Mandy Lui

6月隨筆

2017-06-08T17:50:00.002+08:00

5月頭去左PMQ 行下。天氣好，又唔多人，仲飲左好好味的薑味雞尾酒;)

六月份，熱到焗爐咁，已經發出酷熱天氣警告了。謝絕戶口活動，我的一身古銅色係天生架，不是曬回來的。曬得多會老，驚過變黑妹。就好似29+1 套電影咁，女人年紀漸長，就愈來愈注重保養，至少要望落去唔好似中女。有幾個舊同學，肥左幾個碼，外型變左成個師奶咁。嫁左人生左b 的，都叫做幸福肥的家庭主婦。未嫁的，真係要keep 下....

最近睇左本書，叫「我很喜歡這個功利的社會」。內容和書名講的一樣，就係寫實的生活例子，講下工作上d 人見高拜，見低就踩。又寫下作者的家庭問題，父母的婚姻，現代社會的愛情觀等等。其實，入面d 故事 (或者係真人真事) 都幾好睇。作者的主旨，大約係話做人要自己爭氣點，唔好俾人睇小你。你想變靚女d ，就用多些時間扮靚，你想變有錢d ，就勤力些揾錢，唔好成個怨婦咁，講到上天幾咁唔公平，埋怨自己又窮又唔靚。呢個世界，你始終掌握到命運的一部分，所以最重要的是，你唔好先認輸。

另外，也看了一本書，叫「辭職就好了，減速生活，給窮忙族的樂活提案」。作者在百貨公司做野，工作壓力太大，30歲辭職了。他手上有一筆儲蓄，就計劃了到世界各地旅行。34歲時，開了一間小餐廳，只做晚市。早上就玩下吉他，打掃家居，照顧小朋友。呢個故事如何？辭左職無收入仲可以去到旅行 (窮遊都要錢...) ，開餐館的錢...，工作時的儲蓄真唔少。辭左職唔想做打工仔，首先要有錢。完。

下次睇咩書好呢。

38分鐘內5km

2017-04-18T16:38:00.000+08:00

一天跑步，一天行山，換來今日的肌肉酸痛。不過還好，做完運動都幾爽。

終於終於，我的5km 跑入38分鐘內了。YO~小歡呼，睇返舊陣時的日記，先記得38分鐘內完成5km係我的一個小目標。下次再跑快d....

3月隨筆

2017-03-17T16:23:00.001+08:00

賣走哂d 建行了，因為覺得它的壞賬問題很難解決。其實我唔識，以前都係亂咁買，或者讀左會計一段時間會好些，明多一點，但都無認真研究過年報或者睇公司業績。而家手頭上仲有hsbc, ibond, 金etf 和一些脫歐後買入的英磅，暫時應該無乜操作。

今年加大了運動量，每日做些腹肌練習，同埋盡量維持一星期一次跑步。可以的話，我都想每星期跑2次，不過諗下咋，應該實行唔到，哈哈。現在週末會去行山，行完山仲跑步，瓜得! 一向體能都ma ma地，唔好心頭太高。我會考慮下改變訓練計劃，睇下點樣將運動習慣變得更好。當然，前堤梗係重質不重量。

除左運動，仲有煲劇都好重要。煲劇應該係我心情最放鬆的活動，壓力全消。睇完劇，感覺無咁精神緊張，尤其係忙著應付會計考試的時候，平衡下。朋友問我半工讀辛苦否？我覺得有目標總比無目標好，辛苦可以自己調節下。(其實我唔辛苦啦，仲有時間煲劇，係咪?)

