Market Viking 市場維京人

多事之周

2014-03-31T22:53:00.002+08:00

上個禮拜美元徧弱，唯到咗禮拜五後似有反彈跡象。

睇嚟係係時候迎接今個禮拜多事之周。

今朝日本 PMI 顯放緩，日圓開跌。USD/ JPY 已升過 103.00。下個目標先嚟 104.00，再嚟中期目標 110.00。

傍晚開歐元區 3月CPI 年率：超預期降至2009年11月以來新低0.5%，連續6個月都低於1.0%、令到歐羅沽壓陰影猶在。但數據一出歐元抽咗上升。

市場會關注今晚耶倫講話。另外，日本聽日（周二）將上調消費稅，歐洲澳大利亞央行利率決議又在即，而美國三月非農報告亦會喺呢個禮拜五公佈吖。

睇嚟今個禮拜又係時候搵吓錢喇。記得留意維京人嘅 twitter 吖。

累積日圓淡倉

2014-03-20T20:56:00.001+08:00

經過上兩周升升跌跌的匯市後，尋日維京人就喺 Twitter 度叫大家開始累積日圓淡倉。

講的時候 USD/JPY 都係 101.70 ~ 101.80 咁上下。估唔到唔夠廿四小時，己經升到 102.50! 由於日本年結已過，維持較早前的睇淡日圓方向。今年目標 110.00!

Cheers~

回吐正是出擊時

2014-03-12T01:10:00.000+08:00

自從上星期尾歐羅 chok 升、日圓又跌之後，呢兩日各貨幣普遍略有回吐。

EUR/USD 上咗 1.3800 後仲未夠彊再上去 1.3900，宜觀望。
USD/JPY 上星期尾上過 103.60 咁上下又回吐，但跌低過 103.00 又見美元買盤。
GBP/USD 波幅一向徧大。近期 touch 高位 1.6775 左右見回吐，但 1.6600 幾頂得吓。
AUD/USD 以為有得執，升過近期高位 0.9125 左右後，又腳軟去番 0.9000 咁上下。
USD/CAD 衝上 1.1100 後，似係做緊整固。

回吐正是出擊時。維京人睇好 USD/JPY 同埋 USD/CAD 呢兩 pair。各位點睇？

留意回吐過大時要考慮：1. 止蝕 2.追貨溝淡。

根據維京人經驗，滙市止蝕多數都會止錯蝕。但追貨溝淡十次兩三次睇唔啱嘅話就蝕凸！

Good luck~

歐元上升了，你還未買嗎？

2014-03-07T01:28:00.003+08:00

如果有留意維京人 Twitter 嘅朋友，相信今晚又賺錢鳥。

3月6日下午兩點左右：

開始累積歐羅 ... 係！烏克蘭局勢係仲未穩，好似好多變數。但而家入貨有其值博率吖。EUR/USD 家下1.3720 左右，跌破1.3700 應減持、跌破 1.3650 作止蝕。短期目標 1.3850、中期目標 1.4000 以上大好風光。

3月7日凌晨左右：

今日維京人下午 2點左右同大家講累積歐羅。當其時 EUR/USD 報 1.3720 左右, 我仲同大家講短期目標為 1.3850。點知說時遲那時快，啱啱己經達標。跟維京人 tweet 的朋友相信又執咗唔少! ^^

升得急，家下（Eur/USD = 1.3866) 入貨會有風險。但 forex 一般升／跌起上嚟有餘未盡（即 EUR/USD 仲有得升），建議冇貨者睇埋聽朝市況點先入市。冇貨又心急想入貨者，小注先買少少。冇貨心急想入市又唔想咁細注買入者，建議 1.3830 左右減持、1.3820止蝕。

唔想入歐羅，亦可以留意沽吓日圓。USD/JPY 已經升破 103.00 （美金兌日圓升，即日圓跌），雖然呢 pair 未有大升，仲反覆跌落 103.00 樓下，但啱啱升高位沽壓唔算勁。消化完日圓呢浸買盤（即美元沽盤）USD／ JPY 可能會再升過（即美元升日圓跌）！

Good luck~~~~~~

美元有回勇跡象

2014-02-25T23:22:00.000+08:00

歐羅／美元去到 1.3770 左右無以為繼，英磅／美元氣勢如虹升過 1.7000 亦要抖抖。睇勢美元似有回勇跡象。維京人又唔想咁心急沽番歐羅英磅轉頭，決定㨂加元嚟開刀。美元／加元暫睇 1.1200。今年內目標 1.1700。Good luck~

留意歐羅守唔守得住 1.37~

2014-02-24T01:04:00.005+08:00

似乎市場對於歐羅能否突破升勢有所懷疑。維京人繼續以反向思考，暫時睇歐羅仍可再上。

留意 EUR/USD 能否守一守 1.37。暫時睇 1.40。

Good luck~

英磅果然彈升！

2014-02-13T23:40:00.002+08:00

前兩日先講話要買英鎊，點知尋日英國央行喺發布的季度通脹報告中表示，利率可能會喺一年多之后需要做出調整。說時遲那時快兌美元滙價己經由 1.64 左右急升至 1.66 以上。無他嘅，央行喺報告入面對未來三年英國經濟增長作出咗預估∶ 2014年 GDP 預測均值增長3.4%、2015 年同 2016年則分別增長2.7%和2.8%。行長卡尼仲發表講話時提咗未來有加息可能，你話英磅點唔會 chok 上去？

