Marinduque News Network

P3.5-M halaga ng petrolyo, nasabat sa Gasan; 2 arestado

2026-09-09T14:34:09.199+08:00

GASAN, Marinduque — Nasabat ng mga awtoridad ang tinatayang nasa ₱3.54 milyon halaga ng petroleum products at transport equipment sa isinagawang joint police operation sa Brgy. Bachao Ibaba, Gasan, Marinduque nitong Martes, Setyembre 8.

Arestado sa operasyon ang dalawang suspek matapos umanong mahuling nagdi-dispense ng petroleum products gamit ang isang tanker nang walang kinakailangang authority at permit mula sa Department of Energy (DOE), ayon sa Criminal Investigation and Detection Group (CIDG) at Mimaropa police.

Tinatayang 19,800 litro ng petroleum products ang nakumpiska, kabilang ang 12,000 litro ng premium gasoline, 6,000 litro ng diesel at 1,800 litro ng unleaded gasoline na nagkakahalaga ng humigit-kumulang ₱1.734 milyon.

Kasama rin sa nasabat ang isang blue-and-white na 10-wheeler tank lorry na nagkakahalaga ng tinatayang ₱1.805 milyon, gayundin ang suction hose, official receipt at certificate of registration ng sasakyan, at delivery receipt.

Umabot sa ₱3.538 milyon ang kabuuang tinatayang halaga ng mga nakumpiska sa operasyon.

Nahaharap ang dalawang suspek sa kasong paglabag sa Section 2(a), kaugnay ng Section 3(h), ng Batas Pambansa Blg. 33, na inamyendahan ng Presidential Decree No. 1865, na nagpaparusa sa mga ilegal na gawain kaugnay ng petroleum products. -- Mariduquenews.org

2 kabataan mula Marinduque, pasok sa Top 10 ng librarian licensure exam

2026-09-08T16:35:54.686+08:00

TORRIJOS, Marinduque -- Dalawang kabataang Marinduqueña ang nagningning sa Librarian Licensure Examination (LLE) 2026 matapos makapasok sa Top 10 ng pagsusulit.

Nanguna sa buong pagsusulit si Natalie Ericca Malubag ng Mogpog, na nakakuha ng 92.65% rating para sa Rank 1.

Samantala, si Jemima Faith Peralta ng Torrijos, na nagtala ng 91.70% ay nagkamit ng Rank 5.

Si Malubag ay nagtapos sa Unibersidad ng Santo Tomas habang si Peralta ay sa Philippine Normal University-Manila.

Pareho silang magna cum laude ng kani-kanilang batch na kumuha ng kursong Bachelor of Library and Information Sciences.

Ang kanilang tagumpay ay dagdag na karangalan para sa Marinduque at patunay sa husay at dedikasyon ng mga Marinduqueño sa larangan ng edukasyon. -- Marinduquenews.org

Ka Rosie, unang babaeng bise-gobernador ng Marinduque, pumanaw sa edad na 96

2026-09-05T15:14:00.818+08:00

SANTA CRUZ, Marinduque — Pumanaw na ang unang babaeng nagsilbi bilang bise-gobernador ng lalawigan ng Marinduque na si Rosa E. Lecaroz, mas kilala bilang “Ka Rosie.”

Ayon sa kaanak niyang si Leonee Bunsoy Sto. Tomas, binawian ng buhay si Lecaroz nitong Huwebes, Setyembre 3, matapos makaranas ng mild stroke.

Nitong Agosto 30 lamang ay ipinagdiwang ni Lecaroz ang kanyang ika-96 na kaarawan.

Nagsilbi si Lecaroz bilang bise-gobernador ng Marinduque mula 1992 hanggang 1995. Makalipas ang ilang taon, nahalal naman siya bilang alkalde ng bayan ng Santa Cruz at nagsilbi mula 1998 hanggang 2001, kung saan kinilala siya bilang "centennial mayor.”

Nakaburol ang mga labi ng namayapang lingkod bayan sa Regalia St., Brgy. Maharlika, Santa Cruz habang nakatakda naman ang kanyang libing sa Setyembre 9.

Nagpaabot ng pakikiramay si Santa Cruz Mayor Marisa Red-Martinez sa naulilang pamilya.

“Nawa’y magsilbing alaala at inspirasyon ang kanyang buhay sa lahat ng mga taong nakasama at napamahal sa kanya. Sa panahong ito ng pagdadalamhati, dalangin ko po ang inyong lakas, kapanatagan, at pagdamay sa isa’t isa,” pahayag ni Red-Martinez.

Sa kanyang pagpanaw, iniwan ni Ka Rosie ang isang mahalagang bahagi ng kasaysayan ng lokal na pamahalaan sa Marinduque bilang unang babaeng humawak ng posisyon ng bise-gobernador sa lalawigan. -- Marinduquenews.org

Goodchow, 27 nang naghahatid ng masasarap na pagkain sa mga Marinduqueño

2026-08-28T14:46:21.325+08:00

BOAC, Marinduque -- Sa pag-usbong ng industriya ng fast food sa Marinduque, nananatiling matatag ang isang lokal at paboritong kainan ng mga Marinduqueño — ang Goodchow Food Express, na 27 taon nang naghahatid ng masasarap at lutong-lokal na pagkain sa puso ng Boac.

Sa loob ng halos tatlong dekada, hindi lamang pagkain ang naihahain ng Goodchow. Kasama sa bawat serving ang mga kuwentong nabuo sa hapag-kainan—mula sa simpleng pagsasalo ng pamilya hanggang sa mga espesyal na pagdiriwang at alaala ng mga taga-isla.

Lubos ang pasasalamat ng Goodchow sa patuloy na pagtitiwala at pagmamahal ng kanilang mga suki. Para sa kanila, ang bawat balik, bawat order, at bawat ngiting natatanggap mula sa kanilang mga kababayan ay bahagi ng kuwentong patuloy nilang binubuo.

Sa kabila ng mga pagbabagong dala ng panahon at pagdami ng pagpipilian, nananatili ang kanilang pangako — ang patuloy na ibigay ang makakaya para sa mga Marinduqueño at kanilang mga bisita.

27 taon ng paglilingkod. 27 taon ng tiwala. At isang kuwentong patuloy pang isinusulat.

Proudly Boac. Proudly Marinduque. At higit sa lahat, Goodchow - 27 taon nang kasama sa bawat salu-salo at alaala. -- Marinduquenews.org

Mula binhi hanggang ani: Hazel Joy, unti-unting binubuo ang mas matatag na kinabukasan

2026-08-28T13:11:58.424+08:00

BUENAVISTA, Marinduque — Sa bawat butil ng binhing itinanim, may kasamang pag-asa. Sa bawat punlang inalagaan, may pangarap na unti-unting lumalaki.

Para kay Hazel Joy Sarmiento, 25 anyos, isang ina mula sa Buenavista, Marinduque, ang simpleng pagtatanim ng amargoso (lokal na tawag sa ampalaya) ay naging higit pa sa isang maliit na kabuhayan. Naging daan ito upang madagdagan ang kita ng kanilang pamilya at magkaroon siya ng mas matatag na sandigan para sa kinabukasan.