定期檢視下自己的方向，睇住戶口有幾錢 ;)

38mins 46sec

2017-01-24T11:20:00.000+08:00

慢慢進步的感覺真好。這個月，跑得輕鬆了一點~yeah。聽住歌，就跑完了5km。

食阿拉伯菜

2017-01-17T14:18:00.000+08:00

考完試，時間表又空閒了一些。工作和進修，都沒有什麼壓力，但完成了一個小段落，個人係有小小滿足的。回看2016年，如果命運真係主宰了部分，那其餘的，能做到幾多就做幾多，多一天開心，就少一天難過。唔開心的人，可能係攢牛角尖，俾自己太多壓力，然而事情其實沒有很糟糕。

前幾日看到電視在播仁濟醫院籌款，有個婆婆接受訪問，她12歲在點心店打工，沒有怎樣受教育，之後結婚生小孩。小孩長大了，樓又供完，開了間麵店做點小生意，生活不錯。但好景不常，丈夫過身，兒子欠下140萬賭債，她把樓和店舖都賣了。兒子因此吸取教訓，變得生性，本以為可以相依地過日子，可是8年後，發現兒子得了重病，送院4天後過世。那個婆婆說，為了處理兒子的身後事，日子變得更清貧，但鄰舍都好樂於幫助她，所以自己是幸運的。她說：有人幫我喎，我當然係好運的人。如果我唔好運，就無人幫我啦。

生活即使唔順心，都仲有好的一面既，係咪？

講下其他野，講食最開心!
最近試左間新餐廳，係阿拉伯菜，叫OH FOOD，在灣仔盧押道~

好細的一間餐廳，味道幾好又大大份，啱我，哈哈。
飯後侍應後來送了阿拉伯紅茶給我地嘗嘗，味道跟中國茶差唔多，但係落糖飲的。

十點多，埋單大約$700 (4個人)

侍應介紹了兩個肥廚師，他們是敍利亞人~

我朋友說要跟他來個合照，被他婉拒了。(嘿嘿~阻人收工是也...)

下次再試新餐廳。

1月隨筆

2017-01-12T15:40:00.001+08:00

1月中，閒了下來。要好好保養自己，保養身材。睇很多的健身影片，著迷了，好想今年有model的身型。點解忽然有呢個念頭，可能係見到某間Model agency 搬左來黃竹坑，我每天返工出出入入都見到這些好fit 的models，貼身衫加上180 的身高...係啦，就是那種走天橋的外國model，好型的。

有次，試過全架lift 入面的男女全部身高超過180，除左我。哈哈，望住lift 裡的鏡，覺得有趣。但她們大多都過瘦了，著衫好型但我還是喜歡有肉地的那種曲線。有曲線先有女人味，太瘦只像一個衣架。哈哈，每個女人眼中太肥/太瘦的標準應該不一樣吧...

星期六去了睇攀石比賽，睇左女子公開組咋。我估星期日的賽事會精彩好多，因為有jain kim!! 連續3年世界排名第一的jain kim!!
可惜星期日沒空去，看不到她的風采~~
上網睇返啦唯有。

睇相，運動員來講都幾靚。

無聊記事~

2016-12-19T12:38:00.000+08:00

最近又在看瘦身影片，但沒很多運動，天冷人都懶洋洋了。

不如玩樣新運動？泰拳？未諗好....

上星期看到新聞 :

Kendall Jenner Replacing Tyra Banks As New Host of ‘America’s Next Top Model’ In Relaunch

好多年無睇America’s Next Top Model 了，以前真係集集追架。而家轉左煲韓劇了，間中有睇下無線劇既，幕後玩家都幾好睇，我鐘意睇張繼聰，幾搞笑的。

antm第23季換電視台，又換主持了，換走Tyra banks，變左Kendall Jenner，真唔真架？？人紅真係工作接不停，21歲就上到呢個位，揾咁多錢，會否被人眼紅...

