තමයි අදහස් කරගෙන ඉන්නෙ.

වැදගත්ම දෙයක් කියන්න තියාගත්ත අන්තිමට. මගෙ ආදරවන්තිය මාළිගාගෙ Research Project එක ගැන ගිය සතියෙ විදුසර (25 වනදා) පත්‍රයේ පිටු බාගයක ලිපියක් ගියා. (පත්තරේ තියෙනව නම් බලන්න, අන්තිම පිටුවෙ (පිට පැත්තෙ) පහළ ලිපිය) ඒ ගැන හරිම සතුටුයි. ලොකු ජයක් ඒක. එයා ඒක International Journal එකකටත් යවල තියෙන්නෙ, ගිය සතියෙ corrections කරන්න ඕනෙ කරන තැන් කියල ආපහු එවල තිබුන, ඒකත් බොහෝවිට පළ වන්නට ඉඩ තිබෙනවා. ඒත් මේකටත් වඩා විදුසර පත්‍රයේ ලිපියයි වැදගත්, මොකද සාමාන්‍ය මිනිස්සු අතරට ගෙනියන්න පුළුවන් ඒකනෙ.
ඒගොල්ලන්ගෙ Convocation එකත් ලබන සතියට යෙදිල තියෙනව. (පෙබරවාරි 7) ඒ දවස තවත් විශේෂයි, එයාගෙ උපන්දිනේ. ලස්සන උපන්දින තෑග්ගක් වගේ. <3

ඔන්න ඕව ගැන තමා බ්ලොගෝලය පැත්තෙ මම ආපු නැති කාලෙ මට සිද්ද වෙච්ච විශේෂ දේවල්. මම ආපු නැති කාලේ එක එක දේවල් මේ පැත්තෙන් වෙලා තිබ්බ කියල වටින් ගොඩින් ආරංචි ආව. බලන්න ඕනෙ ටිකක් වටේ ඇවිදල. කොහෙද, වෙලාව තිබ්බත්, මේ මඟුල් මැසිම එක්ක වැඩ කරන්න හරිම අමාරුයිනෙ.
ඉතින් දැනට නවතින්නම්.
බ්ලොගෝලයේ ඉන්න සියළුම සහෝදර සහෝදරියන්ට ජයග්‍රාහී නව වසරක් ප්‍රර්ථනා කරනව. (පරක්කු උනු එක ගැන සමාවෙන්ට. )

ඔබගේ බ්ලොග් එකේ ට්‍රැෆික් වැඩි කරගන්න වසර අවසානය යොදාගන්නේ කොහොමද?

noreply@blogger.com (Madhawa Habarakada) — Tue, 27 Dec 2011 15:40:00 +0000

මේ වසර අවසාන නිවාඩුවෙ, ඔබ මොන ආකාරයේ බ්ලොග් ලියන්නෙක් වෙන්නද හිතන් ඉන්නෙ?

තමන්ගෙ බ්ලොග් එක තව ටිකක් වැඩි දියුණු කරගන්න හිතාගෙන ඉන්නවද, නැත්තම් බඩ පැලෙන්න කනවද? :D

Image Today අතුරු කතා සහ අවාසනාවට ඇත්ත කතාව

noreply@blogger.com (Madhawa Habarakada) — Sat, 17 Dec 2011 00:30:00 +0000

දැන් නම් කට්ටියට අමතකද දන්නෙත් නෑ, මෙහෙම එකකට අපි ගියා කියල. (තව බ්ලොග් ලියන පිස්සො ටිකකුත් සෙට් උනා කියල මම කිව්වෙ.)
අවාසනාවට ඇත්ත කතාවක් කිව්වට මේක සතුටුදායක විදිහට අවසන් නම් උනා. මැද ටික විතරයි අවාසනාවන්ත. :D
මම ඉස්සෙල්ල කිව්වනෙ Image Today Exhibition එකට ගිය එක ගැන. ඒක කියෙව්ව නේද? නැත්තම් දැන්මම කියවල එන්න.

එක තැනකදි දැක්ක, අපි ෆොටෝ එකක් දුන්නොත් එයාල කැලැන්ඩර් එකක් ප්‍රින්ට් කරල දෙනව කියල. නොදොවකින්. මුලින් දන්නව නම් හොඳ ෆොටෝ ටිකක් පෙන් එකටවත් දාගෙන එනවනෙ. :( මම පෙන් එකත් සාක්කුවෙ දාගෙන ඒත් වැඩක් වෙන එකක් නෑ කියල ආපහු තියල ආවනෙ. සන්ජය කියනව අපි දෙන්න එකට ඉඳල එකක් අරගෙන ප්‍රින්ට් කරල කෙල්ලන්ට දෙමු කියල. :D :D එහෙම කොරල අල කන්ඩද. මම කීව ඒක හරියන්නෙ නෑ කියල. මම ශොප් එකේ එකාටත් කීවෙ කෙල්ලත් එක්ක ආව නම් දෙන්නගෙ ෆොටෝ එකක් දාගන්න තිබ්බනෙ කියල. :(

ඊට පස්සෙ ඉතින් බැලුව ෆෝන් එකේ තියෙන ෆොටෝ වලින් මොකුත් කරගන්න බැරි වෙයිද කියල. මගෙ ෆෝන් එකේ තිබ්බ ෆොටෝ වලින් එකක් තෝරගත්ත. අරූගෙ ෆෝන් එකෙත් තිබ්බ ෆොටෝ එකක් තෝරගත්ත. ඉතින් ඒකත් මගෙ ෆෝන් එකටම දාගෙන ගියා අතනට ආපහු. අනේ මූ කියපි microsd card බෑ කියල. කොරහන්කො, ඉතින් මොකෝ කරන්නෙ. ඉතින් මගෙ ෆෝන් එකේ තියෙන ෆොටෝ ටික අරූගෙ කැමරාවෙ කාඩ් එකට ගන්න ක්‍රමයක් හොය හොය මුලු ප්‍රදර්ශනේ වටේම ඇවිද්ද. ලැප්ටොප් තියෙන හැමතැනින්ම ඇහුව. (කැමරාවෙ කාඩ් එක SD එකක්නෙ, ඒක අතන රිඩර් එකෙන් රිඩ් කළෑකිනෙ.)

ඕව හොයන් යන අස්සෙ, Model shoot දෙකටම අරූ සෙට් උනා. (ඉස්සෙල්ල පෝස්ට් එකේ මොඩ්ල්ස්ලගෙ ෆොටෝ ටිකක් මම දැම්ම. ඒ මගෙ මිත්‍රයගෙ වැඩ තමයි. දැක්කෙ නැත්තම් ගිහිල්ල බලන්නකො.)
මිලින්ද වීරසේකර අය්යවත් සෙට් වෙලා එයත් එක්කත් කතා කර කර හිටිය ටිකක්. ඒ අස්සෙ මම ලැප් එකක් ගන්නට තියෙන ඕනෙකම ගැනත් එයාට කීව. (එයා වැඩ කරන්නෙ HP, Apple Official Dealer වන DMS එකේ.) බජට් එක පොඩී නම් Unity එකෙන් ගන්නය කියල. Laptop.lk එකත් හොඳයි කිව්ව එකම කෙනා. එහෙම අරගෙන DMS එකේ Care Pack එක දාගන්නය කීව (අවුරුදු 3නේ වොරන්ටියට රු.15,000යි).
තවත් ඉතාම වැදගත් දෙයකුත් කිව්ව. Unity එකේ තියෙන ගොඩක් ලැප් Asian Region එකට හදපුව නෙමෙයිලු. ඉතින් මෙහෙ ඒවට spare parts නෑලු හරියට. අනිත් එක Climate වෙනස නිසා හුඟක් ලැප් අවුල් යනවලු. ඉතින් හිතාගන්න පුළුවන් නේද ඇයි මේ කට්ටිය HP ලැප් හොඳ නෑ කියල කියන්නෙ කියල. ඉතින් ගන්නකොට ටිකක් පරිස්සමින් ගන්න කීව. Middle East Region එකට හදන ලැප් ගොඩක් තියෙනවලු Unity එකේ. අන්න ඒවයින් බොහොමයක් මොඩල් වලට spares මෙහෙට එවන්නෙම නෑලු. ඉතින් එහෙම එකක් සෙට් වෙලා ඒකට කෙල උනොත්, කෙලාම තමා. :(

හරි හරි, ආපහු කතාවට. ඉතින් මම කීවනෙ අපි හැමතැනම ගියා කියල ෆෝන් එකේ තියෙන ෆොටෝ ටික SD card එකට ගන්න ක්‍රමයක් හොය හොය. හම්බුනේම නෑ, හවස 4.30 විතර වෙනකොට දෙන්නට හොඳටම හෙම්බත්. වැඩේ අතාරින්නත් හිතුන. අපේ දිනේශ් සහෝගෙත් ලැප මැරිල, චාජරෙත් නෑ. ඌ කීව බොරැල්ලට ගිහිල්ල කරගෙන වරෙන්කො කියල. අලුත් බලාපොරොත්තුවක්. අපි ඉතින් එලියට ආව. පස්සෙ කල්පනා කරල වැඩි ෂුවර් එකටත් එක්ක බම්බලපිටියට ගියා. ගිහිල්ල communications දෙක තුනකින් ඇහුව, ම්හ්. :( ඊට පස්සෙ මොකෝ කළේ, අපිට කරගන්නම ඕනෙනෙ. MC එකේ කඩේකට ගිහිල්ල MicroSD Card Reader එකක් සල්ලි වලටම ගත්ත රු.150ක් දීල.

ඉතින් ඕකත් අරගෙන උඩ පැන පැන ආපහු BMICH ඇවිල්ල මගෙ ෆෝන් එකේ කාඩ් එක අරකට ගහල අර ස්ටෝල් එකේ එකාට දුන්න.

හරිම සතුටුයි කියන්න, මගෙ කාඩ් එකේ මොකාක් හරි අවුලක්, මැෂින් එකෙන් ගන්නෙ නෑ. ඉතින් මොකෝ කරන්නෙ. ඔන්න මේ යකා කාඩ් එක රීඩර් එකෙන් ගලවල උගෙ කාඩ් රීඩර් එකට ගැහුවනෙ.

අපි දෙන්නට නේද, පස්ට හැපී, කාඩ් එක රීඩ් කරගන්න පුළුවන් නිසා නෙමෙයි, දෙන්නට දෙපැත්තෙ ඉඳන් අරූගෙ කණ් දෙක රත් කරන්න හිතුන නිසා. ඇයි දෙය්යනේ, මූ ඉස්සෙල්ල MicroSD රීඩ් කරන්න බෑ කීව නිසානෙ අපි පැය ගාණක් කකුල් කඩෙත්තුව හැදෙනකම් එහෙට මෙහෙට ඇවිද්දෙ. :(

ඊට පස්සෙ හරි ගියෙ නැති තැන තවත් එකක් මතක් උනා, දුක කියන්නෙ ඕක ඉස්සෙල්ල මතක් උනේ නෑනෙ. සන්ජයගෙ ෆෝන් එකේ තිබ්බෙ MiniSD එකක්. ඒකට ආපහු ෆයිල් ටික දැම්ම, ඒක රීඩර් එකට දාල ෆොටෝ ටික මැෂිමට ගත්ත.

ආපහු ශෝක්. උන්ගෙ කැලැන්ඩර් එකේ PSD එක නෑ. ඉතින් පුළුවන් Portrait විදිහට විතරයි, අපි දෙන්න දුන්න ෆොටෝ දෙක landscape. ඉතින් මොකෝ කොරන්නෙ, තව ෆොටෝ දෙකක් අමාරුවෙන් හොයල දාල දුන්න. යන්තම් ඔන්න එකා කැලැන්ඩර් දෙක ගාණෙ ප්‍රින්ට් කරගත්ත. (එකකට 150/=යි. )
ඉතින් ඔහොම මහන්සි වෙලා ලැබුනු ප්‍රථිපලේ තමා මෙන්න මේ පහල තියෙන්නෙ.

සයිස් එක අඟල් 13*19යි.

ඒ වෙනකොට වෙලාව හවස 5.30ත් වෙලා. ඊට පස්සෙ කෙලින්ම ගෙදර එන්න පිටත් උනා.

මම ගෙදර එනකොට රෑ 7.30 විතර උනා. එවෙලෙම ලියන්න හිතුනත්, මහන්සි නිසා බෑ කියල හිතුව.

ඔන්න ඔහොමයි උනේ. ඔන්න ඔහොමයි අච්චර දුක් විඳල අන්තිමට කතාවට ලස්සන අවසානයක් දුන්නෙ. :)

Photo-Talk Photography Workshop එකට සහභාගි වෙන්නෙ නැද්ද?

noreply@blogger.com (Madhawa Habarakada) — Sat, 10 Dec 2011 00:30:00 +0000

[රූසර බ්ලොග් අඩවියෙහි පබ්ලිශ් කළ ලිපියේ පිටපතකි.]

මතකයිනෙ ඉස්සෙල්ල ලිපියෙන් ආරංචියක් දුන්න ඔය මාතෘකාවෙ තියෙනව වගේ එකක් ගැන?

ඉතින් මේක ඇත්තටම සහභගි වෙන්නෙ නැති අයටයි.

මම පොඩි වැඩක් කළා, දැනට සාර්ථකයි, හෙටත් සාර්ථක වේවා කියල පතනවා.

ලයිව් ස්ට්‍රීමිං එකක්. එක එක වෙලාවට මම මගෙ ෆෝන් එකෙන් වැඩසටහනේ තැන් ලයිව් ස්ට්‍රීම් කරන්න හිතන් ඉන්නව.

මේ තියෙන්නෙ මගෙ ලයිව් ස්ට්‍රීම් එක ඔයාලට බලාගන්න පුළුවන් ලින්ක් එක.

http://madhawalivestream.blogspot.com/

ෆෝන් එකෙ පාවිච්චි කරන සොෆ්ට්වෙයා එක මීට ඉස්සෙල්ල නම් ඔහොම ඕනිම වෙලාවට පිස්සු කෙලල තියෙනව, වාසනාවන්ත විදිහට එහෙම නැති උනොත් ඔයාලට මෙතන බලාගන්න පුළුවන් වෙයි මම ස්ට්‍රීම් කරන විඩියෝ. එකක් ඉවර උනු ගමන් ඒක මගෙ මුහුණුපොත බිත්තියටත්, යූටියුබයටත් පබ්ලිශ් කරනවා.

ඉතින් එන අයව දකින්න ආසාවෙන් සිටිනාතර එන්නෙ නැති අයට මේක යම් ප්‍රයෝජනයක් වෙයි කියල හිතනව. (මම කිව්ව අවාසනාවන්ත දේ උනේ නැත්තම්. ;) )

ඔබ කුමක් හෝ උගත යුතුයි

noreply@blogger.com (Madhawa Habarakada) — Sun, 04 Dec 2011 00:30:00 +0000

මම පොඩි දෙයක් ගැන පහුගිය ටිකේ හිතුව. ඡායාරූපකරණය ගැන හා Photoshop වැනි මෘදුකාංග හරහා Graphic Design ඉගෙන ගත යුතුයි කියල. (චුට්ටක් දන්නව, නමුත් දන්න තරම හොඳටම මදි.)

ඇයි?

මොකද, මේ දේවල් ගැන තිබෙන ඉල්ලුම ඉතා වැඩියි. ඉතින් තමුන් වැඩි දෙයක් දැනගෙන ඉන්නව නම් තමුන්ට තිබෙන හැකියාවෙන් ප්‍රයෝජන ගන්න පුළුවන්. තමුන්ට තරඟයක් දෙන්න ඉන්නකට්ටියත් අඩු වෙනවා.

ඉතින් ඒකයි මම මේ දේවල් ගැන ඉගෙනගන්න පටන් ගත්තෙ. මම අන්තර්ජාලය තුළින් ගොඩක් පොත් හා විඩියෝ tutorials එකතුකරගත්ත. පසුගිය කාලයේ තිබුනු ඡායාරූපකරණය ගැන තිබුණු ප්‍රදර්ශන වලට ගිහිල්ලත් යම් යම් දැනුමක් එකතු කරගත්ත. ඉතින් දැන් මේව ටික ටික මම බලනව.

ඒක ඉතා සාර්ථකයි, නමුත් තව ගොඩක් දේවල් තිබෙනව බලන්න. ඉතින් මේ හරහා රැකියා අවස්ථාවකුත් කරගන්න පුළුවන් නේද කියල මට හිතුන.

ඉතින් මේ දේවල් එක්ක මම එක් නිගමනයකට ආව, යමෙක්ට සාර්ථකත්වයට යන්න ඕනෙ නම් ඔහුට/ඇයට, යම් විෂයක් සම්බන්ධයෙන් ඉගෙනගත යුතුයි කියන එක. ඒ කියන්නෙ ඔබ මොකක් හරි ප්‍රයෝජනවත් දෙයක් උගත යුතුයි. අන් අය අගය කරන හා අන් අයටත් ප්‍රයෝජනයක් ගත හැකි දෙයක්.

උදාහරණ ගමු.

නිකම්ම වෙබ් අඩවියක් හදන්න, බ්ලොග් පෝස්ට් එකක් ලියන්න පුළුවන් උනාට හරියන්නෙ නෑ. ඒ ගැන හොඳින් හදාරා ඒ විෂය සම්බන්ධයෙන් හොඳ න්‍යායාත්මක වගේම ප්‍රායෝගික දෙනුමක් එකතු කරගත යුතුයි. එහෙම කරනකම් ඒ දැනුම මූල්‍යමය වටිනාකමක් එක් කරන එකක් වෙන්නෙ නෑ.

වෙබ් ඩිසයින් ගැන ගත්තොත්, HTML, CSS ඉගෙන ගැනීම නෙමෙයි වෙබ් ඩිසයින් කියන්නෙ. typography, design patterns, color combinations, JavaScript සම තවත් ගොඩක් දේවල් ඉගෙන ගැනීමයි. ඒව හැම එකක්ම හොඳින් ඉගෙන ගත්තම ඔන්න ඔබේ අතේ තියෙනව මූල්‍ය වටිනාකමක් තිබෙන දැනුමක්.

අපි ගමු අපේ බ්ලොග් ලියන්නන්, බ්ලොග් ලියන්නන් බොහොමයකට ලිවීමේ හැකියාව මොනවට පිහිටල තිබෙනව. තාක්ෂණික දෙයක්ද, කතන්දරයක්ද, ඉතාම සිත් ඇදගන්නා විදිහට ලියන්න පුළුවන් අය ගොඩාක් ඉන්නව.

ඉතින් ඔබ ලියන්න කැමති නම්, ඒකෙන් කියවෙන්නෙ නෑ අරම සිත් ඇදගන්නා බ්ලොග් ලිපියක් ලිවීමම ප්‍රමාණවත් කියල. මුලින්ම ඔබ තීරණය කළ යුතුයි ඔබ ලියන්නෙ මොනව ගැනද කියල. (උදා: විහිළු කතා, බ්ලොග් ලිවීම ගැන, ඉලෙක්ට්‍රොනික තාක්ෂණය ගැන. 2D/3D Modeling ගැන ) ඊට පස්සෙ ඔබ කළ යුත්තේ ඒ දේ ගැන හොඳ දැනුමක් එකතු කරගන්න එක, හොඳින් ඒක ඉගෙනගන්න එක. පොත් පත් කියවල, වෙබ් අඩවි පීරල, tutorials බලල, යම් පාඨමාලාවක් හදාරල, ඒ දැනුම එකතු කරගන්න පුළුවන්. ඒත් එක්කම ඒක ඉතා හොඳින් පුහුණු වීමත් වැදගත්.

ඉතින් අවසානව කියන්නෙ,ඔබට යමක් අවශ්‍ය නම් ඒකට යන්න උත්සාහ කළ යුතුයි. ඔබට ආඩම්බර විය හැකි, දැකිය දැනිය හැකි, අන් අයගේ ප්‍රශංසාවට භාජනය විය හැකි, අන් අයටත් ප්‍රයෝජනවත් වන දෙයක් ඔබට ලබා ගන්න පුළුවන් නම් ඔබ දිනුම්. අන්න ඒකයි සාර්ථකත්වයට මඟ.

ඉතින් ඔබ තාමත් පටන් ගත්තෙ නැත්තම්, ඇයි තවත් බලා ඉන්නෙ???