Sa tulong ng Sustainable Livelihood Program (SLP) ng Department of Social Welfare and Development Field Office-Mimaropa, nabigyan si Hazel Joy ng pagkakataong magsimula ng sariling ampalaya production project.

Bago ito, tulad ng maraming ina, pangunahing hangarin niya ang matugunan ang pang-araw-araw na pangangailangan ng kanilang tahanan. Ngunit batid niyang kailangan niya ng mas maaasahang pagkakakitaan upang makatulong sa gastusin ng pamilya.

Mula sa tulong na natanggap, nagsimula siyang magtanim at mag-alaga ng ampalaya—isang maliit na proyekto na kalaunan ay nagbigay ng malaking pagbabago sa kanilang pamilya.

SA LIKOD NG BAWAT ANI, MAY PAGSUBOK

Hindi naging madali ang pagsisimula.

Sinubok ni Hazel Joy ang pabago-bagong panahon at ang pangangailangang masusing alagaan ang mga pananim. Kailangang bantayan ang mga halaman, tiyaking maayos ang kanilang kondisyon at harapin ang mga hamon na maaaring makaapekto sa ani.

Ngunit sa halip na sumuko, pinili niyang magpatuloy.

Malaking bahagi rin ng kanyang paglalakbay ang suporta ng kanyang pamilya, lalo na ng kanyang ina, na tumulong sa pag-aalaga ng mga pananim.

Sa bawat araw na lumilipas, natutunan ni Hazel Joy na ang isang matagumpay na kabuhayan ay hindi lamang nakasalalay sa puhunan. Kailangan din nito ng tiyaga, tamang pag-aalaga, at kahandaang matuto mula sa bawat karanasan.

MULA SA PUNLA, TUNGO SA PAG-ASA

Dumating ang panahon na nagsimulang mamunga ang mga ampalaya.

Regular na ang kanyang mga ani at naibebenta niya ang mga ito sa kanilang komunidad. Bagama’t maliit sa simula, nakatulong ang kinikita niya upang madagdagan ang pambayad sa pagkain, edukasyon, at iba pang pangunahing pangangailangan ng kanilang pamilya.

Kasabay ng pagdami ng ani ay ang paglago rin ng kanyang kumpiyansa.

Sa aktuwal na karanasan sa pagtatanim, pag-aani at pagbebenta, unti-unti niyang natutunan kung paano pangasiwaan ang kanyang puhunan, produkto at kita.

Ang dating maliit na proyekto ay naging pagkakataon upang matuto, kumita at mas mapalapit sa layunin niyang magkaroon ng mas matatag na kabuhayan.

ISANG PAGKAKATAONG MAGING SARILING SANDIGAN

Para kay Hazel Joy, higit pa sa puhunan ang natanggap niyang tulong.

Ito ay pagkakataong magsimula.

“I am deeply grateful to President Ferdinand Marcos Jr. and to everyone who has been part of the Sustainable Livelihood Program. The assistance we received was not only capital for our livelihood but also gave us greater hope for our family’s future.”

Ayon kay Hazel Joy, bilang isang ordinaryong mamamayan, malaking bagay ang mabigyan ng pagkakataong matuto, magsimula ng sariling kabuhayan at unti-unting maiangat ang buhay sa pamamagitan ng sariling pagsisikap.

Bawat ani at bawat karagdagang kita, aniya, ay nagsisilbing patunay na ang tulong ay maaaring magbunga ng maganda kapag sinabayan ng sipag at tiyaga.

MALIIT NA SIMULA, MAS MALAKING PANGARAP

Ang kuwento ni Hazel Joy ay larawan ng kung paano maaaring maging daan ang isang simpleng livelihood project tungo sa higit na pagiging self-reliant ng isang pamilya.

Sa pamamagitan ng SLP, patuloy na nagbibigay ang DSWD Field Office MIMAROPA ng livelihood assistance at capacity-building support sa mga indibidwal at organisadong grupo upang magkaroon sila ng pagkakataong mapalakas ang kita, mapaunlad ang kanilang kakayahan at makabuo ng mas matatag na kabuhayan.

Para kay Hazel Joy, hindi lamang ampalaya ang kanyang inaani.

Sa bawat bunga na kanyang napipitas, naroon ang bunga ng kanyang tiyaga. Sa bawat kinikita, naroon ang dagdag na ginhawa para sa kanyang pamilya. At sa bawat bagong tanim, may panibagong pag-asang maihahanda niya ang kanilang pamilya para sa mas magandang bukas.

Mula sa isang maliit na binhi, unti-unting lumalago ang isang mas malaking pangarap—isang kinabukasang itinatanim sa sipag, inaalagaan sa tiyaga, at inaani sa pag-asa. -- May kasamang ulat mula sa DSWD Mimaropa/Marinduquenews.org

Marinduque, masiglang nakilahok sa RSTW 2026

2026-08-19T10:52:19.061+08:00

TORRIJOS, Marinduque — Masiglang nakiisa ang lalawigan ng Marinduque sa pagbubukas ng 2026 Regional Science, Technology, and Innovation Week (RSTW) na isinagawa nitong Lunes, Agosto 17, sa Torrijos Stadium.

Sa unang pagkakataon, sabay-sabay na isinagawa ang pagdiriwang sa limang lalawigan ng Mimaropa habang nagsilbing host at sentrong lugar ng mga pangunahing aktibidad ang lalawigan ng Romblon.

Sinimulan ang programa sa pamamagitan ng live feed mula sa itinuturing na marble capital ng bansa, kung saan binigyang-diin ni DOST Secretary Renato Solidum Jr. ang layunin ng ahensya na maging mas madaling maunawaan at mas malapit sa mga mamamayan.

Ayon kay Solidum, nakatuon ang DOST sa pagbibigay ng mga solusyon at pagbubukas ng mga oportunidad para sa lahat, alinsunod sa tagline nitong “One DOST for You: Solutions and Opportunities for All.”

Sa Marinduque, isinagawa ang ceremonial na pagpuputong sa mga panauhin bilang simbolo ng mainit na pagtanggap ng lalawigan sa mga kalahok at bisita.

Kabilang sa mga unang aktibidad ang Forum on FISH-I Technology, na nakatuon sa mga makabagong pamamaraan para sa marine aquaculture monitoring at resource assessment.

Isinagawa rin ang ceremonial turnover ng mga galon na ipinagkaloob ng pamahalaang panlalawigan na pinangunahan ni Provincial Disaster Risk Reduction and Management Office Head Juan Fernandez Jr. at tinanggap naman ng punong barangay ng Maniwaya na si Ana Liza Romasanta.

Ayon kay Romasanta, labis-labi ang kanyang pasasalamat sa DOST para sa mga proyektong ipinagkaloob sa kanilang isla, partikular ang water desalination system na pinondohan ng ahensya at kasalukuyang napakikinabangan ng mga residente.