Kendall Jenner

最近在時代廣場見到她的Calvin Klein Jeans 廣告，幾有型的。周圍都做緊大減價，但就無乜消費意慾喎，可能銅鑼灣太逼，見到要排隊試衫排隊俾錢已經無左買野的心情，哈哈。

* * * * * * * * *

最近約左好多朋友見面食飯。朋友，是快樂的其中一個重要元素。

和mango 食飯，聽到一件開心事。我都替她高興，遇到一個認真發展的男仔真不錯:)

自己的身材自己救

2016-11-18T18:19:00.001+08:00

韓惠珍

最近看了本書，叫自己的身材自己救-韓國頂尖超模的塑身祕訣。

作者是韓國的名模韓惠珍，她又被稱為韓國的林志玲。(不過我就不太喜歡林志玲的。) 自從我開始了練馬甲線的日子，我真的愛上了看這類鍛鍊身材的書/影片。比起以前，我而家每天的少量腹肌運動真係一個好大的進步。人生求進步之嘛，我又唔係要有超模的身材，再努力一點點，練成馬甲線這個小目標已經不錯。

好，講返本書。韓惠珍係首位走上米蘭Gucci時裝Show 的韓國model，也是登上雜誌《Vogue Korea》封面次數最多的。

佢分享的keep fit 經驗，都可以參考下的。

super model 講keep fit 就好似有錢人教揾錢，成功左先有說服力吧。你睇下前陣子很紅的鄭多燕，就係一個活生生的人版，而且跟過她的video 做運動你就知減肥成功真係不容易。

韓分享的一個重點是，唔好諗話今日要食少d，或者今日做多d運動。3分鐘熱度，係唔會有效果。靚係要用堅持換返來的。

所以，要靚，無得懶。(阿媽係女人的道理XD)

本書係幾好睇的，就當係睇一個普通身型的女仔，點樣成功塑造一個近乎完美的身段。好睇的點，就似係睇一個窮人點樣揾到第一桶金，再達到千萬財富的境界，哈哈。

十一月隨筆

2016-11-15T11:55:00.000+08:00

陽光普照，有涼風。出發去行山，今次去龍蝦灣。

由清水灣附近開始，又來一趟Hea 行。風景好靚，空氣好舒服。望住大自然，真係令人減壓，返工望得電腦多，望返多d 綠色野，可以舒一口悶氣。我覺得，適時往外面走走，會後生d! (不過當然係要記得塗防曬啦。紫外線會令人衰老!)我地邊行邊話路線無難度，地圖又易睇。點知行左去孟公屋!哈哈，是但啦咁。下次再去龍蝦灣吧。

閒遊東平洲

2016-11-02T12:37:00.000+08:00

東平洲

天朗氣清，行山最開心。

呢個行山Group SJ170，好搞笑，一齊hea 行。唔洗挑戰難度，睇下風景，吸下新鮮空氣，逃離市區已經好減壓。上星期日，我仲專登揾左件紅色Tee來跟大隊，不過大部分人都係無著團Tee喎....

11月中再行，唔知到時去邊呢？

十月隨筆 2

2016-10-28T16:37:00.000+08:00

十月尾，天氣都未凍。中午和April 吃飯，行兩步都熱到出汗。佢話中午可以去游個水都得，反正公司旁邊係泳池，哈哈。聽落我都可以喎咁，但講下既姐，lunchtime 游水咪無時間食飯囉。我揀食飯，你揀游水啦!

今個月，參加了兩個跑步活動。一個7km，一10km，一個夜晚，一個朝早。我比較鐘意夜跑，唔洗早起身又無咁熱，跑步前仲有個黃昏靚景望下，幾好。不過呢，無街燈下的山路真係幾暗的，會唔會跑跑下有隻動物走出來呢？(驚驚地!)

跑完吃了炸雞脾，飲了支肥可樂，補充能量! 10點半，歸家去，返到屋企又肚餓....

