മറുനാട് | Marunad |

കണ്ണീരുണങ്ങുന്നില്ല, ബ്രസീലിന്റെ ചരിത്രത്തിലെ നാണംകെട്ട തോല്‍വി

2014-07-09T00:21:00.000-07:00

ജര്‍മ്മന്‍ അധിനിവേശത്തില്‍ തവിടുപൊടിയായ ബ്രസീല്‍ അതിന്റെ ചരിത്രത്തിലെ തന്നെ ഏറ്റവും വലിയ തോല്‍വിയാണ് ഇന്നലെ ബെലെ ഹൊറിസോണ്ടയിലെ സ്‌റ്റേഡിയത്തില്‍ ഏറ്റുവാങ്ങിയത്. മത്സരം തുടങ്ങി അരമണിക്കൂറിനുള്ളില്‍ അഞ്ചു ഗോളുകളാണ് ബ്രസീലിന്റെ ഗോള്‍ വലയില്‍ പതിച്ചത്. സ്വന്തം നാട്ടില്‍ നടന്ന ലോകകപ്പിലെ സെമിയില്‍ തന്നെ പുറത്തായതോടെ ഫുട്‌ബോളിനെ ജീവശ്വാസമായി കണ്ടിരുന്ന രാജ്യം നിരാശയിലായി. ഒരു ദേശീയദുരന്തം പോലെയാണ് ബ്രസീല്‍ ജനത തങ്ങളുടെ ടീമിന്റെ പരാജയം കണ്ടിരുന്നത്.

ലോകകപ്പ് സെമിയുടെ ചരിത്രത്തില്‍ ഇതാദ്യമായിട്ടാണ് ഒരു ടീം ഏഴുഗോളുകള്‍ അടിക്കുന്നത്. 1920 ന് ശേഷം ആദ്യമായിട്ടാണ് ബ്രസീല്‍ ടീം ഇത്രയേറെ കനത്ത ഒരു തോല്‍വി ഏറ്റുവാങ്ങുന്നത്. 1920 ലെ ലോകപ്പില്‍ ഉറുഗ്വായോട് 6-0 ത്തിന് തോറ്റതായിരുന്നു ബ്രസീല്‍ ചരിത്രത്തില്‍ ഇതിനുമുന്‍പുള്ള നാണം കെട്ട തോല്‍വി.

ലോകകപ്പ് സെമിയില്‍ ജര്‍മ്മനിയുടെ ഏറ്റവും വലിയ വിജയം കൂടിയാണ് ഇത്. 1954 ല്‍ ഓസ്ട്രിയയ്ക്ക് എതിരേ 6-1 ന് ജയിച്ചതായിരുന്നു ഇതിന് മുന്‍പ് ജര്‍മ്മനിയുടെ പേരിലുള്ള റിക്കോര്‍ഡ്. 39 വര്‍ഷത്തിനിടെ നാട്ടില്‍ 63 മത്സരങ്ങള്‍ കളിച്ച ബ്രസീല്‍ ഇതാദ്യമായാണ് സ്വന്തം ജനതയുടെ മുന്നില്‍ ഒരു തോല്‍വി ഏറ്റുവാങ്ങുന്നത്. അതും ഇത്രയേറെ നാണം കെട്ട രീതിയില്‍ . 1975 ലെ കോപാ അമേരിക്ക മത്സരത്തില്‍ പെറുവിനെതിരേയാണ് ഇതിന് മുന്‍പ് മഞ്ഞപ്പട പരാജയപ്പെട്ടിട്ടുള്ളത്.

ലോകകപ്പ് സെമിയില്‍ ജര്‍മ്മനിയോട് കനത്ത തോല്‍വി ഏറ്റുവാങ്ങേണ്ടി വന്നതില്‍ ബ്രസീലിന്റെ നായകന്‍ ഡേവിഡ് ലൂയിസ് മാപ്പു പറഞ്ഞു. തുടര്‍ച്ചയായ രണ്ട് കളികളില്‍ മഞ്ഞക്കാര്‍ഡ് കണ്ടതിനെ തുടര്‍ന്ന പുറത്തിരിക്കേണ്ടി വന്ന ക്യാപ്റ്റന്‍ തിയാഗോ സില്‍വയുടെ അഭാവത്തിലാണ് ഡേവിഡ് ലൂയിസ് ടീമിനെ നയിച്ചത്. നെയ്മറുടേയും സില്‍വയുടേയും അഭാവം ടീമിനെ മാനസികമായി തളര്‍ത്തിയിരുന്നു.

ദുഖകരമായ ദിവസമായിരുന്നു ഇന്ന്, ഈ ദിനത്തില്‍ നിന്ന് ഒരുപാട് പഠിക്കാനുണ്ട്. ജര്‍മ്മനി ഞങ്ങളെക്കാള്‍ മികച്ച ടീമായിരുന്നു- മത്സരശേഷം കണ്ണീരോടെ ലൂയിസ് പറഞ്ഞു. ബ്രസീല്‍ ആരാധകരുടെ ചിരി കാണാനാണ് ആ്ഗ്രഹിച്ചത്. എന്നാല്‍ അതിന് സാധിച്ചില്ല. ബ്രസീല്‍ ജനതയോടെ മാപ്പ് പറയുകയാണെന്നും ലൂയിസ് പറഞ്ഞു.

ബ്രസീലിന്റെ നാണം കെട്ട തോല്‍വിയ്ക്ക് കോച്ച് ലൂയി ഫിലിപ്പ് സ്‌കൊളാരിയും ജനതയോടെ മാപ്പ് ചോദിച്ചു. എന്നാല്‍ ടീം പരാജയപ്പെട്ടതിന്റെ ഉത്തരവാദിത്വം ഏറ്റെടുത്ത് താന്‍ രാജി വെയ്ക്കില്ലെന്ന് സ്‌കൊളാരി വ്യക്തമാക്കി. തങ്ങളാല്‍ കഴിയുന്നതെല്ലാം ചെയ്തു എന്നും ഫൈനലില്‍ എത്താന്‍ സാധിക്കാത്തതില്‍ ദുഖമുണ്ടെന്നും സ്‌കൊളാരി പറഞ്ഞു. ഇതൊരു ദുരന്തമാണ് അദ്ദേഹം കൂട്ടിച്ചേര്‍ത്തു.