හොඳම බ්ලොගර් ටෙම්ප්ලේට් ලැයිස්තුවක් - with JQuery and Slideshow

noreply@blogger.com (Madhawa Habarakada) — Thu, 01 Dec 2011 09:19:00 +0000

මම ඉස්සෙල්ල ලිපියක කීවනෙ බ්ලොග් එකේ තීම් එක ලස්සනට තියෙනකොට බ්ලොග් එකට එන පිරිස වැඩි වෙනවා කියල.

ඒකට හේතුව මොකද්ද?

ලස්සනට පිළිවෙළට තියෙන බ්ලොග් එකකට එන්න කට්ටිය කැමතියි. එක එක මඟුල් එල්ලල තියෙන, වෛවරණ, ඇහැට අමාරු බ්ලොග් වලට එන්න මිනිස්සු කැමති නෑ. ඉතින් සරළ ලස්සන පිළිවෙලකට තියෙන තීම් එකක් බ්ලොග් එකට දාගන්න පුළුවන් නම් ඔබට ඒක හරහාත් හොඳ විශ්වාසවන්ත කියවන්නන් ප්‍රමාණයක් එකතු කරගන්න පුළුවන්. එන අය කියාවි, "අනේ ඒ බ්ලොග් එක නම් දකින්න ආසයි, ලස්සනට පිළිවෙලට තියෙනව" කියල. කාටද ආඩම්බර? :)

මේ මුලින්ම දෙන්න හදන ටෙම්ප්ප්ලේට් නම් ටිකක් බර ඒව. ඒ කිව්වෙ ලස්සන JQueries සහ Slideshow තිබෙන ඒව ටිකක්. මේවායින් ලස්සන බ්ලොග් එකක් හදාගන්න ඔයාලට පුළුවන්. ඊලඟට දෙන්නම්කො සරළ ටිකක්.

Namisan - Stunning Slider Blogger Template

මේක අලුත්ම jQuery Featured Slideshow එකක් තිබෙන ලස්සන transition effects තිබෙන ටෙම්ප්ලේට් එකක්. මේකෙම ගැජට් ගොඩකුත් තිබෙනවා. Right Side Bar එකක් තිබෙන කොලම් දෙකක ටෙම්ප්ලේට් එකක් තමයි මේක.

Ocenolis Magazine - Advanced Blogger Template

වර්ණවත් ටෙම්ප්ලේට් එකක් වෙන මේක, දකුණු පස side bars දෙකක් තiිබෙන කොලම් තුනක ටෙම්ප්ලේට් එකක්. ක්ලික් කරනකොට රොටේට් වෙන Featured slider එකකුත් තිබෙනවා.

Nyke - Magazine Blogger Template

දකුණු පස සයිඩ් බාර් එකක් තිබෙන මේ මැගසින් ටෙම්ප්ලේට් එකේ ආවේණික slideshow එකක් තිබෙනවා.

Floor - jQuery Rich Blogger Template

මේකත් නියමම ටෙම්ප්ලේට් එකක්. අඳුරු වර්ණයක් සහිත මේ ටෙම්ප්ලේට් එකේ ලස්සන මෙනු එකක් එහෙම තිබෙනවා.

Game Madness - Assassins Creed Blogger Template

මේක ඇවිල්ල ගේම් වලටම හදපු තීම් එකක්. උඩ තිබෙන featured slider එක මුළු වෙබ් පිටුවේ හරස් ඉඩ පුරවාගෙන තිබෙනවා. ලස්සන transition effect එකකුත් තිබෙනවා. ඇයි, තව එක එක ගැජට් ගොඩකුත් තියෙනව.

MoonLight - Clean Magazine Blogger Template

මේක ඇවිල්ල ටිකක් සරල තීම් එකක්. ඒත් ලස්සනට පිළිවෙළට තියෙන තීම් එකක් කියල කියන්න පුළුවන්. කොලම් දෙකක් හා දකුණුපස සයිඩ් බාර් එකක් තිබෙන තීම් එකක්.

Simplex Buzz - Full Background Slideshow

මේක නම් අමුතුම ටෙම්ප්ලේට් එකක්. මේකෙ තිබෙන විශේෂෙ තමා, බ්ලොග් එකේ මුළු පසුබිමම slideshow එකක්. ඒත් එක්කම මේකෙ, තව අමතර featured posts section එකකුත් කොලම් දෙකක ඩිසයින් එකකුත් තිබෙන්නෙ.

Oracle - Advanced Magazine Blogger Template

මේකත් මැගසින් ටෙම්ප්ලේට් එකක්. වම් පස තමයි සයිඩ් බාර් එක තිබෙන්නෙ. Slideshow එකේ ෆේඩ් වෙලා යන effect එකක් තමයි තිබෙන්නෙ.

Extreme - Portfolio Magazine Blogger Template

මේක ඇවිල්ල Portfolio Template එකක්. නමුත් බ්ලොග් එකකට හොඳයි. Featured Postsඳාතර scroll කරගෙන බලාගෙන යන්න පුළුවන්. වෙනමම categories section එකකුත් තිබෙනවා. කොලම් දෙකක ටෙම්ප්ලේට් එකක් මේක.

Superb - Advanced Blogger Template

මේකෙ ලස්සන අමුතුම නියම Featured Slider එකක් තියෙන්නෙ. Slides එක උඩ එක තියල හරහට එහා මෙහා කරන්න පුළුවන් වෙන්න වගේ. තව එක එක වැඩ කෑලි තියෙන මේ ටෙම්ප්ලේට් එක කොලම් දෙකක ටෙම්ප්ලේට් එකක්.

Modern Photography - Abstract Style Template

Photography Portfolio එකක් කරන්න හොඳ මේ ටෙම්ප්ලේට් එකෙත් ලස්සන ලොකු featured slideshow එකක් තිබෙනවා. Slider එක ඉබේම හා මවුසය මගින් වෙනස් කරන්න පුළුවන්. මේකත් කොලම් දෙකක් හා දකුණුපස side bar එකක් තිබෙන ටෙම්ප්ලේට් එකක්.

Calenotis - Photographers Magazine Blogger Template

තවත් මැගසින් තීම් එකක්. full width Featured Slider Slideshow එක ත්‍රිමාණ ගතියක් තියෙන එකක්. විවිධ transitions වලට slider එක ඉබේම scroll වෙනවා. මේක Professional Magazine design එකක් තිබෙන කොලම් දෙකක ටෙම්ප්ලේට් එකක්.

Magulesco -Featured Magazine Blogger Template

මේකත් සරළ නමුත් professional තීම් එකක්. මේකෙ slider එකත් ලස්සනයි. කොලම් දෙකක මැගසින් තීම් එකක් තමයි මේක.

Dimenzion - 3D Style Blogger Template

classic featured slider එකක් තියෙන මේ ටෙම්ප්ලේට් එකේ featured posts ලැයිස්තුව තිබෙන්නෙ දකුණු පසින්. කැපී පෙනෙන වර්ණ තිබෙන මේ ටෙම්ප්ලේට් එක කොලම් දෙකක එකක්.

Glow - Free Premium Blogger Template

මේකෙ slider එකේ පැත්තෙන් slider එකේ තියෙන ඒව thumbnails වගේ පෙන්නනව. ලස්සන, කොලම් දෙකක මැගසින් ස්ටයිල් එකක් තියෙන මේ ටෙම්ප්ලේට් එකේ side bar එක තිබෙන්නෙ දකුණු පසින්.

Mahasoli Tribune - Magazine Blogger Template

තවත් ලස්සන මැගසින් තීම් එකක්. මේකෙත් slider එක, එක මත එක තියල තියෙනව වගේ පේන්නෙ. රූපයත් එක්ක විස්තරයකුත් තිබෙනව. ක්ලික් කළ ගමන් ඒක ඕපන් වෙනව. දකුණුපසින් side bar එක තිබෙන මේ තීම් එක කොලම් දෙකක එකක්.

ඔයාලට හිතට අල්ලන හොඳ ටෙම්ප්ලේට් ටිකක් මෙතන තියේවි අනිවාර්යයෙන්ම. තවත් ලස්සන ටෙම්ප්ලේට් ටිකක් එක්ක ඉදිරියේදී හමුවෙමු.

"ඔබගේ වෙබ් අඩවියේ ට්‍රැෆික් වැඩි කරගන්නේ කෙසේද?" EBook එක තාමත් භාගත කරගන්නෙ නැත්තම් දැන්මම බාගන්න. ඒක ඔයාලට හුඟක්ම ප්‍රයෝජනවත් වේවි කියල මම හිතනවා.

මේ බ්ලොග් අඩවියේ ලිපි ඔබගේ ඊමේල් ගිණුමට කෙලින්ම ලබාගන්න මගේ RSS Feed එකට එකතු වෙලා නැතිනම්, ඒකත් දැන්මම කරගන්න. පහළ text box එකට ඔයාගෙ ඊමේල් ලිපිනය දෙන්න.

හිත ඇදිල යන මාතෘකාවක් ලිපියට දාන්නෙ කොහොමද

noreply@blogger.com (Madhawa Habarakada) — Mon, 28 Nov 2011 06:26:00 +0000

අපේ බ්ලොග් කියවන්නො හුඟක් අය කාර්යබහුලයි ගොඩක්. බ්ලොග් එකක් දෙකක් කියවන්න එන්න වෙලව හොයාගන්නෙත් සමහරු අමාරුවෙන්.

ඉතින් ඔබටත් ඒ අයගේ අවධානය ගන්න තරඟ කරන්න වෙලා.

එහෙම නිකම්ම කරන්න බෑනෙ. ඉතින් ඔබට සිද්ධ වෙනව කියවන්නන්ගේ අවධානය දිනාගන්න වැඩ කරන්න. ඒක කරන්න මුලින්ම ඔයා කරන්න ඕනෙ හිත ඇදිල යන, ඇහැ ඇදිල යන මාතෘකාවක් ඔයාගෙ ලිපියට යොදන එකයි.

මාතෘකාව තියුණු විය යුතුයි. කියවන්නාට කුතුහලයක් සමඟ ලිපිය මොකද්ද කියල බලන්න හිතෙන එකක් විය යුතුයි.

ඉතින් කොහොමද එහෙම ඒව ලියන්නෙ?

මගෙ බ්ලොග් එකේ පහුගිය කාලෙ ලිව්ව ලිපි වලින් ජනප්‍රියම උනු, වැඩිම පිරිසක් බලපු ලිපි කිහිපයක් ගන්නම්.

ඔබගේ වෙබ් අඩවියේ TRAFFIC වැඩිකරගන්නේ කෙසේද?" පොත භාගත කරගන්න

පොත් ප්‍රදර්ශනෙන් පොත් තෝරන්න මගෙනුත් උදව්වක්

ඔබත් තරබාරුකමින් දුක් විඳිනවාද?

ශරීර බර සාමාන්‍ය මට්ටමට වැඩි කර ගැනීම සඳහා උපදෙස්

ඔබගේ වෙබ් අඩවියයේ Traffic වැඩි කරගන්නේ කොහොමද?

කියවන්නෝ ඇත කොමෙන්ට් කරන්නෝ නැත

ඔබ මොන වර්ගයේ බ්ලොග්කරුවෙක්ද? (සිතිවිලි පවුරේ මම ලිව් ලිපියක්)

බ්ලොග් අවකාශයේ ඉතාම ජනප්‍රිය උනු බ්ලොග් වල ඉතාම ජනප්‍රිය උනු ලිපි වල මීට වඩා ගොඩක් ප්‍රභල මාතෘකා තිබෙනවා. මම ඉතින් ගත්තෙ මගෙ චුට්ටි බ්ලොග් එකේ ලිපි ටිකක් තමා උදාහරණෙට. :)

"උදව්වක්", ප්‍රශ්නයක් තිබෙන මාතෘකාවක්, "කොහොමද?", "භාගත කරගන්න" වගේ දේවල් මේ මාතෘකා වල තිබෙනවා පේනවද?

මේ වගේ මාතෘකා වලින් යම් දෙයක් කියවන්නාට දෙන්නට උත්සහ කරනව කියල ඔබට තේරෙනව ඇති. තවත් උදාහරණ මාතෘකා කිව්වොත්, "ඔබගේ ජංගම දුරකථනය සොරුන්ගෙන් රැකගන්නේ කොහොමද", "පසුගිය වසරේ ජනප්‍රියම වෙබ් අඩවි 10" වගේ ඒව ගත්තැකි.

ලිපියේ මාතෘකාව කෙලින්ම පැවසිය යුතුයි මොනවද මේ ලිපියෙ තිබෙන්නෙ කියල. එතකොට කියවන්නන්ට තීරණයක් ගන්න පුළුවන්, මේ තියෙන දේ අපිට වැදගත්ද, අපි මේක කියවිය යුතුද කියල.

ලිපිය කියවන්නන්ට අදාලද කියල හිතල බලන්න. සමාජයේ පවතින ප්‍රශ්නයක්, ගැටළුවක් අරගන්න. ඒකට උත්තර හොයන්න, ලිපියක් ලියන්න. ලේසියෙන් තේරුම් ගන්න පුළුවන්, පහසුවෙන් කරන්න පුළුවන්, "මේක කරන්නෙ කොහොමද" ආකාරයේ ලිපියක් ලියන්න.

උදා: "සාර්ථක බ්ලොග් අඩවියක් පවත්වාගෙන යන්නේ කෙසේද. පියවරෙන් පියවර සරළව", "ඔබේ බ්ලොග් අඩවියේ ට්‍රැෆික් වැඩි කරගන්නේ කෙසේද"

ඔබ කිව්ව දේ ලබා දෙන්න

මම දැකල තිබෙනව සමහරු මෙන්න මේක කරන්නෙ නෑ. පෝස්ට් එකේ මාතෘකාව තියෙන්නෙ එකක්. ඇතුළෙ තියෙන්නෙ වෙන එකක්. ඒකෙන් වෙන්නෙ කියවන්නාගේ විශ්වාසය පලුදු වෙන එක. එන අයට තේරෙන්නෙ එකකොට, "මෙයා මේ බොරුවට ලස්සනට මාතෘකාවක් දාල අපිව බොරුවට අද්දගන්නව" කියලයි. ඒක කරන්නෙපා කවදාවත්.

ඔබ දෙයක් කිව්ව නම් ඒක උපරිමයෙන් දෙන්න, උඩින් දුවල නෙමෙයි, පිළිවෙළට ප්‍රමාණාත්මකව, උපරිමයෙන්.

---------------------------------------------------------------------

"Image Today" බලන්නට ගියෙමි සහ තවත් කතා

noreply@blogger.com (Madhawa Habarakada) — Tue, 08 Nov 2011 10:52:00 +0000

ලිපිය ලියන්න පරක්කු උනේ ඒව මේව ටිකක් සපයගන්න පරක්කු උන නිසයි. (තවත් දේවල් ටිකක් ලැබුනෙ නැති නිසා අද ලිපිය දානව කියල හිතුව.)
"මි" කිව්වට "මු" වෙන්න ඕනෙ හරි නම්. මොකද මම තනියම ඇතුළට ගියාට ඇතුලෙදි තව සෙට් එකක් සෙට් උනා නෙව.

හරි. "Image Today" කියල කියන්නෙ, පසුගිය සති අන්තයේ, BMICH එකේ පැවති ඡායාරූපකරණය සම්බන්ධ ප්‍රදර්ශනයක්. ඒකෙ තිබුනෙ ඡායාරූපකරණයට සම්බන්ධ වෙන ගොඩක් දේවල්. කඩ තමා වැඩිපුරම තිබුනෙ.

හරි කියන්නම්කො විස්තර.

මේකෙ තිබුන, කැමරා හා උපකරණ විකිණීමට, ඕඩර් කිරීමට. Fuji, Canon, Nikon, Olympus, Kodak, Benq වගේ ප්‍රසිද්ධ කැමරා මාදිලි.

ඡායාරූප මුද්‍රණය සම්බන්ධ මුද්‍රණ යන්ත්‍ර හා වෙනත් මුද්‍රණ යන්ත්‍ර, තීන්ත, කඩදාසි වගේ හැම දෙයක්ම මිලට ගන්න, බලන්න, ඕඩර් කරන්න පුළුවන්කම තිබුන.

මංගල උත්සව සම්බන්ධ දේවල්. ඇල්බම් හදන කට්ටිය, ඇල්බම් හදන උපකරණ, විඩියෝ හදන කට්ටිය, වීඩියෝ හදන්න පුළුවන් මෘදුකාංග, සඟරා...

ඡායාරූපකරණය සම්බන්ධ පොත්, සඟරා. (මේ පොත් නම් ඔක්කොම ඉංග්‍රීසි, පට්ට ගණං, සඟරා නම් තිබ්බ)

Lighting Equipment. Flashers, Reflectors, Diffusers, වගේ දේවල්.

ඡායාරූපකරණය සම්බන්ධ පොඩි වැඩමුළුත් තිබුන වෙලාවෙන් වෙලාවට. (අතුල රණරාජා මහතාගේ, ශාක්‍යා ස්ටුඩියෝ එක අයිති නිවේදකයාගේ (මට එයාගෙ නම මතක නෑනෙ. :( ) ) ඉන්ද්‍රනාථ තේනුවර මහත්මයාගෙත් එකක් තිබිල තියෙනව, අපි දැක්කෙ නෑනෙ. :(

ඔක්කොටම වඩා, වැඩිපුරම කට්ටිය සෙට් උනේ Model Shoot එකට. Model Shoots දෙකක් තිබුන. එකක් තෙවෙනි ඇසේ කට්ටිය සංවිධානය කරල තිබුනු එකක්. අනිත් එක Heyleys ආයතනයේ FujiFilm stall එකේ තිබ්බ එකක්.

මෙම ඡායාරූප, සන්ජය විපුල අනුග්‍රහයෙනි.

Fuji ආයතනය විසින් අලුතින් කැමරාවකුත් හඳුන්වා දුන්නා. (DSLR එකක්ද කොහෙද, මම හරියටම දැක්කෙ නෑ. කීවෙ, ඒක Professional හෝ Advanced Amateur දෙගොල්ලන්ටම ගැලපෙන එකක් කියල. රු. 75,000 කැමරාව හඳුන්වාදීමේ මිල රු. 50,000යි.)

Heyleys stall එකෙන් raffle draw එකකුත් තිබ්බ. (ඒක ගැන නම් මම කතා කරන්නෙ නෑ. :D )

හරි හරි. ඉතින්, මම මුලින්ම යන්න හිටියෙ මගෙ යාලුවෙක් වෙන සන්ජය එක්ක. ඌ තමා මගෙ Photography companion. ෆොටෝ ගහන වැඩක් නම් ඌ එක්ක තමා ගොඩක් වෙලාවට සෙට් වෙන්නෙ. ඉතින් මූ බෑ කීවනෙ. (මම ඉස්සෙල්ල ෆොටෝ ෆෙයා ගිය වෙලාවෙ ෆ්‍රී ටිකට් දෙකක් ගත්තෙත් මූටයි මටයි කියලනෙ.)

ඔය අතරෙ බ්ලොගෝලයෙ යාළුවන්ගෙන් ඇහුවම කවුද එන්නෙ කියල, චාපා, ශිරෝෂි, ගෙහාන් එහෙම එනව කීව. තව කිහිප දෙනෙකුත් එනව කීවලු. ඉතින් උන් නිසාම මම සෙනසුරාද යන්න හිතන් හිටි එක ඉරිදට වෙනස් කළා. වෙලාවත් පොඩ්ඩක් ඉස්සර කරල 11 යන්න හිටි එක 10ට අඩු කළා. මගෙ ලඟ ටිකට් තුනක් තිබුන, දෙකක් ටිකට් කියන්නම පුළුවන් ටිකට්, තෙවැන්න මගෙ ෆෝන් එකට ආපු එස් එම් එස් ටිකට් එක. :) චාපා ඕනෙ කීවනෙ ටිකට් දෙක. ඉතින් සෙනසුරාද ටිකට් දෙක එයාට නොමිලේ වික්ක. ගෙහාන්ට එකක් ඕනෙ කීව, ඒත් ඉතින් පරක්කු වැඩීනෙ එතකොට, ඒත් මම කිව්ව ඇතුළට ගන්නම් කියල. ;)

මම ඉතින් ඔන්න බස් එකේ යනකොට BMICH එකට යන්න, අර මගෙ යාළුව ඔන්න කතා කරනව "උඹට හැමදාම පොල්ල තියන්න බෑනෙ බන්, මම එනව, 11 විතර වෙයි" කියල. ඉතින් මමත් "හා" කීව. ඌ නම් කැමරාවත් අරගෙන කීව එන්නෙ. මම 10ට කොළඹ කැම්පස් එක ගාවින් බැස්සම මෙන්න චාප රිං කොරල. කතා කරල බැලුවම ශිරෝෂි ඇවිල්ලලු. ඉතින් එයාට කතා කරල බැලුවම මෙන්න කැන්ටිමට වෙලා ඉන්නවලු. මම ඉතින් ගිහිල්ල බැලුවම මෙන්න ඉන්නව තව දෙතුන් දෙනෙක් එක්ක. බැලුවම, සිංහයා, ස්කූබි ඩූ, අනේ අනිකගෙ නම තාමත් මතක් වෙන්නෙ නෑ නෙව. :( සොලි හොඳේ.