“Ang isla ng Maniwaya ay masasabi kong talagang napaka-super blessed kaya pasasalamat ang ipinapaabot ko sa inyo,” ani Romasanta

Samantala, dinagsa rin ng mga mag-aaral at kalahok ang mga exhibit na tampok ang iba't ibang teknolohiya na nagpapakita ng mga makabagong sensya at innovation. May mga lokal na produkto ring itinampok at ibinenta ng Marinduque State University at Pamahalaang Bayan ng Torrijos.

Tampok din sa programa ang Itik Pinas Technology Forum, na nakatuon sa pagpapataas ng productivity, profitability at sustainability ng pag-aalaga ng itik. Pinangunahan ito ni Dr. Synan Baguio, direktor ng Livestock Research Division ng DOST-Philippine Council for Agriculture, Aquatic and Natural Resources Research and Development (PCAARRD).

Ipinakita rin sa exhibit ang programa para sa Marine Habitat Restoration through Reef Block Deployment and Coral Planting, isa sa mga patuloy na isinusulong na inisyatiba ng DOST sa Marinduque para sa pangangalaga at pagpapanumbalik ng yamang-dagat.

Ang RSTW ay regional counterpart ng National Science and Technology Week (NSTW) at nagsisilbing platform upang maipakita ang mga programa, serbisyo at adbokasiya ng ahensya, gayundin ang kahalagahan ng agham, teknolohiya at innovation sa lokal na pag-unlad.

Bitbit ng pagdiriwang ang temang “Siyensya, Teknolohiya, at Inobasyon: Kabalikat sa Matatag, Maginhawa, at Panatag na Kinabukasan,” at regional sub-theme na “Science, Technology, and Digital Innovation: Driving Food Security, Sustainable Energy, and National Resilience.”

Nakasentro rin ang pagdiriwang sa regional theme na “Sustain Mimaropa: Biodiversity, Environmental Sustainability, and Natural Resources,” na nagbibigay-diin sa mga science-based solution.

Kabilang pa sa mga nakatakdang aktibidad sa ikalawang araw ay ang Regional Scientific Conference at Forum on Solar-Powered Technologies for Sustainable Development, habang magtatapos ang pagdiriwang sa pagpapakita ng mga videos at paggagawad sa mga mananalong kalahok.

Ipinakikita ng RSTW na ang agham ay hindi lamang pinag-aaralan kundi ginagamit at isinasabuhay bilang katuwang sa pangangalaga ng kalikasan at likas na yaman. -- Marinduquenews.org

Bagong hepe ng BJMP Mimaropa, ininspeksyon ang mga kulungan sa Marinduque

2026-08-13T21:28:32.696+08:00

BOAC, Marinduque -- Nagsagawa ng inspeksyon sa mga pasilidad ng Bureau of Jail Management and Penology (BJMP) sa Marinduque si bagong talagang BJMP Mimaropa regional Director Deogracias Fanio De Castillo, kamakailan.

Layunin ng inspeksyon na masuri ang kalagayan at operasyon ng mga pasilidad, gayundin ang pagpapatupad ng mga programa at polisiya ng BJMP sa mga district jail sa lalawigan.

Sa pakikipag-ugnayan sa mga tauhan, binigyang-diin ni Jail Senior Superintendent De Castillo ang kahalagahan ng disiplina, propesyonalismo, integridad, pagtutulungan at dedikasyon sa tungkulin bilang mahahalagang bahagi ng epektibong paglilingkod sa publiko.

Nagbigay rin si del Castillo ng gabay at paghikayat sa mga jail personnel, partikular sa kanilang mahalagang papel sa pagpapanatili ng kaligtasan at seguridad ng mga pasilidad, gayundin sa pangangalaga, kustodiya at rehabilitasyon ng mga persons deprived of liberty (PDL).

Naging pagkakataon din ang pagbisita upang mapakinggan ng regional leadership ang mga concerns at operational needs ng bawat jail unit at mapalakas ang komunikasyon at koordinasyon sa pagitan ng Regional Office at mga field unit.

Binigyang-diin naman ng pamunuan ng BJMP sa rehiyon ang patuloy nitong commitment na palakasin ang jail management, pangalagaan ang kapakanan at morale ng mga personnel, at tiyakin ang ligtas, maayos, secure at makataong serbisyo sa mga PDL. -- Marinduquenews.org

Paggawa ng uling briquettes, cocopots itinuro sa 40 agrarian reform beneficiaries sa Gasan

2026-08-13T14:32:30.516+08:00

GASAN, Marinduque — Nagsagawa ang Department of Agrarian Reform (DAR), sa pakikipagtulungan sa Marinduque State University (MarSU) ng Training on Value Adding of Coconut Biomass Wastes para sa 40 miyembro ng apat na agrarian reform beneficiaries organizations (ARBOs) mula sa Gasan-Buenavista Cluster.

Pinangunahan ni Dr. Alexander Pascua ang pagsasanay, kung saan itinuro ang paggawa ng charcoal briquettes at cocopots gamit ang coconut biomass wastes o mga tirang bahagi ng niyog.

Layunin ng programa na maipakita sa mga kalahok kung paano maaaring gawing mga produktong may dagdag na halaga ang mga by-product ng niyog, habang nagbubukas ng karagdagang oportunidad para sa pagkakakitaan ng mga ARBO.

Kabilang sa mga lumahok ang mga miyembro ng Bayanihan Linis Tanim Multi-Purpose Cooperative (BALITA MPC), Buklurang Itinatag ng Mamamayan ng Daykitin Tungo sa Pag-unlad (BIDA), Bintakay Farmers Association (BFA), at Malbog Multi-Purpose Farmers Cooperative (MMPFC).

Sa pamamagitan ng pagsasanay, inaasahan ng ahensya na maragdagan ang praktikal na kaalaman at kasanayan ng mga kalahok sa pagproseso at paggamit ng mga lokal na materyales upang makalikha ng mga produktong maaaaring pagkakakitaan. -- Marinduquenews.org

DENR may satellite office na sa Torrijos

2026-08-06T07:55:56.248+08:00

TORRIJOS, Marinduque — Hindi na kakailanganin pang bumiyahe ng mga residente ng Torrijos patungong Boac upang makuha ang mga serbisyo ng Department of Environment and Natural Resources (DENR) matapos pormal na buksan ang satellite office ng naturang ahensya sa nasabing bayan.

Nitong Hulyo 30, isinagawa ang paglagda sa Memorandum of Agreement (MOA) sa pagitan ng lokal na pamahalaan ng Torrijos at ng DENR, kasabay ng kick-off ceremony para sa pagbubukas ng bagong tanggapan.

Sa ilalim ng kasunduan, libreng gagamitin ng DENR ang office space sa ikalawang palapag ng Old Municipal Building sa Brgy. Poblacion bilang opisyal na tanggapan ng DENR–PENRO Marinduque Satellite Office sa pangunguna ni PENR officer-in-charge Cesar Odi.