暫時維京人睇今年內英磅兌美元會升到 1.7 或以上。大家睇位～

Cheers~

2014 馬不停蹄沽日圓買英磅

2014-02-08T19:56:00.001+08:00

啱啱寫番編 post 喺 iPhone 維京人，都冇理由唔 update 吓呢個 blog 咁嘅。咁耐冇見，喺度同大家拜番個年先！祝大家馬年行運一條龍、馬上賺大錢～馬年第一件事係想同大家講，今期維京人沽緊日圓買緊英磅。大家留意睇吓個勢點樣？ Forex 波幅可大可更大，大家買時記緊睇位。 Cheers~

2012

2012-01-12T00:56:00.000+08:00

原來已經有近一年半冇寫 Blog 了。呢一年半以嚟，維京人集中炒 Forex，都好少炒股票。就算炒，都只係炒吓 Apple 呢隻美股咁大把。睇到恆指呢段時間嘅表現，亦發覺唔炒股票真係明智到不得了嘅選擇。哈哈。

咁炒 Forex 嘅表現又如何呢？老實講，經過前幾年係咁交嘅學費，近呢兩年終於有啲進步喇。而我發覺其實 Forex 無論你買上又好買落都好，原則其實係比想像中嘅簡單：

嚴守止蝕！

TMD~ 你可能即刻想草泥馬同鵰娜馬我鳥。但呢個確確實實係近呢幾年小弟最感同身受嘅一樣嘢！

想喺 2012 試下寫吓自己所謂嘅心得，好嘅大家可以攞嚟用，唔好嘅大家亦可以知道一個滙市失敗過嘅人所犯過咩嘅錯誤。

祝大家有個成功嘅 2012!!! 記得得閒 follow 吓小弟嘅 Twitter！

http://www.twitter.com/marketviking

Cheers!

是時候入貨了！

2010-08-02T21:28:00.001+08:00

維京人上年 update 呢個 blog 的時候，正正係六月。經過超過一年時間冇 update，可能大家都有 D 奇怪。唔通維京人發咗達？又或者係已經喺人間蒸發？定係已經冇興趣寫 blog ？
係呀，唔知點解，突然間對市場不太感興趣。記得上年六月左右，恆指大約喺兩萬零點左右。由上年六月到而家，恆指基本上係小上小落，唔多點郁。最高恆指去到 22800，最低約去到 18700。升升跌跌，唔玩其實係唔會有損失，反而見以為向上去追貨或者以為向下去沽貨者，就有機會慌失失。維京人一向比較鐘意玩大上或者大落，見個市向上又未係時候，向下又唔會跌得多，所以咪暫且退出下市場，連 blog 都冇寫囉。

反而如果要搵食，可能滙市會好多機會。不過 Forex 嘅殺傷力亦非同少可，所以維京人都係細細注去玩，冇乜所謂。亦無謂喺度同人講。

個市牛皮咗超過成年，如果睇返小弟過去嘅 post，係估恆指今年見 30000 點嘅。家下 2010年已過一半，似乎 30000 點比較難做到。不過世事嘅嘢，乜都有可能嘅。炒股票亦非炒一日咁大把，如果睇好，家下又似乎係入貨嘅時候。

七月份過咗世盃效應，基金經理亦似乎收拾心情？可能仲有人放緊暑假，可能八月就係累積存貨好時機。九月開學，亦係股市開車之時。

係唔係？到時咪知囉。總之小弟就開始入貨喇！

巧合

2009-06-28T21:35:00.002+08:00

2003年，香港經濟因沙士走入谷底。同一年，哥哥同埋梅姐離我哋而去，對香港人嘅心情落井下石。

2009年，美國因金融海嘯經濟亦走入谷底。巧合地，兩顆巨星 MJ 同埋俏嬌娃 Farrah Fawcett 亦離大家而去。

永遠以為是低處，卻低處未算低；個天點都會令人受考驗，令人覺得個世界好悲同好灰。不過，好多時去到最深深低處，正係反彈之時。

******

講番個市，維京人睇六月半年結過後會跌番個零兩個月，然後恆指向出年三萬點邁進。

咩話？太進取？

做人最緊要有想像力。射唔到太陽射到隻大鷹都唔錯吖。

Cheers！

******

過埋今個月，再擺多 D 時間睇住個市先。

******

維京人 Twitter 已開通！
http://twitter.com/marketviking

******

維京人近期愛上跑步，有空請幫幫忙為小弟打氣啦！（雖然呢三個禮拜都冇乜點跑）

http://runningviking.blogspot.com

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam

黃金交叉、黃金機會、黃金後市

2009-06-22T23:26:00.002+08:00

維京人喺度重整旗鼓中，暫時盡量每個禮拜起碼會 update 呢度一至兩次咁啦。

港股 - 黃金交叉？

上個禮拜，維京人話港股似做緊黃金交叉，點知三爬兩撥已經喺上周中出現。上個禮拜二港股收市， 50天線係升穿 250天平均線嘅，仲係 5年嚟首次。所謂黃金交叉，一般係指短期間嘅移動平均線（例如50天）升穿較長期嘅平均線（例如 250天線），係牛市重臨嘅信號。

維京人對於技術指標，算係幾推崇嗰隻。之但係今次 D 人個個話黃金交叉利好，個人就不敢恭維。喺小弟心目中，短期平均線升穿中長期平均線，未算係好「黃金」。真正嘅「黃金交叉」，其實應該要呢兩條平均線都係於交叉嗰點同時上升，先至算有效。

睇番上個禮拜港股營造嘅「黃金交叉」， 250天線其實唔係算係好「上升」，所以呢次嘅威力應該冇乜。嚴格嚟講都唔係好算「黃金交叉」。類似嘅疑似「黃金交叉」喺 2002年亦出現過，結果亦係無效，要到 2003年 SARS 後港股先見底。