至於沙田科學園個10km跑，跑到7km 時已非常攰，返到終點就瓜得。我估，係肌肉量唔夠，做些重量訓練，睇下會否好d?? 就快跑到終點時，見到歐鎧淳和鍾舒漫。她們剛在起點出發，記者d 閃光燈閃個不停。有個記者大聲叫我「借開唔該! 借開唔該!」我心果句係，你行左入黎跑道，仲叫我借開，頂你_ _

呢排好多戶外活動，除了曬黑左少少， 我練左一個多月的馬甲線有小成果了。(感動!)

hey，朋友們，見到我，記得讚我fit 左，我會好開心架。嘻嘻=)

悲傷的另一面

2016-10-18T17:13:00.001+08:00

數月前，看了本書，叫悲傷的另一面 The other side of sadness。

今天紀錄一下裡面的內容吧。

1. 心理彈性

首先，書裡講到，最糟榚的事總會發生。所以，不要覺得奇怪，人類的歷史其實是很多個災難所組成的。當有天災、親人離世、恐怖襲擊和疫症發生，生還者/家屬受驚後會出現創傷的反應。這些反應有失眠、抑鬱、回憶舊事等等，持續一個月。這類創傷會在半年時間內逐漸消減，80% 的人可以回復到正常人的健康心態。(那20%的人或者會持續受負面情緒困擾。)

2. 將注意力從不愉快的事情上轉移

現在有更多的研究指出，應對悲傷的好方法是逃避。冷靜自己，壓抑情緒是有好處的。以前，每逄天災發生，總有好多心理專家提供心理支援，幫助生還者疏泄情感。他們通常是一個聆聽的角色，讓受創傷者可以向人傾訴，表達心中的難過。但後來更多的數據發現，這樣無助當事人整理自己的情緒，最好還是分散他們的注意力，做做其他事。

。2004年，世界衛生組織就發出警告，要求到災區的心理專家要注意這個要點!

。醫學報告指出，一個拒絕談論自己病情的病人，比接受自己及能說出感受的患者，前者康復情況較為理想。(竟然係咁？即係做人唔洗成日咁樂觀既~)

所以，唔開心的時候，諗其他野，做其他野。

3. 逝者已矣,生者如斯

中西方的文化，都有相似的意思。循着逝者的心願,以逝者之心為心。

寫完，好想大覺瞓。世界太多事沒有答案，諗咁多做乜呢？

十月隨筆

2016-10-07T18:02:00.000+08:00

呢個創作幾好笑!

看了本書，講人應該要每日留點時間來冥想，思考些事情。我諗，同寫blog /寫日記差唔多吧，都係整理自己的思緒，同平靜心靈。打blog 還可以紀錄低某些內容或心情，他日再click 入來看看。

今個星期，no coffee week。由每日一咖啡，變成一至五都無飲。少一杯肥咖啡，好似健康d。呢段時間好多活動，行街睇戲行山遊船河，黎緊仲有兩個跑步比賽。咁樣呢....進修的功課真係要快手快腳做，太多未完成的事會令我心掛掛。這一個月，忽然地專心練起馬甲線來，每日做些少腹肌訓練，有無效果？以後話你知。只見網上有太多「十分鐘打造迷人馬甲線」「30天速成腹肌線條」之類的影片，因為跳鄭多燕悶了，就換著做。

香港金閱獎公布了我最喜愛作家的金銀銅得主。金獎作者是孤泣，已3度蟬聯「我最喜愛作家」，是勁的。銀獎係有心無默! 我真係有少少開心。因為他(抑或她？) 的西營盤故事，真係幾好睇。故事的開端，係講堅尼地城線試車後，一班mtr 職員在車上離奇失蹤了......

後來又看了他的《我喺墳場捉咗隻耿鬼之後，女友就人間蒸發咗》，內容係講pokemon go這個遊戲裡有一個詛咒，另一個空間有「人」被困住了，於是透過個game 去引導玩家去某地點，目的係吞噬人類的肉身和靈魂。好睇乎？呢個一般啦。

銅獎係鄺俊宇，但我不太喜歡他的書。另外，忌廉哥的悠長假期寫真集也得了個獎(什麼獎就忘了) 我有睇，個作者係整得本野幾有趣的。

睇書真係好正，支持更多的本地創作!