Ayon kay Mayor Joey Penaflor, layunin ng inisyatibong ito na gawing mas madali at maginhawa ang pagkuha ng mga serbisyo ng DENR para sa mga residente ng Torrijos, gayundin ng mga karatig-bayan ng Santa Cruz at Buenavista, nang hindi na kinakailangang bumiyahe sa pangunahing tanggapan sa Boac.

Bukas ang DENR Satellite Office tuwing Miyerkules, mula alas-8:00 ng umaga hanggang alas-5:00 ng hapon.

Kabilang sa mga serbisyong maaaring ma-avail sa satellite office ang pagproseso ng cutting permits, chainsaw permits, water permits, local transport permits para sa forest products at wildlife, mga aplikasyon para sa residential, agricultural at special free patents, EMB at MGB-related services, gayundin ang iba pang technical assistance ng ahensya.

Bahagi ang pagbubukas ng naturang tanggapan ng programang Handog Serbisyo ng DENR–PENRO Marinduque sa pakikipagtulungan ng mga lokal na pamahalaan sa lalawigan, na naglalayong ilapit sa mga mamamayan ang mga serbisyo ng pamahalaan at gawing mas mabilis, episyente, at accessible ang paghahatid ng mga ito. -- May kasamang ulat mula sa Torrijos Public Affairs Information and Assistance Unit/Marinduquenews.org

Hindi lang pangbotika, pangsenado pa; Arshie Larga, special guest sa pagbubukas ng 20th Congress

2026-07-27T22:44:19.695+08:00

BOAC, Marinduque — Naging espesyal na panauhin ng Senado ang Marinduque-based content creator at pharmacist na si Arshie Larga sa pagbubukas ng ikalawang regular na sesyon ng 20th Congress nitong Lunes, Hulyo 27.

Ayon kay Senador Bam Aquino, chairperson ng Senate Committee on Trade, Commerce and Entrepreneurship, personal niyang inimbitahan si Larga bilang pagkilala sa naging ambag nito sa pagbabahagi ng tamang kaalaman tungkol sa mga gamot at sa pagiging isang matagumpay na negosyante na nangangasiwa rin ng kanilang botika.

Binigyang-diin din ng senador na kabilang sa mga prayoridad ng Senado ang pag-amyenda sa Magna Carta for Micro, Small, and Medium Enterprises (MSMEs) upang higit pang mapalawak ang oportunidad sa pagnenegosyo at mapalakas ang suporta ng pamahalaan sa mga maliliit na negosyo sa bansa.

"Totoo nga yata na laughter is the best medicine. Napakasaya ng kuwentuhan, lalo na tungkol sa kung paano natin mas matutulungan ang ating mga maliliit na negosyante. Sulit ang dose ng good vibes ngayong araw," ani Aquino.

Si Larga ay kilala sa social media sa pagbibigay ng payo tungkol sa tamang paggamit ng mga gamot at sa kanyang mga makabuluhang content na naglalayong itaguyod ang kalusugan at responsableng pagnenegosyo. -- Marinduquenews.org

Marinduque prov'l gov't, tumanggap ng 2 ambulansya mula sa PCSO

2026-07-11T17:53:12.388+08:00

BOAC, Marinduque — Pormal nang tinanggap ng pamahalaang panlalawigan ng Marinduque ang dalawang yunit ng patient transport vehicle (PTV) o ambulansya na ipinagkaloob ng Philippine Charity Sweepstakes Office (PCSO), bilang bahagi ng pagpapalakas ng serbisyong pangkalusugan sa lalawigan.

Personal na tinanggap ni Governor Melecio Go ang certificate of donation mula kina PCSO General Manager Melquiades Robles, Chairman Judge Felix Reyes, Director Jennifer Guevara, at Director Imelda Papin sa isinagawang turnover ceremony.

Ayon kay Go, malaking tulong ang mga bagong ambulansya upang mapabilis ang pagtugon sa mga pangangailangang medikal ng mga Marinduqueño.

Kasabay ng Marinduque, tumanggap din ng tig-dalawang yunit ng PTV ang iba pang apat na lalawigan sa Mimaropa kabilang ang Oriental Mindoro, Occidental Mindoro, Romblon, at Palawan—na may kabuuang 10 ambulansyang ipinamahagi sa rehiyon.

Ang pagkakaloob ng mga sasakyan ay bahagi ng layunin ng administrasyon ni Pangulong Ferdinand Marcos Jr. na higit pang mailapit ang mga serbisyong pangkalusugan sa mga mamamayang Pilipino.

"Inaasahang magiging malaking tulong ang mga PTV sa pagbibigay ng ligtas at maaasahang transportasyong medikal, lalo na sa mga komunidad na may limitadong access sa mga pasilidad na pangkalusugan," pahayag ni Robles.

Sa ilalim ng Medical Transport Vehicle Donation Program (MTVDP), patuloy na isinusulong ng PCSO ang misyong pangkawanggawa sa pamamagitan ng pamamahagi ng mga patient transport vehicle upang masuportahan ang pangangailangan ng mga lokal na pamahalaan at komunidad sa transportasyong medikal. -- Marinduquenews.org

Tulfo, naglaan ng ₱300M sa 5 probinsya sa Mimaropa

2026-07-11T17:01:31.596+08:00

BOAC, Marinduque -- Muling nakipagpulong si Senador Erwin Tulfo sa limang gobernador ng Mimaropa nitong Huwebes, Hulyo 9, upang talakayin ang mga programa at proyektong nakatuon sa pagpapaunlad ng rehiyon.

Ayon kay Marinduque Governor Melecio Go, napag-usapan sa kanilang pananghalian ang nakalaang tig-₱300 milyong halaga ng proyekto na ipinagkaloob ni Tulfo sa bawat lalawigan ng Mimaropa kabilang ang Marinduque, Oriental Mindoro, Occidental Mindoro, Romblon, at Palawan.

Ani Go, layunin ng mga proyektong ito na makatulong sa pagpapalakas ng imprastraktura at iba pang programang magbibigay ng benepisyo sa mga mamamayan ng bawat lalawigan.

Matatandaang noong nakaraang Marso ay nagsagawa rin ng pagpupulong si Tulfo at ang mga provincial chief executives ng rehiyon kung saan ipinaabot ng senador ang paglalaan ng pondo para sa pagpapatayo at pagsasaayos ng mga paaralan sa Mimaropa bilang bahagi ng pagpapabuti ng sektor ng edukasyon. -- Marinduquenews.org

5 mangingisda mula Buenavista, arestado sa Romblon

2026-07-09T09:54:36.019+08:00

BUENAVISTA, Marinduque -- Arestado ang limang mangingisda mula Brgy. Lipata, Buenavista, Marinduque matapos mahuling gumagamit ng ipinagbabawal na diving equipment sa pangingisda sa karagatan ng Dos Hermanas sa Banton, Romblon nitong Martes, Hulyo 7.

Ayon sa Philippine Coast Guard (PCG), naharang ng mga tauhan ng Coast Guard Sub-Station Banton, sakay ng Bantay Dagat patrol boat, ang dalawang motorized banca na umano’y gumagamit ng improvised compression apparatus malapit sa Isabel at Carlota Islets sa Barangay Libtong.