പരാജയത്തിന്റെ മുഴുവന്‍ ഉത്തരവാദിത്വവും താന്‍ ഏറ്റെടുക്കുന്നതായി സ്‌കൊളാരി പറഞ്ഞു. താന്‍ ആരോടും ഒന്നും കടം വാങ്ങിയിട്ടില്ലെന്നും രാജ്യത്തെ കടക്കെണിയിലേക്ക് തള്ളിയിട്ടില്ലെന്നും അതിനാല്‍ രാജി വെയ്‌ക്കേണ്ട ആവശ്യമില്ലെന്നും സ്‌കൊളാരി പറഞ്ഞു. എന്റെ ജോലി ഞാന്‍ കൃത്യമായി ചെയ്തിട്ടുണ്ട്. പക്ഷേ ചില തന്ത്രങ്ങള്‍ പാളിപ്പോയി. അതിന്റെ ഉത്തരവാദിത്വം ഞാന്‍ ഏറ്റെടുക്കുന്നു.- സ്‌കൊളാരി വികാരാധീനനായി. നെയ്മറിന്റെ ആഭാവവും ടീമിനെ കാര്യമായി ബാധിച്ചുവെന്നും എന്നാല്‍ അതിലെല്ലാം ഉപരി കളിയില്‍ താളം കണ്ടെത്തിയ ജര്‍മ്മന്‍ ടീം വിജയം അര്‍ഹിച്ചിരുന്നതായും സ്‌കൊളാരി കൂട്ടിച്ചേര്‍ത്തു.

റൊണാള്‍ഡോയുടെ റെക്കോര്‍ഡ് പഴങ്കഥയാക്കി ക്ലോസെ

2014-07-08T23:58:00.000-07:00

ബ്രസീലിനെ ഒരു ദുരന്തകഥയാക്കി ജര്‍മ്മന്‍ പട ബെലെ ഹോറിസോണ്ടയില്‍ അധിനിവേശം നടത്തുമ്പോള്‍ ഒരു ഗോള്‍ സ്വന്തം പേരില്‍ എഴുതിചേര്‍ത്തുകൊണ്ട് ജര്‍മ്മനിയുടെ മിറസ്ലോവ് ക്ലോസെ ലോകറെക്കോര്‍ഡ് സ്വന്തം പേരിലാക്കി. ലോകകപ്പില്‍ ഏറ്റവും കൂടുതല്‍ ഗോള്‍ നേടുന്ന താരം എന്ന ബഹുമതിയാണ് ബ്രസീലിന്റെ സൂപ്പര്‍താരം റൊണാള്‍ഡോയില്‍ നിന്ന് ക്ലോസെ സ്വന്തം പേരിലാക്കിയത്. നാല് ലോകകപ്പില്‍ നിന്ന് 15 ഗോള്‍ നേടിയ റൊണാള്‍ഡോയുടെ പേരിലായിരുന്നു ഇതുവരെ ഈ റിക്കോര്‍ഡ്.

36 കാരനായ ക്ലോസെയ്ക്കും ഇത് നാലാം ലോകകപ്പാണ്. 2002 ലാണ് ക്ലോസെ ആദ്യമായി ലോകകപ്പ് നേടുന്നത്. അരങ്ങേറ്റ ലോകകപ്പില്‍ അഞ്ചു ഗോളുകളാണ് ക്ലോസെ സ്വന്തം അക്കൗണ്ടില്‍ ചേര്‍ത്തത്. 2006 ലെ ലോകകപ്പിലും അഞ്ച് ഗോളുകള്‍ നേടി ഗോള്‍ഡണ്‍ ബൂട്ടും ക്ലോസെ സ്വന്തമാക്കി. ജര്‍മ്മനിയുടെ ഏകോപനത്തിന് ശേഷം ആദ്യമായി ഗോള്‍ഡണ്‍ ബൂട്ട് നേടുന്ന ജര്‍മ്മന്‍ താരമാണ് ക്ലോസെ. 2010 ലെ ലോകകപ്പില്‍ നാല് ഗോളുകളും സ്വന്തം പേരില്‍ കുറിച്ചു. ബ്രസീല്‍ ലോകകപ്പില്‍ ഇതുവരെ രണ്ട് ഗോള്‍ നേടിയതോടെയാണ് ക്ലോസെ റിക്കോര്‍ഡ് സ്വന്തം പേരിലാക്കിയത്.

കളിച്ച നാല് ലോകകപ്പുകളിലും ഗോള്‍ സ്‌കോര്‍ ചെയ്യുന്ന മൂന്നാമത്തെ താരമാണ് ക്ലോസെ. ജര്‍മ്മന്‍ താരമായ ഉവേ സീലറും ബ്രസീലിന്റെ ഇതിഹാസം പെലേയും മാത്രമാണ് ഇതിന് മുന്‍പ് നാല് ലോകകപ്പുകളിലും സ്‌കോര്‍ ചെയ്തിട്ടുള്ള താരങ്ങള്‍.

ആസിഫിന് പകരം ഹഫീസ്

2010-11-08T07:40:00.001-08:00

കൊച്ചി: കൈതപ്രം ദാമോദരന്‍ നമ്പൂതിരി സംവിധാനം ചെയ്യുന്ന സിനിമയില്‍ പാക് ക്രിക്കറ്റ് താരം മുഹമ്മദ് ആസിഫിന് പകരം പാക് താരമായ മുഹമ്മദ് ഹാഫീസ് നായകനാകുന്നു. കോഴവിവാദത്തെ തുടര്‍ന്നാണ് ആസിഫിനെ മാറ്റി ഹഫീസിനെ നായകനാക്കാന്‍ കൈതപ്രം തീരുമാനിച്ചത്. ക്രിക്കറ്റിനെ അസ്പദമാക്കി നിര്‍മ്മിക്കുന്ന സിനിമയിലൂടെ അതിരുകളില്ലാത്ത മനോഹരമായ ഒരു പ്രണയത്തിന്റെ കഥയാണ് കൈതപ്രം പറയുന്നത്. മഴവില്ലിന്ററ്റം വരെ എന്നു പേരിട്ടിരിക്കുന്ന ചിത്രത്തില്‍ ഇന്ത്യന്‍ ക്രിക്കറ്റ് ടീമിന്റെ മുന്‍ ക്യാപ്റ്റന്‍ കപില്‍ ദേവും പ്രധാനപ്പെട്ട ഒരു വേഷത്തിലെത്തുന്നുണ്ട്.

ചിത്രത്തിന്റെ ഷൂട്ടിങ്ങ് ഈ മാസം 24ന് തുടങ്ങും. കണ്ണൂരിലെ പ്രശസ്തമായ വളളുവന്‍ കടവ് മുത്തപ്പന്‍ ഗ്രാമാണ് ചിത്രത്തിന്റെ പ്രധാന ലൊക്കേഷന്‍. കൈതപ്രത്തിന്റെ മകന്‍ ദീപാങ്കുരനാണ് ചിത്രത്തിന്റെ സംഗീതസംവിധായകന്‍. ചിത്രത്തിന്റെ കഥയും തിരക്കഥയും കൈതപ്രം തന്നെ നിര്‍വ്വഹിക്കുന്നു.