首爾車站 (喪屍片)

2016-09-26T18:28:00.000+08:00

最近睇了首爾車站和屍殺列車，兩套都鐘意。
屍殺列車唔洗多講，好評太多，刺激又有温情，故事簡單，佈排也好好。

我想寫感想的反而係首爾車站 (屍殺列車前傳)。入場前，瞄過網上的評論，呢套戲唔多受歡迎，觀眾似乎都幾失望咁。我都沒有抱好大期望，而且本來對動畫就不是很大興趣。

*以下有劇透 *

屍殺列車雖唔算是大團圓結局，但也算有半個happy ending。有兩個好人生還，壞人順理成章地惡有惡報。我覺得係迎合市場需要，好人死左但壞人消遙法外的話，觀眾未必受落。

相對而言，首爾車站就係一個悲慘的結尾。

裡面講到的人性幾寫實，女主角的逃亡過程很不順利，最後死埋。政府對需要幫助的一小撮市民不予理會，有些是沒貢獻的露宿者，有些是有交稅的乖乖上班族，但遇到危急關頭，韓國政府就打算一併犧牲這些不幸的人。

故事的開頭，第一個喪屍受感染的時候，伸出援手的是個窮人，他是受大財團欺壓的弱者，但遇到有需要幫忙時，他盡全力去幫另一個弱者，反觀其他人，如醫院護士、藥房老闆，只係勉為其難地協助，或者好似打份工咁，叫到咪做囉。

首爾車站裡的壞人大叔，開始時有救過人，到故事結尾就發窮惡，表現出極醜陋的人性。看到尾，你就知道，佢「幫人」只為了個人利益而已。好心幫你，真的係好人麼？或者係覺得你有利用價值姐。可悲...

另外，正義凜然的大隻男，打低了不少核突喪屍。因為佢企最前，也就成為了最快察覺到形勢不受控的人。當刻，他轉身逃走，混亂中只顧自己保命。然而故事最後，他救人的表現又令人覺得他好英勇。電影把他塑造成一個「貼地」的英雄。因為英雄都是人，都會驚慌失措，都會怕死吧。

天不怕，地不怕，你估超人咩？
(屍殺列車裡「愛妻號」馬東錫，就真係超乎常人的勇猛，但作為觀眾的我勁like。(心心眼))

首爾車站的內容，不是屍殺列車的前傳。兩個故事背景差唔多，同題材而已。你可當係另一個喪屍故仔去睇，而唔係從情節中找出屍殺列車未交待的內容。

如果拍成真人版，我覺得首爾車站係會精彩過屍殺列車的。

動畫vs真人，而家梗係輸條街 。(製作成本都差好遠啦，對吧？)

總之，我幾鐘意首爾車站這個故事的。雖然好多人覺得呢套戲係地雷片，OK，但我唔覺得。各人口味不同，我喜歡時又唔需要你認同的。

Hanjin Shipping 破產

2016-09-23T18:04:00.000+08:00

上個月得悉韓國最大船運公司Hanjin Shipping 財務狀況好差，南韓銀行切斷融資協助，好多國家港口已經唔俾Hanjin d 船進入，怕佢走數唔俾碼頭裝卸費。

(無錢俾~人同貨都要滯留公海呢)

無幾耐，Hanjin就對外宣布破產了，短期內對全球航運和貿易市場會有些影響吧。黎緊有11月感恩節、12月聖誕節，而家算係出口高峰期，唔少進出口貨品仲滯留在Hanjin d貨船上，應該都幾煩.....

仲以為船運公司的負面消息不斷，呢個行業睇來唔多好景。但係Hanjin唔惦後，反而益左其他同業競爭者，襯勢搶單。其他航運公司短期受惠於市場，股價造好，不過唔知之後會否來個骨牌效應？who knows.