新股 - 黃金機會？

咁後市點睇？七月必見回吐，呢個已經成為市場上嘅一個大共識，無謂同大眾對著幹。(雖然好多時賺錢都係人哋唔敢而你去做) 反而近期港股又掀起一股抽新股熱潮。繼上個禮拜二有隻旭光 (#00067) 喺上市後即高收 19% 後，今日又有兩隻新股連贏。中金再生 (#00773) 用埋興利 (#00396) 分別較招股價爆升 22% 同埋 39%。抽新股又成為一眾小股民嘅黃金機會。

今日就有三隻股仔宣佈 IPO，分別係有話中國人係要嚟管嘅「大哥」做代言人嘅霸王（＃01338）、秦發集團（＃00866）同埋 361度 (#01361)。三隻新股入面，講氣氛就肯定係霸王，起碼知名度都贏晒。其餘兩隻相對就少 D 人認識。

維京人啱啱過咗嘅 weekend，走咗去廣州。諗住去一德路嗰度嘅批發市場睇下有咩貨可以放喺 eBay 賣。晚上喺上下九路流連，短短十零廿分鐘路程，嘩！驚覺竟然已經有 5 間 361度！簡直同香港西洋菜街嘅百老匯同鐳射等有得揮！！361度係賣體育用品嘅，當晚發現佢嘅生意都唔錯，起碼比起李寧 (#02331) 嘅生意好。李寧呢隻影子股亦由 $15 抽上去接近 $20。相比起霸王可能比較難抽中，維京人會吼 361度。

商品 - 黃金後市如何？

今日信報同埋 Now 聯手攪咗個關於黃金投資嘅機會。維京人本身都想去嘅，但多嘢做冇去到。事後睇番訪問曹 Sir，佢話家下股市係咪牛市未能確定，反而應該投資黃金。估唔到嘅係，佢哋個講座一完咗，金價喺歐洲時段即刻嚟個大暴跌！一度仲跌至 917邊緣，跌超過 15蚊美元一盎斯。唔通市場俾機會大家入貨？

小弟喺上兩個禮拜炒輸咗金，後嚟喺 935左右調轉頭買佢跌，今日見一低過 920即刻平倉，先收復小部份嘅失地先。918 係重要嘅支持，家下報緊 920.5。啱啱轉頭買番佢升，又係開始累積時。

維京人發覺炒黃金其實比較難炒短線。就算係短線，都好難用技術分析。理由係佢會好長嘅一段時間玩唔上唔落，等大家以為佢會慢慢升／跌，但唔聲唔聲就暗地裡做緊嘢，突然就跌（或升），有 D 估佢唔到。或者係小弟嘅功力問題？

******

生意淡薄，不如賭博。聽日六合彩又有四千萬金多寶，想發橫財夢嘅朋友又可以留意！以前逢親金多寶多數都係假期前夕，例如「聖誕金多寶」、「中秋金多寶」等節日金多寶。近幾年馬會為咗「出師有名」，聽日嘅金多寶就叫做「周二勁賞金多寶」！真係唔夠佢嚟！

******

維京人 Twitter 已開通！
http://twitter.com/marketviking

******

維京人近期愛上跑步，有空請幫幫忙為小弟打氣啦！（雖然呢兩個禮拜熱到死，冇乜點跑）

http://runningviking.blogspot.com

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam

似做緊黃金交叉，但個勢又似尋頂 ...

2009-06-14T22:30:00.002+08:00

經過上個星期小弟元氣大傷嘅一個禮拜後，維京人家下固本培元。稍後再戰市場。

油價一度上到近期高位 72美元一桶。金價銀價則繼上個星期後，繼續大上大落咁整固。金價去到 990美元一盎斯後阻力已現，美元兌其他貨幣似做番少少強勢。個人睇美元跌勢暫時告一段落，或起碼喘定。小弟亦喺禮拜六嘅時候喺銀行將 D 歐羅同埋日本紙唱番港紙先。

特別係英鎊，喺星期五亦一度高見 1.6601，但即阻力重重，家下已跌至 1.6444。睇嚟 1.66未必會咁快破到。

睇番個股市，恆指喺過去嘅一個禮拜曾跌穿 18000點水平，但跌近 20天線左近又係跌唔落。星期五仲反撲至 19000樓上，一度高見 19161點。雖然收市後都只係報 18889點，但成個禮拜升 210點，或 1.13%。熊仔又一次技術性被擊倒。

趨勢係炒家嘅好朋友，所以升市千祈唔好買佢跌。但問題係，你當佢朋友，佢未必當你係知己噃。特別係趨勢轉勢時，永遠都係靜悄悄嘅。

睇技術指標例如 RSI、MACD 等，期指就開始出現背馳現像，後市有戒心。睇移動平均線，恆指則似營造緊黃金交叉。咁多種技術指標入面，維京人最鐘意黃金同死亡交叉，貪其容易理解，而且準繩度超高。好似今年 A 股亦曾做黃金交叉，結果長升長有。

睇圖嚟講，恆指黃金交叉有好大機會實現。但始終低位買上嚟已超過 0.618嘅黃金比率，二萬前有機會大跌一嘢，然後先升過。跌幾多？Who knows? 到時候咪知囉。個人睇家下唔適合買貨，但亦唔好買佢跌。悶一陣咁啦。

Cheers！

******

維京人 Twitter 已開通！
http://twitter.com/marketviking

******

維京人近期愛上跑步，有空請幫幫忙為小弟打氣啦！（今日又去咗跑步，不過熱到死！）

http://runningviking.blogspot.com

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam

顛簸的一周 - 一個投機者的獨白（香港版）

2009-06-08T01:28:00.004+08:00

六月開始咗一個禮拜，股市又經過大上大落嘅一周。港股自三月低位，即恆指約萬一點升上嚟家下萬八點樓上，接近 60%。計反彈力度最強嘅比例 0.618 計，已接近高位尋頂階段。