2007 ല്‍ പാക് ദേശീയ ടീമിലംഗമായ മുഹമ്മദ് ഹഫീസ് ഇപ്പോള്‍ പാക് ടീമിന്റെ ഓപ്പണിങ്ങ് ബാറ്റ്‌സ്മാനും ബൗളറുമാണ്. പുതുമക്കു വേണ്ടിയാണ് മുഹമ്മദ് ഹഫീസിനെ നായകനാക്കാന്‍ തീരുമാനിച്ചതെന്ന് കൈതപ്രം പറഞ്ഞു. ചിത്രത്തിലെ നായക വേഷത്തിലേക്ക് പാക് ക്രിക്കറ്റ് താരമായ മുഹമ്മദ് ആസിഫിനെ ആയിരുന്നു ആദ്യം തീരുമാനിച്ചിരുന്നതെങ്കിലും കോഴ വിവാദത്തെ തുടര്‍ന്ന് ആസിഫിനെ ഒഴിവാക്കുകയായിരുന്നു. പുതുമുഖമായ ക്രിഷ്ണയാണ് നായിക. ബോളിവുഡ് താരം സുനില്‍ ഷെട്ടി, മധു, അര്‍ച്ചനാകവി, നെടുമുടിവേണു, കവിയൂര്‍ പൊന്നമ്മ, ഉണ്ണിക്രിഷ്ണന്‍ നമ്പൂതിരി എന്നിവര്‍ പ്രധാന വേഷങ്ങിലെത്തുന്നു.

സഭയ്‌ക്കെതിരേ വീണ്ടും പിണറായി

2010-11-08T05:24:00.000-08:00

സഭയ്‌ക്കെതിരേ വീണ്ടും പിണറായി

തിരുവനന്തപുരം: ചോദ്യപേപ്പര്‍ വിവാദത്തിന്റെ പേരില്‍ പ്രൊഫ. ടി.ജെ. ജോസഫിനെ കോളേജില്‍ നിന്നും പുറത്താക്കിയ സഭയുടെ നടപടി പോപ്പുലര്‍ ഫ്രണ്ടിന്റെ പ്രവൃത്തിയെ ന്യായീകരിക്കുന്നതാണന്ന് സിപിഎം സംസ്ഥാന സെക്രട്ടറി പിണറായി വിജയന്‍. തീവ്രവാദികളുടെ ഗുരുനിന്ദ, മാനേജുമെന്റിന്റെ ഗുരുഹത്യ എന്ന തലക്കെട്ടില്‍ എസ് എഫ് ഐ സംഘടിപ്പിച്ച സെമിനാറില്‍ സംസാരിക്കവേയാണ് സഭയ്‌ക്കെതിരേ പിണറായി തുറന്നടിച്ചത്.

അധ്യാപകനെ പുറത്താക്കിയതിലൂടെ മതതീവ്രവാദത്തെ പ്രോത്സാഹിപ്പിക്കാനാണ് സഭ ശ്രമിച്ചതെന്ന് പിണറായി ആരോപിച്ചു.

ഇസ്ലാം സമൂഹത്തിന്റെ വക്താക്കളായി പോപ്പുലര്‍ ഫ്രണ്ടിനെയാണോ സഭ കാണുന്നതെന്ന് വ്യക്തമാക്കണം. ഇത്തരം തീവ്രവാദത്തെ സംരക്ഷിക്കാനുളള ശ്രമം സമൂഹത്തില്‍ അപകടരമായ ചേരിതിരിവിന് കാരണമാകുമെന്നും പിണറായി ചൂണ്ടിക്കാട്ടി.

മാനേജുമെന്റിന്റെ അപക്വമായ നടപടി തടയുന്നതിനു പകരം അതിനെ പിന്തുണയ്ക്കുന്ന നിലപാടാണ് സഭ സ്വീകരിച്ചത്. മതം രാഷ്ട്രീയത്തില്‍ ഇടപെടരുതെന്ന പൊതുവികാരത്തെ ഇല്ലായ്മ ചെയ്യാനാണ് സഭ ഈ നടപടിയിലൂടെ ശ്രമിച്ചത് പിണറായി പറഞ്ഞു. മതം മതത്തിന്റേതായ കാര്യങ്ങളില്‍ ഒതുങ്ങിനില്‍ക്കുകയാണ് വേണ്ടത്. അത് രാഷ്ട്രീയകാര്യങ്ങളില്‍ ഇടപെടുന്നത് അപകടകരമായ പ്രവണതയാണ് പിണറായി വ്യക്തമാക്കി.

ഇനി ഭാഗ്യത്തിന് കൂടുതല്‍ വില

2010-11-06T17:35:00.001-07:00

ഇനി ഭാഗ്യത്തിന് കൂടുതല്‍ വില

തിരുവനന്തപുരം: ആഴ്ചതോറും നറുക്കെടുക്കുന്ന സംസ്ഥാന ഭാഗ്യക്കുറി ടിക്കറ്റിന്റെ വില 50 രൂപയാക്കാന്‍ ആലോചന. സമ്മാനത്തുക 1 കോടിയായി പരിഷ്‌കരിക്കാനും നീക്കമുണ്ട്. കൂടുതല്‍ ടിക്കറ്റുകള്‍ക്ക് സമ്മാനം കിട്ടത്തക്ക വിധത്തില്‍ സമ്മാനഘടന പരിഷ്‌കരിക്കാനും നീ്ക്കമുണ്ട്. 50 രൂപയുടെ ടിക്കറ്റിന് 15 രൂപ ഏജന്റിന് കമ്മീഷനായി ലഭിക്കും.

നിലവില്‍ ആഴ്ചതോറും നറുക്കെടുക്കുന്ന വിന്‍വിന്‍ ലോട്ടറി അടുത്തമാസം മുതല്‍ ഉണ്ടാവില്ല. ടിക്കറ്റ് വില 100 രൂപയാക്കണമെന്ന് അഭിപ്രായവുമുണ്ട്. എന്നാല്‍ ബമ്പര്‍ ലോട്ടറികളുടെ വില 100 രൂപയായതിനാല്‍ 50 രൂപ മതിയെന്ന അഭിപ്രായത്തിനാണ് മന്ത്രിസഭക്കുളളില്‍ മുന്‍തൂക്കം. വില 50 രൂപയാക്കുന്ന ലോട്ടറിക്ക് കൂടുതല്‍ ടിക്കറ്റുകള്‍ അച്ചടിക്കും. വിന്‍വിന്‍ ലോട്ടറിക്ക് പരമാവധി 15 ലക്ഷം ടിക്കറ്റേ വില്പന നടത്താനാവൂ. ഒന്നാം തീയതി നറുക്കെടുത്ത വിന്‍വിന്‍ ലോട്ടറിയുടെ 11.5 ലക്ഷം ടിക്കറ്റുകളാണ് അച്ചടിച്ചത്. ഈ ആഴ്ച വിന്‍വിന്നിന്റ 15 ലക്ഷം അച്ചടിച്ചിട്ടുണ്ട്. പരമാവധി എത്രടിക്കറ്റ് അച്ചടിക്കുമെന്ന് കേരള ലോട്ടറി ടിക്കറ്റിന്റെ മറുപുറത്ത് രേഖപ്പെടുത്തിയിരിക്കും.