ඉතින් කොහොම හරි ගියගමන් කිරි පැකට් දානෙකට සෙට් උනා. මමත් ඉතින් වේලිලා උන්නු නිසා පිං දීල බිව්ව. එකෙක්ට නම් මදිත් වෙලා පැකට් එකට වතුර ටිකකුත් දාල බොන්න හැදුව. ;) ඒත් එක්කම දැනගන්න ලැබුන, එයාගෙ ප්‍රියතම ප්‍රශ්නෙ (කවුරුහරි එයාගෙන් අහනවට කැමතිම ප්‍රශ්නෙ) "උඹ කාලද?" කියන එකලු. කිරි පැකට් එකක් බිව්වට දෙක තුනක් විතර වේලෙනකම් බලා හිටිය චාප එනකම්. ආ අමතක උනානෙ, තව එකෙක් කිරි බෝතලයක් අරගෙන ඇවිල්ල ඒක මේසෙ යට හංගගෙන තනියමම බිව්වනෙ. :(

ආ ඔය ඉන්න අතරෙ පිංතූර පෙට්ටියෙ දිනේශ් සහෝදරයවත් සෙට් උනානෙ. :) ඌ නම් කීව 100ක් දීල බලන්න දෙයක් නෑ කියල. :( මට දුකත් හිතුන එහෙම කීවම (මට නම් ඉතින් කොහොමත් ෆ්‍රී නෙ.) ගුටි කන්න වෙයිද කියලත් හිතුන. මොකද මම සන්ජයට කතා ගොඩක් කියල තිබ්බෙ. ඔය අතරෙ ඌට කතා කළාම ඌ කීව අවුලක් නෑ බලමුකො, Model Shoot එකකුත් තියෙනවලු, ඒක නිසා කමක් නෑලු.

ඉතින් ඒක මම අරුන්ටත් කීව, බලමුකො කීව. ඉතින් ටිකට් ගන්නත් එපැයි, ඉතින් මොකෝ කළේ, මම හැමෝටම ෆ්‍රී ටිකට් දුන්න. :D :D :D. මට ආපු මැසේජ් එක හැම එකාටම ෆෝවඩ් කළා. චාපට ටිකට් එකක් දුන්න. ඉස්සෙල්ල දෙකක් ඉල්ලපු එකී මෙන්න එකයිලු ඕනෙ කියනව. ඉතින් අනිත් එක තියාගත්ත, පස්සෙ එනව කිව්ව ගෙහාන්ට. (ඒත් ඉතින් ටිකට් එකකුත් තියාගෙන ඉඳල මූ ආවෙ නෑනෙ. :( නැත්තම් හොරෙන්ම ආවද දන්නෙත් නෑ. :D ) ඔන්න ඉතින් ඊට පස්සෙ අපි කැන්ටිමෙන් පිටත් උනා.

සිරිමාවෝ හෝල් එක ගාවට ආවම මෙන්න තියෙනව එක එක තොරොම්බල් කඩයක්. ඒකෙ හිටපු සර්පයෙක්ට ශිරෝශි බය උනානෙ. මට හරි වෙලාවට ෆොටෝ එක ගන්න බැරි උනා, චුට්ටක් ඉක්මන් උනානෙ. :( ඔක්කොටම වඩා දුක කියන්නෙ ඒ ගත්තු ෆොටෝ එකත් අතුරුදන් වෙලා තියෙන එක. ගෙදර ඇවිල්ල ෆෝන් එකේ බලනකොට ෆොටො එක නෑ. ( ;) )
ඊට පස්සෙ මම ඉතින් ස්කූබි ඩූ ට කිව "අපි බෙදිල යං" කියල. ඊට පස්සෙ මුන් බයේ යම්දෝ නොයම්දෝ කියල. මම ගියා ඇතුළට, sms එක පෙන්නල ගියා. අරුන් sms එක පෙන්නනකොට ඇහුවලු sms එක forward කරගත්තද කියලත්. කොහොම හරි ශේප් වෙලා ආව ඇතුළට. තව පොඩ්ඩෙන් ගුටිත් කනව, ඔය ඉන්දියන් කාරයො ලේසි නෑ. :D

ඇතුළෙ ඉතින් යනකොට සන්ජය කතා කලා ඌ ආව කියල. ඊට පස්සෙ ඌ එක්ක සෙට් උනා. බ්ලොග් කස්ටියගෙන් වෙන් උනා. වෙන් උනා කීවට එක එක වෙලාවට උන්ව සෙට් උනා. :)

ඉතින් අරූ එක්ක වටේම ගියා. බ්ලොග් කස්ටිය නම් 2-3 වගේ වෙලාවක පිටත් වෙලා ගියා, උන් මම එනකම් කන්නත් බලන් හිටියලු, මම ඉතින් සන්ජය එක්ක රවුමේ නෙ. උන්ට කන්න කීව.

ඔන්න ඔය අතරෙ තමා අවාසනාවට ඇත්ත කතාව පටන් ගන්නෙ. :D
අන්න ඒ කතාව ටිකක් දිග නිසා මම ඒක වෙනමම පෝස්ට් එකක් විදිහට දානව. (link එක ක්ලික් කොළාද, තාම ඒ ලිපිය රෙඩි නෑ හලෝ. :) )

ඔය අතරෙ මට තව මිත්‍රයෙක් මුණගැහුනනෙ. මුහුණු පොතේ මිතුරු ධනන්ජ ෂශින්ද ඇල්විටිගල මල්ලි. මිනිහත් තව සෙට් එකක් එක්ක බැහැල හිටියෙ. (බලහන්කො, මූ ගෙදර ආවටත් පස්සෙ කියනව ඉන්ද්‍රනාථ මහත්තය එහෙම හිටිය කියල, එවෙලෙ කීවෙ නෑනෙ. :( මට ඉතින් නේද මුගෙ ඔලුව අතගාන්න හිතුන ටිකක් තදට. දැක්ක නම් කතා කරල එන්නත් තිබ්බ. :(

බලන්නකො මේ පහළ තියෙන්නෙ ප්‍රදර්ශනේ තුළ මම ගත්තු ෆොටෝ හා විඩියෝ ටිකක්.

මේ ඉන්නෙ මගෙ මිත්‍රය, සන්ජය

මම එකතු කරගත්තු ඒව මේව ටිකක් ඔන්න.

මේක දැන් ඇති වගේ. අර කතාව ඊලඟ පෝස්ට් එකෙන් කියන්නම්. බ්ලොග් කාරයො ටික එක්ක ගත්තු ෆොටෝ එක ලැබෙනකම් දවස් දෙකක් බලාහිටිය, ඒත් නොලැබුනු තැන අද පෝස්ට් එක දැම්ම. (මේක ගැන තමා උඩමදි කිව්වෙ.)

එහෙනම් මම නවතිමි.

බ්ලොග් එකක් පටන් ගැනීම ඒකෙ අවසානය නෙමෙයි, ආරම්භයයි

noreply@blogger.com (Madhawa Habarakada) — Wed, 02 Nov 2011 04:03:00 +0000

මෙන්න මේ අත්දැකීම ගොඩක් අයට ඇති.

ඔන්න යාළුවෙක් කියනව ඔයාට, "මම මෙන්න බ්ලොග් එකක් පටන් ගත්ත, පොඩ්ඩක් බලන්නකො හොඳද කියල." කියල. එයා කියනව එයා ඒකෙන් කරන්න හිතන් ඉන්න දේවල්. සල්ලි හොයන්න හිතන් ඉන්නව නම් ඒ ගැන.සති කිහිපයකට පස්සෙ ඔයාට ඒ යාළුවව මුණගැහෙනව. ඔයා අහනව "කොහොමද බ්ලොග් එකේ වැඩ?" කියල. මොකද්ද ලැබෙන උත්තරේ?"අනේ වෙලාවක් නෑනෙ ලියන්න" කියල.

බ්ලොග් එකක් ඇරඹීම කියන්නෙ හුඟක් අය හිතන විදිහට ඒකෙ අවසානය නෙමෙයි, ආරම්භයයි. ඒක, ලස්සන ඩිසයින් එකක්, හිතට වදින ඩොමේන් එකක්/නමක්, මුල්ම ලිපිය ලිවීම පමණක් නෙමෙයි.

ඔබ හිතනව නම් බ්ලොග් එකක් පටන් අරගෙන, පළවෙනි ලිපිය ලියල, ඊට පස්සෙ ඔයාගෙ බ්ලොග් එකට කට්ටිය බලන්න ඒවි කියල, ඒක එහෙම නෙමෙයි සිද්ධ වෙන්නෙ. ඇත්තටම වැඩ පටන් ගැනෙන්නෙ බ්ලොග් එක පටන් ගත්තට පස්සෙයි.

ඇත්තටම වැඩ කියන්නෙ දිගටම බ්ලොග් එක වෙනුවෙන් වැඩ කිරීමයි. ටික ටික දිනපතා ක්‍රමානුකූලව, බ්ලොග් එකේ අන්තර්ගතය හා බ්ලොග් එකට එන පිරිස ටික ටික වැඩි කර ගැනීමයි.

සාර්ථක බ්ලොග් එකක් හදන්න කාලයක් යනවා. හරියට කරනවා නම් ගොඩාක් වැඩ තිබෙනවා. දෛනිකව කරන්න ඕනෙ දේවල් ටිකක් තිබෙනවා. ඒක මැරතන් එකක් වගේ, කෙටිදුර දිවිල්ලක් නෙමෙයි.

සති කිහිපයකින් වැඩේ අතාරින්නෙපා. ඔබට හිතෙනවා නම් ඔබට ඕනෙ කරන තරමට ඔබ ඉදිරියට ගිහිල්ල නෑ කියල, ඒත් නවත්තන්න හිතන්නෙපා. කාලෙකින් බ්ලොග් පෝස්ට් එකක් ලියන්න බැරි උනා කිය කිය බ්ලොග් එක මුල සිට අරඹන්න උත්සාහ කරන්නෙපා. කවුරුත් ඒ ගැන හිතන්නෙ නේ, කරගෙන ගිය විදිහටම දිගටම කරගෙන යන්න. (හික්, මමත් මේ වැඩේ නම් කරනව නේද? :D )

බ්ලොග් ලිවීම ගැන මෙවන් තවත් ලිපි ඉදිරියට. එකතු වෙලා ඉන්න මාත් එක්ක.

මගෙ RSS Feed එකත් එක්ක එකතු වෙලා, ලිපි පළ උනු හැටියෙ ඒක මේල් එකටම ගෙන්නගන්න. පහත ෆෝම් එකට ඔබගේ ඊමේල් ලිපිනය එකතු කරන්න.

බ්ලොග් එකට එන අයව ඇදල බැඳල තියාගන්නෙ කොහොමද?

noreply@blogger.com (Madhawa Habarakada) — Thu, 27 Oct 2011 08:52:00 +0000

මතකයිනෙ මම දුන්න ඔයාලට ඔයාලගෙ බ්ලොග් එකේ ට්‍රැෆික් වැඩි කරගන්න උපදෙස් 100ක් තියෙන පොතක්. (ගත්තු නැති අය මෙතනින් ගන්න. සරළ සිංහලෙන් තියෙන්නෙ.) ඉතින් මේවත් ඒ වගේම දේවල් තමයි.

මිනිස්සු හරිම අකමැතියි, එයාලට ඕනෙ විස්තර, ගොඩක් හොය හොයා ඉන්න එයාල අකමැතියි. ගූගල් එකේ සෙවුකම් කළාම, ඉතාම ලේසියෙන් ඕනෙ විස්තර තිබෙන අඩවි ඕනෙ තරම් හොයාගන්න පුළුවන්. ඉතින් ඒකෙන් කියවෙන්නෙ, පුද්ගලයෙක් එක් වෙබ් අඩවියක ගත කරන කාලය ඉතාම අඩුයි කියන එක නේද? ඉතින් මේක වළක්වාගෙන තමුන්ට එන visitorsල තමුන්ගෙ අඩවියට ඇදල බැඳල තියාගන්න, එන අය අඩවිය තුළ ගතකරන කාලය වැඩි කරගන්න ඔබ ඔබගේ වෙබ්/බ්ලොග් අඩවිය ඉතා හොඳින් සකසා ගත යුතුයි.

මම දැන් කියන්න යන්නෙ, ඒ දේ කරගන්න, සරළ නමුත් ඉතාම බලවත් පියවර කිහිපයක්. ඒ හරහා ඔබගේ අඩවියට එන කියවන්නන්ගේ බ්ලොග් එක ගැන තිබෙන අදහස හොඳ එකක් කරල, ඔබ තොරතුරු ලබාදෙන ආකාරය වඩාත් ඵලදායී කරල, ඒ හරහා ඔබගේ visitorsල ඔබගේ අඩවියට ඇදල තියාගන්නට ඔබට හැකි වේවි.

මුල්ම තත්පර 10 තමයි වැදගත්ම

ඔයාගෙ අඩවියට එන කෙනෙක් සමහරක් විට වැඩක් නැති අඩවි හම්බෙලා ඒව බලල එපා වෙලා එන කෙනෙක් වෙන්න පුළුවන්. මෙච්චර වෙලා හරියකට හදල නැති, තියෙන අන්තර්ගතය හරියට නැති අඩවි වලට ගිහිල්ල ඔහුට/ඇයට දැන් එපා වෙලා ඉන්නෙ. ඉතින් ඔබේ අඩවියත් එහෙම උනොත්, එයාල ආපු ක්ෂණයෙන් ආපහු යාවි. හුඟක්ම අය මුල් තත්පර 10-20 ඇතුළත ඔබේ අඩවියෙන් පිට වෙලා යාවි.

නැතිනම් මුලින්ම ආවෙ ඔයාගෙ අඩවියට වෙන්නත් පුළුවන්. එහෙම උනත් අර වගේ අවුල් නම් අනිවා එන අය හැරිල යාවි.

අන්න ඒකයි කියන්නෙ මුල්ම තත්පර 10 තමා වැදගත්ම කියල. ඉතින් ඒ කාලය පන්නගන්න පුළුවන් උනොත් ඔබට වාසනාව තිබෙනවා ඔහුව/ඇයව තවත් වෙලා රඳවා ගන්න.

විශ්වාසවන්තභාවය ඉතාම වැදගත්

කියවන්නා අඩවිය කෙරෙහි දක්වන විශ්වාසවන්තභාවය ඉතාම වැදගත් වෙනවා ඔවුන්ව අඩවිය හා තබාගන්නට. කියවන්නන්ට අවිශ්වාස බවක් ගොඩනැඟුනොත් ඔවුන් කවදාවත් ආපහු එන එකක් නෑ. බ්ලොග් අඩවිය පසුපස ඉන්නෙ කවුද, ලිපිය පසුපස ඉන්නෙ කවුද කියල ඔවුන්ට පෙන්වීම වැදගත්.

බ්ලොග් එකේ පෙනුමෙන් මුලින්ම විශ්වාසවන්ත බව දිනාගන්න. හුඟක් බ්ලොග් වල පෙනුම ඉතාම ප්‍රාථමිකයි. බ්ලොග් එකට Professional look and feel එකක් දෙන්න. හොඳ තීම් එකක් දාගන්න. (හොඳ කීවෙ වෛවරණ එකක් නෙමෙයි, Professional පෙනුමක් තියෙන සරළ එකක්.) ඒව මේව ඇඩ් පිරිච්ච, scripts ගොඩක් තියෙන අඩවි වලට ගොඩක් අය කැමති නෑ.

Professional Header Image එකක් යොදාගන්න අඩවියට. ඔබම හදාගත්තු, අඩවියේ අන්තර්ගතයට ගැළපෙන එකක් වෙන එක තමා ඉතාම හොඳ. ලිපි ඇතුළත තිබෙන රූප පැහැදිලි හොඳ quality එකේ ඒව වෙන්න ඕනෙ. පැහැදිලි බව ඉතාම වැදගත්. පහසුවෙන් අඩවිය පුරා යන්නට (navigation) පැහැදිලි පිරිසිදු ක්‍රමයක් තිබෙන්නට ඕනෙ, අදාල සැබැඳි හරිහැටි යොදන්න.

ඒත් එක්කම ඉතාම වැදගත් දෙයක් තමයි, හරියට ලියන්න. හොඳ භාෂා විලාසයක් තිබීම ඉතාම වැදගත්. මේ කියන්නෙ ලිඛිත භාෂාවෙන් ලියන්න කියල නෙමෙයි, නමුත් පිරිසිදු, පැහැදිලි, තේරුම් ගැනීමට පහසු විදිහට ලියන්න කියන එක.

සරළ බව තමයි රහස

90%කටම වඩා අය ලිපියක් සම්පූර්ණයෙන් කියවන්නේ නෑ. තැනින් තැන කියවගෙන යමින් ඕනෙ කරන වචන, වාක්‍ය හොයාගන්නව. බොහොමයක් දෙනා පහළට scroll කරගෙන යන්න පවා කැමති නෑ. ලිපිය හුඟක් දිගයි වගේ පෙනුනොත් කියවීම සම්පූර්ණයෙන්ම නවත්වන අයත් ඉන්නව. හුඟක් අය ලිපියෙ අන්තිමට යන්නෙ නැති තරම්. (ඔයාල තාම මාත් එක්ක ඉන්නවද??? :) )

සමීක්ෂණ වලින් හොයාගෙන තිබෙනවා සාමාන්‍යයෙන් වැඩි වෙලාවක් වෙබ් අඩවියක් තුළ ගතකරන්නෙ එන අයගෙන් 20% පමණයි කියල හා, Page Break එකෙන් පහළට ගිහිල්ල මොනව හරි ක්ලික් කරන්නෙ තියෙන්නෙ 20%ක් දෙනා පමණයි. ඉතින් ඔබේ ලිපිය දිග වැඩි වෙන්න වැඩි වෙන්න, එන කෙනා ගතකරන කාලය අඩු වෙනවා.

ඉතින් මොකද්ද මේ කියන්නෙ? මේ කියන්නෙ ඔබගේ ලිපිය පුළුවන් තරම් කෙටියෙන් ලියන්න කියන එක තමා.

ඒක කරන්නෙ කොහොමද??

හරියටම ඕනෙ දේ ගැන කියන්න. වැල්වටාරම් කියන්න යන්නෙපා. අදාල දේ පමණක් ලියන්න. ලිපියේ තිබෙන අන්තර්ගතය, සරළ, සෘජු හා ඉලක්කගත විය යුතුයි.

ලියන්න, වෙනස් කරන්න, අනවශ්‍ය කොටස් ඉවත් කරන්න, සරළ වෙන්න.

කියවන්න පහසු විදිහට ලිපිය සකසා ගන්න

අඩවියට එන අය තව වැඩි කාලයක් අඩවිය තුළ රඳවාගන්නට, ඔබ ලිපිය පැහැදිලි, කියවීමට පහසු, කියවීමට ආස හිතෙන විදිහට සකසා ගත යුතුයි.