總結上周，恆指升 508點或 2.8%，收報 18679點；國指升 433點或 4.2%，收報 10862點。留意睇，原來呢兩個指數已經連升三個禮拜。恆指國指及相關期貨圖嘅走勢，全部都做緊頭肩底，at least 恆指目標暫睇 20000點。

家下恆指守喺 250天線（即 18053點）樓上，守得住，每次回吐都係低吸之時。但回吐幾多先至低吸，真係只有事後孔明，事前估得中就係神仙！個人睇六月有機上破 20000點，下個月必見回吐。到時候以跌至 10天或 20天線嚟睇位買貨。

小弟持有嘅 Alibaba (#01688)，上星期中無啦啦話解除基礎投資者禁售期。真係俾佢激死！股價即由 $14.4 見回落，星期五收報 $13.8。小弟睇呢個做法對小股東好唔公平，睇好馬雲發夢但唔代表佢可以亂嚟，開始對佢有戒心，相信短線一定繼續回吐，但市旺，小注繼續持有。

顛簸嘅唔單只係股市，更顛簸嘅係商品同埋外匯市場。

油價算係穩定，我指嘅穩定係「穩定上揚」而唔係「穩穩定定」整固。反觀維京人一路推介嘅黃金冋埋白銀，呢個禮拜真係嚇死人！

金價一如預期喺禮拜一向上衝，小弟由於睇美元跌咁耐終見回吐，所以星期一早上平咗部份倉位先。點知升勢有餘未盡，星期一繼續抽上去 988美元一盎斯。結果，星期一晚果見回吐，但跌到 970又有支持。結果喺星期三抽上 990。手持大量金銀嘅小弟當然係笑到見牙唔見眼啦。

就喺呢個大上大落嘅星期一二三，維京人就係咁累積咗大量嘅好倉，博金價會抽上 1000大關。結果？一踏入六月四日紀念六四二十周年之際，金價即唔夠十二小時由高位 990 跌至 960。小弟喺 970平晒大部份倉位，諗住大賺點知冇得賺，認真冇癮。

最冇癮嘅係，星期五早上繼續買入黃金同白銀，博反彈，點知由於傳英國首相白高敦會落台，英鎊大跌做成美元暴升。英鎊兌美元喺禮拜五晚八點半左右由 1.62 三爬兩撥（唔駛半個鐘）跌至 1.60。金價嘛，竟然由 984 跌至 959！！銀價亦由 15.8 跌至 15.2！

當其時維京人正忙住幫老細做緊私人嘢，同埋趕住去朋友嘅飯局。冇設止蝕下，呢鋪真係輸得好慘。即係想像下當你個股票戶口原本有 100蚊（金額可以自行放大縮細，貨幣亦適隨專便），半個鐘頭後得番 5蚊！！

冇錯，就係呢種感覺！！

往者已矣，最重要係攞個教訓。維京人成日喺度叫人玩 forex 一定要設止蝕，點知自己呢次衰心熊冇設止蝕，哈哈！真係諷刺。睇呢個 blog 嘅朋友除咗睇到小弟對市場準確嘅分析外，亦可以學到一個投機者衰咗嘅慘痛經驗。

冇錯，唔係淨係自吹自擂，連衰咗嘅都會同你分享 ...... 咁當然，希望自吹自擂嘅機會比衰咗嘅機會多 D 啦！

是為投機者的獨白，香港版。

Cheers！

******

Twitter 越嚟越多人用，連今期 Time Magazine （時代雜誌）都以佢做 cover story，How Twitter Will Change The Way We Live，真係利害！

日前同朋友食飯，佢話維京人太多事情想做，太少時間；要放下一些，才可得到一些。諗下諗下，其實好鬼有哲理。既然家下有 Twitter，可能 update 呢個 blog 嘅時間會少咗咯。但小弟一定會繼續寫 blog，將無論賺錢同蝕錢嘅經驗喺度同大家分享。

咁當然，Twitter 就會 update D 啦。呢個 weekend，維京人仲花咗少少時間更新咗 Twitter 嘅 background 㖭。得閒望吓啦。

http://twitter.com/marketviking

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam

******

維京人近期愛上跑步，有空請幫幫忙為小弟打氣啦！（今日終於去咗跑步，爽！）

http://runningviking.blogspot.com

媽媽我餓，但我吃不下！

2009-06-04T00:00:00.004+08:00

媽．媽．我．餓．但．我．吃．不．下

不一樣的五月

2009-05-29T18:49:00.002+08:00

維京人今日放假，終於可以認認真真睇住個市。身為好友嘅我，緊係開心今日個市係咁升啦。

今日係五月最後一個交易日，喺呢個交易日，股市都係要升嘅。恆指今日收報 18171點，升 285點或 1.6%。重上萬八點。成個五月，恆指由四月底 15500 左右起步，家下埋單計數係升咗超過 2651點，約 17%。係 81年以嚟表現最好嘅五月! 期指大部份時間雖然都係低水，報 18120，低水 43點，但只係輕微低水咁啫。

Sell in May? 仲信嘅話肯定要講句問你死未！？熊仔大量被打靶，係望你有聽維京人意見齊齊睇升。經濟數據越差，個市反智地越升。冇計，今期炒熱錢流入，眼鏡碎一地。