പുതിയ ലോട്ടറി 35 ലക്ഷം ടിക്കറ്റ് അടിക്കത്തക്കവിധം സമ്മാനം ക്രമീകരിക്കണമെന്ന നിര്‍ദ്ദേശത്തിന് മുന്‍തൂക്കം കിട്ടിയിട്ടുണ്ട്. തുക കൂടുതലുള്ള സമ്മാനങ്ങളേക്കാള്‍ 10,000 രൂപയില്‍ താഴെയുള്ള സമ്മാനങ്ങളുടെ എണ്ണം വര്‍ദ്ധിപ്പിക്കും. നിലവില്‍ ഓണം ബമ്പറാണ് 35 ലക്ഷം ടിക്കറ്റ് അച്ചടിക്കുന്നത്. നേരത്തേ 30 ലക്ഷം അച്ചടിച്ച ആ ടിക്കറ്റ് അതിനുശേഷം മൂന്നുലക്ഷംകൂടി വിതരണത്തിനെത്തിച്ചു. ശേഷിക്കുന്ന രണ്ടുലക്ഷവും എത്തിച്ചിട്ടുണ്ട്.ബമ്പര്‍ ടിക്കറ്റുകളുടെ സമ്മാനഘടനയും പരിഷ്‌കരിക്കും. പൂജാ ബമ്പര്‍ ടിക്കറ്റുകള്‍ ഈ മാസം എട്ടിന് വിപണിയിലെത്തിക്കും. അന്നാണ് ഓണം ബമ്പറിന്റെ നറുക്കെടുപ്പ്. കൂടുതല്‍ സമ്മാനങ്ങള്‍ ഉറപ്പാക്കി കൂടുതല്‍ ടിക്കറ്റുകള്‍ വില്‍ക്കാനാണ് ഉദ്ദേശ്യം. ബമ്പറുകള്‍ രണ്ടുമാസം വിപണിയില്‍ ലഭിക്കത്തക്കവിധം പുന:ക്രമീകരിക്കുമ്പോള്‍ രണ്ടുടിക്കറ്റ് ഏജന്റുമാര്‍ക്ക് എല്ലായ്‌പോഴും വില്‍ക്കാനാവും. ഇന്നു നടക്കുന്ന ജില്ലാ ലോട്ടറി ഓഫീസര്‍മാരുടെ യോഗത്തില്‍ ഈ നിര്‍ദ്ദേശങ്ങള്‍ ചര്‍ച്ചക്ക് വയ്ക്കുമെന്നാണ് അറിയുന്നത്. യോഗത്തിനുശേഷം ഇതുസംബന്ധിച്ച ലോട്ടറിവകുപ്പിന്റെ നിര്‍ദ്ദേശം തയ്യാറാക്കി സര്‍ക്കാരിന് സമര്‍പ്പിക്കും.

ശബരിമല: വര്‍ഷംമുഴുവന്‍ ദര്‍ശനസൗകര്യം

2010-11-05T19:37:00.000-07:00

കൊച്ചി: ശബരിമലയില്‍ വര്‍ഷം മുഴുവന്‍ ദര്‍ശന സൗകര്യം ഏര്‍പ്പെടുത്തുന്നത് പരിഗണിക്കാന്‍ ഹൈക്കോടതി ദേവസ്വംബോര്‍ഡിന് നിര്‍ദ്ദേശം നല്‍കി.

വര്‍ഷം തോറും ഭക്തരുടെ എണ്ണം വര്‍ദ്ധിച്ചുവരുന്ന സാഹചര്യത്തില്‍ വിദഗ്ദ്ധരുടെ അഭിപ്രായങ്ങള്‍ സമാഹരിച്ച് മൂന്നു മാസത്തിനകം ഇതേക്കുറിച്ച് റിപ്പോര്‍ട്ട് നല്‍കണമെന്നും ജസ്റ്റിസ് തോട്ടത്തില്‍ ബി. രാധാകൃഷ്ണന്‍, ജസ്റ്റിസ് പി. ഭവദാസന്‍ എന്നിവരടങ്ങുന്ന ഡിവിഷന്‍ബെഞ്ച് നിര്‍ദ്ദേശിച്ചു.

വിശ്വാസത്തെയും ആചാരത്തെയും ബാധിക്കാതെ നിബന്ധനകള്‍ക്ക് വിധേയമായി ഭക്തരുടെ പ്രവേശനം സാദ്ധ്യമാകുമോ എന്നാണ് പരിശോധിക്കേണ്ടതെന്നും കോടതി പറഞ്ഞു. വനത്തിലൂടെയുളള യാത്ര സുഗമമല്ലാതിരുന്ന കാലഘട്ടത്തില്‍ ദര്‍ശനത്തിന് പരിമിതികള്‍ ഏര്‍പ്പെടുത്തിയിരുന്നു. എന്നാല്‍ മാറിയ സാഹചര്യത്തില്‍ സുഗമമായ ദര്‍ശനം ഉറപ്പുവരു്ത്താന്‍ ദേവസ്വം ബോര്‍ഡ് നടപടികള്‍ സ്വീകരിക്കേണ്ടതുണ്ടെന്ന് ഹൈക്കോടതി പറഞ്ഞു. ഭക്തരുടെ ദുരിതങ്ങള്‍ ചൂണ്ടിക്കാട്ടി ആലുവ സ്വദേശി സി.ജി. പ്രസന്നകുമാര്‍ അടക്കമുള്ളവര്‍ സമര്‍പ്പിച്ച ഹര്‍ജിയിലാണ് ഹൈക്കോടതിയുടെ ഈ നിര്‍ദ്ദേശം.