我們都忙到忘記了休息

2016-09-07T18:22:00.000+08:00

看了本書，叫 好好休息 - 我們都忙到忘記了休息。

個書名，有d唔順口。

我諗，呢本書係指都市人太多野煩，又或者講緊工作狂的心態吧。我會唔會「忘記」了休息？肯定唔會。因為我漸漸有感，生命無常，明天的憂慮放到明天去。太執著，對人對事都不能釋懐，心情又會影響健康，不值得。

怒傷肝，喜傷心，思傷脾，悲傷肺，恐傷腎。

平時工作為生計為口奔馳，其餘時間就娛樂下自己啦。在你的to do list 入面，放一個位置給心靈需要，知道未？

我的輕鬆練跑日

2016-09-06T12:37:00.000+08:00

星期天，投票+跑步天。

天陰陰，以為就落雨，點知熱身後陽光普照。

今日運動場有個跑步練習。yu kiu的跑步教練係冼大師。 我都有! 搞下笑姐，兩個人來的，同姓而已。好開心阿冼來教我跑步，多一個跑友一齊玩。

歡迎加入我的(hea)跑步group。

好耐之前，睇過yu kiu的「從廢人到10k 輕鬆練習guide」，我就同朋友講笑，其實我都可以寫一篇差唔多的。幾年前我都係完全唔運動，行兩步就覺得攰，體能差到飛起。只係古銅色肌膚令人有錯覺，以為我有些運動細胞，err....實情係跑400米已收檔......

我向來跑步都唔認真，運動用來減肥同減壓，修到身有靚線就已經好開心。(我真係用跑步減到少少肥呢! ) 跑步時間我就覺得無咁重要，每公里跑快1分鐘，感覺已經辛苦好多好多。現在，跑步慢慢變成習慣，也就開始由1km 跑到10km。跑步需要鍛鍊肌肉和心肺功能，欲速則不達，忌太急進。這幾年，跑了幾次10km run，完成賽事都幾開心滿足的。

今日跑到2分50秒一個圈。哈哈，無乜要求，已經滿意。天氣若再涼一點，會更舒服。

努力下個月科學園的10公里跑。

繼續講：美劇 The Affair

2016-08-26T11:36:00.001+08:00

好快地，我睇完第2季的The Affair。(10+12, 共22集)

套劇幾好睇，又睇得明! 哈哈，如果劇情太深奧難明，我就無心機追啦，收左工仲要我用咁多腦，我會揀過第2套。The Affair 的故事很好看，但少少唔like 集集都有情慾/肉搏場面而已。

雙時間點敍事(3年前+3年後) 和4人敘述的角度下，由於他們的記憶同客觀事實都有些距離，而且大部分都係主觀感覺，真相少有地放到第22集先知道。

正如第二季預告片話呢：

There're more than 2 sides to every story, the truth is suspect.

係囉。

人真係好主觀。心理學裡，一種記憶係explicit memory ，另一種係implicit memory。兩樣區別在意識和參與的程度。explicit memory是能夠陳述的，例如人物時間地點。而implicit memory是一種無意識記憶，似曾相識的感覺，例如遇見過的人，聽過的音樂旋律。就如劇中角色陳述舊事時，或許會記得別人的服裝顏色，但對衣服款式、配件、人物表情、髮型之類就多數是自己的主觀投射，只係一個大概印象，事實係咪咁，鬼記得。

我覺得第1季d女角真嘛嘛。第2季有靚女!

就係cole 的新情人Luisa，我喜歡這種小麥色皮膚，身材玲瓏浮凸的美女。見到人地身材咁正，我又要努力做運動先得。小麥色加fit 到漏的線條，so sexy! 真心羨慕! 這個夏天，我都跑去曬了一身的古銅色，呵呵。線條呢咁？未有住。努力中。

Catalina Sandino Moreno

這套劇第一季開播，就爆冷打敗Game of Thrones(權力的遊戲)、The Good Wife (傲骨賢妻)等熱門劇，獲得金球獎劇情類最佳劇集、最佳女主角和女配角。勁!