奧巴馬話要 Change，估唔到股市都帶俾我哋一個不一樣嘅五月。感覺良好。

維京人手頭持有阿里巴巴 (01688)，買入價 $13.5，現價 $15.18，短線目標 $17，遠少少睇 $20 先。

中移動 (00941) 中海油 (00883) 同埋建行 (00939) 被評為今期最抵買嘅股票，尤其係中移動，市帳率 2.7倍，股本回報 26%。中移動喺今期嘅升市唔算郁得太犀利，估計中移動嘅收益實情受金融海嘯嘅影響比較少，可能冇經濟復甦嘅因素？

維京人睇既然個市企穩萬八，後市可以向二萬大關邁進。睇好中移動可以追落後。考慮小注買入 call 輪。

除咗港股，外圍其實都屢見好消息。日本工業生產上升 5.2%，另外 5月 PMI 為 46.6，連升五個月，越嚟越近 50 呢個好壞分界線。雖然失業問題係五年半以嚟最勁，但通常失業率都係一個濟後數據。

除咗股市，樓市似傳好？冇計啦，放喺銀行得嗰雞碎咁多息，買樓似乎仲可以保值。銀湖天峰尋晚通宵賣樓，近期罕見。

另一個不一樣嘅五月係商品大升，不過呢個就唔係出於市場預期之外。主要係美國係咁印銀紙，其他國家亦係咁印銀紙，資金大氾濫，人們預期通漲會重臨。

今期石油同黃金都大升。油價尋晚己經衝破 65美元！金價今日亦大升，終於升破近期嘅高住 970美元一盎斯。衝咗幾次終於衝破，呢兩日守得住，肯定會再向上衝向 1000 大關。而衝破 1000 大關後，相信呢次唔會好似上次咁咁快回落，點都會企得穩 1000。

寫呢篇 post 嘅時候金價做緊 973咁上下，一個月以嚟升咗接 9%。其實已經比油價升得少。維京人手頭呢兩日做咗唔少 Spot Gold 同 Spot Silver 嘅買入盤，家下開心到見牙唔見眼。為咗獎勵下自己，尋日端午節仲買咗塊金幣俾自己呢。不過有朋友話買金粒買賣差價會冇咁大，得閒又去問下先。

美國今晚會公布採購經理及消費者信心指數，對後市有啟示作用。另外，美國財長蓋特納將於呢個禮拜日（３１日）起至下個禮拜二（２日）訪華，市場預期都係同我哋嘅主席同埋總理講下美預算赤字及美國債券等問題，但估未必會提及人民幣匯率。

呢個會對匯市同美股走勢做成影響。近期非美元商品同貨幣走勢強勁，超買再超買，唔排除美元會技術上轉一轉強。所以大家呢期炒外匯、石油同埋黃金等都要睇美元。個人睇如果歐羅兌美元守得住 1.4000，金同銀都有得升，尤其睇好銀價，突破 15.00 美元一盎斯後下一關睇 $17，家下報 $15.44。

******

唔知各位開咗 Twitter account 未？Twitter 又稱 mini blog 迷你網誌，每段 post 限定喺 140字以內。據報 Twitter 用戶於全球已經超過 3000萬，好多大企業如 LV 等亦以此作網絡促銷。維京人喺三月都開咗 Twitter，發覺高手如雲，真係得到好多好有用嘅資訊。如果你開咗 account，記得 follow me 喇。

******

近排比較忙，如果想睇維京人嘅 update，可以去 twitter。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam

******

維京人近期愛上跑步，有空請幫幫忙為小弟打氣啦！（雖然有成兩個幾三個禮拜冇跑）

http://runningviking.blogspot.com

買阿里巴巴即係買馬雲

2009-05-25T23:49:00.001+08:00

今日港股低開後，恆指曾跌 332點。其後有反彈，恆指收市報 17,121點，升 59點或 0.35%。

港股反彈，主要受內地 A 貨做好所影響。A 貨今日做好，又受中石油 (#00857) 傳收購新加坡石油消息所刺激。

港股則禾雀亂飛格局，特別係Ｄ內房股同地產股，升幾十個巴仙都好似冇咩特別咁，嚇死人！

至於維京人推介嘅阿里巴巴 (#01688)，今日上午曾跌 2%。本身想入貨，但要開會。結果喺下午 $13.5 嘅高位追咗貨。利害嘅係高處未算高，收市報 $14.42，「微升」11.09%！維京人即市約賺 6%。

冇錯，話「微升」係因為今日嘅股仔大部份都係「巨升」。至於本身想長線揸貨嘅我，見升勢咁勁，反而想短炒。不過都係揸住先。

經 blog 友留言提醒，先知原來阿里巴巴同微軟上星期傳有單 deal。不過維京人睇好嘅理由其實比較單純，就係睇好網上拍賣嘅前景。上星期五喺深圳書城，見到好多書介紹淘寶網、拍拍、易趣等，都係教人點樣網上開店，而且仲好 pro 㖭。

如此才驚覺原來除了外國，online business 已經於內地爆得火烈。再睇番阿里巴巴嘅業績，首季少賺 16%，營業收入升 19﹪，不過主席馬雲對明年利潤恢復信心。

近期公司嘅新聞又真係唔少，包括傳收購敦煌網 (DH Gate 係呢排好「紅」嘅 drop shipper)、又同土耳其軟件開發商 Logo Group 組成戰略同盟、旗下 B2B 同埋淘寶網首次以「網貨」交易形式為中小企業同埋網路零售商搭橋。再加埋阿里巴巴總部杭州承諾抵制盜版，加上微軟將在當地投資，一切一切，都見到主席馬雲多多攪作。

買科技股，好多時都係買個主席，好似 Apple 就係買 Steve Jobs。而 Alibaba 就係買馬雲！小弟睇好中國網絡生意嘅前景，睇好 #01688，加上睇圖似做緊圓底，暫睇 $17，再睇 $20。