പതിനെട്ടാം പടിയുടെയും ശ്രീകോവില്‍ വാതിലിന്റെയും വീതികൂട്ടുന്നതു സംബന്ധിച്ച് കോടതി നേരത്തെ റിപ്പോര്‍ട്ട് തേടിയിരുന്നു. തുടര്‍ന്ന് ചീഫ് എന്‍ജിനിയര്‍, എക്‌സിക്യിട്ടിവ് എന്‍ജിനിയര്‍, ദേവസ്വം കമ്മിഷണര്‍ എന്നിവരുടെ റിപ്പോര്‍ട്ട് ബോര്‍ഡ് ഹൈക്കോടതിക്ക് കൈമാറിയിരുന്നു. വീതികൂട്ടല്‍ വിശ്വാസത്തെയും ക്ഷേത്ര വാസ്തുവിനെയും ആചാരങ്ങളെയും ദോഷകരമായി ബാധിക്കുമെന്ന് റിപ്പോര്‍ട്ടിലുണ്ട്. റിപ്പോര്‍ട്ടുകള്‍ വ്യക്തിപരമായ അഭിപ്രായങ്ങളുടെ അടിസ്ഥാനത്തിലാണെന്ന് കോടതി വിലയിരുത്തി. വിശ്വസനീയ വസ്തുതകളെയും വിദഗ്ദ്ധരുടെ അഭിപ്രായത്തെയും ആധാരമാക്കിയുള്ളതല്ല അവ. വാസ്തു, ക്ഷേത്രഘടന എന്നിവയെപ്പറ്റിയുള്ള കാര്യങ്ങള്‍ ഈ മേഖലയില്‍ വൈദഗ്ദ്ധ്യമുള്ളവരാണ് പറയേണ്ടത്. നിലവില്‍ ലഭിച്ച റിപ്പോര്‍ട്ടിന്റെയും വിശദീകരണത്തിന്റെയും അടിസ്ഥാനത്തില്‍ തീര്‍പ്പ് കല്‍പ്പിക്കാനാകില്ലെന്നും ഹൈക്കോടതി പറഞ്ഞു.

സാംസ്‌കാരികം: 15കാരന്‍ കേംബ്രിഡ്ജില്‍ ബിരുദവിദ്യാര്‍ത്ഥി

2010-11-05T19:26:00.000-07:00

15കാരന്‍ കേംബ്രിഡ്ജില്‍

ബിരുദവിദ്യാര്‍ത്ഥി

ലണ്ടന്‍: രണ്ടു നൂറ്റാണ്ടിനിടെ, ലോകപ്രശസ്തമായ കേംബ്രിഡ്ജ് സര്‍വകലാശാലയില്‍ പഠിക്കുന്ന ഏറ്റവും പ്രായം കുറഞ്ഞയാളെന്ന ബഹുമതി 15 വയസുള്ള ബ്രിട്ടീഷുകാരന്. അരന്‍ ഫെര്‍ണാണ്ടസ് എന്ന പയ്യന്‍ ചേരുന്നതാകട്ടെ ഐസക് ന്യൂട്ടന്‍, സ്റ്റീഫന്‍ ഹോക്കിംഗ് തുടങ്ങിയ ബുദ്ധിരാക്ഷസന്‍മാര്‍ പഠിച്ച ലോകത്തെ ഏറ്റവും ബുദ്ധിമുട്ടേറിയ ഗണിതശാസ്ത്ര ബിരുദ കോഴ്‌സിനും.കേംബ്രിഡ്ജ് സര്‍വകലാശാലയ്ക്കു കീഴിലുള്ള ഫിറ്റ്‌വില്യം കോളജില്‍ അടുത്തമാസം ക്ലാസുകള്‍ ആരംഭിക്കും. വീട്ടില്‍ പിതാവിന്റെ ശിക്ഷണത്തിലായിരുന്നു അരന്‍ ഫെര്‍ണാഡസിന്റെ വിദ്യാഭ്യാസം.

കേംബ്രിഡ്ജ് യൂണിവേഴ്‌സിറ്റിയിലേക്കുളള തന്റെ പ്രവേശനം തന്നെ അത്ഭുതപ്പെടുത്തുന്നുവെന്ന് അരന്‍ പ്രതികരിച്ചു. ആദ്യ വര്‍ഷത്തെ പുസതകങ്ങള്‍ ഇപ്പോഴെ പഠിച്ചുതുടങ്ങിയതായി അരന്‍ പറഞ്ഞു. കേംബ്രിഡ്ജില്‍ പ്രവേശനം നേടുന്ന പ്രായം കുറഞ്ഞ വിദ്യാര്‍ത്ഥി എന്ന് വിശേഷണമല്ല, പ്രഗത്ഭരായ ആളുകള്‍ പഠിച്ച സര്‍വ്വകാലശാലയില്‍ തനിക്കും പ്രവേശനം ലഭിച്ചു എന്നുളളതാണ് വലിയകാര്യം. എന്ന്ാല്‍ മുതിര്‍ന്നവര്‍ക്കൊപ്പം പഠിക്കാന്‍ അവസരം ലഭിച്ചുവെന്ന് കരുതി ഫ്രഷേഴ്‌സ് പാര്‍ട്ടിയിലൊന്നും പങ്കെടുക്കാന്‍ അരന് താല്‍പ്പര്യമില്ല. പകരം പക്ഷിനിരീക്ഷണ സംഘത്തിലും തോണിതുഴയാന്‍ പോകാനുമാണ് അരന് താല്‍പ്പര്യം.

ഫിസ്‌ക്‌സില്‍ എ ലെവല്‍ കിട്ടുകയാണങ്കില്‍ ജാനുവരിയില്‍ തന്നെ അരന് കേംബ്രിഡ്ജില്‍ പ്രവേശനം നല്‍കാമെന്ന് അധികൃതര്‍ പറഞ്ഞിരുന്നു. എ പ്ലസ് ലെവലില്‍ പാസ്സായ അരന്‍ കണക്ക് തിരഞ്ഞെടുക്കുകയായിരുന്നു. 2008ല്‍ തന്നെ കണക്കില്‍ എ ലെവല്‍ നേടിയിരുന്ന അരന്‍ കഴിഞ്ഞവര്‍ഷവും എഗ്രേഡോടുകൂടി കണക്കു പരീക്ഷ പാസ്സായിരുന്നു. ജിസിഎസ്ഇ വിഷയങ്ങളിലും പരീക്ഷയ്ക്കിരിക്കാന്‍ യൂണിവേഴ്‌സിറ്റി അധികൃതര്‍ അരനോട് ആവശ്യപ്പെട്ടിട്ടുണ്ട്. അഞ്ചാമത്തെ വയസ്സിലാണ് അരന്‍ തന്റെ ജിസിഎസ്്ഇ പാസ്സാകുന്നത്. പ്രഗത്ഭരായ ഗണിതശാസ്ത്രജ്ഞന്‍മാരെപോലും കുഴക്കുന്ന റെയ്മാന്‍ ഹൈപ്പോതിസിസ് സോള്‍വ് ചെയ്യുന്ന്താണ് അരന്റെ ഇഷ്ടവിനോദം.

കേംബ്രിഡ്ജിലെ ഒരു വാടകവീട്ടില്‍ പിതാവിനൊപ്പമാണ് അരന്റെ താമസ്സം. വില്യം പിറ്റാണ് അരനു മുമ്പ് കേംബ്രിഡ്ജില്‍ പഠിച്ച ഏറ്റവും പ്രായം കുറഞ്ഞ വിദ്യാര്‍ഥി. 1773ല്‍ കേംബ്രിഡ്ജ് വിദ്യാര്‍ഥിയാകുമ്പോള്‍ പിറ്റിനു വറും 14 വയസ്സേ പ്രായം ഉണ്ടായിരുന്നുളളു.