幾時有第3季？

美劇 The Affair

2016-08-18T15:45:00.000+08:00

密密煲劇，看完了第一季的The Affair。這套2014年的劇集又叫情事，或者婚外情事，故事主線講出軌。(第一季)The Affair 的敘事基礎是雙視角的，將每一集剖半，上半部由男主角Noah 描述事件，下半部就係女主角Alison 描述她眼中的同樣故事。

第2季劇集應該會由4人敘事，Noah, Helen, Alison, Cole (4個角度呢)

故仔由警員調查Scotty 的死因開始。每集由男女主角各自敘述自己所知的事情，d 線索有d似查案的戲路。但兩人的口供唔一樣，邊d真邊d假，留俾觀眾自己分析。

真話定假話，其實得自己知。當人遇到矛盾位，就會自圓其說。

人的記憶本來也是這樣，每事每物都只係大約印象，你腦海裡的人物有既定的形象，而你又會傾向相信自己心裡那一個版本。你覺得那個人順眼，那個人做的就是好事。你睇佢唔順眼，那好事的背後就一定有什麼壞動機。先入為主，在所難免。

順帶一提，網上的劇情討論都好好睇。我應會好快手煲埋第2季。yo~

學游水

2016-08-08T11:17:00.000+08:00

7月裡，每星期一天跑步，一天跳鄭多燕，一天游水。

遲下忙d 就無咁勤力，襯這段時間較空閒就學埋游水。星期日一早起身，早過返工，和兩個朋友去了泳池。原來當日是全民運動日，泳池免費入場!

本來跟阿雲學游水，我有點壓力，以為她會逼我起碼游到廿個塘先走得(笑~)。最後是她自己太攰太眼睏，游兩游已經在池邊等我。我今次游到一個橫池，練習下應該可以好快游到直池，yeah!

我游左一個朝早，好滿足。

七月隨筆

2016-08-01T14:12:00.000+08:00

星期五晚，Happy Friday是也。

晚上和mango 食飯。她8點多放工，難得她不用ot，可以食個飯傾下計。有她的飯局，一定有酒飲! (歡呼~) 我選了hmv bar，可以摸著酒杯底談心。點知去到先知餐廳最近續唔到酒牌，無得賣酒。。。

原來無得賣酒仲好，餐廳免開瓶費。mango 即刻去買了支sparkling Moscato rosa，便便地又好味。我對酒的認識少，和mango食飯就順便可以跟她學下野。 Moscato Bianco葡萄適合釀酒，酒精度低，是輕鬆日常酒/餐前酒，外國人叫這種易入口的酒做happy wine。mango記得我喜歡這種果甜，真好記性。對我這行外人來說，味道我會有印象的，但酒名多數唔會記得啦。

很開心mango找到了自己喜歡的工作。呢樣唔容易，香港地還是一堆埋怨自己份工的打工仔多。忙得開心，娛工作於娛樂，是好事。她公司是行業龍頭，前景應不錯。不過經常加班至凌晨就好辛苦，社交時間都無埋，但總好過佢之前做果間XX酒業，起碼好一萬倍。

飲飽吃醉，回家大覺瞓。
六月壓力大，睡得少。七月好一些，希望八月又會再好些。

* * * * * * * * * * * * * * * * * * * *

題外話，前排睇左本書，講如何走出傷痛的，從臨床實驗去解釋人。書中講到，人心有個開關掣，唔開心就開著佢，把情緒發洩出來，平復心情後再關上粒掣，又回到開心的狀態。如果你可以控制到呢個開關，就可應付到情緒上的高低起伏。如果唔得，你會經常唔開心，鬱鬱不得志。

on off on off on off

好的，現在是off，又做返樂天的mandy (笑)。

執紙皮的婆婆

2016-07-26T18:39:00.000+08:00

社會上，太少願意分享的人。叫人大熱天時落街做好事，或者d 人更願意出街玩pokemon go 多d。

上星期，大暑翌日，南區有個平等分享行動。

平等分享行動，係將金錢、時間、物資等資源分配給欠缺的人。人無高低之分，高同低的只是職位和品德而已。社會太功利，有時令人覺得，你在鏡頭下派飯卷派日用品，好似另類消費緊低下階層人物。是的，做好人做好事，行前一步都思前想後。