Nasamsam sa operasyon ang dalawang motor banca na may makina, dalawang 12-horsepower compressor engine na binura ang serial number, apat na rolyo ng compressor hose na may kabuuang habang humigit-kumulang 600 metro, isang speargun, apat na pares ng diving flippers, apat na weight belt na may lead sinkers, isang kutsilyo, at nasa 80 kilo ng sari-saring isda.

Tinatayang mahigit ₱183,000 ang kabuuang halaga ng mga nakumpiskang kagamitan at huling laman-dagat.

Nakatakas naman bago maharang ng mga awtoridad ang anim na kasama ng mga suspek na kinilala lamang sa mga alyas na “Mon,” “Tapok,” “Piscal,” “Andoy,” “Gara,” at “Rogie.” Sinasabing pawang mga residente rin ang mga ito ng Buenavista, Marinduque.

Nahaharap ang mga suspek sa paglabag sa Banton Municipal Ordinance No. 01, Series of 2011, na nagbabawal sa paggamit ng compressor breathing apparatus sa pangingisda at nag-aatas sa mga mangingisda na kumuha ng municipal fishing permit at magparehistro.

Dinala sa himpilan ng CGSS Banton ang limang naaresto, kasama ang mga bangka at iba pang ebidensya, para sa dokumentasyon, imbentaryo, at pagsasampa ng kaukulang kaso. Nananatili silang nasa kustodiya ng Coast Guard habang hinihintay ang legal na proseso. -- Marinduquenews.org

Most wanted sa Marinduque, arestado sa Mogpog

2026-07-08T21:39:42.724+08:00

MOGPOG, Marinduque — Inaresto ng pulisya ang rank 1 provincial most wanted person sa Marinduque sa isinagawang joint manhunt operation sa Barangay Marketsite, Mogpog nitong Martes, Hulyo 7.

Ang 24-anyos na suspek, na hindi pinangalanan upang maprotektahan ang pagkakakilanlan ng biktima ng sexual offense, ay dinakip sa bisa ng warrant of arrest na inilabas noong Hunyo 29 ng Family Court Branch 9 sa Boac, Marinduque.

Nahaharap ang suspek sa kasong rape by sexual assault sa ilalim ng ikalawang talata ng Article 266-A ng Revised Penal Code, na nakatala bilang Criminal Case No. 183-26. Nagtakda ang korte ng P200,000 na piyansa para sa kanyang pansamantalang kalayaan.

Nasa kustodiya na ng pulisya ang suspek at ihaharap sa korte para sa kaukulang legal na proseso.

Ayon kay Police Colonel Cornelio Tadena Jr, provincial director ng Marinduque Police Provincial Office (PPO), patunay ang pagkakaaresto ng suspek sa patuloy na pagtupad ng pulisya sa tungkuling dalhin sa hukuman ang mga taong nahaharap sa kaso at tiyaking naipatutupad ang hustisya.

Aniya, patuloy na paiigtingin ng Marinduque PPO ang intelligence-driven operations at palalakasin ang pakikipagtulungan sa komunidad upang mapanatili ang kaligtasan at seguridad sa probinsya.

Isinagawa ang operasyon ng Mogpog Municipal Police Station katuwang ang Marinduque Provincial Intelligence Unit, Marinduque Provincial Highway Patrol Group, at Provincial Intelligence Team ng Regional Intelligence Unit 4B. -- Marinduquenews.org

Maliliit na bangka sa Marinduque, bawal pumalaot simula Hulyo 9

2026-07-08T20:31:06.116+08:00

TORRIJOS, Marinduque — Ipatutupad ang no sail policy para sa lahat ng maliliit at magagaang sasakyang pandagat sa buong lalawigan ng Marinduque simula alas-4:00 ng umaga ng Huwebes, Hulyo 9, dahil sa banta ng masamang panahon.

Batay sa Provincial Disaster Risk Reduction and Management Council (PDRRMC) Advisory No. 01-2026, ipatutupad ang pagbabawal sa paglalayag bunsod ng epekto ng enhanced southwest monsoon o pinalakas na habagat dulot ng Super Typhoon Inday.

Pinapayuhan ang mga mangingisda, biyahero, bangkero at operator ng mga sasakyang pandagat na manatili muna sa ligtas na lugar at huwag pumalaot habang umiiral ang masamang panahon at malalakas na alon.

Mahigpit ding pinaalalahanan ang mga nagbabalak bumiyahe sa dagat na sundin ang kautusan at iwasan ang paglalayag hanggang sa magkaroon ng panibagong abiso mula sa PDRRMC. -- Marinduquenews.org

Petisyon ng Marinduque sa redemption rights ng MR Holdings, ibinasura ng tax court

2026-07-08T19:02:28.124+08:00

BOAC, Marinduque -- Ibinasura ng Court of Tax Appeals (CTA) ang petisyon ng pamahalaang panlalawigan ng Marinduque laban sa MR Holdings Ltd. kaugnay ng pagmamay-ari at karapatang tubusin o right of redemption ang ilang ari-arian ng Marcopper Mining Corporation.

Kinuwestiyon ng pamahalaang panlalawigan ang desisyon ng Regional Trial Court (RTC) na kumikilala sa karapatan ng MR Holdings na tubusin ang piling ari-arian ng Marcopper na naibenta sa public auction dahil sa hindi pagbabayad ng real property taxes.

Sa 13-pahinang desisyon, sinabi ng CTA na wala itong hurisdiksiyon sa kaso dahil hindi usaping buwis ang pangunahing isyung nakapaloob sa petisyon.

Ayon sa korte, inatasan ng RTC ang pamahalaang panlalawigan na payagan ang MR Holdings na gamitin ang karapatan nitong tubusin ang mga piling ari-arian.

Iginiit naman ng Marinduque provincial government sa petisyon nito ang pagbabawal ng Konstitusyon sa dayuhang pagmamay-ari ng lupa sa bansa. Kinuwestiyon din nito ang umano’y kabiguan ng MR Holdings na patunayan ang legal na interes nito sa mga ari-arian, ang umano’y paglipas na ng panahon para gamitin ang redemption rights, at ang iba pang legal na hadlang sa pagtubos ng mga ari-arian.

Gayunman, sinabi ng CTA na ang desisyon ng RTC at mga argumentong inihain ng pamahalaang panlalawigan ay hindi nakatuon sa isang tax issue.

Napansin din ng korte na 11 beses lamang nabanggit ang salitang “tax” sa mga argumento ng petisyoner at maging sa mga pagkakataong nabanggit ito, hindi umano aktuwal na usaping buwis ang tinatalakay.

Dahil dito, ibinasura ng CTA ang petisyon ng pamahalaang panlalawigan ng Marinduque dahil sa kawalan ng hurisdiksiyon.