ഫോണ്‍ ചോര്‍ത്തല്‍ : ആന്‍ഡി കോള്‍സണ്‍ ജോലിയില്‍ തുടരും

2010-11-05T19:16:00.000-07:00

ലണ്ടന്‍: ബ്രിട്ടനിലെ പൊതുപ്രവര്‍ത്തകരുടെ ഫോണ്‍ ചോര്‍ത്തിയതായി ആരോപണമുയര്‍ന്നതിനെ തുടര്‍ന്ന് ഡൗണിങ്ങ് സ്ട്രീറ്റിലെ കമ്മ്യൂണിക്കേഷന്‍ ഡിപ്പാര്‍ട്ട്‌മെന്റിന്റെ ഹെഡ് ആന്‍ഡി കോള്‍സണ്‍ ജോലിയില്‍ തുടരുമെന്ന് അദ്ദേഹത്തോട് അടുത്തവൃത്തങ്ങള്‍ സൂചിപ്പിച്ചു. ന്യൂസ് ഓഫ് ദി വേള്‍ഡിന്റെ എഡിറ്ററായിരുന്ന കാലത്താണ് കോള്‍സണും ഫോണ്‍ ചോര്‍ത്തല്‍ വിവാദത്തില്‍ പെടുന്നത്. വാര്‍ത്തകള്‍ക്കായി തങ്ങളുടെ ഫോണ്‍ ടാപ്പ് ചെയ്തതിനെ കുറിച്ച് വിശദമായ അന്വേഷണം വേണമെന്ന് ലേബര്‍ പാര്‍ട്ടിയുടെ നേതാക്കള്‍ ആവശ്യപ്പെട്ടിരുന്നു. മുന്‍ മന്ത്രി ടെസ്സാ ജോവല്‍ തന്റെ ഫോണ്‍ 28 തവണ ടാപ്പ് ചെയ്യപ്പെട്ടതായി പരാതിപ്പെട്ടിരുന്നു.

കോള്‍സണ്‍ ജോലിയില്‍ നിന്ന് രാജിവെയ്ക്കില്ലെന്നും അദ്ദേഹത്തെ പുറത്താക്കില്ലെന്നും ഗവണ്‍മെന്റ് വൃത്തങ്ങള്‍ അറിയിച്ചു. വേള്‍ഡ് ന്യൂസിന്റെ എഡിറ്ററായിരിക്കുമ്പോള്‍ തന്റെ അറിവോടെയാണ് ഫോണ്‍ ചോര്‍ത്തല്‍ നടന്നതെന്ന വാര്‍ത്ത കോള്‍സണ്‍ നിഷേധിച്ചു. ലേബര്‍പാര്‍ട്ടി ഗവണ്‍മെന്റിനെതിരെ നടത്തുന്ന പടയൊരുക്കങ്ങളുടെ ഭാഗമാണ് ഈ വാര്‍ത്തയെന്ന് കണ്‍സര്‍വേറ്റീവ് പാര്‍ട്ടിയുടെ മന്ത്രിയായ അലന്‍ ഡങ്കന്‍ ആരോപിച്ചു.

ന്യൂസ് ഓഫ് ദി വേള്‍ഡിന്റെ റോയല്‍ എഡിറ്റര്‍ ക്ലീവ് ഗോഡ്മാനെ ഫോണ്‍ ചോര്‍ത്തുന്നതിന് നേതൃത്വം നല്‍കിയെന്നാരോപിച്ച് ജയിലിലടച്ചിരുന്നു. ആന്‍ഡി കോള്‍സണിനെതിരെ രാഷ്ട്രീയലക്ഷ്യത്തോടെയാണ് ലേബര്‍പാര്‍ട്ടി ആരോപണം ഉന്നയിച്ചിരിക്കുന്നതെന്ന് കരുതുന്നു. ഡൗണിങ്ങ് സ്ട്രീറ്റിലെ കമ്മ്യൂണിക്കേഷന്‍ ഹെഡായ ആന്‍ഡി കോള്‍സണ്‍ ആണ് ഡൗണിങ്ങ് സ്ട്രീറ്റിലെ പ്രവര്‍ത്തനങ്ങളുടെ കേന്ദ്രം. മാത്രമല്ല ആന്‍ഡി പ്രധാനമന്ത്രി ഡേവിഡ് കാമറൂണിന്റെ അടുത്തയാളുമാണ്.

120 കിലോമീറ്ററില്‍ ഒരു വണ്ടര്‍ ജാം!!!

2010-11-05T19:07:00.000-07:00

ലണ്ടന്‍: വാഹനവുമായി റോഡിലിറങ്ങുന്നവരുടെ പേടി സ്വപ്നമാണ് ട്രാഫിക് ജാം. എന്നാല്‍ ഏതൊരു െ്രെഡവറും സ്വപ്നത്തില്‍പ്പോലും കണ്ടിട്ടില്ലാത്തൊരു ട്രാഫിക് ജാമിന് കഴിഞ്ഞ ദിവസം വടക്കന്‍ ചൈനയിലെ നിരത്തുകള്‍ വേദിയായി. ഒന്നും രണ്ടും കിലോമീറ്ററൊന്നുമല്ല. 120 കിലോമീറ്റര്‍. ബീജിംഗിലേയ്ക്കുള്ള മൊംഗോളിയ ദേശീയ പാതയാണ് റെക്കോര്‍ഡ് ട്രാഫിക് ജാം കൊണ്ട് വീര്‍പ്പുമുട്ടിയത്.

ചരക്കു കയറ്റി വന്ന കൂറ്റന്‍ ട്രക്കുകളായിരുന്നു വാഹനനിരയില്‍ അധികവും. ട്രാഫിക് ജാമിന്റെ ദൃശ്യങ്ങള്‍ ചൈനീസ് ടെലിവിഷന്‍ ചാനലുകള്‍ സംപ്രേക്ഷണം ചെയ്തിരുന്നു. ദേശീയ പാത വലിയൊരു പാര്‍ക്കിംഗ് സ്ഥലം പോലെ തോന്നിച്ചുവെന്നാണ് ഇതുകണ്ടവര്‍ പറയുന്നത്. ഏതാണ്ട് പതിനായിരത്തോളം കൂറ്റന്‍ ട്രക്കുകളാണ് ഒന്നിനു പുറകെ ഒന്നായി നിരത്തിലൂടെ ഇഴഞ്ഞു നീങ്ങിയത്.