අභ්‍යන්තර සබැඳි: ලිපියක් තුළ තිබෙන සබැඳි මත ක්ලික් කිරීමට ඕනෑම කියවන්නෙක් පෙළඹෙනවා. ඉතින් අඩවියේ වෙනත් ලිපි වලටම ලිපිය තුළ සැබැඳි යෙදීම හරහා ඔබට පුළුවන් එන අයව තවත් වෙලා අඩවිය තුළ රඳවා ගන්නට.
ඡේද: හරි හැටි ඡේද වෙන් කරල ලියන්න. දිග ඡේද කියවන්නට හුඟක් අය අකමැතියි. එහෙමයි කියල වාක්‍යයෙන් වාක්‍යයෙට ඡේද කඩන්නෙපා. ඒක අරකට වඩා එපා කරපු වැඩක්.
එක ඡේදෙකට එක අදහසක්: එක ඡේදෙකට එක අදහස ගානෙ දාන්න. මොකද මුල ටික බලනකොට කියවන්නාට ඕනෙ නැති දෙයක් නම් ඉතිරි ටික කියවන්නෙ නැතිව එයා යන්න යනවා. ඔබ පස්සෙ ලිව්ව දේ වඩා වැදගත් උනත් ඒක අපතේ යනවා.
අනු මාතෘකා: ඡේද කඩනකොට හොඳ අනු මාතෘකා දාල ලිපිය වෙන් කරගන්න.
බහුමාධ්‍ය භාවිතය: රූප, විඩියෝ ලිපිය තුළ භාවිතා කරන්න. ඒ හරහා කියවන්නන්ව ඇදල තියාගන්න පුළුවන්.
ඉස්මතු කිරීම් (Highlight): ඉතාම වැදගත් කොටස් highlight කරල පෙන්නන්න. Bold, Underline, Highlight, font color මේ සඳහා යොදාගන්නට පුළුවන්. ඒ හරහා ලිපියට ලස්සනක් එකතු කරන්නත් ඔබට පුළුවන්.
ලැයිස්තු: ලිපියේ සමහරක් කොටස් ලැයිස්තු විදිහට දාන්න., ඒක කියවන්නාට ඉතාම පහසුවෙක් වෙනවා තේරුම් ගන්න.
වැදගත් වෙනත් දේ: ලිපියට අදාල වෙන වැදගත් දේවල්/ලිපි තිබෙනවා නම් ඒවට අදාල සබැඳි ලිපිය අවසානයේ දාන්න. ඒ හරහා එහ්ටකොට ඔවුන්ට පුළුවන් තවත් වැඩිදුර විස්තර ලබාගන්න. Wordpress වලට තිබෙන Related Posts ප්ලගිනය, එහෙම මේකට කියාපු විසඳුමක්.

ඉතින් මෙන්න මේ දේවල් ගැන හිතල පොඩ්ඩක් ඔයාලගෙ වෙබ් අඩවිය/බ්ලොග් අඩවිය හදාගන්න පුළුවන් නම් ඔබගේ අඩවියට එන අයව ඔබේ අඩවියත් එක්ක හැමදාම තියාගන්න ඔබට පුළුවන් වෙනවා.

තවත් මේ වගේ දේවල් ඉස්සරහට බලපොරොත්තු වෙන්න.

Theweni Esa Photo Fair 2011 ගියෙමි

noreply@blogger.com (Madhawa Habarakada) — Mon, 17 Oct 2011 04:53:00 +0000

ඔන්න ඉතින් මමත් හාපුරා කියල ජීවිතේ පලවෙනි වතාවට ගියාලු ඡායාරූපකරණය සම්බන්ධ Fair එකකට. පොළක් කිව්වම ඉතින් ඔයාල දන්නවනෙ, බඩු විකුණන තැනක්නෙ, මේකත් එහෙම එකක් තමයි, විකුණන්නෙ ඡායාරූපකරණය සම්බන්ධ දේවල් තමයි. ගියේ සෙනසුරාද තමා ගියේ, ඒත් ලිපිය ලිවීම පරක්කු උනේ ගෙදර විදුලි අර්බුදයක් නිසා.

මේක ගැන දැනගත්තෙ මම ෆොටෝ ටිකක් ප්‍රින්ට් කරන්න ස්ටුඩියෝ එකට ගිය වෙලේ. එතන තිබ්බ ෆ්‍රී පාස්. ඉතින් මම ඇහුවම මට 4ක්ම දුන්න. මම ඉතින් ගත්ත, විස්තරත් බලාගත්ත. මගෙ යාළුවෙක් ඉන්නව සන්ජය කියල, මේ වගේ වැඩ වලට මම ඌට තමා ඉතින් කතා කරන්නෙ. දළදා පෙරහැර බලන්න ගියෙත් ඌ එක්කනෙ. මිනිහත් ඉතින් එන්නම් කියල කිව්ව. ඔන්න සිකුරාද කියනව බෑඈඈ කියල. :( බුකියෙ මිතුරු මල්ලි කෙනෙක් එන්නම් කියල එයාටත් අසනීප වෙලා කිව්වනෙ. එදා උදේ ඔෆිස් එකේ එකෙක් එන්නම් කිව්ව, ඌත් ඊට පස්සෙ බෑ කිව්ව. ඉතින් මම තනියම ගියා.

දවල්ට කාල එහෙම පිටත් වෙලා 2.15ට විතර ගියා සම්බුද්ධ ජයන්ති මන්දිරයට. "මාග" එකෙන් හැදුවට එදා තමා ඒකට මුලින්ම ගියේ. ඉතින් ටිකක් වටේ ඇවිදිනකොට මුණගැහුන තෙවෙනි ඇස එකේ ඉන්න අනූපම මහත්තයව. (මම එයත් එක්ක ) එයත් එක්කත් ටිකක් කතා කරල තෙවෙනි ඇස මැගසින් එකත් අරගෙන අර රැෆල් එකටත් දාල (ටිකට් එකේ කෑල්ලක නම ගම ලියල දාන්න තිබ්බෙ) ඉතිරි ටිකත් ගියා. ඔහොම වට දෙකක් ගියා. ඒ අතරෙ තමා මෙන්න මේ පහළ ෆොටෝ ටික ගත්තෙ.

අන්තිම එකට ඉස්සෙල්ල එක බැලුවොත් දන්න අඳුනන කෙනෙක් ඉන්නව. (හැමෝම නම් නෙමෙයි, සමහරෙක් දන්නව මුහුණු පොතේ අපේ ෆොටෝග්‍රැෆි ගෲප් එක්ක ඉන්නව නම් අනිවා දන්න කෙනෙක්.) පින්තූර පෙට්ටිය වෙබ් අඩවියේ ඇඩ්මින් දිනේෂ් පෙරේරා. (හෙවත් කෝට්ටේ දිනේෂ්) (ඔන්න මචෝ උඹේ පොඩි ඇඩ් එකක්. :D )

ෆොටෝ ටික බැලුවමම ඔයාලට තේරෙනව ඇති මේකෙ මොනවද තිබ්බෙ කියල. ඇත්තම කිව්වොත් ඡායාරූපශිල්පියෙකුට ඕනෙ වෙන හැම දෙයක්ම වගේ මෙතන මිලට ගන්න තිබුන. Canon, Nikon, Fuji, Olympus වගේ කැමරා හා උපාංග, ඡායාරූප මුද්‍රණ යන්ත්‍ර, මුද්‍රණ කඩදාසි, රාමු කිරීම සම්බන්ධ දේවල්, තව ගොඩාක් දේවල්.

ඒත් ඉතින් මම නම් මොකුත් ගන්න නෙමෙයි ගියේ, බලන්න විතරයි. ගන්න නම් හිතුනු දේවල් එමටයි, ඒත් ඉතින් ඒව ගන්න නම් ලොතරැයියක්වත් ඇදෙන්න ඕනෙ.

මම ඉතින් අර වට දෙක ගිහිල්ල ඉවර වෙලා පිටත් වෙන්න ලෑස්ති වෙනකොට මෙන්න අපේ ඉස්කෝලෙ මගෙ ක්ලාස්මේට් ඇන්ඩ් අපේ කැම්පස් එකේ අපේ ෆැකල්ටියෙ හිටි එකක් ආව. අනේ ඌයි උගෙ යාලුවයි එක්ක තව වට 5ක් ගියා. :D (ඒකම විතරක් නෙමෙයි පරක්කු වෙන්න සිද්ධිය, sms යවල කරන තව තරඟයක් තිබ්බ, ඒකට sms යවල ඒකෙ ප්‍රතිඵල දෙනකම් ගිටියෙ.) කොහොම හරි 3.30ට පිටත්වෙන්න හිතන් උන්නු මම 5.45 වෙනකම් එතන හිටිය. අරුන් දෙන්න ගියා 5.30ට විතර. අන්තිමට ඒ තරඟෙ තෑග්ග නම් ලැබුනෙ නෑ. :(

ඒත් ඉතින් ඕකෙන් එක හොඳක් උනා. ඔන්න ඔය උඩ ෆොටෝ එකේ හිටි එකාව මුණගැහුන එක. ඒකත් අහම්බයක්ද මන්ද. මොකද මම 1වෙනි වටේ යනකොට ගියා NAPSL (National Association of Photographers - Sri Lanka) එකේ ස්ටෝල් එකට. ගිහිල්ල ඒ සංගමයේ සාමාජික ඉල්ලුම්පත්‍රයක් ගත්ත. ඔතන හිටිය සුදට සුදේ ටිකක් මහත් එකෙක්. මට එවෙලෙ ඌව එච්චර නෝට් උනේ නෑ. 5 වෙනි වටේ යනකොට තමා පින්තූර පෙට්ටිය අඩවියෙ ඇඩ් එකක් අයිනක තියෙනව දැක්කෙ. ඔන්න 6 වෙනි වටේද කොහෙද ගිහිල්ල ඔය NAPSL එකේ ස්ටෝල් එක ඉස්සරහ ස්ටෝල් එකේ Desiccators ටිකක් බලන අතරෙ පොඩ්ඩක් අනිත් පැත්ත හැරිල බලනකොට දැක්ක රතු, කලු, සුදු බිස්නස් කාඩ් එකක් කෙනෙක්ගෙන් තව කෙනෙක්ගෙ අතට යනවා. බැලුවම අර මම මුලින් කීව එකා. අන්න එතකොට මගෙ මතකෙට ආව ඩයල් එක. :D පින්තූර පෙට්ටියෙ දිනේශ්. ඔන්න ඊට පස්සෙ ගිහිල්ල කතා කළාම මේකටත් මාව ක්ලික් උනා. :D ඔන්න ඊට පස්සෙ පොඩ්ඩක් ස්ටෝල් එකට වෙලා ඉඳගෙනම කතාවක් දාගෙන හිටිය. ඒ අස්සෙ අරූ පොඩ්ඩකට ගිය අතරෙ මට සිද්ධ උනා ස්ටෝල් එක බලාගන්නත්. :) ඕව ඉතින් අපට නුපුරුදුය. (ටෙක්නො එකේ අවුරුදු 4ක් එක දිගටම ස්ටෝල් වල ඉඳල තියෙනවනෙ. exhibitorsල නම් නෙමෙයි, Organisersල විදිහට. :) )

කොහොම හරි ඉතින් යන්තම් 5.45ට පිටත් වෙලා තමා ගෙදර ආවෙ.

ආ තව එකක් අමතක උනානෙ. නොවැම්බර් 4-6 දවස් තුනේ BMICH එකේ තියෙනව තවත් මේ වගේම Fair + Exhibition එකක්. ඒක Organize කරන්නෙ NAPSL එකත් එක්ක ඉන්දියානු කට්ටියක්ද කොහෙද. ඒකටත් යන්න තමා හිතාගෙන ඉන්නෙ. මේකට ආව නම් ඒ ප්‍රදර්ශනේට යන්න Free Entry Tickets ගන්න තිබ්බ. (ඒකත් මේ වගේ ෆ්‍රී එකක්ද නම් දන්නෙ නෑ)

ඔන්න ඕකයි මගේ Photo Fair 2011 කතාව. දිනේශ් කිව්ව, බුකියෙ කට්ටිය ගොඩක් එදා උදේ ආව කියල. මම ඉතින් ගියෙ හවසනෙ, මට නම් කාවවත් හම්බුනේ නෑ. :(

ශරීර බර සාමාන්‍ය මට්ටමට වැඩි කර ගැනීම සඳහා උපදෙස්

noreply@blogger.com (Madhawa Habarakada) — Sat, 15 Oct 2011 00:30:00 +0000

මතකයිනෙ මම ඉස්සෙල්ල ලිපියකින් කිව්ව බර වැඩි අය බර අඩු කරගන්නේ කොහොමද කියල. ඒක කියවපු නැති මහත දෙහෙතට ඉන්න කස්ටිය ඉන්නව නම් ටිකක් කියවල බලනව හොඳා. අද කියන්න යන්නෙ, කෙට්ටු අයට තමුන්ගේ ශරීර බර අවශ්‍ය ලිමිට් එකට වැඩිකරගන්නේ කොහොමද කියලයි.

මුලින්ම ඔබ කළ යුත්තේ වෛද්‍ය වරයෙක් හමුවී, ඔබට පෝෂණය පිළිබඳ ගැටළු පවතී දැයි සැක හැර දැනගැනීමයි.

පැවතිය හැකි පෝෂණ ගැටළු

ආහාර දිරවීමේ අපහසුතා
පෝෂ්‍ය පදාර්ථ ශරීරයට උරා ගැනීමේ අපහසුතා
පණු රෝග වැනි පරපෝෂිත රෝග පැවතීම

ඉතින් ඔන්න ඔව තියෙනව නම් වෛද්‍ය උපදෙස් පතන්න වෙනවා.

ප්‍රශ්නයක් නැත්තම් මෙන්න මෙහෙම කරන්න.

ප්‍රශස්ථ BMI අගය සඳහා ඔබගේ බර කෙතරම් වැඩි විය යුතුදැයි දැනගන්න. ඒ අනුව බර වැඩි කර ගැනීමේ කෙටිකාලීන අරමුණු හා ඉලක්ක සාදාගන්න
ඔබ ලඟාකරගන්නා ඉලක්කය ඔබ විසින්ම ඇගයීමට ලක් කරන්න . කුඩා ප්‍රමාණයක බර වැඩි වීමක් වුවද ඵලදායී වේ
ඔබගේ ඉලක්ක සපුරාලීමට හැකිවන පරිදි, ක්‍රමානුකූලව, ආහාර ගැනීමේ පුරුදු වෙනස් කරන්න
ශරීරය වෙහෙසීම හරහා ඔබ දහනය කරන ශක්තියට වඩා වැඩි ශක්ති ප්‍රමාණයක් අහාර වලින් ලබා ගැනීම, ඔබගේ බර වැඩි වීමට උපකාරී වේ
සමතුලිත ආහාර වේලක් ලබා ගැනීමෙන් ඔබගේ ශරීර බර ප්‍රශස්ථ මට්ටමකට ලඟා කරගත හැකිය. ඔබගේ ශරීර බර අඩු කර ගැනීම නිතර අභිප්‍රේශරණය කරන්න.
කිරි, මස්/මාළු/බිත්තර වැනි මාංශජනක ආහාර සහ අසංතෘප්ත මේද අඩංගු තෙල් ආහාර වැඩිපුර ගැනීම, ශරීර බර වර්ධනයට උපකාරී වේ. ඔබ නිර්මාංශ පමණක් අනුභව කරන පුද්ගලයෙක් නම් මාංශජනක ආහාර ලෙස ප්‍රෝටීන බහුල කිරි ආහාර, හතු, සහ මුංඇට, කවුපි, පරිප්පු වැනි ධාන්‍ය වර්ග, පරිභෝජනය කිරීමෙන් අවශ්‍ය මාංශජනක පදාර්ථ ලබාගත හැකිය.
සෙමින් ක්‍රමානුකූලව බර වැඩි කර ගැනීම, ආරක්ෂිත හා වඩා ඵලදායී ක්‍රමයයි.
මධ්‍යස්ථ ක්‍රියාකාරී පුද්ගලයෙකුගේ ශරීර බර පවත්වාගෙන යාමට, ශරීර බර කිලෝග්‍රෑමයකට කැලරි 33ක ආහාර අවශ්‍ය වේ. බර වැඩි කර ගැනීම සඳහා, ශරීරය පවත්වා ගැනීමට අවශ්‍ය අවම කැලරි ප්‍රමාණයට වඩා වැඩි කැලරි ප්‍රමාණයක් අඩංගු සමතුලිත ආහාර වට්ටෝරු ගැනීම කළ යුතුය.
සැම විටම, ආහාර ගැනීමේ රටාව ඇගයීම්කට ලක් කරන්න.
ඔබට අනවශ්‍ය පරිදි කය වෙහෙසීමට සිදුවන්නේ නම්, ඒවා පාලනය කර ගැනීමට සුදුසු ක්‍රමවේදයන් සකසා ගන්න.

ඉතා වැදගත් උපදෙස්

ආහාර තෙලින් බැද සකස්කිරීමේදී, සාමාන්‍ය බඳුන් වෙනුවට නොඇලෙන (nonstick) බඳුන් භාවිතා කර, සංතෘප්ත මේද අඩු තෙල් වර්ගයකින් අඩු ප්‍රමාණයක් යොදාගෙන, ආහාර පිළියෙළ කර ගැනීමෙන්, ආහාරයට එක් වන මේද ප්‍රමාණය අවම කර ගත හැකිය
ආහාර වේල් මඟ හැරීමෙන් වළකින්න.
ආහාර ගැනීමේදී හොඳින් සපමින් ආහාර ගන්න. එය ආහාර වල ඇති පෝෂ්‍ය පදාර්ථ ශරීරයට උරා ගැනීම පහසු කරයි.
ක්‍රමවත් කාලසටහනකට අනුව, ශරීර බර මැනීමට පුරුදු වන්න
යහපත් සෞඛ්‍ය පුරුදු ඇති කර ගැනීම

ඉතින් මෙන්න මෙහෙම හරියට කළොත් ඔයාගෙ බර ප්‍රශස්ථ මට්ටමට ඉහළ නංවා ගැනීමට ඔයාට හැකි වේවි.

"තෙවෙනි ඇස ඡායාරූපකරණය" පිළිබඳ ප්‍රදර්ශනය බලන්න හෙට යමි

noreply@blogger.com (Madhawa Habarakada) — Fri, 14 Oct 2011 10:52:00 +0000

සමහරෙක් නම් දන්නව ඇතිනෙ "තෙවෙනි ඇස" - Photo Fair 2011 ගැන. දන්නෙ නැති අය මෙතනින් ගිහිල්ල විස්තර බලාගන්නකො.

තෙවෙනි ඇස ප්‍රමුඛ ඡායාරූපකරණය පිළිබඳ සඟරාවක්.
ඔවුන් මෙවරත් සංවිධානය කරනු ලබන "Theweni Esa - Photo Fair 2011" මෙවරත් පැවැත්වෙනවා.

ස්ථානය: කොළඹ 5 තුම්මුල්ල, ශ්‍රී සම්බුද්ධ ජයන්ති මන්දිරයේයි.
දිනය : ඔක්තෝබර් 15-16

උදේ 10 සිට රාත්‍රී 7.00 දක්වා

ඉතින් මම නම් හෙට යන්න හිතාගෙන ඉන්නෙ. හවස 2 විතර වෙනකොට මම එතනට යනවා. ජොබ් එක කොරල තමා යන්නෙ. ඇතුළුවීම නොමිලේ. ඡායාරූපකරණය සම්බන්ධව ගොඩක් දේවල් මේකෙන් ගන්න පුළුවන් වේවි.

ඔයාලත් එනවද?

මම, Techno හා Mobitel Virtual Marketing

noreply@blogger.com (Madhawa Habarakada) — Sun, 09 Oct 2011 14:46:00 +0000

ඔන්න ඉතින් මම අද ගියා Techno 2011 බලන්න. තනියම නෙමෙයි, උදිත එක්ක ගියේ. නිසුපට එන්න වෙන්නෙ නෑ කීවනෙ. ඒ අස්සෙ අර ෂානු කියල එක්කෙනෙක් 11ට එනව කියල, සද්දයක්වත් නෑ. අන්තිමට මේ හවස කියනව වැඩ ටිකක් තිබ්බ කියල. අර නීනු කියන එක්කෙනා හෙට තියෙනවද අහනව. ඒත් ඉතින් අදින් ප්‍රදර්ශනේ ඉවරයි නෙව. අපේ තව බ්ලොග් ලියන්නො ආවද දන්නේ නෑ, මොකද කට්ටිය හොරෙන්ද කොහෙදනෙ යන්නෙ. :)

පහුගිය වසර 4ක්ම මම ඕකෙ වැඩ කළා IESL එකේ JIY එක වෙනුවෙන්, ඕගනයිසිං වැඩ වලට. මේ පාර ඒකට සම්බන්ධ උනේ නෑ.

ඉතින් කියන්නම්කො විස්තරේ. රු.20යි ටිකට් එක, ප්‍රදර්ශනේ පටන්ගත්තෙ 9ට. අපි 9ටම ගියා, ඒත් කට්ටිය ඇවිල්ල උන්නෙ නෑ නෙ සමහර ප්‍රදර්ශන කුටි වල. ඉතින් ටිකක් ඇවිද්ද, අපේ කැම්පස් එකේ අපේ බැචෙක් සෙට් උනා, මිනිහ එක්ක කතා කළා, අය්ය කෙනෙක් මුණගැහුන, එයත් එක්කත් කතා කළා. ඊට පස්සෙ ඉතින් වටේ බලාගෙන යන්න පටන් ගත්ත.