Ang MR Holdings Ltd. ay isang kumpanyang nakarehistro sa Cayman Islands na nag-aangkin ng karapatan sa ilang ari-arian ng Marcopper Mining Corporation na isinubasta ng lokal na pamahalaan dahil sa hindi nabayarang real property taxes. -- Marinduquenews.org

Macec, 30 taon nang nangunguna sa pangangalaga ng kalikasan sa Marinduque

2026-07-08T15:27:59.146+08:00

BOAC, Marinduque — Ipinagdiriwang ng Marinduque Council for Environmental Concerns o Macec ang ika-30 anibersaryo nito bilang pagkilala sa tatlong dekada ng patuloy na paninindigan at pagkilos para sa pangangalaga at pagpapanatili ng maayos na kapaligiran sa lalawigan.

Sinimulan ang serye ng paggunita nitong Hunyo 27 sa Holy Rosary Parish sa Tapian, Santa. Cruz; St. Joseph Spouse of Mary Parish sa Gasan; Holy Child Jesus Parish sa Buenavista; at Mary Help of Christians Parish sa Balimbing, Boac.

Ipinagpatuloy ang pagdiriwang sa Holy Cross Parish sa Santa Cruz nitong Hulyo 4 at Saint Ignatius of Loyola Parish sa Torrijos nitong Hulyo 7.

Nakatakda rin ang mga pagtitipon sa Our Lady of Lourdes Parish sa Malibago at St. Joseph the Worker Parish sa Malabon sa Hulyo 11; St. Raphael the Archangel Parish sa Cawit sa Hulyo 12; Immaculate Conception Parish sa Boac sa Hulyo 15; St. Isidore Labrador Parish sa Mogpog sa Hulyo 16; Our Lady of Guadalupe Parish sa Matuyatuya sa Hulyo 18; Our Lady of Peace and Good Voyage Parish sa Balanacan sa Hulyo 21; at Sacred Heart of Jesus Parish sa Poras sa Hulyo 23.

Tampok naman sa pagdiriwang ang Provincial Leaders Assembly na gaganapin sa Hulyo 27 sa Boac Cathedral. Inanyayahan ng Macec ang mga kasapi at lider nito na makiisa sa 30th Anniversary Parochial and Provincial Leaders Assembly.

May temang “Macec@30 Hamos Kita! Tatlong Dekadang Paninindigang Sama-sama, sa Nag-iisang Tahana’y Tagapagkalinga, Patuloy sa Pagiging Mabuting Katiwala,” binibigyang-diin ng anibersaryo ang patuloy na sama-samang pagkilos para sa kalikasan at pagiging responsableng katiwala ng nag-iisang tahanan.

Bahagi rin ng mga aktibidad ang Rights of Nature Youth Summit na dinaluhan ng mga kabataan at lider mula sa mga paaralan, komunidad at civil society organizations noong Hunyo 21.

Nakatakda rin ang Rights of Nature General Assembly sa Hulyo 9 at 10 bilang bahagi ng patuloy na pagsusulong ng MACEC sa pangangalaga sa kalikasan at pagkilala sa karapatan ng kalikasan. -- Dr. Randy Nobleza, Marinduquenews.org

Three Sisters Homemade Banana Chips, nag-uwi ng makasaysayang pambansang parangal sa Gawad Saka

2026-07-04T18:21:48.142+08:00

SANTA CRUZ, Marinduque — Mula sa panimulang puhunan na ₱500, umabot sa pambansang pagkilala ang Three Sisters Homemade Banana Chips matapos itong tanghaling National Awardee for Outstanding Agricultural Entrepreneur – Micro Enterprise Category sa ika-51 Gawad Saka: Parangal para sa mga Natatanging Magsasaka at Mangingisda na inorganisa ng Department of Agriculture nitong Hunyo 29 sa Philippine International Convention Center sa Pasay City.

Ang pagkilala ang kauna-unahang pambansang parangal na naiuwi ng lalawigan ng Marinduque sa larangan ng agricultural entrepreneurship mula sa Gawad Saka.

Itinatag noong 1996 ng Rivadeneira family, nagsimula ang homegrown micro enterprise sa maliit na puhunan bago lumago bilang isang negosyong nagbibigay ng kabuhayan sa mga manggagawa at sumusuporta sa mga lokal na magsasaka.

Sa pamumuno ni Rowena Rivadeneira-Globio, mayroon na ngayong 15 empleyado ang negosyo at nakikipagtulungan sa mahigit 100 lokal na magsasaka sa kanilang lugar. Bukod sa banana chips, gumagawa rin sila ng iba pang value-added products na naglalayong palakasin ang lokal na agrikultura at lumikha ng mas maraming oportunidad sa komunidad.

Bilang bahagi ng pagkilala, tumanggap ang Three Sisters Homemade Banana Chips ng ₱250,000.

“As we celebrate this milestone, we remain committed to producing quality products, empowering our local communities, supporting our banana farmers, and proudly bringing the best of Marinduque to more Filipino homes and beyond,” ani Rivadeneira-Globio.

“Mabuhay ang mga magsasaka at mangingisda! Mabuhay ang mga micro-entrepreneurs at lahat ng mga MSMEs! Mabuhay ang mga Marinduqueño, para sa ikauunlad ng bawat Pilipino,” dagdag niya.

Ang Gawad Saka ay taunang pambansang pagkilala ng Department of Agriculture, katuwang ang mga lokal na pamahalaan, sa mga natatanging magsasaka, mangingisda at mga tagapagtaguyod ng sektor ng agrikultura at pangisdaan na may mahalagang ambag sa seguridad sa pagkain at pag-unlad ng mga pamayanang rural.

Para sa Three Sisters Homemade Banana Chips, ang parangal ay bunga ng tatlong dekada ng paglago—mula sa simpleng puhunan na ₱500 tungo sa isang negosyong nag-uugnay sa produkto, kabuhayan at mga magsasaka ng Marinduque sa pambansang entablado. -- Marinduquenews.org

Kampo ni Go, ligwak sa SedaLaw; 25% contingency fee, makatwiran ayon sa CA

2026-07-04T07:46:03.817+08:00

BOAC, Marinduque — Ibinasura ng Court of Appeals (CA) ang kahilingan ng kampo ni Gov. Melecio Go na bawasan ang 25 porsiyentong contingency fee ng Salazar Enrile Defensor & De Mata Law Offices (SedaLaw), at sa halip ay idineklarang makatwiran, valid at may bisa ang naturang kasunduan.

Sa 26-pahinang resolusyon na denesisyunan at sinang-ayunan nina Associate Justices Jaime Fortunato A. Caringal, Ramon A. Cruz, at Louis P. Acosta, inatasan ng appellate court ang pamahalaang panlalawigan ng Marinduque na tuparin ang obligasyon nitong bayaran ang SedaLaw alinsunod sa Agreement for Legal Services na nilagdaan noong Marso 23, 2022.