രാവിലെ തുടങ്ങിയ കുരുക്ക് നീങ്ങി വാഹനങ്ങള്‍ നീങ്ങി തുടങ്ങിയപ്പോ!ഴേക്കും നേരം ഇരുട്ടിയിരുന്നു. ഇതിനു മുന്‍പ് 100 കിലോ മീറ്റര്‍ ദൂരം ട്രാഫിക് ജാം രൂപപ്പെട്ടതായിരുന്നു ചൈനയിലെ റെക്കോര്‍ഡ്. ഒമ്പത് ദിവസം കൊണ്ടായിരുന്നു ഈ കുരുക്ക് അധികൃതര്‍ അഴിച്ചെടുത്തത്. ഇപ്പോഴത്തെ ട്രാഫിക് ജാമിന്റെ കാരണമെന്തെന്ന് അധികൃതര്‍ വ്യക്തമാക്കിയിട്ടില്ല.

ഓക്‌സ്‌ഫോര്‍ഡ് ഡിക്ഷണറിക്ക് മരണം; ഇനി വെബ്ബില്‍ മാത്രം

2010-11-05T19:06:00.001-07:00

ലണ്ടന്‍: ഓക്‌സ്‌ഫോര്‍ഡ് ഡിക്ഷണറിയുടെ പുസ്തകരൂപം ഇനി മുതല്‍ ഇറക്കേണ്ടതില്ലന്ന് പ്രസാധകര്‍ തീരുമാനിച്ചു. അടുത്ത പതിപ്പ് മുതല്‍ ഇന്റര്‍നെറ്റ് പതിപ്പ് മാത്രം ഇറക്കിയാല്‍ മതിയെന്നാണ് ഓക്‌സ്‌ഫോര്‍ഡ് പ്രസാധകരുടെ പക്ഷം.

1928 ലാണ് നിരവധി വോള്യങ്ങളിലായി ഓക്‌സ്‌ഫോര്‍ഡ് ഇംഗ്ലീഷ് ഡിക്ഷണറിയുടെ ആദ്യപതിപ്പ് പുറത്തിറങ്ങിയത്. 1989 ല്‍ രണ്ടാമത്തെ പതിപ്പും പുറത്തിറങ്ങി. കഴിഞ്ഞ പത്തുവര്‍ഷമായി മൂന്നാമത്തെ പതിപ്പിനായുള്ള പ്രവര്‍ത്തനങ്ങള്‍ നടക്കുകയായിരുന്നു. പുതിയ പതിപ്പിനായി 80 നിഘണ്ടുസമാഹര്‍ത്താക്കളെയും ഭാഷാവിദഗ്ധരെയുമാണ് പ്രസാധകര്‍ ചുമതലപ്പെടുത്തിയിരിക്കുന്നത്. ഇതിനിടെയാണ് ഇനി വെബ് പതിപ്പ് മാത്രം മതിയെന്ന് പ്രസാധകര്‍ ആലോചിക്കുന്നത്.

ഈ ബുക്കുകളുടെ പ്രചാരം വര്‍ദ്ധിച്ചതാണ് ഓക്‌സ്‌ഫോര്‍ഡ് പ്രസാധകരെ കൊണ്ട് ഈ തീരുമാനം എടുപ്പിച്ചതെന്ന് കരുതുന്നു. ഇ ബുക്കുകളുടെ പ്രചാരം വന്‍ തോതില്‍ വര്‍ദ്ധിക്കുന്നതായി അടുത്തിടെ ആമസോണ്‍ നടത്തിയ പഠനത്തില്‍ വ്യക്തമായിരുന്നു. എന്നാല്‍ പുസ്തകരൂപത്തില്‍ ഡിക്ഷണറി ഇറക്കേണ്ടന്ന് ഓക്‌സ്‌ഫോര്‍ഡിന്റെ നിലപാട് മാറ്റുമെന്ന് തന്നെയാണ് ഭാഷാപ്രേമികളുടെ വിശ്വാസം. റെഫന്‍സ് ഗ്രന്ഥങ്ങളുടെ അച്ചടിപ്പതിപ്പിന് ആവശ്യക്കാരേറെയുണ്ടന്ന് ഓക്‌സ്‌ഫോര്‍ഡും സമ്മതിച്ചിട്ടുണ്ട.

ഹൃദയിമിടിപ്പ് അളക്കുന്ന ഫോണ്‍

2010-11-05T19:04:00.001-07:00

ലണ്ടന്‍: കൈയിയലിരിക്കുന്ന ഫോണിലൂടെ രോഗിയുടെ ഹൃദയമിടിപ്പ്് തൊട്ടെടുക്കാന്‍ കഴിയുന്ന സംവിധാനം വികസിപ്പിച്ചെടുത്തു. പുതുതായി വികസിപ്പിച്ചെടുത്ത ഐഫോണ്‍ ഉപയോഗിച്ചാണ് ഡോക്ടര്‍മാര്‍ രോഗിയുടെ ഹൃദയമിടിപ്പ് അളക്കുന്നത്. ബ്രിട്ടിനിലെ ആശുപത്രികളില്‍ വ്യാപകമായി ഈ സങ്കേതം ഉപയോഗിച്ചു തുടങ്ങിക്കഴിഞ്ഞു.

ലണ്ടന്‍ യൂണിവേഴ്‌സിറ്റി കോളേജില്‍ ഗവേഷകനായ പീറ്റര്‍ ബെന്റ്‌ലി വികസിപ്പിച്ചെടുത്ത 'ഐസ്‌റ്റെതസ്‌കോപ്പ് ആപ്ലിക്കേഷന്‍' ആണ് മൊബൈലിനെ സ്‌റ്റെതസ്‌കോപ്പായി മാറ്റുന്നത്. ഫോണിലെ മൈക്രോഫോണിനെ ഹൃദയമിടിപ്പ് പിടിച്ചെടുക്കാന്‍ കഴിവുള്ള സെന്‍സറുകളാക്കി ഈ ആപ്ലിക്കേഷന്‍ ഉപയോഗിച്ച് മാറ്റാം. അത് കാര്‍ഡിയോഗ്രാമായി ഫോണില്‍ തെളിഞ്ഞു കാണുകയും ചെയ്യും. ഹൃദയമിടിപ്പ് മാത്രമല്ല ചുറ്റുമുളള നേര്‍ത്ത ശബ്ദങ്ങളും പിടിച്ചെടുക്കാന്‍ ഈ സ്മാര്‍ട്ട്‌ഫോണിന് കഴിയും.