ගොඩාක් මැදිරි තිබ්බ, නමුත් පසුගිය අවුරුදු වලට වඩා ටිකක් අඩු ගතියකුයි දැනුනෙ. ඒත් ගොඩක් ඒව තිබ්බ. ඉගෙන ගන්නත් ගොඩාක් ඒව තිබ්බ. නමුත් ඉතින් තිබ්බ ගොඩාක් ඒව වඩා වැදගත් වෙන්නෙ නම් industry එකේම ඉන්න කට්ටියටම තමා. ඒ නැතත් අනිත් අයටත් ඉගෙනගන්න ගොඩක් දේවල් තිබුණ.

අපේ කැම්පස් එකේ අපේ ඉංජිනේරු පීඨයෙනුත් ප්‍රදර්ශන කුටියක් තිබ්බ, ඊට අමතරව රුහුණ, පේරා ඉංජිනේරු පීඨ වල හා විවෘත විශ්ව විද්‍යාලයේ ප්‍රදර්ශන කුටි එහෙමත් තිබ්බ. මේ පාරත් රොබෝ තරඟාවලිය නම් තිබුන, ඒත් අපිට බලන්න හම්බුනේ නෑ.

කොහොම හරි මටයි උදිතටයි නම් අල්ලලම ගියේ, මොබිටෙල් එකේ Virtual Marketing කියන සිද්ධිය. ඒ විදිහට ඉදිරියේදී මාරම වෙනසක් වෙයි වෙළඳ භාණ්ඩ අලෙවියේ.

ඔයාල දන්නවද QR Code එක ගැන? මේ පහළ තියෙන්නෙ. QR Code කියන්නෙ පරන Bar Code වල අලුත් version එකනෙ. Bar Code එකකට වඩා මේකෙ දාන්න පුළුවන් තොරතුරු ප්‍රමාණය ගොඩාක් වැඩී.

අන්න ඒව එක්කයි, මේ Virtual Marketing එක්ක හටං කොරන්න තිබ්බ පොඩි ගේම් එකකට සහභාගි වෙලා මොබිටෙල් එකෙන් ටී ෂර්ට් එකකුත් මම දින්න. (දින්න වෙනත් අය ගත්ත ක්‍රිකට් කිට් එකක් එහෙම, මම කීව කැප් එකක් දෙන්න කියල, එතන හිටිය ගෑණු ළමයගෙ කණේ අවුලක්ද කොහෙද දුන්නෙ ටීෂර්ට් එකක්.) මේ පහළ තියෙන්නෙ ඒක. (එයාල කුටියෙ එහෙ මෙහෙ තියල තිබුනු QR Codes ටික හොයගෙන ඒව QR Reader එකකින් කියවල ඒවයෙ තියෙන ලින්ක් වලට ගිහිල්ල Checkin කරන්න තිබ්බෙ. QR Reader එකක් ෆෝන් එකට දාගන්න වෙනව.(ෆෝන් එක Nok S60v5, BB, Android වෙන්න ඕනෙ. ඒකට Foursquare ඇප් එකයි, QR Reader ඇප් එකකුයි දාගන්නත් ඕනෙ.))

හැබැයි දුක කියන්නෙ මට ඒක ලොකු වැඩී නෙව. කොහෙද මම කීව උදිතයට ඒක අරන් පල කියල, ඌ බෑ ම කීවනෙ. :( ඒ නැතත් මොබිටෙල් ප්‍රදර්ශන කුටියට ඇවිල්ල virtual marketing ගැන ඉගෙනගත්තු හැමෝටම මොනව හරි තෑග්ගක් දුන්න. සබන්, දත්බෙහෙත්, එක එක cosmetics වගේ. අපේ උදිතටත් හම්බුනා.)

කොහොම හරි මම කාලෙකට ඉස්සෙල්ල ගිණුමක් හදල අත ඇරල දාල තිබ්බ FourSquare ගිණුමත් මේක නිසා ආපහු ඇක්ටිව් උනා, ඒකෙන් කෙරෙන්නෙ මොකද්ද කියලත් හරියටම තේරුනා. ඒකත් දැන් ටිකක් පාවිච්චි කරන්න හිතුව. ඔයාලත් ගිහිල්ල බලන්නකො ඒ අඩවියට.

ඇයි අපේ ජූනියර් බැච් එකේ හිටිය ශාමික මල්ලිත් මොබිටෙල් එකේනෙ වැඩ, මිනිහ එක්කත් ටිකක් කතා කර කර හිටිය. :)
ඇයි යනකොට මෙන්න ඉන්නව අපේ කණිය මල්ලි. මිනිහ එක්කත් කතා කරල, එයා ඉන්න කොම්පැනියෙන් හදල තියෙන මැසිම ගැනත් අහල එතනින් ආව.

ඇයි අපේ JIY 2011 කුටිය (Junior Inventor of the Year 2011). මම පහුගිය වසර 4ක්ම දුක් විඳගෙන උදව් කරල ඕගනයිසිං වලට සහභාගි වෙලා වැඩ කරපු එකනෙ. ඉතින් මේ පාර ඒකට සහභාගි උනේ නැති නිසා තමා මේ පාර ප්‍රදර්ශනේ බලන්න ගිය පුද්ගලයෙක් විදිහට එන්න පුළුවන් උනේ.

ඊට අමතරව මෙ පාර මම හිතාගෙනමයි ගියේ අර Foot Massager එකක් ගන්නව කියල. මෙ පහළ තියෙනව වගේ එකක්. අන්න ඒකකුත් ගත්ත. උදිතත් ගත්ත. Head Massager එහෙමත් තිබුන, නමුත් මම ගිය සතියෙ ebay එකෙන් ඒව ඕඩර් කළ නිසා ගත්තෙ නෑ.

ඉතින් කොහොම හරි ඉවරයක් වෙන්න බලන්න බැරි උනා, මොකද අපිටත් ටිකක් ඇති වෙලා තිබ්බෙ, සහ උදිතට ටිකක් ඉක්මනට යන්නත් ඕනෙ කිව්වනෙ. (12ට 1ට විතර.) ඉතින් අපි හවස 3ට BMICH එකෙන් පිට වෙලා ගෙදර එන්න පිටත් උනා.

ඔන්න ඔහොමයි කතාව.

Energy Saving ගැන ඔබ නොදත් දේ

noreply@blogger.com (Madhawa Habarakada) — Tue, 04 Oct 2011 00:30:00 +0000

මේ බලශක්ති අර්බුදෙත් එක්ක දැන් එන එකක් නෙව මේ එන'ජි සේවිං කියන්නෙ.

ඉතින් කොහොමද මේ බල ශක්තිය අපතේ යන්නෙ? කොහොමද මේ බල ශක්තිය ඉතුරු කරන්නෙ?

ලයිට් ඕෆ් කරල, අනවශ්‍ය උපකරණ ඕෆ් කරල, කාර්යක්ෂම විදුලි පහන් එහෙම භාවිතා කරල, ඒව මේව කරල තමා ඉති නම් කරන්නෙ. ඉතින් මේ ගැන ඔබ නොදන්නා පොඩි දේවල් ටිකක් කියන්න හිතුන. මේක කියවල පොඩ්ඩක් හිතල බලන්න, ඔයාල කරන්න පුළුවන් උපරිමයෙන් බලශක්තිය ඉතිරි කරනවාද කියල. මේ තොරතුරු වලින් කොටසක් මම උපුටා ගත්තෙ Sri Lanka Engineering Newspaper එකේ ඉංජිනේරු එස්. ශ්‍රීපද්මනාබන් මහතා ලියල තිබුණු ලිපියකින්. (ඒ ලිපිය ඉංගිරිසියෙන් තිබ්බෙ)

ඉතින් ආපහු එමු.

ඔයාල භාවිතා කරන උපකරණ භාවිතයේ නැති වෙලාවට කොහොමද තියන්නෙ? ප්ලග් එකට ගහල එතනින් ඔන් කරල, උපකරණේ ඕෆ් කරල? නැතිනම් standby mode එකේ?

ඔයාල දන්නවද සාමාන්‍යයෙන් උපකරණයක් standby mode එකේ තියෙනකොට ඒක වොට් 1-2ක සිට වොට් 20-40 අතර ශක්තියක් වැය කරනව කියල???

සාමාන්‍ය නිවෙසක විදුලියෙන් 10-15%ක අතර ප්‍රමාණයක් වැය වන්නේ මෙන්න මේ standby load එකට කියල ඔබ දන්නවද???

මෙහෙම විදුලිය වැය කරන තවත් උපකරණ තමා, බැටරි චාජර්, ජංගම දුරකතන චාජර්, ලැප්ටොප්/දුරකතන/TV/VCR/මොඩම්/ප්‍රින්ටර් වැනි උපකරණ වල power adapters, microwave උඳුන්, රෙදි සෝදන යන්ත්‍ර, වියළන වැනි උපකරණ, හා තවත් ගොඩාක් උපකරණ.

ඔබ දන්නවාද, සමහරක් රෙදි සෝදන යන්ත්‍ර, ක්‍රියාකාරිත්වයේදි භාවිතා කරනවාට වටා ශක්තියක් standby mode එකේදී භාවිත කරනවා කියල???

උදා:
LCD TV එකක standby load එක වොට් 0.3 ක් පමණ

ප්‍රින්ටරයක් ඕෆ් වෙලා තියෙනකොට වොට් 8ක් පමණත්, ඕන් වෙලා තියෙනකොට වොට් 12ක් පමණත්, ප්‍රින්ට් කරනකොට වොට් 20ක් පමණ වැය කරනවා.

පරිගණකයක්, ඕෆ් වෙලා තියෙනකොට වොට් 9ක්, Sleep mode එකේ තියෙනකොට වොට් 20-90 ප්‍රමාණයක්, ක්‍රියාකරද්දී වොට් 400ක් පමණ භාවිතා කරනවා.

රූපවාහිනී, ගුවන්විදුලි යන්ත්‍ර, DVD Players වගේ ඒව standby mode එකේදි අවම වශයෙන් වොට් 10ක්වත් භාවිතා කරනවා.

සමහරක් ජංගම දුරකතන චාජර, මුළුමනින්ම චාජ් වෙලා ඉවර උනත් වොට් 10ක් පමණ වැය කරනවා.

මේව දල අගයන් විතරයි. මේ ඉලක්කම්, උපකරණය, Brand එක, Model එක, රට අනුව වෙනස් වෙනවා.

Energy Star Label එක තියෙන උපකරණ තියෙනව නේද?

අන්න ඒව සාමාන්‍යයෙන් standby mode එකේදි වොට් 5ක් පමණ වැය කරනවා. අනෙකුත් උපකරණ වලට සාපේක්ෂව මේ උපකරණ මගින් අපතේ යන ශක්තිය ටිකක් අඩුයි.

තවත් එකක්, මෙහෙම standby mode එකේ උපකරණයක් තියෙනකොට ඒක යම් තාපයක් නිකුත් කරනවා. වායුසමීකරණය කරල එහෙම තියෙනව නම් අර තාපය නිසා AC මැෂින් එකේ ලෝඩ් එකත් වැඩි වෙලා එතනින් තවත් විදුලිය අපතේ යාමක් වෙනවා.
වායුසමීකරණ ගැන කියන්න තව කාරණයක් තිබෙනවා. වායුසමීකරණය කරන ලද ස්ථාන වලදී තාපය නිපදවන උපකරණ තැබීම හැකිතාක් අවම කළ යුතුයි.
උදා: ඡායාපිටපත් යන්ත්‍ර, ශීතකරණ (ඒත් සමහරක් අවස්ථා වලදි නම් මේක ප්‍රායෝගික නෑ.)

ඔබ නිවසේ Dimmers භාවිතා කරනවාද? ඒකෙනුත් ලොකු ප්‍රයෝජනයක් නම් නෑ. මොකද ආලෝකය 25%ක් දක්වා අඩු කළොත්, ඒකෙන් විදුලිය ඉතිරි වන්නේ, 50%ක් වගේ අගයක් 75%ක් නෙමෙයි.

මේ අනුව හිතා බලනකොට ඔබ බලශක්තිය ඉතිරි කරන්න හිතාගෙන උපකරණයක් ඕෆ් කළාට ඒක ප්ලග් එකට ගහල ස්විච් එක දාල තියනව නම් ඒකෙනුත් ගොඩක් ලොකු ශක්තියක් අපතේ යනවා නේද?

සරළව හිතමු.

ඔයාල ෆෝන් එක චාජ් වෙන්න ගහල නිදා ගන්නව. ෆෝන් එකක් චාජ් වෙන්න යන්නෙ පැය දෙකයි නම් ඉතිරි පැය 4,5 ක කාලයක්වත් ශක්තිය අපතේ යැවීමක් ඔබ කරනව නේද???

පරිගණකය ඕෆ් කරන්නෙ නැතිව Sleep කරල යනව වැඩකට යනකොට. කෙතරම් විදුලියක් අහක යනවාද???

TV එක රිමෝට් එකෙන් ඕෆ් කරල ගියාට සමහරක් විට ඒක රෑ පුරාම standby mode එකේ තියෙනව නේද???

ඉතින් මේ වගේ කෙතරම් දේවල් තිබෙනවාද, ඔබ මෙහෙම කෙතරම් විදුලියක් අපතේ යවනවාද???

ඉතින් හොඳම විසඳුම වෙන්නෙ අදාල උපකරණයට ලැබෙන සම්පූර්ණ විදුලියම බිත්තියේ Socket Outlet එකෙන්ම ඕෆ් කරල දාන එක තමයි. අන්න එතකොට ඔබ විදුලිය ඉතිරි කළා වෙනවා.

අනිත් එක, මේ කරන එක බලශක්ති අර්බුධයට විතරක් නෙමෙයි, හරිතාගාර වායු නිදහස් වීම අවම වීම හරහා පරිසරය රැක ගැනීමටත් හේතු වෙනවා.

මඳක් හිතල බලන්න.

කොටස් වෙළඳපළ ආයෝජනය ගැන කණෙන් අහලම දැනගන්න

noreply@blogger.com (Madhawa Habarakada) — Tue, 27 Sep 2011 09:04:00 +0000

ඔන්න ඔයාලට අවස්ථාවක් තිබෙනවා කොටස් වෙළඳපළ ගැන කොටස් වෙළඳපළ ආයෝජනය ගැන කණෙන්ම අහල දැනගන්න.

බස් රේඩියෝවේ (දන්නෙ නැති අයට: බස් රේඩියෝව කියන්නෙ සිංහල බ්ලොග්කරුවන් කණ්ඩායමක් විසින කරගෙන යනු ලබන අන්තර්ජාල ගුවන්විදුලි වැඩසටහනක්.) අද රාත්‍රී "බස් මැගසින්" වැඩසටහනෙන් මම එනවා ඔබත් එක්ක මේ ගැන කතා කරන්න.

ඔබත් කැමති නම් එන්න, සවන්දෙන්න බස් රේඩියෝ මැගසින් එකට.

වෙබ් අඩවිය : www.buzzradio.lk

වේලාව : රාත්‍රී 8.30 - 10.00

ඉතින් පොඩ්ඩක් අහගන්නකො මොනව ගැනද අපි කතා කරන්නෙ කියල.

කොටස් වෙළඳපළ කියන්නෙ මොකද්ද, ඒකෙන් තියෙන ප්‍රයෝජනේ මොකද්ද
කොටස් වෙළඳපළ ඉතිහාසය
ආයෝජකයෝ, තැරැව්කරුවෝ
කොහොමද සම්බන්ධ වෙන්නෙ
ආයෝජනයේ වාසි හා අවාසි
කොටස් මිල ඉහළ පහළ යන්න හේතු
පාඩු නොවී ආයෝජනය කරන්නෙ කොහොමද
බහුලව ඇසෙන ප්‍රශ්න

ඉතින් ඔයාලටත් කොටස් වෙළඳපළ ගැන තිබෙන ගැටළු වලට උත්තර හොයාගන්න මේක හොඳ අවස්ථාවක් වෙයි කියල හිතනවා. අසන්නන්ගේ ප්‍රශ්න වලටත් ඉඩක් ලබා දෙන්න තමා ඉන්නෙ, නමුත් වෙලාව පිළිබඳ ප්‍රශ්නය තමා තිබෙන්නෙ. බලමුකො අපි.

වැඩිපුරම භාගත කරගෙන ඇති Wordpress Plugins 20

noreply@blogger.com (Madhawa Habarakada) — Mon, 26 Sep 2011 00:30:00 +0000

මේ වන විට අන්තර්ජාලය තුළ තිබෙන ජනප්‍රියම Blogging Platform එක තමයි වර්ඩ්ප්‍රෙස්. මේ වෙනකොට self hosted wordpress අඩවි මිලියන 50කට අධික ප්‍රමාණයක් තිබෙනවාලු.

ඉතින් මේ කතාකරන්න යන්නෙ මේ මිලියන 50ට යන අතරෙ, ඒ භාවිතා කරන්නන් වැඩිපුරම භාගත කරගෙන තිබෙන ප්ලගින 20 ගැනයි.

All in One SEO Pack

ස්වයංක්‍රීයවම ඔබගේ බ්ලොග් අඩවිය හා ලිපි SEO කරන ප්ලගිනයක් තමයි මේක. ඒ ඒ ලිපි වලට වෙන වෙනමම ටැග් දාන්න, සෙවුම් යන්ත්‍ර වලට හොයාගන්න ලේසි වෙන්න විවිධ දේ කරන්න මේ හරහා පුළුවන්. තවත් මේ වගේ ඒව තියෙනව, නමුත් මේක තමා මම දැකල තිබෙන හොඳම එක. ටිකක් සංකීර්ණයි, වැඩ කෑලි ගොඩායි.

Downloads 8,208,465

Akismet

ඔබගේ අඩවියට එන කමෙන්ට්ස්, ස්පෑම් සඳහා පරික්ෂා කරන එක තමයි මේකෙන් කරන්නෙ. මේක ඉතාම ප්‍රයෝජනවත් ස්පෑම් වලින් වැළකීම සඳහා. මම නම් මේක අනිවා දාගන්නව මොනව නැතත්.

Downloads 7,010,496

Google XML Sitemaps

ගූගල් සෙවුම් යන්ත්‍රයට ඔබගේ අඩවිය පහසුවෙන් index කිරීම සඳහා සයිට් මැප් එකක් සකසා දීම මෙම ප්ලගිනය මගින් කරනවා. ගූගල් සර්ච් වල ඔයාගෙ බ්ලොග් එක හොඳට ලිස්ට් වෙන්න නම් මේක අනිවා දාගන්න.

Downloads 5,386,430

Contact Form 7

මේක තවත් කන්ටැක්ට් ෆෝම් එකක් විතරයි, නමුත් ගොඩාක් භාවිතය පහසු, සරළ නමුත් ඉතාම හොඳ එකක්.

Downloads 4,203,678

NextGEN Gallery

ගොඩාක් ඔප්ෂන් තියෙන image gallery plugin එකක්.

Downloads 3,494,547

WordPress.com Stats

ඔයාගෙ සර්වර් එකට ලෝඩ් එකක් නැතිව ඔයාගෙ අඩවියෙ stats බලාගන්න පුළුවන් ප්ලගින් එකක්. මේකෙන් කරන්නෙ wordpress.com වල stats හරහා සම්බන්ධ වෙන එකයි.

Downloads 2,589,702

WP Super Cache

මේකෙන් කරන්නෙ ඔයාගෙ අඩවියෙ තිබෙන දේවල් වල static html ෆයිල් හදන එක. ඒකෙන් අඩවිය client side එකෙන් ලෝඩ් වෙන එක ඉතාම වේගවත් වෙනව. (සයිට් එකේ ස්ටැටික් කොටස් ඔක්කොම කෑශ් කරගන්නව පරිගණකයට). හැබැයි මගෙ බ්ලොග් එකක නම් මට මේක කරදරයක් වෙලා අයින් කළා. මොකද අඩවිය ස්ටැටික් කොටස් කෑෂ් කර ගත්තම, අපී ඒකෙ වෙනසක් කලත් බොහෝ වෙලාවට ඒක අඩවියට එන්නන්ට පේන්නෙ නැතුව යනව, ඔවුන්ට පේන්නෙ අර කෑෂ් වෙලා තියෙන එක තමයි. ඒ කියන්නෙ පරන එක. :(

Downloads 2,391,929

WPtouch

ඔයාගෙ බ්ලොග් එක ජංගම දුරකථන වලින් පහසුවෙන් බලන්න පුළුවන් කරන ප්ලගිනයක් තමා මේක. මේකෙන් බ්ලොග් එක iPhone App එකක් වගේ කරනව. :)

Downloads 2,228,517

Google Analytics

මෙක මොකද්ද කියල නම් කාටවත් කියන්න ඕනෙ නෑනෙ. ගූගල් මගින් ලබාදෙන වෙබ් සයිට් ඇනෑලිටික්ස් සේවාව තමා මේක. සාමාන්‍යයෙන් අපි කරන්නෙ ඒකෙන් දෙන කෝඩ් එක අපේ පිටුවකට එකතු කරන එකනෙ. නමුත් මේකෙන් කෙලින්ම ප්ලගිනය හරහා ඔබට ඒ වැඩ ටික කරගන්න පුළුවන්.