Ito ay matapos hilingin ni Go sa pamamagitan ng Provincial Legal Office, na ideklarang "grossly excessive, unreasonable, unconscionable, iniquitous, and disadvantageous" ang 25 porsiyentong contingency fee. Hiniling din nitong ibatay na lamang ang kabayaran sa prinsipyo ng quantum meruit o kung papayagan man ang percentage-based fee, ay limitahan ito sa hindi hihigit sa limang porsiyento ng settlement proceeds.

Gayunman, sa Notice of Resolution na inilabas nitong Miyerkules, Hunyo 22, kinatigan ng Court of Appeals ang lahat ng pangunahing hinihingi ng SedaLaw. Idineklara ng hukuman na makatwiran at may bisa ang 25 porsiyentong contingency fee at iniutos sa pamahalaang panlalawigan na tuparin ang napagkasunduang kontrata.

Isa sa mga pangunahing dahilan ng hukuman sa pagpapanatili ng 25% contingency fee ay ang pagsasagawa ng law firm ng masusing pagsusuri sa mga rekord ng Marcopper mining disaster, legal research, negosasyon, at pagtalakay sa mga komplikadong usaping may kinalaman sa lokal at internasyonal na batas.

Isinagawa rin umano ang serbisyo sa ilalim ng isang purong contingency fee arrangement, kung saan walang matatanggap na kabayaran ang mga abogado kung mabibigo ang kaso, bukod pa sa pag-abono nila sa mga gastusin habang isinasagawa ang legal na proseso.

Tinukoy rin ng Court of Appeals na naging mahalagang salik ang naging resulta ng negosasyon, kung saan naitaas ng SedaLaw ang orihinal na alok na $20 milyon tungo sa $100 milyong settlement para sa pamahalaang panlalawigan.

Inatasan din ng CA ang paglalabas ng Writ of Garnishment laban sa settlement proceeds upang awtomatikong maibawas ang 25 porsiyentong attorney's fees sa bawat tranche ng kabayarang matatanggap ng lalawigan mula sa Barrick Gold Corporation. Ayon sa resolusyon, ang nakaltas na halaga ay direktang ililipat ng Land Bank of the Philippines sa bank account ng SedaLaw.

Batay sa iskedyul ng settlement agreement, ang garnishment ay ipatutupad sa bawat tranche ng kabuuang $100 milyong settlement, kabilang ang unang $50 milyon, kasunod ang tig-$17 milyon sa una at ikalawang anibersaryo ng initial payment, at $16 milyon sa ikatlong anibersaryo.

Pinagsusumite naman ng Court of Appeals ang SedaLaw nang patunay ng pagbabayad ng lahat ng naaangkop na buwis at iba pang obligasyong piskal kaugnay ng matatanggap nitong attorney's fees.

Ang kontrobersiya ay nag-ugat sa petisyong inihain ng SedaLaw sa Court of Appeals noong Setyembre 23, 2025 upang ipatupad ang kasunduang nilagdaan nito at ng Pamahalaang Panlalawigan ng Marinduque kaugnay ng legal na representasyon sa negosasyon na humantong sa $100 milyong settlement sa pagitan ng lalawigan at ng Barrick Gold Corporation. -- Marinduquenews.org

Kauna-unahang pickleball tournament sa Marinduque, inilunsad sa Boac

2026-06-27T20:44:35.048+08:00

BOAC, Marinduque — Pormal nang inilunsad ang kauna-unahang pickleball tournament sa Marinduque na isinagawa sa Good Game Pickleball Courts na matatagpuan sa Barangay Laylay, Boac.

Dumalo sa naturang gawain sina dating Congressman Lord Allan Velasco at Mayor Armi Carrion, na sa unang pagkakataon mula nang matapos ang halalan noong 2025 ay muling nakitang magkasama sa isang pampublikong programa.

Sa kanyang mensahe, nagpahayag ng pasasalamat si Carrion kay Velasco sa patuloy nitong suporta sa pagpapaunlad ng sports sa lalawigan.

"Sa pamamagitan ng kanyang pagsisikap at pananaw, naipatayo ang pasilidad na ito na tiyak na magiging sentro ng pagkakaisa, pagkakaibigan, at malusog na kompetisyon para sa ating mga mamamayan," wika ng alkalde.

Ayon pa kay Carrion, ang paglulunsad ng pickleball tournament ay isang mahalagang hakbang sa pagpapalawak ng mga pasilidad pang-isports sa Marinduque, lalo na sa panahong patuloy na sumisikat ang pickleball bilang isa sa pinakamabilis lumaganap na sports sa bansa.

Umaasa rin ang alkalde na magsisilbing inspirasyon ang bagong pasilidad sa mga kabataan upang yakapin ang aktibo, disiplinado, at malusog na pamumuhay sa pamamagitan ng palakasan.

"Nawa’y maging daan ito upang mas marami pang mamamayan ang mahikayat na makilahok sa sports, mapaunlad ang kanilang talento, at mapalakas ang kanilang pangangatawan at pagkatao," dagdag pa ni Carrion.

Samantala, hinihikayat din ni Velasco ang mamamayan na tangkilikin at umaasa s'ya na lalo pang dumami ang mga manlalaro ng pickleball sa probinsya.

"Alam naman po natin na ang pickleball ay sobrang booming na sports na talaga and it seems na hindi na po ito titigil. Hopefully, it becomes part of palarong pambansa and olympics," wika naman ng dating mambabatas.

Inaasahang magiging sentro ang Good Game Pickleball Courts ng mga lokal na torneo, pagsasanay, at iba pang aktibidad na magpapalawak sa komunidad ng pickleball sa Marinduque at magbibigay ng mas maraming pagkakataon sa mga residente na makibahagi sa isports. -- Marinduquenews.org

60-anyos na lalaki sa Boac, nalunod-patay habang naliligo sa dagat

2026-06-27T19:29:52.873+08:00

BOAC, Marinduque — Patay ang isang 60-anyos na lalaki matapos malunod habang naliligo sa dagat sa Barangay Ihatub, Boac, Marinduque, Sabado ng tanghali, Hunyo 27.

Kinilala ang biktima na si Arnulfo Jawili Velasco, residente ng Barangay Mahinhin, Boac.

Batay sa ulat ng pulisya, bandang 12:45 ng tanghali nang makatanggap ng tawag ang Boac Municipal Police Station mula sa Marinduque Provincial Tactical Operations Center (PTOC) hinggil sa insidente. Agad namang rumesponde ang mga imbestigador at iba pang tauhan ng pulisya upang magsagawa ng beripikasyon at paunang imbestigasyon.

Ayon kay Melita Maalindog Grana, kinakasama ng biktima, nagtungo sila sa beach kasama ang kanilang mga kapitbahay para sa isang outing.

Bago ang insidente, nag-iinuman umano si Velasco kasama ang kanilang mga kapitbahay. Nang mapansing nakainom na ito ng alak, pinayuhan umano siya ni Grana na huwag nang lumangoy, lalo na't hindi ito bihasa sa paglangoy.

Sa kabila ng babala, nagtungo pa rin si Velasco sa dagat at lumangoy nang mag-isa, may layong tinatayang 10 metro mula sa pampang. Makalipas ang ilang sandali, bigla na lamang umano itong nawala sa paningin.