其實都睇好騰訊 (#00700)，不過硬係覺得佢嘅 QQ 冇創意，明顯地抄 ICQ，維京人唔係咁鐘意！（雖然 MSN、Yahoo! Massager 實情都係抄 ICQ）

Cheers！

******

近排比較忙，如果想睇維京人嘅 update，可以去 twitter。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam

******

維京人近期愛上跑步，有空請幫幫忙為小弟打氣啦！（雖然有成兩個幾三個禮拜冇跑）

http://runningviking.blogspot.com

黃金戰士

2009-05-24T00:51:00.000+08:00

報咗案先。維京人成個禮拜冇 update 呢個 blog，簡直係脫離咗小弟每日睇住個市，同埋同大家分享下對個市看法嘅慣例。

理由可以有千千萬萬個，實情最主要嘅理由或者藉口之唔係「懶」同埋「忙」咁啦。另一個主要原因係今期玩緊辦公室政治，日日要防暗箭，冇乜時間吖。

冇 update blog 唔代表冇睇住個市嘅。如果大家有睇維京人嘅 Twitter update，都知道發生咩事。

上個星期話審慎睇好，點知星期一就俾人震倉震走咗隻 call 輪，心情認真納悶。結果星期二同星期三有反彈，隻輪仲返番去買入價㖭。不過維京人一向都係超嚴格嚴守止蝕，話放就放，話之你之後升到喪。所以雖然有過短暫嘅納悶，但仍然奮勇再戰。

戰場唔再係股市，而係金市。呢個禮拜黃金曾一度震倉，爬到去 930 美元一盎斯後跌落 918。維京人喺 880 追上嚟，見佢 930 入咗貨，喺 920 左近又再入咗貨。

結果，震倉果然係震倉，金價呢個禮拜後期返回呢兩個月嘅高位，報 960 左近。小弟笑到見牙唔見眼！

黃金點好喺度已講咗好多次，唔再重覆喇。總之暫時睇有機衝向 1000 關口。日前甚至睇到內地有分析員睇會去到 2500 美元一盎斯㖭！唔係化？2500 咁勁？如果真係去到而又未放，咁維京人就真係盞鬼過中六合彩咯。

睇番港股，資金流入香港速度減慢，但唔代表唔流入。大戶仍未夠喉，會再升。衰就衰在美國嗰面嘅數據真係唔係好生性，成日都差過預期。唯有用番上個禮拜嗰句：「審慎看好」。

反而想吼科網股阿里巴巴 (#01688)，理由會喺下個禮拜有空時解釋。雖然呢隻科幻股由 $4.11 升到家下接近 $13，而且 PE 唔細，但睇好佢嘅潛力！考慮下周初買入作長線（即係買入後唔理佢，得閒先望望）。如果跌三成會再加碼，只宜小注。

祝各位有個愉快嘅周日！！

Cheers！

******

近排比較忙，如果想睇維京人嘅 update，可以去 twitter。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

維京人近期愛上跑步，有空請幫幫忙為小弟打氣啦！（雖然有成個幾兩個禮拜冇跑）

http://runningviking.blogspot.com

壞消息下審慎看好

2009-05-18T00:52:00.001+08:00

金融海嘯，肆虐全球。香港雖然唔係風眼，但都無可避免地經濟受到嚴重打擊。上個禮拜五公布首季 GDP，結果急跌 7.8%！嘩哈！遠遠超過大家嘅預期噃。呢次倒退亦係歴來最大按季跌幅，真係得人驚。

經濟係十年以嚟最差，奇就奇在大家感受嘅痛苦冇 98年亞洲金融風暴咁大鑊，認真奇怪。尋日睇經濟日報亦有分析，話上次金融風暴風眼喺亞洲，香港人感受最深莫過於樓價大暴瀉。今次淨係金融業制造業感受比較深，加上有自由行撐住，零售旅遊呢兩隻腳仲未死晒。

壞消息風起雲湧，恆指一周計數，跌 599點，或 3.4%，國指跌 444點，或 4.4%（咁多 4字嘅？）。兩大指數連升兩個星期回一回，實屬大漲小回格局而已。

後市係點？維京人已轉軚做好友，暫時仲未諗住改變策略。理由係祖國 A 貨近期走勢強勁，上證指數已由低位 1719點抽到家下 2803點。要留意嘅係佢嘅 50天移動平均線已穿越 250天平均線，形造黃金交叉。技術分析冇邊種係百分百準確，但黃金同埋死亡交叉一向準繩度超高。A 股好，H 股肯定會有人追捧，後市港股不要睇得太差。

資金湧港，雖則話可以去得快走得快，但大戶未搵夠錢點會咁快收手？審慎看好。

小弟仲持有 call 輪同埋 spot gold。

Good luck！

******

近排比較忙，如果想睇維京人嘅 update，可以去 twitter。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

維京人近期愛上跑步，有空請幫幫忙為小弟打氣啦！（雖然有成個幾兩個禮拜冇跑）

http://runningviking.blogspot.com

豬流感似未受控

2009-05-15T00:09:00.002+08:00

大市喺 250天線果見爭持。維京人曾講過睇好後市，仲話恆指有機衝向 20000點，不過有兩個前題：

1) 人類豬流感疫情見穩定；
2) 冇天災

幸好呢排算係冇乜天災，之不過疫情喺美國似有擴散跡象。香港似係控制到，但美國好似 hea 下 hea 下咁，有少少半失控。

暫時要觀望一下先。

今日恆指借尋晚美股跌市，大跌 517點，收報 16541點。萬七點眨下眼就失守。維京人仍手持 call 輪，帳面已蝕近三成，幸而小注。熱錢嚟得快唔知亦會唔會走得快，聽日隨時止蝕。反而手持 spot gold 暫時帳面有賺，cover 到 call 輪嘅損失。