Downloads 2,037,340

AddToAny

මේක ඇවිල්ල සෝශල් ශෙයාරිං ප්ලගිනයක්. ඔබගේ ලිපි, ප්‍රසිද්ධ සමාජ ජාල වෙබ් අඩවි වලට ශෙයා කරන්න පුළුවන් මේක හරහා. නමුත් මම නම් මේකට වඩා කැමතියි Sexy Bookmarks කියන ශෙයාරිං ප්ලගිනයට.

Downloads 1,850,470

WP-PageNavi

සමහරක් බ්ලොග් අඩවි වල පහලින් පිටුවෙන් පිටුව යන්න ඉලක්කම් එක්ක තීරුවක් තිබෙනවා ඔබ දැකල ඇති. අන්න ඒක දාගන්නෙ මේකෙන් තමා. මේක අඩවියේ ලිපි අතර යනකොට හරිම පහසුවක් ලැබෙනවා.

Downloads 1,713,578

Fast Secure Contact Form

මේකත් contact form එකක් තමා. අපිට ඕනෙ විදිහට වෙනස් කරගන්න පුළුවන්. කරදරකාර ටෙම්ප්ලේට් නෑ. ස්පෑම් ඇටෑක් එන්නෙත් නෑ. contact forms ප්ලගින වලින් මේක හා Dragon Design Form Mailer තමයි මම කැමතිම contact forms ප්ලගින.

Downloads 1,586,123

Google Analyticator

ඉස්සෙල්ල එකම වගේ එකක්. ගූගල් ඇනැලිටික්ස් වලට ඕනෙ කරන ජාවාස්ක්‍රිප්ට් එක පිටු වලට දාල දෙනවත් එක්කම මේකෙ තිබෙනව ඇනැලිටික්ස් වල විස්තර අඩවියේ මුල් පිටුවට එකතු කරන්න පුළුවන් විජට්ටුවකුත්.

Downloads 1,433,450

GTranslate

ගූගල් එකෙන් දෙන භාෂා පරිවර්තකය අඩවියට එකතු කරන්න පුළුවන් මේකෙන්. ඔයාගෙ අඩවියේ තියෙන අන්තර්ගතය ක්ලික් දෙකකින් භාෂා 58කින් ඕනෙම එකකට කියවන්නාට පරිවර්තනය කරන්න පුළුවන් මේකෙන්. (සිංහල නම් ගූගල් තාම දන්නෙ නැතිලු.)

Downloads 1,215,595

WP e-Commerce

මේක ඇවිල්ල e-commerce වලට තිබෙන හොඳ Web 2.0 වර්ඩ්ප්‍රෙස් ප්ලගිනයක්. ඔබේ අඩවියේ තිබෙන දේවල් විකුණන්න පුළුවන්, ෂොපිං කාට් එකක් දාගන්න පුළුවන් ප්ලගිනයක් තමා මේක.

Downloads 1,208,872

Sociable

මේ ප්ලගිනය හරහා ඔබට පුළුවන්, ස්වයංක්‍රීයවම ඔබ ලිපියක් දැම්ම ගමන්ම ඔබ එකතු කරල තිබෙන social bookmarking අඩවි වලට ඒ ලිපිය එකතු කරන්න.

Downloads 1,155,054

SexyBookmarks

social sharing වලට මම නම් කැමතිම ප්ලගිනය තමා මේක. මේක හරහා social sharing buttons සෙට් එකක් ඔයාගෙ ලිපි වලට එකතු කරගන්න පුළුවන්. ලස්සන පෙනුමකුත් තිබෙනව මේකට.

Downloads 1,089,436

Yet Another Related Posts Plugin

ඔබ ලිව්ව ලිපියට relate වෙන ලිපි වල ලැයිස්තුවක් ඒ ලිපිය යටින් පෙන්වන එක තමයි මේකෙන් කරන්නෙ. tags, categories වලින් තමයි මේ ලිපි තේරිම සිදු කරන්නෙ.

Downloads 1,067,965

WordPress Importer

වර්ඩ්ප්‍රෙස් export file එකකින්, ලිපි, පිටු, අදහස්, ප්‍රවර්ග, තව ගොඩාක් දේවල් මේ ප්ලගිනය මගින් අලුත් වර්ඩ්ප්‍රෙස් බ්ලොග් එකට import කරගන්න මේක හරහා පුළුවන්.

Downloads 1,050,154

WP-DB-Backup

ඉතා පහසුවෙන්, ඔබගේ වර්ඩ්ප්‍රෙස් ඩේටාබේස් එක බැකප් කරගන්න මේකෙන් පුළුවන්.

Downloads 1,044,319

ඉතින් ඔබ මොකද හිතන්නෙ? මේ අඩවියත්, එකක් ඇරුනම මගෙ බ්ලොග් අඩවිත් තිබෙන්නෙ බ්ලොග්ස්පොට් වල තමයි. නමුත් මේක ප්‍රයෝජනවත් වෙන ගොඩක් අය මේ සිංහල බ්ලොගෝලයේ ඉන්නවා. ඉතින් ඔවුන්ට ප්‍රයෝජනවත් වේවි කියල හිතනවා.

අනිත් එක ඔයාලත් වර්ඩ්ප්‍රෙස් වලට මාරු වෙන්න හිතන් ඉන්නව නම් ඒක ඉතාම හොඳයි. නමුත් හොස්ට් කරන්න තැනක් ඕනෙ කරනව. ෆ්‍රී හොස්ටිං එකක කරන්න පුළුවන් පහසුවෙන්ම, ටෙස්ට් කරන්න, පරික්ෂා කරන්න, පුරුදු වෙන්න නම්. (භාවිතයට උනත් නරකම නෑ.) ඔයාලගෙ ඩොමේන් එකකම අඩවිය දාගන්න පුළුවන්නෙ. ඩොමේන් එකක් නැත්තම් ඩොට්.ටීකේ වලින් ෆ්‍රී ඩොමේන් එකක් ගන්න. හොස්ට් එකක් නැත්තම් බයිට්හොස්ට් එකෙන් ෆ්‍රී හොස්ටිං ගන්න. (මම භාවිතා කරන, මට හොඳයි කියල හිතෙන හොඳම ෆ්‍රී හොස්ටිං එක.)

වර්ඩ්ප්‍රෙස් වලින් බ්ලොග් එකක් හදන්නෙ කොහොමද කියල නම් ගොඩාක් අය කතා කරල තිබෙනවා. ඒ නිසා ඒ ගැන කතා කරන්න ඕනෙ නෑ කියල මම හිතනවා.

පොත් ප්‍රදර්ශනේ බලන්න ගියෙමි සහ යන්න ඉන්න අයට උදව්වක්

noreply@blogger.com (Madhawa Habarakada) — Mon, 19 Sep 2011 00:30:00 +0000

ඔන්න ඉතින් මම ගියාලු පොත් ප්‍රදර්ශනේ බලන්න. ගියේ මගෙ නංගියයි, උදිතයි, උගෙ මල්ලියි, නිසුපයි, එයාගෙ නංගියි තමා. එහෙට ගිහිල්ල ගෝල්ඩ් ෆිෂ් සහ මෑන්ස්ගෙ මිත්තරයෙක් සෙට් උනා. අපේ මුහුණු පොතේ මෙගා ත්‍රෙඩ් එකේ කතා උනු විදිහට BMICH එක ඉස්සරහ පොකුණ ගාවට තමා අපි නම් ඒ ආවෙ, ඒත් 10ට පැය බාගයක්ම තියෙන නිසා අනිත් අය එනකම් කියල අපි ඇතුළට ගියා. අනිත් අය කීවෙ, චාපා, ශිරෝෂි, මධුරංග, දඟයා, අර මෙගා ත්‍රෙඩ් එකේ මූලික ලක්මිණි, සහ තවත් අය. අනේ සමාවෙන්න අමතක උනු නම් සම්බන්ධයෙන්. ඉතින් 10ට කියල කතා වෙලා ඔය සමහරු ආවෙ 11ත් පහු වෙලාලු. :D ඔය වෙලාවට එන්නම් කීව නෙරන්ජි, අපි යන්න ඔන්න මෙන්න තියල මෙන්න මූණ පෙන්නගෙන මතු උනානෙ කොහෙන්ද මන්ද පුෂ්පා ආන්ටි එක්ක. :( බැලුවම එයා උදේ 10 ඉඳල ප්‍රදර්ශනේ බලල. :D

බලපල්ලකො ගෝල්ඩ් ෆිෂ් කාරය අපෙන් අවසරයක්වත් නැතුව ෆොටෝ එකේ උගෙ නම දාගෙන තියෙන හැටි.

පට්ටම සෙනඟක්. ඔයාල අනිවා මැප් එක අරගන්න ටිකට් ගන්නකොට. (රු. 10යි ටිකට් එකක්). නැතත් ඇතුළට ගිහිල්ලත් ගන්න දෙතුන්පලකින් පුළුවන්. තවත් විශේෂ දෙයක්. ටිකට් එකත් එක්ක "Minute Maid" බීම එකකට ටෝකන් එකක් දෙනව, ඒකත් ගන්න. හැබැයි ඒ ටෝකන් එකෙන් බීම ගන්න පුළුවන්, ටිකට් ගන්න තැනට එහා පැත්තෙ තියෙන තැනින් විතරයි, ඇතුළෙ කොහෙනවත් බෑ. ඒ නිසා ඒක ගන්නව නම් ඇතුළට යන්න ඉස්සෙල්ල හෝ ප්‍රදර්ශනේ බලල ඉවර වෙලා යන ගමන් තමා ගන්න වෙන්නෙ. ඒත් එලියට යනකොට ගන්න යනව නම් ඔයාලට නොමිලේ දෙන ප්‍රවාහන සේවය ලබා ගන්න බැරි වෙනවා. මොකද ඒක ගන්න පුළුවන්, සිරිමාවෝ එක ඉස්සරහින් තියෙන ගේට්ටුවෙන් ගියොත් තමා. කොහෙට කොහෙට ඒව යනවද නම් දන්නෙ නෑ, බොරැල්ල, මරදාන පැත්තට නම් එකක් යනව.

බිම උනත් ඉඳගන්න බලාන යන්න, මොකද හරියකට ඉඳගන්නවත් බැරි තරම් සෙනඟක් ඇතුළෙ ඉන්නව. ඒත් කඩ කිහිපයක් ඇරුනම අනිත් හැම එකකටම කරදරයක් නැතිව ගිහිල්ල පොත් තෝරන්න පුළුවන්. සෙනඟ ගොඩක් ඉන්නව, නමුත් පොත් තෝරන්න ඉඩ ඇති. (අපි ගිය වෙලාවෙ නම් යම් අපහසුතාවයක් ආවෙ ගුණසේන, සරසවි පමණයි. සමයවර්ධන එක ඇතුළට යන්න බැරි තරම් සෙනඟ නිසා ගියේ නෑ.) ඉංග්‍රීසි පබ්ලිශර්ස්ල ඔක්කොම වගේ හිටියෙ A හෝල් එකේ, ඒ කියන්නෙ සිරිමාවෝ එකේ වම් පැත්තෙ හෝල් එක. විදර්ශනා, දයාවංශ ජයකොඩි, සූරිය, රත්න, ආරිය වගේ ප්‍රසිද්ධ කට්ටිය හිටියෙ B හෝල් එකේ. ඒ කියන්නෙ සිරිමාවෝ එකේ දකුණු පැත්තෙ. ගුණසේන හිටියෙ වෙනද වගේම සිරිමාවෝ එක ඉස්සරහ වම් පැත්තෙ විශාල ස්ටෝල් එකක. සරසවි හිටියෙ සිරිමාවෝ එක එහා පැත්තෙ තියෙන කැන්ටින් එකක් එක්ක තිබෙන තාවකාලික Conference Hall එකේ.

කන්න නම් ඇති වෙන්න තියෙනව, හැබැයි හුඟක් ඒවයින් කන්න නම් ඇති වෙන්න සල්ලිත් තියෙන්න ඕනෙ. අපි ඉතින් නූඩ්ල්ස් කෑව, ගෙදර එනකොට බඩේ පණුවන්ට බොක්සිං ගහල එපා වෙලා අත ඇරල දාල. බඩ ඉරිඟු තිබ්බනෙ, කන්න ඕනෙ උනා ඒත් නූඩ්ල්ස් කෑවෙ. අරකක් කෑව නම් ආයි බඩගිනි එන්නෙ නෑ ගෙදර එනකම්. :(

හරි දැන් පොත් කතා වලට එමු. මගෙ ඉස්සෙල්ල පෝස්ට් එක කියවපු නැති අය මෙතනින් ගිහිල්ල කියවන්නකෝ. මම හිතන් ගියේ, චින්ගීස්ගෙ තවත් පොත් කිහිපයක්, පවුලෝගෙ පොතක් දෙකක්, ජස්ටින් ගාඩර්ගෙ පොතක්, බෞද්ධ පොත් කිහිපයක්, විද්‍යා ප්‍රබන්ධයක්, වීර චාරිකා නව කතාවක්, මනෝ විද්‍යා පොතක් වගේ දේවල් ටිකක් ගන්නයි. ඒත් කළ දේ ටිකක් වෙනස් උනා.

මෙන්න මෙහෙමයි උනේ.

පංච තන්ත්‍රය - අනුවාදක හේමපාල මුණිදාස

ගුණසේන; රු. 350/=

ඉන්දියානු පොතක්. උපදේශාත්මක කතා තමයි තිබෙන්නෙ.

ඈ හෙවත් අයේෂා (කොටස් 1,2) - රයිඩර් හැගාඩ් | කේ. පී. කරුණාතිලක

දයාවංශ ජයකොඩි; රු. 350*2 = 700/=

මේ ඇලන් ක්වාටර්මෙන්ගේ කතා මාලාවේ එකක්. මේකට පස්සෙ ඈ සහ ඇලන්, අයේෂා නැවත එයි, ඇලන් හා ඔහුගේ බිරිඳ කියල කතා ටිකක් තියෙනව. මේව එකටම ගලාගෙන යන කතා. මේවා වැටෙන්නෙ Adventure Novels ගණයට.

පියෙද්රා ගඟබඩ අසල හිද මම වැළපුනෙමි - පාවුලෝ කොයියෝ

විදර්ශනා; රු. 300/=

කාන්තාවක් හා තවෙකෙක් යන සංචාරයක් ගැනයි කියවෙන්නේ. තමන්ගේ සිහින, බලාපොරොත්තු හා ආදරය සොයා යන්නියකගේ කතාවක්.

යක්ෂයා සහ ප්‍රයිම් මෙනෙවිය - පාවුලෝ කොයියෝ

විදර්ශනා; රු. 350/=

කෑදරකම, භීතිය, බියගුළුකම විසින් ගිලගනු ලැබූ ප්‍රජාවක්, සිය වේදනාබර අතීතයෙ අවතාරයන්ගෙන් වද විඳිනා මිනිසෙක්, සතුට සොයා යන තරුණියක්. ආලෝකය අඳුර අතර පවතින අරගලය, අපේ දෛනික ජිවන අරගලය හා එහි අබැඳියාව

වෙරෝනිකා මැරෙන්නට තීරණය කරයි - පාවුලෝ කොයියෝ

විදර්ශනා; රු. 300/=

ජීවිතයේ සතුට සොයා ගොස් බැරි තැන සිය දිවි නසා ගන්නට ගොස් අවසානයේ පිස්සන් කොටුවක සිහිය ලබා ජීවත් වීමට තවත් දින කිහිපයක් පමණක් තිබෙන රූමත් තරුණ කාන්තාවකගේ කතාවක්.

මිනිත්තු එකොළහේ කතාව - පාවුලෝ කොයියෝ

විදර්ශනා; රු. 420/=

ජීවිතය සොයා යෑමේදී, ආදරය, ලිංගිකත්වය හාආත්මීය අර්බුද හා ගැටෙමින් ඇය තුළින් ඇයවම මතු කෙර ගැනීමට කෙරෙන නිර්දීත ගවේෂණයක්.

වීදි දරුවෝ - බර්ලි ඩොරති

baby Bee; රු. 280/=

තම මව මිය යාමෙන් පසුව, විවිධ දුක් කම්කටොළු වලට මුහුණ දෙන අසරණ කුඩා දරුවෙක් ගැන කියවෙන කතාවක්.

නිරුවත් වානරයා - ඩෙස්මන් මොරිස් | එස්. එම්. බන්දුසීල

S & T Group; රු. 450/=

මේක ගැන නම් මම ඉස්සෙල්ල ලිපියෙත් කිව්වනෙ. කියවල තිබුනත් ගන්න හිතුන. මිනිසාගේ සමාජීය හැසිරීම් රටා, ආලයෙන් බැඳිම, හැඟීම්, ලිංගික රටා ගැන විමසුමට ලක් වෙන මනෝ විද්‍යාත්මක පොතක්.

අවසන් සිද්ධාන්තය - ආතර් සී. ක්ලාක්

S & T Group; රු. 750/=

ආතර් සී. ක්ලාක්ගේ අවසාන විද්‍යා ප්‍රබන්ධය තමයි මේක. අනාගතයේ පෘථිවියට පැමිණෙන පිටසක්වල ආක්‍රමණයක් ගැනයි කියවෙන්නේ. ඒ ආක්‍රමණයට හේතු වන්නේ පෘථිවියේ සිදුවන පරමාණුක පිපිරීම් වැනි දේ නිසා මිනිසා තර්ජනාත්මක සත්වයෙක් යයි සිතා මිනිසාව විනාශ කර දැමීමට ඔවුනට අවැසි වීමයි.

ඉතින් ඔන්න ඔය පොත් ටික තමා මම ගත්තෙ. අපේ උදිත සහෝදරයාත්, නිසුපා සහෝදරියත් නම් ලොරි දෙකකට විතර පොත් ගත්තා. :D බර වැඩි කමට එක්කෙනෙක්ගෙ කකුලකුත් මොකද්ද වෙලා තිබුනා. :D

මේ පොත් වලට අමතරව තව ‍යෝජනා ටිකක් තිබෙනවා.

ආතර් සී. ක්ලාක්ගෙ 2001, 2010, 2016, 3001 එක පොත් ගැන ඔබ දන්නවා ඇති. ඒ පොත් සියල්ලම S & T Group ස්ටොල් එකේ තිබෙනවා. ඊට අමතරව චන්ද්‍ර ගවේෂණය කියන පොතත් ගොඩක් හොඳයි.

මම හිතන් ගිය විදිහට චින්ගීස්ගෙ පොත් එකක්වත් ගන්න බැරි උනා. මොකද මම හෙව්ව පොත් තිබුනෙ නෑ හොයාගන්න. නමුත් හැමතැනම තිබුනා ජමිලා හා ගුරු ගීතය. සමහරක් තැන් වල ඒ පොත් වලට ඉතා විශේෂ තැනක් දීල තිබුන, හේතුව නම් මොකද්ද කියල හිතාගන්න බෑ.

බෞද්ධ ග්‍රන්ථ මන්දිරයට යන්න බෞද්ධ පොත් ගන්නව නම්. මට යන්න බැරි උනානෙ. ඇතුළෙ නම් තිබුන පිටිදූවෙ හාමුදුරුවන්ගෙ පොත්ම තිබෙන ස්ටෝල් එකක්. කිරිබත්ගොඩ හාමුදුරුවන්ගෙ පොතුත් තිබුන ස්ටෝල් කිහිපයක.

වානරයා පොත නම් තිබුනේ නෑ හොයාගන්න. මම දැක්කෙම නෑ.

ඡායාරූපකරණය ගැන පොත් හෙව්ව. Expographic එකේ තිබ්බ ඉංග්‍රිසි පොත් ටික විතරමමයි මම දැක්කෙ. :( ඒව නම් පට්ට ගණං.