ഹൃദ്രോഗ ചികിത്സയില്‍ ഏറെ പ്രയോജനം ചെയ്യുന്ന ഒന്നാണ് പുതിയ സ്‌ങ്കേതം. ഐഫോണിന്റെ മൈക്രോഫോണ്‍ ഭാഗം നെഞ്ചില്‍ ചേര്‍ത്തു പിടിച്ചാല്‍ കാര്‍ഡിയോഗ്രാം ഫോണില്‍ തെളിഞ്ഞു വരും. രോഗിക്കു തന്നെ വേണമെങ്കില്‍ ഇത് ചെയ്യാം, എന്നിട്ട് ഈ ദൃശ്യങ്ങള്‍ ഒരു സ്‌പെഷലിസ്റ്റിന് അയച്ചുകൊടുത്ത് ഉപദേശം തേടാം. അടിയന്തിരഘട്ടങ്ങളില്‍ ജീവന്‍ രക്ഷിക്കാന്‍ ഇതു സഹായിക്കുമെന്ന് സാരം. ഐഫോണ്‍ പോലെ ക്യാമറകളും ഉന്നത നിലവാരമുള്ള മൈക്രോഫോണുകളും സെന്‍സറുകളുമൊക്കെയുള്ള സ്മാര്‍ട്ട്‌ഫോണുകള്‍ക്ക് ആരോഗ്യമേഖലയില്‍ വലിയ പ്രയോജനം ചെയ്യാനാകുമെന്നാണ് ഐസ്‌റ്റെതസ്‌കോപ്പ് വ്യക്തമാകുന്നത്.

തമാശക്കായാണ് ബെന്റ്‌ലി ഐ സ്‌റ്റെതസ്‌കോപ്പിന് രൂപം നല്‍കിയതെങ്കിലും കളികാര്യമായന്നാണ് ഇന്റര്‍നെറ്റിലെ കണക്കുകള്‍ വ്യക്തമാക്കുന്നത്. ലോകത്തിന്റെ വിവിധ ഭാഗങ്ങളില്‍ നിന്നായി 30 ലക്ഷത്തിലേറെപ്പേര്‍ ബെന്റ്‌ലിയുടെ ഐഫോണ്‍ ആപ്ലിക്കേഷന്‍ ഇതിനകം ഡൗണ്‍ലോഡ് ചെയ്തു കഴിഞ്ഞു. ഇപ്പോള്‍ ഐസ്‌റ്റെതസ്‌കോപ്പ് ആപ്ലിക്കേഷന്റെ സൈറ്റില്‍ നിന്ന് ദിവസവും അഞ്ഞൂറ് ഡൗണ്‍ലോഡ് നടക്കുന്നുണ്ട്.

ഒസ്‌കാര്‍ സെല്‍ബി, വയസ്സ് 7 ജോലി ധനകാര്യ ഉപദേഷ്ടാവ്

2010-11-05T19:02:00.000-07:00

ലണ്ടന്‍: കളിപ്പാട്ടങ്ങളുമായി കൂട്ടുകൂടേണ്ട പ്രായത്തില്‍ ഓസ്‌കാര്‍ സെല്‍ബി എന്ന ഏഴുവയസ്സുകാരന്റെ മനസ്സില്‍ കണക്കിലെ സൂത്രവാക്യങ്ങള്‍ മാത്രം. കണക്കില്‍ അസാമാന്യ പ്രതിഭയായ ഈ കുട്ടി ഇതിനിടെ ബ്രിട്ടന്റെ തകര്‍ന്ന സമ്പദ് വ്യവസ്ഥയെ നേരെയാക്കാന്‍ ചാന്‍സലര്‍ ജോര്‍ജ്ജ് ഒസ്‌ബോണിന് ഉപദേശവും കൊടുത്തുകഴിഞ്ഞു. ഏഴുവയസ്സേ പ്രായമുളളുവെങ്കിലും സെല്‍ബിയുടെ കൈയ്യിലിരുപ്പ് ഈ മുതിര്‍ന്നവരുടേതാണ്.

കഴിഞ്ഞയാഴ്ച നടന്ന ജി.സി.എസ്.ഇ.യുടെ കണക്ക് പരീക്ഷയില്‍ എ പ്ലസ് ഗ്രേഡാണ് ഒസ്‌കാര്‍ നേടിയെടുത്തത്. 14 വയസ്സിന് മുകളിലുളള കുട്ടികളാണ് സാധാരണയായി ജിസിഎസ്ഇ പരീക്ഷയ്ക്കിരിക്കുന്നതെന്നു കൂടി അറിയുമ്പോഴെ ഒസ്‌കാറിന്റെ നേട്ടത്തിന്റെ വലിപ്പം മനസ്സിലാകു. സറേയിലെ സ്റ്റാംഫോഡ് ഗ്രീന്‍ െ്രെപമറി സ്‌കൂളിലെ വിദ്യാര്‍ഥിയായ ഓസ്‌കാര്‍ അതിനൊപ്പം ഹെര്‍ട്‌ഫോഡ്‌ഷെറിലെ റൈഡ് ടീച്ചിംഗ് സര്‍വീസിലും കണക്കിലെ പ്രതിഭ മിനുക്കിയെടുക്കുന്നുണ്ട്.

ബ്രിട്ടനിലെ ഏറ്റവും വിഷമം പിടിച്ച ഗണിതപ്രശ്‌നം 17,000 കോടി പൗണ്ടിന്റെ ബജറ്റ് കമ്മി പരിഹരിക്കാന്‍ ലളിതമായ ഉപദേശമാണ് ഓസ്‌കാര്‍ സെല്‍ബി നല്‍കിയത്. നികുതിദായകരുടെ പണം കൊണ്ട് ബാങ്കുകളെ സഹായിക്കുന്നതിനു പകരം മുന്‍കാലങ്ങളിലെ വായ്പ തിരിച്ചടയ്ക്കാന്‍ ബാങ്കുകള്‍ക്കു നിര്‍ദേശം നല്‍കുക. വൃദ്ധരുടെ പരിചരണത്തിനും ക്ഷേമത്തിനുമായി കൂടുതല്‍ പണം നീക്കിവയ്ക്കുക. പാകിസ്താനിലെ പ്രളയം പോലെയുള്ള ദുരിതങ്ങളില്‍ ഉഴലുന്നവര്‍ക്കായി സഹായമെത്തിക്കുക. തൊഴിലവസരങ്ങളാണ് രാജ്യത്തിനാവശ്യം; അതു സൃഷ്ടിക്കാന്‍ നടപടിയെടുക്കുക, ആഗോളതാപനം തടയാനുള്ള ശ്രമങ്ങളില്‍ പിശുക്കു കാട്ടാതിരിക്കുക... ഇങ്ങനെ പോകുന്നു സെല്‍ബിയുടെ ഉപദേശങ്ങള്‍.

ചാന്‍സലറെ ഉപദേശിക്കാന്‍മാത്രം വളര്‍ന്നെങ്കിലും രാഷ്ട്രീയം ഓസ്‌കാറിന്റെ മോഹങ്ങളിലില്ല. ഇന്ധനമില്ലാതെ ഓടുന്ന കാര്‍ അതാണ് പയ്യന്റെ സ്വപ്‌നം.