呢排真係忙到連毎個市都唔係太多時間睇。可能 update 呢度會慢少少。大家喺 twitter 見我啦。

Good luck！

******

哈哈，為咗又一再嘗試 Web 2.0 嘅唔同可能性，整咗個維京人分類資訊，得閒望下。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

近排比較忙，如果想睇維京人嘅 update，可以去 twitter。

******

維京人近期愛上跑步，有空請幫幫忙為小弟打氣啦！

http://runningviking.blogspot.com

Twitter Power, 唔到你唔信

2009-05-13T01:19:00.004+08:00

近排好忙，呢兩日冇乜時間 update 吓個 Blog。暫時仲持有恆指 call 輪同埋黃金，過兩日 update 番大家小弟對個市嘅睇法。暫時睇呢兩日嘅調整係算健康嘅，後市暫睇升。

啱啱諗住去 CNN Finance 睇新聞，竟然搵到一篇標題為 "I found my job on Twitter"。

果然，那裡有 Twitter，那裡有力量。

呢個係維京人嘅 Twitter account 吖。

http://twitter.com/marketviking

你仲未有 Twitter account？同炒股票一樣，唔好落後形勢喎。

仲唔快 D 開番個？開咗後記得 follow 我呢。

Cheers！

******

哈哈，為咗又一再嘗試 Web 2.0 嘅唔同可能性，整咗個維京人分類資訊，得閒望下。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

近排比較忙，如果想睇維京人嘅 update，可以去 twitter。

******

維京人近期愛上跑步，有空請幫幫忙為小弟打氣啦！

http://runningviking.blogspot.com

水的三個形態 - 放水掠水散水

2009-05-10T11:14:00.001+08:00

星期四晚美股道指跌超過 100 點，似壓力煲測試做低咁。小弟喺 twitter 度講禮拜五跌得，但可以考慮買貨。

結果星期五早上港股果然開跌，約 200點左右。維京人大概喺 11點零鐘入咗 call 輪 #16114 @ $0.16，係要同淡友作對。喺 twitter 度 update 完成日都冇時間，結果收市後睇一睇，恆指倒升 171點，收報 17389點。＃16114 收報 $0.184，比起小弟嘅買入價升咗 15%。

今次升浪，小弟覺得可以用水的三個形態嚟形容。不過指嘅唔係中學讀書所講固體（冰）液體（水）氣體（蒸氣），而係放水、掠水、散水。

當全世界嘅股市（除咗內地）喺三月左右都係悲情股市時，其實資金已悄悄咁流咗出嚟。無啦啦點會有咁多資金？咁當然係由美國政府先發動嘅放水政策啦。各國為咗救市，乜嘢幾十億幾百億嘅方案都掟出嚟，印鈔機已悄悄開動。要有錢？So easy！政府會放水。當水一多，市場又要諗下呢 D 資金點去運用。

近期有資金係咁流入亞洲區股市，睇速度應係比歐洲嗰面多；而歐洲亦比美國嗰面多。嗰日睇財經台點醒咗我，可能係有基金減持美股增持亞洲區股票？其實好有可能。今次升市由萬五點買上家下萬七點，成交唔細，有成八百幾九百幾億，而且升勢好急，種種跡象顯示大戶做緊嘢。

要知道基金經理一買完貨，係唔會咁快散水嘅。要賺錢，一定要多 D 人落搭。呢個 weekend 小弟搭車都聽到 D 師奶阿叔講話個市咁升，匯豐中移動唔買買唔到貨喎。

相信個市升咁急，一定會回一回作整固。當整固之時如無意外散戶亦應會見低即吸，以防最心痛是買得太遲。呵呵，當大家都入市，連淡友都轉好友（小弟都係由淡轉好，哈哈）就係掠水之時。

咁 next step，之唔係散水囉。

小弟估個市會升到兩萬點，其實諗落可能都有 D 保守。不過投機從來都係摸著石頭過河，見步行步啦。

又一次證明趨勢係你嘅好朋友呢。

祝各位有個愉快嘅周日。

Cheers!

******

哈哈，為咗又一再嘗試 Web 2.0 嘅唔同可能性，整咗個維京人分類資訊，得閒望下。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

近排比較忙，如果想睇維京人嘅 update，可以去 twitter。

******

維京人近期愛上跑步，有空請幫幫忙為小弟打氣啦！

http://runningviking.blogspot.com

決戰 250天線

2009-05-07T22:09:00.000+08:00

港股六個交易日以嚟，恆指升咗超過 2000點！恆指一日破萬五、一日破萬六、抖咗三日後今日恆指破埋萬七！過去 3日 230 隻熊仔死晒！

港股今日追隨外圍嘅升勢，一開市已經裂口高開 443點見高位17327點。臨食 lunch 前開始回軟，之不過下午茶時間３點鐘左右好友又響鐘，買買買買買買買，最後收市恆指守得住萬七，報 17217點，升 383點或 2.3%。最緊要係睇成交，有成 952億，而且期指低水縮窄咗。

250天線一向都係公認嘅所謂牛熊分界線。家下恆指 250天線嘅位大約喺 17486點，初見阻力；好友淡友將會喺度有強大嘅角力。不過阻力係要嚟破嘅而唔係要嚟擋住個升勢，相信喺呢個頂住個市跌多幾次，好友又試衝幾次，最後應會衝得過呢關，然後向下一站二萬點邁進。