කොටස් වෙලඳපළ ගැන උනත් පොතක් හොයාගන්න බැරි උනා. පොඩි පොත් පිංචක් ලිව්ව නම් කීයක් හරි හොයාගන්නත් පුළුවන් වෙයි නේද කියල හිතුන.:D

පූසො ගැන පොත් කිහිපයක් තිබ්බ. ෂෝක් අප්ප ඒව. පිටු දෙක තුනක ඉංගිරිසි අකුරු ටිකක් තියෙනව, ඉතුරු පිටු ඔක්කෝම පුසන්ගෙ එක එක ෆොටෝ වලින් පිරිල. :) හරිම හුරතල්. ඒත් Expographic එකේ තමා තිබුනෙ.

බාගේන් පොත් විකුණන වෙනමම සෙක්ෂන් එකක් තිබුනා. ඒකටත් යන්න බැරි උනානෙ. ගියත් වැඩක් නෑ. අතේ තිබ්බ සල්ලි ඉවර වෙලා. :(

කොහෙද ක්‍රෙඩිට් කාඩ් එක අරගෙන ගියේ ඒකෙන් ගෙවල ලබන මාසෙට ණය වෙන්න, ඒත් දයාවංශ එකේ, විදර්ශනා එකේ එහෙම ක්‍රෙඩිට් කාඩ් වලින් ගෙවන්න පහසුකම් තිබුනෙ නෑ නෙ. :( අපරාදෙ. නැත්තම් තව පොත් ටිකක් ගන්නවා.

හ්ම්ම්. ඔන්න ඕක තමයි අද ඉස්ටෝරිය. දැන් නිදිමතයි. එහෙනම් ඉස්සරහට යන කට්ටියට සුභ පතනවා හොඳ පොත් ගන්න.

පොත් ප්‍රදර්ශනේ බලන්න මම හෙට යමි

noreply@blogger.com (Madhawa Habarakada) — Sat, 17 Sep 2011 14:04:00 +0000

ඔන්න ඉතින් සමහරෙක් අද යන්න ඇති ප්‍රදර්ශනේ බලන්න. මම ඉතින් යන්න ඉන්නෙ හෙට තමා. මම කිව්වට මාත් එක්ක, උදිතයි, නිසුපයි එනව.
මුහුණු පොතේ අපේ මෙගා ත්‍රෙඩ් එකේ කතා උනු විදිහට හෙට උදේ 10ට BMICH එක ඉස්සරහ පොකුණ ගාවට කස්ටිය සෙට් වෙන්නයි කල්පනාව. ගෝල්ඩ් ෆිෂ් එහෙමත් එනව කිව්ව. තව කට්ටිය ගොඩක් එයි. :)
ඔයාලත් එනවද? එහෙනම් අපි එතනට සෙට් වෙමුද?

ඒක නෙමෙයි, කට්ටිය ගන්න ඕනෙ පොත් එහෙම හිතාගෙනද ඉන්නෙ? මොකද මට ආරංචි උනු හැටියට, අද නම් ඇඟිල්ලක් ගහන්න ඉඩ නැති තරම් සෙනඟ උන්නලු. :( පොත් කියව කියව තෝර තෝර ඉන්න නම් ලේසි වෙන එකක් නෑ කියලයි හිතෙන්නෙ. හෙට තවත් සෙනඟ වැඩි වෙයි.
මගෙ පොත් තෝර ගන්න උදව්වක් ලිපිය කියෙව්වද? සමහරක් විට සමහරෙකුට ඒක ප්‍රයෝජනවත් වෙයි කියල හිතෙනව.
එහෙනම් හෙට හම්බුවෙමු.

පොත් ප්‍රදර්ශනෙන් පොත් තෝරන්න මගෙනුත් උදව්වක්

noreply@blogger.com (Madhawa Habarakada) — Thu, 15 Sep 2011 00:30:00 +0000

හෙට අනිද්ද පටන් ගන්නවනෙ ලංකාවේ මහා පොත් ප්‍රදර්ශනේ. මේ පාර BMICH එකත් නැති නිසා පට්ටම තදබදයක් නම් තියෙයි. තෙරපිලා මැරෙයිද දන්නෙ නෑ. :D

ඉතින් ඕකෙන් අපි පොත් ගන්නවනෙ. මමත් ගන්නව. ඔයාලත් ගන්නව. ඉතින් ඔයාලට මමත් පොඩි සහයක් වෙන්න හිතුව පොත් ටිකක් තෝරගන්න.

මේ කියන්න යන්නෙ නම් මගේ රසාස්වාදයේ හැටියට මම තෝරල තිබෙන පොත්. (මගෙ ලඟ, මගෙ කාමරේ, මගෙ පොත් රාක්කෙ තිබෙන මගෙ පුද්ගලික පුස්තකාලෙ තිබෙන මම එකතු කරල, මිලට අරන් තිබෙන පොත්) ඉතින් මේ පොත් වලට ඔයාලත් කැමති නම් ඔයාලටත් මිලට ගන්න ආරාධනා කරනවා.

මම කැමතිම පොත් රචකයෙක් තමයි චින්ගීස් අයිත්මාතව්.

ඔහුගේ පොත් කිහිපයක්ම මගෙ ලඟ තිබෙනවා. මම ඔහුගේ පොත් එකතු කරනවා. මොහු කිර්ගීසියානු ගත් කතුවරයෙක්. කිර්ගීසියාව කියන්නෙ සෝවියට් රුසියාවත් එක්ක තිබෙන රටක්. ඉතාම ලස්සන පරිසරයක් ඇති රටක්ලු. හරි දැන් පොත් වලට යමු.

අංක එකේ පොත: "ගුරු ගීතය"

මේ පොත ඉතා කුඩා නවකතාවක්. නමුත් අයිත්මාතොව්ගෙ ඉතාම ප්‍රසිද්ධ වුනු නවකතාව කියල කියන්න පුළුවන්. ලස්සන කතාවක් තියෙන්නෙ. කිර්ගීසියාවේ රුසියානු බලය ස්ථාපිත වෙන කාලයේ කතාවක්. සමහරෙක් අහල ඇති, "පොප්ලර් ගස් දෙක" ගැන. අයිත්මාතොව්ගෙ ගොඩක් කතා වල මේ පොප්ලර් ගස් ගැන කියවෙනවා.

මිල වෙන්නෙ රු. 100ක් පමණ.

අංක දෙක: "ජමිලා"

මෙයත් ඉතාම ප්‍රසිද්ධ වුනු පොතක්. මේකත් ගුරු ගීතය වගේම ඉතාම කුඩා නව කතාවක්. නමුත් මේක තමා අයිත්මාතොව්ගෙ ප්‍රථම විශාල නවකතාව. ජමිලා නම් කාන්තාවක් වටා ගෙතිල තිබෙන, ආදරය, ජීවිතය, ගැන කියවෙන සරළ නමුත් ගැඹුරු අරුතක් දෙන කතාවක්.

මේකත් රු. 100 අවට මිලක තමයි පවතින්නෙ.

මගේ තෙවන තේරීම: "ධීවර ගීතය"

මේක ටිකක් ලොකු පොතක්. නමුත් ගොඩාක් ලොකු නෑ. දාර්ශනික නව කතාවක්. ආත්ම පරිත්‍යාගය, ආත්ම විශ්වාසය ගැන කියවෙන ඉතාම ලස්සන කතාවක්. අයිත්මාතොව් ලිව්ව පොත් වලින් ඔහු කැමතිම පොත මේකයි.

සාගරයේ අතරමං වන කුඩා දරුවෙක් වටා තමයි කතාව ගලාගෙන යන්නෙ. දෙබස් ගොඩාක් අඩුයි. තිබෙන්නෙ, හිතේ ඇතිවන හැඟීම්, අතීතය මතක් වීම් තමයි ගොඩාක් තිබෙන්නෙ. සමහරෙක්ට නම් කියවගෙන යනකොට එපා වෙන්නත් ඉඩ තිබෙනවා.

මිල රු.220ක් තමා වෙන්නෙ. (විදර්ශනා ප්‍රකාශන)

මගේ සිව්වන තේරීම: "සමුගනිමි ගුල්සාරි"

සමහරෙක් මෙය පළමු තේරීම කරන්නට ඉඩ තිබෙනවා. මේක ඒ තරම්ම ප්‍රසිද්ධ හොඳ කතාවක්. මහළු මිනිසෙක් හා මහළු අශ්වයෙක් අතර තිබෙන අපූර්ව සම්බන්ධතාවයක් ගැන කියවෙන කතාවක් මේක. දුක්බර අවසානයක් තිබුනත්, ඉතාම හැඟීම්බර, ලස්සන කතාවක්.

මිල රු. 350යි (විදර්ශනා ප්‍රකාශන)

තවත් පොත් ගොඩාක් තිබෙනවා චින්ගීස් අයිත්මාතව්ගෙ. "සුදු නැව" නමින් තවත් පොතක් තිබෙනවා. (ගිය අවුරුද්දෙ ප්‍රදර්ශනෙන් මම අරන් ආව, තාම මට කියවන්න බැරි උනා, නමුත් මගෙන් ඉල්ලගෙන ඒක කියෙව්ව කිහිපදෙනෙක්ම)

ඊලඟ කතුවරයා "පවුලෝ කොයියෝ". ඉතා ප්‍රසිද්ධ ලතින් ඇමරිකානු ලේඛකයෙක්.

මොහුගේ පොත් නම් මගෙ ලඟ තිබෙන්නේ එකයි, ඒක සුපිරි. "සන්තියාගෝ නම් සැරිසරන්නා". කවුරුත් දන්න නමින් කිව්වොත් "The Alchemist".

නිධානයක් සොයා යන කොලු ගැටයෙක් වටා තමයි මේ කතාව ගෙතෙන්නෙ. නමුත් මෙහි ඒ නිධානෙට වඩා ගොඩාක් දේවල් තිබෙනවා. උත්සාහය, ආදරය, .... ගොඩක් දේවල්...

මිල රු. 230යි. (විදර්ශනා ප්‍රකාශන)

ඊළඟට ඉන්නෙ "යුස්ටයින් ගෝඩර්"

"සොෆීගේ ලෝකය" නම් ලෝක ප්‍රසිද්ධ නවකතාව රචනය කළ මොහු, නෝවීජියානු ලේකකයෙක්.

මම කතා කරන්න ලෑස්ති වෙන පොත තමයි, "අඳුරු පළිඟුතල මැදින්" කියන පොත. මරණාසන්න ගැහැණු ලමයෙක් හා ඇය හමුඅට එන සුර දූතයෙන් අතර ඇතිවන ජීවිතය, මරණය ගැන කතා කරන කතාබහ ගැන තමයි මෙහි තිබෙන්නෙ. හුඟක් සුන්දර, අනුවේදනීය කතාවක්. දාර්ශනික ප්‍රශ්න, අසන මේ ගැහැණු ළමයාත් ඒවාට සරළ පැහැදිලි කිරීම් කරන මේ සුර දූතයාගේත් කතා බහ එක හුස්මට කියවන් යන්න පුළුවන්.

මිල: රු. 220යි. (baby Bee Publishers)

ඔන්න එනව ලොකු ලොක්කෙක්. කවුරුත් දන්න "ඇන්ටන් චෙකෝෆ්", ලෝක ප්‍රසිද්ධ රුසියානු කෙටි කතා රචකයෙක්.

මම කියන්න යන පොත තමයි, "කළු සිවුරුධර භික්ෂුව" (The Black Monk)

පොඩි පොතක්. හැබැයි ගොඩක් ගැඹුරු පොතක්. (ඇත්තම කියන්න, මටත් මේක හැරියට තේරුනේ නෑ) පුරාවෘත්තයක් වන භික්ෂුවකුත්, ලෞකික ජීවිතයේ සුන්දරත්වය පෙන්වන උයනකුත්, උත්තම මිනිසෙක් වෙන්න හදන පාරලෞකික දැක්මක් සහිත පුද්ගලයෙකුත් වටා ගෙතෙන කතාවක්.

මිල රු. 120යි. (ගොඩගේ ප්‍රකාශකයෝ)

පරිවර්තන ඉවරයි. දැන් ලංකාවෙ කතාවක් ගැන කියන්නම්.

කතුවරයා රත්නසිරි අබේවර්ධන

පොත "නිහඬ ගිගුරුම"

කොටි ත්‍රස්තවාදයත් එක්ක හැප්පෙන අහිංසක මිනිස්සුන්ගේ විනාස උනු, හෙම්බත් උනු ජීවිත අතරෙ හිටපු එක් දිරිය කාන්තාවක් ගැන කියවෙන මේ පොත, කාන්තාවගේ ලාලිත්වය, සුකොමලත්වයට වඩා, ඇය තුල ඇති ශක්තිය, අධිෂ්ඨානය හුවා දක්වන ආධුනික කතුවරයෙක්ගේ විශිෂ්ඨ නව කතාවක්.

මිල රු.495යි. (කතුවරයාගේම ප්‍රකාශනයකි)

මම ගොඩාක්ම කැමති කතා පොතක් තිබෙනවා, මගෙ ලඟ නම් නෑ, නමුත් කිහිපවරක්ම කියවල තිබෙනවා.

"වානරයා". (නැත්තම්, "අමරණීය වානර මුණිවරයා") චීන පුරාඩෘත්තයක් ඇසුරෙන් ගොඩනැඟුනු ලස්සන කතාවක්. ඔයාලට මතක නම් කාලෙකට ඉස්සර රූපවාහිනියේ කාටූන් එකකුත් ගියා "වානර රජු" කියල. (ඒ වගේ නම, මතක නෑ හරියට). ත්‍රිපිටකය ලබා ගැනීමට චීනයේ සිට ඉන්දියාවට යන හාමුදුරු නමකට සහයට එන, දෙව් ලොවටත් කරදරයක් අභියෝගයක් වූ, අමරණීය වානර රජෙකුගේ කතාවත්, මේ හාමුදුරුවො එක්ක යන මෙ වානර රජු හා සෙට් එක මුහුණදෙන විවිධ කරදර බාධා ගැනත් කියවෙන කතාවක්. මාරම ආසයි මම මේකට. මිල නම් මතකයක් නෑ. පළවෙනි පාර මම කියෙව්වෙ 10 වසරෙදි හරි ඊටත් ඉස්සෙල්ල හරි. ඒ කාලේ මගෙ කියවීමේ හොඳ ස්පීඩ් එකකුත් තිබ්බ. එක හුස්මට පුටුවෙන් නැගිටින්නෙ නැතිව පැය 8කින් කියවල ඉවර කළා. (තේකත් අම්ම ලඟට ගෙනත් දුන්නු නිසා බිව්ව.)
පහළ රූපෙ දැක්කම ඩයල් එකව මතක් වේවි.

මතකද "The Forbidden Kingdom" ෆිල්ම් එක? අන්න ඒකෙ හිටියෙ මෙයා තමයි. :)

තව එකක් මතක් වෙනවා, "ඇපොකැලිප්ටස්". මේකත් ටිකක් ලොකු පොතක්. වහලුන්ගේ ගැලවුම් කාරයෙක් වන ඇපොකැලිප්ටස් වහලුන් නිදහස් කරගෙන ඔවුන්ගේම රාජ්‍යයක් සඳහා සටන් වැදී ජයගෙන අලුත් ජීවිතයක් අරඹන හැටි තමා මේ නව කතාවෙහි කියවෙන්නෙ.

දැන් කියන්න යන්නෙ බෞද්ධ පොත් කිහිපයක් ගැන.

පූජ්‍ය කිරිබත්ගොඩ ඤාණානන්ද හිමියන්ගේ පොත් ගොඩාක් තිබෙනව ඉතාම හොඳ ඒවා. ඒවායේ තිබෙන විශේෂත්වය වෙන්නෙ, සරළ බස්වහර, පහසුවෙන් තේරුම් ගත හැකි බව, ඒත් එක්කම ගොඩක් පොත් තරුණ පාඨකයා ඉලක්ක කරල තමා ලියල තිබෙන්නෙ. "අඳුර විනිවිද එළිය දකින්නට" (දයාවංශ ජයකොඩි; රු.180), "සිත දියුණු කරන ක්‍රම" (මහමෙව්නා ප්‍රකාශන; රු. 160), තව බොහොමයක් පොත් තිබෙනවා.

බෙල්ලන ඤාණවිමල මහා නාහිමිගේ "පෙනෙන ලොඅ තුළ නොපෙනෙන ලොවක්" කියන පොතත් මම ගොඩක් කැමති පොතක්. විද්‍යාව, බුදුදහම, පුනරුප්පත්තිය, සිත ගැන ගොඩක් දේවල් කියවෙන, බෞද්ධ, විද්‍යාත්මක පොතක්. (දයාවංශ ජයකොඩි; රු. 180)

ඔබට ඕනෙ නම් නිනිති තාක්ෂණය (නැනෝ තාක්ෂණය) ගැන දැන්ගන්න මම දන්නා තරමින් තිබුනු එකම පොත, චින්තක නදුන් රත්නවීරගෙ "ඉසුරු පිරි යුගයකට - නිනිති තාක්ෂණය" කියන පොතයි. දැන් නම් තවත් පොත් තිබෙනවාද නම් දන්නේ නෑ. නැනෝ තාක්ෂණයේ න්‍යායන් හා ප්‍රායෝගික භාවිත ගැන සරළව මෙහි ඉදිරිපත් කර තිබෙනවා. (කතෲ ප්‍රකාශනයකි; රු.200)

සාපේක්ෂතාවාදය ගැන අහල ඇතිනෙ? අවකාශයය, කාලය, කාලයේ වක්‍ර වීම, ආලෝකයෙ වේගය ඉක්මවා යෑම.... ඔව තේරෙනවද?

මෙන්න තියෙනව ඉතාම හොඳ, පොඩි පොතක් සාපේක්ෂතාවාදයේ ගැඹුර නැත්තටම නැති කරල ඉතාම සරළව පැහැදිලි කරල දෙන. මේක පරිවර්තනයක්.

"සාපේක්ෂතාවාදය යනු කුමක්ද?" පරිවර්තකයා ඩී. එස්. එස්. මායාදුන්නේ. මිල වෙන්නෙ රු.150ක් පමණයි. මේක විසිදුනු ප්‍රකාශනයක්.

මෙන්න හොද පොතක් විශේෂයෙන්ම පාසල් සිසුන්ට. විභාග වලට බයද? එහෙනම් මේක කියවන්න, භාවිතා කරන්න. දායා රෝහණ අතුකෝරළයන්ගේ, "විභාග ජය ගත හැකි පහසු මඟ". (ශික්ෂා මන්දිර; රු.150)

ගොඩක් හොඳ පොතක්. දයා රෝහණයන් කියන්නෙ, ධනාත්මක චින්තනය ගැන නිතර කතා කරන, ගත් කතුවරයෙක්, විශ්ව විද්‍යාල කථිකාචාර්ය වරයෙක්. මොහුගේ පොත් ඉතාම ජනප්‍රිය උනා. මෙතුමාගේ "සිත් දිනාගැනීමේ මඟ" කියන පොතටත් මම ගොඩාක් කැමතියි.

ඉතින් තව පොත් නම් ගොඩාක් තිබෙනවා. මම කියවපු, නමුත් මගෙ ලඟ නැති පොත් ගොඩක් තිබෙනවා, ඉතාම හොඳ. කියවපු පොත් ගොඩක් මට මතකත් නෑ, අන්න ඒක තමයි දුක. :(

ඉතින් මේකෙන් ඔයාලට ප්‍රයෝජනයක් උනොත් සතුටුයි. ඒ එක්කම මටත් මේ ලිපිය කියවන අනිත් අයටත් සහයක් වෙන්න, තවත් හොඳ පොත් අදහස් මගින් කියල.

එහෙනම් සමහරක් විට පොත් ප්‍රදර්ශනයේදී ඔබව හමුවන බලාපොරොත්තුවෙන් ලිපිය අවසන් කරනවා. මාව දැක්කොත් කෑගහල හරි කතා කොරන්ඩ හොඳේ. (දන්න කෙනෙක් නම් අඳුනගන්න බැරි උනොත් සමාවන සේක්වා, මට ටිකක් එක පාරක් දැක්ක මුහුණු මතක හිටින්නේ නැත.)

(මම යන්න ඉන්නෙ 18 වෙනිදා.)

සටහන:
මේ මිල ගණං ටිකක් පරණ ඒව නිසා වෙනස් වෙන්න ඉඩ තිබෙනවා.