Humingi agad ng tulong si Grana sa kanilang kapitbahay ngunit hindi nila agad natagpuan ang biktima. Dahil dito, humingi sila ng saklolo sa mga opisyal ng barangay, na agad namang nakipag-ugnayan sa Bureau of Fire Protection (BFP) Boac at Provincial Disaster Risk Reduction and Management Office (PDRRMO) para sa search and rescue operation.

Sa isinagawang paghahanap, natagpuan ng mga recuers ang biktima na nakadapa sa ilalim ng tubig. Siya ay narekober ni SFO1 Emmanuel Magcarang at agad na isinugod sa Marinduque Provincial Hospital.

Idineklarang dead on arrival ang biktima bandang 1:35 ng hapon.

Batay sa medical findings, acute respiratory failure secondary to drowning o matinding pagkabigo sa paghinga dulot ng pagkalunod ang sanhi ng kanyang pagkamatay.

Samantala, tumanggi ang kinakasama ng biktima na isailalim sa awtopsiya ang labi nito, dahil naniniwala siyang isang purong aksidente ang nangyari at walang indikasyon ng foul play.

Patuloy namang nagpapaalala ang mga awtoridad na magdobleng ingat at huwag ng maglangoy pa sa dagat kapag nasa impluwensya ng alak. -- Marinduquenews.org

Dolphin, natagpuang patay sa Gasan

2026-06-27T18:40:52.312+08:00

GASAN, Marinduque — Isang female false killer whale (Pseudorca crassidens), na kilala rin sa lokal na katawagang dolphin, ang natagpuang patay ng mga mangingisda sa karagatan malapit sa Tres Reyes Island sa Barangay Pinggan, Gasan.

Ayon sa ulat, agad na rumesponde ang ProVet–Marinduque Animal and Wildlife Rescue Emergency Response Team (MAWRERT) matapos makatanggap ng magkahiwalay na report mula kay Municipal Agriculturist Vanessa Tayaba at Gasan MDRRMO Chief Anthony Zoleta hinggil sa insidente.

Kasama ang mga senior veterinary students ng Capiz State University (CapSU), nagsagawa ang grupo ng necropsy o awtopsiya upang matukoy ang posibleng sanhi ng pagkamatay ng marine mammal.

Batay sa paunang resulta ng pagsusuri, walang natagpuang malinaw na panlabas o panloob na pinsala na maaaring magbigay ng tiyak na dahilan ng pagkamatay nito.

Gayunman, nakita sa necropsy ang pagdurugo sa itaas na bahagi ng magkabilang baga, matinding pamumuo ng dugo sa puso, at indikasyon ng hydronephrosis o pamamaga ng bato. Napag-alaman din na walang laman ang tiyan at bituka ng hayop, na nagpapahiwatig na matagal na itong hindi nakakakain bago namatay.

Wala ring nakitang anumang parasitic infestation sa katawan ng balyena.

Bukod dito, napatunayang buo ang tympanic membranes at auditory ossicles o bahagi ng pandinig ng hayop, kaya't malabong dulot ng blast fishing, dinamita, o matinding ingay sa ilalim ng dagat ang naging sanhi ng pagkamatay nito.

Bagama't hindi pa matiyak ang eksaktong dahilan ng insidente, sinabi ng MAWRERT na hindi maaaring isantabi ang posibilidad na may kaugnayan ito sa mga nagdaang seismic activities o iba pang pangyayari sa ilalim ng dagat na maaaring nakaapekto sa kalagayan ng hayop.

Kumuha rin ang rescue team ng tissue samples para sa karagdagang laboratory examination at mga susunod pang pag-aaral.

Nanawagan ang MAWRERT sa publiko na agad iulat sa mga kinauukulang awtoridad ang anumang marine mammal stranding o kahalintulad na insidente upang mapabilis ang pagtugon at makatulong sa patuloy na pag-aaral at pangangalaga sa mga yamang-dagat ng lalawigan. -- Marinduquenews.org

1,260 pamilya sa Boac tumanggap ng tig-10 kilo na bigas

2026-06-17T18:34:52.525+08:00

BOAC, Marinduque -- Tumanggap ng paunang tig-10 kilo na bigas ang nasa 1,260 pamilya sa bayan ng Boac nitong Martes, Hunyo 16.

Ayon kay Mayor Armi DC. Carrion, ang naturang distribusyon ay bahagi ng unang sigwada ng Food Assistance-Rice Distribution Project na pinondohan ng Department of Budget and Management sa ilalim ng Local Government Support Fund-Financial Assistance to Local Government Units o LGSF-FA to LGU's para sa taong 2026.

Aniya, sa pamamagitan ng nasabing programa ay pinagkalooban ang munisipalidad ng Boac nang ₱10 milyong pondo na ginamit sa pagbili at pamamahagi ng komersyal na bigas para sa mga nasasakupang residente.

Kabilang sa mga sektor na nabigyan ng ayuda ay ang mga senior citizen, persons with disabilities (PWDs), mga tricycle drivers, magsasaka at mangingisda na lubos na naapektuhan ng pagtaas ng produktong petrolyo.

Mula sa mahigit 17,000 pamilya sa Boac, tinatayang 13,888 na sako ng bigas ang nakalaan para sa mga benepisyaryo ng nabanggit na programa. -- Marinduquenews.org

Zaijian Jaranilla shares glimpse of his peaceful island escape

2026-06-08T22:14:08.257+08:00

BOAC, Marinduque — Actor Zaijian Jaranilla recently shared photo on Facebook showing him enjoying time in Boac, Marinduque, his home province and favorite getaway destination.

In the photo, Jaranilla is seen shirtless while riding a motorized banca across the province’s calm waters, giving followers a glimpse of his laid-back island retreat.

The actor previously revealed in an interview that Marinduque remains his ultimate travel destination, citing the peace and simplicity he experiences whenever he visits.

"Pag doon ako sa province, naliligo lang ako palagi sa dagat at sobrang tahimik" [When I'm in the province, I just swim in the sea all the time, and it's very peaceful,] Jaranilla said.

The post drew attention from fans who continue to admire the actor’s connection to his roots and his appreciation for the natural beauty and tranquility of Marinduque. -- Marinduquenews.org

Magnitude 2.2 na lindol, naitala sa Torrijos

2026-06-08T20:32:28.720+08:00

TORRIJOS, Marinduque — Isang magnitude 2.2 na lindol ang naitala ng Philippine Institute of Volcanology and Seismology o Phivolcs bandang 3:38 ng madaling araw ng Lunes, Hunyo 8.

Batay sa datos, ang sentro ng lindol ay natukoy sa layong limang kilometro timog-silangan ng bayan ng Torrijos.

May lalim itong 10 kilometro at tectonic ang pinagmulan ng pagyanig.

Walang naidulot na anumang pinsala ang naturang lindol at hindi rin inaasahan ang pagkakaroon ng mga aftershock kaugnay ng pagyanig. -- Marinduquenews.org