聽日凌晨 4點鐘美國就會公布銀行壓力煲測試，夠竟係咪真係你有壓力我有壓力未解決，聽日瞓醒就知。不過美國財長蓋特納提早話咗 19 間壓力煲測試嘅銀行都冇破產嘅風險。唓，咁又點？冇破產壓力唔可以話錯，但有集資需要嘅銀行亦有十多間咁多就真珠都冇咁真！

美國今晚出咗幾個數據，又竟然做得唔錯。美國首季非農業生產力按季升 0.8%，略優於預期；申領失業金人數減少 3.4萬人，好過預期；通用汽車首季蝕 465億，又係好過預期。

當大家都唔信個市會繼續升，想入唔敢入，想放又唔敢放時，淡倉未夠貨，大戶唯有做好唔做淡。先挾淡友，當散戶落搭買貨，做淡先係時候。

今晚早 D 瞓，聽朝起身睇壓力測試結果。

Cheers！

******

哈哈，為咗又一再嘗試 Web 2.0 嘅唔同可能性，整咗個維京人分類資訊，得閒望下。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

近排比較忙，如果想睇維京人嘅 update，可以去 twitter。

******

維京人近期愛上跑步，有空請幫幫忙為小弟打氣啦！

http://runningviking.blogspot.com

2009 殺熊記

2009-05-07T00:31:00.000+08:00

外圍冇方向，大家亦都以為升咗咁多日嘅港股會冇厘神氣，點都要抖抖啩？加上美國銀行壓力煲測試呢個禮拜四就有結果，大家緊係希望少做少錯，唔做唔錯咁啦。

如果你咁諗，即係同一眾散戶毫無分別，好難跑贏大市。港股就喺大家食完 lunch 後發神經，有匯控 (#00005) 做火車頭帶領大市一度衝破 16800 呢個久違了嘅高位。就咁衝一衝，又殺多 26隻熊仔。呢幕血淋淋嘅殺熊記，好友做得漂亮。

尋日維京人漏夜出咗 post，話恆指今次升浪有機會見二萬點。配合今日升市有成 804億成交，更加增強小弟嘅信心。

有朋友可能見維京人喺度吹水唔抹咀，問有乜證據話恆指會見二萬點。

咪玩啦，如果睇市都要講證據，咁唯一可以做嘅就係當個市去到二萬點時，就絕對證明冇錯嘞。

不過咁，你又會賺到錢咩？

股市唔會長升長有，亦唔會永遠下跌。只要係自己認為可以承擔風險，有個 direction，有需要設埋止蝕，咁就 OK，即刻可以扑鎚買貨！

尋晚可能出 post 出得太急，冇乜解釋到點解小弟會睇恆指會去到二萬點，喺度補充一下。

1. 睇圖原來恆指已經形成一個好漂亮嘅頭肩底，低位喺 11500 左右，頸線喺 16000 左右，前日裂口高開升穿咗，照計數量度升幅應為 20500 點。

2. 市面太多人想喺萬六萬七呢個位做淡，小弟較早前亦講過話覺得唔對路。如果咁多淡友，大戶冇理由唔做嘢個喎。

3. 基本面嚟睇，近排美國公布嘅數據顯示經濟有回升跡象。

4. 最重要係，今次嘅升市大家都話係有資金帶動。

今日信報畢 Sir 已經講話內地信貸增長太快，第一季度新增信貸 4.58億人仔；咁喺上個月 25日，銀監會副主席話預計今年發放嘅信貸至少八萬億元！真係嚇親人！據聞銀監會稍後發聲明否認。

係咁「放水」，個市唔想好先難！雖然唔排除呢個又係另一個泡沫。

如果各位想買貨又擔心，可以考慮睇埋禮拜四美國銀行壓力煲測試結果。始終呢個亦係一個令人要擔心嘅風險。或者學畢 Sir 話齋，一動不如一靜？

Good luck！

Cheers！

******

哈哈，為咗又一再嘗試 Web 2.0 嘅唔同可能性，整咗個維京人分類資訊，得閒望下。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

近排比較忙，如果想睇維京人嘅 update，可以去 twitter。

******

維京人近期愛上跑步，有空請幫幫忙為小弟打氣啦！

http://runningviking.blogspot.com

如無意外，今次升勢恆指起碼見二萬點！

2009-05-06T01:44:00.000+08:00

冇錯！如無意外，今次升勢有餘未盡。恆指有機見二萬點，起碼！

所謂無意外，係指：

1) 無天災，如去年嘅四川地震；

2) 無人禍，如 911；

咁當然，豬流感唔好越演越烈啦 ﹣I mean 只要唔係好似 SARS 咁就得。

有一兩個零星嘅流感個案係唔會影響個市嘅大方向嘅，我諗。

經濟環境仲太差，點會大升呀？你可能會咁問。

但係，如果你相信股票市場同家下嘅經濟係冇直接嘅聯繫，如果你相信股市只係炒心理、炒人心趨向、炒未來、同埋炒信念，呢個世界，又有咩冇可能？

恆指會大升吖！Why don't you believe？

Anyway，相信你自己。所有識講股票嘅人只會識講，未必會買。真金白銀會買嘅你，記得自己做分析，同嚴守止蝕！

Cheers！

******

經濟唔好，有朋友話不如試下攪個 blog，用嚟刊登一下分類資訊。哈哈，為咗又一再嘗試 Web 2.0 嘅唔同可能性，整咗個維京人分類資訊，得閒望下。

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

近排比較忙，如果想睇維京人嘅 update，可以去 twitter。

******

維京人近期愛上跑步，有空請幫幫忙為小弟打氣啦！

http://runningviking.blogspot.com