අලුතින් එකතු කිරීමක් (2011.09.15; 19:30):
තව ඉතාම හොඳ පොතක් මතක් උනා, ඩෙස්මන් මොරිස්ගේ පොතක් වන "Naked Ape" පොතෙහි සිංහල අනුවාදය "නිරුවත් වානරයා". මේක මනෝ විද්‍යාව, ජීව විද්‍යාව කැටි උනු පොතක්. මිනිසාගේ ක්‍රියාකාරකම් ගැන අතීත වර්තමාන ගොඩක් දේවල් තිබෙන විද්‍යාත්මක පොතක්. ඩෙස්මන් මොරිස් කියන්නෙ සිග්මන් ප්‍රොයිඩ් වගේම අතිශය අග්‍ර ගණයේ මනෝ විද්‍යාඥයෙක්.

අලුතින් එකතු කිරීමක් (2011.09.15; 20:55):

ශ්‍රීමත් ආතර් කොනන්ඩොයිල්ගෙ "ෂර්ලොක් හෝම්ස්" රහස් පරික්ෂක කතා පෙළ ලෝක ප්‍රසිද්ධ වුනු කතා පෙළක් කියල කියන්න පුළුවන්. මුලින් ඔහු මේ කතා ලිව්වෙ පුවත්පතකට. පස්සෙ තමා පොතක් වශයෙන් එළි දැක්වුනේ. කොනන්ඩොයිල්ට එපා වෙලා ඔහු එක් තැනකදි ෂර්ලොක් හෝම්ස්ව මරල දාල කතාව අවසන් කරනවා. නමුත් පාඨකයන්ගේ දැඩි ඉල්ලීම නිසා ඔහු යළිත් හෝම්ස්ට පණ දීල කතාව යළිත් ලියනව.

ෂර්ලොක් හෝම්ස් රහස් පරීක්ෂක කතා මාලාවෙ කොටස් 60 ක් තිබෙනවා. කෙටි කතා 56කුත් දිගු කතා 4කුත් මේ 60ට ඇතුළත්. මේවායින් ප්‍රසිද්ධම කතාව තමයි "බැස්කවිල් ශාපය".
චන්දන මෙන්ඩිස් කියන පරිවර්තකයාට ස්තුතිවන්ත වෙන්න, ඔහු තමයි පාඨකයාට ඉතාම හොඳින් හිතට වැදෙන විදිහට මේ කතා පරිවර්තනය කළා. නමුත් ඔහු පස්සෙ කළ දේ නම් මම අනුමත කරන්නෙ නෑ. ඔහුම කතා ලියමින් ෂර්ලොක් හෝම්ස්ගේ කතා නමින් විකිණුවා.
ආතර් කොනන්ඩොයිල්ගේ තවත් කතා චන්දන මෙන්ඩිස් පරිවර්තනය කර තිබෙනවා. ඒවත් ගොඩක් ලස්සනට රසවත්ව පරිවර්තනය කර තිබෙනවා.

අලුතින් එකතු කිරීමක් (2011.09.16; 10:45):

කමෙන්ට් එකක් නිසා මතක් උනු පොත් කිහිපයක් දාන්නම්. මේවත් ඉතාම විශිෂ්ට ගත් ඉංග්‍රීසි කතුවරයෙක් වන හෙන්රි රයිඩර් හැගාඩ්ගෙ පොත් කිහිපයක්.

එකම චරිත ටිකක් මේවයෙ තිබෙන්නෙ. මේ කතා ටික ටික එකිනෙකට සම්බන්ධයි.

1. දියමන්ති නිම්නය (King Sollomon's Mines)

අප්‍රිකානු දියමන්ති නිධියක් සොයාගෙන යන කණ්ඩායමක් හා ඔවුන් මුහුණදෙන ත්‍රාසජනක අත්දැකීම් සමූහයක්. ගෝත්‍රිකයන් සමඟ කරන සටන්..... මේක වීර වික්‍රම පිරි කතාවක්. \

මිල නම් කොහොමද දන්නේ නෑ, මගෙ ලඟ තිබෙන පොත මම ගත්තෙ 1999දි රු. 90කට. දැන් රු.200-250 ක්වත් ඇති.

2. ඉස්සෙල්ල එකටත් වඩා හොඳ කතාවක්. අරකෙ ඉන්න සෙට් එකම යන තවත් වික්‍රමයක්, "ඇලන් ක්වාටර්මෙන් වීර චාරිකා". සැඟවුණු ශිෂ්ටාචාරයක් සොයා යන ත්‍රාසය භීතිය පිරි කතාවක්. මේකෙ මිල නම් රු. 300-400 ක්වත් ඇති කියල හිතනවා.

3. "ඈ", "අයේෂා" සහ "ඈ සහ ඇලන්" කියන කතා දෙකත් එකිනෙකට සම්බන්ධයි. මේ ඇලන්ම තමයි ඉස්සෙල්ල කතා දෙකේම හිටි ඇලන් ක්වාටර්මෙන්.

ඊයෙ ගොඩක් විශේෂ දවසක්

noreply@blogger.com (Madhawa Habarakada) — Sat, 10 Sep 2011 07:01:00 +0000

ඊයෙ, 2011 සැප්තැම්බර් 9 වනදා. ගොඩාක් විශේෂ දවසක් මට. මට විතරක් නෙමෙයි තවත් එක පුද්ගලයෙකුට. අද විශේෂයක් වෙන්න හේතු උනේ, 2009 සැප්තැම්බර් 9 වනදා විශේෂ දෙයක් සිද්ධ උනු නිසා. මගෙ ජීවිතේ උනු ගොඩක්ම ලස්සන දෙයක්. මම හොය හොයා උන්නු දෙයක් මට හම්බ උනු දවසක්. :)

ඒ සිදුවීම සිද්ධ වෙලා ඊයෙට හරියටම වසර දෙකක් උනා. ඊයෙ මේ ගැන ලියන්න හිටියත් වෙලාවක් හම්බ උනේ නෑ. ඉතින් ඔය කියන දේ උනේ 2009 අවුරුද්දෙ 9 වෙනි මාසෙ 9 වෙනිද උදේ 9 වෙනි පැයේදි (හරියටම කිව්වොත් 08:30 ට. )

මොකද්ද කියල හිතාගන්න පුළුවන්නෙ?

බලන්නකො, ක්ලික් එකක් දාල ලොකු කරල.

විස්තර කියන්න යන්නෙ නෑ, ඔයාල අදහස් දක්වල යන්නකො...

ඔබත් තරබාරුකමින් දුක් විඳිනවාද?

noreply@blogger.com (Madhawa Habarakada) — Thu, 01 Sep 2011 04:46:00 +0000

මේ ප්‍රශ්නෙ තිබෙන ජනතාව නම් ගොඩක්ම ඉන්නව ලෝකෙ පුරාම. මේකට හේතුව මොකද්ද??? ප්‍රධානම හේතුව තමයි, ජීවන රටාවේ වැරදි, දෙවනුව ආහාර රටාවේ වැරදි. මම වෛද්‍යවරයෙක් නම් නෙමෙයි. නමුත් මේ පියවර ටික අනුගමනය කරල ඔබගේ බර අඩු කරගැනීමට හොඳ සහයක් ගන්න පුළුවන් වේවි කියල හිතනවා.

බර අඩු කර ගැනීම

· ඔබගේ බර කෙතරම් අඩු විය යුතුදැයි දැනගන්න. ඒ අනුව බර අඩු කර ගැනීමේ කෙටිකාලීන අරමුණු හා ඉලක්ක සාදාගන්න

· ඔබ ලඟාකරගන්නා ඉලක්කය ඔබ විසින්ම ඇගයීමට ලක් කරන්න . කුඩා ප්‍රමාණයක බර අඩු වීමක් වුවද වැඩදායී වේ

· ඔබගේ ඉලක්ක සපුරාලීමට හැකිවන පරිදි, ක්‍රමානුකූලව, ආහාර ගැනීමේ පුරුදු වෙනස් කරන්න

· ඔබ අහාර වලින් ලබාගන්නා ශක්ති ප්‍රමාණයට වඩා වැඩි ශක්ති ප්‍රමාණයක්, ශරීරය වෙහෙසීම හරහා දහනය කිරීමෙන් ඔබගේ බර අඩු කරගත හැකිය

· හොඳ ආහාර පුරුදු මගින් ඔබගේ ශරීර බර වැඩි වීම පාලනය කරගත හැකිය .ඔබගේ ශරීර බර අඩු කර ගැනීම නිතර අභිප්‍රේරණය කරන්න

· සෙමින් ක්‍රමානුකූලව බර අඩු කර ගැනීම, ආරක්ෂිත හා වඩා ඵලදායී ක්‍රමයයි. ක්‍රමානුකූලව බර අඩුවීම, දීර්ඝ කාලීනව ශරීරයේ මේද ප්‍රමාණය අඩු කිරීමට හේතු වේ

· මධ්‍යස්ථ ක්‍රියාකාරී පුද්ගලයෙකුගේ ශරීර බර පවත්වාගෙන යාමට, ශරීර බර කිලෝග්‍රෑමයකට කැලරි 33ක ආහාර අවශ්‍ය වේ

· දවසකට ගන්නා ආහාර වල කැලරි ප්‍රමාණය 300කින් අඩු කිරීමෙන් හා වැඩ කිරීමෙන් දවන කැලරි ප්‍රමාණය 200කින් වැඩි කිරීමෙන්, සතියක් තුළ ශරීර බර ග්‍රෑම් 400කින් අඩු කර ගත හැකිය

· මූලික පෝෂණ අවශ්‍යතා සපුරාලීමට, එක් ප්‍රධාන වේලක් සඳහා විවිධ ආහාර වර්ග වලින් (කිරි, මස්/මාළු/බිත්තර වැනි මාංශජනක ආහාර, එළවළු, ධාන්‍ය, පළතුරු) එක බැගින් තෝරාගන්න

· සැම විටම, ආහාර ගැනීමේ රටාව ඇගයීම්කට ලක් කරන්න .අධික පිෂ්ටය හා ලිපිඩ (තෙල්) අඩංගු ආහාර ගැනීම හැකිතාක් දුරට අවම කරන්න

· සාර්ථක බර අඩුකිරීමේ සැලසුම් මගින් ආහාරයට ගන්නා මේද ප්‍රමාණය හා කැලරි ප්‍රමාණය අඩු වේ

භෞතික ක්‍රියාකාරකම්

· ඔබගේ ජීවන රටාවට ගැළපෙන භෞතික ක්‍රියකාරකම් (ව්‍යායාම) තෝරාගන්න

· කඩිසර ගමනින් ඇවිදීම, ව්‍යායාම සඳහා දිවීම, පිහිනීම වැනි ස්වායු ව්‍යායාම, ශරීර බර ස්ථිරවම අඩු කිරීමට හේතුවන ක්‍රියාකරකම් වේ

· සෑම දිනකම මිනිත්තු 30ක් ස්වායු අභ්‍යාස වල යෙදීම ප්‍රමාණවත් වේ (නමුත් එය කරනු ලබන ව්‍යායාම අනුව වෙනස් වේ)

· රාත්‍රී ආහාරයට පසුව ඇවිදීම, සෝපානය වෙනුවට පඩිපෙළ භාවිතා කිරීම, වාහනය තරමක් ඈතින් නවතා අවශ්‍ය තැනට පයින් ඇවිද යාම වැනි සරළ ක්‍රියාකාරකම් බර අඩු කර ගැනීමට උපකාර කරයි.

· ව්‍යායාම කිරීම මගින් නිරෝගීභාවය පිළිබඳ හැඟීම වැඩිවන අතර මානසික ආතතියද අඩු කිරීමට හේතු වේ.

ඉතා වැදගත් උපදෙස්

· ආහාර තෙලින් බැද සකස්කිරීමේදී, මේද අඩු තෙල් වර්ගයක් සමඟ නොඇලෙන (nonstick) බඳුන් භාවිතා කිරීමෙන්, ආහාරයට එක් වන මේද ප්‍රමාණය අවම කර ගත හැකිය

· ආහාර බැදීම වෙනුවට තම්බා ගැනීම හෝ පුළුස්සා ගැනීම (bake) වඩා යෝග්‍ය වේ

· කෙඳි සහිත ආහාර, බහුලව ආහාරයට එකතු කරගන්න

· බීම හා ආහාර රස කිරීම සඳහා සීනි වෙනුවට Solo Sucralose වැනි සීනි රහිත ආදේශක රසකාරක භාවිතා කරන්න

· කැලරි ප්‍රමාණය අඩු මේදය ඉවත් කළ ආහාර මිලදී ගැනීම හා ආපනශාලා වලදී කැලරි ප්‍රමාණය අඩු ආහාර වට්ටෝරු (වැඩිපුර එළවළු හා පළතුරු අඩංගු) තෝරාගැනීමට පුරුදු වන්න

· ආහාර වේල් මඟ හැරීමෙන් වළකින්න. වේල් 3 සිට 6ක් දක්වා වේල් ගණනක්, එම අවස්ථාවේ කුසගින්න නැතිකර ගැනීමට සෑහෙන පරිදි පමණක් ගන්න

· ආහාර ගැනීමට, නොගැඹුරු හා ප්‍රමාණයෙන් කුඩා පිඟානක් භාවිතා කරන්න. පිරුනු ආහාර පිඟානක් ගැනීමේ මානසික අවශ්‍යතාවය සපුරාලමින්, ගන්නා ආහාර ප්‍රමාණය අඩු කර ගැනීමට මෙය වැදගත්වේ

· ආහාර ගැනීමේදී සපමින් වැඩි වෙලාවක් ගත කර ආහාර ගන්න. සම්පූර්ණයෙන් බඩ පිරීමට පෙර ආහාර ගැනීම නවත්වන්න. බඩ පිරුණු බවට මොළයට සංඥා නිකුත් වීමට, ආහාර ගැනීම ආරම්භ කළ මොහොතේ සිට සාමාන්‍යයෙන් මිනිත්තු 20ක් පමණ ගත වේ

· ක්‍රමවත් කාලසටහනකට අනුව, ශරීර බර මැනීමට පුරුදු වන්න

· වඩා කැමති ආහාර ගැනීමෙන් ලබන තෘප්තිය වෙනුවට විවිධ ඇඳුම් ගැනීමට, චිත්‍රපට බැලීමට, විවිධ කොණ්ඩා මෝස්තර සකස්කිරීම, මිතුරන් සමඟ ගත කිරීම වැනි තෘප්තිමත් අවස්ථා පිළිබඳව අවධානය යොමුකරන්න

මේ පහතින් තියෙනව ඔබට අනුගමනය කරන්න පුළුවන් ස්වායු ව්‍යායාම සහිත වීඩියෝ කිහිපයක්. ඔබ YouTube එකට ගියොත් මේ සම්බන්ධව ඇති තරම් විඩියෝ සොයාගන්න පුළුවන්.

මතකද මම දුන්නු E Book එක?

noreply@blogger.com (Madhawa Habarakada) — Mon, 15 Aug 2011 04:33:00 +0000

"ඔබගේ වෙබ් අඩවියේ TRAFFIC වැඩිකරගන්නේ කෙසේද?" කියල E Book එකක මම ඔබට දුන්න මතකද? මම අද නිකමට ගිහිල්ල බැලුව MediaFire පැත්තෙ. පොත කී දෙනෙක් භාගත කරගෙනද කියල බැලුව. 162දෙනෙක් පොත භාගත කරගෙන. සතුටක්, එතරම් ප්‍රමාණයකට පොත කියවන්න හිතුනු එක හා ප්‍රයෝජනවත් උනු එක ගැන.
ඒක ගැන දන්නෙ නැති අය ඉන්නව නම්, මෙන්න මේ සබැඳිය හරහා ගිහිල්ල විස්තර බලල පොත භාගත කරගන්න.

අදහසකුත් දක්වල යන්නකො.

[තොටගමුවේ හිමියන්ගේ ජනප්‍රවාද] නැකැත් කෙළිය - Part 2

noreply@blogger.com (Madhawa Habarakada) — Sun, 14 Aug 2011 06:30:00 +0000

අන්තිමට කතාව ඉවර උනේ කොහෙන්ද?...... ආ උපාසකයො රාහුල හාමුදුරුවන්ගෙන් මෙහෙම ඇහුව.

"ඈ අපේ පොඩි හාමුදුරුවනෙ, ඔබවහන්සේ නෙළන්නෙ අර කළටි පොල් වල්ලද?" කියල.

කියෙව්වෙ නැතිනම් මෙතනින් ගිහිල්ල කියවන්න.

රාහුල හාමුදුරුවො කියපි.

"උඹල කෑ ගහන්නෙ නැතිව ඉදපියව්. පොල් කඩන දවසට උදලු ටිකකුයි පස් ඉවත් කරන්න කූඩ ටිකකුයි අරන් වරෙල්ල" කියල.

මොකද්ද අප්පේ ඒ කතාව??? පොල් කඩන්න මොකටෙයි උදලු??? පස් කූඩ?????

උපාසකයින්ට මාර ප්‍රශ්නෙ මොකද්ද මේ කතාව කියල. ඒත් ඉතින් සද්ද නැතිව උන්න.

ඔන්න දවස උදා උනා...

අහල පහළ ගම් වල විතරක් නෙමෙයි, ඈත ගම්මාන වල පවා කට්ටිය ඇවිල්ල සිද්ධිය බලන්න. මොකද වෙන්නෙ බලන්න. ඇයි අප්පේ රාහුල හාමුදුරුවො මොකද කරන්නෙ කියන්නෙ කියල බලන්න එපැයි.

ගුරු හාමුදුරුවො උජාරුවෙන් ඉන්නව තමුන්ගෙ ගහේ ඵලදාව බල බල. රාහුල හාමුදුරුවොත් ගානක්වත් නැතිව ඉන්නව. හරි නම් මේ වෙලාවට පොළව පලාගෙන යන්න තරම් ලැජ්ජාවක් වෙන්න ඕනෙනෙ. ඇයි අනේ කඩන්නෙ අර පුවක් ගෙඩි සයිස් කළටි ගෙඩි ටිකද????

ඔන්න ඉතින් කට්ටිය සෙට් වෙලා ගුරු හාමුදුරුවන්ගෙ ගහේ පොල් ටික කැඩුව, මොන ටිකද, පොල් ගෙඩි 200ක් විතර!!!. කඩල ඒ ටික ගොඩ ගහල ගුරු හාමුදුරුවො ඔලොක්කුවට වගේ රාහුල හාමුදුරුවො දිහා බැලුව.

රාහුල හාමුදුරුවො හිනා වෙලා මොකද දන්නවද කිව්වෙ?

"උපාසක, ගනිල්ල ඔය උදලු ටික, හාරපල්ල පොල් ගහ වටේටම."

පුදුමයෙන් හාමුදුරුවො දිහා බලපු උපාසක ගොල්ලො උදලු කූඩ අරගෙන පොල් ගහ වටේ හාරන්න පටන් ගත්ත.

මෙන්න පුදුමයක්, පොල් ගහේ මුල පලාගෙන පොලු හැදිල, එකක් දෙකක් නෙමෙයි මහ විසාල ප්‍රමාණයක්, වළු ගාණක්. ගම්මුන්ට විතරක් නෙමෙයි මෛත්‍රී හාමුදුරුවන්ටත් අදහා ගන්න බෑ. ඇයි දෙය්යනේ පොල් මුලෙන් ගෙවි හැදෙනවද!!!!

ඔක්කොම කැඩුව. කැඩුව කිව්වට ගහට නැගල නෙමෙයි, ගහටත් වඩා පහළට බැහැල.

ඔක්කොම පොල් ගෙඩි 300කටත් වැඩී. ගුරු හාමුදුරුවො එතනිනුත් පරාදයි ගෝළයට.

මොකද වෙලා තිබ්බෙ?රාහුල හාමුදුරුවො දැනන් හිටිය හරියටම නැකතට වෙලාවට හිටෙව්වොත් පොල් මුලෙන් උනත් ගෙඩි හැදෙනව කියල. මෛත්‍රී හාමුදුරුවො පොල් පැළය ඉහළට ඔසවන් ඉඳල වලට දානකොට නැකතෙන් ක්ෂණයක් පහු උනා. නමුත් රාහුල හාමුදුරුවො කළේ පොල් පැළය කකුලෙන් රඳවන් ඉඳල ගානට වෙලාවට වලට අත හැරපු එකනෙ.

ඔන්න ඔහොමයි කතාව. එදත් කොහොම හරි ගුරා පැරදුනා ගෝළයට. අනේ එහෙමයි කියල මේ ගුරු හාමුදුරුවො කවදාවත් ගෝළයට වල කපල නම් නෑ. හැම වෙලේම ගෝළයගෙ දියුණුව පැතුව, දියුණුවට අත දුන්න....