社會上貧富懸殊的嚴重，新聞睇得多，但係紙皮賣緊幾錢一公斤你又知道嗎？回收價比以前少了，執紙皮的老人家就多了。這樣的晚年，甚悽涼。

有個婆婆同我講，某某回收檔會呃秤，好衰格! 我話替她抱不平，過去臭罵個檔主，氹到婆婆笑開懷。她說：妹妹，惡都無用，我明天又要賣紙皮俾佢，哈哈。

另一個婆婆，賣紙皮時同樣遇到呃秤，她就索性走去另一處的回收檔。這樣一來一回，帶住幾十公斤的紙皮，只換來一斤菜的酬勞。

當刻我在想，今日派左個罐頭給她們，明天婆婆又要為生活三餐煩惱。這個分享活動可能只係一份關懷，令老人家覺得社會裡，有人願意親近他們的。人與人之間的聯繫，靠的是人情味。扶貧又好，社會運動又好，最重要都係以人為本。

Miranda Kerr要訂婚?!

2016-07-21T14:58:00.000+08:00

Miranda Kerr Is Getting Married To Her Billionaire Snapchat Boyfriend!

今日吸引到我眼球的一單娛樂新聞係....Miranda Kerr要訂婚 !

snapchat 個90後ceo真係好後生，仲要係全球最年輕億萬富豪! 勁呢~

姐弟戀黎講，都幾合襯。

有時又會覺得呢個世界變得好快。3年前，一家三口睇落咁温韾，3年後的Orlando 和Miranda都已經有新情人，可憐了個小朋友。

係咪我諗野太老土呢？

飯聚

2016-07-18T15:51:00.000+08:00

最近去了個特別的飯聚，有止凡，東昇，70s和Rex。我的出席連我自己都覺得意外，哈哈。財經blog 我睇好多，不過財務知識無乜的，買過股票債券，工作上有買賣期油、借貸做按揭等等。股票分享應該無人想睇，因為錢太少，操作又少，可能少過隔離屋個陳師奶。投身社會至今，都無話好認真地理財，身邊的朋友亦然。周圍有買股票的同輩也唔多，所以先上網睇blog，睇下唔同人講投資。

飯局當然係講財經內容，我鐘意聽，只係唔太識搭嘴。我幾年前轉行做會計，因為做秘書成日要social，見人講人話，見鬼講鬼話，我講野唔叻，又怕羞，唔太啱我性格。不過有時又會諗返轉頭，做秘書可以扮下靚靚，但係你幾時會見到會計阿姐著高跟鞋呢？哈哈，女人就係心大心細。不過我覺得而家份工做得ok，証明轉行唔係壞事。(起碼愈轉愈好!)

飯聚講了乜？記得以下少少

1) 八下70s 點解會寫80後求死隊長
2) 講邊d bloggers 係吹水
3) 坊間的「呃人」投資課程，如何氹你入局
4) 幾多錢先叫財自？
5) _ _ 唔洗做1個星期之後就覺得悶，重新又投入工作
6) 出版社的出書經驗 (亮光文化)
7) 工作人事問題
8) 7-11 / 八方雲集特許經營無錢賺？
9) 某2, 3 線股票被blog友熱烈討論
10) 不同的新舊bloggers

仲有全枱人都持有939~哈哈

題外話~

那天我係最後一個到達餐廳，70s 問我：估唔估到我地邊個打邊個呀？
我在雜誌訪問報導中見過止凡，在跑步比賽中見過東昇，在巴黎直播中見過Rex
淨返素未謀面的一個就係70s 啦! easy job

money come

2016-07-14T10:50:00.000+08:00

我盆荷花竹，有2支係新買的，愈來愈多綠葉。

Yeah, money come!